ਅਨ੍ਤਰਪੇਯ੍ਯਾਲਂ

ਕਤਿਪੁਚ੍ਛਾਵਾਰਵਣ੍ਣਨਾ

੨੭੧. ਕਤਿ ਆਪਤ੍ਤਿਯੋਤਿ ਪਾਰਾਜਿਕਾਦੀਸੁ ਪਞ੍ਚਸੁ ਆਪਤ੍ਤੀਸੁ ਮੇਥੁਨਾਦਿਨ੍ਨਾਦਾਨਾਦਿਅਨ੍ਤੋਗਧਭੇਦਂ ਅਪੇਕ੍ਖਿਤ੍ਵਾ ਜਾਤਿਵਸੇਨ ਏਕਤ੍ਤਂ ਆਰੋਪੇਤ੍ਵਾ ਪੁਚ੍ਛਾ ਕਤਾ. ਕਤਿ ਆਪਤ੍ਤਿਕ੍ਖਨ੍ਧਾਤਿ ਅਨ੍ਤੋਗਧਭੇਦਂ ਅਪੇਕ੍ਖਿਤ੍ਵਾ ਪਚ੍ਚੇਕਂ ਰਾਸਟ੍ਠੇਨਾਤਿ ਏਤ੍ਤਕਮੇਵੇਤ੍ਥ ਭੇਦੋ. ਵਿਨੀਤਾਨਿਯੇਵ ਵਿਨੀਤਵਤ੍ਥੂਨੀਤਿ ਆਪਤ੍ਤਿਤੋ ਵਿਰਮਣਾਨਿ ਏਵ ਅਵਿਪ੍ਪਟਿਸਾਰਪਾਮੋਜ੍ਜਾਦਿਧਮ੍ਮਾਨਂ ਕਾਰਣਤ੍ਤਾ ਵਤ੍ਥੂਨੀਤਿ ਵਿਨੀਤਵਤ੍ਥੂਨਿ, ਤਾਨਿ ਏਤ੍ਥ ਅਤ੍ਥਤੋ ਵਿਰਤਿਆਦਿਅਨਵਜ੍ਜਧਮ੍ਮਾ ਏਵ. ਵੇਰਂ ਮਣਤੀਤਿ ਵੇਰਹੇਤੁਤ੍ਤਾ ‘‘ਵੇਰ’’ਨ੍ਤਿ ਲਦ੍ਧਨਾਮਂ ਰਾਗਾਦਿਅਕੁਸਲਪਕ੍ਖਂ ਵਿਨਾਸੇਤਿ.

ਧਮ੍ਮਸ੍ਸਵਨਗ੍ਗਂ ਭਿਨ੍ਦਿਤ੍ਵਾ ਗਚ੍ਛਤੀਤਿ ਬਹੂਸੁ ਏਕਤੋ ਨਿਸੀਦਿਤ੍ਵਾ ਧਮ੍ਮਂ ਸੁਣਨ੍ਤੇਸੁ ਤਂ ਧਮ੍ਮਸ੍ਸਵਨਸਮਾਗਮਂ ਕੋਪੇਤ੍ਵਾ ਉਟ੍ਠਾਯ ਗਚ੍ਛਤਿ. ਅਨਾਦਰੋਵਾਤਿ ਤੁਸ੍ਸਿਤਬ੍ਬਟ੍ਠਾਨੇ ਤੁਟ੍ਠਿਂ, ਸਂਵਿਜਿਤਬ੍ਬਟ੍ਠਾਨੇ ਸਂਵੇਗਞ੍ਚ ਅਪਵੇਦੇਨ੍ਤੋ ਏਵ. ਕਾਯਪਾਗਬ੍ਭਿਯਨ੍ਤਿ ਉਨ੍ਨਤਿਵਸੇਨ ਪਵਤ੍ਤਨਕਾਯਾਨਾਚਾਰਂ.

੨੭੪. ਮੇਤ੍ਤਾਯ ਸਮ੍ਭੂਤਂ ਮੇਤ੍ਤਂ, ਕਾਯਕਮ੍ਮਂ. ਉਭਯੇਹਿਪੀਤਿ ਨਵਕੇਹਿ, ਥੇਰੇਹਿ ਚ. ਪਿਯਂ ਕਰੋਤੀਤਿ ਤਂ ਪੁਗ੍ਗਲਂ ਪੇਮਟ੍ਠਾਨਂ ਕਰੋਤਿ, ਕੇਸਨ੍ਤਿ ਆਹ ‘‘ਸਬ੍ਰਹ੍ਮਚਾਰੀਨ’’ਨ੍ਤਿ.

ਪੁਗ੍ਗਲਂ ਪਟਿਵਿਭਜਿਤ੍ਵਾ ਭੁਞ੍ਜਤੀਤਿ ਪਕਤੇਨ ਸਮ੍ਬਨ੍ਧੋ. ਤਮੇਵ ਪੁਗ੍ਗਲਪਟਿਵਿਭਾਗਂ ਦਸ੍ਸੇਤੁਂ ‘‘ਅਸੁਕਸ੍ਸਾ’’ਤਿਆਦਿ ਵੁਤ੍ਤਂ.

ਭੁਜਿਸ੍ਸਭਾਵਕਰਣਤੋਤਿ ਤਣ੍ਹਾਦਾਸਬ੍ਯਤੋ ਮੋਚੇਤ੍ਵਾ ਸਮਥਵਿਪਸ੍ਸਨਾਸੁ ਸੇਰਿਵਿਹਾਰਿਤਾਕਰਣਤੋਤਿ ਅਤ੍ਥੋ. ਨਿਯ੍ਯਾਤੀਤਿ ਪਵਤ੍ਤਤਿ. ਸਮ੍ਮਾਦੁਕ੍ਖਕ੍ਖਯਾਯ ਸਂਵਤ੍ਤਤੀਤਿ ਅਤ੍ਥੋ.

ਕਤਿਪੁਚ੍ਛਾਵਾਰਵਣ੍ਣਨਾ ਨਿਟ੍ਠਿਤਾ.

ਛਆਪਤ੍ਤਿਸਮੁਟ੍ਠਾਨਵਾਰਵਣ੍ਣਨਾ

੨੭੬. ਪਠਮੇਨ ਆਪਤ੍ਤਿਸਮੁਟ੍ਠਾਨੇਨਾਤਿ ਕੇਵਲਂ ਕਾਯੇਨ. ਪਾਰਾਜਿਕਾਪਤ੍ਤਿਯਾ ਏਕਨ੍ਤਸਚਿਤ੍ਤਕਸਮੁਟ੍ਠਾਨਤ੍ਤਾ ‘‘ਨ ਹੀਤਿ ਵਤ੍ਤਬ੍ਬ’’ਨ੍ਤਿ ਵੁਤ੍ਤਂ. ਸਙ੍ਘਾਦਿਸੇਸਾਦੀਨਂ ਦੁਕ੍ਕਟਪਰਿਯੋਸਾਨਾਨਂ ਪਞ੍ਚਨ੍ਨਂ ਅਚਿਤ੍ਤਕਾਨਮ੍ਪਿ ਸਮ੍ਭਵਤੋ ‘‘ਸਿਯਾ’’ਤਿ ਵੁਤ੍ਤਂ, ਆਪਜ੍ਜਨਂ ਸਿਯਾ ਭਵੇਯ੍ਯਾਤਿ ਅਤ੍ਥੋ. ਹੀਨੁਕ੍ਕਟ੍ਠੇਹਿ ਜਾਤਿਆਦੀਹਿ ਓਮਸਨੇ ਏਵ ਦੁਬ੍ਭਾਸਿਤਸ੍ਸ ਪਞ੍ਞਤ੍ਤਤ੍ਤਾ ਸਾ ਏਕਨ੍ਤਵਾਚਾਚਿਤ੍ਤਸਮੁਟ੍ਠਾਨਾ ਏਵਾਤਿ.

ਦੁਤਿਯਸਮੁਟ੍ਠਾਨਨਯੇ ਵਾਚਾਯ ਏਵ ਸਮਾਪਜ੍ਜਿਤਬ੍ਬਪਾਟਿਦੇਸਨੀਯਸ੍ਸ ਅਭਾਵਾ ‘‘ਨ ਹੀ’’ਤਿ ਵੁਤ੍ਤਂ.

ਤਤਿਯੇ ਪਨ ਵੋਸਾਸਮਾਨਰੂਪਂ ਭਿਕ੍ਖੁਨਿਂ ਕਾਯਵਾਚਾਹਿ ਅਨਪਸਾਦਨਪਚ੍ਚਯਾ ਪਾਟਿਦੇਸਨੀਯਸਮ੍ਭਵਤੋ ‘‘ਸਿਯਾ’’ਤਿ ਵੁਤ੍ਤਂ.

ਓਮਸਨੇ ਪਾਚਿਤ੍ਤਿਯਸ੍ਸ ਅਦਿਨ੍ਨਾਦਾਨਸਮੁਟ੍ਠਾਨਤ੍ਤੇਪਿ ਤਪ੍ਪਚ੍ਚਯਾ ਪਞ੍ਞਤ੍ਤਸ੍ਸ ਦੁਬ੍ਭਾਸਿਤਸ੍ਸ ਪਞ੍ਚਮੇਨੇਵ ਸਮੁਪ੍ਪਤ੍ਤੀਤਿ ਦਸ੍ਸੇਤੁਂ ਚਤੁਤ੍ਥਵਾਰੇ ‘‘ਦੁਬ੍ਭਾਸਿਤਂ ਆਪਜ੍ਜੇਯ੍ਯਾਤਿ ਨ ਹੀਤਿ ਵਤ੍ਤਬ੍ਬ’’ਨ੍ਤਿ ਵਤ੍ਵਾ ਪਞ੍ਚਮਵਾਰੇ ‘‘ਸਿਯਾਤਿ ਵਤ੍ਤਬ੍ਬ’’ਨ੍ਤਿ ਵੁਤ੍ਤਂ. ਕਾਯਵਿਕਾਰੇਨੇਵ ਓਮਸਨ੍ਤਸ੍ਸ ਪਨੇਤ੍ਥ ਦੁਬ੍ਭਾਸਿਤਭਾਵੇਪਿ ਕਾਯਕੀਲ਼ਾਭਾਵਾਭਾਵਤੋ ਦੁਕ੍ਕਟਮੇਵਾਤਿ ਦਟ੍ਠਬ੍ਬਂ.

ਛਟ੍ਠਵਾਰੇ ਪਨ ਵਿਜ੍ਜਮਾਨੋਪਿ ਕਾਯੋ ਦੁਬ੍ਭਾਸਿਤਸ੍ਸ ਅਙ੍ਗਂ ਨ ਹੋਤਿ, ਪਞ੍ਚਮਸਮੁਟ੍ਠਾਨੇ ਏਵ ਛਟ੍ਠਮ੍ਪਿ ਪਵਿਸਤੀਤਿ ਦਸ੍ਸੇਤੁਂ ‘‘ਨ ਹੀ’’ਤਿ ਪਟਿਕ੍ਖਿਤ੍ਤਂ, ਨ ਪਨ ਤਤ੍ਥ ਸਬ੍ਬਥਾ ਦੁਬ੍ਭਾਸਿਤੇਨ ਅਨਾਪਤ੍ਤੀਤਿ ਦਸ੍ਸੇਤੁਂ. ਨ ਹਿ ਦਵਕਮ੍ਯਤਾਯ ਕਾਯਵਾਚਾਹਿ ਓਮਸਨ੍ਤਸ੍ਸ ਦੁਬ੍ਭਾਸਿਤਾਪਤ੍ਤਿ ਨ ਸਮ੍ਭਵਤਿ. ਯਞ੍ਹਿ ਪਞ੍ਚਮੇਨੇਵ ਸਮਾਪਜ੍ਜਤਿ, ਤਂ ਛਟ੍ਠੇਨਪਿ ਸਮਾਪਜ੍ਜਤਿ ਏਵ ਧਮ੍ਮਦੇਸਨਾਪਤ੍ਤਿ ਵਿਯਾਤਿ ਗਹੇਤਬ੍ਬਂ. ਸੇਸਂ ਸਮੁਟ੍ਠਾਨਵਾਰੇ ਸੁਵਿਞ੍ਞੇਯ੍ਯਮੇਵ.

ਛਆਪਤ੍ਤਿਸਮੁਟ੍ਠਾਨਵਾਰਵਣ੍ਣਨਾ ਨਿਟ੍ਠਿਤਾ.

ਕਤਾਪਤ੍ਤਿਵਾਰਵਣ੍ਣਨਾ

੨੭੭. ਦੁਤਿਯੇ ਪਨ ਕਤਿਵਾਰੇ ਪਠਮਸਮੁਟ੍ਠਾਨੇਨ ਆਪਜ੍ਜਿਤਬ੍ਬਾਨਂ ਆਪਤ੍ਤੀਨਂ ਲਹੁਦਸ੍ਸਨਸੁਖਤ੍ਥਂ ਕੁਟਿਕਾਰਾਦੀਨਿ ਏਵ ਸਮੁਦ੍ਧਟਾਨਿ, ਨ ਅਞ੍ਞੇਸਂ ਅਭਾਵਾ, ਸਞ੍ਚਰਿਤ੍ਤਾਦੀਨਮ੍ਪਿ ਵਿਜ੍ਜਮਾਨਤ੍ਤਾ. ਏਵਂ ਦੁਤਿਯਸਮੁਟ੍ਠਾਨਾਦੀਸੁਪਿ. ‘‘ਕਪ੍ਪਿਯਸਞ੍ਞੀ’’ਤਿ ਇਮਿਨਾ ਅਚਿਤ੍ਤਕਤ੍ਤਂ ਦਸ੍ਸੇਤਿ. ‘‘ਕੁਟਿਂ ਕਰੋਤੀ’’ਤਿ ਇਮਿਨਾ ਵਚੀਪਯੋਗਾਭਾਵਂ. ਉਭਯੇਨਾਪਿ ਕੇਵਲਂ ਕਾਯੇਨੇਵ ਦੁਕ੍ਕਟਾਦੀਨਂ ਸਮ੍ਭਵਂ ਦਸ੍ਸੇਤਿ. ਏਵਂ ਉਪਰਿਪਿ ਯਥਾਨੁਰੂਪਂ ਕਾਤਬ੍ਬਂ.

‘‘ਏਕੇਨ ਸਮੁਟ੍ਠਾਨੇਨ ਸਮੁਟ੍ਠਹਨ੍ਤੀ’’ਤਿ ਇਦਂ ਇਧ ਵਿਸੇਸੇਤ੍ਵਾ ਦਸ੍ਸਿਤਾਨਂ ਕਾਯਤੋਵ ਸਮੁਟ੍ਠਿਤਾਨਂ ਵਸੇਨ ਵੁਤ੍ਤਂ, ਅਵਿਸੇਸਤੋ ਪਨ ਤਾ ਆਪਤ੍ਤਿਯੋ ਇਤਰਸਮੁਟ੍ਠਾਨੇਹਿਪਿ ਯਥਾਰਹਂ ਸਮੁਟ੍ਠਹਨ੍ਤਿ ਏਵ. ਏਵਂ ਉਪਰਿਪਿ.

‘‘ਤਿਣਵਤ੍ਥਾਰਕੇਨ ਚਾ’’ਤਿ ਇਦਂ ਸਙ੍ਘਾਦਿਸੇਸਵਜ੍ਜਿਤਾਨਂ ਚਤੁਨ੍ਨਂ ਆਪਤ੍ਤੀਨਂ ਵਸੇਨ ਵੁਤ੍ਤਂ.

੨੭੯. ਸਂਵਿਦਹਿਤ੍ਵਾ ਕੁਟਿਂ ਕਰੋਤੀਤਿ ਵਾਚਾਯ ਸਂਵਿਦਹਤਿ, ਸਯਞ੍ਚ ਕਾਯੇਨ ਕਰੋਤੀਤਿ ਅਤ੍ਥੋ.

ਕਤਾਪਤ੍ਤਿਵਾਰਵਣ੍ਣਨਾ ਨਿਟ੍ਠਿਤਾ.

ਆਪਤ੍ਤਿਸਮੁਟ੍ਠਾਨਗਾਥਾਵਣ੍ਣਨਾ

੨੮੩. ਤਤਿਯੋ ਪਨ ਗਾਥਾਵਾਰੋ ਦੁਤਿਯਵਾਰੇਨ ਵੁਤ੍ਤਮੇਵਤ੍ਥਂ ਸਙ੍ਗਹੇਤ੍ਵਾ ਦਸ੍ਸੇਤੁਂ ਵੁਤ੍ਤੋ. ਤਤ੍ਥ ਕਾਯੋਵ ਕਾਯਿਕੋਤਿ ਵਤ੍ਤਬ੍ਬੇ ਵਚਨਵਿਪਲ੍ਲਾਸੇਨ ‘‘ਕਾਯਿਕਾ’’ਤਿ ਵੁਤ੍ਤਂ. ਤੇਨਾਹ ‘‘ਤੇਨ ਸਮੁਟ੍ਠਿਤਾ’’ਤਿ, ਕਾਯੋ ਸਮੁਟ੍ਠਾਨਂ ਅਕ੍ਖਾਤੋਤਿ ਅਤ੍ਥੋ.

ਵਿਵੇਕਦਸ੍ਸਿਨਾਤਿ ਸਬ੍ਬਸਙ੍ਖਤਵਿਵਿਤ੍ਤਤ੍ਤਾ, ਤਤੋ ਵਿਵਿਤ੍ਤਹੇਤੁਤ੍ਤਾ ਚ ਨੀਵਰਣਵਿਵੇਕਞ੍ਚ ਨਿਬ੍ਬਾਨਞ੍ਚ ਦਸ੍ਸਨਸੀਲੇਨ. ਵਿਭਙ੍ਗਕੋਵਿਦਾਤਿ ਉਭਤੋਵਿਭਙ੍ਗਕੁਸਲਾਤਿ ਆਲਪਨਂ. ਇਧ ਪਨੇਵਂ ਅਞ੍ਞੋ ਪੁਚ੍ਛਨ੍ਤੋ ਨਾਮ ਨਤ੍ਥਿ, ਉਪਾਲਿਤ੍ਥੇਰੋ ਸਯਮੇਵ ਅਤ੍ਥਂ ਪਾਕਟਂ ਕਾਤੁਂ ਪੁਚ੍ਛਾਵਿਸਜ੍ਜਨਞ੍ਚ ਅਕਾਸੀਤਿ ਇਮਿਨਾ ਨਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ.

ਆਪਤ੍ਤਿਸਮੁਟ੍ਠਾਨਗਾਥਾਵਣ੍ਣਨਾ ਨਿਟ੍ਠਿਤਾ.

ਵਿਪਤ੍ਤਿਪਚ੍ਚਯਵਾਰਵਣ੍ਣਨਾ

੨੮੪. ਚਤੁਤ੍ਥੇ ਪਨ ਵਿਪਤ੍ਤਿਪਚ੍ਚਯਵਾਰੇ ਸੀਲਵਿਪਤ੍ਤਿਪਚ੍ਚਯਾਤਿ ਸੀਲਵਿਪਤ੍ਤਿਪਅਚ੍ਛਾਦਨਪਚ੍ਚਯਾ.

੨੮੬. ਦਿਟ੍ਠਿਵਿਪਤ੍ਤਿਪਚ੍ਚਯਾਤਿ ਦਿਟ੍ਠਿਵਿਪਤ੍ਤਿਯਾ ਅਪ੍ਪਟਿਨਿਸ੍ਸਜ੍ਜਨਪਚ੍ਚਯਾ.

੨੮੭. ਆਜੀਵਵਿਪਤ੍ਤਿਪਚ੍ਚਯਾਤਿ ਏਤ੍ਥ ਆਗਮ੍ਮ ਜੀਵਨ੍ਤਿ ਏਤੇਨਾਤਿ ਆਜੀਵੋ, ਚਤੁਪਚ੍ਚਯੋ, ਸੋਵ ਮਿਚ੍ਛਾਪਤ੍ਤਿਯਾ ਵਿਪਨ੍ਨਤ੍ਤਾ ਵਿਪਤ੍ਤੀਤਿ ਆਜੀਵਵਿਪਤ੍ਤਿ, ਤਸ੍ਸਾ ਆਜੀਵਵਿਪਤ੍ਤਿਯਾ ਹੇਤੁ, ਤਦੁਪ੍ਪਾਦਨਤਪਰਿਭੋਗਨਿਮਿਤ੍ਤਨ੍ਤਿ ਅਤ੍ਥੋ.

ਵਿਪਤ੍ਤਿਪਚ੍ਚਯਵਾਰਵਣ੍ਣਨਾ ਨਿਟ੍ਠਿਤਾ.

ਅਧਿਕਰਣਪਚ੍ਚਯਵਾਰਵਣ੍ਣਨਾ

੨੯੧. ਪਞ੍ਚਮੇ ਅਧਿਕਰਣਪਚ੍ਚਯਵਾਰੇ ਕਿਚ੍ਚਾਧਿਕਰਣਪਚ੍ਚਯਾਤਿ ਅਪਲੋਕਨਵਚਨਞਤ੍ਤਿਕਮ੍ਮਵਾਚਾਸਙ੍ਖਤਕਮ੍ਮਵਾਚਾਪਚ੍ਚਯਾ. ਪਞ੍ਚਾਤਿ ਏਤ੍ਥ ਅਧਮ੍ਮਿਕਕਤਿਕਾਦਿਂ ਅਪਲੋਕੇਤ੍ਵਾ ਕਰੋਨ੍ਤਾਨਂ ਅਨਿਮਿਤ੍ਤਨ੍ਤਿ ਅਤ੍ਥੋ. ਪਞ੍ਚਮੇ ਅਧਿਕਰਣਪਚ੍ਚਯਵਾਰੇ ਕਿਚ੍ਚਾਧਿਕਰਣਪਚ੍ਚਯਾ ਅਪਲੋਕਨਾਵਸਾਨੇ ਦੁਕ੍ਕਟਂ, ਅਧਿਪ੍ਪਾਯਾਦਿਨਾ ਞਤ੍ਤਿਕਮ੍ਮਾਦਿਂ ਕਰੋਨ੍ਤਾਨਂ ਥੁਲ੍ਲਚ੍ਚਯਾਦਿ ਚ ਸਙ੍ਗਯ੍ਹਤੀਤਿ ਦਟ੍ਠਬ੍ਬਂ. ਅਵਸੇਸਾ ਆਪਤ੍ਤਿਯੋਤਿ ਸੋਤਾਪਤ੍ਤਿਫਲਸਮਾਪਤ੍ਤਿਆਦਯੋ. ‘‘ਨਤ੍ਥਞ੍ਞਾ ਆਪਤ੍ਤਿਯੋ’’ਤਿ ਇਦਂ ਵਿਪਤ੍ਤਿਆਦਿਭਾਗਿਨਿਯੋ ਸਾਵਜ੍ਜਾਪਤ੍ਤਿਯੋ ਸਨ੍ਧਾਯ ਵੁਤ੍ਤਂ.

ਅਧਿਕਰਣਪਚ੍ਚਯਵਾਰਵਣ੍ਣਨਾ ਨਿਟ੍ਠਿਤਾ.