ਸਮੁਟ੍ਠਾਨਸੀਸਵਣ੍ਣਨਾ

੨੫੭. ਪਾਲ਼ਿਯਂ ਨਿਬ੍ਬਾਨਞ੍ਚੇਵ ਪਞ੍ਞਤ੍ਤੀਤਿ ਏਤ੍ਥ ਯਸ੍ਮਾ ਸਙ੍ਖਤਧਮ੍ਮੇ ਉਪਾਦਾਯ ਪਞ੍ਞਤ੍ਤਾ ਸਮ੍ਮੁਤਿਸਚ੍ਚਭੂਤਾ ਪੁਗ੍ਗਲਾਦਿਪਞ੍ਞਤ੍ਤਿ ਪਰਮਤ੍ਥਤੋ ਅਵਿਜ੍ਜਮਾਨਤ੍ਤਾ ਉਪ੍ਪਤ੍ਤਿਵਿਨਾਸਯੁਤ੍ਤਵਤ੍ਥੁਧਮ੍ਮਨਿਯਤੇਨ ਅਨਿਚ੍ਚਦੁਕ੍ਖਲਕ੍ਖਣਦ੍ਵਯੇਨ ਯੁਤ੍ਤਾਤਿ ਵਤ੍ਤੁਂ ਅਯੁਤ੍ਤਾ, ਕਾਰਕਵੇਦਕਾਦਿਰੂਪੇਨ ਪਨ ਪਰਿਕਪ੍ਪਿਤੇਨ ਅਤ੍ਤਸਭਾਵੇਨ ਵਿਰਹਿਤਤ੍ਤਾ ‘‘ਅਨਤ੍ਤਾ’’ਤਿ ਵਤ੍ਤੁਂ ਯੁਤ੍ਤਾ. ਤਸ੍ਮਾ ਅਯਂ ਪਞ੍ਞਤ੍ਤਿਪਿ ਅਸਙ੍ਖਤਤ੍ਤਸਾਮਞ੍ਞਤੋ ਵਤ੍ਥੁਭੂਤੇਨ ਨਿਬ੍ਬਾਨੇਨ ਸਹ ‘‘ਅਨਤ੍ਤਾ ਇਤਿ ਨਿਚ੍ਛਯਾ’’ਤਿ ਵੁਤ੍ਤਾ. ਅਵਿਜ੍ਜਮਾਨਾਪਿ ਹਿ ਸਮ੍ਮੁਤਿ ਕੇਨਚਿ ਪਚ੍ਚਯੇਨ ਅਕਤਤ੍ਤਾ ਅਸਙ੍ਖਤਾ ਏਵਾਤਿ.

ਕਰੁਣਾਸੀਤਲਤ੍ਤਂ, ਪਞ੍ਞਾਪਭਾਸਿਤਤ੍ਤਞ੍ਚ ਭਗਵਤੋ ਦਸ੍ਸੇਤੁਂ ‘‘ਬੁਦ੍ਧਚਨ੍ਦੇ, ਬੁਦ੍ਧਾਦਿਚ੍ਚੇ’’ਤਿ ਏਤਂ ਉਭਯਂ ਵੁਤ੍ਤਂ. ਹਾਯਤਿ ਏਤੇਨਾਤਿ ਹਾਨਿ, ਦੁਕ੍ਖਸ੍ਸ ਹਾਨਿ ਦੁਕ੍ਖਹਾਨਿ, ਸਬ੍ਬਦੁਕ੍ਖਾਪਨੂਦਨਕਾਰਣਨ੍ਤਿ ਅਤ੍ਥੋ. ਪਿਟਕੇ ਤੀਣਿ ਦੇਸਯੀਤਿ ਯਸ੍ਮਾ ਅਞ੍ਞੇਪਿ ਮਹਾਵੀਰਾ ਸਮ੍ਮਾਸਮ੍ਬੁਦ੍ਧਾ ਸਦ੍ਧਮ੍ਮਂ ਦੇਸਯਨ੍ਤਿ, ਤਸ੍ਮਾ ਅਙ੍ਗੀਰਸੋ ਪਿਟਕਾਨਿ ਤੀਣਿ ਦੇਸਯੀਤਿ ਯੋਜਨਾ. ਮਹਾਗੁਣਨ੍ਤਿ ਮਹਾਨਿਸਂਸਂ. ਏਵਂ ਨੀਯਤਿ ਸਦ੍ਧਮ੍ਮੋਤਿ ਯਦਿ ਵਿਨਯਪਰਿਯਤ੍ਤਿ ਅਪਰਿਹੀਨਾ ਤਿਟ੍ਠਤਿ, ਏਵਂ ਸਤਿ ਪਟਿਪਤ੍ਤਿਪਟਿਵੇਧਸਦ੍ਧਮ੍ਮੋਪਿ ਨੀਯਤਿ ਪਵਤ੍ਤੀਯਤਿ, ਨ ਪਰਿਹਾਯਤੀਤਿ ਅਤ੍ਥੋ.

ਵਿਨਯਪਰਿਯਤ੍ਤਿ ਪਨ ਕਥਂ ਤਿਟ੍ਠਤੀਤਿ ਆਹ ‘‘ਉਭਤੋ ਚਾ’’ਤਿਆਦਿ. ਪਰਿਵਾਰੇਨ ਗਨ੍ਥਿਤਾ ਤਿਟ੍ਠਤੀਤਿ ਯੋਜੇਤਬ੍ਬਂ. ਤਸ੍ਸੇਵ ਪਰਿਵਾਰਸ੍ਸਾਤਿ ਤਸ੍ਮਿਂ ਏਵ ਪਰਿਵਾਰੇ. ਸਮੁਟ੍ਠਾਨਂ ਨਿਯਤੋ ਕਤਨ੍ਤਿ ਏਕਚ੍ਚਂ ਸਮੁਟ੍ਠਾਨੇਨ ਨਿਯਤਂ ਕਤਂ. ਤਸ੍ਮਿਂ ਪਰਿਵਾਰੇ ਕਿਞ੍ਚਿ ਸਿਕ੍ਖਾਪਦਂ ਨਿਯਤਸਮੁਟ੍ਠਾਨਂ ਅਞ੍ਞੇਹਿ ਅਸਾਧਾਰਣਂ, ਤਂ ਪਕਾਸਿਤਨ੍ਤਿ ਅਤ੍ਥੋ.

ਸਮ੍ਭੇਦਂ ਨਿਦਾਨਞ੍ਚਞ੍ਞਨ੍ਤਿ ਸਮ੍ਭੇਦੋ ਸਿਕ੍ਖਾਪਦਾਨਂ ਅਞ੍ਞਮਞ੍ਞਸਮੁਟ੍ਠਾਨੇਨ ਸਂਕਿਣ੍ਣਤਾ, ਨਿਦਾਨਞ੍ਚ ਪਞ੍ਞਤ੍ਤਿਟ੍ਠਾਨਂ, ਅਞ੍ਞਂ ਪੁਗ੍ਗਲਾਦਿਵਤ੍ਥਾਦਿ ਚ. ਸੁਤ੍ਤੇ ਦਿਸ੍ਸਨ੍ਤਿ ਉਪਰੀਤਿ ਹੇਟ੍ਠਾ ਵੁਤ੍ਤੇ, ਉਪਰਿ ਵਕ੍ਖਮਾਨੇ ਚ ਪਰਿਵਾਰਸੁਤ੍ਤੇ ਏਵ ਦਿਸ੍ਸਨ੍ਤਿ. ਯਸ੍ਮਾ ਚ ਏਵਂ, ਤਸ੍ਮਾ ਸਕਲਸਾਸਨਾਧਾਰਸ੍ਸ ਵਿਨਯਸ੍ਸ ਠਿਤਿਹੇਤੁਭੂਤਂ ਪਰਿਵਾਰਂ ਸਿਕ੍ਖੇਤਿ, ਏਵਮੇਤ੍ਥ ਯੋਜਨਾ ਦਟ੍ਠਬ੍ਬਾ.

ਸਮ੍ਭਿਨ੍ਨਸਮੁਟ੍ਠਾਨਾਨੀਤਿ ਅਞ੍ਞੇਹਿ ਸਾਧਾਰਣਸਮੁਟ੍ਠਾਨਾਨਿ. ਆਦਿਮ੍ਹਿ ਤਾਵ ਪੁਰਿਮਨਯੇਤਿ ਸਬ੍ਬਪਠਮੇ ਪਞ੍ਞਤ੍ਤਿਵਾਰੇ ਆਗਤਨਯਂ ਸਨ੍ਧਾਯ ਵਦਤਿ, ਤਤ੍ਥ ਪਨ ਪਞ੍ਞਤ੍ਤਿਵਾਰੇ ‘‘ਪਠਮਂ ਪਾਰਾਜਿਕਂ ਕਤ੍ਥ ਪਞ੍ਞਤ੍ਤਨ੍ਤਿ, ਵੇਸਾਲਿਯਂ ਪਞ੍ਞਤ੍ਤ’’ਨ੍ਤਿਆਦਿਨਾ (ਪਰਿ. ੧) ਨਿਦਾਨਮ੍ਪਿ ਦਿਸ੍ਸਤਿ ਏਵ. ਪਰਤੋਤਿ ਆਗਤਭਾਵਂ ਪਨ ਸਨ੍ਧਾਯ ਪਰਤੋ ਆਗਤੇ ਸੁਤ੍ਤੇ ਦਿਸ੍ਸਤੀਤਿ ਵੇਦਿਤਬ੍ਬਨ੍ਤਿ ਵੁਤ੍ਤਂ. ਤਸ੍ਸਾਤਿ ਉਭਤੋਵਿਭਙ੍ਗਪਰਿਯਾਪਨ੍ਨਸ੍ਸ ਸਿਕ੍ਖਾਪਦਸ੍ਸ.

੨੫੮. ਅਨਿਯਤਾ ਪਠਮਿਕਾਤਿ ਆਪਤ੍ਤਿਂ ਅਪੇਕ੍ਖਿਤ੍ਵਾਵ ਇਤ੍ਥਿਲਿਙ੍ਗਂ ਕਤਂ, ਪਠਮਾਨਿਯਤਂ ਸਿਕ੍ਖਾਪਦਨ੍ਤਿ ਅਤ੍ਥੋ. ਪਾਲ਼ਿਯਂ ਨਾਨੁਬਨ੍ਧੇ ਪਵਤ੍ਤਿਨਿਨ੍ਤਿ ਵੁਟ੍ਠਾਪਿਤਂ ਪਵਤ੍ਤਿਨਿਂ ਅਨਨੁਬਨ੍ਧਨਸਿਕ੍ਖਾਪਦਂ.

੨੬੦. ਏਲ਼ਕਲੋਮਸਿਕ੍ਖਾਪਦਵਤ੍ਥੁਸ੍ਮਿਂ ‘‘ਭਿਕ੍ਖੁਨਿਯੋ ਏਲ਼ਕਲੋਮਾਨਿ ਧੋਵਨ੍ਤਿਯੋ ਰਜਨ੍ਤਿਯੋ ਵਿਜਟੇਨ੍ਤਿਯੋ ਰਿਞ੍ਚਨ੍ਤਿ ਉਦ੍ਦੇਸਂ ਪਰਿਪੁਚ੍ਛ’’ਨ੍ਤਿ (ਪਾਰਾ. ੫੭੬) ਆਗਤਤ੍ਤਾ ਇਮਂ ਰਿਞ੍ਚਨ੍ਤਿ-ਪਦਂ ਗਹੇਤ੍ਵਾ ਸਿਕ੍ਖਾਪਦਂ ਉਪਲਕ੍ਖਿਤਨ੍ਤਿ ਦਸ੍ਸੇਨ੍ਤੋ ‘‘ਵਿਭਙ੍ਗੇ ‘ਰਿਞ੍ਚਨ੍ਤਿ ਉਦ੍ਦੇਸ’ਨ੍ਤਿ ਆਗਤਂ ਏਲ਼ਕਲੋਮਧੋਵਾਪਨਸਿਕ੍ਖਾਪਦ’’ਨ੍ਤਿ ਆਹ.

ਵਸ੍ਸਿਕਸਾਟਿਕਸਿਕ੍ਖਾਪਦਨ੍ਤਿ ਅਸਮਯੇ ਵਸ੍ਸਿਕਸਾਟਿਕਪਰਿਯੇਸਨਸਿਕ੍ਖਾਪਦਂ (ਪਾਰਾ. ੬੨੬ ਆਦਯੋ). ਰਤਨਸਿਕ੍ਖਾਪਦਨ੍ਤਿ ਰਤਨਂ ਵਾ ਰਤਨਸਮ੍ਮਤਂ ਵਾ ਪਟਿਸਾਮਨਸਿਕ੍ਖਾਪਦਂ (ਪਾਚਿ. ੫੦੨ ਆਦਯੋ).

੨੬੫. ਪਾਲ਼ਿਯਂ ਬੁਦ੍ਧਞਾਣੇਨਾਤਿ ਪਟਿਵਿਦ੍ਧਸਬ੍ਬਞ੍ਞੁਤਞ੍ਞਾਣੇਨ.

੨੬੭. ‘‘ਨ ਦੇਸੇਨ੍ਤਿ ਤਥਾਗਤਾ’’ਤਿ ਏਤੇਨ ਛਤ੍ਤਪਾਣਿਸ੍ਸ ਧਮ੍ਮਦੇਸਨਾਪਟਿਕ੍ਖੇਪਂ ਦਸ੍ਸੇਤਿ.

੨੬੯. ਅਕਤਨ੍ਤਿ ਅਞ੍ਞੇਹਿ ਅਮਿਸ੍ਸੀਕਤਂ, ਨਿਯਤਸਮੁਟ੍ਠਾਨਨ੍ਤਿ ਅਤ੍ਥੋ. ਅਕਤਨ੍ਤਿ ਵਾ ਪੁਬ੍ਬੇ ਅਨਾਗਤਂ, ਅਭਿਨਵਨ੍ਤਿ ਅਤ੍ਥੋ.

੨੭੦. ਸਮੁਟ੍ਠਾਨਞ੍ਹਿ ਸਙ੍ਖੇਪਨ੍ਤਿ ਏਤ੍ਥ ਸਙ੍ਖਿਪਨ੍ਤਿ ਸਙ੍ਗਯ੍ਹਨ੍ਤਿ ਸਦਿਸਸਮੁਟ੍ਠਾਨਾਨਿ ਏਤ੍ਥਾਤਿ ਸਙ੍ਖੇਪੋ, ਸਮੁਟ੍ਠਾਨਸੀਸਂ. ਨੇਤਿ ਵਿਨੇਤਿ ਕਾਯਵਚੀਦੁਚ੍ਚਰਿਤਨ੍ਤਿ ਨੇਤ੍ਤਿ, ਵਿਨਯਪਾਲ਼ਿ, ਸਾ ਏਵ ਧਮ੍ਮੋਤਿ ਨੇਤ੍ਤਿਧਮ੍ਮੋਤਿ ਆਹ ‘‘ਵਿਨਯਪਾਲ਼ਿਧਮ੍ਮਸ੍ਸਾ’’ਤਿ.

ਸਮੁਟ੍ਠਾਨਸੀਸਵਣ੍ਣਨਾ ਨਿਟ੍ਠਿਤਾ.