੭. ਸਙ੍ਘਭੇਦਕਕ੍ਖਨ੍ਧਕੋ

ਛਸਕ੍ਯਪਬ੍ਬਜ੍ਜਾਕਥਾਦਿਵਣ੍ਣਨਾ

੩੩੦. ਸਙ੍ਘਭੇਦਕਕ੍ਖਨ੍ਧਕੇ ਪਾਲ਼ਿਯਂ ਅਨੁਪਿਯਂ ਨਾਮਾਤਿ ਅਨੁਪਿਯਾ ਨਾਮ. ਹੇਟ੍ਠਾ ਪਾਸਾਦਾਤਿ ਪਾਸਾਦਤੋ ਹੇਟ੍ਠਾ ਹੇਟ੍ਠਿਮਤਲਂ, ‘‘ਹੇਟ੍ਠਾਪਾਸਾਦ’’ਨ੍ਤਿਪਿ ਪਾਠੋ. ਅਭਿਨੇਤਬ੍ਬਨ੍ਤਿ ਵਪਿਤਖੇਤ੍ਤੇਸੁ ਪਵੇਸੇਤਬ੍ਬਂ. ਨਿਨ੍ਨੇਤਬ੍ਬਨ੍ਤਿ ਤਤੋ ਨੀਹਰਿਤਬ੍ਬਂ. ਨਿਦ੍ਧਾਪੇਤਬ੍ਬਨ੍ਤਿ ਸਸ੍ਸਦੂਸਕਤਿਣਾਦੀਨਿ ਉਦ੍ਧਰਿਤਬ੍ਬਂ. ਉਜੁਂ ਕਾਰਾਪੇਤਬ੍ਬਨ੍ਤਿ ਪੁਞ੍ਜਂ ਕਾਰਾਪੇਤਬ੍ਬਂ, ਅਯਮੇਵ ਵਾ ਪਾਠੋ.

੩੩੨. ਪਰਦਤ੍ਤੋਤਿ ਪਰੇਹਿ ਦਿਨ੍ਨਪਚ੍ਚਯੇਹਿ ਪਵਤ੍ਤਮਾਨੋ. ਮਿਗਭੂਤੇਨ ਚੇਤਸਾਤਿ ਕਤ੍ਥਚਿ ਅਲਗ੍ਗਤਾਯ ਮਿਗਸ੍ਸ ਵਿਯ ਜਾਤੇਨ ਚਿਤ੍ਤੇਨ.

੩੩੩. ਮਨੋਮਯਂ ਕਾਯਨ੍ਤਿ ਝਾਨਮਨੇਨ ਨਿਬ੍ਬਤ੍ਤਂ ਬ੍ਰਹ੍ਮਕਾਯਂ, ‘‘ਕਿਂ ਨੁ ਖੋ ਅਹਂ ਪਸਾਦੇਯ੍ਯਂ, ਯਸ੍ਮਿਂ ਮੇ ਪਸਨ੍ਨੇ ਬਹੁਲਾਭਸਕ੍ਕਾਰੋ ਉਪ੍ਪਜ੍ਜੇਯ੍ਯਾ’’ਤਿ ਪਠਮਂ ਉਪ੍ਪਨ੍ਨਪਰਿਵਿਤਕ੍ਕਸ੍ਸ ਮਨ੍ਦਪਰਿਯੁਟ੍ਠਾਨਤਾਯ ਦੇਵਦਤ੍ਤਸ੍ਸ ਤਸ੍ਮਿਂ ਖਣੇ ਝਾਨਪਰਿਹਾਨਿ ਨਾਹੋਸਿ, ਪਚ੍ਛਾ ਏਵ ਅਹੋਸੀਤਿ ਦਟ੍ਠਬ੍ਬਂ. ਤੇਨਾਹ ‘‘ਸਹ ਚਿਤ੍ਤੁਪ੍ਪਾਦਾ’’ਤਿਆਦਿ. ਦ੍ਵੇ ਵਾ ਤੀਣਿ ਵਾ ਮਾਗਧਕਾਨਿ ਗਾਮਖੇਤ੍ਤਾਨੀਤਿ ਏਤ੍ਥ ਮਗਧਰਟ੍ਠੇ ਖੁਦ੍ਦਕਂ ਗਾਮਖੇਤ੍ਤਂ ਗਾਵੁਤਮਤ੍ਤਂ, ਮਜ੍ਝਿਮਂ ਪਨ ਦਿਯਡ੍ਢਗਾਵੁਤਮਤ੍ਤਂ, ਮਹਨ੍ਤਂ ਅਨੇਕਯੋਜਨਮ੍ਪਿ ਹੋਤਿ. ਤੇਸੁ ਮਜ੍ਝਿਮੇਨ ਗਾਮਖੇਤ੍ਤੇਨ ਦ੍ਵੇ ਵਾ ਖੁਦ੍ਦਕੇਨ ਤੀਣਿ ਵਾ ਗਾਮਖੇਤ੍ਤਾਨਿ, ਤਸ੍ਸ ਸਰੀਰਂ ਤਿਗਾਵੁਤਪ੍ਪਮਾਣੋ ਅਤ੍ਤਭਾਵੋਤਿ ਵੁਤ੍ਤਂ ਹੋਤਿ.

੩੩੪. ਸਤ੍ਥਾਰੋਤਿ ਗਣਸਤ੍ਥਾਰੋ. ਨਾਸ੍ਸਸ੍ਸਾਤਿ ਨ ਏਤਸ੍ਸ ਭਵੇਯ੍ਯ. ਤਨ੍ਤਿ ਸਤ੍ਥਾਰਂ. ਤੇਨਾਤਿ ਅਮਨਾਪੇਨ. ਸਮ੍ਮਨ੍ਨਤੀਤਿ ਚੀਵਰਾਦਿਨਾ ਅਮ੍ਹਾਕਂ ਸਮ੍ਮਾਨਂ ਕਰੋਤਿ, ਪਰੇਹਿ ਵਾ ਅਯਂ ਸਤ੍ਥਾ ਸਮ੍ਮਾਨੀਯਤੀਤਿ ਅਤ੍ਥੋ.

੩੩੫. ਨਾਸਾਯ ਪਿਤ੍ਤਂ ਭਿਨ੍ਦੇਯ੍ਯੁਨ੍ਤਿ ਅਚ੍ਛਪਿਤ੍ਤਂ ਵਾ ਮਚ੍ਛਪਿਤ੍ਤਂ ਵਾ ਨਾਸਾਪੁਟੇ ਪਕ੍ਖਿਪੇਯ੍ਯੁਂ. ਅਸ੍ਸਤਰੀਤਿ ਵਲ਼ਵਾਯ ਕੁਚ੍ਛਿਸ੍ਮਿਂ ਗਦ੍ਰਭਸ੍ਸ ਜਾਤਾ. ਤਸ੍ਸਾ ਹਿ ਗਹਿਤਗਬ੍ਭਾਯ ਵਿਜਾਯਿਤੁਮਸਕ੍ਕੋਨ੍ਤਿਯਾ ਉਦਰਂ ਫਾਲੇਤ੍ਵਾ ਪੋਤਕਂ ਨੀਹਰਨ੍ਤਿ. ਤੇਨਾਹ ‘‘ਅਤ੍ਤਵਧਾਯ ਗਬ੍ਭਂ ਗਣ੍ਹਾਤੀ’’ਤਿ.

੩੩੯. ਪੋਤ੍ਥਨਿਕਨ੍ਤਿ ਛੁਰਿਕਂ, ‘‘ਖਰ’’ਨ੍ਤਿਪਿ ਵੁਚ੍ਚਤਿ.

੩੪੨. ਮਾ ਕੁਞ੍ਜਰ ਨਾਗਮਾਸਦੋਤਿ ਹੇ ਕੁਞ੍ਜਰ ਬੁਦ੍ਧਨਾਗਂ ਵਧਕਚਿਤ੍ਤੇਨ ਮਾ ਉਪਗਚ੍ਛ. ਦੁਕ੍ਖਨ੍ਤਿ ਦੁਕ੍ਖਕਾਰਣਤ੍ਤਾ ਦੁਕ੍ਖਂ. ਇਤੋਤਿ ਇਤੋ ਜਾਤਿਤੋ. ਯਤੋਤਿ ਯਸ੍ਮਾ, ਯਨ੍ਤਸ੍ਸ ਵਾ, ਗਚ੍ਛਨ੍ਤਸ੍ਸਾਤਿ ਅਤ੍ਥੋ. ਮਾ ਚ ਮਦੋਤਿ ਮਦੋ ਤਯਾ ਨ ਕਾਤਬ੍ਬੋਤਿ ਅਤ੍ਥੋ.

੩੪੩. ਤਿਕਭੋਜਨਨ੍ਤਿ ਤੀਹਿ ਭੁਞ੍ਜਿਤਬ੍ਬਂ ਭੋਜਨਂ, ਤਤੋ ਅਧਿਕੇਹਿ ਏਕਤੋ ਪਟਿਗ੍ਗਹੇਤ੍ਵਾ ਭੁਞ੍ਜਿਤੁਂ ਨ ਵਟ੍ਟਨਕਂ ਗਣਭੋਜਨਪਟਿਪਕ੍ਖਂ ਭੋਜਨਨ੍ਤਿ ਅਤ੍ਥੋ. ਕੋਕਾਲਿਕੋਤਿਆਦੀਨਿ ਦੇਵਦਤ੍ਤਪਰਿਸਾਯ ਗਣਪਾਮੋਕ੍ਖਾਨਂ ਨਾਮਾਨਿ. ਕਪ੍ਪਨ੍ਤਿ ਮਹਾਨਿਰਯੇ ਆਯੁਕਪ੍ਪਂ, ਤਂ ਅਨ੍ਤਰਕਪ੍ਪਨ੍ਤਿ ਕੇਚਿ. ਕੇਚਿ ਪਨ ‘‘ਅਸਙ੍ਖ੍ਯੇਯ੍ਯਕਪ੍ਪ’’ਨ੍ਤਿ.

ਛਸਕ੍ਯਪਬ੍ਬਜ੍ਜਾਕਥਾਦਿਵਣ੍ਣਨਾ ਨਿਟ੍ਠਿਤਾ.

ਸਙ੍ਘਭੇਦਕਕਥਾਵਣ੍ਣਨਾ

੩੪੫. ਪਰਸ੍ਸ ਚਿਤ੍ਤਂ ਞਤ੍ਵਾ ਕਥਨਂ ਆਦੇਸਨਾਪਾਟਿਹਾਰਿਯਂ. ਕੇਵਲਂ ਧਮ੍ਮਦੇਸਨਾ ਅਨੁਸਾਸਨੀਪਾਟਿਹਾਰਿਯਂ. ਤਦੁਭਯਮ੍ਪਿ ਧਮ੍ਮੀ ਕਥਾ ਨਾਮ. ਤਾਯ ਥੇਰੋ ਓਵਦਿ. ਇਦ੍ਧਿਵਿਧਂ ਇਦ੍ਧਿਪਾਟਿਹਾਰਿਯਂ ਨਾਮ. ਤੇਨ ਸਹਿਤਾ ਅਨੁਸਾਸਨੀ ਏਵ ਧਮ੍ਮੀ ਕਥਾ. ਤਾਯ ਥੇਰੋ ਓਵਦਿ.

‘‘ਥੁਲ੍ਲਚ੍ਚਯਂ ਦੇਸਾਪੇਹੀ’’ਤਿ ਇਦਂ ਭੇਦਪੁਰੇਕ੍ਖਾਰਸ੍ਸ ਉਪੋਸਥਾਦਿਕਰਣੇ ਥੁਲ੍ਲਚ੍ਚਯਸ੍ਸ ਉਪੋਸਥਕ੍ਖਨ੍ਧਕਾਦੀਸੁ ਪਠਮਮੇਵ ਪਞ੍ਞਤ੍ਤਤ੍ਤਾ ਵੁਤ੍ਤਂ, ਇਤਰਥਾ ਏਤੇਸਂ ਆਦਿਕਮ੍ਮਿਕਤ੍ਤਾ ਅਨਾਪਤ੍ਤਿਯੇਵ ਸਿਯਾ.

੩੪੬. ਸਰਸੀਤਿ ਸਰੋ. ਮਹਿਂ ਵਿਕ੍ਰੁਬ੍ਬਤੋਤਿ ਮਹਿਂ ਦਨ੍ਤੇਹਿ ਵਿਲਿਖਨ੍ਤਸ੍ਸ. ਇਦਞ੍ਚ ਹਤ੍ਥੀਨਂ ਸਭਾਵਦਸ੍ਸਨਂ. ਨਦੀਸੂਤਿ ਸਰੇਸੁ. ਭਿਸਂ ਘਸਮਾਨਸ੍ਸਾਤਿ ਯੋਜਨਾ. ਜਗ੍ਗਤੋਤਿ ਯੂਥਂ ਪਾਲੇਨ੍ਤਸ੍ਸ.

੩੪੭. ਦੂਤੇਯ੍ਯਂ ਗਨ੍ਤੁਨ੍ਤਿ ਦੂਤਕਮ੍ਮਂ ਪਤ੍ਤੁਂ, ਦੂਤਕਮ੍ਮਂ ਕਾਤੁਨ੍ਤਿ ਅਤ੍ਥੋ. ਸਹਿਤਾਸਹਿਤਸ੍ਸਾਤਿ ਯੁਤ੍ਤਾਯੁਤ੍ਤਸ੍ਸ, ਯਂ ਵਤ੍ਤੁਂ, ਕਾਤੁਞ੍ਚ ਯੁਤ੍ਤਂ, ਤਤ੍ਥ ਕੁਸਲੋ. ਅਥ ਵਾ ਅਧਿਪ੍ਪੇਤਾਨਾਧਿਪ੍ਪੇਤਸ੍ਸ ਵਚਨਸ੍ਸ ਕੁਸਲੋ, ਬ੍ਯਞ੍ਜਨਮਤ੍ਤੇ ਨ ਤਿਟ੍ਠਤਿ, ਅਧਿਪ੍ਪੇਤਤ੍ਥਮੇਵ ਆਰੋਚੇਤੀਤਿ ਅਤ੍ਥੋ.

੩੫੦. ਗਾਥਾਸੁ ਜਾਤੂਤਿ ਏਕਂਸੇਨ. ਮਾ ਉਦਪਜ੍ਜਥ ਮਾ ਹੋਤੂਤਿ ਅਤ੍ਥੋ. ਪਾਪਿਚ੍ਛਾਨਂ ਯਥਾਗਤੀਤਿ ਪਾਪਿਚ੍ਛਾਨਂ ਪੁਗ੍ਗਲਾਨਂ ਯਾਦਿਸੀ ਗਤਿ ਅਭਿਸਮ੍ਪਰਾਯੋ. ਤਂ ਅਤ੍ਥਜਾਤਂ. ਇਮਿਨਾਪਿ ਕਾਰਣੇਨ ਜਾਨਾਥਾਤਿ ਦੇਵਦਤ੍ਤਸ੍ਸ ‘‘ਪਣ੍ਡਿਤੋ’’ਤਿਆਦਿਨਾ ਉਪਰਿ ਵਕ੍ਖਮਾਨਾਕਾਰਂ ਦਸ੍ਸੇਤਿ.

ਪਮਾਦਂ ਅਨੁਚਿਣ੍ਣੋਤਿ ਪਮਾਦਂ ਆਪਨ੍ਨੋ. ਆਸੀਸਾਯਨ੍ਤਿ ਅਵਸ੍ਸਂਭਾਵੀਅਤ੍ਥਸਿਦ੍ਧਿਯਂ. ਸਾ ਹਿ ਇਧ ਆਸੀਸਾਤਿ ਅਧਿਪ੍ਪੇਤਾ, ਨ ਪਤ੍ਥਨਾ. ਈਦਿਸੇ ਅਨਾਗਤਤ੍ਥੇ ਅਤੀਤਵਚਨਂ ਸਦ੍ਦਵਿਦੂ ਇਚ੍ਛਨ੍ਤਿ.

ਦੁਬ੍ਭੇਤਿ ਦੁਬ੍ਭੇਯ੍ਯ. ਵਿਸਕੁਮ੍ਭੇਨਾਤਿ ਏਕੇਨ ਵਿਸਪੁਣ੍ਣਕੁਮ੍ਭੇਨ. ਸੋਤਿ ਸੋ ਪੁਗ੍ਗਲੋ. ਨ ਪਦੂਸੇਯ੍ਯ ਵਿਸਮਿਸ੍ਸਂ ਕਾਤੁਂ ਨ ਸਕ੍ਕੋਤੀਤਿ ਅਤ੍ਥੋ. ਭਯਾਨਕੋਤਿ ਵਿਪੁਲਗਮ੍ਭੀਰਭਾਵੇਨ ਭਯਾਨਕੋ. ਤੇਨਾਪਿ ਦੂਸੇਤੁਂ ਨ ਸਕ੍ਕੁਣੇਯ੍ਯਤਂ ਦਸ੍ਸੇਤਿ. ਵਾਦੇਨਾਤਿ ਦੋਸਕਥਨੇਨ. ਉਪਹਿਂਸਤੀਤਿ ਬਾਧਤਿ.

ਸਙ੍ਘਭੇਦਕਕਥਾਵਣ੍ਣਨਾ ਨਿਟ੍ਠਿਤਾ.

ਉਪਾਲਿਪਞ੍ਹਾਕਥਾਵਣ੍ਣਨਾ

੩੫੧. ਨ ਪਨ ਏਤ੍ਤਾਵਤਾ ਸਙ੍ਘੋ ਭਿਨ੍ਨੋ ਹੋਤੀਤਿ ਸਲਾਕਗ੍ਗਾਹਾਪਨਮਤ੍ਤੇਨ ਸਙ੍ਘਭੇਦਾਨਿਬ੍ਬਤ੍ਤਿਤੋ ਵੁਤ੍ਤਂ. ਉਪੋਸਥਾਦਿਸਙ੍ਘਕਮ੍ਮੇ ਕਤੇ ਏਵ ਹਿ ਸਙ੍ਘੋ ਭਿਨ੍ਨੋ ਹੋਤਿ. ਤਤ੍ਥ ਚ ਉਪੋਸਥਪਵਾਰਣਾਸੁ ਞਤ੍ਤਿਨਿਟ੍ਠਾਨੇਨ, ਸੇਸਕਮ੍ਮੇਸੁ ਅਪਲੋਕਨਾਦਿਕਮ੍ਮਪਰਿਯੋਸਾਨੇਨ ਸਙ੍ਘਭੇਦੋ ਸਮਤ੍ਥੋਤਿ ਦਟ੍ਠਬ੍ਬੋ.

‘‘ਅਭਬ੍ਬਤਾ ਨ ਵੁਤ੍ਤਾ’’ਤਿ ਇਦਂ ‘‘ਭਿਕ੍ਖਵੇ, ਦੇਵਦਤ੍ਤੇਨ ਪਠਮਂ ਆਨਨ੍ਤਰਿਯਕਮ੍ਮਂ ਉਪਚਿਤ’’ਨ੍ਤਿਆਦਿਨਾ ਆਨਨ੍ਤਰਿਯਤ੍ਤਂ ਵਦਤਾ ਭਗਵਤਾ ਤਸ੍ਸ ਅਭਬ੍ਬਤਾਸਙ੍ਖਾਤਾ ਪਾਰਾਜਿਕਤਾ ਨ ਪਞ੍ਞਤ੍ਤਾ. ਏਤੇਨ ਆਪਤ੍ਤਿ ਵਿਯ ਅਭਬ੍ਬਤਾਪਿ ਪਞ੍ਞਤ੍ਤਿਅਨਨ੍ਤਰਮੇਵ ਹੋਤਿ, ਨ ਤਤੋ ਪੁਰੇਤਿ ਦਸ੍ਸੇਤਿ. ਇਧ ਪਨ ਆਦਿਕਮ੍ਮਿਕਸ੍ਸਪਿ ਅਨਾਪਤ੍ਤਿਯਾ ਅਵੁਤ੍ਤਤ੍ਤਾ ਦੇਵਦਤ੍ਤਾਦਯੋਪਿ ਨ ਮੁਤ੍ਤਾਤਿ ਦਟ੍ਠਬ੍ਬਂ.

ਤਯੋ ਸਤਿਪਟ੍ਠਾਨਾਤਿਆਦੀਸੁ ਤਯੋ ਏਵ ਸਤਿਪਟ੍ਠਾਨਾ, ਨ ਤਤੋ ਪਰਨ੍ਤਿ ਏਕਸ੍ਸ ਸਤਿਪਟ੍ਠਾਨਸ੍ਸ ਪਟਿਕ੍ਖੇਪੋਵ ਇਧ ਅਧਮ੍ਮੋ, ਨ ਪਨ ਤਿਣ੍ਣਂ ਸਤਿਪਟ੍ਠਾਨਤ੍ਤਵਿਧਾਨਂ ਤਸ੍ਸ ਧਮ੍ਮਤ੍ਤਾ. ਏਵਂ ਸੇਸੇਸੁਪਿ ਹਾਪਨਕੋਟ੍ਠਾਸੇਸੁ. ਵਡ੍ਢਨੇਸੁ ਪਨ ਛ ਇਨ੍ਦ੍ਰਿਯਾਨੀਤਿ ਅਨਿਨ੍ਦ੍ਰਿਯਸ੍ਸਪਿ ਏਕਸ੍ਸ ਇਨ੍ਦ੍ਰਿਯਤ੍ਤਵਿਧਾਨਮੇਵ ਅਧਮ੍ਮੋ. ਏਵਂ ਸੇਸੇਸੁਪਿ. ਨ ਕੇਵਲਞ੍ਚ ਏਤੇਵ, ‘‘ਚਤ੍ਤਾਰੋ ਖਨ੍ਧਾ, ਤੇਰਸਾਯਤਨਾਨੀ’’ਤਿਆਦਿਨਾ ਯਤ੍ਥ ਕਤ੍ਥਚਿ ਵਿਪਰੀਤਤੋ ਪਕਾਸਨਂ ਸਬ੍ਬਂ ਅਧਮ੍ਮੋ. ਯਾਥਾਵਤੋ ਪਕਾਸਨਞ੍ਚ ਸਬ੍ਬਂ ਧਮ੍ਮੋਤਿ ਦਟ੍ਠਬ੍ਬਂ. ਪਕਾਸਨਨ੍ਤਿ ਚੇਤ੍ਥ ਤਥਾ ਤਥਾ ਕਾਯਵਚੀਪਯੋਗਸਮੁਟ੍ਠਾਪਿਕਾ ਅਰੂਪਕ੍ਖਨ੍ਧਾਵ ਅਧਿਪ੍ਪੇਤਾ, ਏਵਮੇਤ੍ਥ ਦਸਕੁਸਲਕਮ੍ਮਪਥਾਦੀਸੁ ਅਨਵਜ੍ਜਟ੍ਠੇਨ ਸਰੂਪਤੋ ਧਮ੍ਮੇਸੁ, ਅਕੁਸਲਕਮ੍ਮਪਥਾਦੀਸੁ ਸਾਵਜ੍ਜਟ੍ਠੇਨ ਸਰੂਪਤੋ ਅਧਮ੍ਮੇਸੁ ਚ ਤਦਞ੍ਞੇਸੁ ਚ ਅਬ੍ਯਾਕਤੇਸੁ ਯਸ੍ਸ ਕਸ੍ਸਚਿ ਕੋਟ੍ਠਾਸਸ੍ਸ ਭਗਵਤਾ ਪਞ੍ਞਤ੍ਤਕ੍ਕਮੇਨੇਵ ਪਕਾਸਨਂ ‘‘ਧਮ੍ਮੋ’’ਤਿ ਚ ਵਿਪਰੀਤਤੋ ਪਕਾਸਨਂ ‘‘ਅਧਮ੍ਮੋ’’ਤਿ ਚ ਦਸ੍ਸਿਤਨ੍ਤਿ ਦਟ੍ਠਬ੍ਬਂ. ਕਾਮਞ੍ਚੇਤ੍ਥ ਵਿਨਯਾਦਯੋਪਿ ਯਥਾਭੂਤਤੋ, ਅਯਥਾਭੂਤਤੋ ਚ ਪਕਾਸਨਵਸੇਨ ਧਮ੍ਮਾਧਮ੍ਮੇਸੁ ਏਵ ਪਵਿਸਨ੍ਤਿ, ਵਿਨਯਾਦਿਨਾਮੇਨ ਪਨ ਵਿਸੇਸੇਤ੍ਵਾ ਵਿਸੁਂ ਗਹਿਤਤ੍ਤਾ ਤਦਵਸੇਸਮੇਵ ਧਮ੍ਮਾਧਮ੍ਮਕੋਟ੍ਠਾਸੇ ਪਵਿਸਤੀਤਿ ਦਟ੍ਠਬ੍ਬਂ.

ਇਮਂ ਅਧਮ੍ਮਂ ਧਮ੍ਮੋਤਿ ਕਰਿਸ੍ਸਾਮਾਤਿਆਦਿ ਧਮ੍ਮਞ੍ਚ ਅਧਮ੍ਮਞ੍ਚ ਯਾਥਾਵਤੋ ਞਤ੍ਵਾਵ ਪਾਪਿਚ੍ਛਂ ਨਿਸ੍ਸਾਯ ਵਿਪਰੀਤਤੋ ਪਕਾਸੇਨ੍ਤਸ੍ਸੇਵ ਸਙ੍ਘਭੇਦੋ ਹੋਤਿ, ਨ ਪਨ ਤਥਾਸਞ੍ਞਾਯ ਪਕਾਸੇਨ੍ਤਸ੍ਸਾਤਿ ਦਸ੍ਸਨਤ੍ਥਂ ਵੁਤ੍ਤਂ. ਏਸ ਨਯੋ ‘‘ਅਵਿਨਯਂ ਵਿਨਯੋਤਿ ਦੀਪੇਨ੍ਤੀ’’ਤਿਆਦੀਸੁਪਿ. ਤਤ੍ਥ ਨਿਯ੍ਯਾਨਿਕਨ੍ਤਿ ਉਕ੍ਕਟ੍ਠਨ੍ਤਿ ਅਤ੍ਥੋ. ‘‘ਤਥੇਵਾ’’ਤਿ ਇਮਿਨਾ ‘‘ਏਵਂ ਅਮ੍ਹਾਕਂ ਆਚਰਿਯਕੁਲ’’ਨ੍ਤਿਆਦਿਨਾ ਵੁਤ੍ਤਮਤ੍ਥਂ ਆਕਡ੍ਢਤਿ.

ਸਂਵਰੋ ਪਹਾਨਂ ਪਟਿਸਙ੍ਖਾਤਿ ਸਂਵਰਵਿਨਯੋ, ਪਹਾਨਵਿਨਯੋ, ਪਟਿਸਙ੍ਖਾਵਿਨਯੋ ਚ ਵੁਤ੍ਤੋ. ਤੇਨਾਹ ‘‘ਅਯਂ ਵਿਨਯੋ’’ਤਿ. ‘‘ਪਞ੍ਞਤ੍ਤਂ ਅਪਞ੍ਞਤ੍ਤ’’ਨ੍ਤਿ ਦੁਕਂ ‘‘ਭਾਸਿਤਂ ਅਭਾਸਿਤ’’ਨ੍ਤਿ ਦੁਕੇਨ ਅਤ੍ਥਤੋ ਸਮਾਨਮੇਵ, ਤਥਾ ਦੁਟ੍ਠੁਲ੍ਲਦੁਕਂ ਗਰੁਕਦੁਕੇਨ. ਤੇਨੇਵ ਤੇਸਂ ‘‘ਚਤ੍ਤਾਰੋ ਸਤਿਪਟ੍ਠਾਨਾ…ਪੇ… ਇਦਂ ਅਪਞ੍ਞਤ੍ਤਂ ਨਾਮਾ’’ਤਿਆਦਿਨਾ ਸਦਿਸਨਿਦ੍ਦੇਸੋ ਕਤੋ. ਸਾਵਸੇਸਾਪਤ੍ਤਿਨ੍ਤਿ ਅਵਸੇਸਸੀਲੇਹਿ ਸਹਿਤਾਪਤ੍ਤਿਂ. ਨਤ੍ਥਿ ਏਤਿਸ੍ਸਂ ਆਪਨ੍ਨਾਯਂ ਸੀਲਾਵਸੇਸਾਤਿ ਅਨਵਸੇਸਾਪਤ੍ਤਿ.

੩੫੪. ਪਾਲ਼ਿਯਂ ਸਮਗ੍ਗਾਨਞ੍ਚ ਅਨੁਗ੍ਗਹੋਤਿ ਯਥਾ ਸਮਗ੍ਗਾਨਂ ਸਾਮਗ੍ਗੀ ਨ ਭਿਜ੍ਜਤਿ, ਏਵਂ ਅਨੁਗ੍ਗਹਣਂ ਅਨੁਬਲਪ੍ਪਦਾਨਂ.

੩੫੫. ਸਿਯਾ ਨੁ ਖੋਤਿ ਸਮ੍ਭਵੇਯ੍ਯ ਨੁ ਖੋ. ਤਸ੍ਮਿਂ ਅਧਮ੍ਮਦਿਟ੍ਠੀਤਿ ਅਤ੍ਤਨੋ ‘‘ਅਧਮ੍ਮਂ ਧਮ੍ਮੋ’’ਤਿ ਏਤਸ੍ਮਿਂ ਦੀਪਨੇ ਅਯੁਤ੍ਤਦਿਟ੍ਠਿ. ਭੇਦੇ ਅਧਮ੍ਮਦਿਟ੍ਠੀਤਿ ‘‘ਅਧਮ੍ਮਂ ਧਮ੍ਮੋ’’ਤਿ ਦੀਪੇਤ੍ਵਾ ਅਨੁਸ੍ਸਾਵਨਸਲਾਕਗ੍ਗਾਹਾਪਨਾਦਿਨਾ ਅਤ੍ਤਾਨਂ ਮੁਞ੍ਚਿਤ੍ਵਾ ਚਤੁਵਗ੍ਗਾਦਿਕਂ ਸਙ੍ਘਂ ਏਕਸੀਮਾਯਮੇਵ ਠਿਤਤੋ ਚਤੁਵਗ੍ਗਾਦਿਸਙ੍ਘਤੋ ਵਿਯੋਜੇਤ੍ਵਾ ਏਕਕਮ੍ਮਾਦਿਨਿਪ੍ਫਾਦਨਵਸੇਨ ਸਙ੍ਘਭੇਦਕਰਣੇ ਅਧਮ੍ਮਦਿਟ੍ਠਿਕੋ ਹੁਤ੍ਵਾਤਿ ਅਤ੍ਥੋ. ਵਿਨਿਧਾਯ ਦਿਟ੍ਠਿਨ੍ਤਿ ਯਾ ਤਸ੍ਮਿਂ ‘‘ਅਧਮ੍ਮਂ ਧਮ੍ਮੋ’’ਤਿ ਦੀਪਨੇ ਅਤ੍ਤਨੋ ਅਧਮ੍ਮਦਿਟ੍ਠਿ ਉਪ੍ਪਜ੍ਜਤਿ, ਤਂ ਵਿਨਿਧਾਯ ਪਟਿਚ੍ਛਾਦੇਤ੍ਵਾ ‘‘ਧਮ੍ਮੋ ਏਵਾਯ’’ਨ੍ਤਿ ਵਿਪਰੀਤਤੋ ਪਕਾਸੇਤ੍ਵਾਤਿ ਅਤ੍ਥੋ. ਏਵਂ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ.

ਭੇਦੇ ਧਮ੍ਮਦਿਟ੍ਠੀਤਿ ਯਥਾਵੁਤ੍ਤਨਯੇਨ ਸਙ੍ਘਭੇਦਨੇ ਦੋਸੋ ਨਤ੍ਥੀਤਿ ਲਦ੍ਧਿਕੋ. ਅਯਂ ਪਨ ‘‘ਅਧਮ੍ਮਂ ਧਮ੍ਮੋ’’ਤਿ ਦੀਪਨੇ ਅਧਮ੍ਮਦਿਟ੍ਠਿਕੋ ਹੁਤ੍ਵਾਪਿ ਤਂ ਦਿਟ੍ਠਿਂ ਵਿਨਿਧਾਯ ਕਰਣੇਨ ਸਙ੍ਘਭੇਦਕੋ ਅਤੇਕਿਚ੍ਛੋ ਜਾਤੋ. ਏਵਂ ਭੇਦੇ ਵੇਮਤਿਕੋਤਿ ਇਮਸ੍ਸ ਪਨ ਭੇਦੇ ਵੇਮਤਿਕਦਿਟ੍ਠਿਯਾ ਵਿਨਿਧਾਨਮ੍ਪਿ ਅਤ੍ਥਿ. ਸੇਸਂ ਸਮਮੇਵ. ਤਸ੍ਮਿਂ ਧਮ੍ਮਦਿਟ੍ਠਿਭੇਦੇ ਅਧਮ੍ਮਦਿਟ੍ਠੀਤਿ ਅਯਂ ਪਨ ਭੇਦੇ ਅਧਮ੍ਮਦਿਟ੍ਠਿਂ ਵਿਨਿਧਾਯ ਕਤਤ੍ਤਾ ਸਙ੍ਘਭੇਦਕੋ ਅਤੇਕਿਚ੍ਛੋ ਜਾਤੋ. ਸੁਕ੍ਕਪਕ੍ਖੇ ਪਨ ਸਬ੍ਬਤ੍ਥ ‘‘ਅਧਮ੍ਮਂ ਧਮ੍ਮੋ’’ਤਿਆਦਿਦੀਪਨੇ ਵਾ ਭੇਦੇ ਵਾ ਧਮ੍ਮਦਿਟ੍ਠਿਤਾਯ ਦਿਟ੍ਠਿਂ ਅਵਿਨਿਧਾਯੇਵ ਕਤਤ੍ਤਾ ਸਙ੍ਘਭੇਦਕੋਪਿ ਸਤੇਕਿਚ੍ਛੋ ਜਾਤੋ. ਤਸ੍ਮਾ ‘‘ਅਧਮ੍ਮਂ ਧਮ੍ਮੋ’’ਤਿਆਦਿਦੀਪਨੇ ਵਾ ਸਙ੍ਘਭੇਦੇ ਵਾ ਉਭੋਸੁਪਿ ਵਾ ਅਧਮ੍ਮਦਿਟ੍ਠਿ ਵਾ ਵੇਮਤਿਕੋ ਵਾ ਹੁਤ੍ਵਾ ਤਂ ਦਿਟ੍ਠਿਂ, ਵਿਮਤਿਞ੍ਚ ਵਿਨਿਧਾਯ ‘‘ਧਮ੍ਮੋ’’ਤਿ ਪਕਾਸੇਤ੍ਵਾ ਵੁਤ੍ਤਨਯੇਨ ਸਙ੍ਘਭੇਦਂ ਕਰੋਨ੍ਤਸ੍ਸੇਵ ਆਨਨ੍ਤਰਿਯਂ ਹੋਤੀਤਿ ਵੇਦਿਤਬ੍ਬਂ.

ਉਪਾਲਿਪਞ੍ਹਾਕਥਾਵਣ੍ਣਨਾ ਨਿਟ੍ਠਿਤਾ.

ਸਙ੍ਘਭੇਦਕਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.