ਨਿਸ੍ਸਗ੍ਗਿਯਕਥਾਵਣ੍ਣਨਾ

੫੫੧. ਏਵਂ ਅਨਿਯਤਕਥਂ ਦਸ੍ਸੇਤ੍ਵਾ ਇਦਾਨਿ ਨਿਸ੍ਸਗ੍ਗਿਯਕਥਂ ਦਸ੍ਸੇਤੁਮਾਹ ‘‘ਖੋਮ’’ਨ੍ਤਿਆਦਿ. ਖੋਮਨ੍ਤਿ ਏਵਂਨਾਮਕਂ ਚੀਵਰਂ. ਖੋਮਨ੍ਤਿ ਗਚ੍ਛਵਿਸੇਸਸ੍ਸ ਨਾਮਂ, ਤਸ੍ਸ ਵਾਕੇਹਿ ਕਤਚੀਵਰਂ ਕਾਰਣੋਪਚਾਰਵੋਹਾਰਵਸੇਨ ‘‘ਖੋਮ’’ਨ੍ਤਿ ਵੁਤ੍ਤਂ. ਕਪ੍ਪਾਸਨ੍ਤਿ ਕਪ੍ਪਾਸਸੁਤ੍ਤਮਯਂ ਚੀਵਰਂ, ਇਦਮ੍ਪਿ ਵੁਤ੍ਤਨਯੇਨੇਵ ‘‘ਕਪ੍ਪਾਸ’’ਨ੍ਤਿ ਵੁਚ੍ਚਤਿ. ਕੋਸੇਯ੍ਯਂ ਨਾਮ ਕੋਸਕਾਰਕਿਮਿਕੋਸਂ, ਕੋਸੇਨ ਨਿਬ੍ਬਤ੍ਤਂ ਸੁਤ੍ਤਂ ਕੋਸੇਯ੍ਯਂ. ਇਧ ਪਨ ਤੇਨ ਕੋਸੇਯ੍ਯਸੁਤ੍ਤੇਨ ਨਿਬ੍ਬਤ੍ਤਂ ਚੀਵਰਂ ‘‘ਕੋਸੇਯ੍ਯ’’ਨ੍ਤਿ ਵੁਤ੍ਤਂ. ਸਾਣਨ੍ਤਿ ਸਾਣਵਾਕਸੁਤ੍ਤੇਹਿ ਵਾਯਿਤ੍ਵਾ ਕਤਚੀਵਰਂ. ਇਦਞ੍ਚ ਖੋਮਂ ਵਿਯ ਦਟ੍ਠਬ੍ਬਂ. ਭਙ੍ਗਨ੍ਤਿ ਖੋਮਸੁਤ੍ਤਾਦੀਨਿ ਸਬ੍ਬਾਨਿ, ਏਕਚ੍ਚਾਨਿ ਵਾ ਮਿਸ੍ਸੇਤ੍ਵਾ ਕਤਚੀਵਰਂ. ਇਦਮ੍ਪਿ ਕਰਣਪ੍ਪਕਾਰੇਨ ਲਦ੍ਧਨਾਮਕਂ. ‘‘ਭਙ੍ਗਂ ਨਾਮ ਏਕਾ ਗਚ੍ਛਜਾਤਿ, ਤਸ੍ਸਾ ਵਾਕਮਯਸੁਤ੍ਤੇਹਿ ਵਾਯਿਤ੍ਵਾ ਕਤਚੀਵਰ’’ਨ੍ਤਿ ਕੇਚਿ. ਇਮਸ੍ਮਿਂ ਪਕ੍ਖੇ ਖੋਮਂ ਵਿਯ ਗਹੇਤਬ੍ਬਂ. ਕਮ੍ਬਲਨ੍ਤਿ ਮਨੁਸ੍ਸਲੋਮਵਾਲ਼ਲੋਮਂ ਵਿਨਾ ਸੇਸਲੋਮੇਹਿ ਵਾਯਿਤ੍ਵਾ ਕਤਚੀਵਰਂ ਵੁਤ੍ਤਨ੍ਤਿ. ਇਦਂ ‘‘ਚੀਵਰਂ ਨਾਮ ਛਨ੍ਨਂ ਚੀਵਰਾਨਂ ਅਞ੍ਞਤਰਂ ਚੀਵਰ’’ਨ੍ਤਿ (ਪਾਰਾ. ੪੬੩) ਪਦਭਾਜਨੇ ਚ ‘‘ਖੋਮਂ ਕਪ੍ਪਾਸਿਕਂ ਕੋਸੇਯ੍ਯਂ ਕਮ੍ਬਲਂ ਸਾਣਂ ਭਙ੍ਗ’’ਨ੍ਤਿ (ਪਾਰਾ. ਅਟ੍ਠ. ੨.੪੬੨-੪੬੩) ਅਟ੍ਠਕਥਾਯ ਚ ਵੁਤ੍ਤਂ ਸਨ੍ਧਾਯਾਹ. ‘‘ਜਾਤਿਤੋ’’ਤਿ ਇਦਂ ਪਮਾਣਾਦਿਭੇਦਸ੍ਸ ਵਕ੍ਖਮਾਨਤ੍ਤਾ ਵੁਤ੍ਤਂ. ਜਾਤਿਤੋਤਿ ਖੋਮਾਦਿਸਾਮਞ੍ਞਤੋ. ਸਾਮਞ੍ਞਞ੍ਹਿ ‘‘ਜਾਤੀ’’ਤਿ ਵੁਚ੍ਚਤਿ. ਦੀਘਰਸ੍ਸਥੂਲਸੁਖੁਮਨੀਲਪੀਤਾਦਿਭੇਦਭਿਨ੍ਨਾਨਂ ਸਬ੍ਬੇਸਂ ਵਤ੍ਥਾਵਯਵਾਨਂ ਸਙ੍ਗਾਹਿਕਖੋਮਸੁਤ੍ਤਮਯਤਾਸਾਮਞ੍ਞਂ ਜਾਤੀਤਿ ਵੁਤ੍ਤਂ ਹੋਤਿ. ਏਵਂ ਸੇਸੇਸੁਪਿ.

੫੫੨. ਦੁਕੂਲਨ੍ਤਿ ਏਵਂਨਾਮਕਂ ਰੁਕ੍ਖਵਾਕਮਯਚੀਵਰਂ. ਪਤ੍ਤੁਣ੍ਣਨ੍ਤਿ ਪਤ੍ਤੁਣ੍ਣਦੇਸੇ ਸਞ੍ਜਾਤਵਤ੍ਥਂ. ‘‘ਪਤ੍ਤੁਣ੍ਣਂ ਕੋਸੇਯ੍ਯਵਿਸੇਸੋ’’ਤਿ ਅਭਿਧਾਨਕੋਸੇ ਵੁਤ੍ਤਂ. ਚਿਨਨ੍ਤਿ ਚਿਨਦੇਸੇ ਉਪ੍ਪਨ੍ਨਵਤ੍ਥਂ. ਸੋਮਾਰਪਟ੍ਟਕਨ੍ਤਿ ਸੋਮਾਰਦੇਸੇ ਉਪ੍ਪਨ੍ਨਵਤ੍ਥਂ. ‘‘ਸੋਮਾਰਚਿਨਪਟਕ’’ਨ੍ਤਿਪਿ ਲਿਖਨ੍ਤਿ, ਸੋਯੇਵਤ੍ਥੋ. ਇਦ੍ਧਿਜਨ੍ਤਿ ਏਹਿਭਿਕ੍ਖੂਨਂ ਪੁਞ੍ਞਿਦ੍ਧਿਯਾ ਨਿਬ੍ਬਤ੍ਤਂ ਚੀਵਰਂ. ਦੇਵਦਿਨ੍ਨਨ੍ਤਿ ਦੇਵਤਾਹਿ ਦਿਨ੍ਨਂ ਚੀਵਰਂ. ਤਞ੍ਹਿ ਕਪ੍ਪਰੁਕ੍ਖੇ ਨਿਬ੍ਬਤ੍ਤਂ, ਜਾਲਿਨਿਯਾ ਦੇਵਕਞ੍ਞਾਯ ਅਨੁਰੁਦ੍ਧਤ੍ਥੇਰਸ੍ਸ ਦਿਨ੍ਨਵਤ੍ਥਸਦਿਸਂ. ਤਸ੍ਸਾਤਿ ਜਾਤਿਤੋ ਛਬ੍ਬਿਧਸ੍ਸ ਕਪ੍ਪਿਯਚੀਵਰਸ੍ਸ. ਇਦਂ ਛਬ੍ਬਿਧਚੀਵਰਂ ਯਥਾਰਹਂ ਅਨੁਲੋਮਿਕਂ ਵੁਤ੍ਤਨ੍ਤਿ ਅਤ੍ਥੋ. ਦੁਕੂਲਞ੍ਹਿ ਸਾਣਸ੍ਸ ਅਨੁਲੋਮਂ ਵਾਕਮਯਤ੍ਤਾ, ਪਤ੍ਤੁਣ੍ਣਾਦੀਨਿ ਕੋਸੇਯ੍ਯਸ੍ਸ ਅਨੁਲੋਮਾਨਿ ਪਾਣਕੇਹਿ ਕਤਸੁਤ੍ਤਮਯਤ੍ਤਾ, ਇਦ੍ਧਿਜਮ੍ਪਿ ਖੋਮਾਦੀਨਂਯੇਵ ਅਞ੍ਞਤਰਂ ਹੋਤੀਤਿ ਤੇਸਂ ਅਨੁਲੋਮਂ, ਦੇਵਦਿਨ੍ਨਮ੍ਪਿ ਖੋਮਾਦੀਨਂਯੇਵ ਅਨੁਲੋਮਂ ਹੋਤਿ ਤੇਸਂ ਅਞ੍ਞਤਰਭਾਵਤੋ. ਯਥਾਹ –

‘‘ਸਾਣਸ੍ਸ ਤੁ ਦੁਕੂਲਞ੍ਹਿ, ਇਦ੍ਧਿਜਂ ਦੇਵਦਿਨ੍ਨਕਂ;

ਖੋਮਾਦੀਨਂਵਸਿਟ੍ਠਂਤੁ, ਕੋਸੇਯ੍ਯਸ੍ਸਾਨੁਲੋਮਿਕ’’ਨ੍ਤਿ.

੫੫੩. ਤਿਣ੍ਣਂ ਚੀਵਰਾਨਂ ਸਮਾਹਾਰੋ ਤਿਚੀਵਰਨ੍ਤਿ ਪਮਾਣਯੁਤ੍ਤਂ ਸਙ੍ਘਾਟਿਆਦਿਨਾਮੇਨ ਅਧਿਟ੍ਠਿਤਚੀਵਰਸ੍ਸੇਵ ਨਾਮਤ੍ਤਾ ਤਦੇਵ ਵੁਚ੍ਚਤਿ. ਗਣਨਵਸੇਨ ਯਂ ਕਿਞ੍ਚਿ ਚੀਵਰਤ੍ਤਯਂ ਨ ਵਤ੍ਤਬ੍ਬਂ. ਸਮੁਦ੍ਦੇਕਦੇਸੋਪਿ ਯਥਾ ‘‘ਸਮੁਦ੍ਦੋ’’ਤਿ ਵੁਚ੍ਚਤਿ, ਏਵਂ ਅਧਿਟ੍ਠਿਤੇਸੁ ਤੀਸੁ ਚੀਵਰੇਸੁ ਅਞ੍ਞਤਰਂ ‘‘ਤਿਚੀਵਰ’’ਨ੍ਤਿ ਵੁਚ੍ਚਤਿ. ਪਰਿਕ੍ਖਾਰਚੋਲ਼ਨ੍ਤਿ ਸਙ੍ਘਾਟਿਆਦਿਵਿਸਿਟ੍ਠਨਾਮੇਹਿ ਅਨਧਿਟ੍ਠਿਤਂ ‘‘ਅਨੁਜਾਨਾਮਿ ਭਿਕ੍ਖਵੇ ਆਯਾਮੇਨ ਅਟ੍ਠਙ੍ਗੁਲਂ ਸੁਗਤਙ੍ਗੁਲੇਨ ਚਤੁਰਙ੍ਗੁਲਵਿਤ੍ਥਤਂ ਪਚ੍ਛਿਮਂ ਚੀਵਰ’’ਨ੍ਤਿ (ਪਾਰਾ. ੩੫੮) ਅਨੁਞ੍ਞਾਤਂ ਪਚ੍ਛਿਮਚੀਵਰਪਰਿਯਨ੍ਤਂ ਕਤ੍ਵਾ ਕਤਾਕਤਸ੍ਸ ਯਸ੍ਸ ਕਸ੍ਸਚਿ ਚੀਵਰਸ੍ਸ ਰੁਲ਼੍ਹਿਸਞ੍ਞਾ.

ਮੁਖਂ ਸਨ੍ਦਮਾਨਲਾਲਂ ਪੁਞ੍ਛਤਿ ਏਤੇਨਾਤਿ ਮੁਖਪੁਞ੍ਛਨਨ੍ਤਿ ਕਪੋਲਤੋ ਨਿਚ੍ਚਂ ਸਨ੍ਦਮਾਨਲਾਲਾਨਂ ਪੁਞ੍ਛਨਤ੍ਥਾਯ ਅਨੁਞ੍ਞਾਤਸ੍ਸ ਚੀਵਰਵਿਸੇਸਸ੍ਸ ਨਾਮਂ. ਨਿਸੀਦਨ੍ਤਿ ਏਤ੍ਥਾਤਿ ਨਿਸੀਦਨਨ੍ਤਿ ਚ ਭਿਕ੍ਖੂਨਂ ਅਤ੍ਥਰਿਤ੍ਵਾ ਨਿਸੀਦਿਤੁਂ ਅਨੁਞ੍ਞਾਤਸ੍ਸ ਚੀਵਰਸ੍ਸ ਨਾਮਂ. ਅਧਿਟ੍ਠੇਯ੍ਯਾਤਿ ‘‘ਇਮਂ ਕਣ੍ਡੁਪ੍ਪਟਿਚ੍ਛਾਦਿ’’ਨ੍ਤਿਆਦਿਨਾ (ਵਿ. ਵਿ. ੫੮੫) ਵਕ੍ਖਮਾਨਨਯੇਨ ਨਾਮਂ ਗਹੇਤ੍ਵਾ ਅਧਿਟ੍ਠੇਯ੍ਯਾਤਿ ਅਤ੍ਥੋ. ਪਚ੍ਚਤ੍ਥਰਣਮੇਵ ਚਾਤਿ ਸਙ੍ਘਿਕੇ ਮਞ੍ਚਪੀਠੇ ਸਰੀਰਸਮ੍ਫੁਸਨੇਨ ਆਪਜ੍ਜਿਤਬ੍ਬਾਯ ਆਪਤ੍ਤਿਯਾ ਮੋਚਨਤ੍ਥਾਯ ਤਤ੍ਥ ਅਤ੍ਥਰਿਤ੍ਵਾ ਪਰਿਭੋਗਤ੍ਥਾਯ ਅਨੁਞ੍ਞਾਤਂ ਪਚ੍ਚਤ੍ਥਰਣਚੀਵਰਞ੍ਚ.

੫੫੪. ਏਕਾਹਨ੍ਤਿ ਵਸਨਕਿਰਿਯਾਯ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ. ਤਿਚੀਵਰਨ੍ਤਿ ਤਿਚੀਵਰੇਨ. ਵਿਪ੍ਪਵਸੇਯ੍ਯਾਤਿ ‘‘ਸਙ੍ਘਾਟਿਯਾ ਵਾ ਉਤ੍ਤਰਾਸਙ੍ਗੇਨ ਵਾ ਅਨ੍ਤਰਵਾਸਕੇਨ ਵਾ’’ਤਿ (ਪਾਰਾ. ੪੭੬) ਵੁਤ੍ਤਤ੍ਤਾ ਏਕਦੇਸੇ ਸਮੁਦਾਯੋਪਚਾਰਵਸੇਨ ਅਵਯਵਸ੍ਸ ਵਚਨਤੋ ਤਿਣ੍ਣਂ ਚੀਵਰਾਨਂ ਅਞ੍ਞਤਰੇਨਾਤਿਪਿ ਵੁਤ੍ਤਂ ਹੋਤਿ. ‘‘ਤਥਾ’’ਤਿ ਇਮਿਨਾ ‘‘ਵਿਨਾ’’ਤਿ ਇਦਂ ਪਚ੍ਚਾਮਸਤਿ. ਅਧਿਟ੍ਠਾਤਿ ਅਧਿਟ੍ਠਾਯਾਤਿ ਗਹੇਤਬ੍ਬਂ ‘‘ਪਟਿਸਙ੍ਖਾ ਯੋਨਿਸੋ’’ਤਿ (ਮ. ਨਿ. ੧.੨੨, ੨੩; ਅ. ਨਿ. ੬.੫੮) ਯਥਾ, ਏਤ੍ਥ ‘‘ਵਲ਼ਞ੍ਜਿਯਮਾਨ’’ਨ੍ਤਿ ਸੇਸੋ, ਅਧਿਟ੍ਠਾਯ ਵਲ਼ਞ੍ਜਿਯਮਾਨਂ ਨਿਸੀਦਨਂ ਤਥਾ ਵਿਨਾ ਚਤੁਮਾਸਂ ਨ ਵਸੇਯ੍ਯਾਤਿ ਯੋਜਨਾ.

੫੫੫. ਕਪ੍ਪਿਯਨ੍ਤਿ ਕਪ੍ਪਿਯਕਾਰਣਂ ਨੀਲਾਦਿਵਣ੍ਣਭੇਦਕਰਣਂ. ਕਪ੍ਪਿਯਨ੍ਤਿ ਚ ਕਾਰਣੇ ਕਾਰਿਯੂਪਚਾਰੇਨ ਗਹੇਤਬ੍ਬਂ. ਬਿਨ੍ਦੁਂ ਦਤ੍ਵਾਤਿ ‘‘ਨੀਲਂ ਵਾ ਕਦ੍ਦਮਂ ਵਾ ਕਾਲ਼ਸਾਮਂ ਵਾ’’ਤਿ (ਪਾਚਿ. ੩੬੮) ਵੁਤ੍ਤਲੋਹਮਲਾਦਿਨਾ ਯੇਨ ਕੇਨਚਿਪਿ ਮਙ੍ਗੁਲਪਿਟ੍ਠਿਪ੍ਪਮਾਣਾਦਿਕਂ ਬਿਨ੍ਦੁਂ ਦਤ੍ਵਾ. ਤਤ੍ਥਾਤਿ ਤੇਸੁ ਅਧਿਟ੍ਠਾਤਬ੍ਬੇਸੁ ਤਿਚੀਵਰਾਦੀਸੁ, ਨਿਦ੍ਧਾਰਣੇ ਭੁਮ੍ਮਂ. ਤਿਚੀਵਰਨ੍ਤਿ ਨਿਦ੍ਧਾਰਿਤਬ੍ਬਂ. ਉਪਪਨ੍ਨਨ੍ਤਿ ਯੁਤ੍ਤਂ. ਪਮਾਣੇਨਾਤਿ ਅਨਨ੍ਤਰਂ ਵਕ੍ਖਮਾਨੇਨ ਪਮਾਣੇਨ. ਅਧਿਟ੍ਠਾਤਬ੍ਬਨ੍ਤਿ ‘‘ਇਮਂ ਸਙ੍ਘਾਟਿਂ ਅਧਿਟ੍ਠਾਮੀ’’ਤਿਆਦਿਨਾ ਵਕ੍ਖਮਾਨਨਯੇਨ ਨਾਮਂ ਵਤ੍ਵਾ ਅਧਿਟ੍ਠਾਤਬ੍ਬਂ. ਏਵਕਾਰੇਨ ਪਨ ਨਾਮਂ ਵਤ੍ਵਾ ਨ ਵਿਕਪ੍ਪੇਤਬ੍ਬਨ੍ਤਿ ਦਸ੍ਸੇਤਿ. ਏਸ ਨਯੋ ਸੇਸਚੀਵਰੇਸੁਪਿ. ਵੁਤ੍ਤਞ੍ਹੇਤਂ ਭਗਵਤਾ ‘‘ਅਨੁਜਾਨਾਮਿ ਭਿਕ੍ਖਵੇ ਤਿਚੀਵਰਂ ਅਧਿਟ੍ਠਾਤੁਂ, ਨ ਵਿਕਪ੍ਪੇਤੁ’’ਨ੍ਤਿਆਦਿ (ਮਹਾਵ. ੩੫੮). ਤਸ੍ਮਾ ਤਿਚੀਵਰਾਦੀਨਿ ਅਧਿਟ੍ਠਹਨ੍ਤੇਨ ‘‘ਇਮਂ ਸਙ੍ਘਾਟਿਂ ਅਧਿਟ੍ਠਾਮੀ’’ਤਿਆਦਿਨਾ ਨਾਮਂ ਵਤ੍ਵਾ ਅਧਿਟ੍ਠਾਤਬ੍ਬਂ. ਵਿਕਪ੍ਪੇਨ੍ਤੇਨ ਪਨ ‘‘ਇਮਂ ਸਙ੍ਘਾਟਿ’’ਨ੍ਤਿਆਦਿਨਾ ਤਸ੍ਸ ਚੀਵਰਸ੍ਸ ਨਾਮਂ ਅਗ੍ਗਹੇਤ੍ਵਾ ‘‘ਇਮਂ ਚੀਵਰਂ ਤੁਯ੍ਹਂ ਵਿਕਪ੍ਪੇਮੀ’’ਤਿ ਵਿਕਪ੍ਪੇਤਬ੍ਬਂ. ਤਿਚੀਵਰਂ ਵਾ ਹੋਤੁ ਅਞ੍ਞਂ ਵਾ, ਯਦਿ ਤਂ ਤਂ ਨਾਮਂ ਗਹੇਤ੍ਵਾ ਵਿਕਪ੍ਪੇਤਿ, ਅਵਿਕਪ੍ਪਿਤਂ ਹੋਤਿ ਅਤਿਰੇਕਚੀਵਰਟ੍ਠਾਨੇ ਤਿਟ੍ਠਤਿ. ਤਂ ਚੀਵਰਨ੍ਤਿ ਸਮ੍ਬਨ੍ਧੋ.

੫੫੬-੭. ‘‘ਉਪਪਨ੍ਨਂ ਪਮਾਣੇਨਾ’’ਤਿ ਏਤ੍ਥ ਵੁਤ੍ਤਪ੍ਪਮਾਣਂ ਦਸ੍ਸੇਤੁਮਾਹ ‘‘ਪਚ੍ਛਿਮਨ੍ਤੇਨਾ’’ਤਿਆਦਿ. ਸਙ੍ਘਟਿਤਟ੍ਠੇਨ ਸਙ੍ਘਾਟਿ. ਵਤ੍ਥਖਣ੍ਡਾਨਿ ਸਿਬ੍ਬਨਕਮ੍ਮੇਨ ਸਙ੍ਘਟੇਤ੍ਵਾ ਕਤਤ੍ਤਾ ‘‘ਸਙ੍ਘਾਟੀ’’ਤਿ ਚੀਵਰਾਨਂ ਸਾਮਞ੍ਞਨਾਮਂ. ਇਧ ਪਨ ਰੁਲ਼੍ਹਿਯਾ ਅਨ੍ਤਰਵਾਸਕਾਦਿਵਿਸੇਸਨਾਮਬ੍ਯਤਿਰਿਤ੍ਤੇ ਚੀਵਰਵਿਸੇਸੇ ਵਤ੍ਤਤਿ. ਮੁਟ੍ਠਿਪਞ੍ਚਕਾਤਿ ਏਤ੍ਥ ਏਕਾਦੀਨਮਟ੍ਠਾਰਸਨ੍ਤਾਨਂ ਸਙ੍ਖ੍ਯਾਸਦ੍ਦਾਨਂ ਸਙ੍ਖ੍ਯੇਯ੍ਯੇ ਵਤ੍ਤਮਾਨਤ੍ਤਾ ਪਞ੍ਚਸਦ੍ਦੋ ਚੀਵਰਪ੍ਪਮਾਣਪ੍ਪਕਰਣਤੋ ਲਬ੍ਭਮਾਨਹਤ੍ਥਸਙ੍ਖਾਤਰਤਨੇਯੇਵ ਪਵਤ੍ਤਤਿ, ਤੇਨੇਵ ਮੁਟ੍ਠਿਸਦ੍ਦੋਪਿ ਉਤ੍ਤਰਪਦਲੋਪੇਨ ਮੁਟ੍ਠਿਰਤਨੇ ਵਤ੍ਤਤਿ. ਪਞ੍ਚਨ੍ਨਂ ਪੂਰਣੋ ਪਞ੍ਚਮੋ, ਮੁਟ੍ਠਿਯਾ ਪਞ੍ਚਮੋ ਮੁਟ੍ਠਿਪਞ੍ਚਮੋ. ਮੁਟ੍ਠਿਪਞ੍ਚਮੋ ਪਰਿਮਾਣਮੇਤਿਸ੍ਸਾਤਿ ‘‘ਮੁਟ੍ਠਿਪਞ੍ਚਮਕਾ’’ਤਿ ਵਤ੍ਤਬ੍ਬੇ ਮ-ਕਾਰਲੋਪੇਨ ‘‘ਮੁਟ੍ਠਿਪਞ੍ਚਕਾ’’ਤਿ ਸਙ੍ਘਾਟਿ ਵੁਤ੍ਤਾ.

ਮੁਟ੍ਠਿਤ੍ਤਿਕਾਤਿ ਏਤ੍ਥ ਵੁਤ੍ਤਨਯੇਨ ਸਙ੍ਖ੍ਯੇਯ੍ਯੇ ਵਤ੍ਤਮਾਨੋ ਤਿ-ਸਦ੍ਦੋ ਚੀਵਰਪ੍ਪਮਾਣਪ੍ਪਕਰਣਤੋ ਲਬ੍ਭਮਾਨਹਤ੍ਥਸਙ੍ਖਾਤਰਤਨੇਯੇਵ ਵਤ੍ਤਤਿ, ਤੇਨੇਵ ਮੁਟ੍ਠਿਸਦ੍ਦੋਪਿ ਉਤ੍ਤਰਪਦਲੋਪੇਨ ਮੁਟ੍ਠਿਰਤਨੇ ਵਤ੍ਤਤਿ. ਤਿਣ੍ਣਂ ਪੂਰਣੋ ਤਤਿਯੋ, ਮੁਟ੍ਠਿਯਾ ਤਤਿਯੋ ਮੁਟ੍ਠਿਤਤਿਯੋ, ਮੁਟ੍ਠਿਤਤਿਯੋ ਪਰਿਮਾਣਮੇਤਿਸ੍ਸਾਤਿ ‘‘ਮੁਟ੍ਠਿਤਤਿਯਕਾ’’ਤਿ ਵਤ੍ਤਬ੍ਬੇ ਤਿਯ-ਪਚ੍ਚਯਲੋਪੇਨ ‘‘ਮੁਟ੍ਠਿਤ੍ਤਿਕਾ’’ਤਿ ਸਙ੍ਘਾਟਿਯੇਵ ਵੁਚ੍ਚਤਿ. ਏਵਮੁਪਰਿਪਿ. ਤਿਰਿਯਨ੍ਤਿ ਤਿਰਿਯਤੋ.

ਉਤ੍ਤਮਨ੍ਤੇਨਾਤਿ ਉਕ੍ਕਟ੍ਠਪਰਿਮਾਣਨ੍ਤੇਨ. ਸਤ੍ਥੁਨੋ ਚੀਵਰੂਨਾਪੀਤਿ ‘‘ਤਤ੍ਰਿਦਂ ਸੁਗਤਸ੍ਸ ਸੁਗਤਚੀਵਰਪ੍ਪਮਾਣਂ, ਦੀਘਸੋ ਨਵ ਵਿਦਤ੍ਥਿਯੋ ਸੁਗਤਵਿਦਤ੍ਥਿਯਾ, ਤਿਰਿਯਂ ਛ ਵਿਦਤ੍ਥਿਯੋ’’ਤਿ (ਪਾਚਿ. ੫੪੮) ਵੁਤ੍ਤਪ੍ਪਮਾਣਸੁਗਤਚੀਵਰਤੋ ਊਨਾਪਿ. ਪਿ-ਸਦ੍ਦੋ ਸਮ੍ਭਾਵਨੇ, ਉਕ੍ਕਟ੍ਠਪਰਿਚ੍ਛੇਦੇਨ ਤਤ੍ਤਕਮ੍ਪਿ ਵਟ੍ਟਤਿ, ਤਤੋ ਚੇ ਊਨਂ ਵਤ੍ਤਬ੍ਬਮੇਵ ਨਤ੍ਥੀਤਿ ਅਤ੍ਥੋ. ਅਨ੍ਤਦ੍ਵਯਸਨ੍ਦਸ੍ਸਨੇਨ ਉਭਯਮਜ੍ਝੇ ਯਂ ਪਹੋਨਕਰੁਚ੍ਚਨਕਪ੍ਪਮਾਣਂ, ਤਂ ਗਹੇਤਬ੍ਬਨ੍ਤਿ ਦਸ੍ਸੇਤਿ.

੫੫੮. ਮੁਟ੍ਠਿਪਞ੍ਚਕਸਦ੍ਦੋ ਪੁਬ੍ਬੇ ਵੁਤ੍ਤਨਯੇਨਿਧ ਦੀਘਨ੍ਤੇ ਵਤ੍ਤਤਿ. ਮੁਟ੍ਠਿਪਞ੍ਚਕੋ ਦੀਘਨ੍ਤੋ ਯਸ੍ਸ, ਯਸ੍ਮਿਂ ਵਾ ਪਮਾਣੇਤਿ ਵਿਗ੍ਗਹੋ, ਦੀਘਨ੍ਤਤੋ ਮੁਟ੍ਠਿਪਞ੍ਚਕਪ੍ਪਮਾਣੇਨਾਤਿ ਵੁਤ੍ਤਂ ਹੋਤਿ. ‘‘ਮੁਟ੍ਠਿਪਞ੍ਚਮ’’ਨ੍ਤਿਪਿ ਲਿਖਨ੍ਤਿ. ਤਿਰਿਯਨ੍ਤਤੋਤਿ ਵਿਤ੍ਥਾਰਨ੍ਤਤੋ. ਅਡ੍ਢਹਤ੍ਥੋ ਅਡ੍ਢੋ ਉਤ੍ਤਰਪਦਲੋਪੇਨ, ਸੋ ਤੇਯ੍ਯੋ ਤਤਿਯੋ ਯਸ੍ਸ ਪਮਾਣਸ੍ਸਾਤਿ ਗਹੇਤਬ੍ਬਂ, ਤਂ, ਅਡ੍ਢਤੇਯ੍ਯਰਤਨਪ੍ਪਮਾਣਂ ਹੋਤੀਤਿ ਅਤ੍ਥੋ. ਦ੍ਵਿਹਤ੍ਥਂ ਵਾਤਿ ਦ੍ਵੇ ਹਤ੍ਥਾ ਯਸ੍ਸ ਪਮਾਣਸ੍ਸਾਤਿ ਵਿਗ੍ਗਹੋ, ਦ੍ਵਿਰਤਨਪ੍ਪਮਾਣਂ ਵਾ ਹੋਤੀਤਿ ਅਤ੍ਥੋ. ਇਦਞ੍ਚ ‘‘ਤਿਰਿਯਂ ਦ੍ਵਿਹਤ੍ਥੋਪਿ ਵਟ੍ਟਤਿ. ਪਾਰੁਪਨੇਨਪਿ ਹਿ ਸਕ੍ਕਾ ਨਾਭਿਂ ਪਟਿਚ੍ਛਾਦੇਤੁ’’ਨ੍ਤਿ (ਪਾਰਾ. ਅਟ੍ਠ. ੨.੪੬੯) ਅਟ੍ਠਕਥਾਗਤਤ੍ਤਾ ਵੁਤ੍ਤਂ. ‘‘ਸੇਸੇ ਅਨ੍ਤਰਵਾਸਕੇ’’ਤਿ ਇਦਂ ਯਥਾਵੁਤ੍ਤਪਰਿਮਾਣੇਨ ਪਰਿਮਿਤਚੀਵਰਨਿਦਸ੍ਸਨਂ.

੫੫੯. ਅਹਤਾਹਤਕਪ੍ਪਾਨਨ੍ਤਿ ਏਤ੍ਥ ‘‘ਵਤ੍ਥਾਨ’’ਨ੍ਤਿ ਸੇਸੋ. ਅਹਤਾਨਂ ਵਤ੍ਥਾਨਨ੍ਤਿ ਨਵਵਤ੍ਥਾਨਂ. ਅਹਤਤੋ ਕਿਞ੍ਚਿ ਊਨਾਨਿ ਅਹਤਕਪ੍ਪਾਨਿ, ਤੇਸਂ ਨਵਵੋਹਾਰੂਪਗਾਨਂ ਕਤਿਪਯਧੋਤਾਨਂ ਵਤ੍ਥਾਨਨ੍ਤਿ ਵੁਤ੍ਤਂ ਹੋਤਿ. ਸਙ੍ਘਾਟੀਤਿ ਸਙ੍ਘਾਟਿਨਾਮਕਚੀਵਰਂ. ਦਿਗੁਣਾਤਿ ਦੁਪਟ੍ਟਕਤਾ.

੫੬੦. ਉਤੁਦ੍ਧਟਾਨਨ੍ਤਿ ਅਤਿਕ੍ਕਨ੍ਤਦਿਵਸਾਨਂ, ਬਹੁਕਾਲਂ ਨਿਵਾਸੇਤ੍ਵਾ ਪਰਿਚ੍ਚਤ੍ਤਾਨਨ੍ਤਿ ਵੁਤ੍ਤਂ ਹੋਤਿ. ਅਥ ਵਾ ਯਾਨਿ ਉਤੁਤੋ ਉਦ੍ਧਟਾਨਿ, ਤੇਸਂ ਵਤ੍ਥਾਨਨ੍ਤਿ ਗਹੇਤਬ੍ਬਂ, ਤਿਣ੍ਣਂ ਉਤੂਨਮਞ੍ਞਤਰਂ ਅਤਿਕ੍ਕਮਿਤ੍ਵਾ ਠਿਤਾਨਂ ਪੁਰਾਣਵਤ੍ਥਾਨਨ੍ਤਿ ਵੁਤ੍ਤਂ ਹੋਤਿ. ਚੀਵਰਾਨਨ੍ਤਿ ਚੀਵਰਤ੍ਥਾਨਿ ਵਤ੍ਥਾਨੇਵ ਗਹਿਤਾਨਿ. ਚਤੁਗ੍ਗੁਣਾਤਿ ਚਤੁਪਟ੍ਟਾ. ਸੇਸਾ ਦੁਵੇਤਿ ਅਨ੍ਤਰਵਾਸਕਉਤ੍ਤਰਾਸਙ੍ਗਾ ਦ੍ਵੇ. ਯਥਾਸੁਖਨ੍ਤਿ ਯਥਾਰੁਚਿ. ਪਂਸੁਕੂਲਨ੍ਤਿ ਸੁਸਾਨਾਦੀਸੁ ਪਤਿਤਪਿਲੋਤਿਕਚੀਵਰਂ.

੫੬੧. ‘‘ਤੀਣਿਪੀ’’ਤਿਆਦੀਸੁ ‘‘ਤਿਚੀਵਰੇ ਕਯਿਰਮਾਨੇ ਸਬ੍ਬਂ ਛਿਨ੍ਨਕਂ ਨਪ੍ਪਹੋਤੀ’’ਤਿ ਪਾਲ਼ਿਯਂ ਆਗਤਵਤ੍ਥੁਮ੍ਹਿ ‘‘ਅਨੁਜਾਨਾਮਿ ਭਿਕ੍ਖਵੇ ਦ੍ਵੇ ਛਿਨ੍ਨਕਾਨਿ ਏਕਂ ਅਛਿਨ੍ਨਕ’’ਨ੍ਤਿ (ਮਹਾਵ. ੩੬੦) ਆਦਿਵਚਨਤੋ ‘‘ਚੀਵਰ’’ਨ੍ਤਿ ਸੇਸੋ. ਛਿਨ੍ਦਿਤਬ੍ਬਨ੍ਤਿ ਵਤ੍ਥਾਨਿ ਛਿਨ੍ਦਿਤ੍ਵਾ ਸਿਬ੍ਬੇਤ੍ਵਾ ਕਾਤਬ੍ਬਂ. ਪਹੋਤਿ ਚੇਤਿ ਵਤ੍ਥਾਨਿ ਛਿਨ੍ਦਿਤ੍ਵਾ ਕਰਣੇ ਯਦਿ ਚੀਵਰਸ੍ਸ ਪਹੋਤਿ. ਸਬ੍ਬੇਸੂਤਿ ਤੀਸੁ ਚੀਵਰੇਸੁ. ਅਪ੍ਪਹੋਨ੍ਤੇਸੂਤਿ ਵਤ੍ਥਾਨਂ ਛਿਨ੍ਦਿਤ੍ਵਾ ਸਿਬ੍ਬਨੇਨ ਅਪ੍ਪਹੋਨ੍ਤੇਸੁ. ਅਨ੍ਵਾਧਿਕਨ੍ਤਿ ਵਤ੍ਥੇ ਊਨਾਤਿਰੇਕਂ ਅਪਨੇਤ੍ਵਾ ਆਗਨ੍ਤੁਕਪਤ੍ਤਸਙ੍ਖਾਤਂ ਅਨੁਵਾਤਂ ਚੀਵਰਸ੍ਸ ਪਰਿਯਨ੍ਤੇ, ਮਜ੍ਝੇ ਚ ਯਥਾਰਹਂ ਦੀਘਰਸ੍ਸਪਰਿਮਾਣਯੁਤ੍ਤਂ ਅਲ੍ਲਿਯਾਪੇਤਬ੍ਬਨ੍ਤਿ ਵੁਤ੍ਤਂ ਹੋਤਿ.

੫੬੨. ਅਚ੍ਛਿਨ੍ਨਂ ਵਾਤਿ ਯਥਾਵੁਤ੍ਤਨਯੇਨ ਅਚ੍ਛਿਨ੍ਨਂ ਵਾ. ਅਨਾਦਿਨ੍ਨਨ੍ਤਿ ਅਨਾਦਿਨ੍ਨਆਗਨ੍ਤੁਕਪਤ੍ਤਂ. ਤਿਚੀਵਰਨ੍ਤਿ ਤੀਸੁ ਚੀਵਰੇਸੁ ਏਕੇਕਨ੍ਤਿ ਵੁਤ੍ਤਂ ਹੋਤਿ. ਦੁਬ੍ਭੋਗੇਨਾਤਿ ਦੁਟ੍ਠੁ ਪਰਿਭੋਗੇਨ. ਯਥਾ ਪਰਿਭੁਤ੍ਤਂ ਨਸ੍ਸਤਿ, ਤਥਾ ਕਿਲਿਟ੍ਠਾਨਂ ਧੋਵਨਾਦਿਮਕਤ੍ਵਾ ਨਿਵਾਸਨਾਦਿਨਾ ਪਰਿਭੋਗੇਨ.

੫੬੩-੪. ਕੁਸਿਨ੍ਤਿ ਆਯਾਮਤੋ ਚ ਵਿਤ੍ਥਾਰਤੋ ਚ ਅਨੁਵਾਤਂ ਚੀਵਰਮਜ੍ਝੇ ਤਾਦਿਸਮੇਵ ਦੀਘਪਤ੍ਤਞ੍ਚ. ਵੁਤ੍ਤਞ੍ਹੇਤਂ ਚੀਵਰਕ੍ਖਨ੍ਧਅਟ੍ਠਕਥਾਯਂ ‘‘ਕੁਸੀਤਿ ਆਯਾਮਤੋ ਚ ਵਿਤ੍ਥਾਰਤੋ ਚ ਅਨੁਵਾਤਾਦੀਨਂ ਦੀਘਪਤ੍ਤਾਨਮੇਤਂ ਅਧਿਵਚਨ’’ਨ੍ਤਿ (ਮਹਾਵ. ਅਟ੍ਠ. ੩੪੫). ਅਡ੍ਢਕੁਸਿਨ੍ਤਿ ਅਨੁਵਾਤਸਦਿਸਂ ਚੀਵਰਮਜ੍ਝੇ ਤਤ੍ਥ ਤਤ੍ਥ ਰਸ੍ਸਪਤ੍ਤਂ. ਵੁਤ੍ਤਮ੍ਪਿ ਚੇਤਂ ‘‘ਅਡ੍ਢਕੁਸੀਤਿ ਅਨ੍ਤਰਨ੍ਤਰਾ ਰਸ੍ਸਪਤ੍ਤਾਨਂ ਨਾਮ’’ਨ੍ਤਿ (ਮਹਾਵ. ਅਟ੍ਠ. ੩੪੫). ਮਣ੍ਡਲਨ੍ਤਿ ਏਕੇਕਸ੍ਮਿਂ ਖਣ੍ਡੇ ਮਹਾਮਣ੍ਡਲਂ. ਵੁਤ੍ਤਮ੍ਪਿ ਚੇਤਂ ‘‘ਮਣ੍ਡਲਨ੍ਤਿ ਪਞ੍ਚਖਣ੍ਡਿਕਚੀਵਰਸ੍ਸ ਏਕੇਕਸ੍ਮਿਂ ਖਣ੍ਡੇ ਮਹਾਮਣ੍ਡਲ’’ਨ੍ਤਿ (ਮਹਾਵ. ਅਟ੍ਠ. ੩੪੫). ਅਡ੍ਢਮਣ੍ਡਲਨ੍ਤਿ ਮਣ੍ਡਲਸ੍ਸ ਅਨ੍ਤੋ ਨਿਵੇਸਿਯਮਾਨਂ ਖੁਦ੍ਦਕਮਣ੍ਡਲਂ. ਵੁਤ੍ਤਮ੍ਪਿ ਚੇਤਂ ‘‘ਅਡ੍ਢਮਣ੍ਡਲਨ੍ਤਿ ਖੁਦ੍ਦਕਮਣ੍ਡਲ’’ਨ੍ਤਿ (ਮਹਾਵ. ਅਟ੍ਠ. ੩੪੫). ਵਿਵਟ੍ਟਨ੍ਤਿ ਮਣ੍ਡਲਂ, ਅਡ੍ਢਮਣ੍ਡਲਞ੍ਚਾਤਿ ਦ੍ਵੇ ਏਕਤੋ ਕਤ੍ਵਾ ਸਿਬ੍ਬਿਤਂ ਵੇਮਜ੍ਝੇ ਖਣ੍ਡਂ. ਵੁਤ੍ਤਮ੍ਪਿ ਚੇਤਂ ‘‘ਵਿਵਟ੍ਟਨ੍ਤਿ ਮਣ੍ਡਲਞ੍ਚ ਅਡ੍ਢਮਣ੍ਡਲਞ੍ਚ ਏਕਤੋ ਕਤ੍ਵਾ ਸਿਬ੍ਬਿਤਂ ਮਜ੍ਝਿਮਖਣ੍ਡ’’ਨ੍ਤਿ (ਮਹਾਵ. ਅਟ੍ਠ. ੩੪੫). ਅਨੁਵਿਵਟ੍ਟਨ੍ਤਿ ਮਜ੍ਝਿਮਖਣ੍ਡਸ੍ਸ ਉਭੋਸੁ ਪਸ੍ਸੇਸੁ ਸਿਬ੍ਬਿਤਂ ਤਥੇਵ ਦ੍ਵਿਮਣ੍ਡਲਪਤ੍ਤਂ ਖਣ੍ਡਦ੍ਵਯਂ. ਵੁਤ੍ਤਮ੍ਪਿ ਚੇਤਂ ‘‘ਅਨੁਵਿਵਟ੍ਟਨ੍ਤਿ ਤਸ੍ਸ ਉਭੋਸੁ ਪਸ੍ਸੇਸੁ ਦ੍ਵੇ ਖਣ੍ਡਾਨੀ’’ਤਿ (ਮਹਾਵ. ਅਟ੍ਠ. ੩੪੫). ਬਾਹਨ੍ਤਨ੍ਤਿ ਤੇਸਂ ਅਨੁਵਿਵਟ੍ਟਾਨਂ ਬਾਹਿਰਪਸ੍ਸੇ ਸਿਬ੍ਬਿਤਂ ਬਾਹਿਰਖਣ੍ਡਦ੍ਵਯਂ. ਵੁਤ੍ਤਮ੍ਪਿ ਚੇਤਂ ‘‘ਬਾਹਨ੍ਤਨ੍ਤਿ ਤੇਸਂ ਅਨੁਵਿਵਟ੍ਟਾਨਂ ਬਹਿ ਏਕੇਕਂ ਖਣ੍ਡ’’ਨ੍ਤਿ (ਮਹਾਵ. ਅਟ੍ਠ. ੩੪੫).

ਪਞ੍ਚਨ੍ਨਂ ਸਮਾਹਾਰੋ ਪਞ੍ਚਕਂ, ਦਸ੍ਸਿਤਪ੍ਪਕਾਰਪਞ੍ਚਖਣ੍ਡੇਹਿ ਸਿਬ੍ਬਿਤਚੀਵਰਂ ਪਞ੍ਚਕਂ ਨਾਮ. ਆਦਿ-ਸਦ੍ਦੇਨ ਸਤ੍ਤਖਣ੍ਡਾਦੀਹਿ ਸਿਬ੍ਬਿਤਚੀਵਰਾਨਂ ਗਹਣਂ. ਤੇਨੇਵੇਤ੍ਥਾਹ ‘‘ਕਤ੍ਤਬ੍ਬਂ ਤੁ ਤਿਚੀਵਰ’’ਨ੍ਤਿ. ਸਤ੍ਤਖਣ੍ਡਸ੍ਸ ਚੀਵਰਸ੍ਸ ਏਕਂ ਮਜ੍ਝਿਮਖਣ੍ਡਂ ਵਿਵਟ੍ਟਨਾਮਮੇਵ ਹੋਤਿ, ਤਸ੍ਸ ਉਭੋਸੁ ਪਸ੍ਸੇਸੁ ਦ੍ਵੇ ਦ੍ਵੇ ਖਣ੍ਡਾਨਿ ਚੂਲ਼ਾਨੁਵਿਵਟ੍ਟਮਹਾਨੁਵਿਵਟ੍ਟਸਙ੍ਖਾਤਾਨਿ ਅਨੁਵਿਵਟ੍ਟਨਾਮਾਨੇਵ ਹੋਨ੍ਤਿ. ਵੁਤ੍ਤਞ੍ਚੇਤਂ ਅਟ੍ਠਕਥਾਯਂ ‘‘ਅਥ ਵਾ ਅਨੁਵਿਵਟ੍ਟਨ੍ਤਿ ਵਿਵਟ੍ਟਸ੍ਸ ਏਕਪਸ੍ਸਤੋ ਦ੍ਵਿਨ੍ਨਂ, ਏਕਪਸ੍ਸਤੋ ਦ੍ਵਿਨ੍ਨਨ੍ਤਿ ਚਤੁਨ੍ਨਮ੍ਪਿ ਖਣ੍ਡਾਨਮੇਤਂ ਨਾਮ’’ਨ੍ਤਿ (ਮਹਾਵ. ਅਟ੍ਠ. ੩੪੫). ਬਾਹਨ੍ਤਨ੍ਤਿ ਦ੍ਵੀਸੁ ਪਰਿਯਨ੍ਤੇਸੁ ਸਿਬ੍ਬਨੀਯਂ ਬਾਹਿਰਖਣ੍ਡਦ੍ਵਯਂ, ਤਞ੍ਚ ਸਙ੍ਘਟੇਤ੍ਵਾ ਬਾਹਮਤ੍ਥਕੇ ਠਪਿਯਮਾਨਤ੍ਤਾ ‘‘ਮਞ੍ਚਾ ਉਕ੍ਕੁਟ੍ਠਿਂ ਕਰੋਨ੍ਤੀ’’ਤਿਆਦੀਸੁ ਵਿਯ ਆਧੇਯ੍ਯੇ ਆਧਾਰੋਪਚਾਰਵਸੇਨ ਬਾਹਾਤਿ ਚ ਚੀਵਰਸ੍ਸ ਪਰਿਯਨ੍ਤਾਵਯਵਤ੍ਤਾ ‘‘ਅਨ੍ਤ’’ਨ੍ਤਿ ਚ ਵੁਚ੍ਚਤਿ. ਵੁਤ੍ਤਮ੍ਪਿ ਚੇਤਂ ‘‘ਬਾਹਨ੍ਤਨ੍ਤਿ ਸੁਪ੍ਪਮਾਣਂ ਚੀਵਰਂ ਪਾਰੁਪਨ੍ਤੇਨ ਸਂਹਰਿਤ੍ਵਾ ਬਾਹਾਯ ਉਪਰਿ ਠਪਿਤਾ ਉਭੋ ਅਨ੍ਤਾ ਬਹਿਮੁਖਾ ਤਿਟ੍ਠਨ੍ਤਿ, ਤੇਸਂ ਏਤਂ ਨਾਮ’’ਨ੍ਤਿ (ਮਹਾਵ. ਅਟ੍ਠ. ੩੪੫). ਇਦਂ ਸਤ੍ਤਖਣ੍ਡਚੀਵਰਮੇਵ ਮਹਾਅਟ੍ਠਕਥਾਯਂ ਵਿਹਿਤਨ੍ਤਿ ਇਦਾਨਿਪਿ ਤਦੇਵ ਵਟ੍ਟਤਿ. ਵੁਤ੍ਤਮ੍ਪਿ ਚੇਤਂ ‘‘ਅਯਮੇਵ ਹਿ ਨਯੋ ਮਹਾਅਟ੍ਠਕਥਾਯਂ ਵੁਤ੍ਤੋ’’ਤਿ. ਭਿਕ੍ਖੁਨਾ ਕੁਸਿਂ…ਪੇ… ਬਾਹਨ੍ਤਮ੍ਪਿਚਾਤਿ ਸਬ੍ਬਂ ਵਿਧਿਂ ਦਸ੍ਸੇਤ੍ਵਾਵ ਛਿਨ੍ਨਂ ਪਞ੍ਚਕਾਦਿਪ੍ਪਭੇਦਕਂ ਸਮਣਸਾਰੁਪ੍ਪਂ ਤਿਚੀਵਰਂ ਕਤ੍ਤਬ੍ਬਨ੍ਤਿ ਯੋਜਨਾ.

੫੬੫-੬. ਯਥਾਵੁਤ੍ਤਵਿਧਿਂ ਅਵਿਰਾਧੇਤ੍ਵਾ ਚੀਵਰਂ ਕਪ੍ਪਬਿਨ੍ਦੁਂ ਦਤ੍ਵਾ ਸਙ੍ਘਾਟਿਆਦਿਨਾਮੇਨ ਅਧਿਟ੍ਠਾਯ ਪਰਿਭੁਞ੍ਜਨ੍ਤਸ੍ਸ ਅਧਿਟ੍ਠਾਨਂ ਕਥਂ ਭਿਜ੍ਜਤੀਤਿ ਆਹ ‘‘ਦਾਨੇਨਾ’’ਤਿਆਦਿ. ਦਾਨੇਨਾਤਿ ਅਞ੍ਞਸ੍ਸ ਦਾਨੇਨ. ਅਚ੍ਛਿਜ੍ਜਗਾਹੇਨਾਤਿ ਅਞ੍ਞੇਨ ਅਚ੍ਛਿਨ੍ਦਿਤ੍ਵਾ ਗਹਣੇਨ. ਵਿਸ੍ਸਾਸਗ੍ਗਹਣੇਨ ਚਾਤਿ ਅਤ੍ਤਨਿ ਵਿਸ੍ਸਾਸੇਨ ਅਞ੍ਞਸ੍ਸ ਗਹਣੇਨ. ਹੀਨਾਯਾਵਤ੍ਤਨੇਨਾਤਿ ਸਿਕ੍ਖਂ ਅਪ੍ਪਚ੍ਚਕ੍ਖਾਯ ਗਿਹਿਭਾਵੂਪਗਮਨੇਨ ਅਞ੍ਞਸ੍ਸ ਦਾਨੇ ਵਿਯ ਚੀਵਰੇ ਨਿਰਾਲਯਭਾਵੇਨੇਵ ਪਰਿਚ੍ਚਤ੍ਤਾ.

ਕੇਚਿ ਪਨ ‘‘ਹੀਨਾਯਾਵਤ੍ਤਨੇਨਾਤਿ ਭਿਕ੍ਖੁਨਿਯਾ ਗਿਹਿਭਾਵੂਪਗਮਨੇਨਾਤਿ ਏਵਮਤ੍ਥਂ ਗਹੇਤ੍ਵਾ ਭਿਕ੍ਖੁ ਪਨ ਵਿਬ੍ਭਨ੍ਤੋਪਿ ਯਾਵ ਸਿਕ੍ਖਂ ਨ ਪਚ੍ਚਕ੍ਖਾਤਿ, ਤਾਵ ਭਿਕ੍ਖੁਯੇਵਾਤਿ ਅਧਿਟ੍ਠਾਨਂ ਨ ਵਿਜਹਤੀ’’ਤਿ ਵਦਨ੍ਤਿ, ਤਂ ਨ ਗਹੇਤਬ੍ਬਂ ‘‘ਭਿਕ੍ਖੁਨਿਯਾ ਹੀਨਾਯਾਵਤ੍ਤਨੇਨਾ’’ਤਿ ਵਿਸੇਸੇਤ੍ਵਾ ਅਵੁਤ੍ਤਤ੍ਤਾ, ਭਿਕ੍ਖੁਨਿਯਾ ਚ ਗਿਹਿਭਾਵੂਪਗਮਨੇ ਅਧਿਟ੍ਠਾਨਵਿਜਹਨਂ ਵਿਸੁਂ ਵਤ੍ਤਬ੍ਬਨ੍ਤਿ ਨਤ੍ਥਿ ਤਸ੍ਸਾ ਵਿਬ੍ਭਮਨੇਨੇਵ ਅਸ੍ਸਮਣਿਭਾਵਤੋ.

ਸਿਕ੍ਖਾਯਾਤਿ ਭਿਕ੍ਖੁਸਿਕ੍ਖਾਯ. ਪਹਾਨੇਨਾਤਿ ਪਚ੍ਚਕ੍ਖਾਨੇਨ. ਸਿਕ੍ਖਾਪਚ੍ਚਕ੍ਖਾਨਂ ਪਨੇਤ੍ਥ ਸਚੇ ਭਿਕ੍ਖੁਲਿਙ੍ਗੇ ਠਿਤੋ ਸਿਕ੍ਖਂ ਪਚ੍ਚਕ੍ਖਾਤਿ, ਤਸ੍ਸ ਕਾਯਲਗ੍ਗਮ੍ਪਿਚੀਵਰਂ ਅਧਿਟ੍ਠਾਨਂ ਵਿਜਹਤੀਤਿ ਦਸ੍ਸਨਤ੍ਥਂ ਗਹਿਤਂ. ‘‘ਸਿਕ੍ਖਾਯ ਚ ਪਹਾਨਤੋ’’ਤਿ ਚ ਲਿਖਨ੍ਤਿ, ਤਂ ‘‘ਹੀਨਾਯਾਵਤ੍ਤਨੇਨਾਪਿ, ਸਿਕ੍ਖਾਯ ਚ ਪਹਾਨਤੋ’’ਤਿ ਪਾਠਕ੍ਕਮੇ ਸਤਿ ਯੁਜ੍ਜਤਿ. ਯਥਾਵੁਤ੍ਤੋ ਪਨ ਪਾਠੋ ‘‘ਸਿਕ੍ਖਾਯ ਚ ਪਹਾਨੇਨ, ਹੀਨਾਯਾਵਤ੍ਤਨੇਨਪੀ’’ਤਿ ਪਾਠਕ੍ਕਮੇ ਯੁਜ੍ਜਤਿ. ਯਥਾ ਤਥਾ ਵਾ ਹੋਤੁ, ਨ ਕੋਚਿ ਵਿਰੋਧੋ.

ਪਚ੍ਚੁਦ੍ਧਾਰੇਨਾਤਿ ਚੀਵਰਸ੍ਸ ਪਚ੍ਚੁਦ੍ਧਰਣੇਨ. ‘‘ਕਾਲਕਿਰਿਯਾਯਾ’’ਤਿ ਅਟ੍ਠਕਥਾਵਚਨਤੋ ਵਿਨਾਸੇਨਾਤਿ ਚੀਵਰਸਾਮਿਕਸ੍ਸ ਜੀਵਿਤਵਿਨਾਸੋਵ ਵੁਚ੍ਚਤੀਤਿ. ਲਿਙ੍ਗਸ੍ਸ ਪਰਿਵਤ੍ਤਨਾਤਿ ਭਿਕ੍ਖੁਸ੍ਸ ਇਤ੍ਥਿਲਿਙ੍ਗਪਰਿਵਤ੍ਤਨਾ, ਭਿਕ੍ਖੁਨਿਯਾ ਪੁਰਿਸਲਿਙ੍ਗਪਰਿਵਤ੍ਤਨਾਤਿ ਏਵਂ ਉਭਯਥਾ ਲਿਙ੍ਗਸ੍ਸ ਪਰਿਵਤ੍ਤਨੇਨ. ਸਬ੍ਬਂ ਨਵਵਿਧਮ੍ਪਿ ਚੀਵਰਂ. ਅਧਿਟ੍ਠਾਨਨ੍ਤਿ ਏਤ੍ਥ ‘‘ਇਮੇਹਿ ਅਟ੍ਠਹੀ’’ਤਿ ਸੇਸੋ. ਵੁਤ੍ਤੋਵਾਯਮਤ੍ਥੋ ਅਟ੍ਠਕਥਾਯਂ ‘‘ਤਤ੍ਥ ਪੁਰਿਮੇਹਿ ਅਟ੍ਠਹਿ ਸਬ੍ਬਚੀਵਰਾਨਿ ਅਧਿਟ੍ਠਾਨਂ ਵਿਜਹਨ੍ਤੀ’’ਤਿ (ਪਾਰਾ. ਅਟ੍ਠ. ੨.੪੬੯). ਭਿਜ੍ਜਤੀਤਿ ਪਜਹਤਿ. ਛਿਦ੍ਦਸ੍ਸ ਭਾਵੋ ਛਿਦ੍ਦਭਾਵੋ, ਤਸ੍ਮਿਂ, ਛਿਦ੍ਦੇ ਸਤਿ ਛਿਦ੍ਦੇ ਜਾਤੇਤਿ ਵੁਤ੍ਤਂ ਹੋਤਿ. ਤਿਚੀਵਰਨ੍ਤਿ ਤੀਸੁ ਚੀਵਰੇਸੁ ਅਞ੍ਞਤਰਨ੍ਤਿ ਵੁਤ੍ਤਂ ਹੋਤਿ. ਤਿਚੀਵਰਮੇਵ ਵਾਤਿ ਗਹੇਤਬ੍ਬਂ. ਵੁਤ੍ਤਞ੍ਚ ‘‘ਛਿਦ੍ਦਭਾਵੇਨ ਪਨ ਤਿਚੀਵਰਸ੍ਸੇਵਾ’’ਤਿ.

੫੬੭. ਕੀਵਪ੍ਪਮਾਣੇ ਛਿਦ੍ਦੇ ਜਾਤੇਤਿ ਆਹ ‘‘ਕਨਿਟ੍ਠਸ੍ਸਾ’’ਤਿਆਦਿ. ‘‘ਕਨਿਟ੍ਠ…ਪੇ… ਮਾਣਕ’’ਨ੍ਤਿ ਇਮਿਨਾ ਹੇਟ੍ਠਿਮਪਰਿਚ੍ਛੇਦਂ ਦਸ੍ਸੇਤਿ.

੫੬੮. ਏਕੋ ਤਨ੍ਤੁਪੀਤਿ ਦੀਘਤੋ ਵਾ ਤਿਰਿਯਤੋ ਵਾ ਏਕਮ੍ਪਿ ਸੁਤ੍ਤਂ.

੫੬੯. ਜਿਣ੍ਣਟ੍ਠਾਨੇ ਅਗ੍ਗਲ਼ਂ ਦੇਨ੍ਤੇਨ ਤੇਚੀਵਰਿਕੇਨ ਵਤ੍ਤਿਤਬ੍ਬਵਿਧਿਂ ਦਸ੍ਸੇਤੁਮਾਹ ‘‘ਪਠਮ’’ਨ੍ਤਿਆਦਿ. ਪਠਮਨ੍ਤਿ ਛਿਨ੍ਨਟ੍ਠਾਨਸ੍ਸ ਛਿਨ੍ਦਨਤੋ ਪੁਬ੍ਬੇਯੇਵ. ਅਗ੍ਗਲ਼ਂ ਦਤ੍ਵਾਤਿ ਵਤ੍ਥਖਣ੍ਡਂ ਅਲ੍ਲਿਯਾਪੇਤ੍ਵਾ. ਰਕ੍ਖਤੀਤਿ ਏਤ੍ਥ ‘‘ਅਧਿਟ੍ਠਾਨ’’ਨ੍ਤਿ ਅਨੁਵਤ੍ਤਤੇ, ‘‘ਤੇਚੀਵਰਿਕੋ ਭਿਕ੍ਖੂ’’ਤਿ ਲਬ੍ਭਤਿ, ਏਵਂ ਵਤ੍ਥਖਣ੍ਡਂ ਅਲ੍ਲਿਯਾਪੇਨ੍ਤੋ ਤੇਚੀਵਰਿਕੋ ਭਿਕ੍ਖੁ ਅਧਿਟ੍ਠਾਨਂ ਰਕ੍ਖਤੀਤਿ ਵੁਤ੍ਤਂ ਹੋਤਿ. ਵਿਪਰਿਯਾਯੇਨ ਅਧਿਟ੍ਠਾਨਂ ਭਿਨ੍ਦਤੀਤਿ ਲਬ੍ਭਤਿ. ਪਠਮਂ ਦ੍ਵੇ ਕੋਟਿਯੋ ਘਟੇਤ੍ਵਾਤਿ ਯੋਜਨਾ. ਮਜ੍ਝੇ ਜਿਣ੍ਣਂ ਅਧਿਟ੍ਠਿਤਚੀਵਰਂ ਮਜ੍ਝੇ ਛਿਨ੍ਦਨ੍ਤੋ ਤਤੋ ਪੁਬ੍ਬੇਯੇਵ ਦ੍ਵੇ ਕੋਟਿਯੋ ਏਕਤੋ ਘਟੇਤ੍ਵਾ ਸਿਬ੍ਬਿਤ੍ਵਾ. ਪਚ੍ਛਾਤਿ ਕੋਟਿਘਟਨਤੋ ਪਚ੍ਛਾ. ਛਿਨ੍ਦਤੀਤਿ ਮਜ੍ਝਂ ਉਭਯਕੋਟਿਂ ਕਾਤੁਂ ਛਿਨ੍ਦਤਿ. ਰਕ੍ਖਤੀਤਿ ਵੁਤ੍ਤਪ੍ਪਕਾਰਮੇਵ.

੫੭੦. ਤਿਚੀਵਰੇ ਕਤ੍ਥ ਜਾਤਂ ਛਿਦ੍ਦਮਧਿਟ੍ਠਾਨਂ ਭਿਨ੍ਦਤੀਤਿ ਆਹ ‘‘ਚਤੁਰਙ੍ਗੁਲਾ’’ਤਿਆਦਿ. ਚਤ੍ਤਾਰਿ ਚ ਅਟ੍ਠ ਚ ਚਤੁਰਟ੍ਠਂ, ਚਤੁਨ੍ਨਂ ਅਟ੍ਠਨ੍ਨਂ ਵਾ ਅਙ੍ਗੁਲਾਨਂ ਸਮਾਹਾਰੋ ਚਤੁਰਟ੍ਠਙ੍ਗੁਲਂ, ਤਸ੍ਮਾਤਿ ਗਹੇਤਬ੍ਬਂ. ਚਤੁਰਙ੍ਗੁਲਾ ਅਟ੍ਠਙ੍ਗੁਲਾਤਿ ਯੋਜਨਾ. ਓਰਨ੍ਤਿ ਅਬ੍ਭਨ੍ਤਰਂ. ਏਕਞ੍ਚ ਦ੍ਵੇ ਚ ਏਕਦ੍ਵੇ, ਤੇਸਂ ਏਕਦ੍ਵਿਨ੍ਨਂ, ‘‘ਚੀਵਰਾਨ’’ਨ੍ਤਿ ਪਕਰਣਤੋ ਲਬ੍ਭਤਿ, ਏਕਸ੍ਸ ਚੀਵਰਸ੍ਸ, ਦ੍ਵਿਨ੍ਨਞ੍ਚ ਚੀਵਰਾਨਨ੍ਤਿ ਯੋਜਨਾ. ਯਥਾਸਙ੍ਖ੍ਯਾਨੁਦ੍ਦੇਸਵਸੇਨ ਏਕਸ੍ਸ ਤਿਰਿਯਤੋ ਚਤੁਰਙ੍ਗੁਲਤੋ ਓਰਂ, ਦ੍ਵਿਨ੍ਨਂ ਤਿਰਿਯਤੋ ਅਟ੍ਠਙ੍ਗੁਲਤੋ ਓਰਨ੍ਤਿ ਯੋਜਨਾ. ਵਾਕ੍ਯਦ੍ਵਯੇਪਿ ‘‘ਛਿਦ੍ਦਂ ਭਿਨ੍ਦਤੇਵਾ’’ਤਿ ਯੋਜੇਤਬ੍ਬਂ.

ਏਕਸ੍ਸ ਚੀਵਰਸ੍ਸਾਤਿ ਅਨ੍ਤਰਵਾਸਕਚੀਵਰਸ੍ਸ. ਤਿਰਿਯਤੋਤਿ ਵਿਤ੍ਥਾਰਤੋ. ਚਤੁਰਙ੍ਗੁਲਂ ਓਰਨ੍ਤਿ ਚਤੁਰਙ੍ਗੁਲਤੋ ਅਬ੍ਭਨ੍ਤਰੇ ਛਿਦ੍ਦਂ ਅਧਿਟ੍ਠਾਨਂ ਭਿਨ੍ਦਤਿ. ਦ੍ਵਿਨ੍ਨਨ੍ਤਿ ਉਤ੍ਤਰਾਸਙ੍ਗਸਙ੍ਘਾਟੀਨਂ. ਤਿਰਿਯਤੋਤਿ ਵਿਤ੍ਥਾਰਤੋ. ਅਟ੍ਠਙ੍ਗੁਲਤੋ ਓਰਨ੍ਤਿ ਅਟ੍ਠਙ੍ਗੁਲਤੋ ਅਬ੍ਭਨ੍ਤਰੇ. ਤਿਣ੍ਣਮ੍ਪਿ ਦੀਘਤੋ ਵਿਦਤ੍ਥਿਯਾ ਓਰਂ ਛਿਦ੍ਦਂ ਅਧਿਟ੍ਠਾਨਂ ਭਿਨ੍ਦਤੇਵਾਤਿ ਯੋਜਨਾ. ਏਤ੍ਥ ਵਿਦਤ੍ਥਿ ਵਡ੍ਢਕਿਵਿਦਤ੍ਥਿ ਗਹੇਤਬ੍ਬਾ. ਏਵਂ ਵੁਤ੍ਤਪਰਿਚ੍ਛੇਦਬ੍ਭਨ੍ਤਰੇ ਛਿਦ੍ਦੇ ਜਾਤੇ ਤਸ੍ਸ ਚੀਵਰਸ੍ਸ ਅਤਿਰੇਕਚੀਵਰਤ੍ਤਾ ਦਸਾਹਮਨਤਿਕ੍ਕਮਿਤ੍ਵਾ ਸੂਚਿਕਮ੍ਮਂ ਕਤ੍ਵਾ ਅਧਿਟ੍ਠਾਤਬ੍ਬਂ. ਤਥਾ ਅਕਰੋਨ੍ਤੇਨ ਪਨ ਪਰਿਕ੍ਖਾਰਚੋਲ਼ਂ ਅਧਿਟ੍ਠਾਤਬ੍ਬਂ.

੫੭੧. ‘‘ਨਿਸੀਦਨਸ੍ਸਾ’’ਤਿ ‘‘ਨਿਸੀਦਨਚੀਵਰਸ੍ਸਾ’’ਤਿ ਵਤ੍ਤਬ੍ਬੇ ਉਤ੍ਤਰਪਦਲੋਪੇਨ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਦਿਯਡ੍ਢਾਤਿ ਏਤ੍ਥ ਵਿਸੇਸਿਤਬ੍ਬਾ ਵਿਦਤ੍ਥਿ ‘‘ਦ੍ਵੇ ਵਿਦਤ੍ਥਿਯੋ’’ਤਿ ਚ ‘‘ਸੁਗਤਸ੍ਸ ਵਿਦਤ੍ਥਿਯਾ’’ਤਿ ਚ ਵੁਤ੍ਤਸਾਮਤ੍ਥਿਯਾ ਲਬ੍ਭਤਿ. ਅਡ੍ਢੇਨ ਦੁਤਿਯਾ ਦਿਯਡ੍ਢਾ, ਦੁਤਿਯਂ ਅਡ੍ਢਮੇਤਸ੍ਸਾਤਿ ‘‘ਦੁਤਿਯਡ੍ਢਾ’’ਤਿ ਵਤ੍ਤਬ੍ਬੇ ਤਿਯ-ਪਚ੍ਚਯਲੋਪੇਨ ‘‘ਦਿਯਡ੍ਢਾ’’ਤਿ ਵੁਤ੍ਤਂ, ਅਡ੍ਢਦੁਤਿਯਾਤਿ ਵੁਤ੍ਤਂ ਹੋਤਿ. ‘‘ਸੁਗਤਸ੍ਸ ਵਿਦਤ੍ਥਿਯਾ’’ਤਿ ਪਮਾਣਨਿਯਮਸ੍ਸ ਕਤਤ੍ਤਾ ਵਡ੍ਢਕਿਵਿਦਤ੍ਥਿਯਾ ਤਿਸ੍ਸੋ ਵਿਦਤ੍ਥਿਯੋ ਏਕਾ ਸੁਗਤਵਿਦਤ੍ਥਿ ਹੋਤਿ. ਇਦਂ ਨਿਸੀਦਨਚੀਵਰਂ ਦੀਘਤੋ ਵਡ੍ਢਕਿਹਤ੍ਥੇਨ ਤਿਹਤ੍ਥਂ, ਵਿਤ੍ਥਾਰਤੋ ਛਲ਼ਙ੍ਗੁਲਾਧਿਕਦ੍ਵਿਹਤ੍ਥਪ੍ਪਮਾਣਂ ਹੋਤਿ. ‘‘ਦਸਾ ਵਿਦਤ੍ਥੀ’’ਤਿ (ਪਾਚਿ. ੫੩੩) ਵੁਤ੍ਤਤ੍ਤਾ ਦਿਯਡ੍ਢਹਤ੍ਥਾ ਦਸਾਤਿ ਵੇਦਿਤਬ੍ਬਾ.

੫੭੨. ਚਤਸ੍ਸੋਤਿ ਏਤ੍ਥਾਪਿ ‘‘ਵਿਦਤ੍ਥਿਯੋ’’ਤਿ ਸਾਮਤ੍ਥਿਯਾਵ ਲਬ੍ਭਤਿ. ‘‘ਕਣ੍ਡੁਪ੍ਪਟਿਚ੍ਛਾਦਿਯਾ’’ਤਿ ਵਿਭਤ੍ਤਿਪਰਿਣਾਮੇਨ ਦੀਘਤੋਤਿ ਯੋਜਨਾ.

੫੭੩. ਅਡ੍ਢਂ ਤੇਯ੍ਯਂ ਤਤਿਯਂ ਯਸ੍ਸਾ ਸਾ ਅਡ੍ਢਤੇਯ੍ਯਾ, ਅਡ੍ਢਤਤਿਯਾਤਿ ਵੁਤ੍ਤਂ ਹੋਤਿ.

੫੭੪. ਤਤੋ ਉਤ੍ਤਰਿਂ ਤਦੁਤ੍ਤਰਿਂ, ਤਸ੍ਸ ਤਸ੍ਸ ਵੁਤ੍ਤਪ੍ਪਮਾਣਤੋ ਅਤਿਰੇਕਂ. ਅਧਿਕਚ੍ਛੇਦਨਨ੍ਤਿ ਅਧਿਕਸ੍ਸ ਪਮਾਣਾਤਿਰਿਤ੍ਤਟ੍ਠਾਨਸ੍ਸ ਛੇਦਨਂ ਅਸ੍ਸ ਪਾਚਿਤ੍ਤਿਯਸ੍ਸ ਦੇਸਨਾਯਾਤਿ ਅਧਿਕਚ੍ਛੇਦਨਂ, ਵੁਤ੍ਤਪ੍ਪਮਾਣਤੋ ਅਧਿਕਟ੍ਠਾਨਂ ਛਿਨ੍ਦਿਤ੍ਵਾ ਦੇਸੇਤਬ੍ਬਂ ਪਾਚਿਤ੍ਤਿਯਂ. ਉਦੀਰਿਤਂ ਵੁਤ੍ਤਂ ਪਾਲ਼ਿਯਾਤਿ ਅਤ੍ਥੋ.

੫੭੫. ਅਪ੍ਪਮਾਣੇਨਾਤਿ ਗੁਣਵਸੇਨ ਅਪ੍ਪਮਾਣੇਨ ਸਮ੍ਮਾਸਮ੍ਬੁਦ੍ਧੇਨ.

੫੭੬. ਸਬ੍ਬਂ ਵਟ੍ਟਤੀਤਿ ਸਮ੍ਬਨ੍ਧੋ. ‘‘ਸਬ੍ਬ’’ਨ੍ਤਿ ਇਮਿਨਾ ਅਟ੍ਠਕਥਾਯ ਆਗਤਂ ਨੀਲਾਦਿਂ ਸਙ੍ਗਣ੍ਹਾਤਿ. ਮਹਨ੍ਤਾਦਿਭੇਦਂ ਸਬ੍ਬਂ ਪਚ੍ਚਤ੍ਥਰਣਚੀਵਰਂ ਵਟ੍ਟਤਿ.

੫੭੭. ‘‘ਮੁਖਪੁਞ੍ਛਨਚੋਲ਼ਂ ਏਕ’’ਨ੍ਤਿ ਪਦਚ੍ਛੇਦੋ. ਏਕਂ ਧੋਵਿਤ੍ਵਾ ਯਾਵ ਸੁਕ੍ਖਾਪੀਯਤਿ, ਤਾਵ ਅਞ੍ਞੇਨ ਮੁਖਪੁਞ੍ਛਨੇਨ ਭਵਿਤਬ੍ਬਤ੍ਤਾ ਆਹ ‘‘ਦ੍ਵੇਪਿ ਵਟ੍ਟਨ੍ਤਿ ਸਬ੍ਬਥਾ’’ਤਿ.

੫੭੯. ਪਮਾਣਤੋ, ਗਣਨਤੋ ਚ ਅਤੀਤਾਤਿ ਪਮਾਣਗਣਨਾਤੀਤਾ. ‘‘ਪਮਾਣਾਤੀਤਾ’’ਤਿ ਵਚਨੇਨ ਵਿਨਯਧਰਾਨਂ ਅਪ੍ਪਮਾਣਗੁਣਤਂ ਦਸ੍ਸੇਤਿ, ‘‘ਗਣਨਾਤੀਤਾ’’ਤਿ ਇਮਿਨਾ ਅਤਿਕ੍ਕਨ੍ਤਗਣਨਤਂ. ਪਕਤਂ ਵਿਨਯੇ ਪਠਮਂ ਕਤਂ ਬੁਦ੍ਧੇਨ ਭਗਵਤਾ ਪਞ੍ਞਤ੍ਤਂ ਜਾਨਨ੍ਤੀਤਿ ਪਕਤਞ੍ਞੂ, ਵਿਨਯਧਰਾ, ਤੇ ਪਕਤਞ੍ਞੁਨੋ. ਅਪਰਿਮਾਣਗੁਣਮਣਿਗਣਭੂਸਿਤਉਪਾਲਿਦਾਸਕਾਦਿਮਹਾਥੇਰਾਚਰਿਯਪਰਮ੍ਪਰਾਗਤਾ ਸਙ੍ਖ੍ਯਾਪਥਾਤੀਤਾ ਵਿਨਯਧਰਾਤਿ ਵੁਤ੍ਤਂ ਹੋਤਿ.

੫੮੦. ਸੁਗਤਟ੍ਠਙ੍ਗੁਲਾਯਾਮਨ੍ਤਿ ਵਡ੍ਢਕਿਰਤਨਪ੍ਪਮਾਣਦੀਘਂ. ਚਤੁਰਙ੍ਗੁਲਵਿਤ੍ਥਤਨ੍ਤਿ ਵਡ੍ਢਕਿਵਿਦਤ੍ਥਿਪ੍ਪਮਾਣਵਿਤ੍ਥਾਰਂ. ਵਿਕਪ੍ਪਨੁਪਗਂ ਪਚ੍ਛਿਮਂ ਚੀਵਰਂ ਨਾਮ ਹੋਤਿ. ਪਚ੍ਛਿਮਂ ਚੀਵਰਨ੍ਤਿ ਪਰਿਸ੍ਸਾਵਨਪਟਾਦੀਨਂ ਵਿਸੇਸਨਂ, ਪਚ੍ਛਿਮਚੀਵਰਪ੍ਪਮਾਣਨ੍ਤਿ ਵੁਤ੍ਤਂ ਹੋਤਿ.

੫੮੧. ਪਰਿਸ੍ਸਾਵਪਟਨ੍ਤਿ ਉਦਕਪਰਿਸ੍ਸਾਵਨਤ੍ਥਂ ਪਟਂ. ਪਤ੍ਤਤ੍ਥਵਿਕਨ੍ਤਿ ਪਤ੍ਤਕਞ੍ਚੁਕਂ. ਪੋਤ੍ਥਕਤ੍ਥਵਿਕਨ੍ਤਿ ਪੋਤ੍ਥਕਕਞ੍ਚੁਕਂ. ਆਦਿਗ੍ਗਹਣੇਨ ਪਚ੍ਛਿਮਪ੍ਪਮਾਣਾਦਿਂ ਯਂ ਕਿਞ੍ਚਿ ਪਟਂ, ਦਣ੍ਡਪਟਞ੍ਚ ਸਙ੍ਗਣ੍ਹਾਤਿ.

੫੮੨. ਅਧਿਟ੍ਠਾਤੁਨ੍ਤਿ ਪਰਿਕ੍ਖਾਰਚੋਲ਼ਂ ਅਧਿਟ੍ਠਾਤੁਂ. ਠਪਿਤੇਤਿ ਅਨਧਿਟ੍ਠਾਯ ਠਪਿਤੇ. ਮਹਾਪਚ੍ਚਰਿਯਂ ਪਨ ‘‘ਅਨਾਪਤ੍ਤੀ’’ਤਿ (ਪਾਰਾ. ਅਟ੍ਠ. ੨.੪੬੯) ਆਹ. ਨਤ੍ਥਿ ਦੋਸਤਾਤਿ ਦੋਸੋ ਏਵ ਦੋਸਤਾ. ‘‘ਅਤ੍ਤਨੋ ਸਨ੍ਤਕਭਾਵਤੋ ਮੋਚੇਤ੍ਵਾ ਠਪਿਤਂ ਸਨ੍ਧਾਯ ਮਹਾਪਚ੍ਚਰਿਯਂ ਅਨਾਪਤ੍ਤਿ ਵੁਤ੍ਤਾ’’ਤਿ ਵਦਨ੍ਤਿ. ‘‘ਇਮਿਨਾ ਭੇਸਜ੍ਜਂ ਚੇਤਾਪੇਸ੍ਸਾਮਿ, ਇਦਂ ਮਾਤੁਯਾ ਦਸ੍ਸਾਮੀ’’ਤਿ ਠਪੇਨ੍ਤੇਨ ਅਧਿਟ੍ਠਾਤਬ੍ਬਂ. ‘‘ਇਦਂ ਭੇਸਜ੍ਜਸ੍ਸ, ਮਾਤੁਯਾ’’ਤਿ ਵਿਭਜਿਤ੍ਵਾ ਸਸਨ੍ਤਕਭਾਵਤੋ ਮੋਚਿਤੇ ਅਧਿਟ੍ਠਾਨਕਿਚ੍ਚਂ ਨਤ੍ਥੀਤਿ ਅਧਿਪ੍ਪਾਯੋ. ਹੋਤਿ ਚੇਤ੍ਥ –

‘‘ਯਂ ਵਤ੍ਥਂ ਭਿਕ੍ਖੁਨਾ ਲਦ੍ਧਂ, ਕਤਂ ਮਾਤਾਦਿਸਨ੍ਤਕਂ;

ਨਿਸ੍ਸਗ੍ਗਿਯਂ ਨ ਹੋਤੀਤਿ, ਤਮਾਹੁ ਵਿਨਯਞ੍ਞੁਨੋ’’ਤਿ.

੫੮੩. ਵਸ੍ਸਮਾਸੇ ਚਤੁਰੋਤਿ ਵਸ੍ਸਾਨੇ ਚਤੁਰੋ ਮਾਸੇ, ਅਧਿਟ੍ਠਾਨਕਿਰਿਯਾਯ ਚਤ੍ਤਾਰੋ ਮਾਸੇ ਅਵਿਚ੍ਛੇਦੋਤਿ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ. ਵਸ੍ਸਿਕੇ ਚਤ੍ਤਾਰੋ ਮਾਸੇ ਨਿਵਾਸੇਤਬ੍ਬਾ ਸਾਟਿਕਾ ਵਸ੍ਸਿਕਸਾਟਿਕਾ.

੫੮੪. ਕਣ੍ਡੁਂ ਪਟਿਚ੍ਛਾਦੇਤੀਤਿ ਕਣ੍ਡੁਪ੍ਪਟਿਚ੍ਛਾਦਿ, ਕਣ੍ਡੁਰੋਗਾਤੁਰਸ੍ਸ ਭਿਕ੍ਖੁਨੋ ਤਪ੍ਪਟਿਚ੍ਛਾਦਨਤ੍ਥਮਨੁਞ੍ਞਾਤਚੀਵਰਸ੍ਸੇਤਮਧਿਵਚਨਂ. ਹੋਨ੍ਤਿ ਚੇਤ੍ਥ –

‘‘ਮਾਤਿਕਟ੍ਠਕਥਾਯਸ੍ਸਾ, ਕਣ੍ਡੁਚ੍ਛਾਦਿਕਸਾਟਿਯਾ;

ਨ ਕਾਲਾਤਿਕ੍ਕਮੇ ਵੁਤ੍ਤਂ, ਅਧਿਟ੍ਠਾਨਵਿਵਟ੍ਟਨਂ.

ਅਧਿਟ੍ਠਾਨਪਹਾਨਙ੍ਗੇ-ਸੁ ਵੁਤ੍ਤਤ੍ਤਾ ਵਿਸੇਸਤੋ;

ਵੀਮਂਸਿਤਬ੍ਬਂ ਵਿਞ੍ਞੂਹਿ, ਤਤ੍ਥ ਯਂ ਕਾਰਣਂ ਸਿਯਾ’’ਤਿ.

੫੮੬. ‘‘ਅਸਮ੍ਮੁਖੇ ਏਤਨ੍ਤਿ ਚਾ’’ਤਿ ਵਚਨੇਨੇਵ ਸਮ੍ਮੁਖੇ ‘‘ਇਮ’’ਨ੍ਤਿ ਵਿਞ੍ਞਾਯਤਿ. ਵਿਚਕ੍ਖਣੋ ਪਚ੍ਚੁਦ੍ਧਰੇਯ੍ਯਾਤਿ ਯੋਜਨਾ.

੫੮੭. ਅਧਿਟ੍ਠਿਤਨ੍ਤਿ ਅਧਿਟ੍ਠਾਨਂ.

੫੮੮. ਇਤਿ ਸਬ੍ਬਮਿਦਨ੍ਤਿ ਏਵਂ ਵੁਤ੍ਤਂ ਇਦਂ ਤਿਚੀਵਰਾਦੀਨਂ ਪਮਾਣਾਦਿਸਬ੍ਬਵਿਧਾਨਂ. ਤੇਚੀਵਰਿਕਭਿਕ੍ਖੁਨੋਤਿ ਤਿਚੀਵਰਾਧਿਟ੍ਠਾਨੇਨ ਅਧਿਟ੍ਠਿਤਤੇਚੀਵਰਿਕਸ੍ਸ ਵਿਨਯਤੇਚੀਵਰਿਕਸ੍ਸ. ਤਿਣ੍ਣਂ ਚੀਵਰਾਨਂ ਸਮਾਹਾਰੋ ਤਿਚੀਵਰਂ, ਤਿਣ੍ਣਂ ਤਿਚੀਵਰਾਨਂ ਸਮਾਹਾਰੋਤਿ ‘‘ਤਿਤਿਚੀਵਰ’’ਨ੍ਤਿ ਵਤ੍ਤਬ੍ਬੇ ਏਕਦੇਸਸਰੂਪੇਕਸੇਸਨਯੇਨ ‘‘ਤਿਚੀਵਰ’’ਨ੍ਤਿ ਨਵਚੀਵਰਾਨਿ ਸਙ੍ਗਹਿਤਾਨਿ, ਤਿਚੀਵਰੇ ਨਿਯੁਤ੍ਤੋ ਤੇਚੀਵਰਿਕੋਤਿ ਵਿਨਯਤੇਚੀਵਰਿਕੋ ਵੁਚ੍ਚਤਿ. ਧੁਤਙ੍ਗਤੇਚੀਵਰਿਕਸ੍ਸਾਪਿ ਤਿਚੀਵਰੇ ਇਦਮੇਵ ਵਿਧਾਨਨ੍ਤਿ ਸੋਪਿ ਸਙ੍ਗਯ੍ਹਤਿ. ਅਞ੍ਞੇਸੁ ਵਾ ਪਨ ਛਸੁ ਚੀਵਰੇਸੁ ਪਰਿਕ੍ਖਾਰਚੋਲ਼ਂ ਏਕਂ ਅਂਸਕਾਸਾਵਮੇਵ ਵਟ੍ਟਤਿ. ਤਥਾ ਵਤ੍ਵਾਵਾਤਿ ‘‘ਇਮਂ ਪਰਿਕ੍ਖਾਰਚੋਲ਼ਂ ਅਧਿਟ੍ਠਾਮੀ’’ਤਿਆਦਿਨਾ ਨਯੇਨ ਵਤ੍ਵਾ. ਤਂ ਪਰਿਕ੍ਖਾਰਚੋਲ਼ਂ. ਪਰਿਕ੍ਖਾਰਚੋਲ਼ਮਸ੍ਸ ਅਤ੍ਥਿ, ਤਤ੍ਥ ਵਾ ਨਿਯੁਤ੍ਤੋਤਿ ਪਰਿਕ੍ਖਾਰਚੋਲ਼ਿਕੋ.

੫੮੯. ‘‘ਤਿਚੀਵਰਂ ਪਨ ਪਰਿਕ੍ਖਾਰਚੋਲ਼ਂ ਅਧਿਟ੍ਠਾਤੁਂ ਵਟ੍ਟਤਿ, ਨ ਵਟ੍ਟਤੀ’’ਤਿ ਅਨੁਯੋਗਂ ਕਤ੍ਵਾ ‘‘ਵਟ੍ਟਤੀ’’ਤਿ (ਪਾਰਾ. ਅਟ੍ਠ. ੨.੪੬੯) ਅਟ੍ਠਕਥਾਯ ਵੁਤ੍ਤਤ੍ਤਾ ਇਧ ‘‘ਤਿਚੀਵਰ’’ਨ੍ਤਿ ਚੀਵਰਤ੍ਤਯਮੇਵ ਵੁਤ੍ਤਂ. ‘‘ਸੁਖਪਰਿਹਾਰਤ੍ਥਂ ਏਕਮ੍ਪਿ ਵਿਕਪ੍ਪੇਤਬ੍ਬ’’ਨ੍ਤਿ ਵਚਨਤੋ ਏਕਦੇਸੇ ਸਮੁਦਾਯੋਪਚਾਰਵਸੇਨ ਏਕਮ੍ਪਿ ਵਿਕਪ੍ਪੇਤਬ੍ਬਮੇਵ ਹੋਤਿ.

ਪਰਿਕ੍ਖਾਰਚੋਲ਼ਂ ਕਾਤੁਮ੍ਪਿ ਵਟ੍ਟਤੀਤਿ ਬਦ੍ਧਸੀਮਤੋ ਬਹਿ ਵਸਨ੍ਤੇਨ ਏਕਕੇਨ ਤੇਚੀਵਰਿਕੇਨ ਅਨ੍ਤੋਅਰੁਣੇ ਅਸਤਿਯਾ ਤੀਸੁ ਚੀਵਰੇਸੁ ਹਤ੍ਥਪਾਸੇ ਅਕਤੇਸੁ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ ਹੋਤੀਤਿ, ਵਿਨਯਕਮ੍ਮਂ ਕਾਤੁਂ ਸਭਾਗਪੁਗ੍ਗਲਾਨਂ ਦੁਲ੍ਲਭਤ੍ਤਾ ਚ ਸੁਖਪਰਿਹਾਰਤ੍ਥਂ ਤੀਸੁ ਏਕਂ ਵਾ ਸਬ੍ਬਾਨਿ ਏਵ ਵਾ ਤਿਚੀਵਰਨਾਮੇਨ ਕਤਾਧਿਟ੍ਠਾਨਾਨਿ ਪਚ੍ਚੁਦ੍ਧਰਿਤ੍ਵਾ ਪਰਿਕ੍ਖਾਰਚੋਲ਼ਨਾਮੇਨ ਅਧਿਟ੍ਠਾਤੁਮ੍ਪਿ ਵਟ੍ਟਤੀਤਿ ਵੁਤ੍ਤਂ ਹੋਤਿ.

ਏਵਂ ਅਗ੍ਗਹੇਤ੍ਵਾ ‘‘ਸਚੇ ਤਿਚੀਵਰਂ ਪਰਿਕ੍ਖਾਰਚੋਲ਼ਾਧਿਟ੍ਠਾਨਂ ਲਭੇਯ੍ਯ, ਉਦੋਸਿਤਸਿਕ੍ਖਾਪਦੇ ਪਰਿਹਾਰੋ ਨਿਰਤ੍ਥਕੋ ਭਵੇਯ੍ਯਾ’’ਤਿ (ਪਾਰਾ. ਅਟ੍ਠ. ੨.੪੬੯) ਵੁਤ੍ਤਂ ਮਹਾਪਦੁਮਤ੍ਥੇਰਸ੍ਸ ਮਤਂ ਦਸ੍ਸੇਤੁਮਾਹ ‘‘ਏਵਂ ਚੁਦੋਸਿਤੇ’’ਤਿਆਦਿ. ਏਵਂ ਚੇਤਿ ਏਵਂ ਤਿਚੀਵਰਂ ਪਰਿਕ੍ਖਾਰਚੋਲ਼ਂ ਅਧਿਟ੍ਠਹਿਤ੍ਵਾ ਪਰਿਹਰਿਤੁਂ ਵਟ੍ਟਤਿ ਚੇ. ਉਦੋਸਿਤੇਤਿ ਇਮਸ੍ਸ ਸਿਕ੍ਖਾਪਦਸ੍ਸ ਅਨਨ੍ਤਰੇ ਦੁਤਿਯਕਥਿਨਸਿਕ੍ਖਾਪਦੇ. ਵੁਤ੍ਤੋ ਪਰਿਹਾਰੋਤਿ ‘‘ਏਕਕੁਲਸ੍ਸ ਗਾਮੋ ਹੋਤਿ ਪਰਿਕ੍ਖਿਤ੍ਤੋ ਚ. ਅਨ੍ਤੋਗਾਮੇ ਚੀਵਰਂ ਨਿਕ੍ਖਿਪਿਤ੍ਵਾ ਅਨ੍ਤੋਗਾਮੇ ਵਤ੍ਥਬ੍ਬ’’ਨ੍ਤਿਆਦਿਨਾ (ਪਾਰਾ. ੪੭੮) ਨਯੇਨ ਪਦਭਾਜਨਾਵਸਾਨੇ ਵੁਤ੍ਤੋ, ਇਧ ਚ ‘‘ਗਾਮਾਦੀਸੁ ਪਦੇਸੇਸੂ’’ਤਿਆਦਿਨਾ ਨਯੇਨ ਅਨਨ੍ਤਰਂ ਵਕ੍ਖਮਾਨੋ ਤਿਚੀਵਰਸ੍ਸ ਪਰਿਹਰਣਵਿਧਿ. ਨਿਰਤ੍ਥਕੋਤਿ ਪਰਿਕ੍ਖਾਰਚੋਲ਼ਨਾਮੇਨ ਅਧਿਟ੍ਠਿਤਚੀਵਰਸ੍ਸ ਤੇਨ ਵਿਧਿਨਾ ਤਿਚੀਵਰਂ ਅਪਰਿਹਰਨ੍ਤਸ੍ਸਾਪਿ ਭਿਕ੍ਖੁਨੋ ਅਨਾਪਤ੍ਤਿਭਾਵਤੋ ਨਿਪ੍ਪਯੋਜਨੋਤਿ ਅਤ੍ਥੋ.

੫੯੦. ਤਪ੍ਪਰਿਹਰਿਤੁਮਾਹ ‘‘ਨ’’ਇਚ੍ਚਾਦਿ. ਨ ਨਿਰਤ੍ਥਕੋਤਿ ਯੋਜਨਾ. ਹੇਤੁਂ ਦਸ੍ਸੇਤੁਮਾਹ ‘‘ਤੇਚੀਵਰਿਕਸ੍ਸੇਵਾ’’ਤਿਆਦਿ. ਯੋ ਤਿਚੀਵਰਨਾਮੇਨ ਅਧਿਟ੍ਠਾਨਂ ਅਪਚ੍ਚੁਦ੍ਧਰਿਤ੍ਵਾ ਸਤਿਂ ਉਪਟ੍ਠਪੇਤ੍ਵਾ ਅਨ੍ਤੋਅਰੁਣੇ ਚੀਵਰਂ ਹਤ੍ਥਪਾਸਤੋ ਅਮੋਚੇਤ੍ਵਾ ਅਰੁਣਂ ਉਟ੍ਠਾਪੇਤਿ, ਤਾਦਿਸਸ੍ਸ ਤੇਚੀਵਰਿਕਸ੍ਸੇਵ ਤਸ੍ਮਿਂ ਸਿਕ੍ਖਾਪਦੇ ਉਦੋਸਿਤਪਰਿਹਾਰਸ੍ਸ ਭਗਵਤਾ ਦੇਸਿਤਤ੍ਤਾਤਿ ਅਤ੍ਥੋ. ਯਸ੍ਮਾ ਤਾਦਿਸਸ੍ਸੇਵ ਤੇਚੀਵਰਿਕਸ੍ਸ ਉਦੋਸਿਤਸਿਕ੍ਖਾਪਦੇ ਪਰਿਹਾਰੋ ਵੁਤ੍ਤੋ, ਤਸ੍ਮਾ. ਤਂ ਸਬ੍ਬਮ੍ਪੀਤਿ ਤਂ ਨਵਵਿਧਂ ਸਬ੍ਬਮ੍ਪਿ ਚੀਵਰਂ. ਪਰਿਕ੍ਖਾਰਚੋਲ਼ਸ੍ਸਾਤਿ ਪਰਿਕ੍ਖਾਰਚੋਲ਼ਨਾਮੇਨ ਅਧਿਟ੍ਠਹਿਤ੍ਵਾ ਚੀਵਰਂ ਪਰਿਭੁਞ੍ਜਿਤੁਕਾਮਸ੍ਸ ਪਰਿਕ੍ਖਾਰਚੋਲ਼ਨਾਮੇਨ ਅਧਿਟ੍ਠਾਤੁਂ ਵਟ੍ਟਤਿ.

੫੯੧. ਇਮਿਨਾ ਉਦੋਸਿਤਪਰਿਹਾਰਸ੍ਸ ਅਨਿਰਤ੍ਥਕਭਾਵਂ ਸਾਧੇਤ੍ਵਾ ਇਦਾਨਿ ‘‘ਤਿਚੀਵਰਂ ਪਰਿਕ੍ਖਾਰਚੋਲ਼ਨਾਮੇਨਾਪਿ ਅਧਿਟ੍ਠਾਤੁਂ ਵਟ੍ਟਤੀ’’ਤਿ ਇਮਸ੍ਸ ਅਧਿਕਤ੍ਥਸ੍ਸ ਮਹਾਕਾਰੁਣਿਕੇਨ ਅਨੁਞ੍ਞਾਤਭਾਵੇ ਕਿਰਿਯਨ੍ਤਰਾਨੁਜਾਨਨਸਙ੍ਖਾਤਅਧਿਕਵਚਨਸ੍ਸ ਞਾਪਕਹੇਤੁਭਾਵਂ ਦਸ੍ਸੇਤੁਮਾਹ ‘‘ਅਧਿਟ੍ਠੇਤੀ’’ਤਿਆਦਿ. ਇਮਸ੍ਮਿਂਯੇਵ ਸਿਕ੍ਖਾਪਦੇ ਅਨਾਪਤ੍ਤਿਵਾਰੇ ‘‘ਅਨਾਪਤ੍ਤਿ ਅਨ੍ਤੋਦਸਾਹਂ ਅਧਿਟ੍ਠੇਤਿ, ਵਿਕਪ੍ਪੇਤੀ’’ਤਿ ਪਾਠੇ ਅਨਾਪਤ੍ਤਿਭਾਵੇ ‘‘ਅਧਿਟ੍ਠੇਤੀ’’ਤਿ ਏਤ੍ਤਕੇਨੇਵ ਪਰਿਯਤ੍ਤੇ (ਪਾਰਾ. ੪੬੯) ‘‘ਵਿਕਪ੍ਪੇਤੀ’’ਤਿ ਕਿਰਿਯਨ੍ਤਰਾਨੁਜਾਨਨੇਨ ਪਕਾਰਨ੍ਤਰੇਨਾਪਿ ਦੋਸੋ ਨਤ੍ਥੀਤਿ ਅਧਿਪ੍ਪਾਯਸ੍ਸ ਵਿਞ੍ਞਾਪਿਤਤ੍ਤਾਤਿ ਅਤ੍ਥੋ.

੫੯੨. ਏਵਂ ਕਰੋਨ੍ਤਸ੍ਸਾਤਿ ਤਿਚੀਵਰਨਾਮੇਨ ਅਧਿਟ੍ਠਾਨਂ ਪਚ੍ਚੁਦ੍ਧਰਿਤ੍ਵਾ ਪਰਿਕ੍ਖਾਰਚੋਲ਼ਨਾਮੇਨ ਅਧਿਟ੍ਠਹਨ੍ਤਸ੍ਸ. ਇਦਾਨਿ ਅਤਿਪ੍ਪਸਙ੍ਗਂ ਦਸ੍ਸੇਤੁਕਾਮਸ੍ਸ ਚੋਦਕਸ੍ਸ ਅਧਿਪ੍ਪਾਯਂ ਦਸ੍ਸੇਤੁਮਾਹ ‘‘ਏਵ’’ਨ੍ਤਿਆਦਿ. ਮੂਲਾਧਿਟ੍ਠਾਨਂ ਪਹਾਯ ਕਾਤਬ੍ਬਪ੍ਪਕਾਰਨ੍ਤਰਸ੍ਸਾਪਿ ਵਿਜ੍ਜਮਾਨਤ੍ਤਾ ਤਿਚੀਵਰਂ ਪਚ੍ਚੁਦ੍ਧਰਿਤ੍ਵਾ ਮੁਖਪੁਞ੍ਛਨਾਦਿਕਂ ਕਤ੍ਵਾ ਅਧਿਟ੍ਠਹਤੋਪਿ ਦੋਸੋ ਨ ਸਿਯਾਤਿ ਕਸ੍ਮਾ ਨਾਪਜ੍ਜਤੀਤਿ ਅਤ੍ਥੋ. ਨਇਤਿ ਅਤਿਪ੍ਪਸਙ੍ਗਨਿਵਾਰਣੇ.

੫੯੩. ਕਿਚ੍ਚਵਿਧਾਨਤੋਤਿ ਤੇਸਂ ਮੁਖਪੁਞ੍ਛਨਾਦੀਨਂ ਅਤ੍ਤਨੋ ਅਤ੍ਤਨੋ ਕਿਚ੍ਚਸ੍ਸ ਸਾਧਨਤੋ, ਤਾਦਿਸਂ ਕਿਚ੍ਚਵਿਸੇਸਾਪੇਕ੍ਖਂ ਵਿਨਾ ਤਂਤਂਨਾਮੇਨ ਅਧਿਟ੍ਠਾਤੁਂ ਨ ਯੁਜ੍ਜਤੀਤਿ ਅਧਿਪ੍ਪਾਯੋ. ਅਕਿਚ੍ਚਸ੍ਸਾਤਿ ਮੁਖਪੁਞ੍ਛਨਾਦਿਕਿਚ੍ਚਰਹਿਤਸ੍ਸ. ਅਧਿਕਸ੍ਸਾਤਿ ਪਚ੍ਚੁਦ੍ਧਰਿਤ੍ਵਾ ਪਠਮਂ ਅਧਿਟ੍ਠਾਨਸ੍ਸ ਵਿਜਹਿਤਤ੍ਤਾ ਅਤਿਰੇਕਸ੍ਸ. ਅਸ੍ਸਾਤਿ ਤਿਚੀਵਰਸ੍ਸ. ਅਧਿਟ੍ਠਾਨਂ ਤੁ ਯੁਜ੍ਜਤੀਤਿ ਦਸਾਹਂ ਅਨਤਿਕ੍ਕਮਿਤ੍ਵਾ ਪਰਿਕ੍ਖਾਰਚੋਲ਼ਨਾਮੇਨ ਅਧਿਟ੍ਠਾਨਂ ਪਨ ਯੁਜ੍ਜਤਿ.

੫੯੪. ਨਿਧਾਨਸ੍ਸ ਮੁਖਂ ਉਪਾਯੋਤਿ ਨਿਧਾਨਮੁਖਂ, ਅਨ੍ਤਰਵਾਸਕਾਦਿਤਂਤਂਚੀਵਰਨਾਮੇਨ ਅਧਿਟ੍ਠਾਨਤੋ ਅਤਿਰੇਕਂ ਯਂ ਕਿਞ੍ਚਿ ਚੀਵਰਂ ਯਥਾ ਠਪਿਤਂ ਆਪਤ੍ਤਿਂ ਨ ਕਰੋਤਿ, ਤਥਾ ਨਿਧਾਨਸ੍ਸ ਉਪਾਯੋਤਿ ਅਤ੍ਥੋ. ਏਤਂ ਪਰਿਕ੍ਖਾਰਚੋਲ਼ਾਧਿਟ੍ਠਾਨਂ. ਮਹਾਪਚ੍ਚਰਿਯਨ੍ਤਿ ਬ੍ਰਾਹ੍ਮਣਤਿਸ੍ਸਭਯੇ ਭਿਕ੍ਖੁਸਙ੍ਘਂ ਜਮ੍ਬੁਦੀਪਂ ਨੇਤੁਂ ਸਕ੍ਕਸ੍ਸ ਦੇਵਾਨਮਿਨ੍ਦਸ੍ਸ ਆਣਤ੍ਤਿਯਾ ਵਿਸੁਕਮ੍ਮੇਨ ਨਿਮ੍ਮਿਤਮਹਾਪਚ੍ਚਰਿਯਂ ਨਿਸੀਦਿਤ੍ਵਾ ਲਿਖਿਤਤ੍ਤਾ ਤਂਨਾਮਕਾਯਂ ਵਿਨਯਟ੍ਠਕਥਾਯਂ, ‘‘ਮਹਾਪਚ੍ਚਰਿਯਾਦਿਸੂ’’ਤਿਪਿ ਲਿਖਨ੍ਤਿ.

੫੯੫. ਪਰਿਕ੍ਖਾਰਚੋਲ਼ਨਾਮੇਨ ਅਧਿਟ੍ਠਾਨਵਿਧਾਨਸ੍ਸ ਵੁਤ੍ਤਪ੍ਪਮਾਣਂ ਕਤਮਨ੍ਤਿ ਆਹ ‘‘ਚੀਵਰ’’ਨ੍ਤਿਆਦਿ. ‘‘ਨਿਦਾਨੇ ਉਪ੍ਪਤ੍ਤਿਤੋ’’ਤਿ ਪਦਚ੍ਛੇਦੋ. ‘‘ਚੀਵਰਂ ਪਰਿਪੁਣ੍ਣ’’ਨ੍ਤਿ ਨਿਦਾਨੇ ‘‘ਤਿਚੀਵਰਂ ਸਮ੍ਪੁਣ੍ਣਂ ਵਿਜ੍ਜਤਿ, ਇਦਮਤਿਰੇਕਚੀਵਰਂ ਕਿਂ ਕਾਤਬ੍ਬ’’ਨ੍ਤਿ ਭਿਕ੍ਖੂਹਿ ਭਗਵਤੋ ਆਰੋਚਿਤਵਤ੍ਥੁਮ੍ਹਿ. ਉਪ੍ਪਤ੍ਤਿਤੋਤਿ ਪਰਿਕ੍ਖਾਰਚੋਲ਼ਾਧਿਟ੍ਠਾਨਸ੍ਸ ਉਪ੍ਪਨ੍ਨਤ੍ਤਾ, ਅਨੁਞ੍ਞਾਤਤ੍ਤਾਤਿ ਅਤ੍ਥੋ. ‘‘ਤੇਨ ਖੋ ਪਨ ਸਮਯੇਨ ਭਿਕ੍ਖੂਨਂ ਪਰਿਪੁਣ੍ਣਂ ਹੋਤਿ ਤਿਚੀਵਰਂ, ਅਤ੍ਥੋ ਚ ਹੋਤਿ ਪਰਿਸ੍ਸਾਵਨੇਹਿਪਿ ਥਵਿਕਾਹਿਪਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ ਭਿਕ੍ਖਵੇ ਪਰਿਕ੍ਖਾਰਚੋਲ਼ਕ’’ਨ੍ਤਿ (ਮਹਾਵ. ੩੫੭) ਏਤ੍ਥ ਪਾਲ਼ਿਯਂ ਏਵਂ ਵਿਪ੍ਪਵਾਸਸੁਖਤ੍ਥਂ ਨਾਮੇਨਾਧਿਟ੍ਠਿਤਤਿਚੀਵਰਂ ਅਧਿਟ੍ਠਾਨਂ ਪਚ੍ਚੁਦ੍ਧਰਿਤ੍ਵਾ ਪਰਿਕ੍ਖਾਰਚੋਲ਼ਨਾਮੇਨ ਅਧਿਟ੍ਠਾਤੁਂ ਵਟ੍ਟਤੀਤਿ ਸਾਧਨੇਨ ਤਦੇਕਸਾਧਨਤ੍ਤਾ ਏਵ ਏਕਮ੍ਪਿ ਚੀਵਰਂ ਵਿਕਪ੍ਪੇਤੁਂ ਵਟ੍ਟਤੀਤਿ ਵੁਤ੍ਤਮੇਵ ਹੋਤਿ. ਤੇਨੇਵਾਹ ਅਟ੍ਠਕਥਾਯਂ ‘‘ਏਵਞ੍ਚ ਸਤਿ ਯੋ ਤਿਚੀਵਰੇ ਏਕੇਨ ਚੀਵਰੇਨ ਵਿਪ੍ਪਵਸਿਤੁਕਾਮੋ ਹੋਤਿ, ਤਸ੍ਸ ਤਿਚੀਵਰਾਧਿਟ੍ਠਾਨਂ ਪਚ੍ਚੁਦ੍ਧਰਿਤ੍ਵਾ ਵਿਪ੍ਪਵਾਸਸੁਖਤ੍ਥਂ ਵਿਕਪ੍ਪਨਾਯ ਓਕਾਸੋ ਦਿਨ੍ਨੋ ਹੋਤੀ’’ਤਿ (ਪਾਰਾ. ਅਟ੍ਠ. ੨.੪੬੯).

੫੯੬-੮. ਏਤ੍ਤਾਵਤਾ ਕਪ੍ਪਿਯਚੀਵਰਞ੍ਚ ਤਤ੍ਥ ਕਤ੍ਤਬ੍ਬਞ੍ਚ ਦਸ੍ਸੇਤ੍ਵਾ ਇਦਾਨਿ ਅਕਪ੍ਪਿਯਚੀਵਰਂ ਦਸ੍ਸੇਤੁਮਾਹ ‘‘ਕੁਸਵਾਕਾਦੀ’’ਤਿਆਦਿ. ਕੁਸਨ੍ਤਿ ਦਬ੍ਬਤਿਣਂ. ਵਾਕਨ੍ਤਿ ਰੁਕ੍ਖਾਦੀਨਂ ਵਾਕਂ. ਆਦਿ-ਸਦ੍ਦੇਨ ਫਲਕਂ ਗਹਿਤਂ, ਚੀਰ-ਸਦ੍ਦੋ ਚੀਵਰਪਰਿਯਾਯੋ, ਇਮਸ੍ਮਿਂ ਕੁਸਾਦਯੋ ਗਨ੍ਥੇਤ੍ਵਾ ਕਤੇ ਚੀਵਰੇਯੇਵ ਵਤ੍ਤਤਿ. ਕੇਸਜਂ ਕਮ੍ਬਲਨ੍ਤਿ ਮਨੁਸ੍ਸਕੇਸੇਹਿ ਵੀਤਕਮ੍ਬਲਞ੍ਚ. ਵਾਲਜਂ ਕਮ੍ਬਲਨ੍ਤਿ ਅਸ੍ਸਵਾਲਚਮਰਵਾਲੇਹਿ ਵੀਤਕਮ੍ਬਲਞ੍ਚ. ਉਲੂਕਪਕ੍ਖਨ੍ਤਿ ਕੋਸਿਯਸਕੁਣਪਤ੍ਤਂ. ਇਧ ਪਨ ਤਂ ਗਨ੍ਥੇਤ੍ਵਾ ਕਤਚੀਵਰਮੇਵ ਗਹੇਤਬ੍ਬਂ. ਅਜਿਨਕ੍ਖਿਪੇਤਿ ਅਜਿਨਦੀਪਿਚਮ੍ਮੇ. ‘‘ਧਾਰਯਤੋ ਥੁਲ੍ਲਚ੍ਚਯ’’ਨ੍ਤਿ ਪਚ੍ਚੇਕਂ ਸਮ੍ਬਨ੍ਧੋ.

ਕਦਲਿਦੁਸ੍ਸੇਤਿ ਕਦਲਿਵਾਕਮਯਵਤ੍ਥੇ. ਏਰਕਦੁਸ੍ਸੇਤਿ ਏਰਕਮਯਵਤ੍ਥੇ. ਅਕ੍ਕਦੁਸ੍ਸੇਤਿ ਅਕ੍ਕਦਣ੍ਡੇ ਵਾ ਤੇਸਂ ਸੁਤ੍ਤਾਨਿ ਵਾ ਗਹੇਤ੍ਵਾ ਕਤਵਤ੍ਥੇ. ਪੋਤ੍ਥਕੇਤਿ ਮਕਚਿਵਾਕਮਯਵਤ੍ਥੇ. ਤਿਰੀਟੇ ਵਾਤਿ ਏਵਂਨਾਮਕੇ ਰੁਕ੍ਖਤਚੇ. ਵੇਠਨੇਤਿ ਸੀਸਵੇਠਨੇ. ਕਞ੍ਚੁਕੇਤਿ ਕਵਚੇ.

ਸਬ੍ਬਨੀਲਕੇਤਿ ਕੇਵਲਨੀਲਕੇ. ਏਸ ਨਯੋ ਮਞ੍ਜੇਟ੍ਠਾਦੀਸੁ. ਮਹਾਨਾਮਰਤ੍ਤੇਤਿ ਤਨੁਪਦੁਮਦਲਵਣ੍ਣਰਤ੍ਤੇ. ਮਹਾਰਙ੍ਗਰਤ੍ਤੇਤਿ ਸਤਪਦਿਵਣ੍ਣਰਤ੍ਤੇ.

੫੯੯. ਅਚ੍ਛਿਨ੍ਨਦਸਕੇਤਿ ਅਚ੍ਛਿਨ੍ਨਾ ਦਸਾ ਯਸ੍ਸ, ਤਸ੍ਮਿਂ ਚੀਵਰੇ. ਏਸ ਨਯੋ ਦੀਘਦਸੇਪਿ. ਫਲਦਸੇਤਿ ਫਲਸਦਿਸਗਨ੍ਥਿਤਾ ਦਸਾ ਯਸ੍ਸ, ਤਸ੍ਮਿਂ. ਪੁਪ੍ਫਦਸੇਤਿ ਕਣ੍ਣਿਕਂ ਬਨ੍ਧਿਤ੍ਵਾ ਵਿਕਾਸੇਤ੍ਵਾ ਕਤਾ ਦਸਾ ਯਸ੍ਸ, ਤਸ੍ਮਿਂ ਚੀਵਰੇਤਿ ਅਤ੍ਥੋ. ਅਚ੍ਛਿਨ੍ਨਚੀਵਰਸ੍ਸਾਤਿ ਨਗ੍ਗਂ ਕਤ੍ਵਾ ਚੋਰੇਹਿ ਵਿਲੁਤ੍ਤਚੀਵਰਸ੍ਸ. ਏਤ੍ਥਾਤਿ ਕੁਸਵਾਕਾਦੀਸੁ, ਸਬ੍ਬਨੀਲਾਦੀਸੁ ਚ. ਕਿਞ੍ਚੀਤਿ ਏਕਮ੍ਪਿ ਅਕਪ੍ਪਿਯਂ ਨਤ੍ਥਿ ਅਨਨੁਲੋਮਿਕਂ ਨਤ੍ਥਿ. ‘‘ਨਗ੍ਗੇਨ ਏਤੇਸੁ ਅਕਪ੍ਪਿਯਚੀਵਰੇਸੁ ਯਂਕਿਞ੍ਚਿ ਲਦ੍ਧਂ, ਤੇਨ ਹਿਰਿਕੋਪਿਨਂ ਪਟਿਚ੍ਛਾਦੇਤ੍ਵਾ ਪਚ੍ਛਾ ਕਪ੍ਪਿਯਚੀਵਰੇ ਲਦ੍ਧੇ ਤਂ ਅਧਿਵਾਸੇਤ੍ਵਾ ਇਦਂ ਅਕਪ੍ਪਿਯਚੀਵਰਂ ਪਰਿਚ੍ਚਜਿਤਬ੍ਬਂ. ਸਬ੍ਬਨੀਲਕਾਦਿਵਤ੍ਥੇਸੁ ਲਦ੍ਧੇਸੁ ਕਪ੍ਪਿਯਰਜਨੇਨ ਰਜਿਤ੍ਵਾ, ਤਂ ਵਣ੍ਣਂ ਨਾਸੇਤ੍ਵਾ ਵਾ ਕਪ੍ਪਿਯਵਤ੍ਥਾਨਿ ਉਭਯਪਸ੍ਸੇਸੁ ਅਲ੍ਲਿਯਾਪੇਤ੍ਵਾ, ਪਟਿਚ੍ਛਾਦੇਤ੍ਵਾ ਵਾ ਨਿਵਾਸੇਤੁਂ ਵਟ੍ਟਤੀ’’ਤਿ ਅਟ੍ਠਕਥਾਯਂ ਵੁਤ੍ਤਂ.

੬੦੦. ‘‘ਅਨ੍ਤੋਦਸਾਹ’’ਨ੍ਤਿ ਇਦਂ ‘‘ਅਧਿਟ੍ਠੇਤੀ’’ਤਿਆਦੀਹਿ ਸਬ੍ਬਪਦੇਹਿਪਿ ਯੋਜੇਤਬ੍ਬਂ. ਵਿਸ੍ਸਜ੍ਜੇਤੀਤਿ ਅਞ੍ਞਸ੍ਸ ਦੇਤਿ. ਇਧ ਦਾਨਂ ਦੁਵਿਧਂ ਸਮ੍ਮੁਖਾਦਾਨਂ, ਪਰਮ੍ਮੁਖਾਦਾਨਨ੍ਤਿ. ਪਟਿਗ੍ਗਾਹਕਂ ਦਿਸ੍ਵਾ ‘‘ਇਦਂ ਤੁਯ੍ਹਂ ਦਮ੍ਮੀ’’ਤਿ ਦਾਨਂ ਸਮ੍ਮੁਖਾਦਾਨਂ ਨਾਮ. ਪਰਮ੍ਮੁਖਾ ‘‘ਇਦਂ ਇਤ੍ਥਨ੍ਨਾਮਸ੍ਸ ਦਮ੍ਮੀ’’ਤਿ ਦਿਨ੍ਨਂ ਪਰਮ੍ਮੁਖਾਦਾਨਂ. ‘‘ਇਦਂ ਤ੍ਵਂ ਗਣ੍ਹਾਹੀ’’ਤਿ ਵਾ ‘‘ਤੁਯ੍ਹਂ ਗਣ੍ਹਾਹੀ’’ਤਿ ਵਾ ਵੁਤ੍ਤੇ ‘‘ਮਯ੍ਹਂ ਗਣ੍ਹਾਮੀ’’ਤਿ ਸਚੇ ਵਦਤਿ, ਦਾਨਗਹਣਦ੍ਵਯਮ੍ਪਿ ਸੁਦ੍ਧਂ. ‘‘ਇਦਂ ਤਵ ਸਨ੍ਤਕਂ ਕਰੋਹਿ, ਤਵ ਸਨ੍ਤਕਂ ਹੋਤੁ, ਤਵ ਸਨ੍ਤਕਂ ਹੋਤੀ’’ਤਿ ਦਾਯਕੇਨ ਵੁਤ੍ਤੇ ਗਣ੍ਹਨ੍ਤੋਪਿ ‘‘ਮਮ ਸਨ੍ਤਕਂ ਕਰੋਮਿ, ਮਮ ਸਨ੍ਤਕਂ ਹੋਤੁ, ਮਮ ਸਨ੍ਤਕਂ ਹੋਤੀ’’ਤਿ ਵਦਤਿ ਚੇ, ਦਾਨਂ, ਗਹਣਞ੍ਚ ਅਸੁਦ੍ਧਂ ਹੋਤਿ. ‘‘ਤਵ ਸਨ੍ਤਕਂ ਕਰੋਹੀ’’ਤਿ ਵੁਤ੍ਤੇ ਪਨ ‘‘ਸਾਧੁ ਭਨ੍ਤੇ ਮਯ੍ਹਂ ਗਣ੍ਹਾਮੀ’’ਤਿ ਵਤ੍ਵਾ ਗਣ੍ਹਾਤਿ, ਗਹਣਂ ਸੁਦ੍ਧਂ. ‘‘ਇਦਂ ਤੁਯ੍ਹਂ ਗਣ੍ਹਾਹੀ’’ਤਿ ਵੁਤ੍ਤੇ ‘‘ਅਹਂ ਨ ਗਣ੍ਹਾਮੀ’’ਤਿ ਵਦਤਿ, ਪੁਨ ‘‘ਦਿਨ੍ਨਂ ਮਯਾ, ਤੁਯ੍ਹਂ ਗਣ੍ਹਾਹੀ’’ਤਿ ਵੁਤ੍ਤੇ ਇਤਰੋਪਿ ਪੁਨ ਪਟਿਕ੍ਖਿਪਤਿ, ਤਂ ਚੀਵਰਂ ਕਸ੍ਸਚਿ ਅਸਨ੍ਤਕਤ੍ਤਾ ਦਸਾਹਾਤਿਕ੍ਕਮੇਨਾਪਿ ਨਿਸ੍ਸਗ੍ਗਿਯਂ ਨ ਹੋਤੀਤਿ ਪਚ੍ਛਾ ਤੇਸੁ ਦ੍ਵੀਸੁ ਯੋ ਇਚ੍ਛਤਿ, ਤੇਨ ਅਧਿਟ੍ਠਾਯ ਪਰਿਭੁਞ੍ਜਿਤਬ੍ਬਨ੍ਤਿ ਸਬ੍ਬਮਿਦਂ ਅਟ੍ਠਕਥਾਯ (ਪਾਰਾ. ਅਟ੍ਠ. ੨.੪੬੯ ਅਤ੍ਥਤੋ ਸਮਾਨਂ) ਵੁਤ੍ਤਂ.

ਅਧਿਟ੍ਠਿਤਚੀਵਰੇ ਅਧਿਟ੍ਠਾਨੇ ਵੇਮਤਿਕੇਨ ਅਤ੍ਤਨੋ ਵਿਮਤਿਂ ਪਠਮਂ ਆਵਿ ਕਤ੍ਵਾ ‘‘ਸਚੇ ਅਨਧਿਟ੍ਠਿਤਂ, ਏਵਂ ਕਤੇ ਕਪ੍ਪਿਯਂ ਹੋਤੀ’’ਤਿ ਚਿਨ੍ਤੇਤ੍ਵਾ ਨਿਸ੍ਸਜ੍ਜੇਤ੍ਵਾ ਵਿਨਯਕਮ੍ਮਂ ਕਰੋਨ੍ਤਸ੍ਸ ਮੁਸਾਵਾਦਦੋਸੋ ਨਾਪਜ੍ਜਤਿ. ਯਥਾਹ ਅਟ੍ਠਕਥਾਯਂ ‘‘ਨ ਹਿ ਏਵਂ ਜਾਨਾਪੇਤ੍ਵਾ ਵਿਨਯਕਮ੍ਮਂ ਕਰੋਨ੍ਤਸ੍ਸ ਮੁਸਾਵਾਦੋ ਹੋਤੀ’’ਤਿ (ਪਾਰਾ. ਅਟ੍ਠ. ੨.੪੬੯). ‘‘ਕੇਚਿ ‘ਤਥਾ ਵੇਮਤਿਕਚੀਵਰਂ ਅਞ੍ਞੇਨ ਵਿਸ੍ਸਾਸੇਨ ਗਹੇਤ੍ਵਾ ਪੁਨ ਦਾਤਬ੍ਬ’ਨ੍ਤਿ ਵਦਨ੍ਤਿ, ਤਂ ਨ ਸੁਨ੍ਦਰ’’ਨ੍ਤਿ (ਪਾਰਾ. ਅਟ੍ਠ. ੨.੪੬੯ ਥੋਕਂ ਵਿਸਦਿਸਂ) ਤਤ੍ਥੇਵ ਵੁਤ੍ਤਂ.

ਵਿਨਸ੍ਸਤੀਤਿ ਚੋਰਾਦੀਹਿ ਵਿਨਸ੍ਸਤਿ. ‘‘ਨਸ੍ਸਤਿ, ਡਯ੍ਹਤਿ, ਅਚ੍ਛਿਨ੍ਦਿਤ੍ਵਾ ਗਣ੍ਹਨ੍ਤੀ’’ਤਿ ਇਮਾਨਿਪਿ ਵਿਨਾਸਪ੍ਪਕਾਰਤ੍ਤਾ ‘‘ਵਿਨਸ੍ਸਤੀ’’ਤਿ ਇਮਿਨਾਵ ਸਙ੍ਗਯ੍ਹਨ੍ਤਿ. ਤਤ੍ਥ ‘‘ਨਸ੍ਸਤੀ’’ਤਿ ਇਦਂ ਚੋਰਾਦੀਹਿ ਹਟਂ ਸਨ੍ਧਾਯ ਵੁਤ੍ਤਂ, ‘‘ਵਿਨਸ੍ਸਤੀ’’ਤਿ ਇਦਂ ਉਨ੍ਦੂਰਖਾਯਿਤਾਦਿਂ ਸਨ੍ਧਾਯ ਵੁਤ੍ਤਂ, ‘‘ਡਯ੍ਹਤੀ’’ਤਿ ਅਗ੍ਗਿਨਾ ਦਡ੍ਢਂ ਸਨ੍ਧਾਯ. ਵਿਸ੍ਸਾਸੇਤਿ ਏਤ੍ਥ ਸਨ੍ਦਿਟ੍ਠੋ ਚ ਸਮ੍ਭਤ੍ਤੋ ਚ ਆਲਪਿਤੋ ਚ ਜੀਵਤਿ ਚ ਗਹਿਤੇ ਚਤ੍ਤਮਨੋ ਹੋਤੀਤਿ ਪਞ੍ਚਙ੍ਗਸਮਨ੍ਨਾਗਤੇਨ ਅਤ੍ਤਨਿ ਵਿਸ੍ਸਾਸੇਨ ਅਞ੍ਞੇਨ ਗਹਿਤੇਤਿ ਅਤ੍ਥੋ. ਪਕਾਸਿਤਾਤਿ ‘‘ਅਨਾਪਤ੍ਤਿ ਅਨ੍ਤੋਦਸਾਹਂ ਅਧਿਟ੍ਠੇਤੀ’’ਤਿਆਦਿਨਾ (ਪਾਰਾ. ੪੬੯) ਨਯੇਨ ਵੁਤ੍ਤਾ.

੬੦੧. ਇਦਂ ਪਨ ਸਮੁਟ੍ਠਾਨਂ ਨਾਮੇਨ ਕਥਿਨਸਮੁਟ੍ਠਾਨਂ ਨਾਮਾਤਿ ਅਤ੍ਥੋ. ਇਦਂ ਕਥਿਨਸਮੁਟ੍ਠਾਨਂ ਨਾਮ ਕਾਯਵਾਚਤੋ ਚ ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਤਿ. ਅਤਿਰੇਕਚੀਵਰਭਾਵਸ੍ਸ ਜਾਨਨਚਿਤ੍ਤੇਨ ਪਣ੍ਣਤ੍ਤਿਜਾਨਨਚਿਤ੍ਤੇ ਅਸਤਿਪਿ ਆਪਤ੍ਤਿਸਮ੍ਭਵਤੋ ਅਚਿਤ੍ਤਂ. ਅਨਧਿਟ੍ਠਾਨਤੋ, ਅਵਿਕਪ੍ਪਨਤੋ ਚ ਅਕ੍ਰਿਯਂ. ਕਮ੍ਮਟ੍ਠਾਨਮਨੁਯੁਞ੍ਜਨ੍ਤੋ ਵਾ ਚੇਤਿਯਾਦਿਂ ਵਨ੍ਦਨ੍ਤੋ ਵਾ ਏਕਾਦਸਮਂ ਅਰੁਣਂ ਉਟ੍ਠਾਪੇਤਿ, ਕੁਸਲਚਿਤ੍ਤੋ ਆਪਜ੍ਜਤਿ, ਕਲਹਾਦਿਪਸੁਤੋ ਵਾ ਵੀਤਿਕ੍ਕਮਂ ਜਾਨਨ੍ਤੋ ਵਾ ਉਟ੍ਠਾਪੇਤਿ, ਅਕੁਸਲਚਿਤ੍ਤੋ ਆਪਜ੍ਜਤਿ, ਖੀਣਾਸਵੋ ਪਨ ਅਸਤਿਯਾ ਵਾ ਪਣ੍ਣਤ੍ਤਿਂ ਅਜਾਨਨ੍ਤੋ ਵਾ ਤਥਾ ਕਰੋਨ੍ਤੋ ਅਬ੍ਯਾਕਤਚਿਤ੍ਤੋ ਆਪਜ੍ਜਤੀਤਿ ਤਿਚਿਤ੍ਤਂ. ਵੁਤ੍ਤਨਯੇਨ ਕਮ੍ਮਟ੍ਠਾਨਾਦਿਮਨੁਯੁਞ੍ਜਨ੍ਤਸ੍ਸ ਸੋਮਨਸ੍ਸਚਿਤ੍ਤਸਮਙ੍ਗਿਨੋ ਸੁਖਵੇਦਨਾ, ਉਪੇਕ੍ਖਾਚਿਤ੍ਤਸਮਙ੍ਗਿਨੋ ਉਪੇਕ੍ਖਾਵੇਦਨਾ, ਕਲਹਾਦਿਪਸੁਤਸ੍ਸ ਦੋਮਨਸ੍ਸਚਿਤ੍ਤਸਮਙ੍ਗਿਨੋ ਦੁਕ੍ਖਵੇਦਨਾ ਹੋਤੀਤਿ ਤਿਵੇਦਨਂ. ਏਸ ਨਯੋ ਉਪਰਿਪਿ ਏਵਰੂਪੇ ਠਾਨੇ ਯੋਜੇਤਬ੍ਬੋ.

ਪਠਮਕਥਿਨਕਥਾਵਣ੍ਣਨਾ.

੬੦੨. ਗਾਮਾਦੀਸੁ ਪਦੇਸੇਸੁ ਤਿਪਞ੍ਚਸੂਤਿ ਤਿਚੀਵਰਾਨਿ ਨਿਕ੍ਖਿਪਿਤ੍ਵਾ ਵਿਪ੍ਪਵਾਸੇਨ ਦੋਸਂ, ਉਪ੍ਪਜ੍ਜਨਟ੍ਠਾਨਞ੍ਚ ਦਸ੍ਸੇਤੁਂ ‘‘ਗਾਮੋ ਏਕੂਪਚਾਰੋ’’ਤਿਆਦਿਨਾ (ਪਾਰਾ. ੪੭੭) ਨਯੇਨ ਪਾਲ਼ਿਯਂ ਵੁਤ੍ਤਗਾਮਨਿਵੇਸਨਉਦੋਸਿਤਅਟ੍ਟਮਾਲ਼ਪਾਸਾਦਹਮ੍ਮਿਯਨਾਵਾਸਤ੍ਥਖੇਤ੍ਤਧਞ੍ਞਕਰ- ਣਆਰਾਮਵਿਹਾਰਰੁਕ੍ਖਮੂਲਅਜ੍ਝੋਕਾਸਸਙ੍ਖਾਤੇਸੁ ਪਨ੍ਨਰਸਸੁ ਚੀਵਰਨਿਕ੍ਖੇਪਟ੍ਠਾਨੇਸੂਤਿ ਵੁਤ੍ਤਂ ਹੋਤਿ. ਏਤ੍ਥ ਗਾਮੋ ਨਾਮ ਏਕਕੁਟਿਕਾਦਿਗਾਮੋ.

ਨਿਵੇਸਨਂ ਨਾਮ ਗਾਮਤੋ ਬਹਿ ਚਤੁਸਾਲਾਦਿਕੋ ਗੇਹੋ. ਤੇਨਾਹ ਗਣ੍ਠਿਪਦੇ ‘‘ਗਾਮਨਿਵੇਸਨਾਨਂ ਵਿਸੇਸਂ ਵਦਨ੍ਤਾ ‘ਪੁਨ ਏਕਪਰਿਚ੍ਛੇਦਂ ਕਤ੍ਵਾ ਨਿਵੇਸਿਤਾ ਬਹੁਗੇਹਾ ਨਿਵੇਸਨਂ ਨਾਮ ਹੋਨ੍ਤੀ’ਤਿ ਵਦਨ੍ਤਿ, ਤਸ੍ਮਾ ਇਦਂ ਨਿਵੇਸਨਾਦਿ ਸਬ੍ਬਂ ‘ਗਾਮਤੋ ਬਹੀ’ਤਿ ਗਹੇਤਬ੍ਬ’’ਨ੍ਤਿ. ਇਦਞ੍ਚ ਤਤ੍ਥੇਵ ਵੁਤ੍ਤਂ ‘‘ਨਿਵੇਸਨਾਦਿਕਂ ਅਨ੍ਤੋਗਾਮੇ ਚੇ ਹੋਤਿ, ਗਾਮੇ ਵੁਤ੍ਤਪਰਿਹਾਰਸ੍ਸੇਵ ਲਬ੍ਭਨਤੋ ਅਨ੍ਤੋਗਾਮਤੋ ਬਹੀ’ਤਿ ਗਹੇਤਬ੍ਬ’’ਨ੍ਤਿ.

ਅਟ੍ਠਕਥਾਯਂ ‘‘ਉਦੋਸਿਤੋਤਿ ਯਾਨਾਦੀਨਂ ਭਣ੍ਡਾਨਂ ਸਾਲਾ’’ਤਿ (ਪਾਰਾ. ਅਟ੍ਠ. ੨.੪੮੨-੪੮੭) ਵੁਤ੍ਤਸਰੂਪਂ ਉਦੋਸਿਤਂ ਨਾਮ. ‘‘ਅਟ੍ਟੋਤਿ ਪਟਿਰਾਜਾਦਿਪਟਿਬਾਹਨਤ੍ਥਂ ਇਟ੍ਠਕਾਹਿ ਕਤੋ ਬਹਲਭਿਤ੍ਤਿਕੋ ਚਤੁਪਞ੍ਚਭੂਮਿਕੋ ਪਤਿਸ੍ਸਯਵਿਸੇਸੋ’’ਤਿ (ਪਾਰਾ. ਅਟ੍ਠ. ੨.੪੮੨-੪੮੭) ਵੁਤ੍ਤਸਰੂਪੋ ਅਟ੍ਟੋ ਨਾਮ. ‘‘ਮਾਲ਼ੋਤਿ ਏਕਕੂਟਸਙ੍ਗਹਿਤੋ ਚਤੁਰਸ੍ਸਪਾਸਾਦੋ’’ਤਿ (ਪਾਰਾ. ਅਟ੍ਠ. ੪੮੨-੪੮੭) ਵੁਤ੍ਤੋ ਏਕਕਣ੍ਣਿਕਸਙ੍ਗਹਿਤੋ ਚਤੁਰਸ੍ਸਗੇਹੋ ਮਾਲ਼ੋ ਨਾਮ. ਪਾਸਾਦੋਤਿ ਦੀਘਪਾਸਾਦੋ. ਹਮ੍ਮਿਯਨ੍ਤਿ ਮੁਣ੍ਡਚ੍ਛਦਨਪਾਸਾਦੋ. ਨਾਵਾਤਿ ਯਾਨਪ੍ਪਤ੍ਤਿ. ਸਤ੍ਥਨ੍ਤਿ ਜਙ੍ਘਸਤ੍ਥਸਕਟਸਤ੍ਥਵਸੇਨ ਦੁਵਿਧੋ ਜਨਸਮੂਹੋ, ਸੋ ਚ ਨਿਵਿਟ੍ਠਾਨਿਵਿਟ੍ਠਵਸੇਨ ਪਚ੍ਚੇਕਂ ਦੁਵਿਧੋ. ਤਤ੍ਥ ਨਿਵਿਟ੍ਠੇ ਵਤਿਆਦਿਪਰਿਕ੍ਖੇਪੋਪਿ ਹੋਤੇਵ.

ਖੇਤ੍ਤਨ੍ਤਿ ਯਵਖੇਤ੍ਤਾਦਿਖੇਤ੍ਤਂ. ਧਞ੍ਞਕਰਣਂ ਖਲਂ. ਆਰਾਮੋ ਪੁਪ੍ਫਾਰਾਮੋ, ਫਲਾਰਾਮੋ ਚ. ਵਿਹਾਰੋਤਿ ਏਕਮ੍ਪਿ ਸੇਨਾਸਨਂ ਵੁਚ੍ਚਤਿ. ‘‘ਰੁਕ੍ਖੋ ਨਾਮ ਯਂ ਮਜ੍ਝਨ੍ਤਿਕੇ ਕਾਲੇ ਸਮਨ੍ਤਾ ਛਾਯਾ ਫਰਤੀ’’ਤਿ (ਪਾਰਾ. ੪੯੪) ਵੁਤ੍ਤਪ੍ਪਮਾਣਪਰਿਚ੍ਛਨ੍ਨੋ ਰੁਕ੍ਖੋ. ਅਜ੍ਝੋਕਾਸੋ ਨਾਮ ਸਤ੍ਤਬ੍ਭਨ੍ਤਰੋ, ਸੋ ਵਿਞ੍ਚਾਟਵਿਆਦਿਅਗਾਮਕਾਰਞ੍ਞੇ ਚ ਮਚ੍ਛਬਨ੍ਧਾਨਂ ਅਗਮਨਪਥੇ ਸਮੁਦ੍ਦਦੀਪੇ ਚ ਲਬ੍ਭਤਿ. ਮਚ੍ਛਬਨ੍ਧਾਨਂ ਅਗਮਨਪਥੋ ਨਾਮ ਉਦਕਪਿਟ੍ਠਿਯਾ ਗਨ੍ਤ੍ਵਾ ਪੁਨ ਤਦਹੇਵ ਗੇਹਂ ਆਗਨ੍ਤੁਂ ਅਸਕ੍ਕੁਣੇਯ੍ਯਤਾਯ ਦੂਰੋ ਸਮੁਦ੍ਦਪ੍ਪਦੇਸੋ ਵੁਚ੍ਚਤਿ.

ਅਯਂ ਗਾਮਾਦਿਕੋ ਪਚ੍ਚੇਕਂ ਏਕੂਪਚਾਰੋ, ਨਾਨੂਪਚਾਰੋਤਿ ਦੁਵਿਧੋ. ਤਤ੍ਥ ਅਜ੍ਝੋਕਾਸਂ ਵਿਨਾ ਗਾਮਾਦਿਕੋ ਤਂਤਂਰਾਜਾਦਿਸਾਮਿਕਕੁਲਾਨਂ ਏਕਤ੍ਥਨਾਨਤ੍ਥਵਸੇਨ ਏਕਕੁਲਸਨ੍ਤਕੋ ਚੇ ਹੋਤਿ, ਏਕੂਪਚਾਰੋ. ਨਾਨਾਕੁਲਸਨ੍ਤਕੋ ਚੇ, ਨਾਨੂਪਚਾਰੋ ਹੋਤਿ. ਵੁਤ੍ਤਞ੍ਹੇਤਂ ‘‘ਗਾਮੋ ਏਕੂਪਚਾਰੋ ਨਾਮ ਏਕਕੁਲਸ੍ਸ ਗਾਮੋ ਹੋਤੀ’’ਤਿਆਦਿ (ਪਾਰਾ. ੪੭੮). ਅਟ੍ਠਕਥਾਯਮ੍ਪਿ ਵੁਤ੍ਤਂ ‘‘ਏਕਕੁਲਸ੍ਸ ਗਾਮੋਤਿ ਏਕਸ੍ਸ ਰਞ੍ਞੋ ਵਾ ਭੋਜਕਸ੍ਸ ਵਾ ਗਾਮੋ’’ਤਿ ਚ ‘‘ਨਾਨਾਕੁਲਸ੍ਸ ਗਾਮੋਤਿ ਨਾਨਾਰਾਜੂਨਂ ਵਾ ਭੋਜਕਾਨਂ ਵਾ ਗਾਮੋ ਵੇਸਾਲੀਕੁਸਿਨਾਰਾਦਿਸਦਿਸੋ’’ਤਿ (ਪਾਰਾ. ਅਟ੍ਠ. ੨.੪੭੯) ਚ.

ਏਕਕੁਲੇਨ ਕਾਰਾਪਿਤੋ ਵਿਹਾਰੋ ਏਕੂਪਚਾਰੋ, ਨਾਨਾਕੁਲੇਹਿ ਕਾਰਾਪਿਤੋ ਨਾਨੂਪਚਾਰੋ ਹੋਤਿ. ਯਥਾਹ ਗਣ੍ਠਿਪਦੇ ‘‘ਵਿਹਾਰੇ ਏਕਕੁਲਨਾਨਾਕੁਲਵੋਹਾਰੋ ਕਾਰਾਪਕਾਨਂ ਵਸੇਨ ਵੁਤ੍ਤੋ’’ਤਿ. ਅਜ੍ਝੋਕਾਸੇ ਪਨ ਉਪਚਾਰਭੇਦੋ ਅਬ੍ਭਨ੍ਤਰਵਸੇਨ ਵੇਦਿਤਬ੍ਬੋ. ਵੁਤ੍ਤਞ੍ਚੇਤਂ ਪਾਲ਼ਿਯਂ ‘‘ਅਜ੍ਝੋਕਾਸੋ ਏਕੂਪਚਾਰੋ ਨਾਮ ਅਗਾਮਕੇ ਅਰਞ੍ਞੇ ਸਮਨ੍ਤਾ ਸਤ੍ਤਬ੍ਭਨ੍ਤਰਾ ਏਕੂਪਚਾਰੋ. ਤਤੋ ਪਰਂ ਨਾਨੂਪਚਾਰੋ’’ਤਿ. ਇਧ ਏਕਂ ਅਬ੍ਭਨ੍ਤਰਂ ਅਟ੍ਠਵੀਸਤਿਰਤਨਂ ਹੋਤਿ. ਯਥਾਹ ਅਟ੍ਠਕਥਾਯਂ ‘‘ਏਕਂ ਅਬ੍ਭਨ੍ਤਰਂ ਅਟ੍ਠਵੀਸਤਿਹਤ੍ਥ’’ਨ੍ਤਿ (ਪਾਰਾ. ਅਟ੍ਠ. ੨.੪੮੯). ਏਵਂ ਸਙ੍ਖੇਪਤੋ ਵੁਤ੍ਤਸਰੂਪਪ੍ਪਭੇਦਾਨਿ ਪਨ੍ਨਰਸ ਠਾਨਾਨਿ ਦਸ੍ਸੇਤੁਮਾਹ ‘‘ਗਾਮਾਦੀਸੁ ਪਦੇਸੇਸੁ ਤਿਪਞ੍ਚਸੂ’’ਤਿ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਪਾਲ਼ਿਅਟ੍ਠਕਥਾਵਣ੍ਣਨਤੋ ਵੇਦਿਤਬ੍ਬੋ.

‘‘ਤਿਚੀਵਰੇਨ ਵਿਪ੍ਪਵਾਸੇਯ੍ਯਾਤਿ ਸਙ੍ਘਾਟਿਯਾ ਵਾ ਉਤ੍ਤਰਾਸਙ੍ਗੇਨ ਵਾ ਅਨ੍ਤਰਵਾਸਕੇਨ ਵਾ. ਅਨ੍ਤੋਗਾਮੇ ਚੀਵਰਂ ਨਿਕ੍ਖਿਪਿਤ੍ਵਾ’’ਤਿ (ਪਾਰਾ. ੪੭੬, ੪੭੮) ਵਚਨਤੋ ਏਤ੍ਥ ਤਿਚੀਵਰਨ੍ਤਿ ਤਿਣ੍ਣਂ ਚੀਵਰਾਨਮਞ੍ਞਤਰਮੇਵ ਚੀਵਰਂ ਵਤ੍ਤਬ੍ਬਂ. ਏਕਰਤ੍ਤਨ੍ਤਿ ਵਿਪ੍ਪਵਾਸਕਿਰਿਯਾਯ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ. ਅਪਿ-ਸਦ੍ਦੇਨ ਕਿਂ ਪਨ ਦਿਰਤ੍ਤਾਦਿਕਨ੍ਤਿ ਦਸ੍ਸੇਤਿ.

ਸਙ੍ਘਸਮ੍ਮੁਤਿਯਾ ਵਿਨਾਤਿ ਤਿਚੀਵਰਂ ਪਰਿਹਰਿਤੁਂ ਅਸਮਤ੍ਥੇਨ ਗਿਲਾਨੇਨ ਭਿਕ੍ਖੁਨਾ ਸਙ੍ਘਂ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ‘‘ਅਹਂ ਭਨ੍ਤੇ ਗਿਲਾਨੋ, ਨ ਸਕ੍ਕੋਮਿ ਤਿਚੀਵਰਂ ਆਦਾਯ ਪਕ੍ਕਮਿਤੁਂ, ਸੋਹਂ ਭਨ੍ਤੇ ਸਙ੍ਘਂ ਤਿਚੀਵਰੇਨ ਅਵਿਪ੍ਪਵਾਸਸਮ੍ਮੁਤਿਂ ਯਾਚਾਮੀ’’ਤਿ ਤਿਕ੍ਖਤ੍ਤੁਂ ਯਾਚਿਤੇਨ ਸਙ੍ਘੇਨ ਤਸ੍ਸ ਞਤ੍ਤਿਦੁਤਿਯਾਯ ਕਮ੍ਮਵਾਚਾਯ ਦਿਨ੍ਨਂ ਅਵਿਪ੍ਪਵਾਸਸਮ੍ਮੁਤਿਂ ਵਿਨਾਤਿ ਵੁਤ੍ਤਂ ਹੋਤਿ. ਤਥਾ ਲਦ੍ਧਸਮ੍ਮੁਤਿਕਸ੍ਸ ਗਿਲਾਨਸ੍ਸ ਭਿਕ੍ਖੁਨੋ ਤਸ੍ਮਿਂ ਗੇਲਞ੍ਞੇ ਅਵੂਪਸਨ੍ਤੇ ਵਾ ਵੂਪਸਨ੍ਤੇਪਿ ਚੀਵਰਨਿਕ੍ਖੇਪਟ੍ਠਾਨਂ ਆਗਮਨਕਾਲੇ ਵਾ ਉਪ੍ਪਨ੍ਨੇ ਅਞ੍ਞੇਪਿ ਰੋਗੇ ਅਵੂਪਸਨ੍ਤੇ ਤਾਯਯੇਵ ਸਮ੍ਮੁਤਿਯਾ ਨ ਦੋਸੋ.

੬੦੩. ਭਿਕ੍ਖੁਨੋਤਿ ਅਲਦ੍ਧਸਮ੍ਮੁਤਿਕਸ੍ਸ ਭਿਕ੍ਖੁਨੋ. ਤੇਨ ਚੀਵਰੇਨ. ਵਿਪ੍ਪਵਤ੍ਥੁਂ ਨ ਵਟ੍ਟਤੀਤਿ ਵਿਨਾ ਵਸਿਤੁਂ ਨ ਵਟ੍ਟਤਿ. ਕਿਂ ਵੁਤ੍ਤਂ ਹੋਤਿ? ‘‘ਏਕਕੁਲਸ੍ਸ ਗਾਮੋ ਹੋਤਿ ਪਰਿਕ੍ਖਿਤ੍ਤੋ ਚ, ਅਨ੍ਤੋਗਾਮੇ ਚੀਵਰਂ ਨਿਕ੍ਖਿਪਿਤ੍ਵਾ ਅਨ੍ਤੋਗਾਮੇ ਵਤ੍ਥਬ੍ਬਂ. ਅਪਰਿਕ੍ਖਿਤ੍ਤੋ ਹੋਤਿ, ਯਸ੍ਮਿਂ ਘਰੇ ਚੀਵਰਂ ਨਿਕ੍ਖਿਤ੍ਤਂ ਹੋਤਿ, ਤਸ੍ਮਿਂ ਘਰੇ ਵਤ੍ਥਬ੍ਬਂ, ਹਤ੍ਥਪਾਸਾ ਵਾ ਨ ਵਿਜਹਿਤਬ੍ਬਂ. ਨਾਨਾਕੁਲਸ੍ਸ ਗਾਮੋ ਹੋਤਿ ਪਰਿਕ੍ਖਿਤ੍ਤੋ ਚ, ਯਸ੍ਮਿਂ ਘਰੇ ਚੀਵਰਂ ਨਿਕ੍ਖਿਤ੍ਤਂ ਹੋਤਿ, ਤਸ੍ਮਿਂ ਘਰੇ ਵਤ੍ਥਬ੍ਬਂ ਸਭਾਯੇ ਵਾ ਦ੍ਵਾਰਮੂਲੇ ਵਾ, ਹਤ੍ਥਪਾਸਾ ਵਾ ਨ ਵਿਜਹਿਤਬ੍ਬ’’ਨ੍ਤਿਆਦਿਨਾ (ਪਾਰਾ. ੪੭੮) ਨਯੇਨ ਪਾਲ਼ਿਯਾ ਵੁਤ੍ਤਟ੍ਠਾਨਤੋ ਬਹਿ ਅਰੁਣਂ ਉਟ੍ਠਾਪੇਤੁਂ ਨ ਵਟ੍ਟਤੀਤਿ ਵੁਤ੍ਤਂ ਹੋਤਿ.

ਇਮਸ੍ਮਿਂ ਪਾਠੇ ‘‘ਪਰਿਕ੍ਖਿਤ੍ਤੋ’’ਤਿ ਇਦਂ ਪਾਕਾਰੇਨ ਵਾ ਵਤਿਯਾ ਵਾ ਪਰਿਖਾਯ ਵਾ ਪਰਿਕ੍ਖਿਤ੍ਤਂ ਸਨ੍ਧਾਯ ਵੁਤ੍ਤਂ. ਹਤ੍ਥਪਾਸਾ ਵਾਤਿ ਏਤ੍ਥ ਹਤ੍ਥਪਾਸਾ ਨਾਮ ਅਡ੍ਢਤਿਯਰਤਨਂ ਹੋਤਿ. ਯਥਾਹ ਅਟ੍ਠਕਥਾਯਂ ‘‘ਤਂ ਘਰਂ ਸਮਨ੍ਤਤੋ ਹਤ੍ਥਪਾਸਾ ਨ ਵਿਜਹਿਤਬ੍ਬਂ, ਅਡ੍ਢਤੇਯ੍ਯਰਤਨਪ੍ਪਮਾਣਾ ਪਦੇਸਾ ਉਦ੍ਧਂ ਨ ਵਿਜਹਿਤਬ੍ਬਨ੍ਤਿ ਵੁਤ੍ਤਂ ਹੋਤੀ’’ਤਿ (ਪਾਰਾ. ਅਟ੍ਠ. ੨.੪੭੭-੪੭੮).

ਵਿਪ੍ਪਵਸਨ੍ਤਸ੍ਸ ਕੋ ਦੋਸੋਤਿ ਆਹ ‘‘ਹੋਤਿ…ਪੇ… ਅਰੁਣੁਗ੍ਗਮੇ’’ਤਿ. ਅਨੁਞ੍ਞਾਤਟ੍ਠਾਨਤੋ ਹਿ ਬਹਿ ਚੀਵਰੇਨ ਵਿਨਾ ਅਰੁਣਂ ਉਟ੍ਠਾਪੇਨ੍ਤਸ੍ਸ ਤਂ ਚੀਵਰਂ ਨਿਸ੍ਸਜ੍ਜਿਤਬ੍ਬਂ ਹੋਤਿ, ਤਂਹੇਤੁਕਾ ਪਾਚਿਤ੍ਤਿਯਾਪਤ੍ਤਿਪਿ ਹੋਤੀਤਿ ਅਤ੍ਥੋ. ਤੇਨੇਵ ਵਕ੍ਖਤਿ ‘‘ਨਿਸ੍ਸਜ੍ਜਿਤ੍ਵਾ…ਪੇ… ਵਿਞ੍ਞੁਨਾ’’ਤਿ.

੬੦੪. ਨ੍ਹਾਯਨ੍ਤਸ੍ਸੇਵਾਤਿ ਚੀਵਰਸ੍ਸ ਹਤ੍ਥਪਾਸਤੋ ਦੂਰੇ ਨਹਾਯਨ੍ਤਸ੍ਸੇਵ, ਅਨਾਦਰੇ ਸਾਮਿਵਚਨਂ.

੬੦੬. ਅਚ੍ਛਿਨ੍ਨਂ ਵਿਲੁਤ੍ਤਂ ਚੀਵਰਂ ਯਸ੍ਸ ਸੋ ਅਚ੍ਛਿਨ੍ਨਚੀਵਰੋ, ਭਿਕ੍ਖੁ, ਤਸ੍ਸ ਠਾਨਂ ਅਚ੍ਛਿਨ੍ਨਚੀਵਰਟ੍ਠਾਨਂ, ਤਸ੍ਮਿਂ.

੬੦੭. ਨਿਵਾਸੇਤ੍ਵਾਤਿ ਏਤ੍ਥ ‘‘ਅਨ੍ਤਰਵਾਸਕ’’ਨ੍ਤਿ ਚ ਗਹੇਤ੍ਵਾਤਿ ਏਤ੍ਥ ‘‘ਇਤਰਾਨੀ’’ਤਿ ਚ ਸੇਸੋ. ਇਦਞ੍ਚ ਗਨ੍ਤਬ੍ਬਟ੍ਠਾਨੇ, ਆਸਨ੍ਨੇ ਮਗ੍ਗੇ ਚ ਮਨੁਸ੍ਸਸਮ੍ਬਾਧੇ ਅਸਤਿ ਕਤ੍ਤਬ੍ਬਦਸ੍ਸਨਂ. ਇਤਰਤ੍ਥ ਨਿਵਾਸੇਤ੍ਵਾ, ਪਾਰੁਪਿਤ੍ਵਾ ਚ ਸਙ੍ਘਾਟਿਂ ਅਂਸੇ ਕਤ੍ਵਾਵ ਗਨ੍ਤਬ੍ਬਂ ਹੋਤਿ. ਵਿਹਾਰੇ ਸਭਾਗੇਸੁ ਅਲਬ੍ਭਮਾਨੇਸੁ ਆਸਨਸਾਲਮ੍ਪਿ ਗਨ੍ਤ੍ਵਾ ਸਭਾਗਸ੍ਸ ਸਨ੍ਤਿਕੇ ਵਿਨਯਕਮ੍ਮਂ ਕਤ੍ਤਬ੍ਬਨ੍ਤਿ ਅਟ੍ਠਕਥਾਯਂ (ਪਾਰਾ. ਅਟ੍ਠ. ੨.੪੯੫ ਅਤ੍ਥਤੋ ਸਮਾਨਂ) ਵੁਤ੍ਤਂ. ‘‘ਨਿਸ੍ਸਜ੍ਜਿਤ੍ਵਾ’’ਤਿ ਇਮਿਨਾ ‘‘ਇਦਂ ਮੇ ਭਨ੍ਤੇ ਚੀਵਰਂ ਰਤ੍ਤਿਵਿਪ੍ਪਵੁਤ੍ਥਂ ਅਞ੍ਞਤ੍ਰ ਭਿਕ੍ਖੁਸਮ੍ਮੁਤਿਯਾ ਨਿਸ੍ਸਗ੍ਗਿਯਂ, ਇਮਾਹਂ ਸਙ੍ਘਸ੍ਸ ਨਿਸ੍ਸਜ੍ਜਾਮੀ’’ਤਿ ਸਙ੍ਘੇ ਵਾ ‘‘ਇਦਂ ਮੇ ਭਨ੍ਤੇ ਚੀਵਰਂ…ਪੇ… ਅਹਂ ਆਯਸ੍ਮਨ੍ਤਾਨਂ ਨਿਸ੍ਸਜ੍ਜਾਮੀ’’ਤਿ ਤਿਣ੍ਣਂ, ਦ੍ਵਿਨ੍ਨਂ ਵਾ ਸਨ੍ਤਿਕੇ ਵਾ ‘‘ਇਦਂ ਮੇ ਆਵੁਸੋ…ਪੇ… ਇਮਾਹਂ ਆਯਸ੍ਮਤੋ ਨਿਸ੍ਸਜ੍ਜਾਮੀ’’ਤਿ ਏਕਸ੍ਸ ਸਨ੍ਤਿਕੇ ਵਾ ਵਤ੍ਵਾ ਨਿਸ੍ਸਜ੍ਜਿਤ੍ਵਾਤਿ ਵੁਤ੍ਤਂ ਹੋਤਿ. ਵਿਞ੍ਞੁਨਾਤਿ ਏਵਂ ਨਿਸ੍ਸਗ੍ਗਿਯਵਤ੍ਥੁਨਿਸ੍ਸਜ੍ਜਨਾਦਿਨਾਨਪ੍ਪਕਾਰਵਿਧਿਜਾਨਨਕੇਨ ਞਾਣਵਤਾਤਿ ਅਤ੍ਥੋ.

੬੦੮. ਤਂ ਨਿਸ੍ਸਗ੍ਗਿਯਚੀਵਰਂ.

੬੦੯. ‘‘ਅਦੇਨ੍ਤਸ੍ਸ ਚ ਨਿਸ੍ਸਟ੍ਠਂ ਦੁਕ੍ਕਟ’’ਨ੍ਤਿ ਇਮਿਨਾ ‘‘ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਆਪਤ੍ਤਿ ਪਟਿਗ੍ਗਹੇਤਬ੍ਬਾ, ਨਿਸ੍ਸਟ੍ਠਚੀਵਰਂ ਦਾਤਬ੍ਬ’’ਨ੍ਤਿ ਵੁਤ੍ਤਤ੍ਤਾ ਇਮਂ ਵਿਧਿਂ ਜਾਨਨਤਾਯ ਬ੍ਯਤ੍ਤੇਨ ਯਥਾਵਿਧਿਂ ਕਾਤੁਂ ਸਮਤ੍ਥਤਾਯ ਪਟਿਬਲੇਨ ਖਨ੍ਧਕੇ (ਚੂਲ਼ਵ. ੨੩੯) ਆਗਤਨਯੇਨ ਆਪਤ੍ਤਿਂ ਪਟਿਗ੍ਗਹੇਤ੍ਵਾ ਨਿਸ੍ਸਟ੍ਠਚੀਵਰਂ ਹਤ੍ਥੇਨ ਗਹੇਤ੍ਵਾ ਨਿਸੀਦਾਪੇਤ੍ਵਾ ਸਚੇ ਸਙ੍ਘੋ ਹੋਤਿ, ‘‘ਸੁਣਾਤੁ ਮੇ ਭਨ੍ਤੇ ਸਙ੍ਘੋ, ਇਦਂ ਚੀਵਰਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਨਿਸ੍ਸਗ੍ਗਿਯਂ ਸਙ੍ਘਸ੍ਸ ਨਿਸ੍ਸਟ੍ਠਂ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਦੇਯ੍ਯਾ’’ਤਿ, ਸਚੇ ਤਯੋ ਹੋਨ੍ਤਿ, ‘‘ਸੁਣਨ੍ਤੁ ਮੇ ਆਯਸ੍ਮਨ੍ਤਾ, ਇਦਂ ਚੀਵਰਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਨਿਸ੍ਸਗ੍ਗਿਯਂ ਆਯਸ੍ਮਨ੍ਤਾਨਂ ਨਿਸ੍ਸਟ੍ਠਂ, ਯਦਾਯਸ੍ਮਨ੍ਤਾਨਂ ਪਤ੍ਤਕਲ੍ਲਂ, ਆਯਸ੍ਮਨ੍ਤਾ ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਦੇਯ੍ਯੁ’’ਨ੍ਤਿ, ਸਚੇ ਏਕਕੋ ਹੋਤਿ, ‘‘ਇਮਂ ਚੀਵਰਂ ਆਯਸ੍ਮਤੋ ਦਮ੍ਮੀ’’ਤਿ ਦਾਤਬ੍ਬਂ, ਨਿਸ੍ਸਟ੍ਠਚੀਵਰਂ ‘‘ਅਤ੍ਤਨੋਯੇਵ ਦਿਨ੍ਨ’’ਨ੍ਤਿ ਸੁਦ੍ਧਸਞ੍ਞਾਯ ਗਹੇਤ੍ਵਾ ਅਦੇਨ੍ਤਸ੍ਸ ਦੁਕ੍ਕਟਂ ਹੋਤੀਤਿ ਵੁਤ੍ਤਂ ਹੋਤਿ.

ਤਸ੍ਸ ਸਨ੍ਤਕਭਾਵਂ ਞਤ੍ਵਾ ਲੇਸੇਨ ਵਿਲੁਮ੍ਪਨ੍ਤਸ੍ਸ ਪਨ ਭਣ੍ਡਗ੍ਘਵਸੇਨ ਦੁਕ੍ਕਟਥੁਲ੍ਲਚ੍ਚਯਪਾਰਾਜਿਕਾਪਤ੍ਤਿਯੋ ਹੋਨ੍ਤਿ. ਯਥਾਹ ਅਟ੍ਠਕਥਾਯਂ ‘‘ਤਸ੍ਸ ਸਨ੍ਤਕਭਾਵਂ ਪਨ ਞਤ੍ਵਾ ਲੇਸੇਨ ਅਚ੍ਛਿਨ੍ਦਨ੍ਤੋ ਭਣ੍ਡਂ ਅਗ੍ਘਾਪੇਤ੍ਵਾ ਕਾਰੇਤਬ੍ਬੋ’’ਤਿ (ਪਾਰਾ. ਅਟ੍ਠ. ੨.੪੬੯). ਪਰਿਯਾਪੁਤਨ੍ਤਿ ‘‘ਨ ਭਿਕ੍ਖਵੇ ਨਿਸ੍ਸਟ੍ਠਚੀਵਰਂ ਨ ਦਾਤਬ੍ਬਂ, ਯੋ ਨ ਦਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਪਾਰਾ. ੪੭੦) ਪਾਲ਼ਿਯਂ ਵੁਤ੍ਤਨ੍ਤਿ ਅਤ੍ਥੋ.

੬੧੦-੧. ਥੇਰੇ ਦਹਰੇ ਚਾਤਿ ਏਤੇਸੁ ਉਭੋਸੁਪਿ ਮਗ੍ਗਂ ਗਚ੍ਛਨ੍ਤੇਸੂਤਿ ਯੋਜਨਾ. ‘‘ਥੇਰੇ’’ਤਿ ਇਮਿਨਾ ਅਨਿਸ੍ਸਿਤਭਾਵਮਾਹ, ‘‘ਦਹਰੇ ਚਾ’’ਤਿ ਇਮਿਨਾ ਨਿਸ੍ਸਿਤਭਾਵਂ. ਓਹੀਨੇਤਿ ਓਸਕ੍ਕਿਤੇ. ਸਚੇ ਸੋ ਥੇਰੋ ਨਿਸ੍ਸਯਾਚਰਿਯੋ ਭਵੇਯ੍ਯਾਤਿ ਅਧਿਪ੍ਪਾਯੇਨਾਹ ‘‘ਗਰੁ’’ਨ੍ਤਿ. ਤਸ੍ਮਿਂ ਦਹਰੇ. ਵਤ੍ਥਨ੍ਤਿ ਤਸ੍ਸ ਹਤ੍ਥੇ ਠਿਤਚੀਵਰਂ. ਨ ਪਸ੍ਸਮ੍ਭਤੀਤਿ ਧੁਰਨਿਕ੍ਖੇਪਂ ਅਕਤ੍ਵਾ ਗਮਨੇ ਸਉਸ੍ਸਾਹਤ੍ਤਾ ਨਿਸ੍ਸਯਪਟਿਪ੍ਪਸ੍ਸਦ੍ਧਿ ਨ ਹੋਤੀਤਿ ਅਧਿਪ੍ਪਾਯੋ. ਤੇਨੇਵ ‘‘ਮੁਹੁਤ੍ਤ’’ਨ੍ਤਿਆਦਿਮਾਹ.

੬੧੪. ਪਚ੍ਚੁਦ੍ਧਾਰੇ ਅਨ੍ਤੋਯੇਵਾਰੁਣੇਤਿ ਇਮਿਨਾ ਸਮ੍ਬਨ੍ਧੋ, ਦਹਰਭਿਕ੍ਖੁਨੋ ਦੂਰਭਾਵਞ੍ਚ ਅਰੁਣੁਗ੍ਗਮਨਞ੍ਚ ਞਤ੍ਵਾ ਚੀਵਰਸ੍ਸ ਅਨਿਸ੍ਸਗ੍ਗਿਯਤ੍ਥਂ ਤਸ੍ਸ ਹਤ੍ਥੇ ਠਿਤਭਾਵਂ ਸਲ੍ਲਕ੍ਖੇਤ੍ਵਾ ਪੁਰਾਰੁਣਾ ਪਚ੍ਚੁਦ੍ਧਰੇਤਿ ਅਤ੍ਥੋ. ਵਿਸ੍ਸਜ੍ਜੇਤੀਤਿ ਅਞ੍ਞਸ੍ਸ ਦੇਤਿ. ਵਿਨਸ੍ਸਤੀਤਿ ਚੋਰਾਦੀਹਿ ਨਸ੍ਸਤਿ.

ਦੁਤਿਯਕਥਿਨਕਥਾਵਣ੍ਣਨਾ.

੬੧੬. ਅਕਾਲਚੀਵਰਨ੍ਤਿ ‘‘ਅਕਾਲਚੀਵਰਂ ਨਾਮ ਅਨਤ੍ਥਤੇ ਕਥਿਨੇ ਏਕਾਦਸਮਾਸੇ ਉਪ੍ਪਨ੍ਨਂ, ਅਤ੍ਥਤੇ ਕਥਿਨੇ ਸਤ੍ਤਮਾਸੇ ਉਪ੍ਪਨ੍ਨਂ, ਕਾਲੇਪਿ ਆਦਿਸ੍ਸ ਦਿਨ੍ਨ’’ਨ੍ਤਿ (ਪਾਰਾ. ੫੦੦) ਵਚਨਤੋ ਅਨਤ੍ਥਤਕਥਿਨੇ ਵਿਹਾਰੇ ‘‘ਚੀਵਰਮਾਸੋ’’ਤਿ ਯੋ ਪੁਬ੍ਬਕਤ੍ਤਿਕਕਾਲ਼ਪਕ੍ਖਪਾਟਿਪਦਤੋ ਪਟ੍ਠਾਯ ਯਾਵ ਅਪਰਕਤ੍ਤਿਕਪੁਣ੍ਣਮੀ, ਤਾਵ ਮਾਸੋ ਵੁਚ੍ਚਤਿ, ਤਤੋ ਪਰੇਸੁ ਏਕਾਦਸਸੁ ਮਾਸੇਸੁ ਉਪ੍ਪਨ੍ਨਞ੍ਚ ਅਤ੍ਥਤਕਥਿਨੇ ਵਿਹਾਰੇ ਯੋ ਚੀਵਰਮਾਸੋ, ਹੇਮਨ੍ਤਾ ਚ ਚਤ੍ਤਾਰੋ ਮਾਸਾਤਿ ਪਞ੍ਚਮਾਸਤੋ ਬਹਿ ਸਤ੍ਤਸੁ ਮਾਸੇਸੁ ਉਪ੍ਪਨ੍ਨਞ੍ਚ ਅਤ੍ਥਤਕਥਿਨੇ ਪਞ੍ਚ ਮਾਸਾ ਯਥਾਪਰਿਚ੍ਛਿਨ੍ਨਕਾਲੇ ਸਙ੍ਘਸ੍ਸ ਚ ‘‘ਇਦਂ ਅਕਾਲਚੀਵਰਂ ਦਮ੍ਮੀ’’ਤਿ ਪੁਗ੍ਗਲਸ੍ਸ ਚ ‘‘ਇਦਂ ਤੁਯ੍ਹਂ ਦਮ੍ਮੀ’’ਤਿ ਦਿਨ੍ਨਞ੍ਚੇਤਿ ਇਦਂ ਅਕਾਲਚੀਵਰਨ੍ਤਿ ਅਤ੍ਥੋ. ‘‘ਉਪ੍ਪਨ੍ਨ’’ਨ੍ਤਿ ਸੇਸੋ, ‘‘ਉਪ੍ਪਜ੍ਜੇਯ੍ਯ ਸਙ੍ਘਤੋ ਵਾ ਗਣਤੋ ਵਾ ਞਾਤਿਤੋ ਵਾ ਮਿਤ੍ਤਤੋ ਵਾ ਪਂਸੁਕੂਲਤੋ ਵਾ ਅਤ੍ਤਨੋ ਵਾ ਧਨੇਨਾ’’ਤਿ (ਪਾਰਾ. ੫੦੦) ਵਚਨਤੋ ਸਙ੍ਘਸ੍ਸ ਵਾ ‘‘ਇਦਂ ਸੁਤ੍ਤਨ੍ਤਿਕਗਣਸ੍ਸ ਦੇਮ, ਇਦਂ ਆਭਿਧਮ੍ਮਿਕਗਣਸ੍ਸ ਦੇਮਾ’’ਤਿਆਦਿਨਾ ਨਯੇਨ ਗਣਸ੍ਸ ਵਾ ਦਿਨ੍ਨਤੋ ਅਤ੍ਤਨੋ ਵਸ੍ਸਗ੍ਗੇਨ ਵਾ ਞਾਤਿਆਦਿਤੋ ਵਾ ਸੁਸਾਨਾਦਿਪਂਸੁਕੂਲਖੇਤ੍ਤਤੋ ਵਾ ਅਤ੍ਤਨੋ ਸਨ੍ਤਕੇਨ ਸੁਤ੍ਤਕਪ੍ਪਾਸਾਦਿਕਪ੍ਪਿਯਵਤ੍ਥੁਤੋ ਵਾ ਉਪ੍ਪਨ੍ਨਚੀਵਰਨ੍ਤਿ ਅਤ੍ਥੋ.

ਮਾਸਪਰਮਂ ਨਿਕ੍ਖਿਪੇਤਿ ਮਾਸੋ ਪਰਮਂ ਪਮਾਣਂ ਏਤਸ੍ਸ ਨਿਕ੍ਖਿਪਨਸ੍ਸਾਤਿ ਮਾਸਪਰਮਂ, ਨਿਕ੍ਖਿਪਨਨ੍ਤਿ ਕਿਰਿਯਾਵਿਸੇਸਨਂ ਕਾਤਬ੍ਬਂ, ਮਾਸਪਰਮਂ ਨਿਕ੍ਖਿਪਨਂ ਕਰੇਯ੍ਯਾਤਿ ਵੁਤ੍ਤਂ ਹੋਤਿ. ‘‘ਆਕਙ੍ਖਮਾਨੇਨ ਭਿਕ੍ਖੁਨਾ ਪਟਿਗ੍ਗਹੇਤਬ੍ਬਂ, ਪਟਿਗ੍ਗਹੇਤ੍ਵਾ ਖਿਪ੍ਪਮੇਵ ਕਾਰੇਤਬ੍ਬਂ, ਨੋ ਚਸ੍ਸ ਪਾਰਿਪੂਰੀ, ਮਾਸਪਰਮਂ ਤੇਨ ਭਿਕ੍ਖੁਨਾ ਤਂ ਚੀਵਰਂ ਨਿਕ੍ਖਿਪਿਤਬ੍ਬਂ ਊਨਸ੍ਸ ਪਾਰਿਪੂਰਿਯਾ’’ਤਿ (ਪਾਰਾ. ੫੦੦) ਵਚਨਤੋ ਏਵਂ ਉਪ੍ਪਨ੍ਨਂ ਚੀਵਰਂ ਇਚ੍ਛਨ੍ਤੇਨ ਪਟਿਗ੍ਗਹੇਤ੍ਵਾ ਸਚੇ ਪਹੋਤਿ, ਦਸਾਹਮਨਤਿਕ੍ਕਾਮੇਤ੍ਵਾ ਕਾਰੇਤਬ੍ਬਂ. ਸਚੇ ਨਪ੍ਪਹੋਤਿ, ਊਨਸ੍ਸ ਪਰਿਪੂਰਣਤ੍ਥਂ ਮਾਸਪਰਮਂ ਠਪੇਤਬ੍ਬਨ੍ਤਿ ਅਤ੍ਥੋ.

ਕਦਾ ਏਵਂ ਨਿਕ੍ਖਿਪਿਤਬ੍ਬਨ੍ਤਿ ਆਹ ‘‘ਸਤਿ ਪਚ੍ਚਾਸਾਯਾ’’ਤਿ, ‘‘ਪਚ੍ਚਾਸਾ ਹੋਤਿ ਸਙ੍ਘਤੋ ਵਾ ਗਣਤੋ ਵਾ ਞਾਤਿਤੋ ਵਾ ਮਿਤ੍ਤਤੋ ਵਾ ਪਂਸੁਕੂਲਤੋ ਵਾ ਅਤ੍ਤਨੋ ਵਾ ਧਨੇਨਾ’’ਤਿ (ਪਾਰਾ. ੫੦੦) ਵੁਤ੍ਤਸਙ੍ਘਾਦਿਤੋ ਅਤ੍ਤਨੋ ਵਸ੍ਸਗ੍ਗਾਦਿਤੋ ਲਭੇਯ੍ਯ, ਤੇਨ ‘‘ਇਮਸ੍ਸ ਊਨੇ ਪਰਿਪੁਣ੍ਣੇ ਕਾਰੇਸ੍ਸਾਮੀ’’ਤਿ ਪਚ੍ਚਾਸਾਯ ਸਤਿ ਏਵਂ ਨਿਕ੍ਖਿਪਿਤਬ੍ਬਨ੍ਤਿ ਅਤ੍ਥੋ. ਤਤੋ ਉਦ੍ਧਂਠਪੇਤੁਂ ਨ ਵਟ੍ਟਤੀਤਿ ਮਾਸਤੋ ਅਤਿਰੇਕਕਾਲਂ ਨਿਕ੍ਖਿਪਿਤੁਂ ਨ ਵਟ੍ਟਤਿ, ਨਿਸ੍ਸਗ੍ਗਿਯਪਾਚਿਤ੍ਤਿਯਂ ਹੋਤੀਤਿ ਅਤ੍ਥੋ.

ਯਦਿ ਏਵਂ ‘‘ਤਦਹੁਪ੍ਪਨ੍ਨੇ ਮੂਲਚੀਵਰੇ ਪਚ੍ਚਾਸਾਚੀਵਰਂ ਉਪ੍ਪਜ੍ਜਤਿ, ਦਸਾਹਾ ਕਾਰੇਤਬ੍ਬਂ…ਪੇ… ਵੀਸੇ ਉਪ੍ਪਨ੍ਨੇ ਮੂਲਚੀਵਰੇ ਪਚ੍ਚਾਸਾਚੀਵਰਂ ਉਪ੍ਪਜ੍ਜਤਿ, ਦਸਾਹਾ ਕਾਰੇਤਬ੍ਬ’’ਨ੍ਤਿ (ਪਾਰਾ. ੫੦੦) ਕਸ੍ਮਾ ਆਹਾਤਿ? ਪਚ੍ਚਾਸਾਚੀਵਰਸ੍ਸ ਦਸਦਿਵਸੇ ਅਤਿਕ੍ਕਮ੍ਮ ਠਪੇਤੁਂ ਅਯੁਤ੍ਤਤ੍ਤਾ, ਮੂਲਚੀਵਰਸ੍ਸ ਤਗ੍ਗਤਿਕਤ੍ਤਾ ਏਵਂ ਵੁਤ੍ਤਂ. ਯਥਾਹ ਅਟ੍ਠਕਥਾਯਂ ‘‘ਮੂਲਚੀਵਰਸ੍ਸ ਉਪ੍ਪਨ੍ਨਦਿਵਸਤੋ ਯਾਵ ਵੀਸਤਿਮੋ ਦਿਵਸੋ, ਤਾਵ ਉਪ੍ਪਨ੍ਨਂ ਪਚ੍ਚਾਸਾਚੀਵਰਂ ਮੂਲਚੀਵਰਂ ਅਤ੍ਤਨੋ ਗਤਿਕਂ ਕਰੋਤੀ’’ਤਿ (ਪਾਰਾ. ਅਟ੍ਠ. ੨.੫੦੦).

ਤਤਿਯਕਥਿਨਕਥਾਵਣ੍ਣਨਾ.

੬੧੮-੯. ਭਿਕ੍ਖੁਨਿਯਾ ਯੋ ਧੋਵਾਪੇਤੀਤਿ ਸਮ੍ਬਨ੍ਧੋ. ‘‘ਭਿਕ੍ਖੁਨੀ ਨਾਮ ਉਭਤੋਸਙ੍ਘੇ ਉਪਸਮ੍ਪਨ੍ਨਾ’’ਤਿ (ਪਾਰਾ. ੫੦੦) ਵਚਨਤੋ ਭਿਕ੍ਖੁਨਿਸਙ੍ਘੇ ਞਤ੍ਤਿਚਤੁਤ੍ਥਾਯ ਕਮ੍ਮਵਾਚਾਯ, ਭਿਕ੍ਖੁਸਙ੍ਘੇ ਞਤ੍ਤਿਚਤੁਤ੍ਥਾਯ ਕਮ੍ਮਵਾਚਾਯਾਤਿ ਅਟ੍ਠਵਾਚਿਕਾਯ ਉਪਸਮ੍ਪਨ੍ਨਾ ਭਿਕ੍ਖੁਨੀ ਨਾਮ. ਭੁਤ੍ਤਨ੍ਤਿ ਭਿਕ੍ਖੁਨਾ ਅਤ੍ਤਨਾ ਪਰਿਭੁਤ੍ਤਂ ਰਜਿਤਂ ਆਦਿਨ੍ਨਕਪ੍ਪਂ, ‘‘ਪਰਿਭੋਗਂ ਕਰਿਸ੍ਸਾਮੀ’’ਤਿ ਅਨ੍ਤਮਸੋ ਸੀਸਂ ਠਪੇਤ੍ਵਾ ਸਯਨਮਤ੍ਤੇਨਾਪਿ ਪੁਰਾਣਭੂਤਂ ਚੀਵਰਨ੍ਤਿ ਅਤ੍ਥੋ. ਯਥਾਹ ਅਟ੍ਠਕਥਾਯਂ ‘‘ਰਜਿਤ੍ਵਾ ਕਪ੍ਪਂ ਕਤ੍ਵਾ ਏਕਵਾਰਮ੍ਪਿ ਨਿਵਤ੍ਥਂ ਵਾ ਪਾਰੁਤਂ ਵਾ ਅਨ੍ਤਮਸੋ ਪਰਿਭੋਗਸੀਸੇਨ ਅਂਸੇ ਵਾ ਮਤ੍ਥਕੇ ਵਾ ਕਤ੍ਵਾ ਮਗ੍ਗਂ ਗਤੋ ਹੋਤਿ, ਉਸ੍ਸੀਸਕਂ ਵਾ ਕਤ੍ਵਾ ਨਿਪਨ੍ਨੋ ਹੋਤਿ, ਏਤਮ੍ਪਿ ਪੁਰਾਣਚੀਵਰਮੇਵਾ’’ਤਿ (ਪਾਰਾ. ਅਟ੍ਠ. ੨.੫੦੩-੫੦੫). ਵਤ੍ਥਨ੍ਤਿ ਕਾਰਿਯੇ ਕਾਰਣੋਪਚਾਰਵਸੇਨ ਚੀਵਰਮੇਵ ਆਹ.

ਅਞ੍ਞਾਤਿਕਾਯਾਤਿ ‘‘ਅਞ੍ਞਾਤਿਕਾ ਨਾਮ ਮਾਤਿਤੋ ਵਾ ਪਿਤਿਤੋ ਵਾ ਯਾਵ ਸਤ੍ਤਮਾ ਪਿਤਾਮਹਯੁਗਾ ਅਸਮ੍ਬਦ੍ਧਾ’’ਤਿ ਵਚਨਤੋ ਅਤ੍ਤਨੋ ਵਾ ਤਸ੍ਸਾ ਵਾ ਮਾਤੁ ਵਾ ਪਿਤੁ ਵਾ ਪਰਮ੍ਪਰਾਯ ਯਾਵ ਸਤ੍ਤਮਾ ਯੁਗਾ, ਏਤ੍ਥਨ੍ਤਰੇ ਯੇਨ ਕੇਨਚਿ ਞਾਤਕੇਨ ਅਸਮ੍ਬਦ੍ਧਭਾਵੇਨ ਅਞ੍ਞਾਤਿਕਾਯਾਤਿ ਅਤ੍ਥੋ. ਯਥਾ ਚਾਹ ਅਟ੍ਠਕਥਾਯਂ ‘‘ਪਿਤਾਮਹੋਯੇਵ ਪਿਤਾਮਹਯੁਗਂ. ਤਤੋ ਉਦ੍ਧਂ ਸਬ੍ਬੇਪਿ ਪੁਬ੍ਬਪੁਰਿਸਾ ਪਿਤਾਮਹਗ੍ਗਹਣੇਨੇਵ ਗਹਿਤਾ. ਏਵਂ ਯਾਵ ਸਤ੍ਤਮੋ ਪੁਰਿਸੋ, ਤਾਵ ਯਾ ਅਸਮ੍ਬਦ੍ਧਾ’’ਤਿ (ਪਾਰਾ. ਅਟ੍ਠ. ੨.੫੦੩-੫੦੫). ਆਕੋਟਾਪੇਤੀਤਿ ਪਹਰਾਪੇਤਿ.

ਤਤੋ ਧੋਵਾਪਨਾਦਿਤੋ. ਨਿਸ੍ਸਗ੍ਗਿਯਾਪਤ੍ਤੀਤਿ ਨਿਸ੍ਸਗ੍ਗਿਯਸ੍ਸ ਆਪਤ੍ਤਿ ਨਿਸ੍ਸਗ੍ਗਿਯਾਪਤ੍ਤਿ, ਨਿਸ੍ਸਗ੍ਗਿਯਸ੍ਸ ਚੀਵਰਸ੍ਸ ਨਾਮੇਨ ਵਿਸਿਟ੍ਠਾ ਪਾਚਿਤ੍ਤਿਯਾਪਤ੍ਤਿ ਹੋਤੀਤਿ ਅਤ੍ਥੋ. ਇਦਞ੍ਚ ਤਿਣ੍ਣਂ ਪਯੋਗਾਨਂ ਅਨ੍ਤੇ ਆਪਜ੍ਜਿਤਬ੍ਬਾਯ ਆਪਤ੍ਤਿਯਾ ਦਸ੍ਸਨਂ. ਤਸ੍ਸ ਨਿਯੋਗੇਨ ਧੋਵਨਾਦਿਂ ਕਰੋਨ੍ਤਿਯਾ ਭਿਕ੍ਖੁਨਿਯਾ ਤਦਤ੍ਥਂ ਸਬ੍ਬਪੁਬ੍ਬਪਯੋਗਗਣਨਾਯ ਭਿਕ੍ਖੁਨੋ ਦੁਕ੍ਕਟਂ ਹੋਤੀਤਿ ਗਹੇਤਬ੍ਬੋ. ਯਥਾਹ ਅਟ੍ਠਕਥਾਯਂ ‘‘ਯਾਵ ਨਂ ਧੋਵਿਤ੍ਵਾ ਉਕ੍ਖਿਪਤਿ, ਤਾਵ ਭਿਕ੍ਖੁਨਿਯਾ ਪਯੋਗੇ ਪਯੋਗੇ ਭਿਕ੍ਖੁਸ੍ਸ ਦੁਕ੍ਕਟ’’ਨ੍ਤਿ (ਪਾਰਾ. ਅਟ੍ਠ. ੨.੫੦੩-੫੦੫). ਪਠਮੇਨਾਤਿ ਤੀਣਿਪਿ ਕਾਰਾਪੇਨ੍ਤਸ੍ਸ ਯਂ ਪਠਮਂ ਕਾਰਾਪੇਤਿ, ਤੇਨਾਤਿ ਅਤ੍ਥੋ. ਦੀਪਿਤਨ੍ਤਿ ‘‘ਅਞ੍ਞਾਤਿਕਾਯ ਅਞ੍ਞਾਤਿਕਸਞ੍ਞੀ ਪੁਰਾਣਚੀਵਰਂ ਧੋਵਾਪੇਤਿ ਰਜਾਪੇਤਿ ਆਕੋਟਾਪੇਤਿ, ਨਿਸ੍ਸਗ੍ਗਿਯੇਨ ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨ’’ਨ੍ਤਿਆਦਿਨਾ (ਪਾਰਾ. ੫੦੬) ਦੇਸਿਤਂ. ਇਮਿਨਾ ਨਯੇਨ ਦ੍ਵੇ ਕਾਰਾਪੇਨ੍ਤਸ੍ਸ ਪਠਮੇਨ ਨਿਸ੍ਸਗ੍ਗਿਯਾਪਤ੍ਤਿ, ਦੁਤਿਯੇਨ ਦੁਕ੍ਕਟਨ੍ਤਿ ਅਯਮਤ੍ਥੋ ਸਙ੍ਗਯ੍ਹਤਿ.

੬੨੦. ‘‘ਧੋਵਨਤ੍ਥਾਯ ਦੇਤੀ’’ਤਿ ਇਮਿਨਾ ‘‘ਭੁਤ੍ਤਂ ਵਤ੍ਥ’’ਨ੍ਤਿ ਅਧਿਕਾਰਤੋ ਲਬ੍ਭਤਿ.

੬੨੧. ਸਾਮਣੇਰਨਿਦ੍ਦੇਸੇਪੀਤਿ ‘‘ਸਾਮਣੇਰਾ’’ਤਿ ਨਿਦ੍ਦੇਸੋ ਨਾਮ ਯਸ੍ਸ, ਤਸ੍ਮਿਮ੍ਪਿ, ਅਤ੍ਤਨਾ ਪਰਿਭੁਤ੍ਤਂ ਵਤ੍ਥਂ ਧੋਵਨਤ੍ਥਾਯ ਦੇਤੀਤਿ ਯੋਜਨਾ, ਅਤ੍ਤਨੋ ਪਰਿਭੁਤ੍ਤਂ ਚੀਵਰਂ ਧੋਵਨਤ੍ਥਾਯ ਸਾਮਣੇਰਸ੍ਸ ਦੇਤੀਤਿ ਅਤ੍ਥੋ. ਪਿ-ਸਦ੍ਦੋ ਸਮੁਚ੍ਚਯਤ੍ਥੋ. ਉਪਸਮ੍ਪਜ੍ਜਾਤਿ ਪੁਬ੍ਬਕਿਰਿਯਾਯ ‘‘ਧੋਵਤੀ’’ਤਿ ਅਪਰਕਿਰਿਯਾ ਸਾਮਤ੍ਥਿਯਾ ਲਬ੍ਭਤਿ.

੬੨੨. ਦਹਰਾਨਞ੍ਚ ਭਿਕ੍ਖੂਨਨ੍ਤਿ ਅਤ੍ਤਨੋ ਨਵਕਤਰਾਨਂ ਭਿਕ੍ਖੂਨਂ. ਨਿਯ੍ਯਾਦਿਤੇ ਦਿਨ੍ਨੇ. ਏਸ ਨਯੋਤਿ ‘‘ਏਕੇਨ ਪਾਚਿਤ੍ਤਿਯਂ, ਅਵਸਿਟ੍ਠੇਹਿ ਦ੍ਵੀਹਿ ਵਾ ਏਕੇਨ ਵਾ ਸਬ੍ਬਪਯੋਗੇਸੁ ਦੁਕ੍ਕਟਂ ਹੋਤੀ’’ਤਿ ਨਯੋ.

੬੨੩. ਚੀਵਰੇਤਿ ਪਰਿਭੁਤ੍ਤਚੀਵਰੇ.

੬੨੪. ‘‘ਧੋਵਨਪ੍ਪਚ੍ਚਯਾਯੇਵਾ’’ਤਿ ਇਮਿਨਾ ਇਤਰਦ੍ਵਯਸ੍ਸ ਤਸ੍ਸ ਅਨਾਣਤ੍ਤਿਯਾ ਕਤਤ੍ਤਾ ਤਤੋ ਅਨਾਪਤ੍ਤਿਭਾਵਮਾਹ.

੬੨੬. ਞਾਤਿਕਾਤਿ ਏਤ੍ਥ ‘‘ਪਟਿਸਙ੍ਖਾ ਯੋਨਿਸੋ’’ਤਿਆਦੀਸੁ (ਮ. ਨਿ. ੧.੨੨-੨੩, ੪੨੨; ਅ. ਨਿ. ੬.੫੮; ੮.੯; ਮਹਾਨਿ. ੨੦੬; ਧ. ਸ. ੧੩੫੫; ਵਿਭ. ੫੧੮) ਵਿਯ ਗਾਥਾਬਨ੍ਧਵਸੇਨ ਯ-ਕਾਰਲੋਪੋ, ਞਾਤਿਕਾਯ ਭਿਕ੍ਖੁਨਿਯਾਤਿ ਅਤ੍ਥੋ. ‘‘ਞਾਤਿਕਾ ਅਞ੍ਞਾਤਿਸਞ੍ਞਿਸ੍ਸਾ’’ਤਿ ਪਦਚ੍ਛੇਦੋ. ਪਚ੍ਚਤ੍ਥਰਣਨ੍ਤਿ ਮਞ੍ਚਪੀਠੇ ਅਤ੍ਥਰਿਤਬ੍ਬਂ ਪਚ੍ਚਤ੍ਥਰਣਚੀਵਰਞ੍ਚ.

੬੨੭. ‘‘ਭਿਕ੍ਖੁਨੀਨਂ ਵਸੇਨਾ’’ਤਿ ਇਦਂ ਭਿਕ੍ਖੁਸਙ੍ਘੇਪਿ ਉਪਸਮ੍ਪਨ੍ਨਾ ਚੇ, ਪਾਚਿਤ੍ਤਿਯਸਮ੍ਭਵਾ ਵੁਤ੍ਤਂ. ਯਥਾਹ ਅਟ੍ਠਕਥਾਯਂ ‘‘ਭਿਕ੍ਖੂਨਂ ਸਨ੍ਤਿਕੇ ਉਪਸਮ੍ਪਨ੍ਨਾਯ ਪਨ ਯਥਾਵਤ੍ਥੁਕਮੇਵਾ’’ਤਿ (ਪਾਰਾ. ਅਟ੍ਠ. ੨.੫੦੬). ਭਿਕ੍ਖੁਨਿਸਙ੍ਘੇ ਪਠਮਂ ਉਪਸਮ੍ਪਜ੍ਜਿਤ੍ਵਾ ਪਚ੍ਛਾ ਭਿਕ੍ਖੁਸਙ੍ਘੇ ਚੇ ਉਪਸਮ੍ਪਜ੍ਜਤਿ, ਕੇਵਲਂ ਭਿਕ੍ਖੁਸਙ੍ਘੇ ਉਪਸਮ੍ਪਨ੍ਨਾਤਿ ਨ ਵੁਚ੍ਚਤੀਤਿ ਤਾ ਭਗਵਤਿ ਧਰਮਾਨੇ ਪਠਮਂ ਪਬ੍ਬਜਿਤਾ ਪਞ੍ਚਸਤਾ ਸਾਕਿਯਾਨਿਯੋ ਵੁਚ੍ਚਨ੍ਤਿ. ਯਥਾਹ ਅਟ੍ਠਕਥਾਯਂ ‘‘ਭਿਕ੍ਖੂਨਂ ਸਨ੍ਤਿਕੇ ਉਪਸਮ੍ਪਨ੍ਨਾ ਨਾਮ ਪਞ੍ਚਸਤਾ ਸਾਕਿਯਾਨਿਯੋ’’ਤਿ (ਪਾਰਾ. ਅਟ੍ਠ. ੨.੫੦੬). ਭਿਕ੍ਖੁਨੋ ਲਿਙ੍ਗੇ ਪਰਿਵਤ੍ਤੇ ਤਸ੍ਸੇਵ ਉਪਸਮ੍ਪਨ੍ਨਕਮ੍ਮਸ੍ਸ ਅਨੁਞ੍ਞਾਤਤ੍ਤਾ ਸੋਪਿ ਗਹੇਤਬ੍ਬੋਯੇਵ.

੬੨੮. ਅਵੁਤ੍ਤਾ ਧੋਵਤੀਤਿ ‘‘ਇਮਂ ਚੀਵਰਂ ਧੋਵਾ’’ਤਿ ਅਵੁਤ੍ਤਾ ਚੀਵਰਂ ਕਿਲਿਟ੍ਠਂ ਦਿਸ੍ਵਾ ਅਵਤ੍ਵਾ ਠਪਿਤਟ੍ਠਾਨਤੋ ਚੀਵਰਂ ਗਹੇਤ੍ਵਾ ਵਾ ਸਯਮੇਵ ਵਤ੍ਵਾ ਯਾਚਨਾਦਿਨਯੇਨ ਵਾ ਅਨਾਣਤ੍ਤਿਯਾ ਚ ਗਹੇਤ੍ਵਾ ਚੀਵਰਧੋਵਨਾਦਿਂ ਕਰੇਯ੍ਯ ਚੇ. ਅਪਰਿਭੁਤ੍ਤਂ ਵਾਤਿ ਹੇਟ੍ਠਾ ਵੁਤ੍ਤਨਯੇਨ ਅਪਰਿਭੁਤ੍ਤਂ ਚੀਵਰਂ. ਅਞ੍ਞਂ ਵਾਤਿ ਉਪਾਹਨਤ੍ਥਵਿਕਪਤ੍ਤਤ੍ਥਵਿਕਪੋਤ੍ਥਕਤ੍ਥਵਿਕਮਞ੍ਚਪੀਠਾਦਿਂ ਯਂ ਕਿਞ੍ਚਿ ਪਰਿਕ੍ਖਾਰਂ.

ਪੁਰਾਣਚੀਵਰਧੋਵਾਪਨਕਥਾਵਣ੍ਣਨਾ.

੬੨੯. ਵਿਕਪ੍ਪਨੁਪਗਂ ਪਚ੍ਛਿਮਂ ਉਪਾਦਾਯ ਕਿਞ੍ਚਿ ਚੀਵਰਂ ਗਣ੍ਹਤੋਤਿ ਯੋਜਨਾ, ਏਤ੍ਥ ‘‘ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਹਤ੍ਥਤੋ’’ਤਿ ਚ ‘‘ਞਾਤਿਕਾਯ ਅਞ੍ਞਾਤਿਕਸਞ੍ਞਿਸ੍ਸਾ’’ਤਿ ਚ ‘‘ਏਕਤੋਉਪਸਮ੍ਪਨ੍ਨਾਯ ਹਤ੍ਥਤੋ ਗਣ੍ਹਾਤੀ’’ਤਿ ਚ ਵਕ੍ਖਮਾਨਵਚਨਸਾਮਤ੍ਥਿਯਾ ਲਬ੍ਭਮਾਨਤੋ ਪੁਬ੍ਬੇ ਵੁਤ੍ਤਨਯੇਨ ਅਞ੍ਞਾਤਿਕਾਯ ਉਭਤੋਸਙ੍ਘੇ ਉਪਸਮ੍ਪਨ੍ਨਾਯ ਭਿਕ੍ਖੁਨਿਯਾ ਹਤ੍ਥਤੋ ਵਿਕਪ੍ਪਨੁਪਗਰਤਨਵਿਦਤ੍ਥਿਪ੍ਪਮਾਣਵਤ੍ਥਤੋ ਪਟ੍ਠਾਯ ਯਂ ਕਿਞ੍ਚਿ ਚੀਵਰਂ ਗਣ੍ਹਨ੍ਤਸ੍ਸਾਤਿ ਅਤ੍ਥੋ. ‘‘ਆਪਤ੍ਤੀ’’ਤਿ ਸਾਮਞ੍ਞੇਨ ਵੁਤ੍ਤੇਪਿ ‘‘ਨਿਸ੍ਸਗ੍ਗਿਯਾ ਪਾਚਿਤ੍ਤਿਯਾਪਤ੍ਤੀ’’ਤਿ ਪਕਰਣਤੋ ਚ ‘‘ਨਿਸ੍ਸਗ੍ਗਿਯਾਪਤ੍ਤੀ’’ਤਿ ਵਕ੍ਖਮਾਨਤੋ ਚ ਲਬ੍ਭਤਿ. ਠਪੇਤ੍ਵਾ ਪਾਰਿਵਤ੍ਤਕਨ੍ਤਿ ‘‘ਪਾਰਿਵਤ੍ਤਕਂ ਪਰਿਤ੍ਤੇਨ ਵਾ ਵਿਪੁਲਂ, ਵਿਪੁਲੇਨ ਵਾ ਪਰਿਤ੍ਤ’’ਨ੍ਤਿ (ਪਾਰਾ. ੫੧੪) ਵਚਨਤੋ ਮਹਾਪਚ੍ਚਰਿਯਂ ‘‘ਅਨ੍ਤਮਸੋ ਹਰੀਤਕਖਣ੍ਡੇਨਾਪੀ’’ਤਿ (ਪਾਰਾ. ਅਟ੍ਠ. ੨.੫੧੪) ਵੁਤ੍ਤਤ੍ਤਾ ਚ ਹੇਟ੍ਠਿਮਨ੍ਤਤੋ ਹਰੀਤਕਖਣ੍ਡਮ੍ਪਿ ਦਤ੍ਵਾ ਗਹੇਤਬ੍ਬਂ ਤਿਚੀਵਰਞ੍ਚ ਪਾਰਿਵਤ੍ਤਕਂ ਨਾਮ ਹੋਤਿ, ਤਂ ਠਪੇਤ੍ਵਾਤਿ ਵੁਤ੍ਤਂ ਹੋਤਿ. ਪਰਿਵਤ੍ਤਨਂ ਪਰਿਵਤ੍ਤਂ, ਤਂ ਏਤਸ੍ਸ ਅਤ੍ਥੀਤਿ ਪਾਰਿਵਤ੍ਤਕਂ, ਕਯਵਿਕ੍ਕਯੇਨ ਗਹੇਤਬ੍ਬਂ ਚੀਵਰਨ੍ਤਿ ਅਤ੍ਥੋ.

੬੩੦. ਗਹਣਤ੍ਥਾਯ ਪਯੋਗੇਤਿ ਗਣ੍ਹਿਤੁਂ ਹਤ੍ਥਪਸਾਰਣਾਦਿਪ੍ਪਯੋਗੇ. ਪਰਿਯਾਪੁਤਨ੍ਤਿ ‘‘ਪਟਿਗ੍ਗਣ੍ਹਾਤਿ ਪਯੋਗੇ ਦੁਕ੍ਕਟ’’ਨ੍ਤਿ (ਪਾਰਾ. ੫੧੨) ਦੇਸਿਤਂ.

੬੩੧. ਅਨੁਪਸਮ੍ਪਨ੍ਨਹਤ੍ਥੇਤਿ ਭਿਕ੍ਖੁਭਿਕ੍ਖੁਨਿਤੋ ਅਞ੍ਞੇ ਸਬ੍ਬੇ ਅਨੁਪਸਮ੍ਪਨ੍ਨਾ ਗਹਿਤਾ. ਯਥਾਹ ਅਟ੍ਠਕਥਾਯਂ ‘‘ਸਚੇ ਪਨ ਸਿਕ੍ਖਮਾਨਾਸਾਮਣੇਰਸਾਮਣੇਰਿਉਪਾਸਕਉਪਾਸਿਕਾਨਂ ਹਤ੍ਥੇ ਪੇਸਿਤਂ ਪਟਿਗ੍ਗਣ੍ਹਾਤਿ, ਅਨਾਪਤ੍ਤੀ’’ਤਿ (ਪਾਰਾ. ਅਟ੍ਠ. ੨.੫੧੨).

੬੩੨. ਏਕਤੋਤਿ ਏਤ੍ਥ ਭਿਕ੍ਖੁਨਿਸਙ੍ਘਤੋਤਿ ਗਹੇਤਬ੍ਬਂ. ਅਞ੍ਞਸ੍ਮਿਂ ਪਕ੍ਖੇ ਪਾਚਿਤ੍ਤਿਯਮੇਵ. ਯਥਾਹ ਅਟ੍ਠਕਥਾਯਂ ‘‘ਭਿਕ੍ਖੂਨਂ ਸਨ੍ਤਿਕੇ ਉਪਸਮ੍ਪਨ੍ਨਾਯ ਪਨ ਪਾਚਿਤ੍ਤਿਯਮੇਵਾ’’ਤਿ (ਪਾਰਾ. ਅਟ੍ਠ. ੨.੫੧੩).

੬੩੩. ‘‘ਪਾਰਿਵਤ੍ਤਕਂ ਦਸ੍ਸਾਮੀ’’ਤਿ ਆਭੋਗਂ ਕਤ੍ਵਾ ਗਣ੍ਹਾਤਿ, ਦੋਸੋ ਨ ਵਿਜ੍ਜਤੀਤਿ ਯੋਜਨਾ.

੬੩੪. ਅਞ੍ਞਂ ਪਰਿਕ੍ਖਾਰਨ੍ਤਿ ਥਵਿਕਕਾਯਬਨ੍ਧਨਾਦਿ ਅਵਿਕਪ੍ਪਿਯਂ ਵਾ ਅਵਿਕਪ੍ਪਨੁਪਗਂ ਵਾ ਪਰਿਕ੍ਖਾਰਮੇਵ ਗਹੇਤਬ੍ਬਂ. ਵਿਕਪ੍ਪਨੁਪਗਂ ਪਨ ਨ ਵਟ੍ਟਤਿ. ਯਥਾਹ ਅਟ੍ਠਕਥਾਯਂ ‘‘ਵਿਕਪ੍ਪਨੁਪਗਂ ਪਚ੍ਛਿਮਚੀਵਰਪ੍ਪਮਾਣਂ ਪਨ ਪਟਪਰਿਸ੍ਸਾਵਨਮ੍ਪਿ ਨ ਵਟ੍ਟਤੀ’’ਤਿ (ਪਾਰਾ. ਅਟ੍ਠ. ੨.੫੧੪). ਚੀਵਰਪਟਿਗ੍ਗਣ੍ਹਨਂ ਕਿਰਿਯਾ, ਪਾਰਿਵਤ੍ਤਕਸ੍ਸ ਅਦਾਨਂ ਅਕਿਰਿਯਾਤਿ ਕਿਰਿਯਾਯ ਚ ਅਕਿਰਿਯਾਯ ਚ ਆਪਜ੍ਜਿਤਬ੍ਬਤੋ ਕ੍ਰਿਯਾਕ੍ਰਿਯਂ.

ਚੀਵਰਪਟਿਗ੍ਗਹਣਕਥਾਵਣ੍ਣਨਾ.

੬੩੫. ‘‘ਅਞ੍ਞਾਤਕਂ ਅਪ੍ਪਵਾਰਿਤ’’ਨ੍ਤਿ ਪਦਚ੍ਛੇਦੋ. ‘‘ਗਹਪਤਿਂ ਵਾ ਗਹਪਤਾਨਿਂ ਵਾ’’ਤਿ ਪਾਠਸੇਸੋ. ਵੁਤ੍ਤਞ੍ਹਿ ਭਗਵਤਾ ‘‘ਅਞ੍ਞਾਤਕਂ ਗਹਪਤਿਂ ਵਾ ਗਹਪਤਾਨਿਂ ਵਾ’’ਤਿ (ਪਾਰਾ. ੫੧੬, ੫੧੮). ਪੁਬ੍ਬੇ ਵੁਤ੍ਤਨਯੇਨ ਯਾਵ ਸਤ੍ਤਮਾ ਪਿਤਾਮਹਯੁਗਾ ਸਮ੍ਬਦ੍ਧਞ੍ਞਾਤਿਕਤਾਯ ਅਭਾਵਤੋ ਅਞ੍ਞਾਤਕਂ. ‘‘ਯਂ ਮਯ੍ਹਂ ਗੇਹੇ ਅਤ੍ਥਿ, ਤਂ ਪਵਾਰੇਮੀ’’ਤਿਆਦਿਨਾ ਨਯੇਨ ਅਪ੍ਪਵਾਰਿਤਂ. ‘‘ਗਹਪਤਿ ਨਾਮ ਯੋ ਕੋਚਿ ਅਗਾਰਂ ਅਜ੍ਝਾਵਸਤੀ’’ਤਿ (ਪਾਰਾ. ੫੧੯) ਪਾਲ਼ਿਯਂ ਵੁਤ੍ਤਂ ਗਹਪਤਿਂ ਵਾ. ‘‘ਗਹਪਤਾਨੀ ਨਾਮ ਯਾ ਕਾਚਿ ਅਗਾਰਂ ਅਜ੍ਝਾਵਸਤੀ’’ਤਿ (ਪਾਰਾ. ੫੧੯) ਪਾਲ਼ਿਯਂ ਵੁਤ੍ਤਂ ਘਰਣਿਂ ਵਾਤਿ ਅਤ੍ਥੋ.

ਹੋਤਿ ਨਿਸ੍ਸਗ੍ਗਿਯਾਪਤ੍ਤੀਤਿ ‘‘ਅਞ੍ਞਤ੍ਰ ਸਮਯਾ ਵਿਞ੍ਞਾਪੇਤਿ, ਪਯੋਗੇ ਦੁਕ੍ਕਟਂ, ਪਟਿਲਾਭੇਨ ਨਿਸ੍ਸਗ੍ਗਿਯਂ ਹੋਤੀ’’ਤਿ (ਪਾਰਾ. ੫੧੯) ਪਾਲ਼ਿਯਂ ਵੁਤ੍ਤੇਸੁ ਸਬ੍ਬੇਸੁ ਪੁਬ੍ਬਪਯੋਗੇਸੁ ਦੁਕ੍ਕਟੇਨ ਸਦ੍ਧਿਂ ਨਿਸ੍ਸਗ੍ਗਿਯਪਾਚਿਤ੍ਤਿਯਂ ਹੋਤੀਤਿ ਵੁਤ੍ਤਂ ਹੋਤਿ. ਅਞ੍ਞਤ੍ਰ ਸਮਯਾਤਿ ‘‘ਤਤ੍ਥਾਯਂ ਸਮਯੋ, ਅਚ੍ਛਿਨ੍ਨਚੀਵਰੋ ਵਾ ਹੋਤਿ ਭਿਕ੍ਖੁ ਨਟ੍ਠਚੀਵਰੋ ਵਾ’’ਤਿ (ਪਾਰਾ. ੫੧੮) ਮਾਤਿਕਾਯ, ‘‘ਅਚ੍ਛਿਨ੍ਨਚੀਵਰੋ ਨਾਮ ਭਿਕ੍ਖੁਸ੍ਸ ਚੀਵਰਂ ਅਚ੍ਛਿਨ੍ਨਂ ਹੋਤਿ ਰਾਜੂਹਿ ਵਾ ਚੋਰੇਹਿ ਵਾ ਧੁਤ੍ਤੇਹਿ ਵਾ ਯੇਹਿ ਕੇਹਿਚਿ ਵਾ ਅਚ੍ਛਿਨ੍ਨਂ ਹੋਤਿ. ਨਟ੍ਠਚੀਵਰੋ ਨਾਮ ਭਿਕ੍ਖੁਸ੍ਸ ਚੀਵਰਂ ਅਗ੍ਗਿਨਾ ਵਾ ਦਡ੍ਢਂ ਹੋਤਿ, ਉਦਕੇਨ ਵਾ ਵੂਲ਼੍ਹਂ ਹੋਤਿ, ਉਨ੍ਦੂਰੇਹਿ ਵਾ ਉਪਚਿਕਾਹਿ ਵਾ ਖਾਯਿਤਂ ਹੋਤੀ’’ਤਿ (ਪਾਰਾ. ੫੧੯) ਪਦਭਾਜਨੇ ਚ ਨਿਦ੍ਦਿਟ੍ਠਸਰੂਪਕਾਲਤੋ ਅਞ੍ਞਤ੍ਰਾਤਿ ਅਤ੍ਥੋ.

੬੩੬. ਤਿਕਪਾਚਿਤ੍ਤਿਯਂ ਵੁਤ੍ਤਨ੍ਤਿ ‘‘ਅਞ੍ਞਾਤਕੇ ਅਞ੍ਞਾਤਕਸਞ੍ਞੀ, ਵੇਮਤਿਕੋ, ਞਾਤਕਸਞ੍ਞੀ ਅਞ੍ਞਤ੍ਰ ਸਮਯਾ ਚੀਵਰਂ ਵਿਞ੍ਞਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯ’’ਨ੍ਤਿ (ਪਾਰਾ. ੫੨੦) ਪਾਚਿਤ੍ਤਿਯਤ੍ਤਯਂ ਭਗਵਤਾ ਵੁਤ੍ਤਂ. ‘‘ਞਾਤਕੇ ਅਞ੍ਞਾਤਿਸਞ੍ਞਿਸ੍ਸਾ’’ਤਿ ਪਦਚ੍ਛੇਦੋ. ਤਤ੍ਥਾਤਿ ਤਸ੍ਮਿਂ ਞਾਤਕੇ. ਵੇਮਤਿਕਸ੍ਸਾਤਿ ‘‘ਞਾਤਕੋ ਨੁ ਖੋ, ਅਞ੍ਞਾਤਕੋ’’ਤਿ ਵੇਮਤਿਕਸ੍ਸ. ਦ੍ਵਿਕਦੁਕ੍ਕਟਂ ਤਥੇਵਾਤਿ ਯੋਜਨਾ. ‘‘ਤਥੇਵਾ’’ਤਿ ‘‘ਵੁਤ੍ਤ’’ਨ੍ਤਿ ਇਦਂ ਆਕਡ੍ਢਤਿ, ‘‘ਞਾਤਕੇ ਅਞ੍ਞਾਤਕਸਞ੍ਞੀ, ਵੇਮਤਿਕੋ ਅਞ੍ਞਤ੍ਰ ਸਮਯਾ ਚੀਵਰਂ ਵਿਞ੍ਞਾਪੇਤਿ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਪਾਰਾ. ੫੨੦) ਦੇਸਿਤਨ੍ਤਿ ਅਤ੍ਥੋ.

੬੩੭-੮. ਸਮਯੇ ਵਿਞ੍ਞਾਪੇਨ੍ਤਸ੍ਸ ਅਨਾਪਤ੍ਤੀਤਿ ਯੋਜਨਾ. ਏਤ੍ਥ ‘‘ਚੀਵਰਂ ਅਞ੍ਞਾਤਕਅਪ੍ਪਵਾਰਿਤ’’ਨ੍ਤਿ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ, ਯਥਾਪਰਿਚ੍ਛਿਨ੍ਨਕਾਲਦ੍ਵਯਤੋ ਅਞ੍ਞਤਰਸ੍ਮਿਂ ਕਾਲੇ ਅਞ੍ਞਾਤਕਅਪ੍ਪਵਾਰਿਤਂ ਚੀਵਰਂ ਵਿਞ੍ਞਾਪੇਨ੍ਤਸ੍ਸ ਅਨਾਪਤ੍ਤੀਤਿ ਅਤ੍ਥੋ. ਞਾਤਕੇ ਵਾ ਪਵਾਰਿਤੇਤਿ ਏਤ੍ਥਾਪਿ ‘‘ਅਤ੍ਤਨੋ’’ਤਿ ਅਜ੍ਝਾਹਾਰੋ, ‘‘ਸਮਯੇ’’ਤਿ ਇਮਿਨਾ ਯੋਜੇਤਬ੍ਬਂ, ਅਤ੍ਤਨੋ ਞਾਤਕਪਵਾਰਿਤੇ ਅਸਮਯੇਪਿ ਚੀਵਰਂ ਵਿਞ੍ਞਾਪੇਨ੍ਤਸ੍ਸ ਅਨਾਪਤ੍ਤੀਤਿ ਅਤ੍ਥੋ. ਅਞ੍ਞਸ੍ਸਤ੍ਥਾਯਾਤਿ ਏਤ੍ਥ ‘‘ਅਤ੍ਤਨੋ’’ਤਿ ਸੇਸੋ, ਅਤ੍ਤਨੋ ਞਾਤਕੇ, ਪਵਾਰਿਤੇ ਵਾ ਵਿਞ੍ਞਾਪੇਨ੍ਤਸ੍ਸ ਅਨਾਪਤ੍ਤੀਤਿ ਯੋਜਨਾ, ਅਞ੍ਞਂ ਭਿਕ੍ਖੁਂ ਨਿਸ੍ਸਾਯ ਅਤ੍ਤਨੋ ਞਾਤਕੇ ਵਾ ਪਵਾਰਿਤੇ ਵਾ ਚੀਵਰਂ ਵਿਞ੍ਞਾਪੇਨ੍ਤਸ੍ਸ ਅਨਾਪਤ੍ਤੀਤਿ ਵੁਤ੍ਤਂ ਹੋਤਿ. ਇਤਰਂ ਪਕ੍ਖਂ ਦਸ੍ਸੇਤਿ ‘‘ਤਸ੍ਸ ਞਾਤਕੇ ਵਾ ਪਵਾਰਿਤੇ ਵਾ’’ਤਿ. ਤਸ੍ਸਾਤਿ ‘‘ਅਞ੍ਞਸ੍ਸਾ’’ਤਿ ਵੁਤ੍ਤਸ੍ਸ, ‘‘ਵਿਞ੍ਞਾਪੇਨ੍ਤਸ੍ਸ ਅਨਾਪਤ੍ਤੀ’’ਤਿ ਇਮਿਨਾ ਯੋਜੇਤਬ੍ਬਂ. ਵਾਤਿ ਪੁਰਿਮਵਿਕਪ੍ਪਾਪੇਕ੍ਖਂ. ਯਂ ਸਨ੍ਧਾਯ ਚੀਵਰਂ ਵਿਞ੍ਞਾਪੇਤਿ, ਤਸ੍ਸ ਞਾਤਕੇ ਵਾ ਪਵਾਰਿਤੇ ਵਾ ਤਂਯੇਵ ਸਨ੍ਧਾਯ ਚੀਵਰਂ ਵਿਞ੍ਞਾਪੇਨ੍ਤਸ੍ਸ ਅਨਾਪਤ੍ਤੀਤਿ ਵੁਤ੍ਤਂ ਹੋਤਿ.

‘‘ਅਤ੍ਤਨੋ ਵਾ ਧਨੇਨਾ’’ਤਿ ਵੁਤ੍ਤਂ ਅਨਾਪਤ੍ਤਿਅਙ੍ਗਂ ਉਮ੍ਮਤ੍ਤਕਾਦਿਨੋਤਿ ਏਤ੍ਥ ਆਦਿ-ਸਦ੍ਦੇਨ ਸਙ੍ਗਯ੍ਹਤਿ, ਅਤ੍ਤਨੋ ਸਨ੍ਤਕਂ ਸੁਤ੍ਤਕਪ੍ਪਾਸਾਦਿਕਂ ਕਪ੍ਪਿਯਵਤ੍ਥੁਂ ਦਤ੍ਵਾ ਗਣ੍ਹਿਤੁਕਾਮਤਾਯ ਅਕਪ੍ਪਿਯਵੋਹਾਰੇਨ ਯਾਚਨ੍ਤਸ੍ਸ ਚ ਅਨਾਪਤ੍ਤੀਤਿ ਅਤ੍ਥੋ.

ਅਞ੍ਞਾਤਕਵਿਞ੍ਞਤ੍ਤਿਕਥਾਵਣ੍ਣਨਾ.

੬੩੯. ਅਪ੍ਪਵਾਰਿਤਮਞ੍ਞਾਤਿਨ੍ਤਿ ਏਤ੍ਥ ‘‘ਗਹਪਤਿਂ ਵਾ ਗਹਪਤਾਨਿਂ ਵਾ’’ਤਿ ਇਦਂ ਸਾਮਤ੍ਥਿਯਾ ਲਬ੍ਭਤਿ. ਤਤੁਤ੍ਤਰਿਨ੍ਤਿ ਤਤੋ ਸਨ੍ਤਰੁਤ੍ਤਰਪਰਮਤੋ ਉਤ੍ਤਰਿਨ੍ਤਿ ਗਹੇਤਬ੍ਬਂ, ‘‘ਸਨ੍ਤਰੁਤ੍ਤਰਪਰਮਂ ਤੇਨ ਭਿਕ੍ਖੁਨਾ ਤਤੋ ਚੀਵਰਂ ਸਾਦਿਤਬ੍ਬ’’ਨ੍ਤਿ (ਪਾਰਾ. ੫੨੩) ਵੁਤ੍ਤਤ੍ਤਾ ਅਚ੍ਛਿਨ੍ਨਚੀਵਰੇਨ ਸਾਦਿਤਬ੍ਬਅਨ੍ਤਰਵਾਸਕਉਤ੍ਤਰਾਸਙ੍ਗਮਤ੍ਤੇਨ ਅਧਿਕਨ੍ਤਿ ਅਤ੍ਥੋ.

‘‘ਤਤੋ ਚੇ ਉਤ੍ਤਰਿ ਸਾਦਿਯੇਯ੍ਯਾ’’ਤਿ (ਪਾਰਾ. ੫੨੩) ਵਚਨਤੋ ‘‘ਸਾਦਿਯਨ੍ਤਸ੍ਸਾ’’ਤਿ ਵਤ੍ਤਬ੍ਬਂ, ਏਵਂ ਵਤ੍ਤਬ੍ਬੇ ‘‘ਵਿਞ੍ਞਾਪੇਨ੍ਤਸ੍ਸਾ’’ਤਿ ਕਸ੍ਮਾ ਵੁਤ੍ਤਨ੍ਤਿ? ਅਚ੍ਛਿਨ੍ਨਚੀਵਰਾਨਂ ਭਿਕ੍ਖੂਨਂ ਛਬ੍ਬਗ੍ਗਿਯੇਹਿ ਭਿਕ੍ਖੂਹਿ ਚੀਵਰਵਿਞ੍ਞਾਪਨਵਤ੍ਥੁਸ੍ਮਿਂ ‘‘ਕਥਞ੍ਹਿ ਨਾਮ ਤੁਮ੍ਹੇ ਮੋਘਪੁਰਿਸਾ ਨ ਮਤ੍ਤਂ ਜਾਨਿਤ੍ਵਾ ਬਹੁਂ ਚੀਵਰਂ ਵਿਞ੍ਞਾਪੇਸ੍ਸਥਾ’’ਤਿ (ਪਾਰਾ. ੫੨੨) ਛਬ੍ਬਗ੍ਗਿਯੇ ਭਿਕ੍ਖੂ ਗਰਹਿਤ੍ਵਾ ਇਮਸ੍ਸ ਸਿਕ੍ਖਾਪਦਸ੍ਸ ਪਞ੍ਞਤ੍ਤਤ੍ਤਾ ‘‘ਸਾਦਿਤਬ੍ਬ’’ਨ੍ਤਿ ਏਤ੍ਥ ਵਿਞ੍ਞਾਪੇਤਬ੍ਬਨ੍ਤਿ ਅਤ੍ਥੋ ਹੋਤਿ, ਤੇਨੇਵ ਇਮਸ੍ਮਿਂ ਪਦਭਾਜਨੇ ‘‘ਤਤੋ ਚੇ ਉਤ੍ਤਰਿ ਸਾਦਿਯੇਯ੍ਯਾਤਿ ਤਤੁਤ੍ਤਰਿ ਵਿਞ੍ਞਾਪੇਤੀ’’ਤਿ (ਪਾਰਾ. ੫੨੪) ਚ ਆਪਤ੍ਤਿਭੇਦਸਨ੍ਦਸ੍ਸਨਟ੍ਠਾਨੇ ‘‘ਅਞ੍ਞਾਤਕੇ ਅਞ੍ਞਾਤਕਸਞ੍ਞੀ ਤਤੁਤ੍ਤਰਿ ਚੀਵਰਂ ਵਿਞ੍ਞਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯ’’ਨ੍ਤਿਆਦਿਵਚਨਤੋ (ਪਾਰਾ. ੫੨੫) ਚ ਵੁਤ੍ਤਂ. ਯਦਿ ਏਵਂ ਸਿਕ੍ਖਾਪਦੇਯੇਵ ‘‘ਸਾਦਿਤਬ੍ਬਂ, ਸਾਦਿਯੇਯ੍ਯਾ’’ਤਿ ਚ ਉਭਯਤ੍ਥ ‘‘ਵਿਞ੍ਞਾਪੇਤਬ੍ਬਂ, ਵਿਞ੍ਞਾਪੇਯ੍ਯਾ’’ਤਿ ਚ ਕਸ੍ਮਾ ਨ ਵੁਤ੍ਤਨ੍ਤਿ? ਅਚ੍ਛਿਨ੍ਨਚੀਵਰਭਾਵਂ ਞਤ੍ਵਾ ਅਵਿਞ੍ਞਾਪਿਤੇਪਿ ਅਭਿਹਰਿਤ੍ਵਾ ਦਿਯ੍ਯਮਾਨਮ੍ਪਿ ਅਧਿਵਾਸੇਨ੍ਤੇਨ ਏਵਮੇਵ ਸਾਦਿਤਬ੍ਬਨ੍ਤਿ ਨ ਵੁਤ੍ਤਂ. ਇਮਸ੍ਸੇਵ ਚ ਅਧਿਕਵਿਞ੍ਞਾਪਨਨਿਸੇਧਨਤ੍ਥਂ ਵਦਨ੍ਤੇਨਾਪਿ ‘‘ਤਞ੍ਚੇ ਅਞ੍ਞਾਤਕੋ ਗਹਪਤਿ ਵਾ ਗਹਪਤਾਨੀ ਵਾ ਬਹੂਹਿ ਚੀਵਰੇਹਿ ਅਭਿਹਟ੍ਠੁਂ ਪਵਾਰੇਯ੍ਯ, ਸਨ੍ਤਰੁਤ੍ਤਰਪਰਮਂ ਤੇਨ ਭਿਕ੍ਖੁਨਾ ਤਤੋ ਚੀਵਰਂ ਸਾਦਿਤਬ੍ਬ’’ਨ੍ਤਿ ਸਾਦਿਤਬ੍ਬਨਿਯਮਪ੍ਪਧਾਨਂ ਵੁਤ੍ਤਂ. ਤਸ੍ਮਾ ਅਚ੍ਛਿਨ੍ਨਚੀਵਰੇਨ ਅਤ੍ਤਨਾ ਵਾ ਤਂ ਸਨ੍ਧਾਯ ਅਞ੍ਞੇਨ ਵਾ ਵਿਞ੍ਞਾਪੇਨ੍ਤੇਨਪਿ ਅਵਿਞ੍ਞਾਪੇਨ੍ਤੇਪਿ ਦਿਯ੍ਯਮਾਨਂ ਸਾਦਿਯਨ੍ਤੇਨਾਪਿ ਸਨ੍ਤਰੁਤ੍ਤਰਪਰਮਤਂ ਨਾਤਿਕ੍ਕਮਿਤਬ੍ਬਨ੍ਤਿ ਇਮਸ੍ਮਿਂ ਸਿਕ੍ਖਾਪਦੇ ਸਨ੍ਧਾਯ ਭਾਸਿਤਤ੍ਥੋਤਿ ਸਲ੍ਲਕ੍ਖੇਤਬ੍ਬਨ੍ਤਿ ਏਤ੍ਤਕਂ ਞਾਪੇਤੁਂ ‘‘ਸਾਦਿਯਨ੍ਤਸ੍ਸਾ’’ਤਿ ਅਵਤ੍ਵਾ ‘‘ਵਿਞ੍ਞਾਪੇਨ੍ਤਸ੍ਸਾ’’ਤਿ ਵੁਤ੍ਤਨ੍ਤਿ ਆਚਰਿਯਾਭਿਸਨ੍ਧਿ ਵੇਦਿਤਬ੍ਬਾ.

੬੪੦. ਇਦਾਨਿ ਵਿਞ੍ਞਾਪਨੇ ਚ ਅਧਿਵਾਸਨੇ ਚ ਉਭਯਤ੍ਥੇਵ ਨਿਯਮਂ ਦਸ੍ਸੇਤੁਂ ‘‘ਸਚੇ ਤੀਣਿ ਨਟ੍ਠਾਨਿ ਹੋਨ੍ਤਿ, ਦ੍ਵੇ ਸਾਦਿਤਬ੍ਬਾਨਿ. ਦ੍ਵੇ ਨਟ੍ਠਾਨਿ, ਏਕਂ ਸਾਦਿਤਬ੍ਬਂ. ਏਕਂ ਨਟ੍ਠਂ, ਨ ਕਿਞ੍ਚਿ ਸਾਦਿਤਬ੍ਬ’’ਨ੍ਤਿ (ਪਾਰਾ. ੫੨੪) ਪਦਭਾਜਨੇ ਵੁਤ੍ਤਵਿਨਿਚ੍ਛਯਂ ਦਸ੍ਸੇਤੁਮਾਹ ‘‘ਯਸ੍ਸਾ’’ਤਿਆਦਿ. ‘‘ਯਸ੍ਸ ਤੀਣਿਪਿ ਨਟ੍ਠਾਨਿ, ਦ੍ਵੇ ਵਾ ਨਟ੍ਠਾਨਿ, ਏਕਂ ਵਾ ਨਟ੍ਠ’’ਨ੍ਤਿ ਸਮ੍ਬਨ੍ਧਿਤ੍ਵਾ ਯਥਾਕ੍ਕਮਂ ‘‘ਤੇਨ ਦ੍ਵੇ ਸਾਦਿਤਬ੍ਬਾਨਿ, ਏਕਂ ਸਾਦਿਤਬ੍ਬਂ, ਨ ਕਿਞ੍ਚਿਪਿ ਸਾਦਿਤਬ੍ਬ’’ਨ੍ਤਿ ਯੋਜਨਾ ਕਾਤਬ੍ਬਾ. ਯਸ੍ਸ ਤੀਣਿਪਿ ਚੀਵਰਾਨਿ ਨਟ੍ਠਾਨਿ, ਬਹੁ ਚ ਦਿਯ੍ਯਤਿ, ਤੇਨ ਦ੍ਵੇਯੇਵ ਚੀਵਰਾਨਿ ਸਾਦਿਤਬ੍ਬਾਨਿ. ਦ੍ਵੇ ਚੀਵਰਾਨਿ ਨਟ੍ਠਾਨਿ, ਏਕਂ ਸਾਦਿਤਬ੍ਬਂ. ਏਕਞ੍ਚੇ ਨਟ੍ਠਂ, ਨ ਸਾਦਿਤਬ੍ਬਂ, ਅਵਸਿਟ੍ਠਂ ਪਚ੍ਛਾ ਧਮ੍ਮੇਨ ਸਮੇਨ ਲਦ੍ਧਨੀਹਾਰੇਨ ਗਹੇਤਬ੍ਬਨ੍ਤਿ ਅਤ੍ਥੋ. ਯਥਾਹ ਅਟ੍ਠਕਥਾਯਂ ‘‘ਸੇਸਂ ਸਭਾਗਟ੍ਠਾਨਤੋ ਪਰਿਯੇਸਿਸ੍ਸਤੀ’’ਤਿ. ‘‘ਭਿਕ੍ਖੁਨਿਯਾ ਪਨ ਪਞ੍ਚਸੁਪਿ ਨਟ੍ਠੇਸੁ ਦ੍ਵੇ ਸਾਦਿਤਬ੍ਬਾਨਿ, ਚਤੂਸੁ ਨਟ੍ਠੇਸੁ ਏਕਂ ਸਾਦਿਤਬ੍ਬਂ, ਤੀਸੁ ਨਟ੍ਠੇਸੁ ਕਿਞ੍ਚਿ ਨ ਸਾਦਿਤਬ੍ਬ’’ਨ੍ਤਿ (ਪਾਰਾ. ਅਟ੍ਠ. ੨.੫੨੨-੫੨੪) ਅਟ੍ਠਕਥਾਯਂ ਵੁਤ੍ਤਂ.

੬੪੧-੨. ਸੇਸਕਂ ਆਹਰਨ੍ਤਸ੍ਸ ਅਨਾਪਤ੍ਤੀਤਿ ਞਾਤਬ੍ਬਨ੍ਤਿ ਯੋਜਨਾ. ਏਵਮੁਪਰਿਪਿ ਯੋਜੇਤਬ੍ਬਂ. ਚੀਵਰਂ ਯੋਜੇਤ੍ਵਾ ਅਤਿਰੇਕਂ ਵਤ੍ਥਂ ਪਚ੍ਚਾਹਰਿਤ੍ਵਾ ‘‘ਦਸ੍ਸਾਮੀ’’ਤਿ ਬਹੁਮ੍ਪਿ ਗਹੇਤ੍ਵਾ ਗਚ੍ਛਨ੍ਤਸ੍ਸ ਅਨਾਪਤ੍ਤੀਤਿ ਅਤ੍ਥੋ. ਅਤਿਰੇਕਮ੍ਪਿ ਤੁਮ੍ਹੇਯੇਵ ਗਣ੍ਹਥਾਤਿ ਦਿਨ੍ਨਂ ਗਣ੍ਹਤੋਪਿ ਅਨਾਪਤ੍ਤਿ. ਨ ਅਚ੍ਛਿਨ੍ਨਕਾਰਣਾ ਦਿਨ੍ਨੇਤਿ ਯੋਜਨਾ, ਅਚ੍ਛਿਨ੍ਨਚੀਵਰਭਾਵਂ ਅਨੁਦ੍ਦਿਸ੍ਸ ਬਹੂਨਂ ਚੀਵਰਾਨਂ ਗਹਣਨਿਮਿਤ੍ਤੇਨਾਪਿ ਅਨਾਪਤ੍ਤੀਤਿ ਅਤ੍ਥੋ. ਏਵਮੇਵ ‘‘ਨ ਨਟ੍ਠਕਾਰਣਾ ਦੇਨ੍ਤੀ’’ਤਿ ਇਦਮ੍ਪਿ ਦਸ੍ਸਿਤਮੇਵ. ਅਚ੍ਛਿਨ੍ਨਚੀਵਰੇ ਨਿਸ੍ਸਾਯ ਤਤੁਤ੍ਤਰਿਚੀਵਰਵਿਞ੍ਞਾਪਨਵਤ੍ਥੁਮ੍ਹਿ ਇਮਸ੍ਸ ਸਿਕ੍ਖਾਪਦਸ੍ਸ ਪਞ੍ਞਤ੍ਤਤ੍ਤਾ ਅਨਾਪਤ੍ਤਿਵਾਰੇ ‘‘ਅਞ੍ਞਸ੍ਸਤ੍ਥਾਯਾ’’ਤਿ ਨ ਗਹਿਤਂ.

ਤਤੁਤ੍ਤਰਿਕਥਾਵਣ੍ਣਨਾ.

੬੪੩. ਕਲ੍ਯਾਣਕਮ੍ਯਤਾਹੇਤੂਤਿ ਸੁਨ੍ਦਰਸ੍ਸ ਮਹਗ੍ਘਸ੍ਸ ਕਾਮਤਂ ਪਟਿਚ੍ਚ ਚੀਵਰੇ ਵਿਕਪ੍ਪਨਂ ਆਪਜ੍ਜੇਯ੍ਯਾਤਿ ਯੋਜਨਾ, ‘‘ਕੀਦਿਸੇਨ ਤੇ ਭਨ੍ਤੇ ਚੀਵਰੇਨ ਅਤ੍ਥੋ’’ਤਿ ਪੁਬ੍ਬੇ ਅਪ੍ਪਵਾਰਿਤੋ ‘‘ਆਯਤਂ ਵਾ ਹੋਤੁ ਵਿਤ੍ਥਤਂ ਵਾ ਅਪ੍ਪਿਤਂ ਵਾ ਸਣ੍ਹਂ ਵਾ’’ਤਿ (ਪਾਰਾ. ੫੨੯) ਪਦਭਾਜਨੇ ਵੁਤ੍ਤਵਿਸਿਟ੍ਠਕਪ੍ਪਂ ਅਧਿਕਵਿਧਾਨਂ ਕਰੋਤੀਤਿ ਅਤ੍ਥੋ. ਤਸ੍ਸ ਲਾਭਾ ਨਿਸ੍ਸਗ੍ਗਿਯਂ ਭਵੇਤਿ ਤਥਾ ਅਪ੍ਪਵਾਰਿਤੇਨ ਹੁਤ੍ਵਾ ਕਤੇਨ ਅਧਿਕਵਿਧਾਨੇਨ ਨਿਪ੍ਫਨ੍ਨਚੀਵਰਸ੍ਸ ਲਾਭਪ੍ਪਯੋਗੇਨ ਦੁਕ੍ਕਟਨਿਸ੍ਸਗ੍ਗਿਯਪਾਚਿਤ੍ਤਿਯਾ ਹੋਨ੍ਤਿ.

੬੪੪. ਮਹਗ੍ਘਂ …ਪੇ… ਵਿਞ੍ਞਾਪੇਤੀਤਿ ਵੀਸਤਿਅਗ੍ਘਨਕਂ ਚੀਵਰਂ ਦਾਤੁਕਾਮਮ੍ਹਿ ਉਪਾਸਕੇ, ‘‘ਅਲਂ ਮਯ੍ਹਂ ਏਤੇਨ, ਦਸਗ੍ਘਨਕਂ ਵਾ ਅਪ੍ਪਗ੍ਘਨਕਂ ਵਾ ਦੇਹੀ’’ਤਿ ਵਦਤਿ.

੬੪੫. ‘‘ਞਾਤਕੇ ਅਞ੍ਞਾਤਿਸਞ੍ਞਿਸ੍ਸਾ’’ਤਿ ਪਦਚ੍ਛੇਦੋ.

ਪਠਮੋਪਕ੍ਖਟਕਥਾਵਣ੍ਣਨਾ.

੬੪੬. ਪਠਮਸਿਕ੍ਖਾਪਦੇ ਏਕੇਨ ਉਪਾਸਕੇਨ ਪੀਲ਼ਾ ਲਦ੍ਧਾ, ਇਧ ਦ੍ਵੀਹੀਤਿ ਏਤ੍ਤਕਂ ਨਾਨਾਕਰਣਂ. ਸੇਸਂ ਪਠਮਸਿਕ੍ਖਾਪਦਸਦਿਸਮੇਵਾਤਿ ਆਹ ‘‘ਦੁਤਿਯੋ…ਪੇ… ਵਿਨਿਚ੍ਛਯੋ’’ਤਿ. ਉਪਕ੍ਖਟਪਦੇਨ ਲਕ੍ਖਿਤਂ ਸਿਕ੍ਖਾਪਦਂ ਉਪਕ੍ਖਟਂ, ਦੁਤਿਯਞ੍ਚ ਤਂ ਉਪਕ੍ਖਟਞ੍ਚਾਤਿ ਦੁਤਿਯੋਪਕ੍ਖਟਂ, ਤਸ੍ਮਿਂ ਦੁਤਿਯੋਪਕ੍ਖਟੇ. ਅਸ੍ਸਾਤਿ ਦੁਤਿਯੋਪਕ੍ਖਟਸ੍ਸ.

ਦੁਤਿਯੋਪਕ੍ਖਟਕਥਾਵਣ੍ਣਨਾ.

੬੪੭. ਰਞ੍ਞਾ ਵਾਤਿ ਰਾਜਤੋ ਵਾ. ਰਾਜਤੋ ਭੋਗ੍ਗਂ ਭੁਞ੍ਜਿਤਬ੍ਬਂ ਅਸ੍ਸ ਅਤ੍ਥੀਤਿ ‘‘ਰਾਜਭੋਗ੍ਗੋ’’ਤਿ ਵੁਤ੍ਤੋ, ਰਾਜਤੋ ਭਤ੍ਤਵੇਤ੍ਤਨਲਾਭਿਤੋ ਯਤੋ ਕੁਤੋਚਿ ਦਾਯਕਾ ਆਭਤਨ੍ਤਿ ਸਮ੍ਬਨ੍ਧੋ. ਨ ਚ ਵਟ੍ਟਤੀਤਿ ਏਤ੍ਥ ‘‘ਨਿਸ੍ਸਗ੍ਗਿਯਪਾਚਿਤ੍ਤਿਯਭਾਵਤੋ’’ਤਿ ਅਜ੍ਝਾਹਰਿਤਬ੍ਬਂ. ਇਧ ਉਤ੍ਤਰਿਕਰਣੀਯਂ ‘‘ਤਿਕ੍ਖਤ੍ਤੁ’’ਨ੍ਤਿਆਦਿਗਾਥਾਯ (ਵਿ. ਵਿ. ੬੭੧) ਵਕ੍ਖਤਿ.

੬੪੮. ਚੀਵਰਚੇਤਾਪਨ੍ਨਵਸੇਨ ਅਧਿਗਤਰਜਤਾਦਿ ਯੇਨ ਕੇਨਚਿ ਪਰਿਯਾਯੇਨਾਪਿ ਨ ਸਾਦਿਤਬ੍ਬਨ੍ਤਿ ਦਸ੍ਸੇਤੁਮਾਹ ‘‘ਰਜਤਂ ਵਾ’’ਤਿਆਦਿ. ਧਵਲਸਭਾਵਤਾਯ ਰਾਜਤੀਤਿ ਰਜਤਂ, ਸਜ੍ਝੁ. ਜਾਤਂ ਰੂਪਂ ਵਣ੍ਣਾਯਤਨਮੇਤਸ੍ਸਾਤਿ ਜਾਤਰੂਪਂ, ਸੁਵਣ੍ਣਂ. ਕਿਞ੍ਚੀਤਿ ਅਪ੍ਪਮਤ੍ਤਕਮ੍ਪਿ. ਅਤ੍ਤਨੋ ਵਾ ਅਤ੍ਥਾਯ ਪਰਸ੍ਸ ਵਾ ਅਤ੍ਥਾਯ ਦਿਯ੍ਯਮਾਨਂ ਕਿਞ੍ਚਿ ਗਣ੍ਹਿਤੁਂ ਨ ਵਟ੍ਟਤੀਤਿ ਯੋਜਨਾ.

੬੪੯. ਅਤ੍ਤਨੋ ਪਟਿਗ੍ਗਹਣੇ ਆਪਤ੍ਤਿਯਾ ਰੂਪਿਯਗਹਣਸਿਕ੍ਖਾਪਦੇ ਵਕ੍ਖਮਾਨਤ੍ਤਾ ਅਞ੍ਞਸ੍ਸ ਅਤ੍ਥਾਯ ਗਹਣੇ ਆਪਤ੍ਤਿਦਸ੍ਸਨਤ੍ਥਮਾਹ ‘‘ਅਞ੍ਞਸ੍ਸਤ੍ਥਾਯਾ’’ਤਿਆਦਿ. ਤਤ੍ਥ ਅਞ੍ਞਸ੍ਸਤ੍ਥਾਯਾਤਿ ਅਞ੍ਞਸ੍ਸ ਪੁਗ੍ਗਲਸ੍ਸ, ਗਣਸ੍ਸ, ਸਙ੍ਘਸ੍ਸ, ਚੇਤਿਯਸ੍ਸ, ਨਵਕਮ੍ਮਸ੍ਸ ਵਾ ਅਤ੍ਥਾਯ. ਨਿਦ੍ਦਿਟ੍ਠਨ੍ਤਿ ਆਹਰਿਤ੍ਵਾ ‘‘ਇਮਂ ਗਣ੍ਹਥਾ’’ਤਿ ਵੁਤ੍ਤਂ ਰਜਤਂ, ਜਾਤਰੂਪਂ ਵਾ ਅਞ੍ਞਂ ਵਾ ਯਂ ਕਿਞ੍ਚਿ ਨਿਸ੍ਸਗ੍ਗਿਯਦੁਕ੍ਕਟਵਤ੍ਥੁਂ ਪਟਿਗ੍ਗਣ੍ਹਤੋ ਤਸ੍ਸ ਭਿਕ੍ਖੁਨੋ ਦੁਕ੍ਕਟਂ ਹੋਤੀਤਿ ਮਹਾਪਚ੍ਚਰਿਯਂ ਵੁਤ੍ਤਨ੍ਤਿ ਯੋਜਨਾ.

੬੫੦-੧. ਵੁਤ੍ਤਮੇਵਤ੍ਥਂ ਸਰੂਪਤੋ ਵਿਭਾਵੇਤੁਮਾਹ ‘‘ਨੇਤ੍ਵਾ’’ਤਿਆਦਿ. ਨੇਤ੍ਵਾਤਿ ਆਨੇਤ੍ਵਾ. ਅਕਪ੍ਪਿਯਂ ਭਣ੍ਡਨ੍ਤਿ ‘‘ਰਜਤਂ ਜਾਤਰੂਪਂ ਵਾ’’ਤਿ ਯਥਾਵੁਤ੍ਤਮੇਵ ਅਕਪ੍ਪਿਯਭਣ੍ਡਂ. ਇਤ੍ਥਨ੍ਤਿ ਵਕ੍ਖਮਾਨਪ੍ਪਕਾਰੇਨ. ਨ ਚ ਵਟ੍ਟਤੀਤਿ ਏਤ੍ਥ ਚ-ਕਾਰੇਨ ਵਟ੍ਟਤਿ ਚਾਤਿ ਅਨੁਞ੍ਞਾਤਂ ਕਤਨ੍ਤਿ. ਯਥਾਹ ਅਟ੍ਠਕਥਾਯਂ –

‘‘ਸਚੇ ਪਨ ‘ਨਯਿਦਂ ਭਿਕ੍ਖੂਨਂ ਸਮ੍ਪਟਿਚ੍ਛਿਤੁਂ ਵਟ੍ਟਤੀ’ਤਿ ਪਟਿਕ੍ਖਿਤ੍ਤੇ ‘ਵਡ੍ਢਕੀਨਂ ਵਾ ਕਮ੍ਮਕਰਾਨਂ ਵਾ ਹਤ੍ਥੇ ਭਵਿਸ੍ਸਤਿ, ਕੇਵਲਂ ਤੁਮ੍ਹੇ ਸੁਕਤਦੁਕ੍ਕਟਂ ਜਾਨਾਥਾ’ਤਿ ਵਤ੍ਵਾ ਤੇਸਂ ਹਤ੍ਥੇ ਦਤ੍ਵਾ ਪਕ੍ਕਮਤਿ, ਵਟ੍ਟਤਿ. ਅਥਾਪਿ ‘ਮਮ ਮਨੁਸ੍ਸਾਨਂ ਹਤ੍ਥੇ ਭਵਿਸ੍ਸਤਿ, ਮਯ੍ਹਮੇਵ ਵਾ ਹਤ੍ਥੇ ਭਵਿਸ੍ਸਤਿ, ਕੇਵਲਂ ਤੁਮ੍ਹੇ ਯਂ ਯਸ੍ਸ ਦਾਤਬ੍ਬਂ, ਤਦਤ੍ਥਾਯ ਪੇਸੇਯ੍ਯਾਥਾ’ਤਿ ਵਦਤਿ, ਏਵਮ੍ਪਿ ਵਟ੍ਟਤੀ’’ਤਿ (ਪਾਰਾ. ਅਟ੍ਠ. ੨.੫੩੮-੫੩੯).

੬੫੨. ਵਿਹਾਰਸ੍ਸਾਤਿ ਏਤ੍ਥ ‘‘ਨਵਕਮ੍ਮਸ੍ਸਾ’’ਤਿ (ਪਾਰਾ. ਅਟ੍ਠ. ੨.੫੩੮-੫੩੯) ਅਟ੍ਠਕਥਾਯਂ ਵੁਤ੍ਤਤ੍ਤਾ ਵਤ੍ਤਬ੍ਬਂ ਗਾਥਾਬਨ੍ਧਵਸੇਨ ਨ ਵੁਤ੍ਤਂ.

੬੫੪. ਰਜਤਂ ਜਾਤਰੂਪਂ ਵਾ ਸਙ੍ਘਸ੍ਸਾਤਿ ਏਤ੍ਥ ‘‘ਚਤ੍ਤਾਰੋ ਪਚ੍ਚਯੇ ਪਰਿਭੁਞ੍ਜਥਾਤਿ ਦਿਨ੍ਨ’’ਨ੍ਤਿ ਸੇਸੋ. ਯਥਾਹ ਅਟ੍ਠਕਥਾਯਂ ‘‘ਸਚੇ ਪਨ ਕੋਚਿ ਬਹੁਮ੍ਪਿ ਹਿਰਞ੍ਞਸੁਵਣ੍ਣਂ ਆਨੇਤ੍ਵਾ ‘ਇਦਂ ਸਙ੍ਘਸ੍ਸ ਦਮ੍ਮਿ, ਚਤ੍ਤਾਰੋ ਪਚ੍ਚਯੇ ਪਰਿਭੁਞ੍ਜਥਾ’ਤਿ ਵਦਤਿ, ਤਂ ਚੇ ਸਙ੍ਘੋ ਸਮ੍ਪਟਿਚ੍ਛਤਿ, ਪਟਿਗ੍ਗਹਣੇਪਿ ਪਰਿਭੋਗੇਪਿ ਆਪਤ੍ਤੀ’’ਤਿ (ਪਾਰਾ. ਅਟ੍ਠ. ੨.੫੩੮-੫੩੯). ਏਵਂ ਆਭਤਂ ਤਸ੍ਮਿਂ ਸਙ੍ਘੇ ਯੋ ਕੋਚਿ ਭਿਕ੍ਖੁ ‘‘ਨਯਿਦਂ ਕਪ੍ਪਤੀ’’ਤਿ ਸਚੇ ਪਟਿਕ੍ਖਿਪਤਿ, ‘‘ਅਯਂ ਸਙ੍ਘਸ੍ਸ ਲਾਭਨ੍ਤਰਾਯਂ ਕਰੋਤੀ’’ਤਿ ਵਦਨ੍ਤਸ੍ਸੇਵ ਆਪਤ੍ਤਿ ਹੋਤਿ. ਯਥਾਹ ਅਟ੍ਠਕਥਾਯਂ ‘‘ਯੋ ਹਿ ਤਂ ਚੋਦੇਤਿ, ਸ੍ਵੇਵ ਸਾਪਤ੍ਤਿਕੋ ਹੋਤਿ, ਤੇਨ ਪਨ ਏਕੇਨ ਬਹੂ ਅਨਾਪਤ੍ਤਿਕਾ ਕਤਾ’’ਤਿ (ਪਾਰਾ. ਅਟ੍ਠ. ੨.੫੩੮-੫੩੯). ਇਧ ਸ੍ਵੇਵ ਸਾਪਤ੍ਤਿਕੋਤਿ ਏਤ੍ਥ ‘‘ਦੁਕ੍ਕਟਾਪਤ੍ਤਿਕੋਤਿ ਵੁਤ੍ਤਂ ਹੋਤੀ’’ਤਿ ਗਣ੍ਠਿਪਦੇ ਵੁਤ੍ਤਂ. ਇਮਿਸ੍ਸਾ ਗਾਥਾਯ ‘‘ਸਙ੍ਘਸ੍ਸਾ’’ਤਿ ਅਲਿਖਿਤ੍ਵਾ ‘‘ਭਿਕ੍ਖੁਨੋ’’ਤਿ ਚ ਲਿਖਨ੍ਤਿ, ਤਂ ਨ ਸੁਨ੍ਦਰਂ. ਇਦਾਨਿ ਦਸ੍ਸਿਤਅਟ੍ਠਕਥਾਪਾਠੇ ‘‘ਸਙ੍ਘੋ ਸਮ੍ਪਟਿਚ੍ਛਤੀ’’ਤਿ (ਪਾਰਾ. ਅਟ੍ਠ. ੨.੫੩੮-੫੩੯) ਵੁਤ੍ਤਤ੍ਤਾ ‘‘ਸਙ੍ਘਸ੍ਸਾ’’ਤਿ ਪਾਠੋ ਸੁਨ੍ਦਰੋ.

੬੫੫. ਤਲ਼ਾਕਸ੍ਸਾਤਿ ਵਾਪਿਯਾ. ਸਸ੍ਸੁਪ੍ਪਤ੍ਤਿਨਿਦਾਨਤੋ ਤਲ਼ਾਕਂ ਖੇਤ੍ਤਂ, ਤਤੋ ਤਸ੍ਸ ਗਹਣਂ ਵਾ ਪਰਿਭੋਗੋ ਵਾ ਨ ਚ ਵਟ੍ਟਤੀਤਿ ਯੋਜਨਾ. ਤਲ਼ਾਕਸ੍ਸ ਚਾਤਿ ਏਤ੍ਥ ਚ-ਕਾਰੇਨ ਖੇਤ੍ਤਵਤ੍ਥੁ ਸਙ੍ਗਹਿਤਂ. ਨ ਚ ਵਟ੍ਟਤੀਤਿ ਏਤ੍ਥ ਚਕਾਰੇਨ ਵਟ੍ਟਤਿ ਚਾਤਿ ਦਸ੍ਸਿਤਂ ਹੋਤਿ.

੬੫੬. ਤਂ ਕਤਮਨ੍ਤਿ ਆਹ ‘‘ਚਤ੍ਤਾਰੋ’’ਤਿਆਦਿ. ਸਬ੍ਬਮ੍ਪੀਤਿ ਤਲ਼ਾਕਪੋਕ੍ਖਰਣਿਖੇਤ੍ਤਾਦਿ ਸਬ੍ਬਮ੍ਪਿ.

੬੫੮-੯. ਅਪਰਿਚ੍ਛਿਨ੍ਨਭਾਗਸ੍ਮਿਨ੍ਤਿ ‘‘ਇਮਸ੍ਮਿਂ ਭੂਮਿਭਾਗੇ ਕਤਸ੍ਸ ਕਮ੍ਮੇਹਿ ਏਤ੍ਤਕੋ ਭਾਗੋ ਦੇਯ੍ਯੋ’’ਤਿ ਏਵਂ ਪੁਬ੍ਬੇ ਅਨਿਯਮਿਤਆਯੇ ਭੂਮਿਭਾਗੇ. ਅਕਤਪੁਬ੍ਬਂ ਨਵਸਸ੍ਸਂ ਨਾਮ. ਏਤ੍ਤਕਂ ਭਾਗਂ ਦੇਥਾਤਿ ਏਤ੍ਤਕਂ ਕਹਾਪਣਭਾਗਂ ਦੇਥ. ਉਟ੍ਠਾਪੇਤੀਤਿ ਉਪ੍ਪਾਦੇਤਿ.

‘‘ਕਸਥ ਵਪਥਾ’’ਤਿ ਅਕਪ੍ਪਿਯਂ ਵਾਚਂ ਵਤ੍ਵਾਤਿ ਯੋਜਨਾ. ਵਪਥਾਤਿ ਚਾਤਿ ਏਤ੍ਥ ਚ-ਸਦ੍ਦੋ ਇਧ ਅਵੁਤ੍ਤਂ ਤਂਕਤ੍ਤੁਯੋਗਕਾਲੇ ਵੁਚ੍ਚਮਾਨਂ ਅਕਪ੍ਪਿਯਵਚਨਨ੍ਤਰਂ ਸਮੁਚ੍ਚਿਨੋਤਿ. ਉਪ੍ਪਾਦਿਤਞ੍ਚਾਤਿ ਏਤ੍ਥ ਚ-ਸਦ੍ਦੋ ਕਹਾਪਣਂ ਸਮੁਚ੍ਚਿਨੋਤਿ. ਸਬ੍ਬਨ੍ਤਿ ਤਥਾ ਉਪ੍ਪਾਦਿਤਕਹਾਪਣਞ੍ਚ ਏਵਂ ਅਕਪ੍ਪਿਯਵੋਹਾਰੇਨ ਉਪ੍ਪਾਦਿਤਞ੍ਚਾਤਿ ਸਬ੍ਬਂ.

੬੬੦. ਕਸਥਾਦਿਕਂ ਵਚਨਂ ਅਵਤ੍ਵਾ ‘‘ਏਤ੍ਤਿਕਾਯ ਭੂਮਿਯਾ ਏਤ੍ਤਕੋ ਨਾਮ ਭਾਗੋ’’ਤਿ ਭੂਮਿਂ ਯੋ ਚ ਪਤਿਟ੍ਠਾਪੇਤਿ, ਤਸ੍ਸੇਵੇਤਮਕਪ੍ਪਿਯਨ੍ਤਿ ਵਕ੍ਖਮਾਨੇਨ ਯੋਜੇਤਬ੍ਬਂ. ਚ-ਸਦ੍ਦੋ ‘‘ਯੋ ਪਨਾ’’ਤਿ ਵਕ੍ਖਮਾਨਪੁਗ੍ਗਲਨ੍ਤਰਾਪੇਕ੍ਖੋ.

੬੬੧-੨. ਭੂਮਿਯਾ ਸਯਮੇਵ ਪਮਾਣਸ੍ਸ ਜਾਨਨਤ੍ਥਂ ਤੂਤਿ ਯੋਜਨਾ, ‘‘ਏਤ੍ਤਕੇ ਭੂਮਿਭਾਗੇ ਅਮ੍ਹੇਹਿ ਸਸ੍ਸਂ ਕਤਂ, ਏਤ੍ਤਕਂ ਨਾਮ ਭਾਗਂ ਗਣ੍ਹਥਾ’’ਤਿ ਕਸਕੇਹਿ ਵੁਤ੍ਤੇ ਤੇਸਂ ਵਚਨਂ ਅਸਦ੍ਦਹਿਤ੍ਵਾ ਸਯਮੇਵ ਖੇਤ੍ਤਭੂਮਿਯਾ ਪਮਾਣਂ ਞਾਤੁਕਾਮਤਾਯਾਤਿ ਅਤ੍ਥੋ. ਤੁ-ਸਦ੍ਦੋ ਇਮਮੇਵ ਵਿਸੇਸਂ ਜੋਤੇਤਿ. ਯੋ ਪਨ ਮਿਨਾਤਿ, ਤਸ੍ਸੇਵੇਤਮਕਪ੍ਪਿਯਨ੍ਤਿ ਵਕ੍ਖਮਾਨੇਨ ਯੋਜੇਤਬ੍ਬਂ. ਰਜ੍ਜੁਯਾਪਿ ਚ ਦਣ੍ਡੇਨਾਤਿ ਏਤ੍ਥ ਪਾਦੇਨਾਪਿ ਮਿਨਿਤੁਂ ਨ ਵਟ੍ਟਤੀਤਿ ਵਦਨ੍ਤਿ. ‘‘ਰਕ੍ਖਤੀ’’ਤਿਆਦਿਕਿਰਿਯਾਪਦੇਹਿਪਿ ਏਵਮੇਵ ਯੋਜੇਤਬ੍ਬਂ.

ਖਲੇ ਠਤ੍ਵਾ ਰਕ੍ਖਤੀਤਿ ਧਞ੍ਞਕਰਣੇ ਠਤ੍ਵਾ ਅਞ੍ਞੇ ਗਣ੍ਹਿਤੁਂ ਅਦਤ੍ਵਾ ਪਾਲੇਤਿ. ਕਥਂ ਰਕ੍ਖਿਤੁਂ ਵਟ੍ਟਤਿ, ਕਥਂ ਰਕ੍ਖਿਤੁਂ ਨ ਵਟ੍ਟਤੀਤਿ? ਤਂ ਪਨ ਵੀਹਿਂ ‘‘ਇਦਂ ਵਾ ਏਤ੍ਤਕਂ ਵਾ ਮਾ ਗਣ੍ਹ, ਇਦਂ ਗਹੇਤੁਂ ਨ ਲਬ੍ਭਤੀ’’ਤਿ ਵਾ ‘‘ਇਤੋ ਅਪਨੇਹਿ, ਇਧ ਪੁਞ੍ਜਂ ਕਰੋਹੀ’’ਤਿ ਵਾ ਏਵਮਾਦਿਨਾ ਪਯੋਗੇਨ ਚੇ ਰਕ੍ਖਤਿ, ਤਂ ਅਕਪ੍ਪਿਯਂ. ਸਚੇ ‘‘ਮਯਿ ਠਿਤੇ ਰਕ੍ਖਿਤਂ ਹੋਤੀ’’ਤਿ ਰਕ੍ਖਤਿ, ਗਣ੍ਹਨ੍ਤੇ ਵਾ ਪਸ੍ਸਿਤ੍ਵਾ ‘‘ਕਿਂ ਕਰੋਥਾ’’ਤਿ ਭਣਤਿ, ਵਟ੍ਟਤਿ. ਰੂਪਿਯਪਟਿਗ੍ਗਹਣਸਿਕ੍ਖਾਪਦੇ ਦ੍ਵਾਰਂ ਪਿਦਹਿਤ੍ਵਾ ਰਕ੍ਖਨ੍ਤੇਨ ਵਸਿਤਬ੍ਬਨ੍ਤਿ ਹਿ ਵੁਤ੍ਤਨ੍ਤਿ ਗਣ੍ਠਿਪਦੇ ਵੁਤ੍ਤਨਯੇਨ ਵੇਦਿਤਬ੍ਬੋ. ਅਞ੍ਞਸ੍ਮਿਮ੍ਪਿ ਗਣ੍ਠਿਪਦੇ ਵੁਤ੍ਤਂ ‘‘ਥੇਨੇਤ੍ਵਾ ਗਣ੍ਹਨ੍ਤੇ ਸਤਿ ਏਤਂ ਭੋ ਪਵਤ੍ਤਿਂ ਭਿਕ੍ਖੁਸਙ੍ਘਸ੍ਸ ਕਿਂ ਆਰੋਚੇਸ੍ਸਾਮੀਤਿ ਪਟਿਪੁਚ੍ਛਿਤੁਂ ਵਟ੍ਟਤੀਤਿ ਵਦਨ੍ਤੀ’’ਤਿ. ਨੀਹਰਾਪੇਤੀਤਿ ਏਤ੍ਥਾਪਿ ਸਚੇ ਪਰਿਯਾਯੇਨ ਵਦਤਿ, ਵਟ੍ਟਤੀਤਿ ਵਦਨ੍ਤਿ. ਤਸ੍ਸੇਵੇਤਮਕਪ੍ਪਿਯਨ੍ਤਿ ਇਦਂ ਖੇਤ੍ਤਮਿਨਨਾਦਿਂ ਕਰੋਨ੍ਤੇਨ ਲਦ੍ਧਬ੍ਬਤੋ ਅਞ੍ਞਸ੍ਸ ਅਭਿਨਵੁਪ੍ਪਾਦਿਤਸ੍ਸ ਅਭਾਵਾ ਅਞ੍ਞੇਸਂ ਵਟ੍ਟਤੀਤਿ ਦ੍ਵੀਸੁ ਗਣ੍ਠਿਪਦੇਸੁ ਵੁਤ੍ਤਂ.

੬੬੩. ‘‘ਏਤ੍ਤਕੇਹਿ ਵੀਹੀਹਿ ਇਦਂ ਆਹਰਥਾ’’ਤਿ ਵੁਤ੍ਤਾ ਸਚੇ ਆਹਰਨ੍ਤੀਤਿ ਯੋਜਨਾ. ਏਤ੍ਥ ‘‘ਤਸ੍ਸੇਵੇਤਮਕਪ੍ਪਿਯ’’ਨ੍ਤਿ ਇਦਂ ਧਞ੍ਞਸ੍ਸ ਵਿਚਾਰਿਤਤ੍ਤਾ ਵੁਤ੍ਤਂ. ਯਥਾਹ ਅਟ੍ਠਕਥਾਯਂ ‘‘ਤਸ੍ਸੇਵ ਅਕਪ੍ਪਿਯਂ. ਕਸ੍ਮਾ? ਧਞ੍ਞਸ੍ਸ ਵਿਚਾਰਿਤਤ੍ਤਾ’’ਤਿ (ਪਾਰਾ. ਅਟ੍ਠ. ੨.੫੩੮-੫੩੯).

੬੬੪. ਹਿਰਞ੍ਞੇਨਾਤਿ ਕਹਾਪਣੇਨ. ‘‘ਤਮਕਪ੍ਪਿਯ’’ਨ੍ਤਿ ਇਦਂ ਕਹਾਪਣਾਨਂ ਵਿਚਾਰਿਤਤ੍ਤਾ ਵੁਤ੍ਤਂ. ਯਥਾਹ ਅਟ੍ਠਕਥਾਯਂ ‘‘ਸਬ੍ਬੇਸਂ ਅਕਪ੍ਪਿਯਂ. ਕਸ੍ਮਾ? ਕਹਾਪਣਾਨਂ ਵਿਚਾਰਿਤਤ੍ਤਾ’’ਤਿ (ਪਾਰਾ. ਅਟ੍ਠ. ੨.੫੩੮-੫੩੯).

੬੬੫. ਪੇਸਕਾਰਕਦਾਸਂ ਵਾਤਿ ਪੇਸਕਾਰਕਸਙ੍ਖਾਤਂ ਦਾਸਂ ਵਾ, ਪੇਸਕਾਰੋ ਤਨ੍ਤਵਾਯੋ. ਆਰਾਮਿਕਾਨਂ ਨਾਮੇਨ ਦੇਨ੍ਤੇਤਿ ‘‘ਆਰਾਮਿਕਂ ਦਮ੍ਮਿ, ਵੇਯ੍ਯਾਵਚ੍ਚਕਰਂ ਦਮ੍ਮੀ’’ਤਿਆਦਿਨਾ ਨਯੇਨ ਦੇਨ੍ਤੇ.

੬੬੬. ਖੀਰਂ ਦਧਿ ਤਕ੍ਕਂ ਸਪ੍ਪਿ ਨਵਨੀਤਨ੍ਤਿ ਪਞ੍ਚਗੋਰਸਾ.

੬੬੭. ਅਜਿਕਾਦੀਸੂਤਿ ਆਦਿ-ਸਦ੍ਦੇਨ ਮਹਿਸਂ ਸਙ੍ਗਣ੍ਹਾਤਿ.

੬੬੯. ਪਟਿਸਿਦ੍ਧੇਪੀਤਿ ਪਟਿਕ੍ਖਿਤ੍ਤੇਪਿ. ਮੂਲਂ ਦਤ੍ਵਾਤਿ ਕਪ੍ਪਿਯਭਣ੍ਡਮੂਲਂ ਦਤ੍ਵਾ. ਕੁਕ੍ਕੁਟਾਦਯੋ ਪਨ ‘‘ਸੁਖੇਨ ਵਸਨ੍ਤੂ’’ਤਿ ਅਰਞ੍ਞੇਯੇਵ ਵਿਸ੍ਸਜ੍ਜੇਤਬ੍ਬਂ. ਯਥਾਹ ਅਟ੍ਠਕਥਾਯਂ ‘‘ਕੁਕ੍ਕੁਟਸੂਕਰੇ ‘ਸੁਖਂ ਜੀਵਨ੍ਤੂ’ਤਿ ਅਰਞ੍ਞੇ ਵਿਸ੍ਸਜ੍ਜੇਤੁਂ ਵਟ੍ਟਤੀ’’ਤਿ (ਪਾਰਾ. ਅਟ੍ਠ. ੨.੫੩੮-੫੩੯). ਸੂਕਰਮਯੂਰਾਦੀਸੁਪਿ ਲਦ੍ਧੇਸੁ ਤੇਸਂ ਅਨੁਰੂਪੇਯੇਵ ਵਿਸਯੇ ਵਿਸ੍ਸਜ੍ਜੇਤਬ੍ਬਾ.

੬੭੧. ‘‘ਤਿਕ੍ਖਤ੍ਤੁ’’ਨ੍ਤਿਆਦਿਗਾਥਾਯ ਕੋ ਸਮ੍ਬਨ੍ਧੋ? ‘‘ਰਞ੍ਞਾ ਵਾ ਰਾਜਭੋਗ੍ਗੇਨਾ’’ਤਿਆਦਿਗਾਥਾਯ ਸਙ੍ਗਹਿਤਨਯੇਨ ਰਾਜਰਾਜਾਮਚ੍ਚਬ੍ਰਾਹ੍ਮਣਗਹਪਤਾਦੀਸੁ ਯੇਨ ਕੇਨਚਿ ਅਤ੍ਤਨਾ ਵਾ ਚੀਵਰਚੇਤਾਪਨ੍ਨੇਨ ਚੀਵਰਂ ਚੇਤਾਪੇਤ੍ਵਾ ‘‘ਇਤ੍ਥਨ੍ਨਾਮਂ ਭਿਕ੍ਖੁਂ ਚੀਵਰੇਨ ਅਚ੍ਛਾਦੇਹੀ’’ਤਿ ਵਤ੍ਵਾ ਤਂ ਚੀਵਰਚੇਤਾਪਨ੍ਨਸਙ੍ਖਾਤਂ ਚੀਵਰਮੂਲਂ ਦਤ੍ਵਾ ਪਹਿਤਦੂਤੇਨ ਵਾ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ‘‘ਇਦਂ ਖੋ ਭਨ੍ਤੇ ਆਯਸ੍ਮਨ੍ਤਂ ਉਦ੍ਦਿਸ੍ਸ ਚੀਵਰਚੇਤਾਪਨ੍ਨਂ ਆਭਤਂ, ਪਟਿਗ੍ਗਣ੍ਹਾਤੁ ਆਯਸ੍ਮਾ ਚੀਵਰਚੇਤਾਪਨ੍ਨ’’ਨ੍ਤਿ ਯਦਿ ਵੁਚ੍ਚੇਯ੍ਯ, ਭਿਕ੍ਖੁਨਾ ‘‘ਨ ਖੋ ਮਯਂ ਆਵੁਸੋ ਚੀਵਰਚੇਤਾਪਨ੍ਨਂ ਪਟਿਗ੍ਗਣ੍ਹਾਮ, ਚੀਵਰਞ੍ਚ ਖੋ ਮਯਂ ਪਟਿਗ੍ਗਣ੍ਹਾਮ ਕਾਲੇਨ ਕਪ੍ਪਿਯ’’ਨ੍ਤਿ ਵੁਤ੍ਤੇ ਸਚੇ ਤੇਨ ‘‘ਅਤ੍ਥਿ ਪਨਾਯਸ੍ਮਤੋ ਕੋਚਿ ਵੇਯ੍ਯਾਵਚ੍ਚਕਰੋ’’ਤਿ ਵੁਤ੍ਤੇ ਚੀਵਰਤ੍ਥਿਕੇਨ ਭਿਕ੍ਖੁਨਾ ‘‘ਏਸੋ ਖੋ ਆਵੁਸੋ ਭਿਕ੍ਖੂਨਂ ਵੇਯ੍ਯਾਵਚ੍ਚਕਰੋ’’ਤਿ ਆਰਾਮਿਕੇ ਵਾ ਉਪਾਸਕੇ ਵਾ ਦਸ੍ਸਿਤੇ ਯਦਿ ਸੋ ਤਸ੍ਸ ਅਤ੍ਤਨਾ ਆਹਰਿਤ੍ਵਾ ‘‘ਇਮਸ੍ਸ ਭਿਕ੍ਖੁਨੋ ਚੀਵਰੇਨ ਅਤ੍ਥੇ ਸਤਿ ਇਮਿਨਾ ਚੀਵਰਂ ਚੇਤਾਪੇਤ੍ਵਾ ਅਚ੍ਛਾਦੇਹੀ’’ਤਿ ਵਤ੍ਵਾ ਤਂ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ‘‘ਯਂ ਖੋ ਭਨ੍ਤੇ ਆਯਸ੍ਮਾ ਵੇਯ੍ਯਾਵਚ੍ਚਕਰਂ ਨਿਦ੍ਦਿਸਿ, ਸਞ੍ਞਤ੍ਤੋ ਸੋ ਮਯਾ, ਉਪਸਙ੍ਕਮਤੁ ਆਯਸ੍ਮਾ ਕਾਲੇਨ, ਚੀਵਰੇਨ ਤਂ ਅਚ੍ਛਾਦੇਸ੍ਸਤੀ’’ਤਿ ਯਦਿ ਵਦੇਯ੍ਯ, ਤੇਨ ਚੀਵਰਤ੍ਥਿਕੇਨ ਭਿਕ੍ਖੁਨਾ ਕਿਂ ਕਾਤਬ੍ਬਨ੍ਤਿ ਭਗਵਤਾ ਵੁਤ੍ਤਨ੍ਤਿ ਆਹਾਤਿ ਅਯਮਿਮਿਸ੍ਸਾ ਗਾਥਾਯ ਸਮ੍ਬਨ੍ਧੋ.