੩. ਦੁਟ੍ਠੁਲ੍ਲਵਾਚਾਸਿਕ੍ਖਾਪਦਵਣ੍ਣਨਾ

੨੮੩. ਤਤਿਯੇ ਉਤ੍ਤਰਪਦਲੋਪੇਨ ਛਿਨ੍ਨਓਤ੍ਤਪ੍ਪਾ ‘‘ਛਿਨ੍ਨਿਕਾ’’ਤਿ ਵੁਤ੍ਤਾਤਿ ਆਹ ‘‘ਛਿਨ੍ਨਿਕਾਤਿ ਛਿਨ੍ਨਓਤਪ੍ਪਾ’’ਤਿ.

੨੮੫. ਯਥਾ ਯੁਵਾ ਯੁਵਤਿਨ੍ਤਿ ਏਤੇਨ ਓਭਾਸਨੇ ਨਿਰਾਸਙ੍ਕਭਾਵਂ ਦਸ੍ਸੇਤਿ. ਮੇਥੁਨੁਪਸਞ੍ਹਿਤਾਹੀਤਿ ਇਦਂ ਦੁਟ੍ਠੁਲ੍ਲਵਾਚਾਯ ਸਿਖਾਪ੍ਪਤ੍ਤਲਕ੍ਖਣਦਸ੍ਸਨਂ. ਇਤ੍ਥਿਲਕ੍ਖਣੇਨਾਤਿ ਵੁਤ੍ਤਮਤ੍ਥਂ ਵਿਵਰਿਤੁਂ ‘‘ਸੁਭਲਕ੍ਖਣੇਨਾ’’ਤਿ ਵੁਤ੍ਤਂ. ਨ ਤਾਵ ਸੀਸਂ ਏਤੀਤਿ ‘‘ਇਤ੍ਥਿਲਕ੍ਖਣੇਨ ਸਮਨ੍ਨਾਗਤਾਸੀ’’ਤਿਆਦਿਨਾ ਵਣ੍ਣਭਣਨਂ ਸਙ੍ਘਾਦਿਸੇਸਾਪਤ੍ਤਿਜਨਕਂ ਹੁਤ੍ਵਾ ਮਤ੍ਥਕਂ ਨ ਪਾਪੁਣਾਤਿ. ਵਣ੍ਣਭਣਨਞ੍ਹਿ ਯੇਨਾਕਾਰੇਨ ਭਣਨ੍ਤਸ੍ਸ ਸਙ੍ਘਾਦਿਸੇਸੋ ਹੋਤਿ, ਤੇਨਾਕਾਰੇਨ ਭਣਨ੍ਤਸ੍ਸ ਸਿਖਾਪ੍ਪਤ੍ਤਂ ਨਾਮ ਹੋਤਿ. ‘‘ਇਤ੍ਥਿਲਕ੍ਖਣੇਨ ਸਮਨ੍ਨਾਗਤਾਸੀਤਿਆਦਿਕਂ ਪਨ ਦੁਟ੍ਠੁਲ੍ਲਵਾਚਸ੍ਸਾਦਰਾਗਵਸੇਨ ਭਣਨ੍ਤਸ੍ਸ ਦੁਕ੍ਕਟ’’ਨ੍ਤਿ ਗਣ੍ਠਿਪਦੇਸੁ ਵੁਤ੍ਤਂ.

ਏਕਾਦਸਹਿ ਪਦੇਹਿ ਅਘਟਿਤੇ ਸੀਸਂ ਨ ਏਤੀਤਿ ‘‘ਅਨਿਮਿਤ੍ਤਾਸੀ’’ਤਿਆਦੀਹਿ ਏਕਾਦਸਹਿ ਪਦੇਹਿ ਅਘਟਿਤੇ ਅਵਣ੍ਣਭਣਨਂ ਸੀਸਂ ਨ ਏਤਿ, ਅਵਣ੍ਣਭਣਨਂ ਨਾਮ ਨ ਹੋਤੀਤਿ ਵੁਤ੍ਤਂ ਹੋਤਿ. ਘਟਿਤੇਪੀਤਿ ਏਕਾਦਸਹਿ ਪਦੇਹਿ ਅਵਣ੍ਣਭਣਨੇ ਘਟਿਤੇਪਿ. ਇਮੇਹਿ ਤੀਹਿ ਘਟਿਤੇਯੇਵ ਸਙ੍ਘਾਦਿਸੇਸੋਤਿ ‘‘ਸਿਖਰਣੀ’’ਤਿਆਦੀਹਿ ਤੀਹਿਯੇਵ ਪਦੇਹਿ ਅਵਣ੍ਣਭਣਨੇ ਘਟਿਤੇਯੇਵ ਸਙ੍ਘਾਦਿਸੇਸੋ ਪਸ੍ਸਾਵਮਗ੍ਗਸ੍ਸ ਨਿਯਤਵਚਨਤ੍ਤਾ ਅਚ੍ਚੋਲ਼ਾਰਿਕਤ੍ਤਾ ਚ. ਅਨਿਮਿਤ੍ਤਾਸੀਤਿਆਦੀਹਿ ਪਨ ਅਟ੍ਠਹਿ ਪਦੇਹਿ ਘਟਿਤੇ ਕੇਵਲਂ ਅਵਣ੍ਣਭਣਨਮੇਵ ਸਮ੍ਪਜ੍ਜਤਿ, ਨ ਸਙ੍ਘਾਦਿਸੇਸੋ, ਤਸ੍ਮਾ ਤਾਨਿ ਥੁਲ੍ਲਚ੍ਚਯਵਤ੍ਥੂਨੀਤਿ ਕੇਚਿ. ਅਕ੍ਕੋਸਨਮਤ੍ਤਤ੍ਤਾ ਦੁਕ੍ਕਟਵਤ੍ਥੂਨੀਤਿ ਅਪਰੇ. ਪਰਿਬ੍ਬਾਜਿਕਾਵਤ੍ਥੁਸ੍ਮਿਂ ਵਿਯ ਥੁਲ੍ਲਚ੍ਚਯਮੇਵੇਤ੍ਥ ਯੁਤ੍ਤਤਰਂ ਦਿਸ੍ਸਤਿ. ਕੁਞ੍ਚਿਕਪਣਾਲਿਮਤ੍ਤਨ੍ਤਿ ਕੁਞ੍ਚਿਕਾਛਿਦ੍ਦਮਤ੍ਤਂ.

੨੮੬-੨੮੭. ਗਰੁਕਾਪਤ੍ਤਿਨ੍ਤਿ ਭਿਕ੍ਖੁਨਿਯਾ ਕਾਯਸਂਸਗ੍ਗੇ ਪਾਰਾਜਿਕਾਪਤ੍ਤਿਂ ਸਨ੍ਧਾਯ ਵਦਤਿ. ਹਸਨ੍ਤੋ ਹਸਨ੍ਤੋਤਿ ਸਭਾਵਦਸ੍ਸਨਤ੍ਥਂ ਵੁਤ੍ਤਂ. ਅਹਸਨ੍ਤੋਪਿ ਵਾਚਸ੍ਸਾਦਰਾਗੇਨ ਪੁਨਪ੍ਪੁਨਂ ਵਦਤਿ, ਆਪਤ੍ਤਿਯੇਵ. ਕਾਯਚਿਤ੍ਤਤੋਤਿ ਹਤ੍ਥਮੁਦ੍ਦਾਯ ਓਭਾਸਨ੍ਤਸ੍ਸ ਕਾਯਚਿਤ੍ਤਤੋ ਸਮੁਟ੍ਠਾਤਿ.

੨੮੮. ਤਸ੍ਮਾ ਦੁਕ੍ਕਟਨ੍ਤਿ ਅਪ੍ਪਟਿਵਿਜਾਨਨਹੇਤੁ ਦੁਕ੍ਕਟਂ, ਪਟਿਵਿਜਾਨਨ੍ਤਿਯਾ ਪਨ ਅਖੇਤ੍ਤਪਦਤ੍ਤਾ ਥੁਲ੍ਲਚ੍ਚਯੇਨ ਭਵਿਤਬ੍ਬਂ. ਤੇਨੇਵ ਪਰਿਬ੍ਬਾਜਿਕਾਵਤ੍ਥੁਸ੍ਮਿਂ ਪਟਿਵਿਜਾਨਨ੍ਤਿਯਾ ਥੁਲ੍ਲਚ੍ਚਯਂ ਵਕ੍ਖਤਿ.

੨੮੯. ਅਸਦ੍ਧਮ੍ਮਂ ਸਨ੍ਧਾਯਾਹਾਤਿ ‘‘ਵਾਪਿਤ’’ਨ੍ਤਿ ਇਮਸ੍ਸ ਬੀਜਨਿਕ੍ਖੇਪਵਚਨਤ੍ਤਾ ਵੁਤ੍ਤਂ. ਸਂਸੀਦਤੀਤਿ ਵਹਤਿ ਪਵਤ੍ਤਤਿ. ਅਥ ਵਾ ਸਂਸੀਦਤੀਤਿ ਸਂਸੀਦਿਸ੍ਸਤਿ. ਮਨੁਸ੍ਸਿਤ੍ਥੀ, ਇਤ੍ਥਿਸਞ੍ਞਿਤਾ, ਦੁਟ੍ਠੁਲ੍ਲਵਾਚਸ੍ਸਾਦਰਾਗੋ, ਤੇਨ ਰਾਗੇਨ ਓਭਾਸਨਂ, ਤਙ੍ਖਣਵਿਜਾਨਨਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ.

ਦੁਟ੍ਠੁਲ੍ਲਵਾਚਾਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.