ਅਧਿਕਰਣਭੇਦਂ

ਉਕ੍ਕੋਟਨਭੇਦਾਦਿਕਥਾਵਣ੍ਣਨਾ

੩੪੧. ‘‘ਅਲਂ ਆਵੁਸੋ’’ਤਿ ਅਤ੍ਤਪਚ੍ਚਤ੍ਥਿਕੇ ਸਞ੍ਞਾਪੇਤ੍ਵਾਤਿ ਪਤ੍ਤਚੀਵਰਾਦਿਅਤ੍ਥਾਯ ਅਲਂ ਭਣ੍ਡਨਾਦਿਕਰਣਨ੍ਤਿ ਵਿਵਾਦਾਦੀਸੁ ਦੋਸਦਸ੍ਸਨਮਤ੍ਤੇਨ ਸਞ੍ਞਾਪੇਤ੍ਵਾ ਅਞ੍ਞਮਞ੍ਞਂ ਖਮਾਪੇਤ੍ਵਾ ਵੂਪਸਮੇਨ੍ਤਿ, ਨ ਪਨ ਅਞ੍ਞਮਞ੍ਞਂ ਆਪਤ੍ਤਾਨਾਪਤ੍ਤਿਦਸ੍ਸਨਵਸੇਨਾਤਿ ਅਧਿਪ੍ਪਾਯੋ. ਤੇਨਾਹ ‘‘ਪਾਲ਼ਿਮੁਤ੍ਤਕਵਿਨਿਚ੍ਛਯੇਨੇਵਾ’’ਤਿ.

ਵਿਸਮਾਨਿ ਕਾਯਕਮ੍ਮਾਦੀਨਿ ਨਿਸ੍ਸਿਤੋ ਭਿਕ੍ਖੁ ਵਿਸਮਨਿਸ੍ਸਿਤੋ ਨਾਮ, ਮਿਚ੍ਛਾਦਿਟ੍ਠਿਨਿਸ੍ਸਿਤੋ ਗਹਨਨਿਸ੍ਸਿਤੋ, ਬਲਵਨ੍ਤੇ ਪੁਰਿਸੇ ਨਿਸ੍ਸਿਤੋ ਬਲਵਨਿਸ੍ਸਿਤੋ ਨਾਮਾਤਿ ਦਸ੍ਸੇਨ੍ਤੋ ‘‘ਏਕੋ ਵਿਸਮਾਨੀ’’ਤਿਆਦਿਮਾਹ.

ਉਕ੍ਕੋਟਨਭੇਦਾਦਿਕਥਾਵਣ੍ਣਨਾ ਨਿਟ੍ਠਿਤਾ.

ਅਧਿਕਰਣਨਿਦਾਨਾਦਿਵਣ੍ਣਨਾ

੩੪੨. ਆਪਤ੍ਤਿਂ ਨਿਸ੍ਸਾਯ ਉਪ੍ਪਜ੍ਜਨਕਆਪਤ੍ਤਿਵਸੇਨਾਤਿ ਪਰੇਸਂ, ਅਤ੍ਤਨੋ ਚ ਆਪਤ੍ਤਿਂ ਪਟਿਚ੍ਛਾਦੇਨ੍ਤਾਨਂ ਵਜ੍ਜਪਟਿਚ੍ਛਾਦੀਨਂ ਪਾਰਾਜਿਕਾਦਿਆਪਤ੍ਤਿਮੇਵ ਸਨ੍ਧਾਯ ਵੁਤ੍ਤਂ, ਨ ਸਬ੍ਬਾਪਤ੍ਤਿਯੋ. ਕਿਚ੍ਚਂ ਨਿਸ੍ਸਾਯ ਉਪ੍ਪਜ੍ਜਨਕਕਿਚ੍ਚਾਨਨ੍ਤਿ ਉਕ੍ਖੇਪਨੀਯਾਦਿਕਮ੍ਮਂ ਨਿਸ੍ਸਾਯ ਉਪ੍ਪਜ੍ਜਨਕਾਨਂ ਤਦਨੁਵਤ੍ਤਿਕਾਯ ਭਿਕ੍ਖੁਨਿਯਾ ਯਾਵਤਤਿਯਾਨੁਸ੍ਸਾਵਨਾਨਂ ਕਿਚ੍ਚਾਨਂ ਵਸੇਨ, ਨ ਸਬ੍ਬੇਸਂ ਕਿਚ੍ਚਾਨਂ ਵਸੇਨਾਤਿ.

੩੪੪. ਪਾਲ਼ਿਯਂ ‘‘ਕਤਿਹਿ ਅਧਿਕਰਣੇਹੀ’’ਤਿ ਪੁਚ੍ਛਾਯ ‘‘ਏਕੇਨ ਅਧਿਕਰਣੇਨ ਕਿਚ੍ਚਾਧਿਕਰਣੇਨਾ’’ਤਿ ਵੁਤ੍ਤਂ. ‘‘ਕਤਿਸੁ ਠਾਨੇਸੂ’’ਤਿ ਪੁਚ੍ਛਾਯ ‘‘ਤੀਸੁ ਠਾਨੇਸੁ ਸਙ੍ਘਮਜ੍ਝੇ, ਗਣਮਜ੍ਝੇ, ਪੁਗ੍ਗਲਸ੍ਸ ਸਨ੍ਤਿਕੇ’’ਤਿ ਵੁਤ੍ਤਂ. ‘‘ਕਤਿਹਿ ਸਮਥੇਹੀ’’ਤਿ ਪੁਚ੍ਛਾਯ ‘‘ਤੀਹਿ ਸਮਥੇਹੀ’’ਤਿ ਵੁਤ੍ਤਂ. ਤੀਹਿਪਿ ਏਤੇਹਿ ਏਕੋ ਵੂਪਸਮਨਪ੍ਪਕਾਰੋਵ ਪੁਚ੍ਛਿਤੋ, ਵਿਸ੍ਸਜ੍ਜਿਤੋ ਚਾਤਿ ਵੇਦਿਤਬ੍ਬੋ.

੩੪੮. ਵਿਵਾਦਾਧਿਕਰਣਂ ਹੋਤਿ ਅਨੁਵਾਦਾਧਿਕਰਣਨ੍ਤਿਆਦੀਸੁ ਵਿਵਾਦਾਧਿਕਰਣਮੇਵ ਅਨੁਵਾਦਾਧਿਕਰਣਾਦਿਪਿ ਹੋਤੀਤਿ ਪੁਚ੍ਛਾਯ ਵਿਵਾਦਾਧਿਕਰਣਂ ਵਿਵਾਦਾਧਿਕਰਣਮੇਵ ਹੋਤਿ, ਅਨੁਵਾਦਾਦਯੋ ਨ ਹੋਤੀਤਿ ਵਿਸ੍ਸਜ੍ਜਨਂ.

ਅਧਿਕਰਣਨਿਦਾਨਾਦਿਵਣ੍ਣਨਾ ਨਿਟ੍ਠਿਤਾ.

ਸਤ੍ਤਸਮਥਨਾਨਾਤ੍ਥਾਦਿਵਣ੍ਣਨਾ

੩੫੪. ਅਧਿਕਰਣਪੁਚ੍ਛਾਵਿਸ੍ਸਜ੍ਜਨੇ ਪਾਲ਼ਿਯਂ ਵਿਪਚ੍ਚਯਤਾਯ ਵੋਹਾਰੋਤਿ ਵਿਰੂਪਵਿਪਾਕਾਯ ਅਞ੍ਞਮਞ੍ਞਂ ਦੁਕ੍ਖੁਪ੍ਪਾਦਨਾਯ ਕਾਯਵਚੀਵੋਹਾਰੋ. ਮੇਧਗਨ੍ਤਿ ਵੁਦ੍ਧਿਪ੍ਪਤ੍ਤੋ ਕਲਹੋ.

ਅਨੁਸਮ੍ਪਵਙ੍ਕਤਾਤਿ ਵਿਪਤ੍ਤਿਚੋਦਨਾਯ ਅਨੁ ਅਨੁ ਸਂਯੁਜ੍ਜਨਵਸੇਨ ਨਿਨ੍ਨਤਾ.

ਅਬ੍ਭੁਸ੍ਸਹਨਤਾਤਿ ਅਤਿਵਿਯ ਸਞ੍ਜਾਤੁਸ੍ਸਾਹਤਾ. ਅਨੁਬਲਪ੍ਪਦਾਨਨ੍ਤਿ ਚੋਦਕਾਨਮ੍ਪਿ ਉਪਤ੍ਥਮ੍ਭਕਰਣਂ. ਕਮ੍ਮਸਙ੍ਗਹਾਭਾਵੇਨਾਤਿ ਸਙ੍ਘਸਮ੍ਮੁਖਤਾਦਿਮਤ੍ਤਸ੍ਸ ਸਮ੍ਮੁਖਾਵਿਨਯਸ੍ਸ ਸਙ੍ਘਾਦੀਹਿ ਕਤ੍ਤਬ੍ਬਕਿਚ੍ਚੇਸੁ ਸਙ੍ਗਹਾਭਾਵਾ.

ਸਤ੍ਤਸਮਥਨਾਨਾਤ੍ਥਾਦਿਵਣ੍ਣਨਾ ਨਿਟ੍ਠਿਤਾ.

ਅਧਿਕਰਣਭੇਦਵਣ੍ਣਨਾਨਯੋ ਨਿਟ੍ਠਿਤੋ.

ਦੁਤਿਯਗਾਥਾਸਙ੍ਗਣਿਕਂ

ਚੋਦਨਾਦਿਪੁਚ੍ਛਾਵਿਸ੍ਸਜ੍ਜਨਾਵਣ੍ਣਨਾ

੩੫੯. ਦੁਤਿਯਗਾਥਾਸਙ੍ਗਣਿਕਾਯ ‘‘ਚੋਦਨਾ ਕਿਮਤ੍ਥਾਯਾ’’ਤਿਆਦਿਕਾ ਪੁਚ੍ਛਾ ਉਪਾਲਿਤ੍ਥੇਰੇਨ ਕਤਾ. ‘‘ਚੋਦਨਾ ਸਾਰਣਤ੍ਥਾਯਾ’’ਤਿਆਦਿਵਿਸ੍ਸਜ੍ਜਨਂ ਭਗਵਤਾ ਵੁਤ੍ਤਂ. ਉਪਾਲਿਤ੍ਥੇਰੋ ਸਯਮੇਵ ਪੁਚ੍ਛਿਤ੍ਵਾ ਵਿਸ੍ਸਜ੍ਜਨਂ ਅਕਾਸੀਤਿਪਿ ਵਦਨ੍ਤਿ.

ਮਨ੍ਤਗ੍ਗਹਣਨ੍ਤਿ ਤੇਸਂ ਵਿਚਾਰਣਾਗਹਣਂ, ਸੁਤ੍ਤਨ੍ਤਿਕਤ੍ਥੇਰਾਨਂ, ਵਿਨਯਧਰਤ੍ਥੇਰਾਨਞ੍ਚ ਅਧਿਪ੍ਪਾਯਗਹਣਨ੍ਤਿ ਅਤ੍ਥੋ. ਪਾਟੇਕ੍ਕਂ ਵਿਨਿਚ੍ਛਯਸਨ੍ਨਿਟ੍ਠਾਪਨਤ੍ਥਨ੍ਤਿ ਤੇਸਂ ਪਚ੍ਚੇਕਂ ਅਧਿਪ੍ਪਾਯਂ ਞਤ੍ਵਾ ਤੇਹਿ ਸਮੁਟ੍ਠਾਪਿਤਨਯਮ੍ਪਿ ਗਹੇਤ੍ਵਾ ਵਿਨਿਚ੍ਛਯਪਰਿਯੋਸਾਪਨਤ੍ਥਨ੍ਤਿ ਅਧਿਪ੍ਪਾਯੋ.

‘‘ਮਾ ਖੋ ਤੁਰਿਤੋ ਅਭਣੀ’’ਤਿਆਦਿਨਾ ਅਭਿਮੁਖੇ ਠਿਤਂ ਕਞ੍ਚਿ ਅਨੁਵਿਜ੍ਜਕਂ ਓਵਦਨ੍ਤੇਨ ਵਿਯ ਥੇਰੇਨ ਅਨੁਵਿਜ੍ਜਕਵਤ੍ਤਂ ਕਥਿਤਂ.

ਅਨੁਯੁਞ੍ਜਨਵਤ੍ਤਨ੍ਤਿ ਅਨੁਯੁਜ੍ਜਨਕ੍ਕਮਂ, ਤਂ ਪਨ ਯਸ੍ਮਾ ਸਬ੍ਬਸਿਕ੍ਖਾਪਦਵੀਤਿਕ੍ਕਮਵਿਸਯੇਪਿ ਤਂਤਂਸਿਕ੍ਖਾਪਦਾਨੁਲੋਮੇਨ ਕਤ੍ਤਬ੍ਬਂ, ਤਸ੍ਮਾ ‘‘ਸਿਕ੍ਖਾਪਦਾਨੁਲੋਮਿਕ’’ਨ੍ਤਿ ਵੁਤ੍ਤਂ. ਅਤ੍ਤਨੋ ਗਤਿਂ ਨਾਸੇਤੀਤਿ ਅਤ੍ਤਨੋ ਸੁਗਤਿਗਮਨਂ ਵਿਨਾਸੇਤਿ.

ਅਨੁਸਨ੍ਧਿਤ-ਸਦ੍ਦੋ ਭਾਵਸਾਧਨੋਤਿ ਆਹ ‘‘ਅਨੁਸਨ੍ਧਿਤਨ੍ਤਿ ਕਥਾਨੁਸਨ੍ਧੀ’’ਤਿ. ਵਤ੍ਤਾਨੁਸਨ੍ਧਿਤੇਨਾਤਿ ਏਤ੍ਥਾਪਿ ਏਸੇਵ ਨਯੋ. ਵਤ੍ਤਾਨੁਸਨ੍ਧਿਤੇਨਾਤਿ ਆਚਾਰਾਨੁਸਨ੍ਧਿਨਾ, ਆਚਾਰੇਨ ਸਦ੍ਧਿਂ ਸਮੇਨ੍ਤਿਯਾ ਪਟਿਞ੍ਞਾਯਾਤਿ ਅਤ੍ਥੋ. ਤੇਨਾਹ ‘‘ਯਾ ਅਸ੍ਸ ਵਤ੍ਤੇਨਾ’’ਤਿਆਦਿ.

ਪਾਲ਼ਿਯਂ ਸਞ੍ਚਿਚ੍ਚ ਆਪਤ੍ਤਿਨ੍ਤਿਆਦਿ ਅਲਜ੍ਜਿਲਜ੍ਜਿਲਕ੍ਖਣਂ ਭਿਕ੍ਖੁਭਿਕ੍ਖੁਨੀਨਂ ਵਸੇਨ ਵੁਤ੍ਤਂ ਤੇਸਞ੍ਞੇਵ ਸਬ੍ਬਪ੍ਪਕਾਰਤੋ ਸਿਕ੍ਖਾਪਦਾਧਿਕਾਰਤ੍ਤਾ. ਸਾਮਣੇਰਾਦੀਨਮ੍ਪਿ ਸਾਧਾਰਣਵਸੇਨ ਪਨ ਸਞ੍ਚਿਚ੍ਚ ਯਥਾਸਕਂ ਸਿਕ੍ਖਾਪਦਵੀਤਿਕ੍ਕਮਨਾਦਿਕਂ ਅਲਜ੍ਜਿਲਜ੍ਜਿਲਕ੍ਖਣਂ ਵੇਦਿਤਬ੍ਬਂ.

ਕਥਾਨੁਸਨ੍ਧਿਵਚਨਨ੍ਤਿ ਚੁਦਿਤਕਅਨੁਵਿਜ੍ਜਕਾਨਂ ਕਥਾਯ ਅਨੁਸਨ੍ਧਿਯੁਤ੍ਤਂ ਵਚਨਂ ਨ ਜਾਨਾਤਿ, ਤੇਹਿ ਏਕਸ੍ਮਿਂ ਕਾਰਣੇ ਵੁਤ੍ਤੇ ਸਯਂ ਤਂ ਅਸਲ੍ਲਕ੍ਖੇਤ੍ਵਾ ਅਤ੍ਤਨੋ ਅਭਿਰੁਚਿਤਮੇਵ ਅਸਮ੍ਬਨ੍ਧਿਤਤ੍ਥਨ੍ਤਿ ਅਤ੍ਥੋ. ਵਿਨਿਚ੍ਛਯਾਨੁਸਨ੍ਧਿਵਚਨਞ੍ਚਾਤਿ ਅਨੁਵਿਜ੍ਜਕੇਨ ਕਤਸ੍ਸ ਆਪਤ੍ਤਾਨਾਪਤ੍ਤਿਵਿਨਿਚ੍ਛਯਸ੍ਸ ਅਨੁਗੁਣਂ, ਸਮ੍ਬਨ੍ਧਵਚਨਞ੍ਚ.

ਚੋਦਨਾਦਿਪੁਚ੍ਛਾਵਿਸ੍ਸਜ੍ਜਨਾਵਣ੍ਣਨਾ ਨਿਟ੍ਠਿਤਾ.