ਪਕਿਣ੍ਣਕਵਿਨਿਚ੍ਛਯਕਥਾਵਣ੍ਣਨਾ

੩੦੨੯. ਛਤ੍ਤਂ ਪਣ੍ਣਮਯਂ ਕਿਞ੍ਚੀਤਿ ਤਾਲਪਣ੍ਣਾਦਿਪਣ੍ਣਚ੍ਛਦਨਂ ਯਂ ਕਿਞ੍ਚਿ ਛਤ੍ਤਂ. ਬਹੀਤਿ ਉਪਰਿ. ਅਨ੍ਤੋਤਿ ਹੇਟ੍ਠਾ. ਸਿਬ੍ਬਿਤੁਨ੍ਤਿ ਰੂਪਂ ਦਸ੍ਸੇਤ੍ਵਾ ਸੂਚਿਕਮ੍ਮਂ ਕਾਤੁਂ.

੩੦੩੦. ਪਣ੍ਣੇਤਿ ਛਦਨਪਣ੍ਣੇ. ਅਡ੍ਢਚਨ੍ਦਨ੍ਤਿ ਅਡ੍ਢਚਨ੍ਦਾਕਾਰਂ. ਮਕਰਦਨ੍ਤਕਨ੍ਤਿ ਮਕਰਦਨ੍ਤਾਕਾਰਂ, ਯਂ ‘‘ਗਿਰਿਕੂਟ’’ਨ੍ਤਿ ਵੁਚ੍ਚਤਿ. ਛਿਨ੍ਦਿਤੁਂ ਨ ਵਟ੍ਟਤੀਤਿ ਸਮ੍ਬਨ੍ਧੋ. ਮੁਖਵਟ੍ਟਿਯਾ ਨਾਮੇਤ੍ਵਾ ਬਦ੍ਧਪਣ੍ਣਕੋਟਿਯਾ ਵਾ ਮਤ੍ਥਕਿਮਣ੍ਡਲਕੋਟਿਯਾ ਵਾ ਗਿਰਿਕੂਟਾਦਿਂ ਕਰੋਨ੍ਤਿ, ਇਮਿਨਾ ਤਂ ਪਟਿਕ੍ਖਿਤ੍ਤਂ. ਦਣ੍ਡੇਤਿ ਛਤ੍ਤਦਣ੍ਡੇ. ਘਟਕਨ੍ਤਿ ਘਟਾਕਾਰੋ. ਵਾਲ਼ਰੂਪਂ ਵਾਤਿ ਬ੍ਯਗ੍ਘਾਦਿਵਾਲ਼ਾਨਂ ਰੂਪਕਂ ਵਾ. ਲੇਖਾਤਿ ਉਕ੍ਕਿਰਿਤ੍ਵਾ ਵਾ ਛਿਨ੍ਦਿਤ੍ਵਾ ਵਾ ਚਿਤ੍ਤਕਮ੍ਮਵਸੇਨ ਵਾ ਕਤਰਾਜਿ.

੩੦੩੧. ਪਞ੍ਚਵਣ੍ਣਾਨਂ ਸੁਤ੍ਤਾਨਂ ਅਨ੍ਤਰੇ ਨੀਲਾਦਿਏਕਵਣ੍ਣੇਨ ਸੁਤ੍ਤੇਨ ਥਿਰਤ੍ਥਂ ਛਤ੍ਤਂ ਅਨ੍ਤੋ ਚ ਬਹਿ ਚ ਸਿਬ੍ਬਿਤੁਂ ਵਾ ਛਤ੍ਤਦਣ੍ਡਗ੍ਗਾਹਕਸਲਾਕਪਞ੍ਜਰਂ ਥਿਰਤ੍ਥਂ ਵਿਨਨ੍ਧਿਤੁਂ ਵਾ ਵਟ੍ਟਤੀਤਿ ਯੋਜਨਾ. ‘‘ਪਞ੍ਚਵਣ੍ਣਾਨਂ ਏਕਵਣ੍ਣੇਨ ਥਿਰਤ੍ਥ’’ਨ੍ਤਿ ਇਮਿਨਾ ਅਨੇਕਵਣ੍ਣੇਹਿ ਸੁਤ੍ਤੇਹਿ ਵਣ੍ਣਮਟ੍ਠਤ੍ਥਾਯ ਸਿਬ੍ਬਿਤੁਞ੍ਚ ਵਿਨਨ੍ਧਿਤੁਞ੍ਚ ਨ ਵਟ੍ਟਤੀਤਿ ਦੀਪੇਤਿ.

ਪੋਤ੍ਥਕੇਸੁ ਪਨ ‘‘ਪਞ੍ਚਵਣ੍ਣੇਨਾ’’ਤਿ ਪਾਠੋ ਦਿਸ੍ਸਤਿ, ਤਸ੍ਸ ਏਕਵਣ੍ਣੇਨ, ਪਞ੍ਚਵਣ੍ਣੇਨ ਵਾ ਸੁਤ੍ਤੇਨ ਥਿਰਤ੍ਥਂ ਸਿਬ੍ਬਿਤੁਂ, ਵਿਨਨ੍ਧਿਤੁਂ ਵਾ ਵਟ੍ਟਤੀਤਿ ਯੋਜਨਾ ਕਾਤਬ੍ਬਾ ਹੋਤਿ, ਸੋ ਏਤ੍ਥੇਵ ਹੇਟ੍ਠਾ ਵੁਤ੍ਤੇਨ –

‘‘ਪਞ੍ਚਵਣ੍ਣੇਨ ਸੁਤ੍ਤੇਨ, ਸਿਬ੍ਬਿਤੁਂ ਨ ਚ ਵਟ੍ਟਤੀ’’ਤਿ –

ਪਾਠੇਨ ਚ ‘‘ਕੇਚਿ ਤਾਲਪਣ੍ਣਚ੍ਛਤ੍ਤਂ ਅਨ੍ਤੋ ਵਾ ਬਹਿ ਵਾ ਪਞ੍ਚਵਣ੍ਣੇਨ ਸੁਤ੍ਤੇਨ ਸਿਬ੍ਬਨ੍ਤਾ ਵਣ੍ਣਮਟ੍ਠਂ ਕਰੋਨ੍ਤਿ, ਤਂ ਨ ਵਟ੍ਟਤਿ. ਏਕਵਣ੍ਣੇਨ ਪਨ ਨੀਲੇਨ ਵਾ ਪੀਤਕੇਨ ਵਾ ਯੇਨ ਕੇਨਚਿ ਸੁਤ੍ਤੇਨ ਅਨ੍ਤੋ ਵਾ ਬਹਿ ਵਾ ਸਿਬ੍ਬਿਤੁਂ ਛਤ੍ਤਦਣ੍ਡਗ੍ਗਾਹਕਂ ਸਲਾਕਪਞ੍ਜਰਂ ਵਾ ਵਿਨਨ੍ਧਿਤੁਂ ਵਟ੍ਟਤਿ, ਤਞ੍ਚ ਖੋ ਥਿਰਕਰਣਤ੍ਥਂ, ਨ ਵਣ੍ਣਮਟ੍ਠਤ੍ਥਾਯਾ’’ਤਿ (ਪਾਰਾ. ਅਟ੍ਠ. ੧.੮੫ ਪਾਲ਼ਿਮੁਤ੍ਤਕਵਿਨਿਚ੍ਛਯ) ਅਟ੍ਠਕਥਾਪਾਠੇਨ ਚ ਵਿਰੁਜ੍ਝਤਿ, ਤਸ੍ਮਾ ਸੋ ਨ ਗਹੇਤਬ੍ਬੋ.

੩੦੩੨. ਲੇਖਾ ਵਾ ਪਨ ਕੇਵਲਾਤਿ ਯਥਾਵੁਤ੍ਤਪ੍ਪਕਾਰਾ ਸਲਾਕਲੇਖਾ ਵਾ. ਛਿਨ੍ਦਿਤ੍ਵਾਤਿ ਉਕ੍ਕਿਰਿਤ੍ਵਾ ਕਤਂ ਛਿਨ੍ਦਿਤ੍ਵਾ. ਘਂਸਿਤ੍ਵਾਤਿ ਚਿਤ੍ਤਕਮ੍ਮਾਦਿਵਸੇਨ ਕਤਂ ਘਂਸਿਤ੍ਵਾ.

੩੦੩੩. ਦਣ੍ਡਬੁਨ੍ਦਮ੍ਹੀਤਿ ਛਤ੍ਤਦਣ੍ਡਸ੍ਸ ਪਞ੍ਜਰੇ ਗਾਹਣਤ੍ਥਾਯ ਫਾਲਿਤਬੁਨ੍ਦਮ੍ਹਿ, ਮੂਲੇਤਿ ਅਤ੍ਥੋ. ਅਯਮੇਤ੍ਥ ਨਿਸ੍ਸਨ੍ਦੇਹੇ ਵੁਤ੍ਤਨਯੋ. ਖੁਦ੍ਦਸਿਕ੍ਖਾਗਣ੍ਠਿਪਦੇ ਪਨ ‘‘ਛਤ੍ਤਪਿਣ੍ਡਿਯਾ ਮੂਲੇ’’ਤਿ ਵੁਤ੍ਤਂ. ਅਹਿਛਤ੍ਤਕਸਣ੍ਠਾਨਨ੍ਤਿ ਫੁਲ੍ਲਅਹਿਛਤ੍ਤਾਕਾਰਂ. ਰਜ੍ਜੁਕੇਹਿ ਗਾਹਾਪੇਤ੍ਵਾ ਦਣ੍ਡੇ ਬਨ੍ਧਨ੍ਤਿ, ਤਸ੍ਮਿਂ ਬਨ੍ਧਟ੍ਠਾਨੇ ਵਲਯਮਿਵ ਉਕ੍ਕਿਰਿਤ੍ਵਾ ਉਟ੍ਠਾਪੇਤ੍ਵਾ. ਬਨ੍ਧਨਤ੍ਥਾਯਾਤਿ ਵਾਤੇਨ ਯਥਾ ਨ ਚਲਤਿ, ਏਵਂ ਰਜ੍ਜੂਹਿ ਦਣ੍ਡੇ ਪਞ੍ਜਰਸ੍ਸ ਬਨ੍ਧਨਤ੍ਥਾਯ. ਉਕ੍ਕਿਰਿਤ੍ਵਾ ਕਤਾ ਲੇਖਾ ਵਟ੍ਟਤੀਤਿ ਯੋਜਨਾ. ਯਥਾਹ – ‘‘ਵਾਤਪ੍ਪਹਾਰੇਨ ਅਚਲਨਤ੍ਥਂ ਛਤ੍ਤਮਣ੍ਡਲਿਕਂ ਰਜ੍ਜੁਕੇਹਿ ਗਾਹਾਪੇਤ੍ਵਾ ਦਣ੍ਡੇ ਬਨ੍ਧਨ੍ਤਿ, ਤਸ੍ਮਿਂ ਬਨ੍ਧਨਟ੍ਠਾਨੇ ਵਲਯਮਿਵ ਉਕ੍ਕਿਰਿਤ੍ਵਾ ਲੇਖਂ ਠਪੇਨ੍ਤਿ, ਸਾ ਵਟ੍ਟਤੀ’’ਤਿ. ‘‘ਸਚੇਪਿ ਨ ਬਨ੍ਧਨ੍ਤਿ, ਬਨ੍ਧਨਾਰਹਟ੍ਠਾਨਤ੍ਤਾ ਵਲਯਂ ਉਕ੍ਕਿਰਿਤੁਂ ਵਟ੍ਟਤੀ’’ਤਿ ਗਣ੍ਠਿਪਦੇ ਵੁਤ੍ਤਂ.

੩੦੩੪. ਸਮਂ ਸਤਪਦਾਦੀਨਨ੍ਤਿ ਸਤਪਦਾਦੀਹਿ ਸਦਿਸਂ, ਤੁਲ੍ਯਤ੍ਥੇ ਕਰਣਵਚਨਪ੍ਪਸਙ੍ਗੇ ਸਾਮਿਵਚਨਂ.

੩੦੩੫. ਪਤ੍ਤਸ੍ਸ ਪਰਿਯਨ੍ਤੇ ਵਾਤਿ ਅਨੁਵਾਤਸ੍ਸ ਉਭਯਪਰਿਯਨ੍ਤੇ ਵਾ. ਪਤ੍ਤਮੁਖੇਪਿ ਵਾਤਿ ਦ੍ਵਿਨ੍ਨਂ ਆਰਾਮਵਿਤ੍ਥਾਰਪਤ੍ਤਾਨਂ ਸਙ੍ਘਟਿਤਟ੍ਠਾਨੇ ਕਣ੍ਣੇਪਿ ਵਾ, ਏਕਸ੍ਸੇਵ ਵਾ ਪਤ੍ਤਸ੍ਸ ਊਨਪੂਰਣਤ੍ਥਂ ਸਙ੍ਘਟਿਤਟ੍ਠਾਨੇਪਿ ਵਾ. ਵੇਣਿਨ੍ਤਿ ਕੁਦ੍ਰੂਸਸੀਸਾਕਾਰੇਨ ਸਿਬ੍ਬਨਂ. ਕੇਚਿ ‘‘ਵਰਕਸੀਸਾਕਾਰੇਨਾ’’ਤਿ ਵਦਨ੍ਤਿ. ਸਙ੍ਖਲਿਕਨ੍ਤਿ ਬਿਲ਼ਾਲਦਾਮਸਦਿਸਂ ਸਿਬ੍ਬਨਂ. ਕੇਚਿ ‘‘ਸਤਪਦਿਸਮ’’ਨ੍ਤਿ ਵਦਨ੍ਤਿ.

੩੦੩੬. ਪਟ੍ਟਨ੍ਤਿ ਪਟ੍ਟਮ੍ਪਿ. ਅਟ੍ਠਕੋਣਾਦਿਕੋ ਵਿਧਿ ਪਕਾਰੋ ਏਤਸ੍ਸਾਤਿ ਅਟ੍ਠਕੋਣਾਦਿਕਵਿਧਿ, ਤਂ. ‘‘ਅਟ੍ਠਕੋਣਾਦਿਕ’’ਨ੍ਤਿ ਗਾਥਾਬਨ੍ਧਵਸੇਨ ਨਿਗ੍ਗਹਿਤਾਗਮੋ. ‘‘ਅਟ੍ਠਕੋਣਾਦਿਕਂ ਵਿਧਿ’’ਨ੍ਤਿ ਏਤਂ ‘‘ਪਟ੍ਟ’’ਨ੍ਤਿ ਏਤਸ੍ਸ ਸਮਾਨਾਧਿਕਰਣਵਿਸੇਸਨਂ, ਕਿਰਿਯਾਵਿਸੇਸਨਂ ਵਾ, ‘‘ਕਰੋਨ੍ਤੀ’’ਤਿ ਇਮਿਨਾ ਸਮ੍ਬਨ੍ਧੋ. ਅਥ ਵਾ ਪਟ੍ਟਨ੍ਤਿ ਏਤ੍ਥ ਭੁਮ੍ਮਤ੍ਥੇ ਉਪਯੋਗਵਚਨਂ, ਪਟ੍ਟੇਤਿ ਅਤ੍ਥੋ. ਇਮਸ੍ਮਿਂ ਪਕ੍ਖੇ ‘‘ਅਟ੍ਠਕੋਣਾਦਿਕ’’ਨ੍ਤਿ ਉਪਯੋਗਵਚਨਂ. ‘‘ਵਿਧਿ’’ਨ੍ਤਿ ਏਤਸ੍ਸ ਵਿਸੇਸਨਂ. ਇਧ ਵਕ੍ਖਮਾਨਚਤੁਕੋਣਸਣ੍ਠਾਨਤੋ ਅਞ੍ਞਂ ਅਟ੍ਠਕੋਣਾਦਿਕਂ ਨਾਮਂ. ਤਤ੍ਥਾਤਿ ਤਸ੍ਮਿਂ ਪਟ੍ਟਦ੍ਵਯੇ. ਅਗ੍ਘਿਯਗਦਾਰੂਪਨ੍ਤਿ ਅਗ੍ਘਿਯਸਣ੍ਠਾਨਞ੍ਚੇਵ ਗਦਾਸਣ੍ਠਾਨਞ੍ਚ ਸਿਬ੍ਬਨਂ. ਮੁਗ੍ਗਰਨ੍ਤਿ ਲਗੁਲ਼ਸਣ੍ਠਾਨਸਿਬ੍ਬਨਂ. ਆਦਿ-ਸਦ੍ਦੇਨ ਚੇਤਿਯਾਦਿਸਣ੍ਠਾਨਾਨਂ ਗਹਣਂ.

੩੦੩੭. ਤਤ੍ਥਾਤਿ ਪਟ੍ਟਦ੍ਵਯੇ ਤਸ੍ਮਿਂ ਠਾਨੇ. ਕਕ੍ਕਟਕਕ੍ਖੀਨੀਤਿ ਕੁਲ਼ੀਰਅਚ੍ਛਿਸਦਿਸਾਨਿ ਸਿਬ੍ਬਨਵਿਕਾਰਾਨਿ. ਉਟ੍ਠਾਪੇਨ੍ਤੀਤਿ ਕਰੋਨ੍ਤਿ. ਤਤ੍ਥਾਤਿ ਤਸ੍ਮਿਂ ਗਣ੍ਠਿਕਪਾਸਕਪਟ੍ਟਕੇ. ਸੁਤ੍ਤਾਤਿ ਕੋਣਤੋ ਕੋਣਂ ਸਿਬ੍ਬਿਤਸੁਤ੍ਤਾ ਚੇਵ ਚਤੁਰਸ੍ਸੇ ਸਿਬ੍ਬਿਤਸੁਤ੍ਤਾ ਚ. ਪਿਲ਼ਕਾਤਿ ਤੇਸਮੇਵ ਸੁਤ੍ਤਾਨਂ ਨਿਵਤ੍ਤੇਤ੍ਵਾ ਸਿਬ੍ਬਿਤਕੋਟਿਯੋ ਚ. ਦੁਵਿਞ੍ਞੇਯ੍ਯਾਵਾਤਿ ਰਜਨਕਾਲੇ ਦੁਵਿਞ੍ਞੇਯ੍ਯਰੂਪਾ ਅਨੋਲ਼ਾਰਿਕਾ ਦੀਪਿਤਾ ਵਟ੍ਟਨ੍ਤੀਤਿ. ਯਥਾਹ – ‘‘ਕੋਣਸੁਤ੍ਤਪਿਲ਼ਕਾ ਚ ਚੀਵਰੇ ਰਤ੍ਤੇ ਦੁਵਿਞ੍ਞੇਯ੍ਯਰੂਪਾ ਵਟ੍ਟਨ੍ਤੀ’’ਤਿ.

੩੦੩੮. ਗਣ੍ਠਿਪਾਸਕਪਟ੍ਟਕਾਤਿ ਗਣ੍ਠਿਕਪਟ੍ਟਕਪਾਸਕਪਟ੍ਟਕਾਤਿ ਯੋਜਨਾ. ਕਣ੍ਣਕੋਣੇਸੁ ਸੁਤ੍ਤਾਨੀਤਿ ਚੀਵਰਕਣ੍ਣੇਸੁ ਸੁਤ੍ਤਾਨਿ ਚੇਵ ਗਣ੍ਠਿਕਪਾਸਕਪਟ੍ਟਾਨਂ ਕੋਣੇਸੁ ਸੁਤ੍ਤਾਨਿ ਚ ਛਿਨ੍ਦੇਯ੍ਯ. ਏਤ੍ਥ ਚ ਚੀਵਰੇ ਆਯਾਮਤੋ, ਵਿਤ੍ਥਾਰਤੋ ਚ ਸਿਬ੍ਬਿਤ੍ਵਾ ਅਨੁਵਾਤਤੋ ਬਹਿ ਨਿਕ੍ਖਨ੍ਤਸੁਤ੍ਤਂ ਚੀਵਰਂ ਰਜਿਤ੍ਵਾ ਸੁਕ੍ਖਾਪਨਕਾਲੇ ਰਜ੍ਜੁਯਾ ਵਾ ਚੀਵਰਵਂਸੇ ਵਾ ਬਨ੍ਧਿਤ੍ਵਾ ਓਲਮ੍ਬਿਤੁਂ ਅਨੁਵਾਤੇ ਬਦ੍ਧਸੁਤ੍ਤਾਨਿ ਚ ਕਣ੍ਣਸੁਤ੍ਤਾਨਿ ਨਾਮ. ਯਥਾਹ – ‘‘ਚੀਵਰਸ੍ਸ ਕਣ੍ਣਸੁਤ੍ਤਕਂ ਨ ਵਟ੍ਟਤਿ, ਰਜਿਤਕਾਲੇ ਛਿਨ੍ਦਿਤਬ੍ਬਂ. ਯਂ ਪਨ ‘ਅਨੁਜਾਨਾਮਿ, ਭਿਕ੍ਖਵੇ, ਕਣ੍ਣਸੁਤ੍ਤਕ’ਨ੍ਤਿ (ਮਹਾਵ. ੩੪੪) ਏਵਂ ਅਨੁਞ੍ਞਾਤਂ, ਤਂ ਅਨੁਵਾਤੇ ਪਾਸਕਂ ਕਤ੍ਵਾ ਬਨ੍ਧਿਤਬ੍ਬਂ, ਰਜਨਕਾਲੇ ਲਗ੍ਗਨਤ੍ਥਾਯਾ’’ਤਿ (ਪਾਰਾ. ਅਟ੍ਠ. ੧.੮੫ ਪਾਲ਼ਿਮੁਤ੍ਤਕਵਿਨਿਚ੍ਛਯ).

੩੦੩੯. ਸੂਚਿਕਮ੍ਮਵਿਕਾਰਂ ਵਾਤਿ ਚੀਵਰਮਣ੍ਡਨਤ੍ਥਾਯ ਨਾਨਾਸੁਤ੍ਤਕੇਹਿ ਸਤਪਦਿਸਦਿਸਂ ਸਿਬ੍ਬਨ੍ਤਾ ਆਗਨ੍ਤੁਕਪਟ੍ਟਂ ਠਪੇਨ੍ਤਿ, ਏਵਰੂਪਂ ਸੂਚਿਕਮ੍ਮਵਿਕਾਰਂ ਵਾ. ਅਞ੍ਞਂ ਵਾ ਪਨ ਕਿਞ੍ਚਿਪੀਤਿ ਅਞ੍ਞਮ੍ਪਿ ਯਂ ਕਿਞ੍ਚਿ ਮਾਲਾਕਮ੍ਮਮਿਗਪਕ੍ਖਿਪਾਦਾਦਿਕਂ ਸਿਬ੍ਬਨਵਿਕਾਰਂ. ਕਾਤੁਨ੍ਤਿ ਸਯਂ ਕਾਤੁਂ. ਕਾਰਾਪੇਤੁਨ੍ਤਿ ਅਞ੍ਞੇਨ ਵਾ ਕਾਰਾਪੇਤੁਂ.

੩੦੪੦. ਯੋ ਭਿਕ੍ਖੁ ਪਰਂ ਉਤ੍ਤਮਂ ਵਣ੍ਣਮਟ੍ਠਂ ਅਭਿਪਤ੍ਥਯਂ ਪਤ੍ਥਯਨ੍ਤੋ ਕਞ੍ਜਿਪਿਟ੍ਠਖਲਿਅਲ੍ਲਿਕਾਦੀਸੁ ਚੀਵਰਂ ਪਕ੍ਖਿਪਤਿ, ਤਸ੍ਸ ਪਨ ਭਿਕ੍ਖੁਨੋ ਦੁਕ੍ਕਟਾ ਮੋਕ੍ਖੋ ਨ ਵਿਜ੍ਜਤੀਤਿ ਯੋਜਨਾ. ਕਞ੍ਜੀਤਿ ਵਾਯਨਤਨ੍ਤਮਕ੍ਖਨਕਞ੍ਜਿਸਦਿਸਾ ਥੂਲਾਕਞ੍ਜਿ. ਪਿਟ੍ਠਨ੍ਤਿ ਤਣ੍ਡੁਲਪਿਟ੍ਠਂ. ਤਣ੍ਡੁਲਪਿਟ੍ਠੇਹਿ ਪਕ੍ਕਾ ਖਲਿ. ਅਲ੍ਲਿਕਾਤਿ ਨਿਯ੍ਯਾਸੋ. ਆਦਿ-ਸਦ੍ਦੇਨ ਲਾਖਾਦੀਨਂ ਗਹਣਂ.

੩੦੪੧. ਚੀਵਰਸ੍ਸ ਕਰਣੇ ਕਰਣਕਾਲੇ ਸਮੁਟ੍ਠਿਤਾਨਂ ਸੂਚਿਹਤ੍ਥਮਲਾਦੀਨਂ ਧੋਵਨਤ੍ਥਂ, ਕਿਲਿਟ੍ਠਕਾਲੇ ਚ ਧੋਵਨਤ੍ਥਂ ਕਞ੍ਜਿਪਿਟ੍ਠਿਖਲਿਅਲ੍ਲਿਕਾਦੀਸੁ ਪਕ੍ਖਿਪਤਿ, ਵਟ੍ਟਤੀਤਿ ਯੋਜਨਾ.

੩੦੪੨. ਤਤ੍ਥਾਤਿ ਯੇਨ ਕਸਾਵੇਨ ਚੀਵਰਂ ਰਜਤਿ, ਤਸ੍ਮਿਂ ਰਜਨੇ ਚੀਵਰਸ੍ਸ ਸੁਗਨ੍ਧਭਾਵਤ੍ਥਾਯ ਗਨ੍ਧਂ ਵਾ ਉਜ੍ਜਲਭਾਵਤ੍ਥਾਯ ਤੇਲਂ ਵਾ ਵਣ੍ਣਤ੍ਥਾਯ ਲਾਖਂ ਵਾ. ਕਿਞ੍ਚੀਤਿ ਏਵਰੂਪਂ ਯਂ ਕਿਞ੍ਚਿ.

੩੦੪੩. ਮਣਿਨਾਤਿ ਪਾਸਾਣੇਨ. ਅਞ੍ਞੇਨਪਿ ਚ ਕੇਨਚੀਤਿ ਯੇਨ ਉਜ੍ਜਲਂ ਹੋਤਿ, ਏਵਰੂਪੇਨ ਮੁਗ੍ਗਰਾਦਿਨਾ ਅਞ੍ਞੇਨਾਪਿ ਕੇਨਚਿ ਵਤ੍ਥੁਨਾ. ਦੋਣਿਯਾਤਿ ਰਜਨਮ੍ਬਣੇ. ਨ ਘਂਸਿਤਬ੍ਬਂ ਹਤ੍ਥੇਨ ਗਾਹੇਤ੍ਵਾ ਨ ਘਟ੍ਟੇਤਬ੍ਬਂ.

੩੦੪੪. ਰਤ੍ਤਂ ਚੀਵਰਂ ਹਤ੍ਥੇਹਿ ਕਿਞ੍ਚਿ ਥੋਕਂ ਪਹਰਿਤੁਂ ਵਟ੍ਟਤੀਤਿ ਯੋਜਨਾ. ‘‘ਯਤ੍ਥ ਪਕ੍ਕਰਜਨਂ ਪਕ੍ਖਿਪਨ੍ਤਿ, ਸਾ ਰਜਨਦੋਣਿ, ਤਤ੍ਥ ਅਂਸਬਦ੍ਧਕਕਾਯਬਨ੍ਧਨਾਦਿਂ ਘਟ੍ਟੇਤੁਂ ਵਟ੍ਟਤੀ’’ਤਿ ਗਣ੍ਠਿਪਦੇ ਵੁਤ੍ਤਂ.

੩੦੪੫. ਗਣ੍ਠਿਕੇਤਿ ਵੇਲ਼ੁਦਨ੍ਤਵਿਸਾਣਾਦਿਮਯਗਣ੍ਠਿਕੇ. ਲੇਖਾ ਵਾਤਿ ਵਟ੍ਟਾਦਿਭੇਦਾ ਲੇਖਾ ਵਾ. ਪਿਲ਼ਕਾ ਵਾਤਿ ਸਾਸਪਬੀਜਸਦਿਸਾ ਖੁਦ੍ਦਕਪੁਬ੍ਬੁਲ਼ਾ ਵਾ. ਪਾਲ਼ਿਕਣ੍ਣਿਕਭੇਦਕੋਤਿ ਮਣਿਕਾਵਲ਼ਿਰੂਪਪੁਪ੍ਫਕਣ੍ਣਿਕਰੂਪਭੇਦਕੋ. ਕਪ੍ਪਬਿਨ੍ਦੁਵਿਕਾਰੋ ਵਾ ਨ ਵਟ੍ਟਤੀਤਿ ਯੋਜਨਾ.

੩੦੪੬. ਆਰਗ੍ਗੇਨਾਤਿ ਆਰਕਣ੍ਟਕਗ੍ਗੇਨ, ਸੂਚਿਮੁਖੇਨ ਵਾ. ਕਾਚਿਪਿ ਲੇਖਾਤਿ ਵਟ੍ਟਕਗੋਮੁਤ੍ਤਾਦਿਸਣ੍ਠਾਨਾ ਯਾ ਕਾਚਿਪਿ ਰਾਜਿ.

੩੦੪੭. ਭਮਂ ਆਰੋਪੇਤ੍ਵਾਤਿ ਭਮੇ ਅਲ੍ਲਿਯਾਪੇਤ੍ਵਾ.

੩੦੪੮. ਪਤ੍ਤਮਣ੍ਡਲਕੇਤਿ ਪਤ੍ਤੇ ਛਵਿਰਕ੍ਖਨਤ੍ਥਾਯ ਤਿਪੁਸੀਸਾਦੀਹਿ ਕਤੇ ਪਤ੍ਤਸ੍ਸ ਹੇਟ੍ਠਾ ਆਧਾਰਾਦੀਨਂ ਉਪਰਿ ਕਾਤਬ੍ਬੇ ਪਤ੍ਤਮਣ੍ਡਲਕੇ. ਭਿਤ੍ਤਿਕਮ੍ਮਨ੍ਤਿ ਵਿਭਤ੍ਤਂ ਕਤ੍ਵਾ ਨਾਨਾਕਾਰਰੂਪਕਕਮ੍ਮਚਿਤ੍ਤਂ. ਯਥਾਹ ‘‘ਨ ਭਿਕ੍ਖਵੇ ਚਿਤ੍ਰਾਨਿ ਪਤ੍ਤਮਣ੍ਡਲਾਨਿ ਧਾਰੇਤਬ੍ਬਾਨਿ ਰੂਪਕਾਕਿਣ੍ਣਾਨਿ ਭਿਤ੍ਤਿਕਮ੍ਮਕਤਾਨੀ’’ਤਿ (ਚੂਲ਼ਵ. ੨੫੩). ਤਤ੍ਥਾਤਿ ਤਸ੍ਮਿਂ ਪਤ੍ਤਮਣ੍ਡਲੇ. ਅਸ੍ਸਾਤਿ ਭਿਕ੍ਖੁਸ੍ਸ. ਮਕਰਦਨ੍ਤਕਨ੍ਤਿ ਗਿਰਿਕੂਟਾਕਾਰਂ.

੩੦੪੯. ਮੁਖਵਟ੍ਟਿਯਂ ਯਾ ਲੇਖਾ ਪਰਿਸ੍ਸਾਵਨਬਨ੍ਧਨਤ੍ਥਾਯ ਅਨੁਞ੍ਞਾਤਾ, ਤਂ ਲੇਖਂ ਠਪੇਤ੍ਵਾ ਧਮ੍ਮਕਰਣਚ੍ਛਤ੍ਤੇ ਵਾ ਕੁਚ੍ਛਿਯਂ ਵਾ ਕਾਚਿਪਿ ਲੇਖਾ ਨ ਵਟ੍ਟਤੀਤਿ ਯੋਜਨਾ.

੩੦੫੦. ਤਹਿਂ ਤਹਿਨ੍ਤਿ ਮਤ੍ਤਿਕਾਯ ਤਤ੍ਥ ਤਤ੍ਥ. ਤਨ੍ਤਿ ਤਥਾਕੋਟ੍ਟਿਤਦਿਗੁਣਸੁਤ੍ਤਕਾਯਬਨ੍ਧਨਂ.

੩੦੫੧. ਅਨ੍ਤੇਸੁ ਦਲ਼੍ਹਤ੍ਥਾਯ ਦਸਾਮੁਖੇ ਦਿਗੁਣਂ ਕਤ੍ਵਾ ਕੋਟ੍ਟੇਨ੍ਤਿ, ਵਟ੍ਟਤੀਤਿ ਯੋਜਨਾ. ਚਿਤ੍ਤਿਕਮ੍ਪੀਤਿ ਮਾਲਾਕਮ੍ਮਲਤਾਕਮ੍ਮਚਿਤ੍ਤਯੁਤ੍ਤਮ੍ਪਿ ਕਾਯਬਨ੍ਧਨਂ.

੩੦੫੨. ਅਕ੍ਖੀਨੀਤਿ ਕੁਞ੍ਜਰਕ੍ਖੀਨਿ. ਤਤ੍ਥਾਤਿ ਕਾਯਬਨ੍ਧਨੇ ਵਟ੍ਟਤੀਤਿ ਕਾ ਕਥਾ. ਉਟ੍ਠਾਪੇਤੁਨ੍ਤਿ ਉਕ੍ਕਿਰਿਤੁਂ.

੩੦੫੩. ਘਟਨ੍ਤਿ ਘਟਸਣ੍ਠਾਨਂ. ਦੇਡ੍ਡੁਭਸੀਸਂ ਵਾਤਿ ਉਦਕਸਪ੍ਪਸੀਸਮੁਖਸਣ੍ਠਾਨਂ ਵਾ. ਯਂ ਕਿਞ੍ਚਿ ਵਿਕਾਰਰੂਪਂ ਦਸਾਮੁਖੇ ਨ ਵਟ੍ਟਤੀਤਿ ਯੋਜਨਾ.

੩੦੫੪. ਮਚ੍ਛਕਣ੍ਟਨ੍ਤਿ ਮਚ੍ਛਕਣ੍ਟਕਾਕਾਰਂ. ਖਜ੍ਜੂਰਿਪਤ੍ਤਕਾਕਾਰਨ੍ਤਿ ਖਜ੍ਜੂਰਿਪਤ੍ਤਸਣ੍ਠਾਨਂ. ਮਚ੍ਛਕਣ੍ਟਂ ਵਾ ਮਟ੍ਠਂ ਪਟ੍ਟਿਕਂ ਵਾ ਖਜ੍ਜੂਰਿਪਤ੍ਤਕਾਕਾਰਂ ਵਾ ਉਜੁਕਂ ਕਤ੍ਵਾ ਕੋਟ੍ਟਿਤਂ ਵਟ੍ਟਤੀਤਿ ਯੋਜਨਾ. ਏਤ੍ਥ ਚ ਉਭਯਪਸ੍ਸੇਸੁ ਮਚ੍ਛਕਣ੍ਟਕਯੁਤ੍ਤਂ ਮਚ੍ਛਸ੍ਸ ਪਿਟ੍ਠਿਕਣ੍ਟਕਂ ਵਿਯ ਯਸ੍ਸ ਪਟ੍ਟਿਕਾਯ ਵਾਯਨਂ ਹੋਤਿ, ਇਦਂ ਕਾਯਬਨ੍ਧਨਂ ਮਚ੍ਛਕਣ੍ਟਕਂ ਨਾਮ. ਯਸ੍ਸ ਖਜ੍ਜੂਰਿਪਤ੍ਤਸਣ੍ਠਾਨਮਿਵ ਵਾਯਨਂ ਹੋਤਿ, ਤਂ ਖਜ੍ਜੂਰਿਪਤ੍ਤਕਾਕਾਰਂ ਨਾਮ.

੩੦੫੫. ਪਕਤਿਵੀਤਾ ਪਟ੍ਟਿਕਾ. ਸੂਕਰਨ੍ਤਂਨਾਮ ਕੁਞ੍ਚਿਕਾਕੋਸਕਸਣ੍ਠਾਨਂ. ਤਸ੍ਸ ਦੁਵਿਧਸ੍ਸ ਕਾਯਬਨ੍ਧਨਸ੍ਸ. ਤਤ੍ਥ ਰਜ੍ਜੁਕਾ ਸੂਕਰਨ੍ਤਾਨੁਲੋਮਿਕਾ, ਦੁਸ੍ਸਪਟ੍ਟਂ ਪਟ੍ਟਿਕਾਨੁਲੋਮਿਕਂ. ਆਦਿ-ਸਦ੍ਦੇਨ ਮੁਦ੍ਦਿਕਕਾਯਬਨ੍ਧਨਂ ਗਹਿਤਂ, ਤਞ੍ਚ ਸੂਕਰਨ੍ਤਾਨੁਲੋਮਿਕਂ. ਯਥਾਹ – ‘‘ਏਕਰਜ੍ਜੁਕਂ, ਪਨ ਮੁਦ੍ਦਿਕਕਾਯਬਨ੍ਧਨਞ੍ਚ ਸੂਕਰਨ੍ਤਕਂ ਅਨੁਲੋਮੇਤੀ’’ਤਿ (ਚੂਲ਼ਵ. ਅਟ੍ਠ. ੨੭੮). ਤਤ੍ਥ ਏਕਰਜ੍ਜੁਕਾ ਨਾਮ ਏਕਵਟ੍ਟਾ. ਬਹੁਰਜ੍ਜੁਕਸ੍ਸ ਅਕਪ੍ਪਿਯਭਾਵਂ ਵਕ੍ਖਤਿ. ‘‘ਮੁਦ੍ਦਿਕਕਾਯਬਨ੍ਧਨਂ ਨਾਮ ਚਤੁਰਸ੍ਸਂ ਅਕਤ੍ਵਾ ਸਜ੍ਜਿਤ’’ਨ੍ਤਿ ਗਣ੍ਠਿਪਦੇ ਵੁਤ੍ਤਂ.

੩੦੫੬. ਮੁਰਜਂ ਨਾਮ ਮੁਰਜਵਟ੍ਟਿਸਣ੍ਠਾਨਂ ਵੇਠੇਤ੍ਵਾ ਕਤਂ. ਵੇਠੇਤ੍ਵਾਤਿ ਨਾਨਾਸੁਤ੍ਤੇਹਿ ਵੇਠੇਤ੍ਵਾ. ਸਿਕ੍ਖਾਭਾਜਨਵਿਨਿਚ੍ਛਯੇ ਪਨ ‘‘ਬਹੁਕਾ ਰਜ੍ਜੁਯੋ ਏਕਤੋ ਕਤ੍ਵਾ ਏਕਾਯ ਰਜ੍ਜੁਯਾ ਵੇਠਿਤਂ ਮੁਰਜਂ ਨਾਮਾ’’ਤਿ ਵੁਤ੍ਤਂ. ਮਦ੍ਦਵੀਣਂ ਨਾਮ ਪਾਮਙ੍ਗਸਣ੍ਠਾਨਂ. ਦੇਡ੍ਡੁਭਕਂ ਨਾਮ ਉਦਕਸਪ੍ਪਸੀਸਸਦਿਸਂ. ਕਲਾਬੁਕਂ ਨਾਮ ਬਹੁਰਜ੍ਜੁਕਂ. ਰਜ੍ਜੁਯੋਤਿ ਉਭਯਕੋਟਿਯਂ ਏਕਤੋ ਅਬਦ੍ਧਾ ਬਹੂ ਰਜ੍ਜੁਯੋ, ਤਥਾ ਬਦ੍ਧਾ ਕਲਾਬੁਕਂ ਨਾਮ ਹੋਤੀਤਿ. ਨ ਵਟ੍ਟਨ੍ਤੀਤਿ ਮੁਰਜਾਦੀਨਿ ਇਮਾਨਿ ਸਬ੍ਬਾਨਿ ਕਾਯਬਨ੍ਧਨਾਨਿ ਨ ਵਟ੍ਟਨ੍ਤਿ. ਪੁਰਿਮਾ ਦ੍ਵੇਤਿ ਮੁਰਜਂ, ਮਦ੍ਦਵੀਣਞ੍ਚਾਤਿ ਦ੍ਵੇ. ‘‘ਦਸਾਸੁ ਸਿਯੁ’’ਨ੍ਤਿ ਵਤ੍ਤਬ੍ਬੇ ਗਾਥਾਬਨ੍ਧਵਸੇਨ ਵਣ੍ਣਲੋਪੇਨ ‘‘ਦਸਾ ਸਿਯੁ’’ਨ੍ਤਿ ਵੁਤ੍ਤਂ. ਯਥਾਹ – ‘‘ਮੁਰਜਂ ਮਦ੍ਦਵੀਣ’ਨ੍ਤਿ ਇਦਂ ਦਸਾਸੁਯੇਵ ਅਨੁਞ੍ਞਾਤ’’ਨ੍ਤਿ (ਚੂਲ਼ਵ. ਅਟ੍ਠ. ੨੭੮).

੩੦੫੭. ਪਾਮਙ੍ਗਸਣ੍ਠਾਨਾਤਿ ਪਾਮਙ੍ਗਦਾਮਂ ਵਿਯ ਚਤੁਰਸ੍ਸਸਣ੍ਠਾਨਾ.

੩੦੫੮. ਏਕਰਜ੍ਜੁਮਯਨ੍ਤਿ ਨਾਨਾਵਟ੍ਟੇ ਏਕਤੋ ਵਟ੍ਟੇਤ੍ਵਾ ਕਤਰਜ੍ਜੁਮਯਂ ਕਾਯਬਨ੍ਧਨਂ. ਵਟ੍ਟਂ ਵਟ੍ਟਤੀਤਿ ‘‘ਰਜ੍ਜੁਕਾ ਦੁਸ੍ਸਪਟ੍ਟਾਦੀ’’ਤਿ ਏਤ੍ਥ ਏਕਵਟ੍ਟਰਜ੍ਜੁਕਾ ਗਹਿਤਾ, ਇਧ ਪਨ ਨਾਨਾਵਟ੍ਟੇ ਏਕਤੋ ਵਟ੍ਟੇਤ੍ਵਾ ਕਤਾਵ ਏਕਰਜ੍ਜੁਕਾ ਗਹਿਤਾ. ਤਞ੍ਚਾਤਿ ਤਮ੍ਪਿ ਏਕਰਜ੍ਜੁਕਕਾਯਬਨ੍ਧਨਂ. ਪਾਮਙ੍ਗਸਣ੍ਠਾਨਂ ਏਕਮ੍ਪਿ ਨ ਚ ਵਟ੍ਟਤੀਤਿ ਕੇਵਲਮ੍ਪਿ ਨ ਵਟ੍ਟਤਿ.

੩੦੫੯. ਬਹੂ ਰਜ੍ਜੁਕੇ ਏਕਤੋ ਕਤ੍ਵਾਤਿ ਯੋਜਨਾ. ਵਟ੍ਟਤਿ ਬਨ੍ਧਿਤੁਨ੍ਤਿ ਮੁਰਜਂ, ਕਲਾਬੁਕਂ ਵਾ ਨ ਹੋਤਿ, ਰਜ੍ਜੁਕਕਾਯਬਨ੍ਧਨਮੇਵ ਹੋਤੀਤਿ ਅਧਿਪ੍ਪਾਯੋ. ਅਯਂ ਪਨ ਵਿਨਿਚ੍ਛਯੋ ‘‘ਬਹੂ ਰਜ੍ਜੁਕੇ ਏਕਤੋ ਕਤ੍ਵਾ ਏਕੇਨ ਨਿਰਨ੍ਤਰਂ ਵੇਠੇਤ੍ਵਾ ਕਤਂ ‘ਬਹੁਰਜ੍ਜੁਕ’ਨ੍ਤਿ ਨ ਵਤ੍ਤਬ੍ਬਂ, ਤਂ ਵਟ੍ਟਤੀ’’ਤਿ (ਪਾਰਾ. ਅਟ੍ਠ. ੧.੮੫ ਪਾਲ਼ਿਮੁਤ੍ਤਕਵਿਨਿਚ੍ਛਯ) ਅਟ੍ਠਕਥਾਗਤੋਵ ਇਧ ਵੁਤ੍ਤੋ. ਸਿਕ੍ਖਾਭਾਜਨਵਿਨਿਚ੍ਛਯੇ ‘‘ਬਹੁਕਾ ਰਜ੍ਜੁਯੋ ਏਕਤੋ ਕਤ੍ਵਾ ਏਕਾਯ ਰਜ੍ਜੁਯਾ ਵੇਠਿਤਂ ਮੁਰਜਂ ਨਾਮਾ’’ਤਿ ਯਂ ਵੁਤ੍ਤਂ, ਤਂ ਇਮਿਨਾ ਵਿਰੁਜ੍ਝਨਤੋ ਨ ਗਹੇਤਬ੍ਬਂ.

੩੦੬੦. ਦਨ੍ਤ-ਸਦ੍ਦੇਨ ਹਤ੍ਥਿਦਨ੍ਤਾ ਵੁਤ੍ਤਾ. ਜਤੂਤਿ ਲਾਖਾ. ਸਙ੍ਖਮਯਨ੍ਤਿ ਸਙ੍ਖਨਾਭਿਮਯਂ. ਵਿਧਕਾ ਮਤਾਤਿ ਏਤ੍ਥ ‘‘ਵੇਠਕਾ’’ਤਿਪਿ ਪਾਠੋ ਵਿਧਪਰਿਯਾਯੋ.

੩੦੬੧. ਕਾਯਬਨ੍ਧਨਵਿਧੇਤਿ ਕਾਯਬਨ੍ਧਨਸ੍ਸ ਦਸਾਯ ਥਿਰਭਾਵਤ੍ਥਂ ਕਟ੍ਠਦਨ੍ਤਾਦੀਹਿ ਕਤੇ ਵਿਧੇ. ਵਿਕਾਰੋ ਅਟ੍ਠਮਙ੍ਗਲਾਦਿਕੋ. ਤਤ੍ਥ ਤਤ੍ਥਾਤਿ ਤਸ੍ਮਿਂ ਤਸ੍ਮਿਂ ਠਾਨੇ, ਉਭਯਕੋਟਿਯਨ੍ਤਿ ਅਤ੍ਥੋ. ਤੁ-ਸਦ੍ਦੇਨ ਘਟਾਕਾਰੋਪਿ ਵਟ੍ਟਤੀਤਿ ਦੀਪੇਤਿ.

੩੦੬੨. ਮਾਲਾ …ਪੇ… ਵਿਚਿਤ੍ਤਿਤਾਤਿ ਮਾਲਾਕਮ੍ਮਲਤਾਕਮ੍ਮੇਹਿ ਚ ਮਿਗਪਕ੍ਖਿਰੂਪਾਦਿਨਾਨਾਰੂਪੇਹਿ ਚ ਵਿਚਿਤ੍ਤਿਤਾ. ਜਨਰਞ੍ਜਨੀਤਿ ਬਾਲਜਨਪਲੋਭਿਨੀ.

੩੦੬੪. ਅਟ੍ਠਂਸਾ ਵਾਪੀਤਿ ਏਤ੍ਥ ਅਪਿ-ਸਦ੍ਦੇਨ ਸੋਲ਼ਸਂਸਾਦੀਨਂ ਗਹਣਂ. ਵਣ੍ਣਮਟ੍ਠਾਤਿ ਮਾਲਾਕਮ੍ਮਾਦਿਵਣ੍ਣਮਟ੍ਠਾ.

੩੦੬੫. ਅਞ੍ਜਨਿਸਲਾਕਾਪਿ ਤਥਾ ਵਣ੍ਣਮਟ੍ਠਾ ਨ ਵਟ੍ਟਤੀਤਿ ਯੋਜਨਾ. ‘‘ਅਞ੍ਜਨਿਤ੍ਥਵਿਕਾਯ ਚ, ਨਾਨਾਵਣ੍ਣੇਹਿ ਸੁਤ੍ਤੇਹਿ, ਚਿਤ੍ਤਕਮ੍ਮਂ ਨ ਵਟ੍ਟਤੀ’’ਤਿ ਪਾਠੋ ਯੁਜ੍ਜਤਿ. ‘‘ਥਵਿਕਾਪਿ ਚਾ’’ਤਿ ਪਾਠੋ ਦਿਸ੍ਸਤਿ, ਸੋ ਨ ਗਹੇਤਬ੍ਬੋ.

੩੦੬੬. ਰਤ੍ਤਾਦਿਨਾ ਯੇਨ ਕੇਨਚਿ ਏਕਵਣ੍ਣੇਨ ਸੁਤ੍ਤੇਨ ਪਿਲੋਤਿਕਾਦਿਮਯਂ ਯਂ ਕਿਞ੍ਚਿ ਸਿਪਾਟਿਕਂ ਸਿਬ੍ਬੇਤ੍ਵਾ ਵਲ਼ਞ੍ਜਨ੍ਤਸ੍ਸ ਵਟ੍ਟਤੀਤਿ ਯੋਜਨਾ.

੩੦੬੭. ਮਣਿਕਨ੍ਤਿ ਥੂਲਪੁਬ੍ਬੁਲ਼ਂ. ਪਿਲ਼ਕਨ੍ਤਿ ਸੁਖੁਮਪੁਬ੍ਬੁਲ਼ਂ. ਪਿਪ੍ਫਲੇਤਿ ਵਤ੍ਥਚ੍ਛੇਦਨਸਤ੍ਥੇ. ਆਰਕਣ੍ਟਕੇਤਿ ਪਤ੍ਤਾਧਾਰਵਲਯਾਨਂ ਵਿਜ੍ਝਨਕਣ੍ਟਕੇ. ਠਪੇਤੁਨ੍ਤਿ ਉਟ੍ਠਾਪੇਤੁਂ. ਯਂ ਕਿਞ੍ਚੀਤਿ ਸੇਸਂ ਵਣ੍ਣਮਟ੍ਠਮ੍ਪਿ ਚ.

੩੦੬੮. ਦਣ੍ਡਕੇਤਿ ਪਿਪ੍ਫਲਦਣ੍ਡਕੇ. ਯਥਾਹ – ‘‘ਪਿਪ੍ਫਲਕੇਪਿ ਮਣਿਕਂ ਵਾ ਪਿਲ਼ਕਂ ਵਾ ਯਂ ਕਿਞ੍ਚਿ ਉਟ੍ਠਾਪੇਤੁਂ ਨ ਵਟ੍ਟਤਿ, ਦਣ੍ਡਕੇ ਪਨ ਪਰਿਚ੍ਛੇਦਲੇਖਾ ਵਟ੍ਟਤੀ’’ਤਿ. ਪਰਿਚ੍ਛੇਦਲੇਖਾਮਤ੍ਤਨ੍ਤਿ ਆਣਿਬਨ੍ਧਨਟ੍ਠਾਨਂ ਪਤ੍ਵਾ ਪਰਿਚ੍ਛਿਨ੍ਦਨਤ੍ਥਂ ਏਕਾਵ ਲੇਖਾ ਵਟ੍ਟਤਿ. ਵਲਿਤ੍ਵਾਤਿ ਉਭਯਕੋਟਿਯਾ ਮੁਖਂ ਕਤ੍ਵਾ ਮਜ੍ਝੇ ਵਲਿਯੋ ਗਾਹੇਤ੍ਵਾ. ਨਖਚ੍ਛੇਦਨਂ ਯਸ੍ਮਾ ਕਰੋਨ੍ਤਿ, ਤਸ੍ਮਾ ਵਟ੍ਟਤੀਤਿ ਯੋਜਨਾ.

੩੦੬੯. ਅਰਣਿਸਹਿਤੇ ਕਨ੍ਤਕਿਚ੍ਚਕਰੋ ਦਣ੍ਡੋ ਉਤ੍ਤਰਾਰਣੀ ਨਾਮ. ਵਾਪੀਤਿ ਪਿ-ਸਦ੍ਦੇਨ ਅਧਰਾਰਣਿਂ ਸਙ੍ਗਣ੍ਹਾਤਿ, ਉਦੁਕ੍ਖਲਦਣ੍ਡਸ੍ਸੇਤਂ ਅਧਿਵਚਨਂ. ਅਞ੍ਛਨਕਯਨ੍ਤਧਨੁ ਧਨੁਕਂ ਨਾਮ. ਮੁਸਲਮਤ੍ਥਕਪੀਲ਼ਨਦਣ੍ਡਕੋ ਪੇਲ੍ਲਦਣ੍ਡਕੋ ਨਾਮ.

੩੦੭੦. ਸਣ੍ਡਾਸੇਤਿ ਅਗ੍ਗਿਸਣ੍ਡਾਸਂ ਵਦਨ੍ਤਿ. ਕਟ੍ਠਚ੍ਛੇਦਨਵਾਸਿਯਾ ਤਥਾ ਯਂ ਕਿਞ੍ਚਿ ਵਣ੍ਣਮਟ੍ਠਂ ਨ ਵਟ੍ਟਤੀਤਿ ਸਮ੍ਬਨ੍ਧੋ. ਦ੍ਵੀਸੁ ਪਸ੍ਸੇਸੂਤਿ ਵਾਸਿਯਾ ਉਭੋਸੁ ਪਸ੍ਸੇਸੁ. ਲੋਹੇਨਾਤਿ ਕਪ੍ਪਿਯਲੋਹੇਨ. ਬਨ੍ਧਿਤੁਂ ਵਟ੍ਟਤੀਤਿ ਉਜੁਕਮੇਵ ਚਤੁਰਸ੍ਸਂ ਵਾ ਅਟ੍ਠਂਸਂ ਵਾ ਬਨ੍ਧਿਤੁਂ ਵਟ੍ਟਤਿ. ‘‘ਸਣ੍ਡਾਸੇਤਿ ਅਗ੍ਗਿਸਣ੍ਡਾਸੇ’’ਤਿ ਨਿਸ੍ਸਨ੍ਦੇਹੇ ਵੁਤ੍ਤਂ. ਅਟ੍ਠਕਥਾਯਂ ਪਨੇਤ੍ਥ ਸੂਚਿਸਣ੍ਡਾਸੋ ਦਸ੍ਸਿਤੋ.

੩੦੭੧. ਹੇਟ੍ਠਤੋਤਿ ਹੇਟ੍ਠਾ ਅਯੋਪਟ੍ਟਵਲਯਸ੍ਸ. ‘‘ਉਪਰਿ ਅਹਿਚ੍ਛਤ੍ਤਮਕੁਲਮਤ੍ਤ’’ਨ੍ਤਿ ਅਟ੍ਠਕਥਾਯਂ ਵੁਤ੍ਤਂ.

੩੦੭੨. ਵਿਸਾਣੇਤਿ ਤੇਲਾਸਿਞ੍ਚਨਕਗਵਯਮਹਿਂਸਾਦਿਸਿਙ੍ਗੇ. ਨਾਲ਼ਿਯਂ ਵਾਪੀਤਿ ਵੇਲ਼ੁਨਾਲ਼ਿਕਾਦਿਨਾਲ਼ਿਯਂ. ਅਪਿ-ਸਦ੍ਦੇਨ ਅਲਾਬੁਂ ਸਙ੍ਗਣ੍ਹਾਤਿ. ਆਮਣ੍ਡਸਾਰਕੇਤਿ ਆਮਲਕਚੁਣ੍ਣਮਯਤੇਲਘਟੇ. ਤੇਲਭਾਜਨਕੇਤਿ ਵੁਤ੍ਤਪ੍ਪਕਾਰੇਯੇਵ ਤੇਲਭਾਜਨੇ. ਸਬ੍ਬਂ ਵਣ੍ਣਮਟ੍ਠਂ ਵਟ੍ਟਤੀਤਿ ਪੁਮਿਤ੍ਥਿਰੂਪਰਹਿਤਂ ਮਾਲਾਕਮ੍ਮਾਦਿ ਸਬ੍ਬਂ ਵਣ੍ਣਮਟ੍ਠਂ ਵਟ੍ਟਤਿ.

੩੦੭੩-੫. ਪਾਨੀਯਸ੍ਸ ਉਲ਼ੁਙ੍ਕੇਤਿ ਪਾਨੀਯਉਲ਼ੁਙ੍ਕੇ. ਦੋਣਿਯਂ ਰਜਨਸ੍ਸਪੀਤਿ ਰਜਨਦੋਣਿਯਮ੍ਪਿ. ਫਲਕਪੀਠੇਤਿ ਫਲਕਮਯੇ ਪੀਠੇ. ਵਲਯਾਧਾਰਕਾਦਿਕੇਤਿ ਦਨ੍ਤਵਲਯਾਦਿਆਧਾਰਕੇ. ਆਦਿ-ਸਦ੍ਦੇਨ ਦਣ੍ਡਾਧਾਰਕੋ ਸਙ੍ਗਹਿਤੋ. ਪਾਦਪੁਞ੍ਛਨਿਯਨ੍ਤਿ ਚੋਲ਼ਾਦਿਮਯਪਾਦਪੁਞ੍ਛਨਿਯਂ. ਪੀਠੇਤਿ ਪਾਦਪੀਠੇ. ਸਹਚਰਿਯੇਨ ਪਾਦਕਥਲਿਕਾਯਞ੍ਚ. ਚਿਤ੍ਤਂ ਸਬ੍ਬਮੇਵ ਚ ਵਟ੍ਟਤੀਤਿ ਯਥਾਵੁਤ੍ਤੇ ਭਿਕ੍ਖੁਪਰਿਕ੍ਖਾਰੇ ਮਾਤੁਗਾਮਰੂਪਰਹਿਤਂ, ਭਿਕ੍ਖੁਨਿਪਰਿਕ੍ਖਾਰੇ ਪੁਰਿਸਰੂਪਰਹਿਤਂ ਅਵਸੇਸਂ ਸਬ੍ਬਂ ਚਿਤ੍ਤਕਮ੍ਮਂ.

੩੦੭੬. ਨਾਨਾ ਚ ਤੇ ਮਣਯੋ ਚਾਤਿ ਨਾਨਾਮਣੀ, ਇਨ੍ਦਨੀਲਾਦਯੋ, ਨਾਨਾਮਣੀਹਿ ਕਤਾ ਨਾਨਾਮਣਿਮਯਾ, ਥਮ੍ਭਾ ਚ ਕਵਾਟਾ ਚ ਦ੍ਵਾਰਾ ਚ ਭਿਤ੍ਤਿਯੋ ਚ ਥਮ੍ਭਕਵਾਟਦ੍ਵਾਰਭਿਤ੍ਤਿਯੋ, ਨਾਨਾਮਣਿਮਯਾ ਥਮ੍ਭਕਵਾਟਦ੍ਵਾਰਭਿਤ੍ਤਿਯੋ ਯਸ੍ਮਿਂ ਤਂ ਤਥਾ ਵੁਤ੍ਤਂ. ਕਾ ਕਥਾ ਵਣ੍ਣਮਟ੍ਠਕੇਤਿ ਮਾਲਾਕਮ੍ਮਲਤਾਕਮ੍ਮਚਿਤ੍ਤਕਮ੍ਮਾਦਿਵਣ੍ਣਮਟ੍ਠਕੇ ਵਤ੍ਤਬ੍ਬਮੇਵ ਨਤ੍ਥੀਤਿ ਅਤ੍ਥੋ.

੩੦੭੭. ਥਾਵਰਸ੍ਸ ਰਤਨਮਯਪਾਸਾਦਸ੍ਸ ਕਪ੍ਪਿਯਭਾਵਂ ਦਸ੍ਸੇਤ੍ਵਾ ਸੁਵਣ੍ਣਾਦਿਮਯਸ੍ਸਾਪਿ ਸਬ੍ਬਪਾਸਾਦਪਰਿਭੋਗਸ੍ਸ ਕਪ੍ਪਿਯਭਾਵਂ ਦਸ੍ਸੇਤੁਮਾਹ ‘‘ਸੋਵਣ੍ਣਯ’’ਨ੍ਤਿਆਦਿ. ਸੋਵਣ੍ਣਯਨ੍ਤਿ ਸੁਵਣ੍ਣਮਯਂ. ਦ੍ਵਾਰਕਵਾਟਾਨਂ ਅਨਨ੍ਤਰਗਾਥਾਯ ਦਸ੍ਸਿਤਤ੍ਤਾ ‘‘ਦ੍ਵਾਰਕਵਾਟਬਨ੍ਧ’’ਨ੍ਤਿ ਇਮਿਨਾ ਦ੍ਵਾਰਕਵਾਟਬਾਹਾਸਙ੍ਖਾਤਂ ਪਿਟ੍ਠਸਙ੍ਘਾਟਂ ਗਹਿਤਂ. ਦ੍ਵਾਰਞ੍ਚ ਕਵਾਟਞ੍ਚ ਦ੍ਵਾਰਕਵਾਟਾਨਿ, ਦ੍ਵਾਰਕਵਾਟਾਨਂ ਬਨ੍ਧਂ ਦ੍ਵਾਰਕਵਾਟਬਨ੍ਧਂ, ਉਤ੍ਤਰਪਾਸਕੁਮ੍ਮਾਰਸਙ੍ਖਾਤਂ ਪਿਟ੍ਠਸਙ੍ਘਾਟਨ੍ਤਿ ਅਤ੍ਥੋ. ਨਾਨਾ ਚ ਤੇ ਮਣਯੋ ਚਾਤਿ ਨਾਨਾਮਣੀ, ਸੁਵਣ੍ਣਞ੍ਚ ਨਾਨਾਮਣੀ ਚ ਸੁਵਣ੍ਣਨਾਨਾਮਣੀ, ਭਿਤ੍ਤਿ ਚ ਭੂਮਿ ਚ ਭਿਤ੍ਤਿਭੂਮਿ ਸੁਵਣ੍ਣਨਾਨਾਮਣੀਹਿ ਕਤਾ ਭਿਤ੍ਤਿਭੂਮਿ ਸੁਵਣ੍ਣਨਾਨਾਮਣਿਭਿਤ੍ਤਿਭੂਮਿ. ਇਤਿ ਇਮੇਸੁ ਸੇਨਾਸਨਾਵਯਵੇਸੁ. ਨ ਕਿਞ੍ਚਿ ਏਕਮ੍ਪਿ ਨਿਸੇਧਨੀਯਨ੍ਤਿ ਏਕਮ੍ਪਿ ਸੇਨਾਸਨਪਰਿਕ੍ਖਾਰਂ ਕਿਞ੍ਚਿ ਨ ਨਿਸੇਧਨੀਯਂ, ਸੇਨਾਸਨਮ੍ਪਿ ਨ ਪਟਿਕ੍ਖਿਪਿਤਬ੍ਬਨ੍ਤਿ ਅਤ੍ਥੋ. ਸੇਨਾਸਨਂ ਵਟ੍ਟਤਿ ਸਬ੍ਬਮੇਵਾਤਿ ਸਬ੍ਬਮੇਵ ਸੇਨਾਸਨਪਰਿਭੋਗਂ ਵਟ੍ਟਤਿ. ਯਥਾਹ –

‘‘ਸਬ੍ਬਂ ਪਾਸਾਦਪਰਿਭੋਗਨ੍ਤਿ ਸੁਵਣ੍ਣਰਜਤਾਦਿਵਿਚਿਤ੍ਰਾਨਿ ਕਵਾਟਾਨਿ ਮਞ੍ਚਪੀਠਾਨਿ ਤਾਲਵਣ੍ਟਾਨਿ ਸੁਵਣ੍ਣਰਜਤਮਯਾਨਿ ਪਾਨੀਯਘਟਪਾਨੀਯਸਰਾਵਾਨਿ ਯਂ ਕਿਞ੍ਚਿ ਚਿਤ੍ਤਕਮ੍ਮਕਤਂ, ਸਬ੍ਬਂ ਵਟ੍ਟਤਿ. ‘ਪਾਸਾਦਸ੍ਸ ਦਾਸਿਦਾਸਂ ਖੇਤ੍ਤਵਤ੍ਥੁਂ ਗੋਮਹਿਂਸਂ ਦੇਮਾ’ਤਿ ਵਦਨ੍ਤਿ, ਪਾਟੇਕ੍ਕਂ ਗਹਣਕਿਚ੍ਚਂ ਨਤ੍ਥਿ, ਪਾਸਾਦੇ ਪਟਿਗ੍ਗਹਿਤੇ ਪਟਿਗ੍ਗਹਿਤਮੇਵ ਹੋਤਿ. ਗੋਨਕਾਦੀਨਿ ਸਙ੍ਘਿਕਵਿਹਾਰੇ ਵਾ ਪੁਗ੍ਗਲਿਕਵਿਹਾਰੇ ਵਾ ਮਞ੍ਚਪੀਠਕੇਸੁ ਅਤ੍ਥਰਿਤ੍ਵਾ ਪਰਿਭੁਞ੍ਜਿਤੁਂ ਨ ਵਟ੍ਟਨ੍ਤਿ. ਧਮ੍ਮਾਸਨੇ ਪਨ ਗਿਹਿਵਿਕਤਨੀਹਾਰੇਨ ਲਬ੍ਭਨ੍ਤਿ, ਤਤ੍ਰਾਪਿ ਨਿਪਜ੍ਜਿਤੁਂ ਨ ਵਟ੍ਟਤੀ’’ਤਿ (ਚੂਲ਼ਵ. ਅਟ੍ਠ. ੩੨੦).

‘‘ਸੋਵਣ੍ਣਦ੍ਵਾਰਕਵਾਟਬਨ੍ਧ’’ਨ੍ਤਿ ਵਾ ਪਾਠੋ, ਬਹੁਬ੍ਬੀਹਿਸਮਾਸੋ. ਇਮਿਨਾ ਚ ਦੁਤਿਯਪਦੇਨ ਚ ਸੇਨਾਸਨਂ ਵਿਸੇਸੀਯਤਿ.

੩੦੭੮. ਨ ਦਵਂ ਕਰੇਤਿ ‘‘ਕਿਂ ਬੁਦ੍ਧੋ ਸਿਲਕਬੁਦ੍ਧੋ? ਕਿਂ ਧਮ੍ਮੋ ਗੋਧਮ੍ਮੋ ਅਜਧਮ੍ਮੋ? ਕਿਂ ਸਙ੍ਘੋ ਗੋਸਙ੍ਘੋ ਅਜਸਙ੍ਘੋ ਮਿਗਸਙ੍ਘੋ’’ਤਿ ਪਰਿਹਾਸਂ ਨ ਕਰੇਯ੍ਯ. ਤਿਤ੍ਥਿਯਬ੍ਬਤਂ ਮੂਗਬ੍ਬਤਾਦਿਕਂ ਨੇਵ ਗਣ੍ਹੇਯ੍ਯਾਤਿ ਯੋਜਨਾ.

੩੦੭੯. ਤਾ ਭਿਕ੍ਖੁਨਿਯੋ ਉਦਕਾਦਿਨਾ ਵਾਪਿ ਨ ਸਿਞ੍ਚੇਯ੍ਯਾਤਿ ਯੋਜਨਾ.

੩੦੮੦. ਅਞ੍ਞਤ੍ਥ ਅਞ੍ਞਸ੍ਮਿਂ ਵਿਹਾਰੇ ਵਸ੍ਸਂਵੁਤ੍ਥੋ ਅਞ੍ਞਤ੍ਥ ਅਞ੍ਞਸ੍ਮਿਂ ਵਿਹਾਰੇ ਭਾਗਂ ਵਸ੍ਸਾਵਾਸਿਕਭਾਗਂ ਗਣ੍ਹਾਤਿ ਚੇ, ਦੁਕ੍ਕਟਂ. ਤਸ੍ਮਿਂ ਚੀਵਰੇ ਨਟ੍ਠੇ ਵਾ ਜਜ੍ਜਰੇ ਜਿਣ੍ਣੇ ਵਾ ਗੀਵਾ ਪੁਨ ਦਾਤਬ੍ਬਨ੍ਤਿ ਯੋਜਨਾ.

੩੦੮੧. ਸੋਤਿ ਅਞ੍ਞਤ੍ਥ ਭਾਗਂ ਗਣ੍ਹਨਕੋ ਭਿਕ੍ਖੁ. ਤੇਹੀਤਿ ਚੀਵਰਸਾਮਿਕੇਹਿ. ਤਨ੍ਤਿ ਤਥਾ ਗਹਿਤਂ ਵਸ੍ਸਾਵਾਸਿਕਭਾਗਂ. ਤੇਸਨ੍ਤਿ ਚੀਵਰਸਾਮਿਕਾਨਂ.

੩੦੮੨. ਕਰੋਤੋਤਿ ਕਾਰਾਪਯਤੋ. ਦਵਾ ਸਿਲਂ ਪਵਿਜ੍ਝਨ੍ਤੋਤਿ ਪਨ੍ਤਿਕੀਲ਼ਾਯ ਕੀਲ਼ਤ੍ਥਿਕਾਨਂ ਸਿਪ੍ਪਦਸ੍ਸਨਵਸੇਨ ਸਕ੍ਖਰਂ ਵਾ ਨਿਨ੍ਨਟ੍ਠਾਨਂ ਪਵਟ੍ਟਨਵਸੇਨ ਪਾਸਾਣਂ ਵਾ ਪਵਿਜ੍ਝਨ੍ਤੋ. ਨ ਕੇਵਲਞ੍ਚ ਪਾਸਾਣਂ, ਅਞ੍ਞਮ੍ਪਿ ਯਂ ਕਿਞ੍ਚਿ ਦਾਰੁਖਣ੍ਡਂ ਵਾ ਇਟ੍ਠਕਖਣ੍ਡਂ ਵਾ ਹਤ੍ਥੇਨ ਵਾ ਯਨ੍ਤੇਨ ਵਾ ਪਵਿਜ੍ਝਿਤੁਂ ਨ ਵਟ੍ਟਤਿ. ਚੇਤਿਯਾਦੀਨਂ ਅਤ੍ਥਾਯ ਪਾਸਾਣਾਦਯੋ ਹਸਨ੍ਤਾ ਹਸਨ੍ਤਾ ਪਵਟ੍ਟੇਨ੍ਤਿਪਿ ਖਿਪਨ੍ਤਿਪਿ ਉਕ੍ਖਿਪਨ੍ਤਿਪਿ, ਕਮ੍ਮਸਮਯੋਤਿ ਵਟ੍ਟਤਿ.

੩੦੮੩. ਗਿਹਿਗੋਪਕਦਾਨਸ੍ਮਿਨ੍ਤਿ ਗਿਹੀਨਂ ਉਯ੍ਯਾਨਗੋਪਕਾਦੀਹਿ ਅਤ੍ਤਨਾ ਗੋਪਿਤਉਯ੍ਯਾਨਾਦਿਤੋ ਫਲਾਦੀਨਂ ਦਾਨੇ ਯਾਵਦਤ੍ਥਂ ਦਿਯ੍ਯਮਾਨੇਪਿ. ਨ ਦੋਸੋ ਕੋਚਿ ਗਣ੍ਹਤੋਤਿ ਪਟਿਗ੍ਗਣ੍ਹਤੋ ਭਿਕ੍ਖੁਨੋ ਕੋਚਿ ਦੋਸੋ ਨਤ੍ਥਿ. ਸਙ੍ਘਚੇਤਿਯਸਨ੍ਤਕੇ ਤਾਲਫਲਾਦਿਮ੍ਹਿ ਉਯ੍ਯਾਨਗੋਪਕਾਦੀਹਿ ਦਿਯ੍ਯਮਾਨੇ ਪਰਿਚ੍ਛੇਦਨਯੋ ਤੇਸਂ ਵੇਤਨਵਸੇਨ ਪਰਿਚ੍ਛਿਨ੍ਨਾਨਂਯੇਵ ਗਹਣੇ ਅਨਾਪਤ੍ਤਿਨਯੋ ਵੁਤ੍ਤੋਤਿ ਯੋਜਨਾ.

੩੦੮੪. ਪੁਰਿਸਸਂਯੁਤ੍ਤਨ੍ਤਿ ਪਰਿਵਿਸਕੇਹਿ ਪੁਰਿਸੇਹਿ ਵੁਯ੍ਹਮਾਨਂ. ਹਤ੍ਥਵਟ੍ਟਕਨ੍ਤਿ ਹਤ੍ਥੇਨੇਵ ਪਵਟ੍ਟੇਤਬ੍ਬਸਕਟਂ.

੩੦੮੫. ਭਿਕ੍ਖੁਨਿਯਾ ਸਦ੍ਧਿਂ ਕਿਞ੍ਚਿਪਿ ਅਨਾਚਾਰਂ ਨ ਸਮ੍ਪਯੋਜੇਯ੍ਯ ਨ ਕਾਰੇਯ੍ਯਾਤਿ ਯੋਜਨਾ. ‘‘ਕਿਞ੍ਚੀ’’ਤਿਪਿ ਪਾਠੋ, ਗਹਟ੍ਠਂ ਵਾ ਪਬ੍ਬਜਿਤਂ ਵਾ ਕਿਞ੍ਚਿ ਭਿਕ੍ਖੁਨਿਯਾ ਸਦ੍ਧਿਂ ਅਨਾਚਾਰਵਸੇਨ ਨ ਸਮ੍ਪਯੋਜੇਯ੍ਯਾਤਿ ਅਤ੍ਥੋ. ਓਭਾਸੇਨ੍ਤਸ੍ਸਾਤਿ ਕਾਮਾਧਿਪ੍ਪਾਯਂ ਪਕਾਸੇਨ੍ਤਸ੍ਸ.

੩੦੮੬. ਹਵੇਤਿ ਏਕਂਸਤ੍ਥੇ ਨਿਪਾਤੋ.

੩੦੮੭. ਅਤ੍ਤਨੋ ਪਰਿਭੋਗਤ੍ਥਂ ਦਿਨ੍ਨਨ੍ਤਿ ‘‘ਤੁਮ੍ਹੇਯੇਵ ਪਰਿਭੁਞ੍ਜਥਾ’’ਤਿ ਵਤ੍ਵਾ ਦਿਨ੍ਨਂ ਤਿਚੀਵਰਾਦਿਂ.

੩੦੮੮. ਅਸਪ੍ਪਾਯਨ੍ਤਿ ਪਿਤ੍ਤਾਦਿਦੋਸਾਨਂ ਕੋਪਨਵਸੇਨ ਅਫਾਸੁਕਾਰਣਂ. ਅਪਨੇਤੁਮ੍ਪਿ ਜਹਿਤੁਮ੍ਪਿ, ਪਗੇਵ ਦਾਤੁਨ੍ਤਿ ਅਧਿਪ੍ਪਾਯੋ. ਅਗ੍ਗਂ ਗਹੇਤ੍ਵਾ ਦਾਤੁਂ ਵਾਤਿ ਤਥਾ ਗਹਣਾਰਹਂ ਅਨ੍ਨਾਦਿਂ ਸਨ੍ਧਾਯ ਵੁਤ੍ਤਂ. ‘‘ਕਤਿਪਾਹਂ ਭੁਤ੍ਵਾ’’ਤਿ ਸੇਸੋ. ਪਿਣ੍ਡਪਾਤਾਦਿਤੋ ਅਗ੍ਗਂ ਗਹੇਤ੍ਵਾ ਪਤ੍ਤਾਦਿਂ ਕਤਿਪਾਹਂ ਭੁਤ੍ਵਾ ਦਾਤੁਂ ਵਟ੍ਟਤੀਤਿ ਅਤ੍ਥੋ.

੩੦੮੯. ਪਞ੍ਚਵਗ੍ਗੂਪਸਮ੍ਪਦਾਤਿ ਵਿਨਯਧਰਪਞ੍ਚਮੇਨ ਸਙ੍ਘੇਨ ਕਾਤਬ੍ਬਉਪਸਮ੍ਪਦਾ. ਨਵਾਤਿ ਅਞ੍ਞੇਹਿ ਏਕਵਾਰਮ੍ਪਿ ਅਪਰਿਭੁਤ੍ਤਾ. ਗੁਣਙ੍ਗੁਣਉਪਾਹਨਾ ਚਤੁਪਟਲਤੋ ਪਟ੍ਠਾਯ ਬਹੁਪਟਲਉਪਾਹਨਾ. ਚਮ੍ਮਤ੍ਥਾਰੋਤਿ ਕਪ੍ਪਿਯਚਮ੍ਮਤ੍ਥਰਣਞ੍ਚ. ਧੁਵਨ੍ਹਾਨਨ੍ਤਿ ਪਕਤਿਨਹਾਨਂ.

੩੦੯੦. ਸਮ੍ਬਾਧਸ੍ਸਾਤਿ ਵਚ੍ਚਮਗ੍ਗਪਸ੍ਸਾਵਮਗ੍ਗਦ੍ਵਯਸ੍ਸ ਸਾਮਨ੍ਤਾ ਦ੍ਵਙ੍ਗੁਲਾ ਅਨ੍ਤੋ ਸਤ੍ਥਵਤ੍ਥਿਕਮ੍ਮਂ ਵਾਰਿਤਨ੍ਤਿ ਯੋਜਨਾ. ਸਤ੍ਥੇਨ ਅਨ੍ਤਮਸੋ ਨਖੇਨਾਪਿ ਛੇਦਨਫਾਲਨਾਦਿਵਸੇਨ ਸਤ੍ਥਕਮ੍ਮਞ੍ਚ ਵਤ੍ਥੀਹਿ ਭੇਸਜ੍ਜਤੇਲਸ੍ਸ ਅਨ੍ਤੋ ਪਵਿਸਨਵਸੇਨ ਕਾਤਬ੍ਬਂ ਵਤ੍ਥਿਕਮ੍ਮਞ੍ਚ ਥੁਲ੍ਲਚ੍ਚਯਾਪਤ੍ਤਿਵਿਧਾਨੇਨ ਵਾਰਿਤਨ੍ਤਿ ਅਤ੍ਥੋ. ਪਸ੍ਸਾਵਮਗ੍ਗਸ੍ਸ ਸਾਮਨ੍ਤਾ ਦ੍ਵਙ੍ਗੁਲਂ ਅਙ੍ਗਜਾਤਸ੍ਸ ਅਗ੍ਗਤੋ ਪਟ੍ਠਾਯ ਗਹੇਤਬ੍ਬਂ.

੩੦੯੧. ‘‘ਪਾਕਤ੍ਥ’’ਨ੍ਤਿ ਇਮਿਨਾ ਨਿਬ੍ਬਾਪੇਤੁਂ ਚਲਨੇ ਨਿਦ੍ਦੋਸਭਾਵਂ ਦੀਪੇਤਿ.

੩੦੯੨. ਉਪਲ਼ਾਲੇਤੀਤਿ ‘‘ਪਤ੍ਤਚੀਵਰਾਦਿਪਰਿਕ੍ਖਾਰਂ ਤੇ ਦਮ੍ਮੀ’’ਤਿ ਵਤ੍ਵਾ ਪਲੋਭੇਤ੍ਵਾ ਗਣ੍ਹਾਤਿ. ਤਤ੍ਥਾਤਿ ਤਸ੍ਮਿਂ ਪੁਗ੍ਗਲੇ. ਆਦੀਨਵਨ੍ਤਿ ਅਲਜ੍ਜਿਤਾਦਿਭਾਵਂ ਦਸ੍ਸੇਤ੍ਵਾ ਤੇਨ ਸਹ ਸਮ੍ਭੋਗਾਦਿਕਰਣੇ ਅਲਜ੍ਜਿਭਾਵਾਪਜ੍ਜਨਾਦਿਆਦੀਨਵਂ. ਤਸ੍ਸਾਤਿ ਤਤੋ ਵਿਯੋਜੇਤਬ੍ਬਸ੍ਸ ਤਸ੍ਸ.

੩੦੯੩. ਆਦੀਨਵਦਸ੍ਸਨਪ੍ਪਕਾਰਂ ਦਸ੍ਸੇਤੁਮਾਹ ‘‘ਮਕ੍ਖਨ’’ਨ੍ਤਿਆਦਿ. ‘‘ਨਹਾਯਿਤੁਂ ਗਤੇਨ ਗੂਥਮੁਤ੍ਤੇਹਿ ਮਕ੍ਖਨਂ ਵਿਯ ਦੁਸ੍ਸੀਲਂ ਨਿਸ੍ਸਾਯ ਵਿਹਰਤਾ ਤਯਾ ਕਤ’’ਨ੍ਤਿ ਏਵਂ ਤਤ੍ਥ ਆਦੀਨਵਂ ਵਤ੍ਤੁਂ ਵਟ੍ਟਤੀਤਿ ਯੋਜਨਾ.

੩੦੯੪-੫. ਭਤ੍ਤਗ੍ਗੇ ਭੋਜਨਸਾਲਾਯ ਭੁਞ੍ਜਮਾਨੋ. ਯਾਗੁਪਾਨੇਤਿ ਯਾਗੁਂ ਪਿਵਨਕਾਲੇ. ਅਨ੍ਤੋਗਾਮੇਤਿ ਅਨ੍ਤਰਘਰੇ. ਵੀਥਿਯਨ੍ਤਿ ਨਿਗਮਨਗਰਗਾਮਾਦੀਨਂ ਰਥਿਕਾਯ. ਅਨ੍ਧਕਾਰੇਤਿ ਅਨ੍ਧਕਾਰੇ ਵਤ੍ਤਮਾਨੇ, ਅਨ੍ਧਕਾਰਗਤੋਤਿ ਅਤ੍ਥੋ. ਤਞ੍ਹਿ ਵਨ੍ਦਨ੍ਤਸ੍ਸ ਮਞ੍ਚਪਾਦਾਦੀਸੁਪਿ ਨਲਾਟਂ ਪਟਿਹਞ੍ਞੇਯ੍ਯ. ਅਨਾਵਜ੍ਜੋਤਿ ਕਿਚ੍ਚਪਸੁਤਤ੍ਤਾ ਵਨ੍ਦਨਂ ਅਸਮਨ੍ਨਾਹਰਨ੍ਤੋ. ਏਕਾਵਤ੍ਤੋਤਿ ਏਕਤੋ ਆਵਤ੍ਤੋ ਸਪਤ੍ਤਪਕ੍ਖੇ ਠਿਤੋ ਵੇਰੀ ਵਿਸਭਾਗਪੁਗ੍ਗਲੋ. ਅਯਞ੍ਹਿ ਵਨ੍ਦਿਯਮਾਨੋ ਪਾਦੇਨਪਿ ਪਹਰੇਯ੍ਯ. ਵਾਵਟੋਤਿ ਸਿਬ੍ਬਨਕਮ੍ਮਾਦਿਕਿਚ੍ਚਨ੍ਤਰਪਸੁਤੋ.

ਸੁਤ੍ਤੋਤਿ ਨਿਦ੍ਦਂ ਓਕ੍ਕਨ੍ਤੋ. ਖਾਦਨ੍ਤਿ ਪਿਟ੍ਠਕਖਜ੍ਜਕਾਦੀਨਿ ਖਾਦਨ੍ਤੋ. ਭੁਞ੍ਜਨ੍ਤੋਤਿ ਓਦਨਾਦੀਨਿ ਭੁਞ੍ਜਨ੍ਤੋ. ਵਚ੍ਚਂ ਮੁਤ੍ਤਮ੍ਪਿ ਵਾ ਕਰਨ੍ਤਿ ਉਚ੍ਚਾਰਂ ਵਾ ਪਸ੍ਸਾਵਂ ਵਾ ਕਰੋਨ੍ਤੋ ਇਤਿ ਇਮੇਸਂ ਤੇਰਸਨ੍ਨਂ ਵਨ੍ਦਨਾ ਅਯੁਤ੍ਤਤ੍ਥੇਨ ਵਾਰਿਤਾਤਿ ਸਮ੍ਬਨ੍ਧੋ.

੩੦੯੬-੭. ਕਮ੍ਮਲਦ੍ਧਿਸੀਮਾਵਸੇਨ ਤੀਸੁ ਨਾਨਾਸਂਵਾਸਕੇਸੁ ਕਮ੍ਮਨਾਨਾਸਂਵਾਸਕਸ੍ਸ ਉਕ੍ਖਿਤ੍ਤਗ੍ਗਹਣੇਨ ਗਹਿਤਤ੍ਤਾ, ਸੀਮਾਨਾਨਾਸਂਵਾਸਕਵੁਡ੍ਢਤਰਪਕਤਤ੍ਤਸ੍ਸ ਵਨ੍ਦਿਯਤ੍ਤਾ, ਪਾਰਿਸੇਸਞਾਯੇਨ ‘‘ਨਾਨਾਸਂਵਾਸਕੋ ਵੁਡ੍ਢਤਰੋ ਅਧਮ੍ਮਵਾਦੀ ਅਵਨ੍ਦਿਯੋ’’ਤਿ (ਪਰਿ. ੪੬੭) ਵਚਨਤੋ ਚ ਲਦ੍ਧਿਨਾਨਾਸਂਵਾਸਕੋ ਇਧ ‘‘ਨਾਨਾਸਂਵਾਸਕੋ’’ਤਿ ਗਹਿਤੋਤਿ ਵੇਦਿਤਬ੍ਬੋ. ਉਕ੍ਖਿਤ੍ਤੋਤਿ ਤਿਵਿਧੇਨਾਪਿ ਉਕ੍ਖੇਪਨੀਯਕਮ੍ਮੇਨ ਉਕ੍ਖਿਤ੍ਤਕੋ. ਗਰੁਕਟ੍ਠਾ ਚ ਪਞ੍ਚਾਤਿ ਪਾਰਿਵਾਸਿਕਮੂਲਾਯਪਟਿਕਸ੍ਸਨਾਰਹਮਾਨਤ੍ਤਾਰਹਮਾਨਤ੍ਤਚਾਰਿਕਅਬ੍ਭਾਨਾਰਹਸਙ੍ਖਾਤਾ ਪਞ੍ਚ ਗਰੁਕਟ੍ਠਾ ਚ. ਇਮੇ ਪਨ ਅਞ੍ਞਮਞ੍ਞਸ੍ਸ ਯਥਾਵੁਡ੍ਢਂ ਵਨ੍ਦਨਾਦੀਨਿ ਲਭਨ੍ਤਿ, ਪਕਤਤ੍ਤੇਨ ਅਵਨ੍ਦਿਯਤ੍ਤਾਵ ਅਵਨ੍ਦਿਯੇਸੁ ਗਹਿਤਾ. ਇਮੇ ਬਾਵੀਸਤਿ ਪੁਗ੍ਗਲੇਤਿ ਨਗ੍ਗਾਦਯੋ ਯਥਾਵੁਤ੍ਤੇ.

੩੦੯੮. ‘‘ਧਮ੍ਮਵਾਦੀ’’ਤਿ ਇਦਂ ‘‘ਨਾਨਾਸਂਵਾਸਵੁਡ੍ਢਕੋ’’ਤਿ ਏਤਸ੍ਸ ਵਿਸੇਸਨਂ. ਯਥਾਹ ‘‘ਤਯੋਮੇ, ਭਿਕ੍ਖਵੇ, ਵਨ੍ਦਿਯਾ. ਪਚ੍ਛਾ ਉਪਸਮ੍ਪਨ੍ਨੇਨ ਪੁਰੇਉਪਸਮ੍ਪਨ੍ਨੋ ਵਨ੍ਦਿਯੋ, ਨਾਨਾਸਂਵਾਸਕੋ ਵੁਡ੍ਢਤਰੋ ਧਮ੍ਮਵਾਦੀ ਵਨ੍ਦਿਯੋ, ਸਦੇਵਕੇ ਲੋਕੇ, ਭਿਕ੍ਖਵੇ, ਸਮਾਰਕੇ…ਪੇ… ਤਥਾਗਤੋ ਅਰਹਂ ਸਮ੍ਮਾਸਮ੍ਬੁਦ੍ਧੋ ਵਨ੍ਦਿਯੋ’’ਤਿ (ਚੂਲ਼ਵ. ੩੧੨).

੩੦੯੯. ‘‘ਏਤੇਯੇਵ ਵਨ੍ਦਿਯਾ, ਨ ਅਞ੍ਞੇ’’ਤਿ ਨਿਯਾਮਸ੍ਸ ਅਕਤਤ੍ਤਾ ਅਞ੍ਞੇਸਮ੍ਪਿ ਵਨ੍ਦਿਯਾਨਂ ਸਬ੍ਭਾਵਂ ਦਸ੍ਸੇਤੁਮਾਹ ‘‘ਤਜ੍ਜਨਾਦੀ’’ਤਿਆਦਿ. ਏਤ੍ਥ ਆਦਿ-ਸਦ੍ਦੇਨ ਨਿਯਸ੍ਸਪਬ੍ਬਾਜਨੀਯਪਅਸਾਰਣੀਯਕਮ੍ਮੇ ਸਙ੍ਗਣ੍ਹਾਤਿ. ਏਤ੍ਥਾਤਿ ਏਤਸ੍ਮਿਂ ਵਨ੍ਦਨੀਯਾਧਿਕਾਰੇ. ਕਮ੍ਮਨ੍ਤਿ ਅਪਲੋਕਨਾਦਿ ਚਤੁਬ੍ਬਿਧਂ ਕਮ੍ਮਂ.

੩੧੦੦. ਸਙ੍ਘੇਨ ਅਧਮ੍ਮਕਮ੍ਮੇ ਕਰਿਯਮਾਨੇ ਤਂ ਵਾਰੇਤੁਂ ਅਸਕ੍ਕੋਨ੍ਤੇਨ, ਅਸਕ੍ਕੋਨ੍ਤੇਹਿ ਚ ਪਟਿਪਜ੍ਜਿਤਬ੍ਬਵਿਧਿਂ ਦਸ੍ਸੇਤੁਮਾਹ ‘‘ਅਧਿਟ੍ਠਾਨ’’ਨ੍ਤਿਆਦਿ. ਅਧਿਟ੍ਠਾਨਂ ਪਨੇਕਸ੍ਸ ਉਦ੍ਦਿਟ੍ਠਨ੍ਤਿ ਯੋਜਨਾ, ਅਧਮ੍ਮਕਮ੍ਮਂ ਕਰੋਨ੍ਤਾਨਂ ਭਿਕ੍ਖੂਨਮਨ੍ਤਰੇ ਨਿਸੀਦਿਤ੍ਵਾ ਤਂ ‘‘ਅਧਮ੍ਮ’’ਨ੍ਤਿ ਜਾਨਿਤ੍ਵਾਪਿ ਤਂ ਵਾਰੇਤੁਂ ਅਸਕ੍ਕੋਨ੍ਤਸ੍ਸ ਏਕਸ੍ਸ ‘‘ਨ ਮੇਤਂ ਖਮਤੀ’’ਤਿ ਚਿਤ੍ਤੇਨ ਅਧਿਟ੍ਠਾਨਮੁਦ੍ਦਿਟ੍ਠਨ੍ਤਿ ਵੁਤ੍ਤਂ ਹੋਤਿ. ਦ੍ਵਿਨ੍ਨਂ ਵਾ ਤਿਣ੍ਣਮੇਵ ਚਾਤਿ ਤਮੇਵ ਵਾਰੇਤੁਂ ਅਸਕ੍ਕੋਨ੍ਤਾਨਂ ਦ੍ਵਿਨ੍ਨਂ ਵਾ ਤਿਣ੍ਣਂ ਵਾ ਭਿਕ੍ਖੂਨਂ ਅਞ੍ਞਮਞ੍ਞਂ ‘‘ਨ ਮੇਤਂ ਖਮਤੀ’’ਤਿ ਦਿਟ੍ਠਾਵਿਕਮ੍ਮਂ ਸਕਸਕਦਿਟ੍ਠਿਯਾ ਪਕਾਸਨਂ ਉਦ੍ਦਿਟ੍ਠਨ੍ਤਿ ਅਤ੍ਥੋ. ਤਤੋ ਉਦ੍ਧਂ ਤੀਹਿ ਉਦ੍ਧਂ ਚਤੁਨ੍ਨਂ ਕਮ੍ਮਸ੍ਸ ਪਟਿਕ੍ਕੋਸਨਂ ‘‘ਇਦਂ ਅਧਮ੍ਮਕਮ੍ਮਂ ਮਾ ਕਰੋਥਾ’’ਤਿ ਪਟਿਕ੍ਖਿਪਨਂ ਉਦ੍ਦਿਟ੍ਠਨ੍ਤਿ ਅਤ੍ਥੋ.

੩੧੦੧. ਵਿਸ੍ਸਾਸਗ੍ਗਾਹਲਕ੍ਖਣਂ ਅਗ੍ਗਹਿਤਗ੍ਗਹਣੇਨ ਪਞ੍ਚਵਿਧਨ੍ਤਿ ਦਸ੍ਸੇਤੁਮਾਹ ‘‘ਸਨ੍ਦਿਟ੍ਠੋ’’ਤਿਆਦਿ. ਯੋਜਨਾ ਪਨੇਤ੍ਥ ਏਵਂ ਵੇਦਿਤਬ੍ਬਾ – ਸਨ੍ਦਿਟ੍ਠੋ ਚ ਹੋਤਿ, ਜੀਵਤਿ ਚ, ਗਹਿਤੇ ਚ ਅਤ੍ਤਮਨੋ ਹੋਤਿ, ਸਮ੍ਭਤ੍ਤੋ ਚ ਹੋਤਿ, ਜੀਵਤਿ ਚ, ਗਹਿਤੇ ਚ ਅਤ੍ਤਮਨੋ ਹੋਤਿ, ਆਲਪਿਤੋ ਚ ਹੋਤਿ, ਜੀਵਤਿ ਚ, ਗਹਿਤੇ ਚ ਅਤ੍ਤਮਨੋ ਹੋਤੀਤਿ ਏਵਂ ਸਨ੍ਦਿਟ੍ਠਸਮ੍ਭਤ੍ਤਆਲਪਿਤਾਨਂ ਤਿਣ੍ਣਮੇਕੇਕਸ੍ਸ ਤੀਣਿ ਤੀਣਿ ਵਿਸ੍ਸਾਸਗ੍ਗਾਹਲਕ੍ਖਣਾਨਿ ਕਤ੍ਵਾ ਨਵਵਿਧਂ ਹੋਤੀਤਿ ਵੇਦਿਤਬ੍ਬਂ. ਵਚਨਤ੍ਥੋ, ਪਨੇਤ੍ਥ ਵਿਨਿਚ੍ਛਯੋ ਚ ਹੇਟ੍ਠਾ ਵੁਤ੍ਤੋਵ.

੩੧੦੨. ਸੀਲਵਿਪਤ੍ਤਿ, ਦਿਟ੍ਠਿਵਿਪਤ੍ਤਿ ਚ ਆਚਾਰਾਜੀਵਸਮ੍ਭਵਾ ਦ੍ਵੇ ਵਿਪਤ੍ਤਿਯੋ ਚਾਤਿ ਯੋਜਨਾ, ਆਚਾਰਵਿਪਤ੍ਤਿ, ਆਜੀਵਵਿਪਤ੍ਤਿ ਚਾਤਿ ਵੁਤ੍ਤਂ ਹੋਤਿ.

੩੧੦੩. ਤਤ੍ਥਾਤਿ ਤੇਸੁ ਚਤੂਸੁ ਵਿਪਤ੍ਤੀਸੁ. ਅਪ੍ਪਟਿਕਮ੍ਮਾ ਪਾਰਾਜਿਕਾ ਵੁਟ੍ਠਾਨਗਾਮਿਨੀ ਸਙ੍ਘਾਦਿਸੇਸਾਪਤ੍ਤਿਕਾ ਦੁਵੇ ਆਪਤ੍ਤਿਯੋ ਸੀਲਵਿਪਤ੍ਤੀਤਿ ਪਕਾਸਿਤਾਤਿ ਯੋਜਨਾ.

੩੧੦੪. ਯਾ ਚ ਅਨ੍ਤਗ੍ਗਾਹਿਕਾ ਦਿਟ੍ਠਿ, ਯਾ ਦਸਵਤ੍ਥੁਕਾ ਦਿਟ੍ਠਿ, ਅਯਂ ਦੁਵਿਧਾ ਦਿਟ੍ਠਿ ਦਿਟ੍ਠਿਵਿਪਤ੍ਤੀਤਿ ਦੀਪਿਤਾਤਿ ਯੋਜਨਾ. ਤਤ੍ਥ ਅਨ੍ਤਗ੍ਗਾਹਿਕਦਿਟ੍ਠਿ ਨਾਮ ਉਚ੍ਛੇਦਨ੍ਤਸਸ੍ਸਤਨ੍ਤਗਾਹਵਸੇਨ ਪਵਤ੍ਤਾ ਦਿਟ੍ਠਿ. ‘‘ਨਤ੍ਥਿ ਦਿਨ੍ਨ’’ਨ੍ਤਿਆਦਿਨਯਪ੍ਪਵਤ੍ਤਾ ਦਸਵਤ੍ਥੁਕਾ ਦਿਟ੍ਠਿ.

੩੧੦੫. ਥੁਲ੍ਲਚ੍ਚਯਾਦਿਕਾ ਦੇਸਨਾਗਾਮਿਨਿਕਾ ਯਾ ਪਞ੍ਚ ਆਪਤ੍ਤਿਯੋ, ਆਚਾਰਕੁਸਲੇਨ ਭਗਵਤਾ ਸਾ ਆਚਾਰਵਿਪਤ੍ਤੀਤਿ ਵੁਤ੍ਤਾਤਿ ਯੋਜਨਾ. ਆਦਿ-ਸਦ੍ਦੇਨ ਪਾਚਿਤ੍ਤਿਯਪਾਟਿਦੇਸਨੀਯਦੁਕ੍ਕਟਦੁਬ੍ਭਾਸਿਤਾਨਂ ਗਹਣਂ. ਯਾਤਿ ਪਞ੍ਚਾਪਤ੍ਤਿਯੋ ਅਪੇਕ੍ਖਿਤ੍ਵਾ ਬਹੁਤ੍ਤਂ. ਸਾਤਿ ਆਚਾਰਵਿਪਤ੍ਤਿ ਸਾਮਞ੍ਞਮਪੇਕ੍ਖਿਤ੍ਵਾ ਏਕਤ੍ਤਂ.

੩੧੦੬. ਕੁਹਨਾਦੀਤਿ ਆਦਿ-ਸਦ੍ਦੇਨ ਲਪਨਾ ਨੇਮਿਤ੍ਤਿਕਤਾ ਨਿਪ੍ਪੇਸਿਕਤਾ ਲਾਭੇਨ ਲਾਭਂ ਨਿਜਿਗੀਸਨਤਾ ਗਹਿਤਾ, ਕੁਹਨਾਦੀਨਂ ਵਿਤ੍ਥਾਰੋ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੧੬) ਵੁਤ੍ਤਨਯੇਨ ਵੇਦਿਤਬ੍ਬੋ. ਆਜੀਵੋ ਪਚ੍ਚਯੋ ਹੇਤੁ ਯਸ੍ਸਾ ਆਪਤ੍ਤਿਯਾਤਿ ਵਿਗ੍ਗਹੋ. ਛਬ੍ਬਿਧਾਤਿ ਚਤੁਤ੍ਥਪਾਰਾਜਿਕਸਞ੍ਚਰਿਤ੍ਤਥੁਲ੍ਲਚ੍ਚਯਪਾਚਿਤ੍ਤਿਯਪਾਟਿਦੇਸਨੀਯਦੁਕ੍ਕਟਾਪਤ੍ਤੀਨਂ ਵਸੇਨ ਛਬ੍ਬਿਧਾ. ਪਕਾਸਿਤਾ –

‘‘ਆਜੀਵਹੇਤੁ ਆਜੀਵਕਾਰਣਾ ਪਾਪਿਚ੍ਛੋ ਇਚ੍ਛਾਪਕਤੋ ਅਸਨ੍ਤਂ ਅਭੂਤਂ ਉਤ੍ਤਰਿਮਨੁਸ੍ਸਧਮ੍ਮਂ ਉਲ੍ਲਪਤਿ, ਆਪਤ੍ਤਿ ਪਾਰਾਜਿਕਸ੍ਸ. ਆਜੀਵਹੇਤੁ…ਪੇ… ਸਞ੍ਚਰਿਤ੍ਤਂ ਸਮਾਪਜ੍ਜਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ. ਆਜੀਵਹੇਤੁ…ਪੇ… ‘ਯੋ ਤੇ ਵਿਹਾਰੇ ਵਸਤਿ, ਸੋ ਭਿਕ੍ਖੁ ਅਰਹਾ’ਤਿ ਭਣਤਿ, ਪਟਿਜਾਨਨ੍ਤਸ੍ਸ ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਆਜੀਵਹੇਤੁ…ਪੇ… ਭਿਕ੍ਖੁ ਪਣੀਤਭੋਜਨਾਨਿ ਅਗਿਲਾਨੋ ਅਤ੍ਤਨੋ ਅਤ੍ਥਾਯ ਵਿਞ੍ਞਾਪੇਤ੍ਵਾ ਭੁਞ੍ਜਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਆਜੀਵਹੇਤੁ…ਪੇ… ਭਿਕ੍ਖੁਨੀ ਪਣੀਤਭੋਜਨਾਨਿ ਅਗਿਲਾਨਾ ਅਤ੍ਤਨੋ ਅਤ੍ਥਾਯ ਵਿਞ੍ਞਾਪੇਤ੍ਵਾ ਭੁਞ੍ਜਤਿ, ਆਪਤ੍ਤਿ ਪਾਟਿਦੇਸਨੀਯਸ੍ਸ. ਆਜੀਵਹੇਤੁ ਆਜੀਵਕਾਰਣਾ ਸੂਪਂ ਵਾ ਓਦਨਂ ਵਾ ਅਗਿਲਾਨੋ ਅਤ੍ਤਨੋ ਅਤ੍ਥਾਯ ਵਿਞ੍ਞਾਪੇਤ੍ਵਾ ਭੁਞ੍ਜਤਿ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਪਰਿ. ੨੮੭) –

ਦੇਸਿਤਾ. ਇਮਿਨਾ ਆਜੀਵਵਿਪਤ੍ਤਿ ਦੀਪਿਤਾ.

੩੧੦੭. ‘‘ਉਕ੍ਖਿਤ੍ਤੋ’’ਤਿਆਦਿ ਯਥਾਕ੍ਕਮੇਨ ਤੇਸਂ ਤਿਣ੍ਣਂ ਨਾਨਾਸਂਵਾਸਕਾਨਂ ਸਰੂਪਦਸ੍ਸਨਂ. ਤਤ੍ਥ ਤਯੋ ਉਕ੍ਖਿਤ੍ਤਕਾ ਵੁਤ੍ਤਾਯੇਵ.

੩੧੦੮-੯. ‘‘ਯੋ ਸਙ੍ਘੇਨ ਉਕ੍ਖੇਪਨੀਯਕਮ੍ਮਕਤਾਨਂ ਅਧਮ੍ਮਵਾਦੀਨਂ ਪਕ੍ਖੇ ਨਿਸਿਨ੍ਨੋ ‘ਤੁਮ੍ਹੇ ਕਿਂ ਭਣਥਾ’ਤਿ ਤੇਸਞ੍ਚ ਇਤਰੇਸਞ੍ਚ ਲਦ੍ਧਿਂ ਸੁਤ੍ਵਾ ‘ਇਮੇ ਅਧਮ੍ਮਵਾਦਿਨੋ, ਇਤਰੇ ਧਮ੍ਮਵਾਦਿਨੋ’ਤਿ ਚਿਤ੍ਤਂ ਉਪ੍ਪਾਦੇਤਿ, ਅਯਂ ਤੇਸਂ ਮਜ੍ਝੇ ਨਿਸਿਨ੍ਨੋਵ ਤੇਸਂ ਨਾਨਾਸਂਵਾਸਕੋ ਹੋਤਿ, ਕਮ੍ਮਂ ਕੋਪੇਤਿ. ਇਤਰੇਸਮ੍ਪਿ ਹਤ੍ਥਪਾਸਂ ਅਨਾਗਤਤ੍ਤਾ ਕੋਪੇਤੀ’’ਤਿ (ਮਹਾਵ. ਅਟ੍ਠ. ੪੫੫) ਆਗਤ ਅਟ੍ਠਕਥਾਵਿਨਿਚ੍ਛਯਂ ਦਸ੍ਸੇਤੁਮਾਹ ‘‘ਅਧਮ੍ਮਵਾਦਿਪਕ੍ਖਸ੍ਮਿ’’ਨ੍ਤਿਆਦਿ.

ਅਧਮ੍ਮਵਾਦਿਪਕ੍ਖਸ੍ਮਿਨ੍ਤਿ ਉਕ੍ਖੇਪਨੀਯਕਮ੍ਮੇਨ ਨਿਸ੍ਸਾਰਿਤਾਨਂ ਅਧਮ੍ਮਵਾਦੀਨਂ ਪਕ੍ਖਸ੍ਮਿਂ. ਨਿਸਿਨ੍ਨੋਵਾਤਿ ਹਤ੍ਥਪਾਸਂ ਅਵਿਜਹਿਤ੍ਵਾ ਗਣਪੂਰਕੋ ਹੁਤ੍ਵਾ ਨਿਸਿਨ੍ਨੋਵ. ਵਿਚਿਨ੍ਤਯਨ੍ਤਿ ‘‘ਇਮੇ ਨੁ ਖੋ ਧਮ੍ਮਵਾਦਿਨੋ, ਉਦਾਹੁ ਏਤੇ’’ਤਿ ਵਿਵਿਧੇਨਾਕਾਰੇਨ ਚਿਨ੍ਤਯਨ੍ਤੋ. ‘‘ਏਤੇ ਪਨ ਧਮ੍ਮਵਾਦੀ’’ਤਿ ਮਾਨਸਂ ਉਪ੍ਪਾਦੇਤਿ, ਏਵਂ ਉਪ੍ਪਨ੍ਨੇ ਪਨ ਮਾਨਸੇ. ਅਧਮ੍ਮਵਾਦਿਪਕ੍ਖਸ੍ਮਿਂ ਨਿਸਿਨ੍ਨੋਵ ਏਵਂ ਮਾਨਸਂ ਉਪ੍ਪਾਦੇਨ੍ਤੋ ਅਯਂ ਭਿਕ੍ਖੁ. ਲਦ੍ਧਿਯਾਤਿ ਏਵਂ ਉਪ੍ਪਾਦਿਤਮਾਨਸਸਙ੍ਖਾਤਾਯ ਲਦ੍ਧਿਯਾ. ਤੇਸਂ ਅਧਮ੍ਮਵਾਦੀਨਂ ਨਾਨਾਸਂਵਾਸਕੋ ਨਾਮ ਹੋਤੀਤਿ ਪਕਾਸਿਤੋ.

ਤਤ੍ਰਟ੍ਠੋ ਪਨ ਸੋਤਿ ਤਸ੍ਮਿਂ ਅਧਮ੍ਮਵਾਦਿਪਕ੍ਖਸ੍ਮਿਂ ਨਿਸਿਨ੍ਨੋਵ ਸੋ. ਸਦ-ਧਾਤੁਯਾ ਗਤਿਨਿਵਾਰਣਤ੍ਥਤ੍ਤਾ ਤਤ੍ਰ ਨਿਸਿਨ੍ਨੋ ‘‘ਤਤ੍ਰਟ੍ਠੋ’’ਤਿ ਵੁਚ੍ਚਤਿ. ਦ੍ਵਿਨ੍ਨਨ੍ਤਿ ਧਮ੍ਮਵਾਦਿਅਧਮ੍ਮਵਾਦਿਪਕ੍ਖਾਨਂ ਦ੍ਵਿਨ੍ਨਂ ਸਙ੍ਘਾਨਂ. ਕਮ੍ਮਨ੍ਤਿ ਚਤੁਵਗ੍ਗਾਦਿਸਙ੍ਘੇਨ ਕਰਣੀਯਕਮ੍ਮਂ. ਕੋਪੇਤੀਤਿ ਅਧਮ੍ਮਵਾਦੀਨਂ ਅਸਂਵਾਸਭਾਵਂ ਗਨ੍ਤ੍ਵਾ ਤੇਸਂ ਗਣਪੂਰਣਤ੍ਤਾ, ਇਤਰੇਸਂ ਏਕਸੀਮਾਯਂ ਠਤ੍ਵਾ ਹਤ੍ਥਪਾਸਂ ਅਨੁਪਗਤਤ੍ਤਾ, ਛਨ੍ਦਸ੍ਸ ਚ ਅਦਿਨ੍ਨਤ੍ਤਾ ਕਮ੍ਮਂ ਕੋਪੇਤਿ. ਯੋ ਪਨ ਅਧਮ੍ਮਵਾਦੀਨਂ ਪਕ੍ਖੇ ਨਿਸਿਨ੍ਨੋ ‘‘ਅਧਮ੍ਮਵਾਦਿਨੋ ਇਮੇ, ਇਤਰੇ ਧਮ੍ਮਵਾਦਿਨੋ’’ਤਿ ਤੇਸਂ ਮਜ੍ਝੇ ਪਵਿਸਤਿ, ਯਤ੍ਥ ਵਾ ਤਤ੍ਥ ਵਾ ਪਕ੍ਖੇ ਨਿਸਿਨ੍ਨੋ ‘‘ਇਮੇ ਧਮ੍ਮਵਾਦਿਨੋ’’ਤਿ ਗਣ੍ਹਾਤਿ, ਅਯਂ ਅਤ੍ਤਨਾਵ ਅਤ੍ਤਾਨਂ ਸਮਾਨਸਂਵਾਸਕਂ ਕਰੋਤੀਤਿ ਵੇਦਿਤਬ੍ਬੋ.

੩੧੧੦. ਬਹਿਸੀਮਾਗਤੋ ਪਕਤਤ੍ਤੋ ਭਿਕ੍ਖੁ ਸਚੇ ਹਤ੍ਥਪਾਸੇ ਠਿਤੋ ਹੋਤਿ, ਸੋ ਸੀਮਾਯ ਨਾਨਾਸਂਵਾਸਕੋ ਮਤੋਤਿ ਯੋਜਨਾ. ਤਂ ਗਣਪੂਰਣਂ ਕਤ੍ਵਾ ਕਤਕਮ੍ਮਮ੍ਪਿ ਕੁਪ੍ਪਤਿ. ਏਵਂ ਯਥਾਵੁਤ੍ਤਨਿਯਾਮੇਨ ਤਯੋ ਨਾਨਾਸਂਵਾਸਕਾ ਮਹੇਸਿਨਾ ਵੁਤ੍ਤਾਤਿ ਯੋਜਨਾ.

੩੧੧੧. ਚੁਤੋਤਿ ਪਾਰਾਜਿਕਾਪਨ੍ਨੋ ਸਾਸਨਤੋ ਚੁਤਤ੍ਤਾ ‘‘ਚੁਤੋ’’ਤਿ ਗਹਿਤੋ. ‘‘ਭਿਕ੍ਖੁਨੀ ਏਕਾਦਸ ਅਭਬ੍ਬਾ’’ਤਿ ਪਦਚ੍ਛੇਦੋ. ਇਮੇਤਿ ਭੇਦਮਨਪੇਕ੍ਖਿਤ੍ਵਾ ਸਾਮਞ੍ਞੇਨ ਸਤ੍ਤਰਸ ਜਨਾ. ਅਸਂਵਾਸਾਤਿ ਨ ਸਂਵਸਿਤਬ੍ਬਾ, ਨਤ੍ਥਿ ਵਾ ਏਤੇਹਿ ਪਕਤਤ੍ਤਾਨਂ ਏਕਕਮ੍ਮਾਦਿਕੋ ਸਂਵਾਸੋਤਿ ਅਸਂਵਾਸਾ ਨਾਮ ਸਿਯੁਂ.

੩੧੧੨. ਅਸਂਵਾਸਸ੍ਸ ਸਬ੍ਬਸ੍ਸਾਤਿ ਯਥਾਵੁਤ੍ਤਸ੍ਸ ਸਤ੍ਤਰਸਵਿਧਸ੍ਸ ਸਬ੍ਬਸ੍ਸ ਅਸਂਵਾਸਸ੍ਸ. ਤਥਾ ਕਮ੍ਮਾਰਹਸ੍ਸ ਚਾਤਿ ‘‘ਯਸ੍ਸ ਸਙ੍ਘੋ ਕਮ੍ਮਂ ਕਰੋਤਿ, ਸੋ ਨੇਵ ਕਮ੍ਮਪਤ੍ਤੋ, ਨਾਪਿ ਛਨ੍ਦਾਰਹੋ, ਅਪਿਚ ਕਮ੍ਮਾਰਹੋ’’ਤਿ (ਪਰਿ. ੪੮੮) ਏਵਂ ਪਰਿਵਾਰੇ ਵੁਤ੍ਤਕਮ੍ਮਾਰਹਸ੍ਸ ਚ. ਉਮ੍ਮਤ੍ਤਕਾਦੀਨਨ੍ਤਿ ਆਦਿ-ਸਦ੍ਦੇਨ ਖਿਤ੍ਤਚਿਤ੍ਤਾਦੀਨਂ ਗਹਣਂ. ਸਙ੍ਘੇ ਤਜ੍ਜਨੀਯਾਦੀਨਿ ਕਰੋਨ੍ਤੇ. ਪਟਿਕ੍ਖੇਪੋਤਿ ਪਟਿਕ੍ਕੋਸਨਾ. ਨ ਰੂਹਤੀਤਿ ਪਟਿਕ੍ਕੋਸਟ੍ਠਾਨੇ ਨ ਤਿਟ੍ਠਤਿ, ਕਮ੍ਮਂ ਨ ਕੋਪੇਤੀਤਿ ਅਧਿਪ੍ਪਾਯੋ.

੩੧੧੩. ਸਸਂਵਾਸੇਕ…ਪੇ… ਭਿਕ੍ਖੁਨੋਤਿ ਵੁਤ੍ਤਨਯੇਨ ਕਮ੍ਮੇਨ ਵਾ ਲਦ੍ਧਿਯਾ ਵਾ ਅਸਂਵਾਸਿਕਭਾਵਂ ਅਨੁਪਗਤਤ੍ਤਾ ਸਮਾਨਸਂਵਾਸਕਸ੍ਸ ਸੀਮਾਯ ਅਸਂਵਾਸਿਕਭਾਵਂ ਅਨੁਪਗਨ੍ਤ੍ਵਾ ਏਕਸੀਮਾਯ ਠਿਤਸ੍ਸ ਅਨ੍ਤਿਮਵਤ੍ਥੁਂ ਅਨਜ੍ਝਾਪਨ੍ਨਤ੍ਤਾ ਪਕਤਤ੍ਤਸ੍ਸ ਭਿਕ੍ਖੁਨੋ. ਅਨਨ੍ਤਰਸ੍ਸਪਿ ਹਤ੍ਥਪਾਸੇ ਵਚਨੇਨ ਵਚੀਭੇਦਕਰਣੇਨ ਪਟਿਕ੍ਖੇਪੋ ਪਟਿਕ੍ਕੋਸੋ ਰੁਹਤਿ ਪਟਿਕ੍ਕੋਸਨਟ੍ਠਾਨੇਯੇਵ ਤਿਟ੍ਠਤਿ, ਕਮ੍ਮਂ ਕੋਪੇਤੀਤਿ ਅਧਿਪ੍ਪਾਯੋ.

੩੧੧੪. ਛਹਿ ਆਕਾਰੇਹੀਤਿ (ਪਾਚਿ. ਅਟ੍ਠ. ੪੩੮; ਕਙ੍ਖਾ. ਅਟ੍ਠ. ਨਿਦਾਨਵਣ੍ਣਨਾ) ਲਜ੍ਜਿਤਾਯ, ਅਞ੍ਞਾਣਤਾਯ, ਕੁਕ੍ਕੁਚ੍ਚਪਕਤਤਾਯ, ਸਤਿਸਮ੍ਮੋਸਾਯ, ਅਕਪ੍ਪਿਯੇਕਪ੍ਪਿਯਸਞ੍ਞਿਤਾਯ, ਕਪ੍ਪਿਯੇਅਕਪ੍ਪਿਯਸਞ੍ਞਿਤਾਯਾਤਿ ਇਮੇਹਿ ਛਹਿ ਆਕਾਰੇਹਿ. ਪਞ੍ਚ ਸਮਣਕਪ੍ਪਾ ਚ ਵੁਤ੍ਤਾ, ਪਞ੍ਚ ਵਿਸੁਦ੍ਧਿਯੋ ਚ ਵੁਤ੍ਤਾਤਿ ਯੋਜਨਾ.

‘‘ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚਹਿ ਸਮਣਕਪ੍ਪੇਹਿ ਫਲਂ ਪਰਿਭੁਞ੍ਜਿਤੁਂ, ਅਗ੍ਗਿਪਰਿਜਿਤਂ ਸਤ੍ਥਪਰਿਜਿਤਂ ਨਖਪਰਿਜਿਤਂ ਅਬੀਜਂ ਨਿਬ੍ਬਟ੍ਟਬੀਜਞ੍ਞੇਵ ਪਞ੍ਚਮ’’ਨ੍ਤਿ (ਚੂਲ਼ਵ. ੨੫੦) ਖੁਦ੍ਦਕਵਤ੍ਥੁਕੇ ਅਨੁਞ੍ਞਾਤਾ ਪਞ੍ਚ ਸਮਣਕਪ੍ਪਾ ਨਾਮ. ਪਞ੍ਚ ਵਿਸੁਦ੍ਧਿਯੋਤਿ ਪਰਿਵਾਰੇ ਏਕੁਤ੍ਤਰੇ ‘‘ਪਞ੍ਚ ਵਿਸੁਦ੍ਧਿਯੋ’’ਤਿ ਇਮਸ੍ਸ ਨਿਦ੍ਦੇਸੇ ‘‘ਨਿਦਾਨਂ ਉਦ੍ਦਿਸਿਤ੍ਵਾ ਅਵਸੇਸਂ ਸੁਤੇਨ ਸਾਵੇਤਬ੍ਬਂ, ਅਯਂ ਪਠਮਾ ਵਿਸੁਦ੍ਧੀ’’ਤਿਆਦਿਨਾ (ਪਰਿ. ੩੨੫) ਨਯੇਨ ਦਸ੍ਸਿਤਾ ਪਞ੍ਚ ਪਾਤਿਮੋਕ੍ਖੁਦ੍ਦੇਸਸਙ੍ਖਾਤਾ ਪਞ੍ਚ ਵਿਸੁਦ੍ਧਿਯੋ ਚ ‘‘ਸੁਤ੍ਤੁਦ੍ਦੇਸੋ ਪਾਰਿਸੁਦ੍ਧਿਉਪੋਸਥੋ ਅਧਿਟ੍ਠਾਨੁਪੋਸਥੋ ਪਵਾਰਣਾ ਸਾਮਗ੍ਗਿਉਪੋਸਥੋਯੇਵ ਪਞ੍ਚਮੋ’’ਤਿ (ਪਰਿ. ੩੨੫) ਏਵਂ ਵੁਤ੍ਤਾ ਪਞ੍ਚ ਵਿਸੁਦ੍ਧਿਯੋ ਚਾਤਿ ਦ੍ਵੇਪਞ੍ਚਵਿਸੁਦ੍ਧਿਯੋ ‘‘ਦ੍ਵਿਪਞ੍ਚਵਿਞ੍ਞਾਣਾਨੀ’’ਤਿਆਦੀਸੁ ਵਿਯ ਸਾਮਞ੍ਞਵਚਨੇਨ ਸਙ੍ਗਹਿਤਾ.

੩੧੧੫-੭. ਨਿਸ੍ਸੇਸੇਨ ਦੀਯਤਿ ਪਞ੍ਞਪੀਯਤਿ ਏਤ੍ਥ ਸਿਕ੍ਖਾਪਦਨ੍ਤਿ ਨਿਦਾਨਂ, ਤੇਸਂ ਤੇਸਂ ਸਿਕ੍ਖਾਪਦਾਨਂ ਪਞ੍ਞਤ੍ਤਿਯਾ ਠਾਨਭੂਤਂ ਵੇਸਾਲੀਆਦਿ. ਪੁਂ ਵੁਚ੍ਚਤਿ ਨਿਰਯੋ, ਤਂ ਗਲਤਿ ਮਦ੍ਦਤਿ ਨੇਰਯਿਕਦੁਕ੍ਖਂ ਅਨੁਭਵਤੀਤਿ ਪੁਗ੍ਗਲੋ, ਸਤ੍ਤੋ. ਅਰਿਯਪੁਗ੍ਗਲਾ ਤਂਸਦਿਸਤ੍ਤਾ, ਭੂਤਪੁਬ੍ਬਗਤਿਯਾ ਵਾ ‘‘ਪੁਗ੍ਗਲਾ’’ਤਿ ਵੇਦਿਤਬ੍ਬਾ. ਇਧ ਪਨੇਤੇ ਸਿਕ੍ਖਾਪਦਵੀਤਿਕ੍ਕਮਸ੍ਸ ਆਦਿਕਮ੍ਮਿਕਾ ਅਧਿਪ੍ਪੇਤਾ. ਇਦਾਨਿ ਪੁਗ੍ਗਲਨਿਦ੍ਦੇਸਂ ਵਕ੍ਖਤਿ. ਵਸਤਿ ਏਤ੍ਥ ਭਗਵਤੋ ਆਣਾਸਙ੍ਖਾਤਾ ਸਿਕ੍ਖਾਪਦਪਞ੍ਞਤ੍ਤਿ ਤਂ ਪਟਿਚ੍ਚ ਪਵਤ੍ਤਤੀਤਿ ਵਤ੍ਥੁ, ਤਸ੍ਸ ਤਸ੍ਸ ਪੁਗ੍ਗਲਸ੍ਸ ਸਿਕ੍ਖਾਪਦਪਞ੍ਞਤ੍ਤਿਹੇਤੁਭੂਤੋ ਅਜ੍ਝਾਚਾਰੋ.

ਵਿਧਾਨਂ ਵਿਭਜਨਂ ਵਿਧਿ, ਪਭੇਦੋ. ਪਞ੍ਞਾਪੀਯਤਿ ਭਗਵਤੋ ਆਣਾ ਪਕਾਰੇਨ ਞਾਪੀਯਤਿ ਏਤਾਯਾਤਿ ਪਞ੍ਞਤ੍ਤਿ, ਪਞ੍ਞਤ੍ਤਿਯਾ ਵਿਧਿ ਪਭੇਦੋ ‘‘ਪਞ੍ਞਤ੍ਤਿਵਿਧਿ’’ਨ੍ਤਿ ਵਤ੍ਤਬ੍ਬੇ ‘‘ਵਿਧਿਂ ਪਞ੍ਞਤ੍ਤਿਯਾ’’ਤਿ ਗਾਥਾਬਨ੍ਧਵਸੇਨ ਅਸਮਤ੍ਥਨਿਦ੍ਦੇਸੋ. ਸਾ ਪਨ ਪਞ੍ਞਤ੍ਤਿਵਿਧਿ ਪਞ੍ਞਤ੍ਤਿਅਨੁਪਞ੍ਞਤ੍ਤਿ ਅਨੁਪ੍ਪਨ੍ਨਪਞ੍ਞਤ੍ਤਿ ਸਬ੍ਬਤ੍ਥਪਞ੍ਞਤ੍ਤਿ ਪਦੇਸਪਞ੍ਞਤ੍ਤਿ ਸਾਧਾਰਣਪਞ੍ਞਤ੍ਤਿ ਅਸਾਧਾਰਣਪਞ੍ਞਤ੍ਤਿ ਏਕਤੋਪਞ੍ਞਤ੍ਤਿ ਉਭਤੋਪਞ੍ਞਤ੍ਤਿਵਸੇਨ ਨਵਵਿਧਾ ਹੋਤਿ.

‘‘ਵਿਪਤ੍ਤਿ ਆਪਤ੍ਤਿ ਅਨਾਪਤ੍ਤੀ’’ਤਿ ਪਦਚ੍ਛੇਦੋ, ਵਿਪਜ੍ਜਨ੍ਤਿ ਏਤਾਯ ਸੀਲਾਦਯੋਤਿ ਵਿਪਤ੍ਤਿ. ਸਾ ਪਨ ਸੀਲਆਚਾਰਦਿਟ੍ਠਿਆਜੀਵਾਨਂ ਵਸੇਨ ਚਤੁਬ੍ਬਿਧਾ. ਸਾ ਪਨ ਉਦ੍ਦੇਸਵਸੇਨ ਹੇਟ੍ਠਾ ਦਸ੍ਸਿਤਾਵ. ਆਪਜ੍ਜਨ੍ਤਿ ਏਤਾਯ ਅਕੁਸਲਾਬ੍ਯਾਕਤਭੂਤਾਯ ਭਗਵਤੋ ਆਣਾਵੀਤਿਕ੍ਕਮਨ੍ਤਿ ਆਪਤ੍ਤਿ. ਸਾ ਪੁਬ੍ਬਪਯੋਗਾਦਿਵਸੇਨ ਅਨੇਕਪ੍ਪਭੇਦਾ ਆਪਤ੍ਤਿ. ਅਨਾਪਤ੍ਤਿ ਅਜਾਨਨਾਦਿਵਸੇਨ ਆਣਾਯ ਅਨਤਿਕ੍ਕਮਨਂ. ਸਮੁਟ੍ਠਾਤਿ ਏਤੇਹਿ ਆਪਤ੍ਤੀਤਿ ਸਮੁਟ੍ਠਾਨਾਨਿ, ਕਾਯਾਦਿਵਸੇਨ ਛਬ੍ਬਿਧਾਨਿ ਆਪਤ੍ਤਿਕਾਰਣਾਨਿ. ਸਮੁਟ੍ਠਾਨਾਨਂ ਨਯੋ ਸਮੁਟ੍ਠਾਨਨਯੋ, ਤਂ.

ਵਜ੍ਜਞ੍ਚ ਕਮ੍ਮਞ੍ਚ ਕਿਰਿਯਾ ਚ ਸਞ੍ਞਾ ਚ ਚਿਤ੍ਤਞ੍ਚ ਆਣਤ੍ਤਿ ਚ ਵਜ੍ਜਕਮ੍ਮਕ੍ਰਿਯਾਸਞ੍ਞਾਚਿਤ੍ਤਾਣਤ੍ਤਿਯੋ, ਤਾਸਂ ਵਿਧਿ ਤਥਾ ਵੁਚ੍ਚਤਿ, ਤਂ. ਵਜ੍ਜਵਿਧਿਨ੍ਤਿ ‘‘ਯਸ੍ਸਾ ਸਚਿਤ੍ਤਕਪਕ੍ਖੇ ਚਿਤ੍ਤਂ ਅਕੁਸਲਮੇਵ ਹੋਤਿ, ਅਯਂ ਲੋਕਵਜ੍ਜਾ, ਸੇਸਾ ਪਣ੍ਣਤ੍ਤਿਵਜ੍ਜਾ’’ਤਿ (ਕਙ੍ਖਾ. ਅਟ੍ਠ. ਪਠਮਪਾਰਾਜਿਕਵਣ੍ਣਨਾ) ਵੁਤ੍ਤਂ ਵਜ੍ਜਵਿਧਿਂ. ਕਮ੍ਮਵਿਧਿਨ੍ਤਿ ‘‘ਸਬ੍ਬਾ ਚ ਕਾਯਕਮ੍ਮਵਚੀਕਮ੍ਮਤਦੁਭਯਵਸੇਨ ਤਿਵਿਧਾ ਹੋਨ੍ਤੀ’’ਤਿ (ਕਙ੍ਖਾ. ਅਟ੍ਠ. ਪਠਮਪਾਰਾਜਿਕਵਣ੍ਣਨਾ) ਦਸ੍ਸਿਤਂ ਕਮ੍ਮਵਿਧਿਂ. ਕ੍ਰਿਯਾਵਿਧਿਨ੍ਤਿ ‘‘ਅਤ੍ਥਾਪਤ੍ਤਿ ਕਿਰਿਯਤੋ ਸਮੁਟ੍ਠਾਤਿ, ਅਤ੍ਥਿ ਅਕਿਰਿਯਤੋ, ਅਤ੍ਥਿ ਕਿਰਿਯਾਕਿਰਿਯਤੋ, ਅਤ੍ਥਿ ਸਿਯਾ ਕਿਰਿਯਤੋ ਸਿਯਾ ਅਕਿਰਿਯਤੋ’’ਤਿਆਦਿਨਾ (ਕਙ੍ਖਾ. ਅਟ੍ਠ. ਪਠਮਪਾਰਾਜਿਕਵਣ੍ਣਨਾ) ਨਯੇਨ ਦਸ੍ਸਿਤਂ ਕਿਰਿਯਾਵਿਧਿਂ. ਸਞ੍ਞਾਵਿਧਿਨ੍ਤਿ ‘‘ਸਞ੍ਞਾਵਿਮੋਕ੍ਖਾ’’ਤਿਆਦਿਨਾ (ਕਙ੍ਖਾ. ਅਟ੍ਠ. ਪਠਮਪਾਰਾਜਿਕਵਣ੍ਣਨਾ) ਨਯੇਨ ਦਸ੍ਸਿਤਂ ਸਞ੍ਞਾਵਿਧਿਂ.

ਚਿਤ੍ਤਵਿਧਿਨ੍ਤਿ ‘‘ਸਬ੍ਬਾਪਿ ਚਿਤ੍ਤਵਸੇਨ ਦੁਵਿਧਾ ਹੋਨ੍ਤਿ ਸਚਿਤ੍ਤਕਾ, ਅਚਿਤ੍ਤਕਾ ਚਾ’’ਤਿ (ਕਙ੍ਖਾ. ਅਟ੍ਠ. ਪਠਮਪਾਰਾਜਿਕਵਣ੍ਣਨਾ) ਵੁਤ੍ਤਂ ਚਿਤ੍ਤਵਿਧਿਂ. ਆਣਤ੍ਤਿਵਿਧਿਨ੍ਤਿ ‘‘ਸਾਣਤ੍ਤਿਕਂ ਅਨਾਣਤ੍ਤਿਕ’’ਨ੍ਤਿ ਵੁਤ੍ਤਂ ਆਣਤ੍ਤਿਵਿਧਿਂ. ਅਙ੍ਗਵਿਧਾਨਨ੍ਤਿ ਸਬ੍ਬਸਿਕ੍ਖਾਪਦੇਸੁ ਆਪਤ੍ਤੀਨਂ ਵੁਤ੍ਤਂ ਅਙ੍ਗਵਿਧਾਨਞ੍ਚ. ਵੇਦਨਾਤ੍ਤਿਕਂ, ਕੁਸਲਤ੍ਤਿਕਞ੍ਚਾਤਿ ਯੋਜਨਾ. ਤਂ ਪਨ ‘‘ਅਕੁਸਲਚਿਤ੍ਤਂ, ਦ੍ਵਿਚਿਤ੍ਤਂ, ਤਿਚਿਤ੍ਤਂ, ਦੁਕ੍ਖਵੇਦਨਂ, ਦ੍ਵਿਵੇਦਨਂ, ਤਿਵੇਦਨ’’ਨ੍ਤਿ ਤਤ੍ਥ ਤਤ੍ਥ ਦਸ੍ਸਿਤਮੇਵ.

ਸਤ੍ਤਰਸਵਿਧਂ ਏਤਂ ਲਕ੍ਖਣਨ੍ਤਿ ਯਥਾਵੁਤ੍ਤਨਿਦਾਨਾਦਿਸਤ੍ਤਰਸਪ੍ਪਭੇਦਂ ਸਬ੍ਬਸਿਕ੍ਖਾਪਦਾਨਂ ਸਾਧਾਰਣਲਕ੍ਖਣਂ. ਦਸ੍ਸੇਤ੍ਵਾਤਿ ਪਕਾਸੇਤ੍ਵਾ. ਬੁਧੋ ਵਿਨਯਕੁਸਲੋ. ਤਤ੍ਥ ਤਤ੍ਥ ਸਿਕ੍ਖਾਪਦੇਸੁ ਯਥਾਰਹਂ ਯੋਜੇਯ੍ਯਾਤਿ ਸਮ੍ਬਨ੍ਧੋ.

੩੧੧੮. ਇਮੇਸੁ ਸਤ੍ਤਰਸਸੁ ਲਕ੍ਖਣੇਸੁ ਨਿਦਾਨਪੁਗ੍ਗਲੇ ਤਾਵ ਨਿਦ੍ਦਿਸਿਤੁਮਾਹ ‘‘ਨਿਦਾਨ’’ਨ੍ਤਿਆਦਿ. ਤਤ੍ਥਾਤਿ ਤੇਸੁ ਸਤ੍ਤਰਸਸੁ ਸਾਧਾਰਣਲਕ੍ਖਣੇਸੁ, ਨਿਦ੍ਧਾਰਣੇ ਚੇਤਂ ਭੁਮ੍ਮਂ. ਨਿਦਾਨਨ੍ਤਿ ਨਿਦ੍ਧਾਰਿਤਬ੍ਬਦਸ੍ਸਨਂ. ‘‘ਪੁਰ’’ਨ੍ਤਿ ਇਦਂ ‘‘ਵੇਸਾਲੀ’’ਤਿਆਦਿਪਦੇਹਿ ਪਚ੍ਚੇਕਂ ਯੋਜੇਤਬ੍ਬਂ. ਸਕ੍ਕਭਗ੍ਗਾਤਿ ਏਤੇਹਿ ਜਨਪਦਵਾਚੀਹਿ ਸਦ੍ਦੇਹਿ ਠਾਨਨਿਸ੍ਸਿਤਾ ਨਾਗਰਾਵ ਗਹੇਤਬ੍ਬਾ. ਤਾਨਿ ਚ ‘‘ਸਕ੍ਕੇਸੁ ਵਿਹਰਤਿ ਕਪਿਲਵਤ੍ਥੁਸ੍ਮਿਂ, ਭਗ੍ਗੇਸੁ ਵਿਹਰਤਿ ਸੁਸੁਮਾਰਗਿਰੇ’’ਤਿ ਤਤ੍ਥ ਤਤ੍ਥ ਸਿਕ੍ਖਾਪਦਨਿਦਾਨੇ ਨਿਦਸ੍ਸਿਤਾਨੇਵ.

੩੧੧੯. ‘‘ਦਸ ਵੇਸਾਲਿਯਾ’’ਤਿਆਦੀਨਂ ਅਤ੍ਥਵਿਨਿਚ੍ਛਯੋ ਉਤ੍ਤਰੇ ਆਵਿ ਭਵਿਸ੍ਸਤਿ. ਗਿਰਿਬ੍ਬਜੇਤਿ ਰਾਜਗਹਨਗਰੇ. ਤਞ੍ਹਿ ਸਮਨ੍ਤਾ ਠਿਤੇਹਿ ਇਸਿਗਿਲਿਆਦੀਹਿ ਪਞ੍ਚਹਿ ਪਬ੍ਬਤੇਹਿ ਵਜਸਦਿਸਨ੍ਤਿ ‘‘ਗਿਰਿਬ੍ਬਜ’’ਨ੍ਤਿ ਵੁਚ੍ਚਤਿ.

੩੧੨੧. ਭਿਕ੍ਖੂਨਂ ਪਾਤਿਮੋਕ੍ਖਸ੍ਮਿਂ ਸੁਦਿਨ੍ਨਧਨਿਯਾਦਯੋ ਤੇਵੀਸਤਿਵਿਧਾ ਆਦਿਕਮ੍ਮਿਕਪੁਗ੍ਗਲਾ ਵੁਤ੍ਤਾਤਿ ਯੋਜਨਾ.

੩੧੨੨. ਉਭਯਪਾਤਿਮੋਕ੍ਖੇ ਆਗਤਾ ਤੇ ਸਬ੍ਬੇ ਆਦਿਕਮ੍ਮਿਕਪੁਗ੍ਗਲਾ ਪਰਿਪਿਣ੍ਡਿਤਾ ਤਿਂਸ ਭਵਨ੍ਤੀਤਿ ਯੋਜਨਾ. ਵਤ੍ਥੁਆਦੀਨਂ ਵਿਨਿਚ੍ਛਯੋ ਉਤ੍ਤਰੇ ਵਕ੍ਖਮਾਨਤ੍ਤਾ ਇਧ ਨ ਵੁਤ੍ਤੋ. ਨਨੁ ਚ ਨਿਦਾਨਪੁਗ੍ਗਲਵਿਨਿਚ੍ਛਯਮ੍ਪਿ ਤਤ੍ਥ ਵਕ੍ਖਤੀਤਿ ਸੋ ਇਧ ਕਸ੍ਮਾ ਵੁਤ੍ਤੋਤਿ? ਨਾਯਂ ਦੋਸੋ, ਇਮਸ੍ਸ ਪਕਰਣਤ੍ਤਾ ਇਧਾਪਿ ਵਤ੍ਤਬ੍ਬੋਤਿ. ਯਦਿ ਏਵਂ ਵਤ੍ਥੁਆਦਿਵਿਨਿਚ੍ਛਯੋਪਿ ਇਧ ਵਤ੍ਤਬ੍ਬੋ ਸਿਯਾ, ਸੋ ਕਸ੍ਮਾ ਨ ਵੁਤ੍ਤੋਤਿ? ਏਕਯੋਗਨਿਦ੍ਦਿਟ੍ਠਸ੍ਸ ਇਮਸ੍ਸ ਵਚਨੇਨ ਸੋਪਿ ਵੁਤ੍ਤੋਯੇਵ ਹੋਤੀਤਿ ਏਕਦੇਸਦਸ੍ਸਨਵਸੇਨ ਸਂਖਿਤ੍ਤੋਤਿ ਦਟ੍ਠਬ੍ਬੋ.

੩੧੨੩. ਯੋ ਏਨਂ ਤਰੁਂ ਜਾਨਾਤਿ, ਸੋ ਪਞ੍ਞਤ੍ਤਿਂ ਅਸੇਸਤੋ ਜਾਨਾਤੀਤਿ ਸਮ੍ਬਨ੍ਧੋ. ਏਤ੍ਥ ‘‘ਏਨਂ ਤਰੁ’’ਨ੍ਤਿ ਇਮਿਨਾ ਨਿਦਾਨਾਦਿਸਤ੍ਤਰਸਪ੍ਪਕਾਰਂ ਸਬ੍ਬਸਿਕ੍ਖਾਪਦਸਾਧਾਰਣਲਕ੍ਖਣਸਮੁਦਾਯਂ ਰੂਪਕੇਨ ਦਸ੍ਸੇਤਿ. ਕਿਂ ਵਿਸਿਟ੍ਠਂ ਤਰੁਨ੍ਤਿ ਆਹ ‘‘ਤਿਮੂਲ’’ਨ੍ਤਿਆਦਿ.

ਤਤ੍ਥ ਤਿਮੂਲਨ੍ਤਿ ਨਿਦਾਨਪੁਗ੍ਗਲਵਤ੍ਥੁਸਙ੍ਖਾਤਾਨਿ ਤੀਣਿ ਮੂਲਾਨਿ ਏਤਸ੍ਸਾਤਿ ਤਿਮੂਲਂ. ਨਵਪਤ੍ਤਨ੍ਤਿ ਨਵਵਿਧਪਣ੍ਣਤ੍ਤਿਸਙ੍ਖਾਤਾਨਿ ਪਤ੍ਤਾਨਿ ਏਤਸ੍ਸਾਤਿ ਨਵਪਤ੍ਤਂ. ਦ੍ਵਯਙ੍ਕੁਰਨ੍ਤਿ ਲੋਕਵਜ੍ਜਪਣ੍ਣਤ੍ਤਿਵਜ੍ਜਸਙ੍ਖਾਤਾ ਦ੍ਵੇ ਅਙ੍ਕੁਰਾ ਏਤਸ੍ਸਾਤਿ ਦ੍ਵਯਙ੍ਕੁਰਂ. ‘‘ਦ੍ਵਿਅਙ੍ਕੁਰ’’ਨ੍ਤਿ ਵਤ੍ਤਬ੍ਬੇ ਇ-ਕਾਰਸ੍ਸ ਅਯਾਦੇਸਂ ਕਤ੍ਵਾ ‘‘ਦ੍ਵਯਙ੍ਕੁਰ’’ਨ੍ਤਿ ਵੁਤ੍ਤਂ. ਸਤ੍ਤਫਲਨ੍ਤਿ ਆਣਤ੍ਤਿਆਪਤ੍ਤਿਅਨਾਪਤ੍ਤਿਵਿਪਤ੍ਤਿਸਞ੍ਞਾਵੇਦਨਾਕੁਸਲਤ੍ਤਿਕਸਙ੍ਖਾਤਾਨਿ ਸਤ੍ਤ ਫਲਾਨਿ ਏਤਸ੍ਸਾਤਿ ਸਤ੍ਤਫਲਂ. ਛਪੁਪ੍ਫਨ੍ਤਿ ਛਸਮੁਟ੍ਠਾਨਸਙ੍ਖਾਤਾਨਿ ਪੁਪ੍ਫਾਨਿ ਏਤਸ੍ਸਾਤਿ ਛਪੁਪ੍ਫਂ. ਦ੍ਵਿਪ੍ਪਭਵਨ੍ਤਿ ਚਿਤ੍ਤਕਮ੍ਮਸਙ੍ਖਾਤਾ ਦ੍ਵੇ ਪਭਵਾ ਏਤਸ੍ਸਾਤਿ ਦ੍ਵਿਪ੍ਪਭਵਂ. ਦ੍ਵਿਸਾਖਨ੍ਤਿ ਕਿਰਿਯਅਙ੍ਗਸਙ੍ਖਾਤਾ ਦ੍ਵੇ ਸਾਖਾ ਏਤਸ੍ਸਾਤਿ ਦ੍ਵਿਸਾਖਂ. ਏਨਂ ਤਰੁਂ ਯੋ ਜਾਨਾਤੀਤਿ ਯੋ ਵੁਤ੍ਤੋ ਭਿਕ੍ਖੁ ਵੁਤ੍ਤਸਰੂਪਸਾਧਾਰਣਸਤ੍ਤਰਸਲਕ੍ਖਣਰਾਸਿਵਿਨਿਚ੍ਛਯਸਙ੍ਖਾਤਤਰੁਂ ਜਾਨਾਤਿ. ਸੋਤਿ ਸੋ ਭਿਕ੍ਖੁ. ਪਞ੍ਞਤ੍ਤਿਨ੍ਤਿ ਵਿਨਯਪਿਟਕਂ. ਅਸੇਸਤੋਤਿ ਸਬ੍ਬਸੋ.

੩੧੨੪. ਇਤਿ ਏਵਂ ਮਧੁਰਪਦਤ੍ਥਂ ਅਨਾਕੁਲਂ ਪਰਮਂ ਉਤ੍ਤਮਂ ਇਮਂ ਵਿਨਿਚ੍ਛਯਂ ਯੋ ਪਠਤਿ ਵਾਚੁਗ੍ਗਤਂ ਕਰੋਨ੍ਤੋ ਪਰਿਯਾਪੁਣਾਤਿ, ਗਰੁਸਨ੍ਤਿਕੇ ਸਾਧੁਕਂ ਸੁਣਾਤਿ, ਪਰਿਪੁਚ੍ਛਤੇ ਚ ਅਤ੍ਥਂ ਪਰਿਪੁਚ੍ਛਤਿ ਚ, ਸੋ ਭਿਕ੍ਖੁ ਵਿਨਯ ਵਿਨਿਚ੍ਛਯੇ ਉਪਾਲਿਸਮੋ ਭਵਤਿ ਵਿਨਯਧਰਾਨਂ ਏਤਦਗ੍ਗਟ੍ਠਾਨੇ ਨਿਕ੍ਖਿਤ੍ਤੇਨ ਉਪਾਲਿਮਹਾਥੇਰੇਨ ਸਦਿਸੋ ਭਵਤੀਤਿ ਯੋਜਨਾ.

ਇਤਿ ਵਿਨਯਤ੍ਥਸਾਰਸਨ੍ਦੀਪਨਿਯਾ ਵਿਨਯਵਿਨਿਚ੍ਛਯਵਣ੍ਣਨਾਯ

ਪਕਿਣ੍ਣਕਵਿਨਿਚ੍ਛਯਕਥਾਵਣ੍ਣਨਾ ਨਿਟ੍ਠਿਤਾ.