੧੩. ਕੁਲਦੂਸਕਸਿਕ੍ਖਾਪਦਵਣ੍ਣਨਾ

੪੩੧. ਤੇਰਸਮੇ ਕੀਟਾਗਿਰੀਤਿ ਤਸ੍ਸ ਨਿਗਮਸ੍ਸ ਨਾਮਂ. ਤਞ੍ਹਿ ਸਨ੍ਧਾਯ ਪਰਤੋ ‘‘ਨ ਅਸ੍ਸਜਿਪੁਨਬ੍ਬਸੁਕੇਹਿ ਭਿਕ੍ਖੂਹਿ ਕੀਟਾਗਿਰਿਸ੍ਮਿਂ ਵਤ੍ਥਬ੍ਬ’’ਨ੍ਤਿ ਵੁਤ੍ਤਂ. ਤੇਨ ਪਨ ਯੋਗਤੋ ਸੋ ਜਨਪਦੋਪਿ ‘‘ਕੀਟਾਗਿਰਿ’’ਇਚ੍ਚੇਵ ਸਙ੍ਖ੍ਯਂ ਗਤੋਤਿ ਆਹ ‘‘ਏਵਂਨਾਮਕੇ ਜਨਪਦੇ’’ਤਿ. ਆਵਾਸੇ ਨਿਯੁਤ੍ਤਾ ਆਵਾਸਿਕਾ, ਨਿਬਦ੍ਧਵਾਸਿਨੋ. ਤੇ ਅਕਤਂ ਸੇਨਾਸਨਂ ਕਰੋਨ੍ਤਿ, ਜਿਣ੍ਣਂ ਪਟਿਸਙ੍ਖਰੋਨ੍ਤਿ, ਕਤੇ ਇਸ੍ਸਰਾ ਹੋਨ੍ਤਿ. ਤੇਨਾਹ ‘‘ਸੋ ਯੇਸਂ ਆਯਤ੍ਤੋ…ਪੇ… ਤੇ ਆਵਾਸਿਕਾ’’ਤਿ. ਨਿਵਾਸੋ ਨਿਵਾਸਮਤ੍ਤਂ ਏਤੇਸਂ ਅਤ੍ਥੀਤਿ ਨੇਵਾਸਿਕਾਤਿ ਆਹ ‘‘ਯੇ ਪਨ ਕੇਵਲ’’ਨ੍ਤਿਆਦਿ. ਤੇਤਿ ਅਸ੍ਸਜਿਪੁਨਬ੍ਬਸੁਕਾ. ਛ ਜਨਾਤਿ ਪਣ੍ਡੁਕੋ ਲੋਹਿਤਕੋ ਮੇਤ੍ਤਿਯੋ ਭੂਮਜਕੋ ਅਸ੍ਸਜਿ ਪੁਨਬ੍ਬਸੁਕੋਤਿ ਇਮੇ ਛ ਜਨਾ. ਸਮ੍ਮਾਤਿ ਆਲਪਨਵਚਨਮੇਤਂ. ਆਯਮੁਖਭੂਤਾਤਿ ਆਯਸ੍ਸ ਮੁਖਭੂਤਾ. ਧੁਰਟ੍ਠਾਨੇਤਿ ਸਾਵਤ੍ਥਿਯਾ ਅਵਿਦੂਰੇ ਠਾਨੇ. ਵਸ੍ਸਾਨੇ ਹੇਮਨ੍ਤੇ ਚਾਤਿ ਦ੍ਵੀਸੁ ਉਤੂਸੁ ਵਸ੍ਸਨਤੋ ‘‘ਦ੍ਵੀਹਿ ਮੇਘੇਹੀ’’ਤਿ ਵੁਤ੍ਤਂ. ਦਿਯਡ੍ਢਭਿਕ੍ਖੁਸਹਸ੍ਸਤੋ ਗਣਾਚਰਿਯਾਨਂ ਛਨ੍ਨਂ ਜਨਾਨਂ ਅਧਿਕਤ੍ਤਾ ‘‘ਸਮਧਿਕ’’ਨ੍ਤਿ ਵੁਤ੍ਤਂ, ਸਾਧਿਕਨ੍ਤਿ ਅਤ੍ਥੋ. ਮ-ਕਾਰੋ ਪਦਸਨ੍ਧਿਵਸੇਨ ਆਗਤੋ. ਅਕਤਵਤ੍ਥੁਨ੍ਤਿ ਅਕਤਪੁਬ੍ਬਂ ਅਭਿਨਵਵਤ੍ਥੁਂ.

ਕਣਿਕਾਰਾਦਯੋ ਪੁਪ੍ਫਰੁਕ੍ਖਾ, ਜਾਤਿਸੁਮਨਾਦਯੋ ਪੁਪ੍ਫਗਚ੍ਛਾ. ਕੋਟ੍ਟਨਨ੍ਤਿ ਸਯਂ ਛਿਨ੍ਦਨਂ. ਕੋਟ੍ਟਾਪਨਨ੍ਤਿ ‘‘ਇਮਂ ਛਿਨ੍ਦ ਭਿਨ੍ਦਾ’’ਤਿ ਅਞ੍ਞੇਹਿ ਛੇਦਾਪਨਂ. ਆਲ਼ਿਯਾ ਬਨ੍ਧਨਨ੍ਤਿ ਯਥਾ ਗਚ੍ਛਮੂਲੇ ਉਦਕਂ ਸਨ੍ਤਿਟ੍ਠਤਿ, ਤਥਾ ਸਮਨ੍ਤਤੋ ਬਨ੍ਧਨਂ. ਉਦਕਸ੍ਸਾਤਿ ਅਕਪ੍ਪਿਯਉਦਕਸ੍ਸ. ਕਪ੍ਪਿਯਉਦਕਸਿਞ੍ਚਨਨ੍ਤਿ ਇਮਿਨਾਵ ਸਿਞ੍ਚਾਪਨਮ੍ਪਿ ਸਙ੍ਗਹਿਤਨ੍ਤਿ ਦਟ੍ਠਬ੍ਬਂ. ਨਨੁ ‘‘ਉਦਕਸ੍ਸ ਸੇਚਨਂ ਸੇਚਾਪਨ’’ਨ੍ਤਿ ਇਮਿਨਾਵ ਸਾਮਞ੍ਞਤੋ ਕਪ੍ਪਿਯਾਕਪ੍ਪਿਯਉਦਕਸਿਞ੍ਚਨਾਦਿਂ ਸਕ੍ਕਾ ਸਙ੍ਗਹੇਤੁਂ, ਤਸ੍ਮਾ ਕਪ੍ਪਿਯਉਦਕਸਿਞ੍ਚਨਾਦਿ ਕਸ੍ਮਾ ਵਿਸੁਂ ਵੁਤ੍ਤਨ੍ਤਿ? ‘‘ਆਰਾਮਾਦਿਅਤ੍ਥਂ ਰੋਪਿਤੇ ਅਕਪ੍ਪਿਯਵੋਹਾਰੇਸੁਪਿ ਕਪ੍ਪਿਯਉਦਕਸਿਞ੍ਚਨਾਦਿ ਵਟ੍ਟਤੀ’’ਤਿ ਵਕ੍ਖਮਾਨਤ੍ਤਾ ਇਧਾਪਿ ਵਿਭਾਗਂ ਕਤ੍ਵਾ ਕਪ੍ਪਿਯਉਦਕਸਿਞ੍ਚਨਾਦਿ ਵਿਸੁਂ ਦਸ੍ਸਿਤਂ. ਹਤ੍ਥਮੁਖਪਾਦਧੋਵਨਨ੍ਹਾਨੋਦਕਸਿਞ੍ਚਨਨ੍ਤਿ ਇਮਿਨਾਪਿ ਪਕਾਰਨ੍ਤਰੇਨ ਕਪ੍ਪਿਯਉਦਕਸਿਞ੍ਚਨਮੇਵ ਦਸ੍ਸੇਤਿ. ‘‘ਅਕਪ੍ਪਿਯਵੋਹਾਰੋ’’ਤਿ ਕੋਟ੍ਟਨਖਣਨਾਦਿਵਸੇਨ ਸਯਂ ਕਰਣਸ੍ਸਪਿ ਕਥਂ ਸਙ੍ਗਹੋਤਿ? ਅਕਪ੍ਪਿਯਨ੍ਤਿ ਵੋਹਰੀਯਤੀਤਿ ਅਕਪ੍ਪਿਯਵੋਹਾਰੋਤਿ ਅਕਪ੍ਪਿਯਭੂਤਂ ਕਰਣਕਾਰਾਪਨਾਦਿ ਸਬ੍ਬਮੇਵ ਸਙ੍ਗਹਿਤਂ, ਨ ਪਨ ਅਕਪ੍ਪਿਯਵਚਨਮਤ੍ਤਨ੍ਤਿ ਦਟ੍ਠਬ੍ਬਂ. ਕਪ੍ਪਿਯਵੋਹਾਰੇਪਿ ਏਸੇਵ ਨਯੋ. ਸੁਕ੍ਖਮਾਤਿਕਾਯ ਉਜੁਕਰਣਨ੍ਤਿ ਇਮਿਨਾ ਪੁਰਾਣਪਣ੍ਣਾਦਿਹਰਣਮ੍ਪਿ ਸਙ੍ਗਹਿਤਨ੍ਤਿ ਦਟ੍ਠਬ੍ਬਂ. ਕੁਦਾਲਾਦੀਨਿ ਭੂਮਿਯਂ ਠਪੇਤ੍ਵਾ ਠਾਨਤੋ ਹਤ੍ਥੇਨ ਗਹੇਤ੍ਵਾ ਠਾਨਮੇਵ ਪਾਕਟਤਰਨ੍ਤਿ ‘‘ਓਭਾਸੋ’’ਤਿ ਵੁਤ੍ਤਂ.

ਮਹਾਪਚ੍ਚਰਿਵਾਦਮ੍ਹਿ ਪਤਿਟ੍ਠਪੇਤੁਕਾਮੋ ਪਚ੍ਛਾ ਵਦਤਿ. ਵਨਤ੍ਥਾਯਾਤਿ ਇਦਂ ਕੇਚਿ ‘‘ਵਤਤ੍ਥਾਯਾ’’ਤਿ ਪਠਨ੍ਤਿ, ਤੇਸਂ ਵਤਿਅਤ੍ਥਾਯਾਤਿ ਅਤ੍ਥੋ. ਅਕਪ੍ਪਿਯਵੋਹਾਰੇਪਿ ਏਕਚ੍ਚਂ ਵਟ੍ਟਤੀਤਿ ਦਸ੍ਸੇਤੁਂ ‘‘ਨ ਕੇਵਲਞ੍ਚ ਸੇਸ’’ਨ੍ਤਿਆਦਿਮਾਹ. ਯਂ ਕਿਞ੍ਚਿ ਮਾਤਿਕਨ੍ਤਿ ਸੁਕ੍ਖਮਾਤਿਕਂ ਵਾ ਅਸੁਕ੍ਖਮਾਤਿਕਂ ਵਾ. ‘‘ਕਪ੍ਪਿਯਉਦਕਂ ਸਿਞ੍ਚਿਤੁ’’ਨ੍ਤਿ ਇਮਿਨਾ ‘‘ਕਪ੍ਪਿਯਉਦਕਂ ਸਿਞ੍ਚਥਾਤਿ ਵਤ੍ਤੁਮ੍ਪਿ ਵਟ੍ਟਤੀ’’ਤਿ ਦਸ੍ਸੇਤਿ. ਸਯਂ ਰੋਪੇਤੁਮ੍ਪਿ ਵਟ੍ਟਤੀਤਿ ਇਮਿਨਾ ‘‘ਰੋਪੇਹੀਤਿ ਵਤ੍ਤੁਂ ਵਟ੍ਟਤੀ’’ਤਿਪਿ ਸਿਦ੍ਧਂ. ਅਞ੍ਞਤ੍ਥਾਯ ਵਾ ਕਰੋਨ੍ਤਸ੍ਸਾਤਿ ਵਤ੍ਥੁਪੂਜਾਦਿਅਤ੍ਥਂ ਕਰੋਨ੍ਤਸ੍ਸ. ਕਸ੍ਮਾ ਨ ਅਨਾਪਤ੍ਤੀਤਿ ਵਤ੍ਥੁਪੂਜਨਤ੍ਥਾਯ ਗਨ੍ਥਨਾਦੀਸੁ ਕਸ੍ਮਾ ਨ ਅਨਾਪਤ੍ਤਿ. ਅਨਾਪਤ੍ਤਿਯੇਵਾਤਿ ਪਟਿਵਚਨਂ ਦਤ੍ਵਾ ਇਦਾਨਿ ਤਮੇਵ ਅਨਾਪਤ੍ਤਿਭਾਵਂ ਦਸ੍ਸੇਤੁਂ ‘‘ਯਥਾਹੀ’’ਤਿਆਦਿ ਵੁਤ੍ਤਂ. ਤਤ੍ਥਾਤਿ ਆਰਾਮਾਦਿਅਤ੍ਥਾਯ ਰੁਕ੍ਖਰੋਪਨੇ. ਤਥਾ ਵਤ੍ਥੁਪੂਜਨਤ੍ਥਾਯਪਿ ਅਨਾਪਤ੍ਤਿਯੇਵਾਤਿ ਰਤਨਤ੍ਤਯਪੂਜਨਤ੍ਥਾਯਪਿ ਕਪ੍ਪਿਯਵੋਹਾਰੇਨ ਪਰਿਯਾਯਾਦੀਹਿ ਚ ਗਨ੍ਥਾਪਨੇ ਅਨਾਪਤ੍ਤਿਯੇਵਾਤਿ ਅਤ੍ਥੋ.

‘‘ਤਥਾ ਵਤ੍ਥੁਪੂਜਨਤ੍ਥਾਯਾ’’ਤਿ ਹਿ ਸਾਮਞ੍ਞਤੋ ਵੁਤ੍ਤੇਪਿ ‘‘ਯਥਾ ਹਿ ਤਤ੍ਥ ਕਪ੍ਪਿਯਵੋਹਾਰੇਨ ਪਰਿਯਾਯਾਦੀਹਿ ਚਾ’’ਤਿ ਵੁਤ੍ਤਤ੍ਤਾ ਕਪ੍ਪਿਯਵੋਹਾਰਾਦੀਹਿ ਗਨ੍ਥਾਪਨੇ ਏਵ ਅਨਾਪਤ੍ਤਿ ਵਿਞ੍ਞਾਯਤਿ, ਨ ਸਯਂ ਗਨ੍ਥਨੇ, ਤੇਨੇਵ ਪਰੋ ਸਯਂ ਗਨ੍ਥਨਮ੍ਪਿ ਕਸ੍ਮਾ ਨ ਵਟ੍ਟਤੀਤਿ ਚੋਦੇਨ੍ਤੋ ‘‘ਨਨੁ ਚਾ’’ਤਿਆਦਿਮਾਹ. ਯਥਾ ਆਰਾਮਾਦਿਅਤ੍ਥਂ ਕਪ੍ਪਿਯਪਥਵਿਯਂ ਸਯਂ ਰੋਪੇਤੁਮ੍ਪਿ ਵਟ੍ਟਤਿ, ਤਥਾ ਵਤ੍ਥੁਪੂਜਨਤ੍ਥਾਯ ਸਯਂ ਗਨ੍ਥਨੇਪਿ ਕਸ੍ਮਾ ਨ ਵਟ੍ਟਤੀਤਿ ਚੋਦਕਸ੍ਸ ਅਧਿਪ੍ਪਾਯੋ. ਵੁਤ੍ਤਨ੍ਤਿਆਦਿ ਆਚਰਿਯਸ੍ਸ ਪਰਿਹਾਰੋ. ਅਥ ‘‘ਨ ਪਨ ਮਹਾਅਟ੍ਠਕਥਾਯ’’ਨ੍ਤਿ ਕਸ੍ਮਾ ਵਦਤਿ. ਮਹਾਪਚ੍ਚਰਿਆਦੀਸੁ ਵੁਤ੍ਤਮ੍ਪਿ ਹਿ ਪਮਾਣਮੇਵਾਤਿ ਨਾਯਂ ਵਿਰੋਧੋ, ਮਹਾਅਟ੍ਠਕਥਾਯਂ ਅਵੁਤ੍ਤਮ੍ਪਿ ਤਤ੍ਥੇਵ ਵੁਤ੍ਤੇਨ ਸਂਸਨ੍ਦਿਤ੍ਵਾ ਪਮਾਣਮੇਵਾਤਿ ਪਤਿਟ੍ਠਾਪੇਤੁਂ ਵੁਤ੍ਤਤ੍ਤਾ. ਤਂ ਕਥਨ੍ਤਿ ਮਞ੍ਞੇਯ੍ਯਾਸੀਤਿ ਸਮ੍ਬਨ੍ਧੋ. ਮਹਾਅਟ੍ਠਕਥਾਯਞ੍ਚ ਕਪ੍ਪਿਯਉਦਕਸੇਚਨਂ ਵੁਤ੍ਤਂ, ਤਂ ਕਥਨ੍ਤਿ ਏਤ੍ਥਾਯਮਧਿਪ੍ਪਾਯੋ. ਕਿਞ੍ਚਾਪਿ ਮਹਾਅਟ੍ਠਕਥਾਯਂ ਆਰਾਮਾਦਿਅਤ੍ਥਾਯ ਕਪ੍ਪਿਯਪਥਵਿਯਂ ਸਯਂ ਰੋਪਨਂ ਨ ਵੁਤ੍ਤਂ, ਕਪ੍ਪਿਯਉਦਕਸ੍ਸ ਪਨ ਸਯਂ ਸਿਞ੍ਚਨਂ ਵੁਤ੍ਤਮੇਵ, ਤਸ੍ਮਾ ਯਥਾ ਆਰਾਮਾਦਿਅਤ੍ਥਾਯ ਕਪ੍ਪਿਯਉਦਕਂ ਸਯਂ ਸਿਞ੍ਚਿਤੁਮ੍ਪਿ ਵਟ੍ਟਤਿ, ਤਥਾ ਵਤ੍ਥੁਪੂਜਨਤ੍ਥਾਯ ਸਯਂ ਗਨ੍ਥਨਮ੍ਪਿ ਕਸ੍ਮਾ ਨ ਵਟ੍ਟਤੀਤਿ. ਤਮ੍ਪਿ ਨ ਵਿਰੁਜ੍ਝਤੀਤਿ ਯਦੇਤਂ ਆਰਾਮਾਦਿਅਤ੍ਥਾਯ ਸਯਂ ਰੋਪਨਂ ਕਪ੍ਪਿਯਉਦਕਸਿਞ੍ਚਨਞ੍ਚ ਵੁਤ੍ਤਂ, ਤਮ੍ਪਿ ਨ ਵਿਰੁਜ੍ਝਤਿ. ਕਥਂ ਤਂ ਨ ਵਿਰੁਜ੍ਝਤੀਤਿ ਆਹ ‘‘ਤਤ੍ਰਹੀ’’ਤਿਆਦਿ. ਏਤਂ ਵੁਤ੍ਤਨ੍ਤਿ ਮਾਲਾਵਚ੍ਛਂ ਰੋਪੇਨ੍ਤਿਪਿ ਰੋਪਾਪੇਨ੍ਤਿਪਿ ਸਿਞ੍ਚਨ੍ਤਿਪਿ ਸਿਞ੍ਚਾਪੇਨ੍ਤਿਪੀਤਿ ਏਤਂ ਵੁਤ੍ਤਂ. ਅਞ੍ਞਤ੍ਰ ਪਨ ਪਰਿਯਾਯੋ ਅਤ੍ਥੀਤਿ ‘‘ਮਾਲਾਵਚ੍ਛਂ ਰੋਪੇਨ੍ਤਿਪਿ ਰੋਪਾਪੇਨ੍ਤਿਪਿ ਸਿਞ੍ਚਨ੍ਤਿਪਿ ਸਿਞ੍ਚਾਪੇਨ੍ਤਿਪੀ’’ਤਿ ਕੁਲਸਙ੍ਗਹਤ੍ਥਾਯ ਰੋਪਨਸਿਞ੍ਚਨਂ ਸਨ੍ਧਾਯ ਵੁਤ੍ਤਤ੍ਤਾ ਤਤੋ ਅਞ੍ਞਤ੍ਰ ਆਰਾਮਾਦਿਅਤ੍ਥਾਯ ਮਾਲਾਵਚ੍ਛਰੋਪਨੇ ਪਰਿਯਾਯੋ ਅਤ੍ਥਿ. ਤਤ੍ਥ ਪਰਿਯਾਯਂ ਇਧ ਚ ਪਰਿਯਾਯਾਭਾਵਂ ਞਤ੍ਵਾਤਿ ਤਤ੍ਥ ‘‘ਮਾਲਾਵਚ੍ਛਂ ਰੋਪੇਨ੍ਤੀ’’ਤਿਆਦੀਸੁ ‘‘ਮਾਲਾਵਚ੍ਛ’’ਨ੍ਤਿ ਵਿਸੇਸਵਚਨਸਬ੍ਭਾਵਤੋ ਪਰਿਯਾਯਂ, ਇਧ ‘‘ਗਨ੍ਥੇਨ੍ਤੀ’’ਤਿਆਦੀਸੁ ਤਥਾਵਿਧਵਿਸੇਸਵਚਨਾਭਾਵਤੋ ਪਰਿਯਾਯਾਭਾਵਞ੍ਚ ਞਤ੍ਵਾ.

ਨਨੁ ਚ ਯਥਾ ‘‘ਗਨ੍ਥੇਨ੍ਤੀ’’ਤਿ ਸਾਮਞ੍ਞਤੋ ਵੁਤ੍ਤਤ੍ਤਾ ਪਰਿਯਾਯੋ ਨ ਲਬ੍ਭਤੀਤਿ ਯਸ੍ਸ ਕਸ੍ਸਚਿ ਅਤ੍ਥਾਯ ਸਯਂ ਗਨ੍ਥਨਂ ਨ ਵਟ੍ਟਤਿ, ਏਵਂ ‘‘ਗਨ੍ਥਾਪੇਨ੍ਤੀ’’ਤਿ ਸਾਮਞ੍ਞਤੋ ਵੁਤ੍ਤਤ੍ਤਾ ਪਰਿਯਾਯੇਨ ਗਨ੍ਥਾਪਨਮ੍ਪਿ ਨ ਵਟ੍ਟਤੀਤਿ ਆਪਜ੍ਜਤਿ. ਏਵਞ੍ਚ ਸਤਿ ਪਰਤੋ ‘‘ਏਵਂ ਜਾਨ, ਏਵਂ ਕਤੇ ਸੋਭੇਯ੍ਯ, ਯਥਾ ਏਤਾਨਿ ਪੁਪ੍ਫਾਨਿ ਨ ਵਿਕਿਰਿਯਨ੍ਤਿ, ਤਥਾ ਕਰੋਹੀਤਿਆਦਿਨਾ ਕਪ੍ਪਿਯਵਚਨੇਨ ਕਾਰੇਤੁਂ ਵਟ੍ਟਤੀ’’ਤਿ ਇਦਂ ਵਿਰੁਜ੍ਝਤੀਤਿ? ਨ ਵਿਰੁਜ੍ਝਤਿ, ਪਰਿਯਾਯੇਨ ਹਿ ਕਾਰਾਪਨਂ ਗਨ੍ਥਾਪਨਮੇਵ ਨ ਹੋਤਿ, ਤਸ੍ਮਾ ਯਥਾਵੁਤ੍ਤਨਯੇਨ ਪਰਿਯਾਯਤੋ ਕਾਰਾਪਨਂ ਵਟ੍ਟਤਿ. ਸਬ੍ਬਂ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ ਹੇਟ੍ਠਾ ਵੁਤ੍ਤਂ ਵਿਨਿਚ੍ਛਯਮੇਵ ਸਙ੍ਖੇਪਤੋ ਨਿਗਮੇਤਿ. ਹਰਣਾਦੀਸੁ ਕਸ੍ਮਾ ਅਨਾਪਤ੍ਤੀਤਿ ਵਤ੍ਥੁਪੂਜਨਤ੍ਥਾਯ ਹਰਣਾਦੀਸੁ ਕਸ੍ਮਾ ਅਨਾਪਤ੍ਤਿ. ਕੁਲਿਤ੍ਥਿਆਦੀਨਂ ਅਤ੍ਥਾਯ ਹਰਣਤੋਤਿ ਕੁਲਿਤ੍ਥਿਆਦੀਨਂ ਹਰਣਸ੍ਸ ਤਤ੍ਥ ਵੁਤ੍ਤਤ੍ਤਾਤਿ ਅਧਿਪ੍ਪਾਯੋ. ਤੇਨੇਵਾਹ ‘‘ਹਰਣਾਧਿਕਾਰੇ ਹੀ’’ਤਿਆਦਿ. ਮਾਲਨ੍ਤਿ ਪੁਪ੍ਫਦਾਮਂ. ਮਞ੍ਜਰੀ ਵਿਯਾਤਿ ਕੁਸੁਮਮਞ੍ਜਰੀ ਵਿਯ. ਹਾਰਸਦਿਸਨ੍ਤਿ ਮੁਤ੍ਤਾਹਾਰਸਦਿਸਂ.

ਪਾਚਿਤ੍ਤਿਯਞ੍ਚੇਵ ਦੁਕ੍ਕਟਞ੍ਚਾਤਿ ਪਥਵੀਖਣਨਪਚ੍ਚਯਾ ਪਾਚਿਤ੍ਤਿਯਂ, ਕੁਲਸਙ੍ਗਹਪਚ੍ਚਯਾ ਦੁਕ੍ਕਟਂ. ਅਕਪ੍ਪਿਯਵੋਹਾਰੇਨਾਤਿ ‘‘ਇਦਂ ਖਣ, ਇਦਂ ਰੋਪੇਹੀ’’ਤਿਆਦਿਅਕਪ੍ਪਿਯਵੋਹਾਰੇਨ. ਦੁਕ੍ਕਟਮੇਵਾਤਿ ਕੁਲਸਙ੍ਗਹਪਚ੍ਚਯਾ ਦੁਕ੍ਕਟਂ. ਉਭਯਤ੍ਥਾਤਿ ਕਪ੍ਪਿਯਾਕਪ੍ਪਿਯਪਥਵਿਯਂ. ਸਬ੍ਬਤ੍ਥਾਤਿ ਕੁਲਸਙ੍ਗਹਪਰਿਭੋਗਆਰਾਮਾਦਿਅਤ੍ਥਾਯ ਰੋਪਿਤੇ. ਦੁਕ੍ਕਟਮ੍ਪੀਤਿ ਨ ਕੇਵਲਂ ਪਾਚਿਤ੍ਤਿਯਮੇਵ. ਕਪ੍ਪਿਯੇਨਾਤਿ ਕਪ੍ਪਿਯੇਨ ਉਦਕੇਨ. ਤੇਸਂਯੇਵ ਦ੍ਵਿਨ੍ਨਨ੍ਤਿ ਕੁਲਦੂਸਨਪਰਿਭੋਗਾਨਂ. ਦੁਕ੍ਕਟਨ੍ਤਿ ਕੁਲਸਙ੍ਗਹਤ੍ਥਾਯ ਸਯਂ ਸਿਞ੍ਚਨੇ ਕਪ੍ਪਿਯਵੋਹਾਰੇਨ ਅਕਪ੍ਪਿਯਵੋਹਾਰੇਨ ਵਾ ਸਿਞ੍ਚਾਪਨੇ ਚ ਦੁਕ੍ਕਟਂ, ਪਰਿਭੋਗਤ੍ਥਾਯ ਪਨ ਸਯਂ ਸਿਞ੍ਚਨੇ ਅਕਪ੍ਪਿਯਵੋਹਾਰੇਨ ਸਿਞ੍ਚਾਪਨੇ ਚ ਦੁਕ੍ਕਟਂ. ਆਪਤ੍ਤਿਬਹੁਲਤਾ ਵੇਦਿਤਬ੍ਬਾਤਿ ਏਤ੍ਥ ਸਯਂ ਸਿਞ੍ਚਨੇ ਧਾਰਾਪਚ੍ਛੇਦਗਣਨਾਯ ਆਪਤ੍ਤਿਗਣਨਾ ਵੇਦਿਤਬ੍ਬਾ. ਸਿਞ੍ਚਾਪਨੇ ਪਨ ਪੁਨਪ੍ਪੁਨਂ ਆਣਾਪੇਨ੍ਤਸ੍ਸ ਵਾਚਾਯ ਵਾਚਾਯ ਆਪਤ੍ਤਿ, ਸਕਿਂ ਆਣਤ੍ਤਸ੍ਸ ਬਹੂਨਂ ਸਿਞ੍ਚਨੇਪਿ ਏਕਾਵ.

ਦੁਕ੍ਕਟਪਾਚਿਤ੍ਤਿਯਾਨੀਤਿ ਕੁਲਸਙ੍ਗਹਪਚ੍ਚਯਾ ਦੁਕ੍ਕਟਂ, ਭੂਤਗਾਮਪਾਤਬ੍ਯਤਾਯ ਪਾਚਿਤ੍ਤਿਯਂ. ਅਞ੍ਞਤ੍ਥਾਤਿ ਵਤ੍ਥੁਪੂਜਾਦਿਅਤ੍ਥਾਯ ਓਚਿਨਨੇ. ਸਕਿਂ ਆਣਤ੍ਤੋਤਿ ਅਕਪ੍ਪਿਯਵੋਹਾਰੇਨ ਆਣਤ੍ਤੋ. ਪਾਚਿਤ੍ਤਿਯਮੇਵਾਤਿ ਅਕਪ੍ਪਿਯਵਚਨੇਨ ਆਣਤ੍ਤਤ੍ਤਾ ਪਾਚਿਤ੍ਤਿਯਂ. ਕਪ੍ਪਿਯਵਚਨੇਨ ਪਨ ਵਤ੍ਥੁਪੂਜਾਦਿਅਤ੍ਥਾਯ ਓਚਿਨਾਪੇਨ੍ਤਸ੍ਸ ਅਨਾਪਤ੍ਤਿਯੇਵ.

ਗਨ੍ਥਨੇਨ ਨਿਬ੍ਬਤ੍ਤਂ ਗਨ੍ਤਿਮਂ. ਏਸ ਨਯੋ ਸੇਸੇਸੁਪਿ. ਨ ਵਟ੍ਟਤੀਤਿ ਕੁਲਸਙ੍ਗਹਤ੍ਥਾਯ ਵਤ੍ਥੁਪੂਜਾਦਿਅਤ੍ਥਾਯ ਵਾ ਵੁਤ੍ਤਨਯੇਨ ਕਰੋਨ੍ਤਸ੍ਸ ਚ ਕਾਰਾਪੇਨ੍ਤਸ੍ਸ ਚ ਦੁਕ੍ਕਟਨ੍ਤਿ ਅਤ੍ਥੋ. ਪੁਰਿਮਨਯੇਨੇਵਾਤਿ ‘‘ਭਿਕ੍ਖੁਸ੍ਸ ਵਾ’’ਤਿਆਦਿਨਾ ਵੁਤ੍ਤਨਯੇਨ. ਧਮ੍ਮਾਸਨਵਿਤਾਨੇ ਬਦ੍ਧਕਣ੍ਟਕੇਸੁ ਪੁਪ੍ਫਾਨਿ ਵਿਜ੍ਝਿਤ੍ਵਾ ਠਪੇਨ੍ਤੀਤਿ ਸਮ੍ਬਨ੍ਧੋ. ਉਪਰੂਪਰਿ ਵਿਜ੍ਝਿਤ੍ਵਾ ਛਤ੍ਤਸਦਿਸਂ ਕਤ੍ਵਾ ਆਵੁਣਨਤੋ ‘‘ਛਤ੍ਤਾਤਿਛਤ੍ਤਂ ਵਿਯਾ’’ਤਿ ਵੁਤ੍ਤਂ. ‘‘ਕਦਲਿਕ੍ਖਨ੍ਧਮ੍ਹੀ’’ਤਿਆਦਿਨਾ ਵੁਤ੍ਤਂ ਸਬ੍ਬਮੇਵ ਸਨ੍ਧਾਯ ‘‘ਤਂ ਅਤਿਓਲ਼ਾਰਿਕਮੇਵਾ’’ਤਿ ਵੁਤ੍ਤਂ, ਸਯਂ ਕਰੋਨ੍ਤਸ੍ਸ ਅਕਪ੍ਪਿਯਵਚਨੇਨੇਵ ਕਾਰਾਪੇਨ੍ਤਸ੍ਸ ਚ ਦੁਕ੍ਕਟਮੇਵਾਤਿ ਅਤ੍ਥੋ. ਪੁਪ੍ਫਵਿਜ੍ਝਨਤ੍ਥਨ੍ਤਿ ਵੁਤ੍ਤਤ੍ਤਾ ਪੁਪ੍ਫਾਨਿ ਵਿਜ੍ਝਿਤੁਂਯੇਵ ਕਣ੍ਟਕਂ ਬਨ੍ਧਿਤੁਂ ਨ ਵਟ੍ਟਤਿ, ਪੁਪ੍ਫਦਾਮਾਦਿਬਨ੍ਧਨਤ੍ਥਂ ਪਨ ਵਟ੍ਟਤਿ. ਕਣ੍ਟਕਮ੍ਪਿ ਬਨ੍ਧਿਤੁਂ ਨ ਵਟ੍ਟਤੀਤਿ ਚ ਇਦਂ ਅਟ੍ਠਕਥਾਚਰਿਯਪ੍ਪਮਾਣੇਨ ਗਹੇਤਬ੍ਬਂ. ਪਵੇਸੇਤੁਂ ਨ ਵਟ੍ਟਤੀਤਿ ਵੁਤ੍ਤਤ੍ਤਾ ਪੁਪ੍ਫਚ੍ਛਿਦ੍ਦੇ ਅਪਵੇਸੇਤ੍ਵਾ ਉਪਰੂਪਰਿ ਠਪੇਤੁਂ ਵਟ੍ਟਤਿ. ਜਾਲਮਯਂ ਵਿਤਾਨਂ ਜਾਲਵਿਤਾਨਂ. ਨਾਗਦਨ੍ਤਕਮ੍ਪਿ ਸਚ੍ਛਿਦ੍ਦਕਂਯੇਵ ਗਹੇਤਬ੍ਬਂ. ਪੁਪ੍ਫਪਟਿਚ੍ਛਕਂ ਦਣ੍ਡਾਦੀਹਿ ਕਤਪੁਪ੍ਫਾਧਾਰਣਂ, ਤਮ੍ਪਿ ਸਚ੍ਛਿਦ੍ਦਮੇਵ ਇਧ ਵੁਤ੍ਤਂ. ਅਸੋਕਪਿਣ੍ਡਿਯਾਤਿ ਅਸੋਕਪੁਪ੍ਫਮਞ੍ਜਰਿਕਾਯ. ‘‘ਧਮ੍ਮਰਜ੍ਜੁ ਨਾਮ ਚੇਤਿਯਂ ਵਾ ਬੋਧਿਂ ਵਾ ਪੁਪ੍ਫਪਵੇਸਨਤ੍ਥਂ ਆਵਿਜ੍ਝਿਤ੍ਵਾ ਬਦ੍ਧਰਜ੍ਜੂ’’ਤਿ ਮਹਾਗਣ੍ਠਿਪਦੇ ਮਜ੍ਝਿਮਗਣ੍ਠਿਪਦੇ ਚ ਵੁਤ੍ਤਂ, ਤਸ੍ਮਾ ਤਥਾਬਦ੍ਧਾਯ ਰਜ੍ਜੁਯਾ ਚੇਤਿਯਸ੍ਸ ਚ ਅਨ੍ਤਰੇ ਪੁਪ੍ਫਾਨਿ ਪਵੇਸੇਤੁਂ ਵਟ੍ਟਤੀਤਿ ਵਿਞ੍ਞਾਯਤਿ. ਗਣ੍ਠਿਪਦੇ ਪਨ ‘‘ਧਮ੍ਮਰਜ੍ਜੁਨ੍ਤਿ ਸਿਥਿਲਂ ਵਟ੍ਟਿਕਂ ਰਜ੍ਜੁਂ ਕਤ੍ਵਾ ਬੋਧਿਂ ਵਾ ਚੇਤਿਯਂ ਵਾ ਪਰਿਕ੍ਖਿਪਿਤ੍ਵਾ ਧਮ੍ਮਾਸਨੇ ਵਾ ਲਮ੍ਬਿਤ੍ਵਾ ਤਤ੍ਥ ਪੁਪ੍ਫਾਨਿ ਪਵੇਸੇਨ੍ਤੀ’’ਤਿ ਵੁਤ੍ਤਂ, ਤਸ੍ਮਾ ਸਿਥਿਲਵਟ੍ਟਿਕਾਯ ਰਜ੍ਜੁਯਾ ਅਨ੍ਤਰੇਪਿ ਪੁਪ੍ਫਾਨਿ ਪਵੇਸੇਤੁਂ ਵਟ੍ਟਤੀਤਿ ਵਿਞ੍ਞਾਯਤਿ, ਵੀਮਂਸਿਤ੍ਵਾ ਯੁਤ੍ਤਤਰਂ ਗਹੇਤਬ੍ਬਂ. ਉਭਯਤ੍ਥਾਪਿ ਪਨੇਤ੍ਥ ਨੇਵਤ੍ਥਿ ਵਿਰੋਧੋਤਿ ਅਮ੍ਹਾਕਂ ਖਨ੍ਤਿ.

ਮਤ੍ਥਕਦਾਮਨ੍ਤਿ ਧਮ੍ਮਾਸਨਾਦਿਮਤ੍ਥਕੇ ਲਮ੍ਬਕਦਾਮਂ. ਪੁਪ੍ਫੇਹਿ ਵੇਠੇਨ੍ਤੀਤਿ ਪੁਪ੍ਫਦਾਮੇਨ ਵੇਠੇਨ੍ਤਿ. ਤੇਸਂਯੇਵਾਤਿ ਉਪ੍ਪਲਾਦੀਨਂਯੇਵ. ਵਾਕੇਨ ਵਾ ਦਣ੍ਡਕੇਨ ਵਾਤਿ ਵਿਸੁਂ ਅਚ੍ਛਿਨ੍ਨੇਨ ਪੁਪ੍ਫਸਹਿਤੇਨੇਵ ਵਾਕੇਨ ਵਾ ਦਣ੍ਡਕੇਨ ਵਾ. ਖਨ੍ਧੇ ਠਪਿਤਕਾਸਾਵਸ੍ਸਾਤਿ ਖਨ੍ਧੇ ਠਪਿਤਸਙ੍ਘਾਟਿਂ ਸਨ੍ਧਾਯ ਵੁਤ੍ਤਂ. ਤਞ੍ਹਿ ਤਥਾ ਬਨ੍ਧਿਤੁਂ ਸਕ੍ਕਾ ਭਵੇਯ੍ਯ. ਇਮਿਨਾਵ ਅਞ੍ਞਮ੍ਪਿ ਤਾਦਿਸਂ ਕਾਸਾਵਂ ਵਾ ਵਤ੍ਥਂ ਵਾ ਵੁਤ੍ਤਨਯੇਨ ਬਨ੍ਧਿਤ੍ਵਾ ਤਤ੍ਥ ਪੁਪ੍ਫਾਨਿ ਪਕ੍ਖਿਪਿਤੁਂ ਵਟ੍ਟਤੀਤਿ ਸਿਦ੍ਧਂ. ਅਂਸਭਣ੍ਡਿਕਂ ਪਸਿਬ੍ਬਕੇ ਪਕ੍ਖਿਤ੍ਤਸਦਿਸਤ੍ਤਾ ਵੇਠਿਮਂ ਨਾਮ ਨ ਜਾਤਂ, ਤਸ੍ਮਾ ਸਿਥਿਲਬਨ੍ਧਸ੍ਸ ਅਨ੍ਤਰਨ੍ਤਰਾ ਪਕ੍ਖਿਪਿਤੁਂ ਵਟ੍ਟਤੀਤਿ ਵਦਨ੍ਤਿ.

ਪੁਪ੍ਫਪਟੇ ਚ ਦਟ੍ਠਬ੍ਬਨ੍ਤਿ ਪੁਪ੍ਫਪਟਂ ਕਰੋਨ੍ਤਸ੍ਸ ਦੀਘਤੋ ਪੁਪ੍ਫਦਾਮਸ੍ਸ ਹਰਣਪਚ੍ਚਾਹਰਣਵਸੇਨ ਪੂਰਣਂ ਸਨ੍ਧਾਯ ਵੁਤ੍ਤਂ. ਤਿਰਿਯਤੋ ਹਰਣਂ ਪਨ ਵਾਯਿਮਂ ਨਾਮ ਹੋਤਿ, ਨ ਪੂਰਿਮਂ. ਪੁਰਿਮਟ੍ਠਾਨਂ ਅਤਿਕ੍ਕਾਮੇਤੀਤਿ ਏਤ੍ਥ ‘‘ਅਫੁਸਾਪੇਤ੍ਵਾਪਿ ਅਤਿਕ੍ਕਾਮੇਨ੍ਤਸ੍ਸ ਆਪਤ੍ਤਿਯੇਵਾ’’ਤਿ ਤੀਸੁਪਿ ਗਣ੍ਠਿਪਦੇਸੁ ਵੁਤ੍ਤਂ. ‘‘ਪੁਰਿਮਟ੍ਠਾਨਂ ਅਤਿਕ੍ਕਾਮੇਤੀ’’ਤਿ ਅਵਿਸੇਸੇਨ ਵੁਤ੍ਤਤ੍ਤਾ ਤਂ ਯੁਤ੍ਤਂ. ਕੇਚਿ ਪਨ ‘‘ਅਞ੍ਞਮਞ੍ਞਂ ਅਫੁਸਾਪੇਤ੍ਵਾ ਅਨੇਕਕ੍ਖਤ੍ਤੁਂ ਪਰਿਕ੍ਖਿਪਿਤੁਂ ਵਟ੍ਟਤੀ’’ਤਿ ਵਦਨ੍ਤੀਤਿ ਵੁਤ੍ਤਂ, ਤਤ੍ਥ ਕਾਰਣਂ ਨ ਦਿਸ੍ਸਤਿ. ਬਨ੍ਧਿਤੁਂ ਵਟ੍ਟਤੀਤਿ ਪੁਪ੍ਫਰਹਿਤਾਯ ਸੁਤ੍ਤਕੋਟਿਯਾ ਵਾਕਕੋਟਿਯਾ ਵਾ ਬਨ੍ਧਿਤੁਂ ਵਟ੍ਟਤਿ. ਏਕਵਾਰਂ ਹਰਿਤ੍ਵਾ ਵਾ ਪਰਿਕ੍ਖਿਪਿਤ੍ਵਾ ਵਾਤਿ ਇਦਂ ਪੁਬ੍ਬੇ ਵੁਤ੍ਤਚੇਤਿਯਾਦਿਪਰਿਕ੍ਖੇਪਂ ਪੁਪ੍ਫਪਟਕਰਣਞ੍ਚ ਸਨ੍ਧਾਯ ਵੁਤ੍ਤਂ, ਤਸ੍ਮਾ ਚੇਤਿਯਂ ਵਾ ਬੋਧਿਂ ਵਾ ਪਰਿਕ੍ਖਿਪਨ੍ਤੇਨ ਏਕਵਾਰਂ ਪਰਿਕ੍ਖਿਪਿਤ੍ਵਾ ਪੁਰਿਮਟ੍ਠਾਨਂ ਸਮ੍ਪਤ੍ਤੇ ਅਞ੍ਞਸ੍ਸ ਦਾਤਬ੍ਬਂ, ਤੇਨਪਿ ਏਕਵਾਰਂ ਪਰਿਕ੍ਖਿਪਿਤ੍ਵਾ ਤਥੇਵ ਕਾਤਬ੍ਬਂ. ਪੁਪ੍ਫਪਟਂ ਕਰੋਨ੍ਤੇਨ ਚ ਏਕਵਾਰਂ ਹਰਿਤ੍ਵਾ ਅਞ੍ਞਸ੍ਸ ਦਾਤਬ੍ਬਂ, ਤੇਨਪਿ ਤਥੇਵ ਕਾਤਬ੍ਬਂ. ਸਚੇਪਿ ਦ੍ਵੇਯੇਵ ਭਿਕ੍ਖੂ ਉਭੋਸੁ ਪਸ੍ਸੇਸੁ ਠਤ੍ਵਾ ਪਰਿਯਾਯੇਨ ਹਰਨ੍ਤਿ, ਵਟ੍ਟਤਿਯੇਵਾਤਿ ਵਦਨ੍ਤਿ.

ਪੂਰਿਤਨ੍ਤਿ ਦੀਘਤੋ ਪਸਾਰਣਵਸੇਨ ਪੂਰਿਤਂ. ਵਾਯਿਤੁਂ ਨ ਲਭਤੀਤਿ ਦੀਘਤੋ ਪਸਾਰਿਤੇ ਤਿਰਿਯਤੋ ਹਰਣਂ ਵਾਯਨਂ ਨਾਮ ਹੋਤੀਤਿ ਏਕਵਾਰਮ੍ਪਿ ਪੁਪ੍ਫਗੁਣਂ ਤਿਰਿਯਤੋ ਹਰਿਤੁਂ ਨ ਵਟ੍ਟਤਿ. ਪੁਪ੍ਫਾਨਿ ਠਪੇਨ੍ਤੇਨਾਤਿ ਅਗਨ੍ਥਿਤਾਨਿ ਪਾਕਤਿਕਪੁਪ੍ਫਾਨਿ ਠਪੇਨ੍ਤੇਨ. ਪੁਪ੍ਫਦਾਮਂ ਪਨ ਪੂਜਨਤ੍ਥਾਯ ਭੂਮਿਯਂ ਠਪੇਨ੍ਤੇਨ ਫੁਸਾਪੇਤ੍ਵਾ ਵਾ ਅਫੁਸਾਪੇਤ੍ਵਾ ਵਾ ਦਿਗੁਣਂ ਕਤ੍ਵਾ ਠਪੇਤੁਂ ਨ ਵਟ੍ਟਤੀਤਿ ਵਦਨ੍ਤਿ. ਘਟਿਕਦਾਮਓਲਮ੍ਬਕੋਤਿ ਅਨ੍ਤੇ ਘਟਿਕਾਕਾਰਯੁਤ੍ਤੋ ਯਮਕਦਾਮਓਲਮ੍ਬਕੋ. ਏਕੇਕਂ ਪਨ ਦਾਮਂ ਨਿਕ੍ਖਨ੍ਤਸੁਤ੍ਤਕੋਟਿਯਾਵ ਬਨ੍ਧਿਤ੍ਵਾ ਓਲਮ੍ਬਿਤੁਂ ਵਟ੍ਟਤਿ, ਪੁਪ੍ਫਦਾਮਦ੍ਵਯਂ ਸਙ੍ਘਟਿਤੁਕਾਮੇਨਪਿ ਨਿਕ੍ਖਨ੍ਤਸੁਤ੍ਤਕੋਟਿਯਾਵ ਸੁਤ੍ਤਕੋਟਿਂ ਸਙ੍ਘਟਿਤੁਂ ਵਟ੍ਟਤਿ. ਅਡ੍ਢਚਨ੍ਦਾਕਾਰੇਨ ਮਾਲਾਗੁਣਪਰਿਕ੍ਖੇਪੋਤਿ ਅਡ੍ਢਚਨ੍ਦਾਕਾਰੇਨ ਮਾਲਾਗੁਣਸ੍ਸ ਪੁਨਪ੍ਪੁਨਂ ਹਰਣਪਚ੍ਚਾਹਰਣਵਸੇਨ ਪੂਰੇਤ੍ਵਾ ਪਰਿਕ੍ਖਿਪਨਂ. ਤੇਨੇਵ ਤਂ ਪੂਰਿਮੇ ਪਵਿਟ੍ਠਂ, ਤਸ੍ਮਾ ਏਤਮ੍ਪਿ ਅਡ੍ਢਚਨ੍ਦਾਕਾਰਂ ਪੁਨਪ੍ਪੁਨਂ ਹਰਣਪਚ੍ਚਾਹਰਣਵਸੇਨ ਪੂਰਿਤਂ ਨ ਵਟ੍ਟਤਿ. ਏਕਵਾਰਂ ਪਨ ਅਡ੍ਢਚਨ੍ਦਾਕਾਰੇਨ ਮਾਲਾਗੁਣਂ ਹਰਿਤੁਂ ਵਟ੍ਟਤੀਤਿ ਵਦਨ੍ਤਿ. ਪੁਪ੍ਫਦਾਮਕਰਣਨ੍ਤਿ ਏਤ੍ਥ ਸੁਤ੍ਤਕੋਟਿਯਂ ਗਹੇਤ੍ਵਾਪਿ ਏਕਤੋ ਕਾਤੁਂ ਨ ਵਟ੍ਟਤੀਤਿ ਵਦਨ੍ਤਿ. ਗੇਣ੍ਡੁਕਖਰਪਤ੍ਤਦਾਮਾਨਂ ਪਟਿਕ੍ਖਿਤ੍ਤਤ੍ਤਾ ਚੇਲਾਦੀਹਿ ਕਤਦਾਮਮ੍ਪਿ ਨ ਵਟ੍ਟਤਿ ਅਕਪ੍ਪਿਯਾਨੁਲੋਮਤ੍ਤਾਤਿ ਵਦਨ੍ਤਿ.

‘‘ਲਾਸਿਯਨਾਟਕਂ ਨਾਟੇਨ੍ਤੀ’’ਤਿ ਵਤ੍ਵਾ ਤਮੇਵ ਪਰਿਯਾਯਨ੍ਤਰੇਨ ਦਸ੍ਸੇਤੁਂ ‘‘ਰੇਚਕਂ ਦੇਨ੍ਤੀ’’ਤਿ ਵੁਤ੍ਤਂ, ਅਭਿਨਯਂ ਦਸ੍ਸੇਨ੍ਤੀਤਿ ਅਤ੍ਥੋ, ਅਤ੍ਤਨੋ ਅਧਿਪ੍ਪਾਯਂ ਪਕਾਸੇਤ੍ਵਾ ‘‘ਏਵਂ ਨਚ੍ਚਿਤਬ੍ਬ’’ਨ੍ਤਿ ਪਠਮਂ ਉਟ੍ਠਹਿਤ੍ਵਾ ਨਚ੍ਚਨਾਕਾਰਂ ਦਸ੍ਸੇਨ੍ਤੀਤਿ ਵੁਤ੍ਤਂ ਹੋਤਿ. ਕੇਚਿ ਪਨ ‘‘ਮੁਖੇ ਅਙ੍ਗੁਲਿਯੋ ਪਕ੍ਖਿਪਿਤ੍ਵਾ ਸਦ੍ਦਂ ਕਰੋਨ੍ਤਾ ਚਕ੍ਕਮਿਵ ਅਤ੍ਤਾਨਂ ਭਮਯਮਾਨਾ ਰੇਚਕਂ ਦੇਨ੍ਤਿ ਨਾਮਾ’’ਤਿ ਵਦਨ੍ਤਿ. ਏਕੇਕਾਯ ਪਨ੍ਤਿਯਾ ਅਟ੍ਠ ਅਟ੍ਠ ਪਦਾਨਿ ਅਸ੍ਸਾਤਿ ਅਟ੍ਠਪਦਂ. ‘‘ਅਟ੍ਠਾਪਦ’’ਨ੍ਤਿਪਿ ਪਠਨ੍ਤਿ. ਦਸਪਦੇਪਿ ਏਸੇਵ ਨਯੋ. ਪਦਾਨੀਤਿ ਚ ਸਾਰਿਆਦੀਨਂ ਪਤਿਟ੍ਠਾਨਟ੍ਠਾਨਾਨਿ. ਦਸਪਦਂ ਨਾਮ ਦ੍ਵੀਹਿ ਪਨ੍ਤੀਹਿ ਵੀਸਤਿਯਾ ਪਦੇਹਿ ਕੀਲ਼ਨਜੂਤਂ. ਆਕਾਸੇਯੇਵ ਕੀਲ਼ਨ੍ਤੀਤਿ ‘‘ਅਯਂ ਸਾਰੀ ਅਸੁਕਪਦਂ ਮਯਾ ਨੀਤਾ, ਅਯਂ ਅਸੁਕਪਦ’’ਨ੍ਤਿ ਕੇਵਲਂ ਮੁਖੇਨੇਵ ਵਦਨ੍ਤਾ ਆਕਾਸੇਯੇਵ ਜੂਤਂ ਕੀਲ਼ਨ੍ਤਿ. ਜੂਤਫਲਕੇਤਿ ਜੂਤਮਣ੍ਡਲੇ. ਪਾਸਕਕੀਲ਼ਾਯ ਕੀਲ਼ਨ੍ਤੀਤਿ ਪਾਸਕਂ ਵੁਚ੍ਚਤਿ ਛਸੁ ਪਸ੍ਸੇਸੁ ਏਕੇਕਂ ਯਾਵ ਛਕ੍ਕਂ ਦਸ੍ਸੇਤ੍ਵਾ ਕਤਕੀਲ਼ਨਂ, ਤਂ ਵਡ੍ਢੇਤ੍ਵਾ ਯਥਾਲਦ੍ਧਏਕਕਾਦਿਵਸੇਨ ਸਾਰਿਯੋ ਅਪਨੇਨ੍ਤਾ ਉਪਨੇਨ੍ਤਾ ਚ ਕੀਲ਼ਨ੍ਤਿ. ਘਟੇਨ ਕੀਲ਼ਾ ਘਟਿਕਾਤਿ ਏਕੇ.

ਮਞ੍ਜਟ੍ਠਿਯਾ ਵਾਤਿ ਮਞ੍ਜਟ੍ਠਿਰੁਕ੍ਖਸਾਰਂ ਗਹੇਤ੍ਵਾ ਪਕ੍ਕਕਸਾਵਂ ਸਨ੍ਧਾਯ ਵਦਤਿ. ਸਲਾਕਹਤ੍ਥਨ੍ਤਿ ਤਾਲਹੀਰਾਦੀਨਂ ਕਲਾਪਸ੍ਸੇਤਂ ਅਧਿਵਚਨਂ. ਬਹੂਸੁ ਸਲਾਕਾਸੁ ਵਿਸੇਸਰਹਿਤਂ ਏਕਂ ਸਲਾਕਂ ਗਹੇਤ੍ਵਾ ਤਾਸੁ ਪਕ੍ਖਿਪਿਤ੍ਵਾ ਪੁਨ ਤਂਯੇਵ ਉਦ੍ਧਰਨ੍ਤਾ ਸਲਾਕਹਤ੍ਥੇਨ ਕੀਲ਼ਨ੍ਤੀਤਿ ਕੇਚਿ. ਪਣ੍ਣੇਨ ਵਂਸਾਕਾਰੇਨ ਕਤਾ ਨਾਲ਼ਿਕਾ ਪਣ੍ਣਨਾਲ਼ਿਕਾ. ਤੇਨੇਵਾਹ ‘‘ਤਂ ਧਮਨ੍ਤਾ’’ਤਿ. ਪੁਚ੍ਛਨ੍ਤਸ੍ਸ ਮੁਖਾਗਤਂ ਅਕ੍ਖਰਂ ਗਹੇਤ੍ਵਾ ਨਟ੍ਠਮੁਟ੍ਠਿਲਾਭਾਲਾਭਾਦਿਜਾਨਨਕੀਲ਼ਾ ਅਕ੍ਖਰਿਕਾਤਿਪਿ ਵਦਨ੍ਤਿ. ਹਤ੍ਥਿਸ੍ਮਿਨ੍ਤਿ ਨਿਮਿਤ੍ਤਤ੍ਥੇ ਭੁਮ੍ਮਂ, ਹਤ੍ਥਿਨਿਮਿਤ੍ਤਸਿਪ੍ਪੇਤਿ ਅਤ੍ਥੋ. ਅਸ੍ਸਸ੍ਮਿਨ੍ਤਿਆਦੀਸੁਪਿ ਏਸੇਵ ਨਯੋ. ‘‘ਉਸ੍ਸੇਲ਼ੇਨ੍ਤਿ ਅਪ੍ਫੋਟੇਨ੍ਤੀ’’ਤਿ ਦ੍ਵਿਨ੍ਨਂ ਪਦਾਨਂ ਅਤ੍ਥੋ ਪਾਕਟੋਯੇਵਾਤਿ ਨ ਵੁਤ੍ਤੋ. ਤਤ੍ਥ ਉਸ੍ਸੇਲ਼ੇਨ੍ਤੀਤਿ ਮੁਖੇਨ ਉਸ੍ਸੇਲ਼ਨਸਦ੍ਦਂ ਪਮੁਞ੍ਚਨ੍ਤਿ, ਮਹਨ੍ਤਂ ਕਤ੍ਵਾ ਅਬ੍ਯਤ੍ਤਸਦ੍ਦਂ ਪਵਤ੍ਤੇਨ੍ਤੀਤਿ ਅਤ੍ਥੋ. ‘‘ਅਜਾਨਂ ਸਞ੍ਞਂ ਦੇਨ੍ਤਾ ਅਜਪਾਲਕਾ ਵਿਯ ਮੁਖੇਨ ਵਾਤਂ ਨਿਚ੍ਛਾਰੇਨ੍ਤਾ ਸੁਖੁਮਂ ਅਬ੍ਯਤ੍ਤਨਾਦਂ ਪਵਤ੍ਤੇਨ੍ਤੀ’’ਤਿਪਿ ਵਦਨ੍ਤਿ. ਅਪ੍ਫੋਟੇਨ੍ਤੀਤਿ ਭੁਜਹਤ੍ਥਸਙ੍ਘਟ੍ਟਨਸਦ੍ਦਂ ਪਵਤ੍ਤੇਨ੍ਤਿ, ਵਾਮਹਤ੍ਥਂ ਉਰੇ ਠਪੇਤ੍ਵਾ ਦਕ੍ਖਿਣੇਨ ਪਾਣਿਨਾ ਤਤ੍ਥ ਤਾਲ਼ਨੇਨ ਸਦ੍ਦਂ ਕਰੋਨ੍ਤੀਤਿ ਅਤ੍ਥੋ. ਮੁਖਡਿਣ੍ਡਿਮਨ੍ਤਿ ਮੁਖਭੇਰਿਯਾ ਏਤਂ ਅਧਿਵਚਨਂ.

੪੩੨. ਪਸਾਦਾਵਹੇਨਾਤਿ ਪਸਾਦਜਨਨਕੇਨ. ਅਭਿਕ੍ਕਮਨਂ ਅਭਿਕ੍ਕਨ੍ਤਨ੍ਤਿ ਆਹ ‘‘ਗਮਨੇਨਾ’’ਤਿ. ਪਟਿਕ੍ਕਮਨਂ ਪਟਿਕ੍ਕਨ੍ਤਂ. ਨਿਵਤ੍ਤਨੇਨਾਤਿ ਨਿਵਤ੍ਤਿਮਤ੍ਤਂ ਦਸ੍ਸੇਤਿ. ਨਿਵਤ੍ਤੇਤ੍ਵਾ ਪਨ ਗਮਨਂ ਗਮਨਮੇਵ. ਅਭਿਮੁਖਂ ਲੋਕਿਤਂ ਆਲੋਕਿਤਨ੍ਤਿ ਆਹ ‘‘ਪੁਰਤੋ ਦਸ੍ਸਨੇਨਾ’’ਤਿ. ਇਤੋ ਚਿਤੋ ਚ ਦਸ੍ਸਨੇਨਾਤਿ ਅਨੁਦਿਸਾਪੇਕ੍ਖਨਂ ਦਸ੍ਸੇਤਿ. ਯਂਦਿਸਾਭਿਮੁਖੋ ਗਚ੍ਛਤਿ ਤਿਟ੍ਠਤਿ ਨਿਸੀਦਤਿ, ਤਦਭਿਮੁਖਂ ਪੇਕ੍ਖਨਂ ਆਲੋਕਿਤਂ, ਤਦਨੁਗਤਦਿਸਾਲੋਕਨਂ ‘‘ਵਿਲੋਕਿਤ’’ਨ੍ਤਿ ਹਿ ਵੁਚ੍ਚਤਿ. ਅਞ੍ਞਾਨਿਪਿ ਹੇਟ੍ਠਾ ਉਪਰਿ ਪਚ੍ਛਤੋ ਪੇਕ੍ਖਨਵਸੇਨ ਓਲੋਕਿਤਉਲ੍ਲੋਕਿਤਾਪਲੋਕਿਤਾਨਿ ਨਾਮ ਹੋਨ੍ਤਿ. ਤਾਨਿ ਪਨ ਨ ਸਮਣਸਾਰੁਪ੍ਪਾਨਿ ਅਪ੍ਪਸਾਦਾਵਹਾਨਿ, ਤੇਨੇਵੇਤ੍ਥ ਆਲੋਕਿਤਵਿਲੋਕਿਤਾਨੇਵ ਗਹਿਤਾਨਿ. ਤੇਸਨ੍ਤਿ ਸਮਾਸੇ ਗੁਣੀਭੂਤਾਨਿਪਿ ਪਬ੍ਬਾਨਿ ਪਰਾਮਸਤਿ. ‘‘ਪਬ੍ਬਸਙ੍ਕੋਚਨੇਨਾ’’ਤਿ ਹਿ ਵੁਤ੍ਤਤ੍ਤਾ ਪਬ੍ਬਾਨਿ ਤਤ੍ਥ ਗੁਣੀਭੂਤਾਨਿ ਸਙ੍ਕੋਚਨਸ੍ਸ ਪਧਾਨਤ੍ਤਾ. ਸਤਿਸਮ੍ਪਜਞ੍ਞੇਹੀਤਿ ਸਾਤ੍ਥਕਤਾਦਿਪਰਿਗ੍ਗਾਹਿਕਾਯ ਸਤਿਯਾ ਤਥਾਪਵਤ੍ਤਸਮ੍ਪਜਞ੍ਞੇਨ ਚ ਸਮਨ੍ਤਤੋ ਪਕਾਰੇਹਿ, ਪਕਟ੍ਠਂ ਵਾ ਸਵਿਸੇਸਂ ਜਾਨਾਤੀਤਿ ਸਮ੍ਪਜਾਨੋ, ਤਸ੍ਸ ਭਾਵੋ ਸਮ੍ਪਜਞ੍ਞਂ. ਤਥਾਪਵਤ੍ਤਞਾਣਸ੍ਸੇਤਂ ਅਧਿਵਚਨਂ. ਅਭਿਸਙ੍ਖਤਤ੍ਤਾਤਿ ਸਮ੍ਮਾ ਪਵਤ੍ਤਿਤਤ੍ਤਾ. ਹੇਟ੍ਠਾਖਿਤ੍ਤਚਕ੍ਖੂਤਿ ਖਨ੍ਧਂ ਅਨਾਮੇਤ੍ਵਾਵ ਅਧੋਖਿਤ੍ਤਚਕ੍ਖੁ. ਖਨ੍ਧਂ ਨਾਮੇਤ੍ਵਾ ਹਿ ਹੇਟ੍ਠਾਵਲੋਕਨਂ ਨ ਸਮਣਸਾਰੁਪ੍ਪਂ. ‘‘ਓਕ੍ਖਿਤ੍ਤਚਕ੍ਖੂ’’ਤਿ ਚ ਇਮਿਨਾ ਯੁਗਮਤ੍ਤਦਸ੍ਸਿਤਾ ਵੁਤ੍ਤਾ.

ਬੋਨ੍ਦੋਤਿ ਲੋਲੋ ਮਨ੍ਦਧਾਤੁਕੋਤਿ ਅਤ੍ਥੋ. ਭਕੁਟਿਂ ਕਤ੍ਵਾਤਿ ਭਮੁਕਭੇਦਂ ਕਤ੍ਵਾ. ਸਾਖਲ੍ਯੇਨ ਯੁਤ੍ਤਾਤਿ ‘‘ਤਤ੍ਥ ਕਤਮਂ ਸਾਖਲ੍ਯਂ? ਯਾ ਸਾ ਵਾਚਾ ਨੇਲਾ ਕਣ੍ਣਸੁਖਾ’’ਤਿਆਦਿਨਾ (ਧ. ਸ. ੧੩੫੦) ਨਯੇਨ ਵੁਤ੍ਤਸਾਖਲ੍ਯੇਨ ਸਮਨ੍ਨਾਗਤਾ, ਮੁਦੁਵਚਨਾਤਿ ਅਤ੍ਥੋ. ਨੇਲਾਤਿ ਏਲਂ ਵੁਚ੍ਚਤਿ ਦੋਸੋ, ਨਾਸ੍ਸਾ ਏਲਨ੍ਤਿ ਨੇਲਾ, ਨਿਦ੍ਦੋਸਾਤਿ ਅਤ੍ਥੋ. ਕਣ੍ਣਸੁਖਾਤਿ ਬ੍ਯਞ੍ਜਨਮਧੁਰਤਾਯ ਕਣ੍ਣਾਨਂ ਸੁਖਾ, ਸੂਚਿਨਾ ਵਿਜ੍ਝਨਂ ਵਿਯ ਕਣ੍ਣਸੂਲਂ ਨ ਜਨੇਤਿ. ਦਾਨਨਿਬਦ੍ਧਾਨੀਤਿ ਨਿਬਦ੍ਧਦਾਨਾਨਿ.

‘‘ਸਾਰਿਪੁਤ੍ਤਮੋਗ੍ਗਲ੍ਲਾਨੇ ਆਮਨ੍ਤੇਸੀ’’ਤਿ ਵਤ੍ਵਾ ‘‘ਗਚ੍ਛਥ ਤੁਮ੍ਹੇ ਸਾਰਿਪੁਤ੍ਤਾ’’ਤਿ ਵਚਨਤੋ ‘‘ਸਾਰਿਪੁਤ੍ਤਾ’’ਤਿ ਇਦਂ ਏਕਸੇਸਨਯੇਨ ਵੁਤ੍ਤਨ੍ਤਿ ਅਯਮਤ੍ਥੋ ਪਾਕਟੋਯੇਵਾਤਿ ਨ ਵੁਤ੍ਤੋ. ‘‘ਸਾਰਿਪੁਤ੍ਤਾ’’ਤਿ ਹਿ ਇਦਂ ਏਕਸੇਸਨਯੇਨ ਵੁਤ੍ਤਂ ਵਿਰੂਪੇਕਸੇਸਸ੍ਸਪਿ ਇਚ੍ਛਿਤਤ੍ਤਾ, ਤੇਨੇਵੇਤ੍ਥ ਬਹੁਵਚਨਨਿਦ੍ਦੇਸੋ ਕਤੋਤਿ. ਸਦ੍ਧਸ੍ਸ ਪਸਨ੍ਨਸ੍ਸਾਤਿ ਰਤਨਤ੍ਤਯਸ੍ਸ ਸਦ੍ਧਾਯ ਸਮਨ੍ਨਾਗਤਸ੍ਸ ਤਤੋਯੇਵ ਚ ਪਸਨ੍ਨਸ੍ਸ, ਕਮ੍ਮਫਲਸਦ੍ਧਾਯ ਵਾ ਸਮਨ੍ਨਾਗਤਤ੍ਤਾ ਸਦ੍ਧਸ੍ਸ ਰਤਨਤ੍ਤਯਪ੍ਪਸਾਦਬਹੁਲਤਾਯ ਪਸਨ੍ਨਸ੍ਸ.

੪੩੩. ਆਪਤ੍ਤਿਂ ਰੋਪੇਤਬ੍ਬਾਤਿ ਕੁਲਦੂਸਕਕਮ੍ਮੇਨ ਆਪਨ੍ਨਾਪਤ੍ਤਿਂ ਰੋਪੇਤਬ੍ਬਾ. ਤਸ੍ਮਿਂ ਵਿਹਾਰੇਤਿ ਬਹਿਗਾਮੇ ਵਿਹਾਰਂ ਸਨ੍ਧਾਯ ਵੁਤ੍ਤਂ. ਅਨ੍ਤੋਗਾਮੇ ਵਿਹਾਰੋ ਪਨ ‘‘ਤਸ੍ਮਿਂ ਗਾਮੇ ਨ ਵਸਿਤਬ੍ਬ’’ਨ੍ਤਿ ਇਮਿਨਾਵ ਸਙ੍ਗਹਿਤੋ ਗਾਮਗ੍ਗਹਣੇਨੇਵ ਗਹਿਤਤ੍ਤਾ. ‘‘ਤਸ੍ਮਿਂ ਵਿਹਾਰੇ’’ਤਿ ਵਚਨਤੋ ਤਸ੍ਸ ਗਾਮਸ੍ਸ ਸਾਮਨ੍ਤਾ ਅਞ੍ਞਸ੍ਮਿਂ ਵਿਹਾਰੇ ਵਸਿਤੁਂ ਵਟ੍ਟਤਿ. ਸਾਮਨ੍ਤਗਾਮੇ ਪਿਣ੍ਡਾਯ ਨ ਚਰਿਤਬ੍ਬਨ੍ਤਿ ਤਸ੍ਮਿਂ ਵਿਹਾਰੇ ਵਾਸਸ੍ਸ ਪਟਿਕ੍ਖਿਤ੍ਤਤ੍ਤਾ ਯਦਿ ਤਤ੍ਥ ਵਸਤਿ, ਤੇਨ ਸਾਮਨ੍ਤਗਾਮੇਪਿ ਪਿਣ੍ਡਾਯ ਨ ਚਰਿਤਬ੍ਬਨ੍ਤਿ ਅਧਿਪ੍ਪਾਯੋ. ਤਸ੍ਮਿਂ ਗਾਮੇ ਪਿਣ੍ਡਾਯ ਨ ਚਰਿਤਬ੍ਬਨ੍ਤਿ ਯਸ੍ਮਿਂ ਗਾਮੇ ਕੁਲਦੂਸਕਕਮ੍ਮਂ ਕਤਂ, ਤਸ੍ਮਿਂ ਗਾਮੇ ਨ ਚਰਿਤਬ੍ਬਂ. ਯਸ੍ਮਿਞ੍ਹਿ ਗਾਮੇ ਵਾ ਨਿਗਮੇ ਵਾ ਕੁਲਦੂਸਕਕਮ੍ਮਂ ਕਤਂ, ਯਸ੍ਮਿਞ੍ਚ ਵਿਹਾਰੇ ਵਸਤਿ, ਨੇਵ ਤਸ੍ਮਿਂ ਗਾਮੇ ਵਾ ਨਿਗਮੇ ਵਾ ਚਰਿਤੁਂ ਲਬ੍ਭਤਿ, ਨ ਵਿਹਾਰੇ ਵਸਿਤੁਂ. ਸਾਮਨ੍ਤਵਿਹਾਰੇ ਵਸਨ੍ਤੇਨ ਪਨ ਸਾਮਨ੍ਤਗਾਮੇ ਚਰਿਤੁਂ ਵਟ੍ਟਤਿ ਤਤ੍ਥ ਵਾਸਸ੍ਸ ਅਪ੍ਪਟਿਕ੍ਖਿਤ੍ਤਤ੍ਤਾ.

੪੩੫. ਅਟ੍ਠਾਰਸ ਵਤ੍ਤਾਨੀਤਿ ‘‘ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ, ਨ ਭਿਕ੍ਖੁਨੋਵਾਦਕਸਮ੍ਮੁਤਿ ਸਾਦਿਤਬ੍ਬਾ, ਸਮ੍ਮਤੇਨ ਭਿਕ੍ਖੁਨਿਯੋ ਨ ਓਵਦਿਤਬ੍ਬਾ, ਯਾਯ ਆਪਤ੍ਤਿਯਾ ਸਙ੍ਘੇਨ ਪਬ੍ਬਾਜਨੀਯਕਮ੍ਮਂ ਕਤਂ ਹੋਤਿ, ਨ ਸਾ ਆਪਤ੍ਤਿ ਆਪਜ੍ਜਿਤਬ੍ਬਾ ਅਞ੍ਞਾ ਵਾ ਤਾਦਿਸਿਕਾ ਤਤੋ ਵਾ ਪਾਪਿਟ੍ਠਤਰਾ, ਕਮ੍ਮਂ ਨ ਗਰਹਿਤਬ੍ਬਂ, ਕਮ੍ਮਿਕਾ ਨ ਗਰਹਿਤਬ੍ਬਾ, ਨ ਪਕਤਤ੍ਤਸ੍ਸ ਭਿਕ੍ਖੁਨੋ ਉਪੋਸਥੋ ਠਪੇਤਬ੍ਬੋ, ਨ ਪਵਾਰਣਾ ਠਪੇਤਬ੍ਬਾ, ਨ ਸਵਚਨੀਯਂ ਕਾਤਬ੍ਬਂ, ਨ ਅਨੁਵਾਦੋ ਠਪੇਤਬ੍ਬੋ, ਨ ਓਕਾਸੋ ਕਾਰੇਤਬ੍ਬੋ, ਨ ਚੋਦੇਤਬ੍ਬੋ, ਨ ਸਾਰੇਤਬ੍ਬੋ, ਨ ਭਿਕ੍ਖੂਹਿ ਸਮ੍ਪਯੋਜੇਤਬ੍ਬ’’ਨ੍ਤਿ ਏਵਮਾਗਤਾਨਿ ਅਟ੍ਠਾਰਸ ਵਤ੍ਤਾਨਿ.

ਅਸ੍ਸਜਿਪੁਨਬ੍ਬਸੁਕਪ੍ਪਧਾਨਾ ਅਸ੍ਸਜਿਪੁਨਬ੍ਬਸੁਕਾਤਿ ਵੁਤ੍ਤਾ ਸਹਚਰਣਞਾਯੇਨ. ਅਨੁਲੋਮਪਟਿਪਦਂ ਅਪ੍ਪਟਿਪਜ੍ਜਨਤਾਯਾਤਿ ਯਥਾਪਞ੍ਞਤ੍ਤਸਮ੍ਮਾਵਤ੍ਤਸਙ੍ਖਾਤਂ ਅਨੁਲੋਮਪਟਿਪਦਂ ਅਪ੍ਪਟਿਪਜ੍ਜਨਤਾਯ, ਯੇਨ ਵਤ੍ਤੇਨ ਚਿਣ੍ਣੇਨ ਸਙ੍ਘੋ ਅਨੁਲੋਮਿਕੋ ਹੋਤਿ, ਤਸ੍ਮਿਂ ਅਵਤ੍ਤਨਤੋਤਿ ਵੁਤ੍ਤਂ ਹੋਤਿ. ਨ ਪਨ੍ਨਲੋਮਾ ਹੋਨ੍ਤੀਤਿ ਪਤਿਤਲੋਮਾ ਨ ਹੋਨ੍ਤਿ, ਅਨੁਕੂਲਵੁਤ੍ਤਿਨੋ ਨ ਹੋਨ੍ਤੀਤਿ ਅਤ੍ਥੋ. ਨਿਤ੍ਥਰਣਮਗ੍ਗਂ ਨ ਪਟਿਪਜ੍ਜਨ੍ਤੀਤਿ ਅਨੁਲੋਮਵਤ੍ਤਸਙ੍ਖਾਤਂ ਨਿਤ੍ਥਰਣੂਪਾਯਂ ਨ ਪਟਿਪਜ੍ਜਨ੍ਤਿ, ਯੇਨ ਵਤ੍ਤੇਨ ਚਿਣ੍ਣੇਨ ਸਾਪਤ੍ਤਿਕਭਾਵਤੋ ਨਿਤ੍ਤਿਣ੍ਣਾ ਹੋਨ੍ਤਿ, ਤਸ੍ਮਿਂ ਨਿਤ੍ਥਰਣਕਵਤ੍ਤਸ੍ਮਿਂ ਨ ਵਤ੍ਤਨ੍ਤਿ, ਆਪਤ੍ਤਿਵੁਟ੍ਠਾਨਤ੍ਥਂ ਤੁਰਿਤਤੁਰਿਤਾ ਛਨ੍ਦਜਾਤਾ ਨ ਹੋਨ੍ਤੀਤਿ ਵੁਤ੍ਤਂ ਹੋਤਿ. ਦਸਹਿ ਅਕ੍ਕੋਸਵਤ੍ਥੂਹੀਤਿ ਜਾਤਿਨਾਮਗੋਤ੍ਤਕਮ੍ਮਸਿਪ੍ਪਆਬਾਧਲਿਙ੍ਗਕਿਲੇਸਆਪਤ੍ਤਿਹੀਨਸਙ੍ਖਾਤੇਹਿਦਸਹਿ ਅਕ੍ਕੋਸਕਾਰਣੇਹਿ. ਛਨ੍ਦਗਾਮਿਤਾ ਪਾਪੇਨ੍ਤੀਤਿਆਦੀਸੁ ਯ-ਕਾਰੋ ‘‘ਸਯਂ ਅਭਿਞ੍ਞਾ’’ਤਿਆਦੀਸੁ ਵਿਯ ਲੁਤ੍ਤਨਿਦ੍ਦਿਟ੍ਠੋਤਿ ਆਹ ‘‘ਛਨ੍ਦਗਾਮਿਤਾਯਪਿ ਪਾਪੇਨ੍ਤੀ’’ਤਿਆਦਿ. ਤੇਸਨ੍ਤਿ ਅਸ੍ਸਜਿਪੁਨਬ੍ਬਸੁਕਾਨਂ ਗਣਪਾਮੋਕ੍ਖਾਨਂ.

੪੩੬-੪੩੭. ਨਿਗਮਸ੍ਸ ਅਪਾਕਟਤ੍ਤਾ ਤਂ ਦਸ੍ਸੇਤੁਂ ‘‘ਤਤ੍ਥਾ’’ਤਿਆਦਿਮਾਹ. ਪਰਸਨ੍ਤਕਂ ਦੇਤਿ, ਦੁਕ੍ਕਟਮੇਵਾਤਿ ਵਿਸ੍ਸਾਸਗ੍ਗਾਹੇਨ ਪਰਸਨ੍ਤਕਂ ਗਹੇਤ੍ਵਾ ਦੇਨ੍ਤਂ ਸਨ੍ਧਾਯ ਵੁਤ੍ਤਂ. ਤਞ੍ਚ ਖੋ ਵਤ੍ਥੁਪੂਜਨਤ੍ਥਾਯਾਤਿ ਮਾਤਾਪਿਤੂਨਮ੍ਪਿ ਦੇਨ੍ਤੇਨ ਵਤ੍ਥੁਪੂਜਨਤ੍ਥਾਯ ਏਵ ਦਾਤਬ੍ਬਨ੍ਤਿ ਦਸ੍ਸੇਤਿ. ‘‘ਮਣ੍ਡਨਤ੍ਥਾਯ ਪਨ ਸਿਵਲਿਙ੍ਗਾਦਿਪੂਜਨਤ੍ਥਾਯਾਤਿ ਏਤ੍ਤਕਮੇਵ ਵੁਤ੍ਤਤ੍ਤਾ ਇਮਂ ਵਿਕ੍ਕਿਣਿਤ੍ਵਾ ਜੀਵਿਕਮ੍ਪਿ ਕਪ੍ਪੇਸ੍ਸਨ੍ਤੀਤਿ ਮਾਤੁਆਦੀਨਂ ਦਾਤੁਂ ਵਟ੍ਟਤੀ’’ਤਿ ਵਦਨ੍ਤਿ. ਕਸ੍ਸਚਿਪੀਤਿ ਞਾਤਕਸ੍ਸ ਅਞ੍ਞਾਤਕਸ੍ਸ ਵਾ ਕਸ੍ਸਚਿਪਿ. ਞਾਤਿਸਾਮਣੇਰੇਹੇਵਾਤਿ ਅਨੁਚ੍ਛਵਿਕਤ੍ਤਾ ਵੁਤ੍ਤਂ. ਸਮ੍ਪਤ੍ਤਾਨਂ ਸਾਮਣੇਰਾਨਂ ਉਪਡ੍ਢਭਾਗਂ ਦਾਤੁਂ ਵਟ੍ਟਤੀਤਿ ਸਙ੍ਘਿਕਸ੍ਸ ਲਾਭਸ੍ਸ ਉਪਚਾਰਸੀਮਗਤਾਨਂ ਸਾਮਣੇਰਾਨਮ੍ਪਿ ਸਨ੍ਤਕਤ੍ਤਾ ਤੇਸਮ੍ਪਿ ਉਪਡ੍ਢਭਾਗੋ ਲਬ੍ਭਤੇਵਾਤਿ ਕਤ੍ਵਾ ਵੁਤ੍ਤਂ. ਚੂਲ਼ਕਨ੍ਤਿ ਉਪਡ੍ਢਭਾਗਤੋਪਿ ਉਪਡ੍ਢਂ. ਚਤੁਤ੍ਥਭਾਗਸ੍ਸੇਤਂ ਅਧਿਵਚਨਂ.

‘‘ਸਾਮਣੇਰਾ…ਪੇ… ਠਪੇਨ੍ਤੀ’’ਤਿ ਇਦਂ ਵਸ੍ਸਗ੍ਗੇਨ ਅਭਾਜਿਯਂ ਸਨ੍ਧਾਯ ਵੁਤ੍ਤਂ. ਤਤ੍ਥ ਤਤ੍ਥਾਤਿ ਮਗ੍ਗੇ ਵਾ ਚੇਤਿਯਙ੍ਗਣੇ ਵਾ. ਦਾਪੇਤੁਂ ਨ ਲਭਨ੍ਤੀਤਿ ਸਾਮਣੇਰੇਹਿ ਦਾਪੇਤੁਂ ਅਨਨੁਚ੍ਛਵਿਕਤ੍ਤਾ ਵੁਤ੍ਤਂ. ਨ ਹਿ ਤਂ ਪੁਪ੍ਫਦਾਨਂ ਨਾਮ ਸਿਯਾ. ਯਦਿ ਹਿ ਤਥਾ ਆਗਤਾਨਂ ਤੇਸਂ ਦਾਨਂ ਪੁਪ੍ਫਦਾਨਂ ਭਵੇਯ੍ਯ, ਸਾਮਣੇਰੇਹਿਪਿ ਦਾਤੁਂ ਨ ਲਬ੍ਭੇਯ੍ਯ. ਸਯਮੇਵਾਤਿ ਸਾਮਣੇਰਾ ਸਯਮੇਵ. ਯਾਗੁਭਤ੍ਤਾਦੀਨਿ ਆਦਾਯਾਤਿ ਇਦਂ ਭਿਕ੍ਖੂਨਂ ਅਤ੍ਥਾਯ ਯਾਗੁਭਤ੍ਤਾਦਿਸਮ੍ਪਾਦਨਂ ਸਨ੍ਧਾਯ ਵੁਤ੍ਤਤ੍ਤਾ ‘‘ਨ ਵਟ੍ਟਤੀ’’ਤਿ ਅਵਿਸੇਸੇਨ ਵੁਤ੍ਤਂ.

ਵੁਤ੍ਤਨਯੇਨੇਵਾਤਿ ਮਾਤਾਪਿਤੂਨਂ ਤਾਵ ਹਰਿਤ੍ਵਾਪਿ ਹਰਾਪੇਤ੍ਵਾਪਿ ਪਕ੍ਕੋਸਿਤ੍ਵਾਪਿ ਪਕ੍ਕੋਸਾਪੇਤ੍ਵਾਪਿ ਦਾਤੁਂ ਵਟ੍ਟਤਿ, ਸੇਸਞਾਤਕਾਨਂ ਪਕ੍ਕੋਸਾਪੇਤ੍ਵਾਵ. ਮਾਤਾਪਿਤੂਨਞ੍ਚ ਹਰਾਪੇਨ੍ਤੇਨ ਞਾਤਿਸਾਮਣੇਰੇਹੇਵ ਹਰਾਪੇਤਬ੍ਬਂ, ਇਤਰੇ ਪਨ ਯਦਿ ਸਯਮੇਵ ਇਚ੍ਛਨ੍ਤਿ, ਵਟ੍ਟਤੀਤਿ ਇਮਂ ਪੁਪ੍ਫੇ ਵੁਤ੍ਤਨਯਂ ਫਲੇਪਿ ਅਤਿਦਿਸਤਿ, ਤਸ੍ਮਾ ਫਲਮ੍ਪਿ ਮਾਤਾਪਿਤੂਨਂ ਹਰਣਹਰਾਪਨਾਦਿਨਾ ਦਾਤੁਂ ਵਟ੍ਟਤਿ, ਸੇਸਞਾਤੀਨਂ ਪਕ੍ਕੋਸਾਪੇਤ੍ਵਾਵ. ਇਦਾਨਿ ‘‘ਯੋ ਹਰਿਤ੍ਵਾ ਵਾ ਹਰਾਪੇਤ੍ਵਾ ਵਾ…ਪੇ… ਇਸ੍ਸਰਵਤਾਯ ਦਦਤੋ ਥੁਲ੍ਲਚ੍ਚਯ’’ਨ੍ਤਿ ਇਮਂ ਪੁਪ੍ਫੇ ਵੁਤ੍ਤਨਯਂ ਫਲੇਪਿ ਸਙ੍ਖਿਪਿਤ੍ਵਾ ਦਸ੍ਸੇਨ੍ਤੋ ‘‘ਕੁਲਸਙ੍ਗਹਤ੍ਥਾਯ ਪਨਾ’’ਤਿਆਦਿਮਾਹ. ਖੀਣਪਰਿਬ੍ਬਯਾਨਨ੍ਤਿ ਆਗਨ੍ਤੁਕੇ ਸਨ੍ਧਾਯ ਵੁਤ੍ਤਂ. ਫਲਪਰਿਚ੍ਛੇਦੇਨ ਵਾਤਿ ‘‘ਏਤ੍ਤਕਾਨਿ ਫਲਾਨਿ ਦਾਤਬ੍ਬਾਨੀ’’ਤਿ ਏਵਂ ਫਲਪਰਿਚ੍ਛੇਦੇਨ ਵਾ. ਰੁਕ੍ਖਪਰਿਚ੍ਛੇਦੇਨ ਵਾਤਿ ‘‘ਇਮੇਹਿ ਰੁਕ੍ਖੇਹਿ ਦਾਤਬ੍ਬਾਨੀ’’ਤਿ ਏਵਂ ਰੁਕ੍ਖਪਰਿਚ੍ਛੇਦੇਨ ਵਾ. ਪਰਿਚ੍ਛਿਨ੍ਨੇਸੁਪਿ ਰੁਕ੍ਖੇਸੁ ‘‘ਇਧ ਫਲਾਨਿ ਸੁਨ੍ਦਰਾਨਿ, ਇਤੋ ਗਣ੍ਹਥਾ’’ਤਿ ਵਦਨ੍ਤੇਨ ਕੁਲਸਙ੍ਗਹੋ ਕਤੋ ਨਾਮ ਹੋਤੀਤਿ ਆਹ ‘‘ਏਵਂ ਪਨ ਨ ਵਤ੍ਤਬ੍ਬ’’ਨ੍ਤਿ.

ਰੁਕ੍ਖਚ੍ਛਲ੍ਲੀਤਿ ਰੁਕ੍ਖਤ੍ਤਚੋ. ਤੇਸਂ ਤੇਸਂ ਗਿਹੀਨਂ ਗਾਮਨ੍ਤਰਦੇਸਨ੍ਤਰਾਦੀਸੁ ਸਾਸਨਪਟਿਸਾਸਨਹਰਣਂ ਜਙ੍ਘਪੇਸਨਿਕਂ. ਤੇਨਾਹ ‘‘ਗਿਹੀਨਂ ਦੂਤੇਯ੍ਯਂ ਸਾਸਨਹਰਣਕਮ੍ਮ’’ਨ੍ਤਿ. ਦੂਤਸ੍ਸ ਕਮ੍ਮਂ ਦੂਤੇਯ੍ਯਂ. ਪਠਮਂ ਸਾਸਨਂ ਅਗ੍ਗਹੇਤ੍ਵਾਪਿ…ਪੇ… ਪਦੇ ਪਦੇ ਦੁਕ੍ਕਟਨ੍ਤਿ ਇਦਂ ਤਸ੍ਸ ਸਾਸਨਂ ਆਰੋਚੇਸ੍ਸਾਮੀਤਿ ਇਮਿਨਾ ਅਧਿਪ੍ਪਾਯੇਨ ਗਮਨਂ ਸਨ੍ਧਾਯ ਵੁਤ੍ਤਂ, ਤਸ੍ਸ ਪਨ ਸਾਸਨਂ ਪਟਿਕ੍ਖਿਪਿਤ੍ਵਾ ਸਯਮੇਵ ਕਾਰੁਞ੍ਞੇ ਠਿਤੋ ਗਨ੍ਤ੍ਵਾ ਅਤ੍ਤਨੋ ਪਤਿਰੂਪਂ ਸਾਸਨਂ ਆਰੋਚੇਤਿ, ਅਨਾਪਤ੍ਤਿ. ਪੁਬ੍ਬੇ ਵੁਤ੍ਤਪ੍ਪਕਾਰਨ੍ਤਿ ‘‘ਮਮ ਵਚਨੇਨ ਭਗਵਤੋ ਪਾਦੇ ਵਨ੍ਦਥਾ’’ਤਿਆਦਿਨਾ ਵੁਤ੍ਤਪ੍ਪਕਾਰਂ ਸਿਕ੍ਖਾਪਦੇ ਪਠਮਂ ਵੁਤ੍ਤਂ. ਪਕ੍ਕਮਤਾਯਸ੍ਮਾਤਿ ਇਦਂ ਪਬ੍ਬਾਜਨੀਯਕਮ੍ਮਵਸੇਨ ਵੁਤ੍ਤਂ. ਪੁਨ ਪਕ੍ਕਮਤਾਯਸ੍ਮਾਤਿ ਇਦਂ ਪਨ ਪਬ੍ਬਾਜਨੀਯਕਮ੍ਮਕਤਸ੍ਸ ਵਤ੍ਤਵਸੇਨ ਵੁਤ੍ਤਂ. ਪਠਮਸਙ੍ਘਭੇਦਸਦਿਸਾਨੇਵਾਤਿ ਏਤ੍ਥ ਅਙ੍ਗੇਸੁਪਿ ਯਥਾ ਤਤ੍ਥ ਪਰਕ੍ਕਮਨਂ, ਏਵਂ ਇਧ ਛਨ੍ਦਾਦੀਹਿ ਪਾਪਨਂ ਦਟ੍ਠਬ੍ਬਂ. ਸੇਸਂ ਤਾਦਿਸਮੇਵਾਤਿ.

ਕੁਲਦੂਸਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਨਿਗਮਨਵਣ੍ਣਨਾ

੪੪੨. ਪਠਮਂ ਆਪਤ੍ਤਿ ਆਪਜ੍ਜਨਂ ਏਤੇਸਨ੍ਤਿ ਪਠਮਾਪਤ੍ਤਿਕਾ. ਤਤ੍ਤਕਾਨਿ ਅਹਾਨੀਤਿ ਪਟਿਚ੍ਛਾਦਿਤਦਿਵਸਤੋ ਪਟ੍ਠਾਯ ਯਾਵ ਆਰੋਚਿਤਦਿਵਸੋ, ਤਾਵ ਦਿਵਸਪਕ੍ਖਮਾਸਸਂਵਚ੍ਛਰਵਸੇਨ ਯਤ੍ਤਕੋ ਕਾਲੋ ਅਤਿਕ੍ਕਨ੍ਤੋ, ਤਤ੍ਤਕਂ ਕਾਲਨ੍ਤਿ ਅਤ੍ਥੋ. ਅਕਾਮੇਨ ਅਵਸੇਨਾਤਿ ਏਤ੍ਥ ਅਪ੍ਪਟਿਕਮ੍ਮਕਤਾਯ ਆਪਤ੍ਤਿਯਾ ਸਗ੍ਗਮੋਕ੍ਖਾਵਰਣਭਾਵਤੋ ਅਨਿਚ੍ਛਨ੍ਤੇਨਪਿ ਪਰਿਵਸਿਤਬ੍ਬਨ੍ਤਿ ਅਧਿਪ੍ਪਾਯੋ. ਅਵ੍ਹਾਤਬ੍ਬੋਤਿ ਅਬ੍ਭਾਨਕਮ੍ਮਵਸੇਨ ਪਕ੍ਕੋਸਿਤਬ੍ਬੋ. ਤੇ ਚ ਭਿਕ੍ਖੂ ਗਾਰਯ੍ਹਾਤਿ ਏਤ੍ਥ ਯੇ ਊਨਭਾਵਂ ਞਤ੍ਵਾ ਅਬ੍ਭੇਨ੍ਤਿ, ਤੇ ਭਿਕ੍ਖੂ ਚ ਗਰਹਿਤਬ੍ਬਾ ਸਾਤਿਸਾਰਾ ਸਦੋਸਾ, ਦੁਕ੍ਕਟਂ ਆਪਜ੍ਜਨ੍ਤੀਤਿ ਅਯਮਤ੍ਥੋ ਪਾਕਟੋਯੇਵਾਤਿ ਨ ਵੁਤ੍ਤੋ. ਸਾਮੀਚੀਤਿ ਵਤ੍ਤਂ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਟ੍ਠਕਥਾਯ ਸਾਰਤ੍ਥਦੀਪਨਿਯਂ

ਤੇਰਸਕਵਣ੍ਣਨਾ ਨਿਟ੍ਠਿਤਾ.