ਸੇਦਮੋਚਨਗਾਥਾ
ਅਵਿਪ੍ਪਵਾਸਪਞ੍ਹਾਵਣ੍ਣਨਾ
੪੭੯. ਸੇਦਮੋਚਨਗਾਥਾਸੁ ਅਕਪ੍ਪਿਯਸਮ੍ਭੋਗੋਤਿ ਅਨੁਪਸਮ੍ਪਨ੍ਨੇਹਿ ਸਦ੍ਧਿਂ ਕਾਤੁਂ ਪਟਿਕ੍ਖਿਤ੍ਤੋ ਉਪੋਸਥਾਦਿਸਂਵਾਸੋ ਏਵ ਵੁਤ੍ਤੋ. ਪਞ੍ਹਾ ਮੇਸਾਤਿ ਏਤ੍ਥ ਮ-ਕਾਰੋ ਪਦਸਨ੍ਧਿਕਰੋ. ਏਸਾਤਿ ਚ ਲਿਙ੍ਗਵਿਪਲ੍ਲਾਸਵਸੇਨ ਵੁਤ੍ਤਂ, ਪਞ੍ਹੋ ਏਸੋਤਿ ਅਤ੍ਥੋ. ਪਞ੍ਹ-ਸਦ੍ਦੋ ਵਾ ਦ੍ਵਿਲਿਙ੍ਗੋ ਦਟ੍ਠਬ੍ਬੋ. ਤੇਨਾਹ ‘‘ਏਸਾ ਪਞ੍ਹਾ’’ਤਿਆਦਿ.
ਗਰੁਭਣ੍ਡਂ ਸਨ੍ਧਾਯਾਤਿ ਗਰੁਭਣ੍ਡੇਨ ਗਰੁਭਣ੍ਡਪਰਿਵਤ੍ਤਨਂ ਸਨ੍ਧਾਯ. ਦਸਾਤਿ ਦਸ ਅਵਨ੍ਦਿਯਪੁਗ੍ਗਲੇ. ਏਕਾਦਸੇਤਿ ਅਭਬ੍ਬਪੁਗ੍ਗਲੇ. ਸਿਕ੍ਖਾਯ ਅਸਾਧਾਰਣੋਤਿ ਖੁਰਭਣ੍ਡਂ ਧਾਰੇਤੁਂ ਅਨੁਞ੍ਞਾਤਸਿਕ੍ਖਾਪਦੇਨ ਭਿਕ੍ਖੂਹਿ ਅਸਾਧਾਰਣਸਿਕ੍ਖਾਪਦੋਤਿ ਅਤ੍ਥੋ.
ਉਬ੍ਭਕ੍ਖਕੇ ਨ ਵਦਾਮੀਤਿ ਅਕ੍ਖਤੋ ਉਦ੍ਧਂ ਸੀਸੇ ਠਿਤਮੁਖਮਗ੍ਗੇਪਿ ਪਾਰਾਜਿਕਂ ਸਨ੍ਧਾਯ ਨ ਵਦਾਮਿ. ਅਧੋਨਾਭਿਨ੍ਤਿ ਨਾਭਿਤੋ ਹੇਟ੍ਠਾ ਠਿਤਵਚ੍ਚਪਸ੍ਸਾਵਮਗ੍ਗੇਪਿ ਵਿਵਜ੍ਜਿਯ ਅਞ੍ਞਸ੍ਮਿਂ ਸਰੀਰਪ੍ਪਦੇਸੇ ਮੇਥੁਨਧਮ੍ਮਪਚ੍ਚਯਾ ਕਥਂ ਪਾਰਾਜਿਕੋ ਸਿਯਾਤਿ ਅਤ੍ਥੋ.
ਛੇਜ੍ਜਵਤ੍ਥੁਨ੍ਤਿ ਪਾਰਾਜਿਕਂ.
ਅਵਿਪ੍ਪਵਾਸਪਞ੍ਹਾਵਣ੍ਣਨਾ ਨਿਟ੍ਠਿਤਾ.
ਪਾਰਾਜਿਕਾਦਿਪਞ੍ਹਾਵਣ੍ਣਨਾ
੪੮੦. ਦੁਸ੍ਸਕੁਟਿਆਦੀਨੀਤਿ ਆਦਿ-ਸਦ੍ਦੇਨ ਅਚ੍ਛਤਰਤਿਪੁਪਟ੍ਟਾਦੀਹਿ, ਤਿਣਪਣ੍ਣਾਦੀਹਿ ਚ ਪਟਿਚ੍ਛਨ੍ਨਕੁਟਿਯੋ ਸਙ੍ਗਣ੍ਹਾਤਿ. ਤਾਦਿਸਾਯ ਹਿ ਕੁਟਿਯਾ ਬਹਿ ਠਤ੍ਵਾ ਅਨ੍ਤੋ ਠਿਤਾਯ ਇਤ੍ਥਿਯਾ ਮਗ੍ਗੇ ਦੁਸ੍ਸਾਦਿਨਾ ਸਨ੍ਥਤਂ ਕਤ੍ਵਾ ਪਵੇਸੇਨ੍ਤੋਪਿ ਪਾਰਾਜਿਕੋ ਸਿਯਾ. ਲਿਙ੍ਗਪਰਿਵਤ੍ਤਂ ਸਨ੍ਧਾਯ ਵੁਤ੍ਤਾਤਿ ਲਿਙ੍ਗੇ ਪਰਿਵਤ੍ਤੇ ਪਟਿਗ੍ਗਹਣਸ੍ਸ ਵਿਜਹਨਤੋ ਪੁਨ ਅਪ੍ਪਟਿਗ੍ਗਹੇਤ੍ਵਾ ਪਰਿਭੁਞ੍ਜਨਾਪਤ੍ਤਿਂ ਸਨ੍ਧਾਯ ਵੁਤ੍ਤਂ.
ਪਾਲ਼ਿਯਂ ਭਿਕ੍ਖੂ ਸਿਯਾ ਵੀਸਤਿਯਾ ਸਮਾਗਤਾਤਿ ਵੀਸਤਿਯਾ ਸਙ੍ਖਾਤਾਯ ਭਿਕ੍ਖੂ ਸਮਾਗਤਾ, ਏਤੇਨ ਸਬ੍ਬਕਮ੍ਮਾਰਹਤਂ ਸਙ੍ਘਸ੍ਸ ਦਸ੍ਸੇਤਿ.
ਨਿਵਤ੍ਥੋਤਿ ਗਾਥਾਯ ਅਨ੍ਤਰਵਾਸਕੇਨ ਨਿਵਤ੍ਥੋ ਉਤ੍ਤਰਾਸਙ੍ਗੇਨ ਦਿਗੁਣਂ ਕਤ੍ਵਾ ਪਾਰੁਤਸਙ੍ਘਾਟਿਯੋ. ਇਤਿ ਤਾਨਿ ਤੀਣਿਪਿ ਚੀਵਰਾਨਿ ਕਾਯੇ ਗਤਾਨੇਵ ਭਿਕ੍ਖੁਨਿਯਾ ਬਿਨ੍ਦੁਮਤ੍ਤਂ ਕਾਲ਼ਕਂ ਉਦਕੇਨ ਧੋਵਿਤਮਤ੍ਤੇ ਨਿਸ੍ਸਗ੍ਗਿਯਾਨਿ ਹੋਨ੍ਤੀਤਿ ਅਤ੍ਥੋ.
ਇਤ੍ਥਿਂ ਹਨੇਤਿ ਗਾਥਾਯ ਨ ਮਾਤੁਭੂਤਂ ਇਤ੍ਥਿਂ ਹਨੇਯ੍ਯ, ਨ ਪਿਤੁਭੂਤਂ ਪੁਰਿਸਂ ਹਨੇਯ੍ਯ. ਅਨਰਿਯਨ੍ਤਿ ਤਞ੍ਚ ਅਨਰਹਨ੍ਤਮੇਵ ਹਨੇਯ੍ਯ, ਏਤੇਨ ਅਰਹਨ੍ਤਘਾਤਕੋਪਿ ਨ ਹੋਤੀਤਿ ਦਸ੍ਸੇਤਿ. ਅਨਨ੍ਤਰਂ ਫੁਸੇਤਿ ਆਨਨ੍ਤਰਿਯਂ ਫੁਸਤੀਤਿ ਅਤ੍ਥੋ.
੪੮੧. ਸੁਪ੍ਪਤਿਟ੍ਠਿਤ-ਨਿਗ੍ਰੋਧਸਦਿਸਨ੍ਤਿ ਯੋਜਨਵਿਤ੍ਥਤਂ ਰੁਕ੍ਖਂ ਸਨ੍ਧਾਯ ਵੁਤ੍ਤਂ.
ਸਤ੍ਤਰਸਕੇਸੂਤਿ ਭਿਕ੍ਖੁਨੀਨਂ ਪਞ੍ਞਤ੍ਤਸਤ੍ਤਰਸਸਙ੍ਘਾਦਿਸੇਸੇਸੁ.
ਪਾਰਾਜਿਕਾਦਿਪਞ੍ਹਾਵਣ੍ਣਨਾ ਨਿਟ੍ਠਿਤਾ.