ਲਕ੍ਖਣਕਥਾਵਣ੍ਣਨਾ
੮੩੭. ਇਤੋਤਿ ਸਾਧਾਰਣਾਸਾਧਾਰਣਕਥਾਯ ਪਰਂ. ਸਬ੍ਬਗਨ੍ਤਿ ਸਬ੍ਬਸਿਕ੍ਖਾਪਦਸਾਧਾਰਣਂ. ਵਦਤੋ ਮੇਤਿ ਵਦਤੋ ਮਮ ਵਚਨਂ. ਨਿਬੋਧਥਾਤਿ ਨਿਸਾਮੇਥ, ਏਕਗ੍ਗਚਿਤ੍ਤਾ ਹੁਤ੍ਵਾ ਸਕ੍ਕਚ੍ਚਂ ਸੁਣਾਥਾਤਿ ਅਤ੍ਥੋ.
੮੩੮-੯. ‘‘ਵਿਪਤ੍ਤਿ ਆਪਤ੍ਤਿ ਅਨਾਪਤ੍ਤੀ’’ਤਿ ਪਦਚ੍ਛੇਦੋ. ‘‘ਆਣਤ੍ਤਿ ਅਙ੍ਗ’’ਨ੍ਤਿ ਪਦਚ੍ਛੇਦੋ. ਵਜ੍ਜਕਮ੍ਮਪਭੇਦਕਨ੍ਤਿ ਵਜ੍ਜਪਭੇਦਕਂ ਕਮ੍ਮਪਭੇਦਕਂ. ਤਿਕਦ੍ਵਯਨ੍ਤਿ ਕੁਸਲਤ੍ਤਿਕਵੇਦਨਾਤ੍ਤਿਕਦ੍ਵਯਂ. ਸਬ੍ਬਤ੍ਥਾਤਿ ਇਦਂ ਪਨ ਸਤ੍ਤਰਸਵਿਧਸਬ੍ਬਸਾਧਾਰਣਲਕ੍ਖਣਂ. ਸਬ੍ਬਤ੍ਥ ਸਬ੍ਬੇਸੁ ਸਿਕ੍ਖਾਪਦੇਸੁ.
੮੪੦. ਇਧ ਇਮਸ੍ਮਿਂ ਸਤ੍ਤਰਸਵਿਧੇ ਯਂ ਲਕ੍ਖਣਂ ਪੁਬ੍ਬੇ ਵੁਤ੍ਤਨਯਂ, ਯਞ੍ਚ ਉਤ੍ਤਾਨਂ, ਤਂ ਸਬ੍ਬਂ ਵਜ੍ਜੇਤ੍ਵਾ ਅਤ੍ਥਜੋਤਨਂ ਅਤ੍ਥਪ੍ਪਕਾਸਨਂ ਕਰਿਸ੍ਸਾਮੀਤਿ ਯੋਜਨਾ.
੮੪੧. ਨਿਦਾਨਂ ਨਾਮ ਰਾਜਗਹਾਦਿਸਿਕ੍ਖਾਪਦਪਞ੍ਞਤ੍ਤਿਟ੍ਠਾਨਭੂਤਾਨਿ ਸਤ੍ਤ ਨਗਰਾਨਿ, ਤਂ ਪੁਬ੍ਬੇ ਦਸ੍ਸਿਤਨ੍ਤਿ ਅਵਸਿਟ੍ਠਾਨਿ ਦਸ੍ਸੇਤੁਮਾਹ ‘‘ਪੁਗ੍ਗਲੋ’’ਤਿਆਦਿ. ਪੁਗ੍ਗਲੋ ਨਾਮ ਕਤਮੋ? ਯਂ ਯਂ ਭਿਕ੍ਖੁਨਿਂ, ਭਿਕ੍ਖੁਞ੍ਚ ਆਰਬ੍ਭ ਸਿਕ੍ਖਾਪਦਂ ਪਞ੍ਞਤ੍ਤਂ, ਅਯਂ ਭਿਕ੍ਖੁਨੀ ਚ ਭਿਕ੍ਖੁ ਚ ਸਿਕ੍ਖਾਪਦਪਞ੍ਞਤ੍ਤਿਯਾ ਆਦਿਕਮ੍ਮਿਕੋ ਪੁਗ੍ਗਲੋਤਿ ਵੁਚ੍ਚਤੀਤਿ ਯੋਜਨਾ.
੮੪੨. ਧਨਿਯਾਦਯੋਤਿ ਆਦਿ-ਸਦ੍ਦੇਨ ਸਮ੍ਬਹੁਲਾ ਭਿਕ੍ਖੂ, ਵਗ੍ਗੁਮੁਦਾਤੀਰਿਯਾ ਭਿਕ੍ਖੂ, ਸੇਯ੍ਯਸਕੋ, ਉਦਾਯੀ, ਆਲ਼ਵਕਾ ਭਿਕ੍ਖੂ, ਛਨ੍ਨੋ, ਮੇਤ੍ਤਿਯਭੂਮਜਕਾ, ਦੇਵਦਤ੍ਤੋ, ਅਸ੍ਸਜਿਪੁਨਬ੍ਬਸੁਕਾ ਭਿਕ੍ਖੂ, ਛਬ੍ਬਗ੍ਗਿਯਾ ਭਿਕ੍ਖੂ, ਉਪਨਨ੍ਦੋ ਸਕ੍ਯਪੁਤ੍ਤੋ, ਅਞ੍ਞਤਰੋ ਭਿਕ੍ਖੁ, ਹਤ੍ਥਕੋ ਸਕ੍ਯਪੁਤ੍ਤੋ, ਅਨੁਰੁਦ੍ਧੋ, ਸਤ੍ਤਰਸਵਗ੍ਗਿਯਾ ਭਿਕ੍ਖੂ, ਚੂਲ਼ਪਨ੍ਥਕੋ, ਬੇਲਟ੍ਠਸੀਸੋ, ਆਯਸ੍ਮਾ ਆਨਨ੍ਦੋ, ਸਾਗਤਤ੍ਥੇਰੋ, ਅਰਿਟ੍ਠੋ ਭਿਕ੍ਖੁ, ਆਯਸ੍ਮਾ ਆਨਨ੍ਦੋਤਿ ਇਮੇ ਏਕਵੀਸਤਿ ਸਙ੍ਗਹਿਤਾ.
੮੪੩. ਥੁਲ੍ਲਨਨ੍ਦਾਦਯੋਤਿ ਆਦਿ-ਸਦ੍ਦੇਨ ਸੁਨ੍ਦਰੀਨਨ੍ਦਾ, ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ, ਅਞ੍ਞਤਰਾ ਭਿਕ੍ਖੁਨੀ, ਚਣ੍ਡਕਾਲ਼ੀ, ਸਮ੍ਬਹੁਲਾ ਭਿਕ੍ਖੁਨਿਯੋ, ਦ੍ਵੇ ਭਿਕ੍ਖੁਨਿਯੋਤਿ ਛਯਿਮੇ ਸਙ੍ਗਹਿਤਾ. ਸਬ੍ਬੇਤਿ ਉਭਯਪਾਤਿਮੋਕ੍ਖੇ ਆਦਿਕਮ੍ਮਿਕਾ ਸਬ੍ਬੇ ਪੁਗ੍ਗਲਾ.
੮੪੪. ਵਤ੍ਥੂਤਿ ਵਤ੍ਥੁ ਨਾਮ ਸੁਦਿਨ੍ਨਾਦਿਨੋ ਤਸ੍ਸ ਤਸ੍ਸੇਵ ਪੁਗ੍ਗਲਸ੍ਸ ਮੇਥੁਨਾਦਿਕਸ੍ਸ ਚ ਵਤ੍ਥੁਨੋ ਸਬ੍ਬਪ੍ਪਕਾਰੇਨ ਅਜ੍ਝਾਚਾਰੋ ਵੀਤਿਕ੍ਕਮੋ ਪਵੁਚ੍ਚਤੀਤਿ ਯੋਜਨਾ.
੮੪੫-੬. ਕੇਵਲਾ ਮੂਲਭੂਤਾ ਪਞ੍ਞਤ੍ਤਿ. ਅਨੁ ਚ ਅਨੁਪ੍ਪਨ੍ਨੋ ਚ ਸਬ੍ਬਤ੍ਥ ਚ ਪਦੇਸੋ ਚ ਅਨ੍ਵਨੁਪ੍ਪਨ੍ਨਸਬ੍ਬਤ੍ਥਪਦੇਸਾ, ਤੇਯੇਵ ਪਦਾਨਿ ਅਨ੍ਵਨੁਪ੍ਪਨ੍ਨਸਬ੍ਬਤ੍ਥਪਦੇਸਪਦਾਨਿ, ਤਾਨਿ ਪੁਬ੍ਬਕਾਨਿ ਯਾਸਂ ਪਞ੍ਞਤ੍ਤੀਨਂ ਤਾ ਅਨ੍ਵਨੁਪ੍ਪਨ੍ਨਸਬ੍ਬਤ੍ਥਪਦੇਸਪਦਪੁਬ੍ਬਿਕਾ. ਤਥੇਵ ਸਾ ਪਞ੍ਞਤ੍ਤੀਤਿ ਯੋਜਨਾ. ਅਨੁਪਞ੍ਞਤ੍ਤਿ ਅਨੁਪ੍ਪਨ੍ਨਪਞ੍ਞਤ੍ਤਿ ਸਬ੍ਬਤ੍ਥਪਞ੍ਞਤ੍ਤਿ ਪਦੇਸਪਞ੍ਞਤ੍ਤਿ ਹੋਤਿ. ਏਕਤੋ ਉਭਤੋ ਪੁਬ੍ਬਾ ਕਥੇਵ ਸਾ ਪਞ੍ਞਤ੍ਤੀਤਿ ਯੋਜਨਾ. ਏਕਤੋਪਦਂ ਉਭਤੋਪਦਞ੍ਚ ਪੁਬ੍ਬਮਸ੍ਸਾਤਿ ਏਕਤੋਉਭਤੋਪੁਬ੍ਬਾ, ਏਕਤੋਪਞ੍ਞਤ੍ਤਿ ਉਭਤੋਪਞ੍ਞਤ੍ਤੀਤਿ ਵੁਤ੍ਤਂ ਹੋਤਿ.
੮੪੭. ਤਤ੍ਥ ਨਵਧਾਸੁ ਪਞ੍ਞਤ੍ਤੀਸੁ. ਪਞ੍ਞਤ੍ਤਿ ਨਾਮ ਕਤਮਾਤਿ ਆਹ ‘‘ਯੋ ਮੇਥੁਨ’’ਨ੍ਤਿਆਦਿ. ‘‘ਯੋ ਭਿਕ੍ਖੁ ਮੇਥੁਨਂ ਧਮ੍ਮਂ ਪਟਿਸੇਵੇਯ੍ਯਾ’’ਤਿ ਚ ‘‘ਯੋ ਭਿਕ੍ਖੁ ਅਦਿਨ੍ਨਂ ਆਦਿਯੇਯ੍ਯਾ’’ਤਿ ਚ ਏਵਮਾਦਿਕਾ ਸਿਕ੍ਖਾਪਦਸ੍ਸ ਮੂਲਭੂਤਾ ਪਞ੍ਞਤ੍ਤਿ ਹੋਤੀਤਿ ਯੋਜਨਾ.
੮੪੮. ਇਚ੍ਚੇਵਮਾਦਿਕਾਤਿ ਆਦਿ-ਸਦ੍ਦੇਨ ‘‘ਸਿਕ੍ਖਂ ਅਪਚ੍ਚਕ੍ਖਾਯ ਦੁਬ੍ਬਲ੍ਯਂ ਅਨਾਵਿਕਤ੍ਵਾ’’ਤਿ ਚ ‘‘ਗਾਮਾ ਵਾ ਅਰਞ੍ਞਾ ਵਾ’’ਤਿ ਚ ਏਵਮਾਦੀਨਂ ਸਙ੍ਗਹੋ.
੮੪੯. ਵਜ੍ਜਕੇ ਅਨੁਪ੍ਪਨ੍ਨੇਯੇਵ ਪਞ੍ਞਤ੍ਤਾ ਅਨੁਪ੍ਪਨ੍ਨਪਞ੍ਞਤ੍ਤਿ, ਸਾ ਅਨੁਪ੍ਪਨ੍ਨਪਞ੍ਞਤ੍ਤਿ.
੮੫੦-੧. ਗੁਣਙ੍ਗੁਣੁਪਾਹਨਸਿਕ੍ਖਾਪਦੇਨ ਸਹ ਚਮ੍ਮਤ੍ਥਰਣਸਿਕ੍ਖਾਪਦਞ੍ਚ ਧੁਵਨ੍ਹਾਨਂ ਧੁਵਨਹਾਨਸਿਕ੍ਖਾਪਦਂ, ਪਞ੍ਚਵਗ੍ਗੇਨ ਉਪਸਮ੍ਪਾਦਨਸਿਕ੍ਖਾਪਦਞ੍ਚਾਤਿ ਏਸਾ ਚਤੁਬ੍ਬਿਧਾ ਪਞ੍ਞਤ੍ਤਿ ਪਦੇਸਪਞ੍ਞਤ੍ਤਿ ਨਾਮਾਤਿ ਵੁਤ੍ਤਾਤਿ ਯੋਜਨਾ. ਮਜ੍ਝਿਮਦੇਸਸ੍ਮਿਂਯੇਵ ਹੋਤੀਤਿ ਮਜ੍ਝਿਮਦੇਸਸ੍ਮਿਂਯੇਵ ਆਪਤ੍ਤਿਕਰਾ ਹੋਤਿ. ਨ ਅਞ੍ਞਤੋਤਿ ਨ ਅਞ੍ਞਤ੍ਰ ਪਚ੍ਚਨ੍ਤਿਮੇਸੁ ਜਨਪਦੇਸੁ ਦੇਸਨ੍ਤਰੇ ਠਾਨੇ.
੮੫੨. ਇਤੋਤਿ ਚਤੁਬ੍ਬਿਧਪਦੇਸਪਞ੍ਞਤ੍ਤਿਤੋ. ਏਤ੍ਥਾਤਿ ਇਮਸ੍ਮਿਂ ਪਞ੍ਞਤ੍ਤਿਭੇਦੇ. ਸਾਧਾਰਣਦੁਕਾਦਿਕਨ੍ਤਿ ਸਾਧਾਰਣਪਞ੍ਞਤ੍ਤਿ ਅਸਾਧਾਰਣਪਞ੍ਞਤ੍ਤਿ, ਏਕਤੋਪਞ੍ਞਤ੍ਤਿ ਉਭਤੋਪਞ੍ਞਤ੍ਤੀਤਿ ਦੁਕਦ੍ਵਯਂ. ਅਤ੍ਥਤੋ ਏਕਮੇਵਾਤਿ ਅਤ੍ਥਤੋ ਅਞ੍ਞਮਞ੍ਞਸਮਾਨਮੇਵ. ਵਿਪਤ੍ਤਾਪਤ੍ਤਾਨਾਪਤ੍ਤਿਵਿਨਿਚ੍ਛਯੋ ਵਿਤ੍ਥਾਰਿਤੋਤਿ ਇਧ ਨ ਦਸ੍ਸਿਤੋ. ਅਯਂ ਪਨੇਤ੍ਥ ਸਙ੍ਖੇਪੋ – ਵਿਪਤ੍ਤੀਤਿ ਸੀਲਆਚਾਰਦਿਟ੍ਠਿਆਜੀਵਵਿਪਤ੍ਤੀਨਂ ਅਞ੍ਞਤਰਾ. ਆਪਤ੍ਤੀਤਿ ਪੁਬ੍ਬਪਯੋਗਾਦਿਵਸੇਨ ਆਪਤ੍ਤਿਭੇਦੋ. ਅਨਾਪਤ੍ਤੀਤਿ ਅਜਾਨਨਾਦਿਵਸੇਨ ਅਨਾਪਤ੍ਤਿ.
੮੫੩. ਆਪਤ੍ਤਿ ਪਨ ਸਾਣਤ੍ਤਿਕਾਪਿ ਹੋਤਿ, ਅਨਾਣਤ੍ਤਿਕਾਪਿ ਹੋਤੀਤਿ ਯੋਜਨਾ. ‘‘ਆਣਤ੍ਤੀਤਿ ਚ ਨਾਮੇਸਾ ਆਣਾਪਨਾ’’ਤਿ ਇਮਿਨਾ ਆਣਤ੍ਤਿ-ਸਦ੍ਦਸ੍ਸ ਸਭਾਵਸਾਧਾਰਣਤ੍ਤਾਤਿ ਇਧਾਹ.
੮੫੪. ਸਬ੍ਬਸਿਕ੍ਖਾਪਦੇਸੁਪਿ ਸਬ੍ਬਾਸਂ ਆਪਤ੍ਤੀਨਂ ਸਬ੍ਬੋ ਪਨ ਅਙ੍ਗਭੇਦੋਪਿ ਵਿਭਾਵਿਨਾ ਞਾਤਬ੍ਬੋਤਿ ਯੋਜਨਾ.
੮੫੬. ‘‘ਸਾ ਚ ਅਕ੍ਰਿਯਸਮੁਟ੍ਠਾਨਾ’’ਤਿ ਪਦਚ੍ਛੇਦੋ. ਕਾਯੇਨ, ਵਾਚਾਯ ਵਾ ਦਸਾਹਬ੍ਭਨ੍ਤਰੇ ਅਤਿਰੇਕਚੀਵਰਸ੍ਸ ਅਨਧਿਟ੍ਠਾਨੇਨ ਨਿਸ੍ਸਗ੍ਗਿਯਪਾਚਿਤ੍ਤਿਯਂ ਹੋਤੀਤਿ ‘‘ਪਠਮੇ ਕਥਿਨੇ ਵਿਯਾ’’ਤਿ ਉਦਾਹਰਣਂ ਕਤਂ.
੮੫੭. ਕ੍ਰਿਯਾਕ੍ਰਿਯਤੋ ਹੋਤੀਤਿ ਕਿਰਿਯਤੋ ਚ ਅਕਿਰਿਯਤੋ ਚ ਹੋਤਿ. ਤਤ੍ਥ ਉਦਾਹਰਣਮਾਹ ‘‘ਚੀਵਰਗ੍ਗਹਣੇ ਵਿਯਾ’’ਤਿ. ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਹਤ੍ਥਤੋ ਚੀਵਰਗ੍ਗਹਣਂ ਕ੍ਰਿਯਾ, ਪਾਰਿਵਤ੍ਤਕਸ੍ਸ ਅਦਾਨਂ ਅਕ੍ਰਿਯਾਤਿ ਏਵਂ ਕਿਰਿਯਾਯ ਚੇਵ ਅਕਿਰਿਯਾਯ ਚ ਇਮਂ ਆਪਜ੍ਜਤਿ.
੮੫੮. ਸਿਯਾ ਪਨ ਕਰੋਨ੍ਤਸ੍ਸ ਅਕਰੋਨ੍ਤਸ੍ਸਾਤਿ ਯਾ ਪਨ ਆਪਤ੍ਤਿ ਸਿਯਾ ਕਰੋਨ੍ਤਸ੍ਸ, ਸਿਯਾ ਅਕਰੋਨ੍ਤਸ੍ਸ ਹੋਤਿ, ਅਯਂ ਸਿਯਾ ਕਿਰਿਯਤੋ, ਸਿਯਾ ਅਕਿਰਿਯਤੋ ਸਮੁਟ੍ਠਾਤਿ. ਸਿਯਾਤਿ ਚ ਕਦਾਚਿ-ਸਦ੍ਦਤ੍ਥੇ ਨਿਪਾਤੋ. ਅਤ੍ਰੋਦਾਹਰਣਮਾਹ ‘‘ਰੂਪਿਯੋਗ੍ਗਹਣੇ ਵਿਯਾ’’ਤਿ. ਰੂਪਿਯਸ੍ਸ ਉਗ੍ਗਹਣੇ, ਉਗ੍ਗਣ੍ਹਾਪਨੇ ਸਿਯਾ ਕਦਾਚਿ ਕਿਰਿਯਤੋ ਸਮੁਟ੍ਠਾਤਿ, ਉਪਨਿਕ੍ਖਿਤ੍ਤਸ੍ਸ ਸਾਦਿਯਨੇ ਕਾਯਵਾਚਾਹਿ ਕਾਤਬ੍ਬਸ੍ਸ ਅਕਰਣੇਨ ਕਦਾਚਿ ਅਕਰੋਨ੍ਤਸ੍ਸ ਹੋਤੀਤਿ.
੮੫੯. ਯਾ ਕਰੋਤੋ ਅਕੁਬ੍ਬਤੋ, ਕਦਾਚਿ ਕਰੋਨ੍ਤਸ੍ਸ ਚ ਹੋਤਿ, ਸਾ ਆਪਤ੍ਤਿ ਸਿਯਾ ਕਿਰਿਯਾਕਿਰਿਯਤੋ, ਸਿਯਾ ਕਿਰਿਯਤੋਪਿ ਚ ਹੋਤੀਤਿ ਯੋਜਨਾ. ‘‘ਕੁਟਿਕਾਰਾਪਤ੍ਤਿ ਵਿਯਾ’’ਤਿ ਵਤ੍ਤਬ੍ਬਂ. ਸਾ ਹਿ ਵਤ੍ਥੁਂ ਦੇਸਾਪੇਤ੍ਵਾ ਪਮਾਣਾਤਿਕ੍ਕਨ੍ਤਂ ਕਰੋਤੋ ਕਿਰਿਯਤੋ ਸਮੁਟ੍ਠਾਤਿ, ਅਦੇਸਾਪੇਤ੍ਵਾ ਪਮਾਣਾਤਿਕ੍ਕਨ੍ਤਂ, ਪਮਾਣਯੁਤ੍ਤਂ ਵਾ ਕਰੋਤੋ ਕਿਰਿਯਾਕਿਰਿਯਤੋ ਸਮੁਟ੍ਠਾਤਿ.
੮੬੧. ਯਤੋ ਆਪਤ੍ਤਿਤੋ. ਅਯਂ ਆਪਤ੍ਤਿ. ਸਞ੍ਞਾਯ ਕਰਣਭੂਤਾਯ ਵਿਮੋਕ੍ਖੋ ਏਤਾਯਾਤਿ ਸਞ੍ਞਾਵਿਮੋਕ੍ਖਾ. ਏਤ੍ਥ ਚ ਵੀਤਿਕ੍ਕਮਸਞ੍ਞਾ ਅਵਿਜ੍ਜਮਾਨਾਪਿ ਆਪਤ੍ਤਿਯਾ ਵਿਮੁਚ੍ਚਨਸ੍ਸ ਸਾਧਕਤਮਟ੍ਠੇਨ ਗਹਿਤਾ. ਯਥਾ ਵੁਟ੍ਠਿਯਾ ਅਭਾਵੇਨ ਜਾਤਂ ਦੁਬ੍ਭਿਕ੍ਖਂ ‘‘ਵੁਟ੍ਠਿਕਤ’’ਨ੍ਤਿ ਵੁਚ੍ਚਤਿ, ਏਵਂਸਮ੍ਪਦਮਿਦਂ ਵੇਦਿਤਬ੍ਬਂ. ਅਯਂ ਸਚਿਤ੍ਤਕਾਪਤ੍ਤਿ.
੮੬੨-੪. ਇਤਰਾ ਪਨ ਅਚਿਤ੍ਤਕਾਪਤ੍ਤਿ. ਵੀਤਿਕ੍ਕਮਸਞ੍ਞਾਯ ਅਭਾਵੇਨ ਨਤ੍ਥਿ ਵਿਮੋਕ੍ਖੋ ਏਤਾਯਾਤਿ ਨੋਸਞ੍ਞਾਵਿਮੋਕ੍ਖਾ. ਸੁਚਿਤ੍ਤੇਨ ਸਵਾਸਨਕਿਲੇਸਪ੍ਪਹਾਨੇਨ, ਸਕਲਲੋਕਿਯਲੋਕੁਤ੍ਤਰਕੁਸਲਸਮ੍ਪਯੋਗੇਨ ਚ ਸੁਨ੍ਦਰਚਿਤ੍ਤੇਨ ਭਗਵਤਾ ਪਕਾਸਿਤਾ ਸਬ੍ਬਾਵ ਆਪਤ੍ਤਿ ਚਿਤ੍ਤਸ੍ਸ ਵਸੇਨ ਦੁਵਿਧਾ ਸਿਯੁਨ੍ਤਿ ਯੋਜਨਾ. ਸਚਿਤ੍ਤਕਸਮੁਟ੍ਠਾਨਵਸੇਨ ਪਨਾਤਿ ਸਚਿਤ੍ਤਕਸਮੁਟ੍ਠਾਨਵਸੇਨੇਵ. ਸਚਿਤ੍ਤਕਮਿਸ੍ਸਕਵਿਵਜ੍ਜਨਤ੍ਥਾਯ ਪਨ-ਸਦ੍ਦੋ ਏਵਕਾਰਤ੍ਥੋ ਵੁਤ੍ਤੋ.
ਯਾ ਸਚਿਤ੍ਤਕੇਹਿ ਵਾ ਅਚਿਤ੍ਤਕਮਿਸ੍ਸਕਸਮੁਟ੍ਠਾਨਵਸੇਨ ਵਾ ਸਮੁਟ੍ਠਾਤਿ, ਅਯਂ ਅਚਿਤ੍ਤਕਾ.
੮੬੫. ਸੁਵਿਜ੍ਜੇਨਾਤਿ ਸੋਭਮਾਨਾਹਿ ਤੀਹਿ ਵਿਜ੍ਜਾਹਿ ਵਾ ਅਟ੍ਠਹਿ ਵਾ ਵਿਜ੍ਜਾਹਿ ਸਮਨ੍ਨਾਗਤਤ੍ਤਾ ਸੁਵਿਜ੍ਜੇਨ. ਅਨਵਜ੍ਜੇਨਾਤਿ ਸਵਾਸਨਕਿਲੇਸਾਵਜ੍ਜਰਹਿਤਤ੍ਤਾ ਅਨਵਜ੍ਜੇਨ ਭਗਵਤਾ. ਲੋਕਪਣ੍ਣਤ੍ਤਿਵਜ੍ਜਤੋ ਲੋਕਪਣ੍ਣਤ੍ਤਿਵਜ੍ਜਵਸੇਨ ਸਬ੍ਬਾਵ ਆਪਤ੍ਤਿਯੋ ਵਜ੍ਜਵਸੇਨ ਦੁਵਿਧਾ ਦੁਕਾ ਵੁਤ੍ਤਾਤਿ ਯੋਜਨਾ.
੮੬੬. ਯਸ੍ਸਾ ਸਚਿਤ੍ਤਕੇ ਪਕ੍ਖੇ, ਚਿਤ੍ਤਂ ਅਕੁਸਲਂ ਸਿਯਾਤਿ ਯਸ੍ਸਾ ਸਚਿਤ੍ਤਕਾਚਿਤ੍ਤਕਸਮੁਟ੍ਠਾਨਾਯ ਅਚਿਤ੍ਤਕਾਯ ਸੁਰਾਪਾਨਾਦਿਆਪਤ੍ਤਿਯਾ ਸਚਿਤ੍ਤਕਸਮੁਟ੍ਠਾਨਪਕ੍ਖੇ ਚਿਤ੍ਤਂ ਅਕੁਸਲਮੇਵ ਹੋਤਿ, ਅਯਂ ਲੋਕਵਜ੍ਜਾ ਨਾਮਾਤਿ ਅਤ੍ਥੋ. ਯਸ੍ਸਾ ਪਨ ਸਚਿਤ੍ਤਕਸਮੁਟ੍ਠਾਨਾਯ ਪਠਮਪਾਰਾਜਿਕਾਦਿਆਪਤ੍ਤਿਯਾ ਚਿਤ੍ਤਂ ਅਕੁਸਲਮੇਵ ਹੋਤਿ, ਤਸ੍ਸਾ ਲੋਕਵਜ੍ਜਤਾਯ ਵਤ੍ਤਬ੍ਬਮੇਵ ਨਤ੍ਥਿ. ਅਚਿਤ੍ਤਕਾਪਿ ਵਾ ਆਪਤ੍ਤਿ ਸਚਿਤ੍ਤਕਪਕ੍ਖੇ ਕੁਸਲਚਿਤ੍ਤੇ ਸਤਿ ਲੋਕਵਜ੍ਜਤਾਯ ਸਿਦ੍ਧਾਯ ਅਚਿਤ੍ਤਕਪਕ੍ਖੇਪਿ ਲੋਕਵਜ੍ਜੋ ਹੋਤਿ, ਕਿਮਙ੍ਗਂ ਪਨ ਅਕੁਸਲਚਿਤ੍ਤੇਨੇਵ ਆਪਜ੍ਜਿਤਬ੍ਬਾਯ ਆਪਤ੍ਤਿਯਾ ਲੋਕਵਜ੍ਜਤਾਤਿ ਸਾ ਵਿਸੁਂ ਨ ਵੁਤ੍ਤਾ.
ਯਸ੍ਮਾ ਪਨ ਪਣ੍ਣਤ੍ਤਿਵਜ੍ਜਾਯ ਵਤ੍ਥੁਵੀਤਿਕ੍ਕਮਵਜ੍ਜਾ ਸਿਯਾ ਕੁਸਲਂ, ਸਿਯਾ ਅਬ੍ਯਾਕਤਂ, ਤਸ੍ਮਾ ਤਸ੍ਸਾ ਸਚਿਤ੍ਤਕਪਕ੍ਖੇ ਚਿਤ੍ਤਂ ਕੁਸਲਮੇਵਾਤਿ ਅਯਂ ਨਿਯਮੋ ਨਤ੍ਥੀਤਿ ਆਹ ‘‘ਸੇਸਾ ਪਣ੍ਣਤ੍ਤਿਵਜ੍ਜਕਾ’’ਤਿ. ‘‘ਪਣ੍ਣਤ੍ਤਿਵਜ੍ਜਕਾ’’ਤਿ ਇਮਿਨਾ ਚ ਲਕ੍ਖਣੇਨ ਵਤ੍ਥੁਵਿਜਾਨਨਚਿਤ੍ਤੇਨ ਸਚਿਤ੍ਤਕਪਕ੍ਖੇ ਚਿਤ੍ਤਂ ਸਿਯਾ ਕੁਸਲਂ, ਸਿਯਾ ਅਕੁਸਲਂ, ਸਿਯਾ ਅਬ੍ਯਾਕਤਂ, ਤਸ੍ਮਾ ਤਸ੍ਸਾ ਸਚਿਤ੍ਤਕਪਕ੍ਖੇ ਚਿਤ੍ਤਂ ਅਕੁਸਲਮੇਵਾਤਿ ਅਯਂ ਨਿਯਮੋ ਨਤ੍ਥੀਤਿ ਆਹ.
੮੬੭. ਕਾਯਦ੍ਵਾਰੇਨ ਆਪਜ੍ਜਿਤਬ੍ਬਾ ਕਾਯਕਮ੍ਮਂ. ਉਭਯਤ੍ਥ ਆਪਜ੍ਜਿਤਬ੍ਬਾ ਤਦੁਭਯਂ ਕਾਯਕਮ੍ਮਂ ਵਚੀਕਮ੍ਮਂ. ਮਨੋਦ੍ਵਾਰੇ ਆਪਤ੍ਤਿ ਨਾਮ ਨਤ੍ਥੀਤਿ ਮਨੋਕਮ੍ਮਂ ਨ ਵੁਤ੍ਤਂ. ‘‘ਮਨੋਦ੍ਵਾਰੇ ਆਪਤ੍ਤਿ ਨਾਮ ਨਤ੍ਥੀਤਿ ਚ ਇਦਂ ਯੇਭੁਯ੍ਯਵਸੇਨ ਵੁਤ੍ਤਂ ਉਪਨਿਕ੍ਖਿਤ੍ਤਸਾਦਿਯਨਾਦੀਸੁ ਮਨੋਦ੍ਵਾਰੇਪਿ ਆਪਤ੍ਤਿਸਮ੍ਭਵਤੋ’’ਤਿ ਆਚਰਿਯਾ.
੮੬੮-੯. ਕੁਸਲਾਦਿਤਿਕਦ੍ਵਯਨ੍ਤਿ ਕੁਸਲਤ੍ਤਿਕਞ੍ਚੇਵ ਵੇਦਨਾਤ੍ਤਿਕਞ੍ਚ. ਆਪਤ੍ਤਿਂ ਆਪਜ੍ਜਨ੍ਤੋ ਕੁਸਲਾਕੁਸਲਚਿਤ੍ਤੋ, ਤਥਾ ਅਬ੍ਯਾਕਤਚਿਤ੍ਤੋ ਵਾ ਹੁਤ੍ਵਾ ਆਪਜ੍ਜਤੀਤਿ ਯੋਜਨਾ.
ਦੁਕ੍ਖਾਦਿਸਂਯੁਤੋਤਿ ਆਦਿ-ਸਦ੍ਦੇਨ ਉਪੇਕ੍ਖਾਵੇਦਨਾਸਮਙ੍ਗਿਨੋ ਸਙ੍ਗਹੋ. ਏਵਂ ਸਨ੍ਤੇਪਿ ਸਬ੍ਬਸਿਕ੍ਖਾਪਦੇਸੁ ਅਕੁਸਲਚਿਤ੍ਤਵਸੇਨ ਏਕਂ ਚਿਤ੍ਤਂ, ਕੁਸਲਾਬ੍ਯਾਕਤਵਸੇਨ ਦ੍ਵੇ ਚਿਤ੍ਤਾਨਿ, ਸਬ੍ਬੇਸਂ ਵਸੇਨ ਤੀਣਿ ਚਿਤ੍ਤਾਨਿ. ਦੁਕ੍ਖਵੇਦਨਾਵਸੇਨ ਏਕਾ ਵੇਦਨਾ, ਸੁਖਉਪੇਕ੍ਖਾਵਸੇਨ ਦ੍ਵੇ, ਸਬ੍ਬਾਸਂ ਵਸੇਨ ਤਿਸ੍ਸੋ ਵੇਦਨਾਤਿ ਅਯਮੇਵ ਭੇਦੋ ਲਬ੍ਭਤਿ, ਨ ਅਞ੍ਞੋ ਭੇਦੋ.
ਕੁਸਲਤ੍ਤਿਕਂ ਸਚੇਪਿ ਗਹਿਤਂ, ਨ ਪਨ ਸਬ੍ਬੇਸਮੇਵ ਚਿਤ੍ਤਾਨਂ ਵਸੇਨ ਲਬ੍ਭਤਿ, ਅਥ ਖੋ ਆਪਤ੍ਤਿਸਮੁਟ੍ਠਾਪਕਾਨਂ ਬਾਤ੍ਤਿਂਸਚਿਤ੍ਤਾਨਮੇਵ ਵਸੇਨ ਲਬ੍ਭਤਿ. ਬਾਤ੍ਤਿਂਸੇਵ ਹਿ ਚਿਤ੍ਤਾਨਿ ਆਪਤ੍ਤਿਸਮੁਟ੍ਠਾਪਕਾਨਿ. ਦ੍ਵਾਦਸ ਅਕੁਸਲਾਨਿ, ਅਟ੍ਠ ਕਾਮਾਵਚਰਕੁਸਲਾਨਿ, ਦਸ ਕਾਮਾਵਚਰਕਿਰਿਯਚਿਤ੍ਤਾਨਿ, ਕੁਸਲਤੋ, ਕਿਰਿਯਤੋ ਚ ਦ੍ਵੇ ਅਭਿਞ੍ਞਾਚਿਤ੍ਤਾਨਿ ਚਾਤਿ ਏਵਂ ਬਾਤ੍ਤਿਂਸਚਿਤ੍ਤੇਹਿ ਸਮੁਟ੍ਠਿਤਾਪਿ ਆਪਤ੍ਤਿ ਅਕੁਸਲਾ ਵਾ ਹੋਤਿ ਅਬ੍ਯਾਕਤਾ ਵਾ, ਨਤ੍ਥਿ ਆਪਤ੍ਤਿ ਕੁਸਲਂ. ਯਥਾਹ ਸਮਥਕ੍ਖਨ੍ਧਕੇ ‘‘ਆਪਤ੍ਤਾਧਿਕਰਣਂ ਸਿਯਾ ਅਕੁਸਲਂ ਸਿਯਾ ਅਬ੍ਯਾਕਤਂ, ਨਤ੍ਥਿ ਆਪਤ੍ਤਾਧਿਕਰਣਂ ਕੁਸਲ’’ਨ੍ਤਿ (ਚੂਲ਼ਵ. ੨੨੨; ਪਰਿ. ੩੦੩). ਅਯਂ ਪਨ ਪਾਠੋ ਪਣ੍ਣਤ੍ਤਿਵਜ੍ਜਂਯੇਵ ਸਨ੍ਧਾਯ ਵੁਤ੍ਤੋ, ਨ ਲੋਕਵਜ੍ਜਂ. ਯਸ੍ਮਿਞ੍ਹਿ ਪਥਵਿਖਣਨਭੂਤਗਾਮਪਾਤਬ੍ਯਤਾਦਿਕੇ ਆਪਤ੍ਤਾਧਿਕਰਣੇ ਕੁਸਲਚਿਤ੍ਤਂ ਅਙ੍ਗਂ ਹੋਤਿ, ਤਸ੍ਮਿਞ੍ਚ ਸਤਿ ਨ ਸਕ੍ਕਾ ਵਤ੍ਤੁਂ ‘‘ਨਤ੍ਥਿ ਆਪਤ੍ਤਾਧਿਕਰਣਂ ਕੁਸਲ’’ਨ੍ਤਿ. ਤਸ੍ਮਾ ਨਯਿਦਂ ਅਙ੍ਗਪਹੋਨਕਚਿਤ੍ਤਂ ਸਨ੍ਧਾਯ ਵੁਤ੍ਤਂ. ਯਂ ਤਾਵ ਆਪਤ੍ਤਾਧਿਕਰਣਂ ਲੋਕਵਜ੍ਜਂ, ਤਂ ਏਕਨ੍ਤਤੋ ਅਕੁਸਲਮੇਵ. ਤਤ੍ਥ ‘‘ਸਿਯਾ ਅਕੁਸਲ’’ਨ੍ਤਿ ਵਿਕਪ੍ਪੋ ਨਤ੍ਥਿ. ਯਂ ਪਨ ਪਣ੍ਣਤ੍ਤਿਵਜ੍ਜਂ, ਤਂ ਯਸ੍ਮਾ ਸਞ੍ਚਿਚ੍ਚ ‘‘ਇਮਂ ਆਪਤ੍ਤਿਂ ਵੀਤਿਕ੍ਕਮਾਮੀ’’ਤਿ ਵੀਤਿਕ੍ਕਮਨ੍ਤਸ੍ਸੇਵ ਅਕੁਸਲਂ ਹੋਤਿ, ਅਸਞ੍ਚਿਚ੍ਚ ਪਨ ਕਿਞ੍ਚਿ ਅਜਾਨਨ੍ਤਸ੍ਸ ਸਹਸੇਯ੍ਯਾਦਿਵਸੇਨ ਆਪਜ੍ਜਨਤੋ ਅਬ੍ਯਾਕਤਂ ਹੋਤਿ, ਤਸ੍ਮਾ ਤਤ੍ਥ ਸਞ੍ਚਿਚ੍ਚਾਸਞ੍ਚਿਚ੍ਚਵਸੇਨ ਇਮਂ ਵਿਕਪ੍ਪਭਾਵਂ ਸਨ੍ਧਾਯ ਇਦਂ ਵੁਤ੍ਤਂ ‘‘ਆਪਤ੍ਤਾਧਿਕਰਣਂ ਸਿਯਾ ਅਕੁਸਲਂ ਸਿਯਾ ਅਬ੍ਯਾਕਤਂ, ਨਤ੍ਥਿ ਆਪਤ੍ਤਾਧਿਕਰਣਂ ਕੁਸਲ’’ਨ੍ਤਿ. ਸਚੇ ਪਨ ‘‘ਯਂ ਕੁਸਲਚਿਤ੍ਤੋ ਆਪਜ੍ਜਤਿ, ਇਦਂ ਵੁਚ੍ਚਤਿ ਆਪਤ੍ਤਾਧਿਕਰਣਂ ਕੁਸਲ’’ਨ੍ਤਿ ਵਦੇਯ੍ਯ, ਅਚਿਤ੍ਤਕਾਨਂ ਏਲ਼ਕਲੋਮਪਦਸੋਧਮ੍ਮਾਦਿਸਮੁਟ੍ਠਾਨਾਨਮ੍ਪਿ ਕੁਸਲਚਿਤ੍ਤਂ ਆਪਜ੍ਜੇਯ੍ਯ, ਨ ਚ ਤਤ੍ਥ ਵਿਜ੍ਜਮਾਨਮ੍ਪਿ ਕੁਸਲਚਿਤ੍ਤਂ ਆਪਤ੍ਤਿਯਾ ਅਙ੍ਗਂ, ਕਾਯਵਚੀਵਿਞ੍ਞਤ੍ਤਿਵਸੇਨ ਪਨ ਚਲਿਤਪਵਤ੍ਤਾਨਂ ਕਾਯਵਾਚਾਨਂ ਅਞ੍ਞਤਰਮੇਵ ਅਙ੍ਗਂ, ਤਞ੍ਚ ਰੂਪਕ੍ਖਨ੍ਧਪਰਿਯਾਪਨ੍ਨਤ੍ਤਾ ਅਬ੍ਯਾਕਤਨ੍ਤਿ.
੮੭੦. ਇਦਂ ਤੁ ਲਕ੍ਖਣਨ੍ਤਿ ਇਦਂ ਨਿਦਾਨਾਦਿਸਾਧਾਰਣਵਿਨਿਚ੍ਛਯਲਕ੍ਖਣਂ.
੮੭੧. ‘‘ਤਰੁ’’ਨ੍ਤਿਆਦਿਗਾਥਾ ਪੁਬ੍ਬੇ ਵੁਤ੍ਤਤ੍ਥਾਵ. ਅਯਂ ਪਨ ਵਿਸੇਸੋ – ਤਤ੍ਥ ‘‘ਦ੍ਵਯਙ੍ਕੁਰ’’ਨ੍ਤਿ ਵੁਤ੍ਤਂ, ਇਧ ‘‘ਚਤੁਸ੍ਸਿਖ’’ਨ੍ਤਿ. ਤਤ੍ਥ ‘‘ਦ੍ਵਯਙ੍ਕੁਰ’’ਨ੍ਤਿ ਲੋਕਵਜ੍ਜਪਣ੍ਣਤ੍ਤਿਵਜ੍ਜਾਨਂ ਗਹਣਂ, ਇਧ ਚਤੁਸ੍ਸਿਖਨ੍ਤਿ ਚਤੁਨ੍ਨਂ ਵਿਪਤ੍ਤੀਨਂ. ਚਤ੍ਤਾਰੋ ਸੀਖਾ ਅਙ੍ਕੁਰਾ ਏਤਸ੍ਸਾਤਿ ਵਿਗ੍ਗਹੋ. ਤਤ੍ਥ ਵਿਪਤ੍ਤਿ ‘‘ਸਤ੍ਤਫਲ’’ਨ੍ਤਿ ਸਤ੍ਤਫਲੇਸੁ ਅਨ੍ਤੋਗਧਾ, ਇਧ ਵਿਪਤ੍ਤਿਟ੍ਠਾਨੇ ਵਜ੍ਜਂ ਗਹੇਤ੍ਵਾ ਸਤ੍ਤਫਲਾਨਿ.
੮੭੨. ਅਨੁਤ੍ਤਰਤਂ ਗਤਂ ਅਤ੍ਤਨਾ ਉਤ੍ਤਰਸ੍ਸ ਉਤ੍ਤਮਸ੍ਸ ਕਸ੍ਸਚਿ ਅਵਿਜ੍ਜਮਾਨਤ੍ਤਾ ਇਮਂ ਉਤ੍ਤਰਂ ਉਤ੍ਤਰਂ ਨਾਮ ਪਕਰਣਂ ਯੋ ਥੇਰਨਵਮਜ੍ਝਿਮੇਸੁ ਅਞ੍ਞਤਰੋ ਪਰਿਯਾਪੁਣਾਤਿ ਪਾਠਸ੍ਸ ਪਗੁਣਵਾਚੁਗ੍ਗਤਕਰਣੇਨ ਅਧੀਯਤਿ, ਪਰਿਪੁਚ੍ਛਤਿ ਅਤ੍ਥਞ੍ਚ ਅਤ੍ਥਵਣ੍ਣਨਂ ਸੁਤ੍ਵਾ ਸਕ੍ਕਚ੍ਚਂ ਉਗ੍ਗਹੇਤ੍ਵਾ ਮਨਸਾ ਪੇਕ੍ਖਿਤ੍ਵਾ ਪਞ੍ਞਾਯ ਸੁਪ੍ਪਟਿਵਿਜ੍ਝਿਤ੍ਵਾ ਧਾਰੇਤਿ, ਸੋ ਚ ਭਿਕ੍ਖੁ ਚ-ਸਦ੍ਦੇਨ ਏਵਮੇਵ ਵਿਨਯਵਿਨਿਚ੍ਛਯੇ ਯੋ ਭਿਕ੍ਖੁ ਯੁਤ੍ਤੋ, ਸੋ ਚ ਕਾਯਵਾਚਵਿਨਯੇ ਕਾਯਵਾਚਾਵੀਤਿਕ੍ਕਮਾਨਂ ਵਿਨਯਨੇ ਸਂਵਰਣੇ ਵਿਨਯੇ ਵਿਨਯਪਿਟਕੇ ਅਨੁਤ੍ਤਰਤਂ ਉਪਯਾਤਿ ਅਤ੍ਤਨੋ ਉਤ੍ਤਰਿਤਰਸ੍ਸ ਅਵਿਜ੍ਜਮਾਨਤਂ ਉਪਗਚ੍ਛਤਿ. ਏਤ੍ਥ ਕਾਰਣਮਾਹ ‘‘ਉਤ੍ਤਰਤੋ’’ਤਿ, ਪਗੁਣਵਾਚੁਗ੍ਗਤਕਰਣੇਨ ਅਧੀਤੇਨ ਅਤ੍ਥਵਣ੍ਣਨਂ ਸੁਤ੍ਵਾ ਧਾਰਣੇਨ ਸੁਟ੍ਠੁ ਧਾਰਿਤੇਨ ਇਮਿਨਾ ਉਤ੍ਤਰਪਕਰਣੇਨ ਹੇਤੁਭੂਤੇਨਾਤਿ ਅਤ੍ਥੋ.
ਇਤਿ ਉਤ੍ਤਰੇ ਲੀਨਤ੍ਥਪਕਾਸਨਿਯਾ
ਲਕ੍ਖਣਕਥਾਵਣ੍ਣਨਾ ਨਿਟ੍ਠਿਤਾ.