੭. ਸੇਖਿਯਕਣ੍ਡਂ
੧. ਪਰਿਮਣ੍ਡਲਵਗ੍ਗਵਣ੍ਣਨਾ
੫੭੬. ਸੇਖਿਯੇਸੁ ਯਸ੍ਮਾ ਵਤ੍ਤਕ੍ਖਨ੍ਧਕੇ (ਚੂਲ਼ਵ. ੩੫੬ ਆਦਯੋ) ਵੁਤ੍ਤਵਤ੍ਤਾਨਿਪਿ ਸਿਕ੍ਖਿਤਬ੍ਬਤ੍ਤਾ ਸੇਖਿਯਾਨੇਵ, ਤਸ੍ਮਾ ਪਾਰਾਜਿਕਾਦੀਸੁ ਵਿਯੇਤ੍ਥ ਪਾਲ਼ਿਯਂ ਪਰਿਚ੍ਛੇਦੋ ਨ ਕਤੋ. ਚਾਰਿਤ੍ਤਨਯਦਸ੍ਸਨਤ੍ਥਞ੍ਚ ‘‘ਯੋ ਪਨ ਭਿਕ੍ਖੁ ਓਲਮ੍ਬੇਨ੍ਤੋ ਨਿਵਾਸੇਯ੍ਯ, ਦੁਕ੍ਕਟ’’ਨ੍ਤਿ ਅਵਤ੍ਵਾ ‘‘ਸਿਕ੍ਖਾ ਕਰਣੀਯਾ’’ਤਿ ਸਬ੍ਬਤ੍ਥ ਪਾਲ਼ਿ ਆਰੋਪਿਤਾ. ਪਦਭਾਜਨੇ ਪਨ ‘‘ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਵੁਤ੍ਤਤ੍ਤਾ ਸਬ੍ਬਤ੍ਥ ਅਨਾਦਰਿਯਕਰਣੇ ਦੁਕ੍ਕਟਂ ਵੇਦਿਤਬ੍ਬਂ.
ਅਟ੍ਠਙ੍ਗੁਲਮਤ੍ਤਨ੍ਤਿ ਮਤ੍ਤ-ਸਦ੍ਦੇਨ ਤਤੋ ਕਿਞ੍ਚਿ ਅਧਿਕਂ, ਊਨਮ੍ਪਿ ਸਙ੍ਗਣ੍ਹਾਤਿ. ਤੇਨੇਵ ਨਿਸਿਨ੍ਨਸ੍ਸ ਚਤੁਰਙ੍ਗੁਲਮਤ੍ਤਮ੍ਪਿ ਵੁਤ੍ਤਂ. ਨ ਹਿ ਨਿਸਿਨ੍ਨਸ੍ਸ ਚਤੁਰਙ੍ਗੁਲਪ੍ਪਮਾਣਂ, ਠਿਤਸ੍ਸ ਅਟ੍ਠਙ੍ਗੁਲਮੇਵਾਤਿ ਸਕ੍ਕਾ ਨਿਯਮੇਤੁਂ ਊਨਾਧਿਕਤ੍ਤਸਮ੍ਭਵਤੋ. ਤਸ੍ਮਾ ਯਥਾ ਸਾਰੁਪ੍ਪਂ ਹੋਤਿ ਏਵਂ ਅਟ੍ਠਙ੍ਗੁਲਾਨੁਸਾਰੇਨ ਨਿਵਾਸਨਞ੍ਞੇਵ ਅਧਿਪ੍ਪੇਤਨ੍ਤਿ ਗਹੇਤਬ੍ਬਂ. ਤੇਨੇਵ ਵਕ੍ਖਤਿ ‘‘ਯੋ ਪਨ ਭਿਕ੍ਖੁ ਸੁਕ੍ਖਜਙ੍ਘੋ ਵਾ’’ਤਿਆਦਿ. ਕੁਰੁਨ੍ਦਿਯਂ ‘‘ਅਜਾਨਨ੍ਤਸ੍ਸ ਅਨਾਪਤ੍ਤੀ’’ਤਿ ਆਦਰਂ ਕਤ੍ਵਾ ਉਗ੍ਗਣ੍ਹਨ੍ਤਸ੍ਸਾਪਿ ਅਜਾਨਨਂ ਸਨ੍ਧਾਯ ਵੁਤ੍ਤਂ. ਤੇਨਾਪਿ ਨਿਰਨ੍ਤਰਂ ਨਿਵਾਸਨਪਾਰੁਪਨਵਤ੍ਤਂ ਸਿਕ੍ਖਿਤਬ੍ਬਂ, ਅਸਿਕ੍ਖਿਤੋ ਅਨਾਦਰਿਯਮੇਵ. ਪਰਿਮਣ੍ਡਲਗ੍ਗਹਣੇਨ ਉਕ੍ਖਿਪਿਤ੍ਵਾ ਨਿਵਾਸਨਮ੍ਪਿ ਪਟਿਕ੍ਖਿਤ੍ਤਨ੍ਤਿ ਆਹ ‘‘ਉਕ੍ਖਿਪਿਤ੍ਵਾ ਵਾ ਓਤਾਰੇਤ੍ਵਾ ਵਾ’’ਤਿ.
ਸਚਿਤ੍ਤਕਨ੍ਤਿ ਵਤ੍ਥੁਵਿਜਾਨਨਚਿਤ੍ਤੇਨ ਸਚਿਤ੍ਤਕਂ. ਸਾਰਤ੍ਥਦੀਪਨਿਯਂ ਪਨ ਉਪਤਿਸ੍ਸਤ੍ਥੇਰਵਾਦਨਯੇਨ ਲੋਕਵਜ੍ਜਤ੍ਤਂ ਗਹੇਤ੍ਵਾ ‘‘ਵਤ੍ਥੁਵਿਜਾਨਨਚਿਤ੍ਤੇਨ, ਪਣ੍ਣਤ੍ਤਿਵਿਜਾਨਨਚਿਤ੍ਤੇਨ ਚ ਸਚਿਤ੍ਤਕ’’ਨ੍ਤਿ (ਸਾਰਤ੍ਥ. ਟੀ. ਸੇਖਿਯਕਣ੍ਡ ੩.੫੭੬) ਵੁਤ੍ਤਂ. ਤਤ੍ਥ ਚ ਵਤ੍ਥੁਵਿਜਾਨਨਂ ਵਿਸੁਂ ਨ ਵਤ੍ਤਬ੍ਬਂ. ਪਣ੍ਣਤ੍ਤਿਵਿਜਾਨਨੇਨ ਤਸ੍ਸਾਪਿ ਅਨ੍ਤੋਗਧਭਾਵਤੋ ਇਦਂ ਵਤ੍ਥੁਂ ਏਵਂ ਵੀਤਿਕ੍ਕਮਨ੍ਤਸ੍ਸ ਆਪਤ੍ਤੀਤਿ ਵਿਜਾਨਨ੍ਤੋ ਹਿ ਪਣ੍ਣਤ੍ਤਿਂ ਵਿਜਾਨਾਤੀਤਿ ਵੁਚ੍ਚਤਿ. ਉਪਤਿਸ੍ਸਤ੍ਥੇਰਵਾਦੇ ਚੇਤ੍ਥ ਪਣ੍ਣਤ੍ਤਿਂ ਅਜਾਨਿਤ੍ਵਾ ਅਪਰਿਮਣ੍ਡਲਨਿਵਾਸਨਾਦਿਵਤ੍ਥੁਮੇਵ ਜਾਨਨ੍ਤਸ੍ਸ ਪਣ੍ਣਤ੍ਤਿਵੀਤਿਕ੍ਕਮਾਨਾਦਰਿਯਾਭਾਵਾ ਸਬ੍ਬਸੇਖਿਯੇਸੁ ਅਨਾਪਤ੍ਤਿ ਏਵ ਅਭਿਮਤਾ, ਤਞ੍ਚ ਨ ਯੁਤ੍ਤਂ ਕੋਸਮ੍ਬਕ੍ਖਨ੍ਧਕੇ (ਮਹਾਵ. ੪੫੧ ਆਦਯੋ) ਵਚ੍ਚਕੁਟਿਯਂ ਉਦਕਾਵਸੇਸਂ ਠਪੇਨ੍ਤਸ੍ਸ ਪਣ੍ਣਤ੍ਤਿਵਿਜਾਨਨਾਭਾਵੇਪਿ ਆਪਤ੍ਤਿਯਾ ਵੁਤ੍ਤਤ੍ਤਾ. ਵੁਤ੍ਤਞ੍ਹਿ ਤਤ੍ਥ ‘‘ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਆਪਤ੍ਤਿਂ ਆਪਨ੍ਨੋ ਹੋਤਿ …ਪੇ… ਸੋ ਅਪਰੇਨ ਸਮਯੇਨ ਤਸ੍ਸਾ ਆਪਤ੍ਤਿਯਾ ਅਨਾਪਤ੍ਤਿਦਿਟ੍ਠਿ ਹੋਤੀ’’ਤਿਆਦਿ (ਮਹਾਵ. ੪੫੧). ਅਟ੍ਠਕਥਾਯਞ੍ਚਸ੍ਸ ‘‘ਤ੍ਵਂ ਏਤ੍ਥ ਆਪਤ੍ਤਿਭਾਵਂ ਨ ਜਾਨਾਸੀਤਿ, ਆਮ ਨ ਜਾਨਾਮੀਤਿ. ਹੋਤੁ ਆਵੁਸੋ, ਏਤ੍ਥ ਆਪਤ੍ਤੀਤਿ, ਸਚੇ ਹੋਤਿ, ਦੇਸੇਸ੍ਸਾਮੀਤਿ. ਸਚੇ ਪਨ ਤੇ, ਆਵੁਸੋ, ਅਸਞ੍ਚਿਚ੍ਚ ਅਸਤਿਯਾ ਕਤਂ, ਨਤ੍ਥਿ ਆਪਤ੍ਤੀਤਿ. ਸੋ ਤਸ੍ਸਾ ਆਪਤ੍ਤਿਯਾ ਅਨਾਪਤ੍ਤਿਦਿਟ੍ਠਿ ਅਹੋਸੀ’’ਤਿ (ਮਹਾਵ. ਅਟ੍ਠ. ੪੫੧) ਵੁਤ੍ਤਂ, ਤਥਾ ‘‘ਅਧਮ੍ਮਵਾਦੀਤਿ ਉਕ੍ਖਿਤ੍ਤਾਨੁਵਤ੍ਤਕੇਸੁ ਅਞ੍ਞਤਰੋ’’ਤਿ (ਮਹਾਵ. ਅਟ੍ਠ. ੪੫੭-੪੫੮) ਚ ਵੁਤ੍ਤਂ. ਖਨ੍ਧਕਵਤ੍ਤਾਨਞ੍ਹਿ ਸੇਖਿਯਤ੍ਤਾ ਤਤ੍ਥ ਵੁਤ੍ਤੋ ਨਯੋ ਇਮੇਸਂ, ਇਧ ਵੁਤ੍ਤੋ ਚ ਤੇਸਂ ਸਾਧਾਰਣੋਵ ਹੋਤੀਤਿ. ਤੇਨੇਵ ‘‘ਅਸਞ੍ਚਿਚ੍ਚ ਅਸਤਿਯਾ ਕਤਂ, ਨਤ੍ਥਿ ਆਪਤ੍ਤੀ’’ਤਿ ਏਵਂ ਇਧ ਵੁਤ੍ਤੋ ਆਪਤ੍ਤਿਨਯੋ ਤਤ੍ਥਾਪਿ ਦਸ੍ਸਿਤੋ. ਤਸ੍ਮਾ ਫੁਸ੍ਸਦੇਵਤ੍ਥੇਰਵਾਦੇ ਏਵ ਠਤ੍ਵਾ ਵਤ੍ਥੁਵਿਜਾਨਨਚਿਤ੍ਤੇਨੇਵ ਸਬ੍ਬਸੇਖਿਯਾਨਿ ਸਚਿਤ੍ਤਕਾਨਿ, ਨ ਪਣ੍ਣਤ੍ਤਿਵਿਜਾਨਨਚਿਤ੍ਤੇਨ. ਭਿਯ੍ਯੋਕਮ੍ਯਤਾਯਸੂਪਬ੍ਯਞ੍ਜਨਪਟਿਚ੍ਛਾਦਨਉਜ੍ਝਾਨਸਞ੍ਞੀਤਿ ਦ੍ਵੇ ਸਿਕ੍ਖਾਪਦਾਨਿ ਲੋਕਵਜ੍ਜਾਨਿ ਅਕੁਸਲਚਿਤ੍ਤਾਨਿ, ਸੇਸਾਨਿ ਪਣ੍ਣਤ੍ਤਿਵਜ੍ਜਾਨਿ, ਤਿਚਿਤ੍ਤਾਨਿ, ਤਿਵੇਦਨਾਨਿ ਚਾਤਿ ਗਹਣਮੇਵ ਯੁਤ੍ਤਤਰਂ ਦਿਸ੍ਸਤਿ. ਤੇਨੇਵੇਤ੍ਥ ‘‘ਅਸਞ੍ਚਿਚ੍ਚਾਤਿ ਪੁਰਤੋ ਵਾ ਪਚ੍ਛਤੋ ਵਾ ਓਲਮ੍ਬੇਤ੍ਵਾ ਨਿਵਾਸੇਸ੍ਸਾਮੀਤਿ ਏਵਂ ਅਸਞ੍ਚਿਚ੍ਚਾ’’ਤਿਆਦਿਨਾ ਵਤ੍ਥੁਅਜਾਨਨਵਸੇਨੇਵ ਅਨਾਪਤ੍ਤਿਵਣ੍ਣਨਾ ਕਤਾ, ਨ ਪਣ੍ਣਤ੍ਤਿਵਿਜਾਨਨਚਿਤ੍ਤਵਸੇਨ.
ਅਪਿਚ ‘‘ਯਸ੍ਸ ਸਚਿਤ੍ਤਕਪਕ੍ਖੇ ਚਿਤ੍ਤਂ ਅਕੁਸਲਮੇਵ ਹੋਤਿ, ਤਂ ਲੋਕਵਜ੍ਜ’’ਨ੍ਤਿ (ਕਙ੍ਖਾ. ਅਟ੍ਠ. ਪਠਮਪਾਰਾਜਿਕਵਣ੍ਣਨਾ) ਇਮਿਨਾ ਲਕ੍ਖਣਵਚਨੇਨਾਪਿ ਚੇਤਂ ਸਿਜ੍ਝਤਿ. ਵਤ੍ਥੁਵਿਜਾਨਨਚਿਤ੍ਤਵਸੇਨੇਵ ਹੇਤ੍ਥ ‘‘ਸਚਿਤ੍ਤਕਪਕ੍ਖੇ’’ਤਿ ਵੁਤ੍ਤਂ. ਇਤਰਥਾ ਪਣ੍ਣਤ੍ਤਿਵਿਜਾਨਨਚਿਤ੍ਤਵਸੇਨ ਸਬ੍ਬਸਿਕ੍ਖਾਪਦਾਨਮ੍ਪਿ ਸਚਿਤ੍ਤਕਪਕ੍ਖੇ ਚਿਤ੍ਤਸ੍ਸ ਅਕੁਸਲਤ੍ਤਨਿਯਮੇਨ ਲੋਕਵਜ੍ਜਤ੍ਤਪ੍ਪਸਙ੍ਗਤੋ ਪਣ੍ਣਤ੍ਤਿਵਜ੍ਜਮੇਵ ਨ ਸਿਯਾ, ਇਦਞ੍ਚ ਵਚਨਂ ਨਿਰਤ੍ਥਕਂ ਸਿਯਾ ਇਮਿਨਾ ਵਚਨੇਨ ਨਿਵਤ੍ਤੇਤਬ੍ਬਸ੍ਸ ਸਿਕ੍ਖਾਪਦਸ੍ਸ ਅਭਾਵਾ. ਨ ਚ ਸੇਖਿਯੇਸੁ ਵਤ੍ਥੁਵਿਜਾਨਨਚਿਤ੍ਤੇਨ ਸਚਿਤ੍ਤਕਪਕ੍ਖੇ ਚਿਤ੍ਤਂ ਪਾਣਾਤਿਪਾਤਾਦੀਸੁ ਵਿਯ ਅਕੁਸਲਮੇਵਾਤਿ ਨਿਯਮੋ ਅਤ੍ਥਿ, ਯੇਨੇਤ੍ਥ ਲੋਕਵਜ੍ਜਤਾ ਪਸਜ੍ਜੇਯ੍ਯ, ‘‘ਅਨਾਦਰਿਯਂ ਪਟਿਚ੍ਚਾ’’ਤਿ ਚੇਤਂ ਪਾਲ਼ਿਵਚਨਂ ਵਤ੍ਥੁਂ ਜਾਨਿਤ੍ਵਾ ਤੀਹਿ ਚਿਤ੍ਤੇਹਿ ਵੀਤਿਕ੍ਕਮਮੇਵ ਅਨਾਦਰਿਯਂ ਕਤ੍ਵਾ ਵੁਤ੍ਤਂ, ਨ ਪਣ੍ਣਤ੍ਤਿਂ ਜਾਨਿਤ੍ਵਾ ਅਕੁਸਲਚਿਤ੍ਤੇਨੇਵ ਵੀਤਿਕ੍ਕਮਨ੍ਤਿ ਗਹੇਤਬ੍ਬਂ. ਅਞ੍ਞਥਾ ਖਨ੍ਧਕਪਾਲ਼ਿਯਾ, ਅਟ੍ਠਕਥਾਯਞ੍ਚ ਪੁਬ੍ਬਾਪਰਞ੍ਚ ਵਿਰੁਜ੍ਝਨਤੋਤਿ ਅਮ੍ਹਾਕਂ ਖਨ੍ਤਿ. ਯਥਾ ਵਾ ਨ ਵਿਰੁਜ੍ਝਤਿ, ਤਥਾ ਏਤ੍ਥ ਅਧਿਪ੍ਪਾਯੋ ਗਵੇਸਿਤਬ੍ਬੋ. ਅਨਾਦਰਿਯਂ, ਅਨਾਪਤ੍ਤਿਕਾਰਣਾਭਾਵੋ, ਅਪਰਿਮਣ੍ਡਲਨਿਵਾਸਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਯਥਾ ਚੇਤ੍ਥ, ਏਵਂ ਸਬ੍ਬਤ੍ਥ. ਕੇਵਲਂ ਤਤ੍ਥ ਤਤ੍ਥ ਵੁਤ੍ਤਪਟਿਪਕ੍ਖਕਰਣਵਸੇਨ ਤਤਿਯਙ੍ਗਯੋਜਨਮੇਵ ਵਿਸੇਸੋ.
੫੭੭. ਦੁਤਿਯਾਦੀਸੁ ਗਿਹਿਪਾਰੁਤਨ੍ਤਿ ਸੇਤਪਟਪਾਰੁਤਾਦਿ. ਵਿਹਾਰੇਪੀਤਿ ਸਙ੍ਘਸਨ੍ਨਿਪਾਤਬੁਦ੍ਧੁਪਟ੍ਠਾਨਾਦਿਕਾਲਂ ਸਨ੍ਧਾਯ ਵੁਤ੍ਤਂ.
੫੭੮. ਗਣ੍ਠਿਕਂ ਪਟਿਮੁਞ੍ਚਿਤ੍ਵਾਤਿਆਦਿ ਪਟਿਚ੍ਛਾਦਨਵਿਧਿਦਸ੍ਸਨਂ. ਗੀਵਂ ਪਟਿਚ੍ਛਾਦੇਤ੍ਵਾਤਿਆਦਿਨਾ ਵੁਤ੍ਤਤ੍ਤਾ ਸਞ੍ਚਿਚ੍ਚ ਗੀਵਂ, ਮਣਿਬਨ੍ਧਨਞ੍ਚ ਅਪ੍ਪਟਿਚ੍ਛਾਦੇਨ੍ਤਸ੍ਸ ਆਪਤ੍ਤਿ. ਏਤ੍ਥਾਪਿ ਪਰਿਮਣ੍ਡਲਸਿਕ੍ਖਾਪਦਸ੍ਸ ਸਾਧਾਰਣਤ੍ਤਾ ਜਾਣੁਮਣ੍ਡਲਤੋ ਹੇਟ੍ਠਾ ਚਤੁਰਙ੍ਗੁਲਮਤ੍ਤਂ ਓਤਾਰੇਤ੍ਵਾ ਅਨੋਲਮ੍ਬੇਤ੍ਵਾ ਪਰਿਮਣ੍ਡਲਮੇਵ ਪਾਰੁਪਿਤਬ੍ਬਂ.
੫੭੯. ਵਿਵਰਿਤ੍ਵਾ ਨਿਸੀਦਤੋਤਿ ਵਿਹਾਰੇ ਵਿਯ ਏਕਂਸਪਾਰੁਪਨਂ ਸਨ੍ਧਾਯ ਵੁਤ੍ਤਂ. ‘‘ਵਾਸਤ੍ਥਾਯ ਉਪਗਤਸ੍ਸਾ’’ਤਿ ਵੁਤ੍ਤਤ੍ਤਾ ਵਾਸਾਧਿਪ੍ਪਾਯਂ ਵਿਨਾ ਧਮ੍ਮਦੇਸਨਪਰਿਤ੍ਤਭਣਨਾਦਿਅਤ੍ਥਾਯ ਸੁਚਿਰਮ੍ਪਿ ਨਿਸੀਦਨ੍ਤੇਨ ਸਬ੍ਬਂ ਅਨ੍ਤਰਘਰਵਤ੍ਤਂ ਪੂਰੇਨ੍ਤੇਨੇਵ ਨਿਸੀਦਿਤਬ੍ਬਂ. ਨਿਸੀਦਨਪਟਿਸਂਯੁਤ੍ਤੇਸੁ ਏਵ ਚ ਸਿਕ੍ਖਾਪਦੇਸੁ ‘‘ਵਾਸੂਪਗਤਸ੍ਸਾ’’ਤਿ ਅਨਾਪਤ੍ਤਿਯਾ ਵੁਤ੍ਤਤ੍ਤਾ ਵਾਸਤ੍ਥਾਯ ਅਨ੍ਤਰਘਰਂ ਉਪਗਚ੍ਛਨ੍ਤੇਨਾਪਿ ਸੁਪ੍ਪਟਿਚ੍ਛਨ੍ਨਤਾਦਿਸਬ੍ਬਂ ਅਕੋਪੇਨ੍ਤੇਨੇਵ ਗਨ੍ਤਬ੍ਬਂ. ‘‘ਵਾਸੂਪਗਤਸ੍ਸਾ’’ਤਿ ਹਿ ਵੁਤ੍ਤਂ, ਨ ਪਨ ਉਪਗਚ੍ਛਮਾਨਸ੍ਸਾਤਿ. ਕੇਚਿ ਪਨ ‘‘ਏਕੇਕਸ੍ਮਿਂ ਪਠਮਂ ਗਨ੍ਤ੍ਵਾ ਵਾਸਪਰਿਗ੍ਗਹੇ ਕਤੇ ਤਤੋ ਅਞ੍ਞੇਹਿ ਯਥਾਸੁਖਂ ਗਨ੍ਤੁਂ ਵਟ੍ਟਤੀ’’ਤਿ ਵਦਨ੍ਤਿ. ਅਪਰੇ ਪਨ ‘‘ਗੇਹਸ੍ਸਾਮਿਕੇਹਿ ‘ਯਾਵ ਤੁਮ੍ਹੇ ਨਿਵਸਿਸ੍ਸਥ, ਤਾਵ ਤੁਮ੍ਹਾਕਂ ਇਮਂ ਗੇਹਂ ਦੇਮੀ’ਤਿ ਦਿਨ੍ਨੇ ਅਞ੍ਞੇਹਿ ਅਵਾਸਾਧਿਪ੍ਪਾਯੇਹਿ ਅਨ੍ਤਰਾਰਾਮੇ ਵਿਯ ਯਥਾਸੁਖਂ ਗਨ੍ਤੁਂ, ਨਿਸੀਦਿਤੁਞ੍ਚ ਵਟ੍ਟਤੀ’’ਤਿ ਵਦਨ੍ਤਿ, ਤਂ ਸਬ੍ਬਂ ਨ ਗਹੇਤਬ੍ਬਂ ਤਥਾਵਚਨਾਭਾਵਾ, ਦਾਨਲਕ੍ਖਣਾਭਾਵਾ, ਤਾਵਤ੍ਤਕੇਨ ਵਿਹਾਰਸਙ੍ਖ੍ਯਾਨੁਪਗਮਨਤੋ ਚ. ‘‘ਯਾਵ ਨਿਸੀਦਿਸ੍ਸਥ, ਤਾਵ ਤੁਮ੍ਹਾਕਂ ਇਮਂ ਗੇਹਂ ਦੇਮੀ’’ਤਿ ਦੇਨ੍ਤੋਪਿ ਹਿ ਤਾਵਕਾਲਿਕਮੇਵ ਦੇਤਿ ਵਤ੍ਥੁਪਰਿਚ੍ਚਾਗਲਕ੍ਖਣਤ੍ਤਾ ਦਾਨਸ੍ਸ.
੫੮੨. ਚਤੁਹਤ੍ਥਪ੍ਪਮਾਣਨ੍ਤਿ ਵਡ੍ਢਕੀਹਤ੍ਥਂ ਸਨ੍ਧਾਯ ਵੁਤ੍ਤਨ੍ਤਿ ਵਦਨ੍ਤਿ.
੫੮੪. ਉਕ੍ਖਿਤ੍ਤਚੀਵਰੋ ਹੁਤ੍ਵਾਤਿ ਕਟਿਤੋ ਉਦ੍ਧਂ ਕਾਯਬਨ੍ਧਨਾਦਿਦਸ੍ਸਨਵਸੇਨੇਵੁਕ੍ਖਿਪਨਂ ਸਨ੍ਧਾਯ ਵੁਤ੍ਤਂ ਪਿਣ੍ਡਾਯ ਚਰਤੋ ਪਤ੍ਤਗ੍ਗਹਣਾਦਿਮਤ੍ਤਸ੍ਸ ਅਨੁਞ੍ਞਾਤਤ੍ਤਾ. ਤੇਨੇਵ ‘‘ਨਿਸਿਨ੍ਨਕਾਲੇ ਪਨ ਧਮਕਰਣ’’ਨ੍ਤਿਆਦਿ ਵੁਤ੍ਤਂ. ਨਿਸਿਨ੍ਨਕਾਲੇ ਹਿ ਖਨ੍ਧੇ ਲਗ੍ਗਪਤ੍ਤਤ੍ਥਵਿਕਾਦਿਤੋ ਧਮਕਰਣਂ ਨੀਹਰਨ੍ਤਸ੍ਸ ਕਟਿਤੋ ਉਦ੍ਧਮ੍ਪਿ ਦਿਸ੍ਸਤਿ, ਤਥਾ ਅਦਸ੍ਸੇਤ੍ਵਾ ਨੀਹਰਿਤਬ੍ਬਨ੍ਤਿ ਅਧਿਪ੍ਪਾਯੋ. ਆਸਨੇ ਨਿਸੀਦਨ੍ਤਸ੍ਸਾਪਿ ਚ ਪਾਰੁਪਿਤਚੀਵਰਂ ਕਿਞ੍ਚਿ ਉਕ੍ਖਿਪਿਤ੍ਵਾ ਸਙ੍ਘਾਟਿਂ ਜਙ੍ਘਪਿਣ੍ਡੇਹਿ ਅਨੁਕ੍ਖਿਪਿਤ੍ਵਾਵ ਨਿਸੀਦਿਤਬ੍ਬਂ. ਇਮਸ੍ਮਿਞ੍ਞੇਵ ਪਨ ਸਿਕ੍ਖਾਪਦੇ ‘‘ਵਾਸੂਪਗਤਸ੍ਸਾ’’ਤਿ ਵੁਤ੍ਤਤ੍ਤਾ ਨਿਸੀਦਨਪਟਿਸਂਯੁਤ੍ਤੇਸੁ ਛਟ੍ਠਅਟ੍ਠਮੇਸੁ ਅਵੁਤ੍ਤਤ੍ਤਾ ਵਾਸੂਪਗਤੇਨਾਪਿ ਸੁਸਂਵੁਤੇਨ ਓਕ੍ਖਿਤ੍ਤਚਕ੍ਖੁਨਾਵ ਨਿਸੀਦਿਤਬ੍ਬਂ. ਤੇਨੇਵ ਮਾਤਿਕਾਟ੍ਠਕਥਾਯਮ੍ਪਿ ਤੇਸਂ ਵਿਸੇਸਂ ਅਵਤ੍ਵਾ ਇਧੇਵ ‘‘ਵਾਸੂਪਗਤਸ੍ਸ ਪਨ ਅਨਾਪਤ੍ਤੀ’’ਤਿ (ਕਙ੍ਖਾ. ਅਟ੍ਠ. ਉਕ੍ਖਿਤ੍ਤਕਸਿਕ੍ਖਾਪਦਵਣ੍ਣਨਾ) ਵੁਤ੍ਤਾ.
ਪਰਿਮਣ੍ਡਲਵਗ੍ਗਵਣ੍ਣਨਾ ਨਿਟ੍ਠਿਤਾ.
੨. ਉਜ੍ਜਗ੍ਘਿਕਵਗ੍ਗਵਣ੍ਣਨਾ
੫੮੬. ਦੁਤਿਯਵਗ੍ਗਾਦਿਉਜ੍ਜਗ੍ਘਿਕਅਪ੍ਪਸਦ੍ਦੇਸੁ ਨਿਸੀਦਨਪਟਿਸਂਯੁਤ੍ਤੇਸੁਪਿ ਵਾਸੂਪਗਤਸ੍ਸ ਅਨਾਪਤ੍ਤਿ ਨ ਵੁਤ੍ਤਾ, ਕਾਯਪ੍ਪਚਾਲਕਾਦੀਸੁ ਏਵ ਪਨ ਵੁਤ੍ਤਾ. ਪਾਲ਼ਿਪੋਤ੍ਥਕੇਸੁ ਪਨੇਤਂ ਕੇਸੁਚਿ ਪੇਯ੍ਯਾਲੇਨ ਬ੍ਯਾਮੋਹਿਤਤ੍ਤਾ ਨ ਸੁਟ੍ਠੁ ਵਿਞ੍ਞਾਯਤਿ. ਯਤ੍ਥ ਚ ਅਨ੍ਤਰਘਰੇ ਧਮ੍ਮਂ ਵਾ ਦੇਸੇਨ੍ਤਸ੍ਸ, ਪਾਤਿਮੋਕ੍ਖਂ ਵਾ ਉਦ੍ਦਿਸਨ੍ਤਸ੍ਸ ਮਹਾਸਦ੍ਦੇਨ ਯਾਵਪਰਿਸਸਾਵਨੇਪਿ ਅਨਾਪਤ੍ਤਿ ਏਵਾਤਿ ਦਟ੍ਠਬ੍ਬਂ ਤਥਾ ਆਨਨ੍ਦਤ੍ਥੇਰਮਹਿਨ੍ਦਤ੍ਥੇਰਾਦੀਹਿ ਆਚਰਿਤਤ੍ਤਾ.
ਉਜ੍ਜਗ੍ਘਿਕਵਗ੍ਗਵਣ੍ਣਨਾ ਨਿਟ੍ਠਿਤਾ.
੩. ਖਮ੍ਭਕਤਵਗ੍ਗਵਣ੍ਣਨਾ
੬੦੩. ਪਤ੍ਤੇ ਗਹਣਸਞ੍ਞਾ ਅਸ੍ਸ ਅਤ੍ਥੀਤਿ ਪਤ੍ਤਸਞ੍ਞੀਤਿ ਇਮਮਤ੍ਥਂ ਦਸ੍ਸੇਤੁਂ ‘‘ਪਤ੍ਤੇ ਸਞ੍ਞਂ ਕਤ੍ਵਾ’’ਤਿ ਵੁਤ੍ਤਂ.
੬੦੪. ਓਲੋਣੀਤਿ ਏਕਾ ਬ੍ਯਞ੍ਜਨਵਿਕਤਿ. ਕਞ੍ਜਿਕਤਕ੍ਕਾਦਿਰਸੋਤਿ ਕੇਚਿ. ਮਂਸਰਸਾਦੀਨੀਤਿ ਆਦਿ-ਸਦ੍ਦੇਨ ਅਵਸੇਸਾ ਸਬ੍ਬਾਪਿ ਬ੍ਯਞ੍ਜਨਵਿਕਤਿ ਸਙ੍ਗਹਿਤਾ.
੬੦੫. ਸਮਭਰਿਤਨ੍ਤਿ ਰਚਿਤਂ. ਹੇਟ੍ਠਾ ਓਰੋਹਤੀਤਿ ਸਮਨ੍ਤਾ ਓਕਾਸਸਮ੍ਭਵਤੋ ਹਤ੍ਥੇਨ ਸਮਂ ਕਰਿਯਮਾਨਂ ਹੇਟ੍ਠਾ ਭਸ੍ਸਤਿ. ਪਤ੍ਤਮਤ੍ਥਕੇ ਠਪਿਤਾਨਿ ਪੂਵਾਨਿ ਏਵ ਵਟਂਸਕਾਕਾਰੇਨ ਠਪਿਤਤ੍ਤਾ ‘‘ਪੂਵਵਟਂਸਕ’’ਨ੍ਤਿ ਵੁਤ੍ਤਾਨਿ. ਕੇਚਿ ਪਨ ‘‘ਪਤ੍ਤਂ ਗਹੇਤ੍ਵਾ ਥੂਪੀਕਤਂ ਪਿਣ੍ਡਪਾਤਂ ਰਚਿਤ੍ਵਾ ਦਿਯ੍ਯਮਾਨਮੇਵ ਗਣ੍ਹਤੋ ਆਪਤ੍ਤਿ, ਹਤ੍ਥਗਤੇ ਏਵ ਪਨ ਪਤ੍ਤੇ ਦਿਯ੍ਯਮਾਨੇ ਥੂਪੀਕਤਮ੍ਪਿ ਗਹੇਤੁਂ ਵਟ੍ਟਤੀ’’ਤਿ ਵਦਨ੍ਤਿ, ਤਂ ਨ ਗਹੇਤਬ੍ਬਮੇਵ ‘‘ਸਮਤਿਤ੍ਤਿਕ’’ਨ੍ਤਿ ਭਾਵਨਪੁਂਸਕਵਸੇਨ ਸਾਮਞ੍ਞਤੋ ਵੁਤ੍ਤਤ੍ਤਾ.
ਖਮ੍ਭਕਤਵਗ੍ਗਵਣ੍ਣਨਾ ਨਿਟ੍ਠਿਤਾ.
੪. ਸਕ੍ਕਚ੍ਚਵਗ੍ਗਵਣ੍ਣਨਾ
੬੦੮. ਚਤੁਤ੍ਥਵਗ੍ਗਾਦੀਸੁ ਸਪਦਾਨਨ੍ਤਿ ਏਤ੍ਥ ਦਾਨਂ ਵੁਚ੍ਚਤਿ ਅਵਖਣ੍ਡਨਂ, ਅਪੇਤਂ ਦਾਨਤੋ ਅਪਦਾਨਂ, ਸਹ ਅਪਦਾਨੇਨ ਸਪਦਾਨਂ, ਅਵਖਣ੍ਡਨਵਿਰਹਿਤਂ ਅਨੁਪਟਿਪਾਟਿਯਾਤਿ ਵੁਤ੍ਤਂ ਹੋਤਿ. ਤੇਨਾਹ ‘‘ਤਤ੍ਥ ਤਤ੍ਥ ਓਧਿਂ ਅਕਤ੍ਵਾ’’ਤਿਆਦਿ.
੬੧੧. ਵਿਞ੍ਞਤ੍ਤਿਯਨ੍ਤਿ ਸੂਪੋਦਨਵਿਞ੍ਞਤ੍ਤਿਸਿਕ੍ਖਾਪਦਂ ਸਨ੍ਧਾਯ ਵਦਤਿ. ‘‘ਵਤ੍ਤਬ੍ਬਂ ਨਤ੍ਥੀ’’ਤਿ ਇਮਿਨਾ ਪਾਲ਼ਿਯਾਵ ਸਬ੍ਬਂ ਵਿਞ੍ਞਾਯਤੀਤਿ ਦਸ੍ਸੇਤਿ. ਤਤ੍ਥ ਪਾਲ਼ਿਯਂ ਅਸਞ੍ਚਿਚ੍ਚਾਤਿਆਦੀਸੁ ਵਤ੍ਥੁਮਤ੍ਤਂ ਞਤ੍ਵਾ ਭੁਞ੍ਜਨੇਨ ਆਪਤ੍ਤਿਂ ਆਪਜ੍ਜਨ੍ਤਸ੍ਸੇਵ ਪੁਨ ਪਣ੍ਣਤ੍ਤਿਂ ਞਤ੍ਵਾ ਮੁਖਗਤਂ ਛਡ੍ਡੇਤੁਕਾਮਸ੍ਸ ਯਂ ਅਰੁਚਿਯਾ ਪਵਿਟ੍ਠਂ, ਤਂ ਅਸਞ੍ਚਿਚ੍ਚ ਪਵਿਟ੍ਠਂ ਨਾਮ, ਤਤ੍ਥ ਅਨਾਪਤ੍ਤਿ. ਤਦੇਵ ਪੁਨ ਅਞ੍ਞਵਿਹਿਤਤਾਯ ਵਾ ਅਵਿਞ੍ਞਤ੍ਤਮਿਦਨ੍ਤਿਸਞ੍ਞਾਯ ਵਾ ਭੁਞ੍ਜਨੇ ‘‘ਅਸਤਿਯਾ’’ਤਿ ਵੁਚ੍ਚਤਿ.
੬੧੩. ‘‘ਅਞ੍ਞਸ੍ਸਤ੍ਥਾਯਾ’’ਤਿ ਇਦਮਸ੍ਸ ਸਿਕ੍ਖਾਪਦਸ੍ਸ ਅਤ੍ਤਨੋ ਅਤ੍ਥਾਯ ਵਿਞ੍ਞਾਪੇਤ੍ਵਾ ਸਯਂ ਭੁਞ੍ਜਨੇ ਏਵ ਪਞ੍ਞਤ੍ਤਤ੍ਤਾ ਇਮਿਨਾ ਸਿਕ੍ਖਾਪਦੇਨ ਅਨਾਪਤ੍ਤਿਂ ਸਨ੍ਧਾਯ ਵੁਤ੍ਤਂ. ਪਞ੍ਚਸਹਧਮ੍ਮਿਕਾਨਂ ਪਨ ਅਤ੍ਥਾਯ ਅਞ੍ਞਾਤਕਅਪ੍ਪਵਾਰਿਤਟ੍ਠਾਨੇ ਵਿਞ੍ਞਾਪੇਨ੍ਤੋ ਵਿਞ੍ਞਤ੍ਤਿਕ੍ਖਣੇ ਅਟ੍ਠਕਥਾਸੁ ਸੁਤ੍ਤਾਨੁਲੋਮਤੋ ਵੁਤ੍ਤਅਕਤਵਿਞ੍ਞਤ੍ਤਿਦੁਕ੍ਕਟਤੋ ਨ ਮੁਚ੍ਚਤਿ. ਸਞ੍ਚਿਚ੍ਚ ਭੁਞ੍ਜਨਕ੍ਖਣੇ ਸਯਞ੍ਚ ਅਞ੍ਞੇ ਚ ਮਿਚ੍ਛਾਜੀਵਤੋ ਨ ਮੁਚ੍ਚਨ੍ਤੀਤਿ ਗਹੇਤਬ੍ਬਂ.
੬੧੫. ‘‘ਕੁਕ੍ਕੁਟਣ੍ਡਂ ਅਤਿਖੁਦ੍ਦਕ’’ਨ੍ਤਿ ਇਦਂ ਅਸਾਰੁਪ੍ਪਵਸੇਨ ਵੁਤ੍ਤਂ, ਅਤਿਮਹਨ੍ਤੇ ਏਵ ਆਪਤ੍ਤੀਤਿ ਦਟ੍ਠਬ੍ਬਂ. ਭੁਞ੍ਜਨ੍ਤੇਨ ਪਨ ਚੋਰਾਦਿਭਯਂ ਪਟਿਚ੍ਚ ਮਹਨ੍ਤਮ੍ਪਿ ਅਪਰਿਮਣ੍ਡਲਮ੍ਪਿ ਕਤ੍ਵਾ ਸੀਘਂ ਭੁਞ੍ਜਨਵਸੇਨੇਤ੍ਥ ਆਪਦਾ. ਏਵਮਞ੍ਞੇਸੁਪਿ ਯਥਾਨੁਰੂਪਂ ਦਟ੍ਠਬ੍ਬਂ.
ਸਕ੍ਕਚ੍ਚਵਗ੍ਗਵਣ੍ਣਨਾ ਨਿਟ੍ਠਿਤਾ.
੫. ਕਬਲ਼ਵਗ੍ਗਵਣ੍ਣਨਾ
੬੧੭. ਅਨਾਹਟੇ ਕਬਲ਼ੇ ਮੁਖਦ੍ਵਾਰਵਿਵਰਣੇ ਪਨ ਪਯੋਜਨਾਭਾਵਾ ‘‘ਆਪਦਾਸੂ’’ਤਿ ਨ ਵੁਤ੍ਤਂ. ਏਵਮਞ੍ਞੇਸੁਪਿ ਈਦਿਸੇਸੁ.
੬੧੮. ਸਬ੍ਬਂ ਹਤ੍ਥਨ੍ਤਿ ਹਤ੍ਥੇਕਦੇਸਾ ਅਙ੍ਗੁਲਿਯੋ ਵੁਤ੍ਤਾ ‘‘ਹਤ੍ਥਮੁਦ੍ਦਾ’’ਤਿਆਦੀਸੁ ਵਿਯ, ਤਸ੍ਮਾ ਏਕਙ੍ਗੁਲਿਮ੍ਪਿ ਮੁਖੇ ਪਕ੍ਖਿਪਿਤੁਂ ਨ ਵਟ੍ਟਤਿ.
ਕਬਲ਼ਵਗ੍ਗਵਣ੍ਣਨਾ ਨਿਟ੍ਠਿਤਾ.
੬. ਸੁਰੁਸੁਰੁਵਗ੍ਗਵਣ੍ਣਨਾ
੬੨੭. ਪਾਲ਼ਿਯਂ ਸੀਤੀਕਤੋਤਿ ਸੀਤਪੀਲ਼ਿਤੋ. ਸਿਲਕਬੁਦ੍ਧੋਤਿ ਪਰਿਹਾਸਵਚਨਮੇਤਂ. ਸਿਲਕਞ੍ਹਿ ਕਿਞ੍ਚਿ ਦਿਸ੍ਵਾ ‘‘ਬੁਦ੍ਧੋ ਅਯ’’ਨ੍ਤਿ ਵੋਹਰਨ੍ਤਿ.
੬੨੮. ‘‘ਅਙ੍ਗੁਲਿਯੋ ਮੁਖੇ ਪਵੇਸੇਤ੍ਵਾ ਭੁਞ੍ਜਿਤੁਂ ਵਟ੍ਟਤੀ’’ਤਿ ਇਮਿਨਾ ਸਬ੍ਬਂ ਹਤ੍ਥਂ ਅਨ੍ਤੋਮੁਖੇ ਪਕ੍ਖਿਪਨਸਿਕ੍ਖਾਪਦਸ੍ਸਪਿ ਪਵਿਟ੍ਠਙ੍ਗੁਲਿਨਿਲ੍ਲੇਹਨੇਨ ਇਮਸ੍ਸਪਿ ਸਿਕ੍ਖਾਪਦਸ੍ਸ ਅਨਾਪਤ੍ਤਿਂ ਦਸ੍ਸੇਤਿ. ਏਸੇਵ ਨਯੋਤਿ ਘਨਯਾਗੁਆਦੀਸੁ ਪਤ੍ਤਂ ਹਤ੍ਥੇਨ, ਓਟ੍ਠਞ੍ਚ ਜਿਵ੍ਹਾਯ ਨਿਲ੍ਲੇਹਿਤੁਂ ਵਟ੍ਟਤੀਤਿ ਅਤਿਦਿਸਤਿ. ਤਸ੍ਮਾਤਿ ਯਸ੍ਮਾ ਘਨਯਾਗੁਆਦਿਵਿਰਹਿਤਂ ਨਿਲ੍ਲੇਹਿਤੁਂ ਨ ਵਟ੍ਟਤਿ.
੬੩੪. ਵਿਲੀਵਚ੍ਛਤ੍ਤਨ੍ਤਿ ਵੇਣੁਪੇਸਿਕਾਹਿ ਕਤਂ. ਮਣ੍ਡਲਬਦ੍ਧਾਨੀਤਿ ਦੀਘਸਲਾਕਾਸੁ ਤਿਰਿਯਂ ਵਲਯਾਕਾਰੇਨ ਸਲਾਕਂ ਠਪੇਤ੍ਵਾ ਸੁਤ੍ਤੇਹਿ ਬਦ੍ਧਾਨਿ ਦੀਘਞ੍ਚ ਤਿਰਿਯਞ੍ਚ ਉਜੁਕਮੇਵ ਸਲਾਕਾਯੋ ਠਪੇਤ੍ਵਾ ਦਲ਼੍ਹਬਦ੍ਧਾਨਿ ਚੇਵ ਤਿਰਿਯਂ ਠਪੇਤ੍ਵਾ ਦੀਘਦਣ੍ਡਕੇਹੇਵ ਸਙ੍ਕੋਚਾਰਹਂ ਕਤ੍ਵਾ ਸੁਤ੍ਤੇਹੇਵ ਤਿਰਿਯਂ ਬਦ੍ਧਾਨਿ. ਤਤ੍ਥਜਾਤਕਦਣ੍ਡਕੇਨ ਕਤਨ੍ਤਿ ਸਹ ਦਣ੍ਡਕੇਨ ਛਿਨ੍ਨਤਾਲਪਣ੍ਣਾਦੀਹਿ ਕਤਂ. ਛਤ੍ਤਪਾਦੁਕਾਯਾਤਿ ਯਸ੍ਮਿਂ ਛਤ੍ਤਦਣ੍ਡਕੋਟਿਂ ਪਵੇਸੇਤ੍ਵਾ ਛਤ੍ਤਂ ਉਜੁਕਂ ਠਪੇਤ੍ਵਾ ਹੇਟ੍ਠਾ ਛਾਯਾਯ ਨਿਸੀਦਨ੍ਤਿ, ਤਿਟ੍ਠਨ੍ਤਿ ਵਾ, ਤਾਦਿਸੇ ਛਤ੍ਤਾਧਾਰੇ.
੬੩੭. ਚਾਪੋਤਿ ਮਜ੍ਝੇ ਵਙ੍ਕਕਾਜਦਣ੍ਡਸਦਿਸਾ ਧਨੁਵਿਕਤਿ. ਕੋਦਣ੍ਡੋਤਿ ਵਿਦ੍ਧਦਣ੍ਡਾ ਧਨੁਵਿਕਤਿ.
ਸੁਰੁਸੁਰੁਵਗ੍ਗਵਣ੍ਣਨਾ ਨਿਟ੍ਠਿਤਾ.
੭. ਪਾਦੁਕਵਗ੍ਗਵਣ੍ਣਨਾ
੬੪੭. ਸਤ੍ਤਮਵਗ੍ਗੇ ਰੁਕ੍ਖਤੋ ਪਤਿਤੋਤਿ ਏਕਂ ਓਲਮ੍ਬਨਸਾਖਂ ਗਹੇਤ੍ਵਾ ਪਤਿਤੋ. ਪਾਲ਼ਿਯਾਤਿ ਅਤ੍ਤਨੋ ਆਚਾਰਪ੍ਪਕਾਸਕਗਨ੍ਥਸ੍ਸ. ਧੀਰਤ੍ਥੂਤਿ ਧੀ ਅਤ੍ਥੁ, ਨਿਨ੍ਦਾ ਹੋਤੂਤਿ ਅਤ੍ਥੋ. ਵਿਨਿਪਾਤਨਹੇਤੁਨਾਤਿ ਵਿਨਿਪਾਤਨਸ੍ਸ ਹੇਤੁਭਾਵੇਨ. ਤ੍ਵਨ੍ਤਿ ਉਪਯੋਗਤ੍ਥੇ ਪਚ੍ਚਤ੍ਤਵਚਨਂ, ਤਂ ਇਚ੍ਚੇਵ ਵਾ ਪਾਠੋ. ਅਸ੍ਮਾਤਿ ਪਾਸਾਣੋ.
੬੪੯. ਨ ਕਥੇਤਬ੍ਬਨ੍ਤਿ ਥੇਰੇਨ ਅਤ੍ਤਨੋ ਕਙ੍ਖਾਟ੍ਠਾਨਸ੍ਸ ਪੁਚ੍ਛਿਤਤ੍ਤਾ ਵੁਤ੍ਤਂ. ਦਹਰਸ੍ਸ ਅਤ੍ਥਕੋਸਲ੍ਲਂ ਞਾਤੁਂ ਪੁਚ੍ਛਿਤੇਨ ਉਚ੍ਚਾਸਨੇ ਨਿਸਿਨ੍ਨਸ੍ਸ ਆਚਰਿਯਸ੍ਸ ਅਨੁਯੋਗਦਾਨਨਯੇਨ ਵਤ੍ਤੁਂ ਵਟ੍ਟਤਿ.
੬੫੨. ਖੇਲ਼ੇਨ ਚੇਤ੍ਥ ਸਿਙ੍ਘਾਣਿਕਾਪਿ ਸਙ੍ਗਹਿਤਾਤਿ ਏਤ੍ਥ ਉਦਕਗਣ੍ਡੁਸਕਂ ਕਤ੍ਵਾ ਉਚ੍ਛੁਕਚਵਰਾਦਿਞ੍ਚ ਮੁਖੇਨੇਵ ਹਰਿਤੁਂ ਉਦਕੇਸੁ ਛਡ੍ਡੇਤੁਂ ਵਟ੍ਟਤੀਤਿ ਦਟ੍ਠਬ੍ਬਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵ.
ਪਾਦੁਕਵਗ੍ਗਵਣ੍ਣਨਾ ਨਿਟ੍ਠਿਤਾ.
ਸੇਖਿਯਵਣ੍ਣਨਾਨਯੋ ਨਿਟ੍ਠਿਤੋ.
੬੫੫. ਅਧਿਕਰਣਸਮਥੇਸੁ ਚ ਇਧ ਵਤ੍ਤਬ੍ਬਂ ਨਤ੍ਥਿ.
ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਟ੍ਠਕਥਾਯ ਵਿਮਤਿਵਿਨੋਦਨਿਯਂ
ਭਿਕ੍ਖੁਵਿਭਙ੍ਗਵਣ੍ਣਨਾਨਯੋ ਨਿਟ੍ਠਿਤੋ.
ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ