੫. ਚਿਤ੍ਤਾਗਾਰਵਗ੍ਗਵਣ੍ਣਨਾ
੯੭੮. ਚਿਤ੍ਤਾਗਾਰਵਗ੍ਗਸ੍ਸ ਪਠਮੇ ਕੀਲ਼ਨਉਪਵਨਨ੍ਤਿ ਅਨ੍ਤੋਨਗਰੇ ਠਿਤਂ ਸਨ੍ਧਾਯ ਵੁਤ੍ਤਂ, ਕੀਲ਼ਨੁਯ੍ਯਾਨਨ੍ਤਿ ਬਹਿਨਗਰੇ ਠਿਤਂ ਸਨ੍ਧਾਯ. ਪਾਟੇਕ੍ਕਾ ਆਪਤ੍ਤਿਯੋਤਿ ਗੀਵਾਯ ਪਰਿਵਟ੍ਟਨਪ੍ਪਯੋਗਗਣਨਾਯ ਆਪਤ੍ਤਿਯੋ, ਨ ਉਮ੍ਮੀਲਨਗਣਨਾਯ. ‘‘ਅਜ੍ਝਾਰਾਮੇ ਰਾਜਾਗਾਰਾਦੀਨਿ ਕਰੋਨ੍ਤਿ, ਤਾਨਿ ਪਸ੍ਸਨ੍ਤਿਯਾ ਅਨਾਪਤ੍ਤੀ’’ਤਿ ਵਚਨਤੋ ‘‘ਅਨ੍ਤੋਆਰਾਮੇ ਤਤ੍ਥ ਤਤ੍ਥ ਗਨ੍ਤ੍ਵਾ ਨਚ੍ਚਾਦੀਨਿ ਪਸ੍ਸਿਤੁਂ ਲਭਤੀ’’ਤਿਪਿ ਸਿਦ੍ਧਂ.
੯੮੨. ਦੁਤਿਯਾਦੀਨਿ ਉਤ੍ਤਾਨਤ੍ਥਾਨੇਵ.
੧੦੧੫. ਨਵਮੇ ਹਤ੍ਥਿਆਦੀਸੁ ਸਿਪ੍ਪ-ਸਦ੍ਦੋ ਪਚ੍ਚੇਕਂ ਯੋਜੇਤਬ੍ਬੋ, ਤਥਾ ਆਥਬ੍ਬਣਾਦੀਸੁ ਮਨ੍ਤ-ਸਦ੍ਦੋ. ਤਤ੍ਥ ਆਥਬ੍ਬਣਮਨ੍ਤੋ ਨਾਮ ਆਥਬ੍ਬਣਵੇਦਵਿਹਿਤੋ ਪਰੂਪਘਾਤਕਰੋ ਮਨ੍ਤੋ, ਖੀਲਨਮਨ੍ਤੋ ਨਾਮ ਦਾਰੁਸਾਰਖੀਲਂ ਮਨ੍ਤੇਤ੍ਵਾ ਪਥਵਿਯਂ ਪਵੇਸੇਤ੍ਵਾ ਮਾਰਣਮਨ੍ਤੋ, ਅਗਦਪ੍ਪਯੋਗੋ ਵਿਸਯੋਜਨਂ. ਨਾਗਮਣ੍ਡਲਨ੍ਤਿ ਸਪ੍ਪਾਨਂ ਪਵੇਸਨਿਵਾਰਣਤ੍ਥਂ ਮਣ੍ਡਲਬਦ੍ਧਮਨ੍ਤੋ.
੧੦੧੮. ਦਸਮਂ ਉਤ੍ਤਾਨਤ੍ਥਮੇਵ.
ਚਿਤ੍ਤਾਗਾਰਵਗ੍ਗਵਣ੍ਣਨਾ ਨਿਟ੍ਠਿਤਾ.
੧੦੨੧. ਆਰਾਮਵਗ੍ਗੇ ਸਬ੍ਬਂ ਉਤ੍ਤਾਨਤ੍ਥਮੇਵ.
੧੦੬੭. ਗਬ੍ਭਿਨਿਵਗ੍ਗੇਪਿ ਸਬ੍ਬਂ ਸੁਵਿਞ੍ਞੇਯ੍ਯਮੇਵ.