੧. ਚੀਵਰਵਗ੍ਗੋ

੧. ਪਠਮਕਥਿਨਸਿਕ੍ਖਾਪਦਵਣ੍ਣਨਾ

੪੫੯. ਸਮਿਤਾਵਿਨਾਤਿ ਸਮਿਤਪਾਪੇਨ. ਗੋਤਮਕੇ ਚੇਤਿਯੇਤਿ ਗੋਤਮਯਕ੍ਖਸ੍ਸ ਚੇਤਿਯਟ੍ਠਾਨੇ ਕਤਵਿਹਾਰੋ ਵੁਚ੍ਚਤਿ. ਪਰਿਭੁਞ੍ਜਿਤੁਂ ਅਨੁਞ੍ਞਾਤਂ ਹੋਤੀਤਿ ਭਗਵਤਾ ਗਹਪਤਿਚੀਵਰੇ ਅਨੁਞ੍ਞਾਤੇ ਬਹੂਨਿ ਚੀਵਰਾਨਿ ਲਭਿਤ੍ਵਾ ਭਣ੍ਡਿਕਂ ਕਤ੍ਵਾ ਸੀਸੇਪਿ ਖਨ੍ਧੇਪਿ ਕਟਿਯਾਪਿ ਠਪੇਤ੍ਵਾ ਆਗਚ੍ਛਨ੍ਤੇ ਭਿਕ੍ਖੂ ਦਿਸ੍ਵਾ ਚੀਵਰੇ ਸੀਮਂ ਬਨ੍ਧਨ੍ਤੇਨ ਤਿਚੀਵਰਂ ਪਰਿਭੋਗਤ੍ਥਾਯ ਅਨੁਞ੍ਞਾਤਂ, ਨ ਪਨ ਅਧਿਟ੍ਠਾਨਵਸੇਨ. ਨਹਾਯਨ੍ਤਿ ਏਤ੍ਥਾਤਿ ਨਹਾਨਂ, ਨਹਾਨਤਿਤ੍ਥਂ.

੪੬੦. ਏਕੋ ਕਿਰ ਬ੍ਰਾਹ੍ਮਣੋ ਚਿਨ੍ਤੇਸਿ ‘‘ਬੁਦ੍ਧਰਤਨਸ੍ਸ ਚ ਸਙ੍ਘਰਤਨਸ੍ਸ ਚ ਪੂਜਾ ਪਞ੍ਞਾਯਤਿ, ਕਥਂ ਨੁ ਖੋ ਧਮ੍ਮਰਤਨਂ ਪੂਜਿਤਂ ਨਾਮ ਹੋਤੀ’’ਤਿ. ਸੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਏਤਮਤ੍ਥਂ ਪੁਚ੍ਛਿ. ਭਗਵਾ ਆਹ ‘‘ਸਚੇਪਿ ਬ੍ਰਾਹ੍ਮਣ ਧਮ੍ਮਰਤਨਂ ਪੂਜੇਤੁਕਾਮੋ, ਏਕਂ ਬਹੁਸ੍ਸੁਤਂ ਪੂਜੇਹੀ’’ਤਿ. ਬਹੁਸ੍ਸੁਤਂ ਭਨ੍ਤੇ ਆਚਿਕ੍ਖਥਾਤਿ. ਭਿਕ੍ਖੁਸਙ੍ਘਂ ਪੁਚ੍ਛਾਤਿ. ਸੋ ਭਿਕ੍ਖੂ ਉਪਸਙ੍ਕਮਿਤ੍ਵਾ ‘‘ਬਹੁਸ੍ਸੁਤਂ ਭਨ੍ਤੇ ਆਚਿਕ੍ਖਥਾ’’ਤਿ ਆਹ. ਆਨਨ੍ਦਤ੍ਥੇਰੋ ਬ੍ਰਾਹ੍ਮਣਾਤਿ. ਬ੍ਰਾਹ੍ਮਣੋ ਥੇਰਂ ਸਹਸ੍ਸਗ੍ਘਨਕੇਨ ਚੀਵਰੇਨ ਪੂਜੇਸਿ. ਤੇਨ ਵੁਤ੍ਤਂ ‘‘ਪਟਿਲਾਭਵਸੇਨ ਉਪ੍ਪਨ੍ਨ’’ਨ੍ਤਿ. ਉਪ੍ਪਨ੍ਨ-ਸਦ੍ਦੋ ਨਿਪ੍ਫਨ੍ਨਪਰਿਯਾਯੋਪਿ ਹੋਤੀਤਿ ਤਂ ਪਟਿਕ੍ਖਿਪਨ੍ਤੋ ਆਹ ‘‘ਨੋ ਨਿਪ੍ਫਤ੍ਤਿਵਸੇਨਾ’’ਤਿ. ਪਠਮਮੇਵ ਹਿ ਤਂ ਤਨ੍ਤਵਾਯਕਮ੍ਮੇਨ ਨਿਪ੍ਫਨ੍ਨਂ.

ਥੇਰਸ੍ਸ ਸਨ੍ਤਿਕੇ ਉਪਜ੍ਝਂ ਗਾਹਾਪੇਤ੍ਵਾ ਸਯਂ ਅਨੁਸ੍ਸਾਵਨਕਮ੍ਮਂ ਕਰੋਤੀਤਿ ਏਤ੍ਥ ਸਾਰਿਪੁਤ੍ਤਤ੍ਥੇਰੋਪਿ ਤਥੇਵ ਕਰੋਤੀਤਿ ਦਟ੍ਠਬ੍ਬਂ. ਏਵਂ ਏਕਮੇਕੇਨ ਅਤ੍ਤਨੋ ਪਤ੍ਤਚੀਵਰਂ ਦਤ੍ਵਾ ਪਬ੍ਬਾਜੇਤ੍ਵਾ ਉਪਜ੍ਝਂ ਗਣ੍ਹਾਪਿਤਾਨਿ ਪਞ੍ਚ ਪਞ੍ਚ ਭਿਕ੍ਖੁਸਤਾਨਿ ਅਹੇਸੁਂ. ਆਯਸ੍ਮਨ੍ਤਂ ਆਨਨ੍ਦਂ ਅਤਿਵਿਯ ਮਮਾਯਤੀਤਿ ਆਨਨ੍ਦਤ੍ਥੇਰੋ ਤਾਵ ਮਮਾਯਤੁ ਅਖੀਣਾਸਵਭਾਵਤੋ, ਸਾਰਿਪੁਤ੍ਤਤ੍ਥੇਰੋ ਕਥਨ੍ਤਿ? ਨ ਇਦਂ ਮਮਾਯਨਂ ਗੇਹਸ੍ਸਿਤਪੇਮਵਸੇਨ, ਅਥ ਖੋ ਗੁਣਸਮ੍ਭਾਵਨਾਵਸੇਨਾਤਿ ਨਾਯਂ ਦੋਸੋ. ਨਵਮਂ ਵਾ ਦਿਵਸਂ ਦਸਮਂ ਵਾਤਿ ਭੁਮ੍ਮਤ੍ਥੇ ਉਪਯੋਗਵਚਨਂ, ਨਵਮੇ ਵਾ ਦਸਮੇ ਵਾ ਦਿਵਸੇਤਿ ਅਤ੍ਥੋ. ਸਚੇ ਭਵੇਯ੍ਯਾਤਿ ਸਚੇ ਕਸ੍ਸਚਿ ਏਵਂ ਸਿਯਾ. ਵੁਤ੍ਤਸਦਿਸਮੇਵਾਤਿ ਏਤ੍ਥ ‘‘ਵੁਤ੍ਤਦਿਵਸਮੇਵਾ’’ਤਿਪਿ ਪਠਨ੍ਤਿ. ਧਾਰੇਤੁਨ੍ਤਿ ਏਤ੍ਥ ‘‘ਆਹਾ’’ਤਿ ਪਾਠਸੇਸੋ ਦਟ੍ਠਬ੍ਬੋ.

੪੬੨-੪੬੩. ਨਿਟ੍ਠਿਤਚੀਵਰਸ੍ਮਿਨ੍ਤਿ ਭੁਮ੍ਮਵਚਨਸ੍ਸ ਲੋਪਂ ਕਤ੍ਵਾ ਨਿਦ੍ਦੇਸੋਤਿ ਆਹ ‘‘ਨਿਟ੍ਠਿਤੇ ਚੀਵਰਸ੍ਮਿ’’ਨ੍ਤਿ, ਚੀਵਰਸ੍ਸ ਕਰਣਪਲਿਬੋਧੇ ਉਪਚ੍ਛਿਨ੍ਨੇਤਿ ਵੁਤ੍ਤਂ ਹੋਤਿ. ਪਾਸਪਟ੍ਟਗਣ੍ਠਿਕਪਟ੍ਟਪਰਿਯੋਸਾਨਂ ਯਂ ਕਿਞ੍ਚਿ ਕਾਤਬ੍ਬਂ, ਤਂ ਕਤ੍ਵਾਤਿ ਯੋਜੇਤਬ੍ਬਂ. ਸੂਚਿਯਾ ਪਟਿਸਾਮਨਨ੍ਤਿ ਇਦਂ ਸੂਚਿਕਮ੍ਮਸ੍ਸ ਸਮ੍ਮਾ ਪਰਿਨਿਟ੍ਠਿਤਭਾਵਦਸ੍ਸਨਤ੍ਥਂ ਵੁਤ੍ਤਂ, ਸੂਚਿਕਮ੍ਮਨਿਟ੍ਠਾਨਮੇਵੇਤ੍ਥ ਪਮਾਣਂ. ਏਤੇਸਮ੍ਪੀਤਿ ਵਿਨਟ੍ਠਾਦਿਂ ਪਰਾਮਸਤਿ.

ਕਥਿਨੇ ਚ ਉਬ੍ਭਤਸ੍ਮਿਨ੍ਤਿ ਯਂ ਸਙ੍ਘਸ੍ਸ ਕਥਿਨਂ ਅਤ੍ਥਤਂ, ਤਸ੍ਮਿਂ ਕਥਿਨੇ ਚ ਉਬ੍ਭਤੇਤਿ ਅਤ੍ਥੋ. ਦੁਤਿਯਸ੍ਸ ਪਲਿਬੋਧਸ੍ਸ ਅਭਾਵਂ ਦਸ੍ਸੇਤੀਤਿ ਆਵਾਸਪਲਿਬੋਧਸ੍ਸ ਅਭਾਵਂ ਦਸ੍ਸੇਤਿ. ਏਤ੍ਥ ਚ ‘‘ਨਿਟ੍ਠਿਤਚੀਵਰਸ੍ਮਿਂ ਉਬ੍ਭਤਸ੍ਮਿਂ ਕਥਿਨੇ’’ਤਿ ਇਮੇਹਿ ਦ੍ਵੀਹਿ ਪਦੇਹਿ ਦ੍ਵਿਨ੍ਨਂ ਪਲਿਬੋਧਾਨਂ ਅਭਾਵਦਸ੍ਸਨੇਨ ਅਤ੍ਥਤਕਥਿਨਸ੍ਸ ਪਞ੍ਚਮਾਸਬ੍ਭਨ੍ਤਰੇ ਯਾਵ ਚੀਵਰਪਲਿਬੋਧੋ ਆਵਾਸਪਲਿਬੋਧੋ ਚ ਨ ਉਪਚ੍ਛਿਜ੍ਜਤਿ, ਤਾਵ ਅਨਧਿਟ੍ਠਿਤਂ ਅਵਿਕਪ੍ਪਿਤਂ ਅਤਿਰੇਕਚੀਵਰਂ ਦਸਾਹਤੋ ਪਰਮ੍ਪਿ ਠਪੇਤੁਂ ਵਟ੍ਟਤੀਤਿ ਦੀਪੇਤਿ. ਅਤ੍ਥਤਕਥਿਨਸ੍ਸ ਹਿ ਯਾਵ ਕਥਿਨਸ੍ਸ ਉਬ੍ਭਾਰਾ ਅਨਾਮਨ੍ਤਚਾਰੋ ਅਸਮਾਦਾਨਚਾਰੋ ਯਾਵਦਤ੍ਥਚੀਵਰਂ ਗਣਭੋਜਨਂ ਯੋ ਚ ਤਤ੍ਥ ਚੀਵਰੁਪ੍ਪਾਦੋਤਿ ਇਮੇ ਪਞ੍ਚਾਨਿਸਂਸਾ ਲਬ੍ਭਨ੍ਤਿ. ਪਕ੍ਕਮਨਂ ਅਨ੍ਤੋ ਅਸ੍ਸਾਤਿ ਪਕ੍ਕਮਨਨ੍ਤਿਕਾ. ਏਵਂ ਸੇਸਾਪਿ ਵੇਦਿਤਬ੍ਬਾ. ਵਿਤ੍ਥਾਰੋ ਪਨੇਤ੍ਥ ਆਗਤਟ੍ਠਾਨੇਯੇਵ ਆਵਿ ਭਵਿਸ੍ਸਤਿ.

ਖੋਮਨ੍ਤਿ ਖੋਮਸੁਤ੍ਤੇਹਿ ਵਾਯਿਤਂ ਖੋਮਪਟਚੀਵਰਂ, ਤਥਾ ਸੇਸਾਨਿ. ਸਾਣਨ੍ਤਿ ਸਾਣਵਾਕਸੁਤ੍ਤੇਹਿ ਕਤਚੀਵਰਂ. ਭਙ੍ਗਨ੍ਤਿ ਖੋਮਸੁਤ੍ਤਾਦੀਨਿ ਸਬ੍ਬਾਨਿ ਏਕਚ੍ਚਾਨਿ ਵਾ ਮਿਸ੍ਸੇਤ੍ਵਾ ਕਤਚੀਵਰਂ. ਭਙ੍ਗਮ੍ਪਿ ਵਾਕਮਯਮੇਵਾਤਿ ਕੇਚਿ. ਦੁਕੂਲਂ ਪਟ੍ਟੁਣ੍ਣਂ ਸੋਮਾਰਪਟਂ ਚੀਨਪਟਂ ਇਦ੍ਧਿਜਂ ਦੇਵਦਿਨ੍ਨਨ੍ਤਿ ਇਮਾਨਿ ਪਨ ਛ ਚੀਵਰਾਨਿ ਏਤੇਸਂਯੇਵ ਅਨੁਲੋਮਾਨੀਤਿ ਵਿਸੁਂ ਨ ਵੁਤ੍ਤਾਨਿ. ਦੁਕੂਲਞ੍ਹਿ ਸਾਣਸ੍ਸ ਅਨੁਲੋਮਂ ਵਾਕਮਯਤ੍ਤਾ. ਪਟ੍ਟੁਣ੍ਣਦੇਸੇ ਸਞ੍ਜਾਤਵਤ੍ਥਂ ਪਟ੍ਟੁਣ੍ਣਂ. ‘‘ਪਟ੍ਟੁਣ੍ਣਕੋਸੇਯ੍ਯਵਿਸੇਸੋ’’ਤਿ ਹਿ ਅਭਿਧਾਨਕੋਸੇ ਵੁਤ੍ਤਂ. ਸੋਮਾਰਦੇਸੇ ਚੀਨਦੇਸੇ ਚ ਜਾਤਵਤ੍ਥਾਨਿ ਸੋਮਾਰਚੀਨਪਟਾਨਿ. ਪਟ੍ਟੁਣ੍ਣਾਦੀਨਿ ਤੀਣਿ ਕੋਸੇਯ੍ਯਸ੍ਸ ਅਨੁਲੋਮਾਨਿ ਪਾਣਕੇਹਿ ਕਤਸੁਤ੍ਤਮਯਤ੍ਤਾ. ਇਦ੍ਧਿਜਂ ਏਹਿਭਿਕ੍ਖੂਨਂ ਪੁਞ੍ਞਿਦ੍ਧਿਯਾ ਨਿਬ੍ਬਤ੍ਤਚੀਵਰਂ, ਤਂ ਖੋਮਾਦੀਨਂ ਅਞ੍ਞਤਰਂ ਹੋਤੀਤਿ ਤੇਸਂ ਏਵ ਅਨੁਲੋਮਂ. ਦੇਵਤਾਹਿ ਦਿਨ੍ਨਂ ਚੀਵਰਂ ਦੇਵਦਿਨ੍ਨਂ, ਤਂ ਕਪ੍ਪਰੁਕ੍ਖੇ ਨਿਬ੍ਬਤ੍ਤਂ ਜਾਲਿਨਿਯਾ ਦੇਵਕਞ੍ਞਾਯ ਅਨੁਰੁਦ੍ਧਤ੍ਥੇਰਸ੍ਸ ਦਿਨ੍ਨਵਤ੍ਥਸਦਿਸਂ, ਤਮ੍ਪਿ ਖੋਮਾਦੀਨਂਯੇਵ ਅਨੁਲੋਮਂ ਹੋਤਿ ਤੇਸੁ ਅਞ੍ਞਤਰਭਾਵਤੋ.

ਮਜ੍ਝਿਮਸ੍ਸ ਪੁਰਿਸਸ੍ਸ ਵਿਦਤ੍ਥਿਂ ਸਨ੍ਧਾਯ ‘‘ਦ੍ਵੇ ਵਿਦਤ੍ਥਿਯੋ’’ਤਿਆਦਿ ਵੁਤ੍ਤਂ. ਇਮਿਨਾ ਦੀਘਤੋ ਵਡ੍ਢਕੀਹਤ੍ਥਪ੍ਪਮਾਣਂ ਵਿਤ੍ਥਾਰਤੋ ਤਤੋ ਉਪਡ੍ਢਪ੍ਪਮਾਣਂ ਵਿਕਪ੍ਪਨੁਪਗਨ੍ਤਿ ਦਸ੍ਸੇਤਿ. ਤਥਾ ਹਿ ‘‘ਸੁਗਤਵਿਦਤ੍ਥਿ ਨਾਮ ਇਦਾਨਿ ਮਜ੍ਝਿਮਸ੍ਸ ਪੁਰਿਸਸ੍ਸ ਤਿਸ੍ਸੋ ਵਿਦਤ੍ਥਿਯੋ, ਵਡ੍ਢਕੀਹਤ੍ਥੇਨ ਦਿਯਡ੍ਢੋ ਹਤ੍ਥੋ ਹੋਤੀ’’ਤਿ ਕੁਟਿਕਾਰਸਿਕ੍ਖਾਪਦਟ੍ਠਕਥਾਯਂ (ਪਾਰਾ. ਅਟ੍ਠ. ੨.੩੪੮-੩੪੯) ਵੁਤ੍ਤਂ, ਤਸ੍ਮਾ ਸੁਗਤਙ੍ਗੁਲੇਨ ਦ੍ਵਾਦਸਙ੍ਗੁਲਂ ਵਡ੍ਢਕੀਹਤ੍ਥੇਨ ਦਿਯਡ੍ਢੋ ਹਤ੍ਥੋਤਿ ਸਿਦ੍ਧਂ. ਏਵਞ੍ਚ ਕਤ੍ਵਾ ਸੁਗਤਙ੍ਗੁਲੇਨ ਅਟ੍ਠਙ੍ਗੁਲਂ ਵਡ੍ਢਕੀਹਤ੍ਥਪ੍ਪਮਾਣਨ੍ਤਿ ਇਦਂ ਆਗਤਮੇਵਾਤਿ.

ਤਂ ਅਤਿਕ੍ਕਾਮਯਤੋਤਿ ਏਤ੍ਥ ਤਨ੍ਤਿ ਚੀਵਰਂ ਕਾਲਂ ਵਾ ਪਰਾਮਸਤਿ. ਤਸ੍ਸ ਯੋ ਅਰੁਣੋਤਿ ਤਸ੍ਸ ਚੀਵਰੁਪ੍ਪਾਦਦਿਵਸਸ੍ਸ ਯੋ ਅਤਿਕ੍ਕਨ੍ਤੋ ਅਰੁਣੋ. ਚੀਵਰੁਪ੍ਪਾਦਦਿਵਸੇਨ ਸਦ੍ਧਿਨ੍ਤਿ ਚੀਵਰੁਪ੍ਪਾਦਦਿਵਸਸ੍ਸ ਅਤਿਕ੍ਕਨ੍ਤਅਰੁਣੇਨ ਸਦ੍ਧਿਨ੍ਤਿ ਅਤ੍ਥੋ. ਦਿਵਸਸਦ੍ਦੇਨ ਹਿ ਤਂਦਿਵਸਨਿਸ੍ਸਿਤੋ ਅਰੁਣੋ ਵੁਤ੍ਤੋ. ਬਨ੍ਧਿਤ੍ਵਾਤਿ ਰਜ੍ਜੁਆਦੀਹਿ ਬਨ੍ਧਿਤ੍ਵਾ. ਵੇਠੇਤ੍ਵਾਤਿ ਵਤ੍ਥਾਦੀਤਿ ਵੇਠੇਤ੍ਵਾ.

ਵਚਨੀਯੋਤਿ ਸਙ੍ਘਂ ਅਪੇਕ੍ਖਿਤ੍ਵਾ ਵੁਤ੍ਤਂ. ਅਞ੍ਞਥਾਪਿ ਵਤ੍ਤਬ੍ਬਨ੍ਤਿ ਏਤ੍ਥ ‘‘ਯਾਯ ਕਾਯਚਿ ਭਾਸਾਯ ਪਦਪਟਿਪਾਟਿਯਾ ਅਵਤ੍ਵਾਪਿ ਅਤ੍ਥਮਤ੍ਤੇ ਵੁਤ੍ਤੇ ਵਟ੍ਟਤੀ’’ਤਿ ਵਦਨ੍ਤਿ. ਤੇਨਾਤਿ ਆਪਤ੍ਤਿਂ ਪਟਿਗ੍ਗਣ੍ਹਨ੍ਤੇਨ. ਪਟਿਗ੍ਗਾਹਕੇਨ ‘‘ਪਸ੍ਸਸੀ’’ਤਿ ਵੁਤ੍ਤੇ ਦੇਸਕੇਨ ਵਤ੍ਤਬ੍ਬਵਚਨਂ ਦਸ੍ਸੇਤਿ ‘‘ਆਮ ਪਸ੍ਸਾਮੀ’’ਤਿ. ਪੁਨ ਪਟਿਗ੍ਗਾਹਕੇਨ ਵਤ੍ਤਬ੍ਬਵਚਨਮਾਹ ‘‘ਆਯਤਿਂ ਸਂਵਰੇਯ੍ਯਾਸੀ’’ਤਿ. ਏਵਂ ਵੁਤ੍ਤੇ ਪੁਨ ਦੇਸਕੇਨ ਵਤ੍ਤਬ੍ਬਵਚਨਂ ‘‘ਸਾਧੁ ਸੁਟ੍ਠੁ ਸਂਵਰਿਸ੍ਸਾਮੀ’’ਤਿ. ਇਮਿਨਾ ਅਤ੍ਤਨੋ ਆਯਤਿਂ ਸਂਵਰੇ ਪਤਿਟ੍ਠਿਤਭਾਵਂ ਦਸ੍ਸੇਤਿ. ਦ੍ਵੀਸੁ ਪਨ ਸਮ੍ਬਹੁਲਾਸੁ ਵਾਤਿ ਦ੍ਵੀਸੁ ਸਮ੍ਬਹੁਲਾਸੁ ਵਾ ਆਪਤ੍ਤੀਸੁ ਪੁਰਿਮਨਯੇਨੇਵ ਵਚਨਭੇਦੋ ਵੇਦਿਤਬ੍ਬੋ. ਞਤ੍ਤਿਯਂ ਆਪਤ੍ਤਿਂ ਸਰਤਿ ਵਿਵਰਤੀਤਿ ਏਤ੍ਥ ਦ੍ਵੇ ਆਪਤ੍ਤਿਯੋਤਿ ਵਾ ਸਮ੍ਬਹੁਲਾ ਆਪਤ੍ਤਿਯੋਤਿ ਵਾ ਵਤ੍ਤਬ੍ਬਨ੍ਤਿ ਅਧਿਪ੍ਪਾਯੋ. ਚੀਵਰਦਾਨੇਪੀਤਿ ਨਿਸ੍ਸਟ੍ਠਚੀਵਰਸ੍ਸ ਦਾਨੇਪਿ. ਵਤ੍ਥੁਵਸੇਨਾਤਿ ਚੀਵਰਗਣਨਾਯ. ਗਣਸ੍ਸ ਵੁਤ੍ਤਾ ਪਾਲ਼ਿਯੇਵੇਤ੍ਥ ਪਾਲ਼ੀਤਿ ਦ੍ਵੀਸੁ ਇਮਾਹਂ ਆਯਸ੍ਮਨ੍ਤਾਨਂ ਨਿਸ੍ਸਜ੍ਜਾਮੀਤਿ ਵਚਨੇ ਵਿਸੇਸਾਭਾਵਤੋ ਵੁਤ੍ਤਂ. ਏਵਂ…ਪੇ… ਵਤ੍ਤੁਂ ਵਟ੍ਟਤੀਤਿ ਵਤ੍ਵਾ ਤਤ੍ਥ ਕਾਰਣਮਾਹ ‘‘ਇਤੋ ਗਰੁਕਤਰਾਨੀ’’ਤਿਆਦਿ. ਤਤ੍ਥ ਇਤੋਤਿ ਇਤੋ ਨਿਸ੍ਸਟ੍ਠਚੀਵਰਦਾਨਤੋ. ਞਤ੍ਤਿਕਮ੍ਮਤੋ ਞਤ੍ਤਿਦੁਤਿਯਕਮ੍ਮਂ ਗਰੁਕਤਰਨ੍ਤਿ ਆਹ ‘‘ਇਤੋ ਗਰੁਕਤਰਾਨੀ’’ਤਿ. ਇਮਾਹਂ ਚੀਵਰਨ੍ਤਿ ਏਤ੍ਥ ‘‘ਇਮਂ ਚੀਵਰ’’ਨ੍ਤਿਪਿ ਪਠਨ੍ਤਿ.

੪੬੮. ਨ ਇਧ ਸਞ੍ਞਾ ਰਕ੍ਖਤੀਤਿ ਇਦਂ ਵੇਮਤਿਕਂ ਅਨਤਿਕ੍ਕਨ੍ਤਸਞ੍ਞਞ੍ਚ ਸਨ੍ਧਾਯ ਵੁਤ੍ਤਂ. ਯੋਪਿ ਏਵਂਸਞ੍ਞੀ, ਤਸ੍ਸਪੀਤਿ ਨ ਕੇਵਲਂ ਅਤਿਕ੍ਕਨ੍ਤੇ ਅਤਿਕ੍ਕਨ੍ਤਸਞ੍ਞਿਸ੍ਸ, ਅਥ ਖੋ ਵੇਮਤਿਕਸ੍ਸ ਅਨਤਿਕ੍ਕਨ੍ਤਸਞ੍ਞਿਸ੍ਸਪੀਤਿ ਅਤ੍ਥੋ. ‘‘ਨ ਇਧ ਸਞ੍ਞਾ ਰਕ੍ਖਤੀ’’ਤਿਆਦਿਨਾ ਵੁਤ੍ਤਮਤ੍ਥਂ ਸੇਸਤ੍ਤਿਕੇਪਿ ਅਤਿਦਿਸਤਿ. ਏਸ ਨਯੋ ਸਬ੍ਬਤ੍ਥਾਤਿ ਏਸ ਨਯੋ ਅਵਿਨਟ੍ਠਾਦੀਸੁਪੀਤਿ ਅਞ੍ਞੇਸਂ ਚੀਵਰੇਸੁ ਉਪਚਿਕਾਦੀਹਿ ਖਾਯਿਤੇਸੁ ‘‘ਮਯ੍ਹਮ੍ਪਿ ਚੀਵਰਂ ਖਾਯਿਤ’’ਨ੍ਤਿ ਏਵਂਸਞ੍ਞੀ ਹੋਤੀਤਿਆਦਿਨਾ ਯੋਜੇਤਬ੍ਬਨ੍ਤਿ ਦਸ੍ਸੇਤਿ. ਅਨਟ੍ਠਤੋ ਅਵਿਲੁਤ੍ਤਸ੍ਸ ਵਿਸੇਸਮਾਹ ‘‘ਪਸਯ੍ਹਾਵਹਾਰਵਸੇਨਾ’’ਤਿ. ਥੇਯ੍ਯਾਵਹਾਰਵਸੇਨ ਗਹਿਤਞ੍ਹਿ ਨਟ੍ਠਨ੍ਤਿ ਅਧਿਪ੍ਪੇਤਂ, ਪਸਯ੍ਹਾਵਹਾਰਵਸੇਨ ਗਹਿਤਂ ਵਿਲੁਤ੍ਤਨ੍ਤਿ. ਅਨਾਪਤ੍ਤਿ ਅਞ੍ਞੇਨ ਕਤਂ ਪਟਿਲਭਿਤ੍ਵਾ ਪਰਿਭੁਞ੍ਜਤੀਤਿ ਇਦਂ ਨਿਸੀਦਨਸਨ੍ਥਤਂ ਸਨ੍ਧਾਯ ਵੁਤ੍ਤਂ. ਯਂ ਯੇਨ ਹਿ ਪੁਰਾਣਸਨ੍ਥਤਸ੍ਸ ਸਾਮਨ੍ਤਾ ਸੁਗਤਵਿਦਤ੍ਥਿਂ ਅਨਾਦਿਯਿਤ੍ਵਾ ਅਞ੍ਞਂ ਨਵਂ ਨਿਸੀਦਨਸਨ੍ਥਤਂ ਕਤਂ, ਤਸ੍ਸ ਤਂ ਨਿਸ੍ਸਗ੍ਗਿਯਂ ਹੋਤਿ. ਤਸ੍ਮਾ ‘‘ਅਨਾਪਤ੍ਤਿ ਅਞ੍ਞੇਨ ਕਤਂ ਪਟਿਲਭਿਤ੍ਵਾ ਪਰਿਭੁਞ੍ਜਤੀ’’ਤਿ ਇਦਂ ਪਰਸ੍ਸ ਨਿਸ੍ਸਗ੍ਗਿਯਂ ਅਪਰਸ੍ਸ ਪਰਿਭੁਞ੍ਜਿਤੁਂ ਵਟ੍ਟਤੀਤਿ ਇਮਮਤ੍ਥਂ ਸਾਧੇਤਿ. ਪਰਿਭੋਗਂ ਸਨ੍ਧਾਯ ਵੁਤ੍ਤਨ੍ਤਿ ਅਨਤਿਕ੍ਕਨ੍ਤੇ ਅਤਿਕ੍ਕਨ੍ਤਸਞ੍ਞਿਸ੍ਸ ਵੇਮਤਿਕਸ੍ਸ ਚ ਪਰਿਭੁਞ੍ਜਨ੍ਤਸ੍ਸੇਵ ਦੁਕ੍ਕਟਂ, ਨ ਪਨ ਅਪਰਿਭੁਞ੍ਜਿਤ੍ਵਾ ਠਪੇਨ੍ਤਸ੍ਸਾਤਿ ਅਧਿਪ੍ਪਾਯੋ.

੪੬੯. ਤਿਚੀਵਰਂ ਅਧਿਟ੍ਠਾਤੁਨ੍ਤਿ ਨਾਮਂ ਵਤ੍ਵਾ ਅਧਿਟ੍ਠਾਤੁਂ. ਨ ਵਿਕਪ੍ਪੇਤੁਨ੍ਤਿ ਨਾਮਂ ਵਤ੍ਵਾ ਨ ਵਿਕਪ੍ਪੇਤੁਂ. ਏਸ ਨਯੋ ਸਬ੍ਬਤ੍ਥ. ਤਸ੍ਮਾ ਤਿਚੀਵਰਾਦੀਨਿ ਅਧਿਟ੍ਠਹਨ੍ਤੇਨ ‘‘ਇਮਂ ਸਙ੍ਘਾਟਿਂ ਅਧਿਟ੍ਠਾਮੀ’’ਤਿਆਦਿਨਾ ਨਾਮਂ ਵਤ੍ਵਾ ਅਧਿਟ੍ਠਾਤਬ੍ਬਂ. ਵਿਕਪ੍ਪੇਨ੍ਤੇਨ ਪਨ ‘‘ਇਮਂ ਸਙ੍ਘਾਟਿ’’ਨ੍ਤਿਆਦਿਨਾ ਤਸ੍ਸ ਤਸ੍ਸ ਚੀਵਰਸ੍ਸ ਨਾਮਂ ਅਗ੍ਗਹੇਤ੍ਵਾਵ ‘‘ਇਮਂ ਚੀਵਰਂ ਤੁਯ੍ਹਂ ਵਿਕਪ੍ਪੇਮੀ’’ਤਿ ਵਿਕਪ੍ਪੇਤਬ੍ਬਂ. ਤਿਚੀਵਰਂ ਵਾ ਹੋਤੁ ਅਞ੍ਞਂ ਵਾ, ਯਦਿ ਤਂ ਤਂ ਨਾਮਂ ਗਹੇਤ੍ਵਾ ਵਿਕਪ੍ਪੇਤਿ, ਅਵਿਕਪ੍ਪਿਤਂ ਹੋਤਿ, ਅਤਿਰੇਕਚੀਵਰਟ੍ਠਾਨੇਯੇਵ ਤਿਟ੍ਠਤਿ. ਤਤੋ ਪਰਂ ਵਿਕਪ੍ਪੇਤੁਨ੍ਤਿ ‘‘ਚਤੁਮਾਸਤੋ ਪਰਂ ਵਿਕਪ੍ਪੇਤ੍ਵਾ ਪਰਿਭੁਞ੍ਜਿਤੁਂ ਅਨੁਞ੍ਞਾਤ’’ਨ੍ਤਿ ਤੀਸੁਪਿ ਗਣ੍ਠਿਪਦੇਸੁ ਵੁਤ੍ਤਂ. ਕੇਚਿ ਪਨ ‘‘ਤਤੋ ਪਰਂ ਵਿਕਪ੍ਪੇਤ੍ਵਾ ਯਾਵ ਆਗਾਮਿਸਂਵਚ੍ਛਰੇ ਵਸ੍ਸਾਨਂ ਚਾਤੁਮਾਸਂ, ਤਾਵ ਠਪੇਤੁਂ ਅਨੁਞ੍ਞਾਤ’’ਨ੍ਤਿਪਿ ਵਦਨ੍ਤਿ. ‘‘ਤਤੋ ਪਰਂ ਵਿਕਪ੍ਪੇਤੁਂ ਅਨੁਜਾਨਾਮੀਤਿ ਏਤ੍ਤਾਵਤਾ ਵਸ੍ਸਿਕਸਾਟਿਕਂ ਕਣ੍ਡੁਪ੍ਪਟਿਚ੍ਛਾਦਿਞ੍ਚ ਤਂ ਤਂ ਨਾਮਂ ਗਹੇਤ੍ਵਾ ਵਿਕਪ੍ਪੇਤੁਂ ਅਨੁਞ੍ਞਾਤਨ੍ਤਿ ਏਵਮਤ੍ਥੋ ਨ ਗਹੇਤਬ੍ਬੋ ਤਤੋ ਪਰਂ ਵਸ੍ਸਿਕਸਾਟਿਕਾਦਿਨਾਮਸ੍ਸੇਵ ਅਭਾਵਤੋ. ਤਸ੍ਮਾ ਤਤੋ ਪਰਂ ਵਿਕਪ੍ਪੇਨ੍ਤੇਨਪਿ ਨਾਮਂ ਗਹੇਤ੍ਵਾ ਨ ਵਿਕਪ੍ਪੇਤਬ੍ਬਂ. ਉਭਿਨ੍ਨਮ੍ਪਿ ਤਤੋ ਪਰਂ ਵਿਕਪ੍ਪੇਤ੍ਵਾ ਪਰਿਭੋਗਸ੍ਸ ਅਨੁਞ੍ਞਾਤਤ੍ਤਾ ਤਥਾ ਵਿਕਪ੍ਪਿਤਂ ਅਞ੍ਞਨਾਮੇਨ ਅਧਿਟ੍ਠਹਿਤ੍ਵਾ ਪਰਿਭੁਞ੍ਜਿਤਬ੍ਬ’’ਨ੍ਤਿ ਤੀਸੁਪਿ ਗਣ੍ਠਿਪਦੇਸੁ ਵੁਤ੍ਤਂ.

ਪਚ੍ਚੁਦ੍ਧਰਾਮੀਤਿ ਠਪੇਮਿ, ਪਰਿਚ੍ਚਜਾਮੀਤਿ ਵਾ ਅਤ੍ਥੋ. ਇਮਂ ਸਙ੍ਘਾਟਿਂ ਅਧਿਟ੍ਠਾਮੀਤਿ ਏਤ੍ਥ ‘‘ਇਮਂ ਚੀਵਰਂ ਸਙ੍ਘਾਟਿਂ ਅਧਿਟ੍ਠਾਮੀਤਿ ਏਵਮ੍ਪਿ ਵਤ੍ਤੁਂ ਵਟ੍ਟਤੀ’’ਤਿ ਗਣ੍ਠਿਪਦੇਸੁ ਵੁਤ੍ਤਂ, ਤਮ੍ਪਿ ‘‘ਇਮਂ ਚੀਵਰਂ ਪਰਿਕ੍ਖਾਰਚੋਲ਼ਂ ਅਧਿਟ੍ਠਾਮੀ’’ਤਿ ਇਮਿਨਾ ਸਮੇਤਿ. ਕਾਯਵਿਕਾਰਂ ਕਰੋਨ੍ਤੇਨਾਤਿ ਹਤ੍ਥੇਨ ਚੀਵਰਂ ਪਰਾਮਸਨ੍ਤੇਨ ਵਾ ਚਾਲੇਨ੍ਤੇਨ ਵਾ. ਦੁਵਿਧਨ੍ਤਿ ਸਮ੍ਮੁਖਪਰਮ੍ਮੁਖਭੇਦੇਸੁ ਦੁਵਿਧਂ. ਹਤ੍ਥਪਾਸੇਤਿ ਇਦਂ ਦ੍ਵਾਦਸਹਤ੍ਥਂ ਸਨ੍ਧਾਯ ਵੁਤ੍ਤਂ, ਤਸ੍ਮਾ ਦ੍ਵਾਦਸਹਤ੍ਥਬ੍ਭਨ੍ਤਰੇ ਠਿਤਂ ‘‘ਇਮ’’ਨ੍ਤਿ ਵਤ੍ਵਾ ਅਧਿਟ੍ਠਾਤਬ੍ਬਂ. ਤਤੋ ਪਰਂ ‘‘ਏਤ’’ਨ੍ਤਿ ਵਤ੍ਵਾ ਅਧਿਟ੍ਠਾਤਬ੍ਬਨ੍ਤਿ ਕੇਚਿ ਵਦਨ੍ਤਿ. ਗਣ੍ਠਿਪਦੇਸੁ ਪਨੇਤ੍ਥ ਨ ਕਿਞ੍ਚਿ ਵੁਤ੍ਤਂ. ਪਾਲ਼ਿਯਂ ਅਟ੍ਠਕਥਾਯਞ੍ਚ ਸਬ੍ਬਤ੍ਥ ‘‘ਹਤ੍ਥਪਾਸੋ’’ਤਿ ਅਡ੍ਢਤੇਯ੍ਯਹਤ੍ਥੋ ਵੁਚ੍ਚਤਿ, ਤਸ੍ਮਾ ਇਧ ਵਿਸੇਸਵਿਕਪ੍ਪਨਾਯ ਕਾਰਣਂ ਗਵੇਸਿਤਬ੍ਬਂ. ਸਾਮਨ੍ਤਵਿਹਾਰੋ ਨਾਮ ਯਤ੍ਥ ਤਦਹੇਵ ਗਨ੍ਤ੍ਵਾ ਨਿਵਤ੍ਤਿਤੁਂ ਸਕ੍ਕਾ. ‘‘ਸਾਮਨ੍ਤਵਿਹਾਰੇ’’ਤਿ ਇਦਂ ਦੇਸਨਾਸੀਸਮਤ੍ਤਂ, ਤਸ੍ਮਾ ਠਪਿਤਟ੍ਠਾਨਂ ਸਲ੍ਲਕ੍ਖੇਤ੍ਵਾ ਦੂਰੇ ਠਿਤਮ੍ਪਿ ਅਧਿਟ੍ਠਾਤਬ੍ਬਨ੍ਤਿ ਵਦਨ੍ਤਿ. ਠਪਿਤਟ੍ਠਾਨਂ ਸਲ੍ਲਕ੍ਖੇਤ੍ਵਾਤਿ ਚ ਇਦਂ ਠਪਿਤਟ੍ਠਾਨਸਲ੍ਲਕ੍ਖਣਂ ਅਨੁਚ੍ਛਵਿਕਨ੍ਤਿ ਕਤ੍ਵਾ ਵੁਤ੍ਤਂ, ਚੀਵਰਸਲ੍ਲਕ੍ਖਣਮੇਵੇਤ੍ਥ ਪਮਾਣਂ.

ਅਧਿਟ੍ਠਹਿਤ੍ਵਾ ਠਪਿਤਵਤ੍ਥੇਹੀਤਿ ਪਰਿਕ੍ਖਾਰਚੋਲ਼ਨਾਮੇਨ ਅਧਿਟ੍ਠਹਿਤ੍ਵਾ ਠਪਿਤਵਤ੍ਥੇਹਿ. ਅਧਿਟ੍ਠਾਨਤੋ ਪੁਬ੍ਬੇ ਸਙ੍ਘਾਟਿਆਦਿਵੋਹਾਰਸ੍ਸ ਅਭਾਵਤੋ ‘‘ਇਮਂ ਪਚ੍ਚੁਦ੍ਧਰਾਮੀ’’ਤਿ ਪਰਿਕ੍ਖਾਰਚੋਲ਼ਸ੍ਸ ਵਿਸੁਂ ਪਚ੍ਚੁਦ੍ਧਾਰਵਿਧਿਂ ਦਸ੍ਸੇਤਿ. ਪਰਿਕ੍ਖਾਰਚੋਲ਼ਨਾਮੇਨ ਪਨ ਅਧਿਟ੍ਠਿਤਤ੍ਤਾ ‘‘ਇਮਂ ਪਰਿਕ੍ਖਾਰਚੋਲ਼ਂ ਪਚ੍ਚੁਦ੍ਧਰਾਮੀ’’ਤਿ ਵੁਤ੍ਤੇਪਿ ਨੇਵਤ੍ਥਿ ਦੋਸੋਤਿ ਵਿਞ੍ਞਾਯਤਿ. ਪਚ੍ਚੁਦ੍ਧਰਿਤ੍ਵਾ ਪੁਨ ਅਧਿਟ੍ਠਾਤਬ੍ਬਾਨੀਤਿ ਇਦਞ੍ਚ ਸਙ੍ਘਾਟਿਆਦਿਚੀਵਰਨਾਮੇਨ ਅਧਿਟ੍ਠਹਿਤ੍ਵਾ ਪਰਿਭੁਞ੍ਜਿਤੁਕਾਮਂ ਸਨ੍ਧਾਯ ਵੁਤ੍ਤਂ. ਪਰਿਕ੍ਖਾਰਚੋਲ਼ਨਾਮੇਨੇਵ ਅਧਿਟ੍ਠਹਿਤ੍ਵਾ ਪਰਿਭੁਞ੍ਜਨ੍ਤਸ੍ਸ ਪਨ ਪੁਬ੍ਬੇਕਤਅਧਿਟ੍ਠਾਨਮੇਵ ਅਧਿਟ੍ਠਾਨਂ. ਅਧਿਟ੍ਠਾਨਕਿਚ੍ਚਂ ਨਤ੍ਥੀਤਿ ਇਮਿਨਾ ਕਪ੍ਪਬਿਨ੍ਦੁਦਾਨਕਿਚ੍ਚਮ੍ਪਿ ਨਤ੍ਥੀਤਿ ਦਸ੍ਸੇਤਿ. ਮੁਟ੍ਠਿਪਞ੍ਚਕਾਦਿਤਿਚੀਵਰਪ੍ਪਮਾਣਯੁਤ੍ਤਂ ਸਨ੍ਧਾਯ ‘‘ਤਿਚੀਵਰਂ ਪਨਾ’’ਤਿਆਦਿ ਵੁਤ੍ਤਂ. ਪਰਿਕ੍ਖਾਰਚੋਲ਼ਂ ਅਧਿਟ੍ਠਾਤੁਨ੍ਤਿ ਪਰਿਕ੍ਖਾਰਚੋਲ਼ਂ ਕਤ੍ਵਾ ਅਧਿਟ੍ਠਾਤੁਂ. ਬਦ੍ਧਸੀਮਾਯਂ ਅਵਿਪ੍ਪਵਾਸਸੀਮਾਸਮ੍ਮੁਤਿਸਬ੍ਭਾਵਤੋ ਚੀਵਰਵਿਪ੍ਪਵਾਸੇਪਿ ਨੇਵਤ੍ਥਿ ਦੋਸੋਤਿ ਨ ਤਤ੍ਥ ਦੁਪ੍ਪਰਿਹਾਰਤਾਤਿ ਆਹ ‘‘ਅਬਦ੍ਧਸੀਮਾਯਂ ਦੁਪ੍ਪਰਿਹਾਰ’’ਨ੍ਤਿ.

ਅਨਤਿਰਿਤ੍ਤਪ੍ਪਮਾਣਾਤਿ ਸੁਗਤਵਿਦਤ੍ਥਿਯਾ ਦੀਘਸੋ ਛ ਵਿਦਤ੍ਥਿਯੋ ਤਿਰਿਯਂ ਅਡ੍ਢਤੇਯ੍ਯਵਿਦਤ੍ਥਿਞ੍ਚ ਅਨਤਿਕ੍ਕਨ੍ਤਪ੍ਪਮਾਣਾਤਿ ਅਤ੍ਥੋ. ਨਨੁ ਚ ਵਸ੍ਸਿਕਸਾਟਿਕਾ ਵਸ੍ਸਾਨਾਤਿਕ੍ਕਮੇਨ, ਕਣ੍ਡੁਪ੍ਪਟਿਚ੍ਛਾਦਿ ਆਬਾਧਵੂਪਸਮੇਨ ਅਧਿਟ੍ਠਾਨਂ ਵਿਜਹਤਿ. ਤੇਨੇਵ ਮਾਤਿਕਾਟ੍ਠਕਥਾਯਂ (ਕਙ੍ਖਾ. ਅਟ੍ਠ. ਕਥਿਨਸਿਕ੍ਖਾਪਦਵਣ੍ਣਨਾ) ‘‘ਵਸ੍ਸਿਕਸਾਟਿਕਾ ਵਸ੍ਸਾਨਮਾਸਾਤਿਕ੍ਕਮੇਨਪਿ, ਕਣ੍ਡੁਪ੍ਪਟਿਚ੍ਛਾਦਿ ਆਬਾਧਵੂਪਸਮੇਨਪਿ ਅਧਿਟ੍ਠਾਨਂ ਵਿਜਹਤੀ’’ਤਿ ਵੁਤ੍ਤਂ. ਤਸ੍ਮਾ ‘‘ਤਤੋ ਪਰਂ ਪਚ੍ਚੁਦ੍ਧਰਿਤ੍ਵਾ ਵਿਕਪ੍ਪੇਤਬ੍ਬਾ’’ਤਿ ਕਸ੍ਮਾ ਵੁਤ੍ਤਂ. ਸਤਿ ਹਿ ਅਧਿਟ੍ਠਾਨੇ ਪਚ੍ਚੁਦ੍ਧਾਰੋ ਯੁਤ੍ਤੋਤਿ? ਏਤ੍ਥ ਤਾਵ ਤੀਸੁਪਿ ਗਣ੍ਠਿਪਦੇਸੁ ਇਦਂ ਵੁਤ੍ਤਂ ‘‘ਪਚ੍ਚੁਦ੍ਧਰਿਤ੍ਵਾਤਿ ਇਦਂ ਪਚ੍ਚੁਦ੍ਧਰਣਂ ਸਨ੍ਧਾਯ ਨ ਵੁਤ੍ਤਂ, ਪਚ੍ਚੁਦ੍ਧਰਿਤ੍ਵਾਤਿ ਪਨ ਵਸ੍ਸਿਕਸਾਟਿਕਭਾਵਤੋ ਅਪਨੇਤ੍ਵਾਤਿ ਏਵਮਤ੍ਥੋ ਗਹੇਤਬ੍ਬੋ. ਤਸ੍ਮਾ ਹੇਮਨ੍ਤਸ੍ਸ ਪਠਮਦਿਵਸਤੋ ਪਟ੍ਠਾਯ ਅਨ੍ਤੋਦਸਾਹੇ ਵਸ੍ਸਿਕਸਾਟਿਕਭਾਵਤੋ ਅਪਨੇਤ੍ਵਾ ਵਿਕਪ੍ਪੇਤਬ੍ਬਾਤਿ ਇਮਮਤ੍ਥਂ ਦਸ੍ਸੇਤੁਂ ‘ਤਤੋ ਪਰਂ ਪਚ੍ਚੁਦ੍ਧਰਿਤ੍ਵਾ ਵਿਕਪ੍ਪੇਤਬ੍ਬਾ’ਤਿ ਵੁਤ੍ਤ’’ਨ੍ਤਿ.

ਕੇਚਿ ਪਨ ‘‘ਯਥਾ ਕਥਿਨਮਾਸਬ੍ਭਨ੍ਤਰੇ ਉਪ੍ਪਨ੍ਨਚੀਵਰਂ ਕਥਿਨਮਾਸਾਤਿਕ੍ਕਮੇ ਨਿਸ੍ਸਗ੍ਗਿਯਂ ਹੋਤਿ, ਏਵਮਯਂ ਵਸ੍ਸਿਕਸਾਟਿਕਾਪਿ ਵਸ੍ਸਾਨਮਾਸਾਤਿਕ੍ਕਮੇ ਨਿਸ੍ਸਗ੍ਗਿਯਾ ਹੋਤਿ, ਤਸ੍ਮਾ ਕਤ੍ਤਿਕਪੁਣ੍ਣਮਦਿਵਸੇ ਪਚ੍ਚੁਦ੍ਧਰਿਤ੍ਵਾ ਤਤੋ ਪਰਂ ਹੇਮਨ੍ਤਸ੍ਸ ਪਠਮਦਿਵਸੇ ਵਿਕਪ੍ਪੇਤਬ੍ਬਾਤਿ ਏਵਮਤ੍ਥੋ ਗਹੇਤਬ੍ਬੋ. ਪਚ੍ਚੁਦ੍ਧਰਿਤ੍ਵਾ ਤਤੋ ਪਰਂ ਵਿਕਪ੍ਪੇਤਬ੍ਬਾਤਿ ਪਦਯੋਜਨਾ ਵੇਦਿਤਬ੍ਬਾ’’ਤਿ ਚ ਵਦਨ੍ਤਿ, ਤਂ ਨ ਯੁਤ੍ਤਂ. ਕਥਿਨਮਾਸੇ ਉਪ੍ਪਨ੍ਨਞ੍ਹਿ ਚੀਵਰਂ ਅਤਿਰੇਕਚੀਵਰਟ੍ਠਾਨੇ ਠਿਤਤ੍ਤਾ ਅਵਸਾਨਦਿਵਸੇ ਅਨਧਿਟ੍ਠਿਤਂ ਕਥਿਨਮਾਸਾਤਿਕ੍ਕਮੇ ਨਿਸ੍ਸਗ੍ਗਿਯਂ ਹੋਤਿ. ਅਯਂ ਪਨ ਵਸ੍ਸਿਕਸਾਟਿਕਾ ਅਧਿਟ੍ਠਹਿਤ੍ਵਾ ਠਪਿਤਤ੍ਤਾ ਨ ਤੇਨ ਸਦਿਸਾਤਿ ਵਸ੍ਸਾਨਾਤਿਕ੍ਕਮੇ ਕਥਂ ਨਿਸ੍ਸਗ੍ਗਿਯਾ ਹੋਤਿ. ਅਨਧਿਟ੍ਠਿਤਅਵਿਕਪ੍ਪਿਤਮੇਵ ਹਿ ਤਂਤਂਕਾਲਾਤਿਕ੍ਕਮੇ ਨਿਸ੍ਸਗ੍ਗਿਯਂ ਹੋਤਿ, ਤਸ੍ਮਾ ਹੇਮਨ੍ਤੇਪਿ ਵਸ੍ਸਿਕਸਾਟਿਕਾ ਦਸਾਹਂ ਪਰਿਹਾਰਂ ਲਭਤਿਯੇਵ. ਏਵਂ ਕਣ੍ਡੁਪ੍ਪਟਿਚ੍ਛਾਦਿਪਿ ਆਬਾਧਵੂਪਸਮੇਨ ਅਧਿਟ੍ਠਾਨਂ ਵਿਜਹਤਿ, ਤਸ੍ਮਾ ਤਤੋ ਪਰਂ ਦਸਾਹਂ ਪਰਿਹਾਰਂ ਲਭਤਿ, ਦਸਾਹਂ ਪਨ ਅਨਤਿਕ੍ਕਮਿਤ੍ਵਾ ਵਿਕਪ੍ਪੇਤਬ੍ਬਾਤਿ.

ਕੇਚਿ ਪਨ ‘‘ਅਧਿਟ੍ਠਾਨਭੇਦਲਕ੍ਖਣੇ ਅਵੁਤ੍ਤਤ੍ਤਾ ਵਸ੍ਸਿਕਸਾਟਿਕਾ ਵਸ੍ਸਾਨਮਾਸਾਤਿਕ੍ਕਮੇਪਿ, ਕਣ੍ਡੁਪ੍ਪਟਿਚ੍ਛਾਦਿ ਆਬਾਧੇ ਵੂਪਸਨ੍ਤੇਪਿ ਅਧਿਟ੍ਠਾਨਂ ਨ ਵਿਜਹਤਿ, ਤਸ੍ਮਾ ‘ਤਤੋ ਪਰਂ ਪਚ੍ਚੁਦ੍ਧਰਿਤ੍ਵਾ ਵਿਕਪ੍ਪੇਤਬ੍ਬਾ’ਤਿ ਇਦਂ ਵੁਤ੍ਤ’’ਨ੍ਤਿ ਵਦਨ੍ਤਿ, ਤਂ ਮਾਤਿਕਾਟ੍ਠਕਥਾਯ ਨ ਸਮੇਤਿ, ਸਮਨ੍ਤਪਾਸਾਦਿਕਾਯ ਪਨ ਸਮੇਤਿ. ਤਥਾ ਹਿ ‘‘ਵਸ੍ਸਿਕਸਾਟਿਕਾ ਵਸ੍ਸਾਨਮਾਸਾਤਿਕ੍ਕਮੇਨਪਿ, ਕਣ੍ਡੁਪ੍ਪਟਿਚ੍ਛਾਦਿ ਆਬਾਧਵੂਪਸਮੇਨਪਿ ਅਧਿਟ੍ਠਾਨਂ ਵਿਜਹਤੀ’’ਤਿ ਇਦਂ ਸਮਨ੍ਤਪਾਸਾਦਿਕਾਯਂ ਨਤ੍ਥਿ, ਪਰਿਵਾਰਟ੍ਠਕਥਾਯਞ੍ਚ ‘‘ਅਤ੍ਥਾਪਤ੍ਤਿ ਹੇਮਨ੍ਤੇ ਆਪਜ੍ਜਤਿ, ਨੋ ਗਿਮ੍ਹੇ’’ਤਿ ਏਤ੍ਥ ਇਦਂ ਵੁਤ੍ਤਂ ‘‘ਕਤ੍ਤਿਕਪੁਣ੍ਣਮਾਸਿਯਾ ਪਚ੍ਛਿਮੇ ਪਾਟਿਪਦਦਿਵਸੇ ਵਿਕਪ੍ਪੇਤ੍ਵਾ ਠਪਿਤਂ ਵਸ੍ਸਿਕਸਾਟਿਕਂ ਨਿਵਾਸੇਨ੍ਤੋ ਹੇਮਨ੍ਤੇ ਆਪਜ੍ਜਤਿ. ਕੁਰੁਨ੍ਦਿਯਂ ਪਨ ‘ਕਤ੍ਤਿਕਪੁਣ੍ਣਮਦਿਵਸੇ ਅਪਚ੍ਚੁਦ੍ਧਰਿਤ੍ਵਾ ਹੇਮਨ੍ਤੇ ਆਪਜ੍ਜਤੀ’ਤਿ ਵੁਤ੍ਤਂ, ਤਮ੍ਪਿ ਸੁਵੁਤ੍ਤਂ. ਚਾਤੁਮਾਸਂ ਅਧਿਟ੍ਠਾਤੁਂ, ਤਤੋ ਪਰਂ ਵਿਕਪ੍ਪੇਤੁਨ੍ਤਿ ਹਿ ਵੁਤ੍ਤ’’ਨ੍ਤਿ (ਪਰਿ. ਅਟ੍ਠ. ੩੨੩).

ਤਤ੍ਥ ਮਹਾਅਟ੍ਠਕਥਾਯਂ ਨਿਵਾਸਨਪਚ੍ਚਯਾ ਦੁਕ੍ਕਟਂ ਵੁਤ੍ਤਂ, ਕੁਰੁਨ੍ਦਟ੍ਠਕਥਾਯਂ ਪਨ ਅਪਚ੍ਚੁਦ੍ਧਾਰਪਚ੍ਚਯਾ. ਤਸ੍ਮਾ ਕੁਰੁਨ੍ਦਿਯਂ ਵੁਤ੍ਤਨਯੇਨੇਵ ਵਸ੍ਸਿਕਸਾਟਿਕਾ ਵਸ੍ਸਾਨਮਾਸਾਤਿਕ੍ਕਮੇਪਿ ਅਧਿਟ੍ਠਾਨਂ ਨ ਵਿਜਹਤੀਤਿ ਪਞ੍ਞਾਯਤਿ. ਕੁਰੁਨ੍ਦਿਯਞ੍ਹਿ ‘‘ਵਸ੍ਸਾਨਂ ਚਾਤੁਮਾਸਂ ਅਧਿਟ੍ਠਾਤੁਂ, ਤਤੋ ਪਰਂ ਵਿਕਪ੍ਪੇਤੁ’’ਨ੍ਤਿ ਵਚਨਤੋ ਯਦਿ ਕਤ੍ਤਿਕਪੁਣ੍ਣਮਾਯਂ ਨ ਪਚ੍ਚੁਦ੍ਧਰੇਯ੍ਯ, ਅਵਿਜਹਿਤਾਧਿਟ੍ਠਾਨਾ ਵਸ੍ਸਿਕਸਾਟਿਕਾ ਹੇਮਨ੍ਤਂ ਸਮ੍ਪਤ੍ਤਾ ਵਿਕਪ੍ਪਨਕ੍ਖੇਤ੍ਤੇ ਅਧਿਟ੍ਠਾਨਸਬ੍ਭਾਵਤੋ ਦੁਕ੍ਕਟਂ ਜਨੇਤਿ, ਤਸ੍ਮਾ ਕਤ੍ਤਿਕਪੁਣ੍ਣਮਾਯਂ ਏਵ ਪਚ੍ਚੁਦ੍ਧਰਿਤ੍ਵਾ ਹੇਮਨ੍ਤੇ ਵਿਕਪ੍ਪੇਤਬ੍ਬਾਤਿ ਇਮਿਨਾ ਅਧਿਪ੍ਪਾਯੇਨ ‘‘ਕਤ੍ਤਿਕਪੁਣ੍ਣਮਦਿਵਸੇ ਅਪਚ੍ਚੁਦ੍ਧਰਿਤ੍ਵਾ ਹੇਮਨ੍ਤੇ ਆਪਜ੍ਜਤੀ’’ਤਿ ਵੁਤ੍ਤਂ, ਤਸ੍ਮਾ ਵੀਮਂਸਿਤ੍ਵਾ ਯੁਤ੍ਤਤਰਂ ਗਹੇਤਬ੍ਬਂ.

ਨਹਾਨਤ੍ਥਾਯ ਅਨੁਞ੍ਞਾਤਤ੍ਤਾ ‘‘ਵਣ੍ਣਭੇਦਮਤ੍ਤਰਤ੍ਤਾਪਿ ਚੇਸਾ ਵਟ੍ਟਤੀ’’ਤਿ ਵੁਤ੍ਤਂ. ਦ੍ਵੇ ਪਨ ਨ ਵਟ੍ਟਨ੍ਤੀਤਿ ਦ੍ਵਿਨ੍ਨਂ ਅਧਿਟ੍ਠਾਨਾਭਾਵਤੋ ਵੁਤ੍ਤਂ. ‘‘ਸਚੇ ਵਸ੍ਸਾਨੇ ਅਪਰਾ ਵਸ੍ਸਿਕਸਾਟਿਕਾ ਉਪ੍ਪਨ੍ਨਾ ਹੋਤਿ, ਪੁਰਿਮਵਸ੍ਸਿਕਸਾਟਿਕਂ ਪਚ੍ਚੁਦ੍ਧਰਿਤ੍ਵਾ ਵਿਕਪ੍ਪੇਤ੍ਵਾ ਚ ਅਧਿਟ੍ਠਾਤਬ੍ਬਾ’’ਤਿ ਵਦਨ੍ਤਿ. ਪਮਾਣਯੁਤ੍ਤਨ੍ਤਿ ਦੀਘਸੋ ਸੁਗਤਵਿਦਤ੍ਥਿਯਾ ਦ੍ਵੇ ਵਿਦਤ੍ਥਿਯੋ, ਵਿਤ੍ਥਾਰਤੋ ਦਿਯਡ੍ਢਾ, ਦਸਾ ਵਿਦਤ੍ਥੀਤਿ ਇਮਿਨਾ ਪਮਾਣੇਨ ਯੁਤ੍ਤਂ. ਪਮਾਣਿਕਾਤਿ ਸੁਗਤਵਿਦਤ੍ਥਿਯਾ ਦੀਘਸੋ ਚਤਸ੍ਸੋ ਵਿਦਤ੍ਥਿਯੋ, ਤਿਰਿਯਂ ਦ੍ਵੇ ਵਿਦਤ੍ਥਿਯੋਤਿ ਏਵਂ ਵੁਤ੍ਤਪ੍ਪਮਾਣਯੁਤ੍ਤਾ. ਪਚ੍ਚੁਦ੍ਧਰਿਤ੍ਵਾ ਵਿਕਪ੍ਪੇਤਬ੍ਬਾਤਿ ਏਤ੍ਥ ਯਂ ਵਤ੍ਤਬ੍ਬਂ, ਤਂ ਹੇਟ੍ਠਾ ਵੁਤ੍ਤਮੇਵ. ‘‘ਸਕਿਂ ਅਧਿਟ੍ਠਿਤਂ ਅਧਿਟ੍ਠਿਤਮੇਵ ਹੋਤਿ, ਪੁਨ ਨ ਪਚ੍ਚੁਦ੍ਧਰੀਯਤਿ ਕਾਲਪਰਿਚ੍ਛੇਦਾਭਾਵਤੋ’’ਤਿ ਵਦਨ੍ਤਿ. ਅਪਰੇ ਪਨ ‘‘ਏਕਵਚਨੇਨਪਿ ਵਟ੍ਟਤੀਤਿ ਦਸ੍ਸਨਤ੍ਥਂ ‘ਸਕਿਂ ਅਧਿਟ੍ਠਿਤਂ ਅਧਿਟ੍ਠਿਤਮੇਵਾ’ਤਿ ਵੁਤ੍ਤ’’ਨ੍ਤਿ ਵਦਨ੍ਤਿ. ਉਭਯਤ੍ਥਾਪਿ ਅਸ੍ਸ ਵਚਨਸ੍ਸ ਇਧ ਵਚਨੇ ਅਪੁਬ੍ਬਂ ਪਯੋਜਨਂ ਨ ਦਿਸ੍ਸਤਿ, ਤੇਨੇਵ ਮਾਤਿਕਾਟ੍ਠਕਥਾਯਂ ਇਮਸ੍ਮਿਂ ਠਾਨੇ ‘‘ਸਕਿਂ ਅਧਿਟ੍ਠਿਤਂ ਅਧਿਟ੍ਠਿਤਮੇਵ ਹੋਤੀ’’ਤਿ ਇਦਂ ਪਦਂ ਨ ਵੁਤ੍ਤਂ.

‘‘ਅਤ੍ਤਨੋ ਸਨ੍ਤਕਭਾਵਤੋ ਮੋਚੇਤ੍ਵਾ ਠਪਿਤਂ ਸਨ੍ਧਾਯ ਮਹਾਪਚ੍ਚਰਿਯਂ ਅਨਾਪਤ੍ਤਿ ਵੁਤ੍ਤਾ’’ਤਿ ਵਦਨ੍ਤਿ. ਇਮਿਨਾ ਭੇਸਜ੍ਜਂ ਚੇਤਾਪੇਸ੍ਸਾਮਿ, ਇਦਂ ਮਾਤੁਯਾ ਦਸ੍ਸਾਮੀਤਿ ਠਪੇਨ੍ਤੇਨ ਅਧਿਟ੍ਠਾਤਬ੍ਬਂ, ਇਦਂ ਭੇਸਜ੍ਜਸ੍ਸ, ਇਦਂ ਮਾਤੁਯਾਤਿ ਵਿਸ੍ਸਜ੍ਜੇਤ੍ਵਾ ਸਕਸਨ੍ਤਕਭਾਵਤੋ ਮੋਚਿਤੇ ਅਧਿਟ੍ਠਾਨਕਿਚ੍ਚਂ ਨਤ੍ਥੀਤਿ ਅਧਿਪ੍ਪਾਯੋ. ਸੇਨਾਸਨਪਰਿਕ੍ਖਾਰਤ੍ਥਾਯ ਦਿਨ੍ਨਪਚ੍ਚਤ੍ਥਰਣੇਤਿ ਏਤ੍ਥ ‘‘ਅਨਿਵਾਸੇਤ੍ਵਾ ਅਪਾਰੁਪਿਤ੍ਵਾ ਚ ਕੇਵਲਂ ਮਞ੍ਚਪੀਠੇਸੁਯੇਵ ਅਤ੍ਥਰਿਤ੍ਵਾ ਪਰਿਭੁਞ੍ਜਿਯਮਾਨਂ ਪਚ੍ਚਤ੍ਥਰਣਂ ਅਤ੍ਤਨੋ ਸਨ੍ਤਕਮ੍ਪਿ ਅਨਧਿਟ੍ਠਾਤੁਂ ਵਟ੍ਟਤੀ’’ਤਿ ਵਦਨ੍ਤਿ. ਹੇਟ੍ਠਾ ਪਨ ‘‘ਪਚ੍ਚਤ੍ਥਰਣਮ੍ਪਿ ਅਧਿਟ੍ਠਾਤਬ੍ਬਮੇਵਾ’’ਤਿ ਅਵਿਸੇਸੇਨ ਵੁਤ੍ਤਤ੍ਤਾ ਅਤ੍ਤਨੋ ਸਨ੍ਤਕਂ ਅਧਿਟ੍ਠਾਤਬ੍ਬਮੇਵਾਤਿ ਅਮ੍ਹਾਕਂ ਖਨ੍ਤਿ, ਵੀਮਂਸਿਤ੍ਵਾ ਗਹੇਤਬ੍ਬਂ.

‘‘ਹੀਨਾਯਾਵਤ੍ਤਨੇਨਾਤਿ ਸਿਕ੍ਖਂ ਅਪ੍ਪਚ੍ਚਕ੍ਖਾਯ ਗਿਹਿਭਾਵੂਪਗਮਨੇਨਾ’’ਤਿ ਤੀਸੁਪਿ ਗਣ੍ਠਿਪਦੇਸੁ ਵੁਤ੍ਤਂ, ਤਂ ਯੁਤ੍ਤਂ ਅਞ੍ਞਸ੍ਸ ਦਾਨੇ ਵਿਯ ਚੀਵਰੇ ਨਿਰਾਲਯਭਾਵੇਨੇਵ ਪਰਿਚ੍ਚਤ੍ਤਤ੍ਤਾ. ਕੇਚਿ ਪਨ ‘‘ਹੀਨਾਯਾਵਤ੍ਤਨੇਨਾਤਿ ਭਿਕ੍ਖੁਨਿਯਾ ਗਿਹਿਭਾਵੂਪਗਮਨੇਨਾ’’ਤਿ ਏਵਮਤ੍ਥਂ ਗਹੇਤ੍ਵਾ ‘‘ਭਿਕ੍ਖੁ ਪਨ ਵਿਬ੍ਭਮਨ੍ਤੋਪਿ ਯਾਵ ਸਿਕ੍ਖਂ ਨ ਪਚ੍ਚਕ੍ਖਾਤਿ, ਤਾਵ ਭਿਕ੍ਖੁਯੇਵਾਤਿ ਅਧਿਟ੍ਠਾਨਂ ਨ ਵਿਜਹਤੀ’’ਤਿ ਵਦਨ੍ਤਿ, ਤਂ ਨ ਗਹੇਤਬ੍ਬਂ ‘‘ਭਿਕ੍ਖੁਨਿਯਾ ਹੀਨਾਯਾਵਤ੍ਤਨੇਨਾ’’ਤਿ ਵਿਸੇਸੇਤ੍ਵਾ ਅਵੁਤ੍ਤਤ੍ਤਾ. ਭਿਕ੍ਖੁਨਿਯਾ ਹਿ ਗਿਹਿਭਾਵੂਪਗਮਨੇ ਅਧਿਟ੍ਠਾਨਵਿਜਹਨਂ ਵਿਸੁਂ ਵਤ੍ਤਬ੍ਬਂ ਨਤ੍ਥਿ ਤਸ੍ਸਾ ਵਿਬ੍ਭਮਨੇਨੇਵ ਅਸ੍ਸਮਣੀਭਾਵਤੋ. ਸਿਕ੍ਖਾਪਚ੍ਚਕ੍ਖਾਨੇਨਾਤਿ ਪਨ ਇਦਂ ਸਚੇ ਭਿਕ੍ਖੁਲਿਙ੍ਗੇ ਠਿਤੋਵ ਸਿਕ੍ਖਂ ਪਚ੍ਚਕ੍ਖਾਤਿ, ਤਸ੍ਸ ਕਾਯਲਗ੍ਗਮ੍ਪਿ ਚੀਵਰਂ ਅਧਿਟ੍ਠਾਨਂ ਵਿਜਹਤੀਤਿ ਦਸ੍ਸਨਤ੍ਥਂ ਵੁਤ੍ਤਂ. ਕਨਿਟ੍ਠਙ੍ਗੁਲਿਨਖਵਸੇਨਾਤਿ ਹੇਟ੍ਠਿਮਪਰਿਚ੍ਛੇਦਂ ਦਸ੍ਸੇਤਿ. ਪਮਾਣਚੀਵਰਸ੍ਸਾਤਿ ਪਚ੍ਛਿਮਪ੍ਪਮਾਣਂ ਸਨ੍ਧਾਯ ਵੁਤ੍ਤਂ. ਦ੍ਵੇ ਚੀਵਰਾਨਿ ਪਾਰੁਪਨ੍ਤਸ੍ਸਾਤਿ ਅਨ੍ਤਰਘਰਪ੍ਪਵੇਸਨਤ੍ਥਾਯ ਸੁਪ੍ਪਟਿਚ੍ਛਨ੍ਨਸਿਕ੍ਖਾਪਦੇ ਵੁਤ੍ਤਨਯੇਨ ਸਙ੍ਘਾਟਿਂ ਉਤ੍ਤਰਾਸਙ੍ਗਞ੍ਚ ਏਕਤੋ ਕਤ੍ਵਾ ਪਾਰੁਪਨ੍ਤਸ੍ਸ. ਸਙ੍ਘਰਿਤਟ੍ਠਾਨੇਤਿ ਦ੍ਵੀਸੁਪਿ ਅਨ੍ਤੇਸੁ ਸਙ੍ਘਰਿਤਟ੍ਠਾਨੇ. ਏਸ ਨਯੋਤਿ ਇਮਿਨਾ ਪਮਾਣਯੁਤ੍ਤੇਸੁ ਯਤ੍ਥ ਕਤ੍ਥਚਿ ਛਿਦ੍ਦਂ ਅਧਿਟ੍ਠਾਨਂ ਵਿਜਹਤਿ, ਮਹਨ੍ਤੇਸੁ ਪਨ ਤਤੋ ਪਰੇਨ ਛਿਦ੍ਦਂ ਅਧਿਟ੍ਠਾਨਂ ਨ ਵਿਜਹਤੀਤਿ ਅਯਮਤ੍ਥੋ ਦਸ੍ਸਿਤੋ. ਸਬ੍ਬੇਸੂਤਿ ਤਿਚੀਵਰਾਦਿਭੇਦੇਸੁ ਸਬ੍ਬਚੀਵਰੇਸੁ.

ਅਞ੍ਞਂ ਪਚ੍ਛਿਮਪ੍ਪਮਾਣਂ ਨਾਮ ਨਤ੍ਥੀਤਿ ਸੁਤ੍ਤੇ ਆਗਤਂ ਨਤ੍ਥੀਤਿ ਅਧਿਪ੍ਪਾਯੋ. ਇਦਾਨਿ ਤਮੇਵ ਵਿਭਾਵੇਤੁਂ ‘‘ਯਞ੍ਹੀ’’ਤਿਆਦਿ ਵੁਤ੍ਤਂ. ‘‘ਤਂ ਅਤਿਕ੍ਕਮਯਤੋ ਛੇਦਨਕਂ ਪਾਚਿਤ੍ਤਿਯ’’ਨ੍ਤਿ ਵੁਤ੍ਤਤ੍ਤਾ ਆਹ ‘‘ਤਤੋ ਉਤ੍ਤਰਿ ਪਟਿਸਿਦ੍ਧਤ੍ਤਾ’’ਤਿ. ਤਂ ਨ ਸਮੇਤੀਤਿ ਪਰਿਕ੍ਖਾਰਚੋਲ਼ਸ੍ਸ ਵਿਕਪ੍ਪਨੁਪਗਪਚ੍ਛਿਮਂ ਪਚ੍ਛਿਮਪ੍ਪਮਾਣਨ੍ਤਿ ਗਹੇਤ੍ਵਾ ਇਤਰੇਸਂ ਤਿਚੀਵਰਾਦੀਨਂ ਮੁਟ੍ਠਿਪਞ੍ਚਕਾਦਿਭੇਦਂ ਪਚ੍ਛਿਮਪ੍ਪਮਾਣਂ ਸਨ੍ਧਾਯ ‘‘ਏਸ ਨਯੋ’’ਤਿਆਦਿਵਚਨਂ ਨ ਸਮੇਤਿ ਤਾਦਿਸਸ੍ਸ ਪਚ੍ਛਿਮਪ੍ਪਮਾਣਸ੍ਸ ਸੁਤ੍ਤੇ ਅਭਾਵਤੋਤਿ ਅਧਿਪ੍ਪਾਯੋ. ਅਨ੍ਧਕਟ੍ਠਕਥਾਯਂ ਵੁਤ੍ਤਵਚਨਂ ਨ ਸਮੇਤੀਤਿ ਇਮਿਨਾਵ ਪਟਿਕ੍ਖੇਪੇਨ ਵਿਕਪ੍ਪਨੁਪਗਪਚ੍ਛਿਮਸ੍ਸ ਅਨ੍ਤੋ ਯਤ੍ਥ ਕਤ੍ਥਚਿ ਛਿਦ੍ਦਂ ਅਧਿਟ੍ਠਾਨਂ ਵਿਜਹਤੀਤਿ ਅਯਮ੍ਪਿ ਨਯੋ ਪਟਿਕ੍ਖਿਤ੍ਤੋਯੇਵਾਤਿ ਦਟ੍ਠਬ੍ਬਂ. ਤਿਚੀਵਰਞ੍ਹਿ ਠਪੇਤ੍ਵਾ ਸੇਸਚੀਵਰੇਸੁ ਛਿਦ੍ਦੇਨ ਅਧਿਟ੍ਠਾਨਵਿਜਹਨਂ ਨਾਮ ਨਤ੍ਥਿ, ਤਸ੍ਮਾ ਅਧਿਟ੍ਠਹਿਤ੍ਵਾ ਠਪਿਤੇਸੁ ਸੇਸਚੀਵਰੇਸੁ ਵਿਕਪ੍ਪਨੁਪਗਪਚ੍ਛਿਮਂ ਅਪ੍ਪਹੋਨ੍ਤਂ ਕਤ੍ਵਾ ਖਣ੍ਡਾਖਣ੍ਡਿਕਂ ਛਿਨ੍ਨੇਸੁਪਿ ਅਧਿਟ੍ਠਾਨਵਿਜਹਨਂ ਨਤ੍ਥਿ. ਸਚੇ ਪਨ ਅਧਿਟ੍ਠਾਨਤੋ ਪੁਬ੍ਬੇਯੇਵ ਤਾਦਿਸਂ ਹੋਤਿ, ਅਚੀਵਰਤ੍ਤਾ ਅਧਿਟ੍ਠਾਨਕਿਚ੍ਚਂ ਨਤ੍ਥਿ. ਖੁਦ੍ਦਕਂ ਚੀਵਰਨ੍ਤਿ ਮੁਟ੍ਠਿਪਞ੍ਚਕਾਦਿਭੇਦਪ੍ਪਮਾਣਤੋ ਅਨੂਨਮੇਵ ਖੁਦ੍ਦਕਚੀਵਰਂ. ਮਹਨ੍ਤਂ ਵਾ ਖੁਦ੍ਦਕਂ ਕਰੋਤੀਤਿ ਏਤ੍ਥ ਤਿਣ੍ਣਂ ਚੀਵਰਾਨਂ ਚਤੂਸੁ ਪਸ੍ਸੇਸੁ ਯਸ੍ਮਿਂ ਪਦੇਸੇ ਛਿਦ੍ਦਂ ਅਧਿਟ੍ਠਾਨਂ ਨ ਵਿਜਹਤਿ, ਤਸ੍ਮਿਂ ਪਦੇਸੇ ਸਮਨ੍ਤਤੋ ਛਿਨ੍ਦਿਤ੍ਵਾ ਖੁਦ੍ਦਕਂ ਕਰੋਨ੍ਤਸ੍ਸ ਅਧਿਟ੍ਠਾਨਂ ਨ ਵਿਜਹਤੀਤਿ ਅਧਿਪ੍ਪਾਯੋ.

ਸਮ੍ਮੁਖਾਵਿਕਪ੍ਪਨਾ ਪਰਮ੍ਮੁਖਾਵਿਕਪ੍ਪਨਾਤਿ ਏਤ੍ਥ ਸਮ੍ਮੁਖੇਨ ਵਿਕਪ੍ਪਨਾ ਪਰਮ੍ਮੁਖੇਨ ਵਿਕਪ੍ਪਨਾਤਿ ਏਵਮਤ੍ਥੋ ਗਹੇਤਬ੍ਬੋ. ਸਨ੍ਨਿਹਿਤਾਸਨ੍ਨਿਹਿਤਭਾਵਨ੍ਤਿ ਆਸਨ੍ਨਦੂਰਭਾਵਂ. ਆਸਨ੍ਨਦੂਰਭਾਵੋ ਚ ਅਧਿਟ੍ਠਾਨੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਪਰਿਭੋਗਾਦਯੋਪਿ ਵਟ੍ਟਨ੍ਤੀਤਿ ਏਤ੍ਥ ਅਧਿਟ੍ਠਾਨਸ੍ਸਪਿ ਅਨ੍ਤੋਗਧਤ੍ਤਾ ਸਚੇ ਸਙ੍ਘਾਟਿਆਦਿਨਾਮੇਨ ਅਧਿਟ੍ਠਹਿਤ੍ਵਾ ਪਰਿਭੁਞ੍ਜਿਤੁਕਾਮੋ ਹੋਤਿ, ਅਧਿਟ੍ਠਾਨਂ ਕਾਤਬ੍ਬਂ. ਨੋ ਚੇ, ਨ ਕਾਤਬ੍ਬਂ, ਵਿਕਪ੍ਪਨਮੇਵ ਪਮਾਣਂ, ਤਸ੍ਮਾ ਅਤਿਰੇਕਚੀਵਰਂ ਨਾਮ ਨ ਹੋਤਿ. ਮਿਤ੍ਤੋਤਿ ਦਲ਼੍ਹਮਿਤ੍ਤੋ. ਸਨ੍ਦਿਟ੍ਠੋਤਿ ਦਿਟ੍ਠਮਿਤ੍ਤੋ ਨਾਤਿਦਲ਼੍ਹਮਿਤ੍ਤੋ. ਵਿਕਪ੍ਪਿਤਵਿਕਪ੍ਪਨਾ ਨਾਮੇਸਾ ਵਟ੍ਟਤੀਤਿ ਅਧਿਟ੍ਠਿਤਅਧਿਟ੍ਠਾਨਂ ਵਿਯਾਤਿ ਅਧਿਪ੍ਪਾਯੋ ਅਵਿਸੇਸੇਨ ਵੁਤ੍ਤਵਚਨਨ੍ਤਿ ਤਿਚੀਵਰਾਦਿਂ ਅਧਿਟ੍ਠੇਤਿ, ਵਸ੍ਸਿਕਸਾਟਿਕਂ ਕਣ੍ਡੁਪ੍ਪਟਿਚ੍ਛਾਦਿਞ੍ਚ ਵਿਕਪ੍ਪੇਤੀਤਿ ਅਵਤ੍ਵਾ ਸਬ੍ਬਚੀਵਰਾਨਂ ਅਵਿਸੇਸੇਨ ਵਿਕਪ੍ਪੇਤੀਤਿ ਵੁਤ੍ਤਵਚਨਂ. ਤਿਚੀਵਰਸਙ੍ਖੇਪੇਨਾਤਿ ਤਿਚੀਵਰਨੀਹਾਰੇਨ, ਸਙ੍ਘਾਟਿਆਦਿਅਧਿਟ੍ਠਾਨਵਸੇਨਾਤਿ ਵੁਤ੍ਤਂ ਹੋਤਿ.

ਤੁਯ੍ਹਂ ਦੇਮੀਤਿਆਦੀਸੁ ‘‘ਤਸ੍ਮਿਂ ਕਾਲੇ ਨ ਗਣ੍ਹਿਤੁਕਾਮੋਪਿ ਸਚੇ ਨ ਪਟਿਕ੍ਖਿਪਤਿ, ਪੁਨ ਗਣ੍ਹਿਤੁਕਾਮਤਾਯ ਸਤਿ ਗਹੇਤੁਂ ਵਟ੍ਟਤੀ’’ਤਿ ਵਦਨ੍ਤਿ. ਇਤ੍ਥਨ੍ਨਾਮਸ੍ਸਾਤਿ ਪਰਮ੍ਮੁਖੇ ਠਿਤਂ ਸਨ੍ਧਾਯ ਵਦਤਿ. ‘‘ਤੁਯ੍ਹਂ ਗਣ੍ਹਾਹੀ’’ਤਿ ਵੁਤ੍ਤੇ ‘‘ਮਯ੍ਹਂ ਗਣ੍ਹਾਮੀ’’ਤਿ ਵਦਤਿ, ਸੁਦਿਨ੍ਨਂ ਸੁਗ੍ਗਹਿਤਞ੍ਚਾਤਿ ਏਤ੍ਥ ‘‘ਯਥਾ ਪਰਤੋ ‘ਤਵ ਸਨ੍ਤਕਂ ਕਰੋਹੀ’ਤਿ ਵੁਤ੍ਤੇ ਦੁਦ੍ਦਿਨ੍ਨਮ੍ਪਿ ‘ਸਾਧੁ, ਭਨ੍ਤੇ, ਮਯ੍ਹਂ ਗਣ੍ਹਾਮੀ’ਤਿ ਵਚਨੇਨ ‘ਸੁਗ੍ਗਹਿਤਂ ਹੋਤੀ’ਤਿ ਵੁਤ੍ਤਂ, ਏਵਮਿਧਾਪਿ ‘ਤੁਯ੍ਹਂ ਗਣ੍ਹਾਹੀ’ਤਿ ਵੁਤ੍ਤੇ ਸੁਦਿਨ੍ਨਤ੍ਤਾ ‘ਮਯ੍ਹਂ ਗਣ੍ਹਾਮੀ’ਤਿ ਅਵੁਤ੍ਤੇਪਿ ‘ਸੁਦਿਨ੍ਨਮੇਵਾ’’’ਤਿ ਵਦਨ੍ਤਿ. ‘‘ਗਣ੍ਹਾਹੀਤਿ ਚ ਆਣਤ੍ਤਿਯਾ ਗਹਣਸ੍ਸ ਤਪ੍ਪਟਿਬਦ੍ਧਤਾਕਰਣਵਸੇਨ ਪਵਤ੍ਤਤ੍ਤਾ ਤਦਾ ਗਣ੍ਹਾਮੀਤਿ ਚਿਤ੍ਤੇ ਅਨੁਪ੍ਪਾਦਿਤੇ ਪਚ੍ਛਾ ਗਹੇਤੁਂ ਨ ਲਭਤੀ’’ਤਿ ਵਦਨ੍ਤਿ.

ਤਂ ਨ ਯੁਜ੍ਜਤੀਤਿ ਵਿਨਯਕਮ੍ਮਸ੍ਸ ਕਰਣਵਸੇਨ ਗਹੇਤ੍ਵਾ ਦਿਨ੍ਨਤ੍ਤਾ ਵੁਤ੍ਤਂ. ਸਚੇ ਪਨ ਪਰੋ ਸਚ੍ਚਤੋਯੇਵ ਵਿਸ੍ਸਾਸਂ ਗਣ੍ਹਾਤਿ, ਪੁਨ ਕੇਨਚਿ ਕਾਰਣੇਨ ਤੇਨ ਦਿਨ੍ਨਂ ਤਸ੍ਸ ਨ ਵਟ੍ਟਤੀਤਿ ਨਤ੍ਥਿ. ਨਿਸ੍ਸਗ੍ਗਿਯਂ ਪਨ ਚੀਵਰਂ ਜਾਨਿਤ੍ਵਾ ਵਾ ਅਜਾਨਿਤ੍ਵਾ ਵਾ ਗਣ੍ਹਨ੍ਤਂ ‘‘ਮਾ ਗਣ੍ਹਾਹੀ’’ਤਿ ਨਿਵਾਰਣਤ੍ਥਂ ਵੁਤ੍ਤਂ. ਕਾਯਵਾਚਾਹਿ ਕਤ੍ਤਬ੍ਬਅਧਿਟ੍ਠਾਨਵਿਕਪ੍ਪਨਾਨਂ ਅਕਤਤ੍ਤਾ ਹੋਤੀਤਿ ਆਹ ‘‘ਕਾਯਵਾਚਾਤੋ ਸਮੁਟ੍ਠਾਤੀ’’ਤਿ. ਚੀਵਰਸ੍ਸ ਅਤ੍ਤਨੋ ਸਨ੍ਤਕਤਾ, ਜਾਤਿਪ੍ਪਮਾਣਯੁਤ੍ਤਤਾ, ਛਿਨ੍ਨਪਲਿਬੋਧਭਾਵੋ, ਅਤਿਰੇਕਚੀਵਰਤਾ, ਦਸਾਹਾਤਿਕ੍ਕਮੋਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ.

ਪਠਮਕਥਿਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਉਦੋਸਿਤਸਿਕ੍ਖਾਪਦਵਣ੍ਣਨਾ

੪੭੧-੪੭੩. ਦੁਤਿਯੇ ਅਥਾਨਨ੍ਦਤ੍ਥੇਰੋ ਕਥਂ ਓਕਾਸਂ ਪਟਿਲਭਤਿ, ਕਿਂ ਕਰੋਨ੍ਤੋ ਚ ਆਹਿਣ੍ਡਤੀਤਿ ਆਹ ‘‘ਥੇਰੋ ਕਿਰਾ’’ਤਿਆਦਿ. ਅਵਿਪ੍ਪਵਾਸੇਤਿ ਨਿਮਿਤ੍ਤਤ੍ਥੇ ਭੁਮ੍ਮਂ, ਅਵਿਪ੍ਪਵਾਸਤ੍ਥਨ੍ਤਿ ਅਤ੍ਥੋ, ਵਿਪ੍ਪਵਾਸਪਚ੍ਚਯਾ ਯਾ ਆਪਤ੍ਤਿ, ਤਦਭਾਵਤ੍ਥਨ੍ਤਿ ਵੁਤ੍ਤਂ ਹੋਤਿ.

੪੭੫-੪੭੬. ਏਵਂ ਛਿਨ੍ਨਪਲਿਬੋਧੋਤਿ ਏਵਂ ਇਮੇਹਿ ਚੀਵਰਨਿਟ੍ਠਾਨਕਥਿਨੁਬ੍ਭਾਰੇਹਿ ਛਿਨ੍ਨਪਲਿਬੋਧੋ. ਅਧਿਟ੍ਠਿਤੇਸੂਤਿ ਤਿਚੀਵਰਾਧਿਟ੍ਠਾਨਨਯੇਨ ਅਧਿਟ੍ਠਿਤੇਸੁ. ਤਿਚੀਵਰੇਨ ਵਿਪ੍ਪਵੁਤ੍ਥੋ ਹੋਤੀਤਿ ‘‘ਰੁਕ੍ਖੋ ਛਿਨ੍ਨੋ, ਪਟੋ ਦਡ੍ਢੋ’’ਤਿਆਦੀਸੁ ਵਿਯ ਅਵਯਵੇਪਿ ਸਮੁਦਾਯਵੋਹਾਰੋ ਲਬ੍ਭਤੀਤਿ ਵੁਤ੍ਤਂ.

੪੭੭-੪੭੮. ਪਰਿਖਾਯ ਵਾ ਪਰਿਕ੍ਖਿਤ੍ਤੋਤਿ ਇਮਿਨਾ ਚ ਸਮਨ੍ਤਾ ਨਦੀਤਲ਼ਾਕਾਦਿਉਦਕੇਨ ਪਰਿਕ੍ਖਿਤ੍ਤੋਪਿ ਪਰਿਕ੍ਖਿਤ੍ਤੋਯੇਵਾਤਿ ਦਸ੍ਸੇਤਿ. ਏਤ੍ਤਾਵਤਾਤਿ ‘‘ਪਰਿਕ੍ਖਿਤ੍ਤੋ’’ਤਿ ਇਮਿਨਾ ਵਚਨੇਨ. ਆਕਾਸੇ ਅਰੁਣਂ ਉਟ੍ਠਾਪੇਤੀਤਿ ਘਰਸ੍ਸ ਉਪਰਿ ਆਕਾਸੇ ਅਡ੍ਢਤੇਯ੍ਯਰਤਨਪ੍ਪਮਾਣਂ ਅਤਿਕ੍ਕਮਿਤ੍ਵਾ ਅਰੁਣਂ ਉਟ੍ਠਾਪੇਤਿ. ਘਰਂ ਨਿਵੇਸਨੁਦੋਸਿਤਾਦਿਲਕ੍ਖਣਮੇਵ, ਨ ਪਨ ਪਾਟਿਯੇਕ੍ਕਂ ਘਰਂ ਨਾਮ ਅਤ੍ਥੀਤਿ ਆਹ ‘‘ਏਤ੍ਥ ਚਾ’’ਤਿਆਦਿ.

੪੭੯. ਪਾਲ਼ਿਯਂ ਵੁਤ੍ਤਨਯੇਨ ‘‘ਸਭਾਯੇ’’ਤਿ ਅਵਤ੍ਵਾ ‘‘ਸਭਾਯ’’ਨ੍ਤਿ ਪਚ੍ਚਤ੍ਤਵਚਨਂ ਸਭਾਯ-ਸਦ੍ਦਸ੍ਸ ਨਪੁਂਸਕਲਿਙ੍ਗਤਾਵਿਭਾਵਨਤ੍ਥਂ ਵੁਤ੍ਤਂ. ਸਭਾ-ਸਦ੍ਦਪਰਿਯਾਯੋਪਿ ਹਿ ਸਭਾਯ-ਸਦ੍ਦੋ ਨਪੁਂਸਕਲਿਙ੍ਗਯੁਤ੍ਤੋ ਇਧ ਵੁਤ੍ਤੋਤਿ ਇਮਮਤ੍ਥਂ ਦਸ੍ਸੇਨ੍ਤੋ ‘‘ਲਿਙ੍ਗਬ੍ਯਤ੍ਤਯੇਨ ਸਭਾ ਵੁਤ੍ਤਾ’’ਤਿ ਆਹ. ਚੀਵਰਹਤ੍ਥਪਾਸੇ ਵਸਿਤਬ੍ਬਂ ਨਤ੍ਥੀਤਿ ਚੀਵਰਹਤ੍ਥਪਾਸੇਯੇਵ ਵਸਿਤਬ੍ਬਨ੍ਤਿ ਨਤ੍ਥਿ. ਯਂ ਤਸ੍ਸਾ…ਪੇ… ਨ ਵਿਜਹਿਤਬ੍ਬਨ੍ਤਿ ਏਤ੍ਥ ਤਸ੍ਸਾ ਵੀਥਿਯਾ ਸਮ੍ਮੁਖਟ੍ਠਾਨੇ ਸਭਾਯਦ੍ਵਾਰਾਨਂ ਗਹਣੇਨੇਵ ਤਤ੍ਥ ਸਬ੍ਬਾਨਿਪਿ ਗੇਹਾਨਿ ਸਾ ਚ ਅਨ੍ਤਰਵੀਥਿ ਗਹਿਤਾਯੇਵ ਹੋਤਿ. ਅਤਿਹਰਿਤ੍ਵਾ ਘਰੇ ਨਿਕ੍ਖਿਪਤੀਤਿ ਤਂ ਵੀਥਿਂ ਮੁਞ੍ਚਿਤ੍ਵਾ ਠਿਤੇ ਅਞ੍ਞਸ੍ਮਿਂ ਘਰੇ ਨਿਕ੍ਖਿਪਤਿ. ਪੁਰਤੋ ਵਾ ਪਚ੍ਛਤੋ ਵਾ ਹਤ੍ਥਪਾਸੇਤਿ ਘਰਸ੍ਸ ਹਤ੍ਥਪਾਸਂ ਸਨ੍ਧਾਯ ਵਦਤਿ.

ਨਿਵੇਸਨਾਦੀਸੁ ਪਰਿਕ੍ਖਿਤ੍ਤਤਾਯ ਏਕੂਪਚਾਰਤਾ, ਅਪਰਿਕ੍ਖਿਤ੍ਤਤਾਯ ਨਾਨੂਪਚਾਰਤਾ ਚ ਵੇਦਿਤਬ੍ਬਾਤਿ ਦਸ੍ਸੇਨ੍ਤੋ ‘‘ਏਤੇਨੇਵੁਪਾਯੇਨਾ’’ਤਿਆਦਿਮਾਹ. ਨਿਵੇਸਨਾਦੀਨਿ ਗਾਮਤੋ ਬਹਿ ਸਨ੍ਨਿਵਿਟ੍ਠਾਨਿ ਗਹਿਤਾਨੀਤਿ ਵੇਦਿਤਬ੍ਬਂ. ਅਨ੍ਤੋਗਾਮੇ ਠਿਤਾਨਞ੍ਹਿ ਗਾਮਗ੍ਗਹਣੇਨ ਗਹਿਤਤ੍ਤਾ ਗਾਮਪਰਿਹਾਰੋਯੇਵਾਤਿ. ਸਬ੍ਬਤ੍ਥਾਪੀਤਿ ਗਾਮਾਦੀਸੁ ਅਜ੍ਝੋਕਾਸਪਰਿਯਨ੍ਤੇਸੁ ਪਨ੍ਨਰਸਸੁ. ਪਰਿਕ੍ਖੇਪਾਦਿਵਸੇਨਾਤਿ ਏਤ੍ਥ ਆਦਿ-ਸਦ੍ਦੇਨ ਅਪਰਿਕ੍ਖੇਪਸ੍ਸੇਵ ਗਹਣਂ ਵੇਦਿਤਬ੍ਬਂ, ਨ ਏਕਕੁਲਾਦੀਨਮ੍ਪਿ.

੪੮੦-੪੮੭. ਓਵਰਕੋ ਨਾਮ ਗਬ੍ਭਸ੍ਸ ਅਬ੍ਭਨ੍ਤਰੇ ਅਞ੍ਞੋ ਗਬ੍ਭੋਤਿਪਿ ਵਦਨ੍ਤਿ. ਮੁਣ੍ਡਚ੍ਛਦਨਪਾਸਾਦੋਤਿ ਚਨ੍ਦਿਕਙ੍ਗਣਯੁਤ੍ਤੋ ਪਾਸਾਦੋ.

੪੮੯. ਸਤ੍ਥੋਤਿ ਜਙ੍ਘਸਤ੍ਥੋ ਸਕਟਸਤ੍ਥੋ ਵਾ. ਪਰਿਯਾਦਿਯਿਤ੍ਵਾਤਿ ਵਿਨਿਵਿਜ੍ਝਿਤ੍ਵਾ. ਵੁਤ੍ਤਮੇਵਤ੍ਥਂ ਵਿਭਾਵੇਤਿ ‘‘ਅਨ੍ਤੋਪਵਿਟ੍ਠੇਨ…ਪੇ… ਠਿਤੋ ਹੋਤੀ’’ਤਿ. ਤਤ੍ਥ ਅਨ੍ਤੋਪਵਿਟ੍ਠੇਨਾਤਿ ਗਾਮਸ੍ਸ ਨਦਿਯਾ ਵਾ ਅਨ੍ਤੋਪਵਿਟ੍ਠੇਨ. ਨਦੀਪਰਿਹਾਰੋ ਚ ਲਬ੍ਭਤੀਤਿ ਏਤ੍ਥ ‘‘ਵਿਸੁਂ ਨਦੀਪਰਿਹਾਰਸ੍ਸ ਅਵੁਤ੍ਤਤ੍ਤਾ ਗਾਮਾਦੀਹਿ ਅਞ੍ਞਤ੍ਥ ਵਿਯ ਚੀਵਰਹਤ੍ਥਪਾਸੋਯੇਵ ਨਦੀਪਰਿਹਾਰੋ’’ਤਿ ਤੀਸੁਪਿ ਗਣ੍ਠਿਪਦੇਸੁ ਵੁਤ੍ਤਂ. ਵਿਹਾਰਸੀਮਨ੍ਤਿ ਅਵਿਪ੍ਪਵਾਸਸੀਮਂ ਸਨ੍ਧਾਯਾਹ. ਵਿਹਾਰਂ ਗਨ੍ਤ੍ਵਾ ਵਸਿਤਬ੍ਬਨ੍ਤਿ ਅਨ੍ਤੋਸੀਮਾਯ ਯਤ੍ਥ ਕਤ੍ਥਚਿ ਵਸਿਤਬ੍ਬਂ. ਸਤ੍ਥਸਮੀਪੇਯੇਵਾਤਿ ਇਦਂ ਯਥਾਵੁਤ੍ਤਅਬ੍ਭਨ੍ਤਰਪਰਿਚ੍ਛੇਦਵਸੇਨ ਵੁਤ੍ਤਂ. ਪਾਲ਼ਿਯਂ ਨਾਨਾਕੁਲਸ੍ਸ ਸਤ੍ਥੋ ਹੋਤਿ, ਸਤ੍ਥੇ ਚੀਵਰਂ ਨਿਕ੍ਖਿਪਿਤ੍ਵਾ ਹਤ੍ਥਪਾਸਾ ਨ ਵਿਜਹਿਤਬ੍ਬਨ੍ਤਿ ਏਤ੍ਥ ਹਤ੍ਥਪਾਸੋ ਨਾਮ ਸਤ੍ਥਸ੍ਸ ਹਤ੍ਥਪਾਸੋਤਿ ਵੇਦਿਤਬ੍ਬਂ.

੪੯੦. ਏਕਕੁਲਸ੍ਸ ਖੇਤ੍ਤੇਤਿ ਅਪਰਿਕ੍ਖਿਤ੍ਤਂ ਸਨ੍ਧਾਯ ਵਦਤਿ. ਯਸ੍ਮਾ ‘‘ਨਾਨਾਕੁਲਸ੍ਸ ਪਰਿਕ੍ਖਿਤ੍ਤੇ ਖੇਤ੍ਤੇ ਚੀਵਰਂ ਨਿਕ੍ਖਿਪਿਤ੍ਵਾ ਖੇਤ੍ਤਦ੍ਵਾਰਮੂਲੇ ਵਾ ਤਸ੍ਸ ਹਤ੍ਥਪਾਸੇ ਵਾ ਵਤ੍ਥਬ੍ਬ’’ਨ੍ਤਿ ਵੁਤ੍ਤਂ, ਤਸ੍ਮਾ ਦ੍ਵਾਰਮੂਲਤੋ ਅਞ੍ਞਤ੍ਥ ਅਨ੍ਤੋਖੇਤ੍ਤੇਪਿ ਵਸਨ੍ਤੇਨ ਚੀਵਰਂ ਹਤ੍ਥਪਾਸੇ ਕਤ੍ਵਾਯੇਵ ਵਸਿਤਬ੍ਬਂ.

੪੯੧-੪੯੪. ‘‘ਵਿਹਾਰੋ ਨਾਮ ਸਪਰਿਕ੍ਖਿਤ੍ਤੋ ਵਾ ਅਪਰਿਕ੍ਖਿਤ੍ਤੋ ਵਾ ਸਕਲੋ ਆਵਾਸੋ’’ਤਿ ਵਦਨ੍ਤਿ. ਯਸ੍ਮਿਂ ਵਿਹਾਰੇਤਿ ਏਤ੍ਥ ਪਨ ਏਕਂ ਗੇਹਮੇਵ ਵੁਤ੍ਤਂ. ਏਕਕੁਲਨਾਨਾਕੁਲਸਨ੍ਤਕਤਾ ਚੇਤ੍ਥ ਕਾਰਾਪਕਾਨਂ ਵਸੇਨ ਵੇਦਿਤਬ੍ਬਾ. ਛਾਯਾਯ ਫੁਟ੍ਠੋਕਾਸਸ੍ਸ ਅਨ੍ਤੋ ਏਵਾਤਿ ਯਦਾ ਮਹਾਵੀਥਿਯਂ ਉਜੁਕਮੇਵ ਗਚ੍ਛਨ੍ਤਂ ਸੂਰਿਯਮਣ੍ਡਲਂ ਮਜ੍ਝਨ੍ਹਿਕਂ ਪਾਪੁਣਾਤਿ, ਤਦਾ ਯਂ ਓਕਾਸਂ ਛਾਯਾ ਫਰਤਿ, ਤਂ ਸਨ੍ਧਾਯ ਵੁਤ੍ਤਂ. ਅਗਮਨਪਥੇਤਿ ਯਂ ਤਦਹੇਵ ਗਨ੍ਤ੍ਵਾ ਪੁਨ ਆਗਨ੍ਤੁਂ ਸਕ੍ਕਾ ਨ ਹੋਤਿ, ਤਾਦਿਸਂ ਸਨ੍ਧਾਯ ਵੁਤ੍ਤਂ.

੪੯੫. ਨਦਿਂ ਓਤਰਤੀਤਿ ਹਤ੍ਥਪਾਸਂ ਮੁਞ੍ਚਿਤ੍ਵਾ ਓਤਰਤਿ. ਨ ਆਪਜ੍ਜਤੀਤਿ ਪਰਿਭੋਗਪਚ੍ਚਯਾ ਦੁਕ੍ਕਟਂ ਨਾਪਜ੍ਜਤਿ. ਤੇਨਾਹ ‘‘ਸੋ ਹੀ’’ਤਿਆਦਿ. ਅਪਰਿਭੋਗਾਰਹਤ੍ਤਾਤਿ ਇਮਿਨਾਵ ਨਿਸ੍ਸਗ੍ਗਿਯਚੀਵਰਂ ਅਨਿਸ੍ਸਜ੍ਜੇਤ੍ਵਾ ਪਰਿਭੁਞ੍ਜਨ੍ਤਸ੍ਸ ਦੁਕ੍ਕਟਂ ਅਚਿਤ੍ਤਕਨ੍ਤਿ ਸਿਦ੍ਧਂ. ਏਕਂ ਪਾਰੁਪਿਤ੍ਵਾ ਏਕਂ ਅਂਸਕੂਟੇ ਠਪੇਤ੍ਵਾ ਗਨ੍ਤਬ੍ਬਨ੍ਤਿ ਇਦਂ ਬਹੂਨਂ ਸਞ੍ਚਾਰਟ੍ਠਾਨੇ ਏਵਂ ਅਕਤ੍ਵਾ ਗਮਨਂ ਨ ਸਾਰੁਪ੍ਪਨ੍ਤਿ ਕਤ੍ਵਾ ਵੁਤ੍ਤਂ. ਬਹਿਗਾਮੇ ਠਪੇਤ੍ਵਾ…ਪੇ… ਵਿਨਯਕਮ੍ਮਂ ਕਾਤਬ੍ਬਨ੍ਤਿ ਵੁਤ੍ਤਤ੍ਤਾ ਅਧਿਟ੍ਠਾਨੇ ਵਿਯ ਪਰਮ੍ਮੁਖਾ ਠਿਤਮ੍ਪਿ ਨਿਸ੍ਸਗ੍ਗਿਯਂ ਚੀਵਰਂ ਨਿਸ੍ਸਜ੍ਜਿਤੁਂ ਨਿਸ੍ਸਟ੍ਠਚੀਵਰਞ੍ਚ ਦਾਤੁਂ ਵਟ੍ਟਤੀਤਿ ਵੇਦਿਤਬ੍ਬਂ.

ਗਮਨੇ ਸਉਸ੍ਸਾਹਤ੍ਤਾ ‘‘ਨਿਸ੍ਸਯੋ ਪਨ ਨ ਪਟਿਪ੍ਪਸ੍ਸਮ੍ਭਤੀ’’ਤਿ ਵੁਤ੍ਤਂ. ਮੁਹੁਤ੍ਤਂ ਸਯਿਤ੍ਵਾ…ਪੇ… ਨਿਸ੍ਸਯੋ ਚ ਪਟਿਪ੍ਪਸ੍ਸਮ੍ਭਤੀਤਿ ਏਤ੍ਥ ‘‘ਉਸ੍ਸਾਹੇ ਅਪਰਿਚ੍ਚਤ੍ਤੇਪਿ ਗਮਨਸ੍ਸ ਉਪਚ੍ਛਿਨ੍ਨਤ੍ਤਾ ਪੁਨ ਉਟ੍ਠਾਯ ਸਉਸ੍ਸਾਹਂ ਗਚ੍ਛਨ੍ਤਾਨਮ੍ਪਿ ਅਨ੍ਤਰਾ ਅਰੁਣੇ ਉਟ੍ਠਿਤੇ ਨਿਸ੍ਸਯੋ ਪਟਿਪ੍ਪਸ੍ਸਮ੍ਭਤਿਯੇਵਾ’’ਤਿ ਵਦਨ੍ਤਿ. ਪਰਤੋ ਮੁਹੁਤ੍ਤਂ ਠਤ੍ਵਾਤਿ ਏਤ੍ਥਾਪਿ ਏਸੇਵ ਨਯੋ. ਅਞ੍ਞਮਞ੍ਞਸ੍ਸ ਵਚਨਂ ਅਗ੍ਗਹੇਤ੍ਵਾ ਗਤਾਤਿ ਏਤ੍ਥ ਸਚੇ ਏਵਂ ਗਚ੍ਛਨ੍ਤਾ ‘‘ਪੁਰਾਰੁਣਾ ਅਞ੍ਞਮਞ੍ਞਂ ਪਸ੍ਸਿਸ੍ਸਾਮਾ’’ਤਿ ਉਸ੍ਸਾਹਂ ਵਿਨਾਵ ਗਤਾ ਹੋਨ੍ਤਿ, ਅਰੁਣੁਗ੍ਗਮਨੇ ਨਿਸ੍ਸਯਪਟਿਪ੍ਪਸ੍ਸਦ੍ਧਿ ਨ ਵਤ੍ਤਬ੍ਬਾ ਪਠਮਤਰਂਯੇਵ ਪਟਿਪ੍ਪਸ੍ਸਮ੍ਭਨਤੋ. ਅਥ ‘‘ਪੁਰਾਰੁਣਾ ਪਸ੍ਸਿਸ੍ਸਾਮਾ’’ਤਿ ਸਉਸ੍ਸਾਹਾਵ ਗਚ੍ਛਨ੍ਤਿ, ਨਿਸ੍ਸਯਪਟਿਪ੍ਪਸ੍ਸਦ੍ਧਿਯੇਵ ਨ ਵਤ੍ਤਬ੍ਬਾ. ਏਵਞ੍ਚ ਸਤਿ ‘‘ਸਹ ਅਰੁਣੁਗ੍ਗਮਨਾ ਨਿਸ੍ਸਯੋ ਪਟਿਪ੍ਪਸ੍ਸਮ੍ਭਤੀ’’ਤਿ ਕਸ੍ਮਾ ਵੁਤ੍ਤਂ? ਵੁਚ੍ਚਤੇ – ਸਉਸ੍ਸਹਤ੍ਤਾ ਪਠਮਤਰਂ ਪਟਿਪ੍ਪਸ੍ਸਦ੍ਧਿ ਨ ਵੁਤ੍ਤਾ. ਸਤਿਪਿ ਚ ਉਸ੍ਸਾਹਭਾਵੇ ਏਕਤੋ ਗਮਨਸ੍ਸ ਉਪਚ੍ਛਿਨ੍ਨਤ੍ਤਾ ‘‘ਮੁਹੁਤ੍ਤਂ ਠਤ੍ਵਾ’’ਤਿ ਏਤ੍ਥ ਵਿਯ ਸਹ ਅਰੁਣੁਗ੍ਗਮਨਾ ਪਟਿਪ੍ਪਸ੍ਸਦ੍ਧਿਯੇਵ ਵੁਤ੍ਤਾ.

ਅਨ੍ਤੋਸੀਮਾਯਂ ਗਾਮਨ੍ਤਿ ਅਵਿਪ੍ਪਵਾਸਸੀਮਾਸਮ੍ਮੁਤਿਯਾ ਪਚ੍ਛਾ ਪਤਿਟ੍ਠਾਪਿਤਗਾਮਂ ਸਨ੍ਧਾਯ ਵਦਤਿ ਗਾਮਂ ਅਨ੍ਤੋ ਕਤ੍ਵਾ ਅਵਿਪ੍ਪਵਾਸਸੀਮਾਸਮ੍ਮੁਤਿਯਾ ਅਭਾਵਤੋ. ਨੇਵ ਚੀਵਰਾਨਿ ਨਿਸ੍ਸਗ੍ਗਿਯਾਨਿ ਹੋਨ੍ਤੀਤਿ ਅਵਿਪ੍ਪਵਾਸਸੀਮਾਭਾਵਤੋ ਵੁਤ੍ਤਂ, ਨ ਨਿਸ੍ਸਯੋ ਪਟਿਪ੍ਪਸ੍ਸਮ੍ਭਤੀਤਿ ਸਉਸ੍ਸਾਹਭਾਵਤੋ. ਅਨ੍ਤਰਾਮਗ੍ਗੇਯੇਵ ਚ ਨੇਸਂ ਅਰੁਣਂ ਉਗ੍ਗਚ੍ਛਤੀਤਿ ਧਮ੍ਮਂ ਸੁਤ੍ਵਾ ਆਗਚ੍ਛਨ੍ਤਾਨਂ ਅਰੁਣਂ ਉਗ੍ਗਚ੍ਛਤਿ. ਅਸ੍ਸਤਿਯਾ ਗਚ੍ਛਤੀਤਿ ਅਸ੍ਸਤਿਯਾ ਅਤ੍ਤਨੋ ਚੀਵਰਂ ਅਪਚ੍ਚੁਦ੍ਧਰਿਤ੍ਵਾ ਥੇਰਸ੍ਸ ਚੀਵਰਂ ਅਪਚ੍ਚੁਦ੍ਧਰਾਪੇਤ੍ਵਾ ਗਚ੍ਛਤਿ. ਏਵਂ ਗਤੇ ਤਸ੍ਮਿਂ ਪਚ੍ਛਾ ਥੇਰੇਨ ਸਰਿਤ੍ਵਾ ਪਟਿਪਜ੍ਜਿਤਬ੍ਬਵਿਧਿਂ ਦਸ੍ਸੇਤਿ ‘‘ਅਤ੍ਤਨੋ ਚੀਵਰਂ ਪਚ੍ਚੁਦ੍ਧਰਿਤ੍ਵਾ ਦਹਰਸ੍ਸ ਚੀਵਰਂ ਵਿਸ੍ਸਾਸੇਨ ਗਹੇਤ੍ਵਾ ਠਪੇਤਬ੍ਬ’’ਨ੍ਤਿ. ਗਨ੍ਤ੍ਵਾ ਵਤ੍ਤਬ੍ਬੋਤਿ ਆਗਤਕਿਚ੍ਚਂ ਨਿਟ੍ਠਪੇਤ੍ਵਾ ਵਿਹਾਰਂ ਗਤੇਨ ਪਟਿਪਜ੍ਜਿਤਬ੍ਬਵਿਧਿਂ ਦਸ੍ਸੇਤਿ. ਅਨਧਿਟ੍ਠਿਤਚੀਵਰਤਾ, ਅਨਤ੍ਥਤਕਥਿਨਤਾ, ਅਲਦ੍ਧਸਮ੍ਮੁਤਿਤਾ, ਰਤ੍ਤਿਵਿਪ੍ਪਵਾਸੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ.

ਉਦੋਸਿਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਤਤਿਯਕਥਿਨਸਿਕ੍ਖਾਪਦਵਣ੍ਣਨਾ

੪੯੭-੪੯੯. ਤਤਿਯੇ ਪਾਲ਼ਿਯਂ ਚੀਵਰਪਚ੍ਚਾਸਾ ਨਿਕ੍ਖਿਪਿਤੁਨ੍ਤਿ ਏਤ੍ਥ ਚੀਵਰਪਚ੍ਚਾਸਾਯ ਸਤਿਯਾ ਨਿਕ੍ਖਿਪਿਤੁਨ੍ਤਿ ਏਵਮਤ੍ਥੋ ਗਹੇਤਬ੍ਬੋ. ਭਣ੍ਡਿਕਾਬਦ੍ਧਾਨਿ ਭਣ੍ਡਿਕਬਦ੍ਧਾਨੀਤਿਪਿ ਪਠਨ੍ਤਿ, ਭਣ੍ਡਿਕਂ ਕਤ੍ਵਾ ਬਦ੍ਧਾਨੀਤਿ ਅਤ੍ਥੋ. ਨਿਟ੍ਠਿਤਚੀਵਰਸ੍ਮਿਂ ਭਿਕ੍ਖੁਨਾਤਿ ਏਤ੍ਥ ਪੁਰਿਮਸਿਕ੍ਖਾਪਦੇ ਵਿਯ ਸਾਮਿਵਸੇਨੇਵ ਕਰਣਵਚਨਸ੍ਸ ਅਤ੍ਥੋ ਵੇਦਿਤਬ੍ਬੋ.

੫੦੦. ਅਨਤ੍ਥਤੇ ਕਥਿਨੇ ਚੀਵਰਮਾਸੇ ਭਿਕ੍ਖੁਨੋ ਉਪ੍ਪਨ੍ਨਚੀਵਰਂ ਅਨਧਿਟ੍ਠਿਤਂ ਅਵਿਕਪ੍ਪਿਤਂ ਤਸ੍ਮਿਂ ਮਾਸੇ ਠਪੇਤੁਂ ਵਟ੍ਟਤੀਤਿ ਆਹ ‘‘ਏਕਂ ਪਚ੍ਛਿਮਕਤ੍ਤਿਕਮਾਸਂ ਠਪੇਤ੍ਵਾ’’ਤਿ. ਕੇਚਿ ਪਨ ‘‘ਕਾਲੇਪਿ ਆਦਿਸ੍ਸ ਦਿਨ੍ਨਂ, ਏਤਂ ਅਕਾਲਚੀਵਰਨ੍ਤਿ ਵਚਨਤੋ ਅਨਤ੍ਥਤੇ ਕਥਿਨੇ ਪਚ੍ਛਿਮਕਤ੍ਤਿਕਮਾਸਸਙ੍ਖਾਤੇ ਚੀਵਰਮਾਸੇ ਉਪ੍ਪਨ੍ਨਚੀਵਰਸ੍ਸਪਿ ਪਚ੍ਚਾਸਾਚੀਵਰੇ ਅਸਤਿ ਦਸਾਹਪਰਿਹਾਰੋਯੇਵ, ਤਤੋ ਪਰਂ ਠਪੇਤੁਂ ਨ ਵਟ੍ਟਤੀ’’ਤਿ ਵਦਨ੍ਤਿ, ਤਂ ਅਟ੍ਠਕਥਾਯ ਨ ਸਮੇਤਿ. ਤਥਾ ਹਿ ਅਚ੍ਚੇਕਚੀਵਰਸਿਕ੍ਖਾਪਦਟ੍ਠਕਥਾਯਂ (ਪਾਰਾ. ਅਟ੍ਠ. ੨.੬੪੬-੬੪੯ ਆਦਯੋ) ‘‘ਪਵਾਰਣਮਾਸਸ੍ਸ ਜੁਣ੍ਹਪਕ੍ਖਪਞ੍ਚਮਿਯਂ ਉਪ੍ਪਨ੍ਨਸ੍ਸ ਅਚ੍ਚੇਕਚੀਵਰਸ੍ਸ ਅਨਤ੍ਥਤੇ ਕਥਿਨੇ ਏਕਾਦਸਦਿਵਸਾਧਿਕੋ ਮਾਸੋ, ਅਤ੍ਥਤੇ ਕਥਿਨੇ ਏਕਾਦਸਦਿਵਸਾਧਿਕਾ ਪਞ੍ਚ ਮਾਸਾ ਪਰਿਹਾਰੋ’’ਤਿ ਵੁਤ੍ਤਂ. ਤਮੇਵ ਚ ਪਰਿਹਾਰਂ ਸਨ੍ਧਾਯ ‘‘ਛਟ੍ਠਿਤੋ ਪਟ੍ਠਾਯ ਪਨ ਉਪ੍ਪਨ੍ਨਂ ਅਨਚ੍ਚੇਕਚੀਵਰਮ੍ਪਿ ਪਚ੍ਚੁਦ੍ਧਰਿਤ੍ਵਾ ਠਪਿਤਚੀਵਰਮ੍ਪਿ ਏਤਂ ਪਰਿਹਾਰਂ ਲਭਤਿਯੇਵਾ’’ਤਿ (ਪਾਰਾ. ਅਟ੍ਠ. ੨.੬੪੬-੬੪੯) ਵੁਤ੍ਤਂ. ਤਸ੍ਮਾ ਚੀਵਰਮਾਸੇ ਦਸਾਹਤੋ ਪਰਮ੍ਪਿ ਅਨਧਿਟ੍ਠਿਤਂ ਅਵਿਕਪ੍ਪਿਤਮ੍ਪਿ ਠਪੇਤੁਂ ਵਟ੍ਟਤਿ.

ਯਦਿ ਏਵਂ ‘‘ਕਾਲੇਪਿ ਆਦਿਸ੍ਸ ਦਿਨ੍ਨਂ, ਏਤਂ ਅਕਾਲਚੀਵਰ’’ਨ੍ਤਿ ਇਦਂ ਕਸ੍ਮਾ ਵੁਤ੍ਤਨ੍ਤਿ ਚੇ? ਅਕਾਲਚੀਵਰਸਾਮਞ੍ਞਤੋ ਅਤ੍ਥੁਦ੍ਧਾਰਵਸੇਨ ਵੁਤ੍ਤਂ ਪਠਮਾਨਿਯਤੇ ਸੋਤਸ੍ਸ ਰਹੋ ਵਿਯ. ਏਕਾਦਸਮਾਸੇ ਸਤ੍ਤਮਾਸੇ ਚ ਉਪ੍ਪਨ੍ਨਞ੍ਹਿ ਚੀਵਰਂ ਵੁਤ੍ਥਵਸ੍ਸੇਹਿ ਸੇਸੇਹਿ ਚ ਸਮ੍ਮੁਖੀਭੂਤੇਹਿ ਭਾਜੇਤੁਂ ਲਬ੍ਭਤੀਤਿ ਅਕਾਲਚੀਵਰਂ ਨਾਮ ਜਾਤਂ. ਕਾਲੇ ਪਨ ‘‘ਸਙ੍ਘਸ੍ਸ ਇਦਂ ਅਕਾਲਚੀਵਰਂ ਦਮ੍ਮੀ’’ਤਿ ਅਨੁਦ੍ਦਿਸਿਤ੍ਵਾ ‘‘ਸਙ੍ਘਸ੍ਸ ਦਮ੍ਮੀ’’ਤਿ ਦਿਨ੍ਨਂ ਵੁਤ੍ਥਵਸ੍ਸੇਹਿਯੇਵ ਭਾਜੇਤਬ੍ਬਂ, ਨ ਅਞ੍ਞੇਹੀਤਿ ਕਾਲਚੀਵਰਨ੍ਤਿ ਵੁਚ੍ਚਤਿ. ਆਦਿਸ੍ਸ ਦਿਨ੍ਨਂ ਪਨ ਸਮ੍ਮੁਖੀਭੂਤੇਹਿ ਸਬ੍ਬੇਹਿਯੇਵ ਭਾਜੇਤਬ੍ਬਨ੍ਤਿ ਅਕਾਲਚੀਵਰਂ, ਤਸ੍ਮਾ ਕਾਲੇਪਿ ਆਦਿਸ੍ਸ ਦਿਨ੍ਨਸ੍ਸ ਵੁਤ੍ਥਵਸ੍ਸੇਹਿ ਸੇਸੇਹਿ ਚ ਸਮ੍ਪਤ੍ਤੇਹਿ ਭਾਜਨੀਯਤ੍ਤਾ ਅਕਾਲਚੀਵਰਸਾਮਞ੍ਞਤੋ ‘‘ਕਾਲੇਪਿ ਆਦਿਸ੍ਸ ਦਿਨ੍ਨਂ, ਏਤਂ ਅਕਾਲਚੀਵਰ’’ਨ੍ਤਿ ਅਤ੍ਥੁਦ੍ਧਾਰਵਸੇਨ ਵੁਤ੍ਤਂ. ਯਦਿ ਏਵਂ ‘‘ਏਕਪੁਗ੍ਗਲਸ੍ਸ ਵਾ ਇਦਂ ਤੁਯ੍ਹਂ ਦਮ੍ਮੀਤਿ ਦਿਨ੍ਨ’’ਨ੍ਤਿ ਕਸ੍ਮਾ ਵੁਤ੍ਤਂ. ਨ ਹਿ ਪੁਗ੍ਗਲਸ੍ਸ ਆਦਿਸ੍ਸ ਦਿਨ੍ਨਂ ਕੇਨਚਿ ਭਾਜਨੀਯਂ ਹੋਤੀਤਿ? ਨਾਯਂ ਵਿਰੋਧੋ ਆਦਿਸ੍ਸ ਵਚਨਸਾਮਞ੍ਞਤੋ ਲਬ੍ਭਮਾਨਮਤ੍ਥਂ ਦਸ੍ਸੇਤੁਂ ਤਥਾ ਵੁਤ੍ਤਤ੍ਤਾ.

ਏਵਂ ਪਨ ਅਵਤ੍ਵਾਤਿ ‘‘ਤਤੋ ਚੇ ਉਤ੍ਤਰਿ’’ਨ੍ਤਿ ਇਮਸ੍ਸ ‘‘ਮਾਸਪਰਮਤੋ ਉਤ੍ਤਰਿ’’ਨ੍ਤਿ ਪਦਭਾਜਨਂ ਅਵਤ੍ਵਾ. ਤਾਵ ਉਪ੍ਪਨ੍ਨਂ ਪਚ੍ਚਾਸਾਚੀਵਰਨ੍ਤਿ ਪਚ੍ਚਤ੍ਤਵਚਨਂ ‘‘ਅਤ੍ਤਨੋ ਗਤਿਕਂ ਕਰੋਤੀ’’ਤਿ ਕਰਣਕਿਰਿਯਾਯ ਕਤ੍ਤੁਭਾਵਤੋ. ਅਨ੍ਤਰਾ ਉਪ੍ਪਨ੍ਨਞ੍ਹਿ ਪਚ੍ਚਾਸਾਚੀਵਰਂ ਮਾਸਪਰਮਂ ਮੂਲਚੀਵਰਂ ਠਪੇਤੁਂ ਅਦਤ੍ਵਾ ਅਤ੍ਤਨੋ ਦਸਾਹਪਰਮਤਾਯ ਏਵ ਪਰਿਚ੍ਛਿਨ੍ਦਤੀਤਿ ਅਤ੍ਤਨੋ ਗਤਿਕਂ ਕਰੋਤਿ. ਤਤੋ ਉਦ੍ਧਂ ਮੂਲਚੀਵਰਨ੍ਤਿ ਏਤ੍ਥ ਪਨ ਮੂਲਚੀਵਰਨ੍ਤਿ ਪਚ੍ਚਤ੍ਤਵਚਨਂ. ਵੀਸਤਿਮਦਿਵਸਤੋ ਉਦ੍ਧਞ੍ਹਿ ਉਪ੍ਪਨ੍ਨਂ ਪਚ੍ਚਾਸਾਚੀਵਰਂ ਦਸਾਹਪਰਮਂ ਗਨ੍ਤੁਂ ਅਦਤ੍ਵਾ ਮੂਲਚੀਵਰਂ ਅਤ੍ਤਨਾ ਸਦ੍ਧਿਂ ਕਰਣਸਮ੍ਬਨ੍ਧਤਾਮਤ੍ਤੇਨ ਸਕਕਾਲਵਸੇਨ ਪਰਿਚ੍ਛਿਨ੍ਦਤੀਤਿ ਅਤ੍ਤਨੋ ਗਤਿਕਂ ਕਰੋਤਿ. ਪਚ੍ਚਾਸਾਚੀਵਰੇ ਪਨ ਲਭਿਤ੍ਵਾ ਵਿਸੁਂ ਠਪੇਨ੍ਤਸ੍ਸ ਦਸਾਹਂ ਅਨਤਿਕ੍ਕਨ੍ਤੇ ਨਤ੍ਥਿ ਤਪ੍ਪਚ੍ਚਯਾ ਆਪਤ੍ਤਿ. ਪਾਲ਼ਿਯਂ ਦਸਾਹਾ ਕਾਰੇਤਬ੍ਬਨ੍ਤਿ ਏਤ੍ਥ ਦਸਾਹਾਤਿ ਕਰਣਤ੍ਥੇ ਨਿਸ੍ਸਕ੍ਕਵਚਨਂ, ਦਸਾਹੇਨਾਤਿ ਅਤ੍ਥੋ. ਪਞ੍ਚਾਹੁਪ੍ਪਨ੍ਨੇਤਿਆਦਿਂ ਰਸ੍ਸਂ ਕਤ੍ਵਾਪਿ ਪਠਨ੍ਤਿ. ਏਕਵੀਸੇ ਉਪ੍ਪਨ੍ਨੇ…ਪੇ… ਨਵਾਹਾ ਕਾਰੇਤਬ੍ਬਨ੍ਤਿਆਦਿ ਪਚ੍ਚਾਸਾਚੀਵਰਸ੍ਸ ਉਪ੍ਪਨ੍ਨਦਿਵਸਂ ਠਪੇਤ੍ਵਾ ਵੁਤ੍ਤਂ.

ਅਞ੍ਞਂ ਪਚ੍ਚਾਸਾਚੀਵਰਂ…ਪੇ… ਕਾਰੇਤਬ੍ਬਨ੍ਤਿ ਇਦਂ ਸਤਿਯਾ ਏਵ ਪਚ੍ਚਾਸਾਯ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਸਚੇ ਪਨ ‘‘ਇਤੋ ਪਟ੍ਠਾਯ ਚੀਵਰਂ ਨ ਲਭਿਸ੍ਸਾਮੀ’’ਤਿ ਪਚ੍ਚਾਸਾ ਉਪਚ੍ਛਿਨ੍ਨਾ, ਮੂਲਚੀਵਰਮ੍ਪਿ ਦਸਾਹਂ ਚੇ ਸਮ੍ਪਤ੍ਤਂ, ਤਦਹੇਵ ਅਧਿਟ੍ਠਾਤਬ੍ਬਂ. ਪਚ੍ਚਾਸਾਚੀਵਰਮ੍ਪਿ ਪਰਿਕ੍ਖਾਰਚੋਲ਼ਂ ਅਧਿਟ੍ਠਾਤਬ੍ਬਨ੍ਤਿ ਪਠਮਤਰਂ ਉਪ੍ਪਨ੍ਨਂ ਵਿਸਭਾਗਪਚ੍ਚਾਸਾਚੀਵਰਂ ਸਨ੍ਧਾਯ ਵਦਤਿ. ਅਞ੍ਞਮਞ੍ਞਨ੍ਤਿ ਅਞ੍ਞਂ ਅਞ੍ਞਂ, ਅਯਮੇਵ ਵਾ ਪਾਠੋ. ਅਙ੍ਗਂ ਪਨੇਤ੍ਥ ਪਠਮਕਥਿਨੇ ਵੁਤ੍ਤਸਦਿਸਮੇਵ. ਕੇਵਲਞ੍ਹਿ ਤਤ੍ਥ ਦਸਾਹਾਤਿਕ੍ਕਮੋ, ਇਧ ਮਾਸਾਤਿਕ੍ਕਮੋਤਿ ਅਯਂ ਵਿਸੇਸੋ.

ਤਤਿਯਕਥਿਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਪੁਰਾਣਚੀਵਰਸਿਕ੍ਖਾਪਦਵਣ੍ਣਨਾ

੫੦੩. ਚਤੁਤ੍ਥੇ ਭਤ੍ਤਵਿਸ੍ਸਗ੍ਗਨ੍ਤਿ ਪਾਲ਼ਿਪਦਸ੍ਸ ਭਤ੍ਤਕਿਚ੍ਚਨ੍ਤਿ ਅਤ੍ਥੋ ਵੇਦਿਤਬ੍ਬੋ, ‘‘ਭਤ੍ਤਸਂਵਿਧਾਨ’’ਨ੍ਤਿਪਿ ਕੇਚਿ. ਤਤ੍ਥ ਨਾਮ ਤ੍ਵਨ੍ਤਿ ਇਮਸ੍ਸਪਿ ਸੋ ਨਾਮ ਤ੍ਵਨ੍ਤਿ ਅਤ੍ਥੋ ਵੇਦਿਤਬ੍ਬੋ, ‘‘ਤਾਯ ਨਾਮ ਤ੍ਵ’’ਨ੍ਤਿ ਕੇਚਿ.

੫੦੫. ਪਿਤਾ ਚ ਮਾਤਾ ਚ ਪਿਤਰੋ, ਪਿਤੂਨਂ ਪਿਤਰੋ ਪਿਤਾਮਹਾ, ਤੇਸਂਯੇਵ ਯੁਗੋ ਪਿਤਾਮਹਯੁਗੋ, ਤਸ੍ਮਾ ਯਾਵ ਸਤ੍ਤਮਾ ਪਿਤਾਮਹਯੁਗਾ ਪਿਤਾਮਹਦ੍ਵਨ੍ਦਾਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਏਵਞ੍ਹਿ ਪਿਤਾਮਹਗ੍ਗਹਣੇਨੇਵ ਮਾਤਾਮਹੋਪਿ ਗਹਿਤੋਤਿ. ‘‘ਯਾਵ ਸਤ੍ਤਮਾ ਪਿਤਾਮਹਯੁਗਾ’’ਤਿ ਵਚਨਤੋ ਹੇਟ੍ਠਾ ਚ ਉਦ੍ਧਞ੍ਚ ਅਟ੍ਠਮਯੁਗੋ ਞਾਤਿ ਨਾਮ ਨ ਹੋਤਿ. ਦੇਸਨਾਮੁਖਮੇਵ ਚੇਤਨ੍ਤਿ ਪਿਤਾਮਹਯੁਗਾਤਿ ਪਿਤਾਮਹ-ਗ੍ਗਹਣਂ ਦੇਸਨਾਮੁਖਂ ਪਿਤਾਮਹੀਮਾਤਾਮਹੀਆਦੀਨਮ੍ਪਿ ਅਧਿਪ੍ਪੇਤਤ੍ਤਾ. ਪਿਤੁ ਮਾਤਾ ਪਿਤਾਮਹੀ. ਮਾਤੁ ਪਿਤਾ ਮਾਤਾਮਹੋ. ਮਾਤੁ ਮਾਤਾ ਮਾਤਾਮਹੀ. ਏਤ੍ਥ ਕਿਞ੍ਚਾਪਿ ਪਞ੍ਚਸਤਸਾਕਿਯਾਨੀਨਂ ਵਸੇਨ ਭਿਕ੍ਖੁਭਾਵੇ ਠਤ੍ਵਾ ਪਰਿਵਤ੍ਤਲਿਙ੍ਗਾਯ ਭਿਕ੍ਖੁਨਿਯਾ ਚ ਵਸੇਨ ਏਕਤੋਉਪਸਮ੍ਪਨ੍ਨਾ ਭਿਕ੍ਖੁਨੀ ਲਬ੍ਭਤਿ, ਤਥਾਪਿ ਪਕਤਿਨਿਯਾਮੇਨੇਵ ਦਸ੍ਸੇਤੁਂ ‘‘ਭਿਕ੍ਖੁਨੀ ਨਾਮ ਉਭਤੋਸਙ੍ਘੇ ਉਪਸਮ੍ਪਨ੍ਨਾ’’ਤਿ ਵੁਤ੍ਤਂ. ‘‘ਕਪ੍ਪਂ ਕਤ੍ਵਾਤਿ ਵਚਨਤੋ ਦਿਨ੍ਨਕਪ੍ਪਮੇਵ ਪਾਚਿਤ੍ਤਿਯਂ ਜਨੇਤੀ’’ਤਿ ਵਦਨ੍ਤਿ. ‘‘ਪੁਰਾਣਚੀਵਰਂ ਨਾਮ ਸਕਿਂ ਨਿਵਤ੍ਥਮ੍ਪਿ ਸਕਿਂ ਪਾਰੁਤਮ੍ਪੀ’’ਤਿ ਇਦਂ ਨਿਦਸ੍ਸਨਮਤ੍ਤਨ੍ਤਿ ਆਹ ‘‘ਅਨ੍ਤਮਸੋ ਪਰਿਭੋਗਸੀਸੇਨਾ’’ਤਿਆਦਿ. ‘‘ਕਾਯੇਨ ਫੁਸਿਤ੍ਵਾ ਪਰਿਭੋਗੋਯੇਵ ਪਰਿਭੋਗੋ ਨਾਮਾ’’ਤਿ ਕੁਰੁਨ੍ਦਿਯਂ ਅਧਿਪ੍ਪਾਯੋ.

੫੦੬. ਕਾਯਵਿਕਾਰਂ ਕਤ੍ਵਾਤਿ ਇਦਂ ਯਾਵ ‘‘ਓਰਤੋ ਠਪੇਤੀ’’ਤਿ ਪਦਂ, ਤਾਵ ਸਬ੍ਬਪਦੇਸੁ ਸਮ੍ਬਨ੍ਧਿਤਬ੍ਬਂ. ਯਥਾ ਸਾ ‘‘ਧੋਵਾਪੇਤੁਕਾਮੋ ਅਯ’’ਨ੍ਤਿ ਜਾਨਾਤਿ, ਏਵਂ ਕਾਯਵਿਕਾਰਂ ਕਤ੍ਵਾਤਿ ਅਤ੍ਥੋ. ‘‘ਕਾਯਵਿਕਾਰਂ ਕਤ੍ਵਾ’’ਤਿ ਵਚਨਤੋ ਕਾਯਵਾਚਾਹਿ ਕਞ੍ਚਿ ਵਿਕਾਰਂ ਅਕਤ੍ਵਾ ਹਤ੍ਥੇਨ ਹਤ੍ਥੇ ਦੇਨ੍ਤਸ੍ਸਪਿ ਅਨਾਪਤ੍ਤਿ. ਅਨ੍ਤੋਦ੍ਵਾਦਸਹਤ੍ਥੇ ਓਕਾਸੇਤਿ ਇਦਂ ਵਿਸੇਸਨਂ ਯਥਾਸਮ੍ਭਵਂ ਯੋਜੇਤਬ੍ਬਂ. ਤਥਾ ਹਿ ਹਤ੍ਥੇਨ ਹਤ੍ਥੇ ਦੇਨ੍ਤਸ੍ਸ ਪਾਦਮੂਲੇ ਚ ਠਪੇਤ੍ਵਾ ਦੇਨ੍ਤਸ੍ਸ ‘‘ਅਨ੍ਤੋਦ੍ਵਾਦਸਹਤ੍ਥੇ ਓਕਾਸੇ’’ਤਿ ਇਦਂ ਵਤ੍ਤਬ੍ਬਨ੍ਤਿ ਨਤ੍ਥਿ ਅਞ੍ਞਥਾ ਅਸਮ੍ਭਵਤੋ. ਸਤਿ ਹਿ ਸਮ੍ਭਵੇ ਬ੍ਯਭਿਚਾਰੇ ਚ ਵਿਸੇਸਨਂ ਸਾਤ੍ਥਕਂ ਹੋਤਿ. ਉਪਰਿ ‘‘ਖਿਪਤੀ’’ਤਿਆਦੀਨਿ ਪਨ ਸਨ੍ਧਾਯ ਇਦਂ ਵਿਸੇਸਨਂ ਵੁਤ੍ਤਂ, ਤਸ੍ਮਾ ਅਨ੍ਤੋਦ੍ਵਾਦਸਹਤ੍ਥੇ ਓਕਾਸੇ ਠਤ੍ਵਾ ਉਪਰਿ ਖਿਪਨ੍ਤਸ੍ਸ ਅਞ੍ਞਸ੍ਸ ਹਤ੍ਥੇ ਪੇਸੇਨ੍ਤਸ੍ਸ ਚ ਆਪਤ੍ਤਿ. ਉਪਚਾਰਂ ਪਨ ਮੁਞ੍ਚਿਤ੍ਵਾ ਕਾਯਵਾਚਾਹਿ ਵਿਕਾਰਂ ਕਤ੍ਵਾ ਆਣਾਪੇਨ੍ਤਸ੍ਸਪਿ ਅਨਾਪਤ੍ਤਿ. ਉਪਚਾਰੇਤਿ ਅਨ੍ਤੋਦ੍ਵਾਦਸਹਤ੍ਥਮੇਵ ਓਕਾਸਂ ਵਦਤਿ. ਉਪਚਾਰਂ ਮੁਞ੍ਚਿਤ੍ਵਾਤਿ ਦ੍ਵਾਦਸਹਤ੍ਥੂਪਚਾਰਂ ਮੁਞ੍ਚਿਤ੍ਵਾ.

ਏਕੇਨ ਵਤ੍ਥੁਨਾਤਿ ਪਠਮਂ ਕਤ੍ਵਾ ਨਿਟ੍ਠਾਪਿਤਂ ਸਨ੍ਧਾਯ ਵੁਤ੍ਤਂ. ਰਜਨੇ ਅਨਾਪਤ੍ਤੀਤਿ ਰਜਨਂ ਪਚ੍ਚਾਸੀਸਨ੍ਤਸ੍ਸਪਿ ‘‘ਧੋਵਿਤ੍ਵਾ ਆਨੇਹੀ’’ਤਿ ਵੁਤ੍ਤਤ੍ਤਾ ਅਨਾਪਤ੍ਤਿ ਅਨਾਣਤ੍ਤਿਯਾ ਕਤਤ੍ਤਾ. ‘‘ਅਵੁਤ੍ਤਾ ਧੋਵਤੀ’’ਤਿ ਇਮਿਨਾ ‘‘ਅਵੁਤ੍ਤਾ ਰਜਤਿ, ਅਵੁਤ੍ਤਾ ਆਕੋਟੇਤੀ’’ਤਿ ਇਦਮ੍ਪਿ ਵੁਤ੍ਤਮੇਵ ਹੋਤੀਤਿ ਆਹ – ‘‘ਅਵੁਤ੍ਤਾ ਧੋਵਤੀਤਿ ਇਮਿਨਾ ਲਕ੍ਖਣੇਨ ਅਨਾਪਤ੍ਤੀ’’ਤਿ. ਸਮ੍ਬਹੁਲਾ ਆਪਤ੍ਤਿਯੋ ਆਪਜ੍ਜਤੀਤਿ ਪਾਚਿਤ੍ਤਿਯੇਨ ਸਦ੍ਧਿਂ ਦ੍ਵੇ ਦੁਕ੍ਕਟਾਨਿ ਆਪਜ੍ਜਤਿ. ਯਥਾਵਤ੍ਥੁਕਮੇਵਾਤਿ ਨਿਸ੍ਸਗ੍ਗਿਯਮੇਵਾਤਿ ਅਤ੍ਥੋ. ਪਞ੍ਚ ਸਤਾਨਿ ਪਰਿਮਾਣਮੇਤਾਸਨ੍ਤਿ ਪਞ੍ਚਸਤਾ.

੫੦੭. ਚੀਵਰਂ ਧੋਵਾਤਿ…ਪੇ… ਆਣਾਪੇਨ੍ਤਸ੍ਸਾਤਿ ਏਤ੍ਥ ਤਾਯ ਧੋਵਨਂ ਪਚ੍ਚਾਸੀਸਨ੍ਤਸ੍ਸਪਿ ਅਨਾਪਤ੍ਤਿ. ਪੁਰਾਣਚੀਵਰਤਾ, ਉਪਚਾਰੇ ਠਤ੍ਵਾ ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਆਣਾਪਨਂ, ਤਸ੍ਸਾ ਧੋਵਨਾਦੀਨਿ ਚਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਪੁਰਾਣਚੀਵਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਚੀਵਰਪਟਿਗ੍ਗਹਣਸਿਕ੍ਖਾਪਦਵਣ੍ਣਨਾ

੫੦੮. ਪਞ੍ਚਮੇ ਅਪਞ੍ਞਤ੍ਤੇ ਸਿਕ੍ਖਾਪਦੇਤਿ ਗਣਮ੍ਹਾ ਓਹੀਯਨਸਿਕ੍ਖਾਪਦੇ ਅਪਞ੍ਞਤ੍ਤੇ. ਵਿਹਾਰਵਾਰਨ੍ਤਿ ਵਿਹਾਰਪਟਿਜਗ੍ਗਨਵਾਰਂ. ਕੋਟ੍ਠਾਸਸਮ੍ਪਤ੍ਤੀਤਿ ਸਕਲਾ ਅਙ੍ਗਪਚ੍ਚਙ੍ਗਸਮ੍ਪਤ੍ਤਿ. ਸਬ੍ਬਪਰਿਯਨ੍ਤਨ੍ਤਿ ਛਟ੍ਠਸ੍ਸ ਅਞ੍ਞਚੀਵਰਸ੍ਸ ਅਭਾਵਾ ਪਞ੍ਚਨ੍ਨਂ ਚੀਵਰਾਨਂ ਏਕਮੇਕਂ ਸਬ੍ਬੇਸਂ ਪਰਿਯਨ੍ਤਨ੍ਤਿ ਸਬ੍ਬਪਰਿਯਨ੍ਤਂ. ਅਨ੍ਤਰਵਾਸਕਾਦੀਸੁ ਹਿ ਪਞ੍ਚਸੁ ਏਕਮੇਕਂ ਅਞ੍ਞਸ੍ਸ ਛਟ੍ਠਸ੍ਸ ਅਭਾਵਾ ਪਞ੍ਚਨ੍ਨਂ ਅਨ੍ਤਮੇਵ ਹੋਤਿ. ਅਥਵਾ ਪਞ੍ਚਸੁ ਚੀਵਰੇਸੁ ਏਕਮੇਕਂ ਅਤ੍ਤਨੋ ਅਞ੍ਞਸ੍ਸ ਦੁਤਿਯਸ੍ਸ ਅਭਾਵਾ ਅਨ੍ਤਮੇਵ ਹੋਤੀਤਿ ਸਬ੍ਬਮੇਵ ਪਰਿਯਨ੍ਤਨ੍ਤਿ ਸਬ੍ਬਪਰਿਯਨ੍ਤਂ, ਸਬ੍ਬਸੋ ਵਾ ਪਰਿਯਨ੍ਤਨ੍ਤਿ ਸਬ੍ਬਪਰਿਯਨ੍ਤਂ. ਤੇਨਾਹ – ‘‘ਅਞ੍ਞਂ…ਪੇ… ਨਤ੍ਥੀ’’ਤਿ. ਯਥਾ ਤਸ੍ਸ ਮਨੋਰਥੋ ਨ ਪੂਰਤੀਤਿ ‘‘ਸਰੀਰਪਾਰਿਪੂਰਿਂ ਪਸ੍ਸਿਸ੍ਸਾਮੀ’’ਤਿ ਤਸ੍ਸ ਉਪ੍ਪਨ੍ਨੋ ਮਨੋਰਥੋ ਯਥਾ ਨ ਪੂਰਤਿ. ਏਵਂ ਹਤ੍ਥਤਲੇਯੇਵ ਦਸ੍ਸੇਤ੍ਵਾਤਿ ਸਰੀਰਂ ਅਦਸ੍ਸੇਤ੍ਵਾਵ ਦਾਤਬ੍ਬਚੀਵਰਂ ਹਤ੍ਥਤਲੇ ‘‘ਹਨ੍ਦਾ’’ਤਿ ਦਸ੍ਸੇਤ੍ਵਾ.

੫੧੦. ਵਿਹਤ੍ਥਤਾਯਾਤਿ ਵਿਹਤਹਤ੍ਥਤਾਯ, ਅਗਣਤਾਯ ਅਪ੍ਪਚ੍ਚਯਤਾਯ ਅਪ੍ਪਟਿਸਰਣਤਾਯਾਤਿ ਵੁਤ੍ਤਂ ਹੋਤਿ. ਸਮਭਿਤੁਨ੍ਨਤ੍ਤਾਤਿ ਪੀਲ਼ਿਤਤ੍ਤਾ. ਪਰਿਵਤ੍ਤੇਤਬ੍ਬਂ ਪਰਿਵਤ੍ਤਂ, ਪਰਿਵਤ੍ਤਮੇਵ ਪਾਰਿਵਤ੍ਤਕਂ, ਪਰਿਵਤ੍ਤੇਤ੍ਵਾ ਦੀਯਮਾਨਨ੍ਤਿ ਅਤ੍ਥੋ.

੫੧੨. ਉਪਚਾਰੇਤਿ ਦ੍ਵਾਦਸਹਤ੍ਥੂਪਚਾਰਂ ਸਨ੍ਧਾਯ ਵਦਤਿ. ਉਪਚਾਰਂ ਵਾ ਮੁਞ੍ਚਿਤ੍ਵਾ ਖਿਪਨ੍ਤੀਤਿ ਦ੍ਵਾਦਸਹਤ੍ਥਂ ਮੁਞ੍ਚਿਤ੍ਵਾ ਓਰਤੋ ਠਪੇਨ੍ਤਿ, ਨ ਪੁਰਿਮਸਿਕ੍ਖਾਪਦੇ ਵਿਯ ਦ੍ਵਾਦਸਹਤ੍ਥਬ੍ਭਨ੍ਤਰੇਯੇਵਾਤਿ ਅਧਿਪ੍ਪਾਯੋ. ਅਞ੍ਞਤ੍ਰ ਪਾਰਿਵਤ੍ਤਕਾਤਿ ਯਂ ਅਨ੍ਤਮਸੋ ਹਰੀਤਕਖਣ੍ਡਮ੍ਪਿ ਦਤ੍ਵਾ ਵਾ ਦਸ੍ਸਾਮੀਤਿ ਆਭੋਗਂ ਕਤ੍ਵਾ ਵਾ ਪਾਰਿਵਤ੍ਤਕਂ ਗਣ੍ਹਾਤਿ, ਤਂ ਠਪੇਤ੍ਵਾ. ਅਚਿਤ੍ਤਕਭਾਵੇਨ ਨ ਸਮੇਤੀਤਿ ਯਥਾ ਅਞ੍ਞਾਤਿਕਾਯ ਞਾਤਿਕਸਞ੍ਞਿਸ੍ਸ ਵੇਮਤਿਕਸ੍ਸ ਚ ਗਣ੍ਹਤੋ ਅਚਿਤ੍ਤਕਤ੍ਤਾ ਆਪਤ੍ਤਿ, ਏਵਮਿਧਾਪਿ ‘‘ਭਿਕ੍ਖੁਨਿਯਾ ਸਨ੍ਤਕਂ ਇਦ’’ਨ੍ਤਿ ਅਜਾਨਿਤ੍ਵਾ ਗਣ੍ਹਤੋਪਿ ਆਪਤ੍ਤਿਯੇਵਾਤਿ ਅਧਿਪ੍ਪਾਯੋ. ਵਸ੍ਸਾਵਾਸਿਕਂ ਦੇਤੀਤਿ ਪੁਗ੍ਗਲਿਕਂ ਕਤ੍ਵਾ ਦੇਤਿ. ਪਂਸੁਕੂਲਂ ਅਤ੍ਤਨੋ ਅਤ੍ਥਾਯ ਠਪਿਤਭਾਵਂ ਜਾਨਿਤ੍ਵਾ ਗਣ੍ਹਨ੍ਤੇਨਪਿ ਅਞ੍ਞਸ੍ਸ ਸਨ੍ਤਕਂ ਗਹਿਤਂ ਨਾਮ ਨ ਹੋਤੀਤਿ ਆਹ – ‘‘ਸਚੇ ਪਨ ਸਙ੍ਕਾਰਕੂਟਾਦੀਸੂ’’ਤਿਆਦਿ. ਅਸਾਮਿਕਞ੍ਹਿ ਪਂਸੁਕੂਲਨ੍ਤਿ ਵੁਚ੍ਚਤਿ. ਪਂਸੁਕੂਲਂ ਅਧਿਟ੍ਠਹਿਤ੍ਵਾਤਿ ‘‘ਅਸਾਮਿਕਂ ਇਦ’’ਨ੍ਤਿ ਸਞ੍ਞਂ ਉਪ੍ਪਾਦੇਤ੍ਵਾ. ਏਵਂ ਪਨ ਪਂਸੁਕੂਲਸਞ੍ਞਂ ਅਨੁਪ੍ਪਾਦੇਤ੍ਵਾ ਗਣ੍ਹਿਤੁਂ ਨ ਵਟ੍ਟਤਿ.

੫੧੩. ਅਞ੍ਞਾਤਿਕਾਯ ਅਞ੍ਞਾਤਿਕਸਞ੍ਞੀਤਿ ਤਿਕਪਾਚਿਤ੍ਤਿਯਨ੍ਤਿ ਏਤ੍ਥ ਇਤਿ-ਸਦ੍ਦੋ ਆਦਿਅਤ੍ਥੋ. ਤੀਣਿ ਪਰਿਮਾਣਮਸ੍ਸਾਤਿ ਤਿਕਂ, ਤਿਕਞ੍ਚ ਤਂ ਪਾਚਿਤ੍ਤਿਯਞ੍ਚਾਤਿ ਤਿਕਪਾਚਿਤ੍ਤਿਯਂ, ਤੀਣਿ ਪਾਚਿਤ੍ਤਿਯਾਨੀਤਿ ਅਤ੍ਥੋ.

੫੧੪. ਪਤ੍ਤਤ੍ਥਵਿਕਾਦਿਂ ਯਂਕਿਞ੍ਚੀਤਿ ਅਨਧਿਟ੍ਠਾਨੁਪਗਂ ਸਨ੍ਧਾਯ ਵਦਤਿ. ‘‘ਚੀਵਰਂ ਨਾਮ ਛਨ੍ਨਂ ਚੀਵਰਾਨਂ ਅਞ੍ਞਤਰਂ ਚੀਵਰਂ ਵਿਕਪ੍ਪਨੁਪਗਂ ਪਚ੍ਛਿਮ’’ਨ੍ਤਿ ਹਿ ਵੁਤ੍ਤਤ੍ਤਾ ਅਧਿਟ੍ਠਾਨੁਪਗਂ ਯਂਕਿਞ੍ਚਿ ਨ ਵਟ੍ਟਤਿ. ਤੇਨੇਵਾਹ – ‘‘ਵਿਕਪ੍ਪਨੁਪਗਪਚ੍ਛਿਮਚੀਵਰਪ੍ਪਮਾਣ’’ਨ੍ਤਿਆਦਿ. ਯਸ੍ਮਾ ਭਿਸਿਚ੍ਛਵਿ ਮਹਨ੍ਤਾਪਿ ਸੇਨਾਸਨਸਙ੍ਗਹਿਤਤ੍ਤਾ ਚੀਵਰਸਙ੍ਖ੍ਯਂ ਨ ਗਚ੍ਛਤੀਤਿ ਨੇਵ ਅਧਿਟ੍ਠਾਨੁਪਗਾ ਨ ਵਿਕਪ੍ਪਨੁਪਗਾ ਚ, ਤਸ੍ਮਾ ਅਨਧਿਟ੍ਠਾਨੁਪਗਸਾਮਞ੍ਞਤੋ ਵੁਤ੍ਤਂ. ਸਚੇਪਿ ਮਞ੍ਚਪ੍ਪਮਾਣਾ ਭਿਸਿਚ੍ਛਵਿ ਹੋਤਿ, ਵਟ੍ਟਤਿਯੇਵਾਤਿ. ਕੋ ਪਨ ਵਾਦੋ ਪਤ੍ਤਤ੍ਥਵਿਕਾਦੀਸੂਤਿ ਮਹਤਿਯਾਪਿ ਤਾਵ ਭਿਸਿਚ੍ਛਵਿਯਾ ਅਨਧਿਟ੍ਠਾਨੁਪਗਤ੍ਤਾ ਅਨਾਪਤ੍ਤਿ, ਤਤੋ ਖੁਦ੍ਦਕਤਰੇਸੁ ਅਨਧਿਟ੍ਠਾਨੁਪਗੇਸੁ ਪਤ੍ਤਤ੍ਥਵਿਕਾਦੀਸੁ ਕਿਮੇਵ ਵਤ੍ਤਬ੍ਬਨ੍ਤਿ ਅਧਿਪ੍ਪਾਯੋ. ਪਟਿਗ੍ਗਹਣਂ ਕਿਰਿਯਾ, ਅਪਰਿਵਤ੍ਤਨਂ ਅਕਿਰਿਯਾ. ਵਿਕਪ੍ਪਨੁਪਗਚੀਵਰਤਾ, ਪਾਰਿਵਤ੍ਤਕਾਭਾਵੋ, ਅਞ੍ਞਾਤਿਕਾਯ ਹਤ੍ਥਤੋ ਗਹਣਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਚੀਵਰਪਟਿਗ੍ਗਹਣਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਅਞ੍ਞਾਤਕਵਿਞ੍ਞਤ੍ਤਿਸਿਕ੍ਖਾਪਦਵਣ੍ਣਨਾ

੫੧੫. ਛਟ੍ਠੇ ਪਤਿਕਿਟ੍ਠੋਤਿ ਨਿਹੀਨੋ, ਲਾਮਕੋਤਿ ਅਤ੍ਥੋ. ਲੋਲਜਾਤਿਕੋਤਿ ਲੋਲਸਭਾਵੋ. ਪਟੁਯੇਵ ਪਟ੍ਟੋ. ਤੇਨਾਹ ‘‘ਛੇਕੋ’’ਤਿਆਦਿ. ਕਿਸ੍ਮਿਂ ਵਿਯਾਤਿ ਏਤ੍ਥ ‘‘ਕਿਸ੍ਮਿਂ ਵਿਯਾ’’ਤਿ ਨਿਪਾਤਵਸੇਨ ਸਮਾਨਤ੍ਥਂ ‘‘ਕਿਂਸੁ ਵਿਯਾ’’ਤਿ ਨਿਪਾਤਪਦਨ੍ਤਿ ਆਹ ‘‘ਕਿਂਸੁ ਵਿਯਾ’’ਤਿ, ਕਿਂ ਵਿਯਾਤਿ ਅਤ੍ਥੋ, ਦੁਕ੍ਖਂ ਵਿਯਾਤਿ ਅਧਿਪ੍ਪਾਯੋ. ਤੇਨਾਹ ‘‘ਕਿਲੇਸੋ ਵਿਯਾ’’ਤਿਆਦਿ. ਧਮ੍ਮਵਸੇਨ ਉਪਚਾਰਵਸੇਨ ਨਿਮਨ੍ਤਨਾ ਧਮ੍ਮਨਿਮਨ੍ਤਨਾਤਿ ਪਾਲ਼ਿਪਦਸ੍ਸ ਅਤ੍ਥੋ ਵੇਦਿਤਬ੍ਬੋ. ਸਚੇ ਪਨ ‘‘ਵਦੇਯ੍ਯਾਥ, ਭਨ੍ਤੇ, ਯੇਨਤ੍ਥੋ’’ਤਿ ਇਦਂ ਸਚ੍ਚਮੇਵ ਵੁਤ੍ਤਂ ਸਿਯਾ, ਪਵਾਰਿਤੋਯੇਵ ਹੋਤਿ. ਯਸ੍ਮਾ ਪਨ ਪਵਾਰੇਤ੍ਵਾਪਿ ਅਦਾਤੁਕਾਮੋ ਅਪ੍ਪਵਾਰਿਤਟ੍ਠਾਨੇਯੇਵ ਤਿਟ੍ਠਤਿ, ਤਸ੍ਮਾ ਭਗਵਾ ਪਵਾਰਿਤਾਪਵਾਰਿਤਭਾਵਂ ਅਵਿਚਾਰੇਤ੍ਵਾ ‘‘ਞਾਤਕੋ ਤੇ, ਉਪਨਨ੍ਦ, ਅਞ੍ਞਾਤਕੋ’’ਤਿ ਞਾਤਕਅਞ੍ਞਾਤਕਭਾਵਂਯੇਵ ਵਿਚਾਰੇਸਿ. ਮੁਸਿਂਸੂਤਿ ਵਿਲੁਮ੍ਪਿਂਸੁ.

੫੧੭. ਅਨੁਪੁਬ੍ਬਕਥਾਤਿ ਅਨੁਪੁਬ੍ਬੇਨ ਵਿਨਿਚ੍ਛਯਕਥਾ. ਸੇਸਪਰਿਕ੍ਖਾਰਾਨਂ ਸਦ੍ਧਿਵਿਹਾਰਿਕੇਹਿ ਗਹਿਤਤ੍ਤਾ ਨਿਵਾਸਨਪਾਰੁਪਨਮਤ੍ਤਮੇਵ ਅਵਸਿਟ੍ਠਨ੍ਤਿ ਆਹ ‘‘ਨਿਵਾਸਨਪਾਰੁਪਨਮਤ੍ਤਂਯੇਵ ਹਰਿਤ੍ਵਾ’’ਤਿ. ਸਦ੍ਧਿਵਿਹਾਰਿਕਾਨਂ ਤਾਵ ਆਗਮਨਸ੍ਸ ਵਾ ਅਨਾਗਮਨਸ੍ਸ ਵਾ ਅਜਾਨਨਤਾਯ ਵੁਤ੍ਤਂ ‘‘ਥੇਰੇਹਿ ਨੇਵ ਤਾਵ…ਪੇ… ਭਞ੍ਜਿਤਬ੍ਬ’’ਨ੍ਤਿ. ਪਰੇਸਮ੍ਪਿ ਅਤ੍ਥਾਯ ਲਭਨ੍ਤੀਤਿ ਅਤ੍ਤਨੋ ਚੀਵਰਂ ਦਦਮਾਨਾ ਸਯਂ ਸਾਖਾਭਙ੍ਗੇਨ ਪਟਿਚ੍ਛਾਦੇਨ੍ਤੀਤਿ ਤੇਸਂ ਅਤ੍ਥਾਯਪਿ ਭਞ੍ਜਿਤੁਂ ਲਭਨ੍ਤਿ. ‘‘ਤਿਣੇਨ ਵਾ ਪਣ੍ਣੇਨ ਵਾ ਪਟਿਚ੍ਛਾਦੇਤ੍ਵਾ ਆਗਨ੍ਤਬ੍ਬ’’ਨ੍ਤਿ ਵਚਨਤੋ ਈਦਿਸੇਸੁ ਭੂਤਗਾਮਪਾਤਬ੍ਯਤਾਪਿ ਅਨੁਞ੍ਞਾਤਾਯੇਵ ਹੋਤੀਤਿ ਆਹ – ‘‘ਨੇਵ ਭੂਤਗਾਮਪਾਤਬ੍ਯਤਾਯ ਪਾਚਿਤ੍ਤਿਯਂ ਹੋਤੀ’’ਤਿ. ਨ ਤੇਸਂ ਧਾਰਣੇ ਦੁਕ੍ਕਟਨ੍ਤਿ ਤੇਸਂ ਤਿਤ੍ਥਿਯਦ੍ਧਜਾਨਂ ਧਾਰਣੇਪਿ ਦੁਕ੍ਕਟਂ ਨਤ੍ਥਿ.

ਯਾਨਿ ਚ ਨੇਸਂ ਵਤ੍ਥਾਨਿ ਦੇਨ੍ਤੀਤਿ ਸਮ੍ਬਨ੍ਧੋ. ਥੇਰਾਨਂ ਸਯਮੇਵ ਦਿਨ੍ਨਤ੍ਤਾ ਵੁਤ੍ਤਂ ‘‘ਅਚ੍ਛਿਨ੍ਨਚੀਵਰਟ੍ਠਾਨੇ ਠਿਤਤ੍ਤਾ’’ਤਿ. ਯਦਿ ਲਦ੍ਧਿਂ ਗਣ੍ਹਾਤਿ, ਤਿਤ੍ਥਿਯਪਕ੍ਕਨ੍ਤਕੋ ਨਾਮ ਹੋਤਿ, ਤਸ੍ਮਾ ਵੁਤ੍ਤਂ ‘‘ਲਦ੍ਧਿਂ ਅਗ੍ਗਹੇਤ੍ਵਾ’’ਤਿ. ‘‘ਨੋ ਚੇ ਹੋਤਿ ਸਙ੍ਘਸ੍ਸ ਵਿਹਾਰਚੀਵਰਂ ਵਾ…ਪੇ… ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਇਮਿਨਾ ਅਨ੍ਤਰਾਮਗ੍ਗੇ ਪਵਿਟ੍ਠਵਿਹਾਰਤੋ ਨਿਕ੍ਖਮਿਤ੍ਵਾ ਅਞ੍ਞਤ੍ਥ ਅਤ੍ਤਨੋ ਅਭਿਰੁਚਿਤਟ੍ਠਾਨਂ ਗਚ੍ਛਨ੍ਤਸ੍ਸ ਦੁਕ੍ਕਟਂ ਵੁਤ੍ਤਂ. ਇਮਿਨਾ ਚ ‘‘ਯਂ ਆਵਾਸਂ ਪਠਮਂ ਉਪਗਚ੍ਛਤੀ’’ਤਿ ਵੁਤ੍ਤਂ ਅਨ੍ਤਰਾਮਗ੍ਗੇ ਠਿਤਵਿਹਾਰਮ੍ਪਿ ਸਚੇ ਨਗ੍ਗੋ ਹੁਤ੍ਵਾ ਗਚ੍ਛਤਿ, ਦੁਕ੍ਕਟਮੇਵਾਤਿ ਵੇਦਿਤਬ੍ਬਂ. ਯਦਿ ਏਵਂ ਤਤ੍ਥ ਕਸ੍ਮਾ ਨ ਵੁਤ੍ਤਨ੍ਤਿ ਚੇ? ਅਨੋਕਾਸਤ੍ਤਾ. ਤਤ੍ਥ ਹਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਅਚ੍ਛਿਨ੍ਨਚੀਵਰਸ੍ਸ ਵਾ…ਪੇ… ਚੀਵਰਂ ਵਿਞ੍ਞਾਪੇਤੁ’’ਨ੍ਤਿ ਇਮਿਨਾ ਸਮ੍ਬਨ੍ਧੇਨ ਸਙ੍ਘਿਕਮ੍ਪਿ ਚੀਵਰਂ ਨਿਵਾਸੇਤੁਂ ਪਾਰੁਪਿਤੁਞ੍ਚ ਅਨੁਜਾਨਨ੍ਤੋ ‘‘ਯਂ ਆਵਾਸਂ ਪਠਮਂ…ਪੇ… ਗਹੇਤ੍ਵਾ ਪਾਰੁਪਿਤੁ’’ਨ੍ਤਿ ਆਹ, ਤਸ੍ਮਾ ਤਤ੍ਥ ਅਨੋਕਾਸਤ੍ਤਾ ਦੁਕ੍ਕਟਂ ਨ ਵੁਤ੍ਤਂ.

ਵਿਹਾਰਚੀਵਰਨ੍ਤਿ ਸੇਨਾਸਨਚੀਵਰਂ. ਚਿਮਿਲਿਕਾਹੀਤਿ ਪਟਪਿਲੋਤਿਕਾਹਿ. ਤਸ੍ਸ ਉਪਰੀਤਿ ਭੂਮਤ੍ਥਰਣਸ੍ਸ ਉਪਰਿ. ਵਿਦੇਸਗਤੇਨਾਤਿ ਅਞ੍ਞਂ ਚੀਵਰਂ ਅਲਭਿਤ੍ਵਾ ਵਿਦੇਸਗਤੇਨ. ਏਕਸ੍ਮਿਂ…ਪੇ… ਠਪੇਤਬ੍ਬਨ੍ਤਿ ਏਤ੍ਥ ‘‘ਲੇਸੇਨ ਗਹੇਤ੍ਵਾ ਅਗਤਤ੍ਤਾ ਠਪੇਨ੍ਤੇਨ ਚ ਸਙ੍ਘਿਕਪਰਿਭੋਗੇਨੇਵ ਠਪਿਤਤ੍ਤਾ ਅਞ੍ਞਸ੍ਮਿਂ ਸੇਨਾਸਨੇ ਨਿਯਮਿਤਮ੍ਪਿ ਅਞ੍ਞਤ੍ਥ ਠਪੇਤੁਂ ਵਟ੍ਟਤੀ’’ਤਿ ਵਦਨ੍ਤਿ. ਪਰਿਭੋਗੇਨੇਵਾਤਿ ਅਞ੍ਞਂ ਚੀਵਰਂ ਅਲਭਿਤ੍ਵਾ ਪਰਿਭੁਞ੍ਜਨੇਨ.

੫੧੯-੫੨੧. ਪਰਿਭੋਗਜਿਣ੍ਣਨ੍ਤਿ ਯਥਾ ਤੇਨ ਚੀਵਰੇਨ ਸਰੀਰਂ ਪਟਿਚ੍ਛਾਦੇਤੁਂ ਨ ਸਕ੍ਕਾ, ਏਵਂ ਜਿਣ੍ਣਂ. ਕਪ੍ਪਿਯਵੋਹਾਰੇਨਾਤਿ ਕਯਵਿਕ੍ਕਯਾਪਤ੍ਤਿਤੋ ਮੋਚਨਤ੍ਥਂ ਵੁਤ੍ਤਂ. ‘‘ਵਿਞ੍ਞਾਪੇਨ੍ਤਸ੍ਸਾ’’ਤਿ ਇਮਸ੍ਸੇਵ ਅਤ੍ਥਂ ਵਿਭਾਵੇਤਿ ‘‘ਚੇਤਾਪੇਨ੍ਤਸ੍ਸ ਪਰਿਵਤ੍ਤਾਪੇਨ੍ਤਸ੍ਸਾ’’ਤਿ. ਅਤ੍ਤਨੋ ਧਨੇਨ ਹਿ ਵਿਞ੍ਞਾਪਨਂ ਨਾਮ ਪਰਿਵਤ੍ਤਨਮੇਵਾਤਿ ਅਧਿਪ੍ਪਾਯੋ. ਸਙ੍ਘਵਸੇਨ ਪਵਾਰਿਤਾਨਂ ਵਿਞ੍ਞਾਪਨੇ ਵਤ੍ਤਂ ਦਸ੍ਸੇਤਿ ‘‘ਪਮਾਣਮੇਵ ਵਟ੍ਟਤੀ’’ਤਿ. ਸਙ੍ਘਵਸੇਨ ਹਿ ਪਵਾਰਿਤੇ ਸਬ੍ਬੇਸਂ ਸਾਧਾਰਣਤ੍ਤਾ ਅਧਿਕਂ ਵਿਞ੍ਞਾਪੇਤੁਂ ਨ ਵਟ੍ਟਤਿ. ਯਂ ਯਂ ਪਵਾਰੇਤੀਤਿ ਯਂ ਯਂ ਚੀਵਰਾਦਿਂ ਦਸ੍ਸਾਮੀਤਿ ਪਵਾਰੇਤਿ. ਵਿਞ੍ਞਾਪਨਕਿਚ੍ਚਂ ਨਤ੍ਥੀਤਿ ਵਿਨਾ ਵਿਞ੍ਞਤ੍ਤਿਯਾ ਦੀਯਮਾਨਤ੍ਤਾ ਵਿਞ੍ਞਾਪੇਤ੍ਵਾ ਕਿਂ ਕਰਿਸ੍ਸਤੀਤਿ ਅਧਿਪ੍ਪਾਯੋ. ਅਞ੍ਞਸ੍ਸਤ੍ਥਾਯਾਤਿ ਏਤ੍ਥਾਪਿ ‘‘ਞਾਤਕਾਨਂ ਪਵਾਰਿਤਾਨ’’ਨ੍ਤਿ ਇਦਂ ਅਨੁਵਤ੍ਤਤਿਯੇਵਾਤਿ ਆਹ ‘‘ਅਤ੍ਤਨੋ ਞਾਤਕਪਵਾਰਿਤੇ’’ਤਿਆਦਿ. ਵਿਕਪ੍ਪਨੁਪਗਚੀਵਰਤਾ, ਸਮਯਾਭਾਵੋ, ਅਞ੍ਞਾਤਕਵਿਞ੍ਞਤ੍ਤਿ, ਤਾਯ ਚ ਪਟਿਲਾਭੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ.

ਅਞ੍ਞਾਤਕਵਿਞ੍ਞਤ੍ਤਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭. ਤਤੁਤ੍ਤਰਿਸਿਕ੍ਖਾਪਦਵਣ੍ਣਨਾ

੫੨੨. ਸਤ੍ਤਮੇ ਪਾਲ਼ਿਯਂ ਪਗ੍ਗਾਹਿਕਸਾਲਨ੍ਤਿ ਦੁਸ੍ਸਵਾਣਿਜਕਾਨਂ ਆਪਣਂ. ‘‘ਪਗ੍ਗਾਹਿਤਸਾਲ’’ਨ੍ਤਿਪਿ ਪਠਨ੍ਤਿ.

੫੨੩-੫੨੪. ਅਭੀਤਿ ਉਪਸਗ੍ਗੋਤਿ ਤਸ੍ਸ ਵਿਸੇਸਤ੍ਥਾਭਾਵਂ ਦਸ੍ਸੇਤਿ. ਤੇਨਾਹ ‘‘ਹਰਿਤੁਨ੍ਤਿ ਅਤ੍ਥੋ’’ਤਿ. ਵਰ-ਸਦ੍ਦਸ੍ਸ ਇਚ੍ਛਾਯਂ ਵਤ੍ਤਮਾਨਤ੍ਤਾ ਆਹ ‘‘ਇਚ੍ਛਾਪੇਯ੍ਯਾ’’ਤਿ. ਦਟ੍ਠੁ ਖੇਮਤੋਤਿ ਏਤ੍ਥ ਗਾਥਾਬਨ੍ਧਵਸੇਨ ਅਨੁਨਾਸਿਕਲੋਪੋ ਦਟ੍ਠਬ੍ਬੋ. ਸਅਨ੍ਤਰਨ੍ਤਿ ਅਨ੍ਤਰਵਾਸਕਸਹਿਤਂ. ਉਤ੍ਤਰਨ੍ਤਿ ਉਤ੍ਤਰਾਸਙ੍ਗਂ. ਅਸ੍ਸ ਚੀਵਰਸ੍ਸਾਤਿ ਸਾਦਿਤਬ੍ਬਚੀਵਰਸ੍ਸ. ਅਚ੍ਛਿਨ੍ਨਸਬ੍ਬਚੀਵਰੇਨਾਤਿ ਅਚ੍ਛਿਨ੍ਨਾਨਿ ਸਬ੍ਬਾਨਿ ਤੀਣਿ ਚੀਵਰਾਨਿ ਅਸ੍ਸਾਤਿ ਅਚ੍ਛਿਨ੍ਨਸਬ੍ਬਚੀਵਰੋ, ਤੇਨਾਤਿ ਅਤ੍ਥੋ. ਯਸ੍ਸ ਹਿ ਅਚ੍ਛਿਨ੍ਦਨਸਮਯੇ ਤੀਣਿ ਚੀਵਰਾਨਿ ਸਨ੍ਨਿਹਿਤਾਨਿ ਹੋਨ੍ਤਿ, ਤਾਨਿ ਸਬ੍ਬਾਨਿ ਅਚ੍ਛਿਨ੍ਨਾਨੀਤਿ ਸੋ ‘‘ਅਚ੍ਛਿਨ੍ਨਸਬ੍ਬਚੀਵਰੋ’’ਤਿ ਵੁਚ੍ਚਤਿ. ਤੇਨੇਵ ‘‘ਅਚ੍ਛਿਨ੍ਨਸਬ੍ਬਚੀਵਰੇਨ ਤਿਚੀਵਰਕੇਨਾ’’ਤਿ ਵੁਤ੍ਤਂ. ਤਿਚੀਵਰਕੇਨਾਤਿ ਹਿ ਅਚ੍ਛਿਨ੍ਦਨਸਮਯੇ ਤਿਚੀਵਰਸ੍ਸ ਸਨ੍ਨਿਹਿਤਭਾਵਂ ਸਨ੍ਧਾਯ ਵੁਤ੍ਤਂ, ਨ ਪਨ ਵਿਨਯਤੇਚੀਵਰਿਕਭਾਵਂ ਧੁਤਙ੍ਗਤੇਚੀਵਰਿਕਭਾਵਂ ਵਾ ਸਨ੍ਧਾਯ. ਏਵਂ ਪਟਿਪਜ੍ਜਿਤਬ੍ਬਨ੍ਤਿ ‘‘ਸਨ੍ਤਰੁਤ੍ਤਰਪਰਮਂ ਤੇਨ ਭਿਕ੍ਖੁਨਾ ਤਤੋ ਚੀਵਰਂ ਸਾਦਿਤਬ੍ਬ’’ਨ੍ਤਿ ਵੁਤ੍ਤਵਿਧਿਨਾ ਪਟਿਪਜ੍ਜਿਤਬ੍ਬਂ. ਅਞ੍ਞੇਨਾਤਿ ਅਚ੍ਛਿਨ੍ਨਅਸਬ੍ਬਚੀਵਰੇਨ. ਯਸ੍ਸ ਤੀਸੁ ਚੀਵਰੇਸੁ ਏਕਂ ਵਾ ਦ੍ਵੇ ਵਾ ਚੀਵਰਾਨਿ ਅਚ੍ਛਿਨ੍ਨਾਨਿ ਹੋਨ੍ਤਿ, ਤੇਨਾਤਿ ਅਤ੍ਥੋ. ਅਞ੍ਞਥਾਪੀਤਿ ‘‘ਸਨ੍ਤਰੁਤ੍ਤਰਪਰਮ’’ਨ੍ਤਿ ਵੁਤ੍ਤਵਿਧਾਨਤੋ ਅਞ੍ਞਥਾਪਿ. ਯਸ੍ਸ ਹਿ ਤੀਸੁ ਦ੍ਵੇ ਚੀਵਰਾਨਿ ਅਚ੍ਛਿਨ੍ਨਾਨਿ ਹੋਨ੍ਤਿ, ਏਕਂ ਸਾਦਿਤਬ੍ਬਂ. ਏਕਸ੍ਮਿਂ ਅਚ੍ਛਿਨ੍ਨੇ ਨ ਸਾਦਿਤਬ੍ਬਨ੍ਤਿ ਨ ਤਸ੍ਸ ਸਨ੍ਤਰੁਤ੍ਤਰਪਰਮਸਾਦਿਯਨਂ ਸਮ੍ਭਵਤਿ, ਅਯਮੇਵ ਚ ਅਤ੍ਥੋ ਪਦਭਾਜਨੇਨ ਵਿਭਾਵਿਤੋ. ਤੇਨਾਹ ‘‘ਤਂ ਵਿਭਾਗਂ ਦਸ੍ਸੇਤੁ’’ਨ੍ਤਿ.

ਕੇਚਿ ਪਨ ‘‘ਤਿਚੀਵਰਕੇਨਾਤਿ ਵੁਤ੍ਤਤ੍ਤਾ ਤਿਚੀਵਰਂ ਪਰਿਕ੍ਖਾਰਚੋਲ਼ਵਸੇਨ ਅਧਿਟ੍ਠਹਿਤ੍ਵਾ ਪਰਿਭੁਞ੍ਜਤੋ ਤਸ੍ਮਿਂ ਨਟ੍ਠੇ ਬਹੂਨਿਪਿ ਗਹੇਤੁਂ ਲਭਤੀ’’ਤਿ ਵਦਨ੍ਤਿ, ਤਂ ਨ ਗਹੇਤਬ੍ਬਂ. ਪਦਭਾਜਨਸ੍ਸ ਹਿ ਅਧਿਪ੍ਪਾਯਂ ਦਸ੍ਸੇਨ੍ਤੇਨ ਯਸ੍ਮਾ ਪਨ ‘‘ਅਚ੍ਛਿਨ੍ਨਸਬ੍ਬਚੀਵਰੇਨ…ਪੇ… ਤਂ ਵਿਭਾਗਂ ਦਸ੍ਸੇਤੁ’’ਨ੍ਤਿ ਵੁਤ੍ਤਂ, ਪਦਭਾਜਨੇ ਚ ਨ ਤਾਦਿਸੋ ਅਤ੍ਥੋ ਉਪਲਬ੍ਭਤਿ, ਤਸ੍ਮਾ ਤਂ ਨ ਗਹੇਤਬ੍ਬਮੇਵ. ਯਮ੍ਪਿ ਮਾਤਿਕਾਟ੍ਠਕਥਾਯਂ (ਕਙ੍ਖਾ. ਅਟ੍ਠ. ਤਤੁਤ੍ਤਰਿਸਿਕ੍ਖਾਪਦਵਣ੍ਣਨਾ) ਵੁਤ੍ਤਂ ‘‘ਯਸ੍ਸ ਅਧਿਟ੍ਠਿਤਚੀਵਰਸ੍ਸ ਤੀਣਿ ਨਟ੍ਠਾਨੀ’’ਤਿ, ਤਤ੍ਥਾਪਿ ਅਧਿਟ੍ਠਿਤਗ੍ਗਹਣਂ ਸਰੂਪਕਥਨਮਤ੍ਤਨ੍ਤਿ ਗਹੇਤਬ੍ਬਂ, ਨ ਪਨ ਤਿਚੀਵਰਾਧਿਟ੍ਠਾਨੇਨ ਅਧਿਟ੍ਠਿਤਚੀਵਰਸ੍ਸੇਵਾਤਿ ਏਵਮਤ੍ਥੋ ਗਹੇਤਬ੍ਬੋ ਪਾਲ਼ਿਯਂ ਅਟ੍ਠਕਥਾਯਞ੍ਚ ਤਥਾ ਅਤ੍ਥਸ੍ਸ ਅਸਮ੍ਭਵਤੋ. ਨ ਹਿ ਤਿਚੀਵਰਾਧਿਟ੍ਠਾਨੇਨ ਅਧਿਟ੍ਠਿਤਚੀਵਰਸ੍ਸੇਵ ਇਦਂ ਸਿਕ੍ਖਾਪਦਂ ਪਞ੍ਞਤ੍ਤਨ੍ਤਿ ਸਕ੍ਕਾ ਵਿਞ੍ਞਾਤੁਂ. ਪੁਰਿਮਸਿਕ੍ਖਾਪਦੇਨ ਹਿ ਅਚ੍ਛਿਨ੍ਨਚੀਵਰਸ੍ਸ ਅਞ੍ਞਾਤਕਵਿਞ੍ਞਤ੍ਤਿਯਾ ਅਨੁਞ੍ਞਾਤਤ੍ਤਾ ਪਮਾਣਂ ਅਜਾਨਿਤ੍ਵਾ ਵਿਞ੍ਞਾਪਨਵਤ੍ਥੁਸ੍ਮਿਂ ਪਮਾਣਤੋ ਸਾਦਿਯਨਂ ਅਨੁਜਾਨਨ੍ਤੇਨ ਭਗਵਤਾ ਇਦਂ ਸਿਕ੍ਖਾਪਦਂ ਪਞ੍ਞਤ੍ਤਂ, ਤਸ੍ਮਾ ‘‘ਪਰਿਕ੍ਖਾਰਚੋਲ਼ਿਕਸ੍ਸ ਬਹੁਮ੍ਪਿ ਸਾਦਿਤੁਂ ਵਟ੍ਟਤੀ’’ਤਿ ਅਯਮਤ੍ਥੋ ਨੇਵ ਪਾਲ਼ਿਯਾ ਸਮੇਤਿ, ਨ ਚ ਭਗਵਤੋ ਅਧਿਪ੍ਪਾਯਂ ਅਨੁਲੋਮੇਤਿ.

ਯਸ੍ਸ ਤੀਣਿ ਨਟ੍ਠਾਨਿ, ਤੇਨ ਦ੍ਵੇ ਸਾਦਿਤਬ੍ਬਾਨੀਤਿ ਏਤ੍ਥ ਯਸ੍ਸ ਤਿਚੀਵਰਤੋ ਅਧਿਕਮ੍ਪਿ ਚੀਵਰਂ ਅਞ੍ਞਤ੍ਥ ਠਿਤਂ ਅਤ੍ਥਿ, ਤਦਾਤਸ੍ਸ ਚੀਵਰਸ੍ਸ ਅਲਬ੍ਭਨੀਯਭਾਵਤੋ ਤੇਨਪਿ ਸਾਦਿਤੁਂ ਵਟ੍ਟਤੀਤਿ ਵੇਦਿਤਬ੍ਬਂ. ਪਕਤਿਯਾਵ ਸਨ੍ਤਰੁਤ੍ਤਰੇਨ ਚਰਤੀਤਿ ਸਾਸਙ੍ਕਸਿਕ੍ਖਾਪਦਵਸੇਨ ਵਾ ਅਵਿਪ੍ਪਵਾਸਸਮ੍ਮੁਤਿਵਸੇਨ ਵਾ ਤਤਿਯਸ੍ਸ ਅਲਾਭੇਨ ਵਾ ਚਰਤਿ. ‘‘ਦ੍ਵੇ ਨਟ੍ਠਾਨੀ’’ਤਿ ਅਧਿਕਾਰਤ੍ਤਾ ਵੁਤ੍ਤਂ ‘‘ਦ੍ਵੇ ਸਾਦਿਤਬ੍ਬਾਨੀ’’ਤਿ. ਏਕਂ ਸਾਦਿਯਨ੍ਤੇਨੇਵ ਸਮੋ ਭਵਿਸ੍ਸਤੀਤਿ ਤਿਣ੍ਣਂ ਚੀਵਰਾਨਂ ਦ੍ਵੀਸੁ ਨਟ੍ਠੇਸੁ ਏਕਂ ਸਾਦਿਯਨ੍ਤੇਨ ਸਮੋ ਭਵਿਸ੍ਸਤਿ ਉਭਿਨ੍ਨਮ੍ਪਿ ਸਨ੍ਤਰੁਤ੍ਤਰਪਰਮਤਾਯ ਅਵਟ੍ਠਾਨਤੋ. ਯਸ੍ਸ ਏਕਂਯੇਵ ਹੋਤੀਤਿ ਅਞ੍ਞੇਨ ਕੇਨਚਿ ਕਾਰਣੇਨ ਵਿਨਟ੍ਠਸੇਸਚੀਵਰਂ ਸਨ੍ਧਾਯ ਵੁਤ੍ਤਂ.

੫੨੬. ‘‘ਸੇਸਕਂ ਤੁਯ੍ਹੇਵ ਹੋਤੂਤਿ ਦੇਨ੍ਤੀ’’ਤਿ ਵੁਤ੍ਤਤ੍ਤਾ ‘‘ਪਮਾਣਯੁਤ੍ਤਂ ਗਣ੍ਹਿਸ੍ਸਾਮ, ਸੇਸਕਂ ਆਹਰਿਸ੍ਸਾਮਾ’’ਤਿ ਵਤ੍ਵਾ ਗਹੇਤ੍ਵਾ ਗਮਨਸਮਯੇਪਿ ‘‘ਸੇਸਕਮ੍ਪਿ ਤੁਮ੍ਹਾਕਞ੍ਞੇਵ ਹੋਤੂ’’ਤਿ ਵਦਨ੍ਤਿ, ਲਦ੍ਧਕਪ੍ਪਿਯਮੇਵ. ਪਵਾਰਿਤਾਨਨ੍ਤਿ ਅਚ੍ਛਿਨ੍ਨਕਾਲਤੋ ਪੁਬ੍ਬੇਯੇਵ ਪਵਾਰਿਤਾਨਂ. ਪਾਲ਼ਿਯਾ ਨ ਸਮੇਤੀਤਿ ਸਨ੍ਤਰੁਤ੍ਤਰਪਰਮਤੋ ਉਤ੍ਤਰਿ ਸਾਦਿਯਨੇ ਅਨਾਪਤ੍ਤਿਦਸ੍ਸਨਤ੍ਥਂ ‘‘ਅਨਾਪਤ੍ਤਿ ਞਾਤਕਾਨਂ ਪਵਾਰਿਤਾਨ’’ਨ੍ਤਿ ਵੁਤ੍ਤਤ੍ਤਾ ਨ ਸਮੇਤਿ. ਸਨ੍ਤਰੁਤ੍ਤਰਪਰਮਂ ਸਾਦਿਯਨ੍ਤਸ੍ਸ ਹਿ ਆਪਤ੍ਤਿਪ੍ਪਸਙ੍ਗੋਯੇਵ ਨਤ੍ਥਿ, ਸਤਿ ਚ ਸਿਕ੍ਖਾਪਦੇਨ ਆਪਤ੍ਤਿਪ੍ਪਸਙ੍ਗੇ ਅਨਾਪਤ੍ਤਿ ਯੁਤ੍ਤਾ ਦਸ੍ਸੇਤੁਨ੍ਤਿ ਅਧਿਪ੍ਪਾਯੋ. ਕੇਚਿ ਪਨ ‘‘ਪਮਾਣਮੇਵ ਵਟ੍ਟਤੀਤਿ ਇਦਂ ਸਲ੍ਲੇਖਦਸ੍ਸਨਤ੍ਥਂ ਵੁਤ੍ਤ’’ਨ੍ਤਿ ਵਦਨ੍ਤਿ.

ਯਸ੍ਮਾ ਪਨਿਦਂ…ਪੇ… ਨ ਵੁਤ੍ਤਨ੍ਤਿ ਏਤ੍ਥਾਯਮਧਿਪ੍ਪਾਯੋ – ‘‘ਅਞ੍ਞਸ੍ਸਤ੍ਥਾਯਾ’’ਤਿ ਵੁਚ੍ਚਮਾਨੇ ਅਞ੍ਞੇਸਂ ਅਤ੍ਥਾਯ ਪਮਾਣਂ ਅਤਿਕ੍ਕਮਿਤ੍ਵਾਪਿ ਗਣ੍ਹਿਤੁਂ ਵਟ੍ਟਤੀਤਿ ਆਪਜ੍ਜਤਿ, ਤਞ੍ਚ ਅਞ੍ਞਸ੍ਸਤ੍ਥਾਯ ਵਿਞ੍ਞਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਤ੍ਤਾ ਵਤ੍ਥੁਨਾ ਸਂਸਨ੍ਦਿਯਮਾਨਂ ਨ ਸਮੇਤਿ. ਨ ਹਿ ਯਂ ਵਤ੍ਥੁਂ ਨਿਸ੍ਸਾਯ ਸਿਕ੍ਖਾਪਦਂ ਪਞ੍ਞਤ੍ਤਂ, ਤਸ੍ਮਿਂਯੇਵ ਅਨਾਪਤ੍ਤਿਵਚਨਂ ਯੁਤ੍ਤਨ੍ਤਿ. ਗਣ੍ਠਿਪਦੇਸੁ ਪਨ ਤੀਸੁਪਿ ‘‘ਇਮਸ੍ਸ ਸਿਕ੍ਖਾਪਦਸ੍ਸ ਅਤ੍ਤਨੋ ਸਾਦਿਯਨਪਟਿਬਦ੍ਧਤਾਵਸੇਨ ਪਵਤ੍ਤਤ੍ਤਾ ‘ਅਞ੍ਞਸ੍ਸਤ੍ਥਾਯਾ’ਤਿ ਵਤ੍ਤੁਂ ਓਕਾਸੋਯੇਵ ਨਤ੍ਥਿ, ਤਸ੍ਮਾ ਨ ਵੁਤ੍ਤ’’ਨ੍ਤਿ ਕਥਿਤਂ. ਇਧ ‘‘ਅਞ੍ਞਸ੍ਸਤ੍ਥਾਯਾ’’ਤਿ ਅਵੁਤ੍ਤਤ੍ਤਾ ਅਞ੍ਞੇਸਂ ਅਤ੍ਥਾਯ ਞਾਤਕਪਵਾਰਿਤੇਸੁ ਅਧਿਕਂ ਵਿਞ੍ਞਾਪੇਨ੍ਤਸ੍ਸ ਆਪਤ੍ਤੀਤਿ ਚੇ? ਨ, ਤਤ੍ਥ ਪੁਰਿਮਸਿਕ੍ਖਾਪਦੇਨੇਵ ਅਨਾਪਤ੍ਤਿਸਿਦ੍ਧਿਤੋ. ਤਤੁਤ੍ਤਰਿਤਾ, ਅਚ੍ਛਿਨ੍ਨਾਦਿਕਾਰਣਤਾ, ਅਞ੍ਞਾਤਕਵਿਞ੍ਞਤ੍ਤਿ, ਤਾਯ ਚ ਪਟਿਲਾਭੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ.

ਤਤੁਤ੍ਤਰਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੮. ਪਠਮਉਪਕ੍ਖਟਸਿਕ੍ਖਾਪਦਵਣ੍ਣਨਾ

੫੨੭. ਅਟ੍ਠਮੇ ਅਪਿ ਮਯ੍ਯਾਤਿ ਪਾਠੇਪਿ ਸੋਯੇਵਤ੍ਥੋ. ਅਯ੍ਯਾਤਿ ਪਨ ਬਹੁਵਚਨੇਨ ਆਮਨ੍ਤਨਂ ਕਤਂ.

੫੨੮-੫੨੯. ਅਪਦਿਸ੍ਸਾਤਿ ‘‘ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਸ੍ਸਾਮੀ’’ਤਿ ਏਵਂ ਅਪਦਿਸਿਤ੍ਵਾ. ਪਚ੍ਚਯਂ ਕਤ੍ਵਾਤਿ ਕਾਰਣਂ ਕਤ੍ਵਾ. ਉਦ੍ਦਿਸ੍ਸਾਤਿ ਏਤ੍ਥ ਯੋ ਕਤ੍ਤਾਤਿ ‘‘ਉਦ੍ਦਿਸ੍ਸਾ’’ਤਿ ਇਮਿਨਾ ਵੁਤ੍ਤਉਦ੍ਦਿਸਨਕਿਰਿਯਾਯ ਯੋ ਕਤ੍ਤਾ. ਚੀਵਰਂ ਚੇਤਾਪੇਨ੍ਤਿ ਪਰਿਵਤ੍ਤੇਨ੍ਤਿ ਏਤੇਨਾਤਿ ਚੀਵਰਚੇਤਾਪਨ੍ਨਂ. ਨ-ਕਾਰਾਗਮਂ ਕਤ੍ਵਾ ਚੀਵਰਚੇਤਾਪਨ੍ਨਨ੍ਤਿ ਵੁਤ੍ਤਂ, ‘‘ਚੀਵਰਚੇਤਾਪਨ’’ਨ੍ਤਿਪਿ ਪਠਨ੍ਤਿ. ਪਚੁਰਵੋਹਾਰਵਸੇਨਾਤਿ ਯੇਭੁਯ੍ਯਵੋਹਾਰਵਸੇਨ. ਯੇਭੁਯ੍ਯਵਸੇਨ ਹਿ ਘਰਸਾਮਿਕਂ ਦਟ੍ਠੁਕਾਮਾ ਤਸ੍ਸ ਘਰਂ ਗਚ੍ਛਨ੍ਤੀਤਿ ਤਥੇਵ ਬਹੁਲਂ ਵੋਹਾਰੋ. ਬ੍ਯਞ੍ਜਨਮਤ੍ਤਮੇਵਾਤਿ ਅਤ੍ਥੋ ਨੇਤਬ੍ਬੋ ਨਤ੍ਥੀਤਿ ਅਧਿਪ੍ਪਾਯੋ.

੫੩੧. ਸਮਕੇਪਿ ਪਨ ਅਨਾਪਤ੍ਤੀਤਿ ਯਦਗ੍ਘਨਕਂ ਸੋ ਦਾਤੁਕਾਮੋ ਹੋਤਿ, ਤਦਗ੍ਘਨਕੇ ਅਨਾਪਤ੍ਤਿ ਮੂਲਂ ਵਡ੍ਢੇਤ੍ਵਾ ਅਧਿਕਵਿਧਾਨਂ ਅਨਾਪਨ੍ਨਤ੍ਤਾ. ਏਤ੍ਥ ਚ ‘‘ਦਾਤੁਕਾਮੋਮ੍ਹੀ’’ਤਿ ਅਤ੍ਤਨੋ ਸਨ੍ਤਿਕੇ ਅਵੁਤ੍ਤੇਪਿ ਦਾਤੁਕਾਮਤਂ ਸੁਤ੍ਵਾ ਯਦਗ੍ਘਨਕਂ ਸੋ ਦਾਤੁਕਾਮੋ ਹੋਤਿ, ਤਦਗ੍ਘਨਕਂ ਆਹਰਾਪੇਤੁਂ ਵਟ੍ਟਤਿ. ਅਗ੍ਘਵਡ੍ਢਨਕਞ੍ਹਿ ਇਦਂ ਸਿਕ੍ਖਾਪਦਨ੍ਤਿ ਏਤ੍ਥ ਅਗ੍ਘਵਡ੍ਢਨਂ ਏਤਸ੍ਸ ਅਤ੍ਥੀਤਿ ਅਗ੍ਘਵਡ੍ਢਨਕਂ, ਅਗ੍ਘਵਡ੍ਢਨਂ ਸਨ੍ਧਾਯ ਇਦਂ ਸਿਕ੍ਖਾਪਦਂ ਪਞ੍ਞਤ੍ਤਨ੍ਤਿ ਅਧਿਪ੍ਪਾਯੋ. ਚੀਵਰਂ ਦੇਹੀਤਿ ਸਙ੍ਘਾਟਿਆਦੀਸੁ ਯਂਕਿਞ੍ਚਿ ਚੀਵਰਂ ਸਨ੍ਧਾਯ ਵਦਤਿ. ਚੀਵਰੇ ਭਿਯ੍ਯੋਕਮ੍ਯਤਾ, ਅਞ੍ਞਾਤਕਵਿਞ੍ਞਤ੍ਤਿ, ਤਾਯ ਚ ਪਟਿਲਾਭੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਪਠਮਉਪਕ੍ਖਟਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫੩੨. ਦੁਤਿਯਉਪਕ੍ਖਟੇ ਵਤ੍ਤਬ੍ਬਂ ਨਤ੍ਥਿ.

੧੦. ਰਾਜਸਿਕ੍ਖਾਪਦਵਣ੍ਣਨਾ

੫੩੭-੫੩੯. ਰਾਜਸਿਕ੍ਖਾਪਦੇ ਪਨ ‘‘ਅਜ੍ਜਣ੍ਹੋ’’ਤਿ ਪਾਠੇ ‘‘ਅਜ੍ਜੁਣ੍ਹੋ’’ਤਿਪਿ ਪਠਨ੍ਤਿ. ਭੋਗੋਤਿ ਭੁਞ੍ਜਿਤਬ੍ਬੋ. ਯਂ ਵੁਤ੍ਤਂ ਮਾਤਿਕਾਟ੍ਠਕਥਾਯਂ ‘‘ਇਮਿਨਾ ਚੀਵਰਚੇਤਾਪਨ੍ਨੇਨ ਚੀਵਰਂ ਚੇਤਾਪੇਤ੍ਵਾ ਇਤ੍ਥਨ੍ਨਾਮਂ ਭਿਕ੍ਖੁਂ ਚੀਵਰੇਨ ਅਚ੍ਛਾਦੇਹੀਤਿ ਇਦਂ ਆਗਮਨਸੁਦ੍ਧਿਂ ਦਸ੍ਸੇਤੁਂ ਵੁਤ੍ਤਂ. ਸਚੇ ਹਿ ‘ਇਦਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦੇਹੀ’ਤਿ ਪੇਸੇਯ੍ਯ, ਆਗਮਨਸ੍ਸ ਅਸੁਦ੍ਧਤ੍ਤਾ ਅਕਪ੍ਪਿਯਵਤ੍ਥੁਂ ਆਰਬ੍ਭ ਭਿਕ੍ਖੁਨਾ ਕਪ੍ਪਿਯਕਾਰਕੋਪਿ ਨਿਦ੍ਦਿਸਿਤਬ੍ਬੋ ਨ ਭਵੇਯ੍ਯਾ’’ਤਿ, ਤਤ੍ਥ ਆਗਮਨਸ੍ਸ ਸੁਦ੍ਧਿਯਾ ਵਾ ਅਸੁਦ੍ਧਿਯਾ ਵਾ ਵਿਸੇਸਪ੍ਪਯੋਜਨਂ ਨ ਦਿਸ੍ਸਤਿ. ਸਤਿਪਿ ਹਿ ਆਗਮਨਸ੍ਸ ਅਸੁਦ੍ਧਭਾਵੇ ਦੂਤੋ ਅਤ੍ਤਨੋ ਕੁਸਲਤਾਯ ਕਪ੍ਪਿਯਵੋਹਾਰੇਨ ਵਦਤਿ, ‘‘ਕਪ੍ਪਿਯਕਾਰਕੋ ਨ ਨਿਦ੍ਦਿਸਿਤਬ੍ਬੋ’’ਤਿ ਇਦਂ ਨਤ੍ਥਿ, ਨ ਚ ਦੂਤੇਨ ਕਪ੍ਪਿਯਵੋਹਾਰਵਸੇਨ ਵੁਤ੍ਤੇ ਦਾਯਕੇਨ ਇਦਂ ਕਥਂ ਪੇਸਿਤਨ੍ਤਿ ਈਦਿਸੀ ਵਿਚਾਰਣਾ ਉਪਲਬ੍ਭਤਿ, ਅਵਿਚਾਰੇਤ੍ਵਾ ਚ ਤਂ ਨ ਸਕ੍ਕਾ ਜਾਨਿਤੁਂ, ਯਦਿ ਪਨ ਆਗਮਨਸ੍ਸ ਅਸੁਦ੍ਧਤ੍ਤਾ ਕਪ੍ਪਿਯਕਾਰਕੋ ਨਿਦ੍ਦਿਸਿਤਬ੍ਬੋ ਨ ਭਵੇਯ੍ਯ, ਚੀਵਰਾਨਂ ਅਤ੍ਥਾਯ ਦੂਤਸ੍ਸ ਹਤ੍ਥੇ ਅਕਪ੍ਪਿਯਵਤ੍ਥੁਸ੍ਮਿਂ ਪੇਸਿਤੇ ਸਬ੍ਬਤ੍ਥ ਦਾਯਕੇਨ ਕਥਂ ਪੇਸਿਤਨ੍ਤਿ ਪੁਚ੍ਛਿਤ੍ਵਾਵ ਕਪ੍ਪਿਯਕਾਰਕੋ ਨਿਦ੍ਦਿਸਿਤਬ੍ਬੋ ਭਵੇਯ੍ਯ. ਤਸ੍ਮਾ ਅਸਤਿਪਿ ਆਗਮਨਸੁਦ੍ਧਿਯਂ ਸਚੇ ਸੋ ਦੂਤੋ ਅਤ੍ਤਨੋ ਕੁਸਲਤਾਯ ਕਪ੍ਪਿਯਵੋਹਾਰਵਸੇਨ ਵਦਤਿ, ਦੂਤਸ੍ਸੇਵ ਵਚਨਂ ਗਹੇਤਬ੍ਬਂ. ਯਦਿ ਹਿ ਆਗਮਨਸੁਦ੍ਧਿਯੇਵੇਤ੍ਥ ਪਮਾਣਂ, ਮੂਲਸਾਮਿਕੇਨ ਕਪ੍ਪਿਯਵੋਹਾਰਵਸੇਨ ਪੇਸਿਤਸ੍ਸ ਦੂਤਸ੍ਸ ਅਕਪ੍ਪਿਯਵੋਹਾਰਵਸੇਨ ਵਦਤੋਪਿ ਕਪ੍ਪਿਯਕਾਰਕੋ ਨਿਦ੍ਦਿਸਿਤਬ੍ਬੋ ਭਵੇਯ੍ਯ, ਤਸ੍ਮਾ ਸਬ੍ਬਤ੍ਥ ਦੂਤਵਚਨਮੇਵ ਪਮਾਣਨ੍ਤਿ ਗਹੇਤਬ੍ਬਂ.

ਇਮਿਨਾ ਚੀਵਰਚੇਤਾਪਨ੍ਨੇਨਾਤਿਆਦਿਨਾ ਪਨ ਇਮਮਤ੍ਥਂ ਦਸ੍ਸੇਤਿ – ਕਪ੍ਪਿਯ ਵਸੇਨ ਆਗਤਮ੍ਪਿ ਚੀਵਰਮੂਲਂ ਈਦਿਸੇਨ ਦੂਤਵਚਨੇਨ ਅਕਪ੍ਪਿਯਂ ਹੋਤਿ, ਤਸ੍ਮਾ ਤਂ ਪਟਿਕ੍ਖਿਪਿਤਬ੍ਬਨ੍ਤਿ. ਤੇਨੇਵਾਹ – ‘‘ਤੇਨ ਭਿਕ੍ਖੁਨਾ ਸੋ ਦੂਤੋ ਏਵਮਸ੍ਸ ਵਚਨੀਯੋ’’ਤਿਆਦਿ. ਸੁਵਣ੍ਣਂ, ਰਜਤਂ, ਕਹਾਪਣੋ, ਮਾਸਕੋਤਿ ਇਮਾਨਿ ਹਿ ਚਤ੍ਤਾਰਿ ਨਿਸ੍ਸਗ੍ਗਿਯਵਤ੍ਥੂਨਿ, ਮੁਤ੍ਤਾ, ਮਣਿ, ਵੇਲ਼ੁਰਿਯੋ, ਸਙ੍ਖੋ, ਸਿਲਾ, ਪਵਾਲ਼ਂ, ਲੋਹਿਤਙ੍ਕੋ, ਮਸਾਰਗਲ੍ਲਂ, ਸਤ੍ਤ ਧਞ੍ਞਾਨਿ, ਦਾਸਿਦਾਸਂ, ਖੇਤ੍ਤਂ, ਵਤ੍ਥੁ, ਪੁਪ੍ਫਾਰਾਮਫਲਾਰਾਮਾਦਯੋਤਿ ਇਮਾਨਿ ਦੁਕ੍ਕਟਵਤ੍ਥੂਨਿ ਚ ਅਤ੍ਤਨੋ ਵਾ ਚੇਤਿਯਸਙ੍ਘਗਣਪੁਗ੍ਗਲਾਨਂ ਵਾ ਅਤ੍ਥਾਯ ਸਮ੍ਪਟਿਚ੍ਛਿਤੁਂ ਨ ਵਟ੍ਟਨ੍ਤਿ, ਤਸ੍ਮਾ ਤਂ ਸਾਦਿਤੁਂ ਨ ਵਟ੍ਟਤੀਤਿ ਦਸ੍ਸਨਤ੍ਥਂ ‘‘ਨ ਖੋ ਮਯਂ, ਆਵੁਸੋ, ਚੀਵਰਚੇਤਾਪਨ੍ਨਂ ਪਟਿਗ੍ਗਣ੍ਹਾਮਾ’’ਤਿ ਵੁਤ੍ਤਂ, ‘‘ਚੀਵਰਞ੍ਚ ਖੋ ਮਯਂ ਪਟਿਗ੍ਗਣ੍ਹਾਮਾ’’ਤਿ ਇਦਂ ਪਨ ਅਤ੍ਤਾਨਂ ਉਦ੍ਦਿਸ੍ਸ ਆਭਤਤ੍ਤਾ ਵਤ੍ਤੁਂ ਵਟ੍ਟਤਿ, ਤਸ੍ਮਾ ਵੁਤ੍ਤਂ. ‘‘ਵੇਯ੍ਯਾਵਚ੍ਚਕਰੋ ਨਿਦ੍ਦਿਸਿਤਬ੍ਬੋ’’ਤਿ ਇਦਂ ‘‘ਅਤ੍ਥਿ ਪਨਾਯਸ੍ਮਤੋ ਕੋਚਿ ਵੇਯ੍ਯਾਵਚ੍ਚਕਰੋ’’ਤਿ ਕਪ੍ਪਿਯਵਚਨੇਨ ਵੁਤ੍ਤਤ੍ਤਾ ਅਨੁਞ੍ਞਾਤਂ. ਸਚੇ ਪਨ ਦੂਤੋ ‘‘ਕੋ ਇਮਂ ਗਣ੍ਹਾਤੀ’’ਤਿ ਵਾ ‘‘ਕਸ੍ਸ ਦੇਮੀ’’ਤਿ ਵਾ ਵਦਤਿ, ਨ ਨਿਦ੍ਦਿਸਿਤਬ੍ਬੋ. ‘‘ਆਰਾਮਿਕੋ ਵਾ ਉਪਾਸਕੋ ਵਾ’’ਤਿ ਇਦਂ ਸਾਰੁਪ੍ਪਤਾਯ ਵੁਤ੍ਤਂ, ਠਪੇਤ੍ਵਾ ਪਨ ਪਞ੍ਚ ਸਹਧਮ੍ਮਿਕੇ ਯੋ ਕੋਚਿ ਕਪ੍ਪਿਯਕਾਰਕੋ ਵਟ੍ਟਤਿ. ‘‘ਏਸੋ ਖੋ, ਆਵੁਸੋ, ਭਿਕ੍ਖੂਨਂ ਵੇਯ੍ਯਾਵਚ੍ਚਕਰੋ’’ਤਿ ਇਦਂ ਭਿਕ੍ਖੁਸ੍ਸ ਕਪ੍ਪਿਯਵਚਨਦਸ੍ਸਨਤ੍ਥਂ ਵੁਤ੍ਤਂ. ਏਵਮੇਵ ਹਿ ਵਤ੍ਤਬ੍ਬਂ, ‘‘ਏਤਸ੍ਸ ਦੇਹੀ’’ਤਿਆਦਿ ਨ ਵਤ੍ਤਬ੍ਬਂ. ਸੋ ਵਾ ਚੇਤਾਪੇਸ੍ਸਤਿ ਵਾਤਿ ਏਤ੍ਥ ਏਕੋ ਵਾ-ਸਦ੍ਦੋ ਪਦਪੂਰਣੋ, ‘‘ਸਞ੍ਞਤ੍ਤੋ ਸੋ ਮਯਾ’’ਤਿਆਦਿ ਪਨ ਦੂਤੇਨ ਏਵਂ ਆਰੋਚਿਤੇਯੇਵ ਤਂ ਚੋਦੇਤੁਂ ਵਟ੍ਟਤਿ, ਨੇਵਾਸ੍ਸ ਹਤ੍ਥੇ ਦਤ੍ਵਾ ਗਤਮਤ੍ਤਕਾਰਣੇਨਾਤਿ ਦਸ੍ਸਨਤ੍ਥਂ ਵੁਤ੍ਤਂ.

ਏਤਾਨਿ ਹਿ ਵਚਨਾਨਿ…ਪੇ… ਨ ਵਤ੍ਤਬ੍ਬੋਤਿ ਏਤ੍ਥ ‘‘ਏਵਂ ਵਦਨ੍ਤੋ ਪਟਿਕ੍ਖਿਤ੍ਤਸ੍ਸ ਕਤਤ੍ਤਾ ਵਤ੍ਤਭੇਦੇ ਦੁਕ੍ਕਟਂ ਆਪਜ੍ਜਤਿ, ਚੋਦਨਾ ਪਨ ਹੋਤਿਯੇਵਾ’’ਤਿ ਮਹਾਗਣ੍ਠਿਪਦੇ ਮਜ੍ਝਿਮਗਣ੍ਠਿਪਦੇ ਚ ਵੁਤ੍ਤਂ. ਉਦ੍ਦਿਟ੍ਠਚੋਦਨਾਪਰਿਚ੍ਛੇਦਂ ਦਸ੍ਸੇਤ੍ਵਾਤਿ ‘‘ਦੁਤਿਯਮ੍ਪਿ ਵਤ੍ਤਬ੍ਬੋ’’ਤਿਆਦਿਨਾ ਦਸ੍ਸੇਤ੍ਵਾ. ਪੁਚ੍ਛਿਯਮਾਨੋਤਿ ਏਤ੍ਥ ਪੁਚ੍ਛਿਯਮਾਨੇਨਾਤਿ ਅਤ੍ਥੋ ਗਹੇਤਬ੍ਬੋਤਿ ਆਹ ‘‘ਕਰਣਤ੍ਥੇ ਪਚ੍ਚਤ੍ਤਵਚਨ’’ਨ੍ਤਿ. ਆਗਤਕਾਰਣਂ ਭਞ੍ਜਤੀਤਿ ਆਗਤਕਾਰਣਂ ਵਿਨਾਸੇਤਿ.

ਏਤ੍ਥ ਕੇਚਿ ਵਦਨ੍ਤਿ ‘‘ਆਗਤਕਾਰਣਂ ਨਾਮ ਚੀਵਰਗ੍ਗਹਣਂ, ਤਂ ਭਞ੍ਜਤੀਤਿ ਵੁਤ੍ਤਤ੍ਤਾ ਪੁਨ ਤਂ ਚੀਵਰਂ ਯੇਨ ਕੇਨਚਿ ਆਕਾਰੇਨ ਗਹੇਤੁਂ ਨ ਵਟ੍ਟਤੀ’’ਤਿ. ਕੇਚਿ ਪਨ ‘‘ਆਗਤਕਾਰਣਂ ਨਾਮ ਕਾਯਵਾਚਾਹਿ ਚੋਦਨਾ, ਤਂ ਭਞ੍ਜਤੀਤਿ ਵੁਤ੍ਤਤ੍ਤਾ ਪੁਨ ਤਂ ਯੇਨ ਕੇਨਚਿ ਆਕਾਰੇਨ ਚੋਦੇਤੁਂ ਨ ਲਭਤਿ. ਸਚੇ ਸਯਮੇਵ ਦੇਤਿ, ਮੂਲਸਾਮਿਕੋ ਵਾ ਦਾਪੇਤਿ, ਗਹੇਤੁਂ ਵਟ੍ਟਤੀ’’ਤਿ ਵਦਨ੍ਤਿ. ਅਪਰੇ ਪਨ ‘‘ਆਗਤਕਾਰਣਂ ਨਾਮ ਠਾਨਂ, ਤਂ ਭਞ੍ਜਤੀਤਿ ਵੁਤ੍ਤਤ੍ਤਾ ਯਥਾ ‘ਅਤ੍ਥੋ ਮੇ, ਆਵੁਸੋ, ਚੀਵਰੇਨਾ’ਤਿ ਏਕਾਯ ਚੋਦਨਾਯ ਦ੍ਵੇ ਠਾਨਾਨਿ ਭਞ੍ਜਤਿ, ਏਵਮਿਧਾਪਿ ਸਚੇ ਆਸਨੇ ਨਿਸੀਦਤਿ, ਏਕਾਯ ਨਿਸਜ੍ਜਾਯ ਦ੍ਵੇ ਠਾਨਾਨਿ ਭਞ੍ਜਤਿ. ਆਮਿਸਂ ਚੇ ਪਟਿਗ੍ਗਣ੍ਹਾਤਿ, ਏਕੇਨ ਪਟਿਗ੍ਗਹਣੇਨ ਦ੍ਵੇ ਠਾਨਾਨਿ ਭਞ੍ਜਤਿ. ਧਮ੍ਮਂ ਚੇ ਭਾਸਤਿ, ਧਮ੍ਮਦੇਸਨਾਸਿਕ੍ਖਾਪਦੇ ਵੁਤ੍ਤਪਰਿਚ੍ਛੇਦਾਯ ਏਕਾਯ ਵਾਚਾਯ ਦ੍ਵੇ ਠਾਨਾਨਿ ਭਞ੍ਜਤੀ’’ਤਿ ਵਦਨ੍ਤਿ. ਇਮੇਸਂ ਪਨ ਸਬ੍ਬੇਸਮ੍ਪਿ ਵਾਦਂ ‘‘ਅਯੁਤ੍ਤ’’ਨ੍ਤਿ ਪਟਿਕ੍ਖਿਪਿਤ੍ਵਾ ਤੀਸੁਪਿ ਗਣ੍ਠਿਪਦੇਸੁ ਇਦਂ ਵੁਤ੍ਤਂ ‘‘ਆਗਤਕਾਰਣਂ ਨਾਮ ਠਾਨਮੇਵ, ਤਸ੍ਮਾ ‘ਨ ਕਤ੍ਤਬ੍ਬ’ਨ੍ਤਿ ਵਾਰਿਤਸ੍ਸ ਕਤਤ੍ਤਾ ਨਿਸਜ੍ਜਾਦੀਸੁ ਕਤੇਸੁ ਛਸੁ ਠਾਨੇਸੁ ਏਕਂ ਠਾਨਂ ਭਞ੍ਜਤੀ’’ਤਿ.

ਤਤ੍ਰ ਤਤ੍ਰ ਠਾਨੇ ਤਿਟ੍ਠਤੀਤਿ ਇਦਂ ਚੋਦਕਸ੍ਸ ਠਿਤਟ੍ਠਾਨਤੋ ਅਪਕ੍ਕਮ੍ਮ ਤਤ੍ਰ ਤਤ੍ਰ ਉਦ੍ਦਿਸ੍ਸ ਠਾਨਂਯੇਵ ਸਨ੍ਧਾਯ ਵੁਤ੍ਤਂ. ‘‘ਸਾਮਂ ਵਾ ਗਨ੍ਤਬ੍ਬਂ, ਦੂਤੋ ਵਾ ਪਾਹੇਤਬ੍ਬੋ’’ਤਿ ਇਦਂ ਸਭਾਵਤੋ ਚੋਦੇਤੁਂ ਅਨਿਚ੍ਛਨ੍ਤੇਨਪਿ ਕਾਤਬ੍ਬਮੇਵਾਤਿ ਵਦਨ੍ਤਿ. ਮੁਖਂ ਵਿਵਰਿਤ੍ਵਾ ਸਯਮੇਵ ਕਪ੍ਪਿਯਕਾਰਕਤ੍ਤਂ ਉਪਗਤੋਤਿ ਮੁਖਵੇਵਟਿਕਕਪ੍ਪਿਯਕਾਰਕੋ. ਅਵਿਚਾਰੇਤੁਕਾਮਤਾਯਾਤਿ ਇਮਸ੍ਮਿਂ ਪਕ੍ਖੇ ‘‘ਨਤ੍ਥਮ੍ਹਾਕਂ ਕਪ੍ਪਿਯਕਾਰਕੋ’’ਤਿ ਇਦਂ ‘‘ਤਾਦਿਸਂ ਕਰੋਨ੍ਤੋ ਕਪ੍ਪਿਯਕਾਰਕੋ ਨਤ੍ਥੀ’’ਤਿ ਇਮਿਨਾ ਅਧਿਪ੍ਪਾਯੇਨ ਵੁਤ੍ਤਂ.

‘‘ਮੇਣ੍ਡਕਸਿਕ੍ਖਾਪਦੇ ਵੁਤ੍ਤਨਯੇਨ ਪਟਿਪਜ੍ਜਿਤਬ੍ਬ’’ਨ੍ਤਿ ਵਤ੍ਵਾ ਇਦਾਨਿ ਤਂ ਮੇਣ੍ਡਕਸਿਕ੍ਖਾਪਦਂ ਦਸ੍ਸੇਨ੍ਤੋ ‘‘ਵੁਤ੍ਤਞ੍ਹੇਤ’’ਨ੍ਤਿਆਦਿਮਾਹ. ਇਦਮੇਵ ਹਿ ‘‘ਸਨ੍ਤਿ, ਭਿਕ੍ਖਵੇ, ਸਦ੍ਧਾ ਪਸਨ੍ਨਾ’’ਤਿਆਦਿਵਚਨਂ ਭੇਸਜ੍ਜਕ੍ਖਨ੍ਧਕੇ ਮੇਣ੍ਡਕਵਤ੍ਥੁਸ੍ਮਿਂ (ਮਹਾਵ. ੨੯੯) ਵੁਤ੍ਤਤ੍ਤਾ ‘‘ਮੇਣ੍ਡਕਸਿਕ੍ਖਾਪਦ’’ਨ੍ਤਿ ਵੁਤ੍ਤਂ. ਤਤ੍ਥ ਹਿ ਮੇਣ੍ਡਕੇਨ ਨਾਮ ਸੇਟ੍ਠਿਨਾ –

‘‘ਸਨ੍ਤਿ, ਭਨ੍ਤੇ, ਮਗ੍ਗਾ ਕਨ੍ਤਾਰਾ ਅਪ੍ਪੋਦਕਾ ਅਪ੍ਪਭਕ੍ਖਾ, ਨ ਸੁਕਰਾ ਅਪਾਥੇਯ੍ਯੇਨ ਗਨ੍ਤੁਂ, ਸਾਧੁ, ਭਨ੍ਤੇ, ਭਗਵਾ ਭਿਕ੍ਖੂਨਂ ਪਾਥੇਯ੍ਯਂ ਅਨੁਜਾਨਾਤੂ’’ਤਿ –

ਯਾਚਿਤੇਨ ਭਗਵਤਾ –

‘‘ਅਨੁਜਾਨਾਮਿ, ਭਿਕ੍ਖਵੇ, ਪਾਥੇਯ੍ਯਂ ਪਰਿਯੇਸਿਤੁਂ. ਤਣ੍ਡੁਲੋ ਤਣ੍ਡੁਲਤ੍ਥਿਕੇਨ, ਮੁਗ੍ਗੋ ਮੁਗ੍ਗਤ੍ਥਿਕੇਨ, ਮਾਸੋ ਮਾਸਤ੍ਥਿਕੇਨ, ਲੋਣਂ ਲੋਣਤ੍ਥਿਕੇਨ, ਗੁਲ਼ੋ ਗੁਲ਼ਤ੍ਥਿਕੇਨ, ਤੇਲਂ ਤੇਲਤ੍ਥਿਕੇਨ, ਸਪ੍ਪਿ ਸਪ੍ਪਿਤ੍ਥਿਕੇਨਾ’’ਤਿ –

ਵਤ੍ਵਾ ਇਦਂ ਵੁਤ੍ਤਂ –

‘‘ਸਨ੍ਤਿ, ਭਿਕ੍ਖਵੇ, ਮਨੁਸ੍ਸਾ ਸਦ੍ਧਾ ਪਸਨ੍ਨਾ, ਤੇ ਕਪ੍ਪਿਯਕਾਰਕਾਨਂ ਹਤ੍ਥੇ ਹਿਰਞ੍ਞਂ ਉਪਨਿਕ੍ਖਿਪਨ੍ਤਿ ‘ਇਮਿਨਾ ਅਯ੍ਯਸ੍ਸ ਯਂ ਕਪ੍ਪਿਯਂ, ਤਂ ਦੇਥਾ’ਤਿ. ਅਨੁਜਾਨਾਮਿ, ਭਿਕ੍ਖਵੇ, ਯਂ ਤਤੋ ਕਪ੍ਪਿਯਂ, ਤਂ ਸਾਦਿਤੁਂ, ਨ ਤ੍ਵੇਵਾਹਂ ਭਿਕ੍ਖਵੇ ਕੇਨਚਿ ਪਰਿਯਾਯੇਨ ਜਾਤਰੂਪਰਜਤਂ ਸਾਦਿਤਬ੍ਬਂ ਪਰਿਯੇਸਿਤਬ੍ਬਨ੍ਤਿ ਵਦਾਮੀ’’ਤਿ.

ਹਿਰਞ੍ਞਂ ਉਪਨਿਕ੍ਖਿਪਨ੍ਤੀਤਿ ਏਤ੍ਥਾਪਿ ਭਿਕ੍ਖੁਸ੍ਸ ਆਰੋਚਨਂ ਅਤ੍ਥਿਯੇਵਾਤਿ ਗਹੇਤਬ੍ਬਂ. ਅਞ੍ਞਥਾ ਅਨਿਦ੍ਦਿਟ੍ਠਕਪ੍ਪਿਯਕਾਰਕਤ੍ਤਂ ਭਜਤੀਤਿ ਨ ਚੋਦੇਤਬ੍ਬੋ ਸਿਯਾ. ਯਦਿ ਮੂਲਂ ਸਨ੍ਧਾਯ ਚੋਦੇਤਿ, ਤਂ ਸਾਦਿਤਮੇਵ ਸਿਯਾਤਿ ਆਹ ‘‘ਮੂਲਂ ਅਸਾਦਿਯਨ੍ਤੇਨਾ’’ਤਿ.

‘‘ਅਞ੍ਞਾਤਕਅਪ੍ਪਵਾਰਿਤੇਸੁ ਵਿਯ ਪਟਿਪਜ੍ਜਿਤਬ੍ਬਨ੍ਤਿ ਇਦਂ ਅਤ੍ਤਨਾ ਚੋਦਨਾਠਾਨਞ੍ਚ ਨ ਕਾਤਬ੍ਬਨ੍ਤਿ ਦਸ੍ਸਨਤ੍ਥਂ ਵੁਤ੍ਤਂ. ਅਞ੍ਞਂ ਪਨ ਕਪ੍ਪਿਯਕਾਰਕਂ ਪੇਸੇਤ੍ਵਾ ਲੋਕਚਾਰਿਤ੍ਤਵਸੇਨ ਅਨੁਯੁਞ੍ਜਿਤ੍ਵਾਪਿ ਕਪ੍ਪਿਯਵਤ੍ਥੁਂ ਆਹਰਾਪੇਤੁਂ ਵਟ੍ਟਤਿ ਅਤ੍ਤਾਨਂ ਉਦ੍ਦਿਸ੍ਸ ਨਿਕ੍ਖਿਤ੍ਤਸ੍ਸ ਅਤ੍ਤਨੋ ਸਨ੍ਤਕਤ੍ਤਾ’’ਤਿ ਕੇਚਿ ਵਦਨ੍ਤਿ, ਤਂ ਅਟ੍ਠਕਥਾਯਂ ‘‘ਅਞ੍ਞਾਤਕਅਪ੍ਪਵਾਰਿਤੇਸੁ ਵਿਯ ਪਟਿਪਜ੍ਜਿਤਬ੍ਬਂ. ਸਚੇ ਸਯਮੇਵ ਚੀਵਰਂ ਆਨੇਤ੍ਵਾ ਦੇਨ੍ਤਿ, ਗਹੇਤਬ੍ਬਂ. ਨੋ ਚੇ, ਕਿਞ੍ਚਿ ਨ ਵਤ੍ਤਬ੍ਬਾ’’ਤਿ ਦਲ਼੍ਹਂ ਕਤ੍ਵਾ ਵੁਤ੍ਤਤ੍ਤਾ ਨ ਗਹੇਤਬ੍ਬਨ੍ਤਿ ਅਮ੍ਹਾਕਂ ਖਨ੍ਤਿ. ਨ ਹਿ ਅਞ੍ਞਾਤਕਅਪ੍ਪਵਾਰਿਤਂ ਸਯਂ ਅਵਿਞ੍ਞਾਪੇਤ੍ਵਾ ਅਞ੍ਞੇਨ ਵਿਞ੍ਞਾਪੇਤੁਂ ਵਟ੍ਟਤਿ, ਨ ਚ ਯਤ੍ਥ ਅਞ੍ਞਂ ਪੇਸੇਤ੍ਵਾ ਆਹਰਾਪੇਤੁਂ ਵਟ੍ਟਤਿ, ਤਤ੍ਥ ਸਯਂ ਗਨ੍ਤ੍ਵਾ ਨ ਆਹਰਾਪੇਤਬ੍ਬਨ੍ਤਿ ਸਕ੍ਕਾ ਵਤ੍ਥੁਂ. ਯਦਿ ਚੇਤ੍ਥ ਅਞ੍ਞੇਨ ਆਹਰਾਪੇਤੁਂ ਵਟ੍ਟਤਿ, ‘‘ਅਞ੍ਞਾਤਕਅਪ੍ਪਵਾਰਿਤੇਸੁ ਵਿਯ ਪਟਿਪਜ੍ਜਿਤਬ੍ਬ’’ਨ੍ਤਿਆਦਿਵਚਨਮੇਵ ਨਿਰਤ੍ਥਕਂ ਸਿਯਾ. ‘‘ਦੂਤੇਨਾ’’ਤਿ ਇਮਸ੍ਸ ਬ੍ਯਭਿਚਾਰਂ ਦਸ੍ਸੇਤਿ ‘‘ਸਯਂ ਆਹਰਿਤ੍ਵਾਪੀ’’ਤਿ. ਦਦਨ੍ਤੇਸੂਤਿ ਇਮਿਨਾ ਸਮ੍ਬਨ੍ਧੋ. ਪਿਣ੍ਡਪਾਤਾਦੀਨਂ ਅਤ੍ਥਾਯਾਤਿ ਇਮਿਨਾ ਪਨ ‘‘ਚੀਵਰਚੇਤਾਪਨ੍ਨ’’ਨ੍ਤਿ ਇਮਸ੍ਸ ਬ੍ਯਭਿਚਾਰਂ ਦਸ੍ਸੇਤਿ. ‘‘ਏਸੇਵ ਨਯੋ’’ਤਿ ਵੁਤ੍ਤਤ੍ਤਾ ਪਿਣ੍ਡਪਾਤਾਦੀਨਂ ਅਤ੍ਥਾਯ ਦਿਨ੍ਨੇਪਿ ਠਾਨਚੋਦਨਾਦਿ ਸਬ੍ਬਂ ਹੇਟ੍ਠਾ ਵੁਤ੍ਤਨਯੇਨੇਵ ਕਾਤਬ੍ਬਂ.

ਪਟਿਗ੍ਗਹਣੇਪਿ ਪਰਿਭੋਗੇਪਿ ਆਪਤ੍ਤੀਤਿ ਪਟਿਗ੍ਗਹਣੇ ਪਾਚਿਤ੍ਤਿਯਂ, ਪਰਿਭੋਗੇ ਦੁਕ੍ਕਟਂ. ਸ੍ਵੇਵ ਸਾਪਤ੍ਤਿਕੋਤਿ ਦੁਕ੍ਕਟਾਪਤ੍ਤਿਂ ਸਨ੍ਧਾਯ ਵਦਤਿ. ਇਦਞ੍ਚ ਅਟ੍ਠਕਥਾਪਮਾਣੇਨੇਵ ਗਹੇਤਬ੍ਬਂ. ‘‘ਪਰਸ੍ਸ ਨਿਦ੍ਦੋਸਭਾਵਦਸ੍ਸਨਤ੍ਥਂ ਸ੍ਵੇਵ ਸਾਪਤ੍ਤਿਕੋ ਸਦੋਸੋਤਿ ਵੁਤ੍ਤਂ ਹੋਤੀ’’ਤਿਪਿ ਵਦਨ੍ਤਿ. ‘‘ਚੋਦੇਤੀਤਿ ਵੁਤ੍ਤਤ੍ਤਾ ਪਨ ਆਪਤ੍ਤਿਯਾ ਚੋਦੇਤੀਤਿ ਕਤ੍ਵਾ ਸ੍ਵੇਵ ਸਾਪਤ੍ਤਿਕੋਤਿ ਇਦਂ ਦੁਕ੍ਕਟਂਯੇਵ ਸਨ੍ਧਾਯ ਵਤ੍ਤੁਂ ਯੁਤ੍ਤ’’ਨ੍ਤਿ ਤੀਸੁਪਿ ਗਣ੍ਠਿਪਦੇਸੁ ਵੁਤ੍ਤਂ. ਪਟਿਗ੍ਗਹਣੇਪਿ ਪਰਿਭੋਗੇਪਿ ਆਪਤ੍ਤਿਯੇਵਾਤਿ ਦੁਕ੍ਕਟਮੇਵ ਸਨ੍ਧਾਯ ਵੁਤ੍ਤਂ. ਤਲ਼ਾਕਸ੍ਸਪਿ ਖੇਤ੍ਤਸਙ੍ਗਹਿਤਤ੍ਤਾ ਤਸ੍ਸ ਪਟਿਗ੍ਗਹਣੇਪਿ ਆਪਤ੍ਤਿ ਵੁਤ੍ਤਾ. ਚਤ੍ਤਾਰੋ ਪਚ੍ਚਯੇ ਸਙ੍ਘੋ ਪਰਿਭੁਞ੍ਜਤੂਤਿ ਦੇਤੀਤਿ ਏਤ੍ਥ ‘‘ਭਿਕ੍ਖੁਸਙ੍ਘੋ ਚਤ੍ਤਾਰੋ ਪਚ੍ਚਯੇ ਪਰਿਭੁਞ੍ਚਤੁ, ਤਲ਼ਾਕਂ ਦਮ੍ਮੀ’’ਤਿ ਵਾ ‘‘ਚਤੁਪਚ੍ਚਯਪਰਿਭੋਗਤ੍ਥਂ ਤਲ਼ਾਕਂ ਦਮ੍ਮੀ’’ਤਿ ਵਾ ਵਦਤਿ, ਵਟ੍ਟਤਿਯੇਵ. ‘‘ਇਤੋ ਤਲ਼ਾਕਤੋ ਉਪ੍ਪਨ੍ਨੇ ਚਤ੍ਤਾਰੋ ਪਚ੍ਚਯੇ ਦਮ੍ਮੀ’’ਤਿ ਵੁਤ੍ਤੇ ਪਨ ਵਤ੍ਤਬ੍ਬਮੇਵ ਨਤ੍ਥਿ.

ਅਮ੍ਹਾਕਂ ਏਕਂ ਕਪ੍ਪਿਯਕਾਰਕਂ ਠਪੇਥਾਤਿ ਵੁਤ੍ਤੇਤਿ ਇਦਂ ਈਦਿਸਂਯੇਵ ਸਨ੍ਧਾਯ ਵੁਤ੍ਤਂ. ਕਪ੍ਪਿਯਕ੍ਕਮੇਨ ਸਮ੍ਪਟਿਚ੍ਛਿਤੇਸੁ ਖੇਤ੍ਤਤਲ਼ਾਕਾਦੀਸੁ ਪਨ ਅਵੁਤ੍ਤੇਪਿ ਕਪ੍ਪਿਯਕਾਰਕਂ ਠਪੇਤੁਂ ਲਬ੍ਭਤਿਯੇਵ. ਯਸ੍ਮਾ ਪਰਸਨ੍ਤਕਂ ਨਾਸੇਤੁਂ ਭਿਕ੍ਖੂਨਂ ਨ ਵਟ੍ਟਤਿ, ਤਸ੍ਮਾ ‘‘ਨ ਸਸ੍ਸਕਾਲੇ’’ਤਿ ਵੁਤ੍ਤਂ. ‘‘ਜਨਪਦਸ੍ਸ ਸਾਮਿਕੋਤਿ ਇਮਿਨਾਵ ਯੋ ਤਂ ਜਨਪਦਂ ਵਿਚਾਰੇਤਿ, ਤੇਨਪਿ ਅਚ੍ਛਿਨ੍ਦਿਤ੍ਵਾ ਦਿਨ੍ਨਂ ਵਟ੍ਟਤਿਯੇਵਾ’’ਤਿ ਵਦਨ੍ਤਿ. ਉਦਕਵਾਹਕਨ੍ਤਿ ਉਦਕਮਾਤਿਕਂ. ਕਪ੍ਪਿਯਵੋਹਾਰੇਪੀਤਿ ਏਤ੍ਥ ‘‘ਵਿਧਾਨਂ ਵਕ੍ਖਾਮਾ’’ਤਿ ਪਾਠਸੇਸੋ. ਉਦਕਵਸੇਨਾਤਿ ਉਦਕਪਰਿਭੋਗਤ੍ਥਂ. ਸੁਦ੍ਧਚਿਤ੍ਤਾਨਨ੍ਤਿ ਕੇਵਲਂ ਉਦਕਪਰਿਭੋਗਤ੍ਥਮੇਵਾਤਿ ਅਧਿਪ੍ਪਾਯੋ. ਅਲਜ੍ਜਿਨਾ ਕਾਰਾਪਿਤੇ ਵਤ੍ਤਬ੍ਬਮੇਵ ਨਤ੍ਥੀਤਿ ਆਹ ‘‘ਲਜ੍ਜੀਭਿਕ੍ਖੁਨਾ’’ਤਿ. ਪਕਤਿਭਾਗੋ ਨਾਮ ਇਮਸ੍ਮਿਂ ਰਟ੍ਠੇ ਚਤੁਅਮ੍ਬਣਮਤ੍ਤਂ. ਅਕਟ੍ਠਪੁਬ੍ਬਂ ਨਵਸਸ੍ਸਂ ਨਾਮ. ਅਪਰਿਚ੍ਛਿਨ੍ਨਭਾਗੇਤਿ ‘‘ਏਤ੍ਤਕੇ ਭੂਮਿਭਾਗੇ ਏਤ੍ਤਕੋ ਭਾਗੋ ਦਾਤਬ੍ਬੋ’’ਤਿ ਏਵਂ ਅਪਰਿਚ੍ਛਿਨ੍ਨਭਾਗੇ.

ਰਜ੍ਜੁਯਾ ਵਾ ਦਣ੍ਡੇਨ ਵਾਤਿ ਏਤ੍ਥ ‘‘ਪਾਦੇਹਿਪਿ ਮਿਨਿਤੁਂ ਨ ਵਟ੍ਟਤੀ’’ਤਿ ਵਦਨ੍ਤਿ. ਖਲੇ ਵਾ ਠਤ੍ਵਾ ਰਕ੍ਖਤੀਤਿ ਏਤ੍ਥ ਪਨ ਥੇਨੇਤ੍ਵਾ ਗਣ੍ਹਨ੍ਤੇ ਦਿਸ੍ਵਾ ‘‘ਮਾ ਗਣ੍ਹਥਾ’’ਤਿ ਨਿਵਾਰੇਨ੍ਤੋ ਰਕ੍ਖਤਿ ਨਾਮ. ਸਚੇ ਪਨ ਅਵਿਚਾਰੇਤ੍ਵਾ ਕੇਵਲਂ ਤੁਣ੍ਹੀਭੂਤੋਵ ਰਕ੍ਖਣਤ੍ਥਾਯ ਓਲੋਕੇਨ੍ਤੋ ਤਿਟ੍ਠਤਿ, ਵਟ੍ਟਤਿ. ਸਚੇਪਿ ਤਸ੍ਮਿਂ ਤੁਣ੍ਹੀਭੂਤੇ ਚੋਰਿਕਾਯ ਹਰਨ੍ਤਿ, ‘‘ਮਯਂ ਭਿਕ੍ਖੁਸਙ੍ਘਸ੍ਸ ਆਰੋਚੇਸ੍ਸਾਮਾ’’ਤਿ ਏਵਂ ਵਤ੍ਤੁਂ ਵਟ੍ਟਤੀਤਿ ਵਦਨ੍ਤਿ. ਨੀਹਰਾਪੇਤਿ ਪਟਿਸਾਮੇਤੀਤਿ ਏਤ੍ਥਾਪਿ ‘‘ਸਚੇ ਪਰਿਯਾਯੇਨ ਵਦਤਿ, ਵਟ੍ਟਤੀ’’ਤਿ ਵਦਨ੍ਤਿ. ਅਪੁਬ੍ਬਸ੍ਸ ਅਨੁਪ੍ਪਾਦਿਤਤ੍ਤਾ ਅਞ੍ਞੇਸਂ ਵਟ੍ਟਤੀਤਿ ਆਹ ‘‘ਤਸ੍ਸੇਵ ਤਂ ਅਕਪ੍ਪਿਯ’’ਨ੍ਤਿ.

ਨਨੁ ਚ ਦੁਬ੍ਬਿਚਾਰਿਤਮਤ੍ਤੇਨ ਤਸ੍ਸੇਵ ਤਂ ਅਕਪ੍ਪਿਯਂ, ਨ ਸਬ੍ਬੇਸਂ ਰੂਪਿਯਸਂਵੋਹਾਰੇ ਚਤੁਤ੍ਥਪਤ੍ਤੋ ਵਿਯ. ਵੁਤ੍ਤਞ੍ਹਿ ਤਤ੍ਥ (ਪਾਰਾ. ਅਟ੍ਠ. ੨.੫੮੯) ‘‘ਯੋ ਪਨ ਰੂਪਿਯਂ ਅਸਮ੍ਪਟਿਚ੍ਛਿਤ੍ਵਾ ‘ਥੇਰਸ੍ਸ ਪਤ੍ਤਂ ਕਿਣਿਤ੍ਵਾ ਦੇਹੀ’ਤਿ ਪਹਿਤਕਪ੍ਪਿਯਕਾਰਕੇਨ ਸਦ੍ਧਿਂ ਕਮ੍ਮਾਰਕੁਲਂ ਗਨ੍ਤ੍ਵਾ ਪਤ੍ਤਂ ਦਿਸ੍ਵਾ ‘ਇਮੇ ਕਹਾਪਣੇ ਗਹੇਤ੍ਵਾ ਇਮਂ ਦੇਹੀ’ਤਿ ਕਹਾਪਣੇ ਦਾਪੇਤ੍ਵਾ ਗਹਿਤੋ, ਅਯਂ ਪਤ੍ਤੋ ਏਤਸ੍ਸੇਵ ਭਿਕ੍ਖੁਨੋ ਨ ਵਟ੍ਟਤਿ ਦੁਬ੍ਬਿਚਾਰਿਤਤ੍ਤਾ, ਅਞ੍ਞੇਸਂ ਪਨ ਵਟ੍ਟਤਿ ਮੂਲਸ੍ਸ ਅਸਮ੍ਪਟਿਚ੍ਛਿਤਤ੍ਤਾ’’ਤਿ. ਤਸ੍ਮਾ ਯਂ ਤੇ ਆਹਰਨ੍ਤਿ, ਸਬ੍ਬੇਸਂ ਅਕਪ੍ਪਿਯਂ. ਕਸ੍ਮਾ? ਕਹਾਪਣਾਨਂ ਵਿਚਾਰਿਤਤ੍ਤਾਤਿ ਇਦਂ ਕਸ੍ਮਾ ਵੁਤ੍ਤਨ੍ਤਿ? ਏਤ੍ਥ ਕੇਚਿ ਵਦਨ੍ਤਿ ‘‘ਕਹਾਪਣੇ ਸਾਦਿਯਿਤ੍ਵਾ ਵਿਚਾਰਿਤਂ ਸਨ੍ਧਾਯ ਏਵਂ ਵੁਤ੍ਤ’’ਨ੍ਤਿ. ਸਙ੍ਘਿਕਤ੍ਤਾ ਚ ਨਿਸ੍ਸਜ੍ਜਿਤੁਂ ਨ ਸਕ੍ਕਾ, ਤਸ੍ਮਾ ਸਬ੍ਬੇਸਂ ਨ ਕਪ੍ਪਤੀਤਿ ਤੇਸਂ ਅਧਿਪ੍ਪਾਯੋ. ਕੇਚਿ ਪਨ ‘‘ਅਸਾਦਿਯਿਤ੍ਵਾਪਿ ਕਹਾਪਣਾਨਂ ਵਿਚਾਰਿਤਤ੍ਤਾ ਰੂਪਿਯਸਂਵੋਹਾਰੋ ਕਤੋ ਹੋਤਿ, ਸਙ੍ਘਿਕਤ੍ਤਾ ਚ ਨਿਸ੍ਸਜ੍ਜਿਤੁਂ ਨ ਸਕ੍ਕਾ, ਤਸ੍ਮਾ ਸਬ੍ਬੇਸਂ ਨ ਕਪ੍ਪਤੀ’’ਤਿ ਵਦਨ੍ਤਿ. ਗਣ੍ਠਿਪਦੇਸੁ ਪਨ ਤੀਸੁਪਿ ਇਦਂ ਵੁਤ੍ਤਂ ‘‘ਚਤੁਤ੍ਥਪਤ੍ਤੋ ਗਿਹਿਸਨ੍ਤਕਾਨਂਯੇਵ ਕਹਾਪਣਾਨਂ ਵਿਚਾਰਿਤਤ੍ਤਾ ਅਞ੍ਞੇਸਂ ਕਪ੍ਪਤਿ, ਇਧ ਪਨ ਸਙ੍ਘਿਕਾਨਂ ਵਿਚਾਰਿਤਤ੍ਤਾ ਸਬ੍ਬੇਸਂ ਨ ਕਪ੍ਪਤੀ’’ਤਿ. ਸਬ੍ਬੇਸਮ੍ਪਿ ਵਾਦੋ ਤੇਨ ਤੇਨ ਪਰਿਯਾਯੇਨ ਯੁਜ੍ਜਤਿਯੇਵ.

ਚਤੁਸਾਲਦ੍ਵਾਰੇਤਿ ਭੋਜਨਸਾਲਂ ਸਨ੍ਧਾਯ ਵੁਤ੍ਤਂ. ਪਰਿਯਾਯੇਨ ਕਥਿਤਤ੍ਤਾਤਿ ‘‘ਗਣ੍ਹਾ’’ਤਿ ਅਵਤ੍ਵਾ ‘‘ਸੀਮਾ ਗਤਾ’’ਤਿ ਪਰਿਯਾਯੇਨ ਕਥਿਤਤ੍ਤਾ. ਪਕਤਿਭੂਮਿਕਰਣਤ੍ਥਂ ‘‘ਹੇਟ੍ਠਾ ਗਹਿਤਂ ਪਂਸੁ’’ਨ੍ਤਿਆਦਿ ਵੁਤ੍ਤਂ. ਦਾਸਂ ਦਮ੍ਮੀਤਿ ਏਤ੍ਥ ‘‘ਮਨੁਸ੍ਸਂ ਦਮ੍ਮੀਤਿ ਵੁਤ੍ਤੇ ਵਟ੍ਟਤੀ’’ਤਿ ਵਦਨ੍ਤਿ. ਕੁਕ੍ਕੁਟਸੂਕਰਾ…ਪੇ… ਵਟ੍ਟਤੀਤਿ ਏਤ੍ਥ ਕੁਕ੍ਕੁਟਸੂਕਰੇਸੁ ਦੀਯਮਾਨੇਸੁ ‘‘ਇਮੇਹਿ ਅਮ੍ਹਾਕਂ ਅਤ੍ਥੋ ਨਤ੍ਥਿ, ਸੁਖਂ ਜੀਵਨ੍ਤੁ, ਅਰਞ੍ਞੇ ਵਿਸ੍ਸਜ੍ਜੇਥਾ’’ਤਿ ਵਤ੍ਤੁਂ ਵਟ੍ਟਤਿ. ‘‘ਖੇਤ੍ਤਵਤ੍ਥੁਪਟਿਗ੍ਗਹਣਾ ਪਟਿਵਿਰਤੋ ਹੋਤੀ’’ਤਿਆਦਿਵਚਨਤੋ (ਦੀ. ਨਿ. ੧.੧੦, ੧੯੪) ਖੇਤ੍ਤਾਦੀਨਂ ਪਟਿਗ੍ਗਹਣੇ ਅਯਂ ਸਬ੍ਬੋ ਵਿਨਿਚ੍ਛਯੋ ਵੁਤ੍ਤੋ. ਕਪ੍ਪਿਯਕਾਰਕਸ੍ਸ ਭਿਕ੍ਖੁਨਾ ਨਿਦ੍ਦਿਟ੍ਠਭਾਵੋ, ਦੂਤੇਨ ਅਪ੍ਪਿਤਤਾ, ਤਤੁਤ੍ਤਰਿ ਵਾਯਾਮੋ, ਤੇਨ ਵਾਯਾਮੇਨ ਪਟਿਲਾਭੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ.

ਰਾਜਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤੋ ਚੀਵਰਵਗ੍ਗੋ ਪਠਮੋ.