੮. ਪਠਮਦੁਟ੍ਠਦੋਸਸਿਕ੍ਖਾਪਦਵਣ੍ਣਨਾ
੩੮੦. ਅਟ੍ਠਮੇ ਪਾਕਾਰੇਨ ਪਰਿਕ੍ਖਿਤ੍ਤਨ੍ਤਿ ਸਮ੍ਬਨ੍ਧੋ. ਗੋਪੁਰਟ੍ਟਾਲਕਯੁਤ੍ਤਨ੍ਤਿ ਦ੍ਵਾਰਪਾਸਾਦੇਨ ਚ ਤਤ੍ਥ ਤਤ੍ਥ ਪਾਕਾਰਮਤ੍ਥਕੇ ਪਤਿਟ੍ਠਾਪਿਤਅਟ੍ਟਾਲਕੇਹਿ ਚ ਯੁਤ੍ਤਂ. ਵੇਲ਼ੂਹਿ ਪਰਿਕ੍ਖਿਤ੍ਤਤ੍ਤਾ ਅਬ੍ਭਨ੍ਤਰੇ ਪੁਪ੍ਫੂਪਗਫਲੂਪਗਰੁਕ੍ਖਸਞ੍ਛਨ੍ਨਤ੍ਤਾ ਚ ਨੀਲੋਭਾਸਂ. ਛਾਯੂਦਕਸਮ੍ਪਤ੍ਤਿਯਾ ਭੂਮਿਭਾਗਸਮ੍ਪਤ੍ਤਿਯਾ ਚ ਮਨੋਰਮਂ. ਕਾਲ਼ਕਵੇਸੇਨਾਤਿ ਕਲਨ੍ਦਕਰੂਪੇਨ. ਨਿਵਾਪਨ੍ਤਿ ਭੋਜਨਂ. ਤਨ੍ਤਿ ਉਯ੍ਯਾਨਂ. ਦਬ੍ਬੋਤਿ ਤਸ੍ਸ ਥੇਰਸ੍ਸ ਨਾਮਨ੍ਤਿ ਦਬ੍ਬਤ੍ਥਮ੍ਭੇ ਪਤਿਤਤ੍ਤਾ ਦਬ੍ਬੋਤਿ ਤਸ੍ਸ ਥੇਰਸ੍ਸ ਨਾਮਂ ਅਹੋਸਿ.
ਕਸ੍ਸਪਦਸਬਲਸ੍ਸ ਸਾਸਨੋਸਕ੍ਕਨਕਾਲੇ ਕਿਰ ਸਤ੍ਤ ਭਿਕ੍ਖੂ ਏਕਚਿਤ੍ਤਾ ਹੁਤ੍ਵਾ ਅਞ੍ਞੇ ਸਾਸਨੇ ਅਗਾਰਵਂ ਕਰੋਨ੍ਤੇ ਦਿਸ੍ਵਾ ‘‘ਇਧ ਕਿਂ ਕਰੋਮ, ਏਕਮਨ੍ਤੇ ਸਮਣਧਮ੍ਮਂ ਕਤ੍ਵਾ ਦੁਕ੍ਖਸ੍ਸਨ੍ਤਂ ਕਰਿਸ੍ਸਾਮਾ’’ਤਿ ਨਿਸ੍ਸੇਣਿਂ ਬਨ੍ਧਿਤ੍ਵਾ ਉਚ੍ਚਂ ਪਬ੍ਬਤਸਿਖਰਂ ਅਭਿਰੁਹਿਤ੍ਵਾ ਅਤ੍ਤਨੋ ਚਿਤ੍ਤਬਲਂ ਜਾਨਨ੍ਤਾ ‘‘ਨਿਸ੍ਸੇਣਿਂ ਪਾਤੇਨ੍ਤੁ, ਜੀਵਿਤੇ ਸਾਲਯਾ ਓਤਰਨ੍ਤੁ, ਮਾ ਪਚ੍ਛਾਨੁਤਪ੍ਪਿਨੋ ਅਹੁਵਤ੍ਥਾ’’ਤਿ ਵਤ੍ਵਾ ਸਬ੍ਬੇ ਏਕਚਿਤ੍ਤਾ ਹੁਤ੍ਵਾ ਨਿਸ੍ਸੇਣਿਂ ਪਾਤੇਤ੍ਵਾ ‘‘ਅਪ੍ਪਮਤ੍ਤਾ ਹੋਥ, ਆਵੁਸੋ’’ਤਿ ਅਞ੍ਞਮਞ੍ਞਂ ਓਵਦਿਤ੍ਵਾ ਚਿਤ੍ਤਰੁਚਿਯੇਸੁ ਠਾਨੇਸੁ ਨਿਸੀਦਿਤ੍ਵਾ ਸਮਣਧਮ੍ਮਂ ਕਾਤੁਂ ਆਰਭਿਂਸੁ.
ਤਤ੍ਰੇਕੋ ਥੇਰੋ ਪਞ੍ਚਮੇ ਦਿਵਸੇ ਅਰਹਤ੍ਤਂ ਪਤ੍ਵਾ ‘‘ਮਮ ਕਿਚ੍ਚਂ ਨਿਪ੍ਫਨ੍ਨਂ, ਅਹਂ ਇਮਸ੍ਮਿਂ ਠਾਨੇ ਕਿਂ ਕਰਿਸ੍ਸਾਮੀ’’ਤਿ ਇਦ੍ਧਿਯਾ ਉਤ੍ਤਰਕੁਰੁਤੋ ਪਿਣ੍ਡਪਾਤਂ ਆਹਰਿਤ੍ਵਾ ਆਹ – ‘‘ਆਵੁਸੋ, ਇਮਂ ਪਿਣ੍ਡਪਾਤਂ ਪਰਿਭੁਞ੍ਜਥ, ਭਿਕ੍ਖਾਚਾਰਕਿਚ੍ਚਂ ਮਮਾਯਤ੍ਤਂ ਹੋਤੁ, ਤੁਮ੍ਹੇ ਅਤ੍ਤਨੋ ਕਮ੍ਮਂ ਕਰੋਥਾ’’ਤਿ. ਕਿਂ ਨੁ ਮਯਂ, ਆਵੁਸੋ, ਨਿਸ੍ਸੇਣਿਂ ਪਾਤੇਨ੍ਤਾ ਏਵਂ ਅਵਚੁਮ੍ਹ ‘‘ਯੋ ਪਠਮਂ ਧਮ੍ਮਂ ਸਚ੍ਛਿਕਰੋਤਿ, ਸੋ ਭਿਕ੍ਖਂ ਆਹਰਤੁ, ਤੇਨਾਭਤਂ ਸੇਸਾ ਪਰਿਭੁਞ੍ਜਿਤ੍ਵਾ ਸਮਣਧਮ੍ਮਂ ਕਰਿਸ੍ਸਨ੍ਤੀ’’ਤਿ. ਨਤ੍ਥਿ, ਆਵੁਸੋਤਿ. ਤੁਮ੍ਹੇ ਅਤ੍ਤਨੋ ਪੁਬ੍ਬਹੇਤੁਨਾਵ ਲਭਿਤ੍ਥ, ਮਯਮ੍ਪਿ ਸਕ੍ਕੋਨ੍ਤਾ ਵਟ੍ਟਸ੍ਸਨ੍ਤਂ ਕਰਿਸ੍ਸਾਮ, ਗਚ੍ਛਥ ਤੁਮ੍ਹੇਤਿ. ਥੇਰੋ ਤੇ ਸਞ੍ਞਾਪੇਤੁਂ ਅਸਕ੍ਕੋਨ੍ਤੋ ਫਾਸੁਕਟ੍ਠਾਨੇ ਪਿਣ੍ਡਪਾਤਂ ਪਰਿਭੁਞ੍ਜਿਤ੍ਵਾ ਗਤੋ. ਅਪਰੋਪਿ ਥੇਰੋ ਸਤ੍ਤਮੇ ਦਿਵਸੇ ਅਨਾਗਾਮਿਫਲਂ ਪਤ੍ਵਾ ਤਤੋ ਚੁਤੋ ਸੁਦ੍ਧਾਵਾਸਬ੍ਰਹ੍ਮਲੋਕੇ ਨਿਬ੍ਬਤ੍ਤੋ, ਇਤਰੇ ਥੇਰਾ ਏਕਂ ਬੁਦ੍ਧਨ੍ਤਰਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਤੇਸੁ ਤੇਸੁ ਕੁਲੇਸੁ ਨਿਬ੍ਬਤ੍ਤਾ. ਏਕੋ ਗਨ੍ਧਾਰਰਟ੍ਠੇ ਤਕ੍ਕਸਿਲਨਗਰੇ ਰਾਜਗੇਹੇ ਨਿਬ੍ਬਤ੍ਤੋ, ਏਕੋ ਪਚ੍ਚਨ੍ਤਿਮਰਟ੍ਠੇ ਪਰਿਬ੍ਬਾਜਿਕਾਯ ਕੁਚ੍ਛਿਮ੍ਹਿ ਨਿਬ੍ਬਤ੍ਤੋ, ਏਕੋ ਬਾਹਿਯਰਟ੍ਠੇ ਕੁਟੁਮ੍ਬਿਯਗੇਹੇ ਨਿਬ੍ਬਤ੍ਤੋ, ਏਕੋ ਰਾਜਗਹੇ ਕੁਟੁਮ੍ਬਿਯਗੇਹੇ ਨਿਬ੍ਬਤ੍ਤੋ.
ਅਯਂ ਪਨ ਦਬ੍ਬਤ੍ਥੇਰੋ ਮਲ੍ਲਰਟ੍ਠੇ ਅਨੁਪਿਯਨਗਰੇ ਏਕਸ੍ਸ ਮਲ੍ਲਰਞ੍ਞੋ ਗੇਹੇ ਪਟਿਸਨ੍ਧਿਂ ਗਣ੍ਹਿ. ਤਸ੍ਸ ਮਾਤਾ ਉਪਵਿਜਞ੍ਞਾ ਕਾਲਮਕਾਸਿ. ਮਤਸਰੀਰਂ ਸੁਸਾਨਂ ਨੇਤ੍ਵਾ ਦਾਰੁਚਿਤਕਂ ਆਰੋਪੇਤ੍ਵਾ ਅਗ੍ਗਿਂ ਅਦਂਸੁ. ਅਗ੍ਗਿਵੇਗਸਨ੍ਤਤ੍ਤਂ ਉਦਰਪਟਲਂ ਦ੍ਵੇਧਾ ਅਹੋਸਿ. ਦਾਰਕੋ ਅਤ੍ਤਨੋ ਪੁਞ੍ਞਬਲੇਨ ਉਪ੍ਪਤਿਤ੍ਵਾ ਏਕਸ੍ਮਿਂ ਦਬ੍ਬਤ੍ਥਮ੍ਭੇ ਨਿਪਤਿ, ਤਂ ਦਾਰਕਂ ਗਹੇਤ੍ਵਾ ਅਯ੍ਯਿਕਾਯ ਅਦਂਸੁ. ਸਾ ਤਸ੍ਸ ਨਾਮਂ ਗਣ੍ਹਨ੍ਤੀ ਦਬ੍ਬਤ੍ਥਮ੍ਭੇ ਪਤਿਤ੍ਵਾ ਲਦ੍ਧਜੀਵਿਕਤ੍ਤਾ ‘‘ਦਬ੍ਬੋ’’ਤਿ ਤਸ੍ਸ ਨਾਮਂ ਅਕਾਸਿ. ਤੇਨ ਵੁਤ੍ਤਂ ‘‘ਦਬ੍ਬੋਤਿ ਤਸ੍ਸ ਥੇਰਸ੍ਸ ਨਾਮ’’ਨ੍ਤਿ.
ਤਸ੍ਸ ਸਤ੍ਤਵਸ੍ਸਿਕਕਾਲੇ ਸਤ੍ਥਾ ਭਿਕ੍ਖੁਸਙ੍ਘਪਰਿਵੁਤੋ ਮਲ੍ਲਰਟ੍ਠੇ ਚਾਰਿਕਂ ਚਰਮਾਨੋ ਅਨੁਪਿਯਨਿਗਮਂ ਪਤ੍ਵਾ ਅਨੁਪਿਯਮ੍ਬਵਨੇ ਵਿਹਰਤਿ. ਦਬ੍ਬਕੁਮਾਰੋ ਸਤ੍ਥਾਰਂ ਦਿਸ੍ਵਾ ਸਹ ਦਸ੍ਸਨੇਨੇਵ ਪਸੀਦਿਤ੍ਵਾ ਪਬ੍ਬਜਿਤੁਕਾਮੋ ਹੁਤ੍ਵਾ ‘‘ਅਹਂ ਦਸਬਲਸ੍ਸ ਸਨ੍ਤਿਕੇ ਪਬ੍ਬਜਿਸ੍ਸਾਮੀ’’ਤਿ ਅਯ੍ਯਿਕਂ ਆਪੁਚ੍ਛਿ. ਸਾ ‘‘ਸਾਧੁ ਤਾਤਾ’’ਤਿ ਦਬ੍ਬਕੁਮਾਰਂ ਆਦਾਯ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ‘‘ਭਨ੍ਤੇ, ਇਮਂ ਕੁਮਾਰਂ ਪਬ੍ਬਾਜੇਥਾ’’ਤਿ ਆਹ. ਸਤ੍ਥਾ ਅਞ੍ਞਤਰਸ੍ਸ ਭਿਕ੍ਖੁਨੋ ਸਞ੍ਞਂ ਅਦਾਸਿ ‘‘ਭਿਕ੍ਖੁ ਇਮਂ ਦਾਰਕਂ ਪਬ੍ਬਾਜੇਹੀ’’ਤਿ. ਸੋ ਥੇਰੋ ਸਤ੍ਥੁ ਵਚਨਂ ਸੁਤ੍ਵਾ ਦਬ੍ਬਕੁਮਾਰਂ ਪਬ੍ਬਾਜੇਨ੍ਤੋ ਤਚਪਞ੍ਚਕਕਮ੍ਮਟ੍ਠਾਨਂ ਆਚਿਕ੍ਖਿ. ਪੁਬ੍ਬਹੇਤੁਸਮ੍ਪਨ੍ਨੋ ਕਤਾਭਿਨੀਹਾਰੋ ਪਠਮਕੇਸਵਟ੍ਟਿਯਾ ਵੋਰੋਪਨਕ੍ਖਣੇਯੇਵ ਸੋਤਾਪਤ੍ਤਿਫਲੇ ਪਤਿਟ੍ਠਾਸਿ, ਦੁਤਿਯਾਯ ਕੇਸਵਟ੍ਟਿਯਾ ਓਰੋਪਿਯਮਾਨਾਯ ਸਕਦਾਗਾਮਿਫਲੇ, ਤਤਿਯਾਯ ਅਨਾਗਾਮਿਫਲੇ, ਸਬ੍ਬਕੇਸਾਨਂ ਪਨ ਓਰੋਪਨਞ੍ਚ ਅਰਹਤ੍ਤਫਲਸਚ੍ਛਿਕਿਰਿਯਾ ਚ ਅਪਚ੍ਛਾ ਅਪੁਰੇ ਅਹੋਸਿ. ਤਂ ਸਨ੍ਧਾਯ ਵੁਤ੍ਤਂ ‘‘ਥੇਰੋ ਕਿਰ ਸਤ੍ਤਵਸ੍ਸਿਕੋਵ ਸਂਵੇਗਂ ਲਭਿਤ੍ਵਾ ਪਬ੍ਬਜਿਤੋ ਖੁਰਗ੍ਗੇਯੇਵ ਅਰਹਤ੍ਤਂ ਪਾਪੁਣੀਤਿ ਵੇਦਿਤਬ੍ਬੋ’’ਤਿ.
ਸਾਵਕੇਨ ਪਤ੍ਤਬ੍ਬਨ੍ਤਿ ਯਥੁਪਨਿਸ੍ਸਯਂ ਤੇਨ ਤੇਨ ਸਾਵਕੇਨ ਪਤ੍ਤਬ੍ਬਂ. ਤਿਸ੍ਸੋ ਵਿਜ੍ਜਾਤਿਆਦਿ ਯਥਾਸਮ੍ਭਵਵਸੇਨ ਵੁਤ੍ਤਂ. ਗੁਣਜਾਤਨ੍ਤਿ ‘‘ਯਞ੍ਚ ਕਿਞ੍ਚਿ ਸਾਵਕੇਨ ਪਤ੍ਤਬ੍ਬ’’ਨ੍ਤਿ ਨਪੁਂਸਕਲਿਙ੍ਗਸਮ੍ਬਨ੍ਧਦਸ੍ਸਨਤ੍ਥਂ ਵੁਤ੍ਤਂ. ਚਤੂਸੁ ਸਚ੍ਚੇਸੁ ਚਤੂਹਿ ਮਗ੍ਗੇਹਿ ਸੋਲ਼ਸਵਿਧਸ੍ਸ ਕਿਚ੍ਚਸ੍ਸ ਕਤਤ੍ਤਾਤਿ ਦੁਕ੍ਖਸਮੁਦਯਨਿਰੋਧਮਗ੍ਗਸਙ੍ਖਾਤੇਸੁ ਚਤੂਸੁ ਸਚ੍ਚੇਸੁ ਦੁਕ੍ਖਪਰਿਞ੍ਞਾ ਸਮੁਦਯਪ੍ਪਹਾਨਂ ਨਿਰੋਧਸਚ੍ਛਿਕਿਰਿਯਾ ਮਗ੍ਗਭਾਵਨਾਤਿ ਏਕੇਕਸ੍ਸ ਮਗ੍ਗਸ੍ਸ ਚਤੁਨ੍ਨਂ ਚਤੁਨ੍ਨਂ ਕਿਚ੍ਚਾਨਂ ਵਸੇਨ ਸੋਲ਼ਸਵਿਧਸ੍ਸ ਕਿਚ੍ਚਸ੍ਸ ਕਤਤ੍ਤਾ. ਤਤੋ ਤਤੋ ਪਟਿਕ੍ਕਮਿਤ੍ਵਾਤਿ ਤਤੋ ਤਤੋ ਕਿਚ੍ਚਤੋ ਆਰਮ੍ਮਣਤੋ ਚ ਪਟਿਵਤ੍ਤਿਤ੍ਵਾ. ਸਿਲਾਪਟ੍ਟਕੇਤਿ ਪਾਸਾਣਫਲਕੇ. ਤੇਰਸਾਪੀਤਿ ਭਤ੍ਤੁਦ੍ਦੇਸਕਸੇਨਾਸਨਗ੍ਗਾਹਾਪਕਭਣ੍ਡਾਗਾਰਿਕਚੀਵਰਪਟਿਗ੍ਗਾਹਕਚੀਵਰਭਾਜਨਕਯਾਗੁਭਾਜਨਕਫਲਭਾਜਨਕਖਜ੍ਜਭਾਜਨਕਅਪ੍ਪਮਤ੍ਤਕਵਿਸ੍ਸਜ੍ਜਕਸਾਟਿਯਗ੍ਗਾਹਾਪਕਪਤ੍ਤਗ੍ਗਾਹਾਪਕਆਰਾਮਿਕਪੇਸਕਸਾਮਣੇਰਪੇਸਕਸਮ੍ਮੁਤੀਨਂ ਵਸੇਨ ਤੇਰਸਾਪਿ ਸਮ੍ਮੁਤਿਯੋ ਦਾਤੁਂ ਵਟ੍ਟਨ੍ਤਿ.
੩੮੨. ਅਪਿਸੂਤਿ ਏਤ੍ਥ ਸੂਤਿ ਨਿਪਾਤਮਤ੍ਤਂ, ਅਪਿ-ਸਦ੍ਦੋ ਅਟ੍ਠਾਨਪ੍ਪਯੁਤ੍ਤੋ ‘‘ਵਿਕਾਲੇ’’ਤਿ ਇਮਸ੍ਸ ਅਨਨ੍ਤਰਂ ਦਟ੍ਠਬ੍ਬੋ, ਵਿਕਾਲੇਪਿ ਆਗਚ੍ਛਨ੍ਤੀਤਿ ਅਤ੍ਥੋ. ਜਾਨਨ੍ਤਾਤਿ ਦੂਰਭਾਵਂ ਜਾਨਨ੍ਤਾ. ਏਵਂ ਸਬ੍ਬਪਦੇਸੂਤਿ ਏਤ੍ਥ ਕਤਿਕਸਣ੍ਠਾਨਾਦੀਨਂ ਨਾਨਪ੍ਪਕਾਰਤ੍ਤਾ ਤਸ੍ਮਿਂ ਤਸ੍ਮਿਂ ਵਿਹਾਰੇ ਕਤਿਕਵਤ੍ਤਾਦੀਨਿ ਵਿਸੁਂ ਵਿਸੁਂ ਕਥਾਪੇਤੀਤਿ ਵੇਦਿਤਬ੍ਬਂ. ਸਬ੍ਬਵਿਹਾਰੇਸੁ ਚ ਗਮਨਮਗ੍ਗੇ ਸਮਪ੍ਪਮਾਣੇ ਕਤ੍ਵਾ ਅਧਿਟ੍ਠਾਤੀਤਿ ਵਦਨ੍ਤਿ. ਅਯਞ੍ਹਿ ਨਿਮ੍ਮਿਤਾਨਂ ਧਮ੍ਮਤਾਤਿ ਅਨਿਯਮੇਤ੍ਵਾ ਨਿਮ੍ਮਿਤਾਨਂ ਅਯਂ ‘‘ਏਕਸ੍ਮਿਂ ਭਾਸਮਾਨਸ੍ਮਿ’’ਨ੍ਤਿਆਦਿ ਧਮ੍ਮਤਾ. ਤਥਾ ਹਿ ਯੇ ਵਣ੍ਣਵਯਸਰੀਰਾਵਯਵਪਰਿਕ੍ਖਾਰਕਿਰਿਯਾਵਿਸੇਸਾਦੀਹਿ ਨਿਯਮਂ ਅਕਤ੍ਵਾ ਨਿਮ੍ਮਿਤਾ ਹੋਨ੍ਤਿ, ਤੇ ਅਨਿਯਮੇਤ੍ਵਾ ਨਿਮ੍ਮਿਤਤ੍ਤਾ ਇਦ੍ਧਿਮਤਾ ਸਦਿਸਾਵ ਹੋਨ੍ਤਿ. ਠਾਨਨਿਸਜ੍ਜਾਦੀਸੁ ਭਾਸਿਤਤੁਣ੍ਹੀਭਾਵਾਦੀਸੁ ਵਾ ਯਂ ਯਂ ਇਦ੍ਧਿਮਾ ਕਰੋਤਿ, ਤਂ ਤਦੇਵ ਕਰੋਨ੍ਤਿ. ਸਚੇ ਪਨ ਨਾਨਪ੍ਪਕਾਰੇ ਕਾਤੁਕਾਮੋ ਹੋਤਿ, ਕੇਚਿ ਪਠਮਵਯੇ, ਕੇਚਿ ਮਜ੍ਝਿਮਵਯੇ, ਕੇਚਿ ਪਚ੍ਛਿਮਵਯੇ, ਤਥਾ ਦੀਘਕੇਸੇ, ਉਪਡ੍ਢਮੁਣ੍ਡੇ, ਮਿਸ੍ਸਕਕੇਸੇ, ਉਪਡ੍ਢਰਤ੍ਤਚੀਵਰੇ, ਪਣ੍ਡੁਕਚੀਵਰੇ, ਪਦਭਾਣਧਮ੍ਮਕਥਾਸਰਭਞ੍ਞਪਞ੍ਹਪੁਚ੍ਛਨਪਞ੍ਹਵਿਸ੍ਸਜ੍ਜਨਚੀਵਰਸਿਬ੍ਬਨਧੋਵਨਾਦੀਨਿ ਕਰੋਨ੍ਤੇ, ਅਪਰੇਪਿ ਵਾ ਨਾਨਪ੍ਪਕਾਰਕੇ ਕਾਤੁਕਾਮੋ ਹੋਤਿ, ਤੇਨ ਪਾਦਕਜ੍ਝਾਨਤੋ ਵੁਟ੍ਠਾਯ ‘‘ਏਤ੍ਤਕਾ ਭਿਕ੍ਖੂ ਪਠਮਵਯਾ ਹੋਨ੍ਤੂ’’ਤਿਆਦਿਨਾ ਨਯੇਨ ਪਰਿਕਮ੍ਮਂ ਕਤ੍ਵਾ ਪੁਨ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਅਧਿਟ੍ਠਿਤੇ ਅਧਿਟ੍ਠਾਨਚਿਤ੍ਤੇਨ ਸਦ੍ਧਿਂ ਇਚ੍ਛਿਤਿਚ੍ਛਿਤਪ੍ਪਕਾਰਾਯੇਵ ਹੋਨ੍ਤਿ. ਅਵਤ੍ਥੁਕਵਚਨਂ ਨ ਹੋਤੀਤਿ ਨਿਮ੍ਮਿਤਾਨਂ ‘‘ਅਯਂ ਮਞ੍ਚੋ’’ਤਿਆਦਿਵਚਨਂ ਅਵਤ੍ਥੁਕਂ ਨ ਹੋਤਿ ਸਬ੍ਬਤ੍ਥ ਮਞ੍ਚਪੀਠਾਨਂ ਸਮ੍ਭਵਤੋ.
੩੮੩. ਏਕਚਾਰਿਕਭਤ੍ਤਨ੍ਤਿ ਅਤਿਮਨਾਪਤ੍ਤਾ ਵਿਸੁਂ ਠਿਤਿਕਾਯ ਪਾਪੇਤਬ੍ਬਂ ਭਤ੍ਤਂ. ਤਦ੍ਧਿਤਵੋਹਾਰੇਨਾਤਿ ਚਤ੍ਤਾਰਿ ਪਰਿਮਾਣਮਸ੍ਸ ਚਤੁਕ੍ਕਨ੍ਤਿ ਏਵਂ ਤਦ੍ਧਿਤਵੋਹਾਰੇਨ. ਓਦਨਸ੍ਸ ਪੁਚ੍ਛਾਯ ਸਾਧਕਤਮਤ੍ਤਾ ਆਹ – ‘‘ਕਰਣਤ੍ਥੇਯੇਵ ਕਰਣਵਚਨ’’ਨ੍ਤਿ, ਓਦਨੇਨ ਕਰਣਭੂਤੇਨ ਪੁਚ੍ਛਨ੍ਤੀਤਿ ਵੁਤ੍ਤਂ ਹੋਤਿ. ਯੇ ਚ ਓਦਨੇਨ ਕਰਣਭੂਤੇਨ ਪੁਚ੍ਛਨ੍ਤਿ, ਤੇਸਂ ਪੁਚ੍ਛਨਾਕਾਰਦਸ੍ਸਨਤ੍ਥਂ ‘‘ਕਿਂ, ਭਨ੍ਤੇ, ਓਦਨਂ ਦੇਮਾਤਿ ਪੁਚ੍ਛਨ੍ਤੀ’’ਤਿ ਵੁਤ੍ਤਂ.
ਭਵੋਤਿ ਭਵਿਤਬ੍ਬੋ. ਅਸਮਨ੍ਨਾਹਰਿਤ੍ਵਾਤਿ ਆਭੋਗਂ ਅਕਤ੍ਵਾ. ਰਤ੍ਤਿਂ ਸਮ੍ਮਨ੍ਤਯਮਾਨਾਤਿ ਕਞ੍ਚਿ ਕਾਲਂ ਸੁਪਿਤ੍ਵਾ ਵੁਟ੍ਠਾਯ ਸਮ੍ਮਨ੍ਤਯਮਾਨਾ. ਰਤ੍ਤਿਯਞ੍ਹਿ ਪਠਮਯਾਮਮਜ੍ਝਿਮਯਾਮੇਸੁ ਸੁਪਿਤ੍ਵਾ ਪਬੁਦ੍ਧਾਨਂ ਅਜ੍ਜਤਨਕਾਲੇਪਿ ਅਨਜ੍ਜਤਨਾਭਿਮਾਨੋ ਹੋਤਿ, ਤਸ੍ਮਾ ਤੇ ‘‘ਹਿਯ੍ਯੋ’’ਤਿ ਆਹਂਸੁ. ਯੇ ਪਨ ਰਤ੍ਤਿਯਂ ਕਮ੍ਮਪ੍ਪਸੁਤਾ ਜਾਗਰਿਯਮਨੁਯੁਤ੍ਤਾ ਹੋਨ੍ਤਿ, ਤੇਸਂ ਅਜ੍ਜਤਨਾਭਿਮਾਨੋਯੇਵ, ਤਸ੍ਮਾ ਤੇ ‘‘ਅਜ੍ਜ’’ਇਚ੍ਚੇਵ ਵੋਹਰਨ੍ਤਿ, ਨ ‘‘ਹਿਯ੍ਯੋ’’ਤਿ. ਪਧੂਪਾਯਨ੍ਤਾਤਿ ਪੁਨਪ੍ਪੁਨਂ ਉਪ੍ਪਜ੍ਜਨਕਕੋਧਵਸੇਨ ਪਧੂਪਾਯਨ੍ਤਾ.
੩੮੪. ਦਬ੍ਬ ਦਬ੍ਬਾਤਿ ਦੁਤਿਯੋ ਦਬ੍ਬ-ਸਦ੍ਦੋ ਪਣ੍ਡਿਤਾਧਿਵਚਨੋਤਿ ਆਹ ‘‘ਦਬ੍ਬਾ ਪਣ੍ਡਿਤਾ’’ਤਿ. ਏਵਂ ਨ ਨਿਬ੍ਬੇਠੇਨ੍ਤੀਤਿ ਸਮ੍ਬਨ੍ਧੋ. ਨਿਬ੍ਬੇਠੇਨ੍ਤੀਤਿ ਅਤ੍ਤਾਨਂ ਦੋਸਤੋ ਮੋਚੇਨ੍ਤਿ. ਵੁਟ੍ਠਾਨਲਕ੍ਖਣਂ ਮਞ੍ਞਮਾਨਾਤਿ ਵੁਟ੍ਠਾਨਲਕ੍ਖਣਨ੍ਤਿ ਮਞ੍ਞਮਾਨਾ. ਨ ਘਟਿਯਤੀਤਿ ਥੇਰਸ੍ਸ ਸੁਸੀਲਪਟਿਞ੍ਞਾਯ ਤਸ੍ਸਾ ਦੁਸ੍ਸੀਲਪਟਿਞ੍ਞਾਵਚਨਂ ਨ ਘਟਿਯਤੀਤਿ ਅਧਿਪ੍ਪਾਯੋ. ਏਤ੍ਥ ਯਂ ਵਤ੍ਤਬ੍ਬਂ, ਤਂ ਪਰਤੋ ਆਵਿ ਭਵਿਸ੍ਸਤਿ. ਨਾਸੇਥਾਤਿ ਸੇਤਕਂ ਦਤ੍ਵਾ ਗਿਹਿਭਾਵਂ ਪਾਪੇਥਾਤਿ ਅਤ੍ਥੋ. ਲਿਙ੍ਗਨਾਸਨਾ ਹੇਤ੍ਥ ਅਧਿਪ੍ਪੇਤਾ. ਇਮਮੇਵ ਚ ਦਸ੍ਸੇਤੁਂ ‘‘ਤਿਸ੍ਸੋ ਨਾਸਨਾ’’ਤਿਆਦਿ ਵੁਤ੍ਤਂ. ਏਕਕਮ੍ਮਾਦਿਸਂਵਾਸਸ੍ਸ ਅਕਰਣਂ ਸਂਵਾਸਨਾਸਨਾ. ਦਣ੍ਡਕਮ੍ਮਨਾਸਨਾ ਨਾਮ ਵਾਲੁਕਾਦੀਨਿ ਓਕਿਰਿਤ੍ਵਾ ਯਾਵ ਖਮਾਪੇਤਿ, ਤਾਵ ਦਣ੍ਡਕਮ੍ਮਵਸੇਨ ਨਿਕ੍ਕਡ੍ਢਨਂ. ਚਰ ਪਿਰੇ ਵਿਨਸ੍ਸਾਤਿ ਨਿਕ੍ਕਡ੍ਢਨਾਕਾਰਦਸ੍ਸਨਂ. ਤਤ੍ਥ ਚਰਾਤਿ ਗਚ੍ਛ, ਅਪੇਹੀਤਿ ਵੁਤ੍ਤਂ ਹੋਤਿ. ਪਿਰੇਤਿ ਪਰ ਅਮਾਮਕ, ਅਮ੍ਹਾਕਂ ਅਨਜ੍ਝਤ੍ਤਿਕਭੂਤਾਤਿ ਅਤ੍ਥੋ. ਪਿਰੇਤਿ ਹਿ ਪਰ-ਸਦ੍ਦੇਨ ਸਮਾਨਤ੍ਥਂ ਸਮ੍ਬੋਧਨਵਚਨਂ. ਅਥ ਵਾ ਪਿਰੇਤਿ ‘‘ਪਰਤੋ’’ਤਿ ਇਮਿਨਾ ਸਮਾਨਤ੍ਥਂ ਨਿਪਾਤਪਦਂ, ਤਸ੍ਮਾ ਚਰ ਪਿਰੇਤਿ ਪਰਤੋ ਗਚ੍ਛ, ਮਾ ਇਧ ਤਿਟ੍ਠਾਤਿ ਅਤ੍ਥੋ. ਵਿਨਸ੍ਸਾਤਿ ਅਦਸ੍ਸਨਂ ਗਚ੍ਛ.
ਯਸ੍ਮਾ ਤੇ ਭਿਕ੍ਖੂ ਅਤ੍ਤਾਨਂ ਅਪ੍ਪਕਾਸੇਤ੍ਵਾ ਠਿਤਾ, ਤਸ੍ਮਾ ਅਨੁਯੁਞ੍ਜਥਾਤਿ ਇਮਸ੍ਸ ਗਵੇਸਥ ਜਾਨਾਥਾਤਿ ਅਤ੍ਥੋ ਵੁਤ੍ਤੋ. ਕਾਰਕੋ ਹੋਤੀਤਿ ‘‘ਅਯ੍ਯੇਨਮ੍ਹਿ ਦੂਸਿਤਾ’’ਤਿ ਪਟਿਞ੍ਞਾਤਤ੍ਤਾ ਤਾਯ ਪਟਿਞ੍ਞਾਯ ਯਦਿ ਨਾਸਿਤਾ, ਥੇਰੋ ਕਾਰਕੋ ਹੋਤਿ, ਸਦੋਸੋਤਿ ਅਤ੍ਥੋ. ਅਕਾਰਕੋ ਹੋਤੀਤਿ ਤਾਯ ਕਤਪਟਿਞ੍ਞਂ ਅਨਪੇਕ੍ਖਿਤ੍ਵਾ ਯਦਿ ਭਗਵਤਾ ਪਕਤਿਦੁਸ੍ਸੀਲਭਾਵਂਯੇਵ ਸਨ੍ਧਾਯ ਸਾ ਨਾਸਿਤਾ, ਥੇਰੋ ਅਕਾਰਕੋ ਹੋਤੀਤਿ ਅਧਿਪ੍ਪਾਯੋ. ‘‘ਸਕਾਯ ਪਟਿਞ੍ਞਾਯ ਨਾਸੇਥਾ’’ਤਿ ਵੁਤ੍ਤੇ ‘‘ਅਯ੍ਯੇਨਮ੍ਹਿ ਦੂਸਿਤਾ’’ਤਿ ਤਾਯ ਕਤਪਟਿਞ੍ਞਾਯ ਭੂਤਤਾ ਆਪਜ੍ਜਤੀਤਿ ਆਹ – ‘‘ਭਨ੍ਤੇ, ਤੁਮ੍ਹਾਕਂ ਵਾਦੇ ਥੇਰੋ ਕਾਰਕੋ ਹੋਤਿ ਸਦੋਸੋ’’ਤਿ. ਭਿਕ੍ਖੁਨਿਂ ਅਨੁਦ੍ਧਂਸੇਤਿ, ਦੁਕ੍ਕਟਨ੍ਤਿ ਇਮਿਨਾ ਮਹਾਅਟ੍ਠਕਥਾਵਾਦੋ ਦਸ੍ਸਿਤੋ. ਮੁਸਾਵਾਦੇ ਪਾਚਿਤ੍ਤਿਯਨ੍ਤਿ ਵੁਤ੍ਤਨ੍ਤਿ ਭਿਕ੍ਖੁਨਿਂ ਅਨੁਦ੍ਧਂਸੇਨ੍ਤਸ੍ਸ ਮੁਸਾਵਾਦੇ ਪਾਚਿਤ੍ਤਿਯਨ੍ਤਿ ਵੁਤ੍ਤਂ.
ਤਤ੍ਰਾਤਿ ਤੇਸੁ ਦੁਕ੍ਕਟਪਾਚਿਤ੍ਤਿਯੇਸੁ. ਇਤੋ ਪਟ੍ਠਾਯ ‘‘ਤਸ੍ਮਾ ਪਾਚਿਤ੍ਤਿਯਮੇਵ ਯੁਜ੍ਜਤੀ’’ਤਿ ਵਚਨਪਰਿਯਨ੍ਤਂ ਦ੍ਵੀਸੁਪਿ ਅਟ੍ਠਕਥਾਸੁ ਅਧਿਪ੍ਪਾਯਵਿਭਾਵਨਂ. ਤਤ੍ਥ ਪੁਰਿਮਨਯੇਤਿ ‘‘ਭਿਕ੍ਖੁਨਿਂ ਅਨੁਦ੍ਧਂਸੇਤਿ, ਦੁਕ੍ਕਟ’’ਨ੍ਤਿ ਵੁਤ੍ਤਅਟ੍ਠਕਥਾਨਯੇ. ਦੁਕ੍ਕਟਮੇਵ ਯੁਜ੍ਜਤੀਤਿ ਕਸ੍ਮਾ ਵੁਤ੍ਤਨ੍ਤਿ ਚੇ? ਤਤ੍ਥ ਕਾਰਣਂ ਦਸ੍ਸੇਨ੍ਤੋ ‘‘ਯਥਾ’’ਤਿਆਦਿਮਾਹ. ਭਿਕ੍ਖੁਨੋ ਭਿਕ੍ਖੁਸ੍ਮਿਂ ਸਙ੍ਘਾਦਿਸੇਸੋਤਿ ਭਿਕ੍ਖੁਂ ਅਮੂਲਕੇਨ ਅਨ੍ਤਿਮਵਤ੍ਥੁਨਾ ਅਨੁਦ੍ਧਂਸੇਨ੍ਤਸ੍ਸ ਭਿਕ੍ਖੁਨੋ ਸਙ੍ਘਾਦਿਸੇਸੋਤਿ ਅਤ੍ਥੋ. ਪਚ੍ਛਿਮਨਯੇਪਿ ‘‘ਭਿਕ੍ਖੁਨਿਂ ਅਨੁਦ੍ਧਂਸੇਨ੍ਤਸ੍ਸ ਮੁਸਾਵਾਦੇ ਪਾਚਿਤ੍ਤਿਯ’’ਨ੍ਤਿ ਵੁਤ੍ਤਂ. ਕੁਰੁਨ੍ਦੀਨਯੇਪਿ ਮੁਸਾਵਾਦਤ੍ਤਾ ਪਾਚਿਤ੍ਤਿਯਮੇਵ ਯੁਜ੍ਜਤੀਤਿ ਵਿਸਂਵਾਦਪੁਰੇਕ੍ਖਤਾਯ ਪਾਚਿਤ੍ਤਿਯਮੇਵ ਯੁਜ੍ਜਤੀਤਿ ਅਧਿਪ੍ਪਾਯੋ. ਯਦਿ ਏਵਂ ਭਿਕ੍ਖੁਂ ਅਮੂਲਕੇਨ ਅਨ੍ਤਿਮਵਤ੍ਥੁਨਾ ਅਨੁਦ੍ਧਂਸੇਨ੍ਤਸ੍ਸ ਅਕ੍ਕੋਸਨ੍ਤਸ੍ਸ ਚ ਮੁਸਾਵਾਦਤ੍ਤਾ ਪਾਚਿਤ੍ਤਿਯੇਨੇਵ ਭਵਿਤਬ੍ਬਨ੍ਤਿ ਚੇ? ਤਤ੍ਥ ਸਤਿਪਿ ਮੁਸਾਵਾਦੇ ਵਚਨਪ੍ਪਮਾਣਤੋ ਸਙ੍ਘਾਦਿਸੇਸਓਮਸਵਾਦਪਾਚਿਤ੍ਤਿਯੇਹੇਵ ਭਵਿਤਬ੍ਬਂ, ਨ ਸਮ੍ਪਜਾਨਮੁਸਾਵਾਦਪਾਚਿਤ੍ਤਿਯੇਨਾਤਿ ਦਸ੍ਸੇਤੁਂ ‘‘ਵਚਨਪ੍ਪਮਾਣਤੋ’’ਤਿਆਦਿਮਾਹ. ਤਤ੍ਥ ਵਚਨਪ੍ਪਮਾਣਤੋਤਿ ਭਗਵਤਾ ਵੁਤ੍ਤਪਾਲ਼ਿਵਚਨਪ੍ਪਮਾਣਤੋ. ਇਦਾਨਿ ਤਂ ਵਚਨਂ ਦਸ੍ਸੇਤੁਂ ‘‘ਅਨੁਦ੍ਧਂਸਨਾਧਿਪ੍ਪਾਯੇਨਾ’’ਤਿਆਦਿ ਵੁਤ੍ਤਂ. ਭਿਕ੍ਖੁਸ੍ਸ ਪਨ ਭਿਕ੍ਖੁਨਿਯਾ ਦੁਕ੍ਕਟਨ੍ਤਿ ਵਚਨਂ ਨਤ੍ਥੀਤਿ ਭਿਕ੍ਖੁਨਿਯਾ ਅਨੁਦ੍ਧਂਸਨੇ ਭਿਕ੍ਖੁਨੋ ਦੁਕ੍ਕਟਨ੍ਤਿ ਵਚਨਂ ਨਤ੍ਥਿ ਤਥਾ ਪਾਲ਼ਿਯਂ ਅਨਾਗਤਤ੍ਤਾ. ਸਮ੍ਪਜਾਨਮੁਸਾਵਾਦੇ ਪਾਚਿਤ੍ਤਿਯਨ੍ਤਿ ਵਚਨਮਤ੍ਥੀਤਿ ਸਾਮਞ੍ਞਤੋ ਵੁਤ੍ਤਂ ਸਮ੍ਪਜਾਨਮੁਸਾਵਾਦਸਿਕ੍ਖਾਪਦਂ ਦਸ੍ਸੇਤਿ.
ਇਦਾਨਿ ਦ੍ਵੀਸੁਪਿ ਅਟ੍ਠਕਥਾਵਾਦੇਸੁ ਅਧਿਪ੍ਪਾਯਂ ਵਿਭਾਵੇਤ੍ਵਾ ਤੇਸੁ ਪਚ੍ਛਿਮਵਾਦੇ ਦੋਸਂ ਦਸ੍ਸੇਤ੍ਵਾ ਪੁਰਿਮਵਾਦਂ ਪਤਿਟ੍ਠਪੇਤੁਕਾਮੋ ਆਚਰਿਯੋ ‘‘ਤਤ੍ਰ ਪਨਾ’’ਤਿਆਦਿਮਾਹ. ਤਤ੍ਰਾਤਿ ‘‘ਪਾਚਿਤ੍ਤਿਯਮੇਵ ਯੁਜ੍ਜਤੀ’’ਤਿ ਵੁਤ੍ਤਵਾਦੇ. ਅਨੁਦ੍ਧਂਸਨਾਧਿਪ੍ਪਾਯੇ ਅਸਤਿ ਪਾਚਿਤ੍ਤਿਯਨ੍ਤਿ ਇਮਿਨਾ ਸਮ੍ਪਜਾਨਮੁਸਾਵਾਦੇ ਪਾਚਿਤ੍ਤਿਯਸ੍ਸ ਓਕਾਸਂ ਦਸ੍ਸੇਤਿ. ਵਿਸੁਂ ਪਾਚਿਤ੍ਤਿਯਂ ਵੁਤ੍ਤਨ੍ਤਿ ਸਮ੍ਪਜਾਨਮੁਸਾਵਾਦੇ ਪਾਚਿਤ੍ਤਿਯਤੋ ਵਿਸੁਂ ਅਞ੍ਞਮੇਵ ਪਾਚਿਤ੍ਤਿਯਂ ਵੁਤ੍ਤਂ. ਏਤੇਹਿ ਨਾਸਨਾ ਨਤ੍ਥੀਤਿ ਸਾਮਞ੍ਞਤੋ ਵੁਤ੍ਤਂ, ਇਮਿਸ੍ਸਾ ਪਨ ਦੁਕ੍ਕਟੇਨ ਨਾਸਨਾ ਨਤ੍ਥੀਤਿ ਅਧਿਪ੍ਪਾਯੋ. ਯਦਿ ਏਵਂ ਕਸ੍ਮਾ ਨਂ ਭਗਵਾ ਨਾਸੇਤੀਤਿ ਆਹ ‘‘ਯਸ੍ਮਾ ਪਨਾ’’ਤਿਆਦਿ.
੩੮੫-੩੮੬. ਦੂਸਿਤੋਤਿ ਦੁਟ੍ਠਸਦ੍ਦਸ੍ਸ ਕਮ੍ਮਸਾਧਨਤਂ ਦਸ੍ਸੇਤਿ. ਦੂਸਯਤਿ ਪਰਂ ਵਿਨਾਸੇਤੀਤਿ ਦੂਸਕੋ. ਇਮਿਨਾ ‘‘ਦੂਸਯਤੀਤਿ ਦੋਸੋ’’ਤਿ ਦੋਸਸਦ੍ਦਸ੍ਸ ਕਤ੍ਤੁਸਾਧਨਤਾ ਵੁਤ੍ਤਾ. ਪਕਤਿਭਾਵਂ ਜਹਾਪਿਤੋਤਿ ਦੁਸਸਦ੍ਦਸ੍ਸ ਵਿਕਤਿਯਂ ਪਠਿਤਤ੍ਤਾ ਵੁਤ੍ਤਂ, ਪਕਤਿਯਾ ਸੋਮ੍ਮਭਾਵਂ ਜਹਾਪਿਤੋਤਿ ਅਤ੍ਥੋ, ਵਿਕਾਰਮਾਪਾਦਿਤੋਤਿ ਵੁਤ੍ਤਂ ਹੋਤਿ. ਆਕਾਰਨਾਨਤ੍ਤੇਨਾਤਿ ਦੂਸਿਤਾਕਾਰਸ੍ਸ ਦੂਸਕਾਕਾਰਸ੍ਸ ਚ ਨਾਨਤ੍ਤੇਨ. ਅਨਭਿਰਦ੍ਧੋਤਿ ਅਤੁਟ੍ਠੋ. ਯੋ ਪਨ ਅਤੁਟ੍ਠੋ, ਸੋ ਸੁਖਿਤੋ ਨਾਮ ਨ ਹੋਤੀਤਿ ਆਹ ‘‘ਨ ਸੁਖਿਤੋ’’ਤਿ. ‘‘ਆਰਾਧਿਤੋ ਰਾਜਾ’’ਤਿਆਦੀਸੁ ਪਸਾਦਿਤੋਤਿ ਅਤ੍ਥਸਮ੍ਭਵਤੋ ‘‘ਨ ਵਾ ਪਸਾਦਿਤੋ’’ਤਿ ਵੁਤ੍ਤਂ. ਖੀਲਸਦ੍ਦੋ ਥਦ੍ਧਭਾਵਵਚਨੋ ਕਚਵਰਪਰਿਯਾਯੋ ਚ ਹੋਤੀਤਿ ਆਹ – ‘‘ਚਿਤ੍ਤਥਦ੍ਧਭਾਵਚਿਤ੍ਤਕਚਵਰਸਙ੍ਖਾਤਂ ਪਟਿਘਖੀਲ’’ਨ੍ਤਿ. ਖੀਲਯਤਿ ਤੇਨ ਚਿਤ੍ਤਂ ਥਦ੍ਧਭਾਵਂ ਆਪਜ੍ਜਤੀਤਿ ਖੀਲਂ, ਚਿਤ੍ਤਸ੍ਸ ਥਦ੍ਧਭਾਵੋ. ਸੋ ਚ ਅਤ੍ਥਤੋ ਪਟਿਘੋਯੇਵ. ਚਿਤ੍ਤਸ੍ਸ ਥਦ੍ਧਭਾਵਲਕ੍ਖਣੋ ਹਿ ਪਟਿਘੋ, ਤਸ੍ਮਿਞ੍ਚ ਉਪ੍ਪਨ੍ਨੇ ਚਿਤ੍ਤਂ ਉਕ੍ਲਾਪਜਾਤਟ੍ਠਾਨਂ ਵਿਯ ਅਮਨੁਞ੍ਞਂ ਹੋਤਿ, ਤਸ੍ਮਾ ਕਚਵਰਸਦਿਸਤ੍ਤਾਪਿ ਪਟਿਘੋਵ ‘‘ਖੀਲ’’ਨ੍ਤਿ ਵੁਤ੍ਤੋ. ਤੇਨਾਹ ‘‘ਪਟਿਘਖੀਲ’’ਨ੍ਤਿ. ਚਿਤ੍ਤਸ੍ਸ ਥਦ੍ਧਭਾਵਤ੍ਤਾ ਕਚਵਰਸਦਿਸਤ੍ਤਾ ਚ ਪਟਿਘੋਯੇਵ ਖੀਲਂ ਪਟਿਘਖੀਲਂ. ਨਪ੍ਪਤੀਤੋਤਿ ਪੀਤਿਸੁਖਾਦੀਹਿ ਨ ਅਭਿਗਤੋ ਨ ਅਨੁਗਤੋ, ਨ ਉਪੇਤੋਤਿ ਅਤ੍ਥੋ. ਯੋ ਚ ਪੀਤਿਸੁਖਾਦੀਹਿ ਅਨੁਪਗਤੋ, ਸੋ ਤੇਹਿ ਵਜ੍ਜਿਤੋ ਨਾਮ ਹੋਤੀਤਿ ਆਹ ‘‘ਪੀਤਿਸੁਖਾਦੀਹਿ ਵਜ੍ਜਿਤੋ’’ਤਿ. ਯੋ ਚ ਤੇਹਿ ਵਜ੍ਜਿਤੋ, ਨ ਸੋ ਤੇਨ ਅਭਿਸਟੋ ਨਾਮ ਹੋਤੀਤਿ ਆਹ ‘‘ਨ ਅਭਿਸਟੋ’’ਤਿ, ਪੀਤਿਸੁਖਾਦੀਹਿ ਨ ਪਤ੍ਥਟੋਤਿ ਅਤ੍ਥੋ.
ਯੇਨਾਤਿ ਯੇਨ ਕੋਪੇਨ. ਦੁਟ੍ਠੋਤਿ ਮਾਤਿਕਾਯ ਆਗਤਪਦਂ ਦਸ੍ਸੇਤਿ, ਕੁਪਿਤੋਤਿ ਪਦਭਾਜਨੇ ਆਗਤਪਦਂ. ਅਤ੍ਥਤੋ ਏਕਤ੍ਤੇਪਿ ਉਭਿਨ੍ਨਂ ਪਦਾਨਂ ਵਸੇਨ ‘‘ਉਭਯਮ੍ਪੀ’’ਤਿ ਵੁਤ੍ਤਂ. ਏਵਂ ‘‘ਤੇਨ ਚ ਕੋਪੇਨ ਤੇਨ ਚ ਦੋਸੇਨਾ’’ਤਿ ਇਮੇਸਂ ਪਦਾਨਂ ਵਸੇਨ ‘‘ਦ੍ਵੀਹੀ’’ਤਿ ਵੁਤ੍ਤਂ, ਅਤ੍ਥਤੋ ਪਨ ਦੋਸੋਯੇਵ. ਸੋ ਚ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨੋਤਿ ਆਹ ‘‘ਇਮੇਹਿ ਦ੍ਵੀਹਿ ਸਙ੍ਖਾਰਕ੍ਖਨ੍ਧਮੇਵ ਦਸ੍ਸੇਤੀ’’ਤਿ. ‘‘ਅਨਤ੍ਤਮਨਤਾ ਅਨਭਿਰਦ੍ਧੀ’’ਤਿ ਵਚਨੇਹਿ ਦੋਮਨਸ੍ਸਵੇਦਨਾਵ ਵੁਤ੍ਤਾਤਿ ਆਹ ‘‘ਇਮੇਹਿ ਦ੍ਵੀਹਿ ਵੇਦਨਾਕ੍ਖਨ੍ਧਂ ਦਸ੍ਸੇਤੀ’’ਤਿ.
ਯਦਾ ਪਨ ਚੋਦਕੇਨ ਅਦਿਟ੍ਠਂ ਅਸੁਤਂ ਅਪਰਿਸਙ੍ਕਿਤਂ ਵਾ ਹੋਤਿ, ਤਦਾ ਅਮੂਲਕਂ ਨਾਮ ਹੋਤੀਤਿ ਆਹ ‘‘ਤਂ ਪਨਸ੍ਸ…ਪੇ… ਚੋਦਕਵਸੇਨ ਅਧਿਪ੍ਪੇਤ’’ਨ੍ਤਿ. ਯਦਿ ਚੁਦਿਤਕਵਸੇਨ ਅਧਿਪ੍ਪੇਤਂ ਸਿਯਾ, ਅਮੂਲਕਂ ਨਾਮ ਅਨਜ੍ਝਾਪਨ੍ਨਨ੍ਤਿ ਪਦਭਾਜਨਂ ਵਦੇਯ੍ਯਾਤਿ ਅਧਿਪ੍ਪਾਯੋ. ਯਂ ਪਾਰਾਜਿਕਨ੍ਤਿ ਭਿਕ੍ਖੁਨੋ ਅਨੁਰੂਪੇਸੁ ਏਕੂਨਵੀਸਤਿਯਾ ਪਾਰਾਜਿਕੇਸੁ ਅਞ੍ਞਤਰਂ. ਪਦਭਾਜਨੇ ਪਨ ਪਾਲ਼ਿਯਂ ਆਗਤਾਨੇਵ ਗਹੇਤ੍ਵਾ ‘‘ਚਤੁਨ੍ਨਂ ਅਞ੍ਞਤਰੇਨਾ’’ਤਿ ਵੁਤ੍ਤਂ. ਏਤਨ੍ਤਿ ਚੁਦਿਤਕਸ੍ਸ ਆਪਨ੍ਨਾਨਾਪਨ੍ਨਤ੍ਤਂ. ਇਧਾਤਿ ਇਮਸ੍ਮਿਂ ਸਿਕ੍ਖਾਪਦੇ.
ਤਥੇਵਾਤਿ ਪਸਾਦਸੋਤੇਨ ਦਿਬ੍ਬਸੋਤੇਨ ਵਾਤਿ ਇਮਮਤ੍ਥਂ ਅਤਿਦਿਸਤਿ. ਸੁਤ੍ਵਾਵ ਜਾਨਿਤਬ੍ਬਤੋ ‘‘ਸੁਤਟ੍ਠਾਨੇਯੇਵ ਤਿਟ੍ਠਤੀ’’ਤਿ ਵੁਤ੍ਤਂ. ਪਰਿਸਙ੍ਕਨਂ ਪਰਿਸਙ੍ਕਿਤਂ, ਦਿਟ੍ਠਾਨੁਗਤਂ ਪਰਿਸਙ੍ਕਿਤਂ ਦਿਟ੍ਠਪਰਿਸਙ੍ਕਿਤਂ. ਏਵਂ ਸੇਸੇਸੁਪਿ. ਇਮੇਸਨ੍ਤਿ ਕਤ੍ਤੁਅਤ੍ਥੇ ਸਾਮਿਵਚਨਂ, ਇਮੇਹੀਤਿ ਅਤ੍ਥੋ. ਕਰਿਸ੍ਸਨ੍ਤਿ ਵਾਤਿ ਏਤ੍ਥ ਵਿਭਤ੍ਤਿਪਰਿਣਾਮਂ ਕਤ੍ਵਾ ਇਮੇਤਿ ਯੋਜੇਤਬ੍ਬਂ. ਦਿਟ੍ਠਂ ਅਤ੍ਥਿ ਸਮੂਲਕਂ, ਅਤ੍ਥਿ ਅਮੂਲਕਨ੍ਤਿ ਇਦਂ ਅਜ੍ਝਾਚਾਰਸ੍ਸ ਸਬ੍ਭਾਵਾਸਬ੍ਭਾਵਂ ਸਨ੍ਧਾਯ ਵੁਤ੍ਤਂ. ਅਤ੍ਥਿ ਸਞ੍ਞਾਸਮੂਲਕਂ, ਅਤ੍ਥਿ ਸਞ੍ਞਾਅਮੂਲਕਨ੍ਤਿ ਇਦਂ ਪਨ ਦਿਟ੍ਠਸਞ੍ਞਾਯ ਸਬ੍ਭਾਵਾਸਬ੍ਭਾਵਂ ਸਨ੍ਧਾਯ.
ਸਮੀਪੇ ਠਤ੍ਵਾਤਿ ਦ੍ਵਾਦਸਹਤ੍ਥਬ੍ਭਨ੍ਤਰੇ ਸਮੀਪੇ ਠਤ੍ਵਾਤਿ ਵਦਨ੍ਤੀਤਿ ਤੀਸੁਪਿ ਗਣ੍ਠਿਪਦੇਸੁ ਵੁਤ੍ਤਂ. ਪਰਤੋ ਪਨ ‘‘ਦੂਤਂ ਵਾ ਪਣ੍ਣਂ ਵਾ ਸਾਸਨਂ ਪੇਸੇਤ੍ਵਾ ਚੋਦੇਨ੍ਤਸ੍ਸ ਸੀਸਂ ਨ ਏਤੀ’’ਤਿ ਪਰਮ੍ਮੁਖਾਚੋਦਨਾਯ ਏਵ ਅਨਾਪਤ੍ਤਿਯਾ ਵੁਤ੍ਤਤ੍ਤਾ ‘‘ਸਮੀਪੇ ਠਤ੍ਵਾ’’ਤਿ ਇਦਂ ਸਮ੍ਮੁਖਭਾਵਮਤ੍ਤਦਸ੍ਸਨਤ੍ਥਂ ਵੁਤ੍ਤਨ੍ਤਿ ਅਮ੍ਹਾਕਂ ਖਨ੍ਤਿ. ਤੇਨੇਵ ਮਾਤਿਕਾਟ੍ਠਕਥਾਯਂ (ਕਙ੍ਖਾ. ਅਟ੍ਠ. ਦੁਟ੍ਠਦੋਸਸਿਕ੍ਖਾਪਦਵਣ੍ਣਨਾ) ਅਙ੍ਗਂ ਦਸ੍ਸੇਨ੍ਤੇਨ ‘‘ਚਾਵਨਾਧਿਪ੍ਪਾਯੇਨ ਸਮ੍ਮੁਖਾਚੋਦਨਾ’’ਤਿ ਵੁਤ੍ਤਂ, ਨ ਚ ਸਮ੍ਮੁਖਭਾਵੋ ਦ੍ਵਾਦਸਹਤ੍ਥਬ੍ਭਨ੍ਤਰੇਯੇਵਾਤਿ ਨਿਯਮੋ ਸਕ੍ਕਾ ਵਤ੍ਥੁਂ. ਵਿਨਯਵਿਨਿਚ੍ਛਯਞ੍ਚ ਪਤ੍ਵਾ ਗਰੁਕੇਯੇਵ ਠਾਤਬ੍ਬਨ੍ਤਿ ਵੁਤ੍ਤਂ, ਤਸ੍ਮਾ ਉਪਪਰਿਕ੍ਖਿਤ੍ਵਾ ਯੁਤ੍ਤਤਰਂ ਗਹੇਤਬ੍ਬਂ. ਚੋਦਾਪਕਸ੍ਸੇਵ ਵਾਚਾਯ ਵਾਚਾਯ ਸਙ੍ਘਾਦਿਸੇਸੋਤਿ ਆਣਤ੍ਤਸ੍ਸ ਵਾਚਾਯ ਵਾਚਾਯ ਚੋਦਾਪਕਸ੍ਸ ਸਙ੍ਘਾਦਿਸੇਸੋ. ਮਯਾਪਿ ਦਿਟ੍ਠਂ ਸੁਤਂ ਅਤ੍ਥੀਤਿ ਇਦਂ ਆਣਤ੍ਤਸ੍ਸਪਿ ਚੋਦਕਭਾਵਦਸ੍ਸਨਤ੍ਥਂ ਵੁਤ੍ਤਂ, ਏਵਂ ਪਨ ਅਵਤ੍ਵਾਪਿ ‘‘ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨੋਸੀ’’ਤਿ ਇਦਮੇਵ ਵਚਨਂ ਪਰਸ੍ਸ ਵਚਨਂ ਵਿਯ ਅਕਤ੍ਵਾ ਅਨੁਦ੍ਧਂਸਨਾਧਿਪ੍ਪਾਯੇਨ ਵਦਨ੍ਤਸ੍ਸ ਸਙ੍ਘਾਦਿਸੇਸੋਯੇਵ. ਸਤਿਪਿ ਪਨ ਅਨੁਦ੍ਧਂਸਨਾਧਿਪ੍ਪਾਯੇ ‘‘ਅਸੁਕੇਨ ਏਵਂ ਵੁਤ੍ਤ’’ਨ੍ਤਿ ਦਸ੍ਸੇਤ੍ਵਾ ਵਦਨ੍ਤਸ੍ਸ ਨਤ੍ਥਿ ਸਙ੍ਘਾਦਿਸੇਸੋਤਿ ਵਦਨ੍ਤਿ.
ਸਮ੍ਬਹੁਲਾ ਸਮ੍ਬਹੁਲੇ ਸਮ੍ਬਹੁਲੇਹਿ ਵਤ੍ਥੂਹਿ ਚੋਦੇਨ੍ਤੀਤਿ ਏਤ੍ਥ ਸਮ੍ਬਹੁਲੇਤਿ ਬਹੁਤ੍ਤਨਿਦ੍ਦੇਸੇ ਕਾਰਣਂ ਨ ਦਿਸ੍ਸਤਿ. ਵਤ੍ਥੁਚੋਦਕਾਨਂਯੇਵ ਹਿ ਏਕਾਨੇਕਵਸੇਨ ਇਦਂ ਚਤੁਕ੍ਕਮਾਗਤਂ, ਨ ਚੁਦਿਤਕਸ੍ਸਪਿ ਏਕਾਨੇਕਵਸੇਨ. ਤਥਾ ਹਿ ਏਕਸ੍ਸੇਵ ਚੁਦਿਤਕਸ੍ਸ ਵਸੇਨ ਏਕਵਤ੍ਥੁਏਕਚੋਦਕਏਕਵਤ੍ਥੁਨਾਨਾਚੋਦਕਨਾਨਾਵਤ੍ਥੁਏਕਚੋਦਕਨਾਨਾਵਤ੍ਥੁਨਾਨਾਚੋਦਕਪ੍ਪਭੇਦਂ ਇਦਂ ਚਤੁਕ੍ਕਮਾਗਤਂ, ਤੇਨੇਵ ਚਤੁਤ੍ਥਚੋਦਨਂ ਦਸ੍ਸੇਨ੍ਤੇਨਪਿ ‘‘ਇਮਿਸ੍ਸਾ ਚੋਦਨਾਯ ਨਾਨਾਵਤ੍ਥੂਨਿ ਨਾਨਾਚੋਦਕਾ’’ਤਿ ਵੁਤ੍ਤਂ, ਨ ਪਨ ‘‘ਨਾਨਾਚੁਦਿਤਕਾ’’ਤਿ, ਤਸ੍ਮਾ ‘‘ਸਮ੍ਬਹੁਲੇ’’ਤਿ ਬਹੁਤ੍ਤਨਿਦ੍ਦੇਸੇ ਕਾਰਣਂ ਨ ਦਿਸ੍ਸਤਿ. ਅਥ ਵਾ ਪਠਮਂ ਤੀਸੁਪਿ ਚੋਦਨਾਸੁ ਏਕਤ੍ਤੇਨ ਚੁਦਿਤਕਂ ਨਿਦ੍ਦਿਸਿਤ੍ਵਾਪਿ ਇਧ ਬਹੁਤ੍ਤੇਨ ਨਿਦ੍ਦੇਸੋ ‘‘ਨ ਕੇਵਲਂ ਏਕਸ੍ਮਿਂਯੇਵ ਚੁਦਿਤਕੇ ਚੋਦਨਾ ਸਮ੍ਭਵਤਿ, ਅਥ ਖੋ ਸਮ੍ਬਹੁਲੇਸੁਪੀ’’ਤਿ ਇਮਮਤ੍ਥਂ ਦਸ੍ਸੇਤੁਂ ਕਤੋ.
ਚੋਦੇਤੁਂ ਪਨ ਕੋ ਲਭਤਿ, ਕੋ ਨ ਲਭਤੀਤਿਆਦਿ ਅਨੁਦ੍ਧਂਸਨਾਧਿਪ੍ਪਾਯਂ ਵਿਨਾਪਿ ਚੋਦਨਾਲਕ੍ਖਣਂ ਦਸ੍ਸੇਤੁਂ ਵੁਤ੍ਤਂ. ਸੀਲਸਮ੍ਪਨ੍ਨੋਤਿ ਇਦਂ ਦੁਸ੍ਸੀਲਸ੍ਸ ਵਚਨਂ ਅਪ੍ਪਮਾਣਨ੍ਤਿ ਅਧਿਪ੍ਪਾਯੇਨ ਵੁਤ੍ਤਂ. ਭਿਕ੍ਖੁਨੀਨਂ ਪਨ ਭਿਕ੍ਖੁਂ ਚੋਦੇਤੁਂ ਅਨਿਸ੍ਸਰਤ੍ਤਾ ‘‘ਭਿਕ੍ਖੁਨਿਮੇਵਾ’’ਤਿ ਵੁਤ੍ਤਂ. ਸਤਿਪਿ ਭਿਕ੍ਖੁਨੀਨਂ ਭਿਕ੍ਖੂਸੁ ਅਨਿਸ੍ਸਰਭਾਵੇ ਤਾਹਿ ਕਤਚੋਦਨਾਪਿ ਚੋਦਨਾਰੁਹਤ੍ਤਾ ਚੋਦਨਾਯੇਵਾਤਿ ਅਧਿਪ੍ਪਾਯੇਨ ‘‘ਪਞ੍ਚਪਿ ਸਹਧਮ੍ਮਿਕਾ ਲਭਨ੍ਤੀ’’ਤਿ ਵੁਤ੍ਤਂ. ਭਿਕ੍ਖੁਸ੍ਸ ਸੁਤ੍ਵਾ ਚੋਦੇਤੀਤਿਆਦਿਨਾ ਚੋਦਕੋ ਯੇਸਂ ਸੁਤ੍ਵਾ ਚੋਦੇਤਿ, ਤੇਸਮ੍ਪਿ ਵਚਨਂ ਪਮਾਣਮੇਵਾਤਿ ਸਮ੍ਪਟਿਚ੍ਛਿਤਤ੍ਤਾ ਤੇਸਂ ਚੋਦਨਾਪਿ ਰੁਹਤੇਵਾਤਿ ਦਸ੍ਸੇਤੁਂ ਥੇਰੋ ਸੁਤ੍ਤਂ ਨਿਦਸ੍ਸੇਸਿ.
ਦੂਤਂ ਵਾ ਪਣ੍ਣਂ ਵਾ ਸਾਸਨਂ ਵਾ ਪੇਸੇਤ੍ਵਾਤਿ ‘‘ਤ੍ਵਂਯੇਵ ਗਨ੍ਤ੍ਵਾ ਚੋਦੇਹੀ’’ਤਿ ਦੂਤਂ ਵਾ ਪੇਸੇਤ੍ਵਾ ਯੋ ਤਂ ਚੋਦੇਤੁਂ ਸਕ੍ਕੋਤਿ, ਤਸ੍ਸ ਮੁਖਸਾਸਨਂ ਵਾ ਪਣ੍ਣਂ ਵਾ ਪੇਸੇਤ੍ਵਾ. ਸੀਸਂ ਨ ਏਤੀਤਿ ਸਙ੍ਘਾਦਿਸੇਸੋ ਨ ਹੋਤੀਤਿ ਅਧਿਪ੍ਪਾਯੋ. ਕਿਞ੍ਚਾਪਿ ਪਾਲ਼ਿਯਂ ‘‘ਚੋਦੇਤਿ ਵਾ ਚੋਦਾਪੇਤਿ ਵਾ’’ਤਿ ਸਾਮਞ੍ਞਤੋ ਵੁਤ੍ਤਤ੍ਤਾ ਦੂਤਸਾਸਨਾਦੀਹਿ ਚੋਦਾਪੇਨ੍ਤਸ੍ਸਪਿ ਆਪਤ੍ਤਿਯੇਵਾਤਿ ਪਞ੍ਞਾਯਤਿ, ‘‘ਸੀਸਂ ਨ ਏਤੀ’’ਤਿ ਇਦਂ ਪਨ ਅਟ੍ਠਕਥਾਚਰਿਯਪ੍ਪਮਾਣੇਨ ਗਹੇਤਬ੍ਬਂ. ਸਮਯੇਨਾਤਿ ਪਕਤਿਯਾ ਸਦ੍ਦਂ ਸੁਤ੍ਵਾ ਅਤ੍ਥਵਿਜਾਨਨਸਮਯੇਨ.
ਗਰੁਕਾਨਂ ਦ੍ਵਿਨ੍ਨਨ੍ਤਿ ਪਾਰਾਜਿਕਸਙ੍ਘਾਦਿਸੇਸਾਨਂ. ਅਵਸੇਸਾਨਂ ਵਸੇਨਾਤਿ ਪਞ੍ਚਲਹੁਕਾਪਤ੍ਤੀਨਂ ਵਸੇਨ. ‘‘ਨਤ੍ਥਿ ਦਿਨ੍ਨ’’ਨ੍ਤਿਆਦਿ ਦਸਵਤ੍ਥੁਕਾ ਮਿਚ੍ਛਾਦਿਟ੍ਠਿ. ‘‘ਅਨ੍ਤਵਾ ਲੋਕੋ, ਅਨਨ੍ਤਵਾ ਲੋਕੋ’’ਤਿਆਦਿਨਯਪ੍ਪਵਤ੍ਤਾ ਦਿਟ੍ਠਿ ਸਸ੍ਸਤੁਚ੍ਛੇਦਸਙ੍ਖਾਤਂ ਅਨ੍ਤਂ ਗਣ੍ਹਾਤੀਤਿ ਅਨ੍ਤਗ੍ਗਾਹਿਕਾ. ਆਜੀਵਹੇਤੁ ਪਞ੍ਞਤ੍ਤਾਨਂ ਛਨ੍ਨਂ ਸਿਕ੍ਖਾਪਦਾਨਂ ਵਸੇਨਾਤਿ ਆਜੀਵਹੇਤੁ ਆਜੀਵਕਾਰਣਾ ਪਾਪਿਚ੍ਛੋ ਇਚ੍ਛਾਪਕਤੋ ਅਸਨ੍ਤਂ ਅਭੂਤਂ ਉਤ੍ਤਰਿਮਨੁਸ੍ਸਧਮ੍ਮਂ ਉਲ੍ਲਪਤਿ, ਆਪਤ੍ਤਿ ਪਾਰਾਜਿਕਸ੍ਸ, ਆਜੀਵਹੇਤੁ ਆਜੀਵਕਾਰਣਾ ਸਞ੍ਚਰਿਤ੍ਤਂ ਸਮਾਪਜ੍ਜਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ, ਆਜੀਵਹੇਤੁ ਆਜੀਵਕਾਰਣਾ ਯੋ ਤੇ ਵਿਹਾਰੇ ਵਸਤਿ, ਸੋ ਭਿਕ੍ਖੁ ਅਰਹਾਤਿ ਭਣਤਿ, ਪਟਿਵਿਜਾਨਨ੍ਤਸ੍ਸ ਆਪਤ੍ਤਿ ਥੁਲ੍ਲਚ੍ਚਯਸ੍ਸ, ਆਜੀਵਹੇਤੁ ਆਜੀਵਕਾਰਣਾ ਭਿਕ੍ਖੁ ਪਣੀਤਭੋਜਨਾਨਿ ਅਗਿਲਾਨੋ ਅਤ੍ਤਨੋ ਅਤ੍ਥਾਯ ਵਿਞ੍ਞਾਪੇਤ੍ਵਾ ਭੁਞ੍ਜਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ, ਆਜੀਵਹੇਤੁ ਆਜੀਵਕਾਰਣਾ ਭਿਕ੍ਖੁਨੀ ਪਣੀਤਭੋਜਨਾਨਿ ਅਗਿਲਾਨਾ ਅਤ੍ਤਨੋ ਅਤ੍ਥਾਯ ਵਿਞ੍ਞਾਪੇਤ੍ਵਾ ਭੁਞ੍ਜਤਿ, ਆਪਤ੍ਤਿ ਪਾਟਿਦੇਸਨੀਯਸ੍ਸ, ਆਜੀਵਹੇਤੁ ਆਜੀਵਕਾਰਣਾ ਭਿਕ੍ਖੁ ਸੂਪਂ ਵਾ ਓਦਨਂ ਵਾ ਅਗਿਲਾਨੋ ਅਤ੍ਤਨੋ ਅਤ੍ਥਾਯ ਵਿਞ੍ਞਾਪੇਤ੍ਵਾ ਭੁਞ੍ਜਤਿ, ਆਪਤ੍ਤਿ ਦੁਕ੍ਕਟਸ੍ਸ, ਆਜੀਵਵਿਪਤ੍ਤਿਪਚ੍ਚਯਾ ਇਮਾ ਛ ਆਪਤ੍ਤਿਯੋ ਆਪਜ੍ਜਤੀਤਿ ਏਵਂ ਪਰਿਵਾਰਪਾਲ਼ਿਯਂ (ਪਰਿ. ੨੮੭) ਦਸ੍ਸਿਤਾਨਂ ਛਨ੍ਨਂ ਸਿਕ੍ਖਾਪਦਾਨਂ ਵਸੇਨ. ਦਿਟ੍ਠਿਵਿਪਤ੍ਤਿਆਜੀਵਵਿਪਤ੍ਤੀਹਿ ਚੋਦੇਨ੍ਤੋਪਿ ਤਮ੍ਮੂਲਿਕਾਯ ਆਪਤ੍ਤਿਯਾ ਏਵ ਚੋਦੇਤਿ.
‘‘ਕਸ੍ਮਾ ਮਂ ਨ ਵਨ੍ਦਸੀ’’ਤਿ ਪੁਚ੍ਛਿਤੇ ‘‘ਅਸ੍ਸਮਣੋਸਿ ਅਸਕ੍ਯਪੁਤ੍ਤਿਯੋਸੀ’’ਤਿ ਅਵਨ੍ਦਨਕਾਰਣਸ੍ਸ ਵੁਤ੍ਤਤ੍ਤਾ ਅਨ੍ਤਿਮਵਤ੍ਥੁਂ ਅਜ੍ਝਾਪਨ੍ਨੋ ਨ ਵਨ੍ਦਿਤਬ੍ਬੋਤਿ ਵਦਨ੍ਤਿ. ਚੋਦੇਤੁਕਾਮਤਾਯ ਏਵ ਅਵਨ੍ਦਿਤ੍ਵਾ ਅਤ੍ਤਨਾ ਵਤ੍ਤਬ੍ਬਸ੍ਸ ਵੁਤ੍ਤਮਤ੍ਥਂ ਠਪੇਤ੍ਵਾ ਅਵਨ੍ਦਿਯਭਾਵੇ ਤਂ ਕਾਰਣਂ ਨ ਹੋਤੀਤਿ ਚੂਲ਼ਗਣ੍ਠਿਪਦੇ ਮਜ੍ਝਿਮਗਣ੍ਠਿਪਦੇ ਚ ਵੁਤ੍ਤਂ. ਅਨ੍ਤਿਮਵਤ੍ਥੁਂ ਅਜ੍ਝਾਪਨ੍ਨਸ੍ਸ ਅਵਨ੍ਦਨੀਯੇਸੁ ਅਵੁਤ੍ਤਤ੍ਤਾ ਤੇਨ ਸਦ੍ਧਿਂ ਸਯਨ੍ਤਸ੍ਸ ਸਹਸੇਯ੍ਯਾਪਤ੍ਤਿਯਾ ਅਭਾਵਤੋ ਤਸ੍ਸ ਚ ਪਟਿਗ੍ਗਹਣਸ੍ਸ ਰੁਹਨਤੋ ਤਦੇਵ ਯੁਤ੍ਤਤਰਨ੍ਤਿ ਵਿਞ੍ਞਾਯਤਿ. ਕਿਞ੍ਚਾਪਿ ਯਾਵ ਸੋ ਭਿਕ੍ਖੁਭਾਵਂ ਪਟਿਜਾਨਾਤਿ, ਤਾਵ ਵਨ੍ਦਿਤਬ੍ਬੋ. ਯਦਾ ਪਨ ‘‘ਅਸ੍ਸਮਣੋਮ੍ਹੀ’’ਤਿ ਪਟਿਜਾਨਾਤਿ, ਤਦਾ ਨ ਵਨ੍ਦਿਤਬ੍ਬੋਤਿ ਅਯਮੇਤ੍ਥ ਵਿਸੇਸੋ ਵੇਦਿਤਬ੍ਬੋ. ਅਨ੍ਤਿਮਵਤ੍ਥੁਂ ਅਜ੍ਝਾਪਨ੍ਨਸ੍ਸ ਹਿ ਭਿਕ੍ਖੁਭਾਵਂ ਪਟਿਜਾਨਨ੍ਤਸ੍ਸੇਵ ਭਿਕ੍ਖੁਭਾਵੋ, ਨ ਤਤੋ ਪਰਂ. ਭਿਕ੍ਖੁਭਾਵਂ ਅਪ੍ਪਟਿਜਾਨਨ੍ਤੋ ਹਿ ਅਨੁਪਸਮ੍ਪਨ੍ਨਪਕ੍ਖਂ ਭਜਤਿ. ਯਸ੍ਮਾ ਆਮਿਸਂ ਦੇਨ੍ਤੋ ਅਤ੍ਤਨੋ ਇਚ੍ਛਿਤਟ੍ਠਾਨੇਯੇਵ ਦੇਤਿ, ਤਸ੍ਮਾ ਪਟਿਪਾਟਿਯਾ ਨਿਸਿਨ੍ਨਾਨਂ ਯਾਗੁਭਤ੍ਤਾਦੀਨਿ ਦੇਨ੍ਤੇਨ ਏਕਸ੍ਸ ਚੋਦੇਤੁਕਾਮਤਾਯ ਅਦਿਨ੍ਨੇਪਿ ਚੋਦਨਾ ਨਾਮ ਨ ਹੋਤੀਤਿ ਆਹ ‘‘ਨ ਤਾਵਤਾ ਚੋਦਨਾ ਹੋਤੀ’’ਤਿ.
ਤਿਂਸਾਨੀਤਿ ਤਿਂਸ ਏਤੇਸਮਤ੍ਥੀਤਿ ਤਿਂਸਾਨਿ, ਤਿਂਸਵਨ੍ਤਾਨੀਤਿ ਅਤ੍ਥੋ, ਤਿਂਸਾਧਿਕਾਨੀਤਿ ਵੁਤ੍ਤਂ ਹੋਤਿ. ਗੁਣਵਚਨਤ੍ਤਾ ਤਦ੍ਧਿਤਲੋਪਂ ਕਤ੍ਵਾ ‘‘ਤਿਂਸਾਨੀ’’ਤਿ ਵੁਤ੍ਤਂ. ਅਥ ਵਾ ਤਿਂਸ ਚੋਦਨਾ ਅਧਿਕਾ ਏਤੇਸੂਤਿ ਤਿਂਸਾਨਿ. ਤਸ੍ਮਿਂ ਅਧਿਕਮਿਤਿ ਡਕਾਰਪਚ੍ਚਯੇ ਸਤਿ ਰੂਪਮਿਦਂ ਦਟ੍ਠਬ੍ਬਂ. ਨਵੁਤਾਨੀਤਿ ਏਤ੍ਥਾਪਿ ਏਸੇਵ ਨਯੋ.
ਉਬ੍ਬਾਹਿਕਾਯ ਤਂ ਅਧਿਕਰਣਂ ਵਿਨਿਚ੍ਛਿਨਿਤਬ੍ਬਨ੍ਤਿ ਉਬ੍ਬਾਹਿਕਾਯ ਸਮ੍ਮਤੇਹਿ ਤਂ ਅਧਿਕਰਣਂ ਵਿਨਿਚ੍ਛਿਨਿਤਬ੍ਬਂ. ਅਲਜ੍ਜੁਸ੍ਸਨ੍ਨਾਯ ਹਿ ਪਰਿਸਾਯ ਦਸਹਙ੍ਗੇਹਿ ਸਮਨ੍ਨਾਗਤੋ ਭਿਕ੍ਖੁ ਉਬ੍ਬਾਹਿਕਾਯ ਸਮ੍ਮਨ੍ਨਿਤਬ੍ਬੋ. ‘‘ਸੀਲਵਾ ਹੋਤਿ ਪਾਤਿਮੋਕ੍ਖਸਂਵਰਸਂਵੁਤੋ ਵਿਹਰਤਿ ਆਚਾਰਗੋਚਰਸਮ੍ਪਨ੍ਨੋ’’ਤਿਆਦਿਨਾ ਸਮਥਕ੍ਖਨ੍ਧਕੇ (ਚੂਲ਼ਵ. ੨੩੧) ਵੁਤ੍ਤਦਸਙ੍ਗਸਮ੍ਪਤ੍ਤਿਯਾ ਸਮਨ੍ਨਾਗਤਾ ਦ੍ਵੇ ਤਯੋ ਭਿਕ੍ਖੂ ਉਚ੍ਚਿਨਿਤ੍ਵਾ ਤਤ੍ਥੇਵ ਵੁਤ੍ਤਾਯ ਞਤ੍ਤਿਦੁਤਿਯਕਮ੍ਮਵਾਚਾਯ ਸਮ੍ਮਨ੍ਨਿਤਬ੍ਬਾ. ਏਵਂ ਸਮ੍ਮਤੇਹਿ ਪਨ ਤੇਹਿ ਭਿਕ੍ਖੂਹਿ ਵਿਸੁਂ ਵਾ ਨਿਸੀਦਿਤ੍ਵਾ ਤਸ੍ਸਾਯੇਵ ਵਾ ਪਰਿਸਾਯ ‘‘ਅਞ੍ਞੇਹਿ ਨ ਕਿਞ੍ਚਿ ਕਥੇਤਬ੍ਬ’’ਨ੍ਤਿ ਸਾਵੇਤ੍ਵਾ ਤਂ ਅਧਿਕਰਣਂ ਵਿਨਿਚ੍ਛਿਨਿਤਬ੍ਬਂ. ਤੁਮ੍ਹਾਕਨ੍ਤਿ ਚੁਦਿਤਕਚੋਦਕੇ ਸਨ੍ਧਾਯ ਵੁਤ੍ਤਂ.
ਕਿਮ੍ਹੀਤਿ ਕਿਸ੍ਮਿਂ ਵਤ੍ਥੁਸ੍ਮਿਂ. ਕਿਮ੍ਹਿ ਨਮ੍ਪਿ ਨ ਜਾਨਾਸੀਤਿ ਕਿਮ੍ਹਿ ਨਨ੍ਤਿ ਵਚਨਮ੍ਪਿ ਨ ਜਾਨਾਸਿ. ਨਾਸ੍ਸ ਅਨੁਯੋਗੋ ਦਾਤਬ੍ਬੋਤਿ ਨਾਸ੍ਸ ਪੁਚ੍ਛਾ ਪਟਿਪੁਚ੍ਛਾ ਦਾਤਬ੍ਬਾ. ‘‘ਦੁਮ੍ਮਙ੍ਕੂਨਂ ਪੁਗ੍ਗਲਾਨਂ ਨਿਗ੍ਗਹਾਯਾ’’ਤਿਆਦਿਵਚਨਤੋ ‘‘ਅਲਜ੍ਜੀਨਿਗ੍ਗਹਤ੍ਥਾਯ…ਪੇ… ਪਞ੍ਞਤ੍ਤ’’ਨ੍ਤਿ ਵੁਤ੍ਤਂ. ਏਹਿਤੀਤਿ ਆਗਮਿਸ੍ਸਤਿ. ਦਿਟ੍ਠਸਨ੍ਤਾਨੇਨਾਤਿ ਦਿਟ੍ਠਸਮ੍ਬਨ੍ਧੇਨ, ਦਿਟ੍ਠਨਿਯਾਮੇਨਾਤਿ ਵੁਤ੍ਤਂ ਹੋਤਿ. ਵਿਵਾਦਵਤ੍ਥੁਸਙ੍ਖਾਤੇ ਅਤ੍ਥੇ ਪਚ੍ਚਤ੍ਥਿਕਾ ਅਤ੍ਥਪ੍ਪਚ੍ਚਤ੍ਥਿਕਾ. ਸਞ੍ਞਂ ਦਤ੍ਵਾਤਿ ਤੇਸਂ ਕਥਂ ਪਚ੍ਛਿਨ੍ਦਿਤ੍ਵਾ ਅਤ੍ਤਨੋ ਵਚਨਂ ਸਾਧੇਤੁਂ ਸਞ੍ਞਂ ਕਤ੍ਵਾ. ਅਸੁਦ੍ਧਸਞ੍ਞਾਯ ਉਪ੍ਪਨ੍ਨਤ੍ਤਾ ‘‘ਅਨਨੁਚ੍ਛਵਿਕੋ’’ਤਿ ਆਹ. ਏਕਸਮ੍ਭੋਗਪਰਿਭੋਗਾਤਿ ਇਦਂ ਅਤ੍ਤਨੋ ਸਨ੍ਤਿਕਾ ਤੇਸਂ ਮੋਚਨਤ੍ਥਂ ਵੁਤ੍ਤਂ, ਨ ਪਨ ਤੇਸਂ ਅਞ੍ਞਮਞ੍ਞਸਮ੍ਭੋਗੇ ਯੋਜਨਤ੍ਥਂ. ਵਿਨਿਚ੍ਛਯੋ ਨ ਕਾਤਬ੍ਬੋਤਿ ‘‘ਅਮ੍ਹਾਕਂ ਵਚਨੇ ਅਟ੍ਠਾਤਬ੍ਬਸਭਾਵਾ ਏਤੇ ਅਲਜ੍ਜਿਨੋ’’ਤਿ ਜਾਨਨ੍ਤੇਨ ਵਿਨਿਚ੍ਛਯੋ ਨ ਕਾਤਬ੍ਬੋ.
ਵਿਰਦ੍ਧਂ ਹੋਤੀਤਿ ਅਤ੍ਤਨਾ ਕਤਦੋਸਪ੍ਪਟਿਚ੍ਛਾਦਨਤ੍ਥਂ ਕਞ੍ਚਿ ਮੁਸਾਵਾਦਂ ਕਤ੍ਵਾ ਵਿਰਦ੍ਧਂ ਹੋਤਿ. ਪਟਿਞ੍ਞਂ ਨ ਦੇਤੀਤਿ ਸਚੇ ਮਯਾ ਕਤਦੋਸਂ ਵਕ੍ਖਾਮਿ, ਮਯ੍ਹਂ ਅਨੁਵਤ੍ਤਕਾ ਭਿਜ੍ਜਿਸ੍ਸਨ੍ਤੀਤਿ ‘‘ਕਤਂ ਮਯਾ’’ਤਿ ਪਟਿਞ੍ਞਂ ਨ ਦੇਤਿ. ਸੁਦ੍ਧੋ ਹੋਤੂਤਿ ਤੇਸਂ ਵਚਨੇਨ ਸੁਦ੍ਧੋ ਨਾਮ ਹੋਤੁ, ਤੇਸਂ ਵਚਨੇਨ ਏਕਦ੍ਵੇਵਾਰਮਸ੍ਸ ਵਿਨਿਚ੍ਛਯੋ ਦਾਤਬ੍ਬੋਤਿ ਅਧਿਪ੍ਪਾਯੋ. ਠਾਨੇ ਨ ਤਿਟ੍ਠਤੀਤਿ ਲਜ੍ਜਿਟ੍ਠਾਨੇ ਨ ਤਿਟ੍ਠਤਿ. ਵਿਨਿਚ੍ਛਯੋ ਨ ਦਾਤਬ੍ਬੋਤਿ ਅਲਜ੍ਜਿਭਾਵਮਾਪਨ੍ਨਤ੍ਤਾ ਨ ਦਾਤਬ੍ਬੋ.
ਅਮੂਲਕਮ੍ਪਿ ਸਮੂਲਕਮ੍ਪਿ ਮੂਲਂ ਗਹੇਤ੍ਵਾ ਵਦਨ੍ਤੀਤਿ ਆਹ ‘‘ਦ੍ਵੇ ਮੂਲਾਨੀ’’ਤਿ. ਕਾਲੇਨ ਵਕ੍ਖਾਮੀਤਿਆਦੀਸੁ ਏਕੋ ਏਕਂ ਓਕਾਸਂ ਕਾਰੇਤ੍ਵਾ ਚੋਦੇਨ੍ਤੋ ਕਾਲੇਨ ਵਦਤਿ ਨਾਮ. ਸਙ੍ਘਮਜ੍ਝੇ ਗਣਮਜ੍ਝੇ ਸਲਾਕਗ੍ਗਯਾਗੁਅਗ੍ਗਵਿਤਕ੍ਕਮਾਲ਼ਕਭਿਕ੍ਖਾਚਾਰਮਗ੍ਗਆਸਨਸਾਲਾਦੀਸੁ ਉਪਟ੍ਠਾਕੇਹਿ ਪਰਿਵਾਰਿਤਕ੍ਖਣੇ ਵਾ ਚੋਦੇਨ੍ਤੋ ਅਕਾਲੇਨ ਵਦਤਿ ਨਾਮ. ਤਚ੍ਛੇਨ ਵਦਨ੍ਤੋ ਭੂਤੇਨ ਵਦਤਿ ਨਾਮ. ‘‘ਅਮ੍ਭੋ ਮਹਲ੍ਲਕ-ਪਰਿਸਾਵਚਰ-ਪਂਸੁਕੂਲਿਕ-ਧਮ੍ਮਕਥਿਕ-ਪਤਿਰੂਪਂ ਤਵ ਇਦ’’ਨ੍ਤਿ ਵਦਨ੍ਤੋ ਫਰੁਸੇਨ ਵਦਤਿ ਨਾਮ. ਕਾਰਣਨਿਸ੍ਸਿਤਂ ਪਨ ਕਤ੍ਵਾ ‘‘ਭਨ੍ਤੇ ਮਹਲ੍ਲਕਾਤ੍ਥ, ਪਰਿਸਾਵਚਰਾ ਪਂਸੁਕੂਲਿਕਾ ਧਮ੍ਮਕਥਿਕਾਤ੍ਥ, ਪਤਿਰੂਪਂ ਤੁਮ੍ਹਾਕਂ ਇਦ’’ਨ੍ਤਿ ਵਦਨ੍ਤੋ ਸਣ੍ਹੇਨ ਵਦਤਿ ਨਾਮ. ਕਾਰਣਨਿਸ੍ਸਿਤਂ ਕਤ੍ਵਾ ਵਦਨ੍ਤੋ ਅਤ੍ਥਸਞ੍ਹਿਤੇਨ ਵਦਤਿ ਨਾਮ. ਮੇਤ੍ਤਚਿਤ੍ਤੋ ਵਕ੍ਖਾਮਿ, ਨੋ ਦੋਸਨ੍ਤਰੋਤਿ ਮੇਤ੍ਤਚਿਤ੍ਤਂ ਉਪਟ੍ਠਾਪੇਤ੍ਵਾ ਵਕ੍ਖਾਮਿ, ਨ ਦੁਟ੍ਠਚਿਤ੍ਤੋ ਹੁਤ੍ਵਾ. ਪਨ੍ਨਰਸਸੁ ਧਮ੍ਮੇਸੂਤਿ ਪਰਿਸੁਦ੍ਧਕਾਯਸਮਾਚਾਰਤਾ, ਪਰਿਸੁਦ੍ਧਵਚੀਸਮਾਚਾਰਤਾ, ਸਬ੍ਰਹ੍ਮਚਾਰੀਸੁ ਮੇਤ੍ਤਚਿਤ੍ਤਤਾ, ਬਹੁਸ੍ਸੁਤਤਾ, ਉਭਿਨ੍ਨਂ ਪਾਤਿਮੋਕ੍ਖਾਨਂ ਵਿਤ੍ਥਾਰੇਨ ਸ੍ਵਾਗਤਸੁਵਿਭਤ੍ਤਸੁਪ੍ਪਵਤ੍ਤਸੁਵਿਨਿਚ੍ਛਿਤਤਾ, ‘‘ਕਾਲੇਨ ਵਕ੍ਖਾਮੀ’’ਤਿਆਦਿਨਾ ਵੁਤ੍ਤਪਞ੍ਚਧਮ੍ਮਾ, ਕਾਰੁਞ੍ਞਤਾ, ਹਿਤੇਸਿਤਾ, ਅਨੁਕਮ੍ਪਤਾ, ਆਪਤ੍ਤਿਵੁਟ੍ਠਾਨਤਾ, ਵਿਨਯਪੁਰੇਕ੍ਖਾਰਤਾਤਿ ਇਮੇਸੁ ਪਨ੍ਨਰਸਸੁ ਧਮ੍ਮੇਸੁ. ਤਤ੍ਥ ਕਾਰੁਞ੍ਞਤਾਤਿ ਕਾਰੁਣਿਕਭਾਵੋ. ਇਮਿਨਾ ਕਰੁਣਾ ਚ ਕਰੁਣਾਪੁਬ੍ਬਭਾਗੋ ਚ ਦਸ੍ਸਿਤੋ. ਹਿਤੇਸਿਤਾਤਿ ਹਿਤਗਵੇਸਨਤਾ. ਅਨੁਕਮ੍ਪਤਾਤਿ ਤੇਨ ਹਿਤੇਨ ਸਂਯੋਜਨਾ. ਦ੍ਵੀਹਿਪਿ ਮੇਤ੍ਤਾ ਚ ਮੇਤ੍ਤਾਪੁਬ੍ਬਭਾਗੋ ਚ ਦਸ੍ਸਿਤੋ. ਆਪਤ੍ਤਿਵੁਟ੍ਠਾਨਤਾਤਿ ਆਪਤ੍ਤਿਤੋ ਵੁਟ੍ਠਾਪੇਤ੍ਵਾ ਸੁਦ੍ਧਨ੍ਤੇ ਪਤਿਟ੍ਠਾਪਨਾ. ਵਤ੍ਥੁਂ ਚੋਦੇਤ੍ਵਾ ਸਾਰੇਤ੍ਵਾ ਪਟਿਞ੍ਞਂ ਆਰੋਪੇਤ੍ਵਾ ਯਥਾਪਟਿਞ੍ਞਾਯ ਕਮ੍ਮਕਰਣਂ ਵਿਨਯਪੁਰੇਕ੍ਖਾਰਤਾ ਨਾਮ. ਸਚ੍ਚੇ ਚ ਅਕੁਪ੍ਪੇ ਚਾਤਿ ਵਚੀਸਚ੍ਚੇ ਚ ਅਕੁਪ੍ਪਤਾਯ ਚ. ਚੁਦਿਤਕੇਨ ਹਿ ਸਚ੍ਚਞ੍ਚ ਵਤ੍ਤਬ੍ਬਂ, ਕੋਪੋ ਚ ਨ ਕਾਤਬ੍ਬੋ, ਨੇਵ ਅਤ੍ਤਨਾ ਕੁਜ੍ਝਿਤਬ੍ਬੋ, ਨ ਪਰੋ ਘਟ੍ਟੇਤਬ੍ਬੋਤਿ ਅਤ੍ਥੋ.
ਭੁਮ੍ਮਪ੍ਪਤ੍ਤਿਯਾਤਿ ਭੁਮ੍ਮਵਚਨੇ ਸਮ੍ਪਤ੍ਤੇ, ਭੁਮ੍ਮਤ੍ਥੇ ਇਦਂ ਉਪਯੋਗਵਚਨਨ੍ਤਿ ਵੁਤ੍ਤਂ ਹੋਤਿ. ਅਧਿਕਰੀਯਨ੍ਤਿ ਏਤ੍ਥਾਤਿ ਅਧਿਕਰਣਾਨਿ. ਕੇ ਅਧਿਕਰੀਯਨ੍ਤਿ? ਸਮਥਾ. ਕਥਂ ਅਧਿਕਰੀਯਨ੍ਤਿ? ਸਮਨਵਸੇਨ. ਅਧਿਕਰਣਂ ਸਮੇਨ੍ਤਿ ਵੂਪਸਮੇਨ੍ਤੀਤਿ ਹਿ ਸਮਥਾ. ਅਥ ਵਾ ਸਮਨਤ੍ਥਾਯ ਪਵਤ੍ਤਮਾਨੇਹਿ ਸਮਥੇਹਿ ਅਧਿਕਾਤਬ੍ਬਾਨੀਤਿ ਅਧਿਕਰਣਾਨਿ. ਯਥਾ ਹਿ ਸਮਨਵਸੇਨ ਸਮਥਾਨਂ ਵਿਵਾਦਾਦੀਸੁ ਅਧਿਕਤ੍ਤੁਭਾਵੋ, ਏਵਂ ਵਿਵਾਦਾਦੀਨਂ ਤੇਹਿ ਅਧਿਕਤ੍ਤਬ੍ਬਤਾਪਿ. ਤੇਨਾਹ ‘‘ਸਮਥੇਹਿ ਅਧਿਕਰਣੀਯਤਾ’’ਤਿ. ਇਮਿਨਾ ਅਧਿਕਰਣਸਦ੍ਦਸ੍ਸ ਕਮ੍ਮਸਾਧਨਤਾ ਵੁਤ੍ਤਾ. ਗਾਹਨ੍ਤਿ ‘‘ਅਸੁਕਂ ਚੋਦੇਸ੍ਸਾਮੀ’’ਤਿ ਮਨਸਾ ਚੋਦਨਾਯ ਗਹਣਂ. ਚੇਤਨਨ੍ਤਿ ‘‘ਚੋਦੇਸ੍ਸਾਮੀ’’ਤਿ ਉਪ੍ਪਨ੍ਨਚੇਤਨਂ. ਅਕ੍ਖਨ੍ਤਿਨ੍ਤਿ ਚੁਦਿਤਕੇ ਉਪ੍ਪਨ੍ਨਂ ਅਕ੍ਖਨ੍ਤਿਂ. ਵੋਹਾਰਨ੍ਤਿ ਚੋਦਨਾਵਸਪ੍ਪਤ੍ਤਵਚਨਂ. ਪਣ੍ਣਤ੍ਤਿਨ੍ਤਿ ਚੋਦਨਾਵਸਪ੍ਪਵਤ੍ਤਨਾਮਪਣ੍ਣਤ੍ਤਿਂ. ਅਤ੍ਤਾਦਾਨਂ ਗਹੇਤ੍ਵਾਤਿ ਚੋਦਨਂ ਮਨਸਾ ਗਹੇਤ੍ਵਾ. ਤਂ ਅਧਿਕਰਣਨ੍ਤਿ ਤਂ ਗਾਹਲਕ੍ਖਣਂ ਅਧਿਕਰਣਂ.
ਤਸ੍ਮਾ ਪਣ੍ਣਤ੍ਤਿ ਅਧਿਕਰਣਨ੍ਤਿ ਅਟ੍ਠਕਥਾਸੁ ਕਤਸਨ੍ਨਿਟ੍ਠਾਨਂ ਦਸ੍ਸੇਤ੍ਵਾ ਇਦਾਨਿ ਤਮ੍ਪਿ ਨ ਯੁਤ੍ਤਨ੍ਤਿ ਦਸ੍ਸੇਤੁਂ ‘‘ਤਂ ਪਨੇਤ’’ਨ੍ਤਿਆਦਿਮਾਹ. ਤੇਤਿ ਅਟ੍ਠਕਥਾਚਰਿਯਾ. ਪਾਰਾਜਿਕਧਮ੍ਮੋਤਿ ਪਾਰਾਜਿਕਾਪਤ੍ਤਿ. ਅਚ੍ਚਨ੍ਤਅਕੁਸਲਤ੍ਤਾਤਿ ਲੋਕਵਜ੍ਜਭਾਵਤੋ ਪਾਰਾਜਿਕਾਪਤ੍ਤਿਯਾ ਏਕਨ੍ਤਅਕੁਸਲਤ੍ਤਾ. ਯਾਯ ਪਣ੍ਣਤ੍ਤਿਯਾਤਿ ਨਾਮਪਣ੍ਣਤ੍ਤਿਂ ਸਨ੍ਧਾਯ ਵਦਤਿ. ਅਭਿਲਾਪੇਨਾਤਿ ਤਸ੍ਸੇਵ ਵੇਵਚਨਂ. ਪਞ੍ਞਤ੍ਤੋਤਿ ਵੋਹਾਰਵਸੇਨ ਕਥਿਤੋ. ਅਧਿਕਰਣੇ ਪਵਤ੍ਤਤ੍ਤਾ ਚ ਅਧਿਕਰਣਨ੍ਤਿ ਮਞ੍ਚਟ੍ਠੇਸੁ ਮਞ੍ਚਵੋਹਾਰੋ ਵਿਯ. ਯਸ੍ਮਾ ਅਮੂਲਕੇਨ ਚੋਦੇਨ੍ਤੋ ਚੁਦਿਤਕੇ ਪੁਗ੍ਗਲੇ ਤਂ ਅਧਿਕਰਣਂ ਨਤ੍ਥੀਤਿ ਸਲ੍ਲਕ੍ਖੇਤਿ, ਤਸ੍ਮਾ ਤਸ੍ਸ ਵਚਨਂ ਅਭਿਧੇਯ੍ਯਸੁਞ੍ਞਨ੍ਤਿ ਆਹ ‘‘ਸਭਾਵਤੋ ਨਤ੍ਥੀ’’ਤਿ. ਤਞ੍ਚ ਖੋ ਇਧੇਵਾਤਿ ਤਞ੍ਚ ਯਥਾਵੁਤ੍ਤਪਰਿਯਾਯੇਨ ਪਣ੍ਣਤ੍ਤਿਯਾ ਅਧਿਕਰਣਭਾਵੋ ਇਧੇਵ ਇਮਸ੍ਮਿਂਯੇਵ ਸਿਕ੍ਖਾਪਦੇ. ‘‘ਮਾਤਾਪਿ ਪੁਤ੍ਤੇਨ ਵਿਵਦਤੀ’’ਤਿਆਦਿਨਯਪ੍ਪਵਤ੍ਤਸ੍ਸ ਵਿਵਾਦਸ੍ਸ ਅਧਿਕਰਣਭਾਵੋ ਨ ਸਮ੍ਭਵਤਿ ਸਮਥੇਹਿ ਅਨਧਿਕਰਣੀਯਤ੍ਤਾਤਿ ਆਹ ‘‘ਇਧੇਕਚ੍ਚੋ ਵਿਵਾਦੋ’’ਤਿ.
ਅਟ੍ਠਾਰਸਭੇਦਕਰਵਤ੍ਥੂਨੀਤਿ ਲਕ੍ਖਣਵਚਨਮੇਤਂ ਯਥਾ ‘‘ਯਦਿ ਮੇ ਬ੍ਯਾਧਿਤਾ ਦਹੇਯ੍ਯੁਂ, ਦਾਤਬ੍ਬਮਿਦਮੋਸਧ’’ਨ੍ਤਿ, ਤਸ੍ਮਾ ਤੇਸੁ ਅਞ੍ਞਤਰਞ੍ਞਤਰਂ ਨਿਸ੍ਸਾਯ ਉਪ੍ਪਨ੍ਨੋ ਵਿਵਾਦੋ ‘‘ਅਟ੍ਠਾਰਸਭੇਦਕਰਵਤ੍ਥੂਨਿ ਨਿਸ੍ਸਾਯ ਉਪ੍ਪਨ੍ਨੋ’’ਤਿ ਵੁਚ੍ਚਤਿ. ਅਨੁਵਾਦੋਤਿ ਉਪਵਦਨਾ ਚੇਵ ਚੋਦਨਾ ਚ. ਤਤ੍ਥ ਉਪਵਦਨਾ ਨਾਮ ਅਕ੍ਕੋਸੋ. ਪਞ੍ਚਪਿ ਆਪਤ੍ਤਿਕ੍ਖਨ੍ਧਾਤਿ ਮਾਤਿਕਾਯ ਆਗਤਾ ਪਞ੍ਚ ਆਪਤ੍ਤਿਕ੍ਖਨ੍ਧਾ. ਸਤ੍ਤਾਤਿ ਤੇਯੇਵ ਪਞ੍ਚ, ਵਿਭਙ੍ਗੇ ਆਗਤਾ ਥੁਲ੍ਲਚ੍ਚਯਦੁਬ੍ਭਾਸਿਤਾਪਤ੍ਤਿਯੋ ਦ੍ਵੇਤਿ ਸਤ੍ਤ. ਕਿਚ੍ਚਯਤਾਤਿ ਕਤ੍ਤਬ੍ਬਤਾ. ਕਰਣੀਯਤਾਤਿ ਤਸ੍ਸੇਵ ਵੇਵਚਨਂ. ਉਭਯੇਨਪਿ ਅਪਲੋਕਨਾਦਿਸਙ੍ਘਕਮ੍ਮਂਯੇਵ ਦਸ੍ਸੇਤਿ, ਤੇਨਾਹ ‘‘ਅਪਲੋਕਨਕਮ੍ਮ’’ਨ੍ਤਿਆਦਿ.
ਆਪਤ੍ਤਾਧਿਕਰਣਂ ਠਪੇਤ੍ਵਾ ਸੇਸਾਧਿਕਰਣੇਹਿ ਚੋਦਨਾਯੇਵ ਨਤ੍ਥੀਤਿ ਆਹ ‘‘ਇਮਸ੍ਮਿਂ ਪਨਤ੍ਥੇ…ਪੇ… ਆਪਤ੍ਤਾਧਿਕਰਣਮੇਵ ਅਧਿਪ੍ਪੇਤ’’ਨ੍ਤਿ. ਸਪਦਾਨੁਕ੍ਕਮਨਿਦ੍ਦੇਸਸ੍ਸਾਤਿ ਪਦਾਨਂ ਅਨੁਕ੍ਕਮੇਨ ਨਿਦ੍ਦੇਸੋ ਪਦਾਨੁਕ੍ਕਮਨਿਦ੍ਦੇਸੋ, ਪਦਭਾਜਨਸ੍ਸੇਤਂ ਅਧਿਵਚਨਂ. ਤੇਨ ਸਹ ਵਤ੍ਤਮਾਨਂ ਸਪਦਾਨੁਕ੍ਕਮਨਿਦ੍ਦੇਸਂ, ਸਿਕ੍ਖਾਪਦਂ, ਤਸ੍ਸ ਪਦਾਨੁਕ੍ਕਮਨਿਦ੍ਦੇਸਸਹਿਤਸ੍ਸ ਸਿਕ੍ਖਾਪਦਸ੍ਸਾਤਿ ਅਤ੍ਥੋ, ਪਦਭਾਜਨਸਹਿਤਸ੍ਸਾਤਿ ਵੁਤ੍ਤਂ ਹੋਤਿ.
ਅਸ੍ਸਾਤਿ ਕਤ੍ਤੁਅਤ੍ਥੇ ਸਾਮਿਵਚਨਂ, ਅਨੇਨਾਤਿ ਅਤ੍ਥੋ. ਤੇਨਾਹ ‘‘ਏਤੇਨ ਚੋਦਕੇਨਾ’’ਤਿਆਦਿ. ਇਧਾਗਤੇਸੂਤਿ ਇਮਸ੍ਮਿਂ ਸਿਕ੍ਖਾਪਦੇ ਆਗਤੇਸੁ. ਅਞ੍ਞਤ੍ਰ ਆਗਤੇਸੂਤਿ ਇਤੋ ਅਞ੍ਞਤ੍ਰ ਓਮਸਵਾਦਾਦਿਸਿਕ੍ਖਾਪਦਪਾਲ਼ਿਯਂ ਆਗਤੇਸੁ. ਦੁਸ੍ਸੀਲੋਤਿ ਨਿਸ੍ਸੀਲੋ ਸੀਲਵਿਰਹਿਤੋ. ਪਾਪਧਮ੍ਮੋਤਿ ਦੁਸ੍ਸੀਲਤ੍ਤਾ ਏਵ ਹੀਨਜ੍ਝਾਸਯਤਾਯ ਲਾਮਕਸਭਾਵੋ. ਅਸੁਚਿਸਙ੍ਕਸ੍ਸਰਸਮਾਚਾਰੋਤਿ ਅਪਰਿਸੁਦ੍ਧਕਾਯਕਮ੍ਮਾਦਿਤਾਯ ਅਸੁਚਿ ਹੁਤ੍ਵਾ ਸਙ੍ਕਾਯ ਸਰਿਤਬ੍ਬਸਮਾਚਾਰੋ. ਦੁਸ੍ਸੀਲੋ ਹਿ ਕਿਞ੍ਚਿਦੇਵ ਅਸਾਰੁਪ੍ਪਂ ਦਿਸ੍ਵਾ ‘‘ਇਦਂ ਅਸੁਕੇਨ ਕਤਂ ਭਵਿਸ੍ਸਤੀ’’ਤਿ ਪਰੇਸਂ ਆਸਙ੍ਕਨੀਯੋ ਹੋਤਿ, ਕੇਨਚਿਦੇਵ ਵਾ ਕਰਣੀਯੇਨ ਮਨ੍ਤਯਨ੍ਤੇ ਭਿਕ੍ਖੂ ਦਿਸ੍ਵਾ ‘‘ਕਚ੍ਚਿ ਨੁ ਖੋ ਇਮੇ ਮਯਾ ਕਤਕਮ੍ਮਂ ਜਾਨਿਤ੍ਵਾ ਮਨ੍ਤੇਨ੍ਤੀ’’ਤਿ ਅਤ੍ਤਨੋਯੇਵ ਸਙ੍ਕਾਯ ਸਰਿਤਬ੍ਬਸਮਾਚਾਰੋ. ਪਟਿਚ੍ਛਨ੍ਨਕਮ੍ਮਨ੍ਤੋਤਿ ਲਜ੍ਜਿਤਬ੍ਬਤਾਯ ਪਟਿਚ੍ਛਾਦੇਤਬ੍ਬਕਮ੍ਮਨ੍ਤੋ. ਅਸ੍ਸਮਣੋਤਿ ਨ ਸਮਣੋ. ਸਲਾਕਗ੍ਗਹਣਾਦੀਸੁ ‘‘ਅਹਮ੍ਪਿ ਸਮਣੋ’’ਤਿ ਮਿਚ੍ਛਾਪਟਿਞ੍ਞਾਯ ਸਮਣਪਟਿਞ੍ਞੋ. ਅਸੇਟ੍ਠਚਾਰਿਤਾਯ ਅਬ੍ਰਹ੍ਮਚਾਰੀ. ਉਪੋਸਥਾਦੀਸੁ ‘‘ਅਹਮ੍ਪਿ ਬ੍ਰਹ੍ਮਚਾਰੀ’’ਤਿ ਮਿਚ੍ਛਾਪਟਿਞ੍ਞਾਯ ਬ੍ਰਹ੍ਮਚਾਰਿਪਟਿਞ੍ਞੋ. ਪੂਤਿਨਾ ਕਮ੍ਮੇਨ ਸੀਲਵਿਪਤ੍ਤਿਯਾ ਅਨ੍ਤੋ ਅਨੁਪਵਿਟ੍ਠਤ੍ਤਾ ਅਨ੍ਤੋਪੂਤਿ. ਛਦ੍ਵਾਰੇਹਿ ਰਾਗਾਦਿਕਿਲੇਸਾਨੁਵਸ੍ਸਨੇਨ ਤਿਨ੍ਤਤ੍ਤਾ ਅਵਸ੍ਸੁਤੋ. ਸਞ੍ਜਾਤਰਾਗਾਦਿਕਚਵਰਤ੍ਤਾ ਸੀਲਵਨ੍ਤੇਹਿ ਛਡ੍ਡੇਤਬ੍ਬਤ੍ਤਾ ਚ ਕਸਮ੍ਬੁਜਾਤੋ.
ਇਧ ਪਾਲ਼ਿਯਨ੍ਤਿ ਇਮਸ੍ਮਿਂ ਸਿਕ੍ਖਾਪਦੇ ਪਾਲ਼ਿਯਂ. ਜੇਟ੍ਠਬ੍ਬਤਿਕੋਤਿ ਕਲਿਦੇਵੀਵਤਨਿਯੁਤ੍ਤੋ. ਕਲਿਦੇਵੀ ਕਿਰ ਸਿਰੀਦੇਵਿਯਾ ਜੇਟ੍ਠਾ, ਤਸ੍ਮਾ ਤਸ੍ਸਾ ਵਤਧਰੋ ‘‘ਜੇਟ੍ਠਬ੍ਬਤਿਕੋ’’ਤਿ ਵੁਚ੍ਚਤਿ. ਤਂ ਪਨ ਵਤਂ ਸਮਾਦਿਯਿਤ੍ਵਾ ਪੂਰੇਨ੍ਤੋ ਸਕਲਸਰੀਰੇ ਮਸਿਂ ਮਕ੍ਖੇਤ੍ਵਾ ਕਾਕਪਤ੍ਤਾਨਿ ਮੁਟ੍ਠਿਯਂ ਕਤ੍ਵਾ ਕਲਿਦੇਵਿਂ ਫਲਕੇ ਲਿਖਾਪੇਤ੍ਵਾ ਤਂ ਕਾਜਕੋਟਿਯਂ ਬਨ੍ਧਿਤ੍ਵਾ ਥੋਮੇਨ੍ਤੋ ਵਿਚਰਤਿ. ਯਦਗ੍ਗੇਨਾਤਿ ਯਤ੍ਤਕੇਨ. ਤਦਗ੍ਗੇਨਾਤਿ ਤਤ੍ਤਕੇਨ. ਨੋ ਕਪ੍ਪੇਤੀਤਿਆਦਿ ਵੇਮਤਿਕਭਾਵਦੀਪਨਤ੍ਥਮੇਵ ਵੁਤ੍ਤਨ੍ਤਿ ਮਹਾਪਦੁਮਤ੍ਥੇਰਸ੍ਸ ਅਧਿਪ੍ਪਾਯੋ. ਦੁਤਿਯਤ੍ਥੇਰੋ ਪਨ ‘‘ਨੋ ਕਪ੍ਪੇਤਿ, ਨਸ੍ਸਰਤਿ, ਪਮੁਟ੍ਠੋ’’ਤਿ ਏਤੇਹਿ ਵੇਮਤਿਕਭਾਵਾਵਤ੍ਥਾਯ ਅਦੀਪਨਤੋ ਅਞ੍ਞੋ ਵੇਮਤਿਕਭਾਵੋ, ਅਞ੍ਞਾਨਿ ਨੋ ਕਪ੍ਪਨਾਦੀਨੀਤਿ ਚਤੁਨ੍ਨਮ੍ਪਿ ਵਿਭਾਗੇਨ ਅਤ੍ਥਂ ਦਸ੍ਸੇਤਿ, ਤਸ੍ਮਾ ਤਸ੍ਸ ਵਾਦੋ ਯੁਤ੍ਤਤਰੋਤਿ ਪਚ੍ਛਾ ਵੁਤ੍ਤੋ. ਦਸ੍ਸਨੇ ਵੇਮਤਿਕੋ ਹੋਤੀਤਿ ਪੁਗ੍ਗਲੇ ਞਾਤੇਪਿ ਤਸ੍ਸ ਕਿਰਿਯਾਯ ਸਮ੍ਮਾ ਅਦਿਟ੍ਠਭਾਵਤੋ ਚਿਰਕਾਲਾਤਿਕ੍ਕਮਤੋ ਵਾ ਤਂ ਕਿਰਿਯਂ ਕਰੋਨ੍ਤੋ ‘‘ਏਸ ਮਯਾ ਦਿਟ੍ਠੋ ਵਾ, ਨ ਵਾ’’ਤਿ ਦਸ੍ਸਨੇ ਵੇਮਤਿਕੋ ਹੋਤਿ. ਪੁਗ੍ਗਲੇ ਵੇਮਤਿਕੋ ਹੋਤੀਤਿ ਤੇਨ ਕਤਕਮ੍ਮੇ ਞਾਤੇਪਿ ਤਂ ਕਮ੍ਮਂ ਕਰੋਨ੍ਤਸ੍ਸ ਸਮ੍ਮਾ ਅਦਿਟ੍ਠਭਾਵਤੋ ਕਾਲਨ੍ਤਰਭਾਵਤੋ ਵਾ ‘‘ਤਸ੍ਸ ਕਮ੍ਮਸ੍ਸ ਕਾਰਕੋ ਅਯਂ ਵਾ, ਨੋ’’ਤਿ ਪੁਗ੍ਗਲੇ ਵੇਮਤਿਕੋ ਹੋਤਿ.
੩੮੯. ‘‘ਤਜ੍ਜਨੀਯਕਮ੍ਮਾਦਿਸਤ੍ਤਵਿਧਮ੍ਪਿ ਕਮ੍ਮਂ ਕਰਿਸ੍ਸਾਮਾ’’ਤਿ ਆਪਤ੍ਤਿਯਾ ਚੋਦੇਨ੍ਤਸ੍ਸ ਅਧਿਪ੍ਪਾਯੋ ਕਮ੍ਮਾਧਿਪ੍ਪਾਯੋ. ‘‘ਆਪਤ੍ਤਿਤੋ ਵੁਟ੍ਠਾਪੇਸ੍ਸਾਮੀ’’ਤਿ ਅਧਿਪ੍ਪਾਯੋ ਵੁਟ੍ਠਾਨਾਧਿਪ੍ਪਾਯੋ. ਅਨੁਦ੍ਧਂਸੇਨ੍ਤਸ੍ਸਾਤਿ ਇਮਿਨਾ ਚਾਵਨਾਧਿਪ੍ਪਾਯਂ ਦਸ੍ਸੇਤਿ. ਅਕ੍ਕੋਸਾਧਿਪ੍ਪਾਯੇਨ ਵਦਨ੍ਤਸ੍ਸ ਪਾਚਿਤ੍ਤਿਯਨ੍ਤਿ ਅਕ੍ਕੋਸਾਧਿਪ੍ਪਾਯੇਨ ਸਤ੍ਤਹਿਪਿ ਆਪਤ੍ਤਿਕ੍ਖਨ੍ਧੇਹਿ ਸਮ੍ਮੁਖਾ ਵਦਨ੍ਤਸ੍ਸ ਪਾਚਿਤ੍ਤਿਯਂ. ਦੁਕ੍ਕਟਨ੍ਤਿ ਅਕ੍ਕੋਸਾਧਿਪ੍ਪਾਯੇਨ ਵਦਨ੍ਤਸ੍ਸ ਦੁਕ੍ਕਟਂ.
‘‘ਏਵਂ ਸਂਵਦ੍ਧਾ ਹਿ ਤਸ੍ਸ ਭਗਵਤੋ ਪਰਿਸਾ ਯਦਿਦਂ ਅਞ੍ਞਮਞ੍ਞਵਚਨੇਨ ਅਞ੍ਞਮਞ੍ਞਵੁਟ੍ਠਾਪਨੇਨਾ’’ਤਿ ਵਚਨਤੋ ਕੁਰੁਨ੍ਦਟ੍ਠਕਥਾਨਯਂ ਪਤਿਟ੍ਠਪੇਨ੍ਤੋ ‘‘ਕੁਰੁਨ੍ਦਿਯਂ ਪਨਾ’’ਤਿਆਦਿਮਾਹ. ਸਬ੍ਬਤ੍ਥੇਵਾਤਿ ਸਬ੍ਬਅਟ੍ਠਕਥਾਸੁ. ਯ੍ਯ-ਕਾਰੇ ਸਮ੍ਪਤ੍ਤੇ ਰੇ-ਕਾਰੋ ਅਤਿਕ੍ਕਨ੍ਤੋ ਨਾਮ ਹੋਤੀਤਿ ਆਹ ‘‘ਰੇ-ਕਾਰੇ ਅਨਤਿਕ੍ਕਨ੍ਤੇ’’ਤਿ. ਉਪੋਸਥਸ੍ਸ ਞਤ੍ਤਿਕਮ੍ਮਭਾਵਤੋ ਞਤ੍ਤਿਯਾ ਸਮਤ੍ਤਾਯ ਉਪੋਸਥੋ ਕਤੋ ਨਾਮ ਹੋਤੀਤਿ ਆਹ ‘‘ਯ੍ਯ-ਕਾਰੇ ਸਮ੍ਪਤ੍ਤੇ ਨ ਲਬ੍ਭਤੀ’’ਤਿ.
ਇਦਞ੍ਚਿਦਞ੍ਚਾਤਿ ‘‘ਪਾਣਾਤਿਪਾਤਂ ਅਦਿਨ੍ਨਾਦਾਨ’’ਨ੍ਤਿਆਦਿਂ. ‘‘ਅਸੁਕੋ ਚ ਅਸੁਕੋ ਚ ਅਸ੍ਸਮਣੋ ਅਨੁਪਾਸਕੋ’’ਤਿ ਅਕ੍ਕੋਸਾਧਿਪ੍ਪਾਯੇਨ ਪਰਮ੍ਮੁਖਾ ਵਦਨ੍ਤਸ੍ਸ ਦੁਕ੍ਕਟਂ, ਸਮ੍ਮੁਖਾ ਵਦਨ੍ਤਸ੍ਸ ਪਨ ਪਾਚਿਤ੍ਤਿਯਮੇਵ. ਯਥਾ ‘‘ਅਸੂਰਿਯਂ ਪਸ੍ਸਤਿ ਕਞ੍ਞਾ’’ਤਿ ਏਤ੍ਥ ‘‘ਸੂਰਿਯਂ ਨ ਪਸ੍ਸਤਿ ਕਞ੍ਞਾ’’ਤਿ ਅਯਮਤ੍ਥੋ ਲਬ੍ਭਤਿ, ਏਵਂ ‘‘ਅਨੋਕਾਸਂ ਕਾਰਾਪੇਤ੍ਵਾ’’ਤਿ ਏਤ੍ਥਾਪਿ ‘‘ਓਕਾਸਂ ਅਕਾਰਾਪੇਤ੍ਵਾ’’ਤਿ ਅਯਮਤ੍ਥੋ ਲਬ੍ਭਤੀਤਿ ਆਹ ‘‘ਯਂ ਪਨਾ’’ਤਿਆਦਿ. ਯਂ ਚੋਦੇਤਿ, ਤਸ੍ਸ ਉਪਸਮ੍ਪਨ੍ਨੋਤਿ ਸਙ੍ਖ੍ਯੂਪਗਮਨਂ, ਤਸ੍ਮਿਂ ਸੁਦ੍ਧਸਞ੍ਞਿਤਾ, ਯੇਨ ਪਾਰਾਜਿਕੇਨ ਚੋਦੇਤਿ, ਤਸ੍ਸ ਦਿਟ੍ਠਾਦਿਵਸੇਨ ਅਮੂਲਕਤਾ, ਚਾਵਨਾਧਿਪ੍ਪਾਯੇਨ ਸਮ੍ਮੁਖਾ ਚੋਦਨਾ, ਤਸ੍ਸ ਤਙ੍ਖਣਵਿਜਾਨਨਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ.
ਪਠਮਦੁਟ੍ਠਦੋਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.