੮. ਵਤ੍ਤਕ੍ਖਨ੍ਧਕੋ

ਆਗਨ੍ਤੁਕਵਤ੍ਤਕਥਾਵਣ੍ਣਨਾ

੩੫੭. ਵਤ੍ਤਕ੍ਖਨ੍ਧਕੇ ਪਤ੍ਥਰਿਤਬ੍ਬਨ੍ਤਿ ਆਤਪੇ ਪਤ੍ਥਰਿਤਬ੍ਬਂ. ਪਾਲ਼ਿਯਂ ਅਭਿਵਾਦਾਪੇਤਬ੍ਬੋਤਿ ਵਨ੍ਦਨਤ੍ਥਾਯ ਵਸ੍ਸਂ ਪੁਚ੍ਛਨੇਨ ਨਵਕੋ ਸਯਮੇਵ ਵਨ੍ਦਤੀਤਿ ਵੁਤ੍ਤਂ. ਨਿਲ੍ਲੋਕੇਤਬ੍ਬੋਤਿ ਓਲੋਕੇਤਬ੍ਬੋ.

ਆਗਨ੍ਤੁਕਵਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

ਆਵਾਸਿਕਵਤ੍ਤਕਥਾਵਣ੍ਣਨਾ

੩੫੯. ‘‘ਯਥਾਭਾਗ’’ਨ੍ਤਿ ਠਪਿਤਟ੍ਠਾਨਂ ਅਨਤਿਕ੍ਕਮਿਤ੍ਵਾ ਮਞ੍ਚਪੀਠਾਦਿਂ ਪਪ੍ਫੋਟੇਤ੍ਵਾ ਪਤ੍ਥਰਿਤ੍ਵਾ ਉਪਰਿ ਪਚ੍ਚਤ੍ਥਰਣਂ ਦਤ੍ਵਾ ਦਾਨਮ੍ਪਿ ਸੇਨਾਸਨਪਞ੍ਞਾਪਨਮੇਵਾਤਿ ਦਸ੍ਸੇਨ੍ਤੋ ਆਹ ‘‘ਪਪ੍ਫੋਟੇਤ੍ਵਾ ਹਿ ਪਤ੍ਥਰਿਤੁਂ ਪਨ ਵਟ੍ਟਤਿਯੇਵਾ’’ਤਿ.

ਆਵਾਸਿਕਵਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

ਅਨੁਮੋਦਨਵਤ੍ਤਕਥਾਵਣ੍ਣਨਾ

੩੬੨. ਪਞ੍ਚਮੇ ਨਿਸਿਨ੍ਨੇਤਿ ਅਨੁਮੋਦਨਤ੍ਥਾਯ ਨਿਸਿਨ੍ਨੇ. ਨ ਮਹਾਥੇਰਸ੍ਸ ਭਾਰੋ ਹੋਤੀਤਿ ਅਨੁਮੋਦਕਂ ਆਗਮੇਤੁਂ ਨ ਭਾਰੋ. ਅਜ੍ਝਿਟ੍ਠੋਵ ਆਗਮੇਤਬ੍ਬੋਤਿ ਅਤ੍ਤਨਾ ਅਜ੍ਝਿਟ੍ਠੇਹਿ ਭਿਕ੍ਖੂਹਿ ਅਨੁਮੋਦਨ੍ਤੇਯੇਵ ਨਿਸੀਦਿਤਬ੍ਬਨ੍ਤਿ ਅਤ੍ਥੋ.

ਅਨੁਮੋਦਨਵਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

ਭਤ੍ਤਗ੍ਗਵਤ੍ਤਕਥਾਵਣ੍ਣਨਾ

੩੬੪. ਮਨੁਸ੍ਸਾਨਂ ਪਰਿਵਿਸਨਟ੍ਠਾਨਨ੍ਤਿ ਯਤ੍ਥ ਅਨ੍ਤੋਵਿਹਾਰੇਪਿ ਮਨੁਸ੍ਸਾ ਸਪੁਤ੍ਤਦਾਰਾ ਆਵਸਿਤ੍ਵਾ ਭਿਕ੍ਖੂ ਨੇਤ੍ਵਾ ਭੋਜੇਨ੍ਤਿ. ਆਸਨੇਸੁ ਸਤੀਤਿ ਨਿਸੀਦਨਟ੍ਠਾਨੇਸੁ ਸਨ੍ਤੇਸੁ. ਇਦਂ, ਭਨ੍ਤੇ, ਆਸਨਂ ਉਚ੍ਚਨ੍ਤਿ ਆਸਨ੍ਨੇ ਸਮਭੂਮਿਭਾਗੇ ਪਞ੍ਞਤ੍ਤਂ ਥੇਰਾਸਨੇਨ ਸਮਕਂ ਆਸਨਂ ਸਨ੍ਧਾਯ ਵੁਤ੍ਤਂ, ਥੇਰਾਸਨਤੋ ਪਨ ਉਚ੍ਚਤਰੇ ਆਪੁਚ੍ਛਿਤ੍ਵਾਪਿ ਨਿਸੀਦਿਤੁਂ ਨ ਵਟ੍ਟਤਿ. ਯਦਿ ਤਂ ਆਸਨ੍ਨਮ੍ਪਿ ਨੀਚਤਰਂ ਹੋਤਿ, ਅਨਾਪੁਚ੍ਛਾਪਿ ਨਿਸੀਦਿਤੁਂ ਵਟ੍ਟਤਿ. ਮਹਾਥੇਰਸ੍ਸੇਵ ਆਪਤ੍ਤੀਤਿ ਆਸਨੇਨ ਪਟਿਬਾਹਨਾਪਤ੍ਤਿਯਾ ਆਪਤ੍ਤਿ. ਅਵਤ੍ਥਰਿਤ੍ਵਾਤਿ ਪਾਰੁਤਸਙ੍ਘਾਟਿਂ ਅਵਤ੍ਥਰਿਤ੍ਵਾ, ਅਨੁਕ੍ਖਿਪਿਤ੍ਵਾਤਿ ਅਤ੍ਥੋ.

ਪਾਲ਼ਿਯਂ ‘‘ਉਭੋਹਿ ਹਤ੍ਥੇਹਿ…ਪੇ… ਓਦਨੋ ਪਟਿਗ੍ਗਹੇਤਬ੍ਬੋ’’ਤਿ ਇਦਂ ਹਤ੍ਥਤਲੇ ਵਾ ਪਚ੍ਛਿਪਿਟ੍ਠਿਆਦਿਦੁਸ੍ਸਣ੍ਠਿਤਾਧਾਰੇ ਵਾ ਪਤ੍ਤਂ ਠਪੇਤ੍ਵਾ ਓਦਨਸ੍ਸ ਗਹਣਕਾਲੇ ਪਤ੍ਤਸ੍ਸ ਅਪਤਨਤ੍ਥਾਯ ਵੁਤ੍ਤਂ, ਸੁਸਜ੍ਜਿਤੇ ਪਨ ਆਧਾਰੇ ਪਤ੍ਤਂ ਠਪੇਤ੍ਵਾ ਏਕੇਨ ਹਤ੍ਥੇਨ ਤਂ ਪਰਾਮਸਿਤ੍ਵਾਪਿ ਓਦਨਂ ਪਟਿਗ੍ਗਹੇਤੁਂ ਵਟ੍ਟਤਿ ਏਵ. ਉਭੋਹਿ ਹਤ੍ਥੇਹਿ…ਪੇ… ਉਦਕਂ ਪਟਿਗ੍ਗਹੇਤਬ੍ਬਨ੍ਤਿ ਏਤ੍ਥਾਪਿ ਏਸੇਵ ਨਯੋ.

ਹਤ੍ਥਧੋਵਨਉਦਕਨ੍ਤਿ ਭੋਜਨਾਵਸਾਨੇ ਉਦਕਂ. ਤੇਨਾਹ ‘‘ਪਾਨੀਯਂ ਪਿਵਿਤ੍ਵਾ ਹਤ੍ਥਾ ਧੋਵਿਤਬ੍ਬਾ’’ਤਿ. ਤੇਨ ਪਰਿਯੋਸਾਨੇ ਧੋਵਨਮੇਵ ਪਟਿਕ੍ਖਿਤ੍ਤਂ, ਭੋਜਨਨ੍ਤਰੇ ਪਨ ਪਾਨੀਯਪਿਵਨਾਦਿਨਾ ਨਯੇਨ ਹਤ੍ਥਂ ਧੋਵਿਤ੍ਵਾ ਪੁਨ ਭੁਞ੍ਜਿਤੁਂ ਵਟ੍ਟਤੀਤਿ ਦਸ੍ਸੇਤਿ. ਪੋਤ੍ਥਕੇਸੁ ਪਨ ‘‘ਪਾਨੀਯਂ ਪਿਵਿਤ੍ਵਾ ਹਤ੍ਥਾ ਨ ਧੋਵਿਤਬ੍ਬਾ’’ਤਿ ਲਿਖਨ੍ਤਿ, ਤਂ ਪੁਰਿਮਵਚਨੇਨ ਨ ਸਮੇਤਿ ਪਰਿਯੋਸਾਨੇ ਉਦਕਸ੍ਸੇਵ ‘‘ਹਤ੍ਥਧੋਵਨਉਦਕ’’ਨ੍ਤਿ ਵੁਤ੍ਤਤ੍ਤਾ. ਸਚੇ ਮਨੁਸ੍ਸਾ ਧੋਵਥ, ਭਨ੍ਤੇਤਿਆਦਿ ਨਿਟ੍ਠਿਤਭਤ੍ਤਂ ਨਿਸਿਨ੍ਨਂ ਥੇਰਂ ਸਨ੍ਧਾਯ ਵੁਤ੍ਤਂ. ਧੁਰੇ ਦ੍ਵਾਰਸਮੀਪੇ.

ਭਤ੍ਤਗ੍ਗਵਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

ਪਿਣ੍ਡਚਾਰਿਕਵਤ੍ਤਕਥਾਦਿਵਣ੍ਣਨਾ

੩੬੬. ਪਾਲ਼ਿਯਂ ਠਾਪੇਤਿ ਵਾਤਿ ਤਿਟ੍ਠ ਭਨ੍ਤੇਤਿ ਵਦਨ੍ਤਿ.

੩੬੭. ਅਤ੍ਥਿ, ਭਨ੍ਤੇ, ਨਕ੍ਖਤ੍ਤਪਦਾਨੀਤਿ ਨਕ੍ਖਤ੍ਤਪਦਵਿਸਯਾਨਿ ਞਾਤਾਨਿ ਅਤ੍ਥਿ, ਅਸ੍ਸਯੁਜਾਦਿਨਕ੍ਖਤ੍ਤਂ ਜਾਨਾਥਾਤਿ ਅਧਿਪ੍ਪਾਯੋ. ਤੇਨਾਹ ‘‘ਨ ਜਾਨਾਮ, ਆਵੁਸੋ’’ਤਿ. ਅਤ੍ਥਿ, ਭਨ੍ਤੇ, ਦਿਸਾਭਾਗਨ੍ਤਿ ਏਤ੍ਥਾਪਿ ਏਸੇਵ ਨਯੋ. ਕੇਨਜ੍ਜ, ਭਨ੍ਤੇ, ਯੁਤ੍ਤਨ੍ਤਿ ਕੇਨ ਨਕ੍ਖਤ੍ਤੇਨ ਚਨ੍ਦੋ ਯੁਤ੍ਤੋਤਿ ਅਤ੍ਥੋ.

੩੬੯. ਅਙ੍ਗਣੇਤਿ ਅਬ੍ਭੋਕਾਸੇ. ਏਵਮੇਵ ਪਟਿਪਜ੍ਜਿਤਬ੍ਬਨ੍ਤਿ ਉਦ੍ਦੇਸਦਾਨਾਦਿ ਆਪੁਚ੍ਛਿਤਬ੍ਬਨ੍ਤਿ ਦਸ੍ਸੇਤਿ.

੩੭੪. ਨਿਬਦ੍ਧਗਮਨਤ੍ਥਾਯਾਤਿ ਅਤ੍ਤਨੋਵ ਨਿਰਨ੍ਤਰਗਮਨਤ੍ਥਾਯ. ਊਹਦਿਤਾਤਿ ਏਤ੍ਥ ਹਦ-ਧਾਤੁਸ੍ਸ ਵਚ੍ਚਵਿਸ੍ਸਜ੍ਜਨਤ੍ਥਤਾਯਾਹ ‘‘ਬਹਿ ਵਚ੍ਚਮਕ੍ਖਿਤਾ’’ਤਿ.

ਪਿਣ੍ਡਚਾਰਿਕਵਤ੍ਤਕਥਾਦਿਵਣ੍ਣਨਾ ਨਿਟ੍ਠਿਤਾ.

ਵਤ੍ਤਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.