੪. ਪਾਚਿਤ੍ਤਿਯਕਣ੍ਡਂ (ਭਿਕ੍ਖੁਨੀਵਿਭਙ੍ਗਵਣ੍ਣਨਾ)

੧. ਲਸੁਣਵਗ੍ਗਵਣ੍ਣਨਾ

੭੯੩-੭੯੭. ਪਾਚਿਤ੍ਤਿਯੇਸੁ ਲਸੁਣਵਗ੍ਗਸ੍ਸ ਪਠਮੇ ਜਾਤਿਂ ਸਰਤੀਤਿ ਜਾਤਿਸ੍ਸਰੋ. ਸਭਾਵੇਨੇਵਾਤਿ ਸੂਪਸਮ੍ਪਾਕਾਦਿਂ ਵਿਨਾਵ. ਬਦਰਸਾਲ਼ਵਂ ਨਾਮ ਬਦਰਫਲਾਨਿ ਸੁਕ੍ਖਾਪੇਤ੍ਵਾ ਚੁਣ੍ਣੇਤ੍ਵਾ ਕਤ੍ਤਬ੍ਬਾ ਖਾਦਨੀਯਵਿਕਤਿ. ਸੇਸਮੇਤ੍ਥ ਉਤ੍ਤਾਨਮੇਵ. ਆਮਕਲਸੁਣਞ੍ਚੇਵ ਅਜ੍ਝੋਹਰਣਞ੍ਚਾਤਿ ਇਮਾਨਿ ਪਨੇਤ੍ਥ ਦ੍ਵੇ ਅਙ੍ਗਾਨਿ.

੭੯੮-੮੦੨. ਦੁਤਿਯਤਤਿਯਚਤੁਤ੍ਥਾਨਿ ਉਤ੍ਤਾਨਤ੍ਥਾਨੇਵ.

੮੧੨. ਪਞ੍ਚਮੇ ਦ੍ਵਿਨ੍ਨਂ ਪਬ੍ਬਾਨਂ ਉਪਰੀਤਿ ਏਤ੍ਥ ਦ੍ਵਿਨ੍ਨਂ ਅਙ੍ਗੁਲੀਨਂ ਸਹ ਪਵੇਸਨੇ ਏਕੇਕਾਯ ਅਙ੍ਗੁਲਿਯਾ ਏਕੇਕਂ ਪਬ੍ਬਂ ਕਤ੍ਵਾ ਦ੍ਵਿਨ੍ਨਂ ਪਬ੍ਬਾਨਂ ਉਪਰਿ. ਏਕਙ੍ਗੁਲਿਪਵੇਸਨੇ ਦ੍ਵਿਨ੍ਨਂ ਪਬ੍ਬਾਨਂ ਉਪਰਿ ਨ ਵਟ੍ਟਤੀਤਿ ਵੇਦਿਤਬ੍ਬਂ. ਮਹਾਪਚ੍ਚਰਿਯਮ੍ਪਿ ਅਯਮੇਵ ਨਯੋ ਦਸ੍ਸਿਤੋ. ਉਦਕਸੁਦ੍ਧਿਪਚ੍ਚਯੇਨ ਪਨ ਸਤਿਪਿ ਫਸ੍ਸਸਾਦਿਯਨੇ ਯਥਾਵੁਤ੍ਤਪਰਿਚ੍ਛੇਦੇ ਅਨਾਪਤ੍ਤਿ.

੮੧੫-੮੧੭. ਛਟ੍ਠੇ ਆਸੁਮ੍ਭਿਤ੍ਵਾਤਿ ਪਾਤੇਤ੍ਵਾ. ਦਧਿਮਤ੍ਥੂਤਿ ਦਧਿਮਣ੍ਡਂ ਦਧਿਮ੍ਹਿ ਪਸਨ੍ਨੋਦਕਂ. ਭੁਞ੍ਜਨ੍ਤਸ੍ਸ ਭਿਕ੍ਖੁਨੋ ਹਤ੍ਥਪਾਸੇ ਠਾਨਂ, ਪਾਨੀਯਸ੍ਸ ਵਾ ਵਿਧੂਪਨਸ੍ਸ ਵਾ ਗਹਣਨ੍ਤਿ ਇਮਾਨਿ ਪਨੇਤ੍ਥ ਦ੍ਵੇ ਅਙ੍ਗਾਨਿ.

੮੨੨. ਸਤ੍ਤਮੇ ‘‘ਪਟਿਗ੍ਗਣ੍ਹਾਤਿ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਇਦਂ ਪੁਬ੍ਬਪਯੋਗਦੁਕ੍ਕਟਸ੍ਸ ਨਿਦਸ੍ਸਨਮਤ੍ਤਨ੍ਤਿ ਆਹ ‘‘ਨ ਕੇਵਲਂ ਪਟਿਗ੍ਗਹਣੇਯੇਵ ਹੋਤੀ’’ਤਿਆਦਿ. ਪਮਾਣਨ੍ਤਿ ਪਾਚਿਤ੍ਤਿਯਾਪਤ੍ਤਿਯਾ ਪਮਾਣਂ. ਇਮੇਹਿਯੇਵ ਦ੍ਵੀਹਿ ਪਾਚਿਤ੍ਤਿਯਂ ਹੋਤਿ, ਨਾਞ੍ਞੇਹਿ ਭਜ੍ਜਨਾਦੀਹੀਤਿ ਅਤ੍ਥੋ. ਵੁਤ੍ਤਮੇਵਤ੍ਥਂ ਵਿਤ੍ਥਾਰਤੋ ਦਸ੍ਸੇਤੁਂ ‘‘ਤਸ੍ਮਾ’’ਤਿਆਦਿਮਾਹ. ਤਂ ਪੁਬ੍ਬਾਪਰਵਿਰੁਦ੍ਧਨ੍ਤਿ ਪੁਨਪਿ ਵੁਤ੍ਤਨ੍ਤਿ ਵੁਤ੍ਤਵਾਦਂ ਸਨ੍ਧਾਯਾਹ. ਅਞ੍ਞਾਯ ਵਿਞ੍ਞਤ੍ਤਿਯਾ ਲਦ੍ਧਮ੍ਪਿ ਹਿ ਅਨਾਣਤ੍ਤਿਯਾ ਵਿਞ੍ਞਤ੍ਤਿਯਾ ਇਮਿਸ੍ਸਾ ਅਵਿਞ੍ਞਤ੍ਤਿਯਾ ਲਦ੍ਧਪਕ੍ਖਂ ਭਜਤਿ, ਤਸ੍ਮਾ ਹੇਟ੍ਠਾ ਅਵਿਞ੍ਞਤ੍ਤਿਯਾ ਲਦ੍ਧੇ ਕਰਣਕਾਰਾਪਨੇਸੁ ਵਿਸੇਸਂ ਅਵਤ੍ਵਾ ਇਧ ਵਿਸੇਸਵਚਨਂ ਪੁਬ੍ਬਾਪਰਵਿਰੁਦ੍ਧਂ. ਯਦਿ ਚੇਤ੍ਥ ਕਰਣੇ ਪਾਚਿਤ੍ਤਿਯਂ, ਕਾਰਾਪਨੇਪਿ ਪਾਚਿਤ੍ਤਿਯੇਨੇਵ ਭਵਿਤਬ੍ਬਂ. ਅਥ ਕਾਰਾਪਨੇ ਦੁਕ੍ਕਟਂ, ਕਰਣੇਪਿ ਦੁਕ੍ਕਟੇਨੇਵ ਭਵਿਤਬ੍ਬਂ. ਨ ਹਿ ਕਰਣੇ ਵਾ ਕਾਰਾਪਨੇ ਵਾ ਵਿਸੇਸੋ ਅਤ੍ਥਿ, ਤਸ੍ਮਾ ਅਞ੍ਞਾਯ ਵਿਞ੍ਞਤ੍ਤਿਯਾ ਲਦ੍ਧਂ ਸਯਂ ਭਜ੍ਜਨਾਦੀਨਿ ਕਤ੍ਵਾਪਿ ਕਾਰਾਪੇਤ੍ਵਾਪਿ ਭੁਞ੍ਜਨ੍ਤਿਯਾ ਦੁਕ੍ਕਟਮੇਵਾਤਿ ਇਦਮੇਤ੍ਥ ਸਨ੍ਨਿਟ੍ਠਾਨਂ. ਅਵਿਸੇਸੇਨ ਵੁਤ੍ਤਨ੍ਤਿ ਕਰਣਕਾਰਾਪਨਾਨਂ ਸਾਮਞ੍ਞਤੋ ਵੁਤ੍ਤਂ. ਸੇਸਮੇਤ੍ਥ ਉਤ੍ਤਾਨਮੇਵ. ਸਤ੍ਤਨ੍ਨਂ ਧਞ੍ਞਾਨਂ ਅਞ੍ਞਤਰਸ੍ਸ ਵਿਞ੍ਞਾਪਨਂ ਵਾ ਵਿਞ੍ਞਾਪਾਪਨਂ ਵਾ, ਪਟਿਲਾਭੋ, ਭਜ੍ਜਨਾਦੀਨਿ ਕਤ੍ਵਾ ਵਾ ਕਾਰੇਤ੍ਵਾ ਵਾ ਅਜ੍ਝੋਹਰਣਨ੍ਤਿ ਇਮਾਨਿ ਪਨੇਤ੍ਥ ਤੀਣਿ ਅਙ੍ਗਾਨਿ.

੮੨੪. ਅਟ੍ਠਮੇ ਨਿਬ੍ਬਿਟ੍ਠੋਤਿ ਪਤਿਟ੍ਠਾਪਿਤੋ. ਕੇਣੀਤਿ ਰਞ੍ਞੋ ਦਾਤਬ੍ਬਸ੍ਸ ਆਯਸ੍ਸੇਤਂ ਅਧਿਵਚਨਂ. ਠਾਨਨ੍ਤਰਨ੍ਤਿ ਗਾਮਜਨਪਦਾਦਿਠਾਨਨ੍ਤਰਂ. ਸੇਸਮੇਤ੍ਥ ਉਤ੍ਤਾਨਮੇਵ. ਉਚ੍ਚਾਰਾਦਿਭਾਵੋ, ਅਨਵਲੋਕਨਂ, ਵਲ਼ਞ੍ਜਨਟ੍ਠਾਨਂ, ਤਿਰੋਕੁਟ੍ਟਪਾਕਾਰਤਾ, ਛਡ੍ਡਨਂ ਵਾ ਛਡ੍ਡਾਪਨਂ ਵਾਤਿ ਇਮਾਨਿ ਪਨੇਤ੍ਥ ਪਞ੍ਚ ਅਙ੍ਗਾਨਿ.

੮੩੦. ਨਵਮੇ ਸਬ੍ਬੇਸਨ੍ਤਿ ਭਿਕ੍ਖੁਸ੍ਸ ਭਿਕ੍ਖੁਨਿਯਾ ਚ. ਇਧ ਖੇਤ੍ਤਪਾਲਕਾ ਆਰਾਮਾਦਿਗੋਪਕਾ ਚ ਸਾਮਿਕਾ ਏਵ.

੮੩੬. ਦਸਮੇ ਏਕਪਯੋਗੇਨਾਤਿ ਏਕਦਿਸਾਵਲੋਕਨਪਯੋਗੇਨ. ਤੇਸਂਯੇਵਾਤਿ ਯੇਸਂ ਨਚ੍ਚਂ ਪਸ੍ਸਤਿ. ਕਿਞ੍ਚਾਪਿ ਸਯਂ ਨਚ੍ਚਨਾਦੀਸੁ ਪਾਚਿਤ੍ਤਿਯਂ ਪਾਲ਼ਿਯਂ ਨ ਵੁਤ੍ਤਂ, ਤਥਾਪਿ ਅਟ੍ਠਕਥਾਪਮਾਣੇਨ ਗਹੇਤਬ੍ਬਨ੍ਤਿ ਦਸ੍ਸੇਤੁਂ ‘‘ਸਬ੍ਬਅਟ੍ਠਕਥਾਸੁ ਵੁਤ੍ਤ’’ਨ੍ਤਿ ਆਹ. ‘‘ਆਰਾਮੇ ਠਤ੍ਵਾਤਿ ਨ ਕੇਵਲਂ ਠਤ੍ਵਾ, ਤਤੋ ਤਤੋ ਗਨ੍ਤ੍ਵਾਪਿ ਸਬ੍ਬਿਰਿਯਾਪਥੇਹਿ ਲਭਤਿ, ‘ਆਰਾਮੇ ਠਿਤਾ’ਤਿ ਪਨ ਆਰਾਮਪਰਿਯਾਪਨ੍ਨਭਾਵਦਸ੍ਸਨਤ੍ਥਂ ਵੁਤ੍ਤਂ. ਇਤਰਥਾ ਨਿਸਿਨ੍ਨਾਪਿ ਨ ਲਭੇਯ੍ਯਾ’’ਤਿ ਤੀਸੁਪਿ ਗਣ੍ਠਿਪਦੇਸੁ ਵੁਤ੍ਤਂ. ਸੇਸਮੇਤ੍ਥ ਉਤ੍ਤਾਨਮੇਵ. ਨਚ੍ਚਾਦੀਨਂ ਅਞ੍ਞਤਰਤਾ, ਅਞ੍ਞਤ੍ਰ ਅਨੁਞ੍ਞਾਤਕਾਰਣਾ ਗਮਨਂ, ਦਸ੍ਸਨਂ ਵਾ ਸਵਨਂ ਵਾਤਿ ਇਮਾਨਿ ਪਨੇਤ੍ਥ ਤੀਣਿ ਅਙ੍ਗਾਨਿ.

ਲਸੁਣਵਗ੍ਗਵਣ੍ਣਨਾ ਨਿਟ੍ਠਿਤਾ.

੨. ਅਨ੍ਧਕਾਰਵਗ੍ਗਵਣ੍ਣਨਾ

੮੪੧. ਅਨ੍ਧਕਾਰਵਗ੍ਗਸ੍ਸ ਪਠਮੇ ਦਾਨੇ ਵਾ ਪੂਜਾਯ ਵਾਤਿ ਦਾਨਨਿਮਿਤ੍ਤਂ ਵਾ ਪੂਜਾਨਿਮਿਤ੍ਤਂ ਵਾ. ਮਨ੍ਤੇਤੀਤਿ ਕਥੇਤਿ. ਰਤ੍ਤਨ੍ਧਕਾਰਤਾ, ਪੁਰਿਸਸ੍ਸ ਹਤ੍ਥਪਾਸੇ ਠਾਨਂ ਵਾ ਸਲ੍ਲਪਨਂ ਵਾ, ਸਹਾਯਾਭਾਵੋ, ਰਹੋਪੇਕ੍ਖਤਾਤਿ ਇਮਾਨਿ ਪਨੇਤ੍ਥ ਚਤ੍ਤਾਰਿ ਅਙ੍ਗਾਨਿ.

੮੪੨-੮੪੬. ਦੁਤਿਯਤਤਿਯਚਤੁਤ੍ਥਾਨਿ ਉਤ੍ਤਾਨਤ੍ਥਾਨੇਵ.

੮੫੬-੮੫੭. ਪਞ੍ਚਮੇ ਅਨੋਵਸ੍ਸਕਂ ਅਤਿਕ੍ਕਾਮੇਨ੍ਤਿਯਾਤਿ ਛਨ੍ਨਸ੍ਸ ਅਨ੍ਤੋ ਨਿਸੀਦਿਤ੍ਵਾ ਪਕ੍ਕਮਨ੍ਤਿਂ ਸਨ੍ਧਾਯ ਵੁਤ੍ਤਂ. ‘‘ਉਪਚਾਰੋ ਦ੍ਵਾਦਸਹਤ੍ਥੋ’’ਤਿ ਵਦਨ੍ਤਿ. ਪਲ੍ਲਙ੍ਕਸ੍ਸ ਅਨੋਕਾਸੇਤਿ ਊਰੁਬਦ੍ਧਾਸਨਸ੍ਸ ਅਨੋਕਾਸੇ ਅਪ੍ਪਹੋਨ੍ਤੇ. ਪੁਰੇਭਤ੍ਤਤਾ, ਅਨ੍ਤਰਘਰੇ ਨਿਸਜ੍ਜਾ, ਆਸਨਸ੍ਸ ਪਲ੍ਲਙ੍ਕੋਕਾਸਤਾ, ਅਞ੍ਞਤ੍ਰ ਅਨੁਞ੍ਞਾਤਕਾਰਣਾ ਅਨਾਪੁਚ੍ਛਨਂ, ਵੁਤ੍ਤਪਰਿਚ੍ਛੇਦਾਤਿਕ੍ਕਮੋਤਿ ਇਮਾਨਿ ਪਨੇਤ੍ਥ ਪਞ੍ਚ ਅਙ੍ਗਾਨਿ.

੮੫੯-੮੬੪. ਛਟ੍ਠਸਤ੍ਤਮਾਦੀਨਿ ਉਤ੍ਤਾਨਤ੍ਥਾਨੇਵ.

ਅਨ੍ਧਕਾਰਵਗ੍ਗਵਣ੍ਣਨਾ ਨਿਟ੍ਠਿਤਾ.

੩. ਨਗ੍ਗਵਗ੍ਗਵਣ੍ਣਨਾ

੮੮੩-੮੮੭. ਨਗ੍ਗਵਗ੍ਗਸ੍ਸ ਪਠਮਦੁਤਿਯਾਨਿ ਉਤ੍ਤਾਨਤ੍ਥਾਨੇਵ.

੮੯੩. ਤਤਿਯੇ ਵਿਸਿਬ੍ਬੇਤ੍ਵਾਤਿ ਦੁਸ੍ਸਿਬ੍ਬਿਤਂ ਪੁਨ ਸਿਬ੍ਬਨਤ੍ਥਾਯ ਵਿਸਿਬ੍ਬੇਤ੍ਵਾ ਵਿਜਟੇਤ੍ਵਾ. ਅਞ੍ਞਤ੍ਰ ਚਤੂਹਪਞ੍ਚਾਹਾਤਿ ਵਿਸਿਬ੍ਬਿਤਦਿਵਸਤੋ ਪਞ੍ਚ ਦਿਵਸੇ ਅਤਿਕ੍ਕਮਿਤ੍ਵਾ. ਨਿਵਾਸਨਪਾਵੁਰਣੂਪਗਚੀਵਰਤਾ, ਉਪਸਮ੍ਪਨ੍ਨਾਯ ਸਨ੍ਤਕਤਾ, ਸਿਬ੍ਬਨਤ੍ਥਾਯ ਵਿਸਿਬ੍ਬਨਂ ਵਾ ਵਿਸਿਬ੍ਬਾਪਨਂ ਵਾ, ਅਞ੍ਞਤ੍ਰ ਅਨੁਞ੍ਞਾਤਕਾਰਣਾ ਪਞ੍ਚਾਹਾਤਿਕ੍ਕਮੋ, ਧੁਰਨਿਕ੍ਖੇਪੋਤਿ ਇਮਾਨਿ ਪਨੇਤ੍ਥ ਪਞ੍ਚ ਅਙ੍ਗਾਨਿ.

੮੯੮. ਚਤੁਤ੍ਥੇ ਪਞ੍ਚਨ੍ਨਂ ਚੀਵਰਾਨਨ੍ਤਿ ਤਿਚੀਵਰਂ ਉਦਕਸਾਟਿਕਾ ਸਙ੍ਕਚ੍ਚਿਕਾਤਿ ਇਮੇਸਂ ਪਞ੍ਚਨ੍ਨਂ ਚੀਵਰਾਨਂ. ਪਞ੍ਚਨ੍ਨਂ ਚੀਵਰਾਨਂ ਅਞ੍ਞਤਰਤਾ, ਪਞ੍ਚਾਹਾਤਿਕ੍ਕਮੋ, ਅਨੁਞ੍ਞਾਤਕਾਰਣਾਭਾਵੋ, ਅਪਰਿਵਤ੍ਤਨਨ੍ਤਿ ਇਮਾਨਿ ਪਨੇਤ੍ਥ ਚਤ੍ਤਾਰਿ ਅਙ੍ਗਾਨਿ.

੯੦੨. ਪਞ੍ਚਮਂ ਉਤ੍ਤਾਨਤ੍ਥਮੇਵ.

੯੦੭. ਛਟ੍ਠੇ ਚੀਵਰਲਾਭਨ੍ਤਿ ਲਭਿਤਬ੍ਬਚੀਵਰਂ. ਵਿਕਪ੍ਪਨੁਪਗਪਚ੍ਛਿਮਤਾ, ਸਙ੍ਘਸ੍ਸ ਪਰਿਣਤਭਾਵੋ, ਵਿਨਾ ਆਨਿਸਂਸਦਸ੍ਸਨੇਨ ਅਨ੍ਤਰਾਯਕਰਣਨ੍ਤਿ ਇਮਾਨਿ ਪਨੇਤ੍ਥ ਤੀਣਿ ਅਙ੍ਗਾਨਿ.

੯੧੧. ਸਤ੍ਤਮਂ ਉਤ੍ਤਾਨਤ੍ਥਮੇਵ.

੯੧੬. ਅਟ੍ਠਮੇ ਕੁਮ੍ਭਥੂਣਂ ਨਾਮ ਕੁਮ੍ਭਸਦ੍ਦੋ, ਤੇਨ ਚਰਨ੍ਤਿ ਕੀਲ਼ਨ੍ਤਿ, ਤਂ ਵਾ ਸਿਪ੍ਪਂ ਏਤੇਸਨ੍ਤਿ ਕੁਮ੍ਭਥੂਣਿਕਾ. ਤੇਨਾਹ ‘‘ਘਟਕੇਨ ਕੀਲ਼ਨਕਾ’’ਤਿ. ਦੀਘਨਿਕਾਯਟ੍ਠਕਥਾਯਂ (ਦੀ. ਨਿ. ਅਟ੍ਠ. ੧.੧੩) ਪਨ ‘‘ਕੁਮ੍ਭਥੂਣਂ ਨਾਮ ਚਤੁਰਸ੍ਸਅਮ੍ਬਣਕਤਾਲ਼’’ਨ੍ਤਿ ਵੁਤ੍ਤਂ. ਚਤੁਰਸ੍ਸਅਮ੍ਬਣਕਤਾਲ਼ਂ ਨਾਮ ਰੁਕ੍ਖਸਾਰਦਨ੍ਤਾਦੀਸੁ ਯੇਨ ਕੇਨਚਿ ਚਤੁਰਸ੍ਸਅਮ੍ਬਣਂ ਕਤ੍ਵਾ ਚਤੂਸੁ ਪਸ੍ਸੇਸੁ ਚਮ੍ਮੇਨ ਓਨਨ੍ਧਿਤ੍ਵਾ ਕਤਵਾਦਿਤਭਣ੍ਡਂ. ਬਿਮ੍ਬਿਸਕਨ੍ਤਿਪਿ ਤਸ੍ਸੇਵ ਵੇਵਚਨਂ, ਤਂ ਵਾਦੇਨ੍ਤਿ, ਤਂ ਵਾ ਸਿਪ੍ਪਂ ਏਤੇਸਨ੍ਤਿ ਕੁਮ੍ਭਥੂਣਿਕਾ. ਤੇਨਾਹ ‘‘ਬਿਮ੍ਬਿਸਕਵਾਦਕਾਤਿਪਿ ਵਦਨ੍ਤੀ’’ਤਿ. ਸਮਣਚੀਵਰਤਾ, ਠਪੇਤ੍ਵਾ ਸਹਧਮ੍ਮਿਕੇ ਮਾਤਾਪਿਤਰੋ ਚ ਅਞ੍ਞੇਸਂ ਦਾਨਂ, ਅਤਾਵਕਾਲਿਕਤਾਤਿ ਇਮਾਨਿ ਪਨੇਤ੍ਥ ਤੀਣਿ ਅਙ੍ਗਾਨਿ.

੯੨੦. ਨਵਮਂ ਉਤ੍ਤਾਨਤ੍ਥਮੇਵ.

੯੨੭. ਦਸਮੇ ਧਮ੍ਮਿਕਂ ਕਥਿਨੁਦ੍ਧਾਰਨ੍ਤਿ ਸਬ੍ਬਾਸਂ ਭਿਕ੍ਖੁਨੀਨਂ ਅਕਾਲਚੀਵਰਂ ਦਾਤੁਕਾਮੇਨ ਉਪਾਸਕੇਨ ਯਤ੍ਤਕੋ ਅਤ੍ਥਾਰਮੂਲਕੋ ਆਨਿਸਂਸੋ, ਤਤੋ ਅਧਿਕਂ ਵਾ ਸਮਕਂ ਵਾ ਦਤ੍ਵਾ ਯਾਚਿਤਕੇਨ ਸਮਗ੍ਗੇਨ ਭਿਕ੍ਖੁਨਿਸਙ੍ਘੇਨ ਯਂ ਕਥਿਨਂ ਞਤ੍ਤਿਦੁਤਿਯੇਨ ਕਮ੍ਮੇਨ ਅਨ੍ਤਰਾ ਉਦ੍ਧਰੀਯਤਿ, ਤਸ੍ਸ ਸੋ ਉਦ੍ਧਾਰੋ ਧਮ੍ਮਿਕੋਤਿ ਵੁਚ੍ਚਤਿ, ਏਵਰੂਪਂ ਕਥਿਨੁਦ੍ਧਾਰਨ੍ਤਿ ਅਤ੍ਥੋ. ਸੇਸਂ ਉਤ੍ਤਾਨਤ੍ਥਮੇਵ.

ਨਗ੍ਗਵਗ੍ਗਵਣ੍ਣਨਾ ਨਿਟ੍ਠਿਤਾ.

੯੩੨. ਤੁਵਟ੍ਟਵਗ੍ਗੇ ਸਬ੍ਬਂ ਉਤ੍ਤਾਨਮੇਵ.

੫. ਚਿਤ੍ਤਾਗਾਰਵਗ੍ਗਵਣ੍ਣਨਾ

੯੭੮. ਚਿਤ੍ਤਾਗਾਰਵਗ੍ਗਸ੍ਸ ਪਠਮੇ ਕੀਲ਼ਨਉਪਵਨਨ੍ਤਿ ਅਨ੍ਤੋਨਗਰੇ ਠਿਤਂ ਸਨ੍ਧਾਯ ਵੁਤ੍ਤਂ, ਕੀਲ਼ਨੁਯ੍ਯਾਨਨ੍ਤਿ ਬਹਿਨਗਰੇ ਠਿਤਂ ਸਨ੍ਧਾਯ. ਪਾਟੇਕ੍ਕਾ ਆਪਤ੍ਤਿਯੋਤਿ ਗੀਵਾਯ ਪਰਿਵਟ੍ਟਨਪ੍ਪਯੋਗਗਣਨਾਯ ਆਪਤ੍ਤਿਯੋ, ਨ ਉਮ੍ਮੀਲਨਗਣਨਾਯ. ‘‘ਅਜ੍ਝਾਰਾਮੇ ਰਾਜਾਗਾਰਾਦੀਨਿ ਕਰੋਨ੍ਤਿ, ਤਾਨਿ ਪਸ੍ਸਨ੍ਤਿਯਾ ਅਨਾਪਤ੍ਤੀ’’ਤਿ ਵਚਨਤੋ ‘‘ਅਨ੍ਤੋਆਰਾਮੇ ਤਤ੍ਥ ਤਤ੍ਥ ਗਨ੍ਤ੍ਵਾ ਨਚ੍ਚਾਦੀਨਿ ਪਸ੍ਸਿਤੁਂ ਲਭਤੀ’’ਤਿਪਿ ਸਿਦ੍ਧਂ.

੯੮੨. ਦੁਤਿਯਾਦੀਨਿ ਉਤ੍ਤਾਨਤ੍ਥਾਨੇਵ.

੧੦੧੫. ਨਵਮੇ ਹਤ੍ਥਿਆਦੀਸੁ ਸਿਪ੍ਪ-ਸਦ੍ਦੋ ਪਚ੍ਚੇਕਂ ਯੋਜੇਤਬ੍ਬੋ, ਤਥਾ ਆਥਬ੍ਬਣਾਦੀਸੁ ਮਨ੍ਤ-ਸਦ੍ਦੋ. ਤਤ੍ਥ ਆਥਬ੍ਬਣਮਨ੍ਤੋ ਨਾਮ ਆਥਬ੍ਬਣਵੇਦਵਿਹਿਤੋ ਪਰੂਪਘਾਤਕਰੋ ਮਨ੍ਤੋ, ਖੀਲਨਮਨ੍ਤੋ ਨਾਮ ਦਾਰੁਸਾਰਖੀਲਂ ਮਨ੍ਤੇਤ੍ਵਾ ਪਥਵਿਯਂ ਪਵੇਸੇਤ੍ਵਾ ਮਾਰਣਮਨ੍ਤੋ, ਅਗਦਪ੍ਪਯੋਗੋ ਵਿਸਯੋਜਨਂ. ਨਾਗਮਣ੍ਡਲਨ੍ਤਿ ਸਪ੍ਪਾਨਂ ਪਵੇਸਨਿਵਾਰਣਤ੍ਥਂ ਮਣ੍ਡਲਬਦ੍ਧਮਨ੍ਤੋ.

੧੦੧੮. ਦਸਮਂ ਉਤ੍ਤਾਨਤ੍ਥਮੇਵ.

ਚਿਤ੍ਤਾਗਾਰਵਗ੍ਗਵਣ੍ਣਨਾ ਨਿਟ੍ਠਿਤਾ.

੧੦੨੧. ਆਰਾਮਵਗ੍ਗੇ ਸਬ੍ਬਂ ਉਤ੍ਤਾਨਤ੍ਥਮੇਵ.

੧੦੬੭. ਗਬ੍ਭਿਨਿਵਗ੍ਗੇਪਿ ਸਬ੍ਬਂ ਸੁਵਿਞ੍ਞੇਯ੍ਯਮੇਵ.

੮. ਕੁਮਾਰਿਭੂਤਵਗ੍ਗਵਣ੍ਣਨਾ

੧੧੧੯. ਕੁਮਾਰਿਭੂਤਵਗ੍ਗਸ੍ਸ ਪਠਮੇ ਸਬ੍ਬਪਠਮਾ ਦ੍ਵੇ ਮਹਾਸਿਕ੍ਖਮਾਨਾਤਿ ਗਬ੍ਭਿਨਿਵਗ੍ਗੇ ਸਬ੍ਬਪਠਮਂ ਵੁਤ੍ਤਾ ਦ੍ਵੇ ਸਿਕ੍ਖਮਾਨਾ. ਸਿਕ੍ਖਮਾਨਾ ਇਚ੍ਚੇਵ ਵਤ੍ਤਬ੍ਬਾਤਿ ਸਮ੍ਮੁਤਿਕਮ੍ਮਾਦੀਸੁ ਏਵਂ ਵਤ੍ਤਬ੍ਬਾ. ਗਿਹਿਗਤਾਤਿ ਵਾ ਕੁਮਾਰਿਭੂਤਾਤਿ ਵਾ ਨ ਵਤ੍ਤਬ੍ਬਾਤਿ ਸਚੇ ਵਦਨ੍ਤਿ, ਕਮ੍ਮਂ ਕੁਪ੍ਪਤੀਤਿ ਅਧਿਪ੍ਪਾਯੋ. ਇਤੋ ਪਰਂ ਨਵਮਪਰਿਯੋਸਾਨਂ ਉਤ੍ਤਾਨਤ੍ਥਮੇਵ.

੧੧੬੩. ਦਸਮੇ ਅਪੁਬ੍ਬਸਮੁਟ੍ਠਾਨਸੀਸਨ੍ਤਿ ਪਠਮਪਾਰਾਜਿਕਸਮੁਟ੍ਠਾਨਾਦੀਸੁ ਤੇਰਸਸੁ ਸਮੁਟ੍ਠਾਨੇਸੁ ਅਨਨੁਞ੍ਞਾਤਸਮੁਟ੍ਠਾਨਂ ਸਨ੍ਧਾਯ ਵੁਤ੍ਤਂ. ਤਞ੍ਹਿ ਇਤੋ ਪੁਬ੍ਬੇ ਤਾਦਿਸਸ੍ਸ ਸਮੁਟ੍ਠਾਨਸੀਸਸ੍ਸ ਅਨਾਗਤਤ੍ਤਾ ‘‘ਅਪੁਬ੍ਬਸਮੁਟ੍ਠਾਨਸੀਸ’’ਨ੍ਤਿ ਵੁਤ੍ਤਂ.

੧੧੬੬. ਏਕਾਦਸਮਾਦੀਨਿ ਉਤ੍ਤਾਨਤ੍ਥਾਨੇਵ.

ਕੁਮਾਰਿਭੂਤਵਗ੍ਗਵਣ੍ਣਨਾ ਨਿਟ੍ਠਿਤਾ.

੯. ਛਤ੍ਤੁਪਾਹਨਵਗ੍ਗਵਣ੍ਣਨਾ

੧੨੧੪. ਛਤ੍ਤੁਪਾਹਨਵਗ੍ਗਸ੍ਸ ਏਕਾਦਸਮੇ ਉਪਚਾਰਂ ਸਨ੍ਧਾਯਾਤਿ ਸਮਨ੍ਤਾ ਦ੍ਵਾਦਸਹਤ੍ਥੁਪਚਾਰਂ ਸਨ੍ਧਾਯ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵ.

ਛਤ੍ਤੁਪਾਹਨਵਗ੍ਗਵਣ੍ਣਨਾ ਨਿਟ੍ਠਿਤਾ.

ਗਿਰਗ੍ਗਸਮਜ੍ਜਾਦੀਨਿ ਅਚਿਤ੍ਤਕਾਨਿ ਲੋਕਵਜ੍ਜਾਨੀਤਿ ਵੁਤ੍ਤਤ੍ਤਾ ਨਚ੍ਚਨ੍ਤਿ ਵਾ ਵਣ੍ਣਕਨ੍ਤਿ ਵਾ ਅਜਾਨਿਤ੍ਵਾਵ ਪਸ੍ਸਨ੍ਤਿਯਾ ਵਾ ਨਹਾਯਨ੍ਤਿਯਾ ਵਾ ਆਪਤ੍ਤਿਸਮ੍ਭਵਤੋ ਵਤ੍ਥੁਅਜਾਨਨਚਿਤ੍ਤੇਨ ਅਚਿਤ੍ਤਕਾਨਿ, ਨਚ੍ਚਨ੍ਤਿ ਵਾ ਵਣ੍ਣਕਨ੍ਤਿ ਵਾ ਜਾਨਿਤ੍ਵਾ ਪਸ੍ਸਨ੍ਤਿਯਾ ਵਾ ਨਹਾਯਨ੍ਤਿਯਾ ਵਾ ਅਕੁਸਲੇਨੇਵ ਆਪਜ੍ਜਨਤੋ ਲੋਕਵਜ੍ਜਾਨੀਤਿ ਵੇਦਿਤਬ੍ਬਾਨਿ. ਚੋਰੀਵੁਟ੍ਠਾਪਨਾਦੀਨਿ ਚੋਰੀਤਿਆਦਿਨਾ ਵਤ੍ਥੁਂ ਜਾਨਿਤ੍ਵਾ ਕਰਣੇ ਏਵ ਆਪਤ੍ਤਿਸਮ੍ਭਵਤੋ ਸਚਿਤ੍ਤਕਾਨਿ, ਉਪਸਮ੍ਪਦਾਦੀਨਂ ਏਕਨ੍ਤਅਕੁਸਲਚਿਤ੍ਤੇਨੇਵ ਅਕਤ੍ਤਬ੍ਬਤ੍ਤਾ ਪਣ੍ਣਤ੍ਤਿਵਜ੍ਜਾਨਿ. ‘‘ਇਧ ਸਚਿਤ੍ਤਕਾਚਿਤ੍ਤਕਤਾ ਪਣ੍ਣਤ੍ਤਿਜਾਨਨਾਜਾਨਨਤਾਯ ਅਗ੍ਗਹੇਤ੍ਵਾ ਵਤ੍ਥੁਜਾਨਨਾਜਾਨਨਤਾਯ ਗਹੇਤਬ੍ਬਾ’’ਤਿ ਤੀਸੁਪਿ ਗਣ੍ਠਿਪਦੇਸੁ ਵੁਤ੍ਤਂ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵ.

ਭਿਕ੍ਖੁਨੀਵਿਭਙ੍ਗੇ ਖੁਦ੍ਦਕਵਣ੍ਣਨਾ ਨਿਟ੍ਠਿਤਾ.

ਪਾਚਿਤ੍ਤਿਯਕਣ੍ਡਂ ਨਿਟ੍ਠਿਤਂ.