ਸਮਥਭੇਦਂ

ਅਧਿਕਰਣਪਰਿਯਾਯਵਾਰਵਣ੍ਣਨਾ

੨੯੩. ਛਟ੍ਠੇ ਪਰਿਯਾਯਵਾਰੇ ਅਲੋਭੋ ਪੁਬ੍ਬਙ੍ਗਮੋਤਿਆਦਿ ਸਾਸਨਟ੍ਠਿਤਿਯਾ ਅਵਿਪਰੀਤਤੋ ਧਮ੍ਮਵਾਦਿਸ੍ਸ ਵਿਵਾਦਂ ਸਨ੍ਧਾਯ ਵੁਤ੍ਤਂ. ਅਟ੍ਠਾਰਸ ਭੇਦਕਰਵਤ੍ਥੂਨਿ ਠਾਨਾਨੀਤਿ ਧਮ੍ਮਾਦੀਸੁ ਅਧਮ੍ਮੋਤਿਆਦਿਨਾ ਗਹੇਤ੍ਵਾ ਦੀਪਨਾਨਿ ਇਧੇਵ ਭੇਦਕਰਵਤ੍ਥੂਨਿ, ਤਾਨਿ ਏਵ ਕਾਯਕਲਹਾਦਿਵਿਵਾਦਸ੍ਸ ਕਾਰਣਤ੍ਤਾ ਠਾਨਾਨਿ, ਓਕਾਸਤ੍ਤਾ ਵਤ੍ਥੂਨਿ, ਆਧਾਰਤ੍ਤਾ ਭੂਮਿਯੋਤਿ ਚ ਵੁਤ੍ਤਾਨਿ. ਅਬ੍ਯਾਕਤਹੇਤੂਤਿ ਅਸੇਕ੍ਖਾਨਂ ਵਿਵਾਦਂ ਸਨ੍ਧਾਯ ਵੁਤ੍ਤਂ. ਦ੍ਵਾਦਸ ਮੂਲਾਨੀਤਿ ਕੋਧੋ ਉਪਨਾਹੋ, ਮਕ੍ਖੋ ਪਲਾਸੋ, ਇਸ੍ਸਾ ਮਚ੍ਛਰਿਯਂ, ਮਾਯਾ ਸਾਠੇਯ੍ਯਂ, ਪਾਪਿਚ੍ਛਤਾ ਮਹਿਚ੍ਛਤਾ, ਸਨ੍ਦਿਟ੍ਠਿਪਰਾਮਾਸਿਤਾ ਆਧਾਨਗ੍ਗਾਹੀਦੁਪ੍ਪਟਿਨਿਸ੍ਸਜ੍ਜਿਤਾਨੀਤਿ ਇਮੇਸਂ ਛਨ੍ਨਂ ਯੁਗਲ਼ਾਨਂ ਵਸੇਨ ਛ ਧਮ੍ਮਾ ਚੇਵ ਲੋਭਾਦਯੋ ਛ ਹੇਤੂ ਚਾਤਿ ਦ੍ਵਾਦਸ ਧਮ੍ਮਾ ਵਿਵਾਦਾਧਿਕਰਣਸ੍ਸ ਮੂਲਾਨਿ.

੨੯੪. ਚੁਦ੍ਦਸ ਮੂਲਾਨੀਤਿ ਤਾਨੇਵ ਦ੍ਵਾਦਸ ਕਾਯਵਾਚਾਹਿ ਸਦ੍ਧਿਂ ਚੁਦ੍ਦਸ ਅਨੁਵਾਦਾਧਿਕਰਣਸ੍ਸ ਮੂਲਾਨਿ.

੨੯੫. ਪਥਵੀਖਣਨਾਦੀਸੁ ਪਣ੍ਣਤ੍ਤਿਵਜ੍ਜੇਸੁ ਕੁਸਲਾਬ੍ਯਾਕਤਚਿਤ੍ਤਮੂਲਿਕਾ ਆਪਤ੍ਤਿ ਹੋਤੀਤਿ ਦਸ੍ਸੇਤੁਂ ‘‘ਅਲੋਭੋ ਪੁਬ੍ਬਙ੍ਗਮੋ’’ਤਿਆਦਿ ਵੁਤ੍ਤਂ. ਸਤ੍ਤ ਆਪਤ੍ਤਿਕ੍ਖਨ੍ਧਾ ਠਾਨਾਨੀਤਿਆਦਿ ਸਤ੍ਤਨ੍ਨਂ ਆਪਤ੍ਤਿਕ੍ਖਨ੍ਧਾਨਂ ਪਟਿਚ੍ਛਾਦਨਪਚ੍ਚਯਾ ਆਪਤ੍ਤਿਸਮ੍ਭਵਤੋ ਵੁਤ੍ਤਂ. ‘‘ਆਪਤ੍ਤਾਧਿਕਰਣਪਚ੍ਚਯਾ ਚਤਸ੍ਸੋ ਆਪਤ੍ਤਿਯੋ ਆਪਜ੍ਜਤੀ’’ਤਿ (ਪਰਿ. ੨੯੦) ਹਿ ਵੁਤ੍ਤਂ. ‘‘ਛ ਹੇਤੂ’’ਤਿ ਇਦਂ ਕੁਸਲਾਨਂ ਆਪਤ੍ਤਿਹੇਤੁਵੋਹਾਰਸ੍ਸ ਅਯੁਤ੍ਤਤਾਯ ਵੁਤ੍ਤਂ, ਨ ਪਨ ਕੁਸਲਹੇਤੂਨਂ ਅਭਾਵਤੋ. ‘‘ਅਲੋਭੋ ਪੁਬ੍ਬਙ੍ਗਮੋ’’ਤਿ ਹਿ ਆਦਿ ਵੁਤ੍ਤਂ. ਆਪਤ੍ਤਿਹੇਤਵੋ ਏਵ ਹਿ ਪੁਬ੍ਬਙ੍ਗਮਨਾਮੇਨ ਵੁਤ੍ਤਾ.

੨੯੬. ਚਤ੍ਤਾਰਿ ਕਮ੍ਮਾਨਿ ਠਾਨਾਨੀਤਿਆਦੀਸੁ ਅਪਲੋਕਨਵਾਚਾ, ਞਤ੍ਤਿਆਦਿਵਾਚਾਯੋ ਚ ਕਮ੍ਮਾਨੀਤਿ ਵੁਤ੍ਤਂ. ਤਾ ਏਵ ਹਿ ਏਕਸੀਮਾਯਂ ਸਾਮਗ੍ਗਿਮੁਪਗਤਾਨਂ ਕਮ੍ਮਪ੍ਪਤ੍ਤਾਨਂ ਅਨੁਮਤਿਯਾ ਸਾਵਨਕਿਰਿਯਾਨਿਪ੍ਫਤ੍ਤਿਸਙ੍ਖਾਤਸ੍ਸ ਸਙ੍ਘਗਣਕਿਚ੍ਚਸਭਾਵਸ੍ਸ ਕਿਚ੍ਚਾਧਿਕਰਣਸ੍ਸ ਅਧਿਟ੍ਠਾਨਾਭਾਵੇਨ ‘‘ਠਾਨਵਤ੍ਥੁਭੂਮਿਯੋ’’ਤਿ ਵੁਚ੍ਚਨ੍ਤਿ. ਏਕਂ ਮੂਲਂ ਸਙ੍ਘੋਤਿ ਯੇਭੁਯ੍ਯਵਸੇਨ ਵੁਤ੍ਤਂ. ਗਣਞਤ੍ਤਿਅਪਲੋਕਨਾਨਞ੍ਹਿ ਗਣੋਪਿ ਮੂਲਨ੍ਤਿ. ਞਤ੍ਤਿਤੋ ਵਾਤਿ ਞਤ੍ਤਿਞਤ੍ਤਿਦੁਤਿਯਞਤ੍ਤਿਚਤੁਤ੍ਥਕਮ੍ਮਵਾਚਾਨਂ ਞਤ੍ਤਿਰੂਪਤ੍ਤਾ, ਞਤ੍ਤਿਪੁਬ੍ਬਕਤ੍ਤਾ ਚ ਵੁਤ੍ਤਂ. ਕਮ੍ਮਞਤ੍ਤਿਕਮ੍ਮਵਾਚਾਞਤ੍ਤਿਵਸੇਨ ਹਿ ਦੁਵਿਧਾਸੁ ਞਤ੍ਤੀਸੁ ਅਨੁਸ੍ਸਾਵਨਾਪਿ ਕਮ੍ਮਮੂਲਕਨ੍ਤ੍ਵੇਵ ਸਙ੍ਗਯ੍ਹਨ੍ਤਿ. ਞਤ੍ਤਿਵਿਭਾਗੋ ਚਾਯਂ ਉਪਰਿ ਆਵਿ ਭਵਿਸ੍ਸਤਿ.

‘‘ਇਮੇ ਸਤ੍ਤ ਸਮਥਾ…ਪੇ… ਪਰਿਯਾਯੇਨਾ’’ਤਿ ਇਦਂ ਪੁਚ੍ਛਾਵਚਨਂ. ‘‘ਸਿਯਾ’’ਤਿ ਇਦਂ ਵਿਸਜ੍ਜਨਂ. ‘‘ਕਥਞ੍ਚ ਸਿਯਾ’’ਤਿ ਇਦਂ ਪੁਨ ਪੁਚ੍ਛਾ. ਵਿਵਾਦਾਧਿਕਰਣਸ੍ਸ ਦ੍ਵੇ ਸਮਥਾਤਿਆਦਿ ਪੁਨ ਵਿਸਜ੍ਜਨਂ. ਤਤ੍ਥ ‘‘ਵਤ੍ਥੁਵਸੇਨਾ’’ਤਿ ਇਦਂ ‘‘ਸਤ੍ਤ ਸਮਥਾ ਦਸ ਸਮਥਾ ਹੋਨ੍ਤੀ’’ਤਿ ਇਮਸ੍ਸ ਕਾਰਣਵਚਨਂ. ‘‘ਪਰਿਯਾਯੇਨਾ’’ਤਿ ਇਦਂ ‘‘ਦਸ ਸਮਥਾ ਸਤ੍ਤ ਸਮਥਾ ਹੋਨ੍ਤੀ’’ਤਿ ਇਮਸ੍ਸ ਕਾਰਣਵਚਨਂ. ਚਤੁਬ੍ਬਿਧਾਧਿਕਰਣਸਙ੍ਖਾਤਵਤ੍ਥੁਵਸੇਨ ਚ ਦੇਸਨਾਕ੍ਕਮਸਙ੍ਖਾਤਪਰਿਯਾਯਵਸੇਨ ਚਾਤਿ ਅਤ੍ਥੋ.

ਅਧਿਕਰਣਪਰਿਯਾਯਵਾਰਵਣ੍ਣਨਾ ਨਿਟ੍ਠਿਤਾ.

ਸਾਧਾਰਣਵਾਰਾਦਿਵਣ੍ਣਨਾ

੨੯੭. ਸਤ੍ਤਮੇ ਸਾਧਾਰਣਵਾਰੇ ਸਾਧਾਰਣਾਤਿ ਵਿਵਾਦਾਧਿਕਰਣਸ੍ਸ ਵੂਪਸਮਨਕਿਚ੍ਚਸਾਧਾਰਣਾ. ਏਵਂ ਸਬ੍ਬਤ੍ਥ.

੨੯੮. ਅਟ੍ਠਮੇ ਤਬ੍ਭਾਗਿਯਵਾਰੇ ਤਬ੍ਭਾਗਿਯਾਤਿ ਵਿਵਾਦਾਧਿਕਰਣਸ੍ਸ ਵੂਪਸਮਨਤੋ ਤਪ੍ਪਕ੍ਖਿਕਾ.

ਸਾਧਾਰਣਵਾਰਾਦਿਵਣ੍ਣਨਾ ਨਿਟ੍ਠਿਤਾ.

ਸਮਥਾਸਮਥਸ੍ਸਸਾਧਾਰਣਵਾਰਵਣ੍ਣਨਾ

੨੯੯. ਨਵਮੇ ਸਮਥਾਸਮਥਸਾਧਾਰਣਵਾਰੇ ‘‘ਸਬ੍ਬੇ ਸਮਥਾ ਏਕਤੋਵ ਅਧਿਕਰਣਂ ਸਮੇਨ੍ਤਿ ਉਦਾਹੁ ਨਾਨਾ’’ਤਿ ਪੁਚ੍ਛਨ੍ਤੇਨ ‘‘ਸਮਥਾ ਸਮਥਸ੍ਸ ਸਾਧਾਰਣਾ, ਸਮਥਾ ਸਮਥਸ੍ਸ ਅਸਾਧਾਰਣਾ’’ਤਿ ਵੁਤ੍ਤਂ. ਵਿਵਾਦਾਦਿਅਧਿਕਰਣਕ੍ਕਮੇਨ ਤਬ੍ਬੂਪਸਮਹੇਤੁਭੂਤੇ ਸਮਥੇ ਉਦ੍ਧਰਨ੍ਤੋ ‘‘ਯੇਭੁਯ੍ਯਸਿਕਾ’’ਤਿਆਦਿਮਾਹ. ਸਮ੍ਮੁਖਾਵਿਨਯਂ ਵਿਨਾ ਕਸ੍ਸਚਿ ਸਮਥਸ੍ਸ ਅਸਮ੍ਭਵਾ ਸੇਸਾ ਛਪਿ ਸਮਥਾ ਸਮ੍ਮੁਖਾਵਿਨਯਸ੍ਸ ਸਾਧਾਰਣਾ ਵੁਤ੍ਤਾ, ਤੇਸਂ ਪਨ ਛਨ੍ਨਂ ਅਞ੍ਞਮਞ੍ਞਾਪੇਕ੍ਖਾਭਾਵਤੋ ਤੇ ਅਞ੍ਞਮਞ੍ਞਂ ਅਸਾਧਾਰਣਾ ਵੁਤ੍ਤਾ. ਤਬ੍ਭਾਗਿਯਵਾਰੇਪਿ ਏਸੇਵ ਨਯੋ.

ਸਮਥਾਸਮਥਸ੍ਸਸਾਧਾਰਣਵਾਰਵਣ੍ਣਨਾ ਨਿਟ੍ਠਿਤਾ.

ਸਮਥਸਮ੍ਮੁਖਾਵਿਨਯਵਾਰਾਦਿਵਣ੍ਣਨਾ

੩੦੧-੩. ਏਕਾਦਸਮਵਾਰੇਪਿ ਸਮ੍ਮੁਖਾਵਿਨਯੋਤਿਆਦਿ ਪੁਚ੍ਛਾ. ਯੇਭੁਯ੍ਯਸਿਕਾ ਸਤਿਵਿਨਯੋਤਿਆਦਿ ਵਿਸਜ੍ਜਨਂ. ਏਵਂ ਵਿਨਯਵਾਰੇ ਕੁਸਲ-ਵਾਰੇ ਤਤੋ ਪਰੇਸੁਪਿ ਪੁਚ੍ਛਾਵਿਸਜ੍ਜਨਪਰਿਚ੍ਛੇਦੋ ਵੇਦਿਤਬ੍ਬੋ.

ਤਤ੍ਥ ਸਮ੍ਮੁਖਾਵਿਨਯੋ ਸਿਯਾ ਕੁਸਲੋਤਿਆਦੀਸੁ ਤਸ੍ਮਿਂ ਤਸ੍ਮਿਂ ਵਿਨਯਕਮ੍ਮੇ, ਵਿਵਾਦਾਦਿਮ੍ਹਿ ਚ ਨਿਯੁਤ੍ਤਪੁਗ੍ਗਲਾਨਂ ਸਮੁਪ੍ਪਜ੍ਜਨਕਕੁਸਲਾਦੀਨਂ ਵਸੇਨ ਸਮ੍ਮੁਖਾਵਿਨਯਾਦੀਨਂ, ਵਿਵਾਦਾਦੀਨਞ੍ਚ ਕੁਸਲਾਦਿਭਾਵੋ ਤੇਨ ਤੇਨ ਉਪਚਾਰੇਨ ਵੁਤ੍ਤੋ. ਯਸ੍ਮਾ ਪਨੇਤਸ੍ਸ ਸਮ੍ਮੁਖਾਵਿਨਯੋ ਨਾਮ ਸਙ੍ਘਸਮ੍ਮੁਖਤਾਦਯੋ ਹੋਨ੍ਤਿ, ਤੇਸਞ੍ਚ ਅਨਵਜ੍ਜਸਭਾਵਤ੍ਤਾ ਅਕੁਸਲੇ ਵਿਜ੍ਜਮਾਨੇਪਿ ਅਕੁਸਲਤ੍ਤੂਪਚਾਰੋ ਨ ਯੁਤ੍ਤੋ ਆਪਤ੍ਤਾਧਿਕਰਣਸ੍ਸ ਅਕੁਸਲਤ੍ਤੂਪਚਾਰੋ ਵਿਯ, ਤਸ੍ਮਾ ਨਤ੍ਥਿ ਸਮ੍ਮੁਖਾਵਿਨਯੋ ਅਕੁਸਲੋਤਿ ਅਤ੍ਥੋ.

੩੦੪. ਤਤੋ ਪਰੇਸੁ ਯਤ੍ਥ ਯੇਭੁਯ੍ਯਸਿਕਾ ਲਬ੍ਭਤਿ, ਤਤ੍ਥ ਸਮ੍ਮੁਖਾਵਿਨਯੋ ਲਬ੍ਭਤੀਤਿਆਦਿ ਸਮ੍ਮੁਖਾਵਿਨਯਸ੍ਸ ਇਤਰੇਹਿ ਸਮਥੇਹਿ ਨਿਯਮੇਨ ਸਂਸਟ੍ਠਤਂ, ਇਤਰੇਸਂ ਪਨ ਛਨ੍ਨਂ ਅਞ੍ਞਮਞ੍ਞਂ ਸਂਸਗ੍ਗਾਭਾਵਞ੍ਚ ਦਸ੍ਸੇਤੁਂ ਵੁਤ੍ਤਂ.

ਸਮਥਸਮ੍ਮੁਖਾਵਿਨਯਵਾਰਾਦਿਵਣ੍ਣਨਾ ਨਿਟ੍ਠਿਤਾ.

ਸਂਸਟ੍ਠਵਾਰਾਦਿਵਣ੍ਣਨਾ

੩੦੬. ਅਧਿਕਰਣਨ੍ਤਿ ਵਾ ਸਮਥਾਤਿ ਵਾ ਇਮੇ ਧਮ੍ਮਾ ਸਂਸਟ੍ਠਾਤਿਆਦਿ ਸਮਥਾਨਂ ਅਧਿਕਰਣੇਸੁ ਏਵ ਯਥਾਰਹਂ ਪਵਤ੍ਤਿਂ, ਅਧਿਕਰਣਾਨਿ ਵਿਨਾ ਤੇਸਂ ਵਿਸੁਂ ਅਟ੍ਠਾਨਞ੍ਚ ਦਸ੍ਸੇਤੁਂ ਵੁਤ੍ਤਂ. ਵਿਨਿਬ੍ਭੁਜਿਤ੍ਵਾ ਨਾਨਾਕਰਣਂ ਪਞ੍ਞਾਪੇਤੁਨ੍ਤਿ ਅਧਿਕਰਣਤੋ ਸਮਥੇਹਿ ਵਿਯੋਜੇਤ੍ਵਾ ਅਸਂਸਟ੍ਠੇ ਕਤ੍ਵਾ ਨਾਨਾਕਰਣਂ ਅਞ੍ਞਮਞ੍ਞਂ ਅਸਂਸਟ੍ਠਤਾਯ ਠਿਤਭਾਵਸਙ੍ਖਾਤਂ ਨਾਨਤ੍ਤਂ ਪਞ੍ਞਾਪੇਤੁਂ ਅਧਿਕਰਣਵੂਪਸਮਕ੍ਖਣੇ ਏਵ ਤੇਸਂ ਅਸਂਸਗ੍ਗਂ ਪਞ੍ਞਾਪੇਤੁਂ ਕਿਂ ਸਕ੍ਕਾਤਿ ਪੁਚ੍ਛਤਿ.

ਅਧਿਕਰਣਨ੍ਤਿਆਦਿ ਗਾਰਯ੍ਹਵਾਦਦਸ੍ਸਨਂ. ਸੋ ਮਾ ਹੇਵਨ੍ਤਿ ਯੋ ਏਵਂ ਵਦਤਿ, ਸੋ ‘‘ਮਾ ਏਵਂ ਵਦਾ’’ਤਿ ਵਚਨੀਯੋ ਅਸ੍ਸ, ਨ ਚ ਲਬ੍ਭਤਿ ਸਮਥਾਨਂ ਅਞ੍ਞਤ੍ਰ ਅਧਿਕਰਣਾ ਵੂਪਸਮਲਕ੍ਖਣਨ੍ਤਿ ਪਹਾਨਾਵਤ੍ਥਾਨਸਙ੍ਖਾਤਂ ਨਾਨਾਕਰਣਂ ਪਟਿਕ੍ਖਿਪਤਿ. ਲਕ੍ਖਣਤੋ ਪਨ ਅਧਿਕਰਣੇਹਿ ਸਮਥਾਨਂ ਨਾਨਾਕਰਣਂ ਅਤ੍ਥੇਵਾਤਿ ਦਟ੍ਠਬ੍ਬਂ. ਸਮਥਾ ਅਧਿਕਰਣੇਹਿ ਸਮ੍ਮਨ੍ਤੀਤਿ ਅਪਲੋਕਨਾਦੀਹਿ ਚਤੂਹਿ ਕਿਚ੍ਚਾਧਿਕਰਣੇਹਿ ਸਬ੍ਬੇਪਿ ਸਮਥਾ ਨਿਟ੍ਠਾਨਂ ਗਚ੍ਛਨ੍ਤਿ, ਨਾਞ੍ਞੇਹੀਤਿ ਇਮਮਤ੍ਥਂ ਸਨ੍ਧਾਯ ਵੁਤ੍ਤਂ. ਤੇਨੇਵ ਵਕ੍ਖਤਿ ‘‘ਸਮ੍ਮੁਖਾਵਿਨਯੋ ਵਿਵਾਦਾਧਿਕਰਣੇਨ ਨ ਸਮ੍ਮਤਿ. ਅਨੁਵਾਦ…ਪੇ… ਆਪਤ੍ਤਾਧਿਕਰਣੇਨ ਨ ਸਮ੍ਮਤਿ, ਕਿਚ੍ਚਾਧਿਕਰਣੇਨ ਸਮ੍ਮਤੀ’’ਤਿਆਦਿ (ਪਰਿ. ੩੧੧).

੩੦੭-੩੧੩. ਵਿਵਾਦਾਧਿਕਰਣਂ ਕਤਿਹਿ ਸਮਥੇਹਿ ਸਮ੍ਮਤੀਤਿਆਦਿਕੋ ਸਮ੍ਮਤਿਵਾਰੋ. ਤਦਨਨ੍ਤਰੋ ਸਮ੍ਮਤਿਨਸਮ੍ਮਤਿਵਾਰੋ ਚ ਅਧਿਕਰਣੇਹਿ ਸਮਥਾਨਂ ਸਂਸਟ੍ਠਤਂ, ਵਿਸਂਸਟ੍ਠਤਞ੍ਚ ਦਸ੍ਸੇਤੁਂ ਵੁਤ੍ਤੋ. ਸਮਥਾ ਸਮਥੇਹਿ ਸਮ੍ਮਨ੍ਤੀਤਿਆਦਿਕੋ ਸਮਥਾਧਿਕਰਣਵਾਰੋ ਸਮਥਾਨਂ ਅਞ੍ਞਮਞ੍ਞਂ, ਅਧਿਕਰਣੇਹਿ ਚ ਅਧਿਕਰਣਾਨਞ੍ਚ ਅਞ੍ਞਮਞ੍ਞਂ, ਸਮਥੇਹਿ ਚ ਵੂਪਸਮਾਵੂਪਸਮਂ ਦਸ੍ਸੇਤੁਂ ਵੁਤ੍ਤੋ.

੩੧੪. ਸਮੁਟ੍ਠਾਪੇਤਿਵਾਰੋ ਪਨ ਅਧਿਕਰਣੇਹਿ ਅਧਿਕਰਣਾਨਂ ਉਪ੍ਪਤ੍ਤਿਪ੍ਪਕਾਰਦਸ੍ਸਨਤ੍ਥਂ ਵੁਤ੍ਤੋ. ਨ ਕਤਮਂ ਅਧਿਕਰਣਨ੍ਤਿ ਅਤ੍ਤਨੋ ਸਮ੍ਭਵਮਤ੍ਤੇਨ ਏਕਮ੍ਪਿ ਅਧਿਕਰਣਂ ਨ ਸਮੁਟ੍ਠਾਪੇਤੀਤਿ ਅਤ੍ਥੋ. ਕਥਞ੍ਚਰਹਿ ਸਮੁਟ੍ਠਾਪੇਤੀਤਿ ਆਹ ‘‘ਅਪਿ ਚਾ’’ਤਿਆਦਿ. ਤਤ੍ਥ ਜਾਯਨ੍ਤੀਤਿ ਅਨਨ੍ਤਰਮੇਵ ਅਨੁਪ੍ਪਜ੍ਜਿਤ੍ਵਾ ਪਰਮ੍ਪਰਪਚ੍ਚਯਾ ਜਾਯਨ੍ਤੀਤਿ ਅਧਿਪ੍ਪਾਯੋ. ‘‘ਧਮ੍ਮੋ ਅਧਮ੍ਮੋ’’ਤਿਆਦਿਨਾ ਉਭਿਨ੍ਨਂ ਪੁਗ੍ਗਲਾਨਂ ਵਿਵਾਦਪਚ੍ਚਯਾ ਅਞ੍ਞਮਞ੍ਞਖੇਮਭਙ੍ਗਾ ਹੋਨ੍ਤਿ, ਤਪ੍ਪਚ੍ਚਯਾ ਤੇਸਂ ਪਕ੍ਖਂ ਪਰਿਯੇਸਨੇਨ ਕਲਹਂ ਵਡ੍ਢਨ੍ਤਾਨਂ ਵਿਵਾਦੋ ਕਞ੍ਚਿ ਮਹਾਪਰਿਸਂ ਸਙ੍ਘਪਰਿਣਾਯਕਂ ਲਜ੍ਜਿਂ ਆਗਮ੍ਮ ਵੂਪਸਮਂ ਗਚ੍ਛਤਿ. ਤਥਾ ਅਵੂਪਸਮਨ੍ਤੇ ਪਨ ਵਿਵਾਦੋ ਕਮੇਨ ਵਡ੍ਢਿਤ੍ਵਾ ਸਕਲੇਪਿ ਸਙ੍ਘੇ ਵਿਵਾਦਂ ਸਮੁਟ੍ਠਾਪੇਤਿ, ਤਤੋ ਅਨੁਵਾਦਾਦੀਨੀਤਿ ਏਵਂ ਪਰਮ੍ਪਰਕ੍ਕਮੇਨ ਵੂਪਸਮਕਾਰਣਾਭਾਵੇ ਚਤ੍ਤਾਰਿ ਅਧਿਕਰਣਾਨਿ ਜਾਯਨ੍ਤਿ. ਤਂ ਸਨ੍ਧਾਯਾਹ ‘‘ਸਙ੍ਘੋ ਵਿਵਦਤਿ ਵਿਵਾਦਾਧਿਕਰਣ’’ਨ੍ਤਿ. ਸਙ੍ਘਸ੍ਸ ਵਿਵਦਤੋ ਯੋ ਵਿਵਾਦੋ, ਤਂ ਵਿਵਾਦਾਧਿਕਰਣਂ ਹੋਤੀਤਿ ਅਤ੍ਥੋ. ਏਸ ਨਯੋ ਸੇਸੇਸੁਪਿ.

ਸਂਸਟ੍ਠਵਾਰਾਦਿਵਣ੍ਣਨਾ ਨਿਟ੍ਠਿਤਾ.

ਭਜਤਿਵਾਰਵਣ੍ਣਨਾ

੩੧੮. ਤਦਨਨ੍ਤਰਵਾਰੇ ਪਨ ਵਿਵਾਦਾਧਿਕਰਣਂ ਚਤੁਨ੍ਨਂ ਅਧਿਕਰਣਾਨਨ੍ਤਿਆਦਿ ਅਧਿਕਰਣਾਨਂ ਵੁਤ੍ਤਨਯੇਨ ਅਞ੍ਞਮਞ੍ਞਪਚ੍ਚਯਤ੍ਤੇਪਿ ਸਂਸਗ੍ਗਭਾਵਦਸ੍ਸਨਤ੍ਥਂ ਵੁਤ੍ਤਂ. ਵਿਵਾਦਾਧਿਕਰਣਂ ਚਤੁਨ੍ਨਂ ਅਧਿਕਰਣਾਨਂ ਵਿਵਾਦਾਧਿਕਰਣਂ ਭਜਤੀਤਿਆਦੀਸੁ ਵਿਵਾਦਾਧਿਕਰਣਂ ਚਤੂਸੁ ਅਧਿਕਰਣੇਸੁ ਵਿਵਾਦਾਧਿਕਰਣਭਾਵਮੇਵ ਭਜਤਿ, ਨਾਞ੍ਞਾਧਿਕਰਣਭਾਵਂ, ਚਤੂਸੁ ਅਧਿਕਰਣੇਸੁ ਵਿਵਾਦਾਧਿਕਰਣਤ੍ਤਮੇਵ ਨਿਸ੍ਸਿਤਂ ਵਿਵਾਦਾਧਿਕਰਣਮੇਵ ਪਰਿਯਾਪਨ੍ਨਂ ਵਿਵਾਦਾਧਿਕਰਣਭਾਵੇਨੇਵ ਸਙ੍ਗਹਿਤਨ੍ਤਿ ਏਵਮਤ੍ਥੋ ਗਹੇਤਬ੍ਬੋ.

੩੧੯. ਵਿਵਾਦਾਧਿਕਰਣਂ ਸਤ੍ਤਨ੍ਨਂ ਸਮਥਾਨਂ ਕਤਿ ਸਮਥੇ ਭਜਤੀਤਿਆਦਿ ਪਨ ਚਤੁਨ੍ਨਂ ਅਧਿਕਰਣਾਨਂ ਵੂਪਸਮਨੇ ਸਤਿ ਨਿਯਤਸਮਥੇ ਦਸ੍ਸੇਤੁਂ ਵੁਤ੍ਤਂ. ਤਤ੍ਥ ਕਤਿ ਸਮਥੇ ਭਜਤੀਤਿ ਅਤ੍ਤਨੋ ਉਪਸਮਤ੍ਥਾਯ ਕਿਤ੍ਤਕੇ ਸਮਥੇ ਉਪਗਚ੍ਛਤਿ, ਕਿਤ੍ਤਕੇ ਸਮਥੇ ਆਗਮ੍ਮ ਵੂਪਸਮਂ ਗਚ੍ਛਤੀਤਿ ਅਤ੍ਥੋ. ਕਤਿ ਸਮਥਪਰਿਯਾਪਨ੍ਨਨ੍ਤਿ ਅਤ੍ਤਾਨਂ ਵੂਪਸਮੇਤੁਂ ਕਤਿਸੁ ਸਮਥੇਸੁ ਤੇਹਿ ਸਮਾਨਵਸੇਨ ਪਵਿਟ੍ਠਂ. ਕਤਿਹਿ ਸਮਥੇਹਿ ਸਙ੍ਗਹਿਤਨ੍ਤਿ ਵੂਪਸਮਂ ਕਰੋਨ੍ਤੇਹਿ ਕਤਿਹਿ ਸਮਥੇਹਿ ਵੂਪਸਮਕਰਣਤ੍ਥਂ ਸਙ੍ਗਹਿਤਂ.

ਭਜਤਿਵਾਰਵਣ੍ਣਨਾ ਨਿਟ੍ਠਿਤਾ.