੫. ਸਞ੍ਚਰਿਤ੍ਤਸਿਕ੍ਖਾਪਦਵਣ੍ਣਨਾ

੨੯੬. ਪਞ੍ਚਮੇ ਪਣ੍ਡਿਤਸ੍ਸ ਭਾਵੋ ਪਣ੍ਡਿਚ੍ਚਂ, ਞਾਣਸ੍ਸੇਤਂ ਅਧਿਵਚਨਂ. ਗਤਿਮਨ੍ਤਾਤਿ ਞਾਣਗਤਿਯਾ ਸਮਨ੍ਨਾਗਤਾ. ਪਣ੍ਡਿਤਾਤਿ ਇਮਿਨਾ ਸਭਾਵਞਾਣੇਨ ਸਮਨ੍ਨਾਗਤਤਾ ਵੁਤ੍ਤਾ, ਬ੍ਯਤ੍ਤਾਤਿ ਇਮਿਨਾ ਇਤ੍ਥਿਕਤ੍ਤਬ੍ਬੇਸੁ ਵਿਸਾਰਦਪਞ੍ਞਾਯ. ਤੇਨਾਹ ‘‘ਉਪਾਯਞ੍ਞੂ ਵਿਸਾਰਦਾ’’ਤਿ. ਮੇਧਾਵਿਨੀਤਿ ਠਾਨੁਪ੍ਪਤ੍ਤਿਪਞ੍ਞਾਸਙ੍ਖਾਤਾਯ ਤਸ੍ਮਿਂ ਤਸ੍ਮਿਂ ਅਤ੍ਥਕਿਚ੍ਚੇ ਉਪਟ੍ਠਿਤੇ ਠਾਨਸੋ ਤਙ੍ਖਣੇ ਏਵ ਉਪ੍ਪਜ੍ਜਨਪਞ੍ਞਾਯ ਸਮਨ੍ਨਾਗਤਾ. ਤੇਨਾਹ ‘‘ਦਿਟ੍ਠਂ ਦਿਟ੍ਠਂ ਕਰੋਤੀ’’ਤਿ. ਛੇਕਾਤਿ ਯਾਗੁਭਤ੍ਤਸਮ੍ਪਾਦਨਾਦੀਸੁ ਨਿਪੁਣਾ. ਉਟ੍ਠਾਨਵੀਰਿਯਸਮ੍ਪਨ੍ਨਾਤਿ ਕਾਯਿਕੇਨ ਵੀਰਿਯੇਨ ਸਮਨ੍ਨਾਗਤਾ, ਯਥਾ ਅਞ੍ਞਾ ਕੁਸੀਤਾ ਨਿਸਿਨ੍ਨਟ੍ਠਾਨੇ ਨਿਸਿਨ੍ਨਾਵ ਹੋਨ੍ਤਿ, ਠਿਤਟ੍ਠਾਨੇ ਠਿਤਾਵ, ਏਵਂ ਅਹੁਤ੍ਵਾ ਵਿਪ੍ਫਾਰਿਕੇਨ ਚਿਤ੍ਤੇਨ ਸਬ੍ਬਕਿਚ੍ਚਂ ਨਿਪ੍ਫਾਦੇਤੀਤਿ ਵੁਤ੍ਤਂ ਹੋਤਿ. ਕੁਮਾਰਿਕਾਯਾਤਿ ਨਿਮਿਤ੍ਤਤ੍ਥੇ ਭੁਮ੍ਮਂ, ਹੇਤੁਮ੍ਹਿ ਵਾ ਕਰਣਵਚਨਂ. ਤੇਨਾਹ ‘‘ਕੁਮਾਰਿਕਾਯ ਕਾਰਣਾ’’ਤਿ. ਆਵਹਨਂ ਆਵਾਹੋ, ਪਰਿਗ੍ਗਹਭਾਵੇਨ ਦਾਰਿਕਾਯ ਗਣ੍ਹਾਪਨਂ, ਤਥਾ ਦਾਪਨਂ ਵਿਵਾਹੋ. ਤੇਨਾਹ ‘‘ਦਾਰਕਸ੍ਸਾ’’ਤਿਆਦਿ.

੨੯੭-੨੯੮. ਭਤ੍ਤਪਾਚਨਂ ਸਨ੍ਧਾਯ ਰਨ੍ਧਾਪਨਂ ਵੁਤ੍ਤਂ, ਯਸ੍ਸ ਕਸ੍ਸਚਿ ਪਾਚਨਂ ਸਨ੍ਧਾਯ ਪਚਾਪਨਂ ਵੁਤ੍ਤਂ. ਦੁਟ੍ਠੁਂ ਕੁਲਂ ਗਤਾ ਦੁਗ੍ਗਤਾਤਿ ਇਮਮਤ੍ਥਂ ਦਸ੍ਸੇਨ੍ਤੋ ‘‘ਯਤ੍ਥ ਵਾ ਗਤਾ’’ਤਿਆਦਿਮਾਹ. ਆਹਰਣਂ ਆਹਾਰੋ. ਨ ਉਪਾਹਟਨ੍ਤਿ ਨ ਦਿਨ੍ਨਂ. ਕਯੋ ਗਹਣਂ, ਵਿਕ੍ਕਯੋ ਦਾਨਂ. ਤਦੁਭਯਂ ਸਙ੍ਗਣ੍ਹਿਤ੍ਵਾ ‘‘ਵੋਹਾਰੋ’’ਤਿ ਵੁਤ੍ਤਂ. ਮਣ੍ਡਿਤਪਸਾਧਿਤੋਤਿ ਏਤ੍ਥ ਬਾਹਿਰੁਪਕਰਣੇਨ ਅਲਙ੍ਕਰਣਂ ਮਣ੍ਡਨਂ, ਅਜ੍ਝਤ੍ਤਿਕਾਨਂ ਕੇਸਾਦੀਨਂਯੇਵ ਸਣ੍ਠਪਨਂ ਪਸਾਧਨਂ.

੩੦੦. ‘‘ਅਬ੍ਭੁਤਂ ਕਾਤੁਂ ਨ ਵਟ੍ਟਤੀ’’ਤਿ ਇਮਿਨਾ ਦੁਕ੍ਕਟਂ ਹੋਤੀਤਿ ਦੀਪੇਤਿ. ‘‘ਪਰਾਜਿਤੇਨ ਦਾਤਬ੍ਬ’’ਨ੍ਤਿ ਵੁਤ੍ਤਤ੍ਤਾ ਅਦੇਨ੍ਤੋ ਧੁਰਨਿਕ੍ਖੇਪੇਨ ਕਾਰੇਤਬ੍ਬੋ. ਅਚਿਰਕਾਲੇ ਅਧਿਕਾਰੋ ਏਤਸ੍ਸ ਅਤ੍ਥੀਤਿ ਅਚਿਰਕਾਲਾਧਿਕਾਰਿਕਂ, ਸਞ੍ਚਰਿਤ੍ਤਂ. ‘‘ਅਚਿਰਕਾਲਾਚਾਰਿਕ’’ਨ੍ਤਿ ਵਾ ਪਾਠੋ, ਅਚਿਰਕਾਲੇ ਆਚਾਰੋ ਅਜ੍ਝਾਚਾਰੋ ਏਤਸ੍ਸਾਤਿ ਅਚਿਰਕਾਲਾਚਾਰਿਕਂ.

ਕਿਞ੍ਚਾਪਿ ਏਹਿਭਿਕ੍ਖੂਪਸਮ੍ਪਨ੍ਨਾ ਚੇਵ ਸਰਣਗਮਨੂਪਸਮ੍ਪਨ੍ਨਾ ਚ ਸਞ੍ਚਰਿਤ੍ਤਾਦਿਪਣ੍ਣਤ੍ਤਿਵਜ੍ਜਂ ਆਪਤ੍ਤਿਂ ਆਪਜ੍ਜਨ੍ਤਿ, ਤੇਸਂ ਪਨ ਨ ਸਬ੍ਬਕਾਲਿਕਤ੍ਤਾ ਤੇ ਵਜ੍ਜੇਤ੍ਵਾ ਸਬ੍ਬਕਾਲਾਨੁਰੂਪਂ ਤਨ੍ਤਿਂ ਠਪੇਨ੍ਤੋ ਭਗਵਾ ਇਧਾਪਿ ਞਤ੍ਤਿਚਤੁਤ੍ਥੇਨੇਵ ਕਮ੍ਮੇਨ ਉਪਸਮ੍ਪਨ੍ਨਂ ਭਿਕ੍ਖੁਂ ਦਸ੍ਸੇਤੁਂ ‘‘ਤਤ੍ਰ ਯ੍ਵਾਯਂ ਭਿਕ੍ਖੁ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤੋ ਭਿਕ੍ਖੂ’’ਤਿ ਪਦਭਾਜਨਂ ਆਹ, ਨ ਪਨ ਨੇਸਂ ਸਞ੍ਚਰਿਤ੍ਤਾਦਿਆਪਜ੍ਜਨੇ ਅਭਬ੍ਬਭਾਵਤੋ. ਖੀਣਾਸਵਾਪਿ ਹਿ ਅਪ੍ਪਸ੍ਸੁਤਾ ਕਿਞ੍ਚਾਪਿ ਲੋਕਵਜ੍ਜਂ ਨਾਪਜ੍ਜਨ੍ਤਿ, ਪਣ੍ਣਤ੍ਤਿਯਂ ਪਨ ਅਕੋਵਿਦਤ੍ਤਾ ਵਿਹਾਰਕਾਰਂ ਕੁਟਿਕਾਰਂ ਸਹਾਗਾਰਂ ਸਹਸੇਯ੍ਯਨ੍ਤਿ ਏਵਰੂਪਾ ਕਾਯਦ੍ਵਾਰੇ ਆਪਤ੍ਤਿਯੋ ਆਪਜ੍ਜਨ੍ਤਿ, ਸਞ੍ਚਰਿਤ੍ਤਂ ਪਦਸੋਧਮ੍ਮਂ ਉਤ੍ਤਰਿਛਪ੍ਪਞ੍ਚਵਾਚਂ ਭੂਤਾਰੋਚਨਨ੍ਤਿ ਏਵਰੂਪਾ ਵਚੀਦ੍ਵਾਰੇ ਆਪਤ੍ਤਿਯੋ ਆਪਜ੍ਜਨ੍ਤਿ, ਉਪਨਿਕ੍ਖਿਤ੍ਤਸਾਦਿਯਨਵਸੇਨ ਮਨੋਦ੍ਵਾਰੇ ਰੂਪਿਯਪਟਿਗ੍ਗਹਣਾਪਤ੍ਤਿਂ ਆਪਜ੍ਜਨ੍ਤਿ.

੩੦੧. ਸਞ੍ਚਰਣਂ ਸਞ੍ਚਰੋ, ਸੋ ਏਤਸ੍ਸ ਅਤ੍ਥੀਤਿ ਸਞ੍ਚਰੀ, ਤਸ੍ਸ ਭਾਵੋ ਸਞ੍ਚਰਿਤ੍ਤਂ. ਤੇਨਾਹ ‘‘ਸਞ੍ਚਰਣਭਾਵ’’ਨ੍ਤਿ, ਇਤ੍ਥਿਪੁਰਿਸਾਨਂ ਅਨ੍ਤਰੇ ਸਞ੍ਚਰਣਭਾਵਨ੍ਤਿ ਅਤ੍ਥੋ. ਜਾਯਤ੍ਤਨੇ ਜਾਰਤ੍ਤਨੇਤਿ ਚ ਨਿਮਿਤ੍ਤਤ੍ਥੇ ਭੁਮ੍ਮਂ, ਜਾਯਭਾਵਤ੍ਥਂ ਜਾਰਭਾਵਤ੍ਥਨ੍ਤਿ ਵੁਤ੍ਤਂ ਹੋਤਿ. ਜਾਯਭਾਵੇਤਿ ਭਰਿਯਭਾਵਾਯ. ਜਾਰਭਾਵੇਤਿ ਸਾਮਿਕਭਾਵਾਯ. ਕਿਞ੍ਚਾਪਿ ਇਮਸ੍ਸ ਪਦਭਾਜਨੇ ‘‘ਜਾਰੀ ਭਵਿਸ੍ਸਸੀ’’ਤਿ ਇਤ੍ਥਿਲਿਙ੍ਗਵਸੇਨ ਪਦਭਾਜਨਂ ਵੁਤ੍ਤਂ, ਜਾਰਤ੍ਤਨੇਤਿ ਪਨ ਨਿਦ੍ਦੇਸਸ੍ਸ ਉਭਯਲਿਙ੍ਗਸਾਧਾਰਣਤ੍ਤਾ ਪੁਰਿਸਲਿਙ੍ਗਵਸੇਨਪਿ ਯੋਜੇਤ੍ਵਾ ਅਤ੍ਥਂ ਦਸ੍ਸੇਨ੍ਤੋ ‘‘ਇਤ੍ਥਿਯਾ ਮਤਿਂ ਪੁਰਿਸਸ੍ਸ ਆਰੋਚੇਨ੍ਤੋ ਜਾਰਤ੍ਤਨੇ ਆਰੋਚੇਤੀ’’ਤਿਆਦਿਮਾਹ. ਏਤ੍ਥ ਹਿ ‘‘ਜਾਰੋ ਭਵਿਸ੍ਸਸੀ’’ਤਿ ਇਤ੍ਥਿਯਾ ਮਤਿਂ ਪੁਰਿਸਸ੍ਸ ਆਰੋਚੇਨ੍ਤੋ ਜਾਰਤ੍ਤਨੇ ਆਰੋਚੇਤਿ ਨਾਮ. ਪਾਲ਼ਿਯਂ ਪਨ ਇਤ੍ਥਿਲਿਙ੍ਗਵਸੇਨੇਵ ਯੋਜਨਾ ਕਤਾ, ਤਦਨੁਸਾਰੇਨ ਪੁਰਿਸਲਿਙ੍ਗਵਸੇਨਪਿ ਸਕ੍ਕਾ ਯੋਜੇਤੁਨ੍ਤਿ.

ਇਦਾਨਿ ਪਾਲ਼ਿਯਂ ਵੁਤ੍ਤਨਯੇਨਪਿ ਅਤ੍ਥਂ ਦਸ੍ਸੇਨ੍ਤੋ ‘‘ਅਪਿਚਾ’’ਤਿਆਦਿਮਾਹ. ਪਤਿ ਭਵਿਸ੍ਸਸੀਤਿ ਵੁਤ੍ਤਮੇਵਤ੍ਥਂ ‘‘ਸਾਮਿਕੋ ਭਵਿਸ੍ਸਸੀ’’ਤਿ ਪਰਿਯਾਯਵਚਨੇਨ ਵਿਸੇਸੇਤ੍ਵਾ ਦਸ੍ਸੇਤਿ. ਇਦਞ੍ਚ ਜਾਰਤ੍ਤਨੇਤਿ ਨਿਦ੍ਦੇਸਸ੍ਸ ਉਭਯਲਿਙ੍ਗਸਾਧਾਰਣਤ੍ਤਾ ਵੁਤ੍ਤਂ. ਮੁਹੁਤ੍ਤਿਕਾ ਭਵਿਸ੍ਸਸੀਤਿ ਅਸਾਮਿਕਂ ਸਨ੍ਧਾਯ ਵੁਤ੍ਤਂ, ਜਾਰੀ ਭਵਿਸ੍ਸਸੀਤਿ ਸਸਾਮਿਕਂ ਸਨ੍ਧਾਯ. ਅਨ੍ਤਮਸੋ ਤਙ੍ਖਣਿਕਾਯਪੀਤਿ ਇਦਂ ਨਿਦਸ੍ਸਨਮਤ੍ਤਨ੍ਤਿ ਆਹ ‘‘ਏਤੇਨੇਵੁਪਾਯੇਨਾ’’ਤਿਆਦਿ.

੩੦੩. ਸੇਰਿਵਿਹਾਰਨ੍ਤਿ ਸਚ੍ਛਨ੍ਦਚਾਰਂ. ਅਤ੍ਤਨੋ ਵਸਨ੍ਤਿ ਅਤ੍ਤਨੋ ਆਣਂ. ਗੋਤ੍ਤਨ੍ਤਿ ਗੋਤਮਗੋਤ੍ਤਾਦਿਕਂ ਗੋਤ੍ਤਂ. ਧਮ੍ਮੋਤਿ ਪਣ੍ਡਰਙ੍ਗਪਰਿਬ੍ਬਾਜਕਾਦੀਨਂ, ਤੇਸਂ ਤੇਸਂ ਵਾ ਕੁਲਾਨਂ ਧਮ੍ਮੋ. ਗੋਤ੍ਤਵਨ੍ਤੇਸੁ ਗੋਤ੍ਤਸਦ੍ਦੋ, ਧਮ੍ਮਚਾਰੀਸੁ ਚ ਧਮ੍ਮਸਦ੍ਦੋ ਵਤ੍ਤਤੀਤਿ ਆਹ ‘‘ਸਗੋਤ੍ਤੇਹੀ’’ਤਿਆਦਿ. ਤਤ੍ਥ ਸਗੋਤ੍ਤੇਹੀਤਿ ਸਮਾਨਗੋਤ੍ਤੇਹਿ, ਏਕਵਂਸਜਾਤੇਹੀਤਿ ਅਤ੍ਥੋ. ਸਹਧਮ੍ਮਿਕੇਹੀਤਿ ਏਕਸ੍ਸ ਸਤ੍ਥੁਸਾਸਨੇ ਸਹਚਰਿਤਬ੍ਬਧਮ੍ਮੇਹਿ, ਸਮਾਨਕੁਲਧਮ੍ਮੇਹਿ ਵਾ. ਤੇਨੇਵਾਹ ‘‘ਏਕਂ ਸਤ੍ਥਾਰ’’ਨ੍ਤਿਆਦਿ. ਤਤ੍ਥ ‘‘ਏਕਂ ਸਤ੍ਥਾਰਂ ਉਦ੍ਦਿਸ੍ਸ ਪਬ੍ਬਜਿਤੇਹੀ’’ਤਿ ਇਮਿਨਾ ਪਣ੍ਡਰਙ੍ਗਪਰਿਬ੍ਬਾਜਕਾਦਯੋ ਵੁਤ੍ਤਾ, ਏਕਗਣਪਰਿਯਾਪਨ੍ਨੇਹੀਤਿ ਮਾਲਾਕਾਰਾਦਿਏਕਗਣਪਰਿਯਾਪਨ੍ਨੇਹਿ.

ਸਸਾਮਿਕਾ ਸਾਰਕ੍ਖਾ. ਯਸ੍ਸਾ ਗਮਨੇ ਰਞ੍ਞਾ ਦਣ੍ਡੋ ਠਪਿਤੋ, ਸਾ ਸਪਰਿਦਣ੍ਡਾ. ਪਚ੍ਛਿਮਾਨਂ ਦ੍ਵਿਨ੍ਨਨ੍ਤਿ ਸਾਰਕ੍ਖਸਪਰਿਦਣ੍ਡਾਨਂ ਮਿਚ੍ਛਾਚਾਰੋ ਹੋਤਿ ਤਾਸਂ ਸਸਾਮਿਕਭਾਵਤੋ. ਨ ਇਤਰਾਸਨ੍ਤਿ ਇਤਰਾਸਂ ਮਾਤੁਰਕ੍ਖਿਤਾਦੀਨਂ ਅਟ੍ਠਨ੍ਨਂ ਪੁਰਿਸਨ੍ਤਰਗਮਨੇ ਨਤ੍ਥਿ ਮਿਚ੍ਛਾਚਾਰੋ ਤਾਸਂ ਅਸਾਮਿਕਭਾਵਤੋ. ਯਾ ਹਿ ਸਾਮਿਕਸ੍ਸ ਸਨ੍ਤਕਂ ਫਸ੍ਸਂ ਥੇਨੇਤ੍ਵਾ ਪਰੇਸਂ ਅਭਿਰਤਿਂ ਉਪ੍ਪਾਦੇਨ੍ਤਿ, ਤਾਸਂ ਮਿਚ੍ਛਾਚਾਰੋ, ਨ ਚ ਮਾਤਾਦਯੋ ਤਾਸਂ ਫਸ੍ਸੇ ਇਸ੍ਸਰਾ. ਮਾਤਾਦਯੋ ਹਿ ਨ ਅਤ੍ਤਨਾ ਫਸ੍ਸਾਨੁਭਵਨਤ੍ਥਂ ਤਾ ਰਕ੍ਖਨ੍ਤਿ, ਕੇਵਲਂ ਅਨਾਚਾਰਂ ਨਿਸੇਧੇਨ੍ਤਾ ਪੁਰਿਸਨ੍ਤਰਗਮਨਂ ਤਾਸਂ ਵਾਰੇਨ੍ਤਿ. ਪੁਰਿਸਸ੍ਸ ਪਨ ਏਤਾਸੁ ਅਟ੍ਠਸੁਪਿ ਹੋਤਿਯੇਵ ਮਿਚ੍ਛਾਚਾਰੋ ਮਾਤਾਦੀਹਿ ਯਥਾ ਪੁਰਿਸੇਨ ਸਦ੍ਧਿਂ ਸਂਵਾਸਂ ਨ ਕਪ੍ਪੇਤਿ, ਤਥਾ ਰਕ੍ਖਿਤਤ੍ਤਾ ਪਰੇਸਂ ਰਕ੍ਖਿਤਗੋਪਿਤਂ ਫਸ੍ਸਂ ਥੇਨੇਤ੍ਵਾ ਫੁਟ੍ਠਭਾਵਤੋ.

ਧਨੇਨ ਕੀਤਾਤਿ ਭਰਿਯਭਾਵਤ੍ਥਂ ਧਨੇਨ ਕੀਤਾ. ਤੇਨਾਹ ‘‘ਯਸ੍ਮਾ ਪਨਾ’’ਤਿਆਦਿ. ਭੋਗੇਨਾਤਿ ਭੋਗਹੇਤੁ. ਭੋਗਤ੍ਥਞ੍ਹਿ ਵਸਨ੍ਤੀ ‘‘ਭੋਗਵਾਸਿਨੀ’’ਤਿ ਵੁਚ੍ਚਤਿ. ਲਭਿਤ੍ਵਾਤਿ ਯੋ ਨਂ ਵਾਸੇਤਿ, ਤਸ੍ਸ ਹਤ੍ਥਤੋ ਲਭਿਤ੍ਵਾ. ਉਦਕਪਤ੍ਤਂ ਆਮਸਿਤ੍ਵਾ ਗਹਿਤਾ ਓਦਪਤ੍ਤਕਿਨੀ. ਤੇਨਾਹ ‘‘ਉਭਿਨ੍ਨ’’ਨ੍ਤਿਆਦਿ. ਧਜੇਨ ਆਹਟਾਤਿ ਏਤ੍ਥ ਧਜਯੋਗਤੋ ਸੇਨਾਵ ਧਜਸਦ੍ਦੇਨ ਵੁਤ੍ਤਾ, ਉਸ੍ਸਿਤਦ੍ਧਜਾਯ ਸੇਨਾਯ ਆਹਟਾਤਿ ਵੁਤ੍ਤਂ ਹੋਤਿ. ਤੇਨਾਹ ‘‘ਉਸ੍ਸਿਤਦ੍ਧਜਾਯਾ’’ਤਿਆਦਿ.

੩੦੫. ਬਹਿਦ੍ਧਾ ਵਿਮਟ੍ਠਂ ਨਾਮ ਹੋਤੀਤਿ ਅਞ੍ਞਤ੍ਥ ਆਰੋਚਿਤਂ ਨਾਮ ਹੋਤਿ. ਤਂ ਕਿਰਿਯਂ ਸਮ੍ਪਾਦੇਸ੍ਸਤੀਤਿ ਤਸ੍ਸਾ ਆਰੋਚੇਤ੍ਵਾ ਤਂ ਕਿਚ੍ਚਂ ਸਮ੍ਪਾਦੇਤੁ ਵਾ ਮਾ ਵਾ, ਤਂਕਿਰਿਯਾਸਮ੍ਪਾਦਨੇ ਯੋਗ੍ਯਤਂ ਸਨ੍ਧਾਯ ਵੁਤ੍ਤਂ. ਦਾਰਕਂ ਦਾਰਿਕਞ੍ਚ ਅਜਾਨਾਪੇਤ੍ਵਾ ਤੇਸਂ ਮਾਤਾਪਿਤੁਆਦੀਹਿ ਮਾਤਾਪਿਤੁਆਦੀਨਂਯੇਵ ਸਨ੍ਤਿਕਂ ਸਾਸਨੇ ਪੇਸਿਤੇਪਿ ਹਰਣਵੀਮਂਸਨਪਚ੍ਚਾਹਰਣਸਙ੍ਖਾਤਾਯ ਤਿਵਙ੍ਗਸਮ੍ਪਤ੍ਤਿਯਾ ਸਙ੍ਘਾਦਿਸੇਸੋ ਹੋਤਿਯੇਵਾਤਿ ਦਟ੍ਠਬ੍ਬਂ. ਯਂ ਉਦ੍ਦਿਸ੍ਸ ਸਾਸਨਂ ਪੇਸਿਤਂ, ਤਂਯੇਵ ਸਨ੍ਧਾਯ ਤਸ੍ਸਾ ਮਾਤੁਆਦੀਨਂ ਆਰੋਚਿਤੇ ਵਤ੍ਥੁਨੋ ਏਕਤ੍ਤਾ ਮਾਤੁਆਦਯੋਪਿ ਖੇਤ੍ਤਮੇਵਾਤਿ ਖੇਤ੍ਤਮੇਵ ਓਤਿਣ੍ਣਭਾਵਂ ਦਸ੍ਸੇਤੁਂ ‘‘ਬੁਦ੍ਧਂ ਪਚ੍ਚਕ੍ਖਾਮੀ’’ਤਿਆਦਿ ਉਦਾਹਟਂ. ਇਮਿਨਾ ਸਮੇਤੀਤਿ ਏਤ੍ਥਾਯਮਧਿਪ੍ਪਾਯੋ – ਯਥਾ ਸਯਂ ਅਨਾਰੋਚੇਤ੍ਵਾ ਅਞ੍ਞੇਨ ਅਨ੍ਤੇਵਾਸਿਆਦਿਨਾ ਆਰੋਚਾਪੇਨ੍ਤਸ੍ਸ ਵਿਸਙ੍ਕੇਤੋ ਨਤ੍ਥਿ, ਏਵਂ ਤਸ੍ਸਾ ਸਯਂ ਅਨਾਰੋਚੇਤ੍ਵਾ ਆਰੋਚਨਤ੍ਥਂ ਮਾਤੁਆਦੀਨਂ ਵਦਨ੍ਤਸ੍ਸਪਿ ਨਤ੍ਥਿ ਵਿਸਙ੍ਕੇਤੋਤਿ. ਘਰਂ ਨਯਤੀਤਿ ਘਰਣੀ. ਮੂਲਟ੍ਠਾਨਞ੍ਚ ਵਸੇਨਾਤਿ ਏਤ੍ਥ ਪੁਰਿਸਸ੍ਸ ਮਾਤੁਆਦਯੋ ਸਾਸਨਪੇਸਨੇ ਮੂਲਭੂਤਤ੍ਤਾ ‘‘ਮੂਲਟ੍ਠਾ’’ਤਿ ਵੁਚ੍ਚਨ੍ਤਿ. ਮਾਤੁਰਕ੍ਖਿਤਾਯ ਮਾਤਾ ਭਿਕ੍ਖੁਂ ਪਹਿਣਤੀਤਿ ਏਤ੍ਥ ਅਤ੍ਤਨੋ ਵਾ ਧੀਤੁ ਸਨ੍ਤਿਕਂ ‘‘ਇਤ੍ਥਨ੍ਨਾਮਸ੍ਸ ਭਰਿਯਾ ਹੋਤੂ’’ਤਿ ਭਿਕ੍ਖੁਂ ਪਹਿਣਤਿ, ਪੁਰਿਸਸ੍ਸ ਵਾ ਸਨ੍ਤਿਕਂ ‘‘ਮਮ ਧੀਤਾ ਇਤ੍ਥਨ੍ਨਾਮਸ੍ਸ ਭਰਿਯਾ ਹੋਤੂ’’ਤਿ ਪਹਿਣਤੀਤਿ ਗਹੇਤਬ੍ਬਂ. ਏਸ ਨਯੋ ਸੇਸੇਸੁਪਿ. ਪੁਬ੍ਬੇ ਵੁਤ੍ਤਨਯਤ੍ਤਾਤਿ ਪਠਮਸਙ੍ਘਾਦਿਸੇਸੇ ਵੁਤ੍ਤਨਯਤ੍ਤਾ.

੩੩੮. ਏਤ੍ਤੋਵ ਪਕ੍ਕਮਤੀਤਿ ਪੁਨ ਆਗਨ੍ਤ੍ਵਾ ਆਣਾਪਕਸ੍ਸ ਅਨਾਰੋਚੇਤ੍ਵਾ ਤਤੋਯੇਵ ਪਕ੍ਕਮਤਿ. ਅਞ੍ਞੇਨ ਕਰਣੀਯੇਨਾਤਿ ਗਮਨਹੇਤੁਵਿਸੁਦ੍ਧਿਦਸ੍ਸਨਤ੍ਥਂ ਵੁਤ੍ਤਂ. ਤੇਨੇਵ ਪਨ ਕਰਣੀਯੇਨ ਗਨ੍ਤ੍ਵਾਪਿ ਕਿਞ੍ਚਿ ਅਨਾਰੋਚੇਨ੍ਤੋ ਨ ਵੀਮਂਸਤਿ ਨਾਮ. ਅਨਭਿਨਨ੍ਦਿਤ੍ਵਾਤਿ ਇਦਂ ਤਥਾ ਪਟਿਪਜ੍ਜਮਾਨਂ ਸਨ੍ਧਾਯ ਵੁਤ੍ਤਂ, ਸਤਿਪਿ ਅਭਿਨਨ੍ਦਨੇ ਸਾਸਨਂ ਅਨਾਰੋਚੇਨ੍ਤੋ ਪਨ ਨ ਵੀਮਂਸਤਿ ਨਾਮ. ਤਤਿਯਪਦੇ ਵੁਤ੍ਤਨਯੇਨਾਤਿ ‘‘ਸੋ ਤਸ੍ਸਾ ਵਚਨਂ ਅਨਭਿਨਨ੍ਦਿਤ੍ਵਾ’’ਤਿਆਦਿਨਾ ਵੁਤ੍ਤਨਯੇਨ. ਵਤ੍ਥੁਗਣਨਾਯਾਤਿ ਸਮ੍ਬਹੁਲਾਨਂ ਇਤ੍ਥਿਪੁਰਿਸਾਨਂ ਸਮਭਾਵੇ ਸਤਿ ਦ੍ਵਿਨ੍ਨਂ ਦ੍ਵਿਨ੍ਨਂ ਇਤ੍ਥਿਪੁਰਿਸਵਤ੍ਥੂਨਂ ਗਣਨਾਯ. ਸਚੇ ਪਨ ਏਕਤੋ ਅਧਿਕਾ ਹੋਨ੍ਤਿ, ਅਧਿਕਾਨਂ ਗਣਨਾਯ ਆਪਤ੍ਤਿਭੇਦੋ ਵੇਦਿਤਬ੍ਬੋ.

੩੩੯-੩੪੦. ਪਾਲ਼ਿਯਂ ਚਤੁਤ੍ਥਵਾਰੇ ਅਸਤਿਪਿ ‘‘ਗਚ੍ਛਨ੍ਤੋ ਨ ਸਮ੍ਪਾਦੇਤਿ, ਆਗਚ੍ਛਨ੍ਤੋ ਵਿਸਂਵਾਦੇਤਿ, ਅਨਾਪਤ੍ਤੀ’’ਤਿ ਇਦਂ ਅਤ੍ਥਤੋ ਆਪਨ੍ਨਮੇਵਾਤਿ ਕਤ੍ਵਾ ਵੁਤ੍ਤਂ ‘‘ਚਤੁਤ੍ਥੇ ਅਨਾਪਤ੍ਤੀ’’ਤਿ. ਕਾਰੁਕਾਨਨ੍ਤਿ ਵਡ੍ਢਕੀਆਦੀਨਂ. ਤਚ੍ਛਕਅਯੋਕਾਰਤਨ੍ਤਵਾਯਰਜਕਨ੍ਹਾਪਿਤਕਾ ਪਞ੍ਚ ਕਾਰਵੋ ‘‘ਕਾਰੁਕਾ’’ਤਿ ਵੁਚ੍ਚਨ੍ਤਿ. ਏਵਰੂਪੇਨ…ਪੇ… ਅਨਾਪਤ੍ਤੀਤਿ ਤਾਦਿਸਂ ਗਿਹਿਵੇਯ੍ਯਾਵਚ੍ਚਮ੍ਪਿ ਨ ਹੋਤੀਤਿ ਕਤ੍ਵਾ ਵੁਤ੍ਤਂ.

ਕਾਯਤੋ ਸਮੁਟ੍ਠਾਤੀਤਿ ਪਣ੍ਣਤ੍ਤਿਂ ਵਾ ਅਲਂਵਚਨੀਯਭਾਵਂ ਵਾ ਅਜਾਨਨ੍ਤਸ੍ਸ ਕਾਯਤੋ ਸਮੁਟ੍ਠਾਤਿ. ਵਾਚਤੋ ਸਮੁਟ੍ਠਾਤੀਤਿ ਏਤ੍ਥਾਪਿ ਏਸੇਵ ਨਯੋ. ਕਾਯਵਾਚਤੋ ਸਮੁਟ੍ਠਾਤੀਤਿ ਪਣ੍ਣਤ੍ਤਿਂ ਜਾਨਿਤ੍ਵਾ ਅਲਂਵਚਨੀਯਭਾਵਂ ਅਜਾਨਨ੍ਤਸ੍ਸਪਿ ਕਾਯਵਾਚਤੋ ਸਮੁਟ੍ਠਾਤੀਤਿ ਵੇਦਿਤਬ੍ਬਂ. ਅਲਂਵਚਨੀਯਾ ਹੋਨ੍ਤੀਤਿ ਦੇਸਚਾਰਿਤ੍ਤਵਸੇਨ ਪਣ੍ਣਦਾਨਾਦਿਨਾ ਪਰਿਚ੍ਚਤ੍ਤਾ ਹੋਨ੍ਤਿ. ਪਣ੍ਣਤ੍ਤਿਂ ਪਨ ਜਾਨਿਤ੍ਵਾਤਿ ਏਤ੍ਥ ਅਲਂਵਚਨੀਯਭਾਵਂ ਵਾਤਿ ਚ ਦਟ੍ਠਬ੍ਬਂ. ਤੇਨੇਵ ਮਾਤਿਕਾਟ੍ਠਕਥਾਯਂ (ਕਙ੍ਖਾ. ਅਟ੍ਠ. ਸਞ੍ਚਰਿਤ੍ਤਸਿਕ੍ਖਾਪਦਵਣ੍ਣਨਾ) ‘‘ਤਦੁਭਯਂ ਪਨ ਜਾਨਿਤ੍ਵਾ ਏਤੇਹੇਵ ਤੀਹਿ ਨਯੇਹਿ ਸਮਾਪਜ੍ਜਨ੍ਤਸ੍ਸ ਤਾਨੇਵ ਤੀਣਿ ਤਦੁਭਯਜਾਨਨਚਿਤ੍ਤੇਨ ਸਚਿਤ੍ਤਕਾਨਿ ਹੋਨ੍ਤੀ’’ਤਿ ਵੁਤ੍ਤਂ. ਤਸ੍ਮਾ ਪਣ੍ਣਤ੍ਤਿਜਾਨਨਚਿਤ੍ਤੇਨਾਤਿ ਏਤ੍ਥਾਪਿ ਤਦੁਭਯਜਾਨਨਂ ਵਤ੍ਤਬ੍ਬਂ. ਭਿਕ੍ਖੁਂ ਅਜਾਨਾਪੇਤ੍ਵਾ ਅਤ੍ਤਨੋ ਅਧਿਪ੍ਪਾਯਂ ਪਣ੍ਣੇ ਲਿਖਿਤ੍ਵਾ ਦਿਨ੍ਨਂ ਹਰਨ੍ਤਸ੍ਸਪਿ ਆਪਤ੍ਤਿ ਹੋਤਿ, ਇਮਸ੍ਸ ਸਿਕ੍ਖਾਪਦਸ੍ਸ ਅਚਿਤ੍ਤਕਤ੍ਤਾਤਿ ਨ ਗਹੇਤਬ੍ਬਂ. ਪਾਲ਼ਿਯਂ ਪਨ ‘‘ਆਰੋਚੇਤੀ’’ਤਿ ਵੁਤ੍ਤਤ੍ਤਾ ਅਟ੍ਠਕਥਾਯਞ੍ਚ ਤਤ੍ਥ ਤਤ੍ਥ ਆਰੋਚਨਸ੍ਸੇਵ ਦਸ੍ਸਿਤਤ੍ਤਾ ਕਾਯੇਨ ਵਾ ਵਾਚਾਯ ਵਾ ਆਰੋਚੇਨ੍ਤਸ੍ਸੇਵ ਆਪਤ੍ਤਿ ਹੋਤੀਤਿ ਗਹੇਤਬ੍ਬਂ.

੩੪੧. ਦੁਟ੍ਠੁਲ੍ਲਾਦੀਸੁਪੀਤਿ ਆਦਿ-ਸਦ੍ਦੇਨ ਸਞ੍ਚਰਿਤ੍ਤਮ੍ਪਿ ਸਙ੍ਗਣ੍ਹਾਤਿ. ਏਤ੍ਥ ਪਨ ਕਿਞ੍ਚਾਪਿ ਇਤ੍ਥੀ ਨਾਮ ਮਨੁਸ੍ਸਿਤ੍ਥੀ, ਨ ਯਕ੍ਖੀ, ਨ ਪੇਤੀ, ਨ ਤਿਰਚ੍ਛਾਨਗਤਾ, ਪੁਰਿਸੋ ਨਾਮ ਮਨੁਸ੍ਸਪੁਰਿਸੋ, ਨ ਯਕ੍ਖੋਤਿਆਦਿ ਨ ਵੁਤ੍ਤਂ, ਤਥਾਪਿ ਮਨੁਸ੍ਸਜਾਤਿਕਾਵ ਇਤ੍ਥਿਪੁਰਿਸਾ ਇਧ ਅਧਿਪ੍ਪੇਤਾ. ਤਸ੍ਮਾ ਯੇਸੁ ਸਞ੍ਚਰਿਤ੍ਤਂ ਸਮਾਪਜ੍ਜਤਿ, ਤੇਸਂ ਮਨੁਸ੍ਸਜਾਤਿਕਤਾ, ਨ ਨਾਲਂਵਚਨੀਯਤਾ, ਪਟਿਗ੍ਗਣ੍ਹਨਵੀਮਂਸਨਪਚ੍ਚਾਹਰਣਾਨੀਤਿ ਇਮਾਨੇਤ੍ਥ ਪਞ੍ਚਙ੍ਗਾਨਿ.

ਸਞ੍ਚਰਿਤ੍ਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.