ਪਾਚਿਤ੍ਤਿਯਕਥਾਵਣ੍ਣਨਾ

੮੮੯. ਏਵਂ ਨਾਤਿਵਿਤ੍ਥਾਰਸਙ੍ਖੇਪਤੋ ਨਿਸ੍ਸਗ੍ਗਿਯਵਿਨਿਚ੍ਛਯਂ ਦਸ੍ਸੇਤ੍ਵਾ ਇਦਾਨਿ ਤਦਨਨ੍ਤਰਂ ਨਿਦ੍ਦਿਟ੍ਠਸ੍ਸ ਪਾਚਿਤ੍ਤਿਯਕਣ੍ਡਸ੍ਸ ਵਿਨਿਚ੍ਛਯਂ ਦਸ੍ਸੇਤੁਂ ‘‘ਸਮ੍ਪਜਾਨਮੁਸਾਵਾਦੇ’’ਤਿਆਦਿ ਆਰਦ੍ਧਂ. ਸਮ੍ਪਜਾਨਮੁਸਾਵਾਦੇਤਿ ਅਤ੍ਤਨੋ ਵਚਨਸ੍ਸ ਮੁਸਾਭਾਵਂ ਞਤ੍ਵਾ, ਅਦਿਟ੍ਠਂ ‘‘ਦਿਟ੍ਠ’’ਨ੍ਤਿਆਦਿਨਾ ਨਯੇਨ ਮੁਸਾਵਾਦੇ ਸਮ੍ਪਜਾਨਨ੍ਤਸ੍ਸ ਮੁਸਾਭਣਨੇਤਿਪਿ ਅਤ੍ਥੋ ਗਹੇਤਬ੍ਬੋ. ਯਥਾਹ ਅਟ੍ਠਕਥਾਯਂ ‘‘ਜਾਨਿਤ੍ਵਾ ਜਾਨਨ੍ਤਸ੍ਸ ਚ ਮੁਸਾਭਣਨੇ’’ਤਿ (ਪਾਚਿ. ਅਟ੍ਠ. ੨). ‘‘ਮੁਸਾਵਾਦੇ’’ਤਿ ਹਿ ਨਿਮਿਤ੍ਤਤ੍ਥੇ ਭੁਮ੍ਮਂ, ਮੁਸਾਵਾਦਨਿਮਿਤ੍ਤਨ੍ਤਿ ਅਤ੍ਥੋ.

ਦਵਾ ਭਣਨ੍ਤਸ੍ਸਾਤਿ ਯੋਜਨਾ. ਅਨੁਪਪਰਿਕ੍ਖਿਤ੍ਵਾ ਵੇਗੇਨ ਦਿਟ੍ਠਮ੍ਪਿ ‘‘ਅਦਿਟ੍ਠਂ ਮੇ’’ਤਿ ਵਦਨ੍ਤਸ੍ਸਾਤਿ ਅਤ੍ਥੋ. ਯਥਾਹ ‘‘ਦਵਾ ਭਣਤਿ ਨਾਮ ਸਹਸਾ ਭਣਤੀ’’ਤਿ ਪਦਭਾਜਨੀਅਟ੍ਠਕਥਾਯਂ ‘‘ਸਹਸਾ ਭਣਤੀਤਿ ਅਵੀਮਂਸਿਤ੍ਵਾ ਅਨੁਪਧਾਰੇਤ੍ਵਾ ਵੇਗੇਨ ਦਿਟ੍ਠਮ੍ਪਿ ‘ਅਦਿਟ੍ਠਂ ਮੇ’ਤਿ ਭਣਤੀ’’ਤਿ (ਪਾਚਿ. ਅਟ੍ਠ. ੧੧). ਰਵਾ ਭਣਨ੍ਤਸ੍ਸਾਤਿ ‘‘ਚੀਵਰ’’ਨ੍ਤਿ ਵਤ੍ਤੁਕਾਮਸ੍ਸ ‘‘ਚੀਰ’’ਨ੍ਤਿ ਵਚਨਂ ਵਿਯ ਮਨ੍ਦਤ੍ਤਾ ਮੋਮੂਹਤ੍ਤਾ ‘‘ਅਞ੍ਞਂ ਭਣਿਸ੍ਸਾਮੀ’’ਤਿ ਅਞ੍ਞਂ ਭਣਨ੍ਤਸ੍ਸ. ਯਥਾਹ ‘‘ਰਵਾ ਭਣਤਿ ਨਾਮ ‘ਅਞ੍ਞਂ ਭਣਿਸ੍ਸਾਮੀ’ਤਿ ਅਞ੍ਞਂ ਭਣਤੀ’’ਤਿ.

੮੯੦. ਅਞ੍ਞਤ੍ਥਾਤਿ ਚਤੁਤ੍ਥਪਾਰਾਜਿਕਾਦੀਸੁ. ਅਤ੍ਤਨਾ ਅਲਦ੍ਧਂ ਉਤ੍ਤਰਿਮਨੁਸ੍ਸਧਮ੍ਮਂ ‘‘ਲਦ੍ਧਂ ਮਯਾ’’ਤਿ ਮੁਸਾ ਯਸ੍ਸ ਭਣਤਿ, ਤੇਨ ਤਙ੍ਖਣਮੇਵ ਸੁਤ੍ਵਾ ਤਦਤ੍ਥੇ ਞਾਤੇ ਪਾਰਾਜਿਕਸ੍ਸ, ਅਞ੍ਞਾਤੇ ਕਾਲਨ੍ਤਰੇਨ ਞਾਤੇ ਚ ਪਰਿਯਾਯਵਚਨੇ ਚ ਞਾਤੇ ਥੁਲ੍ਲਚ੍ਚਯਸ੍ਸ, ਪਰਿਯਾਯਵਚਨੇ ਅਵਿਞ੍ਞਾਤੇ ਦੁਕ੍ਕਟਸ੍ਸ, ਦੁਟ੍ਠਦੋਸਸਿਕ੍ਖਾਪਦੇ ਪਾਰਾਜਿਕਂ ਅਨਾਪਨ੍ਨਸ੍ਸ ‘‘ਆਪਨ੍ਨੋ’’ਤਿ ਮੁਸਾਭਣਨੇ ਸਙ੍ਘਾਦਿਸੇਸਸ੍ਸ, ਓਮਸਵਾਦਸਿਕ੍ਖਾਪਦੇ ਦੁਬ੍ਭਾਸਿਤਸ੍ਸ ਚ ਵੁਤ੍ਤਤ੍ਤਾ ਆਹ ‘‘ਮੁਸਾਵਾਦਸ੍ਸ ਕਾਰਣਾ ਪਞ੍ਚ ਆਪਤ੍ਤਿਯੋ’’ਤਿ. ਇਮਾਯ ਪਾਚਿਤ੍ਤਿਯਾ ਸਦ੍ਧਿਂ ਛ ਆਪਤ੍ਤਿਕ੍ਖਨ੍ਧਾ ਹੋਨ੍ਤਿ.

ਸਮ੍ਪਜਾਨਮੁਸਾਵਾਦਕਥਾਵਣ੍ਣਨਾ.

੮੯੧-੩. ਵੁਤ੍ਤੇਸੁ ਜਾਤਿਆਦੀਸੁ ਦਸਸੁ ਅਕ੍ਕੋਸਵਤ੍ਥੂਸੂਤਿ ਯੋਜਨਾ, ਪਦਭਾਜਨੇ ਵੁਤ੍ਤੇਸੁ ਜਾਤਿਨਾਮਗੋਤ੍ਤਕਮ੍ਮਸਿਪ੍ਪਆਬਾਧਲਿਙ੍ਗਕਿਲੇਸਆਪਤ੍ਤਿਅਕ੍ਕੋਸਾਨਂ ਵਸੇਨ ਦਸਸੁ ਅਕ੍ਕੋਸਵਤ੍ਥੂਸੂਤਿ ਅਤ੍ਥੋ. ਤੇਸੁ ਕਿਲੇਸਂ ਵਿਨਾ ਸਬ੍ਬੇਤੇ ਹੀਨੁਕ੍ਕਟ੍ਠਵਸੇਨ ਦ੍ਵਿਪ੍ਪਕਾਰਾ ਹੋਨ੍ਤਿ. ਯਥਾਹ ਪਦਭਾਜਨੇ ‘‘ਜਾਤਿ ਨਾਮ ਦ੍ਵੇ ਜਾਤਿਯੋ ਹੀਨਾ ਚ ਜਾਤਿ ਉਕ੍ਕਟ੍ਠਾ ਚ ਜਾਤੀ’’ਤਿਆਦਿ.

ਤਤ੍ਥ ਚਣ੍ਡਾਲਾਦਿਜਾਤਿ ਹੀਨਾ, ਖਤ੍ਤਿਯਬ੍ਰਾਹ੍ਮਣਜਾਤਿਯੋ ਉਕ੍ਕਟ੍ਠਾ. ਨਾਮੇਸੁ ਅਵਕਣ੍ਣਕਜਵਕਣ੍ਣਕਾਦਿਨਾਮਾਨਿ ਦਾਸਨਾਮਤ੍ਤਾ ਹੀਨਾਨਿ, ਬੁਦ੍ਧਰਕ੍ਖਿਤਾਦਿਨਾਮਾਨਿ ਉਕ੍ਕਟ੍ਠਾਨਿ. ਕੋਸਿਯਾਦਿਗੋਤ੍ਤਂ ਹੀਨਂ, ਗੋਤਮਾਦਿਗੋਤ੍ਤਂ ਉਕ੍ਕਟ੍ਠਂ. ਕਮ੍ਮੇਸੁ ਵਡ੍ਢਕਿਮਣਿਕਾਰਾਦਿਕਮ੍ਮਾਨਿ ਹੀਨਾਨਿ, ਕਸਿਵਾਣਿਜ੍ਜਾਗੋਰਕ੍ਖਕਮ੍ਮਾਨਿ ਉਕ੍ਕਟ੍ਠਾਨਿ. ਸਿਪ੍ਪੇਸੁ ਨਲ਼ਕਾਰਕੁਮ੍ਭਕਾਰਾਦਿਸਿਪ੍ਪਂ ਹੀਨਂ, ਮੁਦ੍ਦਾਗਣਨਾਦਿਸਿਪ੍ਪਂ ਉਕ੍ਕਟ੍ਠਂ. ਆਬਾਧੇਸੁ ਸਬ੍ਬੇਪਿ ਆਬਾਧਾ ਹੀਨਾ, ਅਪਿਚ ਮਧੁਮੇਹੋ ਪੀਲ਼ਾਜਨਕਤ੍ਤਾਭਾਵਾ ਉਕ੍ਕਟ੍ਠੋ. ਲਿਙ੍ਗੇਸੁ ਅਤਿਦੀਘਤਾਦਯੋ ਹੀਨਾ, ਨਾਤਿਦੀਘਤਾਦਯੋ ਉਕ੍ਕਟ੍ਠਾ. ਸਬ੍ਬੇਪਿ ਕਿਲੇਸਾ ਹੀਨਾ. ਸਬ੍ਬਾਪਤ੍ਤਿਯੋਪਿ ਹੀਨਾ, ਅਪਿਚ ਸੋਤਾਪਤ੍ਤਿਸਮਾਪਤ੍ਤਿ ਉਕ੍ਕਟ੍ਠਾ. ਅਕ੍ਕੋਸੇਸੁ ‘‘ਓਟ੍ਠੋਸਿ ਮੇਣ੍ਡੋਸਿ ਗੋਣੋਸੀ’’ਤਿਆਦਿਕੋ ਹੀਨੋ, ‘‘ਪਣ੍ਡਿਤੋਸਿ ਬ੍ਯਤ੍ਤੋਸੀ’’ਤਿਆਦਿਕੋ ਉਕ੍ਕਟ੍ਠੋ.

ਅਞ੍ਞਤ੍ਰਞ੍ਞਾਪਦੇਸੇਨਾਤਿ ਪਰਿਯਾਯਕਥਨੇਨ ਵਿਨਾ. ਓਮਸਨ੍ਤਸ੍ਸਾਤਿ ਵਚਨਪਤੋਦੇਨ ਓਵਿਜ੍ਝਨ੍ਤਸ੍ਸ. ਸਮ੍ਬੁਦ੍ਧੇਨ ਪਕਾਸਿਤਾਤਿ ‘‘ਚਣ੍ਡਾਲੋਸਿ ਵੇਨੋਸਿ ਨੇਸਾਦੋਸਿ ਰਥਕਾਰੋਸਿ ਪੁਕ੍ਕੁਸੋਸੀ’ਤਿ ਭਣਤਿ, ਆਪਤ੍ਤਿ ਵਾਚਾਯ ਵਾਚਾਯ ਪਾਚਿਤ੍ਤਿਯਸ੍ਸਾ’’ਤਿ ਸਾਮਂ ਸਬ੍ਬਧਮ੍ਮਾਵਬੋਧਤੋ ‘‘ਸਮ੍ਬੁਦ੍ਧੋ’’ਤਿ ਪਞ੍ਞਾਤੇਨ ਭਗਵਤਾ ਦੇਸਿਤਾ.

੮੯੪. ਤੇਹੇਵਾਤਿ ਜਾਤਿਆਦੀਹਿ ਅਕ੍ਕੋਸਵਤ੍ਥੂਹੇਵ. ਅਞ੍ਞਾਪਦੇਸੇਨ ਭੂਤੇਨ ਵਾ…ਪੇ… ਆਪਨ੍ਨਮੇਵ ਵਾ ਅਨੁਪਸਮ੍ਪਨ੍ਨਂ ਅਕ੍ਕੋਸਨ੍ਤਸ੍ਸ ਦੁਕ੍ਕਟਂ ਸਮ੍ਬੁਦ੍ਧੇਨ ਪਕਾਸਿਤਨ੍ਤਿ ਸਮ੍ਬਨ੍ਧੋ. ਇਧ ਭੂਤਾਭੂਤਪਦਾਨਿ ਤੇਹੀਤਿ ਅਪੇਕ੍ਖਿਤ੍ਵਾ ਬਹੁਵਚਨਨ੍ਤਾਨਿ ਯੋਜੇਤਬ੍ਬਾਨਿ. ਏਤੇਨ ‘‘ਸਨ੍ਤਿ ਇਧੇਕਚ੍ਚੇ’’ਤਿਆਦਿਦੁਤਿਯਵਾਰਤ੍ਥਂ (ਪਾਚਿ. ੨੬) ਦਸ੍ਸੇਨ੍ਤੇਨ ਦੁਕ੍ਕਟਸਾਧਨਤ੍ਥੇਨ ਤਦੇਕਕਾਰਿਯਂ ਤਤਿਯਂ ਯੇਨੂਨਵਾਰਞ੍ਚ ਚਤੁਤ੍ਥਂ ਨ ਮਯਨ੍ਤਿਆਦਿਵਾਰਞ੍ਚ ਸਙ੍ਗਹਿਤਨ੍ਤਿ ਦਟ੍ਠਬ੍ਬਂ. ਯਥਾਹ ਅਟ੍ਠਕਥਾਯਂ ‘‘ਸਨ੍ਤਿ ਇਧੇਕਚ੍ਚੇ’ਤਿ ਵਾਰੇ ਪਨ ਪਰਿਹਰਿਤ੍ਵਾ ਵੁਤ੍ਤਭਾਵੇਨ ਦੁਕ੍ਕਟਂ. ਏਸੇਵ ਨਯੋ ‘ਯੇਨੂਨ…ਪੇ… ਨ ਮਯ’ਨ੍ਤਿ ਵਾਰੇਸੁਪੀ’’ਤਿ (ਪਾਚਿ. ਅਟ੍ਠ. ੨੬).

ਪਾਲ਼ਿਮੁਤ੍ਤਪਦੇਹਿਪੀਤਿ ਏਤ੍ਥਾਪਿ ਤਥੇਵ ‘‘ਭੂਤੇਨ ਵਾ’’ਤਿਆਦੀਨਿ ਪਦਾਨਿ ਸਮ੍ਬਨ੍ਧਿਤਬ੍ਬਾਨਿ. ‘‘ਚੋਰੋਸਿ, ਗਣ੍ਠਿਭੇਦਕੋਸੀ’’ਤਿਆਦਿ ਪਾਲ਼ਿਮੁਤ੍ਤਪਦਂ ਨਾਮ. ਸਬ੍ਬਤ੍ਥਾਤਿ ਸਬ੍ਬੇਸੁ ਚਤੂਸੁ ਵਾਰੇਸੁ, ਪਾਲ਼ਿਮੁਤ੍ਤਪਦੇਸੁ ਚ. ਵੁਤ੍ਤਞ੍ਹਿ ‘‘ਅਨੁਪਸਮ੍ਪਨ੍ਨੇ ਪਨ ਚਤੂਸੁਪਿ ਵਾਰੇਸੁ ਦੁਕ੍ਕਟਮੇਵ. ‘ਚੋਰੋਸਿ, ਗਣ੍ਠਿਭੇਦਕੋਸੀ’ਤਿਆਦਿਵਚਨੇਹਿ ਪਨ ਉਪਸਮ੍ਪਨ੍ਨੇਪਿ ਅਨੁਪਸਮ੍ਪਨ੍ਨੇਪਿ ਸਬ੍ਬਵਾਰੇਸੁ ਦੁਕ੍ਕਟਮੇਵਾ’’ਤਿ (ਪਾਚਿ. ਅਟ੍ਠ. ੨੬). ‘‘ਅਨੁਪਸਮ੍ਪਨ੍ਨ’’ਨ੍ਤਿ ਇਮਿਨਾ ‘‘ਇਮਸ੍ਮਿਞ੍ਚ ਸਿਕ੍ਖਾਪਦੇ ਠਪੇਤ੍ਵਾ ਭਿਕ੍ਖੁਂ ਭਿਕ੍ਖੁਨਿਆਦਯੋ ਸਬ੍ਬੇ ਸਤ੍ਤਾ ਅਨੁਪਸਮ੍ਪਨ੍ਨਟ੍ਠਾਨੇ ਠਿਤਾ’’ਤਿ (ਪਾਚਿ. ਅਟ੍ਠ. ੨੬) ਅਟ੍ਠਕਥਾਯਂ ਵੁਤ੍ਤਾ ਅਨੁਪਸਮ੍ਪਨ੍ਨਾ ਸਙ੍ਗਹਿਤਾ. ਤੇਨੇਵੇਤ੍ਥਾਪਿ ਵਕ੍ਖਤਿ ‘‘ਪਵਿਟ੍ਠਾਨੁਪਸਮ੍ਪਨ੍ਨਟ੍ਠਾਨੇ ਇਧ ਚ ਭਿਕ੍ਖੁਨੀ’’ਤਿ.

੮੯੫. ਦਵਕਮ੍ਯਤਾਤਿ ਏਤ੍ਥ ‘‘ਪਟਿਸਙ੍ਖਾ ਯੋਨਿਸੋ’’ਤਿਆਦੀਸੁ (ਮ. ਨਿ. ੧.੨੨, ੨੩, ੪੨੨; ਅ. ਨਿ. ੬.੫੮; ੯.੯; ਮਹਾਨਿ. ੨੦੬; ਵਿਭ. ੫੧੮) ਵਿਯ ਯ-ਕਾਰਲੋਪੋ. ਸਬ੍ਬਤ੍ਥਾਤਿ ਸਬ੍ਬੇਸੁ ਵੁਤ੍ਤਪਾਚਿਤ੍ਤਿਯਵਤ੍ਥੂਸੁ ਚ ਦੁਕ੍ਕਟਵਤ੍ਥੂਸੁ ਚਾਤਿ ਸਬ੍ਬਤ੍ਥੇਵ. ਦੁਬ੍ਭਾਸਿਤਮੁਦੀਰਿਤਨ੍ਤਿ ‘‘ਚਣ੍ਡਾਲੋਸਿ…ਪੇ… ਪੁਕ੍ਕੁਸੋਸੀ’ਤਿ ਭਣਤਿ, ਆਪਤ੍ਤਿ ਵਾਚਾਯ ਵਾਚਾਯ ਦੁਬ੍ਭਾਸਿਤਸ੍ਸਾ’’ਤਿ (ਪਾਚਿ. ੩੨) ਵੁਤ੍ਤਨ੍ਤਿ ਅਤ੍ਥੋ. ਪਰਮ੍ਮੁਖਾ ਪਨ ਪਾਚਿਤ੍ਤਿਯਵਤ੍ਥੂਹਿ ਚ ਦੁਕ੍ਕਟਵਤ੍ਥੂਹਿ ਚ ਅਕ੍ਕੋਸਨੇ ਦੁਕ੍ਕਟਮੇਵ. ਤਥਾ ਦਵਕਮ੍ਯਤਾਯ ਪਰਮ੍ਮੁਖਾ ਵਦਨ੍ਤਸ੍ਸਾਪਿ ਦੁਬ੍ਭਾਸਿਤਮੇਵਾਤਿ ਆਚਰਿਯਾ ਵਦਨ੍ਤਿ.

੮੯੬-੭. ਅਤ੍ਥਂ ਪੁਰਕ੍ਖਤ੍ਵਾ ਵਦਤੋ ਭਿਕ੍ਖੁਸ੍ਸ ਅਨਾਪਤ੍ਤੀਤਿ ਯੋਜਨਾ. ਧਮ੍ਮੋ ਨਾਮ ‘‘ਚਣ੍ਡਾਲੋਸੀ’’ਤਿਆਦਿਪਾਲ਼ਿਯੇਵ. ਯਥਾਹ ਅਟ੍ਠਕਥਾਯਂ ‘‘ਪਾਲ਼ਿਂ ਵਾਚੇਨ੍ਤੋ ਧਮ੍ਮਪੁਰੇਕ੍ਖਾਰੋ’’ਤਿ (ਪਾਚਿ. ਅਟ੍ਠ. ੩੫). ਅਨੁਸਾਸਨੀ ਨਾਮ ‘‘ਇਦਾਨਿਪਿ ਚਣ੍ਡਾਲੋਸਿ, ਮਾ ਪਾਪਧਮ੍ਮਂ ਅਕਾਸਿ, ਮਾ ਤਮੋ ਤਮਪਰਾਯਨੋ ਅਹੋਸੀ’’ਤਿਆਦਿਨਾ (ਪਾਚਿ. ਅਟ੍ਠ. ੩੫) ਨਯੇਨ ਅਟ੍ਠਕਥਾਯਂ ਵੁਤ੍ਤਸਰੂਪਾਯੇਵ ਅਨੁਸਾਸਨੀਪੁਰੇਕ੍ਖਤਾਯ ਠਤ੍ਵਾ ਵਦਨ੍ਤਸ੍ਸ ਚਿਤ੍ਤਸ੍ਸ ਲਹੁਪਰਿਵਤ੍ਤਿਤਭਾਵਤੋ ਅਨ੍ਤਰਾ ਕੋਧੇ ਉਪ੍ਪਨ੍ਨੇਪਿ ਅਨਾਪਤ੍ਤਿ.

ਏਤ੍ਥਾਤਿ ਇਮਸ੍ਮਿਂ ਓਮਸਵਾਦਸਿਕ੍ਖਾਪਦੇ. ਪਟਿਘਸਮ੍ਪਯੁਤ੍ਤਚਿਤ੍ਤੇਨੇਵ ਆਪਜ੍ਜਿਤਬ੍ਬਤ੍ਤਾ ਮਾਨਸਿਕਦੁਕ੍ਖਵੇਦਨਾਵ ਹੋਤਿ.

ਓਮਸਵਾਦਕਥਾਵਣ੍ਣਨਾ.

੮੯੮. ਦੁਵਿਧਾਕਾਰਤੋ ਭਿਕ੍ਖੁਪੇਸੁਞ੍ਞੇ ਆਪਤ੍ਤਿ ਸਿਯਾਤਿ ਯੋਜਨਾ. ਪਿਸਤੀਤਿ ਪਿਸੁਣਾ, ਵਾਚਾ, ਸਮਗ੍ਗੇ ਸਤ੍ਤੇ ਅਵਯਵਭੂਤੇ ਵਗ੍ਗੇ ਭਿਨ੍ਨੇ ਕਰੋਤੀਤਿ ਅਤ੍ਥੋ. ਪਿਸੁਣਾ ਏਵ ਪੇਸੁਞ੍ਞਂ, ਤਾਯ ਵਾਚਾਯ ਸਮਨ੍ਨਾਗਤੋ ਪੁਗ੍ਗਲੋ ਸਹਚਰਿਯਨਯੇਨ ਪਿਸੁਣੋ, ਤਸ੍ਸ ਕਮ੍ਮਂ ਪੇਸੁਞ੍ਞਂ, ਭਿਕ੍ਖੂਨਂ ਪੇਸੁਞ੍ਞਂ ਭਿਕ੍ਖੁਪੇਸੁਞ੍ਞਂ, ਤਸ੍ਮਿਂ ਭਿਕ੍ਖੁਪੇਸੁਞ੍ਞੇ. ਪਦਭਾਜਨੇ ‘‘ਉਪਸਮ੍ਪਨ੍ਨੋ ਉਪਸਮ੍ਪਨ੍ਨਸ੍ਸ ਸੁਤ੍ਵਾ ਉਪਸਮ੍ਪਨ੍ਨਸ੍ਸ ਪੇਸੁਞ੍ਞਂ ਉਪਸਂਹਰਤਿ ‘ਇਤ੍ਥਨ੍ਨਾਮੋ ਤਂ ‘ਚਣ੍ਡਾਲੋ…ਪੇ… ਪੁਕ੍ਕੁਸੋ’ਤਿ ਭਣਤੀ’ਤਿ ਆਪਤ੍ਤਿ…ਪੇ… ਪਾਚਿਤ੍ਤਿਯਸ੍ਸਾ’’ਤਿ (ਪਾਚਿ. ੩੯) ਵੁਤ੍ਤਤ੍ਤਾ ਸਯਂ ਉਪਸਮ੍ਪਨ੍ਨੋ ਹੁਤ੍ਵਾ ਉਪਸਮ੍ਪਨ੍ਨਸ੍ਸ ਜਾਤਿਆਦੀਸੁ ਦਸਸੁ ਅਕ੍ਕੋਸਵਤ੍ਥੂਸੁ ਅਞ੍ਞਤਰੇਨ ਅਞ੍ਞਂ ਉਪਸਮ੍ਪਨ੍ਨਂ ਪਰਮ੍ਮੁਖਾ ਅਕ੍ਕੋਸਨ੍ਤਸ੍ਸ ਸੁਤ੍ਵਾ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਵਕ੍ਖਮਾਨਸਰੂਪੇਸੁ ਅਤ੍ਤਨੋ ਪਿਯਕਾਮਤਾਭੇਦਾਧਿਪ੍ਪਾਯਸਙ੍ਖਾਤੇਸੁ ਦ੍ਵੀਸੁ ਕਾਰਣੇਸੁ ਅਞ੍ਞਤਰਕਾਰਣਂ ਪਟਿਚ੍ਚ ‘‘ਅਸੁਕੋ ਤੁਯ੍ਹਂ ਏਵਂ ਵਦਤੀ’’ਤਿ ਪੇਸੁਞ੍ਞਂ ਹਰਤਿ, ਤਸ੍ਸ ਪੇਸੁਞ੍ਞਕਥਨਨਿਮਿਤ੍ਤਂ ਪਾਚਿਤ੍ਤਿਯਂ ਹੋਤੀਤਿ ਅਤ੍ਥੋ.

ਦੁਵਿਧਾਕਾਰਤੋਤਿ ਏਤ੍ਥ ਆਕਾਰ-ਸਦ੍ਦੋ ਕਾਰਣਪਰਿਯਾਯੋ. ਯਥਾਹ ਅਟ੍ਠਕਥਾਯਂ ‘‘ਦ੍ਵੀਹਾਕਾਰੇਹੀਤਿ ਦ੍ਵੀਹਿ ਕਾਰਣੇਹੀ’’ਤਿ (ਪਾਚਿ. ਅਟ੍ਠ. ੩੮). ਏਤ੍ਥ ਕਾਰਣਂ ਨਾਮ ਅਧਿਪ੍ਪਾਯਵਿਸੇਸੋ. ਤਂ ਕਾਰਣਂ ਅਧਿਪ੍ਪਾਯਮੁਖੇਨ ਦਸ੍ਸੇਤੁਮਾਹ ‘‘ਅਤ੍ਤਨੋ’’ਤਿਆਦਿ. ਅਤ੍ਤਨੋ ਪਿਯਕਾਮਸ੍ਸਾਤਿ ਅਤ੍ਤਨੋ ਪਿਯਭਾਵਕਾਮਸ੍ਸ ਪੇਸੁਞ੍ਞਂ ਭਣਨ੍ਤਸ੍ਸ, ਅਤ੍ਤਨੋ ਪਿਯਭਾਵਂ ਕਾਮਯਨ੍ਤਸ੍ਸਾਤਿ ਅਤ੍ਥੋ, ਤਾਦਿਸੇਨ ਅਧਿਪ੍ਪਾਯੇਨਾਤਿ ਵੁਤ੍ਤਂ ਹੋਤਿ. ਯਥਾਹ ਅਟ੍ਠਕਥਾਯਂ ‘‘ਏਵਂ ਅਹਂ ਏਤਸ੍ਸ ਪਿਯੋ ਭਵਿਸ੍ਸਾਮੀ’’ਤਿ ਅਤ੍ਤਨੋ ਪਿਯਭਾਵਂ ਪਤ੍ਥਯਮਾਨਸ੍ਸਾ’’ਤਿ (ਪਾਚਿ. ਅਟ੍ਠ. ੩੮). ਪਰਭੇਦਤ੍ਥਿਨੋਪਿ ਵਾਤਿ ਅਕ੍ਕੋਸਕਸ੍ਸ ਚ ਅਤ੍ਤਨੋ ਪੇਸੁਞ੍ਞਵਚਨਂ ਸੁਣਨ੍ਤਸ੍ਸ ਚਾਤਿ ਉਭਿਨ੍ਨਂ ਭੇਦਂ ਇਚ੍ਛਨ੍ਤਸ੍ਸਾਤਿ ਅਤ੍ਥੋ, ਭੇਦਾਧਿਪ੍ਪਾਯੇਨਾਤਿ ਵੁਤ੍ਤਂ ਹੋਤਿ. ਯਥਾਹ ਅਟ੍ਠਕਥਾਯਂ ‘‘ਪਰਸ੍ਸ ਪਰੇਨ ਭੇਦਂ ਇਚ੍ਛਨ੍ਤਸ੍ਸਾ’’ਤਿ (ਪਾਚਿ. ਅਟ੍ਠ. ੩੮).

੮੯੯. ਪਰਿਯਾਯਨਯੇਨ ਅਕ੍ਕੋਸਨ੍ਤਸ੍ਸ ਵਚਨਸ੍ਸ…ਪੇ… ਦੁਕ੍ਕਟਨ੍ਤਿ ਯੋਜਨਾ, ਪਰਿਯਾਯਅਕ੍ਕੋਸਵਚਨਂ ਸੁਤ੍ਵਾ ਪਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਵਦਨ੍ਤਸ੍ਸ ਭਿਕ੍ਖੁਨੋ ਦੁਕ੍ਕਟਂ ਹੋਤੀਤਿ ਅਤ੍ਥੋ. ਯਥਾਹ ‘‘ਇਤ੍ਥਨ੍ਨਾਮੋ ਸਨ੍ਤਿ ਇਧੇਕਚ੍ਚੇ ਚਣ੍ਡਾਲਾ…ਪੇ… ਭਣਤਿ, ਨ ਸੋ ਅਞ੍ਞਂ ਭਣਤਿ, ਤਂਯੇਵ ਭਣਤੀਤਿ ਆਪਤ੍ਤਿ ਵਾਚਾਯ ਵਾਚਾਯ ਦੁਕ੍ਕਟਸ੍ਸਾ’’ਤਿਆਦਿ (ਪਾਚਿ. ੪੧). ਪਾਲ਼ਿਮੁਤ੍ਤਨਯੇਨ ਅਕ੍ਕੋਸਨ੍ਤਸ੍ਸ ਵਚਨਸ੍ਸ…ਪੇ… ਦੁਕ੍ਕਟਨ੍ਤਿ ਯੋਜਨਾ. ਏਤ੍ਥ ‘‘ਚੋਰੋਸਿ, ਗਣ੍ਠਿਭੇਦਕੋਸੀ’’ਤਿਆਦਿਨਾ ਦਸ੍ਸਿਤੋ ਪਾਲ਼ਿਮੁਤ੍ਤਨਯੋ ਨਾਮ.

੯੦੦. ਅਨੁਪਸਮ੍ਪਨ੍ਨਸ੍ਸ ਅਕ੍ਕੋਸਂ ਉਪਸਮ੍ਪਨ੍ਨਂ ਹਰਤੋਪਿ ਚ ਤਥਾ ਦੁਕ੍ਕਟਨ੍ਤਿ ਯੋਜਨਾ. ਚ-ਸਦ੍ਦੇਨ ਉਪਸਮ੍ਪਨ੍ਨਸ੍ਸ ਅਕ੍ਕੋਸਂ ਅਨੁਪਸਮ੍ਪਨ੍ਨਂ ਹਰਤੋਪਿ ਚ, ਅਨੁਪਸਮ੍ਪਨ੍ਨਸ੍ਸ ਅਕ੍ਕੋਸਂ ਅਨੁਪਸਮ੍ਪਨ੍ਨਂ ਹਰਤੋਪਿ ਚ ਤਥਾ ਦੁਕ੍ਕਟਨ੍ਤਿ ਵਿਕਪ੍ਪਦ੍ਵਯਞ੍ਚ ਸਮੁਚ੍ਚਿਨੋਤਿ. ‘‘ਇਧਾਪਿ ਭਿਕ੍ਖੁਨਿਂ ਆਦਿਂ ਕਤ੍ਵਾ ਸਬ੍ਬੇ ਅਨੁਪਸਮ੍ਪਨ੍ਨਾ ਨਾਮਾ’’ਤਿ (ਪਾਚਿ. ਅਟ੍ਠ. ੩੮) ਅਟ੍ਠਕਥਾਵਚਨਤੋ ‘‘ਭਿਕ੍ਖੁਨੀ’’ਤਿ ਉਪਲਕ੍ਖਣਂ.

੯੦੧. ਨ ਚੇਵ ਪਿਯਕਾਮਸ੍ਸਾਤਿ ਪਿਯਭਾਵਂ ਅਕਾਮਯਨ੍ਤਸ੍ਸ ਚ. ਨ ਭੇਦਤ੍ਥਿਨੋਪਿ ਚਾਤਿ ਭੇਦਂ ਅਨਿਚ੍ਛਨ੍ਤਸ੍ਸ ਚ. ਪਾਪਾਨਂ ਗਰਹਤ੍ਥਾਯਾਤਿ ਏਤ੍ਥ ‘‘ਕੇਵਲ’’ਨ੍ਤਿ ਸੇਸੋ. ਯਥਾਹ ਅਟ੍ਠਕਥਾਯਂ ‘‘ਏਕਂ ਅਕ੍ਕੋਸਨ੍ਤਂ, ਏਕਞ੍ਚ ਖਮਨ੍ਤਂ ਦਿਸ੍ਵਾ ‘ਅਹੋ ਨਿਲ੍ਲਜ੍ਜੋ, ਈਦਿਸਮ੍ਪਿ ਨਾਮ ਆਯਸ੍ਮਨ੍ਤਂ ਪੁਨ ਵਤ੍ਤਬ੍ਬਂ ਮਞ੍ਞਿਸ੍ਸਤੀ’ਤਿ ਏਵਂ ਕੇਵਲਂ ਪਾਪਗਰਹਿਤਾਯ ਭਣਨ੍ਤਸ੍ਸ ਅਨਾਪਤ੍ਤੀ’’ਤਿ (ਪਾਚਿ. ਅਟ੍ਠ. ੩੮).

ਪੇਸੁਞ੍ਞਕਥਾਵਣ੍ਣਨਾ.

੯੦੩. ਅਞ੍ਞੇਨਾਤਿ ਸਾਮਣੇਰਾਦਿਨਾ. ‘‘ਯਞ੍ਚ ਪਦਂ ਯਞ੍ਚ ਅਨੁਪਦਂ ਯਞ੍ਚ ਅਨ੍ਵਕ੍ਖਰਂ ਯਞ੍ਚ ਅਨੁਬ੍ਯਞ੍ਜਨਂ, ਸਬ੍ਬਮੇਤਂ ਪਦਸੋ ਨਾਮਾ’’ਤਿ (ਪਾਚਿ. ੪੬) ਪਦਭਾਜਨੇ ਵੁਤ੍ਤਤ੍ਤਾ ਅਵਯਵੇ ਸਮੁਦਾਯੋਪਚਾਰਵਸੇਨ ‘‘ਪਿਟਕਤ੍ਤਯ’’ਨ੍ਤਿ ਤਦੇਕਦੇਸਪਦਾਦਿ ਏਵ ਵੁਤ੍ਤੋਤਿ ਗਹੇਤਬ੍ਬੋ. ਏਤ੍ਥ ਪਦਾਦਿਸਰੂਪਂ ਅਟ੍ਠਕਥਾਯ ਵੇਦਿਤਬ੍ਬਂ. ਵੁਤ੍ਤਞ੍ਹਿ ਤਤ੍ਥ ‘‘ਪਦਨ੍ਤਿ ਏਕੋ ਗਾਥਾਪਾਦੋ ਅਧਿਪ੍ਪੇਤੋ. ਅਨੁਪਦਨ੍ਤਿ ਦੁਤਿਯੋ ਪਾਦੋ. ਅਨ੍ਵਕ੍ਖਰਨ੍ਤਿ ਏਕੇਕਮਕ੍ਖਰਂ. ਅਨੁਬ੍ਯਞ੍ਜਨਨ੍ਤਿ ਪੁਰਿਮਬ੍ਯਞ੍ਜਨੇਨ ਸਦਿਸਂ ਪਚ੍ਛਾਬ੍ਯਞ੍ਜਨ’’ਨ੍ਤਿ (ਪਾਚਿ. ਅਟ੍ਠ. ੪੫). ਇਦਂ ਗਾਥਾਮਯਦੇਸਨਂ ਸਨ੍ਧਾਯ ਵੁਤ੍ਤਂ. ‘‘ਯਂ ਕਿਞ੍ਚਿ ਵਾ ਏਕਮਕ੍ਖਰਂ ਅਨ੍ਵਕ੍ਖਰਂ, ਅਕ੍ਖਰਸਮੂਹੋ ਅਨੁਬ੍ਯਞ੍ਜਨਂ, ਅਕ੍ਖਰਾਨੁਬ੍ਯਞ੍ਜਨਸਮੂਹੋ ਪਦਂ, ਪਠਮਪਦਂ ਪਦਮੇਵ, ਦੁਤਿਯਂ ਅਨੁਪਦਨ੍ਤਿ ਏਵਮੇਤ੍ਥ ਨਾਨਾਕਰਣਂ ਵੇਦਿਤਬ੍ਬ’’ਨ੍ਤਿਪਿ (ਪਾਚਿ. ਅਟ੍ਠ. ੪੫) ਵੁਤ੍ਤਂ. ਇਦਂ ਚੁਣ੍ਣਿਯਦੇਸਨਂ ਸਨ੍ਧਾਯ ਵੁਤ੍ਤਂ.

ਧਮ੍ਮਨ੍ਤਿ ਬੁਦ੍ਧਭਾਸਿਤਾਦਿਪਾਲ਼ਿਧਮ੍ਮਂ. ਪਟਿਸਮ੍ਭਿਦਾਯਞ੍ਹਿ ਧਮ੍ਮਪਞ੍ਚਕੇ ਪਾਲ਼ਿਪਿ ਧਮ੍ਮੋਤਿ ਵੁਤ੍ਤਾ. ਧਮ੍ਮਪਞ੍ਚਕਂ ਨਾਮ ਫਲਨਿਬ੍ਬਤ੍ਤਕੋ ਹੇਤੁ, ਅਰਿਯਮਗ੍ਗੋ, ਭਾਸਿਤਂ, ਕੁਸਲਾਕੁਸਲਂ ਚੇਤਿ ਏਤੇ ਧਮ੍ਮਸਞ੍ਞਿਤਾਤਿ ਨਿਦ੍ਦਿਟ੍ਠਂ. ਏਤ੍ਥ ਹਿ ਭਾਸਿਤਨ੍ਤਿ ਪਾਲ਼ਿ ਵੁਤ੍ਤਾ. ਅਟ੍ਠਕਥਾਨਿਸ੍ਸਿਤੋਪਿ ਏਤ੍ਥੇਵ ਸਙ੍ਗਹਂ ਗਚ੍ਛਤਿ. ਸੋ ਚ ਪੁਬ੍ਬੇ ਮਗਧਭਾਸਾਯ ਠਿਤੋ ਸਙ੍ਗੀਤਿਤ੍ਤਯਾਰੁਲ਼੍ਹੋ ਗਹੇਤਬ੍ਬੋ.

‘‘ਸਹ ਭਣਨ੍ਤਸ੍ਸ ਪਾਚਿਤ੍ਤਿਯਂ ਸਿਯਾ’’ਤਿ ਇਮਿਨਾ ‘‘ਏਕਤੋ ਪਟ੍ਠਪੇਤ੍ਵਾ ਏਕਤੋ ਓਸਾਪੇਨ੍ਤੀ’’ਤਿਆਦਿਨਾ (ਪਾਚਿ. ੪੬) ਪਦਭਾਜਨਾਗਤਨਯੇਨ ਅਨੁਪਸਮ੍ਪਨ੍ਨੇਨ ਸਦ੍ਧਿਂ ਆਰਭਿਤ੍ਵਾ ਏਕਤੋ ਉਚ੍ਚਾਰਣਵਸੇਨ ਪਦਂ ਵਾ ਅਨੁਪਦਂ ਵਾ ਅਨ੍ਵਕ੍ਖਰਂ ਵਾ ਅਨੁਬ੍ਯਞ੍ਜਨਂ ਵਾ ਵਦਤੋ ਪਦਾਦਿਗਣਨਾਵਸੇਨ ਪਾਚਿਤ੍ਤਿਯਨ੍ਤਿ ਵੁਤ੍ਤਂ ਹੋਤਿ.

੯੦੪. ਸਙ੍ਗੀਤਿਂ ਅਨਾਰੁਲ਼੍ਹੇਸੁ ਧਮ੍ਮੇਸੁ ਰਾਜੋਵਾਦਾਦਯੋ ਸੁਤ੍ਤਨ੍ਤਾ ਆਪਤ੍ਤਿਜਨਕਾਯੇਵਾਤਿ ਮਹਾਪਚ੍ਚਰਿਯਾਦਿਸੁ ਵੁਤ੍ਤਾਤਿ ਯੋਜਨਾ. ਰਾਜੋਵਾਦੋ ਨਾਮ ਏਕੋ ਸੁਤ੍ਤਨ੍ਤੋ. ਆਦਿ-ਸਦ੍ਦੇਨ ਤਿਕ੍ਖਿਨ੍ਦ੍ਰਿਯਾਦਿਸੁਤ੍ਤਨ੍ਤਾ ਗਹਿਤਾ.

੯੦੫. ਭਿਕ੍ਖੁਸ੍ਮਿਮ੍ਪਿ ਭਿਕ੍ਖੁਨਿਯਾਪਿ ਚ ਅਨੁਪਸਮ੍ਪਨ੍ਨਸਞ੍ਞਿਨੋ, ਵਿਮਤਿਸ੍ਸ ਵਾ ਭਿਕ੍ਖੁਸ੍ਸ ਤਥਾ ਪਦਸੋਧਮ੍ਮੇ ਦੁਕ੍ਕਟਂ ਹੋਤੀਤਿ ਯੋਜਨਾ.

੯੦੬-੭. ਏਕਤੋ ਉਦ੍ਦਿਸਾਪੇਤੀਤਿ ਏਕਤੋ ਉਦ੍ਦੇਸਂ ਗਣ੍ਹਨ੍ਤੇਹਿ ਅਨੁਪਸਮ੍ਪਨ੍ਨੇਹਿ ਸਦ੍ਧਿਂ ਉਚ੍ਚਾਰਣਵਸੇਨ ਉਦ੍ਦਿਸਾਪੇਤਿ. ਸਜ੍ਝਾਯਂ ਵਾ ਕਰੋਤੀਤਿ ਤਥਾ ਏਕਤੋ ਸਜ੍ਝਾਯਤਿ.

‘‘ਸਚੇ ਏਕਗਾਥਾਯ ਏਕੋ ਪਾਦੋ ਨ ਆਗਚ੍ਛਤਿ, ਸੇਸਂ ਆਗਚ੍ਛਤਿ, ਅਯਂ ਯੇਭੁਯ੍ਯੇਨ ਪਗੁਣਗਨ੍ਥੋ ਨਾਮ. ਏਸ ਨਯੋ ਸੁਤ੍ਤੇਪਿ ਵੇਦਿਤਬ੍ਬੋਤੀ’’ਤਿ (ਪਾਚਿ. ਅਟ੍ਠ. ੪੮) ਅਟ੍ਠਕਥਾਵਚਨਤੋ ਪਗੁਣਗਨ੍ਥਨ੍ਤਿ ਏਤ੍ਥ ‘‘ਯੇਭੁਯ੍ਯੇਨਾ’’ਤਿ ਸੇਸੋ. ਓਪਾਤੇਤੀਤਿ ‘‘ਏਵਂ ਭਣਾਹੀ’’ਤਿ ਏਕਤੋ ਭਣਤਿ. ਉਦ੍ਦੇਸਨ੍ਤਿ ਉਦ੍ਦਿਸਿਤਬ੍ਬਂ. ਤੇਨਾਤਿ ਅਨੁਪਸਮ੍ਪਨ੍ਨੇਨ.

੯੦੮. ਯਸ੍ਮਾ ਇਦਂ ਪਦਸੋਧਮ੍ਮਸਿਕ੍ਖਾਪਦਂ ਵਾਚਤੋ ਚ ਸਮੁਟ੍ਠਾਤਿ, ਵਾਚਾਚਿਤ੍ਤਦ੍ਵਯਾਪਿ ਚ ਸਮੁਟ੍ਠਾਤਿ, ਤਸ੍ਮਾ ਇਦਂ ਸਮੁਟ੍ਠਾਨਂ ਪਦਸੋਧਮ੍ਮਸਞ੍ਞਿਤਨ੍ਤਿ ਵੁਤ੍ਤਨ੍ਤਿ ਯੋਜਨਾ.

ਪਦਸੋਧਮ੍ਮਕਥਾਵਣ੍ਣਨਾ.

੯੦੯-੧੦. ਸਬ੍ਬਚ੍ਛਨ੍ਨਸਬ੍ਬਪਰਿਚ੍ਛਨ੍ਨੇ ਸੇਨਾਸਨੇ ਤਿਸ੍ਸਨ੍ਨਂ ਪਨ ਰਤ੍ਤੀਨਂ ਯੋ ਪਨ ਭਿਕ੍ਖੁ ਰਤ੍ਤਿਯਂ ਠਪੇਤ੍ਵਾ ਭਿਕ੍ਖੁਂ ਅਞ੍ਞੇਨ ਸਚੇ ਨਿਪਜ੍ਜੇਯ੍ਯ, ਤਸ੍ਸ ਪਾਚਿਤ੍ਤਿਯਂ ਸਿਯਾਤਿ ਯੋਜਨਾ. ‘‘ਯਂ ਕਿਞ੍ਚਿ ਪਟਿਚ੍ਛਾਦਨਸਮਤ੍ਥਂ ਇਧ ਛਦਨਞ੍ਚ ਪਰਿਚ੍ਛਨ੍ਨਞ੍ਚ ਵੇਦਿਤਬ੍ਬ’’ਨ੍ਤਿ (ਪਾਚਿ. ਅਟ੍ਠ. ੫੧) ਅਟ੍ਠਕਥਾਯਂ ਵੁਤ੍ਤਤ੍ਤਾ ਛਦਨਾਰਹਂ ਇਟ੍ਠਕਾਸਿਲਾਸੁਧਾਤਿਣਪਣ੍ਣਾਦੀਨਂ ਯੇਨ ਕੇਨਚਿ ਸਬ੍ਬਸੋ ਛਾਦਿਤਂ ਸੇਨਾਸਨਂ ਸਬ੍ਬਚ੍ਛਨ੍ਨਂ. ‘‘ਭੂਮਿਤੋ ਪਟ੍ਠਾਯ ਯਾਵ ਛਦਨਂ ਆਹਚ੍ਚ ਪਾਕਾਰੇਨ ਵਾ ਅਞ੍ਞੇਨ ਵਾ ਕੇਨਚਿ ਅਨ੍ਤਮਸੋ ਵਤ੍ਥੇਨਪਿ ਪਰਿਕ੍ਖਿਤ੍ਤ’’ਨ੍ਤਿ (ਪਾਚਿ. ਅਟ੍ਠ. ੫੧) ਅਟ੍ਠਕਥਾਯਂ ਵੁਤ੍ਤਤ੍ਤਾ ਯੇਨ ਕੇਨਚਿ ਪਰਿਕ੍ਖਿਪਿਤ੍ਵਾ ਪਟਿਚ੍ਛਾਦਿਤਸੇਨਾਸਨਂ ਸਬ੍ਬਪਰਿਚ੍ਛਨ੍ਨਂ. ‘‘ਛਦਨਂ ਅਨਾਹਚ੍ਚ ਸਬ੍ਬਨ੍ਤਿਮੇਨ ਪਰਿਯਾਯੇਨ ਦਿਯਡ੍ਢਹਤ੍ਥੁਬ੍ਬੇਧੇਨ ਪਾਕਾਰਾਦਿਨਾ ਪਰਿਕ੍ਖਿਤ੍ਤਾਪਿ ਸਬ੍ਬਪਰਿਚ੍ਛਨ੍ਨਾਯੇਵਾ’’ਤਿ (ਪਾਚਿ. ਅਟ੍ਠ. ੫੧) ਕੁਰੁਨ੍ਦਟ੍ਠਕਥਾਯਂ ਵੁਤ੍ਤਂ, ਤਂ ‘‘ਦਿਯਡ੍ਢਾ’’ਤਿਆਦਿਨਾ ਵਕ੍ਖਤਿ.

ਏਵਂ ਸਬ੍ਬਚ੍ਛਨ੍ਨਸਬ੍ਬਪਰਿਚ੍ਛਨ੍ਨੇ ਏਕਸ੍ਮਿਂ ਸੇਨਾਸਨੇ ਯੋ ਭਿਕ੍ਖੁ ਉਪਸਮ੍ਪਨ੍ਨਤੋ ਅਞ੍ਞੇਨ ਏਕੇਨ ਵਾ ਅਨੇਕੇਹਿ ਵਾ ਤਿਰਤ੍ਤਂ ਸਹਸੇਯ੍ਯਂ ਕਪ੍ਪੇਤ੍ਵਾ ਚਤੁਤ੍ਥਰਤ੍ਤਿਂ ਆਦਿਂ ਕਤ੍ਵਾ ਸਬ੍ਬਰਤ੍ਤੀਸੁ ਸੂਰਿਯਤ੍ਥਙ੍ਗਮਤੋ ਪਟ੍ਠਾਯ ਸਕਲਰਤ੍ਤਿਯਂ ਪਠਮਂ ਵਾ ਪਚ੍ਛਾ ਵਾ ਅਪੁਬ੍ਬਾਚਰਿਮਂ ਵਾ ਪਿਟ੍ਠਿਂ ਪਸਾਰੇਤ੍ਵਾ ਸਚੇ ਏਕਸੇਨਾਸਨੇ ਸੇਯ੍ਯਂ ਕਪ੍ਪੇਤਿ, ਤਸ੍ਸ ਦੇਵਸਿਕਂ ਪਾਚਿਤ੍ਤਿਯਂ ਹੋਤੀਤਿ ਇਦਂ ਵਿਧਾਨਂ ‘‘ਅਪਿਚੇਤ੍ਥ ਏਕਾਵਾਸਾਦਿਕਮ੍ਪਿ ਚਤੁਕ੍ਕਂ ਵੇਦਿਤਬ੍ਬ’’ਨ੍ਤਿਆਦਿਨਾ (ਪਾਚਿ. ਅਟ੍ਠ. ੫੧) ਅਟ੍ਠਕਥਾਯਂ ਵੁਤ੍ਤਂ.

‘‘ਯੇਭੁਯ੍ਯੇਨ ਪਰਿਚ੍ਛਨ੍ਨੇ ਛਨ੍ਨੇ’’ਤਿ ਇਮਿਨਾਪਿ ਏਵਮੇਵ ਯੋਜੇਤ੍ਵਾ ਅਤ੍ਥੋ ਵੇਦਿਤਬ੍ਬੋ. ‘‘ਯਸ੍ਸਾ ਪਨ ਉਪਰਿ ਬਹੁਤਰਂ ਠਾਨਂ ਛਨ੍ਨਂ, ਅਪ੍ਪਂ ਅਚ੍ਛਨ੍ਨਂ, ਸਮਨ੍ਤਤੋ ਚ ਬਹੁਤਰਂ ਪਰਿਕ੍ਖਿਤ੍ਤਂ, ਅਪ੍ਪਂ ਅਪਰਿਕ੍ਖਿਤ੍ਤਂ, ਅਯਂ ਯੇਭੁਯ੍ਯੇਨਛਨ੍ਨਾ ਯੇਭੁਯ੍ਯੇਨਪਰਿਚ੍ਛਨ੍ਨਾ ਨਾਮਾ’’ਤਿ (ਪਾਚਿ. ਅਟ੍ਠ. ੫੧) ਅਟ੍ਠਕਥਾਯਂ ਵੁਤ੍ਤਨਯੇਨ ਯੇਭੁਯ੍ਯੇਨ ਛਨ੍ਨਪਰਿਚ੍ਛਨ੍ਨਂ ਵੇਦਿਤਬ੍ਬਂ. ਅਤ੍ਥੋ ਵੁਤ੍ਤਨਯੋਯੇਵ. ‘‘ਯੇਭੁਯ੍ਯੇਨ ਪਂਸੁਕਾ’’ਤਿ ਏਤਸ੍ਸ ਅਟ੍ਠਕਥਾਯਂ (ਪਾਚਿ. ਅਟ੍ਠ. ੮੬) ਤੀਸੁ ਦ੍ਵੇ ਯੇਭੁਯ੍ਯਂ ਨਾਮ, ਇਧ ਪਨ ਪਦਸੋਧਮ੍ਮੇ ‘‘ਯੇਭੁਯ੍ਯੇਨ ਪਗੁਣਂ ਗਨ੍ਥ’’ਨ੍ਤਿ ਏਤਸ੍ਸ ਅਟ੍ਠਕਥਾਯਂ (ਪਾਚਿ. ਅਟ੍ਠ. ੪੮) ‘‘ਏਕਗਾਥਾਯਾ’’ਤਿਆਦਿਵਿਵਰਣੇ ਵਿਯ ਚਤੂਸੁ ਤਯੋਪਿ ਭਾਗਾ ਯੇਭੁਯ੍ਯਂ ਨਾਮਾਤਿ ਵੇਦਿਤਬ੍ਬਂ.

੯੧੧. ਮੇਥੁਨਸ੍ਸ ਪਹੋਨਕਂ ਯਂ ਪਨ ਵਤ੍ਥੁ ਪਠਮਪਾਰਾਜਿਕਾਯ ਨਿਦ੍ਦਿਟ੍ਠਂ ਅਨ੍ਤਮਸੋ ਤਿਰਚ੍ਛਾਨਗਤੇਨਪਿ, ਤੇਨ ਪਠਮਪਾਰਾਜਿਕਵਤ੍ਥੁਨਾ ਪੁਗ੍ਗਲੇਨ ਸਹ ਨਿਪਜ੍ਜਿਤ੍ਵਾ ਆਪਤ੍ਤਿ ਸਹਸੇਯ੍ਯਾਪਤ੍ਤਿ ਹੋਤੀਤਿ ਯੋਜਨਾ.

੯੧੨-੩. ‘‘ਉਭੋ ਵਾ ਨਿਪਜ੍ਜਨ੍ਤੀ’’ਤਿ ਵਿਕਪ੍ਪਸ੍ਸ ਪਠਮਗਾਥਾਦ੍ਵਯੇਨੇਵ ਅਤ੍ਥਤੋ ਦਸ੍ਸਿਤਤ੍ਤਾ ਪੁਬ੍ਬਾਪਰਿਯਵਸੇਨਪਿ ਸਮ੍ਭਵਨ੍ਤਂ ਦਸ੍ਸੇਤੁਂ ‘‘ਅਨੁਪਸਮ੍ਪਨ੍ਨੇ’’ਤਿਆਦਿਨਾ (ਪਾਚਿ. ੫੨-੫੪) ਨਯੇਨ ਦਸ੍ਸਿਤਪਕ੍ਖਦ੍ਵਯਂ ਨਿਦਸ੍ਸੇਤੁਮਾਹ ‘‘ਨਿਪਨ੍ਨੇ’’ਤਿਆਦਿ. ‘‘ਉਟ੍ਠਹਿਤ੍ਵਾ’’ਤਿ ਇਦਂ ਵਿਚ੍ਛਾਵਸੇਨ ਗਹੇਤਬ੍ਬਂ. ਅਨੁਪਸਮ੍ਪਨ੍ਨਗਣਨਾਯਪਿ ਵਾਤਿ ਬਹੂਸੁ ਅਨੁਪਸਮ੍ਪਨ੍ਨੇਸੁ ਤੇਸਂ ਗਣਨਾਯ ਚ. ਅਨੁਪਸਮ੍ਪਨ੍ਨੇਸੁ ਬਹੂਸੁ ਤੇਸਂ ਗਣਨਾਯ ਏਕਸ੍ਸ ਭਿਕ੍ਖੁਨੋ ਬਹੂ ਆਪਤ੍ਤਿਯੋ ਹੋਨ੍ਤੀਤਿ ਏਵਂ ਦਸ੍ਸਨੇਨ ਉਪਸਮ੍ਪਨ੍ਨੇਸੁ ਬਹੂਸੁ ਏਕਸ੍ਮਿਂ ਅਨੁਪਸਮ੍ਪਨ੍ਨੇ ਸਤਿ ਤੇਸਞ੍ਚ ਤਸ੍ਸ ਪਯੋਗਗਣਨਾਯ ਆਪਜ੍ਜਿਤਬ੍ਬਾ ਬਹੂ ਆਪਤ੍ਤਿਯੋ ਚ ਉਭੋਸੁਪਿ ਬਹੂਸੁ ਏਕੇਕਸ੍ਸੇਵ ਉਪਸਮ੍ਪਨ੍ਨਸ੍ਸ ਅਨੁਪਸਮ੍ਪਨ੍ਨਗਣਨਾਯ ਬਹੂ ਆਪਤ੍ਤਿਯੋ ਚ ਹੋਨ੍ਤੀਤਿਪਿ ਦਸ੍ਸਿਤਂ ਹੋਤਿ.

੯੧੪. ਏਕੇਨੇਵ ਦ੍ਵਾਰੇਨ ਵਲ਼ਞ੍ਜਿਤਬ੍ਬਤੋ ਏਕੂਪਚਾਰੇ ਸਤਗਬ੍ਭੇਪਿ ਸੇਨਾਸਨੇ ਉਪਸਮ੍ਪਨ੍ਨੋ ਏਕਸ੍ਮਿਂ ਗਬ੍ਭੇ ਵਸਨ੍ਤੋ ਅਤ੍ਤਨਾ ਸਯਨਗਬ੍ਭੇ ਦ੍ਵਾਰਂ ਪਿਦਹਿਤ੍ਵਾ ਵਾ ਅਪਿਦਹਿਤ੍ਵਾ ਵਾ ਚਤੁਤ੍ਥਰਤ੍ਤਿਯਂ ਸਯਤਿ ਚੇ, ਉਪਰਿਮਤਲੇ, ਅਵਸੇਸਗਬ੍ਭੇਸੁ ਚ ਸਯਨ੍ਤੇਹਿ ਅਨੁਪਸਮ੍ਪਨ੍ਨੇਹਿ ਪੁਬ੍ਬੇ ਵੁਤ੍ਤਆਪਤ੍ਤਿਨਿਯਮੋਯੇਵਾਤਿ ਦਸ੍ਸਨਤ੍ਥਮਾਹ ‘‘ਸਚੇ ਪਿਧਾਯਾ’’ਤਿਆਦਿ. ਗਬ੍ਭਦ੍ਵਾਰਂ ਉਤ੍ਤਰਪਦਲੋਪੇਨ ‘‘ਗਬ੍ਭ’’ਨ੍ਤਿ ਵੁਤ੍ਤਂ. ਚਤੁਤ੍ਥਦਿਵਸੇ ਅਤ੍ਥਙ੍ਗਤੇ ਸੂਰਿਯੇ ਨਿਪਜ੍ਜਤਿ, ਆਪਤ੍ਤਿ ਸਿਯਾਤਿ ਯੋਜਨਾ. ‘‘ਅਨੁਪਸਮ੍ਪਨ੍ਨੇਨ ਸਹਾ’’ਤਿ ਪਕਰਣਤੋ ਲਬ੍ਭਤਿ. ਆਪਤ੍ਤਿ ਪਾਚਿਤ੍ਤਿਯਂ.

੯੧੫. ਦਿਯਡ੍ਢਹਤ੍ਥੁਬ੍ਬੇਧੇਨਾਤਿ ਵਡ੍ਢਕਿਰਤਨੇਨ ਦਿਯਡ੍ਢਰਤਨੁਬ੍ਬੇਧੇਨ. ਪਾਕਾਰੋ ਨਾਮ ਨਿਟ੍ਠਿਤੋ. ਚਯਨਂ ਨਾਮ ਵਿਪ੍ਪਕਤਪਾਕਾਰੋਤਿਪਿ ਵਦਨ੍ਤਿ. ਇਮਿਨਾ ਚ ਆਲ਼ਿਨ੍ਦਸ੍ਸ ਅਗ੍ਗਹਣਤ੍ਥਂ ‘‘ਦਸਹਤ੍ਥੁਬ੍ਬੇਧਾਪਿ ਜਗਤਿ ਪਰਿਕ੍ਖੇਪਸਙ੍ਖ੍ਯਂ ਨ ਗਚ੍ਛਤੀ’’ਤਿ (ਪਾਚਿ. ਅਟ੍ਠ. ੫੧) ਅਟ੍ਠਕਥਾ ਪਮਾਣਨ੍ਤਿ ਵਦਨ੍ਤਿ. ਜਗਤੀਤਿ ਆਲ਼ਿਨ੍ਦਂ. ਆਦਿ-ਸਦ੍ਦੇਨ ਭਿਤ੍ਤਿਪਣ੍ਣਾਵਰਣਾਦਿਗਹਣਂ.

੯੧੬. ਦੁਸ੍ਸਕੁਟਿਯਨ੍ਤਿ ਵਤ੍ਥਕੁਟਿਯਂ.

੯੧੭. ‘‘ਸਬ੍ਬਚ੍ਛਨ੍ਨਪਰਿਚ੍ਛਨ੍ਨਾਦਿਪ੍ਪਭੇਦਤੋ ਯੇਭੁਯ੍ਯਾਦਿਪ੍ਪਭੇਦਤੋ’’ਤਿ ਆਦਿ-ਸਦ੍ਦੋ ਪਚ੍ਚੇਕਂ ਯੋਜੇਤਬ੍ਬੋ. ਪਠਮੇਨ ਆਦਿ-ਸਦ੍ਦੇਨ ਸਬ੍ਬਚ੍ਛਨ੍ਨਯੇਭੁਯ੍ਯਪਰਿਚ੍ਛਨ੍ਨਸਬ੍ਬਚ੍ਛਨ੍ਨਉਪਡ੍ਢਪਰਿਚ੍ਛਨ੍ਨਸਬ੍ਬਪਰਿਚ੍ਛਨ੍ਨਯੇਭੁਯ੍ਯਚ੍ਛਨ੍ਨ- ਸਬ੍ਬਪਰਿਚ੍ਛਨ੍ਨਉਪਡ੍ਢਚ੍ਛਨ੍ਨਸਙ੍ਖਾਤਾਨਿ ਚਤ੍ਤਾਰਿ ਸੇਨਾਸਨਾਨਿ ਗਹਿਤਾਨਿ. ਗਾਥਾਯ ਸਰੂਪੇਨ ਵੁਤ੍ਤਸਬ੍ਬਚ੍ਛਨ੍ਨਸਬ੍ਬਪਰਿਚ੍ਛਨ੍ਨੇਨ ਸਦ੍ਧਿਂ ਪਞ੍ਚ ਸੇਨਾਸਨਾਨਿ ਦਸ੍ਸਿਤਾਨਿ ਹੋਨ੍ਤਿ. ਦੁਤਿਯੇਨ ਆਦਿ-ਸਦ੍ਦੇਨ ਯੇਭੁਯ੍ਯਚ੍ਛਨ੍ਨਯੇਭੁਯ੍ਯਪਰਿਚ੍ਛਨ੍ਨ ਯੇਭੁਯ੍ਯਚ੍ਛਨ੍ਨਉਪਡ੍ਢਪਰਿਚ੍ਛਨ੍ਨ ਯੇਭੁਯ੍ਯਪਰਿਚ੍ਛਨ੍ਨਉਪਡ੍ਢਚ੍ਛਨ੍ਨਸਙ੍ਖਾਤਾਨਿ ਤੀਣਿ ਸੇਨਾਸਨਾਨਿ ਗਹਿਤਾਨਿ. ਇਮੇ ਅਟ੍ਠ ਵਿਕਪ੍ਪਾ ਲਬ੍ਭਨ੍ਤਿ. ਕਸ੍ਮਾ ਵੁਤ੍ਤਂ ‘‘ਸਤ੍ਤ ਪਾਚਿਤ੍ਤਿਯਾਨੀ’’ਤਿ? ਮਹਾਅਟ੍ਠਕਥਾਯ ਵੁਤ੍ਤਤ੍ਤਾ. ਯਥਾਹ ‘‘ਮਹਾਅਟ੍ਠਕਥਾਯਂ ਪਨ ‘ਸਬ੍ਬਚ੍ਛਨ੍ਨੇ ਯੇਭੁਯ੍ਯੇਨਪਰਿਚ੍ਛਨ੍ਨੇ ਪਾਚਿਤ੍ਤਿਯਂ, ਸਬ੍ਬਚ੍ਛਨ੍ਨੇ ਉਪਡ੍ਢਪਰਿਚ੍ਛਨ੍ਨੇ ਪਾਚਿਤ੍ਤਿਯਂ, ਯੇਭੁਯ੍ਯੇਨਚ੍ਛਨ੍ਨੇ ਉਪਡ੍ਢਪਰਿਚ੍ਛਨ੍ਨੇ ਪਾਚਿਤ੍ਤਿਯਂ, ਸਬ੍ਬਪਰਿਚ੍ਛਨ੍ਨੇ ਯੇਭੁਯ੍ਯੇਨਚ੍ਛਨ੍ਨੇ ਪਾਚਿਤ੍ਤਿਯਂ, ਸਬ੍ਬਪਰਿਚ੍ਛਨ੍ਨੇ ਉਪਡ੍ਢਚ੍ਛਨ੍ਨੇ ਪਾਚਿਤ੍ਤਿਯਂ, ਯੇਭੁਯ੍ਯੇਨਪਰਿਚ੍ਛਨ੍ਨੇ ਉਪਡ੍ਢਚ੍ਛਨ੍ਨੇ ਪਾਚਿਤ੍ਤਿਯਂ, ਪਾਲ਼ਿਯਂ ਵੁਤ੍ਤਪਾਚਿਤ੍ਤਿਯੇਨ ਸਦ੍ਧਿਂ ਸਤ੍ਤ ਪਾਚਿਤ੍ਤਿਯਾਨੀ’ਤਿ ਵੁਤ੍ਤ’’ਨ੍ਤਿ (ਪਾਚਿ. ਅਟ੍ਠ. ੫੩).

ਕਸ੍ਮਾ ਪਨ ਅਟ੍ਠਕਥਾਯਂ ‘‘ਅਟ੍ਠ ਪਾਚਿਤ੍ਤਿਯਾਨੀ’’ਤਿ ਵਤ੍ਵਾ ‘‘ਸਤ੍ਤਾ’’ਤਿ ਗਣਨਪਰਿਚ੍ਛੇਦੋ ਕਤੋਤਿ? ਨਿਸ੍ਸਨ੍ਦੇਹੇ ਤਾਵ ‘‘ਸੇਯ੍ਯਾ ਨਾਮ ਸਬ੍ਬਚ੍ਛਨ੍ਨਾ ਸਬ੍ਬਪਰਿਚ੍ਛਨ੍ਨਾ, ਯੇਭੁਯ੍ਯੇਨਚ੍ਛਨ੍ਨਾ ਯੇਭੁਯ੍ਯੇਨਪਰਿਚ੍ਛਨ੍ਨਾ’ਤਿ (ਪਾਚਿ. ੫੨) ਪਾਲ਼ਿਯਂ ਆਗਤੇਸੁ ਦ੍ਵੀਸੁ ਵਿਕਪ੍ਪੇਸੁ ਏਕਸ੍ਮਿਂ ਵੁਤ੍ਤਪਾਚਿਤ੍ਤਿਯਂ ਗਹੇਤ੍ਵਾ ਪਾਲ਼ਿਯਂ ਵੁਤ੍ਤੇਨ ਪਾਚਿਤ੍ਤਿਯੇਨ ‘ਸਤ੍ਤਾ’ਤਿ ਵੁਤ੍ਤ’’ਨ੍ਤਿ ਪਰਿਹਾਰੋ ਦਸ੍ਸਿਤੋ. ਸਾਰਤ੍ਥਦੀਪਨਿਯਞ੍ਚ ‘‘ਸਤ੍ਤ ਪਾਚਿਤ੍ਤਿਯਾਨੀ’ਤਿ ਪਾਲ਼ਿਯਂ ਵੁਤ੍ਤਪਾਚਿਤ੍ਤਿਯਦ੍ਵਯਂ ਸਾਮਞ੍ਞਤੋ ਏਕਤ੍ਤੇਨ ਗਹੇਤ੍ਵਾ ਵੁਤ੍ਤਂ. ਵਿਸੁਂ ਪਨ ਗਯ੍ਹਮਾਨੇ ਸਬ੍ਬਚ੍ਛਨ੍ਨੇ ਸਬ੍ਬਪਰਿਚ੍ਛਨ੍ਨੇ ਪਾਚਿਤ੍ਤਿਯਂ, ਯੇਭੁਯ੍ਯੇਨਚ੍ਛਨ੍ਨੇ ਯੇਭੁਯ੍ਯੇਨਪਰਿਚ੍ਛਨ੍ਨੇ ਪਾਚਿਤ੍ਤਿਯਨ੍ਤਿ ਅਟ੍ਠੇਵ ਪਾਚਿਤ੍ਤਿਯਾਨਿ ਹੋਨ੍ਤੀ’’ਤਿ (ਸਾਰਤ੍ਥ. ਟੀ. ਪਾਚਿਤ੍ਤਿਯ ੩.੫੩) ਪਰਿਹਾਰੋ ਵੁਤ੍ਤੋ.

ਸਬ੍ਬਯੇਭੁਯ੍ਯਉਪਡ੍ਢਪਦੇਸੁ ਛਨ੍ਨਪਰਿਚ੍ਛਨ੍ਨਪਦੇਹਿ ਯੋਜਿਤੇਸੁ ਨਵ ਵਿਕਪ੍ਪਾ ਸਮ੍ਭਵਨ੍ਤਿ, ਤੇਸੁ ਨਵਮੇ ਉਪਡ੍ਢਚ੍ਛਨ੍ਨਉਪਡ੍ਢਪਰਿਚ੍ਛਨ੍ਨਵਿਕਪ੍ਪੇ ਦੁਕ੍ਕਟਸ੍ਸ ਦਸ੍ਸਿਤਤ੍ਤਾ ਪਾਰਿਸੇਸਤੋ ਇਤਰੇਸੁ ਅਟ੍ਠਸੁ ਅਟ੍ਠ ਪਾਚਿਤ੍ਤਿਯਾਨੇਵ ਸਮ੍ਭਵਨ੍ਤਿ. ਅਟ੍ਠਕਥਾਯਂ ਪਨ ਅਪ੍ਪਕਂ ਊਨਮਧਿਕਂ ਵਾ ਗੁਣਨੂਪਗਂ ਨ ਹੋਤੀਤਿ ਕਤ੍ਵਾ ‘‘ਸਤ੍ਤਾ‘‘ਤਿ ਵੁਤ੍ਤਨ੍ਤਿ ਗਹੇਤਬ੍ਬਂ. ਏਤ੍ਥਾਤਿ ਇਮਸ੍ਮਿਂ ਸਿਕ੍ਖਾਪਦੇ.

੯੧੮. ‘‘ਅਡ੍ਢਚ੍ਛਨ੍ਨੇ ਅਡ੍ਢਪਰਿਚ੍ਛਨ੍ਨੇ’’ਤਿ ਯੋਜਨਾ. ‘‘ਸਬ੍ਬਪਰਿਚ੍ਛਨ੍ਨੇ ਚੂਲ਼ਚ੍ਛਨ੍ਨੇ’’ਤਿ ਯਥਾਕ੍ਕਮੇਨ ਯੋਜਨਾ. ਇਮਿਨਾ ਅਟ੍ਠਕਥਾਗਤੇਸੁ ਪਞ੍ਚਸੁ ਵਿਕਪ੍ਪੇਸੁ ਤਤਿਯਵਿਕਪ੍ਪਂ ਦਸ੍ਸੇਤ੍ਵਾ ਆਦਿ-ਸਦ੍ਦੇਨ ਸਬ੍ਬਚ੍ਛਨ੍ਨਾਦਯੋ ਸੇਸਵਿਕਪ੍ਪਾ ਗਹਿਤਾ. ਯਥਾਹ ਅਟ੍ਠਕਥਾਯਂ ‘‘ਸਬ੍ਬਚ੍ਛਨ੍ਨੇ ਚੂਲ਼ਕਪਰਿਚ੍ਛਨ੍ਨੇ ਦੁਕ੍ਕਟਂ, ਯੇਭੁਯ੍ਯੇਨਚ੍ਛਨ੍ਨੇ ਚੂਲ਼ਕਪਰਿਚ੍ਛਨ੍ਨੇ ਦੁਕ੍ਕਟਂ, ਸਬ੍ਬਪਰਿਚ੍ਛਨ੍ਨੇ ਚੂਲ਼ਕਚ੍ਛਨ੍ਨੇ ਦੁਕ੍ਕਟਂ, ਯੇਭੁਯ੍ਯੇਨਪਰਿਚ੍ਛਨ੍ਨੇ ਚੂਲ਼ਕਚ੍ਛਨ੍ਨੇ ਦੁਕ੍ਕਟਂ, ਪਾਲ਼ਿਯਂ ਆਗਤਦੁਕ੍ਕਟੇਨ ਸਹ ਪਞ੍ਚ ਦੁਕ੍ਕਟਾਨੀਹਿ ਵੁਤ੍ਤ’’ਨ੍ਤਿ (ਪਾਚਿ. ਅਟ੍ਠ. ੫੩). ਪਾਲ਼ਿਯਂ ਆਗਤਦੁਕ੍ਕਟਂ ਨਾਮ ਇਮਿਸ੍ਸਾਯੇਵ ਗਾਥਾਯ ਆਦਿਮ੍ਹਿਯੇਵ ਵੁਤ੍ਤਦੁਕ੍ਕਟਂ. ਯਥਾਹ ‘‘ਉਪਡ੍ਢਚ੍ਛਨ੍ਨੇ ਉਪਡ੍ਢਪਰਿਚ੍ਛਨ੍ਨੇ ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਪਾਚਿ. ੫੩).

ਚੂਲ਼ਚ੍ਛਨ੍ਨਾਦੀਨਿ ਚੇਤ੍ਥ ਏਵਂ ਵੇਦਿਤਬ੍ਬਾਨਿ – ਯਸ੍ਸ ਚਤੂਸੁ ਭਾਗੇਸੁ ਏਕੋ ਛਨ੍ਨੋ, ਸੇਸਾ ਅਚ੍ਛਨ੍ਨਾ, ਇਦਂ ਚੂਲ਼ਕਚ੍ਛਨ੍ਨਂ. ਯਸ੍ਸ ਤੀਸੁ ਭਾਗੇਸੁ ਦ੍ਵੇ ਛਨ੍ਨਾ, ਏਕੋ ਅਚ੍ਛਨ੍ਨੋ, ਇਦਂ ਯੇਭੁਯ੍ਯੇਨਚ੍ਛਨ੍ਨਂ. ਯਸ੍ਸ ਦ੍ਵੀਸੁ ਭਾਗੇਸੁ ਏਕੋ ਛਨ੍ਨੋ, ਏਕੋ ਅਚ੍ਛਨ੍ਨੋ, ਇਦਂ ਉਪਡ੍ਢਚ੍ਛਨ੍ਨਂ ਨਾਮ ਸੇਨਾਸਨਂ. ਚੂਲ਼ਪਰਿਚ੍ਛਨ੍ਨਾਦੀਨਿ ਇਮਿਨਾ ਨਯੇਨ ਵੇਦਿਤਬ੍ਬਾਨਿ. ਛਨ੍ਨਾਦੀਹਿਪੀਤਿ ਸਹਤ੍ਥੇ ਕਰਣਵਚਨਂ. ਪਿ-ਸਦ੍ਦੋ ਸਮੁਚ੍ਚਯਤ੍ਥੋ. ਸਬ੍ਬਚੂਲ਼ਪਰਿਚ੍ਛਨ੍ਨਛਨ੍ਨਾਦੀਹਿ ਚਤੂਹਿਪਿ ਸਹ ਅਡ੍ਢਚ੍ਛਨ੍ਨਪਰਿਚ੍ਛਨ੍ਨੇ ਪਞ੍ਚਧਾ ਦੁਕ੍ਕਟਂ ਪਰਿਦੀਪਿਤਨ੍ਤਿ ਯੋਜਨਾ.

੯੨੦. ਸਬ੍ਬਚ੍ਛਨ੍ਨਾਦਿਕੇਤਿ ਏਤ੍ਥ ਆਦਿ-ਸਦ੍ਦੇਨ ‘‘ਸਬ੍ਬਪਰਿਚ੍ਛਨ੍ਨੇ ਸਬ੍ਬਅਚ੍ਛਨ੍ਨੇ ਯੇਭੁਯ੍ਯੇਨਅਚ੍ਛਨ੍ਨੇ ਯੇਭੁਯ੍ਯੇਨਅਪਰਿਚ੍ਛਨ੍ਨੇ’’ਤਿ (ਪਾਚਿ. ੫੪) ਪਾਲ਼ਿਯਂ ਵੁਤ੍ਤਾ ਅਨਾਪਤ੍ਤਿਵਾਰਸੇਸਾ ਚ ਅਟ੍ਠਕਥਾਯਂ ਵੁਤ੍ਤਾ ‘‘ਉਪਡ੍ਢਚ੍ਛਨ੍ਨੇ ਚੂਲ਼ਕਪਰਿਚ੍ਛਨ੍ਨੇ, ਉਪਡ੍ਢਪਰਿਚ੍ਛਨ੍ਨੇ ਚੂਲ਼ਕਚ੍ਛਨ੍ਨੇ, ਚੂਲ਼ਕਚ੍ਛਨ੍ਨੇ ਚੂਲ਼ਕਪਰਿਚ੍ਛਨ੍ਨੇ’’ਤਿ (ਪਾਚਿ. ਅਟ੍ਠ. ੫੩) ਤਯੋ ਅਨਾਪਤ੍ਤਿਵਾਰਾ ਚ ਗਹਿਤਾ.

੯੨੧. ਨਿਪਨ੍ਨੇਪੀਤਿ ਏਤ੍ਥ ਪਿ-ਸਦ੍ਦੇਨ ‘‘ਭਿਕ੍ਖੁ ਨਿਪਨ੍ਨੇ ਅਨੁਪਸਮ੍ਪਨ੍ਨੋ ਨਿਸੀਦਤਿ, ਉਭੋ ਵਾ ਨਿਸੀਦਨ੍ਤੀ’’ਤਿ (ਪਾਚਿ. ੫੪) ਪਾਲ਼ਿਯਂ ਵੁਤ੍ਤਪਕਾਰਨ੍ਤਰੇ ਸਮੁਚ੍ਚਿਨੋਤਿ.

ਸਹਸੇਯ੍ਯਕਥਾਵਣ੍ਣਨਾ.

੯੨੨. ਅਪਿ-ਸਦ੍ਦੇਨ ਪਗੇਵ ਮਹਤ੍ਤਰਿਯਾਤਿ ਦਸ੍ਸੇਤਿ. ਸਹਸੇਯ੍ਯਂ ਪਕਪ੍ਪੇਯ੍ਯਾਤਿ ਯਥਾਵੁਤ੍ਤਲਕ੍ਖਣਂ ਸਬ੍ਬਚ੍ਛਨ੍ਨਸਬ੍ਬਪਰਿਚ੍ਛਨ੍ਨਾਦਿਸੇਨਾਸਨਂ ਪਵਿਸਿਤ੍ਵਾ ਸੂਰਿਯਤ੍ਥਙ੍ਗਮਤੋ ਪਟ੍ਠਾਯ ਪੁਬ੍ਬੇ ਵੁਤ੍ਤਪ੍ਪਕਾਰੇਨੇਵ ਪਿਟ੍ਠਿਪ੍ਪਸਾਰਣਲਕ੍ਖਣਂ ਸੇਯ੍ਯਂ ਕਪ੍ਪੇਯ੍ਯ.

੯੨੩-੪. ਦੇਵਿਯਾਤਿ ਦੇਵਿਤ੍ਥਿਯਾ. ਤਿਰਚ੍ਛਾਨਗਤਿਤ੍ਥਿਯਾਤਿ ਗੋਧਾਦਿਕਾਯ. ‘‘ਮੇਥੁਨਵਤ੍ਥੁਭੂਤਾਯਾ’’ਤਿ ਇਮਿਨਾ ਮੇਥੁਨਧਮ੍ਮਸ੍ਸ ਅਵਤ੍ਥੁਭੂਤਾਯ ਸਹਸੇਯ੍ਯਾਯ ਦੋਸਾਭਾਵਂ ਦਸ੍ਸੇਤਿ. ਵਤ੍ਥੂਨਂ ਗਣਨਾਯਾਤਿ ਮਾਤੁਗਾਮਸ੍ਸ ਗਣਨਾਯ ਚ ਤਾਸਞ੍ਚ ਅਤ੍ਤਨੋ ਚ ਪਯੋਗਗਣਨਾਯ ਚ. ਅਸ੍ਸਾਤਿ ਭਿਕ੍ਖੁਸ੍ਸ. ਮਾਤੁਗਾਮੇਨ ਤਯੋ ਦਿਵਸੇ ਸਹਸੇਯ੍ਯਾਯ ਇਮਿਨਾ ਸਿਕ੍ਖਾਪਦੇਨ ਆਪਤ੍ਤਿਂ ਆਪਜ੍ਜਿਤ੍ਵਾ ਚਤੁਤ੍ਥਦਿਵਸੇ ਸਹਸੇਯ੍ਯਾਯ ਦ੍ਵੀਹਿਪਿ ਸਿਕ੍ਖਾਪਦੇਹਿ ਆਪਤ੍ਤਿਂ ਆਪਜ੍ਜਤੀਤਿ ਏਤ੍ਥ ਦੁਕ੍ਕਟਵਤ੍ਥੁਭੂਤਾਯ ਇਤ੍ਥਿਯਾ ਤਤ੍ਥੇਵ ਸਹਸੇਯ੍ਯਾਯ ਇਮਿਨਾ ਸਿਕ੍ਖਾਪਦੇਨ ਦੁਕ੍ਕਟਂ ਆਪਜ੍ਜਿਤ੍ਵਾ ਚਤੁਤ੍ਥਦਿਵਸੇ ਰਤ੍ਤਿਯਂ ਸਹਸੇਯ੍ਯਾਯ ਇਮਿਨਾ ਸਿਕ੍ਖਾਪਦੇਨ ਆਪਜ੍ਜਿਤਬ੍ਬਦੁਕ੍ਕਟੇਨ ਸਹ ਪੁਰਿਮਸਿਕ੍ਖਾਪਦੇਨ ਪਾਚਿਤ੍ਤਿਯਂ ਆਪਜ੍ਜਤੀਤਿ ਵੇਦਿਤਬ੍ਬਂ.

ਦੁਤਿਯਸਹਸੇਯ੍ਯਕਥਾਵਣ੍ਣਨਾ.

੯੨੬. ਛਪ੍ਪਞ੍ਚਵਾਚਾਹਿ ਉਦ੍ਧਂ ਇਤ੍ਥਿਯਾ ਧਮ੍ਮਂ ਭਣਨ੍ਤਸ੍ਸਾਤਿ ਸਮ੍ਬਨ੍ਧੋ. ਇਤ੍ਥਿਯਾਤਿ ‘‘ਮਾਤੁਗਾਮੋ ਨਾਮ ਮਨੁਸ੍ਸਿਤ੍ਥੀ, ਨ ਯਕ੍ਖੀ, ਨ ਪੇਤੀ, ਨ ਤਿਰਚ੍ਛਾਨਗਤਾ, ਵਿਞ੍ਞੂ ਪਟਿਬਲਾ ਹੋਤਿ ਸੁਭਾਸਿਤਦੁਬ੍ਭਾਸਿਤਂ ਦੁਟ੍ਠੁਲ੍ਲਾਦੁਟ੍ਠੁਲ੍ਲਂ ਆਜਾਨਿਤੁ’’ਨ੍ਤਿ ਪਾਲ਼ਿਯਂ ਵੁਤ੍ਤਮਨੁਸ੍ਸਿਤ੍ਥਿਯਾ. ਭਣਨ੍ਤਸ੍ਸਾਤਿ ਵਕ੍ਖਮਾਨਲਕ੍ਖਣਂ ਧਮ੍ਮਂ ਛਹਿ ਪਦੇਹਿ ਉਤ੍ਤਰਿ ਭਣਨ੍ਤਸ੍ਸ. ਵਿਞ੍ਞੁਂ ਪੁਰਿਸਵਿਗ੍ਗਹਂ ਵਿਨਾਤਿ ‘‘ਵਿਞ੍ਞੂ ਨਾਮ ਪੁਰਿਸਵਿਗ੍ਗਹੋ ਪਟਿਬਲੋ ਹੋਤਿ ਸੁਭਾਸਿਤਦੁਬ੍ਭਾਸਿਤਂ ਦੁਟ੍ਠੁਲ੍ਲਾਦੁਟ੍ਠੁਲ੍ਲਂ ਆਜਾਨਿਤੁ’’ਨ੍ਤਿ (ਪਾਚਿ. ੬੪) ਪਾਲ਼ਿਯਂ ਵੁਤ੍ਤਸਵਨੂਪਚਾਰਗਤਮਨੁਸ੍ਸਪੁਰਿਸਂ ਵਿਨਾ. ਧਮ੍ਮਨ੍ਤਿ ਵਕ੍ਖਮਾਨਪ੍ਪਕਾਰਸਰੂਪਂ ਦੇਸਨਾਧਮ੍ਮਂ.

੯੨੭. ਗਾਥਾਮਯਾ, ਚੁਣ੍ਣਿਯਗਨ੍ਥਮਯਾਤਿ ਦੁਵਿਧਾ ਦੇਸਨਾ, ਤਤ੍ਥ ਗਾਥਾਮਯਦੇਸਨਾਯ ਵਾਚਾ ਨਾਮ ਗਾਥਾਪਾਦਲਕ੍ਖਣਾਤਿ ਦਸ੍ਸੇਤੁਮਾਹ ‘‘ਗਾਥਾਪਾਦੋ’’ਤਿਆਦਿ. ਚੁਣ੍ਣਿਯਦੇਸਨਾਯਂ ਪਨ ਵਾਚਾਪਰਿਚ੍ਛੇਦੋ ਵਿਭਤ੍ਯਨ੍ਤਵਸੇਨ ਵੇਦਿਤਬ੍ਬੋ. ਤੇਨਾਹ ਗਣ੍ਠਿਪਦੇ ‘‘ਏਕੋ ਗਾਥਾਪਾਦੋ’ਤਿ ਇਦਂ ਗਾਥਾਬਨ੍ਧਮੇਵ ਸਨ੍ਧਾਯ ਵੁਤ੍ਤਂ, ਅਞ੍ਞਤ੍ਥ ਪਨ ਵਿਭਤ੍ਤਿਅਨ੍ਤਪਦਮੇਵ ਗਹੇਤਬ੍ਬ’’ਨ੍ਤਿ. ਪਦਸੋਧਮ੍ਮਂ ਨਿਦ੍ਦਿਟ੍ਠਂ ਧਮ੍ਮਨ੍ਤਿ ਪਿਟਕਤ੍ਤਯਂ. ‘‘ਅਟ੍ਠਕਥ’’ਨ੍ਤਿ ਇਮਿਨਾ ਸਙ੍ਗੀਤਿਤ੍ਤਯਾਰੁਲ਼੍ਹਂ ਪੋਰਾਣਟ੍ਠਕਥਂ ਗਹੇਤਬ੍ਬਂ. ਤੇਨੇਵ ਗਣ੍ਠਿਪਦੇ ਵੁਤ੍ਤਂ ‘‘ਅਟ੍ਠਕਥਂ ਧਮ੍ਮਪਦਜਾਤਕਾਦਿਵਤ੍ਥੁਞ੍ਚਾ’’ਤਿ. ਇਮਿਨਾਪਿ ਪੋਰਾਣਕਂ ਸਙ੍ਗੀਤਿਆਰੁਲ਼੍ਹਮੇਵ ਅਟ੍ਠਕਥਂ ਵੁਤ੍ਤਨ੍ਤਿ ਵਦਨ੍ਤਿ. ਅਟ੍ਠਕਥਾਦਿਪਾਠਂ ਠਪੇਤ੍ਵਾ ਦਮਿਲ਼ਾਦਿਭਾਸਨ੍ਤਰੇਨ ਯਥਾਰੁਚਿ ਕਥੇਤੁਂ ਵਟ੍ਟਤੀਤਿ.

੯੨੮. ਪਦਾਦੀਨਂ ਵਸਾ ਛਨ੍ਨਂ ਵਾਚਾਨਂ ਉਪਰਿ ਧਮ੍ਮਂ ਦੇਸੇਨ੍ਤਸ੍ਸਾਤਿ ਯੋਜਨਾ. ਦੇਸੇਨ੍ਤਸ੍ਸਾਤਿ ਪਦਸੋਧਮ੍ਮੇ ਵੁਤ੍ਤਲਕ੍ਖਣਪਦਾਦਿਸਰੂਪਾਹਿ ਛਹਿ ਵਾਚਾਹਿ ਉਤ੍ਤਰਿ ਧਮ੍ਮਂ ਦੇਸੇਨ੍ਤਸ੍ਸ. ਪਦਾਦਿਗਣਨਾਯਾਤਿ ਯਥਾਵੁਤ੍ਤਲਕ੍ਖਣਪਦਅਨੁਪਦਅਨ੍ਵਕ੍ਖਰਅਨੁਬ੍ਯਞ੍ਜਨਗਣਨਾਯ.

੯੨੯. ਪੁਰਿਸਵਿਗ੍ਗਹਨ੍ਤਿ ਮਨੁਸ੍ਸਪੁਰਿਸਵੇਸਂ. ਏਤ੍ਥ ਤਿਰਚ੍ਛਾਨਗਤਾ ਨਾਮ ਵੇਸਨਿਮ੍ਮਾਨਾਰਹਾ ਇਦ੍ਧਿਮਨ੍ਤਾ ਨਾਗਸੁਪਣ੍ਣਾ.

੯੩੧. ਵਦਤੋਤਿ ਅਧਿਕਂ ਧਮ੍ਮਂ ਭਾਸਤੋ.

੯੩੨. ਇਤ੍ਥਿਰੂਪਨ੍ਤਿ ਮਨੁਸ੍ਸਿਤ੍ਥਿਵੇਸਂ. ਤਿਰਚ੍ਛਾਨਗਤਿਤ੍ਥਿਯਾਤਿ ਵੁਤ੍ਤਸਰੂਪਾਯ ਤਿਰਚ੍ਛਾਨਗਤਿਤ੍ਥਿਯਾ.

੯੩੩. ਸਯਂ ਉਟ੍ਠਾਯ ਨਿਸੀਦਿਤ੍ਵਾ ਪੁਨ ਧਮ੍ਮਂ ਦੇਸੇਨ੍ਤਸ੍ਸ ਅਨਾਪਤ੍ਤਿ ਪਕਾਸਿਤਾਤਿ ਸਮ੍ਬਨ੍ਧੋ. ਮਾਤੁਗਾਮਸ੍ਸ ਵਾ ਤਥਾਤਿ ਏਤ੍ਥ ‘‘ਤਥਾ’’ਤਿ ਇਮਿਨਾ ਵੁਤ੍ਤਪ੍ਪਕਾਰਸ੍ਸ ਗਹਿਤਤ੍ਤਾ ਉਟ੍ਠਾਯ ਨਿਸਿਨ੍ਨਸ੍ਸ ਮਾਤੁਗਾਮਸ੍ਸ ਪੁਨ ਧਮ੍ਮਂ ਦੇਸੇਨ੍ਤਸ੍ਸ ਅਨਾਪਤ੍ਤਿ ਪਕਾਸਿਤਾਤਿ ਵੁਤ੍ਤਂ ਹੋਤਿ. ‘‘ਉਟ੍ਠਾਯਾ’’ਤਿਆਦਿਨਾ ਇਰਿਯਾਪਥਪਰਿਵਤ੍ਤਨਦਸ੍ਸਨੇਨ ਨਾਨਾਇਰਿਯਾਪਥੇਪਿ ਅਨਾਪਤ੍ਤਿਂ ਦੀਪੇਤਿ.

੯੩੪. ਅਞ੍ਞਿਸ੍ਸਾ ਪੁਨ ਅਞ੍ਞਿਸ੍ਸਾਤਿ ਏਤ੍ਥ ‘‘ਆਗਤਾਗਤਾਯਾ’’ਤਿ ਸੇਸੋ. ਯਥਾਹ ਅਟ੍ਠਕਥਾਯਂ ‘‘ਅਞ੍ਞਸ੍ਸ ਮਾਤੁਗਾਮਸ੍ਸਾਤਿ ਏਕਿਸ੍ਸਾ ਦੇਸੇਤ੍ਵਾ ਪੁਨ ਆਗਤਾਗਤਾਯ ਅਞ੍ਞਿਸ੍ਸਾਪਿ ਦੇਸੇਤੀਤਿ ਏਵਂ ਏਕਾਸਨੇ ਨਿਸਿਨ੍ਨੋ ਮਾਤੁਗਾਮਸਤਸਹਸ੍ਸਨ੍ਨਮ੍ਪਿ ਦੇਸੇਤੀਤਿ ਅਤ੍ਥੋ’’ਤਿ (ਪਾਚਿ. ਅਟ੍ਠ. ੬੬). ਅਵੁਤ੍ਤਸਮੁਚ੍ਚਯਤ੍ਥੇਨ ਚ-ਸਦ੍ਦੇਨ ‘‘ਪਞ੍ਹਂ ਪੁਟ੍ਠੋ ਕਥੇਤੀ’’ਤਿ (ਪਾਚਿ. ੬੬) ਇਦਂ ਸਮੁਚ੍ਚਿਨੋਤਿ. ‘‘ਦੀਘਨਿਕਾਯੋ ਕਿਮਤ੍ਥਿਯੋ ਭਨ੍ਤੇ’’ਤਿ ਪਞ੍ਹਂ ਪੁਚ੍ਛਤੋ ਮਾਤੁਗਾਮਸ੍ਸ ਸਬ੍ਬਂ ਦੀਘਨਿਕਾਯਂ ਵਦਤੋਪਿ ਅਨਾਪਤ੍ਤਿ. ਯਥਾਹ ਅਟ੍ਠਕਥਾਯਂ ‘‘ਪਞ੍ਹਂ ਪੁਚ੍ਛਤਿ, ਪਞ੍ਹਂ ਪੁਟ੍ਠੋ ਕਥੇਤੀਤਿ ਮਾਤੁਗਾਮੋ ‘ਦੀਘਨਿਕਾਯੋ ਨਾਮ ਭਨ੍ਤੇ ਕਿਮਤ੍ਥਂ ਦੀਪੇਤੀ’ਤਿ ਪੁਚ੍ਛਤਿ, ਏਵਂ ਪਞ੍ਹਂ ਪੁਟ੍ਠੋ ਭਿਕ੍ਖੁ ਸਬ੍ਬਂ ਚੇਪਿ ਦੀਘਨਿਕਾਯਂ ਕਥੇਤਿ, ਅਨਾਪਤ੍ਤੀ’’ਤਿ (ਪਾਚਿ. ਅਟ੍ਠ. ੬੬). ਏਤ੍ਥ ਚ ਸਬ੍ਬਂ ਚੇਪਿ ਦੀਘਨਿਕਾਯਂ ਕਥੇਤੀਤਿ ਯਾਵ ਨ ਨਿਟ੍ਠਾਤਿ, ਤਾਵ ਪੁਨਦਿਵਸੇਪਿ ਕਥੇਤਿ.

੯੩੫. ਧਮ੍ਮਸ੍ਸ ਦੇਸਨਾਯ, ਵਿਞ੍ਞੁਮਨੁਸ੍ਸਪੁਰਿਸਸ੍ਸ ਅਸਨ੍ਨਿਹਿਤਕਰਣੇਨ ਚ ਆਪਜ੍ਜਿਤਬ੍ਬਤੋ ਕ੍ਰਿਯਾਕ੍ਰਿਯਂ.

ਧਮ੍ਮਦੇਸਨਾਕਥਾਵਣ੍ਣਨਾ.

੯੩੬. ਮਹਗ੍ਗਤਂ ਰੂਪਾਰੂਪਜ੍ਝਾਨਂ. ਪਣੀਤਂ ਲੋਕੁਤ੍ਤਰਧਮ੍ਮਂ. ਪਧਾਨਭਾਵਂ ਨੀਤਨ੍ਤਿ ਪਣੀਤਂ. ਆਰੋਚੇਨ੍ਤਸ੍ਸਾਤਿ ‘‘ਪਠਮਂ ਝਾਨਂ ਸਮਾਪਜ੍ਜਾਮੀ’’ਤਿਆਦਿਨਾ (ਪਾਰਾ. ੨੦੧) ਨਯੇਨ ਚਤੁਤ੍ਥਪਾਰਾਜਿਕੇ ਵੁਤ੍ਤਨਯੇਨ ਵਦਨ੍ਤਸ੍ਸ. ਪਰਿਨਿਬ੍ਬਾਨਕਾਲੇ ਚ ਪੁਟ੍ਠਕਾਲੇ ਚ ਭਿਕ੍ਖੁਭਿਕ੍ਖੁਨੀਨਂ ਅਤ੍ਤਨਾ ਲਦ੍ਧਸ੍ਸ ਉਤ੍ਤਰਿਮਨੁਸ੍ਸਧਮ੍ਮਸ੍ਸ ਆਰੋਚੇਤਬ੍ਬਤ੍ਤਾ ‘‘ਠਪੇਤ੍ਵਾ ਭਿਕ੍ਖੁਨਿਂ ਭਿਕ੍ਖੁ’’ਨ੍ਤਿ ਵੁਤ੍ਤਂ. ‘‘ਅਞ੍ਞਸ੍ਸਾ’’ਤਿ ਸੇਸੋ. ਯਥਾਹ ਅਟ੍ਠਕਥਾਯਂ ‘‘ਉਪਸਮ੍ਪਨ੍ਨਸ੍ਸ ਭੂਤਂ ਆਰੋਚੇਤੀਤਿ ਉਤ੍ਤਰਿਮਨੁਸ੍ਸਧਮ੍ਮਮੇਵ ਸਨ੍ਧਾਯ ਵੁਤ੍ਤਂ. ਪਰਿਨਿਬ੍ਬਾਨਕਾਲੇ, ਹਿ ਅਨ੍ਤਰਾ ਵਾ ਅਤਿਕਡ੍ਢਿਯਮਾਨੇਨ ਉਪਸਮ੍ਪਨ੍ਨਸ੍ਸ ਭੂਤਂ ਆਰੋਚੇਤੁਂ ਵਟ੍ਟਤੀ’’ਤਿ (ਪਾਚਿ. ਅਟ੍ਠ. ੭੭). ਭੂਤੇਤਿ ਏਤ੍ਥ ‘‘ਉਤ੍ਤਰਿਮਨੁਸ੍ਸਧਮ੍ਮੇ ਆਰੋਚਿਤੇ’’ਤਿ ਵਤ੍ਤਬ੍ਬਂ, ਨਿਮਿਤ੍ਤਤ੍ਥੇ ਭੁਮ੍ਮਂ, ਅਤ੍ਤਨੋ ਸਨ੍ਤਾਨੇ ਇਮਸ੍ਮਿਂ ਅਤ੍ਤਭਾਵੇ ਸਿਦ੍ਧਉਤ੍ਤਰਿਮਨੁਸ੍ਸਧਮ੍ਮਸ੍ਸ ਆਰੋਚਨਨਿਮਿਤ੍ਤਨ੍ਤਿ ਅਤ੍ਥੋ.

੯੩੭. ਨੋ ਚੇ ਜਾਨਾਤਿ ਸੋ ਵੁਤ੍ਤਨ੍ਤਿ ਯਸ੍ਸ ਆਰੋਚੇਤਿ, ਸੋ ਸਚੇ ਸੁਤਕ੍ਖਣੇਯੇਵ ਵੁਤ੍ਤਨਯੇਨੇਵ ‘‘ਏਸ ਪਠਮਜ੍ਝਾਨਸ੍ਸ ਲਾਭੀ’’ਤਿਆਦਿਨਾ ਨਯੇਨ ਵੁਤ੍ਤਂ ਨੋ ਜਾਨਾਤਿ. ਪਰਿਯਾਯਵਚਨੇਤਿ ‘‘ਯੋ ਤੇ ਵਿਹਾਰੇ ਵਸਤਿ, ਸੋ ਪਠਮਸ੍ਸ ਝਾਨਸ੍ਸ ਲਾਭੀ’’ਤਿ ਏਵਮਾਦਿਪਰਿਯਾਯਵਚਨੇ. ਯਸ੍ਸ ਉਤ੍ਤਰਿਮਨੁਸ੍ਸਧਮ੍ਮਂ ਆਰੋਚੇਤਿ, ਸੋ ਸਚੇ ਸੁਤਸਮਨਨ੍ਤਰਂ ‘‘ਏਸ ਏਵਂ ਵਦਤੀ’’ਤਿ ਵੁਤ੍ਤਂ ਨੋ ਜਾਨਾਤਿ, ਤਾਦਿਸਸ੍ਸ ਆਰੋਚੇਨ੍ਤਸ੍ਸ ਭਿਕ੍ਖੁਨੋ ਹੋਤਿ ਆਪਤ੍ਤਿ ਦੁਕ੍ਕਟਨ੍ਤਿ ਸਮ੍ਬਨ੍ਧੋ. ਅਸ੍ਸ ਭੂਤਸ੍ਸ ਪਰਿਯਾਯਵਚਨੇ ਚ ਭਿਕ੍ਖੁਨੋ ਆਪਤ੍ਤਿ ਦੁਕ੍ਕਟਂ ਹੋਤੀਤਿ ਯੋਜਨਾ.

੯੩੮. ਤਥਾਰੂਪੇ ਕਾਰਣੇ ਸਤੀਤਿ ਪਰਸ੍ਸ ਕਾਰਣਭਾਵਂ ਞਤ੍ਵਾਪਿ ਪਟਿਪਤ੍ਤਿਯਾ ਅਮੋਘਭਾਵਦਸ੍ਸਨਸਮੁਤ੍ਤੇਜਨਸਮ੍ਪਹਂਸਨਾਦਿਕਰਸਙ੍ਖਾਤੇ ਕਾਰਣੇ ਸਤਿ. ਸਬ੍ਬਸ੍ਸਾਪੀਤਿ ਉਪਸਮ੍ਪਨ੍ਨਾਨੁਪਸਮ੍ਪਨ੍ਨਸ੍ਸ ਸਬ੍ਬਸ੍ਸ. ਸੀਲਾਦਿਨ੍ਤਿ ਸੀਲਸੁਤਪਰਿਯਤ੍ਤਿਗੁਣਂ. ਵਦਤੋਤਿ ਏਤ੍ਥ ‘‘ਭਿਕ੍ਖੁਨੋ’’ਤਿ ਪਕਰਣਤੋ ਲਬ੍ਭਤਿ.

੯੩੯. ਤਦਸਮ੍ਭਵਾਤਿ ਦਿਟ੍ਠਿਸਮ੍ਪਨ੍ਨਸ੍ਸ ਉਮ੍ਮਾਦਾਦੀਨਂ ਅਸਮ੍ਭਵਾ. ਯਥਾਹ ਅਟ੍ਠਕਥਾਯਂ ‘‘ਦਿਟ੍ਠਿਸਮ੍ਪਨ੍ਨਾਨਂ ਉਮ੍ਮਾਦਸ੍ਸ ਵਾ ਚਿਤ੍ਤਕ੍ਖੇਪਸ੍ਸ ਵਾ ਅਭਾਵਾਤਿ. ਮਹਾਪਚ੍ਚਰਿਯਮ੍ਪਿ ਹਿ ਵਿਚਾਰਿਤ’’ਨ੍ਤਿ (ਪਾਚਿ. ਅਟ੍ਠ. ੭੭). ਉਮ੍ਮਤ੍ਤਕਪਦਸ੍ਸ ਅਵਚਨੇ ਕਾਰਣਂ ਵਦਨ੍ਤੇਨੇਵ ਖਿਤ੍ਤਚਿਤ੍ਤਾਦਿਪਦਾਨਂ ਅਵਚਨੇ ਕਾਰਣਞ੍ਚ ਉਪਲਕ੍ਖਣਤੋ ਦਸ੍ਸਿਤਮੇਵਾਤਿ ਦਟ੍ਠਬ੍ਬਂ. ਏਤ੍ਥ ਚ ਮਗ੍ਗਫਲਦਿਟ੍ਠਿਯਾ ਸਮਨ੍ਨਾਗਤਾਨਂ ਅਰਿਯਾਨਮੇਵ ਹਿ ਉਮ੍ਮਤ੍ਤਕਾਦਿਭਾਵੋ ਨਤ੍ਥਿ. ਝਾਨਲਾਭਿਨੋ ਪਨ ਤਸ੍ਮਿਂ ਸਤਿ ਝਾਨਾ ਪਰਿਹਾਯਨ੍ਤਿ, ਤਸ੍ਮਾ ਤੇਸਂ ਅਭੂਤਾਰੋਚਨਪਚ੍ਚਯਾ ਅਨਾਪਤ੍ਤਿ ਵਤ੍ਤਬ੍ਬਾ, ਨ ਭੂਤਾਰੋਚਨਪਚ੍ਚਯਾ.

੯੪੦. ਇਮਿਸ੍ਸਾਪਤ੍ਤਿਯਾ ਅਞ੍ਞਤ੍ਰ ਝਾਨਮਗ੍ਗਾਦਿਲਾਭੀਨਂ ਅਞ੍ਞਸ੍ਸ ਅਸਮ੍ਭਵਾ ‘‘ਕੁਸਲਾਬ੍ਯਾਕਤੇਹੇਵ ਦ੍ਵਿਚਿਤ੍ਤ’’ਨ੍ਤਿ ਵੁਤ੍ਤਂ. ਇਦਞ੍ਚ ਉਕ੍ਕਟ੍ਠਪਰਿਚ੍ਛੇਦੇਨ ਅਰਿਯਪੁਗ੍ਗਲੇਯੇਵ ਸਨ੍ਧਾਯ ਵੁਤ੍ਤਂ. ਪਣ੍ਣਤ੍ਤਿਂ ਅਜਾਨਨ੍ਤਾ ਪਨ ਝਾਨਲਾਭੀ ਪੁਥੁਜ੍ਜਨਾ ਨਾਨਾਵਤ੍ਥੁਮ੍ਹਿ ਲੋਭਵਸੇਨ ਅਕੁਸਲਚਿਤ੍ਤੇਨਾਪਿ ਨ ਆਰੋਚੇਨ੍ਤੀਤਿ ਨਤ੍ਥਿ, ਤਸ੍ਮਾ ‘‘ਤਿਚਿਤ੍ਤ’’ਨ੍ਤਿ ਵਤ੍ਤਬ੍ਬਂ ਸਿਯਾ, ਤਥਾਪਿ ਬਹੁਲੇਨ ਕੁਸਲਾਬ੍ਯਾਕਤਾਨਮੇਵ ਸਮ੍ਭਵੋਤਿ ਏਵਂ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਦ੍ਵਿਵੇਦਨਂ ਸੁਖੋਪੇਕ੍ਖਾਵਸੇਨ. ਇਦਞ੍ਚ ਸਿਕ੍ਖਾਪਦਂ ਪਣ੍ਣਤ੍ਤਿਅਜਾਨਨਵਸੇਨ ਅਚਿਤ੍ਤਕਸਮੁਟ੍ਠਾਨਂ ਹੋਤਿ. ਅਰਿਯਾ ਚੇਤ੍ਥ ਪਣ੍ਣਤ੍ਤਿਂ ਜਾਨਨ੍ਤਾ ਵੀਤਿਕ੍ਕਮਂ ਨ ਕਰੋਨ੍ਤਿ, ਪੁਥੁਜ੍ਜਨਾ ਪਨ ਪਣ੍ਣਤ੍ਤਿਂ ਜਾਨਿਤ੍ਵਾਪਿ ਵੀਤਿਕ੍ਕਮਂ ਕਰੋਨ੍ਤਿ. ਤੇ ਚ ਸਤ੍ਥੁਨੋ ਆਣਾਵੀਤਿਕ੍ਕਮਚੇਤਨਾਯ ਬਲਵਅਕੁਸਲਭਾਵਤੋ ਝਾਨਾ ਪਰਿਹਾਯਨ੍ਤੀਤਿ ਦਟ੍ਠਬ੍ਬਂ.

ਭੂਤਾਰੋਚਨਕਥਾਵਣ੍ਣਨਾ.

੯੪੧. ਭਿਕ੍ਖੁਨੋ ਦੁਟ੍ਠੁਲ੍ਲਂ ਆਪਤ੍ਤਿਂ ਭਿਕ੍ਖੁਸਮ੍ਮੁਤਿਂ ਠਪੇਤ੍ਵਾ ਅਨੁਪਸਮ੍ਪਨ੍ਨੇ ਆਰੋਚੇਨ੍ਤਸ੍ਸ ਭਿਕ੍ਖੁਨੋ ਆਪਤ੍ਤੀਤਿ ਯੋਜਨਾ. ਦੁਟ੍ਠੁਲ੍ਲਂ ਆਪਤ੍ਤਿਨ੍ਤਿ ਸਙ੍ਘਾਦਿਸੇਸੋ. ਨਨੁ ਚ ‘‘ਦੁਟ੍ਠੁਲ੍ਲਾ ਨਾਮ ਆਪਤ੍ਤਿ ਚਤ੍ਤਾਰਿ ਚ ਪਾਰਾਜਿਕਾਨਿ ਤੇਰਸ ਚ ਸਙ੍ਘਾਦਿਸੇਸਾ’’ਤਿ (ਪਾਚਿ. ੭੯) ਪਦਭਾਜਨੇ ਪਾਰਾਜਿਕਸਙ੍ਘਾਦਿਸੇਸਾ ਦਸ੍ਸਿਤਾ, ਕਸ੍ਮਾ ਇਧ ਸਙ੍ਘਾਦਿਸੇਸੋਵ ਗਹਿਤੋਤਿ? ਵੁਚ੍ਚਤੇ – ਪਾਰਾਜਿਕਂ ਦੁਟ੍ਠੁਲ੍ਲਸਦ੍ਦਤ੍ਥਦਸ੍ਸਨਤ੍ਥਂ ਵੁਤ੍ਤਂ, ਇਧ ਪਨ ਸਙ੍ਘਾਦਿਸੇਸੋਯੇਵ ਭਗਵਤਾ ਅਧਿਪ੍ਪੇਤੋਤਿ ਅਟ੍ਠਕਥਾਯਂ ਵਿਚਾਰਿਤਮੇਤਂ. ਵੁਤ੍ਤਞ੍ਹਿ ਤਤ੍ਥ ‘‘ਪਾਰਾਜਿਕਾਨਿ ਦੁਟ੍ਠੁਲ੍ਲਸਦ੍ਦਤ੍ਥਦਸ੍ਸਨਤ੍ਥਂ ਵੁਤ੍ਤਾਨਿ, ਸਙ੍ਘਾਦਿਸੇਸਂ ਪਨ ਇਧ ਅਧਿਪ੍ਪੇਤ’’ਨ੍ਤਿ (ਪਾਚਿ. ਅਟ੍ਠ. ੭੮). ਵਕ੍ਖਤਿ ਚ ‘‘ਇਧ ਸਙ੍ਘਾਦਿਸੇਸਾਵ, ਦੁਟ੍ਠੁਲ੍ਲਾਪਤ੍ਤਿਯੋ ਮਤਾ’’ਤਿ. ਅਨੁਪਸਮ੍ਪਨ੍ਨੇਤਿ ‘‘ਭਿਕ੍ਖੁਞ੍ਚ ਭਿਕ੍ਖੁਨਿਞ੍ਚ ਠਪੇਤ੍ਵਾ ਅਵਸੇਸੋ ਅਨੁਪਸਮ੍ਪਨ੍ਨੋ’’ਤਿ (ਪਾਚਿ. ੮੦) ਪਦਭਾਜਨੇ ਨਿਦ੍ਦਿਟ੍ਠਅਨੁਪਸਮ੍ਪਨ੍ਨਸ੍ਸ ਆਰੋਚੇਨ੍ਤਸ੍ਸਾਤਿ ਵੁਤ੍ਤਂ ਹੋਤਿ.

ਠਪੇਤ੍ਵਾ ਭਿਕ੍ਖੁਸਮ੍ਮੁਤਿਨ੍ਤਿ ‘‘ਅਤ੍ਥਿ ਭਿਕ੍ਖੁਸਮ੍ਮੁਤਿ ਆਪਤ੍ਤਿਪਰਿਯਨ੍ਤਾ ਨ ਕੁਲਪਰਿਯਨ੍ਤਾ’’ਤਿਆਦਿਨਾ (ਪਾਚਿ. ੮੦) ਪਦਭਾਜਨੇ ਦਸ੍ਸਿਤਂ ਅਭਿਣ੍ਹਾਪਤ੍ਤਿਕਸ੍ਸ ਭਿਕ੍ਖੁਨੋ ਆਯਤਿਂ ਸਂਵਰਤ੍ਥਂ ਹਿਰੋਤ੍ਤਪ੍ਪਜਨਨਤ੍ਥਂ ਆਪਤ੍ਤਿਯੋ ਵਾ ਉਪਾਸਕਕੁਲਾਨਿ ਵਾ ਉਭਯਮੇਵ ਵਾ ਪਰਿਚ੍ਛਿਨ੍ਦਿਤ੍ਵਾ ਵਾ ਅਪਰਿਚ੍ਛਿਨ੍ਦਿਤ੍ਵਾ ਵਾ ਆਪਤ੍ਤਿਯੋ ਆਰੋਚੇਤੁਂ ਸਙ੍ਘੇਨ ਸਙ੍ਘਮਜ੍ਝੇ ਤਿਕ੍ਖਤ੍ਤੁਂ ਸਾਵੇਤ੍ਵਾ ਕਤਸਮ੍ਮੁਤਿਂ ਠਪੇਤ੍ਵਾਤਿ ਵੁਤ੍ਤਂ ਹੋਤਿ. ਯਥਾਹ ਅਟ੍ਠਕਥਾਯਂ ‘‘ਅਭਿਣ੍ਹਾਪਤ੍ਤਿਕਂ ਭਿਕ੍ਖੁਂ ਦਿਸ੍ਵਾ ‘ਏਵਮੇਸ ਪਰੇਸੁ ਹਿਰੋਤ੍ਤਪ੍ਪੇਨਾਪਿ ਆਯਤਿਂ ਸਂਵਰਂ ਆਪਜ੍ਜਿਸ੍ਸਤੀ’ਤਿ ਤਸ੍ਸ ਭਿਕ੍ਖੁਨੋ ਹਿਤੇਸਿਤਾਯ ਤਿਕ੍ਖਤ੍ਤੁਂ ਅਪਲੋਕੇਤ੍ਵਾ ਸਙ੍ਘੇਨ ਕਾਤਬ੍ਬਾ’’ਤਿ (ਪਾਚਿ. ਅਟ੍ਠ. ੮੦).

੯੪੨. ਘਟੇਤ੍ਵਾ ਵਦਨ੍ਤਸ੍ਸੇਵਾਤਿ ਏਵਕਾਰੋ ਯਥਾਠਾਨੇ ਯੋਜੇਤਬ੍ਬੋ. ਏਵਕਾਰੇਨ ਬ੍ਯਵਚ੍ਛਿਨ੍ਨਮਤ੍ਥਂ ਵਕ੍ਖਤਿ ‘‘ਵਤ੍ਥੁ’’ਨ੍ਤਿਆਦਿਨਾ. ‘‘ਅਸੁਚਿਂ ਮੋਚੇਤ੍ਵਾ’’ਤਿ ਇਮਿਨਾ ਵਤ੍ਥੁਮਾਹ, ‘‘ਸਙ੍ਘਾਦਿਸੇਸ’’ਨ੍ਤਿ ਇਮਿਨਾ ਆਪਤ੍ਤਿਂ. ਵਜ੍ਜਮੇਵ ਵਜ੍ਜਤਾ. ‘‘ਪਾਚਿਤ੍ਤਿਯਾਪਤ੍ਤੀ’’ਤਿ ਇਮਸ੍ਸਾਯਂ ਪਰਿਯਾਯੋ. ‘‘ਅਯਂ ਅਸੁਚਿਂ ਮੋਚੇਤ੍ਵਾ ਸਙ੍ਘਾਦਿਸੇਸਂ ਆਪਨ੍ਨੋ’’ਤਿ ਵਤ੍ਥੁਨਾ ਸਦ੍ਧਿਂ ਘਟੇਤ੍ਵਾ ਆਪਤ੍ਤਿਂ ਵਦਨ੍ਤਸ੍ਸ ਵਜ੍ਜਤਾ ਪਾਚਿਤ੍ਤਿਯਾਪਤ੍ਤਿ ਹੋਤੀਤਿ ਯੋਜਨਾ.

੯੪੩. ਸੁਦ੍ਧਸ੍ਸਾਤਿ ਪਾਰਾਜਿਕਮਨਾਪਨ੍ਨਸ੍ਸ. ਵਦਨ੍ਤਿ ਵਦਨਹੇਤੁ, ਵਤ੍ਥੁਨਾ ਸਦ੍ਧਿਂ ਸਙ੍ਘਾਦਿਸੇਸਸ੍ਸ ਕਥਨਤੋਤਿ ਅਤ੍ਥੋ.

੯੪੪. ਅਦੁਟ੍ਠੁਲ੍ਲਾਯਾਤਿ ਸਙ੍ਘਾਦਿਸੇਸਤੋ ਅਞ੍ਞਾਯ ਆਪਤ੍ਤਿਯਾ. ਦੁਟ੍ਠੁਲ੍ਲਸਞ੍ਞਿਨੋਤਿ ਸਙ੍ਘਾਦਿਸੇਸਸਞ੍ਞਿਨੋ. ਸੇਸਾ ਆਪਤ੍ਤਿਯੋਪਿ ਵਾਤਿ ਸਙ੍ਘਾਦਿਸੇਸਂ ਵਿਨਾ ਸੇਸੇ ਛਲ਼ਾਪਤ੍ਤਿਕ੍ਖਨ੍ਧੇ.

੯੪੫. ਤਥਾਤਿ ਦੁਕ੍ਕਟਂ ਅਤਿਦਿਸਤਿ. ਪਞ੍ਚਧਾ ਮਤਂ ਅਨੁਪਸਮ੍ਪਨ੍ਨਸ੍ਸ ਦੁਟ੍ਠੁਲ੍ਲਂ ਅਜ੍ਝਾਚਾਰਂ ਆਰੋਚੇਨ੍ਤਸ੍ਸ ਤਥਾ ਦੁਕ੍ਕਟਨ੍ਤਿ ਯੋਜਨਾ. ਅਨੁਪਸਮ੍ਪਨ੍ਨਸ੍ਸ ਪਞ੍ਚਧਾ ਮਤਂ ਦੁਟ੍ਠੁਲ੍ਲਂ ਅਜ੍ਝਾਚਾਰਨ੍ਤਿ ਚ ਪਾਣਾਤਿਪਾਤਾਦਿਪਞ੍ਚਸਿਕ੍ਖਾਪਦਵੀਤਿਕ੍ਕਮਾ ਗਹਿਤਾ. ਕੇਚਿ ਪਨ ‘‘ਸੁਕ੍ਕਵਿਸ੍ਸਟ੍ਠਿਆਦਯੋ ਪਞ੍ਚਾ’’ਤਿ ਵਦਨ੍ਤਿ, ਤਂ ਨ ਗਹੇਤਬ੍ਬਂ. ਪਾਣਾਤਿਪਾਤਾਦੀਨਿ ਹਿ ਦਸੇਵ ਸਿਕ੍ਖਾਪਦਾਨਿ ਸਾਮਣੇਰਾਨਂ ਪਞ੍ਞਤ੍ਤਾਨਿ. ਤੇਸਂ ਪਞ੍ਞਤ੍ਤੇਸੁਯੇਵ ਚ ਸਿਕ੍ਖਾਪਦੇਸੁ ਦੁਟ੍ਠੁਲ੍ਲਾਦੁਟ੍ਠੁਲ੍ਲਵਿਚਾਰਣਾ ਕਾਤਬ੍ਬਾ, ਨ ਚ ਸੁਕ੍ਕਵਿਸ੍ਸਟ੍ਠਿਆਦੀਨਿ ਵਿਸੁਂ ਤੇਸਂ ਪਞ੍ਞਤ੍ਤਾਨਿ ਅਤ੍ਥੀਤਿ.

ਅਥ ਭਿਕ੍ਖੁਨੋ ਦੁਟ੍ਠੁਲ੍ਲਸਙ੍ਖਾਤਾਨਿ ਸੁਕ੍ਕਵਿਸ੍ਸਟ੍ਠਿਆਦੀਨਿ ਅਨੁਪਸਮ੍ਪਨ੍ਨਸ੍ਸ ਕਿਂ ਨਾਮ ਹੋਨ੍ਤੀਤਿ? ਅਜ੍ਝਾਚਾਰੋ ਨਾਮ ਹੋਨ੍ਤੀਤਿ. ਯਥਾਹ ਅਟ੍ਠਕਥਾਯਂ ‘‘ਸੁਕ੍ਕਵਿਸ੍ਸਟ੍ਠਿ…ਪੇ… ਅਜ੍ਝਾਚਾਰੋ ਨਾਮਾਤਿ ਵੁਤ੍ਤ’’ਨ੍ਤਿ (ਪਾਚਿ. ਅਟ੍ਠ. ੮੨). ਇਮਿਨਾਪਿ ਚੇਤਂ ਸਿਦ੍ਧਂ ‘‘ਅਨੁਪਸਮ੍ਪਨ੍ਨਸ੍ਸ ਸੁਕ੍ਕਵਿਸ੍ਸਟ੍ਠਿਆਦਿ ਦੁਟ੍ਠੁਲ੍ਲਂ ਨਾਮ ਨ ਹੋਤੀ’’ਤਿ. ‘‘ਅਜ੍ਝਾਚਾਰੋ ਨਾਮਾ’’ਤਿ ਹਿ ਵਦਨ੍ਤੋ ਅਨੁਪਸਮ੍ਪਨ੍ਨਸ੍ਸ ਸੁਕ੍ਕਵਿਸ੍ਸਟ੍ਠਿਆਦਿ ਕੇਵਲਂ ਅਜ੍ਝਾਚਾਰੋ ਨਾਮ ਹੋਤਿ, ਨ ਪਨ ਦੁਟ੍ਠੁਲ੍ਲੋ ਨਾਮ ਅਜ੍ਝਾਚਾਰੋਤਿ ਦੀਪੇਤਿ. ‘‘ਅਜ੍ਝਾਚਾਰੋ ਨਾਮਾ’’ਤਿ ਚ ਅਟ੍ਠਕਥਾਯਂ ਵੁਤ੍ਤਤ੍ਤਾ, ਅਕਤ੍ਤਬ੍ਬਰੂਪਤ੍ਤਾ ਚ ਅਨੁਪਸਮ੍ਪਨ੍ਨਸ੍ਸ ਸੁਕ੍ਕਵਿਸ੍ਸਟ੍ਠਿਆਦੀਨਿ ਦਣ੍ਡਕਮ੍ਮਵਤ੍ਥੁਪਕ੍ਖਂ ਭਜਨ੍ਤਿ. ਤਾਨਿ ਚ ਅਞ੍ਞਸ੍ਸ ਅਨੁਪਸਮ੍ਪਨ੍ਨਸ੍ਸ ਅਵਣ੍ਣਕਾਮਤਾਯ ਆਰੋਚੇਨ੍ਤੋ ਭਿਕ੍ਖੁ ਦੁਕ੍ਕਟਂ ਆਪਜ੍ਜਤੀਤਿ ਵਦਨ੍ਤਿ. ਇਧ ਪਨ ਅਨੁਪਸਮ੍ਪਨ੍ਨਗ੍ਗਹਣੇਨ ਸਾਮਣੇਰਸਾਮਣੇਰਿਸਿਕ੍ਖਮਾਨਾਨਂ ਗਹਣਂ ਵੇਦਿਤਬ੍ਬਂ.

ਅਦੁਟ੍ਠੁਲ੍ਲਂ ਅਜ੍ਝਾਚਾਰਨ੍ਤਿ ਯੋਜਨਾ. ‘‘ਅਨੁਪਸਮ੍ਪਨ੍ਨਸ੍ਸਾ’’ਤਿ ਚ ਅਜ੍ਝਾਹਰਿਤਬ੍ਬਾਨਿ. ਅਨੁਪਸਮ੍ਪਨ੍ਨਸ੍ਸ ਯਥਾਵੁਤ੍ਤੇਹਿ ਪਞ੍ਚਸਿਕ੍ਖਾਪਦੇਹਿ ਅਞ੍ਞਂ ਵਿਕਾਲਭੋਜਨਾਦਿਂ ਅਦੁਟ੍ਠੁਲ੍ਲਂ ਅਜ੍ਝਾਚਾਰਂ ਵਾ. ਯਥਾਹ ‘‘ਅਨੁਪਸਮ੍ਪਨ੍ਨਸ੍ਸ ਦੁਟ੍ਠੁਲ੍ਲਂ ਵਾ ਅਦੁਟ੍ਠੁਲ੍ਲਂ ਵਾ ਅਜ੍ਝਾਚਾਰ’’ਨ੍ਤਿਆਦਿ (ਪਾਚਿ. ੮੨).

੯੪੬. ਕੇਵਲਂ ਵਤ੍ਥੁਂ ਵਾ ਆਰੋਚੇਨ੍ਤਸ੍ਸਾਤਿ ‘‘ਅਯਂ ਸੁਕ੍ਕਵਿਸ੍ਸਟ੍ਠਿਂ ਆਪਨ੍ਨੋ’’ਤਿਆਦਿਨਾ ਨਯੇਨ ਵਤ੍ਥੁਮਤ੍ਤਂ ਆਰੋਚੇਨ੍ਤਸ੍ਸ. ਕੇਵਲਂ ਆਪਤ੍ਤਿਂ ਵਾ ਆਰੋਚੇਨ੍ਤਸ੍ਸਾਤਿ ‘‘ਅਯਂ ਪਾਰਾਜਿਕਂ ਆਪਨ੍ਨੋ, ਅਯਂ ਸਙ੍ਘਾਦਿਸੇਸਂ ਆਪਨ੍ਨੋ’’ਤਿਆਦਿਨਾ ਨਯੇਨ ਆਪਤ੍ਤਿਮਤ੍ਤਂ ਆਰੋਚੇਨ੍ਤਸ੍ਸ ਚ. ਭਿਕ੍ਖੁਸਮ੍ਮੁਤਿਯਾਤਿ ਏਤ੍ਥ ਵਤ੍ਥੁਨਾ ਘਟੇਤ੍ਵਾ ਆਪਤ੍ਤਿਂ ਆਰੋਚੇਨ੍ਤਸ੍ਸਾਤਿ ਗਹੇਤਬ੍ਬਂ. ‘‘ਤਥਾ’’ਤਿ ਇਮਿਨਾ ‘‘ਅਨਾਪਤ੍ਤੀ’’ਤਿ ਏਤਂ ਪਰਾਮਸਤਿ.

ਦੁਟ੍ਠੁਲ੍ਲਾਰੋਚਨਕਥਾਵਣ੍ਣਨਾ.

੯੪੮. ਅਕਪ੍ਪਿਯਂ ਪਥਵਿਨ੍ਤਿ ਪਦਭਾਜਨੇ ‘‘ਦ੍ਵੇ ਪਥਵਿਯੋ ਜਾਤਾ ਚ ਪਥਵੀ ਅਜਾਤਾ ਚ ਪਥਵੀ’’ਤਿ (ਪਾਚਿ. ੮੬) ਉਦ੍ਦਿਸਿਤ੍ਵਾ –

‘‘ਜਾਤਾ ਨਾਮ ਪਥਵੀ ਸੁਦ੍ਧਪਂਸੁ ਸੁਦ੍ਧਮਤ੍ਤਿਕਾ ਅਪ੍ਪਪਾਸਾਣਾ ਅਪ੍ਪਸਕ੍ਖਰਾ ਅਪ੍ਪਕਥਲਾ ਅਪ੍ਪਮਰੁਮ੍ਬਾ ਅਪ੍ਪਵਾਲਿਕਾ ਯੇਭੁਯ੍ਯੇਨਪਂਸੁਕਾ ਯੇਭੁਯ੍ਯੇਨਮਤ੍ਤਿਕਾ, ਅਦਡ੍ਢਾਪਿ ਵੁਚ੍ਚਤਿ ਜਾਤਾ ਪਥਵੀ. ਯੋਪਿ ਪਂਸੁਪੁਞ੍ਜੋ ਵਾ ਮਤ੍ਤਿਕਾਪੁਞ੍ਜੋ ਵਾ ਅਤਿਰੇਕਚਾਤੁਮਾਸਂ ਓਵਟ੍ਠੋ, ਅਯਮ੍ਪਿ ਵੁਚ੍ਚਤਿ ਜਾਤਾ ਪਥਵੀ’’ਤਿ (ਪਾਚਿ. ੮੬) ਚ,

‘‘ਅਜਾਤਾ ਨਾਮ ਪਥਵੀ ਸੁਦ੍ਧਪਾਸਾਣਾ ਸੁਦ੍ਧਸਕ੍ਖਰਾ ਸੁਦ੍ਧਕਥਲਾ ਸੁਦ੍ਧਮਰੁਮ੍ਬਾ ਸੁਦ੍ਧਵਾਲਿਕਾ ਅਪ੍ਪਪਂਸੁ ਅਪ੍ਪਮਤ੍ਤਿਕਾ ਯੇਭੁਯ੍ਯੇਨਪਾਸਾਣਾ ਯੇਭੁਯ੍ਯੇਨਸਕ੍ਖਰਾ ਯੇਭੁਯ੍ਯੇਨਕਥਲਾ ਯੇਭੁਯ੍ਯੇਨਮਰੁਮ੍ਬਾ ਯੇਭੁਯ੍ਯੇਨਵਾਲਿਕਾ, ਦਡ੍ਢਾਪਿ ਵੁਚ੍ਚਤਿ ਅਜਾਤਾ ਪਥਵੀ. ਯੋਪਿ ਪਂਸੁਪੁਞ੍ਜੋ ਵਾ ਮਤ੍ਤਿਕਾਪੁਞ੍ਜੋ ਵਾ ਊਨਚਾਤੁਮਾਸਂ ਓਵਟ੍ਠੋ, ਅਯਮ੍ਪਿ ਵੁਚ੍ਚਤਿ ਅਜਾਤਾ ਪਥਵੀ’’ਤਿ (ਪਾਚਿ. ੮੬) ਚ –

ਨਿਦ੍ਦਿਟ੍ਠਾਸੁ ਦ੍ਵੀਸੁ ਪਥਵੀਸੁ ਜਾਤਪਥਵਿਸਙ੍ਖਾਤਂ ਅਕਪ੍ਪਿਯਪਥਵਿਂ.

ਏਤ੍ਥ ਪਾਸਾਣਾਦੀਨਂ ਲਕ੍ਖਣਂ ਅਟ੍ਠਕਥਾਯਂ ‘‘ਮੁਟ੍ਠਿਪ੍ਪਮਾਣਤੋ ਉਪਰਿ ਪਾਸਾਣਾਤਿ ਵੇਦਿਤਬ੍ਬਾ, ਮੁਟ੍ਠਿਪ੍ਪਮਾਣਾ ਸਕ੍ਖਰਾ. ਕਥਲਾਤਿ ਕਪਾਲਖਣ੍ਡਾਨਿ. ਮਰੁਮ੍ਬਾਤਿ ਕਟਸਕ੍ਖਰਾ. ਵਾਲਿਕਾਤਿ ਵਾਲੁਕਾਯੇਵਾ’’ਤਿ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਯੇਭੁਯ੍ਯੇਨਪਂਸੁਕਾਦੀਨਂ ਲਕ੍ਖਣਂ ‘‘ਯੇਭੁਯ੍ਯੇਨਪਂਸੁਕਾਤਿ ਤੀਸੁ ਕੋਟ੍ਠਾਸੇਸੁ ਦ੍ਵੇ ਕੋਟ੍ਠਾਸਾ ਪਂਸੁ, ਏਕੋ ਪਾਸਾਣਾਦੀਸੁ ਅਞ੍ਞਤਰੋ ਕੋਟ੍ਠਾਸੋ’’ਤਿ (ਪਾਚਿ. ਅਟ੍ਠ. ੮੬) ਚ ‘‘ਅਦਡ੍ਢਾਪੀਤਿ ਉਦ੍ਧਨਪਤ੍ਤਪਚਨਕੁਮ੍ਭਕਾਰਾਵਾਪਾਦਿਵਸੇਨ ਤਥਾ ਤਥਾ ਅਦਡ੍ਢਾ’’ਤਿਆਦਿ ਅਟ੍ਠਕਥਾਤੋ ਚ ਵੇਦਿਤਬ੍ਬਂ. ‘‘ਅਪ੍ਪਪਂਸੁਅਪ੍ਪਮਤ੍ਤਿਕਾ’’ਤਿ ਦ੍ਵੀਸੁਪਿ ਪਦੇਸੁ ਨਿਦ੍ਦੇਸਰੂਪੇਨ ਯੇਭੁਯ੍ਯੇਨਪਾਸਾਣਾਦਿਪਦਪਞ੍ਚਕਂ ਵੁਤ੍ਤਂ, ਤਤ੍ਥਾਪਿ ਅਤ੍ਥੋ ਯੇਭੁਯ੍ਯੇਨਪਂਸੁਪਦਾਦੀਸੁ ਵੁਤ੍ਤਵਿਪਲ੍ਲਾਸੇਨ ਵੇਦਿਤਬ੍ਬੋ. ਯਥਾਹ ਅਟ੍ਠਕਥਾਯਂ ‘‘ਤੇਸਂਯੇਵ ਹਿ ਦ੍ਵਿਨ੍ਨਂ ਪਭੇਦਦਸ੍ਸਨਮੇਤ’’ਨ੍ਤਿ (ਪਾਚਿ. ੮੬).

ਖਣੇਯ੍ਯ ਵਾਤਿ ਏਵਰੂਪਂ ਅਕਪ੍ਪਿਯਪਥਵਿਪਦੇਸਂ ਅਨ੍ਤਮਸੋ ਪਾਦਙ੍ਗੁਟ੍ਠੇਨਾਪਿ ਸਮ੍ਮੁਞ੍ਜਨਿਸਲਾਕਾਯਪਿ ਸਯਂ ਵਾ ਖਣਤਿ. ਖਣਾਪੇਯ੍ਯ ਵਾਤਿ ਅਞ੍ਞੇਨ ਵਾ ‘‘ਇਦਂ ਖਣਾਹੀ’’ਤਿਆਦਿਨਾ ਅਕਪ੍ਪਿਯਵੋਹਾਰੇਨ ਖਣਾਪੇਯ੍ਯ. ਭੇਦਾਪੇਯ੍ਯਾਤਿ ਤਥੇਵ ਭੇਦਾਪੇਯ੍ਯ. ਭਿਨ੍ਦੇਯ੍ਯ ਵਾਤਿ ਪਸ੍ਸਾਵਧਾਰਾਦੀਹਿਪਿ ਭਿਨ੍ਦੇਯ੍ਯ. ਅਧਿਕਾਰਵਸੇਨ ਵਾ-ਸਦ੍ਦਸ੍ਸ ਸਬ੍ਬਕਿਰਿਯਾਪਦੇਹਿ ਸਮ੍ਬਨ੍ਧੋ ਲਬ੍ਭਤੀਤਿ ਭੇਦਾਪੇਯ੍ਯ ਚਾਤਿ ਏਤ੍ਥ ਚ-ਸਦ੍ਦੋ ਇਧ ਅਵੁਤ੍ਤਸ੍ਸ ‘‘ਦਹਤਿ ਵਾ, ਦਹਾਪੇਤਿ ਵਾ’’ਤਿ ਪਦਦ੍ਵਯਸ੍ਸ ਸਮੁਚ੍ਚਯਕੋਤਿ ਵੇਦਿਤਬ੍ਬੋ. ਅਨ੍ਤਮਸੋ ਪਤ੍ਤਮ੍ਪਿ ਪਚਨ੍ਤੋ ਸਯਂ ਵਾ ਦਹਤਿ, ਅਞ੍ਞੇਨ ਵਾ ਦਹਾਪੇਤੀਤਿਆਦਿ ਇਮੇਸਂ ਪਦਾਨਂ ਅਟ੍ਠਕਥਾਵਸੇਨ (ਪਾਚਿ. ਅਟ੍ਠ. ੮੭) ਵੇਦਿਤਬ੍ਬਂ. ਪਾਚਿਤ੍ਤਿਯਂ ਸਿਯਾਤਿ ਖਣਨ੍ਤਸ੍ਸ, ਭਿਨ੍ਦਨ੍ਤਸ੍ਸ ਚ ਪਹਾਰੇ ਪਹਾਰੇ ਪਾਚਿਤ੍ਤਿਯਂ.

੯੪੯. ਆਣਾਪੇਨ੍ਤਸ੍ਸ ਆਣਤ੍ਤਿਗਣਨਾਯ, ਦਹਨ੍ਤਸ੍ਸ ਅਗ੍ਗਿਪਾਤਗਣਨਾਯ ਹੋਤੀਤਿ ਇਦਂ ‘‘ਪਹਾਰੇ ਪਹਾਰੇ ਪਾਚਿਤ੍ਤਿਯ’’ਨ੍ਤਿਆਦਿਅਟ੍ਠਕਥਾਵਚਨਵਸੇਨ ਵੇਦਿਤਬ੍ਬਂ, ਇਮਮੇਵ ਦਸ੍ਸੇਤੁਮਾਹ ‘‘ਸਯਮੇਵਾ’’ਤਿਆਦਿ.

੯੫੦. ਆਣਾਪੇਨ੍ਤਸ੍ਸਾਤਿ ਸਕਿਂ ਆਣਾਪੇਨ੍ਤਸ੍ਸ.

੯੫੧. ‘‘ਖਣਾਪੇਯ੍ਯਾ’’ਤਿ ਸਾਮਞ੍ਞਵਚਨਸ੍ਸ ਅਪਵਾਦਦਸ੍ਸਨਤ੍ਥਂ ‘‘ਖਣ ਪੋਕ੍ਖਰਣਿ’’ਨ੍ਤਿਆਦਿਮਾਹ. ਕੋਚਿ ਦੋਸੋ ਨ ਵਿਜ੍ਜਤੀਤਿ ਏਤ੍ਥ ਪੋਕ੍ਖਰਣਿਆਵਾਟਾਦਿਸਦ੍ਦਾਨਂ ਪਥਵਿਪਰਿਯਾਯਤ੍ਤਾਭਾਵਤੋ ਏਵਂਵਚਨੇਨ ਅਨਾਪਤ੍ਤੀਤਿ ਅਧਿਪ੍ਪਾਯੋ.

੯੫੨. ‘‘ਇਮਂ ਇਧਾ’’ਤਿਆਦੀਨਂ ਪਦਾਨਂ ਪਚ੍ਚਕ੍ਖਭੂਤਾਧਿਪ੍ਪੇਤਭੂਮਿਵਾਚਕਤ੍ਤਾ ਤੇਹਿ ਯੋਜੇਤ੍ਵਾ ਵੁਤ੍ਤਸ੍ਸ ਤਸ੍ਸੇਵ ਪਯੋਗਸ੍ਸ ਆਪਤ੍ਤਿਕਰਭਾਵਂ ਦਸ੍ਸੇਤੁਮਾਹ ‘‘ਇਮ’’ਨ੍ਤਿਆਦਿ.

੯੫੩. ਕਨ੍ਦਨ੍ਤਿ ਤਾਲਾਦਿਕਨ੍ਦਂ. ਕੁਰੁਨ੍ਦਨ੍ਤਿ ਕੁਲਚੋਚਰੁਕ੍ਖਂ. ਥੂਣਨ੍ਤਿ ਥਮ੍ਭਂ. ਖਾਣੁਕਨ੍ਤਿ ਸਾਖਾਵਿਟਪਰਹਿਤਂ ਰੁਕ੍ਖਾਵਯਵਂ. ਮੂਲਨ੍ਤਿ ਪਥਵਿਯਾ ਸੁਪ੍ਪਤਿਟ੍ਠਿਤਭਾਵਕਰਂ ਰੁਕ੍ਖਾਵਯਵਂ. ਵਟ੍ਟਤੀਤਿ ਅਨਿਯਮੇਤ੍ਵਾ ਵਚਨੇਨ ਅਨਾਪਤ੍ਤਿਭਾਵਤੋ ਵਟ੍ਟਤਿ.

੯੫੪. ਇਮਨ੍ਤਿ ਪਚ੍ਚਕ੍ਖਪਰਾਮਾਸਪਦੇਨ ਨਿਯਮੇਤ੍ਵਾ ਵਚਨਤੋ ਆਪਤ੍ਤਿ ਹੋਤੀਤਿ ਆਹ ‘‘ਨਿਯਮੇਤ੍ਵਾਨ ਵਤ੍ਤੁਂ ਪਨ ਨ ਵਟ੍ਟਤੀ’’ਤਿ.

੯੫੫. ਘਟੇਹਿ ਉਸ੍ਸਿਞ੍ਚਿਤੁਨ੍ਤਿ ਘਟੇਹਿ ਗਹੇਤ੍ਵਾ ਅਵਸਿਞ੍ਚਿਤੁਂ. ਤਨੁਕਦ੍ਦਮੋਤਿ ਜਮ੍ਬਾਲੋ. ਬਹਲਂ ਕਦ੍ਦਮਂ ਭਿਕ੍ਖੁਨਾ ਅਪਨੇਤੁਂ ਨ ਚ ਵਟ੍ਟਤੀਤਿ ਯੋਜੇਤਬ੍ਬਂ.

੯੫੬. ਨਦਿਯਾਦੀਨਨ੍ਤਿ ਏਤ੍ਥ ਆਦਿ-ਸਦ੍ਦੇਨ ਗਙ੍ਗਾਕਨ੍ਦਰਾਦੀਨਂ ਗਹਣਂ. ‘‘ਤਟ’’ਨ੍ਤਿ ਇਮਿਨਾ ਸਮ੍ਬਨ੍ਧੋ. ਵਟ੍ਠਨ੍ਤਿ ਵੁਟ੍ਠੀਹਿ ਓਵਟ੍ਠਞ੍ਚ. ਚਾਤੁਮਾਸਨ੍ਤਿ ਵਿਕੋਪਨਕਿਰਿਯਾਯ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ, ਚਾਤੁਮਾਸਬ੍ਭਨ੍ਤਰੇ ਵਿਕੋਪੇਤੁਂ ਵਟ੍ਟਤੀਤਿ ਅਤ੍ਥੋ.

੯੫੭. ਸਚੇ ਤੋਯਸ੍ਮਿਂ ਪਤਤਿ ਤਟਨ੍ਤਿ ਯੋਜਨਾ, ਸਚੇ ਕੂਲਂ ਭਿਜ੍ਜਿਤ੍ਵਾ ਅਨ੍ਤੋਉਦਕੇ ਪਤਤੀਤਿ. ਦੇਵੇ ਵੁਟ੍ਠੇਪੀਤਿ ਪਜ੍ਜੁਨ੍ਨਦੇਵੇ ਵੁਟ੍ਠੇਪਿ. ਵੁਟ੍ਠ-ਸਦ੍ਦੋ ਕਤ੍ਤੁਸਾਧਨੋ. ਚਾਤੁਮਾਸਮਤਿਕ੍ਕਨ੍ਤੇਪੀਤਿ ਯੋਜਨਾ. ਤਤ੍ਥ ਹੇਤੁਦਸ੍ਸਨਤ੍ਥਮਾਹ ‘‘ਤੋਯੇ ਦੇਵੋ ਹਿ ਵਸ੍ਸਤੀ’’ਤਿ.

੯੫੮. ਸੋਣ੍ਡਿਨ੍ਤਿ ਪਾਸਾਣਪੋਕ੍ਖਰਣਿਂ. ਤਤ੍ਥ ਤੂਤਿ ਉਦਕਰਹਿਤੇ ਤਸ੍ਮਿਂ ਸੋਣ੍ਡਿਆਵਾਟੇ.

੯੫੯. ਅਨ੍ਤੋਚਾਤੁਮਾਸਂ ਸੋਧੇਤੁਂ ਭਿਨ੍ਦਿਤੁਨ੍ਤਿ ਯੋਜਨਾ. ‘‘ਸੋਧੇਤੁਂ ਭਿਨ੍ਦਿਤੁਂ ਵਿਕੋਪੇਤੁ’’ਨ੍ਤਿ ਕਿਰਿਯਾਪਦੇਹਿ ‘‘ਰਜ’’ਨ੍ਤਿ ਕਮ੍ਮਪਦਂ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਤਂ ਰਜੋਰਾਸਿਂ ਦੇਵੇ ਵੁਟ੍ਠੇ ਪਚ੍ਛਾ ਉਦਕਸ੍ਸ ਛਿਨ੍ਨਤ੍ਤਾ ਬਹਲਭੂਮਿਸੁਕ੍ਖਮ੍ਪਿ ਵੁਟ੍ਠਿਪਾਤਦਿਵਸਤੋ ਪਟ੍ਠਾਯ ਅਨ੍ਤੋਚਾਤੁਮਾਸੇ ਕੋਪੇਤੁਂ ਭਿਨ੍ਦਿਤੁਂ ਵਟ੍ਟਤੀਤਿ ਅਤ੍ਥੋ.

੯੬੦. ਪੁਣ੍ਣੇ ਸੋਣ੍ਡਿਮ੍ਹਿ ਤਂ ਰਜਂ ਵਿਕੋਪੇਤੁਂ ਵਟ੍ਟਤਿ ਚਾਤੁਮਾਸਤੋ ਉਦ੍ਧਨ੍ਤਿ ਯੋਜਨਾ.

੯੬੧. ‘‘ਫੁਸਾਯਨ੍ਤੇ’’ਤਿ ਏਤੇਨ ‘‘ਦੇਵੋ’’ਤਿ ਇਦਂ ਭੁਮ੍ਮਵਸੇਨ ਵਿਪਰਿਣਾਮੇਤ੍ਵਾ ‘‘ਦੇਵੇ ਫੁਸਾਯਨ੍ਤੇ’’ਤਿ ਯੋਜੇਤਬ੍ਬਂ, ਪਜ੍ਜੁਨ੍ਨਦੇਵੇ ਵੁਟ੍ਠਿਪਾਤਂ ਕਰੋਨ੍ਤੇਤਿ ਅਤ੍ਥੋ. ਪਿਟ੍ਠਿਪਾਸਾਣਕੇਤਿ ਪਾਸਾਣਪਿਟ੍ਠੇ. ਤਮ੍ਪੀਤਿ ਤਥਾ ਪਾਸਾਣਪਿਟ੍ਠੇ ਲਗ੍ਗਂ ਤਮ੍ਪਿ ਰਜਂ.

੯੬੨. ਅਕਤਪਬ੍ਭਾਰੋ ਨਾਮ ਯਥਾ ਹੇਟ੍ਠਾਭਾਗੋ ਵੁਟ੍ਠਿਫੁਸਿਤੇਹਿ ਨ ਤੇਮੀਯਤਿ, ਤਥਾ ਨਮਿਤ੍ਵਾ ਠਿਤਪਬ੍ਬਤਪ੍ਪਦੇਸੋ. ਇਦਂ ਅਨੋਵਸ੍ਸਕਟ੍ਠਾਨੇ ਉਟ੍ਠਿਤਵਮ੍ਮਿਕਾਨਂ ਉਪਲਕ੍ਖਣਂ.

੯੬੩. ਅਬ੍ਭੋਕਾਸੇ ਵੁਟ੍ਠਿਤੋ ਵਮ੍ਮਿਕੋ ਸਚੇ ਓਵਟ੍ਠੋ, ਕਂ ਚਾਤੁਮਾਸਂ ਵਿਕੋਪੇਤੁਂ ਵਟ੍ਟਤੀਤਿ ਸਮ੍ਬਨ੍ਧੋ. ਚਾਤੁਮਾਸਨ੍ਤਿ ਵਿਕੋਪਨਕਿਰਿਯਾਯ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ. ਰੁਕ੍ਖੇਤਿ ਚ ਥਮ੍ਭਪਾਸਾਣਾਦੀਨਂ ਉਪਲਕ੍ਖਣਂ. ਉਪਚਿਕਾਦੀਨਨ੍ਤਿ ਆਦਿ-ਸਦ੍ਦੇਨ ਕਾਲ਼ਕਿਪਿਲ੍ਲਿਕਾਦੀਨਂ ਗਹਣਂ. ਸੋ ਨਯੋਤਿ ‘‘ਓਵਟ੍ਠਦਿਵਸਤੋ ਉਤ੍ਤਰਿ ਚਾਤੁਮਾਸਬ੍ਭਨ੍ਤਰੇ ਕੋਪੇਤੁਂ ਵਟ੍ਟਤੀ’’ਤਿ ਯਥਾਵੁਤ੍ਤੋ ਨਯੋ.

੯੬੪. ਮੂਸਿਕੁਕ੍ਕਿਰਂ ਨਾਮ ਮੂਸਿਕਾਹਿ ਉਦ੍ਧਟਪਂਸੁ. ਮੂਸਿਕਾਨਂ ਉਕ੍ਕਿਰੋ ਮੂਸਿਕੁਕ੍ਕਿਰੋਤਿ ਵਿਗ੍ਗਹੋ. ਗੋਕਣ੍ਟਕਂ ਨਾਮ ਗੁਨ੍ਨਂ ਖੁਰਾਨਂ ਉਟ੍ਠਿਤਮਤ੍ਤਿਕਾ. ਗਣ੍ਡੁਪ੍ਪਾਦਮਲਂ ਨਾਮ ਭੂਲਤਾਯ ਮਲਮਤ੍ਤਿਕਾ. ਸਮ੍ਬਨ੍ਧਂ ਪਨ ਪਕਤਿਭੂਮਿਂ ਅਕੋਪੇਨ੍ਤੇਨ ਮਤ੍ਥਕਤੋ ਗਣ੍ਹਿਤੁਂ ਵਟ੍ਟਤਿ.

੯੬੫. ਕਸੀਤਿ ਕਸਿਤਟ੍ਠਾਨਂ, ਤਤ੍ਥ ਨਙ੍ਗਲੇਨ ਉਦ੍ਧਟਮਤ੍ਤਿਕਾ ਕਸਿਨਙ੍ਗਲਮਤ੍ਤਿਕਾ. ‘‘ਅਚ੍ਛਿਨ੍ਨਾ’’ਤਿਇਮਿਨਾ ਖਣ੍ਡਾਖਣ੍ਡਿਕਂ ਕਤ੍ਵਾ ਆਯਤਂ ਹੁਤ੍ਵਾ ਠਿਤਮਤ੍ਤਿਕਾਪਟਲਮ੍ਪਿ ਅਜਾਤਪਥਵੀ ਸਿਯਾਤਿ ਆਸਙ੍ਕਾਨਿਵਤ੍ਤਨਤ੍ਥਮਾਹ ‘‘ਭੂਮਿਸਮ੍ਬਨ੍ਧਾ’’ਤਿ. ਸਾਤਿ ਕਸਿਨਙ੍ਗਲਮਤ੍ਤਿਕਾ.

੯੬੬. ਸੇਨਾਸਨਨ੍ਤਿ ਏਤ੍ਥ ‘‘ਪੁਰਾਣ’’ਨ੍ਤਿ ਪਾਠਸੇਸੋ ਗਹੇਤਬ੍ਬੋ. ਓਵਟ੍ਠਂ ਚਾਤੁਮਾਸਤੋ ਉਦ੍ਧਂ ਨ ਵਿਕੋਪਯੇਤਿ ਯੋਜਨਾ.

੯੬੭. ਤਤੋਤਿ ਓਵਟ੍ਠਦਿਵਸਤੋ ਪਟ੍ਠਾਯ ਚਾਤੁਮਾਸਾਤਿਕ੍ਕਨ੍ਤਗੇਹਤੋ. ‘‘ਗੋਪਾਨਸਿ’’ਨ੍ਤਿ ਇਮਿਨਾ ਗੋਪਾਨਸਿਮਤ੍ਥਕੇ ਠਿਤਉਪਚਿਕਾਪਂਸੁਮ੍ਹਿ ਭਿਜ੍ਜਨ੍ਤੇਪਿ ਅਨਾਪਤ੍ਤਿਭਾਵਂ ਦੀਪੇਤਿ. ‘‘ਭਿਤ੍ਤਿ’’ਨ੍ਤਿ ਇਮਿਨਾ ਤਦੇਕਦੇਸਂ ਭਿਤ੍ਤਿਪਾਦਾਦਿਦਾਰੁਮਾਹ. ਇਦਮ੍ਪਿ ਭਿਤ੍ਤਿਮਤ੍ਤਿਕਂ ਉਪਚਿਕਾਮਤ੍ਤਿਕਂ ਸਨ੍ਧਾਯ ਵੁਤ੍ਤਂ. ‘‘ਥਮ੍ਭ’’ਨ੍ਤਿ ਇਦਮ੍ਪਿ ਤਂਸਮ੍ਬਨ੍ਧਪਾਕਾਰਭੂਮਿਮਤ੍ਤਿਕਾਉਪਚਿਕਾਦਿਪਂਸੁਂ ਸਨ੍ਧਾਯ ਵੁਤ੍ਤਂ. ਪਦਰਤ੍ਥਰਨ੍ਤਿ ਅਤ੍ਥਤਪਦਰਂ. ਇਦਮ੍ਪਿ ਪਦਰਾਨਂ ਉਪਰਿ ਮਤ੍ਤਿਕਾਉਪਚਿਕਾਪਂਸੁਂ ਸਨ੍ਧਾਯ ਵੁਤ੍ਤਂ. ‘‘ਗੋਪਾਨਸਿ’’ਨ੍ਤਿਆਦੀਹਿ ਪਦੇਹਿ ‘‘ਗਣ੍ਹਿਸ੍ਸਾਮੀ’’ਤਿ ਪਚ੍ਚੇਕਂ ਯੋਜਨੀਯਂ. ‘‘ਗਣ੍ਹਿਸ੍ਸਾਮੀ’’ਤਿ ਇਮਿਨਾ ਵਿਕੋਪਨਾਧਿਪ੍ਪਾਯਾਭਾਵਂ ਦੀਪੇਤਿ.

੯੬੮. ਗਣ੍ਹਨ੍ਤਸ੍ਸਾਤਿ ਏਤ੍ਥ ਅਨਾਦਰੇ ਸਾਮਿਵਚਨਂ, ‘‘ਸੁਦ੍ਧਚਿਤ੍ਤੇਨਾ’’ਤਿ ਪਾਠਸੇਸੋ. ਇਟ੍ਠਕਾਤਿ ਛਦਨਿਟ੍ਠਕਾ. ਆਦਿ-ਸਦ੍ਦੇਨ ਪਾਸਾਣਸਮੁਦ੍ਦਫੇਣਾਦੀਨਂ ਗਹਣਂ. ਪਤਤੀਤਿ ਸੁਦ੍ਧਚਿਤ੍ਤੇਨ ਗਣ੍ਹਨ੍ਤੇ ਸਚੇ ਮਤ੍ਤਿਕਾ ਛਿਜ੍ਜਿਤ੍ਵਾ ਪਤਤਿ, ਅਨਾਪਤ੍ਤੀਤਿ ਅਤ੍ਥੋ. ਮਤ੍ਤਿਕਨ੍ਤਿ ਭਿਤ੍ਤਿਯਂ, ਛਦਨੇ ਚ ਚਾਤੁਮਾਸਾਧਿਕੋਵਟ੍ਠਮਤ੍ਤਿਕਂ, ਅਨੋਵਟ੍ਠਂ ਚੇ, ਗਣ੍ਹਿਤੁਂ ਵਟ੍ਟਤੀਤਿ. ਯਥਾਹ ਅਟ੍ਠਕਥਾਯਂ ‘‘ਸਚੇ ਯਾ ਯਾ ਅਤਿਨ੍ਤਾ, ਤਂ ਤਂ ਗਣ੍ਹਾਤਿ, ਅਨਾਪਤ੍ਤੀ’’ਤਿ (ਪਾਚਿ. ਅਟ੍ਠ. ੮੬). ਯਦਿ ਗਣ੍ਹਤਿ, ਆਪਤ੍ਤਿ ਸਿਯਾਤਿ ਯੋਜਨਾ.

੯੬੯. ਅਤਿਨ੍ਤੋਤਿ ਵਸ੍ਸੋਦਕੇਨ ਅਤਿਨ੍ਤੋ, ਇਮਿਨਾ ਵਿਨਿਚ੍ਛਿਤਬ੍ਬਵਤ੍ਥੁਂ ਦਸ੍ਸੇਤਿ. ਤਸ੍ਸ ਅਨ੍ਤੋਗੇਹੇ ਚ ਬਹਿ ਚ ਸਮ੍ਭਵਤੋ ਅਨ੍ਤੋਗੇਹੇ ਠਿਤਸ੍ਸ ਤਾਵ ਵਿਨਿਚ੍ਛਯਂ ਦਸ੍ਸੇਤੁਮਾਹ ‘‘ਅਨ੍ਤੋਗੇਹੇ ਸਚੇ ਸਿਯਾ’’ਤਿ. ਵਸ੍ਸੋਦਕੇਨ ਤਿਨ੍ਤਾਤਿਨ੍ਤੇਸੁ ਦ੍ਵੀਸੁ ਮਤ੍ਤਿਕਾਪੁਞ੍ਜੇਸੁ ਅਤਿਨ੍ਤਂ ਤਾਵ ਦਸ੍ਸੇਤੁਮਾਹ ‘‘ਅਨੋਵਟ੍ਠੋ ਚਾ’’ਤਿ.

੯੭੦. ਵਸ੍ਸੋਦਕੇਨ ਤਿਨ੍ਤੇ ਵਿਨਿਚ੍ਛਯਂ ਦਸ੍ਸੇਤੁਮਾਹ ‘‘ਵੁਟ੍ਠੇ ਪੁਨ ਚਾ’’ਤਿਆਦਿ. ‘‘ਵੁਟ੍ਠੇ’’ਤਿ ਇਮਿਨਾ ‘‘ਮਤ੍ਤਿਕਾਪੁਞ੍ਜੋ’’ਤਿ ਪਦਂ ਭੁਮ੍ਮਵਸੇਨ ਵਿਪਰਿਣਾਮੇਤ੍ਵਾ ਵੁਟ੍ਠੇ ਮਤ੍ਤਿਕਾਪੁਞ੍ਜੇਤਿ ਯੋਜੇਤਬ੍ਬਂ, ‘‘ਏਕਦਿਵਸਮ੍ਪੀ’’ਤਿ ਸੇਸੋ, ਗੇਹਸ੍ਮਿਨ੍ਤਿ ਏਤ੍ਥ ‘‘ਠਿਤੇ’’ਤਿ ਵਤ੍ਤਬ੍ਬਂ, ਗੇਹਸ੍ਮਿਂ ਠਿਤੇ ਮਤ੍ਤਿਕਾਪੁਞ੍ਜੇ ਵਸ੍ਸੋਦਕੇਨ ਏਕਦਿਵਸਮ੍ਪਿ ਤਿਨ੍ਤੇਤਿ ਵੁਤ੍ਤਂ ਹੋਤਿ. ਵਕ੍ਖਮਾਨਨਯੇਨ ਅਞ੍ਞਤ੍ਥ ਪਹਰਿਤ੍ਵਾ ਉਟ੍ਠਿਤੇਨ ਤੇਨ ਅਤੇਮਿਤ੍ਵਾ ਉਜੁਕਂ ਪਤਿਤੇਹਿ ਵਸ੍ਸਫੁਸਿਤੇਹਿ ਤਿਨ੍ਤੇਤਿ ਗਹੇਤਬ੍ਬਂ. ਸਚੇ ਸਬ੍ਬੋ ਤਿਨ੍ਤੋ ਹੋਤੀਤਿ ਯੋਜਨਾ. ‘‘ਮਤ੍ਤਿਕਾਪੁਞ੍ਜੋ’’ਤਿ ਇਮਿਨਾ ਸਮ੍ਬਨ੍ਧੋ.

੯੭੧. ‘‘ਸਬ੍ਬੋ’’ਤਿ ਇਮਿਨਾ ਵਿਸੇਸਨੇਨ ਬ੍ਯਵਚ੍ਛਿਨ੍ਨਂ ਏਕਦੇਸਤਿਨ੍ਤੇ ਵਿਨਿਚ੍ਛਯਂ ਦਸ੍ਸੇਤੁਮਾਹ ‘‘ਯਤ੍ਤਕ’’ਨ੍ਤਿਆਦਿ. ਤੁ-ਸਦ੍ਦੋ ਇਮਮੇਵ ਵਿਸੇਸਂ ਜੋਤੇਤਿ. ਯਤ੍ਤਕਨ੍ਤਿ ਹੇਟ੍ਠਾ ਅਨੋਤਰਿਤ੍ਵਾ ਮਤ੍ਥਕਤੋ, ਪਰਿਯਨ੍ਤਕਤੋ ਚ ਯਤ੍ਤਕਪ੍ਪਮਾਣਂ. ਤਤ੍ਥਾਤਿ ਮਤ੍ਤਿਕਾਪੁਞ੍ਜੇ. ‘‘ਅਕਪ੍ਪਿਯ’’ਨ੍ਤਿ ਏਤਸ੍ਸ ‘‘ਚਾਤੁਮਾਸਚ੍ਚਯੇਨਾ’’ਤਿ ਅਨੁਵਤ੍ਤਤਿ. ‘‘ਅਤਿਨ੍ਤਂ…ਪੇ… ਕਪ੍ਪਿਯ’’ਨ੍ਤਿ ਇਮਿਨਾ ਅਕਪ੍ਪਿਯਟ੍ਠਾਨਂ ਪਰਿਹਰਿਤ੍ਵਾ ਵਾ ਕਪ੍ਪਿਯਕਾਰਕੇਹਿ ਕਪ੍ਪਿਯਵਚਨੇਨ ਹਰਾਪੇਤ੍ਵਾ ਵਾ ਅਤਿਨ੍ਤਂ ਠਾਨਂ ਯਥਾਕਾਮਂ ਵਲ਼ਞ੍ਜੇਤਬ੍ਬਨ੍ਤਿ ਅਯਮਤ੍ਥੋ ਦਸ੍ਸਿਤੋ ਹੋਤਿ. ਯਥਾਹ ਅਟ੍ਠਕਥਾਯਂ ‘‘ਕਪ੍ਪਿਯਕਾਰਕੇਹੀ’’ਤਿਆਦਿ (ਪਾਚਿ. ਅਟ੍ਠ. ੮੬).

੯੭੨. ਵਾਰਿਨਾਤਿ ਉਜੁਕਂ ਆਕਾਸਤੋ ਪਤਿਤਵਸ੍ਸੋਦਕੇਨ. ਅਞ੍ਞਤ੍ਥ ਪਹਰਿਤ੍ਵਾ ਤਤ੍ਥ ਪਤਿਤ੍ਵਾ ਤੇਮਿਤੇ ਵਟ੍ਟਤਿ. ਸੋ ਮਤ੍ਤਿਕਾਪੁਞ੍ਜੋ. ਤਤੋ ਪਰਨ੍ਤਿ ਏਕਾਬਦ੍ਧਕਾਲਤੋ ਉਤ੍ਤਰਿਂ ਸੋ ਮਤ੍ਤਿਕਾਪੁਞ੍ਜੋ ਵਾਰਿਨਾ ਤੇਮਿਤੋ ਭੂਮਿਯਾ ਏਕਾਬਦ੍ਧੋ ਚੇ ਹੋਤਿ, ਤਤੋ ਪਰਂ ਸਾ ਜਾਤਾ ਪਥਵੀ ਏਵ, ਕੋਪੇਤੁਂ ਨ ਵਟ੍ਟਤੀਤਿ ਯੋਜਨਾ.

੯੭੩. ‘‘ਓਵਟ੍ਠੋ’’ਤਿ ਇਮਿਨਾ ਅਨੋਵਟ੍ਠਪਾਕਾਰੋ ਕਪ੍ਪਿਯੋਤਿ ਬ੍ਯਤਿਰੇਕਵਸੇਨ ਦਸ੍ਸੇਤਿ. ‘‘ਮਤ੍ਤਿਕਾਮਯੋ’’ਤਿ ਵਿਸੇਸਨੇਨ ਇਟ੍ਠਕਪਾਕਾਰਾਦਿਂ ਬ੍ਯਵਚ੍ਛਿਨ੍ਦਤਿ. ਤਸ੍ਸ ਪਨ ਕਪ੍ਪਿਯਭਾਵਂ ਵਕ੍ਖਤਿ ‘‘ਸਚੇ ਇਟ੍ਠਕਪਾਕਾਰੋ’’ਤਿਆਦਿਨਾ. ‘‘ਚਾਤੁਮਾਸਚ੍ਚਯੇ’’ਤਿ ਇਮਿਨਾ ਤਤੋ ਅਨ੍ਤੋ ਵਿਕੋਪਨੀਯਭਾਵਂ ਦਸ੍ਸੇਤਿ.

੯੭੪. ਤਤ੍ਥਾਤਿ ਓਵਟ੍ਠੇ ਮਤ੍ਤਿਕਪਾਕਾਰੇ. ਅਘਂਸਨ੍ਤੋਵਾਤਿ ਪਾਕਾਰਮਤ੍ਤਿਕਂ ਅਕੋਪੇਨ੍ਤੋ. ਮਤ੍ਤਸੋ ਛੁਪਿਤ੍ਵਾਤਿ ਪਮਾਣਤੋ ਮੁਦੁਕਂ ਕਤ੍ਵਾ ਹਤ੍ਥਤਲਂ ਠਪੇਤ੍ਵਾ. ਅਲ੍ਲਹਤ੍ਥੇਨਾਤਿ ਉਦਕਤਿਨ੍ਤੇਨ ਹਤ੍ਥਤਲੇਨ. ਹਤ੍ਥੇਕਦੇਸੋ ਹਤ੍ਥੋ ਨਾਮ.

੯੭੫. ਯੇਭੁਯ੍ਯਕਥਲੇ ਠਾਨੇਤਿ ਪੁਬ੍ਬੇ ਵੁਤ੍ਤਨਯੇਨ ਯਸ੍ਸਾ ਤੀਸੁ ਭਾਗੇਸੁ ਦ੍ਵੇ ਭਾਗਾ ਕਥਲਾ ਹੋਨ੍ਤਿ, ਤਾਦਿਸੇ ਕਪ੍ਪਿਯਪਥਵਿਟ੍ਠਾਨੇ.

੯੭੬. ਅਬ੍ਭੋਕਾਸੇਤਿ ਉਪਲਕ੍ਖਣਤ੍ਤਾ ਅਨ੍ਤੋਗੇਹੇਪਿ ਥਮ੍ਭਂ ਚਾਲੇਤ੍ਵਾ ਜਾਤਪਥਵਿਂ ਵਿਕੋਪੇਤੁਂ ਨ ਵਟ੍ਟਤੀਤਿ ਦਟ੍ਠਬ੍ਬਂ. ਦ੍ਵੀਸੁਪਿ ਠਾਨੇਸੁ ਸੁਦ੍ਧਚਿਤ੍ਤੇਨ ਨਿਦ੍ਦੋਸਭਾਵਂ ਯਥਾਵੁਤ੍ਤੇਨ ‘‘ਥਮ੍ਭਂ ਵਾ ਪਦਰਤ੍ਥਰਂ. ਗਣ੍ਹਿਸ੍ਸਾਮੀ’ਤਿ ਸਞ੍ਞਾਯ, ਗਹੇਤੁਂ ਪਨ ਵਟ੍ਟਤੀ’’ਤਿ ਇਮਿਨਾ ਨਯੇਨਾਹ. ਪਥਵਿਨ੍ਤਿ ਅਕਪ੍ਪਿਯਪਥਵਿਂ.

੯੭੭. ਉਜੁਮੁਦ੍ਧਰਤੋ ਨ ਦੋਸੋਤਿ ਯੋਜਨਾ.

੯੭੮. ਉਚ੍ਚਾਲੇਤ੍ਵਾਤਿ ਉਕ੍ਖਿਪਿਤ੍ਵਾ ਚਾਲੇਤ੍ਵਾ ਪਰਿਵਤ੍ਤੇਤ੍ਵਾ. ਪਵਟ੍ਟਤੀਤਿ ਪਵਟ੍ਟੇਤ੍ਵਾ ਪਵਟ੍ਟੇਤ੍ਵਾ ਨੇਤੀਤਿ ਅਤ੍ਥੋ. ਸੁਦ੍ਧਚਿਤ੍ਤਸ੍ਸਾਤਿ ‘‘ਭੂਮਿ ਭਿਜ੍ਜਤੀ’’ਤਿ ਅਸਲ੍ਲਕ੍ਖੇਤ੍ਵਾ ‘‘ਪਾਸਾਣਂ ਪਵਟ੍ਟੇਤ੍ਵਾ ਪਵਟ੍ਟੇਤ੍ਵਾ ਹਰਿਸ੍ਸਾਮੀ’’ਤਿ ਸੁਦ੍ਧਚਿਤ੍ਤਵਤੋ.

੯੭੯. ਭੂਮਿਯਂ ਦਾਰੂਨਿ ਫਾਲੇਨ੍ਤਾਨਮ੍ਪਿ ਭੂਮਿਯਂ ਸਾਖਾਦੀਨਿ ਕਡ੍ਢਤੋ ਚਾਤਿ ਯੋਜਨਾ.

੯੮੦. ਕਣ੍ਟਕਨ੍ਤਿ ਰੁਕ੍ਖਕਣ੍ਟਕਂ, ਮਚ੍ਛਕਣ੍ਟਕਞ੍ਚ. ਸੂਚਿ ਨਾਮ ਅਯੋਮਯਦਨ੍ਤਮਯਤਮ੍ਬਮਯਕਟ੍ਠਮਯਾਦਿਸੂਚੀਨਂ ਅਞ੍ਞਤਰਾ. ਅਟ੍ਠਿਂ ਵਾਤਿ ਗੋਮਹਿਂਸਾਦੀਨਂ ਅਟ੍ਠਿਂ ਵਾ. ਹੀਰਂ ਵਾਤਿ ਨਾਲ਼ਿਕੇਰਾਦਿਹੀਰਂ ਵਾ. ਆਕੋਟੇਤੁਨ੍ਤਿ ਯਥਾ ਏਕਕੋਟਿ ਭੂਮਿਂ ਪਵਿਸਤਿ, ਤਥਾ ਤਾਲ਼ੇਤੁਂ. ਪਵੇਸੇਤੁਨ੍ਤਿ ਭੂਮਿਂ ਗਮਯਿਤੁਂ.

੯੮੧. ਪਸ੍ਸਾਵਂ ਮੁਤ੍ਤਂ. ਮੇਦਨਿਨ੍ਤਿ ਏਤ੍ਥ ਅਕਪ੍ਪਿਯਪਥਵਿਮਾਹ. ਭਿਨ੍ਦਿਸ੍ਸਾਮੀਤਿ ਏਤ੍ਥ ‘‘ਏਵਂ ਚਿਨ੍ਤੇਤ੍ਵਾ’’ਤਿ ਸੇਸੋ.

੯੮੨. ਕਰੋਨ੍ਤਸ੍ਸਾਤਿ ਸੁਦ੍ਧਚਿਤ੍ਤੇਨ ਪਸ੍ਸਾਵਂ ਕਰੋਨ੍ਤਸ੍ਸਾਤਿਯੋਜੇਤਬ੍ਬਂ. ‘‘ਸਮ੍ਮਜ੍ਜਤੋ’’ਤਿ ਇਦਂ ‘‘ਸਮ੍ਮਜ੍ਜਨ੍ਤੇਨਾ’’ਤਿ ਗਹੇਤਬ੍ਬਂ, ‘‘ਸਮ੍ਮਜ੍ਜਨਿਯਾ’’ਤਿ ਸੇਸੋ, ਅਨਨ੍ਤਰਂ ਮੇਦਨੀਪਦਂ ਉਪਯੋਗਵਸੇਨ ‘‘ਮੇਦਨਿ’’ਨ੍ਤਿ ਗਹੇਤਬ੍ਬਂ, ‘‘ਵਿਸਮ’’ਨ੍ਤਿ ਸੇਸੋ, ‘‘ਸਮਂ ਕਾਤੁ’’ਨ੍ਤਿ ਇਮਿਨਾ ਯੋਜੇਤਬ੍ਬਂ, ਸਮ੍ਮਜ੍ਜਨ੍ਤੇਨ ਉਚ੍ਚਟ੍ਠਾਨਂ ਮਦ੍ਦਿਤ੍ਵਾ, ਆਵਾਟਟ੍ਠਾਨਂ ਪਵੇਸੇਤ੍ਵਾ ਸਮਂ ਕਾਤੁਂ ਸਮ੍ਮਜ੍ਜਨਿਯਾ ਘਂਸੇਤੁਂ ਨ ਵਟ੍ਟਤੀਤਿ ਅਤ੍ਥੋ. ਯਥਾਹ ਅਟ੍ਠਕਥਾਯਂ ‘‘ਵਿਸਮਂ ਭੂਮਿਂ ਸਮਂ ਕਰਿਸ੍ਸਾਮੀਤਿ ਸਮ੍ਮਜ੍ਜਨਿਯਾ ਘਂਸਿਤੁਮ੍ਪਿ ਨ ਵਟ੍ਟਤੀ’’ਤਿ (ਪਾਚਿ. ਅਟ੍ਠ. ੮੬).

੯੮੩. ਪਾਦਙ੍ਗੁਟ੍ਠੇਨ ਵਾਤਿ ਏਤ੍ਥ ਸਮੁਚ੍ਚਯਤ੍ਥੇਨ ਵਾ-ਸਦ੍ਦੇਨ ਅਟ੍ਠਕਥਾਯਂ ਵੁਤ੍ਤਂ ‘‘ਕਤ੍ਤਰਯਟ੍ਠਿਯਾ ਭੂਮਿਂ ਕੋਟ੍ਟੇਨ੍ਤੀ’’ਤਿ ਇਦਂ ਸਙ੍ਗਣ੍ਹਾਤਿ. ਲਿਖਿਤੁਮ੍ਪੀਤਿ ਰਾਜਿਂ ਕਾਤੁਮ੍ਪਿ ਭੂਮਿਂ ਭਿਨ੍ਦਨ੍ਤੇਨਾਤਿ ਯੋਜਨਾ. ਪਾਦੇਹੀਤਿ ਪਾਦਤਲੇਹਿ.

੯੮੫. ਭੂਮਿਨ੍ਤਿ ਅਕਪ੍ਪਿਯਭੂਮਿਂ. ਦਹਤਿ ਦਹਾਪੇਤੀਤਿ ਏਤ੍ਥ ‘‘ਯੋ’’ਤਿ ਚ ‘‘ਤਸ੍ਸਾ’’ਤਿ ਚ ਸਮ੍ਬਨ੍ਧਵਸੇਨ ਲਬ੍ਭਤਿ. ਪਤ੍ਤਂ ਦਹਨ੍ਤਸ੍ਸਾਤਿ ਛਵਿਯਾ ਥਿਰਭਾਵਤ੍ਥਂ ਧੂਮਂ ਗਾਹਾਪੇਤ੍ਵਾ ਤਿਣੁਕ੍ਕਾਦੀਹਿ ਪਤ੍ਤਂ ਗਣ੍ਹਨ੍ਤਸ੍ਸ.

੯੮੬. ਤਤ੍ਤਕਾਨੇਵਾਤਿ ਠਾਨਪ੍ਪਮਾਣਾਨੇਵ. ਇਧਾਪਿ ‘‘ਯੋ’’ਤਿ ਚ ‘‘ਤਸ੍ਸਾ’’ਤਿ ਚ ਸਾਮਤ੍ਥਿਯਾ ਲਬ੍ਭਤਿ.

੯੮੭. ਭੂਮਿਯਨ੍ਤਿ ਅਕਪ੍ਪਿਯਭੂਮਿਯਂ. ਪਤ੍ਤਂ ਪਚੀਯਤਿ ਏਤ੍ਥਾਤਿ ਪਤ੍ਤਪਚਨਂ, ਕਪਾਲਂ, ਤਸ੍ਮਿਂ ਕਪਾਲੇ.

੯੮੮. ਸੋ ਅਗ੍ਗਿ ਤਾਨਿ ਦਾਰੂਨਿ ਦਹਨ੍ਤੋ ਗਨ੍ਤ੍ਵਾ ਚੇ ਏਕਂਸੇਨ ਭੂਮਿਂ ਦਹਤਿ, ਤਸ੍ਮਾ ਦਾਰੂਨਂ ਉਪਰਿ ਅਗ੍ਗਿਂ ਠਪੇਤੁਂ ਨ ਵਟ੍ਟਤੀਤਿ ਯੋਜਨਾ.

੯੮੯. ਇਟ੍ਠਕਾ ਆਵਪੀਯਨ੍ਤਿ ਪਚ੍ਚਨ੍ਤਿ ਏਤ੍ਥਾਤਿ ਇਟ੍ਠਕਾਵਾਪੋ, ਸੋ ਏਵ ਇਟ੍ਠਕਾਵਾਪਕੋ, ਇਟ੍ਠਕਾਪਚਨਟ੍ਠਾਨਂ. ਆਦਿ-ਸਦ੍ਦੇਨ ਕੁਮ੍ਭਕਾਰਾਵਾਪਾਦਿਂ ਸਙ੍ਗਣ੍ਹਾਤਿ.

੯੯੦. ਉਪਾਦੀਯਤੀਤਿ ਉਪਾਦਾਨਂ, ਇਨ੍ਧਨਂ, ਨ ਉਪਾਦਾਨਂ ਅਨੁਪਾਦਾਨਂ, ਇਨ੍ਧਨਤੋ ਅਞ੍ਞਂ, ਤਤੋ ਅਨੁਪਾਦਾਨਤੋਤਿ ਅਤ੍ਥੋ. ਖਾਣੁਕੇਤਿ ਮਤਖਾਣੁਕੇ ਚ ਸੁਕ੍ਖਰੁਕ੍ਖੇ ਚ ਭੂਮਿਗਤਂ ਅਦਤ੍ਵਾ ‘‘ਨਿਬ੍ਬਾਪੇਸ੍ਸਾਮੀ’’ਤਿ ਅਗ੍ਗਿਦਾਨਂ ਵਟ੍ਟਤਿ. ਪਚ੍ਛਾ ਉਸ੍ਸਾਹੇ ਕਤੇਪਿ ਨ ਨਿਬ੍ਬਾਯਤਿ, ਨ ਦੋਸੋਤਿ. ਯਥਾਹ ਅਟ੍ਠਕਥਾਯਂ ‘‘ਸਚੇ ਪਨ ਭੂਮਿਂ ਅਪ੍ਪਤ੍ਤਮੇਵਾ’’ਤਿਆਦਿ (ਪਾਚਿ. ਅਟ੍ਠ. ੮੭).

੯੯੧. ਤਿਣੁਕ੍ਕਨ੍ਤਿ ਤਿਣੇਨ ਬਦ੍ਧਉਕ੍ਕਂ. ਤਿਣੁਕ੍ਕਨ੍ਤਿ ਉਪਲਕ੍ਖਣਂ. ਨਾਲ਼ਿਕੇਰਪਣ੍ਣਾਦੀਹਿ ਬਦ੍ਧਾਪਿ ਸਙ੍ਗਯ੍ਹਨ੍ਤਿ.

੯੯੨. ਤਸ੍ਸ ਅਗ੍ਗਿਸ੍ਸ ਪਤਿਤਟ੍ਠਾਨੇ ਇਨ੍ਧਨਂ ਦਤ੍ਵਾ ਪੁਨ ਤਂ ਅਗ੍ਗਿਂ ਕਾਤੁਂ ਵਟ੍ਟਤੀਤਿ ਮਹਾਪਚ੍ਚਰਿਯਂ ਰੁਤਂ ਕਥਿਤਨ੍ਤਿ ਯੋਜਨਾ.

੯੯੩. ‘‘ਤਸ੍ਸ ਅਪਥਵਿਯ’’ਨ੍ਤਿ ਪਦਚ੍ਛੇਦੋ. ਵਿਮਤਿਸ੍ਸੁਭਯਤ੍ਥਾਪੀਤਿ ਪਥਵਿਅਪਥਵਿਦ੍ਵਯੇਪਿ ਵੇਮਤਿਕਸ੍ਸ. ਤਤ੍ਥ ਜਾਤਾ ਪਥਵੀ, ਇਤਰਾ ਅਪਥਵੀ.

੯੯੪. ਇਮਨ੍ਤਿ ਆਵਾਟਂ, ਮਤ੍ਤਿਕਂ, ਪਂਸੁਂ ਵਾ.

ਪਥਵੀਖਣਨਕਥਾਵਣ੍ਣਨਾ.

ਮੁਸਾਵਾਦਵਗ੍ਗੋ ਪਠਮੋ.

੯੯੫. ਭਵਨ੍ਤਸ੍ਸਾਤਿ ਜਾਯਨ੍ਤਸ੍ਸ, ਵਡ੍ਢਮਾਨਸ੍ਸ ਚ. ਭੂਤਸ੍ਸਾਤਿ ਜਾਤਸ੍ਸ, ਵਡ੍ਢਿਤਸ੍ਸ ਚਾਤਿ ਅਤ੍ਥੋ. ਯਥਾਹ ਅਟ੍ਠਕਥਾਯਂ ‘‘ਭਵਨ੍ਤਿ ਅਹੁਵੁਞ੍ਚਾਤਿ ਭੂਤਾ, ਜਾਯਨ੍ਤਿ ਵਡ੍ਢਨ੍ਤਿ, ਜਾਤਾ ਵਡ੍ਢਿਤਾ ਚਾ’’ਤਿ (ਪਾਚਿ. ਅਟ੍ਠ. ੯੦). ਏਤ੍ਥ ਚ ‘‘ਭਵਨ੍ਤੀ’’ਤਿ ਇਮਿਨਾ ਵਿਰੁਲ਼੍ਹਮੂਲੇ ਨੀਲਭਾਵਂ ਆਪਜ੍ਜਿਤ੍ਵਾ ਵਡ੍ਢਮਾਨਕੇ ਤਰੁਣਗਚ੍ਛੇ ਦਸ੍ਸੇਤਿ. ‘‘ਅਹੁਵੁ’’ਨ੍ਤਿ ਇਮਿਨਾ ਪਨ ਵਡ੍ਢਿਤ੍ਵਾ ਠਿਤੇ ਮਹਨ੍ਤੇ ਰੁਕ੍ਖਗਚ੍ਛਾਦਿਕੇ ਦਸ੍ਸੇਤਿ. ‘‘ਭਵਨ੍ਤੀ’’ਤਿ ਇਮਸ੍ਸ ਵਿਵਰਣਂ ‘‘ਜਯਨ੍ਤਿ ਵਡ੍ਢਨ੍ਤੀ’’ਤਿ, ‘‘ਅਹੁਵੁ’’ਨ੍ਤਿ ਇਮਸ੍ਸ ‘‘ਜਾਤਾ ਵਡ੍ਢਿਤਾ’’ਤਿ. ਏਵਂ ਭੂਤ-ਸਦ੍ਦੋ ਪਚ੍ਚੁਪ੍ਪਨ੍ਨਾਤੀਤਵਿਸਯੋਤਿ ਦਸ੍ਸੇਤਿ. ‘‘ਭਵਨ੍ਤਸ੍ਸ ਭੂਤਸ੍ਸਾ’’ਤਿ ਇਮਿਨਾ ਪਦਦ੍ਵਯੇਨ ‘‘ਭੂਤਗਾਮਸ੍ਸਾ’’ਤਿ ਪਦਸ੍ਸ ਤੁਲ੍ਯਾਧਿਕਰਣਤਾਦਸ੍ਸਨੇਨ ਗਾਮ-ਸਦ੍ਦਸ੍ਸ ਦਿਟ੍ਠਿਗਤਵਨਨ੍ਤਾਦਿਸਦ੍ਦਾਨਂ ਦਿਟ੍ਠਿਵਨਾਦਿਸਦ੍ਦਤ੍ਥੇ ਵਿਯ ਭੂਤਸਦ੍ਦਤ੍ਥੇ ਵੁਤ੍ਤਿਪਕ੍ਖਮਾਹ. ਯਥਾਹ ਅਟ੍ਠਕਥਾਯਂ (ਪਾਚਿ. ਅਟ੍ਠ. ੯੦) ‘‘ਭੂਤਾ ਏਵ ਵਾ ਗਾਮੋ ਭੂਤਗਾਮੋ, ਪਤਿਟ੍ਠਿਤਹਰਿਤਤਿਣਰੁਕ੍ਖਾਦੀਨਮੇਤਂ ਅਧਿਵਚਨ’’ਨ੍ਤਿ. ਭੂਤਾਨਂ ਦੇਵਤਾਨਂ ਗਾਮੋ ਨਿਵਾਸੋਤਿ ਵਾ ਭੂਤਗਾਮੋ. ਭੂਮਿਯਂ ਪਤਿਟ੍ਠਹਿਤ੍ਵਾ ਹਿ ਹਰਿਤਭਾਵਮਾਪਨ੍ਨਾ ਤਿਣਰੁਕ੍ਖਗਚ੍ਛਾਦਯੋ ਦੇਵਤਾਹਿ ਪਰਿਗਯ੍ਹਨ੍ਤੀਤਿ. ਜਾਯਨ੍ਤਸ੍ਸ ਵਡ੍ਢਨ੍ਤਸ੍ਸ ਵਾ ਸਮ੍ਪਤ੍ਤਵੁਦ੍ਧਿਮਰਿਯਾਦਸ੍ਸ ਵਾ ਰੁਕ੍ਖਾਦਿਨੋਤਿ ਅਤ੍ਥੋ.

ਪਾਤਬ੍ਯਤਾਨਿਮਿਤ੍ਤਨ੍ਤਿ ਏਤ੍ਥ ਪਾਤਬ੍ਯਭਾਵੋ ਪਾਤਬ੍ਯਤਾ, ‘‘ਛੇਦਨਭੇਦਨਾਦੀਹਿ ਯਥਾਰੁਚਿ ਪਰਿਭੁਞ੍ਜਿਤਬ੍ਬਤਾਤਿ ਅਤ੍ਥੋ’’ਤਿ ਅਟ੍ਠਕਥਾਵਚਨਤੋ ਪਾਤਬ੍ਯਤਾ-ਸਦ੍ਦਸ੍ਸ ਪਰਿਭੁਞ੍ਜਿਤਬ੍ਬਤਾਤਿ ਅਤ੍ਥੋ ਵੇਦਿਤਬ੍ਬੋ, ਸਾ ਨਿਮਿਤ੍ਤਂ ਹੇਤੁ ਯਸ੍ਸ ਪਾਚਿਤ੍ਤਿਯਸ੍ਸ ਤਂ ਪਾਤਬ੍ਯਤਾਨਿਮਿਤ੍ਤਂ. ਰੁਕ੍ਖਾਦੀਨਂ ਛੇਦਨਫਾਲਨਾਦਿਵਸੇਨ ਵਿਕੋਪਨੀਯਤਾਸਙ੍ਖਾਤਪਾਤਬ੍ਯਤਾਨਿਮਿਤ੍ਤਂ ਪਰਿਭੁਞ੍ਜਿਤਬ੍ਬਤਾਹੇਤੁ ਪਾਚਿਤ੍ਤਿਯਂ ਉਦੀਰਿਤਂ ਵੁਤ੍ਤਨ੍ਤਿ ਅਤ੍ਥੋ.

੯੯੬-੭. ਸੋਤਿ ਭੂਤਗਾਮੋ. ਤਿਲਬੀਜਾਦਿਕੋਤਿ ਤਿਲਬੀਜਮੇਤ੍ਥ ਸੁਖੁਮਪਣ੍ਣਸੇਵਾਲਾਦਿਕੋ. ਆਦਿ-ਸਦ੍ਦੇਨ ਚ ਤਾਦਿਸਾ ਇਤਰਾ ਸੇਵਾਲਜਾਤਿ ਗਹਿਤਾ. ‘‘ਉਪਰਿ ਖੁਦ੍ਦਾਨੁਖੁਦ੍ਦਕਪਣ੍ਣਙ੍ਕੁਰੋ, ਹੇਟ੍ਠਾ ਖੁਦ੍ਦਾਨੁਖੁਦ੍ਦਕਮੂਲਙ੍ਕੁਰੋ ਸੇਵਾਲੋ ਤਿਲਬੀਜਂ ਨਾਮਾ’’ਤਿ ਗਣ੍ਠਿਪਦੇ ਵੁਤ੍ਤਨ੍ਤਿ. ਵਿਕੋਪੇਨ੍ਤਸ੍ਸ ਤਂ ਸਬ੍ਬਨ੍ਤਿ ਭੂਮਿਯਂ ਪਤਿਟ੍ਠਾਯ ਉਦਕੇ ਜਾਯਮਾਨਕਸੇਵਾਲਾਦਿਂ ਭੂਮਿਯਾ ਉਪ੍ਪਾਟਨਚ੍ਛੇਦਨਵਸੇਨ ਜਲੇ ਏਵ ਪਤਿਟ੍ਠਿਤਂ ਸੁਖੁਮਪਣ੍ਣਨੀਲਿਕਾਦਿਂ ਉਦਕਤੋ ਉਦ੍ਧਰਣਚ੍ਛੇਦਨਵਸੇਨ ਤਂ ਸਬ੍ਬਂ ਸੇਵਾਲਂ ਵਿਕੋਪੇਨ੍ਤਸ੍ਸਾਤਿ ਅਤ੍ਥੋ.

੯੯੮. ਹਤ੍ਥੇਨ ਵਿਯੂਹਿਤ੍ਵਾਤਿ ਜਲਤੋ ਅਮੋਚੇਤ੍ਵਾ ਹਤ੍ਥੇਨ ਦੂਰਤੋ ਅਪਨੇਤ੍ਵਾ. ‘‘ਹੋਤੀ’’ਤਿਆਦਿ ਤਸ੍ਸ ਹੇਤੁਸਨ੍ਦਸ੍ਸਨਤ੍ਥਂ. ਸਕਲਂ ਅਨਵਸੇਸਂ ਸਬ੍ਬਂ ਜਲਂ ਤਸ੍ਸ ਯਸ੍ਮਾ ਠਾਨਂ ਹੋਤਿ, ਤਸ੍ਮਾਤਿ ਅਤ੍ਥੋ.

੯੯੯. ਚੇਚ੍ਚਾਤਿ ਜਾਨਨ੍ਤੋ. ਤਂ ਸੇਵਾਲਜਾਤਿਕਂ ਜਲਾ ਉਦ੍ਧਰਿਤੁਂ ਉਦਕੇਨ ਵਿਨਾ ਭਿਕ੍ਖੁਸ੍ਸ ਨ ਵਟ੍ਟਤੀਤਿ ਯੋਜਨਾ. ਠਾਨਸਙ੍ਕਮਨਞ੍ਹਿ ਤਨ੍ਤਿ ਹੇਤੁਦਸ੍ਸਨਂ. ਤਂ ਤਥਾਕਰਣਂ ਯਸ੍ਮਾ ਠਾਨਸਙ੍ਕਮਨਂ ਠਾਨਤੋ ਚਾਵਨਂ, ਤਸ੍ਮਾ ਤਂ ਨ ਵਟ੍ਟਤੀਤਿ ਯੋਜਨਾ.

੧੦੦੦. ਯਥਾਵੁਤ੍ਤਸ੍ਸ ਬ੍ਯਤਿਰੇਕਂ ਦਸ੍ਸੇਤੁਮਾਹ ‘‘ਉਦਕੇਨਾ’’ਤਿਆਦਿ. ਤਤ੍ਥ ਉਦਕੇਨਾਤਿ ਸਹਤ੍ਥੇ ਕਰਣਵਚਨਂ. ਤਂ ਸੇਵਾਲਜਾਤਿਕਂ. ਵਾਰਿਸੂਤਿ ਏਤ੍ਥ ਵਾਸਂ ਵਾਰਯਨ੍ਤੀਤਿ ਵਾਰੀ, ਤੇਸੁ.

੧੦੦੧. ਜਲੇ ਵਲ੍ਲਿਤਿਣਾਦੀਨੀਤਿ ਜਲਮਤ੍ਥਕੇ ਵਲ੍ਲਿਞ੍ਚ ਜਾਯਮਾਨਕਰਵਲ੍ਲਿਤਿਣਾਦੀਨਿ ਚ. ਉਦ੍ਧਰਨ੍ਤਸ੍ਸਾਤਿ ਭੂਮਿਯਂ ਪਤਿਟ੍ਠਿਤਂ ਭੂਮਿਤੋ, ਉਦਕੇ ਪਤਿਟ੍ਠਿਤਂ ਉਦਕਤੋ ਚ ਉਦ੍ਧਰਨ੍ਤਸ੍ਸ. ਤਤ੍ਥ ਅਨ੍ਤਪਕ੍ਖਂ ਦਸ੍ਸੇਤੁਮਾਹ ‘‘ਤੋਯਤੋ’’ਤਿ. ਵਿਕੋਪੇਨ੍ਤਸ੍ਸਾਤਿ ਖਣ੍ਡਨਾਦਿਵਸੇਨ ਕੋਪੇਨ੍ਤਸ੍ਸ. ਤਤ੍ਥਾਤਿ ਤਸ੍ਮਿਂ ਉਦਕੇ, ਏਵ-ਕਾਰੋ ਲੁਤ੍ਤਨਿਦ੍ਦਿਟ੍ਠੋ ‘‘ਤਤ੍ਥੇਵਾ’’ਤਿ (ਪਾਚਿ. ਅਟ੍ਠ. ੯੨) ਅਟ੍ਠਕਥਾਵਚਨਤੋ.

੧੦੦੨. ਏਤ੍ਥਾਤਿ ਉਦਕੇ ਏਵ. ਵਿਕੋਪੇਨ੍ਤਸ੍ਸਾਤਿ ਕਪ੍ਪਿਯਂ ਅਕਾਰਾਪੇਤ੍ਵਾ ਛੇਦਨਾਦਿਂ ਕਰੋਨ੍ਤਸ੍ਸ. ਤਾਨੀਤਿ ਤਥਾ ਪਰੇਹਿ ਉਪ੍ਪਾਟਿਤਤ੍ਤਾ ਭੂਤਗਾਮਭਾਵਤੋ ਮੁਤ੍ਤਾਨਿ ਵਲ੍ਲਿਤਿਣਾਦੀਨਿ. ਬੀਜਗਾਮੇਨਾਤਿ ਮੂਲਬੀਜਗਾਮਾਦਿਵਸੇਨ.

੧੦੦੩. ਏਵਂ ਉਦਕਟ੍ਠੇ ਸਙ੍ਖੇਪਤੋ ਵਿਨਿਚ੍ਛਯਂ ਦਸ੍ਸੇਤ੍ਵਾ ਇਦਾਨਿ ਇਤਰਤ੍ਰਾਪਿ ਵਿਨਿਚ੍ਛਯਂ ਦਸ੍ਸੇਤੁਮਾਹ ‘‘ਥਲਟ੍ਠੇ’’ਤਿਆਦਿ. ਹਰਿਤਖਾਣੁਕੋਤਿ ਏਤ੍ਥ ‘‘ਯੋ’’ਤਿ ਸੇਸੋ. ‘‘ਤਸ੍ਸਾ’’ਤਿ ਇਮਿਨਾ ਸਮ੍ਬਨ੍ਧੋ, ਕਕੁਧਕਰਞ੍ਜਾਦੀਨਂ ਛਿਨ੍ਨਾਵਸਿਟ੍ਠਖਾਣੁਕੋਤਿ ਵੁਤ੍ਤਂ ਹੋਤਿ. ‘‘ਭੂਤਗਾਮੇਨ ਸਙ੍ਗਹੋ’’ਤਿ ਇਮਿਨਾ ਤਂਵਿਕੋਪਨੇ ਪਾਚਿਤ੍ਤਿਯਭਾਵਂ ਦੀਪੇਤਿ. ਏਵਮੁਪਰਿਪਿ.

੧੦੦੪. ਨਾਲ਼ਿਕੇਰਾਦਿਕਾਨਂ ਖਾਣੂਤਿ ਏਤ੍ਥਾਪਿ ‘‘ਉਪਰਿਹਰਿਤੋ’’ਤਿ ਸਾਮਤ੍ਥਿਯਾ ਲਬ੍ਭਤਿ. ‘‘ਬੀਜਗਾਮੇਨ ਸਙ੍ਗਹੋ’’ਤਿ ਇਮਿਨਾ ਦੁਕ੍ਕਟਵਤ੍ਥੁਤਮਾਹ. ਏਵਮੁਪਰਿਪਿ. ਕਿਞ੍ਚਾਪਿ ਹਿ ਤਾਲਨਾਲ਼ਿਕੇਰਾਦੀਨਂ ਖਾਣੁ ਉਦ੍ਧਂ ਅਵਡ੍ਢਨਕੋ ਭੂਤਗਾਮਸ੍ਸ ਕਾਰਣਂ ਨ ਹੋਤਿ, ਤਥਾਪਿ ਭੂਤਗਾਮਸਙ੍ਖਾਤਨਿਬ੍ਬਤ੍ਤਪਣ੍ਣਮੂਲਬੀਜਤੋ ਸਮ੍ਭੂਤਤ੍ਤਾ ਭੂਤਗਾਮਤੋ ਉਪ੍ਪਨ੍ਨੋ ਨਾਮ ਹੋਤੀਤਿ ਬੀਜਗਾਮੇਨ ਸਙ੍ਗਹਂ ਗਚ੍ਛਤਿ.

੧੦੦੫. ਤਥਾਪਕਾਸਿਤੋਤਿ ‘‘ਬੀਜਗਾਮੋ’’ਤਿ ਵੁਤ੍ਤੋ.

੧੦੦੬. ਫਲਿਤਾ ਕਦਲੀ ਯਾਵ ਨੀਲਪਣ੍ਣਾ, ਤਾਵ ਸਾ ਚ ਭੂਤਗਾਮੋਤਿ ਪਕਾਸਿਤਾਤਿ ਯੋਜਨਾ. ਯਥਾਹ ਅਟ੍ਠਕਥਾਯਂ ‘‘ਕਦਲੀ ਪਨ ਫਲਿਤਾ ਯਾਵ ਨੀਲਪਣ੍ਣਾ, ਤਾਵ ਭੂਤਗਾਮੇਨੇਵ ਸਙ੍ਗਹਿਤਾ’’ਤਿ (ਪਾਚਿ. ਅਟ੍ਠ. ੯੨). ਨਲ਼ਨ੍ਤਿ ਖੁਦ੍ਦਕਵੇਲ਼ੁ. ਵੇਲ਼ੂਤਿ ਮਹਾਵੇਲ਼ੁ. ਤਿਣਾਦੀਨਨ੍ਤਿ ਆਦਿ-ਸਦ੍ਦੇਨ ਸਸ੍ਸਾਦਯੋ ਗਹਿਤਾ.

੧੦੦੭. ਯੋ ਅਯਂ ਪਨ ਵੇਲ਼ੁ ਅਗ੍ਗਤੋ ਪਟ੍ਠਾਯ ਯਦਾ ਸੁਸ੍ਸਤਿ, ਤਦਾ ਸੋ ਬੀਜਗਾਮੇਨ ਸਙ੍ਗਹਿਤੋ ਨਾਮ ਹੋਤੀਤਿ ਯੋਜਨਾ. ਬੀਜਗਾਮੇਨਾਤਿ ਫਲ਼ੁਬੀਜਗਾਮੇਨ. ਯਥਾਹ ਅਟ੍ਠਕਥਾਯਂ ‘‘ਕਤਰਬੀਜਗਾਮੇਨ? ਫਲ਼ੁਬੀਜਗਾਮੇਨਾ’’ਤਿ.

੧੦੦੮. ਇਨ੍ਦਸਾਲੋ ਸਲ੍ਲਕੀ. ਆਦਿ-ਸਦ੍ਦੇਨ ਸੋਭਞ੍ਜਨਾਦੀਨਂ ਸਙ੍ਗਹੋ. ਤੁ-ਸਦ੍ਦੇਨ ਅਟ੍ਠਕਥਾਯਂ ‘‘ਕਿਞ੍ਚਾਪਿ ਰਾਸਿਕਤਦਣ੍ਡਕੇਹਿ ਰਤਨਪ੍ਪਮਾਣਾਪਿ ਸਾਖਾ ਨਿਕ੍ਖਮਨ੍ਤੀ’’ਤਿ (ਪਾਚਿ. ਅਟ੍ਠ. ੯੨) ਵੁਤ੍ਤਵਿਸੇਸਂ ਜੋਤੇਤਿ. ਛਿਨ੍ਦਿਤ੍ਵਾ ਠਪਿਤਦਣ੍ਡਕੇਸੁ ਰਤਨਮਤ੍ਤਾਸੁਪਿ ਸਾਖਾਸੁ ਉਟ੍ਠਿਤਾਸੁ ਭੂਤਗਾਮਂ ਅਹੁਤ੍ਵਾ ਬੀਜਗਾਮਮੇਵ ਹੋਤਿ ਅਵਿਰੁਲ਼੍ਹਮੂਲਕਤ੍ਤਾਤਿ ਅਯਂ ਵਿਨਿਚ੍ਛਯੋ ਵਿਨਯਞ੍ਞੁਨਾ ਞਾਤੋ ਕੁਕ੍ਕੁਚ੍ਚਕਾਨਮੁਪਕਾਰਾਯ ਹੋਤੀਤਿ ਆਹ ‘‘ਵਿਞ੍ਞੇਯ੍ਯੋ ਵਿਨਯਞ੍ਞੁਨਾ’’ਤਿ. ਇਮਮੇਵਤ੍ਥਂ ‘‘ਮੂਲਮਤ੍ਤੇਪਿ ਵਾ’’ਤਿਆਦਿਨਾ ਵਕ੍ਖਤਿ.

੧੦੦੯. ਮਣ੍ਡਪਾਦੀਨਮਤ੍ਥਾਯਾਤਿ ਮਣ੍ਡਪਵਤਿਪਾਕਾਰਾਦੀਨਮਤ੍ਥਾਯ. ਸਚੇ ਤੇ ਨਿਕ੍ਖਣਨ੍ਤੀਤਿ ਯਦਿ ਤੇ ਇਨ੍ਦਸਾਲਾਦਿਦਣ੍ਡਕੇ ਭੂਮਿਯਂ ਨਿਖਣਨ੍ਤਿ. ਨਿਗ੍ਗਤੇ ਮੂਲਪਣ੍ਣਸ੍ਮਿਨ੍ਤਿ ਤਥਾ ਨਿਖਾਤਦਣ੍ਡਤੋ ਮੂਲੇ ਚ ਪਣ੍ਣੇ ਚ ਜਾਤੇ. ਭੂਤਗਾਮੇਨ ਸਙ੍ਗਹੋਤਿ ਏਤ੍ਥ ‘‘ਤੇਸ’’ਨ੍ਤਿ ਸਾਮਤ੍ਥਿਯਾ ਲਬ੍ਭਤਿ, ‘‘ਵਿਞ੍ਞੇਯ੍ਯੋ’’ਤਿ ਅਧਿਕਾਰੋ.

੧੦੧੦. ਨਿਗ੍ਗਤੇਪੀਤਿ ਤਤਿਯੇਨ ਪਿ-ਸਦ੍ਦੇਨ ਅਤਿਖੁਦ੍ਦਕਤਂ ਸੂਚੇਤਿ.

੧੦੧੧. ਸਕਨ੍ਦਾ ਤਾਲਟ੍ਠੀਤਿ ਸਕਨ੍ਦਤਾਲਬੀਜਂ. ਪਤ੍ਤਵਟ੍ਟੀਤਿ ਸੂਚਿਸਣ੍ਠਾਨਾ ਅਙ੍ਕੁਰਪਤ੍ਤਵਟ੍ਟਿ. ਨ ਚ ਬੀਜਗਾਮੋਤਿ ਵੁਚ੍ਚਤੀਤਿ ਯੋਜਨਾ. ‘‘ਭੂਤਗਾਮੋ’’ਤਿ ਇਦਂ ਯਥਾਵੁਤ੍ਤਸ੍ਸ ਬ੍ਯਤਿਰੇਕਵਸੇਨ ਦਸ੍ਸੇਤਿ.

੧੦੧੨. ਨਾਲ਼ਿਕੇਰਤਚਨ੍ਤਿ ਨਾਲ਼ਿਕੇਰਫਲਛਲ੍ਲਿਂ. ਦਨ੍ਤਸੂਚੀਵਾਤਿ ਦਨ੍ਤਮਯਸੂਚਿ ਇਵ. ਸੋਪੀਤਿ ਨਾਲ਼ਿਕੇਰੋਪਿ. ਰੁਕ੍ਖਤਚਸਦ੍ਦਾਨਂ ਫਲੇਸੁ ਵਤ੍ਤਮਾਨਕਾਲੇਸੁਪਿ ਤਂਲਿਙ੍ਗਤਾ ਨ ਵਿਰੁਜ੍ਝਤੀਤਿ ‘‘ਸੋ’’ਤਿ ਆਹਾਤਿ ਵਿਞ੍ਞਾਯਤਿ.

੧੦੧੩. ਮਿਗਸਿਙ੍ਗਸਮਾਨਾਯਾਤਿ ਹਰਿਤਵਿਸਾਣਸਦਿਸਾਯ. ਪਤ੍ਤਵਟ੍ਟਿਯਾਤਿ ਅਙ੍ਕੁਰਪਤ੍ਤਵਟ੍ਟਿਯਾ. ਸਤਿਯਾਤਿ ਵਿਜ੍ਜਮਾਨਾਯ. ਭੂਤਗਾਮੋਤਿ ਵੁਚ੍ਚਤੀਤਿ ਅਮੂਲਕਭੂਤਗਾਮੋਤਿ ਵੁਚ੍ਚਤਿ. ਇਦਂ ਨਾਲ਼ਿਕੇਰਸ੍ਸ ਆਵੇਣਿਕਂ ਕਤ੍ਵਾ ਵੁਤ੍ਤਂ.

ਚਤੁਭਾਣਵਾਰਵਣ੍ਣਨਾ ਨਿਟ੍ਠਿਤਾ.

੧੦੧੫-੬. ਅਮ੍ਬਟ੍ਠੀਤਿ ਅਮ੍ਬਬੀਜਂ. ਜਮ੍ਬੁਟ੍ਠੀਤਿ ਜਮ੍ਬੁਬੀਜਂ. ਆਦਿ-ਸਦ੍ਦੇਨ ਮਧੁਕਪਨਸਾਦਿਬੀਜਾਨਂ ਗਹਣਂ. ਵਨ੍ਦਾਕਾਤਿ ਰੁਕ੍ਖਾਦਨੀ. ਅਞ੍ਞਂ ਵਾਤਿ ਭਣ੍ਡਕਦਲਿਮਨੋਰਹਂ ਵਾ. ਅਸ੍ਸਾਤਿ ਵਨ੍ਦਾਕਾਦਿਨੋ. ਅਮੂਲਵਲ੍ਲੀਤਿ ਏਵਂਨਾਮਿਕਾ ਵਲ੍ਲਿ.

੧੦੧੭. ਸੋ ਸੇਵਾਲੋਤਿ ਯੋਜਨਾ.

੧੦੧੮. ਘਂਸਿਤ੍ਵਾਤਿ ਯੇਨ ਕੇਨਚਿ ਘਂਸਿਤ੍ਵਾ. ਤਂ ਸੇਵਾਲਂ. ਤਸ੍ਮਾਤਿ ਤਸ੍ਮਾ ਪਾਕਾਰਾ.