ਭੇਸਜ੍ਜਕ੍ਖਨ੍ਧਕਕਥਾਵਣ੍ਣਨਾ

੨੬੬੫. ਗਹਪਤਿਸ੍ਸ ਭੂਮਿ, ਸਮ੍ਮੁਤਿਭੂਮਿ, ਉਸ੍ਸਾਵਨਨ੍ਤਿਕਾਭੂਮਿ, ਗੋਨਿਸਾਦਿਭੂਮੀਤਿ ਕਪ੍ਪਿਯਭੂਮਿਯੋ ਚਤਸ੍ਸੋ ਹੋਨ੍ਤੀਤਿ ਵੁਤ੍ਤਾ ਭਗਵਤਾਤਿ ਯੋਜਨਾ.

੨੬੬੬. ਕਥਂ ਕਪ੍ਪਿਯਂ ਕਤ੍ਤਬ੍ਬਨ੍ਤਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਚਤਸ੍ਸੋ ਕਪ੍ਪਿਯਭੂਮਿਯੋ ਉਸ੍ਸਾਵਨਨ੍ਤਿਕਂ ਗੋਨਿਸਾਦਿਕਂ ਗਹਪਤਿਂ ਸਮ੍ਮੁਤਿ’’ਨ੍ਤਿ (ਮਹਾਵ. ੨੯੫) ਏਵਂ ਚਤਸ੍ਸੋ ਭੂਮਿਯੋ ਉਦ੍ਧਰਿਤ੍ਵਾ ਤਾਸਂ ਸਾਮਞ੍ਞਲਕ੍ਖਣਂ ਦਸ੍ਸੇਤੁਮਾਹ ‘‘ਸਙ੍ਘਸ੍ਸਾ’’ਤਿਆਦਿ. ਸਙ੍ਘਸ੍ਸ ਸਨ੍ਤਕਂ ਵਾਸਤ੍ਥਾਯ ਕਤਂ ਗੇਹਂ ਵਾ ਭਿਕ੍ਖੁਨੋ ਸਨ੍ਤਕਂ ਵਾਸਤ੍ਥਾਯ ਕਤਂ ਗੇਹਂ ਵਾਤਿ ਯੋਜਨਾ. ਕਪ੍ਪਿਯਂ ਕਤ੍ਤਬ੍ਬਨ੍ਤਿ ਕਪ੍ਪਿਯਟ੍ਠਾਨਂ ਕਤ੍ਤਬ੍ਬਂ. ਸਹਸੇਯ੍ਯਪ੍ਪਹੋਨਕਨ੍ਤਿ ਸਬ੍ਬਚ੍ਛਨ੍ਨਪਰਿਚ੍ਛਨ੍ਨਾਦਿਲਕ੍ਖਣੇਨ ਸਹਸੇਯ੍ਯਾਰਹਂ.

੨੬੬੭. ਇਦਾਨਿ ਚਤਸ੍ਸੋਪਿ ਭੂਮਿਯੋ ਸਰੂਪਤੋ ਦਸ੍ਸੇਤੁਮਾਹ ‘‘ਠਪੇਤ੍ਵਾ’’ਤਿਆਦਿ. ਭਿਕ੍ਖੁਂ ਠਪੇਤ੍ਵਾ ਅਞ੍ਞੇਹਿ ਕਪ੍ਪਿਯਭੂਮਿਯਾ ਅਤ੍ਥਾਯ ਦਿਨ੍ਨਂ ਵਾ ਤੇਸਂ ਸਨ੍ਤਕਂ ਵਾ ਯਂ ਗੇਹਂ, ਇਦਂ ਏਵ ਗਹਪਤਿਭੂਮਿ ਨਾਮਾਤਿ ਯੋਜਨਾ.

੨੬੬੮. ਯਾ ਪਨ ਕੁਟਿ ਸਙ੍ਘੇਨ ਸਮ੍ਮਤਾ ਞਤ੍ਤਿਦੁਤਿਯਾਯ ਕਮ੍ਮਵਾਚਾਯ, ਸਾ ਸਮ੍ਮੁਤਿਕਾ ਨਾਮ. ਤਸ੍ਸਾ ਸਮ੍ਮਨ੍ਨਨਕਾਲੇ ਕਮ੍ਮਵਾਚਂ ਅਵਤ੍ਵਾ ਅਪਲੋਕਨਂ ਵਾ ਕਾਤੁਂ ਵਟ੍ਟਤੇਵਾਤਿ ਯੋਜਨਾ.

੨੬੬੯-੭੦. ਪਠਮਇਟ੍ਠਕਾਯ ਵਾ ਪਠਮਪਾਸਾਣਸ੍ਸ ਵਾ ਪਠਮਤ੍ਥਮ੍ਭਸ੍ਸ ਵਾ ਆਦਿ-ਗ੍ਗਹਣੇਨ ਪਠਮਭਿਤ੍ਤਿਪਾਦਸ੍ਸ ਵਾ ਠਪਨੇ ਪਰੇਸੁ ਮਨੁਸ੍ਸੇਸੁ ਉਕ੍ਖਿਪਿਤ੍ਵਾ ਠਪੇਨ੍ਤੇਸੁ ਸਮਨ੍ਤਤੋ ਪਰਿਵਾਰੇਤ੍ਵਾ ‘‘ਕਪ੍ਪਿਯਕੁਟਿਂ ਕਰੋਮ, ਕਪ੍ਪਿਯਕੁਟਿਂ ਕਰੋਮਾ’’ਤਿ ਅਭਿਕ੍ਖਣਂ ਵਦਨ੍ਤੇਹਿ ਆਮਸਿਤ੍ਵਾ ਵਾ ਸਯਮੇਵ ਉਕ੍ਖਿਪਿਤ੍ਵਾ ਵਾ ਇਟ੍ਠਕਾ ਠਪੇਯ੍ਯ ਪਾਸਾਣੋ ਵਾ ਥਮ੍ਭੋ ਵਾ ਭਿਤ੍ਤਿਪਾਦੋ ਵਾ ਠਪੇਯ੍ਯ ਠਪੇਤਬ੍ਬੋ, ਅਯਂ ਉਸ੍ਸਾਵਨਨ੍ਤਿਕਾ ਕੁਟੀਤਿ ਯੋਜਨਾ.

੨੬੭੧. ਇਟ੍ਠਕਾਦਿਪਤਿਟ੍ਠਾਨਨ੍ਤਿ ਪਠਮਿਟ੍ਠਕਾਦੀਨਂ ਭੂਮਿਯਂ ਪਤਿਟ੍ਠਾਨਂ. ਵਦਤਨ੍ਤਿ ‘‘ਕਪ੍ਪਿਯਕੁਟਿਂ ਕਰੋਮ, ਕਪ੍ਪਿਯਕੁਟਿਂ ਕਰੋਮਾ’’ਤਿ ਵਦਨ੍ਤਾਨਂ. ਸਮਕਾਲਂ ਤੁ ਵਟ੍ਟਤੀਤਿ ਏਕਕਾਲਂ ਵਟ੍ਟਤਿ, ਇਮਿਨਾ ‘‘ਸਚੇ ਹਿ ਅਨਿਟ੍ਠਿਤੇ ਵਚਨੇ ਥਮ੍ਭੋ ਪਤਿਟ੍ਠਾਤਿ, ਅਪ੍ਪਤਿਟ੍ਠਿਤੇ ਵਾ ਤਸ੍ਮਿਂ ਵਚਨਂ ਨਿਟ੍ਠਾਤਿ, ਅਕਤਾ ਹੋਤਿ ਕਪ੍ਪਿਯਕੁਟੀ’’ਤਿ (ਮਹਾਵ. ਅਟ੍ਠ. ੨੯੫) ਅਟ੍ਠਕਥਾਵਿਨਿਚ੍ਛਯੋ ਸੂਚਿਤੋ.

੨੬੭੨. ਆਰਾਮੋ ਸਕਲੋ ਅਪਰਿਕ੍ਖਿਤ੍ਤੋ ਵਾ ਯੇਭੁਯ੍ਯਤੋ ਅਪਰਿਕ੍ਖਿਤ੍ਤੋ ਵਾਤਿ ਦੁਵਿਧੋਪਿ ਵਿਞ੍ਞੂਹਿ ਵਿਨਯਧਰੇਹਿ ‘‘ਗੋਨਿਸਾਦੀ’’ਤਿ ਵੁਚ੍ਚਤਿ. ਪਵੇਸਨਿਵਾਰਣਾਭਾਵੇਨ ਪਵਿਟ੍ਠਾਨਂ ਗੁਨ੍ਨਂ ਨਿਸਜ੍ਜਾਯੋਗਤੋ ਤਥਾ ਵੁਚ੍ਚਤੀਤਿ ਯੋਜਨਾ.

੨੬੭੩. ਪਯੋਜਨਂ ਦਸ੍ਸੇਤੁਮਾਹ ‘‘ਏਤ੍ਥ ਪਕ੍ਕਞ੍ਚਾ’’ਤਿਆਦਿ. ਆਮਿਸਨ੍ਤਿ ਪੁਰਿਮਕਾਲਿਕਦ੍ਵਯਂ. ‘‘ਆਮਿਸ’’ਨ੍ਤਿ ਇਮਿਨਾ ਨਿਰਾਮਿਸਂ ਇਤਰਕਾਲਿਕਦ੍ਵਯਂ ਅਕਪ੍ਪਿਯਕੁਟਿਯਂ ਵੁਤ੍ਥਮ੍ਪਿ ਪਕ੍ਕਮ੍ਪਿ ਕਪ੍ਪਤੀਤਿ ਦੀਪੇਤਿ.

੨੬੭੪-੫. ਇਮਾ ਕਪ੍ਪਿਯਕੁਟਿਯੋ ਕਦਾ ਜਹਿਤਵਤ੍ਥੁਕਾ ਹੋਨ੍ਤੀਤਿ ਆਹ ‘‘ਉਸ੍ਸਾਵਨਨ੍ਤਿਕਾ ਯਾ ਸਾ’’ਤਿਆਦਿ. ਯਾ ਉਸ੍ਸਾਵਨਨ੍ਤਿਕਾ ਯੇਸੁ ਥਮ੍ਭਾਦੀਸੁ ਅਧਿਟ੍ਠਿਤਾ, ਸਾ ਤੇਸੁ ਥਮ੍ਭਾਦੀਸੁ ਅਪਨੀਤੇਸੁ ਤਦਞ੍ਞੇਸੁਪਿ ਥਮ੍ਭਾਦੀਸੁ ਤਿਟ੍ਠਤੀਤਿ ਯੋਜਨਾ.

ਸਬ੍ਬੇਸੁ ਥਮ੍ਭਾਦੀਸੁ ਅਪਨੀਤੇਸੁ ਸਾ ਜਹਿਤਵਤ੍ਥੁਕਾ ਸਿਯਾਤਿ ਯੋਜਨਾ. ਗੋਨਿਸਾਦਿਕੁਟਿ ਪਰਿਕ੍ਖਿਤ੍ਤਾ ਵਤਿਆਦੀਹਿ ਜਹਿਤਵਤ੍ਥੁਕਾ ਸਿਯਾ. ਪਰਿਕ੍ਖਿਤ੍ਤਾਤਿ ਚ ‘‘ਆਰਾਮੋ ਪਨ ਉਪਡ੍ਢਪਰਿਕ੍ਖਿਤ੍ਤੋਪਿ ਬਹੁਤਰਂ ਪਰਿਕ੍ਖਿਤ੍ਤੋਪਿ ਪਰਿਕ੍ਖਿਤ੍ਤੋਯੇਵ ਨਾਮਾ’’ਤਿ (ਮਹਾਵ. ਅਟ੍ਠ. ੨੯੫) ਕੁਰੁਨ੍ਦਿਮਹਾਪਚ੍ਚਰਿਯਾਦੀਸੁ ਵੁਤ੍ਤਤ੍ਤਾ ਨ ਕੇਵਲਂ ਸਬ੍ਬਪਰਿਕ੍ਖਿਤ੍ਤਾਵ, ਉਪਡ੍ਢਪਰਿਕ੍ਖਿਤ੍ਤਾਪਿ ਯੇਭੁਯ੍ਯਪਰਿਕ੍ਖਿਤ੍ਤਾਪਿ ਗਹੇਤਬ੍ਬਾ.

ਸੇਸਾਤਿ ਗਹਪਤਿਸਮ੍ਮੁਤਿਕੁਟਿਯੋ. ਛਦਨਨਾਸਤੋ ਜਹਿਤਵਤ੍ਥੁਕਾ ਸਿਯੁਨ੍ਤਿ ਯੋਜਨਾ. ਛਦਨਨਾਸਤੋਤਿ ਏਤ੍ਥ ‘‘ਗੋਪਾਨਸਿਮਤ੍ਤਂ ਠਪੇਤ੍ਵਾ’’ਤਿ ਸੇਸੋ. ਸਚੇ ਗੋਪਾਨਸੀਨਂ ਉਪਰਿ ਏਕਮ੍ਪਿ ਪਕ੍ਖਪਾਸਮਣ੍ਡਲਂ ਅਤ੍ਥਿ, ਰਕ੍ਖਤਿ. ਯਤ੍ਰ ਪਨਿਮਾ ਚਤਸ੍ਸੋਪਿ ਕਪ੍ਪਿਯਭੂਮਿਯੋ ਨਤ੍ਥਿ, ਤਤ੍ਥ ਕਿਂ ਕਾਤਬ੍ਬਂ? ਅਨੁਪਸਮ੍ਪਨ੍ਨਸ੍ਸ ਦਤ੍ਵਾ ਤਸ੍ਸ ਸਨ੍ਤਕਂ ਕਤ੍ਵਾ ਪਰਿਭੁਞ੍ਜਿਤਬ੍ਬਂ.

੨੬੭੬. ਭਿਕ੍ਖੁਂ ਠਪੇਤ੍ਵਾ ਅਞ੍ਞੇਸਂ ਹਤ੍ਥਤੋ ਪਟਿਗ੍ਗਹੋ ਚ ਤੇਸਂ ਸਨ੍ਨਿਧਿ ਚ ਤੇਸਂ ਅਨ੍ਤੋਵੁਤ੍ਥਞ੍ਚ ਭਿਕ੍ਖੁਸ੍ਸ ਵਟ੍ਟਤੀਤਿ ਯੋਜਨਾ.

੨੬੭੭. ਭਿਕ੍ਖੁਸ੍ਸ ਸਨ੍ਤਕਂ ਸਙ੍ਘਿਕਮ੍ਪਿ ਵਾ ਅਕਪ੍ਪਿਯਭੂਮਿਯਂ ਸਹਸੇਯ੍ਯਪ੍ਪਹੋਨਕੇ ਗੇਹੇ ਅਨ੍ਤੋਵੁਤ੍ਥਞ੍ਚ ਅਨ੍ਤੋਪਕ੍ਕਞ੍ਚ ਭਿਕ੍ਖੁਸ੍ਸ ਨ ਵਟ੍ਟਤਿ. ਭਿਕ੍ਖੁਨਿਯਾ ਸਨ੍ਤਕਂ ਸਙ੍ਘਿਕਮ੍ਪਿ ਵਾ ਅਕਪ੍ਪਿਯਭੂਮਿਯਂ ਸਹਸੇਯ੍ਯਪ੍ਪਹੋਨਕੇ ਗੇਹੇ ਅਨ੍ਤੋਵੁਤ੍ਥਞ੍ਚ ਅਨ੍ਤੋਪਕ੍ਕਞ੍ਚ ਭਿਕ੍ਖੁਨਿਯਾ ਨ ਵਟ੍ਟਤੀਤਿ ਏਵਂ ਉਭਿਨ੍ਨਂ ਭਿਕ੍ਖੁਭਿਕ੍ਖੁਨੀਨਂ ਨ ਵਟ੍ਟਤੀਤਿ ਯੋਜਨਾ.

੨੬੭੮. ਅਕਪ੍ਪਕੁਟਿਯਾਤਿ ਅਕਪ੍ਪਿਯਕੁਟਿਯਾ, ‘‘ਅਕਪ੍ਪਿਯਭੂਮਿਯਂ ਸਹਸੇਯ੍ਯਪ੍ਪਹੋਨਕੇ ਗੇਹੇ’’ਤਿ ਅਟ੍ਠਕਥਾਯਂ ਵੁਤ੍ਤਾਯ ਅਕਪ੍ਪਿਯਭੂਮਿਯਾਤਿ ਅਤ੍ਥੋ. ਆਦਿ-ਸਦ੍ਦੇਨ ਨਵਨੀਤਤੇਲਮਧੁਫਾਣਿਤਾਨਂ ਗਹਣਂ.

੨੬੭੯. ਤੇਹੇਵ ਅਨ੍ਤੋਵੁਤ੍ਥੇਹਿ ਸਪ੍ਪਿਆਦੀਹਿ ਸਤ੍ਤਾਹਕਾਲਿਕੇਹਿ ਸਹ ਭਿਕ੍ਖੁਨਾ ਪਕ੍ਕਂ ਤਂ ਯਾਵਜੀਵਿਕਂ ਨਿਰਾਮਿਸਂ ਸਤ੍ਤਾਹਂ ਪਰਿਭੁਞ੍ਜਿਤੁਂ ਵਟ੍ਟਤੇਵਾਤਿ ਯੋਜਨਾ.

੨੬੮੦. ਪਕ੍ਕਂ ਸਾਮਂਪਕ੍ਕਂ ਤਂ ਯਾਵਜੀਵਿਕਂ ਸਚੇ ਆਮਿਸਸਂਸਟ੍ਠਂ ਪਰਿਭੁਞ੍ਜਤਿ, ਅਨ੍ਤੋਵੁਤ੍ਥਞ੍ਚ ਭੁਞ੍ਜਤਿ, ਕਿਞ੍ਚ ਭਿਯ੍ਯੋ ਸਾਮਂਪਕ੍ਕਞ੍ਚ ਭੁਞ੍ਜਤੀਤਿ ਯੋਜਨਾ. ਯਾਵਜੀਵਿਕਸ੍ਸ ਆਮਿਸਸਂਸਟ੍ਠਸ੍ਸ ਆਮਿਸਗਤਿਕਤ੍ਤਾ ‘‘ਅਨ੍ਤੋਵੁਤ੍ਥ’’ਨ੍ਤਿ ਵੁਤ੍ਤਂ.

੨੬੮੨. ਉਦਕਂ ਨ ਹੋਤਿ ਕਾਲਿਕਂ ਚਤੂਸੁ ਕਾਲਿਕੇਸੁ ਅਸਙ੍ਗਹਿਤਤ੍ਤਾ.

੨੬੮੩. ਤਿਕਾਲਿਕਾ ਯਾਵਕਾਲਿਕਾ ਯਾਮਕਾਲਿਕਾ ਸਤ੍ਤਾਹਕਾਲਿਕਾਤਿ ਤਯੋ ਕਾਲਿਕਾ ਪਟਿਗ੍ਗਹਵਸੇਨੇਵ ਅਤ੍ਤਨੋ ਅਤ੍ਤਨੋ ਕਾਲਂ ਅਤਿਕ੍ਕਮਿਤ੍ਵਾ ਭੁਤ੍ਤਾ ਦੋਸਕਰਾ ਹੋਨ੍ਤਿ, ਤਤਿਯਂ ਸਤ੍ਤਾਹਾਤਿਕ੍ਕਮੇ ਨਿਸ੍ਸਗ੍ਗਿਯਪਾਚਿਤ੍ਤਿਯਵਤ੍ਥੁਤ੍ਤਾ ਅਭੁਤ੍ਤਮ੍ਪਿ ਦੋਸਕਰਨ੍ਤਿ ਯੋਜਨਾ.

‘‘ਭੁਤ੍ਤਾ ਦੋਸਕਰਾ’’ਤਿ ਇਮਿਨਾ ਪੁਰਿਮਕਾਲਿਕਦ੍ਵਯਂ ਪਟਿਗ੍ਗਹੇਤ੍ਵਾ ਕਾਲਾਤਿਕ੍ਕਮਨਮਤ੍ਤੇਨ ਆਪਤ੍ਤਿਯਾ ਕਾਰਣਂ ਨ ਹੋਤਿ, ਭੁਤ੍ਤਮੇਵ ਹੋਤਿ. ਸਤ੍ਤਾਹਕਾਲਿਕਂ ਕਾਲਾਤਿਕ੍ਕਮੇਨ ਅਪਰਿਭੁਤ੍ਤਮ੍ਪਿ ਆਪਤ੍ਤਿਯਾ ਕਾਰਣਂ ਹੋਤੀਤਿ ਦੀਪੇਤਿ. ਤੇਸੁ ਸਤ੍ਤਾਹਕਾਲਿਕੇਯੇਵ ਵਿਸੇਸਂ ਦਸ੍ਸੇਤੁਮਾਹ ‘‘ਅਭੁਤ੍ਤਂ ਤਤਿਯਮ੍ਪਿ ਚਾ’’ਤਿ. ਚ-ਸਦ੍ਦੋ ਤੁ-ਸਦ੍ਦਤ੍ਥੇ. ਯਾਵਜੀਵਿਕਂ ਪਨ ਪਟਿਗ੍ਗਹੇਤ੍ਵਾ ਯਾਵਜੀਵਂ ਪਰਿਭੁਞ੍ਜਿਯਮਾਨਂ ਇਤਰਕਾਲਿਕਸਂਸਗ੍ਗਂ ਵਿਨਾ ਦੋਸਕਰਂ ਨ ਹੋਤੀਤਿ ਨ ਗਹਿਤਂ.

੨੬੮੪. ਅਮ੍ਬਾਦਯੋ ਸਦ੍ਦਾ ਰੁਕ੍ਖਾਨਂ ਨਾਮਭੂਤਾ ਤਂਤਂਫਲੇਪਿ ਵਤ੍ਤਮਾਨਾ ਇਧ ਉਪਚਾਰਵਸੇਨ ਤਜ੍ਜੇ ਪਾਨਕੇ ਵੁਤ੍ਤਾ, ਤੇਨੇਵਾਹ ‘‘ਪਾਨਕਂ ਮਤ’’ਨ੍ਤਿ. ਚੋਚਂ ਅਟ੍ਠਿਕਕਦਲਿਪਾਨਂ. ਮੋਚਂ ਇਤਰਕਦਲਿਪਾਨਂ. ਮਧੂਤਿ ਮੁਦ੍ਦਿਕਫਲਾਨਂ ਰਸਂ. ਮੁਦ੍ਦਿਕਾਤਿ ਸੀਤੋਦਕੇ ਮਦ੍ਦਿਤਾਨਂ ਮੁਦ੍ਦਿਕਫਲਾਨਂ ਪਾਨਂ. ‘‘ਸਾਲੂਕਪਾਨਨ੍ਤਿ ਰਤ੍ਤੁਪ੍ਪਲਨੀਲੁਪ੍ਪਲਾਦੀਨਂ ਸਾਲੂਕੇ ਮਦ੍ਦਿਤ੍ਵਾ ਕਤਪਾਨ’’ਨ੍ਤਿ ਪਾਲ਼ਿਯਂ, ਅਟ੍ਠਕਥਾਯ (ਮਹਾਵ. ਅਟ੍ਠ. ੩੦੦) ਚ ਸਾਲੂਕ-ਸਦ੍ਦਸ੍ਸ ਦੀਘਵਸੇਨ ਸਂਯੋਗਦਸ੍ਸਨਤੋ ‘‘ਸਾਲੁ ਫਾਰੁਸਕਞ੍ਚਾ’’ਤਿ ਗਾਥਾਬਨ੍ਧਵਸੇਨ ਰਸ੍ਸੋ ਕਤੋ.

ਸਾਲੂਕਂ ਕੁਮੁਦੁਪ੍ਪਲਾਨਂ ਫਲਰਸਂ. ਖੁਦ੍ਦਸਿਕ੍ਖਾਵਣ੍ਣਨਾਯਂ ਪਨ ‘‘ਸਾਲੂਕਪਾਨਂ ਨਾਮ ਰਤ੍ਤੁਪ੍ਪਲਨੀਲੁਪ੍ਪਲਾਦੀਨਂ ਕਿਞ੍ਜਕ੍ਖਰੇਣੂਹਿ ਕਤਪਾਨ’’ਨ੍ਤਿ ਵੁਤ੍ਤਂ. ‘‘ਫਾਰੁਸਕ’ਨ੍ਤਿਆਦੀਸੁ ਏਕੋ ਰੁਕ੍ਖੋ’’ਤਿ ਗਣ੍ਠਿਪਦੇ ਵੁਤ੍ਤਂ. ਤਸ੍ਸ ਫਲਰਸੋ ਫਾਰੁਸਕਂ ਨਾਮ. ਏਤੇਸਂ ਅਟ੍ਠਨ੍ਨਂ ਫਲਾਨਂ ਰਸੋ ਉਦਕਸਮ੍ਭਿਨ੍ਨੋ ਵਟ੍ਟਤਿ, ਸੀਤੁਦਕੇ ਮਦ੍ਦਿਤੋ ਪਸਨ੍ਨੋ ਨਿਕ੍ਕਸਟੋਵ ਵਟ੍ਟਤਿ, ਉਦਕੇਨ ਪਨ ਅਸਮ੍ਭਿਨ੍ਨੋ ਰਸੋ ਯਾਵਕਾਲਿਕੋ.

੨੬੮੫. ਫਲਨ੍ਤਿ ਅਮ੍ਬਾਦਿਫਲਂ. ਸਵਤ੍ਥੁਕਪਟਿਗ੍ਗਹੋਤਿ ਪਾਨਵਤ੍ਥੁਕਾਨਂ ਫਲਾਨਂ ਪਟਿਗ੍ਗਹੋ. ਵਸਤਿ ਏਤ੍ਥ ਪਾਨਨ੍ਤਿ ਵਤ੍ਥੁ, ਫਲਂ, ਵਤ੍ਥੁਨਾ ਸਹ ਵਟ੍ਟਤੀਤਿ ਸਵਤ੍ਥੁਕਂ, ਪਾਨਂ, ਸਵਤ੍ਥੁਕਸ੍ਸ ਪਟਿਗ੍ਗਹੋ ਸਵਤ੍ਥੁਕਪਟਿਗ੍ਗਹੋ. ਸਵਤ੍ਥੁਕਸ੍ਸ ਪਟਿਗ੍ਗਹਂ ਨਾਮ ਵਤ੍ਥੁਪਟਿਗ੍ਗਹਣਮੇਵਾਤਿ ਕਤ੍ਵਾ ਵੁਤ੍ਤਂ ‘‘ਪਾਨਵਤ੍ਥੁਕਾਨਂ ਫਲਾਨਂ ਪਟਿਗ੍ਗਹੋ’’ਤਿ.

੨੬੮੬. ‘‘ਸੁਕੋਟ੍ਟੇਤ੍ਵਾ’’ਤਿ ਵੁਚ੍ਚਮਾਨਤ੍ਤਾ ‘‘ਅਮ੍ਬਪਕ੍ਕ’’ਨ੍ਤਿ ਆਮਕਮੇਵ ਅਮ੍ਬਫਲਂ ਵੁਚ੍ਚਤਿ. ਉਦਕੇਤਿ ਸੀਤੋਦਕੇ. ਪਰਿਸ੍ਸਵਂ ਪਰਿਸ੍ਸਾਵਿਤਂ. ਕਤ੍ਵਾਤਿ ਮਧੁਆਦੀਹਿ ਅਭਿਸਙ੍ਖਰਿਤ੍ਵਾ. ਯਥਾਹ – ‘‘ਤਦਹੁਪਟਿਗ੍ਗਹਿਤੇਹਿ ਮਧੁਸਕ੍ਕਰਕਪ੍ਪੂਰਾਦੀਹਿ ਯੋਜੇਤ੍ਵਾ ਕਾਤਬ੍ਬ’’ਨ੍ਤਿ (ਮਹਾਵ. ਅਟ੍ਠ. ੩੦੦). ਪਾਤੁਂ ਵਟ੍ਟਤੀਤਿ ਏਤ੍ਥ ਵਿਨਿਚ੍ਛਯੋ ‘‘ਏਵਂ ਕਤਂ ਪੁਰੇਭਤ੍ਤਮੇਵ ਕਪ੍ਪਤਿ, ਅਨੁਪਸਮ੍ਪਨ੍ਨੇਹਿ ਕਤਂ ਲਭਿਤ੍ਵਾ ਪਨ ਪੁਰੇਭਤ੍ਤਂ ਪਟਿਗ੍ਗਹਿਤਂ ਪੁਰੇਭਤ੍ਤਂ ਸਾਮਿਸਪਰਿਭੋਗੇਨਾਪਿ ਵਟ੍ਟਤਿ, ਪਚ੍ਛਾਭਤ੍ਤਂ ਨਿਰਾਮਿਸਪਰਿਭੋਗੇਨ ਯਾਵ ਅਰੁਣੁਗ੍ਗਮਨਾ ਵਟ੍ਟਤਿਯੇਵ. ਏਸ ਨਯੋ ਸਬ੍ਬਪਾਨੇਸੂ’’ਤਿ ਅਟ੍ਠਕਥਾਯਂ ਵੁਤ੍ਤੋ.

੨੬੮੭. ਸੇਸਪਾਨਕੇਸੁਪੀਤਿ ਜਮ੍ਬੁਪਾਨਕਾਦੀਸੁਪਿ.

੨੬੮੮. ਉਚ੍ਛੁਰਸੋ ਅਨ੍ਤੋਗਧਤ੍ਤਾ ਇਧ ਵੁਤ੍ਤੋ, ਨ ਪਨ ਯਾਮਕਾਲਿਕਤ੍ਤਾ, ਸੋ ਪਨ ਸਤ੍ਤਾਹਕਾਲਿਕੋਯੇਵ.

੨੬੮੯. ਮਧੁਕਸ੍ਸ ਰਸਨ੍ਤਿ ਮਧੁਕਪੁਪ੍ਫਸ੍ਸ ਰਸਂ. ਏਤ੍ਥ ਮਧੁਕਪੁਪ੍ਫਰਸੋ ਅਗ੍ਗਿਪਾਕੋ ਵਾ ਹੋਤੁ ਆਦਿਚ੍ਚਪਾਕੋ ਵਾ, ਪਚ੍ਛਾਭਤ੍ਤਂ ਨ ਵਟ੍ਟਤਿ. ਪੁਰੇਭਤ੍ਤਮ੍ਪਿ ਯਂ ਪਾਨਂ ਗਹੇਤ੍ਵਾ ਮਜ੍ਜਂ ਕਰੋਨ੍ਤਿ, ਸੋ ਆਦਿਤੋ ਪਟ੍ਠਾਯ ਨ ਵਟ੍ਟਤਿ. ਮਧੁਕਪੁਪ੍ਫਂ ਪਨ ਅਲ੍ਲਂ ਵਾ ਸੁਕ੍ਖਂ ਵਾ ਭਜ੍ਜਿਤਂ ਵਾ ਤੇਨ ਕਤਫਾਣਿਤਂ ਵਾ ਯਤੋ ਪਟ੍ਠਾਯ ਮਜ੍ਜਂ ਨ ਕਰੋਨ੍ਤਿ, ਤਂ ਸਬ੍ਬਂ ਪੁਰੇਭਤ੍ਤਂ ਵਟ੍ਟਤਿ.

ਪਕ੍ਕਡਾਕਰਸਨ੍ਤਿ ਪਕ੍ਕਸ੍ਸ ਯਾਵਕਾਲਿਕਸ੍ਸ ਰਸਂ. ਸਬ੍ਬੋ ਪਤ੍ਤਰਸੋ ਯਾਮਕਾਲਿਕੋ ਵੁਤ੍ਤੋਤਿ ਯੋਜਨਾ. ਅਟ੍ਠਕਥਾਯਂ ‘‘ਯਾਵਕਾਲਿਕਪਤ੍ਤਾਨਞ੍ਹਿ ਪੁਰੇਭਤ੍ਤਂਯੇਵ ਰਸੋ ਕਪ੍ਪਤੀ’’ਤਿ (ਮਹਾਵ. ਅਟ੍ਠ. ੩੦੦) ਇਮਮੇਵ ਸਨ੍ਧਾਯ ਵੁਤ੍ਤਂ.

੨੬੯੦. ਸਾਨੁਲੋਮਾਨਂ ਸਤ੍ਤਨ੍ਨਂ ਧਞ੍ਞਾਨਂ ਫਲਜਂ ਰਸਂ ਠਪੇਤ੍ਵਾ ਸਬ੍ਬੋ ਫਲਜੋ ਰਸੋ ਵਿਕਾਲੇ ਯਾਮਸਞ੍ਞਿਤੇ ਅਨੁਲੋਮਤੋ ਪਰਿਭੁਞ੍ਜਿਤੁਂ ਅਨੁਞ੍ਞਾਤੋਤਿ ਯੋਜਨਾ.

੨੬੯੧. ਯਾਵਕਾਲਿਕਪਤ੍ਤਾਨਂ ਸੀਤੁਦਕੇ ਮਦ੍ਦਿਤ੍ਵਾ ਕਤੋ ਰਸੋਪਿ ਅਪਕ੍ਕੋ, ਆਦਿਚ੍ਚਪਾਕੋਪਿ ਵਿਕਾਲੇ ਪਨ ਵਟ੍ਟਤੀਤਿ ਯੋਜਨਾ.

੨੬੯੨-੩. ਸਤ੍ਤਧਞ੍ਞਾਨੁਲੋਮਾਨਿ ਸਰੂਪਤੋ ਦਸ੍ਸੇਤੁਮਾਹ ‘‘ਤਾਲਞ੍ਚਨਾਲ਼ਿਕੇਰਞ੍ਚਾ’’ਤਿਆਦਿ. ਅਪਰਣ੍ਣਂ ਮੁਗ੍ਗਾਦਿ. ‘‘ਸਤ੍ਤਧਞ੍ਞਾਨੁਲੋਮਿਕ’’ਨ੍ਤਿ ਇਮਿਨਾ ਏਤੇਸਂ ਰਸੋ ਯਾਵਕਾਲਿਕੋ ਯਾਮਕਾਲਸਙ੍ਖਾਤੇ ਵਿਕਾਲੇ ਪਰਿਭੁਞ੍ਜਿਤੁਂ ਨ ਵਟ੍ਟਤੀਤਿ ਦਸ੍ਸੇਤਿ.

੨੬੯੫. ਏਵਮਾਦੀਨਂ ਖੁਦ੍ਦਕਾਨਂ ਫਲਾਨਂ ਰਸੋ ਪਨ ਅਟ੍ਠਪਾਨਾਨੁਲੋਮਤ੍ਤਾ ਅਨੁਲੋਮਿਕੇ ਯਾਮਕਾਲਿਕਾਨੁਲੋਮਿਕੇ ਨਿਦ੍ਦਿਟ੍ਠੋ ਕਥਿਤੋਤਿ ਯੋਜਨਾ.

੨੬੯੬. ਇਧ ਇਮਸ੍ਮਿਂ ਲੋਕੇ ਸਾਨੁਲੋਮਸ੍ਸ ਧਞ੍ਞਸ੍ਸ ਫਲਜਂ ਰਸਂ ਠਪੇਤ੍ਵਾ ਅਯਾਮਕਾਲਿਕੋ ਅਞ੍ਞੋ ਫਲਰਸੋ ਨਤ੍ਥੀਤਿ ਯੋਜਨਾ, ਸਬ੍ਬੋ ਯਾਮਕਾਲਿਕੋਯੇਵਾਤਿ ਦੀਪੇਤਿ.

ਭੇਸਜ੍ਜਕ੍ਖਨ੍ਧਕਕਥਾਵਣ੍ਣਨਾ.