੬. ਸੇਨਾਸਨਕ੍ਖਨ੍ਧਕੋ

ਵਿਹਾਰਾਨੁਜਾਨਨਕਥਾਵਣ੍ਣਨਾ

੨੯੫. ਸੇਨਾਸਨਕ੍ਖਨ੍ਧਕੇ ਸਿਸਿਰੇਤਿ ਸਿਸਿਰਕਾਲੇ ਹਿਮਪਾਤਵਸੇਨ ਸਤ੍ਤਾਹਵਦ੍ਦਲਿਕਾਦਿਵਸ੍ਸਪਾਤਵਸ੍ਸੇਨ ਚ ਉਪ੍ਪਨ੍ਨੋ ਖਰੋ ਸੀਤਸਮ੍ਫਸ੍ਸੋ ਅਧਿਪ੍ਪੇਤੋਤਿ ਆਹ ‘‘ਸਮ੍ਫੁਸਿਤਕੋ’’ਤਿ. ‘‘ਤਤੋ’’ਤਿ ਇਦਂ ਕਤ੍ਤੁਅਤ੍ਥੇ ਨਿਸ੍ਸਕ੍ਕਵਚਨਂ, ਤੇਨ ਚ ਵਿਹਾਰੇਨ ਵਾਤਾਤਪੋ ਪਟਿਹਞ੍ਞਤੀਤਿ ਅਤ੍ਥੋਤਿ ਆਹ ‘‘ਵਿਹਾਰੇਨ ਪਟਿਹਞ੍ਞਤੀ’’ਤਿ.

੨੯੬. ਆਵਿਞ੍ਛਨਛਿਦ੍ਦਨ੍ਤਿ ਯਤ੍ਥ ਅਙ੍ਗੁਲਿਂ ਵਾ ਰਜ੍ਜੁਸਙ੍ਖਲਿਕਾਦਿਂ ਵਾ ਪਵੇਸੇਤ੍ਵਾ ਕਵਾਟਂ ਆਕਡ੍ਢਨ੍ਤਾ ਦ੍ਵਾਰਬਾਹਂ ਫੁਸਾਪੇਨ੍ਤਿ, ਤਸ੍ਸੇਤਂ ਅਧਿਵਚਨਂ. ਸੇਨਾਸਨਪਰਿਭੋਗੇ ਅਕਪ੍ਪਿਯਂ ਨਾਮ ਨਤ੍ਥੀਤਿ ਦਸ੍ਸਨਤ੍ਥਂ ‘‘ਸਚੇਪਿ ਦੀਪਿਨਙ੍ਗੁਟ੍ਠੇਨਾ’’ਤਿਆਦਿ ਵੁਤ੍ਤਂ. ਚੇਤਿਯੇ ਵੇਦਿਕਾਸਦਿਸਨ੍ਤਿ ਵਾਤਪਾਨਦਾਰੁਂ ਵਾ ਜਾਲਂ ਵਾ ਅਟ੍ਠਪੇਤ੍ਵਾ ਦਾਰੁਟ੍ਠਾਨੇ ਚੇਤਿਯੇ ਵੇਦਿਕਾਯ ਪਟ੍ਟਾਦੀਨਿ ਵਿਯ ਇਟ੍ਠਕਾਦੀਹਿ ਉਦ੍ਧਂ, ਤਿਰਿਯਞ੍ਚ ਪਟ੍ਟਿਕਾਦਯੋ ਦਸ੍ਸੇਤ੍ਵਾ ਚਤੁਛਿਦ੍ਦਯੁਤ੍ਤਂ ਕਤਂ. ਥਮ੍ਭਕਵਾਤਪਾਨਂ ਨਾਮ ਤਿਰਿਯਂ ਦਾਰੂਨਿ ਅਦਤ੍ਵਾ ਉਦ੍ਧਂ ਠਪਿਤਦਾਰੂਹਿ ਏਵ ਕਤਂ. ਚੋਲ਼ਕਪਾਦਪੁਞ੍ਛਨਂ ਬਨ੍ਧਿਤੁਨ੍ਤਿ ਵਾਤਪਾਨਪ੍ਪਮਾਣੇਨ ਪਾਦਪੁਞ੍ਛਨਸਦਿਸਂ ਚੋਲ਼ਕਾਦਿਨਾ ਬਨ੍ਧਿਤ੍ਵਾ ਵਗ੍ਗੁਲਿਆਦਿਪ੍ਪਵੇਸਨਨਿਵਾਰਣਤ੍ਥਂ, ਕਥੇਤੁਨ੍ਤਿ ਅਤ੍ਥੋ. ਮਿਡ੍ਢਕਨ੍ਤਿ ਮਞ੍ਚਾਕਾਰੇਨ ਕਟ੍ਠਮਤ੍ਤਿਕਾਦੀਹਿ ਕਤਵੇਦਿਕਾਕਾਰਂ.

੨੯੭. ਚਤੁਰਸ੍ਸਪੀਠਨ੍ਤਿ ਸਮਚਤੁਰਸ੍ਸਂ. ਅਟ੍ਠਙ੍ਗੁਲਪਾਦਕਂ ਵਟ੍ਟਤੀਤਿ ਅਟ੍ਠਙ੍ਗੁਲਪਾਦਕਮੇਵ ਵਟ੍ਟਤਿ. ਪਮਾਣਾਤਿਕ੍ਕਨ੍ਤੋਪਿ ਵਟ੍ਟਤੀਤਿ ਸਮਚਤੁਰਸ੍ਸਮੇਵ ਸਨ੍ਧਾਯ ਵੁਤ੍ਤਂ. ਆਯਤਚਤੁਰਸ੍ਸਾ ਪਨ ਸਤ੍ਤਙ੍ਗਪਞ੍ਚਙ੍ਗਾਪਿ ਉਚ੍ਚਪਾਦਾ ਨ ਵਟ੍ਟਨ੍ਤਿ. ਵੇਤ੍ਤੇਹੇਵ ਚਤੁਰਸ੍ਸਾਦਿਆਕਾਰੇਨ ਕਤਂ ਭਦ੍ਦਪੀਠਨ੍ਤਿ ਆਹ ‘‘ਵੇਤ੍ਤਮਯਂ ਪੀਠ’’ਨ੍ਤਿ. ਦਾਰੁਪਟ੍ਟਿਕਾਯ ਉਪਰੀਤਿ ਅਟਨਿਆਕਾਰੇਨ ਠਿਤਦਾਰੁਪਟਲਸ੍ਸ ਹੇਟ੍ਠਾ ਉਦ੍ਧਂ ਪਾਦਂ ਕਤ੍ਵਾ. ਪਵੇਸਨਕਾਲਞ੍ਹਿ ਸਨ੍ਧਾਯ ‘‘ਉਪਰੀ’’ਤਿ ਵੁਤ੍ਤਂ. ਏਲ਼ਕਸ੍ਸ ਪਚ੍ਛਿਮਪਾਦਦ੍ਵਯਂ ਵਿਯ ਵਙ੍ਕਾਕਾਰੇਨ ਠਿਤਤ੍ਤਾ ਪਨੇਤਂ ‘‘ਏਲ਼ਕਪਾਦਪੀਠ’’ਨ੍ਤਿ ਵੁਤ੍ਤਂ. ਪਲੋਠੇਨ੍ਤੀਤਿ ਸਹ ਮਞ੍ਚੇਹਿ ਪਵਟ੍ਟੇਨ੍ਤਿ. ਰੁਕ੍ਖੇ, ਲਤਾ ਚ ਮੁਞ੍ਚਿਤ੍ਵਾ ਅਵਸੇਸਂ ਗਚ੍ਛਾਦਿਕਂ ਸਬ੍ਬਮ੍ਪਿ ਤਿਣਜਾਤਿ ਏਵਾਤਿ ਆਹ ‘‘ਯੇਸਂ ਕੇਸਞ੍ਚਿ ਤਿਣਜਾਤਿਕਾਨ’’ਨ੍ਤਿਆਦਿ.

ਉਪਦਹਨ੍ਤੀਤਿ ਠਪੇਨ੍ਤਿ. ਸੀਸਪ੍ਪਮਾਣਂ ਨਾਮ ਯਤ੍ਥ ਗੀਵਾਯ ਸਹ ਸਕਲਂ ਸੀਸਂ ਠਪੇਤੁਂ ਸਕ੍ਕਾ, ਤਸ੍ਸ ਚ ਮੁਟ੍ਠਿਰਤਨਂ ਵਿਤ੍ਥਾਰਪ੍ਪਮਾਣਨ੍ਤਿ ਦਸ੍ਸੇਨ੍ਤੋ ‘‘ਵਿਤ੍ਥਾਰਤੋ’’ਤਿਆਦਿਮਾਹ. ਇਦਞ੍ਚ ਬਿਮ੍ਬੋਹਨਸ੍ਸ ਉਭੋਸੁ ਅਨ੍ਤੇਸੁ ਠਪੇਤਬ੍ਬਚੋਲ਼ਪ੍ਪਮਾਣਦਸ੍ਸਨਂ. ਤਸ੍ਸ ਵਸੇਨ ਬਿਮ੍ਬੋਹਨਸ੍ਸ ਵਿਤ੍ਥਾਰਪ੍ਪਮਾਣਂ ਪਰਿਚ੍ਛਿਜ੍ਜਤਿ, ਤਂ ਵਟ੍ਟਂ ਵਾ ਚਤੁਰਸ੍ਸਂ ਵਾ ਕਤ੍ਵਾ ਸਿਬ੍ਬਿਤਂ ਯਥਾ ਕੋਟਿਤੋ ਕੋਟਿ ਵਿਤ੍ਥਾਰਤੋ ਪੁਥੁਲਟ੍ਠਾਨਂ ਮੁਟ੍ਠਿਰਤਨਪ੍ਪਮਾਣਂ ਹੋਤਿ, ਏਵਂ ਸਿਬ੍ਬਿਤਬ੍ਬਂ. ਇਤੋ ਅਧਿਕਂ ਨ ਵਟ੍ਟਤਿ, ਤਂ ਪਨ ਅਨ੍ਤੇਸੁ ਠਪਿਤਚੋਲ਼ਂ ਕੋਟਿਯਾ ਕੋਟਿਂ ਆਹਚ੍ਚ ਦਿਗੁਣਂ ਕਤਂ ਤਿਕਣ੍ਣਂ ਹੋਤਿ. ਤੇਸੁ ਤੀਸੁ ਕਣ੍ਣੇਸੁ ਦ੍ਵਿਨ੍ਨਂ ਕਣ੍ਣਾਨਮਨ੍ਤਰਂ ਵਿਦਤ੍ਥਿਚਤੁਰਙ੍ਗੁਲਂ ਹੋਤਿ, ਮਜ੍ਝਟ੍ਠਾਨਂ ਕੋਟਿਤੋ ਕੋਟਿਂ ਆਹਚ੍ਚ ਮੁਟ੍ਠਿਰਤਨਂ ਹੋਤਿ, ਇਦਮਸ੍ਸ ਉਕ੍ਕਟ੍ਠਪ੍ਪਮਾਣਂ. ਤੇਨਾਹ ‘‘ਤੀਸੁ ਕਣ੍ਣੇਸੂ’’ਤਿਆਦਿ.

‘‘ਕਮ੍ਬਲਮੇਵ…ਪੇ… ਉਣ੍ਣਭਿਸਿਸਙ੍ਖ੍ਯਮੇਵ ਗਚ੍ਛਤੀ’’ਤਿ ਸਾਮਞ੍ਞਤੋ ਵੁਤ੍ਤਤ੍ਤਾ ਗੋਨਕਾਦਿਅਕਪ੍ਪਿਯਮ੍ਪਿ ਉਣ੍ਣਮਯਤ੍ਥਰਣਂ ਭਿਸਿਯਂ ਪਕ੍ਖਿਪਿਤ੍ਵਾ ਸਯਿਤੁਂ ਵਟ੍ਟਤੀਤਿ ਦਟ੍ਠਬ੍ਬਂ.

ਮਸੂਰਕੇਤਿ ਚਮ੍ਮਮਯਭਿਸਿਯਂ. ਚਮ੍ਮਮਯਂ ਪਨ ਬਿਮ੍ਬੋਹਨਂ ਤੂਲਪੁਣ੍ਣਮ੍ਪਿ ਨ ਵਟ੍ਟਤਿ. ਪਾਲ਼ਿਯਂ ਸੇਨਾਸਨਪਰਿਕ੍ਖਾਰਦੁਸ੍ਸਨ੍ਤਿ ਸੇਨਾਸਨਪਰਿਕ੍ਖਾਰਕਰਣਤ੍ਥਾਯ ਦੁਸ੍ਸਂ. ਭਿਸਿਂ ਓਨਨ੍ਧਿਤੁਨ੍ਤਿ ਭਿਸਿਤ੍ਥਵਿਕਾਯ ਪਕ੍ਖਿਪਿਤ੍ਵਾ ਬਨ੍ਧਿਤੁਂ. ਪਰਿਭਿਜ੍ਜਤੀਤਿ ਮਞ੍ਚਾਦਿਤੋ ਸਾਰਿਯਮਾਨਾ ਪੀਠਕੋਟਿਆਦੀਸੁ ਨਿਸੀਦਨ੍ਤੇਹਿ ਘਂਸਿਯਮਾਨਾ ਭਿਸਿ ਪਰਿਭਿਜ੍ਜਤਿ. ਓਨਦ੍ਧਮਞ੍ਚਨ੍ਤਿ ਭਿਸਿਂ ਏਕਾਬਦ੍ਧਂ ਕਤ੍ਵਾ ਬਦ੍ਧਮਞ੍ਚਂ. ਪਾਲ਼ਿਯਂ ਛਵਿਂ ਉਪ੍ਪਾਟੇਤ੍ਵਾ ਹਰਨ੍ਤੀਤਿ ਭਿਸਿਚ੍ਛਵਿਂ ਚੋਰਾ ਹਰਨ੍ਤਿ. ਫੋਸਿਤੁਨ੍ਤਿ ਚੋਰੇਹਿ ਹਰਿਤਸ੍ਸ ਪਚ੍ਛਾ ਹਰਿਤਸਞ੍ਞਾਣਫੁਸਿਤਬਿਨ੍ਦੂਨਿ ਦਾਤੁਂ. ਭਿਤ੍ਤਿਕਮ੍ਮਨ੍ਤਿ ਨਾਨਾਵਣ੍ਣੇਹਿ ਵਿਭਿਤ੍ਤਿਰਾਜਿਕਰਣਂ. ਹਤ੍ਥਕਮ੍ਮਨ੍ਤਿ ਹਤ੍ਥੇਨ ਯਂ ਕਿਞ੍ਚਿ ਸਞ੍ਞਾਕਰਣਂ.

੨੯੮. ਪਾਲ਼ਿਯਂ ਨ ਨਿਪਤਤੀਤਿ ਨ ਅਲ੍ਲੀਯਤਿ. ਪਟਿਬਾਹੇਤ੍ਵਾਤਿ ਘਂਸਿਤ੍ਵਾ. ਨ ਨਿਬਨ੍ਧਤੀਤਿ ਅਨਿਬਨ੍ਧਨੀਯੋ, ਨ ਲਗ੍ਗਨਕੋਤਿ ਅਤ੍ਥੋ.

੨੯੯. ‘‘ਕਰੋਹੀ’’ਤਿ ਵਤ੍ਤੁਮ੍ਪਿ ਨ ਲਬ੍ਭਤੀਤਿ ਆਣਤ੍ਤਿਯਾ ਏਵ ਪਟਿਕ੍ਖਿਤ੍ਤਤ੍ਤਾ ਦ੍ਵਾਰਪਾਲਂ ‘‘ਕਿਂ ਨ ਕਰੋਸੀ’’ਤਿਆਦਿਨਾ ਪਰਿਯਾਯੇਨ ਵਤ੍ਤੁਂ ਵਟ੍ਟਤਿ. ਜਾਤਕਪਕਰਣਨ੍ਤਿ ਜਾਤਕਪਟਿਸਂਯੁਤ੍ਤਂ ਇਤ੍ਥਿਪੁਰਿਸਾਦਿ ਯਂ ਕਿਞ੍ਚਿ ਰੂਪਂ ਅਧਿਪ੍ਪੇਤਂ. ‘‘ਪਰੇਹਿ ਕਾਰਾਪੇਤੁ’’ਨ੍ਤਿ ਵੁਤ੍ਤਤ੍ਤਾ ਬੁਦ੍ਧਰੂਪਮ੍ਪਿ ਸਯਂ ਕਾਤੁਂ ਨ ਲਭਤਿ. ਪਾਲ਼ਿਯਂ ਪਞ੍ਚਪਟਿਕਨ੍ਤਿ ਜਾਤਿਆਦਿਪਞ੍ਚਪ੍ਪਕਾਰਵਣ੍ਣਮਟ੍ਠਂ.

੩੦੦. ਉਪਚਾਰੋ ਨ ਹੋਤੀਤਿ ਗਬ੍ਭਸ੍ਸ ਬਹਿ ਸਮਨ੍ਤਾ ਅਨੁਪਰਿਗਮਨਸ੍ਸ ਓਕਾਸੋ ਨਪ੍ਪਹੋਤਿ. ਰੁਕ੍ਖਂ ਵਿਜ੍ਝਿਤ੍ਵਾਤਿ ਤਚ੍ਛਿਤਸਾਰਦਾਰੁਂ ਅਗ੍ਗਸਮੀਪੇ ਵਿਜ੍ਝਿਤ੍ਵਾ. ਕਤ੍ਵਾਤਿ ਛਿਦ੍ਦੇ ਕਤ੍ਵਾ. ਕਪ੍ਪਕਤਂ ਵਿਯ ਸਾਰਖਾਣੁਕੇ ਆਕੋਟੇਤ੍ਵਾ ਏਵਂ ਕਤਮੇਵ ‘‘ਆਹਰਿਮਂ ਭਿਤ੍ਤਿਪਾਦ’’ਨ੍ਤਿ ਵੁਤ੍ਤਂ. ਉਪਤ੍ਥਮ੍ਭਨਤ੍ਥਂ ਭੂਮਿਯਂ ਪਤਿਟ੍ਠਾਪੇਤੁਨ੍ਤਿ ਜਿਣ੍ਣਭਿਤ੍ਤਿਪਾਦੇਨ ਬਹਿ ਸਮਾਨਭਾਰਂ ਖਾਣੁਕਪ੍ਪਸੀਸੇਨ ਉਸ੍ਸਾਪੇਤ੍ਵਾ ਮੂਲੇਨ ਭੂਮਿਯਂ ਪਤਿਟ੍ਠਾਪੇਤੁਂ. ਪਰਿਤ੍ਤਾਣਤ੍ਥਨ੍ਤਿ ਉਲ੍ਲਿਤ੍ਤਾਵਲਿਤ੍ਤਕੁਟਿਯਾ ਓਵਸ੍ਸਨਟ੍ਠਾਨਸ੍ਸ ਪਰਿਤ੍ਤਾਣਤ੍ਥਂ. ਕਿਟਿਕਨ੍ਤਿ ਤਾਲਪਣ੍ਣਾਦੀਹਿ ਕਤਪਦਲਂ. ਮਦ੍ਦਿਤਮਤ੍ਤਿਕਨ੍ਤਿ ਓਵਸ੍ਸਨਛਿਦ੍ਦਸ੍ਸ ਪਿਦਹਨਤ੍ਥਂ ਵੁਤ੍ਤਂ.

ਉਭਤੋਕੁਟ੍ਟਂ ਨੀਹਰਿਤ੍ਵਾ ਕਤਪਦੇਸਸ੍ਸਾਤਿ ਯਥਾ ਬਹਿ ਠਿਤਾ ਉਜੁਕਂ ਅਨ੍ਤੋ ਨਿਸਿਨ੍ਨੇ ਨ ਪਸ੍ਸਨ੍ਤਿ, ਏਵਂ ਦ੍ਵਾਰਾਭਿਮੁਖਂ ਪਿਦਹਨਵਸੇਨ ਭਿਤ੍ਤਿਞ੍ਚ ਅਞ੍ਞਤੋ ਦ੍ਵਾਰਞ੍ਚ ਯੋਜੇਤ੍ਵਾ ਕਤਟ੍ਠਾਨਂ ਵਦਤਿ. ਸਮਨ੍ਤਾ ਪਰਿਯਾਗਾਰੋਤਿ ਸਮਨ੍ਤਤੋ ਆਵਿਦ੍ਧਪਮੁਖਂ. ਵਂਸਂ ਦਤ੍ਵਾਤਿ ਪੁਰਿਸਪ੍ਪਮਾਣੇ ਪਾਦੇ ਨਿਖਣਿਤ੍ਵਾ ਤੇਸਂ ਉਪਰਿ ਪਿਟ੍ਠਿਵਂਸਸਦਿਸਂ ਪਸ੍ਸਵਂਸਂ ਠਪੇਤ੍ਵਾ ਓਸਾਰੇਤ੍ਵਾ. ਏਕਂ ਦਣ੍ਡਕੋਟਿਂ ਅਤਿਉਚ੍ਚਾਯ ਵਿਹਾਰਭਿਤ੍ਤਿਕੋਟਿਯਾ ਏਕਂ ਕੋਟਿਂ ਨੀਚੇ ਵਂਸਪਿਟ੍ਠਿਯਂ ਠਪਨਵਸੇਨ ਦਣ੍ਡਕੇ ਪਸਾਰੇਤ੍ਵਾ. ਚਕ੍ਕਲਯੁਤ੍ਤੋ ਕਿਟਿਕੋਤਿ ਕਵਾਟਂ ਵਿਯ ਵਿਵਰਣਥਕਨਸੁਖਤ੍ਥਂ ਚਕ੍ਕਲਬਨ੍ਧਕਿਟਿਕਂ. ਪਾਲ਼ਿਯਂ ਉਗ੍ਘਾਟਨਕਿਟਿਕਨ੍ਤਿ ਆਪਣਾਦੀਸੁ ਅਨਤ੍ਥਿਕਕਾਲੇ ਉਕ੍ਖਿਪਿਤ੍ਵਾ, ਉਪਰਿ ਚ ਬਨ੍ਧਿਤ੍ਵਾ ਪਚ੍ਛਾ ਓਤਰਣਕਿਟਿਕਂ, ਕਪ੍ਪਸੀਸੇਹਿ ਵਾ ਉਪਤ੍ਥਮ੍ਭਨੀਹਿ ਉਕ੍ਖਿਪਿਤ੍ਵਾ ਪਚ੍ਛਾ ਓਤਰਣਕਿਟਿਕਮ੍ਪਿ.

੩੦੧. ਪਾਨੀਯਂ ਓਤਪ੍ਪਤੀਤਿ ਪਾਨੀਯਭਾਜਨੇਸੁ ਠਪਿਤਪਾਨੀਯਂ ਆਤਪੇਨ ਸਨ੍ਤਪ੍ਪਤਿ.

੩੦੩. ਤਯੋ ਵਾਟੇਤਿ ਤਯੋ ਪਰਿਕ੍ਖੇਪੇ. ਵੇਲ਼ੁਵਾਟਨ੍ਤਿ ਸਬ੍ਬਂ ਦਾਰੁਪਰਿਕ੍ਖੇਪਂ ਸਙ੍ਗਣ੍ਹਾਤਿ. ਕਣ੍ਟਕਵਾਟਨ੍ਤਿ ਸਬ੍ਬਸਾਖਾਪਰਿਕ੍ਖੇਪਂ.

੩੦੫. ਆਲੋਕੋ ਅਨ੍ਤਰਧਾਯੀਤਿ ਯੋ ਬੁਦ੍ਧਾਰਮ੍ਮਣਾਯ ਪੀਤਿਯਾ ਆਨੁਭਾਵੇਨ ਮਹਨ੍ਤੋ ਓਭਾਸੋ ਅਹੋਸਿ, ਯੇਨ ਚਸ੍ਸ ਪਦੀਪਸਹਸ੍ਸੇਨ ਵਿਯ ਵਿਗਤਨ੍ਧਕਾਰੋ ਮਗ੍ਗੋ ਅਹੋਸਿ, ਸੋ ਬਹਿਨਗਰੇ ਛਵਸਰੀਰਸਮਾਕੁਲਂ ਦੁਗ੍ਗਨ੍ਧਂ ਬੀਭਚ੍ਛਂ ਆਮਕਸੁਸਾਨਂ ਪਤ੍ਤਸ੍ਸ ਭਯੇਨ ਪੀਤਿਵੇਗੇ ਮਨ੍ਦੀਭੂਤੇ ਅਨ੍ਤਰਧਾਯਿ.

ਸਤਂ ਹਤ੍ਥੀਤਿ ਗਾਥਾਯ ਹਤ੍ਥਿਨੋ ਸਤਸਹਸ੍ਸਾਨੀਤਿ ਏਵਂ ਪਚ੍ਚੇਕਂ ਸਹਸ੍ਸ-ਸਦ੍ਦੇਨ ਯੋਜੇਤ੍ਵਾ ਅਤ੍ਥੋ ਞਾਤਬ੍ਬੋ. ਪਦਵੀਤਿਹਾਰਸ੍ਸਾਤਿ ‘‘ਬੁਦ੍ਧਂ ਵਨ੍ਦਿਸ੍ਸਾਮੀ’’ਤਿ ਰਤਨਤ੍ਤਯਂ ਉਦ੍ਦਿਸ੍ਸ ਗਚ੍ਛਤੋ ਏਕਪਦਵੀਤਿਹਾਰਸ੍ਸ, ਤਪ੍ਪਚ੍ਚਯਕੁਸਲਫਲਸ੍ਸਾਤਿ ਅਤ੍ਥੋ. ਤਸ੍ਸ ਸੋਲ਼ਸਮੋ ਭਾਗੋ ਕਲਂ ਨਾਮ, ਤਂ ਸੋਲ਼ਸਿਂ ਕਲਂ ਯਥਾਵੁਤ੍ਤਾ ਹਤ੍ਥਿਆਦਯੋ ਸਬ੍ਬੇ ਨਾਗ੍ਘਨ੍ਤਿ ਨਾਰਹਨ੍ਤਿ, ਨਿਦਸ੍ਸਨਮਤ੍ਤਞ੍ਚੇਤਂ. ਅਨੇਕਸਤਸਹਸ੍ਸਭਾਗਮ੍ਪਿ ਨਾਗ੍ਘਨ੍ਤਿ.

ਅਨ੍ਧਕਾਰੋ ਅਨ੍ਤਰਧਾਯੀਤਿ ਪੁਨ ਬਲਵਪੀਤਿਯਾ ਆਲੋਕੇ ਸਮੁਪ੍ਪਨ੍ਨੇ ਅਨ੍ਤਰਧਾਯਿ. ਆਸਤ੍ਤਿਯੋਤਿ ਤਣ੍ਹਾਯੋ. ਵਯਕਰਣਨ੍ਤਿ ਦੇਯ੍ਯਧਮ੍ਮਮੂਲਂ ਨਵਕਮ੍ਮਂ.

੩੦੯. ਦਦੇਯ੍ਯਾਤਿ ਨਵਕਮ੍ਮਂ ਅਧਿਟ੍ਠਾਤੁਂ ਵਿਹਾਰੇ ਇਸ੍ਸਰਿਯਂ ਦਦੇਯ੍ਯਾਤਿ ਅਤ੍ਥੋ. ਦਿਨ੍ਨੋਤਿ ਨਵਕਮ੍ਮਂ ਕਾਤੁਂ ਵਿਹਾਰੋ ਦਿਨ੍ਨੋ, ਵਿਹਾਰੇ ਨਵਕਮ੍ਮਂ ਦਿਨ੍ਨਨ੍ਤਿ ਵਾ ਅਤ੍ਥੋ.

੩੧੩-੪. ਸਨ੍ਥਾਗਾਰੇਤਿ ਸਨ੍ਨਿਪਾਤਮਣ੍ਡਪੇ. ਓਕਾਸੇਤਿ ਨਿਵਾਸੋਕਾਸੇ. ਉਦ੍ਦਿਸ੍ਸ ਕਤਨ੍ਤਿ ਸਙ੍ਘਂ ਉਦ੍ਦਿਸ੍ਸ ਕਤਂ. ਗਿਹਿਵਿਕਟਨ੍ਤਿ ਗਿਹੀਹਿ ਕਤਂ ਪਞ੍ਞਤ੍ਤਂ, ਗਿਹਿਸਨ੍ਤਕਨ੍ਤਿ ਅਤ੍ਥੋ.

ਵਿਹਾਰਾਨੁਜਾਨਨਕਥਾਵਣ੍ਣਨਾ ਨਿਟ੍ਠਿਤਾ.

ਸੇਨਾਸਨਗ੍ਗਾਹਕਥਾਵਣ੍ਣਨਾ

੩੧੮. ‘‘ਛਮਾਸਚ੍ਚਯੇਨ ਛਮਾਸਚ੍ਚਯੇਨਾ’’ਤਿ ਇਦਂ ਦ੍ਵਿਕ੍ਖਤ੍ਤੁਂ ਪਚ੍ਚਯਦਾਨਕਾਲਪਰਿਚ੍ਛੇਦਦਸ੍ਸਨਂ, ਏਵਂ ਉਪਰਿਪਿ. ‘‘ਤਂ ਨ ਗਾਹੇਤਬ੍ਬ’’ਨ੍ਤਿ ਵਚਨਸ੍ਸ ਕਾਰਣਮਾਹ ‘‘ਪਚ੍ਚਯੇਨੇਵ ਹਿ ਤ’’ਨ੍ਤਿਆਦਿਨਾ, ਪਚ੍ਚਯਞ੍ਞੇਵ ਨਿਸ੍ਸਾਯ ਤਤ੍ਥ ਵਸਿਤ੍ਵਾ ਪਟਿਜਗ੍ਗਨਾ ਭਵਿਸ੍ਸਨ੍ਤੀਤਿ ਅਧਿਪ੍ਪਾਯੋ.

ਉਬ੍ਭਣ੍ਡਿਕਾਤਿ ਉਕ੍ਖਿਤ੍ਤਭਣ੍ਡਾ ਭਵਿਸ੍ਸਨ੍ਤਿ. ਦੀਘਸਾਲਾਤਿ ਚਙ੍ਕਮਨਸਾਲਾ. ਮਣ੍ਡਲਮਾਲ਼ੋਤਿ ਉਪਟ੍ਠਾਨਸਾਲਾ. ਅਨੁਦਹਤੀਤਿ ਪੀਲ਼ੇਤਿ. ‘‘ਅਦਾਤੁਂ ਨ ਲਬ੍ਭਤੀ’’ਤਿ ਇਮਿਨਾ ਸਞ੍ਚਿਚ੍ਚ ਅਦਦਨ੍ਤਸ੍ਸ ਪਟਿਬਾਹਨੇ ਪਵਿਸਨਤੋ ਦੁਕ੍ਕਟਨ੍ਤਿ ਦੀਪੇਤਿ.

‘‘ਨ ਗੋਚਰਗਾਮੋ ਘਟ੍ਟੇਤਬ੍ਬੋ’’ਤਿ ਵੁਤ੍ਤਮੇਵਤ੍ਥਂ ਵਿਭਾਵੇਤੁਂ ‘‘ਨ ਤਤ੍ਥ ਮਨੁਸ੍ਸਾ ਵਤ੍ਤਬ੍ਬਾ’’ਤਿਆਦਿ ਵੁਤ੍ਤਂ. ਵਿਤਕ੍ਕਂ ਛਿਨ੍ਦਿਤ੍ਵਾਤਿ ‘‘ਇਮਿਨਾ ਨੀਹਾਰੇਨ ਗਚ੍ਛਨ੍ਤਂ ਦਿਸ੍ਵਾ ਨਿਵਾਰੇਤ੍ਵਾ ਪਚ੍ਚਯੇ ਦਸ੍ਸਨ੍ਤੀ’’ਤਿ ਏਵਰੂਪਂ ਵਿਤਕ੍ਕਂ ਅਨੁਪ੍ਪਾਦੇਤ੍ਵਾ. ਭਣ੍ਡਪ੍ਪਟਿਚ੍ਛਾਦਨਨ੍ਤਿ ਪਟਿਚ੍ਛਾਦਨਭਣ੍ਡਂ. ਸਰੀਰਪ੍ਪਟਿਚ੍ਛਾਦਨਚੀਵਰਨ੍ਤਿ ਅਤ੍ਥੋ. ‘‘ਸੁਦ੍ਧਚਿਤ੍ਤਤ੍ਤਾਵ ਅਨਵਜ੍ਜ’’ਨ੍ਤਿ ਇਦਂ ਪੁਚ੍ਛਿਤਕ੍ਖਣੇ ਕਾਰਣਾਚਿਕ੍ਖਨਂ ਸਨ੍ਧਾਯ ਵੁਤ੍ਤਂ ਨ ਹੋਤਿ ਅਸੁਦ੍ਧਚਿਤ੍ਤਸ੍ਸਪਿ ਪੁਚ੍ਛਿਤਪਞ੍ਹਵਿਸਜ੍ਜਨੇ ਦੋਸਾਭਾਵਾ. ਏਵਂ ਪਨ ਗਤੇ ਮਂ ਪੁਚ੍ਛਿਸ੍ਸਨ੍ਤੀਤਿਸਞ੍ਞਾਯ ਅਗਮਨਂ ਸਨ੍ਧਾਯ ਵੁਤ੍ਤਨ੍ਤਿ ਦਟ੍ਠਬ੍ਬਂ.

ਪਟਿਜਗ੍ਗਿਤਬ੍ਬਾਨੀਤਿ ਖਣ੍ਡਫੁਲ੍ਲਪਟਿਸਙ੍ਖਰਣਸਮ੍ਮਜ੍ਜਨਾਦੀਹਿ ਪਟਿਜਗ੍ਗਿਤਬ੍ਬਾਨਿ. ਮੁਦ੍ਦਵੇਦਿਕਾਯਾਤਿ ਚੇਤਿਯਸ੍ਸ ਹਮ੍ਮਿਯਵੇਦਿਕਾਯ ਘਟਾਕਾਰਸ੍ਸ ਉਪਰਿ ਚਤੁਰਸ੍ਸਵੇਦਿਕਾਯ. ਕਸ੍ਮਾ ਪੁਚ੍ਛਿਤਬ੍ਬਨ੍ਤਿਆਦਿ ਯਤੋ ਪਕਤਿਯਾ ਲਭਤਿ. ਤਤ੍ਥਾਪਿ ਪੁਚ੍ਛਨਸ੍ਸ ਕਾਰਣਸਨ੍ਦਸ੍ਸਨਤ੍ਥਂ ਵੁਤ੍ਤਂ.

ਪਟਿਕ੍ਕਮ੍ਮਾਤਿ ਵਿਹਾਰਤੋ ਅਪਸਕ੍ਕਿਤ੍ਵਾ. ਤਮਤ੍ਥਂ ਦਸ੍ਸੇਨ੍ਤੋ ‘‘ਯੋਜਨਦ੍ਵਿਯੋਜਨਨ੍ਤਰੇ ਹੋਤੀ’’ਤਿ ਆਹ. ਉਪਨਿਕ੍ਖੇਪਂ ਠਪੇਤ੍ਵਾਤਿ ਵਡ੍ਢਿਯਾ ਕਹਾਪਣਾਦਿਂ ਠਪੇਤ੍ਵਾ, ਖੇਤ੍ਤਾਦੀਨਿ ਵਾ ਨਿਯਮੇਤ੍ਵਾ. ਇਤਿ ਸਦ੍ਧਾਦੇਯ੍ਯੇਤਿ ਏਵਂ ਹੇਟ੍ਠਾ ਵੁਤ੍ਤਨਯੇਨ ਸਦ੍ਧਾਯ ਦਾਤਬ੍ਬੇ ਵਸ੍ਸਾਵਾਸਿਕਲਾਭਵਿਸਯੇਤਿ ਅਤ੍ਥੋ.

ਵਤ੍ਥੁ ਪਨਾਤਿ ਤਤ੍ਰੁਪ੍ਪਾਦੇ ਉਪ੍ਪਨ੍ਨਰੂਪਿਯਂ, ਤਞ੍ਚ ‘‘ਤਤੋ ਚਤੁਪਚ੍ਚਯਂ ਪਰਿਭੁਞ੍ਜਥਾ’’ਤਿ ਦਿਨ੍ਨਖੇਤ੍ਤਾਦਿਤੋ ਉਪ੍ਪਨ੍ਨਤ੍ਤਾ ਕਪ੍ਪਿਯਕਾਰਕਾਨਂ ਹਤ੍ਥੇ ‘‘ਕਪ੍ਪਿਯਭਣ੍ਡਂ ਪਰਿਭੁਞ੍ਜਥਾ’’ਤਿ ਦਾਯਕੇਹਿ ਦਿਨ੍ਨਵਤ੍ਥੁਸਦਿਸਂ ਹੋਤੀਤਿ ਆਹ ‘‘ਕਪ੍ਪਿਯਕਾਰਕਾਨਂ ਹੀ’’ਤਿਆਦਿ.

ਸਙ੍ਘਸੁਟ੍ਠੁਤਾਯਾਤਿ ਸਙ੍ਘਸ੍ਸ ਹਿਤਾਯ. ਪੁਗ੍ਗਲਵਸੇਨਾਤਿ ‘‘ਭਿਕ੍ਖੂ ਚੀਵਰੇਨ ਕਿਲਮਨ੍ਤੀ’’ਤਿ ਏਵਂ ਪੁਗ੍ਗਲਪਰਾਮਾਸਵਸੇਨ, ਨ ‘‘ਸਙ੍ਘੋ ਕਿਲਮਤੀ’’ਤਿ ਏਵਂ ਸਙ੍ਘਪਰਾਮਾਸਵਸੇਨ.

‘‘ਕਪ੍ਪਿਯਭਣ੍ਡਵਸੇਨਾ’’ਤਿ ਸਾਮਞ੍ਞਤੋ ਵੁਤ੍ਤਮੇਵਤ੍ਥਂ ਵਿਭਾਵੇਤੁਂ ‘‘ਚੀਵਰਤਣ੍ਡੁਲਾਦਿਵਸੇਨੇਵ ਚਾ’’ਤਿ ਵੁਤ੍ਤਂ. ਚ-ਕਾਰੋ ਚੇਤ੍ਥ ਪਨ-ਸਦ੍ਦਤ੍ਥੇ ਵਤ੍ਤਤਿ, ਨ ਸਮੁਚ੍ਚਯਤ੍ਥੇਤਿ ਦਟ੍ਠਬ੍ਬਂ. ਪੁਗ੍ਗਲਵਸੇਨੇਵ, ਕਪ੍ਪਿਯਭਣ੍ਡਵਸੇਨ ਚ ਅਪਲੋਕਨਪ੍ਪਕਾਰਂ ਦਸ੍ਸੇਤੁਂ ‘‘ਤਂ ਪਨ ਏਵਂ ਕਤ੍ਤਬ੍ਬ’’ਨ੍ਤਿਆਦਿ ਵੁਤ੍ਤਂ.

ਚੀਵਰਪਚ੍ਚਯਂ ਸਲ੍ਲਕ੍ਖੇਤ੍ਵਾਤਿ ਸਦ੍ਧਾਦੇਯ੍ਯਤਤ੍ਰੁਪ੍ਪਾਦਾਦਿਵਸੇਨ ਤਸ੍ਮਿਂ ਵਸ੍ਸਾਵਾਸੇ ਲਬ੍ਭਮਾਨਂ ਚੀਵਰਸਙ੍ਖਾਤਂ ਪਚ੍ਚਯਂ ‘‘ਏਤ੍ਤਕ’’ਨ੍ਤਿ ਪਰਿਚ੍ਛਿਨ੍ਦਿਤ੍ਵਾ. ਸੇਨਾਸਨਸ੍ਸਾਤਿ ਸੇਨਾਸਨਗ੍ਗਾਹਾਪਨਸ੍ਸ. ‘‘ਨਵਕੋ ਵੁਡ੍ਢਤਰਸ੍ਸ, ਵੁਡ੍ਢੋ ਚ ਨਵਕਸ੍ਸਾ’’ਤਿ ਇਦਂ ਸੇਨਾਸਨਗ੍ਗਾਹਸ੍ਸ ਅਤ੍ਤਨਾਵ ਅਤ੍ਤਨੋ ਗਹਣਂ ਅਸਾਰੁਪ੍ਪਨ੍ਤਿ ਵੁਤ੍ਤਂ, ਦ੍ਵੇ ਅਞ੍ਞਮਞ੍ਞਂ ਗਾਹੇਸ੍ਸਨ੍ਤੀਤਿ ਅਧਿਪ੍ਪਾਯੋ. ਅਟ੍ਠਪਿ ਸੋਲ਼ਸਪਿ ਜਨੇ ਸਮ੍ਮਨ੍ਨਿਤੁਂ ਵਟ੍ਟਤੀਤਿ ਏਕਕਮ੍ਮਵਾਚਾਯ ਸਬ੍ਬੇਪਿ ਏਕਤੋ ਸਮ੍ਮਨ੍ਨਿਤੁਂ ਵਟ੍ਟਤਿ. ਨਿਗ੍ਗਹਕਮ੍ਮਮੇਵ ਹਿ ਸਙ੍ਘੋ ਸਙ੍ਘਸ੍ਸ ਨ ਕਰੋਤਿ. ਤੇਨੇਵ ਸਤ੍ਤਸਤਿਕਕ੍ਖਨ੍ਧਕੇ ‘‘ਉਬ੍ਬਾਹਿਕਕਮ੍ਮਸਮ੍ਮੁਤਿਯਂ ਅਟ੍ਠਪਿ ਜਨਾ ਏਕਤੋਵ ਸਮ੍ਮਤਾਤਿ.

ਆਸਨਘਰਨ੍ਤਿ ਪਟਿਮਾਘਰਂ. ਮਗ੍ਗੋਤਿ ਉਪਚਾਰਸੀਮਬ੍ਭਨ੍ਤਰਗਤੇ ਗਾਮਾਭਿਮੁਖਮਗ੍ਗੇ ਕਤਸਾਲਾ ਵੁਚ੍ਚਤਿ. ਏਵਂ ਪੋਕ੍ਖਰਣੀਰੁਕ੍ਖਮੂਲਾਦੀਸੁਪਿ.

ਲਭਨ੍ਤੀਤਿ ਤਤ੍ਰਵਾਸਿਨੋ ਭਿਕ੍ਖੂ ਲਭਨ੍ਤਿ. ਵਿਜਟੇਤ੍ਵਾਤਿ ‘‘ਏਕੇਕਸ੍ਸ ਪਹੋਨਕਪ੍ਪਮਾਣੇਨ ਵਿਯੋਜੇਤ੍ਵਾ. ਆਵਾਸੇਸੁ ਪਕ੍ਖਿਪਿਤ੍ਵਾਤਿ ‘‘ਇਤੋ ਉਪ੍ਪਨ੍ਨਂ ਅਸੁਕਸ੍ਮਿਂ ਅਸੁਕਸ੍ਮਿਞ੍ਚ ਆਵਾਸੇ ਵਸਨ੍ਤਾ ਪਾਪੇਤ੍ਵਾ ਗਣ੍ਹਨ੍ਤੂ’’ਤਿ ਵਾਚਾਯ ਉਪਸਂਹਰਿਤ੍ਵਾ. ਪਵਿਸਿਤਬ੍ਬਨ੍ਤਿ ਮਹਾਲਾਭੇ ਪਰਿਵੇਣੇ ਵਸਿਤ੍ਵਾਵ ਲਾਭੋ ਗਹੇਤਬ੍ਬੋਤਿ ਅਧਿਪ੍ਪਾਯੋ.

ਅਯਮ੍ਪੀਤਿ ਏਤ੍ਥ ਯੋ ਪਂਸੁਕੂਲਿਕੋ ਪਚ੍ਚਯਂ ਵਿਸ੍ਸਜ੍ਜੇਤਿ. ਤੇਨੇਵ ਵਿਸ੍ਸਟ੍ਠੋ ਅਯਂ ਚੀਵਰਪਚ੍ਚਯੋਪੀਤਿ ਯੋਜਨਾ. ਪਾਦਮੂਲੇ ਠਪੇਤ੍ਵਾ ਸਾਟਕਂ ਦੇਨ੍ਤੀਤਿ ਪਚ੍ਚਯਦਾਯਕਾ ਦੇਨ੍ਤਿ. ਏਤੇਨ ਗਹਟ੍ਠੇਹਿ ਪਾਦਮੂਲੇ ਠਪੇਤ੍ਵਾ ਦਿਨ੍ਨਮ੍ਪਿ ਪਂਸੁਕੂਲਿਕਾਨਮ੍ਪਿ ਵਟ੍ਟਤੀਤਿ ਦਸ੍ਸੇਤਿ. ਅਥ ਵਸ੍ਸਾਵਾਸਿਕਂ ਦੇਮਾਤਿ ਵਦਨ੍ਤੀਤਿ ਏਤ੍ਥ ਪਂਸੁਕੂਲਿਕਾਨਂ ਨ ਵਟ੍ਟਤੀਤਿ ਅਜ੍ਝਾਹਰਿਤ੍ਵਾ ਯੋਜੇਤਬ੍ਬਂ. ਵਸ੍ਸਂਵੁਤ੍ਥਭਿਕ੍ਖੂਨਨ੍ਤਿ ਪਂਸੁਕੂਲਿਕਤੋ ਅਞ੍ਞੇਸਂ ਭਿਕ੍ਖੂਨਂ.

ਉਪਨਿਬਨ੍ਧਿਤ੍ਵਾ ਗਾਹਾਪੇਤਬ੍ਬਨ੍ਤਿ ਇਧ ਰੁਕ੍ਖਾਦੀਸੁ ਵਸਿਤ੍ਵਾ ਚੀਵਰਂ ਗਣ੍ਹਥਾਤਿ ਪਟਿਬਨ੍ਧਂ ਕਤ੍ਵਾ ਗਾਹੇਤਬ੍ਬਂ.

ਪਾਟਿਪਦਅਰੁਣਤੋਤਿਆਦਿ ਵਸ੍ਸੂਪਨਾਯਿਕਦਿਵਸਂ ਸਨ੍ਧਾਯ ਵੁਤ੍ਤਂ. ਅਨ੍ਤਰਾਮੁਤ੍ਤਕਂ ਪਨ ਪਾਟਿਪਦਂ ਅਤਿਕ੍ਕਮਿਤ੍ਵਾਪਿ ਗਾਹੇਤੁਂ ਵਟ੍ਟਤਿ. ਨਿਬਦ੍ਧਵਤ੍ਤਂ ਠਪੇਤ੍ਵਾਤਿ ਸਜ੍ਝਾਯਮਨਸਿਕਾਰਾਦੀਸੁ ਨਿਰਨ੍ਤਰਕਰਣੀਯੇਸੁ ਕਤ੍ਤਬ੍ਬਂ ਕਤਿਕਵਤ੍ਤਂ ਕਤ੍ਵਾ. ਕਸਾਵਪਰਿਭਣ੍ਡਨ੍ਤਿ ਕਸਾਵਰਸੇਹਿ ਭੂਮਿਪਰਿਕਮ੍ਮਂ.

ਤਿਵਿਧਮ੍ਪੀਤਿ ਪਰਿਯਤ੍ਤਿਪਟਿਪਤ੍ਤਿਪਟਿਵੇਧਵਸੇਨ ਤਿਵਿਧਮ੍ਪਿ. ਸੋਧੇਤ੍ਵਾਤਿ ਆਚਾਰਾਦੀਸੁ ਉਪਪਰਿਕ੍ਖਿਤ੍ਵਾ. ਏਕਚਾਰਿਕਵਤ੍ਤਨ੍ਤਿ ਭਾਵਨਾਕਮ੍ਮਂ. ਤਞ੍ਹਿ ਗਣਸਙ੍ਗਣਿਕਂ ਪਹਾਯ ਏਕਚਾਰਿਕੇਨੇਵ ਵਤ੍ਤਿਤਬ੍ਬਤ੍ਤਾ ਏਵਂ ਵੁਤ੍ਤਂ. ਦਸਵਤ੍ਥੁਕਕਥਾ ਨਾਮ ਅਪ੍ਪਿਚ੍ਛਕਥਾ, ਸਨ੍ਤੁਟ੍ਠਿ, ਪਵਿਵੇਕ, ਅਸਂਸਗ੍ਗ, ਵੀਰਿਯਾਰਮ੍ਭ, ਸੀਲ, ਸਮਾਧਿ, ਪਞ੍ਞਾ, ਵਿਮੁਤ੍ਤਿ, ਵਿਮੁਤ੍ਤਿਞਾਣਦਸ੍ਸਨਕਥਾਤਿ ਇਮਾ ਦਸ.

ਦਨ੍ਤਕਟ੍ਠਖਾਦਨਵਤ੍ਤਨ੍ਤਿ ਦਨ੍ਤਕਟ੍ਠਮਾਲ਼ਕੇ ਨਿਕ੍ਖਿਤ੍ਤੇਸੁ ਦਨ੍ਤਕਟ੍ਠੇਸੁ ‘‘ਦਿਵਸੇ ਦਿਵਸੇ ਏਕਮੇਵ ਦਨ੍ਤਕਟ੍ਠਂ ਗਹੇਤਬ੍ਬ’’ਨ੍ਤਿਆਦਿਨਾ (ਪਾਰਾ. ਅਟ੍ਠ. ੧.੧੦੯) ਅਦਿਨ੍ਨਾਦਾਨੇ ਦਨ੍ਤਪੋਨਕਥਾਯਂ ਵੁਤ੍ਤਂ ਵਤ੍ਤਂ. ਪਤ੍ਤਂ ਵਾ…ਪੇ… ਨ ਕਥੇਤਬ੍ਬਨ੍ਤਿ ਪਤ੍ਤਗੁਤ੍ਤਤ੍ਥਾਯ ਵੁਤ੍ਤਂ. ਵਿਸਭਾਗਕਥਾਤਿ ਤਿਰਚ੍ਛਾਨਕਥਾ. ਖਨ੍ਧਕਵਤ੍ਤਨ੍ਤਿ ਵਤ੍ਤਕ੍ਖਨ੍ਧਕੇ (ਚੂਲ਼ਵ. ੩੬੫) ਆਗਤਂ ਪਿਣ੍ਡਚਾਰਿਕਵਤ੍ਤਤੋ ਅਵਸਿਟ੍ਠਵਤ੍ਤਂ ਤਸ੍ਸ ‘‘ਭਿਕ੍ਖਾਚਾਰਵਤ੍ਤ’’ਨ੍ਤਿ ਵਿਸੁਂ ਗਹਿਤਤ੍ਤਾ.

ਇਦਾਨਿ ਯਂ ਦਾਯਕਾ ਪਚ੍ਛਿਮਵਸ੍ਸਂਵੁਤ੍ਥਾਨਂ ਵਸ੍ਸਾਵਾਸਿਕਂ ਦੇਨ੍ਤਿ, ਤਤ੍ਥ ਪਟਿਪਜ੍ਜਨਵਿਧਿਂ ਦਸ੍ਸੇਤੁਂ ‘‘ਪਚ੍ਛਿਮਵਸ੍ਸੂਪਨਾਯਿਕਦਿਵਸੇ ਪਨਾ’’ਤਿ ਆਰਦ੍ਧਂ. ਆਗਨ੍ਤੁਕੋ ਸਚੇ ਭਿਕ੍ਖੂਤਿ ਚੀਵਰੇ ਗਾਹਿਤੇ ਪਚ੍ਛਾ ਆਗਤੋ ਆਗਨ੍ਤੁਕੋ ਭਿਕ੍ਖੁ. ਪਤ੍ਤਟ੍ਠਾਨੇਤਿ ਵਸ੍ਸਗ੍ਗੇਨ ਪਤ੍ਤਟ੍ਠਾਨੇ. ਪਠਮਵਸ੍ਸੂਪਗਤਾਤਿ ਆਗਨ੍ਤੁਕਸ੍ਸ ਆਗਮਨਤੋ ਪੁਰੇਤਰਮੇਵ ਪਚ੍ਛਿਮਿਕਾਯ ਵਸ੍ਸੂਪਨਾਯਿਕਾਯ ਵਸ੍ਸੂਪਗਤਾ. ਲਦ੍ਧਂ ਲਦ੍ਧਨ੍ਤਿ ਪੁਨਪ੍ਪੁਨਂ ਦਾਯਕਾਨਂ ਸਨ੍ਤਿਕਾ ਆਗਤਾਗਤਸਾਟਕਂ.

ਨੇਵ ਵਸ੍ਸਾਵਾਸਿਕਸ੍ਸ ਸਾਮਿਨੋਤਿ ਛਿਨ੍ਨਵਸ੍ਸਤ੍ਤਾ ਵੁਤ੍ਤਂ. ਪਠਮਮੇਵ ਕਤਿਕਾਯ ਕਤਤ੍ਤਾ ‘‘ਨੇਵ ਅਦਾਤੁਂ ਲਭਨ੍ਤੀ’’ਤਿ ਵੁਤ੍ਤਂ, ਦਾਤਬ੍ਬਂ ਵਾਰੇਨ੍ਤਾਨਂ ਗੀਵਾ ਹੋਤੀਤਿ ਅਧਿਪ੍ਪਾਯੋ. ਤੇਸਮੇਵ ਦਾਤਬ੍ਬਨ੍ਤਿ ਵਸ੍ਸੂਪਗਤੇਸੁ ਅਲਦ੍ਧਵਸ੍ਸਾਵਾਸਿਕਾਨਂ ਏਕਚ੍ਚਾਨਮੇਵ ਦਾਤਬ੍ਬਂ.

ਭਤਿਨਿਵਿਟ੍ਠਨ੍ਤਿ ਪਾਨੀਯੁਪਟ੍ਠਾਨਾਦਿਭਤਿਂ ਕਤ੍ਵਾ ਲਦ੍ਧਂ. ਸਙ੍ਘਿਕਂ ਪਨਾਤਿਆਦਿ ਕੇਸਞ੍ਚਿ ਵਾਦਦਸ੍ਸਨਂ. ਤਤ੍ਥ ਅਪਲੋਕਨਕਮ੍ਮਂ ਕਤ੍ਵਾ ਗਾਹਿਤਨ੍ਤਿ ‘‘ਛਿਨ੍ਨਵਸ੍ਸਾਨਂ ਵਸ੍ਸਾਵਾਸਿਕਞ੍ਚ ਇਦਾਨਿ ਉਪ੍ਪਜ੍ਜਨਕਵਸ੍ਸਾਵਾਸਿਕਞ੍ਚ ਇਮੇਸਂ ਦਾਤੁਂ ਰੁਚ੍ਚਤੀ’’ਤਿ ਅਨਨ੍ਤਰੇ ਵੁਤ੍ਤਨਯੇਨ ਅਪਲੋਕਨਂ ਕਤ੍ਵਾ ਗਾਹਿਤਂ ਸਙ੍ਘੇਨ ਦਿਨ੍ਨਤ੍ਤਾ ਵਿਬ੍ਭਨ੍ਤੋਪਿ ਲਭਤਿ. ਪਗੇਵ ਛਿਨ੍ਨਵਸ੍ਸੋ. ਪਚ੍ਚਯਵਸੇਨ ਗਾਹਿਤਂ ਪਨ ਤੇਮਾਸਂ ਵਸਿਤ੍ਵਾ ਗਹੇਤੁਂ ਅਤ੍ਤਨਾ, ਦਾਯਕੇਹਿ ਚ ਅਨੁਮਤਤ੍ਤਾ ਭਤਿਨਿਵਿਟ੍ਠਮ੍ਪਿ ਛਿਨ੍ਨਵਸ੍ਸੋਪਿ ਵਿਬ੍ਭਨ੍ਤੋਪਿ ਨ ਲਭਤੀਤਿ ਕੇਚਿ ਆਚਰਿਯਾ ਵਦਨ੍ਤਿ. ਇਦਞ੍ਚ ਪਚ੍ਛਾ ਵੁਤ੍ਤਤ੍ਤਾ ਪਮਾਣਂ. ਤੇਨੇਵ ਵਸ੍ਸੂਪਨਾਯਿਕਦਿਵਸੇ ਏਵ ਦਾਯਕੇਹਿ ਦਿਨ੍ਨਵਸ੍ਸਾਵਾਸਿਕਂ ਗਹਿਤਭਿਕ੍ਖੁਨੋ ਵਸ੍ਸਚ੍ਛੇਦਂ ਅਕਤ੍ਵਾ ਵਾਸੋਵ ਹੇਟ੍ਠਾ ਵਿਹਿਤੋ, ਨ ਪਾਨੀਯੁਪਟ੍ਠਾਨਾਦਿਭਤਿਕਰਣਵਤ੍ਤਂ. ਯਦਿ ਹਿ ਤਂ ਨਿਵਿਟ੍ਠਮੇਵ ਸਿਯਾ, ਭਤਿਕਰਣਮੇਵ ਵਿਧਾਤਬ੍ਬਂ. ਤਸ੍ਮਾ ਵਸ੍ਸਗ੍ਗੇਨ ਗਾਹਿਤਂ ਛਿਨ੍ਨਵਸ੍ਸਾਦਯੋ ਨ ਲਭਨ੍ਤੀਤਿ ਵੇਦਿਤਬ੍ਬਂ.

‘‘ਸਙ੍ਘਿਕਂ ਹੋਤੀ’’ਤਿ ਏਤੇਨ ਵੁਤ੍ਥਵਸ੍ਸਾਨਮ੍ਪਿ ਵਸ੍ਸਾਵਾਸਿਕਭਾਗੋ ਸਙ੍ਘਿਕਤੋ ਅਮੋਚਿਤੋ ਤੇਸਂ ਵਿਬ੍ਭਮੇਨ ਸਙ੍ਘਿਕੋ ਹੋਤੀਤਿ ਦਸ੍ਸੇਤਿ. ਲਭਤੀਤਿ ‘‘ਮਮ ਪਤ੍ਤਭਾਗਂ ਏਤਸ੍ਸ ਦੇਥਾ’’ਤਿ ਦਾਯਕੇ ਸਮ੍ਪਟਿਚ੍ਛਾਪੇਨ੍ਤੇਨੇਵ ਸਙ੍ਘਿਕਤੋ ਵਿਯੋਜਿਤਂ ਹੋਤੀਤਿ ਵੁਤ੍ਤਂ.

ਵਰਭਾਗਂ ਸਾਮਣੇਰਸ੍ਸਾਤਿ ਤਸ੍ਸ ਪਠਮਗਾਹਤ੍ਤਾ, ਥੇਰੇਨ ਪੁਬ੍ਬੇ ਪਠਮਭਾਗਸ੍ਸ ਗਹਿਤਤ੍ਤਾ, ਇਦਾਨਿ ਗਯ੍ਹਮਾਨਸ੍ਸ ਦੁਤਿਯਭਾਗਤ੍ਤਾ ਚ ਵੁਤ੍ਤਂ.

ਸੇਨਾਸਨਗ੍ਗਾਹਕਥਾਵਣ੍ਣਨਾ ਨਿਟ੍ਠਿਤਾ.

ਉਪਨਨ੍ਦਵਤ੍ਥੁਕਥਾਵਣ੍ਣਨਾ

੩੧੯. ਪਾਲ਼ਿਯਂ ਉਭਯਤ੍ਥ ਪਰਿਬਾਹਿਰੋਤਿ ਕਮੇਨ ਉਭਯਸ੍ਸਪਿ ਮੁਤ੍ਤਤ੍ਤਾ ਵੁਤ੍ਤਂ, ਨ ਸਬ੍ਬਥਾ ਉਭਯਤੋ ਪਰਿਬਾਹਿਰਤ੍ਤਾ. ਤੇਨਾਹ ‘‘ਪਚ੍ਛਿਮੇ…ਪੇ… ਤਿਟ੍ਠਤੀ’’ਤਿ.

੩੨੦. ਯਂ ਤਿਣ੍ਣਂ ਪਹੋਤੀਤਿ ਮਞ੍ਚਪੀਠਵਿਨਿਮੁਤ੍ਤਂ ਯਂ ਆਸਨਂ ਤਿਣ੍ਣਂ ਸੁਖਂ ਨਿਸੀਦਿਤੁਂ ਪਹੋਤਿ, ਇਦਂ ਪਚ੍ਛਿਮਦੀਘਾਸਨਂ. ਏਤ੍ਥ ਮਞ੍ਚਪੀਠਰਹਿਤੇਸੁ ਅਸਮਾਨਾਸਨਿਕਾਪਿ ਤਯੋ ਨਿਸੀਦਿਤੁਂ ਲਭਨ੍ਤਿ. ਮਞ੍ਚਪੀਠੇਸੁ ਪਨ ਦ੍ਵੇ. ਅਦੀਘਾਸਨੇਸੁ ਮਞ੍ਚਪੀਠੇਸੁ ਸਮਾਨਾਸਨਿਕਾ ਏਵ ਦ੍ਵੇ ਨਿਸੀਦਿਤੁਂ ਲਭਨ੍ਤਿ ਦੁਵਗ੍ਗਸ੍ਸੇਵ ਅਨੁਞ੍ਞਾਤਤ੍ਤਾ.

ਹਤ੍ਥਿਨਖੋ ਹੇਟ੍ਠਾਭਾਗੇ ਏਤਸ੍ਸ ਅਤ੍ਥੀਤਿ ਹਤ੍ਥਿਨਖੋ, ਪਾਸਾਦੋ. ਪਾਸਾਦਸ੍ਸ ਨਖੋ ਨਾਮ ਹੇਟ੍ਠਿਮਭਾਗੋ ਪਾਦਨਖਸਦਿਸਤ੍ਤਾ, ਸੋ ਸਬ੍ਬਦਿਸਾਸੁ ਅਨੇਕੇਹਿ ਹਤ੍ਥਿਰੂਪੇਹਿ ਸਮਲਙ੍ਕਤੋ ਠਿਤੋ. ਤਸ੍ਸੂਪਰਿ ਕਤੋ ਪਾਸਾਦੋ ਹਤ੍ਥਿਕੁਮ੍ਭੇ ਪਤਿਟ੍ਠਿਤੋ ਵਿਯ ਹੋਤੀਤਿ ਆਹ ‘‘ਹਤ੍ਥਿਕੁਮ੍ਭੇ ਪਤਿਟ੍ਠਿਤ’’ਨ੍ਤਿ. ਸੁਵਣ੍ਣਰਜਤਾਦਿਵਿਚਿਤ੍ਰਾਨੀਤਿ ਸਙ੍ਘਿਕਸੇਨਾਸਨਂ ਸਨ੍ਧਾਯ ਵੁਤ੍ਤਂ. ਪੁਗ੍ਗਲਿਕਂ ਪਨ ਸੁਵਣ੍ਣਾਦਿਵਿਚਿਤ੍ਰਂ ਭਿਕ੍ਖੁਸ੍ਸ ਸਮ੍ਪਟਿਚ੍ਛਿਤੁਮੇਵ ਨ ਵਟ੍ਟਤਿ ‘‘ਨ ਕੇਨਚਿ ਪਰਿਯਾਯੇਨ ਜਾਤਰੂਪਰਜਤਂ ਸਾਦਿਤਬ੍ਬ’’ਨ੍ਤਿ (ਮਹਾਵ. ੨੯੯) ਵੁਤ੍ਤਤ੍ਤਾ. ਤੇਨੇਵੇਤ੍ਥ ਅਟ੍ਠਕਥਾਯਂ ‘‘ਸਙ੍ਘਿਕਵਿਹਾਰੇ ਵਾ ਪੁਗ੍ਗਲਿਕਵਿਹਾਰੇ ਵਾ’’ਤਿ ਨ ਵੁਤ੍ਤਂ, ਗੋਨਕਾਦਿਅਕਪ੍ਪਿਯਭਣ੍ਡਵਿਸਯੇ ਏਵ ਵੁਤ੍ਤਂ ਏਕਭਿਕ੍ਖੁਸ੍ਸਾਪਿ ਤੇਸਂ ਗਹਣੇ ਦੋਸਾਭਾਵਾ. ਗਿਹਿਵਿਕਟਨੀਹਾਰੇਨਾਤਿ ਗਿਹੀਹਿ ਕਤਨੀਹਾਰੇਨ, ਗਿਹੀਹਿ ਅਤ੍ਤਨੋ ਸਨ੍ਤਕਂ ਅਤ੍ਥਰਿਤ੍ਵਾ ਦਿਨ੍ਨਨਿਯਾਮੇਨਾਤਿ ਅਤ੍ਥੋ. ਲਬ੍ਭਨ੍ਤੀਤਿ ਨਿਸੀਦਿਤੁਂ ਲਬ੍ਭਨ੍ਤਿ.

ਉਪਨਨ੍ਦਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

ਅਵਿਸ੍ਸਜ੍ਜਿਯਵਤ੍ਥੁਕਥਾਵਣ੍ਣਨਾ

੩੨੧. ਅਰਞ੍ਜਰੋਤਿ ਬਹੁਉਦਕਗਣ੍ਹਨਿਕਾ ਮਹਾਚਾਟਿ, ਜਲਂ ਗਣ੍ਹਿਤੁਮਲਨ੍ਤਿ ਅਰਞ੍ਜਰੋ.

ਥਾਵਰੇਨ ਚ ਥਾਵਰਨ੍ਤਿਆਦੀਸੁ ਪਞ੍ਚਸੁ ਕੋਟ੍ਠਾਸੇਸੁ ਪੁਰਿਮਦ੍ਵਯਂ ਥਾਵਰਂ, ਪਚ੍ਛਿਮਤ੍ਤਯਂ ਗਰੁਭਣ੍ਡਨ੍ਤਿ ਵੇਦਿਤਬ੍ਬਂ. ਸਮਕਮੇਵ ਦੇਤੀਤਿ ਏਤ੍ਥ ਊਨਕਂ ਦੇਨ੍ਤਮ੍ਪਿ ਵਿਹਾਰਵਤ੍ਥੁਸਾਮਨ੍ਤਂ ਗਹੇਤ੍ਵਾ ਦੂਰਤਰਂ ਦੁਕ੍ਖਗੋਪਂ ਵਿਸ੍ਸਜ੍ਜੇਤੁਂ ਵਟ੍ਟਤੀਤਿ ਦਟ੍ਠਬ੍ਬਂ. ਵਕ੍ਖਤਿ ਹਿ ‘‘ਭਿਕ੍ਖੂਨਂ ਚੇ ਮਹਗ੍ਘਤਰਂ…ਪੇ… ਸਮ੍ਪਟਿਚ੍ਛਿਤੁਂ ਵਟ੍ਟਤੀ’’ਤਿ (ਚੂਲ਼ਵ. ਅਟ੍ਠ. ੩੨੧). ਜਾਨਾਪੇਤ੍ਵਾਤਿ ਭਿਕ੍ਖੁਸਙ੍ਘਸ੍ਸ ਜਾਨਾਪੇਤ੍ਵਾ, ਅਪਲੋਕੇਤ੍ਵਾਤਿ ਅਤ੍ਥੋ. ‘‘ਨਨੁ ਤੁਮ੍ਹਾਕਂ ਬਹੁਤਰਾ ਰੁਕ੍ਖਾਤਿ ਵਤ੍ਤਬ੍ਬ’’ਨ੍ਤਿ ਇਦਂ ਸਾਮਿਕੇਸੁ ਅਤ੍ਤਨੋ ਭਣ੍ਡਸ੍ਸ ਮਹਗ੍ਘਤਂ ਅਜਾਨਿਤ੍ਵਾ ਦੇਨ੍ਤੇਸੁ ਤਂ ਞਤ੍ਵਾ ਥੇਯ੍ਯਚਿਤ੍ਤੇਨ ਗਣ੍ਹਤੋ ਅਵਹਾਰੋ ਹੋਤੀਤਿ ਵੁਤ੍ਤਂ.

ਵਿਹਾਰੇਨ ਵਿਹਾਰੋ ਪਰਿਵਤ੍ਤੇਤਬ੍ਬੋਤਿ ਸਵਤ੍ਥੁਕੇਨ ਅਞ੍ਞੇਸਂ ਭੂਮਿਯਂ ਕਤਪਾਸਾਦਾਦਿਨਾ, ਅਵਤ੍ਥੁਕੇਨ ਵਾ ਸਵਤ੍ਥੁਕਂ ਪਰਿਵਤ੍ਤੇਤਬ੍ਬਂ. ਅਵਤ੍ਥੁਕਂ ਪਨ ਅਵਤ੍ਥੁਕੇਨੇਵ ਪਰਿਵਤ੍ਤੇਤਬ੍ਬਂ. ਕੇਵਲਂ ਪਾਸਾਦਸ੍ਸ ਭੂਮਿਤੋ ਅਥਾਵਰਤ੍ਤਾ. ਏਵਂ ਥਾਵਰੇਸੁਪਿ ਥਾਵਰਵਿਭਾਗਂ ਞਤ੍ਵਾਵ ਪਰਿਵਤ੍ਤੇਤਬ੍ਬਂ.

‘‘ਕਪ੍ਪਿਯਮਞ੍ਚਾ ਸਮ੍ਪਟਿਚ੍ਛਿਤਬ੍ਬਾ’’ਤਿ ਇਮਿਨਾ ਸੁਵਣ੍ਣਾਦਿਵਿਚਿਤ੍ਤਂ ਅਕਪ੍ਪਿਯਮਞ੍ਚਂ ‘‘ਸਙ੍ਘਸ੍ਸਾ’’ਤਿ ਵੁਤ੍ਤੇਪਿ ਸਮ੍ਪਟਿਚ੍ਛਿਤੁਂ ਨ ਵਟ੍ਟਤੀਤਿ ਦਸ੍ਸੇਤਿ. ‘‘ਵਿਹਾਰਸ੍ਸ ਦੇਮਾ’’ਤਿ ਵੁਤ੍ਤੇ ਸਙ੍ਘਸ੍ਸ ਵਟ੍ਟਤਿ, ਨ ਪੁਗ੍ਗਲਸ੍ਸ ਖੇਤ੍ਤਾਦਿ ਵਿਯਾਤਿ ਦਟ੍ਠਬ੍ਬਂ. ਏਤੇਸੂਤਿ ਮਞ੍ਚਾਦੀਸੁ. ਕਪ੍ਪਿਯਾਕਪ੍ਪਿਯਂ ਵੁਤ੍ਤਨਯਮੇਵਾਤਿ ਆਸਨ੍ਦੀਤੂਲਿਕਾਦਿਵਿਨਿਚ੍ਛਯੇਸੁ ਵੁਤ੍ਤਨਯਮੇਵ. ਅਕਪ੍ਪਿਯਂ ਵਾਤਿ ਆਸਨ੍ਦੀਆਦਿ, ਪਮਾਣਾਤਿਕ੍ਕਨ੍ਤਂ ਬਿਮ੍ਬੋਹਨਾਦਿ ਚ. ਮਹਗ੍ਘਂ ਕਪ੍ਪਿਯਂ ਵਾਤਿ ਸੁਵਣ੍ਣਾਦਿਵਿਚਿਤ੍ਤਂ ਕਪ੍ਪਿਯਵੋਹਾਰੇਨ ਦਿਨ੍ਨਂ.

‘‘ਕਾਲ਼ਲੋਹ…ਪੇ… ਭਾਜੇਤਬ੍ਬੋ’’ਤਿ ਵੁਤ੍ਤਤ੍ਤਾ ਵਟ੍ਟਕਂਸਲੋਹਮਯਮ੍ਪਿ ਭਾਜਨਂ ਪੁਗ੍ਗਲਿਕਮ੍ਪਿ ਸਮ੍ਪਟਿਚ੍ਛਿਤੁਮ੍ਪਿ ਪਰਿਹਰਿਤੁਮ੍ਪਿ ਵਟ੍ਟਤਿ ਪੁਗ੍ਗਲਪਰਿਹਰਿਤਬ੍ਬਸ੍ਸੇਵ ਭਾਜੇਤਬ੍ਬਤ੍ਤਾਤਿ ਵਦਨ੍ਤਿ. ਤਂ ਉਪਰਿ ‘‘ਕਂਸਲੋਹਵਟ੍ਟਲੋਹਭਾਜਨਵਿਕਤਿ ਸਙ੍ਘਿਕਪਰਿਭੋਗੇਨ ਵਾ ਗਿਹਿਵਿਕਟਾ ਵਾ ਵਟ੍ਟਤੀ’’ਤਿਆਦਿਕੇਨ ਮਹਾਪਚ੍ਚਰਿਵਚਨੇਨ ਵਿਰੁਜ੍ਝਤਿ. ਇਮਸ੍ਸ ਹਿ ‘‘ਵਟ੍ਟਲੋਹਕਂਸਲੋਹਾਨਂ ਯੇਨ ਕੇਨਚਿ ਕਤੋ ਸੀਹਲ਼ਦੀਪੇ ਪਾਦਗ੍ਗਣ੍ਹਨਕੋ ਭਾਜੇਤਬ੍ਬੋ’’ਤਿ ਵੁਤ੍ਤਸ੍ਸ ਮਹਾਅਟ੍ਠਕਥਾਵਚਨਸ੍ਸ ਪਟਿਕ੍ਖੇਪਾਯ ਤਂ ਮਹਾਪਚ੍ਚਰਿਵਚਨਂ ਪਚ੍ਛਾ ਦਸ੍ਸਿਤਂ. ਤਸ੍ਮਾ ਵਟ੍ਟਲੋਹਕਂਸਲੋਹਮਯਂ ਯਂ ਕਿਞ੍ਚਿ ਪਾਦਗ੍ਗਣ੍ਹਨਕਵਾਰਕਮ੍ਪਿ ਉਪਾਦਾਯ ਅਭਾਜਨੀਯਮੇਵ. ਗਿਹੀਹਿ ਦਿਯ੍ਯਮਾਨਮ੍ਪਿ ਪੁਗ੍ਗਲਸ੍ਸ ਸਮ੍ਪਟਿਚ੍ਛਿਤੁਮ੍ਪਿ ਨ ਵਟ੍ਟਤਿ. ਪਾਰਿਹਾਰਿਯਂ ਨ ਵਟ੍ਟਤੀਤਿ ਪਤ੍ਤਾਦਿਪਰਿਕ੍ਖਾਰਂ ਵਿਯ ਸਯਮੇਵ ਪਟਿਸਾਮੇਤ੍ਵਾ ਪਰਿਭੁਞ੍ਜਿਤੁਂ ਨ ਵਟ੍ਟਤਿ. ਗਿਹਿਸਨ੍ਤਕਂ ਵਿਯ ਆਰਾਮਿਕਾਦਯੋ ਚੇ ਸਯਮੇਵ ਗੋਪੇਤ੍ਵਾ ਵਿਨਿਯੋਗਕਾਲੇ ਆਨੇਤ੍ਵਾ ਪਟਿਨੇਨ੍ਤਿ, ਪਰਿਭੁਞ੍ਜਿਤੁਂ ਵਟ੍ਟਤਿ. ‘‘ਪਟਿਸਾਮੇਤ੍ਵਾ ਭਿਕ੍ਖੂਨਂ ਦੇਥਾ’’ਤਿ ਵਤ੍ਤੁਮ੍ਪਿ ਵਟ੍ਟਤਿ.

ਪਣ੍ਣਸੂਚਿ ਨਾਮ ਲੇਖਨੀਤਿ ਵਦਨ੍ਤਿ. ‘‘ਅਤ੍ਤਨਾ ਲਦ੍ਧਾਨਿਪੀ’’ਤਿਆਦਿਨਾ ਪਟਿਗ੍ਗਹਣੇ ਦੋਸੋ ਨਤ੍ਥਿ, ਪਰਿਹਰਿਤ੍ਵਾ ਪਰਿਭੋਗੋਵ ਆਪਤ੍ਤਿਕਰੋਤਿ ਦਸ੍ਸੇਤਿ. ਯਥਾ ਚੇਤ੍ਥ, ਏਵਂ ਉਪਰਿ ਅਭਾਜਨੀਯਵਾਸਿਆਦੀਸੁ ਅਤ੍ਤਨੋ ਸਨ੍ਤਕੇਸੁਪਿ.

ਅਨਾਮਾਸਮ੍ਪੀਤਿ ਸੁਵਣ੍ਣਾਦਿਮਯਮ੍ਪਿ ਸਬ੍ਬਂ ਤਂ ਆਮਸਿਤ੍ਵਾਪਿ ਪਰਿਭੁਞ੍ਜਿਤੁਂ ਵਟ੍ਟਤਿ. ਉਪਕ੍ਖਰੇਤਿ ਉਪਕਰਣੇ. ਅਡ੍ਢਬਾਹੁਪ੍ਪਮਾਣਾ ਨਾਮ ਅਡ੍ਢਬਾਹੁਮਤ੍ਤਾ. ਅਡ੍ਢਬ੍ਯਾਮਮਤ੍ਤਾਤਿਪਿ ਵਦਨ੍ਤਿ. ਯੋਤ੍ਤਾਨੀਤਿ ਚਮ੍ਮਰਜ੍ਜੁਕਾ.

ਅਟ੍ਠਙ੍ਗੁਲਸੂਚਿਦਣ੍ਡਮਤ੍ਤੋਪੀਤਿ ਤਸਰਦਣ੍ਡਾਦਿਸੂਚਿਆਕਾਰਤਨੁਦਣ੍ਡਕਮਤ੍ਤੋਪਿ. ਰਿਤ੍ਤਪੋਤ੍ਥਕੋਪੀਤਿ ਅਲਿਖਿਤਪੋਤ੍ਥਕੋ. ਇਦਞ੍ਚ ਪਣ੍ਣਪ੍ਪਸਙ੍ਗੇਨ ਵੁਤ੍ਤਂ.

‘‘ਘਟ੍ਟਨਫਲਕਂ ਘਟ੍ਟਨਮੁਗ੍ਗਰੋ’’ਤਿ ਇਦਂ ਰਜਿਤਚੀਵਰਂ ਏਕਸ੍ਮਿਂ ਮਟ੍ਠੇ ਦਣ੍ਡਮੁਗ੍ਗਰੇ ਵੇਠੇਤ੍ਵਾ ਏਕਸ੍ਸ ਮਟ੍ਠਫਲਕਸ੍ਸ ਉਪਰਿ ਠਪੇਤ੍ਵਾ ਉਪਰਿ ਅਪਰੇਨ ਮਟ੍ਠਫਲਕੇਨ ਨਿਕੁਜ੍ਜਿਤ੍ਵਾ ਏਕੋ ਉਪਰਿ ਅਕ੍ਕਮਿਤ੍ਵਾ ਤਿਟ੍ਠਤਿ. ਦ੍ਵੇ ਜਨਾ ਉਪਰਿ ਫਲਕਂ ਦ੍ਵੀਸੁ ਕੋਟੀਸੁ ਗਹੇਤ੍ਵਾ ਅਪਰਾਪਰਂ ਆਕਡ੍ਢਨਵਿਕਡ੍ਢਨਂ ਕਰੋਨ੍ਤਿ, ਏਤਂ ਸਨ੍ਧਾਯ ਵੁਤ੍ਤਂ. ਹਤ੍ਥੇ ਠਪਾਪੇਤ੍ਵਾ ਹਤ੍ਥੇਨ ਪਹਰਣਂ ਪਨ ਨਿਟ੍ਠਿਤਰਜਨਸ੍ਸ ਚੀਵਰਸ੍ਸ ਅਲ੍ਲਕਾਲੇ ਕਾਤਬ੍ਬਂ. ਇਦਂ ਪਨ ਫਲਕਮੁਗ੍ਗਰੇਹਿ ਘਟ੍ਟਨਂ ਸੁਕ੍ਖਕਾਲੇ ਥਦ੍ਧਭਾਵਵਿਮੋਚਨਤ੍ਥਨ੍ਤਿ ਦਟ੍ਠਬ੍ਬਂ. ਅਮ੍ਬਣਨ੍ਤਿ ਏਕਦੋਣਿਕਨਾਵਾਫਲਕੇਹਿ ਪੋਕ੍ਖਰਣੀਸਦਿਸਂ ਕਤਂ. ਪਾਨੀਯਭਾਜਨਨ੍ਤਿਪਿ ਵਦਨ੍ਤਿ. ਰਜਨਦੋਣੀਤਿ ਏਕਦਾਰੁਨਾਵ ਕਤਂ ਰਜਨਭਾਜਨਂ. ਉਦਕਦੋਣੀਪਿ ਏਕਦਾਰੁਨਾਵ ਕਤਂ ਉਦਕਭਾਜਨਂ.

ਭੂਮਤ੍ਥਰਣਂ ਕਾਤੁਂ ਵਟ੍ਟਤੀਤਿ ਅਕਪ੍ਪਿਯਚਮ੍ਮਂ ਸਨ੍ਧਾਯ ਵੁਤ੍ਤਂ. ਤਤ੍ਥ ਭੂਮਤ੍ਥਰਣਸਙ੍ਖੇਪੇਨ ਸਯਿਤੁਮ੍ਪਿ ਵਟ੍ਟਤਿਯੇਵ. ‘‘ਪਚ੍ਚਤ੍ਥਰਣਗਤਿਕ’’ਨ੍ਤਿ ਇਮਿਨਾ ਮਞ੍ਚਾਦੀਸੁ ਅਤ੍ਥਰਿਤਬ੍ਬਂ ਮਹਾਚਮ੍ਮਂ ਏਲ਼ਕਚਮ੍ਮਂ ਨਾਮਾਤਿ ਦਸ੍ਸੇਤਿ.

ਛਤ੍ਤਮੁਟ੍ਠਿਪਣ੍ਣਨ੍ਤਿ ਤਾਲਪਣ੍ਣਂ ਸਨ੍ਧਾਯ ਵੁਤ੍ਤਂ. ਪਤ੍ਤਕਟਾਹਨ੍ਤਿ ਪਤ੍ਤਪਚਨਕਟਾਹਂ.

ਅਵਿਸ੍ਸਜ੍ਜਿਯਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

ਨਵਕਮ੍ਮਦਾਨਕਥਾਵਣ੍ਣਨਾ

੩੨੩. ਪਾਲ਼ਿਯਂ ਪਿਣ੍ਡਨਿਕ੍ਖੇਪਨਮਤ੍ਤੇਨਾਤਿਆਦੀਸੁ ਖਣ੍ਡਫੁਲ੍ਲਟ੍ਠਾਨੇ ਮਤ੍ਤਿਕਾਪਿਣ੍ਡਟ੍ਠਪਨਂ ਪਿਣ੍ਡਨਿਕ੍ਖੇਪਨਂ ਨਾਮ. ਨਵਕਮ੍ਮਨ੍ਤਿ ਨਵਕਮ੍ਮਸਮ੍ਮੁਤਿ. ਅਗ੍ਗਲ਼ਵਟ੍ਟਿ ਨਾਮ ਕਵਾਟਬਨ੍ਧੋ. ਛਾਦਨਂ ਨਾਮ ਤਿਣਾਦੀਹਿ ਗੇਹਚ੍ਛਾਦਨਂ. ਬਨ੍ਧਨਂ ਨਾਮ ਦਣ੍ਡਵਲ੍ਲਿਆਦੀਹਿ ਛਦਨਬਨ੍ਧਨਮੇਵ. ਚਤੁਹਤ੍ਥਵਿਹਾਰੇਤਿ ਵਿਤ੍ਥਾਰਪ੍ਪਮਾਣਤੋ ਵੁਤ੍ਤਂ. ਉਬ੍ਬੇਧਤੋ ਪਨ ਅਨੇਕਭੂਮਕਤ੍ਤਾ ਵਡ੍ਢਕੀਹਤ੍ਥੇਨ ਵੀਸਤਿਹਤ੍ਥੋਪਿ ਨਾਨਾਸਣ੍ਠਾਨਵਿਚਿਤ੍ਤੋਪਿ ਹੋਤਿ. ਤੇਨਸ੍ਸ ਚਤੁਵਸ੍ਸਿਕਂ ਨਵਕਮ੍ਮਂ ਵੁਤ੍ਤਂ. ਏਵਂ ਸੇਸੇਸੁਪਿ.

ਪਾਲ਼ਿਯਂ ਸਬ੍ਬੇ ਵਿਹਾਰੇਤਿ ਭੁਮ੍ਮਤ੍ਥੇ ਉਪਯੋਗਬਹੁਵਚਨਂ. ਏਕਸ੍ਸ ਸਬ੍ਬੇਸੁ ਵਿਹਾਰੇਸੁ ਨਵਕਮ੍ਮਂ ਦੇਤੀਤਿ ਅਤ੍ਥੋ. ਸਬ੍ਬਕਾਲਂ ਪਟਿਬਾਹਨ੍ਤੀਤਿ ਨਵਕਮ੍ਮਿਕਾ ਅਤ੍ਤਨੋ ਗਾਹਿਤਂ ਵਰਸੇਯ੍ਯਂ ਸਮ੍ਪਤ੍ਤਾਨਂ ਯਥਾਵੁਡ੍ਢਂ ਅਕਤ੍ਵਾ ਉਤੁਕਾਲੇਪਿ ਪਟਿਬਾਹਨ੍ਤਿ.

‘‘ਸਚੇ ਸੋ ਆਵਾਸੋ ਜੀਰਤੀ’’ਤਿਆਦਿ ਪਾਲ਼ਿਮੁਤ੍ਤਕਵਿਨਿਚ੍ਛਯੋ. ਮਞ੍ਚਟ੍ਠਾਨਂ ਦਤ੍ਵਾਤਿ ਮਞ੍ਚਟ੍ਠਾਨਂ ਪੁਗ੍ਗਲਿਕਂ ਦਤ੍ਵਾ. ਤਿਭਾਗਨ੍ਤਿ ਤਤਿਯਭਾਗਂ. ਏਵਂ ਵਿਸ੍ਸਜ੍ਜਨਮ੍ਪਿ ਥਾਵਰੇਨ ਥਾਵਰਪਰਿਵਤ੍ਤਨਟ੍ਠਾਨੇ ਏਵ ਪਵਿਸਤਿ, ਨ ਇਤਰਥਾ ਸਬ੍ਬਸੇਨਾਸਨਾਨਂ ਵਿਨਸ੍ਸਨਤੋ. ਸਚੇ ਸਦ੍ਧਿਵਿਹਾਰਿਕਾਨਂ ਦਾਤੁਕਾਮੋ ਹੋਤੀਤਿ ਸਚੇ ਸੋ ਸਙ੍ਘਸ੍ਸ ਭਣ੍ਡਕਟ੍ਠਪਨਟ੍ਠਾਨਂ ਵਾ ਅਞ੍ਞੇਸਂ ਭਿਕ੍ਖੂਨਂ ਵਸਨਟ੍ਠਾਨਂ ਵਾ ਦਾਤੁਂ ਨ ਇਚ੍ਛਤਿ, ਅਤ੍ਤਨੋ ਸਦ੍ਧਿਵਿਹਾਰਿਕਾਨਞ੍ਞੇਵ ਦਾਤੁਕਾਮੋ ਹੋਤਿ, ਤਾਦਿਸਸ੍ਸ ਤੁਯ੍ਹਂ ਪੁਗ੍ਗਲਿਕਮੇਵ ਕਤ੍ਵਾ ਜਗ੍ਗਾਤਿ ਨ ਸਬ੍ਬਂ ਤਸ੍ਸ ਦਾਤਬ੍ਬਨ੍ਤਿ ਅਧਿਪ੍ਪਾਯੋ. ਤਤ੍ਥ ਪਨ ਕਤ੍ਤਬ੍ਬਵਿਧਿਂ ਦਸ੍ਸੇਨ੍ਤੋ ਆਹ ‘‘ਕਮ੍ਮ’’ਨ੍ਤਿਆਦਿ. ਏਵਞ੍ਹੀਤਿਆਦਿਮ੍ਹਿ ਵਯਾਨੁਰੂਪਂ ਤਤਿਯਭਾਗੇ ਵਾ ਉਪਡ੍ਢਭਾਗੇ ਵਾ ਗਹਿਤੇ ਤਂ ਭਾਗਂ ਦਾਤੁਂ ਲਭਤੀਤਿ ਅਤ੍ਥੋ.

ਯੇਨਾਤਿ ਤੇਸੁ ਦ੍ਵੀਸੁ ਭਿਕ੍ਖੂਸੁ ਯੇਨ. ਸੋ ਸਾਮੀਤਿ ਤਸ੍ਸਾ ਭੂਮਿਯਾ ਵਿਹਾਰਕਰਣੇ ਸੋਵ ਸਾਮੀ, ਤਂ ਪਟਿਬਾਹਿਤ੍ਵਾ ਇਤਰੇਨ ਨ ਕਾਤਬ੍ਬਨ੍ਤਿ ਅਧਿਪ੍ਪਾਯੋ. ਸੋ ਹਿ ਪਠਮਂ ਗਹਿਤੋ. ਅਕਤਟ੍ਠਾਨੇਤਿ ਚਯਾਦੀਨਂ ਅਕਤਪੁਬ੍ਬਟ੍ਠਾਨੇ. ਚਯਂ ਵਾ ਪਮੁਖਂ ਵਾਤਿ ਸਙ੍ਘਿਕਸੇਨਾਸਨਂ ਨਿਸ੍ਸਾਯ ਤਤੋ ਬਹਿ ਚਯਂ ਬਨ੍ਧਿਤ੍ਵਾ, ਏਕਂ ਸੇਨਾਸਨਂ ਵਾ. ਬਹਿਕੁਟ੍ਟੇਤਿ ਕੁਟ੍ਟਤੋ ਬਹਿ, ਅਤ੍ਤਨੋ ਕਤਟ੍ਠਾਨੇਤਿ ਅਤ੍ਥੋ.

ਨਵਕਮ੍ਮਦਾਨਕਥਾਵਣ੍ਣਨਾ ਨਿਟ੍ਠਿਤਾ.

ਅਞ੍ਞਤ੍ਰਪਰਿਭੋਗਪਟਿਕ੍ਖੇਪਾਦਿਕਥਾਵਣ੍ਣਨਾ

੩੨੪. ਵਡ੍ਢਿਕਮ੍ਮਤ੍ਥਾਯਾਤਿ ਯਥਾ ਤਮ੍ਮੂਲਗ੍ਘਤੋ ਨ ਪਰਿਹਾਯਤਿ, ਏਵਂ ਕਤ੍ਤਬ੍ਬਸ੍ਸ ਏਵਂ ਨਿਪ੍ਫਾਦੇਤਬ੍ਬਸ੍ਸ ਮਞ੍ਚਪੀਠਾਦਿਨੋ ਅਤ੍ਥਾਯ.

ਚਕ੍ਕਲਿਕਨ੍ਤਿ ਪਾਦਪੁਞ੍ਛਨਤ੍ਥਂ ਚਕ੍ਕਾਕਾਰੇਨ ਕਤਂ. ਪਰਿਭਣ੍ਡਕਤਭੂਮਿ ਵਾਤਿ ਕਾਲ਼ਵਣ੍ਣਾਦਿਕਤਸਣ੍ਹਭੂਮਿ ਵਾ. ਸੇਨਾਸਨਂ ਵਾਤਿ ਮਞ੍ਚਪੀਠਾਦਿ ਵਾ.

‘‘ਤਥੇਵ ਵਲ਼ਞ੍ਜੇਤੁਂ ਵਟ੍ਟਤੀ’’ਤਿ ਇਮਿਨਾ ਨੇਵਾਸਿਕੇਹਿ ਧੋਤਪਾਦਾਦੀਹਿ ਵਲ਼ਞ੍ਜਨਟ੍ਠਾਨੇ ਸਞ੍ਚਿਚ੍ਚ ਅਧੋਤਪਾਦਾਦੀਹਿ ਵਲ਼ਞ੍ਜਨ੍ਤਸ੍ਸੇਵ ਆਪਤ੍ਤਿ ਪਞ੍ਞਤ੍ਤਾਤਿ ਦਸ੍ਸੇਤਿ.

‘‘ਦ੍ਵਾਰਮ੍ਪੀ’’ਤਿਆਦਿਨਾ ਸਾਮਞ੍ਞਤੋ ਵੁਤ੍ਤਤ੍ਤਾ ਦ੍ਵਾਰਵਾਤਪਾਨਾਦਯੋ ਅਪਰਿਕਮ੍ਮਕਤਾਪਿ ਨ ਅਪਸ੍ਸਯਿਤਬ੍ਬਾ. ਅਜਾਨਿਤ੍ਵਾ ਅਪਸ੍ਸਯਨ੍ਤਸ੍ਸਪਿ ਇਧ ਲੋਮਗਣਨਾਯ ਆਪਤ੍ਤਿ.

ਅਞ੍ਞਤ੍ਰਪਰਿਭੋਗਪਟਿਕ੍ਖੇਪਾਦਿਕਥਾਵਣ੍ਣਨਾ ਨਿਟ੍ਠਿਤਾ.

ਸਙ੍ਘਭਤ੍ਤਾਦਿਅਨੁਜਾਨਨਕਥਾਵਣ੍ਣਨਾ

੩੨੫. ਉਦ੍ਦੇਸਭਤ੍ਤਂ ਨਿਮਨ੍ਤਨਨ੍ਤਿ ਇਮਂ ਵੋਹਾਰਂ ਪਤ੍ਤਾਨੀਤਿ ਏਤ੍ਥ ਇਤਿ-ਸਦ੍ਦੋ ਆਦਿਅਤ੍ਥੋ, ਉਦ੍ਦੇਸਭਤ੍ਤਂ ਨਿਮਨ੍ਤਨਨ੍ਤਿਆਦਿਵੋਹਾਰਂ ਪਤ੍ਤਾਨੀਤਿ ਅਤ੍ਥੋ. ਤਮ੍ਪੀਤਿ ਸਙ੍ਘਭਤ੍ਤਮ੍ਪਿ.

ਸਙ੍ਘਭਤ੍ਤਾਦਿਅਨੁਜਾਨਨਕਥਾਵਣ੍ਣਨਾ ਨਿਟ੍ਠਿਤਾ.

ਉਦ੍ਦੇਸਭਤ੍ਤਕਥਾਵਣ੍ਣਨਾ

ਭੋਜਨਸਾਲਾਯਾਤਿ ਭਤ੍ਤੁਦ੍ਦੇਸਟ੍ਠਾਨਂ ਸਨ੍ਧਾਯ ਵੁਤ੍ਤਂ. ਏਕਵਲ਼ਞ੍ਜਨ੍ਤਿ ਏਕਦ੍ਵਾਰੇਨ ਵਲ਼ਞ੍ਜਿਤਬ੍ਬਂ. ਨਾਨਾਨਿਵੇਸਨੇਸੂਤਿ ਨਾਨਾਕੁਲਸ੍ਸ ਨਾਨੂਪਚਾਰੇਸੁ ਨਿਵੇਸਨੇਸੁ.

ਨਿਸਿਨ੍ਨਸ੍ਸਪਿ ਨਿਦ੍ਦਾਯਨ੍ਤਸ੍ਸਪੀਤਿ ਅਨਾਦਰੇ ਸਾਮਿਵਚਨਂ, ਵੁਡ੍ਢਤਰੇ ਨਿਦ੍ਦਾਯਨ੍ਤੇ ਨਵਕਸ੍ਸ ਗਾਹਿਤਂ ਸੁਗ੍ਗਹਿਤਨ੍ਤਿ ਅਤ੍ਥੋ.

ਵਿਸ੍ਸਟ੍ਠਦੂਤੋਤਿ ਯਥਾਰੁਚਿ ਵਤ੍ਤੁਂ ਲਭਨਤੋ ਨਿਰਾਸਙ੍ਕਦੂਤੋ. ਪੁਚ੍ਛਾਸਭਾਗੇਨਾਤਿ ਪੁਚ੍ਛਾਵਚਨਪਟਿਭਾਗੇਨ. ‘‘ਏਕਾ ਕੂਟਟ੍ਠਿਤਿਕਾ ਨਾਮਾ’’ਤਿ ਵੁਤ੍ਤਮੇਵਤ੍ਥਂ ਵਿਭਾਵੇਤੁਂ ‘‘ਰਞ੍ਞੋ ਵਾ ਹੀ’’ਤਿਆਦਿ ਵੁਤ੍ਤਂ.

ਸਬ੍ਬਂ ਪਤ੍ਤਸ੍ਸਾਮਿਕਸ੍ਸ ਹੋਤੀਤਿ ਚੀਵਰਾਦਿਕਮ੍ਪਿ ਸਬ੍ਬਂ ਪਤ੍ਤਸ੍ਸਾਮਿਕਸ੍ਸੇਵ ਹੋਤਿ, ਮਯਾ ਭਤ੍ਤਮੇਵ ਸਨ੍ਧਾਯ ਵੁਤ੍ਤਂ, ਨ ਚੀਵਰਾਦਿਨ੍ਤਿ ਵਤ੍ਵਾ ਗਹੇਤੁਂ ਨ ਵਟ੍ਟਤੀਤਿ ਅਤ੍ਥੋ.

ਅਕਤਭਾਗੋਨਾਮਾਤਿ ਆਗਨ੍ਤੁਕਭਾਗੋ ਨਾਮ, ਅਦਿਨ੍ਨਪੁਬ੍ਬਭਾਗੋਤਿ ਅਤ੍ਥੋ.

ਕਿਂ ਆਹਰੀਯਤੀਤਿ ਅਵਤ੍ਵਾਤਿ ‘‘ਕਤਰਭਤ੍ਤਂ ਵਾ ਤਯਾ ਆਹਰੀਯਤੀ’’ਤਿ ਦਾਯਕਂ ਅਪੁਚ੍ਛਿਤ੍ਵਾ. ਪਕਤਿਟ੍ਠਿਤਿਕਾਯਾਤਿ ਉਦ੍ਦੇਸਭਤ੍ਤਟ੍ਠਿਤਿਕਾਯ.

ਉਦ੍ਦੇਸਭਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

ਨਿਮਨ੍ਤਨਭਤ੍ਤਕਥਾਵਣ੍ਣਨਾ

ਵਿਚ੍ਛਿਨ੍ਦਿਤ੍ਵਾਤਿ ‘‘ਭਤ੍ਤਂ ਗਣ੍ਹਥਾ’’ਤਿ ਪਦਂ ਅਵਤ੍ਵਾ. ਤੇਨੇਵਾਹ ‘‘ਭਤ੍ਤਨ੍ਤਿ ਅਵਦਨ੍ਤੇਨਾ’’ਤਿ.

ਆਲੋਪਸਙ੍ਖੇਪੇਨਾਤਿ ਏਕੇਕਪਿਣ੍ਡਵਸੇਨ, ਏਵਞ੍ਚ ਭਾਜਨਂ ਉਦ੍ਦੇਸਭਤ੍ਤੇ ਨ ਵਟ੍ਟਤਿ. ਤਤ੍ਥ ਹਿ ਏਕਸ੍ਸ ਪਹੋਨਕਪ੍ਪਮਾਣੇਨੇਵ ਭਾਜੇਤਬ੍ਬਂ.

ਆਰੁਲ਼੍ਹਾਯੇਵ ਮਾਤਿਕਂ, ਸਙ੍ਘਤੋ ਅਟ੍ਠ ਭਿਕ੍ਖੂਤਿ ਏਤ੍ਥ ਯੇ ਮਾਤਿਕਂ ਆਰੁਲ਼੍ਹਾ, ਤੇ ਅਟ੍ਠ ਭਿਕ੍ਖੂਤਿ ਯੋਜੇਤਬ੍ਬਂ. ਉਦ੍ਦੇਸਭਤ੍ਤਨਿਮਨ੍ਤਨਭਤ੍ਤਾਦਿਸਙ੍ਘਿਕਭਤ੍ਤਮਾਤਿਕਾਸੁ ਨਿਮਨ੍ਤਨਭਤ੍ਤਮਾਤਿਕਾਯ ਠਿਤਿਵਸੇਨ ਆਰੁਲ਼੍ਹੇ ਭਤ੍ਤੁਦ੍ਦੇਸਕੇਨ ਵਾ ਸਯਂ ਵਾ ਸਙ੍ਘਤੋ ਉਦ੍ਦਿਸਾਪੇਤ੍ਵਾ ਗਹੇਤ੍ਵਾ ਗਨ੍ਤਬ੍ਬਂ, ਨ ਅਤ੍ਤਨੋ ਰੁਚਿਤੇ ਗਹੇਤ੍ਵਾਤਿ ਅਧਿਪ੍ਪਾਯੋ. ਮਾਤਿਕਂ ਆਰੋਪੇਤ੍ਵਾਤਿ ‘‘ਸਙ੍ਘਤੋ ਗਣ੍ਹਾਮੀ’’ਤਿਆਦਿਨਾ ਵੁਤ੍ਤਮਾਤਿਕਾਭੇਦਂ ਦਾਯਕਸ੍ਸ ਵਿਞ੍ਞਾਪੇਤ੍ਵਾਤਿ ਅਤ੍ਥੋ.

ਪਟਿਬਦ੍ਧਕਾਲਤੋ ਪਨ ਪਟ੍ਠਾਯਾਤਿ ਤਤ੍ਥੇਵ ਵਾਸਸ੍ਸ ਨਿਬਦ੍ਧਕਾਲਤੋ ਪਟ੍ਠਾਯ.

ਨਿਮਨ੍ਤਨਭਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

ਸਲਾਕਭਤ੍ਤਕਥਾਵਣ੍ਣਨਾ

ਉਪਨਿਬਨ੍ਧਿਤ੍ਵਾਤਿ ਲਿਖਿਤ੍ਵਾ. ਗਾਮਵਸੇਨਪੀਤਿ ਯੇਭੁਯ੍ਯੇਨ ਸਮਲਾਭਗਾਮਵਸੇਨਪਿ. ਬਹੂਨਿ ਸਲਾਕਭਤ੍ਤਾਨੀਤਿ ਤਿਂਸਂ ਵਾ ਚਤ੍ਤਾਰੀਸਂ ਵਾ ਭਤ੍ਤਾਨਿ. ‘‘ਸਚੇ ਹੋਨ੍ਤੀ’’ਤਿ ਅਜ੍ਝਾਹਰਿਤ੍ਵਾ ਯੋਜੇਤਬ੍ਬਂ.

ਸਲ੍ਲਕ੍ਖੇਤ੍ਵਾਤਿ ਤਾਨਿ ਭਤ੍ਤਾਨਿ ਪਮਾਣਵਸੇਨ ਸਲ੍ਲਕ੍ਖੇਤ੍ਵਾ. ਨਿਗ੍ਗਹੇਨ ਦਤ੍ਵਾਤਿ ਦੂਰਂ ਗਨ੍ਤੁਂ ਅਨਿਚ੍ਛਨ੍ਤਸ੍ਸ ਨਿਗ੍ਗਹੇਨ ਸਮ੍ਪਟਿਚ੍ਛਾਪੇਤ੍ਵਾ ਦਤ੍ਵਾ. ਪੁਨ ਵਿਹਾਰਂ ਆਗਨ੍ਤ੍ਵਾਤਿ ਏਤ੍ਥ ਵਿਹਾਰਂ ਅਨਾਗਨ੍ਤ੍ਵਾ ਭਤ੍ਤਂ ਗਹੇਤ੍ਵਾ ਪਚ੍ਛਾ ਵਿਹਾਰੇ ਅਤ੍ਤਨੋ ਪਾਪੇਤ੍ਵਾ ਭੁਞ੍ਜਿਤੁਮ੍ਪਿ ਵਟ੍ਟਤਿ.

ਏਕਗੇਹਵਸੇਨਾਤਿ ਵੀਥਿਯਮ੍ਪਿ ਏਕਪਸ੍ਸੇ ਘਰਪਾਲ਼ਿਯਾ ਵਸੇਨ. ਉਦ੍ਦਿਸਿਤ੍ਵਾਪੀਤਿ ਅਸੁਕਕੁਲੇ ਸਲਾਕਭਤ੍ਤਾਨਿ ਤੁਯ੍ਹਂ ਪਾਪੁਣਨ੍ਤੀਤਿ ਵਤ੍ਵਾ.

ਵਾਰਗਾਮੇਤਿ ਅਤਿਦੂਰਤ੍ਤਾ ਵਾਰੇਨ ਗਨ੍ਤਬ੍ਬਗਾਮੇ. ਸਟ੍ਠਿਤੋ ਵਾ ਪਣ੍ਣਾਸਤੋ ਵਾਤਿ ਦਣ੍ਡਕਮ੍ਮਤ੍ਥਾਯ ਉਦਕਘਟਂ ਸਨ੍ਧਾਯ ਵੁਤ੍ਤਂ. ਵਿਹਾਰਵਾਰੋਤਿ ਸਬ੍ਬਭਿਕ੍ਖੂਸੁ ਭਿਕ੍ਖਤ੍ਥਾਯ ਗਤੇਸੁ ਵਿਹਾਰਰਕ੍ਖਣਵਾਰੋ.

ਤੇਸਨ੍ਤਿ ਵਿਹਾਰਵਾਰਿਕਾਨਂ. ਫਾਤਿਕਮ੍ਮਮੇਵਾਤਿ ਵਿਹਾਰਰਕ੍ਖਣਕਿਚ੍ਚਸ੍ਸ ਪਹੋਨਕਪਟਿਪਾਦਨਮੇਵ. ਏਕਸ੍ਸੇਵ ਪਾਪੁਣਨ੍ਤੀਤਿ ਦਿਵਸੇ ਦਿਵਸੇ ਏਕੇਕਸ੍ਸੇਵ ਪਾਪਿਤਾਨੀਤਿ ਅਤ੍ਥੋ.

ਰਸਸਲਾਕਨ੍ਤਿ ਉਚ੍ਛੁਰਸਸਲਾਕਂ. ‘‘ਸਲਾਕਵਸੇਨ ਗਾਹਿਤਤ੍ਤਾ ਪਨ ਨ ਸਾਦਿਤਬ੍ਬਾ’’ਤਿ ਇਦਂ ਅਸਾਰੁਪ੍ਪਵਸੇਨ ਵੁਤ੍ਤਂ, ਨ ਧੁਤਙ੍ਗਭੇਦਵਸੇਨ. ‘‘ਸਙ੍ਘਤੋ ਨਿਰਾਮਿਸਸਲਾਕਾ…ਪੇ… ਵਟ੍ਟਤਿਯੇਵਾ’’ਤਿ (ਵਿਸੁਦ੍ਧਿ. ੧.੨੬) ਹਿ ਵਿਸੁਦ੍ਧਿਮਗ੍ਗੇ ਵੁਤ੍ਤਂ. ਅਗ੍ਗਭਿਕ੍ਖਾਮਤ੍ਤਨ੍ਤਿ ਏਕਕਟਚ੍ਛੁਭਿਕ੍ਖਾਮਤ੍ਤਂ. ਲਦ੍ਧਾ ਵਾ ਅਲਦ੍ਧਾ ਵਾ ਸ੍ਵੇਪਿ ਗਣ੍ਹੇਯ੍ਯਾਸੀਤਿ ਲਦ੍ਧੇਪਿ ਅਪ੍ਪਮਤ੍ਤਤਾਯ ਵੁਤ੍ਤਂ. ਤੇਨਾਹ ‘‘ਯਾਵਦਤ੍ਥਂ ਲਭਤਿ…ਪੇ… ਅਲਭਿਤ੍ਵਾ ‘ਸ੍ਵੇ ਗਣ੍ਹੇਯ੍ਯਾਸੀ’ਤਿ ਵਤ੍ਤਬ੍ਬੋ’’ਤਿ.

ਤਤ੍ਥਾਤਿ ਤਸ੍ਮਿਂ ਦਿਸਾਭਾਗੇ. ਤਂ ਗਹੇਤ੍ਵਾਤਿ ਤਂ ਵਾਰਗਾਮੇ ਸਲਾਕਂ ਅਤ੍ਤਨੋ ਗਹੇਤ੍ਵਾ. ਤੇਨਾਤਿ ਦਿਸਂਗਮਿਕਤੋ ਅਞ੍ਞੇਨ ਤਸ੍ਮਿਂ ਦਿਸਂਗਮਿਕੇ. ਦੇਵਸਿਕਂ ਪਾਪੇਤਬ੍ਬਾਤਿ ਉਪਚਾਰਸੀਮਾਯ ਠਿਤਸ੍ਸ ਯਸ੍ਸ ਕਸ੍ਸਚਿ ਵਸ੍ਸਗ੍ਗੇਨ ਪਾਪੇਤਬ੍ਬਾ. ਏਵਂ ਏਤੇਸੁ ਅਗਤੇਸੁ ਆਸਨ੍ਨਵਿਹਾਰੇ ਭਿਕ੍ਖੂਨਂ ਭੁਞ੍ਜਿਤੁਂ ਵਟ੍ਟਤਿ ਇਤਰਥਾ ਸਙ੍ਘਿਕਤੋ.

ਅਮ੍ਹਾਕਂ ਗੋਚਰਗਾਮੇਵਾਤਿ ਸਲਾਕਭਤ੍ਤਦਾਯਕਾਨਂ ਗਾਮਂ ਸਨ੍ਧਾਯ ਵੁਤ੍ਤਂ. ਵਿਹਾਰੇ ਥੇਰਸ੍ਸ ਪਤ੍ਤਸਲਾਕਭਤ੍ਤਨ੍ਤਿ ਵਿਹਾਰੇ ਏਕੇਕਸ੍ਸੇਵ ਓਹੀਨਤ੍ਥੇਰਸ੍ਸ ਸਬ੍ਬਸਲਾਕਾਨਂ ਅਤ੍ਤਨੋ ਪਾਪਨਵਸੇਨ ਪਤ੍ਤਸਲਾਕਭਤ੍ਤਂ.

ਸਲਾਕਭਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

ਪਕ੍ਖਿਕਭਤ੍ਤਾਦਿਕਥਾਵਣ੍ਣਨਾ

‘‘ਸ੍ਵੇ ਪਕ੍ਖੋ’’ਤਿ ਅਜ੍ਜ ਪਕ੍ਖਿਕਂ ਨ ਗਾਹੇਤਬ੍ਬਨ੍ਤਿ ਅਟ੍ਠਮਿਯਾ ਭੁਞ੍ਜਿਤਬ੍ਬਂ ਸਤ੍ਤਮਿਯਾ ਭੁਞ੍ਜਨਤ੍ਥਾਯ ਨ ਗਾਹੇਤਬ੍ਬਂ, ਦਾਯਕੇਹਿ ਨਿਯਮਿਤਦਿਵਸੇਨੇਵ ਗਾਹੇਤਬ੍ਬਨ੍ਤਿ ਅਤ੍ਥੋ. ਤੇਨਾਹ ‘‘ਸਚੇ ਪਨਾ’’ਤਿਆਦਿ. ਸ੍ਵੇ ਲੂਖਨ੍ਤਿ ਅਜ੍ਜ ਆਵਾਹਮਙ੍ਗਲਾਦਿਕਰਣਤੋ ਅਤਿਪਣੀਤਭੋਜਨਂ ਕਰੀਯਤਿ, ਸ੍ਵੇ ਤਥਾ ਨ ਭਵਿਸ੍ਸਤਿ, ਅਜ੍ਜੇਵ ਭਿਕ੍ਖੂ ਭੋਜੇਸ੍ਸਾਮੀਤਿ ਅਧਿਪ੍ਪਾਯੋ.

ਪਕ੍ਖਿਕਭਤ੍ਤਤੋ ਉਪੋਸਥਿਕਸ੍ਸ ਭੇਦਂ ਦਸ੍ਸੇਨ੍ਤੋ ਆਹ ‘‘ਉਪੋਸਥਙ੍ਗਾਨਿ ਸਮਾਦਿਯਿਤ੍ਵਾ’’ਤਿਆਦਿ. ਨਿਬਨ੍ਧਾਪਿਤਨ੍ਤਿ ‘‘ਅਸੁਕਵਿਹਾਰੇ ਆਗਨ੍ਤੁਕਾ ਭੁਞ੍ਜਨ੍ਤੂ’’ਤਿ ਨਿਯਮਿਤਂ.

ਗਮਿਕੋ ਆਗਨ੍ਤੁਕਭਤ੍ਤਮ੍ਪੀਤਿ ਗਾਮਨ੍ਤਰਤੋ ਆਗਨ੍ਤ੍ਵਾ ਅਵੂਪਸਨ੍ਤੇਨ ਗਮਿਕਚਿਤ੍ਤੇਨ ਵਸਿਤ੍ਵਾ ਪੁਨ ਅਞ੍ਞਤ੍ਥ ਗਚ੍ਛਨ੍ਤਂ ਸਨ੍ਧਾਯ ਵੁਤ੍ਤਂ. ਆਵਾਸਿਕਸ੍ਸ ਪਨ ਗਨ੍ਤੁਕਾਮਸ੍ਸ ਗਮਿਕਭਤ੍ਤਮੇਵ ਲਬ੍ਭਤਿ. ‘‘ਲੇਸਂ ਓਡ੍ਡੇਤ੍ਵਾ’’ਤਿ ਵੁਤ੍ਤਤ੍ਤਾ ਲੇਸਾਭਾਵੇ ਯਾਵ ਗਮਨਪਰਿਬਨ੍ਧੋ ਵਿਗਚ੍ਛਤਿ, ਤਾਵ ਭੁਞ੍ਜਿਤੁਂ ਵਟ੍ਟਤੀਤਿ ਞਾਪਿਤਨ੍ਤਿ ਦਟ੍ਠਬ੍ਬਂ.

ਤਣ੍ਡੁਲਾਦੀਨਿ ਪੇਸੇਨ੍ਤਿ…ਪੇ… ਵਟ੍ਟਤੀਤਿ ਅਭਿਹਟਭਿਕ੍ਖਤ੍ਤਾ ਵਟ੍ਟਤਿ. ਤਥਾ ਪਟਿਗ੍ਗਹਿਤਤ੍ਤਾਤਿ ਭਿਕ੍ਖਾਨਾਮੇਨ ਪਟਿਗ੍ਗਹਿਤਤ੍ਤਾ.

ਅਵਿਭਤ੍ਤਂ ਸਙ੍ਘਿਕਂ ਭਣ੍ਡਨ੍ਤਿ ਕੁਕ੍ਕੁਚ੍ਚੁਪ੍ਪਤ੍ਤਿਆਕਾਰਦਸ੍ਸਨਂ. ਏਵਂ ਕੁਕ੍ਕੁਚ੍ਚਂ ਕਤ੍ਵਾ ਪੁਚ੍ਛਿਤਬ੍ਬਕਿਚ੍ਚਂ ਨਤ੍ਥਿ, ਅਪੁਚ੍ਛਿਤ੍ਵਾ ਦਾਤਬ੍ਬਨ੍ਤਿ ਅਧਿਪ੍ਪਾਯੋ.

ਪਕ੍ਖਿਕਭਤ੍ਤਾਦਿਕਥਾਵਣ੍ਣਨਾ ਨਿਟ੍ਠਿਤਾ.

ਸੇਨਾਸਨਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.