ਅਪਰਦੁਤਿਯਗਾਥਾਸਙ੍ਗਣਿਕਂ

ਕਾਯਿਕਾਦਿਆਪਤ੍ਤਿਵਣ੍ਣਨਾ

੪੭੪. ‘‘ਕਤਿ ਆਪਤ੍ਤਿਯੋ’’ਤਿਆਦਿਨਾ ਉਪਾਲਿਤ੍ਥੇਰੇਨ ਵਿਨਯਸ੍ਸ ਪਾਟਵਤ੍ਥਂ ਸਯਮੇਵ ਪੁਚ੍ਛਿਤ੍ਵਾ ਵਿਸ੍ਸਜ੍ਜਨਂ ਕਤਂ. ਭਿਕ੍ਖੁਨੀਨਂਯੇਵ…ਪੇ… ਅਟ੍ਠਵਤ੍ਥੁਕਾ ਨਾਮਾਤਿ ਭਿਕ੍ਖੁਨੀਨਂ ਪਞ੍ਞਤ੍ਤਾ ਏਕਾ ਏਵ ਆਪਤ੍ਤਿ ਅਟ੍ਠਵਤ੍ਥੁਕਾ ਨਾਮਾਤਿ ਅਤ੍ਥੋ.

੪੭੫. ਕਮ੍ਮਞ੍ਚ ਕਮ੍ਮਪਾਦਕਾ ਚਾਤਿ ਏਤ੍ਥ ਯਸ੍ਮਾ ਞਤ੍ਤਿਕਮ੍ਮੇਸੁ ਞਤ੍ਤਿ ਸਯਮੇਵ ਕਮ੍ਮਂ ਹੋਤਿ, ਞਤ੍ਤਿਦੁਤਿਯਞਤ੍ਤਿਚਤੁਤ੍ਥੇਸੁ ਕਮ੍ਮੇਸੁ ਅਨੁਸ੍ਸਾਵਨਸਙ੍ਖਾਤਸ੍ਸ ਕਮ੍ਮਸ੍ਸ ਞਤ੍ਤਿਪਾਦਕਭਾਵੇਨ ਤਿਟ੍ਠਤਿ, ਤਸ੍ਮਾ ਇਮਾਨਿ ਦ੍ਵੇ ‘‘ਞਤ੍ਤਿਕਿਚ੍ਚਾਨੀ’’ਤਿ ਵੁਤ੍ਤਾਨਿ.

ਪਾਚਿਤ੍ਤਿਯੇਨ ਸਦ੍ਧਿਂ ਦੁਕ੍ਕਟਾ ਕਤਾਤਿ ਦਸਸੁਪਿ ਸਿਕ੍ਖਾਪਦੇਸੁ ਏਕਤੋਉਪਸਮ੍ਪਨ੍ਨਾਯ ਵਸੇਨ ਵੁਤ੍ਤਦੁਕ੍ਕਟਂ ਸਨ੍ਧਾਯ ਵੁਤ੍ਤਂ. ਪਠਮਸਿਕ੍ਖਾਪਦਮ੍ਹੀਤਿ ਭਿਕ੍ਖੁਨੋਵਾਦਵਗ੍ਗਸ੍ਸ ਪਠਮਸਿਕ੍ਖਾਪਦਵਿਭਙ੍ਗੇ (ਪਾਚਿ. ੧੪੪ ਆਦਯੋ). ਅਧਮ੍ਮਕਮ੍ਮੇਤਿ ਭਿਕ੍ਖੁਨੋਵਾਦਕਸਮ੍ਮੁਤਿਕਮ੍ਮੇ ਅਧਮ੍ਮਕਮ੍ਮੇ ਜਾਤੇ ਆਪਜ੍ਜਿਤਬ੍ਬਾ ਦ੍ਵੇ ਆਪਤ੍ਤਿਨਵਕਾ, ਧਮ੍ਮਕਮ੍ਮੇ ਦ੍ਵੇ ਆਪਤ੍ਤਿਨਵਕਾਤਿ ਚਤ੍ਤਾਰੋ ਨਵਕਾ ਵੁਤ੍ਤਾ. ਆਮਕਧਞ੍ਞਂ ਵਿਞ੍ਞਾਪੇਤ੍ਵਾ ਭੁਞ੍ਜਨ੍ਤਿਯਾ ਵਿਞ੍ਞਾਪਨਾਦਿਪੁਬ੍ਬਪਯੋਗੇ ਦੁਕ੍ਕਟਂ, ਅਜ੍ਝੋਹਾਰੇ ਪਾਚਿਤ੍ਤਿਯਂ. ਪਾਚਿਤ੍ਤਿਯੇਨ ਸਦ੍ਧਿਂ ਦੁਕ੍ਕਟਾ ਕਤਾਯੇਵਾਤਿ ਵੁਤ੍ਤਂ.

ਵਿਜਹਨ੍ਤੀ ਤਿਟ੍ਠਤੀਤਿਆਦੀਸੁ ਯਦਾ ਭਿਕ੍ਖੁਨਿਯਾ ਏਕੇਨ ਪਾਦੇਨ ਹਤ੍ਥਪਾਸਂ ਵਿਜਹਿਤ੍ਵਾ ਠਤ੍ਵਾ ਕਿਞ੍ਚਿ ਕਮ੍ਮਂ ਕਤ੍ਵਾ ਤਤੋ ਅਪਰੇਨ ਪਾਦੇਨ ਵਿਜਹਿਤ੍ਵਾ ਠਾਤੁਕਾਮਤਾ ਉਪ੍ਪਜ੍ਜਤਿ, ਤਦਾ ਸਾ ਯਥਾਕ੍ਕਮਂ ‘‘ਵਿਜਹਨ੍ਤੀ ਤਿਟ੍ਠਤਿ, ਵਿਜਹਿਤ੍ਵਾ ਤਿਟ੍ਠਤੀ’’ਤਿ ਇਮਂ ਵੋਹਾਰਂ ਲਭਤਿ. ਅਞ੍ਞਥਾ ਹਿਸ੍ਸਾ ਗਾਮੂਪਚਾਰਮੋਕ੍ਕਨ੍ਤਿਯਾ ਵਿਸੇਸੋ ਨ ਸਿਯਾ ਹਤ੍ਥਪਾਸਵਿਜਹਨਸ੍ਸਾਪਿ ਗਮਨਤ੍ਤਾ. ਨਿਸੀਦਤਿ ਵਾ ਨਿਪਜ੍ਜਤਿ ਵਾਤਿ ਏਤ੍ਥਾਪਿ ਯਥਾਵੁਤ੍ਤਾਧਿਪ੍ਪਾਯੇਨ ਅਦ੍ਧਾਸਨੇਨ ਹਤ੍ਥਪਾਸਂ ਵਿਜਹਨ੍ਤੀ ਨਿਸੀਦਤਿ, ਸਕਲੇਨ ਵਾ ਆਸਨੇਨ ਵਿਜਹਿਤ੍ਵਾ ਨਿਸੀਦਤਿ, ਅਦ੍ਧਸਰੀਰੇਨ ਵਿਜਹਨ੍ਤੀ ਨਿਪਜ੍ਜਤਿ, ਸਕਲੇਨ ਸਰੀਰੇਨ ਵਿਜਹਿਤ੍ਵਾ ਨਿਪਜ੍ਜਤੀਤਿ ਯੋਜੇਤਬ੍ਬਂ.

ਕਾਯਿਕਾਦਿਆਪਤ੍ਤਿਵਣ੍ਣਨਾ ਨਿਟ੍ਠਿਤਾ.

ਪਾਚਿਤ੍ਤਿਯਵਣ੍ਣਨਾ

੪੭੬. ਸਬ੍ਬਾਨਿ ਨਾਨਾਵਤ੍ਥੁਕਾਨੀਤਿ ਸਪ੍ਪਿਨਵਨੀਤਾਦੀਨਂ ਪਞ੍ਚਨ੍ਨਂ ਵਤ੍ਥੂਨਂ ਭੇਦੇਨ ਪਾਚਿਤ੍ਤਿਯਾਨਿ ਪਞ੍ਚ ਨਾਨਾਵਤ੍ਥੁਕਾਨਿ. ਏਸ ਨਯੋ ਪਣੀਤਭੋਜਨਵਿਸਯੇ ਨਵ ਪਾਚਿਤ੍ਤਿਯਾਨੀਤਿਆਦੀਸੁਪਿ. ਏਤੇਨ ਭੇਸਜ੍ਜਪਣੀਤਭੋਜਨਸਿਕ੍ਖਾਪਦਾਨਿ ਏਕੇਕਸਿਕ੍ਖਾਪਦਵਸੇਨ ਪਞ੍ਞਤ੍ਤਾਨਿਪਿ ਵਤ੍ਥੁਭੇਦੇਨ ਪਚ੍ਚੇਕਂ ਪਞ੍ਚਸਿਕ੍ਖਾਪਦਨਵਸਿਕ੍ਖਾਪਦਸਦਿਸਾਨਿ ਭਿਕ੍ਖੁਨੀਨਂ ਪਾਟਿਦੇਸਨੀਯਾਪਤ੍ਤਿਯੋ ਵਿਯਾਤਿ ਦਸ੍ਸੇਤਿ. ਤੇਨੇਵ ‘‘ਨਾਨਾਵਤ੍ਥੁਕਾਨੀ’’ਤਿ ਵੁਤ੍ਤਂ. ਸਪ੍ਪਿਂ ਏਵ ਪਟਿਗ੍ਗਹੇਤ੍ਵਾ ਅਨੇਕਭਾਜਨੇਸੁ ਠਪੇਤ੍ਵਾ ਸਤ੍ਤਾਹਂ ਅਤਿਕ੍ਕਾਮੇਨ੍ਤਸ੍ਸ ਭਾਜਨਗਣਨਾਯ ਸਮ੍ਭਵਨ੍ਤਿਯੋ ਬਹੁਕਾਪਿ ਆਪਤ੍ਤਿਯੋ ਏਕਵਤ੍ਥੁਕਾ ਏਵ ਹੋਨ੍ਤਿ, ਏਵਂ ਸਪ੍ਪਿਭੋਜਨਮੇਵ ਬਹੂਸੁ ਠਾਨੇਸੁ ਵਿਞ੍ਞਾਪੇਤ੍ਵਾ ਏਕਤੋ ਵਾ ਵਿਸੁਂ ਵਿਸੁਮੇਵ ਵਾ ਭੁਞ੍ਜਨ੍ਤਸ੍ਸ ਆਪਤ੍ਤਿਯੋ ਏਕਵਤ੍ਥੁਕਾ ਏਵਾਤਿ ਦਟ੍ਠਬ੍ਬਾ.

ਪਾਲ਼ਿਯਂ ਏਕਵਾਚਾਯ ਦੇਸੇਯ੍ਯ, ਵੁਤ੍ਤਾ ਆਦਿਚ੍ਚਬਨ੍ਧੁਨਾਤਿ ਏਤ੍ਥ ‘‘ਦੇਸੇਯ੍ਯਾਤਿ ਵੁਤ੍ਤਾ’’ਤਿ ਇਤਿ-ਸਦ੍ਦਂ ਅਜ੍ਝਾਹਰਿਤ੍ਵਾ ਯੋਜੇਤਬ੍ਬਂ. ਏਵਂ ਸੇਸੇਸੁਪਿ.

ਭੇਦਾਨੁਵਤ੍ਤਕਾਨਨ੍ਤਿ ਏਤ੍ਥ ਆਦਿ-ਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋ. ਯਾਵਤਤਿਯਕਾ ਚ ਸਬ੍ਬੇ ਉਭਤੋਵਿਭਙ੍ਗੇ ਆਗਤਾ, ਸਙ੍ਘਾਦਿਸੇਸਸਾਮਞ੍ਞੇਨ ਏਕਂ, ਪਾਚਿਤ੍ਤਿਯਸਾਮਞ੍ਞੇਨ ਚ ਏਕਂ ਕਤ੍ਵਾ ‘‘ਯਾਵਤਤਿਯਕੇ ਤਿਸ੍ਸੋ’’ਤਿ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਏਤ੍ਥ ਚ ਞਤ੍ਤਿਯਾ ਦੁਕ੍ਕਟਂ, ਦ੍ਵੀਹਿ ਕਮ੍ਮਵਾਚਾਹਿ ਥੁਲ੍ਲਚ੍ਚਯਾਪਿ ਸਨ੍ਤਿ ਏਵ. ਤਾਨਿ ਮਾਤਿਕਾਯ ਨ ਆਗਤਾਨਿ. ਮਾਤਿਕਾਗਤਵਸੇਨ ਹੇਤ੍ਥ ‘‘ਤਿਸ੍ਸੋ’’ਤਿ ਵੁਤ੍ਤਂ.

ਸਙ੍ਘਾਦੀਹੀਤਿ ਸਙ੍ਘਗਣਪੁਗ੍ਗਲੇਹਿ ਕਾਰਣਭੂਤੇਹਿ. ਅਬ੍ਭੁਣ੍ਹਸੀਲੋਤਿ ਪਰਿਸੁਦ੍ਧਭਾਵੂਪਗਮਨੇਨ ਅਭਿਨਵੁਪ੍ਪਨ੍ਨਸੀਲੋ. ਅਭਿਨਵੁਪ੍ਪਨ੍ਨਞ੍ਹਿ ‘‘ਅਬ੍ਭੁਣ੍ਹ’’ਨ੍ਤਿ ਵੁਚ੍ਚਤਿ, ਪਰਿਸੁਦ੍ਧਸੀਲੋਤਿ ਅਤ੍ਥੋ. ਤੇਨਾਹ ‘‘ਪਾਕਤਿਕੋ’’ਤਿ.

‘‘ਕੋਸਮ੍ਬਕਕ੍ਖਨ੍ਧਕੇ ਵੁਤ੍ਤਾਨਿਸਂਸੇ’’ਤਿ ਇਦਂ ਕੋਸਮ੍ਬਕਕ੍ਖਨ੍ਧਕੇ ‘‘ਸਚੇ ਮਂ ਇਮੇ ਭਿਕ੍ਖੂ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਸ੍ਸਨ੍ਤਿ, ਨ ਮਯਾ ਸਦ੍ਧਿਂ ਉਪੋਸਥਂ ਕਰਿਸ੍ਸਨ੍ਤੀ’’ਤਿਆਦਿਨਾ ਆਪਤ੍ਤਿਯਾ ਅਦਸ੍ਸਨੇ ਆਦੀਨਵਂ ਦਸ੍ਸੇਤ੍ਵਾ ਪਰੇਸਮ੍ਪਿ ਸਦ੍ਧਾਯ ਆਪਤ੍ਤਿਦੇਸਨਾਵਿਧਾਨਮੁਖੇਨ ਸਾਮਤ੍ਥਿਯਤੋ ਪਕਾਸਿਤੋ. ਏਕਤੋ ਉਪੋਸਥਕਰਣ, ਪਵਾਰਣਾਕਰਣ, ਸਙ੍ਘਕਮ੍ਮਕਰਣ, ਆਸਨੇਨਿਸੀਦਨ, ਯਾਗੁਪਾਨੇਨਿਸੀਦਨ, ਭਤ੍ਤਗ੍ਗੇਨਿਸੀਦਨ, ਏਕਚ੍ਛਨ੍ਨੇਸਯਨ, ਯਥਾਵੁਡ੍ਢਅਭਿਵਾਦਨਾਦਿਕਰਣਸਙ੍ਖਾਤੇ ਅਟ੍ਠਾਨਿਸਂਸੇ ਸਨ੍ਧਾਯ ਵੁਤ੍ਤਂ.

ਚਤੁਨ੍ਨਨ੍ਤਿ ਵਿਨਯਪਿਟਕੇ ਆਗਤਾਨਂ ਵਸੇਨ ਵੁਤ੍ਤਂ. ਕਤਮਾ ਪਨ ਸਾਤਿ ਸਾ ਚਤੁਬ੍ਬਿਧਾ ਅਚ੍ਚਯਦੇਸਨਾ ਕਤਮਾਤਿ ਅਤ੍ਥੋ. ਅਭਿਮਾਰਾਨਨ੍ਤਿ ਮਾਰਣਤ੍ਥਾਯ ਪਯੋਜਿਤਧਨੁਗ੍ਗਹਾਨਂ. ਉਪਟ੍ਠਾਯਿਕਾਯਾਤਿ ਸਹਸੇਯ੍ਯਸਿਕ੍ਖਾਪਦਵਤ੍ਥੁਸ੍ਮਿਂ ਆਗਤਾਯ.

ਅਟ੍ਠਨ੍ਨਂ ਭਿਕ੍ਖੁਨੀਨਨ੍ਤਿ ਥੇਰਾਸਨਤੋ ਪਟ੍ਠਾਯ ਅਟ੍ਠਹਿ ਭਿਕ੍ਖੁਨੀਹਿ ਇਤਰਾਯ ਆਗਤਾਯ ਵੁਡ੍ਢਾਯ ਭਿਕ੍ਖੁਨਿਯਾ ਆਸਨਂ ਦਾਤਬ੍ਬਂ. ਅਟ੍ਠਨ੍ਨਂ ਪਨ ਭਿਕ੍ਖੁਨੀਨਂ ਨਵਕਾਯ ਆਗਤਾਯ ਅਦਾਤੁਮ੍ਪਿ ਵਟ੍ਟਤਿ. ਤਾਯ ਪਨ ਸਙ੍ਘਨਵਕਾਸਨੇ ਲਦ੍ਧੋਕਾਸੇ ਨਿਸੀਦਿਤਬ੍ਬਂ. ਅਥ ਵਾ ਅਟ੍ਠਨ੍ਨਂ ਵੁਡ੍ਢਾਨਂ ਭਿਕ੍ਖੁਨੀਨਂ ਇਤਰਾਯ ਨਵਕਤਰਾਯ ਆਸਨਂ ਦਾਤਬ੍ਬਂ. ਕਮ੍ਮਾਨਿ ਨਵਾਤਿ ਓਸਾਰਣਾਦੀਨਿ ਨਵ ਏਵ.

ਪਾਚਿਤ੍ਤਿਯਵਣ੍ਣਨਾ ਨਿਟ੍ਠਿਤਾ.

ਅਵਨ੍ਦਨੀਯਪੁਗ੍ਗਲਾਦਿਵਣ੍ਣਨਾ

੪੭੭. ਦਸ ਜਨਾਤਿ ‘‘ਦਸ ਇਮੇ, ਭਿਕ੍ਖਵੇ, ਅਵਨ੍ਦਿਯਾ’’ਤਿਆਦਿਨਾ (ਪਰਿ. ੩੩੦) ਵੁਤ੍ਤਾ ਨਵਕਅਨੁਪਸਮ੍ਪਨ੍ਨਨਾਨਾਸਂਵਾਸਕਮਾਤੁਗਾਮਪਣ੍ਡਕਾ ਪਞ੍ਚ, ਪਾਰਿਵਾਸਿਕਾਦਯੋ ਚ ਪਞ੍ਚਾਤਿ ਦਸ ਜਨਾ.

ਦ੍ਵਾਦਸ ਕਮ੍ਮਦੋਸਾਤਿ ਦੋਸਯੁਤ੍ਤਕਮ੍ਮਾਨਿ ਦ੍ਵਾਦਸਾਤਿ ਅਤ੍ਥੋ. ਕਮ੍ਮਸਮ੍ਪਤ੍ਤਿਯੋਤਿ ਸਮ੍ਪਨ੍ਨਕਮ੍ਮਾਨਿ, ਵਿਸੁਦ੍ਧਕਮ੍ਮਾਨੀਤਿ ਅਤ੍ਥੋ. ਏਤਦੇਵਾਤਿ ਧਮ੍ਮੇਨ ਸਮਗ੍ਗਮੇਵ.

ਅਨਨ੍ਤਂ ਨਿਬ੍ਬਾਨਂ ਅਜਿਨਿ ਜਿਨਿਤ੍ਵਾ ਪਟਿਲਭਤੀਤਿ ਅਨਨ੍ਤਜਿਨੋਤਿ ਆਹ ‘‘ਪਰਿਯਨ੍ਤ’’ਇਚ੍ਚਾਦਿ. ਸ੍ਵੇਵਾਤਿ ਸੋ ਏਵ ਭਗਵਾ.

‘‘ਵਿਨਯਂ ਪਟਿਜਾਨਨ੍ਤਸ੍ਸ, ਵਿਨਯਾਨਿ ਸੁਣੋਮ ਤੇ’’ਤਿਆਦਿਨਾ ਉਪਾਲਿਤ੍ਥੇਰੇਨੇਵ ਏਕਂ ਵਿਨਯਧਰਂ ਸਮ੍ਮੁਖੇ ਠਿਤਂ ਪੁਚ੍ਛਨ੍ਤੇਨ ਵਿਯ ਪੁਚ੍ਛਿਤ੍ਵਾ ਤੇਨ ਵਿਸ੍ਸਜ੍ਜਿਤਂ ਵਿਯ ਵਿਸ੍ਸਜ੍ਜਨਂ ਕਤਂ. ਤਤ੍ਥ ਵਿਨਯਂ ਪਟਿਜਾਨਨ੍ਤਸ੍ਸਾਤਿ ਵਿਨਯਂ ਜਾਨਾਮੀਤਿ ਪਟਿਜਾਨਨ੍ਤਸ੍ਸ. ਵਿਨਯਾਨੀਤਿ ਵਿਨਯੇ ਤਯਾ ਵੁਚ੍ਚਮਾਨੇ ਸੁਣੋਮ.

੪੭੮. ਪਾਲ਼ਿਯਂ ਪਾਰਾਜਿਕਾਤਿਆਦਿ ਉਭਤੋਵਿਭਙ੍ਗੇਸੁ ਆਗਤੇਸੁ ਅਗ੍ਗਹਿਤਗ੍ਗਹਣਵਸੇਨ ਵੁਤ੍ਤਂ.

ਅਵਨ੍ਦਨੀਯਪੁਗ੍ਗਲਾਦਿਵਣ੍ਣਨਾ ਨਿਟ੍ਠਿਤਾ.