ਕਥਿਨਕ੍ਖਨ੍ਧਕਕਥਾਵਣ੍ਣਨਾ
੨੬੯੭. ਵੁਤ੍ਥਵਸ੍ਸਾਨਂ ਪੁਰਿਮਿਕਾਯ ਵਸ੍ਸਂ ਉਪਗਨ੍ਤ੍ਵਾ ਯਾਵ ਮਹਾਪਵਾਰਣਾ, ਤਾਵ ਰਤ੍ਤਿਚ੍ਛੇਦਂ ਅਕਤ੍ਵਾ ਵੁਤ੍ਥਵਸ੍ਸਾਨਂ ਭਿਕ੍ਖੂਨਂ ਏਕਸ੍ਸ ਵਾ ਦ੍ਵਿਨ੍ਨਂ ਤਿਣ੍ਣਂ ਚਤੁਨ੍ਨਂ ਪਞ੍ਚਨ੍ਨਂ ਅਤਿਰੇਕਾਨਂ ਵਾ ਭਿਕ੍ਖੂਨਂ ਪਞ੍ਚਨ੍ਨਂ ਆਨਿਸਂਸਾਨਂ ਵਕ੍ਖਮਾਨਾਨਂ ਅਨਾਮਨ੍ਤਚਾਰਾਦੀਨਂ ਪਞ੍ਚਨ੍ਨਂ ਆਨਿਸਂਸਾਨਂ ਪਟਿਲਾਭਕਾਰਣਾ ਮੁਨਿਪੁਙ੍ਗਵੋ ਸਬ੍ਬੇਸਂ ਅਗਾਰਿਕਾਦਿਮੁਨੀਨਂ ਸਕਲਗੁਣਗਣੇਹਿ ਉਤ੍ਤਮੋ ਭਗਵਾ ਕਥਿਨਤ੍ਥਾਰਂ ‘‘ਅਨੁਜਾਨਾਮਿ, ਭਿਕ੍ਖਵੇ, ਵਸ੍ਸਂਵੁਤ੍ਥਾਨਂ ਭਿਕ੍ਖੂਨਂ ਕਥਿਨਂ ਅਤ੍ਥਰਿਤੁ’’ਨ੍ਤਿ (ਮਹਾਵ. ੩੦੬) ਅਬ੍ਰ੍ਵਿ ਕਥੇਸੀਤਿ ਯੋਜਨਾ.
ਏਤ੍ਥਾਯਂ ਵਿਨਿਚ੍ਛਯੋ – ‘‘ਕਥਿਨਤ੍ਥਾਰਂ ਕੇ ਲਭਨ੍ਤਿ, ਕੇ ਨ ਲਭਨ੍ਤੀਤਿ? ਗਣਨਵਸੇਨ ਤਾਵ ਪਚ੍ਛਿਮਕੋਟਿਯਾ ਪਞ੍ਚ ਜਨਾ ਲਭਨ੍ਤਿ, ਉਦ੍ਧਂ ਸਤਸਹਸ੍ਸਮ੍ਪਿ, ਪਞ੍ਚਨ੍ਨਂ ਹੇਟ੍ਠਾ ਨ ਲਭਨ੍ਤੀ’’ਤਿ (ਮਹਾਵ. ਅਟ੍ਠ. ੩੦੬) ਇਦਂ ਅਟ੍ਠਕਥਾਯ ਅਤ੍ਥਾਰਕਸ੍ਸ ਭਿਕ੍ਖੁਨੋ ਸਙ੍ਘਸ੍ਸ ਕਥਿਨਦੁਸ੍ਸਦਾਨਕਮ੍ਮਂ ਸਨ੍ਧਾਯ ਵੁਤ੍ਤਂ. ‘‘ਵੁਤ੍ਥਵਸ੍ਸਵਸੇਨ ਪੁਰਿਮਿਕਾਯ ਵਸ੍ਸਂ ਉਪਗਨ੍ਤ੍ਵਾ ਪਠਮਪਵਾਰਣਾਯ ਪਵਾਰਿਤਾ ਲਭਨ੍ਤਿ, ਛਿਨ੍ਨਵਸ੍ਸਾ ਵਾ ਪਚ੍ਛਿਮਿਕਾਯ ਉਪਗਤਾ ਵਾ ਨ ਲਭਨ੍ਤਿ. ਅਞ੍ਞਸ੍ਮਿਂ ਵਿਹਾਰੇ ਵੁਤ੍ਥਵਸ੍ਸਾਪਿ ਨ ਲਭਨ੍ਤੀਤਿ ਮਹਾਪਚ੍ਚਰਿਯਂ ਵੁਤ੍ਤ’’ਨ੍ਤਿ (ਮਹਾਵ. ਅਟ੍ਠ. ੩੦੬) ਇਦਂ ਅਟ੍ਠਕਥਾਯ ਆਨਿਸਂਸਲਾਭਂ ਸਨ੍ਧਾਯ ਵੁਤ੍ਤਂ, ਨ ਕਮ੍ਮਂ.
ਇਦਾਨਿ ਤਦੁਭਯਂ ਵਿਭਜਿਤ੍ਵਾ ਦਸ੍ਸੇਤਿ –
‘‘ਪੁਰਿਮਿਕਾਯ ਉਪਗਤਾਨਂ ਪਨ ਸਬ੍ਬੇ ਗਣਪੂਰਕਾ ਹੋਨ੍ਤਿ, ਆਨਿਸਂਸਂ ਨ ਲਭਨ੍ਤਿ, ਆਨਿਸਂਸੋ ਇਤਰੇਸਂਯੇਵ ਹੋਤਿ. ਸਚੇ ਪੁਰਿਮਿਕਾਯ ਉਪਗਤਾ ਚਤ੍ਤਾਰੋ ਵਾ ਹੋਨ੍ਤਿ, ਤਯੋ ਵਾ ਦ੍ਵੇ ਵਾ ਏਕੋ ਵਾ, ਇਤਰੇ ਗਣਪੂਰਕੇ ਕਤ੍ਵਾ ਕਥਿਨਂ ਅਤ੍ਥਰਿਤਬ੍ਬਂ. ਅਥ ਚਤ੍ਤਾਰੋ ਭਿਕ੍ਖੂ ਉਪਗਤਾ, ਏਕੋ ਪਰਿਪੁਣ੍ਣਵਸ੍ਸੋ ਸਾਮਣੇਰੋ, ਸੋ ਚੇ ਪਚ੍ਛਿਮਿਕਾਯ ਉਪਸਮ੍ਪਜ੍ਜਤਿ, ਗਣਪੂਰਕੋ ਚੇਵ ਹੋਤਿ, ਆਨਿਸਂਸਞ੍ਚ ਲਭਤਿ. ਤਯੋ ਭਿਕ੍ਖੂ ਦ੍ਵੇ ਸਾਮਣੇਰਾ, ਦ੍ਵੇ ਭਿਕ੍ਖੂ ਤਯੋ ਸਾਮਣੇਰਾ, ਏਕੋ ਭਿਕ੍ਖੁ ਚਤ੍ਤਾਰੋ ਸਾਮਣੇਰਾਤਿ ਏਤ੍ਥਾਪਿ ਏਸੇਵ ਨਯੋ. ਸਚੇ ਪੁਰਿਮਿਕਾਯ ਉਪਗਤਾ ਕਥਿਨਤ੍ਥਾਰਕੁਸਲਾ ਨ ਹੋਨ੍ਤਿ, ਅਤ੍ਥਾਰਕੁਸਲਾ ਖਨ੍ਧਕਭਾਣਕਤ੍ਥੇਰਾ ਪਰਿਯੇਸਿਤ੍ਵਾ ਆਨੇਤਬ੍ਬਾ, ਕਮ੍ਮਵਾਚਂ ਸਾਵੇਤ੍ਵਾ ਕਥਿਨਂ ਅਤ੍ਥਰਾਪੇਤ੍ਵਾ ਦਾਨਞ੍ਚ ਭੁਞ੍ਜਿਤ੍ਵਾ ਗਮਿਸ੍ਸਨ੍ਤਿ, ਆਨਿਸਂਸੋ ਪਨ ਇਤਰੇਸਂਯੇਵ ਹੋਤੀ’’ਤਿ (ਮਹਾਵ. ਅਟ੍ਠ. ੩੦੬).
ਕਥਿਨਂ ਕੇਨ ਦਿਨ੍ਨਂ ਵਟ੍ਟਤੀਤਿ? ਯੇਨ ਕੇਨਚਿ ਦੇਵੇਨ ਵਾ ਮਨੁਸ੍ਸੇਨ ਵਾ ਪਞ੍ਚਨ੍ਨਂ ਵਾ ਸਹਧਮ੍ਮਿਕਾਨਂ ਅਞ੍ਞਤਰੇਨ ਦਿਨ੍ਨਂ ਵਟ੍ਟਤਿ. ਕਥਿਨਦਾਯਕਸ੍ਸ ਵਤ੍ਤਂ ਅਤ੍ਥਿ, ਸਚੇ ਸੋ ਤਂ ਅਜਾਨਨ੍ਤੋ ਪੁਚ੍ਛਤਿ ‘‘ਭਨ੍ਤੇ, ਕਥਂ ਕਥਿਨਂ ਦਾਤਬ੍ਬ’’ਨ੍ਤਿ, ਤਸ੍ਸ ਏਵਂ ਆਚਿਕ੍ਖਿਤਬ੍ਬਂ ‘‘ਤਿਣ੍ਣਂ ਚੀਵਰਾਨਂ ਅਞ੍ਞਤਰਪ੍ਪਹੋਨਕਂ ਸੂਰਿਯੁਗ੍ਗਮਨਸਮਯੇ ਵਤ੍ਥਂ ‘ਕਥਿਨਚੀਵਰਂ ਦੇਮਾ’ਤਿ ਦਾਤੁਂ ਵਟ੍ਟਤਿ, ਤਸ੍ਸ ਪਰਿਕਮ੍ਮਤ੍ਥਂ ਏਤ੍ਤਕਾ ਨਾਮ ਸੂਚਿਯੋ, ਏਤ੍ਤਕਂ ਸੁਤ੍ਤਂ, ਏਤ੍ਤਕਂ ਰਜਨਂ, ਪਰਿਕਮ੍ਮਂ ਕਰੋਨ੍ਤਾਨਂ ਏਤ੍ਤਕਾਨਂ ਭਿਕ੍ਖੂਨਂ ਯਾਗੁਭਤ੍ਤਞ੍ਚ ਦਾਤੁਂ ਵਟ੍ਟਤੀ’’ਤਿ.
ਕਥਿਨਤ੍ਥਾਰਕੇਨਾਪਿ ਧਮ੍ਮੇਨ ਸਮੇਨ ਉਪ੍ਪਨ੍ਨਂ ਕਥਿਨਂ ਅਤ੍ਥਰਨ੍ਤੇਨ ਵਤ੍ਤਂ ਜਾਨਿਤਬ੍ਬਂ. ਤਨ੍ਤਵਾਯਗੇਹਤੋ ਹਿ ਆਭਤਸਨ੍ਤਾਨੇਨੇਵ ਖਲਿਮਕ੍ਖਿਤਸਾਟਕੋਪਿ ਨ ਵਟ੍ਟਤਿ, ਮਲੀਨਸਾਟਕੋਪਿ ਨ ਵਟ੍ਟਤਿ, ਤਸ੍ਮਾ ਕਥਿਨਤ੍ਥਾਰਸਾਟਕਂ ਲਭਿਤ੍ਵਾ ਸੁਦ੍ਧਂ ਧੋਵਿਤ੍ਵਾ ਸੂਚਿਆਦੀਨਿ ਚੀਵਰਕਮ੍ਮੂਪਕਰਣਾਨਿ ਸਜ੍ਜੇਤ੍ਵਾ ਬਹੂਹਿ ਭਿਕ੍ਖੂਹਿ ਸਦ੍ਧਿਂ ਤਦਹੇਵ ਸਿਬ੍ਬਿਤ੍ਵਾ ਨਿਟ੍ਠਿਤਸੂਚਿਕਮ੍ਮਂ ਰਜਿਤ੍ਵਾ ਕਪ੍ਪਬਿਨ੍ਦੁਂ ਦਤ੍ਵਾ ਕਥਿਨਂ ਅਤ੍ਥਰਿਤਬ੍ਬਂ. ਸਚੇ ਤਸ੍ਮਿਂ ਅਨਤ੍ਥਤੇਯੇਵ ਅਞ੍ਞੋ ਕਥਿਨਸਾਟਕਂ ਅਤ੍ਥਰਿਤਬ੍ਬਕਂ ਆਹਰਤਿ, ਅਞ੍ਞਾਨਿ ਚ ਬਹੂਨਿ ਕਥਿਨਾਨਿਸਂਸਵਤ੍ਥਾਨਿ ਦੇਤਿ, ਯੋ ਆਨਿਸਂਸਂ ਬਹੁਂ ਦੇਤਿ, ਤਸ੍ਸ ਸਨ੍ਤਕੇਨੇਵ ਅਤ੍ਥਰਿਤਬ੍ਬਂ. ਇਤਰੋ ਯਥਾ ਤਥਾ ਓਵਦਿਤ੍ਵਾ ਸਞ੍ਞਾਪੇਤਬ੍ਬੋ.
ਕਥਿਨਂ ਪਨ ਕੇਨ ਅਤ੍ਥਰਿਤਬ੍ਬਂ? ਯਸ੍ਸ ਸਙ੍ਘੋ ਕਥਿਨਚੀਵਰਂ ਦੇਤਿ. ਸਙ੍ਘੇਨ ਪਨ ਕਸ੍ਸ ਦਾਤਬ੍ਬਂ? ਯੋ ਜਿਣ੍ਣਚੀਵਰੋ ਹੋਤਿ. ਸਚੇ ਬਹੂ ਜਿਣ੍ਣਚੀਵਰਾ ਹੋਨ੍ਤਿ, ਵੁਡ੍ਢਸ੍ਸ ਦਾਤਬ੍ਬਂ. ਵੁਡ੍ਢੇਸੁਪਿ ਯੋ ਮਹਾਪਰਿਵਾਰੋ ਤਦਹੇਵ ਚੀਵਰਂ ਕਤ੍ਵਾ ਅਤ੍ਥਰਿਤੁਂ ਸਕ੍ਕੋਤਿ, ਤਸ੍ਸ ਦਾਤਬ੍ਬਂ. ਸਚੇ ਵੁਡ੍ਢੋ ਨ ਸਕ੍ਕੋਤਿ, ਨਵਕਤਰੋ ਸਕ੍ਕੋਤਿ, ਤਸ੍ਸ ਦਾਤਬ੍ਬਂ. ਅਪਿ ਚ ਸਙ੍ਘੇਨ ਮਹਾਥੇਰਸ੍ਸ ਸਙ੍ਗਹਂ ਕਾਤੁਂ ਵਟ੍ਟਤਿ, ਤਸ੍ਮਾ ‘‘ਤੁਮ੍ਹੇ, ਭਨ੍ਤੇ, ਗਣ੍ਹਥ, ਮਯਂ ਕਤ੍ਵਾ ਦਸ੍ਸਾਮਾ’’ਤਿ ਵਤ੍ਤਬ੍ਬਂ.
ਤੀਸੁ ਚੀਵਰੇਸੁ ਯਂ ਜਿਣ੍ਣਂ ਹੋਤਿ, ਤਦਤ੍ਥਾਯ ਦਾਤਬ੍ਬਂ. ਪਕਤਿਯਾ ਦੁਪਟ੍ਟਚੀਵਰਸ੍ਸ ਦੁਪਟ੍ਟਤ੍ਥਾਯੇਵ ਦਾਤਬ੍ਬਂ. ਸਚੇਪਿਸ੍ਸ ਏਕਪਟ੍ਟਚੀਵਰਂ ਘਨਂ ਹੋਤਿ, ਕਥਿਨਸਾਟਕੋ ਚ ਪੇਲਵੋ, ਸਾਰੁਪ੍ਪਤ੍ਥਾਯ ਦੁਪਟ੍ਟਪ੍ਪਹੋਨਕਮੇਵ ਦਾਤਬ੍ਬਂ. ‘‘ਅਹਂ ਅਲਭਨ੍ਤੋ ਏਕਪਟ੍ਟਂ ਪਾਰੁਪਾਮੀ’’ਤਿ ਵਦਨ੍ਤਸ੍ਸਾਪਿ ਦੁਪਟ੍ਟਂ ਦਾਤੁਂ ਵਟ੍ਟਤਿ. ਯੋ ਪਨ ਲੋਭਪਕਤਿਕੋ ਹੋਤਿ, ਤਸ੍ਸ ਨ ਦਾਤਬ੍ਬਂ. ਤੇਨਾਪਿ ਕਥਿਨਂ ਅਤ੍ਥਰਿਤ੍ਵਾ ‘‘ਪਚ੍ਛਾ ਵਿਸਿਬ੍ਬਿਤ੍ਵਾ ਦ੍ਵੇ ਚੀਵਰਾਨਿ ਕਰਿਸ੍ਸਾਮੀ’’ਤਿ ਨ ਗਹੇਤਬ੍ਬਂ.
ਯਸ੍ਸ ਪਨ ਦਿਯ੍ਯਤਿ, ਤਸ੍ਸ –
‘‘ਸੁਣਾਤੁ ਮੇ, ਭਨ੍ਤੇ ਸਙ੍ਘੋ, ਇਦਂ ਸਙ੍ਘਸ੍ਸ ਕਥਿਨਦੁਸ੍ਸਂ ਉਪ੍ਪਨ੍ਨਂ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਮਂ ਕਥਿਨਦੁਸ੍ਸਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਦੇਯ੍ਯ ਕਥਿਨਂ ਅਤ੍ਥਰਿਤੁਂ, ਏਸਾ ਞਤ੍ਤਿ.
‘‘ਸੁਣਾਤੁ ਮੇ, ਭਨ੍ਤੇ ਸਙ੍ਘੋ, ਇਦਂ ਸਙ੍ਘਸ੍ਸ ਕਥਿਨਦੁਸ੍ਸਂ ਉਪ੍ਪਨ੍ਨਂ, ਸਙ੍ਘੋ ਇਮਂ ਕਥਿਨਦੁਸ੍ਸਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦੇਤਿ ਕਥਿਨਂ ਅਤ੍ਥਰਿਤੁਂ, ਯਸ੍ਸਾਯਸ੍ਮਤੋ ਖਮਤਿ ਇਮਸ੍ਸ ਕਥਿਨਦੁਸ੍ਸਸ੍ਸ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਾਨਂ ਕਥਿਨਂ ਅਤ੍ਥਰਿਤੁਂ, ਸੋ ਤੁਣ੍ਹਸ੍ਸ, ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.
‘‘ਦਿਨ੍ਨਂ ਇਦਂ ਸਙ੍ਘੇਨ ਕਥਿਨਦੁਸ੍ਸਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਕਥਿਨਂ ਅਤ੍ਥਰਿਤੁਂ, ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ (ਮਹਾਵ. ੩੦੭) –
ਏਵਂ ਞਤ੍ਤਿਦੁਤਿਯਾਯ ਕਮ੍ਮਵਾਚਾਯ ਦਾਤਬ੍ਬਨ੍ਤਿ ਏਵਂ ਦਿਨ੍ਨਂ.
੨੬੯੮-੯. ਨ ਉਲ੍ਲਿਖਿਤਮਤ੍ਤਾਦਿ-ਚਤੁਵੀਸਤਿਵਜ੍ਜਿਤਨ੍ਤਿ ਪਾਲ਼ਿਯਂ ਆਗਤੇਹਿ ‘‘ਨ ਉਲ੍ਲਿਖਿਤਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨ’’ਨ੍ਤਿ (ਮਹਾਵ. ੩੦੮) ਉਲ੍ਲਿਖਿਤਮਤ੍ਤਾਦੀਹਿ ਚਤੁਵੀਸਤਿਯਾ ਆਕਾਰੇਹਿ ਵਜ੍ਜਿਤਂ. ਚੀਵਰਨ੍ਤਿ ‘‘ਅਹਤੇਨ ਅਤ੍ਥਤਂ ਹੋਤਿ ਕਥਿਨ’’ਨ੍ਤਿ (ਮਹਾਵ. ੩੦੯) ਪਾਲ਼ਿਯਂ ਆਗਤਾਨਂ ਸੋਲ਼ਸਨ੍ਨਂ ਆਕਾਰਾਨਂ ਅਞ੍ਞਤਰੇਨ ਯੁਤ੍ਤਂ ਕਤਪਰਿਯੋਸਿਤਂ ਦਿਨ੍ਨਂ ਕਪ੍ਪਬਿਨ੍ਦੁਂ ਤਿਣ੍ਣਂ ਚੀਵਰਾਨਂ ਅਞ੍ਞਤਰਚੀਵਰਂ. ਤੇ ਪਨ ਚਤੁਵੀਸਤਿ ਆਕਾਰਾ, ਸੋਲ਼ਸਾਕਾਰਾ ਚ ਪਾਲ਼ਿਤੋ (ਮਹਾਵ. ੩੦੮), ਅਟ੍ਠਕਥਾਤੋ (ਮਹਾਵ. ਅਟ੍ਠ. ੩੦੮) ਚ ਗਹੇਤਬ੍ਬਾ. ਗਨ੍ਥਗਾਰਵਪਰਿਹਾਰਤ੍ਥਮਿਧ ਨ ਵੁਤ੍ਤਾ.
ਭਿਕ੍ਖੁਨਾ ਵਕ੍ਖਮਾਨੇ ਅਟ੍ਠਧਮ੍ਮੇ ਜਾਨਨ੍ਤੇਨ ਅਤ੍ਥਰਕੇਨ ਆਦਾਯ ਗਹੇਤ੍ਵਾ ਪੁਰਾਣਕਂ ਅਤ੍ਤਨਾ ਪਰਿਭੁਞ੍ਜਿਯਮਾਨਂ ਅਤ੍ਥਰਿਤਬ੍ਬਚੀਵਰੇਨ ਏਕਨਾਮਕਂ ਪੁਰਾਣਚੀਵਰਂ ਉਦ੍ਧਰਿਤ੍ਵਾ ਪਚ੍ਚੁਦ੍ਧਰਿਤ੍ਵਾ ਨਵਂ ਅਤ੍ਥਰਿਤਬ੍ਬਂ ਚੀਵਰਂ ਅਧਿਟ੍ਠਹਿਤ੍ਵਾ ਪੁਰਾਣਪਚ੍ਚੁਦ੍ਧਟਚੀਵਰਸ੍ਸ ਨਾਮੇਨ ਅਧਿਟ੍ਠਹਿਤ੍ਵਾਵ ਤਂ ਅਨ੍ਤਰਵਾਸਕਂ ਚੇ, ‘‘ਇਮਿਨਾ ਅਨ੍ਤਰਵਾਸਕੇਨ ਕਥਿਨਂ ਅਤ੍ਥਰਾਮਿ’’ਇਤਿ ਵਚਸਾ ਵਤ੍ਤਬ੍ਬਨ੍ਤਿ ਯੋਜਨਾ. ਸਚੇ ਉਤ੍ਤਰਾਸਙ੍ਗੋ ਹੋਤਿ, ‘‘ਇਮਿਨਾ ਉਤ੍ਤਰਾਸਙ੍ਗੇਨ ਕਥਿਨਂ ਅਤ੍ਥਰਾਮਿ’’, ਸਚੇ ਸਙ੍ਘਾਟਿ ਹੋਤਿ, ‘‘ਇਮਾਯ ਸਙ੍ਘਾਟਿਯਾ ਕਥਿਨਂ ਅਤ੍ਥਰਾਮੀ’’ਤਿ ਵਤ੍ਤਬ੍ਬਂ.
੨੭੦੦-੧. ਇਚ੍ਚੇਵਂ ਤਿਕ੍ਖਤ੍ਤੁਂ ਵੁਤ੍ਤੇ ਕਥਿਨਂ ਅਤ੍ਥਤਂ ਹੋਤੀਤਿ ਯੋਜਨਾ. ਤੇਨ ਪਨ ਭਿਕ੍ਖੁਨਾ ਨਵਕੇਨ ਕਥਿਨਚੀਵਰਂ ਆਦਾਯ ਸਙ੍ਘਂ ਉਪਸਙ੍ਕਮ੍ਮ ‘‘ਅਤ੍ਥਤਂ, ਭਨ੍ਤੇ, ਸਙ੍ਘਸ੍ਸ ਕਥਿਨਂ, ਧਮ੍ਮਿਕੋ ਕਥਿਨਤ੍ਥਾਰੋ, ਅਨੁਮੋਦਥ’’ਇਤਿ ਵਤ੍ਤਬ੍ਬਨ੍ਤਿ ਯੋਜਨਾ.
੨੭੦੨. ਅਨੁਮੋਦਕੇਸੁ ਚ ਥੇਰੇਹਿ ‘‘ਅਤ੍ਥਤਂ, ਆਵੁਸੋ, ਸਙ੍ਘਸ੍ਸ ਕਥਿਨਂ, ਧਮ੍ਮਿਕੋ ਕਥਿਨਤ੍ਥਾਰੋ, ਅਨੁਮੋਦਾਮਾ’’ਤਿ ਵਤ੍ਤਬ੍ਬਂ, ਨਵੇਨ ਪਨ ‘‘ਅਤ੍ਥਤਂ, ਭਨ੍ਤੇ, ਸਙ੍ਘਸ੍ਸ ਕਥਿਨਂ, ਧਮ੍ਮਿਕੋ ਕਥਿਨਤ੍ਥਾਰੋ, ਅਨੁਮੋਦਾਮੀ’’ਤਿ ਇਤਿ ਪੁਨ ਈਰਯੇ ਕਥੇਯ੍ਯਾਤਿ ਯੋਜਨਾ. ਗਾਥਾਯ ਪਨ ਅਨੁਮੋਦਨਪਾਠਸ੍ਸ ਅਤ੍ਥਦਸ੍ਸਨਮੁਖੇਨ ‘‘ਸੁਅਤ੍ਥਤਂ ਤਯਾ ਭਨ੍ਤੇ’’ਤਿ ਵੁਤ੍ਤਂ, ਨ ਪਾਠਕ੍ਕਮਦਸ੍ਸਨਵਸੇਨਾਤਿ ਵੇਦਿਤਬ੍ਬਂ.
ਅਤ੍ਥਾਰਕੇਸੁ ਚ ਅਨੁਮੋਦਕੇਸੁ ਚ ਨਵੇਹਿ ਵੁਡ੍ਢਾਨਂ ਵਚਨਕ੍ਕਮੋ ਵੁਤ੍ਤੋ, ਵੁਡ੍ਢੇਹਿ ਨਵਾਨਂ ਵਚਨਕ੍ਕਮੋ ਪਨ ਤਦਨੁਸਾਰੇਨ ਯਥਾਰਹਂ ਯੋਜੇਤ੍ਵਾ ਵਤ੍ਤਬ੍ਬੋਤਿ ਗਾਥਾਸੁ ਨ ਵੁਤ੍ਤੋਤਿ ਵੇਦਿਤਬ੍ਬੋ. ਅਤ੍ਥਾਰਕੇਨ ਥੇਰੇਨ ਵਾ ਨਵੇਨ ਵਾ ਗਣਪੁਗ੍ਗਲਾਨਂ ਵਚਨਕ੍ਕਮੋ ਚ ਗਣਪੁਗ੍ਗਲੇਹਿ ਅਤ੍ਥਾਰਕਸ੍ਸ ਵਚਨਕ੍ਕਮੋ ਚ ਵੁਤ੍ਤਨਯੇਨ ਯਥਾਰਹਂ ਯੋਜੇਤੁਂ ਸਕ੍ਕਾਤਿ ਨ ਵੁਤ੍ਤੋ.
ਏਵਂ ਅਤ੍ਥਤੇ ਪਨ ਕਥਿਨੇ ਸਚੇ ਕਥਿਨਚੀਵਰੇਨ ਸਦ੍ਧਿਂ ਆਭਤਂ ਆਨਿਸਂਸਂ ਦਾਯਕਾ ‘‘ਯੇਨ ਅਮ੍ਹਾਕਂ ਕਥਿਨਂ ਗਹਿਤਂ, ਤਸ੍ਸੇਵ ਚ ਦੇਮਾ’’ਤਿ ਦੇਨ੍ਤਿ, ਭਿਕ੍ਖੁਸਙ੍ਘੋ ਅਨਿਸ੍ਸਰੋ. ਅਥ ਅਵਿਚਾਰੇਤ੍ਵਾਵ ਦਤ੍ਵਾ ਗਚ੍ਛਨ੍ਤਿ, ਭਿਕ੍ਖੁਸਙ੍ਘੋ ਇਸ੍ਸਰੋ. ਤਸ੍ਮਾ ਸਚੇ ਕਥਿਨਤ੍ਥਾਰਕਸ੍ਸ ਸੇਸਚੀਵਰਾਨਿਪਿ ਦੁਬ੍ਬਲਾਨਿ ਹੋਨ੍ਤਿ, ਸਙ੍ਘੇਨ ਅਪਲੋਕੇਤ੍ਵਾ ਤੇਸਮ੍ਪਿ ਅਤ੍ਥਾਯ ਵਤ੍ਥਾਨਿ ਦਾਤਬ੍ਬਾਨਿ, ਕਮ੍ਮਵਾਚਾਯ ਪਨ ਏਕਾਯੇਵ ਵਟ੍ਟਤਿ. ਅਵਸੇਸੇ ਕਥਿਨਾਨਿਸਂਸੇ ਬਲਵਵਤ੍ਥਾਨਿ ਵਸ੍ਸਾਵਾਸਿਕਠਿਤਿਕਾਯ ਦਾਤਬ੍ਬਾਨਿ, ਠਿਤਿਕਾਯ ਅਭਾਵੇ ਥੇਰਾਸਨਤੋ ਪਟ੍ਠਾਯ ਦਾਤਬ੍ਬਾਨਿ, ਗਰੁਭਣ੍ਡਂ ਨ ਭਾਜੇਤਬ੍ਬਂ. ਸਚੇ ਪਨ ਏਕਸੀਮਾਯ ਬਹੂ ਵਿਹਾਰਾ ਹੋਨ੍ਤਿ, ਸਬ੍ਬੇ ਭਿਕ੍ਖੂ ਸਨ੍ਨਿਪਾਤੇਤ੍ਵਾ ਏਕਤ੍ਥ ਕਥਿਨਂ ਅਤ੍ਥਰਿਤਬ੍ਬਂ, ਵਿਸੁਂ ਵਿਸੁਂ ਅਤ੍ਥਰਿਤੁਂ ਨ ਵਟ੍ਟਤਿ.
੨੭੦੩. ‘‘ਕਥਿਨਸ੍ਸ ਚ ਕਿਂ ਮੂਲ’’ਨ੍ਤਿਆਦੀਨਿ ਸਯਮੇਵ ਵਿਵਰਿਸ੍ਸਤਿ.
੨੭੦੬. ਅਟ੍ਠਧਮ੍ਮੁਦ੍ਦੇਸਗਾਥਾਯ ਪੁਬ੍ਬਕਿਚ੍ਚਂ ਪੁਬ੍ਬ-ਵਚਨੇਨੇਵ ਉਤ੍ਤਰਪਦਲੋਪੇਨ ਵੁਤ੍ਤਂ. ਤੇਨੇਵ ਵਕ੍ਖਤਿ ‘‘ਪੁਬ੍ਬਕਿਚ੍ਚਨ੍ਤਿ ਵੁਚ੍ਚਤੀ’’ਤਿ. ‘‘ਪਚ੍ਚੁਦ੍ਧਾਰ’’ਇਤਿ ਵਤ੍ਤਬ੍ਬੇ ‘‘ਪਚ੍ਚੁਦ੍ਧਰ’’ਇਤਿ ਗਾਥਾਬਨ੍ਧਵਸੇਨ ਰਸ੍ਸੋ. ਤੇਨੇਵ ਵਕ੍ਖਤਿ ‘‘ਪਚ੍ਚੁਦ੍ਧਾਰੋ’’ਤਿ. ਅਧਿਟ੍ਠਹਨਂ ਅਧਿਟ੍ਠਾਨਂ. ਪਚ੍ਚੁਦ੍ਧਾਰੋ ਚ ਅਧਿਟ੍ਠਾਨਞ੍ਚ ਪਚ੍ਚੁਦ੍ਧਰਾਧਿਟ੍ਠਾਨਾ. ਇਤਰੀਤਰਯੋਗੇਨ ਦ੍ਵਨ੍ਦਸਮਾਸੋ. ਅਤ੍ਥਾਰੋਤਿ ਏਤ੍ਥ ‘‘ਕਥਿਨਤ੍ਥਾਰੋ’’ਤਿ ਪਕਰਣਤੋ ਲਬ੍ਭਤਿ.
‘‘ਮਾਤਿਕਾ’’ਤਿ ਇਮਿਨਾ ‘‘ਅਟ੍ਠ ਕਥਿਨੁਬ੍ਭਾਰਮਾਤਿਕਾ’’ਤਿ ਪਕਰਣਤੋ ਵਿਞ੍ਞਾਯਤਿ. ਯਥਾਹ – ‘‘ਅਟ੍ਠਿਮਾ, ਭਿਕ੍ਖਵੇ, ਮਾਤਿਕਾ ਕਥਿਨਸ੍ਸ ਉਬ੍ਭਾਰਾਯਾ’’ਤਿ (ਮਹਾਵ. ੩੧੦). ਮਾਤਿਕਾਤਿ ਮਾਤਰੋ ਜਨੇਤ੍ਤਿਯੋ, ਕਥਿਨੁਬ੍ਭਾਰਂ ਏਤਾ ਅਟ੍ਠ ਜਨੇਨ੍ਤੀਤਿ ਅਤ੍ਥੋ. ਉਦ੍ਧਾਰੋਤਿ ਕਥਿਨਸ੍ਸ ਉਦ੍ਧਾਰੋ. ਆਨਿਸਂਸਾਤਿ ਏਤ੍ਥ ‘‘ਕਥਿਨਸ੍ਸਾ’’ਤਿ ਪਕਰਣਤੋ ਲਬ੍ਭਤਿ. ਕਥਿਨਸ੍ਸ ਆਨਿਸਂਸਾਤਿ ਇਮੇ ਅਟ੍ਠ ਧਮ੍ਮਾਤਿ ਯੋਜਨਾ. ਯਥਾਹ ‘‘ਅਤ੍ਥਤਕਥਿਨਾਨਂ ਵੋ, ਭਿਕ੍ਖਵੇ, ਪਞ੍ਚ ਕਪ੍ਪਿਸ੍ਸਨ੍ਤੀ’’ਤਿਆਦਿ (ਮਹਾਵ. ੩੦੬). ‘‘ਆਨਿਸਂਸੇਨਾ’’ਤਿਪਿ ਪਾਠੋ. ਆਨਿਸਂਸੇਨ ਸਹ ਇਮੇ ਅਟ੍ਠ ਧਮ੍ਮਾਤਿ ਯੋਜਨਾ.
੨੭੦੭. ‘‘ਨ ਉਲ੍ਲਿਖਿਤਮਤ੍ਤਾਦਿ-ਚਤੁਵੀਸਤਿਵਜ੍ਜਿਤ’’ਨ੍ਤਿਆਦਿਨਾ ਕਥਿਨਂ ਅਤ੍ਥਰਿਤੁਂ ਕਤਪਰਿਯੋਸਿਤਂ ਚੀਵਰਂ ਚੇ ਲਦ੍ਧਂ, ਤਤ੍ਥ ਪਟਿਪਜ੍ਜਨਵਿਧਿਂ ਦਸ੍ਸੇਤ੍ਵਾ ਸਚੇ ਅਕਤਸਿਬ੍ਬਨਾਦਿਕਮ੍ਮਂ ਵਤ੍ਥਮੇਵ ਲਦ੍ਧਂ, ਤਤ੍ਥ ਪਟਿਪਜ੍ਜਨਵਿਧਿਂ ਪੁਬ੍ਬਕਿਚ੍ਚਵਸੇਨ ਦਸ੍ਸੇਤੁਮਾਹ ‘‘ਧੋਵਨ’’ਨ੍ਤਿਆਦਿ. ਤਤ੍ਥ ਧੋਵਨਨ੍ਤਿ ਕਥਿਨਦੁਸ੍ਸਸ੍ਸ ਸੇਤਭਾਵਕਰਣਂ. ਵਿਚਾਰੋਤਿ ‘‘ਪਞ੍ਚਕਂ ਵਾ ਸਤ੍ਤਕਂ ਵਾ ਨਵਕਂ ਵਾ ਏਕਾਦਸਕਂ ਵਾ ਹੋਤੂ’’ਤਿ ਵਿਚਾਰਣਂ. ਛੇਦਨਨ੍ਤਿ ਯਥਾਵਿਚਾਰਿਤਸ੍ਸ ਵਤ੍ਥਸ੍ਸ ਛੇਦਨਂ. ਬਨ੍ਧਨਨ੍ਤਿ ਮੋਘਸੁਤ੍ਤਕਾਰੋਪਨਂ. ਸਿਬ੍ਬਨਨ੍ਤਿ ਸਬ੍ਬਸੂਚਿਕਮ੍ਮਂ. ਰਜਨਨ੍ਤਿ ਰਜਨਕਮ੍ਮਂ. ਕਪ੍ਪਨ੍ਤਿ ਕਪ੍ਪਬਿਨ੍ਦੁਦਾਨਂ. ‘‘ਪੁਬ੍ਬਕਿਚ੍ਚ’’ਨ੍ਤਿ ਵੁਚ੍ਚਤਿ ਇਦਂ ਸਬ੍ਬਂ ਕਥਿਨਤ੍ਥਾਰਸ੍ਸ ਪਠਮਮੇਵ ਕਤ੍ਤਬ੍ਬਤ੍ਤਾ.
੨੭੦੮. ਅਨ੍ਤਰਵਾਸਕੋਤਿ ਏਤ੍ਥ ਇਤਿ-ਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋ. ਸਙ੍ਘਾਟਿ, ਉਤ੍ਤਰਾਸਙ੍ਗੋ, ਅਥੋ ਅਨ੍ਤਰਵਾਸਕੋਤਿ ਏਸਮੇਵ ਤੁ ਪਚ੍ਚੁਦ੍ਧਾਰੋਪਿ ਅਧਿਟ੍ਠਾਨਮ੍ਪਿ ਅਤ੍ਥਾਰੋਪਿ ਵੁਤ੍ਤੋਤਿ ਯੋਜਨਾ.
੨੭੦੯. ਅਟ੍ਠਮਾਤਿਕਾ (ਮਹਾਵ. ੩੧੦-੩੧੧; ਪਰਿ. ੪੧੫; ਮਹਾਵ. ਅਟ੍ਠ. ੩੧੦-੩੧੧) ਦਸ੍ਸੇਤੁਮਾਹ ‘‘ਪਕ੍ਕਮਨਞ੍ਚਾ’’ਤਿਆਦਿ. ਪਕ੍ਕਮਨਂ ਅਨ੍ਤੋ ਏਤਸ੍ਸਾਤਿ ਪਕ੍ਕਮਨਨ੍ਤਿਕਾਤਿ ਵਤ੍ਤਬ੍ਬੇ ਉਤ੍ਤਰਪਦਲੋਪੇਨ ‘‘ਪਕ੍ਕਮਨ’’ਨ੍ਤਿ ਵੁਤ੍ਤਂ. ਏਸ ਨਯੋ ਸਬ੍ਬਤ੍ਥ. ਅਟ੍ਠਿਮਾਤਿ ਏਤ੍ਥ ‘‘ਮਾਤਿਕਾ’’ਤਿ ਪਕਰਣਤੋ ਲਬ੍ਭਤਿ. ਇਮਾ ਅਟ੍ਠ ਮਾਤਿਕਾਤਿ ਯੋਜਨਾ.
੨੭੧੦. ਉਦ੍ਦੇਸਾਨੁਕ੍ਕਮੇਨ ਨਿਦ੍ਦਿਸਿਤੁਮਾਹ ‘‘ਕਤਚੀਵਰਮਾਦਾਯਾ’’ਤਿਆਦਿ. ‘‘ਕਤਚੀਵਰਮਾਦਾਯਾ’’ਤਿ ਇਮਿਨਾ ਚੀਵਰਪਲਿਬੋਧੁਪਚ੍ਛੇਦੋ ਦਸ੍ਸਿਤੋ. ‘‘ਆਵਾਸੇ ਨਿਰਪੇਕ੍ਖਕੋ’’ਤਿ ਇਮਿਨਾ ਦੁਤਿਯੋ ਆਵਾਸਪਲਿਬੋਧੁਪਚ੍ਛੇਦੋ ਦਸ੍ਸਿਤੋ. ਏਤ੍ਥ ਸਬ੍ਬਵਾਕ੍ਯੇਸੁ ‘‘ਅਤ੍ਥਤਕਥਿਨੋ ਯੋ ਭਿਕ੍ਖੁ ਸਚੇ ਪਕ੍ਕਮਤੀ’’ਤਿ ਸੇਸੋ. ਅਤਿਕ੍ਕਨ੍ਤਾਯ ਸੀਮਾਯਾਤਿ ਵਿਹਾਰਸੀਮਾਯ ਅਤਿਕ੍ਕਨ੍ਤਾਯ. ਹੋਤਿ ਪਕ੍ਕਮਨਨ੍ਤਿਕਾਤਿ ਏਤ੍ਥ ‘‘ਤਸ੍ਸ ਭਿਕ੍ਖੁਨੋ’’ਤਿ ਸੇਸੋ, ਤਸ੍ਸ ਭਿਕ੍ਖੁਨੋ ਪਕ੍ਕਮਨਨ੍ਤਿਕਾ ਨਾਮ ਮਾਤਿਕਾ ਹੋਤੀਤਿ ਅਤ੍ਥੋ.
੨੭੧੧-੨. ਆਨਿਸਂਸਂ ਨਾਮ ਵੁਤ੍ਥਵਸ੍ਸੇਨ ਲਦ੍ਧਂ ਅਕਤਸੂਚਿਕਮ੍ਮਵਤ੍ਥਂ. ਤੇਨੇਵ ਵਕ੍ਖਤਿ ‘‘ਕਰੋਤੀ’’ਤਿਆਦਿ. ‘‘ਵਿਹਾਰੇ ਅਨਪੇਕ੍ਖਕੋ’’ਤਿ ਇਮਿਨਾ ਏਤ੍ਥ ਪਠਮਂ ਆਵਾਸਪਲਿਬੋਧੁਪਚ੍ਛੇਦੋ ਦਸ੍ਸਿਤੋ. ਸੁਖਵਿਹਰਣਂ ਪਯੋਜਨਮਸ੍ਸਾਤਿ ਸੁਖਵਿਹਾਰਿਕੋ, ਵਿਹਾਰੋਤਿ. ਤਤ੍ਥ ਤਸ੍ਮਿਂ ਵਿਹਾਰੇ ਵਿਹਰਨ੍ਤੋਵ ਤਂ ਚੀਵਰਂ ਯਦਿ ਕਰੋਤਿ, ਤਸ੍ਮਿਂ ਚੀਵਰੇ ਨਿਟ੍ਠਿਤੇ ਨਿਟ੍ਠਾਨਨ੍ਤਾ ਨਿਟ੍ਠਾਨਨ੍ਤਿਕਾਤਿ ਵੁਚ੍ਚਤੀਤਿ ਯੋਜਨਾ. ‘‘ਨਿਟ੍ਠਿਤੇਚੀਵਰੇ’’ਤਿ ਇਮਿਨਾ ਚੀਵਰਪਲਿਬੋਧੁਪਚ੍ਛੇਦੋ ਦਸ੍ਸਿਤੋ.
੨੭੧੩. ਤਮਸ੍ਸਮਨ੍ਤਿ ਤਂ ਵੁਤ੍ਥਵਸ੍ਸਾਵਾਸਂ. ਧੁਰਨਿਕ੍ਖੇਪੇਤਿ ਉਭਯਧੁਰਨਿਕ੍ਖੇਪਵਸੇਨ ਚਿਤ੍ਤਪ੍ਪਵਤ੍ਤਕ੍ਖਣੇ. ਸਨ੍ਨਿਟ੍ਠਾਨਂ ਨਾਮ ਧੁਰਨਿਕ੍ਖੇਪੋ. ਏਤ੍ਥ ਪਲਿਬੋਧਦ੍ਵਯਸ੍ਸ ਏਕਕ੍ਖਣੇਯੇਵ ਉਪਚ੍ਛੇਦੋ ਅਟ੍ਠਕਥਾਯਂ ਵੁਤ੍ਤੋ ‘‘ਸਨ੍ਨਿਟ੍ਠਾਨਨ੍ਤਿਕੇ ਦ੍ਵੇਪਿ ਪਲਿਬੋਧਾ ‘ਨੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’ਨ੍ਤਿ ਚਿਨ੍ਤਿਤਮਤ੍ਤੇਯੇਵ ਏਕਤੋ ਛਿਜ੍ਜਨ੍ਤੀ’’ਤਿ (ਮਹਾਵ. ਅਟ੍ਠ. ੩੧੧).
੨੭੧੪. ਕਥਿਨਚ੍ਛਾਦਨਨ੍ਤਿ ਕਥਿਨਾਨਿਸਂਸਂ ਚੀਵਰਵਤ੍ਥੁਂ. ਨ ਪਚ੍ਚੇਸ੍ਸਨ੍ਤਿ ਨ ਪਚ੍ਚਾਗਮਿਸ੍ਸਾਮਿ. ਕਰੋਨ੍ਤਸ੍ਸੇਵਾਤਿ ਏਤ੍ਥ ‘‘ਚੀਵਰ’’ਨ੍ਤਿ ਪਕਰਣਤੋ ਲਬ੍ਭਤਿ. ‘‘ਕਥਿਨਚ੍ਛਾਦਨ’’ਨ੍ਤਿ ਇਦਂ ਵਾ ਸਮ੍ਬਨ੍ਧਨੀਯਂ. ਕਰੋਨ੍ਤਸ੍ਸਾਤਿ ਅਨਾਦਰੇ ਸਾਮਿਵਚਨਂ. ਨਟ੍ਠਨ੍ਤਿ ਚੋਰੇਹਿ ਹਟਤ੍ਤਾ ਵਾ ਉਪਚਿਕਾਦੀਹਿ ਖਾਦਿਤਤ੍ਤਾ ਵਾ ਨਟ੍ਠਂ. ਦਡ੍ਢਂ ਵਾਤਿ ਅਗ੍ਗਿਨਾ ਦਡ੍ਢਂ ਵਾ. ਨਾਸਨਨ੍ਤਿਕਾਤਿ ਏਵਂ ਚੀਵਰਸ੍ਸ ਨਾਸਨਨ੍ਤੇ ਲਬ੍ਭਮਾਨਾ ਅਯਂ ਮਾਤਿਕਾ ਨਾਸਨਨ੍ਤਿਕਾ ਨਾਮਾਤਿ ਅਤ੍ਥੋ. ਏਤ੍ਥ ‘‘ਨ ਪਚ੍ਚੇਸ੍ਸ’’ਨ੍ਤਿ ਇਮਿਨਾ ਪਠਮਂ ਆਵਾਸਪਲਿਬੋਧੁਪਚ੍ਛੇਦੋ ਦਸ੍ਸਿਤੋ. ‘‘ਕਰੋਨ੍ਤਸ੍ਸੇਵਾ’’ਤਿ ਇਮਿਨਾ ਦੁਤਿਯਂ ਚੀਵਰਪਲਿਬੋਧੁਪਚ੍ਛੇਦੋ ਦਸ੍ਸਿਤੋ.
੨੭੧੫. ਲਦ੍ਧਾਨਿਸਂਸੋਤਿ ਲਦ੍ਧਕਥਿਨਾਨਿਸਂਸਚੀਵਰੋ. ਆਨਿਸਂਸੇ ਚੀਵਰੇ ਸਾਪੇਕ੍ਖੋ ਅਪੇਕ੍ਖਵਾ ਬਹਿਸੀਮਗਤੋ ਵਸ੍ਸਂਵੁਤ੍ਥਸੀਮਾਯ ਬਹਿਸੀਮਗਤੋ ਤਂ ਚੀਵਰਂ ਕਰੋਤਿ, ਸੋ ਕਤਚੀਵਰੋ ਅਨ੍ਤਰੁਬ੍ਭਾਰਂ ਅਨ੍ਤਰਾ ਉਬ੍ਭਾਰਂ ਸੁਣਾਤਿ ਚੇ, ਸਵਨਨ੍ਤਿਕਾ ਨਾਮ ਹੋਤੀਤਿ ਯੋਜਨਾ. ‘‘ਬਹਿਸੀਮਗਤੋ’’ਤਿਆਦਿਨਾ ਦੁਤਿਯਪਲਿਬੋਧੁਪਚ੍ਛੇਦੋ ਦਸ੍ਸਿਤੋ. ਏਤ੍ਥ ‘‘ਕਤਚੀਵਰੋ’’ਤਿ ਵੁਤ੍ਤਤ੍ਤਾ ਚੀਵਰਪਲਿਬੋਧੁਪਚ੍ਛੇਦੋ ਪਠਮਂ ਹੋਤਿ, ਇਤਰੋ ਪਨ ‘‘ਸਹ ਸਵਨੇਨ ਆਵਾਸਪਲਿਬੋਧੋ ਛਿਜ੍ਜਤੀ’’ਤਿ (ਮਹਾਵ. ਅਟ੍ਠ. ੩੧੧) ਅਟ੍ਠਕਥਾਯ ਵੁਤ੍ਤਤ੍ਤਾ ਪਚ੍ਛਾ ਹੋਤਿ.
੨੭੧੬-੭. ਚੀਵਰਾਸਾਯ ਵਸ੍ਸਂਵੁਤ੍ਥੋ ਆਵਾਸਤੋ ਪਕ੍ਕਨ੍ਤੋ ‘‘ਤੁਯ੍ਹਂ ਚੀਵਰਂ ਦਸ੍ਸਾਮੀ’’ਤਿ ਕੇਨਚਿ ਵੁਤ੍ਤੋ ਬਹਿਸੀਮਗਤੋ ਪਨ ਸਵਤਿ, ਪੁਨ ‘‘ਤਵ ਚੀਵਰਂ ਦਾਤੁਂ ਨ ਸਕ੍ਕੋਮੀ’’ਤਿ ਵੁਤ੍ਤੋ ਆਸਾਯ ਛਿਨ੍ਨਮਤ੍ਤਾਯ ਚੀਵਰੇ ਪਚ੍ਚਾਸਾਯ ਉਪਚ੍ਛਿਨ੍ਨਮਤ੍ਤਾਯ ਆਸਾਵਚ੍ਛੇਦਿਕਾ ਨਾਮ ਮਾਤਿਕਾਤਿ ਮਤਾ ਞਾਤਾਤਿ ਯੋਜਨਾ. ਆਸਾਵਚ੍ਛਾਦਿਕੇ ਕਥਿਨੁਬ੍ਭਾਰੇ ਆਵਾਸਪਲਿਬੋਧੋ ਪਠਮਂ ਛਿਜ੍ਜਤਿ, ਚੀਵਰਾਸਾਯ ਉਪਚ੍ਛਿਨ੍ਨਾਯ ਚੀਵਰਪਲਿਬੋਧੋ ਛਿਜ੍ਜਤਿ.
੨੭੧੮-੨੦. ਯੋ ਵਸ੍ਸਂਵੁਤ੍ਥਵਿਹਾਰਮ੍ਹਾ ਅਞ੍ਞਂ ਵਿਹਾਰਂ ਗਤੋ ਹੋਤਿ, ਸੋ ਆਗਚ੍ਛਂ ਆਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਕਥਿਨੁਦ੍ਧਾਰਂ ਅਤਿਕ੍ਕਮੇਯ੍ਯ, ਤਸ੍ਸ ਸੋ ਕਥਿਨੁਦ੍ਧਾਰੋ ਸੀਮਾਤਿਕ੍ਕਨ੍ਤਿਕੋ ਮਤੋਤਿ ਯੋਜਨਾ. ਤਤ੍ਥ ਸੀਮਾਤਿਕ੍ਕਨ੍ਤਿਕੇ ਕਥਿਨੁਬ੍ਭਾਰੇ ਚੀਵਰਪਲਿਬੋਧੋ ਪਠਮਂ ਛਿਜ੍ਜਤਿ, ਤਸ੍ਸ ਬਹਿਸੀਮੇ ਆਵਾਸਪਲਿਬੋਧੋ ਛਿਜ੍ਜਤਿ.
ਏਤ੍ਥ ਚ ‘‘ਸੀਮਾਤਿਕ੍ਕਨ੍ਤਿਕੋ ਨਾਮ ਚੀਵਰਕਾਲਸੀਮਾਤਿਕ੍ਕਨ੍ਤਿਕੋ’’ਤਿ ਕੇਨਚਿ ਵੁਤ੍ਤਂ. ‘‘ਬਹਿਸੀਮਾਯਂ ਚੀਵਰਕਾਲਸਮਯਸ੍ਸ ਅਤਿਕ੍ਕਨ੍ਤਤ੍ਤਾ ਸੀਮਾਤਿਕ੍ਕਨ੍ਤਿਕੋ’’ਤਿ (ਸਾਰਤ੍ਥ. ਟੀ. ਮਹਾਵ. ੩੧੧) ਸਾਰਤ੍ਥਦੀਪਨਿਯਂ ਵੁਤ੍ਤਂ. ‘‘ਆਗਚ੍ਛਂ ਅਨ੍ਤਰਾਮਗ੍ਗੇ, ਤਦੁਦ੍ਧਾਰਮਤਿਕ੍ਕਮੇ’’ਤਿ ਵੁਤ੍ਤਤ੍ਤਾ ਪਨ ਸਙ੍ਘੇਨ ਕਰਿਯਮਾਨਂ ਅਨ੍ਤਰੁਬ੍ਭਾਰਂ ਆਗਚ੍ਛਨ੍ਤੋ ਵਿਹਾਰਸੀਮਂ ਅਸਮ੍ਪਤ੍ਤੇਯੇਵ ਕਥਿਨੁਬ੍ਭਾਰਸ੍ਸ ਜਾਤਤ੍ਤਾ ਤਂ ਨ ਸਮ੍ਭੁਣੇਯ੍ਯ, ਤਸ੍ਸੇਵਂ ਸੀਮਮਤਿਕ੍ਕਨ੍ਤਸ੍ਸੇਵ ਸਤੋ ਪੁਨ ਆਗਚ੍ਛਤੋ ਅਨ੍ਤਰਾਮਗ੍ਗੇ ਜਾਤੋ ਕਥਿਨੁਬ੍ਭਾਰੋ ਸੀਮਾਤਿਕ੍ਕਨ੍ਤਿਕੋਤਿ ਅਮ੍ਹਾਕਂ ਖਨ੍ਤਿ.
ਕਥਿਨਾਨਿਸਂਸਚੀਵਰਂ ਆਦਾਯ ਸਚੇ ਆਵਾਸੇ ਸਾਪੇਕ੍ਖੋਵ ਗਤੋ ਹੋਤਿ, ਪੁਨ ਆਗਨ੍ਤ੍ਵਾ ਕਥਿਨੁਦ੍ਧਾਰਂ ਕਥਿਨਸ੍ਸ ਅਨ੍ਤਰੁਬ੍ਭਾਰਮੇਵ ਸਮ੍ਭੁਣਾਤਿ ਚੇ ਯਦਿ ਪਾਪੁਣੇਯ੍ਯ, ਤਸ੍ਸ ਸੋ ਕਥਿਨੁਦ੍ਧਾਰੋ ਹੋਤਿ, ਸੋ ‘‘ਸਹੁਬ੍ਭਾਰੋ’’ਤਿ ਵੁਚ੍ਚਤੀਤਿ ਯੋਜਨਾ. ਸਹੁਬ੍ਭਾਰੇ ਦ੍ਵੇ ਪਲਿਬੋਧਾ ਅਪੁਬ੍ਬਂ ਅਚਰਿਮਂ ਛਿਜ੍ਜਨ੍ਤਿ.
੨੭੨੧. ‘‘ਸੀਮਾਤਿਕ੍ਕਨ੍ਤਿਕੇਨਾ’’ਤਿ ਵਤ੍ਤਬ੍ਬੇ ਉਤ੍ਤਰਪਦਲੋਪੇਨ ‘‘ਸੀਮਤੋ’’ਤਿ ਵੁਤ੍ਤਂ. ਪਕ੍ਕਮਨਞ੍ਚ ਨਿਟ੍ਠਾਨਞ੍ਚ ਸਨ੍ਨਿਟ੍ਠਾਨਞ੍ਚ ਸੀਮਤੋ ਸੀਮਾਤਿਕ੍ਕਨ੍ਤਿਕੇਨ ਸਹ ਇਮੇ ਚਤ੍ਤਾਰੋ ਕਥਿਨੁਬ੍ਭਾਰਾ ਪੁਗ੍ਗਲਾਧੀਨਾ ਪੁਗ੍ਗਲਾਯਤ੍ਤਾ ਸਹੁਬ੍ਭਾਰਸਙ੍ਖਾਤੋ ਅਨ੍ਤਰੁਬ੍ਭਾਰੋ ਸਙ੍ਘਾਧੀਨੋਤਿ ਯੋਜਨਾ. ‘‘ਅਨ੍ਤਰੁਬ੍ਭਰੋ’’ਤਿ ਗਾਥਾਬਨ੍ਧਵਸੇਨ ਰਸ੍ਸਤ੍ਤਂ.
੨੭੨੨. ਨਾਸਨਨ੍ਤਿ ਨਾਸਨਨ੍ਤਿਕੋ. ਸਵਨਨ੍ਤਿ ਸਵਨਨ੍ਤਿਕੋ. ਆਸਾਵਚ੍ਛੇਦਿਕਾਪਿ ਚਾਤਿ ਤਯੋਪਿ ਕਥਿਨੁਬ੍ਭਾਰਾ. ਨ ਤੁ ਸਙ੍ਘਾ ਨ ਭਿਕ੍ਖੁਤੋਤਿ ਸਙ੍ਘਤੋਪਿ ਨ ਹੋਨ੍ਤਿ, ਪੁਗ੍ਗਲਤੋਪਿ ਨ ਹੋਨ੍ਤੀਤਿ ਅਤ੍ਥੋ. ਚੀਵਰਸ੍ਸ ਵਿਨਾਸੋ ਸਙ੍ਘਸ੍ਸ ਵਾ ਚੀਵਰਸਾਮਿਕਸ੍ਸ ਵਾ ਪਯੋਗੇਨ ਨ ਜਾਤੋਤਿ ਨਾਸਨਕੋ ਤਾਵ ਕਥਿਨੁਬ੍ਭਾਰੋ ਉਭਤੋਪਿ ਨ ਹੋਤੀਤਿ ਵੁਤ੍ਤੋ. ਸਵਨਞ੍ਚ ਉਭਯੇਸਂ ਪਯੋਗਤੋ ਨ ਜਾਤਨ੍ਤਿ ਤਥਾ ਵੁਤ੍ਤਂ. ਤਥਾ ਆਸਾਵਚ੍ਛੇਦਿਕਾਪਿ.
੨੭੨੩. ਆਵਾਸੋਯੇਵ ਪਲਿਬੋਧੋਤਿ ਵਿਗ੍ਗਹੋ. ਪਲਿਬੋਧੋ ਚ ਚੀਵਰੇਤਿ ਏਤ੍ਥ ਚੀਵਰੇਤਿ ਭੇਦਵਚਨਿਚ੍ਛਾਯ ਨਿਮਿਤ੍ਤਤ੍ਥੇ ਭੁਮ੍ਮਂ, ਚੀਵਰਨਿਮਿਤ੍ਤਪਲਿਬੋਧੋਤਿ ਅਤ੍ਥੋ, ਚੀਵਰਸਙ੍ਖਾਤੋ ਪਲਿਬੋਧੋਤਿ ਵੁਤ੍ਤਂ ਹੋਤਿ. ਸਚ੍ਚਾਦਿਗੁਣਯੁਤ੍ਤਂ ਮੁਸਾਵਾਦਾਦਿਦੋਸਵਿਮੁਤ੍ਤਂ ਅਤ੍ਥਂ ਵਦਤਿ ਸੀਲੇਨਾਤਿ ਯੁਤ੍ਤਮੁਤ੍ਤਤ੍ਥਵਾਦੀ, ਤੇਨ.
੨੭੨੪. ਅਟ੍ਠਨ੍ਨਂ ਮਾਤਿਕਾਨਨ੍ਤਿ ਬਹਿਸੀਮਗਤਾਨਂ ਵਸੇਨ ਵੁਤ੍ਤਾ ਪਕ੍ਕਮਨਨ੍ਤਿਕਾਦਯੋ ਸਤ੍ਤ ਮਾਤਿਕਾ, ਬਹਿਸੀਮਂ ਗਨ੍ਤ੍ਵਾ ਅਨ੍ਤਰੁਬ੍ਭਾਰਂ ਸਮ੍ਭੁਣਨ੍ਤਸ੍ਸ ਵਸੇਨ ਵੁਤ੍ਤੋ ਸਹੁਬ੍ਭਾਰੋਤਿ ਇਮਾਸਂ ਅਟ੍ਠਨ੍ਨਂ ਮਾਤਿਕਾਨਂ ਵਸੇਨ ਚ. ਅਨ੍ਤਰੁਬ੍ਭਾਰਤੋਪਿ ਵਾਤਿ ਬਹਿਸੀਮਂ ਅਗਨ੍ਤ੍ਵਾ ਤਤ੍ਥੇਵ ਵਸਿਤ੍ਵਾ ਕਥਿਨੁਬ੍ਭਾਰਕਮ੍ਮੇਨ ਉਬ੍ਭਾਰਕਥਿਨਾਨਂ ਵਸੇਨ ਲਬ੍ਭਨਤੋ ਅਨ੍ਤਰੁਬ੍ਭਾਰਤੋ ਚਾਤਿ ਮਹੇਸਿਨਾ ਕਥਿਨਸ੍ਸ ਦੁਵੇ ਉਬ੍ਭਾਰਾਪਿ ਵੁਤ੍ਤਾਤਿ ਯੋਜਨਾ. ਬਹਿਸੀਮਂ ਗਨ੍ਤ੍ਵਾ ਆਗਤਸ੍ਸ ਵਸੇਨ ਸਹੁਬ੍ਭਾਰੋ, ਬਹਿਸੀਮਂ ਆਗਤਾਨਂ ਵਸੇਨ ਅਨ੍ਤਰੁਬ੍ਭਾਰੋਤਿ ਏਕੋਯੇਵ ਉਬ੍ਭਾਰੋ ਦ੍ਵਿਧਾ ਵੁਤ੍ਤੋ, ਤਸ੍ਮਾ ਅਨ੍ਤਰੁਬ੍ਭਾਰਂ ਵਿਸੁਂ ਅਗ੍ਗਹੇਤ੍ਵਾ ਅਟ੍ਠੇਵ ਮਾਤਿਕਾ ਪਾਲ਼ਿਯਂ (ਮਹਾਵ. ੩੧੦) ਵਿਭਤ੍ਤਾਤਿ ਵੇਦਿਤਬ੍ਬਾ.
੨੭੨੫. ਅਨਾਮਨ੍ਤਚਾਰੋ ਉਤ੍ਤਰਪਦਲੋਪਵਸੇਨ ‘‘ਅਨਾਮਨ੍ਤਾ’’ ਇਤਿ ਵੁਤ੍ਤੋ. ਯਾਵ ਕਥਿਨਂ ਨ ਉਦ੍ਧਰੀਯਤਿ, ਤਾਵ ਅਨਾਮਨ੍ਤੇਤ੍ਵਾ ਚਰਣਂ ਕਪ੍ਪਿਸ੍ਸਤਿ, ਚਾਰਿਤ੍ਤਸਿਕ੍ਖਾਪਦੇਨ ਅਨਾਪਤ੍ਤਿ ਭਵਿਸ੍ਸਤੀਤਿ ਅਤ੍ਥੋ.
ਅਸਮਾਦਾਨਚਾਰੋ ‘‘ਅਸਮਾਦਾਨ’’ਨ੍ਤਿ ਉਤ੍ਤਰਪਦਲੋਪੇਨ ਵੁਤ੍ਤੋ. ਅਸਮਾਦਾਨਚਾਰੋਤਿ ਤਿਚੀਵਰਂ ਅਸਮਾਦਾਯ ਚਰਣਂ, ਚੀਵਰਵਿਪ੍ਪਵਾਸੋ ਕਪ੍ਪਿਸ੍ਸਤੀਤਿ ਅਤ੍ਥੋ.
‘‘ਗਣਤੋ’’ਤਿ ਇਮਿਨਾ ਉਤ੍ਤਰਪਦਲੋਪੇਨ ਗਣਭੋਜਨਂ ਦਸ੍ਸਿਤਂ. ਗਣਭੋਜਨਮ੍ਪਿ ਕਪ੍ਪਿਸ੍ਸਤਿ, ਤਂ ਸਰੂਪਤੋ ਪਾਚਿਤ੍ਤਿਯਕਣ੍ਡੇ ਵੁਤ੍ਤਂ.
‘‘ਯਾਵਦਤ੍ਥਿਕ’’ਨ੍ਤਿ ਇਮਿਨਾ ਯਾਵਦਤ੍ਥਚੀਵਰਂ ਵੁਤ੍ਤਂ. ਯਾਵਦਤ੍ਥਚੀਵਰਨ੍ਤਿ ਯਾਵਤਕੇਨ ਚੀਵਰੇਨ ਅਤ੍ਥੋ, ਤਾਵਤਕਂ ਅਨਧਿਟ੍ਠਿਤਂ ਅਵਿਕਪ੍ਪਿਤਂ ਕਪ੍ਪਿਸ੍ਸਤੀਤਿ ਅਤ੍ਥੋ.
‘‘ਤਤ੍ਥ ਯੋ ਚੀਵਰੁਪ੍ਪਾਦੋ’’ਤਿ ਇਮਿਨਾ ‘‘ਯੋ ਚ ਤਤ੍ਥ ਚੀਵਰੁਪ੍ਪਾਦੋ’’ਤਿ (ਮਹਾਵ. ੩੦੬) ਵੁਤ੍ਤੋ ਆਨਿਸਂਸੋ ਦਸ੍ਸਿਤੋ. ਯੋ ਚ ਤਤ੍ਥ ਚੀਵਰੁਪ੍ਪਾਦੋਤਿ ਤਤ੍ਥ ਕਥਿਨਤ੍ਥਤਸੀਮਾਯਂ ਮਤਕਚੀਵਰਂ ਵਾ ਹੋਤੁ ਸਙ੍ਘਸ੍ਸ ਉਦ੍ਦਿਸ੍ਸ ਦਿਨ੍ਨਂ ਵਾ ਸਙ੍ਘਿਕੇਨ ਤਤ੍ਰੁਪ੍ਪਾਦੇਨ ਆਭਤਂ ਵਾ, ਯੇਨ ਕੇਨਚਿ ਆਕਾਰੇਨ ਯਂ ਸਙ੍ਘਿਕਂ ਚੀਵਰਂ ਉਪ੍ਪਜ੍ਜਤਿ, ਤਂ ਤੇਸਂ ਭਵਿਸ੍ਸਤੀਤਿ ਅਤ੍ਥੋ. ਇਮੇ ਪਞ੍ਚ ਕਥਿਨਾਨਿਸਂਸਾ ਚ ਵੁਤ੍ਤਾਤਿ ਸਮ੍ਬਨ੍ਧੋ.
ਕਥਿਨਕ੍ਖਨ੍ਧਕਕਥਾਵਣ੍ਣਨਾ.