੨. ਕਾਯਸਂਸਗ੍ਗਸਿਕ੍ਖਾਪਦਵਣ੍ਣਨਾ

੨੬੯. ਦੁਤਿਯੇ ਯੇਸੁ ਵਿਵਟੇਸੁ ਅਨ੍ਧਕਾਰੋ ਹੋਤਿ, ਤਾਨਿ ਵਿਵਰਨ੍ਤੋਤਿ ਬ੍ਰਾਹ੍ਮਣਿਯਾ ਸਦ੍ਧਿਂ ਕਾਯਸਂਸਗ੍ਗਂ ਸਮਾਪਜ੍ਜਿਤੁਕਾਮੋ ਏਵਮਕਾਸਿ. ਤੇਨ ਕਤਸ੍ਸਪਿ ਵਿਪ੍ਪਕਾਰਸ੍ਸ ਅਤ੍ਤਨਿ ਕਤਤ੍ਤਾ ‘‘ਅਤ੍ਤਨੋ ਵਿਪ੍ਪਕਾਰ’’ਨ੍ਤਿ ਵੁਤ੍ਤਂ. ਉਲ਼ਾਰਤ੍ਤਤਾਤਿ ਉਲ਼ਾਰਚਿਤ੍ਤਤਾ, ਪਣੀਤਾਧਿਮੁਤ੍ਤਤਾਤਿ ਵੁਤ੍ਤਂ ਹੋਤਿ.

੨੭੦. ਓਤਿਣ੍ਣੋਤਿ ਇਦਂ ਕਮ੍ਮਸਾਧਨਂ ਕਤ੍ਤੁਸਾਧਨਂ ਵਾ ਹੋਤੀਤਿ ਤਦੁਭਯਵਸੇਨ ਅਤ੍ਥਂ ਦਸ੍ਸੇਨ੍ਤੋ ‘‘ਯਕ੍ਖਾਦੀਹਿ ਵਿਯ ਸਤ੍ਤਾ’’ਤਿਆਦਿਮਾਹ. ਅਸਮਪੇਕ੍ਖਿਤ੍ਵਾਤਿ ਯਥਾਸਭਾਵਂ ਅਨੁਪਪਰਿਕ੍ਖਿਤ੍ਵਾ, ਯਥਾ ਤੇ ਰਤਿਜਨਕਾ ਰੂਪਾਦਯੋ ਵਿਸਯਾ ਅਨਿਚ੍ਚਦੁਕ੍ਖਾਸੁਭਾਨਤ੍ਤਾਕਾਰੇਨ ਅਵਤ੍ਥਿਤਾ, ਤਥਾ ਅਪਸ੍ਸਿਤ੍ਵਾਤਿ ਵੁਤ੍ਤਂ ਹੋਤਿ.

੨੭੧. ਸਞ੍ਞਮਵੇਲਨ੍ਤਿ ਸੀਲਮਰਿਯਾਦਂ. ਆਚਾਰੋਤਿ ਆਚਰਣਂ ਹਤ੍ਥਗਹਣਾਦਿਕਿਰਿਯਾ. ਅਸ੍ਸਾਤਿ ‘‘ਕਾਯਸਂਸਗ੍ਗਂ ਸਮਾਪਜ੍ਜੇਯ੍ਯਾ’’ਤਿ ਪਦਸ੍ਸ.

੨੭੩. ਏਤੇਸਂ ਪਦਾਨਂ ਵਸੇਨਾਤਿ ਆਮਸਨਾਦਿਪਦਾਨਂ ਵਸੇਨ. ਇਤੋ ਚਿਤੋ ਚ…ਪੇ… ਸਞ੍ਚੋਪੇਤੀਤਿ ਅਤ੍ਤਨੋ ਹਤ੍ਥਂ ਵਾ ਕਾਯਂ ਵਾ ਤਿਰਿਯਂ ਇਤੋ ਚਿਤੋ ਚ ਸਞ੍ਚਾਰੇਤਿ. ‘‘ਕਾਯਤੋ ਅਮੋਚੇਤ੍ਵਾਵਾਤਿ ਵਚਨਤੋ ਮਤ੍ਥਕਤੋ ਪਟ੍ਠਾਯ ਹਤ੍ਥਂ ਓਤਾਰੇਨ੍ਤਸ੍ਸ ਕਾਯਤੋ ਮੋਚੇਤ੍ਵਾ ਨਿਵਤ੍ਥਸਾਟਕੂਪਰਿ ਓਮਸਨ੍ਤਸ੍ਸ ਥੁਲ੍ਲਚ੍ਚਯਂ, ਸਾਟਕਤੋ ਓਤਾਰੇਤ੍ਵਾ ਜਙ੍ਘਤੋ ਪਟ੍ਠਾਯ ਕਾਯਂ ਓਮਸਨ੍ਤਸ੍ਸ ਪੁਨ ਸਙ੍ਘਾਦਿਸੇਸੋ’’ਤਿ ਵਦਨ੍ਤਿ.

ਦ੍ਵਾਦਸਸੁਪਿ ਆਮਸਨਾਦਿਪ੍ਪਯੋਗੇਸੁ ਏਕੇਕਸ੍ਮਿਂ ਪਯੋਗੇ ਕਾਯਤੋ ਅਮੋਚਿਤੇ ਏਕੇਕਾਵ ਆਪਤ੍ਤਿ ਹੋਤੀਤਿ ਆਹ ‘‘ਮੂਲਗ੍ਗਹਣਮੇਵ ਪਮਾਣ’’ਨ੍ਤਿ. ਇਦਞ੍ਚ ਏਕੇਨ ਹਤ੍ਥੇਨ ਕਾਯਂ ਗਹੇਤ੍ਵਾ ਇਤਰੇਨ ਹਤ੍ਥੇਨ ਕਾਯਪਰਾਮਸਨਂ ਸਨ੍ਧਾਯ ਵੁਤ੍ਤਂ. ਏਕੇਨ ਪਨ ਹਤ੍ਥੇਨ ਕਾਯਪਟਿਬਦ੍ਧਂ ਗਹੇਤ੍ਵਾ ਇਤਰੇਨ ਤਤ੍ਥ ਤਤ੍ਥ ਕਾਯਂ ਪਰਾਮਸਤੋ ਪਯੋਗਗਣਨਾਯ ਆਪਤ੍ਤਿ. ਅਯਂ ਪਨ ਸਙ੍ਘਾਦਿਸੇਸੋ ਨ ਕੇਵਲਂ ਵਤ੍ਥੁਵਸੇਨੇਵ, ਅਪਿਚ ਸਞ੍ਞਾਵਸੇਨਪੀਤਿ ਆਹ ‘‘ਇਤ੍ਥਿਯਾ ਇਤ੍ਥਿਸਞ੍ਞਿਸ੍ਸ ਸਙ੍ਘਾਦਿਸੇਸੋ’’ਤਿ. ਪਾਲ਼ਿਯਂ ਤਿਰਚ੍ਛਾਨਗਤੋ ਚ ਹੋਤੀਤਿ ਏਤ੍ਥ ਤਿਰਚ੍ਛਾਨਗਤਿਤ੍ਥਿਯਾ ਤਿਰਚ੍ਛਾਨਗਤਪੁਰਿਸਸ੍ਸ ਚ ਗਹਣਂ ਵੇਦਿਤਬ੍ਬਂ.

ਸਮਸਾਰਾਗੋਤਿ ਕਾਯਸਂਸਗ੍ਗਰਾਗੇਨ ਏਕਸਦਿਸਰਾਗੋ. ਪੁਰਿਮਨਯੇਨੇਵਾਤਿ ਰਜ੍ਜੁਵਤ੍ਥਾਦੀਹਿ ਪਰਿਕ੍ਖਿਪਿਤ੍ਵਾ ਗਹਣੇ ਵੁਤ੍ਤਨਯੇਨ. ਪੁਨ ਪੁਰਿਮਨਯੇਨੇਵਾਤਿ ਸਮਸਾਰਾਗੋ ਵੁਤ੍ਤੋ. ਅਨਨ੍ਤਰਨਯੇਨੇਵਾਤਿ ਕਾਯਪਟਿਬਦ੍ਧਆਮਸਨਨਯੇਨ. ਵੇਣਿਗ੍ਗਹਣੇਨ ਲੋਮਾਨਮ੍ਪਿ ਸਙ੍ਗਹਿਤਤ੍ਤਾ ਲੋਮਾਨਂ ਫੁਸਨੇਪਿ ਸਙ੍ਘਾਦਿਸੇਸੋ ਵੁਤ੍ਤੋ. ਇਦਾਨਿ ਵੁਤ੍ਤਮੇਵਤ੍ਥਂ ਪਕਾਸੇਤੁਕਾਮੋ ‘‘ਉਪਾਦਿਨ੍ਨਕੇਨ ਹੀ’’ਤਿਆਦਿਮਾਹ.

ਯਥਾਨਿਦ੍ਦਿਟ੍ਠਨਿਦ੍ਦੇਸੇਤਿ ਯਥਾਵੁਤ੍ਤਕਾਯਸਂਸਗ੍ਗਨਿਦ੍ਦੇਸੇ. ਤੇਨਾਤਿ ਤੇਨ ਯਥਾਵੁਤ੍ਤਕਾਰਣੇਨ. ਸਞ੍ਞਾਯ ਵਿਰਾਗਿਤਮ੍ਹੀਤਿ ਸਞ੍ਞਾਯ ਵਿਰਦ੍ਧਾਯ. ਲਿਙ੍ਗਬ੍ਯਤ੍ਤਯੇਨ ‘‘ਵਿਰਾਗਿਤਮ੍ਹੀ’’ਤਿ ਵੁਤ੍ਤਂ. ਇਮਂ ਨਾਮ ਵਤ੍ਥੁਨ੍ਤਿ ਇਮਸ੍ਮਿਂ ਸਿਕ੍ਖਾਪਦੇ ਆਗਤਂ ਸਨ੍ਧਾਯ ਵਦਤਿ. ਅਞ੍ਞਮ੍ਪਿ ਯਂ ਕਿਞ੍ਚਿ ਵਤ੍ਥੁਂ ਸਨ੍ਧਾਯ ਵਦਤੀਤਿਪਿ ਕੇਚਿ. ਸਾਰਤ੍ਤਨ੍ਤਿ ਕਾਯਸਂਸਗ੍ਗਰਾਗੇਨ ਸਾਰਤ੍ਤਂ. ਵਿਰਤ੍ਤਨ੍ਤਿ ਕਾਯਸਂਸਗ੍ਗਰਾਗਰਹਿਤਂ ਮਾਤੁਭਗਿਨੀਆਦਿਂ ਸਨ੍ਧਾਯ ਵਦਤਿ. ‘‘ਵਿਰਤ੍ਤਂ ਗਣ੍ਹਿਸ੍ਸਾਮੀ’’ਤਿ ਵਿਰਤ੍ਤਂ ਗਣ੍ਹਿ, ਦੁਕ੍ਕਟਨ੍ਤਿ ਮਾਤੁਪੇਮਾਦਿਵਸੇਨ ਗਹਣੇ ਦੁਕ੍ਕਟਂ ਵੁਤ੍ਤਂ.

ਇਮਾਯ ਪਾਲ਼ਿਯਾ ਸਮੇਤੀਤਿ ਸਮ੍ਬਨ੍ਧੋ. ਕਥਂ ਸਮੇਤੀਤਿ ਚੇ? ਯਦਿ ਹਿ ‘‘ਇਤ੍ਥਿਯਾ ਕਾਯਪਟਿਬਦ੍ਧਂ ਗਣ੍ਹਿਸ੍ਸਾਮੀ’’ਤਿ ਚਿਤ੍ਤੇ ਉਪ੍ਪਨ੍ਨੇ ਇਤ੍ਥਿਸਞ੍ਞਾ ਵਿਰਾਗਿਤਾ ਭਵੇਯ੍ਯ, ਕਾਯਪਟਿਬਦ੍ਧਗ੍ਗਹਣੇ ਥੁਲ੍ਲਚ੍ਚਯਂ ਵਦਨ੍ਤੇਨ ਭਗਵਤਾ ‘‘ਇਤ੍ਥੀ ਚ ਹੋਤਿ ਇਤ੍ਥਿਸਞ੍ਞੀ ਚਾ’’ਤਿ ਨ ਵਤ੍ਤਬ੍ਬਂ ਸਿਯਾ, ਵੁਤ੍ਤਞ੍ਚ, ਤਸ੍ਮਾ ‘‘ਇਤ੍ਥਿਯਾ ਕਾਯਪਟਿਬਦ੍ਧਂ ਗਣ੍ਹਿਸ੍ਸਾਮੀ’’ਤਿ ਕਾਯਂ ਗਣ੍ਹਨ੍ਤਸ੍ਸ ਇਤ੍ਥਿਸਞ੍ਞਾ ਵਿਰਾਗਿਤਾ ਨਾਮ ਨ ਹੋਤੀਤਿ ‘‘ਕਾਯਪਟਿਬਦ੍ਧਂ ਗਣ੍ਹਿਸ੍ਸਾਮੀਤਿ ਕਾਯਂ ਗਣ੍ਹਨ੍ਤੋ ਯਥਾਵਤ੍ਥੁਕਮੇਵ ਆਪਜ੍ਜਤੀ’’ਤਿ ਮਹਾਸੁਮਤ੍ਥੇਰੇਨ ਵੁਤ੍ਤਵਾਦੋ ਇਮਾਯ ਪਾਲ਼ਿਯਾ ਸਮੇਤਿ. ਯੋ ਪਨੇਤ੍ਥ ‘‘ਸਤਿਪਿ ਇਤ੍ਥਿਸਞ੍ਞਾਯ ਕਾਯਪਟਿਬਦ੍ਧਂ ਗਣ੍ਹਨ੍ਤਸ੍ਸ ਗਹਣਸਮਯੇ ‘ਕਾਯਪਟਿਬਦ੍ਧਂ ਗਣ੍ਹਿਸ੍ਸਾਮੀ’ਤਿ ਸਞ੍ਞਂ ਠਪੇਤ੍ਵਾ ‘ਇਤ੍ਥਿਂ ਗਣ੍ਹਾਮੀ’ਤਿ ਸਞ੍ਞਾਯ ਅਭਾਵਤੋ ਵਤ੍ਥੁਸਞ੍ਞਾਨਂ ਭਿਨ੍ਨਤ੍ਤਾ ਅਯੁਤ੍ਤ’’ਨ੍ਤਿ ਵਦੇਯ੍ਯ, ਸੋ ਪੁਚ੍ਛਿਤਬ੍ਬੋ ‘‘ਕਿਂ ਕਾਯਪਟਿਬਦ੍ਧਂ ਵਤ੍ਥਾਦਿਂ ਗਣ੍ਹਨ੍ਤੋ ਇਤ੍ਥਿਯਾ ਰਾਗੇਨ ਗਣ੍ਹਾਤਿ, ਉਦਾਹੁ ਵਤ੍ਥਾਦੀਸੁ ਰਾਗੇਨਾ’’ਤਿ. ਯਦਿ ‘‘ਵਤ੍ਥਾਦੀਸੁ ਰਾਗੇਨ ਗਣ੍ਹਾਤੀ’’ਤਿ ਵਦੇਯ੍ਯ, ਇਤ੍ਥਿਯਾ ਕਾਯਪਟਿਬਦ੍ਧਂ ਅਹੁਤ੍ਵਾ ਅਞ੍ਞਤ੍ਥ ਠਿਤਂ ਵਤ੍ਥਾਦਿਂ ਗਣ੍ਹਨ੍ਤਸ੍ਸਪਿ ਥੁਲ੍ਲਚ੍ਚਯਂ ਸਿਯਾ, ਤਸ੍ਮਾ ਇਤ੍ਥੀ ਇਤ੍ਥਿਸਞ੍ਞਾ ਸਾਰਤ੍ਤਭਾਵੋ ਗਹਣਞ੍ਚਾਤਿ ਅਙ੍ਗਪਾਰਿਪੂਰਿਸਬ੍ਭਾਵਤੋ ਮਹਾਸੁਮਤ੍ਥੇਰਵਾਦੋਵ ਯੁਤ੍ਤਵਾਦੋ. ਅਟ੍ਠਕਥਾਵਿਨਿਚ੍ਛਯੇਹਿ ਚ ਸਮੇਤੀਤਿ ਏਤ੍ਥਾਪਿ ਅਯਮਧਿਪ੍ਪਾਯੋ – ਯਦਿ ਸਞ੍ਞਾਵਿਰਾਗੇਨ ਵਿਰਾਗਿਤਂ ਨਾਮ ਸਿਯਾ, ‘‘ਸਮ੍ਬਹੁਲਾ ਇਤ੍ਥਿਯੋ ਬਾਹਾਹਿ ਪਰਿਕ੍ਖਿਪਿਤ੍ਵਾ ਗਣ੍ਹਾਮੀ’’ਤਿ ਏਵਂਸਞ੍ਞਿਸ੍ਸ ‘‘ਮਜ੍ਝਗਤਿਤ੍ਥਿਯੋ ਕਾਯਪਟਿਬਦ੍ਧੇਨ ਗਣ੍ਹਾਮੀ’’ਤਿ ਏਵਰੂਪਾਯ ਸਞ੍ਞਾਯ ਅਭਾਵਤੋ ਮਜ੍ਝਗਤਾਨਂ ਵਸੇਨ ਥੁਲ੍ਲਚ੍ਚਯਂ ਨ ਸਿਯਾ, ਏਵਂ ਸਨ੍ਤੇਪਿ ਅਟ੍ਠਕਥਾਯ ਥੁਲ੍ਲਚ੍ਚਯਸ੍ਸ ਵੁਤ੍ਤਤ੍ਤਾ ਸਞ੍ਞਾਵਿਰਾਗੇਨ ਵਿਰਾਗਿਤਂ ਨਾਮ ਨ ਹੋਤੀਤਿ ਅਯਮਤ੍ਥੋ ਸਿਦ੍ਧੋਯੇਵਾਤਿ. ਨੀਲੇਨ ਦੁਵਿਞ੍ਞੇਯ੍ਯਸਭਾਵਤੋ ਕਾਲ਼ਿਤ੍ਥੀ ਵੁਤ੍ਤਾ.

੨੭੯. ਸੇਵਨਾਧਿਪ੍ਪਾਯੋਤਿ ਫਸ੍ਸਸੁਖਸੇਵਨਾਧਿਪ੍ਪਾਯੋ. ਇਤ੍ਥਿਯਾ ਕਾਯੇਨ ਭਿਕ੍ਖੁਸ੍ਸ ਕਾਯਪਟਿਬਦ੍ਧਾਮਸਨਵਾਰੇਪਿ ਫਸ੍ਸਂ ਪਟਿਵਿਜਾਨਾਤੀਤਿ ਇਦਂ ਅਤ੍ਤਨੋ ਕਾਯਪਟਿਬਦ੍ਧਾਮਸਨੇਪਿ ਕਾਯਸਮ੍ਬਨ੍ਧਸਭਾਵਤੋ ਵੁਤ੍ਤਂ. ਏਤ੍ਥਾਤਿ ਨਿਸ੍ਸਗ੍ਗਿਯੇਨ ਨਿਸ੍ਸਗ੍ਗਿਯਵਾਰੇ. ਮੋਕ੍ਖਾਧਿਪ੍ਪਾਯੋਤਿ ਏਤ੍ਥ ਪਠਮਂ ਕਾਯਸਂਸਗ੍ਗਰਾਗੇ ਸਤਿਪਿ ਪਚ੍ਛਾ ਮੋਕ੍ਖਾਧਿਪ੍ਪਾਯਸ੍ਸ ਅਨਾਪਤ੍ਤਿ.

੨੮੧. ਪਾਰਿਪਨ੍ਥਿਕਾਤਿ ਵਿਲੁਮ੍ਪਨਿਕਾ, ਅਨ੍ਤਰਾਯਿਕਾਤਿ ਵੁਤ੍ਤਂ ਹੋਤਿ. ਨਦੀਸੋਤੇਨ ਵੁਯ੍ਹਮਾਨਂ ਮਾਤਰਨ੍ਤਿ ਉਕ੍ਕਟ੍ਠਪਰਿਚ੍ਛੇਦਦਸ੍ਸਨਤ੍ਥਂ ਵੁਤ੍ਤਂ, ਅਞ੍ਞਾਸੁਪਿ ਪਨ ਇਤ੍ਥੀਸੁ ਕਾਰੁਞ੍ਞਾਧਿਪ੍ਪਾਯੇਨ ਮਾਤਰਿ ਵੁਤ੍ਤਨਯੇਨ ਪਟਿਪਜ੍ਜਨ੍ਤਸ੍ਸ ਨੇਵਤ੍ਥਿ ਦੋਸੋਤਿ ਵਦਨ੍ਤਿ. ‘‘ਮਾਤਰ’’ਨ੍ਤਿ ਵੁਤ੍ਤਤ੍ਤਾ ਅਞ੍ਞਾਸਂ ਨ ਵਟ੍ਟਤੀਤਿ ਵਦਨ੍ਤਾਪਿ ਅਤ੍ਥਿ. ਤਿਣਣ੍ਡੁਪਕਨ੍ਤਿ ਹਿਰੀਵੇਰਾਦਿਮੂਲੇਹਿ ਕਤਚੁਮ੍ਬਟਕਂ. ਤਾਲਪਣ੍ਣਮੁਦ੍ਦਿਕਨ੍ਤਿ ਤਾਲਪਣ੍ਣੇਹਿ ਕਤਅਙ੍ਗੁਲਿਮੁਦ੍ਦਿਕਂ. ਪਰਿਵਤ੍ਤੇਤ੍ਵਾਤਿ ਅਤ੍ਤਨੋ ਨਿਵਾਸਨਪਾਰੁਪਨਭਾਵਤੋ ਅਪਨੇਤ੍ਵਾ, ਚੀਵਰਤ੍ਥਾਯ ਅਪਨਾਮੇਤ੍ਵਾਤਿ ਵੁਤ੍ਤਂ ਹੋਤਿ. ਚੀਵਰਤ੍ਥਾਯ ਪਾਦਮੂਲੇ ਠਪੇਤਿ, ਵਟ੍ਟਤੀਤਿ ਇਦਂ ਨਿਦਸ੍ਸਨਮਤ੍ਤਂ, ਪਚ੍ਚਤ੍ਥਰਣਵਿਤਾਨਾਦਿਅਤ੍ਥਮ੍ਪਿ ਵਟ੍ਟਤਿਯੇਵ, ਪੂਜਾਦਿਅਤ੍ਥਂ ਤਾਵਕਾਲਿਕਮ੍ਪਿ ਗਹੇਤੁਂ ਵਟ੍ਟਤਿ.

ਇਤ੍ਥਿਸਣ੍ਠਾਨੇਨ ਕਤਨ੍ਤਿ ਏਤ੍ਥ ਹੇਟ੍ਠਿਮਪਰਿਚ੍ਛੇਦਤੋ ਪਾਰਾਜਿਕਵਤ੍ਥੁਭੂਤਤਿਰਚ੍ਛਾਨਗਤਿਤ੍ਥੀਨਮ੍ਪਿ ਅਨਾਮਾਸਭਾਵਤੋ ਤਾਦਿਸਂ ਇਤ੍ਥਿਸਣ੍ਠਾਨੇਨ ਕਤਂ ਤਿਰਚ੍ਛਾਨਗਤਰੂਪਮ੍ਪਿ ਅਨਾਮਾਸਨ੍ਤਿ ਦਟ੍ਠਬ੍ਬਂ. ‘‘ਭਿਕ੍ਖੁਨੀਹਿ ਪਟਿਮਾਰੂਪਂ ਆਮਸਿਤੁਂ ਵਟ੍ਟਤੀ’’ਤਿ ਵਦਨ੍ਤਿ ਆਚਰਿਯਾ. ਇਤ੍ਥਿਰੂਪਾਨਿ ਦਸ੍ਸੇਤ੍ਵਾ ਕਤਂ ਵਤ੍ਥਞ੍ਚ ਪਚ੍ਚਤ੍ਥਰਣਞ੍ਚ ਭਿਤ੍ਤਿਞ੍ਚ ਇਤ੍ਥਿਰੂਪਂ ਅਨਾਮਸਿਤ੍ਵਾ ਗਣ੍ਹਿਤੁਂ ਵਟ੍ਟਤਿ. ਭਿਨ੍ਦਿਤ੍ਵਾਤਿ ਏਤ੍ਥ ਹਤ੍ਥੇਨ ਅਗ੍ਗਹੇਤ੍ਵਾਵ ਕੇਨਚਿਦੇਵ ਦਣ੍ਡਾਦਿਨਾ ਭਿਨ੍ਦਿਤਬ੍ਬਂ. ਏਤ੍ਥ ਚ ‘‘ਅਨਾਮਾਸਮ੍ਪਿ ਹਤ੍ਥੇਨ ਅਪਰਾਮਸਿਤ੍ਵਾ ਦਣ੍ਡਾਦਿਨਾ ਕੇਨਚਿ ਭਿਨ੍ਦਿਤੁਂ ਵਟ੍ਟਤੀ’’ਤਿ ਇਧ ਵੁਤ੍ਤਤ੍ਤਾ ‘‘ਪਂਸੁਕੂਲਂ ਗਣ੍ਹਨ੍ਤੇਨ ਮਾਤੁਗਾਮਸਰੀਰੇਪਿ ਸਤ੍ਥਾਦੀਹਿ ਵਣਂ ਕਤ੍ਵਾ ਗਹੇਤਬ੍ਬ’’ਨ੍ਤਿ ਵੁਤ੍ਤਤ੍ਤਾ ਚ ਗਹਿਤਮਣ੍ਡੂਕਸਪ੍ਪਿਨਿਂ ਦਣ੍ਡਾਦੀਹਿ ਨਿਪ੍ਪੀਲ਼ੇਤ੍ਵਾ ਮਣ੍ਡੂਕਂ ਵਿਸ੍ਸਜ੍ਜਾਪੇਤੁਂ ਵਟ੍ਟਤਿ.

ਮਗ੍ਗਂ ਅਧਿਟ੍ਠਾਯਾਤਿ ਮਗ੍ਗੇ ਗਚ੍ਛਾਮੀਤਿ ਏਵਂ ਮਗ੍ਗਸਞ੍ਞੀ ਹੁਤ੍ਵਾਤਿ ਅਤ੍ਥੋ. ਕੀਲ਼ਨ੍ਤੇਨਾਤਿ ਇਦਂ ਗਿਹਿਸਨ੍ਤਕਂ ਸਨ੍ਧਾਯ ਵੁਤ੍ਤਂ, ਭਿਕ੍ਖੁਸਨ੍ਤਕਂ ਪਨ ਯੇਨ ਕੇਨਚਿ ਅਧਿਪ੍ਪਾਯੇਨ ਅਨਾਮਸਿਤਬ੍ਬਮੇਵ ਦੁਰੁਪਚਿਣ੍ਣਭਾਵਤੋ. ਤਾਲਪਨਸਾਦੀਨੀਤਿ ਚੇਤ੍ਥ ਆਦਿ-ਸਦ੍ਦੇਨ ਨਾਲ਼ਿਕੇਰਲਬੁਜਤਿਪੁਸਅਲਾਬੁਕੁਮ੍ਭਣ੍ਡਪੁਸ੍ਸਫਲਏਲ਼ਾਲੁਕਫਲਾਨਂ ਸਙ੍ਗਹੋ ਦਟ੍ਠਬ੍ਬੋ. ‘‘ਯਥਾਵੁਤ੍ਤਫਲਾਨਂਯੇਵ ਚੇਤ੍ਥ ਕੀਲ਼ਾਧਿਪ੍ਪਾਯੇਨ ਆਮਸਨਂ ਨ ਵਟ੍ਟਤੀ’’ਤਿ ਵੁਤ੍ਤਤ੍ਤਾ ਪਾਸਾਣਸਕ੍ਖਰਾਦੀਨਿ ਕੀਲ਼ਾਧਿਪ੍ਪਾਯੇਨਪਿ ਆਮਸਿਤੁਂ ਵਟ੍ਟਤਿ.

ਮੁਤ੍ਤਾਤਿ ਹਤ੍ਥਿਕੁਮ੍ਭਜਾਦਿਕਾ ਅਟ੍ਠਵਿਧਾ ਮੁਤ੍ਤਾ. ਤਥਾ ਹਿ ਹਤ੍ਥਿਕੁਮ੍ਭਂ, ਵਰਾਹਦਾਠਂ, ਭੁਜਙ੍ਗਸੀਸਂ, ਵਲਾਹਕਂ, ਵੇਲ਼ੁ, ਮਚ੍ਛਸਿਰੋ, ਸਙ੍ਖੋ, ਸਿਪ੍ਪੀਤਿ ਅਟ੍ਠ ਮੁਤ੍ਤਾਯੋਨਿਯੋ. ਤਤ੍ਥ ਹਤ੍ਥਿਕੁਮ੍ਭਜਾ ਪੀਤਵਣ੍ਣਾ ਪਭਾਵਿਹੀਨਾ. ਵਰਾਹਦਾਠਜਾ ਵਰਾਹਦਾਠਵਣ੍ਣਾਵ. ਭੁਜਙ੍ਗਸੀਸਜਾ ਨੀਲਾਦਿਵਣ੍ਣਾ ਸੁਵਿਸੁਦ੍ਧਾ ਵਟ੍ਟਲਾ. ਵਲਾਹਕਜਾ ਆਭਾਸੂਰਾ ਦੁਬ੍ਬਿਭਾਗਰੂਪਾ ਰਤ੍ਤਿਭਾਗੇ ਅਨ੍ਧਕਾਰਂ ਵਿਦ੍ਧਮਨ੍ਤਿਯੋ ਤਿਟ੍ਠਨ੍ਤਿ, ਦੇਵੂਪਭੋਗਾ ਏਵ ਚ ਹੋਨ੍ਤਿ. ਵੇਲ਼ੁਜਾ ਕਰਕਫਲਸਮਾਨਵਣ੍ਣਾ ਨ ਆਭਾਸੂਰਾ, ਤੇ ਚ ਵੇਲ਼ੂ ਅਮਨੁਸ੍ਸਗੋਚਰੇ ਏਵ ਪਦੇਸੇ ਜਾਯਨ੍ਤਿ. ਮਚ੍ਛਸਿਰਜਾ ਪਾਠੀਨਪਿਟ੍ਠਿਸਮਆਨਵਣ੍ਣਾ ਵਟ੍ਟਲਾ ਲਘਵੋ ਚ ਹੋਨ੍ਤਿ ਪਭਾਵਿਹੀਨਾ ਚ, ਤੇ ਚ ਮਚ੍ਛਾ ਸਮੁਦ੍ਦਮਜ੍ਝੇਯੇਵ ਜਾਯਨ੍ਤਿ. ਸਙ੍ਖਜਾ ਸਙ੍ਖਉਦਰਚ੍ਛਵਿਵਣ੍ਣਾ ਕੋਲਫਲਪ੍ਪਮਾਣਾਪਿ ਹੋਨ੍ਤਿ ਪਭਾਵਿਹੀਨਾਵ. ਸਿਪ੍ਪਿਜਾ ਪਭਾਵਿਸੇਸਯੁਤ੍ਤਾ ਹੋਨ੍ਤਿ ਨਾਨਾਸਣ੍ਠਾਨਾ. ਏਵਂ ਜਾਤਿਤੋ ਅਟ੍ਠਵਿਧਾਸੁ ਮੁਤ੍ਤਾਸੁ ਯਾ ਮਚ੍ਛਸਙ੍ਖਸਿਪ੍ਪਿਜਾ, ਤਾ ਸਾਮੁਦ੍ਦਿਕਾ. ਭੁਜਙ੍ਗਜਾਪਿ ਕਾਚਿ ਸਾਮੁਦ੍ਦਿਕਾ ਹੋਨ੍ਤਿ, ਇਤਰਾ ਅਸਾਮੁਦ੍ਦਿਕਾ. ਯਸ੍ਮਾ ਬਹੁਲਂ ਸਾਮੁਦ੍ਦਿਕਾਵ ਮੁਤ੍ਤਾ ਲੋਕੇ ਦਿਸ੍ਸਨ੍ਤਿ, ਤਤ੍ਥਾਪਿ ਸਪ੍ਪਿਜਾਵ, ਇਤਰਾ ਕਦਾਚਿ ਕਾਚਿ, ਤਸ੍ਮਾ ਸਮ੍ਮੋਹਵਿਨੋਦਨਿਯਂ ‘‘ਮੁਤ੍ਤਾਤਿ ਸਾਮੁਦ੍ਦਿਕਾ ਮੁਤ੍ਤਾ’’ਤਿ ਵੁਤ੍ਤਂ.

ਮਣੀਤਿ ਠਪੇਤ੍ਵਾ ਵੇਲ਼ੁਰਿਯਾਦਿਕੇ ਸੇਸੋ ਜੋਤਿਰਸਾਦਿਭੇਦੋ ਸਬ੍ਬੋਪਿ ਮਣਿ. ਵੇਲ਼ੁਰਿਯੋਤਿ ਵਂਸਵਣ੍ਣਮਣਿ. ਸਙ੍ਖੋਤਿ ਸਾਮੁਦ੍ਦਿਕਸਙ੍ਖੋ. ਸਿਲਾਤਿ ਕਾਲ਼ਸਿਲਾਪਣ੍ਡੁਸਿਲਾਸੇਤਸਿਲਾਦਿਭੇਦਾ ਸਬ੍ਬਾਪਿ ਸਿਲਾ. ਰਜਤਨ੍ਤਿ ਕਹਾਪਣਾਦਿਕਂ ਵੁਤ੍ਤਾਵਸੇਸਂ ਰਤਨਸਮ੍ਮਤਂ. ਜਾਤਰੂਪਨ੍ਤਿ ਸੁਵਣ੍ਣਂ. ਲੋਹਿਤਙ੍ਕੋਤਿ ਰਤ੍ਤਮਣਿ. ਮਸਾਰਗਲ੍ਲਨ੍ਤਿ ਕਬਰਮਣਿ. ਭਣ੍ਡਮੂਲਤ੍ਥਾਯਾਤਿ ਪਤ੍ਤਚੀਵਰਾਦਿਭਣ੍ਡਮੂਲਤ੍ਥਾਯ. ਕੁਟ੍ਠਰੋਗਸ੍ਸਾਤਿ ਨਿਦਸ੍ਸਨਮਤ੍ਤਂ, ਤਾਯ ਵੂਪਸਮੇਤਬ੍ਬਸ੍ਸ ਯਸ੍ਸ ਕਸ੍ਸਚਿ ਰੋਗਸ੍ਸਤ੍ਥਾਯਪਿ ਵਟ੍ਟਤਿਯੇਵ. ‘‘ਭੇਸਜ੍ਜਤ੍ਥਞ੍ਚ ਅਧਿਟ੍ਠਾਯੇਵ ਮੁਤ੍ਤਾ ਵਟ੍ਟਤੀ’’ਤਿ ਤੀਸੁਪਿ ਗਣ੍ਠਿਪਦੇਸੁ ਵੁਤ੍ਤਂ. ਆਕਰਮੁਤ੍ਤੋਤਿ ਆਕਰਤੋ ਮੁਤ੍ਤਮਤ੍ਤੋ. ‘‘ਭਣ੍ਡਮੂਲਤ੍ਥਾਯ ਸਮ੍ਪਟਿਚ੍ਛਿਤੁਂ ਵਟ੍ਟਤੀ’’ਤਿ ਇਮਿਨਾ ਚ ਆਮਸਿਤੁਮ੍ਪਿ ਵਟ੍ਟਤੀਤਿ ਦਸ੍ਸੇਤਿ. ਪਚਿਤ੍ਵਾ ਕਤੋਤਿ ਕਾਚਕਾਰੇਹਿ ਪਚਿਤ੍ਵਾ ਕਤੋ.

ਧੋਤਵਿਦ੍ਧੋ ਚ ਰਤਨਮਿਸ੍ਸੋਤਿ ਅਲਙ੍ਕਾਰਤ੍ਥਂ ਕਞ੍ਚਨਲਤਾਦਿਂ ਦਸ੍ਸੇਤ੍ਵਾ ਕਤੋ ਰਤਨਖਚਿਤੋ ਧੋਤਵਿਦ੍ਧੋ ਅਨਾਮਾਸੋ. ਧੋਤਵਿਦ੍ਧੋ ਚ ਰਤਨਮਿਸ੍ਸੋ ਚਾਤਿ ਵਿਸੁਂ ਵਾ ਪਦਂ ਸਮ੍ਬਨ੍ਧਿਤਬ੍ਬਂ. ਪਾਨੀਯਸਙ੍ਖੋਤਿ ਇਮਿਨਾ ਚ ਸਙ੍ਖੇਨ ਕਤਪਾਨੀਯਭਾਜਨਪਿਧਾਨਾਦਿਸਮਣਪਰਿਕ੍ਖਾਰੋਪਿ ਆਮਸਿਤੁਂ ਵਟ੍ਟਤੀਤਿ ਸਿਦ੍ਧਂ. ਸੇਸਨ੍ਤਿ ਰਤਨਮਿਸ੍ਸਂ ਠਪੇਤ੍ਵਾ ਅਵਸੇਸਂ. ਮੁਗ੍ਗਵਣ੍ਣਂਯੇਵ ਰਤਨਸਮ੍ਮਿਸ੍ਸਂ ਕਰੋਨ੍ਤਿ, ਨ ਅਞ੍ਞਨ੍ਤਿ ਆਹ ‘‘ਮੁਗ੍ਗਵਣ੍ਣਾਵਾ’’ਤਿ, ਮੁਗ੍ਗਵਣ੍ਣਾ ਰਤਨਮਿਸ੍ਸਾਵ ਨ ਵਟ੍ਟਤੀਤਿ ਵੁਤ੍ਤਂ ਹੋਤਿ. ਸੇਸਾਤਿ ਰਤਨਸਮ੍ਮਿਸ੍ਸਂ ਠਪੇਤ੍ਵਾ ਅਵਸੇਸਾ ਮੁਗ੍ਗਵਣ੍ਣਾ ਨੀਲਸਿਲਾ.

ਬੀਜਤੋ ਪਟ੍ਠਾਯਾਤਿ ਧਾਤੁਪਾਸਾਣਤੋ ਪਟ੍ਠਾਯ. ਸੁਵਣ੍ਣਚੇਤਿਯਨ੍ਤਿ ਧਾਤੁਕਰਣ੍ਡਕਂ. ਪਟਿਕ੍ਖਿਪੀਤਿ ‘‘ਧਾਤੁਟ੍ਠਪਨਤ੍ਥਾਯ ਗਣ੍ਹਥਾ’’ਤਿ ਅਵਤ੍ਵਾ ‘‘ਤੁਮ੍ਹਾਕਂ ਗਣ੍ਹਥਾ’’ਤਿ ਪੇਸਿਤਤ੍ਤਾ ਪਟਿਕ੍ਖਿਪਿ. ਸੁਵਣ੍ਣਬੁਬ੍ਬੁਲ਼ਕਨ੍ਤਿ ਸੁਵਣ੍ਣਤਾਰਕਂ. ‘‘ਕੇਲ਼ਾਪਯਿਤੁਨ੍ਤਿ ਇਤੋ ਚਿਤੋ ਚ ਸਞ੍ਚਾਰਨ੍ਤੇਹਿ ਆਮਸਿਤੁਂ ਵਟ੍ਟਤੀ’’ਤਿ ਮਹਾਅਟ੍ਠਕਥਾਯਂ ਵੁਤ੍ਤਂ. ਕਚਵਰਮੇਵ ਹਰਿਤੁਂ ਵਟ੍ਟਤੀਤਿ ਚੇਤਿਯਗੋਪਕਾ ਵਾ ਭਿਕ੍ਖੂ ਹੋਨ੍ਤੁ ਅਞ੍ਞੇ ਵਾ, ਹਤ੍ਥੇਨਪਿ ਪੁਞ੍ਛਿਤ੍ਵਾ ਕਚਵਰਂ ਅਪਨੇਤੁਂ ਵਟ੍ਟਤਿ, ਮਲਮ੍ਪਿ ਪਮਜ੍ਜਿਤੁਂ ਵਟ੍ਟਤਿਯੇਵ.

ਆਰਕੂਟਲੋਹਨ੍ਤਿ ਕਿਤ੍ਤਿਮਲੋਹਂ. ਤੀਣਿ ਹਿ ਕਿਤ੍ਤਿਮਲੋਹਾਨਿ ਕਂਸਲੋਹਂ, ਵਟ੍ਟਲੋਹਂ, ਆਰਕੂਟਨ੍ਤਿ. ਤਤ੍ਥ ਤਿਪੁਤਮ੍ਬੇ ਮਿਸ੍ਸੇਤ੍ਵਾ ਕਤਂ ਕਂਸਲੋਹਂ, ਸੀਸਤਮ੍ਬੇ ਮਿਸ੍ਸੇਤ੍ਵਾ ਕਤਂ ਵਟ੍ਟਲੋਹਂ, ਪਕਤਿਰਸਤਮ੍ਬੇ ਮਿਸ੍ਸੇਤ੍ਵਾ ਕਤਂ ਆਰਕੂਟਂ. ਤੇਨੇਵ ਤਂਕਰਣੇਨ ਨਿਬ੍ਬਤ੍ਤਤ੍ਤਾ ‘‘ਕਿਤ੍ਤਿਮਲੋਹ’’ਨ੍ਤਿ ਵੁਚ੍ਚਤਿ. ‘‘ਜਾਤਰੂਪਗਤਿਕਮੇਵਾਤਿ ਵੁਤ੍ਤਤ੍ਤਾ ਆਰਕੂਟਂ ਸੁਵਣ੍ਣਸਦਿਸਮੇਵ ਆਮਸਿਤੁਂ ਨ ਵਟ੍ਟਤਿ, ਅਞ੍ਞਂ ਪਨ ਵਟ੍ਟਤੀ’’ਤਿ ਤੀਸੁਪਿ ਗਣ੍ਠਿਪਦੇਸੁ ਵੁਤ੍ਤਂ. ਕੇਚਿ ਪਨ ‘‘ਆਰਕੂਟਂ ਅਨਾਮਸਿਤਬ੍ਬਤੋ ਜਾਤਰੂਪਗਤਿਕਮੇਵਾਤਿ ਵੁਤ੍ਤਂ, ਤਸ੍ਮਾ ਉਭਯਮ੍ਪਿ ਜਾਤਰੂਪਂ ਵਿਯ ਆਮਸਿਤੁਂ ਨ ਵਟ੍ਟਤੀ’’ਤਿ ਵਦਨ੍ਤਿ. ਪਠਮਂ ਵੁਤ੍ਤੋਯੇਵ ਚ ਅਤ੍ਥੋ ਗਣ੍ਠਿਪਦਕਾਰੇਹਿ ਅਧਿਪ੍ਪੇਤੋ. ਪਟਿਜਗ੍ਗਿਤੁਂ ਵਟ੍ਟਤੀਤਿ ਸੇਨਾਸਨਪਟਿਬਦ੍ਧਤ੍ਤਾ ਵੁਤ੍ਤਂ.

ਸਾਮਿਕਾਨਂ ਪੇਸੇਤਬ੍ਬਨ੍ਤਿ ਸਾਮਿਕਾਨਂ ਸਾਸਨਂ ਪੇਸੇਤਬ੍ਬਂ. ਭਿਨ੍ਦਿਤ੍ਵਾਤਿ ਹਤ੍ਥੇਨ ਅਗ੍ਗਹੇਤ੍ਵਾ ਅਞ੍ਞੇਨ ਯੇਨ ਕੇਨਚਿ ਭਿਨ੍ਦਿਤ੍ਵਾ. ਭੇਰਿਸਙ੍ਘਾਟੋਤਿ ਸਙ੍ਘਟਿਤਚਮ੍ਮਭੇਰੀ. ਵੀਣਾਸਙ੍ਘਾਟੋਤਿ ਸਙ੍ਘਟਿਤਚਮ੍ਮਵੀਣਾ. ਚਮ੍ਮਵਿਨਦ੍ਧਾਨਂ ਭੇਰਿਵੀਣਾਨਮੇਤਂ ਅਧਿਵਚਨਂ. ਤੁਚ੍ਛਪੋਕ੍ਖਰਨ੍ਤਿ ਅਵਿਨਦ੍ਧਚਮ੍ਮਂ ਭੇਰਿਪੋਕ੍ਖਰਂ ਵੀਣਾਪੋਕ੍ਖਰਞ੍ਚ. ਆਰੋਪਿਤਚਮ੍ਮਨ੍ਤਿ ਭੇਰਿਆਦੀਨਂ ਵਿਨਦ੍ਧਨਤ੍ਥਾਯ ਮੁਖਵਟ੍ਟਿਯਂ ਆਰੋਪਿਤਚਮ੍ਮਂ ਤਤੋ ਉਦ੍ਧਰਿਤ੍ਵਾ ਵਿਸੁਂ ਠਪਿਤਚਮ੍ਮਞ੍ਚ. ਓਨਹਿਤੁਂ ਵਾਤਿ ਭੇਰਿਪੋਕ੍ਖਰਾਦੀਨਿ ਚਮ੍ਮਂ ਆਰੋਪੇਤ੍ਵਾ ਵਿਨਨ੍ਧਿਤੁਂ. ਓਨਹਾਪੇਤੁਂ ਵਾਤਿ ਤਥੇਵ ਅਞ੍ਞੇਹਿ ਵਿਨਨ੍ਧਾਪੇਤੁਂ. ਪਾਰਾਜਿਕਪ੍ਪਹੋਨਕਕਾਲੇਤਿ ਅਕੁਥਿਤਕਾਲੇ.

੨੮੨. ਸਙ੍ਕਮਾਦਿ ਭੂਮਿਗਤਿਕਤ੍ਤਾ ਨ ਕਾਯਪਟਿਬਦ੍ਧਟ੍ਠਾਨਿਯਨ੍ਤਿ ਦੁਕ੍ਕਟਂ ਵੁਤ੍ਤਂ. ਏਕਪਦਿਕਸਙ੍ਕਮੋਤਿ ਖੁਦ੍ਦਕਸੇਤੁ. ਸਕਟਮਗ੍ਗਸਙ੍ਕਮੋਤਿ ਸਕਟਮਗ੍ਗਭੂਤੋ ਮਹਾਸੇਤੁ. ਠਾਨਾ ਚਾਲੇਤੁਨ੍ਤਿ ਰਜ੍ਜੁਂ ਠਾਨਾ ਚਾਲੇਤੁਂ. ਪਟਿਚ੍ਛਾਦੇਤਬ੍ਬਾਤਿ ਅਪਨੇਤਬ੍ਬਾ. ਮਨੁਸ੍ਸਿਤ੍ਥੀ, ਇਤ੍ਥਿਸਞ੍ਞਿਤਾ, ਕਾਯਸਂਸਗ੍ਗਰਾਗੋ, ਤੇਨ ਰਾਗੇਨ ਵਾਯਾਮੋ, ਹਤ੍ਥਗ੍ਗਾਹਾਦਿਸਮਾਪਜ੍ਜਨਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ.

ਕਾਯਸਂਸਗ੍ਗਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.