੯. ਦੁਤਿਯਦੁਟ੍ਠਦੋਸਸਿਕ੍ਖਾਪਦਵਣ੍ਣਨਾ

੩੯੧. ਨਵਮੇ ਦਿਸ੍ਵਾਤਿ ਅਜਿਕਾਯ ਵਿਪ੍ਪਟਿਪਜ੍ਜਨ੍ਤਂ ਛਗਲਕਂ ਦਿਸ੍ਵਾ. ਮੇਤ੍ਤਿਯਂ ਭਿਕ੍ਖੁਨਿਨ੍ਤਿ ਤਸ੍ਸਾ ਭਿਕ੍ਖੁਨਿਕਾਲਂ ਗਹੇਤ੍ਵਾ ਭੂਤਪੁਬ੍ਬਵੋਹਾਰੇਨ ਵੋਹਰਨ੍ਤਿ. ਵੇਲ਼ੁਵਨੇਯੇਵਾਤਿ ਥੇਰਸ੍ਸ ਭਿਕ੍ਖਾਚਾਰਵੇਲਂ ਅਗ੍ਗਹੇਤ੍ਵਾ ਤੇਹਿ ਵੁਤ੍ਤਭਤ੍ਤੁਦ੍ਦੇਸਵੇਲਂਯੇਵ ਸਨ੍ਧਾਯ ਵੁਤ੍ਤਂ. ਕਚ੍ਚਿ ਨੋਤਿ ਕਚ੍ਚਿ ਨੁ. ਏਤਮਤ੍ਥਂ ਆਰੋਚੇਸੁਨ੍ਤਿ ਅਞ੍ਞਭਾਗਿਯਸ੍ਸ ਅਧਿਕਰਣਸ੍ਸ ਕਞ੍ਚਿਦੇਸਂ ਲੇਸਮਤ੍ਤਂ ਉਪਾਦਾਯ ਪਾਰਾਜਿਕੇਨ ਧਮ੍ਮੇਨ ਅਨੁਦ੍ਧਂਸਿਤਭਾਵਂ ਆਰੋਚੇਸੁਂ.

ਅਞ੍ਞਭਾਗਸ੍ਸਾਤਿ ਅਞ੍ਞਕੋਟ੍ਠਾਸਸ੍ਸ, ਥੇਰਸ੍ਸ ਮਨੁਸ੍ਸਜਾਤਿਭਿਕ੍ਖੁਭਾਵਤੋ ਅਞ੍ਞਸ੍ਸ ਤਿਰਚ੍ਛਾਨਜਾਤਿਛਗਲਕਭਾਵਸਙ੍ਖਾਤਸ੍ਸ ਕੋਟ੍ਠਾਸਸ੍ਸਾਤਿ ਵੁਤ੍ਤਂ ਹੋਤਿ. ਇਦਨ੍ਤਿ ਸਾਮਞ੍ਞਤੋ ਨਪੁਂਸਕਨਿਦ੍ਦੇਸੇਨ ਛਗਲਕਂ ਨਿਦ੍ਦਿਸਤਿ, ਇਦਂ ਛਗਲਕਜਾਤਨ੍ਤਿ ਅਤ੍ਥੋ, ਅਯਂ ਛਗਲਕੋਤਿ ਵੁਤ੍ਤਂ ਹੋਤਿ. ਅਧਿਕਰਣਸਦ੍ਦਾਪੇਕ੍ਖੋ ਵਾ ਨਪੁਂਸਕਨਿਦ੍ਦੇਸੋ, ਇਦਂ ਛਗਲਕਸਙ੍ਖਾਤਂ ਅਧਿਕਰਣਨ੍ਤਿ ਵੁਤ੍ਤਂ ਹੋਤਿ. ਅਞ੍ਞਭਾਗੋਤਿ ਯਥਾਵੁਤ੍ਤਤਿਰਚ੍ਛਾਨਜਾਤਿਛਗਲਕਭਾਵਸਙ੍ਖਾਤੋ ਅਞ੍ਞਭਾਗੋ, ਅਞ੍ਞਕੋਟ੍ਠਾਸੋਤਿ ਅਤ੍ਥੋ. ਅਸ੍ਸਾਤਿ ਛਗਲਕਸ੍ਸ. ‘‘ਅਞ੍ਞਭਾਗਸਮ੍ਬਨ੍ਧੀ ਅਞ੍ਞਭਾਗਿਯ’’ਨ੍ਤਿ ਪਠਮਵਿਗ੍ਗਹਸ੍ਸ ਅਤ੍ਥੋ, ‘‘ਅਞ੍ਞਭਾਗਵਨ੍ਤਂ ਅਞ੍ਞਭਾਗਿਯ’’ਨ੍ਤਿ ਦੁਤਿਯਵਿਗ੍ਗਹਸ੍ਸ. ਦ੍ਵੀਹਿਪਿ ਵਿਗ੍ਗਹੇਹਿ ਅਞ੍ਞਭਾਗਿਯਨ੍ਤਿ ਛਗਲਕੋਵ ਵੁਤ੍ਤੋ. ਤਿਰਚ੍ਛਾਨਜਾਤਿਛਗਲਕਭਾਵਞ੍ਚ ਠਪੇਤ੍ਵਾ ਪਰਮਤ੍ਥਤੋ ਵਿਸੁਂ ਛਗਲਕੇ ਅਸਤਿਪਿ ‘‘ਪਟਿਮਾਯ ਸਰੀਰ’’ਨ੍ਤਿਆਦੀਸੁ ਵਿਯ ਅਭੇਦੇਪਿ ਭੇਦਕਪ੍ਪਨਾਯ ਪਵਤ੍ਤਲੋਕਵੋਹਾਰਵਸੇਨ ‘‘ਅਞ੍ਞਭਾਗਸ੍ਸ ਇਦਂ, ਅਞ੍ਞਭਾਗੋ ਵਾ ਅਸ੍ਸ ਅਤ੍ਥੀ’’ਤਿ ਵੁਤ੍ਤਂ.

ਇਦਾਨਿ ਦ੍ਵੀਹਿਪਿ ਵਿਗ੍ਗਹੇਹਿ ਵੁਤ੍ਤਮਤ੍ਥਂ ਵਿਤ੍ਥਾਰੇਤ੍ਵਾ ਦਸ੍ਸੇਨ੍ਤੋ ‘‘ਯੋ ਹਿ ਸੋ’’ਤਿਆਦਿਮਾਹ. ਸੋਤਿ ਸੋ ਛਗਲਕੋ. ਤਸ੍ਸ ‘‘ਹੋਤੀ’’ਤਿ ਇਮਿਨਾ ਸਮ੍ਬਨ੍ਧੋ. ਤਤੋਤਿ ਤਤੋ ਮਨੁਸ੍ਸਜਾਤਿਤੋ ਭਿਕ੍ਖੁਭਾਵਤੋ ਚ. ਸੋ ਵਾ ਅਞ੍ਞਭਾਗੋਤਿ ਯਥਾਵੁਤ੍ਤਤਿਰਚ੍ਛਾਨਜਾਤਿਛਗਲਕਭਾਵਸਙ੍ਖਾਤੋ ਅਞ੍ਞਭਾਗੋ. ਅਸ੍ਸਾਤਿ ਛਗਲਕਸ੍ਸ. ਸੋ ਛਗਲਕੋ ਅਞ੍ਞਭਾਗਿਯਸਙ੍ਖਾਤਂ ਲਭਤੀਤਿ ਯੋਜੇਤਬ੍ਬਂ. ‘‘ਅਧਿਕਰਣਨ੍ਤਿ ਆਧਾਰੋ, ਵਤ੍ਥੁ ਅਧਿਟ੍ਠਾਨ’’ਨ੍ਤਿ ਹੇਟ੍ਠਾ ਵੁਤ੍ਤਮਤ੍ਥਂ ਸਰੂਪਤੋ ਦਸ੍ਸੇਤੁਂ ‘‘ਯਸ੍ਮਾ ਚਾ’’ਤਿਆਦਿਮਾਹ. ਤੇਸਨ੍ਤਿ ਮੇਤ੍ਤਿਯਭੂਮਜਕਾਨਂ. ਇਮਨ੍ਤਿ ਛਗਲਕਂ. ਨਾਮਕਰਣਸਞ੍ਞਾਯਾਤਿ ਨਾਮਕਰਣਸਙ੍ਖਾਤਾਯ ਸਞ੍ਞਾਯ ਸੋ ਛਗਲਕੋ ਅਧਿਕਰਣਨ੍ਤਿ ਵੇਦਿਤਬ੍ਬੋਤਿ ਯੋਜੇਤਬ੍ਬਂ. ਤਞ੍ਹਿ ਸਨ੍ਧਾਯਾਤਿ ‘‘ਅਵਸ੍ਸਂ ਤੁਮ੍ਹੇਹਿ ਲੇਸੋ ਓਡ੍ਡਿਤੋ, ਕਿਂ ਵਦਥ, ਕਿਂ ਪਸ੍ਸਿਤ੍ਥਾ’’ਤਿ ਅਨੁਯੁਤ੍ਤੇਹਿ ਤੇਹਿ ਭਿਕ੍ਖੂਹਿ ‘‘ਛਗਲਕਸ੍ਸ ਵਿਪ੍ਪਟਿਪਤ੍ਤਿਂ ਦਿਸ੍ਵਾ ਦਬ੍ਬਸ੍ਸ ਨਾਮਂ ਤਸ੍ਸ ਕਰਿਮ੍ਹਾ’’ਤਿ ਵੁਤ੍ਤਤ੍ਤਾ ਤਸ੍ਸ ਨਾਮਕਰਣਸਞ੍ਞਾਯ ਅਧਿਟ੍ਠਾਨਭੂਤਂ ਤਂ ਛਗਲਕਂ ਸਨ੍ਧਾਯ. ਤੇ ਭਿਕ੍ਖੂਤਿ ਤੇ ਅਨੁਯੁਞ੍ਜਕਾ ਭਿਕ੍ਖੂ. ਆਪਤ੍ਤਿਲੇਸਮ੍ਪਿ ਪੁਗ੍ਗਲਸ੍ਮਿਂਯੇਵ ਆਰੋਪੇਤ੍ਵਾ ਵੁਤ੍ਤਤ੍ਤਾ ‘‘ਪੁਗ੍ਗਲਾਨਂਯੇਵ ਲੇਸਾ’’ਤਿ ਵੁਤ੍ਤਂ. ਪਦਭਾਜਨੇ ਪਨ…ਪੇ… ਵੇਦਿਤਬ੍ਬਨ੍ਤਿ ਇਮਿਨਾ ਨਾਮਕਰਣਸਞ੍ਞਾਯ ਆਧਾਰਭੂਤਸ੍ਸ ਛਗਲਕਸਙ੍ਖਾਤਸ੍ਸ ਅਧਿਕਰਣਸ੍ਸ ਅਵਚਨੇ ਕਾਰਣਂ ਵੁਤ੍ਤਂ.

੩੯੩. ‘‘ਅਞ੍ਞਭਾਗਿਯਸ੍ਸ ਅਧਿਕਰਣਸ੍ਸਾ’’ਤਿ ਏਤ੍ਥ ਪਾਲ਼ਿਆਗਤਅਧਿਕਰਣਸਦ੍ਦਪਤਿਰੂਪਕਂ ਅਞ੍ਞਂ ਅਧਿਕਰਣਸਦ੍ਦਂ ਪਾਲ਼ਿਆਗਤਤਦਞ੍ਞਸਾਧਾਰਣਤਾਯ ਉਭਯਪਦਤ੍ਥਂ ਉਦ੍ਧਰਿਤ੍ਵਾ ‘‘ਅਧਿਕਰਣਂ ਨਾਮ ਚਤ੍ਤਾਰਿ ਅਧਿਕਰਣਾਨੀ’’ਤਿ ਵੁਤ੍ਤਂ. ਅਤ੍ਥੁਦ੍ਧਾਰਵਸੇਨ ਹਿ ਅਤ੍ਥਂ ਦਸ੍ਸੇਨ੍ਤੇਨ ਪਾਲ਼ਿਯਂ ਆਗਤਸਦ੍ਦਪਤਿਰੂਪਕੋ ਅਞ੍ਞੋ ਸਦ੍ਦੋ ਉਭਯਪਦਤ੍ਥੋ ਉਦ੍ਧਰਿਤਬ੍ਬੋ, ਨ ਚ ਅਞ੍ਞਂ ਉਦ੍ਧਰਿਤ੍ਵਾ ਅਞ੍ਞਸ੍ਸ ਅਤ੍ਥੋ ਵਤ੍ਤਬ੍ਬੋ, ਤਸ੍ਮਾ ਪਾਲ਼ਿਆਗਤਅਧਿਕਰਣਸਦ੍ਦਪਤਿਰੂਪਕੋ ਅਞ੍ਞੋਯੇਵ ਉਭਯਪਦਤ੍ਥਸਾਧਾਰਣੋ ਅਧਿਕਰਣਸਦ੍ਦੋ ਉਦ੍ਧਟੋਤਿ ਦਟ੍ਠਬ੍ਬਂ. ਤੇਨੇਵਾਹ ‘‘ਅਧਿਕਰਣਨ੍ਤਿ ਵਚਨਸਾਮਞ੍ਞਤੋ ਅਤ੍ਥੁਦ੍ਧਾਰਵਸੇਨ ਪਵਤ੍ਤਾਨਿ ਚਤ੍ਤਾਰਿ ਅਧਿਕਰਣਾਨੀ’’ਤਿ. ਯਾ ਚ ਸਾ ਅਵਸਾਨੇ…ਪੇ… ਚੋਦਨਾ ਵੁਤ੍ਤਾਤਿ ਭਿਕ੍ਖੁ ਸਙ੍ਘਾਦਿਸੇਸਂ ਅਜ੍ਝਾਪਜ੍ਜਨ੍ਤੋ ਦਿਟ੍ਠੋ ਹੋਤਿ, ਸਙ੍ਘਾਦਿਸੇਸੇ ਸਙ੍ਘਾਦਿਸੇਸਦਿਟ੍ਠੀ ਹੋਤਿ, ਤਞ੍ਚੇ ਪਾਰਾਜਿਕੇਨ ਚੋਦੇਤੀਤਿਆਦਿਚੋਦਨਂ ਸਨ੍ਧਾਯ ਵਦਤਿ.

ਮੇਥੁਨਵੀਤਿਕ੍ਕਮਾਪਤ੍ਤਿਯੋ ਵਤ੍ਥੁਤੋ ਸਭਾਗਾ, ਇਤਰਾਸਂ ਪਨ ਅਦਿਨ੍ਨਾਦਾਨਾਦਿਆਪਤ੍ਤੀਨਂ ਸਮਾਨੇਪਿ ਪਾਰਾਜਿਕਾਪਤ੍ਤਿਭਾਵੇ ਵਤ੍ਥੁਤੋ ਵਿਸਭਾਗਾਤਿ ਆਹ ‘‘ਸਭਾਗਵਿਸਭਾਗਵਤ੍ਥੁਤੋ’’ਤਿ. ਸਭਾਵਸਰਿਕ੍ਖਾਸਰਿਕ੍ਖਤੋਤਿ ਸਭਾਵੇਨ ਸਦਿਸਾਸਦਿਸਭਾਵਤੋ. ਪਠਮਪਾਰਾਜਿਕਞ੍ਹਿ ਪਠਮਪਾਰਾਜਿਕਾਪਤ੍ਤਿਯਾ ਮੇਥੁਨਰਾਗੇਨ ਸਭਾਵਤੋ ਸਦਿਸਂ, ਦੋਸਸਮ੍ਪਯੁਤ੍ਤਮਨੁਸ੍ਸਵਿਗ੍ਗਹੇਨ ਅਸਦਿਸਂ. ਨਨੁ ਚ ‘‘ਆਪਤ੍ਤਾਧਿਕਰਣਂ ਆਪਤ੍ਤਾਧਿਕਰਣਸ੍ਸ ਸਿਯਾ ਤਬ੍ਭਾਗਿਯਂ, ਸਿਯਾ ਅਞ੍ਞਭਾਗਿਯ’’ਨ੍ਤਿ ਵੁਤ੍ਤਤ੍ਤਾ ਉਦ੍ਦੇਸਾਨੁਕ੍ਕਮੇਨ ਤਬ੍ਭਾਗਿਯਤਂ ਅਨਿਦ੍ਦਿਸਿਤ੍ਵਾ ਅਞ੍ਞਭਾਗਿਯਤਾ ਪਠਮਂ ਕਸ੍ਮਾ ਨਿਦ੍ਦਿਟ੍ਠਾਤਿ ਆਹ ‘‘ਆਦਿਤੋ ਪਟ੍ਠਾਯਾ’’ਤਿਆਦਿ. ਵੁਤ੍ਤਨਯੇਨੇਵਾਤਿ ‘‘ਸਭਾਗਵਿਸਭਾਗਵਤ੍ਥੁਤੋ’’ਤਿਆਦਿਨਾ ਵੁਤ੍ਤਨਯੇਨ.

‘‘ਸਙ੍ਘਕਮ੍ਮਾਨਿ ਨਿਸ੍ਸਾਯ ਉਪ੍ਪਨ੍ਨ’’ਨ੍ਤਿ ਵੁਤ੍ਤਤ੍ਤਾ ਸਙ੍ਘਕਮ੍ਮਤੋ ਕਿਚ੍ਚਾਧਿਕਰਣਂ ਵਿਸੁਂ ਵਿਯ ਦਿਸ੍ਸਤੀਤਿ ਆਹ ‘‘ਕਿਂ ਪਨਾ’’ਤਿਆਦਿ. ‘‘ਕਿਚ੍ਚਮੇਵ ਕਿਚ੍ਚਾਧਿਕਰਣ’’ਨ੍ਤਿ ਵੁਤ੍ਤਤ੍ਤਾ ‘‘ਸਙ੍ਘਕਮ੍ਮਾਨਮੇਵੇਤਂ ਅਧਿਵਚਨ’’ਨ੍ਤਿ ਵੁਤ੍ਤਂ. ਯਦਿ ਏਵਂ ‘‘ਸਙ੍ਘਕਮ੍ਮਾਨਿ ਨਿਸ੍ਸਾਯ ਉਪ੍ਪਨ੍ਨ’’ਨ੍ਤਿ ਕਸ੍ਮਾ ਵੁਤ੍ਤਨ੍ਤਿ ਆਹ ‘‘ਏਵਂ ਸਨ੍ਤੇਪੀ’’ਤਿਆਦਿ. ਤਸ੍ਸ ਤਸ੍ਸ ਸਙ੍ਘਕਮ੍ਮਸ੍ਸ ਭਗਵਤਾ ਵੁਤ੍ਤਂ ਇਤਿਕਤ੍ਤਬ੍ਬਤਾਲਕ੍ਖਣਂਯੇਵ ਤਤੋ ਸਙ੍ਘਕਮ੍ਮਸ੍ਸ ਨਿਪ੍ਫਜ੍ਜਨਤੋ ਫਲੂਪਚਾਰੇਨ ਸਙ੍ਘਕਮ੍ਮਨ੍ਤਿ ਵਤ੍ਤਬ੍ਬਤਂ ਅਰਹਤੀਤਿ ਆਹ ‘‘ਯਂ ਕਮ੍ਮਲਕ੍ਖਣਂ ਮਨਸਿ ਕਰੋਤਿ, ਤਂ ਨਿਸ੍ਸਾਯ ਉਪ੍ਪਜ੍ਜਨਤੋ’’ਤਿ. ਪਰਿਵਾਸਾਦਿਸਙ੍ਘਕਮ੍ਮਂ ਨਿਸ੍ਸਾਯ ਮਾਨਤ੍ਤਾਦੀਨਂ ਉਪ੍ਪਜ੍ਜਨਤੋ ਉਕ੍ਖੇਪਨੀਯਕਮ੍ਮਸੀਮਾਸਮ੍ਮੁਤਿਕਮ੍ਮਾਦੀਨਿ ਇਸ੍ਸਾਯ ਓਸਾਰਣਸੀਮਾਸਮੂਹਨਨਾਦਿਕਮ੍ਮਾਨਂ ਉਪ੍ਪਜ੍ਜਨਤੋ ਚ ‘‘ਪੁਰਿਮਂ ਪੁਰਿਮਂ ਸਙ੍ਘਕਮ੍ਮ’’ਨ੍ਤਿਆਦਿ ਵੁਤ੍ਤਂ.

੩੯੫-੪੦੦. ਸਵਤ੍ਥੁਕਂ ਕਤ੍ਵਾਤਿ ਪੁਗ੍ਗਲਾਧਿਟ੍ਠਾਨਂ ਕਤ੍ਵਾ. ਦੀਘਾਦਿਨੋਤਿ ਦੀਘਰਸ੍ਸਕਾਲ਼ਓਦਾਤਾਦਿਨੋ. ਦਿਟ੍ਠਾਦਿਨੋਤਿ ਦਿਟ੍ਠਸੁਤਾਦਿਨੋ. ਲੋਹਪਤ੍ਤਸਦਿਸੋਤਿ ਅਯੋਪਤ੍ਤਸਦਿਸੋ. ਅਙ੍ਗਾਨਿ ਪਠਮਦੁਟ੍ਠਦੋਸੇ ਵੁਤ੍ਤਸਦਿਸਾਨਿ, ਇਧ ਪਨ ਕਞ੍ਚਿਦੇਸਂ ਲੇਸਮਤ੍ਤਂ ਉਪਾਦਿਯਨਾ ਅਧਿਕਾ.

ਦੁਤਿਯਦੁਟ੍ਠਦੋਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.