ਅਨਿਯਤਕਥਾਵਣ੍ਣਨਾ

੫੪੨-੩. ਇਦਾਨਿ ਸਙ੍ਘਾਦਿਸੇਸਕਥਾਨਨ੍ਤਰਂ ਅਨਿਯਤਕਥਂ ਦਸ੍ਸੇਤੁਮਾਹ ‘‘ਰਹੋਨਿਸਜ੍ਜਸ੍ਸਾਦੇਨਾ’’ਤਿਆਦਿ. ਰਹਸਿ ਨਿਸਜ੍ਜਾ ਰਹੋਨਿਸਜ੍ਜਾ, ਤਸ੍ਸਾ ਅਸ੍ਸਾਦੋ ਰਹੋਨਿਸਜ੍ਜਸ੍ਸਾਦੋ, ਤੇਨ ਰਹੋਨਿਸਜ੍ਜਸ੍ਸਾਦੇਨ, ਮੇਥੁਨਧਮ੍ਮਸਨ੍ਨਿਸ੍ਸਿਤੇਨ ਕਿਲੇਸੇਨਾਤਿ ਅਤ੍ਥੋ. ਵੁਤ੍ਤਞ੍ਹਿ ਅਟ੍ਠਕਥਾਯਂ ‘‘ਰਹੋਨਿਸਜ੍ਜਸ੍ਸਾਦੋਤਿ ਮੇਥੁਨਧਮ੍ਮਸਨ੍ਨਿਸ੍ਸਿਤਕਿਲੇਸੋ ਵੁਚ੍ਚਤੀ’’ਤਿ (ਪਾਰਾ. ਅਟ੍ਠ. ੨.੪੫੧). ‘‘ਰਹੋ ਨਾਮ ਚਕ੍ਖੁਸ੍ਸ ਰਹੋ ਸੋਤਸ੍ਸ ਰਹੋ. ਚਕ੍ਖੁਸ੍ਸ ਰਹੋ ਨਾਮ ਨ ਸਕ੍ਕਾ ਹੋਤਿ ਅਕ੍ਖਿਂ ਵਾ ਨਿਖਣਿਯਮਾਨੇ ਭਮੁਕਂ ਵਾ ਉਕ੍ਖਿਪਿਯਮਾਨੇ ਸੀਸਂ ਵਾ ਉਕ੍ਖਿਪਿਯਮਾਨੇ ਪਸ੍ਸਿਤੁਂ. ਸੋਤਸ੍ਸ ਰਹੋ ਨਾਮ ਨ ਸਕ੍ਕਾ ਹੋਤਿ ਪਕਤਿਕਥਾ ਸੋਤੁ’’ਨ੍ਤਿ (ਪਾਰਾ. ੪੪੫) ਪਦਭਾਜਨੇ ਵੁਤ੍ਤਰਹੇਸੁ ਚਕ੍ਖੁਸ੍ਸ ਰਹੋ ਏਵ ਇਧਾਧਿਪ੍ਪੇਤੋ. ਯਥਾਹ ਅਟ੍ਠਕਥਾਯਂ ‘‘ਕਿਞ੍ਚਾਪਿ ਪਾਲ਼ਿਯਂ ‘ਸੋਤਸ੍ਸ ਰਹੋ’ਤਿ ਆਗਤਂ, ਚਕ੍ਖੁਸ੍ਸ ਰਹੇਨੇਵ ਪਨ ਪਰਿਚ੍ਛੇਦੋ ਵੇਦਿਤਬ੍ਬੋ’’ਤਿ (ਪਾਰਾ. ਅਟ੍ਠ. ੨.੪੪੪-੪੪੫).

ਚਕ੍ਖੁਸ੍ਸ ਰਹਤ੍ਤਾ ‘‘ਪਟਿਚ੍ਛਨ੍ਨ’’ਨ੍ਤਿ ਇਮਮ੍ਪਿ ਪਟਿਚ੍ਛਨ੍ਨਤ੍ਤਾ ਏਵ ‘‘ਅਲਂਕਮ੍ਮਨਿਯ’’ਨ੍ਤਿ ਇਮਮ੍ਪਿ ਸਙ੍ਗਣ੍ਹਾਤਿ. ਨਿਸਜ੍ਜਸਦ੍ਦੋਪਾਦਾਨੇਨ ‘‘ਆਸਨੇ’’ਤਿ ਇਦਮ੍ਪਿ ਗਹਿਤਮੇਵ. ‘‘ਮਾਤੁਗਾਮਸ੍ਸ ਸਨ੍ਤਿਕਂ ਗਨ੍ਤੁਕਾਮੋ’’ਤਿ ਇਮਿਨਾ ‘‘ਮਾਤੁਗਾਮੇਨ ਸਦ੍ਧਿ’’ਨ੍ਤਿ ਇਦਮ੍ਪਿ ਗਹਿਤਮੇਵ. ਏਵਂ ਸਾਮਤ੍ਥਿਯਾ ਲਬ੍ਭਮਾਨਪਦੋਪਾਦਾਨੇਨ ਯੋ ਪਨ ਭਿਕ੍ਖੁ ਮਾਤੁਗਾਮੇਨ ਸਦ੍ਧਿਂ ਏਕੋ ਏਕਾਯ ਰਹੋ ਪਟਿਚ੍ਛਨ੍ਨੇ ਆਸਨੇ ਅਲਂਕਮ੍ਮਨਿਯੇ ਨਿਸਜ੍ਜਸ੍ਸਾਦੇਨਾਤਿ ਵੁਤ੍ਤਂ ਹੋਤਿ. ਚਕ੍ਖੁਸ੍ਸ ਰਹਭਾਵੇਨ ਕੁਟ੍ਟਾਦਿਪਟਿਚ੍ਛਨ੍ਨੇ ਤੇਨੇਵ ਮੇਥੁਨਸੇਵਨਕਮ੍ਮਸ੍ਸ ਅਨੁਰੂਪੇ ਆਸਨੇ ਤਦਹੁਜਾਤਾਯਪਿ ਮਨੁਸ੍ਸਿਤ੍ਥਿਯਾ ਸਹ ਨਿਸਜ੍ਜਸ੍ਸਾਦਰਾਗੇਨ ਸਮਨ੍ਨਾਗਤੋ ਹੁਤ੍ਵਾਤਿ ਅਤ੍ਥੋ. ਏਤ੍ਥ ‘‘ਮਾਤੁਗਾਮਸ੍ਸਾ’’ਤਿ ਤਦਹੁਜਾਤਮ੍ਪਿ ਇਤ੍ਥਿਂ ਗਣ੍ਹਾਤੀਤਿ ਕੁਤੋ ਲਬ੍ਭਤੀਤਿ? ‘‘ਮਾਤੁਗਾਮੋ ਨਾਮ ਮਨੁਸ੍ਸਿਤ੍ਥੀ, ਨ ਯਕ੍ਖੀ, ਨ ਪੇਤੀ, ਨ ਤਿਰਚ੍ਛਾਨਗਤਾ, ਅਨ੍ਤਮਸੋ ਤਦਹੁਜਾਤਾਪਿ ਦਾਰਿਕਾ, ਪਗੇਵ ਮਹਤ੍ਤਰੀ’’ਤਿ (ਪਾਰਾ. ੪੪੫) ਪਦਭਾਜਨਤੋ ਲਬ੍ਭਤਿ.

‘‘ਨਿਵਾਸੇਤੀ’’ਤਿ ਇਮਿਨਾ ‘‘ਕਾਯਬਨ੍ਧਨਂ ਬਨ੍ਧਤਿ, ਚੀਵਰਂ ਪਾਰੁਪਤੀ’’ਤਿ ਇਦਂ ਲਕ੍ਖੀਯਤਿ. ਸਬ੍ਬਤ੍ਥਾਤਿ ਯਥਾਵੁਤ੍ਤਂ ਪਯੋਗਤੋ ਪੁਬ੍ਬਾਪਰਪਯੋਗੇ ਸਙ੍ਗਣ੍ਹਾਤਿ. ਤੇਨੇਵ ‘‘ਪਯੋਗੇ ਚ ਪਯੋਗੇ ਚਾ’’ਤਿ ਵਿਚ੍ਛਾਪਯੋਗੋ ਕਤੋ. ਨਿਸੀਦਤੋ ਚਸ੍ਸ ਦੁਕ੍ਕਟਨ੍ਤਿ ਯੋਜਨਾ. ‘‘ਉਭਿਨ੍ਨਮ੍ਪਿ ਨਿਸਜ੍ਜਾਯ ਪਾਚਿਤ੍ਤਿਯ’’ਨ੍ਤਿ ਵਕ੍ਖਮਾਨਤ੍ਤਾ ਦੁਕ੍ਕਟਂ ਸਨ੍ਧਾਯ ਏਕਕਸ੍ਸ ਨਿਸੀਦਤੋਤਿ ਗਹੇਤਬ੍ਬਂ.

੫੪੪. ਨਿਸਜ੍ਜਾਯ ਉਭਿਨ੍ਨਮ੍ਪੀਤਿ ਏਤ੍ਥ ‘‘ਸਕਿ’’ਨ੍ਤਿ ਸੇਸੋ, ਉਭਿਨ੍ਨਂ ਨਿਸਜ੍ਜਾਪੂਰਣਵਸੇਨ ਅਞ੍ਞਮਞ੍ਞਸ੍ਸ ਪੁਰੇ ਵਾ ਪਚ੍ਛਾ ਵਾ ਏਕਕ੍ਖਣੇ ਵਾ ਮਾਤੁਗਾਮਸ੍ਸ ਵਾ ਭਿਕ੍ਖੁਸ੍ਸ ਵਾ ਏਕਵਾਰਂ ਨਿਸਜ੍ਜਾਯਾਤਿ ਵੁਤ੍ਤਂ ਹੋਤਿ. ਵੁਤ੍ਤਞ੍ਹੇਤਂ ਪਾਲ਼ਿਯਂ ‘‘ਮਾਤੁਗਾਮੇ ਨਿਸਿਨ੍ਨੇ ਭਿਕ੍ਖੁ ਉਪਨਿਸਿਨ੍ਨੋ ਵਾ ਹੋਤੀ’’ਤਿਆਦਿ (ਪਾਰਾ. ੪੪੫). ਹੋਤਿ ਪਾਚਿਤ੍ਤਿਯਨ੍ਤਿ ਯੋਜਨਾ. ਪਯੋਗਗਣਨਾਯ ਚ ਹੋਨ੍ਤਿ ਪਾਚਿਤ੍ਤਿਯਾਨੀਤਿ ਗਹੇਤਬ੍ਬਂ, ਮਾਤੁਗਾਮਸ੍ਸ ਵਾ ਭਿਕ੍ਖੁਨੋ ਵਾ ਉਭਿਨ੍ਨਂ ਵਾ ਉਟ੍ਠਾਯੁਟ੍ਠਾਯ ਪੁਨਪ੍ਪੁਨਂ ਉਪਨਿਸੀਦਨਪਯੋਗਗਣਨਾਯ ਚਾਤਿ ਅਤ੍ਥੋ. ‘‘ਆਪਤ੍ਤੀਹਿਪਿ ਤੀਹਿਪੀ’’ਤਿ ਵਕ੍ਖਮਾਨਤ੍ਤਾ ਪਾਚਿਤ੍ਤਿਯਗ੍ਗਹਣਂ ਪਾਰਾਜਿਕਸਙ੍ਘਾਦਿਸੇਸਾਨਂ ਉਪਲਕ੍ਖਣਂ ਹੋਤਿ, ਤੀਸੁ ਏਕਂ ਹੋਤੀਤਿ ਵੁਤ੍ਤਂ ਹੋਤਿ. ਏਤ੍ਥ ‘‘ਪਯੋਗਗਣਨਾਯਾ’’ਤਿ ਇਦਂ ਪਾਰਾਜਿਕਾਯ ਨ ਲਬ੍ਭਤਿ ਏਕਪਯੋਗੇਨੇਵ ਸਿਜ੍ਝਨਤੋ. ਕਾਯਸਂਸਗ੍ਗਸਙ੍ਘਾਦਿਸੇਸੋ, ਪਨ ਸਰੀਰਤੋ ਪੁਨਪ੍ਪੁਨਂ ਵਿਯੁਜ੍ਜਿਤ੍ਵਾ ਫੁਸਨੇਨ ਪਾਚਿਤ੍ਤਿਯਞ੍ਚ ਯਥਾਵੁਤ੍ਤਨਯੇਨੇਵ ਲਬ੍ਭਤਿ.

ਬਹੂਸੁਪਿ ਮਾਤੁਗਾਮੇਸੁ ਬਹੁਕਾਨਿ ਪਾਚਿਤ੍ਤਿਯਾਨਿ ਹੋਨ੍ਤੀਤਿ ਯੋਜਨਾ. ਬਹੂਸੁ ਮਾਤੁਗਾਮੇਸੁ ਨਿਸਿਨ੍ਨੇਸੁ ਨਿਸਿਨ੍ਨਾਨਂ ਗਣਨਾਯ ਏਕੇਨੇਵ ਪਯੋਗੇਨ ਬਹੂਨਿ ਪਾਚਿਤ੍ਤਿਯਾਨਿ ਚ ਸਙ੍ਘਾਦਿਸੇਸਾ ਚ ਹੋਨ੍ਤਿ. ‘‘ਪਯੋਗਗਣਨਾਯ ਚਾ’’ਤਿ ਇਮਸ੍ਸ ਏਤ੍ਥਾਪਿ ਯੁਜ੍ਜਮਾਨਤ੍ਤਾ ਤਾਸੁ ਵਿਸੁਂ ਵਿਸੁਂ ਉਟ੍ਠਾਯੁਟ੍ਠਾਯ ਪੁਨਪ੍ਪੁਨਂ ਨਿਸੀਦਨ੍ਤੀਸੁ, ਸਯਞ੍ਚ ਉਟ੍ਠਾਯੁਟ੍ਠਾਯ ਪੁਨਪ੍ਪੁਨਂ ਨਿਸੀਦਤੋ ਤਾਸਂ ਗਣਨਾਯ ਆਪਜ੍ਜਿਤਬ੍ਬਾਪਤ੍ਤਿਯੋ ਪਯੋਗਗਣਨਾਯ ਚ ਬਹੂ ਹੋਨ੍ਤੀਤਿ ਇਦਂ ਲਬ੍ਭਤਿ. ਏਤ੍ਥਾਪਿ ਪਨ ਪਾਰਾਜਿਕਂ ਨ ਲਬ੍ਭਤਿ, ਸਙ੍ਘਾਦਿਸੇਸੋ, ਪਾਚਿਤ੍ਤਿਯਞ੍ਚ ਲਬ੍ਭਤਿ.

੫੪੫. ਸਮੀਪੇ ਠਿਤੋਪਿ ਅਨ੍ਧੋ ਅਨਾਪਤ੍ਤਿਂ ਨ ਕਰੋਤੀਤਿ ਸੋਤਸ੍ਸ ਰਹਭਾਵੇ ਅਸਤਿਪਿ ਪਧਾਨਭੂਤਸ੍ਸ ‘‘ਚਕ੍ਖੁਸ੍ਸ ਰਹੋ’’ਤਿ ਇਮਸ੍ਸ ਅਙ੍ਗਸ੍ਸ ਵਿਜ੍ਜਮਾਨਤ੍ਤਾ ਵੁਤ੍ਤਂ ‘‘ਅਨ੍ਤੋਦ੍ਵਾਦਸਹਤ੍ਥਕੇ’’ਤਿ, ਇਮਿਨਾ ਸਵਨੂਪਚਾਰੇ ਵਿਜ੍ਜਮਾਨੇਪੀਤਿ ਵੁਤ੍ਤਂ ਹੋਤਿ. ਇਤ੍ਥੀਨਂ ਤੁ ਸਤਮ੍ਪਿ ਚ ਨ ਕਰੋਤਿ ਅਨਾਪਤ੍ਤਿਨ੍ਤਿ ਯੋਜਨਾ, ਵਿਞ੍ਞੁਨੋ ਪੁਰਿਸਸ੍ਸ ਅਸਨ੍ਨਿਹਿਤਭਾਵੇਨਾਤਿ ਅਧਿਪ੍ਪਾਯੋ. ‘‘ਇਤ੍ਥੀਨਮ੍ਪਿ ਸਤਮ੍ਪਿ ਚਾ’’ਤਿ ਲਿਖਨ੍ਤਿ, ਤਤੋਪਿ ਅਯਮੇਵ ਪਾਠੋ ਸੁਨ੍ਦਰੋ. ਪਿ-ਸਦ੍ਦੋ ਵਾ ਤੁ-ਸਦ੍ਦਤ੍ਥੇ ਦਟ੍ਠਬ੍ਬੋ.

੫੪੬. ਨਿਪਜ੍ਜਿਤ੍ਵਾਤਿ ਏਤ੍ਥ ‘‘ਸਮੀਪੇ’’ਤਿ ਸੇਸੋ, ‘‘ਨਿਦ੍ਦਾਯਨ੍ਤੋਪੀ’’ਤਿ ਏਤਸ੍ਸ ਵਿਸੇਸਕੇਨ ‘‘ਨਿਪਜ੍ਜਿਤ੍ਵਾ’’ਤਿ ਇਮਿਨਾ ਨਿਸੀਦਿਤ੍ਵਾ ਨਿਦ੍ਦਾਯਨ੍ਤੋਤਿ ਇਮਸ੍ਸ ਨਿਵਤ੍ਤਿਤਤ੍ਤਾ ਸਮੀਪੇ ਨਿਸੀਦਿਤ੍ਵਾ ਨਿਦ੍ਦਾਯਨ੍ਤੋਪਿ ਅਨਨ੍ਧੋ ਮਨੁਸ੍ਸਪੁਰਿਸੋ ਅਨਾਪਤ੍ਤਿਂ ਕਰੋਤੀਤਿ ਲਬ੍ਭਤਿ. ‘‘ਕੇਵਲ’’ਨ੍ਤਿ ਵਿਸੇਸਨੇਨ ਬਲਵਨਿਦ੍ਦੂਪਗਤੋ ਗਹਿਤੋਤਿ ਤਥਾ ਅਹੁਤ੍ਵਾ ਅਨ੍ਤਰਨ੍ਤਰਾ ਆਪਨ੍ਨਾਪਨ੍ਨੇ ਵਿਨਿਚ੍ਛਿਨਿਤ੍ਵਾ ਪਵਤ੍ਤਮਾਨਾਯ ਕਪਿਨਿਦ੍ਦਾਯ ਨਿਦ੍ਦਾਯਨ੍ਤੋਪਿ ਅਨਾਪਤ੍ਤਿਂ ਕਰੋਤੀਤਿ ਅਯਮਤ੍ਥੋ ਲਬ੍ਭਤਿ. ‘‘ਪਿਹਿਤਦ੍ਵਾਰਗਬ੍ਭਸ੍ਸਾ’’ਤਿ ਵਤ੍ਤਬ੍ਬੇ ਮਜ੍ਝਪਦਲੋਪੀਸਮਾਸਵਸੇਨ ‘‘ਪਿਹਿਤਗਬ੍ਭਸ੍ਸਾ’’ਤਿ ਵੁਤ੍ਤਂ. ‘‘ਦ੍ਵਾਰੇ’’ਤਿ ਇਮਿਨਾ ਦ੍ਵਾਰੇਕਦੇਸਭੂਤਂ ਉਮ੍ਮਾਰਂ ਵਾ ਤਂਸਮੀਪਂ ਵਾ ਉਪਚਾਰੇਨ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਸਚੇ ਗਬ੍ਭੋ ਪਿਹਿਤਦ੍ਵਾਰੋ ਨ ਹੋਤਿ, ਅਨਾਪਤ੍ਤੀਤਿ ਬ੍ਯਤਿਰੇਕਤੋ ਦਸ੍ਸਿਤਂ.

੫੪੭. ਇਮਸ੍ਮਿਂ ਅਨਿਯਤਸਿਕ੍ਖਾਪਦੇ ਪਾਲ਼ਿਯਂ ਅਨਾਪਤ੍ਤਿਵਾਰੇ ਅਸਤਿਪਿ ‘‘ਯੋ ਪਨ ਭਿਕ੍ਖੁ ਮਾਤੁਗਾਮੇਨ ਸਦ੍ਧਿਂ ਰਹੋ ਪਟਿਚ੍ਛਨ੍ਨੇ ਆਸਨੇ ਨਿਸਜ੍ਜਂ ਕਪ੍ਪੇਯ੍ਯ, ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੨੮੫) ਪਞ੍ਚਮਸ੍ਸ ਅਚੇਲਕਵਗ੍ਗਸ੍ਸ ਚਤੁਤ੍ਥਸਿਕ੍ਖਾਪਦੇ ਅਨਾਪਤ੍ਤਿਵਾਰੇ ‘‘ਅਨਾਪਤ੍ਤਿ ਯੋ ਕੋਚਿ ਵਿਞ੍ਞੂ ਪੁਰਿਸੋ ਦੁਤਿਯੋ ਹੋਤਿ, ਤਿਟ੍ਠਤਿ ਨ ਨਿਸੀਦਤਿ, ਅਰਹੋਪੇਕ੍ਖੋ, ਅਞ੍ਞਵਿਹਿਤੋ ਨਿਸੀਦਤਿ, ਉਮ੍ਮਤ੍ਤਕਸ੍ਸ ਆਦਿਕਮ੍ਮਿਕਸ੍ਸਾ’’ਤਿ (ਪਾਚਿ. ੨੮੮) ਵੁਤ੍ਤੇ ਅਨਾਪਤ੍ਤਿਵਾਰੇ ਸਙ੍ਗਹੇਤੁਮਾਹ ‘‘ਅਨਨ੍ਧੇ ਸਤੀ’’ਤਿਆਦਿ. ‘‘ਏਤਸ੍ਸ ਸਮੀਪੇ’’ਤਿ ਪਕਰਣਤੋ ਲਬ੍ਭਤਿ. ਇਧ ਪੁਲ੍ਲਿਙ੍ਗਨਿਦ੍ਦੇਸੇਨ ਪੁਰਿਸੋ ਲਬ੍ਭਤਿ, ‘‘ਤੇਨਾਪਿ ਅਬਾਲੇਨ ਭਵਿਤਬ੍ਬਂ, ਮਨੁਸ੍ਸਜਾਤਿਕੇਨ ਭਵਿਤਬ੍ਬ’’ਨ੍ਤਿ ਇਦਞ੍ਚ ‘‘ਵਿਞ੍ਞੁਸ੍ਮਿ’’ਨ੍ਤਿ ਇਮਿਨਾ ਲਬ੍ਭਤਿ. ਅਨ੍ਧਸਦਿਸਨਿਦ੍ਦੂਪਗਤਪਟਿਪਕ੍ਖਵਾਚਿਅਨਨ੍ਧਪਦੇਨ ‘‘ਅਨਿਦ੍ਦਾਯਨ੍ਤੇ’’ਤਿ ਲਬ੍ਭਤਿ, ਮਨਾਪਾਮਨਾਪਂ ਜਾਨਨ੍ਤੇ ਅਨਿਦ੍ਦਾਯਨ੍ਤੇ ਮਨੁਸ੍ਸਪੁਰਿਸੇ ਦਸ੍ਸਨੂਪਚਾਰਸ੍ਸ ਅਨ੍ਤੋ ਵਿਜ੍ਜਮਾਨੇਤਿ ਅਤ੍ਥੋ.

‘‘ਨਿਸਜ੍ਜਪਚ੍ਚਯਾ ਦੋਸੋ ਨਤ੍ਥੀ’’ਤਿ ਇਮਿਨਾ ਸਮ੍ਬਨ੍ਧੋ, ਏਵਰੂਪੇ ਰਹੋ ਆਸਨੇ ਮਾਤੁਗਾਮੇਨ ਸਦ੍ਧਿਂ ਨਿਸਿਨ੍ਨਪਚ੍ਚਯਾ ਆਪਤ੍ਤਿ ਨਤ੍ਥੀਤਿ ਅਤ੍ਥੋ. ‘‘ਠਿਤਸ੍ਸਾ’’ਤਿ ਇਮਿਨਾਪਿ ਤਦੇਵ ਪਦਂ ਯੋਜੇਤਬ੍ਬਂ. ਵਿਞ੍ਞੁਮ੍ਹਿ ਪਟਿਬਲੇ ਮਨੁਸ੍ਸਪੁਰਿਸੇ ਅਸਨ੍ਨਿਹਿਤੇਪਿ ਤਥਾਵਿਧੇ ਰਹੋ ਆਸਨੇ ਮਾਤੁਗਾਮੇ ਆਸਨੇ ਨਿਸਿਨ੍ਨੇਪਿ ਸਯਾਨੇਪਿ ਠਿਤੇਪਿ ਸਯਂ ਠਿਤਸ੍ਸ ਨਿਸਜ੍ਜਾਯ ਅਭਾਵਾ ਤਪ੍ਪਚ੍ਚਯਾ ਆਪਤ੍ਤਿ ਨ ਹੋਤੀਤਿ ਅਤ੍ਥੋ. ਅਰਹਸਞ੍ਞਿਨੋ ਨਿਸਜ੍ਜਪਚ੍ਚਯਾ ਦੋਸੋ ਨਤ੍ਥੀਤਿ ਰਹੋ ਆਸਨੇ ਮਾਤੁਗਾਮੇਨ ਸਦ੍ਧਿਂ ਨਿਸਜ੍ਜਨ੍ਤਸ੍ਸਾਪਿ ‘‘ਰਹੋ’’ਤਿ ਸਞ੍ਞਾਰਹਿਤਸ੍ਸ ਨਿਸੀਦਤੋ ਨਿਸਜ੍ਜਪਚ੍ਚਯਾ ਅਨਾਪਤ੍ਤੀਤਿ ਅਤ੍ਥੋ. ਵਿਕ੍ਖਿਤ੍ਤਚੇਤਸੋ ਨਿਸਜ੍ਜਪਚ੍ਚਯਾ ਦੋਸੋ ਨਤ੍ਥੀਤਿ ਯੋਜਨਾ.

੫੪੮. ਏਤ੍ਤਾਵਤਾ ਪਾਚਿਤ੍ਤਿਯਾਪਤ੍ਤਿਮਤ੍ਤਤੋ ਅਨਾਪਤ੍ਤਿਪ੍ਪਕਾਰਂ ਦਸ੍ਸੇਤ੍ਵਾ ਇਦਾਨਿ ਇਮਸ੍ਸ ਸਿਕ੍ਖਾਪਦਸ੍ਸ ਅਨਿਯਤਵੋਹਾਰਹੇਤੁਭੂਤਾਹਿ ਤੀਹਿ ਆਪਤ੍ਤੀਹਿ ਅਨਾਪਤ੍ਤਿਪਕਾਰਂ ਦਸ੍ਸੇਤੁਮਾਹ ‘‘ਨ ਦੋਸੋ’’ਤਿਆਦਿ. ਆਪਤ੍ਤੀਹਿਪਿ ਤੀਹਿਪੀਤਿ ‘‘ਨਿਸਜ੍ਜਂ ਭਿਕ੍ਖੁ ਪਟਿਜਾਨਮਾਨੋ ਤਿਣ੍ਣਂ ਧਮ੍ਮਾਨਂ ਅਞ੍ਞਤਰੇਨ ਕਾਰੇਤਬ੍ਬੋ ਪਾਰਾਜਿਕੇਨ ਵਾ ਸਙ੍ਘਾਦਿਸੇਸੇਨ ਵਾ ਪਾਚਿਤ੍ਤਿਯੇਨ ਵਾ’’ਤਿ (ਪਾਰਾ. ੪੪੪) ਪਾਲ਼ਿਯਂ ਵੁਤ੍ਤਾਹਿ ‘‘ਪਠਮਪਾਰਾਜਿਕਾਪਤ੍ਤਿਕਾਯਸਂਸਗ੍ਗਸਙ੍ਘਾਦਿਸੇਸਾਪਤ੍ਤਿਪਾਚਿਤ੍ਤਿਯਾਪਤ੍ਤੀ’’ਤਿ ਇਮਾਹਿ ਤੀਹਿਪਿ ਆਪਤ੍ਤੀਹੀਤਿ ਵੁਤ੍ਤਂ ਹੋਤੀਤਿ.

ਪਠਮਾਨਿਯਤਕਥਾਵਣ੍ਣਨਾ.

੫੪੯. ਵਤ੍ਤਬ੍ਬਭਾਵੇਨਾਧਿਕਤਦੁਤਿਯਾਨਿਯਤਵਿਨਿਚ੍ਛਯਤੋ ਪਠਮਾਨਿਯਤੇ ਵੁਤ੍ਤਵਿਨਿਚ੍ਛਯੇਹਿ ਸਮਂ ਵਿਨਿਚ੍ਛਯਂ ਪਹਾਯ ਤਤ੍ਥ ਅਵੁਤ੍ਤਂ ਇਮਸ੍ਸੇਵ ਵਿਨਿਚ੍ਛਯਵਿਸੇਸਂ ਦਸ੍ਸੇਤੁਮਾਹ ‘‘ਅਨਨ੍ਧਾ’’ਤਿਆਦਿ. ਇਧ ਦੁਟ੍ਠੁਲ੍ਲਵਾਚਾਸਙ੍ਘਾਦਿਸੇਸਸ੍ਸਾਪਿ ਗਹਿਤਤ੍ਤਾ ਤਤੋ ਅਨਾਪਤ੍ਤਿਕਰਂ ਦਸ੍ਸੇਤੁਂ ‘‘ਅਬਧਿਰੋ’’ਤਿ ਵੁਤ੍ਤਂ. ਅਨਨ੍ਧੋ ਅਬਧਿਰੋਤਿ ‘‘ਪੁਰਿਸੋ’’ਤਿ ਇਦਂ ਸਨ੍ਧਾਯ ਵੁਤ੍ਤਂ. ‘‘ਇਤ੍ਥੀ’’ਤਿ ਇਦਂ ਸਨ੍ਧਾਯ ‘‘ਅਨਨ੍ਧਾਬਧਿਰਾ’’ਤਿ ਗਹੇਤਬ੍ਬਂ. ਏਵਮੁਪਰਿਪਿ. ਤੇਨਾਪਿ ਸਵਨੂਪਚਾਰਨ੍ਤੋਗਧੇਨ ਭਵਿਤਬ੍ਬਨ੍ਤਿ ਦਸ੍ਸੇਤੁਂ ‘‘ਅਨ੍ਤੋਦ੍ਵਾਦਸਹਤ੍ਥਟ੍ਠੋ’’ਤਿ ਵੁਤ੍ਤਂ.

੫੫੦. ‘‘ਅਨ੍ਧੋ ਅਬਧਿਰੋ ਅਨਾਪਤ੍ਤਿਂ ਨ ਕਰੋਤੀ’’ਤਿ ਇਦਂ ਕਾਯਸਂਸਗ੍ਗਸਙ੍ਘਾਦਿਸੇਸਂ ਸਨ੍ਧਾਯ ਵੁਤ੍ਤਂ. ‘‘ਬਧਿਰੋ ਵਾਪਿ ਚਕ੍ਖੁਮਾ, ਨ ਕਰੋਤਿ ਅਨਾਪਤ੍ਤਿ’’ਨ੍ਤਿ ਇਦਂ ਪਨ ਦੁਟ੍ਠੁਲ੍ਲਵਾਚਾਸਙ੍ਘਾਦਿਸੇਸਂ ਸਨ੍ਧਾਯ ਵੁਤ੍ਤਨ੍ਤਿ ਏਵਮੇਤ੍ਥ ਸਨ੍ਧਾਯ ਭਾਸਿਤਤ੍ਥੋ ਵੇਦਿਤਬ੍ਬੋ.

ਪੁਰਿਮਾਨਿਯਤਕਥਾਯ ਅਵੁਤ੍ਤਵਿਸੇਸਸ੍ਸ ਦੁਤਿਯਾਨਿਯਤਕਥਾਯ ਵਤ੍ਤੁਮਿਚ੍ਛਿਤਤ੍ਤਾ ਅਯਮ੍ਪਿ ਵਿਸੇਸੋ ਇਧ ਵਤ੍ਤਬ੍ਬੋ. ਕੋਯਂ ਵਿਸੇਸੋ, ਯੋ ਇਧ ਵਤ੍ਤਬ੍ਬੋਤਿ ਚੇ? ਤਤ੍ਥ ‘‘ਪਟਿਚ੍ਛਨ੍ਨੇ ਆਸਨੇ ਅਲਂਕਮ੍ਮਨਿਯੇ’’ਤਿ (ਪਾਰਾ. ੪੪੪) ਵੁਤ੍ਤਂ ਆਸਨਙ੍ਗਦ੍ਵਯਂ ਇਧ ‘‘ਨ ਹੇਵ ਖੋ ਪਨ ਪਟਿਚ੍ਛਨ੍ਨਂ ਆਸਨਂ ਹੋਤਿ ਨਾਲਂਕਮ੍ਮਨਿਯ’’ਨ੍ਤਿ (ਪਾਰਾ. ੪੫੩) ਨਿਸੇਧੇਤ੍ਵਾ ‘‘ਅਲਞ੍ਚ ਖੋ ਹੋਤਿ ਮਾਤੁਗਾਮਂ ਦੁਟ੍ਠੁਲ੍ਲਾਹਿ ਵਾਚਾਹਿ ਓਭਾਸਿਤੁ’’ਨ੍ਤਿ (ਪਾਰਾ. ੪੫੩) ਇਦਂ ਅਪੁਬ੍ਬਙ੍ਗਂ ਵੁਤ੍ਤਂ. ਤਤ੍ਰ ਮਾਤੁਗਾਮੋਤਿ ਅਨ੍ਤਮਸੋ ਤਦਹੁਜਾਤਾਪਿ ਦਾਰਿਕਾ ਗਹਿਤਾ, ਇਧ ‘‘ਮਾਤੁਗਾਮੋ ਨਾਮ ਮਨੁਸ੍ਸਿਤ੍ਥੀ, ਨ ਯਕ੍ਖੀ, ਨ ਪੇਤੀ, ਨ ਤਿਰਚ੍ਛਾਨਗਤਾ, ਵਿਞ੍ਞੂ ਪਟਿਬਲਾ ਸੁਭਾਸਿਤਦੁਬ੍ਭਾਸਿਤਂ ਦੁਟ੍ਠੁਲ੍ਲਾਦੁਟ੍ਠੁਲ੍ਲਂ ਆਜਾਨਿਤੁ’’ਨ੍ਤਿ (ਪਾਰਾ. ੪੫੪) ਵਿਞ੍ਞੂ ਪਟਿਬਲੋ ਮਾਤੁਗਾਮੋਵ ਵੁਤ੍ਤੋ. ਤਤ੍ਥ ‘‘ਪਾਰਾਜਿਕੇਨ ਵਾ ਸਙ੍ਘਾਦਿਸੇਸੇਨ ਵਾ ਪਾਚਿਤ੍ਤਿਯੇਨ ਵਾ’’ਤਿ (ਪਾਰਾ. ੪੪੪) ਤਿਸ੍ਸੋ ਆਪਤ੍ਤਿਯੋ ਵੁਤ੍ਤਾ, ਇਧ ‘‘ਨਿਸਜ੍ਜਂ ਭਿਕ੍ਖੁ ਪਟਿਜਾਨਮਾਨੋ ਦ੍ਵਿਨ੍ਨਂ ਧਮ੍ਮਾਨਂ ਅਞ੍ਞਤਰੇਨ ਕਾਰੇਤਬ੍ਬੋ ਸਙ੍ਘਾਦਿਸੇਸੇਨ ਵਾ ਪਾਚਿਤ੍ਤਿਯੇਨ ਵਾ’’ਤਿ (ਪਾਰਾ. ੪੫੩) ਦ੍ਵੇਯੇਵ ਆਪਤ੍ਤਿਯੋ ਵੁਤ੍ਤਾ. ਸਙ੍ਘਾਦਿਸੇਸੇਸੁ ਚ ਤਤ੍ਥ ‘‘ਸਾ ਚੇ ਏਵਂ ਵਦੇਯ੍ਯ ‘ਅਯ੍ਯੋ ਮਯਾ ਦਿਟ੍ਠੋ ਨਿਸਿਨ੍ਨੋ ਮਾਤੁਗਾਮੇਨ ਸਦ੍ਧਿਂ ਕਾਯਸਂਸਗ੍ਗਂ ਸਮਾਪਜ੍ਜਨ੍ਤੋ’ਤਿ, ਸੋ ਚ ਤਂ ਪਟਿਜਾਨਾਤਿ, ਆਪਤ੍ਤਿਯਾ ਕਾਰੇਤਬ੍ਬੋ’’ਤਿ (ਪਾਰਾ. ੪੪੮) ਕਾਯਸਂਸਗ੍ਗਸਙ੍ਘਾਦਿਸੇਸੋਵ ਵੁਤ੍ਤੋ, ਇਧ ਸੋ ਚ ਵੁਤ੍ਤੋ, ‘‘ਸਾ ਚੇ ਏਵਂ ਵਦੇਯ੍ਯ ‘ਅਯ੍ਯਸ੍ਸ ਮਯਾ ਸੁਤਂ ਨਿਸਿਨ੍ਨਸ੍ਸ ਮਾਤੁਗਾਮਂ ਦੁਟ੍ਠੁਲ੍ਲਾਹਿ ਵਾਚਾਹਿ ਓਭਾਸੇਨ੍ਤਸ੍ਸਾ’ਤਿ, ਸੋ ਚ ਤਂ ਪਟਿਜਾਨਾਤਿ, ਆਪਤ੍ਤਿਯਾ ਕਾਰੇਤਬ੍ਬੋ’’ਤਿ (ਪਾਰਾ. ੪੫੫) ਦੁਟ੍ਠੁਲ੍ਲਵਾਚਾਸਙ੍ਘਾਦਿਸੇਸੋ ਚ ਵੁਤ੍ਤੋ. ਏਤ੍ਤਕੋ ਉਭਿਨ੍ਨਮਨਿਯਤਾਨਂ ਵਿਸੇਸੋ.

ਅਯਂ ਕਸ੍ਮਾ ਨ ਵੁਤ੍ਤੋਤਿ? ਅਯਂ ਸਮ੍ਬੋਧਵਤ੍ਥੁਵਿਸੇਸੋ ਵਤ੍ਤੁਮਿਚ੍ਛਿਤੋ ਪਨ ਅਟ੍ਠਕਥਾਗਤਵਿਨਿਚ੍ਛਯਵਿਸੇਸਤੋਤਿ ਤਸ੍ਮਾ ਨ ਵੁਤ੍ਤੋਤਿ ਦਟ੍ਠਬ੍ਬੋ. ਤਿਸਮੁਟ੍ਠਾਨਮੇਵਿਦਂ ਕਾਯਚਿਤ੍ਤਵਾਚਾਚਿਤ੍ਤਕਾਯਵਾਚਾਚਿਤ੍ਤਵਸੇਨ ਤੀਣਿ ਸਮੁਟ੍ਠਾਨਾਨਿ ਏਤਸ੍ਸਾਤਿ ਕਤ੍ਵਾ.

ਇਮੇਹਿਪਿ ਦ੍ਵੀਹਿ ਅਨਿਯਤਸਿਕ੍ਖਾਪਦੇਹਿ ਸਿਕ੍ਖਾਪਦਨ੍ਤਰੇਸੁ ਪਞ੍ਞਤ੍ਤਾਯੇਵ ਆਪਤ੍ਤਿਯੋ, ਅਨਾਪਤ੍ਤਿਯੋ ਚ ਦਸ੍ਸਿਤਾ, ਨ ਕੋਚਿ ਆਪਤ੍ਤਿਵਿਸੇਸੋ ਵੁਤ੍ਤੋ, ਤਸ੍ਮਾ ਕਿਮੇਤੇਸਂ ਵਚਨੇਨਾਤਿ? ਵੁਚ੍ਚਤੇ – ਵਿਨਯਵਿਨਿਚ੍ਛਯਲਕ੍ਖਣਂ ਠਪੇਤੁਂ ਭਗਵਤਾ ਉਪ੍ਪਨ੍ਨੇ ਵਤ੍ਥੁਮ੍ਹਿ ਦ੍ਵੇ ਅਨਿਯਤਾ ਪਞ੍ਞਤ੍ਤਾ. ਕਥਂ? ਏਵਰੂਪਾਯਪਿ ਸਦ੍ਧੇਯ੍ਯਵਚਨਾਯ ਉਪਾਸਿਕਾਯ ਵੁਚ੍ਚਮਾਨੋ ਪਟਿਜਾਨਮਾਨੋਵ ਆਪਤ੍ਤਿਯਾ ਕਾਰੇਤਬ੍ਬੋ, ਨ ਅਪ੍ਪਟਿਜਾਨਮਾਨੋ, ਤਸ੍ਮਾ ‘‘ਯਾਯ ਕਾਯਚਿ ਆਪਤ੍ਤਿਯਾ ਯੇਨ ਕੇਨਚਿ ਚੋਦਿਤੇ ਪਟਿਞ੍ਞਾਤਕਰਣਂਯੇਵਙ੍ਗਂ ਕਾਤਬ੍ਬ’’ਨ੍ਤਿ ਇਮੇਹਿ ਸਿਕ੍ਖਾਪਦੇਹਿ ਵਿਨਿਚ੍ਛਯਲਕ੍ਖਣਂ ਠਪਿਤਨ੍ਤਿ ਵੇਦਿਤਬ੍ਬਂ. ਅਥ ਕਸ੍ਮਾ ਭਿਕ੍ਖੁਨੀਨਂ ਅਨਿਯਤਂ ਨ ਵੁਤ੍ਤਨ੍ਤਿ? ਇਦਮੇਵ ਲਕ੍ਖਣਂ ਸਬ੍ਬਤ੍ਥ ਅਨੁਗਤਨ੍ਤਿ ਨ ਵੁਤ੍ਤਂ.

ਦੁਤਿਯਾਨਿਯਤਕਥਾਵਣ੍ਣਨਾ.

ਇਤਿ ਵਿਨਯਤ੍ਥਸਾਰਸਨ੍ਦੀਪਨਿਯਾ

ਵਿਨਯਵਿਨਿਚ੍ਛਯਵਣ੍ਣਨਾਯ

ਅਨਿਯਤਕਥਾਵਣ੍ਣਨਾ ਨਿਟ੍ਠਿਤਾ.