ਵਸ੍ਸੂਪਨਾਯਿਕਕ੍ਖਨ੍ਧਕਕਥਾਵਣ੍ਣਨਾ

੨੬੦੮. ਵਸ੍ਸੂਪਨਾਯਿਕਾ ਵੁਤ੍ਤਾਤਿ ਸੇਸੋ. ਪਚ੍ਛਿਮਾ ਚਾਤਿ ਏਤ੍ਥ ਇਤਿ-ਸਦ੍ਦੋ ਨਿਦਸ੍ਸਨੇ. ਵਸ੍ਸੂਪਨਾਯਿਕਾਤਿ ਵਸ੍ਸੂਪਗਮਨਾ. ਆਲਯੋ, ਵਚੀਭੇਦੋ ਵਾ ਕਾਤਬ੍ਬੋ ਉਪਗਚ੍ਛਤਾਤਿ ਇਮਿਨਾ ਵਸ੍ਸੂਪਗਮਨਪ੍ਪਕਾਰੋ ਦਸ੍ਸਿਤੋ. ਉਪਗਚ੍ਛਤਾ ਆਲਯੋ ਕਤ੍ਤਬ੍ਬੋ, ਵਚੀਭੇਦੋ ਵਾ ਕਤ੍ਤਬ੍ਬੋਤਿ ਸਮ੍ਬਨ੍ਧੋ. ਉਪਗਚ੍ਛਨ੍ਤੇਨ ਚ ਸੇਨਾਸਨੇ ਅਸਤਿ ‘‘ਇਧ ਵਸ੍ਸਂ ਵਸਿਸ੍ਸਾਮੀ’’ਤਿ ਚਿਤ੍ਤੁਪ੍ਪਾਦਮਤ੍ਤਂ ਵਾ ਕਾਤਬ੍ਬਂ, ਸੇਨਾਸਨੇ ਸਤਿ ‘‘ਇਮਸ੍ਮਿਂ ਵਿਹਾਰੇ ਇਮਂ ਤੇਮਾਸਂ ਵਸ੍ਸਂ ਉਪੇਮੀ’’ਤਿ ਚ ‘‘ਇਧ ਵਸ੍ਸਂ ਉਪੇਮੀ’’ਤਿ ਚ ਵਚੀਭੇਦੋ ਵਾ ਕਾਤਬ੍ਬੋਤਿ ਅਤ੍ਥੋ.

੨੬੦੯. ਜਾਨਂ ਵਸ੍ਸੂਪਗਮਨਂ ਅਨੁਪਗਚ੍ਛਤੋ ਵਾਪੀਤਿ ਯੋਜਨਾ. ਤੇਮਾਸਨ੍ਤਿ ਏਤ੍ਥ ‘‘ਪੁਰਿਮਂ ਵਾ ਪਚ੍ਛਿਮਂ ਵਾ’’ਤਿ ਸੇਸੋ. ਚਰਨ੍ਤਸ੍ਸਾਪੀਤਿ ਏਤ੍ਥ ‘‘ਚਾਰਿਕ’’ਨ੍ਤਿ ਸੇਸੋ. ਪੁਰਿਮਂ ਵਾ ਤੇਮਾਸਂ ਪਚ੍ਛਿਮਂ ਵਾ ਤੇਮਾਸਂ ਅਵਸਿਤ੍ਵਾਵ ਚਾਰਿਕਂ ਚਰਨ੍ਤਸ੍ਸਾਪਿ ਦੁਕ੍ਕਟਨ੍ਤਿ ਯੋਜਨਾ. ਤੇਮਾਸਨ੍ਤਿ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ. ਯਥਾਹ – ‘‘ਨ, ਭਿਕ੍ਖਵੇ, ਵਸ੍ਸਂ ਉਪਗਨ੍ਤ੍ਵਾ ਪੁਰਿਮਂ ਵਾ ਤੇਮਾਸਂ ਪਚ੍ਛਿਮਂ ਵਾ ਤੇਮਾਸਂ ਅਵਸਿਤ੍ਵਾ ਚਾਰਿਕਾ ਪਕ੍ਕਮਿਤਬ੍ਬਾ, ਯੋ ਪਕ੍ਕਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੧੮੫).

੨੬੧੦. ਰੁਕ੍ਖਸ੍ਸ ਸੁਸਿਰੇਤਿ ਏਤ੍ਥ ‘‘ਸੁਦ੍ਧੇ’’ਤਿ ਸੇਸੋ. ਯਥਾਹ – ‘‘ਰੁਕ੍ਖਸੁਸਿਰੇਤਿ ਏਤ੍ਥ ਸੁਦ੍ਧੇ ਰੁਕ੍ਖਸੁਸਿਰੇਯੇਵ ਨ ਵਟ੍ਟਤਿ, ਮਹਨ੍ਤਸ੍ਸ ਪਨ ਰੁਕ੍ਖਸੁਸਿਰਸ੍ਸ ਅਨ੍ਤੋ ਪਦਰਚ੍ਛਦਨਂ ਕੁਟਿਕਂ ਕਤ੍ਵਾ ਪਵਿਸਨਦ੍ਵਾਰਂ ਯੋਜੇਤ੍ਵਾ ਉਪਗਨ੍ਤੁਂ ਵਟ੍ਟਤੀ’’ਤਿ. ‘‘ਰੁਕ੍ਖਸ੍ਸ ਸੁਸਿਰੇ’’ਤਿ ਇਮਿਨਾ ਰੁਕ੍ਖੇਕਦੇਸੋ ਵਿਟਪੋਪਿ ਸਙ੍ਗਹਿਤੋ, ਸੋਪਿ ਸੁਦ੍ਧੋਵ ਨ ਵਟ੍ਟਤਿ. ਯਥਾਹ – ‘‘ਰੁਕ੍ਖਵਿਟਭਿਯਾਤਿ ਏਤ੍ਥਾਪਿ ਸੁਦ੍ਧੇ ਵਿਟਪਮਤ੍ਤੇ ਨ ਵਟ੍ਟਤਿ, ਮਹਾਵਿਟਪੇ ਪਨ ਅਟ੍ਟਕਂ ਬਨ੍ਧਿਤ੍ਵਾ ਤਤ੍ਥ ਪਦਰਚ੍ਛਦਨਂ ਕੁਟਿਕਂ ਕਤ੍ਵਾ ਉਪਗਨ੍ਤੁਂ ਵਟ੍ਟਤੀ’’ਤਿ (ਮਹਾਵ. ਅਟ੍ਠ. ੨੦੩).

‘‘ਛਤ੍ਤੇਤਿ ਏਤ੍ਥਾਪਿ ਚਤੂਸੁ ਥਮ੍ਭੇਸੁ ਛਤ੍ਤਂ ਠਪੇਤ੍ਵਾ ਆਵਰਣਂ ਕਤ੍ਵਾ ਦ੍ਵਾਰਂ ਯੋਜੇਤ੍ਵਾ ਉਪਗਨ੍ਤੁਂ ਵਟ੍ਟਤਿ, ਛਤ੍ਤਕੁਟਿਕਾ ਨਾਮੇਸਾ ਹੋਤਿ. ਚਾਟਿਯਾਤਿ ਏਤ੍ਥਾਪਿ ਮਹਨ੍ਤੇਨ ਕਪਲ੍ਲੇਨ ਛਤ੍ਤੇ ਵੁਤ੍ਤਨਯੇਨ ਕੁਟਿਂ ਕਤ੍ਵਾਵ ਉਪਗਨ੍ਤੁਂ ਵਟ੍ਟਤੀ’’ਤਿ ਅਟ੍ਠਕਥਾਵਚਨਤੋ ਏਵਮਕਤਾਸੁ ਸੁਦ੍ਧਛਤ੍ਤਚਾਟੀਸੁ ਨਿਵਾਰਣਂ ਵੇਦਿਤਬ੍ਬਂ. ਛਵਕੁਟੀਤਿ ਟਙ੍ਕਿਤਮਞ੍ਚਾਦਯੋ ਵੁਤ੍ਤਾ. ਯਥਾਹ – ‘‘ਛਵਕੁਟਿਕਾ ਨਾਮ ਟਙ੍ਕਿਤਮਞ੍ਚਾਦਿਭੇਦਾ ਕੁਟਿ, ਤਤ੍ਥ ਉਪਗਨ੍ਤੁਂ ਨ ਵਟ੍ਟਤੀ’’ਤਿ (ਮਹਾਵ. ਅਟ੍ਠ. ੨੦੩).

ਸੁਸਾਨੇ ਪਨ ਅਞ੍ਞਂ ਕੁਟਿਕਂ ਕਤ੍ਵਾ ਉਪਗਨ੍ਤੁਂ ਵਟ੍ਟਤਿ. ‘‘ਛਵਸਰੀਰਂ ਝਾਪੇਤ੍ਵਾ ਛਾਰਿਕਾਯ, ਅਟ੍ਠਿਕਾਨਞ੍ਚ ਅਤ੍ਥਾਯ ਕੁਟਿਕਾ ਕਰੀਯਤੀ’’ਤਿ ਅਨ੍ਧਕਟ੍ਠਕਥਾਯਂ ਛਵਕੁਟਿ ਵੁਤ੍ਤਾ. ‘‘ਟਙ੍ਕਿਤਮਞ੍ਚੋਤਿ ਕਸਿਕੁਟਿਕਾਪਾਸਾਣਘਰਨ੍ਤਿ ਲਿਖਿਤ’’ਨ੍ਤਿ (ਵਜਿਰ. ਟੀ. ਮਹਾਵਗ੍ਗ ੨੦੩) ਵਜਿਰਬੁਦ੍ਧਿਤ੍ਥੇਰੋ. ਚਤੁਨ੍ਨਂ ਪਾਸਾਣਾਨਂ ਉਪਰਿ ਪਾਸਾਣਂ ਅਤ੍ਥਰਿਤ੍ਵਾ ਕਤੋ ਗੇਹੋਪਿ ‘‘ਟਙ੍ਕਿਤਮਞ੍ਚੋ’’ਤਿ ਵੁਚ੍ਚਤਿ. ਦੀਘੇ ਮਞ੍ਚਪਾਦੇ ਮਜ੍ਝੇ ਵਿਜ੍ਝਿਤ੍ਵਾ ਅਟਨਿਯੋ ਪਵੇਸੇਤ੍ਵਾ ਮਞ੍ਚਂ ਕਰੋਨ੍ਤੀਤਿ ਤਸ੍ਸ ਇਦਂ ਉਪਰਿ, ਇਦਂ ਹੇਟ੍ਠਾਤਿ ਨਤ੍ਥਿ, ਪਰਿਵਤ੍ਤੇਤ੍ਵਾ ਅਤ੍ਥਤੋਪਿ ਤਾਦਿਸੋਵ ਹੋਤਿ, ਤਂ ਸੁਸਾਨੇ, ਦੇਵਟ੍ਠਾਨੇ ਚ ਠਪੇਨ੍ਤਿ, ਅਯਮ੍ਪਿ ਟਙ੍ਕਿਤਮਞ੍ਚੋ ਨਾਮ.

੨੬੧੧. ‘‘ਸਤਿ ਪਚ੍ਚਯਵੇਕਲ੍ਲੇ, ਸਰੀਰਾਫਾਸੁਤਾਯ ਵਾ’’ਤਿ ਅਵਸੇਸਨ੍ਤਰਾਯਾਨਂ ਵਕ੍ਖਮਾਨਤ੍ਤਾ ‘‘ਅਨ੍ਤਰਾਯੋ’’ਤਿ ਇਮਿਨਾ ਰਾਜਨ੍ਤਰਾਯਾਦਿ ਦਸਵਿਧੋ ਗਹੇਤਬ੍ਬੋ.

੨੬੧੨-੪. ‘‘ਅਨੁਜਾਨਾਮਿ, ਭਿਕ੍ਖਵੇ, ਸਤ੍ਤਨ੍ਨਂ ਸਤ੍ਤਾਹਕਰਣੀਯੇਨ ਅਪ੍ਪਹਿਤੇਪਿ ਗਨ੍ਤੁਂ, ਪਗੇਵ ਪਹਿਤੇ ਭਿਕ੍ਖੁਸ੍ਸ ਭਿਕ੍ਖੁਨਿਯਾ ਸਿਕ੍ਖਮਾਨਾਯ ਸਾਮਣੇਰਸ੍ਸ ਸਾਮਣੇਰਿਯਾ ਮਾਤੁਯਾ ਚ ਪਿਤੁਸ੍ਸ ਚਾ’’ਤਿ (ਮਹਾਵ. ੧੯੮) ਵੁਤ੍ਤਨਯਂ ਦਸ੍ਸੇਤੁਮਾਹ ‘‘ਮਾਤਾਪਿਤੂਨ’’ਨ੍ਤਿਆਦਿ.

ਮਾਤਾਪਿਤੂਨਂ ਦਸ੍ਸਨਤ੍ਥਂ, ਪਞ੍ਚਨ੍ਨਂ ਸਹਧਮ੍ਮਿਕਾਨਂ ਦਸ੍ਸਨਤ੍ਥਂ ਵਾ ਨੇਸਂ ਅਤ੍ਥੇ ਸਤਿ ਵਾ ਨੇਸਂ ਅਨ੍ਤਰੇ ਗਿਲਾਨਂ ਦਟ੍ਠੁਂ ਵਾ ਤਦੁਪਟ੍ਠਾਕਾਨਂ ਭਤ੍ਤਾਦਿਂ ਪਰਿਯੇਸਨਤ੍ਥਂ ਵਾ ਨੇਸਂ ਭਤ੍ਤਾਦਿਂ ਪਰਿਯੇਸਨਤ੍ਥਂ ਵਾ ਤਥਾ ਨੇਸਂ ਪਞ੍ਚਨ੍ਨਂ ਸਹਧਮ੍ਮਿਕਾਨਂ ਅਞ੍ਞਤਰਂ ਅਨਭਿਰਤਂ ਉਕ੍ਕਣ੍ਠਿਤਂ ਅਹਂ ਗਨ੍ਤ੍ਵਾ ਵੂਪਕਾਸੇਸ੍ਸਂ ਵਾ ਵੂਪਕਾਸਾਪੇਸ੍ਸਾਮਿ ਵਾ ਧਮ੍ਮਕਥਮਸ੍ਸ ਕਰਿਸ੍ਸਾਮੀਤਿ ਵਾ ਤਸ੍ਸ ਪਞ੍ਚਨ੍ਨਂ ਸਹਧਮ੍ਮਿਕਾਨਂ ਅਞ੍ਞਤਰਸ੍ਸ ਉਟ੍ਠਿਤਂ ਉਪ੍ਪਨ੍ਨਂ ਦਿਟ੍ਠਿਂ ਵਿਵੇਚੇਸ੍ਸਾਮਿ ਵਾ ਵਿਵੇਚਾਪੇਸ੍ਸਾਮਿ ਵਾ ਧਮ੍ਮਕਥਮਸ੍ਸ ਕਰਿਸ੍ਸਾਮੀਤਿ ਵਾ ਤਥਾ ਉਪ੍ਪਨ੍ਨਂ ਕੁਕ੍ਕੁਚ੍ਚਂ ਵਿਨੋਦੇਸ੍ਸਾਮੀਤਿ ਵਾ ਵਿਨੋਦਾਪੇਸ੍ਸਾਮੀਤਿ ਵਾ ਧਮ੍ਮਕਥਮਸ੍ਸ ਕਰਿਸ੍ਸਾਮੀਤਿ ਵਾ ਏਵਂ ਵਿਨਯਞ੍ਞੁਨਾ ਭਿਕ੍ਖੁਨਾ ਸਤ੍ਤਾਹਕਿਚ੍ਚੇਨ ਅਪੇਸਿਤੇਪਿ ਗਨ੍ਤਬ੍ਬਂ, ਪਗੇਵ ਪਹਿਤੇਤਿ ਯੋਜਨਾ.

ਭਤ੍ਤਾਦੀਤਿ ਏਤ੍ਥ ਆਦਿ-ਸਦ੍ਦੇਨ ਭੇਸਜ੍ਜਪਰਿਯੇਸਨਾਦਿਂ ਸਙ੍ਗਣ੍ਹਾਤਿ. ਯਥਾਹ – ‘‘ਗਿਲਾਨਭਤ੍ਤਂ ਵਾ ਪਰਿਯੇਸਿਸ੍ਸਾਮਿ, ਗਿਲਾਨੁਪਟ੍ਠਾਕਭਤ੍ਤਂ ਵਾ ਪਰਿਯੇਸਿਸ੍ਸਾਮਿ, ਗਿਲਾਨਭੇਸਜ੍ਜਂ ਵਾ ਪਰਿਯੇਸਿਸ੍ਸਾਮਿ, ਪੁਚ੍ਛਿਸ੍ਸਾਮਿ ਵਾ ਉਪਟ੍ਠਹਿਸ੍ਸਾਮਿ ਵਾ’’ਤਿ. ਵੂਪਕਾਸੇਸ੍ਸਨ੍ਤਿ ਯਤ੍ਥ ਅਨਭਿਰਤਿ ਉਪ੍ਪਨ੍ਨਾ, ਤਤੋ ਅਞ੍ਞਤ੍ਥ ਗਹੇਤ੍ਵਾ ਗਮਿਸ੍ਸਾਮੀਤਿ ਅਤ੍ਥੋ.

ਵਿਨੋਦੇਸ੍ਸਾਮਹਨ੍ਤਿ ਵਾਤਿ ਏਤ੍ਥ ਵਾ-ਸਦ੍ਦੇਨ ‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਗਰੁਧਮ੍ਮਂ ਅਜ੍ਝਾਪਨ੍ਨੋ ਹੋਤਿ ਪਰਿਵਾਸਾਰਹੋ, ਸੋ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ ‘ਅਹਞ੍ਹਿ ਗਰੁਧਮ੍ਮਂ ਅਜ੍ਝਾਪਨ੍ਨੋ ਪਰਿਵਾਸਾਰਹੋ, ਆਗਚ੍ਛਨ੍ਤੁ ਭਿਕ੍ਖੂ, ਇਚ੍ਛਾਮਿ ਭਿਕ੍ਖੂਨਂ ਆਗਤ’ਨ੍ਤਿ. ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ ਅਪ੍ਪਹਿਤੇਪਿ, ਪਗੇਵ ਪਹਿਤੇ ‘ਪਰਿਵਾਸਦਾਨਂ ਉਸ੍ਸੁਕ੍ਕਂ ਕਰਿਸ੍ਸਾਮਿ ਵਾ ਅਨੁਸ੍ਸਾਵੇਸ੍ਸਾਮਿ ਵਾ ਗਣਪੂਰਕੋ ਵਾ ਭਵਿਸ੍ਸਾਮੀ’’ਤਿਆਦਿਨਯਂ (ਮਹਾਵ. ੧੯੩) ਸਙ੍ਗਣ੍ਹਾਤਿ. ਏਵਂ ਸਤ੍ਤਾਹਕਿਚ੍ਚੇਨ ਗਚ੍ਛਨ੍ਤੇਨ ਅਨ੍ਤੋਉਪਚਾਰਸੀਮਾਯ ਠਿਤੇਨੇਵ ‘‘ਅਨ੍ਤੋਸਤ੍ਤਾਹੇ ਆਗਚ੍ਛਿਸ੍ਸਾਮੀ’’ਤਿ ਆਭੋਗਂ ਕਤ੍ਵਾ ਗਨ੍ਤਬ੍ਬਂ. ਸਚੇ ਆਭੋਗਂ ਅਕਤ੍ਵਾ ਉਪਚਾਰਸੀਮਂ ਅਤਿਕ੍ਕਮਤਿ, ਛਿਨ੍ਨਵਸ੍ਸੋ ਹੋਤੀਤਿ ਵਦਨ੍ਤਿ.

੨੬੧੫. ‘‘ਅਯਂ ਪਨੇਤ੍ਥ ਪਾਲ਼ਿਮੁਤ੍ਤਕਰਤ੍ਤਿਚ੍ਛੇਦਵਿਨਿਚ੍ਛਯੋ’’ਤਿ ਅਟ੍ਠਕਥਾਗਤਂ ਰਤ੍ਤਿਚ੍ਛੇਦਵਿਨਿਚ੍ਛਯਂ ਦਸ੍ਸੇਤੁਮਾਹ ‘‘ਵਸ੍ਸਂ ਉਪਗਤੇਨੇਤ੍ਥਾ’’ਤਿਆਦਿ. ਏਤ੍ਥਾਤਿ ਇਮਸ੍ਮਿਂ ਸਤ੍ਤਾਹਕਿਚ੍ਚਾਧਿਕਾਰੇ. ਅਯਂ ਪਾਲ਼ਿਮੁਤ੍ਤਕਵਿਨਿਚ੍ਛਯੋ ਦਟ੍ਠਬ੍ਬੋਤਿ ਅਤ੍ਥੋ.

੨੬੧੬. ‘‘ਅਸੁਕਂ ਨਾਮ ਦਿਵਸ’’ਨ੍ਤਿਆਦਿਨਾ ਨਿਮਨ੍ਤਨਾਕਾਰਂ ਵਕ੍ਖਤਿ. ਪੁਬ੍ਬਨ੍ਤਿ ਪਠਮਂ. ਵਟ੍ਟਤੀਤਿ ਸਤ੍ਤਾਹਕਿਚ੍ਚੇਨ ਗਨ੍ਤੁਂ ਵਟ੍ਟਤਿ. ਯਥਾਹ – ‘‘ਸਚੇ ਏਕਸ੍ਮਿਂ ਮਹਾਵਾਸੇ ਪਠਮਂਯੇਵ ਕਤਿਕਾ ਕਤਾ ਹੋਤਿ ‘ਅਸੁਕਦਿਵਸਂ ਨਾਮ ਸਨ੍ਨਿਪਤਿਤਬ੍ਬ’ਨ੍ਤਿ, ਨਿਮਨ੍ਤਿਤੋਯੇਵ ਨਾਮ ਹੋਤਿ, ਗਨ੍ਤੁਂ ਵਟ੍ਟਤੀ’’ਤਿ (ਮਹਾਵ. ਅਟ੍ਠ. ੧੯੯). ‘‘ਉਪਾਸਕੇਹਿ ‘ਇਮਸ੍ਮਿਂ ਨਾਮ ਦਿਵਸੇ ਦਾਨਾਦੀਨਿ ਕਰੋਮ, ਸਬ੍ਬੇ ਏਵ ਸਨ੍ਨਿਪਤਨ੍ਤੂ’ਤਿ ਕਤਿਕਾਯਪਿ ਕਤਾਯ ਗਨ੍ਤੁਂ ਵਟ੍ਟਤਿ, ਨਿਮਨ੍ਤਿਤੋਯੇਵ ਨਾਮ ਹੋਤੀ’’ਤਿ ਕੇਚਿ.

੨੬੧੭. ਭਣ੍ਡਕਨ੍ਤਿ ਅਤ੍ਤਨੋ ਚੀਵਰਭਣ੍ਡਂ. ਨ ਵਟ੍ਟਤੀਤਿ ਸਤ੍ਤਾਹਕਿਚ੍ਚੇਨ ਗਨ੍ਤੁਂ ਨ ਵਟ੍ਟਤਿ. ਪਹਿਣਨ੍ਤੀਤਿ ਚੀਵਰਧੋਵਨਾਦਿਕਮ੍ਮੇਨ ਪਹਿਣਨ੍ਤਿ. ਆਚਰਿਯੁਪਜ੍ਝਾਯਾਨਂ ਆਣਤ੍ਤਿਯੇਨ ਕੇਨਚਿ ਅਨਵਜ੍ਜਕਿਚ੍ਚੇਨ ਸਤ੍ਤਾਹਕਰਣੀਯੇਨ ਗਨ੍ਤੁਂ ਵਟ੍ਟਤੀਤਿ ਇਮਿਨਾਵ ਦੀਪਿਤਂ ਹੋਤਿ.

੨੬੧੮. ਉਦ੍ਦੇਸਾਦੀਨਮਤ੍ਥਾਯਾਤਿ ਪਾਲ਼ਿਵਾਚਨਾਨਿ ਸਨ੍ਧਾਯ. ਆਦਿ-ਸਦ੍ਦੇਨ ਪਰਿਪੁਚ੍ਛਾਦਿਂ ਸਙ੍ਗਣ੍ਹਾਤਿ. ਗਰੂਨਨ੍ਤਿ ਅਗਿਲਾਨਾਨਮ੍ਪਿ ਆਚਰਿਯੁਪਜ੍ਝਾਯਾਨਂ. ਗਨ੍ਤੁਂ ਲਭਤੀਤਿ ਸਤ੍ਤਾਹਕਰਣੀਯੇਨ ਗਨ੍ਤੁਂ ਲਭਤਿ. ਪੁਗ੍ਗਲੋਤਿ ਪਕਰਣਤੋ ਭਿਕ੍ਖੁਂਯੇਵ ਗਣ੍ਹਾਤਿ.

੨੬੧੯. ਆਚਰਿਯੋਤਿ ਨਿਦਸ੍ਸਨਮਤ੍ਤਂ, ਉਪਜ੍ਝਾਯੇਨ ਨਿਵਾਰਿਤੇਪਿ ਏਸੇਵ ਨਯੋ. ‘‘ਸਚੇ ਪਨ ਨਂ ਆਚਰਿਯੋ ‘ਅਜ੍ਜ ਮਾ ਗਚ੍ਛਾ’ਤਿ ਵਦਤਿ, ਵਟ੍ਟਤੀ’’ਤਿ (ਮਹਾਵ. ਅਟ੍ਠ. ੧੯੯) ਅਟ੍ਠਕਥਾਨਯਂ ਦਸ੍ਸੇਤੁਮਾਹ ‘‘ਰਤ੍ਤਿਚ੍ਛੇਦੇ ਅਨਾਪਤ੍ਤਿ, ਹੋਤੀਤਿ ਪਰਿਦੀਪਿਤਾ’’ਤਿ. ਰਤ੍ਤਿਚ੍ਛੇਦੇਤਿ ਵਸ੍ਸਚ੍ਛੇਦਨਿਮਿਤ੍ਤਂ. ‘‘ਰਤ੍ਤਿਚ੍ਛੇਦੇ’’ਤਿ ਸਬ੍ਬਤ੍ਥ ਵਸ੍ਸਚ੍ਛੇਦੋਤਿ ਸਨ੍ਨਿਟ੍ਠਾਨਂ ਕਤ੍ਵਾ ਵਦਨ੍ਤਿ, ਏਵਂ ਸਤ੍ਤਾਹਕਰਣੀਯੇਨ ਗਤਂ ਨਂ ਅਨ੍ਤੋਸਤ੍ਤਾਹੇਯੇਵ ਪੁਨ ਆਗਚ੍ਛਨ੍ਤਂ ਸਚੇ ਆਚਰਿਯੋ ਵਾ ਉਪਜ੍ਝਾਯੋ ਵਾ ‘‘ਅਜ੍ਜ ਮਾ ਗਚ੍ਛਾ’’ਤਿ ਵਦਤਿ, ਸਤ੍ਤਾਹਾਤਿਕ੍ਕਮੇਪਿ ਅਨਾਪਤ੍ਤੀਤਿ ਅਧਿਪ੍ਪਾਯੋ, ਵਸ੍ਸਚ੍ਛੇਦੋ ਪਨ ਹੋਤਿਯੇਵਾਤਿ ਦਟ੍ਠਬ੍ਬਂ ਸਤ੍ਤਾਹਸ੍ਸ ਬਹਿਦ੍ਧਾ ਵੀਤਿਨਾਮਿਤਤ੍ਤਾ.

੨੬੨੦. ਯਸ੍ਸ ਕਸ੍ਸਚਿ ਞਾਤਿਸ੍ਸਾਤਿ ਮਾਤਾਪਿਤੂਹਿ ਅਞ੍ਞਸ੍ਸ ਞਾਤਿਜਨਸ੍ਸ. ‘‘ਗਚ੍ਛਤੋ ਦਸ੍ਸਨਤ੍ਥਾਯਾ’’ਤਿ ਇਮਿਨਾ ਸੇਸਞਾਤਿਕੇਹਿ ‘‘ਮਯਂ ਗਿਲਾਨਾ ਭਦਨ੍ਤਾਨਂ ਆਗਮਨਂ ਇਚ੍ਛਾਮਾ’’ਤਿ ਚ ‘‘ਉਪਟ੍ਠਾਕਕੁਲੇਹਿ ਦਾਨਂ ਦਸ੍ਸਾਮ, ਧਮ੍ਮਂ ਸੋਸ੍ਸਾਮ, ਭਿਕ੍ਖੂਨਂ ਦਸ੍ਸਨਂ ਇਚ੍ਛਾਮਾ’’ਤਿ ਚ ਏਵਂ ਕਤ੍ਤਬ੍ਬਂ ਨਿਦ੍ਦਿਸਿਤ੍ਵਾ ਦੂਤੇ ਵਾ ਪੇਸਿਤੇ ਸਤ੍ਤਾਹਕਰਣੀਯੇਨ ਗਚ੍ਛਤੋ ਰਤ੍ਤਿਚ੍ਛੇਦੋ ਚ ਦੁਕ੍ਕਟਞ੍ਚ ਨ ਹੋਤੀਤਿ ਵੁਤ੍ਤਂ ਹੋਤਿ. ਯਥਾਹ ‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁਸ੍ਸ ਞਾਤਕੋ ਗਿਲਾਨੋ ਹੋਤਿ…ਪੇ… ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ ਪਹਿਤੇ, ਨ ਤ੍ਵੇਵ ਅਪ੍ਪਹਿਤੇ’’ਤਿ (ਮਹਾਵ. ੧੯੯) ਚ ‘‘ਇਧ ਪਨ, ਭਿਕ੍ਖਵੇ, ਉਪਾਸਕੇਨ ਸਙ੍ਘਂ ਉਦ੍ਦਿਸ੍ਸ ਵਿਹਾਰੋ ਕਾਰਾਪਿਤੋ ਹੋਤਿ…ਪੇ… ਇਚ੍ਛਾਮਿ ਦਾਨਞ੍ਚ ਦਾਤੁਂ ਧਮ੍ਮਞ੍ਚ ਸੋਤੁਂ ਭਿਕ੍ਖੂ ਚ ਪਸ੍ਸਿਤੁਨ੍ਤਿ. ਗਨ੍ਤਬ੍ਬਂ, ਭਿਕ੍ਖਵੇ, ਸਤ੍ਤਾਹਕਰਣੀਯੇਨ ਪਹਿਤੇ, ਨ ਤ੍ਵੇਵ ਅਪ੍ਪਹਿਤੇ’’ਤਿ (ਮਹਾਵ. ੧੮੮) ਚ.

੨੬੨੧. ‘‘ਅਹਂ ਗਾਮਕਂ ਗਨ੍ਤ੍ਵਾ ਅਜ੍ਜੇਵ ਆਗਮਿਸ੍ਸਾਮੀ’’ਤਿ ਆਗਚ੍ਛਂ ਆਗਚ੍ਛਨ੍ਤੋ ਸਚੇ ਪਾਪੁਣਿਤੁਂ ਨ ਸਕ੍ਕੋਤੇਵ, ਵਟ੍ਟਤੀਤਿ ਯੋਜਨਾ. ਵਟ੍ਟਤੀਤਿ ਏਤ੍ਥ ‘‘ਅਜ੍ਜੇਵ ਆਗਮਿਸ੍ਸਾਮੀ’’ਤਿ ਗਨ੍ਤ੍ਵਾ ਆਗਚ੍ਛਨ੍ਤਸ੍ਸ ਅਨ੍ਤਰਾਮਗ੍ਗੇ ਸਚੇ ਅਰੁਣੁਗ੍ਗਮਨਂ ਹੋਤਿ, ਵਸ੍ਸਚ੍ਛੇਦੋਪਿ ਨ ਹੋਤਿ, ਰਤ੍ਤਿਚ੍ਛੇਦਦੁਕ੍ਕਟਞ੍ਚ ਨਤ੍ਥੀਤਿ ਅਧਿਪ੍ਪਾਯੋ.

੨੬੨੨. ਵਜੇਤਿ (ਮਹਾਵ. ਅਟ੍ਠ. ੨੦੩) ਗੋਪਾਲਕਾਨਂ ਨਿਵਾਸਨਟ੍ਠਾਨੇ. ਸਤ੍ਥੇਤਿ ਜਙ੍ਘਸਤ੍ਥਸਕਟਸਤ੍ਥਾਨਂ ਸਨ੍ਨਿਵਿਟ੍ਠੋਕਾਸੇ. ਤੀਸੁ ਠਾਨੇਸੁ ਭਿਕ੍ਖੁਨੋ, ਵਸ੍ਸਚ੍ਛੇਦੇ ਅਨਾਪਤ੍ਤੀਤਿ ਤੇਹਿ ਸਦ੍ਧਿਂ ਗਚ੍ਛਨ੍ਤਸ੍ਸੇਵ ਨਤ੍ਥਿ ਆਪਤ੍ਤਿ, ਤੇਹਿ ਵਿਯੁਞ੍ਜਿਤ੍ਵਾ ਗਮਨੇ ਪਨ ਆਪਤ੍ਤਿਯੇਵ, ਪਵਾਰੇਤੁਞ੍ਚ ਨ ਲਭਤਿ.

ਵਜਾਦੀਸੁ ਵਸ੍ਸਂ ਉਪਗਚ੍ਛਨ੍ਤੇਨ ਵਸ੍ਸੂਪਨਾਯਿਕਦਿਵਸੇ ਤੇਨ ਭਿਕ੍ਖੁਨਾ ਉਪਾਸਕਾ ਵਤ੍ਤਬ੍ਬਾ ‘‘ਕੁਟਿਕਾ ਲਦ੍ਧੁਂ ਵਟ੍ਟਤੀ’’ਤਿ. ਸਚੇ ਕਰਿਤ੍ਵਾ ਦੇਨ੍ਤਿ, ਤਤ੍ਥ ਪਵਿਸਿਤ੍ਵਾ ‘‘ਇਧ ਵਸ੍ਸਂ ਉਪੇਮੀ’’ਤਿ ਤਿਕ੍ਖਤ੍ਤੁਂ ਵਤ੍ਤਬ੍ਬਂ. ਨੋ ਚੇ ਦੇਨ੍ਤਿ, ਸਾਲਾਸਙ੍ਖੇਪੇਨ ਠਿਤਸਕਟਸ੍ਸ ਹੇਟ੍ਠਾ ਉਪਗਨ੍ਤਬ੍ਬਂ. ਤਮ੍ਪਿ ਅਲਭਨ੍ਤੇਨ ਆਲਯੋ ਕਾਤਬ੍ਬੋ. ਸਤ੍ਥੇ ਪਨ ਕੁਟਿਕਾਦੀਨਂ ਅਭਾਵੇ ‘‘ਇਧ ਵਸ੍ਸਂ ਉਪੇਮੀ’’ਤਿ ਵਚੀਭੇਦਂ ਕਤ੍ਵਾ ਉਪਗਨ੍ਤੁਂ ਨ ਵਟ੍ਟਤਿ, ਆਲਯਕਰਣਮਤ੍ਤਮੇਵ ਵਟ੍ਟਤਿ. ਆਲਯੋ ਨਾਮ ‘‘ਇਧ ਵਸ੍ਸਂ ਵਸਿਸ੍ਸਾਮੀ’’ਤਿ ਚਿਤ੍ਤੁਪ੍ਪਾਦਮਤ੍ਤਂ.

ਸਚੇ ਮਗ੍ਗਪ੍ਪਟਿਪਨ੍ਨੇਯੇਵ ਸਤ੍ਥੇ ਪਵਾਰਣਦਿਵਸੋ ਹੋਤਿ, ਤਤ੍ਥੇਵ ਪਵਾਰੇਤਬ੍ਬਂ. ਅਥ ਸਤ੍ਥੋ ਅਨ੍ਤੋਵਸ੍ਸੇਯੇਵ ਭਿਕ੍ਖੁਨਾ ਪਤ੍ਥਿਤਟ੍ਠਾਨਂ ਪਤ੍ਵਾ ਅਤਿਕ੍ਕਮਤਿ. ਪਤ੍ਥਿਤਟ੍ਠਾਨੇ ਵਸਿਤ੍ਵਾ ਤਤ੍ਥ ਭਿਕ੍ਖੂਹਿ ਸਦ੍ਧਿਂ ਪਵਾਰੇਤਬ੍ਬਂ. ਅਥਾਪਿ ਸਤ੍ਥੋ ਅਨ੍ਤੋਵਸ੍ਸੇਯੇਵ ਅਨ੍ਤਰਾ ਏਕਸ੍ਮਿਂ ਗਾਮੇ ਤਿਟ੍ਠਤਿ ਵਾ ਵਿਪ੍ਪਕਿਰਤਿ ਵਾ, ਤਸ੍ਮਿਂਯੇਵ ਗਾਮੇ ਭਿਕ੍ਖੂਹਿ ਸਦ੍ਧਿਂ ਵਸਿਤ੍ਵਾ ਪਵਾਰੇਤਬ੍ਬਂ, ਅਪ੍ਪਵਾਰੇਤ੍ਵਾ ਤਤੋ ਪਰਂ ਗਨ੍ਤੁਂ ਨ ਵਟ੍ਟਤਿ.

ਨਾਵਾਯ ਵਸ੍ਸਂ ਉਪਗਚ੍ਛਨ੍ਤੇਨਾਪਿ ਕੁਟਿਯਂਯੇਵ ਉਪਗਨ੍ਤਬ੍ਬਂ. ਪਰਿਯੇਸਿਤ੍ਵਾ ਅਲਭਨ੍ਤੇ ਆਲਯੋ ਕਾਤਬ੍ਬੋ. ਸਚੇ ਅਨ੍ਤੋਤੇਮਾਸਂ ਨਾਵਾ ਸਮੁਦ੍ਦੇਯੇਵ ਹੋਤਿ, ਤਤ੍ਥੇਵ ਪਵਾਰੇਤਬ੍ਬਂ. ਅਥ ਨਾਵਾ ਕੂਲਂ ਲਭਤਿ, ਸਯਞ੍ਚ ਪਰਤੋ ਗਨ੍ਤੁਕਾਮੋ ਹੋਤਿ, ਗਨ੍ਤੁਂ ਨ ਵਟ੍ਟਤਿ. ਨਾਵਾਯ ਲਦ੍ਧਗਾਮੇਯੇਵ ਵਸਿਤ੍ਵਾ ਭਿਕ੍ਖੂਹਿ ਸਦ੍ਧਿਂ ਪਵਾਰੇਤਬ੍ਬਂ. ਸਚੇਪਿ ਨਾਵਾ ਅਨੁਤੀਰਮੇਵ ਅਞ੍ਞਤ੍ਥ ਗਚ੍ਛਤਿ, ਭਿਕ੍ਖੁ ਚ ਪਠਮਂ ਲਦ੍ਧਗਾਮੇਯੇਵ ਵਸਿਤੁਕਾਮੋ, ਨਾਵਾ ਗਚ੍ਛਤੁ, ਭਿਕ੍ਖੁਨਾ ਤਤ੍ਥੇਵ ਵਸਿਤ੍ਵਾ ਭਿਕ੍ਖੂਹਿ ਸਦ੍ਧਿਂ ਪਵਾਰੇਤਬ੍ਬਂ.

ਇਤਿ ਵਜੇ, ਸਤ੍ਥੇ, ਨਾਵਾਯਨ੍ਤਿ ਤੀਸੁ ਠਾਨੇਸੁ ਨਤ੍ਥਿ ਵਸ੍ਸਚ੍ਛੇਦੇ ਆਪਤ੍ਤਿ, ਪਵਾਰੇਤੁਞ੍ਚ ਲਭਤਿ.

੨੬੨੩. ਸਤਿ ਪਚ੍ਚਯਵੇਕਲ੍ਲੇਤਿ ਪਿਣ੍ਡਪਾਤਾਦੀਨਂ ਪਚ੍ਚਯਾਨਂ ਊਨਤ੍ਤੇ ਸਤਿ. ਸਰੀਰਾਫਾਸੁਤਾਯ ਵਾਤਿ ਸਰੀਰਸ੍ਸ ਅਫਾਸੁਤਾਯ ਆਬਾਧੇ ਵਾ ਸਤਿ. ਵਸ੍ਸਂ ਛੇਤ੍ਵਾਪਿ ਪਕ੍ਕਮੇਤਿ ਵਸ੍ਸਚ੍ਛੇਦਂ ਕਤ੍ਵਾਪਿ ਯਥਾਫਾਸੁਕਟ੍ਠਾਨਂ ਗਚ੍ਛੇਯ੍ਯ. ਅਪਿ-ਸਦ੍ਦੇਨ ਵਸ੍ਸਂ ਅਛੇਤ੍ਵਾ ਵਸ੍ਸਚ੍ਛੇਦਕਾਰਣੇ ਸਤਿ ਸਤ੍ਤਾਹਕਰਣੀਯੇਨ ਗਨ੍ਤੁਮ੍ਪਿ ਵਟ੍ਟਤੀਤਿ ਦੀਪੇਤਿ.

੨੬੨੪. ਯੇਨ ਕੇਨਨ੍ਤਰਾਯੇਨਾਤਿ ਰਾਜਨ੍ਤਰਾਯਾਦੀਸੁ ਯੇਨ ਕੇਨਚਿ ਅਨ੍ਤਰਾਯੇਨ. ਯੋ ਭਿਕ੍ਖੁ ਵਸ੍ਸਂ ਨੋਪਗਤੋ, ਤੇਨਾਪਿ ਛਿਨ੍ਨਵਸ੍ਸੇਨ ਵਾਪਿ ਦੁਤਿਯਾ ਵਸ੍ਸੂਪਨਾਯਿਕਾ ਉਪਗਨ੍ਤਬ੍ਬਾਤਿ ਯੋਜਨਾ.

੨੬੨੫-੬. ਸਤ੍ਤਾਹਨ੍ਤਿ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ. ‘‘ਵੀਤਿਨਾਮੇਤੀ’’ਤਿ ਇਮਿਨਾ ਸਮ੍ਬਨ੍ਧੋ. ਉਪਗਨ੍ਤ੍ਵਾਪਿ ਵਾ ਬਹਿਦ੍ਧਾ ਏਵ ਸਤ੍ਤਾਹਂ ਵੀਤਿਨਾਮੇਤਿ ਚੇ. ਯੋ ਗਚ੍ਛਤਿ, ਯੋ ਚ ਵੀਤਿਨਾਮੇਤਿ, ਤਸ੍ਸ ਭਿਕ੍ਖੁਸ੍ਸ. ਪੁਰਿਮਾਪਿ ਨ ਵਿਜ੍ਜਤੀਤਿ ਅਨੁਪਗਤਤ੍ਤਾ, ਛਿਨ੍ਨਵਸ੍ਸਤ੍ਤਾ ਚ ਪੁਰਿਮਾਪਿ ਵਸ੍ਸੂਪਨਾਯਿਕਾ ਨ ਵਿਜ੍ਜਤਿ ਨ ਲਭਤਿ. ਇਮੇਸਂ ਦ੍ਵਿਨ੍ਨਂ ਯਥਾਕ੍ਕਮਂ ਉਪਚਾਰਾਤਿਕ੍ਕਮੇ, ਸਤ੍ਤਾਹਾਤਿਕ੍ਕਮੇ ਚ ਆਪਤ੍ਤਿ ਵੇਦਿਤਬ੍ਬਾ.

ਪਟਿਸ੍ਸਵੇ ਚ ਭਿਕ੍ਖੁਸ੍ਸ, ਹੋਤਿ ਆਪਤ੍ਤਿ ਦੁਕ੍ਕਟਨ੍ਤਿ ‘‘ਇਧ ਵਸ੍ਸਂ ਵਸਥਾ’’ਤਿ ਵੁਤ੍ਤੇ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਤਸ੍ਸ ਵਿਸਂਵਾਦੇ ਅਸਚ੍ਚਾਪਨੇ ਆਪਤ੍ਤਿ ਹੋਤਿ. ਕਤਮਾਤਿ ਆਹ ‘‘ਦੁਕ੍ਕਟ’’ਨ੍ਤਿ. ਨ ਕੇਵਲਂ ਏਤਸ੍ਸੇਵ ਵਿਸਂਵਾਦੇ ਆਪਤ੍ਤਿ ਹੋਤਿ, ਅਥ ਖੋ ਇਤਰੇਸਮ੍ਪਿ ਪਟਿਸ੍ਸਵਾਨਂ ਵਿਸਂਵਾਦੇ ਆਪਤ੍ਤਿ ਵੇਦਿਤਬ੍ਬਾ. ਯਥਾਹ – ‘‘ਪਟਿਸ੍ਸਵੇ ਚ ਆਪਤ੍ਤਿ ਦੁਕ੍ਕਟਸ੍ਸਾਤਿ ਏਤ੍ਥ ਨ ਕੇਵਲਂ ‘ਇਮਂ ਤੇਮਾਸਂ ਇਧ ਵਸ੍ਸਂ ਵਸਥਾ’ਤਿ ਏਤਸ੍ਸੇਵ ਪਟਿਸ੍ਸਵਸ੍ਸ ਵਿਸਂਵਾਦੇ ਆਪਤ੍ਤਿ, ‘ਇਮਂ ਤੇਮਾਸਂ ਭਿਕ੍ਖਂ ਗਣ੍ਹਥ, ਉਭੋਪਿ ਮਯਂ ਇਧ ਵਸ੍ਸਂ ਵਸਿਸ੍ਸਾਮ, ਏਕਤੋਵ ਉਦ੍ਦਿਸਾਪੇਸ੍ਸਾਮਾ’ਤਿ ਏਵਮਾਦਿਨਾਪਿ ਤਸ੍ਸ ਤਸ੍ਸ ਪਟਿਸ੍ਸਵਸ੍ਸ ਵਿਸਂਵਾਦੇ ਦੁਕ੍ਕਟ’’ਨ੍ਤਿ (ਮਹਾਵ. ਅਟ੍ਠ. ੨੦੭). ਤਞ੍ਚ ਖੋ ਪਟਿਸ੍ਸਵਕਾਲੇ ਸੁਦ੍ਧਚਿਤ੍ਤਸ੍ਸ ਪਚ੍ਛਾ ਵਿਸਂਵਾਦਨਪਚ੍ਚਯਾ ਹੋਤਿ. ਪਠਮਂ ਅਸੁਦ੍ਧਚਿਤ੍ਤਸ੍ਸ ਪਨ ਪਟਿਸ੍ਸਵੇ ਪਾਚਿਤ੍ਤਿਯਂ, ਵਿਸਂਵਾਦੇਨ ਦੁਕ੍ਕਟਨ੍ਤਿ ਪਾਚਿਤ੍ਤਿਯੇਨ ਸਦ੍ਧਿਂ ਦੁਕ੍ਕਟਂ ਯੁਜ੍ਜਤਿ.

੨੬੨੭. ‘‘ਵਸ੍ਸਂ ਉਪਗਨ੍ਤ੍ਵਾ ਪਨ ਅਰੁਣਂ ਅਨੁਟ੍ਠਾਪੇਤ੍ਵਾ ਤਦਹੇਵ ਸਤ੍ਤਾਹਕਰਣੀਯੇਨ ਪਕ੍ਕਮਨ੍ਤਸ੍ਸਾਪਿ ਅਨ੍ਤੋਸਤ੍ਤਾਹੇ ਨਿਵਤ੍ਤਨ੍ਤਸ੍ਸ ਅਨਾਪਤ੍ਤੀ’’ਤਿ (ਮਹਾਵ. ਅਟ੍ਠ. ੨੦੭) ਅਟ੍ਠਕਥਾਵਚਨਤੋ, ‘‘ਕੋ ਵਾਦੋ ਵਸਿਤ੍ਵਾ ਬਹਿ ਗਚ੍ਛਤੋ’’ਤਿ ਵਕ੍ਖਮਾਨਤ੍ਤਾ ਚ ‘‘ਨੁਟ੍ਠਾਪੇਤ੍ਵਾ ਪਨਾਰੁਣ’’ਨ੍ਤਿ ਪਾਠੋ ਗਹੇਤਬ੍ਬੋ. ਕਤ੍ਥਚਿ ਪੋਤ੍ਥਕੇਸੁ ‘‘ਉਟ੍ਠਾਪੇਤ੍ਵਾ ਪਨਾਰੁਣ’’ਨ੍ਤਿ ਪਾਠੋ ਦਿਸ੍ਸਤਿ, ਸੋ ਨ ਗਹੇਤਬ੍ਬੋ.

੨੬੨੮. ਵਸਿਤ੍ਵਾਤਿ ਦ੍ਵੀਹਤੀਹਂ ਵਸਿਤ੍ਵਾ. ਯਥਾ ਵਸ੍ਸਂ ਵਸਿਤ੍ਵਾ ਅਰੁਣਂ ਅਨੁਟ੍ਠਾਪੇਤ੍ਵਾਵ ਸਤ੍ਤਾਹਕਰਣੀਯੇਨ ਗਚ੍ਛਤੋ ਅਨਾਪਤ੍ਤਿ, ਤਥਾ ਗਤਟ੍ਠਾਨਤੋ ਅਨ੍ਤੋਸਤ੍ਤਾਹੇ ਆਗਨ੍ਤ੍ਵਾ ਪੁਨਪਿ ਅਰੁਣਂ ਅਨੁਟ੍ਠਾਪੇਤ੍ਵਾਵ ਸਤ੍ਤਾਹਕਰਣੀਯੇਨ ਗਚ੍ਛਤੋ ਅਨਾਪਤ੍ਤਿ. ‘‘ਸਤ੍ਤਾਹਵਾਰੇਨ ਅਰੁਣੋ ਉਟ੍ਠਾਪੇਤਬ੍ਬੋ’’ਤਿ (ਮਹਾਵ. ਅਟ੍ਠ. ੨੦੧) ਅਟ੍ਠਕਥਾਵਚਨਂ ਸਤ੍ਤਮਾਰੁਣੇਨ ਪਟਿਬਦ੍ਧਦਿਵਸਂ ਸਤ੍ਤਮੇਨ ਅਰੁਣੇਨੇਵ ਸਙ੍ਗਹੇਤ੍ਵਾ ਸਤ੍ਤਮਅਰੁਣਬ੍ਭਨ੍ਤਰੇ ਅਨਾਗਨ੍ਤ੍ਵਾ ਅਟ੍ਠਮਂ ਅਰੁਣਂ ਬਹਿ ਉਟ੍ਠਾਪੇਨ੍ਤਸ੍ਸ ਰਤ੍ਤਿਚ੍ਛੇਦਦਸ੍ਸਨਪਰਂ, ਨ ਸਤ੍ਤਮਅਰੁਣਸ੍ਸੇਵ ਤਤ੍ਥ ਉਟ੍ਠਾਪੇਤਬ੍ਬਭਾਵਦਸ੍ਸਨਪਰਨ੍ਤਿ ਗਹੇਤਬ੍ਬਂ ਸਿਕ੍ਖਾਭਾਜਨਅਟ੍ਠਕਥਾਯ, ਸੀਹਲ਼ਗਣ੍ਠਿਪਦੇਸੁ ਚ ਤਥਾ ਵਿਨਿਚ੍ਛਿਤਤ੍ਤਾ.

੨੬੨੯. ‘‘ਨੋਪੇਤਿ ਅਸਤਿਯਾ’’ਤਿ ਪਦਚ੍ਛੇਦੋ, ਨੋਪੇਤੀਤਿ ‘‘ਇਮਸ੍ਮਿਂ ਵਿਹਾਰੇ ਇਮਂ ਤੇਮਾਸਂ ਵਸ੍ਸਂ ਉਪੇਮੀ’’ਤਿ ਵਚੀਭੇਦੇਨ ਨ ਉਪਗਚ੍ਛਤਿ.

੨੬੩੦. ਵੁਤ੍ਤਮੇਵਤ੍ਥਂ ਸਮਤ੍ਥੇਤੁਮਾਹ ‘‘ਨ ਦੋਸੋ ਕੋਚਿ ਵਿਜ੍ਜਤੀ’’ਤਿ.

੨੬੩੧. ‘‘ਇਮਸ੍ਮਿਂ ਵਿਹਾਰੇ ਇਮਂ ਤੇਮਾਸਂ ਵਸ੍ਸਂ ਉਪੇਮੀ’’ਤਿ ਤਿਕ੍ਖਤ੍ਤੁਂ ਵਚਨੇ ਨਿਚ੍ਛਾਰਿਤੇ ਏਵ ਵਸ੍ਸਂ ਉਪਗਤੋ ਸਿਯਾਤਿ ਯੋਜਨਾ. ‘‘ਨਿਚ੍ਛਾਰਿਤੇਵ ਤਿਕ੍ਖਤ੍ਤੁ’’ਨ੍ਤਿ ਇਦਂ ਉਕ੍ਕਂਸਵਸੇਨ ਵੁਤ੍ਤਂ, ਸਕਿਂ, ਦ੍ਵਿਕ੍ਖਤ੍ਤੁਂ ਵਾ ਨਿਚ੍ਛਾਰਿਤੇਪਿ ਵਸ੍ਸੂਪਗਤੋ ਨਾਮ ਹੋਤੀਤਿ. ਯਥਾਹ – ‘‘ਇਮਸ੍ਮਿਂ ਵਿਹਾਰੇ ਇਮਂ ਤੇਮਾਸਂ ਵਸ੍ਸਂ ਉਪੇਮੀਤਿ ਸਕਿਂ ਵਾ ਦ੍ਵਤ੍ਤਿਕ੍ਖਤ੍ਤੁਂ ਵਾ ਵਾਚਂ ਨਿਚ੍ਛਾਰੇਤ੍ਵਾਵ ਵਸ੍ਸਂ ਉਪਗਨ੍ਤਬ੍ਬ’’ਨ੍ਤਿ (ਮਹਾਵ. ਅਟ੍ਠ. ੧੮੪).

੨੬੩੨. ਨਵਮਿਤੋ ਪਟ੍ਠਾਯ ਗਨ੍ਤੁਂ ਵਟ੍ਟਤਿ, ਆਗਚ੍ਛਤੁ ਵਾ ਮਾ ਵਾ, ਅਨਾਪਤ੍ਤੀ’’ਤਿ (ਮਹਾਵ. ਅਟ੍ਠ. ੨੦੭) ਅਟ੍ਠਕਥਾਨਯਂ ਦਸ੍ਸੇਤੁਮਾਹ ‘‘ਆਦਿਂ ਤੁ ਨਵਮਿਂ ਕਤ੍ਵਾ’’ਤਿਆਦਿ. ਨਵਮਿਂ ਪਭੁਤਿ ਆਦਿਂ ਕਤ੍ਵਾ, ਨਵਮਿਤੋ ਪਟ੍ਠਾਯਾਤਿ ਵੁਤ੍ਤਂ ਹੋਤਿ. ਗਨ੍ਤੁਂ ਵਟ੍ਟਤੀਤਿ ਸਤ੍ਤਾਹਕਰਣੀਯੇਨੇਵ ਗਨ੍ਤੁਂ ਵਟ੍ਟਤਿ, ਤਸ੍ਮਾ ਪਵਾਰਣਦਿਵਸੇਪਿ ਤਦਹੇਵ ਆਗਨ੍ਤੁਂ ਅਸਕ੍ਕੁਣੇਯ੍ਯਟ੍ਠਾਨਂ ਪਵਾਰਣਤ੍ਥਾਯ ਗਚ੍ਛਨ੍ਤੇਨ ਲਬ੍ਭਮਾਨੇਨ ਸਤ੍ਤਾਹਕਰਣੀਯੇਨ ਗਨ੍ਤੁਂ ਵਟ੍ਟਤਿ. ‘‘ਪਵਾਰੇਤ੍ਵਾ ਪਨ ਗਨ੍ਤੁਂ ਵਟ੍ਟਤਿ ਪਵਾਰਣਾਯ ਤਂਦਿਵਸਸਨ੍ਨਿਸ੍ਸਿਤਤ੍ਤਾ’’ਤਿ (ਵਜਿਰ. ਟੀ. ਮਹਾਵਗ੍ਗ ੨੦੭) ਹਿ ਵਜਿਰਬੁਦ੍ਧਿਤ੍ਥੇਰੋ. ਸੋ ਪਚ੍ਛਾ ਆਗਚ੍ਛਤੁ ਵਾ ਮਾ ਵਾ, ਦੋਸੋ ਨ ਵਿਜ੍ਜਤੀਤਿ ਯੋਜਨਾ.

ਵਸ੍ਸੂਪਨਾਯਿਕਕ੍ਖਨ੍ਧਕਕਥਾਵਣ੍ਣਨਾ.