ਪਾਰਾਜਿਕਕਥਾ

ਪਠਮਪਾਰਾਜਿਕਕਥਾਵਣ੍ਣਨਾ

੬. ਏਵਂ ਪਞ੍ਚਹਿ ਗਾਥਾਹਿ ਰਤਨਤ੍ਤਯਪਣਾਮਾਦਿਂ ਦਸ੍ਸੇਤ੍ਵਾ ਇਦਾਨਿ ਯਥਾਪਟਿਞ੍ਞਾਤਵਿਨਿਚ੍ਛਯਂ ਦਸ੍ਸੇਤੁਮਾਹ ‘‘ਤਿਵਿਧੇ’’ਤਿਆਦਿ. ਤਤ੍ਥ ‘‘ਤਿਵਿਧੇ’’ਤਿਆਦਿਨਾ ਪਠਮਪਾਰਾਜਿਕਸਿਕ੍ਖਾਪਦਵਿਨਿਚ੍ਛਯਂ ਦਸ੍ਸੇਤਿ. ਤਿਵਿਧੇਤਿ ਵਚ੍ਚਪਸ੍ਸਾਵਮੁਖਮਗ੍ਗਾਨਂ ਵਸੇਨ ਤਿਪ੍ਪਕਾਰੇ ਮਗ੍ਗੇਤਿ ਇਮਿਨਾ ਸਮ੍ਬਨ੍ਧੋ. ਤਿਲਮਤ੍ਤਮ੍ਪੀਤਿ ਤਿਲਬੀਜਮਤ੍ਤਮ੍ਪਿ ਅਙ੍ਗਜਾਤਨ੍ਤਿ ਸਮ੍ਬਨ੍ਧੋ. ਮਗ੍ਗੇਤਿ ਵਚ੍ਚਪਸ੍ਸਾਵਾਨਂ ਨਿਕ੍ਖਮਨਦ੍ਵਾਰਤਾਯ, ਅਨ੍ਨਪਾਨਪਿਤ੍ਤਸੇਮ੍ਹਾਦੀਨਂ ਪਵੇਸਨਨਿਕ੍ਖਮਨਦ੍ਵਾਰਤਾਯ ਚ ਮਗ੍ਗਵੋਹਾਰਗਤੇ ਸਰੀਰਪ੍ਪਦੇਸੇ, ਅਲ੍ਲੋਕਾਸੇਤਿ ਸਮ੍ਬਨ੍ਧੋ. ‘‘ਮਗ੍ਗੇਸੁ ਤਿਲਮਤ੍ਤਮ੍ਪਿ, ਤੀਸੁ ਸੇਵਨਚੇਤਨੋ’’ਤਿ ਵਤ੍ਤਬ੍ਬੇਪਿ ‘‘ਤਿਵਿਧੇ’’ਤਿ ਪਕਾਰਵਾਚਿਵਿਧਸਦ੍ਦੋਪਾਦਾਨੇਨ ਸਜਾਤਿਸਙ੍ਗਹਵਸੇਨ ਤੀਹਿ ਰਾਸੀਹਿ ਸਙ੍ਗਹੇਤ੍ਵਾ ਪਭੇਦਵਸੇਨ ਤਿਂਸਵਿਧੋ ਮਗ੍ਗੋ ਦਸ੍ਸਿਤੋ ਹੋਤਿ.

ਸੇਯ੍ਯਥਿਦਂ? ਪਾਰਾਜਿਕਵਤ੍ਥੁਭੂਤਮੁਖਾਦਿਮਗ੍ਗਾਨਂ ਨਿਸ੍ਸਯਭੂਤੇ ਸਤ੍ਤੇ ਦਸ੍ਸੇਤੁਂ ‘‘ਤਿਸ੍ਸੋ ਇਤ੍ਥਿਯੋ ਮਨੁਸ੍ਸਿਤ੍ਥੀ ਅਮਨੁਸ੍ਸਿਤ੍ਥੀ ਤਿਰਚ੍ਛਾਨਗਤਿਤ੍ਥੀ’’ਤਿਆਦਿਨਾ (ਪਾਰਾ. ੫੬) ਨਯੇਨ ਪਾਲ਼ਿਯਂ ਦਸ੍ਸਿਤਮਨੁਸ੍ਸਾਮਨੁਸ੍ਸਤਿਰਚ੍ਛਾਨਗਤਿਤ੍ਥੀਨਂ ਪਚ੍ਚੇਕਂ ਤਿਣ੍ਣਂ ਮਗ੍ਗਾਨਂ ਵਸੇਨ ਨਵ ਮਗ੍ਗਾ, ਤਥੇਵ ਦਸ੍ਸਿਤਾਨਂ ਤਿਣ੍ਣਂ ਉਭਤੋਬ੍ਯਞ੍ਜਨਕਾਨਂ ਵਸੇਨ ਨਵ ਮਗ੍ਗਾ, ਤਿਣ੍ਣਂ ਪਨ ਪਣ੍ਡਕਾਨਂ ਮੁਖਮਗ੍ਗਵਚ੍ਚਮਗ੍ਗਾਨਂ ਵਸੇਨ ਪਚ੍ਚੇਕਂ ਦ੍ਵੇ ਦ੍ਵੇ ਮਗ੍ਗਾਤਿ ਛ ਮਗ੍ਗਾ, ਤਥਾ ਤਿਣ੍ਣਂ ਪਨ ਪੁਰਿਸਾਨਨ੍ਤਿ ਏਵਂ ਤਿਂਸਵਿਧੋ ਹੋਤਿ.

ਸੇਵਨਚੇਤਨੋਤਿ ਸੇਵਨੇ ਮੇਥੁਨਪਯੋਗੇ ਚੇਤਨਾ ਅਸ੍ਸਾਤਿ ਵਿਗ੍ਗਹੋ, ਮੇਥੁਨਰਾਗੂਪਸਂਹਿਤਾਯ ਚੇਤਨਾਯ ਸਮਨ੍ਨਾਗਤੋਤਿ ਅਤ੍ਥੋ. ਅਲ੍ਲੋਕਾਸੇਤਿ ਤਿਂਸਮਗ੍ਗਾਨਮਞ੍ਞਤਰੇ ਮਗ੍ਗੇ ਪਕਤਿਵਾਤੇਨ ਅਸਂਫੁਟ੍ਠੇ ਅਲ੍ਲਪਦੇਸੇ, ਇਮਿਨਾ ਬਾਹਿਰਂ ਪਾਰਾਜਿਕਕ੍ਖੇਤ੍ਤਂ ਨ ਹੋਤੀਤਿ ਦੀਪੇਤਿ. ਵਿਸੇਸਨਸ੍ਸ ਵਿਸੇਸਾਪੇਕ੍ਖਤ੍ਤਾ ਦੁਤਿਯਗਾਥਾਯ ‘‘ਸਸਿਕ੍ਖੋ ਸੋ’’ਤਿ ਪਦਦ੍ਵਯਂ ਆਹਰਿਤ੍ਵਾ ‘‘ਸੇਵਨਚੇਤਨੋ ਸਸਿਕ੍ਖੋ ਸੋ ਭਿਕ੍ਖੂ’’ਤਿ ਯੋਜੇਤਬ੍ਬਂ.

ਅਙ੍ਗੇ ਸਰੀਰੇ ਜਾਤਨ੍ਤਿ ਅਙ੍ਗਜਾਤਂ, ਪੁਰਿਸਨਿਮਿਤ੍ਤਂ. ਸਤਿਪਿ ਅਵਸੇਸਸਰੀਰਾਵਯਵਾਨਂ ਤਥਾਭਾਵੇ ਰੁਲ਼੍ਹਿਵਸੇਨ ਤਦੇਵ ਤਥਾ ਵੁਤ੍ਤਂ. ਪਵੇਸੇਨ੍ਤੋਤਿ ਦ੍ਵਯਂਦ੍ਵਯਸਮਾਪਤ੍ਤਿਸਙ੍ਖਾਤਕਾਯਿਕਕਿਰਿਯਂ ਨਿਪ੍ਫਾਦੇਨ੍ਤੋ. ਪਰਾਜਿਤੋਤਿ ਦੁਲ੍ਲਭਾਯ ਖਣਸਮ੍ਪਤ੍ਤਿਯਾ ਲਦ੍ਧਬ੍ਬਤੋ ਦੁਲ੍ਲਭਾ ਲੋਕਿਯਲੋਕੁਤ੍ਤਰਗੁਣਸਮ੍ਪਤ੍ਤਿਸੁਖਤੋ ਪਰਿਹਾਪੇਤ੍ਵਾ ਕਿਲੇਸਸਪਤ੍ਤੇਹਿ ਪਰਾਜਯਮਾਪਾਦਿਤੋਤਿ ਅਤ੍ਥੋ.

ਅਯਮੇਤ੍ਥ ਯੋਜਨਾ – ਸਸਿਕ੍ਖੋ ਸੇਵਨਚੇਤਨੋ ਤਿਵਿਧੇ ਮਗ੍ਗੇ ਅਲ੍ਲੋਕਾਸੇ ਅਙ੍ਗਜਾਤਂ ਤਿਲਮਤ੍ਤਮ੍ਪਿ ਪਵੇਸੇਨ੍ਤੋ ਸੋ ਭਿਕ੍ਖੁ ਪਰਾਜਿਤੋ ਹੋਤੀਤਿ. ਏਤ੍ਤਾਵਤਾ –

‘‘ਯੋ ਪਨ ਭਿਕ੍ਖੁ ਭਿਕ੍ਖੂਨਂ ਸਿਕ੍ਖਾਸਾਜੀਵਸਮਾਪਨ੍ਨੋ ਸਿਕ੍ਖਂ ਅਪਚ੍ਚਕ੍ਖਾਯ ਦੁਬ੍ਬਲ੍ਯਂ ਅਨਾਵਿਕਤ੍ਵਾ ਮੇਥੁਨਂ ਧਮ੍ਮਂ ਪਟਿਸੇਵੇਯ੍ਯ, ਅਨ੍ਤਮਸੋ ਤਿਰਚ੍ਛਾਨਗਤਾਯਪਿ, ਪਾਰਾਜਿਕੋ ਹੋਤਿ ਅਸਂਵਾਸੋ’’ਤਿ (ਪਾਰਾ. ੪੪) –

ਭਗਵਤਾ ਪਞ੍ਞਤ੍ਤਸਿਕ੍ਖਾਪਦਂ ਸਙ੍ਗਹਿਤਨ੍ਤਿ ਦਟ੍ਠਬ੍ਬਂ.

੭. ਏਵਂ ਇਮਿਸ੍ਸਾ ਗਾਥਾਯ ਅਤ੍ਤੂਪਕ੍ਕਮਮੂਲਕਂ ਪਾਰਾਜਿਕਂ ਦਸ੍ਸੇਤ੍ਵਾ ਇਦਾਨਿ ‘‘ਭਿਕ੍ਖੁਪਚ੍ਚਤ੍ਥਿਕਾ ਮਨੁਸ੍ਸਿਤ੍ਥਿਂ ਭਿਕ੍ਖੁਸ੍ਸ ਸਨ੍ਤਿਕੇ ਆਨੇਤ੍ਵਾ ਵਚ੍ਚਮਗ੍ਗੇਨ (ਪਾਰਾ. ੫੮) ਅਙ੍ਗਜਾਤੇ ਅਭਿਨਿਸੀਦੇਨ੍ਤੀ’’ਤਿਆਦਿਨਯਪ੍ਪਵਤ੍ਤਂ ਪਰੋਪਕ੍ਕਮਮੂਲਕਂ ਪਾਰਾਜਿਕਞ੍ਚ ਦਸ੍ਸੇਤੁਮਾਹ ‘‘ਪਵੇਸਨ’’ਨ੍ਤਿਆਦਿ. ਤਤ੍ਥ ਪਵੇਸਨਨ੍ਤਿ ਭਿਕ੍ਖੁਪਚ੍ਚਤ੍ਥਿਕੇਹਿ ਸੁਤ੍ਤਪਮਤ੍ਤਾਦਿਮਨੁਸ੍ਸਿਤ੍ਥਿਆਦੀਨਮਞ੍ਞਤਰਂ ਆਨੇਤ੍ਵਾ ਯਥਾਵੁਤ੍ਤਮਗ੍ਗਾਨਮਞ੍ਞਤਰਂ ਮਗ੍ਗਂ ਯਥਾ ਪਵਿਸਤਿ, ਤਥਾ ਭਿਕ੍ਖੁਨੋ ਅਙ੍ਗਜਾਤੇ ਅਭਿਨਿਸੀਦਾਪਨੇ ਸਮ੍ਭਵਨ੍ਤਂ ਮਗ੍ਗਪ੍ਪਵੇਸਨਮਾਹ. ਪਵੇਸਨਂ ਸਾਦਿਯਨ੍ਤੋ ਸਸਿਕ੍ਖੋ ਸੋਤਿ ਯੋਜਨਾ. ਏਤ੍ਥ ‘‘ਪਵੇਸਨਂ ਸਾਦਿਯਤਿ ਅਧਿਵਾਸੇਤਿ, ਤਸ੍ਮਿਂ ਖਣੇ ਸੇਵਨਚਿਤ੍ਤਂ ਉਪਟ੍ਠਾਪੇਤੀ’’ਤਿ (ਪਾਰਾ. ਅਟ੍ਠ. ੧.੫੮) ਅਟ੍ਠਕਥਾਵਚਨਤੋ ਅਗ੍ਗਤੋ ਯਾਵ ਮੂਲਂ ਪਵੇਸੇਨ੍ਤੇਸੁ ਅਸ੍ਸਾਦਚਿਤ੍ਤਂ ਉਪਟ੍ਠਾਪੇਨ੍ਤੋ ਤਙ੍ਖਣੇਯੇਵ ਸਾਸਨਤੋ ਚੁਤੋਤਿ ਅਤ੍ਥੋ. ਪਵਿਟ੍ਠਨ੍ਤਿਆਦੀਸੁ ਪਦੇਸੁਪਿ ਏਵਮੇਵ ਯੋਜਨਾ.

ਪਵਿਟ੍ਠਨ੍ਤਿ ਪਵਿਟ੍ਠਕ੍ਖਣੋ. ‘‘ਪਵਿਟ੍ਠ’’ਨ੍ਤਿਆਦਿਨਾ ਤਾਯ ਤਾਯ ਕਿਰਿਯਾਯ ਉਪਲਕ੍ਖਿਤੋ ਖਣੋ ਗਹੇਤਬ੍ਬੋ. ਤੇਨੇਵੇਤ੍ਥ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ ਕਤਂ. ਠਿਤਨ੍ਤਿ ਏਤ੍ਥ ‘‘ਸੁਕ੍ਕਵਿਸ੍ਸਟ੍ਠਿਸਮਯੇ’’ਤਿ ਅਟ੍ਠਕਥਾਵਚਨਸ੍ਸ ਸਬ੍ਬਥਾ ਬ੍ਯਾਪਾਰਰਹਿਤਂ ਕਾਲਂ ਸਨ੍ਧਾਯ ਵੁਤ੍ਤਤ੍ਤਾ ਸੁਕ੍ਕਵਿਸ੍ਸਟ੍ਠਿਸਮਯੋਪਿ ਗਹੇਤਬ੍ਬੋ. ਤੇਨੇਵ ਗਣ੍ਠਿਪਦੇ ਵੁਤ੍ਤਨਯੇਨ ਪਵਿਟ੍ਠਸ੍ਸ ਚ ਯਾਵ ਉਦ੍ਧਰਣਾਰਮ੍ਭੋ, ਤਾਵ ਸਮ੍ਭਵਨ੍ਤੋ ਠਿਤਕਾਲੋਪਿ ਗਹੇਤਬ੍ਬੋ. ਉਦ੍ਧਰਣਨ੍ਤਿ ਨੀਹਰਣਕਾਲੋ.

ਵਾਤਿ ਵਿਕਪ੍ਪੇ, ਅਪੀਤਿ ਸਮੁਚ੍ਚਯੇ, ਸੋ ਵਾ-ਸਦ੍ਦੇਨ ਵਿਕਪ੍ਪਿਤਾਨਂ ਪਕ੍ਖਾਨਂ ਤੁਲ੍ਯਬਲਤਂ ਜੋਤੇਤਿ. ਇਤਿ ਇਮੇਹਿ ਦ੍ਵੀਹਿਪਿ ‘‘ਸੋ ਚੇ ਪਵੇਸਨਂ ਸਾਦਿਯਤਿ, ਪਵਿਟ੍ਠਂ ਸਾਦਿਯਤੀ’’ਤਿਆਦਿਨਾ (ਪਾਰਾ. ੫੮) ਪਾਲ਼ਿਯਂ ਆਗਤਨਯੇਨ ਲਬ੍ਭਮਾਨਂ ਪਵੇਸਨਾਦਿਏਕਕ੍ਖਣਮ੍ਪਿ ਸਾਦਿਯਨਪਚ੍ਚਯਾ ਆਪਜ੍ਜਮਾਨਂ ਪਾਰਾਜਿਕਂ ਦਸ੍ਸੇਤਿ. ਸਸਿਕ੍ਖੋਤਿ ਸਿਕ੍ਖਾਯ ਸਹ ਵਤ੍ਤਤੀਤਿ ਸਸਿਕ੍ਖੋ, ਅਪਚ੍ਚਕ੍ਖਾਤਸਿਕ੍ਖੋਤਿ ਅਤ੍ਥੋ. ਸਾਦਿਯਨ੍ਤੋਤਿ ਸੇਵਨਚਿਤ੍ਤਂ ਉਪਟ੍ਠਾਪੇਨ੍ਤੋ. ਸੋ ਭਿਕ੍ਖੁ. ਠਪੇਤ੍ਵਾ ਕਿਰਿਯਨ੍ਤਿ ਅਤ੍ਤੂਪਕ੍ਕਮਨਂ ਵਿਨਾ. ਚੁਤੋਤਿ ‘‘ਭਿਕ੍ਖੁਪਚ੍ਚਤ੍ਥਿਕੇਹਿ ਕਤਮਿਦਂ, ਨ ਮਯਾ’’ਤਿ ਲੇਸੇਨ ਨ ਮੁਚ੍ਚਤਿ, ਸਾਦਿਯਨਚਿਤ੍ਤੇ ਸਤਿ ਸਾਸਨਤੋ ਚੁਤੋਯੇਵ ਹੋਤੀਤਿ ਅਧਿਪ੍ਪਾਯੋ.

ਏਤ੍ਥ ਚ ਸਸਿਕ੍ਖੋਤਿ ਇਦਂ ‘‘ਸਿਕ੍ਖਂ ਅਪਚ੍ਚਕ੍ਖਾਯ ਦੁਬ੍ਬਲ੍ਯਂ ਅਨਾਵਿਕਤ੍ਵਾ’’ਤਿ (ਪਾਰਾ. ੪੪) ਸਿਕ੍ਖਾਪਦਪਾਠਸ੍ਸ ਅਤ੍ਥਦਸ੍ਸਨਵਸੇਨ ਨਿਦ੍ਦਿਟ੍ਠਂ. ਤਸ੍ਸ ਪਦਭਾਜਨੇ (ਪਾਰਾ. ੪੫), ਤਦਟ੍ਠਕਥਾਯ ਚ ਵਿਭਤ੍ਤਂ ਸਿਕ੍ਖਾਪਚ੍ਚਕ੍ਖਾਨਂ ਸਙ੍ਖੇਪਤੋ ਏਵਂ ਵੇਦਿਤਬ੍ਬਂ – ਚਿਤ੍ਤਖੇਤ੍ਤਕਾਲਪਯੋਗਪੁਗ੍ਗਲਵਿਜਾਨਨਵਸੇਨ ਸਿਕ੍ਖਾਪਚ੍ਚਕ੍ਖਾਨਂ ਹੋਤਿ, ਨ ਤਦਭਾਵੇਨ. ਉਪਸਮ੍ਪਨ੍ਨਭਾਵਤੋ ਚਵਿਤੁਕਾਮਤਾਚਿਤ੍ਤੇਨੇਵ ਹਿ ਸਿਕ੍ਖਾਪਚ੍ਚਕ੍ਖਾਨਂ ਹੋਤਿ, ਨ ਦਵਾ ਵਾ ਰਵਾ ਵਾ ਵਦਨ੍ਤਸ੍ਸ. ਏਵਂ ਚਿਤ੍ਤਵਸੇਨ ਸਿਕ੍ਖਾਪਚ੍ਚਕ੍ਖਾਨਂ ਹੋਤਿ, ਨ ਤਦਭਾਵੇਨ.

ਤਥਾ ‘‘ਬੁਦ੍ਧਂ ਪਚ੍ਚਕ੍ਖਾਮਿ, ਧਮ੍ਮਂ ਪਚ੍ਚਕ੍ਖਾਮਿ, ਸਙ੍ਘਂ ਪਚ੍ਚਕ੍ਖਾਮਿ, ਸਿਕ੍ਖਂ, ਵਿਨਯਂ, ਪਾਤਿਮੋਕ੍ਖਂ, ਉਦ੍ਦੇਸਂ, ਉਪਜ੍ਝਾਯਂ, ਆਚਰਿਯਂ, ਸਦ੍ਧਿਵਿਹਾਰਿਕਂ, ਅਨ੍ਤੇਵਾਸਿਕਂ, ਸਮਾਨੁਪਜ੍ਝਾਯਕਂ, ਸਮਾਨਾਚਰਿਯਕਂ, ਸਬ੍ਰਹ੍ਮਚਾਰਿਂ ਪਚ੍ਚਕ੍ਖਾਮੀ’’ਤਿ ਏਵਂ ਵੁਤ੍ਤਾਨਂ ਬੁਦ੍ਧਾਦੀਨਂ ਚਤੁਦ੍ਦਸਨ੍ਨਂ, ‘‘ਗਿਹੀਤਿ ਮਂ ਧਾਰੇਹਿ, ਉਪਾਸਕੋ, ਆਰਾਮਿਕੋ, ਸਾਮਣੇਰੋ, ਤਿਤ੍ਥਿਯੋ, ਤਿਤ੍ਥਿਯਸਾਵਕੋ, ਅਸ੍ਸਮਣੋ, ਅਸਕ੍ਯਪੁਤ੍ਤਿਯੋਤਿ ਮਂ ਧਾਰੇਹੀ’’ਤਿ ਏਵਂ ਵੁਤ੍ਤਾਨਂ ਗਿਹਿਆਦੀਨਂ ਅਟ੍ਠਨ੍ਨਞ੍ਚਾਤਿ ਇਮੇਸਂ ਬਾਵੀਸਤਿਯਾ ਖੇਤ੍ਤਪਦਾਨਂ ਯਸ੍ਸ ਕਸ੍ਸਚਿ ਸਵੇਵਚਨਸ੍ਸ ਵਸੇਨ ਤੇਸੁ ਯਂ ਕਿਞ੍ਚਿ ਵਤ੍ਤੁਕਾਮਸ੍ਸ ਯਂ ਕਿਞ੍ਚਿ ਵਦਤੋ ਸਿਕ੍ਖਾਪਚ੍ਚਕ੍ਖਾਨਂ ਹੋਤਿ, ਨ ਰੁਕ੍ਖਾਦੀਨਂ ਅਞ੍ਞਤਰਸ੍ਸ ਨਾਮਂ ਗਹੇਤ੍ਵਾ ਸਿਕ੍ਖਂ ਪਚ੍ਚਕ੍ਖਨ੍ਤਸ੍ਸ. ਏਵਂ ਖੇਤ੍ਤਵਸੇਨ ਸਿਕ੍ਖਾਪਚ੍ਚਕ੍ਖਾਨਂ ਹੋਤਿ, ਨ ਤਦਭਾਵੇਨ.

ਤਤ੍ਥ ਯਦੇਤਂ ‘‘ਪਚ੍ਚਕ੍ਖਾਮੀ’’ਤਿ ਚ ‘‘ਮਂ ਧਾਰੇਹੀ’’ਤਿ ਚਾਤਿ ਵੁਤ੍ਤਂ ਵਤ੍ਤਮਾਨਕਾਲਵਚਨਂ, ਯਾਨਿ ਚ ‘‘ਅਲਂ ਮੇ ਬੁਦ੍ਧੇਨ, ਕਿਂ ਨੁ ਮੇ ਬੁਦ੍ਧੇਨ, ਨ ਮਮਤ੍ਥੋ ਬੁਦ੍ਧੇਨ, ਸੁਮੁਤ੍ਤਾਹਂ ਬੁਦ੍ਧੇਨਾ’’ਤਿਆਦਿਨਾ ਨਯੇਨ ਆਖ੍ਯਾਤਵਸੇਨ ਕਾਲਂ ਅਨਾਮਸਿਤ੍ਵਾ ਪੁਰਿਮੇਹਿ ਚੁਦ੍ਦਸਹਿ ਪਦੇਹਿ ਸਦ੍ਧਿਂ ਯੋਜੇਤ੍ਵਾ ਵੁਤ੍ਤਾਨਿ ‘‘ਅਲਂ ਮੇ’’ਤਿਆਦੀਨਿ ਚਤ੍ਤਾਰਿ ਪਦਾਨਿ, ਤੇਸਂਯੇਵ ਸਵੇਵਚਨਾਨਂ ਵਸੇਨ ਪਚ੍ਚਕ੍ਖਾਨਂ ਹੋਤਿ, ਨ ‘‘ਪਚ੍ਚਕ੍ਖਾਸਿ’’ਨ੍ਤਿ ਵਾ ‘‘ਪਚ੍ਚਕ੍ਖਿਸ੍ਸ’’ਨ੍ਤਿ ਵਾ ‘‘ਮਂ ਧਾਰੇਸੀ’’ਤਿ ਵਾ ‘‘ਮਂ ਧਾਰੇਸ੍ਸਤੀ’’ਤਿ ਵਾ ‘‘ਯਂ ਨੂਨਾਹਂ ਪਚ੍ਚਕ੍ਖੇਯ੍ਯ’’ਨ੍ਤਿ ਵਾਤਿਆਦੀਨਿ ਅਤੀਤਾਨਾਗਤਪਰਿਕਪ੍ਪਵਚਨਾਨਿ ਭਣਨ੍ਤਸ੍ਸ. ਏਵਂ ਵਤ੍ਤਮਾਨਕਾਲਵਸੇਨ ਚੇਵ ਅਨਾਮਟ੍ਠਕਾਲਵਸੇਨ ਚ ਪਚ੍ਚਕ੍ਖਾਨਂ ਹੋਤਿ, ਨ ਤਦਭਾਵੇਨ.

ਪਯੋਗੋ ਪਨ ਦੁਵਿਧੋ ਕਾਯਿਕੋ ਚ ਵਾਚਸਿਕੋ ਚ. ਤਤ੍ਥ ‘‘ਬੁਦ੍ਧਂ ਪਚ੍ਚਕ੍ਖਾਮੀ’’ਤਿਆਦਿਨਾ ਨਯੇਨ ਯਾਯ ਕਾਯਚਿ ਭਾਸਾਯ ਵਚੀਭੇਦਂ ਕਤ੍ਵਾ ਵਾਚਸਿਕਪਯੋਗੇਨੇਵ ਪਚ੍ਚਕ੍ਖਾਨਂ ਹੋਤਿ, ਨ ਅਕ੍ਖਰਲਿਖਨਂ ਵਾ ਹਤ੍ਥਮੁਦ੍ਦਾਦਿਦਸ੍ਸਨਂ ਵਾ ਕਾਯਪਯੋਗਂ ਕਰੋਨ੍ਤਸ੍ਸ. ਏਵਂ ਵਾਚਸਿਕਪਯੋਗੇਨੇਵ ਪਚ੍ਚਕ੍ਖਾਨਂ ਹੋਤਿ, ਨ ਤਦਭਾਵੇਨ.

ਪੁਗ੍ਗਲੋ ਪਨ ਦੁਵਿਧੋ ਯੋ ਚ ਪਚ੍ਚਕ੍ਖਾਤਿ, ਯਸ੍ਸ ਚ ਪਚ੍ਚਕ੍ਖਾਤਿ. ਤਤ੍ਥ ਯੋ ਪਚ੍ਚਕ੍ਖਾਤਿ, ਸੋ ਸਚੇ ਉਮ੍ਮਤ੍ਤਕਖਿਤ੍ਤਚਿਤ੍ਤਵੇਦਨਟ੍ਟਾਨਂ ਅਞ੍ਞਤਰੋ ਨ ਹੋਤਿ. ਯਸ੍ਸ ਪਨ ਪਚ੍ਚਕ੍ਖਾਤਿ, ਸੋ ਸਚੇ ਮਨੁਸ੍ਸਜਾਤਿਕੋ ਹੋਤਿ, ਨ ਚ ਉਮ੍ਮਤ੍ਤਕਾਦੀਨਂ ਅਞ੍ਞਤਰੋ, ਸਮ੍ਮੁਖੀਭੂਤੋ ਚ ਸਿਕ੍ਖਾਪਚ੍ਚਕ੍ਖਾਨਂ ਹੋਤਿ. ਨ ਹਿ ਅਸਮ੍ਮੁਖੀਭੂਤਸ੍ਸ ਦੂਤੇਨ ਵਾ ਪਣ੍ਣੇਨ ਵਾ ਆਰੋਚਨਂ ਰੁਹਤਿ. ਏਵਂ ਯਥਾਵੁਤ੍ਤਸ੍ਸ ਪੁਗ੍ਗਲਸ੍ਸ ਵਸੇਨ ਪਚ੍ਚਕ੍ਖਾਨਂ ਹੋਤਿ, ਨ ਤਦਭਾਵੇਨ.

ਵਿਜਾਨਨਮ੍ਪਿ ਨਿਯਮਿਤਾਨਿਯਮਿਤਵਸੇਨ ਦੁਵਿਧਂ. ਤਤ੍ਥ ਯਸ੍ਸ, ਯੇਸਂ ਵਾ ਨਿਯਮੇਤ੍ਵਾ ‘‘ਇਮਸ੍ਸ, ਇਮੇਸਂ ਵਾ ਆਰੋਚੇਮੀ’’ਤਿ ਵਦਤਿ. ਸਚੇ ਤੇ ਯਥਾ ਪਕਤਿਯਾ ਲੋਕੇ ਮਨੁਸ੍ਸਾ ਵਚਨਂ ਸੁਤ੍ਵਾ ਆਵਜ੍ਜਨਸਮਯੇ ਜਾਨਨ੍ਤਿ, ਏਵਂ ਤਸ੍ਸ ਵਚਨਾਨਨ੍ਤਰਮੇਵ ਤਸ੍ਸ ‘‘ਅਯਂ ਉਕ੍ਕਣ੍ਠਿਤੋ’’ਤਿ ਵਾ ‘‘ਗਿਹਿਭਾਵਂ ਪਤ੍ਥਯਤੀ’’ਤਿ ਵਾ ਯੇਨ ਕੇਨਚਿ ਆਕਾਰੇਨ ਸਿਕ੍ਖਾਪਚ੍ਚਕ੍ਖਾਨਭਾਵਂ ਜਾਨਨ੍ਤਿ, ਪਚ੍ਚਕ੍ਖਾਤਾਵ ਹੋਤਿ ਸਿਕ੍ਖਾ. ਅਥ ਅਪਰਭਾਗੇ ‘‘ਕਿਂ ਇਮਿਨਾ ਵੁਤ੍ਤ’’ਨ੍ਤਿ ਚਿਨ੍ਤੇਤ੍ਵਾ ਜਾਨਨ੍ਤਿ, ਅਞ੍ਞੇ ਵਾ ਜਾਨਨ੍ਤਿ, ਅਪਚ੍ਚਕ੍ਖਾਤਾਵ ਹੋਤਿ ਸਿਕ੍ਖਾ. ਅਨਿਯਮੇਤ੍ਵਾ ਆਰੋਚੇਨ੍ਤਸ੍ਸ ਪਨ ਸਚੇ ਵੁਤ੍ਤਨਯੇਨ ਯੋ ਕੋਚਿ ਮਨੁਸ੍ਸਜਾਤਿਕੋ ਵਚਨਤ੍ਥਂ ਜਾਨਾਤਿ, ਪਚ੍ਚਕ੍ਖਾਤਾਵ ਹੋਤਿ ਸਿਕ੍ਖਾ. ਏਵਂ ਵਿਜਾਨਨਵਸੇਨ ਪਚ੍ਚਕ੍ਖਾਨਂ ਹੋਤਿ, ਨ ਤਦਭਾਵੇਨ. ਯੋ ਪਨ ਅਨ੍ਤਮਸੋ ਦਵਾਯਪਿ ਪਚ੍ਚਕ੍ਖਾਤਿ, ਤੇਨ ਅਪਚ੍ਚਕ੍ਖਾਤਾਵ ਹੋਤਿ ਸਿਕ੍ਖਾ.

ਇਤਿ ਇਮੇਸਂ ਵੁਤ੍ਤਪ੍ਪਕਾਰਾਨਂ ਚਿਤ੍ਤਾਦੀਨਂ ਵਸੇਨ ਅਪਚ੍ਚਕ੍ਖਾਤਸਿਕ੍ਖੋ ‘‘ਸਸਿਕ੍ਖੋ’’ਤਿ ਵੁਤ੍ਤੋ.

੮-੧੦. ‘‘ਇਦਾਨਿ ਸਨ੍ਥਤੇਨ ਸਨ੍ਥਤਸ੍ਸ ਘਟ੍ਟਨੇ ਉਪਾਦਿਨ੍ਨਕਘਟ੍ਟਨਾਭਾਵਤੋ ਦੋਸੋ ਨਤ੍ਥੀ’’ਤਿ ਪਾਪਭਿਕ੍ਖੂਨਂ ਲੇਸਕਪ੍ਪਨਂ ਪਟਿਕ੍ਖਿਪਿਤੁਂ ‘‘ਭਿਕ੍ਖੁਪਚ੍ਚਤ੍ਥਿਕਾ ਮਨੁਸ੍ਸਿਤ੍ਥਿਂ ਭਿਕ੍ਖੁਸ੍ਸ ਸਨ੍ਤਿਕੇ ਆਨੇਤ੍ਵਾ ਵਚ੍ਚਮਗ੍ਗੇਨ, ਪਸ੍ਸਾਵਮਗ੍ਗੇਨ, ਮੁਖੇਨ ਅਙ੍ਗਜਾਤਂ ਅਭਿਨਿਸੀਦੇਨ੍ਤਿ ਸਨ੍ਥਤਾਯ ਅਸਨ੍ਥਤਸ੍ਸਾ’’ਤਿਆਦਿਨਾ (ਪਾਰਾ. ੬੧) ਨਯੇਨ ਪਾਲ਼ਿਯਂ ਵੁਤ੍ਤਸਨ੍ਥਤਵਾਰਾਨਮਤ੍ਥਂ ਸਙ੍ਗਣ੍ਹਨ੍ਤੋ ਆਹ ‘‘ਸਨ੍ਥਤੇਨਾ’’ਤਿਆਦਿ. ਤਤ੍ਥ ਸਨ੍ਥਤੇਨਾਤਿ ਚਮ੍ਮਚੋਲ਼ਤਿਪੁਪਟ੍ਟਾਦੀਹਿ ਪਟਿਚ੍ਛਾਦਿਤੇਨ. ‘‘ਪਵੇਸੇਨ੍ਤੋ’’ਤਿ ਇਮਿਨਾ ਸਨ੍ਥਤਵਾਰਸ੍ਸ ਪਰੋਪਕ੍ਕਮਂ ਨਿਸ੍ਸਾਯ ਦਸ੍ਸਨਮੁਪਲਕ੍ਖਣਨ੍ਤਿ ਅਤ੍ਤੂਪਕ੍ਕਮੇਪਿ ਯੋਜੇਤਬ੍ਬਤਂ ਦਸ੍ਸੇਤਿ, ਤਸ੍ਸ ਵਕ੍ਖਮਾਨੇਨ ‘‘ਪਰਾਜਿਤੋ’’ਤਿ ਇਮਿਨਾ ਸਮ੍ਬਨ੍ਧੋ. ‘‘ਤਥੇਵਾ’’ਤਿ ਇਮਿਨਾ ਪਵੇਸੇਨ੍ਤੋਤਿਆਦਿਪ੍ਪਕਾਰਂ ਪਰਾਮਸਤਿ.

ਏਵਂ ਪਵੇਸੇਨ੍ਤੋ ਕਦਾ ਪਰਾਜਿਤੋ ਹੋਤੀਤਿ ਆਹ ‘‘ਉਪਾਦਿਨ੍ਨੇਨਾ’’ਤਿਆਦਿ. ਏਤ੍ਥ ਉਪਾਦਿਨ੍ਨੇਨਾਤਿ ਤਣ੍ਹਾਦਿਟ੍ਠੀਹਿ ਉਪੇਤੇਨ ਕਮ੍ਮੁਨਾ ਅਤ੍ਤਨੋ ਫਲਭਾਵੇਨੇਵ ਆਦਿਨ੍ਨਂ ਗਹਿਤਨ੍ਤਿ ਉਪਾਦਿਨ੍ਨਂ, ਏਤੇਨ ਅਤ੍ਤਨੋ ਅਙ੍ਗਜਾਤਸ੍ਸ, ਵਤ੍ਥੁਪੁਗ੍ਗਲਾਨਂ ਮਗ੍ਗਸ੍ਸ ਚ ਘਟ੍ਟਨਟ੍ਠਾਨਗਤਂ ਕਾਯਪ੍ਪਸਾਦਂ ਦਸ੍ਸੇਤਿ. ਇਮਿਨਾਵ ਅਙ੍ਗਜਾਤਗਤਂ ਅਨਟ੍ਠਕਾਯਪ੍ਪਸਾਦਂ ਚਮ੍ਮਖਿਲਂ, ਪਿਲ਼ਕਾਦਿ ਚ ਗਹੇਤਬ੍ਬਂ. ‘‘ਉਪਾਦਿਨ੍ਨਕਂ ਨਾਮ ਕਾਯਿਨ੍ਦ੍ਰਿਯ’’ਨ੍ਤਿ ਗਣ੍ਠਿਪਦੇ ਵੁਤ੍ਤਂ. ਤਬ੍ਬਿਪਰਿਯਾਯੇਨ ‘‘ਅਨੁਪਾਦਿਨ੍ਨਕ’’ਨ੍ਤਿ ਤਪ੍ਪਟਿਚ੍ਛਾਦਕਂ ਚੋਲ਼ਾਦਿ ਵੁਤ੍ਤਂ. ਉਪਾਦਿਨ੍ਨੇਨ ਉਪਾਦਿਨ੍ਨੇ, ਅਨੁਪਾਦਿਨ੍ਨੇ ਵਾ ਪਾਰਾਜਿਕਕ੍ਖੇਤ੍ਤੇ ਘਟ੍ਟਿਤੇ, ਅਨੁਪਾਦਿਨ੍ਨਕੇਨ ਵਾ ਉਪਾਦਿਨ੍ਨੇ ਅਨੁਪਾਦਿਨ੍ਨੇ ਵਾ ਪਾਰਾਜਿਕਕ੍ਖੇਤ੍ਤੇ ਘਟ੍ਟਿਤੇਤਿ ਯੋਜਨਾ. ਏਤ੍ਥ ਚ ਕਰਣਵਚਨਨ੍ਤਾਨਿ ਪਦਾਨਿ ‘‘ਅਙ੍ਗਜਾਤੇਨਾ’’ਤਿ ਇਮਸ੍ਸ ਵਿਸੇਸਨਾਨਿ.

ਏਤ੍ਤਾਵਤਾ ਸਨ੍ਥਤਚਤੁਕ੍ਕਵਸੇਨ ਅਤ੍ਤੂਪਕ੍ਕਮੇ ਸਤਿ ਪਾਰਾਜਿਕਕ੍ਖੇਤ੍ਤੇ ਪਾਰਾਜਿਕਂ ਦਸ੍ਸੇਤ੍ਵਾ ਇਦਾਨਿ ਪਰੂਪਕ੍ਕਮੇਪਿ ਦਸ੍ਸੇਤੁਮਾਹ ‘‘ਸਚੇ’’ਤਿਆਦਿ. ਏਤ੍ਥਾਤਿ ਏਤੇਸੁ ਚਤੂਸੁ ਵਿਕਪ੍ਪੇਸੁ. ਪਾਰਾਜਿਕਕ੍ਖੇਤ੍ਤੇ ਪਵਿਟ੍ਠੇ ਤੂਤਿ ਏਤ੍ਥ ਤੁ-ਸਦ੍ਦੇਨ ਪਵੇਸਨਟ੍ਠਿਤੁਦ੍ਧਾਰਕ੍ਖਣਤ੍ਤਯਂ ਸਮੁਚ੍ਚਿਨੋਤਿ. ਯਂਤਂ-ਸਦ੍ਦਾਨਂ ਨਿਚ੍ਚਸਮ੍ਬਨ੍ਧਤ੍ਤਾ ਹਿ ‘‘ਸੋ’’ਤਿ ਤਂ-ਸਦ੍ਦੋਪਾਦਾਨੇ ‘‘ਯੋ’’ਤਿ ਯਂ-ਸਦ੍ਦੋਪਿ ਅਜ੍ਝਾਹਰਿਤਬ੍ਬੋ, ਸਾਮਤ੍ਥਿਯੇਨ ਸਮ੍ਪਿਣ੍ਡਨਤ੍ਥੋ ਅਪਿਸਦ੍ਦੋ ਚ. ਅਯਮੇਤ੍ਥ ਅਤ੍ਥਯੋਜਨਾ – ਭਿਕ੍ਖੁਪਚ੍ਚਤ੍ਥਿਕੇਹਿ ਆਨੇਤ੍ਵਾ ਭਿਕ੍ਖੁਨੋ ਅਙ੍ਗਜਾਤੇ ਅਭਿਨਿਸੀਦਾਪਿਤਮਨੁਸ੍ਸਿਤ੍ਥਿਆਦੀਨਂ ਤੀਸੁ ਮਗ੍ਗੇਸੁ ਅਞ੍ਞਤਰਮਗ੍ਗਸਙ੍ਖਾਤਂ ਪਾਰਾਜਿਕਕ੍ਖੇਤ੍ਤਂ ਪਵਿਟ੍ਠੇ ਵਾ ਤੁ-ਸਦ੍ਦੇਨ ਸਮ੍ਪਿਣ੍ਡਿਤਪਵੇਸਨਟ੍ਠਿਤੁਦ੍ਧਾਰਾਨਮਞ੍ਞਤਰਕ੍ਖਣੇ ਵਾ ਸਚੇ ਯੋ ਸਾਦਿਯਤਿ, ਸਪ੍ਪਮੁਖਾਦਿਪ੍ਪਵੇਸਨਕਾਲੇ ਵਿਯ ਅਨੁਤ੍ਤਸਿਤ੍ਵਾ ਕਾਮਰਾਗਪਿਪਾਸਾਭਿਭੂਤੋ ਯਦਿ ਸਾਦਿਯਤਿ, ਸੋਪਿ ਭਿਕ੍ਖੁ ਪਰਾਜਿਤੋ ਹੋਤੀਤਿ ਯੋਜਨਾ. ‘‘ਸਚੇ ਸਾਦਿਯਤੀ’’ਤਿ ਇਮਿਨਾ ਸਾਸਙ੍ਕਵਚਨੇਨ ਨ ਸਾਦਿਯਤਿ, ਅਨਾਪਤ੍ਤੀਤਿ ਸੂਚਿਤਂ ਹੋਤਿ.

‘‘ਪਾਰਾਜਿਕਕ੍ਖੇਤ੍ਤੇ’’ਤਿ ਇਮਿਨਾ ਬ੍ਯਵਚ੍ਛਿਨ੍ਨੇ ਅਞ੍ਞਸ੍ਮਿਂ ਠਾਨੇ ਵੀਤਿਕ੍ਕਮਨ੍ਤਸ੍ਸ ਇਮਸ੍ਮਿਂਯੇਵ ਵਿਕਪ੍ਪੇ ਸਮ੍ਭਵਨ੍ਤਿਯੋ ਇਤਰਾਪਤ੍ਤਿਯੋ ਦਸ੍ਸੇਤੁਮਾਹ ‘‘ਖੇਤ੍ਤੇ’’ਤਿਆਦਿ. ‘‘ਏਤ੍ਥਾ’’ਤਿ ਆਨੇਤ੍ਵਾ ਸਮ੍ਬਨ੍ਧਨੀਯਂ. ‘‘ਖੇਤ੍ਤੇ’’ਤਿ ਸਾਮਞ੍ਞਨਿਦ੍ਦੇਸੇਪਿ ਹੇਟ੍ਠਾ ‘‘ਪਾਰਾਜਿਕਕ੍ਖੇਤ੍ਤੇ’’ਤਿ ਵਿਸੇਸਿਤਤ੍ਤਾ, ਉਪਰਿਥੁਲ੍ਲਚ੍ਚਯਾਦੀਨਞ੍ਚ ਵਿਧੀਯਮਾਨਤ੍ਤਾ ਅਞ੍ਞਥਾਨੁਪਪਤ੍ਤਿਲਕ੍ਖਣਾਯ ਸਾਮਤ੍ਥਿਯਾ ਥੁਲ੍ਲਚ੍ਚਯਦੁਕ੍ਕਟਾਨਂ ਖੇਤ੍ਤੇਤਿ ਅਯਮਤ੍ਥੋ ਲਬ੍ਭਤਿ. ‘‘ਕਣ੍ਣਚ੍ਛਿਦ੍ਦਕ੍ਖਿਨਾਸਾਸੂ’’ਤਿਆਦਿਨਾ ਨਯੇਨ ਵਕ੍ਖਮਾਨੇਸੁ ਜੀਵਮਾਨਕਸਰੀਰਗਤਥੁਲ੍ਲਚ੍ਚਯਦੁਕ੍ਕਟਕ੍ਖੇਤ੍ਤੇਸੂਤਿ ਵੁਤ੍ਤਂ ਹੋਤਿ.

ਇਮੇਸੁ ਦ੍ਵੀਸੁ ਖੇਤ੍ਤੇਸੁ ‘‘ਸਨ੍ਥਤਾਦਿਨਾ ਸਨ੍ਥਤਾਦਿਂ ਪਵੇਸੇਨ੍ਤਸ੍ਸ ਉਪਾਦਿਨ੍ਨਾਦੀਹਿ ਉਪਾਦਿਨ੍ਨਾਦੀਨਂ ਘਟ੍ਟਨੇ ਅਧਿਵਾਸੇਨ੍ਤਸ੍ਸ ਅਨਾਪਤ੍ਤੀ’’ਤਿ ਵਤ੍ਤੁਮਸਕ੍ਕੁਣੇਯ੍ਯਤਾਯ ਪਾਰਾਜਿਕਕ੍ਖੇਤ੍ਤੇ ਵੁਤ੍ਤਸਬ੍ਬਵਿਕਪ੍ਪੇ ਏਤ੍ਥ ਯੋਜੇਨ੍ਤੇਹਿ ਏਵਂ ਯੋਜੇਤਬ੍ਬਂ – ਥੁਲ੍ਲਚ੍ਚਯਕ੍ਖੇਤ੍ਤੇ ਸਨ੍ਥਤੇ ਵਾ ਅਸਨ੍ਥਤੇ ਵਾ ਸਨ੍ਥਤੇਨ ਵਾ ਅਸਨ੍ਥਤੇਨ ਵਾ ਅਙ੍ਗਜਾਤੇਨ ਸੇਵਨ੍ਤਸ੍ਸ ਉਪਾਦਿਨ੍ਨੇ ਵਾ ਅਨੁਪਾਦਿਨ੍ਨੇ ਵਾ ਉਪਾਦਿਨ੍ਨੇਨ, ਤਥਾ ਅਨੁਪਾਦਿਨ੍ਨੇਨ ਵਾ ਘਟ੍ਟਿਤੇ ਥੁਲ੍ਲਚ੍ਚਯਂ ਤਸ੍ਸ ਵਿਨਿਦ੍ਦਿਸੇਤਿ. ਏਵਂ ਦੁਕ੍ਕਟਕ੍ਖੇਤ੍ਤੇ ਸਨ੍ਥਤੇ ਵਾ…ਪੇ… ਘਟ੍ਟਿਤੇ ਦੁਕ੍ਕਟਞ੍ਚ ਤਸ੍ਸ ਵਿਨਿਦ੍ਦਿਸੇਤਿ ਯੋਜੇਤਬ੍ਬਂ.

ਇਹ ਸਬ੍ਬਤ੍ਥ ਤੀਸੁਪਿ ਖੇਤ੍ਤੇਸੁ ਉਪਾਦਿਨ੍ਨ-ਸਦ੍ਦੇਨ ਅਨਟ੍ਠਕਾਯਪ੍ਪਸਾਦਂ ਅਙ੍ਗਜਾਤਞ੍ਚ ਤਤ੍ਥਜਾਤਚਮ੍ਮਖਿਲਪਿਲ਼ਕਾ ਚ ਗਯ੍ਹਨ੍ਤਿ, ਦੁਕ੍ਕਟਕ੍ਖੇਤ੍ਤੇ ਪਨ ਅਙ੍ਗੁਲਿਆਦਿਇਤਰਾਵਯਵਾਪਿ. ਤੀਸੁਪਿ ਖੇਤ੍ਤੇਸੁ ਅਨੁਪਾਦਿਨ੍ਨ-ਸਦ੍ਦੇਨ ਅਙ੍ਗਜਾਤਾਦਿਪਟਿਚ੍ਛਾਦਿਤਵਤ੍ਥਾਦਯੋ ਚ ਗਯ੍ਹਨ੍ਤਿ, ਦੁਕ੍ਕਟਕ੍ਖੇਤ੍ਤੇ ਪਨ ਨਿਮਿਤ੍ਤੇ ਨਟ੍ਠਕਾਯਪ੍ਪਸਾਦਚਮ੍ਮਖਿਲਪਿਲ਼ਕਰੋਮਾਦੀਨਿ. ਇਮਾਨਿ ਚ ਅਨੁਪਾਦਿਨ੍ਨਾਨਿ. ਅਙ੍ਗਜਾਤੇਤਰੋਪਾਦਿਨ੍ਨਾਵਯਵੇ ਚ ਤੀਸੁਪਿ ਖੇਤ੍ਤੇਸੁ ਪਵੇਸੇਨ੍ਤਸ੍ਸ ਦੁਕ੍ਕਟਮੇਵ.

੧੧. ਏਤ੍ਤਾਵਤਾ ਜੀਵਮਾਨਸਰੀਰੇ ਸਨ੍ਥਤਾਸਨ੍ਥਤਵਸੇਨ ਪਚ੍ਚੇਕਂ ਤਿਵਿਧੇਸੁਪਿ ਪਾਰਾਜਿਕਥੁਲ੍ਲਚ੍ਚਯਦੁਕ੍ਕਟਕ੍ਖੇਤ੍ਤੇਸੁ ਸਨ੍ਥਤਾਸਨ੍ਥਤਵਸੇਨੇਵ ਦੁਵਿਧੇਨ ਨਿਮਿਤ੍ਤੇਨ ਸੇਵਨ੍ਤਸ੍ਸ ਪਰੋਪਕ੍ਕਮੇ ਸਤਿ ਸਾਦਿਯਨ੍ਤਸ੍ਸ ਲਬ੍ਭਮਾਨਪਾਰਾਜਿਕਥੁਲ੍ਲਚ੍ਚਯਦੁਕ੍ਕਟਾਪਤ੍ਤਿਯੋ ਯਥਾਸਮ੍ਭਵਂ ਦਸ੍ਸੇਤ੍ਵਾ ਇਦਾਨਿ ‘‘ਮਤਸਰੀਰੇ ਪਨ ਤਥਾ ਤਥਾ ਸੇਵਨ੍ਤਾਨਂ ਦੋਸੋ ਨਤ੍ਥੀ’’ਤਿ ਪਾਪਭਿਕ੍ਖੂਨਂ ਲੇਸੋਕਾਸਪਟਿਬਾਹਨਤ੍ਥਂ ਪਾਲ਼ਿਯਂ ਦਸ੍ਸਿਤੇਸੁ ਯਥਾਵੁਤ੍ਤੇਸੁ ਤੀਸੁ ਖੇਤ੍ਤੇਸੁ ਲਬ੍ਭਮਾਨਾ ਤਿਸ੍ਸੋ ਆਪਤ੍ਤਿਯੋ ਦਸ੍ਸੇਤੁਮਾਹ ‘‘ਮਤੇ’’ਤਿਆਦਿ.

ਤਤ੍ਥ ‘‘ਮਤੇ’’ਤਿ ਏਤਸ੍ਸ ‘‘ਮਨੁਸ੍ਸਿਤ੍ਥਿਆਦੀਨਂ ਸਰੀਰੇ’’ਤਿ ਅਜ੍ਝਾਹਰਿਤ੍ਵਾ ਅਤ੍ਥਯੋਜਨਾ ਕਾਤਬ੍ਬਾ. ਇਮਿਨਾ ‘‘ਅਕ੍ਖਾਯਿਤੇ’’ਤਿਆਦਿਨਾ ਦਸ੍ਸਿਤਾਨਂ ਨਿਮਿਤ੍ਤਾਨਂ ਨਿਸ੍ਸਯਂ ਦਸ੍ਸਿਤਂ ਹੋਤਿ. ‘‘ਨਿਮਿਤ੍ਤਮਤ੍ਤਂ ਸੇਸੇਤ੍ਵਾ’’ਤਿਆਦਿਨਾ ਨਯੇਨ ਵਕ੍ਖਮਾਨਗਾਥਾਯਂ ਵਿਯ ਸਕਲਸਰੀਰੇ ਖਾਦਿਤੇਪਿ ਨਿਮਿਤ੍ਤਸ੍ਸ ਵਿਜ੍ਜਮਾਨਾਵਿਜ੍ਜਮਾਨਭਾਵੋਯੇਵ ਆਪਤ੍ਤਿਯਾਭਾਵਾਭਾਵਸ੍ਸ ਪਮਾਣਨ੍ਤਿ ‘‘ਅਕ੍ਖਾਯਿਤੇ’’ਤਿ ਏਤੇਨ ‘‘ਮਤੇ’’ਤਿ ਏਤਂ ਅਵਿਸੇਸੇਤ੍ਵਾ ‘‘ਨਿਮਿਤ੍ਤੇ’’ਤਿ ਅਜ੍ਝਾਹਰਿਤ੍ਵਾ ਤਂ ਤੇਨ ਵਿਸੇਸਿਤਬ੍ਬਂ. ਅਥ ਵਾ ‘‘ਨਿਮਿਤ੍ਤਮਤ੍ਤ’’ਨ੍ਤਿਆਦਿਨਾ ਵਕ੍ਖਮਾਨਗਾਥਾਯ ‘‘ਨਿਮਿਤ੍ਤੇ’’ਤਿ ਪਦਂ ਆਨੇਤ੍ਵਾ ਯੋਜੇਤਬ੍ਬਂ.

ਅਕ੍ਖਾਯਿਤੇਤਿ ਸਬ੍ਬਥਾ ਅਕ੍ਖਾਯਿਤੇ ਪਾਰਾਜਿਕਵਤ੍ਥੁਭੂਤੇ ਨਿਮਿਤ੍ਤੇ. ਯੇਭੁਯ੍ਯਕ੍ਖਾਯਿਤੇਪਿ ਚਾਤਿ ਕਿਞ੍ਚਿ ਕਿਞ੍ਚਿ ਖਾਦਿਤ੍ਵਾ ਬਹੁਕਾਵਸਿਟ੍ਠੇ ਨਿਮਿਤ੍ਤੇ. ‘‘ਯਸ੍ਸ ਚਤੂਸੁ ਭਾਗੇਸੁ ਤਿਭਾਗਮਤ੍ਤਂ ਖਾਦਿਤਂ, ਤਂ ਨਿਮਿਤ੍ਤਂ ਯੇਭੁਯ੍ਯਕ੍ਖਾਯਿਤਂ ਨਾਮਾ’’ਤਿ ਵਦਨ੍ਤਿ. ਮੇਥੁਨਨ੍ਤਿ ਰਾਗਪਰਿਯੁਟ੍ਠਾਨੇਨ ਸਦਿਸਭਾਵਾਪਤ੍ਤਿਯਾ ਮਿਥੁਨਾਨਂ ਇਦਂ ਮੇਥੁਨਂ, ਮਤਿਤ੍ਥਿਆਦੀਨਂ ਰਾਗਪਰਿਯੁਟ੍ਠਾਨੇਨ ਸਦਿਸਤ੍ਤਾਭਾਵੇਪਿ ਤਤ੍ਥ ਵੀਤਿਕ੍ਕਮੋ ਰੁਲ਼੍ਹਿਯਾ ‘‘ਮੇਥੁਨ’’ਨ੍ਤਿ ਵੁਚ੍ਚਤਿ.

ਪਾਰਾਜਿਕੋਤਿਪਰਾਜਿਤੋ, ਪਰਾਜਯਮਾਪਨ੍ਨੋਤਿ ਅਤ੍ਥੋ. ਅਯਞ੍ਹਿ ਪਾਰਾਜਿਕ-ਸਦ੍ਦੋ ਸਿਕ੍ਖਾਪਦਾਪਤ੍ਤਿਪੁਗ੍ਗਲੇਸੁ ਵਤ੍ਤਤਿ. ਤਤ੍ਥ ‘‘ਅਟ੍ਠਾਨਮੇਤਂ ਆਨਨ੍ਦ ਅਨਵਕਾਸੋ, ਯਂ ਤਥਾਗਤੋ ਵਜ੍ਜੀਨਂ ਵਾ ਵਜ੍ਜਿਪੁਤ੍ਤਕਾਨਂ ਵਾ ਕਾਰਣਾ ਸਾਵਕਾਨਂ ਪਾਰਾਜਿਕਂ ਸਿਕ੍ਖਾਪਦਂ ਪਞ੍ਞਤ੍ਤਂ ਸਮੂਹਨੇਯ੍ਯਾ’’ਤਿ (ਪਾਰਾ. ੪੩) ਏਵਂ ਸਿਕ੍ਖਾਪਦੇ ਵਤ੍ਤਮਾਨੋ ਵੇਦਿਤਬ੍ਬੋ. ‘‘ਆਪਤ੍ਤਿ ਤ੍ਵਂ ਭਿਕ੍ਖੁ ਆਪਨ੍ਨੋ ਪਾਰਾਜਿਕ’’ਨ੍ਤਿ (ਪਾਰਾ. ੬੭) ਆਪਤ੍ਤਿਯਾ. ‘‘ਨ ਮਯਂ ਪਾਰਾਜਿਕਾ, ਯੋ ਅਵਹਟੋ, ਸੋ ਪਾਰਾਜਿਕੋ’’ਤਿ (ਪਾਰਾ. ੧੫੫) ਏਵਂ ਪੁਗ੍ਗਲੇ. ‘‘ਪਾਰਾਜਿਕੇਨ ਧਮ੍ਮੇਨ ਅਨੁਦ੍ਧਂਸੇਯ੍ਯਾ’’ਤਿਆਦੀਸੁ (ਪਾਰਾ. ੩੮੪) ਪਨ ਧਮ੍ਮੇ ਵਤ੍ਤਤੀਤਿ ਵਦਨ੍ਤਿ. ਯਸ੍ਮਾ ਪਨ ਤਤ੍ਥ ਧਮ੍ਮੋਤਿ ਕਤ੍ਥਚਿ ਆਪਤ੍ਤਿ, ਕਤ੍ਥਚਿ ਸਿਕ੍ਖਾਪਦਮੇਵ ਅਧਿਪ੍ਪੇਤਂ, ਤਸ੍ਮਾ ਸੋ ਵਿਸੁਂ ਨ ਵਤ੍ਤਬ੍ਬੋ.

ਤਤ੍ਥ ਸਿਕ੍ਖਾਪਦਂ ਯੋ ਤਂ ਅਤਿਕ੍ਕਮਤਿ ਤਂ ਪਰਾਜੇਤਿ, ਤਸ੍ਮਾ ‘‘ਪਾਰਾਜਿਕ’’ਨ੍ਤਿ ਵੁਚ੍ਚਤਿ. ਆਪਤ੍ਤਿ ਪਨ ਯੋ ਨਂ ਅਜ੍ਝਾਪਜ੍ਜਤਿ ਤਂ ਪਰਾਜੇਤਿ, ਤਸ੍ਮਾ ‘‘ਪਾਰਾਜਿਕਾ’’ਤਿ ਵੁਚ੍ਚਤਿ. ਪੁਗ੍ਗਲੋ ਯਸ੍ਮਾ ਪਰਾਜਿਤੋ ਪਰਾਜਯਮਾਪਨ੍ਨੋ, ਤਸ੍ਮਾ ‘‘ਪਾਰਾਜਿਕੋ’’ਤਿ ਵੁਚ੍ਚਤਿ. ਸਿਕ੍ਖਾਪਦਾਪਤ੍ਤੀਸੁ ਪਾਰਾਜਿਕ-ਸਦ੍ਦੋ ਪਰਾਜੇਤੀਤਿ ‘‘ਪਾਰਾਜਿਕੋ’’ਤਿ ਕਤ੍ਤੁਸਾਧਨੋ, ਪੁਗ੍ਗਲੇ ਪਨ ਪਰਾਜੀਯਤੀਤਿ ਕਮ੍ਮਸਾਧਨੋਤਿ ਵੇਦਿਤਬ੍ਬੋ. ‘‘ਨਰੋ’’ਤਿ ਇਮਿਨਾ ਪੁਬ੍ਬੇ ਵੁਤ੍ਤਭਿਕ੍ਖੁਯੇਵ ਅਧਿਪ੍ਪੇਤੋ. ਸਾਮਞ੍ਞਜੋਤਨਾ ਵਿਸੇਸੇ ਅਵਤਿਟ੍ਠਤੀਤਿ.

੧੨. ਯੇਭੁਯ੍ਯਕ੍ਖਾਯਿਤੇਤਿ ਚਤੂਸੁ ਕੋਟ੍ਠਾਸੇਸੁ ਏਕਕੋਟ੍ਠਾਸਾਵਸੇਸਂ ਕਤ੍ਵਾ ਖਾਦਿਤੇ. ਉਪਡ੍ਢਕ੍ਖਾਯਿਤੇਤਿ ਸਮਭਾਗਾਵਸੇਸਂ ਖਾਦਿਤੇ. ਥੂਲੋ ਅਚ੍ਚਯੋ ਥੁਲ੍ਲਚ੍ਚਯੋ, ਸੋਯੇਵ ਆਪਜ੍ਜੀਯਤੀਤਿ ਆਪਤ੍ਤੀਤਿ ਥੁਲ੍ਲਚ੍ਚਯਾਪਤ੍ਤਿ. ਪਾਚਿਤ੍ਤਿਯਾਦਯੋ ਸਨ੍ਧਾਯੇਤ੍ਥ ਥੁਲ੍ਲਚ੍ਚਯਵੋਹਾਰੋ, ਨ ਪਾਰਾਜਿਕਸਙ੍ਘਾਦਿਸੇਸੇਤਿ ਦਟ੍ਠਬ੍ਬਂ. ਸੇਸੇਤਿ ਅਵਸੇਸੇ ਉਪਕਚ੍ਛਕਾਦੀਸੁ. ਵੁਤ੍ਤਞ੍ਹਿ ਅਟ੍ਠਕਥਾਯਂ ‘‘ਅਵਸੇਸਸਰੀਰੇ ਉਪਕਚ੍ਛਕਾਦੀਸੁ ਦੁਕ੍ਕਟ’’ਨ੍ਤਿ (ਪਾਰਾ. ਅਟ੍ਠ. ੧.੫੯-੬੦). ਦੁਟ੍ਠੁ ਕਤਨ੍ਤਿ ਦੁਕ੍ਕਟਂ, ਦੁਕ੍ਕਟ-ਸਦ੍ਦੋ ਨਿਯਤਨਪੁਂਸਕਤ੍ਤਾ ਇਤ੍ਥਿਲਿਙ੍ਗਸ੍ਸਾਪਿ ਆਪਤ੍ਤਿ-ਸਦ੍ਦਸ੍ਸ ਸਲਿਙ੍ਗੇਨ ਵਿਸੇਸਨਂ ਹੋਤਿ.

੧੩. ਨਿਮਿਤ੍ਤਮਤ੍ਤਂ ਸੇਸੇਤ੍ਵਾ ਖਾਯਿਤੇਪੀਤਿ ਏਤ੍ਥ ਤਿਣ੍ਣਮਞ੍ਞਤਰਂ ਨਿਮਿਤ੍ਤਂ ਸੇਸੇਤ੍ਵਾ ਸਕਲਸਰੀਰੇ ਖਾਦਿਤੇਪਿ. ਪਿ-ਸਦ੍ਦੋ ਬ੍ਯਤਿਰੇਕੇ, ਪਗੇਵ ਇਤਰੇਤਿ ਦੀਪੇਤਿ. ਤਸ੍ਮਿਂ ਨਿਮਿਤ੍ਤੇ ਅਕ੍ਖਾਯਿਤੇ ਵਾ ਯੇਭੁਯ੍ਯਕ੍ਖਾਯਿਤੇ ਵਾਤਿ ਦ੍ਵਿਧਾ ਵੁਤ੍ਤੇਸੁ ਤੀਸੁ ਨਿਮਿਤ੍ਤੇਸੁ ਅਞ੍ਞਤਰਸ੍ਮਿਂ ਨਿਮਿਤ੍ਤੇ ਮੇਥੁਨਂ ਸੇਵਤੋਪਿ ਪਰਾਜਯੋ ਪਾਰਾਜਿਕਾਪਤ੍ਤਿ ਹੋਤੀਤਿ ਅਧਿਪ੍ਪਾਯੋ. ਸੇਵਤੋਪੀਤਿ ਏਤ੍ਥ ਪਿ-ਸਦ੍ਦੋ ਅਪੇਕ੍ਖਾਯਂ. ਤਸ੍ਮਾ ਨ ਕੇਵਲਂ ਹੇਟ੍ਠਾ ਵੁਤ੍ਤਾਨਮੇਵਾਤਿ ਅਪੇਕ੍ਖਤਿ. ਸਨ੍ਥਤਾਦਯੋ ਵਿਕਪ੍ਪਾ ਯਥਾਵੁਤ੍ਤਨਯੇਨ ਏਤ੍ਥਾਪਿ ਯੋਜੇਤਬ੍ਬਾ.

੧੪. ‘‘ਉਦ੍ਧੁਮਾਤਾਦਿਸਮ੍ਪਤ੍ਤੇ’’ਤਿ ਏਤ੍ਥ ‘‘ਯਦਾ ਪਨ ਸਰੀਰਂ ਉਦ੍ਧੁਮਾਤਕਂ ਹੋਤਿ ਕੁਥਿਤਂ ਨੀਲਮਕ੍ਖਿਕਾਸਮਾਕਿਣ੍ਣਂ ਕਿਮਿਕੁਲਸਮਾਕੁਲਂ ਨਵਹਿ ਵਣਮੁਖੇਹਿ ਪਗ੍ਘਰਿਤਪੁਬ੍ਬਕੁਣਪਭਾਵੇਨ ਉਪਗਨ੍ਤੁਮ੍ਪਿ ਅਸਕ੍ਕੁਣੇਯ੍ਯਂ, ਤਦਾ ਪਾਰਾਜਿਕਵਤ੍ਥੁਞ੍ਚ ਥੁਲ੍ਲਚ੍ਚਯਵਤ੍ਥੁਞ੍ਚ ਜਹਤਿ, ਤਾਦਿਸੇ ਸਰੀਰੇ ਯਤ੍ਥ ਕਤ੍ਥਚਿ ਉਪਕ੍ਕਮਤੋ ਦੁਕ੍ਕਟਮੇਵਾ’’ਤਿ (ਪਾਰਾ. ਅਟ੍ਠ. ੧.੫੯-੬੦) ਅਟ੍ਠਕਥਾਵਚਨਤੋ ਸਬ੍ਬਤ੍ਥਾਪਿ ਚਾਤਿ ਅਕ੍ਖਾਯਿਤਾਦਿਸਬ੍ਬਵਿਕਪ੍ਪੋਪਗਤਾਨਿ ਪਾਰਾਜਿਕਥੁਲ੍ਲਚ੍ਚਯਦੁਕ੍ਕਟਕ੍ਖੇਤ੍ਤਾਨਿ ਗਹਿਤਾਨੀਤਿ ਦਟ੍ਠਬ੍ਬਂ. ਤਤ੍ਥਾਪਿ ਵੀਤਿਕ੍ਕਮੋ ਅਨਾਪਤ੍ਤਿ ਨ ਹੋਤੀਤਿ ਦਸ੍ਸੇਤੁਮਾਹ ‘‘ਦੁਕ੍ਕਟ’’ਨ੍ਤਿ. ‘‘ਖਾਯਿਤਕ੍ਖਾਯਿਤ’’ਨ੍ਤਿਆਦੀਸੁ ਖਾਯਿਤਕ੍ਖਾਯਿਤਞ੍ਚ ਨਾਮੇਤਂ ਸਬ੍ਬਂ ਮਤਸਰੀਰਕੇਯੇਵ ਵੇਦਿਤਬ੍ਬਂ, ਨ ਜੀਵਮਾਨੇਤਿ ਯੋਜੇਤਬ੍ਬਂ.

੧੫. ਜੀਵਮਾਨੇ ਕਥਨ੍ਤਿ ਆਹ ‘‘ਛਿਨ੍ਦਿਤ੍ਵਾ ਪਨਾ’’ਤਿਆਦਿ. ਤਤ੍ਥ ਵਣਸਙ੍ਖੇਪਤੋਤਿ ਵਣਸਙ੍ਗਹਤੋ. ਤਸ੍ਮਿਨ੍ਤਿ ਯਤ੍ਥ ਠਿਤਂ ਨਿਮਿਤ੍ਤਂ ਉਪ੍ਪਾਟਿਤਂ, ਤਸ੍ਮਿਂ ਪਦੇਸੇ. ਏਤ੍ਥ ਦੁਤਿਯੋ ਪਨ-ਸਦ੍ਦੋ ਇਧ ਅਦਸ੍ਸਿਤਂ ਅਟ੍ਠਕਥਾਯਂ ਆਗਤਨਯੇਨ ਵਿਞ੍ਞਾਯਮਾਨਂ ਅਤ੍ਥਵਿਸੇਸਂ ਜੋਤੇਤਿ. ਅਟ੍ਠਕਥਾਯਹਿ ‘‘ਯਦਿਪਿ ਨਿਮਿਤ੍ਤਂ ਸਬ੍ਬਸੋ ਖਾਯਿਤਂ, ਛਵਿਚਮ੍ਮਮ੍ਪਿ ਨਤ੍ਥਿ, ਨਿਮਿਤ੍ਤਸਣ੍ਠਾਨਂ ਪਞ੍ਞਾਯਤਿ, ਪਵੇਸਨਂ ਜਾਯਤਿ, ਪਾਰਾਜਿਕਮੇਵਾ’’ਤਿ ਏਵਂ ਅਜੀਵਮਾਨੇ ਵੁਤ੍ਤਵਿਨਿਚ੍ਛਯਾਨੁਸਾਰੇਨ ਜੀਵਮਾਨੇਪਿ ਛਵਿਚਮ੍ਮਮਤ੍ਤਂ ਚੇ ਸਬ੍ਬਸੋ ਉਪ੍ਪਾਟਿਤਂ, ਨਿਮਿਤ੍ਤਸਣ੍ਠਾਨਂ ਪਞ੍ਞਾਯਤਿ, ਪਵੇਸਨਕ੍ਖਮਂ ਹੋਤਿ, ਤਤ੍ਥ ਸੇਵਨ੍ਤਸ੍ਸ ਪਾਰਾਜਿਕਮੇਵਾਤਿ ਵਿਞ੍ਞਾਯਮਾਨਮਤ੍ਥਂ ਜੋਤੇਤੀਤਿ ਵੁਤ੍ਤਂ ਹੋਤਿ.

੧੬. ਤਤੋ ਨਿਮਿਤ੍ਤਤੋਤਿ ਸਮ੍ਬਨ੍ਧੋ. ਪਤਿਤਾਯਾਤਿ ਪਤਿਤਾਯਂ, ਅਯਮੇਵ ਵਾ ਪਾਠੋ. ਨਿਮਿਤ੍ਤਤੋਤਿ ਨਿਮਿਤ੍ਤਪ੍ਪਦੇਸਤੋ ਪਤਿਤਾਯਂ ਮਂਸਪੇਸਿਯਨ੍ਤਿ ਸਮ੍ਬਨ੍ਧੋ. ਛਿਨ੍ਦਿਤ੍ਵਾ ਵਾ ਤਚ੍ਛੇਤ੍ਵਾ ਵਾ ਪਤਿਤਾਯਂ ਤਸ੍ਸਂ ਨਿਮਿਤ੍ਤਮਂਸਪੇਸਿਯਨ੍ਤਿ ਅਤ੍ਥੋ. ਮੇਥੁਨਰਾਗੇਨ ਉਪਕ੍ਕਮਨ੍ਤਸ੍ਸ ਦੁਕ੍ਕਟਂ ਵਿਨਿਦ੍ਦਿਸੇਤਿ ਯੋਜਨਾ.

੧੭. ‘‘ਨਖਪਿਟ੍ਠਿਪ੍ਪਮਾਣੇਪੀ’’ਤਿਆਦਿਗਾਥਾਯ ‘‘ਛਿਨ੍ਦਿਤ੍ਵਾ’’ਤਿਆਦਿਕਾ ਅਟ੍ਠਕਥਾ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਾ. ਸਤੀਤਿ ਏਤ੍ਥ ‘‘ਅਵਸਿਟ੍ਠੇ’’ਤਿ ਪਾਠਸੇਸੋ. ਜੀਵਮਾਨੇਤਿ ਏਤ੍ਥ ‘‘ਸਰੀਰੇ’’ਤਿ ਪਾਠਸੇਸੋ. ਜੀਵਮਾਨਸਰੀਰੇ ਪਨ ਛਿਨ੍ਦਿਤ੍ਵਾ ਤਚ੍ਛੇਤ੍ਵਾ ਨਿਮਿਤ੍ਤੇ ਉਪ੍ਪਾਟਿਤੇ ਨਖਪਿਟ੍ਠਿਪ੍ਪਮਾਣੇਪਿ ਮਂਸੇ, ਨ੍ਹਾਰੁਮ੍ਹਿ ਵਾ ਅਵਸਿਟ੍ਠੇ ਸਤਿ ਮੇਥੁਨਂ ਪਟਿਸੇਵਨ੍ਤੋ ਪਰਾਜਿਤੋਤਿ ਯੋਜਨਾ.

੧੮. ‘‘ਕਣ੍ਣਚ੍ਛਿਦ੍ਦਕ੍ਖੀ’’ਤਿ ਗਾਥਾਯ ‘‘ਜੀਵਮਾਨੇ’’ਤਿ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ, ‘‘ਸਰੀਰੇ’’ਤਿ ਪਾਠਸੇਸੋ. ‘‘ਅਸ੍ਸਗੋਮਹਿਸਾਦੀਨ’’ਨ੍ਤਿਆਦਿਨਾ ਅਸ੍ਸਾਦੀਨਂ ਵਕ੍ਖਮਾਨਤ੍ਤਾ ਪਾਰਿਸੇਸਤੋ ‘‘ਮਨੁਸ੍ਸਾਨ’’ਨ੍ਤਿ ਲਬ੍ਭਤਿ. ਮਨੁਸ੍ਸਾਨਂ ਜੀਵਮਾਨਸਰੀਰੇ ਕਣ੍ਣ…ਪੇ… ਵਣੇਸੁ ਵਾਤਿ ਯੋਜਨਾ. ਵਤ੍ਥਿਕੋਸੇਤਿ ਮੁਤ੍ਤਪਥਬ੍ਭਨ੍ਤਰੇ. ਵਣੇਸੁ ਵਾਤਿ ਸਤ੍ਥਕਾਦੀਹਿ ਕਤਵਣੇਸੁ. ਅਙ੍ਗਜਾਤਨ੍ਤਿ ਤਿਲਮਤ੍ਤਮ੍ਪਿ ਅਙ੍ਗਜਾਤੇਕਦੇਸਂ. ਰਾਗਾਤਿ ਮੇਥੁਨਰਾਗੇਨ.

੧੯. ਅਵਸੇਸਸਰੀਰਸ੍ਮਿਨ੍ਤਿ ਕਣ੍ਣਚ੍ਛਿਦ੍ਦਾਦਿਯਥਾਵੁਤ੍ਤਸਰੀਰਾਵਯਵਵਜ੍ਜਿਤਸਰੀਰਪ੍ਪਦੇਸੇ. ਤੇਨਾਹ ‘‘ਉਪਕਚ੍ਛੂਰੁਕਾਦਿਸੂ’’ਤਿ ਉਪਕਚ੍ਛਂ ਨਾਮ ਬਾਹੁਮੂਲਨ੍ਤਰਂ. ਊਰੁਕਾਦਿਸੂਤਿ ਊਰੁਵੇਮਜ੍ਝਾਦੀਸੁ. ਆਦਿ-ਸਦ੍ਦੇਨ ਵੁਤ੍ਤਾਵਸੇਸਂ ਸਰੀਰਪ੍ਪਦੇਸਂ ਸਙ੍ਗਣ੍ਹਾਤਿ. ‘‘ਅਙ੍ਗਜਾਤ’’ਨ੍ਤਿ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ‘‘ਪਵੇਸੇਤ੍ਵਾ’’ਤਿ ਸਾਮਤ੍ਥਿਯਾ ਲਬ੍ਭਤਿ, ਅਙ੍ਗਜਾਤਂ ਤਿਲਬੀਜਮਤ੍ਤਂ ਪਵੇਸੇਤ੍ਵਾਤਿ ਵੁਤ੍ਤਂ ਹੋਤਿ. ਵਸਾ ਮੇਥੁਨਰਾਗਸ੍ਸ ਸੇਵਮਾਨਸ੍ਸਾਤਿ ਮੇਥੁਨਰਾਗੇਨ ਵੀਤਿਕ੍ਕਮਨ੍ਤਸ੍ਸਾਤਿ ਅਤ੍ਥੋ. ‘‘ਸਨ੍ਥਤੇਨਾ’’ਤਿਆਦਿਨਾ ਵੁਤ੍ਤਪ੍ਪਕਾਰੋ ਏਤ੍ਥਾਪਿ ਯੋਜੇਤਬ੍ਬੋ.

੨੦. ਅਸ੍ਸਗੋਮਹਿਸਾਦੀਨਨ੍ਤਿ ਆਦਿ-ਸਦ੍ਦੇਨ ਗੋਕਣ੍ਣਗਵਜਾਦਯੋ ਸਙ੍ਗਹਿਤਾ. ਅਸ੍ਸਾਦਯੋ ਪਾਕਟਾਯੇਵ. ‘‘ਮਤਾਨ’’ਨ੍ਤਿ ਵਕ੍ਖਮਾਨਤ੍ਤਾ ‘‘ਜੀਵਮਾਨਾਨ’’ਨ੍ਤਿ ਸਾਮਤ੍ਥਿਯਾ ਲਬ੍ਭਤਿ. ਸੇਵਨ੍ਤਿ ‘‘ਵਸਾ ਮੇਥੁਨਰਾਗਸ੍ਸਾ’’ਤਿ ਅਨੁਵਤ੍ਤਮਾਨਤ੍ਤਾ ਮੇਥੁਨਰਾਗਵਸੇਨ ਤਿਲਬੀਜਮਤ੍ਤਮ੍ਪਿ ਅਙ੍ਗਜਾਤਪ੍ਪਦੇਸਂ ਪਵੇਸੇਨ੍ਤੋ ਥੁਲ੍ਲਚ੍ਚਯਂ ਫੁਸੇਤਿ ਯੋਜਨਾ. ਏਤ੍ਥ ਚ ‘‘ਓਟ੍ਠਗਦ੍ਰਭਦਨ੍ਤੀਨਂ, ਅਸ੍ਸਗੋਮਹਿਸਾਦਿਨ’’ਨ੍ਤਿ ਪਾਠੇਨ ਭਵਿਤਬ੍ਬਂ. ਏਵਞ੍ਹਿ ਸਤਿ ਅਟ੍ਠਕਥਾਵਸਾਨੇ ਨਿਦ੍ਦਿਟ੍ਠੇਨ ਪਕਾਰਤ੍ਥਵਾਚਿਨਾ ਆਦਿ-ਸਦ੍ਦੇਨ ਥੁਲ੍ਲਚ੍ਚਯਵੀਤਿਕ੍ਕਮਾਰਹਨਾਸਾਵਤ੍ਥਿਕੋਸਵਨ੍ਤੋ ਅਵੁਤ੍ਤਾ ਸਬ੍ਬੇਪਿ ਸਤ੍ਤਾ ਗਯ੍ਹਨ੍ਤਿ. ‘‘ਅਸ੍ਸਗੋਮਹਿਸਾਦੀਨ’’ਨ੍ਤਿ ਪਠਮਪਾਦਾਵਸਾਨੇ ਨਿਦ੍ਦਿਟ੍ਠੇਨ ਆਦਿ-ਸਦ੍ਦੇਨ ਓਟ੍ਠਗਦ੍ਰਭਦਨ੍ਤੀਨਮ੍ਪਿ ਸਙ੍ਗਹੋ ਹੋਤੀਤਿ ਤੇਸਂ ਪੁਨਵਚਨਂ ਨਿਰਤ੍ਥਕਂ ਸਿਯਾਤਿ.

੨੧. ਤਥਾ ਸੇਵਮਾਨਸ੍ਸ ਦੁਕ੍ਕਟਨ੍ਤਿ ਸਮ੍ਬਨ੍ਧੋ. ਸਬ੍ਬਤਿਰਚ੍ਛਾਨਨ੍ਤਿ ਤਿਰਿਯਂ ਅਞ੍ਚਨ੍ਤਿ ਵਡ੍ਢਨ੍ਤੀਤਿ ਤਿਰਚ੍ਛਾ, ਸਬ੍ਬੇ ਚ ਤੇ ਤਿਰਚ੍ਛਾਚਾਤਿ ਸਬ੍ਬਤਿਰਚ੍ਛਾ, ਤੇਸਂ ਸਬ੍ਬਤਿਰਚ੍ਛਾਨਂ. ‘‘ਤਥਾ’’ਤਿ ਇਮਿਨਾ ‘‘ਵਸਾ ਮੇਥੁਨਰਾਗਸ੍ਸਾ’’ਤਿਆਦੀਨਂ ਪਰਾਮਟ੍ਠਤ੍ਤਾ ਸਬ੍ਬਤਿਰਚ੍ਛਾਨਾਨਂ ਅਕ੍ਖਿਆਦੀਸੁ ਤਿਲਬੀਜਮਤ੍ਤਮ੍ਪਿ ਅਙ੍ਗਜਾਤਪ੍ਪਦੇਸਂ ਮੇਥੁਨਰਾਗੇਨ ਪਵੇਸੇਨ੍ਤਸ੍ਸ ਦੁਕ੍ਕਟਨ੍ਤਿ ਵੁਤ੍ਤਂ ਹੋਤਿ. ਏਤ੍ਥਾਪਿ ਸਨ੍ਥਤਾਦਿਵਿਕਪ੍ਪੇ ਨਿਦ੍ਦੋਸਭਾਵੋ ਨ ਸਕ੍ਕਾ ਵਤ੍ਤੁਨ੍ਤਿ ਤਮ੍ਪਿ ਯੋਜੇਤਬ੍ਬਂ.

੨੨. ਏਵਂ ਤਿਰਚ੍ਛਾਨਾਨਂ ਜੀਵਮਾਨਕਸਰੀਰੇ ਲਬ੍ਭਮਾਨਾ ਆਪਤ੍ਤਿਯੋ ਦਸ੍ਸੇਤ੍ਵਾ ਤੇਸਂਯੇਵ ਮਤਸਰੀਰੇਪਿ ਸਮ੍ਭਵਨਕਆਪਤ੍ਤਿਯੋ ਦਸ੍ਸੇਤੁਮਾਹ ‘‘ਤੇਸ’’ਨ੍ਤਿਆਦਿ. ‘‘ਤੇਸ’’ਨ੍ਤਿ ਇਮਿਨਾ ਮਨੁਸ੍ਸਤਿਰਚ੍ਛਾਨਗਤਾਨਂ ਗਹਣਨ੍ਤਿ ਵਦਨ੍ਤਿ. ਮਨੁਸ੍ਸਾਨਂ ਮਤਾਮਤਸਰੀਰੇ ਪਾਰਾਜਿਕਥੁਲ੍ਲਚ੍ਚਯਦੁਕ੍ਕਟਕ੍ਖੇਤ੍ਤੇਸੁ ਤਿਸ੍ਸਨ੍ਨਂ ਆਪਤ੍ਤੀਨਂ ਦਸ੍ਸਿਤਤ੍ਤਾ, ਪੁਨ ਗਹਣੇ ਪਯੋਜਨਾਭਾਵਾ ਤੇ ਵਜ੍ਜੇਤ੍ਵਾ ਅਨੁਵਤ੍ਤਮਾਨਸਬ੍ਬਤਿਰਚ੍ਛਾਨਨ੍ਤਿ ਇਮਿਨਾ ਯੋਜੇਤਬ੍ਬਂ, ਤੇਸਂ ਸਬ੍ਬਤਿਰਚ੍ਛਾਨਗਤਾਨਨ੍ਤਿ ਅਤ੍ਥੋ. ਅਲ੍ਲਸਰੀਰੇਸੂਤਿ ਉਦ੍ਧੁਮਾਤਕਾਦਿਭਾਵਮਸਮ੍ਪਤ੍ਤੇਸੁ ਅਲ੍ਲਮਤਸਰੀਰੇਸੁ ਤਿਵਿਧੇ ਖੇਤ੍ਤਸ੍ਮਿਂ ਅਸਨ੍ਥਤੇ, ਸਨ੍ਥਤੇ ਵਾ ਸਤਿ ਮੇਥੁਨਰਾਗਸ੍ਸ ਵਸਾ ਸੇਵਤੋ ਤਿਵਿਧਾਪਿ ਆਪਤ੍ਤਿ ਸਿਯਾਤਿ ਅਨੁਵਤ੍ਤਮਾਨਪਦੇਹਿ ਸਹ ਯੋਜਨਾ.

ਤਿਵਿਧੇ ਖੇਤ੍ਤਸ੍ਮਿਨ੍ਤਿ ਮਤਮਨੁਸ੍ਸਸਰੀਰੇ ਵੁਤ੍ਤਨਯੇਨ ਅਕ੍ਖਾਯਿਤਯੇਭੁਯ੍ਯਕ੍ਖਾਯਿਤਭੇਦੇ ਮਗ੍ਗਤ੍ਤਯਸਙ੍ਖਾਤੇ ਪਾਰਾਜਿਕਕ੍ਖੇਤ੍ਤੇ ਚ ਯੇਭੁਯ੍ਯਕ੍ਖਾਯਿਤਉਪਡ੍ਢਕ੍ਖਾਯਿਤਭੇਦੇ ਤਸ੍ਮਿਂਯੇਵ ਮਗ੍ਗਤ੍ਤਯਸਙ੍ਖਾਤੇ ਚ, ਅਕ੍ਖਾਯਿਤਯੇਭੁਯ੍ਯਕ੍ਖਾਯਿਤਭੇਦੇ ਕਣ੍ਣਚ੍ਛਿਦ੍ਦਕ੍ਖਿਨਾਸਾਵਤ੍ਥਿਕੋਸਵਣਸਙ੍ਖਾਤੇ ਚ ਥੁਲ੍ਲਚ੍ਚਯਕ੍ਖੇਤ੍ਤੇ ਉਪਡ੍ਢਕ੍ਖਾਯਿਤਯੇਭੁਯ੍ਯਕ੍ਖਾਯਿਤਭੇਦੇ ਤਸ੍ਮਿਂਯੇਵ ਕਣ੍ਣਚ੍ਛਿਦ੍ਦਕ੍ਖਿਨਾਸਾਵਤ੍ਥਿਕੋਸਵਣਸਙ੍ਖਾਤੇ ਚ, ਅਕ੍ਖਾਯਿਤਯੇਭੁਯ੍ਯਕ੍ਖਾਯਿਤਉਪਡ੍ਢਕ੍ਖਾਯਿਤ ਯੇਭੁਯ੍ਯਕ੍ਖਾਯਿਤਭੇਦੇ ਅਵਸੇਸਸਰੀਰਸਙ੍ਖਾਤੇ ਦੁਕ੍ਕਟਕ੍ਖੇਤ੍ਤੇ ਚਾਤਿ ਤਿਵਿਧੇਪਿ ਖੇਤ੍ਤੇ. ਸਤੀਤਿ ਵਿਜ੍ਜਮਾਨੇ. ਸਨ੍ਥਤੇ ਵਾ ਅਸਨ੍ਥਤੇ ਵਾ ਮੇਥੁਨਰਾਗਸ੍ਸ ਵਸਾ ਸੇਵਤੋ ਯਥਾਰਹਂ ਪਾਰਾਜਿਕਥੁਲ੍ਲਚ੍ਚਯਦੁਕ੍ਕਟਸਙ੍ਖਾਤਾ ਤਿਵਿਧਾ ਆਪਤ੍ਤਿ ਭਵੇਯ੍ਯਾਤਿ ਅਤ੍ਥੋ.

ਏਤੇਸਮੇਵ ਚ ਉਦ੍ਧੁਮਾਤਾਦਿਭਾਵਂ ਸਮ੍ਪਤ੍ਤੇ ਸਰੀਰੇ ਸਨ੍ਥਤਾਦਿਵੁਤ੍ਤਵਿਕਪ੍ਪਯੁਤ੍ਤੇਸੁ ਤੀਸੁ ਮਗ੍ਗੇਸੁ ਯਤ੍ਥ ਕਤ੍ਥਚਿ ਮੇਥੁਨਰਾਗੇਨ ਸੇਵਤੋ ਆਪਜ੍ਜਿਤਬ੍ਬਦੁਕ੍ਕਟਞ੍ਚ ਉਦ੍ਧੁਮਾਤਾਦਿਸਮ੍ਪਤ੍ਤੇ ਸਬ੍ਬਤ੍ਥਾਪਿ ਚ ਦੁਕ੍ਕਟਨ੍ਤਿ ਮਨੁਸ੍ਸਸਰੀਰੇ ਵੁਤ੍ਤਨਯੇਨ ਵਿਞ੍ਞਾਤੁਂ ਸਕ੍ਕਾਤਿ ਇਮਸ੍ਮਿਂ ਤਿਰਚ੍ਛਾਨਗਤਸਰੀਰੇ ਵਿਸੇਸਮਤ੍ਤਂ ਦਸ੍ਸੇਤੁਂ ‘‘ਤੇਸਂ ਅਲ੍ਲਸਰੀਰੇਸੂ’’ਤਿਆਦੀਨਂ ਵੁਤ੍ਤਤ੍ਤਾ ਦੁਕ੍ਕਟਂ ਪੁਬ੍ਬੇ ਵੁਤ੍ਤਨਯੇਨ ਵੇਦਿਤਬ੍ਬਂ. ਯਥਾਹ ਅਟ੍ਠਕਥਾਯਂ ‘‘ਕੁਥਿਤਕੁਣਪੇ ਪਨ ਪੁਬ੍ਬੇ ਵੁਤ੍ਤਨਯੇਨੇਵ ਸਬ੍ਬਤ੍ਥ ਦੁਕ੍ਕਟ’’ਨ੍ਤਿ.

੨੩. ਬਹਿ ਛੁਪਨ੍ਤਸ੍ਸਾਤਿ ਯੋਜਨਾ. ਨਿਮਿਤ੍ਤਂ ਮੁਤ੍ਤਕਰਣਂ. ‘‘ਇਤ੍ਥਿਯਾ’’ਤਿ ਸਾਮਞ੍ਞੇਨ ਵੁਤ੍ਤੇਪਿ ਚਤੁਤ੍ਥਗਾਥਾਯ ‘‘ਤਿਰਚ੍ਛਾਨਗਤਿਤ੍ਥਿਯਾ’’ਤਿ ਵਕ੍ਖਮਾਨਤ੍ਤਾ ਪਾਰਿਸੇਸਤੋ ਇਮਿਨਾ ਮਨੁਸ੍ਸਾਮਨੁਸ੍ਸਿਤ੍ਥੀਨਮੇਵ ਗਹਣਂ, ਇਮਿਨਾ ਅਮਨੁਸ੍ਸਿਤ੍ਥਿਯਾਪਿ ਗਹਣਸ੍ਸ. ਇਮਿਸ੍ਸਾਨਨ੍ਤਰਗਾਥਾਯ ਇਤੋ ‘‘ਇਤ੍ਥਿਯਾ’’ਤਿ ਅਨੁਵਤ੍ਤਿਤੇ ਤਤ੍ਰਾਪਿ ਅਮਨੁਸ੍ਸਿਤ੍ਥਿਯਾਪਿ ਗਹਣਂ ਸਿਯਾਤਿ ਤਮ੍ਪਿ ਵਜ੍ਜੇਤ੍ਵਾ ਕਾਯਸਂਸਗ੍ਗਸਙ੍ਘਾਦਿਸੇਸਸ੍ਸ ਵਤ੍ਥੁਭੂਤਂ ਮਨੁਸ੍ਸਿਤ੍ਥਿਮੇਵ ਦਸ੍ਸੇਤੁਂ ਤਤ੍ਥ ਵੁਤ੍ਤਂ ‘‘ਇਤ੍ਥਿਯਾ’’ਤਿਅਧਿਕਵਚਨਮੇਵ ਞਾਪਕਨ੍ਤਿ ਵੇਦਿਤਬ੍ਬਂ.

ਮਹਾਅਟ੍ਠਕਥਾਯਂ (ਪਾਰਾ. ਅਟ੍ਠ. ੧.੫੯-੬੦) ‘‘ਇਤ੍ਥਿਨਿਮਿਤ੍ਤਂ ਮੇਥੁਨਰਾਗੇਨ ਮੁਖੇਨ ਛੁਪਤਿ, ਥੁਲ੍ਲਚ੍ਚਯ’’ਨ੍ਤਿ ਸਾਮਞ੍ਞੇਨ ਵੁਤ੍ਤਤ੍ਤਾ ਚ ਧਮ੍ਮਕ੍ਖਨ੍ਧਕੇ ‘‘ਨ ਚ ਭਿਕ੍ਖਵੇ ਰਤ੍ਤਚਿਤ੍ਤੇਨ ਅਙ੍ਗਜਾਤਂ ਛੁਪਿਤਬ੍ਬਂ, ਯੋ ਛੁਪੇਯ੍ਯ, ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ (ਮਹਾਵ. ੨੫੨) ਸਾਮਞ੍ਞਵਚਨਤੋ ਚ ਉਦ੍ਧੁਮਾਤਾਦਿਭਾਵਮਸਮ੍ਪਤ੍ਤਾਯ ਅਲ੍ਲਮਤਮਨੁਸ੍ਸਿਤ੍ਥਿਯਾ ਚ ਅਕ੍ਖਾਯਿਤੇ ਵਾ ਯੇਭੁਯ੍ਯਕ੍ਖਾਯਿਤੇ ਵਾ ਨਿਮਿਤ੍ਤੇ ਸਤਿ ਪਾਰਾਜਿਕਵਤ੍ਥੁਭਾਵਤੋ ਤਤ੍ਥਾਪਿ ਬਹਿ ਛੁਪਨ੍ਤਸ੍ਸ ਥੁਲ੍ਲਚ੍ਚਯਨ੍ਤਿ ਅਯਮਤ੍ਥੋਪਿ ਮਤਾਮਤਵਿਸੇਸਂ ਅਕਤ੍ਵਾ ‘‘ਇਤ੍ਥਿਯਾ’’ਤਿ ਇਮਿਨਾਵ ਸਾਮਞ੍ਞਵਚਨੇਨ ਗਹੇਤਬ੍ਬੋ.

੨੪. ਨਿਮਿਤ੍ਤੇਨਾਤਿ ਅਤ੍ਤਨੋ ਅਙ੍ਗਜਾਤੇਨ. ਮੁਖੇਨਾਤਿ ਪਕਤਿਮੁਖੇਨ. ਨਿਮਿਤ੍ਤਂ ਇਤ੍ਥਿਯਾਤਿ ਜੀਵਮਾਨਕਮਨੁਸ੍ਸਿਤ੍ਥਿਯਾ ਅਙ੍ਗਜਾਤਂ. ਯਸ੍ਮਾ ਪਨ ਕਾਯਸਂਸਗ੍ਗਸਿਕ੍ਖਾਪਦਵਿਨੀਤਵਤ੍ਥੂਸੁ ਮਤਿਤ੍ਥਿਵਤ੍ਥੁਮ੍ਹਿ ਮਤਿਤ੍ਥਿਯਾ ਸਰੀਰੇ ਕਾਯਸਂਸਗ੍ਗਰਾਗੇਨ ਯੋ ਛੁਪਤਿ, ਤਸ੍ਸ ‘‘ਅਨਾਪਤ੍ਤਿ ਭਿਕ੍ਖੁ ਸਙ੍ਘਾਦਿਸੇਸਸ੍ਸ, ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ (ਪਾਰਾ. ੨੮੧) ਵੁਤ੍ਤਤ੍ਤਾ ਮਤਮਨੁਸ੍ਸਿਤ੍ਥੀ ਨ ਗਹੇਤਬ੍ਬਾ. ਤਥੇਵ ਯਕ੍ਖਿਵਤ੍ਥੁਮ੍ਹਿ ਕਾਯਸਂਸਗ੍ਗਰਾਗੇਨ ਯਕ੍ਖਿਨਿਯਾ ਸਰੀਰਂ ਯੇਨ ਫੁਟ੍ਠਂ, ਤਸ੍ਸ ‘‘ਅਨਾਪਤ੍ਤਿ ਭਿਕ੍ਖੁ ਸਙ੍ਘਾਦਿਸੇਸਸ੍ਸ, ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ ਵੁਤ੍ਤਤ੍ਤਾ, ਇਧੇਵ ਉਪਰਿ ਦੁਤਿਯਸਙ੍ਘਾਦਿਸੇਸੇ ‘‘ਪਣ੍ਡਕੇ ਯਕ੍ਖਿਪੇਤੀਸੁ, ਤਸ੍ਸ ਥੁਲ੍ਲਚ੍ਚਯਂ ਸਿਯਾ’’ਤਿ (ਵਿ. ਵਿ. ੩੪੧) ਵਕ੍ਖਮਾਨਤ੍ਤਾ ਚ ਅਮਨੁਸ੍ਸਿਤ੍ਥੀਪਿ ਨ ਗਹੇਤਬ੍ਬਾ. ਤੇਨ ਵੁਤ੍ਤਂ ‘‘ਜੀਵਮਾਨਕਮਨੁਸ੍ਸਿਤ੍ਥਿਯਾ ਅਙ੍ਗਜਾਤ’’ਨ੍ਤਿ. ਅਨ੍ਤੋ ਪਵੇਸੇਤੁਕਾਮਤਾਯ ਸਤਿ ਕਾਯਸਂਸਗ੍ਗਰਾਗਾਸਮ੍ਭਵਤੋ ‘‘ਕਾਯਸਂਸਗ੍ਗਰਾਗੇਨਾ’’ਤਿ ਇਮਿਨਾ ਚ ਬਹਿ ਛੁਪਿਤੁਕਾਮਤਾ ਵਿਞ੍ਞਾਯਤੀਤਿ ‘‘ਬਹੀ’’ਤਿ ਅਨੁਵਤ੍ਤਨਂ ਵਿਨਾਪਿ ਤਦਤ੍ਥੋ ਲਬ੍ਭਤਿ. ਗਰੁਕਨ੍ਤਿ ਸਙ੍ਘਾਦਿਸੇਸੋ.

੨੫. ਤਥੇਵ ਬਹਿ ਛੁਪਨ੍ਤਸ੍ਸਾਤਿ ਯੋਜਨਾ, ਅਨ੍ਤੋ ਅਪ੍ਪਵੇਸੇਤ੍ਵਾ ਬਹਿਯੇਵ ਛੁਪਨ੍ਤਸ੍ਸਾਤਿ ਵੁਤ੍ਤਂ ਹੋਤਿ. ਉਭਯਰਾਗੇਨਾਤਿ ਕਾਯਸਂਸਗ੍ਗਰਾਗੇਨ, ਮੇਥੁਨਰਾਗੇਨ ਵਾ. ਪੁਰਿਸਸ੍ਸਾਪੀਤਿ ਜੀਵਮਾਨਕਪੁਰਿਸਸ੍ਸਪਿ. ਪਿ-ਸਦ੍ਦੋ ਨ ਕੇਵਲਂ ਵੁਤ੍ਤਨਯੇਨ ਇਤ੍ਥਿਯਾ ਨਿਮਿਤ੍ਤਂ ਫੁਸਨ੍ਤਸ੍ਸੇਵ ਆਪਤ੍ਤਿ, ਅਥ ਖੋ ਪੁਰਿਸਸ੍ਸਾਪੀਤਿ ਦੀਪੇਤਿ. ‘‘ਨਿਮਿਤ੍ਤ’’ਨ੍ਤਿ ਮੁਤ੍ਤਕਰਣਮੇਵ ਵੁਚ੍ਚਤਿ. ‘‘ਜੀਵਮਾਨਕਪੁਰਿਸਸ੍ਸਾ’’ਤਿ ਅਯਂ ਵਿਸੇਸੋ ਕੁਤੋ ਲਬ੍ਭਤੀਤਿ ਚੇ? ‘‘ਕਾਯਸਂਸਗ੍ਗਰਾਗੇਨ ਵਾ ਮੇਥੁਨਰਾਗੇਨ ਵਾ ਜੀਵਮਾਨਕਪੁਰਿਸਸ੍ਸ ਵਤ੍ਥਿਕੋਸਂ ਅਪ੍ਪਵੇਸੇਨ੍ਤੋ ਨਿਮਿਤ੍ਤੇਨ ਨਿਮਿਤ੍ਤਂ ਛੁਪਤਿ, ਦੁਕ੍ਕਟ’’ਨ੍ਤਿ ਇਤੋ ਅਟ੍ਠਕਥਾਵਚਨਤੋ (ਪਾਰਾ. ਅਟ੍ਠ. ੧.੫੯-੬੦) ਲਬ੍ਭਤਿ.

੨੬. ਅਚਿਰਵਤਿਤਰਨ੍ਤਾਨਂ ਗੁਨ੍ਨਂ ਪਿਟ੍ਠਿਂ ਅਭਿਰੁਹਨ੍ਤਾ ਛਬ੍ਬਗ੍ਗਿਯਾ ਭਿਕ੍ਖੂ ਮੇਥੁਨਰਾਗੇਨ ਅਙ੍ਗਜਾਤੇਨ ਅਙ੍ਗਜਾਤਂ ਛੁਪਿਂਸੂਤਿ ਇਮਸ੍ਮਿਂ ਵਤ੍ਥੁਮ੍ਹਿ ‘‘ਨ ਚ ਭਿਕ੍ਖਵੇ ਰਤ੍ਤਚਿਤ੍ਤੇਨ ਅਙ੍ਗਜਾਤਂ ਛੁਪਿਤਬ੍ਬਂ, ਯੋ ਛੁਪੇਯ੍ਯ, ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ (ਮਹਾਵ. ੨੫੨) ਆਗਤਨਯਂ ਦਸ੍ਸੇਤੁਮਾਹ ‘‘ਨਿਮਿਤ੍ਤੇਨਾ’’ਤਿਆਦਿ. ਏਤ੍ਥਾਪਿ ‘‘ਤਥਾ’’ਤਿ ਇਮਸ੍ਸਾਨੁਵਤ੍ਤਨਤੋ ‘‘ਬਹੀ’’ਤਿ ਲਬ੍ਭਤਿ. ਅਤ੍ਤਨੋ ਨਿਮਿਤ੍ਤੇਨ ਤਿਰਚ੍ਛਾਨਗਤਿਤ੍ਥਿਯਾ ਨਿਮਿਤ੍ਤਂ ਮੇਥੁਨਰਾਗਤੋ ਬਹਿ ਛੁਪਨ੍ਤਸ੍ਸ ਥੁਲ੍ਲਚ੍ਚਯਂ ਹੋਤੀਤਿ ਯੋਜਨਾ.

੨੭. ‘‘ਮੇਥੁਨਰਾਗਤੋ’’ਤਿ ਇਮਿਨਾ ਬ੍ਯਵਚ੍ਛਿਨ੍ਨਮਤ੍ਥਂ ਦਸ੍ਸੇਤੁਮਾਹ ‘‘ਕਾਯਸਂਸਗ੍ਗਰਾਗੇਨਾ’’ਤਿਆਦਿ. ਏਤ੍ਥਾਪਿ ‘‘ਕਾਯਸਂਸਗ੍ਗਰਾਗੇਨਾ’’ਤਿਵਚਨਸਾਮਤ੍ਥਿਯਾ ਬਹਿ ਛੁਪਨਂ ਵੇਦਿਤਬ੍ਬਂ. ਨਿਮਿਤ੍ਤਸ੍ਸਾਤਿ ਪਸ੍ਸਾਵਮਗ੍ਗਸ੍ਸ. ਛੁਪਨੇਤਿ ਫੁਸਨੇ.

੨੮. ਤਮਾਵਟ੍ਟਕਤੇਤਿ ਏਤ੍ਥ ‘‘ਤਂ ਆਵਟ੍ਟਕਤੇ’’ਤਿ ਪਦਚ੍ਛੇਦੋ. ਆਵਟ੍ਟਕਤੇਤਿ ਵਿਵਟੇ. ‘‘ਮੁਖੇ’’ਤਿ ਸਮ੍ਬਨ੍ਧਿਸਦ੍ਦਤ੍ਤਾ, ਅਞ੍ਞਸ੍ਸ ਸਮ੍ਬਨ੍ਧਿਨੋ ਚ ਅਨਿਦ੍ਦਿਟ੍ਠਤ੍ਤਾ ਸੁਤਾਨੁਲੋਮਿਕਾਨਂ ਸੁਤਸਮ੍ਬਨ੍ਧਸ੍ਸੇਵ ਬਲਵਤ੍ਤਾ ਚ ਪੁਰਿਮਾਨਨ੍ਤਰਗਾਥਾਯ ‘‘ਤਿਰਚ੍ਛਾਨਗਤਿਤ੍ਥਿਯਾ ਮੁਖੇ’’ਤਿ ਕਿਞ੍ਚਾਪਿ ਸੁਤਸ੍ਸੇਵ ਸਮ੍ਬਨ੍ਧੋ ਵਿਞ੍ਞਾਯਤਿ, ਤਥਾਪਿ ਇਮਾਯ ਗਾਥਾਯ ਵਿਨੀਤਵਤ੍ਥੁਮ੍ਹਿ (ਪਾਰਾ. ੭੩) ‘‘ਅਞ੍ਞਤਰੋ ਭਿਕ੍ਖੁ ਸਿਵਥਿਕਂ ਗਨ੍ਤ੍ਵਾ ਛਿਨ੍ਨਸੀਸਂ ਪਸ੍ਸਿਤ੍ਵਾ ਵਟ੍ਟਕਤੇ ਮੁਖੇ ਅਚ੍ਛੁਪਨ੍ਤਂ ਅਙ੍ਗਜਾਤਂ ਪਵੇਸੇਸੀ’’ਤਿ ਦਸ੍ਸਿਤਛਿਨ੍ਨਸੀਸਵਤ੍ਥੁਸ੍ਸ ਸਙ੍ਗਹਿਤਤ੍ਤਾ ਮਨੁਸ੍ਸਮੁਖਮੇਵ ਗਹੇਤਬ੍ਬਂ ਸਿਯਾ. ਤਿਰਚ੍ਛਾਨਗਤਾਨਂ, ਪਨ ਅਮਨੁਸ੍ਸਾਨਞ੍ਚ ਮੁਖੇ ਤਥਾ ਪਵੇਸੋ ਨਿਦ੍ਦੋਸੋਤਿ ਵਤ੍ਤੁਮਸਕ੍ਕੁਣੇਯ੍ਯਤ੍ਤਾ ਤਤ੍ਥਾਪਿ ਇਦਮੇਵ ਉਪਲਕ੍ਖਣਨ੍ਤਿ ਪਾਰਾਜਿਕਪ੍ਪਹੋਨਕਾਨਂ ਸਬ੍ਬੇਸਂ ਮੁਖੇਤਿ ਦਟ੍ਠਬ੍ਬਂ. ਤਂ ਅਙ੍ਗਜਾਤਂ. ਤਤ੍ਥ ਆਵਟ੍ਟਕਤੇ ਪਾਰਾਜਿਕਪ੍ਪਹੋਨਕਾਨਂ ਮੁਖੇ ਆਕਾਸਗਤਂ ਕਤ੍ਵਾ ਕਤ੍ਥਚਿ ਅਫੁਸਾਪੇਤ੍ਵਾ ਨੀਹਰਨ੍ਤਸ੍ਸ ਉਕ੍ਖਿਪਨ੍ਤਸ੍ਸ ਦੁਕ੍ਕਟਨ੍ਤਿ ਯੋਜਨਾ. ਅਥ ਵਾ ਤਿਰਚ੍ਛਾਨਾਨਂ ਆਵਟ੍ਟਕਤੇ ਮੁਖੇਤਿ ਯੋਜੇਤ੍ਵਾ ਤਦਞ੍ਞਸਙ੍ਗਹੋ ਉਪਲਕ੍ਖਣਵਸੇਨ ਕਾਤਬ੍ਬੋ.

੨੯. ਤਥਾਤਿ ‘‘ਆਕਾਸਗਤਂ ਕਤ੍ਵਾ’’ਤਿ ਯਥਾਵੁਤ੍ਤਪ੍ਪਕਾਰਂ ਪਰਾਮਸਤਿ. ਚਤੂਹਿ ਪਸ੍ਸੇਹੀਤਿ ਸਹਤ੍ਥੇ ਕਰਣਵਚਨਂ. ‘‘ਪਸ੍ਸੇਹੀ’’ਤਿ ਸਮ੍ਬਨ੍ਧਿਸਦ੍ਦਤ੍ਤਾ ‘‘ਨਿਮਿਤ੍ਤਸ੍ਸਾ’’ਤਿ ਸਾਮਤ੍ਥਿਯਾ ਲਬ੍ਭਤਿ. ‘‘ਇਤ੍ਥਿਯਾ’’ਤਿ ਸਾਮਞ੍ਞਸਦ੍ਦਤ੍ਤਾ ‘‘ਸਬ੍ਬਸ੍ਸਾ’’ਤਿ ਪਾਠਸੇਸੋ. ਜਾਤਿਵਾਚਕਤ੍ਤਾ ਏਕਵਚਨਂ. ‘‘ਚਤੂਹਿ ਪਸ੍ਸੇਹਿ, ਹੇਟ੍ਠਿਮਤ੍ਤਲ’’ਨ੍ਤਿ ਚ ਇਮੇਸਂ ਸਮ੍ਬਨ੍ਧਿਪਦਸ੍ਸ ਅਨਿਦ੍ਦੇਸੇਪਿ ਮੇਥੁਨਪਾਰਾਜਿਕਾਧਿਕਾਰਤ੍ਤਾ ਚ ਸਨ੍ਥਤਚਤੁਕ੍ਕਸ੍ਸ ਅਟ੍ਠਕਥਾਵਸਾਨੇ ਇਮਾਯ ਗਾਥਾਯ ਸਙ੍ਗਹਿਤਸ੍ਸ ਇਮਸ੍ਸ ਵਿਨਿਚ੍ਛਯਸ੍ਸ ਪਰਿਯੋਸਾਨੇ ‘‘ਯਥਾ ਚ ਇਤ੍ਥਿਨਿਮਿਤ੍ਤੇ ਵੁਤ੍ਤਂ, ਏਵਂ ਸਬ੍ਬਤ੍ਥ ਲਕ੍ਖਣਂ ਵੇਦਿਤਬ੍ਬ’’ਨ੍ਤਿ (ਪਾਰਾ. ਅਟ੍ਠ. ੧.੬੧-੬੨) ਨਿਮਿਤ੍ਤਵਿਨਿਚ੍ਛਯਸ੍ਸਾਤਿਦੇਸਸ੍ਸ ਕਤਤ੍ਤਾ ਚ ਸਾਮਤ੍ਥਿਯੇਨ ‘‘ਨਿਮਿਤ੍ਤਸ੍ਸਾ’’ਤਿ ਲਬ੍ਭਤਿ. ਇਦਮੇਵ ‘‘ਪਵੇਸੇਤ੍ਵਾ’’ਤਿ ਏਤਸ੍ਸ ਆਧਾਰਵਸੇਨ ਗਹੇਤਬ੍ਬਂ. ‘‘ਅਙ੍ਗਜਾਤ’’ਨ੍ਤਿ ਅਨੁਵਤ੍ਤਤਿ.

ਏਵਂ ਵਾਕ੍ਯਂ ਪੂਰੇਤ੍ਵਾ ‘‘ਯਥਾ ਆਵਟ੍ਟਕਤੇ ਮੁਖੇ ਅਙ੍ਗਜਾਤਂ ਪਵੇਸੇਤ੍ਵਾ ਤਮਾਕਾਸਗਤਂ ਕਤ੍ਵਾ ਨੀਹਰਨ੍ਤਸ੍ਸ ਦੁਕ੍ਕਟਂ, ਤਥਾ ਸਬ੍ਬਸ੍ਸਾ ਇਤ੍ਥਿਯਾ ਨਿਮਿਤ੍ਤੇ ਪਸ੍ਸਾਵਮਗ੍ਗਸਙ੍ਖਾਤੇ ਅਙ੍ਗਜਾਤਂ ਪਵੇਸੇਤ੍ਵਾ ਤਸ੍ਸ ਚਤੂਹਿ ਪਸ੍ਸੇਹਿ ਸਹ ਹੇਟ੍ਠਿਮਤ੍ਤਲਂ ਚਤ੍ਤਾਰੋ ਪਸ੍ਸੇ, ਹੇਟ੍ਠਿਮਤ੍ਤਲਞ੍ਚ ਅਚ੍ਛੁਪਨ੍ਤਂ ਆਕਾਸਗਤਂ ਕਤ੍ਵਾ ਨੀਹਰਨ੍ਤਸ੍ਸ ਦੁਕ੍ਕਟ’’ਨ੍ਤਿ ਯੋਜੇਤ੍ਵਾ ਅਤ੍ਥੋ ਵਤ੍ਤਬ੍ਬੋ.

੩੦. ਉਪ੍ਪਾਟਿਤੋਟ੍ਠਮਂਸੇਸੂਤਿ ਉਪ੍ਪਾਟਿਤਂ ਓਟ੍ਠਮਂਸਂ ਯੇਸਨ੍ਤਿ ਵਿਗ੍ਗਹੋ. ਤੇਸੁ ਦਨ੍ਤੇਸੁ. ਬਹਿਨਿਕ੍ਖਨ੍ਤਕੇਸੁ ਵਾਤਿ ਪਕਤਿਯਾ ਓਟ੍ਠਮਂਸਤੋ ਬਹਿ ਨਿਕ੍ਖਮਿਤ੍ਵਾ ਠਿਤੇਸੁ ਵਾ ਦਨ੍ਤੇਸੁ. ਵਾਯਮਨ੍ਤਸ੍ਸਾਤਿ ਅਙ੍ਗਜਾਤੇਨ ਛੁਪਨ੍ਤਸ੍ਸ.

੩੧. ਅਟ੍ਠਿਸਙ੍ਘਟ੍ਟਨਂ ਕਤ੍ਵਾਤਿ ਨਿਮਿਤ੍ਤਮਂਸਸਨ੍ਨਿਸ੍ਸਯਾਨਿ ਅਟ੍ਠੀਨਿ ਸਙ੍ਘਟ੍ਟੇਤ੍ਵਾ. ਮਗ੍ਗੇਤਿ ਅਟ੍ਠਿਸਙ੍ਘਾਤਮਯੇ ਮਗ੍ਗੇ. ਦੁਵਿਧਰਾਗਤੋਤਿ ਮੇਥੁਨਰਾਗੇਨ ਵਾ ਕਾਯਸਂਸਗ੍ਗਰਾਗੇਨ ਵਾ. ਵਾਯਮਨ੍ਤਸ੍ਸਾਤਿ ਅਙ੍ਗਜਾਤਂ ਪਵੇਸੇਤ੍ਵਾ ਚਾਰੇਨ੍ਤਸ੍ਸ.

੩੨. ਆਲਿਙ੍ਗਨ੍ਤਸ੍ਸਾਤਿ ਪਰਿਸ੍ਸਜਨ੍ਤਸ੍ਸ. ਹਤ੍ਥਗਾਹਾਦੀਸੁ ਹਤ੍ਥੋ ਨਾਮ ਕਪ੍ਪਰਤੋ ਪਟ੍ਠਾਯ ਯਾਵ ਅਗ੍ਗਨਖਾ. ਹਤ੍ਥਸ੍ਸ, ਤਪ੍ਪਟਿਬਨ੍ਧਸ੍ਸ ਚ ਗਹਣਂ ਹਤ੍ਥਗ੍ਗਾਹੋ. ਅਵਸੇਸਸਰੀਰਸ੍ਸ, ਤਪ੍ਪਟਿਬਨ੍ਧਸ੍ਸ ਚ ਪਰਾਮਸਨਂ ਪਰਾਮਾਸੋ. ਨਿਸ੍ਸਨ੍ਦੇਹੇ ਪਨ ‘‘ਮਾਤੁਗਾਮਸ੍ਸ ਸਰੀਰਸ੍ਸ ਵਾ ਤਪ੍ਪਟਿਬਨ੍ਧਸ੍ਸ ਵਾ ਹਤ੍ਥੇਨ ਗਹਣਂ ਹਤ੍ਥਗ੍ਗਾਹੋ’’ਤਿ ਵੁਤ੍ਤਂ, ਤਂ ਅਟ੍ਠਕਥਾਯ ਨ ਸਮੇਤਿ. ਤਸ੍ਮਾ ਯਥਾਵੁਤ੍ਤਨਯਸ੍ਸੇਵ ਅਟ੍ਠਕਥਾਸੁ ਆਗਤਤ੍ਤਾ ਸੋਯੇਵ ਸਾਰਤੋ ਪਚ੍ਚੇਤਬ੍ਬੋ. ਪਰਾਮਸੇਪਿ ‘‘ਹਤ੍ਥੇਨ ਸਰੀਰਸ੍ਸ, ਤਪ੍ਪਟਿਬਨ੍ਧਸ੍ਸ ਚ ਪਰਾਮਸਨ’’ਨ੍ਤਿ ਯਂ ਤਤ੍ਥ ਵੁਤ੍ਤਂ, ਤਮ੍ਪਿ ਨ ਯੁਜ੍ਜਤਿ. ਅਵਸੇਸਸਰੀਰਾਵਯਵੇਨਾਪਿ ਪਰਾਮਸਤੋ ਦੁਕ੍ਕਟਮੇਵ ਹੋਤੀਤਿ. ਚੁਮ੍ਬਨਾਦੀਸੂਤਿ ਆਦਿ-ਸਦ੍ਦੇਨ ਵੇਣਿਗ੍ਗਾਹਾਦਿਂ ਸਙ੍ਗਣ੍ਹਾਤਿ. ‘‘ਅਯਂ ਨਯੋ’’ਤਿ ਏਤੇਨ ‘‘ਇਤ੍ਥਿਯਾ ਮੇਥੁਨਰਾਗੇਨ ਹਤ੍ਥਗ੍ਗਾਹਾਦੀਸੁ ਦੁਕ੍ਕਟ’’ਨ੍ਤਿ ਇਮਮਤ੍ਥਂ ਅਤਿਦਿਸਤਿ.

੩੩. ਮਨੁਸ੍ਸਾਮਨੁਸ੍ਸੇਹਿ ਅਞ੍ਞੇਸੁ ਤਿਰਚ੍ਛਾਨਗਤੇਸੁ ਹੇਟ੍ਠਿਮਪਰਿਚ੍ਛੇਦੇਨ ਮੇਥੁਨਧਮ੍ਮਪਾਰਾਜਿਕਵਤ੍ਥੁਭੂਤੇ ਸਤ੍ਤੇ ਦਸ੍ਸੇਤੁਮਾਹ ‘‘ਅਪਦੇ’’ਤਿਆਦਿ. ‘‘ਅਪਦੇ, ਦ੍ਵਿਪਦੇ, ਚਤੁਪ੍ਪਦੇ’’ਤਿ ਇਮੇਹਿ ਵਿਸੇਸਨੇਹਿ ਵਿਸੇਸਿਤਬ੍ਬਂ ‘‘ਸਤ੍ਤਨਿਕਾਯੇ’’ਤਿ ਇਦਂ ਵਤ੍ਤਬ੍ਬਂ. ਅਪਦੇ ਸਤ੍ਤਨਿਕਾਯੇ. ਅਹਯੋਤਿ ਥਲਚਰੇਸੁ ਉਕ੍ਕਟ੍ਠਪਰਿਚ੍ਛੇਦਤੋ ਹਤ੍ਥਿਗਿਲਨਕੇ ਅਜਗਰੇ ਉਪਾਦਾਯ ਹੇਟ੍ਠਿਮਪਰਿਚ੍ਛੇਦੇਨ ਨਾਗਾ ਚ. ਮਚ੍ਛਾਤਿ ਜਲਜੇਸੁ ਉਪਰਿਮਕੋਟਿਯਾ ਪਞ੍ਚਸਤਯੋਜਨਿਕਾਨਿ ਤਿਮਿਰਪਿਙ੍ਗਲਾਦਿਮਚ੍ਛੇ ਉਪਾਦਾਯ ਹੇਟ੍ਠਿਮਨ੍ਤਤੋ ਪਾਠੀਨਪਾਵੁਸਾਦਯੋ ਮਚ੍ਛਾ ਚ. ਦ੍ਵਿਪਦੇ ਸਤ੍ਤਨਿਕਾਯੇ. ਕਪੋਤਾਤਿ ਉਪਰਿਮਕੋਟਿਯਾ ਗਰੁਲ਼ੇ ਉਪਾਦਾਯ ਹੇਟ੍ਠਿਮਨ੍ਤਤੋ ਕਪੋਤਾਕਪੋਤਪਕ੍ਖੀ ਚ. ਪਾਰਾਵਤਾਤਿ ਕੇਚਿ. ਚਤੁਪ੍ਪਦੇ ਸਤ੍ਤਨਿਕਾਯੇ. ਗੋਧਾਤਿ ਉਪਰਿਮਕੋਟਿਯਾ ਹਤ੍ਥਿਂ ਉਪਾਦਾਯ ਹੇਟ੍ਠਿਮਨ੍ਤਤੋ ਗੋਧਾ ਚਾਤਿ ਇਮੇ ਸਤ੍ਤਾ. ਹੇਟ੍ਠਾਤਿ ਹੇਟ੍ਠਿਮਪਰਿਚ੍ਛੇਦਤੋ. ਪਾਰਾਜਿਕਸ੍ਸਵਤ੍ਥੂਤਿ ਮੇਥੁਨਧਮ੍ਮਪਾਰਾਜਿਕਸ੍ਸ ਵਤ੍ਥੂਨੀਤਿ ਪਾਠਸੇਸੋ.

੩੪. ਸੇਵੇਤੁਕਾਮਤਾ ਮੇਥੁਨਸੇਵਾਯ ਤਣ੍ਹਾ, ਤਾਯ ਮੇਥੁਨਰਾਗਸਙ੍ਖਾਤਾਯ ਸਮ੍ਪਯੁਤ੍ਤਂ ਚਿਤ੍ਤਂ ਸੇਵੇਤੁਕਾਮਤਾਚਿਤ੍ਤਂ. ਮਗ੍ਗੇਤਿ ਵਚ੍ਚਮਗ੍ਗਾਦੀਨਂ ਅਞ੍ਞਤਰੇ ਮਗ੍ਗੇ. ਮਗ੍ਗਸ੍ਸ ਅਤ੍ਤਨੋ ਮੁਤ੍ਤਕਰਣਸ੍ਸ ਪਵੇਸਨਂ. ਪਬ੍ਬਜ੍ਜਾਯ, ਪਾਤਿਮੋਕ੍ਖਸਂਵਰਸੀਲਸ੍ਸ ਵਾ ਅਨ੍ਤੇ ਵਿਨਾਸੇ ਭਵੋਤਿ ਅਨ੍ਤਿਮੋ, ਪਾਰਾਜਿਕਾਪਨ੍ਨੋ ਪੁਗ੍ਗਲੋ, ਤਸ੍ਸ ਵਤ੍ਥੁ ਅਨ੍ਤਿਮਭਾਵਸ੍ਸ ਕਾਰਣਤ੍ਤਾ ਪਾਰਾਜਿਕਾਪਤ੍ਤਿ ਅਨ੍ਤਿਮਵਤ੍ਥੂਤਿ ਵੁਚ੍ਚਤਿ, ਤਦੇਵ ਪਠਮਂ ਚਤੁਨ੍ਨਂ ਪਾਰਾਜਿਕਾਨਂ ਆਦਿਮ੍ਹਿ ਦੇਸਿਤਤ੍ਤਾ ਪਠਮਨ੍ਤਿਮਵਤ੍ਥੁ, ਤਸ੍ਸ ਪਠਮਨ੍ਤਿਮਵਤ੍ਥੁਨੋ, ਪਠਮਪਾਰਾਜਿਕਸ੍ਸਾਤਿ ਵੁਤ੍ਤਂ ਹੋਤਿ.

੩੫. ਸਾਮਨ੍ਤਾ ਆਪਤ੍ਤਿਸਮੀਪੇ ਭਵਂ ਸਾਮਨ੍ਤਂ, ਪਾਰਾਜਿਕਾਪਤ੍ਤਿਯਾ ਸਮੀਪੇ ਪੁਬ੍ਬਭਾਗੇ ਭਵਨ੍ਤਿ ਅਤ੍ਥੋ. ਸੇਸਾਨਂ ਪਨ ਤਿਣ੍ਣਮ੍ਪੀਤਿ ਅਵਸੇਸਾਨਂ ਅਦਿਨ੍ਨਾਦਾਨਾਦੀਨਂ ਤਿਣ੍ਣਂ ਪਾਰਾਜਿਕਧਮ੍ਮਾਨਂ. ਥੁਲ੍ਲਚ੍ਚਯਂ ਸਾਮਨ੍ਤਮਿਤਿ ਉਦੀਰਿਤਨ੍ਤਿ ਸਮ੍ਬਨ੍ਧੋ. ਕਥਮੁਦੀਰਿਤਂ? ‘‘ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ (ਪਾਰਾ. ੯੪) ਦੁਤਿਯੇ, ‘‘ਮਨੁਸ੍ਸਂ ਉਦ੍ਦਿਸ੍ਸ ਓਪਾਤਂ ਖਣਤਿ, ਪਤਿਤ੍ਵਾ ਦੁਕ੍ਖਵੇਦਨਂ ਉਪ੍ਪਾਦੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ, ਤਤਿਯੇ, ‘‘ਪਟਿਵਿਜਾਨਨ੍ਤਸ੍ਸ ਆਪਤ੍ਤਿ ਪਾਰਾਜਿਕਸ੍ਸ, ਅਪ੍ਪਟਿਵਿਜਾਨਨ੍ਤਸ੍ਸ ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ (ਪਾਰਾ. ੨੧੫) ਚਤੁਤ੍ਥੇ ਸਮੁਦੀਰਿਤਂ.

ਏਤ੍ਥ ਚ ਚਤੁਤ੍ਥਪਾਰਾਜਿਕਸ੍ਸ ਥੁਲ੍ਲਚ੍ਚਯਾਪਤ੍ਤਿਯਾ ਸਾਮਨ੍ਤਾਪਤ੍ਤਿਭਾਵੋ ਯਸ੍ਸ ਉਤ੍ਤਰਿਮਨੁਸ੍ਸਧਮ੍ਮਂ ਸਮੁਲ੍ਲਪਤਿ, ਸੋ ਯਾਵ ਨ ਪਟਿਵਿਜਾਨਾਤਿ, ਤਾਵ ਸਮੁਲ੍ਲਪਨਪਚ੍ਚਯਾ ਥੁਲ੍ਲਚ੍ਚਯਾਪਤ੍ਤਿਸਮ੍ਭਾਵੇ, ਸਮੁਲ੍ਲਪਿਤੇ ਤਸ੍ਮਿਂ ਸਮੁਲ੍ਲਪਿਤਮਤ੍ਥੇ ਪਟਿਵਿਜਾਨਨ੍ਤੇ ਪਾਰਾਜਿਕਾਪਤ੍ਤਿਸਮ੍ਭਾਵੇ ਚ ਯੁਜ੍ਜਤਿ. ਸੋ ਚ ‘‘ਅਪ੍ਪਟਿਵਿਜਾਨਨ੍ਤਸ੍ਸ ਵੁਤ੍ਤੇ ਥੁਲ੍ਲਚ੍ਚਯ’’ਨ੍ਤਿ ਇਮਿਨਾਵ ਸਙ੍ਗਹਿਤੋਤਿ ਦਟ੍ਠਬ੍ਬਂ.

੩੬. ਅਜਾਨਨ੍ਤਸ੍ਸ ਵਾਤੂਪਤ੍ਥਦ੍ਧਂ ਅਙ੍ਗਜਾਤਂ ਦਿਸ੍ਵਾ ਅਤ੍ਤਨੋ ਰੁਚਿਯਾ ਵੀਤਿਕ੍ਕਮਂ ਕਤ੍ਵਾ ਮਾਤੁਗਾਮੇਸੁ ਗਚ੍ਛਨ੍ਤੇਸੁ ਅਜਾਨਮਾਨਸ੍ਸ, ਮਹਾਵਨੇ ਦਿਵਾ ਨਿਦ੍ਦੁਪਗਤਭਿਕ੍ਖੁਨੋ ਵਿਯ ਪਰੇਹਿ ਕਿਰਿਯਮਾਨਂ ਅਜਾਨਨ੍ਤਸ੍ਸਾਤਿ ਵੁਤ੍ਤਂ ਹੋਤਿ. ਤਥੇਵਾਤਿ ਇਮਿਨਾ ‘‘ਅਨਾਪਤ੍ਤੀਤਿ ਞਾਤਬ੍ਬ’’ਨ੍ਤਿ ਇਦਮਾਕਡ੍ਢਤਿ. ਅਸ੍ਸਾਦਿਯਨ੍ਤਸ੍ਸਾਤਿ ਭਿਕ੍ਖੁਪਚ੍ਚਤ੍ਥਿਕੇਸੁ ਅਭਿਭਵਿਤ੍ਵਾ ਵੀਤਿਕ੍ਕਮਂ ਕਰੋਨ੍ਤੇਸੁ ਚ ਕਾਰਾਪੇਨ੍ਤੇਸੁ ਚ, ਸਪ੍ਪਮੁਖਂ ਪਵਿਟ੍ਠਕਾਲੇ ਵਿਯ ਉਤ੍ਤਸਿਤ੍ਵਾ ਅਨਧਿਵਾਸੇਨ੍ਤਸ੍ਸ ਚ, ਮਹਾਵਨੇ ਦਿਵਾਵਿਹਾਰੋਪਗਤਭਿਕ੍ਖੁਨੋ ਵਿਯ ਪਰੋਪਕ੍ਕਮਂ ਞਤ੍ਵਾਪਿ ਕਾਯੇ ਆਦਿਤ੍ਤਅਗ੍ਗਿਨਾ ਵਿਯ ਉਤ੍ਤਸਿਤ੍ਵਾ ਅਨਧਿਵਾਸੇਨ੍ਤਸ੍ਸਾਤਿ ਅਤ੍ਥੋ. ‘‘ਅਜਾਨਨ੍ਤਸ੍ਸਾ’’ਤਿ ਏਤ੍ਥ ਅਪਿ-ਸਦ੍ਦੋ ਯੋਜੇਤਬ੍ਬੋ. ਬੁਦ੍ਧਸਾਸਨੇ ਖੀਰਸਾਗਰਸਲਿਲਨਿਮ੍ਮਲੇ ਸਬ੍ਬਪਠਮਂ ਪਾਤੁਭੂਤਤ੍ਤਾ ਆਦਿ ਚ ਤਂ ਵੀਤਿਕ੍ਕਮਸਙ੍ਖਾਤਂ ਕਮ੍ਮਞ੍ਚਾਤਿ ਆਦਿਕਮ੍ਮਂ, ਤਂ ਏਤਸ੍ਸ ਅਤ੍ਥੀਤਿ ਆਦਿਕਮ੍ਮੀ, ਏਤ੍ਥ ਸੁਦਿਨ੍ਨੋ ਭਿਕ੍ਖੁ, ਤਸ੍ਸ ਆਦਿਕਮ੍ਮਿਨੋਤਿ ਗਹੇਤਬ੍ਬੋ. ਉਪਰਿਪਿ ਇਮੇਸਂ ਪਦਾਨਂ ਆਗਤਾਗਤਟ੍ਠਾਨੇ ਇਮਿਨਾਵ ਨਯੇਨ ਅਤ੍ਥੋ ਵੇਦਿਤਬ੍ਬੋ. ਇਧ ਚ ਉਪਰਿ ਸਬ੍ਬਸਿਕ੍ਖਾਪਦੇਸੁ ਚ ਨਿਦਾਨਾਦਿਵਸੇਨ ਸਤ੍ਤਰਸਵਿਧੋ ਸਾਧਾਰਣਵਿਨਿਚ੍ਛਯੋ ਪਕਿਣ੍ਣਕੇ ਸਙ੍ਖੇਪਤੋ, ਉਤ੍ਤਰੇ ਵਿਤ੍ਥਾਰਤੋ ਚ ਆਵਿ ਭਵਿਸ੍ਸਤਿ. ਤਸ੍ਮਾ ਏਤ੍ਥ ਨ ਦਸ੍ਸਿਤੋਤਿ ਵੇਦਿਤਬ੍ਬਂ.

੩੭-੩੮. ਵਿਨਯੇਤਿ ਵਿਨਯਪਿਟਕੇ. ਅਨਯੂਪਰਮੇਤਿ ਨੇਤਿ ਪਾਪੇਤਿ ਸੀਲਸਮ੍ਪਦਂ ਸਮਾਧਿਸਮ੍ਪਦਂ ਪਞ੍ਞਾਸਮ੍ਪਦਞ੍ਚਾਤਿ ਨਯੋ, ਕਾਯਵਚੀਦ੍ਵਾਰੇਹਿ ਅਵੀਤਿਕ੍ਕਮਸਙ੍ਖਾਤੋ ਸਂਵਰੋ, ਤਪ੍ਪਟਿਪਕ੍ਖੋ ਅਸਂਵਰੋ ਅਨਯੋ ਨਾਮ, ਤਸ੍ਸ ਉਪਰਮੋ ਨਿਵਤ੍ਤਿ ਏਤ੍ਥਾਤਿ ਅਨਯੂਪਰਮੋ, ਵਿਨਯੋ, ਤਤ੍ਥ ਅਨਯੂਪਰਮੇ ਵਿਨਯੇ.

ਤਤੋ ਏਵ ਪਰਮੇ ਉਕ੍ਕਟ੍ਠੇ. ਅਨਯਸ੍ਸ ਵਾ ਉਪਰਮੇ ਨਿਵਤ੍ਤਨੇ ਪਰਮੇ ਉਕ੍ਕਟ੍ਠੇਤਿ ਗਹੇਤਬ੍ਬਂ. ਪਰਾ ਉਤ੍ਤਮਾ ਮਾ ਸਾਸਨਸਿਰੀ ਏਤ੍ਥਾਤਿ ਪਰਮੋ, ਵਿਨਯੋਤਿ ਏਵਮ੍ਪਿ ਗਹੇਤਬ੍ਬਂ. ‘‘ਵਿਨਯੋ ਨਾਮ ਸਾਸਨਸ੍ਸ ਆਯੂ’’ਤਿ (ਦੀ. ਨਿ. ਅਟ੍ਠ. ੧.ਪਠਮਸਙ੍ਗੀਤਿਕਥਾ; ਪਾਰਾ. ਅਟ੍ਠ. ੧.ਪਠਮਸਙ੍ਗੀਤਿਕਥਾ; ਖੁ. ਪਾ. ਅਟ੍ਠ. ੫.ਮਹਾਸਙ੍ਗੀਤਿਕਥਾ; ਥੇਰਗਾ. ਅਟ੍ਠ. ੧.੨੫੧) ਵਚਨਤੋ ਉਤ੍ਤਮਸਾਸਨਸਮ੍ਪਤ੍ਤਿਯੁਤ੍ਤੇਤਿ ਅਤ੍ਥੋ.

ਸੁਜਨਸ੍ਸਾਤਿ ਸੋਭਣੋ ਜਨੋ ਸੁਜਨੋ, ਸਿਕ੍ਖਾਕਾਮੋ ਅਧਿਸੀਲਸਿਕ੍ਖਾਯ ਸੋਭਮਾਨੋ ਪਿਯਸੀਲੋ ਕੁਲਪੁਤ੍ਤੋ, ਤਸ੍ਸ ਨਯਨੇ ਨਯਨੂਪਮੇ ਵਿਨਯੇਤਿ ਸਮ੍ਬਨ੍ਧੋ. ਅਨਯੂਪਰਮਤ੍ਤਾ, ਪਰਮਤ੍ਤਾ ਚ ਸੁਜਨਸ੍ਸ ਕੁਲਪੁਤ੍ਤਸ੍ਸ ਨਯਨੇ ਨਯਨੂਪਮੇ. ਸੁਖਾਨਯਨੇਤਿ ਲੋਕਿਯਲੋਕੁਤ੍ਤਰਭੇਦਂ ਸੁਖਂ ਆਨੇਤੀਤਿ ਸੁਖਾਨਯਨਂ, ਤਸ੍ਮਿਂ. ਇਦਞ੍ਚ ‘‘ਨਯਨੇ’’ਤਿ ਏਤਸ੍ਸ ਵਿਸੇਸਨਂ.

ਏਤਂ ਵਿਸੇਸਨਂ ਕਿਮਤ੍ਥਨ੍ਤਿ ਚੇ? ਉਪਮਾਭਾਵੇਨ ਗਹਿਤਪਕਤਿਨਯਨਤੋ ਇਧ ਸਮ੍ਭਵਨ੍ਤਂ ਵਿਸੇਸਂ ਦਸ੍ਸੇਤੁਨ੍ਤਿ ਵੇਦਿਤਬ੍ਬਂ. ਕਤਰੋ ਸੋ ਵਿਸੇਸੋਤਿ ਚੇ? ਪਕਤਿਨਯਨਂ ਰਾਗਦੋਸਾਦਿਕਿਲੇਸੂਪਨਿਸ੍ਸਯੋ ਹੁਤ੍ਵਾ ਦਿਟ੍ਠਧਮ੍ਮਿਕਸਮ੍ਪਰਾਯਿਕਦੁਕ੍ਖਸ੍ਸ ਚ ਪਚ੍ਚਯੋ ਹੋਤਿ. ਇਦਂ ਪਨ ਵਿਨਯਨਯਨਂ ਇਮਸ੍ਸ ਕੁਲਪੁਤ੍ਤਸ੍ਸ ਏਵਂ ਅਹੁਤ੍ਵਾ ਏਕਂਸੇਨ ਮੋਕ੍ਖਾਵਹਨਸੁਖਸ੍ਸੇਵ ਪਚ੍ਚਯੋ ਹੋਤੀਤਿ ਇਮਸ੍ਸ ਵਿਸੇਸਸ੍ਸ ਦਸ੍ਸਨਤ੍ਥਂ. ਯਥਾ ਵਿਨਯਮਵਿਰਾਧੇਤ੍ਵਾ ਪਟਿਪਜ੍ਜਨੇਨ ਸਿਜ੍ਝਨਕਸੀਲਸਂਵਰਮੂਲਕਅਵਿਪ੍ਪਟਿਸਾਰਾਦਿਅਨੁਪਾਦਿਸੇਸਪਰਿਨਿਬ੍ਬਾਨਾਵਸਾ- ਨਫਲਸਮ੍ਪਤ੍ਤਿਵਸੇਨ ਉਪ੍ਪਜ੍ਜਨਕਲੋਕਿਯਲੋਕੁਤ੍ਤਰਸੁਖਾਵਹਨੇ ਵਿਨਯੇਤਿ ਵੁਤ੍ਤਂ ਹੋਤਿ.

ਪਧਾਨਰਤੋਤਿ ਏਤ੍ਥ ‘‘ਅਪੀ’’ਤਿ ਪਾਠਸੇਸੋ. ਪਧਾਨੇ ਵਿਨਯਾਭਿਯੋਗੇ ਰਤੋਪਿ, ਵਿਨਯੇ ਅਜ੍ਝਾਯਨਸਵਨਚਿਨ੍ਤਨਾਦਿਵਸੇਨ ਵਾਯਮਨ੍ਤੋਪੀਤਿ ਅਤ੍ਥੋ. ਅਥ ਵਾ ‘‘ਵਿਰਾਗੋ ਸੇਟ੍ਠੋ ਧਮ੍ਮਾਨ’’ਨ੍ਤਿ (ਧ. ਪ. ੨੭੩; ਨੇਤ੍ਤਿ. ੧੭੦; ਕਥਾ. ੮੭੨) ਵਚਨਤੋ ਪਧਾਨਂ ਨਿਬ੍ਬਾਨਂ, ਤਸ੍ਮਿਂ ਰਤੋਤਿ ਅਤ੍ਥੋ. ਸਾਰਮਤੇਤਿ ‘‘ਸਾਰ’’ਨ੍ਤਿ ਅਧਿਮਤੇ. ਅਥ ਵਾ ਸਾਰਂ ਅਫੇਗ੍ਗੁਮਤਂ ਮਹਾਵਿਹਾਰਵਾਸੀਨਂ ਆਚਰਿਯਮਤਂ ਏਤ੍ਥਾਤਿ ‘‘ਸਾਰਮਤੋ’’ਤਿ ਵਿਨਯਵਿਨਿਚ੍ਛਯੋ ਵੁਤ੍ਤੋ, ਤਸ੍ਮਿਂ. ਇਧਾਤਿ ਇਮਸ੍ਮਿਂ ਵਿਨਯਵਿਨਿਚ੍ਛਯੇ. ਰਤੋਤਿ ਅਚ੍ਚਨ੍ਤਾਭਿਰਤੋ. ‘‘ਨ ਰਤੋ’’ਤਿ ਏਤ੍ਥ ਨ-ਕਾਰਂ ‘‘ਰਮਤੇ’’ਤਿ ਓਸਾਨਪਦੇਨ ਯੋਜੇਤ੍ਵਾ ਯੋ ਪਨ ਨ ਰਮਤੇਤਿ ਸਮ੍ਬਨ੍ਧੋ.

ਥੇਰਨਵਮਜ੍ਝਿਮਭਿਕ੍ਖੁਭਿਕ੍ਖੁਨੀਨਂ ਅਨ੍ਤਰੇ ਯੋ ਪਨ ਪੁਗ੍ਗਲੋ ਨਿਚ੍ਚਪਰਿਵਤ੍ਤਨਸਵਨਾਨੁਸ੍ਸਰਣਚਿਨ੍ਤਨਵਸੇਨ ਨ ਰਮਤੇ ਨ ਕੀਲ਼ਤਿ, ਸੋ ਪੁਗ੍ਗਲੋ ਵਿਨਯੇ ਪਧਾਨਰਤੋਪਿ ਵਿਨਯਪਿਟਕੇ ਅਜ੍ਝਯਨਸਵਨਾਦਿਵਸੇਨ ਯੁਤ੍ਤਪਯੁਤ੍ਤੋਪਿ ਪਟੁ ਹੋਤਿ ਕਿਂ, ਨ ਹੋਤੇਵਾਤਿ ਦਸ੍ਸੇਤਿ. ਵਿਨਯਪਿਟਕੇ ਪਾਟਵਮਾਕਙ੍ਖਨ੍ਤੇਹਿ ਪਠਮਂ ਤਾਵੇਤ੍ਥ ਸਕ੍ਕਚ੍ਚਂ ਅਭਿਯੋਗੋ ਕਾਤਬ੍ਬੋਤਿ ਅਧਿਪ੍ਪਾਯੋ.

ਇਮਮੇਵਤ੍ਥਂ ਆਨਿਸਂਸਪਾਰਂਪਰਿਯਪਯੋਜਨੇਨ ਸਹ ਦਸ੍ਸੇਤੁਮਾਹ ‘‘ਇਮ’’ਨ੍ਤਿਆਦਿ. ਇਮਨ੍ਤਿ ਵੁਚ੍ਚਮਾਨਂ ਵਿਨਯਵਿਨਿਚ੍ਛਯਂ, ‘‘ਅਵੇਦੀ’’ਤਿ ਇਮਿਨਾ ਸਮ੍ਬਨ੍ਧੋ. ‘‘ਯੋ’’ਤਿ ਪਾਠਸੇਸੋ. ਯੋ ਕੁਲਪੁਤ੍ਤੋ ਸਤਿਸਮ੍ਪਜਞ੍ਞਸਦ੍ਧਾਸਮ੍ਪਨ੍ਨੋ ਇਮਂ ਵਿਨਯਵਿਨਿਚ੍ਛਯਂ ਸਮ੍ਮਾ ਅਵੇਦਿ ਅਞ੍ਞਾਸਿ. ਕਿਂ ਭੂਤਨ੍ਤਿ ਆਹ ‘‘ਹਿਤਵਿਭਾਵਨ’’ਨ੍ਤਿ. ਲੋਕਿਯਲੋਕੁਤ੍ਤਰਸਮ੍ਪਤ੍ਤਿਯਾ ਮੂਲਸਾਧਨਤ੍ਤਾ ਸੀਲਮਿਧ ਹਿਤਂ ਨਾਮ, ਤਂ ਵਿਭਾਵੇਤਿ ਪਕਾਸੇਤੀਤਿ ਹਿਤਵਿਭਾਵਨੋਤਿ ਵਿਗ੍ਗਹੋ. ‘‘ਸੀਲੇ ਪਤਿਟ੍ਠਾਯ…ਪੇ… ਵਿਜਟਯੇ ਜਟ’’ਨ੍ਤਿ (ਸਂ. ਨਿ. ੧.੨੩, ੧੯੨; ਮਿ. ਪ. ੨.੧.੯) ਵੁਤ੍ਤਤ੍ਤਾ ਸਬ੍ਬਕਿਲੇਸਜਟਾਵਿਜਟਨਲੋਕੁਤ੍ਤਰਞਾਣਸ੍ਸ ਪਦਟ੍ਠਾਨਸੋਪਚਾਰਸਾਭਿਞ੍ਞਾਰੂਪਾਰੂਪਅਟ੍ਠਸਮਾਧੀਨਂ ਪਦਟ੍ਠਾਨਤਾਯ ਸਬ੍ਬਲੋਕਿਯਲੋਕੁਤ੍ਤਰਗੁਣਸਮ੍ਪਦਾਨਂ ਮੂਲਭੂਤੇਸੁ ਚਤੁਪਾਰਿਸੁਦ੍ਧਿਸੀਲੇਸੁ ਪਧਾਨਂ ਪਾਤਿਮੋਕ੍ਖਸਂਵਰਸੀਲਂ, ਤਪ੍ਪਕਾਸਕਤ੍ਤਾ ਅਯਂ ਵਿਨਯਵਿਨਿਚ੍ਛਯੋ ‘‘ਹਿਤਵਿਭਾਵਨੋ’’ਤਿ ਵੁਤ੍ਤੋ.

ਭਾਵਨਨ੍ਤਿ ਭਾਵੀਯਤਿ ਪੁਨਪ੍ਪੁਨਂ ਚੇਤਸਿ ਨਿਵੇਸੀਯਤੀਤਿ ਭਾਵਨੋ, ਭਾਵਨੀਯੋਤਿ ਵੁਤ੍ਤਂ ਹੋਤਿ. ਹਿਤਵਿਭਾਵਕਤ੍ਤਾਯੇਵ ਹਿਤਤ੍ਥੀਹਿ ਪੁਨਪ੍ਪੁਨਂ ਚਿਤ੍ਤੇ ਵਾਸੇਤਬ੍ਬੋਤਿ ਵੁਤ੍ਤਂ ਹੋਤਿ, ਤਂ ਏਵਂਵਿਧਂ ਵਿਨਯਵਿਨਿਚ੍ਛਯਂ. ਸੁਰਸਮ੍ਭਵਨ੍ਤਿ ਰਸੀਯਤਿ ਅਸ੍ਸਾਦੀਯਤੀਤਿ ਰਸੋ, ਸਦ੍ਦਰਸੋ ਅਤ੍ਥਰਸੋ ਕਰੁਣਾਦਿਰਸੋ ਵਿਮੁਤ੍ਤਿਰਸੋ ਚ, ਸੋਭਣੋ ਰਸੋ ਏਤਸ੍ਸਾਤਿ ਸੁਰਸੋ, ਵਿਨਯਵਿਨਿਚ੍ਛਯੋ, ਤਂ ਸੁਰਸਂ. ਭਵਂ ਭਵਨ੍ਤਂ, ਸਨ੍ਤਨ੍ਤਿ ਵੁਤ੍ਤਂ ਹੋਤਿ, ਸੁਰਸਂ ਸਮਾਨਂ, ਸੁਰਸਂ ਭੂਤਨ੍ਤਿ ਅਤ੍ਥੋ. ਕਿਂ ਵੁਤ੍ਤਂ ਹੋਤਿ? ‘‘ਸਿਲੇਸੋ ਪਸਾਦੋ ਸਮਤਾ ਮਧੁਰਤਾ ਸੁਖੁਮਾਲਤਾ ਅਤ੍ਥਬ੍ਯਤ੍ਤਿ ਉਦਾਰਤਾ ਓਜੋ ਕਨ੍ਤਿ ਸਮਾਧੀ’’ਤਿ ਏਵਂ ਵੁਤ੍ਤੇਹਿ ਕਵਿਜਨੇਹਿ ਅਸ੍ਸਾਦੇਤਬ੍ਬਸਿਲੇਸਾਦਿਦਸਵਿਧਸਦ੍ਦਜੀਵਿਤਗੁਣਸਙ੍ਖਾਤਸਦ੍ਦਰਸਸਮ੍ਪਤ੍ਤੀਹਿ ਚ ਸਭਾਵਾਖ੍ਯਾਨਂ ਉਪਮਾ ਰੂਪਕਂ ਦੀਪਕਂ ਆਵੁਤ੍ਤੀਤਿ ਏਵਮਾਦਿਕ੍ਕਮਨਿਦ੍ਦਿਟ੍ਠਪਞ੍ਚਤਿਂਸਅਤ੍ਥਾਲਙ੍ਕਾਰੇਸੁ ਅਨੁਰੂਪਸਭਾਵਾਖ੍ਯਾਨਾਦਿਪ੍ਪਧਾਨਅਤ੍ਥਾਲਙ੍ਕਾਰਸਙ੍ਖਾਤਅਤ੍ਥਰਸਸਮ੍ਪਤ੍ਤੀਹਿ ਚ ਯਥਾਸਮ੍ਭਵਂ ਪਕਾਸਿਤਬ੍ਬਕਰੁਣਾਰਸਅਬ੍ਭੁਤਰਸਸਨ੍ਤਰਸਾਦੀਹਿ ਚ ਯੁਤ੍ਤਤ੍ਤਾ ਸੁਰਸਂ ਇਮਂ ਵਿਨਯਵਿਨਿਚ੍ਛਯਨ੍ਤਿ ਵੁਤ੍ਤਂ ਹੋਤਿ.

ਅਥ ਵਾ ਇਮਿਨਾ ਪਕਰਣੇਨ ਪਧਾਨਤੋ ਵਿਧੀਯਮਾਨਪਾਤਿਮੋਕ੍ਖਸਂਵਰਸੀਲਸ੍ਸ ਏਕਨ੍ਤੇਨ ਸਮਾਧਿਸਂਵਤ੍ਤਨਿਕਤ੍ਤਾ ਸਮਾਧਿਸ੍ਸ ਚ ਪਞ੍ਞਾਯ ਪਦਟ੍ਠਾਨਤ੍ਤਾ ਪਞ੍ਞਾਯ ਚ ਨਿਬ੍ਬਾਨਪਾਪਨਤੋ ਮੂਲਕਾਰਣਂ ਹੁਤ੍ਵਾ ਕਮੇਨ ਨਿਬ੍ਬਾਨਾਮਤਫਲਰਸਸਮ੍ਪਦਾਯਕਂ ਇਮਂ ਵਿਨਯਵਿਨਿਚ੍ਛਯਂ ਪਰਮਸ੍ਸਾਦਨੀਯਰੂਪੇਨ ਧਿਤਿਵਿਮੁਤ੍ਤਿਰਸੇਨ ਸੁਰਸਭੂਤਨ੍ਤਿ ਵੁਤ੍ਤਂ ਹੋਤੀਤਿ ਚ ਵੇਦਿਤਬ੍ਬਂ. ਸਮ੍ਭਵਨ੍ਤਿ ਏਤ੍ਥ ਸਂ ਵੁਚ੍ਚਤਿ ਸੁਖਂ ਕਾਯਿਕਂ ਚੇਤਸਿਕਞ੍ਚ, ਤਂ ਭਵਤਿ ਏਤਸ੍ਮਾਤਿ ਸਮ੍ਭਵੋ, ਵਿਨਯਵਿਨਿਚ੍ਛਯੋ, ਤਂ, ਕਾਯਚਿਤ੍ਤਸੁਖਾਨਂ ਮੂਲਕਾਰਣਭੂਤਂ, ਵੁਤ੍ਤਨਯੇਨ ਸੁਰਸਤ੍ਤਾ ਚ ਯਥਾਵੁਤ੍ਤਰਸਸਮ੍ਪਦਸਾਰਮਹੁਸ੍ਸਵੇਨ ਸਮ੍ਭੂਤਮਾਨਸਿਕਸੁਖਸ੍ਸ, ਤਂਸਮੁਟ੍ਠਾਨਰੂਪਨਿਸ੍ਸਯਕਾਯਿਕਸੁਖਸ੍ਸ ਚ ਪਭਵਭੂਤਨ੍ਤਿ ਅਤ੍ਥੋ. ਏਤ੍ਤਾਵਤਾ ਇਮਸ੍ਸ ਵਿਨਯਵਿਨਿਚ੍ਛਯਸ੍ਸ ਸਮ੍ਮਾ ਵਿਞ੍ਞਾਤਬ੍ਬਤਾਯ ਕਾਰਣਂ ਦਸ੍ਸਿਤਂ ਹੋਤਿ.

ਏਵਂ ਨਾਨਾਗੁਣਰਤਨਾਕਰਂ ਇਮਂ ਵਿਨਯਵਿਨਿਚ੍ਛਯਂ ਸਮ੍ਪਜਾਨਨ੍ਤੋ ਸੋ ਕੁਲਪੁਤ੍ਤੋ ਕਿਂ ਹੋਤੀਤਿ ਚੇ? ਪਾਲਿਨਾ ਉਪਾਲਿਨਾ ਸਮੋ ਭਵਤਿ. ਪਾਲਿਨਾਤਿ ਸਾਸਨਂ ਪਾਲੇਤੀਤਿ ‘‘ਪਾਲੋ’’ਤਿ ਵਿਨਯੋ ਵੁਚ੍ਚਤਿ, ਵੁਤ੍ਤਞ੍ਹਿ ‘‘ਵਿਨਯੋ ਨਾਮ ਸਾਸਨਸ੍ਸ ਆਯੂ’’ਤਿ (ਦੀ. ਨਿ. ਅਟ੍ਠ. ੧.ਪਠਮਸਙ੍ਗੀਤਿਕਥਾ; ਪਾਰਾ. ਅਟ੍ਠ. ੧.ਪਠਮਸਙ੍ਗੀਤਿਕਥਾ; ਖੁ. ਪਾ. ਅਟ੍ਠ. ੫.ਮਹਾਸਙ੍ਗੀਤਿਕਥਾ; ਥੇਰਗਾ. ਅਟ੍ਠ. ੧.੨੫੧) ਸੋ ਅਸ੍ਸ ਅਤ੍ਥੀਤਿ ਪਾਲੀ, ਪਰਿਯਤ੍ਤਿਪਟਿਪਤ੍ਤਿਪਟਿਵੇਧਵਸੇਨ ਤਿਵਿਧਸਾਸਨਸ੍ਸ ਜੀਵਿਤਭੂਤਵਿਨਯਪਞ੍ਞਤ੍ਤਿਸਙ੍ਖਾਤਸਾਸਨਧਰਤ੍ਤਾ ‘‘ਪਾਲੀ’’ਤਿ ਲਦ੍ਧਨਾਮੇਨ ਉਪਾਲਿਨਾ, ‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਕਾਨਂ ਭਿਕ੍ਖੂਨਂ ਵਿਨਯਧਰਾਨਂ ਯਦਿਦਂ ਉਪਾਲੀ’’ਤਿ (ਅ. ਨਿ. ੧.੨੧੯, ੨੨੮) ਚਤੁਪਰਿਸਮਜ੍ਝੇ ਨਿਸਿਨ੍ਨੇਨ ਸਦ੍ਧਮ੍ਮਵਰਚਕ੍ਕਵਤ੍ਤਿਨਾ ਸਮ੍ਮਾਸਮ੍ਬੁਦ੍ਧੇਨ ਮੁਖਪਦੁਮਂ ਵਿਕਾਸੇਤ੍ਵਾ ਪਕਾਸਿਤਏਤਦਗ੍ਗਟ੍ਠਾਨੇਨ ਵਿਸੇਸਤੋ ਸਾਯਨਰਕ੍ਖਨਕਭਾਵੇਨ ਪਟਿਲਦ੍ਧਪਾਲੀਤਿਨਾਮਧੇਯ੍ਯੇਨ ਉਪਾਲਿਮਹਾਥੇਰੇਨ ਸਮੋ ਹੋਤੀਤਿ ਵੁਤ੍ਤਂ ਹੋਤਿ.

ਕਸ੍ਮਿਂ ਵਿਸਯੇ ਸਮੋ ਭਵਤੀਤਿ ਚੇ? ਸਾਸਨੇ. ਸਾਸਨੇਤਿ ਯਥਾਵੁਤ੍ਤੇ ਤਿਵਿਧੇ ਸਾਸਨੇ, ਤਤ੍ਰਾਪਿ ਥਾਵਰਜਙ੍ਗਮਸਕਲਵਤ੍ਥੁਵਿਤ੍ਥਾਰਾਧਰਮਣ੍ਡਲਸਦਿਸੇ ਪਟਿਪਤ੍ਤਿਪਟਿਵੇਧਦ੍ਵਯਧਾਰੇ ਪਰਿਯਤ੍ਤਿਸਾਸਨੇ, ਤਤ੍ਥਾਪਿ ਵਿਨਯਕਥਾਧਿਕਾਰਤ੍ਤਾ ਲਬ੍ਭਮਾਨੇ ਵਿਨਯਪਿਟਕਸਙ੍ਖਾਤਪਰਿਯਤ੍ਤਿਸਾਸਨੇਕਦੇਸੇ ਸਮੋ ਭਵਤੀਤਿ ਅਤ੍ਥੋ.

ਕਿਂਭੂਤੇ ਸਾਸਨੇ? ਮਾਰਬਲਿਸਾਸਨੇ. ਮਾਰਸ੍ਸ ਬਲਿ ਮਾਰਬਲਿ, ਮਾਰਗੋਚਰੋ, ਤਸ੍ਸ ਸਾਸਨਂ ਹਿਂਸਕਂ ਮਾਰਬਲਿਸਾਸਨਂ, ਤਸ੍ਮਿਂ. ਖਨ੍ਧਾਦੀਸੁ ਪਞ੍ਚਸੁ ਮਾਰੇਸੁ ਪਧਾਨਭੂਤਕਾਮਰਾਗਾਦਿਪਭਵਕਿਲੇਸਮਾਰਸ੍ਸ ਗੋਚਰਭਾਵੇਨ ਬਲਿਸਙ੍ਖਾਤਇਤ੍ਥਿਸਰੀਰਾਦਿਨਿਸ੍ਸਯਫੋਟ੍ਠਬ੍ਬਾਦਿਵਿਸਯਸ੍ਸ ਪਰਿਚ੍ਚਜਾਪਨਤ੍ਥਂ ‘‘ਯੋ ਪਨ ਭਿਕ੍ਖੁ…ਪੇ… ਅਸਂਵਾਸੋ’’ਤਿਆਦਿਨਾ (ਪਾਰਾ. ੪੪) ਨਯੇਨ ਵੁਤ੍ਤਤ੍ਤਾ ਤਸ੍ਸ ਮਾਰਬਲਿਸ੍ਸ ਹਿਂਸਕਂ ਹੋਤੀਤਿ ਮਾਰਬਲਿਸਾਸਨਨਾਮਧੇਯ੍ਯਵਿਨਯਪਞ੍ਞਤ੍ਤਿਸਙ੍ਖਾਤਸਾਸਨੇਤਿ ਅਤ੍ਥੋ.

ਅਥ ਵਾ ‘‘ਬਲ਼ਿਸੇਨਪਿ ਜਾਲੇਨ, ਹਤ੍ਥੇਨ ਕੁਮਿਨੇਨ ਵਾ’’ਤਿ ਉਦਕਟ੍ਠਕਥਾਯ ਵਕ੍ਖਮਾਨਤ੍ਤਾ ਬਲ਼ਿਸ-ਸਦ੍ਦੇਨ ਮਚ੍ਛਮਾਰਣਕਣ੍ਟਕਮਾਹ, ਤਂ ਮਾਰਸ੍ਸ ਬਲ਼ਿਸਂ ਅਸਤਿ ਖਿਪਤਿ ਵਜ੍ਜੇਤੀਤਿ ਮਾਰਬਲ਼ਿਸਾਸਨਂ, ਤਸ੍ਮਿਂ, ‘‘ਸਮਨ੍ਤਪਾਸੋ ਮਾਰਸ੍ਸਾ’’ਤਿ ਵੁਤ੍ਤਤ੍ਤਾ ਸਂਸਾਰਸਾਗਰੇ ਪਰਿਵਤ੍ਤਮਾਨਕਸਂਕਿਲੇਸਦਾਸਪੁਥੁਜ੍ਜਨਸਙ੍ਖਾਤਮਚ੍ਛੇ ਗਣ੍ਹਿਤੁਂ ਮਾਰਮਹਾਕੇਵਟ੍ਟੇਨ ਪਕ੍ਖਿਤ੍ਤਬਲ਼ਿਸਸਙ੍ਖਾਤਇਤ੍ਥਿਰੂਪਸਦ੍ਦਾਦਿਪਞ੍ਚਕਾਮਗੁਣਾ- ਮਿਸਾਵੁਤਕਾਮਰਾਗਾਦਿਕਿਲੇਸਮਹਾਬਲ਼ਿਸਂ ਤਦਙ੍ਗਪ੍ਪਹਾਨਵੀਤਿਕ੍ਕਮਪ੍ਪਹਾਨਾਦਿਵਸੇਨ ਪਜਹਨ੍ਤੇ ਵਿਨਯਪਞ੍ਞਤ੍ਤਿਸਙ੍ਖਾਤੇ ਸਾਸਨੇਤਿ ਅਧਿਪ੍ਪਾਯੋ.

ਏਤ੍ਥ ਚ ਸਾਰਮਤੇ ਇਧ ਇਮਸ੍ਮਿਂ ਵਿਨਯਵਿਨਿਚ੍ਛਯੇ ਯੋ ਪਨ ਨ ਰਮਤੇ, ਸੋ ਪੁਗ੍ਗਲੋ ਅਨਯੂਪਰਮੇ ਤਤੋ ਏਵ ਪਰਮੇ ਉਤ੍ਤਮੇ ਸੁਜਨਸ੍ਸ ਸੁਖਾਨਯਨੇ ਨਯਨੇ ਨਯਨੁਪਮੇ ਵਿਨਯੇ ਰਤੋ ਅਭਿਰਤੋ ਪਧਾਨਰਤੋਪਿ ਵਿਨਯੇ ਅਜ੍ਝਾਯਨਾਦੀਸੁ ਯੋਗਮਾਪਜ੍ਜਨ੍ਤੋਪਿ ਪਟੁ ਹੋਤਿ ਪਟੁਤਰੋ ਹੋਤਿ ਕਿਂ, ਨ ਹੋਤੇਵ. ਤਸ੍ਮਾ ਵਿਨਯੇ ਪਾਟਵਤ੍ਥਿਨਾ ਏਤ੍ਥੇਵ ਸਕ੍ਕਚ੍ਚਾਭਿਯੋਗੋ ਕਾਤਬ੍ਬੋਤਿ ਸਙ੍ਖੇਪਤੋ ਸਾਧਿਪ੍ਪਾਯਾ ਅਤ੍ਥਯੋਜਨਾ ਵੇਦਿਤਬ੍ਬਾ. ਅਥ ਵਾ ਪਧਾਨੇ ਚਤੁਬ੍ਬਿਧੇ ਸਮ੍ਮਪ੍ਪਧਾਨੇ ਵੀਰਿਯੇ ਰਤੋ ਅਭਿਰਤੋ ਯੋ ਪਨ ਨਰੋ ਸਾਰਮਤੇ ਇਧ ਇਮਸ੍ਮਿਂ ਵਿਨਯਵਿਨਿਚ੍ਛਯੇ ਯਤੋ ਰਮਤੇ, ਅਤੋ ਤਸ੍ਮਾ ਸੋ ਅਨਯੂਪਰਮੇ ਸੁਜਨਸ੍ਸ ਸੁਖਾਨਯਨੇ ਵਿਨਯੇ ਪਟੁ ਹੋਤਿ ਕੁਸਲੋ ਹੋਤੀਤਿ ਯੋਜਨਾਤਿ ਨੋ ਖਨ੍ਤਿ.

ਹਿਤਵਿਭਾਵਨਂ ਹਿਤਪ੍ਪਕਾਸਕਂ ਭਾਵਨਂ ਭਾਵਨੀਯਂ ਆਸੇਵਿਤਬ੍ਬਂ ਸੁਰਸਮ੍ਭਵਂ ਸੁਰਸਂ ਸਮਾਨਂ ਸੁਰਸਂ ਭੂਤਂ ਸਮ੍ਭਵਂ ਸੁਖਹੇਤੁਕਂ ਇਮਂ ਵਿਨਯਵਿਨਿਚ੍ਛਯਂ ਯੋ ਅਵੇਦਿ ਅਞ੍ਞਾਸਿ, ਸੋ ਪੁਗ੍ਗਲੋ ਮਾਰਬਲ਼ਿਸਾਸਨੇ ਮਾਰਵਿਸਯਪ੍ਪਹਾਨਕਰੇ, ਅਥ ਵਾ ਮਾਰਬਲ਼ਿਸਸ੍ਸ ਮਾਰਸ੍ਸ ਵਤ੍ਥੁਕਾਮਾਮਿਸਾਵੁਤਕਿਲੇਸਕਾਮਬਲ਼ਿਸਸ੍ਸ ਅਸਨੇ ਵਜ੍ਜਮਾਨੇ ਸਾਸਨੇ ਤਿਵਿਧੇਪਿ ਜਿਨਸਾਸਨੇ, ਤਤ੍ਥਾਪਿ ਪਟਿਪਤ੍ਤਿਪਟਿਵੇਧਾਨਂ ਪਤਿਟ੍ਠਾਨਭੂਤੇ ਪਰਿਯਤ੍ਤਿਸਾਸਨੇ, ਤਤ੍ਰਾਪਿ ਸਕਲਸਾਸਨਸ੍ਸ ਜੀਵਿਤਸਮਾਨੇ ਵਿਨਯਪਞ੍ਞਤ੍ਤਿਸਙ੍ਖਾਤਪਰਿਯਤ੍ਤਿਸਾਸਨੇਕਦੇਸੇ ਪਾਲਿਨਾ ਵਿਨਯਪਰਿਯਤ੍ਤਿਯਂ ਏਤਦਗ੍ਗੇ ਠਪਨੇਨ ਸਾਸਨਪਾਲਨੇ ਤਂਮੂਲਭਾਵਤੋ ਪਾਲਸਙ੍ਖਾਤਵਿਨਯਪਰਿਯਤ੍ਤਿਯਾ ਪਸਤ੍ਥਤਰੇਨ ਉਪਾਲਿਨਾ ਉਪਾਲਿਮਹਾਥੇਰੇਨ ਸਮੋ ਭਵਤੀਤਿ ਯੋਜਨਾ.

ਇਤਿ ਵਿਨਯਤ੍ਥਸਾਰਸਨ੍ਦੀਪਨਿਯਾ

ਵਿਨਯਵਿਨਿਚ੍ਛਯਵਣ੍ਣਨਾਯ

ਪਠਮਪਾਰਾਜਿਕਕਥਾਵਣ੍ਣਨਾ ਨਿਟ੍ਠਿਤਾ.

ਦੁਤਿਯਪਾਰਾਜਿਕਕਥਾਵਣ੍ਣਨਾ

੩੯. ਇਦਾਨਿ ਦੁਤਿਯਂ ਪਾਰਾਜਿਕਵਿਨਿਚ੍ਛਯਂ ਦਸ੍ਸੇਤੁਮਾਹ ‘‘ਆਦਿਯਨ੍ਤੋ’’ਤਿਆਦਿ. ਤਤ੍ਥ ‘‘ਥੇਯ੍ਯਚਿਤ੍ਤੇਨਾ’’ਤਿ ਪਾਠਸੇਸੋ. ਸੋ ਚ ਪਚ੍ਚਤ੍ਤੇਕਵਚਨਨ੍ਤੇਹਿ ਸਬ੍ਬਪਦੇਹਿ ਯੋਜੇਤਬ੍ਬੋ, ਥੇਯ੍ਯਚਿਤ੍ਤੇਨ ਆਦਿਯਨ੍ਤੋ ਪਰਾਜਿਤੋਤਿ ਸਮ੍ਬਨ੍ਧੋ. ਪਰਸਨ੍ਤਕਂ ਆਰਾਮਾਦਿਂ ਅਭਿਯੁਞ੍ਜਿਤ੍ਵਾ ਸਾਮਿਕਂ ਪਰਾਜੇਤ੍ਵਾ ਥੇਯ੍ਯਚਿਤ੍ਤੇਨ ਗਣ੍ਹਨ੍ਤੋ ਤਦਤ੍ਥਾਯ ਕਤੇ ਪੁਬ੍ਬਪਯੋਗੇ ਦੁਕ੍ਕਟਂ, ਸਾਮਿਕਸ੍ਸ ਵਿਮਤੁਪ੍ਪਾਦਨੇ ਥੁਲ੍ਲਚ੍ਚਯਞ੍ਚ ਆਪਜ੍ਜਿਤ੍ਵਾ ਤਸ੍ਸ ਚ ਅਤ੍ਤਨੋ ਚ ਧੁਰਨਿਕ੍ਖੇਪੇਨ ਪਾਤਿਮੋਕ੍ਖਸਂਵਰਸੀਲਸਮ੍ਪਤ੍ਤਿਯਾ ਅਦਾਯਾਦੋ ਹੁਤ੍ਵਾ ਪਰਾਜਿਤੋ ਹੋਤੀਤਿ ਵੁਤ੍ਤਂ ਹੋਤਿ.

‘‘ਤਥਾ’’ਤਿ ਚ ‘‘ਅਪੀ’’ਤਿ ਚ ‘‘ਪਰਾਜਿਤੋ’’ਤਿ ਚ ‘‘ਥੇਯ੍ਯਚਿਤ੍ਤੇਨਾ’’ਤਿ ਇਮਿਨਾ ਸਹ ਏਕਤੋ ਕਤ੍ਵਾ ‘‘ਹਰਨ੍ਤੋ’’ਤਿਆਦੀਹਿ ਚਤੂਹਿਪਿ ਪਦੇਹਿ ਯੋਜੇਤਬ੍ਬਂ. ਥੇਯ੍ਯਚਿਤ੍ਤੇਨ ਹਰਨ੍ਤੋਪਿ ਤਥਾ ਪਰਾਜਿਤੋਤਿ ਯੋਜਨਾ ਸੀਸਾਦੀਹਿ ਪਰਸਨ੍ਤਕਂ ਭਣ੍ਡਂ ਹਰਨ੍ਤੋ ਥੇਯ੍ਯਚਿਤ੍ਤੇਨ ਭਣ੍ਡਸ੍ਸ ਆਮਸਨੇ ਦੁਕ੍ਕਟਞ੍ਚ ਫਨ੍ਦਾਪਨੇ ਥੁਲ੍ਲਚ੍ਚਯਞ੍ਚ ਆਪਜ੍ਜਿਤ੍ਵਾ ਸੀਸਤੋ ਖਨ੍ਧੋਹਰਣਾਦਿਪਯੋਗਂ ਕਰੋਨ੍ਤੋਪਿ ਤਥਾ ਪਰਾਜਿਤੋ ਹੋਤੀਤਿ ਅਤ੍ਥੋ.

ਥੇਯ੍ਯਚਿਤ੍ਤੇਨ ਅਵਹਰਨ੍ਤੋਪਿ ਤਥਾ ਪਰਾਜਿਤੋਤਿ ਯੋਜਨਾ. ਅਯਂ ਪਨੇਤ੍ਥ ਅਤ੍ਥੋ – ਅਞ੍ਞੇਹਿ ਸਙ੍ਗੋਪਨਾਦਿਂ ਸਨ੍ਧਾਯ ਅਤ੍ਤਨਿ ਉਪਨਿਕ੍ਖਿਤ੍ਤਭਣ੍ਡਂ ‘‘ਦੇਹਿ ਮੇ ਭਣ੍ਡ’’ਨ੍ਤਿ ਚੋਦਿਯਮਾਨੋ ‘‘ਨ ਮਯਾ ਗਹਿਤ’’ਨ੍ਤਿਆਦਿਨਾ ਮੁਸਾ ਵਤ੍ਵਾ ਥੇਯ੍ਯਚਿਤ੍ਤੇਨ ਗਣ੍ਹਨ੍ਤੋਪਿ ਤਸ੍ਸ ਵਿਮਤੁਪ੍ਪਾਦਨੇ ਥੁਲ੍ਲਚ੍ਚਯਮਾਪਜ੍ਜਿਤ੍ਵਾ ਤਥੇਵ ਧੁਰਨਿਕ੍ਖੇਪੇਨ ਪਰਾਜਿਤੋ ਹੋਤੀਤਿ. ‘‘ਨਾਹਂ ਅਗ੍ਗਹੇਸਿ’’ਨ੍ਤਿਆਦਿਨਾ ਅਵਜਾਨਿਤ੍ਵਾ ਪਟਿਕ੍ਖਿਪਿਤ੍ਵਾ ਹਰਨ੍ਤੋ ‘‘ਅਵਹਰਨ੍ਤੋ’’ਤਿ ਵੁਤ੍ਤੋ.

ਥੇਯ੍ਯਚਿਤ੍ਤੇਨ ਇਰਿਯਾਪਥਂ ਵਿਕੋਪੇਨ੍ਤੋਪਿ ਤਥਾ ਪਰਾਜਿਤੋਤਿ ਯੋਜਨਾ. ਯਂ ਪਨ ਅਞ੍ਞੇਸਂ ਭਣ੍ਡਹਰਣਕਮਨੁਸ੍ਸਾਦੀਨਮਞ੍ਞਤਰਂ ‘‘ਤੇਨ ਭਣ੍ਡੇਨ ਸਹ ਗਣ੍ਹਾਮੀ’’ਤਿ ਭਣ੍ਡਂ ਹਰਨ੍ਤਂ ਥੇਯ੍ਯਚਿਤ੍ਤੇਨ ਨਿਵਾਰੇਤ੍ਵਾ ਅਤ੍ਤਨਾ ਇਚ੍ਛਿਤਦਿਸਾਭਿਮੁਖਂ ਕਤ੍ਵਾ ਤਸ੍ਸ ਪਕਤਿਇਰਿਯਾਪਥਂ ਵਿਕੋਪੇਨ੍ਤੋਪਿ ਪਠਮਪਾਦੁਦ੍ਧਾਰੇਨ ਥੁਲ੍ਲਚ੍ਚਯਮਾਪਜ੍ਜਿਤ੍ਵਾ ਦੁਤਿਯਪਦਵਾਰਾਤਿਕ੍ਕਮੇਨ ਤਥੇਵ ਪਰਾਜਿਤੋ ਹੋਤੀਤਿ ਅਤ੍ਥੋ.

ਥੇਯ੍ਯਚਿਤ੍ਤੇਨ ਠਾਨਾ ਚਾਵੇਨ੍ਤੋਪਿ ਤਥਾ ਪਰਾਜਿਤੋਤਿ ਯੋਜਨਾ. ਥਲਾਦੀਸੁ ਠਿਤਂ ਭਣ੍ਡਂ ਥੇਯ੍ਯਚਿਤ੍ਤੇਨ ਅਵਹਰਿਤੁਕਾਮਤਾਯ ਠਿਤਟ੍ਠਾਨਤੋ ਅਪਨੇਨ੍ਤੋਪਿ ਦੁਤਿਯਪਰਿਯੇਸਨਾਦੀਸੁ ਆਮਸਨਾਵਸਾਨੇਸੁ ਸਬ੍ਬੇਸੁਪਿ ਪਯੋਗੇਸੁ ਦੁਕ੍ਕਟਾਨਿ ਚ ਫਨ੍ਦਾਪਨੇ ਥੁਲ੍ਲਚ੍ਚਯਞ੍ਚ ਆਪਜ੍ਜਿਤ੍ਵਾ ਉਪਰਿ ਵਕ੍ਖਮਾਨਪ੍ਪਕਾਰੇਸੁ ਵਿਯ ਠਿਤਟ੍ਠਾਨਤੋ ਕੇਸਗ੍ਗਮਤ੍ਤਮ੍ਪਿ ਅਪਨੇਨ੍ਤੋ ਤਥੇਵ ਪਰਾਜਿਤੋ ਹੋਤੀਤਿ ਅਤ੍ਥੋ.

ਏਵਮੇਤਾਯ ਗਾਥਾਯ ‘‘ਆਦਿਯੇਯ੍ਯ ਹਰੇਯ੍ਯ ਅਵਹਰੇਯ੍ਯ ਇਰਿਯਾਪਥਂ ਵਿਕੋਪੇਯ੍ਯ ਠਾਨਾਚਾਵੇਯ੍ਯ ਸਙ੍ਕੇਤਂ ਵੀਤਿਨਾਮੇਯ੍ਯਾ’’ਤਿ (ਪਾਰਾ. ੯੨) ਪਦਭਾਜਨਾਗਤੇਸੁ ਛਸੁ ਪਦੇਸੁ ਆਦੋ ਪਞ੍ਚ ਪਦਾਨਿ ਸਙ੍ਗਹੇਤ੍ਵਾ ਛਟ੍ਠਂ ਪਦਂ ਕਸ੍ਮਾ ਨ ਸਙ੍ਗਹਿਤਨ੍ਤਿ ਚੇ? ਅਯਂ ਗਾਥਾ ਨ ਤਂਪਦਭਾਜਨਂ ਦਸ੍ਸੇਤੁਂ ਵੁਤ੍ਤਾ, ਅਥ ਖੋ ਤੇਸਂ ਪਦਾਨਂ ਵਿਨਿਚ੍ਛਯਂ ਸਨ੍ਧਾਯ ਅਟ੍ਠਕਥਾਸੁ (ਪਾਰਾ. ਅਟ੍ਠ. ੧.੯੨) ਵੁਤ੍ਤਪਞ੍ਚਵੀਸਤਿਅਵਹਾਰੇ ਦਸ੍ਸੇਤੁਂ ਤਦਵਯਵਭੂਤਪਞ੍ਚਪਞ੍ਚਕਾਨਿ ਦਸ੍ਸੇਤੁਕਾਮੇਨ ਵੁਤ੍ਤਾ, ਤਸ੍ਮਾ ਏਤ੍ਥ ਛਟ੍ਠਂ ਪਦਂ ਨ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਅਥ ਵਾ ਵਕ੍ਖਮਾਨੇ ਤਤਿਯਪਞ੍ਚਕੇ ਨਿਸ੍ਸਗ੍ਗਿਯਾਵਹਾਰਪਦੇਨ, ਪਞ੍ਚਮਪਞ੍ਚਕੇ ਪਰਿਕਪ੍ਪਾਵਹਾਰਪਦੇਨ ਚ ਸਙ੍ਗਯ੍ਹਮਾਨਤ੍ਤਾ ਏਤ੍ਥ ਨਾਨੇਕਭਣ੍ਡਪਞ੍ਚਕਦ੍ਵਯਂ ਅਸਙ੍ਕਰਤੋ ਦਸ੍ਸੇਤੁਂ ਛਟ੍ਠਂ ਪਦਂ ਨ ਗਹਿਤਨ੍ਤਿ ਵੇਦਿਤਬ੍ਬਂ.

੪੦. ਇਮਸ੍ਮਿਂ ਅਦਿਨ੍ਨਾਦਾਨਪਾਰਾਜਿਕੇ ਵਤ੍ਥੁਮ੍ਹਿ ਓਤਿਣ੍ਣੇ ਕਤ੍ਤਬ੍ਬਵਿਨਿਚ੍ਛਯਸ੍ਸ ਪਞ੍ਚਵੀਸਤਿਅਵਹਾਰਾਨਂ ਅਙ੍ਗਾਨਿ ਹੋਨ੍ਤਿ, ਤੇ ਚ ਨਾਨਾਭਣ੍ਡਪਞ੍ਚਕਂ ਏਕਭਣ੍ਡਪਞ੍ਚਕਂ ਸਾਹਤ੍ਥਿਕਪਞ੍ਚਕਂ ਪੁਬ੍ਬਪਯੋਗਪਞ੍ਚਕਂ ਥੇਯ੍ਯਾਵਹਾਰਪਞ੍ਚਕਨ੍ਤਿ ਨਿਦ੍ਦਿਟ੍ਠਾ ਪਞ੍ਚਪਞ੍ਚਕਭੇਦਾ, ਤਤ੍ਥ ਇਮਾਯ ਗਾਥਾਯ ਨਾਨੇਕਭਣ੍ਡਪਞ੍ਚਕਦ੍ਵਯਪ੍ਪਭੇਦੇ ਦਸ ਅਵਹਾਰੇ ਸਙ੍ਗਹੇਤ੍ਵਾ ਅਵਸੇਸਪਞ੍ਚਕਤ੍ਤਯਂ ਦਸ੍ਸੇਤੁਂ ‘‘ਤਤ੍ਥਾ’’ਤਿ ਆਰਦ੍ਧਂ. ਤਤ੍ਥ ਤਤ੍ਥਾਤਿ ਤਿਸ੍ਸਂ ਗਾਥਾਯਂ. ਨਾਨੇਕਭਣ੍ਡਾਨਨ੍ਤਿ ਨਾਨਾ, ਏਕੋ ਚ ਭਣ੍ਡੋ ਯੇਸਨ੍ਤਿ ਵਿਗ੍ਗਹੋ. ਸਵਿਞ੍ਞਾਣਕਅਵਿਞ੍ਞਾਣਕਭਣ੍ਡਵਸੇਨ ਨਾਨਾਭਣ੍ਡਪਞ੍ਚਕਞ੍ਚ ਸਵਿਞ੍ਞਾਣਕਭਣ੍ਡਵਸੇਨੇਵ ਏਕਭਣ੍ਡਪਞ੍ਚਕਞ੍ਚ ਵੇਦਿਤਬ੍ਬਂ. ਪਞ੍ਚ ਪਰਿਮਾਣਾ ਯੇਸਨ੍ਤੇ ਪਞ੍ਚਕਾ, ਤੇਸਂ. ਅਵਹਾਰਾਤਿ ਅਵਹਰਣਾਨਿ, ਚੋਰਕਮ੍ਮਾਨੀਤਿ ਵੁਤ੍ਤਂ ਹੋਤਿ. ਏਤੇਤਿ ਅਨਨ੍ਤਰਗਾਥਾਯ ‘‘ਆਦਿਯਨ੍ਤੋ’’ਤਿਆਦਿਨਾ ਨਿਦ੍ਦਿਟ੍ਠਾ ਆਦਿਯਨ੍ਤਾਦਯੋ. ਪਟਿਪਤ੍ਤਿਸਨ੍ਤਾਨੇ ਵਿਸੇਸਂ ਵਿਨਿਚ੍ਛਯਂ ਭਾਵੇਤਿ ਉਪ੍ਪਾਦੇਤੀਤਿ ਵਿਭਾਵੀ, ਵਿਨਯਧਰੋ, ਤੇਨ ਵਿਭਾਵਿਨਾ. ਵਿਞ੍ਞਾਤਬ੍ਬਾਤਿ ਪਰੇਸਂ ਆਰਾਮਾਦਿਸਵਿਞ੍ਞਾਣਕਵਤ੍ਥੂਨਿ ਵਾ ਦਾਸਮਯੂਰਾਦਿਂ ਕੇਵਲਂ ਸਵਿਞ੍ਞਾਣਕਵਤ੍ਥੁਮਤ੍ਤਂ ਵਾ ਅਵਹਰਿਤੁਂ ਕਤਾ ਯਥਾਵੁਤ੍ਤਸਰੂਪਾ ਆਦਿਯਨਾਦਯੋ ਠਾਨਾਚਾਵਨਪਰਿਯੋਸਾਨਾ ਪਞ੍ਚ ਅਵਹਾਰਾ ਯਥਾਵੁਤ੍ਤਨਾਨਾਭਣ੍ਡਏਕਭਣ੍ਡਵਿਸਯਾ ਹੁਤ੍ਵਾ ਪਵਤ੍ਤਨ੍ਤੀਤਿ ਨਾਨਾਭਣ੍ਡਪਞ੍ਚਕਂ ਏਕਭਣ੍ਡਪਞ੍ਚਕਨ੍ਤਿ ਦਸ ਅਵਹਾਰਾ ਭਵਨ੍ਤੀਤਿ ਵਿਨਯਧਰੇਨ ਓਤਿਣ੍ਣਸ੍ਸ ਵਤ੍ਥੁਨੋ ਵਿਨਿਚ੍ਛਯੋਪਕਾਰਕਤ੍ਤਾ ਤਥਤੋ ਞਾਤਬ੍ਬਾਤਿ ਅਤ੍ਥੋ.

੪੧. ਏਵਂ ਪਞ੍ਚਵੀਸਤਿ ਅਵਹਾਰੇ ਦਸ੍ਸੇਤੁਂ ਵਤ੍ਤਬ੍ਬੇਸੁ ਪਞ੍ਚਸੁ ਪਞ੍ਚਕੇਸੁ ਨਾਨੇਕਭਣ੍ਡਪਞ੍ਚਕਾਨਿ ਦ੍ਵੇ ਦਸ੍ਸੇਤ੍ਵਾ ਇਦਾਨਿ ਅਵਸੇਸਪਞ੍ਚਕਤ੍ਤਯਂ ਦਸ੍ਸੇਤੁਮਾਹ ‘‘ਸਾਹਤ੍ਥਾ’’ਤਿਆਦਿ. ਤਤ੍ਥ ਸਾਹਤ੍ਥੋਤਿ ਸਕੋ ਹਤ੍ਥੋ, ਤੇਨ ਨਿਬ੍ਬਤ੍ਤੋ, ਤਸ੍ਸ ਵਾ ਸਮ੍ਬਨ੍ਧੀਤਿ ਸਾਹਤ੍ਥੋ, ਅਵਹਾਰੋ, ਚੋਰੇਨ ਸਹਤ੍ਥਾ ਕਤੋ ਅਵਹਾਰੋਤਿ ਅਤ੍ਥੋ. ਆਣਤ੍ਤਿਕੋ ਚੇਵਾਤਿ ਆਣਤ੍ਤਿਯਾ ਨਿਬ੍ਬਤ੍ਤੋ ਆਣਤ੍ਤਿਕੋ, ਅਵਹਾਰੋ, ਚੋਰਸ੍ਸ ‘‘ਇਮਂ ਨਾਮ ਭਣ੍ਡਂ ਗਣ੍ਹਾ’’ਤਿ ਯਸ੍ਸ ਕਸ੍ਸਚਿ ਆਣਾਪਨੇਨ ਸਿਦ੍ਧੋ ਅਵਹਾਰੋ ਚ. ਨਿਸ੍ਸਗ੍ਗੋਤਿ ਨਿਸ੍ਸਜ੍ਜਨਂ ਨਿਸ੍ਸਗ੍ਗੋ, ਅਵਹਾਰੋ, ਸੁਙ੍ਕਘਾਤਟ੍ਠਾਨੇ, ਪਰਿਕਪ੍ਪਿਤੋਕਾਸੇ ਵਾ ਠਤ੍ਵਾ ਭਣ੍ਡਸ੍ਸ ਬਹਿ ਪਾਤਨਨ੍ਤਿ ਵੁਤ੍ਤਂ ਹੋਤਿ.

ਅਤ੍ਥਸਾਧਕੋਤਿ ਪਾਰਾਜਿਕਾਪਤ੍ਤਿਸਙ੍ਖਾਤਂ ਅਤ੍ਥਂ ਸਾਧੇਤੀਤਿ ਅਤ੍ਥਸਾਧਕੋ, ਸੋ ਅਵਹਾਰੋ ਚ ਯਥਾਣਤ੍ਤਿਕਂ ਅਵਿਰਾਧੇਤ੍ਵਾ ਏਕਂਸੇਨ ਅਵਹਰਨ੍ਤਸ੍ਸ ‘‘ਅਸੁਕਸ੍ਸ ਭਣ੍ਡਂ ਅਵਹਰਾ’’ਤਿ ਅਵਿਸੇਸੇਨ ਵਾ ਅਵਹਰਿਤਬ੍ਬਵਤ੍ਥੁਵਿਸੇਸੋ ਗਹਣਕਾਲੋ ਗਹਣਦੇਸੋ ਗਹਣਾਕਾਰੋ ਚਾਤਿ ਏਵਮਾਦਿਵਿਸੇਸਾਨਮਞ੍ਞਤਰੇਨ ਵਿਸੇਸੇਤ੍ਵਾ ਵਾ ਆਣਾਪਨਞ੍ਚ ਏਕਂਸੇਨ ਪਾਦਗ੍ਘਨਕਤੇਲਪਿਵਨਕਂ ਉਪਾਹਨਾਦਿਕਿਞ੍ਚਿਵਤ੍ਥੁਂ ਤੇਲਭਾਜਨਾਦੀਸੁ ਪਾਤਨਾਦਿਪ੍ਪਯੋਗੋ ਚਾਤਿ ਏਵਮਾਦਿਪ੍ਪਯੋਗੋ ਚ ਕਿਰਿਯਾਸਿਦ੍ਧਿਯਾ ਪੁਰੇਤਰਮੇਵ ਪਾਰਾਜਿਕਸਙ੍ਖਾਤਸ੍ਸ ਅਤ੍ਥਸ੍ਸ ਸਾਧਨਤੋ ਅਤ੍ਥਸਾਧਕੋ ਅਵਹਾਰੋ ਚਾਤਿ ਵੁਤ੍ਤਂ ਹੋਤਿ.

ਧੁਰਨਿਕ੍ਖੇਪਨਞ੍ਚਾਤਿ ਧੁਰਸ੍ਸ ਨਿਕ੍ਖੇਪਨਂ ਧੁਰਨਿਕ੍ਖੇਪਨਂ, ਤਞ੍ਚ ਅਵਹਾਰੋ, ਪਰਸਨ੍ਤਕਾਨਂ ਆਰਾਮਾਦੀਨਂ ਅਭਿਯੋਗਵਿਸਯੇ ਚ ਉਪਨਿਕ੍ਖਿਤ੍ਤਸ੍ਸ ਭਣ੍ਡਾਦਿਨੋ ਵਿਸਯੇ ਚ ਚੋਰਸ੍ਸ ਸਾਮਿਨੋ ਵਿਸ੍ਸਜ੍ਜਨੇ ਚ ਸਾਮਿਨੋ ਚ, ਯਦਾ ਕਦਾਚਿ ਯਥਾਕਥਞ੍ਚਿ ਗਣ੍ਹਿਸ੍ਸਾਮੀਤਿ ਗਹਣੇ ਨਿਰੁਸ੍ਸਾਹਭਾਵਸਙ੍ਖਾਤੋ ਧੁਰਨਿਕ੍ਖੇਪਾਵਹਾਰੋ ਚਾਤਿ ਵੁਤ੍ਤਂ ਹੋਤਿ. ਇਤਿ ਇਦਂ ਧੁਰਨਿਕ੍ਖੇਪਨਞ੍ਚ ਯਥਾਵੁਤ੍ਤਪ੍ਪਕਾਰਂ ਸਾਹਤ੍ਥਾਦਿਚਤੁਕ੍ਕਞ੍ਚ ਪਞ੍ਚਨ੍ਨਂ ਅਵਹਾਰਾਨਂ ਸਮੂਹੋ ਪਞ੍ਚਕਂ, ਸਾਹਤ੍ਥਾਦਿਪਞ੍ਚਕਂ ‘‘ਸਾਹਤ੍ਥਪਞ੍ਚਕ’’ਨ੍ਤਿ ਵੁਚ੍ਚਤਿ. ਆਦਿ-ਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋਤਿ ਵੇਦਿਤਬ੍ਬਂ.

੪੨. ਪੁਬ੍ਬਸਹਪਯੋਗਾ ਚਾਤਿ ਏਤ੍ਥ ‘‘ਪੁਬ੍ਬਪਯੋਗੋ ਸਹਪਯੋਗੋ’’ਤਿ ਪਯੋਗ-ਸਦ੍ਦੋ ਪਚ੍ਚੇਕਂ ਯੋਜੇਤਬ੍ਬੋ. ‘‘ਆਣਤ੍ਤਿਵਸੇਨ ਪੁਬ੍ਬਪਯੋਗੋ ਵੇਦਿਤਬ੍ਬੋ’’ਤਿ ਅਟ੍ਠਕਥਾਵਚਨਤੋ (ਪਾਰਾ. ਅਟ੍ਠ. ੧.੯੨) ਯਥਾਣਤ੍ਤਿਕਮਵਿਰਾਧੇਤ੍ਵਾ ਗਣ੍ਹਤੋ ‘‘ਅਸੁਕਸ੍ਸ ਇਤ੍ਥਨ੍ਨਾਮਂ ਭਣ੍ਡਂ ਅਵਹਰਾ’’ਤਿ ਆਣਾਪਨਂ ਪੁਬ੍ਬਪਯੋਗੋ ਨਾਮ ਅਵਹਾਰੋ. ਕਾਯੇਨ, ਵਾਚਾਯ ਵਾ ਪਯੁਜ੍ਜਨਂ ਆਣਾਪਨਂ ਪਯੋਗੋ, ਆਣਤ੍ਤਸ੍ਸ ਭਣ੍ਡਗ੍ਗਹਣਤੋ ਪੁਬ੍ਬਤ੍ਤਾ ਪੁਬ੍ਬੋ ਚ ਸੋ ਪਯੋਗੋ ਚਾਤਿ ਪੁਬ੍ਬਪਯੋਗੋ ਅਵਹਾਰੋਤਿ ਦਟ੍ਠਬ੍ਬਂ. ‘‘ਠਾਨਾਚਾਵਨਵਸੇਨ ਸਹਪਯੋਗੋ ਵੇਦਿਤਬ੍ਬੋ’’ਤਿ ਅਟ੍ਠਕਥਾਵਚਨਸ੍ਸ ਉਪਲਕ੍ਖਣਪਦਤ੍ਤਾ ਠਾਨਾਚਾਵਨਞ੍ਚ ਪਰਾਯਤ੍ਤਭੂਮਿਗਹਣੇ ਖੀਲਸਙ੍ਕਮਨਾਦਿਕਞ੍ਚ ਸਹਪਯੋਗੋ ਅਵਹਾਰੋਤਿ ਵੇਦਿਤਬ੍ਬੋ.

ਸਂਵਿਦਾਹਰਣਨ੍ਤਿ ਬਹੂਹਿ ਏਕਤੋ ਹੁਤ੍ਵਾ ‘‘ਇਦਂ ਨਾਮ ਭਣ੍ਡਂ ਅਵਹਰਿਸ੍ਸਾਮਾ’’ਤਿ ਸਂਵਿਦਹਿਤ੍ਵਾ ਸਬ੍ਬੇਹਿ, ਏਕਤੋ ਵਾ ਸਬ੍ਬੇਸਂ ਅਨੁਮਤਿਯਾ ਏਕੇਨ ਵਾ ਗਨ੍ਤ੍ਵਾ ਪਰਸਨ੍ਤਕਸ੍ਸ ਥੇਯ੍ਯਚਿਤ੍ਤੇਨ ਹਰਣਸਙ੍ਖਾਤੋ ਸਂਵਿਦਾਵਹਾਰੋ ਚ. ਸਮਂ ਏਕੀ ਹੁਤ੍ਵਾ ਵਿਸੁਂ ਏਕੇਨਾਪਿ ਥੇਯ੍ਯਚਿਤ੍ਤੇਨ ਪਾਦੇ ਵਾ ਪਾਦਾਰਹੇ ਵਾ ਗਹਿਤੇ ਕਤਮਨ੍ਤਨਾਨਂ ਸਬ੍ਬੇਸਮ੍ਪਿ ਪਾਰਾਜਿਕਂ ਹੋਤੀਤਿ ਦਟ੍ਠਬ੍ਬਂ. ਸਂਵਿਦਹਿਤ੍ਵਾ ਮਨ੍ਤੇਤ੍ਵਾ ਅਵਹਰਣਂ ਸਂਵਿਦਾਹਰਣਂ. ਨਿਰੁਤ੍ਤਿਨਯੇਨ ਸਦ੍ਦਸਿਦ੍ਧਿ ਵੇਦਿਤਬ੍ਬਾ. ‘‘ਸਂਵਿਦਾਹਰਣ’’ਨ੍ਤਿ ‘‘ਸਂਵਿਦਾਵਹਾਰੋ’’ਤਿ ਇਮਸ੍ਸ ਵੇਵਚਨਂ. ‘‘ਸਮ੍ਬਹੁਲਾ ਸਂਵਿਦਹਿਤ੍ਵਾ ਏਕੋ ਭਣ੍ਡਂ ਅਵਹਰਤਿ, ਆਪਤ੍ਤਿ ਸਬ੍ਬੇਸਂ ਪਾਰਾਜਿਕਸ੍ਸਾ’’ਤਿ (ਪਾਰਾ. ੧੧੮) ਵਚਨਤੋ ਏਵਂ ਸਹਕਤਮਨ੍ਤਨੇਸੁ ਏਕੇਨਾਪਿ ਥੇਯ੍ਯਚਿਤ੍ਤੇਨ ਪਾਦੇ ਵਾ ਪਾਦਾਰਹੇ ਵਾ ਗਹਿਤੇ ਕਤਮਨ੍ਤਨਾਨਂ ਸਬ੍ਬੇਸਂ ਪਾਰਾਜਿਕਂ ਹੋਤੀਤਿ ਦਟ੍ਠਬ੍ਬਂ.

ਸਙ੍ਕੇਤਕਮ੍ਮਨ੍ਤਿ ਪੁਬ੍ਬਣ੍ਹਾਦਿਕਾਲਪਰਿਚ੍ਛੇਦੇਨ ਸਞ੍ਜਾਨਨਂ ਸਙ੍ਕੇਤੋ, ਤੇਨ ਕਤਂ ਕਮ੍ਮਂ ਅਵਹਰਣਂ ਸਙ੍ਕੇਤਕਮ੍ਮਂ ਨਾਮ. ਤਂ ਪਨ ਪੁਰੇਭਤ੍ਤਾਦੀਸੁ ਕਞ੍ਚਿ ਕਾਲਂ ਪਰਿਚ੍ਛਿਨ੍ਦਿਤ੍ਵਾ ‘‘ਇਮਸ੍ਮਿਂ ਕਾਲੇ ਇਤ੍ਥਨ੍ਨਾਮਂ ਭਣ੍ਡਂ ਅਵਹਰਾ’’ਤਿ ਵੁਤ੍ਤੇ ਤਸ੍ਮਿਂਯੇਵ ਕਾਲੇ ਤਂਯੇਵ ਯਥਾਵੁਤ੍ਤਂ ਭਣ੍ਡਂ ਅਵਹਰਤਿ ਚੇ, ਸਙ੍ਕੇਤਕਾਰਕਸ੍ਸ ਸਙ੍ਕੇਤਕ੍ਖਣੇਯੇਵ ਪਾਰਾਜਿਕਨ੍ਤਿ ਸਙ੍ਖੇਪਤੋ ਵੇਦਿਤਬ੍ਬਂ.

ਨੇਮਿਤ੍ਤਨ੍ਤਿ ਪਰਭਣ੍ਡਾਵਹਾਰਸ੍ਸ ਹੇਤੁਤ੍ਤਾ ਅਕ੍ਖਿਨਿਖਣਨਾਦਿ ਨਿਮਿਤ੍ਤਂ ਨਾਮ, ਤੇਨ ਨਿਬ੍ਬਤ੍ਤਂ ਨੇਮਿਤ੍ਤਂ, ਅਵਹਰਣਸਙ੍ਖਾਤਕਮ੍ਮਂ ਅਵਹਾਰੋ. ‘‘ਮਯਾ ਅਕ੍ਖਿਮ੍ਹਿ ਨਿਖਣਿਤੇ ਵਾ ਭਮੁਮ੍ਹਿ ਉਕ੍ਖਿਤ੍ਤੇ ਵਾ ਇਤ੍ਥਨ੍ਨਾਮਂ ਭਣ੍ਡਂ ਅਵਹਰਾ’’ਤਿ ਆਣਤ੍ਤੇਨ ਤਂ ਨਿਮਿਤ੍ਤਂ ਦਿਸ੍ਵਾ ਵੁਤ੍ਤਮੇਵ ਭਣ੍ਡਂ ਵੁਤ੍ਤਨਿਯਾਮਮਵਿਰਾਧੇਤ੍ਵਾ ਗਹਿਤਂ ਚੇ, ਨਿਮਿਤ੍ਤਕਾਰਕਸ੍ਸ ਨਿਮਿਤ੍ਤਕਰਣਕ੍ਖਣੇਯੇਵ ਪਾਰਾਜਿਕਂ ਹੋਤਿ. ਵੁਤ੍ਤਨਿਯਾਮਂ ਵਿਰਾਧੇਤ੍ਵਾ ਗਹਿਤਂ ਚੇ, ਨਿਮਿਤ੍ਤਕਾਰਕੋ ਮੁਚ੍ਚਤਿ, ਅਵਹਾਰਕਸ੍ਸੇਵ ਪਾਰਾਜਿਕਂ. ਪੁਬ੍ਬਪਯੋਗੋ ਆਦਿ ਯਸ੍ਸ ਤਂ ਪੁਬ੍ਬਪਯੋਗਾਦਿ, ਪੁਬ੍ਬਪਯੋਗਾਦਿ ਚ ਤਂ ਪਞ੍ਚਕਞ੍ਚਾਤਿ ਵਿਗ੍ਗਹੋ.

੪੩. ਥੇਯ੍ਯਞ੍ਚ ਪਸਯ੍ਹਞ੍ਚ ਪਰਿਕਪ੍ਪੋ ਚ ਪਟਿਚ੍ਛਨ੍ਨੋ ਚ ਕੁਸੋ ਚ ਥੇਯ੍ਯਪਸਯ੍ਹਪਰਿਕਪ੍ਪਪਟਿਚ੍ਛਨ੍ਨਕੁਸਾ, ਤੇ ਆਦੀ ਉਪਪਦਭੂਤਾ ਯੇਸਂ ਅਵਹਾਰਾਨਂ ਤੇ ਥੇਯ੍ਯ…ਪੇ… ਕੁਸਾਦਿਕਾ, ਅਵਹਾਰਾ, ਇਮਿਨਾ ਥੇਯ੍ਯਾਵਹਾਰੋ ਚ…ਪੇ… ਕੁਸਾਵਹਾਰੋ ਚਾਤਿ ਵੁਤ੍ਤਂ ਹੋਤਿ. ਤਤ੍ਥ ਥੇਯ੍ਯਾਵਹਾਰੋਤਿ ਥੇਨੋ ਵੁਚ੍ਚਤਿ ਚੋਰੋ, ਤਸ੍ਸ ਭਾਵੋ ਥੇਯ੍ਯਂ, ਏਤ੍ਥ ਨ-ਕਾਰਲੋਪੋ ਨਿਰੁਤ੍ਤਿਨਯੇਨ ਦਟ੍ਠਬ੍ਬੋ, ਤੇਨ ਅਵਹਰਣਂ ਥੇਯ੍ਯਾਵਹਾਰੋ, ਸਨ੍ਧਿਚ੍ਛੇਦਾਦਿਵਸੇਨ ਅਦਿਸ੍ਸਮਾਨੇਨ ਗਹਣਞ੍ਚ ਕੂਟਮਾਨਕੂਟਕਹਾਪਣਾਦੀਹਿ ਵਞ੍ਚੇਤ੍ਵਾ ਗਹਣਞ੍ਚ ਥੇਯ੍ਯਾਵਹਾਰੋ.

ਪਸਯ੍ਹ ਅਭਿਭਵਿਤ੍ਵਾ ਅਵਹਰਣਂ ਪਸਯ੍ਹਾਵਹਾਰੋ, ਗਾਮਵਿਲੋਪਕਾ ਵਿਯ ਸਾਮਿਕੇ ਅਭਿਭਵਿਤ੍ਵਾ ਗਹਣਞ੍ਚ ਰਾਜਭਟਾਦਯੋ ਵਿਯ ਅਭਿਭਵਿਤ੍ਵਾ ਨਿਬਦ੍ਧਕਰਗ੍ਗਹਣੇ ਅਧਿਕਗ੍ਗਹਣਞ੍ਚ ਪਸਯ੍ਹਾਵਹਾਰੋ.

ਵਤ੍ਥਸੁਤ੍ਤਾਦਿਕਂ ਪਰਿਚ੍ਛਿਜ੍ਜ ਕਪ੍ਪੇਤ੍ਵਾ ਅਵਹਰਣਂ ਪਰਿਕਪ੍ਪਾਵਹਾਰੋ, ਸੋ ਚ ਭਣ੍ਡੋਕਾਸਪਰਿਕਪ੍ਪਵਸੇਨ ਦੁਵਿਧੋ ਹੋਤਿ. ਤਤ੍ਥ ਨਿਕ੍ਖਿਤ੍ਤਭਣ੍ਡਂ ਅਨ੍ਧਕਾਰਪ੍ਪਦੇਸਂ ਪਵਿਸਿਤ੍ਵਾ ਸੁਤ੍ਤਾਦਿਭਣ੍ਡਾਨਿ ਤਤ੍ਥ ਨਿਕ੍ਖਿਤ੍ਤਾਨਿ, ਤੇ ਪੇਲ਼ਾਦਯੋ ਗਣ੍ਹਨ੍ਤਸ੍ਸ ‘‘ਵਤ੍ਥਾਨਿ ਚੇ ਗਣ੍ਹਿਸ੍ਸਾਮਿ, ਸੁਤ੍ਤਾਨਿ ਚੇ ਨ ਗਣ੍ਹਿਸ੍ਸਾਮੀ’’ਤਿਆਦਿਨਾ ਨਯੇਨ ਪਰਿਕਪ੍ਪੇਤ੍ਵਾ ਉਕ੍ਖਿਪਨਂ ਭਣ੍ਡਪਰਿਕਪ੍ਪਪੁਬ੍ਬਕਤ੍ਤਾ ਭਣ੍ਡਪਰਿਕਪ੍ਪਾਵਹਾਰੋ ਨਾਮ. ਆਰਾਮਪਰਿਵੇਣਾਦੀਨਿ ਪਵਿਸਿਤ੍ਵਾ ਲੋਭਨੀਯਂ ਭਣ੍ਡਂ ਦਿਸ੍ਵਾ ਗਬ੍ਭਪਾਸਾਦਤਲਪਮੁਖਮਾਲ਼ਕਪਾਕਾਰਦ੍ਵਾਰਕੋਟ੍ਠਕਾਦਿਂ ਯਂ ਕਿਞ੍ਚਿ ਠਾਨਂ ਪਰਿਕਪ੍ਪੇਤ੍ਵਾ ‘‘ਏਤ੍ਥਨ੍ਤਰੇ ਦਿਟ੍ਠੋ ਚੇ, ਓਲੋਕੇਤੁਂ ਗਹਿਤਂ ਵਿਯ ਦਸ੍ਸਾਮਿ, ਨੋ ਚੇ, ਹਰਿਸ੍ਸਾਮੀ’’ਤਿ ਪਰਿਕਪ੍ਪੇਤ੍ਵਾ ਆਦਾਯ ਗਨ੍ਤ੍ਵਾ ਪਰਿਕਪ੍ਪਿਤਟ੍ਠਾਨਾਤਿਕ੍ਕਮੋ ਓਕਾਸਪਰਿਕਪ੍ਪਪੁਬ੍ਬਕਤ੍ਤਾ ਓਕਾਸਪਰਿਕਪ੍ਪਾਵਹਾਰੋ ਨਾਮਾਤਿ ਸਙ੍ਖੇਪਤੋ ਵੇਦਿਤਬ੍ਬੋ.

ਤਿਣਪਣ੍ਣਾਦੀਹਿ ਪਟਿਚ੍ਛਨ੍ਨਸ੍ਸ ਭਣ੍ਡਸ੍ਸ ਅਵਹਰਣਂ ਪਟਿਚ੍ਛਨ੍ਨਾਵਹਾਰੋ, ਉਯ੍ਯਾਨਾਦੀਸੁ ਕੀਲ਼ਮਾਨੇਹਿ ਵਾ ਸਙ੍ਘਪਰਿਵਿਸਨ੍ਤੇਹਿ ਵਾ ਮਨੁਸ੍ਸੇਹਿ ਓਮੁਞ੍ਚਿਤ੍ਵਾ ਠਪਿਤਂ ਅਲਙ੍ਕਾਰਾਦਿਕਂ ਯਂ ਕਿਞ੍ਚਿ ਭਣ੍ਡਂ ਦਿਸ੍ਵਾ ‘‘ਓਣਮਿਤ੍ਵਾ ਗਣ੍ਹਨ੍ਤੇ ਆਸਙ੍ਕਨ੍ਤੀ’’ਤਿ ਠਤ੍ਵਾ ਤਿਣਪਣ੍ਣਪਂਸੁਵਾਲੁਕਾਦੀਹਿ ਪਟਿਚ੍ਛਾਦੇਤ੍ਵਾ ਸਾਮਿਕੇਸੁ ਪਰਿਯੇਸਿਤ੍ਵਾ ਅਦਿਸ੍ਵਾ ਸਾਲਯੇਸੁ ਗਤੇਸੁ ਪਚ੍ਛਾ ਥੇਯ੍ਯਚਿਤ੍ਤੇਨ ਗਹਣਞ੍ਚ ਤਦੇਵ ਭਣ੍ਡਂ ਕਦ੍ਦਮਾਦੀਸੁ ਥੇਯ੍ਯਚਿਤ੍ਤੇਨ ਅਙ੍ਗੁਟ੍ਠਾਦੀਹਿ ਪੀਲ਼ੇਤ੍ਵਾ ਓਸੀਦਾਪੇਤ੍ਵਾ ਹੇਟ੍ਠਾਭਾਗੇਨ ਫੁਟ੍ਠਟ੍ਠਾਨਂ ਉਪਰਿਭਾਗੇਨ ਅਤਿਕ੍ਕਮਨਞ੍ਚ ਪਟਿਚ੍ਛਨ੍ਨਾਵਹਾਰੋਤਿ ਵੁਤ੍ਤਂ ਹੋਤਿ.

ਕੁਸੇਨ ਅਵਹਾਰੋ ਕੁਸਾਵਹਾਰੋ, ਥੇਯ੍ਯਚਿਤ੍ਤੇਨ ਕੁਸਂ ਸਙ੍ਕਾਮੇਤ੍ਵਾ ਪਰਕੋਟ੍ਠਾਸਸ੍ਸ ਅਗ੍ਘੇਨ ਮਹਨ੍ਤਸ੍ਸ ਵਾ ਸਮਸਮਸ੍ਸ ਵਾ ਗਹਣਨ੍ਤਿ ਅਤ੍ਥੋ. ਯੋ ਪਨ ਭਿਕ੍ਖੁ ਕੁਸਪਾਤਨੇਨ ਸਙ੍ਘਸ੍ਸ ਚੀਵਰੇਸੁ ਭਾਜਿਯਮਾਨੇਸੁ ਅਤ੍ਤਨੋ ਕੋਟ੍ਠਾਸੇਨ ਸਮਂ ਵਾ ਅਧਿਕਂ ਵਾ ਊਨਕਂ ਵਾ ਅਗ੍ਘੇਨ ਪਞ੍ਚਮਾਸਕਂ ਵਾ ਅਤਿਰੇਕਪਞ੍ਚਮਾਸਕਂ ਵਾ ਅਗ੍ਘਨਕਂ ਅਞ੍ਞਸ੍ਸ ਕੋਟ੍ਠਾਸਂ ਅਵਹਰਿਤੁਕਾਮੋ ਅਤ੍ਤਨੋ ਕੋਟ੍ਠਾਸੇ ਪਤਿਤਂ ਕੁਸਂ ਪਰਕੋਟ੍ਠਾਸੇ ਪਾਤੇਤੁਕਾਮੋ ਉਦ੍ਧਰਤਿ, ਤਙ੍ਖਣੇ ਚ ਪਰਸ੍ਸ ਕੋਟ੍ਠਾਸੇ ਪਾਤਿਤਕ੍ਖਣੇ ਚ ਨ ਪਾਰਾਜਿਕਂ ਅਨਾਪਜ੍ਜਿਤ੍ਵਾ ਪਰਕੋਟ੍ਠਾਸਤੋ ਪਰਨਾਮਲਿਖਿਤਂ ਕੁਸਂ ਉਕ੍ਖਿਪੇਨ੍ਤੋ ਤਤੋ ਕੇਸਗ੍ਗਮਤ੍ਤਮ੍ਪਿ ਅਪਨਾਮੇਤਿ, ਪਾਰਾਜਿਕੋ ਹੋਤਿ. ਯਦਿ ਪਠਮਂ ਪਰਕੋਟ੍ਠਾਸਤੋ ਕੁਸਂ ਉਦ੍ਧਰਤਿ, ਉਦ੍ਧਟਕ੍ਖਣੇ ਚ ਅਤ੍ਤਨੋ ਕੋਟ੍ਠਾਸੇ ਪਾਤਿਤਕ੍ਖਣੇ ਚ ਸਕਨਾਮਲਿਖਿਤਂ ਕੁਸਂ ਉਦ੍ਧਰਣਕ੍ਖਣੇ ਚ ਪਾਰਾਜਿਕਂ ਅਨਾਪਜ੍ਜਿਤ੍ਵਾ ਪਰਕੋਟ੍ਠਾਸੇ ਪਾਤਨਕ੍ਖਣੇ ਹਤ੍ਥਤੋ ਕੇਸਗ੍ਗਮਤ੍ਤਮ੍ਪਿ ਮੁਤ੍ਤੇ ਪਾਰਾਜਿਕੋ ਹੋਤਿ.

ਯਦਿ ਦ੍ਵੇਪਿ ਕੁਸੇ ਪਟਿਚ੍ਛਾਦੇਤ੍ਵਾ ਸਬ੍ਬੇਸੁ ਭਿਕ੍ਖੂਸੁ ਸਕਸਕਕੋਟ੍ਠਾਸਂ ਆਦਾਯ ਗਤੇਸੁ ਯਸ੍ਮਿਂ ਕੁਸਂ ਪਟਿਚ੍ਛਾਦੇਸਿ, ਤਸ੍ਸ ਸਾਮਿਕੇਨ ਆਗਨ੍ਤ੍ਵਾ ‘‘ਮਯ੍ਹਂ ਕੁਸੋ ਕਸ੍ਮਾ ਨ ਦਿਸ੍ਸਤੀ’’ਤਿ ਵੁਤ੍ਤੇ ਚੋਰੋ ‘‘ਮਯ੍ਹਮ੍ਪਿ ਕੁਸੋ ਨ ਦਿਸ੍ਸਤੀ’’ਤਿ ਵਤ੍ਵਾ ਅਤ੍ਤਨੋ ਕੋਟ੍ਠਾਸਂ ਤਸ੍ਸ ਸਨ੍ਤਕਂ ਵਿਯ ਦਸ੍ਸੇਤ੍ਵਾ ਤਸ੍ਮਿਂ ਵਿਵਦਿਤ੍ਵਾ ਵਾ ਅਵਿਵਦਿਤ੍ਵਾ ਵਾ ਗਹੇਤ੍ਵਾ ਗਤੇ ਇਤਰਂ ਕੋਟ੍ਠਾਸਂ ਉਦ੍ਧਰਤਿ ਚੇ, ਉਦ੍ਧਟਕ੍ਖਣੇਯੇਵ ਪਾਰਾਜਿਕੋ ਹੋਤਿ. ਯਦਿ ਪਰੋ ‘‘ਮਯ੍ਹਂ ਕੋਟ੍ਠਾਸਂ ਤੁਯ੍ਹਂ ਨ ਦੇਮਿ, ਤ੍ਵਂ ਤੁਯ੍ਹਂ ਕੋਟ੍ਠਾਸਂ ਵਿਚਿਨਿਤ੍ਵਾ ਗਣ੍ਹਾਹੀ’’ਤਿ ਵਦਤਿ, ਏਵਂ ਵੁਤ੍ਤੇ ਸੋ ਅਤ੍ਤਨੋ ਅਸ੍ਸਾਮਿਕਭਾਵਂ ਜਾਨਨ੍ਤੋਪਿ ਪਰਸ੍ਸ ਕੋਟ੍ਠਾਸਂ ਉਦ੍ਧਰਤਿ, ਉਦ੍ਧਟਕ੍ਖਣੇ ਪਾਰਾਜਿਕੋ ਹੋਤਿ. ਯਦਿ ਪਰੋ ਵਿਵਾਦਭੀਰੁਕਤ੍ਤਾ ‘‘ਕਿਂ ਵਿਵਾਦੇਨਾ’’ਤਿ ਚਿਨ੍ਤੇਤ੍ਵਾ ‘‘ਮਯ੍ਹਂ ਵਾ ਪਤ੍ਤਂ ਹੋਤੁ ਤੁਯ੍ਹਂ ਵਾ, ਵਰਕੋਟ੍ਠਾਸਂ ਤ੍ਵਂ ਗਣ੍ਹਾਹੀ’’ਤਿ ਵਦੇਯ੍ਯ, ਦਿਨ੍ਨਕਂ ਨਾਮ ਗਹਿਤਂ ਹੋਤੀਤਿ ਪਾਰਾਜਿਕਂ ਨ ਹੋਤੀਤਿ. ਯਦਿ ‘‘ਤਵ ਰੁਚ੍ਚਨਕਂ ਗਣ੍ਹਾਹੀ’’ਤਿ ਵੁਤ੍ਤੋ ਵਿਵਾਦਭਯੇਨ ਅਤ੍ਤਨੋ ਪਤ੍ਤਂ ਵਰਭਾਗਂ ਠਪੇਤ੍ਵਾ ਲਾਮਕਭਾਗਂ ਗਹੇਤ੍ਵਾ ਗਤੋ, ਚੋਰੋ ਪਚ੍ਛਾ ਗਣ੍ਹਨ੍ਤੋ ਵਿਚਿਤਾਵਸੇਸਂ ਨਾਮ ਅਗ੍ਗਹੇਸੀਤਿ ਪਾਰਾਜਿਕੋ ਨ ਹੋਤਿ. ਏਵਂ ਕੁਸਾਵਹਾਰਵਿਨਿਚ੍ਛਯੋ ਵੇਦਿਤਬ੍ਬੋ. ਅਯਮੇਤ੍ਥ ਪਞ੍ਚਵੀਸਤਿਯਾ ਅਵਹਾਰੇਸੁ ਸਙ੍ਖੇਪੋ, ਵਿਤ੍ਥਾਰੋ ਪਨ ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.

੪੪. ਏਤ੍ਤਾਵਤਾ ਅਦਿਨ੍ਨਾਦਾਨਪਾਰਾਜਿਕਸ੍ਸ ਵਿਨਿਚ੍ਛਯਾਵਯਵਰੂਪੇਨ ਉਗ੍ਗਹੇਤਬ੍ਬੇ ਪਞ੍ਚਵੀਸਤਿ ਅਵਹਾਰੇ ਦਸ੍ਸੇਤ੍ਵਾ ਇਦਾਨਿ ਅਦਿਨ੍ਨਾਦਾਨਵਿਨਿਚ੍ਛਯੇ ਸਮ੍ਪਤ੍ਤੇ ਸਹਸਾ ਆਪਤ੍ਤਿਂ ਅਨਾਰੋਪੇਤ੍ਵਾ ਪਠਮਂ ਓਲੋਕੇਤਬ੍ਬਾਨਿ ਪਞ੍ਚ ਠਾਨਾਨਿ ਦਸ੍ਸੇਤੁਂ ‘‘ਵਤ੍ਥੁਕਾਲਗ੍ਘਦੇਸੇ ਚਾ’’ਤਿਆਦਿ ਆਰਦ੍ਧਂ.

ਤਤ੍ਥ ਵਤ੍ਥੁ ਨਾਮ ਅਵਹਟਭਣ੍ਡਂ. ਕਿਂ ਵੁਤ੍ਤਂ ਹੋਤਿ? ਅਵਹਾਰਕੇਨ ‘‘ਮਯਾ ਇਤ੍ਥਨ੍ਨਾਮਂ ਭਣ੍ਡਂ ਅਵਹਟ’’ਨ੍ਤਿ ਵੁਤ੍ਤੇਪਿ ਤਸ੍ਸ ਭਣ੍ਡਸ੍ਸ ਸਸ੍ਸਾਮਿਕਅਸ੍ਸਾਮਿਕਭਾਵਂ ਉਪਪਰਿਕ੍ਖਿਤ੍ਵਾ ਸਸ੍ਸਾਮਿਕਂ ਚੇ, ਅਵਹਾਰਕਾਲੇ ਤੇਸਂ ਸਾਲਯਭਾਵਂ ਵਾ ਨਿਰਾਲਯਭਾਵਂ ਵਾ ਨਿਯਮੇਤ੍ਵਾ ਸਾਲਯਕਾਲੇ ਚੇ ਗਹਿਤਂ, ਭਣ੍ਡਂ ਅਗ੍ਘਾਪੇਤ੍ਵਾ ਮਾਸਕਂ ਵਾ ਊਨਮਾਸਕਂ ਵਾ ਹੋਤਿ, ਦੁਕ੍ਕਟੇਨ, ਅਤਿਰੇਕਮਾਸਕਂ ਵਾ ਊਨਪਞ੍ਚਮਾਸਕਂ ਵਾ ਹੋਤਿ, ਥੁਲ੍ਲਚ੍ਚਯੇਨ, ਪਞ੍ਚਮਾਸਕਂ ਵਾ ਅਤਿਰੇਕਪਞ੍ਚਮਾਸਕਂ ਵਾ ਹੋਤਿ, ਪਾਰਾਜਿਕੇਨ ਕਾਤਬ੍ਬੋ. ਸਾਮਿਕਾਨਂ ਨਿਰਾਲਯਕਾਲੇ ਚੇ ਗਹਿਤਂ, ਨਤ੍ਥਿ ਪਾਰਾਜਿਕਂ. ਭਣ੍ਡਸਾਮਿਕੇ ਪਨ ਭਣ੍ਡਂ ਆਹਰਾਪੇਨ੍ਤੇ ਤਂ ਵਾ ਭਣ੍ਡਂ ਤਦਗ੍ਘਨਕਂ ਵਾ ਦਾਤਬ੍ਬਨ੍ਤਿ.

ਕਾਲੋ ਨਾਮ ਅਵਹਾਰਕਾਲੋ. ਭਣ੍ਡਂ ਨਾਮੇਤਂ ਕਦਾਚਿ ਮਹਗ੍ਘਂ ਹੋਤਿ, ਕਦਾਚਿ ਸਮਗ੍ਘਂ. ਤਸ੍ਮਾ ਅਵਹਟਭਣ੍ਡਸ੍ਸ ਅਗ੍ਘਂ ਪਰਿਚ੍ਛਿਨ੍ਦਨ੍ਤੇਹਿ ਅਵਹਟਕਾਲਾਨੁਰੂਪਂ ਕਤ੍ਵਾ ਪਰਿਚ੍ਛਿਨ੍ਦਨਤ੍ਥਂ ਕਾਲਵਿਨਿਚ੍ਛਯੋ ਕਾਤਬ੍ਬੋਤਿ ਵੁਤ੍ਤਂ ਹੋਤਿ.

ਅਗ੍ਘੋ ਨਾਮ ਅਵਹਟਭਣ੍ਡਸ੍ਸ ਅਗ੍ਘੋ. ਏਤ੍ਥ ਚ ਸਬ੍ਬਦਾ ਭਣ੍ਡਾਨਂ ਅਗ੍ਘੋ ਸਮਾਨਰੂਪੋ ਨ ਹੋਤਿ, ਨਵਭਣ੍ਡਂ ਮਹਗ੍ਘਂ ਹੋਤਿ, ਪੁਰਾਣਂ ਚੇ ਸਮਗ੍ਘਂ. ਤਸ੍ਮਾ ਅਵਹਾਰਕਾਲੇ ਭਣ੍ਡਸ੍ਸ ਨਵਭਾਵਂ ਵਾ ਪੁਰਾਣਭਾਵਂ ਵਾ ਨਿਯਮੇਤ੍ਵਾ ਅਗ੍ਘੋ ਪਰਿਚ੍ਛਿਨ੍ਦਿਤਬ੍ਬੋਤਿ ਅਧਿਪ੍ਪਾਯੋ.

ਦੇਸੋ ਚਾਤਿ ਭਣ੍ਡਾਵਹਾਰਦੇਸੋ. ਏਤ੍ਥ ਚ ਸਬ੍ਬਸ੍ਸਾਪਿ ਭਣ੍ਡਸ੍ਸ ਉਟ੍ਠਾਨਦੇਸੇ ਸਮਗ੍ਘਂ ਹੁਤ੍ਵਾ ਅਞ੍ਞਤ੍ਥ ਮਹਗ੍ਘਤ੍ਤਾ ਅਵਹਟਭਣ੍ਡੇ ਅਗ੍ਘਂ ਪਰਿਚ੍ਛਿਨ੍ਦਿਤ੍ਵਾ ਤਦਨੁਰੂਪਾ ਆਪਤ੍ਤਿਯੋ ਨਿਯਮਨ੍ਤੇਹਿ ਅਗ੍ਘਂ ਪਰਿਚ੍ਛਿਨ੍ਦਨਤ੍ਥਾਯ ਅਵਹਾਰਦੇਸਂ ਨਿਯਮੇਤ੍ਵਾ ਤਸ੍ਮਿਂ ਦੇਸੇ ਅਗ੍ਘਵਸੇਨ ਤਦਨੁਰੂਪਾ ਆਪਤ੍ਤਿਯੋ ਕਾਰੇਤਬ੍ਬਾਤਿ ਅਧਿਪ੍ਪਾਯੋ.

ਪਰਿਭੋਗੋ ਨਾਮ ਅਵਹਟਭਣ੍ਡੇ ਅਵਹਾਰਤੋ ਪੁਬ੍ਬੇ ਪਰੇਹਿ ਕਤਪਰਿਭੋਗੋ. ਏਤ੍ਥ ਚ ਯਸ੍ਸ ਕਸ੍ਸਚਿ ਭਣ੍ਡਸ੍ਸ ਪਰਿਭੋਗੇਨ ਅਗ੍ਘੋ ਪਰਿਹਾਯਤੀਤਿ ਭਣ੍ਡਸਾਮਿਕਂ ਪੁਚ੍ਛਿਤ੍ਵਾ ਤਸ੍ਮਿਂ ਭਣ੍ਡੇ ਨਵੇਪਿ ਏਕਵਾਰਮ੍ਪਿ ਯੇਨ ਕੇਨਚਿ ਪਕਾਰੇਨ ਪਰਿਭੁਤ੍ਤੇ ਪਰਿਹਾਪੇਤ੍ਵਾ ਅਗ੍ਘੋ ਪਰਿਚ੍ਛਿਨ੍ਦਿਤਬ੍ਬੋਤਿ ਵੁਤ੍ਤਂ ਹੋਤਿ.

ਏਵਮਾਦਿਨਾ ਨਯੇਨ ਏਤਾਨਿ ਪਞ੍ਚ ਠਾਨਾਨਿ ਉਪਪਰਿਕ੍ਖਿਤ੍ਵਾਵ ਵਿਨਿਚ੍ਛਯੋ ਕਾਤਬ੍ਬੋਤਿ ਦਸ੍ਸੇਤੁਮਾਹ ‘‘ਪਞ੍ਚਪਿ ਞਤ੍ਵਾ ਏਤਾਨਿ ਕਤ੍ਤਬ੍ਬੋ ਪਣ੍ਡਿਤੇਨ ਵਿਨਿਚ੍ਛਯੋ’’ਤਿ.

੪੫. ਏਤ੍ਤਾਵਤਾ ਅਦਿਨ੍ਨਾਦਾਨਵਿਨਿਚ੍ਛਯਾਵਯਵਭੂਤੇ ਪਞ੍ਚਵੀਸਤਿ ਅਵਹਾਰੇ ਚ ਪਞ੍ਚਟ੍ਠਾਨਾਵਲੋਕਨਞ੍ਚ ਦਸ੍ਸੇਤ੍ਵਾ ਇਦਾਨਿ ਅਨਾਗਤੇ ਪਾਪਭਿਕ੍ਖੂਨਂ ਲੇਸੋਕਾਸਪਿਦਹਨਤ੍ਥਂ ਪਰਸਨ੍ਤਕਂ ਯਂ ਕਿਞ੍ਚਿ ਵਤ੍ਥੁਂ ਯਤ੍ਥ ਕਤ੍ਥਚਿ ਠਿਤਂ ਯੇਨ ਕੇਨਚਿ ਪਕਾਰੇਨ ਗਣ੍ਹਤੋ ਮੋਕ੍ਖਾਭਾਵਂ ਦਸ੍ਸੇਤੁਕਾਮੇਨ ਤਥਾਗਤੇਨ ਯਾ ਪਨੇਤਾ –

ਭੂਮਟ੍ਠਞ੍ਚ ਥਲਟ੍ਠਞ੍ਚ;

ਆਕਾਸਟ੍ਠ ਮਥਾਪਰਂ;

ਵੇਹਾਸਟ੍ਠੋ ਦਕਟ੍ਠਞ੍ਚ;

ਨਾਵਾ ਯਾਨਟ੍ਠਮੇਵ ਚ.

ਭਾਰਾ ਰਾਮ ਵਿਹਾਰਟ੍ਠਂ;

ਖੇਤ੍ਤ ਵਤ੍ਥੁਟ੍ਠਮੇਵ ਚ;

ਗਾਮਾ ਰਞ੍ਞਟ੍ਠ ਮੁਦਕਂ;

ਦਨ੍ਤਪੋਨੋ ਵਨਪ੍ਪਤਿ.

ਹਰਣਕੋ ਪਨਿਧਿ ਚੇਵ;

ਸੁਙ੍ਕਘਾਤਕਂ ਪਾਣਕਾ;

ਅਪਦਂ ਦ੍ਵਿਪਦਞ੍ਚੇਵ;

ਚਤੁਪ੍ਪਦਂ ਬਹੁਪ੍ਪਦਂ.

ਓਚਰਕੋਣਿਰਕ੍ਖੋ ਚ;

ਸਂਵਿਦਾਹਰਣਮ੍ਪਿ ਚ;

ਸਙ੍ਕੇਤਕਮ੍ਮਂ ਨਿਮਿਤ੍ਤ-

ਮਿਤਿ ਤਿਂ ਸੇਤ੍ਥ ਮਾਤਿਕਾ. –

ਨਿਕ੍ਖਿਤ੍ਤਾ, ਤਾਸਂ ਯਥਾਕ੍ਕਮਂ ਪਦਭਾਜਨੇ, ਤਦਟ੍ਠਕਥਾਯ ਚ ਆਗਤਨਯੇਨ ਵਿਨਿਚ੍ਛਯਂ ਦਸ੍ਸੇਤੁਕਾਮੋ ਪਠਮਂ ਤਾਵ ਭੂਮਟ੍ਠੇ ਵਿਨਿਚ੍ਛਯਂ ਦਸ੍ਸੇਤੁਮਾਹ ‘‘ਦੁਤਿਯਂ ਵਾਪੀ’’ਤਿਆਦਿ.

ਤਤ੍ਥ ਦੁਤਿਯਂ ਥੇਯ੍ਯਚਿਤ੍ਤੇਨ ਪਰਿਯੇਸਤੋ ਦੁਕ੍ਕਟਨ੍ਤਿ ਸਮ੍ਬਨ੍ਧੋ. ਏਵਂ ਸਬ੍ਬਪਦੇਸੁ. ਉਪਰਿ ਸਞ੍ਜਾਤਾਹਿ ਰੁਕ੍ਖਲਤਾਹਿ, ਇਟ੍ਠਕਪਾਸਾਣਾਦੀਹਿ ਚ ਸਞ੍ਛਨ੍ਨਂ ਮਹਾਨਿਧਿਂ ਉਦ੍ਧਰਿਤੁਕਾਮੇਨ ‘‘ਮਯਾ ਏਕੇਨੇਵ ਨ ਸਕ੍ਕਾ’’ਤਿ ਅਤ੍ਤਨੋ ਅਞ੍ਞਂ ਸਹਾਯਂ ਪਰਿਯੇਸਿਤੁਂ ਥੇਯ੍ਯਚਿਤ੍ਤੇਨ ਸਯਿਤਟ੍ਠਾਨਾ ਉਟ੍ਠਾਨਾਦੀਸੁ ਸਬ੍ਬਪਯੋਗੇਸੁ ਦੁਕ੍ਕਟਂ ਹੋਤੀਤਿ ਅਤ੍ਥੋ. ਕੁਦਾਲਂ ਭੂਮਿਖਣਨਤ੍ਥਾਯ ਪਿਟਕਂ ਵਾਪਿ ਪਂਸੁਉਦ੍ਧਰਣਤ੍ਥਾਯ ਯਂ ਕਿਞ੍ਚਿ ਭਾਜਨਂ. ਇਮੇਸੁ ਦ੍ਵੀਸੁ ਕੁਦਾਲਸ੍ਸ ਚੇ ਦਣ੍ਡੋ ਨਤ੍ਥਿ, ਦਣ੍ਡਤ੍ਥਾਯ ਰੁਕ੍ਖਤੋ ਦਣ੍ਡਂ ਛਿਨ੍ਦਤੋ ਚ ਕੁਦਾਲੋ ਚੇ ਨ ਹੋਤਿ, ਕੁਦਾਲਕਰਣਤ੍ਥਾਯ ਅਯੋਬੀਜਂ ਉਦ੍ਧਰਣਤ੍ਥਾਯ ਅਕਪ੍ਪਿਯਪਥਵਿਂ ਖਣਨ੍ਤਸ੍ਸਪਿ ਪਚ੍ਛਿਕਰਣਤ੍ਥਾਯ ਪਣ੍ਣਾਨਿ ਛਿਨ੍ਦਤੋਪਿ ਪਿਟਕਵਾਯਨਤ੍ਥਾਯ ਵਲ੍ਲਿਂ ਛਿਨ੍ਦਤੋਪਿ ਉਭਯਤ੍ਥਾਪਿ ਪਰਿਯੇਸਨੇ ਮੁਸਾ ਭਣਤੋਪਿ ਦੁਕ੍ਕਟਞ੍ਚੇਵ ਪਾਚਿਤ੍ਤਿਯਞ੍ਚ, ਇਤਰਪਯੋਗੇਸੁ ਦੁਕ੍ਕਟਮੇਵਾਤਿ ਵੇਦਿਤਬ੍ਬਂ.

ਗਚ੍ਛਤੋਤਿ ਦੁਤਿਯਾਦਿਂ ਪਰਿਯੇਸਿਤ੍ਵਾ ਲਦ੍ਧਾ ਵਾ ਅਲਦ੍ਧਾ ਵਾ ਨਿਧਿਟ੍ਠਾਨਂ ਗਚ੍ਛਨ੍ਤਸ੍ਸ ਪਦੇ ਪਦੇ ਦੁਕ੍ਕਟਨ੍ਤਿ ਅਤ੍ਥੋ. ਏਤ੍ਥ ਚ ‘‘ਥੇਯ੍ਯਚਿਤ੍ਤੋ ਦੁਤਿਯਂ ਵਾ ਪਰਿਯੇਸਤੀ’’ਤਿਆਦਿ ਪਾਲ਼ਿਯਂ (ਪਾਰਾ. ੯੪) ‘‘ਥੇਯ੍ਯਚਿਤ੍ਤੋ’’ਤਿ ਵੁਤ੍ਤਤ੍ਤਾ, ਇਧ ‘‘ਥੇਯ੍ਯਚਿਤ੍ਤੇਨਾ’’ਤਿ ਵਚਨਤੋ ‘‘ਇਮਂ ਨਿਧਿਂ ਲਭਿਤ੍ਵਾ ਬੁਦ੍ਧਪੂਜਂ ਵਾ ਕਰਿਸ੍ਸਾਮਿ, ਸਙ੍ਘਭਤ੍ਤਂ ਵਾ ਕਰਿਸ੍ਸਾਮੀ’’ਤਿ ਏਵਮਾਦਿਨਾ ਨਯੇਨ ਕੁਸਲਚਿਤ੍ਤਪ੍ਪਵਤ੍ਤਿਯਾ ਸਤਿ ਅਨਾਪਤ੍ਤੀਤਿ ਦਟ੍ਠਬ੍ਬਂ. ਪੁਬ੍ਬਯੋਗਤੋਤਿ ਅਦਿਨ੍ਨਾਦਾਨਸ੍ਸ ਪੁਬ੍ਬਪਯੋਗਭਾਵਤੋ, ਦੁਤਿਯਪਰਿਯੇਸਨਾਦੀਸੁ ਪੁਬ੍ਬਪਯੋਗੇਸੁ ਦੁਕ੍ਕਟਨ੍ਤਿ ਅਤ੍ਥੋ.

ਦੁਕ੍ਕਟਞ੍ਚ ਅਟ੍ਠਵਿਧਂ ਹੋਤਿ ਪੁਬ੍ਬਪਯੋਗਦੁਕ੍ਕਟਂ ਸਹਪਯੋਗਦੁਕ੍ਕਟਂ ਅਨਾਮਾਸਦੁਕ੍ਕਟਂ ਦੁਰੁਪਚਿਣ੍ਣਦੁਕ੍ਕਟਂ ਵਿਨਯਦੁਕ੍ਕਟਂ ਞਾਤਦੁਕ੍ਕਟਂ ਞਤ੍ਤਿਦੁਕ੍ਕਟਂ ਪਟਿਸ੍ਸਵਦੁਕ੍ਕਟਨ੍ਤਿ. ਤਤ੍ਥ ‘‘ਥੇਯ੍ਯਚਿਤ੍ਤੋ ਦੁਤਿਯਂ ਵਾ ਕੁਦਾਲਂ ਵਾ ਪਿਟਕਂ ਵਾ ਪਰਿਯੇਸਤਿ ਗਚ੍ਛਤਿ ਵਾ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਵੁਤ੍ਤਂ ਪੁਬ੍ਬਪਯੋਗਦੁਕ੍ਕਟਂ ਨਾਮ. ਇਧ ਪਾਚਿਤ੍ਤਿਯਟ੍ਠਾਨੇ ਪਾਚਿਤ੍ਤਿਯਂ, ਇਤਰੇਸੁ ਪੁਬ੍ਬਪਯੋਗੇਸੁ ਦੁਕ੍ਕਟਂ. ‘‘ਤਤ੍ਥਜਾਤਕਂ ਕਟ੍ਠਂ ਵਾ ਲਤਂ ਵਾ ਛਿਨ੍ਦਤਿ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਵੁਤ੍ਤਂ ਸਹਪਯੋਗਦੁਕ੍ਕਟਂ. ਇਧ ਅਦਿਨ੍ਨਾਦਾਨਸਹਿਤਪਯੋਗਤ੍ਤਾ ਪਾਚਿਤ੍ਤਿਯਵਤ੍ਥੁਮ੍ਹਿ, ਇਤਰਤ੍ਰ ਚ ਦੁਕ੍ਕਟਮੇਵਾਤਿ ਅਯਮੇਤ੍ਥ ਵਿਸੇਸੋ. ਮੁਤ੍ਤਾਮਣਿਆਦੀਸੁ ਦਸਸੁ ਰਤਨੇਸੁ, ਸਾਲਿਆਦੀਸੁ ਸਤ੍ਤਸੁ ਧਞ੍ਞੇਸੁ, ਸਬ੍ਬੇਸੁ ਚ ਆਵੁਧਭਣ੍ਡਾਦੀਸੁ ਆਮਸਨਪਚ੍ਚਯਾ ਦੁਕ੍ਕਟਂ ਅਨਾਮਾਸਦੁਕ੍ਕਟਂ. ਕਦਲਿਨਾਲ਼ਿਕੇਰਪਨਸਾਦਿਰੁਕ੍ਖਟ੍ਠਮੇਵ ਫਲਂ ਆਮਸਨ੍ਤਸ੍ਸ ਵੁਤ੍ਤਂ ਦੁਕ੍ਕਟਂ ਦੁਰੁਪਚਿਣ੍ਣਦੁਕ੍ਕਟਂ. ਉਪਚਰਣਂ ਉਪਚਿਣ੍ਣਂ, ਪਰਾਮਸਨਨ੍ਤਿ ਅਤ੍ਥੋ. ਦੁਟ੍ਠੁ ਉਪਚਿਣ੍ਣਂ ਦੁਰੁਪਚਿਣ੍ਣਂ, ਦੁਰੁਪਚਿਣ੍ਣੇ ਦੁਕ੍ਕਟਂ ਦੁਰੁਪਚਿਣ੍ਣਦੁਕ੍ਕਟਂ. ਭਿਕ੍ਖਾਚਾਰਕਾਲੇ ਪਤ੍ਤੇ ਰਜਸ੍ਮਿਂ ਪਤਿਤੇ ਪਤ੍ਤਂ ਅਪ੍ਪਟਿਗ੍ਗਹੇਤ੍ਵਾ ਵਾ ਅਧੋਵਿਤ੍ਵਾ ਵਾ ਭਿਕ੍ਖਾਪਟਿਗ੍ਗਹਣੇਨ ਦੁਕ੍ਕਟਂ ਵਿਨਯਦੁਕ੍ਕਟਂ, ਵਿਨਯੇ ਪਞ੍ਞਤ੍ਤਂ ਦੁਕ੍ਕਟਂ ਵਿਨਯਦੁਕ੍ਕਟਂ. ਕਿਞ੍ਚਾਪਿ ਅਵਸੇਸਦੁਕ੍ਕਟਾਨਿਪਿ ਵਿਨਯੇ ਪਞ੍ਞਤ੍ਤਾਨੇਵ, ਤਥਾਪਿ ਰੁਲ਼੍ਹਿਯਾ ਮਯੂਰਾਦਿਸਦ੍ਦੇਹਿ ਮੋਰਾਦਯੋ ਵਿਯ ਇਦਮੇਵ ਤਥਾ ਵੁਚ੍ਚਤਿ. ‘‘ਸੁਤ੍ਵਾ ਨ ਵਦਨ੍ਤਿ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਵੁਤ੍ਤਂ ਞਾਤਦੁਕ੍ਕਟਂ ਨਾਮ. ਏਕਾਦਸਸੁ ਸਮਨੁਭਾਸਨਾਸੁ ‘‘ਞਤ੍ਤਿਯਾ ਦੁਕ੍ਕਟ’’ਨ੍ਤਿ ਵੁਤ੍ਤਂ ਞਤ੍ਤਿਦੁਕ੍ਕਟਂ. ‘‘ਤਸ੍ਸ ਭਿਕ੍ਖਵੇ ਭਿਕ੍ਖੁਨੋ ਪੁਰਿਮਿਕਾ ਚ ਨ ਪਞ੍ਞਾਯਤਿ, ਪਟਿਸ੍ਸਵੇ ਚ ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੨੦੭) ਵੁਤ੍ਤਂ ਪਟਿਸ੍ਸਵਦੁਕ੍ਕਟਂ ਨਾਮ. ਇਮੇਸੁ ਅਟ੍ਠਸੁ ਦੁਕ੍ਕਟੇਸੁ ਇਧ ਆਪਜ੍ਜਿਤਬ੍ਬਂ ਦੁਕ੍ਕਟਂ ਪੁਬ੍ਬਪਯੋਗਦੁਕ੍ਕਟਂ ਨਾਮ. ਤੇਨਾਹ ‘‘ਪੁਬ੍ਬਯੋਗਤੋ’’ਤਿ. ਗਾਥਾਬਨ੍ਧਸੁਖਤ੍ਥਂ ਉਪਸਗ੍ਗਂ ਅਨਾਦਿਯਿਤ੍ਵਾ ‘‘ਪੁਬ੍ਬਪਯੋਗਤੋ’’ਤਿ ਵਤ੍ਤਬ੍ਬੇ ‘‘ਪੁਬ੍ਬਯੋਗਤੋ’’ਤਿ ਵੁਤ੍ਤਨ੍ਤਿ ਗਹੇਤਬ੍ਬਂ.

ਏਤ੍ਥ ਚ ਕਿਞ੍ਚਾਪਿ ਇਮੇਸੁ ਦੁਕ੍ਕਟੇਸੁ ਅਸਙ੍ਗਹਿਤਾਨਿ ਉਭਤੋਵਿਭਙ੍ਗਾਗਤਾਨਿ ਦਿਵਾਸੇਯ੍ਯਾਦਿਦੁਕ੍ਕਟਾਨਿ ਚੇਵ ਖਨ੍ਧਕਾਗਤਾਨਿ ਚ ਬਹੂਨਿ ਦੁਕ੍ਕਟਾਨਿ ਸਨ੍ਤਿ, ਤਾਨਿ ਪਨੇਤ੍ਥ ਵਿਨਯਦੁਕ੍ਕਟੇਯੇਵ ਸਙ੍ਗਹਿਤਬ੍ਬਾਨਿ. ‘‘ਵਿਨਯੇ ਪਞ੍ਞਤ੍ਤਂ ਦੁਕ੍ਕਟਂ ਵਿਨਯਦੁਕ੍ਕਟ’’ਨ੍ਤਿ ਹਿ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ੨.੯੪) ਵੁਤ੍ਤਨ੍ਤਿ. ਅਟ੍ਠਕਥਾਯਂ (ਪਾਰਾ. ਅਟ੍ਠ. ੧.੯੪) ਪਨ ਰਜੋਕਿਣ੍ਣਦੁਕ੍ਕਟਸ੍ਸੇਵ ‘‘ਵਿਨਯਦੁਕ੍ਕਟ’’ਨ੍ਤਿ ਗਹਣਂ ਉਪਲਕ੍ਖਣਮਤ੍ਤਂ. ਇਤਰਥਾ ਅਟ੍ਠ ਦੁਕ੍ਕਟਾਨੀਤਿ ਗਣਨਾਪਰਿਚ੍ਛੇਦੋਯੇਵ ਨਿਰਤ੍ਥਕੋ ਸਿਯਾਤਿ ਪੁਬ੍ਬਪਯੋਗੇ ਦੁਕ੍ਕਟਾਦੀਨਮ੍ਪਿ ਵਿਨਯਦੁਕ੍ਕਟੇਯੇਵ ਸਙ੍ਗਹੇਤਬ੍ਬਭਾਵੇਪਿ ਕਤਿਪਯਾਨਿ ਦਸ੍ਸੇਤ੍ਵਾ ਇਤਰੇਸਮੇਕਤੋ ਦਸ੍ਸਨਤ੍ਥਂ ਤੇਸਂ ਵਿਸੁਂ ਗਹਣਂ ਸੁਤ੍ਤਙ੍ਗਸਙ੍ਗਹਿਤਤ੍ਤੇਪਿ ਗੇਯ੍ਯਗਾਥਾਦੀਨਂ ਅਟ੍ਠਨ੍ਨਂ ਵਿਸੁਂ ਦਸ੍ਸਨਂ ਵਿਯਾਤਿ ਵੇਦਿਤਬ੍ਬਂ.

੪੬. ਤਤ੍ਥਜਾਤਕਂ ਕਟ੍ਠਂ ਵਾਤਿ ਤਸ੍ਮਿਂ ਚਿਰਨਿਹਿਤਨਿਧੂਪਰਿ ਜਾਤਂ ਅਲ੍ਲਂ ਸੁਕ੍ਖਂ ਕਟ੍ਠਂ ਵਾ. ਲਤਂ ਵਾਤਿ ਤਾਦਿਸਂ ਵਲ੍ਲਿਂ ਵਾ. ਇਦਂ ਉਪਲਕ੍ਖਣਂ ਤਿਣਾਦੀਨਂ ਖੁਦ੍ਦਕਗਚ੍ਛਾਨਞ੍ਚ ਗਹੇਤਬ੍ਬਤ੍ਤਾ. ਉਭਯਤ੍ਥਾਪੀਤਿ ਅਲ੍ਲੇ ਚ ਸੁਕ੍ਖੇ ਚਾਤਿ ਵੁਤ੍ਤਂ ਹੋਤਿ. ਅਲ੍ਲਰੁਕ੍ਖਾਦੀਨਿ ਛਿਨ੍ਦਤੋ ਪਾਚਿਤ੍ਤਿਯਂ ਅਹੁਤ੍ਵਾ ਦੁਕ੍ਕਟਮਤ੍ਤਸ੍ਸ ਭਵਨੇ ਕਾਰਣਂ ਦਸ੍ਸੇਤਿ ‘‘ਸਹਪਯੋਗਤੋ’’ਤਿ. ਅਵਹਾਰੇਨ ਸਹਿਤਪਯੋਗਤ੍ਤਾ ਪਾਚਿਤ੍ਤਿਯਟ੍ਠਾਨੇਪਿ ਦੁਕ੍ਕਟਮੇਵਾਤਿ ਵੁਤ੍ਤਂ ਹੋਤਿ. ‘‘ਸਹਪਯੋਗਤੋ ਉਭਯਤ੍ਥਾਪਿ ਦੁਕ੍ਕਟ’’ਨ੍ਤਿ ਵਦਨ੍ਤੋ ਪਠਮਗਾਥਾਯ ਦਸ੍ਸਿਤਪੁਬ੍ਬਪਯੋਗਤੋ ਇਮਾਯ ਦਸ੍ਸਿਤਸਹਪਯੋਗਸ੍ਸ ਵਿਸੇਸਂ ਦਸ੍ਸੇਤਿ.

੪੭. ਪਥਵਿਨ੍ਤਿ ਕਪ੍ਪਿਯਂ ਵਾ ਅਕਪ੍ਪਿਯਂ ਵਾ ਪਥਵਿਂ. ਅਕਪ੍ਪਿਯਪਥਵਿਂ ਖਣਤੋ ਸਹਪਯੋਗਤ੍ਤਾ ਦੁਕ੍ਕਟਮੇਵ. ਬ੍ਯੂਹਤੋਤਿ ਪਂਸੁਂ ਏਕਤੋ ਰਾਸਿਂ ਕਰੋਨ੍ਤਸ੍ਸ. ‘‘ਵਿਯੂਹਤਿ ਏਕਪਸ੍ਸੇ ਰਾਸਿਂ ਕਰੋਤੀ’’ਤਿ ਅਟ੍ਠਕਥਾਵਚਨਤੋ ਊਹ-ਇਚ੍ਚੇਤਸ੍ਸ ਧਾਤੁਨੋ ਵਿਤਕ੍ਕੇ ਉਪ੍ਪਨ੍ਨਤ੍ਤੇਪਿ ਧਾਤੂਨਮਨੇਕਤ੍ਥਤ੍ਤਾ ਵਿ-ਉਪਸਗ੍ਗਵਸੇਨ ਇਧ ਰਾਸਿਕਰਣੇ ਵਤ੍ਤਤੀਤਿ ਗਹੇਤਬ੍ਬਂ. ਰਾਸਿਭੂਤਂ ਪਂਸੁਂ ਕੁਦਾਲੇਨ ਵਾ ਹਤ੍ਥੇਨ ਵਾ ਪਚ੍ਛਿਯਾ ਵਾ ਉਦ੍ਧਰਨ੍ਤਸ੍ਸ ਚ ਅਪਨੇਨ੍ਤਸ੍ਸ ਚ ਪਯੋਗਗਣਨਾਯ ਦੁਕ੍ਕਟਂ ਪਂਸੁਮੇਵ ਵਾਤਿ ਏਤ੍ਥ ਅਵੁਤ੍ਤਸਮੁਚ੍ਚਯਤ੍ਥੇਨ ਵਾ-ਸਦ੍ਦੇਨ ਸਙ੍ਗਹਿਤਨ੍ਤਿ ਦਟ੍ਠਬ੍ਬਂ. ਆਮਸਨ੍ਤਸ੍ਸਾਤਿ ਨਿਧਿਕੁਮ੍ਭਿਂ ਹਤ੍ਥੇਨ ਪਰਾਮਸਨ੍ਤਸ੍ਸ. ਵਾਤਿ ਸਮੁਚ੍ਚਯੇ. ਦੁਕ੍ਕਟਨ੍ਤਿ ਦੁਟ੍ਠੁ ਕਤਂ ਕਿਰਿਯਂ ਸਤ੍ਥਾਰਾ ਵੁਤ੍ਤਂ ਵਿਰਾਧੇਤ੍ਵਾ ਖਲਿਤ੍ਵਾ ਕਤਤ੍ਤਾਤਿ ਦੁਕ੍ਕਟਂ. ਵੁਤ੍ਤਞ੍ਚੇਤਂ ਪਰਿਵਾਰੇ (ਪਰਿ. ੩੩੯) –

‘‘ਦੁਕ੍ਕਟਨ੍ਤਿ ਹਿ ਯਂ ਵੁਤ੍ਤਂ, ਤਂ ਸੁਣੋਹਿ ਯਥਾਤਥਂ;

ਅਪਰਦ੍ਧਂ ਵਿਰਦ੍ਧਞ੍ਚ, ਖਲਿਤਂ ਯਞ੍ਚ ਦੁਕ੍ਕਟ’’ਨ੍ਤਿ.

ਦੁਟ੍ਠੁ ਵਾ ਵਿਰੂਪਂ ਕਤਂ ਕਿਰਿਯਾਤਿ ਦੁਕ੍ਕਟਂ. ਵੁਤ੍ਤਮ੍ਪਿ ਚੇਤਂ ਪਰਿਵਾਰੇ (ਪਰਿ. ੩੩੯) –

‘‘ਯਂ ਮਨੁਸ੍ਸੋ ਕਰੇ ਪਾਪਂ, ਆਵਿ ਵਾ ਯਦਿ ਵਾ ਰਹੋ;

‘ਦੁਕ੍ਕਟ’ਨ੍ਤਿ ਪਵੇਦੇਨ੍ਤਿ, ਤੇਨੇਤਂ ਇਤਿ ਵੁਚ੍ਚਤੀ’’ਤਿ.

ਏਵਂ ‘‘ਤਤ੍ਥਜਾਤਕ’’ਨ੍ਤਿਆਦਿਗਾਥਾਦ੍ਵਯਾਗਤਂ ਛੇਦਨਦੁਕ੍ਕਟਂ ਖਣਨਦੁਕ੍ਕਟਂ ਬ੍ਯੂਹਨਦੁਕ੍ਕਟਂ ਉਦ੍ਧਰਣਦੁਕ੍ਕਟਂ ਆਮਸਨਦੁਕ੍ਕਟਨ੍ਤਿ ਪਞ੍ਚਸੁ ਸਹਪਯੋਗਦੁਕ੍ਕਟੇਸੁ ਪੁਰਿਮਪੁਰਿਮਪਯੋਗੇਹਿ ਆਪਨ੍ਨਾ ਦੁਕ੍ਕਟਾਪਤ੍ਤਿਯੋ ਪਚ੍ਛਿਮਂ ਪਚ੍ਛਿਮਂ ਦੁਕ੍ਕਟਂ ਪਤ੍ਵਾ ਪਟਿਪਸ੍ਸਮ੍ਭਨ੍ਤਿ, ਤਂਤਂਪਯੋਗਾਵਸਾਨੇ ਲਜ੍ਜਿਧਮ੍ਮਂ ਓਕ੍ਕਮਿਤ੍ਵਾ ਓਰਮਤਿ ਚੇ, ਤਂਤਂਦੁਕ੍ਕਟਮਤ੍ਤਂ ਦੇਸੇਤ੍ਵਾ ਪਰਿਸੁਦ੍ਧੋ ਹੋਤਿ. ਧੁਰਨਿਕ੍ਖੇਪਮਕਤ੍ਵਾ ਫਨ੍ਦਾਪੇਨ੍ਤਸ੍ਸ ਥੁਲ੍ਲਚ੍ਚਯਂ ਪਤ੍ਵਾ ਆਮਸਨਦੁਕ੍ਕਟਂ ਪਟਿਪਸ੍ਸਮ੍ਭਤੀਤਿ ਮਹਾਅਟ੍ਠਕਥਾਯਂ (ਪਾਰਾ. ਅਟ੍ਠ. ੧.੯੪) ਵੁਤ੍ਤਂ. ਯਥਾਪਾਲ਼ਿਯਾ ਗਯ੍ਹਮਾਨੇ ਪੁਰਿਮਪੁਰਿਮਾਪਤ੍ਤੀਨਂ ਪਟਿਪਸ੍ਸਦ੍ਧਿ ‘‘ਞਤ੍ਤਿਯਾ ਦੁਕ੍ਕਟਂ, ਦ੍ਵੀਹਿ ਕਮ੍ਮਵਾਚਾਹਿ ਥੁਲ੍ਲਚ੍ਚਯਾ ਪਟਿਪਸ੍ਸਮ੍ਭਨ੍ਤੀ’’ਤਿ ਪਾਲ਼ਿਯਂ (ਪਾਰਾ. ੪੧੪, ੪੨੧, ੪੨੮, ੪੩੯) ਆਗਤਤ੍ਤਾ ਅਨੁਸ੍ਸਾਵਨਾਯ ਏਵ ਲਬ੍ਭਤੀਤਿ ਦਟ੍ਠਬ੍ਬਂ. ਇਮਸ੍ਸ ਪਨ ਸੁਤ੍ਤਸ੍ਸ ਅਨੁਲੋਮਵਸੇਨ ਮਹਾਅਟ੍ਠਕਥਾਯਂ ਵੁਤ੍ਤਾ ਇਮਸ੍ਮਿਂ ਅਦਿਨ੍ਨਾਦਾਨਸਿਕ੍ਖਾਪਦੇਪਿ ਆਪਤ੍ਤਿਪਟਿਪਸ੍ਸਦ੍ਧਿ ਪਮਾਣਨ੍ਤਿ ਨਿਟ੍ਠਮੇਤ੍ਥ ਗਨ੍ਤਬ੍ਬਂ.

੪੮. ‘‘ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸਾ’’ਤਿ (ਪਾਰਾ. ੯੪) ਵੁਤ੍ਤਂ ਠਾਨਾਚਾਵਨੇ ਪਾਰਾਜਿਕਞ੍ਚ ਤਸ੍ਸ ਸਾਮਨ੍ਤਾਪਤ੍ਤਿਭੂਤਂ ਥੁਲ੍ਲਚ੍ਚਯਞ੍ਚ ਠਾਨਭੇਦਵਿਞ੍ਞਾਪਨਮੁਖੇਨ ਵਤ੍ਤਬ੍ਬਨ੍ਤਿ ਇਦਾਨਿ ਤਂ ਦਸ੍ਸੇਤੁਮਾਹ ‘‘ਮੁਖੇਪਾਸ’’ਨ੍ਤਿਆਦਿ. ਤਤ੍ਥ ਮੁਖੇ ਕੁਮ੍ਭਿਮੁਖਵਟ੍ਟਿਯਂ. ਪਾਸਂ ਪਵੇਸੇਤ੍ਵਾਤਿ ਬਨ੍ਧਨਂ ਪਾਸਂ ਪਕ੍ਖਿਪਿਤ੍ਵਾ. ਖਾਣੁਕੇਤਿ ਅਯੋਖਾਣੁਮ੍ਹਿ, ਖਦਿਰਖਾਣੁਕੇ ਵਾ. ਬਦ੍ਧਕੁਮ੍ਭਿਯਾ ਠਾਨਭੇਦੋ ਬਨ੍ਧਨਾਨਂ ਵਸਾ ਞੇਯ੍ਯੋਤਿ ਸਮ੍ਬਨ੍ਧੋ.

੪੯. ਇਦਾਨਿ ਠਾਨਭੇਦਂ ਦਸ੍ਸੇਤਿ ‘‘ਦ੍ਵੇ’’ਤਿਆਦਿਨਾ. ‘‘ਏਕਸ੍ਮਿਂ ਖਾਣੁਕੇ’’ਤਿ ਇਮਿਨਾ ਦ੍ਵੀਸੁ ਦਿਸਾਸੁ ਵਾ ਤੀਸੁ ਚਤੂਸੁ ਵਾ ਦਿਸਾਸੁ ਖਾਣੁਕੇ ਖਣਿਤ੍ਵਾ ਬਦ੍ਧਖਾਣੁਗਣਨਾਯ ਸਮ੍ਭਵਨ੍ਤੋ ਠਾਨਭੇਦੋ ਉਪਲਕ੍ਖਿਤੋ ਹੋਤਿ. ਵਲਯਂ…ਪੇ… ਕਤਾਯ ਵਾ ਦ੍ਵੇ ਠਾਨਾਨੀਤਿ ਯੋਜਨਾ. ਵਾਤਿ ਸਮੁਚ੍ਚਯੇ ਉਪਲਕ੍ਖਿਤੋ ਹੋਤਿ.

੫੦. ਏਵਂ ਠਾਨਭੇਦਂ ਦਸ੍ਸੇਤ੍ਵਾ ਇਦਾਨਿ ਠਾਨਵਸੇਨ ਆਪਜ੍ਜਿਤਬ੍ਬਾ ਆਪਤ੍ਤਿਯੋ ਦਸ੍ਸੇਤੁਮਾਹ ‘‘ਉਦ੍ਧਰਨ੍ਤਸ੍ਸਾ’’ਤਿਆਦਿ. ਸਙ੍ਖਲਿਨ੍ਤਿ ਦਾਮਂ. ਥੁਲ੍ਲਚ੍ਚਯਨ੍ਤਿ ਏਕਸ੍ਸ ਸਨ੍ਤਿਕੇ ਦੇਸੇਤਬ੍ਬਾਸੁ ਆਪਤ੍ਤੀਸੁ ਥੂਲਤ੍ਤਾ, ਅਚ੍ਚਯਤ੍ਤਾ ਚ ਥੁਲ੍ਲਚ੍ਚਯਂ ਨਾਮ. ਵੁਤ੍ਤਞ੍ਹੇਤਂ ਪਰਿਵਾਰੇ –

‘‘ਥੁਲ੍ਲਚ੍ਚਯਨ੍ਤਿ ਯਂ ਵੁਤ੍ਤਂ;

ਤਂ ਸੁਣੋਹਿ ਯਥਾਤਥਂ;

ਏਕਸ੍ਸ ਮੂਲੇ ਯੋ ਦੇਸੇਤਿ;

ਯੋ ਚ ਤਂ ਪਟਿਗਣ੍ਹਤਿ;

ਅਚ੍ਚਯੋ ਤੇਨ ਸਮੋ ਨਤ੍ਥਿ;

ਤੇਨੇਤਂ ਇਤਿ ਵੁਚ੍ਚਤੀ’’ਤਿ. (ਪਰਿ. ੩੩੯);

ਏਤ੍ਥ ਚ ਥੂਲਚ੍ਚਯਨ੍ਤਿ ਵਤ੍ਤਬ੍ਬੇ ‘‘ਸਮ੍ਪਰਾਯੇ ਚ (ਸਂ. ਨਿ. ੧.੪੯) ਸੁਗ੍ਗਤਿ, ਤਂ ਹੋਤਿ ਕਟੁਕਪ੍ਫਲ’’ਨ੍ਤਿਆਦੀਸੁ (ਧ. ਪ. ੬੬) ਵਿਯ ਲਕਾਰਸ੍ਸ ਦ੍ਵਿਤ੍ਤਂ, ਸਂਯੋਗੇ ਊਕਾਰਸ੍ਸ ਰਸ੍ਸੋ ਚ ਵੇਦਿਤਬ੍ਬੋ. ਤਤੋ ਸਙ੍ਖਲਿਕਭੇਦਤੋ ਪਰਂ. ਠਾਨਾ ਚਾਵੇਤੀਤਿ ਠਿਤਟ੍ਠਾਨਤੋ ਕੇਸਗ੍ਗਮਤ੍ਤਮ੍ਪਿ ਅਪਨੇਤਿ. ਏਤ੍ਥ ਚ ਨਾਵਟ੍ਠਕਥਾਯਂ ‘‘ਉਦ੍ਧਂ ਵਾ ਅਧੋ ਵਾ ਤਿਰਿਯਂ ਵਾ ਅਨ੍ਤਮਸੋ ਕੇਸਗ੍ਗਮਤ੍ਤਮ੍ਪਿ ਸਙ੍ਕਾਮੇਤਿ, ਆਪਤ੍ਤਿ ਪਾਰਾਜਿਕਸ੍ਸਾ’’ਤਿ (ਪਾਰਾ. ੯੯) ਵੁਤ੍ਤਨਯੇਨ ‘‘ਤਿਰਿਯ’’ਨ੍ਤਿ ਵੁਤ੍ਤਾ ਚਤਸ੍ਸੋ ਦਿਸਾ, ਉਦ੍ਧਮਧੋ ਚਾਤਿ ਛਟ੍ਠਾਨਾਨਿ. ਤਾਸੁ ਏਕਂ ਦਿਸਂ ਅਪਨੀਯਮਾਨਾਯ ਕੁਮ੍ਭਿਯਾ ਤਂਦਿਸਾਭਿਮੁਖਂ ਇਤਰਦਿਸਾਯਂ ਠਿਤਪਸ੍ਸੇ ਓਰਿਮਦਿਸਾਯ ਠਿਤਪਸ੍ਸੇਨ ਫੁਟ੍ਠੋਕਾਸਸ੍ਸ ਕੇਸਗ੍ਗਮਤ੍ਤਮ੍ਪਿ ਅਨਤਿਕ੍ਕਨ੍ਤੇ ਫਨ੍ਦਾਪਨਵਸੇਨ ਥੁਲ੍ਲਚ੍ਚਯਂ ਹੋਤਿ, ਅਤਿਕ੍ਕਨ੍ਤੇ ਠਾਨਾ ਚਾਵਿਤਤ੍ਤਾ ਪਾਰਾਜਿਕਂ ਹੋਤੀਤਿ ਵੇਦਿਤਬ੍ਬੋ. ਇਮਮੇਵ ਸਨ੍ਧਾਯਾਹ ‘‘ਠਾਨਾ ਚਾਵੇਤਿ ਚੇ ਚੁਤੋ’’ਤਿ. ਏਸੇਵ ਨਯੋ ਫਨ੍ਦਨਰਹਿਤਾਯ ਨਿਧਿਕੁਮ੍ਭਿਯਾ ਠਾਨਾਚਾਵਨੇਪਿ.

੫੧. ਏਵਂ ਪਠਮਂ ਬਨ੍ਧਨਂ ਛਿਨ੍ਦਿਤ੍ਵਾ ਪਚ੍ਛਾ ਕੁਮ੍ਭਿਗ੍ਗਹਣੇ ਨਯਂ ਦਸ੍ਸੇਤ੍ਵਾ ਇਦਾਨਿ ਪਠਮਂ ਕੁਮ੍ਭਿਂ ਅਪਨੇਤ੍ਵਾ ਪਚ੍ਛਾ ਬਨ੍ਧਨਾਪਨਯਨੇ ਨਯਂ ਦਸ੍ਸੇਤੁਮਾਹ ‘‘ਪਠਮ’’ਨ੍ਤਿਆਦਿ. ਸੋ ਨਯੋਤਿ ‘‘ਪਠਮੁਦ੍ਧਾਰੇ ਥੁਲ੍ਲਚ੍ਚਯਂ, ਦੁਤਿਯੁਦ੍ਧਾਰੇ ਪਾਰਾਜਿਕ’’ਨ੍ਤਿ ਤਮੇਵਤ੍ਥਮਤਿਦਿਸਤਿ.

੫੨. ਵਲਯਨ੍ਤਿ ਕੁਮ੍ਭਿਯਾ ਬਦ੍ਧਸਙ੍ਖਲਿਕਾਯ ਮੂਲੇ ਪਵੇਸਿਤਂ ਵਲਯਂ. ਮੂਲੇ ਘਂਸਨ੍ਤੋ ਇਤੋ ਚਿਤੋ ਚ ਸਾਰੇਤੀਤਿ ਯੋਜਨਾ. ਘਂਸਨ੍ਤੋਤਿ ਫੁਸਾਪੇਨ੍ਤੋ. ਇਤੋ ਚਿਤੋ ਚ ਸਾਰੇਤੀਤਿ ਓਰਤੋ ਚ ਪਾਰਤੋ ਚ ਸਞ੍ਚਾਲੇਤਿ. ਰਕ੍ਖਤੀਤਿ ਏਤ੍ਥ ‘‘ਸੀਲਂ ਭਿਕ੍ਖੁ’’ਨ੍ਤਿ ਪਾਠਸੇਸੋ, ਪਾਰਾਜਿਕਂ ਨਾਪਜ੍ਜਤੀਤਿ ਵੁਤ੍ਤਂ ਹੋਤਿ. ਤਤ੍ਥਾਤਿ ਤਸ੍ਮਿਂ ਮੂਲੇ. ਖੇਗਤਂ ਕਰੋਨ੍ਤੋਵਾਤਿ ਸਬ੍ਬਪਸ੍ਸਤੋ ਮੂਲਂ ਅਫੁਸਾਪੇਤ੍ਵਾ ਆਕਾਸਗਤਂ ਕਰੋਨ੍ਤੋਵ. ਪਰਾਜਿਤੋਤਿ ਠਾਨਾਚਾਵਨਸ੍ਸ ਕਤਤ੍ਤਾ ਪਰਾਜਯਮਾਪਨ੍ਨੋ ਹੋਤਿ.

੫੩. ਕੁਮ੍ਭਿਮਤ੍ਥਕੇ ਜਾਤਨ੍ਤਿ ਯੋਜਨਾ. ਚਿਰਕਾਲਂ ਨਿਹਿਤਤ੍ਤਾ ਮੂਲੇਹਿ ਕੁਮ੍ਭਿਂ ਵਿਨਨ੍ਧਿਤ੍ਵਾ ਠਿਤਨ੍ਤਿ ਅਤ੍ਥੋ. ਸਮੀਪੇ ਜਾਤਂ ਰੁਕ੍ਖਂ ਛਿਨ੍ਦਤੋਤਿ ਯੋਜਨਾ. ਏਤ੍ਥ ਚ ‘‘ਤਤ੍ਥਜਾਤਕਂ ਕਟ੍ਠਂ ਵਾ’’ਤਿਆਦਿਕਾਯ ਗਾਥਾਯ ਨਿਧਿਮਤ੍ਥਕੇ ਭੂਮਿਯਂ ਠਿਤਰੁਕ੍ਖਲਤਾਦਿਂ ਛਿਨ੍ਦਨ੍ਤਸ੍ਸ ਆਪਤ੍ਤਿ ਵੁਤ੍ਤਾ, ਇਮਾਯ ਪਨ ਗਾਥਾਯ ਭੂਮਿਂ ਨਿਖਣਿਤ੍ਵਾ ਓਤਿਣ੍ਣਕਾਲੇ ਨਿਧਿਂ ਵਿਨਨ੍ਧਿਤ੍ਵਾ ਠਿਤਮੂਲਂ ਅਲ੍ਲਰੁਕ੍ਖਂ, ਖਾਣੁਕਂ ਵਾ ਗਹੇਤ੍ਵਾ ਆਹਾਤਿ ਪੁਨਰੁਤ੍ਤਿਦੋਸਾਭਾਵੋ ਵੇਦਿਤਬ੍ਬੋ. ‘‘ਅਤਤ੍ਥਜ’’ਨ੍ਤਿ ਇਮਿਨਾ ਸਹਪਯੋਗਾਭਾਵਮਾਹ. ਇਮਿਨਾਵ ਪੁਰਿਮਗਾਥਾਯ ਵੁਤ੍ਤਂ ਕਟ੍ਠਲਤਾਦੀਨਿ ਨਿਧਿਸਮ੍ਬਨ੍ਧਾਨਿ ਚੇ, ਯਥਾਵੁਤ੍ਤਦੁਕ੍ਕਟਸ੍ਸ ਵਤ੍ਥੂਨਿ, ਸਮੀਪਾਨਿ ਚੇ, ਪਾਚਿਤ੍ਤਿਯਸ੍ਸੇਵ ਵਤ੍ਥੂਨੀਤਿ ਦੀਪੇਤਿ.

੫੪. ਇਦਾਨਿ ਏਵਂ ਪਰਿਯੇਸਿਤ੍ਵਾ ਦਿਟ੍ਠਨਿਧਿਭਾਜਨਂ ਠਿਤਟ੍ਠਾਨਤੋ ਅਚਾਲੇਤ੍ਵਾ ਅਨ੍ਤੋਠਿਤਂ ਭਣ੍ਡਮਤ੍ਤਂ ਗਣ੍ਹਤੋ ਵਿਨਿਚ੍ਛਯਂ ਦਸ੍ਸੇਤੁਮਾਹ ‘‘ਅਨ੍ਤੋਕੁਮ੍ਭਿਗਤ’’ਨ੍ਤਿਆਦਿ. ਤਤ੍ਥ ਫਨ੍ਦਾਪੇਤੀਤਿ ਅਨ੍ਤੋਚਾਟਿਯਾ ਪਕ੍ਖਿਤ੍ਤੇ ਅਤ੍ਤਨੋ ਭਾਜਨੇ ਪਕ੍ਖਿਪਿਤੁਂ ਰਾਸਿਕਰਣਾਦਿਵਸੇਨ ਫਨ੍ਦਾਪੇਤਿ. ਅਪਬ੍ਯੂਹਤਿ ਵਾਤਿ ਹੇਟ੍ਠਾ ਠਿਤਂ ਗਣ੍ਹਿਤੁਂ ਉਪਰਿ ਠਿਤਾਨਿ ਅਪਨੇਨ੍ਤੋ ਵਿਯੂਹਤਿ ਵਾ. ਅਥ ਵਾ ਅਪਬ੍ਯੂਹਨ੍ਤੋਤਿ (ਪਾਰਾ. ਅਟ੍ਠ. ੧.੯੪) ਅਟ੍ਠਕਥਾਵਚਨਸ੍ਸ ਦ੍ਵਿਧਾ ਕਰੋਨ੍ਤੋਤਿ ਗਣ੍ਠਿਪਦੇ ਅਤ੍ਥੋ ਵੁਤ੍ਤੋਤਿ ਅਤ੍ਤਨੋ ਭਾਜਨੇ ਪਕ੍ਖਿਪਿਤੁਂ ਇਤੋ ਚਿਤੋ ਚ ਰਾਸਿਂ ਕਰੋਨ੍ਤੋਤਿ ਅਤ੍ਥੋ ਵੇਦਿਤਬ੍ਬੋ. ਤਤ੍ਥੇਵਾਤਿ ਅਨ੍ਤੋਕੁਮ੍ਭਿਯਮੇਵ.