ਸਬ੍ਬਸਙ੍ਕਲਨਨਯਕਥਾਵਣ੍ਣਨਾ
੮੭੩. ਪਰਿਵਾਰੇ ਮੁਖਾਗਤਾ ਕਤ੍ਥਪਞ੍ਞਤ੍ਤਿਵਾਰਾਦਯੋ ਅਟ੍ਠ ਵਾਰਾ, ਤੇਯੇਵ ਪਚ੍ਚਯ-ਸਦ੍ਦੇਨ ਯੋਜੇਤ੍ਵਾ ਵੁਤ੍ਤਾ ਅਟ੍ਠਪਚ੍ਚਯਵਾਰਾਤਿ ਵਿਭਙ੍ਗਦ੍ਵਯੇ ਵਿਸੁਂ ਵਿਸੁਂ ਦਸ੍ਸਿਤਾ ਸੋਲ਼ਸ ਪਰਿਵਾਰਾ ਅਸ੍ਸਾਤਿ ਸੋਲ਼ਸਪਰਿਵਾਰੋ, ਤਸ੍ਸ ਸੋਲ਼ਸਪਰਿਵਾਰਸ੍ਸ. ਸਬ੍ਬਂ ਸਙ੍ਕਲਨਂ ਨਯਨ੍ਤਿ ਸਬ੍ਬੇਸਂ ਵੁਤ੍ਤਾਨਂ ਸਙ੍ਕਲਨਨਯਾਨਂ ਸਙ੍ਗਹੇਤਬ੍ਬਤੋ ਸਬ੍ਬਂ ਸਙ੍ਕਲਭੇਦਨਂ ਨਯਂ.
੮੭੫. ਕਾਯਿਕਾ ਛਬ੍ਬਿਧਾਤਿ ਪਠਮਪਾਰਾਜਿਕਾਪਤ੍ਤਿ, ਕੁਟਿਕਰਣੇ ਪਯੋਗੇ ਦੁਕ੍ਕਟਾਪਤ੍ਤਿ, ਏਕਂ ਪਿਣ੍ਡਂ ਅਨਾਗਤੇ ਥੁਲ੍ਲਚ੍ਚਯਾਪਤ੍ਤਿ, ਤਸ੍ਮਿਂ ਆਗਤੇ ਸਙ੍ਘਾਦਿਸੇਸਾਪਤ੍ਤਿ, ਵਿਕਾਲਭੋਜਨੇ ਪਾਚਿਤ੍ਤਿਯਾਪਤ੍ਤਿ, ਪਠਮਪਾਟਿਦੇਸਨੀਯਾਪਤ੍ਤੀਤਿ ਛਬ੍ਬਿਧਾ.
ਤਥਾ ਵਾਚਸਿਕਾਪਿ ਚਾਤਿ ਚਤੁਤ੍ਥਪਾਰਾਜਿਕਾ, ਕੁਟਿਯਾ ਕਾਰਾਪਨੇ ਪੁਬ੍ਬਗਤਿਯੋ, ਪਦਸੋਧਮ੍ਮਪਾਚਿਤ੍ਤਿਯਂ, ਦਵਕਮ੍ਯਤਾਯ ਹੀਨੇਨ ਖੁਂਸਨਂ, ਤਸ੍ਸ ਦੁਬ੍ਭਾਸਿਤਨ੍ਤਿ ਤਥਾ ਛਬ੍ਬਿਧਾ.
ਛਾਦੇਨ੍ਤਸ੍ਸ ਚ ਤਿਸ੍ਸੋਤਿ ਭਿਕ੍ਖੁਨਿਯਾ ਵਜ੍ਜਪਟਿਚ੍ਛਾਦਿਕਾਯ ਪਾਰਾਜਿਕਂ, ਭਿਕ੍ਖੁਨੋ ਸਙ੍ਘਾਦਿਸੇਸਛਾਦਨੇ ਪਾਚਿਤ੍ਤਿਯਂ, ਅਤ੍ਤਨੋ ਦੁਟ੍ਠੁਲ੍ਲਚ੍ਛਾਦਨੇ ਦੁਕ੍ਕਟਨ੍ਤਿ ਤਿਸ੍ਸੋ ਚ.
ਪਞ੍ਚ ਸਂਸਗ੍ਗਪਚ੍ਚਯਾਤਿ ਕਾਯਸਂਸਗ੍ਗੇ ਭਿਕ੍ਖੁਨਿਯਾ ਪਾਰਾਜਿਕਂ, ਭਿਕ੍ਖੁਨੋ ਸਙ੍ਘਾਦਿਸੇਸੋ, ਕਾਯੇਨ ਕਾਯਪਟਿਬਦ੍ਧੇ ਥੁਲ੍ਲਚ੍ਚਯਂ, ਨਿਸ੍ਸਗ੍ਗਿਯੇਨ ਕਾਯਪਟਿਬਦ੍ਧੇ ਦੁਕ੍ਕਟਂ, ਅਙ੍ਗੁਲਿਪਤੋਦਕੇ ਪਾਚਿਤ੍ਤਿਯਨ੍ਤਿ ਕਾਯਸਂਸਗ੍ਗਪਚ੍ਚਯਾ ਪਞ੍ਚ ਆਪਤ੍ਤਿਯੋ.
੮੭੭. ਭਿਕ੍ਖੁਨਿਯਾ ਵਜ੍ਜਪਟਿਚ੍ਛਾਦਿਕਾਯ ਪਾਰਾਜਿਕਂ, ਭਿਕ੍ਖੁਸ੍ਸ ਸਙ੍ਘਾਦਿਸੇਸਪਟਿਚ੍ਛਾਦਕਸ੍ਸ ਪਾਚਿਤ੍ਤਿਯਨ੍ਤਿ ਦੁਟ੍ਠੁਲ੍ਲਚ੍ਛਾਦਨੇ ਦੁਵੇ.
੮੭੯. ‘‘ਗਾਮਨ੍ਤਰੇ ਚਤਸ੍ਸੋਵਾ’’ਤਿਆਦਿ ਪਟਿਨਿਦ੍ਦੇਸਤੋ ਚ ਵਿਞ੍ਞਾਯਤਿ.
੮੮੧. ਵਜਨ੍ਤਿਯਾਤਿ ਗਚ੍ਛਨ੍ਤਿਯਾ.
੮੮੫. ਯਾ ਪਨ ਭਿਕ੍ਖੁਨੀ ਰਤ੍ਤਨ੍ਧਕਾਰੇ ਅਪ੍ਪਦੀਪੇ ਹਤ੍ਥਪਾਸੇ ਪੁਰਿਸੇਨ ਸਦ੍ਧਿਂ ਯਦਿ ਸਲ੍ਲਪੇਯ੍ਯ, ਤਸ੍ਸਾ ਪਾਚਿਤ੍ਤਿ. ਦੂਰੇ ਠਿਤਾ ਹਤ੍ਥਪਾਸਂ ਵਿਜਹਿਤ੍ਵਾ ਠਿਤਾ ਵਦੇਯ੍ਯ ਚੇ, ਦੁਕ੍ਕਟਮੇਵਾਤਿ ਯੋਜਨਾ.
੮੮੬. ਯਾ ਪਨ ਭਿਕ੍ਖੁਨੀ ਛਨ੍ਨੇ ਪਟਿਚ੍ਛਨ੍ਨਟ੍ਠਾਨੇ ਦਿਵਾ ਪੁਰਿਸੇਨ ਸਦ੍ਧਿਂ ਅਸ੍ਸ ਪੁਰਿਸਸ੍ਸ ਹਤ੍ਥਪਾਸੇ ਠਿਤਾ ਵਦੇਯ੍ਯ ਸਲ੍ਲਪੇਯ੍ਯ, ਤਸ੍ਸਾ ਪਾਚਿਤ੍ਤਿ. ਹਤ੍ਥਪਾਸਂ ਵਿਜਹਿਤ੍ਵਾ ਵਦੇਯ੍ਯ ਚੇ, ਦੁਕ੍ਕਟਮੇਵਾਤਿ ਯੋਜਨਾ.
੮੯੧. ਸਨਿਸ੍ਸਗ੍ਗਾ ਚ ਪਾਚਿਤ੍ਤੀਤਿ ਨਿਸ੍ਸਜ੍ਜਨਵਿਨਯਕਮ੍ਮਸਹਿਤਾਯੇਵ ਪਾਚਿਤ੍ਤਿ.
੮੯੩. ਇਧ ਇਮਸ੍ਮਿਂ ਸਾਸਨੇ.
੮੯੬. ਦੁਵਿਨ੍ਨਨ੍ਤਿ ਦ੍ਵਿਨ੍ਨਂ.
੮੯੮. ਸਮਾਨਸਂਵਾਸਕਭੂਮਿ ਨਾਮ ਪਕਤਤ੍ਤਸ੍ਸ ਭਿਕ੍ਖੁਨੋ ਸਮਾਨਲਦ੍ਧਿਕਸ੍ਸ ਏਕਸੀਮਾਯਂ ਠਿਤਭਾਵੋ. ਨਾਨਾਪਦਂ ਪੁਬ੍ਬਂ ਏਤਿਸ੍ਸਾਤਿ ਨਾਨਾਪਦਪੁਬ੍ਬਿਕਾ, ਨਾਨਾਸਂਵਾਸਕਭੂਮੀਤਿ ਅਤ੍ਥੋ. ਉਕ੍ਖਿਤ੍ਤਨਾਨਾਲਦ੍ਧਿਕਨਾਨਾਸੀਮਗਤਾ ਨਾਨਾਸਂਵਾਸਕਭੂਮਿ. ਇਮਾ ਦ੍ਵੇਯੇਵ ਸਂਵਾਸਕਭੂਮਿਯੋ ਹਿ ਮਹੇਸਿਨਾ ਕਾਰੁਣਿਕੇਨ ਵੁਤ੍ਤਾਤਿ ਯੋਜਨਾ.
੮੯੯. ਦੁਵਿਨ੍ਨਨ੍ਤਿ ਪਾਰਿਵਾਸਿਕਮਾਨਤ੍ਤਚਾਰੀਨਂ ਦ੍ਵਿਨ੍ਨਂ ਪੁਗ੍ਗਲਾਨਂ. ਦ੍ਵਯਾਤੀਤੇਨਾਤਿ ਕਾਮਸੁਖਲ੍ਲਿਕਾਨੁਯੋਗਅਤ੍ਤਕਿਲਮਥਾਨੁਯੋਗਸਙ੍ਖਾਤਂ ਅਨ੍ਤਦ੍ਵਯਂ ਅਤਿਕ੍ਕਮ੍ਮ ਮਜ੍ਝਿਮਾਯ ਪਟਿਪਦਾਯ ਠਿਤੇਨ. ਅਥ ਵਾ ਸਸ੍ਸਤੁਚ੍ਛੇਦਦ੍ਵਯਂ ਅਤਿਕ੍ਕਨ੍ਤੇਨ.
੯੦੦. ‘‘ਦ੍ਵਙ੍ਗੁਲਪਬ੍ਬਪਰਮਂ ਆਦਾਤਬ੍ਬ’’ਨ੍ਤਿ ਚ ਤਥੇਵ ‘‘ਦ੍ਵਙ੍ਗੁਲਂ ਵਾ ਦੁਮਾਸਂ ਵਾ’’ਤਿ ਚ ਦ੍ਵਙ੍ਗੁਲਾ ਦੁਵੇ ਪਞ੍ਞਤ੍ਤਾਤਿ ਯੋਜਨਾ.
੯੦੫. ਆਣਤ੍ਤਿਯਾ ਮਨੁਸ੍ਸਮਾਰਣਂ, ਆਣਤ੍ਤਿਯਾ ਅਦਿਨ੍ਨਾਦਾਨਮ੍ਪੀਤਿ ਯੋਜਨਾ.
੯੦੭. ਤਿਸ੍ਸੋ ਓਭਾਸਨਾਯਿਮਾਤਿ ਇਮਾ ਤਿਸ੍ਸੋ ਮੇਥੁਨਾਧਿਪ੍ਪਾਯਪ੍ਪਕਾਸਨਾ.
੯੦੮. ਸਙ੍ਘਾਦਿਸੇਸੋ ਏਵ ਸਙ੍ਘਾਦਿਸੇਸਤਾ.
੯੧੦. ਵਨਪ੍ਪਤਿ ਨਾਮ ਪੁਪ੍ਫਂ ਵਿਨਾ ਫਲਨ੍ਤੀ ਨਿਗ੍ਰੋਧਉਦੁਮ੍ਬਰਅਸ੍ਸਤ੍ਥਪਿਲਕ੍ਖਕਾਦਿਰੁਕ੍ਖਜਾਤਿ, ਇਧ ਪਨ ਵਨਜੇਟ੍ਠੋ ਰਕ੍ਖਿਤਗੋਪਿਤਚੇਤਿਯਰੁਕ੍ਖੋ ਵਨਪ੍ਪਤੀਤਿ ਅਧਿਪ੍ਪਾਯੋ. ਥੁਲ੍ਲਤਾਤਿ ਥੁਲ੍ਲਚ੍ਚਯਂ.
੯੧੨. ਵਿਸ੍ਸਟ੍ਠੀਤਿ ਵਿਸ੍ਸਜ੍ਜਿ ਸਮ੍ਭਵਧਾਤੁ. ਛਡ੍ਡਨੇਤਿ ਉਪਕ੍ਕਮਿਤ੍ਵਾ ਮੋਚਨੇ. ‘‘ਹਰਿਤੇ ਉਚ੍ਚਾਰਂ ਪਸ੍ਸਾਵਂ ਛਡ੍ਡਨੇ’’ਤਿ ਪਦਚ੍ਛੇਦੋ.
੯੧੩. ਕਿਂ ਪਮਾਣਮੇਤਾਸਨ੍ਤਿ ਕਿਤ੍ਤਕਾ.
੯੧੫. ਭਿਕ੍ਖੁ ਭਿਕ੍ਖੁਨਿਯਾ ਸਦ੍ਧਿਨ੍ਤਿ ਏਤ੍ਥ ਭਿਕ੍ਖੂਤਿ ਸਾਮਿਵਚਨਪ੍ਪਸਙ੍ਗੇ ਪਚ੍ਚਤ੍ਤਂ, ਭਿਕ੍ਖੁਨੋਤਿ ਅਤ੍ਥੋ. ਗਾਥਾਬਨ੍ਧਵਸੇਨ ਵਾ ਵਣ੍ਣਲੋਪੋ.
੯੧੮. ਦੁਤਿਯਾਯ ਹਤ੍ਥਪਾਸਕਂ.
੯੨੨. ‘‘ਯਾਵਤਤਿਯਕੇ ਤਿਸ੍ਸੋ ਆਪਤ੍ਤਿਯੋ’’ਤਿ (ਪਰਿ. ਅਟ੍ਠ. ੪੭੬ ਅਤ੍ਥਤੋ ਸਮਾਨਂ) ਪਦਸ੍ਸ ਨਿਦ੍ਦੇਸੇ ‘‘ਥੁਲ੍ਲਚ੍ਚਯਂ ਸਿਯਾ ਸਙ੍ਘ-ਭੇਦਕਸ੍ਸਾਨੁਵਤ੍ਤਿਨੋ’’ਤਿ ਪਠਨ੍ਤਿ. ‘‘ਤਿਣ੍ਣਂ ਸਙ੍ਘਭੇਦਾਨੁਵਤ੍ਤਾਕਾਨਂ ਕੋਕਾਲਿਕਾਦੀਨਂ ਸਙ੍ਘਾਦਿਸੇਸੋ’’ਤਿ ਅਟ੍ਠਕਥਾਯਂ ਵੁਤ੍ਤਤ੍ਤਾ ਤਥਾ ਪਾਠੋ ਨ ਗਹੇਤਬ੍ਬੋ.
੯੨੩. ਯਾਵਤਤਿਯਕੇਤਿ ਤਿਣ੍ਣਂ ਪੂਰਣੀ ਤਤਿਯਾ, ਕਮ੍ਮਵਾਚਾ, ਯਾਵਤਤਿਯਾਯ ਕਮ੍ਮਵਾਚਾਯ ਪਰਿਯੋਸਾਨੇ ਆਪਜ੍ਜਿਤਬ੍ਬਾ ਆਪਤ੍ਤਿ ਯਾਵਤਤਿਯਕਾ ਨਾਮ.
੯੨੬. ‘‘ਅਵਸ੍ਸੁਤਸ੍ਸ…ਪੇ… ਕਿਞ੍ਚੀ’’ਤਿ ਇਦਂ ਗਰੁਕਾਪਤ੍ਤਿਯਾ ਵਤ੍ਥੁਦਸ੍ਸਨਂ. ‘‘ਸਬ੍ਬਂ ਮਂਸਂ ਅਕਪ੍ਪਿਯ’’ਨ੍ਤਿ ਇਦਂ ਥੁਲ੍ਲਚ੍ਚਯਦੁਕ੍ਕਟਾਨਂ ਵਤ੍ਥੁਦਸ੍ਸਨਂ.
੯੨੭. ‘‘ਵਿਞ੍ਞਾਪੇਤ੍ਵਾਨ…ਪੇ… ਭੋਜਨਮ੍ਪਿ ਚਾ’’ਤਿ ਇਦਂ ਪਾਟਿਦੇਸਨੀਯਵਤ੍ਥੁਦਸ੍ਸਨਂ. ‘‘ਲਸੁਣਮ੍ਪਿ ਚਾ’’ਤਿ ਇਦਂ ਪਾਚਿਤ੍ਤਿਯਵਤ੍ਥੁਦਸ੍ਸਨਂ. ‘‘ਏਕਤੋ ਅਜ੍ਝੋਹਰਨ੍ਤਿਯਾ’’ਤਿ ਪਦਚ੍ਛੇਦੋ.
੯੩੦. ਰਤ੍ਤਚਿਤ੍ਤੇਨ ਇਤ੍ਥਿਯਾ ਅਙ੍ਗਜਾਤਂ ਓਲੋਕੇਨ੍ਤਸ੍ਸ ਦੁਕ੍ਕਟਂ ਵੁਤ੍ਤਨ੍ਤਿ ਯੋਜਨਾ.
੯੩੧. ਸਮ੍ਮਾਵਤ੍ਤਨਾਵ ਸਮ੍ਮਾਵਤ੍ਤਨਕਾ. ਤੇਚਤ੍ਤਾਲੀਸ ਵਤ੍ਤਨਾ ਦ੍ਵਾਸੀਤਿਕ੍ਖਨ੍ਧਕਵਤ੍ਤਾਨਂ ਪਰਿਪੂਰਣਟ੍ਠਾਨੇ ਦਸ੍ਸਿਤਾ.
੯੩੨. ਅਦਸ੍ਸਨਅਪਟਿਕਮ੍ਮੇ ਆਪਨ੍ਨਾਪਤ੍ਤਿਯਾ ਦੁਵੇ ਪੁਗ੍ਗਲਾ, ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਆਪਨ੍ਨਾਪਤ੍ਤਿਯਾ ਏਕੋਤਿ ਇਮੇ ਤਯੋ ਉਕ੍ਖਿਤ੍ਤਪੁਗ੍ਗਲਾ.
੯੩੪. ਦੂਸਕੋਤਿ ਭਿਕ੍ਖੁਨਿਦੂਸਕੋ. ਕਣ੍ਟਕੋਤਿ ਕਣ੍ਟਕਸਾਮਣੇਰੋ.
੯੩੭. ਦਦੇਯ੍ਯਚ੍ਚੇਵਮਾਦਿਕਾਤਿ ਞਤ੍ਤਿਕਾਲੇ ‘‘ਸਙ੍ਘੋ ਦਦੇਯ੍ਯਾ’’ਤਿਆਦਿਭੇਦਾ ਞਤ੍ਤਿਕਪ੍ਪਨਾ, ਞਤ੍ਤਿਕਿਰਿਯਾਤਿ ਅਤ੍ਥੋ. ਦੇਤਿ ਸਙ੍ਘੋ ਕਰੋਤੀਤਿਆਦੀਤਿ ਕਮ੍ਮਵਾਚਾਕਾਲੇ ‘‘ਸਙ੍ਘੋ ਦੇਤੀ’’ਤਿ ਵਾ ‘‘ਕਰੋਤੀ’’ਤਿ ਵਾ ਆਦਿਭੇਦਾ ਵਚਨਕਮ੍ਮਸ੍ਸ ਅਨਿਟ੍ਠਿਤਤ੍ਤਾ ਵਿਪ੍ਪਕਤਪਚ੍ਚੁਪ੍ਪਨ੍ਨਂ ਨਾਮ ਸਿਯਾ.
੯੩੮. ਦਿਨ੍ਨਂ ਕਤਂ ਪਨਿਚ੍ਚਾਦੀਤਿ ਕਮ੍ਮਵਾਚਾਯ ਨਿਟ੍ਠਿਤਾਯ ‘‘ਦਿਨ੍ਨਂ ਸਙ੍ਘੇਨਾ’’ਤਿ ਵਾ ‘‘ਕਤਂ ਸਙ੍ਘੇਨਾ’’ਤਿ ਵਾਤਿਆਦਿਵਚਨਂ ਅਤੀਤਕਰਣਂ ਨਾਮ ਸਿਯਾ.
੯੩੯. ਸਙ੍ਘੇਤਿ ਸਙ੍ਘਮਜ੍ਝੇ.
‘‘ਕਾਰਣੇਹਿ ਪਨ ਦ੍ਵੀਹਿ, ਸਙ੍ਘੋ ਭਿਜ੍ਜਤਿ ਨਞ੍ਞਥਾ’’ਤਿ ਕਸ੍ਮਾ ਵੁਤ੍ਤਂ, ਨਨੁ ‘‘ਪਞ੍ਚਹੁਪਾਲਿ, ਆਕਾਰੇਹਿ ਸਙ੍ਘੋ ਭਿਜ੍ਜਤਿ. ਕਤਮੇਹਿ ਪਞ੍ਚਹਿ? ਕਮ੍ਮੇਨ, ਉਦ੍ਦੇਸੇਨ, ਵੋਹਰਨ੍ਤੋ, ਅਨੁਸ੍ਸਾਵਨੇਨ, ਸਲਾਕਗ੍ਗਾਹੇਨਾ’’ਤਿ (ਪਰਿ. ੪੫੮) ਵੁਤ੍ਤਤ੍ਤਾ, ਅਟ੍ਠਕਥਾਯਞ੍ਚ (ਪਰਿ. ਅਟ੍ਠ. ੪੫੮) ‘‘ਪਞ੍ਚਹਿ ਕਾਰਣੇਹੀ’’ਤਿ ਵਚਨਤੋ ਚ ਇਧ ਇਮੇਹਿ ਦ੍ਵੀਹੇਵ ਕਾਰਣੇਹਿ ਸਙ੍ਘਭੇਦਕਥਨਂ ਅਯੁਤ੍ਤਨ੍ਤਿ? ਵੁਚ੍ਚਤੇ – ਨਾਯੁਤ੍ਤਂ ਪੁਬ੍ਬਪਯੋਗਕਾਰਕਵਸੇਨ ਵੁਤ੍ਤਤ੍ਤਾ. ਤਥਾ ਹਿ ਅਟ੍ਠਕਥਾਯਂ –
‘‘ਕਮ੍ਮੇਨਾਤਿ ਅਪਲੋਕਨਾਦੀਸੁ ਚਤੂਸੁ ਕਮ੍ਮੇਸੁ ਅਞ੍ਞਤਰੇਨ ਕਮ੍ਮੇਨ. ਉਦ੍ਦੇਸੇਨਾਤਿ ਪਞ੍ਚਸੁ ਪਾਤਿਮੋਕ੍ਖੁਦ੍ਦੇਸੇਸੁ ਅਞ੍ਞਤਰੇਨ ਉਦ੍ਦੇਸੇਨ. ਵੋਹਰਨ੍ਤੋਤਿ ਕਥਯਨ੍ਤੋ, ਤਾਹਿ ਤਾਹਿ ਉਪਪਤ੍ਤੀਹਿ ‘ਅਧਮ੍ਮਂ ਧਮ੍ਮੋ’ਤਿਆਦੀਨਿ ਅਟ੍ਠਾਰਸ ਭੇਦਕਰਵਤ੍ਥੂਨਿ ਦੀਪੇਨ੍ਤੋ. ਅਨੁਸ੍ਸਾਵਨੇਨਾਤਿ ‘ਨਨੁ ਤੁਮ੍ਹੇ ਜਾਨਾਥ ਮਯ੍ਹਂ ਉਚ੍ਚਾਕੁਲਾ ਪਬ੍ਬਜਿਤਭਾਵਂ, ਬਹੁਸ੍ਸੁਤਭਾਵਞ੍ਚ, ਮਾਦਿਸੋ ਨਾਮ ਉਦ੍ਧਮ੍ਮਂ ਉਬ੍ਬਿਨਯਂ ਸਤ੍ਥੁਸਾਸਨਂ ਕਰੇਯ੍ਯਾਤਿ ਚਿਤ੍ਤੇ ਉਪ੍ਪਾਦੇਤੁਂ ਤੁਮ੍ਹਾਕਂ ਯੁਤ੍ਤਂ, ਕਿਂ ਮਯ੍ਹਂ ਅਵੀਚਿ ਨੀਲੁਪ੍ਪਲਵਨਮਿਵ ਸੀਤਲੋ, ਕਿਮਹਂ ਅਪਾਯਤੋ ਨ ਭਾਯਾਮੀ’ਤਿਆਦਿਨਾ ਨਯੇਨ ਕਣ੍ਣਮੂਲੇ ਵਚੀਭੇਦਂ ਕਤ੍ਵਾ ਅਨੁਸ੍ਸਾਵਨੇਨ. ਸਲਾਕਗ੍ਗਾਹੇਨਾਤਿ ਏਵਂ ਅਨੁਸ੍ਸਾਵੇਤ੍ਵਾ ਤੇਸਂ ਚਿਤ੍ਤਂ ਉਪਤ੍ਥਮ੍ਭੇਤ੍ਵਾ ਅਨਿਵਤ੍ਤਿਧਮ੍ਮੇ ਕਤ੍ਵਾ ‘ਗਣ੍ਹਥ ਇਮਂ ਸਲਾਕ’ਨ੍ਤਿ ਸਲਾਕਗ੍ਗਾਹੇਨ.
‘‘ਏਤ੍ਥ ਚ ਕਮ੍ਮਮੇਵ, ਉਦ੍ਦੇਸੋ ਵਾ ਪਮਾਣਂ, ਵੋਹਾਰਾਨੁਸ੍ਸਾਵਨਸਲਾਕਗ੍ਗਾਹਾ ਪਨ ਪੁਬ੍ਬਭਾਗਾ. ਅਟ੍ਠਾਰਸਵਤ੍ਥੁਦੀਪਨਵਸੇਨ ਹਿ ਵੋਹਰਨ੍ਤੇ ਤਤ੍ਥ ਰੁਚਿਜਨਨਤ੍ਥਂ ਅਨੁਸ੍ਸਾਵੇਤ੍ਵਾ ਸਲਾਕਾਯ ਗਹਿਤਾਯਪਿ ਅਭਿਨ੍ਨੋਵ ਹੋਤਿ ਸਙ੍ਘੋ. ਯਦਾ ਪਨ ਏਵਂ ਚਤ੍ਤਾਰੋ ਵਾ ਅਤਿਰੇਕੇ ਵਾ ਸਲਾਕਂ ਗਾਹੇਤ੍ਵਾ ਆਵੇਣਿਕਂ ਕਮ੍ਮਂ ਵਾ ਉਦ੍ਦੇਸਂ ਵਾ ਕਰੋਤਿ, ਤਦਾ ਸਙ੍ਘੋ ਭਿਨ੍ਨੋ ਨਾਮ ਹੋਤੀ’’ਤਿ (ਪਰਿ. ਅਟ੍ਠ. ੪੫੮) –
ਵੁਤ੍ਤਤ੍ਤਾ ਸਲਾਕਗ੍ਗਾਹਕਮ੍ਮਾਨਿ ਦ੍ਵੇ ਪਧਾਨਕਾਰਣਾਨੀਤਿ ਇਧ ਤਾਨੇਵ ਦਸ੍ਸਿਤਾਨਿ.
ਨਨੁ ਚ ਸਲਾਕਗ੍ਗਾਹੋਪਿ ਸਙ੍ਘਭੇਦਸ੍ਸ ਪੁਬ੍ਬਭਾਗੋ ਵੁਤ੍ਤੋ, ਉਦ੍ਦੇਸਕਮ੍ਮਾਨੇਵ ਪਧਾਨਭਾਵੇਨ ਵੁਤ੍ਤਾਨਿ, ਤਸ੍ਮਾ ਕਥਮਸ੍ਸ ਸਲਾਕਗ੍ਗਾਹਸ੍ਸ ਪਧਾਨਕਾਰਣਭਾਵੋਤਿ? ਵੁਚ੍ਚਤੇ – ਉਦ੍ਦੇਸਕਮ੍ਮਾਨਿਪਿ ਸਲਾਕਗ੍ਗਾਹੇ ਸਿਦ੍ਧੇ ਅਵਸ੍ਸਮ੍ਭਵਨਤੋ ਅਤ੍ਥਸਾਧਨਪਯੋਗੇਨ ਵਿਨਾ ਅਸਿਦ੍ਧਾਨੇਵ ਹੋਨ੍ਤੀਤਿ ਸੋ ਪਧਾਨਭਾਵੇਨ ਇਧ ਗਹਿਤੋ, ਉਦ੍ਦੇਸੋ ਪਨ ਪਞ੍ਞਤ੍ਤਕਮ੍ਮਪੁਬ੍ਬਙ੍ਗਮਤ੍ਤਾ ਕਮ੍ਮੇਨੇਵ ਸਙ੍ਗਹਿਤੋਤਿ ਇਧ ਵਿਸੁਂ ਨ ਵੁਤ੍ਤੋਤਿ ਦਟ੍ਠਬ੍ਬਂ.
੯੪੧. ਪਯੁਤ੍ਤਾਯੁਤ੍ਤਵਾਚਾਯਾਤਿ ਪਚ੍ਚਯੁਪ੍ਪਾਦਨਤ੍ਥਾਯ ਪਯੁਤ੍ਤਾ ਚ ਸਾ ਸਕ੍ਯਪੁਤ੍ਤਿਯਭਾਵਸ੍ਸ ਅਯੁਤ੍ਤਾ ਅਨਨੁਰੂਪਾ ਚਾਤਿ ਪਯੁਤ੍ਤਾਯੁਤ੍ਤਾ, ਸਾਯੇਵ ਵਾਚਾਤਿ ਪਯੁਤ੍ਤਾਯੁਤ੍ਤਵਾਚਾ, ਤਾਯ.
੯੪੪. ਯਾ ਭਿਕ੍ਖੁਨੀ ਵਿਞ੍ਞਾਪੇਤ੍ਵਾ ਭੁਞ੍ਜਤਿ, ਤਸ੍ਸਾ ਚ ਪਾਟਿਦੇਸਨੀਯਂ ਸਿਯਾਤਿ ਯੋਜਨਾ.
੯੪੫. ਅਨਾਮਯੋਤਿ ਅਗਿਲਾਨੋ.
੯੪੬. ‘‘ਦਸਸਤਾਨੀ’’ਤਿਆਦਿਗਾਥਾਯ ਰਤ੍ਤੀਨਨ੍ਤਿ ਏਤ੍ਥ ‘‘ਸਤ’’ਨ੍ਤਿ ਸੇਸੋ. ਛਾਦਨਕਿਰਿਯਾਯ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ. ਦਸਸਤਾਨਿ ਆਪਤ੍ਤਿਯੋ ਰਤ੍ਤੀਨਂ ਸਤਂ ਛਾਦੇਤ੍ਵਾਤਿ ਯੋਜਨਾ. ਏਵਂ ਕਤ੍ਤਬ੍ਬਯੋਜਨਾਯਂ –
‘‘ਦਸ ਸਤਂ ਰਤ੍ਤਿਸਤਂ, ਆਪਤ੍ਤਿਯੋ ਛਾਦਯਿਤ੍ਵਾਨ;
ਦਸ ਰਤ੍ਤਿਯੋ ਵਸਿਤ੍ਵਾਨ, ਮੁਚ੍ਚੇਯ੍ਯ ਪਾਰਿਵਾਸਿਕੋ’’ਤਿ. (ਪਰਿ. ੪੭੭) –
ਅਯਂ ਪਰਿਵਾਰਗਾਥਾਪਮਾਣਂ. ਏਕਦਿਵਸਂ ਸਤਂਸਙ੍ਘਾਦਿਸੇਸਾਪਤ੍ਤਿਯੋ ਆਪਜ੍ਜਿਤ੍ਵਾ ਦਸਦਿਵਸੇ ਛਾਦਨਵਸੇਨ ਸਤਂਦਿਵਸੇ ਸਹਸ੍ਸਸਙ੍ਘਾਦਿਸੇਸਾਪਤ੍ਤਿਯੋ ਛਾਦਯਿਤ੍ਵਾਤਿ ਅਤ੍ਥੋ. ਅਯਮੇਤ੍ਥ ਸਙ੍ਖੇਪਤ੍ਥੋ – ਯੋ ਦਸਦਿਵਸੇ ਸਤਂ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਿਤ੍ਵਾ ਦਸਦਿਵਸੇ ਪਟਿਚ੍ਛਾਦੇਤਿ, ਤੇਨ ਰਤ੍ਤਿਸਤਂ ਆਪਤ੍ਤਿਸਹਸ੍ਸਂ ਪਟਿਚ੍ਛਾਦਿਤਂ ਹੋਤੀਤਿ. ਦਸ ਰਤ੍ਤਿਯੋ ਵਸਿਤ੍ਵਾਨਾਤਿ ‘‘ਸਬ੍ਬਾਵ ਤਾ ਆਪਤ੍ਤਿਯੋ ਦਸਾਹਪਟਿਚ੍ਛਨ੍ਨਾ’’ਤਿ ਪਰਿਵਾਸਂ ਯਾਚਿਤ੍ਵਾ ਦਸ ਰਤ੍ਤਿਯੋ ਵਸਿਤ੍ਵਾਤਿ ਅਤ੍ਥੋ. ਮੁਚ੍ਚੇਯ੍ਯ ਪਾਰਿਵਾਸਿਕੋਤਿ ਪਰਿਵਾਸਂ ਵਸਨ੍ਤੋ ਭਿਕ੍ਖੁ ਅਤ੍ਤਨਾ ਵਸਿਤਬ੍ਬਪਰਿਵਾਸਤੋ ਮੁਚ੍ਚੇਯ੍ਯ, ਮੁਤ੍ਤੋ ਭਵੇਯ੍ਯਾਤਿ ਅਤ੍ਥੋ.
੯੪੭. ਪਾਰਾਜਿਕਾਨਿ ਅਟ੍ਠੇਵਾਤਿ ਅਗ੍ਗਹਿਤਗ੍ਗਹਣੇਨ. ਤੇਵੀਸ ਗਰੁਕਾਤਿ ਭਿਕ੍ਖੂਹਿ ਅਸਾਧਾਰਣਾ ਭਿਕ੍ਖੁਨੀਨਂ ਦਸ, ਭਿਕ੍ਖੁਨੀਹਿ ਅਸਾਧਾਰਣਾ ਭਿਕ੍ਖੂਨਂ ਛ, ਉਭਿਨ੍ਨਂ ਸਾਧਾਰਣਾ ਸਤ੍ਤਾਤਿ ਏਵਂ ਤੇਵੀਸ ਸਙ੍ਘਾਦਿਸੇਸਾ.
੯੪੮. ਵੁਤ੍ਤਾਨੀਤਿ ਯਥਾਵੁਤ੍ਤਾਨਿ ਨਿਸ੍ਸਗ੍ਗਿਯਾਨਿ. ਦ੍ਵੇਚਤ੍ਤਾਲੀਸ ਹੋਨ੍ਤੀਤਿ ਭਿਕ੍ਖੁਵਿਭਙ੍ਗਾਗਤਾ ਤਿਂਸ, ਭਿਕ੍ਖੂਹਿ ਅਸਾਧਾਰਣਾ ਭਿਕ੍ਖੁਨੀਨਂ ਆਦਿਤੋ ਦ੍ਵਾਦਸ ਚਾਤਿ ਦ੍ਵਾਚਤ੍ਤਾਲੀਸ ਨਿਸ੍ਸਗ੍ਗਿਯਾਨਿ ਹੋਨ੍ਤਿ. ਅਟ੍ਠਾਸੀਤਿਸਤਂ ਪਾਚਿਤ੍ਤਿਯਾ ਪੁਬ੍ਬੇ ਦਸ੍ਸਿਤਾਵ.
੯੪੯. ਸੁਸਿਕ੍ਖੇਨਾਤਿ ਸੁਟ੍ਠੁ ਸਿਕ੍ਖਿਤਅਧਿਸੀਲਾਦਿਤਿਵਿਧਸਿਕ੍ਖੇਨ ਭਗਵਤਾ.
੯੫੦. ਸੁਪਞ੍ਞੇਨਾਤਿ ਸੋਭਣਾ ਦਸਬਲਚਤੁਵੇਸਾਰਜ੍ਜਛਅਸਾਧਾਰਣਾਦਯੋ ਪਞ੍ਞਾ ਯਸ੍ਸ ਸੋ ਸੁਪਞ੍ਞੋ, ਤੇਨ. ਯਸਸ੍ਸਿਨਾਤਿ ਅਟ੍ਠਅਰਿਯਪੁਗ੍ਗਲਸਮੂਹਸਙ੍ਖਾਤਪਰਿਵਾਰਯਸਾ ਚ ਸਬ੍ਬਲੋਕਬ੍ਯਾਪਕਗੁਣਘੋਸਸਙ੍ਖਾਤਕਿਤ੍ਤਿਯਸਾ ਚ ਤੇਨ ਸਮਨ੍ਨਾਗਤਤ੍ਤਾ ਯਸਸ੍ਸਿਨਾ. ਅਡ੍ਢੁਡ੍ਢਾਨਿ ਸਤਾਨਿ ਭਵਨ੍ਤੀਤਿ ਯਥਾਦਸ੍ਸਿਤਗਣਨਾਯ ਪਿਣ੍ਡਵਸੇਨ ਪਞ੍ਞਾਸਾਧਿਕਾਨਿ ਤੀਣਿ ਸਤਾਨਿ ਭਵਨ੍ਤੀਤਿ ਅਤ੍ਥੋ. ਸੁਪਞ੍ਞੇਨ ਯਸਸ੍ਸਿਨਾ ਗੋਤਮੇਨ ਪਞ੍ਞਤ੍ਤਾਨਿ ਸਬ੍ਬਾਨਿ ਸਿਕ੍ਖਾਪਦਾਨਿ ਅਡ੍ਢੁਡ੍ਢਾਨਿ ਸਤਾਨਿ ਭਵਨ੍ਤੀਤਿ ਯੋਜਨਾ.
੯੫੧. ਏਤੇਸੁ ਸਿਕ੍ਖਾਪਦੇਸੁ ਯੋ ਸਾਰਭੂਤੋ ਵਿਨਿਚ੍ਛਯੋ ਵਤ੍ਤਬ੍ਬੋ, ਸੋ ਸਕਲੋ ਮਯਾ ਸਮਾਸੇਨ ਸਬ੍ਬਥਾ ਸਬ੍ਬਾਕਾਰੇਨ ਵੁਤ੍ਤੋਤਿ ਯੋਜਨਾ.
੯੫੨. ਇਦਂ ਉਤ੍ਤਰਂ ਨਾਮ ਪਕਰਣਂ.
੯੫੩. ਤਸ੍ਮਾਤਿ ਮਯਾ ਵਿਚਾਰੇਤ੍ਵਾ ਵੁਤ੍ਤਤ੍ਤਾਵ. ਅਤ੍ਥੇਤਿ ਵਚਨਤ੍ਥਭਾਵਤ੍ਥਾਦਿਭੇਦੇ ਅਤ੍ਥੇ ਵਾ. ਅਕ੍ਖਰਬਨ੍ਧੇ ਵਾਤਿ ਅਕ੍ਖਰਸਙ੍ਖਾਤਪਦਬਨ੍ਧੇ ਵਾ. ਵਿਞ੍ਞਾਸਸ੍ਸ ਕਮੇਪਿ ਵਾਤਿ ਉਦ੍ਦੇਸਵਸੇਨ ਗਨ੍ਥਨਿਕ੍ਖੇਪਸ੍ਸ ਕਮੇਪਿ. ਕਙ੍ਖਾ ਨ ਕਾਤਬ੍ਬਾਤਿ ‘‘ਯਥਾਅਧਿਪ੍ਪੇਤਸ੍ਸ ਇਦਂ ਵਾਚਕਂ ਨੁ ਖੋ, ਅਵਾਚਕ’’ਨ੍ਤਿ ਵਾ ‘‘ਇਦਮਯੁਤ੍ਤਂ ਨੁ ਖੋ, ਯੁਤ੍ਤ’’ਨ੍ਤਿ ਵਾ ‘‘ਇਦਮਧਿਕਂ ਨੁ ਖੋ, ਊਨ’’ਨ੍ਤਿ ਵਾ ‘‘ਇਦਮਘਟ੍ਟਿਤਕ੍ਕਮਂ ਨੁ ਖੋ, ਘਟ੍ਟਿਤਕ੍ਕਮ’’ਨ੍ਤਿ ਵਾ ‘‘ਇਦਂ ਵਿਰੁਦ੍ਧਸਮਯਂ ਨੁ ਖੋ, ਅਵਿਰੁਦ੍ਧਸਮਯ’’ਨ੍ਤਿ ਵਾ ‘‘ਇਦਂ ਦੁਰੁਤ੍ਤਂ ਨੁ ਖੋ, ਸੁਵੁਤ੍ਤ’’ਨ੍ਤਿ ਵਾ ‘‘ਇਦਂ ਸਤ੍ਥਕਂ ਨੁ ਖੋ, ਨਿਰਤ੍ਥਕ’’ਨ੍ਤਿ ਵਾ ਕਙ੍ਖਾ ਵਿਮਤਿ ਯੇਨ ਕੇਨਚਿ ਨ ਕਾਤਬ੍ਬਾ. ਬਹੁਮਾਨਤਾਤਿ ‘‘ਵਿਨਯੋ ਸਂਵਰਤ੍ਥਾਯਾ’’ਤਿਆਦਿਨਾ (ਪਰਿ. ੩੬੬) ਨਿਦ੍ਦਿਟ੍ਠਪਯੋਜਨਪਰਮ੍ਪਰਾਯ ਮੂਲਕਾਰਣਤ੍ਤਾ ਮਹਤੀ ਸਮ੍ਮਾਨਾ ਕਾਤਬ੍ਬਾਤਿ ਅਤ੍ਥੋ.
੯੫੪. ਯੋ ਭਿਕ੍ਖੁ ਸਉਤ੍ਤਰਂ ਉਤ੍ਤਰਪਕਰਣੇਨ ਸਹਿਤਂ ਵਿਨਯਸ੍ਸਵਿਨਿਚ੍ਛਯਂ ਨਾਮ ਪਕਰਣਂ ਜਾਨਾਤਿ ਧਮ੍ਮਤੋ ਚੇਵ ਅਤ੍ਥਤੋ ਚ ਵਿਨਿਚ੍ਛਯਤੋ ਚ ਸਬ੍ਬਥਾ ਅਵਬੁਜ੍ਝਤਿ, ਸੋ ਭਿਕ੍ਖੁ ਅਤ੍ਤਨਾ ਸਿਕ੍ਖਿਤਬ੍ਬਾਯ ਸਿਕ੍ਖਾਯ ਸਬ੍ਬਸੋ ਵਿਞ੍ਞਾਤਤ੍ਤਾ ਸਿਕ੍ਖਾਪਕੇਨ ਆਚਰਿਯੇਨ ਵਿਨਾਪਿ ਸਿਕ੍ਖਿਤੁਂ ਸਮਤ੍ਥੋਤਿ. ਨਿਸ੍ਸਯਂ ਵਿਮੁਞ੍ਚਿਤ੍ਵਾਤਿ ਆਚਰਿਯੁਪਜ੍ਝਾਯੇ ਨਿਸ੍ਸਾਯ ਵਾਸਂ ਮੁਞ੍ਚਿਤ੍ਵਾ. ਯਥਾਕਾਮਙ੍ਗਤੋ ਸਿਯਾਤਿ ਯਾਦਿਸਾ ਯਾਦਿਸਾ ਅਤ੍ਤਨਾ ਗਾਮਿਤਾ, ਤਤ੍ਥ ਤਤ੍ਥ ਗਮਨਾਰਹੋ ਭਵੇਯ੍ਯਾਤਿ ਅਤ੍ਥੋ.
੯੫੫. ਨਿਸ੍ਸਯਂ ਦਾਤੁਕਾਮੇਨ. ਸਹ ਵਿਭਙ੍ਗੇਨ ਸਵਿਭਙ੍ਗਂ. ਸਹ ਮਾਤਿਕਾਯ ਸਮਾਤਿਕਂ. ਇਦਂ ਸਉਤ੍ਤਰਂ ਵਿਨਯਵਿਨਿਚ੍ਛਯਪਕਰਣਂ ਸੁਟ੍ਠੁ ਵਾਚੁਗ੍ਗਤਂ ਕਤ੍ਵਾ ਗਨ੍ਥਤੋ ਸੁਟ੍ਠੁ ਪਗੁਣਂ ਵਾਚੁਗ੍ਗਤਂ ਕਤ੍ਵਾ ਅਤ੍ਥਤੋ, ਵਿਨਿਚ੍ਛਯਤੋ ਚ ਸਮ੍ਮਾ ਜਾਨਿਤ੍ਵਾ ਏਵਂ ਦਾਤਬ੍ਬਨ੍ਤਿ ਯੋਜਨਾ.
੯੫੬-੭. ਯੋ ਭਿਕ੍ਖੁ ਇਮਂ ਸਉਤ੍ਤਰਂ ਵਿਨਯਵਿਨਿਚ੍ਛਯਪਕਰਣਂ ਵਾਚਾਯ ਪਠਤਿ, ਮਨਸਾ ਚਿਨ੍ਤੇਤਿ, ਅਞ੍ਞੇਹਿ ਵੁਚ੍ਚਮਾਨਂ ਸੁਣਾਤਿ, ਅਤ੍ਥਂ ਪਰਿਪੁਚ੍ਛਤਿ, ਪਰਂ ਵਾਚੇਤਿ, ਨਿਚ੍ਚਂ ਅਤ੍ਥਂ ਉਪਪਰਿਕ੍ਖਤਿ ਯਥਾਪਰਿਪੁਚ੍ਛਿਤਮਤ੍ਥਂ ਹੇਤੁਉਦਾਹਰਣਪਵਤ੍ਤਿਵਸੇਨ ਉਪਗਨ੍ਤ੍ਵਾ ਸਮਨ੍ਤਤੋ ਇਕ੍ਖਤਿ ਪਞ੍ਞਾਯ ਨਿਯਮੇਤਿ ਵਵਤ੍ਥਪੇਤਿ, ਤਸ੍ਸ ਪਨ ਭਿਕ੍ਖੁਸ੍ਸ ਵਿਨਯਨਿਸ੍ਸਿਤਾ ਸਬ੍ਬੇਵ ਅਤ੍ਥਾ ਆਪਤ੍ਤਾਨਾਪਤ੍ਤਿਕਪ੍ਪਿਯਾਕਪ੍ਪਿਯਾਦਿਪਭੇਦਾ ਸਬ੍ਬੇ ਅਤ੍ਥਾ ਹਤ੍ਥੇ ਆਮਲਕਂ ਵਿਯ ਕਰਤਲੇ ਅਮਲਮਣਿਰਤਨਂ ਵਿਯ ਉਪਟ੍ਠਹਨ੍ਤਿ ਪਾਕਟਾ ਭਵਨ੍ਤੀਤਿ ਯੋਜਨਾ. ਨਤ੍ਥਿ ਏਤਸ੍ਸ ਮਲਨ੍ਤਿ ਅਮਲਂ, ਅਮਲਮੇਵ ਆਮਲਕਨ੍ਤਿ ਮਣਿਰਤਨਂ ਵੁਚ੍ਚਤਿ.
੯੫੮. ਨਤ੍ਥਿ ਏਤੇਸਂ ਬੁਦ੍ਧੀਤਿ ਅਬੁਦ੍ਧੀ, ਅਬੁਦ੍ਧੀ ਚ ਤੇ ਜਨਾ ਚਾਤਿ ਅਬੁਦ੍ਧਿਜਨਾ, ਅਬੁਦ੍ਧਿਜਨਾਨਂ ਸਾਰਂ ਅਵਸਾਰਂ ਓਸੀਦਨਂ ਦਦਾਤਿ ਆਦਦਾਤਿ ਕਰੋਤੀਤਿ ਅਬੁਦ੍ਧਿਜਨਸਾਰਦਂ, ਬੁਦ੍ਧਿਵਿਰਹਿਤਾਨਂ ਅਗਾਧਂ ਗਮ੍ਭੀਰਂ. ਤੇਹਿ ਅਲਦ੍ਧਪਤਿਟ੍ਠਂ ਅਮਤਸਾਗਰਂ ਸਦ੍ਦਤ੍ਥਰਸਾਮਤਸ੍ਸ, ਨਿਬ੍ਬਾਨਾਮਤਸ੍ਸ ਵਾ ਪਟਿਲਾਭਕਾਰਣਤ੍ਤਾ ਸਾਗਰਸਦਿਸਂ ਪਰਮਂ ਉਤ੍ਤਮਂ ਇਮਂ ਉਤ੍ਤਰਂ ਸਾਗਰਂ ਆਸਨ੍ਨਪਚ੍ਚਕ੍ਖਂ ਉਤ੍ਤਰਪਕਰਣਸਙ੍ਖਾਤਂ ਸਮੁਦ੍ਦਸਾਗਰਂ ਸਾਰਦੋ ਹੁਤ੍ਵਾ ਉਤ੍ਤਰਂ ਉਤ੍ਤਰਨ੍ਤੋ ਪਰਿਯੋਸਾਪੇਨ੍ਤੋ ਨਰੋ ਭਿਕ੍ਖੁ ਹਿ ਯਸ੍ਮਾ ਵਿਨਯਪਾਰਗੋ ਵਿਨਯਪਿਟਕਸ੍ਸ ਪਰਿਯਨ੍ਤਂ ਗਤੋ ਹੁਤ੍ਵਾ ਪਾਰਗੋ ਪਾਰਂ ਸਂਸਾਰਸ੍ਸ ਪਾਰਸਙ੍ਖਾਤਂ ਨਿਬ੍ਬਾਨਂ ਗਚ੍ਛਨ੍ਤੋ ਸਿਯਾ ਭਵੇਯ੍ਯਾਤਿ ਯੋਜਨਾ.
੯੫੯. ਅਤੋਤਿ ਤਸ੍ਮਾਦੇਵ ਕਾਰਣਾ ਅਵਪੂਰਤੋਰਤੋ ਪਾਪਪੂਰਤੋ ਨਿਰਾਸਙ੍ਕਤਾਯ ਓਰਤੋ ਨਿਵਤ੍ਤੋ ਪਾਪਭੀਰੁਕੋ ਨਰੋ ਤਮਂ ਵਿਧੂਯ ਪਾਪਭੀਰੁਕਤਾਯ ਏਵ ਚਿਤ੍ਤਪਰਿਯੁਟ੍ਠਾਨਵਸੇਨ ਉਪ੍ਪਜ੍ਜਨਕਂ ਮੋਹਨ੍ਧਕਾਰਂ ਤਦਙ੍ਗਪਹਾਨਵਸੇਨ ਵਿਧਮੇਤ੍ਵਾ. ਸਬ੍ਬਙ੍ਗਣਕਮ੍ਮਦਂ ਸਬ੍ਬੇਸਂ ਰਾਗਾਦੀਨਂ ਅਙ੍ਗਣਾਨਂ ਕਮ੍ਮਂ ਤਦਙ੍ਗਾਦਿਪਹਾਨਂ ਦਦਾਤਿ ਆਵਹਤੀਤਿ ‘‘ਸਬ੍ਬਙ੍ਗਣਕਮ੍ਮਦ’’ਨ੍ਤਿ ਲਦ੍ਧਨਾਮਂ ਸੁਖਸ੍ਸ ਪਦਂ ਲੋਕਿਯਲੋਕੁਤ੍ਤਰਸ੍ਸ ਸੁਖਸ੍ਸ ਕਾਰਣਂ ਗੁਣਸਂਹਿਤਂ ਸੀਲਾਦੀਹਿ ਅਤ੍ਥਭੂਤੇਹਿ ਗੁਣੇਹਿ ਸਂਹਿਤਂ ਯੁਤ੍ਤਂ ਗੁਣਪ੍ਪਕਾਸਕਂ ਹਿਤਂ ਅਮਤੋਸਧਂ ਵਿਯ ਸਬ੍ਬਦੋਸਸਬ੍ਬਬ੍ਯਾਧਿਰਹਿਤਤਾਯ ਅਜਰਾਅਮਤਾਦਿਗੁਣਾਵਹਤ੍ਤਾ ਹਿਤਂ ਇਮਂ ਉਤ੍ਤਰਂ ਨਾਮ ਪਕਰਣਂ ਸਕ੍ਕਚ੍ਚਂ ਆਦਰੋ ਹੁਤ੍ਵਾ ਨਿਚ੍ਚਂ ਸਤਤਂ ਸਿਕ੍ਖੇ ‘‘ਏਵਂ ਪਰਿਚਯਨ੍ਤਂ ਕਰੋਮੀ’’ਤਿ ਚਿਨ੍ਤੇਤ੍ਵਾ ਏਕਨ੍ਤੇਨ ਯਥਾਵੁਤ੍ਤਪਯੋਜਨਸਾਧਨਯੋਗ੍ਗਂ ਕਤ੍ਵਾ ਅਜ੍ਝੇਨਾਦਿਵਸੇਨ ਸਿਕ੍ਖੇਯ੍ਯ ਏਵ, ਨ ਅਜ੍ਝੁਪੇਕ੍ਖਕੋ ਭਵੇਯ੍ਯਾਤਿ ਯੋਜਨਾ.
੯੬੦. ਪਟੁਭਾਵਕਰੇ ਪਾਤਿਮੋਕ੍ਖਸਂਵਰਸੀਲਪੂਰਣੇ, ਸਾਸਨਪਚ੍ਚਤ੍ਥਿਕਾਭਿਭਵਨੇ ਚ ਪਟੁਭਾਵਂ ਛੇਕਤ੍ਤਂ ਵੇਸਾਰਜ੍ਜਂ ਕਰੋਤਿ ਅਤ੍ਤਾਨਂ ਧਾਰੇਨ੍ਤਾਨਂ ਲਜ੍ਜਿਪੁਗ੍ਗਲਾਨਨ੍ਤਿ ਪਟੁਭਾਵਕਰੇ ਪਰਮੇ ਤਤੋਯੇਵ ਉਤ੍ਤਮੇ ਪਿਟਕੇ ਵਿਨਯਪਿਟਕੇ ਪਟੁਤਂ ਪਾਟਵਂ ਪਞ੍ਞਾਕੋਸਲ੍ਲਂ ਅਭਿਪਤ੍ਥਯਨ੍ਤੇਨ ਪਟੁਨਾ ਯਤਿਨਾ ਨਿਮ੍ਮਲਪ੍ਪਵਤ੍ਤਿਕੇਨ ਪਟੁਨਾ ਵਿਧਿਨਾ ਛੇਕੇਨ ਸਾਰੇਨ ਵਿਧਾਨੇਨ ਇਦਂ ਸਉਤ੍ਤਰਂ ਵਿਨਯਵਿਨਿਚ੍ਛਯਪਕਰਣਂ ਸਤਤਂ ਨਿਰਨ੍ਤਰਂ ਪਰਿਯਾਪੁਣਿਤਬ੍ਬਂ ਉਗ੍ਗਹਣਧਾਰਣਪਰਿਪੁਚ੍ਛਾਚਿਨ੍ਤਨਾਦਿਵਸੇਨ ਸਿਕ੍ਖਿਤਬ੍ਬਨ੍ਤਿ ਯੋਜਨਾ.
ਇਤਿ ਉਤ੍ਤਰੇ ਲੀਨਤ੍ਥਪਕਾਸਨਿਯਾ
ਸਬ੍ਬਸਙ੍ਕਲਨਨਯਕਥਾਵਣ੍ਣਨਾ ਨਿਟ੍ਠਿਤਾ.
ਨਿਗਮਨਕਥਾਵਣ੍ਣਨਾ
੯੬੧-੩. ਮਹੇਸਿਨੋ ਤਿਵਿਧਸ੍ਸਾਪਿ ਸਾਸਨਸ੍ਸ ਸੁਚਿਰਟ੍ਠਿਤਿਕਾਮੇਨ ਅਤਿਚਿਰਕਾਲਪ੍ਪਵਤ੍ਤਿਂ ਇਚ੍ਛਨ੍ਤੇਨ ਧੀਮਤਾ ਪਸਤ੍ਥਤਰਞਾਣੇਨ ਸੁਦ੍ਧਚਿਤ੍ਤੇਨ ਲਾਭਸਕ੍ਕਾਰਨਿਰਪੇਕ੍ਖਤਾਯ ਪਰਿਸੁਦ੍ਧਜ੍ਝਾਸਯੇਨ ਬੁਦ੍ਧਦਤ੍ਤੇਨ ਬੁਦ੍ਧਦਤ੍ਤਾਭਿਧਾਨੇਨ ਆਚਰਿਯਵਰੇਨ ਰਚਿਤੋ.
ਪਜ੍ਜਵਸੇਨ ਗਨ੍ਥਤੋ, ਅਤ੍ਥਤੋ ਚੇਵ ਪਰਮੁਤ੍ਤਰੋ ਉਤ੍ਤਰੋ ਵਿਨਿਚ੍ਛਯੋ ਅਨ੍ਤਰਾਯਂ ਅਨ੍ਤਰੇਨ ਅਜ੍ਝਤ੍ਤਿਕਂ, ਬਾਹਿਰਂ ਵਾ ਅਨ੍ਤਰਾਯਂ ਵਿਨਾ ਯਥਾ ਸਿਦ੍ਧਿਂ ਉਪਾਗਤੋ ਪਰਿਨਿਟ੍ਠਾਨਂ ਪਤ੍ਤੋ, ਤਥਾ ਸਤ੍ਤਾਨਂ ਧਮ੍ਮਸਂਯੁਤਾ ਕੁਸਲੂਪਸਂਹਿਤਾ ਸਙ੍ਕਪ੍ਪਾ ਮਨੋਰਥਾ ਸਿਜ੍ਝਨ੍ਤੁ ਅਨ੍ਤਰਾਯਂ ਵਿਨਾ ਨਿਪ੍ਪਜ੍ਜਨ੍ਤੁ, ਏਤੇਨ ਉਤ੍ਤਰਵਿਨਿਚ੍ਛਯਰਚਨਾਮਯੇਨ ਮਹਤਾ ਪੁਞ੍ਞੋਦਯੇਨ ਚਤੂਹਿ ਸਙ੍ਗਹਵਤ੍ਥੂਹਿ ਜਨਂ ਰਞ੍ਜੇਤੀਤਿ ‘‘ਰਾਜਾ’’ਤਿ ਸਙ੍ਖਂ ਗਤੋ ਮਹੀਪਾਲੋ ਮਹਿਂ ਪਥਵਿਸਨ੍ਨਿਸ੍ਸਿਤਂ ਜਨਕਾਯਂ ਸਮ੍ਮਾ ਞਾਯੇਨ ਦਸ ਰਾਜਧਮ੍ਮੇ ਅਕੋਪੇਨ੍ਤੋ ਪਾਲੇਤੁ. ਦੇਵੋ ਪਜ੍ਜੁਨ੍ਨੋ ਕਾਲੇ ਥਾਵਰਜਙ੍ਗਮਾਨਂ ਉਪਯੋਗਾਰਹਕਾਲੇ ਸਮ੍ਮਾ ਪਵਸ੍ਸਤੁ ਅਵੁਟ੍ਠਿਅਤਿਵੁਟ੍ਠਿਕਂ ਅਕਤ੍ਵਾ ਸਮ੍ਮਾ ਪਵਚ੍ਛਤੁ.
੯੬੪. ਸੇਲਿਨ੍ਦੋ ਸਿਨੇਰੁਪਬ੍ਬਤਰਾਜਾ ਯਾਵ ਤਿਟ੍ਠਤਿ ਯਾਵ ਲੋਕੇ ਪਵਤ੍ਤਤਿ, ਚਨ੍ਦੋ ਸਕਲਜਨਪਦਨਯਨਸਾਯਨੋ ਯਾਵ ਵਿਰੋਚਤਿ ਯਾਵ ਅਤ੍ਤਨੋ ਸਭਾਵਂ ਜੋਤੇਤਿ, ਤਾਵ ਯਸਸ੍ਸਿਨੋ ਗੋਤਮਸ੍ਸ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ ਸਦ੍ਧਮ੍ਮੋ ਪਰਿਯਤ੍ਤਿਪਟਿਪਤ੍ਤਿਪਟਿਵੇਧਵਸੇਨ ਤਿਵਿਧੋ ਸਦ੍ਧਮ੍ਮੋ ਤਿਟ੍ਠਤੁ ਪਵਤ੍ਤਤੁ.
੯੬੫. ਸੀਹਾਦੀਨਂ, ਦਾਹਾਦੀਨਞ੍ਚ ਬਾਹਿਰਜ੍ਝਤ੍ਤਿਕਾਨਂ ਪਰਿਸ੍ਸਯਾਨਂ ਖਮਨਂ ਸਹਨਂ ਅਭਿਭਵਿਤ੍ਵਾ ਪਵਤ੍ਤਨਂ ਖਨ੍ਤਿ. ਸੋਰਚ੍ਚਨ੍ਤਿ ਸੋਭਨੇ ਰਤੋਤਿ ਸੁਰਤੋ, ਸੁਰਤਸ੍ਸ ਭਾਵੋ ਸੋਰਚ੍ਚਂ. ਸੁਨ੍ਦਰਂ ਅਖਣ੍ਡਤਾਦਿਗੁਣਸਮਨ੍ਨਾਗਤਂ ਸੀਲਂ ਅਸ੍ਸਾਤਿ ਸੁਸੀਲੋ. ਸੁਸੀਲਸ੍ਸ ਭਾਵੋ.
ਨਿਗਮਨਕਥਾਵਣ੍ਣਨਾ ਨਿਟ੍ਠਿਤਾ.
ਉਤ੍ਤਰਵਿਨਿਚ੍ਛਯਟੀਕਾ ਨਿਟ੍ਠਿਤਾ.
ਇਤਿ ਵਿਨਯਤ੍ਥਸਾਰਸਨ੍ਦੀਪਨੀ ਨਾਮ ਵਿਨਯਵਿਨਿਚ੍ਛਯਵਣ੍ਣਨਾ,
ਲੀਨਤ੍ਥਪਕਾਸਨੀ ਨਾਮ ਉਤ੍ਤਰਵਿਨਿਚ੍ਛਯਵਣ੍ਣਨਾ ਚ
ਸਮਤ੍ਤਾ.
ਪਚ੍ਛਾ ਠਪਿਤਗਾਥਾਯੋ
ਥੇਰੇਨ ਥਿਰਚਿਤ੍ਤੇਨ, ਸਾਸਨੁਜ੍ਜੋਤਨਤ੍ਥਿਨਾ;
ਪੁਞ੍ਞਵਾ ਞਾਣਵਾ ਸੀਲੀ, ਸੁਹਜ੍ਜੋ ਮੁਦੁਕੋ ਤਥਾ.
ਯੋ ਸੀਹਲ਼ਾਰਿਮਦ੍ਦੇਸੁ, ਚਨ੍ਦਿਮਾ ਸੂਰਿਯੋ ਵਿਯ;
ਪਾਕਟੋ ਸੀਵਲਿਤ੍ਥੇਰੋ, ਮਹਾਤੇਜੋ ਮਹਾਯਸੋ.
ਤੇਨ ਨੀਤਾ ਸੀਹਲ਼ਾ ਯਾ, ਇਧ ਪਤ੍ਤਾ ਸੁਧੀਮਤਾ;
ਏਸਾ ਸਂਵਣ੍ਣਨਾ ਸੀਹ-ਲ਼ਕ੍ਖਰੇਨ ਸੁਲਿਕ੍ਖਿਤਾ.
ਰੇਵਤੋ ਇਤਿ ਨਾਮੇਨ, ਥੇਰੇਨ ਥਿਰਚੇਤਸਾ;
ਅਰਿਮਦ੍ਦਿਕੇ ਰਕ੍ਖਨ੍ਤੇਨ, ਪਰਿਵਤ੍ਤੇਤ੍ਵਾਨ ਸਾਧੁਕਂ.
ਲਿਖਾਪਿਤਾ ਹਿਤਤ੍ਥਾਯ, ਭਿਕ੍ਖੂਨਂ ਅਰਿਮਦ੍ਦਿਕੇ;
ਏਸਾ ਸਂਵਣ੍ਣਨਾ ਸੁਟ੍ਠੁ, ਸਨ੍ਨਿਟ੍ਠਾਨਮੁਪਾਗਤਾ;
ਤਥੇਵ ਸਬ੍ਬਸਤ੍ਤਾਨਂ, ਸਬ੍ਬਤ੍ਥੋ ਚ ਸਮਿਜ੍ਝਤੂਤਿ.