ਪਞ੍ਚਵਗ੍ਗੋ

ਕਮ੍ਮਵਗ੍ਗਵਣ੍ਣਨਾ

੪੮੩. ਕਮ੍ਮਵਗ੍ਗੇ ਠਪਿਤਉਪੋਸਥਪਵਾਰਣਾਨਂ ਕਤ੍ਤਿਕਮਾਸੇ ਸਾਮਗ੍ਗਿਯਾ ਕਤਾਯ ਸਾਮਗ੍ਗੀਪਵਾਰਣਂ ਮੁਞ੍ਚਿਤ੍ਵਾ ਉਪੋਸਥਂ ਕਾਤੁਂ ਨ ਵਟ੍ਟਤੀਤਿ ਆਹ ‘‘ਠਪੇਤ੍ਵਾ ਕਤ੍ਤਿਕਮਾਸ’’ਨ੍ਤਿ. ਸਚੇ ਪਨ ਤੇਸਂ ਨਾਨਾਸੀਮਾਸੁ ਮਹਾਪਵਾਰਣਾਯ ਵਿਸੁਂ ਪਵਾਰਿਤਾਨਂ ਕਤ੍ਤਿਕਮਾਸਬ੍ਭਨ੍ਤਰੇ ਸਾਮਗ੍ਗੀ ਹੋਤਿ, ਸਾਮਗ੍ਗੀਉਪੋਸਥੋ ਏਵ ਤੇਹਿ ਕਤ੍ਤਬ੍ਬੋ, ਨ ਪਵਾਰਣਾ. ਏਕਸ੍ਮਿਂ ਵਸ੍ਸੇ ਕਤਪਵਾਰਣਾਨਂ ਪੁਨ ਪਵਾਰਣਾਯ ਅਵਿਹਿਤਤ੍ਤਾ. ਸਾਮਗ੍ਗੀਦਿਵਸੋਤਿ ਅਨੁਪੋਸਥਦਿਵਸੇ ਸਾਮਗ੍ਗੀਕਰਣਂ ਸਨ੍ਧਾਯ ਵੁਤ੍ਤਂ. ਸਚੇ ਪਨ ਚਾਤੁਦ੍ਦਸਿਯਂ, ਪਨ੍ਨਰਸਿਯਂ ਵਾ ਸਙ੍ਘੋ ਸਾਮਗ੍ਗਿਂ ਕਰੋਤਿ, ਤਦਾ ਸਾਮਗ੍ਗੀਉਪੋਸਥਦਿਵਸੋ ਨ ਹੋਤਿ, ਚਾਤੁਦ੍ਦਸੀਪਨ੍ਨਰਸੀਉਪੋਸਥੋਵ ਹੋਤਿ. ਉਪਰਿ ਪਵਾਰਣਾਯਪਿ ਏਸੇਵ ਨਯੋ.

ਪਚ੍ਚੁਕ੍ਕਡ੍ਢਿਤ੍ਵਾ ਠਪਿਤਦਿਵਸੋਤਿ ਭਣ੍ਡਨਕਾਰਕੇਹਿ ਉਪਦ੍ਦੁਤਾ ਵਾ ਕੇਨਚਿਦੇਵ ਕਰਣੀਯੇਨ ਪਵਾਰਣਾਸਙ੍ਗਹਂ ਵਾ ਕਤ੍ਵਾ ਠਪਿਤੋ ਕਾਲ਼ਪਕ੍ਖਚਾਤੁਦ੍ਦਸੀਦਿਵਸੋਵ. ਦ੍ਵੇ ਚ ਪੁਣ੍ਣਮਾਸਿਯੋਤਿ ਪੁਬ੍ਬ-ਕਤ੍ਤਿਕਪੁਣ੍ਣਮਾ, ਪਚ੍ਛਿਮਕਤ੍ਤਿਕਪੁਣ੍ਣਮਾ ਚਾਤਿ ਦ੍ਵੇ ਪੁਣ੍ਣਮਾਸਿਯੋ. ਏਵਂ ਚਤੁਬ੍ਬਿਧਮ੍ਪੀਤਿ ਪੁਣ੍ਣਮਾਸੀਦ੍ਵਯੇਨ ਸਦ੍ਧਿਂ ਸਾਮਗ੍ਗੀਪਵਾਰਣਂ, ਚਾਤੁਦ੍ਦਸੀਪਵਾਰਣਞ੍ਚ ਸਮ੍ਪਿਣ੍ਡੇਤ੍ਵਾ ਵੁਤ੍ਤਂ. ਇਦਞ੍ਚ ਪਕਤਿਚਾਰਿਤ੍ਤਵਸੇਨ ਵੁਤ੍ਤਂ. ਤਥਾਰੂਪਪਚ੍ਚਯੇ ਪਨ ਸਤਿ ਉਭਿਨ੍ਨਂ ਪੁਣ੍ਣਮਾਸੀਨਂ ਪੁਰਿਮਾ ਦ੍ਵੇ ਚਾਤੁਦ੍ਦਸਿਯੋਪਿ ਕਾਲ਼ਪਕ੍ਖਚਾਤੁਦ੍ਦਸਿਯਾ ਅਨਨ੍ਤਰਾ ਪਨ੍ਨਰਸੀਪੀਤਿ ਇਮੇਪਿ ਤਯੋ ਦਿਵਸਾ ਪਵਾਰਣਾਦਿਵਸਾ ਏਵਾਤਿ ਇਮਂ ਸਤ੍ਤਵਿਧਮ੍ਪਿ ਪਵਾਰਣਾਦਿਵਸਂ ਠਪੇਤ੍ਵਾ ਅਞ੍ਞਸ੍ਮਿਂ ਦਿਵਸੇ ਪਵਾਰੇਤੁਂ ਨ ਵਟ੍ਟਤਿ.

੪੮੪. ਅਨੁਸ੍ਸਾਵਨਕਮ੍ਮਂ ਕਤ੍ਵਾਤਿ ਪਠਮਂ ਅਨੁਸ੍ਸਾਵਨਂ ਸਾਵੇਤ੍ਵਾ ‘‘ਏਸਾ ਞਤ੍ਤੀ’’ਤਿ ਅਨੁਸ੍ਸਾਵਨਾਨਨ੍ਤਰਮੇਵ ਸਕਲਂ ਞਤ੍ਤਿਂ ਵਤ੍ਵਾ, ਪਰਿਯੋਸਾਨੇ ‘‘ਏਸਾ ਞਤ੍ਤੀ’’ਤਿ ਵਤ੍ਵਾਤਿ ਅਧਿਪ੍ਪਾਯੋ.

੪੮੫. ਯ੍ਵਾਯਨ੍ਤਿ ਬ੍ਯਞ੍ਜਨਪ੍ਪਭੇਦੋ ਅਧਿਪ੍ਪੇਤੋ. ਦਸਧਾ ਬ੍ਯਞ੍ਜਨਬੁਦ੍ਧਿਯਾ ਪਭੇਦੋਤਿ ਏਤ੍ਥ ਦਸਧਾ ਦਸਵਿਧੇਨ ਬ੍ਯਞ੍ਜਨਾਨਂ ਪਭੇਦੋਤਿ ਯੋਜੇਤਬ੍ਬਂ. ਕੇਨਾਯਂ ਪਭੇਦੋਤਿ ਆਹ ‘‘ਬ੍ਯਞ੍ਜਨਬੁਦ੍ਧਿਯਾ’’ਤਿ. ਯਥਾਧਿਪ੍ਪੇਤਤ੍ਥਬ੍ਯਞ੍ਜਨਤੋ ਬ੍ਯਞ੍ਜਨਸਙ੍ਖਾਤਾਨਂ ਅਕ੍ਖਰਾਨਂ ਜਨਿਕਾ ਬੁਦ੍ਧਿ ਬ੍ਯਞ੍ਜਨਬੁਦ੍ਧਿ, ਤਾਯ ਬ੍ਯਞ੍ਜਨਬੁਦ੍ਧਿਯਾ, ਅਕ੍ਖਰਸਮੁਟ੍ਠਾਪਕਚਿਤ੍ਤਭੇਦੇਨੇਵਾਤਿ ਅਤ੍ਥੋ. ਯਂ ਵਾ ਸਂਯੋਗਪਰਂ ਕਤ੍ਵਾ ਵੁਚ੍ਚਤਿ, ਇਦਮ੍ਪਿ ਗਰੁਕਨ੍ਤਿ ਯੋਜਨਾ.

ਤਤ੍ਥ ਆਯਸ੍ਮਤੋਤਿਆਦੀਸੁ ਯਾਨਿ ਅਨਨ੍ਤਰਿਤਾਨਿ ਸ-ਕਾਰਮ-ਕਾਰਾਦਿਬ੍ਯਞ੍ਜਨਾਨਿ ‘‘ਸਂਯੋਗੋ’’ਤਿ ਵੁਚ੍ਚਨ੍ਤਿ, ਸੋ ਸਂਯੋਗੋ ਪਰੋ ਯਸ੍ਸ ਅ-ਕਾਰਾਦਿਨੋ, ਸੋ ਸਂਯੋਗਪਰੋ ਨਾਮ. ਰਸ੍ਸਨ੍ਤਿ ਅਕਾਰਾਦਿਬ੍ਯਞ੍ਜਨਰਹਿਤਂ ਸਰਂ. ਅਸਂਯੋਗਪਰਨ੍ਤਿ ‘‘ਯਸ੍ਸ ਨਕ੍ਖਮਤੀ’’ਤਿਆਦੀਸੁ ਯ-ਕਾਰ ਨ-ਕਾਰਾਦਿਬ੍ਯਞ੍ਜਨਸਹਿਤਸਰਂ ਸਨ੍ਧਾਯ ਵੁਤ੍ਤਂ. ਤ-ਕਾਰਸ੍ਸ ਥ-ਕਾਰਂ ਅਕਤ੍ਵਾ ਵਗ੍ਗਨ੍ਤਰੇ ਸਿਥਿਲਮੇਵ ਕਤ੍ਵਾ ‘‘ਸੁਣਾਟੁ ਮੇ’’ਤਿਆਦਿਂ ਵਦਨ੍ਤੋਪਿ ਦੁਰੁਤ੍ਤਂ ਕਰੋਤਿਯੇਵ ਠਪੇਤ੍ਵਾ ਅਨੁਰੂਪਂ ਆਦੇਸਂ. ਯਞ੍ਹਿ ‘‘ਸਚ੍ਚਿਕਤ੍ਥਪਰਮਤ੍ਥੇਨਾ’’ਤਿ ਵਤ੍ਤਬ੍ਬੇ ‘‘ਸਚ੍ਚਿਕਟ੍ਠਪਰਮਟ੍ਠੇਨਾ’’ਤਿ ਚ ‘‘ਅਤ੍ਥਕਥਾ’’ਤਿ ਵਤ੍ਤਬ੍ਬੇ ‘‘ਅਟ੍ਠਕਥਾ’’ਤਿ ਚ ਤਤ੍ਥ ਤਤ੍ਥ ਵੁਚ੍ਚਤਿ, ਤਾਦਿਸਂ ਪਾਲ਼ਿਅਟ੍ਠਕਥਾਸੁ ਦਿਟ੍ਠਪਯੋਗਂ, ਤਦਨੁਰੂਪਞ੍ਚ ਵਤ੍ਤੁਂ ਵਟ੍ਟਤਿ, ਤਤੋ ਅਞ੍ਞਂ ਨ ਵਟ੍ਟਤਿ. ਤੇਨਾਹ ‘‘ਅਨੁਕ੍ਕਮਾਗਤਂ ਪਵੇਣਿਂ ਅਵਿਨਾਸੇਨ੍ਤੇਨਾ’’ਤਿਆਦਿ.

ਦੀਘੇ ਵਤ੍ਤਬ੍ਬੇ ਰਸ੍ਸਨ੍ਤਿਆਦੀਸੁ ‘‘ਭਿਕ੍ਖੂਨ’’ਨ੍ਤਿ ਵਤ੍ਤਬ੍ਬੇ ‘‘ਭਿਕ੍ਖੁਨ’’ਨ੍ਤਿ ਵਾ ‘‘ਬਹੂਸੂ’’ਤਿ ਵਤ੍ਤਬ੍ਬੇ ‘‘ਬਹੁਸੂ’’ਤਿ ਵਾ ‘‘ਨਕ੍ਖਮਤੀ’’ਤਿ ਵਤ੍ਤਬ੍ਬੇ ‘‘ਨ ਖਮਤੀ’’ਤਿ ਵਾ ‘‘ਉਪਸਮ੍ਪਦਾਪੇਕ੍ਖੋ’’ਤਿ ਵਤ੍ਤਬ੍ਬੇ ‘‘ਉਪਸਮ੍ਪਦਾਪੇਖੋ’’ਤਿ ਵਾ ਏਵਂ ਅਨੁਰੂਪਟ੍ਠਾਨੇਸੁ ਏਵ ਦੀਘਰਸ੍ਸਾਦਿ ਰਸ੍ਸਦੀਘਾਦਿਵਸੇਨ ਪਰਿਵਤ੍ਤੇਤੁਂ ਵਟ੍ਟਤਿ, ਨ ਪਨ ‘‘ਨਾਗੋ’’ਤਿ ਵਤ੍ਤਬ੍ਬੇ ‘‘ਨਗੋ’’ਤਿ ਵਾ ‘‘ਸਙ੍ਘੋ’’ਤਿ ਵਤ੍ਤਬ੍ਬੇ ‘‘ਸਘੋ’’ਤਿ ਵਾ ‘‘ਤਿਸ੍ਸੋ’’ਤਿ ਵਤ੍ਤਬ੍ਬੇ ‘‘ਤਿਸੋ’’ਤਿ ਵਾ ‘‘ਯਾਚਤੀ’’ਤਿ ਵਤ੍ਤਬ੍ਬੇ ‘‘ਯਾਚਨ੍ਤੀ’’ਤਿ ਵਾ ਏਵਂ ਅਨਨੁਰੂਪਟ੍ਠਾਨੇਸੁ ਵਤ੍ਤੁਂ. ਸਮ੍ਬਨ੍ਧਂ, ਪਨ ਵਵਤ੍ਥਾਨਞ੍ਚ ਸਬ੍ਬਥਾਪਿ ਵਟ੍ਟਤੀਤਿ ਗਹੇਤਬ੍ਬਂ.

੪੮੬. ਸੇਸਸੀਮਾਸੁਪੀਤਿ ਅਤਿਮਹਤੀਆਦੀਸੁ ਦਸਸੁਪਿ.

੪੮੮. ਚਤੁਵਗ੍ਗਕਰਣੇਤਿ ਚਤੁਵਗ੍ਗੇਨ ਸਙ੍ਘੇਨ ਕਤ੍ਤਬ੍ਬੇ. ਅਨਿਸ੍ਸਾਰਿਤਾਤਿ ਉਪੋਸਥਟ੍ਠਪਨਾਦਿਨਾ ਵਾ ਲਦ੍ਧਿਨਾਨਾਸਂਵਾਸਕਭਾਵੇਨ ਵਾ ਨ ਬਹਿਕਤਾ. ਅਟ੍ਠਕਥਾਯਞ੍ਹਿ ‘‘ਅਪਕਤਤ੍ਤਸ੍ਸਾਤਿ ਉਕ੍ਖਿਤ੍ਤਕਸ੍ਸ ਵਾ, ਯਸ੍ਸ ਵਾ ਉਪੋਸਥਪਵਾਰਣਾ ਠਪਿਤਾ ਹੋਨ੍ਤੀ’’ਤਿ (ਪਰਿ. ਅਟ੍ਠ. ੪੨੫) ਵੁਤ੍ਤਤ੍ਤਾ ਠਪਿਤਉਪੋਸਥਪਵਾਰਣੋ ਭਿਕ੍ਖੁ ਅਪਕਤਤ੍ਤੋ ਏਵਾਤਿ ਗਹੇਤਬ੍ਬਂ. ਪਰਿਸੁਦ੍ਧਸੀਲਾਤਿ ਪਾਰਾਜਿਕਂ ਅਨਾਪਨ੍ਨਾ ਅਧਿਪ੍ਪੇਤਾ. ਪਰਿਵਾਸਾਦਿਕਮ੍ਮੇਸੁ ਪਨ ਗਰੁਕਟ੍ਠਾਪਿ ਅਪਕਤਤ੍ਤਾ ਏਵਾਤਿ ਗਹੇਤਬ੍ਬਂ. ਅਵਸੇਸਾ…ਪੇ… ਛਨ੍ਦਾਰਹਾਵ ਹੋਨ੍ਤੀਤਿ ਸਙ੍ਘਤੋ ਹਤ੍ਥਪਾਸਂ ਵਿਜਹਿਤ੍ਵਾ ਠਿਤੇ ਸਨ੍ਧਾਯ ਵੁਤ੍ਤਂ. ਅਵਿਜਹਿਤ੍ਵਾ ਠਿਤਾ ਪਨ ਛਨ੍ਦਾਰਹਾ ਨ ਹੋਨ੍ਤਿ, ਤੇਪਿ ਚਤੁਵਗ੍ਗਾਦਿਤੋ ਅਧਿਕਾ ਹਤ੍ਥਪਾਸਂ ਵਿਜਹਿਤ੍ਵਾਵ ਛਨ੍ਦਾਰਹਾ ਹੋਨ੍ਤਿ. ਤਸ੍ਮਾ ਸਙ੍ਘਤੋ ਹਤ੍ਥਪਾਸਂ ਵਿਜਹਿਤ੍ਵਾ ਠਿਤੇਨੇਵ ਛਨ੍ਦੋ ਵਾ ਪਾਰਿਸੁਦ੍ਧਿ ਵਾ ਦਾਤਬ੍ਬਾ.

ਕਮ੍ਮਵਗ੍ਗਵਣ੍ਣਨਾ ਨਿਟ੍ਠਿਤਾ.

ਅਪਲੋਕਨਕਮ੍ਮਕਥਾਵਣ੍ਣਨਾ

੪੯੬. ਏਤਰਹਿ ਸਚੇਪਿ ਸਾਮਣੇਰੋਤਿਆਦੀਸੁ ਬੁਦ੍ਧਾਦੀਨਂ ਅਵਣ੍ਣਭਾਸਨਮ੍ਪਿ ਅਕਪ੍ਪਿਯਾਦਿਂ ਕਪ੍ਪਿਯਾਦਿਭਾਵੇਨ ਦੀਪਨਮ੍ਪਿ ਦਿਟ੍ਠਿਵਿਪਤ੍ਤਿਯਞ੍ਞੇਵ ਪਵਿਸਤਿ. ਤੇਨੇਵ ਵਕ੍ਖਤਿ ‘‘ਤਂ ਲਦ੍ਧਿਂ ਨਿਸ੍ਸਜ੍ਜਾਪੇਤਬ੍ਬੋ’’ਤਿ. ਭਿਕ੍ਖੂਨਮ੍ਪਿ ਏਸੇਵ ਨਯੋ. ਮਿਚ੍ਛਾਦਿਟ੍ਠਿਕੋਤਿ ਬੁਦ੍ਧਵਚਨਾਧਿਪ੍ਪਾਯਂ ਵਿਪਰੀਤਤੋ ਗਣ੍ਹਨ੍ਤੋ, ਸੋ ਏਵ ਅਨ੍ਤਗ੍ਗਾਹਿਕਾਯ ਦਿਟ੍ਠਿਯਾ ਸਮਨ੍ਨਾਗਤੋਤਿ ਚ ਵੁਤ੍ਤੋ. ਕੇਚਿ ਪਨ ‘‘ਸਸ੍ਸਤੁਚ੍ਛੇਦਾਨਂ ਅਞ੍ਞਤਰਦਿਟ੍ਠਿਯਾ ਸਮਨ੍ਨਾਗਤੋ’’ਤਿ ਵਦਨ੍ਤਿ, ਤਂ ਨ ਯੁਤ੍ਤਂ, ਸਸ੍ਸਤੁਚ੍ਛੇਦਗ੍ਗਾਹਸ੍ਸ ਸਾਮਣੇਰਾਨਂ ਲਿਙ੍ਗਨਾਸਨਾਯ ਕਾਰਣਤ੍ਤੇਨ ਹੇਟ੍ਠਾ ਅਟ੍ਠਕਥਾਯਮੇਵ (ਮਹਾਵ. ਅਟ੍ਠ. ੧੦੮) ਵੁਤ੍ਤਤ੍ਤਾ, ਇਧ ਚ ਦਣ੍ਡਕਮ੍ਮਨਾਸਨਾਯ ਏਵ ਅਧਿਪ੍ਪੇਤਤ੍ਤਾ.

ਤਸ੍ਸਾਪਿ ਦਾਤਬ੍ਬੋਤਿ ਵਿਜ੍ਜਮਾਨਂ ਮੁਖਰਾਦਿਭਾਵਂ ਨਿਸ੍ਸਾਯ ਅਪ੍ਪਟਿਪੁਚ੍ਛਿਤ੍ਵਾਪਿ ਪਟਿਞ੍ਞਂ ਅਗ੍ਗਹੇਤ੍ਵਾਪਿ ਆਪਤ੍ਤਿਂ ਅਨਾਰੋਪੇਤ੍ਵਾਪਿ ਦੇਸਿਤਾਯਪਿ ਆਪਤ੍ਤਿਯਾ ਖੁਂਸਨਾਦਿਤੋ ਅਨੋਰਮਨ੍ਤਸ੍ਸ ਦਾਤਬ੍ਬੋਵ. ਓਰਮਨ੍ਤਸ੍ਸ ਪਨ ਖਮਾਪੇਨ੍ਤਸ੍ਸ ਨ ਦਾਤਬ੍ਬੋ.

ਬ੍ਰਹ੍ਮਦਣ੍ਡਸ੍ਸ ਦਾਨਨ੍ਤਿ ਖਰਦਣ੍ਡਸ੍ਸ ਉਕ੍ਕਟ੍ਠਦਣ੍ਡਸ੍ਸ ਦਾਨਂ. ਤਜ੍ਜਨੀਯਾਦਿਕਮ੍ਮੇ ਹਿ ਕਤੇ ਓਵਾਦਾਨੁਸਾਸਨਿਪ੍ਪਦਾਨਪਟਿਕ੍ਖੇਪੋ ਨਤ੍ਥਿ. ਦਿਨ੍ਨਬ੍ਰਹ੍ਮਦਣ੍ਡੇ ਪਨ ਤਸ੍ਮਿਂ ਸਦ੍ਧਿਂ ਤਜ੍ਜਨੀਯਾਦਿਕਮ੍ਮਕਤੇਹਿ ਪਟਿਕ੍ਖਿਤ੍ਤਮ੍ਪਿ ਕਾਤੁਂ ਨ ਵਟ੍ਟਤਿ, ‘‘ਨੇਵ ਵਤ੍ਤਬ੍ਬੋ’’ਤਿਆਦਿਨਾ ਆਲਾਪਸਲ੍ਲਾਪਾਦਿਮਤ੍ਤਸ੍ਸਾਪਿ ਨਕਾਰੇਨ ਪਟਿਕ੍ਖਿਤ੍ਤਤ੍ਤਾ. ਤਞ੍ਹਿ ਦਿਸ੍ਵਾ ਭਿਕ੍ਖੂ ਗੀਵਂ ਪਰਿਵਤ੍ਤੇਤ੍ਵਾ ਓਲੋਕਨਮਤ੍ਤਮ੍ਪਿ ਨ ਕਰੋਨ੍ਤਿ, ਏਵਂ ਵਿਵਜ੍ਜੇਤਬ੍ਬਂ ਨਿਮ੍ਮਦਨਕਰਣਤ੍ਥਮੇਵ ਤਸ੍ਸ ਦਣ੍ਡਸ੍ਸ ਅਨੁਞ੍ਞਾਤਤ੍ਤਾ. ਤੇਨੇਵ ਛਨ੍ਨਤ੍ਥੇਰੋਪਿ ਉਕ੍ਖੇਪਨੀਯਾਦਿਕਮ੍ਮਕਤੋਪਿ ਅਭਾਯਿਤ੍ਵਾ ਬ੍ਰਹ੍ਮਦਣ੍ਡੇ ਦਿਨ੍ਨੇ ‘‘ਸਙ੍ਘੇਨਾਹਂ ਸਬ੍ਬਥਾ ਵਿਵਜ੍ਜਿਤੋ’’ਤਿ ਮੁਚ੍ਛਿਤੋ ਪਪਤਿ. ਯੋ ਪਨ ਬ੍ਰਹ੍ਮਦਣ੍ਡਕਤੇਨ ਸਦ੍ਧਿਂ ਞਤ੍ਵਾ ਸਂਸਟ੍ਠੋ ਅਵਿਵਜ੍ਜੇਤ੍ਵਾ ਵਿਹਰਤਿ, ਤਸ੍ਸ ਦੁਕ੍ਕਟਮੇਵਾਤਿ ਗਹੇਤਬ੍ਬਂ ਅਞ੍ਞਥਾ ਬ੍ਰਹ੍ਮਦਣ੍ਡਵਿਧਾਨਸ੍ਸ ਨਿਰਤ੍ਥਕਤਾਪਸਙ੍ਗਤੋ. ਤੇਨਾਤਿ ਬ੍ਰਹ੍ਮਦਣ੍ਡਕਤੇਨ. ਯਥਾ ਤਜ੍ਜਨੀਯਾਦਿਕਮ੍ਮਕਤੇਹਿ, ਏਵਮੇਵ ਤਤੋ ਅਧਿਕਮ੍ਪਿ ਸਙ੍ਘਂਆਰਾਧੇਨ੍ਤੇਨ ਸਮ੍ਮਾਵਤ੍ਤਿਤਬ੍ਬਂ. ਤਞ੍ਚ ‘‘ਸੋਰਤੋ ਨਿਵਾਤਵੁਤ੍ਤੀ’’ਤਿਆਦਿਨਾ ਸਰੂਪਤੋ ਦਸ੍ਸਿਤਮੇਵ. ਤੇਨਾਹ ‘‘ਸਮ੍ਮਾਵਤ੍ਤਿਤ੍ਵਾ ਖਮਾਪੇਨ੍ਤਸ੍ਸ ਬ੍ਰਹ੍ਮਦਣ੍ਡੋ ਪਟਿਪ੍ਪਸ੍ਸਮ੍ਭੇਤਬ੍ਬੋ’’ਤਿ.

ਯਂ ਤਂ ਭਗਵਤਾ ਅਵਨ੍ਦਿਯਕਮ੍ਮਂ ਅਨੁਞ੍ਞਾਤਨ੍ਤਿ ਸਮ੍ਬਨ੍ਧੋ. ‘‘ਤਸ੍ਸ ਭਿਕ੍ਖੁਨੋ ਦਣ੍ਡਕਮ੍ਮਂ ਕਾਤੁ’’ਨ੍ਤਿ ਸਾਮਞ੍ਞਤੋ ਅਨੁਞ੍ਞਾਤਪ੍ਪਕਾਰਂ ਦਸ੍ਸੇਤ੍ਵਾ ਪੁਨ ਵਿਸੇਸਤੋ ਅਨੁਞ੍ਞਾਤਪ੍ਪਕਾਰਂ ਦਸ੍ਸੇਤੁਂ ‘‘ਅਥ ਖੋ’’ਤਿਆਦਿਪਾਲ਼ਿ ਉਦ੍ਧਟਾਤਿ ਵੇਦਿਤਬ੍ਬਂ. ਇਮਸ੍ਸ ਅਪਲੋਕਨਕਮ੍ਮਸ੍ਸ ਠਾਨਂ ਹੋਤੀਤਿ ਅਪਲੋਕਨਕਮ੍ਮਸ੍ਸ ਸਾਮਞ੍ਞਸ੍ਸ ਪਵਤ੍ਤਿਟ੍ਠਾਨਂ ਹੋਤੀਤਿ. ਵਿਸੇਸਬ੍ਯਤਿਰੇਕੇਨ ਅਵਿਜ੍ਜਮਾਨਮ੍ਪਿ ਤਦਞ੍ਞਤ੍ਥ ਅਪ੍ਪਵਤ੍ਤਿਂ ਦਸ੍ਸੇਤੁਂ ਵਿਸੇਸਨਿਸ੍ਸਿਤਂ ਵਿਯ ਵੋਹਰੀਯਤਿ. ‘‘ਕਮ੍ਮਞ੍ਞੇਵ ਲਕ੍ਖਣ’’ਨ੍ਤਿ ਇਮਿਨਾ ਓਸਾਰਣਾਦਿਵਸੇਨ ਗਹਿਤਾਵਸੇਸਾਨਂ ਸਬ੍ਬੇਸਂ ਅਪਲੋਕਨਕਮ੍ਮਸ੍ਸ ਸਾਮਞ੍ਞਲਕ੍ਖਣਵਸੇਨ ਗਹਿਤਤ੍ਤਾ ਕਮ੍ਮਞ੍ਞੇਵ ਲਕ੍ਖਣਮਸ੍ਸਾਤਿ ਕਮ੍ਮਲਕ੍ਖਣਨ੍ਤਿ ਨਿਬ੍ਬਚਨਂ ਦਸ੍ਸੇਤਿ. ਇਦਞ੍ਚ ਵੁਤ੍ਤਾਵਸੇਸਾਨਂ ਕਮ੍ਮਾਨਂ ਨਿਟ੍ਠਾਨਟ੍ਠਾਨਂ, ਸਙ੍ਖਾਰਕ੍ਖਨ੍ਧਧਮ੍ਮਾਯਤਨਾਨਿ ਵਿਯ ਵੁਤ੍ਤਾਵਸੇਸਖਨ੍ਧਾਯਤਨਾਨਨ੍ਤਿ ਦਟ੍ਠਬ੍ਬਂ. ਤੇਨੇਵ ਵਕ੍ਖਤਿ ‘‘ਅਯਂ ਪਨੇਤ੍ਥ ਪਾਲ਼ਿਮੁਤ੍ਤਕੋਪਿ ਕਮ੍ਮਲਕ੍ਖਣਵਿਨਿਚ੍ਛਯੋ’’ਤਿਆਦਿ (ਪਰਿ. ਅਟ੍ਠ. ੪੯੫-੪੯੬). ਯਥਾ ਚੇਤ੍ਥ, ਏਵਂ ਉਪਰਿ ਞਤ੍ਤਿਕਮ੍ਮਾਦੀਸੁਪਿ ਕਮ੍ਮਲਕ੍ਖਣਂ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਤਸ੍ਸ ਕਰਣਨ੍ਤਿ ਅਵਨ੍ਦਿਯਕਮ੍ਮਸ੍ਸ ਕਰਣਵਿਧਾਨਂ.

‘‘ਨ ਵਨ੍ਦਿਤਬ੍ਬੋ’’ਤਿ ਇਮਿਨਾ ਵਨ੍ਦਨ੍ਤਿਯਾ ਦੁਕ੍ਕਟਨ੍ਤਿ ਦਸ੍ਸੇਤੀਤਿ ਦਟ੍ਠਬ੍ਬਂ. ਸਙ੍ਘੇਨ ਕਤਂ ਕਤਿਕਂ ਞਤ੍ਵਾ ਮਦ੍ਦਨਂ ਵਿਯ ਹਿ ਸਙ੍ਘਸਮ੍ਮੁਤਿਂ ਅਨਾਦਰੇਨ ਅਤਿਕ੍ਕਮਨ੍ਤਸ੍ਸ ਆਪਤ੍ਤਿ ਏਵ ਹੋਤਿ.

ਭਿਕ੍ਖੁਸਙ੍ਘਸ੍ਸਾਪਿ ਪਨੇਤਂ ਲਬ੍ਭਤਿਯੇਵਾਤਿ ਅਵਨ੍ਦਿਯਕਮ੍ਮਸ੍ਸ ਉਪਲਕ੍ਖਣਮਤ੍ਤੇਨ ਗਹਿਤਤ੍ਤਾ ਭਿਕ੍ਖੁਸਙ੍ਘਸ੍ਸਾਪਿ ਕਮ੍ਮਲਕ੍ਖਣਂ ਲਬ੍ਭਤਿ ਏਵ.

ਸਲਾਕਦਾਨਟ੍ਠਾਨਂ ਸਲਾਕਗ੍ਗਂ ਨਾਮ. ਯਾਗੁਭਤ੍ਤਾਨਂ ਭਾਜਨਟ੍ਠਾਨਾਨਿ ਯਾਗਗ੍ਗਭਤ੍ਤਗ੍ਗਾਨਿ ਨਾਮ. ਏਤੇਸੁਪਿ ਹਿ ਠਾਨੇਸੁ ਸਬ੍ਬੋ ਸਙ੍ਘੋ ਉਪੋਸਥੇ ਵਿਯ ਸਨ੍ਨਿਪਤਿਤੋ, ਕਮ੍ਮਞ੍ਚ ਵਗ੍ਗਕਮ੍ਮਂ ਨ ਹੋਤਿ, ‘‘ਮਯਮੇਤਂ ਨ ਜਾਨਿਮ੍ਹਾ’’ਤਿ ਪਚ੍ਛਾ ਖਿਯ੍ਯਨ੍ਤਾਪਿ ਨ ਹੋਨ੍ਤਿ. ਖਣ੍ਡਸੀਮਾਯ ਪਨ ਕਤੇ ਖਿਯ੍ਯਨ੍ਤਿ. ਸਙ੍ਘਿਕਪਚ੍ਚਯਞ੍ਹਿ ਅਚ੍ਛਿਨ੍ਨਚੀਵਰਾਦੀਨਂ ਦਾਤੁਂ ਅਪਲੋਕੇਨ੍ਤੇਹਿ ਉਪਚਾਰਸੀਮਟ੍ਠਾਨਂ ਸਬ੍ਬੇਸਂ ਅਨੁਮਤਿਂ ਗਹੇਤ੍ਵਾਵ ਕਾਤਬ੍ਬਂ. ਯੋ ਪਨ ਵਿਸਭਾਗਪੁਗ੍ਗਲੋ ਧਮ੍ਮਿਕਂ ਅਪਲੋਕਨਂ ਪਟਿਬਾਹਤਿ, ਤਂ ਉਪਾਯੇਨ ਬਹਿਉਪਚਾਰਸੀਮਾਗਤਂ ਵਾ ਕਤ੍ਵਾ ਖਣ੍ਡਸੀਮਂ ਵਾ ਪਵਿਸਿਤ੍ਵਾ ਕਾਤੁਂ ਵਟ੍ਟਤਿ.

ਯਂ ਸਨ੍ਧਾਯ ‘‘ਅਪਲੋਕਨਕਮ੍ਮਂ ਕਰੋਤੀ’’ਤਿ ਸਾਮਞ੍ਞਤੋ ਦਸ੍ਸੇਤਿ, ਤਂ ਅਪਲੋਕਨਕਮ੍ਮਂ ਸਰੂਪਤੋ ਦਸ੍ਸੇਤੁਮਾਹ ‘‘ਅਚ੍ਛਿਨ੍ਨਚੀਵਰਂ’’ਇਚ੍ਚਾਦਿ. ਯਦਿ ਅਪਲੋਕੇਤ੍ਵਾਵ ਚੀਵਰਂ ਦਾਤਬ੍ਬਂ, ਕਿਂ ਪਨ ਅਪ੍ਪਮਤ੍ਤਕਵਿਸ੍ਸਜ੍ਜਕਸਮ੍ਮੁਤਿਯਾਤਿ ਆਹ ‘‘ਅਪ੍ਪਮਤ੍ਤਕਵਿਸ੍ਸਜ੍ਜਨਕੇਨ ਪਨਾ’’ਤਿਆਦਿ. ਨਾਲ਼ਿ ਵਾ ਉਪਡ੍ਢਨਾਲ਼ਿ ਵਾਤਿ ਦਿਵਸੇ ਦਿਵਸੇ ਅਪਲੋਕੇਤ੍ਵਾ ਦਾਤਬ੍ਬਸ੍ਸ ਪਮਾਣਦਸ੍ਸਨਂ. ਤੇਨ ਯਾਪਨਮਤ੍ਤਮੇਵ ਅਪਲੋਕੇਤਬ੍ਬਂ, ਨ ਅਧਿਕਨ੍ਤਿ ਦਸ੍ਸੇਤਿ. ਏਕਦਿਵਸਂਯੇਵ ਵਾਤਿਆਦਿ ਦਸਵੀਸਤਿਦਿਵਸਾਨਂ ਏਕਸ੍ਮਿਂ ਦਿਵਸੇਯੇਵ ਦਾਤਬ੍ਬਪਰਿਚ੍ਛੇਦਦਸ੍ਸਨਂ, ਤੇਨ ਯਾਵ ਜੀਵਨ੍ਤਿ ਵਾ ਯਾਵ ਰੋਗਾ ਵੁਟ੍ਠਹਤੀਤਿ ਵਾ ਏਵਂ ਅਪਲੋਕੇਤੁਂ ਨ ਵਟ੍ਟਤੀਤਿ ਦਸ੍ਸੇਤਿ. ਇਣਪਲਿਬੋਧਨ੍ਤਿ ਇਣਵਤ੍ਥੁਂ ਦਾਤੁਂ ਵਟ੍ਟਤੀਤਿ ਸਮ੍ਬਨ੍ਧੋ. ਤਞ੍ਚ ਇਣਾਯਿਕੇਹਿ ਪਲਿਬੁਦ੍ਧਸ੍ਸ ਲਜ੍ਜਿਪੇਸਲਸ੍ਸ ਸਾਸਨੁਪਕਾਰਕਸ੍ਸ ਪਮਾਣਯੁਤ੍ਤਮੇਵ ਕਪ੍ਪਿਯਭਣ੍ਡਂ ਨਿਯਮੇਤ੍ਵਾ ਅਪਲੋਕੇਤ੍ਵਾ ਦਾਤਬ੍ਬਂ, ਨ ਪਨ ਸਹਸ੍ਸਂ ਵਾ ਸਤਸਹਸ੍ਸਂ ਵਾ ਮਹਾਇਣਂ. ਤਾਦਿਸਞ੍ਹਿ ਭਿਕ੍ਖਾਚਰਿਯਵਤ੍ਤੇਨ ਸਬ੍ਬੇਹਿ ਭਿਕ੍ਖੂਹਿ ਤਾਦਿਸਸ੍ਸ ਭਿਕ੍ਖੁਨੋ ਪਰਿਯੇਸਿਤ੍ਵਾ ਦਾਤਬ੍ਬਂ.

ਉਪਨਿਕ੍ਖੇਪਤੋਤਿ ਚੇਤਿਯਪਟਿਜਗ੍ਗਨਤ੍ਥਾਯ ਵਡ੍ਢਿਯਾ ਪਯੋਜੇਤ੍ਵਾ ਕਪ੍ਪਿਯਕਾਰਕੇਹਿ ਠਪਿਤਵਤ੍ਥੁਤੋ. ਸਙ੍ਘਿਕੇਨਪੀਤਿ ਨ ਕੇਵਲਞ੍ਚ ਤਤ੍ਰੁਪ੍ਪਾਦਤੋ ਪਚ੍ਚਯਦਾਯਕੇਹਿ ਚਤੁਪਚ੍ਚਯਤ੍ਥਾਯ ਸਙ੍ਘਸ੍ਸ ਦਿਨ੍ਨਵਤ੍ਥੁਨਾਪੀਤਿ ਅਤ੍ਥੋ.

ਸਙ੍ਘਭਤ੍ਤਂ ਕਾਤੁਂ ਨ ਵਟ੍ਟਤੀਤਿ ਮਹਾਦਾਨਂ ਦੇਨ੍ਤੇਹਿਪਿ ਕਰਿਯਮਾਨਂ ਸਙ੍ਘਭਤ੍ਤਂ ਵਿਯ ਕਾਰੇਤੁਂ ਨ ਵਟ੍ਟਤੀਤਿ ਅਧਿਪ੍ਪਾਯੋ.

‘‘ਯਥਾਸੁਖਂ ਪਰਿਭੁਞ੍ਜਿਤੁਂ ਰੁਚ੍ਚਤੀ’’ਤਿ ਵੁਤ੍ਤਤ੍ਤਾ ਅਤ੍ਤਨੋ ਪਰਿਭੋਗਪ੍ਪਹੋਨਕਂ ਅਪ੍ਪਂ ਵਾ ਬਹੁਂ ਵਾ ਗਹੇਤਬ੍ਬਂ, ਅਧਿਕਂ ਪਨ ਗਹੇਤੁਂ ਨ ਲਭਤਿ. ਉਪੋਸਥਦਿਵਸੇਤਿ ਨਿਦਸ੍ਸਨਮਤ੍ਤਂ, ਯਸ੍ਮਿਂ ਕਿਸ੍ਮਿਞ੍ਚਿ ਦਿਵਸੇਪਿ ਕਤਂ ਸੁਕਤਮੇਵ ਹੋਤਿ. ਕਰੋਨ੍ਤੇਨ ‘‘ਯਂ ਇਮਸ੍ਮਿਂ ਵਿਹਾਰੇ ਅਨ੍ਤੋਸੀਮਾਯ ਸਙ੍ਘਸਨ੍ਤਕਂ…ਪੇ… ਯਥਾਸੁਖਂ ਪਰਿਭੁਞ੍ਜਿਤੁਂ ਮਯ੍ਹਂ ਰੁਚ੍ਚਤੀ’’ਤਿ ਏਵਂ ਕਤਿਕਾ ਕਾਤਬ੍ਬਾ, ਤਥਾ ਦ੍ਵੀਹਿ ਤੀਹਿਪਿ ‘‘ਆਯਸ੍ਮਨ੍ਤਾਨਂ ਰੁਚ੍ਚਤੀ’’ਤਿ ਵਚਨਮੇਵ ਹੇਤ੍ਥ ਵਿਸੇਸੋ. ਤੇਸਮ੍ਪੀਤਿ ਰੁਕ੍ਖਾਨਂ. ਸਾ ਏਵ ਕਤਿਕਾਤਿ ਵਿਸੁਂ ਕਤਿਕਾ ਨ ਕਾਤਬ੍ਬਾਤਿ ਅਤ੍ਥੋ.

ਤੇਸਨ੍ਤਿ ਰੁਕ੍ਖਾਨਂ. ਸਙ੍ਘੋ ਸਾਮੀਤਿ ਸਮ੍ਬਨ੍ਧੋ. ਪੁਰਿਮਵਿਹਾਰੇਤਿ ਪੁਰਿਮੇ ਯਥਾਸੁਖਂ ਪਰਿਭੋਗਤ੍ਥਾਯ ਕਤਕਤਿਕੇ ਵਿਹਾਰੇ. ਪਰਿਵੇਣਾਨਿ ਕਤ੍ਵਾ ਜਗ੍ਗਨ੍ਤੀਤਿ ਯਤ੍ਥ ਅਰਕ੍ਖਿਯਮਾਨੇ ਫਲਾਫਲਾਨਿ, ਰੁਕ੍ਖਾ ਚ ਵਿਨਸ੍ਸਨ੍ਤਿ, ਤਾਦਿਸਂ ਠਾਨਂ ਸਨ੍ਧਾਯ ਵੁਤ੍ਤਂ, ਤਤ੍ਥ ਸਙ੍ਘਸ੍ਸ ਕਤਿਕਾ ਨ ਪਵਤ੍ਤੀਤਿ ਅਧਿਪ੍ਪਾਯੋ. ਯੇ ਪਨ ਰੁਕ੍ਖਾ ਬੀਜਾਨਿ ਰੋਪੇਤ੍ਵਾ ਆਦਿਤੋ ਪਟ੍ਠਾਯ ਪਟਿਜਗ੍ਗਿਤਾ, ਤੇਪਿ ਦਸਮਭਾਗਂ ਦਤ੍ਵਾ ਰੋਪਕੇਹੇਵ ਪਰਿਭੁਞ੍ਜਿਤਬ੍ਬਾ. ਤੇਹੀਤਿ ਜਗ੍ਗਕੇਹਿ.

ਤਤ੍ਥਾਤਿ ਤਸ੍ਮਿਂ ਵਿਹਾਰੇ. ਮੂਲੇਤਿ ਆਦਿਕਾਲੇ, ਪੁਬ੍ਬੇਤਿ ਅਤ੍ਥੋ. ਦੀਘਾ ਕਤਿਕਾਤਿ ਅਪਰਿਚ੍ਛਿਨ੍ਨਕਾਲਾ ਯਥਾਸੁਖਂ ਪਰਿਭੋਗਤ੍ਥਾਯ ਕਤਿਕਾ. ਨਿਕ੍ਕੁਕ੍ਕੁਚ੍ਚੇਨਾਤਿ ‘‘ਅਭਾਜਿਤਮਿਦ’’ਨ੍ਤਿ ਕੁਕ੍ਕੁਚ੍ਚਂ ਅਕਤ੍ਵਾਤਿ ਅਤ੍ਥੋ. ਖਿਯ੍ਯਨਮਤ੍ਤਮੇਵੇਤਨ੍ਤਿ ਤੇਨ ਖਿਯ੍ਯਨੇਨ ਬਹੁਂ ਖਾਦਨ੍ਤਾਨਂ ਦੋਸੋ ਨਤ੍ਥਿ ਅਤ੍ਤਨੋ ਪਰਿਭੋਗਪ੍ਪਮਾਣਸ੍ਸੇਵ ਗਹਿਤਤ੍ਤਾ, ਖਿਯ੍ਯਨ੍ਤੇਪਿ ਅਤ੍ਤਨੋ ਪਹੋਨਕਂ ਗਹੇਤ੍ਵਾ ਖਾਦਿਤਬ੍ਬਨ੍ਤਿ ਅਧਿਪ੍ਪਾਯੋ.

ਗਣ੍ਹਥਾਤਿ ਨ ਵਤ੍ਤਬ੍ਬਾਤਿ ਤਥਾਵੁਤ੍ਤੇ ਤੇਨੇਵ ਭਿਕ੍ਖੁਨਾ ਦਿਨ੍ਨਂ ਵਿਯ ਮਞ੍ਞੇਯ੍ਯੁਂ, ਤਂ ਨਿਸ੍ਸਾਯ ਮਿਚ੍ਛਾਜੀਵਸਮ੍ਭਵੋ ਹੋਤੀਤਿ ਵੁਤ੍ਤਂ. ਤੇਨਾਹ ‘‘ਅਨੁਵਿਚਰਿਤ੍ਵਾ’’ਤਿਆਦਿ. ਉਪਡ੍ਢਭਾਗੋਤਿ ਏਕਭਿਕ੍ਖੁਨੋ ਪਟਿਵੀਸਤੋ ਉਪਡ੍ਢਭਾਗੋ. ਦੇਨ੍ਤੇਨ ਚ ‘‘ਏਤ੍ਤਕਂ ਦਾਤੁਂ ਸਙ੍ਘੋ ਅਨੁਞ੍ਞਾਸੀ’’ਤਿ ਏਵਂ ਅਤ੍ਤਾਨਂ ਪਰਿਮੋਚੇਤ੍ਵਾ ਯਥਾ ਤੇ ਸਙ੍ਘੇ ਏਵ ਪਸੀਦਨ੍ਤਿ, ਏਵਂ ਵਤ੍ਵਾ ਦਾਤਬ੍ਬਂ.

ਅਪਚ੍ਚਾਸੀਸਨ੍ਤੇਨਾਤਿ ਗਿਲਾਨਗਮਿਕਿਸ੍ਸਰਾਦੀਨਂ ਅਨੁਞ੍ਞਾਤਪੁਗ੍ਗਲਾਨਮ੍ਪਿ ਅਤ੍ਤਨੋ ਸਨ੍ਤਕਂ ਦੇਨ੍ਤੇਨ ਅਪਚ੍ਚਾਸੀਸਨ੍ਤੇਨੇਵ ਦਾਤਬ੍ਬਂ, ਅਨਨੁਞ੍ਞਾਤਪੁਗ੍ਗਲਾਨਂ ਪਨ ਅਪਚ੍ਚਾਸੀਸਨ੍ਤੇਨਾਪਿ ਦਾਤੁਂ ਨ ਵਟ੍ਟਤੀਤਿ. ਸਙ੍ਘਿਕਮੇਵ ਯਥਾਕਤਿਤਾਯ ਦਾਪੇਤਬ੍ਬਂ. ਅਤ੍ਤਨੋ ਸਨ੍ਤਕਮ੍ਪਿ ਪਚ੍ਚਯਦਾਯਕਾਦੀ ਸਯਮੇਵ ਵਿਸ੍ਸਾਸੇਨ ਗਣ੍ਹਨ੍ਤਿ, ਨ ਵਾਰੇਤਬ੍ਬਾ, ਲਦ੍ਧਕਪ੍ਪਿਯਨ੍ਤਿ ਤੁਣ੍ਹੀ ਭਵਿਤਬ੍ਬਂ. ਪੁਬ੍ਬੇ ਵੁਤ੍ਤਮੇਵਾਤਿ ‘‘ਕੁਦ੍ਧੋ ਹਿ ਸੋ ਰੁਕ੍ਖੇਪਿ ਛਿਨ੍ਦੇਯ੍ਯਾ’’ਤਿਆਦਿਨਾ ਤੁਣ੍ਹੀਭਾਵੇ ਕਾਰਣਂ ਪੁਬ੍ਬੇ ਵੁਤ੍ਤਮੇਵ. ਤੇਹਿ ਕਤਅਨਤ੍ਥਾਭਾਵੇਪਿ ਕਾਰੁਞ੍ਞੇਨ ਤੁਣ੍ਹੀ ਭਵਿਤੁਂ ਵਟ੍ਟਤਿ, ‘‘ਗਣ੍ਹਥਾ’’ਤਿਆਦਿ ਪਨ ਵਤ੍ਤੁਂ ਨ ਵਟ੍ਟਤਿ.

ਗਰੁਭਣ੍ਡਤ੍ਤਾ…ਪੇ… ਨ ਦਾਤਬ੍ਬਨ੍ਤਿ ਜੀਵਰੁਕ੍ਖਾਨਂ ਆਰਾਮਟ੍ਠਾਨੀਯਤ੍ਤਾ, ਦਾਰੂਨਞ੍ਚ ਗੇਹਸਮ੍ਭਾਰਾਨੁਪਗਤਤ੍ਤਾ ‘‘ਸਬ੍ਬਂ ਤ੍ਵਮੇਵ ਗਣ੍ਹਾ’’ਤਿ ਦਾਤੁਂ ਨ ਵਟ੍ਟਤੀਤਿ ਵੁਤ੍ਤਂ. ਅਕਤਾਵਾਸਂ ਵਾ ਕਤ੍ਵਾਤਿ ਪੁਬ੍ਬੇ ਅਵਿਜ੍ਜਮਾਨਂ ਸੇਨਾਸਨਂ ਕਤ੍ਵਾ ਜਗ੍ਗਿਤਕਾਲੇ ਫਲਵਾਰੇ ਸਮ੍ਪਤ੍ਤੇ.

ਅਪਲੋਕਨਕਮ੍ਮਕਥਾਵਣ੍ਣਨਾ ਨਿਟ੍ਠਿਤਾ.

ਅਤ੍ਥਵਸਵਗ੍ਗਾਦਿਵਣ੍ਣਨਾ

੪੯੮. ਵਿਪਾਕਦੁਕ੍ਖਸਙ੍ਖਾਤਾਨਂ ਸਮ੍ਪਰਾਯਿਕਵੇਰਾਨਨ੍ਤਿ ਏਤ੍ਥ ਪਾਣਾਤਿਪਾਤਾਦਿਵੇਰੇਨ ਨਿਬ੍ਬਤ੍ਤਤ੍ਤਾ, ਵੇਰਪ੍ਪਤ੍ਤਿਯਾ ਹੇਤੁਤ੍ਤਾ ਚ ‘‘ਵਿਪਾਕਦੁਕ੍ਖਵੇਦਨਾ’’ਤਿ ਵੁਤ੍ਤਾ. ਪਾਣਾਤਿਪਾਤਾਦਿਪਞ੍ਚਵੇਰਵਿਨਿਮੁਤ੍ਤਾਨਮ੍ਪਿ ਅਕੁਸਲਾਨਂ ਵੇਰੇਹਿ ਸਹ ਏਕਤੋ ਸਙ੍ਗਣ੍ਹਨਤ੍ਥਂ ‘‘ਦਸਅਕੁਸਲਕਮ੍ਮਪਥਪ੍ਪਭੇਦਾਨ’’ਨ੍ਤਿ ਪੁਨ ਵੁਤ੍ਤਂ.

੪੯੯-੫੦੦. ਤਂ ਕਮ੍ਮਨ੍ਤਿ ਤਜ੍ਜਨੀਯਾਦਿਕਮ੍ਮਮੇਵ, ਸਤ੍ਤਾ ਆਪਤ੍ਤਿਕ੍ਖਨ੍ਧਾ ਪਞ੍ਞਤ੍ਤਂ ਨਾਮਾਤਿ ਸਮ੍ਬਨ੍ਧੋ. ਅਨ੍ਤਰਾ ਕੇਨਚਿ ਅਪਞ੍ਞਤ੍ਤੇ ਸਿਕ੍ਖਾਪਦੇਤਿ ਇਮਸ੍ਮਿਂ ਕਪ੍ਪੇ ਆਦਿਤੋ ਪਟ੍ਠਾਯ ਯਾਵ ਅਮ੍ਹਾਕਂ ਭਗਵਤੋ ਅਭਿਸਮ੍ਬੋਧਿ, ਤਾਵ ਅਨ੍ਤਰਾਕਾਲੇ ਕਕੁਸਨ੍ਧਾਦਿਂ ਠਪੇਤ੍ਵਾ ਕੇਨਚਿ ਅਪਞ੍ਞਤ੍ਤੇ ਸਿਕ੍ਖਾਪਦੇਤਿ ਅਤ੍ਥੋ. ਵਿਨੀਤਕਥਾ ਸਿਕ੍ਖਾਪਦਨ੍ਤਿ ਵਿਨੀਤਵਤ੍ਥੂਨਿ ਏਵ. ਤਾਨਿ ਹਿ ਤਂਤਂਸਿਕ੍ਖਾਕੋਟ੍ਠਾਸਾਨਂ ਪਕਾਸਨਤੋ ‘‘ਸਿਕ੍ਖਾਪਦ’’ਨ੍ਤਿ ਚ ਆਪਤ੍ਤਿਅਨਾਪਤ੍ਤੀਨਂ ਅਨੁਪਞ੍ਞਾਪਨਤੋ ‘‘ਅਨੁਪਞ੍ਞਤ੍ਤ’’ਨ੍ਤਿ ਚ ਵੁਚ੍ਚਨ੍ਤਿ.

ਅਤ੍ਥਵਸਵਗ੍ਗਾਦਿਵਣ੍ਣਨਾ ਨਿਟ੍ਠਿਤਾ.

ਸਙ੍ਗਹਵਗ੍ਗਵਣ੍ਣਨਾਨਯੋ ਨਿਟ੍ਠਿਤੋ.

ਇਤਿ ਮਹਾਵਗ੍ਗੋ, ਪਞ੍ਞਤ੍ਤਿਵਗ੍ਗੋ, ਸਙ੍ਗਹਵਗ੍ਗੋਤਿ ਤੀਹਿ ਮਹਾਵਗ੍ਗੇਹਿ ਪਟਿਮਣ੍ਡਿਤੋ ਪਰਿਵਾਰੋਤਿ ਵੇਦਿਤਬ੍ਬੋ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਟ੍ਠਕਥਾਯ ਵਿਮਤਿਵਿਨੋਦਨਿਯਂ

ਪਰਿਵਾਰਵਣ੍ਣਨਾਨਯੋ ਨਿਟ੍ਠਿਤੋ.

ਨਿਗਮਨਕਥਾਵਣ੍ਣਨਾ

ਅਵਸਾਨਗਾਥਾਸੁ ਉਭਤੋਵਿਭਙ੍ਗ-ਖਨ੍ਧਕ-ਪਰਿਵਾਰੇਹਿ ਵਿਭਤ੍ਤਤ੍ਤਾ ਵਿਭਾਗਪਟਿਦੇਸਨਾ ਯਸ੍ਮਿਂ ਵਿਨਯਪਿਟਕੇ. ਸੋ ਉਭਤੋਵਿਭਙ੍ਗ-ਖਨ੍ਧਕ-ਪਰਿਵਾਰਵਿਭਤ੍ਤਦੇਸਨੋ ਆਹਾਤਿ ਯੋਜਨਾ. ਤਸ੍ਸਾਤਿ ਵਿਨਯਪਿਟਕਸ੍ਸ.

ਸਤ੍ਥੁ ਮਹਾਬੋਧੀਤਿ ਦਕ੍ਖਿਣਸਾਖਂ ਸਨ੍ਧਾਯ ਵਦਤਿ. ਯਂ ਪਧਾਨਘਰਂ ਨਾਮ ਪਰਿਵੇਣਂ, ਤਤ੍ਥ ਚਾਰੁਪਾਕਾਰੇਨ ਸਞ੍ਚਿਤਂ ਪਰਿਕ੍ਖਿਤ੍ਤਂ ਯਂ ਪਾਸਾਦਂ ਕਾਰਯਿ, ਤਤ੍ਰ ਤਸ੍ਮਿਂ ਮਹਾਨਿਗਮਸਾਮਿਨੋ ਪਾਸਾਦੇ ਵਸਤਾਤਿ ਯੋਜੇਤਬ੍ਬਾ.

ਬੁਦ੍ਧਸਿਰਿਂ ਉਦ੍ਦਿਸਿਤ੍ਵਾ ਨਿਸ੍ਸਾਯ, ਤਸ੍ਸ ਵਾ ਅਜ੍ਝੇਸਨਮ੍ਪਿ ਪਟਿਚ੍ਚ ਯਾ ਇਦ੍ਧਾ ਪਰਿਪੁਣ੍ਣਵਿਨਿਚ੍ਛਯਤਾਯ ਸਮਿਦ੍ਧਾ ਵਿਨਯਸਂਵਣ੍ਣਨਾ ਆਰਦ੍ਧਾਤਿ ਯੋਜਨਾ.

ਸਿਰਿਨਿਵਾਸਸ੍ਸਾਤਿ ਸਿਰਿਯਾ ਨਿਵਾਸਨਟ੍ਠਾਨਭੂਤਸ੍ਸ ਸਿਰਿਪਾਲਨਾਮਕਸ੍ਸ ਰਞ੍ਞੋ. ਜਯਸਂਵਚ੍ਛਰੇਤਿ ਵਿਜਯਯੁਤ੍ਤੇ ਸਂਵਚ੍ਛਰੇ. ਆਰਦ੍ਧਕਾਲਦਸ੍ਸਨਤ੍ਥਂ ਪੁਨ ‘‘ਜਯਸਂਵਚ੍ਛਰੇ ਅਯਂ ਆਰਦ੍ਧਾ’’ਤਿ ਵੁਤ੍ਤਂ.

ਕਾਲੇ ਵਸ੍ਸਨ੍ਤਿ ਯੁਤ੍ਤਕਾਲੇ ਵਸ੍ਸਨਸੀਲੋ. ਦੇਵੋਤਿ ਮੇਘੋ.

ਨਿਗਮਨਕਥਾਵਣ੍ਣਨਾ ਨਿਟ੍ਠਿਤਾ.

ਨਿਗਮਨਕਥਾ

ਏਤ੍ਤਾਵਤਾ ਚ ਆਰਦ੍ਧਾ, ਵਿਨਯਟ੍ਠਕਥਾਯ ਯਾ;

ਵਣ੍ਣਨਾ ਨਾਤਿਵਿਤ੍ਥਿਣ੍ਣਾ, ਪਰਿਪੁਣ੍ਣਵਿਨਿਚ੍ਛਯਾ.

ਪਞ੍ਞਾਸਭਾਣਵਾਰਾਯ, ਤਨ੍ਤਿਯਾ ਪਰਿਮਾਣਤੋ;

ਸਮਿਜ੍ਝਨਿਟ੍ਠਿਪਰਮਾ, ਯਾ ਵਿਮਤਿਵਿਨੋਦਨੀ.

ਅਨਨ੍ਤਰਾਯੇਨ ਕਤਾ, ਅਯਂ ਨਿਟ੍ਠਮੁਪਾਗਤਾ;

ਯਂ ਤਂ ਨਿਟ੍ਠਂ ਤਥਾ ਸਬ੍ਬੇ, ਪਾਣਿਨੋ ਸਮਨੋਰਥਾ.

ਥੇਰੇਹਿ ਵਿਨਯਞ੍ਞੂਹਿ, ਸੁਚਿਸਲ੍ਲੇਖਵੁਤ੍ਤਿਹਿ;

ਅਵਿਸ੍ਸਤ੍ਥਾਤਿਵਿਤ੍ਥਿਣ੍ਣ-ਗਨ੍ਥਭੀਰੂ ਹਿਪਤ੍ਥਿਤਂ.

ਕਰੋਨ੍ਤੇਨ ਮਯਾ ਏਵਂ, ਵਿਨਯਅਤ੍ਥਵਣ੍ਣਨਂ;

ਯਂ ਪਤ੍ਤਂ ਕੁਸਲਂ ਤੇਨ, ਪਤ੍ਵਾ ਸਮ੍ਬੋਧਿਮੁਤ੍ਤਮਂ.

ਵਿਨਯਤ੍ਥਂ ਪਕਾਸੇਤ੍ਵਾ, ਯੋ ਸੋਪਾਯੇਨ ਲਕ੍ਖਣਂ;

ਸੋਪਾਯਂ ਵਿਮਤਿਚ੍ਛੇਦ-ਞਾਣਚਕ੍ਖੁਪਦਾਯਕਂ.

ਵਿਰਦ੍ਧਤ੍ਥਵਿਪਲ੍ਲਾਸ-ਗਨ੍ਥਵਿਤ੍ਥਾਰਹਾਨਿਯਾ;

ਵਿਸੁਦ੍ਧਿਂ ਪਾਪਯਿਸ੍ਸਾਮਿ, ਸਤ੍ਤੇ ਸਂਸਾਰਦੁਕ੍ਖਤੋ.

ਲੋਕਿਯੇਹਿ ਚ ਭੋਗੇਹਿ, ਗੁਣੇਹਿ ਨਿਖਿਲਾ ਪਜਾ;

ਸਬ੍ਬੇਹਿ ਸਹਿਤਾ ਹੋਨ੍ਤੁ, ਰਤਾ ਸਮ੍ਬੁਦ੍ਧਸਾਸਨੇਤਿ.

ਵਿਮਤਿਵਿਨੋਦਨੀਟੀਕਾ ਨਿਟ੍ਠਿਤਾ.