ਸਙ੍ਘਾਦਿਸੇਸਕਥਾਵਣ੍ਣਨਾ

੩੨੫. ਏਵਂ ਨਾਨਾਨਯਪਟਿਮਣ੍ਡਿਤਸ੍ਸ ਪਾਰਾਜਿਕਕਣ੍ਡਸ੍ਸ ਵਿਨਿਚ੍ਛਯਂ ਦਸ੍ਸੇਤ੍ਵਾ ਇਦਾਨਿ ਤਦਨਨ੍ਤਰਮੁਦ੍ਦਿਟ੍ਠਸ੍ਸ ਤੇਰਸਕਣ੍ਡਸ੍ਸ ਵਿਨਿਚ੍ਛਯਂ ਦਸ੍ਸੇਤੁਮਾਹ ‘‘ਮੋਚੇਤੁਕਾਮਤਾ’’ਤਿਆਦਿ. ਮੋਚੇਤੁਂ ਕਾਮੇਤੀਤਿ ਮੋਚੇਤੁਕਾਮੋ, ਤਸ੍ਸ ਭਾਵੋ ਮੋਚੇਤੁਕਾਮਤਾ, ਤਾਯ ਸਮ੍ਪਯੁਤ੍ਤਂ ਚਿਤ੍ਤਂ ਮੋਚੇਤੁਕਾਮਤਾਚਿਤ੍ਤਂ. ਏਤ੍ਥ ‘‘ਮੋਚੇਤੁਕਾਮਤਾ’’ਤਿ ਇਮਿਨਾ ਏਕਾਦਸਸੁ ਰਾਗੇਸੁ ‘‘ਮੋਚਨਸ੍ਸਾਦੋ’’ਤਿ ਵੁਤ੍ਤਂ ਇਮਸ੍ਸ ਸਙ੍ਘਾਦਿਸੇਸਸ੍ਸ ਮੂਲਕਾਰਣਂ ਸੁਕ੍ਕਮੋਚਨਵਿਸਯਂ ਰਾਗਮਾਹ.

ਏਕਾਦਸ ਰਾਗਾ ਨਾਮ ‘‘ਮੋਚਨਸ੍ਸਾਦੋ, ਮੁਚ੍ਚਨਸ੍ਸਾਦੋ, ਮੁਤ੍ਤਸ੍ਸਾਦੋ, ਮੇਥੁਨਸ੍ਸਾਦੋ, ਫਸ੍ਸਸ੍ਸਾਦੋ, ਕਣ੍ਡੁਵਨਸ੍ਸਾਦੋ, ਦਸ੍ਸਨਸ੍ਸਾਦੋ, ਨਿਸਜ੍ਜਸ੍ਸਾਦੋ, ਵਾਚਸ੍ਸਾਦੋ, ਗੇਹਸ੍ਸਿਤਪੇਮਂ, ਵਨਭਙ੍ਗਿਯ’’ਨ੍ਤਿ ਏਵਮਾਗਤਾ. ਇਧ ਮੋਚਨਂ ਨਾਮ ਸਮ੍ਭਵਧਾਤੁਮੋਚਨਂ, ਤਦਤ੍ਥਾਯ ਤਬ੍ਬਿਸਯਰਾਗਸਮ੍ਪਯੁਤ੍ਤਵੇਦਨਾ ਮੋਚਨਸ੍ਸਾਦੋ ਨਾਮ. ਤੇਨਾਹ ਅਟ੍ਠਕਥਾਯਂ ‘‘ਮੋਚੇਤੁਂ ਅਸ੍ਸਾਦੋ ਮੋਚਨਸ੍ਸਾਦੋ’’ਤਿ. ਮੁਚ੍ਚਮਾਨੇ ਅਸ੍ਸਾਦੋ ਮੁਚ੍ਚਨਸ੍ਸਾਦੋ, ਸਮ੍ਭਵਧਾਤੁਮ੍ਹਿ ਮੁਚ੍ਚਮਾਨੇ ਤਂਰਾਗਸਮ੍ਪਯੁਤ੍ਤਾ ਵੇਦਨਾ ਮੁਚ੍ਚਨਸ੍ਸਾਦੋ ਨਾਮ. ਏਤੇਨੇਵ ਨਯੇਨ ਮੁਤ੍ਤਸ੍ਸਾਦਾਦਿਵਾਚਸ੍ਸਾਦਾਵਸਾਨੇਸੁ ਪਦੇਸੁ ਅਤ੍ਥਕ੍ਕਮੋ ਵੇਦਿਤਬ੍ਬੋ. ਇਮੇਹਿ ਨਵਹਿ ਪਦੇਹਿ ਅਸ੍ਸਾਦਸੀਸੇਨ ਕੁਨ੍ਤਯਟ੍ਠਿਞਾਯੇਨ ਤਂਸਹਚਰਿਤੋ ਰਾਗੋ ਦਸ੍ਸਿਤੋ. ਯਥਾਹ ਅਟ੍ਠਕਥਾਯਂ ‘‘ਨਵਹਿ ਪਦੇਹਿ ਸਮ੍ਪਯੁਤ੍ਤਅਸ੍ਸਾਦਸੀਸੇਨ ਰਾਗੋ ਵੁਤ੍ਤੋ’’ਤਿ.

ਗੇਹਸ੍ਸਿਤਪੇਮਨ੍ਤਿ ਏਤ੍ਥ ਗੇਹਟ੍ਠਾ ਮਾਤੁਆਦਯੋ ਆਧੇਯ੍ਯਆਧਾਰਵੋਹਾਰੇਨ ‘‘ਗੇਹਾ’’ਤਿ ਵੁਚ੍ਚਨ੍ਤਿ. ‘‘ਮਞ੍ਚਾ ਉਕ੍ਕੁਟ੍ਠਿਂ ਕਰੋਨ੍ਤੀ’’ਤਿਆਦੀਸੁ ਵਿਯ ਤਨ੍ਨਿਸ੍ਸਿਤੋ ਸਿਨੇਹਪਰਿਯਾਯੋ ਰਾਗੋ ‘‘ਗੇਹਸ੍ਸਿਤਪੇਮ’’ਨ੍ਤਿ ਵੁਤ੍ਤੋ. ਇਮਿਨਾ ਪਦੇਨ ਰਾਗਸ੍ਸ ਸਭਾਵੋ ਸਨ੍ਦਸ੍ਸਿਤੋ. ਵਨਤੋ ਭਞ੍ਜਿਤ੍ਵਾ ਆਭਤਂ ਯਂ ਕਿਞ੍ਚਿ ਫਲਪੁਪ੍ਫਾਦਿ ਵਨਭਙ੍ਗਿਯਂ ਨਾਮ. ਇਧ ਪਨ ਰਾਗਵਸੇਨ ਪਟਿਬਦ੍ਧਚਿਤ੍ਤਂ ਮਾਤੁਗਾਮੇਹਿ ਵਿਰਹਦੁਕ੍ਖਾਪਨਯਨਤ੍ਥਂ (ਪਾਰਾ. ਅਟ੍ਠ. ੨.੨੪੦) ਤੇਸਂ ਠਾਨੇ ਠਪੇਤ੍ਵਾ ਦਸ੍ਸਨਫੁਸਨਵਸੇਨ ਵਿਨ੍ਦਿਤੁਂ ਰਾਗੀਹਿ ਗਹੇਤਬ੍ਬਤੋ ਤੇਹਿ ਪਿਲ਼ਨ੍ਧਿਤਮਾਲਸਹਿਤਂ ਤਮ੍ਬੂਲਨ੍ਤਿ ਏਵਮਾਦਿ ‘‘ਵਨਭਙ੍ਗਿਯ’’ਨ੍ਤਿ ਅਧਿਪ੍ਪੇਤਂ. ਇਮਿਨਾ ਪਤ੍ਥਿਤਵਿਸਯਗੋਚਰੋ ਰਾਗੋ ਤਦਾਯਤ੍ਤਵਤ੍ਥੁਵਸੇਨ ਸਨ੍ਦਸ੍ਸਿਤੋ. ਯਥਾਹ ਅਟ੍ਠਕਥਾਯਂ ‘‘ਏਕੇਨ ਪਦੇਨ ਸਰੂਪੇਨੇਵ ਰਾਗੋ, ਏਕੇਨ ਪਦੇਨ ਵਤ੍ਥੁਨਾ ਵੁਤ੍ਤੋ. ਵਨਭਙ੍ਗੋ ਹਿ ਰਾਗਸ੍ਸ ਵਤ੍ਥੁ, ਨ ਰਾਗੋਯੇਵਾ’’ਤਿ (ਪਾਰਾ. ਅਟ੍ਠ. ੨.੨੪੦).

‘‘ਮੋਚੇਤੁਕਾਮਤਾ’’ਤਿ ਇਦਮੇਵ ਅਵਤ੍ਵਾ ‘‘ਚਿਤ੍ਤ’’ਨ੍ਤਿ ਵਚਨੇਨ ਵੀਤਿਕ੍ਕਮਸਾਧਿਕਾਯ ਕਾਯਵਿਞ੍ਞਤ੍ਤਿਯਾ ਸਮੁਟ੍ਠਾਪਕਂ ਰਾਗਸਮ੍ਪਯੁਤ੍ਤਂ ਚਿਤ੍ਤਵਿਸੇਸਂ ਦਸ੍ਸੇਤਿ. ਤੇਨ ਚਿਤ੍ਤੇਨ ਸਮੁਟ੍ਠਾਪਿਯਮਾਨਂ ਵਿਞ੍ਞਤ੍ਤਿਸਙ੍ਖਾਤਂ ਵੀਤਿਕ੍ਕਮਂ ‘‘ਵਾਯਾਮੋ’’ਤਿ ਇਮਿਨਾ ਦਸ੍ਸੇਤਿ. ਵਾਯਾਮੋ ਨਾਮ ਤਂਚਿਤ੍ਤਸਮ੍ਪਯੁਤ੍ਤਵੀਰਿਯਂ. ਏਤ੍ਥ ਪਨ ‘‘ਸੇਮ੍ਹੋ ਗੁਲ਼ੋ’’ਤਿਆਦੀਸੁ ਵਿਯ ਫਲੇ ਹੇਤੂਪਚਾਰਞਾਯੇਨ ਵੀਤਿਕ੍ਕਮਸ੍ਸ ਵਿਸੇਸਹੇਤੁਭੂਤਵੀਰਿਯਵਾਚਕੇਨ ਚ ਪਦੇਨ ਵੀਤਿਕ੍ਕਮੋਵ ਵੁਤ੍ਤੋਤਿ ਦਟ੍ਠਬ੍ਬਂ. ਅਜ੍ਝਤ੍ਤਬਾਹਿਰਵਤ੍ਥੁਘਟ੍ਟਨਂ, ਆਕਾਸੇ ਕਟਿਕਮ੍ਪਨਨ੍ਤਿ ਸੁਕ੍ਕਮੋਚਨਤ੍ਥੋ ਵਾਯਾਮੋਤਿ ਅਤ੍ਥੋ. ਸੁਕ੍ਕਸ੍ਸ ਮੋਚਨਂ ਸੁਕ੍ਕਮੋਚਨਂ.

ਏਤ੍ਥ ਚ ਸੁਕ੍ਕਸ੍ਸਾਤਿ ‘‘ਸੁਕ੍ਕਨ੍ਤਿ ਦਸ ਸੁਕ੍ਕਾਨਿ ਨੀਲਂ ਪੀਤਕਂ ਲੋਹਿਤਕਂ ਓਦਾਤਂ ਤਕ੍ਕਵਣ੍ਣਂ ਦਕਵਣ੍ਣਂ ਤੇਲਵਣ੍ਣਂ ਖੀਰਵਣ੍ਣਂ ਦਧਿਵਣ੍ਣਂ ਸਪ੍ਪਿਵਣ੍ਣ’’ਨ੍ਤਿ (ਪਾਰਾ. ੨੩੭) ਪਦਭਾਜਨੇ ਵੁਤ੍ਤਾਨਿ ਸਤ੍ਤਾਨਂ ਪਿਤ੍ਤਾਦਿਆਸਯਭੇਦੇਨ, ਪਥਵਿਧਾਤੁਆਦੀਨਂ ਚਤੁਨ੍ਨਂ ਵਾ ਰਸਸੋਣਿਤਮਂਸਮੇਦਅਟ੍ਠਿਅਟ੍ਠਿਮਿਞ੍ਜਾਨਂ ਛਨ੍ਨਂ ਦੇਹਧਾਤੂਨਂ ਵਾ ਭੇਦੇਨ ਅਨੇਕਧਾ ਭਿਨ੍ਨੇ ਦਸਵਿਧੇ ਸੁਕ੍ਕੇ ਅਞ੍ਞਤਰਸ੍ਸ ਸੁਕ੍ਕਸ੍ਸਾਤਿ ਅਤ੍ਥੋ. ਮੋਚਨਂ ਵਿਸ੍ਸਟ੍ਠੀਤਿ ਪਰਿਯਾਯਂ, ਪਕਤਿਯਾ ਠਿਤਸਕਟ੍ਠਾਨਤੋ ਮੋਚਨਨ੍ਤਿ ਅਤ੍ਥੋ. ਯਥਾਹ ਪਦਭਾਜਨੇ ‘‘ਵਿਸ੍ਸਟ੍ਠੀਤਿ ਠਾਨਤੋ ਚਾਵਨਾ ਵੁਚ੍ਚਤੀ’’ਤਿ (ਪਾਰਾ. ੨੩੭). ਇਹ ‘‘ਠਾਨਂ ਨਾਮ ਵਤ੍ਥਿਸੀਸਸਙ੍ਖਾਤਂ ਮੁਤ੍ਤਕਰਣਮੂਲ’’ਨ੍ਤਿ ਕੇਚਿ. ‘‘ਕਟੀ’’ਤਿ ਅਪਰੇ. ‘‘ਸਕਲਕਾਯੋ’’ਤਿ ਅਞ੍ਞੇ. ਇਮੇਸਂ ਤਿਣ੍ਣਂ ਵਚਨੇਸੁ ‘‘ਤਤਿਯਸ੍ਸ ਭਾਸਿਤਂ ਸੁਭਾਸਿਤ’’ਨ੍ਤਿ (ਪਾਰਾ. ਅਟ੍ਠ. ੨.੨੩੭) ਅਟ੍ਠਕਥਾਯਂ ਤਤਿਯਵਾਦਸ੍ਸ ਕਤਪਾਸਂਸਤ੍ਤਾ ਕੇਸਲੋਮਨਖਦਨ੍ਤਾਨਂ ਮਂਸਵਿਨਿਮੁਤ੍ਤਟ੍ਠਾਨਞ੍ਚ ਮੁਤ੍ਤਕਰੀਸਖੇਲ਼ਸਿਙ੍ਘਾਣਿਕਾਥਦ੍ਧਸੁਕ੍ਖਚਮ੍ਮਞ੍ਚ ਵਜ੍ਜੇਤ੍ਵਾ ਅਵਸੇਸਂ ਸਕਲਸਰੀਰਂ ਕਾਯਪ੍ਪਸਾਦਭਾਵਜੀਵਿਤਿਨ੍ਦ੍ਰਿਯਅਬਦ੍ਧਪਿਤ੍ਤਾਨਂ ਵਿਯ ਸਮ੍ਭਵਧਾਤੁਯਾ ਚ ਠਾਨਨ੍ਤਿ ਵੇਦਿਤਬ੍ਬਂ.

‘‘ਸੁਕ੍ਕਮੋਚਨ’’ਨ੍ਤਿ ਇਮਿਨਾਕਿਂ ਵੁਤ੍ਤਂ ਹੋਤੀਤਿ? ‘‘ਆਰੋਗ੍ਯਤ੍ਥਾਯ, ਸੁਖਤ੍ਥਾਯ, ਭੇਸਜ੍ਜਤ੍ਥਾਯ, ਦਾਨਤ੍ਥਾਯ, ਪੁਞ੍ਞਤ੍ਥਾਯ, ਯਞ੍ਞਤ੍ਥਾਯ, ਸਗ੍ਗਤ੍ਥਾਯ, ਬੀਜਤ੍ਥਾਯ, ਵੀਮਂਸਤ੍ਥਾਯ, ਦਵਤ੍ਥਾਯ ਮੋਚੇਤੀ’’ਤਿ (ਪਾਰਾ. ੨੩੭) ਵੁਤ੍ਤਦਸਵਿਧਅਧਿਪ੍ਪਾਯਨ੍ਤੋਗਧਅਞ੍ਞਤਰਅਧਿਪ੍ਪਾਯੋ ਹੁਤ੍ਵਾ ‘‘ਰਾਗੂਪਤ੍ਥਮ੍ਭੇ, ਵਚ੍ਚੂਪਤ੍ਥਮ੍ਭੇ, ਪਸ੍ਸਾਵੂਪਤ੍ਥਮ੍ਭੇ, ਵਾਤੂਪਤ੍ਥਮ੍ਭੇ, ਉਚ੍ਚਾਲਿਙ੍ਗਪਾਣਕਦਟ੍ਠੂਪਤ੍ਥਮ੍ਭੇ ਮੋਚੇਤੀ’’ਤਿ (ਪਾਰਾ. ੨੩੭) ਵੁਤ੍ਤਪਞ੍ਚਵਿਧਕਾਲਾਨਮਞ੍ਞਤਰਕਾਲੇ ‘‘ਅਜ੍ਝਤ੍ਤਰੂਪੇ, ਬਹਿਦ੍ਧਾਰੂਪੇ, ਅਜ੍ਝਤ੍ਤਬਹਿਦ੍ਧਾਰੂਪੇ, ਆਕਾਸੇ ਕਟਿਂ ਕਮ੍ਪੇਨ੍ਤੋ ਮੋਚੇਤੀ’’ਤਿ (ਪਾਰਾ. ੨੩੭) ਵੁਤ੍ਤਚਤੁਰੁਪਾਯਾਨਮਞ੍ਞਤਰੇਨ ਉਪਾਯੇਨ ਯਥਾਵੁਤ੍ਤਰਾਗਪਿਸਾਚਵਸੇਨ ਵਿਵਸੋ ਹੁਤ੍ਵਾ ਯਥਾਵੁਤ੍ਤਨੀਲਾਦਿਦਸਵਿਧਸਮ੍ਭਵਧਾਤੂਨਮਞ੍ਞਤਰਂ ਯਥਾਵੁਤ੍ਤਟ੍ਠਾਨਤੋ ਖੁਦ੍ਦਕਮਕ੍ਖਿਕਾਯ ਪਿਵਨਮਤ੍ਤਮ੍ਪਿ ਸਚੇ ਮੋਚੇਤੀਤਿ ਸਙ੍ਖੇਪਤੋ ਗਹੇਤਬ੍ਬਂ. ਏਤ੍ਥ ਚ ਉਚ੍ਚਾਲਿਙ੍ਗਪਾਣਕਾ ਨਾਮ ਲੋਮਸਪਾਣਾ, ਯੇਸਂ ਲੋਮੇ ਅਲ੍ਲਿਨੇ ਅਙ੍ਗਜਾਤਂ ਕਮ੍ਮਨਿਯਂ ਹੋਤਿ.

ਅਞ੍ਞਤ੍ਰ ਸੁਪਿਨਨ੍ਤੇਨਾਤਿ ਸੁਪਿਨੋ ਏਵ ਸੁਪਿਨਨ੍ਤੋ, ਨਿਸ੍ਸਕ੍ਕਵਚਨਪ੍ਪਸਙ੍ਗੇ ਕਰਣਵਚਨਤੋ ਸੁਪਿਨਨ੍ਤਾਤਿ ਅਤ੍ਥੋ. ਸੁਪਿਨਾ ਨਾਮ ‘‘ਵਾਤਾਦਿਧਾਤੁਕ੍ਖੋਭਵਸੇਨ ਵਾ ਪੁਬ੍ਬਾਨੁਭੂਤਇਤ੍ਥਿਰੂਪਾਦਿਵਿਸਯਵਸੇਨ ਵਾ ਇਟ੍ਠਾਨਿਟ੍ਠਦੇਵਤਾਨੁਭਾਵੇਨ ਵਾ ਪੁਞ੍ਞੇਨ ਪਟਿਲਭਿਤਬ੍ਬਅਤ੍ਥਸ੍ਸ, ਅਪੁਞ੍ਞੇਨ ਪਤ੍ਤਬ੍ਬਾਨਤ੍ਥਸ੍ਸ ਚ ਪੁਬ੍ਬਨਿਮਿਤ੍ਤਵਸੇਨ ਵਾ ਹੋਤੀ’’ਤਿ (ਪਾਰਾ. ਅਟ੍ਠ. ੨.੨੩੭) ਵੁਤ੍ਤੇਸੁ ਚਤੂਸੁ ਕਾਰਣੇਸੁ ਏਕੇਨ ਕਾਰਣੇਨ ਕਪਿਨਿਦ੍ਦਾਯ ਸੁਪਿਨੇ ਦਿਸ੍ਸਮਾਨਾਰਮ੍ਮਣਤੋ ਯਂ ਸੁਕ੍ਕਮੋਚਨਂ ਹੋਤਿ, ਤਂ ਅਵਿਸਯਂ ਸੁਕ੍ਕਮੋਚਨਂ ਵਿਨਾਤਿ ਵੁਤ੍ਤਂ ਹੋਤਿ.

ਸਙ੍ਘਾਦਿਸੇਸੋਵ ਸਙ੍ਘਾਦਿਸੇਸਤਾ. ਸਙ੍ਘਾਦਿਸੇਸਂ ਆਪਜ੍ਜਿਤ੍ਵਾ ਤਤੋ ਵੁਟ੍ਠਾਤੁਕਾਮਸ੍ਸ ਕੁਲਪੁਤ੍ਤਸ੍ਸ ਆਦਿਮ੍ਹਿ ਪਰਿਵਾਸਦਾਨਤ੍ਥਂ, ਮਜ੍ਝੇ ਚ ਮੂਲਾਯਪਟਿਕਸ੍ਸਨੇਨ ਵਿਨਾ ਵਾ ਸਹ ਵਾ ਮਾਨਤ੍ਤਦਾਨਤ੍ਥਂ, ਅਵਸਾਨੇ ਅਬ੍ਭਾਨਤ੍ਥਞ੍ਚ ਸਙ੍ਘੋ ਏਸਿਤਬ੍ਬੋਤਿ ‘‘ਸਙ੍ਘੋ ਆਦਿਮ੍ਹਿ ਚੇਵ ਸੇਸੇ ਚ ਇਚ੍ਛਿਤਬ੍ਬੋ ਅਸ੍ਸਾਤਿ ਸਙ੍ਘਾਦਿਸੇਸੋ’’ਤਿ (ਪਾਰਾ. ਅਟ੍ਠ. ੨.੨੩੭; ਕਙ੍ਖਾ. ਅਟ੍ਠ. ਸੁਕ੍ਕਵਿਸ੍ਸਟ੍ਠਿਸਿਕ੍ਖਾਪਦਵਣ੍ਣਨਾ) ਵੁਤ੍ਤਤ੍ਤਾ ਸਙ੍ਘਾਦਿਸੇਸਾ ਨਾਮ, ਸੁਕ੍ਕਵਿਸ੍ਸਟ੍ਠਿਸਙ੍ਘਾਦਿਸੇਸਾਪਤ੍ਤਿ ਹੋਤੀਤਿ ਅਤ੍ਥੋ. ਯਥਾਹ ਪਦਭਾਜਨੇ ‘‘ਸਙ੍ਘੋਵ ਤਸ੍ਸਾ ਆਪਤ੍ਤਿਯਾ ਪਰਿਵਾਸਂ ਦੇਤਿ, ਮੂਲਾਯ ਪਟਿਕਸ੍ਸਤਿ, ਮਾਨਤ੍ਤਂ ਦੇਤਿ, ਅਬ੍ਭੇਤਿ, ਨ ਸਮ੍ਬਹੁਲਾ, ਨ ਏਕਪੁਗ੍ਗਲੋ, ਤੇਨ ਵੁਚ੍ਚਤਿ ‘ਸਙ੍ਘਾਦਿਸੇਸੋ’ਤਿ. ਤਸ੍ਸੇਵ ਆਪਤ੍ਤਿਨਿਕਾਯਸ੍ਸ ਨਾਮਂ ਨਾਮਕਮ੍ਮਂ ਅਧਿਵਚਨਂ, ਤੇਨਪਿ ਵੁਚ੍ਚਤਿ ‘ਸਙ੍ਘਾਦਿਸੇਸੋ’’ਤਿ (ਪਾਰਾ. ੨੩੭). ਏਤ੍ਥ ਚ ਪਰਿਵਾਸਾਦਿਕਥਾ ਸਙ੍ਘਾਦਿਸੇਸਾਵਸਾਨੇ ਆਗਤਟ੍ਠਾਨੇਯੇਵ ਆਵਿ ਭਵਿਸ੍ਸਤਿ.

੩੨੬. ਏਤ੍ਤਾਵਤਾ ਮੂਲਸਿਕ੍ਖਾਪਦਾਗਤਂ ਅਤ੍ਤੂਪਕ੍ਕਮਮੂਲਕਂ ਆਪਤ੍ਤਿਂ ਦਸ੍ਸੇਤ੍ਵਾ ਇਦਾਨਿ ਇਮਿਸ੍ਸਾ ਸਙ੍ਘਾਦਿਸੇਸਾਪਤ੍ਤਿਯਾ ਪਰੂਪਕ੍ਕਮੇਨਪਿ ਆਪਜ੍ਜਨਂ ਦਸ੍ਸੇਤੁਮਾਹ ‘‘ਪਰੇਨਾ’’ਤਿਆਦਿ. ਉਪਕ੍ਕਮਾਪੇਤ੍ਵਾਤਿ ਅਙ੍ਗਜਾਤਸ੍ਸ ਗਹਣਂ ਵਾ ਘਟ੍ਟਨਂ ਵਾ ਕਾਰੇਤ੍ਵਾ.

੩੨੭. ਸਞ੍ਚਿਚ੍ਚਾਤਿ ‘‘ਉਪਕ੍ਕਮਾਮਿ ਮੋਚੇਸ੍ਸਾਮੀ’’ਤਿ ਚੇਤੇਤ੍ਵਾ ਪਕਪ੍ਪੇਤ੍ਵਾ. ਉਪਕ੍ਕਮਨ੍ਤਸ੍ਸਾਤਿ ਅਜ੍ਝਤ੍ਤਰੂਪਾਦੀਸੁ ਤੀਸੁ ਯਤ੍ਥ ਕਤ੍ਥਚਿ ਘਟ੍ਟੇਨ੍ਤਸ੍ਸ. ਸਮੁਦ੍ਦਿਟ੍ਠਨ੍ਤਿ ‘‘ਚੇਤੇਤਿ ਉਪਕ੍ਕਮਤਿ ਨ ਮੁਚ੍ਚਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ (ਪਾਰਾ. ੨੬੨) ਪਦਭਾਜਨੇ ਭਗਵਤਾ ਵੁਤ੍ਤਨ੍ਤਿ ਅਧਿਪ੍ਪਾਯੋ.

੩੨੮. ਇਮਿਸ੍ਸਂ ਗਾਥਾਯਂ ‘‘ਅਤ੍ਤਨੋ ਅਙ੍ਗਜਾਤਂ ਉਪਕ੍ਕਮਨ੍ਤਸ੍ਸਾ’’ਤਿ ਇਮਿਨਾ ਅਜ੍ਝਤ੍ਤਰੂਪੇ ਵਾ ਬਹਿਦ੍ਧਾਰੂਪੇ ਵਾ ਅਜ੍ਝਤ੍ਤਬਹਿਦ੍ਧਾਰੂਪੇ ਵਾ ਅਤ੍ਤਨੋ ਅਙ੍ਗਜਾਤਂ ਘਟ੍ਟੇਨ੍ਤਸ੍ਸਾਤਿ ਇਮਸ੍ਸ ਅਤ੍ਥਸ੍ਸ ਵੁਤ੍ਤਤ੍ਤਾ ਅਙ੍ਗਜਾਤਘਟ੍ਟਨੇਨ ਵਿਨਾਭਾਵਤੋ ਇਮਿਨਾ ਅਸਙ੍ਗਯ੍ਹਮਾਨਸ੍ਸਾਪਿ ਆਕਾਸੇ ਕਟਿਕਮ੍ਪਨੇਨ ਸੁਕ੍ਕਮੋਚਨੇ ਸਙ੍ਘਾਦਿਸੇਸਸ੍ਸ ਪਠਮਗਾਥਾਯਂ ‘‘ਵਾਯਾਮੋ’’ਤਿ ਸਾਮਞ੍ਞਵਚਨੇਨ ਸਙ੍ਗਹਿਤਤ੍ਤਾ ਤਂ ਠਪੇਤ੍ਵਾ ‘‘ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਮੋਚਨਾਧਿਪ੍ਪਾਯਸ੍ਸ ਆਕਾਸੇ ਕਟਿਂ ਕਮ੍ਪੇਨ੍ਤਸ੍ਸ ਅਸੁਚਿ ਮੁਚ੍ਚਿ…ਪੇ… ਅਸੁਚਿ ਨ ਮੁਚ੍ਚਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ਅਨਾਪਤ੍ਤਿ ਭਿਕ੍ਖੁ ਸਙ੍ਘਾਦਿਸੇਸਸ੍ਸ, ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ ਆਕਾਸੇਕਟਿਕਮ੍ਪਨਵਤ੍ਥੁਮ੍ਹਿ ਵੁਤ੍ਤਤ੍ਤਾ ਅਮੁਤ੍ਤੇ ਥੁਲ੍ਲਚ੍ਚਯਂ ਸਙ੍ਗਹੇਤੁਮਾਹ ‘‘ਸਞ੍ਚਿਚ੍ਚਾ’’ਤਿਆਦਿ.

ਤਤ੍ਥ ਸਞ੍ਚਿਚ੍ਚਾਤਿ ‘‘ਉਪਕ੍ਕਮਾਮਿ ਮੋਚੇਸ੍ਸਾਮੀ’’ਤਿ ਜਾਨਿਤ੍ਵਾ ਸਞ੍ਜਾਨਿਤ੍ਵਾਤਿ ਅਤ੍ਥੋ. ‘‘ਉਪਕ੍ਕਮਨ੍ਤਸ੍ਸਾ’’ਤਿ ਸਾਮਞ੍ਞਤੋ ਤਂ ਵਿਸੇਸੇਤੁਂ ‘‘ਆਕਾਸੇ ਕਮ੍ਪਨੇਨਪੀ’’ਤਿ ਆਹ, ਕਟਿਕਮ੍ਪਨੇਨਾਤਿ ਗਹੇਤਬ੍ਬਂ. ਕਥਮਿਦਂ ਲਬ੍ਭਤੀਤਿ ਚੇ? ਇਮਾਯ ਕਥਾਯ ਸਙ੍ਗਹੇਤਬ੍ਬਵਤ੍ਥੁਮ੍ਹਿ ‘‘ਆਕਾਸੇ ਕਟਿਂ ਕਮ੍ਪੇਨ੍ਤਸ੍ਸਾ’’ਤਿ (ਪਾਰਾ. ੨੬੬) ਪਾਠੇ ‘‘ਕਟਿਂ ਕਮ੍ਪੇਨ੍ਤਸ੍ਸਾ’’ਤਿ ਵਚਨਸਹਚਰਸ੍ਸ ‘‘ਆਕਾਸੇ’’ਤਿ ਵਚਨਸ੍ਸ ਸਨ੍ਨਿਧਾਨਬਲੇਨ ਲਬ੍ਭਤਿ ਅਤ੍ਥਪ੍ਪਕਰਣਸਦ੍ਦਨ੍ਤਰਸਨ੍ਨਿਧਾਨਾ ਸਦ੍ਦਾਨਂ ਵਿਸੇਸਤ੍ਥਦੀਪਨਤੋ.

੩੨੯. ਵਤ੍ਥਿਨ੍ਤਿ ਮੁਤ੍ਤਵਤ੍ਥਿਂ, ਮੁਤ੍ਤਕਰਣਸ੍ਸ ਵਤ੍ਥਿਨ੍ਤਿ ਅਤ੍ਥੋ. ਕੀਲ਼ਾਯ ਪੂਰੇਤ੍ਵਾਤਿ ਗਾਮਦਾਰਕੋ ਵਿਯ ਕੀਲ਼ਿਤੁਕਾਮਤਾਯ ਮੁਤ੍ਤਵਤ੍ਥਿਂ ਦਲ਼੍ਹਂ ਗਹੇਤ੍ਵਾ ਪੂਰੇਤ੍ਵਾਤਿ ਅਤ੍ਥੋ. ਯਥਾਹ ਵਤ੍ਥਿਵਤ੍ਥੁਮ੍ਹਿ ਅਟ੍ਠਕਥਾਯਂ ‘‘ਤੇ ਭਿਕ੍ਖੂ ਵਤ੍ਥਿਂ ਦਲ਼੍ਹਂ ਗਹੇਤ੍ਵਾ ਪੂਰੇਤ੍ਵਾ ਪੂਰੇਤ੍ਵਾ ਵਿਸ੍ਸਜ੍ਜੇਨ੍ਤਾ ਗਾਮਦਾਰਕਾਵਿਯ ਪਸ੍ਸਾਵਮਕਂਸੂ’’ਤਿ (ਪਾਰਾ. ਅਟ੍ਠ. ੨.੨੬੪). ‘‘ਨ ਵਟ੍ਟਤੀ’’ਤਿ ਸਾਮਞ੍ਞੇਨ ਕਸ੍ਮਾ ਵੁਤ੍ਤਨ੍ਤਿ? ਤਸ੍ਮਿਂ ਵਤ੍ਥੁਸ੍ਮਿਂ ਵੁਤ੍ਤਨਯੇਨ ਮੋਚਨਾਧਿਪ੍ਪਾਯੇਨ ਦਲ਼੍ਹਂ ਗਹੇਤ੍ਵਾ ਪੂਰੇਤ੍ਵਾ ਪੂਰੇਤ੍ਵਾ ਵਿਸ੍ਸਜ੍ਜੇਨ੍ਤਸ੍ਸ ਸੁਕ੍ਕੇ ਮੁਤ੍ਤੇ ਮੋਚਨਾਧਿਪ੍ਪਾਯੋ ਚੇਤੇਤਿ, ਉਪਕ੍ਕਮਤਿ, ਮੁਚ੍ਚਤੀਤਿ ਅਙ੍ਗਾਨਂ ਸਮ੍ਪਨ੍ਨਤ੍ਤਾ ਸਙ੍ਘਾਦਿਸੇਸਸ੍ਸ, ਅਮੁਤ੍ਤੇ ਥੁਲ੍ਲਚ੍ਚਯਸ੍ਸ ਸਮ੍ਭਵਤੋ ਉਭਯਸਙ੍ਗਹਤ੍ਥਮਾਹ.

੩੩੦. ਉਪਨਿਜ੍ਝਾਯਨਵਤ੍ਥੁਮ੍ਹਿ ‘‘ਨ ਚ ਭਿਕ੍ਖਵੇ ਸਾਰਤ੍ਤੇਨ ਮਾਤੁਗਾਮਸ੍ਸ ਅਙ੍ਗਜਾਤਂ ਉਪਨਿਜ੍ਝਾਯਿਤਬ੍ਬਂ, ਯੋ ਉਪਨਿਜ੍ਝਾਯੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਪਾਰਾ. ੨੬੬) ਪਾਲ਼ਿਯਂ ‘‘ਮਾਤੁਗਾਮਸ੍ਸਾ’’ਤਿ ਸਾਮਞ੍ਞੇਨ ਵੁਤ੍ਤਤ੍ਤਾ ‘‘ਤਿਸ੍ਸਨ੍ਨ’’ਨ੍ਤਿ ਵਦਤਿ. ਤਿਸ੍ਸਨ੍ਨਂ ਪਨ ਇਤ੍ਥੀਨਨ੍ਤਿ ਮਨੁਸ੍ਸਾਮਨੁਸ੍ਸਤਿਰਚ੍ਛਾਨਗਤਵਸੇਨ ਤਿਸ੍ਸਨ੍ਨਂ ਇਤ੍ਥੀਨਂ. ‘‘ਅਙ੍ਗਜਾਤ’’ਨ੍ਤਿ ਵਿਸੇਸੇਤ੍ਵਾ ਵੁਤ੍ਤਤ੍ਤਾ ‘‘ਨਿਮਿਤ੍ਤ’’ਨ੍ਤਿ ਮੁਤ੍ਤਕਰਣਮੇਵ ਵੁਚ੍ਚਤਿ, ਪਟਸਤੇਨਾਪਿ ਪਟਿਚ੍ਛਾਦਿਤਂ ਵਾ ਅਪ੍ਪਟਿਚ੍ਛਾਦਿਤਂ ਵਾ ਯੋਨਿਮਗ੍ਗਨ੍ਤਿ ਅਤ੍ਥੋ. ਤੇਨਾਹ ਅਟ੍ਠਕਥਾਯਂ ‘‘ਸਚੇਪਿ ਪਟਸਤਂ ਨਿਵਤ੍ਥਾ ਹੋਤਿ, ਪੁਰਤੋ ਵਾ ਪਚ੍ਛਤੋ ਵਾ ਠਤ੍ਵਾ ‘ਇਮਸ੍ਮਿਂ ਨਾਮ ਓਕਾਸੇ ਨਿਮਿਤ੍ਤ’ਨ੍ਤਿ ਉਪਨਿਜ੍ਝਾਯਨ੍ਤਸ੍ਸ ਦੁਕ੍ਕਟਮੇਵ. ਅਨਿਵਤ੍ਥਾਨਂ ਗਾਮਦਾਰਿਕਾਨਂ ਨਿਮਿਤ੍ਤਂ ਉਪਨਿਜ੍ਝਾਯਨ੍ਤਸ੍ਸ ਪਨ ਕਿਮੇਵ ਵਤ੍ਤਬ੍ਬ’’ਨ੍ਤਿ (ਪਾਰਾ. ਅਟ੍ਠ. ੨.੨੬੬). ਪੁਰਤੋ ਵਾਤਿ ਏਤ੍ਥ ‘‘ਠਤ੍ਵਾ’’ਤਿ ਪਾਠਸੇਸੋ.

੩੩੧. ਏਕੇਨ…ਪੇ… ਪਸ੍ਸਤੋ ਏਕਂ ਦੁਕ੍ਕਟਨ੍ਤਿ ਸਮ੍ਬਨ੍ਧੋ. ‘‘ਏਕੇਨ ਪਯੋਗੇਨ ਏਕਂ ਦੁਕ੍ਕਟ’’ਨ੍ਤਿ ਵਚਨਤੋ ਅਨੇਕੇਹਿ ਪਯੋਗੇਹਿ ਅਨੇਕਾਨਿ ਦੁਕ੍ਕਟਾਨੀਤਿ ਬ੍ਯਤਿਰੇਕਤੋ ਲਬ੍ਭਤਿ. ਯਥਾਹ ਅਟ੍ਠਕਥਾਯਂ ‘‘ਇਤੋ ਚਿਤੋ ਚ ਵਿਲੋਕੇਤ੍ਵਾ ਪੁਨਪ੍ਪੁਨਂ ਉਪਨਿਜ੍ਝਾਯਨ੍ਤਸ੍ਸ ਪਯੋਗੇ ਪਯੋਗੇ ਦੁਕ੍ਕਟ’’ਨ੍ਤਿ (ਪਾਰਾ. ਅਟ੍ਠ. ੨.੨੬੬). ਇਮਿਸ੍ਸਾ ਅਟ੍ਠਕਥਾਯ ‘‘ਇਤੋ ਚਿਤੋ ਚਾ’’ਤਿ ਵੁਤ੍ਤਤ੍ਤਾ ਉਮ੍ਮੀਲਨਨਿਮੀਲਨਨ੍ਤਿ ਏਤ੍ਥ ‘‘ਵਿਵਿਧਾ ਤਂ ਅਨੋਲੋਕੇਤ੍ਵਾ ਤਮੇਵ ਓਲੋਕੇਨ੍ਤਸ੍ਸਾ’’ਤਿ ਲਬ੍ਭਤਿ.

੩੩੨. ਅਮੋਚਨਾਧਿਪ੍ਪਾਯਸ੍ਸ ਮੁਤ੍ਤਸ੍ਮਿਂ ਅਨਾਪਤ੍ਤਿ ਪਕਾਸਿਤਾਤਿ ਯੋਜਨਾ. ਮੋਚਨਾਧਿਪ੍ਪਾਯਂ ਵਿਨਾ ਭੇਸਜ੍ਜਕਰਣਤ੍ਥਂ ਸੁਦ੍ਧਚਿਤ੍ਤੇਨ ਅਙ੍ਗਜਾਤੇ ਭੇਸਜ੍ਜਲੇਪਂ ਕਰੋਨ੍ਤਸ੍ਸ ਵਾ ਸੁਦ੍ਧਚਿਤ੍ਤੇਨੇਵ ਉਚ੍ਚਾਰਪਸ੍ਸਾਵਾਦਿਂ ਕਰੋਨ੍ਤਸ੍ਸ ਵਾ ਮੁਤ੍ਤੇਪਿ ਅਨਾਪਤ੍ਤੀਤਿ ਇਦਂ ‘‘ਅਨਾਪਤ੍ਤਿ ਸੁਪਿਨਨ੍ਤੇਨ ਨਮੋਚਨਾਧਿਪ੍ਪਾਯਸ੍ਸਾ’’ਤਿਆਦਿਨਾ (ਪਾਰਾ. ੨੬੩) ਨਯੇਨ ਅਨਾਪਤ੍ਤਿਵਾਰੇ ਵੁਤ੍ਤਮੇਵਾਤਿ ਅਤ੍ਥੋ.

ਇਮਸ੍ਮਿਂ ਪਾਠੇ ‘‘ਅਨੁਪਕ੍ਕਮਨ੍ਤਸ੍ਸਾ’’ਤਿ ਅਵੁਤ੍ਤੇਪਿ ਇਮਸ੍ਸ ਪਾਠਸ੍ਸ ਪੁਰਤੋ ‘‘ਚੇਤੇਤਿ ਨ ਉਪਕ੍ਕਮਤਿ ਮੁਚ੍ਚਤਿ, ਅਨਾਪਤ੍ਤੀ’’ਤਿ (ਪਾਰਾ. ੨੬੨) ਚ ‘‘ਨ ਚੇਤੇਤਿ ਨ ਉਪਕ੍ਕਮਤਿ ਮੁਚ੍ਚਤਿ, ਅਨਾਪਤ੍ਤੀ’’ਤਿ (ਪਾਰਾ. ੨੬੨) ਚ ਵਚਨਤੋ ਤਂ ਸਙ੍ਗਹੇਤੁਮਾਹ ‘‘ਅਨੁਪਕ੍ਕਮਤੋਪਿ ਚ ਮੁਤ੍ਤਸ੍ਮਿਂ ਅਨਾਪਤ੍ਤਿ ਪਕਾਸਿਤਾ’’ਤਿ. ਮੋਚਨਸ੍ਸਾਦਰਾਗੇਨ ਪੀਲ਼ਿਤੋ ਹੁਤ੍ਵਾ ‘‘ਅਹੋ ਵਤ ਮੇ ਮੁਚ੍ਚੇਯ੍ਯਾ’’ਤਿ ਚਿਨ੍ਤੇਤ੍ਵਾ ਵਾ ਏਵਰੂਪਮੋਚਨਸ੍ਸਾਦਰਾਗਪੀਲ਼ਾਪੁਬ੍ਬਙ੍ਗਮਚਿਤ੍ਤੇ ਅਸਤਿਪਿ ਕੇਵਲਂ ਕਾਮਵਿਤਕ੍ਕਮਤ੍ਤੇਨ ਉਪਹਤੋ ਹੁਤ੍ਵਾ ਤਾਦਿਸਅਜ੍ਝਤ੍ਤਿਕਬਾਹਿਰਵਤ੍ਥੂਸੁ ਘਟ੍ਟਨਵਸੇਨ ਵਾ ਆਕਾਸੇ ਕਟਿਕਮ੍ਪਨਵਸੇਨ ਵਾ ਉਪਕ੍ਕਮਂ ਅਕਰੋਨ੍ਤਸ੍ਸ ਤਾਦਿਸਚਿਨ੍ਤਾਬਲੇਨ ਵਾ ਕਾਮਵਿਤਕ੍ਕਬਲੇਨ ਵਾ ਸੁਕ੍ਕੇ ਮੁਤ੍ਤੇਪਿ ਅਨਾਪਤ੍ਤੀਤਿ ਇਦਂ ਯਥਾਵੁਤ੍ਤਪਾਠਵਸੇਨ ਪਕਾਸਿਤਨ੍ਤਿ ਅਤ੍ਥੋ.

ਸੁਪਿਨਨ੍ਤੇਨ ਮੁਤ੍ਤਸ੍ਮਿਂ, ਅਨਾਪਤ੍ਤਿ ਪਕਾਸਿਤਾਤਿ ਏਤ੍ਥ ਅਨ੍ਤਸਦ੍ਦਤ੍ਥਾਭਾਵਤੋ ਸੁਪਿਨੇਤਿ ਅਤ੍ਥੋ. ਸੁਪਿਨੇ ਮੇਥੁਨਂ ਧਮ੍ਮਂ ਪਟਿਸੇਵਨ੍ਤਸ੍ਸ ਵਾ ਮਾਤੁਗਾਮੇਹਿ ਕਾਯਸਂਸਗ੍ਗਂ ਆਪਜ੍ਜਨ੍ਤਸ੍ਸ ਵਾ ਸੁਕ੍ਕੇ ਮੁਤ੍ਤੇਪਿ ਅਵਿਸਯਤ੍ਤਾ ਅਨਾਪਤ੍ਤਿ ਪਾਲ਼ਿਯਂ ‘‘ਅਨਾਪਤ੍ਤਿ ਭਿਕ੍ਖੁ ਸੁਪਿਨਨ੍ਤੇਨਾ’’ਤਿ (ਪਾਰਾ. ੨੬੩) ਇਮਿਨਾ ਪਕਾਸਿਤਾਤਿ ਅਤ੍ਥੋ.

ਏਤ੍ਥ ਠਤ੍ਵਾ ਅਟ੍ਠਕਥਾਯਂ ‘‘ਸੁਪਿਨੇ ਪਨ ਉਪ੍ਪਨ੍ਨਾਯ ਅਸ੍ਸਾਦਚੇਤਨਾਯ ਸਚਸ੍ਸ ਵਿਸਯੋ ਹੋਤਿ, ਨਿਚ੍ਚਲੇਨ ਭਵਿਤਬ੍ਬਂ. ਨ ਹਤ੍ਥੇਨ ਨਿਮਿਤ੍ਤਂ ਕੀਲ਼ਾਪੇਤਬ੍ਬਂ. ਕਾਸਾਵਪਚ੍ਚਤ੍ਥਰਣਰਕ੍ਖਨਤ੍ਥਂ ਪਨ ਹਤ੍ਥਪੁਟੇਨ ਗਹੇਤ੍ਵਾ ਜਗ੍ਗਨਤ੍ਥਾਯ ਉਦਕਟ੍ਠਾਨਂ ਗਨ੍ਤੁਂ ਵਟ੍ਟਤੀ’’ਤਿ (ਪਾਰਾ. ਅਟ੍ਠ. ੨.੨੬੨) ਵੁਤ੍ਤਤ੍ਤਾ ਅਣ੍ਡਪਾਲਿਕਾ ਕਿਕੀਸਕੁਣਾ ਵਿਯ, ਵਾਲਪਾਲਿਕਾ ਚਮਰੀ ਵਿਯ, ਏਕਨੇਤ੍ਤਪਾਲਕੋ ਪੁਰਿਸੋ ਵਿਯ ਚ ਕਾਯਜੀਵਿਤੇਪਿ ਅਪੇਕ੍ਖਂ ਪਹਾਯ ਸੀਲਂ ਰਕ੍ਖਿਤੁਕਾਮੇਨ ਸਿਕ੍ਖਾਕਾਮੇਨ ਨਿਬ੍ਬਾਨਗਾਮਿਨਿਪਟਿਪਤ੍ਤਿਂ ਪੂਰੇਤੁਕਾਮੇਨ ਕੁਲਪੁਤ੍ਤੇਨ ‘‘ਅਞ੍ਞਤ੍ਰ ਸੁਪਿਨਨ੍ਤਾ’’ਤਿ (ਪਾਰਾ. ੨੩੭) ਵਦਤੋ ਤਥਾਗਤਸ੍ਸ ਅਧਿਪ੍ਪਾਯਾਨੁਕੂਲਂ ਅਟ੍ਠਕਥਾਤੋ ਞਤ੍ਵਾ ਅਪ੍ਪਮਤ੍ਤੇਨ ਪਟਿਪਜ੍ਜਿਤਬ੍ਬਨ੍ਤਿ ਅਯਮਤ੍ਰਾਨੁਸਾਸਨੀ.

ਸੁਕ੍ਕਵਿਸ੍ਸਟ੍ਠਿਕਥਾਵਣ੍ਣਨਾ.

੩੩੩. ਮਨੁਸ੍ਸਿਤ੍ਥਿਨ੍ਤਿ ਮਨੁਸ੍ਸਜਾਤਿਕਂ ਇਤ੍ਥਿਂ, ‘‘ਮਾਤੁਗਾਮੋ ਨਾਮ ਮਨੁਸ੍ਸਿਤ੍ਥੀ, ਨ ਯਕ੍ਖੀ, ਨ ਪੇਤੀ, ਨ ਤਿਰਚ੍ਛਾਨਗਤਾ, ਅਨ੍ਤਮਸੋ ਤਦਹੁਜਾਤਾਪਿ ਦਾਰਿਕਾ, ਪਗੇਵ ਮਹਤ੍ਤਰੀ’’ਤਿ (ਪਾਰਾ. ੨੭੧) ਪਦਭਾਜਨੇ ਵੁਤ੍ਤਤ੍ਤਾ ਤਦਹੁਜਾਤਕੁਮਾਰਿਕਾਭਾਵੇਨਪਿ ਠਿਤਂ ਜੀਵਮਾਨਕਮਨੁਸ੍ਸਮਾਤੁਗਾਮਨ੍ਤਿ ਵੁਤ੍ਤਂ ਹੋਤਿ. ‘‘ਮਨੁਸ੍ਸਿਤ੍ਥਿ’’ਨ੍ਤਿ ਸਾਮਞ੍ਞਵਚਨੇਨ ਜੀਵਮਾਨਕਮਨੁਸ੍ਸਿਤ੍ਥਿਨ੍ਤਿ ਅਯਂ ਵਿਸੇਸੋ ਕੁਤੋ ਲਬ੍ਭਤੀਤਿ? ਵਿਨੀਤਵਤ੍ਥੁਮ੍ਹਿ (ਪਾਰਾ. ੨੮੧ ਆਦਯੋ) ਮਤਿਤ੍ਥਿਯਾ ਕਾਯਂ ਫੁਸਨ੍ਤਸ੍ਸ ਥੁਲ੍ਲਚ੍ਚਯਵਚਨਤੋ ਪਾਰਿਸੇਸਤੋ ਲਬ੍ਭਤਿ. ਆਮਸਨ੍ਤੋਤਿ ‘‘ਹਤ੍ਥਗ੍ਗਾਹਂ ਵਾ ਵੇਣਿਗ੍ਗਾਹਂ ਵਾ ਅਞ੍ਞਤਰਸ੍ਸ ਵਾ ਅਞ੍ਞਤਰਸ੍ਸ ਵਾ ਅਙ੍ਗਸ੍ਸ ਪਰਾਮਸਨ’’ਨ੍ਤਿ (ਪਾਰਾ. ੨੭੦) ਵੁਤ੍ਤਤ੍ਤਾ ਹਤ੍ਥਾਦਿਅਙ੍ਗਪਚ੍ਚਙ੍ਗਫੁਸਨਾਦਿਨਾਨਪ੍ਪਕਾਰਾਨਂ ਅਞ੍ਞਤਰੇਨ ਪਕਾਰੇਨ ਆਮਸਨ੍ਤੋਤਿ ਅਤ੍ਥੋ. ਅਤ੍ਤਨੋ ਕਾਯੇਨ ਇਤ੍ਥਿਯਾ ਕਾਯਸ੍ਸ ਸਂਸਗ੍ਗੇ ਮਿਸ੍ਸੀਭਾਵੇ ਰਾਗੋ ਕਾਯਸਂਸਗ੍ਗਰਾਗੋ. ਸਙ੍ਘਾਦਿਸੇਸੋ ਏਤਸ੍ਸ ਅਤ੍ਥੀਤਿ ਸਙ੍ਘਾਦਿਸੇਸਿਕੋ, ਕਾਯਸਂਸਗ੍ਗਸਙ੍ਘਾਦਿਸੇਸੋ ਆਪਨ੍ਨੋ ਹੋਤੀਤਿ ਵੁਤ੍ਤਂ ਹੋਤਿ.

੩੩੪. ਕਾਯਸਂਸਗ੍ਗਰਾਗੇਨ ਇਤ੍ਥਿਯਾ ਅਨ੍ਤਮਸੋ ਲੋਮਮ੍ਪਿ ਅਤ੍ਤਨੋ ਸਰੀਰੇ ਲੋਮੇਨ ਫੁਸਨ੍ਤਸ੍ਸ ਭਿਕ੍ਖੁਨੋ ਸਙ੍ਘਾਦਿਸੇਸਾਪਤ੍ਤਿ ਹੋਤੀਤਿ ਯੋਜਨਾ. ਏਤ੍ਥ (ਪਾਰਾ. ਅਟ੍ਠ. ੨.੨੭੪) ‘‘ਲੋਮਗਣਨਾਯ ਸਙ੍ਘਾਦਿਸੇਸਾ ਹੋਨ੍ਤੀ’’ਤਿ ਕੁਰੁਨ੍ਦਟ੍ਠਕਥਾਮਤਸ੍ਸ ਅਟ੍ਠਿਤਤ੍ਤਾ, ‘‘ਕੋਟ੍ਠਾਸਗਣਨਾਯ ਨ ਹੋਤਿ, ਇਤ੍ਥਿਗਣਨਾਯ ਹੋਤੀ’’ਤਿ ਮਹਾਅਟ੍ਠਕਥਾਮਤਸ੍ਸ ਠਿਤਤ੍ਤਾ ਸਙ੍ਘਸਨ੍ਤਕੇ ਮਞ੍ਚਪੀਠੇ ਪਚ੍ਚਤ੍ਥਰਣਾਦਿਨਾ ਕੇਨਚਿ ਅਪ੍ਪਟਿਚ੍ਛਾਦਿਤੇ ਫੁਸਨ੍ਤਸ੍ਸ ਵਿਯ ਲੋਮਗਣਨਾਯ ਅਹੁਤ੍ਵਾ ਫੁਟ੍ਠਲੋਮਾਨਂ ਬਹੁਤ੍ਤੇਪਿ ਏਕਸ੍ਮਿਂ ਪਯੋਗੇ ਏਕਾ ਏਵ ਆਪਤ੍ਤਿ, ਬਹੂਸੁ ਪਯੋਗੇਸੁ ਪਯੋਗਗਣਨਾਯ ਆਪਤ੍ਤਿਯੋ ਹੋਨ੍ਤੀਤਿ ਸਨ੍ਨਿਟ੍ਠਾਨਂ.

੩੩੫. ਇਤ੍ਥਿਯਾਤਿ ਮਨੁਸ੍ਸਿਤ੍ਥਿਯਾ. ਸਮ੍ਫੁਟ੍ਠੋਤਿ ਹਤ੍ਥਾਦਿਸਰੀਰਾਵਯਵੇ ਸਂਸਗ੍ਗਂ ਸਮਾਪਨ੍ਨੋ. ਸੇਵਨਚੇਤਨੋ ਵਾਯਮਿਤ੍ਵਾ ਕਾਯਸਂਸਗ੍ਗਰਾਗੇਨ ਅਤ੍ਤਨੋ ਕਾਯਂ ਚਾਲੇਤ੍ਵਾਤਿ ਅਤ੍ਥੋ. ਸਙ੍ਘਾਦਿਸੇਸਤਾਤਿ ਏਤ੍ਥ ਸਕਤ੍ਥੇ ਤਦ੍ਧਿਤਪ੍ਪਚ੍ਚਯੋ. ‘‘ਸਙ੍ਘਾਦਿਸੇਸਿਤਾ’’ਤਿ ਪਨ ਪਾਠੋ ਸੁਨ੍ਦਰੋ, ਸਙ੍ਘਾਦਿਸੇਸਸ੍ਸ ਅਤ੍ਥਿਤਾ ਵਿਜ੍ਜਮਾਨਭਾਵੋਤਿ ਅਤ੍ਥੋ. ਸਙ੍ਘਾਦਿਸੇਸਾਪਤ੍ਤਿਯਾ ਸਬ੍ਭਾਵਸਙ੍ਖਾਤਾ ਅਤ੍ਥਿਤਾ ਈਪਚ੍ਚਯਤ੍ਥੇ ਪੁਗ੍ਗਲੇ ਸਙ੍ਘਾਦਿਸੇਸੀਸਦ੍ਦਪਵਤ੍ਤਿਨਿਮਿਤ੍ਤਂ ਹੋਤੀਤਿ ਭਾਵਪਚ੍ਚਯੋ ਤਂਅਤ੍ਥਵਸੇਨ ਲਬ੍ਭਤਿ. ਯਥਾਹੁ ‘‘ਯਸ੍ਸ ਗੁਣਸ੍ਸ ਹਿ ਭਾਵਾ ਦਬ੍ਬੇ ਸਦ੍ਦਸਨ੍ਨਿਵੇਸੋ, ਤਦਭਿਧਾਨੇ ਤ੍ਤਤਾਦਯੋ’’ਤਿ.

੩੩੬. ਏਕੇਨ ਹਤ੍ਥੇਨ ਗਹੇਤ੍ਵਾਤਿ (ਕਙ੍ਖਾ. ਅਟ੍ਠ. ਕਾਯਸਂਸਗ੍ਗਸਿਕ੍ਖਾਪਦਵਣ੍ਣਨਾ) ਏਤ੍ਥ ‘‘ਕਾਯਸਂਸਗ੍ਗਰਾਗੇਨਾ’’ਤਿ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ‘‘ਮਨੁਸ੍ਸਿਤ੍ਥਿ’’ਨ੍ਤਿ ਅਜ੍ਝਾਹਾਰੋ. ਤਂ ਮਨੁਸ੍ਸਿਤ੍ਥਿਂ. ਤਤ੍ਥ ਤਤ੍ਥਾਤਿ ਇਤ੍ਥਿਯਾ ਤਸ੍ਮਿਂ ਤਸ੍ਮਿਂ ਸਰੀਰਾਵਯਵੇ. ‘‘ਏਕਾਵਾਪਤ੍ਤੀ’’ਤਿ ਪਠਮਂ ਗਹਿਤਹਤ੍ਥਸ੍ਸ ਅਨਪਨੀਤਤ੍ਤਾ ਵੁਤ੍ਤਂ. ਗਹਿਤਹਤ੍ਥਂ ਪਨ ਮੋਚੇਤ੍ਵਾ ਪੁਨਪ੍ਪੁਨਂ ਫੁਸਨ੍ਤਸ੍ਸ ਪਯੋਗਗਣਨਾਯ ਆਪਤ੍ਤਿ ਹੋਤੀਤਿ ਬ੍ਯਤਿਰੇਕਤੋ ਲਬ੍ਭਤਿ.

੩੩੭. ਏਕੇਨ ਹਤ੍ਥੇਨ ਅਗ੍ਗਹੇਤ੍ਵਾ ਸੀਸਤੋ ਯਾਵ ਪਾਦਂ, ਪਾਦਤੋ ਯਾਵ ਸੀਸਞ੍ਚ ਕਾਯਾ ਹਤ੍ਥਂ ਅਮੋਚੇਤ੍ਵਾ ਦਿਵਸਮ੍ਪਿ ਤਂ ਇਤ੍ਥਿਂ ਫੁਸਨ੍ਤਸ੍ਸ ਏਕਾਵਾਪਤ੍ਤੀਤਿ ਯੋਜਨਾ. ਏਤ੍ਥਾਪਿ ‘‘ਅਮੋਚੇਤ੍ਵਾ’’ਤਿ ਬ੍ਯਤਿਰੇਕਤੋ ਮੋਚੇਤ੍ਵਾ ਫੁਸਨ੍ਤਸ੍ਸ ਪਯੋਗਗਣਨਾਯ ਅਨੇਕਾਪਤ੍ਤਿਯੋਤਿ ਲਬ੍ਭਤਿ.

੩੩੮. ਏਕਤੋ ਗਹਿਤਪਞ੍ਚਙ੍ਗੁਲੀਨਂ ਗਣਨਾਯ ਸਚੇ ਆਪਤ੍ਤਿ ਸਿਯਾ, ਏਕਸ੍ਸ ਮਾਤੁਗਾਮਸ੍ਸ ਸਰੀਰਂ ਰਾਗਚਿਤ੍ਤੇਨ ਫੁਸਨ੍ਤਸ੍ਸ ਦ੍ਵਤ੍ਤਿਂਸਕਲਾਪਕੋਟ੍ਠਾਸਤੋ ਬ੍ਯਤਿਰੇਕਸ੍ਸ ਸਰੀਰਸ੍ਸਾਭਾਵਾ ਦ੍ਵਤ੍ਤਿਂਸਕਲਾਪਕੋਟ੍ਠਾਸਗਣਨਾਯ ਆਪਤ੍ਤਿਯਾ ਭਵਿਤਬ੍ਬਂ, ਤਥਾ ਅਭਾਵਤੋ ਇਦਮ੍ਪਿ ਨ ਹੋਤੀਤਿ ਦਸ੍ਸਨਤ੍ਥਂ ‘‘ਨ ਹਿ ਕੋਟ੍ਠਾਸਤੋ ਸਿਯਾ’’ਤਿ ਆਹ.

੩੪੦-੧. ਇਤ੍ਥਿਯਾ ਵਿਮਤਿਸ੍ਸਾਪਿ ਅਤ੍ਤਨੋ ਕਾਯੇਨ ਇਤ੍ਥਿਯਾ ਕਾਯਂ ਫੁਸਤੋ ਤਸ੍ਸ ਥੁਲ੍ਲਚ੍ਚਯਂ ਸਿਯਾ, ਇਤ੍ਥਿਯਾ ਪਣ੍ਡਕਾਦਿਸਞ੍ਞਿਨੋਪਿ ਅਤ੍ਤਨੋਪਿ ਕਾਯੇਨ ਇਤ੍ਥਿਯਾ ਕਾਯਂ ਫੁਸਤੋ ਤਸ੍ਸ ਥੁਲ੍ਲਚ੍ਚਯਂ ਸਿਯਾ. ਆਦਿ-ਸਦ੍ਦੇਨ ਪੁਰਿਸਤਿਰਚ੍ਛਾਨਗਤਾਨਂ ਸਙ੍ਗਹੋ. ਇਤ੍ਥਿਯਾ ਇਤ੍ਥਿਸਞ੍ਞਿਨੋ ਅਤ੍ਤਨੋ ਕਾਯੇਨ ਇਤ੍ਥਿਯਾ ਕਾਯਸਮ੍ਬਦ੍ਧਂ ਫੁਸਤੋ ਤਸ੍ਸ ਥੁਲ੍ਲਚ੍ਚਯਂ ਸਿਯਾ. ਪਣ੍ਡਕੇ ਪਣ੍ਡਕਸਞ੍ਞਿਨੋ ਅਤ੍ਤਨੋ ਕਾਯੇਨ ਪਣ੍ਡਕਸ੍ਸ ਕਾਯਂ ਫੁਸਤੋ ਤਸ੍ਸ ਥੁਲ੍ਲਚ੍ਚਯਂ ਸਿਯਾ. ਯਕ੍ਖਿਪੇਤੀਸੁ ਯਕ੍ਖਿਪੇਤਿਸਞ੍ਞਿਨੋ ਅਤ੍ਤਨੋ ਕਾਯੇਨ ਤਾਸਂ ਕਾਯਂ ਫੁਸਤੋ ਤਸ੍ਸ ਥੁਲ੍ਲਚ੍ਚਯਂ ਸਿਯਾਤਿ ਯੋਜਨਾ. ਏਤ੍ਥ ‘‘ਪਣ੍ਡਕਗ੍ਗਹਣੇਨ ਉਭਤੋਬ੍ਯਞ੍ਜਨਕੋਪਿ ਗਯ੍ਹਤੀ’’ਤਿ ਵਜਿਰਬੁਦ੍ਧਿਟੀਕਾਯਂ ਵੁਤ੍ਤਂ. ‘‘ਇਤ੍ਥਿਯਾ ਵੇਮਤਿਕਸ੍ਸਾਪਿ ਪਣ੍ਡਕਾਦਿਸਞ੍ਞਿਨੋਪਿ ਅਤ੍ਤਨੋ ਕਾਯੇਨ ਇਤ੍ਥਿਯਾ ਕਾਯਸਮ੍ਬਦ੍ਧਂ ਫੁਸਤੋ ਤਸ੍ਸ ਥੁਲ੍ਲਚ੍ਚਯਂ ਸਿਯਾ’’ਤਿ ਨ ਯੋਜੇਤਬ੍ਬਂ. ਕਸ੍ਮਾ? ਤਥਾ ਯੋਜਨਾਯਂ ਪਾਲ਼ਿਯਂ ਦੁਕ੍ਕਟਂ ਵੁਤ੍ਤਂ, ਨ ਥੁਲ੍ਲਚ੍ਚਯਨ੍ਤਿ ਅਨਿਟ੍ਠਪ੍ਪਸਙ੍ਗਤੋ.

‘‘ਦੁਕ੍ਕਟਂ ਕਾਯਸਂਸਗ੍ਗੇ, ਤਿਰਚ੍ਛਾਨਗਤਿਤ੍ਥਿਯਾ’’ਤਿ ਇਮਿਨਾ ਵਿਨੀਤਵਤ੍ਥੁਮ੍ਹਿ ਆਗਤਨਯੇ ਸਙ੍ਗਹਿਤੇਪਿ ਤੇਨੇਵ ਨਯੇਨ ਪਣ੍ਡਕੇ ਵਿਮਤਿਇਤ੍ਥਿਸਞ੍ਞਿਤਾਦਿਅਞ੍ਞਮਤਿਪਕ੍ਖੇ ਚ ਪੁਰਿਸਤਿਰਚ੍ਛਾਨਗਤੇਸੁ ਪੁਰਿਸਤਿਰਚ੍ਛਾਨਗਤਸਞ੍ਞਿਵਿਮਤਿਪਣ੍ਡਕਾਦਿਅਞ੍ਞਮਤਿਪਕ੍ਖੇ ਚ ਇਤਿ ਇਮੇਸਂ ਤਿਣ੍ਣਂ ਕਾਯਪਟਿਬਦ੍ਧਾਮਸਨਾਦੀਸੁ ਚ ਪਦਭਾਜਨੇ ਵੁਤ੍ਤਸਬ੍ਬਦੁਕ੍ਕਟਾਪਤ੍ਤਿਯੋ ਉਪਲਕ੍ਖਿਤਾਤਿ ਦਟ੍ਠਬ੍ਬਂ.

੩੪੨. ਅਤ੍ਤਨੋ ਕਾਯੇਨ ਪਟਿਬਦ੍ਧੇਨ ਇਤ੍ਥਿਯਾ ਕਾਯੇਨ ਪਟਿਬਦ੍ਧਂ ਫੁਸਨ੍ਤਸ੍ਸ ਭਿਕ੍ਖੁਨੋ ਪਨ ਦੁਕ੍ਕਟਨ੍ਤਿ ਯੋਜਨਾ. ਏਤ੍ਥ ਪਿ-ਸਦ੍ਦੋ ਵੁਤ੍ਤਦੁਕ੍ਕਟਾਨਂ ਸਮੁਚ੍ਚਯਤ੍ਥੋ. ਚ-ਸਦ੍ਦੇਨ ਪਨ ਅਵੁਤ੍ਤਸਮੁਚ੍ਚਯਤ੍ਥੇਨ ‘‘ਨਿਸ੍ਸਗ੍ਗਿਯੇਨ ਕਾਯਂ ਆਮਸਤਿ. ਨਿਸ੍ਸਗ੍ਗਿਯੇਨ ਕਾਯਪਟਿਬਦ੍ਧਂ ਆਮਸਤਿ. ਨਿਸ੍ਸਗ੍ਗਿਯੇਨ ਨਿਸ੍ਸਗ੍ਗਿਯਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਪਾਰਾ. ੨੭੬) ਪਾਲ਼ਿਯਂ ਆਗਤਦੁਕ੍ਕਟਾਨਂ ਸਙ੍ਗਹੋ ਵੇਦਿਤਬ੍ਬੋ.

੩੪੩-੪. ਨ ਕੇਵਲਂ ਪਦਭਾਜਨਾਗਤਇਤ੍ਥਿਸਰੀਰਾਦਿਕਮੇਵ ਅਨਾਮਾਸਂ, ਵਿਨੀਤਵਤ੍ਥੂਸੁ ਦਾਰੁਧੀਤਲਿਕਵਤ੍ਥੁਅਨੁਲੋਮਤੋ ਪੋਤ੍ਥਲਿਕਾਦਿਇਤ੍ਥਿਰੂਪਕਞ੍ਚ ਨਿਸ੍ਸਗ੍ਗਿਯਵਾਰਾਨੁਲੋਮਤੋ ਅਸਰੀਰਟ੍ਠਂ ਮਾਤੁਗਾਮੇਹਿ ਪਰਿਭੁਤ੍ਤਵਤ੍ਥਾਭਰਣਾਦਿਞ੍ਚ ਵਿਭਙ੍ਗਕ੍ਖਨ੍ਧਕਾਦੀਸੁ ਵੁਤ੍ਤਨਯਾਨੁਸਾਰੇਨ ਅਟ੍ਠਕਥਾਗਤਂ ਅਵਸੇਸਂ ਅਨਾਮਾਸਵਤ੍ਥੁਞ੍ਚ ਆਮਸਨ੍ਤਸ੍ਸ ਆਪਤ੍ਤਿਂ ਸਙ੍ਗਹੇਤੁਮਾਹ ‘‘ਇਤ੍ਥੀਨ’’ਨ੍ਤਿਆਦਿ.

‘‘ਇਤ੍ਥੀਨਂ ਇਤ੍ਥਿਰੂਪਞ੍ਚਾ’’ਤਿ ਇਦਂ ‘‘ਇਤ੍ਥਿਕਾਯ ਇਤ੍ਥਿਧਨਂ (ਪਾਰਾ. ੩੪), ਸਦ੍ਧਾਨਂ ਸਦ੍ਧਾਪਰਾਯਨ’’ਨ੍ਤਿਆਦੀਸੁ ਵਿਯ ਲੋਕਵੋਹਾਰਵਸੇਨ ਵੁਤ੍ਤਂ. ਇਤ੍ਥੀਨਂ ਦਾਰੁਲੋਹਮਯਾਦਿਕਂ ਇਤ੍ਥਿਰੂਪਞ੍ਚਾਤਿ ਯੋਜਨਾ. ਆਦਿ-ਸਦ੍ਦੇਨ ਹੇਟ੍ਠਿਮਪਰਿਚ੍ਛੇਦਤੋ ਮਤ੍ਤਿਕਾਯ, ਪਿਟ੍ਠੇਨ ਵਾ ਕਤਂ ਮਾਤੁਗਾਮਰੂਪਂ ਸਙ੍ਗਣ੍ਹਾਤਿ. ਮਾਤੁਗਾਮਰੂਪਂ ਯੇਨ ਕੇਨਚਿ ਦਿਨ੍ਨਂ ਸਬ੍ਬਰਤਨਮਯਂ ਵਿਨਾ ਅਵਸੇਸਂ ਸਾਦਿਯਿਤ੍ਵਾ ਭਿਨ੍ਦਿਤ੍ਵਾ ਸਮਣਸਾਰੁਪ੍ਪਪਰਿਕ੍ਖਾਰਂ ਕਾਰਾਪੇਤੁਂ, ਅਫੁਸਿਤ੍ਵਾ ਪਰਿਭੁਞ੍ਜਿਤਬ੍ਬੇ ਵਾ ਯੋਜੇਤੁਂ ਵਟ੍ਟਤਿ.

‘‘ਵਤ੍ਥ’’ਨ੍ਤਿ ਇਮਿਨਾ ਨਿਵਾਸਨਪਾਰੁਪਨਦ੍ਵਯਮ੍ਪਿ ਸਾਮਞ੍ਞੇਨ ਗਹਿਤਂ. ਇਦਞ੍ਚ ਮਾਤੁਗਾਮੇਨ ਪਰਿਭੁਞ੍ਜਿਤੁਂ ਠਪਿਤਮ੍ਪਿ ਅਨਾਮਾਸਮੇਵ, ਚੀਵਰਤ੍ਥਾਯ ਦਿਨ੍ਨਂ ਸਮ੍ਪਟਿਚ੍ਛਿਤ੍ਵਾ ਗਣ੍ਹਿਤੁਂ ਵਟ੍ਟਤਿ. ਹੇਟ੍ਠਿਮਪਰਿਚ੍ਛੇਦੇਨ ਤਿਣਚੁਮ੍ਬਟਕਂ, ਅਙ੍ਗੁਲਿਯਾ ਪਣ੍ਣਮੁਦ੍ਦਿਕਂ ਉਪਾਦਾਯ ਅਲਙ੍ਕਾਰਮੇਵ. ਏਤ੍ਥ ਚ ਵਾਲਕੇਸਵਟ੍ਟਕੇਸੇਸੁ ਪਵੇਸਨਕਦਨ੍ਤਸੂਚਿਆਦਿ ਕਪ੍ਪਿਯਭਣ੍ਡਂ ਦਿਯ੍ਯਮਾਨਂ ਸਮਣਸਾਰੁਪ੍ਪਪਰਿਕ੍ਖਾਰਤ੍ਥਾਯ ਗਹੇਤਬ੍ਬਂ.

ਤਤ੍ਥਜਾਤਫਲਂ ਖਜ੍ਜਨ੍ਤਿ ਰੁਕ੍ਖੇ ਠਿਤਂ ਖਾਦਿਤਬ੍ਬਂ ਪਨਸਨਾਲ਼ਿਕੇਰਾਦਿਫਲਞ੍ਚ ਮਨੁਸ੍ਸੇਹਿ ਰਾਸਿਕਤਂ ਪਰਿਭੁਞ੍ਜਿਤਬ੍ਬਫਲਞ੍ਚ ‘‘ਮਨੁਸ੍ਸੇਹਿ ਰਾਸਿਕਤੇਸੁਪਿ ਏਸੇਵ ਨਯੋ’’ਤਿ (ਪਾਰਾ. ਅਟ੍ਠ. ੨.੨੮੧) ਅਟ੍ਠਕਥਾਯਂ ਵੁਤ੍ਤਤ੍ਤਾ ਅਨਾਮਾਸਨ੍ਤਿ ਉਪਲਕ੍ਖਣਤੋ ਇਮਿਨਾਵ ਗਹੇਤਬ੍ਬਂ. ਅਰਞ੍ਞੇ ਰੁਕ੍ਖਤੋ ਪਤਿਤਂ ਫਲਂ ‘‘ਅਨੁਪਸਮ੍ਪਨ੍ਨਸ੍ਸ ਦਸ੍ਸਾਮੀ’’ਤਿ ਗਹੇਤੁਂ ਵਟ੍ਟਤਿ. ‘‘ਮੁਗ੍ਗਾਦਿਂ ਤਤ੍ਥਜਾਤਕ’’ਨ੍ਤਿ ਉਪਲਕ੍ਖਣਪਦਤ੍ਤਾ ਗਚ੍ਛਤੋ ਵਿਯੁਤ੍ਤਮ੍ਪਿ ਗਹੇਤਬ੍ਬਂ. ਮੁਗ੍ਗਾਦਿਨ੍ਤਿ ਏਤ੍ਥ ‘‘ਅਪਰਣ੍ਣ’’ਨ੍ਤਿ ਪਾਠਸੇਸੋ.

ਸਬ੍ਬਾਨਿ ਧਞ੍ਞਾਨੀਤਿ ‘‘ਸਾਲਿ ਵੀਹਿ ਯਵੋ ਕਙ੍ਗੁ, ਕੁਦ੍ਰੂਸਵਰਕਗੋਧੁਮਾ’’ਤਿ ਵੁਤ੍ਤਾਨਿ ਸਤ੍ਤ ਧਞ੍ਞਾਨਿ. ਖੇਤ੍ਤਮਗ੍ਗੇਨ ਗਚ੍ਛਤਾ ਸਾਲਿਸੀਸੇ ਹਤ੍ਥੇਨ ਅਫੁਸਨ੍ਤੇਨ ਗਨ੍ਤਬ੍ਬਂ. ਸਚੇ ਮਗ੍ਗੋ ਸਮ੍ਬਾਧੋ ਹੋਤਿ, ਸਰੀਰੇ ਧਞ੍ਞਂ ਫੁਸਨ੍ਤੇਪਿ ਮਗ੍ਗਤ੍ਤਾ ਨ ਦੋਸੋ. ਵੀਥਿਯਂ, ਗੇਹਙ੍ਗਣੇ ਵਾ ਧਞ੍ਞੇਸੁ ਪਸਾਰਿਤੇਸੁ ਅਪਸਕ੍ਕਿਤ੍ਵਾ ਚੇ ਗਨ੍ਤੁਂ ਨ ਸਕ੍ਕਾ, ‘‘ਮਗ੍ਗਂ ਅਧਿਟ੍ਠਾਯ ਗਨ੍ਤਬ੍ਬ’’ਨ੍ਤਿ (ਪਾਰਾ. ਅਟ੍ਠ. ੨.੨੮੧) ਅਟ੍ਠਕਥਾਵਚਨਤੋ ‘‘ਇਮਂ ਮਗ੍ਗਂ ਗਮਿਸ੍ਸਾਮੀ’’ਤਿ ਗਨ੍ਤੁਂ ਵਟ੍ਟਤਿ. ‘‘ਕੁਲਗੇਹੇ ਧਞ੍ਞਮਤ੍ਥਕੇ ਚੇ ਆਸਨਂ ਪਞ੍ਞਾਪੇਤ੍ਵਾ ਦਿਨ੍ਨਂ ਹੋਤਿ, ਨਿਸੀਦਿਤੁਂ ਵਟ੍ਟਤੀ’’ਤਿ (ਪਾਰਾ. ਅਟ੍ਠ. ੨.੨੮੧ ਅਤ੍ਥਤੋ ਸਮਾਨਂ) ਅਟ੍ਠਕਥਾਯਂ ਵੁਤ੍ਤਂ. ‘‘ਆਸਨਸਾਲਾਯਂ ਧਞ੍ਞੇ ਵਿਪ੍ਪਕਿਣ੍ਣੇ ਅਨੁਕ੍ਕਮਿਤ੍ਵਾ ਏਕਮਨ੍ਤੇ ਪੀਠਕਂ ਪਞ੍ਞਾਪੇਤ੍ਵਾ ਨਿਸੀਦਿਤਬ੍ਬਂ. ਸਚੇ ਮਨੁਸ੍ਸਾ ਤਸ੍ਮਿਂ ਧਞ੍ਞਮਤ੍ਥਕੇ ਆਸਨਂ ਪਞ੍ਞਾਪੇਤ੍ਵਾ ਦੇਨ੍ਤਿ, ਨਿਸੀਦਿਤੁਂ ਵਟ੍ਟਤੀ’’ਤਿ (ਪਾਰਾ. ਅਟ੍ਠ. ੨.੨੮੧ ਅਤ੍ਥਤੋ ਸਮਾਨਂ) ਅਟ੍ਠਕਥਾਯਂ ਵੁਤ੍ਤਤ੍ਤਾ ਅਤ੍ਤਨਾ ਤਤ੍ਥ ਆਸਨਂ ਪਞ੍ਞਾਪੇਤ੍ਵਾ ਨਿਸੀਦਿਤੁਂ ਨ ਵਟ੍ਟਤਿ.

੩੪੫. ਧਮਨਸਙ੍ਖਾਦਿਂ ਸਬ੍ਬਂ ਪਞ੍ਚਙ੍ਗਤੁਰਿਯਮ੍ਪਿ ਚਾਤਿ ਸਮ੍ਬਨ੍ਧੋ. ਧਮਨਸਙ੍ਖੋ ਨਾਮ ਸਦ੍ਦਕਰਣਸਙ੍ਖੋ. ਆਦਿ-ਸਦ੍ਦੇਨ ਵਂਸਸਿਙ੍ਗਤਾਲ਼ਾਦੀਨਂ ਸਙ੍ਗਹੋ. ਪਞ੍ਚਙ੍ਗਤੁਰਿਯਨ੍ਤਿ ਆਤਤਂ, ਵਿਤਤਂ, ਆਤਤਵਿਤਤਂ, ਘਨਂ, ਸੁਸਿਰਨ੍ਤਿ ਪਞ੍ਚਙ੍ਗਸਙ੍ਖਾਤਂ ਤੁਰਿਯਂ. ਤਤ੍ਥ ਆਤਤਂ ਨਾਮ ਚਮ੍ਮਪਰਿਯੋਨਦ੍ਧੇਸੁ ਭੇਰਿਆਦੀਸੁ ਏਕਤੋ ਆਕਡ੍ਢਿਤ੍ਵਾ ਓਨਦ੍ਧਂ ਏਕਤਲਤੁਰਿਯਂ. ਵਿਤਤਂ ਨਾਮ ਉਭਤੋ ਆਕਡ੍ਢਿਤ੍ਵਾ ਓਨਦ੍ਧਂ ਉਭਯਤਲਤੁਰਿਯਂ. ਆਤਤਵਿਤਤਂ ਨਾਮ ਉਭਯਤੋ ਚ ਮਜ੍ਝਤੋ ਚ ਸਬ੍ਬਤੋ ਪਰਿਯੋਨਨ੍ਧਿਤਂ. ਘਨਂ ਸਮ੍ਮਾਦਿ. ਸਮ੍ਮਨ੍ਤਿ ਤਾਲ਼ਂ, ਘਣ੍ਟਾਕਿਙ੍ਕਣਿਆਦੀਨਮ੍ਪਿ ਏਤ੍ਥੇਵ ਸਙ੍ਗਹੋ. ਸੁਸਿਰਨ੍ਤਿ ਵਂਸਾਦਿ.

ਇਧ (ਪਾਰਾ. ਅਟ੍ਠ. ੨.੨੮੧) ਕੁਰੁਨ੍ਦਟ੍ਠਕਥਾਯਂ ਵੁਤ੍ਤਨਯੇਨ ਭੇਰਿਪੋਕ੍ਖਰਞ੍ਚ ਭੇਰਿਤਲਚਮ੍ਮਞ੍ਚ ਵੀਣਾ ਚ ਵੀਣਾਪੋਕ੍ਖਰਚਮ੍ਮਞ੍ਚ ਦਣ੍ਡੋ ਚ ਅਨਾਮਾਸਂ. ‘‘ਪੂਜਂ ਕਤ੍ਵਾ ਚੇਤਿਯਙ੍ਗਣਾਦੀਸੁ ਠਪਿਤਭੇਰਿਯੋ ਅਚਾਲੇਨ੍ਤੇਨ ਅਵਸੇਸਟ੍ਠਾਨਂ ਸਮ੍ਮਜ੍ਜਿਤਬ੍ਬਂ. ਕਚਵਰਛਡ੍ਡਨਕਾਲੇ ਕਚਵਰਂ ਵਿਯ ਗਹੇਤ੍ਵਾ ਏਕਸ੍ਮਿਂ ਠਾਨੇ ਠਪੇਤਬ੍ਬ’’ਨ੍ਤਿ ਮਹਾਪਚ੍ਚਰਿਯਂ ਵੁਤ੍ਤਂ. ਤੁਰਿਯਭਣ੍ਡੇਸੁ ਯਂ ਕਿਞ੍ਚਿ ਅਤ੍ਤਨੋ ਦੀਯਮਾਨਂ ਤਂ ਪਰਿਵਤ੍ਤੇਤ੍ਵਾ ਕਪ੍ਪਿਯਪਰਿਕ੍ਖਾਰਂ ਗਹੇਤੁਂ ਅਧਿਵਾਸੇਤਬ੍ਬਂ. ਦੋਣਿ ਵਾ ਪੋਕ੍ਖਰਂ ਵਾ ਦਨ੍ਤਕਟ੍ਠਨਿਕ੍ਖਿਪਨਤ੍ਥਾਯ, ਚਮ੍ਮਞ੍ਚ ਸਤ੍ਥਕੋਸਕਰਣਤ੍ਥਾਯ ਗਹੇਤਬ੍ਬਂ.

ਰਤਨਾਨਿ ਚ ਸਬ੍ਬਾਨੀਤਿ ਮੁਤ੍ਤਾ ਮਣਿ ਵੇਲ਼ੁਰਿਯੋ ਸਙ੍ਖੋ ਸਿਲਾ ਪਵਾਲ਼ਂ ਰਜਤਂ ਜਾਤਰੂਪਂ ਲੋਹਿਤਙ੍ਕੋ ਮਸਾਰਗਲ੍ਲਨ੍ਤਿ (ਪਾਰਾ. ਅਟ੍ਠ. ੨.੨੮੧) ਵੁਤ੍ਤਾਨਿ ਸਬ੍ਬਾਨਿ ਰਤਨਾਨਿ ਚ. ਏਤ੍ਥ ਚ ਵਿਦ੍ਧਾ, ਅਵਿਦ੍ਧਾ ਵਾ ਸਾਮੁਦ੍ਦਿਕਾਦੀ ਸਬ੍ਬਾਪਿ ਮੁਤ੍ਤਾ ਅਨਾਮਾਸਾ. ਭਣ੍ਡਮੂਲਤ੍ਥਞ੍ਚ ਗਣ੍ਹਿਤੁਂ ਨ ਵਟ੍ਟਤਿ. ਅਨ੍ਤਮਸੋ ਜਾਤਿਫਲਿਕਂ ਉਪਾਦਾਯ ਨੀਲਪੀਤਾਦਿਭੇਦੋ ਸਬ੍ਬੋਪਿ ਮਣਿ ਧੋਤਵਿਦ੍ਧੋ ਅਨਾਮਾਸੋ. ਆਹਤਾਕਾਰੇਨੇਵ ਠਿਤੋ ਅਵਿਦ੍ਧਾਧੋਤੋ ਮਣਿ ਪਤ੍ਤਾਦਿ ਭਣ੍ਡਮੂਲਤ੍ਥਂ ਅਧਿਵਾਸੇਤੁਂ ਵਟ੍ਟਤੀਤਿ ਵੁਤ੍ਤਂ. ਮਹਾਪਚ੍ਚਰਿਯਂ ਪਨ ਪਟਿਕ੍ਖਿਤ੍ਤਂ. ਪਚਿਤ੍ਵਾ ਕਤੋ ਕਾਚਮਣਿਯੇਵੇਕੋ ਵਟ੍ਟਤਿ. ਵੇਲ਼ੁਰਿਯੇ ਚ ਮਣਿਸਦਿਸੋਯੇਵ ਵਿਨਿਚ੍ਛਯੋ.

ਧਮਨਸਙ੍ਖੋ ‘‘ਸਬ੍ਬਂ ਧਮਨਸਙ੍ਖਾਦਿ’’ਨ੍ਤਿਆਦਿਗਾਥਾਯ ਤੁਰਿਯੇਸੁ ਗਹਿਤੋ. ਰਤਨਖਚਿਤੋ ਸਙ੍ਖੋ ਅਨਾਮਾਸੋ. ਪਾਨੀਯਸਙ੍ਖੋ ਧੋਤੋਪਿ ਅਧੋਤੋਪਿ ਆਮਾਸੋ. ਅਵਸੇਸਸਙ੍ਖੋ ਪਨ ਅਞ੍ਜਨਾਦਿਭੇਸਜ੍ਜਤ੍ਥਂ, ਪਤ੍ਤਾਦਿਭਣ੍ਡਮੂਲਭਾਵੇਨ ਚ ਅਧਿਵਾਸੇਤੁਂ ਵਟ੍ਟਤਿ. ਸੁਵਣ੍ਣੇਨ ਏਕਤੋ ਵਿਲਿਯਾਪੇਤ੍ਵਾ ਕਤਾ ਮੁਗ੍ਗਵਣ੍ਣਾ ਸਿਲਾ ਅਨਾਮਾਸਾ. ਸੇਸਾ ਸਿਲਾ ਖੁਦ੍ਦਕਨਿਸਾਨਾਦਿਕਮ੍ਮਤ੍ਥਂ ਅਧਿਵਾਸੇਤੁਂ ਵਟ੍ਟਤਿ. ‘‘ਪਵਾਲ਼ਂ ਧੋਤਮਧੋਤਞ੍ਚ ਵਿਦ੍ਧਮਵਿਦ੍ਧਞ੍ਚ ਸਬ੍ਬਥਾ ਅਨਾਮਾਸਂ, ਨਾਪਿ ਅਧਿਵਾਸੇਤਬ੍ਬ’’ਨ੍ਤਿ ਮਹਾਪਚ੍ਚਰਿਯਂ ਵੁਤ੍ਤਤ੍ਤਾ ਪਵਾਲ਼ਪਟਿਮਾਚੇਤਿਯਾਨਿ ਚੇਵ ਪੋਤ੍ਥਕੇਸੁ ਪਵੇਸੇਤਬ੍ਬਆਣਿਯਾ ਮੂਲੇ, ਅਗ੍ਗੇਚ ਪਵੇਸੇਤਬ੍ਬਂ ਪਦੁਮਾਦਿਆਕਾਰੇਨ ਕਤਂ ਵਟ੍ਟਞ੍ਚ ਨ ਗਹੇਤਬ੍ਬਂ ਨ ਫੁਸਿਤਬ੍ਬਂ.

ਬੀਜਤੋ ਪਟ੍ਠਾਯ ਰਜਤਂ, ਜਾਤਰੂਪਞ੍ਚ ਕਤਂ ਵਾ ਹੋਤੁ ਅਕਤਂ ਵਾ, ਸਬ੍ਬਸੋ ਅਨਾਮਾਸਂ, ਨ ਚ ਸਾਦਿਤਬ੍ਬਂ. ਇਮਿਨਾ ਕਤਂ ਪਟਿਮਾਦਿਕਞ੍ਚ ਆਰਕੂਟਲੋਹਞ੍ਚ ਅਨਾਮਾਸਨ੍ਤਿ ਵਕ੍ਖਤਿ. ਕਤਾਕਤਸੁਵਣ੍ਣਰਜਤਾਨਂ ਅਸਾਦਿਯਿਤਬ੍ਬਤਾਯ ਇਧ ਅਟ੍ਠਕਥਾਯ ਆਗਤਤ੍ਤਾ ਉਤ੍ਤਰੇਨ ਰਾਜਪੁਤ੍ਤੇਨ ਕਾਰੇਤ੍ਵਾ ਆਹਟਂ ਸੁਵਣ੍ਣਚੇਤਿਯਂ ਨ ਵਟ੍ਟਤੀਤਿ ਮਹਾਪਦੁਮਤ੍ਥੇਰੇਨ ਪਟਿਕ੍ਖਿਤ੍ਤਨ੍ਤਿ ਸੁਵਣ੍ਣਪਟਿਮਾਚੇਤਿਯਪੋਤ੍ਥਕਾਵਚ੍ਛਾਦਕਮਣਿਪਦੁਮਵਟ੍ਟਾਦਿ ਯਂ ਕਿਞ੍ਚਿ ਨ ਸਾਦਿਤਬ੍ਬਮੇਵ, ਨ ਚ ਆਮਸਿਤਬ੍ਬਂ. ਏਤੇਨ ਕਤਂ ਸੇਨਾਸਨੋਪਕਰਣਂ ਪਨ ਪਰਿਭੁਞ੍ਜਿਤੁਂ ਵਟ੍ਟਤਿ. ਧਮ੍ਮਮਣ੍ਡਪੇ ਕਤਮ੍ਪਿ ਪਟਿਜਗ੍ਗਿਤੁਂ ਵਟ੍ਟਤਿ. ਲੋਹਿਤਵਣ੍ਣੋ ਮਣਿ, ਮਸਾਰਗਲ੍ਲਮਣਿ ਚ ਸਬ੍ਬਥਾ ਅਨਾਮਾਸੋ, ਨ ਚ ਅਧਿਵਾਸੇਤਬ੍ਬੋਤਿ ਮਹਾਪਚ੍ਚਰਿਯਂ ਵੁਤ੍ਤਂ.

੩੪੬. ਸਬ੍ਬਮਾਵੁਧਭਣ੍ਡਨ੍ਤਿ ਖਗ੍ਗਾਦਿ ਸਬ੍ਬਂ ਆਵੁਧੋਪਕਰਣਂ ਪਤ੍ਤਾਦਿਕਪ੍ਪਿਯਪਰਿਕ੍ਖਾਰਮੂਲਤ੍ਥਾਯ ਦੀਯਮਾਨਂ ਸਤ੍ਥਵਾਣਿਜਾਯ ਅਕਾਤਬ੍ਬਤ੍ਤਾ ਨ ਗਹੇਤਬ੍ਬਂ, ‘‘ਇਮਂ ਗਣ੍ਹਥਾ’’ਤਿ ਦਿਨ੍ਨਂ ਭਿਨ੍ਦਿਤ੍ਵਾ ਖਣ੍ਡਾਖਣ੍ਡਿਕਂ ਕਤ੍ਵਾ ‘‘ਖੁਰਾਦਿਕਪ੍ਪਿਯਪਰਿਕ੍ਖਾਰਂ ਕਾਰੇਸ੍ਸਾਮੀ’’ਤਿ ਸਾਦਿਤੁਂ ਵਟ੍ਟਤਿ. ਸਙ੍ਗਾਮਭੂਮਿਯਂ ਮਗ੍ਗੇ ਪਤਿਤਖਗ੍ਗਾਦਿਂ ਦਿਸ੍ਵਾ ਪਾਸਾਣੇਨ ਭਿਨ੍ਦਿਤ੍ਵਾ ‘‘ਖੁਰਾਦਿਕਪ੍ਪਿਯਭਣ੍ਡਾਨਿ ਕਾਰੇਸ੍ਸਾਮੀ’’ਤਿ ਗਣ੍ਹਿਤੁਂ ਵਟ੍ਟਤਿ. ਉਸੁਸਤ੍ਤਿਆਦਿਕਂ ਫਲਤੋ ਦਣ੍ਡਂ ਅਪਨੇਤ੍ਵਾ ਕਪ੍ਪਿਯਪਰਿਕ੍ਖਾਰਕਾਰਾਪਨਤ੍ਥਾਯ ਗਹੇਤਬ੍ਬਂ.

ਜਿਯਾਤਿ ਧਨੁਗੁਣੋ. ਚ-ਕਾਰੇਨ ਇਮਿਸ੍ਸਾ ਗਾਥਾਯ ਅਵੁਤ੍ਤਂ ਅਙ੍ਕੁਸਤੋਮਰਾਦਿਂ ਪਰਹਿਂ ਸੋਪਕਰਣਂ ਸਙ੍ਗਣ੍ਹਾਤਿ. ਧਨੁਦਣ੍ਡਕੋਤਿ ਜਿਯਾਵਿਰਹਿਤੋ ਧਨੁਦਣ੍ਡਕੋ. ਇਦਂ ਪਰਹਿਂਸੋਪਕਰਣਭਣ੍ਡਾਦਿਕਂ ਵਿਹਾਰੇ ਸਮ੍ਮਜ੍ਜਿਤਬ੍ਬਟ੍ਠਾਨੇ ਠਪਿਤਂ ਚੇ, ਸਾਮਿਕਾਨਂ ਵਤ੍ਵਾ ਤੇਹਿ ਅਗ੍ਗਹਿਤਂ ਚੇ, ਅਚਾਲੇਨ੍ਤੇਨ ਸਮ੍ਮਜ੍ਜਿਤਬ੍ਬਂ.

ਜਾਲਞ੍ਚਾਤਿ ਮਚ੍ਛਜਾਲਪਕ੍ਖਿਜਾਲਾਦਿਜਾਲਞ੍ਚ. ਜਾਲਂ ਦੀਯਮਾਨਂ ਛਤ੍ਤਵੇਠਨਤ੍ਥਂ, ਆਸਨਚੇਤਿਯਾਦਿਮਤ੍ਥਕੇ ਬਨ੍ਧਨਾਦਿਪਯੋਜਨੇ ਸਤਿ ਤਦਤ੍ਥਞ੍ਚ ਗਹੇਤਬ੍ਬਂ. ਸਰਵਾਰਣਂ ਨਾਮ ਫਲਕਾਦਿਕਂ ਅਞ੍ਞੇਹਿ ਅਤ੍ਤਨੋ ਵਿਜ੍ਝਨਤ੍ਥਾਯ ਵਿਸ੍ਸਟ੍ਠਸਰਨਿਵਾਰਣਂ ਵਿਨਾਸਨੋਪਰੋਧਕਾਰਣਂ ਹੋਤੀਤਿ ਭਣ੍ਡਮੂਲਤ੍ਥਂ ਸਾਦਿਤੁਂ ਵਟ੍ਟਤਿ. ‘‘ਦਨ੍ਤਕਟ੍ਠਾਧਾਰਫਲਕਾਦਿ ਯਦਿਚ੍ਛਿਤਂ ਕਰੋਮੀ’’ਤਿ ਮੁਟ੍ਠਿਂ ਅਪਨੇਤ੍ਵਾ ਗਹੇਤੁਂ ਵਟ੍ਟਤਿ.

੩੪੭. ਚੇਤਿਯਨ੍ਤਿ ਏਤ੍ਥ ‘‘ਸੁਵਣ੍ਣਚੇਤਿਯ’’ਨ੍ਤਿ ਇਦਂ ‘‘ਸੁਵਣ੍ਣਪਟਿਬਿਮ੍ਬਾਦੀ’’ਤਿ ਅਨਨ੍ਤਰਂ ਵੁਤ੍ਤਤ੍ਤਾ ਲਬ੍ਭਤਿ. ਸੁਵਣ੍ਣਗ੍ਗਹਣਞ੍ਚੁਪਲਕ੍ਖਣਨ੍ਤਿ ਰਜਤਮਯਞ੍ਚ ਗਹੇਤਬ੍ਬਂ. ਆਰਕੂਟਕਨ੍ਤਿ ਸੁਵਣ੍ਣਵਣ੍ਣਂ ਲੋਹਵਿਸੇਸਮਾਹ. ‘‘ਅਨਾਮਾਸ’’ਨ੍ਤਿ ਇਦਂ ‘‘ਅਸਮ੍ਪਟਿਚ੍ਛਿਯਂ ਵਾ’’ਤਿ ਏਤਸ੍ਸ ਉਪਲਕ੍ਖਣਂ.

੩੪੮. ਸਬ੍ਬਂ ਵਾਦਿਤਮਿਤਿ ਸਮ੍ਬਨ੍ਧੋ. ਓਨਹਿਤੁਨ੍ਤਿ ਚਮ੍ਮਵਰਤ੍ਤਤਨ੍ਤੀਹਿ ਬਨ੍ਧਿਤੁਂ. ਓਨਹਾਪੇਤੁਨ੍ਤਿ ਤਥੇਵ ਅਞ੍ਞੇਹਿ ਕਾਰਾਪੇਤੁਂ. ਵਾਦਾਪੇਤੁਨ੍ਤਿ ਅਞ੍ਞੇਹਿ ਵਾਦਾਪੇਤੁਂ. ਵਾਦੇਤੁਨ੍ਤਿ ਅਤ੍ਤਨਾ ਵਾਦੇਤੁਂ. ਵਾਦਿਤਨ੍ਤਿ ਵਾਦਨੀਯਂ ਯਥਾ ‘‘ਕਰਣੀਯਂ ਕਾਰਿਤ’’ਨ੍ਤਿ, ਵਾਦਨਾਰਹਂ ਤੁਰਿਯਭਣ੍ਡਨ੍ਤਿ ਅਤ੍ਥੋ. ਇਦਞ੍ਚ ਓਨਹਨਾਦਿਕਿਰਿਯਾਯ ਕਮ੍ਮਂ.

੩੪੯. ਉਪਹਾਰਂ ਕਰਿਸ੍ਸਾਮਾਤਿ ਪੂਜਂ ਕਰਿਸ੍ਸਾਮ. ਇਤਿ ਅਨੁਮਤਿਗ੍ਗਹਣਤ੍ਥਾਯ. ਵਤ੍ਤਬ੍ਬਾਤਿ ਤੇ ਵਤ੍ਤਾਰੋ ਵਤ੍ਤਬ੍ਬਾਤਿ ਯੋਜਨਾ.

੩੫੦-੧. ਧੁਤ੍ਤਿਯਾ ਇਤ੍ਥਿਯਾਤਿ ਵਿਪਨ੍ਨਾਚਾਰਾਯ ਲੋਲ਼ਿਤ੍ਥਿਯਾ. ਸਯਂ ਫੁਸਿਯਮਾਨਸ੍ਸਾਤਿ ਭਿਕ੍ਖੁਨੋ ਪਯੋਗਂ ਵਿਨਾ ਇਤ੍ਥਿਯਾ ਅਤ੍ਤਨਾਵ ਫੁਸਿਯਮਾਨਸ੍ਸ. ਕਾਯੇਨ ਅਵਾਯਮਿਤ੍ਵਾਤਿ ਤਸ੍ਸਾ ਸਰੀਰਸਮ੍ਫਸ੍ਸਾਨੁਭਵਨਤ੍ਥਂ ਅਤ੍ਤਨੋ ਕਾਯਂ ਅਚਾਲੇਤ੍ਵਾ. ਫਸ੍ਸਂ ਪਟਿਵਿਜਾਨਤੋਤਿ ਫਸ੍ਸਂ ਅਨੁਭਵਨ੍ਤਸ੍ਸ.

ਅਸਞ੍ਚਿਚ੍ਚਾਤਿ ਏਤ੍ਥ ‘‘ਫੁਸਨੇ’’ਤਿ ਪਾਠਸੇਸੋ, ‘‘ਇਮਿਨਾ ਉਪਾਯੇਨ ਇਮਂ ਫੁਸਾਮੀ’’ਤਿ ਅਚੇਤੇਤ੍ਵਾ. ਕਿਂ ਵੁਤ੍ਤਂ ਹੋਤਿ? ‘‘ਇਮਿਨਾ ਪਤ੍ਤਪਟਿਗ੍ਗਹਣਾਦਿਨਾ ਉਪਾਯੇਨ ਏਤਿਸ੍ਸਾ ਸਰੀਰਸਮ੍ਫਸ੍ਸਂ ਅਨੁਭਵਿਸ੍ਸਾਮੀ’’ਤਿ ਅਚਿਨ੍ਤੇਤ੍ਵਾ ਪਤ੍ਤਥਾਲਕਤਟ੍ਟਕਪਣ੍ਣਪੁਟਭੇਸਜ੍ਜਾਦਿਂ ਪਟਿਗ੍ਗਣ੍ਹਾਪੇਨ੍ਤਿਯਾ ਹਤ੍ਥੇ ਅਤ੍ਤਨੋ ਹਤ੍ਥੇਨ ਫੁਸਨਾਦੀਸੁ ਅਨਾਪਤ੍ਤੀਤਿ ਵੁਤ੍ਤਂ ਹੋਤਿ. ‘‘ਅਸ੍ਸਤਿਯਾ’’ਤਿ ਇਦਂ ਪਨ ਇਮਿਨਾਵ ਸਙ੍ਗਹਿਤਤ੍ਤਾ ਇਧ ਵਿਸੁਂ ਨ ਵੁਤ੍ਤਂ, ਮਾਤੁਗਾਮਸ੍ਸ ਸਰੀਰੇ ਫੁਸਨਭਾਵਂ ਅਜਾਨਿਤ੍ਵਾ ਅਞ੍ਞਵਿਹਿਤੋ ਹੁਤ੍ਵਾ ਸਤਿਂ ਅਨੁਪਟ੍ਠਪੇਤ੍ਵਾ ਹਤ੍ਥਪਾਦਪਸਾਰਣਾਦੀਸੁ ਫੁਸਨ੍ਤਸ੍ਸਾਤਿ ਅਤ੍ਥੋ.

ਅਜਾਨਨ੍ਤਸ੍ਸਾਤਿ ਦਾਰਕਾਕਾਰਂ ਦਾਰਿਕਂ ‘‘ਮਾਤੁਗਾਮੋ’’ਤਿ ਅਜਾਨਿਤ੍ਵਾ ਕੇਨਚਿ ਕਰਣੀਯੇਨ ਫੁਸਨ੍ਤਸ੍ਸ. ਮੋਕ੍ਖਾਧਿਪ੍ਪਾਯਿਨੋ ਚਾਤਿ ‘‘ਮੋਕ੍ਖਾਧਿਪ੍ਪਾਯੋ ਕਾਯੇਨ ਵਾਯਮਤਿ, ਫਸ੍ਸਂ ਪਟਿਵਿਜਾਨਾਤਿ, ਅਨਾਪਤ੍ਤਿ. ਮੋਕ੍ਖਾਧਿਪ੍ਪਾਯੋ ਕਾਯੇਨ ਵਾਯਮਤਿ, ਨ ਚ ਫਸ੍ਸਂ ਪਟਿਵਿਜਾਨਾਤਿ, ਅਨਾਪਤ੍ਤਿ. ਮੋਕ੍ਖਾਧਿਪ੍ਪਾਯੋ ਨ ਚ ਕਾਯੇਨ ਵਾਯਮਤਿ, ਫਸ੍ਸਂ ਪਟਿਵਿਜਾਨਾਤਿ, ਅਨਾਪਤ੍ਤਿ. ਮੋਕ੍ਖਾਧਿਪ੍ਪਾਯੋ ਨ ਚ ਕਾਯੇਨ ਵਾਯਮਤਿ, ਨ ਚ ਫਸ੍ਸਂ ਪਟਿਵਿਜਾਨਾਤਿ, ਅਨਾਪਤ੍ਤੀ’’ਤਿ (ਪਾਰਾ. ੨੭੯) ਵੁਤ੍ਤਮੋਕ੍ਖਾਧਿਪ੍ਪਾਯਵਤੋ ਚਤੁਬ੍ਬਿਧਸ੍ਸ ਪੁਗ੍ਗਲਸ੍ਸਾਤਿ ਵੁਤ੍ਤਂ ਹੋਤਿ. ‘‘ਅਨਾਪਤ੍ਤੀ’’ਤਿ ਇਮਿਨਾ ਸਮ੍ਬਨ੍ਧੋ.

ਇਮੇਸੁ ਯੋ ਮਾਤੁਗਾਮੇਨ ਆਲਿਙ੍ਗਨਾਦਿਪਯੋਗੇਨ ਅਜ੍ਝੋਤ੍ਥਰਯਮਾਨੋ ਤਂ ਅਤ੍ਤਨੋ ਸਰੀਰਤੋ ਅਪਨੇਤ੍ਵਾ ਮੁਞ੍ਚਿਤੁਕਾਮੋ ਹਤ੍ਥਚਾਲੇਨ, ਮੁਟ੍ਠਿਆਦੀਹਿ ਵਾ ਪਟਿਪਣਾਮਨਂ, ਪਹਰਣਾਦਿਕਞ੍ਚ ਪਯੋਗਂ ਕਰੋਤਿ, ਅਯਂ ਪਠਮੋ ਪੁਗ੍ਗਲੋ. ਅਤ੍ਤਾਨਮਜ੍ਝੋਤ੍ਥਰਿਤੁਂ ਆਗਚ੍ਛਨ੍ਤਿਂ ਇਤ੍ਥਿਂ ਦਿਸ੍ਵਾ ਪਹਰਣਾਕਾਰਾਦਿਸਬ੍ਬਪਯੋਗਂ ਦਸ੍ਸੇਤ੍ਵਾ ਤਾਸੇਤ੍ਵਾ ਅਤ੍ਤਨੋ ਸਰੀਰਂ ਫੁਸਿਤੁਂ ਅਦੇਨ੍ਤੋ ਦੁਤਿਯੋ. ਇਤ੍ਥਿਯਾ ਅਜ੍ਝੋਤ੍ਥਰਿਤ੍ਵਾ ਆਲਿਙ੍ਗਿਤੋ ਚੋਪਨਰਹਿਤਂ ਮਂ ‘‘ਅਨਤ੍ਥਿਕੋ’’ਤਿ ਮਨ੍ਤ੍ਵਾ ‘‘ਸਯਮੇਵ ਪਲਾਯਿਸ੍ਸਤੀ’’ਤਿ, ‘‘ਅਚੋਪਨਮੇਵ ਮੋਕ੍ਖੋਪਾਯੋ’’ਤਿ ਞਤ੍ਵਾ ਨਿਚ੍ਚਲੋਵ ਹੁਤ੍ਵਾ ਫਸ੍ਸਂ ਪਟਿਵਿਜਾਨਨ੍ਤੋ ਤਤਿਯੋ. ਅਤ੍ਤਾਨਂ ਅਜ੍ਝੋਤ੍ਥਰਿਤੁਮਾਗਚ੍ਛਨ੍ਤਿਂ ਇਤ੍ਥਿਂ ਦਿਸ੍ਵਾ ਦੁਤਿਯੋ ਵਿਯ ਤਾਸੇਤੁਂ ਕਾਯਪ੍ਪਯੋਗਂ ਅਕਤ੍ਵਾ ‘‘ਅਗਤੇ ਪਾਤੇਸ੍ਸਾਮਿ, ਪਹਰਿਤ੍ਵਾ ਤਾਸੇਸ੍ਸਾਮੀ’’ਤਿ ਵਾ ਚਿਨ੍ਤੇਤ੍ਵਾ ਨਿਚ੍ਚਲੋਵ ਹੁਤ੍ਵਾ ਤਿਟ੍ਠਨ੍ਤੋ ਚਤੁਤ੍ਥੋਤਿ ਵੇਦਿਤਬ੍ਬੋ.

੩੫੨. ਪਠਮੇਨਾਤਿ ਏਤ੍ਥ ‘‘ਪਾਰਾਜਿਕੇਨਾ’’ਤਿ ਪਾਠਸੇਸੋ, ਕਾਯਚਿਤ੍ਤਸਮੁਟ੍ਠਾਨਨ੍ਤਿ ਵੁਤ੍ਤਂ ਹੋਤਿ. ਇਧ ਚਿਤ੍ਤਂ ਨਾਮ ਕਾਯਸਂਸਗ੍ਗਰਾਗਸਮ੍ਪਯੁਤ੍ਤਂ ਚਿਤ੍ਤਂ, ਸੁਕ੍ਕਵਿਸ੍ਸਟ੍ਠਿਮ੍ਹਿ ਮੋਚੇਤੁਕਾਮਤਾਯ ਸਮ੍ਪਯੁਤ੍ਤਂ ਚਿਤ੍ਤਂ.

ਕਾਯਸਂਸਗ੍ਗਕਥਾਵਣ੍ਣਨਾ.

੩੫੩-੪. ਦੁਟ੍ਠੁਲ੍ਲਵਾਚਸ੍ਸਾਦੇਨਾਤਿ ਦੁਟ੍ਠੁ ਕੁਚ੍ਛਿਤਭਾਵਂ ਉਲਤਿ ਗਚ੍ਛਤੀਤਿ ਦੁਟ੍ਠੁਲ੍ਲਾ, ਦੁਟ੍ਠੁਲ੍ਲਾ ਚ ਸਾ ਵਾਚਾ ਚਾਤਿ ਦੁਟ੍ਠੁਲ੍ਲਵਾਚਾ, ਵਚ੍ਚਮਗ੍ਗਪਸ੍ਸਾਵਮਗ੍ਗੇ ਮੇਥੁਨਧਮ੍ਮਪਟਿਸਂਯੁਤ੍ਤਾ ਵਾਚਾ, ਯਥਾਹ ‘‘ਦੁਟ੍ਠੁਲ੍ਲਾ ਨਾਮ ਵਾਚਾ ਵਚ੍ਚਮਗ੍ਗਪਸ੍ਸਾਵਮਗ੍ਗਮੇਥੁਨਧਮ੍ਮਪਟਿਸਂਯੁਤ੍ਤਾ ਵਾਚਾ’’ਤਿ (ਪਾਰਾ. ੨੮੫), ਦੁਟ੍ਠੁਲ੍ਲਵਾਚਾਯ ਅਸ੍ਸਾਦੋ ਦੁਟ੍ਠੁਲ੍ਲਵਾਚਸ੍ਸਾਦੋ, ਤਥਾਪਵਤ੍ਤਵਚੀਵਿਞ੍ਞਤ੍ਤਿਸਮੁਟ੍ਠਾਪਕਚਿਤ੍ਤਸਮ੍ਪਯੁਤ੍ਤਾ ਚੇਤਨਾ, ਤੇਨ ਸਮ੍ਪਯੁਤ੍ਤੋ ਰਾਗੋ ਇਧ ਸਹਚਰਿਯੇਨ ‘‘ਦੁਟ੍ਠੁਲ੍ਲਵਾਚਸ੍ਸਾਦੋ’’ਤਿ ਵੁਤ੍ਤੋ, ਤੇਨ, ਦੁਟ੍ਠੁਲ੍ਲਵਾਚਸ੍ਸਾਦਸਮ੍ਪਯੁਤ੍ਤੇਨ ਰਾਗੇਨਾਤਿ ਅਤ੍ਥੋ. ਇਮਿਨਾ ‘‘ਓਭਾਸਨ੍ਤਸ੍ਸਾ’’ਤਿ ਵਕ੍ਖਮਾਨਓਭਾਸਨਸ੍ਸ ਹੇਤੁ ਦਸ੍ਸਿਤੋ.

ਇਤ੍ਥਿਯਾ ਇਤ੍ਥਿਸਞ੍ਞਿਨੋ ਭਿਕ੍ਖੁਨੋਤਿ ਯੋਜਨਾ. ਇਤ੍ਥਿਯਾ ਇਤ੍ਥਿਸਞ੍ਞਿਨੋਤਿ ‘‘ਮਾਤੁਗਾਮੋ ਨਾਮ ਮਨੁਸ੍ਸਿਤ੍ਥੀ, ਨ ਯਕ੍ਖੀ, ਨ ਪੇਤੀ, ਨ ਤਿਰਚ੍ਛਾਨਗਤਾ, ਵਿਞ੍ਞੂ ਪਟਿਬਲਾ ਸੁਭਾਸਿਤਦੁਬ੍ਭਾਸਿਤਂ ਦੁਟ੍ਠੁਲ੍ਲਾਦੁਟ੍ਠੁਲ੍ਲਂ ਆਜਾਨਿਤੁ’’ਨ੍ਤਿ ਪਦਭਾਜਨੇ ਨਿਦ੍ਦਿਟ੍ਠਸਰੂਪਾਯ ਸੁਭਾਸਿਤਦੁਬ੍ਭਾਸਿਤਂ ਜਾਨਨ੍ਤਿਯਾ ਮਨੁਸ੍ਸਿਤ੍ਥਿਯਾ ਇਤ੍ਥਿਸਞ੍ਞਿਨੋ ਭਿਕ੍ਖੁਨੋਤਿ ਅਤ੍ਥੋ. ‘‘ਦ੍ਵਿਨ੍ਨਂ ਮਗ੍ਗਾਨ’’ਨ੍ਤਿ ਏਤਸ੍ਸ ਸਮ੍ਬਨ੍ਧੀਵਸੇਨ ‘‘ਇਤ੍ਥਿਯਾ’’ਤਿ ਇਦਂ ਸਾਮਿਵਸੇਨ ਯੋਜੇਤਬ੍ਬਂ, ਯਥਾਵੁਤ੍ਤਸਰੂਪਸ੍ਸ ਮਾਤੁਗਾਮਸ੍ਸ ਵਚ੍ਚਮਗ੍ਗਪਸ੍ਸਾਵਮਗ੍ਗਨ੍ਤਿ ਅਤ੍ਥੋ. ਵਣ੍ਣਾਵਣ੍ਣਵਸੇਨ ਚਾਤਿ ‘‘ਵਣ੍ਣਂ ਭਣਤਿ ਨਾਮ ਦ੍ਵੇ ਮਗ੍ਗੇ ਥੋਮੇਤਿ ਵਣ੍ਣੇਤਿ ਪਸਂਸਤਿ. ਅਵਣ੍ਣਂ ਭਣਤਿ ਨਾਮ ਦ੍ਵੇ ਮਗ੍ਗੇ ਖੁਂਸੇਤਿ ਵਮ੍ਭੇਤਿ ਗਰਹਤੀ’’ਤਿ ਨਿਦ੍ਦੇਸੇ ਵੁਤ੍ਤਨਯੇਨ ਉਭੋ ਮਗ੍ਗੇ ਉਦ੍ਦਿਸ੍ਸ ਥੋਮਨਗਰਹਣਵਸੇਨਾਤਿ ਵੁਤ੍ਤਂ ਹੋਤਿ.

ਮੇਥੁਨਸ੍ਸ ਯਾਚਨਾਦਯੋ ਮੇਥੁਨਯਾਚਨਾਦਯੋ, ਤੇਹਿ ਮੇਥੁਨਯਾਚਨਾਦੀਹਿ, ‘‘ਯਾਚਤਿਪਿ ਆਯਾਚਤਿਪਿ ਪੁਚ੍ਛਤਿਪਿ ਪਟਿਪੁਚ੍ਛਤਿਪਿ ਆਚਿਕ੍ਖਤਿਪਿ ਅਨੁਸਾਸਤਿਪਿ ਅਕ੍ਕੋਸਤਿਪੀ’’ਤਿ (ਪਾਰਾ. ੨੮੫) ਉਦ੍ਦੇਸੇ ਵੁਤ੍ਤਮੇਥੁਨਯਾਚਨਾਦਿਵਸੇਨਾਤਿ ਵੁਤ੍ਤਂ ਹੋਤਿ. ਇਮੇਹਿ ਦ੍ਵੀਹਿ ‘‘ਓਭਾਸਨ੍ਤਸ੍ਸਾ’’ਤਿ ਵੁਤ੍ਤਓਭਾਸਨਾ ਦਸ੍ਸਿਤਾ. ਓਭਾਸਨ੍ਤਸ੍ਸਾਤਿ ਉਦ੍ਦੇਸਯਨ੍ਤਸ੍ਸ, ਪਕਾਸੇਨ੍ਤਸ੍ਸਾਤਿ ਅਤ੍ਥੋ. ‘‘ਵਿਞ੍ਞੁ’’ਨ੍ਤਿ ਇਮਿਨਾ ਓਭਾਸਨਕਿਰਿਯਾਯ ਕਮ੍ਮਮਾਹ, ਇਮਿਨਾ ਵਿਸੇਸਿਤਬ੍ਬਂ ‘‘ਮਨੁਸ੍ਸਿਤ੍ਥਿ’’ਨ੍ਤਿ ਇਦਂ ਪਕਰਣਤੋ ਲਬ੍ਭਤਿ, ਯਥਾਦਸ੍ਸਿਤਪਦਭਾਜਨਾਗਤਸਰੂਪਂ ਵਿਞ੍ਞੁਂ ਪਟਿਬਲਂ ਮਨੁਸ੍ਸਿਤ੍ਥਿਨ੍ਤਿ ਵੁਤ੍ਤਂ ਹੋਤਿ. ਅਨ੍ਤਮਸੋ ਹਤ੍ਥਮੁਦ੍ਦਾਯਪੀਤਿ ਓਭਾਸਨੇ ਅਨ੍ਤਿਮਪਰਿਚ੍ਛੇਦਦਸ੍ਸਨਂ. ਦੁਟ੍ਠੁਲ੍ਲਵਚਨਸ੍ਸਾਦਭਾਵੇ ਸਤਿ ਯੋ ਵਚ੍ਚਮਗ੍ਗਪਸ੍ਸਾਵਮਗ੍ਗਪਟਿਬਦ੍ਧਂ ਗੁਣਦੋਸਂ ਵਾ ਮੇਥੁਨਧਮ੍ਮਯਾਚਨਾਦਿਵਸੇਨ ਵਾ ਦੁਟ੍ਠੁਲ੍ਲਾਦੁਟ੍ਠੁਲ੍ਲਂ ਜਾਨਨ੍ਤਿਂ ਮਨੁਸ੍ਸਿਤ੍ਥਿਂ ਹੇਟ੍ਠਿਮਪਰਿਚ੍ਛੇਦੇਨ ਹਤ੍ਥਮੁਦ੍ਦਾਯਪਿ ਵਦੇਯ੍ਯਾਤਿ ਅਤ੍ਥੋ.

ਇਮਸ੍ਮਿਂ ਗਾਥਾਦ੍ਵਯੇ ਦੁਟ੍ਠੁਲ੍ਲਵਾਚਸ੍ਸਾਦੇਨ ਇਤ੍ਥਿਯਾ ਇਤ੍ਥਿਸਞ੍ਞਿਨੋ ਵਿਞ੍ਞੁਂ ਤਂ ਇਤ੍ਥਿਂ ਦ੍ਵਿਨ੍ਨਂ ਮਗ੍ਗਾਨਂ ਵਣ੍ਣਵਸੇਨ ਅਨ੍ਤਮਸੋ ਹਤ੍ਥਮੁਦ੍ਦਾਯਪਿ ਓਭਾਸਨ੍ਤਸ੍ਸ ਭਿਕ੍ਖੁਨੋ ਗਰੁਕਂ ਸਿਯਾਤਿ ਏਕਂ ਵਾਕ੍ਯਂ, ਤਥਾ ‘‘ਦ੍ਵਿਨ੍ਨਂ ਮਗ੍ਗਾਨਂ ਅਵਣ੍ਣਵਸੇਨਾ’’ਤਿ ਇਮਿਨਾ ਚ ‘‘ਮੇਥੁਨਯਾਚਨਾਦੀਹੀ’’ਤਿ ਇਮਿਨਾ ਚ ਯੋਜਨਾਯ ਵਾਕ੍ਯਦ੍ਵਯਨ੍ਤਿ ਏਵਂ ਯੋਜਨਾਵਸੇਨ ਤੀਣਿ ਵਾਕ੍ਯਾਨਿ ਹੋਨ੍ਤਿ.

ਤਤ੍ਥ ਪਠਮਵਾਕ੍ਯੇ ਵਣ੍ਣਵਚਨੇਨ ਸਙ੍ਗਹਿਤਂ ਥੋਮਨਾਦਿਕਥਂ ਕਥੇਨ੍ਤਸ੍ਸ ਸਙ੍ਘਾਦਿਸੇਸੋ ਹੋਤਿ. ‘‘ਇਤ੍ਥਿਲਕ੍ਖਣੇਨ ਸੁਭਲਕ੍ਖਣੇਨ ਸਮਨ੍ਨਾਗਤਾਸੀ’’ਤਿ ਏਤ੍ਤਕਮੇਵ ਥੋਮਨਤ੍ਥਂ ਵਦਤੋ ਸਙ੍ਘਾਦਿਸੇਸੋ ਨ ਹੋਤਿ, ‘‘ਤਵ ਵਚ੍ਚਮਗ੍ਗੋ ਚ ਪਸ੍ਸਾਵਮਗ੍ਗੋ ਚ ਈਦਿਸੋ ਸੁਭੋ ਸੁਸਣ੍ਠਾਨੋ, ਤੇਨ ਨਾਮ ਈਦਿਸੇਨ ਇਤ੍ਥਿਲਕ੍ਖਣੇਨ ਸੁਭਲਕ੍ਖਣੇਨ ਸਮਨ੍ਨਾਗਤਾਸੀ’’ਤਿ ਵਦਨ੍ਤਸ੍ਸ ਹੋਤਿ. ‘‘ਵਣ੍ਣੇਤਿ, ਪਸਂਸਤੀ’’ਤਿ ਪਦਦ੍ਵਯਞ੍ਚ ‘‘ਥੋਮੇਤੀ’’ਤਿ ਪਦਸ੍ਸ ਪਰਿਯਾਯੋ.

ਦੁਤਿਯਵਾਕ੍ਯੇ ਅਵਣ੍ਣਪਦਸਙ੍ਗਹਿਤਂ ਖੁਂਸਨਾਦਿਤ੍ਤਯੇ ਖੁਂਸਨਂ ਨਾਮ ਪਤੋਦੋਪਮੇਹਿ ਫਰੁਸਵਚਨੇਹਿ ਤੁਦਨਂ. ਯਥਾਹ ਅਟ੍ਠਕਥਾਯਂ ‘‘ਖੁਂਸੇਤੀਤਿ ਵਾਚਾਪਤੋਦੇਨ ਘਟ੍ਟੇਤੀ’’ਤਿ (ਪਾਰਾ. ਅਟ੍ਠ. ੨.੨੮੫). ਪਤੁਜ੍ਜਤੇਨੇਨਾਤਿ ‘‘ਪਤੋਦੋ’’ਤਿਅਗਚ੍ਛਨ੍ਤੇ ਅਸ੍ਸਾਦਯੋ ਪਵਤ੍ਤੇਤੁਂ ਵਿਜ੍ਝਨਕਪਾਚਨਦਣ੍ਡੋ ਵੁਚ੍ਚਤਿ. ਵਮ੍ਭਨਂ ਨਾਮ ਅਪਸਾਦਨਂ. ਅਪਸਾਦਨਂ ਨਾਮ ਗੁਣਤੋ ਪਰਿਹਾਪਨਂ. ਯਥਾਹ ‘‘ਵਮ੍ਭੇਤੀਤਿ ਅਪਸਾਦੇਤੀ’’ਤਿ (ਪਾਰਾ. ਅਟ੍ਠ. ੨.੨੮੫). ਗਰਹਾ ਨਾਮ ਦੋਸਾਰੋਪਨਂ. ਯਥਾਹ ‘‘ਗਰਹਤੀਤਿ ਦੋਸਂ ਦੇਤੀ’’ਤਿ (ਪਾਰਾ. ਅਟ੍ਠ. ੨.੨੮੫). ਇਮਂ ਖੁਂਸਨਾਦਿਪਟਿਸਂਯੁਤ੍ਤਵਚਨਂ ਵਕ੍ਖਮਾਨੇਸੁ ‘‘ਸਿਖਰਣੀਸਿ, ਸਮ੍ਭਿਨ੍ਨਾਸਿ, ਉਭਤੋਬ੍ਯਞ੍ਜਨਾਸੀ’’ਤਿ ਇਮੇਸੁ ਤੀਸੁ ਪਦੇਸੁ ਅਞ੍ਞਤਰੇਨ ਯੋਜੇਤ੍ਵਾ ਕਥੇਨ੍ਤਸ੍ਸੇਵ ਸਙ੍ਘਾਦਿਸੇਸੋ, ਨ ਇਤਰਸ੍ਸ.

ਤਤਿਯਵਾਕ੍ਯੇ ਮੇਥੁਨਯਾਚਨਾਦਿਵਚਨੇਹਿ ਸਙ੍ਗਹਿਤਂ ਆਯਾਚਨਾਦਿਂ ਕਰੋਨ੍ਤਸ੍ਸਾਪਿ ਸਙ੍ਘਾਦਿਸੇਸੋ. ‘‘ਯਾਚਤਿ ਨਾਮ ਦੇਹਿ ਮੇ ਅਰਹਸਿ ਮੇ ਦਾਤੁ’’ਨ੍ਤਿਆਦਿਨਾ (ਪਾਰਾ. ੨੮੫) ਨਯੇਨ ਏਕੇਕਂ ਪਦਂ ‘‘ਦੇਹਿ ਮੇ ਮੇਥੁਨਂ ਧਮ੍ਮ’’ਨ੍ਤਿਆਦਿਵਸੇਨ ਮੇਥੁਨਧਮ੍ਮਪਦੇਨ ਸਹ ਘਟੇਤ੍ਵਾ ਮੇਥੁਨਧਮ੍ਮਂ ਯਾਚਨ੍ਤਸ੍ਸੇਵ ਹੋਤਿ.

‘‘ਕਦਾ ਤੇ ਮਾਤਾ ਪਸੀਦਿਸ੍ਸਤਿ, ਕਦਾ ਤੇ ਪਿਤਾ ਪਸੀਦਿਸ੍ਸਤਿ, ਕਦਾ ਤੇ ਦੇਵਤਾਯੋ ਪਸੀਦਿਸ੍ਸਨ੍ਤਿ, ਕਦਾ ਤੇ ਸੁਖਣੋ ਸੁਲਯੋ ਸੁਮੁਹੁਤ੍ਤੋ ਭਵਿਸ੍ਸਤੀ’’ਤਿਆਦਿਆਯਾਚਨਪਦਨਿਦ੍ਦੇਸੇ ਏਕੇਕਂ ਪਦਂ ਤਤ੍ਥੇਵ ਓਸਾਨੇ ਵੁਤ੍ਤੇਨ ‘‘ਕਦਾ ਤੇ ਮੇਥੁਨਂ ਧਮ੍ਮਂ ਲਭਿਸ੍ਸਾਮੀ’’ਤਿ ਪਦੇਨ ਘਟੇਤ੍ਵਾ ਮੇਥੁਨਂ ਯਾਚਨ੍ਤਸ੍ਸੇਵ ਹੋਤਿ.

‘‘ਕਥਂ ਤ੍ਵਂ ਸਾਮਿਕਸ੍ਸ ਦੇਸਿ, ਕਥਂ ਜਾਰਸ੍ਸ ਦੇਸੀ’’ਤਿ (ਪਾਰਾ. ੨੮੫) ਪੁਚ੍ਛਾਨਿਦ੍ਦੇਸਵਚਨੇਸੁ ਚ ਅਞ੍ਞਤਰਂ ਮੇਥੁਨਧਮ੍ਮਪਦੇਨ ਘਟੇਤ੍ਵਾ ਪੁਚ੍ਛਨ੍ਤਸ੍ਸੇਵ ਹੋਤਿ.

‘‘ਏਵਂ ਕਿਰ ਤ੍ਵਂ ਸਾਮਿਕਸ੍ਸ ਦੇਸਿ, ਏਵਂ ਜਾਰਸ੍ਸ ਦੇਸੀ’’ਤਿ (ਪਾਰਾ. ੨੮੫) ਪਟਿਪੁਚ੍ਛਾਨਿਦ੍ਦੇਸਵਚਨੇਸੁ ਅਞ੍ਞਤਰਂ ਮੇਥੁਨਧਮ੍ਮਪਦੇਨ ਘਟੇਤ੍ਵਾ ਵਿਸੇਸੇਤ੍ਵਾ ਪਟਿਪੁਚ੍ਛਨ੍ਤਸ੍ਸੇਵ ਹੋਤਿ.

‘‘ਕਥਂ ਦਦਮਾਨਾ ਸਾਮਿਕਸ੍ਸ ਪਿਯਾ ਹੋਤੀ’’ਤਿ ਪੁਚ੍ਛਤੋ ਮਾਤੁਗਾਮਸ੍ਸ ‘‘ਏਵਂ ਦੇਹਿ, ਏਵਂ ਦੇਨ੍ਤੀ ਸਾਮਿਕਸ੍ਸ ਪਿਯਾ ਭਵਿਸ੍ਸਤਿ ਮਨਾਪਾ ਚਾ’’ਤਿ ਆਣਤ੍ਤਿਵਚਨੇ, ਅਨੁਸਾਸਨਿਵਚਨੇ ਚ ਏਸੇਵ ਨਯੋ.

੩੫੫. ਅਕ੍ਕੋਸਨਿਦ੍ਦੇਸਾਗਤੇਸੁ ‘‘ਅਨਿਮਿਤ੍ਤਾਸਿ ਨਿਮਿਤ੍ਤਮਤ੍ਤਾਸਿ ਅਲੋਹਿਤਾਸਿ ਧੁਵਲੋਹਿਤਾਸਿ ਧੁਵਚੋਲ਼ਾਸਿ ਪਗ੍ਘਰਨ੍ਤੀਸਿ ਸਿਖਰਣੀਸਿ ਇਤ੍ਥਿਪਣ੍ਡਕਾਸਿ ਵੇਪੁਰਿਸਿਕਾਸਿ ਸਮ੍ਭਿਨ੍ਨਾਸਿ ਉਭਤੋਬ੍ਯਞ੍ਜਨਾਸੀ’’ਤਿ ਏਕਾਦਸਸੁ ਪਦੇਸੁ ‘‘ਸਿਖਰਣੀਸਿ ਸਮ੍ਭਿਨ੍ਨਾਸਿ ਉਭਤੋਬ੍ਯਞ੍ਜਨਾਸੀ’’ਤਿ ਪਦਤ੍ਤਯਂ ਪਚ੍ਚੇਕਂ ਆਪਤ੍ਤਿਕਰਂ, ਇਮਿਨਾ ਪਦਤ੍ਤਯੇਨ ਸਹ ਪੁਬ੍ਬੇ ਵੁਤ੍ਤਾਨਿ ਵਚ੍ਚਮਗ੍ਗਪਸ੍ਸਾਵਮਗ੍ਗਮੇਥੁਨਧਮ੍ਮਪਦਾਨਿ ਤੀਣਿ ਚਾਤਿ ਛਪ੍ਪਦਾਨਂ ਪਚ੍ਚੇਕਂ ਆਪਤ੍ਤਿਕਰਤ੍ਤਾ ਇਤੋ ਪਰਾਨਿ ਅਨਿਮਿਤ੍ਤਾਦੀਨਿ ਅਟ੍ਠ ਪਦਾਨਿ ‘‘ਅਨਿਮਿਤ੍ਤਾਸਿ ਮੇਥੁਨਧਮ੍ਮਂ ਦੇਹੀ’’ਤਿਆਦਿਨਾ ਨਯੇਨ ਮੇਥੁਨਧਮ੍ਮਪਦੇਨ ਸਹ ਘਟੇਤ੍ਵਾ ਵੁਤ੍ਤਾਨੇਵ ਆਪਤ੍ਤਿਕਰਾਨੀਤਿ ਵੇਦਿਤਬ੍ਬਾਨਿ, ‘‘ਮੇਥੁਨਯਾਚਨਾਦੀਹੀ’’ਤਿ ਏਤ੍ਥ ਆਦਿ-ਸਦ੍ਦਸਙ੍ਗਹਿਤੇਸੁ ‘‘ਅਨਿਮਿਤ੍ਤਾਸੀ’’ਤਿਆਦੀਸੁ ਏਕਾਦਸਸੁ ਅਕ੍ਕੋਸਪਦੇਸੁ ਅਨ੍ਤੋਗਧਤ੍ਤੇਪਿ ਕੇਵਲਂ ਆਪਤ੍ਤਿਕਰਤ੍ਤਾ ਗਰੁਤਰਂ ਪਦਤ੍ਤਯਂ ਵਿਸੁਂ ਸਙ੍ਗਹੇਤਬ੍ਬਨ੍ਤਿ ਞਾਪੇਤੁਮਾਹ ‘‘ਸਿਖਰਣੀਸੀ’’ਤਿਆਦਿ.

ਸਿਖਰਣੀਸੀਤਿ ਏਤ੍ਥ ‘‘ਸਿਖਰਣੀ ਅਸੀ’’ਤਿ ਪਦਚ੍ਛੇਦੋ. ‘‘ਅਸੀ’’ਤਿ ਪਚ੍ਚੇਕਂ ਯੋਜੇਤਬ੍ਬਂ. ਤੁ-ਸਦ੍ਦੋ ਕੇਵਲਯੁਤ੍ਤਮ੍ਪਿ ਆਪਤ੍ਤਿਕਰਂ ਹੋਤੀਤਿ ਵਿਸੇਸਂ ਜੋਤੇਤਿ. ਕੇਵਲੇਨਾਪਿ ਅਕ੍ਕੋਸਵਚਨੇਨਾਤਿ ਯੋਜਨਾ. ਸਿਖਰਣੀਸੀਤਿ ਬਹਿ ਨਿਕ੍ਖਨ੍ਤਆਣਿਮਂਸਾ ਭਵਸਿ. ਸਮ੍ਭਿਨ੍ਨਾਸੀਤਿ ਮਿਸ੍ਸੀਭੂਤਵਚ੍ਚਮਗ੍ਗਪਸ੍ਸਾਵਮਗ੍ਗਾ. ਉਭਤੋਬ੍ਯਞ੍ਜਨਾਸੀਤਿ ਇਤ੍ਥਿਨਿਮਿਤ੍ਤੇਨ, ਪੁਰਿਸਨਿਮਿਤ੍ਤੇਨ ਚਾਤਿ ਉਭਤੋਬ੍ਯਞ੍ਜਨੇਹਿ ਸਮਨ੍ਨਾਗਤਾ. ‘‘ਅਯਂ ਇਤ੍ਥੀ, ਅਯਂ ਪੁਰਿਸੋ’’ਤਿ ਬ੍ਯਞ੍ਜਯਤੀਤਿ ਬ੍ਯਞ੍ਜਨਂ, ਮੁਤ੍ਤਕਰਣਾਨਿ. ਸੁਣਨ੍ਤਿਯਾਤਿ ਏਤ੍ਥ ‘‘ਵਿਞ੍ਞੁਮਨੁਸ੍ਸਿਤ੍ਥਿਯਾ’’ਤਿ ਅਧਿਕਾਰਤੋ ਲਬ੍ਭਤਿ, ਇਮਿਨਾ ਅਕ੍ਕੋਸਿਤਬ੍ਬਵਤ੍ਥੁ ਦਸ੍ਸਿਤਂ ਹੋਤਿ. ਭਾਸਿਤਂ ਸੁਣਨ੍ਤਿਯਾ ਸੁਭਾਸਿਤਦੁਬ੍ਭਾਸਿਤਂ ਜਾਨਨ੍ਤਿਯਾ ਮਨੁਸ੍ਸਿਤ੍ਥਿਯਾ ਵਿਸਯੇ ਪਵਤ੍ਤਅਕ੍ਕੋਸਵਚਨੇਨ ਸਙ੍ਘਾਦਿਸੇਸੋ ਹੋਤੀਤਿ ਅਤ੍ਥੋ.

੩੫੬. ਪੁਨਪ੍ਪੁਨਂ ਓਭਾਸਨ੍ਤਸ੍ਸ ਵਾਚਾਨਂ ਗਣਨਾਯ ਗਰੁਕਾ ਸਿਯੁਨ੍ਤਿ ਯੋਜਨਾ. ਏਤ੍ਥ ‘‘ਏਕਂ ਇਤ੍ਥਿ’’ਨ੍ਤਿ ਅਜ੍ਝਾਹਰਿਤਬ੍ਬਂ. ਏਕਵਾਚਾਯ ਬਹੂ ਓਭਾਸਨ੍ਤਸ੍ਸ ਚ ਇਤ੍ਥੀਨਂ ਗਣਨਾਯ ਗਰੁਕਾ ਸਿਯੁਨ੍ਤਿ ਯੋਜਨਾ. ਏਤ੍ਥਾਪਿ ‘‘ਇਤ੍ਥਿਯੋਪੀ’’ਤਿ ਲਬ੍ਭਤਿ.

੩੫੭. ਸਾ ਚੇ ਨਪ੍ਪਟਿਜਾਨਾਤੀਤਿ ਏਤ੍ਥ ‘‘ਯਂ ਸੁਣਨ੍ਤਿਂ ਮਨੁਸ੍ਸਿਤ੍ਥਿਂ ਦ੍ਵਿਨ੍ਨਂ ਮਗ੍ਗਾਨਂ ਵਣ੍ਣਾਵਣ੍ਣਵਸੇਨ ਓਭਾਸਤਿ, ਸਾ ਚੇ ਨ ਪਟਿਜਾਨਾਤੀ’’ਤਿ ਸਾਮਤ੍ਥਿਯਾ ਲਬ੍ਭਮਾਨਂ ਆਦਾਯ ਯੋਜੇਤਬ੍ਬਂ. ਅਤ੍ਤਨੋ ਭਾਸਿਤਂ ਦੁਟ੍ਠੁਲ੍ਲਂ ਵੁਤ੍ਤਸਮਨਨ੍ਤਰਮੇਵ ਅਤ੍ਥਵਸੇਨ ਸਚੇ ਨ ਜਾਨਾਤੀਤਿ ਅਤ੍ਥੋ. ਤਸ੍ਸਾਤਿ ਤਸ੍ਸ ਦੁਟ੍ਠੁਲ੍ਲਭਾਸਿਤਭਿਕ੍ਖੁਸ੍ਸ. ਉਬ੍ਭਜਾਣੁਂ, ਅਧਕ੍ਖਕਂ ਵਾ ਆਦਿਸ੍ਸ ਭਣਨੇ ਚਾਪਿ ਤਸ੍ਸ ਥੁਲ੍ਲਚ੍ਚਯਂ ਸਿਯਾਤਿ ਯੋਜਨਾ. ਭਣਨੇਤਿ ਦ੍ਵਿਨ੍ਨਂ ਮਗ੍ਗਾਨਂ ਵਣ੍ਣਾਦਿਕਥਨੇ, ‘‘ਭਣਤੋ’’ਤਿਪਿ ਲਿਖਨ੍ਤਿ, ਭਣਨ੍ਤਸ੍ਸ, ਭਣਨਹੇਤੂਤਿ ਅਤ੍ਥੋ. ਹੇਤੁਮ੍ਹਿ ਅਯਮਨ੍ਤਪਚ੍ਚਯੋ ‘‘ਅਸਮ੍ਬੁਧ’’ਨ੍ਤਿਆਦੀਸੁ (ਪਾਰਾ. ਅਟ੍ਠ. ੧.ਗਨ੍ਥਾਰਮ੍ਭਕਥਾ) ਵਿਯ. ਉਬ੍ਭਜਾਣੁਨ੍ਤਿ ਜਾਣੁਤੋ ਉਦ੍ਧਂ. ਅਕ੍ਖੇਕਨ੍ਤਿ ਅਕ੍ਖਕਤੋ ਹੇਟ੍ਠਾ.

੩੫੮. ਉਬ੍ਭਕ੍ਖਕਨ੍ਤਿ ਅਕ੍ਖਕਤੋ ਉਦ੍ਧਂ. ਅਧੋਜਾਣੁਮਣ੍ਡਲਨ੍ਤਿ ਜਾਣੁਮਣ੍ਡਲਤੋ ਅਧੋ. ਉਦ੍ਦਿਸਨ੍ਤਿ ਉਦ੍ਦਿਸ੍ਸ. ‘‘ਉਦ੍ਦਿਸ੍ਸੁਬ੍ਭਕ੍ਖਂ ਵਾ ਤਥਾ, ਅਧੋਜਾਣੁਮਣ੍ਡਲ’’ਨ੍ਤਿ ਚ ਲਿਖਨ੍ਤਿ, ਸੋ ਪਾਠੋ ਸੁਨ੍ਦਰੋ. ਵਣ੍ਣਾਦਿਭਣਨੇ ਦੁਕ੍ਕਟਨ੍ਤਿ ਸਮ੍ਬਨ੍ਧੋ. ‘‘ਵਿਞ੍ਞੁਮਨੁਸ੍ਸਿਤ੍ਥਿਯਾ’’ਤਿ ਅਧਿਕਾਰਤੋ ਲਬ੍ਭਤਿ. ਕਾਯਪਟਿਬਦ੍ਧੇ ਵਣ੍ਣਾਦਿਭਣਨੇ ਦੁਕ੍ਕਟਨ੍ਤਿ ਏਤ੍ਥਾਪਿ ਏਸੇਵ ਨਯੋ. ਵਚ੍ਚਮਗ੍ਗਪਸ੍ਸਾਵਮਗ੍ਗਾ ਸਙ੍ਘਾਦਿਸੇਸਕ੍ਖੇਤ੍ਤਂ, ਅਧਕ੍ਖਕਂ ਉਬ੍ਭਜਾਣੁਮਣ੍ਡਲਂ ਥੁਲ੍ਲਚ੍ਚਯਕ੍ਖੇਤ੍ਤਂ, ਉਦ੍ਧਕ੍ਖਕਂ ਅਧੋਜਾਣੁਮਣ੍ਡਲਂ ਦੁਕ੍ਕਟਕ੍ਖੇਤ੍ਤਨ੍ਤਿ ਇਮੇਸੁ ਤੀਸੁ ਖੇਤ੍ਤੇਸੁ ਅਕ੍ਖਕਞ੍ਚੇਵ ਜਾਣੁਮਣ੍ਡਲਞ੍ਚ ਥੁਲ੍ਲਚ੍ਚਯਦੁਕ੍ਕਟਾਨਂ ਦ੍ਵਿਨ੍ਨਂ ਅਵਧਿਭੂਤਂ ਕਤ੍ਥ ਸਙ੍ਗਯ੍ਹਤੀਤਿ? ਦੁਕ੍ਕਟਕ੍ਖੇਤ੍ਤੇਯੇਵ ਸਙ੍ਗਯ੍ਹਤਿ. ਯਥਾਹ ਅਟ੍ਠਕਥਾਯਂ ‘‘ਅਕ੍ਖਕਂ, ਪਨ ਜਾਣੁਮਣ੍ਡਲਞ੍ਚ ਏਤ੍ਥੇਵ ਦੁਕ੍ਕਟਕ੍ਖੇਤ੍ਤੇ ਸਙ੍ਗਹਂ ਗਚ੍ਛਤੀ’’ਤਿ (ਪਾਰਾ. ਅਟ੍ਠ. ੨.੨੮੬).

੩੫੯. ਪਣ੍ਡਕੇ ਯਕ੍ਖਿਪੇਤੀਸੁ ਦ੍ਵਿਨ੍ਨਂ ਮਗ੍ਗਾਨਂ ਵਣ੍ਣਾਦਿਭਣਨੇ ਤਸ੍ਸ ਭਣਨ੍ਤਸ੍ਸ ਥੁਲ੍ਲਚ੍ਚਯਂ ਭਵੇਤਿ ਅਧਿਕਾਰਵਸੇਨ ਆਗਤਪਦੇਹਿ ਸਹ ਯੋਜੇਤਬ੍ਬਂ. ਪਣ੍ਡਕਾਦੀਸੂਤਿ ਆਦਿ-ਸਦ੍ਦੇਨ ਯਕ੍ਖਿਪੇਤੀਨਂ ਗਹਣਂ.

੩੬੦. ਉਬ੍ਭਕ੍ਖਕ…ਪੇ… ਅਯਂ ਨਯੋਤਿ ‘‘ਪਣ੍ਡਕਾਦੀਸੂ’’ਤਿ ਇਮਿਨਾ ਯੋਜੇਤਬ੍ਬਂ. ਅਯਂ ਨਯੋਤਿ ‘‘ਦੁਕ੍ਕਟਮੇਵ ਹੋਤੀ’’ਤਿ ਵੁਤ੍ਤੋ ਨਯੋ. ਸਬ੍ਬਤ੍ਥਾਤਿ ਸਙ੍ਘਾਦਿਸੇਸਥੁਲ੍ਲਚ੍ਚਯਦੁਕ੍ਕਟਕ੍ਖੇਤ੍ਤਵਸੇਨ ਸਬ੍ਬੇਸੁ ਖੇਤ੍ਤੇਸੁ.

੩੬੧. ਅਤ੍ਥਪੁਰੇਕ੍ਖਾਰੋ ਹੁਤ੍ਵਾ ਓਭਾਸਤੋਪਿ ਅਨਾਪਤ੍ਤੀਤਿ ਯੋਜਨਾ. ਮਾਤੁਗਾਮਾਨਂ ‘‘ਅਨਿਮਿਤ੍ਤਾਸੀ’’ਤਿਆਦੀਸੁ ਪਦੇਸੁ ਅਤ੍ਥਕਥਨਂ ਪੁਰੇਕ੍ਖਤ੍ਵਾ ‘‘ਅਨਿਮਿਤ੍ਤਾਸੀ’’ਤਿਆਦਿਪਦਂ ਭਣਨ੍ਤਸ੍ਸ ਵਾ ਮਾਤੁਗਾਮੇਹਿ ਸਹ ਅਟ੍ਠਕਥਂ ਸਜ੍ਝਾਯਨ੍ਤਾਨਂ ਵਾ ਅਨਾਪਤ੍ਤੀਤਿ ਅਤ੍ਥੋ. ਧਮ੍ਮਪੁਰੇਕ੍ਖਾਰੋ ਹੁਤ੍ਵਾ ਓਭਾਸਤੋ ਅਨਾਪਤ੍ਤੀਤਿ ਯੋਜਨਾ. ਪਾਲ਼ਿਧਮ੍ਮਂ ਵਾਚੇਨ੍ਤਸ੍ਸ ਵਾ ਤਾਸਂ ਸੁਣਨ੍ਤੀਨਂ ਸਜ੍ਝਾਯਨਂ ਵਾ ਪੁਰੇਕ੍ਖਤ੍ਵਾ ‘‘ਅਨਿਮਿਤ੍ਤਾਸੀ’’ਤਿਆਦੀਸੁ ਪਦੇਸੁ ਯਂ ਕਿਞ੍ਚਿ ਪਬ੍ਬਜਿਤਸ੍ਸ ਵਾ ਇਤਰਸ੍ਸ ਵਾ ਮਾਤੁਗਾਮਸ੍ਸ ਕਥੇਨ੍ਤਸ੍ਸ ਅਨਾਪਤ੍ਤੀਤਿ. ਪੁਰੇਕ੍ਖਤ੍ਵਾਨੁਸਾਸਨਿਨ੍ਤਿ ‘‘ਇਦਾਨਿ ਅਨਿਮਿਤ੍ਤਾਸਿ…ਪੇ… ਉਭਤੋਬ੍ਯਞ੍ਜਨਾਸਿ, ਅਪ੍ਪਮਾਦਂ ਦਾਨਿ ਕਰੇਯ੍ਯਾਸਿ, ਯਥਾ ਆਯਤਿਮ੍ਪਿ ਏਵਰੂਪਾ ਨਾਹੋਸੀ’’ਤਿ ਅਨੁਸਾਸਨਿਂ ਪੁਰੇਕ੍ਖਤ੍ਵਾ.

੩੬੨. ਉਮ੍ਮਤ੍ਤਕਾਦੀਨਨ੍ਤਿ ਪਿਤ੍ਤੁਮ੍ਮਤ੍ਤਕਯਕ੍ਖੁਮ੍ਮਤ੍ਤਕਵਸੇਨ ਦ੍ਵਿਨ੍ਨਂ ਉਮ੍ਮਤ੍ਤਕਾਨਞ੍ਚ ਆਦਿ-ਸਦ੍ਦਸਙ੍ਗਹਿਤਸ੍ਸ ਇਮਸ੍ਮਿਂ ਆਦਿਕਮ੍ਮਿਕਸ੍ਸ ਉਦਾਯਿਤ੍ਥੇਰਸ੍ਸ ਚ ਅਨਾਪਤ੍ਤੀਤਿ ਵੁਤ੍ਤਂ ਹੋਤਿ. ‘‘ਇਦਂ ਸਿਕ੍ਖਾਪਦਂ ਤਿਸਮੁਟ੍ਠਾਨਂ ਕਾਯਚਿਤ੍ਤਤੋ ਚ ਵਾਚਾਚਿਤ੍ਤਤੋ ਚ ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਤਿ. ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤ’’ਨ੍ਤਿ (ਪਾਰਾ. ਅਟ੍ਠ. ੨.੨੮੭) ਅਟ੍ਠਕਥਾਯਂ ਵੁਤ੍ਤਪਕਿਣ੍ਣਕਵਿਨਿਚ੍ਛਯਂ ਦਸ੍ਸੇਤਿ ‘‘ਸਮੁਟ੍ਠਾਨਾਦਯੋ…ਪੇ… ਤੁਲ੍ਯਾਵਾ’’ਤਿ. ਵੇਦਨਾਯ ਅਦਿਨ੍ਨਾਦਾਨੇਨ ਅਸਮਤ੍ਤਾ ‘‘ਵੇਦਨੇਤ੍ਥ ਦ੍ਵਿਧਾ ਮਤਾ’’ਤਿ ਆਹ, ਸੁਖੋਪੇਕ੍ਖਾਵੇਦਨਾਵਸੇਨ ਦ੍ਵਿਧਾ ਮਤਾਤਿ ਅਤ੍ਥੋ.

ਦੁਟ੍ਠੁਲ੍ਲਵਾਚਾਕਥਾਵਣ੍ਣਨਾ.

੩੬੩. ਕਾਮਪਾਰਿਚਰਿਯਾਯਾਤਿ ਮੇਥੁਨਧਮ੍ਮਸਙ੍ਖਾਤੇਨ ਕਾਮੇਨ ਪਾਰਿਚਰਿਯਾਯ, ਮੇਥੁਨਧਮ੍ਮੇਨ ਪਾਰਿਚਰਿਯਾਯਾਤਿ ਅਤ੍ਥੋ. ਅਥ ਵਾ ਕਾਮਿਤਾ ਪਤ੍ਥਿਤਾਤਿ ਕਾਮਾ, ਮੇਥੁਨਰਾਗਵਸੇਨ ਪਤ੍ਥਿਤਾਤਿ ਅਤ੍ਥੋ, ਕਾਮਾ ਚ ਸਾ ਪਾਰਿਚਰਿਯਾ ਚਾਤਿ ਕਾਮਪਾਰਿਚਰਿਯਾ, ਤਸ੍ਸਾ ਕਾਮਪਾਰਿਚਰਿਯਾਯਾਤਿਪਿ ਗਹੇਤਬ੍ਬਂ, ਮੇਥੁਨਰਾਗਚਿਤ੍ਤੇਨ ਅਭਿਪਤ੍ਥਿਤਪਾਰਿਚਰਿਯਾਯਾਤਿਅਤ੍ਥੋ. ‘‘ਵਣ੍ਣਂ ਭਾਸਤੋ’’ਤਿ ਇਮਿਨਾ ਸਮ੍ਬਨ੍ਧੋ, ‘‘ਏਤਦਗ੍ਗਂ ਭਗਿਨਿ ਪਾਰਿਚਰਿਯਾਨਂ ਯਾ ਮਾਦਿਸਂ ਸੀਲਵਨ੍ਤਂ ਕਲ੍ਯਾਣਧਮ੍ਮਂ ਬ੍ਰਹ੍ਮਚਾਰਿਂ ਏਤੇਨ ਧਮ੍ਮੇਨ ਪਰਿਚਰੇਯ੍ਯਾ’’ਤਿ ਅਤ੍ਤਨੋ ਮੇਥੁਨਧਮ੍ਮੇਨ ਪਾਰਿਚਰਿਯਾਯ ਗੁਣਂ ਆਨਿਸਂਸਂ ਕਥੇਨ੍ਤਸ੍ਸਾਤਿ ਵੁਤ੍ਤਂ ਹੋਤਿ. ਤਸ੍ਮਿਂਯੇਵ ਖਣੇਤਿ ਤਸ੍ਮਿਂ ਭਣਿਤਕ੍ਖਣੇਯੇਵ. ਸਾ ਚੇ ਜਾਨਾਤੀਤਿ ਯਂ ਉਦ੍ਦਿਸ੍ਸ ਅਭਾਸਿ, ਸਚੇ ਸਾ ਵਚਨਸਮਨਨ੍ਤਰਮੇਵ ਜਾਨਾਤਿ.

੩੬੪. ਸਾ ਮਨੁਸ੍ਸਿਤ੍ਥੀ ਨੋ ਜਾਨਾਤਿ ਚੇ, ਤਸ੍ਸ ਥੁਲ੍ਲਚ੍ਚਯਨ੍ਤਿ ਸਮ੍ਬਨ੍ਧੋ. ਯਕ੍ਖਿਪੇਤਿਦੇਵੀਸੁ ਜਾਨਨ੍ਤੀਸੁ, ਪਣ੍ਡਕੇ ਚ ਜਾਨਨ੍ਤੇ ਅਤ੍ਤਕਾਮਪਾਰਿਚਰਿਯਾਯ ਵਣ੍ਣਂ ਭਾਸਤੋ ਤਸ੍ਸ ਭਿਕ੍ਖੁਨੋ ਥੁਲ੍ਲਚ੍ਚਯਂ ਹੋਤੀਤਿ ਯੋਜਨਾ. ਸੇਸੇਤਿ ਪੁਰਿਸਤਿਰਚ੍ਛਾਨਗਤਵਿਸਯੇ, ਯਕ੍ਖਿਆਦੀਨਂ ਅਜਾਨਨਵਿਸਯੇ ਚ ਅਤ੍ਤਕਾਮਪਾਰਿਚਰਿਯਾਯ ਵਣ੍ਣਂ ਭਾਸਤੋ ਤਸ੍ਸ ਆਪਤ੍ਤਿ ਦੁਕ੍ਕਟਂ ਹੋਤੀਤਿ ਯੋਜਨਾ.

੩੬੫. ਚੀਵਰਾਦੀਹੀਤਿ ਚੀਵਰਪਿਣ੍ਡਪਾਤਾਦੀਹਿ. ਵਤ੍ਥੁਕਾਮੇਹੀਤਿ ਤਣ੍ਹਾਯ ਵਤ੍ਥੁਭਾਵੇਨ ਵਤ੍ਥੂ ਚ ਕਾਮਿਤਤ੍ਤਾ ਕਾਮਾਤਿ ਚ ਸਙ੍ਖਾਤੇਹਿ ਪਚ੍ਚਯੇਹਿ.

੩੬੬. ਰਾਗੋ ਏਵ ਰਾਗਤਾ. ‘‘ਰਾਗਿਤਾ’’ਤਿ ਵਾ ਪਾਠੋ, ਰਾਗੋ ਅਸ੍ਸ ਅਤ੍ਥੀਤਿ ਰਾਗੀ, ਤਸ੍ਸ ਭਾਵੋ ਰਾਗਿਤਾ, ਅਤ੍ਤਕਾਮਪਾਰਿਚਰਿਯਾਯ ਰਾਗੋਤਿ ਅਤ੍ਥੋ. ਓਭਾਸੋਤਿ ਅਤ੍ਤਕਾਮਪਾਰਿਚਰਿਯਾਯ ਗੁਣਭਣਨਂ. ਤੇਨ ਰਾਗੇਨਾਤਿ ਕਾਮਪਾਰਿਚਰਿਯਾਯ ਰਾਗੇਨ. ਖਣੇ ਤਸ੍ਮਿਨ੍ਤਿ ਭਣਿਤਕ੍ਖਣੇ. ਵਿਜਾਨਨਨ੍ਤਿ ਯਂ ਮਨੁਸ੍ਸਿਤ੍ਥਿਂ ਉਦ੍ਦਿਸ੍ਸ ਅਤ੍ਤਕਾਮਪਾਰਿਚਰਿਯਾਯ ਵਣ੍ਣਂ ਭਣਤਿ, ਤਾਯ ਤਸ੍ਸ ਵਚਨਤ੍ਥਸ੍ਸ ਵਿਜਾਨਨਨ੍ਤਿ ਵੁਤ੍ਤਂ ਹੋਤਿ.

੩੬੭. ਪਞ੍ਚਙ੍ਗਾਨੀਤਿ ਮਨੁਸ੍ਸਿਤ੍ਥਿਤਾ, ਤਂਸਞ੍ਞਿਤਾ, ਪਾਰਿਚਰਿਯਾਯ ਰਾਗਿਤਾ, ਤੇਨ ਰਾਗੇਨ ਓਭਾਸਨਂ, ਖਣੇ ਤਸ੍ਮਿਂ ਵਿਜਾਨਨਨ੍ਤਿ ਇਮਾਨਿ ਏਤ੍ਥ ਅਤ੍ਤਕਾਮਪਾਰਿਚਰਿਯਸਿਕ੍ਖਾਪਦੇ ਪਞ੍ਚ ਅਙ੍ਗਾਨਿ, ਪਞ੍ਚ ਆਪਤ੍ਤਿਕਾਰਣਾਨੀਤਿ ਅਤ੍ਥੋ. ਅਸ੍ਸਾਤਿ ਅਤ੍ਤਕਾਮਪਾਰਿਚਰਿਯਸਿਕ੍ਖਾਪਦਸ੍ਸ.

ਅਤ੍ਤਕਾਮਪਾਰਿਚਰਿਯਕਥਾਵਣ੍ਣਨਾ.

੩੬੮. ‘‘ਪਟਿਗ੍ਗਣ੍ਹਾਤੀ’’ਤਿਆਦਿਕਿਰਿਯਾਤ੍ਤਯੋਪਾਦਾਨਸਾਮਤ੍ਥਿਯੇਨ ਤਿਕ੍ਖਤ੍ਤੁਂ ਪਟਿਪਾਦਨਕਂ ‘‘ਯੋ ਭਿਕ੍ਖੂ’’ਤਿ ਚ ‘‘ਗਰੁ ਹੋਤੀ’’ਤਿ ਪਦਸਾਮਤ੍ਥਿਯੇਨ ‘‘ਤਸ੍ਸਾ’’ਤਿ ਚ ਲਬ੍ਭਮਾਨਤ੍ਤਾ ਤਿਵਿਧੇਹਿ ਸਹ ‘‘ਯੋ ਭਿਕ੍ਖੁ ਪੁਰਿਸਸ੍ਸ ਸਨ੍ਦੇਸਂ ਪਟਿਗ੍ਗਣ੍ਹਾਤਿ, ਵੀਮਂਸਤਿ ਪਚ੍ਚਾਹਰਤਿ ਚੇ, ਤਸ੍ਸ ਗਰੁ ਹੋਤੀ’’ਤਿ ਏਕਂ ਵਾਕ੍ਯਂ ਹੋਤਿ. ਏਵਂ ‘‘ਇਤ੍ਥਿਯਾਪਿ ਵਾ’’ਤਿ ਇਮਿਨਾ ਯੋਜਨਾਯਪਿ ਏਕਂ ਵਾਕ੍ਯਂ ਹੋਤੀਤਿ ਇਮਿਸ੍ਸਾ ਗਾਥਾਯ ਵਾਕ੍ਯਦ੍ਵਯਂ ਯੁਜ੍ਜਤਿ.

ਇਧ ਸਨ੍ਦੇਸਕ੍ਕਮਞ੍ਚ ਯੋਜਨਾਕ੍ਕਮਞ੍ਚ ਜਾਨਨਤ੍ਥਂ ਪਠਮਂ ਤਾਵ ਇਤ੍ਥੀਨਞ੍ਚ ਭਰਿਯਾਨਞ੍ਚ ਪਭੇਦੋ ਚ ਸਰੂਪਞ੍ਚ ਵਿਭਾਵੀਯਤਿ – ਤੇਸੁ ਇਤ੍ਥਿਯੋ ਦਸਵਿਧਾ ਹੋਨ੍ਤਿ. ਯਥਾਹ ਪਦਭਾਜਨੇ ‘‘ਦਸ ਇਤ੍ਥਿਯੋ ਮਾਤੁਰਕ੍ਖਿਤਾ ਪਿਤੁਰਕ੍ਖਿਤਾ ਮਾਤਾਪਿਤੁਰਕ੍ਖਿਤਾ ਭਾਤੁਰਕ੍ਖਿਤਾ ਭਗਿਨਿਰਕ੍ਖਿਤਾ ਞਾਤਿਰਕ੍ਖਿਤਾ ਗੋਤ੍ਤਰਕ੍ਖਿਤਾ ਧਮ੍ਮਰਕ੍ਖਿਤਾ ਸਾਰਕ੍ਖਾ ਸਪਰਿਦਣ੍ਡਾ’’ਤਿ. ਭਰਿਯਾ ਚ ਦਸਵਿਧਾ ਹੋਨ੍ਤਿ. ਯਥਾਹ ਪਦਭਾਜਨੇ ‘‘ਦਸ ਭਰਿਯਾਯੋ ਧਨਕ੍ਕੀਤਾ ਛਨ੍ਦਵਾਸਿਨੀ ਭੋਗਵਾਸਿਨੀ ਓਦਪਤ੍ਤਕਿਨੀ ਓਭਟਚੁਮ੍ਬਟਾ ਦਾਸੀ ਚ ਭਰਿਯਾ ਚ ਕਮ੍ਮਕਾਰੀ ਚ ਭਰਿਯਾ ਚ ਧਜਾਹਟਾ ਮੁਹੁਤ੍ਤਿਕਾ’’ਤਿ (ਪਾਰਾ. ੩੦੩). ਇਮਾਸਂ ਪਭੇਦੋ ਚ ਸਰੂਪਾਨਿ ਚ ਸਙ੍ਖੇਪਤੋ ਏਵਂ ਵੇਦਿਤਬ੍ਬਾਨਿ –

ਪੁਰਿਸੇਹਿ ਸਹ ਯਥਾ ਸਂਵਾਸਂ ਨ ਕਰੋਤਿ, ਏਵਂ ਮਾਤਰਾ ਰਕ੍ਖਿਤਾ ਮਾਤੁਰਕ੍ਖਿਤਾ. ਯਥਾਹ ‘‘ਮਾਤੁਰਕ੍ਖਿਤਾ ਨਾਮ ਮਾਤਾ ਰਕ੍ਖਤਿ ਗੋਪੇਤਿ ਇਸ੍ਸਰਿਯਂ ਕਾਰੇਤਿ ਵਸਂ ਵਤ੍ਤੇਤੀ’’ਤਿ. ਪਿਤੁਰਕ੍ਖਿਤਾਦੀਸੁਪਿ ਏਸੇਵ ਨਯੋ. ਤਤ੍ਥ ਯਸ੍ਮਿਂ ਕੋਣ੍ਡਞ੍ਞਾਦਿਗੋਤ੍ਤੇ ਜਾਤਾ, ਤਸ੍ਮਿਂਯੇਵ ਗੋਤ੍ਤੇ ਜਾਤੇਹਿ ਰਕ੍ਖਿਤਾ ਗੋਤ੍ਤਰਕ੍ਖਿਤਾ. ਯਥਾਹ ‘‘ਗੋਤ੍ਤਰਕ੍ਖਿਤਾ ਨਾਮ ਸਗੋਤ੍ਤਾ ਰਕ੍ਖਨ੍ਤੀ’’ਤਿਆਦਿ. ਏਕਂ ਸਤ੍ਥਾਰਂ ਉਦ੍ਦਿਸ੍ਸ ਪਬ੍ਬਜਿਤੇਹਿ ਵਾ ਏਕਗਣਪਰਿਯਾਪਨ੍ਨੇਹਿ ਵਾ ਰਕ੍ਖਿਤਾ ਧਮ੍ਮਰਕ੍ਖਿਤਾ ਨਾਮ. ਯਥਾਹ ‘‘ਧਮ੍ਮਰਕ੍ਖਿਤਾ ਨਾਮ ਸਹਧਮ੍ਮਿਕਾ ਰਕ੍ਖਨ੍ਤੀ’’ਤਿਆਦਿ (ਪਾਰਾ. ੩੦੪). ਸਾਰਕ੍ਖਾ ਨਾਮ ‘‘ਗਬ੍ਭੇਪਿ ਪਰਿਗ੍ਗਹਿਤਾ ਹੋਤਿ ‘ਮਯ੍ਹਂ ਏਸਾ’ਤਿ ਅਨ੍ਤਮਸੋ ਮਾਲਾਗੁਲ਼ਪਰਿਕ੍ਖਿਤ੍ਤਾਪੀ’’ਤਿ ਪਾਲ਼ਿਯਂ ਵੁਤ੍ਤਸਰੂਪਾ. ਸਪਰਿਦਣ੍ਡਾ ਨਾਮ ‘‘ਕੇਹਿਚਿ ਦਣ੍ਡੋ ਠਪਿਤੋ ਹੋਤਿ ‘ਯੋ ਇਤ੍ਥਨ੍ਨਾਮਂ ਇਤ੍ਥਿਂ ਗਚ੍ਛਤਿ, ਤਸ੍ਸ ਏਤ੍ਤਕੋ ਦਣ੍ਡੋ’’ਤਿ ਵੁਤ੍ਤਸਰੂਪਾਤਿ ਅਯਂ ਦਸਨ੍ਨਂ ਇਤ੍ਥੀਨਂ ਸਰੂਪਸਙ੍ਖੇਪੋ. ਇਮਾਸੁ ਦਸਸੁ ਸਾਰਕ੍ਖਸਪਰਿਦਣ੍ਡਾਨਂ ਦ੍ਵਿਨ੍ਨਂ ਪਰਪੁਰਿਸਸੇਵਾਯਂ ਮਿਚ੍ਛਾਚਾਰੋ ਹੋਤਿ, ਇਤਰਾਸਂ ਨ ਹੋਤਿ. ਇਮਾ ਦਸਪਿ ਪਞ੍ਚਸੀਲਂ ਰਕ੍ਖਨ੍ਤੇਹਿ ਅਗਮਨੀਯਾ.

ਦਸਸੁ ਭਰਿਯਾਸੁ ‘‘ਧਨਕ੍ਕੀਤਾ ਨਾਮ ਧਨੇਨ ਕਿਣਿਤ੍ਵਾ ਵਾਸੇਤੀ’’ਤਿ ਵੁਤ੍ਤਤ੍ਤਾ ਭਰਿਯਭਾਵਾਯ ਅਪ੍ਪਕਂ ਵਾ ਬਹੁਂ ਵਾ ਧਨਂ ਦਤ੍ਵਾ ਗਹਿਤਾ ਧਨਕ੍ਕੀਤਾ ਨਾਮ. ‘‘ਛਨ੍ਦਵਾਸਿਨੀ ਨਾਮ ਪਿਯੋ ਪਿਯਂ ਵਾਸੇਤੀ’’ਤਿ ਵੁਤ੍ਤਤ੍ਤਾ ਅਤ੍ਤਰੁਚਿਯਾ ਸਂਵਸਿਤੇਨ ਪੁਰਿਸੇਨ ਸਮ੍ਪਟਿਚ੍ਛਿਤਾ ਛਨ੍ਦਵਾਸਿਨੀ ਨਾਮ. ‘‘ਭੋਗਵਾਸਿਨੀ ਨਾਮ ਭੋਗਂ ਦਤ੍ਵਾ ਵਾਸੇਤੀ’’ਤਿ ਵੁਤ੍ਤਤ੍ਤਾ ਉਦੁਕ੍ਖਲਮੁਸਲਾਦਿਗੇਹੋਪਕਰਣਂ ਲਭਿਤ੍ਵਾ ਭਰਿਯਭਾਵਂ ਗਚ੍ਛਨ੍ਤੀ ਜਨਪਦਿਤ੍ਥੀ ਭੋਗਵਾਸਿਨੀ ਨਾਮ. ‘‘ਪਟਵਾਸਿਨੀ ਨਾਮ ਪਟਂ ਦਤ੍ਵਾ ਵਾਸੇਤੀ’’ਤਿ ਵੁਤ੍ਤਤ੍ਤਾ ਨਿਵਾਸਨਮਤ੍ਤਂ ਵਾ ਪਾਰੁਪਨਮਤ੍ਤਂ ਵਾ ਲਦ੍ਧਾ ਭਰਿਯਭਾਵਂ ਗਚ੍ਛਨ੍ਤੀ ਦਲਿਦ੍ਦਿਤ੍ਥੀ ਪਟਵਾਸਿਨੀ ਨਾਮ. ਓਦਪਤ੍ਤਕਿਨੀ ਨਾਮ ‘‘ਉਦਕਪਤ੍ਤਂ ਆਮਸਿਤ੍ਵਾ ਵਾਸੇਤੀ’’ਤਿ (ਪਾਰਾ. ੩੦੪) ਵੁਤ੍ਤਤ੍ਤਾ ‘‘ਇਦਂ ਉਦਕਂ ਵਿਯ ਸਂਸਟ੍ਠਾ ਅਭੇਜ੍ਜਾ ਹੋਥਾ’’ਤਿ ਵਤ੍ਵਾ ਏਕਸ੍ਮਿਂ ਉਦਕਪਤ੍ਤੇ ਪੁਰਿਸੇਨ ਸਦ੍ਧਿਂ ਹਤ੍ਥਂ ਓਤਾਰੇਤ੍ਵਾ ਭਰਿਯਭਾਵਂ ਨੀਤੋ ਮਾਤੁਗਾਮੋ ਵੁਚ੍ਚਤਿ. ‘‘ਓਭਟਚੁਮ੍ਬਟਾ ਨਾਮ ਚੁਮ੍ਬਟਂ ਓਰੋਪੇਤ੍ਵਾ ਵਾਸੇਤੀ’’ਤਿ (ਪਾਰਾ. ੩੦੪) ਵੁਤ੍ਤਤ੍ਤਾ ਸੀਸਤੋ ਚੁਮ੍ਬਟਂ ਓਰੋਪੇਤ੍ਵਾ ਭਰਿਯਭਾਵਮੁਪਨੀਤਾ ਕਟ੍ਠਹਾਰਿਕਾਦਿਇਤ੍ਥੀ ਓਭਟਚੁਮ੍ਬਟਾ ਨਾਮ. ਦਾਸੀ ਚ ਭਰਿਯਾ ਚ ਨਾਮ ‘‘ਦਾਸੀ ਚੇਵ ਹੋਤਿ ਭਰਿਯਾ ਚਾ’’ਤਿ (ਪਾਰਾ. ੩੦੪) ਵੁਤ੍ਤਤ੍ਤਾ ਭਰਿਯਂ ਕਤ੍ਵਾ ਵਾਸਿਤਾ ‘‘ਤਸ੍ਸੇਵ ਦਾਸੀ ਚ ਭਰਿਯਾ ਚਾ’’ਤਿ ਵੁਤ੍ਤਾ. ਕਮ੍ਮਕਾਰੀ ਚ ਭਰਿਯਾ ਚ ਨਾਮ ‘‘ਕਮ੍ਮਕਾਰੀ ਚੇਵ ਹੋਤਿ ਭਰਿਯਾ ਚਾ’’ਤਿ (ਪਾਰਾ. ੩੦੪) ਵੁਤ੍ਤਤ੍ਤਾ ਪਧਾਨਿਤ੍ਥਿਨਿਰਪੇਕ੍ਖੇਨ ਕੁਟੁਮ੍ਬਕਿਚ੍ਚਂ ਕਾਰੇਤ੍ਵਾ ਭਰਿਯਭਾਵਂ ਨੀਤਾ ਭਰਿਯਾ ਕਤਕਮ੍ਮਾ ‘‘ਕਮ੍ਮਕਾਰੀ ਚ ਭਰਿਯਾ ਚਾ’’ਤਿ ਵੁਤ੍ਤਾ. ‘‘ਧਜਾਹਟਾ ਨਾਮ ਕਰਮਰਾਨੀਤਾ ਵੁਚ੍ਚਤੀ’’ਤਿ (ਪਾਰਾ. ੩੦੪) ਵੁਤ੍ਤਤ੍ਤਾ ਧਜਂ ਉਸ੍ਸਾਪੇਤ੍ਵਾ ਗਚ੍ਛਨ੍ਤਿਯਾ ਮਹਾਸੇਨਾਯ ਸਦ੍ਧਿਂ ਗਨ੍ਤ੍ਵਾ ਪਰਵਿਸਯਂ ਵਿਲੁਮ੍ਪਨ੍ਤੇਨ ਪਚ੍ਛਿਨ੍ਦਿਤ੍ਵਾ ਆਨੇਤ੍ਵਾ ਭਰਿਯਭਾਵਮੁਪਨੀਤਾ ਇਤ੍ਥੀ ਧਜਾਹਟਾ ਨਾਮ. ‘‘ਮੁਹੁਤ੍ਤਿਕਾ ਨਾਮ ਤਙ੍ਖਣਿਕਾ ਵੁਚ੍ਚਤੀ’’ਤਿ (ਪਾਰਾ. ੩੦੪) ਵੁਤ੍ਤਤ੍ਤਾ ਅਚਿਰਕਾਲਂ ਸਂਵਾਸਤ੍ਥਾਯ ਗਹਿਤਾ ਇਤ੍ਥੀ ਮੁਹੁਤ੍ਤਿਕਾ ਨਾਮਾਤਿ ਅਯਂ ਦਸਨ੍ਨਂ ਭਰਿਯਾਨਂ ਸਰੂਪਸਙ੍ਖੇਪੋ. ਯਥਾਵੁਤ੍ਤਾਸੁ ਦਸਸੁ ਇਤ੍ਥੀਸੁ ਅਞ੍ਞਤਰਂ ਦਸਨ੍ਨਂ ਭਰਿਯਾਨਂ ਅਞ੍ਞਤਰਟ੍ਠਾਨੇ ਠਪਨਤ੍ਥਮਧਿਪ੍ਪੇਤਭਾਵਂ ਵਤ੍ਤੁਂ ਪੁਰਿਸੇਨ ‘‘ਗਚ੍ਛ ਭਨ੍ਤੇ ਇਤ੍ਥਨ੍ਨਾਮਂ ਮਾਤੁਰਕ੍ਖਿਤਂ ਬ੍ਰੂਹਿ ‘ਹੋਹਿ ਕਿਰ ਇਤ੍ਥਨ੍ਨਾਮਸ੍ਸ ਭਰਿਯਾ ਧਨਕ੍ਕੀਤਾ’ਤਿ’’ਆਦਿਨਾ ਨਯੇਨ ਦਿਨ੍ਨਸਨ੍ਦੇਸਂ ‘‘ਸਾਧੁ ਉਪਾਸਕਾ’’ਤਿਆਦਿਨਾ ਨਯੇਨ ਵਚੀਭੇਦਂ ਕਤ੍ਵਾ ਵਾ ਸੀਸਕਮ੍ਪਨਾਦਿਵਸੇਨ ਵਾ ਪਟਿਗ੍ਗਣ੍ਹਾਤੀਤਿ ਆਹ ‘‘ਪਟਿਗ੍ਗਣ੍ਹਾਤਿ ਸਨ੍ਦੇਸਂ ਪੁਰਿਸਸ੍ਸਾ’’ਤਿ.

ਏਤ੍ਥ ਪੁਰਿਸਸ੍ਸਾਤਿ ਉਪਲਕ੍ਖਣਤ੍ਤਾ ‘‘ਪੁਰਿਸਸ੍ਸ ਮਾਤਾ ਭਿਕ੍ਖੁਂ ਪਹਿਣਤੀ’’ਤਿਆਦਿਨਾ (ਪਾਰਾ. ੩੨੧) ਨਯੇਨ ਪਾਲ਼ਿਯਂ ਵੁਤ੍ਤਪੁਰਿਸਸ੍ਸ ਮਾਤਾਪਿਤੁਆਦਯੋ ਚ ਗਹੇਤਬ੍ਬਾ. ਵੀਮਂਸਤੀਤਿ ਏਵਂ ਪਟਿਗ੍ਗਹਿਤਸਾਸਨਂ ਤਸ੍ਸਾਯੇਵ ਏਕਂਸੇਨ ਅਵਿਰਾਧੇਤ੍ਵਾ ਵਦਨ੍ਤਸ੍ਸ ਮਾਤਾਪਿਤੁਆਦੀਨਮਞ੍ਞਤਰਸ੍ਸ ਵਾ ਆਰੋਚੇਤੀਤਿ ਅਤ੍ਥੋ. ਏਤ੍ਥਾਪਿ ਵੀਮਂਸਤੀਤਿ ਉਪਲਕ੍ਖਣਤ੍ਤਾ ‘‘ਪਟਿਗ੍ਗਣ੍ਹਾਤਿ ਅਨ੍ਤੇਵਾਸਿਂ ਵੀਮਂਸਾਪੇਤ੍ਵਾ ਅਤ੍ਤਨਾ ਪਚ੍ਚਾਹਰਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸਾ’’ਤਿ (ਪਾਰਾ. ੩੩੮) ਵੁਤ੍ਤਤ੍ਤਾ ਵੀਮਂਸਾਪੇਤੀਤਿਪਿ ਗਹੇਤਬ੍ਬਂ. ਪਚ੍ਚਾਹਰਤੀਤਿ ਤਥਾ ਆਹਟਂ ਸਾਸਨਂ ਸੁਤ੍ਵਾ ਤਸ੍ਸਾ ਇਤ੍ਥਿਯਾ ਸਮ੍ਪਟਿਚ੍ਛਿਤੇ ਚ ਅਸਮ੍ਪਟਿਚ੍ਛਿਤੇ ਚ ਲਜ੍ਜਾਯ ਤੁਣ੍ਹੀਭੂਤਾਯ ਚ ਤਂ ਪਵਤ੍ਤਿਂ ਪਚ੍ਚਾਹਰਿਤ੍ਵਾ ਆਚਿਕ੍ਖਤੀਤਿ ਵੁਤ੍ਤਂ ਹੋਤਿ. ਇਧਾਪਿ ਪਚ੍ਚਾਹਰਤੀਤਿ ਉਪਲਕ੍ਖਣਤ੍ਤਾ ‘‘ਪਟਿਗ੍ਗਣ੍ਹਾਤਿ ਵੀਮਂਸਤਿ ਅਨ੍ਤੇਵਾਸਿਂ ਪਚ੍ਚਾਹਰਾਪੇਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸਾ’’ਤਿ (ਪਾਰਾ. ੩੩੮) ਵੁਤ੍ਤਤ੍ਤਾ ਪਚ੍ਚਾਹਰਾਪੇਤੀਤਿ ਚ ਗਹੇਤਬ੍ਬਂ.

‘‘ਇਤ੍ਥਿਯਾਪਿ ਵਾ’’ਤਿ ਇਮਿਨਾ ਯੋਜੇਤ੍ਵਾ ਗਹਿਤਦੁਤਿਯਵਾਕ੍ਯੇ ਚ ਏਵਮੇਵ ਅਤ੍ਥੋ ਵਤ੍ਤਬ੍ਬੋ. ਤਤ੍ਥ ਸਨ੍ਦੇਸਕ੍ਕਮੋ ਪਨ ‘‘ਮਾਤੁਰਕ੍ਖਿਤਾ ਭਿਕ੍ਖੁਂ ਪਹਿਣਤਿ ‘ਗਚ੍ਛ ਭਨ੍ਤੇ ਇਤ੍ਥਨ੍ਨਾਮਂ ਬ੍ਰੂਹਿ ‘ਹੋਮਿ ਇਤ੍ਥਨ੍ਨਾਮਸ੍ਸ ਭਰਿਯਾ ਧਨਕ੍ਕੀਤਾ’ਤਿ’’ਆਦਿਪਾਲ਼ਿਨਯੇਨ (ਪਾਰਾ. ੩੩੦) ਦਟ੍ਠਬ੍ਬੋ. ਏਤ੍ਥਾਪਿ ‘‘ਵੀਮਂਸਾਪੇਤਿ ਪਚ੍ਚਾਹਰਾਪੇਤੀ’’ਤਿ ਇਦਞ੍ਚ ਵੁਤ੍ਤਨਯੇਨੇਵ ਗਹੇਤਬ੍ਬਂ. ਇਮਿਨਾ ਨਿਯਾਮੇਨ ਦਸਨ੍ਨਂ ਇਤ੍ਥੀਨਂ ਨਾਮਂ ਵਿਸੁਂ ਵਿਸੁਂ ਵਤ੍ਵਾ ਦਸਨ੍ਨਂ ਭਰਿਯਾਨਂ ਅਞ੍ਞਤਰਤ੍ਥਾਯ ਦੀਯਮਾਨਸਨ੍ਦੇਸਕ੍ਕਮੋ ਯੋਜੇਤਬ੍ਬੋ. ਇਧਾਪਿ ਇਤ੍ਥਿਯਾਪਿ ਵਾਤਿ ਉਪਲਕ੍ਖਣਤ੍ਤਾ ‘‘ਮਾਤੁਰਕ੍ਖਿਤਾਯ ਮਾਤਾ ਭਿਕ੍ਖੁਂ ਪਹਿਣਤਿ ‘ਗਚ੍ਛ ਭਨ੍ਤੇ ਇਤ੍ਥਨ੍ਨਾਮਂ ਬ੍ਰੂਹਿ ‘ਹੋਤੁ ਇਤ੍ਥਨ੍ਨਾਮਸ੍ਸ ਭਰਿਯਾ ਧਨਕ੍ਕੀਤਾ’’ਤਿਆਦਿਪਾਲ਼ਿਵਸੇਨ (ਪਾਰਾ. ੩੨੪) ਇਤ੍ਥਿਯਾ ਮਾਤੁਪਿਤੁਆਦੀਨਞ੍ਚ ਸਨ੍ਦੇਸਕ੍ਕਮੋ ਯੋਜੇਤਬ੍ਬੋ.

੩੭੦. ਤਂ ਪਵਤ੍ਤਿਂ. ਸਞ੍ਚਰਿਤ੍ਤਾ ਸਞ੍ਚਰਣਹੇਤੁ. ਨ ਮੁਚ੍ਚਤੀਤਿ ਇਤ੍ਥਿਪੁਰਿਸਾਨਂ ਅਨ੍ਤਰੇ ਸਾਸਨਂ ਪਟਿਗ੍ਗਹੇਤ੍ਵਾ ਸਞ੍ਚਰਣਹੇਤੁ ਆਪਜ੍ਜਿਤਬ੍ਬਸਙ੍ਘਾਦਿਸੇਸਤੋ ਨ ਮੁਚ੍ਚਤੀਤਿ ਅਤ੍ਥੋ.

੩੭੧. ਅਞ੍ਞਂ ਵਾਤਿ ਮਾਤਾਪਿਤੁਰਕ੍ਖਿਤਾਦੀਸੁ ਅਞ੍ਞਤਰਂ ਵਾ. ‘‘ਭਾਸਤੋ’’ਤਿ ਲਿਖਨ੍ਤਿ. ‘‘ਪੇਸਿਤੋ’’ਤਿ ਇਮਿਨਾ ਵਿਰੁਦ੍ਧਤ੍ਤਾ ਤਂ ਪਹਾਯ ‘‘ਭਾਸਤੀ’’ਤਿ ਪਾਠੋ ਗਹੇਤਬ੍ਬੋ. ਪਾਠਸੇਸੋ ਵਾ ਕਾਤਬ੍ਬੋ. ‘‘ਯੋ ਅਞ੍ਞਂ ਭਾਸਤਿ ਚੇ, ਤਸ੍ਸ ਭਾਸਤੋਤਿ ਯੋਜਨਾ’’ਤਿ ਨਿਸ੍ਸਨ੍ਦੇਹੇ ਵੁਤ੍ਤਂ. ‘‘ਮਾਤਰਾ ਰਕ੍ਖਿਤਂ ਇਤ੍ਥਿਂ ‘ਗਚ੍ਛ ਬ੍ਰੂਹੀ’ਤਿ ਯੋ ਪੇਸਿਤੋ ਹੋਤਿ, ਤਸ੍ਸ ਪਿਤੁਰਕ੍ਖਿਤਂ ਵਾ ਅਞ੍ਞਂ ਵਾ ਭਾਸਤੋ ਵਿਸਙ੍ਕੇਤੋਵਾ’’ਤਿ, ‘‘ਮਾਤਰਾ…ਪੇ… ਬ੍ਰੂਹੀ’ਤਿ ਪੇਸਿਤੋ ਹੁਤ੍ਵਾ ਪਿਤੁਰਕ੍ਖਿਤਂ ਵਾ ਅਞ੍ਞਂ ਵਾ ਭਾਸਤੋ ਵਿਸਙ੍ਕੇਤੋਵਾ’’ਤਿ ਯੋਜਨਾ ਯੁਤ੍ਤਤਰਾਤਿ ਅਮ੍ਹਾਕਂ ਖਨ੍ਤਿ.

੩੭੨. ਪਟਿਗ੍ਗਣ੍ਹਨਤਾਦੀਹੀਤਿ ਪਟਿਗ੍ਗਣ੍ਹਨਮੇਵ ਪਟਿਗ੍ਗਣ੍ਹਨਤਾ. ਆਦਿ-ਸਦ੍ਦੇਨ ਵੀਮਂਸਨਪਚ੍ਚਾਹਰਣਾਨਿ ਗਹਿਤਾਨਿ. ਸਞ੍ਚਰਿਤ੍ਤੇਤਿ ਸਞ੍ਚਰਣੇ. ਸਮਾਪਨ੍ਨੇਤਿ ਗਤੇ ਸਤਿ. ਗਰੁਕਾਪਤ੍ਤਿਮਾਦਿਸੇਤਿ ਏਤ੍ਥ ‘‘ਤਸ੍ਸਾ’’ਤਿ ਸੇਸੋ. ਆਦਿਸੇਤਿ ਕਥੇਯ੍ਯ.

੩੭੩. ਦ੍ਵੀਹਿ ਥੁਲ੍ਲਚ੍ਚਯਂ ਵੁਤ੍ਤਨ੍ਤਿ ਏਤ੍ਥ ਦ੍ਵੀਹਿ ਦ੍ਵੀਹਿ ਅਙ੍ਗੇਹਿ ਸਞ੍ਚਰਿਤ੍ਤੇ ਸਮਾਪਨ੍ਨੇ ਥੁਲ੍ਲਚ੍ਚਯਂ ਵੁਤ੍ਤਨ੍ਤਿ ਗਹੇਤਬ੍ਬਂ. ‘‘ਪਟਿਗ੍ਗਣ੍ਹਾਤਿ ਵੀਮਂਸਤਿ ਨ ਪਚ੍ਚਾਹਰਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਪਟਿਗ੍ਗਣ੍ਹਾਤਿ ਨ ਵੀਮਂਸਤਿ ਪਚ੍ਚਾਹਰਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਨ ਪਟਿਗ੍ਗਣ੍ਹਾਤਿ ਵੀਮਂਸਤਿ ਪਚ੍ਚਾਹਰਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ (ਪਾਰਾ. ੩੩੮) ਦ੍ਵੀਹਿ ਦ੍ਵੀਹਿ ਅਙ੍ਗੇਹਿ ਥੁਲ੍ਲਚ੍ਚਯਂ ਵੁਤ੍ਤਨ੍ਤਿ ਅਤ੍ਥੋ. ਪਣ੍ਡਕਾਦੀਸੂਤਿ ਪਣ੍ਡਕਯਕ੍ਖਿਪੇਤੀਸੁ. ਤੀਹਿਪਿ ਅਙ੍ਗੇਹਿ ਸਞ੍ਚਰਿਤ੍ਤੇ ਸਮਾਪਨ੍ਨੇ ਥੁਲ੍ਲਚ੍ਚਯਂ ਵੁਤ੍ਤਨ੍ਤਿ ਯੋਜਨਾ.

ਏਕੇਨੇਵਾਤਿ ਏਕੇਨੇਵ ਅਙ੍ਗੇਨ. ਸਬ੍ਬਤ੍ਥਾਤਿ ਮਾਤੁਰਕ੍ਖਿਤਾਦੀਸੁ ਸਬ੍ਬਮਾਤੁਗਾਮੇਸੁ ਚ ਵਿਨੀਤਵਤ੍ਥੁਮ੍ਹਿ ‘‘ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਪੁਰਿਸੋ ਅਞ੍ਞਤਰਂ ਭਿਕ੍ਖੁਂ ਆਣਾਪੇਸਿ ‘ਗਚ੍ਛ ਭਨ੍ਤੇ ਇਤ੍ਥਨ੍ਨਾਮਂ ਇਤ੍ਥਿਂ ਵੀਮਂਸਾ’ਤਿ. ਸੋ ਗਨ੍ਤ੍ਵਾ ਮਨੁਸ੍ਸੇ ਪੁਚ੍ਛਿ ‘ਕਹਂ ਇਤ੍ਥਨ੍ਨਾਮਾ’ਤਿ. ਸੁਤ੍ਤਾ ਭਨ੍ਤੇਤਿ…ਪੇ… ਮਤਾ ਭਨ੍ਤੇਤਿ. ਨਿਕ੍ਖਨ੍ਤਾ ਭਨ੍ਤੇਤਿ. ਅਨਿਤ੍ਥੀ ਭਨ੍ਤੇਤਿ. ਇਤ੍ਥਿਪਣ੍ਡਕਾ ਭਨ੍ਤੇਤਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ. ਅਨਾਪਤ੍ਤਿ ਭਿਕ੍ਖੁ ਸਙ੍ਘਾਦਿਸੇਸਸ੍ਸ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਪਾਰਾ. ੩੪੧) ਆਗਤਾਸੁ ਸੁਤ੍ਤਾਦੀਸੁ ਪਞ੍ਚਸੁ ਚ.

੩੭੪. ਅਨਾਪਤ੍ਤਿ ਪਕਾਸਿਤਾਤਿ ਚੇਤਿਯਾਦੀਸੁ ਕਤ੍ਤਬ੍ਬਂ ਨਿਸ੍ਸਾਯ ਇਤ੍ਥਿਯਾ ਪੁਰਿਸਸ੍ਸ, ਪੁਰਿਸੇਨ ਚ ਇਤ੍ਥਿਯਾ ਦਿਨ੍ਨਸਾਸਨਂ ਪਟਿਗ੍ਗਹੇਤ੍ਵਾ ਵੀਮਂਸਿਤ੍ਵਾ ਪਚ੍ਚਾਹਰਿਤ੍ਵਾ ਆਰੋਚੇਨ੍ਤਸ੍ਸ ਅਨਾਪਤ੍ਤਿਭਾਵੋ ‘‘ਅਨਾਪਤ੍ਤਿ ਸਙ੍ਘਸ੍ਸ ਵਾ ਚੇਤਿਯਸ੍ਸ ਵਾ ਗਿਲਾਨਸ੍ਸ ਵਾ ਕਰਣੀਯੇਨ ਗਚ੍ਛਤਿ, ਉਮ੍ਮਤ੍ਤਕਸ੍ਸ ਆਦਿਕਮ੍ਮਿਕਸ੍ਸਾ’’ਤਿ (ਪਾਰਾ. ੩੪੦) ਪਾਲ਼ਿਯਂ ਵੁਤ੍ਤਾਤਿ ਅਤ੍ਥੋ.

੩੭੫. ਤਥਾ ਤਸ੍ਸਾਤਿ ਮਨੁਸ੍ਸਜਾਤਿਕਾਯ ਤਸ੍ਸਾ. ਨਨਾਲਂਵਚਨੀਯਤਾਤਿ ‘‘ਮਮਾਯ’’ਨ੍ਤਿ ਵਾ ਨਿਗ੍ਗਹਪਗ੍ਗਹੇ ਵਾ ਨਿਰਾਸਙ੍ਕਂ ਵਤ੍ਤੁਂ ਨਾਹਰਤੀਤਿ ਅਲਂਵਚਨੀਯਾ, ਅਸ੍ਸਾਮਿਕਾ, ਸਾ ਹਿ ਕੇਨਚਿ ‘‘ਮਯ੍ਹਂ ਏਸਾ’’ਤਿ ਵਤ੍ਤੁਂ ਵਾ ਨਿਰਾਸਙ੍ਕੇਨ ਨਿਗ੍ਗਹਪਗ੍ਗਹਵਚਨਂ ਵਾ ਵਤ੍ਤੁਂ ਅਸਕ੍ਕੁਣੇਯ੍ਯਾ, ਅਲਂਵਚਨੀਯਾ ਨ ਭਵਤੀਤਿ ਨਾਲਂਵਚਨੀਯਾ, ਸਸ੍ਸਾਮਿਕਾ, ਸਾ ਹਿ ਸਾਮਿਕੇਨ ਤਥਾ ਕਾਤੁਂ ਸਕ੍ਕੁਣੇਯ੍ਯਾਤਿ ਨਾਲਂਵਚਨੀਯਾ, ਨਾਲਂਵਚਨੀਯਾ ਨ ਭਵਤੀਤਿ ਨਨਾਲਂਵਚਨੀਯਾ, ਅਲਂਵਚਨੀਯਪਦੇਨ ਵੁਤ੍ਤਾ ਅਸ੍ਸਾਮਿਕਾ ਏਵ, ਪਟਿਸੇਧਾ ਦ੍ਵੇ ਪਕਤਿਮਤ੍ਥਂ ਗਮਯਨ੍ਤੀਤਿ, ਨਨਾਲਂਵਚਨੀਯਾਯ ਭਾਵੋ ਨਨਾਲਂਵਚਨੀਯਤਾ, ਨਿਰਾਸਙ੍ਕੇਨ ਅਵਚਨੀਯਤਾ ਅਸ੍ਸਾਮਿਕਭਾਵੋਤਿ ਵੁਤ੍ਤਂ ਹੋਤਿ. ਸਞ੍ਚਰਿਤ੍ਤਵਸੇਨ ਭਿਕ੍ਖੁਨਾ ਵਚਨੀਯਾ ਨ ਹੋਤੀਤਿ ਵਾ ‘‘ਅਲਂਵਚਨੀਯਾ’’ਤਿਪਿ ਗਹੇਤਬ੍ਬਮੇਵ. ਪਟਿਗ੍ਗਣ੍ਹਨਤਾਦੀਨਂ ਵਸਾਤਿ ਏਤ੍ਥ ਚਕਾਰੋ ਲੁਤ੍ਤਨਿਦ੍ਦਿਟ੍ਠੋ. ਤਤੋ ਪਟਿਗ੍ਗਣ੍ਹਨਵੀਮਂਸਨਪਚ੍ਚਾਹਰਣਸਙ੍ਖਾਤਾਨਂ ਤਿਣ੍ਣਂ ਅਙ੍ਗਾਨਂ ਵਸੇਨ ਚ ਪੁਬ੍ਬੇ ਵੁਤ੍ਤਮਨੁਸ੍ਸਿਤ੍ਥਿਤਾ ਨਨਾਲਂਵਚਨੀਯਤਾਤਿ ਵੁਤ੍ਤਾਨਂ ਦ੍ਵਿਨ੍ਨਂ ਅਙ੍ਗਾਨਂ ਵਸੇਨ ਚ ਇਦਂ ਸਿਕ੍ਖਾਪਦਂ ਆਪਤ੍ਤਿਕਾਰਣੇਹਿ ਪਞ੍ਚਹਿ ਅਙ੍ਗੇਹਿ ਯੁਤ੍ਤਨ੍ਤਿ ਅਤ੍ਥੋ.

੩੭੬. ਇਦਂ ਸਞ੍ਚਰਿਤ੍ਤਸਿਕ੍ਖਾਪਦਂ. ਅਥ ਵਾ ਲਿਙ੍ਗਵਿਪਲ੍ਲਾਸੇਨ ਚ ਅਯਂ ਸਙ੍ਘਾਦਿਸੇਸੋਤਿ ਗਹੇਤਬ੍ਬੋ. ਕਾਯਤੋ, ਵਾਚਤੋ, ਕਾਯਵਾਚਤੋ, ਕਾਯਚਿਤ੍ਤਤੋ, ਵਾਚਾਚਿਤ੍ਤਤੋ, ਕਾਯਵਾਚਾਚਿਤ੍ਤਤੋ ਵਾ ਉਪ੍ਪਜ੍ਜਨਤੋ ਛਸਮੁਟ੍ਠਾਨਂ. ਤਤੋ ਏਵ ਅਚਿਤ੍ਤਕਮੁਦੀਰਿਤਂ. ਮਿਸ੍ਸਕਸਮੁਟ੍ਠਾਨਞ੍ਹਿ ਅਚਿਤ੍ਤਕਂ. ਅਵਸੇਸਚਿਤ੍ਤੇਸੁਪਿ ਯਸ੍ਮਿਂ ਚਿਤ੍ਤੇ ਅਸਤਿ ਅਚਿਤ੍ਤਕਂ ਨਾਮ ਹੋਤਿ, ਤਂ ਦਸ੍ਸੇਤੁਮਾਹ ‘‘ਅਲਂਵਚਨਿਯਤ੍ਤਂ ਵਾ’’ਤਿਆਦਿ. ਗਾਥਾਬਨ੍ਧਵਸੇਨ ਰਸ੍ਸੋ, ‘‘ਅਲਂਵਚਨੀਯਤ੍ਤ’’ਨ੍ਤਿ ਗਹੇਤਬ੍ਬਂ. ਯੋ ਸਨ੍ਦੇਸਂ ਪੇਸੇਤਿ, ਤਸ੍ਮਿਂ ਪਟਿਬਦ੍ਧਭਾਵਨ੍ਤਿ ਅਤ੍ਥੋ. ਪਣ੍ਣਤ੍ਤਿਂ ਵਾਤਿ ਸਞ੍ਚਰਿਤ੍ਤਸਿਕ੍ਖਾਪਦਸਙ੍ਖਾਤਂ ਪਣ੍ਣਤ੍ਤਿਂ ਵਾ ਅਜਾਨਤੋ ਅਚਿਤ੍ਤਕਮੁਦੀਰਿਤਨ੍ਤਿ ਸਮ੍ਬਨ੍ਧੋ.

੩੭੭. ਸਾਸਨਨ੍ਤਿ ਮਾਤੁਗਾਮਸ੍ਸ, ਪੁਰਿਸਸ੍ਸ ਵਾ ਸਾਸਨਂ. ਕਾਯਵਿਕਾਰੇਨਾਤਿ ਸੀਸਕਮ੍ਪਨਾਦਿਨਾ ਕਾਯਵਿਕਾਰੇਨ. ਗਹੇਤ੍ਵਾਤਿ ਪਟਿਗ੍ਗਹੇਤ੍ਵਾ. ਤਂ ਉਪਗਮ੍ਮਾਤਿ ਪਟਿਗ੍ਗਹਿਤਸਾਸਨਂ ਯਸ੍ਸ ਵਤ੍ਤਬ੍ਬਂ ਹੋਤਿ, ਤਂ ਮਾਤੁਗਾਮਂ, ਪੁਰਿਸਂ ਵਾ ਉਪਗਮ੍ਮ. ਵੀਮਂਸਿਤ੍ਵਾਤਿ ਤਂ ਕਿਚ੍ਚਂ ਤੀਰੇਤ੍ਵਾ. ਹਰਨ੍ਤਸ੍ਸਾਤਿ ਪਚ੍ਚਾਹਰਨ੍ਤਸ੍ਸ. ਕਾਯਤੋ ਸਿਯਾਤਿ ਵਚੀਭੇਦਂ ਵਿਨਾ ਪਟਿਗ੍ਗਹਣਾਦੀਨਂ ਕਾਯੇਨੇਵ ਕਤਤ੍ਤਾ ਕਾਯਸਮੁਟ੍ਠਾਨਤੋਵ ਸਙ੍ਘਾਦਿਸੇਸੋ ਹੋਤੀਤਿ ਅਤ੍ਥੋ.

੩੭੮. ਇਤ੍ਥਿਯਾ ਵਚਨਂ ਸੁਤ੍ਵਾਤਿ ਯੋਜਨਾ. ਯਥਾ ਨਿਸਿਨ੍ਨੋਵਾਤਿ ਪਕਤਿਯਾ ਨਿਸਿਨ੍ਨਟ੍ਠਾਨੇਯੇਵ ਨਿਸਿਨ੍ਨੋ. ਤਂ ਵਚਨਂ. ਤਤ੍ਥੇਵਾਗਤਸ੍ਸੇਵਾਤਿ ਯਤ੍ਥ ਨਿਸਿਨ੍ਨੋ ਇਤ੍ਥਿਯਾ ਸਾਸਨਂ ਪਟਿਗ੍ਗਣ੍ਹਿ, ਤਮੇਵ ਆਸਨਂ ਅਵਿਜਹਿਤ੍ਵਾ ਅਤ੍ਤਨਾ ਨਿਸਿਨ੍ਨਟ੍ਠਾਨਮੇਵ ਆਗਤਸ੍ਸ ਸਨ੍ਨਿਸਿਤਬ੍ਬਪੁਰਿਸਸ੍ਸੇਵ, ਏਤ੍ਥ ‘‘ਆਰੋਚੇਤ੍ਵਾ’’ਤਿ ਪਾਠਸੇਸੋ. ਪੁਨ ‘‘ਆਰੋਚੇਨ੍ਤਸ੍ਸਾ’’ਤਿ ਇਦਂ ਤਤ੍ਥੇਵਾਗਤਾਯ ਤਸ੍ਸਾ ਏਵ ਇਤ੍ਥਿਯਾ ਏਵਂ ਯੋਜੇਤਬ੍ਬਂ. ਸਾਸਨਂ ਦਤ੍ਵਾ ਗਨ੍ਤ੍ਵਾ ਪੁਨ ਤਤ੍ਥੇਵ ਆਗਤਸ੍ਸ ਮਾਤੁਗਾਮਸ੍ਸੇਵ ਞਾਤਮਨਨ੍ਤਰਂ ਕਾਯਿਕਕਿਰਿਯਂ ਵਿਨਾ ਵਚਨੇਨੇਵ ਆਰੋਚੇਨ੍ਤਸ੍ਸਾਤਿ ਅਤ੍ਥੋ. ਇਦਂ ਇਤ੍ਥਿਯਾ ਸਾਸਨਂ ਪਟਿਗ੍ਗਹਣਾਦਿਵਸੇਨ ਵੁਤ੍ਤਂ.

ਅਥ ਵਾ ਪੁਰਿਸਸ੍ਸ ਵਚਨਂ ਸੁਤ੍ਵਾ ਯਥਾਨਿਸਿਨ੍ਨੋਵ ਤਂ ਵਚਨਂ ਇਤ੍ਥਿਯਾ ਆਰੋਚੇਤ੍ਵਾ ਪੁਨ ਤਤ੍ਥੇਵਾਗਤਸ੍ਸੇਵ ਪੁਰਿਸਸ੍ਸ ਆਰੋਚੇਨ੍ਤਸ੍ਸਾਤਿ ਏਵਂ ਪੁਰਿਸਸਨ੍ਦੇਸਂ ਪਟਿਗ੍ਗਹਣਾਦਿਵਸੇਨਾਪਿ ਯੋਜਨਾ ਕਾਤਬ੍ਬਾ. ਏਤ੍ਥ ਚ ਤਤ੍ਥੇਵਾਗਤਸ੍ਸਾਤਿ ਉਪਲਕ੍ਖਣਂ. ਸਾਸਨਵਚਨਮਤ੍ਤੇਨੇਵ ਪਟਿਗ੍ਗਹੇਤ੍ਵਾ, ਕਿਚ੍ਚਨ੍ਤਰੇਨ ਗਨ੍ਤ੍ਵਾ ਵਾ ਯਦਿਚ੍ਛਾਵਸੇਨ ਦਿਟ੍ਠਟ੍ਠਾਨੇ ਵਾ ਵਤ੍ਵਾ ਪੁਨਪਿ ਤਤ੍ਥੇਵ ਦਿਟ੍ਠਟ੍ਠਾਨੇ ਪੁਨ ਆਰੋਚੇਨ੍ਤਸ੍ਸ ਚ ਵਚਨੇਨੇਵ ਸਮੁਟ੍ਠਾਨਭਾਵੋ ਵੇਦਿਤਬ੍ਬੋ.

੩੭੯. ‘‘ਅਲਂ…ਪੇ… ਅਜਾਨਤੋ’’ਤਿ ਅਚਿਤ੍ਤਕਤ੍ਤਕਾਰਣਂ ਵੁਤ੍ਤਮੇਵ, ਕਸ੍ਮਾ ਪੁਨ ‘‘ਅਜਾਨਨ੍ਤਸ੍ਸ ਪਣ੍ਣਤ੍ਤਿ’’ਨ੍ਤਿ ਵੁਤ੍ਤਨ੍ਤਿ ਚੇ? ਤਦੁਭਯਸ੍ਸਾਪਿ ਵਿਸੁਂ ਕਾਰਣਾਭਾਵਂ ਵਿਞ੍ਞਾਪੇਤੁਂ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਨਂ ਵਿਧਿਨ੍ਤਿ ਸਾਸਨਂ ਪਟਿਗ੍ਗਹੇਤ੍ਵਾ ਆਹਰਿਤ੍ਵਾ ਆਰੋਚੇਤ੍ਵਾ ਪਚ੍ਚਾਹਰਿਤ੍ਵਾ ਆਰੋਚਨਸਙ੍ਖਾਤਂ ਵਿਧਾਨਂ. ਅਰਹਤੋਪੀਤਿ ਖੀਣਾਸਵਸ੍ਸਪਿ, ਸੇਖਪੁਥੁਜ੍ਜਨਾਨਂ ਪਗੇਵਾਤਿ ਅਯਮਤ੍ਥੋ ਸਮ੍ਭਾਵਨਤ੍ਥੇਨ ਅਪਿ-ਸਦ੍ਦੇਨ ਜੋਤਿਤੋ.

੩੮੦. ਜਾਨਿਤ੍ਵਾਤਿ ਅਲਂਵਚਨੀਯਭਾਵਂ ਵਾ ਪਣ੍ਣਤ੍ਤਿਂ ਵਾ ਉਭਯਮੇਵ ਵਾ ਜਾਨਿਤ੍ਵਾ. ਤਥਾਤਿ ਕਾਯਵਾਚਤੋ ਕਰੋਨ੍ਤਸ੍ਸਾਤਿ ਇਮਿਨਾ ਯੋਜੇਤਬ੍ਬਂ. ਸਚਿਤ੍ਤਕੇਹੀਤਿ ਯਥਾਵੁਤ੍ਤਚਿਤ੍ਤੇਨ ਸਚਿਤ੍ਤਕੇਹਿ. ਤੇਹੇਵਾਤਿ ਕਾਯਾਦੀਹਿ ਤੇਹਿ ਏਵ, ‘‘ਤੀਹੇਵਾ’’ਤਿਪਿ ਪਾਠੋ.

ਸਞ੍ਚਰਿਤ੍ਤਕਥਾਵਣ੍ਣਨਾ.

੩੮੧-੨. ਸਯਂਯਾਚਿਤਕੇਹੇਵਾਤਿ ਏਤ੍ਥ ‘‘ਉਪਕਰਣੇਹੀ’’ਤਿ ਪਾਠਸੇਸੋ, ‘‘ਪੁਰਿਸਂ ਦੇਥਾ’’ਤਿਆਦਿਨਾ ਨਯੇਨ ਅਤ੍ਤਨਾਵ ਯਾਚਿਤ੍ਵਾ ਗਹਿਤੇਹਿ ਉਪਕਰਣੇਹੇਵਾਤਿ ਅਤ੍ਥੋ. ਯਥਾਹ ‘‘ਸਞ੍ਞਾਚਿਕਾ ਨਾਮ ਸਯਂ ਯਾਚਿਤ੍ਵਾ ਪੁਰਿਸਮ੍ਪਿ ਪੁਰਿਸਤ੍ਤਕਰਮ੍ਪਿ ਗੋਣਮ੍ਪਿ ਸਕਟਮ੍ਪਿ ਵਾਸਿਮ੍ਪਿ ਪਰਸੁਮ੍ਪਿ ਕੁਠਾਰਿਮ੍ਪਿ ਕੁਦਾਲਮ੍ਪਿ ਨਿਖਾਦਨਮ੍ਪੀ’’ਤਿ. ਏਤ੍ਥ ਏਵ-ਕਾਰੇਨ ਅਯਾਚਿਤਂ ਨਿਵਤ੍ਤੇਤਿ. ਤੇਨ ਅਸ੍ਸਾਮਿਕਨ੍ਤਿ ਦੀਪਿਤਂ ਹੋਤਿ. ‘‘ਕੁਟਿਕ’’ਨ੍ਤਿ ਇਮਿਨਾ ‘‘ਕੁਟਿ ਨਾਮ ਉਲ੍ਲਿਤ੍ਤਾ ਵਾ ਹੋਤਿ ਅਵਲਿਤ੍ਤਾ ਵਾ ਉਲ੍ਲਿਤ੍ਤਾਵਲਿਤ੍ਤਾ ਵਾ’’ਤਿ (ਪਾਰਾ. ੩੪੯) ਵੁਤ੍ਤਤ੍ਤਾ ਭੂਮਿਤੋ ਪਟ੍ਠਾਯ ਭਿਤ੍ਤਿਚ੍ਛਦਨਾਨਿ ਪਟਿਚ੍ਛਾਦੇਤ੍ਵਾ ਮਤ੍ਤਿਕਾਯ ਵਾ ਸੁਧਾਯ ਵਾ ਦ੍ਵਾਰਵਾਤਪਾਨਾਦਿਅਲੇਪੋਕਾਸਂ ਠਪੇਤ੍ਵਾ ਅਨ੍ਤੋ ਲਿਤ੍ਤਭਾਵੇਨ ਉਲ੍ਲਿਤ੍ਤਾਨਾਮਕਂ ਵਾ ਤਥਾ ਬਹਿ ਲਿਤ੍ਤਭਾਵੇਨ ਅਵਲਿਤ੍ਤਾਨਾਮਕਂ ਵਾ ਅਨ੍ਤੋ ਚ ਬਹਿ ਚ ਲਿਤ੍ਤਭਾਵੇਨ ਉਲ੍ਲਿਤ੍ਤਾਵਲਿਤ੍ਤਾਨਾਮਕਂ ਵਾ ਕੁਟਿਨ੍ਤਿ ਵੁਤ੍ਤਂ ਹੋਤਿ.

ਅਪ੍ਪਮਾਣਿਕਨ੍ਤਿ ‘‘ਤਤ੍ਰਿਦਂ ਪਮਾਣਂ, ਦੀਘਸੋ ਦ੍ਵਾਦਸਵਿਦਤ੍ਥਿਯੋ ਸੁਗਤਵਿਦਤ੍ਥਿਯਾ, ਤਿਰਿਯਂ ਸਤ੍ਤਨ੍ਤਰਾ’’ਤਿ (ਪਾਰਾ. ੩੪੮) ਦੀਘਪੁਥੁਲਾਨਂ ਵੁਤ੍ਤਪ੍ਪਮਾਣੇਨ ਅਤਿਰੇਕਤ੍ਤਾ ਅਪ੍ਪਮਾਣਿਕਨ੍ਤਿ ਅਤ੍ਥੋ.

ਏਤ੍ਥ ਚ ਤਿਲਕ੍ਖਣਂ ਪਟਿਵਿਜ੍ਝਿਤ੍ਵਾ ਤੀਣਿ ਕਿਲੇਸਮੂਲਾਨਿ ਉਪ੍ਪਾਟੇਤ੍ਵਾ ਕਾਲਤ੍ਤਯਵਤ੍ਤ ਸਬ੍ਬਧਮ੍ਮੇ ਪਟਿਵਿਜ੍ਝਿਤ੍ਵਾ ਤਿਭੁਵਨੇਕਪਟਿਸਰਣਭੂਤਸ੍ਸ ਭਗਵਤੋ ਧਮ੍ਮਰਾਜਸ੍ਸ ਅਙ੍ਗੁਲਂ ਪਮਾਣਮਜ੍ਝਿਮਪੁਰਿਸਸ੍ਸ ਅਙ੍ਗੁਲਤੋ ਤਿਵਙ੍ਗੁਲਂ ਹੋਤਿ, ਏਕਾ ਵਿਦਤ੍ਥਿ ਤਿਸ੍ਸੋ ਵਿਦਤ੍ਥਿਯੋ ਹੋਨ੍ਤਿ, ਏਕਂ ਰਤਨਂ ਤੀਣਿ ਰਤਨਾਨਿ ਹੋਨ੍ਤੀਤਿ ਏਵਂ ਨਿਯਮਿਤਾ ਸੁਗਤਵਿਦਤ੍ਥਿ ਚ ਵਡ੍ਢਕਿਰਤਨੇਨ ਦਿਯਡ੍ਢਰਤਨਪ੍ਪਮਾਣਾ ਹੋਤਿ. ਯਥਾਹ ਅਟ੍ਠਕਥਾਯਂ ‘‘ਸੁਗਤਵਿਦਤ੍ਥਿ ਨਾਮ ਇਦਾਨਿ ਮਜ੍ਝਿਮਸ੍ਸ ਪੁਰਿਸਸ੍ਸ ਤਿਸ੍ਸੋ ਵਿਦਤ੍ਥਿਯੋ ਵਡ੍ਢਕਿਹਤ੍ਥੇਨ ਦਿਯਡ੍ਢੋ ਹਤ੍ਥੋ ਹੋਤੀ’’ਤਿ (ਪਾਰਾ. ਅਟ੍ਠ. ੨.੩੪੮-੩੪੯). ਤਸ੍ਮਾ ਸੁਗਤਵਿਦਤ੍ਥਿਯਾ ਦ੍ਵਾਦਸ ਵਡ੍ਢਕਿਹਤ੍ਥੇਨ ਅਟ੍ਠਾਰਸ ਹਤ੍ਥਾ ਹੋਨ੍ਤਿ. ‘‘ਦੀਘਸੋ ਦ੍ਵਾਦਸ ਵਿਦਤ੍ਥਿਯੋ ਸੁਗਤਵਿਦਤ੍ਥਿਯਾਤਿ ਬਾਹਿਰਿਮੇਨ ਮਾਨੇਨਾ’’ਤਿ (ਪਾਰਾ. ੩੪੯) ਪਦਭਾਜਨੇ ਵੁਤ੍ਤਤ੍ਤਾ ਅਨ੍ਤਿਮਂ ਸੁਧਾਲੇਪਂ ਅਗ੍ਗਹੇਤ੍ਵਾ ਥੁਸਮਤ੍ਤਿਕਪਰਿਯਨ੍ਤੇਨ ਵਾ ਮਹਾਮਤ੍ਤਿਕਪਰਿਯਨ੍ਤੇਨ ਵਾ ਬਾਹਿਰਨ੍ਤਤੋ ਅਟ੍ਠਾਰਸਹਤ੍ਥਪ੍ਪਮਾਣਂ, ‘‘ਤਿਰਿਯਂ ਸਤ੍ਤਨ੍ਤਰਾਤਿ ਅਬ੍ਭਨ੍ਤਰਿਮੇਨ ਮਾਨੇਨਾ’’ਤਿ (ਪਾਰਾ. ੩੪੯) ਪਦਭਾਜਨੇ ਵੁਤ੍ਤਤ੍ਤਾ ਅਬ੍ਭਨ੍ਤਰਿਮੇਨ ਪੁਥੁਲਤੋ ਦ੍ਵਾਦਸਙ੍ਗੁਲਾਧਿਕਦਸਹਤ੍ਥਪ੍ਪਮਾਣਞ੍ਚ ਕੁਟਿਯਾ ਪਮਾਣਨ੍ਤਿ ਗਹੇਤਬ੍ਬਂ. ਏਵਂ ਠਿਤਪਮਾਣਤੋ ਦੀਘਤੋ ਪੁਥੁਲਤੋ ਵਾ ਉਭਤੋ ਵਾ ਕੇਸਗ੍ਗਮਤ੍ਤਾਧਿਕਾਪਿ ਕੁਟਿ ਆਪਤ੍ਤਿਯਾ ਅਙ੍ਗਂ ਹੋਤੀਤਿ ਦਸ੍ਸੇਤੁਂ ‘‘ਅਪ੍ਪਮਾਣਿਕ’’ਨ੍ਤਿ ਆਹਾਤਿ ਸਙ੍ਖੇਪਤੋ ਵੇਦਿਤਬ੍ਬਂ.

ਅਤ੍ਤੁਦ੍ਦੇਸਨ੍ਤਿ ਉਦ੍ਦਿਸਿਤਬ੍ਬੋਤਿ ਉਦ੍ਦੇਸੋ, ਅਤ੍ਤਾ ਉਦ੍ਦੇਸੋ ਏਤਿਸ੍ਸਾਤਿ ਅਤ੍ਤੁਦ੍ਦੇਸਾ, ਕੁਟਿ, ਤਂ ਅਤ੍ਤੁਦ੍ਦੇਸਂ. ‘‘ਅਤ੍ਤੁਦ੍ਦੇਸਨ੍ਤਿ ਅਤ੍ਤਨੋ ਅਤ੍ਥਾਯਾ’’ਤਿ ਪਦਭਾਜਨੇ ਵੁਤ੍ਤਤ੍ਤਾ ‘‘ਮਯ੍ਹਂ ਏਸਾ ਵਾਸਤ੍ਥਾਯ ਭਵਿਸ੍ਸਤੀ’’ਤਿ ਅਤ੍ਤਾਨਂ ਉਦ੍ਦਿਸਿਤ੍ਵਾਤਿ ਅਤ੍ਥੋ. ‘‘ਕਰੋਨ੍ਤਸ੍ਸਾ’’ਤਿ ਇਦਂ ‘‘ਕਾਰਯਮਾਨੇਨਾਤਿ ਕਰੋਨ੍ਤੋ ਵਾ ਕਾਰਾਪੇਨ੍ਤੋ ਵਾ’’ਤਿ ਪਦਭਾਜਨੇ ਵੁਤ੍ਤਨਯੇਨ ਪਯੋਜਕਕਤ੍ਤੁਨੋ ਚ ਗਹੇਤਬ੍ਬਤ੍ਤਾ ਉਪਲਕ੍ਖਣਨ੍ਤਿ ਗਹੇਤਬ੍ਬਂ. ਤਥਾਤਿ ਤੇਨੇਵ ਪਕਾਰੇਨ, ਯੇਹਿ ਅਸ੍ਸਾਮਿਕਤਾਦੀਹਿ ਪਕਾਰੇਹਿ ਯੁਤ੍ਤਂ ਪਮਾਣਾਤਿਕ੍ਕਨ੍ਤਂ ਕੁਟਿਂ ਕਰੋਨ੍ਤਸ੍ਸ ਆਪਤ੍ਤਿ, ਤੇਹੇਵ ਪਕਾਰੇਹਿ ਯੁਤ੍ਤਂ ਅਦੇਸਿਤਵਤ੍ਥੁਕਮ੍ਪਿ ਕੁਟਿਂ ਕਰੋਨ੍ਤਸ੍ਸਾਤਿ. ਇਮਿਨਾ ਅਪ੍ਪਮਾਣਿਕਂ ਵਿਯ ਅਦੇਸਿਤਵਤ੍ਥੁਕਮ੍ਪਿ ਵਿਸੁਂਯੇਵ ਆਪਤ੍ਤਿਯਾ ਪਧਾਨਙ੍ਗਨ੍ਤਿ. ਵਸਤਿ ਏਤ੍ਥਾਤਿ ਵਤ੍ਥੁ, ਭੂਮਿ, ਸਾ ਅਦੇਸਿਤਾ ਏਤਿਸ੍ਸਾਤਿ ਅਦੇਸਿਤਵਤ੍ਥੁਕਾ, ਕੁਟਿ, ਤਂ ਅਦੇਸਿਤਵਤ੍ਥੁਕਂ.

ਕਿਂ ਵੁਤ੍ਤਂ ਹੋਤਿ? ਤੇਨ ਕੁਟਿਕਾਰੇਨ ਭਿਕ੍ਖੁਨਾ ਕੁਟਿਵਤ੍ਥੁਂ ਸੋਧੇਤ੍ਵਾ ਸਮਤਲਂ ਕਾਰੇਤ੍ਵਾ ਸਙ੍ਘਂ ਉਪਸਙ੍ਕਮਿਤ੍ਵਾ ਵੁਡ੍ਢਾਨਂ ਭਿਕ੍ਖੂਨਂ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ‘‘ਅਹਂ ਭਨ੍ਤੇ ਸਞ੍ਞਾਚਿਕਾਯ ਕੁਟਿਂ ਕਤ੍ਤੁਕਾਮੋ ਅਸ੍ਸਾਮਿਕਂ ਅਤ੍ਤੁਦ੍ਦੇਸਂ, ਸੋਹਂ ਭਨ੍ਤੇ ਸਙ੍ਘਂ ਕੁਟਿਵਤ੍ਥੁਓਲੋਕਨਂ ਯਾਚਾਮੀ’’ਤਿ ਤਿਕ੍ਖਤ੍ਤੁਂ ਵਤ੍ਵਾ ਯਾਚਿਤੇਨ ਸਙ੍ਘੇਨ ਵਾ ਸਙ੍ਘੇਨ ਞਤ੍ਤਿਦੁਤਿਯਾਯ ਕਮ੍ਮਵਾਚਾਯ ਸਮ੍ਮਤੇਹਿ ਬ੍ਯਤ੍ਤੇਹਿ ਪਟਿਬਲੇਹਿ ਦ੍ਵੀਹਿ ਭਿਕ੍ਖੂਹਿ ਵਾ ਤੇਨ ਸਦ੍ਧਿਂ ਗਨ੍ਤ੍ਵਾ ਕੁਟਿਵਤ੍ਥੁਂ ਓਲੋਕੇਤ੍ਵਾ ਸਾਰਮ੍ਭਭਾਵਂ ਵਾ ਅਪਰਿਕ੍ਕਮਨਭਾਵਂ ਵਾ ਉਭਯਮੇਵ ਵਾ ਪਸ੍ਸਨ੍ਤੇਹਿ ‘‘ਮਾਯਿਧ ਕਰੀ’’ਤਿ ਨਿਵਾਰੇਤ੍ਵਾ ਅਨਾਰਮ੍ਭਂ ਚੇ ਹੋਤਿ ਸਪਰਿਕ੍ਕਮਨਂ, ਆਗਨ੍ਤ੍ਵਾ ਸਙ੍ਘਸ੍ਸ ਆਰੋਚਿਤੇ ਕੁਟਿਕਾਰਕੇਨੇਵ ਭਿਕ੍ਖੁਨਾ ਪੁਬ੍ਬੇ ਵੁਤ੍ਤਨਯੇਨ ਸਙ੍ਘਂ ਉਪਸਙ੍ਕਮਿਤ੍ਵਾ ਵੁਡ੍ਢਾਨਂ ਭਿਕ੍ਖੂਨਂ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ‘‘ਅਹਂ ਭਨ੍ਤੇ ਸਞ੍ਞਾਚਿਕਾਯ ਕੁਟਿਂ ਕਤ੍ਤੁਕਾਮੋ ਅਸ੍ਸਾਮਿਕਂ ਅਤ੍ਤੁਦ੍ਦੇਸਂ, ਸੋਹਂ ਭਨ੍ਤੇ ਸਙ੍ਘਂ ਕੁਟਿਵਤ੍ਥੁਦੇਸਨਂ ਯਾਚਾਮੀ’’ਤਿ ਤਿਕ੍ਖਤ੍ਤੁਂ ਵਤ੍ਵਾ ਯਾਚਿਤੇ ਵੁਡ੍ਢਾਨੁਮਤੇਨ ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਞਤ੍ਤਿਦੁਤਿਯਾਯ ਕਮ੍ਮਵਾਚਾਯ ਦੇਸੇਤ੍ਵਾ ਨਿਯ੍ਯਾਦਿਤਕੁਟਿਵਤ੍ਥੁਸ੍ਸ ਅਭਾਵਾ ਅਦੇਸਿਤਵਤ੍ਥੁਕਂ, ਤੇਨੇਵ ਅਸ੍ਸਾਮਿਕਤਾਦਿਪਕਾਰੇਨ ਯੁਤ੍ਤਂ ਯਥਾਵੁਤ੍ਤਪ੍ਪਕਾਰਂ ਕੁਟਿਕਂ ਅਤ੍ਤਨਾ ਯਾਚਿਤੇਹਿ ਉਪਕਰਣੇਹਿ ਕਰੋਨ੍ਤਸ੍ਸ, ਕਾਰਾਪੇਨ੍ਤਸ੍ਸ ਚਾਤਿ ਵੁਤ੍ਤਂ ਹੋਤਿ.

ਦ੍ਵੇ ਸਙ੍ਘਾਦਿਸੇਸਾ ਹੋਨ੍ਤੀਤਿ ‘‘ਭਿਕ੍ਖੂ ਵਾ ਅਨਭਿਨੇਯ੍ਯ ਵਤ੍ਥੁਦੇਸਨਾਯ, ਪਮਾਣਂ ਵਾ ਅਤਿਕ੍ਕਾਮੇਯ੍ਯ, ਸਙ੍ਘਾਦਿਸੇਸੋ’’ਤਿ (ਪਾਰਾ. ੩੪੮) ਤੁਲ੍ਯਬਲਤਾਸੂਚਕੇਨ ਵਾ-ਸਦ੍ਦੇਨ ਸਮ੍ਪਿਣ੍ਡਿਤ੍ਵਾ ਵੁਤ੍ਤਅਙ੍ਗਦ੍ਵਯਸਹਿਤਤ੍ਤਾ ਦ੍ਵੇ ਸਙ੍ਘਾਦਿਸੇਸਾ ਹੋਨ੍ਤੀਤਿ ਅਤ੍ਥੋ. ਯਥਾਹ ‘‘ਭਿਕ੍ਖੁ ਕੁਟਿਂ ਕਰੋਤਿ ਅਦੇਸਿਤਵਤ੍ਥੁਕਂ ਪਮਾਣਾਤਿਕ੍ਕਨ੍ਤਂ ਅਨਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਦ੍ਵਿਨ੍ਨਂ ਸਙ੍ਘਾਦਿਸੇਸਾਨ’’ਨ੍ਤਿ (ਪਾਰਾ. ੩੫੫) ਚ ‘‘ਭਿਕ੍ਖੁਕੁਟਿਂ ਕਰੋਤਿ ਅਦੇਸਿਤਵਤ੍ਥੁਕਂ ਅਨਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸਸ੍ਸਾ’’ਤਿ (ਪਾਰਾ. ੩੫੪) ਚ ‘‘ਭਿਕ੍ਖੁ ਕੁਟਿਂ ਕਰੋਤਿ ਪਮਾਣਾਤਿਕ੍ਕਨ੍ਤਂ ਅਨਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸਸ੍ਸਾ’’ਤਿ (ਪਾਰਾ. ੩੫੫) ਚ ਵੁਤ੍ਤਤ੍ਤਾ ਦ੍ਵੀਸੁ ਅਙ੍ਗੇਸੁ ਏਕਂ ਚੇ, ਏਕੋਵ ਸਙ੍ਘਾਦਿਸੇਸੋ ਹੋਤੀਤਿ. ਤਂ ਪਨ ‘‘ਸਚੇ ਏਕਵਿਪਨ੍ਨਾ ਸਾ, ਗਰੁਕਂ ਏਕਕਂ ਸਿਯਾ’’ਤਿ ਵਕ੍ਖਤਿ.

ਸਾਰਮ੍ਭਾਦੀਸੂਤਿ ਏਤ੍ਥ ਸਾਰਮ੍ਭ-ਸਦ੍ਦੋ ਸੋਪਦ੍ਦਵਪਰਿਯਾਯੋ. ਯਥਾਹ ਅਟ੍ਠਕਥਾਯਂ ‘‘ਸਾਰਮ੍ਭਂ ਅਨਾਰਮ੍ਭਨ੍ਤਿ ਸਉਪਦ੍ਦਵਂ ਅਨੁਪਦ੍ਦਵ’’ਨ੍ਤਿ (ਪਾਰਾ. ਅਟ੍ਠ. ੨.੩੪੮-੩੪੯). ਏਤ੍ਥ ‘‘ਸੇਤਂ ਛਾਗਮਾਰਭੇਥ ਯਜਮਾਨੋ’’ਤਿ ਪਯੋਗੇ ਵਿਯ ਆ-ਪੁਬ੍ਬਸ੍ਸ ਰਭਸ੍ਸ ਹਿਂਸਤ੍ਥੇਪਿ ਦਿਸ੍ਸਮਾਨਤ੍ਤਾ ਕਤ੍ਤੁਸਾਧਨੋ ਆਰਮ੍ਭ-ਸਦ੍ਦੋ ਹਿਂਸਕਾਨਂ ਕਿਪਿਲ੍ਲਿਕਾਦਿਸਤ੍ਤਾਨਂ ਵਾਚਕੋ ਭਵਤੀਤਿ ਤਂਸਹਿਤਟ੍ਠਾਨਂ ਸਾਰਮ੍ਭਂ ਨਾਮ ਹੋਤਿ. ਤੇਨੇਵ ਪਦਭਾਜਨੇਪਿ ਵੁਤ੍ਤਂ ‘‘ਸਾਰਮ੍ਭਂ ਨਾਮ ਕਿਪਿਲ੍ਲਿਕਾਨਂ ਵਾ ਆਸਯੋ ਹੋਤਿ, ਉਪਚਿਕਾਨਂ ਵਾ, ਉਨ੍ਦੂਰਾਨਂ ਵਾ, ਅਹੀਨਂ ਵਾ, ਵਿਚ੍ਛਿਕਾਨਂ ਵਾ, ਸਤਪਦੀਨਂ ਵਾ, ਹਤ੍ਥੀਨਂ ਵਾ, ਅਸ੍ਸਾਨਂ ਵਾ, ਸੀਹਾਨਂ ਵਾ, ਬ੍ਯਗ੍ਘਾਨਂ ਵਾ…ਪੇ… ਆਸਯੋ ਹੋਤੀ’’ਤਿ (ਪਾਰਾ. ੩੫੩).

ਆਦਿ-ਸਦ੍ਦੇਨ ਅਪਰਿਕ੍ਕਮਨਂ ਸਙ੍ਗਣ੍ਹਾਤਿ. ‘‘ਸਪਰਿਕ੍ਕਮਨਂ ਨਾਮ ਸਕ੍ਕਾ ਹੋਤਿ ਯਥਾਯੁਤ੍ਤੇਨ ਸਕਟੇਨ ਅਨੁਪਰਿਗਨ੍ਤੁਂ, ਸਮਨ੍ਤਾ ਨਿਸ੍ਸੇਣਿਯਾ ਅਨੁਪਰਿਗਨ੍ਤੁਂ, ਏਤਂ ਸਪਰਿਕ੍ਕਮਨਂ ਨਾਮਾ’’ਤਿ (ਪਾਰਾ. ੩੫੩) ਵੁਤ੍ਤਲਕ੍ਖਣਵਿਪਰਿਯਾਯਤੋ ਨਿਬ੍ਬਕੋਸਸ੍ਸ ਉਦਕਪਾਤਟ੍ਠਾਨੇ ਏਕਂ ਚਕ੍ਕਂ ਠਪੇਤ੍ਵਾ ਇਤਰਂ ਚਕ੍ਕਂ ਬਹਿ ਠਪੇਤ੍ਵਾ ਕੁਟਿਂ ਪਰਿਕ੍ਖਿਪਿਤ੍ਵਾ ਆਵਜ੍ਜਿਯਮਾਨਸ੍ਸ ਗੋਯੁਤ੍ਤਸਕਟਸ੍ਸ ਵਾ ਨਿਸ੍ਸੇਣਿਯਂ ਠਤ੍ਵਾ ਕੁਟਿਂ ਛਾਦਯਮਾਨਾਨਂ ਨਿਸ੍ਸੇਣਿਯਾ ਵਾ ਪਰਤੋ ਗਮਿਤੁਮਸਕ੍ਕੁਣੇਯ੍ਯਤ੍ਤਾ ਅਪਰਿਕ੍ਕਮਨਨ੍ਤਿ ਵੇਦਿਤਬ੍ਬਂ.

ਏਵਂ ਵੁਤ੍ਤਸਾਰਮ੍ਭਅਪਰਿਕ੍ਕਮਨਸਙ੍ਖਾਤਅਙ੍ਗਦ੍ਵਯੇਨ ਯੁਤ੍ਤਂ ਚੇ, ਦ੍ਵੇ ਦੁਕ੍ਕਟਾਨਿ ਹੋਨ੍ਤਿ. ਯਥਾਹ ‘‘ਭਿਕ੍ਖੁ ਕੁਟਿਂ ਕਰੋਤਿ ਦੇਸਿਤਵਤ੍ਥੁਕਂ ਪਮਾਣਿਕਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨ’’ਨ੍ਤਿ (ਪਾਰਾ. ੩੫੫). ਏਕਂ ਚੇ, ਏਕਮੇਵ ਹੋਤਿ. ਯਥਾਹ ‘‘ਭਿਕ੍ਖੁ ਕੁਟਿਂ ਕਰੋਤਿ ਦੇਸਿਤਵਤ੍ਥੁਕਂ ਪਮਾਣਿਕਂ ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ. ਭਿਕ੍ਖੁ ਕੁਟਿਂ ਕਰੋਤਿ ਦੇਸਿਤਵਤ੍ਥੁਕਂ ਪਮਾਣਿਕਂ ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਪਾਰਾ. ੩੫੫) ਏਤਂ ਤਯਮ੍ਪਿ ‘‘ਸਾਰਮ੍ਭਾਦੀਸੁ ਦੁਕ੍ਕਟ’’ਨ੍ਤਿ ਸਾਮਞ੍ਞੇਨ ਸਙ੍ਗਹਿਤਨ੍ਤਿ ਦਟ੍ਠਬ੍ਬਂ.

ਏਕਂ ਅਙ੍ਗਂ ਪਮਾਣਿਕਤ੍ਤਂ ਵਾ ਦੇਸਿਤਵਤ੍ਥੁਕਤ੍ਤਂ ਵਾ ਵਿਪਨ੍ਨਂ ਏਤਿਸ੍ਸਾਤਿ ਏਕਵਿਪਨ੍ਨਾ. ਪੁਬ੍ਬੇ ਵੁਤ੍ਤਤ੍ਥਾਨਂ ਸਙ੍ਘਾਦਿਸੇਸਾਦਿਪਦਾਨਮਤ੍ਥੋ ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਸਾਤਿ ਯਥਾਵੁਤ੍ਤਲਕ੍ਖਣਕੁਟਿ.

੩੮੩. ਇਦਾਨਿ ਇਮਸ੍ਮਿਂ ਸਿਕ੍ਖਾਪਦੇ ਅਟ੍ਠੁਪ੍ਪਤ੍ਤਿਯਂ ‘‘ਤੇ ਯਾਚਨਬਹੁਲਾ ਵਿਞ੍ਞਤ੍ਤਿਬਹੁਲਾ ਵਿਹਰਨ੍ਤਿ ‘ਪੁਰਿਸਂ ਦੇਥ ਪੁਰਿਸਤ੍ਤਕਰਂ ਦੇਥਾ’’ਤਿਆਦਿਪਾਲ਼ਿਯਾ (ਪਾਰਾ. ੩੪੨) ਅਟ੍ਠਕਥਾਯਂ (ਪਾਰਾ. ਅਟ੍ਠ. ੨.੩੪੨) ਆਗਤਂ ਕਪ੍ਪਿਯਾਕਪ੍ਪਿਯਵਿਨਿਚ੍ਛਯਂ ਸਙ੍ਖੇਪਤੋ ਦਸ੍ਸੇਤੁਮਾਹ ‘‘ਪੁਰਿਸ’’ਨ੍ਤਿਆਦਿ. ਕਮ੍ਮਸਹਾਯਤ੍ਥਾਯਾਤਿ ਕਿਸ੍ਮਿਞ੍ਚਿ ਕਮ੍ਮੇ ਸਹਾਯਭਾਵਾਯ, ਕਮ੍ਮਕਰਣਤ੍ਥਾਯਾਤਿ ਵੁਤ੍ਤਂ ਹੋਤਿ. ‘‘ਇਤ੍ਥਨ੍ਨਾਮਂ ਕਮ੍ਮਂ ਕਾਤੁਂ ਪੁਰਿਸਂ ਲਦ੍ਧੁਂ ਵਟ੍ਟਤੀ’’ਤਿ ਯਾਚਿਤੁਂ ਵਟ੍ਟਤੀਤਿ ਅਤ੍ਥੋ. ਯਥਾਹ ਅਟ੍ਠਕਥਾਯਂ ‘‘ਕਮ੍ਮਕਰਣਤ੍ਥਾਯ ‘ਪੁਰਿਸਂ ਦੇਥਾ’ਤਿ ਯਾਚਿਤੁਂ ਵਟ੍ਟਤੀ’’ਤਿ (ਪਾਰਾ. ਅਟ੍ਠ. ੨.੩੪੨). ਮੂਲਚ੍ਛੇਜ੍ਜਵਸੇਨਾਤਿ ਸਾਮਿਕਾਨਂ ਆਯਤ੍ਤਭਾਵਸਙ੍ਖਾਤਮੂਲਸ੍ਸ ਛਿਨ੍ਦਨਵਸੇਨ, ਅਤ੍ਤਨੋ ਆਯਤ੍ਤਭਾਵਕਰਣਵਸੇਨਾਤਿ ਵੁਤ੍ਤਂ ਹੋਤਿ.

੩੮੪. ਅਵਜ੍ਜਨ੍ਤਿ ਵਜ੍ਜਰਹਿਤਂ, ਨਿਦ੍ਦੋਸਨ੍ਤਿ ਅਤ੍ਥੋ. ਮਿਗਲੁਦ੍ਦਕਮਚ੍ਛਬਨ੍ਧਕਾਦੀਨਂ ਸਕਕਮ੍ਮਂ ਵਜ੍ਜਕਮ੍ਮਂ ਨਾਮ. ਤਸ੍ਮਾ ਮਿਗਲੁਦ੍ਦਕਾਦਯੋ ਹਤ੍ਥਕਮ੍ਮਂ ਯਾਚਨ੍ਤੇਨ ਪਨ ‘‘ਤੁਮ੍ਹਾਕਂ ਹਤ੍ਥਕਮ੍ਮਂ ਦੇਥਾ’’ਤਿ, ‘‘ਹਤ੍ਥਕਮ੍ਮਂ ਦਾਤਬ੍ਬ’’ਨ੍ਤਿ ਸਾਮਞ੍ਞੇਨ ਅਵਤ੍ਵਾ ‘‘ਇਤ੍ਥਨ੍ਨਾਮਂ ਕਮ੍ਮਂ ਦਾਤਬ੍ਬ’’ਨ੍ਤਿ ਵਿਸੇਸੇਤ੍ਵਾਯੇਵ ਯਾਚਿਤਬ੍ਬਂ. ਲੁਦ੍ਦਕੇ ਵਾ ਇਤਰੇ ਵਾ ਨਿਕ੍ਕਮ੍ਮੇ ਅਯਾਚਿਤ੍ਵਾਪਿ ਯਥਾਰੁਚਿ ਕਮ੍ਮਂ ਕਾਰਾਪੇਤੁਂ ਵਟ੍ਟਤਿ. ਹਤ੍ਥਕਮ੍ਮਯਾਚਨਾਯ ਸਬ੍ਬਥਾਪਿ ਕਪ੍ਪਿਯਭਾਵਂ ਦੀਪੇਤੁਂ ਤਂਤਂਸਿਪ੍ਪਿਕੇ ਯਾਚਿਤ੍ਵਾ ਮਹਨ੍ਤਮ੍ਪਿ ਪਾਸਾਦਂ ਕਾਰਾਪੇਨ੍ਤੇਨ ਹਤ੍ਥਕਮ੍ਮੇ ਯਾਚਿਤੇ ਅਤ੍ਤਨੋ ਅਨੋਕਾਸਭਾਵਂ ਞਤ੍ਵਾ ਅਞ੍ਞੇਸਂ ਕਰੋਨ੍ਤਾਨਂ ਦਾਤਬ੍ਬਂ ਮੂਲਂ ਦਿਯ੍ਯਮਾਨਂ ਅਧਿਵਾਸੇਤੁਂ ਵਟ੍ਟਤੀਤਿ ਵਿਤ੍ਥਾਰਤੋ ਅਟ੍ਠਕਥਾਯਂ (ਪਾਰਾ. ਅਟ੍ਠ. ੨.੩੪੨ ਅਤ੍ਥਤੋਸਮਾਨਂ) ਵੁਤ੍ਤਤ੍ਤਾ ਕੁਸਲਾਨਂ ਅਤ੍ਥਂ ਅਪਰਿਹਾਪੇਨ੍ਤੇਨ ਕਪ੍ਪਿਯੇਨ ਸਾਰੁਪ੍ਪੇਨ ਪਯੋਗੇਨ ਯਾਚਿਤਬ੍ਬਂ. ਯਾਚਿਤਕਮ੍ਮਂ ਕਾਤੁਂ ਅਸਮਤ੍ਥੇਹਿ ਕਰੋਨ੍ਤਾਨਂ ਦਿਯ੍ਯਮਾਨਂ ਹਤ੍ਥਕਮ੍ਮਮੂਲਂ ਕਮ੍ਮਂ ਕਾਰਾਪੇਤ੍ਵਾ ਕਮ੍ਮਕਾਰਕੇ ਦਸ੍ਸੇਤ੍ਵਾ ਦਾਪੇਤਬ੍ਬਂ. ਏਵਂ ਯਾਚਨਾਯ ਅਨਵਜ੍ਜਭਾਵੇ ਅਟ੍ਠਕਥਾਗਤਂ ਕਾਰਣਂ ਦਸ੍ਸੇਤੁਮਾਹ ‘‘ਹਤ੍ਥਕਮ੍ਮਮ੍ਪੀ’’ਤਿਆਦਿ. ਪਿ-ਸਦ੍ਦੋ ਅਵਧਾਰਣੇ, ਪਦਪੂਰਣੇ ਵਾ. ਹਿ-ਸਦ੍ਦੋ ਹੇਤੁਮ੍ਹਿ. ਯਸ੍ਮਾ ਇਦਂ ਹਤ੍ਥਕਮ੍ਮਂ ਕਿਞ੍ਚਿ ਵਤ੍ਥੁ ਨ ਹੋਤਿ, ਤਸ੍ਮਾ ਅਨਵਜ੍ਜਮੇਵ ਹਤ੍ਥਕਮ੍ਮਂ ਯਾਚਿਤੁਂ ਪਨ ਵਟ੍ਟਤੀਤਿ.

੩੮੫. ਞਾਤਕਾਦਿਕੇਤਿ ਞਾਤਕਪਵਾਰਿਤੇ. ਠਪੇਤ੍ਵਾਤਿ ਵਜ੍ਜੇਤ੍ਵਾ. ਗੋਣਮਾਯਾਚਮਾਨਸ੍ਸਾਤਿ ਅਞ੍ਞਾਤਕਅਪ੍ਪਵਾਰਿਤੇ ਤਾਵਕਾਲਿਕਂ ਵਿਨਾ ਕੇਵਲਂ ਕਮ੍ਮਕਰਣਤ੍ਥਾਯ ਗੋਣਂ ਯਾਚਨ੍ਤਸ੍ਸ. ਤੇਸੁਪੀਤਿ ਞਾਤਕਾਦੀਸੁਪਿ ਮੂਲਚ੍ਛੇਜ੍ਜੇਨ ਗੋਣਮਾਯਾਚਨਸ੍ਸ ਦੁਕ੍ਕਟਨ੍ਤਿ ਯੋਜਨਾ. ‘‘ਤਾਵਕਾਲਿਕਨਯੇਨ ਸਬ੍ਬਤ੍ਥ ਵਟ੍ਟਤੀ’’ਤਿ (ਪਾਰਾ. ਅਟ੍ਠ. ੨.੩੪੨) ਅਟ੍ਠਕਥਾਵਚਨਤੋ ਯਾਵ ਕਮ੍ਮਕਰਣਕਾਲਂ, ਤਾਵ ਨਿਯਮੇਤ੍ਵਾ ਞਾਤਕਅਞ੍ਞਾਤਕਪਵਾਰਿਤਅਪ੍ਪਵਾਰਿਤੇ ਸਬ੍ਬੇਪਿ ਯਾਚਿਤੁਂ ਵਟ੍ਟਤਿ. ਤਥਾ ਯਾਚਿਤ੍ਵਾ ਵਾ ਅਯਾਚਿਤ੍ਵਾ ਵਾ ਗਹਿਤੋ ਚੇ, ਰਕ੍ਖਿਤ੍ਵਾ ਪਟਿਜਗ੍ਗਿਤ੍ਵਾ ਸਾਮਿਕਾਨਂ ਨਿਯ੍ਯਾਦੇਤਬ੍ਬੋ, ਗੋਣੇ ਵਾ ਨਟ੍ਠੇ ਵਿਸਾਣੇ ਵਾ ਭਿਨ੍ਨੇ ਸਾਮਿਕੇਸੁ ਅਸਮ੍ਪਟਿਚ੍ਛਨ੍ਤੇਸੁ ਭਣ੍ਡਦੇਯ੍ਯਂ.

੩੮੬. ਦੇਮਾਤਿ ਏਤ੍ਥ ‘‘ਤੁਮ੍ਹਾਕ’’ਨ੍ਤਿ ਪਾਠਸੇਸੋ. ‘‘ਵਿਹਾਰਸ੍ਸ ਦੇਮਾ’ਤਿ ਵੁਤ੍ਤੇ ਪਨ ‘ਆਰਾਮਿਕਾਨਂ ਆਚਿਕ੍ਖਥ ਪਟਿਜਗ੍ਗਨਤ੍ਥਾਯਾ’ਤਿ ਵਤ੍ਤਬ੍ਬ’’ਨ੍ਤਿ (ਪਾਰਾ. ਅਟ੍ਠ. ੨.੩੪੨) ਅਟ੍ਠਕਥਾਯਂ ਵੁਤ੍ਤਂ. ਸਕਟਵਿਨਿਚ੍ਛਯਸ੍ਸਾਪਿ ਗੋਣਵਿਨਿਚ੍ਛਯੇਨ ਸਮਾਨਤ੍ਤਾ ਤਂ ਅਵਤ੍ਵਾ ਵਿਸੇਸਮਤ੍ਤਮੇਵ ਦਸ੍ਸੇਤੁਮਾਹ ‘‘ਸਕਟਂ…ਪੇ… ਵਟ੍ਟਤੀ’’ਤਿ. ‘‘ਤੁਮ੍ਹਾਕਂ ਦੇਮਾਤਿ ਵੁਤ੍ਤੇ’’ਤਿ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਯਥਾਹ ਅਟ੍ਠਕਥਾਯਂ ‘‘ਤੁਮ੍ਹਾਕਮੇਵ ਦੇਮਾਤਿ ਵੁਤ੍ਤੇ ਦਾਰੁਭਣ੍ਡਂ ਨਾਮ ਸਮ੍ਪਟਿਚ੍ਛਿਤੁਂ ਵਟ੍ਟਤੀ’’ਤਿ (ਪਾਰਾ. ਅਟ੍ਠ. ੨.੩੪੨).

੩੮੭. ਕੁਠਾਰਾਦੀਸੂਤਿ ਏਤ੍ਥ ਆਦਿ-ਸਦ੍ਦੇਨ ਨਿਖਾਦਨਂ ਸਙ੍ਗਣ੍ਹਾਤਿ. ਅਯਂ ਨਯੋ ਵੇਦਿਤਬ੍ਬੋਤਿ ਪਾਠਸੇਸੋ. ‘‘ਸਕਟਂ ਗੋਣੋ ਵਿਯ ਤਾਵਕਾਲਿਕਂ ਅਕਤ੍ਵਾ ਅਞ੍ਞਾਤਕਅਪ੍ਪਵਾਰਿਤੇ ਨ ਯਾਚਿਤਬ੍ਬਂ, ਮੂਲਚ੍ਛੇਜ੍ਜਵਸੇਨ ਅਞ੍ਞਾਤਕਅਪ੍ਪਵਾਰਿਤੇ ਨ ਯਾਚਿਤਬ੍ਬਂ, ਤਾਵਕਾਲਿਕਂ ਯਾਚਿਤਬ੍ਬ’’ਨ੍ਤਿ ਵਿਨਿਚ੍ਛਯੋ ਚ ‘‘ਸਕਟਂ…ਪੇ… ਵਟ੍ਟਤੀ’’ਤਿ ਵਿਸੇਸਵਿਨਿਚ੍ਛਯੋ ਚਾਤਿ ਅਯਂ ਨਯੋ ਵਾਸਿਆਦੀਸੁ ਚ ਵੇਦਿਤਬ੍ਬੋਤਿ ਅਤ੍ਥੋ. ਅਨਜ੍ਝਾਵੁਤ੍ਥਕਨ੍ਤਿ ਕੇਨਚਿ ‘‘ਮਮੇਤ’’ਨ੍ਤਿ ਅਪਰਿਗ੍ਗਹਿਤਂ, ‘‘ਰਕ੍ਖਿਤਗੋਪਿਤਟ੍ਠਾਨੇਯੇਵ ਹਿ ਵਿਞ੍ਞਤ੍ਤਿ ਨਾਮ ਵੁਚ੍ਚਤੀ’’ਤਿ ਅਟ੍ਠਕਥਾਵਚਨਤੋ ਅਰਕ੍ਖਿਤਾਗੋਪਿਤਕਨ੍ਤਿ ਵੁਤ੍ਤਂ ਹੋਤਿ. ਅਟ੍ਠਕਥਾਯ ਵਲ੍ਲਿਆਦਿਵਿਨਿਚ੍ਛਯਮ੍ਪਿ ਵਤ੍ਵਾ ‘‘ਅਨਜ੍ਝਾਵੁਤ੍ਥਕਂ ਪਨ ਯਂ ਕਿਞ੍ਚਿ ਆਹਰਾਪੇਤੁਂ ਵਟ੍ਟਤੀ’’ਤਿ (ਪਾਰਾ. ਅਟ੍ਠ. ੨.੩੪੨) ਵੁਤ੍ਤਤ੍ਤਾ ਸਬ੍ਬਨ੍ਤਿ ਇਧ ਵੁਤ੍ਤਗੋਣਾਦਿਕਞ੍ਚ ਵਕ੍ਖਮਾਨਵਲ੍ਲਿਆਦਿਕਞ੍ਚ ਗਹੇਤਬ੍ਬਂ. ਇਮਿਨਾ ਪੁਬ੍ਬੇ ਵੁਤ੍ਤਵਿਨਿਚ੍ਛਯਸ੍ਸ ਰਕ੍ਖਿਤਗੋਪਿਤਵਿਸਯਤ੍ਤਂ ਦੀਪਿਤਂ ਹੋਤਿ. ਹਰਾਪੇਤੁਮ੍ਪਿ ਵਟ੍ਟਤੀਤਿ ਏਤ੍ਥ ਅਪਿ-ਸਦ੍ਦੇਨ ਪਗੇਵ ਕੇਨਚਿ ਹਰਿਤ੍ਵਾ ਦਿਨ੍ਨਨ੍ਤਿ ਦੀਪੇਤਿ.

੩੮੮. ਵਲ੍ਲਿਆਦਿਮ੍ਹੀਤਿ ਆਦਿ-ਸਦ੍ਦੇਨ ਵੇਤ੍ਤਮੁਞ੍ਜਤਿਣਮਤ੍ਤਿਕਾ ਸਙ੍ਗਣ੍ਹਾਤਿ. ਏਤ੍ਥ ਮੁਞ੍ਜਪਬ੍ਬਜਤਿਣਂ ਵਿਨਾ ਗੇਹਚ੍ਛਾਦਨਤਿਣਂ ਤਿਣਂ ਨਾਮ. ਗਰੁਭਣ੍ਡਪ੍ਪਹੋਨਕੇਤਿ ‘‘ਵਲ੍ਲਿ ਅਡ੍ਢਬਾਹੁਮਤ੍ਤਾਪੀ’’ਤਿਆਦਿਨਾ ਨਯੇਨ ਵੁਤ੍ਤਲਕ੍ਖਣੇ ਗਰੁਭਣ੍ਡਪ੍ਪਹੋਨਕੇ. ਪਰੇਸਂ ਸਨ੍ਤਕੇਯੇਵਾਤਿ ਅਵਧਾਰਣੇਨ ਨ ਅਨਜ੍ਝਾਵੁਤ੍ਥਕੇ ਦੁਕ੍ਕਟਨ੍ਤਿ ਬ੍ਯਤਿਰੇਕਤੋ ਦੀਪੇਤਿ.

੩੮੯. ਪਚ੍ਚਯੇਸੂਤਿ ਚੀਵਰਪਿਣ੍ਡਪਾਤਸੇਨਾਸਨਸਙ੍ਖਾਤੇਸੁ ਤੀਸੁ ਪਚ੍ਚਯੇਸੁ. ਏਵ-ਕਾਰੇਨ ਗਿਲਾਨਪਚ੍ਚਯਸਙ੍ਖਾਤੇ ਚਤੁਤ੍ਥਪਚ੍ਚਯੇ ਵਿਞ੍ਞਤ੍ਤਿ ਵਟ੍ਟਤੀਤਿ ਦੀਪੇਤਿ. ਵਿਞ੍ਞਤ੍ਤਿ ਨਾਮ ‘‘ਆਹਰ, ਦੇਹੀ’’ਤਿ ਇਚ੍ਛਿਤਪਚ੍ਚਯੇ ਨਾਮਂ ਵਤ੍ਵਾ ਯਾਚਨਾ. ਅਟ੍ਠਕਥਾਯਂ ਵੁਤ੍ਤਂ ‘‘ਸਬ੍ਬੇਨ ਸਬ੍ਬਂ ਨ ਵਟ੍ਟਤੀ’’ਤਿ (ਪਾਰਾ. ਅਟ੍ਠ. ੨.੩੪੨) ਸਾਵਧਾਰਣਤ੍ਥਂ ਦਸ੍ਸੇਤੁਂ ‘‘ਨ ਚ ਵਟ੍ਟਤੀ’’ਤਿ ਵੁਤ੍ਤਤ੍ਤਾ ਨੇਵ ਵਟ੍ਟਤੀਤਿ ਅਤ੍ਥੋ ਗਹੇਤਬ੍ਬੋ.

ਵਿਞ੍ਞਤ੍ਤਿਯਾ ਅਲਬ੍ਭਮਾਨਭਾਵੇਨ ਸਮਤ੍ਤਾ ਪਚ੍ਚਯੇਸੁ ਤੀਸੁ ਅਨਨ੍ਤਰਂ ਸਹਨਿਦ੍ਦਿਟ੍ਠਪਚ੍ਚਯਤ੍ਤਯਤੋ ਤਤਿਯਪਚ੍ਚਯੇਯੇਵ ਲਬ੍ਭਮਾਨਵਿਸੇਸਂ ਦਸ੍ਸੇਤੁਂ ‘‘ਤਤਿਯੇ ਪਰਿਕਥੋਭਾਸਨਿਮਿਤ੍ਤਾਨਿ ਚ ਲਬ੍ਭਰੇ’’ਤਿ ਵੁਤ੍ਤਤ੍ਤਾ ਅਵਸਿਟ੍ਠਦ੍ਵਯੇ ਪਨ ਪਰਿਕਥਾਦਯੋ ਨ ਲਬ੍ਭਨ੍ਤੀਤਿ ਵੁਤ੍ਤਂ ਹੋਤਿ. ਅਵੁਤ੍ਤੇ ਚਤੁਤ੍ਥਪਚ੍ਚਯੇਪਿ ਸਮੁਚ੍ਚਯਤ੍ਥੇਨ ਚ-ਕਾਰੇਨ ਪਰਿਕਥਾਦਿਤ੍ਤਯਂ ਲਬ੍ਭਤੀਤਿ ਸਿਦ੍ਧਤ੍ਤਾ ‘‘ਤੀਸ੍ਵੇਵਾ’’ਤਿ ਏਵ-ਕਾਰੇਨ ਬ੍ਯਤਿਰੇਕਮੁਖੇਨ ਵਿਞ੍ਞਤ੍ਤਿਯਾ ਚ ਅਨੁਞ੍ਞਾਤਤ੍ਤਾ ਚਤੁਤ੍ਥੇ ਗਿਲਾਨਪਚ੍ਚਯੇ ਪਰਿਕਥੋਭਾਸਨਿਮਿਤ੍ਤਕਮ੍ਮਵਿਞ੍ਞਤ੍ਤਿਯੋ ਵਟ੍ਟਨ੍ਤੀਤਿ ਸਿਦ੍ਧਂ. ਏਤ੍ਤਾਵਤਾ ਚਤੁਤ੍ਥੇ ਪਚ੍ਚਯੇ ਪਰਿਕਥਾਦਯੋ ਚਤ੍ਤਾਰੋਪਿ ਵਟ੍ਟਨ੍ਤਿ, ਤਤਿਯਪਚ੍ਚਯੇ ਵਿਞ੍ਞਤ੍ਤਿਂ ਵਿਨਾ ਸੇਸਤ੍ਤਯਂ ਵਟ੍ਟਤਿ, ਪੁਰਿਮਪਚ੍ਚਯਦ੍ਵਯੇ ਸਬ੍ਬਮ੍ਪਿ ਨ ਵਟ੍ਟਤੀਤਿ ਵੁਤ੍ਤਨ੍ਤਿ ਦਟ੍ਠਬ੍ਬਂ.

ਸੇਨਾਸਨਪਚ੍ਚਯੇ ਪਰਿਕਥਾਦਿਕਨ੍ਤਿ ਉਪੋਸਥਾਗਾਰਾਦਿਕਰਣਾਰਹਟ੍ਠਾਨਂ ਓਲੋਕੇਤ੍ਵਾ ਉਪਾਸਕਾਨਂ ਸੁਣਨ੍ਤਾਨਂ ‘‘ਇਮਸ੍ਮਿਂ ਵਤ ਓਕਾਸੇ ਏਵਰੂਪਂ ਸੇਨਾਸਨਂ ਕਾਤੁਂ ਵਟ੍ਟਤੀ’’ਤਿ ਵਾ ‘‘ਯੁਤ੍ਤ’’ਨ੍ਤਿ ਵਾ ‘‘ਅਨੁਰੂਪ’’ਨ੍ਤਿ ਵਾ ਪਵਤ੍ਤਾ ਕਥਾ ਪਰਿਕਥਾ ਨਾਮ. ‘‘ਉਪਾਸਕਾ ਤੁਮ੍ਹੇ ਕਤ੍ਥ ਵਸਥਾ’’ਤਿ ਪੁਚ੍ਛਿਤ੍ਵਾ ‘‘ਪਾਸਾਦੇ ਭਨ੍ਤੇ’’ਤਿ ਵੁਤ੍ਤੇ ‘‘ਭਿਕ੍ਖੂਨਂ ਪਨ ਉਪਾਸਕਾ ਪਾਸਾਦੋ ਨ ਵਟ੍ਟਤੀ’’ਤਿਆਦਿਨਾ ਨਯੇਨ ਪਵਤ੍ਤਾ ਕਥਾ ਓਭਾਸੋ ਨਾਮ. ਉਪਾਸਕੇਸੁ ਪਸ੍ਸਮਾਨੇਸੁ ਭੂਮਿਯਂ ਰਜ੍ਜੁਂ ਪਸਾਰੇਤ੍ਵਾ ਭੂਮਿਂ ਭਾਜੇਤ੍ਵਾ ਖਾਣੁਕੇ ਆਕੋਟੇਤ੍ਵਾ ‘‘ਕਿਮਿਦਂ ਭਨ੍ਤੇ’’ਤਿ ਵੁਤ੍ਤੇ ‘‘ਏਤ੍ਥ ਆਵਾਸਂ ਕਰੋਮ ਉਪਾਸਕਾ’’ਤਿਆਦਿਕਾ ਕਥਾ ਨਿਮਿਤ੍ਤਕਥਾ ਨਾਮ. ਗਿਲਾਨਪਚ੍ਚਯੇ ਚ ਇਮਿਨਾ ਨਯੇਨ ਯਥਾਰਹਂ ਵੇਦਿਤਬ੍ਬਂ. ਸਬ੍ਬਮੇਤਂ ਅਟ੍ਠਕਥਾਯ (ਪਾਰਾ. ਅਟ੍ਠ. ੨.੩੪੨) ਵੁਤ੍ਤਂ.

੩੯੦-੩. ਇਦਾਨਿ ਕੁਟਿਕਾਰਸ੍ਸ ਭਿਕ੍ਖੁਨੋ ਆਪਤ੍ਤਿਦਸ੍ਸਨਤ੍ਥਮਾਹ ‘‘ਅਦੇਸਿਤੇ’’ਤਿਆਦਿ. ਤਂ ਉਤ੍ਤਾਨਤ੍ਥਮੇਵ. ਨਿਸੇਨ੍ਤਸ੍ਸਾਤਿ ਪਾਸਾਣੇ ਘਂਸਿਤ੍ਵਾ ਤਿਖਿਣਂ ਕਰੋਨ੍ਤਸ੍ਸ. ਪਾਚਿਤ੍ਤਿਯਾ ਸਹਾਤਿ ‘‘ਭੂਤਗਾਮਪਾਤਬ੍ਯਤਾਯ ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੯੦) ਵੁਤ੍ਤਪਾਚਿਤ੍ਤਿਯੇਨ ਸਦ੍ਧਿਂ.

ਆਪਤ੍ਤਿਨ੍ਤਿ ਪਾਚਿਤ੍ਤਿਯਟ੍ਠਾਨੇ ਪਾਚਿਤ੍ਤਿਯਞ੍ਚੇਵ ਦੁਕ੍ਕਟਞ੍ਚ ਇਤਰਤ੍ਰ ਸੁਦ੍ਧਪਯੋਗਦੁਕ੍ਕਟਞ੍ਚਾਤਿ ਆਪਤ੍ਤਿਂ.

ਯਾ ਪਨਾਤਿ ਯਾ ਕੁਟਿ. ਪਠਮੇ ਦੁਤਿਯੇਤਿ ਏਤ੍ਥ ‘‘ਪਿਣ੍ਡੇਹੀ’’ਤਿ ਕਰਣਬਹੁਵਚਨਂ ਵਿਭਤ੍ਤਿਵਚਨਵਿਪਰਿਣਾਮਵਸੇਨ ‘‘ਪਿਣ੍ਡੇ’’ਤਿ ਭੁਮ੍ਮੇਕਵਚਨਨ੍ਤਂ ਕਤ੍ਵਾ ਯੋਜੇਤਬ੍ਬਂ, ‘‘ਨਿਕ੍ਖਿਤ੍ਤੇ’’ਤਿ ਅਜ੍ਝਾਹਰਿਤਬ੍ਬਂ, ਭਾਵਲਕ੍ਖਣੇ ਭੁਮ੍ਮਂ, ਨਿਕ੍ਖਿਤ੍ਤੇ ਸਤੀਤਿ ਅਤ੍ਥੋ.

੩੯੪. ‘‘ਸਚੇ ਅਞ੍ਞਸ੍ਸਾ’’ਤਿ ਪਦਚ੍ਛੇਦੋ. ਵਿਪ੍ਪਕਤਨ੍ਤਿ ਆਰਦ੍ਧਮਨਿਟ੍ਠਿਤਂ. ‘‘ਅਨਾਪਤ੍ਤੀ’’ਤਿ ਇਦਂ ਨਿਟ੍ਠਿਤੇ ਆਪਜ੍ਜਿਤਬ੍ਬਸਙ੍ਘਾਦਿਸੇਸਾਭਾਵਂ ਸਨ੍ਧਾਯਾਹ. ਪੁਬ੍ਬਪਯੋਗਮਤ੍ਤੇਨ ਹਿ ਪਾਚਿਤ੍ਤਿਯਦੁਕ੍ਕਟਾਨਿਪਿ ਹੋਨ੍ਤਿ, ਤਾਨਿ ਪਨ ਦੇਸੇਤਬ੍ਬਾਨਿ. ‘‘ਤਥਾ’’ਤਿ ਇਮਿਨਾ ‘‘ਅਨਾਪਤ੍ਤੀ’’ਤਿ ਆਕਡ੍ਢਤਿ, ਤੇਨ ਸਙ੍ਘਾਦਿਸੇਸਾਪਤ੍ਤਿਯਾ ਅਭਾਵਤੋ ਪੁਬ੍ਬਭਾਗੇ ਆਪਨ੍ਨਾਨਂ ਪਾਚਿਤ੍ਤਿਯਦੁਕ੍ਕਟਾਨਂ ਦੇਸੇਤਬ੍ਬਤਾ ਚ ਦੀਪਿਤਾ ਹੋਤਿ. ਤਂ ਕੁਟਿਨ੍ਤਿ ਤਂ ਵਿਪ੍ਪਕਤਕੁਟਿਂ.

੩੯੫. ਅਞ੍ਞਂ ਭੋਜਨਸਾਲਾਦਿਂ. ਤਥਾਤਿ ਅਨਾਪਤ੍ਤਿਮਾਹ.

੩੯੬. ‘‘ਕਰੋਤੋ’’ਤਿ ਇਮਿਨਾ ‘‘ਕਾਰਾਪਯਤੋ’’ਤਿਪਿ ਲਬ੍ਭਤਿ. ਉਭਯੇਨਾਪਿ ‘‘ਕ੍ਰਿਯਤੋ’’ਤਿ ਇਮਸ੍ਸ ਕਾਰਣਂ ਦਸ੍ਸੇਤਿ. ‘‘ਅਪ੍ਪਮਾਣਿਕ’’ਨ੍ਤਿ ਇਮਿਨਾ ਸਙ੍ਘਾਦਿਸੇਸਸ੍ਸ ਅਙ੍ਗਂ ਦਸ੍ਸੇਤਿ.

੩੯੭. ਤਨ੍ਤਿ ‘‘ਅਪ੍ਪਮਾਣਿਕ’’ਨ੍ਤਿ ਏਵਂ ਪਚ੍ਚਾਮਸਤਿ. ‘‘ਕ੍ਰਿਯਾਕ੍ਰਿਯਤੋ’’ਤਿ ਇਦਂ ਕੁਟਿਯਾ ਕਰਣਞ੍ਚ ਵਤ੍ਥੁਦੇਸਨਾਯ ਅਕਰਣਞ੍ਚ ਉਪਾਦਾਯ ਵੁਤ੍ਤਂ.

ਕੁਟਿਕਾਰਸਿਕ੍ਖਾਪਦਵਣ੍ਣਨਾ.

੩੯੮. ਵਤ੍ਥੁਂ ਅਦੇਸੇਤ੍ਵਾਤਿ ਸਮ੍ਬਨ੍ਧੋ, ‘‘ਤੇਨ ਵਿਹਾਰਕਾਰਕੇਨ ਭਿਕ੍ਖੁਨਾ ਵਿਹਾਰਵਤ੍ਥੁਂ ਸੋਧੇਤ੍ਵਾ ਸਙ੍ਘਂ ਉਪਸਙ੍ਕਮਿਤ੍ਵਾ’’ਤਿਆਦਿਨਾ (ਪਾਰਾ. ੩੬੭) ਪਦਭਾਜਨੇ ਆਗਤਨਯੇਨ ਵਿਹਾਰਂ ਕਾਰਾਪੇਨ੍ਤੇਨ ਭਿਕ੍ਖੁਨਾ ਵਿਹਾਰਵਤ੍ਥੁਂ ਸੋਧੇਤ੍ਵਾ ਸਮਤਲਂ ਕਾਰੇਤ੍ਵਾ ਸਙ੍ਘਂ ਉਪਸਙ੍ਕਮ੍ਮ ਵੁਡ੍ਢਾਨਂ ਭਿਕ੍ਖੂਨਂ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ‘‘ਅਹਂ ਭਨ੍ਤੇ ਮਹਲ੍ਲਕਂ ਵਿਹਾਰਂ ਕਤ੍ਤੁਕਾਮੋ ਸਸ੍ਸਾਮਿਕਂ ਅਤ੍ਤੁਦ੍ਦੇਸਂ, ਸੋਹਂ ਭਨ੍ਤੇ ਸਙ੍ਘਂ ਵਿਹਾਰਵਤ੍ਥੁਓਲੋਕਨਂ ਯਾਚਾਮੀ’’ਤਿ ਤਿਕ੍ਖਤ੍ਤੁਂ ਯਾਚਿਤ੍ਵਾ ਲਦ੍ਧੇ ਵੁਡ੍ਢੇ ਵਾ ਭਿਕ੍ਖੂ ਞਤ੍ਤਿਦੁਤਿਯਾਯ ਕਮ੍ਮਵਾਚਾਯ ਸਙ੍ਘੇਨ ਸਮ੍ਮਤੇ ਵਾ ਭਿਕ੍ਖੂ ਨੇਤ੍ਵਾ ਕਤਪਰਿਕਮ੍ਮਂ ਵਿਹਾਰਵਤ੍ਥੁਂ ਦਸ੍ਸੇਤ੍ਵਾ ਕੁਟਿਵਤ੍ਥੁਓਲੋਕਨੇ ਵਿਯ ਗਤਭਿਕ੍ਖੂਹਿ ਓਲੋਕੇਤ੍ਵਾ ਸਾਰਮ੍ਭਾਦਿਭਾਵਂ ਉਪਪਰਿਕ੍ਖਿਤ੍ਵਾ ਅਨਾਰਮ੍ਭਸਪਰਿਕ੍ਕਮਨਭਾਵਂ ਞਤ੍ਵਾ ਆਗਨ੍ਤ੍ਵਾ ਸਙ੍ਘਸ੍ਸ ਆਰੋਚਿਤੇ ਪੁਨ ਤੇਨ ਸਙ੍ਘਂ ਉਪਸਙ੍ਕਮਿਤ੍ਵਾ ਵੁਡ੍ਢਾਨਂ ਭਿਕ੍ਖੂਨਂ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ‘‘ਅਹਂ ਭਨ੍ਤੇ ਮਹਲ੍ਲਕਂ ਵਿਹਾਰਂ ਕਤ੍ਤੁਕਾਮੋ ਸਸ੍ਸਾਮਿਕਂ ਅਤ੍ਤੁਦ੍ਦੇਸਂ, ਸੋਹਂ ਭਨ੍ਤੇ ਸਙ੍ਘਂ ਵਿਹਾਰਵਤ੍ਥੁਦੇਸਨਂ ਯਾਚਾਮੀ’’ਤਿ ਤਿਕ੍ਖਤ੍ਤੁਂ ਯਾਚਿਤ੍ਵਾ ਸਙ੍ਘੇਨ ਞਤ੍ਤਿਦੁਤਿਯਾਯ ਕਮ੍ਮਵਾਚਾਯ ਵਿਹਾਰਵਤ੍ਥੁ ਦੇਸੇਤਬ੍ਬਂ, ਤਥਾ ਅਕਤ੍ਵਾਤਿ ਵੁਤ੍ਤਂ ਹੋਤਿ. ਇਹ ਸਾਰਮ੍ਭਾਦਿ ਪਠਮਸਿਕ੍ਖਾਪਦੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

ਮਹਲ੍ਲਕਨ੍ਤਿ ‘‘ਸਸ੍ਸਾਮਿਕਭਾਵੇਨ ਸਞ੍ਞਾਚਿਕਕੁਟਿਤੋ ਮਹਨ੍ਤਭਾਵੋ ਏਤਸ੍ਸ ਅਤ੍ਥੀਤਿ ਮਹਲ੍ਲਕੋ. ਯਸ੍ਮਾ ਵਾ ਵਤ੍ਥੁਂ ਦੇਸਾਪੇਤ੍ਵਾ ਪਮਾਣਾਤਿਕ੍ਕਮੇਨਾਪਿ ਕਾਤੁਂ ਵਟ੍ਟਤਿ, ਤਸ੍ਮਾ ਪਮਾਣਮਹਨ੍ਤਤਾਯਪਿ ਮਹਲ੍ਲਕੋ’’ਤਿ (ਪਾਰਾ. ਅਟ੍ਠ. ੨.੩੬੬) ਅਟ੍ਠਕਥਾਯਂ ਵੁਤ੍ਤਨਯੇਨ ਮਹਨ੍ਤਭਾਵੇਨ ਯੁਤ੍ਤਨ੍ਤਿ ਅਤ੍ਥੋ. ਵਿਹਾਰਨ੍ਤਿ ‘‘ਵਿਹਾਰੋ ਨਾਮ ਉਲ੍ਲਿਤ੍ਤੋ ਵਾ ਹੋਤਿ ਅਵਲਿਤ੍ਤੋ ਵਾ ਉਲ੍ਲਿਤ੍ਤਾਵਲਿਤ੍ਤੋ ਵਾ’’ਤਿ (ਪਾਰਾ. ੩੭੧) ਪਦਭਾਜਨੇ ਵੁਤ੍ਤਪ੍ਪਕਾਰਂ ਸੇਨਾਸਨਨ੍ਤਿ ਅਤ੍ਥੋ. ਵਿਹਰਨ੍ਤਿ ਅਸ੍ਮਿਨ੍ਤਿ ਵਿਗ੍ਗਹੋ. ਉਲ੍ਲਿਤ੍ਤਾਦਿਸਰੂਪਂ ਪੁਰਿਮਸਿਕ੍ਖਾਪਦੇ ਵੁਤ੍ਤਨਯਮੇਵ. ਤਂ ਵਿਹਾਰਂ ਯੋ ਕਰੇਯ੍ਯਾਤਿ ਯੋਜਨਾ. ਕਰੇਯ੍ਯ ਵਾ ਕਾਰਾਪੇਯ੍ਯ ਵਾਤਿ ਪੁਬ੍ਬੇ ਵੁਤ੍ਤਨਯਮੇਵ. ਅਤ੍ਤਵਾਸਤ੍ਥਨ੍ਤਿ ਅਤ੍ਤਨੋ ਵਾਸਂ ਪਟਿਚ੍ਚ, ਇਮਿਨਾ ਪਰਸ੍ਸ ਵਾਸਤ੍ਥਾਯ ਕਰੋਤਿ, ਅਨਾਪਤ੍ਤੀਤਿ ਬ੍ਯਤਿਰੇਕਤੋ ਵਿਞ੍ਞਾਯਤਿ. ‘‘ਗਰੁਕ’’ਨ੍ਤਿ ਏਤ੍ਥ ਵਤ੍ਥੁਦੇਸਨਾਯ ਅਕਾਰਾਪਨੇਨ ‘‘ਏਕੋਵ ਸਙ੍ਘਾਦਿਸੇਸੋ ਹੋਤੀ’’ਤਿ ਪੁਬ੍ਬੇ ਵੁਤ੍ਤਵਿਕਪ੍ਪਤ੍ਤਯਂ ਨ ਗਹੇਤਬ੍ਬਂ. ਇਦਞ੍ਚ ਵਕ੍ਖਤਿ ‘‘ਪਮਾਣਾ…ਪੇ… ਸਙ੍ਘਾਦਿਸੇਸਤਾ’’ਤਿ (ਵਿ. ਵਿ. ੩੯੯ ਆਦਯੋ).

੩੯੯. ਕ੍ਰਿਯਾਸਮੁਟ੍ਠਾਨਾਭਾਵਨ੍ਤਿ ਪਮਾਣਾਤਿਕ੍ਕਮੇਪਿ ਆਪਤ੍ਤਿਯਾ ਅਸਮ੍ਭਵਤੋ ਕਿਰਿਯਾਸਮੁਟ੍ਠਾਨਸ੍ਸ ਇਧ ਅਭਾਵੋ ਞਾਤਬ੍ਬੋ. ਕ੍ਰਿਯ…ਪੇ… ਲਕ੍ਖਯੇਤਿ ਏਤ੍ਥ ਬ੍ਯਤਿਰੇਕਤੋ ਅਦੇਸਿਤਵਤ੍ਥੁਕਤਾਯ ਅਕਿਰਿਯਾਸਮੁਟ੍ਠਾਨਤਾ ਅਨੁਞ੍ਞਾਤਾ.

ਮਹਲ੍ਲਕਵਿਹਾਰਕਥਾਵਣ੍ਣਨਾ.

੪੦੧-੩. ਤੇਸੂਤਿ ਚਤੁਵੀਸਤਿਯਾ ਪਾਰਾਜਿਕੇਸੁ. ਭਿਕ੍ਖੁਨੋ ਅਨੁਰੂਪਾਨਿ ਏਕੂਨਵੀਸਤੀਤਿ ਭਿਕ੍ਖੁਨੀਨਂ ਪਟਿਨਿਯਤਾ ਉਬ੍ਭਜਾਣੁਮਣ੍ਡਲਿਕਾਦਯੋ ਚਤ੍ਤਾਰੋ ਤਦਨੁਲੋਮਾਯ ਵਿਬ੍ਭਨ੍ਤਭਿਕ੍ਖੁਨਿਯਾ ਸਹ ਪਞ੍ਚ ਪਾਰਾਜਿਕੇ ਵਿਨਾ ਭਿਕ੍ਖੁਨੋ ਅਨੁਰੂਪਾ ਸੇਸਾ ਏਕੂਨਵੀਸਤਿ ਪਾਰਾਜਿਕਾ.

ਇਮਸ੍ਮਿਂ ਸਿਕ੍ਖਾਪਦੇ ਪਦਭਾਜਨੇ ‘‘ਪਾਰਾਜਿਕੇਨ ਧਮ੍ਮੇਨਾਤਿ ਚਤੁਨ੍ਨਂ ਅਞ੍ਞਤਰੇਨਾ’’ਤਿ (ਪਾਰਾ. ੩੮੬) ਵੁਤ੍ਤਨਯਸ੍ਸ ਇਧ ‘‘ਏਕੂਨਵੀਸਤੀ’’ਤਿ ਵਚਨਂ ਵਿਰੁਜ੍ਝਤੀਤਿ ਚੇ? ਨ ਵਿਰੁਜ੍ਝਤਿ. ਕਸ੍ਮਾ? ਯਸ੍ਮਾ ਪਦਭਾਜਨਂ ਪਾਤਿਮੋਕ੍ਖੁਦ੍ਦੇਸਾਗਤਮਤ੍ਤਂ ਗਹੇਤ੍ਵਾ ਪਵਤ੍ਤਂ, ਇਦਂ ਪਨ ਬੁਦ੍ਧਾਨੁਮਤਿਂ ਗਹੇਤ੍ਵਾ ਵਿਨਯਪਰਿਯਤ੍ਤਿਪਵਤ੍ਤਕਾਨਂ ਆਚਰਿਯਾਨਂ ਮਤਂ ਗਹੇਤ੍ਵਾ ਪਵਤ੍ਤਂ, ਤਸ੍ਮਾ ਨ ਵਿਰੁਜ੍ਝਤੀਤਿ ਗਹੇਤਬ੍ਬਂ. ਆਚਰਿਯੋ ਸਬ੍ਬਪਾਰਾਜਿਕਾਨਂ ‘‘ਬ੍ਰਹ੍ਮਚਰਿਯਾ ਚਾਵੇਯ੍ਯ’’ਨ੍ਤਿ (ਪਾਰਾ. ੩੮੫) ਵੁਤ੍ਤਅਨੁਦ੍ਧਂਸਨਸ੍ਸ ਏਕਨ੍ਤਸਾਧਨਤ੍ਤਾ ਭਿਕ੍ਖੁਨੀਨਂ ਪਟਿਨਿਯਤਸਾਨੁਲੋਮਪਾਰਾਜਿਕਪਞ੍ਚਕਂ ਵਿਨਾ ਅਵਸੇਸਂ ਸਬ੍ਬਂ ਸਙ੍ਗਣ੍ਹਿ, ਤੇਨੇਵ ਵਿਨਯਟ੍ਠਕਥਾਯ ਗਣ੍ਠਿਪਦਵਿਵਰਣੇ ‘‘ਚਤੁਨ੍ਨਂ ਅਞ੍ਞਤਰੇਨਾਤਿ ਪਾਤਿਮੋਕ੍ਖੁਦ੍ਦੇਸੇ ਏਵ ਆਗਤੇ ਗਹੇਤ੍ਵਾ ਵੁਤ੍ਤਂ, ਇਤਰੇਸਂ ਅਞ੍ਞਤਰੇਨਾਪਿ ਅਨੁਦ੍ਧਂਸੇਨ੍ਤਸ੍ਸ ਸਙ੍ਘਾਦਿਸੇਸੋਵਾ’’ਤਿ ਵੁਤ੍ਤਂ. ਤਸ੍ਮਾ ‘‘ਅਨੁਦ੍ਧਂਸੇਯ੍ਯਾ’’ਤਿ (ਪਾਰਾ. ੩੮੪) ਪਾਠੇ ਅਧਿਪ੍ਪਾਯਂ ਗਹੇਤ੍ਵਾ ਪਵਤ੍ਤਤ੍ਤਾ ਇਮੇਸਂ ਆਚਰਿਯਾਨਂ ਮਤਂ ਪਮਾਣਨ੍ਤਿ ਗਹੇਤਬ੍ਬਂ. ‘‘ਤੇਸੁ ਅਞ੍ਞਤਰੇਨਾ’’ਤਿ ਵਕ੍ਖਮਾਨਤ੍ਤਾ ‘‘ਏਕੂਨਵੀਸਤੀ’’ਤਿ ਏਤ੍ਥ ‘‘ਯਾਨੀ’’ਤਿ ਸਾਮਤ੍ਥਿਯਾ ਲਬ੍ਭਤਿ.

ਅਞ੍ਞਤਰੇਨ ਅਮੂਲਕੇਨਾਤਿ ਯੋਜਨਾ. ਅਮੂਲਕੇਨਾਤਿ ਚੋਦਕਸ੍ਸ ਦਸ੍ਸਨਾਦੀਹਿ ਚੋਦਨਾਮੂਲੇਹਿ ਵਿਰਹਿਤਤ੍ਤਾ ਅਮੂਲਕਂ, ਪਾਰਾਜਿਕਂ, ਤੇਨ. ਯਥਾਹ ਅਟ੍ਠਕਥਾਯਂ ‘‘ਯਂ ਪਾਰਾਜਿਕਂ ਚੋਦਕੇਨ ਚੁਦਿਤਕਮ੍ਹਿ ਪੁਗ੍ਗਲੇ ਨੇਵ ਦਿਟ੍ਠਂ ਨ ਸੁਤਂ ਨ ਪਰਿਸਙ੍ਕਿਤਂ, ਇਦਂ ਏਤੇਸਂ ਦਸ੍ਸਨਸਵਨਪਰਿਸਙ੍ਕਾਸਙ੍ਖਾਤਾਨਂ ਮੂਲਾਨਂ ਅਭਾਵੇਨ ਅਮੂਲਕਂ ਨਾਮਾ’’ਤਿ (ਪਾਰਾ. ਅਟ੍ਠ. ੨.੩੮੫-੩੮੬). ਏਤ੍ਥ ਚ ਮਂਸਚਕ੍ਖੁਨਾ ਵਾ ਦਿਬ੍ਬਚਕ੍ਖੁਨਾ ਵਾ ਦਿਟ੍ਠਂ ਦਿਟ੍ਠਂ ਨਾਮ. ਪਕਤਿਸੋਤੇਨ ਵਾ ਦਿਬ੍ਬਸੋਤੇਨ ਵਾ ਸੁਤਂ ਸੁਤਂ ਨਾਮ. ਚਿਤ੍ਤੇਨ ਪਰਿਸਙ੍ਕਿਤਂ ਪਰਿਸਙ੍ਕਿਤਂ ਨਾਮ. ਤਂ ਤਿਵਿਧਂ ਦਿਟ੍ਠਸੁਤਮੁਤਪਰਿਸਙ੍ਕਿਤਵਸੇਨ.

ਤਤ੍ਥ ਤਾਦਿਸੇ ਕਮ੍ਮਨਿਯੇ ਓਕਾਸੇ ਮਾਤੁਗਾਮੇਨ ਸਦ੍ਧਿਂ ਭਿਕ੍ਖੁਨੋ ਅਞ੍ਞਥਿਯਂ ਪਯੋਗਂ ਦਿਸ੍ਵਾ ਅਞ੍ਞਥਾ ਗਹੇਤ੍ਵਾ ‘‘ਵੀਤਿਕ੍ਕਮਨਂ ਨੁ ਖੋਯਮਕਾਸੀ’’ਤਿ ਗਹਣਂ ਦਿਟ੍ਠਪਰਿਸਙ੍ਕਿਤਂ ਨਾਮ. ਕੁਟ੍ਟਤਿਰੋਹਿਤੇ ਭਿਕ੍ਖੁਮ੍ਹਿ ਮਾਤੁਗਾਮਸ੍ਸ ਸਦ੍ਦਂ ਸੁਤ੍ਵਾ ਤਤ੍ਥ ਅਞ੍ਞਸ੍ਸ ਵਿਞ੍ਞੁਪੁਰਿਸਸ੍ਸ ਸਬ੍ਭਾਵਂ ਅਜਾਨਿਤ੍ਵਾ ‘‘ਵੀਤਿਕ੍ਕਮਨਂ ਨੁ ਖੋਯਮਕਾਸੀ’’ਤਿ ਏਵਂ ਗਹਣਂ ਸੁਤਪਰਿਸਙ੍ਕਿਤਂ ਨਾਮ. ਵਿਹਾਰਪਰਿਯਨ੍ਤੇ ਤਰੁਣਮਾਤੁਗਾਮਪੁਰਿਸਾਨਂ ਦਿਵਸਂ ਵੀਤਿਨਾਮੇਤ੍ਵਾ ਗਤਟ੍ਠਾਨੇ ਵਿਪ੍ਪਕਿਣ੍ਣਪੁਪ੍ਫਾਨਿ ਓਲੋਕੇਤ੍ਵਾ, ਮਂਸਸੁਰਗਨ੍ਧਞ੍ਚ ਘਾਯਿਤ੍ਵਾ ‘‘ਇਦਂ ਕਸ੍ਸ ਕਮ੍ਮ’’ਨ੍ਤਿ ਉਪਪਰਿਕ੍ਖਨ੍ਤੇਨ ਭਿਕ੍ਖੁਨੋ ਚੇਤਿਯਪੂਜਿਤਮਾਲਾਗਨ੍ਧਸ੍ਸ ਪੀਤਾਰਿਟ੍ਠਸ੍ਸ ਭਿਕ੍ਖੁਨੋ ਸਰੀਰਗਨ੍ਧਂ ਘਾਯਿਤ੍ਵਾ ‘‘ਤਂ ਏਤਸ੍ਸ ਕਮ੍ਮਂ ਨੁ ਖੋ’’ਤਿ ਕਿਰਿਯਮਾਨਸਂਸਯੋ ਮੁਤਪਰਿਸਙ੍ਕਿਤਂ ਨਾਮ. ਏਵਰੂਪਸ੍ਸ ਦਿਟ੍ਠਸੁਤਪਰਿਸਙ੍ਕਿਤਮੂਲਕਸ੍ਸ ਅਭਾਵਤੋ ਅਮੂਲਕੇਨ ਪਾਰਾਜਿਕੇਨਾਤਿ ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਸਮਨ੍ਤਪਾਸਾਦਿਕਾਯ (ਪਾਰਾ. ਅਟ੍ਠ. ੨.੩੮੫-੩੮੬) ਵੁਤ੍ਤਨਯੇਨ ਦਟ੍ਠਬ੍ਬੋ.

ਚੋਦੇਤੀਤਿ ‘‘ਪਾਰਾਜਿਕਂ ਧਮ੍ਮਂ ਆਪਨ੍ਨੋਸੀ’’ਤਿਆਦਿਵਚਨੇਨ ਸਯਂ ਚੋਦੇਤਿ. ਚੋਦਾਪਨਂ ਪਨ ਵਕ੍ਖਤਿ. ਚਾਵਨਚੇਤਨੋ ਹੁਤ੍ਵਾਤਿ ‘‘ਅਪ੍ਪੇਵ ਨਾਮ ਨਂ ਇਮਮ੍ਹਾ ਬ੍ਰਹ੍ਮਚਰਿਯਾ ਚਾਵੇਯ੍ਯ’’ਨ੍ਤਿ ਉਪ੍ਪਨ੍ਨੇਨ ਪਰਂ ਸਾਸਨਾ ਚਾਵੇਤੁਕਾਮੇਨ ਚਿਤ੍ਤੇਨ ਸਮਨ੍ਨਾਗਤੋ ਹੁਤ੍ਵਾ. ‘‘ਸੁਦ੍ਧਂ ਵਾ ਅਸੁਦ੍ਧਂ ਵਾ’’ਤਿ ਇਦਂ ‘‘ਚੋਦੇਤੀ’’ਤਿ ਇਮਿਨਾ ਵੁਤ੍ਤਚੋਦਨਾਕਿਰਿਯਾਯ ਕਮ੍ਮਨਿਦ੍ਦੇਸੋ, ‘‘ਅਞ੍ਞਂ ਭਿਕ੍ਖੁ’’ਨ੍ਤਿ ਸੇਸੋ, ਪਾਰਾਜਿਕਮਨਾਪਨ੍ਨਂ ਵਾ ਆਪਨ੍ਨਂ ਵਾ ਅਞ੍ਞਂ ਭਿਕ੍ਖੁਨ੍ਤਿ ਅਤ੍ਥੋ. ਯੋਤਿ ਮਾਤਿਕਾਗਤਭਿਕ੍ਖੁ, ‘‘ਦੁਟ੍ਠੋ ਦੋਸੋ ਅਪ੍ਪਤੀਤੋ’’ਤਿ ਇਦਂ ਅਜ੍ਝਾਹਰਿਤਬ੍ਬਂ, ਉਪ੍ਪਨ੍ਨੇਨ ਦੋਸਲੇਸੇਨ ਸਯਂ ਦੂਸਿਤੋ, ਪਰਞ੍ਚ ਦੂਸੇਨ੍ਤੋ ਪੀਤਿਸੁਖਾਦੀਹਿ ਅਪਗਤੋ ਯੋ ਭਿਕ੍ਖੂਤਿ ਅਤ੍ਥੋ. ਵਕ੍ਖਮਾਨੇਨ ‘‘ਤਸ੍ਸਾ’’ਤਿ ਇਮਿਨਾ ਸਮ੍ਬਨ੍ਧੋ.

‘‘ਕਤੇ ਓਕਾਸਮ੍ਹੀ’’ਤਿ ਪਦਚ੍ਛੇਦੋ, ਓਕਾਸਂ ‘‘ਕਾਰਾਪੇਤ੍ਵਾ’’ਤਿ (ਪਾਰਾ. ੩੮੯) ਪਾਠਤੋ ਅਨ੍ਤੋਨੀਤਹੇਤ੍ਵਤ੍ਥਤਾਯ ‘‘ਕਤੇ’’ਤਿ ‘‘ਕਾਰਿਤੇ’’ਤਿ ਏਤਸ੍ਸ ਪਰਿਯਾਯੋ ਹੋਤਿ, ‘‘ਓਕਾਸਂ ਮੇ ਕਰੋਹਿ, ਅਹਂ ਤਂ ਵਤ੍ਤੁਕਾਮੋ’’ਤਿ ਓਕਾਸੇ ਕਾਰਾਪਿਤੇਤਿ ਅਤ੍ਥੋ. ‘‘ਅਕਤੇ ਓਕਾਸੇ’’ਤਿ ਪਦਚ੍ਛੇਦੋ, ਪੁਬ੍ਬੇ ਵੁਤ੍ਤੋਯੇਵਤ੍ਥੋ. ਦੁਕ੍ਕਟਾਪਤ੍ਤਿਯਾ ਸਹਾਤਿ ਓਕਾਸਸ੍ਸ ਅਕਾਰਾਪਿਤਤ੍ਤਾ ਦੁਕ੍ਕਟਾਪਤ੍ਤਿਯਾ ਸਦ੍ਧਿਂ.

੪੦੪-੫. ਕੋਣ੍ਠੋਸੀਤਿ ਧੁਤ੍ਤੋਸਿ. ਜੇਟ੍ਠਬ੍ਬਤਿਕੋਸੀਤਿ ਕਾਲੀਦੇਵੀਵਤਨਿਯੁਤ੍ਤੋਸਿ. ਕਾਲੀਦੇਵੀ ਕਿਰ ਸਿਰਿਦੇਵਿਯਾ ਜੇਟ੍ਠਾ, ਤਸ੍ਮਾ ਤਸ੍ਸਾ ਵਤਧਰੋ ਜੇਟ੍ਠਬ੍ਬਤਿਕੋ ਵੁਚ੍ਚਤਿ. ਤਂ ਪਨ ਵਤਂ ਸਮਾਦਿਯਿਤ੍ਵਾ ਪੂਰੇਨ੍ਤੋ ਸਕਲਸਰੀਰੇ ਮਸਿਂ ਮਕ੍ਖੇਤ੍ਵਾ ਕਾਕਪਤ੍ਤਾਨਿ ਮੁਟ੍ਠਿਯਂ ਕਤ੍ਵਾ ਕਾਲੀਦੇਵਿਂ ਫਲਕੇ ਲਿਖਾਪੇਤ੍ਵਾ ਤਂ ਕਾਜਕੋਟਿਯਂ ਬਨ੍ਧਿਤ੍ਵਾ ਉਚ੍ਛਿਟ੍ਠੋਦਕਾਦਿਅਸੁਚਿਸਨ੍ਨਿਚਿਤਓਲਿਗਲ੍ਲਂ ਪਵਿਸਿਤ੍ਵਾ ‘‘ਦੁਸ੍ਸੀਲੋਸਿ ਨਿਸ੍ਸੀਲੋਸਿ ਸੀਲਵਿਰਹਿਤੋਸੀ’’ਤਿ ਥੋਮੇਨ੍ਤੋ ਵਿਚਰਤੀਤਿ.

ਦੁਸ੍ਸੀਲਤ੍ਤਾ ਏਵ ਹੀਨਜ੍ਝਾਸਯਤਾਯ ਪਾਪਧਮ੍ਮੋ ਲਾਮਕਸਭਾਵੋਸਿ. ਪੂਤਿਨਾ ਕਮ੍ਮੇਨ ਸੀਲਵਿਪਤ੍ਤਿਯਾ ਅਨ੍ਤੋ ਪਵਿਟ੍ਠਤ੍ਤਾ ਅਨ੍ਤੋਪੂਤਿ. ਛਹਿ ਦ੍ਵਾਰੇਹਿ ਰਾਗਾਦਿਕਿਲੇਸਾਨੁਸ੍ਸਵਨੇਨ ਤਿਨ੍ਤਤ੍ਤਾ ਅਵਸ੍ਸੁਤੋ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵ. ਗਰੁਕਂ ਨਿਦ੍ਦਿਸੇਤਿ ਏਤ੍ਥ ‘‘ਕਤੋਕਾਸਮ੍ਹੀ’’ਤਿ ਚ ‘‘ਤਥੇਵ ਅਕਤੋਕਾਸੇ, ਦੁਕ੍ਕਟਾਪਤ੍ਤਿਯਾ ਸਹਾ’’ਤਿ ਚ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਏਵਮੁਤ੍ਤਰਤ੍ਰਾਪਿ.

੪੦੬. ਸਮ੍ਮੁਖਾਤਿ ਚੁਦਿਤਕਸ੍ਸ ਸਮ੍ਮੁਖਾ, ਅਵਿਦੂਰੇਤਿ ਅਤ੍ਥੋ. ਹਤ੍ਥਮੁਦ੍ਦਾਯਾਤਿ ਮੁਤ੍ਤਪਾਣਾਦਿਵਸੇਨ. ਤਂ ਹਤ੍ਥਮੁਦ੍ਦਾਯ ਕਥਿਤਂ. ਪਰੋਤਿ ਯਂ ਚੋਦੇਸਿ, ਸੋ ਚੁਦਿਤਕੋ ਪਰੋ. ਭਿਕ੍ਖੁਨੋਤਿ ਚੋਦਕਸ੍ਸ ਭਿਕ੍ਖੁਨੋ.

੪੦੭. ਸਮ੍ਮੁਖੇ ਠਤ੍ਵਾਤਿ ਚੁਦਿਤਕਸ੍ਸ ਆਸਨ੍ਨੇ ਠਤ੍ਵਾ. ‘‘ਚੋਦਾਪੇਨ੍ਤਸ੍ਸਾ’’ਤਿ ਏਤਸ੍ਸ ਕਮ੍ਮਭਾਵਤੋ ਪਰੋਤਿ ਇਦਂ ਉਪਯੋਗਨ੍ਤਵਸੇਨ ਸਮ੍ਬਨ੍ਧਿਤਬ੍ਬਂ. ਏਵਮੁਤ੍ਤਰਤ੍ਰ. ਕੇਨਚੀਤਿ ਅਞ੍ਞੇਨ ਕੇਨਚਿ ਪੁਗ੍ਗਲੇਨ. ਤਸ੍ਸ ਚੋਦਕਸ੍ਸ. ‘‘ਚੋਦਾਪੇਨ੍ਤਸ੍ਸਾ’’ਤਿ ਪੁਨ ਵਚਨਂ ਨਿਯਮਤ੍ਥਂ.

੪੦੮. ਸੋਪੀਤਿ ਉਗ੍ਗਹਾਪਿਤਤ੍ਤਾ ਚੋਦਨਂ ਕਰੋਨ੍ਤੋ ਇਤਰੋ ਪਯੋਜ੍ਜਕਪੁਗ੍ਗਲੋਪਿ. ਤੇਸਂ ਦ੍ਵਿਨ੍ਨਮ੍ਪੀਤਿ ਪਯੋਜਕਪਯੋਜ੍ਜਕਾਨਂ ਦ੍ਵਿਨ੍ਨਮ੍ਪਿ.

੪੦੯. ਵੁਤ੍ਤਟ੍ਠਾਨਂ ਪਣ੍ਣਂ ਵਾ ਸਨ੍ਦੇਸਂ ਵਾ ਹਰਨ੍ਤੋ ਦੂਤੋ ਨਾਮ, ਸੋ ‘‘ਪਣ੍ਣਂ ਵਾ ਸਾਸਨਂ ਵਾ ਪੇਸੇਤ੍ਵਾ’’ਤਿ ਇਮਿਨਾ ਸਙ੍ਗਯ੍ਹਤੀਤਿ ਤਸ੍ਮਿਂ ਵਿਸੁਂ ਅਵਤ੍ਤਬ੍ਬੇਪਿ ‘‘ਦੁਤ’’ਨ੍ਤਿ ਵਚਨੇਨ ਨਿਸ੍ਸਟ੍ਠਦੂਤਮਾਹ. ਪਣ੍ਣਂ ਵਾ ਅਦਤ੍ਵਾ ‘‘ਏਵਞ੍ਚ ਏਵਞ੍ਚ ਵਦਾ’’ਤਿ ਸਾਸਨਞ੍ਚ ਅਦਤ੍ਵਾ ‘‘ਤਂ ਚੋਦੇਹੀ’’ਤਿ ਅਤ੍ਥਮਤ੍ਤਮੇਵ ਦਤ੍ਵਾ ਨਿਸ੍ਸਟ੍ਠੋ ਭਿਕ੍ਖੁ ਇਧ ‘‘ਨਿਸ੍ਸਟ੍ਠਦੂਤੋ’’ਤਿ ਗਹੇਤਬ੍ਬੋ.

ਅਥ ਵਾ ‘‘ਦੂਤ’’ਨ੍ਤਿ ਇਮਿਨਾ ਚੋਦੇਤੁਂ ਉਗ੍ਗਹਾਪੇਤ੍ਵਾ, ਤਮਨੁਗ੍ਗਹਾਪੇਤ੍ਵਾ ਵਾ ਨਿਸ੍ਸਟ੍ਠੋ ਭਿਕ੍ਖੁ ਦੂਤੋਯੇਵ ਗਹੇਤਬ੍ਬੋ. ‘‘ਪਣ੍ਣ’’ਨ੍ਤਿ ਇਮਿਨਾ ਪਬ੍ਬਜਿਤਸ੍ਸ ਵਾ ਅਪਬ੍ਬਜਿਤਸ੍ਸ ਵਾ ਕਸ੍ਸਚਿ ਹਤ੍ਥੇ ਚੋਦਨਂ ਲਿਖਿਤ੍ਵਾ ਦਿਨ੍ਨਪਣ੍ਣਂ ਗਹੇਤਬ੍ਬਂ. ਸਾਸਨਨ੍ਤਿ ‘‘ਪਾਰਾਜਿਕਂ ਆਪਨ੍ਨੋ’’ਤਿਆਦਿਨਾ ਨਯੇਨ ਵਤ੍ਵਾ ਪੇਸਿਯਮਾਨਂ ਸਾਸਨਂ ਗਹੇਤਬ੍ਬਂ. ਇਦਂ ਤਯਮ੍ਪਿ ਦੂਰੇ ਨਿਸੀਦਿਤ੍ਵਾ ਅਞ੍ਞੇਹਿ ਕਾਰਾਪਨਤੋ ‘‘ਚੋਦਾਪੇਨ੍ਤਸ੍ਸਾ’’ਤਿ ਆਹ. ‘‘ਪਰ’’ਨ੍ਤਿ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਏਤ੍ਥ ਓਕਾਸਕਾਰਾਪਨਂ ਨਤ੍ਥਿ.

੪੧੦. ਤਥਾਤਿ ਯਥਾ ਅਮੂਲਕੇਨ ਪਾਰਾਜਿਕੇਨ ਸਮ੍ਮੁਖਾ ਓਕਾਸੇ ਕਾਰਿਤੇ, ਅਕਾਰਿਤੇ ਚ, ਤਥਾ ਅਮੂਲਕੇਹਿ ਸਙ੍ਘਾਦਿਸੇਸੇਹੀਤਿ ਵੁਤ੍ਤਂ ਹੋਤਿ. ‘‘ਵੁਤ੍ਤੇ ਸਮ੍ਮੁਖਾ ਪਰੇ’’ਤਿ ਭੁਮ੍ਮਵਸੇਨ ਅਧਿਕਤੇਨ ਯੋਜੇਤਬ੍ਬਂ, ਚੋਦੇਤਿ ਚੋਦਾਪੇਤੀਤਿ ਵੁਤ੍ਤਂ ਹੋਤੀਤਿ. ਪਾਚਿਤ੍ਤਿਯਾਪਤ੍ਤੀਤਿ ਓਕਾਸੇ ਕਾਰਿਤੇ ਕੇਵਲਾ, ਅਕਾਰਿਤੇ ਦੁਕ੍ਕਟੇਨ ਸਹਾਤਿ ਗਹੇਤਬ੍ਬਂ. ਸਮ੍ਮੁਖਾ ਸੇਸਾਪਤ੍ਤੀਹਿ ਪਰੇ ਵੁਤ੍ਤੇ ਚਾਵਨਸਞ੍ਞਿਨੋ ਦੁਕ੍ਕਟਂ ਹੋਤੀਤਿ ਯੋਜਨਾ. ਓਕਾਸਾਕਾਰਾਪਨੇਨਪਿ ਦੁਕ੍ਕਟਮੇਵ ਹੋਤਿ.

੪੧੧. ਅਕ੍ਕੋਸਨਾਧਿਪ੍ਪਾਯਸ੍ਸਾਤਿ ਖੁਂਸਨਾਧਿਪ੍ਪਾਯਸ੍ਸ. ਅਕਤੋਕਾਸਨ੍ਤਿ ਅਕਾਰਿਤੋਕਾਸਂ, ‘‘ਪਰ’’ਨ੍ਤਿ ਇਮਿਨਾ ਯੋਜੇਤਬ੍ਬਂ. ਅਤ੍ਤਨਾਤਿ ਚੋਦਕੇਨ, ‘‘ਸਯਂ ਅਕਾਰਿਤੋਕਾਸ’’ਨ੍ਤਿ ਇਮਿਨਾ ਯੋਜੇਤਬ੍ਬਂ. ਸਹ ਪਾਚਿਤ੍ਤਿਯੇਨਾਤਿ ‘‘ਓਮਸਵਾਦੇ ਪਾਚਿਤ੍ਤਿਯ’’ਨ੍ਤਿ (ਪਾਰਾ. ੧੪) ਵੁਤ੍ਤਪਾਚਿਤ੍ਤਿਯੇਨ ਸਹ. ਵਦਨ੍ਤਸ੍ਸਾਤਿ ਚੋਦੇਨ੍ਤਸ੍ਸ ਵਾ ਚੋਦਾਪੇਨ੍ਤਸ੍ਸ ਵਾ, ਏਤ੍ਥ ‘‘ਸਮ੍ਮੁਖਾ’’ਤਿ ਇਦਂ ਵਕ੍ਖਮਾਨਸ੍ਸ ‘‘ਅਸਮ੍ਮੁਖਾ’’ਤਿ ਏਤਸ੍ਸ ਵਿਪਰਿਯਾਯਤੋ ਲਬ੍ਭਤਿ, ਚ-ਕਾਰੇਨ ਕਾਰਿਤੋਕਾਸਪਕ੍ਖੇ ਦੁਕ੍ਕਟੇਨ ਪਾਚਿਤ੍ਤਿਯਸਮ੍ਬਨ੍ਧੀ.

੪੧੨. ਅਸਮ੍ਮੁਖਾ ਵਦਨ੍ਤਸ੍ਸਾਤਿ ਏਤ੍ਥ ‘‘ਅਕ੍ਕੋਸਨਾਧਿਪ੍ਪਾਯਸ੍ਸਾ’’ਤਿ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ‘‘ਅਕਤੋਕਾਸਮਤ੍ਤਨਾ’’ਤਿ ਨਾਨੁਵਤ੍ਤਤਿ. ਸਤ੍ਤਹਿ ਆਪਤ੍ਤੀਹੀਤਿ ਪਾਰਾਜਿਕਸਙ੍ਘਾਦਿਸੇਸਥੁਲ੍ਲਚ੍ਚਯਪਾਚਿਤ੍ਤਿਯਪਾਟਿਦੇਸਨੀਯਦੁਕ੍ਕਟਦੁਬ੍ਭਾਸਿਤਸਙ੍ਖਾਤੇਸੁ ਸਤ੍ਤਸੁ ਆਪਤ੍ਤਿਕ੍ਖਨ੍ਧੇਸੁ ਯੇਨ ਕੇਨਚੀਤਿ ਵੁਤ੍ਤਂ ਹੋਤਿ. ‘‘ਤਥਾ’’ਤਿ ਇਮਿਨਾ ‘‘ਅਸਮ੍ਮੁਖਾ’’ਤਿ ਇਦਂ ਸਙ੍ਗਣ੍ਹਾਤਿ. ਕਮ੍ਮਨ੍ਤਿ ਤਜ੍ਜਨੀਯਾਦਿਸਤ੍ਤਵਿਧਂ ਕਮ੍ਮਂ.

੪੧੩. ਉਮ੍ਮਤ੍ਤਕਾਦੀਨਨ੍ਤਿ ਆਦਿ-ਸਦ੍ਦੇਨ ‘‘ਅਨਾਪਤ੍ਤਿ ਸੁਦ੍ਧੇ ਅਸੁਦ੍ਧਦਿਟ੍ਠਿਸ੍ਸ ਅਸੁਦ੍ਧੇ ਅਸੁਦ੍ਧਦਿਟ੍ਠਿਸ੍ਸ ਉਮ੍ਮਤ੍ਤਕਸ੍ਸ ਆਦਿਕਮ੍ਮਿਕਸ੍ਸਾ’’ਤਿ (ਪਾਰਾ. ੩੯੦) ਵੁਤ੍ਤੇ ਸਙ੍ਗਣ੍ਹਾਤਿ. ਪਞ੍ਚਙ੍ਗਸਂਯੁਤਨ੍ਤਿ ਯਂ ਚੋਦੇਤਿ, ਤਸ੍ਸ ‘‘ਉਪਸਮ੍ਪਨ੍ਨੋ’’ਤਿ ਸਙ੍ਖ੍ਯੂਪਗਮਨਂ, ਤਸ੍ਮਿਂ ਸੁਦ੍ਧਸਞ੍ਞਿਤਾ, ਯੇਨ ਪਾਰਾਜਿਕੇਨ ਚੋਦੇਤਿ, ਤਸ੍ਸ ਦਿਟ੍ਠਾਦਿਵਸੇਨ ਅਮੂਲਕਤਾ, ਚਾਵਨਾਧਿਪ੍ਪਾਯੇਨ ਸਮ੍ਮੁਖਾ ਚੋਦਨਾ, ਤਸ੍ਸ ਤਙ੍ਖਣਵਿਜਾਨਨਨ੍ਤਿ ਇਮੇਹਿ ਪਞ੍ਚਹਿ ਅਙ੍ਗੇਹਿ ਯੁਤ੍ਤਂ ਹੋਤਿ.

੪੧੫. ਇਦਨ੍ਤਿ ‘‘ਸਿਕ੍ਖਾਪਦ’’ਨ੍ਤਿ ਸੇਸੋ, ‘‘ਸਿਕ੍ਖਾਪਦ’’ਨ੍ਤਿ ਚ ਇਮਿਨਾ ਤਪ੍ਪਟਿਪਾਦਨੀਯਾ ਆਪਤ੍ਤਿਯੇਵ ਗਯ੍ਹਤਿ. ਤਿਸਮੁਟ੍ਠਾਨਨ੍ਤਿ ਕਾਯਚਿਤ੍ਤਤੋ, ਵਾਚਾਚਿਤ੍ਤਤੋ, ਕਾਯਵਾਚਾਚਿਤ੍ਤਤੋਤਿ ਸਚਿਤ੍ਤਕੇਹਿ ਤੀਹਿ ਸਮੁਟ੍ਠਾਨਤੋ ਤਿਸਮੁਟ੍ਠਾਨਂ. ਤੇਨੇਵਾਹ ‘‘ਸਚਿਤ੍ਤ’’ਨ੍ਤਿ. ਪਟਿਘਚਿਤ੍ਤਾਨਂ ਦ੍ਵਿਨ੍ਨਂ ਅਞ੍ਞਤਰੇਨ ਸਹਿਤਤ੍ਤਾ ਸਚਿਤ੍ਤਕਂ. ਤਂਸਮ੍ਪਯੁਤ੍ਤਾਯ ਦੋਮਨਸ੍ਸਵੇਦਨਾਯ ਵਸੇਨ ਦੁਕ੍ਖਵੇਦਨਂ.

ਦੁਟ੍ਠਦੋਸਕਥਾਵਣ੍ਣਨਾ.

੪੧੬. ਲੇਸਮਤ੍ਤਨ੍ਤਿ ‘‘ਅਞ੍ਞਮ੍ਪਿ ਵਤ੍ਥੁਂ ਲਿਸ੍ਸਤਿ ਸਿਲਿਸ੍ਸਤਿ ਵੋਹਾਰਮਤ੍ਤੇਨੇਵ ਈਸਕਂ ਅਲ੍ਲੀਯਤੀਤਿ ਲੇਸੋ, ਜਾਤਿਆਦੀਨਂਯੇਵ ਅਞ੍ਞਤਰਕੋਟ੍ਠਾਸਸ੍ਸੇਤਂ ਅਧਿਵਚਨ’’ਨ੍ਤਿ (ਪਾਰਾ. ਅਟ੍ਠ. ੨.੩੯੧) ਅਟ੍ਠਕਥਾਯ ਦਸ੍ਸਿਤਨਿਬ੍ਬਚਨੇਸੁ ‘‘ਲੇਸੋ ਨਾਮ ਦਸ ਲੇਸਾ ਜਾਤਿਲੇਸੋ ਨਾਮਲੇਸੋ’’ਤਿਆਦਿਨਾ (ਪਾਰਾ. ਅਟ੍ਠ. ੩੯੪) ਨਯੇਨ ਪਦਭਾਜਨੇ ਵੁਤ੍ਤੇਸੁ ਜਾਤਿਨਾਮਗੋਤ੍ਤਾਦੀਸੁ ਦਸਸੁ ਲੇਸੇਸੁ ਅਞ੍ਞਤਰਲੇਸਮਤ੍ਤਨ੍ਤਿ ਵੁਤ੍ਤਂ ਹੋਤਿ.