੪. ਅਤ੍ਤਕਾਮਪਾਰਿਚਰਿਯਸਿਕ੍ਖਾਪਦਵਣ੍ਣਨਾ

੨੯੦. ਚਤੁਤ੍ਥੇ ਚੀਵਰਨ੍ਤਿ ਨਿਵਾਸਨਾਦਿ ਯਂ ਕਿਞ੍ਚਿ ਚੀਵਰਂ. ਪਿਣ੍ਡਪਾਤਨ੍ਤਿ ਯੋ ਕੋਚਿ ਆਹਾਰੋ. ਸੋ ਹਿ ਪਿਣ੍ਡੋਲ੍ਯੇਨ ਭਿਕ੍ਖੁਨੋ ਪਤ੍ਤੇ ਪਤਨਤੋ ਤਤ੍ਥ ਤਤ੍ਥ ਲਦ੍ਧਭਿਕ੍ਖਾਨਂ ਪਿਣ੍ਡਾਨਂ ਪਾਤੋ ਸਨ੍ਨਿਪਾਤੋਤਿ ਵਾ ਪਿਣ੍ਡਪਾਤੋਤਿ ਵੁਚ੍ਚਤਿ. ਸੇਨਾਸਨਨ੍ਤਿ ਸਯਨਞ੍ਚ ਆਸਨਞ੍ਚ. ਯਤ੍ਥ ਹਿ ਵਿਹਾਰਾਦਿਕੇ ਸੇਤਿ ਨਿਪਜ੍ਜਤਿ ਆਸਤਿ ਨਿਸੀਦਤਿ, ਤਂ ਸੇਨਾਸਨਂ. ਪਤਿ ਏਤਿ ਏਤਸ੍ਮਾਤਿ ਪਚ੍ਚਯੋਤਿ ਆਹ ‘‘ਪਤਿਕਰਣਟ੍ਠੇਨ ਪਚ੍ਚਯੋ’’ਤਿ. ਰੋਗਸ੍ਸ ਪਤਿਅਯਨਟ੍ਠੇਨ ਵਾ ਪਚ੍ਚਯੋ, ਪਚ੍ਚਨੀਕਗਮਨਟ੍ਠੇਨਾਤਿ ਅਤ੍ਥੋ, ਵੂਪਸਮਨਤ੍ਥੇਨਾਤਿ ਵੁਤ੍ਤਂ ਹੋਤਿ. ਧਾਤੁਕ੍ਖੋਭਲਕ੍ਖਣਸ੍ਸ ਹਿ ਤਂਹੇਤੁਕਦੁਕ੍ਖਵੇਦਨਾਲਕ੍ਖਣਸ੍ਸ ਵਾ ਰੋਗਸ੍ਸ ਪਟਿਪਕ੍ਖਭਾਵੋ ਪਤਿਅਯਨਟ੍ਠੋ. ਯਸ੍ਸ ਕਸ੍ਸਚੀਤਿ ਸਪ੍ਪਿਆਦੀਸੁ ਯਸ੍ਸ ਕਸ੍ਸਚਿ. ਸਪ੍ਪਾਯਸ੍ਸਾਤਿ ਹਿਤਸ੍ਸ ਵਿਕਾਰਵੂਪਸਮੇਨਾਤਿ ਅਧਿਪ੍ਪਾਯੋ. ਭਿਸਕ੍ਕਸ੍ਸ ਕਮ੍ਮਂ ਤੇਨ ਵਿਧਾਤਬ੍ਬਤੋ, ਤੇਨਾਹ ‘‘ਅਨੁਞ੍ਞਾਤਤ੍ਤਾ’’ਤਿ. ਨਗਰਪਰਿਕ੍ਖਾਰੇਹੀਤਿ ਨਗਰਂ ਪਰਿਵਾਰੇਤ੍ਵਾ ਰਕ੍ਖਣਕੇਹਿ. ਆਵਾਟਪਰਿਕ੍ਖੇਪੋ ਪਰਿਖਾ ਉਦ੍ਦਾਪੋ ਪਾਕਾਰੋ ਏਸਿਕਾ ਪਲਿਘੋ ਪਾਕਾਰਮਤ੍ਥਕਮਣ੍ਡਲਨ੍ਤਿ ਸਤ੍ਤ ਨਗਰਪਰਿਕ੍ਖਾਰਾਤਿ ਵਦਨ੍ਤਿ. ਸੇਤਪਰਿਕ੍ਖਾਰੋਤਿ ਸੁਵਿਸੁਦ੍ਧਸੀਲਾਲਙ੍ਕਾਰੋ. ਅਰਿਯਮਗ੍ਗੋ ਹਿ ਇਧ ‘‘ਰਥੋ’’ਤਿ ਅਧਿਪ੍ਪੇਤੋ. ਤਸ੍ਸ ਚ ਸਮ੍ਮਾਵਾਚਾਦਯੋ ਅਲਙ੍ਕਾਰਟ੍ਠੇਨ ‘‘ਪਰਿਕ੍ਖਾਰੋ’’ਤਿ ਵੁਤ੍ਤਾ. ਚਕ੍ਕਵੀਰਿਯੋਤਿ ਵੀਰਿਯਚਕ੍ਕੋ. ਜੀਵਿਤਪਰਿਕ੍ਖਾਰਾਤਿ ਜੀਵਿਤਸ੍ਸ ਪਵਤ੍ਤਿਕਾਰਣਾਨਿ. ਸਮੁਦਾਨੇਤਬ੍ਬਾਤਿ ਸਮ੍ਮਾ ਉਦ੍ਧਂ ਉਦ੍ਧਂ ਆਨੇਤਬ੍ਬਾ ਪਰਿਯੇਸਿਤਬ੍ਬਾ. ਪਰਿਵਾਰੋਪਿ ਹੋਤਿ ਅਨ੍ਤਰਾਯਾਨਂ ਪਰਿਤੋ ਵਾਰਣਤੋ, ਤੇਨਾਹ – ‘‘ਜੀਵਿਤ…ਪੇ… ਰਕ੍ਖਣਤੋ’’ਤਿ. ਤਤ੍ਥ ਅਨ੍ਤਰਨ੍ਤਿ ਵਿਵਰਂ, ਓਕਾਸੋਤਿ ਅਤ੍ਥੋ. ਰਕ੍ਖਣਤੋਤਿ ਵੇਰਿਕਾਨਂ ਅਨ੍ਤਰਂ ਅਦਤ੍ਵਾ ਅਤ੍ਤਨੋ ਸਾਮੀਨਂ ਪਰਿਵਾਰੇਤ੍ਵਾ ਠਿਤਸੇਵਕਾ ਵਿਯ ਰਕ੍ਖਣਤੋ. ਅਸ੍ਸਾਤਿ ਜੀਵਿਤਸ੍ਸ. ਕਾਰਣਭਾਵਤੋਤਿ ਚਿਰਪ੍ਪਵਤ੍ਤਿਯਾ ਕਾਰਣਭਾਵਤੋ. ਰਸਾਯਨਭੂਤਞ੍ਹਿ ਭੇਸਜ੍ਜਂ ਸੁਚਿਰਮ੍ਪਿ ਕਾਲਂ ਜੀਵਿਤਂ ਪਵਤ੍ਤੇਤਿਯੇਵ.

੨੯੧. ਉਪਚਾਰੇਤਿ ਯਤ੍ਥ ਠਿਤੋ ਵਿਞ੍ਞਾਪੇਤੁਂ ਸਕ੍ਕੋਤਿ, ਤਾਦਿਸੇ. ਕਾਮੋ ਚੇਵ ਹੇਤੁ ਚ ਪਾਰਿਚਰਿਯਾ ਚ ਅਤ੍ਥੋ. ਸੇਸਂ ਬ੍ਯਞ੍ਜਨਨ੍ਤਿਆਦੀਸੁ ਪਾਲ਼ਿਯਂ ‘‘ਅਤ੍ਤਕਾਮ’’ਨ੍ਤਿ ਪਦਂ ਉਦ੍ਧਰਿਤ੍ਵਾ ਅਤ੍ਤਨੋ ਕਾਮਂ, ਅਤ੍ਤਨੋ ਹੇਤੁਂ, ਅਤ੍ਤਨੋ ਅਧਿਪ੍ਪਾਯਂ, ਅਤ੍ਤਨੋ ਪਾਰਿਚਰਿਯਨ੍ਤਿ ਚਤ੍ਤਾਰੋ ਅਤ੍ਥਾ ਪਦਭਾਜਨੇ ਵੁਤ੍ਤਾ. ਤੇਸੁ ਪਠਮੇ ਅਤ੍ਥਵਿਕਪ੍ਪੇ ਕਾਮੋ ਚ ਹੇਤੁ ਚ ਪਾਰਿਚਰਿਯਾ ਚ ਅਤ੍ਥੋ, ਸੇਸਂ ਅਧਿਪ੍ਪਾਯਪਦਮੇਕਂ ਬ੍ਯਞ੍ਜਨਂ ਪਠਮਵਿਗ੍ਗਹੇ ਤਦਤ੍ਥਸ੍ਸ ਅਸਮ੍ਭਵਭਾਵਤੋ ਨਿਰਤ੍ਥਕਤ੍ਤਾ. ਦੁਤਿਯੇ ਪਨ ਅਤ੍ਥਵਿਕਪ੍ਪੇ ਅਧਿਪ੍ਪਾਯੋ ਚ ਪਾਰਿਚਰਿਯਾ ਚ ਅਤ੍ਥੋ, ਕਾਮੋ ਚ ਹੇਤੁ ਚਾਤਿ ਸੇਸਂ ਪਦਦ੍ਵਯਂ ਬ੍ਯਞ੍ਜਨਂ ਤੇਸਂ ਤਤ੍ਥ ਅਤ੍ਥਾਭਾਵਤੋਤਿ ਏਵਂ ਚਤ੍ਤਾਰਿ ਪਦਾਨਿ ਦ੍ਵਿਨ੍ਨਂ ਵਿਗ੍ਗਹਾਨਂ ਵਸੇਨ ਯੋਜਿਤਾਨੀਤਿ ਕੇਚਿ ਵਦਨ੍ਤਿ. ਗਣ੍ਠਿਪਦੇ ਚ ਅਯਮੇਵਤ੍ਥੋ ਵੁਤ੍ਤੋ. ਚੂਲ਼ਮਜ੍ਝਿਮਮਹਾਗਣ੍ਠਿਪਦੇਸੁ ਪਨ ‘‘ਪਠਮਸ੍ਮਿਂ ਅਤ੍ਥਵਿਕਪ੍ਪੇ ਕਾਮੋ ਚ ਹੇਤੁ ਚ ਪਾਰਿਚਰਿਯਾ ਚ ਅਧਿਪ੍ਪਾਯਤ੍ਥੋ, ਸੇਸਂ ਮੇਥੁਨਧਮ੍ਮਸਙ੍ਖਾਤੇਨ ਕਾਮੇਨਾਤਿਆਦਿ ਵਿਗ੍ਗਹਵਾਕ੍ਯਂ ਅਕ੍ਖਰਵਿਵਰਣਮਤ੍ਤਤੋ ਬ੍ਯਞ੍ਜਨਮਤ੍ਤਂ. ਦੁਤਿਯੇ ਅਤ੍ਥਵਿਕਪ੍ਪੇ ਅਧਿਪ੍ਪਾਯੋ ਚ ਪਾਰਿਚਰਿਯਾ ਚ ਅਧਿਪ੍ਪਾਯਤ੍ਥੋ, ਸੇਸਂ ਅਤ੍ਤਨਾ ਕਾਮਿਤਾ ਇਚ੍ਛਿਤਾਤਿਆਦਿ ਵਿਗ੍ਗਹਵਾਕ੍ਯਂ ਅਕ੍ਖਰਵਿਵਰਣਮਤ੍ਤਤੋ ਬ੍ਯਞ੍ਜਨਮਤ੍ਤ’’ਨ੍ਤਿ ਏਵਮਤ੍ਥੋ ਵੁਤ੍ਤੋ. ‘‘ਬ੍ਯਞ੍ਜਨੇ ਆਦਰਂ ਅਕਤ੍ਵਾ’’ਤਿ ਵਚਨਤੋ ਅਯਮੇਵਤ੍ਥੋ ਇਧ ਯੁਤ੍ਤਤਰੋਤਿ ਵਿਞ੍ਞਾਯਤਿ. ਬ੍ਯਞ੍ਜਨੇ ਆਦਰਂ ਅਕਤ੍ਵਾਤਿ ਇਮਿਨਾ ਹਿ ਅਟ੍ਠਕਥਾਯਂ ਵੁਤ੍ਤਵਿਗ੍ਗਹਵਸੇਨ ਬ੍ਯਞ੍ਜਨੇ ਆਦਰਂ ਅਕਤ੍ਵਾਤਿ ਅਯਮਤ੍ਥੋ ਦੀਪਿਤੋ.

ਇਦਾਨਿ ਯਥਾਵੁਤ੍ਤਮੇਵਤ੍ਥਂ ਪਦਭਾਜਨੇਨ ਸਂਸਨ੍ਦਿਤ੍ਵਾ ਦਸ੍ਸੇਤੁਂ ‘‘ਅਤ੍ਤਨੋ ਕਾਮਂ ਅਤ੍ਤਨੋ ਹੇਤੁਂ ਅਤ੍ਤਨੋ ਪਾਰਿਚਰਿਯਨ੍ਤਿ ਹਿ ਵੁਤ੍ਤੇ ਜਾਨਿਸ੍ਸਨ੍ਤਿ ਪਣ੍ਡਿਤਾ’’ਤਿਆਦਿ ਆਰਦ੍ਧਂ. ਇਦਂ ਵੁਤ੍ਤਂ ਹੋਤਿ – ‘‘ਅਤ੍ਤਨੋ ਹੇਤੁ’’ਨ੍ਤਿ ਵੁਤ੍ਤੇ ਅਤ੍ਤਨੋ ਅਤ੍ਥਾਯਾਤਿ ਅਯਮਤ੍ਥੋ ਵਿਞ੍ਞਾਯਤਿ. ‘‘ਅਤ੍ਤਨੋ ਕਾਮਂ ਅਤ੍ਤਨੋ ਪਾਰਿਚਰਿਯ’’ਨ੍ਤਿ ਚ ਵੁਤ੍ਤੇ ਕਾਮੇਨ ਪਾਰਿਚਰਿਯਾਤਿ ਅਯਮਤ੍ਥੋ ਵਿਞ੍ਞਾਯਤਿ. ਤਸ੍ਮਾ ਅਤ੍ਤਨੋ ਕਾਮਂ ਅਤ੍ਤਨੋ ਹੇਤੁਂ ਅਤ੍ਤਨੋ ਪਾਰਿਚਰਿਯਨ੍ਤਿ ਇਮੇਹਿ ਤੀਹਿ ਪਦੇਹਿ ਅਤ੍ਤਨੋ ਅਤ੍ਥਾਯ ਕਾਮੇਨ ਪਾਰਿਚਰਿਯਾ ਅਤ੍ਤਕਾਮਪਾਰਿਚਰਿਯਾਤਿ ਅਯਮਤ੍ਥਵਿਕਪ੍ਪੋ ਵੁਤ੍ਤੋਤਿ ਵਿਞ੍ਞੂ ਜਾਨਿਸ੍ਸਨ੍ਤਿ. ‘‘ਅਤ੍ਤਨੋ ਅਧਿਪ੍ਪਾਯ’’ਨ੍ਤਿ ਵੁਤ੍ਤੇ ਪਨ ਅਧਿਪ੍ਪਾਯਸਦ੍ਦਸ੍ਸ ਕਾਮਿਤਸਦ੍ਦੇਨ ਸਮਾਨਤ੍ਥਭਾਵਤੋ ਅਤ੍ਤਨੋ ਪਾਰਿਚਰਿਯਨ੍ਤਿ ਇਮਸ੍ਸ ਚ ਉਭਯਵਿਗ੍ਗਹਸਾਮਞ੍ਞਤੋ ਅਤ੍ਤਨੋ ਇਚ੍ਛਿਤਕਾਮਿਤਟ੍ਠੇਨ ਅਤ੍ਤਕਾਮਪਾਰਿਚਰਿਯਾਤਿ ਅਯਮਤ੍ਥਵਿਕਪ੍ਪੋ ਦ੍ਵੀਹਿ ਪਦੇਹਿ ਦਸ੍ਸਿਤੋਤਿ ਵਿਞ੍ਞੂ ਜਾਨਿਸ੍ਸਨ੍ਤੀਤਿ.

ਏਤਦਗ੍ਗਨ੍ਤਿ ਏਸਾ ਅਗ੍ਗਾ. ਦੁਟ੍ਠੁਲ੍ਲਵਾਚਾਸਿਕ੍ਖਾਪਦੇ ਕਿਞ੍ਚਾਪਿ ਮੇਥੁਨਯਾਚਨਂ ਆਗਤਂ, ਤਥਾਪਿ ਤਂ ਦੁਟ੍ਠੁਲ੍ਲਵਾਚਸ੍ਸਾਦਰਾਗਵਸੇਨ ਵੁਤ੍ਤਂ, ਇਧ ਪਨ ਅਤ੍ਤਨੋ ਮੇਥੁਨਸ੍ਸਾਦਰਾਗਵਸੇਨਾਤਿ ਅਯਂ ਵਿਸੇਸੋ. ਵਿਨੀਤਵਤ੍ਥੂਸੁ ‘‘ਤੇਨ ਹਿ ਭਗਿਨਿ ਅਗ੍ਗਦਾਨਂ ਦੇਹੀ’’ਤਿ ਇਦਂ ਅਤ੍ਤਨੋ ਅਤ੍ਥਾਯ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਮਨੁਸ੍ਸਿਤ੍ਥੀ, ਇਤ੍ਥਿਸਞ੍ਞਿਤਾ, ਅਤ੍ਤਕਾਮਪਾਰਿਚਰਿਯਾਯ ਰਾਗੋ, ਤੇਨ ਰਾਗੇਨ ਵਣ੍ਣਭਣਨਂ, ਤਙ੍ਖਣਵਿਜਾਨਨਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ.

ਅਤ੍ਤਕਾਮਪਾਰਿਚਰਿਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.