ਕਮ੍ਮਟ੍ਠਾਨਵਿਭਾਵਨਾਵਿਧਾਨਕਥਾਵਣ੍ਣਨਾ
੩੧੨੫. ‘‘ਆਦਿਮ੍ਹਿ ਸੀਲਂ ਦਸ੍ਸੇਯ੍ਯ.
ਮਜ੍ਝੇ ਮਗ੍ਗਂ ਵਿਭਾਵਯੇ;
ਪਰਿਯੋਸਾਨੇ ਚ ਨਿਬ੍ਬਾਨਂ;
ਏਸਾ ਕਥਿਕਸਣ੍ਠਿਤੀ’’ਤਿ. (ਦੀ. ਨਿ. ਅਟ੍ਠ. ੧.੧੯੦; ਮ. ਨਿ. ਅਟ੍ਠ. ੧.੨੯੧; ਅ. ਨਿ. ਅਟ੍ਠ. ੨.੩.੬੪) –
ਵੁਤ੍ਤਂ ਧਮ੍ਮਕਥਿਕਲਕ੍ਖਣਂ ਸਮਨੁਸ੍ਸਰਨ੍ਤੋਯਮਾਚਰਿਯੋ ਪਾਤਿਮੋਕ੍ਖਸਂਵਰਸੀਲਪਰਿਦੀਪਕਂ ਵਿਨਿਚ੍ਛਯਂ ਨਾਤਿਸਙ੍ਖੇਪਵਿਤ੍ਥਾਰਮੁਖੇਨ ਦਸ੍ਸੇਤ੍ਵਾ ਤਂਮੂਲਕਾਨਂ ਇਤਰੇਸਞ੍ਚ ਤਿਣ੍ਣਂ ਸੀਲਾਨਂ ਤਂਦਸ੍ਸਨੇਨੇਵ ਦਸ੍ਸਿਤਭਾਵਞ੍ਚ ਸੀਲਵਿਸੁਦ੍ਧਿਮੂਲਿਕਾ ਚਿਤ੍ਤਵਿਸੁਦ੍ਧਿਆਦਿਯੋ ਪਞ੍ਚਵਿਸੁਦ੍ਧਿਯੋ ਚ ਤਂਮੂਲਿਕਞ੍ਚ ਅਰਿਯਮਗ੍ਗਸਙ੍ਖਾਤਂ ਞਾਣਦਸ੍ਸਨਵਿਸੁਦ੍ਧਿਂ ਤਦਧਿਗਮਨੀਯਂ ਨਿਬ੍ਬਾਨਞ੍ਚ ਦਸ੍ਸੇਤ੍ਵਾ ਯਥਾਰਦ੍ਧਂ ਵਿਨਯਕਥਂ ਪਰਿਯੋਸਾਪੇਤੁਕਾਮੋ ਆਹ ‘‘ਪਾਮੋਕ੍ਖੇ’’ਤਿਆਦਿ. ਤਤ੍ਥ ਪਾਮੋਕ੍ਖੇਤਿ ਸਮਾਧਿਆਦੀਨਂ ਅਨਵਜ੍ਜਧਮ੍ਮਾਨਂ ਪਤਿਟ੍ਠਾਭਾਵੇਨ ਉਤ੍ਤਮੇ. ਮੋਕ੍ਖਪ੍ਪਵੇਸਨੇਤਿ ਅਮਤਮਹਾਨਿਬ੍ਬਾਨਨਗਰਸ੍ਸ ਪਵੇਸਨਨਿਮਿਤ੍ਤੇ. ਮੁਖੇ ਅਸਹਾਯਦ੍ਵਾਰਭੂਤੇ. ਯਥਾਹ –
‘‘ਸਗ੍ਗਾਰੋਹਣਸੋਪਾਨਂ, ਅਞ੍ਞਂ ਸੀਲਸਮਂ ਕੁਤੋ;
ਦ੍ਵਾਰਂ ਵਾ ਪਨ ਨਿਬ੍ਬਾਨ-ਨਗਰਸ੍ਸ ਪਵੇਸਨੇ’’ਤਿ. (ਵਿਸੁਦ੍ਧਿ. ੧.੯; ਬੁ. ਬਂ. ਅਟ੍ਠ. ੩.ਦੀਪਙ੍ਕਰਬੁਦ੍ਧਵਂਸਵਣ੍ਣਨਾ);
ਸਬ੍ਬਦੁਕ੍ਖਕ੍ਖਯੇਤਿ ਜਾਤਿਦੁਕ੍ਖਾਦਿਸਬ੍ਬਦੁਕ੍ਖਾਨਂ ਖਯਸ੍ਸ ਅਰਿਯਮਗ੍ਗਸ੍ਸ ਅਧਿਗਮੂਪਾਯਤ੍ਤਾ ਫਲੂਪਚਾਰੇਨ ਸਬ੍ਬਦੁਕ੍ਖਕ੍ਖਯਸਙ੍ਖਾਤੇ. ‘‘ਪਾਮੋਕ੍ਖੇ’’ਤਿ ਚ ‘‘ਮੋਕ੍ਖਪ੍ਪਵੇਸਨੇ ਮੁਖੇ’’ਤਿ ਚ ‘‘ਸਬ੍ਬਦੁਕ੍ਖਕ੍ਖਯੇ’’ਤਿ ਚ ‘‘ਪਾਤਿਮੋਕ੍ਖਸ੍ਮਿ’’ਨ੍ਤਿ ਏਤਸ੍ਸ ਵਿਸੇਸਨਂ. ਵੁਤ੍ਤੇਤਿ ਪਾਰਾਜਿਕਤੋ ਪਟ੍ਠਾਯ ਨਾਨਪ੍ਪਕਾਰਤੋ ਨਿਦ੍ਦਿਟ੍ਠੇ ਸਤਿ. ਇਤਰਤ੍ਤਯਂ ਵੁਤ੍ਤਮੇਵਾਤਿ ਸਮ੍ਬਨ੍ਧੋ. ਇਨ੍ਦ੍ਰਿਯਸਂਵਰਸੀਲਆਜੀਵਪਾਰਿਸੁਦ੍ਧਿਸੀਲਪਚ੍ਚਯਸਨ੍ਨਿਸ੍ਸਿਤਸੀਲਸਙ੍ਖਾਤਂ ਇਤਰਂ ਸੀਲਤ੍ਤਯਂ ਵੁਤ੍ਤਮੇਵ ਹੋਤਿ ‘‘ਰਾਜਾ ਆਗਤੋ’’ਤਿ ਵੁਤ੍ਤੇ ਪਰਿਸਾਯ ਆਗਮਨਂ ਵਿਯ, ਤਸ੍ਮਾ ਤਂ ਨ ਵਕ੍ਖਾਮਾਤਿ ਅਧਿਪ੍ਪਾਯੋ.
੩੧੨੬. ਇਦਂ ਚਤੁਬ੍ਬਿਧਂ ਸੀਲਨ੍ਤਿ ਪਾਤਿਮੋਕ੍ਖਸਂਵਰਸੀਲਾਦਿਂ ਚਤੁਪਾਰਿਸੁਦ੍ਧਿਸੀਲਂ. ਞਤ੍ਵਾਤਿ ਲਕ੍ਖਣਾਦਿਤੋ, ਵੋਦਾਨਤੋ, ਹਾਨਭਾਗਿਯਟ੍ਠਿਤਿਭਾਗਿਯਵਿਸੇਸਭਾਗਿਯਨਿਬ੍ਬੇਧਭਾਗਿਯਾਦਿਪ੍ਪਕਾਰਤੋ ਚ ਜਾਨਿਤ੍ਵਾ. ਤਤ੍ਥਾਤਿ ਚਤੁਬ੍ਬਿਧਸੀਲੇ. ਪਤਿਟ੍ਠਿਤੋਤਿ ਅਚ੍ਛਿਦ੍ਦਾਦਿਅਙ੍ਗਸਮਨ੍ਨਾਗਤਭਾਵਮਾਪਾਦਨੇਨ ਪਤਿਟ੍ਠਿਤੋ. ਸਮਾਧਿਨ੍ਤਿ ਉਪਚਾਰਪ੍ਪਨਾਭੇਦਲੋਕਿਯਸਮਾਧਿਂ. ਭਾਵੇਤ੍ਵਾਤਿ ਸਮਚਤ੍ਤਾਲੀਸਾਯ ਕਮ੍ਮਟ੍ਠਾਨੇਸੁ ਪੁਨਪ੍ਪੁਨਂ ਅਨੁਯੋਗਵਸੇਨ ਵਡ੍ਢੇਤ੍ਵਾ. ਪਞ੍ਞਾਯਾਤਿ ਤਿਲਕ੍ਖਣਾਕਾਰਾਦਿਪਰਿਚ੍ਛੇਦਿਕਾਯ ਲੋਕੁਤ੍ਤਰਾਯ ਪਞ੍ਞਾਯ ਹੇਤੁਭੂਤਾਯ, ਕਰਣਭੂਤਾਯ ਚ. ਪਰਿਮੁਚ੍ਚਤੀਤਿ ਸਬ੍ਬਕਿਲੇਸਬਨ੍ਧਨਂ ਛੇਤ੍ਵਾ ਸਂਸਾਰਚਾਰਕਾ ਸਮਨ੍ਤਤੋ ਮੁਚ੍ਚਤਿ, ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯਤੀਤਿ ਅਧਿਪ੍ਪਾਯੋ.
੩੧੨੭. ਏਵਂ ਸਮਾਸਤੋ ਵੁਤ੍ਤਮੇਵਤ੍ਥਂ ਨਿਦ੍ਦਿਸਨ੍ਤੋ ਆਹ ‘‘ਦਸਾਨੁਸ੍ਸਤਿਯੋ’’ਤਿਆਦਿ. ਦਸ ਅਨੁਸ੍ਸਤਿਯੋ ਚ ਦਸ ਕਸਿਣਾ ਚ ਦਸ ਅਸੁਭਾ ਚ ਚਤਸ੍ਸੋ ਅਪ੍ਪਮਞ੍ਞਾਯੋ ਚ ਤਥਾ ਚਤ੍ਤਾਰੋ ਆਰੁਪ੍ਪਾ ਚ ਵੁਤ੍ਤਾ. ਅਪਰਂ ਕਮ੍ਮਟ੍ਠਾਨਦ੍ਵਯਞ੍ਚ ਵੁਤ੍ਤਨ੍ਤਿ ਸਮ੍ਬਨ੍ਧੋ.
ਤਤ੍ਥ ਦਸਾਨੁਸ੍ਸਤਿਯੋ ਨਾਮ ‘‘ਬੁਦ੍ਧਾਨੁਸ੍ਸਤਿ, ਧਮ੍ਮਾਨੁਸ੍ਸਤਿ, ਸਙ੍ਘਾਨੁਸ੍ਸਤਿ, ਸੀਲਾਨੁਸ੍ਸਤਿ, ਚਾਗਾਨੁਸ੍ਸਤਿ, ਦੇਵਤਾਨੁਸ੍ਸਤਿ, ਕਾਯਗਤਾਸਤਿ, ਮਰਣਾਨੁਸ੍ਸਤਿ, ਆਨਾਪਾਨਸਤਿ, ਉਪਸਮਾਨੁਸ੍ਸਤੀ’’ਤਿ (ਵਿਸੁਦ੍ਧਿ. ੧.੪੭) ਏਵਂ ਵੁਤ੍ਤਾ ਦਸ ਅਨੁਸ੍ਸਤਿਯੋ.
ਦਸ ਕਸਿਣਾ ਨਾਮ ‘‘ਪਥਵੀਕਸਿਣਂ, ਆਪੋਕਸਿਣਂ, ਤੇਜੋਕਸਿਣਂ, ਵਾਯੋਕਸਿਣਂ, ਨੀਲਕਸਿਣਂ, ਪੀਤਕਸਿਣਂ, ਲੋਹਿਤਕਸਿਣਂ, ਓਦਾਤਕਸਿਣਂ, ਆਲੋਕਕਸਿਣਂ, ਪਰਿਚ੍ਛਿਨ੍ਨਾਕਾਸਕਸਿਣ’’ਨ੍ਤਿ (ਵਿਸੁਦ੍ਧਿ. ੧.੪੭) ਵੁਤ੍ਤਾ ਇਮੇ ਦਸ ਕਸਿਣਾ.
ਦਸ ਅਸੁਭਾ ਨਾਮ ‘‘ਉਦ੍ਧੁਮਾਤਕਂ, ਵਿਨੀਲਕਂ, ਵਿਪੁਬ੍ਬਕਂ, ਵਿਚ੍ਛਿਦ੍ਦਕਂ, ਵਿਕ੍ਖਾਯਿਤਕਂ, ਵਿਕ੍ਖਿਤ੍ਤਕਂ, ਹਤਵਿਕ੍ਖਿਤ੍ਤਕਂ, ਲੋਹਿਤਕਂ, ਪੁਲ਼ੁਵਕਂ, ਅਟ੍ਠਿਕ’’ਨ੍ਤਿ (ਵਿਸੁਦ੍ਧਿ. ੧.੪੭) ਵੁਤ੍ਤਾ ਇਮੇ ਦਸ ਅਸੁਭਾ.
ਚਤਸ੍ਸੋ ਅਪ੍ਪਮਞ੍ਞਾਯੋ ਨਾਮ ‘‘ਮੇਤ੍ਤਾ, ਕਰੁਣਾ, ਮੁਦਿਤਾ, ਉਪੇਕ੍ਖਾ’’ਤਿ (ਵਿਸੁਦ੍ਧਿ. ੧.੪੭) ਵੁਤ੍ਤਾ ਇਮੇ ਅਪ੍ਪਮਞ੍ਞਾਯੋ.
ਚਤ੍ਤਾਰੋ ਆਰੁਪ੍ਪਾ ਨਾਮ ‘‘ਆਕਾਸਾਨਞ੍ਚਾਯਤਨਂ, ਵਿਞ੍ਞਾਣਞ੍ਚਾਯਤਨਂ, ਆਕਿਞ੍ਚਞ੍ਞਾਯਤਨਂ, ਨੇਵਸਞ੍ਞਾਨਾਸਞ੍ਞਾਯਤਨ’’ਨ੍ਤਿ (ਵਿਸੁਦ੍ਧਿ. ੧.੪੭) ਵੁਤ੍ਤਾ ਇਮੇ ਆਰੁਪ੍ਪਾ. ਅਪਰਂ ਕਮ੍ਮਟ੍ਠਾਨਦ੍ਵਯਂ ਨਾਮ ‘‘ਆਹਾਰੇਪਟਿਕ੍ਕੂਲਸਞ੍ਞਾ, ਚਤੁਧਾਤੁਵਵਤ੍ਥਾਨ’’ਨ੍ਤਿ ਵੁਤ੍ਤਂ ਟ੍ਠਾਨਉਭਯਂ.
੩੧੨੮. ਇਚ੍ਚੇਵਂ ਚਤ੍ਤਾਲੀਸਵਿਧਂ ਮਨੋਭੁਨੋ ਕਮ੍ਮਟ੍ਠਾਨਂ ਸਬ੍ਬਮ੍ਪਿ ਕਮ੍ਮਟ੍ਠਾਨਂ ਸਮੁਦ੍ਦਿਟ੍ਠਂ ਸਿਯਾਤਿ ਯੋਜਨਾ. ਕਮ੍ਮਸ੍ਸ ਯੋਗਸਙ੍ਖਾਤਸ੍ਸ ਠਾਨਂ ਆਰਮ੍ਮਣਭਾਵੇਨ ਪਵਤ੍ਤਿਟ੍ਠਾਨਨ੍ਤਿ ਕਮ੍ਮਟ੍ਠਾਨਂ. ਤਿਟ੍ਠਤਿ ਏਤ੍ਥ ਫਲਂ ਤਦਾਯਤ੍ਤਵੁਤ੍ਤਿਤਾਯਾਤਿ ਠਾਨਂ, ਕਾਰਣਂ, ਕਮ੍ਮਸ੍ਸ ਵਿਪਸ੍ਸਨਾਯ ਠਾਨਂ ਕਾਰਣਂ ਕਮ੍ਮਟ੍ਠਾਨਂ, ਕਸ੍ਸਾਤਿ ਆਹ ‘‘ਮਨੋਭੁਨੋ’’ਤਿ. ਮਨੋ ਅਭਿਭਵਤੀਤਿ ਮਨੋਭੂ, ਤਸ੍ਸ ਮਨੋਭੁਨੋ, ਕੁਸਲਚਿਤ੍ਤਪ੍ਪਵਤ੍ਤਿਨਿਵਾਰਣੇਨ ਤਥਾਲਦ੍ਧਨਾਮਸ੍ਸ ਕਾਮਦੇਵਸ੍ਸਾਤਿ ਅਤ੍ਥੋ. ਇਮਿਨਾ ਕਮ੍ਮਟ੍ਠਾਨਗਣਨਾਪਰਿਚ੍ਛੇਦੋ ਦਸ੍ਸਿਤੋ.
੩੧੨੯-੩੦. ਇਮੇਸਂ ਕਮ੍ਮਟ੍ਠਾਨਾਨਂ ਭਾਵਨਾਮਯਂ ਭਿਨ੍ਦਿਤ੍ਵਾ ਦਸ੍ਸੇਤੁਂ ਮਾਤਿਕਂ ਤਾਵ ਦਸ੍ਸੇਨ੍ਤੋ ਆਹ ‘‘ਉਪਚਾਰਪ੍ਪਨਾਤੋ’’ਤਿਆਦਿ. ਤਤ੍ਥ ਉਪਚਾਰਪ੍ਪਨਾਤੋਤਿ ‘‘ਏਤ੍ਤਕਾਨਿ ਕਮ੍ਮਟ੍ਠਾਨਾਨਿ ਉਪਚਾਰਾਵਹਾਨਿ, ਏਤ੍ਤਕਾਨਿ ਅਪ੍ਪਨਾਵਹਾਨੀ’’ਤਿ ਏਵਂ ਉਪਚਾਰਪ੍ਪਨਾਵਸੇਨ ਚ. ਝਾਨਭੇਦਾਤਿ ‘‘ਏਤ੍ਤਕਾਨਿ ਪਠਮਜ੍ਝਾਨਿਕਾਨਿ, ਏਤ੍ਤਕਾਨਿ ਤਿਕਚਤੁਕ੍ਕਜ੍ਝਾਨਿਕਾਨਿ, ਏਤ੍ਤਕਾਨਿ ਪਞ੍ਚਕਜ੍ਝਾਨਿਕਾਨੀ’’ਤਿਆਦਿਨਾ ਝਾਨਭੇਦਾ ਚ. ਅਤਿਕ੍ਕਮਾਤਿ ਅਙ੍ਗਾਨਂ, ਆਰਮ੍ਮਣਾਨਞ੍ਚ ਅਤਿਕ੍ਕਮਤੋ. ਵਡ੍ਢਨਾਵਡ੍ਢਨਾ ਚਾਪੀਤਿ ਅਙ੍ਗੁਲਦ੍ਵਙ੍ਗੁਲਾਦਿਵਸੇਨ ਵਡ੍ਢੇਤਬ੍ਬਾ, ਅਵਡ੍ਢੇਤਬ੍ਬਾ ਚ. ਆਰਮ੍ਮਣਭੂਮਿਤੋਤਿ ਨਿਮਿਤ੍ਤਾਰਮ੍ਮਣਾਦਿਆਰਮ੍ਮਣਤੋ ਚੇਵ ਲਬ੍ਭਮਾਨਾਲਬ੍ਭਮਾਨਭੂਮਿਤੋ ਚ.
ਗਹਣਾਤਿ ਦਿਟ੍ਠਾਦਿਵਸੇਨ ਗਹੇਤਬ੍ਬਤੋ. ਪਚ੍ਚਯਾਤਿ ਤਂਤਂਠਾਨਾਨਂ ਪਚ੍ਚਯਭਾਵਤੋ ਚ. ਭਿਯ੍ਯੋਤਿ ਪੁਨ-ਸਦ੍ਦਤ੍ਥਨੀਹਾਰਤ੍ਥੋ. ਚਰਿਯਾਨੁਕੂਲਤੋਤਿ ਰਾਗਚਰਿਯਾਦੀਨਂ ਅਨੁਕੂਲਭਾਵਤੋਤਿ ਅਯਂ ਵਿਸੇਸੋ ਅਯਂ ਭੇਦੋ. ਏਤੇਸੁ ਚਤ੍ਤਾਲੀਸਾਯ ਕਮ੍ਮਟ੍ਠਾਨੇਸੁ.
੩੧੩੧. ਏਵਂ ਮਾਤਿਕਂ ਨਿਦ੍ਦਿਸਿਤ੍ਵਾ ਯਥਾਕ੍ਕਮਂ ਨਿਦ੍ਦਿਸਨ੍ਤੋ ਪਠਮਂ ਤਾਵ ਉਪਚਾਰਾਵਹਾਦਯੋ ਦਸ੍ਸੇਤੁਮਾਹ ‘‘ਅਟ੍ਠਾਨੁਸ੍ਸਤਿਯੋ’’ਤਿਆਦਿ. ਤਤ੍ਥਾਤਿ ਤਿਸ੍ਸਂ ਮਾਤਿਕਾਯਂ, ਤੇਸੁ ਵਾ ਚਤ੍ਤਾਲੀਸਾਯ ਕਮ੍ਮਟ੍ਠਾਨੇਸੁ. ਅਟ੍ਠਾਨੁਸ੍ਸਤਿਯੋਤਿ ਕਾਯਗਤਾਸਤਿਆਨਾਪਾਨਸਤਿਦ੍ਵਯਵਜ੍ਜਿਤਾ ਬੁਦ੍ਧਾਨੁਸ੍ਸਤਿਆਦਿਕਾ ਅਟ੍ਠ ਅਨੁਸ੍ਸਤਿਯੋ ਚ. ਸਞ੍ਞਾ ਆਹਾਰੇਪਟਿਕ੍ਕੂਲਸਞ੍ਞਾ ਚ. ਵਵਤ੍ਥਾਨਞ੍ਚ ਚਤੁਧਾਤੁਵਵਤ੍ਥਾਨਞ੍ਚਾਤਿ ਇਮੇ ਦਸ. ਉਪਚਾਰਾਵਹਾਤਿ ਬੁਦ੍ਧਗੁਣਾਦੀਨਂ ਪਰਮਤ੍ਥਭਾਵਤੋ, ਅਨੇਕਵਿਧਤ੍ਤਾ, ਏਕਸ੍ਸਾਪਿ ਗਮ੍ਭੀਰਭਾਵਤੋ ਚ ਏਤੇਸੁ ਦਸਸੁ ਕਮ੍ਮਟ੍ਠਾਨੇਸੁ ਅਪ੍ਪਨਾਵਸੇਨ ਸਮਾਧਿਸ੍ਸ ਪਤਿਟ੍ਠਾਤੁਮਸਕ੍ਕੁਣੇਯ੍ਯਤ੍ਤਾ ਅਪ੍ਪਨਾਭਾਵਨਾਪ੍ਪਤ੍ਤੋ ਸਮਾਧਿ ਉਪਚਾਰਭਾਵੇਯੇਵ ਪਤਿਟ੍ਠਾਤਿ, ਤਸ੍ਮਾ ਏਤੇ ਉਪਚਾਰਾਵਹਾ.
ਨਨੁ ਚੇਤ੍ਥ ਦੁਤਿਯਚਤੁਤ੍ਥਾਰੁਪ੍ਪਸਮਾਧਿ, ਲੋਕੁਤ੍ਤਰੋ ਚ ਸਮਾਧਿ ਪਰਮਤ੍ਥਧਮ੍ਮੇ ਅਪ੍ਪਨਂ ਪਾਪੁਣਾਤਿ, ਤਸ੍ਮਾ ‘‘ਪਰਮਤ੍ਥਭਾਵਤੋ’’ਤਿ ਹੇਤੁ ਅਪ੍ਪਨਮਪਾਪੁਣਨੇ ਕਾਰਣਭਾਵੇਨ ਨ ਵੁਚ੍ਚਤੀਤਿ? ਨ, ਤਸ੍ਸ ਭਾਵਨਾਵਿਸੇਸੇਨ ਪਰਮਤ੍ਥਧਮ੍ਮੇ ਪਵਤ੍ਤਿਸਮ੍ਭਵਤੋ, ਇਮਸ੍ਸ ਚ ਰੂਪਾਵਚਰਚਤੁਤ੍ਥਭਾਵਨਾਵਿਸੇਸਸਮ੍ਭਵਤੋ ਚ. ਤਥਾ ਹਿ ਦੁਤਿਯਚਤੁਤ੍ਥਾਰੁਪ੍ਪਸਮਾਧਿ ਅਪ੍ਪਨਾਪਤ੍ਤਸ੍ਸ ਅਰੂਪਾਵਚਰਸਮਾਧਿਸ੍ਸ ਚਤੁਤ੍ਥਜ੍ਝਾਨਸ੍ਸ ਆਰਮ੍ਮਣਸਮਤਿਕ੍ਕਮਮਤ੍ਤਭਾਵਨਾਵਸੇਨ ਸਭਾਵਾਰਮ੍ਮਣੇਪਿ ਅਪ੍ਪਨਂ ਪਾਪੁਣਾਤਿ. ਵਿਸੁਦ੍ਧਿਭਾਵਨਾਨੁਕ੍ਕਮਬਲੇਨ ਲੋਕੁਤ੍ਤਰੋ ਸਮਾਧਿ ਅਪ੍ਪਨਂ ਪਾਪੁਣਾਤੀਤਿ.
੩੧੩੨. ਤਤ੍ਥਾਤਿ ਤੇਸੁ ਝਾਨਾਵਹੇਸੁ ਤਿਂਸਕਮ੍ਮਟ੍ਠਾਨੇਸੁ. ਅਸੁਭਾਤਿ ਉਦ੍ਧੁਮਾਤਕਾਦਯੋ ਦਸ ਅਸੁਭਾ. ਕਾਯਗਤਾਸਤੀਤਿ ਕਾਯਗਤਾਸਤਿ ਚਾਤਿ ਇਮੇ ਏਕਾਦਸ. ਪਠਮਜ੍ਝਾਨਿਕਾਤਿ ਇਮੇਸਂ ਪਟਿਕ੍ਕੂਲਾਰਮ੍ਮਣਤ੍ਤਾ, ਪਟਿਕ੍ਕੂਲਾਰਮ੍ਮਣੇ ਚ ਚਿਤ੍ਤਸ੍ਸ ਚਣ੍ਡਸੋਤਾਯ ਨਦਿਯਾ ਅਰਿਤ੍ਤਬਲੇਨ ਨਾਵਾਟ੍ਠਾਨਂ ਵਿਯ ਵਿਤਕ੍ਕਬਲੇਨੇਵ ਪਵਤ੍ਤਿਸਮ੍ਭਵਤੋ ਅਵਿਤਕ੍ਕਾਨਂ ਦੁਤਿਯਜ੍ਝਾਨਾਦੀਨਂ ਅਸਮ੍ਭਵੋਤਿ ਸਵਿਤਕ੍ਕਸ੍ਸ ਪਠਮਜ੍ਝਾਨਸ੍ਸੇਵ ਸਮ੍ਭਵਤੋ ਪਠਮਜ੍ਝਾਨਿਕਾ. ਆਨਾਪਾਨਞ੍ਚ ਕਸਿਣਾ ਚਾਤਿ ਇਮੇ ਏਕਾਦਸ ਚਤੁਕ੍ਕਜ੍ਝਾਨਿਕਾ ਰੂਪਾਵਚਰਚਤੁਕ੍ਕਜ੍ਝਾਨਿਕਾ ਚ ਚਤੁਕ੍ਕਨਯੇਨ, ਪਞ੍ਚਕਜ੍ਝਾਨਿਕਾ ਚ.
੩੧੩੩. ਤਿਸ੍ਸੋਵ ਅਪ੍ਪਮਞ੍ਞਾਤਿ ਮੇਤ੍ਤਾ, ਕਰੁਣਾ, ਮੁਦਿਤਾਤਿ ਅਪ੍ਪਮਞ੍ਞਾ ਤਿਸ੍ਸੋਵ. ਸਾਮਞ੍ਞਨਿਦ੍ਦੇਸੇ ਏਤਾਸਮੇਵ ਗਹਣਂ ਕਥਂ ਵਿਞ੍ਞਾਯਤੀਤਿ? ‘‘ਅਥ ਪਚ੍ਛਿਮਾ’’ਤਿਆਦਿਨਾ ਚਤੁਤ੍ਥਾਯ ਅਪ੍ਪਮਞ੍ਞਾਯ ਚਤੁਤ੍ਥਜ੍ਝਾਨਿਕਭਾਵਸ੍ਸ ਵਕ੍ਖਮਾਨਤ੍ਤਾ ਪਾਰਿਸੇਸਤੋ ਤਂ ਵਿਞ੍ਞਾਯਤਿ. ਤਿਕਜ੍ਝਾਨਾਨੀਤਿ ਤਿਕਜ੍ਝਾਨਿਕਾ. ‘‘ਤਿਕਜ੍ਝਾਨਾ’’ਤਿ ਵਤ੍ਤਬ੍ਬੇ ਲਿਙ੍ਗਵਿਪਲ੍ਲਾਸੇਨ ਏਵਂ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਮੇਤ੍ਤਾਦੀਨਂ ਦੋਮਨਸ੍ਸਸਹਗਤਬ੍ਯਾਪਾਦਵਿਹਿਂਸਾਨਭਿਰਤੀਨਂ ਪਹਾਯਕਤ੍ਤਾ ਦੋਮਨਸ੍ਸਪਟਿਪਕ੍ਖੇਨ ਸੋਮਨਸ੍ਸੇਨੇਵ ਸਹਗਤਤਾ ਵੁਤ੍ਤਾਤਿ ਚਤੁਕ੍ਕਨਯੇਨ ਤਿਕਜ੍ਝਾਨਿਕਤਾ ਵੁਤ੍ਤਾ, ਪਞ੍ਚਕਨਯੇਨ ਚਤੁਕ੍ਕਜ੍ਝਾਨਿਕਤਾ ਚ.
‘‘ਅਥਾ’’ਤਿ ਇਦਂ ‘‘ਪਚ੍ਛਿਮਾ’’ਤਿ ਪਦਸ੍ਸ ‘‘ਤਿਸ੍ਸੋ’’ਤਿ ਇਮਿਨਾ ਪੁਰਿਮਪਦੇਨ ਸਮ੍ਬਨ੍ਧਨਿਵਤ੍ਤਨਤ੍ਥਂ. ਪਚ੍ਛਿਮਾ ਅਪ੍ਪਮਞ੍ਞਾ, ਚਤ੍ਤਾਰੋ ਆਰੁਪ੍ਪਾ ਚ ਚਤੁਤ੍ਥਜ੍ਝਾਨਿਕਾ ਮਤਾ ਚਤੁਕ੍ਕਨਯੇਨ, ਪਞ੍ਚਮਜ੍ਝਾਨਿਕਾ ਚ. ‘‘ਸਬ੍ਬੇ ਸਤ੍ਤਾ ਸੁਖਿਤਾ ਹੋਨ੍ਤੁ, ਦੁਕ੍ਖਾ ਮੁਚ੍ਚਨ੍ਤੁ, ਲਦ੍ਧਸੁਖਸਮ੍ਪਤ੍ਤਿਤੋ ਮਾ ਵਿਗਚ੍ਛਨ੍ਤੂ’’ਤਿ ਮੇਤ੍ਤਾਦਿਤਿਵਿਧਵਸਪ੍ਪਵਤ੍ਤਂ ਬ੍ਯਾਪਾਰਤ੍ਤਯਂ ਪਹਾਯ ਕਮ੍ਮਸ੍ਸਕਤਾਦਸ੍ਸਨੇਨ ਸਤ੍ਤੇਸੁ ਮਜ੍ਝਤ੍ਤਾਕਾਰਪ੍ਪਤ੍ਤਭਾਵਨਾਨਿਬ੍ਬਤ੍ਤਾਯ ਤਤ੍ਰਮਜ੍ਝਤ੍ਤੋਪੇਕ੍ਖਾਯ ਬਲਵਤਰਤ੍ਤਾ ਅਪ੍ਪਨਾਪ੍ਪਤ੍ਤਸ੍ਸ ਉਪੇਕ੍ਖਾਬ੍ਰਹ੍ਮਵਿਹਾਰਸ੍ਸ ਸੁਖਸਹਗਤਤਾਸਮ੍ਭਵਤੋ ਉਪੇਕ੍ਖਾਸਹਗਤਤਾ ਵੁਤ੍ਤਾ.
੩੧੩੪. ਅਙ੍ਗਾਰਮ੍ਮਣਤੋ ਅਤਿਕ੍ਕਮੋ ਦ੍ਵਿਧਾ ਵੁਤ੍ਤੋਤਿ ਯੋਜਨਾ. ਚਤੁਕ੍ਕਤਿਕਜ੍ਝਾਨੇਸੂਤਿ ਦਸਕਸਿਣਾ, ਆਨਾਪਾਨਸਤੀਤਿ ਏਕਾਦਸਸੁ ਚਤੁਕ੍ਕਜ੍ਝਾਨਿਕੇਸੁ ਚੇਵ ਮੇਤ੍ਤਾਦਿਪੁਰਿਮਬ੍ਰਹ੍ਮਵਿਹਾਰਤ੍ਤਯਸਙ੍ਖਾਤੇਸੁ ਤਿਕਜ੍ਝਾਨਿਕੇਸੁ ਚ ਕਮ੍ਮਟ੍ਠਾਨੇਸੁ. ਅਙ੍ਗਾਤਿਕ੍ਕਮਤਾਤਿ ਏਕਸ੍ਮਿਂਯੇਵ ਆਰਮ੍ਮਣੇ ਵਿਤਕ੍ਕਾਦਿਝਾਨਙ੍ਗ ਸਮਤਿਕ੍ਕਮੇਨ ਪਠਮਜ੍ਝਾਨਾਦੀਨਂ ਆਰਮ੍ਮਣੇਯੇਵ ਦੁਤਿਯਜ੍ਝਾਨਾਦੀਨਂ ਉਪ੍ਪਤ੍ਤਿਤੋ ਅਙ੍ਗਾਤਿਕ੍ਕਮੋ ਅਧਿਪ੍ਪੇਤੋਤਿ ਅਤ੍ਥੋ. ਅਙ੍ਗਾਤਿਕ੍ਕਮੋਯੇਵ ਅਙ੍ਗਾਤਿਕ੍ਕਮਤਾ.
੩੧੩੫. ਅਙ੍ਗਾਤਿਕ੍ਕਮਤੋਤਿ ਤਤਿਯਜ੍ਝਾਨਸਮ੍ਪਯੁਤ੍ਤਸੋਮਨਸ੍ਸਾਤਿਕ੍ਕਮਨਤੋ. ਆਰਮ੍ਮਣਮਤਿਕ੍ਕਮ੍ਮਾਤਿ ਪਟਿਭਾਗਨਿਮਿਤ੍ਤਕਸਿਣੁਗ੍ਘਾਟਿਮਾਕਾਸਤਬ੍ਬਿਸਯਪਠਮਾਰੁਪ੍ਪਵਿਞ੍ਞਾਣਤਦਭਾਵਸਙ੍ਖਾਤਾਨਿ ਚਤ੍ਤਾਰਿ ਆਰਮ੍ਮਣਾਨਿ ਯਥਾਕ੍ਕਮਂ ਅਤਿਕ੍ਕਮਿਤ੍ਵਾ. ਕਸਿਣੁਗ੍ਘਾਟਿਮਾਕਾਸਤਬ੍ਬਿਸਯਪਠਮਾਰੁਪ੍ਪਵਿਞ੍ਞਾਣਤਦਭਾਵਤਬ੍ਬਿਸਯਤਤਿਯਾਰੁਪ੍ਪਵਿਞ੍ਞਾਣਸਙ੍ਖਾਤੇਸੁ ਚਤੂਸੁ ਆਰਮ੍ਮਣੇਸੁ ਆਰੁਪ੍ਪਾ ਆਕਾਸਾਨਞ੍ਚਾਯਤਨਾਦੀਨਿ ਚਤ੍ਤਾਰਿ ਅਰੂਪਾਵਚਰਜ੍ਝਾਨਾਨਿ ਜਾਯਰੇ ਉਪ੍ਪਜ੍ਜਨ੍ਤਿ.
੩੧੩੬. ਏਤ੍ਥਾਤਿ ਏਤੇਸੁ ਆਰਮ੍ਮਣੇਸੁ. ਵਡ੍ਢੇਤਬ੍ਬਾਨੀਤਿ ‘‘ਯਤ੍ਤਕਂ ਓਕਾਸਂ ਕਸਿਣੇਨ ਫਰਤਿ, ਤਦਬ੍ਭਨ੍ਤਰੇ ਦਿਬ੍ਬਾਯ ਸੋਤਧਾਤੁਯਾ ਸਦ੍ਦਂ ਸੋਤੁਂ, ਦਿਬ੍ਬੇਨ ਚਕ੍ਖੁਨਾ ਰੂਪਂ ਪਸ੍ਸਿਤੁਂ, ਪਰਸਤ੍ਤਾਨਞ੍ਚ ਚੇਤਸਾ ਚਿਤ੍ਤਂ ਅਞ੍ਞਾਤੁਂ ਸਮਤ੍ਥੋ ਹੋਤੀ’’ਤਿ ਵੁਤ੍ਤਪ੍ਪਯੋਜਨਂ ਸਨ੍ਧਾਯ ਅਙ੍ਗਗਣਨਾਦਿਵਸੇਨ ਪਰਿਚ੍ਛਿਨ੍ਦਿਤ੍ਵਾ ਯਤ੍ਤਕਂ ਇਚ੍ਛਤਿ, ਤਤ੍ਤਕਂ ਵਡ੍ਢੇਤਬ੍ਬਾਨਿ. ਸੇਸਂ ਅਸੁਭਾਦਿ ਸਬ੍ਬਂ ਤਂ ਕਮ੍ਮਟ੍ਠਾਨਂ ਪਯੋਜਨਾਭਾਵਾ ਨ ਵਡ੍ਢੇਤਬ੍ਬਮੇਵਾਤਿ ਯੋਜਨਾ.
੩੧੩੭. ਤਤ੍ਥ ਤੇਸੁ ਕਮ੍ਮਟ੍ਠਾਨੇਸੁ ਦਸ ਕਸਿਣਾ ਚ ਦਸ ਅਸੁਭਾ ਚ ਕਾਯਗਤਾਸਤਿ, ਆਨਾਪਾਨਸਤੀਤਿ ਇਮੇ ਬਾਵੀਸਤਿ ਕਮ੍ਮਟ੍ਠਾਨਾਨਿ ਪਟਿਭਾਗਾਰਮ੍ਮਣਾਨੀਤਿ ਯੋਜਨਾ. ਏਤ੍ਥ ‘‘ਕਸਿਣਾ’’ਤਿਆਦਿਨਾ ਤਦਾਰਮ੍ਮਣਾਨਿ ਝਾਨਾਨਿ ਗਹਿਤਾਨਿ.
੩੧੩੮. ਧਾਤੁਵਵਤ੍ਥਨਨ੍ਤਿ ਚਤੁਧਾਤੁਵਵਤ੍ਥਾਨਂ, ਗਾਥਾਬਨ੍ਧਵਸੇਨ ਰਸ੍ਸਤ੍ਤਂ. ਵਿਞ੍ਞਾਣਞ੍ਚਾਤਿ ਵਿਞ੍ਞਾਣਞ੍ਚਾਯਤਨਂ. ਨੇਵਸਞ੍ਞਾਤਿ ਨੇਵਸਞ੍ਞਾਨਾਸਞ੍ਞਾਯਤਨਂ. ਦਸ ਦ੍ਵੇਤਿ ਦ੍ਵਾਦਸ. ਭਾਵਗੋਚਰਾਤਿ ਸਭਾਵਧਮ੍ਮਗੋਚਰਾ, ਪਰਮਤ੍ਥਧਮ੍ਮਾਲਮ੍ਬਣਾਤਿ ਵੁਤ੍ਤਂ ਹੋਤਿ.
੩੧੩੯. ਦ੍ਵੇ ਚ ਆਰੁਪ੍ਪਮਾਨਸਾਤਿ ਆਕਾਸਾਨਞ੍ਚਾਯਤਨਆਕਿਞ੍ਚਞ੍ਞਾਯਤਨਸਙ੍ਖਾਤਾ ਅਰੂਪਾਵਚਰਚਿਤ੍ਤੁਪ੍ਪਾਦਾ ਦ੍ਵੇ ਚ. ਛ ਇਮੇ ਧਮ੍ਮਾ ਨਵਤ੍ਤਬ੍ਬਗੋਚਰਾ ਨਿਦ੍ਦਿਟ੍ਠਾਤਿ ਯੋਜਨਾ ਚਤੁਨ੍ਨਂ ਅਪ੍ਪਮਞ੍ਞਾਨਂ ਸਤ੍ਤਪਞ੍ਞਤ੍ਤਿਯਾ, ਪਠਮਾਰੁਪ੍ਪਸ੍ਸ ਕਸਿਣੁਗ੍ਘਾਟਿਮਾਕਾਸਪਞ੍ਞਤ੍ਤਿਯਾ, ਤਤਿਯਾਰੁਪ੍ਪਸ੍ਸ ਪਠਮਾਰੁਪ੍ਪਵਿਞ੍ਞਾਣਾਭਾਵਪਞ੍ਞਤ੍ਤਿਯਾ ਚ ਆਰਮ੍ਮਣਤ੍ਤਾ.
੩੧੪੦. ਪਟਿਕ੍ਕੂਲਸਞ੍ਞਾਤਿ ਆਹਾਰੇਪਟਿਕ੍ਕੂਲਸਞ੍ਞਾ. ਕਾਯਗਤਾਸਤੀਤਿ ਦ੍ਵਾਦਸੇਵ ਭੂਮਿਤੋ ਦੇਵੇਸੁ ਕਾਮਾਵਚਰਦੇਵੇਸੁ ਕੁਣਪਾਨਂ, ਪਟਿਕ੍ਕੂਲਾਰਹਸ੍ਸ ਚ ਅਸਮ੍ਭਵਾ ਨ ਪਵਤ੍ਤਨ੍ਤੀਤਿ ਯੋਜਨਾ.
੩੧੪੧. ਤਾਨਿ ਦ੍ਵਾਦਸ ਚ. ਭਿਯ੍ਯੋਤਿ ਅਧਿਕਤ੍ਥੇ ਨਿਪਾਤੋ, ਤਤੋ ਅਧਿਕਂ ਆਨਾਪਾਨਸਤਿ ਚਾਤਿ ਤੇਰਸ ਰੂਪਾਰੂਪਲੋਕੇ ਅਸ੍ਸਾਸਪਸ੍ਸਾਸਾਨਞ੍ਚ ਅਭਾਵਾ ਸਬ੍ਬਸੋ ਨ ਜਾਯਰੇਤਿ ਯੋਜਨਾ.
੩੧੪੨. ਅਰੂਪਾਵਚਰੇ ਅਰੂਪਭਵੇ ਚਤੁਰੋ ਆਰੁਪ੍ਪੇ ਠਪੇਤ੍ਵਾ ਅਞ੍ਞੇ ਛਤ੍ਤਿਂਸ ਧਮ੍ਮਾ ਰੂਪਸਮਤਿਕ੍ਕਮਾਭਾਵਾ ਨ ਜਾਯਨ੍ਤੀਤਿ ਯੋਜਨਾ. ਸਬ੍ਬੇ ਸਮਚਤ੍ਤਾਲੀਸ ਧਮ੍ਮਾ ਮਾਨੁਸੇ ਮਨੁਸ੍ਸਲੋਕੇ ਸਬ੍ਬੇਸਮੇਵ ਲਬ੍ਭਮਾਨਤ੍ਤਾ ਜਾਯਨ੍ਤਿ.
੩੧੪੩. ਚਤੁਤ੍ਥਕਸਿਣਂ ਹਿਤ੍ਵਾਤਿ ਵਾਯੋਕਸਿਣਂ ਦਿਟ੍ਠਫੁਟ੍ਠੇਨ ਗਹੇਤਬ੍ਬਤ੍ਤਾ ਤਂ ਵਜ੍ਜੇਤ੍ਵਾ ਨਵ ਕਸਿਣਾ ਚ ਦਸ ਅਸੁਭਾ ਚਾਤਿ ਤੇ ਏਕੂਨਵੀਸਤਿ ਧਮ੍ਮਾ ਦਿਟ੍ਠੇਨੇਵ ਚਕ੍ਖੁਵਿਞ੍ਞਾਣੇਨ ਪੁਬ੍ਬਭਾਗੇ ਪਰਿਕਮ੍ਮਕਾਲੇ ਗਹੇਤਬ੍ਬਾ ਭਵਨ੍ਤੀਤਿ ਯੋਜਨਾ. ਪੁਬ੍ਬਭਾਗੇ ਚਕ੍ਖੁਨਾ ਓਲੋਕੇਤ੍ਵਾ ਪਰਿਕਮ੍ਮਂ ਕਤਂ, ਤੇਨ ਉਗ੍ਗਹਿਤਨਿਮਿਤ੍ਤਂ ਤੇਸਂ ਗਹੇਤਬ੍ਬਨ੍ਤਿ ਵੁਤ੍ਤਂ ਹੋਤਿ.
੩੧੪੪. ਫੁਟ੍ਠੇਨਾਤਿ ਨਾਸਿਕਗ੍ਗੇ, ਉਤ੍ਤਰੋਟ੍ਠੇ ਵਾ ਫੁਟ੍ਠਵਸੇਨ. ਕਾਯਗਤਾਸਤਿਯਂ ਤਚਪਞ੍ਚਕਂ ਦਿਟ੍ਠੇਨ ਗਹੇਤਬ੍ਬਂ. ਮਾਲੁਤੋਤਿ ਵਾਯੋਕਸਿਣਂ ਦਿਟ੍ਠਫੁਟ੍ਠੇਨ ਗਹੇਤਬ੍ਬਂ ਉਚ੍ਛੁਸਸ੍ਸਾਦੀਨਂ ਪਤ੍ਤੇਸੁ ਚਲਮਾਨਵਣ੍ਣਗ੍ਗਹਣਮੁਖੇਨ, ਕਾਯਪ੍ਪਸਾਦਘਟ੍ਟਨੇਨ ਚ ਗਹੇਤਬ੍ਬਤ੍ਤਾ. ਏਤ੍ਥ ਏਤੇਸੁ ਕਮ੍ਮਟ੍ਠਾਨੇਸੁ. ਸੇਸਕਨ੍ਤਿ ਵੁਤ੍ਤਾਵਸੇਸਂ. ਬੁਦ੍ਧਾਨੁਸ੍ਸਤਿਆਦਿਕਾ ਅਟ੍ਠਾਨੁਸ੍ਸਤਿਯੋ, ਚਤ੍ਤਾਰੋ ਬ੍ਰਹ੍ਮਵਿਹਾਰਾ, ਚਤ੍ਤਾਰੋ ਆਰੁਪ੍ਪਾ, ਆਹਾਰੇਪਟਿਕ੍ਕੂਲਸਞ੍ਞਾ, ਚਤੁਧਾਤੁਵਵਤ੍ਥਾਨਂ, ਕਾਯਗਤਾਸਤਿਯਂ ਵਕ੍ਕਪਞ੍ਚਕਾਦੀਨਿ ਚਾਤਿ ਸਬ੍ਬਮੇਤਂ ਪਰਤੋ ਸੁਤ੍ਵਾ ਗਹੇਤਬ੍ਬਤ੍ਤਾ ਸੁਤੇਨੇਵ ਗਹੇਤਬ੍ਬਨ੍ਤਿ ਵੁਤ੍ਤਂ.
੩੧੪੫. ਏਤ੍ਥ ਏਤੇਸੁ ਕਮ੍ਮਟ੍ਠਾਨੇਸੁ ਆਕਾਸਕਸਿਣਂ ਠਪੇਤ੍ਵਾ ਨਵ ਕਸਿਣਾ ਪਠਮਾਰੁਪ੍ਪਚਿਤ੍ਤਸ੍ਸ ਆਰਮ੍ਮਣਭੂਤਕਸਿਣੁਗ੍ਘਾਟਿਮਾਕਾਸਸ੍ਸ ਹੇਤੁਭਾਵਤੋ ਪਚ੍ਚਯਾ ਜਾਯਰੇ ਪਚ੍ਚਯਾ ਭਵਨ੍ਤੀਤਿ ਯੋਜਨਾ.
੩੧੪੬. ਦਸਪਿ ਕਸਿਣਾ ਅਭਿਞ੍ਞਾਨਂ ਦਿਬ੍ਬਚਕ੍ਖੁਞਾਣਾਦੀਨਂ ਪਚ੍ਚਯਾ ਭਵਨ੍ਤੀਤਿ ਯੋਜਨਾ. ਚਤੁਤ੍ਥਸ੍ਸਾਤਿ ਚਤੁਤ੍ਥਸ੍ਸ ਬ੍ਰਹ੍ਮਵਿਹਾਰਸ੍ਸ.
੩੧੪੭. ਹੇਟ੍ਠਿਮਹੇਟ੍ਠਿਮਾਰੁਪ੍ਪਨ੍ਤਿ ਆਕਾਸਾਨਞ੍ਚਾਯਤਨਾਦਿਕਂ. ਪਰਸ੍ਸ ਚ ਪਰਸ੍ਸ ਚਾਤਿ ਵਿਞ੍ਞਾਣਞ੍ਚਾਯਤਨਾਦਿਉਤ੍ਤਰਜ੍ਝਾਨਸ੍ਸ ਪਚ੍ਚਯੋਤਿ ਪਕਾਸਿਤਨ੍ਤਿ ਯੋਜਨਾ. ਨੇਵਸਞ੍ਞਾਤਿ ਨੇਵਸਞ੍ਞਾਨਾਸਞ੍ਞਾਯਤਨਂ. ਨਿਰੋਧਸ੍ਸਾਤਿ ਸਞ੍ਞਾਵੇਦਯਿਤਨਿਰੋਧਸ੍ਸ, ਤਾਯ ਨਿਰੋਧਸਮਾਪਤ੍ਤਿਯਾ.
੩੧੪੮. ਸਬ੍ਬੇਤਿ ਸਮਚਤ੍ਤਾਲੀਸਕਮ੍ਮਟ੍ਠਾਨਧਮ੍ਮਾ. ਸੁਖਵਿਹਾਰਸ੍ਸਾਤਿ ਦਿਟ੍ਠਧਮ੍ਮਸੁਖਵਿਹਾਰਸ੍ਸ. ਭਵਨਿਸ੍ਸਰਣਸ੍ਸ ਚਾਤਿ ਵਿਭਵੂਪਨਿਸ੍ਸਯਤਾਯ ਵਿਪਸ੍ਸਨਾਪਾਦਕਤ੍ਤੇਨ ਆਸਵਕ੍ਖਯਞਾਣੇਨ ਅਧਿਗਨ੍ਤਬ੍ਬਸ੍ਸ ਨਿਬ੍ਬਾਨਸ੍ਸ ਚ. ਭਵਸੁਖਾਨਞ੍ਚਾਤਿ ਪਰਿਕਮ੍ਮੋਪਚਾਰਭਾਵਨਾਵਸਪ੍ਪਵਤ੍ਤਾਨਿ ਕਾਮਾਵਚਰਕੁਸਲਚਿਤ੍ਤਾਨਿ ਕਾਮਸੁਗਤਿਭਵਸੁਖਾਨਂ, ਰੂਪਾਵਚਰਪ੍ਪਨਾਵਸਪਵਤ੍ਤਾਨਿ ਰੂਪਾਵਚਰਚਿਤ੍ਤਾਨਿ ਰੂਪਾਵਚਰਭਵਸੁਖਾਨਂ, ਇਤਰਾਨਿ ਅਰੂਪਾਵਚਰਭੂਤਾਨਿ ਅਰੂਪਾਵਚਰਭਵਸੁਖਾਨਞ੍ਚ ਪਚ੍ਚਯਾਤਿ ਦੀਪਿਤਾ.
੩੧੪੯. ਦਸ ਅਸੁਭਾ, ਕਾਯਗਤਾਸਤੀਤਿ ਇਮੇ ਏਕਾਦਸ ਰਾਗਚਰਿਤਸ੍ਸ ਵਿਸੇਸਤੋ ਅਨੁਕੂਲਾ ਵਿਞ੍ਞੇਯ੍ਯਾਤਿ ਯੋਜਨਾ. ‘‘ਵਿਸੇਸਤੋ’’ਤਿ ਇਮਿਨਾ ਰਾਗਸ੍ਸ ਉਜੁਵਿਪਚ੍ਚਨੀਕਭਾਵੇਨ ਚ ਅਤਿਸਪ੍ਪਾਯਤੋ ਚ ਵੁਤ੍ਤੋ, ਇਤਰੇ ਚ ਅਪਟਿਕ੍ਖਿਤ੍ਤਾਤਿ ਦੀਪੇਤਿ. ਵੁਤ੍ਤਞ੍ਹੇਤਂ ਵਿਸੁਦ੍ਧਿਮਗ੍ਗੇ ‘‘ਸਬ੍ਬਞ੍ਚੇਤਂ ਉਜੁਵਿਪਚ੍ਚਨੀਕਵਸੇਨ ਚ ਅਤਿਸਪ੍ਪਾਯਵਸੇਨ ਚ ਵੁਤ੍ਤਂ, ਰਾਗਾਦੀਨਂ ਪਨ ਅਵਿਕ੍ਖਮ੍ਭਿਕਾ, ਸਦ੍ਧਾਦੀਨਂ ਵਾ ਅਨੁਪਕਾਰਾ ਕੁਸਲਭਾਵਨਾ ਨਾਮ ਨਤ੍ਥੀ’’ਤਿ (ਵਿਸੁਦ੍ਧਿ. ੧.੪੭).
੩੧੫੦. ਸਵਣ੍ਣਕਸਿਣਾਤਿ ਚਤੂਹਿ ਵਣ੍ਣਕੇਹਿ ਕਸਿਣੇਹਿ ਸਹਿਤਾ. ਚਤਸ੍ਸੋ ਅਪ੍ਪਮਞ੍ਞਾਯੋਤਿ ਇਮੇ ਅਟ੍ਠ ਦੋਸਚਰਿਤਸ੍ਸ ਅਨੁਕੂਲਾਤਿ ਪਕਾਸਿਤਾਤਿ ਯੋਜਨਾ.
੩੧੫੧. ਮੋਹਪ੍ਪਕਤਿਨੋਤਿ ਮੋਹਚਰਿਤਸ੍ਸ. ‘‘ਆਨਾਪਾਨਸਤਿ ਏਕਾਵਾ’’ਤਿ ਪਦਚ੍ਛੇਦੋ.
੩੧੫੨. ਮਰਣੂਪਸਮੇਤਿ ਮਰਣਞ੍ਚ ਉਪਸਮੋ ਚ ਮਰਣੂਪਸਮਂ, ਤਸ੍ਮਿਂ ਮਰਣੂਪਸਮੇ. ਸਤੀਤਿ ਮਰਣਾਨੁਸ੍ਸਤਿ, ਉਪਸਮਾਨੁਸ੍ਸਤਿ ਚਾਤਿ ਏਤੇ ਚਤ੍ਤਾਰੋ ਧਮ੍ਮਾ. ਪਞ੍ਞਾਪਕਤਿਨੋਤਿ ਬੁਦ੍ਧਿਚਰਿਤਸ੍ਸ.
੩੧੫੩. ਆਦਿਅਨੁਸ੍ਸਤਿਚ੍ਛਕ੍ਕਨ੍ਤਿ ਬੁਦ੍ਧਧਮ੍ਮਸਙ੍ਘਸੀਲਚਾਗਦੇਵਤਾਨੁਸ੍ਸਤਿਸਙ੍ਖਾਤਂ ਛਕ੍ਕਂ. ਸਦ੍ਧਾਚਰਿਤਵਣ੍ਣਿਤਨ੍ਤਿ ਸਦ੍ਧਾਚਰਿਤਸ੍ਸ ਅਨੁਕੂਲਨ੍ਤਿ ਕਥਿਤਂ. ਆਰੁਪ੍ਪਾਤਿ ਚਤ੍ਤਾਰੋ ਆਰੁਪ੍ਪਾ. ਸੇਸਾ ਕਸਿਣਾਤਿ ਭੂਤਕਸਿਣਆਲੋਕਾਕਾਸਕਸਿਣਾਨਂ ਵਸੇਨ ਛ ਕਸਿਣਾਤਿ ਸੇਸਾ ਦਸ ਧਮ੍ਮਾ. ਸਬ੍ਬਾਨੁਰੂਪਕਾਤਿ ਸਬ੍ਬੇਸਂ ਛਨ੍ਨਂ ਚਰਿਯਾਨਂ ਅਨੁਕੂਲਾਤਿ ਅਤ੍ਥੋ.
੩੧੫੪-੮. ਏਵਂ ਯਥਾਨਿਕ੍ਖਿਤ੍ਤਮਾਤਿਕਾਨੁਕ੍ਕਮੇਨ ਕਮ੍ਮਟ੍ਠਾਨਪ੍ਪਭੇਦਂ ਵਿਭਾਵੇਤ੍ਵਾ ਇਦਾਨਿ ਭਾਵਨਾਨਯਂ ਦਸ੍ਸੇਤੁਮਾਹ ‘‘ਏਵ’’ਨ੍ਤਿਆਦਿ. ਏਵਂ ਪਭੇਦਤੋ ਞਤ੍ਵਾ ਕਮ੍ਮਟ੍ਠਾਨਾਨੀਤਿ ਯਥਾਵੁਤ੍ਤਭੇਦਨਯਮੁਖੇਨ ਭਾਵਨਾਮਯਾਰਮ੍ਭਦਸ੍ਸਨਂ. ਪਣ੍ਡਿਤੋਤਿ ਤਿਹੇਤੁਕਪਟਿਸਨ੍ਧਿਪਞ੍ਞਾਯ ਪਞ੍ਞਵਾ ਭਬ੍ਬਪੁਗ੍ਗਲੋ. ਤੇਸੂਤਿ ਨਿਦ੍ਧਾਰਣੇ ਭੁਮ੍ਮਂ. ਮੇਧਾਵੀਤਿ ਪਾਰਿਹਾਰਿਯਪਞ੍ਞਾਯ ਸਮਨ੍ਨਾਗਤੋ. ਦਲ਼੍ਹਂ ਗਹੇਤ੍ਵਾਨਾਤਿਆਦਿਮਜ੍ਝਪਰਿਯੋਸਾਨੇ ਸੁਟ੍ਠੁ ਸਲ੍ਲਕ੍ਖਨ੍ਤੇਨ ਦਲ਼੍ਹਂ ਅਟ੍ਠਿਂ ਕਤ੍ਵਾ ਸਕ੍ਕਚ੍ਚਂ ਉਗ੍ਗਹੇਤ੍ਵਾ. ਕਲ੍ਯਾਣਮਿਤ੍ਤਕੋਤਿ –
‘‘ਪਿਯੋ ਗਰੁ ਭਾਵਨੀਯੋ;
ਵਤ੍ਤਾ ਚ ਵਚਨਕ੍ਖਮੋ;
ਗਮ੍ਭੀਰਞ੍ਚ ਕਥਂ ਕਤ੍ਤਾ;
ਨੋ ਚਟ੍ਠਾਨੇ ਨਿਯੋਜਕੋ’’ਤਿ. (ਵਿਸੁਦ੍ਧਿ. ੧.੩੭; ਨੇਤ੍ਤਿ. ੧੧੩) –
ਵੁਤ੍ਤਲਕ੍ਖਣਕੋ ਸੀਲਸੁਤਪਞ੍ਞਾਦਿਗੁਣਸਮਨ੍ਨਾਗਤਕਲ੍ਯਾਣਮਿਤ੍ਤਕੋ.
ਪਠਮਮੇਵ ਪਲਿਬੋਧਾਨਂ ਉਚ੍ਛੇਦਂ ਕਤ੍ਵਾਤਿ ਯੋਜਨਾ. ਪਠਮਨ੍ਤਿ ਭਾਵਨਾਰਮ੍ਭਤੋ ਪਠਮਮੇਵ. ਪਲਿਬੋਧਾਨਂ ਉਚ੍ਛੇਦਂ ਕਤ੍ਵਾਤਿ –
‘‘ਆਵਾਸੋ ਚ ਕੁਲਂ ਲਾਭੋ;
ਗਣੋ ਕਮ੍ਮਞ੍ਚ ਪਞ੍ਚਮਂ;
ਅਦ੍ਧਾਨਂ ਞਾਤਿ ਆਬਾਧੋ;
ਗਨ੍ਥੋ ਇਦ੍ਧੀਤਿ ਤੇ ਦਸਾ’’ਤਿ. (ਵਿਸੁਦ੍ਧਿ. ੧.੪੧) –
ਵੁਤ੍ਤਾਨਂ ਦਸਮਹਾਪਲਿਬੋਧਾਨਂ, ਦੀਘਕੇਸਨਖਲੋਮਚ੍ਛੇਦਨਚੀਵਰਰਜਨਪਤ੍ਤਪਚਨਾਦੀਨਂ ਖੁਦ੍ਦਕਪਅਬੋਧਾਨਞ੍ਚਾਤਿ ਉਭਯੇਸਂ ਪਲਿਬੋਧਾਨਂ ਉਚ੍ਛੇਦਂ ਕਤ੍ਵਾ ਨਿਟ੍ਠਾਪਨੇਨ ਵਾ ਆਲਯਪਰਿਚ੍ਚਾਗੇਨ ਵਾ ਉਚ੍ਛੇਦਂ ਕਤ੍ਵਾ. ਇਦ੍ਧਿ ਪਨੇਤ੍ਥ ਵਿਪਸ੍ਸਨਾਯ ਪਲਿਬੋਧੋ ਹੋਤਿ, ਨ ਸਮਾਧਿਭਾਵਨਾਯ. ਵੁਤ੍ਤਞ੍ਹੇਤਂ ਵਿਸੁਦ੍ਧਿਮਗ੍ਗੇ ‘‘ਇਦ੍ਧੀਤਿ ਪੋਥੁਜ੍ਜਨਿਕਾ ਇਦ੍ਧਿ. ਸਾ ਹਿ ਉਤ੍ਤਾਨਸੇਯ੍ਯਕਦਾਰਕੋ ਵਿਯ, ਤਰੁਣਸਸ੍ਸਂ ਵਿਯ ਚ ਦੁਪ੍ਪਰਿਹਾਰਾ ਹੋਤਿ, ਅਪ੍ਪਮਤ੍ਤਕੇਨੇਵ ਭਿਜ੍ਜਤਿ. ਸਾ ਪਨ ਵਿਪਸ੍ਸਨਾਯ ਪਲਿਬੋਧੋ ਹੋਤਿ, ਨ ਸਮਾਧਿਸ੍ਸ ਸਮਾਧਿਂ ਪਤ੍ਵਾ ਪਤ੍ਤਬ੍ਬਤ੍ਤਾ’’ਤਿ (ਵਿਸੁਦ੍ਧਿ. ੧.੪੧).
ਦੋਸਵਜ੍ਜਿਤੇ, ਅਨੁਰੂਪੇ ਚ ਵਿਹਾਰੇ ਵਸਨ੍ਤੇਨਾਤਿ ਯੋਜਨਾ. ਦੋਸਵਜ੍ਜਿਤੇਤਿ –
‘‘ਮਹਾਵਾਸਂ ਨਵਾਵਾਸਂ, ਜਰਾਵਾਸਞ੍ਚ ਪਨ੍ਥਨਿਂ;
ਸੋਣ੍ਡਿਂ ਪਣ੍ਣਞ੍ਚ ਪੁਪ੍ਫਞ੍ਚ, ਫਲਂ ਪਤ੍ਥਿਤਮੇਵ ਚ.
‘‘ਨਗਰਂ ਦਾਰੁਨਾ ਖੇਤ੍ਤਂ, ਵਿਸਭਾਗੇਨ ਪਟ੍ਟਨਂ;
ਪਚ੍ਚਨ੍ਤਸੀਮਾਸਪ੍ਪਾਯਂ, ਯਤ੍ਥ ਮਿਤ੍ਤੋ ਨ ਲਬ੍ਭਤਿ.
‘‘ਅਟ੍ਠਾਰਸੇਤਾਨਿ ਠਾਨਾਨਿ, ਇਤਿ ਵਿਞ੍ਞਾਯ ਪਣ੍ਡਿਤੋ;
ਆਰਕਾ ਪਰਿਵਜ੍ਜੇਯ੍ਯ, ਮਗ੍ਗਂ ਪਟਿਭਯਂ ਯਥਾ’’ਤਿ. (ਵਿਸੁਦ੍ਧਿ. ੧.੫੨) –
ਅਟ੍ਠਕਥਾਸੁ ਵੁਤ੍ਤੇਹਿ ਇਮੇਹਿ ਅਟ੍ਠਾਰਸਹਿ ਦੋਸੇਹਿ ਗਜ੍ਜਿਤੇ.
ਅਨੁਰੂਪੇ ਵਸਨ੍ਤੇਨਾਤਿ –
‘‘ਇਧ, ਭਿਕ੍ਖਵੇ, ਸੇਨਾਸਨਂ ਨਾਤਿਦੂਰਂ ਹੋਤਿ ਨਚ੍ਚਾਸਨ੍ਨਂ ਗਮਨਾਗਮਨਸਮ੍ਪਨ੍ਨਂ, ਦਿਵਾ ਅਪ੍ਪਾਕਿਣ੍ਣਂ, ਰਤ੍ਤਿਂ ਅਪ੍ਪਸਦ੍ਦਂ ਅਪ੍ਪਨਿਗ੍ਘੋਸਂ, ਅਪ੍ਪਡਂਸਮਕਸਵਾਤਾਤਪਸਰੀਸਪਸਮ੍ਫਸ੍ਸਂ, ਤਸ੍ਮਿਂ ਖੋ ਪਨ ਸੇਨਾਸਨੇ ਵਿਹਰਨ੍ਤਸ੍ਸ ਅਪ੍ਪਕਸਿਰੇਨੇਵ ਉਪ੍ਪਜ੍ਜਨ੍ਤਿ ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਾ, ਤਸ੍ਮਿਂ ਖੋ ਪਨ ਸੇਨਾਸਨੇ ਯੇ ਤੇ ਭਿਕ੍ਖੂ ਵਿਹਰਨ੍ਤਿ ਬਹੁਸ੍ਸੁਤਾ ਆਗਤਾਗਮਾ ਧਮ੍ਮਧਰਾ ਵਿਨਯਧਰਾ ਮਾਤਿਕਾਧਰਾ, ਤੇ ਕਾਲੇਨ ਕਾਲਂ ਉਪਸਙ੍ਕਮਿਤ੍ਵਾ ਪਰਿਪੁਚ੍ਛਤਿ ਪਰਿਪਞ੍ਹਤਿ ‘ਇਦਂ, ਭਨ੍ਤੇ, ਕਥਂ, ਇਮਸ੍ਸ ਕੋ ਅਤ੍ਥੋ’ਤਿ, ਤਸ੍ਸ ਤੇ ਆਯਸ੍ਮਨ੍ਤੋ ਅਵਿਵਟਞ੍ਚੇਵ ਵਿਵਰਨ੍ਤਿ, ਅਨੁਤ੍ਤਾਨੀਕਤਞ੍ਚ ਉਤ੍ਤਾਨਿਂ ਕਰੋਨ੍ਤਿ, ਅਨੇਕਵਿਹਿਤੇਸੁ ਚ ਕਙ੍ਖਟ੍ਠਾਨੀਯੇਸੁ ਧਮ੍ਮੇਸੁ ਕਙ੍ਖਂ ਪਟਿਵਿਨੋਦੇਨ੍ਤਿ. ਏਵਂ ਖੋ, ਭਿਕ੍ਖਵੇ, ਸੇਨਾਸਨਂ ਪਞ੍ਚਙ੍ਗਸਮਨ੍ਨਾਗਤਂ ਹੋਤੀ’’ਤਿ (ਅ. ਨਿ. ੧੦.੧੧) –
ਏਵਂ ਭਗਵਤਾ ਵਣ੍ਣਿਤੇਹਿ ਪਞ੍ਚਹਿ ਗੁਣੇਹਿ ਸਮਨ੍ਨਾਗਤਤ੍ਤਾ ਅਨੁਰੂਪੇ ਭਾਵਨਾਕਮ੍ਮਾਨੁਗੁਣੇ ਵਿਹਾਰੇ ਵਿਹਰਨ੍ਤੇਨਾਤਿ ਅਤ੍ਥੋ. ਪਠਮਾਦੀਨੀਤਿ ਪਠਮਦੁਤਿਯਾਦੀਨਿ ਰੂਪਾਵਚਰਜ੍ਝਾਨਾਨਿ. ਸਬ੍ਬਸੋ ਭਾਵੇਤ੍ਵਾਤਿ ਵਿਸੁਦ੍ਧਿਮਗ੍ਗੇ ‘‘ਸਬ੍ਬਂ ਭਾਵਨਾਵਿਧਾਨਂ ਅਪਰਿਹਾਪੇਨ੍ਤੇਨ ਭਾਵੇਤਬ੍ਬੋ’’ਤਿ (ਵਿਸੁਦ੍ਧਿ. ੧.੪੧) ਨਿਕ੍ਖਿਤ੍ਤਸ੍ਸ ਮਾਤਿਕਾਪਦਸ੍ਸ ਵਿਤ੍ਥਾਰਕ੍ਕਮੇਨ ਭਾਵੇਤ੍ਵਾ, ਚਿਤ੍ਤਵਿਸੁਦ੍ਧਿਂ ਸਮ੍ਪਾਦੇਤ੍ਵਾਤਿ ਵੁਤ੍ਤਂ ਹੋਤਿ.
ਸਪ੍ਪਞ੍ਞੋਤਿ ਕਮ੍ਮਜਤਿਹੇਤੁਕਪਟਿਸਨ੍ਧਿਪਞ੍ਞਾਯ ਚੇਵ ਕਮ੍ਮਟ੍ਠਾਨਮਨਸਿਕਾਰਸਪ੍ਪਾਯਾਨਿ ਪਰਿਗ੍ਗਹੇਤ੍ਵਾ ਅਸਪ੍ਪਾਯਂ ਪਰਿਵਜ੍ਜੇਤ੍ਵਾ ਸਪ੍ਪਾਯਸੇਵਨੋਪਕਾਰਾਯ ਪਾਰਿਹਾਰਿਯਪਞ੍ਞਾਯ ਚ ਸਮਨ੍ਨਾਗਤੋ ਯੋਗਾਵਚਰੋ. ਤਤੋਤਿ ਨੇਵਸਞ੍ਞਾਨਾਸਞ੍ਞਾਯਤਨਵਜ੍ਜਿਤਰੂਪਾਰੂਪਜ੍ਝਾਨਂ ਵਿਪਸ੍ਸਨਾਪਾਦਕਭਾਵੇਨ ਸਮਾਪਜ੍ਜਿਤ੍ਵਾ ਅਟ੍ਠਨ੍ਨਂ ਵਿਪਸ੍ਸਨਾਪਾਦਕਜ੍ਝਾਨਾਨਮਞ੍ਞਤਰਤੋ ਝਾਨਾ ਵੁਟ੍ਠਾਯ. ਤੇਨਾਹ ਵਿਸੁਦ੍ਧਿਮਗ੍ਗੇ ‘‘ਠਪੇਤ੍ਵਾ ਨੇਵਸਞ੍ਞਾਨਾਸਞ੍ਞਾਯਤਨਂ ਅਵਸੇਸਰੂਪਾਰੂਪਾਵਚਰਜ੍ਝਾਨਾਨਂ ਅਞ੍ਞਤਰਤੋ ਵੁਟ੍ਠਾਯਾ’’ਤਿ (ਵਿਸੁਦ੍ਧਿ. ੨.੬੬੩).
ਨਾਮਰੂਪਵਵਤ੍ਥਾਨਂ ਕਤ੍ਵਾਤਿ ਵਿਸੁਦ੍ਧਿਮਗ੍ਗੇ ਦਿਟ੍ਠਿਵਿਸੁਦ੍ਧਿਨਿਦ੍ਦੇਸੇ ਵੁਤ੍ਤਨਯੇਨ ਪਞ੍ਚਕ੍ਖਨ੍ਧਾਦਿਮੁਖੇਸੁ ਯਥਿਚ੍ਛਿਤੇਨ ਮੁਖੇਨ ਪਵਿਸਿਤ੍ਵਾ ਨਾਮਰੂਪਂ ਵਵਤ੍ਥਪੇਤ੍ਵਾ ‘‘ਇਦਂ ਨਾਮਂ, ਇਦਂ ਰੂਪਂ, ਇਮਮ੍ਹਾ ਨਾਮਰੂਪਤੋ ਬ੍ਯਤਿਰਿਤ੍ਤਂ ਅਤ੍ਤਾਦਿ ਕਿਞ੍ਚਿ ਵਤ੍ਤਬ੍ਬਂ ਨਤ੍ਥੀ’’ਤਿ ਨਿਟ੍ਠਂ ਗਨ੍ਤ੍ਵਾ, ਇਮਿਨਾ ਦਿਟ੍ਠਿਵਿਸੁਦ੍ਧਿ ਦਸ੍ਸਿਤਾ.
ਕਙ੍ਖਂ ਵਿਤੀਰਿਯਾਤਿ ਯਥਾਦਿਟ੍ਠਨਾਮਰੂਪਧਮ੍ਮਾਨਂ ਵਿਸੁਦ੍ਧਿਮਗ੍ਗੇ ਕਙ੍ਖਾਵਿਤਰਣਵਿਸੁਦ੍ਧਿਨਿਦ੍ਦੇਸੇ (ਵਿਸੁਦ੍ਧਿ. ੨.੬੭੮ ਆਦਯੋ) ਵੁਤ੍ਤਨਯੇਨ ਪਞ੍ਚਧਾ ਪਰਿਗ੍ਗਹੇਤ੍ਵਾ ‘‘ਨ ਤਾਵਿਦਂ ਨਾਮਰੂਪਂ ਅਹੇਤੁਕਂ, ਨ ਅਤ੍ਤਾਦਿਹੇਤੁਕ’’ਨ੍ਤਿ ਯਾਥਾਵਤੋ ਨਾਮਰੂਪਸ੍ਸ ਪਞ੍ਚਧਾ ਦਸ੍ਸਨੇਨ ਅਦ੍ਧਤ੍ਤਯਗਤਂ ‘‘ਅਹੋਸਿਂ ਨੁ ਖੋ ਅਹਂ ਅਤੀਤਮਦ੍ਧਾਨ’’ਨ੍ਤਿਆਦਿਨਯਪ੍ਪਵਤ੍ਤਂ (ਮ. ਨਿ. ੧.੧੮; ਸਂ. ਨਿ. ੨.੨੦; ਮਹਾਨਿ. ੧੭੪) ਸੋਲ਼ਸਵਿਧਂ ਕਙ੍ਖਂ, ‘‘ਸਤ੍ਥਰਿ ਕਙ੍ਖਤੀ’’ਤਿਆਦਿਨਯਪ੍ਪਵਤ੍ਤਂ (ਧ. ਸ. ੧੦੦੮) ਅਟ੍ਠਵਿਧਞ੍ਚ ਕਙ੍ਖਂ ਵੀਰਿਯੇਨ ਤਰਿਤ੍ਵਾ ਪਜਹਿਤ੍ਵਾ, ਇਮਿਨਾ ਕਙ੍ਖਾਵਿਤਰਣਵਿਸੁਦ੍ਧਿ ਦਸ੍ਸਿਤਾ ਹੋਤਿ.
ਏਵਂ ਕਙ੍ਖਾਵਿਤਰਣਵਿਸੁਦ੍ਧਿਨਿਪ੍ਫਾਦਨੇਨ ਞਾਤਪਰਿਞ੍ਞਾਯ ਠਿਤੋ ਯੋਗਾਵਚਰੋ ਸਪ੍ਪਾਯਂ ਨਾਮਰੂਪਂ ਲਕ੍ਖਣਤ੍ਤਯਂ ਆਰੋਪੇਤ੍ਵਾ ਕਙ੍ਖਾਵੂਪਸਮਞਾਣੇਨ ਮਗ੍ਗਾਮਗ੍ਗਞਾਣਦਸ੍ਸਨਵਿਸੁਦ੍ਧਿਨਿਦ੍ਦੇਸੇ (ਵਿਸੁਦ੍ਧਿ. ੨.੬੯੨ ਆਦਯੋ) ਵੁਤ੍ਤਨਯੇਨ ਸਙ੍ਖਾਰੇ ਸਮ੍ਮਸਨ੍ਤੋ ਓਭਾਸੋ, ਞਾਣਂ, ਪੀਤਿ, ਪਸ੍ਸਦ੍ਧਿ, ਸੁਖਂ, ਅਧਿਮੋਕ੍ਖੋ, ਪਗ੍ਗਹੋ, ਉਪਟ੍ਠਾਨਂ, ਉਪੇਕ੍ਖਾ, ਨਿਕਨ੍ਤੀਤਿ ਦਸਸੁ ਉਪਕ੍ਕਿਲੇਸੇਸੁ ਪਾਤੁਭੂਤੇਸੁ ਤਥਾ ਪਾਤੁਭੂਤੇ ਓਭਾਸਾਦਯੋ ਦਸ ਉਪਕ੍ਕਿਲੇਸੇ ‘‘ਅਮਗ੍ਗੋ’’ਤਿ ਮਗ੍ਗਵੀਥਿਪਟਿਪਨ੍ਨਂ ਵਿਪਸ੍ਸਨਾਞਾਣਮੇਵ ‘‘ਮਗ੍ਗੋ’’ਤਿ ਪਣ੍ਡਿਤੋ ਪਞ੍ਞਵਾ ਯੋਗਾਵਚਰੋ ਜਾਨਾਤੀਤਿ ਅਤ੍ਥੋ, ਇਮਿਨਾ ਮਗ੍ਗਾਮਗ੍ਗਞਾਣਦਸ੍ਸਨਵਿਸੁਦ੍ਧਿ ਸਙ੍ਖੇਪਤੋ ਦਸ੍ਸਿਤਾ ਹੋਤਿ.
੩੧੫੯. ਏਤ੍ਤਾਵਤਾ ਤੇਸਂ ਤਿਣ੍ਣਂ ਵਵਤ੍ਥਾਨੇਤਿ ਯੋਜਨਾ. ਏਤ੍ਤਾਵਤਾਤਿ ‘‘ਨਾਮਰੂਪਵਵਤ੍ਥਾਨਂ ਕਤ੍ਵਾ’’ਤਿਆਦਿਨਾ ਸਙ੍ਖੇਪਤੋ ਦਸ੍ਸਿਤਨਯੇਨ. ਤੇਸਂ ਤਿਣ੍ਣਨ੍ਤਿ ਦਿਟ੍ਠਿਵਿਸੁਦ੍ਧਿ, ਕਙ੍ਖਾਵਿਤਰਣਵਿਸੁਦ੍ਧਿ, ਮਗ੍ਗਾਮਗ੍ਗਞਾਣਦਸ੍ਸਨਵਿਸੁਦ੍ਧੀਤਿ ਤੀਹਿ ਵਿਸੁਦ੍ਧੀਹਿ ਸਕਸਕਵਿਪਸ੍ਸਨਾਨਂ ਨਾਮਰੂਪਤਪ੍ਪਚ੍ਚਯਮਗ੍ਗਾਮਗ੍ਗਾਨਂ ਤਿਣ੍ਣਂ. ਵਵਤ੍ਥਾਨੇ ਕਤੇ ਨਿਯਮੇ ਕਤੇ. ਤਿਣ੍ਣਂ ਸਚ੍ਚਾਨਨ੍ਤਿ ਦੁਕ੍ਖਸਮੁਦਯਮਗ੍ਗਸਙ੍ਖਆਤਾਨਂ ਤਿਣ੍ਣਂ ਸਚ੍ਚਾਨਂ. ਵਵਤ੍ਥਾਨਂ ਕਤਂ ਸਿਯਾਤਿ ਞਾਤਤੀਰਣਪਰਿਞ੍ਞਾਸਙ੍ਖਾਤੇਨ ਲੋਕਿਯੇਨੇਵ ਞਾਣੇਨ ਅਨੁਬੋਧਵਸੇਨ ਨਿਚ੍ਛਯੋ ਕਤੋ ਹੋਤੀਤਿ ਅਤ੍ਥੋ. ਕਥਂ? ਨਾਮਰੂਪਵਵਤ੍ਥਾਨਸਙ੍ਖਾਤੇਨ ਦਿਟ੍ਠਿਵਿਸੁਦ੍ਧਿਞਾਣੇਨ ਦੁਕ੍ਖਸਚ੍ਚਵਵਤ੍ਥਾਨਂ ਕਤਂ ਹੋਤਿ, ਪਚ੍ਚਯਪਰਿਗ੍ਗਹਸਙ੍ਖਾਤੇਨ ਕਙ੍ਖਾਵਿਤਰਣਵਿਸੁਦ੍ਧਿਞਾਣੇਨ ਸਮੁਦਯਸਚ੍ਚਵਵਤ੍ਥਾਨਂ, ਮਗ੍ਗਾਮਗ੍ਗਵਵਤ੍ਥਾਨਸਙ੍ਖਾਤੇਨ ਮਗ੍ਗਾਮਗ੍ਗਞਾਣਦਸ੍ਸਨੇਨ ਮਗ੍ਗਸਚ੍ਚਵਵਤ੍ਥਾਨਂ.
੩੧੬੦-੧. ਏਵਂ ਞਾਤਤੀਰਣਪਰਿਞ੍ਞਾਦ੍ਵਯਂ ਸਙ੍ਖੇਪਤੋ ਦਸ੍ਸੇਤ੍ਵਾ ਪਹਾਨਪਰਿਞ੍ਞਾਯ ਸਰੀਰਭੂਤਾਨਿ ਨਵ ਞਾਣਾਨਿ ਦਸ੍ਸੇਤੁਮਾਹ ‘‘ਉਦਯਬ੍ਬਯਾ’’ਤਿਆਦਿ. ਤਤ੍ਥ ਉਦਯਬ੍ਬਯਾਤਿ ਉਪ੍ਪਾਦਭਙ੍ਗਾਨੁਪਸ੍ਸਨਾਵਸਪ੍ਪਵਤ੍ਤਾ ਉਤ੍ਤਰਪਦਲੋਪੇਨ ‘‘ਉਦਯਬ੍ਬਯਾ’’ਤਿ ਵੁਤ੍ਤਾ. ਤਤ੍ਥ ਉਦਯਂ ਮੁਞ੍ਚਿਤ੍ਵਾ ਵਯੇ ਵਾ ਪਵਤ੍ਤਾ ਭਙ੍ਗਾਨੁਪਸ੍ਸਨਾ ‘‘ਭਙ੍ਗਾ’’ਤਿ ਵੁਤ੍ਤਾ. ਭਯਞ੍ਚ ਆਦੀਨਵੋ ਚ ਨਿਬ੍ਬਿਦਾ ਚ ਭਯਾਦੀਨਵਨਿਬ੍ਬਿਦਾ, ਸਙ੍ਖਾਰਾਨਂ ਭਯਤੋ ਅਨੁਪਸ੍ਸਨਵਸੇਨ ਪਵਤ੍ਤਾ ਭਯਾਨੁਪਸ੍ਸਨਾ ਚ ਦਿਟ੍ਠਭਯਾਨਂ ਆਦੀਨਵਤੋ ਪੇਕ੍ਖਨਵਸੇਨ ਪਵਤ੍ਤਾ ਆਦੀਨਵਾਨੁਪਸ੍ਸਨਾ ਚ ਦਿਟ੍ਠਾਦੀਨਵੇਸੁ ਨਿਬ੍ਬੇਦਵਸੇਨ ਪਵਤ੍ਤਾ ਨਿਬ੍ਬਿਦਾਨੁਪਸ੍ਸਨਾ ਚ ਤਥਾ ਵੁਤ੍ਤਾ. ਨਿਬ੍ਬਿਨ੍ਦਿਤ੍ਵਾ ਸਙ੍ਖਾਰੇਹਿ ਮੁਚ੍ਚਿਤੁਕਾਮਤਾਵਸੇਨੇਵ ਪਵਤ੍ਤਂ ਞਾਣਂ ਮੁਚ੍ਚਿਤੁਕਾਮਤਾਞਾਣਂ. ਮੁਚ੍ਚਨਸ੍ਸ ਉਪਾਯਸਮ੍ਪਟਿਪਾਦਨਤ੍ਥਂ ਪੁਨ ਸਙ੍ਖਾਰਤ੍ਤਯਪਟਿਗ੍ਗਹਵਸਪਵਤ੍ਤਂ ਞਾਣਂ ਪਟਿਸਙ੍ਖਾਨੁਪਸ੍ਸਨਾ.
ਸਙ੍ਖਾਰਧਮ੍ਮੇ ਭਯਨਨ੍ਦਿਵਿਵਜ੍ਜਨਵਸੇਨ ਅਜ੍ਝੁਪੇਕ੍ਖਿਤ੍ਵਾ ਪਵਤ੍ਤਞਾਣਂ ਸਙ੍ਖਾਰੁਪੇਕ੍ਖਾਞਾਣਂ, ਸਚ੍ਚਾਨੁਲੋਮੋ ਤਦਧਿਗਮਾਯ ਏਕਨ੍ਤਪਚ੍ਚਯੋ ਹੋਤੀਤਿ ‘‘ਸਚ੍ਚਾਨੁਲੋਮਿਕ’’ਨ੍ਤਿ ਚ ਕਲਾਪਸਮ੍ਮਸਨਞਾਣਾਦੀਨਂ ਪੁਰਿਮਾਨਂ ਨਵਨ੍ਨਂ ਕਿਚ੍ਚਨਿਪ੍ਫਤ੍ਤਿਯਾ, ਉਪਰਿ ਚ ਸਤ੍ਤਤਿਂਸਾਯ ਬੋਧਿਪਕ੍ਖਿਯਧਮ੍ਮਾਨਞ੍ਚ ਅਨੁਲੋਮਨਤੋ ‘‘ਅਨੁਲੋਮਞਾਣ’’ਨ੍ਤਿ ਚ ਵੁਤ੍ਤਂ ਨਵਮਂ ਞਾਣਞ੍ਚਾਤਿ ਯਾ ਨਵਾਨੁਪੁਬ੍ਬਵਿਪਸ੍ਸਨਾਸਙ੍ਖਾਤਾ ਪਹਾਨਪਰਿਞ੍ਞਾ ਦਸ੍ਸਿਤਾ, ਅਯਂ ‘‘ਪਟਿਪਦਾਞਾਣਦਸ੍ਸਨ’’ਨ੍ਤਿ ਪਕਾਸਿਤਾਤਿ ਯੋਜਨਾ.
੩੧੬੨. ਤਤੋ ਅਨੁਲੋਮਞਾਣਤੋ ਪਰਂ ਮਗ੍ਗਸ੍ਸ ਆਵਜ੍ਜਨਟ੍ਠਾਨਿਯਂ ਹੁਤ੍ਵਾ ਨਿਬ੍ਬਾਨਮਾਲਮ੍ਬਿਤ੍ਵਾ ਉਪ੍ਪਨ੍ਨਸ੍ਸ ਪੁਥੁਜ੍ਜਨਗੋਤ੍ਤਸ੍ਸ ਅਭਿਭਵਨਤੋ, ਅਰਿਯਗੋਤ੍ਤਸ੍ਸ ਭਾਵਨਤੋ ਵਡ੍ਢਨਤੋ ਚ ‘‘ਗੋਤ੍ਰਭੂ’’ਤਿ ਸਙ੍ਖਂ ਗਤਸ੍ਸ ਚਿਤ੍ਤਸ੍ਸ ਸਮਨਨ੍ਤਰਮੇਵ ਚ. ਸਨ੍ਤਿਮਾਰਮ੍ਮਣਂ ਕਤ੍ਵਾਤਿ ਸਬ੍ਬਕਿਲੇਸਦਰਥਾਨਞ੍ਚ ਸਙ੍ਖਾਰਦੁਕ੍ਖਗ੍ਗਿਨੋ ਚ ਵੂਪਸਮਨਿਮਿਤ੍ਤਤ੍ਤਾ ‘‘ਸਨ੍ਤਿ’’ਨ੍ਤਿ ਸਙ੍ਖਾਤਂ ਨਿਰੋਧਮਾਲਮ੍ਬਿਤ੍ਵਾ. ਞਾਣਦਸ੍ਸਨਨ੍ਤਿ ਚਤੁਨ੍ਨਂ ਅਰਿਯਸਚ੍ਚਾਨਂ ਪਰਿਞ੍ਞਾਭਿਸਮਯਾਦਿਵਸੇਨ ਜਾਨਨਟ੍ਠੇਨ ਞਾਣਂ, ਚਕ੍ਖੁਨਾ ਵਿਯ ਪਚ੍ਚਕ੍ਖਤੋ ਦਸ੍ਸਨਟ੍ਠੇਨ ਦਸ੍ਸਨਨ੍ਤਿ ਸਙ੍ਖਂ ਗਤਂ ਸੋਤਾਪਤ੍ਤਿਮਗ੍ਗਞਾਣਸਙ੍ਖਾਤਂ ਸਤ੍ਤਮਵਿਸੁਦ੍ਧਿਞਾਣਂ ਜਾਯਤੇ ਉਪ੍ਪਜ੍ਜਤੀਤਿ ਅਤ੍ਥੋ.
੩੧੬੩. ਪਚ੍ਚਵੇਕ੍ਖਣਪਰਿਯਨ੍ਤਨ੍ਤਿ ਪਚ੍ਚਵੇਕ੍ਖਣਜਵਨਪਰਿਯੋਸਾਨਂ. ਤਸ੍ਸਾਤਿ ਞਾਣਦਸ੍ਸਨਸਙ੍ਖਾਤਸ੍ਸ ਸੋਤਾਪਤ੍ਤਿਮਗ੍ਗਸ੍ਸ. ਫਲਨ੍ਤਿ ਫਲਚਿਤ੍ਤਂ ਅਨੁ ਪਚ੍ਛਾ ਮਗ੍ਗਾਨਨ੍ਤਰਂ ਹੁਤ੍ਵਾ ਜਾਯਤੇ.
ਏਤ੍ਥ ‘‘ਪਚ੍ਚਵੇਕ੍ਖਣਪਰਿਯਨ੍ਤ’’ਨ੍ਤਿ ਇਦਂ ‘‘ਫਲ’’ਨ੍ਤਿ ਏਤਸ੍ਸ ਵਿਸੇਸਨਂ, ਕਿਰਿਯਾਵਿਸੇਸਨਂ ਵਾ, ਪਚ੍ਚਵੇਕ੍ਖਣਜਵਨਂ ਮਰਿਯਾਦਂ ਕਤ੍ਵਾਤਿ ਅਤ੍ਥੋ. ਮਗ੍ਗਾਨਨ੍ਤਰਂ ਫਲੇ ਦ੍ਵਿਕ੍ਖਤ੍ਤੁਂ, ਤਿਕ੍ਖਤ੍ਤੁਂ ਵਾ ਉਪ੍ਪਜ੍ਜਿਤ੍ਵਾ ਨਿਰੁਦ੍ਧੇ ਤਦਨਨ੍ਤਰਮੇਵ ਭਵਙ੍ਗਂ ਹੋਤਿ, ਭਵਙ੍ਗਂ ਆਵਟ੍ਟੇਤ੍ਵਾ ਪਚ੍ਚਵੇਕ੍ਖਿਤਬ੍ਬਂ ਮਗ੍ਗਮਾਲਮ੍ਬਿਤ੍ਵਾ ਮਨੋਦ੍ਵਾਰਾਵਜ੍ਜਨਂ ਉਪ੍ਪਜ੍ਜਤਿ, ਤਤੋ ਪਚ੍ਚਵੇਕ੍ਖਣਜਵਨਾਨਿ. ਏਵਂ ਫਲਚਿਤ੍ਤਂ ਭਵਙ੍ਗਪਰਿਯਨ੍ਤਮੇਵ ਹੋਤਿ, ਨ ਪਚ੍ਚਵੇਕ੍ਖਣਪਰਿਯਨ੍ਤਂ. ਤਥਾਪਿ ਅਞ੍ਞੇਨ ਜਵਨੇਨ ਅਨਨ੍ਤਰਿਕਂ ਹੁਤ੍ਵਾ ਫਲਜਵਨਾਨਮਨਨ੍ਤਰਂ ਪਚ੍ਚਵੇਕ੍ਖਣਜਵਨਮੇਵ ਪਵਤ੍ਤਤੀਤਿ ਦਸ੍ਸਨਤ੍ਥਂ ਫਲਪਚ੍ਚਵੇਕ੍ਖਣਜਵਨਾਨਨ੍ਤਰੇ ਉਪ੍ਪਨ੍ਨਾਨਿ ਭਵਙ੍ਗਾਵਜ੍ਜਨਾਨਿ ਅਬ੍ਬੋਹਾਰਿਕਾਨਿ ਕਤ੍ਵਾ ‘‘ਪਚ੍ਚਵੇਕ੍ਖਣਪਰਿਯਨ੍ਤਂ, ਫਲਂ ਤਸ੍ਸਾਨੁਜਾਯਤੇ’’ਤਿ ਵੁਤ੍ਤਨ੍ਤਿ ਗਹੇਤਬ੍ਬਂ.
ਪਚ੍ਚਵੇਕ੍ਖਣਞ੍ਚ ਮਗ੍ਗਫਲਨਿਬ੍ਬਾਨਪਹੀਨਕਿਲੇਸਅਵਸਿਟ੍ਠਕਿਲੇਸਾਨਂ ਪਚ੍ਚਵੇਕ੍ਖਣਵਸੇਨ ਪਞ੍ਚਵਿਧਂ ਹੋਤਿ. ਤੇਸੁ ਏਕੇਕਂ ਏਕੇਕੇਨ ਜਵਨਵਾਰੇਨ ਪਚ੍ਚਵੇਕ੍ਖਤੀਤਿ ਪਞ੍ਚ ਪਚ੍ਚਵੇਕ੍ਖਣਜਵਨਵਾਰਾਨਿ ਹੋਨ੍ਤਿ. ਤਾਨਿ ਪਚ੍ਚਵੇਕ੍ਖਣਗ੍ਗਹਣੇਨ ਸਾਮਞ੍ਞਤੋ ਦਸ੍ਸਿਤਾਨੀਤਿ ਦਟ੍ਠਬ੍ਬਾਨਿ.
੩੧੬੪. ਤੇਨੇਵ ਚ ਉਪਾਯੇਨਾਤਿ ਉਦਯਬ੍ਬਯਾਨੁਪਸ੍ਸਨਾਦਿਵਿਪਸ੍ਸਨਾਨਂ ਪਠਮਂ ਮਗ੍ਗੋ ਅਧਿਗਤੋ, ਤੇਨੇਵ ਉਪਾਯੇਨ. ਸੋ ਭਿਕ੍ਖੂਤਿ ਸੋ ਯੋਗਾਵਚਰੋ ਭਿਕ੍ਖੁ. ਪੁਨਪ੍ਪੁਨਂ ਭਾਵੇਨ੍ਤੋਤਿ ਪੁਨਪ੍ਪੁਨਂ ਵਿਪਸ੍ਸਨਂ ਵਡ੍ਢੇਤ੍ਵਾ. ਯਥਾ ਪਠਮਮਗ੍ਗਫਲਾਨਿ ਪਤ੍ਤੋ, ਤਥਾ. ਸੇਸਮਗ੍ਗਫਲਾਨਿ ਚਾਤਿ ਦੁਤਿਯਾਦਿਮਗ੍ਗਫਲਾਨਿ ਚ ਪਾਪੁਣਾਤਿ.
੩੧੬੫. ਇਚ੍ਚੇਵਂ ਯਥਾਵੁਤ੍ਤਨਯੇਨ ਉਪ੍ਪਾਦਵਯਨ੍ਤਾਤੀਤਕਤ੍ਤਾ ਅਚ੍ਚਨ੍ਤਂ ਅਮਤਂ ਧਮ੍ਮਂ ਅਵੇਚ੍ਚ ਪਟਿਵਿਜ੍ਝਿਤ੍ਵਾ ਅਸੇਸਂ ਅਕੁਸਲਂ ਵਿਦ੍ਧਂਸਯਿਤ੍ਵਾ ਸਮੁਚ੍ਛੇਦਪ੍ਪਹਾਨੇਨ ਪਜਹਿਤ੍ਵਾ ਤਯੋ ਭਵੇ ਕਾਮਭਵਾਦੀਸੁ ਤੀਸੁ ਭਵੇਸੁ ਨਿਕਨ੍ਤਿਯਾ ਸੋਸਨਵਸੇਨ ਤਯੋ ਭਵੇ ਵਿਸੇਸੇਨ ਸੋਸਯਿਤ੍ਵਾ ਸੋ ਅਗ੍ਗਦਕ੍ਖਿਣੇਯ੍ਯੋ ਖੀਣਾਸਵੋ ਭਿਕ੍ਖੁ ਪਠਮਂ ਕਿਲੇਸਪਰਿਨਿਬ੍ਬਾਨੇ ਸੋਸਿਤਵਿਪਾਕਕ੍ਖਨ੍ਧਕਟਤ੍ਤਾਰੂਪਸਙ੍ਖਾਤਉਪਾਦਿਸੇਸਰਹਿਤਤ੍ਤਾ ਨਿਰੁਪਾਦਿਸੇਸਂ ਨਿਬ੍ਬਾਨਧਾਤੁਂ ਉਪੇਤਿ ਅਧਿਗਚ੍ਛਤੀਤਿ ਯੋਜਨਾ.
ਇਚ੍ਚੇਵਂ ਸਙ੍ਖੇਪਤੋ ਕਮ੍ਮਟ੍ਠਾਨਭਾਵਨਾਨਯੋ ਆਚਰਿਯੇਨ ਦਸ੍ਸਿਤੋਤਿ ਗਨ੍ਥਭੀਰੁਜਨਾਨੁਗ੍ਗਹਵਸੇਨ ਵਿਤ੍ਥਾਰਵਣ੍ਣਨਂ ਅਨਾਮਸਿਤ੍ਵਾ ਅਨੁਪਦਵਣ੍ਣਨਾਮਤ੍ਤਮੇਵੇਤ੍ਥ ਕਤਂ. ਵਿਤ੍ਥਾਰਵਣ੍ਣਨਾ ਪਨਸ੍ਸ ਵਿਸੁਦ੍ਧਿਮਗ੍ਗਤੋ, ਤਬ੍ਬਣ੍ਣਨਤੋ ਚ ਗਹੇਤਬ੍ਬਾ.
੩੧੬੬-੭. ਵਿਞ੍ਞਾਸਕ੍ਕਮਤੋ ਵਾਪੀਤਿ ਅਕ੍ਖਰਪਦਵਾਕ੍ਯਸਙ੍ਖਾਤਗਨ੍ਥਰਚਨਕ੍ਕਮਤੋ ਵਾ. ਪੁਬ੍ਬਾਪਰਵਸੇਨ ਵਾਤਿ ਵਤ੍ਤਬ੍ਬਾਨਮਤ੍ਥਵਿਸੇਸਾਨਂ ਪਟਿਪਾਟਿਵਸੇਨ ਵਾ. ਅਕ੍ਖਰਬਨ੍ਧੇ ਵਾਤਿ ਸਦ੍ਦਸਤ੍ਥਅਲਙ੍ਕਾਰਸਤ੍ਥਛਨ੍ਦੋਵਿਚਿਤਿਸਤ੍ਥਾਨੁਪਾਤੇਨ ਕਾਤਬ੍ਬਾਯ ਅਕ੍ਖਰਪਦਰਚਨਾਯ, ਗਾਥਾਬਨ੍ਧੇਤਿ ਅਤ੍ਥੋ. ਅਯੁਤ੍ਤਂ ਵਿਯ ਯਦਿ ਦਿਸ੍ਸਤੀਤਿ ਯੋਜਨਾ.
ਤਨ੍ਤਿ ਤਂ ‘‘ਅਯੁਤ੍ਤ’’ਨ੍ਤਿ ਦਿਸ੍ਸਮਾਨਟ੍ਠਾਨਂ. ਤਥਾ ਨ ਗਹੇਤਬ੍ਬਨ੍ਤਿ ਦਿਸ੍ਸਮਾਨਾਕਾਰੇਨੇਵ ਅਯੁਤ੍ਤਨ੍ਤਿ ਨ ਗਹੇਤਬ੍ਬਂ. ਕਥਂ ਗਹੇਤਬ੍ਬਨ੍ਤਿ ਆਹ ‘‘ਗਹੇਤਬ੍ਬਮਦੋਸਤੋ’’ਤਿ. ਤਸ੍ਸ ਕਾਰਣਮਾਹ ‘‘ਮਯਾ ਉਪਪਰਿਕ੍ਖਿਤ੍ਵਾ, ਕਤਤ੍ਤਾ ਪਨ ਸਬ੍ਬਸੋ’’ਤਿ. ਯੋ ਯੋ ਪਨੇਤ੍ਥ ਦੋਸੋ ਦਿਸ੍ਸਤਿ ਖਿਤ੍ਤਦੋਸੋ ਵਾ ਹੋਤੁ ਵਿਪਲ੍ਲਾਸਗ੍ਗਹਣਦੋਸੋ ਵਾ, ਨਾਪਰਂ ਦੋਸੋਤਿ ਦੀਪੇਤਿ. ਤੇਨੇਤਂ ਪਕਰਣਂ ਸਬ੍ਬੇਸਂ ਤਿਪਿਟਕਪਰਿਯਤ੍ਤਿਪ੍ਪਭੇਦਾਯਤਨਬਹੁਸ੍ਸੁਤਾਨਂ ਸਿਕ੍ਖਾਕਾਮਾਨਂ ਥੇਰਾਨਂ ਅਤ੍ਤਨੋ ਪਮਾਣਭੂਤਤਂ ਸੂਚੇਤਿ. ਅਤ੍ਤਨੋ ਪਮਾਣਸੂਚਨੇਨ ਅਤ੍ਤਨਾ ਵਿਰਚਿਤਸ੍ਸ ਵਿਨਯਵਿਨਿਚ੍ਛਯਸ੍ਸਾਪਿ ਪਮਾਣਤਂ ਵਿਭਾਵੇਨ੍ਤੋ ਤਸ੍ਸ ਸਵਨੁਗ੍ਗਹਧਾਰਣਾਦੀਸੁ ਸੋਤੁਜਨਂ ਨਿਯੋਜੇਤੀਤਿ ਦਟ੍ਠਬ੍ਬਂ.
ਇਤਿ ਵਿਨਯਤ੍ਥਸਾਰਸਨ੍ਦੀਪਨਿਯਾ ਵਿਨਯਵਿਨਿਚ੍ਛਯਵਣ੍ਣਨਾਯ
ਕਮ੍ਮਟ੍ਠਾਨਭਾਵਨਾਵਿਧਾਨਕਥਾਵਣ੍ਣਨਾ ਨਿਟ੍ਠਿਤਾ.
ਨਿਗਮਨਕਥਾਵਣ੍ਣਨਾ
੩੧੬੮-੭੮. ਏਵਂ ‘‘ਵਿਨਯੋ ਸਂਵਰਤ੍ਥਾਯ, ਸਂਵਰੋ ਅਵਿਪ੍ਪਟਿਸਾਰਤ੍ਥਾਯ, ਅਵਿਪ੍ਪਟਿਸਾਰੋ ਪਾਮੋਜ੍ਜਤ੍ਥਾਯ, ਪਾਮੋਜ੍ਜਂ ਪੀਤਤ੍ਥਾਯ, ਪੀਤਿ ਪਸ੍ਸਦ੍ਧਤ੍ਥਾਯ, ਪਸ੍ਸਦ੍ਧਿ ਸੁਖਤ੍ਥਾਯ, ਸੁਖਂ ਸਮਾਧਤ੍ਥਾਯ, ਸਮਾਧਿ ਯਥਾਭੂਤਞਾਣਦਸ੍ਸਨਤ੍ਥਾਯ, ਯਥਾਭੂਤਞਾਣਦਸ੍ਸਨਂ ਨਿਬ੍ਬਿਦਤ੍ਥਾਯ, ਨਿਬ੍ਬਿਦਾ ਵਿਰਾਗਤ੍ਥਾਯ, ਵਿਰਾਗੋ ਵਿਮੁਤ੍ਤਤ੍ਥਾਯ, ਵਿਮੁਤ੍ਤਿ ਵਿਮੁਤ੍ਤਿਞਾਣਦਸ੍ਸਨਤ੍ਥਾਯ, ਵਿਮੁਤ੍ਤਿਞਾਣਦਸ੍ਸਨਂ ਅਨੁਪਾਦਾਪਅਨਿਬ੍ਬਾਨਤ੍ਥਾਯਾ’’ਤਿ (ਪਰਿ. ੩੬੫) ਦਸ੍ਸਿਤਾਨਿਸਂਸਪਰਮ੍ਪਰਾਨਿਦ੍ਧਾਰਣਮੁਖੇਨ ਅਨੁਪਾਦਿਸੇਸਨਿਬ੍ਬਾਨਧਾਤੁਪਰਿਯਨ੍ਤਂ ਸਾਨਿਸਂਸਂ ਵਿਨਯਕਥਂ ਕਥੇਤ੍ਵਾ ਤਸ੍ਸਾ ਪਮਾਣਤਞ੍ਚ ਵਿਭਾਵੇਤ੍ਵਾ ਅਤ੍ਤਨੋ ਸੁਤਬੁਦ੍ਧਤ੍ਤਾ ‘‘ਸਨਿਦਾਨਂ, ਭਿਕ੍ਖਵੇ, ਧਮ੍ਮਂ ਦੇਸੇਮੀ’’ਤਿ (ਅ. ਨਿ. ੩.੧੨੬; ਕਥਾ. ੮੦੬) ਵਚਨਤੋ ਭਗਵਤੋ ਚਰਿਤਮਨੁਵਤ੍ਤਨ੍ਤੋ ਤਸ੍ਸ ਦੇਸਕਾਲਾਦਿਵਸੇਨ ਨਿਦਾਨਂ ਦਸ੍ਸੇਤੁਮਾਹ ‘‘ਸੇਟ੍ਠਸ੍ਸਾ’’ਤਿਆਦਿ.
ਤਤ੍ਥ ਸੇਟ੍ਠਸ੍ਸਾਤਿ ਧਨਧਞ੍ਞਵਤ੍ਥਾਲਙ੍ਕਾਰਾਦਿਉਪਭੋਗਪਰਿਭੋਗਸਮ੍ਪਤ੍ਤਿਯਾ ਚੇਵ ਗਾਮਰਾਜਧਾਨਿਖੇਤ੍ਤਵਤ੍ਥੁਨਦਿਤਲ਼ਾਕਾਰਾਮਾਦਿਸਮ੍ਪਤ੍ਤਿਯਾ ਚ ਪਸਤ੍ਥਤਰਸ੍ਸ. ਨਾਭਿਭੂਤੇਤਿ ਮਜ੍ਝਵਤ੍ਤਿਤਾਯ ਨਾਭਿਸਦਿਸੇ. ਨਿਰਾਕੁਲੇਤਿ ਮਜ੍ਝਵਤ੍ਤਿਤਾਯੇਵ ਪਰਿਮਣ੍ਡਲਾਦਿਸਮ੍ਭਵਤੋ ਵਿਲੋਪਾਦਿਆਕੁਲਰਹਿਤੇ. ਸਬ੍ਬਸ੍ਸ ਪਨ ਲੋਕਸ੍ਸ ਰਾਮਣੀਯਕੇ ਸਮ੍ਪਿਣ੍ਡਿਤੇ ਵਿਯ ਰਮਣੀਯਤਰੇ ਭੂਤਮਙ੍ਗਲੇ ਗਾਮੇਤਿ ਸਮ੍ਬਨ੍ਧੋ.
ਪੁਨਪਿ ਕਿਂਵਿਸਿਟ੍ਠੇਤਿ ਆਹ ‘‘ਕਦਲੀ’’ਤਿਆਦਿ. ਕਦਲੀ ਚ ਸਾਲਞ੍ਚ ਤਾਲਞ੍ਚ ਉਚ੍ਛੁ ਚ ਨਾਲ਼ਿਕੇਰਾ ਚ ਕਦਲੀ…ਪੇ… ਨਾਲ਼ਿਕੇਰਾ, ਤੇਸਂ ਵਨਾਨਿ ਕਦਲੀ…ਪੇ… ਨਾਲ਼ਿਕੇਰਵਨਾਨਿ, ਤੇਹਿ ਆਕੁਲੇ ਆਕਿਣ੍ਣੇਤਿ ਅਤ੍ਥੋ. ਕਮਲਾਨਿ ਚ ਉਪ੍ਪਲਾਨਿ ਚ ਕਮਲੁਪ੍ਪਲਾਨਿ, ਤੇਹਿ ਸਞ੍ਛਨ੍ਨਾ ਕਮਲੁਪ੍ਪਲਸਞ੍ਛਨ੍ਨਾ, ਸਲਿਲਸ੍ਸ ਆਸਯਾ ਸਲਿਲਾਸਯਾ, ਕਮਲੁਪ੍ਪਲਸਞ੍ਛਨ੍ਨਾ ਚ ਤੇ ਸਲਿਲਾਸਯਾ ਚਾਤਿ ਕਮਲ…ਪੇ… ਸਲਿਲਾਸਯਾ, ਤੇਹਿ ਸੋਭਿਤੋ ਕਮਲੁਪ੍ਪਲਸਞ੍ਛਨ੍ਨਸਲਿਲਾਸਯਸੋਭਿਤੋ, ਤਸ੍ਮਿਂ.
ਕਾਵੇਰਿਯਾ ਜਲਂ ਕਾਵੇਰਿਜਲਂ, ਕਾਵੇਰਿਜਲਸ੍ਸ ਸਮ੍ਪਾਤੋ ਪਵਤ੍ਤਨਂ ਕਾਵੇਰਿਜਲਸਮ੍ਪਾਤੋ, ਤੇਨ ਪਰਿ ਸਮਨ੍ਤਤੋ ਭੂਤਂ ਪਵਤ੍ਤਿਤਂ ਮਹੀਤਲਂ ਏਤਸ੍ਸਾਤਿ ਕਾਵੇਰਿਜਲਸਮ੍ਪਾਤਪਰਿਭੂਤਮਹੀਤਲੋ, ਤਸ੍ਮਿਂ. ਇਦ੍ਧੇਤਿ ਨਾਨਾਸਮ੍ਪਤ੍ਤਿਯਾ ਸਮਿਦ੍ਧੇ. ਸਬ੍ਬਙ੍ਗਸਮ੍ਪਨ੍ਨੇਤਿ ਸਬ੍ਬਸੁਖੋਪਕਰਣਸਮ੍ਪਨ੍ਨੇ. ਮਙ੍ਗਲੇਤਿ ਜਨਾਨਂ ਇਦ੍ਧਿਵੁਦ੍ਧਿਕਾਰਣਭੂਤੇ. ਭੂਤਮਙ੍ਗਲੇਤਿ ਏਵਂਨਾਮਕੇ ਗਾਮੇ.
ਪਵਰੋ ਤਿਰਤਾਰੀਣਤਲਾਦਿਗਣੇਹਿ ਕੁਲਾਚਲਚਕ੍ਕਭੋਗਿਨਾ ਭੋਗਵਲਯਸੀਦਨ੍ਤਰਸਾਗਰਾਦਿ ਆਕਾਰੋ ਏਤਾਸਨ੍ਤਿ ਪਵਰਾਕਾਰਾ, ਪਾਕਾਰਾ ਚ ਪਰਿਖਾ ਚ ਪਾਕਾਰਪਰਿਖਾ, ਪਵਰਾਕਾਰਾ ਚ ਤਾ ਪਾਕਾਰਪਰਿਖਾ ਚਾਤਿ ਪਵਰਾਕਾਰਪਾਕਾਰਪਰਿਖਾ, ਤਾਹਿ ਪਰਿਵਾਰਿਤੋ ਪਵਰਾਕਾਰਪਾਕਾਰਪਰਿਖਾਪਰਿਵਾਰਿਤੋ, ਤਸ੍ਮਿਂ. ਦਸ੍ਸਨੀਯੇਤਿ ਦਸ੍ਸਨਾਰਹੇ. ਮਨੋ ਰਮਤਿ ਏਤ੍ਥਾਤਿ ਮਨੋਰਮੋ, ਤਸ੍ਮਿਂ.
ਤੀਰਸ੍ਸ ਅਨ੍ਤੋ ਤੀਰਨ੍ਤੋ, ਤੀਰਮੇਵ ਵਾ ਅਨ੍ਤੋ ਤੀਰਨ੍ਤੋ, ਪੋਕ੍ਖਰਣਿਸੋਬ੍ਭਉਦਕਵਾਹਕਪਰਿਖਾਦੀਨਂ ਕੂਲਪ੍ਪਦੇਸੋ, ਤੀਰਨ੍ਤੇ ਰੁਹਿਂਸੁ ਜਾਯਿਂਸੂਤਿ ਤੀਰਨ੍ਤਰੁਹਾ, ਤੀਰਨ੍ਤਰੁਹਾ ਚ ਤੇ ਬਹੁਤ੍ਤਾ ਅਤੀਰਾ ਅਪਰਿਚ੍ਛੇਦਾ ਚਾਤਿ ਤੀਰਨ੍ਤਰੁਹਵਾਤੀਰਾ. ਵ-ਕਾਰੋ ਸਨ੍ਧਿਜੋ, ਤਰੂਨਂ ਰਾਜਾਨੋ ਤਰੁਰਾਜਾਨੋ, ਤੀਰਨ੍ਤਰੁਹਵਾਤੀਰਾ ਚ ਤੇ ਤਰੁਰਾਜਾਨੋ ਚਾਤਿ ਤੀਰਨ੍ਤਰੁਹਵਾਤੀਰਤਰੁਰਾਜਾਨੋ, ਤੇਹਿ ਵਿਰਾਜਿਤੋ ਤੀਰਨ੍ਤ…ਪੇ… ਵਿਰਾਜਿਤੋ, ਤਸ੍ਮਿਂ, ਪੁਪ੍ਫੂਪਗਫਲੂਪਗਛਾਯੂਪਗੇਹਿ ਮਹਾਰੁਕ੍ਖੇਹਿ ਪਟਿਮਣ੍ਡਿਤੇਤਿ ਅਤ੍ਥੋ. ‘‘ਤੀਰਨ੍ਤਰੁਹਵਾਨਤਰੁਰਾਜਿਵਿਰਾਜਿਤੇ’’ਤਿ ਵਾ ਪਾਠੋ, ਤੀਰਨ੍ਤਰੁਹਾਨਂ ਵਾਨਤਰੂਨਂ ਵੇਤਰੂਪਰੁਕ੍ਖਾਨਂ ਰਾਜੀਹਿ ਪਨ੍ਤੀਹਿ ਪਟਿਮਣ੍ਡਿਤੇਤਿ ਅਤ੍ਥੋ. ਦਿਜਾਨਂ ਗਣਾ ਦਿਜਗਣਾ, ਨਾਨਾ ਚ ਤੇ ਦਿਜਗਣਾ ਚਾਤਿ ਨਾਨਾਦਿਜਗਣਾ, ਤੇ ਤਤੋ ਤਤੋ ਆਗਨ੍ਤ੍ਵਾ ਰਮਨ੍ਤਿ ਏਤ੍ਥਾਤਿ ਨਾਨਾਦਿਜਗਣਾਰਾਮੋ, ਤਸ੍ਮਿਂ, ਸੁਕਕੋਕਿਲਮਯੂਰਾਦਿਸਕੁਣਾਨਂ ਆਗਨ੍ਤ੍ਵਾ ਰਮਨਟ੍ਠਾਨਭੂਤੇਤਿ ਅਤ੍ਥੋ. ਨਾਨਾਰਾਮਮਨੋਰਮੇਤਿ ਨਾਨਾ ਅਨੇਕੇ ਆਰਾਮਾ ਪੁਪ੍ਫਫਲਾਰਾਮਾ ਨਾਨਾਰਾਮਾ, ਤੇਹਿ ਮਨੋਰਮੋਤਿ ਨਾਨਾਰਾਮਮਨੋਰਮੋ, ਤਸ੍ਮਿਂ.
ਚਾਰੂ ਚ ਤੇ ਪਙ੍ਕਜਾ ਚਾਤਿ ਚਾਰੁਪਙ੍ਕਜਾ, ਕਮਲੁਪ੍ਪਲਕੁਮੁਦਾਦਯੋ, ਚਾਰੁਪਙ੍ਕਜੇਹਿ ਸਂਕਿਣ੍ਣਾ ਸਞ੍ਛਨ੍ਨਾ ਚਾਰੁਪਙ੍ਕਜਸਂਕਿਣ੍ਣਾ, ਚਾਰੁਪਙ੍ਕਜਸਂਕਿਣ੍ਣਾ ਚ ਤੇ ਤਲ਼ਾਕਾ ਚੇਤਿ ਚਾਰੁਪਙ੍ਕਜਸਂਕਿਣ੍ਣਤਲ਼ਾਕਾ, ਤੇਹਿ ਸਮਲਙ੍ਕਤੋ ਵਿਭੂਸਿਤੋ ਚਾਰੁ…ਪੇ… ਸਮਲਙ੍ਕਤੋ, ਤਸ੍ਮਿਂ. ਸੁਨ੍ਦਰੋ ਮਧੁਰੋ ਰਸੋ ਅਸ੍ਸਾਤਿ ਸੁਰਸਂ, ਸੁਰਸਞ੍ਚ ਤਂ ਉਦਕਞ੍ਚਾਤਿ ਸੁਰਸੋਦਕਂ, ਸੁਰਸੋਦਕੇਨ ਸਮ੍ਪੁਣ੍ਣਾ ਸੁਰਸੋਦਕਸਮ੍ਪੁਣ੍ਣਾ, ਵਰਾ ਚ ਤੇ ਕੂਪਾ ਚਾਤਿ ਵਰਕੂਪਾ, ਸੁਰਸੋਦਕਸਮ੍ਪੁਣ੍ਣਾ ਚ ਤੇ ਵਰਕੂਪਾ ਚੇਤਿ ਸੁਰਸੋਦਕਸਮ੍ਪੁਣ੍ਣਵਰਕੂਪਾ, ਤੇਹਿ ਉਪਸੋਭਿਤੋ ਸੁਰਸੋ…ਪੇ… ਕੂਪਸੋਭਿਤੋ, ਤਸ੍ਮਿਂ.
ਵਿਸੇਸੇਨ ਚਿਤ੍ਰਾਤਿ ਵਿਚਿਤ੍ਰਾ, ਵਿਚਿਤ੍ਰਾ ਚ ਤੇ ਵਿਪੁਲਾ ਚਾਤਿ ਵਿਚਿਤ੍ਰਵਿਪੁਲਾ, ਵਿਚਿਤ੍ਰਵਿਪੁਲਾ ਚ ਤੇ ਮਣ੍ਡਪਾ ਚਾਤਿ…ਪੇ… ਮਣ੍ਡਪਾ, ਅਤਿਸਯੇਨ ਉਗ੍ਗਤਾ ਅਚ੍ਚੁਗ੍ਗਤਾ, ਅਚ੍ਚੁਗ੍ਗਤਾ ਚ ਤੇ ਵਰਮਣ੍ਡਪਾ ਚਾਤਿ ਅਚ੍ਚੁਗ੍ਗਵਰਮਣ੍ਡਪਾ, ਗਾਥਾਬਨ੍ਧਵਸੇਨ ਵਣ੍ਣਲੋਪੋ, ਵਿਚਿਤ੍ਰਵਿਪੁਲਾ ਚ ਤੇ ਅਚ੍ਚੁਗ੍ਗਵਰਮਣ੍ਡਪਾ ਚਾਤਿ ਵਿਚਿਤ੍ਰਵਿਪੁਲਅਚ੍ਚੁਗ੍ਗਵਰਮਣ੍ਡਪਾ, ਤੇਹਿ ਮਣ੍ਡਿਤੋ ਵਿਭੂਸਿਤੋ ਵਿਚਿਤ੍ਰ…ਪੇ… ਮਣ੍ਡਿਤੋ, ਤਸ੍ਮਿਂ. ਮਣ੍ਡਂ ਸੂਰਿਯਰਸ੍ਮਿਂ ਪਾਤਿ ਰਕ੍ਖਤੀਤਿ ਮਣ੍ਡਪੋ. ਤਤੋ ਤਤੋ ਆਗਮ੍ਮ ਵਸਨ੍ਤਿ ਏਤ੍ਥਾਤਿ ਆਵਾਸੋ, ਪਾਸਾਦਹਮ੍ਮਿਯਮਾਲ਼ਾਦਯੋ. ਅਨੇਕੇਹੀਤਿ ਬਹੂਹਿ. ਅਚ੍ਚਨ੍ਤਨ੍ਤਿ ਅਤਿਸਯੇਨ.
ਧਰਣੀਤਲਂ ਭੇਤ੍ਵਾ ਉਗ੍ਗਤੇਨ ਵਿਯ, ਖਰਂ ਫਰੁਸਂ ਕੇਲਾਸਸਿਖਰਂ ਜਿਤ੍ਵਾ ਅਵਹਸਨ੍ਤੇਨ ਵਿਯ ਥੂਪੇਨ ਚ ਉਪਸੋਭਿਤੇ ਵਿਹਾਰੇਤਿ ਯੋਜਨਾ.
ਅਮ੍ਬੁਂ ਦਦਾਤੀਤਿ ਅਮ੍ਬੁਦੋ, ਸਰਦੇ ਅਮ੍ਬੁਦੋ ਸਰਦਮ੍ਬੁਦੋ, ਥੁਲ੍ਲਨਤਮਹਨ੍ਤਭਾਵਸਾਮਞ੍ਞੇਨ ਸਰਦਮ੍ਬੁਦੇਨ ਸਙ੍ਕਾਸੋ ਸਰਦਮ੍ਬੁਦਸਙ੍ਕਾਸੋ, ਤਸ੍ਮਿਂ. ਸਮ੍ਮਾ ਉਸ੍ਸਿਤੋ ਉਗ੍ਗਤੋਤਿ ਸਮੁਸ੍ਸਿਤੋ, ਤਸ੍ਮਿਂ. ਓਲੋਕੇਨ੍ਤਾਨਂ, ਵਸਨ੍ਤਾਨਞ੍ਚ ਪਸਾਦਂ ਚਿਤ੍ਤਸ੍ਸ ਤੋਸਂ ਜਨੇਤੀਤਿ ਪਸਾਦਜਨਨਂ, ਤਸ੍ਮਿਂ. ਏਤ੍ਤਾਵਤਾ ਵਿਨਯਵਿਨਿਚ੍ਛਯਕਥਾਯ ਪਵਤ੍ਤਿਤਦੇਸਂ ਦਸ੍ਸੇਤਿ, ‘‘ਵਸਤਾ ਮਯਾ’’ਤਿ ਕਤ੍ਤਾਰਂ.
ਦੇਵਦਤ੍ਤਚਿਞ੍ਚਮਾਣਵਿਕਾਦੀਹਿ ਕਤਾਪਰਾਧਸ੍ਸ, ਸੀਤੁਣ੍ਹਾਦਿਪਰਿਸ੍ਸਯਸ੍ਸ ਚ ਸਹਨਤੋ, ਸਸਨ੍ਤਾਨਗਤਕਿਲੇਸਾਦੀਨਂ ਹਨਨਤੋ ਚ ਸੀਹੋ ਵਿਯਾਤਿ ਸੀਹੋ, ਬੁਦ੍ਧੋ ਚ ਸੋ ਸੀਹੋ ਚਾਤਿ ਬੁਦ੍ਧਸੀਹੋ. ਸੇਟ੍ਠਪਰਿਯਾਯੋ ਵਾ ਸੀਹ-ਸਦ੍ਦੋ, ਬੁਦ੍ਧਸੇਟ੍ਠੇਨਾਤਿ ਅਤ੍ਥੋ. ਵੁਤ੍ਤਸ੍ਸਾਤਿ ਦੇਸਿਤਸ੍ਸ. ਵਿਨਯਸ੍ਸ ਵਿਨਯਪਿਟਕਸ੍ਸ. ਵਿਨਿਚ੍ਛਯੋਤਿ ਪਾਠਾਗਤੋ ਚੇਵ ਅਟ੍ਠਕਥਾਗਤੋ ਚ ਆਚਰਿਯਪਰਮ੍ਪਰਾਭਤੋ ਚ ਵਿਨਿਚ੍ਛਯੋ. ਬੁਦ੍ਧਸੀਹਨ੍ਤਿ ਏਵਂਨਾਮਕਂ ਮਹਾਥੇਰਂ. ਸਮੁਦ੍ਦਿਸ੍ਸਾਤਿ ਉਦ੍ਦਿਸਿਤ੍ਵਾ, ਤੇਨ ਕਤਆਯਾਚਨਂ ਪਟਿਚ੍ਚਾਤਿ ਵੁਤ੍ਤਂ ਹੋਤਿ. ਇਮਿਨਾ ਬਾਹਿਰਨਿਮਿਤ੍ਤਂ ਦਸ੍ਸਿਤਂ.
ਅਯਂ ਵਿਨਿਚ੍ਛਯੋ ਮਮ ਸਦ੍ਧਿਵਿਹਾਰਿਕਂ ਬੁਦ੍ਧਸੀਹਂ ਸਮੁਦ੍ਦਿਸ੍ਸ ਭਿਕ੍ਖੂਨਂ ਹਿਤਤ੍ਥਾਯ ਸਮਾਸਤੋ ਵਰਪਾਸਾਦੇ ਵਸਤਾ ਮਯਾ ਕਤੋਤਿ ਯੋਜਨਾ.
ਕਿਮਤ੍ਥਾਯਾਤਿ ਆਹ ‘‘ਵਿਨਯਸ੍ਸਾਵਬੋਧਤ੍ਥਂ, ਸੁਖੇਨੇਵਾਚਿਰੇਨ ਚਾ’’ਤਿ, ਅਨੁਪਾਦਿਸੇਸੇਨ ਨਿਬ੍ਬਾਨਪਰਿਯਨ੍ਤਾਨਿਸਂਸਸ੍ਸ ਵਿਨਯਪਿਟਕਸ੍ਸ ਪਕਰਣਸ੍ਸ ਗਨ੍ਥਵਸੇਨ ਸਮਾਸੇਤ੍ਵਾ ਅਤ੍ਥਵਸੇਨ ਸੁਟ੍ਠੁ ਵਿਨਿਚ੍ਛਿਤਤ੍ਤਾ ਸੁਖੇਨ ਚੇਵ ਅਚਿਰੇਨ ਚ ਅਵਬੋਧਨਤ੍ਥਨ੍ਤਿ ਵੁਤ੍ਤਂ ਹੋਤਿ. ਭਿਕ੍ਖੂਨਨ੍ਤਿ ਪਧਾਨਨਿਦਸ੍ਸਨਂ, ਏਕਸੇਸਨਿਦ੍ਦੇਸੋ ਵਾ ਹੇਟ੍ਠਾ –
‘‘ਭਿਕ੍ਖੂਨਂ ਭਿਕ੍ਖੁਨੀਨਞ੍ਚ ਹਿਤਤ੍ਥਾਯ ਸਮਾਹਿਤੋ. ਪਵਕ੍ਖਾਮੀ’’ਤਿ (ਵਿ. ਵਿ. ਗਨ੍ਥਾਰਮ੍ਭਕਥਾ ੨) –
ਆਰਦ੍ਧਤ੍ਤਾ. ਇਮਿਨਾ ਪਯੋਜਨਂ ਦਸ੍ਸਿਤਂ.
੩੧੭੯. ਏਵਂ ਦੇਸਕਤ੍ਤੁਨਿਮਿਤ੍ਤਪਯੋਜਨਾਨਿ ਦਸ੍ਸੇਤ੍ਵਾ ਕਾਲਨਿਯਮਂ ਦਸ੍ਸੇਤੁਮਾਹ ‘‘ਅਚ੍ਚੁਤਾ’’ਤਿਆਦਿ. ਵਿਕ੍ਕਮਨਂ ਵਿਕ੍ਕਨ੍ਤੋ, ਵਿਕ੍ਕਮੋਤਿ ਅਤ੍ਥੋ. ਅਚ੍ਚੁਤਂ ਕੇਨਚਿ ਅਨਭਿਭੂਤਂ, ਤਞ੍ਚ ਤਂ ਵਿਕ੍ਕਨ੍ਤਞ੍ਚਾਤਿ ਅਚ੍ਚੁਤਵਿਕ੍ਕਨ੍ਤਂ, ਅਚ੍ਚੁਤਸ੍ਸ ਨਾਰਾਯਨਸ੍ਸ ਵਿਯ ਅਚ੍ਚੁਤਵਿਕ੍ਕਨ੍ਤਂ ਏਤਸ੍ਸਾਤਿ ਅਚ੍ਚੁਤਚ੍ਚੁਤਵਿਕ੍ਕਨ੍ਤੋ. ਕੋ ਸੋ? ਰਾਜਾ, ਤਸ੍ਮਿਂ. ਕਲਮ੍ਭਕੁਲਂ ਨਨ੍ਦਯਤੀਤਿ ਕਲਮ੍ਭਕੁਲਨਨ੍ਦਨੋ, ਤਸ੍ਮਿਂ. ਇਮਿਨਾ ਤਸ੍ਸ ਕੁਲਵਂਸੋ ਨਿਦਸ੍ਸਿਤੋ. ਕਲਮ੍ਭਕੁਲਵਂਸਜਾਤੇ ਅਚ੍ਚੁਤਚ੍ਚੁਤਵਿਕ੍ਕਨ੍ਤਨਾਮੇ ਚੋਲ਼ਰਾਜਿਨਿ ਮਹਿਂ ਚੋਲ਼ਰਟ੍ਠਂ ਸਮਨੁਸਾਸਨ੍ਤੇ ਸਮ੍ਮਾ ਅਨੁਸਾਸਨ੍ਤੇ ਸਤਿ ਤਸ੍ਮਿਂ ਚੋਲ਼ਰਾਜਿਨਿ ਰਜ੍ਜਂ ਕਾਰੇਨ੍ਤੇ ਸਤਿ ਅਯਂ ਵਿਨਿਚ੍ਛਯੋ ਮਯਾ ਆਰਦ੍ਧੋ ਚੇਵ ਸਮਾਪਿਤੋ ਚਾਤਿ. ਇਮਿਨਾ ਕਾਲਂ ਨਿਦਸ੍ਸੇਤਿ.
੩੧੮੦. ਇਦਾਨਿ ਇਮਂ ਵਿਨਯਵਿਨਿਚ੍ਛਯਪ੍ਪਕਰਣਂ ਕਰੋਨ੍ਤੇਨ ਅਤ੍ਤਨੋ ਪੁਞ੍ਞਸਮ੍ਪਦਂ ਸਕਲਲੋਕਹਿਤਤ੍ਥਾਯ ਪਰਿਣਾਮੇਨ੍ਤੋ ਆਹ ‘‘ਯਥਾ’’ਤਿਆਦਿ. ਅਯਂ ਵਿਨਯਵਿਨਿਚ੍ਛਯੋ ਅਨ੍ਤਰਾਯਂ ਵਿਨਾ ਯਥਾ ਸਿਦ੍ਧਿਂ ਨਿਪ੍ਫਤ੍ਤਿਂ ਪਤ੍ਤੋ, ਤਥਾ ਸਤ੍ਤਾਨਂ ਧਮ੍ਮਸਂਯੁਤਾ ਕੁਸਲਨਿਸ੍ਸਿਤਾ ਸਙ੍ਕਪ੍ਪਾ ਚਿਤ੍ਤੁਪ੍ਪਾਦਾ, ਅਧਿਪ੍ਪੇਤਤ੍ਥਾ ਵਾ ਸਬ੍ਬੇ ਅਨ੍ਤਰਾਯਂ ਵਿਨਾ ਸਿਜ੍ਝਨ੍ਤੁ ਨਿਪ੍ਪਜ੍ਜਨ੍ਤੂਤਿ ਯੋਜਨਾ.
੩੧੮੧. ਤੇਨੇਵ ਪੁਞ੍ਞਪ੍ਫਲਭਾਵੇਨ ਸਕਲਲੋਕਹਿਤੇਕਹੇਤੁਨੋ ਭਗਵਤੋ ਸਾਸਨਸ੍ਸ ਚਿਰਟ੍ਠਿਤਿਮਾਸੀਸਨ੍ਤੋ ਆਹ ‘‘ਯਾਵ ਤਿਟ੍ਠਤੀ’’ਤਿਆਦਿ. ‘‘ਮਨ੍ਦਾਰੋ’’ਤਿ ਵੁਚ੍ਚਤਿ ਸੀਤਸਿਨਿਦ੍ਧਏਕਪਬ੍ਬਤਰਾਜਾ. ਕਂ ਵੁਚ੍ਚਤਿ ਉਦਕਂ, ਤੇਨ ਦਾਰਿਤੋ ਨਿਗ੍ਗਮਪ੍ਪਦੇਸੋ ‘‘ਕਨ੍ਦਰੋ’’ਤਿ ਵੁਚ੍ਚਤਿ. ਸੀਤਸਿਨਿਦ੍ਧਵਿਪੁਲਪੁਲਿਨਤਲੇਹਿ, ਸਨ੍ਦਮਾਨਸਾਤਸੀਤਲਪਸਨ੍ਨਸਲਿਲੇਹਿ, ਕੀਲ਼ਮਾਨਨਾਨਪ੍ਪਕਾਰਮਚ੍ਛਗੁਮ੍ਬੇਹਿ, ਉਭਯਤੀਰਪੁਪ੍ਫਫਲਪਲ੍ਲਵਾਲਙ੍ਕਤਤਰੁਲਤਾਵਨੇਹਿ, ਕੂਜਮਾਨਸੁਕਸਾਲਿਕਕਓਕਿਲਮਯੂਰਹਂਸਾਦਿਸਕੁਨ੍ਤਾਭਿਰੁਤੇਹਿ, ਤਤ੍ਥ ਤਤ੍ਥ ਪਰਿਭਮਨ੍ਤਭਮਰਾਮਵਜ੍ਜਾਹਿ ਚ ਚਾਰੁ ਮਨੁਞ੍ਞਾ ਕਨ੍ਦਰਾ ਏਤਸ੍ਸਾਤਿ ਚਾਰੁਕਨ੍ਦਰੋ. ਕਲਿ ਵੁਚ੍ਚਤਿ ਅਪਰਾਧੋ, ਤਂ ਸਾਸਤਿ ਹਿਂਸਤਿ ਅਪਨੇਤੀਤਿ ਕਲਿਸਾਸਨਂ. ‘‘ਕਲੁਸਾਸਨ’’ਨ੍ਤਿ ਵਾ ਪਾਠੋ. ਕਲੁਸਂ ਵੁਚ੍ਚਤਿ ਪਾਪਂ, ਤਂ ਅਸਤਿ ਵਿਕ੍ਖਿਪਤਿ ਦੂਰਮੁਸ੍ਸਾਰਯਤੀਤਿ ਕਲੁਸਾਸਨਂ, ਪਰਿਯਤ੍ਤਿਪਟਿਪਤ੍ਤਿਪਟਿਵੇਧਸਙ੍ਖਾਤਂ ਤਿਵਿਧਸਾਸਨਂ.
੩੧੮੨. ਏਵਂ ਓਕਸ੍ਸ ਦਿਟ੍ਠਧਮ੍ਮਿਕਸਮ੍ਪਰਾਯਿਕਪਰਮਤ੍ਥਹਿਤਸਾਧਕਸ੍ਸ ਸਾਸਨਸ੍ਸ ਚਿਰਟ੍ਠਿਤਿਂ ਪਤ੍ਥੇਤ੍ਵਾ ਤੇਨੇਵ ਪੁਞ੍ਞਕਮ੍ਮਾਨੁਭਾਵੇਨ ਲੋਕਸ੍ਸ ਦਿਟ੍ਠਧਮ੍ਮਿਕਤ੍ਥਹੇਤੁਮਾਸੀਸਨ੍ਤੋ ਆਹ ‘‘ਕਾਲੇ’’ਤਿਆਦਿ. ਕਾਲੇਤਿ ਸਸ੍ਸਸਮਿਦ੍ਧੀਨਂ ਅਨੁਰੂਪੇ ਕਾਲੇ. ਸਮ੍ਮਾ ਪਵਸ੍ਸਨ੍ਤੂਤਿ ਅਵੁਟ੍ਠਿਅਤਿਵੁਟ੍ਠਿਦੋਸਰਹਿਤਾ ਯਥਾ ਸਸ੍ਸਾਦੀਨਿ ਸਮ੍ਪਜ੍ਜਨ੍ਤਿ, ਤਥਾ ਵਸ੍ਸਂ ਵੁਟ੍ਠਿਧਾਰਂ ਪਵਸ੍ਸਨ੍ਤੂਤਿ ਅਤ੍ਥੋ. ਵਸ੍ਸਵਲਾਹਕਾਤਿ ਵਸ੍ਸਵਲਾਹਕਾਧਿਟ੍ਠਿਤਾ ਪਜ੍ਜੁਨ੍ਨਦੇਵਪੁਤ੍ਤਾ. ਮਹੀਪਾਲਾਤਿ ਰਾਜਾਨੋ. ਧਮ੍ਮਤੋਤਿ ਦਸਰਾਜਧਮ੍ਮਤੋ. ਸਕਲਂ ਮਹਿਨ੍ਤਿ ਪਥਵਿਨਿਸ੍ਸਿਤਸਬ੍ਬਜਨਕਾਯਂ.
੩੧੮੩. ਏਵਂ ਸਬ੍ਬਲੋਕਸ੍ਸ ਲੋਕਿਯਲੋਕੁਤ੍ਤਰਸਮ੍ਪਤ੍ਤਿਸਾਧਨਤ੍ਥਾਯ ਅਤ੍ਤਨੋ ਪੁਞ੍ਞਪਰਿਣਾਮਂ ਕਤ੍ਵਾ ਇਦਾਨਿ ਵਿਦਿਤਲੋਕੁਤ੍ਤਰਸਮ੍ਪਤ੍ਤਿਨਿਪ੍ਫਾਦਨਵਸੇਨੇਵ ਪੁਞ੍ਞਪਰਿਣਾਮਂ ਕਰੋਨ੍ਤੋ ਆਹ ‘‘ਇਮ’’ਨ੍ਤਿਆਦਿ. ਇਮਿਨਾ ਅਤ੍ਤਨੋ ਵਿਰਚਿਤਂ ਪਚ੍ਚਕ੍ਖਂ ਵਿਨਿਚ੍ਛਯਮਾਹ. ਸਾਰਭੂਤਨ੍ਤਿ ਸੀਲਸਾਰਾਦਿਤਿਵਿਧਸਿਕ੍ਖਾਸਾਰਸ੍ਸ ਪਕਾਸਨਤੋ ਹਤ੍ਥਸਾਰਮਿਵ ਭੂਤਂ. ਹਿਤਨ੍ਤਿ ਤਦਤ੍ਥੇ ਪਟਿਪਜ੍ਜਨ੍ਤਾਨਂ ਅਨੁਪਾਦਿਸੇਸਨਿਬ੍ਬਾਨਾਵਸਾਨਸ੍ਸ ਹਿਤਸ੍ਸ ਆਵਹਨਤੋ, ਸਂਸਾਰਦੁਕ੍ਖਸ੍ਸ ਚ ਵੂਪਸਮਨਤੋ ਅਮਤੋਸਧਂ ਵਿਯ ਹਿਤਂ. ਅਤ੍ਥਯੁਤ੍ਤਨ੍ਤਿ ਦਿਟ੍ਠਧਮ੍ਮਿਕਸਮ੍ਪਰਾਯਿਕਪਰਮਤ੍ਥਾਨਂ ਵਿਨਯਨਾਦੀਹਿ ਯੁਤ੍ਤਤ੍ਤਾ ਅਤ੍ਥਯੁਤ੍ਤਂ. ਕਰੋਨ੍ਤੇਨਾਤਿ ਰਚਯਨ੍ਤੇਨ ਮਯਾ. ਯਂ ਪੁਞ੍ਞਂ ਪਤ੍ਤਨ੍ਤਿ ਕਾਰਕਂ ਪੁਨਾਤੀਤਿ ਪੁਞ੍ਞਂ, ਪੁਜ੍ਜਭਵਫਲਨਿਪ੍ਫਾਦਨਤੋ ਵਾ ‘‘ਪੁਞ੍ਞ’’ਨ੍ਤਿ ਸਙ੍ਖਂ ਗਤਂ ਯਂ ਕੁਸਲਕਮ੍ਮਂ ਅਪਰਿਮੇਯ੍ਯਭਵਪਰਿਯਨ੍ਤਂ ਪਸੁਤਂ ਅਧਿਗਤਂ. ਤੇਨ ਪੁਞ੍ਞੇਨ ਹੇਤੁਭੂਤੇਨ. ਅਯਂ ਲੋਕੋਤਿ ਅਯਂ ਸਕਲੋਪਿ ਸਤ੍ਤਲੋਕੋ. ਮੁਨਿਨ੍ਦਪ੍ਪਯਾਤਨ੍ਤਿ ਮੁਨਿਨ੍ਦੇਨ ਸਮ੍ਮਾਸਮ੍ਬੁਦ੍ਧੇਨ ਸਮ੍ਪਤ੍ਤਂ. ਵੀਤਸੋਕਨ੍ਤਿ ਵਿਗਤਸੋਕਂ. ਸੋਕਪਰਿਦੇਵਦੁਕ੍ਖਦੋਮਨਸ੍ਸਉਪਾਯਾਸਾਦੀਹਿ ਵਿਗਤਤ੍ਤਾ, ਤੇਸਂ ਨਿਕ੍ਕਮਨਨਿਮਿਤ੍ਤਤ੍ਤਾ ਚ ਅਪਗਤਸੋਕਾਦਿਸਂਸਾਰਦੁਕ੍ਖਂ. ਸਿਵਂ ਪੁਰਂ ਨਿਬ੍ਬਾਨਪੁਰਂ ਪਾਪੁਣਾਤੁ ਸਚ੍ਛਿਕਰੋਤੁ, ਕਿਲੇਸਪਰਿਨਿਬ੍ਬਾਨੇਨ, ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਚ ਪਰਿਨਿਬ੍ਬਾਤੂਤਿ ਵੁਤ੍ਤਂ ਹੋਤਿ.
ਇਤਿ ਤਮ੍ਬਪਣ੍ਣਿਯੇਨਾਤਿਆਦਿ ਪਕਰਣਕਾਰਕਸ੍ਸ ਪਭਵਸੁਦ੍ਧਿਬਾਹੁਸਚ੍ਚਾਦਿਗੁਣਮੁਖੇਨ ਪਕਰਣੇ ਗਾਰਵਂ ਜਨੇਤੁਕਾਮੇਨ ਏਤਸ੍ਸ ਸਿਸ੍ਸੇਨ ਠਪਿਤਂ ਵਾਕ੍ਯਂ.
ਤਤ੍ਥ ਤਮ੍ਬਪਣ੍ਣਿਯੇਨਾਤਿ ਤਮ੍ਬਪਣ੍ਣਿਮ੍ਹਿ ਜਾਤੋ, ਤਤ੍ਥ ਵਿਦਿਤੋ, ਤਤੋ ਆਗਤੋਤਿ ਵਾ ਤਮ੍ਬਪਣ੍ਣਿਯੋ, ਤੇਨ. ਬ੍ਯਾਕਰਣਮਵੇਚ੍ਚ ਅਧੀਤਵਾਤਿ ਵੇਯ੍ਯਾਕਰਣੋ, ਪਰਮੋ ਚ ਉਤ੍ਤਮੋ ਚ ਸੋ ਵੇਯ੍ਯਾਕਰਣੋ ਚਾਤਿ ਪਰਮਵੇਯ੍ਯਾਕਰਣੋ, ਤੇਨ. ਤੀਣਿ ਪਿਟਕਾਨਿ ਸਮਾਹਟਾਨਿ, ਤਿਣ੍ਣਂ ਪਿਟਕਾਨਂ ਸਮਾਹਾਰੋ ਵਾ ਤਿਪਿਟਕਂ, ਨੀਯਨ੍ਤਿ ਬੁਜ੍ਝੀਯਨ੍ਤਿ ਸੇਯ੍ਯਤ੍ਥਿਕੇਹੀਤਿ ਨਯਾ, ਨਯਨ੍ਤਿ ਵਾ ਏਤੇਹਿ ਲੋਕਿਯਲੋਕੁਤ੍ਤਰਸਮ੍ਪਤ੍ਤਿਂ ਵਿਸੇਸੇਨਾਤਿ ਨਯਾ, ਪਾਲ਼ਿਨਯਅਤ੍ਥਨਯਏਕਤ੍ਤਨਯਾਦਯੋਵ, ਤਿਪਿਟਕੇ ਆਗਤਾ ਨਯਾ ਤਿਪਿਟਕਨਯਾ, ਵਿਧਾਨਂ ਪਸਾਸਨਂ, ਪਵਤ੍ਤਨਂ ਵਾ ਵਿਧਿ, ਤਿਪਿਟਕਨਯਾਨਂ ਵਿਧਿ ਤਿਪਿਟਕਨਯਵਿਧਿ, ਤਿਪਿਟਕਨਯਵਿਧਿਮ੍ਹਿ ਕੁਸਲੋ ਤਿਪਿਟਕਨਯਵਿਧਿਕੁਸਲੋ, ਤੇਨ.
ਪਰਮਾ ਚ ਤੇ ਕਵਿਜਨਾ ਚਾਤਿ ਪਰਮਕਵਿਜਨਾ, ਪਰਮਕਵਿਜਨਾਨਂ ਹਦਯਾਨਿ ਪਰਮਕਵਿਜਨਹਦਯਾਨਿ, ਪਦੁਮਾਨਂ ਵਨਾਨਿ ਪਦੁਮਵਨਾਨਿ, ਪਰਮਕਵਿਜਨਹਦਯਾਨਿ ਚ ਤਾਨਿ ਪਦੁਮਵਨਾਨਿ ਚਾਤਿ ਪਰਮਕਵਿਜਨਹਦਯਪਦੁਮਵਨਾਨਿ, ਤੇਸਂ ਵਿਕਸਨਂ ਬੋਧਂ ਸੂਰਿਯੋ ਵਿਯ ਕਰੋਤੀਤਿ ਪਰਮਕਵਿਜਨਹਦਯਪਦੁਮਵਨਵਿਕਸਨਕਰੋ, ਤੇਨ. ਕਵੀ ਚ ਤੇ ਵਰਾ ਚਾਤਿ ਕਵਿਵਰਾ, ਕਵੀਨਂ ਵਰਾਤਿ ਵਾ ਕਵਿਵਰਾ, ਕਵਿਵਰਾਨਂ ਵਸਭੋ ਉਤ੍ਤਮੋ ਕਵਿਵਰਵਸਭੋ, ਤੇਨ, ਕਵਿਰਾਜਰਾਜੇਨਾਤਿ ਅਤ੍ਥੋ.
ਪਰਮਾ ਚ ਸਾ ਰਤਿ ਚਾਤਿ ਪਰਮਰਤਿ, ਪਰਮਰਤਿਂ ਕਰੋਨ੍ਤੀਤਿ ਪਰਮਰਤਿਕਰਾਨਿ, ਵਰਾਨਿ ਚ ਤਾਨਿ ਮਧੁਰਾਨਿ ਚਾਤਿ ਵਰਮਧੁਰਾਨਿ, ਵਰਮਧੁਰਾਨਿ ਚ ਤਾਨਿ ਵਚਨਾਨਿ ਚਾਤਿ ਵਰਮਧੁਰਵਚਨਾਨਿ, ਪਰਮਰਤਿਕਰਾਨਿ ਚ ਤਾਨਿ ਵਰਮਧੁਰਵਚਨਾਨਿ ਚਾਤਿ ਪਰਮਰਤਿਕਰਵਰਮਧੁਰਵਚਨਾਨਿ, ਉਗ੍ਗਿਰਣਂ ਕਥਨਂ ਉਗ੍ਗਾਰੋ, ਪਰਮਰਤਿਕਰਵਰਮਧੁਰਵਚਨਾਨਂ ਉਗ੍ਗਾਰੋ ਏਤਸ੍ਸਾਤਿ ਪਰਮ…ਪੇ… ਵਚਨੁਗ੍ਗਾਰੋ, ਤੇਨ. ਉਰਗਪੁਰਂ ਪਰਮਪਵੇਣਿਗਾਮੋ ਅਸ੍ਸ ਨਿਵਾਸੋਤਿ ਉਰਗਪੁਰੋ, ਤੇਨ. ਬੁਦ੍ਧਦਤ੍ਤੇਨਾਤਿ ਏਵਂਨਾਮਕੇਨ ਥੇਰੇਨ, ਆਚਰਿਯਬੁਦ੍ਧਦਤ੍ਤਤ੍ਥੇਰੇਨਾਤਿ ਅਤ੍ਥੋ. ਅਯਂ ਵਿਨਯਵਿਨਿਚ੍ਛਯੋ ਰਚਿਤੋਤਿ ਸਮ੍ਬਨ੍ਧੋ.
ਨਿਟ੍ਠਿਤਾ ਚਾਯਂ ਵਿਨਯਤ੍ਥਸਾਰਸਨ੍ਦੀਪਨੀ ਨਾਮ
ਵਿਨਯਵਿਨਿਚ੍ਛਯਵਣ੍ਣਨਾ.
ਵਿਨਯਵਿਨਿਚ੍ਛਯ-ਟੀਕਾ ਸਮਤ੍ਤਾ.
ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ