੬. ਕੁਟਿਕਾਰਸਿਕ੍ਖਾਪਦਵਣ੍ਣਨਾ

੩੪੨. ਛਟ੍ਠੇ ਏਤ੍ਤਕੇਨਾਤਿ ਏਤ੍ਤਕੇਨ ਦਾਰੁਆਦਿਨਾ. ਅਪਰਿਚ੍ਛਿਨ੍ਨਪ੍ਪਮਾਣਾਯੋਤਿ ਅਪਰਿਚ੍ਛਿਨ੍ਨਦਾਰੁਆਦਿਪ੍ਪਮਾਣਾਯੋ. ਮੂਲਚ੍ਛੇਜ੍ਜਾਯ ਪੁਰਿਸਂ ਯਾਚਿਤੁਂ ਨ ਵਟ੍ਟਤੀਤਿ ਪਰਸਨ੍ਤਕਭਾਵਤੋ ਮੋਚੇਤ੍ਵਾ ਅਤ੍ਤਨੋਯੇਵ ਸਨ੍ਤਕਂ ਕਤ੍ਵਾ ਯਾਚਿਤੁਂ ਨ ਵਟ੍ਟਤਿ. ਏਵਂ ਮੂਲਚ੍ਛੇਜ੍ਜਾਯ ਅਞ੍ਞਾਤਕਅਪ੍ਪਵਾਰਿਤਟ੍ਠਾਨਤੋ ਯਾਚਨ੍ਤਸ੍ਸ ਅਞ੍ਞਾਤਕਵਿਞ੍ਞਤ੍ਤਿਯਾ ਦੁਕ੍ਕਟਂ. ਦਾਸਂ ਅਤ੍ਤਨੋ ਅਤ੍ਥਾਯ ਸਾਦਿਯਨ੍ਤਸ੍ਸਪਿ ਦੁਕ੍ਕਟਮੇਵ ‘‘ਦਾਸਿਦਾਸਪਟਿਗ੍ਗਹਣਾ ਪਟਿਵਿਰਤੋ ਹੋਤੀ’’ਤਿ (ਦੀ. ਨਿ. ੧.੧੦, ੧੯੪) ਵਚਨਤੋ. ਞਾਤਕਪਵਾਰਿਤਟ੍ਠਾਨਤੋ ਪਨ ਦਾਸਂ ਮੂਲਚ੍ਛੇਜ੍ਜਾਯ ਯਾਚਨ੍ਤਸ੍ਸ ਸਾਦਿਯਨਵਸੇਨ ਦੁਕ੍ਕਟਂ. ਸਕਕਮ੍ਮਂ ਨ ਯਾਚਿਤਬ੍ਬਾਤਿ ਪਾਣਾਤਿਪਾਤਸਿਕ੍ਖਾਪਦਰਕ੍ਖਣਤ੍ਥਂ ਵੁਤ੍ਤਂ. ਅਨਿਯਮੇਤ੍ਵਾਪਿ ਨ ਯਾਚਿਤਬ੍ਬਾਤਿ ਮਨੁਸ੍ਸਾਨਂ ਅਞ੍ਞਥਾ ਗਾਹਸ੍ਸਪਿ ਸਮ੍ਭਵਤੋ ਵੁਤ੍ਤਂ, ਸੁਦ੍ਧਚਿਤ੍ਤੇਨ ਪਨ ਹਤ੍ਥਕਮ੍ਮਂ ਯਾਚਨ੍ਤਸ੍ਸ ਆਪਤ੍ਤਿ ਨਾਮ ਨਤ੍ਥਿ.

ਸਬ੍ਬਕਪ੍ਪਿਯਭਾਵਦੀਪਨਤ੍ਥਨ੍ਤਿ ਸਬ੍ਬਸੋ ਕਪ੍ਪਿਯਭਾਵਦੀਪਨਤ੍ਥਂ. ਮੂਲਂ ਦੇਥਾਤਿ ਵਤ੍ਤੁਂ ਵਟ੍ਟਤੀਤਿ ਯਸ੍ਮਾ ਮੂਲਂ ਦਸ੍ਸਾਮਾਤਿ ਤੇਹਿ ਪਠਮਂ ਵੁਤ੍ਤਤ੍ਤਾ ਵਿਞ੍ਞਤ੍ਤਿ ਨ ਹੋਤਿ, ਯਸ੍ਮਾ ਚ ਮੂਲਨ੍ਤਿ ਭਣਿਤਂ ਸਾਮਞ੍ਞਵਚਨਤੋ ਅਕਪ੍ਪਿਯਵਚਨਂ ਨ ਹੋਤਿ, ਤਸ੍ਮਾ ਮੂਲਂ ਦੇਥਾਤਿ ਵਤ੍ਤੁਂ ਵਟ੍ਟਤਿ. ਅਨਜ੍ਝਾਵੁਤ੍ਥਕਨ੍ਤਿ ਅਪਰਿਗ੍ਗਹਿਤਂ. ਅਕਪ੍ਪਿਯਕਹਾਪਣਾਦਿ ਨ ਦਾਤਬ੍ਬਨ੍ਤਿ ਕਿਞ੍ਚਾਪਿ ਅਕਪ੍ਪਿਯਕਹਾਪਣਾਦਿਂ ਅਸਾਦਿਯਨ੍ਤੇਨ ਕਪ੍ਪਿਯਵੋਹਾਰਤੋ ਦਾਤੁਂ ਵਟ੍ਟਤਿ, ਤਥਾਪਿ ਸਾਰੁਪ੍ਪਂ ਨ ਹੋਤਿ. ਮਨੁਸ੍ਸਾ ਚ ਏਤਸ੍ਸ ਸਨ੍ਤਕਂ ਕਿਞ੍ਚਿ ਅਤ੍ਥੀਤਿ ਵਿਹੇਠੇਤਬ੍ਬਂ ਮਞ੍ਞਨ੍ਤੀਤਿ ਅਕਪ੍ਪਿਯਕਹਾਪਣਾਦਿਦਾਨਂ ਪਟਿਕ੍ਖਿਤ੍ਤਂ. ਤਥੇਵ ਪਾਚੇਤ੍ਵਾਤਿ ਹਤ੍ਥਕਮ੍ਮਵਸੇਨੇਵ ਪਾਚੇਤ੍ਵਾ. ‘‘ਕਿਂ, ਭਨ੍ਤੇ’’ਤਿ ਏਤ੍ਤਕੇਪਿ ਪੁਚ੍ਛਿਤੇ ਯਦਤ੍ਥਾਯ ਪਵਿਟ੍ਠੋ, ਤਂ ਕਥੇਤੁਂ ਵਟ੍ਟਤਿ ਪੁਚ੍ਛਿਤਪਞ੍ਹਤ੍ਤਾ.

ਵਤ੍ਤਨ੍ਤਿ ਚਾਰਿਤ੍ਤਂ, ਆਪਤ੍ਤਿ ਪਨ ਨ ਹੋਤੀਤਿ ਅਧਿਪ੍ਪਾਯੋ. ਕਪ੍ਪਿਯਂ ਕਾਰਾਪੇਤ੍ਵਾ ਪਟਿਗ੍ਗਹੇਤਬ੍ਬਾਨੀਤਿ ਸਾਖਾਯ ਲਗ੍ਗਰਜਸ੍ਮਿਂ ਪਤ੍ਤੇ ਪਤਿਤੇਪਿ ਸਾਖਂ ਛਿਨ੍ਦਿਤ੍ਵਾ ਖਾਦਿਤੁਕਾਮਤਾਯਪਿ ਸਤਿ ਸੁਖਪਰਿਭੋਗਤ੍ਥਂ ਵੁਤ੍ਤਂ. ‘‘ਨਦਿਂ ਵਾ…ਪੇ… ਆਹਰਾ’’ਤਿ ਵਤ੍ਥੁਂ ਵਟ੍ਟਤੀਤਿ ਅਪਰਿਗ੍ਗਹਿਤਤ੍ਤਾ ਵੁਤ੍ਤਂ. ਗੇਹਤੋ…ਪੇ… ਪਰਿਭੁਞ੍ਜਿਤਬ੍ਬਨ੍ਤਿ ਪਰਿਗ੍ਗਹਿਤਉਦਕਤ੍ਤਾ ਵਿਞ੍ਞਤ੍ਤਿਯਾ ਦੁਕ੍ਕਟਂ ਹੋਤੀਤਿ ਅਧਿਪ੍ਪਾਯੋ. ਅਲਜ੍ਜੀਹਿ…ਪੇ… ਨ ਕਾਰੇਤਬ੍ਬਨ੍ਤਿ ਇਦਂ ਉਤ੍ਤਰਿਭਙ੍ਗਾਧਿਕਾਰਤ੍ਤਾ ਅਜ੍ਝੋਹਰਣੀਯਂ ਸਨ੍ਧਾਯ ਵੁਤ੍ਤਂ. ਬਾਹਿਰਪਰਿਭੋਗੇਸੁ ਪਨ ਅਲਜ੍ਜੀਹਿਪਿ ਹਤ੍ਥਕਮ੍ਮਂ ਕਾਰੇਤੁਂ ਵਟ੍ਟਤੀਤਿ.

ਗੋਣਂ ਪਨ…ਪੇ… ਆਹਰਾਪੇਤੁਂ ਨ ਵਟ੍ਟਤੀਤਿ ਅਤ੍ਤਨੋ ਅਤ੍ਥਾਯ ਮੂਲਚ੍ਛੇਜ੍ਜਵਸੇਨ ਆਹਰਾਪੇਤੁਂ ਨ ਵਟ੍ਟਤਿ. ਆਹਰਾਪੇਨ੍ਤਸ੍ਸ ਦੁਕ੍ਕਟਨ੍ਤਿ ਅਞ੍ਞਾਤਕਵਿਞ੍ਞਤ੍ਤਿਯਾ ਦੁਕ੍ਕਟਂ. ਅਤ੍ਤਨੋ ਅਤ੍ਥਾਯ ਸਾਦਿਯਨੇਪਿ ਦੁਕ੍ਕਟਮੇਵ ‘‘ਹਤ੍ਥਿਗਵਾਸ੍ਸਵਲ਼ਵਪਟਿਗ੍ਗਹਣਾ ਪਟਿਵਿਰਤੋ ਹੋਤੀ’’ਤਿ (ਦੀ. ਨਿ. ੧.੧੦, ੧੯੪) ਵੁਤ੍ਤਤ੍ਤਾ. ਤੇਨੇਵਾਹ ‘‘ਞਾਤਕਪਵਾਰਿਤਟ੍ਠਾਨਤੋਪਿ ਮੂਲਚ੍ਛੇਜ੍ਜਾਯ ਯਾਚਿਤੁਂ ਨ ਵਟ੍ਟਤੀ’’ਤਿ. ਰਕ੍ਖਿਤ੍ਵਾਤਿ ਯਥਾ ਚੋਰਾ ਨ ਹਰਨ੍ਤਿ, ਏਵਂ ਰਕ੍ਖਿਤ੍ਵਾ. ਜਗ੍ਗਿਤ੍ਵਾਤਿ ਤਿਣਦਾਨਾਦੀਹਿ ਜਗ੍ਗਿਤ੍ਵਾ. ਨ ਸਮ੍ਪਟਿਚ੍ਛਿਤਬ੍ਬਨ੍ਤਿ ਅਤ੍ਤਨੋ ਅਤ੍ਥਾਯ ਗੋਣੇ ਸਾਦਿਯਨਸ੍ਸ ਪਟਿਕ੍ਖਿਤ੍ਤਤ੍ਤਾ ਵੁਤ੍ਤਂ.

ਸਕਟਂ ਦੇਥਾਤਿ…ਪੇ… ਵਟ੍ਟਤੀਤਿ ਮੂਲਚ੍ਛੇਜ੍ਜਵਸੇਨ ਸਕਟਂ ਦੇਥਾਤਿ ਵਤ੍ਤੁਂ ਨ ਵਟ੍ਟਤਿ. ਤਾਵਕਾਲਿਕਂ ਵਟ੍ਟਤੀਤਿ ਤਾਵਕਾਲਿਕਂ ਕਤ੍ਵਾ ਸਬ੍ਬਤ੍ਥ ਯਾਚਿਤੁਂ ਵਟ੍ਟਤਿ. ਵਲ੍ਲਿਆਦੀਸੁ ਚ ਪਰਪਰਿਗ੍ਗਹਿਤੇਸੁ ਏਸੇਵ ਨਯੋਤਿ ਯੋਜੇਤਬ੍ਬਂ. ਗਰੁਭਣ੍ਡਪ੍ਪਹੋਨਕੇਸੁਯੇਵ ਚ ਵਲ੍ਲਿਆਦੀਸੂਤਿ ਏਤ੍ਥ ਆਦਿ-ਸਦ੍ਦੇਨ ਵੇਲ਼ੁਮੁਞ੍ਜਪਬ੍ਬਜਤਿਣਮਤ੍ਤਿਕਾਨਂ ਸਙ੍ਗਹੋ ਦਟ੍ਠਬ੍ਬੋ. ਯਂ ਪਨ ਵਤ੍ਥੁਵਸੇਨ ਅਪ੍ਪਂ ਹੁਤ੍ਵਾ ਅਗ੍ਘਵਸੇਨ ਮਹਨ੍ਤਂ ਹਰਿਤਾਲਹਿਙ੍ਗੁਲਕਾਦਿ, ਤਂ ਗਰੁਭਣ੍ਡਂ ਅਪ੍ਪਹੋਨ੍ਤਮ੍ਪਿ ਯਾਚਿਤੁਂ ਨ ਵਟ੍ਟਤੀਤਿ ਵਦਨ੍ਤਿ.

ਸਾਤਿ ਵਿਞ੍ਞਤ੍ਤਿਂ ਪਰਾਮਸਤਿ. ਸਾ ਚ ਇਧ ਪਰਿਕਥਾਦਿਨਾ ਯੇਨ ਕੇਨਚਿ ਅਧਿਪ੍ਪਾਯਵਿਞ੍ਞਾਪਨਂ ਵਿਞ੍ਞਤ੍ਤੀਤਿ ਗਹੇਤਬ੍ਬਾ. ਤੇਨਾਹ ‘‘ਸਬ੍ਬੇਨ ਸਬ੍ਬ’’ਨ੍ਤਿ, ਸਬ੍ਬਪ੍ਪਕਾਰੇਨਾਤਿ ਅਤ੍ਥੋ. ਤੇਨ ‘‘ਪਰਿਕਥਾਦਿਵਸੇਨਪਿ ਵਿਞ੍ਞਾਪਨਂ ਨ ਵਟ੍ਟਤੀ’’ਤਿ ਦੀਪੇਤਿ. ਪਰਿਕਥੋਭਾਸਨਿਮਿਤ੍ਤਕਮ੍ਮਮ੍ਪਿ ਹਿ ਚੀਵਰਪਿਣ੍ਡਪਾਤੇਸੁ ਦ੍ਵੀਸੁ ਪਚ੍ਚਯੇਸੁ ਨ ਵਟ੍ਟਤਿ. ਇਦਾਨਿ ਸੇਨਾਸਨਪਚ੍ਚਯੇ ਅਧਿਪ੍ਪੇਤਂ ਵਿਞ੍ਞਤ੍ਤਿਂ ਪਰਿਕਥਾਦੀਹਿ ਵਿਸੇਸੇਤ੍ਵਾ ਦਸ੍ਸੇਨ੍ਤੋ ‘‘ਆਹਰ ਦੇਹੀਤਿ ਵਿਞ੍ਞਤ੍ਤਿਮਤ੍ਤਮੇਵ ਨ ਵਟ੍ਟਤੀ’’ਤਿ ਆਹ. ਪਰਿਕਥੋਭਾਸਨਿਮਿਤ੍ਤਕਮ੍ਮਾਨਿ ਵਟ੍ਟਨ੍ਤੀਤਿ ਏਤ੍ਥ ਪਰਿਕਥਾ ਨਾਮ ਪਰਿਯਾਯੇਨ ਕਥਨਂ ਭਿਕ੍ਖੁਸਙ੍ਘਸ੍ਸ ਸੇਨਾਸਨਂ ਸਮ੍ਬਾਧਨ੍ਤਿਆਦਿਵਚਨਂ. ਓਭਾਸੋ ਨਾਮ ਉਜੁਕਮੇਵ ਅਕਥੇਤ੍ਵਾ ਯਥਾ ਅਧਿਪ੍ਪਾਯੋ ਵਿਭੂਤੋ ਹੋਤਿ, ਏਵਂ ਓਭਾਸਨਂ, ਉਪਾਸਕਾ, ਤੁਮ੍ਹੇ ਕੁਹਿਂ ਵਸਥਾਤਿ? ਪਾਸਾਦੇ, ਭਨ੍ਤੇਤਿ. ਭਿਕ੍ਖੂਨਂ ਪਨ, ਉਪਾਸਕਾ, ਪਾਸਾਦੋ ਨ ਵਟ੍ਟਤੀਤਿਆਦਿਵਚਨਂ. ਨਿਮਿਤ੍ਤਕਮ੍ਮਂ ਨਾਮ ਪਚ੍ਚਯੇ ਉਦ੍ਦਿਸ੍ਸ ਯਥਾ ਅਧਿਪ੍ਪਾਯੋ ਵਿਞ੍ਞਾਯਤਿ, ਏਵਂ ਨਿਮਿਤ੍ਤਕਮ੍ਮਂ, ਸੇਨਾਸਨਤ੍ਥਂ ਭੂਮਿਪਰਿਕਮ੍ਮਾਦੀਨਿ ਕਰੋਨ੍ਤਸ੍ਸ ‘‘ਕਿਂ, ਭਨ੍ਤੇ, ਕਰੋਸਿ, ਕੋ ਕਾਰਾਪੇਤੀ’’ਤਿ ਵੁਤ੍ਤੇ ‘‘ਨ ਕੋਚੀ’’ਤਿਆਦਿਵਚਨਂ.

ਇਦਾਨਿ ਗਿਲਾਨਪਚ੍ਚਯੇ ਵਿਞ੍ਞਤ੍ਤਿਆਦਿਕਂ ਸਬ੍ਬਮ੍ਪਿ ਵਟ੍ਟਤੀਤਿ ਦਸ੍ਸੇਨ੍ਤੋ ਆਹ ‘‘ਗਿਲਾਨਪਚ੍ਚਯੇ ਪਨਾ’’ਤਿਆਦਿ. ਤਥਾ ਉਪ੍ਪਨ੍ਨਂ ਪਨ ਭੇਸਜ੍ਜਂ ਰੋਗੇ ਵੂਪਸਨ੍ਤੇ ਪਰਿਭੁਞ੍ਜਿਤੁਂ ਵਟ੍ਟਤਿ, ਨ ਵਟ੍ਟਤੀਤਿ? ਤਤ੍ਥ ਵਿਨਯਧਰਾ ‘‘ਭਗਵਤਾ ਰੋਗਸੀਸੇਨ ਪਰਿਭੋਗਸ੍ਸ ਦ੍ਵਾਰਂ ਦਿਨ੍ਨਂ, ਤਸ੍ਮਾ ਅਰੋਗਕਾਲੇਪਿ ਪਰਿਭੁਞ੍ਜਿਤੁਂ ਵਟ੍ਟਤਿ, ਆਪਤ੍ਤਿ ਨ ਹੋਤੀ’’ਤਿ ਵਦਨ੍ਤਿ. ਸੁਤ੍ਤਨ੍ਤਿਕਾ ਪਨ ‘‘ਕਿਞ੍ਚਾਪਿ ਆਪਤ੍ਤਿ ਨ ਹੋਤਿ, ਆਜੀਵਂ ਪਨ ਕੋਪੇਤਿ, ਤਸ੍ਮਾ ਸਲ੍ਲੇਖਪ੍ਪਟਿਪਤ੍ਤਿਯਂ ਠਿਤਸ੍ਸ ਨ ਵਟ੍ਟਤਿ, ਸਲ੍ਲੇਖਂ ਕੋਪੇਤੀ’’ਤਿ ਵਦਨ੍ਤਿ. ਉਕ੍ਕਮਨ੍ਤੀਤਿ ਅਪਗਚ੍ਛਨ੍ਤਿ.

੩੪੪. ਮਣਿ ਕਣ੍ਠੇ ਅਸ੍ਸਾਤਿ ਮਣਿਕਣ੍ਠੋ, ਮਣਿਨਾ ਉਪਲਕ੍ਖਿਤੋ ਵਾ ਕਣ੍ਠੋ ਅਸ੍ਸਾਤਿ ਮਣਿਕਣ੍ਠੋਤਿ ਮਜ੍ਝਪਦਲੋਪੀਸਮਾਸੋ ਦਟ੍ਠਬ੍ਬੋ. ਦੇਵਵਣ੍ਣਨ੍ਤਿ ਦੇਵਤ੍ਤਭਾਵਂ. ਪਸਨ੍ਨਾਕਾਰਨ੍ਤਿ ਪਸਨ੍ਨੇਹਿ ਕਾਤਬ੍ਬਕਿਚ੍ਚਂ, ਕਾਯਵੇਯ੍ਯਾਵਚ੍ਚਸਙ੍ਖਾਤਂ ਉਪਟ੍ਠਾਨਨ੍ਤਿ ਵੁਤ੍ਤਂ ਹੋਤਿ. ਮਣਿਯਾਚਨਾਯ ਤਸ੍ਸ ਅਨਾਗਮਨੇਨ ਅਤ੍ਤਨੋ ਵਡ੍ਢਿ ਹੋਤੀਤਿ ਵੁਤ੍ਤਂ ‘‘ਮਣਿਨਾ ਮੇ ਅਤ੍ਥੋ’’ਤਿ, ਮਨ੍ਤਪਦਨੀਹਾਰੇਨ ਵਾ ਤਥਾ ਵੁਤ੍ਤਨ੍ਤਿ ਦਟ੍ਠਬ੍ਬਂ.

੩੪੫. ਵਤ੍ਤਮਾਨਸਮੀਪੇਤਿ ਵਤ੍ਤਮਾਨਸ੍ਸ ਸਮੀਪੇ ਅਤੀਤੇ. ਏਵਂ ਵਤ੍ਤੁਂ ਲਬ੍ਭਤੀਤਿ ‘‘ਆਗਤੋਸੀ’’ਤਿ ਵਤ੍ਤਬ੍ਬੇ ਵਤ੍ਤਮਾਨਸਮੀਪਤ੍ਤਾ ‘‘ਆਗਚ੍ਛਸੀ’’ਤਿ ਏਵਂ ਵਤ੍ਤਮਾਨਵੋਹਾਰੇਨ ਵਤ੍ਤੁਂ ਲਬ੍ਭਤਿ. ਲਕ੍ਖਣਂ ਪਨੇਤ੍ਥ ਸਦ੍ਦਸਤ੍ਥਾਨੁਸਾਰਤੋ ਵੇਦਿਤਬ੍ਬਂ. ਸੋ ਏਵ ਨਯੋਤਿ ‘‘ਆਗਤੋਮ੍ਹੀ’’ਤਿ ਵਤ੍ਤਬ੍ਬੇ ‘‘ਆਗਚ੍ਛਾਮੀ’’ਤਿ ਅਯਮ੍ਪਿ ਵਤ੍ਤਮਾਨਸਮੀਪੇ ਵਤ੍ਤਮਾਨਵੋਹਾਰੋਤਿ ਦਸ੍ਸੇਤਿ.

੩੪੮-੩੪੯. ਯਸ੍ਮਾ ਪਨ ਨ ਸਕ੍ਕਾ ਕੇਵਲਂ ਯਾਚਨਾਯ ਕਿਞ੍ਚਿ ਕਾਤੁਂ, ਤਸ੍ਮਾ ‘‘ਸਯਂ ਯਾਚਿਤਕੇਹਿ ਉਪਕਰਣੇਹੀ’’ਤਿ ਅਧਿਪ੍ਪਾਯਤ੍ਥੋ ਵੁਤ੍ਤੋ. ਉਦ੍ਧਂਮੁਖਂ ਲਿਤ੍ਤਾ ਉਲ੍ਲਿਤ੍ਤਾ, ਅਧੋਮੁਖਂ ਲਿਤ੍ਤਾ ਅਵਲਿਤ੍ਤਾ. ਯਸ੍ਮਾ ਪਨ ਉਦ੍ਧਂਮੁਖਂ ਲਿਮ੍ਪਨ੍ਤਾ ਯੇਭੁਯ੍ਯੇਨ ਅਨ੍ਤੋ ਲਿਮ੍ਪਨ੍ਤਿ, ਅਧੋਮੁਖਂ ਲਿਮ੍ਪਨ੍ਤਾ ਚ ਬਹਿ, ਤਸ੍ਮਾ ਵੁਤ੍ਤਂ ‘‘ਉਲ੍ਲਿਤ੍ਤਾਤਿ ਅਨ੍ਤੋਲਿਤ੍ਤਾ, ਅਵਲਿਤ੍ਤਾਤਿ ਬਹਿਲਿਤ੍ਤਾ’’ਤਿ. ਤਤ੍ਥ ਉਲ੍ਲਿਤ੍ਤਾ ਨਾਮ ਠਪੇਤ੍ਵਾ ਤੁਲਾਪਿਟ੍ਠਸਙ੍ਘਾਤਵਾਤਪਾਨਧੂਮਛਿਦ੍ਦਾਦਿਭੇਦਂ ਅਲੇਪੋਕਾਸਂ ਅਵਸੇਸੇ ਲੇਪੋਕਾਸੇ ਕੁਟ੍ਟੇਹਿ ਸਦ੍ਧਿਂ ਘਟੇਤ੍ਵਾ ਛਦਨਸ੍ਸ ਅਨ੍ਤੋ ਸੁਧਾਯ ਵਾ ਮਤ੍ਤਿਕਾਯ ਵਾ ਲਿਤ੍ਤਾ. ਅਵਲਿਤ੍ਤਾ ਨਾਮ ਵੁਤ੍ਤਨਯੇਨੇਵ ਛਦਨਸ੍ਸ ਬਹਿ ਲਿਤ੍ਤਾ. ਉਲ੍ਲਿਤ੍ਤਾਵਲਿਤ੍ਤਾ ਨਾਮ ਤਥੇਵ ਛਦਨਸ੍ਸ ਅਨ੍ਤੋ ਚ ਬਹਿ ਚ ਲਿਤ੍ਤਾ.

ਬ੍ਯਞ੍ਜਨਂ ਸਮੇਤੀਤਿ ‘‘ਕਾਰਯਮਾਨੇਨਾ’’ਤਿ ਹੇਤੁਕਤ੍ਤੁਵਸੇਨ ਉਦ੍ਦਿਟ੍ਠਪਦਸ੍ਸ ‘‘ਕਾਰਾਪੇਨ੍ਤੇਨਾ’’ਤਿ ਹੇਤੁਕਤ੍ਤੁਵਸੇਨੇਵ ਨਿਦ੍ਦੇਸਸ੍ਸ ਕਤਤ੍ਤਾ ਬ੍ਯਞ੍ਜਨਂ ਸਮੇਤਿ. ਯਦਿ ਏਵਂ ‘‘ਕਰੋਨ੍ਤੋ ਵਾ ਕਾਰਾਪੇਨ੍ਤੋ ਵਾ’’ਤਿ ਕਸ੍ਮਾ ਤਸ੍ਸ ਪਦਭਾਜਨਂ ਵੁਤ੍ਤਨ੍ਤਿ ਆਹ ‘‘ਯਸ੍ਮਾ ਪਨਾ’’ਤਿਆਦਿ. ‘‘ਅਤ੍ਤਨਾ ਵਿਪ੍ਪਕਤਂ ਪਰੇਹਿ ਪਰਿਯੋਸਾਪੇਤੀ’’ਤਿਆਦਿਵਚਨਤੋ ‘‘ਕਰੋਨ੍ਤੇਨਪਿ ਇਧ ਵੁਤ੍ਤਨਯੇਨੇਵ ਪਟਿਪਜ੍ਜਿਤਬ੍ਬ’’ਨ੍ਤਿ ਵੁਤ੍ਤਂ. ਤਤ੍ਥ ਇਧ ਵੁਤ੍ਤਨਯੇਨੇਵਾਤਿ ਇਮਸ੍ਮਿਂ ਸਿਕ੍ਖਾਪਦੇ ਵੁਤ੍ਤਨਯੇਨੇਵ. ਉਭੋਪੇਤੇਤਿ ਕਾਰਕਕਾਰਾਪਕਾ. ਕਾਰਯਮਾਨੇਨਾਤਿ ਇਮਿਨਾਵ ਪਦੇਨ ਸਙ੍ਗਹਿਤਾਤਿ ਕਥਂ ਸਙ੍ਗਹਿਤਾ. ਨ ਹਿ ਕਾਰਯਮਾਨੋ ਕਰੋਨ੍ਤੋ ਨਾਮ ਹੋਤਿ, ਏਵਂ ਪਨੇਤ੍ਥ ਅਧਿਪ੍ਪਾਯੋ ਵੇਦਿਤਬ੍ਬੋ – ਯਸ੍ਮਾ ਕਰੋਨ੍ਤੇਨਪਿ ਕਾਰਯਮਾਨੇਨਪਿ ਇਧ ਵੁਤ੍ਤਨਯੇਨੇਵ ਪਟਿਪਜ੍ਜਿਤਬ੍ਬਂ, ਤਸ੍ਮਾ ਕਾਰਯਮਾਨੇਨ ਏਵਂ ਪਟਿਪਜ੍ਜਿਤਬ੍ਬਨ੍ਤਿ ਵੁਤ੍ਤੇ ਪਗੇਵ ਕਰੋਨ੍ਤੇਨਾਤਿ ਇਦਂ ਅਤ੍ਥਤੋ ਆਗਤਮੇਵਾਤਿ ‘‘ਕਾਰਯਮਾਨੇਨਾ’’ਤਿ ਭਗਵਤਾ ਵੁਤ੍ਤਂ. ਤਤੋ ‘‘ਕਾਰਯਮਾਨੇਨਾ’’ਤਿ ਵੁਤ੍ਤੇ ਸਾਮਤ੍ਥਿਯਤੋ ਲਬ੍ਭਮਾਨੋਪਿ ਅਤ੍ਥੋ ਤੇਨੇਵ ਸਙ੍ਗਹਿਤੋ ਨਾਮ ਹੋਤੀਤਿ. ਬ੍ਯਞ੍ਜਨਂ ਵਿਲੋਮਿਤਂ ਭਵੇਯ੍ਯਾਤਿ ਯਸ੍ਮਾ ‘‘ਕਾਰਯਮਾਨੇਨਾ’’ਤਿ ਇਮਸ੍ਸ ‘‘ਕਰੋਨ੍ਤੇਨਾ’’ਤਿ ਇਦਂ ਪਰਿਯਾਯਵਚਨਂ ਨ ਹੋਤਿ, ਤਸ੍ਮਾ ਕਰੋਨ੍ਤੇਨ ਵਾ ਕਾਰਾਪੇਨ੍ਤੇਨ ਵਾਤਿ ਪਦਤ੍ਥਵਸੇਨ ਨਿਦ੍ਦੇਸੇ ਕਤੇ ਬ੍ਯਞ੍ਜਨਂ ਵਿਰੁਦ੍ਧਂ ਭਵੇਯ੍ਯਾਤਿ ਅਧਿਪ੍ਪਾਯੋ. ਅਤ੍ਥਮਤ੍ਤਮੇਵਾਤਿ ਪਦਤ੍ਥਤੋ ਸਾਮਤ੍ਥਿਯਤੋ ਚ ਲਬ੍ਭਮਾਨਂ ਅਤ੍ਥਮਤ੍ਤਮੇਵ.

ਉਦ੍ਦੇਸੋਤਿ ਉਦ੍ਦਿਸਿਤਬ੍ਬੋ. ਅਬ੍ਬੋਹਾਰਿਕਨ੍ਤਿ ਅਪ੍ਪਮਾਣਂ. ‘‘ਆਯਾਮਤੋ ਚ ਵਿਤ੍ਥਾਰਤੋ ਚਾ’’ਤਿ ਅਵਤ੍ਵਾ ਵਿਕਪ੍ਪਤ੍ਥਸ੍ਸ ਵਾ-ਸਦ੍ਦਸ੍ਸ ਵੁਤ੍ਤਤ੍ਤਾ ਏਕਤੋਭਾਗੇਨ ਵਡ੍ਢਿਤੇਪਿ ਆਪਤ੍ਤਿਯੇਵਾਤਿ ਦਸ੍ਸੇਨ੍ਤੋ ‘‘ਯੋ ਪਨਾ’’ਤਿਆਦਿਮਾਹ. ਤਿਹਤ੍ਥਾਤਿ ਵਡ੍ਢਕੀਹਤ੍ਥੇਨ ਤਿਹਤ੍ਥਾ. ਪਮਾਣਯੁਤ੍ਤੋ ਮਞ੍ਚੋਤਿ ਪਕਤਿਵਿਦਤ੍ਥਿਯਾ ਨਵਵਿਦਤ੍ਥਿਪ੍ਪਮਾਣੋ ਮਞ੍ਚੋ. ਪਮਾਣਿਕਾ ਕਾਰੇਤਬ੍ਬਾਤਿ ਉਕ੍ਕਟ੍ਠਪ੍ਪਮਾਣਂ ਸਨ੍ਧਾਯ ਵੁਤ੍ਤਤ੍ਤਾ ਉਕ੍ਕਟ੍ਠਪ੍ਪਮਾਣਯੁਤ੍ਤਾਵ ਕੁਟਿ ਅਦੇਸਿਤਵਤ੍ਥੁਕਾ ਨ ਵਟ੍ਟਤਿ, ਪਮਾਣਤੋ ਪਨ ਊਨਤਰਾ ਅਦੇਸਿਤਵਤ੍ਥੁਕਾਪਿ ਵਟ੍ਟਤੀਤਿ ਕਸ੍ਸਚਿ ਸਨ੍ਦੇਹੋ ਸਿਯਾਤਿ ਤਂਨਿਵਤ੍ਤਨਤ੍ਥਂ ‘‘ਪਮਾਣਤੋ ਊਨਤਰਮ੍ਪੀ’’ਤਿਆਦਿ ਵੁਤ੍ਤਂ. ਤਤ੍ਥ ਪਮਾਣਤੋ ਊਨਤਰਨ੍ਤਿ ਪਾਲ਼ਿਯਂ ਵੁਤ੍ਤਪ੍ਪਮਾਣਤੋ ਊਨਤਰਂ. ਪਚ੍ਛਿਮੇਨ ਪਮਾਣੇਨ ਚਤੁਹਤ੍ਥਤੋ ਊਨਤਰਾ ਕੁਟਿ ਨਾਮ ਨ ਹੋਤੀਤਿ ਚਤੁਹਤ੍ਥਤੋ ਪਟ੍ਠਾਯ ਕੁਟਿਲਕ੍ਖਣਪ੍ਪਤ੍ਤਂ ਕੁਟਿਂ ਦਸ੍ਸੇਤੁਂ ‘‘ਚਤੁਹਤ੍ਥਂ ਪਞ੍ਚਹਤ੍ਥਮ੍ਪੀ’’ਤਿ ਵੁਤ੍ਤਂ. ਕਲਲਲੇਪੋਤਿ ਕੇਨਚਿ ਸਿਲੇਸੇਨ ਕਤਲੇਪੋ, ਤਮ੍ਬਮਤ੍ਤਿਕਾਦਿਕਲਲਲੇਪੋ ਵਾ. ਅਲੇਪੋ ਏਵਾਤਿ ਅਬ੍ਬੋਹਾਰਿਕਾਯੇਵਾਤਿ ਅਧਿਪ੍ਪਾਯੋ. ਪਿਟ੍ਠਸਙ੍ਘਾਟੋ ਦ੍ਵਾਰਬਾਹਾ. ਓਲੋਕੇਤ੍ਵਾਪੀਤਿ ਅਪਲੋਕੇਤ੍ਵਾਪਿ, ਅਪਲੋਕਨਕਮ੍ਮਵਸੇਨਪਿ ਕਾਤੁਂ ਵਟ੍ਟਤੀਤਿ ਅਧਿਪ੍ਪਾਯੋ.

੩੫੩. ਯਥਾ ਸੀਹਾਦੀਨਂ ਗੋਚਰਾਯ ਪਕ੍ਕਮਨ੍ਤਾਨਂ ਨਿਬਦ੍ਧਗਮਨਮਗ੍ਗੋ ਨ ਵਟ੍ਟਤਿ, ਏਵਂ ਹਤ੍ਥੀਨਮ੍ਪਿ ਨਿਬਦ੍ਧਗਮਨਮਗ੍ਗੋ ਨ ਵਟ੍ਟਤਿ. ਏਤੇਸਨ੍ਤਿ ਸੀਹਾਦੀਨਂ. ਚਾਰਿਭੂਮੀਤਿ ਗੋਚਰਭੂਮਿ. ਨ ਗਹਿਤਾਤਿ ਨ ਵਾਰਿਤਾਤਿ ਅਧਿਪ੍ਪਾਯੋ. ਆਰੋਗ੍ਯਤ੍ਥਾਯਾਤਿ ਨਿਰੁਪਦ੍ਦਵਤ੍ਥਾਯ. ਸੇਸਾਨੀਤਿ ਪੁਬ੍ਬਣ੍ਣਨਿਸ੍ਸਿਤਾਦੀਨਿ. ਪੁਬ੍ਬਣ੍ਣਨਿਸ੍ਸਿਤਨ੍ਤਿ ਏਤ੍ਥ ਪੁਬ੍ਬਣ੍ਣਵਿਰੁਹਨਟ੍ਠਾਨਂ ਪੁਬ੍ਬਣ੍ਣ-ਸਦ੍ਦੇਨ ਗਹਿਤਂ. ਤੇਨਾਹ – ‘‘ਸਤ੍ਤਨ੍ਨਂ ਧਞ੍ਞਾਨਂ…ਪੇ… ਠਿਤ’’ਨ੍ਤਿ. ਅਭਿਹਨਨ੍ਤਿ ਏਤ੍ਥਾਤਿ ਅਬ੍ਭਾਘਾਤਂ. ‘‘ਵੇਰਿਘਰ’’ਨ੍ਤਿ ਵੁਤ੍ਤਮੇਵਤ੍ਥਂ ਵਿਭਾਵੇਤੁਂ ‘‘ਚੋਰਾਨਂ ਮਾਰਣਤ੍ਥਾਯ ਕਤ’’ਨ੍ਤਿ ਵੁਤ੍ਤਂ. ਧਮ੍ਮਗਨ੍ਧਿਕਾਤਿ ਹਤ੍ਥਪਾਦਾਦਿਛਿਨ੍ਦਨਗਨ੍ਧਿਕਾ.

ਆਵਿਜ੍ਜਿਤੁਂ ਨ ਸਕ੍ਕਾ ਹੋਤੀਤਿ ਛਿਨ੍ਦਤਟਾਦਿਸਮ੍ਭਵਤੋ ਨ ਸਕ੍ਕਾ ਹੋਤਿ ਆਵਿਜ੍ਜਿਤੁਂ. ਪਾਚਿਨਨ੍ਤਿ ਕੁਟਿਵਤ੍ਥੁਸਾਮਨ੍ਤਾ ਚਿਨਿਤਬ੍ਬਅਧਿਟ੍ਠਾਨਂ. ਕਿਞ੍ਚਾਪਿ ਇਧ ਪੁਬ੍ਬਪਯੋਗਸਹਪਯੋਗਾਨਂ ਅਦਿਨ੍ਨਾਦਾਨੇ ਵਿਯ ਵਿਸੇਸੋ ਨਤ੍ਥਿ, ਤਥਾਪਿ ਤੇਸਂ ਵਿਭਾਗੇਨ ਦਸ੍ਸਨਂ ਛਿਨ੍ਦਿਤ੍ਵਾ ਪੁਨ ਕਾਤਬ੍ਬਾਤਿ ਏਤ੍ਥ ਕੁਟਿਯਾ ਭੇਦਨਪਰਿਚ੍ਛੇਦਦਸ੍ਸਨਤ੍ਥਂ ਕਤਂ. ਤਦਤ੍ਥਾਯਾਤਿ ਤਚ੍ਛਨਤ੍ਥਾਯ. ਏਵਂ ਕਤਨ੍ਤਿ ਅਦੇਸਿਤਵਤ੍ਥੁਂ ਪਮਾਣਾਤਿਕ੍ਕਨ੍ਤਂ ਵਾ ਕਤਂ. ਦਾਰੁਨਾ ਕਤਂ ਕੁਟ੍ਟਂ ਏਤ੍ਥਾਤਿ ਦਾਰੁਕੁਟ੍ਟਿਕਾ, ਕੁਟਿ. ਸਿਲਾਕੁਟ੍ਟਿਕਨ੍ਤਿਆਦੀਸੁਪਿ ਏਸੇਵ ਨਯੋ. ਪਣ੍ਣਸਾਲਨ੍ਤਿ ਬਹਿ ਪਣ੍ਣੇਹਿ ਛਾਦੇਤਬ੍ਬਂ ਉਲ੍ਲਿਤ੍ਤਾਵਲਿਤ੍ਤਂ ਕੁਟਿਮੇਵ ਵਦਤਿ. ਤੇਨੇਵਾਹ ‘‘ਸਭਿਤ੍ਤਿਚ੍ਛਦਨਂ ਲਿਮ੍ਪਿਸ੍ਸਾਮੀ’’ਤਿ.

ਅਨ੍ਤੋਲੇਪੇਨੇਵ ਨਿਟ੍ਠਾਪੇਤੁਕਾਮਂ ਸਨ੍ਧਾਯ ‘‘ਅਨ੍ਤੋਲੇਪੇ ਵਾ’’ਤਿਆਦਿ ਵੁਤ੍ਤਂ. ਬਹਿਲੇਪੇ ਵਾਤਿ ਏਤ੍ਥਾਪਿ ਏਸੇਵ ਨਯੋ. ਤਸ੍ਮਿਂ ਦ੍ਵਾਰਬਦ੍ਧੇ ਵਾ ਵਾਤਪਾਨੇ ਵਾ ਠਪਿਤੇਤਿ ਯੋਜੇਤਬ੍ਬਂ. ਤਸ੍ਸੋਕਾਸਨ੍ਤਿ ਤਸ੍ਸ ਦ੍ਵਾਰਬਦ੍ਧਸ੍ਸ ਵਾ ਵਾਤਪਾਨਸ੍ਸ ਵਾ ਓਕਾਸਂ. ਪੁਨ ਵਡ੍ਢੇਤ੍ਵਾ ਵਾਤਿ ਪੁਬ੍ਬੇਵ ਠਪਿਤੋਕਾਸਂ ਖੁਦ੍ਦਕਂ ਚੇ, ਭੇਦਨੇਨ ਪੁਨ ਵਡ੍ਢੇਤ੍ਵਾ. ਲੇਪੋ ਨ ਘਟਿਯਤੀਤਿ ਪੁਬ੍ਬੇ ਦਿਨ੍ਨਲੇਪੋ ਦ੍ਵਾਰਬਦ੍ਧੇਨ ਵਾ ਵਾਤਪਾਨੇਨ ਵਾ ਸਦ੍ਧਿਂ ਨ ਘਟਿਯਤਿ, ਏਕਾਬਦ੍ਧਂ ਹੁਤ੍ਵਾ ਨ ਤਿਟ੍ਠਤੀਤਿ ਵੁਤ੍ਤਂ ਹੋਤਿ. ਤਨ੍ਤਿ ਦ੍ਵਾਰਬਦ੍ਧਂ ਵਾ ਵਾਤਪਾਨਂ ਵਾ. ਪਠਮਮੇਵ ਸਙ੍ਘਾਦਿਸੇਸੋਤਿ ਲੇਪਕਿਚ੍ਚਸ੍ਸ ਨਿਟ੍ਠਿਤਤ੍ਤਾ ਦ੍ਵਾਰਬਦ੍ਧਂ ਵਾ ਵਾਤਪਾਨਂ ਵਾ ਠਪਨਤੋ ਪੁਬ੍ਬੇਯੇਵ ਸਙ੍ਘਾਦਿਸੇਸੋ. ਅਟ੍ਠਙ੍ਗੁਲਮਤ੍ਤੇਨ ਅਪ੍ਪਤ੍ਤਚ੍ਛਦਨਂ ਕਤ੍ਵਾਤਿ ਏਤ੍ਥ ਏਵਂ ਮੇ ਆਪਤ੍ਤਿ ਨ ਸਿਯਾਤਿ ਭਿਤ੍ਤਿਯਂ ਵਾ ਛਦਨੇ ਵਾ ਏਕਙ੍ਗੁਲਮਤ੍ਤਮ੍ਪਿ ਓਕਾਸਂ ਲੇਪੇਨ ਅਘਟੇਤ੍ਵਾ ਠਪੇਤਿ, ਵਟ੍ਟਤੀਤਿ ਵਦਨ੍ਤਿ. ਮਤ੍ਤਿਕਾਕੁਟ੍ਟਮੇਵ ਮਤ੍ਤਿਕਾਲੇਪਸਙ੍ਖ੍ਯਂ ਗਚ੍ਛਤੀਤਿ ਆਹ – ‘‘ਸਚੇ ਮਤ੍ਤਿਕਾਯ ਕੁਟ੍ਟਂ ਕਰੋਤਿ, ਛਦਨਲੇਪੇਨ ਸਦ੍ਧਿਂ ਘਟਨੇ ਆਪਤ੍ਤੀ’’ਤਿ. ਉਭਿਨ੍ਨਂ ਅਨਾਪਤ੍ਤੀਤਿ ਪੁਰਿਮਸ੍ਸ ਲੇਪਸ੍ਸ ਅਘਟਿਤਤ੍ਤਾ ਦੁਤਿਯਸ੍ਸ ਅਤ੍ਤੁਦ੍ਦੇਸਿਕਤਾਸਮ੍ਭਵਤੋ ਉਭਿਨ੍ਨਂ ਅਨਾਪਤ੍ਤਿ, ਤਸ੍ਮਾ ਵਿਨਾਪਿ ਵਤ੍ਤਸੀਸੇਨ ਤੇਨ ਅਨਾਣਤ੍ਤੋ ਤਸ੍ਸ ਕਰੋਮੀਤਿ ਕਰੋਤਿ, ਉਭਿਨ੍ਨਂ ਅਨਾਪਤ੍ਤਿਯੇਵ. ਸਚੇ ਤੇਨ ਆਣਤ੍ਤੋ ਕਰੋਤਿ, ਮੂਲਟ੍ਠਸ੍ਸੇਵ ਆਪਤ੍ਤਿ.

੩੫੪. ਛਤ੍ਤਿਂਸ ਚਤੁਕ੍ਕਾਨਿ ਨਾਮ ‘‘ਭਿਕ੍ਖੁ ਕੁਟਿਂ ਕਰੋਤੀ’’ਤਿਆਦਿਮ੍ਹਿ ਪਠਮਵਾਰੇ ਅਦੇਸਿਤਵਤ੍ਥੁਕਚਤੁਕ੍ਕਂ ਦੇਸਿਤਵਤ੍ਥੁਕਚਤੁਕ੍ਕਂ ਪਮਾਣਾਤਿਕ੍ਕਨ੍ਤਚਤੁਕ੍ਕਂ ਪਮਾਣਿਕਚਤੁਕ੍ਕਂ ਅਦੇਸਿਤਵਤ੍ਥੁਕਪ੍ਪਮਾਣਾਤਿਕ੍ਕਨ੍ਤਚਤੁਕ੍ਕਂ ਦੇਸਿਤਵਤ੍ਥੁਕਪ੍ਪਮਾਣਿਕਚਤੁਕ੍ਕਨ੍ਤਿ ਛ ਚਤੁਕ੍ਕਾਨਿ, ਏਵਂ ਸਮਾਦਿਸਤਿਵਾਰਾਦੀਸੁਪਿ ਪਞ੍ਚਸੂਤਿ ਛਤ੍ਤਿਂਸ. ਆਪਤ੍ਤਿਭੇਦਦਸ੍ਸਨਤ੍ਥਂ ਵੁਤ੍ਤਾਨੀਤਿ ‘‘ਸਾਰਮ੍ਭੇ ਚੇ ਭਿਕ੍ਖੁ ਵਤ੍ਥੁਸ੍ਮਿਂ ਅਪਰਿਕ੍ਕਮਨੇ’’ਤਿ ਅਵਿਸੇਸੇਨ ਮਾਤਿਕਾਯ ਵੁਤ੍ਤਤ੍ਤਾ ਸਾਰਮ੍ਭਅਪਰਿਕ੍ਕਮਨੇਸੁਪਿ ਸਙ੍ਘਾਦਿਸੇਸੋਵ ਸਿਯਾਤਿ ਮਿਚ੍ਛਾਗਾਹਨਿਵਤ੍ਤਨਤ੍ਥਂ ਸਾਰਮ੍ਭੇ ਅਪਰਿਕ੍ਕਮਨੇ ਚ ਦੁਕ੍ਕਟਂ, ਅਦੇਸਿਤਵਤ੍ਥੁਕਤਾਯ ਪਮਾਣਾਤਿਕ੍ਕਨ੍ਤਤਾਯ ਚ ਸਙ੍ਘਾਦਿਸੇਸੋਤਿ ਏਵਂ ਆਪਤ੍ਤਿਭੇਦਦਸ੍ਸਨਤ੍ਥਂ ਵੁਤ੍ਤਾਨਿ.

੩੫੫-੩੬੧. ‘‘ਦ੍ਵੀਹਿ ਸਙ੍ਘਾਦਿਸੇਸੇਹੀ’’ਤਿ ਵਤ੍ਤਬ੍ਬੇ ਵਿਭਤ੍ਤਿਬ੍ਯਤ੍ਤਯੇਨ ਚ ਵਚਨਬ੍ਯਤ੍ਤਯੇਨ ਚ ਦ੍ਵਿਨ੍ਨਂ ਸਙ੍ਘਾਦਿਸੇਸੇਨਾਤਿ ਵੁਤ੍ਤਨ੍ਤਿ ਆਹ ‘‘ਦ੍ਵੀਹਿ ਸਙ੍ਘਾਦਿਸੇਸੇਹਿ…ਪੇ… ਅਤ੍ਥੋ ਵੇਦਿਤਬ੍ਬੋ’’ਤਿ. ‘‘ਅਞ੍ਞਸ੍ਸ ਵਾ ਦਾਤਬ੍ਬਾ’’ਤਿ ਵੁਤ੍ਤਤ੍ਤਾ ਵਿਪ੍ਪਕਤਂ ਕੁਟਿਂ ਲਭਿਤ੍ਵਾ ਅਤ੍ਤਨੋ ਅਤ੍ਥਾਯ ਕਰੋਨ੍ਤਸ੍ਸਪਿ ਆਦਿਤੋ ਪਟ੍ਠਾਯ ਅਕਤਤ੍ਤਾ ਅਨਾਪਤ੍ਤਿਯੇਵਾਤਿ ਵਦਨ੍ਤਿ. ਅਪਚਿਨਿਤਬ੍ਬਾਤਿ ਵਿਦ੍ਧਂਸੇਤਬ੍ਬਾ. ਭੂਮਿਸਮਂ ਕਤ੍ਵਾਤਿ ਕੁਟਿਵਤ੍ਥੁਸਮਂ ਕਤ੍ਵਾ.

੩੬੪. ਨ ਹੇਤ੍ਥ ਲੇਪੋ ਘਟਿਯਤੀਤਿ ਛਦਨਲੇਪਸ੍ਸ ਅਭਾਵਤੋ ਵੁਤ੍ਤਂ, ਵਿਸੁਂਯੇਵ ਅਨੁਞ੍ਞਾਤਤ੍ਤਾ ਪਨ ਸਚੇਪਿ ਲੇਣਸ੍ਸ ਅਨ੍ਤੋ ਉਪਰਿਭਾਗੇ ਚਿਤ੍ਤਕਮ੍ਮਾਦਿਕਰਣਤ੍ਥਂ ਲੇਪਂ ਦੇਨ੍ਤਿ, ਵਟ੍ਟਤਿਯੇਵ. ਲੇਪਦਾਨਵਸੇਨ ਅਕਤਾ ਇਟ੍ਠਕਾਦਿਗੁਹਾ ਗੁਹਾ ਨਾਮਾਤਿ ਗਣ੍ਠਿਪਦੇਸੁ ਵੁਤ੍ਤਂ. ਤਿਣੇਹਿ ਵਾ ਪਣ੍ਣੇਹਿ ਵਾ ਛਾਦਿਤਕੁਟਿਕਾਵ ਵੁਤ੍ਤਾਤਿ ‘‘ਕੁਕ੍ਕੁਟਚ੍ਛਿਕਗੇਹਂ ਵਟ੍ਟਤੀ’’ਤਿ ਵਤ੍ਵਾ ‘‘ਛਦਨਂ ਦਣ੍ਡਕੇਹੀ’’ਤਿਆਦਿਨਾ ਪੁਨ ਤਂ ਦਸ੍ਸੇਨ੍ਤੇਹਿ ਤਿਣਪਣ੍ਣਚ੍ਛਦਨਾ ਕੁਟਿਕਾਵ ਵੁਤ੍ਤਾ. ਛਦਨਂ ਦਣ੍ਡਕੇਹਿ ਜਾਲਬਨ੍ਧਂ ਕਤ੍ਵਾਤਿ ਛਦਨਂ ਦੀਘਤੋ ਤਿਰਿਯਤੋ ਚ ਠਪਿਤਦਣ੍ਡਕੇਹਿ ਜਾਲਂ ਵਿਯ ਬਨ੍ਧਿਤ੍ਵਾ. ਓਗੁਮ੍ਫੇਤ੍ਵਾਤਿ ਤਿਣਾਦਿਂ ਵਿਦ੍ਧਂਸੇਤ੍ਵਾ. ਭਿਤ੍ਤਿਲੇਪੇਨ ਸਦ੍ਧਿਂ ਲੇਪੇ ਘਟਿਤੇਤਿ ਏਤ੍ਥ ਉਲ੍ਲਿਤ੍ਤਾਵਲਿਤ੍ਤਭਾਵਸ੍ਸ ਛਦਨਂ ਸਨ੍ਧਾਯ ਵੁਤ੍ਤਤ੍ਤਾ ਸਚੇਪਿ ਭਿਤ੍ਤਿਲੇਪੇਨ ਅਨਤ੍ਥਿਕੋ ਹੋਤਿ, ਛਦਨਲੇਪੇ ਸਮਨ੍ਤਤੋ ਭਿਤ੍ਤਿਯਾ ਅਪ੍ਪਮਤ੍ਤਕੇਨਪਿ ਘਟਿਤੇ ਭਿਤ੍ਤਿਲੇਪੇਨ ਵਿਨਾਪਿ ਆਪਤ੍ਤਿਯੇਵਾਤਿ ਵਦਨ੍ਤਿ. ਉਪਚਿਕਾਮੋਚਨਤ੍ਥਮੇਵ ਹੇਟ੍ਠਾ ਪਾਸਾਣਕੁਟ੍ਟਂ ਕਤ੍ਵਾ ਤਂ ਅਲਿਮ੍ਪਿਤ੍ਵਾ ਉਪਰਿ ਲਿਮ੍ਪਤਿ, ਲੇਪੋ ਨ ਘਟਿਯਤਿ ਨਾਮ, ਅਨਾਪਤ੍ਤਿਯੇਵਾਤਿ ਇਮਿਨਾ ਅਟ੍ਠਕਥਾਵਚਨੇਨ ਤਂ ਨ ਸਮੇਤਿ. ਤਤ੍ਥ ਕੇਚਿ ਵਦਨ੍ਤਿ ‘‘ਭਿਤ੍ਤਿਂ ਅਲਿਮ੍ਪਿਤੁਕਾਮਤਾਯ ਅਭਾਵਤੋ ਛਦਨਲੇਪੇ ਪਾਸਾਣਕੁਟ੍ਟੇਨ ਸਦ੍ਧਿਂ ਘਟਿਤੇਪਿ ਤਤ੍ਥ ਅਨਾਪਤ੍ਤਿ ਵੁਤ੍ਤਾ’’ਤਿ, ਤਮ੍ਪਿ ਨ ਯੁਤ੍ਤਂ. ‘‘ਉਪਚਿਕਾਮੋਚਨਤ੍ਥਮੇਵਾ’’ਤਿ ਹਿ ਵੁਤ੍ਤਤ੍ਤਾ ਪਾਸਾਣਕੁਟ੍ਟੇ ਪੁਨ ਲਿਮ੍ਪਿਤੁਕਾਮਤਾਯ ਅਭਾਵੋਯੇਵ ਵਿਞ੍ਞਾਯਤਿ, ਤੇਨੇਵ ‘‘ਤਂ ਅਲਿਮ੍ਪਿਤ੍ਵਾ’’ਤਿ ਵੁਤ੍ਤਂ. ਤਸ੍ਮਾ ‘‘ਉਲ੍ਲਿਤ੍ਤਾਦਿਭਾਵੋ…ਪੇ… ਛਦਨਮੇਵ ਸਨ੍ਧਾਯ ਵੁਤ੍ਤੋ’’ਤਿ ਇਦਂ ਸਤਿਪਿ ਭਿਤ੍ਤਿਲੇਪੇ ਛਦਨਲੇਪੇਨ ਵਿਨਾ ਆਪਤ੍ਤਿ ਨ ਹੋਤੀਤਿ ਛਦਨਲੇਪਸ੍ਸ ਪਧਾਨਭਾਵਦਸ੍ਸਨਤ੍ਥਂ ਵੁਤ੍ਤਂ, ਨ ਪਨ ਭਿਤ੍ਤਿਲੇਪੇਨ ਵਿਨਾਪਿ ਆਪਤ੍ਤਿ ਹੋਤੀਤਿ ਦਸ੍ਸਨਤ੍ਥਨ੍ਤਿ ਵਦਨ੍ਤਿ, ਇਦਮੇਵ ਚੇਤ੍ਥ ਯੁਤ੍ਤਤਰਨ੍ਤਿ ਅਮ੍ਹਾਕਂ ਖਨ੍ਤਿ. ਏਤ੍ਥਾਤਿ ਤਿਣਕੁਟਿਕਾਯ.

ਏਤ੍ਥ ਚ ਤਿਣਕੁਟਿਕਾਯ ਏਵ ਸਬ੍ਬਥਾ ਅਨਾਪਤ੍ਤਿਭਾਵਸ੍ਸ ਦਸ੍ਸਨਂ ਪਰਿਵਾਰਪਾਲ਼ਿਂ ਆਨੇਤ੍ਵਾ ਤਿਣਕੁਟਿਕਾਯ ਸਾਰਮ੍ਭਾਦਿਪਚ੍ਚਯਾਪਿ ਅਨਾਪਤ੍ਤਿਭਾਵੋ ਸੁਖੇਨ ਸਕ੍ਕਾ ਸਾਧੇਤੁਨ੍ਤਿ ਕਤਂ. ਤਿਣਕੁਟਿਕਾਯ ਚ ਸਬ੍ਬਥਾ ਅਨਾਪਤ੍ਤਿਭਾਵੇ ਸਾਧਿਤੇ ਤੇਨੇਵ ਨਯੇਨ ਲੇਣਗੁਹਾਦੀਸੁਪਿ ਸਾਰਮ੍ਭਾਦਿਪਚ੍ਚਯਾਪਿ ਅਨਾਪਤ੍ਤਿਭਾਵੋ ਸਕ੍ਕਾ ਵਿਞ੍ਞਾਤੁਨ੍ਤਿ. ਤੇਨੇਵ ‘‘ਯਂ ਪਨਾ’’ਤਿਆਦਿ ਵੁਤ੍ਤਂ. ਤਥਾ ਹਿ ਤਿਣਕੁਟਿਕਾਯ ਸਾਰਮ੍ਭਾਦਿਪਚ੍ਚਯਾਪਿ ਅਨਾਪਤ੍ਤਿਭਾਵੇ ਸਾਧਿਤੇ ਤੇਨੇਵ ਨਯੇਨ ਅਞ੍ਞਸ੍ਸਤ੍ਥਾਯ ਕਰੋਨ੍ਤਸ੍ਸਪਿ ਸਾਰਮ੍ਭਾਦਿਪਚ੍ਚਯਾਪਿ ਅਨਾਪਤ੍ਤਿਭਾਵੋ ਅਤ੍ਥਤੋ ਦਸ੍ਸਿਤੋਯੇਵ ਹੋਤਿ. ਏਵਞ੍ਚ ਸਤਿ ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ ‘‘ਕੁਟਿਂ ਮੇ ਕਰੋਥਾ’’ਤਿ, ਸਮਾਦਿਸਤਿ ਚ ਦੇਸਿਤਵਤ੍ਥੁਕਾ ਚ ਹੋਤੁ ਅਨਾਰਮ੍ਭਾ ਚ ਸਪਰਿਕ੍ਕਮਨਾ ਚਾਤਿ, ਤਸ੍ਸ ਕੁਟਿਂ ਕਰੋਨ੍ਤਿ ਅਦੇਸਿਤਵਤ੍ਥੁਕਂ ਸਾਰਮ੍ਭਂ ਅਪਰਿਕ੍ਕਮਨਂ. ‘‘ਆਪਤ੍ਤਿ ਕਾਰੁਕਾਨਂ ਤਿਣ੍ਣਂ ਦੁਕ੍ਕਟਾਨ’’ਨ੍ਤਿ ਪਾਲ਼ਿਯਂ ਅਞ੍ਞਸ੍ਸਤ੍ਥਾਯ ਕਰੋਨ੍ਤਸ੍ਸਪਿ ਸਾਰਮ੍ਭਾਦਿਪਚ੍ਚਯਾਪਿ ਦੁਕ੍ਕਟਂ ਕਸ੍ਮਾ ਵੁਤ੍ਤਨ੍ਤਿ ਇਮਂ ਚੋਦਨਂ ਮਨਸਿ ਨਿਧਾਯ ‘‘ਯਂ ਪਨ…ਪੇ… ਅਕਰਣਪਚ੍ਚਯਾ ਵੁਤ੍ਤ’’ਨ੍ਤਿ ਇਦਂ ਵੁਤ੍ਤਂ. ਅਯਞ੍ਹੇਤ੍ਥ ਅਧਿਪ੍ਪਾਯੋ – ਅਞ੍ਞਸ੍ਸਤ੍ਥਾਯ ਕਰੋਨ੍ਤਸ੍ਸਪਿ ਸਾਰਮ੍ਭਾਦਿਪਚ੍ਚਯਾਪਿ ਅਨਾਪਤ੍ਤਿਯੇਵ. ‘‘ਆਪਤ੍ਤਿ ਕਾਰੁਕਾਨਂ ਤਿਣ੍ਣਂ ਦੁਕ੍ਕਟਾਨ’’ਨ੍ਤਿ ਇਦਂ ਪਨ ਅਞ੍ਞਸ੍ਸਤ੍ਥਾਯ ਕਰੋਨ੍ਤਸ੍ਸ ਨ ਸਾਰਮ੍ਭਾਦਿਪਚ੍ਚਯਾ ਆਪਤ੍ਤਿਦਸ੍ਸਨਤ੍ਥਂ ਵੁਤ੍ਤਂ, ਕਿਞ੍ਚਰਹਿ ਯਥਾਸਮਾਦਿਟ੍ਠਾਯ ਅਕਰਣਪਚ੍ਚਯਾ ਆਪਤ੍ਤਿਦਸ੍ਸਨਤ੍ਥਨ੍ਤਿ. ਯਸ੍ਮਾ ਬਹੂਸੁ ਪੋਤ੍ਥਕੇਸੁ ਸਤਸੋਧਿਤਸਮ੍ਮਤੇ ਚ ਪੁਰਾਣਪੋਤ੍ਥਕੇ ਅਯਮੇਵ ਪਾਠਕ੍ਕਮੋ ਦਿਸ੍ਸਤਿ, ਤਸ੍ਮਾ ਯਥਾਦਿਟ੍ਠਪਾਠਾਨੁਕ੍ਕਮੇਨੇਵੇਤ੍ਥ ਅਤ੍ਥੋ ਪਕਾਸਿਤੋ. ਕਤ੍ਥਚਿ ਪੋਤ੍ਥਕੇ ਪਨ ‘‘ਕੁਟਿਲਕ੍ਖਣਪ੍ਪਤ੍ਤਮ੍ਪਿ ਕੁਟਿਂ…ਪੇ… ਅਨਾਪਤ੍ਤੀ’’ਤਿ ਇਮਸ੍ਸਾਨਨ੍ਤਰਂ ‘‘ਯਂ ਪਨਾ’’ਤਿਆਦਿਪਾਠਂ ਲਿਖਨ੍ਤਿ, ਏਵਞ੍ਚ ਸਤਿ ਤਤ੍ਥ ਅਧਿਪ੍ਪਾਯੋ ਪਾਕਟੋਯੇਵ. ਅਨਾਪਤ੍ਤੀਤਿ ਵਤ੍ਵਾਤਿ ਉਪੋਸਥਾਗਾਰਞ੍ਚ ਭਵਿਸ੍ਸਤਿ, ਅਹਞ੍ਚ ਵਸਿਸ੍ਸਾਮੀਤਿਆਦੀਸੁ ਵਾਸਾਗਾਰਤ੍ਥਾਯ ਏਵ ਅਨਿਯਮਿਤਤ੍ਤਾ ਅਨਾਪਤ੍ਤੀਤਿ ਵਤ੍ਵਾ.

ਪਮਾਣਾਤਿਕ੍ਕਨ੍ਤਕੁਟਿਕਰਣਲਕ੍ਖਣਾ ਕਿਰਿਯਾਯੇਵ, ਅਦੇਸਿਤਵਤ੍ਥੁਮੂਲਿਕਾਯਪਿ ਆਪਤ੍ਤਿਯਾ ਅਙ੍ਗਂ ਹੋਤਿ ਪਮਾਣਾਤਿਕ੍ਕਨ੍ਤਮੂਲਿਕਾਯਪਿ, ਤਦੁਭਯਂ ਏਕਤੋ ਕਤ੍ਵਾ ‘‘ਕਿਰਿਯਾਕਿਰਿਯਤੋ’’ਤਿ ਵੁਤ੍ਤਂ. ਵਤ੍ਥੁਂ ਅਦੇਸਾਪੇਤ੍ਵਾ ਪਮਾਣਯੁਤ੍ਤਂ ਕੁਟਿਂ ਕਰੋਨ੍ਤਸ੍ਸਪਿ ਵਤ੍ਥੁਂ ਦੇਸਾਪੇਤ੍ਵਾ ਅਕਿਰਿਯਾਯ ਕੁਟਿਕਰਣਕਿਰਿਯਾਯ ਚ ਸਮੁਟ੍ਠਾਨਤੋ ਕਿਰਿਯਾਕਿਰਿਯਤੋਵ ਸਮੁਟ੍ਠਾਤੀਤਿ ਵੇਦਿਤਬ੍ਬਂ. ਅਚਿਤ੍ਤਕਨ੍ਤਿ ਪਣ੍ਣਤ੍ਤਿਅਜਾਨਨਚਿਤ੍ਤੇਨ ਅਚਿਤ੍ਤਕਂ. ਉਲ੍ਲਿਤ੍ਤਾਦੀਨਂ ਅਞ੍ਞਤਰਤਾ, ਹੇਟ੍ਠਿਮਪ੍ਪਮਾਣਸਮ੍ਭਵੋ, ਅਦੇਸਿਤਵਤ੍ਥੁਤਾ, ਪਮਾਣਾਤਿਕ੍ਕਨ੍ਤਤਾ, ਅਤ੍ਤੁਦ੍ਦੇਸਿਕਤਾ, ਵਾਸਾਗਾਰਤਾ, ਲੇਪਘਟ੍ਟਨਾਤਿ ਇਮਾਨੇਤ੍ਥ ਛ ਵਾ ਸਤ੍ਤ ਵਾ ਅਙ੍ਗਾਨਿ.

ਕੁਟਿਕਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.