੧੦. ਪਠਮਸਙ੍ਘਭੇਦਸਿਕ੍ਖਾਪਦਵਣ੍ਣਨਾ

੪੧੦. ਦਸਮੇ ਯੇ ਦੁਬ੍ਬਲਾ ਹੋਨ੍ਤਿ ਅਪ੍ਪਥਾਮਾ, ਨ ਸਕ੍ਕੋਨ੍ਤਿ ਅਰਞ੍ਞਕਾਦੀਨਿ ਸੇਵਨ੍ਤਾ ਦੁਕ੍ਖਸ੍ਸਨ੍ਤਂ ਕਾਤੁਂ, ਤੇ ਸਨ੍ਧਾਯਾਹ ‘‘ਬਹੂਨਂ ਕੁਲਪੁਤ੍ਤਾਨਂ ਮਗ੍ਗਨ੍ਤਰਾਯਾਯ ਸਂਵਤ੍ਤਨ੍ਤੀ’’ਤਿ. ਅਧਿਵਾਸਨਖਨ੍ਤਿਸਮ੍ਪਨ੍ਨੋਤਿ ‘‘ਖਮੋ ਹੋਤਿ ਸੀਤਸ੍ਸਾ’’ਤਿਆਦਿਨਾ ਵੁਤ੍ਤਸੀਤੁਣ੍ਹਾਦਿਸਹਨਲਕ੍ਖਣਾਯ ਖਨ੍ਤਿਯਾ ਸਮਨ੍ਨਾਗਤੋ. ਬ੍ਯਞ੍ਜਨਪਦਮੇਵ ਪਰਮਂ ਅਸ੍ਸਾਤਿ ਪਦਪਰਮੋ. ਯਸ੍ਸ ਹਿ ਪੁਗ੍ਗਲਸ੍ਸ ਬਹੁਮ੍ਪਿ ਸੁਣਤੋ ਬਹੁਮ੍ਪਿ ਭਣਤੋ ਬਹੁਮ੍ਪਿ ਧਾਰਯਤੋ ਬਹੁਮ੍ਪਿ ਵਾਚਯਤੋ ਨ ਤਾਯ ਜਾਤਿਯਾ ਧਮ੍ਮਾਭਿਸਮਯੋ ਹੋਤਿ, ਅਯਂ ‘‘ਪਦਪਰਮੋ’’ਤਿ ਵੁਚ੍ਚਤਿ. ਅਭਿਸਮ੍ਭੁਣਿਤ੍ਵਾਤਿ ਨਿਪ੍ਫਾਦੇਤ੍ਵਾ. ਨਾਭਿਸਮ੍ਭੁਣਾਤੀਤਿ ਨ ਸਮ੍ਪਾਦੇਤਿ, ਅਰਞ੍ਞਵਾਸਂ ਸਮ੍ਪਾਦੇਤੁਂ ਨ ਸਕ੍ਕੋਤੀਤਿ ਵੁਤ੍ਤਂ ਹੋਤਿ. ਧਮ੍ਮਤੋ ਅਪੇਤਂ ਉਦ੍ਧਮ੍ਮਂ. ਅਸਬ੍ਬਞ੍ਞੂ ਅਸ੍ਸਾਤਿ ਤੇਸਂ ਅਨੁਰੂਪਸ੍ਸ ਅਜਾਨਨਤੋ ਅਸਬ੍ਬਞ੍ਞੂ ਭਵੇਯ੍ਯ. ‘‘ਨ, ਭਿਕ੍ਖਵੇ, ਅਸੇਨਾਸਨਿਕੇਨ ਵਸ੍ਸਂ ਉਪਗਨ੍ਤਬ੍ਬ’’ਨ੍ਤਿ (ਮਹਾਵ. ੨੦੪) ਵਚਨਤੋ ‘‘ਚਤ੍ਤਾਰੋ ਪਨ…ਪੇ… ਪਟਿਕ੍ਖਿਤ੍ਤਮੇਵਾ’’ਤਿ ਵੁਤ੍ਤਂ. ਇਦਮੇਵ ਵਚਨਂ ਸਨ੍ਧਾਯ ਪਾਲ਼ਿਯਮ੍ਪਿ ‘‘ਅਟ੍ਠ ਮਾਸੇ ਖੋ ਮਯਾ ਦੇਵਦਤ੍ਤ ਰੁਕ੍ਖਮੂਲਸੇਨਾਸਨਂ ਅਨੁਞ੍ਞਾਤ’’ਨ੍ਤਿ ਵੁਤ੍ਤਂ.

ਤੀਹਿ ਕੋਟੀਹੀਤਿ ਤੀਹਿ ਆਕਾਰੇਹਿ, ਤੀਹਿ ਕਾਰਣੇਹੀਤਿ ਅਤ੍ਥੋ. ਤਦੁਭਯਵਿਮੁਤ੍ਤਪਰਿਸਙ੍ਕਿਤਨ੍ਤਿ ਦਿਟ੍ਠਂ ਸੁਤਨ੍ਤਿ ਇਦਂ ਉਭਯਂ ਅਨਿਸ੍ਸਾਯ ‘‘ਕਿਂ ਨੁ ਖੋ ਇਦਂ ਭਿਕ੍ਖੁਂ ਉਦ੍ਦਿਸ੍ਸ ਵਧਿਤ੍ਵਾ ਸਮ੍ਪਾਦਿਤ’’ਨ੍ਤਿ ਕੇਵਲਮੇਵ ਪਰਿਸਙ੍ਕਿਤਂ. ਮਚ੍ਛਬਨ੍ਧਨਂ ਜਾਲਂ, ਵਾਗੁਰਾ ਮਿਗਬਨ੍ਧਨੀ. ਕਪ੍ਪਤੀਤਿ ਯਦਿ ਤੇਸਂ ਵਚਨੇਨ ਆਸਙ੍ਕਾ ਉਪਚ੍ਛਿਨ੍ਨਾ ਹੋਤਿ, ਵਟ੍ਟਤਿ. ਪਵਤ੍ਤਮਂਸਨ੍ਤਿ ਵਿਕ੍ਕਾਯਿਕਮਂਸਂ. ਮਙ੍ਗਲਾਦੀਨਨ੍ਤਿ ਆਦਿ-ਸਦ੍ਦੇਨ ਆਹੁਨਪਾਹੁਨਾਦਿਕੇ ਸਙ੍ਗਣ੍ਹਾਤਿ. ਭਿਕ੍ਖੂਨਂਯੇਵ ਅਤ੍ਥਾਯਾਤਿ ਏਤ੍ਥ ਅਟ੍ਠਾਨਪ੍ਪਯੁਤ੍ਤੋ ਏਵ-ਸਦ੍ਦੋ, ਭਿਕ੍ਖੂਨਂ ਅਤ੍ਥਾਯ ਅਕਤਮੇਵਾਤਿ ਸਮ੍ਬਨ੍ਧਿਤਬ੍ਬਂ. ਤਸ੍ਮਾ ‘‘ਭਿਕ੍ਖੂਨਞ੍ਚ ਦਸ੍ਸਾਮ, ਮਙ੍ਗਲਾਦੀਨਞ੍ਚ ਅਤ੍ਥਾਯ ਭਵਿਸ੍ਸਤੀ’’ਤਿ ਮਿਸ੍ਸੇਤ੍ਵਾ ਕਤਮ੍ਪਿ ਨ ਵਟ੍ਟਤੀਤਿ ਵੇਦਿਤਬ੍ਬਂ. ਕੇਚਿ ਪਨ ‘‘ਭਿਕ੍ਖੂਨਂਯੇਵਾਤਿ ਅਵਧਾਰਣੇਨ ਭਿਕ੍ਖੂਨਞ੍ਚ ਅਞ੍ਞੇਸਞ੍ਚ ਅਤ੍ਥਾਯ ਕਤਂ ਵਟ੍ਟਤੀ’’ਤਿ ਵਦਨ੍ਤਿ, ਤਂ ਨ ਸੁਨ੍ਦਰਂ. ਯਤ੍ਥ ਚ ਨਿਬ੍ਬੇਮਤਿਕੋ ਹੋਤੀਤਿ ਭਿਕ੍ਖੂਨਂ ਅਤ੍ਥਾਯ ਕਤੇਪਿ ਸਬ੍ਬੇਨ ਸਬ੍ਬਂ ਪਰਿਸਙ੍ਕਿਤਾਭਾਵਮਾਹ. ਤਮੇਵਤ੍ਥਂ ਆਵਿਕਾਤੁਂ ‘‘ਸਚੇ ਪਨਾ’’ਤਿਆਦਿ ਵੁਤ੍ਤਂ. ਇਤਰੇਸਂ ਵਟ੍ਟਤੀਤਿ ਅਜਾਨਨ੍ਤਾਨਂ ਵਟ੍ਟਤਿ, ਜਾਨਤੋ ਏਵੇਤ੍ਥ ਆਪਤ੍ਤਿ ਹੋਤੀਤਿ. ਤੇਯੇਵਾਤਿ ਯੇ ਉਦ੍ਦਿਸ੍ਸ ਕਤਂ, ਤੇਯੇਵ. ਉਦ੍ਦਿਸਕਤਮਂਸਪਰਿਭੋਗਤੋ ਅਕਪ੍ਪਿਯਮਂਸਪਰਿਭੋਗਸ੍ਸ ਵਿਸੇਸਂ ਦਸ੍ਸੇਤੁਂ ‘‘ਅਕਪ੍ਪਿਯਮਂਸਂ ਪਨਾ’’ਤਿਆਦਿ ਵੁਤ੍ਤਂ. ਪੁਰਿਮਸ੍ਮਿਂ ਸਚਿਤ੍ਤਕਾ ਆਪਤ੍ਤਿ, ਇਤਰਸ੍ਮਿਂ ਅਚਿਤ੍ਤਕਾ. ਤੇਨਾਹ ‘‘ਅਕਪ੍ਪਿਯਮਂਸਂ ਅਜਾਨਿਤ੍ਵਾ ਭੁਞ੍ਜਨ੍ਤਸ੍ਸਪਿ ਆਪਤ੍ਤਿਯੇਵਾ’’ਤਿ. ‘‘ਪਰਿਭੋਗਕਾਲੇ ਪੁਚ੍ਛਿਤ੍ਵਾ ਪਰਿਭੁਞ੍ਜਿਸ੍ਸਾਮੀਤਿ ਵਾ ਗਹੇਤ੍ਵਾ ਪੁਚ੍ਛਿਤ੍ਵਾ ਪਰਿਭੁਞ੍ਜਿਤਬ੍ਬ’’ਨ੍ਤਿ ਵਚਨਤੋ ਅਕਪ੍ਪਿਯਮਂਸਂ ਅਜਾਨਿਤ੍ਵਾ ਗਣ੍ਹਨ੍ਤਸ੍ਸ ਪਟਿਗ੍ਗਹਣੇਨ ਅਨਾਪਤ੍ਤਿ ਸਿਯਾ. ਅਜਾਨਿਤ੍ਵਾਪਿ ਭੁਞ੍ਜਨ੍ਤਸ੍ਸੇਵ ਹਿ ਆਪਤ੍ਤਿ ਵੁਤ੍ਤਾ. ਵਤ੍ਤਨ੍ਤਿ ਵਦਨ੍ਤੀਤਿ ਇਮਿਨਾ ਆਪਤ੍ਤਿ ਨਤ੍ਥੀਤਿ ਦਸ੍ਸੇਤਿ.

ਸਲ੍ਲੇਖਾ ਵੁਤ੍ਤਿ ਏਤੇਸਨ੍ਤਿ ਸਲ੍ਲੇਖਵੁਤ੍ਤਿਨੋ. ਬਾਹੁਲਿਕੋਤਿ ਏਕਸ੍ਸ ਲ-ਕਾਰਸ੍ਸ ਲੋਪਂ ਕਤ੍ਵਾ ਵੁਤ੍ਤਂ. ਕਪ੍ਪਨ੍ਤਿ ਆਯੁਕਪ੍ਪਂ. ਸਙ੍ਘਭੇਦਕੋ ਹਿ ਏਕਂ ਕਪ੍ਪਂ ਅਸੀਤਿਭਾਗੇ ਕਤ੍ਵਾ ਤਤੋ ਏਕਭਾਗਮਤ੍ਤਂ ਕਾਲਂ ਨਿਰਯੇ ਤਿਟ੍ਠੇਯ੍ਯਾਤਿ ਆਯੁਕਪ੍ਪਂ ਸਨ੍ਧਾਯ ‘‘ਕਪ੍ਪਂ ਨਿਰਯਮ੍ਹਿ ਪਚ੍ਚਤੀ’’ਤਿ ਵੁਤ੍ਤਂ. ਕਪ੍ਪਟ੍ਠਕਥਾਯਂ (ਵਿਭ. ਅਟ੍ਠ. ੮੦੯) ਪਨ ‘‘ਸਣ੍ਠਹਨ੍ਤੇ ਹਿ ਕਪ੍ਪੇ ਕਪ੍ਪਵੇਮਜ੍ਝੇ ਵਾ ਸਙ੍ਘਭੇਦਂ ਕਤ੍ਵਾ ਕਪ੍ਪਵਿਨਾਸੇਯੇਵ ਮੁਚ੍ਚਤਿ. ਸਚੇਪਿ ਹਿ ਸ੍ਵੇ ਕਪ੍ਪੋ ਵਿਨਸ੍ਸਿਸ੍ਸਤੀਤਿ ਅਜ੍ਜ ਸਙ੍ਘਭੇਦਂ ਕਰੋਤਿ, ਸ੍ਵੇਵ ਮੁਚ੍ਚਤਿ, ਏਕਦਿਵਸਮੇਵ ਨਿਰਯੇ ਪਚ੍ਚਤੀ’’ਤਿ ਵੁਤ੍ਤਂ. ਤਤ੍ਥਾਪਿ ਕਪ੍ਪਵਿਨਾਸੇਯੇਵਾਤਿ ਆਯੁਕਪ੍ਪਵਿਨਾਸੇਯੇਵਾਤਿ ਅਤ੍ਥੇ ਸਤਿ ਨਤ੍ਥਿ ਵਿਰੋਧੋ. ਸਣ੍ਠਹਨ੍ਤੇਤਿ ਇਦਮ੍ਪਿ ‘‘ਸ੍ਵੇ ਵਿਨਸ੍ਸਿਸ੍ਸਤੀ’’ਤਿ ਵਿਯ ਅਭੂਤਪਰਿਕਪ੍ਪਨਵਸੇਨ ਵੁਤ੍ਤਂ. ‘‘ਏਕਦਿਵਸਮੇਵ ਨਿਰਯੇ ਪਚ੍ਚਤੀ’’ਤਿ ਏਤ੍ਥਾਪਿ ਤਤੋ ਪਰਂ ਕਪ੍ਪਾਭਾਵੇ ਆਯੁਕਪ੍ਪਸ੍ਸਪਿ ਅਭਾਵਤੋਤਿ ਅਵਿਰੋਧਤੋ ਅਤ੍ਥਯੋਜਨਾ ਦਟ੍ਠਬ੍ਬਾ. ਬ੍ਰਹ੍ਮਂ ਪੁਞ੍ਞਨ੍ਤਿ ਸੇਟ੍ਠਂ ਪੁਞ੍ਞਂ. ਕਪ੍ਪਂ ਸਗ੍ਗਮ੍ਹਿ ਮੋਦਤੀਤਿ ਏਤ੍ਥਾਪਿ ਆਯੁਕਪ੍ਪਮੇਵ.

੪੧੧. ਲਦ੍ਧਿਨਾਨਾਸਂਵਾਸਕੇਨਾਤਿ ਭਾਵਪ੍ਪਧਾਨੋਯਂ ਨਿਦ੍ਦੇਸੋ, ਲਦ੍ਧਿਨਾਨਾਸਂਵਾਸਕਭਾਵੇਨਾਤਿ ਅਤ੍ਥੋ. ਕਮ੍ਮਨਾਨਾਸਂਵਾਸਕੇਨਾਤਿ ਏਤ੍ਥਾਪਿ ਏਸੇਵ ਨਯੋ. ਅਞ੍ਞਥਾ ਨਾਨਾਸਂਵਾਸਕੇਨ ਸਹਿਤਸ੍ਸ ਸਮਾਨਸਂਵਾਸਕਸ੍ਸਪਿ ਸਙ੍ਘਸ੍ਸ ਅਸਮਾਨਸਂਵਾਸਕਤ੍ਤਂ ਆਪਜ੍ਜੇਯ੍ਯ. ਤਤ੍ਥ ਲਦ੍ਧਿਨਾਨਾਸਂਵਾਸਕੋ ਨਾਮ ਉਕ੍ਖਿਤ੍ਤਾਨੁਵਤ੍ਤਕੋ. ਸੋ ਹਿ ਅਤ੍ਤਨੋ ਲਦ੍ਧਿਯਾ ਨਾਨਾਸਂਵਾਸਕੋ ਜਾਤੋਤਿ ‘‘ਲਦ੍ਧਿਨਾਨਾਸਂਵਾਸਕੋ’’ਤਿ ਵੁਚ੍ਚਤਿ. ਕਮ੍ਮਨਾਨਾਸਂਵਾਸਕੋ ਨਾਮ ਉਕ੍ਖੇਪਨੀਯਕਮ੍ਮਕਤੋ. ਸੋ ਹਿ ਉਕ੍ਖੇਪਨੀਯਕਮ੍ਮਵਸੇਨ ਨਾਨਾਸਂਵਾਸਕੋ ਹੋਤੀਤਿ ‘‘ਕਮ੍ਮਨਾਨਾਸਂਵਾਸਕੋ’’ਤਿ ਵੁਚ੍ਚਤਿ. ਵਿਰਹਿਤੋਤਿ ਵਿਮੁਤ੍ਤੋ. ਕਾਯਸਾਮਗ੍ਗੀਦਾਨਂ ਤੇਸੁ ਤੇਸੁ ਸਙ੍ਘਕਮ੍ਮੇਸੁ ਹਤ੍ਥਪਾਸੂਪਗਮਨਵਸੇਨ ਵੇਦਿਤਬ੍ਬਂ.

‘‘ਭੇਦਾਯ ਪਰਕ੍ਕਮੇਯ੍ਯਾ’’ਤਿ ਵਿਸੁਂ ਵੁਤ੍ਤਤ੍ਤਾ ਭੇਦਨਸਂਵਤ੍ਤਨਿਕਸ੍ਸ ਅਧਿਕਰਣਸ੍ਸ ਸਮਾਦਾਯ ਪਗ੍ਗਣ੍ਹਤੋ ਪੁਬ੍ਬੇਪਿ ਪਕ੍ਖਪਰਿਯੇਸਨਾਦਿਵਸੇਨ ਸਙ੍ਘਭੇਦਾਯ ਪਰਕ੍ਕਮਨ੍ਤਸ੍ਸ ਸਮਨੁਭਾਸਨਕਮ੍ਮਂ ਕਾਤਬ੍ਬਨ੍ਤਿ ਵੇਦਿਤਬ੍ਬਂ. ਇਮਾਨਿ ਵਤ੍ਥੂਨੀਤਿ ਅਟ੍ਠਾਰਸ ਭੇਦਕਰਵਤ੍ਥੂਨਿ. ਕਮ੍ਮੇਨਾਤਿ ਅਪਲੋਕਨਾਦੀਸੁ ਚਤੂਸੁ ਕਮ੍ਮੇਸੁ ਅਞ੍ਞਤਰੇਨ ਕਮ੍ਮੇਨ. ਉਦ੍ਦੇਸੇਨਾਤਿ ਪਞ੍ਚਸੁ ਪਾਤਿਮੋਕ੍ਖੁਦ੍ਦੇਸੇਸੁ ਅਞ੍ਞਤਰੇਨ ਉਦ੍ਦੇਸੇਨ. ਵੋਹਾਰੇਨਾਤਿ ਤਾਹਿ ਤਾਹਿ ਉਪਪਤ੍ਤੀਹਿ ‘‘ਅਧਮ੍ਮਂ ਧਮ੍ਮੋ’’ਤਿਆਦਿਅਟ੍ਠਾਰਸਭੇਦਕਰਵਤ੍ਥੁਦੀਪਕੇਨ ਵੋਹਾਰੇਨ. ਅਨੁਸ੍ਸਾਵਨਾਯਾਤਿ ‘‘ਨਨੁ ਤੁਮ੍ਹੇ ਜਾਨਾਥ ਮਯ੍ਹਂ ਉਚ੍ਚਾਕੁਲਾ ਪਬ੍ਬਜਿਤਭਾਵਂ ਬਹੁਸ੍ਸੁਤਭਾਵਞ੍ਚ, ਮਾਦਿਸੋ ਨਾਮ ਉਦ੍ਧਮ੍ਮਂ ਉਬ੍ਬਿਨਯਂ ਸਤ੍ਥੁਸਾਸਨਂ ਗਾਹੇਯ੍ਯਾਤਿ ਚਿਤ੍ਤਮ੍ਪਿ ਉਪ੍ਪਾਦੇਤੁਂ ਤੁਮ੍ਹਾਕਂ ਯੁਤ੍ਤਂ, ਕਿਂ ਮਯ੍ਹਂ ਅਵੀਚਿ ਨੀਲੁਪ੍ਪਲਵਨਂ ਵਿਯ ਸੀਤਲੋ, ਕਿਮਹਂ ਅਪਾਯਤੋ ਨ ਭਾਯਾਮੀ’’ਤਿਆਦਿਨਾ ਨਯੇਨ ਕਣ੍ਣਮੂਲੇ ਵਚੀਭੇਦਂ ਕਤ੍ਵਾ ਅਨੁਸ੍ਸਾਵਨੇਨ. ਸਲਾਕਗ੍ਗਾਹੇਨਾਤਿ ਏਵਂ ਅਨੁਸ੍ਸਾਵੇਤ੍ਵਾ ਤੇਸਂ ਚਿਤ੍ਤਂ ਉਪਤ੍ਥਮ੍ਭੇਤ੍ਵਾ ਅਨਿਵਤ੍ਤਿਧਮ੍ਮੇ ਕਤ੍ਵਾ ‘‘ਗਣ੍ਹਥ ਇਮਂ ਸਲਾਕ’’ਨ੍ਤਿ ਸਲਾਕਗ੍ਗਾਹੇਨ. ਪਞ੍ਚਹਿ ਕਾਰਣੇਹਿ ਸਙ੍ਘਭੇਦੋ ਹੋਤੀਤਿ ਏਤ੍ਥ ਕਮ੍ਮਮੇਵ ਉਦ੍ਦੇਸੋ ਵਾ ਸਙ੍ਘਭੇਦੇ ਪਧਾਨਕਾਰਣਨ੍ਤਿ ਵੇਦਿਤਬ੍ਬਂ. ਵੋਹਾਰਾਨੁਸ੍ਸਾਵਨਸਲਾਕਗ੍ਗਾਹਾ ਪਨ ਪੁਬ੍ਬਭਾਗਾ. ਅਟ੍ਠਾਰਸਵਤ੍ਥੁਦੀਪਨਵਸਏਨ ਹਿ ਵੋਹਰਨ੍ਤੇਨ ਤਤ੍ਥ ਰੁਚਿਜਨਨਤ੍ਥਂ ਅਨੁਸ੍ਸਾਵੇਤ੍ਵਾ ਸਲਾਕਾਯ ਗਹਿਤਾਯਪਿ ਅਭਿਨ੍ਨੋਵ ਹੋਤਿ ਸਙ੍ਘੋ. ਯਦਾ ਪਨ ਏਵਂ ਚਤ੍ਤਾਰੋ ਵਾ ਅਤਿਰੇਕਾ ਵਾ ਸਲਾਕਂ ਗਹੇਤ੍ਵਾ ਆਵੇਣਿਕਕਮ੍ਮਂ ਵਾ ਉਦ੍ਦੇਸਂ ਵਾ ਕਰੋਨ੍ਤਿ, ਤਦਾ ਸਙ੍ਘੋ ਭਿਨ੍ਨੋ ਨਾਮ ਹੋਤਿ. ਅਬ੍ਭੁਸ੍ਸਿਤਨ੍ਤਿ ਅਬ੍ਭੁਗ੍ਗਤਂ. ਅਚ੍ਛੇਯ੍ਯਾਤਿ ਵਿਹਰੇਯ੍ਯ, ਪਵਤ੍ਤੇਯ੍ਯਾਤਿ ਅਤ੍ਥੋ.

‘‘ਲਜ੍ਜੀ ਰਕ੍ਖਿਸ੍ਸਤੀ’’ਤਿ ਵਚਨਤੋ ਆਪਤ੍ਤਿਭਯੇਨ ਆਰੋਚਨਂ ਲਜ੍ਜੀਨਂਯੇਵ ਭਾਰੋਤਿ ਆਹ ‘‘ਲਜ੍ਜੀਹਿ ਭਿਕ੍ਖੂਹੀ’’ਤਿ. ਅਲਜ੍ਜਿਸ੍ਸਪਿ ਅਨਾਰੋਚੇਨ੍ਤਸ੍ਸ ਆਪਤ੍ਤਿਯੇਵ ‘‘ਯੇ ਪਸ੍ਸਨ੍ਤਿ, ਯੇ ਸੁਣਨ੍ਤੀ’’ਤਿ ਵਚਨਤੋ. ਸਮਾਗਚ੍ਛਤੂਤਿ ਏਕੀ ਭਵਤੁ. ਏਕੀਭਾਵੋ ਚ ਸਮਾਨਲਦ੍ਧਿਵਸੇਨ ਹੋਤੀਤਿ ਆਹ ‘‘ਏਕਲਦ੍ਧਿਕੋ ਹੋਤੂ’’ਤਿ. ਸਮ੍ਪਤ੍ਤਿਯਾਤਿ ਸੀਲਾਦਿਸਮ੍ਪਤ੍ਤਿਯਾ. ਪਟਿਨਿਸ੍ਸਜ੍ਜਨ੍ਤਸ੍ਸ ਅਨਾਪਤ੍ਤਿਭਾਵਤੋ ‘‘ਸੋਤ੍ਥਿਭਾਵੋ ਤਸ੍ਸ ਭਿਕ੍ਖੁਨੋ’’ਤਿ ਵੁਤ੍ਤਂ. ਅਪ੍ਪਟਿਨਿਸ੍ਸਜ੍ਜਤੋ ਦੁਕ੍ਕਟਨ੍ਤਿ ਵਿਸੁਂ ਵਿਸੁਂ ਵਦਨ੍ਤਾਨਂ ਗਣਨਾਯ ਦੁਕ੍ਕਟਂ. ਪਹੋਨ੍ਤੇਨਾਤਿ ਗਨ੍ਤੁਂ ਸਮਤ੍ਥੇਨ ਅਗਿਲਾਨੇਨ. ਸਙ੍ਘਭੇਦਸ੍ਸ ਗਰੁਕਭਾਵਤੋ ਅਵਸ੍ਸਂ ਕਤ੍ਤਬ੍ਬਤਾਦਸ੍ਸਨਤ੍ਥਂ ‘‘ਦੂਰੇਪਿ ਭਾਰੋਯੇਵਾ’’ਤਿ ਵੁਤ੍ਤਂ, ਆਪਤ੍ਤਿ ਪਨ ਅਦ੍ਧਯੋਜਨਬ੍ਭਨ੍ਤਰੇ ਗਨ੍ਤੁਂ ਸਮਤ੍ਥਸ੍ਸ ਅਗਿਲਾਨਸ੍ਸੇਵ ਵੇਦਿਤਬ੍ਬਾ.

੪੧੬. ਅਸਮਨੁਭਾਸਨ੍ਤਸ੍ਸਾਤਿ ਕਮ੍ਮਕਾਰਕੇ ਕਤ੍ਤੁਨਿਦ੍ਦੇਸੋਤਿ ਆਹ ‘‘ਅਸਮਨੁਭਾਸਿਯਮਾਨਸ੍ਸਾ’’ਤਿ. ਤਤਿਯਕਮ੍ਮਵਾਚਾਯ ਪਟਿਨਿਸ੍ਸਜ੍ਜਨ੍ਤੋ ਞਤ੍ਤਿਯਾ ਦੁਕ੍ਕਟਂ ਦ੍ਵੀਹਿ ਕਮ੍ਮਵਾਚਾਹਿ ਥੁਲ੍ਲਚ੍ਚਯੇ ਚ ਆਪਜ੍ਜਤਿਯੇਵਾਤਿ ਆਹ ‘‘ਪਟਿਨਿਸ੍ਸਜ੍ਜਨ੍ਤਸ੍ਸ ਸਙ੍ਘਾਦਿਸੇਸੇਨ ਅਨਾਪਤ੍ਤੀ’’ਤਿ. ਅਸ੍ਸਾਤਿ ਦੇਵਦਤ੍ਤਸ੍ਸ. ਕਤੇਨ ਭਵਿਤਬ੍ਬਨ੍ਤਿ ਸਮਨੁਭਾਸਨਕਮ੍ਮੇਨ ਕਤੇਨ ਭਵਿਤਬ੍ਬਂ. ਅਤ੍ਤਨੋ ਰੁਚਿਮਤ੍ਤੇਨ ਵਦੇਯ੍ਯਾਤਿਆਦਿਕਮ੍ਮਿਕਤ੍ਤਾ ਅਪ੍ਪਟਿਨਿਸ੍ਸਜ੍ਜਨ੍ਤਸ੍ਸਪਿ ਅਨਾਪਤ੍ਤੀਤਿ ਅਧਿਪ੍ਪਾਯੇਨ ਵਦੇਯ੍ਯ. ਅਪਞ੍ਞਤ੍ਤੇ ਸਿਕ੍ਖਾਪਦੇ ਸਮਨੁਭਾਸਨਕਮ੍ਮਸ੍ਸੇਵ ਅਭਾਵਤੋ ‘‘ਨ ਹਿ ਪਞ੍ਞਤ੍ਤਂ ਸਿਕ੍ਖਾਪਦਂ ਵੀਤਿਕ੍ਕਮਨ੍ਤਸ੍ਸਾ’’ਤਿ ਵੁਤ੍ਤਂ. ਸਿਕ੍ਖਾਪਦਂ ਪਞ੍ਞਪੇਨ੍ਤੇਨੇਵ ਹਿ ਸਮਨੁਭਾਸਨਕਮ੍ਮਂ ਅਨੁਞ੍ਞਾਤਂ. ਉਦ੍ਦਿਸ੍ਸ ਅਨੁਞ੍ਞਾਤਤੋਤਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਰੋਮਨ੍ਥਕਸ੍ਸ ਰੋਮਨ੍ਥਨ’’ਨ੍ਤਿਆਦਿਂ (ਚੂਲ਼ਵ. ੨੭੩) ਉਦ੍ਦਿਸ੍ਸ ਅਨੁਞ੍ਞਾਤਂ ਸਨ੍ਧਾਯ ਵਦਨ੍ਤਿ. ਅਨਾਪਤ੍ਤਿਯਨ੍ਤਿ ਅਨਾਪਤ੍ਤਿਵਾਰੇ. ਆਪਤ੍ਤਿਂ ਰੋਪੇਤਬ੍ਬੋਤਿ ਅਨਿਸ੍ਸਜ੍ਜਨਪਚ੍ਚਯਾ ਆਪਨ੍ਨਪਾਚਿਤ੍ਤਿਯਾਪਤ੍ਤਿਂ ਉਕ੍ਖੇਪਨੀਯਕਮ੍ਮਕਰਣਤ੍ਥਂ ਆਰੋਪੇਤਬ੍ਬੋਤਿ ਅਤ੍ਥੋ.

ਆਪਤ੍ਤਿਯੇਵ ਨ ਜਾਤਾਤਿ ਸਙ੍ਘਾਦਿਸੇਸਾਪਤ੍ਤਿ ਨ ਜਾਤਾਯੇਵਾਤਿ ਅਤ੍ਥੋ. ਸਾ ਪਨੇਸਾਤਿ ਸਾ ਪਨ ਏਸਾ ਅਨਾਪਤ੍ਤਿ. ਤਿਵਙ੍ਗਿਕਨ੍ਤਿ ਕਾਯਵਾਚਾਚਿਤ੍ਤਵਸੇਨ ਤਿਵਙ੍ਗਿਕਂ, ਕਾਯਵਾਚਾਚਿਤ੍ਤਤੋ ਸਮੁਟ੍ਠਾਤੀਤਿ ਵੁਤ੍ਤਂ ਹੋਤਿ. ‘‘ਨਪ੍ਪਟਿਨਿਸ੍ਸਜ੍ਜਾਮੀ’’ਤਿ ਸਞ੍ਞਾਯ ਅਭਾਵੇਨ ਮੁਚ੍ਚਨਤੋ ਸਞ੍ਞਾਵਿਮੋਕ੍ਖਂ. ਸਚਿਤ੍ਤਕਨ੍ਤਿ ‘‘ਨਪ੍ਪਟਿਨਿਸ੍ਸਜ੍ਜਾਮੀ’’ਤਿ ਜਾਨਨਚਿਤ੍ਤੇਨ ਸਚਿਤ੍ਤਕਂ. ਭੇਦਾਯ ਪਰਕ੍ਕਮਨਂ, ਧਮ੍ਮਕਮ੍ਮੇਨ ਸਮਨੁਭਾਸਨਂ, ਕਮ੍ਮਵਾਚਾਪਰਿਯੋਸਾਨਂ, ਅਪ੍ਪਟਿਨਿਸ੍ਸਜ੍ਜਨਨ੍ਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ.

ਪਠਮਸਙ੍ਘਭੇਦਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.