ਚੂਲ਼ਸਙ੍ਗਾਮਂ

ਅਨੁਵਿਜ੍ਜਕਸ੍ਸ ਪਟਿਪਤ੍ਤਿਵਣ੍ਣਨਾ

੩੬੫. ਤਤ੍ਰ ਹੀਤਿ ਤਸ੍ਮਿਂ ਸਨ੍ਨਿਪਾਤੇ. ਅਤ੍ਤਪਚ੍ਚਤ੍ਥਿਕਾਤਿ ਲਜ੍ਜਿਪੇਸਲਸ੍ਸ ਚੋਦਕਪਾਪਗਰਹੀਪੁਗ੍ਗਲਸ੍ਸ ਅਨਤ੍ਥਕਾਮਾ ਵੇਰੀਪੁਗ੍ਗਲਾ. ਸਾਸਨਪਚ੍ਚਤ੍ਥਿਕਾਤਿ ਅਤ੍ਤਨੋ ਅਨਾਚਾਰਾਨੁਗੁਣਂ ਬੁਦ੍ਧਵਚਨਂ ਪਕਾਸੇਨ੍ਤੋ ਤਣ੍ਹਾਗਤਿਕਾ, ਦਿਟ੍ਠਿਗਤਿਕਾ ਚ. ਅਜ੍ਝੋਗਾਹੇਤ੍ਵਾਤਿ ਅਲਜ੍ਜਿਅਭਿਭਵਨਵਸੇਨ ਸਙ੍ਘਮਜ੍ਝਂ ਪਵਿਸਿਤ੍ਵਾ. ਸੋ ਸਙ੍ਗਾਮਾਵਚਰੋਤਿ ਸੋ ਚੋਦਕੋ ਸਙ੍ਗਾਮਾਵਚਰੋ ਨਾਮ. ਦਿਟ੍ਠਸੁਤਮੁਤਮ੍ਪਿ ਰਾਜਕਥਾਦਿਕਨ੍ਤਿ ਦਿਟ੍ਠਸੁਤਵਸੇਨੇਵ ਰਾਜਚੋਰਾਦਿਕਥਂ, ਮੁਤਵਸੇਨਪਿ ਅਨ੍ਨਾਦਿਕਥਞ੍ਚ ਅਕਥੇਨ੍ਤੇਨਾਤਿ ਯੋਜੇਤਬ੍ਬਂ. ਕਪ੍ਪਿਯਾਕਪ੍ਪਿਯਨਿਸ੍ਸਿਤਾ ਵਾਤਿਆਦੀਸੁ ਰੂਪਾਰੂਪਪਟਿਚ੍ਛੇਦਪਦੇਨ ਸਕਲਅਭਿਧਮ੍ਮਤ੍ਥਪਿਟਕਤ੍ਤਂ ਦਸ੍ਸੇਤਿ. ਸਮਥਾਚਾਰਾਦੀਹਿ ਪਟਿਸਂਯੁਤ੍ਤਨ੍ਤਿ ਸਕਲਸੁਤ੍ਤਨ੍ਤਪਿਟਕਤ੍ਤਂ. ਤਤ੍ਥ ਸਮਥਾਚਾਰੋ ਨਾਮ ਸਮਥਭਾਵਨਾਕ੍ਕਮੋ. ਤਥਾ ਵਿਪਸ੍ਸਨਾਚਾਰੋ. ਠਾਨਨਿਸਜ੍ਜਵਤ੍ਤਾਦਿਨਿਸ੍ਸਿਤਾਤਿ ਸਙ੍ਘਮਜ੍ਝਾਦੀਸੁ ਗਰੁਚਿਤ੍ਤੀਕਾਰਂ ਪਚ੍ਚੁਪਟ੍ਠਪੇਤ੍ਵਾ ਠਾਨਾਦਿਕ੍ਕਮਨਿਸ੍ਸਿਤਾ ਚੇਵ ਚੁਦ੍ਦਸਮਹਾਵਤ੍ਤਾਦਿਵਤ੍ਤਨਿਸ੍ਸਿਤਾ ਚ, ਆਦਿ-ਸਦ੍ਦੇਨ ਅਪ੍ਪਿਚ੍ਛਤਾਦਿਨਿਸ੍ਸਿਤਾ ਚਾਤਿ ਅਤ੍ਥੋ. ਪਞ੍ਹੇ ਉਪ੍ਪਨ੍ਨੇਤਿ ਕੇਨਚਿ ਉਪ੍ਪਨ੍ਨੇ ਪਞ੍ਹੇ ਪੁਚ੍ਛਿਤੇ. ਇਦਞ੍ਚ ਉਪਲਕ੍ਖਣਮਤ੍ਤਂ, ਯਂ ਕਿਞ੍ਚਿ ਉਪਟ੍ਠਿਤਂ ਧਮ੍ਮਂ ਭਾਸਸ੍ਸੂਤਿ ਅਧਿਪ੍ਪਾਯੋ.

ਕੁਲਪਦੇਸੋ ਨਾਮ ਖਤ੍ਤਿਯਾਦਿਜਾਤਿਯਮ੍ਪਿ ਕਾਸਿਕਰਾਜਕੁਲਾਦਿਕੁਲਵਿਸੇਸੋ. ਏਤਮੇਵਾਹ ‘‘ਕੁਲਪਦੇਸੋ ਖਤ੍ਤਿਯਕੁਲਾਦਿਵਸੇਨੇਵ ਵੇਦਿਤਬ੍ਬੋ’’ਤਿ. ਸਨ੍ਨਿਪਾਤਮਣ੍ਡਲੇਤਿ ਅਤ੍ਤਨੋ ਅਨੁਵਿਜ੍ਜਮਾਨਪ੍ਪਕਾਰਂ ਸਙ੍ਘਸ੍ਸ ਞਾਪਨਤ੍ਥਂ ਉਟ੍ਠਾਯ ਸਙ੍ਘਸਨ੍ਨਿਪਾਤਮਜ੍ਝੇ ਇਤੋ ਚਿਤੋ ਚ ਪਰੇਸਂ ਮੁਖਂ ਓਲੋਕੇਨ੍ਤੇਨ ਨ ਚਰਿਤਬ੍ਬਂ. ਯਥਾਨਿਸਿਨ੍ਨੇਨੇਵ ਧਮ੍ਮਵਿਨਯਾਨੁਗੁਣਂ ਵਿਨਿਚ੍ਛਯਂ ਯਥਾ ਸਬ੍ਬੇ ਸੁਣਨ੍ਤਿ, ਤਥਾ ਵਤ੍ਤਬ੍ਬਨ੍ਤਿ ਅਤ੍ਥੋ.

ਪਾਲ਼ਿਯਂ ਅਚਣ੍ਡਿਕਤੇਨਾਤਿ ਅਕਤਚਣ੍ਡਭਾਵੇਨ, ਅਫਰੁਸੇਨਾਤਿ ਅਤ੍ਥੋ. ‘‘ਹਿਤਾਨੁਕਮ੍ਪਿਨਾ’’ਤਿ ਏਤੇਨ ਮੇਤ੍ਤਾਪੁਬ੍ਬਭਾਗੋ ਵੁਤ੍ਤੋ. ‘‘ਕਾਰੁਣਿਕੇਨ ਭਵਿਤਬ੍ਬ’’ਨ੍ਤਿ ਇਮਿਨਾ ਅਪ੍ਪਨਾਪ੍ਪਤ੍ਤਕਰੁਣਾ ਵੁਤ੍ਤਾ. ‘‘ਹਿਤਪਰਿਸਕ੍ਕਿਨਾ’’ਤਿ ਇਮਿਨਾ ਕਰੁਣਾਪੁਬ੍ਬਭਾਗੋ. ਤੇਨਾਹ ‘‘ਕਰੁਣਾ ਚ ਕਰੁਣਾਪੁਬ੍ਬਭਾਗੋ ਚ ਉਪਟ੍ਠਾਪੇਤਬ੍ਬੋਤਿ ਅਯਂ ਪਦਦ੍ਵਯੇਪਿ ਅਧਿਪ੍ਪਾਯੋ’’ਤਿ. ਲਜ੍ਜਿਯਾਤਿ ਲਜ੍ਜਿਨੀ.

ਅਨੁਯੋਗਵਤ੍ਤਂ ਕਥਾਪੇਤ੍ਵਾਤਿ ‘‘ਕਾਲੇਨ ਵਕ੍ਖਾਮੀ’’ਤਿਆਦਿਨਾ (ਪਰਿ. ੩੬੨) ਵੁਤ੍ਤਵਤ੍ਤਂ. ਅਨੁਯੁਞ੍ਜਨਾਚਾਰਕ੍ਕਮੇਨੇਵ ਅਨੁਯੁਞ੍ਜਨਂ ਅਨੁਯੋਗਵਤ੍ਤਂ ਨਾਮ, ਤਂ ਕਥਾਪੇਤ੍ਵਾ ਤੇਨੇਵ ਕਮੇਨ ਅਨੁਯੁਞ੍ਜਾਪੇਤ੍ਵਾਤਿ ਅਤ੍ਥੋ. ਉਜੁਮਦ੍ਦਵੇਨਾਤਿ ਏਤ੍ਥ ਅਜ੍ਝਾਹਰਿਤਬ੍ਬਪਦਂ ਦਸ੍ਸੇਤਿ ‘‘ਉਪਚਰਿਤਬ੍ਬੋ’’ਤਿ. ‘‘ਧਮ੍ਮੇਸੁ ਚ ਪੁਗ੍ਗਲੇਸੁ ਚਾ’’ਤਿ ਇਦਂ ‘‘ਮਜ੍ਝਤ੍ਤੇਨ ਭਵਿਤਬ੍ਬ’’ਨ੍ਤਿ ਪਕਤੇਨ ਸਮ੍ਬਨ੍ਧਿਤਬ੍ਬਨ੍ਤਿ ਆਹ ‘‘ਧਮ੍ਮੇਸੁ ਚ ਪੁਗ੍ਗਲੇਸੁ ਚ…ਪੇ… ਮਜ੍ਝਤ੍ਤੋਤਿ ਵੇਦਿਤਬ੍ਬੋ’’ਤਿ. ਯਞ੍ਹਿ ਯਤ੍ਥ ਕਤ੍ਥਚਿ ਕਤ੍ਤਬ੍ਬਂ, ਤਂ ਤਤ੍ਥ ਅਤਿਕ੍ਕਮਨ੍ਤੋ ਮਜ੍ਝਤ੍ਤੋ ਨਾਮ ਨ ਹੋਤਿ, ਧਮ੍ਮੇਸੁ ਚ ਗਾਰਵੋ ਕਤ੍ਤਬ੍ਬੋ. ਪੁਗ੍ਗਲੇਸੁ ਪਨ ਮੇਤ੍ਤਾਭਾਵੇਨ ਪਕ੍ਖਪਾਤਗਾਰਵੋ. ਤਸ੍ਮਾ ਇਮਂ ਵਿਧਿਂ ਅਨਤਿਕ੍ਕਨ੍ਤੋਵ ਤੇਸੁ ਮਜ੍ਝਤ੍ਤੋਤਿ ਵੇਦਿਤਬ੍ਬੋ.

੩੬੬. ਸਂਸਨ੍ਦਨਤ੍ਥਨ੍ਤਿ ਆਪਤ੍ਤਿ ਵਾ ਅਨਾਪਤ੍ਤਿ ਵਾਤਿ ਸਂਸਯੇ ਜਾਤੇ ਸਂਸਨ੍ਦਿਤ੍ਵਾ ਨਿਚ੍ਛਯਕਰਣਤ੍ਥਂ ਵੁਤ੍ਤਨ੍ਤਿ ਅਧਿਪ੍ਪਾਯੋ. ਅਤ੍ਥਦਸ੍ਸਨਾਯਾਤਿ ਸਾਧੇਤਬ੍ਬਸ੍ਸ ਆਪਤ੍ਤਾਦਿਉਪਮੇਯ੍ਯਤ੍ਥਸ੍ਸ ਚੋਦਕਚੁਦਿਤਕੇ ਅਤ੍ਤਨੋ ਪਟਿਞ੍ਞਾਯ ਏਵ ਸਰੂਪਵਿਭਾਵਨਤ੍ਥਂ. ਅਤ੍ਥੋ ਜਾਨਾਪਨਤ੍ਥਾਯਾਤਿ ਏਵਂ ਵਿਭਾਵਿਤੋ ਅਤ੍ਥੋ ਚੋਦਕਚੁਦਿਤਕਸਙ੍ਘਾਨਂ ਞਾਪਨਤ੍ਥਾਯ ਨਿਜ੍ਝਾਪਨਤ੍ਥਾਯ, ਸਮ੍ਪਟਿਚ੍ਛਾਪਨਤ੍ਥਾਯਾਤਿ ਅਤ੍ਥੋ. ਪੁਗ੍ਗਲਸ੍ਸ ਠਪਨਤ੍ਥਾਯਾਤਿ ਚੋਦਕਚੁਦਿਤਕੇ ਅਤ੍ਤਨੋ ਪਟਿਞ੍ਞਾਯ ਏਵ ਆਪਤ੍ਤਿਯਂ, ਅਨਾਪਤ੍ਤਿਯਂ ਵਾ ਪਤਿਟ੍ਠਾਪਨਤ੍ਥਾਯ. ਸਾਰਣਤ੍ਥਾਯਾਤਿ ਪਮੁਟ੍ਠਸਰਾਪਨਤ੍ਥਾਯ. ਸਵਚਨੀਯਕਰਣਤ੍ਥਾਯਾਤਿ ਦੋਸੇ ਸਾਰਿਤੇਪਿ ਸਮ੍ਪਟਿਚ੍ਛਿਤ੍ਵਾ ਪਟਿਕਮ੍ਮਂ ਅਕਰੋਨ੍ਤਸ੍ਸ ਸਵਚਨੀਯਕਰਣਤ੍ਥਾਯ. ‘‘ਨ ਤੇ ਅਪਸਾਦੇਤਬ੍ਬਾ’’ਤਿ ਇਦਂ ਅਧਿਪ੍ਪੇਤਤ੍ਥਦਸ੍ਸਨਂ. ਤਤ੍ਥ ਅਵਿਸਂਵਾਦਕਟ੍ਠਾਨੇ ਠਿਤਾ ਏਵ ਨ ਅਪਸਾਦੇਤਬ੍ਬਾ, ਨ ਇਤਰੇਤਿ ਦਟ੍ਠਬ੍ਬਂ.

ਅਪ੍ਪਚ੍ਚਯਪਰਿਨਿਬ੍ਬਾਨਤ੍ਥਾਯਾਤਿ ਆਯਤਿਂ ਪਟਿਸਨ੍ਧਿਯਾ ਅਕਾਰਣਭੂਤਪਰਿਨਿਬ੍ਬਾਨਤ੍ਥਾਯ. ਪਰਿਨਿਬ੍ਬਾਨਞ੍ਹਿ ਨਾਮ ਖੀਣਾਸਵਾਨਂ ਸਬ੍ਬਪਚ੍ਛਿਮਾ ਚੁਤਿਚਿਤ੍ਤਕਮ੍ਮਜਰੂਪਸਙ੍ਖਾਤਾ ਖਨ੍ਧਾ, ਤੇ ਚ ਸਬ੍ਬਾਕਾਰਤੋ ਸਮੁਚ੍ਛਿਨ੍ਨਾਨੁਸਯਤਾਯ ਪੁਨਬ੍ਭਵਾਯ ਅਨਨ੍ਤਰਾਦਿਪਚ੍ਚਯਾ ਨ ਹੋਨ੍ਤਿ ਅਞ੍ਞੇਹਿ ਚ ਤਣ੍ਹਾਦਿਪਚ੍ਚਯੇਹਿ ਵਿਰਹਿਤਤ੍ਤਾ. ਤਸ੍ਮਾ ‘‘ਅਪ੍ਪਚ੍ਚਯਪਰਿਨਿਬ੍ਬਾਨ’’ਨ੍ਤਿ ਵੁਚ੍ਚਤਿ. ਤਨ੍ਤਿ ਵਿਮੁਤ੍ਤਿਞਾਣਦਸ੍ਸਨਂ. ਤੇਨੇਵਾਹ ‘‘ਤਸ੍ਮਿ’’ਨ੍ਤਿ. ਵਿਨਯਮਨ੍ਤਨਾਤਿ ਵਿਨਯਵਿਨਿਚ੍ਛਯੋ. ਸੋਤਾਵਧਾਨਨ੍ਤਿ ਸੋਤਸ੍ਸ ਓਦਹਨਂ, ਸਵਨਨ੍ਤਿ ਅਤ੍ਥੋ. ਤੇਨਾਹ ‘‘ਯਂ ਉਪ੍ਪਜ੍ਜਤਿ ਞਾਣ’’ਨ੍ਤਿ. ਯਥਾਵੁਤ੍ਤਾਯ ਵਿਨਯਸਂਵਰਾਦਿਕਾਰਣਪਰਮ੍ਪਰਾਯ ਵਿਮੁਤ੍ਤਿਯਾ ਏਵ ਪਧਾਨਤ੍ਤਾ ਸਾ ਪੁਨ ਚਿਤ੍ਤਸ੍ਸ ਵਿਮੋਕ੍ਖੋਤਿ ਉਦ੍ਧਟੋਤਿ ਆਹ ‘‘ਅਰਹਤ੍ਤਫਲਸਙ੍ਖਾਤੋ ਵਿਮੋਕ੍ਖੋ’’ਤਿ. ਅਥ ਵਾ ਯੋ ਯਂ ਕਿਞ੍ਚਿ ਧਮ੍ਮਂ ਅਨੁਪਾਦਿਯਿਤ੍ਵਾ ਪਰਿਨਿਬ੍ਬਾਨਵਸੇਨ ਚਿਤ੍ਤਸ੍ਸ ਚਿਤ੍ਤਸਨ੍ਤਤਿਯਾ, ਤਪ੍ਪਟਿਬਦ੍ਧਕਮ੍ਮਜਰੂਪਸਨ੍ਤਤਿਯਾ ਚ ਵਿਮੋਕ੍ਖੋ ਵਿਮੁਚ੍ਚਨਂ ਅਪੁਨਪ੍ਪਵਤ੍ਤਿਵਸੇਨ ਵਿਗਮੋ, ਏਤਦਤ੍ਥਾਯ ਏਤਸ੍ਸ ਵਿਗਮਸ੍ਸਤ੍ਥਾਯ ਏਵਾਤਿ ਏਵਂ ਨਿਗਮਨਵਸੇਨਪੇਤ੍ਥ ਅਤ੍ਥੋ ਵੇਦਿਤਬ੍ਬੋ.

੩੬੭. ਅਨੁਯੋਗਵਤ੍ਤਗਾਥਾਸੁ ਕੁਸਲੇਨ ਬੁਦ੍ਧਿਮਤਾਤਿ ਸਮ੍ਮਾਸਮ੍ਬੁਦ੍ਧੇਨ. ਕਤਨ੍ਤਿ ਨਿਬ੍ਬਤ੍ਤਿਤਂ, ਪਕਾਸਿਤਨ੍ਤਿ ਅਤ੍ਥੋ. ਤੇਨੇਵਾਤਿਆਦੀਸੁ ਤੇਨੇਵ ਕਤਾਕਤਸ੍ਸ ਅਜਾਨਨੇਵ ਪੁਬ੍ਬਾਪਰਂ ਅਜਾਨਨਸ੍ਸ, ਅਞ੍ਞਸ੍ਸਪਿ ਭਿਕ੍ਖੁਨੋ ਯਂ ਕਤਾਕਤਂ ਹੋਤਿ, ਤਮ੍ਪਿ ਨ ਜਾਨਾਤੀਤਿ ਅਤ੍ਥੋ. ਅਤ੍ਤਨੋ ਸਦਿਸਾਯਾਤਿ ਯਥਾਵੁਤ੍ਤੇਹਿ ਦੋਸੇਹਿ ਯੁਤ੍ਤਤਾਯ ਅਤ੍ਤਨਾ ਸਦਿਸਾਯ.

ਅਨੁਵਿਜ੍ਜਕਸ੍ਸ ਪਟਿਪਤ੍ਤਿਵਣ੍ਣਨਾ ਨਿਟ੍ਠਿਤਾ.