ਉਪੋਸਥਕ੍ਖਨ੍ਧਕਕਥਾਵਣ੍ਣਨਾ

੨੫੫੧-੨. ਯਾ ਏਕਾਦਸਹਿ ਸੀਮਾਵਿਪਤ੍ਤੀਹਿ ਵਜ੍ਜਿਤਾ ਤਿਸਮ੍ਪਤ੍ਤਿਸਂਯੁਤਾ ਨਿਮਿਤ੍ਤੇਨ ਨਿਮਿਤ੍ਤਂ ਘਟੇਤ੍ਵਾ ਸਮ੍ਮਤਾ, ਸਾ ਅਯਂ ਬਦ੍ਧਸੀਮਾ ਨਾਮ ਸਿਯਾਤਿ ਯੋਜਨਾ. ਤਤ੍ਥ ਅਤਿਖੁਦ੍ਦਕਾ, ਅਤਿਮਹਤੀ, ਖਣ੍ਡਨਿਮਿਤ੍ਤਾ, ਛਾਯਾਨਿਮਿਤ੍ਤਾ, ਅਨਿਮਿਤ੍ਤਾ, ਬਹਿਸੀਮੇ ਠਿਤਸਮ੍ਮਤਾ, ਨਦਿਯਾ ਸਮ੍ਮਤਾ, ਸਮੁਦ੍ਦੇ ਸਮ੍ਮਤਾ, ਜਾਤਸ੍ਸਰੇ ਸਮ੍ਮਤਾ, ਸੀਮਾਯ ਸੀਮਂ ਸਮ੍ਭਿਨ੍ਦਨ੍ਤੇਨ ਸਮ੍ਮਤਾ, ਸੀਮਾਯ ਸੀਮਂ ਅਜ੍ਝੋਤ੍ਥਰਨ੍ਤੇਨ ਸਮ੍ਮਤਾਤਿ ‘‘ਇਮੇਹਿ ਏਕਾਦਸਹਿ ਆਕਾਰੇਹਿ ਸੀਮਤੋ ਕਮ੍ਮਾਨਿ ਵਿਪਜ੍ਜਨ੍ਤੀ’’ਤਿ (ਪਰਿ. ੪੮੬) ਵਚਨਤੋ ਇਮਾ ਏਕਾਦਸ ਵਿਪਤ੍ਤਿਸੀਮਾਯੋ ਨਾਮ, ਵਿਪਨ੍ਨਸੀਮਾਤਿ ਵੁਤ੍ਤਂ ਹੋਤਿ.

ਤਤ੍ਥ ਅਤਿਖੁਦ੍ਦਕਾ ਨਾਮ ਯਤ੍ਥ ਏਕਵੀਸਤਿ ਭਿਕ੍ਖੂ ਨਿਸੀਦਿਤੁਂ ਨ ਸਕ੍ਕੋਨ੍ਤਿ. ਅਤਿਮਹਤੀ ਨਾਮ ਯਾ ਅਨ੍ਤਮਸੋ ਕੇਸਗ੍ਗਮਤ੍ਤੇਨਾਪਿ ਤਿਯੋਜਨਂ ਅਤਿਕ੍ਕਮਿਤ੍ਵਾ ਸਮ੍ਮਤਾ. ਖਣ੍ਡਨਿਮਿਤ੍ਤਾ ਨਾਮ ਅਘਟਿਤਨਿਮਿਤ੍ਤਾ ਵੁਚ੍ਚਤਿ. ਪੁਰਤ੍ਥਿਮਾਯ ਦਿਸਾਯ ਨਿਮਿਤ੍ਤਂ ਕਿਤ੍ਤੇਤ੍ਵਾ ਅਨੁਕ੍ਕਮੇਨੇਵ ਦਕ੍ਖਿਣਾਯ, ਪਚ੍ਛਿਮਾਯ, ਉਤ੍ਤਰਾਯ ਦਿਸਾਯ ਕਿਤ੍ਤੇਤ੍ਵਾ ਪੁਨ ਪੁਰਤ੍ਥਿਮਾਯ ਦਿਸਾਯ ਪੁਬ੍ਬਕਿਤ੍ਤਿਤਂ ਪਟਿਕਿਤ੍ਤੇਤ੍ਵਾ ਠਪੇਤੁਂ ਵਟ੍ਟਤਿ, ਏਵਂ ਅਖਣ੍ਡਨਿਮਿਤ੍ਤਾ ਹੋਤਿ. ਸਚੇ ਪਨ ਅਨੁਕ੍ਕਮੇਨ ਆਹਰਿਤ੍ਵਾ ਉਤ੍ਤਰਾਯ ਦਿਸਾਯ ਨਿਮਿਤ੍ਤਂ ਕਿਤ੍ਤੇਤ੍ਵਾ ਤਤ੍ਥੇਵ ਠਪੇਤਿ, ਖਣ੍ਡਨਿਮਿਤ੍ਤਾ ਨਾਮ ਹੋਤਿ. ਅਪਰਾਪਿ ਖਣ੍ਡਨਿਮਿਤ੍ਤਾ ਨਾਮ ਯਾ ਅਨਿਮਿਤ੍ਤੁਪਗਂ ਤਚਸਾਰਰੁਕ੍ਖਂ ਵਾ ਖਾਣੁਕਂ ਵਾ ਪਂਸੁਪੁਞ੍ਜਵਾਲਿਕਾਪੁਞ੍ਜਾਨਂ ਵਾ ਅਞ੍ਞਤਰਂ ਅਨ੍ਤਰਾ ਏਕਂ ਨਿਮਿਤ੍ਤਂ ਕਤ੍ਵਾ ਸਮ੍ਮਤਾ. ਛਾਯਾਨਿਮਿਤ੍ਤਾ ਨਾਮ ਪਬ੍ਬਤਚ੍ਛਾਯਾਦੀਨਂ ਯਂ ਕਿਞ੍ਚਿ ਛਾਯਂ ਨਿਮਿਤ੍ਤਂ ਕਤ੍ਵਾ ਸਮ੍ਮਤਾ. ਅਨਿਮਿਤ੍ਤਾ ਨਾਮ ਸਬ੍ਬੇਨ ਸਬ੍ਬਂ ਨਿਮਿਤ੍ਤਾਨਿ ਅਕਿਤ੍ਤੇਤ੍ਵਾ ਸਮ੍ਮਤਾ. ਬਹਿਸੀਮੇ ਠਿਤਸਮ੍ਮਤਾ ਨਾਮ ਨਿਮਿਤ੍ਤਾਨਿ ਕਿਤ੍ਤੇਤ੍ਵਾ ਨਿਮਿਤ੍ਤਾਨਂ ਬਹਿ ਠਿਤੇਨ ਸਮ੍ਮਤਾ.

ਨਦਿਯਾ ਸਮੁਦ੍ਦੇ ਜਾਤਸ੍ਸਰੇ ਸਮ੍ਮਤਾ ਨਾਮ ਏਤੇਸੁ ਨਦਿਆਦੀਸੁ ਸਮ੍ਮਤਾ. ਸਾ ਹਿ ਏਵਂ ਸਮ੍ਮਤਾਪਿ ‘‘ਸਬ੍ਬਾ, ਭਿਕ੍ਖਵੇ, ਨਦੀ ਅਸੀਮਾ, ਸਬ੍ਬੋ ਸਮੁਦ੍ਦੋ ਅਸੀਮੋ, ਸਬ੍ਬੋ ਜਾਤਸ੍ਸਰੋ ਅਸੀਮੋ’’ਤਿ (ਮਹਾਵ. ੧੪੮) ਵਚਨਤੋ ਅਸਮ੍ਮਤਾਵ ਹੋਤਿ. ਸੀਮਾਯ ਸੀਮਂ ਸਮ੍ਭਿਨ੍ਦਨ੍ਤੇਨ ਸਮ੍ਮਤਾ ਨਾਮ ਅਤ੍ਤਨੋ ਸੀਮਾਯ ਪਰੇਸਂ ਸੀਮਂ ਸਮ੍ਭਿਨ੍ਦਨ੍ਤੇਨ ਸਮ੍ਮਤਾ. ਸਚੇ ਹਿ ਪੋਰਾਣਕਸ੍ਸ ਵਿਹਾਰਸ੍ਸ ਪੁਰਤ੍ਥਿਮਾਯ ਦਿਸਾਯ ਅਮ੍ਬੋ ਚੇਵ ਜਮ੍ਬੂ ਚਾਤਿ ਦ੍ਵੇ ਰੁਕ੍ਖਾ ਅਞ੍ਞਮਞ੍ਞਂ ਸਂਸਟ੍ਠਵਿਟਪਾ ਹੋਨ੍ਤਿ, ਤੇਸੁ ਅਮ੍ਬਸ੍ਸ ਪਚ੍ਛਿਮਦਿਸਾਭਾਗੇ ਜਮ੍ਬੂ, ਵਿਹਾਰਸੀਮਾ ਚ ਜਮ੍ਬੁਂ ਅਨ੍ਤੋ ਕਤ੍ਵਾ ਅਮ੍ਬਂ ਕਿਤ੍ਤੇਤ੍ਵਾ ਬਦ੍ਧਾ ਹੋਤਿ, ਅਥ ਪਚ੍ਛਾ ਤਸ੍ਸ ਵਿਹਾਰਸ੍ਸ ਪੁਰਤ੍ਥਿਮਾਯ ਦਿਸਾਯ ਵਿਹਾਰੇ ਕਤੇ ਸੀਮਂ ਬਨ੍ਧਨ੍ਤਾ ਭਿਕ੍ਖੂ ਤਂ ਅਮ੍ਬਂ ਅਨ੍ਤੋ ਕਤ੍ਵਾ ਜਮ੍ਬੁਂ ਕਿਤ੍ਤੇਤ੍ਵਾ ਬਨ੍ਧਨ੍ਤਿ, ਸੀਮਾਯ ਸੀਮਂ ਸਮ੍ਭਿਨ੍ਨਾ ਹੋਤਿ. ਸੀਮਾਯ ਸੀਮਂ ਅਜ੍ਝੋਤ੍ਥਰਨ੍ਤੇਨ ਸਮ੍ਮਤਾ ਨਾਮ ਅਤ੍ਤਨੋ ਸੀਮਾਯ ਪਰੇਸਂ ਸੀਮਂ ਅਜ੍ਝੋਤ੍ਥਰਨ੍ਤੇਨ ਸਮ੍ਮਤਾ. ਸਚੇ ਹਿ ਪਰੇਸਂ ਬਦ੍ਧਸੀਮਂ ਸਕਲਂ ਵਾ ਤਸ੍ਸਾ ਪਦੇਸਂ ਵਾ ਅਨ੍ਤੋ ਕਤ੍ਵਾ ਅਤ੍ਤਨੋ ਸੀਮਂ ਸਮ੍ਮਨ੍ਨਤਿ, ਸੀਮਾਯ ਸੀਮਾ ਅਜ੍ਝੋਤ੍ਥਰਿਤਾ ਨਾਮ ਹੋਤੀਤਿ. ਇਤਿ ਇਮਾਹਿ ਏਕਾਦਸਹਿ ਵਿਪਤ੍ਤਿਸੀਮਾਹਿ ਵਜ੍ਜਿਤਾਤਿ ਅਤ੍ਥੋ.

ਤਿਸਮ੍ਪਤ੍ਤਿਸਂਯੁਤਾਤਿ ਨਿਮਿਤ੍ਤਸਮ੍ਪਤ੍ਤਿ, ਪਰਿਸਾਸਮ੍ਪਤ੍ਤਿ, ਕਮ੍ਮਵਾਚਾਸਮ੍ਪਤ੍ਤੀਤਿ ਇਮਾਹਿ ਤੀਹਿ ਸਮ੍ਪਤ੍ਤੀਹਿ ਸਮਨ੍ਨਾਗਤਾ. ਤਤ੍ਥ ਨਿਮਿਤ੍ਤਸਮ੍ਪਤ੍ਤਿਯੁਤ੍ਤਾ ਨਾਮ ‘‘ਪਬ੍ਬਤਨਿਮਿਤ੍ਤਂ, ਪਾਸਾਣਨਿਮਿਤ੍ਤਂ, ਵਨਨਿਮਿਤ੍ਤਂ, ਰੁਕ੍ਖਨਿਮਿਤ੍ਤਂ, ਮਗ੍ਗਨਿਮਿਤ੍ਤਂ, ਵਮ੍ਮਿਕਨਿਮਿਤ੍ਤਂ, ਨਦਿਨਿਮਿਤ੍ਤਂ, ਉਦਕਨਿਮਿਤ੍ਤ’’ਨ੍ਤਿ (ਮਹਾਵ. ੧੩੮) ਏਵਂ ਵੁਤ੍ਤੇਸੁ ਅਟ੍ਠਸੁ ਨਿਮਿਤ੍ਤੇਸੁ ਤਸ੍ਮਿਂ ਤਸ੍ਮਿਂ ਦਿਸਾਭਾਗੇ ਯਥਾਲਦ੍ਧਾਨਿ ਨਿਮਿਤ੍ਤੁਪਗਾਨਿ ਨਿਮਿਤ੍ਤਾਨਿ ‘‘ਪੁਰਤ੍ਥਿਮਾਯ ਦਿਸਾਯ ਕਿਂ ਨਿਮਿਤ੍ਤਂ? ਪਬ੍ਬਤੋ, ਭਨ੍ਤੇ, ਏਸੋ ਪਬ੍ਬਤੋ ਨਿਮਿਤ੍ਤ’’ਨ੍ਤਿਆਦਿਨਾ ਨਯੇਨ ਸਮ੍ਮਾ ਕਿਤ੍ਤੇਤ੍ਵਾ ਸਮ੍ਮਤਾ.

ਪਰਿਸਾਸਮ੍ਪਤ੍ਤਿਯੁਤ੍ਤਾ ਨਾਮ ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨ ਚਤੂਹਿ ਭਿਕ੍ਖੂਹਿ ਸਨ੍ਨਿਪਤਿਤ੍ਵਾ ਯਾਵਤਿਕਾ ਤਸ੍ਮਿਂ ਗਾਮਖੇਤ੍ਤੇ ਬਦ੍ਧਸੀਮਂ ਵਾ ਨਦਿਸਮੁਦ੍ਦਜਾਤਸ੍ਸਰੇ ਵਾ ਅਨੋਕ੍ਕਮਿਤ੍ਵਾ ਠਿਤਾ ਭਿਕ੍ਖੂ, ਤੇ ਸਬ੍ਬੇ ਹਤ੍ਥਪਾਸੇ ਵਾ ਕਤ੍ਵਾ, ਛਨ੍ਦਂ ਵਾ ਆਹਰਿਤ੍ਵਾ ਸਮ੍ਮਤਾ.

ਕਮ੍ਮਵਾਚਾਸਮ੍ਪਤ੍ਤਿਯੁਤ੍ਤਾ ਨਾਮ ‘‘ਸੁਣਾਤੁ ਮੇ, ਭਨ੍ਤੇ ਸਙ੍ਘੋ, ਯਾਵਤਾ ਸਮਨ੍ਤਾ ਨਿਮਿਤ੍ਤਾ ਕਿਤ੍ਤਿਤਾ’’ਤਿਆਦਿਨਾ (ਮਹਾਵ. ੧੩੯) ਨਯੇਨ ਵੁਤ੍ਤਾਯ ਪਰਿਸੁਦ੍ਧਾਯ ਞਤ੍ਤਿਦੁਤਿਯਕਮ੍ਮਵਾਚਾਯ ਸਮ੍ਮਤਾ. ਏਵਂ ਏਕਾਦਸ ਵਿਪਤ੍ਤਿਸੀਮਾਯੋ ਅਤਿਕ੍ਕਮਿਤ੍ਵਾ ਤਿਵਿਧਸਮ੍ਪਤ੍ਤਿਯੁਤ੍ਤਾ ਨਿਮਿਤ੍ਤੇਨ ਨਿਮਿਤ੍ਤਂ ਘਟੇਤ੍ਵਾ ਸਮ੍ਮਤਾ ਸੀਮਾ ਬਦ੍ਧਸੀਮਾਤਿ ਵੇਦਿਤਬ੍ਬਾ.

੨੫੫੩-੪. ਖਣ੍ਡਸਮਾਨਸਂਵਾਸਅਵਿਪ੍ਪਵਾਸਾ ਆਦਯੋ ਆਦਿਭੂਤਾ, ਆਦਿਮ੍ਹਿ ਵਾ ਯਾਸਂ ਸੀਮਾਨਂ ਤਾ ਖਣ੍ਡਸਮਾਨਸਂਵਾਸਾਵਿਪ੍ਪਵਾਸਾਦੀ, ਤਾਸਂ, ਤਾਹਿ ਵਾ ਪਭੇਦੋ ਖਣ੍ਡਸਮਾਨਸਂਵਾਸਾਦਿਭੇਦੋ, ਤਤੋ ਖਣ੍ਡਸਮਾਨਸਂਵਾਸਾਦਿਭੇਦਤੋ, ਖਣ੍ਡਸੀਮਾ, ਸਮਾਨਸਂਵਾਸਸੀਮਾ, ਅਵਿਪ੍ਪਵਾਸਸੀਮਾਤਿ ਇਮਾਸਂ ਸੀਮਾਨਂ ਏਤਾਹਿ ਵਾ ਕਰਣਭੂਤਾਹਿ, ਹੇਤੁਭੂਤਾਹਿ ਵਾ ਜਾਤੇਨ ਵਿਭਾਗੇਨਾਤਿ ਵੁਤ੍ਤਂ ਹੋਤਿ. ਸਮਾਨਸਂਵਾਸਾਵਿਪ੍ਪਵਾਸਾਨਮਨ੍ਤਰੇ ਖਣ੍ਡਾ ਪਰਿਚ੍ਛਿਨ੍ਨਾ ਤਾਹਿ ਅਸਙ੍ਕਰਾ ਸੀਮਾ ਖਣ੍ਡਸੀਮਾ ਨਾਮ. ਸਮਾਨਸਂਵਾਸੇਹਿ ਭਿਕ੍ਖੂਹਿ ਏਕਤੋ ਉਪੋਸਥਾਦਿਕੋ ਸਂਵਾਸੋ ਏਤ੍ਥ ਕਰੀਯਤੀਤਿ ਸਮਾਨਸਂਵਾਸਾ ਨਾਮ. ਅਵਿਪ੍ਪਵਾਸਾਯ ਲਕ੍ਖਣਂ ‘‘ਬਨ੍ਧਿਤ੍ਵਾ’’ਤਿਆਦਿਨਾ ਵਕ੍ਖਤਿ. ਇਤਿ ਬਦ੍ਧਾ ਤਿਧਾ ਵੁਤ੍ਤਾਤਿ ਏਵਂ ਬਦ੍ਧਸੀਮਾ ਤਿਪ੍ਪਭੇਦਾ ਵੁਤ੍ਤਾ.

ਉਦਕੁਕ੍ਖੇਪਾਤਿ ਹੇਤੁਮ੍ਹਿ ਨਿਸ੍ਸਕ੍ਕਵਚਨਂ. ਸਤ੍ਤਨ੍ਨਂ ਅਬ੍ਭਨ੍ਤਰਾਨਂ ਸਮਾਹਾਰਾ ਸਤ੍ਤਬ੍ਭਨ੍ਤਰਾ, ਤਤੋਪਿ ਚ. ਅਬਦ੍ਧਾਪਿ ਤਿਵਿਧਾਤਿ ਸਮ੍ਬਨ੍ਧੋ. ਤਤ੍ਥਾਤਿ ਤਾਸੁ ਤੀਸੁ ਅਬਦ੍ਧਸੀਮਾਸੁ. ਗਾਮਪਰਿਚ੍ਛੇਦੋਤਿ ਸਬ੍ਬਦਿਸਾਸੁ ਸੀਮਂ ਪਰਿਚ੍ਛਿਨ੍ਦਿਤ੍ਵਾ ‘‘ਇਮਸ੍ਸ ਪਦੇਸਸ੍ਸ ਏਤ੍ਤਕੋ ਕਰੋ’’ਤਿ ਏਵਂ ਕਰੇਨ ਨਿਯਮਿਤੋ ਗਾਮਪ੍ਪਦੇਸੋ. ਯਥਾਹ – ‘‘ਯਤ੍ਤਕੇ ਪਦੇਸੇ ਤਸ੍ਸ ਗਾਮਸ੍ਸ ਭੋਜਕਾ ਬਲਿਂ ਹਰਨ੍ਤਿ, ਸੋ ਪਦੇਸੋ ਅਪ੍ਪੋ ਵਾ ਹੋਤੁ ਮਹਨ੍ਤੋ ਵਾ, ‘ਗਾਮਸੀਮਾ’ਤ੍ਵੇਵ ਸਙ੍ਖ੍ਯਂ ਗਚ੍ਛਤਿ. ਯਮ੍ਪਿ ਏਕਸ੍ਮਿਂਯੇਵ ਗਾਮਕ੍ਖੇਤ੍ਤੇ ਏਕਂ ਪਦੇਸਂ ‘ਅਯਂ ਵਿਸੁਂ ਗਾਮੋ ਹੋਤੂ’ਤਿ ਪਰਿਚ੍ਛਿਨ੍ਦਿਤ੍ਵਾ ਰਾਜਾ ਕਸ੍ਸਚਿ ਦੇਤਿ, ਸੋਪਿ ਵਿਸੁਂਗਾਮਸੀਮਾ ਹੋਤਿਯੇਵਾ’’ਤਿ (ਮਹਾਵ. ਅਟ੍ਠ. ੧੪੭).

‘‘ਗਾਮਪਰਿਚ੍ਛੇਦੋ’’ਤਿ ਇਮਿਨਾ ਚ ਨਗਰਪਰਿਚ੍ਛੇਦੋ ਚ ਸਙ੍ਗਹਿਤੋ. ਯਥਾਹ – ‘‘ਗਾਮਗ੍ਗਹਣੇਨ ਚੇਤ੍ਥ ਨਗਰਮ੍ਪਿ ਗਹਿਤਮੇਵ ਹੋਤੀ’’ਤਿ (ਮਹਾਵ. ਅਟ੍ਠ. ੧੪੭). ਨਿਗਮਸੀਮਾਯ ਵਿਸੁਂਯੇਵ ਵੁਤ੍ਤਤ੍ਤਾ ਤਸ੍ਸਾ ਇਧ ਸਙ੍ਗਹੋ ਨ ਵਤ੍ਤਬ੍ਬੋ. ਵੁਤ੍ਤਞ੍ਹਿ ਪਾਲ਼ਿਯਂ ‘‘ਯਂ ਗਾਮਂ ਵਾ ਨਿਗਮਂ ਵਾ ਉਪਨਿਸ੍ਸਾਯ ਵਿਹਰਤਿ. ਯਾ ਤਸ੍ਸ ਵਾ ਗਾਮਸ੍ਸ ਗਾਮਸੀਮਾ, ਨਿਗਮਸ੍ਸ ਵਾ ਨਿਗਮਸੀਮਾ, ਅਯਂ ਤਤ੍ਥ ਸਮਾਨਸਂਵਾਸਾ ਏਕੁਪੋਸਥਾ’’ਤਿ (ਮਹਾਵ. ੧੪੭). ਇਮਿਸ੍ਸਾ ਵਿਸੁਂਯੇਵ ਲਕ੍ਖਣਸ੍ਸ ਵੁਤ੍ਤਤ੍ਤਾ ਗਾਮਸੀਮਾਲਕ੍ਖਣੇਨੇਵ ਉਪਲਕ੍ਖਿਤਾ.

੨੫੫੫. ‘‘ਜਾਤਸ੍ਸਰੇ’’ਤਿਆਦੀਸੁ ਜਾਤਸ੍ਸਰਾਦੀਨਂ ਲਕ੍ਖਣਂ ਏਵਂ ਵੇਦਿਤਬ੍ਬਂ – ਯੋ ਪਨ ਕੇਨਚਿ ਖਣਿਤ੍ਵਾ ਅਕਤੋ ਸਯਂਜਾਤੋ ਸੋਬ੍ਭੋ ਸਮਨ੍ਤਤੋ ਆਗਤੇਨ ਉਦਕੇਨ ਪੂਰਿਤੋ ਤਿਟ੍ਠਤਿ, ਯਤ੍ਥ ਨਦਿਯਂ ਵਕ੍ਖਮਾਨਪ੍ਪਕਾਰੇ ਵਸ੍ਸਕਾਲੇ ਉਦਕਂ ਸਨ੍ਤਿਟ੍ਠਤਿ, ਅਯਂ ਜਾਤਸ੍ਸਰੋ ਨਾਮ. ਯੋਪਿ ਨਦਿਂ ਵਾ ਸਮੁਦ੍ਦਂ ਵਾ ਭਿਨ੍ਦਿਤ੍ਵਾ ਨਿਕ੍ਖਨ੍ਤਉਦਕੇਨ ਖਣਿਤੋ ਸੋਬ੍ਭੋ ਏਤਂ ਲਕ੍ਖਣਂ ਪਾਪੁਣਾਤਿ, ਅਯਮ੍ਪਿ ਜਾਤਸ੍ਸਰੋਯੇਵ. ਸਮੁਦ੍ਦੋ ਪਾਕਟੋਯੇਵ.

ਯਸ੍ਸਾ ਧਮ੍ਮਿਕਾਨਂ ਰਾਜੂਨਂ ਕਾਲੇ ਅਨ੍ਵਡ੍ਢਮਾਸਂ ਅਨੁਦਸਾਹਂ ਅਨੁਪਞ੍ਚਾਹਂ ਅਨਤਿਕ੍ਕਮਿਤ੍ਵਾ ਦੇਵੇ ਵਸ੍ਸਨ੍ਤੇ ਵਲਾਹਕੇਸੁ ਵਿਗਤਮਤ੍ਤੇਸੁ ਸੋਤਂ ਪਚ੍ਛਿਜ੍ਜਤਿ, ਅਯਂ ਨਦਿਸਙ੍ਖ੍ਯਂ ਨ ਗਚ੍ਛਤਿ. ਯਸ੍ਸਾ ਪਨ ਈਦਿਸੇ ਸੁਵੁਟ੍ਠਿਕਾਲੇ ਵਸ੍ਸਾਨਸ੍ਸ ਚਤੁਮਾਸੇ ਸੋਤਂ ਨ ਪਚ੍ਛਿਜ੍ਜਤਿ, ਯਤ੍ਥ ਤਿਤ੍ਥੇਨ ਵਾ ਅਤਿਤ੍ਥੇਨ ਵਾ ਸਿਕ੍ਖਾਕਰਣੀਯੇ ਆਗਤਲਕ੍ਖਣੇਨ ਤਿਮਣ੍ਡਲਂ ਪਟਿਚ੍ਛਾਦੇਤ੍ਵਾ ਅਨ੍ਤਰਵਾਸਕਂ ਅਨੁਕ੍ਖਿਪਿਤ੍ਵਾ ਉਤ੍ਤਰਨ੍ਤਿਯਾ ਭਿਕ੍ਖੁਨਿਯਾ ਏਕਦ੍ਵਙ੍ਗੁਲਮਤ੍ਤਮ੍ਪਿ ਅਨ੍ਤਰਵਾਸਕੋ ਤੇਮਿਯਤਿ, ਅਯਂ ਸਮੁਦ੍ਦਂ ਵਾ ਪਵਿਸਤੁ ਤਲ਼ਾਕਂ ਵਾ, ਪਭਵਤੋ ਪਟ੍ਠਾਯ ਨਦੀ ਨਾਮ.

ਸਮਨ੍ਤਤੋਤਿ ਸਮਨ੍ਤਾ. ਮਜ੍ਝਿਮਸ੍ਸਾਤਿ ਥਾਮਮਜ੍ਝਿਮਸ੍ਸ ਪੁਰਿਸਸ੍ਸ. ਉਦਕੁਕ੍ਖੇਪੋਤਿ ਵਕ੍ਖਮਾਨੇਨ ਨਯੇਨ ਥਾਮਪ੍ਪਮਾਣੇਨ ਖਿਤ੍ਤਸ੍ਸ ਉਦਕਸ੍ਸ ਵਾ ਵਾਲੁਕਾਯ ਵਾ ਪਤਿਤਟ੍ਠਾਨੇਨ ਪਰਿਚ੍ਛਿਨ੍ਨੋ ਅਨ੍ਤੋਪਦੇਸੋ. ਯਥਾ ਅਕ੍ਖਧੁਤ੍ਤਾ ਦਾਰੁਗੁਲ਼ਂ ਖਿਪਨ੍ਤਿ, ਏਵਂ ਉਦਕਂ ਵਾ ਵਾਲੁਕਂ ਵਾ ਹਤ੍ਥੇਨ ਗਹੇਤ੍ਵਾ ਥਾਮਮਜ੍ਝਿਮੇਨ ਪੁਰਿਸੇਨ ਸਬ੍ਬਥਾਮੇਨ ਖਿਪਿਤਬ੍ਬਂ, ਤਤ੍ਥ ਯਤ੍ਥ ਏਵਂ ਖਿਤ੍ਤਂ ਉਦਕਂ ਵਾ ਵਾਲੁਕਾ ਵਾ ਪਤਤਿ, ਅਯਂ ਉਦਕੁਕ੍ਖੇਪੋ ਨਾਮਾਤਿ. ਉਦਕੁਕ੍ਖੇਪਸਞ੍ਞਿਤੋਤਿ ‘‘ਉਦਕੁਕ੍ਖੇਪੋ’’ਤਿ ਸਲ੍ਲਕ੍ਖਿਤੋ.

੨੫੫੬. ਅਗਾਮਕੇ ਅਰਞ੍ਞੇਤਿ ਵਿਞ੍ਝਾਟਵਿਸਦਿਸੇ ਗਾਮਰਹਿਤੇ ਮਹਾਅਰਞ੍ਞੇ. ਸਮਨ੍ਤਤੋ ਸਤ੍ਤੇਵਬ੍ਭਨ੍ਤਰਾਤਿ ਅਤ੍ਤਨੋ ਠਿਤਟ੍ਠਾਨਤੋ ਪਰਿਕ੍ਖਿਪਿਤ੍ਵਾ ਸਤ੍ਤੇਵ ਅਬ੍ਭਨ੍ਤਰਾ ਯਸ੍ਸਾ ਸੀਮਾਯ ਪਰਿਚ੍ਛੇਦੋ, ਅਯਂ ਸਤ੍ਤਬ੍ਭਨ੍ਤਰਨਾਮਿਕਾ ਸੀਮਾ ਨਾਮ.

੨੫੫੭. ਗੁਲ਼ੁਕ੍ਖੇਪਨਯੇਨਾਤਿ ਅਕ੍ਖਧੁਤ੍ਤਕਾਨਂ ਦਾਰੁਗੁਲ਼ੁਕ੍ਖਿਪਨਾਕਾਰੇਨ. ਉਦਕੁਕ੍ਖੇਪਕਾਤਿ ਉਦਕੁਕ੍ਖੇਪਸਦਿਸਵਸੇਨ.

੨੫੫੮. ਇਮਾਸਂ ਦ੍ਵਿਨ੍ਨਂ ਸੀਮਾਨਂ ਵਡ੍ਢਨਕ੍ਕਮਂ ਦਸ੍ਸੇਤੁਮਾਹ ‘‘ਅਬ੍ਭਨ੍ਤਰੂਦਕੁਕ੍ਖੇਪਾ, ਠਿਤੋਕਾਸਾ ਪਰਂ ਸਿਯੁ’’ਨ੍ਤਿ. ਠਿਤੋਕਾਸਾ ਪਰਨ੍ਤਿ ਪਰਿਸਾਯ ਠਿਤਟ੍ਠਾਨਤੋ ਪਰਂ, ਪਰਿਸਪਰਿਯਨ੍ਤਤੋ ਪਟ੍ਠਾਯ ਸਤ੍ਤਬ੍ਭਨ੍ਤਰਾ ਚ ਮਿਨਿਤਬ੍ਬਾ, ਉਦਕੁਕ੍ਖੇਪੋ ਚ ਕਾਤਬ੍ਬੋਤਿ ਅਤ੍ਥੋ.

੨੫੫੯-੬੦. ਅਨ੍ਤੋਪਰਿਚ੍ਛੇਦੇਤਿ ਉਦਕੁਕ੍ਖੇਪੇਨ ਵਾ ਸਤ੍ਤਬ੍ਭਨ੍ਤਰੇਹਿ ਵਾ ਪਰਿਚ੍ਛਿਨ੍ਨੋਕਾਸਸ੍ਸ ਅਨ੍ਤੋ. ਹਤ੍ਥਪਾਸਂ ਵਿਹਾਯ ਠਿਤੋ ਵਾ ਪਰਂ ਤਤ੍ਤਕਂ ਪਰਿਚ੍ਛੇਦਂ ਅਨਤਿਕ੍ਕਮ੍ਮ ਠਿਤੋ ਵਾਤਿ ਯੋਜਨਾ, ਸੀਮਨ੍ਤਰਿਕਤ੍ਥਾਯ ਠਪੇਤਬ੍ਬਂ ਏਕਂ ਉਦਕੁਕ੍ਖੇਪਂ ਵਾ ਸਤ੍ਤਬ੍ਭਨ੍ਤਰਂ ਏਵ ਵਾ ਅਨਤਿਕ੍ਕਮ੍ਮ ਠਿਤੋਤਿ ਅਤ੍ਥੋ.

ਕਮ੍ਮਂ ਵਿਕੋਪੇਤੀਤਿ ਅਨ੍ਤੋ ਠਿਤੋ ਕਮ੍ਮਸ੍ਸ ਵਗ੍ਗਭਾਵਕਰਣਤੋ, ਬਹਿ ਤਤ੍ਤਕਂ ਪਦੇਸਂ ਅਨਤਿਕ੍ਕਮਿਤ੍ਵਾ ਠਿਤੋ ਅਞ੍ਞਸ੍ਸ ਸਙ੍ਘਸ੍ਸ ਗਣਪੂਰਣਭਾਵਂ ਗਚ੍ਛਨ੍ਤੋ ਸੀਮਾਯ ਸਙ੍ਕਰਭਾਵਕਰਣੇਨ ਕਮ੍ਮਂ ਵਿਕੋਪੇਤਿ. ਇਤਿ ਯਸ੍ਮਾ ਅਟ੍ਠਕਥਾਨਯੋ, ਤਸ੍ਮਾ ਸੋ ਅਨ੍ਤੋਸੀਮਾਯ ਹਤ੍ਥਪਾਸਂ ਵਿਜਹਿਤ੍ਵਾ ਠਿਤੋ ਹਤ੍ਥਪਾਸੇ ਵਾ ਕਾਤਬ੍ਬੋ, ਸੀਮਨ੍ਤਰਿਕਤ੍ਥਾਯ ਪਰਿਚ੍ਛਿਨ੍ਨੋਕਾਸਤੋ ਬਹਿ ਵਾ ਕਾਤਬ੍ਬੋ. ਤਤ੍ਤਕਂ ਪਰਿਚ੍ਛੇਦਂ ਅਨਤਿਕ੍ਕਮਿਤ੍ਵਾ ਠਿਤੋ ਯਥਾਠਿਤੋਵ ਸਚੇ ਅਞ੍ਞਸ੍ਸ ਕਮ੍ਮਸ੍ਸ ਗਣਪੂਰਕੋ ਨ ਹੋਤਿ, ਕਮ੍ਮਂ ਨ ਕੋਪੇਤੀਤਿ ਗਹੇਤਬ੍ਬਂ.

੨੫੬੧-੨. ਸਣ੍ਠਾਨਨ੍ਤਿ ਤਿਕੋਟਿਸਣ੍ਠਾਨਂ. ਨਿਮਿਤ੍ਤਨ੍ਤਿ ਪਬ੍ਬਤਾਦਿਨਿਮਿਤ੍ਤਂ. ਦਿਸਕਿਤ੍ਤਨਨ੍ਤਿ ‘‘ਪੁਰਤ੍ਥਿਮਾਯ ਦਿਸਾਯ ਕਿਂ ਨਿਮਿਤ੍ਤ’’ਨ੍ਤਿਆਦਿਨਾ ਦਿਸਾਕਿਤ੍ਤਨਂ. ਪਮਾਣਨ੍ਤਿ ਤਿਯੋਜਨਪਰਮਂ ਪਮਾਣਂ. ਸੋਧੇਤ੍ਵਾਤਿ ਯਸ੍ਮਿਂ ਗਾਮਕ੍ਖੇਤ੍ਤੇ ਸੀਮਂ ਬਨ੍ਧਤਿ, ਤਤ੍ਥ ਵਸਨ੍ਤੇ ਉਪਸਮ੍ਪਨ੍ਨਭਿਕ੍ਖੂ ਬਦ੍ਧਸੀਮਵਿਹਾਰੇ ਵਸਨ੍ਤੇ ਸੀਮਾਯ ਬਹਿ ਗਨ੍ਤੁਂ ਅਦਤ੍ਵਾ, ਅਬਦ੍ਧਸੀਮਵਿਹਾਰੇ ਵਸਨ੍ਤੇ ਹਤ੍ਥਪਾਸਂ ਉਪਨੇਤਬ੍ਬੇ ਹਤ੍ਥਪਾਸਂ ਨੇਤ੍ਵਾ ਅਵਸੇਸੇ ਬਹਿਸੀਮਾਯ ਕਤ੍ਵਾ ਸਬ੍ਬਮਗ੍ਗੇਸੁ ਆਰਕ੍ਖਂ ਵਿਦਹਿਤ੍ਵਾਤਿ ਵੁਤ੍ਤਂ ਹੋਤਿ. ਸੀਮਨ੍ਤਿ ਖਣ੍ਡਸੀਮਂ.

ਕੀਦਿਸਨ੍ਤਿ ਆਹ ‘‘ਤਿਕੋਣ’’ਨ੍ਤਿਆਦਿ. ਪਣਵੂਪਮਨ੍ਤਿ ਪਣਵਸਣ੍ਠਾਨਂ ਮਜ੍ਝੇ ਸਂਖਿਤ੍ਤਂ ਉਭਯਕੋਟਿਯਾ ਵਿਤ੍ਥਤਂ. ‘‘ਵਿਤਾਨਾਕਾਰਂ ਧਨੁਕਾਕਾਰ’’ਨ੍ਤਿ ਆਕਾਰ-ਸਦ੍ਦੋ ਪਚ੍ਚੇਕਂ ਯੋਜੇਤਬ੍ਬੋ. ਧਨੁਕਾਕਾਰਨ੍ਤਿ ਆਰੋਪਿਤਧਨੁਸਣ੍ਠਾਨਂ, ‘‘ਮੁਦਿਙ੍ਗੂਪਮਂ ਸਕਟੂਪਮ’’ਨ੍ਤਿ ਉਪਮਾ-ਸਦ੍ਦੋ ਪਚ੍ਚੇਕਂ ਯੋਜੇਤਬ੍ਬੋ. ਮੁਦਿਙ੍ਗੂਪਮਨ੍ਤਿ ਮਜ੍ਝੇ ਵਿਤ੍ਥਤਂ ਉਭਯਕੋਟਿਯਾ ਤਨੁਕਂ ਤੁਰਿਯਵਿਸੇਸਂ ਮੁਦਿਙ੍ਗਨ੍ਤਿ ਵਦਨ੍ਤਿ, ਤਾਦਿਸਨ੍ਤਿ ਅਤ੍ਥੋ. ਸੀਮਂ ਬਨ੍ਧੇਯ੍ਯਾਤਿ ਯੋਜਨਾ.

੨੫੬੩. ਪਬ੍ਬਤਾਦਿਨਿਮਿਤ੍ਤੁਪਗਨਿਮਿਤ੍ਤਾਨਿ ਦਸ੍ਸੇਤੁਮਾਹ ‘‘ਪਬ੍ਬਤ’’ਨ੍ਤਿਆਦਿ. ਇਤਿ ਅਟ੍ਠ ਨਿਮਿਤ੍ਤਾਨਿ ਦੀਪਯੇਤਿ ਯੋਜਨਾ. ਤਤ੍ਰੇਵਂ ਸਙ੍ਖੇਪਤੋ ਨਿਮਿਤ੍ਤੁਪਗਤਾ ਵੇਦਿਤਬ੍ਬਾ – ਸੁਦ੍ਧਪਂਸੁਸੁਦ੍ਧਪਾਸਾਣਉਭਯਮਿਸ੍ਸਕਵਸੇਨ (ਕਙ੍ਖਾ. ਅਟ੍ਠ. ਨਿਦਾਨਵਣ੍ਣਨਾ; ਮਹਾਵ. ਅਟ੍ਠ. ੧੩੮) ਤਿਵਿਧੋਪਿ ਹਿ ਪਬ੍ਬਤੋ ਹਤ੍ਥਿਪ੍ਪਮਾਣਤੋ ਪਟ੍ਠਾਯ ਉਦ੍ਧਂ ਨਿਮਿਤ੍ਤੁਪਗੋ, ਤਤੋ ਓਮਕਤਰੋ ਨ ਵਟ੍ਟਤਿ. ਅਨ੍ਤੋਸਾਰੇਹਿ ਵਾ ਅਨ੍ਤੋਸਾਰਮਿਸ੍ਸਕੇਹਿ ਵਾ ਰੁਕ੍ਖੇਹਿ ਚਤੁਪਞ੍ਚਰੁਕ੍ਖਮਤ੍ਤਮ੍ਪਿ ਵਨਂ ਨਿਮਿਤ੍ਤੁਪਗਂ, ਤਤੋ ਊਨਤਰਂ ਨ ਵਟ੍ਟਤਿ. ਪਾਸਾਣਨਿਮਿਤ੍ਤੇ ਅਯਗੁਲ਼ਮ੍ਪਿ ਪਾਸਾਣਸਙ੍ਖ੍ਯਮੇਵ ਗਚ੍ਛਤਿ, ਤਸ੍ਮਾ ਯੋ ਕੋਚਿ ਪਾਸਾਣੋ ਉਕ੍ਕਂਸੇਨ ਹਤ੍ਥਿਪ੍ਪਮਾਣਤੋ ਓਮਕਤਰਂ ਆਦਿਂ ਕਤ੍ਵਾ ਹੇਟ੍ਠਿਮਪਰਿਚ੍ਛੇਦੇਨ ਦ੍ਵਤ੍ਤਿਂਸਪਲਗੁਲ਼ਪਿਣ੍ਡਪਰਿਮਾਣੋ ਨਿਮਿਤ੍ਤੁਪਗੋ, ਨ ਤਤੋ ਖੁਦ੍ਦਕਤਰੋ. ਪਿਟ੍ਠਿਪਾਸਾਣੋ ਪਨ ਅਤਿਮਹਨ੍ਤੋਪਿ ਵਟ੍ਟਤਿ. ਰੁਕ੍ਖੋ ਜੀਵਨ੍ਤੋਯੇਵ ਅਨ੍ਤੋਸਾਰੋ ਭੂਮਿਯਂ ਪਤਿਟ੍ਠਿਤੋ ਅਨ੍ਤਮਸੋ ਉਬ੍ਬੇਧਤੋ ਅਟ੍ਠਙ੍ਗੁਲੋ ਪਰਿਣਾਹਤੋ ਸੂਚਿਦਣ੍ਡਪ੍ਪਮਾਣੋਪਿ ਨਿਮਿਤ੍ਤੁਪਗੋ, ਨ ਤਤੋ ਓਰਂ ਵਟ੍ਟਤਿ. ਮਗ੍ਗੋ ਜਙ੍ਘਮਗ੍ਗੋ ਵਾ ਹੋਤੁ ਸਕਟਮਗ੍ਗੋ ਵਾ, ਯੋ ਵਿਨਿਵਿਜ੍ਝਿਤ੍ਵਾ ਦ੍ਵੇ ਤੀਣਿ ਗਾਮਕ੍ਖੇਤ੍ਤਾਨਿ ਗਚ੍ਛਤਿ, ਤਾਦਿਸੋ ਜਙ੍ਘਸਕਟਸਤ੍ਥੇਹਿ ਵਲ਼ਞ੍ਜਿਯਮਾਨੋਯੇਵ ਨਿਮਿਤ੍ਤੁਪਗੋ, ਅਵਲ਼ਞ੍ਜੋ ਨ ਵਟ੍ਟਤਿ. ਹੇਟ੍ਠਿਮਪਰਿਚ੍ਛੇਦੇਨ ਤਂਦਿਵਸਂ ਜਾਤੋ ਅਟ੍ਠਙ੍ਗੁਲੁਬ੍ਬੇਧੋ ਗੋਵਿਸਾਣਮਤ੍ਤੋਪਿ ਵਮ੍ਮਿਕੋ ਨਿਮਿਤ੍ਤੁਪਗੋ, ਤਤੋ ਓਰਂ ਨ ਵਟ੍ਟਤਿ. ਉਦਕਂ ਯਂ ਅਸਨ੍ਦਮਾਨਂ ਆਵਾਟਪੋਕ੍ਖਰਣਿਤਲ਼ਾਕਜਾਤਸ੍ਸਰਲੋਣਿਸਮੁਦ੍ਦਾਦੀਸੁ ਠਿਤਂ, ਤਂ ਆਦਿਂ ਕਤ੍ਵਾ ਅਨ੍ਤਮਸੋ ਤਙ੍ਖਣਂਯੇਵ ਪਥਵਿਯਂ ਖਤੇ ਆਵਾਟੇ ਘਟੇਹਿ ਆਹਰਿਤ੍ਵਾ ਪੂਰਿਤਮ੍ਪਿ ਯਾਵ ਕਮ੍ਮਵਾਚਾਪਰਿਯੋਸਾਨਾ ਸਣ੍ਠਹਨਕਂ ਨਿਮਿਤ੍ਤੁਪਗਂ, ਇਤਰਂ ਸਨ੍ਦਮਾਨਕਂ, ਵੁਤ੍ਤਪਰਿਚ੍ਛੇਦਕਾਲਂ ਅਤਿਟ੍ਠਨ੍ਤਂ, ਭਾਜਨਗਤਂ ਵਾ ਨ ਵਟ੍ਟਤਿ. ਯਾ ਅਬਦ੍ਧਸੀਮਾਲਕ੍ਖਣੇ ਨਦੀ ਵੁਤ੍ਤਾ, ਸਾ ਨਿਮਿਤ੍ਤੁਪਗਾ, ਅਞ੍ਞਾ ਨ ਵਟ੍ਟਤੀਤਿ.

੨੫੬੪. ਤੇਸੂਤਿ ਨਿਦ੍ਧਾਰਣੇ ਭੁਮ੍ਮਂ. ਤੀਣੀਤਿ ਨਿਦ੍ਧਾਰਿਤਬ੍ਬਦਸ੍ਸਨਂ, ਇਮਿਨਾ ਏਕਂ ਵਾ ਦ੍ਵੇ ਵਾ ਨਿਮਿਤ੍ਤਾਨਿ ਨ ਵਟ੍ਟਨ੍ਤੀਤਿ ਦਸ੍ਸੇਤਿ. ਯਥਾਹ – ‘‘ਸਾ ਏਵਂ ਸਮ੍ਮਨ੍ਨਿਤ੍ਵਾ ਬਜ੍ਝਮਾਨਾ ਏਕੇਨ, ਦ੍ਵੀਹਿ ਵਾ ਨਿਮਿਤ੍ਤੇਹਿ ਅਬਦ੍ਧਾ ਹੋਤੀ’’ਤਿ (ਮਹਾਵ. ਅਟ੍ਠ. ੧੩੮). ਸਤੇਨਾਪੀਤਿ ਏਤ੍ਥ ਪਿ-ਸਦ੍ਦੋ ਸਮ੍ਭਾਵਨਾਯਂ ਦਟ੍ਠਬ੍ਬੋ, ਤੇਨ ਵੀਸਤਿਯਾ, ਤਿਂਸਾਯ ਵਾ ਨਿਮਿਤ੍ਤੇਹਿ ਵਤ੍ਤਬ੍ਬਮੇਵ ਨਤ੍ਥੀਤਿ ਦੀਪੇਤਿ.

੨੫੬੫. ਤਿਯੋਜਨਂ ਪਰਂ ਉਕ੍ਕਟ੍ਠੋ ਪਰਿਚ੍ਛੇਦੋ ਏਤਿਸ੍ਸਾਤਿ ਤਿਯੋਜਨਪਰਾ. ‘‘ਵੀਸਤੀ’’ਤਿਆਦੀਨਂ ਸਙ੍ਖ੍ਯਾਨੇ, ਸਙ੍ਖ੍ਯੇਯ੍ਯੇ ਚ ਵਤ੍ਤਨਤੋ ਇਧ ਸਙ੍ਖ੍ਯਾਨੇ ਵਤ੍ਤਮਾਨਂ ਵੀਸਤਿ-ਸਦ੍ਦਂ ਗਹੇਤ੍ਵਾ ਏਕਵੀਸਤਿ ਭਿਕ੍ਖੂਨਨ੍ਤਿ ਭਿਨ੍ਨਾਧਿਕਰਣਨਿਦ੍ਦੇਸੋ ਕਤੋਤਿ ਦਟ੍ਠਬ੍ਬਂ. ‘‘ਏਕਵੀਸਤਿ’’ਨ੍ਤਿ ਵਤ੍ਤਬ੍ਬੇ ਗਾਥਾਬਨ੍ਧਵਸੇਨ ਨਿਗ੍ਗਹੀਤਲੋਪੋ, ਵੀਸਤਿਵਗ੍ਗਕਰਣੀਯਪਰਮਤ੍ਤਾ ਸਙ੍ਘਕਮ੍ਮਸ੍ਸ ਕਮ੍ਮਾਰਹੇਨ ਸਦ੍ਧਿਂ ਭਿਕ੍ਖੂਨਂ ਏਕਵੀਸਤਿਂ ਗਣ੍ਹਨ੍ਤੀਤਿ ਅਤ੍ਥੋ, ਇਦਞ੍ਚ ਨਿਸਿਨ੍ਨਾਨਂ ਵਸੇਨ ਵੁਤ੍ਤਂ. ਹੇਟ੍ਠਿਮਨ੍ਤਤੋ ਹਿ ਯਤ੍ਥ ਏਕਵੀਸਤਿ ਭਿਕ੍ਖੂ ਨਿਸੀਦਿਤੁਂ ਸਕ੍ਕੋਨ੍ਤਿ, ਤਤ੍ਤਕੇ ਪਦੇਸੇ ਸੀਮਂ ਬਨ੍ਧਿਤੁਂ ਵਟ੍ਟਤੀਤਿ.

੨੫੬੬. ਯਾ ਉਕ੍ਕਟ੍ਠਾਯਪਿ ਯਾ ਚ ਹੇਟ੍ਠਿਮਾਯਪਿ ਕੇਸਗ੍ਗਮਤ੍ਤਤੋਪਿ ਅਧਿਕਾ ਵਾ ਊਨਾ ਵਾ, ਏਤਾ ਦ੍ਵੇਪਿ ਸੀਮਾਯੋ ‘‘ਅਸੀਮਾ’’ਤਿ ਆਦਿਚ੍ਚਬਨ੍ਧੁਨਾ ਵੁਤ੍ਤਾਤਿ ਯੋਜਨਾ.

੨੫੬੭. ਸਮਨ੍ਤਤੋ ਸਬ੍ਬਮੇਵ ਨਿਮਿਤ੍ਤਂ ਕਿਤ੍ਤੇਤ੍ਵਾਤਿ ਪੁਬ੍ਬਦਿਸਾਨੁਦਿਸਾਦੀਸੁ ਪਰਿਤੋ ਸਬ੍ਬਦਿਸਾਸੁ ਯਥਾਲਦ੍ਧਂ ਨਿਮਿਤ੍ਤੋਪਗਂ ਸਬ੍ਬਨਿਮਿਤ੍ਤਂ ‘‘ਵਿਨਯਧਰੇਨ ਪੁਚ੍ਛਿਤਬ੍ਬਂ ‘ਪੁਰਤ੍ਥਿਮਾਯ ਦਿਸਾਯ ਕਿਂ ਨਿਮਿਤ੍ਤ’ਨ੍ਤਿ? ‘ਪਬ੍ਬਤੋ, ਭਨ੍ਤੇ’ਤਿ. ਪੁਨ ਵਿਨਯਧਰੇਨ ‘ਏਸੋ ਪਬ੍ਬਤੋ ਨਿਮਿਤ੍ਤ’’ਨ੍ਤਿਆਦਿਨਾ (ਮਹਾਵ. ਅਟ੍ਠ. ੧੩੮) ਅਟ੍ਠਕਥਾਯਂ ਵੁਤ੍ਤਨਯੇਨ ਨਿਮਿਤ੍ਤੇਨ ਨਿਮਿਤ੍ਤਂ ਘਟੇਤ੍ਵਾ ਕਿਤ੍ਤੇਤ੍ਵਾ. ਞਤ੍ਤਿ ਦੁਤਿਯਾ ਯਸ੍ਸਾਤਿ ਵਿਗ੍ਗਹੋ, ‘‘ਸੁਣਾਤੁ ਮੇ, ਭਨ੍ਤੇ ਸਙ੍ਘੋ, ਯਾਵਤਾ ਸਮਨ੍ਤਾ ਨਿਮਿਤ੍ਤਾ ਕਿਤ੍ਤਿਤਾ’’ਤਿਆਦਿਨਾ (ਮਹਾਵ. ੧੩੯) ਪਦਭਾਜਨੇ ਵੁਤ੍ਤੇਨ ਞਤ੍ਤਿਦੁਤਿਯੇਨ ਕਮ੍ਮੇਨਾਤਿ ਅਤ੍ਥੋ. ਅਰਹਤਿ ਪਹੋਤਿ ਵਿਨਯਧਰੋਤਿ ਅਧਿਪ੍ਪਾਯੋ.

੨੫੬੮. ਬਨ੍ਧਿਤ੍ਵਾਤਿ ਯਥਾਵੁਤ੍ਤਲਕ੍ਖਣਨਯੇਨ ਸਮਾਨਸਂਵਾਸਸੀਮਂ ਪਠਮਂ ਬਨ੍ਧਿਤ੍ਵਾ. ਅਨਨ੍ਤਰਨ੍ਤਿ ਕਿਚ੍ਚਨ੍ਤਰੇਨ ਬ੍ਯਵਹਿਤਂ ਅਕਤ੍ਵਾ, ਕਾਲਕ੍ਖੇਪਂ ਅਕਤ੍ਵਾਤਿ ਵੁਤ੍ਤਂ ਹੋਤਿ, ਸੀਮਂ ਸਮੂਹਨਿਤੁਕਾਮਾਨਂ ਪਚ੍ਚਤ੍ਤਿਕਾਨਂ ਓਕਾਸਂ ਅਦਤ੍ਵਾਤਿ ਅਧਿਪ੍ਪਾਯੋ. ਪਚ੍ਛਾਤਿ ਸਮਾਨਸਂਵਾਸਸਮ੍ਮੁਤਿਤੋ ਪਚ੍ਛਾ. ਚੀਵਰਾਵਿਪ੍ਪਵਾਸਕਂ ਸਮ੍ਮਨ੍ਨਿਤ੍ਵਾਨ ਯਾ ਬਦ੍ਧਾ, ਸਾ ‘‘ਅਵਿਪ੍ਪਵਾਸਾ’’ਤਿ ਵੁਚ੍ਚਤੀਤਿ ਯੋਜਨਾ.

ਤਤ੍ਥ ਚੀਵਰਾਵਿਪ੍ਪਵਾਸਕਂ ਸਮ੍ਮਨ੍ਨਿਤ੍ਵਾਨ ਯਾ ਬਦ੍ਧਾਤਿ ‘‘ਸੁਣਾਤੁ ਮੇ, ਭਨ੍ਤੇ ਸਙ੍ਘੋ, ਯਾ ਸਾ ਸਙ੍ਘੇਨ ਸੀਮਾ ਸਮ੍ਮਤਾ ਸਮਾਨਸਂਵਾਸਾ ਏਕੁਪੋਸਥਾ…ਪੇ… ਠਪੇਤ੍ਵਾ ਗਾਮਞ੍ਚ ਗਾਮੂਪਚਾਰਞ੍ਚ, ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ (ਮਹਾਵ. ੧੪੪) ਵੁਤ੍ਤਨਯੇਨ ਚੀਵਰੇਨ ਅਵਿਪ੍ਪਵਾਸਂ ਸਮ੍ਮਨ੍ਨਿਤ੍ਵਾ ਯਾ ਬਦ੍ਧਾ. ਸਾ ਅਵਿਪ੍ਪਵਾਸਾਤਿ ਵੁਚ੍ਚਤੀਤਿ ਤਤ੍ਥ ਵਸਨ੍ਤਾਨਂ ਭਿਕ੍ਖੂਨਂ ਚੀਵਰੇਨ ਵਿਪ੍ਪਵਾਸਨਿਮਿਤ੍ਤਾਪਤ੍ਤਿਯਾ ਅਭਾਵਤੋ ਤਥਾ ਵੁਚ੍ਚਤਿ, ‘‘ਅਵਿਪ੍ਪਵਾਸਸੀਮਾ’’ਤਿ ਵੁਚ੍ਚਤੀਤਿ ਵੁਤ੍ਤਂ ਹੋਤਿ.

੨੫੬੯. ‘‘ਯਾ ਕਾਚਿ ਨਦਿਲਕ੍ਖਣਪ੍ਪਤ੍ਤਾ ਨਦੀ ਨਿਮਿਤ੍ਤਾਨਿ ਕਿਤ੍ਤੇਤ੍ਵਾ ‘ਏਤਂ ਬਦ੍ਧਸੀਮਂ ਕਰੋਮਾ’ਤਿ ਕਤਾਪਿ ਅਸੀਮਾਵ ਹੋਤੀ’’ਤਿਆਦਿਕਂ (ਮਹਾਵ. ਅਟ੍ਠ. ੧੪੭) ਅਟ੍ਠਕਥਾਨਯਂ ਦਸ੍ਸੇਤੁਮਾਹ ‘‘ਨਦੀ…ਪੇ… ਨ ਵੋਤ੍ਥਰਤੀ’’ਤਿ, ਨ ਪਤ੍ਥਰਤਿ ਸੀਮਾਭਾਵੇਨ ਬ੍ਯਾਪਿਨੀ ਨ ਹੋਤੀਤਿ ਅਤ੍ਥੋ. ਤੇਨੇਵਾਤਿ ਯੇਨ ਨ ਵੋਤ੍ਥਰਤਿ, ਤੇਨੇਵ ਕਾਰਣੇਨ. ਅਬ੍ਰਵੀਤਿ ‘‘ਸਬ੍ਬਾ, ਭਿਕ੍ਖਵੇ, ਨਦੀ ਅਸੀਮਾ, ਸਬ੍ਬੋ ਸਮੁਦ੍ਦੋ ਅਸੀਮੋ, ਸਬ੍ਬੋ ਜਾਤਸ੍ਸਰੋ ਅਸੀਮੋ’’ਤਿ (ਮਹਾਵ. ੧੪੭) ਅਵੋਚ.

ਸੀਮਾਕਥਾਵਣ੍ਣਨਾ.

੨੫੭੦. ਅਟ੍ਠਮਿਯਾਪਿ ਉਪੋਸਥਵੋਹਾਰਤ੍ਤਾ ਦਿਨਵਸੇਨ ਉਪੋਸਥਾਨਂ ਅਤਿਰੇਕਤ੍ਤੇਪਿ ਇਧ ਅਧਿਪ੍ਪੇਤੇਯੇਵ ਉਪੋਸਥੇ ਗਹੇਤ੍ਵਾ ਆਹ ‘‘ਨਵੇਵਾ’’ਤਿ.

੨੫੭੧-੩. ਤੇ ਸਰੂਪਤੋ ਦਸ੍ਸੇਤੁਮਾਹ ‘‘ਚਾਤੁਦ੍ਦਸੋ…ਪੇ… ਕਮ੍ਮੇਨੁਪੋਸਥਾ’’ਤਿ. ਚਤੁਦ੍ਦਸਨ੍ਨਂ ਪੂਰਣੋ ਚਾਤੁਦ੍ਦਸੋ. ਪਨ੍ਨਰਸਨ੍ਨਂ ਪੂਰਣੋ ਪਨ੍ਨਰਸੋ. ਯਦਾ ਪਨ ਕੋਸਮ੍ਬਕ੍ਖਨ੍ਧਕੇ (ਮਹਾਵ. ੪੫੧ ਆਦਯੋ) ਆਗਤਨਯੇਨ ਭਿਨ੍ਨੇ ਸਙ੍ਘੇ ਓਸਾਰਿਤੇ ਤਸ੍ਮਿਂ ਭਿਕ੍ਖੁਸ੍ਮਿਂ ਸਙ੍ਘੋ ਤਸ੍ਸ ਵਤ੍ਥੁਸ੍ਸ ਵੂਪਸਮਾਯ ਸਙ੍ਘਸਾਮਗ੍ਗਿਂ ਕਰੋਤਿ, ਤਦਾ ‘‘ਤਾਵਦੇਵ ਉਪੋਸਥੋ ਕਾਤਬ੍ਬੋ, ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬ’’ਨ੍ਤਿ (ਮਹਾਵ. ੪੭੫) ਵਚਨਤੋ ਠਪੇਤ੍ਵਾ ਚਾਤੁਦ੍ਦਸਪਨ੍ਨਰਸੇ ਅਞ੍ਞੋਪਿ ਯੋ ਕੋਚਿ ਦਿਵਸੋ ਸਾਮਗ੍ਗੀ ਉਪੋਸਥੋਤਿ. ਏਤ੍ਥ ਇਤਿ-ਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋ. ਚਾਤੁਦ੍ਦਸੋ, ਪਨ੍ਨਰਸੋ, ਸਾਮਗ੍ਗੀ ਚ ਉਪੋਸਥੋਤਿ ਏਤੇ ਤਯੋਪਿ ਉਪੋਸਥਾ ਦਿਵਸੇਨੇਵ ਨਿਦ੍ਦਿਟ੍ਠਾ ਦਿਵਸੇਨੇਵ ਵੁਤ੍ਤਾਤਿ ਯੋਜਨਾ.

ਸਙ੍ਘੇਉਪੋਸਥੋਤਿ ਸਙ੍ਘੇਨ ਕਾਤਬ੍ਬਉਪੋਸਥੋ. ਗਣੇਪੁਗ੍ਗਲੁਪੋਸਥੋਤਿ ਏਤ੍ਥਾਪਿ ਏਸੇਵ ਨਯੋ. ਸਾਧ੍ਯਸਾਧਨਲਕ੍ਖਣਸ੍ਸ ਸਮ੍ਬਨ੍ਧਸ੍ਸ ਲਬ੍ਭਮਾਨਤ੍ਤਾ ‘‘ਸਙ੍ਘੇ’’ਤਿਆਦੀਸੁ ਸਾਮਿਵਚਨਪ੍ਪਸਙ੍ਗੇ ਭੁਮ੍ਮਨਿਦ੍ਦੇਸੋ. ਉਪੋਸਥੋ ਸਾਧ੍ਯੋ ਕਮ੍ਮਭਾਵਤੋ, ਸਙ੍ਘਗਣਪੁਗ੍ਗਲਾ ਸਾਧਨਂ ਕਾਰਕਭਾਵਤੋ.

ਸੁਤ੍ਤਸ੍ਸ ਉਦ੍ਦੇਸੋ ਸੁਤ੍ਤੁਦ੍ਦੇਸੋ, ਸੁਤ੍ਤੁਦ੍ਦੇਸੋਤਿ ਅਭਿਧਾਨਂ ਨਾਮਂ ਯਸ੍ਸ ਸੋ ਸੁਤ੍ਤੁਦ੍ਦੇਸਾਭਿਧਾਨੋ. ਕਮ੍ਮੇਨਾਤਿ ਕਿਚ੍ਚਵਸੇਨ.

੨੫੭੪. ‘‘ਅਧਿਟ੍ਠਾਨ’’ਨ੍ਤਿ ਵਾਚ੍ਚਲਿਙ੍ਗਮਪੇਕ੍ਖਿਤ੍ਵਾ ‘‘ਨਿਦ੍ਦਿਟ੍ਠ’’ਨ੍ਤਿ ਨਪੁਂਸਕਨਿਦ੍ਦੇਸੋ. ਵਾਚ੍ਚਲਿਙ੍ਗਾ ਹਿ ਤਬ੍ਬਾਦਯੋਤਿ ਪਾਤਿਮੋਕ੍ਖੋ ਨਿਦ੍ਦਿਟ੍ਠੋ, ਪਾਰਿਸੁਦ੍ਧਿ ਨਿਦ੍ਦਿਟ੍ਠਾਤਿ ਪੁਮਿਤ੍ਥਿਲਿਙ੍ਗੇਨ ਯੋਜੇਤਬ੍ਬਾ.

੨੫੭੫. ਵੁਤ੍ਤਾਤਿ ‘‘ਪਞ੍ਚਿਮੇ, ਭਿਕ੍ਖਵੇ, ਪਾਤਿਮੋਕ੍ਖੁਦ੍ਦੇਸਾ, ਨਿਦਾਨਂ ਉਦ੍ਦਿਸਿਤ੍ਵਾ ਅਵਸੇਸਂ ਸੁਤੇਨ ਸਾਵੇਤਬ੍ਬਂ, ਅਯਂ ਪਠਮੋ ਪਾਤਿਮੋਕ੍ਖੁਦ੍ਦੇਸੋ’’ਤਿਆਦਿਨਾ (ਮਹਾਵ. ੧੫੦) ਦੇਸਿਤਾ, ਸਯਞ੍ਚ ਤੇਸਞ੍ਚ ਉਦ੍ਦੇਸੇ ਸਙ੍ਖੇਪਤੋ ਦਸ੍ਸੇਤੁਮਾਹ ‘‘ਨਿਦਾਨ’’ਨ੍ਤਿਆਦਿ. ਸਾਵੇਤਬ੍ਬਨ੍ਤਿ ਏਤ੍ਥ ‘‘ਸੁਤੇਨਾ’’ਤਿ ਸੇਸੋ. ਸੇਸਕਨ੍ਤਿ ਅਨੁਦ੍ਦਿਟ੍ਠਟ੍ਠਾਨਂ –

‘‘ਸੁਣਾਤੁ ਮੇ, ਭਨ੍ਤੇ ਸਙ੍ਘੋ…ਪੇ… ਆਵਿਕਤਾ ਹਿਸ੍ਸ ਫਾਸੁ ਹੋਤੀਤਿ ਇਮਂ ਨਿਦਾਨਂ ਉਦ੍ਦਿਸਿਤ੍ਵਾ ‘ਉਦ੍ਦਿਟ੍ਠਂ ਖੋ ਆਯਸ੍ਮਨ੍ਤੋ ਨਿਦਾਨਂ, ਤਤ੍ਥਾਯਸ੍ਮਨ੍ਤੇ ਪੁਚ੍ਛਾਮਿ ਕਚ੍ਚਿਤ੍ਥ ਪਰਿਸੁਦ੍ਧਾ, ਦੁਤਿਯਮ੍ਪਿ ਪੁਚ੍ਛਾਮਿ…ਪੇ… ਏਵਮੇਤਂ ਧਾਰਯਾਮੀ’ਤਿ ਵਤ੍ਵਾ ‘ਉਦ੍ਦਿਟ੍ਠਂ ਖੋ ਆਯਸ੍ਮਨ੍ਤੋ ਨਿਦਾਨਂ. ਸੁਤਾ ਖੋ ਪਨਾਯਸ੍ਮਨ੍ਤੇਹਿ ਚਤ੍ਤਾਰੋ ਪਾਰਾਜਿਕਾ ਧਮ੍ਮਾ…ਪੇ… ਅਵਿਵਦਮਾਨੇਹਿ ਸਿਕ੍ਖਿਤਬ੍ਬ’’ਨ੍ਤਿ (ਮਹਾਵ. ਅਟ੍ਠ. ੧੫੦) –

ਅਟ੍ਠਕਥਾਯ ਵੁਤ੍ਤਨਯੇਨ ਅਵਸੇਸਂ ਸੁਤੇਨ ਸਾਵੇਤਬ੍ਬਂ.

੨੫੭੬. ਸੇਸੇਸੁਪੀਤਿ ਉਦ੍ਦਿਟ੍ਠਾਪੇਕ੍ਖਾਯ ਸੇਸੇਸੁ ਪਾਰਾਜਿਕੁਦ੍ਦੇਸਾਦੀਸੁਪਿ. ‘‘ਅਯਮੇਵ ਨਯੋ ਞੇਯ੍ਯੋ’’ਤਿ ਸਾਮਞ੍ਞੇਨ ਵੁਤ੍ਤੇਪਿ ‘‘ਵਿਤ੍ਥਾਰੇਨੇਵ ਪਞ੍ਚਮੋ’’ਤਿ ਵਚਨਤੋ ਵਿਤ੍ਥਾਰੁਦ੍ਦੇਸੇ ‘‘ਸਾਵੇਤਬ੍ਬਂ ਤੁ ਸੇਸਕ’’ਨ੍ਤਿ ਅਯਂ ਨਯੋ ਨ ਲਬ੍ਭਤਿ. ‘‘ਸਾਵੇਤਬ੍ਬਂ ਤੁ ਸੇਸਕ’’ਨ੍ਤਿ ਵਚਨਤੋ ਪਾਰਾਜਿਕੁਦ੍ਦੇਸਾਦੀਸੁ ਯਸ੍ਮਿਂ ਵਿਪ੍ਪਕਤੇ ਅਨ੍ਤਰਾਯੋ ਉਪ੍ਪਜ੍ਜਤਿ, ਤੇਨ ਸਦ੍ਧਿਂ ਅਵਸੇਸਂ ਸੁਤੇਨ ਸਾਵੇਤਬ੍ਬਂ. ਨਿਦਾਨੁਦ੍ਦੇਸੇ ਪਨ ਅਨੁਦ੍ਦਿਟ੍ਠੇ ਸੁਤੇਨ ਸਾਵੇਤਬ੍ਬਂ ਨਾਮ ਨਤ੍ਥਿ. ਭਿਕ੍ਖੁਨਿਪਾਤਿਮੋਕ੍ਖੇ ਅਨਿਯਤੁਦ੍ਦੇਸਸ੍ਸ ਪਰਿਹੀਨਤ੍ਤਾ ‘‘ਭਿਕ੍ਖੁਨੀਨਞ੍ਚ ਚਤ੍ਤਾਰੋ’’ਤਿ ਵੁਤ੍ਤਂ. ਉਦ੍ਦੇਸਾ ਨਵਿਮੇ ਪਨਾਤਿ ਭਿਕ੍ਖੂਨਂ ਪਞ੍ਚ, ਭਿਕ੍ਖੁਨੀਨਂ ਚਤ੍ਤਾਰੋਤਿ ਉਭਤੋਪਾਤਿਮੋਕ੍ਖੇ ਇਮੇ ਨਵ ਉਦ੍ਦੇਸਾ ਵੁਤ੍ਤਾਤਿ ਅਤ੍ਥੋ.

੨੫੭੭. ਉਪੋਸਥੇਤਿ ਸਙ੍ਘੁਪੋਸਥੇ. ਅਨ੍ਤਰਾਯਨ੍ਤਿ ਰਾਜਨ੍ਤਰਾਯਾਦਿਕਂ ਦਸਵਿਧਂ ਅਨ੍ਤਰਾਯਂ. ਯਥਾਹ – ‘‘ਰਾਜਨ੍ਤਰਾਯੋ ਚੋਰਨ੍ਤਰਾਯੋ ਅਗ੍ਯਨ੍ਤਰਾਯੋ ਉਦਕਨ੍ਤਰਾਯੋ ਮਨੁਸ੍ਸਨ੍ਤਰਾਯੋ ਅਮਨੁਸ੍ਸਨ੍ਤਰਾਯੋ ਵਾਲ਼ਨ੍ਤਰਾਯੋ ਸਰੀਸਪਨ੍ਤਰਾਯੋ ਜੀਵਿਤਨ੍ਤਰਾਯੋ ਬ੍ਰਹ੍ਮਚਰਿਯਨ੍ਤਰਾਯੋ’’ਤਿ (ਮਹਾਵ. ੧੫੦).

ਤਤ੍ਥ ਸਚੇ ਭਿਕ੍ਖੂਸੁ ‘‘ਉਪੋਸਥਂ ਕਰਿਸ੍ਸਾਮਾ’’ਤਿ (ਮਹਾਵ. ਅਟ੍ਠ. ੧੫੦) ਨਿਸਿਨ੍ਨੇਸੁ ਰਾਜਾ ਆਗਚ੍ਛਤਿ, ਅਯਂ ਰਾਜਨ੍ਤਰਾਯੋ. ਚੋਰਾ ਆਗਚ੍ਛਨ੍ਤਿ, ਅਯਂ ਚੋਰਨ੍ਤਰਾਯੋ. ਦਵਦਾਹੋ ਆਗਚ੍ਛਤਿ ਵਾ, ਆਵਾਸੇ ਵਾ ਅਗ੍ਗਿ ਉਟ੍ਠਹਤਿ, ਅਯਂ ਅਗ੍ਯਨ੍ਤਰਾਯੋ. ਮੇਘੋ ਵਾ ਉਟ੍ਠੇਤਿ, ਓਘੋ ਵਾ ਆਗਚ੍ਛਤਿ, ਅਯਂ ਉਦਕਨ੍ਤਰਾਯੋ. ਬਹੂ ਮਨੁਸ੍ਸਾ ਆਗਚ੍ਛਨ੍ਤਿ, ਅਯਂ ਮਨੁਸ੍ਸਨ੍ਤਰਾਯੋ. ਭਿਕ੍ਖੁਂ ਯਕ੍ਖੋ ਗਣ੍ਹਾਤਿ, ਅਯਂ ਅਮਨੁਸ੍ਸਨ੍ਤਰਾਯੋ. ਬ੍ਯਗ੍ਘਾਦਯੋ ਚਣ੍ਡਮਿਗਾ ਆਗਚ੍ਛਨ੍ਤਿ, ਅਯਂ ਵਾਲ਼ਨ੍ਤਰਾਯੋ. ਭਿਕ੍ਖੁਂ ਸਪ੍ਪਾਦਯੋ ਡਂਸਨ੍ਤਿ, ਅਯਂ ਸਰੀਸਪਨ੍ਤਰਾਯੋ. ਭਿਕ੍ਖੁ ਗਿਲਾਨੋ ਵਾ ਹੋਤਿ, ਕਾਲਂ ਵਾ ਕਰੋਤਿ, ਵੇਰਿਨੋ ਵਾ ਤਂ ਮਾਰੇਤੁਂ ਗਣ੍ਹਨ੍ਤਿ, ਅਯਂ ਜੀਵਿਤਨ੍ਤਰਾਯੋ. ਮਨੁਸ੍ਸਾ ਏਕਂ ਵਾ ਬਹੁਂ ਵਾ ਭਿਕ੍ਖੂ ਬ੍ਰਹ੍ਮਚਰਿਯਾ ਚਾਵੇਤੁਕਾਮਾ ਗਣ੍ਹਨ੍ਤਿ, ਅਯਂ ਬ੍ਰਹ੍ਮਚਰਿਯਨ੍ਤਰਾਯੋ.

‘‘ਚੇਵਾ’’ਤਿ ਇਮਿਨਾ ਅਨ੍ਤਰਾਯੇਵ ਅਨ੍ਤਰਾਯਸਞ੍ਞਿਨਾ ਵਿਤ੍ਥਾਰੁਦ੍ਦੇਸੇ ਅਕਤੇਪਿ ਅਨਾਪਤ੍ਤੀਤਿ ਦੀਪੇਤਿ. ਅਨੁਦ੍ਦੇਸੋਤਿ ਵਿਤ੍ਥਾਰੇਨ ਅਨੁਦ੍ਦੇਸੋ. ਨਿਵਾਰਿਤੋਤਿ ‘‘ਨ, ਭਿਕ੍ਖਵੇ, ਅਸਤਿ ਅਨ੍ਤਰਾਯੇ ਸਂਖਿਤ੍ਤੇਨ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬ’’ਨ੍ਤਿਆਦਿਨਾ (ਮਹਾਵ. ੧੫੦) ਪਟਿਸਿਦ੍ਧੋ. ਇਮਿਨਾ ‘‘ਅਨੁਜਾਨਾਮਿ, ਭਿਕ੍ਖਵੇ, ਸਤਿ ਅਨ੍ਤਰਾਯੇ ਸਂਖਿਤ੍ਤੇਨ ਪਾਤਿਮੋਕ੍ਖਂ ਉਦ੍ਦਿਸਿਤੁ’’ਨ੍ਤਿ (ਮਹਾਵ. ੧੫੦) ਇਦਮ੍ਪਿ ਵਿਭਾਵਿਤਂ ਹੋਤਿ.

੨੫੭੮. ਤਸ੍ਸਾਤਿ ਪਾਤਿਮੋਕ੍ਖਸ੍ਸ. ਇਸ੍ਸਰਣਸ੍ਸ ਹੇਤੁਮਾਹ ‘‘‘ਥੇਰਾਧੇਯ੍ਯ’ਨ੍ਤਿ ਪਾਠਤੋ’’ਤਿ. ਥੇਰਾਧੇਯ੍ਯਨ੍ਤਿ ਥੇਰਾਧੀਨਂ, ਥੇਰਾਯਤ੍ਤਨ੍ਤਿ ਅਤ੍ਥੋ. ਪਾਠਤੋਤਿ ਪਾਲ਼ਿਵਚਨਤੋ. ‘‘ਯੋ ਤਤ੍ਥ ਭਿਕ੍ਖੁ ਬ੍ਯਤ੍ਤੋ ਪਟਿਬਲੋ, ਤਸ੍ਸਾਧੇਯ੍ਯਂ ਪਾਤਿਮੋਕ੍ਖ’’ਨ੍ਤਿ (ਮਹਾਵ. ੧੫੫) ਵਚਨਤੋ ਆਹ ‘‘ਅਵਤ੍ਤਨ੍ਤੇਨਾ’’ਤਿਆਦਿ. ਅਵਤ੍ਤਨ੍ਤੇਨਾਤਿ ਅਨ੍ਤਮਸੋ ਦ੍ਵੇਪਿ ਉਦ੍ਦੇਸੇ ਉਦ੍ਦਿਸਿਤੁਂ ਅਸਕ੍ਕੋਨ੍ਤੇਨ. ਥੇਰੇਨ ਯੋ ਅਜ੍ਝਿਟ੍ਠੋ, ਏਵਮਜ੍ਝਿਟ੍ਠਸ੍ਸ ਯਸ੍ਸ ਪਨ ਥੇਰਸ੍ਸ, ਨਵਸ੍ਸ, ਮਜ੍ਝਿਮਸ੍ਸ ਵਾ ਸੋ ਪਾਤਿਮੋਕ੍ਖੋ ਵਤ੍ਤਤਿ ਪਗੁਣੋ ਹੋਤਿ, ਸੋ ਇਸ੍ਸਰੋਤਿ ਸਮ੍ਬਨ੍ਧੋ.

ਅਜ੍ਝਿਟ੍ਠੋਤਿ ‘‘ਤ੍ਵਂ, ਆਵੁਸੋ, ਪਾਤਿਮੋਕ੍ਖਂ ਉਦ੍ਦਿਸਾ’’ਤਿ ਆਣਤ੍ਤੋ, ਇਮਿਨਾ ਅਨਾਣਤ੍ਤਸ੍ਸ ਉਦ੍ਦਿਸਿਤੁਂ ਸਾਮਤ੍ਥਿਯਾ ਸਤਿਪਿ ਅਨਿਸ੍ਸਰਭਾਵੋ ਦੀਪਿਤੋ ਹੋਤਿ. ਯਥਾਹ – ‘‘ਸਚੇ ਥੇਰਸ੍ਸ ਪਞ੍ਚ ਵਾ ਚਤ੍ਤਾਰੋ ਵਾ ਤਯੋ ਵਾ ਪਾਤਿਮੋਕ੍ਖੁਦ੍ਦੇਸਾ ਨਾਗਚ੍ਛਨ੍ਤਿ, ਦ੍ਵੇ ਪਨ ਅਖਣ੍ਡਾ ਸੁਵਿਸਦਾ ਵਾਚੁਗ੍ਗਤਾ ਹੋਨ੍ਤਿ, ਥੇਰਾਯਤ੍ਤੋਵ ਪਾਤਿਮੋਕ੍ਖੋ. ਸਚੇ ਪਨ ਏਤ੍ਤਕਮ੍ਪਿ ਵਿਸਦਂ ਕਾਤੁਂ ਨ ਸਕ੍ਕੋਤਿ, ਬ੍ਯਤ੍ਤਸ੍ਸ ਭਿਕ੍ਖੁਨੋ ਆਯਤ੍ਤੋ ਹੋਤੀ’’ਤਿ (ਮਹਾਵ. ਅਟ੍ਠ. ੧੫੫).

੨੫੭੯. ਉਦ੍ਦਿਸਨ੍ਤੇਤਿ ਪਾਤਿਮੋਕ੍ਖੁਦ੍ਦੇਸਕੇ ਪਾਤਿਮੋਕ੍ਖਂ ਉਦ੍ਦਿਸਨ੍ਤੇ. ਸਮਾ ਵਾਤਿ ਆਵਾਸਿਕੇਹਿ ਗਣਨੇਨ ਸਮਾ ਵਾ. ਅਪ੍ਪਾ ਵਾਤਿ ਊਨਾ ਵਾ. ਆਗਚ੍ਛਨ੍ਤਿ ਸਚੇ ਪਨਾਤਿ ਸਚੇ ਪਨ ਆਗਨ੍ਤੁਕਾ ਭਿਕ੍ਖੂ ਆਗਚ੍ਛਨ੍ਤਿ. ਸੇਸਕਨ੍ਤਿ ਅਨੁਦ੍ਦਿਟ੍ਠਟ੍ਠਾਨਂ.

੨੫੮੦. ਉਦ੍ਦਿਟ੍ਠਮਤ੍ਤੇਤਿ ਉਦ੍ਦਿਟ੍ਠਕ੍ਖਣੇਯੇਵ ਕਥਾਰਮ੍ਭਤੋ ਪੁਬ੍ਬਮੇਵ. ‘‘ਵਾ’’ਤਿ ਇਦਂ ਏਤ੍ਥਾਪਿ ਯੋਜੇਤਬ੍ਬਂ, ਇਮਿਨਾ ਅਵੁਤ੍ਤਂ ‘‘ਅਵੁਟ੍ਠਿਤਾਯ ਵਾ’’ਤਿ ਇਮਂ ਵਿਕਪ੍ਪਂ ਸਮ੍ਪਿਣ੍ਡੇਤਿ. ਅਵੁਟ੍ਠਿਤਾਯ ਪਰਿਸਾਯਾਤਿ ਚ ਭਿਕ੍ਖੁਪਰਿਸਾਯ ਅਞ੍ਞਮਞ੍ਞਂ ਸੁਖਕਥਾਯ ਨਿਸਿਨ੍ਨਾਯਯੇਵਾਤਿ ਅਤ੍ਥੋ. ਪਰਿਸਾਯਾਤਿ ਏਤ੍ਥ ‘‘ਏਕਚ੍ਚਾਯਾ’’ਤਿ ਚ ‘‘ਸਬ੍ਬਾਯਾ’’ਤਿ ਚ ਸੇਸੋ. ਭਿਕ੍ਖੂਨਂ ਏਕਚ੍ਚਾਯ ਪਰਿਸਾਯ ਵੁਟ੍ਠਿਤਾਯ ਵਾ ਸਬ੍ਬਾਯ ਪਰਿਸਾਯ ਵੁਟ੍ਠਿਤਾਯ ਵਾਤਿ ਯੋਜਨਾ. ਤੇਸਨ੍ਤਿ ਵੁਤ੍ਤਪ੍ਪਕਾਰਾਨਂ ਆਵਾਸਿਕਾਨਂ. ਮੂਲੇਤਿ ਸਨ੍ਤਿਕੇ. ਪਾਰਿਸੁਦ੍ਧਿ ਕਾਤਬ੍ਬਾਤਿ ਯੋਜਨਾ. ‘‘ਇਧ ਪਨ, ਭਿਕ੍ਖਵੇ…ਪੇ… ਆਗਚ੍ਛਨ੍ਤਿ ਬਹੁਤਰਾ, ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਪੁਨ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬ’’ਨ੍ਤਿ ਵੁਤ੍ਤਨਯਂ ਦਸ੍ਸੇਤੁਮਾਹ ‘‘ਸਚੇ ਬਹੂ’’ਤਿ. ਏਤ੍ਥ ‘‘ਪੁਨ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬ’’ਨ੍ਤਿ ਸੇਸੋ. ਸਬ੍ਬਵਿਕਪ੍ਪੇਸੁ ਪੁਬ੍ਬਕਿਚ੍ਚਂ ਕਤ੍ਵਾ ਪੁਨ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਨ੍ਤਿ ਅਤ੍ਥੋ. ਅਯਂ ਪਨੇਤ੍ਥ ਸੇਸਵਿਨਿਚ੍ਛਯੋ –

‘‘ਪਨ੍ਨਰਸੋਵਾਸਿਕਾਨਂ, ਇਤਰਾਨਂ ਸਚੇਤਰੋ;

ਸਮਾਨੇਤਰੇਨੁਵਤ੍ਤਨ੍ਤੁ, ਪੁਰਿਮਾਨਂ ਸਚੇਧਿਕਾ;

ਪੁਰਿਮਾ ਅਨੁਵਤ੍ਤਨ੍ਤੁ, ਤੇਸਂ ਸੇਸੇਪ੍ਯਯਂ ਨਯੋ.

‘‘ਪਾਟਿਪਦੋਵਾਸਿਕਾਨਂ,

ਇਤਰਾਨਂ ਉਪੋਸਥੋ;

ਸਮਥੋਕਾਨਂ ਸਾਮਗ੍ਗਿਂ,

ਮੂਲਟ੍ਠਾ ਦੇਨ੍ਤੁ ਕਾਮਤੋ.

ਬਹਿ ਗਨ੍ਤ੍ਵਾਨ ਕਾਤਬ੍ਬੋ,

ਨੋ ਚੇ ਦੇਨ੍ਤਿ ਉਪੋਸਥੋ;

ਦੇਯ੍ਯਾਨਿਚ੍ਛਾਯ ਸਾਮਗ੍ਗੀ,

ਬਹੂਸੁ ਬਹਿ ਵਾ ਵਜੇ.

‘‘ਪਾਟਿਪਦੇਗਨ੍ਤੁਕਾਨਂ, ਏਵਮੇਵ ਅਯਂ ਨਯੋ;

ਸਾਵੇਯ੍ਯ ਸੁਤ੍ਤਂ ਸਞ੍ਚਿਚ੍ਚ, ਅਸ੍ਸਾਵੇਨ੍ਤਸ੍ਸ ਦੁਕ੍ਕਟਨ੍ਤਿ.

੨੫੮੧. ਵਿਨਿਦ੍ਦਿਟ੍ਠਸ੍ਸਾਤਿ ਆਣਤ੍ਤਸ੍ਸ, ਇਮਿਨਾ ਇਤਰੇਸਂ ਅਨਾਪਤ੍ਤੀਤਿ ਦੀਪੇਤਿ. ਇਧ ‘‘ਅਗਿਲਾਨਸ੍ਸਾ’’ਤਿ ਸੇਸੋ. ਥੇਰੇਨ ਆਣਾਪੇਨ੍ਤੇਨ ‘‘ਕਿਞ੍ਚਿ ਕਮ੍ਮਂ ਕਰੋਨ੍ਤੋ ਵਾ ਸਦਾਕਾਲਮੇਵ ਏਕੋ ਵਾ ਭਾਰਨਿਤ੍ਥਰਣਕੋ ਵਾ ਸਰਭਾਣਕਧਮ੍ਮਕਥਿਕਾਦੀਸੁ ਅਞ੍ਞਤਰੋ ਵਾ ਨ ਉਪੋਸਥਾਗਾਰਸਮ੍ਮਜ੍ਜਨਤ੍ਥਂ ਆਣਾਪੇਤਬ੍ਬੋ, ਅਵਸੇਸਾ ਪਨ ਵਾਰੇਨ ਆਣਾਪੇਤਬ੍ਬਾ’’ਤਿ (ਮਹਾਵ. ਅਟ੍ਠ. ੧੫੯) ਅਟ੍ਠਕਥਾਯ ਵੁਤ੍ਤਵਿਧਿਨਾ ਆਣਾਪੇਤਬ੍ਬੋ. ਸਚੇ ਆਣਤ੍ਤੋ ਸਮ੍ਮਜ੍ਜਨਿਂ ਤਾਵਕਾਲਿਕਮ੍ਪਿ ਨ ਲਭਤਿ, ਸਾਖਾਭਙ੍ਗਂ ਕਪ੍ਪਿਯਂ ਕਾਰੇਤ੍ਵਾ ਸਮ੍ਮਜ੍ਜਿਤਬ੍ਬਂ. ਤਮ੍ਪਿ ਅਲਭਨ੍ਤਸ੍ਸ ਲਦ੍ਧਕਪ੍ਪਿਯਂ ਹੋਤਿ.

ਆਸਨਪਞ੍ਞਾਪਨਾਣਤ੍ਤਿਯਮ੍ਪਿ ਵੁਤ੍ਤਨਯੇਨੇਵ ਆਣਾਪੇਤਬ੍ਬੋ. ਆਣਾਪੇਨ੍ਤੇਨ ਚ ਸਚੇ ਉਪੋਸਥਾਗਾਰੇ ਆਸਨਾਨਿ ਨਤ੍ਥਿ, ਸਙ੍ਘਿਕਾਵਾਸਤੋਪਿ ਆਹਰਿਤ੍ਵਾ ਪਞ੍ਞਪੇਤ੍ਵਾ ਪੁਨ ਆਹਰਿਤਬ੍ਬਾਨਿ. ਆਸਨੇਸੁ ਅਸਤਿ ਕਟਸਾਰਕੇਪਿ ਤਟ੍ਟਿਕਾਯੋਪਿ ਪਞ੍ਞਪੇਤੁਂ ਵਟ੍ਟਤਿ, ਤਟ੍ਟਿਕਾਸੁਪਿ ਅਸਤਿ ਸਾਖਾਭਙ੍ਗਾਨਿ ਕਪ੍ਪਿਯਂ ਕਾਰੇਤ੍ਵਾ ਪਞ੍ਞਪੇਤਬ੍ਬਾਨਿ, ਕਪ੍ਪਿਯਕਾਰਕਂ ਅਲਭਨ੍ਤਸ੍ਸ ਲਦ੍ਧਕਪ੍ਪਿਯਂ ਹੋਤਿ.

ਪਦੀਪਕਰਣੇਪਿ ਵੁਤ੍ਤਨਯੇਨੇਵ ਆਣਾਪੇਤਬ੍ਬੋ. ਆਣਾਪੇਨ੍ਤੇਨ ਚ ‘‘ਅਸੁਕਸ੍ਮਿਂ ਨਾਮ ਓਕਾਸੇ ਤੇਲਂ ਵਾ ਵਟ੍ਟਿ ਵਾ ਕਪਲ੍ਲਿਕਾ ਵਾ ਅਤ੍ਥਿ, ਤਂ ਗਹੇਤ੍ਵਾ ਕਰੋਹੀ’’ਤਿ ਵਤ੍ਤਬ੍ਬੋ. ਸਚੇ ਤੇਲਾਦੀਨਿ ਨਤ੍ਥਿ, ਭਿਕ੍ਖਾਚਾਰੇਨਪਿ ਪਰਿਯੇਸਿਤਬ੍ਬਾਨਿ. ਪਰਿਯੇਸਿਤ੍ਵਾ ਅਲਭਨ੍ਤਸ੍ਸ ਲਦ੍ਧਕਪ੍ਪਿਯਂ ਹੋਤਿ. ਅਪਿਚ ਕਪਾਲੇ ਅਗ੍ਗਿਪਿ ਜਾਲੇਤਬ੍ਬੋ.

੨੫੮੨. ਦੀਪਨ੍ਤਿ ਏਤ੍ਥ ‘‘ਜਾਲੇਤ੍ਵਾ’’ਤਿ ਸੇਸੋ. ਅਥ ਵਾ ‘‘ਕਤ੍ਵਾ’’ਤਿ ਇਮਿਨਾ ਚ ਯੋਜੇਤਬ੍ਬਂ. ਗਣਞਤ੍ਤਿਂ ਠਪੇਤ੍ਵਾਤਿ ‘‘ਸੁਣਨ੍ਤੁ ਮੇ, ਆਯਸ੍ਮਨ੍ਤਾ, ਅਜ੍ਜੁਪੋਸਥੋ ਪਨ੍ਨਰਸੋ, ਯਦਾਯਸ੍ਮਨ੍ਤਾਨਂ ਪਤ੍ਤਕਲ੍ਲਂ, ਮਯਂ ਅਞ੍ਞਮਞ੍ਞਂ ਪਾਰਿਸੁਦ੍ਧਿਉਪੋਸਥਂ ਕਰੇਯ੍ਯਾਮਾ’’ਤਿ ਏਵਂ ਗਣਞਤ੍ਤਿਂ ਨਿਕ੍ਖਿਪਿਤ੍ਵਾ. ਕਤ੍ਤਬ੍ਬੋ ਤੀਹੁਪੋਸਥੋਤਿ ਤੀਹਿ ਭਿਕ੍ਖੂਹਿ ਉਪੋਸਥੋ ਕਾਤਬ੍ਬੋ. ਤੀਸੁ ਥੇਰੇਨ ਏਕਂਸਂ ਉਤ੍ਤਰਾਸਙ੍ਗਂ ਕਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਦ੍ਵੇ ਏਵਂ ਤਿਕ੍ਖਤ੍ਤੁਮੇਵ ਵਤ੍ਤਬ੍ਬੋ ‘‘ਪਰਿਸੁਦ੍ਧੋ ਅਹਂ, ਆਵੁਸੋ, ‘ਪਰਿਸੁਦ੍ਧੋ’ਤਿ ਮਂ ਧਾਰੇਥਾ’’ਤਿ (ਮਹਾਵ. ੧੬੮). ਦੁਤਿਯੇਨ, ਤਤਿਯੇਨ ਚ ਯਥਾਕ੍ਕਮਂ ‘‘ਪਰਿਸੁਦ੍ਧੋ ਅਹਂ, ਭਨ੍ਤੇ, ‘ਪਰਿਸੁਦ੍ਧੋ’ਤਿ ਮਂ ਧਾਰੇਥਾ’’ਤਿ ਤਿਕ੍ਖਤ੍ਤੁਮੇਵ ਵਤ੍ਤਬ੍ਬਂ.

੨੫੮੩. ਪੁਬ੍ਬਕਿਚ੍ਚਾਦੀਨਿ ਕਤ੍ਵਾ ਞਤ੍ਤਿਂ ਅਟ੍ਠਪੇਤ੍ਵਾ ਥੇਰੇਨ ਨਵੋ ਏਵਂ ਤਿਕ੍ਖਤ੍ਤੁਮੇਵ ਵਤ੍ਤਬ੍ਬੋ ‘‘ਪਰਿਸੁਦ੍ਧੋ ਅਹਂ, ਆਵੁਸੋ, ‘ਪਰਿਸੁਦ੍ਧੋ’ਤਿ ਮਂ ਧਾਰੇਹੀ’’ਤਿ (ਮਹਾਵ. ੧੬੮), ਨਵੇਨ ਥੇਰੋਪਿ ‘‘ਪਰਿਸੁਦ੍ਧੋ ਅਹਂ, ਭਨ੍ਤੇ, ‘ਪਰਿਸੁਦ੍ਧੋ’ਤਿ ਮਂ ਧਾਰੇਥਾ’’ਤਿ (ਮਹਾਵ. ੧੬੮) ਤਿਕ੍ਖਤ੍ਤੁਂ ਵਤ੍ਤਬ੍ਬੋ. ਇਮਸ੍ਮਿਂ ਪਨ ਵਾਰੇ ਞਤ੍ਤਿਯਾ ਅਟ੍ਠਪਨਞ੍ਚ ‘‘ਧਾਰੇਹੀ’’ਤਿ ਏਕਵਚਨਨਿਦ੍ਦੇਸੋ ਚਾਤਿ ਏਤ੍ਤਕੋਵ ਵਿਸੇਸੋਤਿ ਤਂ ਅਨਾਦਿਯਿਤ੍ਵਾ ਪੁਗ੍ਗਲੇਨ ਕਾਤਬ੍ਬਂ ਉਪੋਸਥਵਿਧਿਂ ਦਸ੍ਸੇਤੁਮਾਹ ‘‘ਪੁਬ੍ਬਕਿਚ੍ਚਂ ਸਮਾਪੇਤ੍ਵਾ, ਅਧਿਟ੍ਠੇਯ੍ਯ ਪਨੇਕਕੋ’’ਤਿ. ਅਧਿਟ੍ਠੇਯ੍ਯਾਤਿ ‘‘ਅਜ੍ਜ ਮੇ ਉਪੋਸਥੋ, ਪਨ੍ਨਰਸੋ’ਤਿ ਵਾ ‘ਚਾਤੁਦ੍ਦਸੋ’ਤਿ ਵਾ ਅਧਿਟ੍ਠਾਮੀ’’ਤਿ ਅਧਿਟ੍ਠੇਯ੍ਯ. ਅਸ੍ਸਾਤਿ ਅਵਸਾਨੇ ਵੁਤ੍ਤਪੁਗ੍ਗਲਂ ਸਨ੍ਧਾਯ ਏਕਵਚਨਨਿਦ੍ਦੇਸੋ. ਯਥਾਵੁਤ੍ਤੋ ਸਙ੍ਘੋਪਿ ਤਯੋਪਿ ਦ੍ਵੇਪਿ ਅਤ੍ਤਨੋ ਅਤ੍ਤਨੋ ਅਨੁਞ੍ਞਾਤਂ ਉਪੋਸਥਂ ਅਨ੍ਤਰਾਯਂ ਵਿਨਾ ਸਚੇ ਨ ਕਰੋਨ੍ਤਿ, ਏਵਮੇਵ ਆਪਤ੍ਤਿਮਾਪਜ੍ਜਨ੍ਤੀਤਿ ਵੇਦਿਤਬ੍ਬੋ.

੨੫੮੪-੫. ਇਦਾਨਿ ‘‘ਚਤ੍ਤਾਰਿਮਾਨਿ, ਭਿਕ੍ਖਵੇ, ਉਪੋਸਥਕਮ੍ਮਾਨਿ, ਅਧਮ੍ਮੇਨ ਵਗ੍ਗਂ ਉਪੋਸਥਕਮ੍ਮ’’ਨ੍ਤਿਆਦਿਨਾ (ਮਹਾਵ. ੧੪੯) ਨਯੇਨ ਵੁਤ੍ਤਂ ਕਮ੍ਮਚਤੁਕ੍ਕਂ ਦਸ੍ਸੇਤੁਮਾਹ ‘‘ਅਧਮ੍ਮੇਨ ਚ ਵਗ੍ਗੇਨਾ’’ਤਿਆਦਿ. ਅਧਮ੍ਮੇਨ ਵਗ੍ਗੇਨ ਕਮ੍ਮਂ, ਅਧਮ੍ਮਤੋ ਸਮਗ੍ਗੇਨ ਕਮ੍ਮਂ, ਧਮ੍ਮੇਨ ਵਗ੍ਗੇਨ ਕਮ੍ਮਂ, ਧਮ੍ਮਤੋ ਸਮਗ੍ਗੇਨ ਕਮ੍ਮਨ੍ਤਿ ਏਤਾਨਿ ਚਤ੍ਤਾਰਿ ਉਪੋਸਥਸ੍ਸ ਕਮ੍ਮਾਨੀਤਿ ਜਿਨੋ ਅਬ੍ਰਵੀਤਿ ਯੋਜਨਾ. ਚਤੂਸ੍ਵਪਿ ਪਨੇਤੇਸੂਤਿ ਏਤੇਸੁ ਚਤੂਸੁ ਕਮ੍ਮੇਸੁ ਪਨ. ਚਤੁਤ੍ਥਨ੍ਤਿ ‘‘ਸਮਗ੍ਗੇਨ ਚ ਧਮ੍ਮਤੋ’’ਤਿ ਵੁਤ੍ਤਂ ਚਤੁਤ੍ਥਂ ਉਪੋਸਥਕਮ੍ਮਂ ‘‘ਧਮ੍ਮਕਮ੍ਮ’’ਨ੍ਤਿ ਅਧਿਪ੍ਪੇਤਂ.

੨੫੮੬-੭. ਤਾਨਿ ਕਮ੍ਮਾਨਿ ਵਿਭਾਵੇਤੁਮਾਹ ‘‘ਅਧਮ੍ਮੇਨਿਧਾ’’ਤਿਆਦਿ. ਇਧ ਇਮਸ੍ਮਿਂ ਸਾਸਨੇ ਏਤ੍ਥ ਏਤੇਸੁ ਚਤੂਸੁ ਉਪੋਸਥੇਸੁ. ਅਧਮ੍ਮੇਨ ਵਗ੍ਗੋ ਉਪੋਸਥੋ ਕਤਮੋਤਿ ਕਥੇਤੁਕਾਮਤਾਪੁਚ੍ਛਾ. ਯਤ੍ਥ ਯਸ੍ਸਂ ਏਕਸੀਮਾਯਂ ਭਿਕ੍ਖੁਨੋ ਚਤ੍ਤਾਰੋ ਵਸਨ੍ਤੀਤਿ ਯੋਜਨਾ.

ਤਤ੍ਰ ਏਕਸ੍ਸ ਪਾਰਿਸੁਦ੍ਧਿਂ ਆਨਯਿਤ੍ਵਾ ਤੇ ਤਯੋ ਜਨਾ ਪਾਰਿਸੁਦ੍ਧਿਂ ਉਪੋਸਥਂ ਕਰੋਨ੍ਤਿ ਚੇ, ਏਵਂ ਕਤੋ ਉਪੋਸਥੋ ਅਧਮ੍ਮੋ ਵਗ੍ਗੁਪੋਸਥੋ ਨਾਮਾਤਿ ਯੋਜਨਾ, ਏਕਸੀਮਟ੍ਠੇਹਿ ਚਤੂਹਿ ਸਙ੍ਘੁਪੋਸਥੇ ਕਾਤਬ੍ਬੇ ਗਣੁਪੋਸਥਸ੍ਸ ਕਤਤ੍ਤਾ ਅਧਮ੍ਮੋ ਚ ਸਙ੍ਘਮਜ੍ਝਂ ਵਿਨਾ ਗਣਮਜ੍ਝਂ ਪਾਰਿਸੁਦ੍ਧਿਯਾ ਅਗਮਨਤੋ ਤਸ੍ਸ ਹਤ੍ਥਪਾਸਂ ਅਨੁਪਗਮਨੇਨ ਵਗ੍ਗੋ ਚ ਹੋਤੀਤਿ ਅਤ੍ਥੋ.

੨੫੮੮. ਅਧਮ੍ਮੇਨ ਸਮਗ੍ਗੋਤਿ ਏਤ੍ਥ ‘‘ਉਪੋਸਥੋ ਕਤਮੋ’’ਤਿ ਅਨੁਵਤ੍ਤੇਤਬ੍ਬਂ. ‘‘ਭਿਕ੍ਖੁਨੋ ਏਕਤੋ’’ਤਿ ਪਦਚ੍ਛੇਦੋ. ‘‘ਹੋਤਿ ਅਧਮ੍ਮਿਕੋ’’ਤਿ ਪਦਚ੍ਛੇਦੋ. ਚਤੂਹਿ ਸਮਗ੍ਗੇਹਿ ਸਙ੍ਘੁਪੋਸਥੇ ਕਾਤਬ੍ਬੇ ਗਣੁਪੋਸਥਕਰਣਂ ਅਧਮ੍ਮੋ, ਹਤ੍ਥਪਾਸੁਪਗਮਨਤੋ ਸਮਗ੍ਗੋ ਹੋਤਿ.

੨੫੮੯-੯੦. ਯੋ ਉਪੋਸਥੋ ਧਮ੍ਮੇਨ ਵਗ੍ਗੋ ਹੋਤਿ, ਸੋ ਕਤਮੋਤਿ ਯੋਜਨਾ. ਯਤ੍ਥ ਯਸ੍ਸਂ ਏਕਸੀਮਾਯਂ ਚਤ੍ਤਾਰੋ ਭਿਕ੍ਖੁਨੋ ਵਸਨ੍ਤਿ, ਤਤ੍ਰ ਏਕਸ੍ਸ ਪਾਰਿਸੁਦ੍ਧਿਂ ਆਨਯਿਤ੍ਵਾ ਤੇ ਤਯੋ ਜਨਾ ਪਾਤਿਮੋਕ੍ਖਂ ਉਦ੍ਦਿਸਨ੍ਤੇ ਚੇ, ਧਮ੍ਮੇਨ ਵਗ੍ਗੋ ਉਪੋਸਥੋ ਹੋਤੀਤਿ ਯੋਜਨਾ. ਏਕਸੀਮਟ੍ਠੇਹਿ ਚਤੂਹਿ ਸਙ੍ਘੁਪੋਸਥਸ੍ਸ ਕਤਤ੍ਤਾ ਧਮ੍ਮੋ, ਏਕਸ੍ਸ ਹਤ੍ਥਪਾਸਂ ਅਨੁਪਗਮਨੇਨ ਵਗ੍ਗੋ ਚ ਹੋਤੀਤਿ ਅਤ੍ਥੋ.

੨੫੯੧. ਯੋ ਧਮ੍ਮਤੋ ਸਮਗ੍ਗੋ, ਸੋ ਕਤਮੋਤਿ ਯੋਜਨਾ. ਇਧ ਇਮਸ੍ਮਿਂ ਸਾਸਨੇ ਚਤ੍ਤਾਰੋ ਭਿਕ੍ਖੁਨੋ ਏਕਤੋ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ ਚੇ, ਅਯਂ ਧਮ੍ਮਤੋ ਸਮਗ੍ਗੋ ਉਪੋਸਥੋਤਿ ਮਤੋ ਅਧਿਪ੍ਪੇਤੋਤਿ ਯੋਜਨਾ. ਚਤੂਹਿ ਸਙ੍ਘੁਪੋਸਥਸ੍ਸ ਕਤਤ੍ਤਾ ਧਮ੍ਮੋ, ਏਕਸ੍ਸਾਪਿ ਹਤ੍ਥਪਾਸਂ ਅਵਿਜਹਨੇਨ ਸਮਗ੍ਗੋਤਿ ਅਧਿਪ੍ਪਾਯੋ.

੨੫੯੨. ਵਗ੍ਗੇ ਸਙ੍ਘੇ ਵਗ੍ਗੋਤਿ ਸਞ੍ਞਿਨੋ, ਸਮਗ੍ਗੇ ਚ ਸਙ੍ਘੇ ਵਗ੍ਗੋਤਿ ਸਞ੍ਞਿਨੋ ਉਭਯਤ੍ਥ ਵਿਮਤਿਸ੍ਸ ਵਾ ਉਪੋਸਥਂ ਕਰੋਨ੍ਤਸ੍ਸ ਦੁਕ੍ਕਟਂ ਆਪਤ੍ਤਿ ਹੋਤੀਤਿ ਯੋਜਨਾ.

੨੫੯੩. ਭੇਦਾਧਿਪ੍ਪਾਯਤੋਤਿ ‘‘ਨਸ੍ਸਨ੍ਤੇਤੇ, ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ ਏਵਂ ਭੇਦਪੁਰੇਕ੍ਖਾਰਤਾਯ ‘‘ਉਪੋਸਥਂ ਕਰੋਨ੍ਤਸ੍ਸਾ’’ਤਿ ਆਨੇਤ੍ਵਾ ਯੋਜੇਤਬ੍ਬਂ. ਤਸ੍ਸ ਭਿਕ੍ਖੁਨੋ ਥੁਲ੍ਲਚ੍ਚਯਂ ਹੋਤਿ ਅਕੁਸਲਬਲਵਤਾਯ ਚ ਥੁਲ੍ਲਚ੍ਚਯਂ ਹੋਤੀਤਿ. ਯਥਾਹ – ‘‘ਭੇਦਪੁਰੇਕ੍ਖਾਰਪਨ੍ਨਰਸਕੇ ਅਕੁਸਲਬਲਵਤਾਯ ਥੁਲ੍ਲਚ੍ਚਯਂ ਵੁਤ੍ਤ’’ਨ੍ਤਿ (ਮਹਾਵ. ਅਟ੍ਠ. ੧੭੬). ਵਗ੍ਗੇ ਵਾ ਸਮਗ੍ਗੇ ਵਾ ਸਙ੍ਘੇ ਸਮਗ੍ਗੋ ਇਤਿ ਸਞ੍ਞਿਨੋ ਉਪੋਸਥਂ ਕਰੋਨ੍ਤਸ੍ਸ ਅਨਾਪਤ੍ਤੀਤਿ ਯੋਜਨਾ. ਅਵਸੇਸੋ ਪਨੇਤ੍ਥ ਵਤ੍ਤਬ੍ਬਵਿਨਿਚ੍ਛਯੋ ਪਵਾਰਣਵਿਨਿਚ੍ਛਯਾਵਸਾਨੇ ‘‘ਪਾਰਿਸੁਦ੍ਧਿਪ੍ਪਦਾਨੇਨਾ’’ਤਿਆਦੀਹਿ (ਵਿ. ਵਿ. ੨੬੪੨) ਏਕਤੋ ਵਤ੍ਤੁਮਿਚ੍ਛਨ੍ਤੇਨ ਨ ਵੁਤ੍ਤੋ.

੨੫੯੪-੫. ‘‘ਉਕ੍ਖਿਤ੍ਤੇਨਾ’’ਤਿਆਦਿਕਾਨਿ ਕਰਣਵਚਨਨ੍ਤਾਨਿ ਪਦਾਨਿ ‘‘ਸਹਾ’’ਤਿ ਇਮਿਨਾ ਸਦ੍ਧਿਂ ‘‘ਉਪੋਸਥੋ ਨ ਕਾਤਬ੍ਬੋ’’ਤਿ ਪਦੇਨ ਪਚ੍ਚੇਕਂ ਯੋਜੇਤਬ੍ਬਾਨਿ. ਉਕ੍ਖਿਤ੍ਤੇਨਾਤਿ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਤ੍ਤਕੋ, ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖਿਤ੍ਤਕੋ, ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖਿਤ੍ਤਕੋਤਿ ਤਿਵਿਧੇਨ ਉਕ੍ਖਿਤ੍ਤੇਨ. ਏਤੇਸੁ ਹਿ ਤਿਵਿਧੇ ਉਕ੍ਖਿਤ੍ਤਕੇ ਸਤਿ ਉਪੋਸਥਂ ਕਰੋਨ੍ਤੋ ਸਙ੍ਘੋ ਪਾਚਿਤ੍ਤਿਯਂ ਆਪਜ੍ਜਤਿ.

‘‘ਗਹਟ੍ਠੇਨਾ’’ਤਿ ਇਮਿਨਾ ਤਿਤ੍ਥਿਯੋਪਿ ਸਙ੍ਗਹਿਤੋ. ਸੇਸੇਹਿ ਸਹਧਮ੍ਮਿਹੀਤਿ ਭਿਕ੍ਖੁਨੀ, ਸਿਕ੍ਖਮਾਨਾ, ਸਾਮਣੇਰੋ, ਸਾਮਣੇਰੀਤਿ ਚਤੂਹਿ ਸਹਧਮ੍ਮਿਕੇਹਿ. ਚੁਤਨਿਕ੍ਖਿਤ੍ਤਸਿਕ੍ਖੇਹੀਤਿ ਏਤ੍ਥ ਚੁਤੋ ਚ ਨਿਕ੍ਖਿਤ੍ਤਸਿਕ੍ਖੋ ਚਾਤਿ ਵਿਗ੍ਗਹੋ. ਚੁਤੋ ਨਾਮ ਅਨ੍ਤਿਮਵਤ੍ਥੁਂ ਅਜ੍ਝਾਪਨ੍ਨਕੋ. ਨਿਕ੍ਖਿਤ੍ਤਸਿਕ੍ਖੋ ਨਾਮ ਸਿਕ੍ਖਾਪਚ੍ਚਕ੍ਖਾਤਕੋ.

ਏਕਾਦਸਹੀਤਿ ਪਣ੍ਡਕੋ, ਥੇਯ੍ਯਸਂਵਾਸਕੋ, ਤਿਤ੍ਥਿਯਪਕ੍ਕਨ੍ਤਕੋ, ਤਿਰਚ੍ਛਾਨਗਤੋ, ਮਾਤੁਘਾਤਕੋ, ਪਿਤੁਘਾਤਕੋ, ਅਰਹਨ੍ਤਘਾਤਕੋ, ਭਿਕ੍ਖੁਨਿਦੂਸਕੋ, ਸਙ੍ਘਭੇਦਕੋ, ਲੋਹਿਤੁਪ੍ਪਾਦਕੋ, ਉਭਤੋਬ੍ਯਞ੍ਜਨਕੋਤਿ ਇਮੇਹਿ ਏਕਾਦਸਹਿ ਅਭਬ੍ਬੇਹਿ.

ਸਭਾਗਾਪਤ੍ਤਿਕੇਨ ਵਾ ਸਹ ਉਪੋਸਥੋ ਨ ਕਾਤਬ੍ਬੋ, ਪਾਰਿਵੁਤ੍ਥੇਨ ਛਨ੍ਦੇਨ ਉਪੋਸਥੋ ਨ ਕਾਤਬ੍ਬੋ, ਕਰੋਤੋ ਦੁਕ੍ਕਟਂ ਹੋਤੀਤਿ ਯੋਜਨਾ. ਏਵਂ ਉਕ੍ਖਿਤ੍ਤਵਜ੍ਜਿਤੇਸੁ ਸਬ੍ਬਵਿਕਪ੍ਪੇਸੁ ਦੁਕ੍ਕਟਮੇਵ ਵੇਦਿਤਬ੍ਬਂ. ‘‘ਯਂ ਦ੍ਵੇਪਿ ਜਨਾ ਵਿਕਾਲਭੋਜਨਾਦਿਨਾ ਸਭਾਗਵਤ੍ਥੁਨਾ ਆਪਤ੍ਤਿਂ ਆਪਜ੍ਜਨ੍ਤਿ, ਏਵਰੂਪਾ ਵਤ੍ਥੁਸਭਾਗਾ ‘ਸਭਾਗਾ’ਤਿ ਵੁਚ੍ਚਤੀ’’ਤਿ (ਮਹਾਵ. ਅਟ੍ਠ. ੧੬੯) ਵਚਨਤੋ ‘‘ਸਭਾਗਾਪਤ੍ਤੀ’’ਤਿ ਵਤ੍ਥੁਸਭਾਗਾਪਤ੍ਤਿਯੇਵ ਗਹੇਤਬ੍ਬਾ.

ਉਪੋਸਥਦਿਵਸੇ ਸਬ੍ਬੋਵ ਸਙ੍ਘੋ ਸਚੇ ਸਭਾਗਾਪਤ੍ਤਿਂ ਆਪਨ੍ਨੋ ਹੋਤਿ,

‘‘ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਸਬ੍ਬੋ ਸਙ੍ਘੋ ਸਭਾਗਂ ਆਪਤ੍ਤਿਂ ਆਪਨ੍ਨੋ ਹੋਤਿ, ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਏਕੋ ਭਿਕ੍ਖੁ ਸਾਮਨ੍ਤਾ ਆਵਾਸਾ ਸਜ੍ਜੁਕਂ ਪਾਹੇਤਬ੍ਬੋ ‘ਗਚ੍ਛਾਵੁਸੋ, ਤਂ ਆਪਤ੍ਤਿਂ ਪਟਿਕਰਿਤ੍ਵਾ ਆਗਚ੍ਛ, ਮਯਂ ਤੇ ਸਨ੍ਤਿਕੇ ਤਂ ਆਪਤ੍ਤਿਂ ਪਟਿਕਰਿਸ੍ਸਾਮਾ’ਤਿ. ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ – ‘ਸੁਣਾਤੁ ਮੇ, ਭਨ੍ਤੇ ਸਙ੍ਘੋ, ਅਯਂ ਸਬ੍ਬੋ ਸਙ੍ਘੋ ਸਭਾਗਂ ਆਪਤ੍ਤਿਂ ਆਪਨ੍ਨੋ, ਯਦਾ ਅਞ੍ਞਂ ਭਿਕ੍ਖੁਂ ਸੁਦ੍ਧਂ ਅਨਾਪਤ੍ਤਿਕਂ ਪਸ੍ਸਿਸ੍ਸਤਿ, ਤਦਾ ਤਸ੍ਸ ਸਨ੍ਤਿਕੇ ਤਂ ਆਪਤ੍ਤਿਂ ਪਟਿਕਰਿਸ੍ਸਤੀ’’ਤਿ (ਮਹਾਵ. ੧੭੧) ਚ,

ਵੇਮਤਿਕੋ ਚੇ ਹੋਤਿ,

‘‘ਸੁਣਾਤੁ ਮੇ, ਭਨ੍ਤੇ ਸਙ੍ਘੋ, ਅਯਂ ਸਬ੍ਬੋ ਸਙ੍ਘੋ ਸਭਾਗਾਯ ਆਪਤ੍ਤਿਯਾ ਵੇਮਤਿਕੋ, ਯਦਾ ਨਿਬ੍ਬੇਮਤਿਕੋ ਭਵਿਸ੍ਸਤਿ, ਤਦਾ ਤਂ ਆਪਤ੍ਤਿਂ ਪਟਿਕਰਿਸ੍ਸਤੀ’’ਤਿ (ਮਹਾਵ. ੧੭੧) ਚ,

ਵੁਤ੍ਤਨਯੇਨ ਉਪੋਸਥੋ ਕਾਤਬ੍ਬੋ.

ਏਤ੍ਥ ਚ ਸਜ੍ਝੁਕਨ੍ਤਿ ਤਦਹੇਵਾਗਮਨਤ੍ਥਾਯ. ਗਣੁਪੋਸਥਾਦੀਸੁਪਿ ਏਸੇਵ ਨਯੋ. ਵੁਤ੍ਤਞ੍ਹਿ ਅਟ੍ਠਕਥਾਗਣ੍ਠਿਪਦੇ ‘‘ਯਥਾ ਸਙ੍ਘੋ ਸਭਾਗਂ ਆਪਤ੍ਤਿਂ ਆਪਜ੍ਜਿਤ੍ਵਾ ਸੁਦ੍ਧਂ ਅਲਭਿਤ੍ਵਾ ‘ਯਦਾ ਸੁਦ੍ਧਂ ਪਸ੍ਸਿਸ੍ਸਤਿ, ਤਦਾ ਤਸ੍ਸ ਸਨ੍ਤਿਕੇ ਤਂ ਆਪਤ੍ਤਿਂ ਪਟਿਕਰਿਸ੍ਸਤੀ’ਤਿ ਵਤ੍ਵਾ ਉਪੋਸਥਂ ਕਾਤੁਂ ਲਭਤਿ, ਏਵਂ ਦ੍ਵੀਹਿਪਿ ਅਞ੍ਞਮਞ੍ਞਂ ਆਰੋਚੇਤ੍ਵਾ ਉਪੋਸਥਂ ਕਾਤੁਂ ਵਟ੍ਟਤਿ. ਏਕੇਨਾਪਿ ‘ਪਰਿਸੁਦ੍ਧਂ ਲਭਿਤ੍ਵਾ ਪਟਿਕਰਿਸ੍ਸਾਮੀ’ਤਿ ਆਭੋਗਂ ਕਤ੍ਵਾ ਕਾਤੁਂ ਵਟ੍ਟਤਿ ਕਿਰਾ’’ਤਿ. ਕਿਰਾਤਿ ਚੇਤ੍ਥ ਅਨੁਸ੍ਸਵਤ੍ਥੇ ਦਟ੍ਠਬ੍ਬੋ, ਨ ਪਨਾਰੁਚਿਯਂ.

ਪਾਰਿਵੁਤ੍ਥੇਨ ਛਨ੍ਦੇਨਾਤਿ ਛਨ੍ਦਂ ਆਹਰਿਤ੍ਵਾ ਕਮ੍ਮਂ ਕਾਤੁਂ ਨਿਸਿਨ੍ਨੇਨਪਿ ‘‘ਅਸੁਭਲਕ੍ਖਣਤਾਦਿਨਾ ਕੇਨਚਿ ਕਾਰਣੇਨ ਨ ਕਰਿਸ੍ਸਾਮੀ’’ਤਿ ਵਿਸ੍ਸਟ੍ਠੇ ਛਨ੍ਦੇ ਸਚੇ ਪੁਨ ਕਰਿਸ੍ਸਤਿ, ਪੁਨ ਛਨ੍ਦਪਾਰਿਸੁਦ੍ਧਿਂ ਆਹਰਿਤ੍ਵਾ ਕਾਤਬ੍ਬਂ. ਯਥਾਹ – ‘‘ਏਤਸ੍ਮਿਂ ਪਾਰਿਵਾਸਿਯੇ ਪੁਨ ਛਨ੍ਦਪਾਰਿਸੁਦ੍ਧਿਂ ਅਨਾਨੇਤ੍ਵਾ ਕਮ੍ਮਂ ਕਾਤੁਂ ਨ ਵਟ੍ਟਤੀ’’ਤਿ (ਮਹਾਵ. ਅਟ੍ਠ. ੧੧੬੭).

੨੫੯੬. ਅਦੇਸੇਤ੍ਵਾ ਪਨਾਪਤ੍ਤਿਨ੍ਤਿ ਆਪਨ੍ਨਂ ਆਪਤ੍ਤਿਂ ਅਦੇਸੇਤ੍ਵਾ. ਨਾਵਿਕਤ੍ਵਾਨ ਵੇਮਤਿਨ੍ਤਿ ‘‘ਅਹਂ, ਭਨ੍ਤੇ, ਸਮ੍ਬਹੁਲਾਸੁ ਆਪਤ੍ਤੀਸੁ ਵੇਮਤਿਕੋ, ਯਦਾ ਨਿਬ੍ਬੇਮਤਿਕੋ ਭਵਿਸ੍ਸਾਮਿ, ਤਦਾ ਤਾ ਆਪਤ੍ਤਿਯੋ ਪਟਿਕਰਿਸ੍ਸਾਮੀ’’ਤਿ ਵਿਮਤਿਂ ਅਨਾਰੋਚੇਤ੍ਵਾ. ‘‘ਯਦਾ ਨਿਬ੍ਬੇਮਤਿਕੋਤਿ ਏਤ੍ਥ ਸਚੇ ਪਨੇਸ ਨਿਬ੍ਬੇਮਤਿਕੋ ਨ ਹੋਤਿ, ਵਤ੍ਥੁਂ ਕਿਤ੍ਤੇਤ੍ਵਾਵ ਦੇਸੇਤੁਂ ਵਟ੍ਟਤੀ’’ਤਿ (ਮਹਾਵ. ਅਟ੍ਠ. ੧੬੯) ਅਨ੍ਧਕਟ੍ਠਕਥਾਯਂ ਵੁਤ੍ਤਂ. ਤਤ੍ਰਾਯਂ ਦੇਸਨਾਵਿਧਿ – ਸਚੇ ਮੇਘਚ੍ਛਨ੍ਨੇ ਸੂਰਿਯੇ ‘‘ਕਾਲੋ ਨੁ ਖੋ, ਵਿਕਾਲੋ’’ਤਿ ਵੇਮਤਿਕੋ ਭੁਞ੍ਜਤਿ, ਤੇਨ ਭਿਕ੍ਖੁਨਾ ‘‘ਅਹਂ, ਭਨ੍ਤੇ, ਵੇਮਤਿਕੋ ਭੁਞ੍ਜਿਂ, ਸਚੇ ਕਾਲੋ ਅਤ੍ਥਿ, ਸਮ੍ਬਹੁਲਾ ਦੁਕ੍ਕਟਾ ਆਪਤ੍ਤਿਯੋ ਆਪਨ੍ਨੋਮ੍ਹਿ. ਨੋ ਚੇ ਅਤ੍ਥਿ, ਸਮ੍ਬਹੁਲਾ ਪਾਚਿਤ੍ਤਿਯਾਪਤ੍ਤਿਯੋ ਆਪਨ੍ਨੋਮ੍ਹੀ’’ਤਿ ਏਵਂ ਵਤ੍ਥੁਂ ਕਿਤ੍ਤੇਤ੍ਵਾ ‘‘ਅਹਂ, ਭਨ੍ਤੇ, ਯਾ ਤਸ੍ਮਿਂ ਵਤ੍ਥੁਸ੍ਮਿਂ ਸਮ੍ਬਹੁਲਾ ਦੁਕ੍ਕਟਾ ਵਾ ਪਾਚਿਤ੍ਤਿਯਾ ਵਾ ਆਪਤ੍ਤਿਯੋ ਆਪਨ੍ਨੋ, ਤਾ ਤੁਮ੍ਹਮੂਲੇ ਪਟਿਦੇਸੇਮੀ’’ਤਿ ਵਤ੍ਤਬ੍ਬਂ. ਏਸੇਵ ਨਯੋ ਸਬ੍ਬਾਪਤ੍ਤੀਸੂਤਿ.

ਗਣ੍ਠਿਪਦੇਸੁ ਪਨੇਵਂ ਵਿਨਿਚ੍ਛਯੋ ਵੁਤ੍ਤੋ – ‘‘ਅਹਂ, ਆਵੁਸੋ, ਇਤ੍ਥਨ੍ਨਾਮਾਯ ਆਪਤ੍ਤਿਯਾ ਵੇਮਤਿਕੋ, ਯਦਾ ਨਿਬ੍ਬੇਮਤਿਕੋ ਭਵਿਸ੍ਸਾਮਿ, ਤਦਾ ਤਂ ਆਪਤ੍ਤਿਂ ਪਟਿਕਰਿਸ੍ਸਾਮੀ’ਤਿ ਵਤ੍ਵਾ ਉਪੋਸਥੋ ਕਾਤਬ੍ਬੋ, ਪਾਤਿਮੋਕ੍ਖਂ ਸੋਤਬ੍ਬ’’ਨ੍ਤਿ (ਮਹਾਵ. ੧੭੦) ਵਚਨਤੋ ਯਾਵ ਨਿਬ੍ਬੇਮਤਿਕੋ ਨ ਹੋਤਿ, ਤਾਵ ਸਭਾਗਾਪਤ੍ਤਿਂ ਪਟਿਗ੍ਗਹੇਤੁਂ ਨ ਲਭਤਿ. ਅਞ੍ਞੇਸਞ੍ਚ ਕਮ੍ਮਾਨਂ ਪਰਿਸੁਦ੍ਧੋ ਨਾਮ ਹੋਤਿ. ‘‘ਪੁਨ ਨਿਬ੍ਬੇਮਤਿਕੋ ਹੁਤ੍ਵਾ ਦੇਸੇਤਬ੍ਬਮੇਵਾ’’ਤਿ (ਕਙ੍ਖਾ. ਅਭਿ. ਟੀ. ਨਿਦਾਨਵਣ੍ਣਨਾ) ਨੇਵ ਪਾਲ਼ਿਯਂ, ਨ ਅਟ੍ਠਕਥਾਯਂ ਅਤ੍ਥਿ, ਦੇਸਿਤੇ ਪਨ ਨ ਦੋਸੋ. ‘‘ਇਤੋ ਵੁਟ੍ਠਹਿਤ੍ਵਾ ਤਂ ਆਪਤ੍ਤਿਂ ਪਟਿਕਰਿਸ੍ਸਾਮੀ’’ਤਿ (ਮਹਾਵ. ੧੭੦) ਏਤ੍ਥਾਪਿ ਏਸੇਵ ਨਯੋਤਿ.

੨੫੯੭. ਉਪੋਸਥੇਤਿ ਦਿਨਕਾਰਕਕਤ੍ਤਬ੍ਬਾਕਾਰਵਸੇਨ ਪਨ੍ਨਰਸੀ, ਸਙ੍ਘੁਪੋਸਥੋ, ਸੁਤ੍ਤੁਦ੍ਦੇਸੋਤਿ ਇਮੇਹਿ ਤੀਹਿ ਲਕ੍ਖਣੇਹਿ ਸਮਨ੍ਨਾਗਤੇ ਉਪੋਸਥੇ. ਸਭਿਕ੍ਖੁਮ੍ਹਾ ਚ ਆਵਾਸਾਤਿ ‘‘ਯਸ੍ਮਿਂ ਉਪੋਸਥੇ ਕਿਚ੍ਚ’’ਨ੍ਤਿਆਦਿਨਾ ਵਕ੍ਖਮਾਨਪ੍ਪਕਾਰਾ ਸਭਿਕ੍ਖੁਕਾ ਆਵਾਸਾ. ਇਧ ‘‘ਅਨਾਵਾਸਾ’’ਤਿ ਸੇਸੋ. ਆਵਾਸੋ ਵਾ ਅਨਾਵਾਸੋ ਵਾਤਿ ਏਤ੍ਥ ‘‘ਅਭਿਕ੍ਖੁਕੋ ਵਾ ਨਾਨਾਸਂਵਾਸਕੇਹਿ ਸਭਿਕ੍ਖੁਕੋ ਵਾ’’ਤਿ ਚ ਨ ਗਨ੍ਤਬ੍ਬੋਤਿ ਏਤ੍ਥ ‘‘ਅਞ੍ਞਤ੍ਰ ਸਙ੍ਘੇਨ ਅਞ੍ਞਤ੍ਰ ਅਨ੍ਤਰਾਯਾ’’ਤਿ ਚ ਸੇਸੋ. ‘‘ਅਨਾਵਾਸੋ’’ਤਿ ਉਦੋਸਿਤਾਦਯੋ ਵੁਤ੍ਤਾ. ਭਿਕ੍ਖੁਨਾ ਉਪੋਸਥੇ ਸਭਿਕ੍ਖੁਮ੍ਹਾ ਆਵਾਸਾ ਵਾ ਅਨਾਵਾਸਾ ਵਾ ਅਭਿਕ੍ਖੁਕੋ ਵਾ ਨਾਨਾਸਂਵਾਸਕੇਹਿ ਸਭਿਕ੍ਖੁਕੋ ਵਾ ਆਵਾਸੋ ਵਾ ਅਨਾਵਾਸੋ ਵਾ ਅਞ੍ਞਤ੍ਰ ਸਙ੍ਘੇਨ ਅਞ੍ਞਤ੍ਰ ਅਨ੍ਤਰਾਯਾ ਕੁਦਾਚਨਂ ਕਦਾਚਿਪਿ ਨ ਗਨ੍ਤਬ੍ਬੋਤਿ ਯੋਜਨਾ.

੨੫੯੮. ਯਸ੍ਮਿਂ ਆਵਾਸੇ ਪਨ ਉਪੋਸਥੇ ਕਿਚ੍ਚਂ ਸਚੇ ਵਤ੍ਤਤਿ, ਸੋ ਆਵਾਸੋ ‘‘ਸਭਿਕ੍ਖੁਕੋ ਨਾਮਾ’’ਤਿ ਪਕਾਸਿਤੋਤਿ ਯੋਜਨਾ, ਇਮਿਨਾ ਸਚੇ ਯਤ੍ਥ ਉਪੋਸਥੋ ਨ ਵਤ੍ਤਤਿ, ਸੋ ਸਨ੍ਤੇਸੁਪਿ ਭਿਕ੍ਖੂਸੁ ਅਭਿਕ੍ਖੁਕੋ ਨਾਮਾਤਿ ਦੀਪੇਤਿ.

੨੫੯੯. ਉਪੋਸਥਸ੍ਸ ਪਯੋਜਨਂ, ਤਪ੍ਪਸਙ੍ਗੇਨ ਪਵਾਰਣਾਯ ਚ ਨਿਦ੍ਧਾਰੇਤੁਕਾਮਤਾਯਾਹ ‘‘ਉਪੋਸਥੋ ਕਿਮਤ੍ਥਾਯਾ’’ਤਿਆਦਿ.

੨੬੦੦. ਪਟਿਕ੍ਕੋਸੇਯ੍ਯਾਤਿ ਨਿਵਾਰੇਯ੍ਯ. ਅਦੇਨ੍ਤਸ੍ਸਪਿ ਦੁਕ੍ਕਟਨ੍ਤਿ ਏਤ੍ਥ ‘‘ਕੋਪੇਤੁਂ ਧਮ੍ਮਿਕਂ ਕਮ੍ਮ’’ਨ੍ਤਿ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ.

੨੬੦੧. ਸੋ ਚਾਤਿ (ਕਙ੍ਖਾ. ਅਟ੍ਠ. ਨਿਦਾਨਵਣ੍ਣਨਾ) ਚਤੁਵਗ੍ਗਾਦਿਪ੍ਪਭੇਦੇਨ ਪਞ੍ਚਵਿਧੋ ਸੋ ਸਙ੍ਘੋ ਚ. ਹੇਟ੍ਠਿਮਪਰਿਚ੍ਛੇਦੇਨ ਕਤ੍ਤਬ੍ਬਕਮ੍ਮਾਨਂ ਵਸੇਨ ਪਰਿਦੀਪਿਤੋ, ਨ ਛਬ੍ਬਗ੍ਗਾਦੀਨਂ ਕਾਤੁਂ ਅਯੁਤ੍ਤਤਾਦਸ੍ਸਨਵਸੇਨ.

੨੬੦੨. ਚਤੁਵਗ੍ਗਾਦਿਭੇਦਨਿਬਨ੍ਧਨਂ ਕਮ੍ਮਂ ਦਸ੍ਸੇਤੁਮਾਹ ‘‘ਪਵਾਰਣ’’ਨ੍ਤਿਆਦਿ. ਪਵਾਰਣਞ੍ਚ ਤਥਾ ਅਬ੍ਭਾਨਞ੍ਚ ਉਪਸਮ੍ਪਦਞ੍ਚ ਠਪੇਤ੍ਵਾ ਚਤੁਵਗ੍ਗੇਨ ਅਕਤ੍ਤਬ੍ਬਂ ਕਮ੍ਮਂ ਨ ਵਿਜ੍ਜਤੀਤਿ ਯੋਜਨਾ.

੨੬੦੩. ਮਜ੍ਝਦੇਸੇ ਉਪਸਮ੍ਪਦਾ ਮਜ੍ਝਦੇਸੂਪਸਮ੍ਪਦਾ, ਤਂ. ਅਬ੍ਭਾਨਂ, ਮਜ੍ਝਦੇਸੂਪਸਮ੍ਪਦਞ੍ਚ ਵਿਨਾ ਪਞ੍ਚਵਗ੍ਗੇਨ ਸਬ੍ਬਂ ਕਮ੍ਮਂ ਕਾਤੁਂ ਵਟ੍ਟਤੀਤਿ ਯੋਜਨਾ.

੨੬੦੪. ਕਿਞ੍ਚਿਪਿ ਕਮ੍ਮਂ ਨ ਨ ਕਤ੍ਤਬ੍ਬਨ੍ਤਿ ਯੋਜਨਾ, ਸਬ੍ਬਮ੍ਪਿ ਕਮ੍ਮਂ ਕਤ੍ਤਬ੍ਬਮੇਵਾਤਿ ਅਤ੍ਥੋ. ਦ੍ਵੇ ਪਟਿਸੇਧਾ ਪਕਤਤ੍ਥਂ ਗਮਯਨ੍ਤੀਤਿ. ਵੀਸਤਿਵਗ੍ਗੇਨ ਸਙ੍ਘੇਨ ਸਬ੍ਬੇਸਮ੍ਪਿ ਕਮ੍ਮਾਨਂ ਕਤ੍ਤਬ੍ਬਭਾਵੇ ਕਿਮਤ੍ਥਂ ਅਤਿਰੇਕਵੀਸਤਿਵਗ੍ਗਸ੍ਸ ਗਹਣਨ੍ਤਿ ਆਹ ‘‘ਊਨੇ ਦੋਸੋਤਿ ਞਾਪੇਤੁਂ, ਨਾਧਿਕੇ ਅਤਿਰੇਕਤਾ’’ਤਿ. ਯਥਾਵੁਤ੍ਤੇ ਚਤੁਬ੍ਬਿਧੇ ਸਙ੍ਘੇ ਗਣਨਤੋ ਊਨੇ ਦੋਸੋ ਹੋਤਿ, ਅਧਿਕੇ ਦੋਸੋ ਨ ਹੋਤੀਤਿ ਞਾਪੇਤੁਂ ਅਤਿਰੇਕਤਾ ਦਸ੍ਸਿਤਾ, ਅਤਿਰੇਕਵੀਸਤਿਵਗ੍ਗਸਙ੍ਘੋ ਦਸ੍ਸਿਤੋਤਿ ਅਧਿਪ੍ਪਾਯੋ.

੨੬੦੫. ਚਤੁਵਗ੍ਗੇਨ ਕਤ੍ਤਬ੍ਬੇ ਪਕਤਤ੍ਤਾਵ ਚਤ੍ਤਾਰੋ ਕਮ੍ਮਪ੍ਪਤ੍ਤਾਤਿ ਦੀਪਿਤਾਤਿ ਯੋਜਨਾ. ਸੇਸਾ ਪਕਤਤ੍ਤਾ ਛਨ੍ਦਾਰਹਾਤਿ ਸੇਸੋ. ਪਕਤਤ੍ਤਾਤਿ ਅਨੁਕ੍ਖਿਤ੍ਤਾ ਚੇਵ ਅਨ੍ਤਿਮਵਤ੍ਥੁਂ ਅਨਜ੍ਝਾਪਨ੍ਨਾ ਚ ਗਹੇਤਬ੍ਬਾ. ਸੇਸੇਸੁ ਚਾਤਿ ਪਞ੍ਚਵਗ੍ਗਾਦੀਸੁਪਿ.

੨੬੦੬. ਚਤੁਵਗ੍ਗਾਦਿਕਤ੍ਤਬ੍ਬਕਮ੍ਮਂ ਅਸਂਵਾਸਪੁਗ੍ਗਲਂ ਗਣਪੂਰਂ ਕਤ੍ਵਾ ਕਰੋਨ੍ਤਸ੍ਸ ਦੁਕ੍ਕਟਂ ਹੋਤਿ. ਨ ਕੇਵਲਂ ਦੁਕ੍ਕਟਮੇਵ, ਕਤਞ੍ਚ ਕਮ੍ਮਂ ਕੁਪ੍ਪਤੀਤਿ ਯੋਜਨਾ.

੨੬੦੭. ਪਰਿਵਾਸਾਦੀਤਿ ਏਤ੍ਥ ਆਦਿ-ਸਦ੍ਦੇਨ ਮੂਲਾਯਪਟਿਕਸ੍ਸਨਾਦੀਨਂ ਗਹਣਂ. ਤਤ੍ਰਟ੍ਠਨ੍ਤਿ ਪਰਿਵਾਸਾਦੀਸੁ ਠਿਤਂ. ‘‘ਤਥਾ’’ਤਿ ਇਮਿਨਾ ‘‘ਕਤਂ ਕੁਪ੍ਪਤਿ ਦੁਕ੍ਕਟ’’ਨ੍ਤਿ ਇਦਂ ਅਨੁਵਤ੍ਤੇਤਿ. ਸੇਸਂ ਤੂਤਿ ਪਰਿਵਾਸਾਦਿਕਮ੍ਮਤੋ ਅਞ੍ਞਂ ਪਨ ਉਪੋਸਥਾਦਿਕਮ੍ਮਂ. ਵਟ੍ਟਤੀਤਿ ਤੇ ਪਾਰਿਵਾਸਿਕਾਦਯੋ ਗਣਪੂਰਕੇ ਕਤ੍ਵਾ ਕਾਤੁਂ ਵਟ੍ਟਤਿ.

ਉਪੋਸਥਕ੍ਖਨ੍ਧਕਕਥਾਵਣ੍ਣਨਾ.