੧੨. ਦੁਬ੍ਬਚਸਿਕ੍ਖਾਪਦਵਣ੍ਣਨਾ

੪੨੪. ਦ੍ਵਾਦਸਮੇ ਵਮ੍ਭਨਵਚਨਨ੍ਤਿ ਗਰਹਵਚਨਂ. ਅਪਸਾਦੇਤੁਕਾਮੋਤਿ ਖਿਪਿਤੁਕਾਮੋ, ਤਜ੍ਜੇਤੁਕਾਮੋ ਵਾ, ਘਟ੍ਟੇਤੁਕਾਮੋਤਿ ਵੁਤ੍ਤਂ ਹੋਤਿ. ਸਟਸਦ੍ਦੋ ਪਤਿਤਸਦ੍ਦੇਨ ਸਮਾਨਤ੍ਥੋ. ਵਿਸੇਸਨਸ੍ਸ ਚ ਪਰਨਿਪਾਤਂ ਕਤ੍ਵਾ ਤਿਣਕਟ੍ਠਪਣ੍ਣਸਟਨ੍ਤਿ ਵੁਤ੍ਤਨ੍ਤਿ ਆਹ ‘‘ਤਤ੍ਥ ਤਤ੍ਥ ਪਤਿਤਂ ਤਿਣਕਟ੍ਠਪਣ੍ਣ’’ਨ੍ਤਿ. ਕੇਨਾਪੀਤਿ ਵਾਤਸਦਿਸੇਨ ਨਦੀਸਦਿਸੇਨ ਚ ਕੇਨਾਪਿ.

੪੨੫-੪੨੬. ਵਤ੍ਤੁਂ ਅਸਕ੍ਕੁਣੇਯ੍ਯੋਤਿ ਕਿਸ੍ਮਿਞ੍ਚਿ ਵੁਚ੍ਚਮਾਨੇ ਅਸਹਨਤੋ ਓਵਦਿਤੁਂ ਅਸਕ੍ਕੁਣੇਯ੍ਯੋ. ਦੁਕ੍ਖਂ ਵਚੋ ਏਤਸ੍ਮਿਂ ਵਿਪ੍ਪਟਿਕੂਲਗ੍ਗਾਹੇ ਵਿਪਚ੍ਚਨੀਕਵਾਦੇ ਅਨਾਦਰੇ ਪੁਗ੍ਗਲੇਤਿ ਦੁਬ੍ਬਚੋ. ਤੇਨਾਹ ‘‘ਦੁਕ੍ਖੇਨ ਕਿਚ੍ਛੇਨ ਵਦਿਤਬ੍ਬੋ’’ਤਿਆਦਿ. ਦੁਬ੍ਬਚਭਾਵਕਰਣੀਯੇਹੀਤਿ ਦੁਬ੍ਬਚਭਾਵਕਾਰਕੇਹਿ. ਕਤ੍ਤੁਅਤ੍ਥੇ ਅਨੀਯਸਦ੍ਦੋ ਦਟ੍ਠਬ੍ਬੋ. ਤੇਨੇਵਾਹ ‘‘ਯੇ ਧਮ੍ਮਾ ਦੁਬ੍ਬਚਂ ਪੁਗ੍ਗਲਂ ਕਰੋਨ੍ਤੀ’’ਤਿਆਦਿ. ਪਾਪਿਕਾ ਇਚ੍ਛਾ ਏਤਸ੍ਸਾਤਿ ਪਾਪਿਚ੍ਛੋ, ਤਸ੍ਸ ਭਾਵੋ ਪਾਪਿਚ੍ਛਤਾ, ਅਸਨ੍ਤਗੁਣਸਮ੍ਭਾਵਨਤਾ ਪਟਿਗ੍ਗਹਣੇ ਚ ਅਮਤ੍ਤਞ੍ਞੁਤਾ ਪਾਪਿਚ੍ਛਤਾਤਿ ਵੇਦਿਤਬ੍ਬਾ. ਅਤ੍ਤੁਕ੍ਕਂਸਕਾ ਚ ਤੇ ਪਰਵਮ੍ਭਕਾ ਚਾਤਿ ਅਤ੍ਤੁਕ੍ਕਂਸਕਪਰਵਮ੍ਭਕਾ. ਯੇ ਅਤ੍ਤਾਨਂ ਉਕ੍ਕਂਸਨ੍ਤਿ ਉਕ੍ਖਿਪਨ੍ਤਿ ਉਚ੍ਚੇ ਠਾਨੇ ਠਪੇਨ੍ਤਿ, ਪਰਞ੍ਚ ਵਮ੍ਭੇਨ੍ਤਿ ਗਰਹਨ੍ਤਿ ਨੀਚੇ ਠਾਨੇ ਠਪੇਨ੍ਤਿ, ਤੇਸਮੇਤਂ ਅਧਿਵਚਨਂ. ਤੇਸਂ ਭਾਵੋ ਅਤ੍ਤੁਕ੍ਕਂਸਕਪਰਵਮ੍ਭਕਤਾ. ਕੁਜ੍ਝਨਸੀਲੋ ਕੋਧਨੋ, ਤਸ੍ਸ ਭਾਵੋ ਕੋਧਨਤਾ. ਕੁਜ੍ਝਨਲਕ੍ਖਣਸ੍ਸ ਕੋਧਸ੍ਸੇਤਂ ਅਧਿਵਚਨਂ.

ਪੁਬ੍ਬਕਾਲੇ ਕੋਧੋ, ਅਪਰਕਾਲੇ ਉਪਨਾਹੋਤਿ ਆਹ ‘‘ਕੋਧਹੇਤੁ ਉਪਨਾਹਿਤਾ’’ਤਿ. ਤਤ੍ਥ ਉਪਨਹਨਸੀਲੋ, ਉਪਨਾਹੋ ਵਾ ਏਤਸ੍ਸ ਅਤ੍ਥੀਤਿ ਉਪਨਾਹੀ, ਤਸ੍ਸ ਭਾਵੋ ਉਪਨਾਹਿਤਾ. ਪੁਨਪ੍ਪੁਨਂ ਚਿਤ੍ਤਪਰਿਯੋਨਦ੍ਧਲਕ੍ਖਣਸ੍ਸ ਕੋਧਸ੍ਸੇਵੇਤਂ ਅਧਿਵਚਨਂ. ਸਕਿਞ੍ਹਿ ਉਪ੍ਪਨ੍ਨੋ ਕੋਧੋ ਕੋਧੋਯੇਵ, ਤਤੁਤ੍ਤਰਿ ਉਪਨਾਹੋ. ਅਭਿਸਙ੍ਗੋਤਿ ਦੁਮ੍ਮੋਚਨੀਯੋ ਬਲਵਉਪਨਾਹੋ. ਸੋ ਅਸ੍ਸ ਅਤ੍ਥੀਤਿ ਅਭਿਸਙ੍ਗੀ, ਤਸ੍ਸ ਭਾਵੋ ਅਭਿਸਙ੍ਗਿਤਾ. ਦੁਮ੍ਮੋਚਨੀਯਸ੍ਸ ਬਲਵਉਪਨਾਹਸ੍ਸੇਤਂ ਅਧਿਵਚਨਂ. ਚੋਦਕਂ ਪਟਿਪ੍ਫਰਣਤਾਤਿ ਚੋਦਕਸ੍ਸ ਪਟਿਵਿਰੁਦ੍ਧੇਨ ਪਚ੍ਚਨੀਕੇਨ ਹੁਤ੍ਵਾ ਅਵਟ੍ਠਾਨਂ. ਚੋਦਕਂ ਅਪਸਾਦਨਤਾਤਿ ‘‘ਕਿਂ ਨੁ ਖੋ ਤੁਯ੍ਹਂ ਬਾਲਸ੍ਸ ਅਬ੍ਯਤ੍ਤਸ੍ਸ ਭਣਿਤੇਨ, ਤ੍ਵਮ੍ਪਿ ਨਾਮ ਭਣਿਤਬ੍ਬਂ ਮਞ੍ਞਿਸ੍ਸਸੀ’’ਤਿ ਏਵਂ ਚੋਦਕਸ੍ਸ ਘਟ੍ਟਨਾ. ਚੋਦਕਸ੍ਸ ਪਚ੍ਚਾਰੋਪਨਤਾਤਿ ‘‘ਤ੍ਵਮ੍ਪਿ ਖੋਸਿ ਇਤ੍ਥਨ੍ਨਾਮਂ ਆਪਤ੍ਤਿਂ ਆਪਨ੍ਨੋ, ਤਂ ਤਾਵ ਪਟਿਕਰੋਹੀ’’ਤਿ ਏਵਂ ਚੋਦਕਸ੍ਸ ਉਪਰਿ ਪਟਿਆਰੋਪਨਤਾ.

ਅਞ੍ਞੇਨ ਅਞ੍ਞਂ ਪਟਿਚਰਣਤਾਤਿ ਅਞ੍ਞੇਨ ਕਾਰਣੇਨ, ਵਚਨੇਨ ਵਾ ਅਞ੍ਞਸ੍ਸ ਕਾਰਣਸ੍ਸ, ਵਚਨਸ੍ਸ ਵਾ ਪਟਿਚ੍ਛਾਦਨਵਸੇਨ ਚਰਣਤਾ. ਪਟਿਚ੍ਛਾਦਨਤ੍ਥੋ ਏਵ ਵਾ ਚਰਸਦ੍ਦੋ ਅਨੇਕਤ੍ਥਤ੍ਤਾ ਧਾਤੂਨਨ੍ਤਿ ਪਟਿਚ੍ਛਾਦਨਤਾਤਿ ਅਤ੍ਥੋ. ਤਾਯ ਸਮਨ੍ਨਾਗਤੋ ਹਿ ਪੁਗ੍ਗਲੋ ਯਂ ਚੋਦਕੇਨ ਦੋਸਵਿਭਾਵਨਕਾਰਣਂ, ਵਚਨਂ ਵਾ ਵੁਤ੍ਤਂ, ਤਂ ਤਤੋ ਅਞ੍ਞੇਨੇਵ ਚੋਦਨਾਯ ਅਮੂਲਿਕਭਾਵਦੀਪਨੇਨ ਕਾਰਣੇਨ, ਤਦਤ੍ਥਬੋਧਕੇਨ ਵਚਨੇਨ ਵਾ ਪਟਿਚ੍ਛਾਦੇਤਿ. ‘‘ਆਪਤ੍ਤਿਂ ਆਪਨ੍ਨੋਸੀ’’ਤਿ ਵੁਤ੍ਤੇ ‘‘ਕੋ ਆਪਨ੍ਨੋ, ਕਿਂ ਆਪਨ੍ਨੋ, ਕਿਸ੍ਮਿਂ ਆਪਨ੍ਨੋ, ਕਂ ਭਣਥ, ਕਿਂ ਭਣਥਾ’’ਤਿ ਵਾ ਵਤ੍ਵਾ ‘‘ਏਵਰੂਪਂ ਕਿਞ੍ਚਿ ਤਯਾ ਦਿਟ੍ਠ’’ਨ੍ਤਿ ਵੁਤ੍ਤੇ ‘‘ਨ ਸੁਣਾਮੀ’’ਤਿ ਸੋਤਂ ਵਾ ਉਪਨਾਮੇਤ੍ਵਾ ਵਿਕ੍ਖੇਪਂ ਕਰੋਨ੍ਤੋਪਿ ਅਞ੍ਞੇਨਞ੍ਞਂ ਪਟਿਚ੍ਛਾਦੇਤਿ. ‘‘ਇਤ੍ਥਨ੍ਨਾਮਂ ਆਪਤ੍ਤਿਂ ਆਪਨ੍ਨੋਸੀ’’ਤਿ ਪੁਟ੍ਠੇ ‘‘ਪਾਟਲਿਪੁਤ੍ਤਂ ਗਤੋਮ੍ਹੀ’’ਤਿ ਵਤ੍ਵਾ ਪੁਨ ‘‘ਨ ਤਵ ਪਾਟਲਿਪੁਤ੍ਤਗਮਨਂ ਪੁਚ੍ਛਾਮ, ਆਪਤ੍ਤਿਂ ਪੁਚ੍ਛਾਮਾ’’ਤਿ ਵੁਤ੍ਤੇ ਤਤੋ ‘‘ਰਾਜਗਹਂ ਗਤੋਮ੍ਹੀ’’ਤਿ ਵਤ੍ਵਾ ‘‘ਰਾਜਗਹਂ ਵਾ ਯਾਹਿ ਬ੍ਰਾਹ੍ਮਣਗਹਂ ਵਾ, ਆਪਤ੍ਤਿਂ ਆਪਨ੍ਨੋਸੀ’’ਤਿ ਵੁਤ੍ਤੇ ‘‘ਤਤ੍ਥ ਮੇ ਸੂਕਰਮਂਸਂ ਲਦ੍ਧ’’ਨ੍ਤਿਆਦੀਨਿ ਵਤ੍ਵਾ ਬਹਿਦ੍ਧਾ ਕਥਾਵਿਕ੍ਖਿਪਨਮ੍ਪਿ ਅਤ੍ਥਤੋ ਅਞ੍ਞੇਨਞ੍ਞਂ ਪਟਿਚਰਣਮੇਵਾਤਿ ਵਿਸੁਂ ਨ ਗਹਿਤਂ.

ਅਪਦਾਨੇਨਾਤਿ ਅਤ੍ਤਨੋ ਚਰਿਯਾਯ. ਅਪਦੀਯਨ੍ਤਿ ਹਿ ਦੋਸਾ ਏਤੇਨ ਦਕ੍ਖੀਯਨ੍ਤਿ, ਲੁਯਨ੍ਤਿ ਛਿਜ੍ਜਨ੍ਤੀਤਿ ਵਾ ਅਪਦਾਨਂ, ਸਤ੍ਤਾਨਂ ਸਮ੍ਮਾ ਮਿਚ੍ਛਾ ਵਾ ਵਤ੍ਤਪ੍ਪਯੋਗੋ. ਨ ਸਮ੍ਪਾਯਨਤਾਤਿ ‘‘ਆਵੁਸੋ, ਤ੍ਵਂ ਕੁਹਿਂ ਵਸਸਿ, ਕਂ ਨਿਸ੍ਸਾਯ ਵਸਸੀ’’ਤਿ ਵਾ ‘‘ਯਂ ਤ੍ਵਂ ਵਦੇਸਿ ‘ਮਯਾ ਏਸ ਆਪਤ੍ਤਿਂ ਆਪਜ੍ਜਨ੍ਤੋ ਦਿਟ੍ਠੋ’ਤਿ, ਤ੍ਵਂ ਤਸ੍ਮਿਂ ਸਮਯੇ ਕਿਂ ਕਰੋਸਿ, ਅਯਂ ਕਿਂ ਕਰੋਤਿ, ਕਤ੍ਥ ਚ ਤ੍ਵਂ ਅਹੋਸਿ, ਕਤ੍ਥ ਅਯ’’ਨ੍ਤਿ ਵਾ ਆਦਿਨਾ ਨਯੇਨ ਚਰਿਯਂ ਪੁਟ੍ਠੇਨ ਸਮ੍ਪਾਦੇਤ੍ਵਾ ਅਕਥਨਂ.

ਮਕ੍ਖਿਪਲ਼ਾਸਿਤਾਤਿ ਏਤ੍ਥ ਪਰਗੁਣਮਕ੍ਖਨਲਕ੍ਖਣੋ ਮਕ੍ਖੋ, ਸੋ ਏਤਸ੍ਸ ਅਤ੍ਥੀਤਿ ਮਕ੍ਖੀ. ਤਾਦਿਸੋ ਪੁਗ੍ਗਲੋ ਅਗਾਰਿਯੋ ਅਨਗਾਰਿਯੋ ਵਾ ਸਮਾਨੋ ਪਰੇਸਂ ਸੁਕਤਕਰਣਂ ਵਿਨਾਸੇਤਿ. ਅਗਾਰਿਯੋਪਿ ਹਿ ਕੇਨਚਿ ਅਨੁਕਮ੍ਪਕੇਨ ਦਲਿਦ੍ਦੋ ਸਮਾਨੋ ਉਚ੍ਚਟ੍ਠਾਨੇ ਠਪਿਤੋ, ਅਪਰੇਨ ਸਮਯੇਨ ‘‘ਕਿਂ ਤਯਾ ਮਯ੍ਹਂ ਕਤ’’ਨ੍ਤਿ ਤਸ੍ਸ ਸੁਕਤਕਰਣਂ ਵਿਨਾਸੇਤਿ. ਅਨਗਾਰਿਯੋਪਿ ਸਾਮਣੇਰਕਾਲਤੋ ਪਭੁਤਿ ਆਚਰਿਯੇਨ ਵਾ ਉਪਜ੍ਝਾਯੇਨ ਵਾ ਚਤੂਹਿ ਪਚ੍ਚਯੇਹਿ ਉਦ੍ਦੇਸਪਰਿਪੁਚ੍ਛਾਦੀਹਿ ਚ ਅਨੁਗ੍ਗਹੇਤ੍ਵਾ ਧਮ੍ਮਕਥਾਨਯਪਕਰਣਕੋਸਲ੍ਲਾਦੀਨਿ ਸਿਕ੍ਖਾਪਿਤੋ, ਅਪਰੇਨ ਸਮਯੇਨ ਰਾਜਰਾਜਮਹਾਮਤ੍ਤਾਦੀਹਿ ਸਕ੍ਕਤੋ ਗਰੁਕਤੋ ਆਚਰਿਯੁਪਜ੍ਝਾਯੇਸੁ ਅਚਿਤ੍ਤੀਕਤੋ ਚਰਮਾਨੋ ‘‘ਅਯਂ ਅਮ੍ਹੇਹਿ ਦਹਰਕਾਲੇ ਏਵ ਅਨੁਗ੍ਗਹਿਤੋ ਸਂਵਦ੍ਧਿਤੋ ਚ, ਅਥ ਚ ਪਨਿਦਾਨਿ ਨਿਸ੍ਸਿਨੇਹੋ ਜਾਤੋ’’ਤਿ ਵੁਚ੍ਚਮਾਨੋ ‘‘ਕਿਂ ਮਯ੍ਹਂ ਤੁਮ੍ਹੇਹਿ ਕਤ’’ਨ੍ਤਿ ਤੇਸਂ ਸੁਕਤਕਰਣਂ ਵਿਨਾਸੇਤਿ.

‘‘ਬਹੁਸ੍ਸੁਤੇਪਿ ਪੁਗ੍ਗਲੇ ਅਜ੍ਝੋਤ੍ਥਰਿਤ੍ਵਾ ਈਦਿਸਸ੍ਸ ਚੇਵ ਬਹੁਸ੍ਸੁਤਸ੍ਸ ਅਨਿਯਤਾ ਗਤਿ, ਤਵ ਵਾ ਮਮ ਵਾ ਕੋ ਵਿਸੇਸੋ’’ਤਿਆਦਿਨਾ ਨਯੇਨ ਉਪ੍ਪਜ੍ਜਮਾਨੋ ਯੁਗਗ੍ਗਾਹਲਕ੍ਖਣੋ ਪਲ਼ਾਸੋ. ਸੋ ਪਰਗੁਣੇਹਿ ਅਤ੍ਤਨੋ ਗੁਣਾਨਂ ਸਮਕਰਣਰਸੋ. ਤਥਾ ਹੇਸ ਪਰੇਸਂ ਗੁਣੇ ਡਂਸਿਤ੍ਵਾ ਵਿਯ ਅਤ੍ਤਨੋ ਗੁਣੇਹਿ ਸਮੇ ਕਰੋਤੀਤਿ ਪਲ਼ਾਸੋਤਿ ਵੁਚ੍ਚਤਿ, ਸੋ ਏਤਸ੍ਸ ਅਤ੍ਥੀਤਿ ਪਲ਼ਾਸੀ. ਮਕ੍ਖੀ ਚ ਪਲ਼ਾਸੀ ਚ ਮਕ੍ਖਿਪਲ਼ਾਸਿਨੋ, ਤੇਸਂ ਭਾਵੋ ਮਕ੍ਖਿਪਲ਼ਾਸਿਤਾ. ਅਤ੍ਥਤੋ ਪਨ ਮਕ੍ਖੋ ਚੇਵ ਪਲ਼ਾਸੋ ਚ.

ਇਸ੍ਸਤਿ ਪਰਸਮ੍ਪਤ੍ਤਿਂ ਨ ਸਹਤੀਤਿ ਇਸ੍ਸੁਕੀ. ਮਚ੍ਛਰਾਯਤਿ ਅਤ੍ਤਨੋ ਸਮ੍ਪਤ੍ਤਿਂ ਨਿਗੂਹਤਿ, ਪਰੇਸਂ ਸਾਧਾਰਣਭਾਵਂ ਨ ਸਹਤਿ, ਮਚ੍ਛੇਰਂ ਵਾ ਏਤਸ੍ਸ ਅਤ੍ਥੀਤਿ ਮਚ੍ਛਰੀ. ਸਠਯਤਿ ਨ ਸਮ੍ਮਾ ਭਾਸਤੀਤਿ ਸਠੋ, ਅਤ੍ਤਨੋ ਅਵਿਜ੍ਜਮਾਨਗੁਣਪ੍ਪਕਾਸਨਲਕ੍ਖਣੇਨ ਸਾਠੇਯ੍ਯੇਨ ਸਮਨ੍ਨਾਗਤੋ ਕੇਰਾਟਿਕਪੁਗ੍ਗਲੋ. ਕੇਰਾਟਿਕੋ ਚ ਆਨਨ੍ਦਮਚ੍ਛੋ ਵਿਯ ਹੋਤਿ. ਆਨਨ੍ਦਮਚ੍ਛੋ ਨਾਮ ਕਿਰ ਮਚ੍ਛਾਨਂ ਨਙ੍ਗੁਟ੍ਠਂ ਦਸ੍ਸੇਤਿ, ਸਪ੍ਪਾਨਂ ਸੀਸਂ ‘‘ਤੁਮ੍ਹੇਹਿ ਸਦਿਸੋ ਅਹ’’ਨ੍ਤਿ ਜਾਨਾਪੇਤੁਂ, ਏਵਮੇਵ ਕੇਰਾਟਿਕੋ ਪੁਗ੍ਗਲੋ ਯਂ ਯਂ ਸੁਤ੍ਤਨ੍ਤਿਕਂ ਵਾ ਆਭਿਧਮ੍ਮਿਕਂ ਵਾ ਉਪਸਙ੍ਕਮਤਿ, ਤਂ ਤਂ ਏਵਂ ਵਦਤਿ ‘‘ਅਹਂ ਤੁਮ੍ਹਾਕਂ ਅਨ੍ਤੇਵਾਸੀ, ਤੁਮ੍ਹੇ ਮਯ੍ਹਂ ਅਨੁਕਮ੍ਪਕਾ, ਨਾਹਂ ਤੁਮ੍ਹੇ ਮੁਞ੍ਚਾਮੀ’’ਤਿ ‘‘ਏਵਮੇਤੇ ‘ਸਗਾਰਵੋ ਅਯਂ ਅਮ੍ਹੇਸੁ ਸਪ੍ਪਤਿਸ੍ਸੋ’ਤਿ ਮਞ੍ਞਿਸ੍ਸਨ੍ਤੀ’’ਤਿ. ਸਾਠੇਯ੍ਯੇਨ ਹਿ ਸਮਨ੍ਨਾਗਤਸ੍ਸ ਪੁਗ੍ਗਲਸ੍ਸ ਅਸਨ੍ਤਗੁਣਸਮ੍ਭਾਵਨੇਨ ਚਿਤ੍ਤਾਨੁਰੂਪਕਿਰਿਯਾਵਿਹਰਤੋ ‘‘ਏਵਂਚਿਤ੍ਤੋ ਏਵਂਕਿਰਿਯੋ’’ਤਿ ਦੁਵਿਞ੍ਞੇਯ੍ਯਤ੍ਤਾ ਕੁਚ੍ਛਿਂ ਵਾ ਪਿਟ੍ਠਿਂ ਵਾ ਜਾਨਿਤੁਂ ਨ ਸਕ੍ਕਾ. ਯਤੋ ਸੋ –

‘‘ਵਾਮੇਨ ਸੂਕਰੋ ਹੋਤਿ, ਦਕ੍ਖਿਣੇਨ ਅਜਾਮਿਗੋ;

ਸਰੇਨ ਨੇਲਕੋ ਹੋਤਿ, ਵਿਸਾਣੇਨ ਜਰਗ੍ਗਵੋ’’ਤਿ. (ਦੀ. ਨਿ. ਅਟ੍ਠ. ੨.੨੯੬; ਵਿਭ. ਅਟ੍ਠ. ੮੯੪; ਮਹਾਨਿ. ਅਟ੍ਠ. ੧੬੬) –

ਏਵਂ ਵੁਤ੍ਤਯਕ੍ਖਸੂਕਰਸਦਿਸੋ ਹੋਤਿ. ਕਤਪਾਪਪਟਿਚ੍ਛਾਦਨਲਕ੍ਖਣਾ ਮਾਯਾ, ਸਾ ਅਸ੍ਸ ਅਤ੍ਥੀਤਿ ਮਾਯਾਵੀ.

ਥਮ੍ਭਸਮਙ੍ਗਿਤਾਯ ਥਦ੍ਧੋ. ਵਾਤਭਰਿਤਭਸ੍ਤਾਸਦਿਸਥਦ੍ਧਭਾਵਪਗ੍ਗਹਿਤਸਿਰਅਨਿਵਾਤਵੁਤ੍ਤਿਕਾਰਕਰੋਤਿ ਥਮ੍ਭੋ. ਯੇਨ ਸਮਨ੍ਨਾਗਤੋ ਪੁਗ੍ਗਲੋ ਗਿਲਿਤਨਙ੍ਗਲਸਦਿਸੋ ਵਿਯ ਅਜਗਰੋ, ਵਾਤਭਰਿਤਭਸ੍ਤਾ ਵਿਯ ਚ ਥਦ੍ਧੋ ਹੁਤ੍ਵਾ ਗਰੁਟ੍ਠਾਨਿਯੇ ਦਿਸ੍ਵਾ ਓਨਮਿਤੁਮ੍ਪਿ ਨ ਇਚ੍ਛਤਿ, ਪਰਿਯਨ੍ਤੇਨੇਵ ਚਰਤਿ. ਅਬ੍ਭੁਨ੍ਨਤਿਲਕ੍ਖਣੋ ਅਤਿਮਾਨੋ, ਸੋ ਏਤਸ੍ਸ ਅਤ੍ਥੀਤਿ ਅਤਿਮਾਨੀ.

ਸਂ ਅਤ੍ਤਨੋ ਦਿਟ੍ਠਿਂ ਪਰਾਮਸਤਿ ਸਭਾਵਂ ਅਤਿਕ੍ਕਮਿਤ੍ਵਾ ਪਰਤੋ ਆਮਸਤੀਤਿ ਸਨ੍ਦਿਟ੍ਠਿਪਰਾਮਾਸੀ. ਆਧਾਨਂ ਗਣ੍ਹਾਤੀਤਿ ਆਧਾਨਗ੍ਗਾਹੀ. ‘‘ਆਧਾਨ’’ਨ੍ਤਿ ਦਲ਼੍ਹਂ ਵੁਚ੍ਚਤਿ, ਦਲ਼੍ਹਗ੍ਗਾਹੀਤਿ ਅਤ੍ਥੋ. ਯੁਤ੍ਤਂ ਕਾਰਣਂ ਦਿਸ੍ਵਾਵ ਲਦ੍ਧਿਂ ਪਟਿਨਿਸ੍ਸਜ੍ਜਤੀਤਿ ਪਟਿਨਿਸ੍ਸਗ੍ਗੀ, ਦੁਕ੍ਖੇਨ ਕਿਚ੍ਛੇਨ ਕਸਿਰੇਨ ਬਹੁਮ੍ਪਿ ਕਾਰਣਂ ਦਸ੍ਸੇਤ੍ਵਾ ਨ ਸਕ੍ਕਾ ਪਟਿਨਿਸ੍ਸਗ੍ਗਿਂ ਕਾਤੁਨ੍ਤਿ ਦੁਪ੍ਪਟਿਨਿਸ੍ਸਗ੍ਗੀ, ਯੋ ਅਤ੍ਤਨੋ ਦਿਟ੍ਠਿਂ ‘‘ਇਦਮੇਵ ਸਚ੍ਚ’’ਨ੍ਤਿ ਦਲ਼੍ਹਂ ਗਣ੍ਹਿਤ੍ਵਾ ਅਪਿ ਬੁਦ੍ਧਾਦੀਹਿ ਕਾਰਣਂ ਦਸ੍ਸੇਤ੍ਵਾ ਵੁਚ੍ਚਮਾਨੋ ਨ ਪਟਿਨਿਸ੍ਸਜ੍ਜਤਿ, ਤਸ੍ਸੇਤਂ ਅਧਿਵਚਨਂ. ਤਾਦਿਸੋ ਹਿ ਪੁਗ੍ਗਲੋ ਯਂ ਯਦੇਵ ਧਮ੍ਮਂ ਵਾ ਅਧਮ੍ਮਂ ਵਾ ਸੁਣਾਤਿ, ਤਂ ਸਬ੍ਬਂ ‘‘ਏਵਂ ਅਮ੍ਹਾਕਂ ਆਚਰਿਯੇਹਿ ਕਥਿਤਂ, ਏਵਂ ਅਮ੍ਹੇਹਿ ਸੁਤ’’ਨ੍ਤਿ ਕੁਮ੍ਮੋਵ ਅਙ੍ਗਾਨਿ ਸਕੇ ਕਪਾਲੇ ਅਨ੍ਤੋਯੇਵ ਸਮੋਦਹਤਿ. ਯਥਾ ਹਿ ਕਚ੍ਛਪੋ ਅਤ੍ਤਨੋ ਪਾਦਾਦਿਕੇ ਅਙ੍ਗੇ ਕੇਨਚਿ ਘਟ੍ਟਿਤੇ ਸਬ੍ਬਾਨਿ ਅਙ੍ਗਾਨਿ ਅਤ੍ਤਨੋ ਕਪਾਲੇਯੇਵ ਸਮੋਦਹਤਿ, ਨ ਬਹਿ ਨੀਹਰਤਿ, ਏਵਮਯਮ੍ਪਿ ‘‘ਨ ਸੁਨ੍ਦਰੋ ਤਵ ਗਾਹੋ, ਛਡ੍ਡੇਹਿ ਨ’’ਨ੍ਤਿ ਵੁਤ੍ਤੋ ਤਂ ਨ ਵਿਸ੍ਸਜ੍ਜੇਤਿ, ਅਨ੍ਤੋਯੇਵ ਅਤ੍ਤਨੋ ਹਦਯੇ ਏਵ ਠਪੇਤ੍ਵਾ ਵਿਚਰਤਿ. ਯਥਾ ਕੁਮ੍ਭੀਲਾ ਗਹਿਤਂ ਨ ਪਟਿਨਿਸ੍ਸਜ੍ਜਨ੍ਤਿ, ਏਵਂ ਕੁਮ੍ਭੀਲਗ੍ਗਾਹਂ ਗਣ੍ਹਾਤਿ, ਨ ਵਿਸ੍ਸਜ੍ਜੇਤਿ. ਮਕ੍ਖਿਪਲ਼ਾਸਿਤਾਦਿਯੁਗਲ਼ਤ੍ਤਯੇਨ ਦਸ੍ਸਿਤੇ ਮਕ੍ਖਪਲ਼ਾਸਾਦਯੋ ਛ ਧਮ੍ਮੇ ਵਿਸੁਂ ਵਿਸੁਂ ਗਹੇਤ੍ਵਾ ‘‘ਏਕੂਨਵੀਸਤਿ ਧਮ੍ਮਾ’’ਤਿ ਵੁਤ੍ਤਂ. ਅਨੁਮਾਨਸੁਤ੍ਤਟ੍ਠਕਥਾਯਂ (ਮ. ਨਿ. ਅਟ੍ਠ. ੧.੧੮੧) ਪਨ ਮਕ੍ਖਪਲ਼ਾਸਾਦਯੋਪਿ ਯੁਗਲ਼ਵਸੇਨ ਏਕਂ ਕਤ੍ਵਾ ‘‘ਸੋਲ਼ਸ ਧਮ੍ਮਾ’’ਤਿ ਵੁਤ੍ਤਂ.

ਪਕਾਰੇਹਿ ਆਵਹਨਂ ਪਦਕ੍ਖਿਣਂ, ਤਤੋ ਪਦਕ੍ਖਿਣਤੋ ਗਹਣਸੀਲੋ ਪਦਕ੍ਖਿਣਗ੍ਗਾਹੀ, ਨ ਪਦਕ੍ਖਿਣਗ੍ਗਾਹੀ ਅਪ੍ਪਦਕ੍ਖਿਣਗ੍ਗਾਹੀ. ਯੋ ਵੁਚ੍ਚਮਾਨੋ ‘‘ਤੁਮ੍ਹੇ ਮਂ ਕਸ੍ਮਾ ਵਦਥ, ਅਹਂ ਅਤ੍ਤਨੋ ਕਪ੍ਪਿਯਾਕਪ੍ਪਿਯਂ ਸਾਵਜ੍ਜਾਨਵਜ੍ਜਂ ਅਤ੍ਥਾਨਤ੍ਥਂ ਜਾਨਾਮੀ’’ਤਿ ਵਦਤਿ, ਅਯਂ ਅਨੁਸਾਸਨਿਂ ਪਦਕ੍ਖਿਣਤੋ ਨ ਗਣ੍ਹਾਤਿ, ਵਾਮਤੋਵ ਗਣ੍ਹਾਤਿ, ਤਸ੍ਮਾ ‘‘ਅਪ੍ਪਦਕ੍ਖਿਣਗ੍ਗਾਹੀ’’ਤਿ ਵੁਚ੍ਚਤਿ, ਤੇਨਾਹ ‘‘ਯਥਾਨੁਸਿਟ੍ਠ’’ਨ੍ਤਿਆਦਿ.

ਉਦ੍ਦੇਸੇਤਿ ਪਾਤਿਮੋਕ੍ਖੁਦ੍ਦੇਸੇ. ਅਥ ਸਬ੍ਬਾਨੇਵ ਸਿਕ੍ਖਾਪਦਾਨਿ ਕਥਂ ਪਾਤਿਮੋਕ੍ਖੁਦ੍ਦੇਸਪਰਿਯਾਪਨ੍ਨਾਨੀਤਿ ਆਹ ‘‘ਯਸ੍ਸ ਸਿਯਾ ਆਪਤ੍ਤਿ, ਸੋ ਆਵਿਕਰੇਯ੍ਯਾਤਿ ਏਵਂ ਸਙ੍ਗਹਿਤਤ੍ਤਾ’’ਤਿ. ‘‘ਯਸ੍ਸ ਸਿਯਾ ਆਪਤ੍ਤੀ’’ਤਿ ਹਿ ਇਮਿਨਾ ਸਬ੍ਬਾਪਿ ਆਪਤ੍ਤਿਯੋ ਨਿਦਾਨੁਦ੍ਦੇਸੇ ਸਙ੍ਗਹਿਤਾਯੇਵ ਹੋਨ੍ਤਿ. ਪਞ੍ਚਹਿ ਸਹਧਮ੍ਮਿਕੇਹਿ ਸਿਕ੍ਖਿਤਬ੍ਬਤ੍ਤਾਤਿ ਲਬ੍ਭਮਾਨਵਸੇਨ ਵੁਤ੍ਤਂ. ਸਹਧਮ੍ਮਿਕੇਨ ਸਹਕਾਰਣੇਨਾਤਿਪਿ ਅਤ੍ਥੋ ਦਟ੍ਠਬ੍ਬੋ. ‘‘ਵਚਨਾਯਾ’’ਤਿ ਨਿਸ੍ਸਕ੍ਕੇ ਸਮ੍ਪਦਾਨਵਚਨਨ੍ਤਿ ਆਹ ‘‘ਤਤੋ ਮਮ ਵਚਨਤੋ’’ਤਿ. ਅਙ੍ਗਾਨਿ ਚੇਤ੍ਥ ਪਠਮਸਙ੍ਘਭੇਦਸਦਿਸਾਨਿ. ਅਯਂ ਪਨ ਵਿਸੇਸੋ – ਯਥਾ ਤਤ੍ਥ ਭੇਦਾਯ ਪਰਕ੍ਕਮਨਂ, ਏਵਂ ਇਧ ਅਵਚਨੀਯਕਰਣਤਾ ਦਟ੍ਠਬ੍ਬਾ.

ਦੁਬ੍ਬਚਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.