੫. ਖੁਦ੍ਦਕਵਤ੍ਥੁਕ੍ਖਨ੍ਧਕੋ

ਖੁਦ੍ਦਕਵਤ੍ਥੁਕਥਾਵਣ੍ਣਨਾ

੨੪੩. ਖੁਦ੍ਦਕਵਤ੍ਥੁਕ੍ਖਨ੍ਧਕੇ ਅਟ੍ਠਪਦਾਕਾਰੇਨਾਤਿ ਜੂਤਫਲਕੇ ਅਟ੍ਠਗਬ੍ਭਰਾਜਿਆਕਾਰੇਨ. ਮਲ੍ਲਕਮੂਲਸਣ੍ਠਾਨੇਨਾਤਿ ਖੇਲ਼ਮਲ੍ਲਕਮੂਲਸਣ੍ਠਾਨੇਨ. ਇਦਞ੍ਚ ਵਟ੍ਟਾਧਾਰਕਂ ਸਨ੍ਧਾਯ ਵੁਤ੍ਤਂ, ਕਣ੍ਟਕੇ ਉਟ੍ਠਾਪੇਤ੍ਵਾ ਕਤਵਟ੍ਟਕਪਾਲਸ੍ਸੇਤਂ ਅਧਿਵਚਨਂ.

੨੪੪. ਪੁਥੁਪਾਣਿਕਨ੍ਤਿ ਮੁਟ੍ਠਿਂ ਅਕਤ੍ਵਾ ਵਿਕਸਿਤਹਤ੍ਥਤਲੇਹਿ ਪਿਟ੍ਠਿਪਰਿਕਮ੍ਮਂ ਵੁਚ੍ਚਤਿ. ਏਤਮੇਵ ਸਨ੍ਧਾਯ ‘‘ਹਤ੍ਥਪਰਿਕਮ੍ਮ’’ਨ੍ਤਿ ਵੁਤ੍ਤਂ.

੨੪੫. ਮੁਤ੍ਤੋਲਮ੍ਬਕਾਦੀਨਨ੍ਤਿ ਆਦਿ-ਸਦ੍ਦੇਨ ਕੁਣ੍ਡਲਾਦਿਂ ਸਙ੍ਗਣ੍ਹਾਤਿ. ਪਲਮ੍ਬਕਸੁਤ੍ਤਨ੍ਤਿ ਬ੍ਰਾਹ੍ਮਣਾਨਂ ਯਞ੍ਞੋਪਚਿਤਸੁਤ੍ਤਾਦਿਆਕਾਰਂ ਵੁਚ੍ਚਤਿ. ਵਲਯਨ੍ਤਿ ਹਤ੍ਥਪਾਦਵਲਯਂ.

੨੪੬. ਦ੍ਵਙ੍ਗੁਲੇਤਿ ਉਪਯੋਗਬਹੁਵਚਨਂ, ਦ੍ਵਙ੍ਗੁਲਪ੍ਪਮਾਣਂ ਅਤਿਕ੍ਕਾਮੇਤੁਂ ਨ ਵਟ੍ਟਤੀਤਿ ਅਤ੍ਥੋ. ਏਤ੍ਥ ਚ ਦੁਮਾਸਸ੍ਸ ਵਾ ਦ੍ਵਙ੍ਗੁਲਸ੍ਸ ਵਾ ਅਤਿਕ੍ਕਨ੍ਤਭਾਵਂ ਅਜਾਨਨ੍ਤਸ੍ਸਾਪਿ ਕੇਸਮਸ੍ਸੁਗਣਨਾਯ ਅਚਿਤ੍ਤਕਾਪਤ੍ਤਿਯੋ ਹੋਨ੍ਤੀਤਿ ਵਦਨ੍ਤਿ.

ਕੋਚ੍ਛੇਨਾਤਿ ਉਸੀਰਤਿਣਾਦੀਨਿ ਬਨ੍ਧਿਤ੍ਵਾ ਸਮਂ ਛਿਨ੍ਦਿਤ੍ਵਾ ਗਹਿਤਕੋਚ੍ਛੇਨ. ਚਿਕ੍ਕਲੇਨਾਤਿ ਸਿਲੇਸਯੁਤ੍ਤਤੇਲੇਨ. ਉਣ੍ਹਾਭਿਤਤ੍ਤਰਜਸਿਰਾਨਮ੍ਪੀਤਿ ਉਣ੍ਹਾਭਿਤਤ੍ਤਾਨਂ ਰਜੋਕਿਣ੍ਣਸਿਰਾਨਂ. ਅਦ੍ਦਹਤ੍ਥੇਨਾਤਿ ਅਲ੍ਲਹਤ੍ਥੇਨ.

੨੪੮-੯. ਸਾਧੁਗੀਤਨ੍ਤਿ ਅਨਿਚ੍ਚਤਾਦਿਪਟਿਸਞ੍ਞੁਤ੍ਤਂ ਗੀਤਂ. ਚਤੁਰਸ੍ਸੇਨ ਵਤ੍ਤੇਨਾਤਿ ਪਰਿਪੁਣ੍ਣੇਨ ਉਚ੍ਚਾਰਣਵਤ੍ਤੇਨ. ਤਰਙ੍ਗਵਤ੍ਤਾਦੀਨਂ ਸਬ੍ਬੇਸਮ੍ਪਿ ਸਾਮਞ੍ਞਲਕ੍ਖਣਂ ਦਸ੍ਸੇਤੁਂ ‘‘ਸਬ੍ਬੇਸਂ…ਪੇ… ਲਕ੍ਖਣ’’ਨ੍ਤਿ ਵੁਤ੍ਤਂ. ਯਤ੍ਤਕਾਹਿ ਮਤ੍ਤਾਹਿ ਅਕ੍ਖਰਂ ਪਰਿਪੁਣ੍ਣਂ ਹੋਤਿ, ਤਤੋਪਿ ਅਧਿਕਮਤ੍ਤਾਯੁਤ੍ਤਂ ਕਤ੍ਵਾ ਕਥਨਂ ਵਿਕਾਰਕਥਨਂ ਨਾਮ, ਤਥਾ ਅਕਤ੍ਵਾ ਕਥਨਮੇਵ ਲਕ੍ਖਣਨ੍ਤਿ ਅਤ੍ਥੋ. ਬਾਹਿਰਲੋਮਿਨ੍ਤਿ ਭਾਵਨਪੁਂਸਕਨਿਦ੍ਦੇਸੋ, ਯਥਾ ਬਹਿਦ੍ਧਾ ਲੋਮਾਨਿ ਦਿਸ੍ਸਨ੍ਤਿ, ਏਵਂ ਧਾਰੇਨ੍ਤਸ੍ਸ ਦੁਕ੍ਕਟਨ੍ਤਿ ਅਤ੍ਥੋ.

੨੫੦. ਪਾਲ਼ਿਯਂ ਤਰੁਣਞ੍ਞੇਵ ਅਮ੍ਬਨ੍ਤਿ ਤਰੁਣਂ ਅਸਞ੍ਜਾਤਬੀਜਂ ਏਵ ਅਮ੍ਬਫਲਂ. ਪਾਤਾਪੇਤ੍ਵਾਤਿ ਛਿਨ੍ਦਾਪੇਤ੍ਵਾਵ. ‘‘ਮਤ੍ਤਾਵਣ੍ਣਿਤਾ’’ਤਿ ਇਦਂ ‘‘ਪਰੇ ਨਿਨ੍ਦਨ੍ਤੀ’’ਤਿ ਸਾਸਨਹਿਤੇਸਿਤਾਯ ਵੁਤ੍ਤਂ. ਨ ਪਰਿਯਾਪੁਣਿਂਸੂਤਿ ਨਾਸਿਕ੍ਖਿਂਸੁ.

੨੫੧. ਚਤ੍ਤਾਰਿ ਅਹਿਰਾਜਕੁਲਾਨੀਤਿ ਸਬ੍ਬੇਸਂ ਅਹਿਭੇਦਾਨਂ ਚਤੂਸੁ ਏਵ ਸਙ੍ਗਹਤੋ ਵੁਤ੍ਤਂ. ਅਤ੍ਤਪਰਿਤ੍ਤਂ ਕਾਤੁਨ੍ਤਿ ਅਤ੍ਤਨੋ ਪਰਿਤ੍ਤਾਣਂ ਕਾਤੁਂ.

ਵਿਰੂਪਕ੍ਖੇਹਿ ਮੇ ਮੇਤ੍ਤਨ੍ਤਿ ਵਿਰੂਪਕ੍ਖਜਾਤਿਕੇਹਿ ਨਾਗੇਹਿ ਸਹ ਮਯ੍ਹਂ ਮਿਤ੍ਤਭਾਵੋ ਹੋਤੁ, ਮੇਤ੍ਤਾ ਹੋਤੂਤਿ ਅਤ੍ਥੋ, ਤੇ ਸੁਖਿਤਾ ਨਿਦ੍ਦੁਕ੍ਖਾ ਅਵੇਰਾ ਹੋਨ੍ਤੂਤਿ ਅਧਿਪ੍ਪਾਯੋ. ਏਵਞ੍ਹਿ ਮੇਤ੍ਤਾਫਰਣਂ ਹੋਤਿ. ਸੇਸੇਸੁਪਿ ਏਸੇਵ ਨਯੋ. ਅਪਾਦਕੇਹੀਤਿ ਅਹਿਕੁਲੇਹਿ ਸਹ ਸਬ੍ਬਸਤ੍ਤੇਸੁ ਓਧਿਸੋ ਮੇਤ੍ਤਾਫਰਣਦਸ੍ਸਨਂ. ਮਾ ਮਂ ਅਪਾਦਕੋ ਹਿਂਸੀਤਿ ਤਾਯ ਮੇਤ੍ਤਾਯ ਅਤ੍ਤਰਕ੍ਖਾਵਿਧਾਨਦਸ੍ਸਨਂ.

ਸਬ੍ਬੇ ਸਤ੍ਤਾਤਿਆਦਿ ਅਤ੍ਤਾਨਂ ਉਪਮਂ ਕਤ੍ਵਾ ਸਬ੍ਬਸਤ੍ਤੇਸੁ ਅਨੋਧਿਸੋ ਮੇਤ੍ਤਾਫਰਣਦਸ੍ਸਨਂ. ਤਤ੍ਥ ਮਾ ਕਞ੍ਚਿ ਪਾਪਮਾਗਮਾਤਿ ਕਞ੍ਚਿ ਸਤ੍ਤਂ ਲਾਮਕਂ ਦੁਕ੍ਖਹੇਤੁ, ਦੁਕ੍ਖਞ੍ਚ ਮਾ ਆਗਚ੍ਛਤੁ.

ਏਵਂ ਮੇਤ੍ਤਾਯ ਅਤ੍ਤਗੁਤ੍ਤਿਂ ਦਸ੍ਸੇਤ੍ਵਾ ਇਦਾਨਿ ਰਤਨਤ੍ਤਯਾਨੁਸ੍ਸਰਣੇਨ ਦਸ੍ਸੇਤੁਂ ‘‘ਅਪ੍ਪਮਾਣੋ’’ਤਿਆਦਿ ਵੁਤ੍ਤਂ. ਤਤ੍ਥ ਪਮਾਣਕਰਧਮ੍ਮਾ ਅਕੁਸਲਾ, ਤਬ੍ਬਿਪਾਕਾ ਚ ਪਮਾਣਾ, ਤਪ੍ਪਟਿਪਕ੍ਖਾ ਸੀਲਾਦਯੋ ਗੁਣਾ, ਤਬ੍ਬਿਪਾਕਾ ਚ ਲੋਕਿਯਲੋਕੁਤ੍ਤਰਫਲਾਨਿ ਅਪ੍ਪਮਾਣਾ, ਤੇ ਅਸ੍ਸ ਅਤ੍ਥੀਤਿ ਅਪ੍ਪਮਾਣੋ, ਅਪ੍ਪਮਾਣਾ ਵਾ ਅਪਰਿਮੇਯ੍ਯਗੁਣਾ ਅਸ੍ਸਾਤਿਪਿ ਅਪ੍ਪਮਾਣੋ. ਪਮਾਣਵਨ੍ਤਾਨੀਤਿ ਯਥਾਵੁਤ੍ਤਪਮਾਣਕਰਧਮ੍ਮਯੁਤ੍ਤਾਨਿ. ਅਹਿਵਿਚ੍ਛਿਕਾਤਿ ਸਰੀਸਪਾਨਞ੍ਞੇਵ ਪਭੇਦਦਸ੍ਸਨਂ. ਉਣ੍ਣਨਾਭੀਤਿ ਲੋਮਸਨਾਭਿਕੋ ਮਕ੍ਕਟੋ. ਸਰਬੂਤਿ ਘਰਗੋਲ਼ਿਕਾ.

ਪਟਿਕ੍ਕਮਨ੍ਤੂਤਿ ਅਪਗਚ੍ਛਨ੍ਤੁ, ਮਾ ਮਂ ਵਿਹੇਸਯਿਂਸੂਤਿ ਅਤ੍ਥੋ. ਸੋਹਂ ਨਮੋਤਿ ਏਤ੍ਥ ‘‘ਕਰੋਮੀ’’ਤਿ ਪਾਠਸੇਸੋ. ਯਸ੍ਮਾ ਮਯਾ ਮੇਤ੍ਤਾਦੀਹਿ ਤੁਮ੍ਹਾਕਞ੍ਚ ਮਯ੍ਹਞ੍ਚ ਰਕ੍ਖਾ ਕਤਾ, ਯਸ੍ਮਾ ਚ ਸੋਹਂ ਭਗਵਤੋ ਨਮੋ ਕਰੋਮਿ, ਵਿਪਸ੍ਸੀਆਦੀਨਂ ਸਤ੍ਤਨ੍ਨਮ੍ਪਿ ਨਮੋ ਕਰੋਮਿ, ਤਸ੍ਮਾ ਪਟਿਕ੍ਕਮਨ੍ਤੁ ਭੂਤਾਨੀਤਿ ਯੋਜਨਾ.

ਅਞ੍ਞਮ੍ਹੀਤਿ ਕਾਮਰਾਗੇ ਅਸੁਭਮਨਸਿਕਾਰਾਦਿਨਾ ਛੇਤਬ੍ਬੇਤਿ ਅਤ੍ਥੋ. ਅਙ੍ਗਜਾਤਨ੍ਤਿ ਬੀਜਵਿਰਹਿਤਂ ਪੁਰਿਸਨਿਮਿਤ੍ਤਂ. ਬੀਜੇ ਹਿ ਛਿਨ੍ਨੇ ਓਪਕ੍ਕਮਿਕਪਣ੍ਡਕੋ ਨਾਮ ਅਭਬ੍ਬੋ ਹੋਤੀਤਿ ਵਦਨ੍ਤਿ. ਏਕੇ ਪਨ ‘‘ਬੀਜਸ੍ਸਾਪਿ ਛੇਦਨਕ੍ਖਣੇ ਦੁਕ੍ਕਟਾਪਤ੍ਤਿ ਏਵ ਕਮੇਨ ਪੁਰਿਸਿਨ੍ਦ੍ਰਿਯਾਦਿਕੇ ਅਨ੍ਤਰਹਿਤੇ ਪਣ੍ਡਕੋ ਨਾਮ ਅਭਬ੍ਬੋ ਹੋਤਿ, ਤਦਾ ਲਿਙ੍ਗਨਾਸਨਾਯ ਨਾਸੇਤਬ੍ਬੋ’’ਤਿ ਵਦਨ੍ਤਿ. ਤਾਦਿਸਂ ਵਾ ਦੁਕ੍ਖਂ ਉਪ੍ਪਾਦੇਨ੍ਤਸ੍ਸਾਤਿ ਮੁਟ੍ਠਿਪ੍ਪਹਾਰਾਦੀਹਿ ਅਤ੍ਤਨੋ ਦੁਕ੍ਖਂ ਉਪ੍ਪਾਦੇਨ੍ਤਸ੍ਸ.

੨੫੨. ਪਾਲ਼ਿਯਂ ਤੁਯ੍ਹੇਸੋ ਪਤ੍ਤੋਤਿ ‘‘ਯੋ ਚ ਅਰਹਾ ਚੇਵ ਇਦ੍ਧਿਮਾ ਚ, ਤਸ੍ਸ ਦਿਨ੍ਨਮੇਵਾ’’ਤਿ ਸੇਟ੍ਠਿਨਾ ਵੁਤ੍ਤਂ, ਤਂ ਸਨ੍ਧਾਯ ਵਦਤਿ. ਤਂ ਪਤ੍ਤਂ ਗਹੇਤ੍ਵਾ ਤਿਕ੍ਖਤ੍ਤੁਂ ਰਾਜਗਹਂ ਅਨੁਪਰਿਯਾਯੀਤਿ ਏਤ੍ਥ ਵੇਲ਼ੁਪਰਮ੍ਪਰਾਯ ਬਦ੍ਧਪਤ੍ਤਸ੍ਸ ਉਪਰਿਭਾਗੇ ਆਕਾਸੇ ਨਗਰਂ ਤਿਕ੍ਖਤ੍ਤੁਂ ਅਨੁਪਰਿਯਾਯਿਤ੍ਵਾ ਠਿਤਭਾਵਂ ਸਨ੍ਧਾਯ ‘‘ਪਤ੍ਤਂ ਗਹੇਤ੍ਵਾ’’ਤਿ ਵੁਤ੍ਤਂ, ਨ ਪਨ ਥੇਰੋ ਹਤ੍ਥੇਨ ਪਤ੍ਤਂ ਸਯਮੇਵ ਅਗ੍ਗਹੇਸਿ. ਕੇਚਿ ਪਨ ਵਦਨ੍ਤਿ ‘‘ਇਦ੍ਧਿਬਲੇਨ ਤਂ ਪਤ੍ਤਂ ਵੇਲ਼ੁਪਰਮ੍ਪਰਤੋ ਮੁਞ੍ਚਿਤ੍ਵਾ ਥੇਰਂ ਅਨੁਬਨ੍ਧਮਾਨੋ ਅਟ੍ਠਾਸਿ, ਸੋ ਚ ਅਨੇਨ ਹਤ੍ਥੇਨ ਗਹਿਤੋ ਵਿਯ ਅਹੋਸੀ’’ਤਿ. ਤਥਾ ਠਿਤਮੇਵ ਪਨ ਸਨ੍ਧਾਯ ‘‘ਭਾਰਦ੍ਵਾਜਸ੍ਸ ਹਤ੍ਥਤੋ ਪਤ੍ਤਂ ਗਹੇਤ੍ਵਾ’’ਤਿ ਵੁਤ੍ਤਂ. ਤੇ ਚ ਮਨੁਸ੍ਸਾ…ਪੇ… ਅਨੁਬਨ੍ਧਿਂਸੂਤਿ ਯੇ ਚ ਮਨੁਸ੍ਸਾ ਪਠਮਂ ਪਾਟਿਹਾਰਿਯਂ ਨਾਦ੍ਦਸਂਸੁ, ਤੇ ਅਮ੍ਹਾਕਮ੍ਪਿ ਪਾਟਿਹਾਰਿਯਂ ਦਸ੍ਸੇਹੀਤਿ ਥੇਰਮਨੁਬਨ੍ਧਿਂਸੁ. ਥੇਰੋ ਚ ਸੀਹਬ੍ਯਗ੍ਘਾਦਿਰੂਪਂ ਗਹੇਤ੍ਵਾ ਵਿਕੁਬ੍ਬਨਿਦ੍ਧਿਂ ਦਸ੍ਸੇਤਿ, ਤੇ ਚ ਅਚ੍ਛਰਿਯਬ੍ਭੁਤਜਾਤਾ ਉਚ੍ਚਾਸਦ੍ਦਾ ਮਹਾਸਦ੍ਦਾ ਅਹੇਸੁਂ. ਤੇਨਾਹ ‘‘ਕਿਂ ਨੁ ਖੋ ਸੋ, ਆਨਨ੍ਦ, ਉਚ੍ਚਾਸਦ੍ਦੋ ਮਹਾਸਦ੍ਦੋ’’ਤਿ. ਇਦ੍ਧਿਪਾਟਿਹਾਰਿਯਂ ਨ ਦਸ੍ਸੇਤਬ੍ਬਨ੍ਤਿ ਏਤ੍ਥ ‘‘ਯੋ ਪਕਤਿਵਣ੍ਣਂ ਵਿਜਹਿਤ੍ਵਾ ਕੁਮਾਰਵਣ੍ਣਂ ਵਾ ਦਸ੍ਸੇਤਿ, ਨਾਗਵਣ੍ਣਂ ਵਾ…ਪੇ… ਵਿਵਿਧਮ੍ਪਿ ਸੇਨਾਬ੍ਯੂਹਂ ਦਸ੍ਸੇਤੀ’’ਤਿ (ਪਟਿ. ਮ. ੩.੧੩) ਏਵਮਾਗਤਾ ਅਤ੍ਤਨੋ ਸਰੀਰਸ੍ਸ ਵਿਕਾਰਾਪਾਦਨਵਸਪ੍ਪਵਤ੍ਤਾ ਵਿਕੁਬ੍ਬਨਿਦ੍ਧਿ ਅਧਿਪ੍ਪੇਤਾਤਿ ਆਹ ‘‘ਅਧਿਟ੍ਠਾਨਿਦ੍ਧਿ ਪਨ ਅਪ੍ਪਟਿਕ੍ਖਿਤ੍ਤਾ’’ਤਿ. ਪਕਤਿਯਾ ਏਕੋ ਬਹੁਕਂ ਆਵਜ੍ਜਤਿ, ਸਤਂ ਵਾ ਸਹਸ੍ਸਂ ਵਾ ਸਤਸਹਸ੍ਸਂ ਵਾ ਆਵਜ੍ਜੇਤ੍ਵਾ ਞਾਣੇਨ ਅਧਿਟ੍ਠਾਤਿ ‘‘ਬਹੁਕੋ ਹੋਮੀ’’ਤਿ (ਪਟਿ. ਮ. ੩.੧੦) ਏਵਂ ਦਸ੍ਸਿਤਾ ਅਧਿਟ੍ਠਾਨਵਸੇਨ ਨਿਪ੍ਫਨ੍ਨਾ ਅਧਿਟ੍ਠਾਨਿਦ੍ਧਿ ਨਾਮ. ਗਿਹਿਵਿਕਟਾਨੀਤਿ ਗਿਹਿਸਨ੍ਤਕਾਨਿ.

੨੫੩. ਪਾਲ਼ਿਯਂ ਨ ਅਚ੍ਛੁਪਿਯਨ੍ਤੀਤਿ ਨ ਫੁਸਿਤਾਨਿ ਹੋਨ੍ਤਿ. ਰੂਪਕਾਕਿਣ੍ਣਾਨੀਤਿ ਇਤ੍ਥਿਰੂਪਾਦੀਹਿ ਆਕਿਣ੍ਣਾਨਿ.

੨੫੪. ਭੂਮਿਆਧਾਰਕੇਤਿ ਦਨ੍ਤਾਦੀਹਿ ਕਤੇ ਵਲਯਾਧਾਰਕੇ. ਏਤਸ੍ਸ ਵਲਯਾਧਾਰਕਸ੍ਸ ਅਨੁਚ੍ਚਤਾਯ ਠਪਿਤਾ ਪਤ੍ਤਾ ਨ ਪਰਿਪਤਨ੍ਤੀਤਿ ‘‘ਤਯੋ ਪਤ੍ਤੇ ਠਪੇਤੁਂ ਵਟ੍ਟਤੀ’’ਤਿ ਵੁਤ੍ਤਂ. ਅਨੁਚ੍ਚਤਞ੍ਹਿ ਸਨ੍ਧਾਯ ਅਯਂ ‘‘ਭੂਮਿਆਧਾਰਕੋ’’ਤਿ ਵੁਤ੍ਤੋ. ਦਾਰੁਆਧਾਰਕਦਣ੍ਡਾਧਾਰਕੇਸੂਤਿ ਏਕਦਾਰੁਨਾ ਕਤਆਧਾਰਕੇ, ਬਹੂਹਿ ਦਣ੍ਡੇਹਿ ਕਤਆਧਾਰਕੇ ਚ. ਏਤੇ ਚ ਉਚ੍ਚਤਰਾ ਹੋਨ੍ਤਿ ਪਤ੍ਤੇਹਿ ਸਹ ਪਤਨਸਭਾਵਾ. ਤੇਨ ‘‘ਸੁਸਜ੍ਜਿਤੇਸੂ’’ਤਿ ਵੁਤ੍ਤਂ. ਭਮਕੋਟਿਸਦਿਸੋਤਿ ਯਤ੍ਥ ਧਮਕਰਣਾਦਿਂ ਪਵੇਸੇਤ੍ਵਾ ਲਿਖਨ੍ਤਿ, ਤਸ੍ਸ ਭਮਕਸ੍ਸ ਕੋਟਿਯਾ ਸਦਿਸੋ. ਤਾਦਿਸਸ੍ਸ ਦਾਰੁਆਧਾਰਕਸ੍ਸ ਅਵਿਤ੍ਥਿਣ੍ਣਤਾਯ ਠਪਿਤੋਪਿ ਪਤ੍ਤੋ ਪਤਤੀਤਿ ‘‘ਅਨੋਕਾਸੋ’’ਤਿ ਵੁਤ੍ਤੋ.

ਆਲਿਨ੍ਦਕਮਿਡ੍ਢਿਕਾਦੀਨਨ੍ਤਿ ਪਮੁਖਮਿਡ੍ਢਿਕਾਦੀਨਂ, ਉਚ੍ਚਵਤ੍ਥੁਕਾਨਨ੍ਤਿ ਅਤ੍ਥੋ. ਬਾਹਿਰਪਸ੍ਸੇਤਿ ਪਾਸਾਦਾਦੀਨਂ ਬਹਿਕੁਟ੍ਟੇ. ਤਨੁਕਮਿਡ੍ਢਿਕਾਯਾਤਿ ਵੇਦਿਕਾਯ. ਸਬ੍ਬਤ੍ਥ ਪਨ ਹਤ੍ਥਪ੍ਪਮਾਣਤੋ ਅਬ੍ਭਨ੍ਤਰੇ ਠਪੇਤੁਂ ਵਟ੍ਟਤਿ. ਆਧਾਰੇ ਪਨ ਤਤੋ ਬਹਿਪਿ ਵਟ੍ਟਤਿ.

ਪਾਲ਼ਿਯਂ ਓਟ੍ਠੋਤਿ ਮੁਖਵਟ੍ਟਿ. ਪਤ੍ਤਮਾਲ਼ਕਨ੍ਤਿ ਉਪਚਿਕਾਨਂ ਅਨੁਟ੍ਠਹਨਤ੍ਥਾਯ ਭੂਮਿਤੋ ਉਚ੍ਚਤਰਂ ਕਤਂ ਵੇਦਿਕਾਕਾਰਮਾਲ਼ਕਂ. ਮਹਾਮੁਖਕੁਣ੍ਡਸਣ੍ਠਾਨਾਤਿ ਮਹਾਮੁਖਚਾਟਿਸਣ੍ਠਾਨਾ. ਲਗ੍ਗੇਨ੍ਤਸ੍ਸ ਦੁਕ੍ਕਟਨ੍ਤਿ ਕੇਵਲਂ ਪਤ੍ਤਂ ਲਗ੍ਗੇਨ੍ਤਸ੍ਸ, ਨ ਥਵਿਕਾਯ ਲਗ੍ਗੇਨ੍ਤਸ੍ਸਾਤਿ ਵਦਨ੍ਤਿ. ਵੀਮਂਸਿਤਬ੍ਬਂ. ਅਞ੍ਞੇਨ ਪਨ ਭਣ੍ਡਕੇਨਾਤਿ ਅਞ੍ਞੇਨ ਭਾਰਬਨ੍ਧਨੇਨ ਭਣ੍ਡਕੇਨ. ‘‘ਬਨ੍ਧਿਤ੍ਵਾ ਓਲਮ੍ਬੇਤੁ’’ਨ੍ਤਿ ਵੁਤ੍ਤਤ੍ਤਾ ਪਤ੍ਤਤ੍ਥਵਿਕਾਯ ਅਂਸਬਦ੍ਧਕੋ ਯਥਾ ਲਗ੍ਗਿਤਟ੍ਠਾਨਤੋ ਨ ਪਰਿਗਲ਼ਤਿ, ਤਥਾ ਸਬ੍ਬਥਾਪਿ ਬਨ੍ਧਿਤ੍ਵਾ ਠਪੇਤੁਂ ਵਟ੍ਟਤਿ. ਬਨ੍ਧਿਤ੍ਵਾਪਿ ਉਪਰਿ ਠਪੇਤੁਂ ਨ ਵਟ੍ਟਤੀਤਿ ਉਪਰਿ ਨਿਸੀਦਨ੍ਤਾ ਓਤ੍ਥਰਿਤ੍ਵਾ ਭਿਨ੍ਦਨ੍ਤੀਤਿ ਵੁਤ੍ਤਂ. ਤਤ੍ਥ ਠਪੇਤੁਂ ਵਟ੍ਟਤੀਤਿ ਨਿਸੀਦਨਸਙ੍ਕਾਭਾਵਤੋ ਵੁਤ੍ਤਂ. ਬਨ੍ਧਿਤ੍ਵਾ ਵਾਤਿ ਬਨ੍ਧਿਤ੍ਵਾ ਠਪਿਤਛਤ੍ਤੇ ਵਾ. ਯੋ ਕੋਚੀਤਿ ਭਤ੍ਤਪੂਰੋਪਿ ਤੁਚ੍ਛਪਤ੍ਤੋਪਿ.

੨੫੫. ਪਰਿਹਰਿਤੁਨ੍ਤਿ ਦਿਵਸੇ ਦਿਵਸੇ ਪਿਣ੍ਡਾਯ ਚਰਣਤ੍ਥਾਯ ਠਪੇਤੁਂ. ਪਤ੍ਤਂ ਅਲਭਨ੍ਤੇਨ ਪਨ ਏਕਦਿਵਸਂ ਪਿਣ੍ਡਾਯ ਚਰਿਤ੍ਵਾ ਭੁਞ੍ਜਿਤ੍ਵਾ ਛਡ੍ਡੇਤੁਂ ਵਟ੍ਟਤਿ. ਤੇਨਾਹ ‘‘ਤਾਵਕਾਲਿਕਂ ਪਰਿਭੁਞ੍ਜਿਤੁਂ ਵਟ੍ਟਤੀ’’ਤਿ. ਪਣ੍ਣਪੁਟਾਦੀਸੁਪਿ ਏਸੇਵ ਨਯੋ. ਅਭੁਂ ਮੇਤਿ ਅਭੂਤਿ ਮਯ੍ਹਂ, ਵਿਨਾਸੋ ਮਯ੍ਹਨ੍ਤਿ ਅਤ੍ਥੋ. ਪਾਲ਼ਿਯਂ ਪਿਸਾਚੋ ਵਤਮਨ੍ਤਿ ਪਿਸਾਚੋ ਵਤਾਯਂ, ਅਯਮੇਵ ਵਾ ਪਾਠੋ. ਪਿਸਾਚਿਲ੍ਲਿਕਾਤਿ ਪਿਸਾਚਦਾਰਕਾ. ਛਵਸੀਸਸ੍ਸ ਪਤ੍ਤੋਤਿ ਛਵਸੀਸਮਯੋ ਪਤ੍ਤੋ. ਪਕਤਿਵਿਕਾਰਸਮ੍ਬਨ੍ਧੇ ਚੇਤਂ ਸਾਮਿਵਚਨਂ.

ਚਬ੍ਬੇਤ੍ਵਾਤਿ ਨਿਟ੍ਠੁਭਿਤ੍ਵਾ. ‘‘ਪਟਿਗ੍ਗਹਂ ਕਤ੍ਵਾ’’ਤਿ ਵੁਤ੍ਤਤ੍ਤਾ ਉਚ੍ਛਿਟ੍ਠਹਤ੍ਥੇਨ ਉਦਕਂ ਗਹੇਤ੍ਵਾ ਪਤ੍ਤਂ ਪਰਿਪ੍ਫੋਸਿਤ੍ਵਾ ਧੋਵਨਘਂਸਨਵਸੇਨ ਹਤ੍ਥਂ ਧੋਵਿਤੁਂ ਵਟ੍ਟਤਿ, ਏਤ੍ਤਕੇਨ ਪਤ੍ਤਂ ਪਟਿਗ੍ਗਹਂ ਕਤ੍ਵਾ ਹਤ੍ਥੋ ਧੋਵਿਤੋ ਨਾਮ ਨ ਹੋਤਿ. ਏਕਂ ਉਦਕਗਣ੍ਡੁਸਂ ਗਹੇਤ੍ਵਾਤਿ ਪਤ੍ਤਂ ਅਫੁਸਿਤ੍ਵਾ ਤਤ੍ਥ ਉਦਕਮੇਵ ਉਚ੍ਛਿਟ੍ਠਹਤ੍ਥੇਨ ਉਕ੍ਖਿਪਿਤ੍ਵਾ ਗਣ੍ਡੁਸਂ ਕਤ੍ਵਾ, ਵਾਮਹਤ੍ਥੇਨੇਵ ਵਾ ਪਤ੍ਤਂ ਉਕ੍ਖਿਪਿਤ੍ਵਾ ਮੁਖੇਨ ਗਣ੍ਡੁਸਂ ਗਹੇਤੁਮ੍ਪਿ ਵਟ੍ਟਤਿ. ਬਹਿ ਉਦਕੇਨ ਵਿਕ੍ਖਾਲੇਤ੍ਵਾਤਿ ਦ੍ਵੀਸੁ ਅਙ੍ਗੁਲੀਸੁ ਆਮਿਸਮਤ੍ਤਂ ਵਿਕ੍ਖਾਲੇਤ੍ਵਾ ਬਹਿ ਗਹੇਤੁਮ੍ਪਿ ਵਟ੍ਟਤਿ. ਪਟਿਖਾਦਿਤੁਕਾਮੋਤਿ ਏਤ੍ਥ ਨ ਸਯਂ ਖਾਦਿਤੁਕਾਮੋਪਿ ਅਞ੍ਞੇਸਂ ਖਾਦਨਾਰਹਂ ਠਪੇਤੁਂ ਲਭਤਿ. ਤਤ੍ਥੇਵ ਕਤ੍ਵਾਤਿ ਪਤ੍ਤੇਯੇਵ ਯਥਾਠਪਿਤਟ੍ਠਾਨਤੋ ਅਨੁਦ੍ਧਰਿਤ੍ਵਾ. ਲੁਞ੍ਚਿਤ੍ਵਾਤਿ ਤਤੋ ਮਂਸਮੇਵ ਨਿਰਵਸੇਸਂ ਉਪ੍ਪਟ੍ਟੇਤ੍ਵਾ.

੨੫੬. ਕਿਣ੍ਣਚੁਣ੍ਣੇਨਾਤਿ ਸੁਰਾਕਿਣ੍ਣਚੁਣ੍ਣੇਨ. ਮਕ੍ਖੇਤੁਨ੍ਤਿ ਸੂਚਿਂ ਮਕ੍ਖੇਤੁਂ. ਨਿਸ੍ਸੇਣਿਮ੍ਪੀਤਿ ਚਤੂਹਿ ਦਣ੍ਡੇਹਿ ਚੀਵਰਪ੍ਪਮਾਣੇਨ ਆਯਤਚਤੁਰਸ੍ਸਂ ਕਤ੍ਵਾ ਬਦ੍ਧਪਟਲਮ੍ਪਿ. ਏਤ੍ਥ ਹਿ ਚੀਵਰਕੋਟਿਯੋ ਸਮਕਂ ਬਨ੍ਧਿਤ੍ਵਾ ਚੀਵਰਂ ਯਥਾਸੁਖਂ ਸਿਬ੍ਬਨ੍ਤਿ. ਤਤ੍ਥ ਅਤ੍ਥਰਿਤਬ੍ਬਨ੍ਤਿ ਤਸ੍ਸਾ ਨਿਸ੍ਸੇਣਿਯਾ ਉਪਰਿ ਚੀਵਰਸ੍ਸ ਉਪਤ੍ਥਮ੍ਭਨਤ੍ਥਾਯ ਅਤ੍ਥਰਿਤਬ੍ਬਂ. ਕਥਿਨਸਙ੍ਖਾਤਾਯ ਨਿਸ੍ਸੇਣਿਯਾ ਚੀਵਰਸ੍ਸ ਬਨ੍ਧਨਕਰਜ੍ਜੁ ਕਥਿਨਰਜ੍ਜੂਤਿ ਮਜ੍ਝਿਮਪਦਲੋਪੀਸਮਾਸੋਤਿ ਆਹ ‘‘ਯਾਯਾ’’ਤਿਆਦਿ. ਤਤ੍ਥ ਯਸ੍ਮਾ ਦ੍ਵਿਨ੍ਨਂ ਪਟਲਾਨਂ ਏਕਸ੍ਮਿਂ ਅਧਿਕੇ ਜਾਤੇ ਤਤ੍ਥ ਵਲਿਯੋ ਹੋਨ੍ਤਿ, ਤਸ੍ਮਾ ਦੁਪਟ੍ਟਚੀਵਰਸ੍ਸ ਪਟਲਦ੍ਵਯਮ੍ਪਿ ਸਮਕਂ ਕਤ੍ਵਾ ਬਨ੍ਧਨਕਰਜ੍ਜੁ ਕਥਿਨਰਜ੍ਜੂਤਿ ਵੇਦਿਤਬ੍ਬਂ.

ਪਾਲ਼ਿਯਂ ਕਥਿਨਸ੍ਸ ਅਨ੍ਤੋ ਜੀਰਤੀਤਿ ਕਥਿਨੇ ਬਦ੍ਧਸ੍ਸ ਚੀਵਰਸ੍ਸ ਪਰਿਯਨ੍ਤੋ ਜੀਰਤਿ. ਕਥਿਨਨਿਸ੍ਸਿਤਞ੍ਹਿ ਚੀਵਰਂ ਇਧ ਨਿਸ੍ਸਯਵੋਹਾਰੇਨ ‘‘ਕਥਿਨ’’ਨ੍ਤਿ ਵੁਤ੍ਤਂ ‘‘ਮਞ੍ਚਾ ਘੋਸਨ੍ਤੀ’’ਤਿਆਦੀਸੁ ਵਿਯ. ਅਨੁਵਾਤਂ ਪਰਿਭਣ੍ਡਨ੍ਤਿ ਕਥਿਨੇ ਬਨ੍ਧਨਰਜ੍ਜੂਹਿ ਚੀਵਰਸ੍ਸ ਸਮਨ੍ਤਾ ਪਰਿਯਨ੍ਤਸ੍ਸ ਅਜੀਰਣਤ੍ਥਂ ਯੇਹਿ ਕੇਹਿਚਿ ਚੋਲ਼ਕੇਹਿ ਦੀਘਤੋ ਅਨੁਵਾਤਂ, ਤਿਰਿਯਤੋ ਪਰਿਭਣ੍ਡਞ੍ਚ ਸਿਬ੍ਬਿਤ੍ਵਾ ਕਾਤੁਂ ਯਤ੍ਥ ਰਜ੍ਜੁਕੇ ਪਵੇਸੇਤ੍ਵਾ ਦਣ੍ਡੇਸੁ ਪਲਿਵੇਠੇਤ੍ਵਾ ਚੀਵਰਸਮਕਂ ਆਕਡ੍ਢਿਤੁਂ ਸਕ੍ਕਾ, ਤਾਦਿਸਨ੍ਤਿ ਅਤ੍ਥੋ. ਕੇਚਿ ਪਨ ‘‘ਕਥਿਨਸਙ੍ਖਾਤੇਸੁ ਕਿਲਞ੍ਜਾਦੀਸੁ ਏਵ ਅਜੀਰਣਤ੍ਥਾਯ ਅਨੁਵਾਤਪਰਿਭਣ੍ਡਕਰਣਂ ਅਨੁਞ੍ਞਾਤ’’ਨ੍ਤਿ ਵਦਨ੍ਤਿ. ਤਸ੍ਸ ਮਜ੍ਝੇਤਿ ਪੁਰਾਣਕਥਿਨਸ੍ਸੇਵ ਅਨ੍ਤੋ. ਭਿਕ੍ਖੁਨੋ ਪਮਾਣੇਨਾਤਿ ਭਿਕ੍ਖੁਨੋ ਚੀਵਰਸ੍ਸ ਪਮਾਣੇਨ. ਅਞ੍ਞਂ ਨਿਸ੍ਸੇਣਿਨ੍ਤਿ ਦੀਘਤੋ ਚ ਤਿਰਿਯਤੋ ਚ ਅਞ੍ਞਂ ਦਣ੍ਡਂ ਠਪੇਤ੍ਵਾ ਬਨ੍ਧਿਤੁਂ.

ਬਿਦਲਕਨ੍ਤਿ ਦਿਗੁਣਕਰਣਸਙ੍ਖਾਤਕਿਰਿਯਾਵਿਸੇਸਸ੍ਸ ਅਧਿਵਚਨਂ. ਤੇਨਾਹ ‘‘ਦੁਗੁਣਕਰਣ’’ਨ੍ਤਿ. ਪਵੇਸਨਸਲਾਕਨ੍ਤਿ ਵਲੀਨਂ ਅਗ੍ਗਹਣਤ੍ਥਾਯ ਪਵੇਸਨਕਵੇਲ਼ੁਸਲਾਕਾਦਿ. ਪਾਲ਼ਿਯਂ ਪਟਿਗ੍ਗਹਨ੍ਤਿ ਅਙ੍ਗੁਲਿਕਞ੍ਚੁਕਂ.

੨੫੭. ਪਾਤਿ ਨਾਮ ਭਣ੍ਡਟ੍ਠਪਨਕੋ ਭਾਜਨਵਿਸੇਸੋ. ਪਾਲ਼ਿਯਂ ਪਟਿਗ੍ਗਹਥਵਿਕਨ੍ਤਿ ਪਾਤਿਆਦਿਭਾਜਨਤ੍ਥਵਿਕਂ. ਚਿਨਿਤੁਨ੍ਤਿ ਉਚ੍ਚਵਤ੍ਥੁਪਰਿਯਨ੍ਤਸ੍ਸ ਅਪਤਨਤ੍ਥਾਯ ਇਟ੍ਠਕਾਦੀਹਿ ਚਿਨਿਤੁਂ. ਆਲਮ੍ਬਨਬਾਹਨ੍ਤਿ ਆਲਮ੍ਬਨਰਜ੍ਜੁਦਣ੍ਡਾਦਿ. ਪਰਿਭਿਜ੍ਜਤੀਤਿ ਕਟਸਾਰਾਦਿਕਂ ਕਥਿਨਮਜ੍ਝੇ ਭਙ੍ਗਂ ਹੋਤਿ. ਉਸ੍ਸਾਪੇਤ੍ਵਾਤਿ ਦਣ੍ਡਕਥਿਨਂ ਸਨ੍ਧਾਯ ਵੁਤ੍ਤਂ.

੨੫੮-੯. ਉਦਕਂ ਅਕਪ੍ਪਿਯਨ੍ਤਿ ਸਪ੍ਪਾਣਕਂ. ਉਪਨਨ੍ਧੀਤਿ ਵੇਰਂ ਬਨ੍ਧਿ. ਅਦ੍ਧਾਨਮਗ੍ਗੋ ਪਟਿਪਜ੍ਜਿਤਬ੍ਬੋਤਿ ਏਤ੍ਥ ਅਦ੍ਧਯੋਜਨਂ ਅਦ੍ਧਾਨਮਗ੍ਗੋ ਨਾਮ, ਤਂ ਪਟਿਪਜ੍ਜਿਤੁਕਾਮਸ੍ਸ ਸਞ੍ਚਿਚ੍ਚ ਵਿਹਾਰੂਪਚਾਰਾਤਿਕ੍ਕਮਨੇ ਆਪਤ੍ਤਿ. ਅਸਞ੍ਚਿਚ੍ਚ ਗਤਸ੍ਸ ਪਨ ਯਤ੍ਥ ਸਰਤਿ, ਤਤ੍ਥ ਠਤ੍ਵਾ ਸਙ੍ਘਾਟਿਕਣ੍ਣਾਦਿਂ ਅਨਧਿਟ੍ਠਹਿਤ੍ਵਾ ਗਮਨੇ ਪਦਵਾਰੇਨ ਆਪਤ੍ਤੀਤਿ ਵੇਦਿਤਬ੍ਬਂ. ਨ ਸਮ੍ਮਤੀਤਿ ਨ ਪਹੋਤਿ.

੨੬੦. ਅਭਿਸਨ੍ਨਕਾਯਾਤਿ ਸੇਮ੍ਹਾਦਿਦੋਸਸਨ੍ਨਿਚਿਤਕਾਯਾ. ਤਤ੍ਥ ਮਜ੍ਝੇਤਿ ਅਗ੍ਗਲ਼ਪਾਸਕਸ੍ਸ ਮਜ੍ਝੇ. ਉਪਰੀਤਿ ਅਗ੍ਗਲ਼ਪਾਸਕਸ੍ਸ ਉਪਰਿਭਾਗੇ. ਉਦਕਟ੍ਠਪਨਟ੍ਠਾਨਨ੍ਤਿ ਉਦਕਟ੍ਠਪਨਤ੍ਥਾਯ ਪਰਿਚ੍ਛਿਨ੍ਦਿਤ੍ਵਾ ਕਤਟ੍ਠਾਨਂ.

੨੬੧. ਪਾਲ਼ਿਯਂ ਉਦਪਾਨਨ੍ਤਿ ਕੂਪਂ. ਨੀਚਵਤ੍ਥੁਕੋਤਿ ਕੂਪਸ੍ਸ ਸਮਨ੍ਤਾ ਕੂਲਟ੍ਠਾਨਂ, ਭੂਮਿਸਮਂ ਤਿਟ੍ਠਤੀਤਿ ਅਤ੍ਥੋ. ਉਦਕੇਨ ਓਤ੍ਥਰਿਯ੍ਯਤੀਤਿ ਸਮਨ੍ਤਾ ਵਸ੍ਸੋਦਕਂ ਆਗਨ੍ਤ੍ਵਾ ਕੂਪੇ ਪਤਤੀਤਿ ਅਤ੍ਥੋ.

੨੬੨. ਵਾਹੇਨ੍ਤੀਤਿ ਉਸ੍ਸਿਞ੍ਚਨ੍ਤਿ. ਅਰਹਟਘਟਿਯਨ੍ਤਂ ਨਾਮ ਚਕ੍ਕਸਣ੍ਠਾਨਂ ਅਨੇਕਾਰਂ ਅਰੇ ਅਰੇ ਘਟਿਕਾਨਿ ਬਨ੍ਧਿਤ੍ਵਾ ਏਕੇਨ, ਦ੍ਵੀਹਿ ਵਾ ਪਰਿਬ੍ਭਮਿਯਮਾਨਯਨ੍ਤਂ.

੨੬੩. ਆਵਿਦ੍ਧਪਕ੍ਖਪਾਸਕਨ੍ਤਿ ਕਣ੍ਣਿਕਮਣ੍ਡਲਸ੍ਸ ਸਮਨ੍ਤਾ ਠਪਿਤਪਕ੍ਖਪਾਸਕਂ. ਮਣ੍ਡਲੇਤਿ ਕਣ੍ਣਿਕਮਣ੍ਡਲੇ. ਪਕ੍ਖਪਾਸਕੇ ਠਪੇਤ੍ਵਾਤਿ ਸਮਨ੍ਤਾ ਚਤੁਰਸ੍ਸਾਕਾਰੇਨ ਫਲਕਾਦੀਨਿ ਠਪੇਤ੍ਵਾ.

੨੬੪. ਨਮਤਕਂ ਨਾਮ ਸਨ੍ਥਤਸਦਿਸਨ੍ਤਿ ਕੇਚਿ ਵਦਨ੍ਤਿ. ਕੇਚਿ ਪਨ ‘‘ਰੁਕ੍ਖਤਚਮਯ’’ਨ੍ਤਿ. ਚਮ੍ਮਖਣ੍ਡਪਰਿਹਾਰੇਨਾਤਿ ਅਨਧਿਟ੍ਠਹਿਤ੍ਵਾ ਸਯਨਾਸਨਵਿਧਿਨਾਤਿ ਅਤ੍ਥੋ. ਪੇਲ਼ਾਯਾਤਿ ਅਟ੍ਠਂਸਸੋਲ਼ਸਂਸਾਦਿਆਕਾਰੇਨ ਕਤਾਯ ਭਾਜਨਾਕਾਰਾਯ ਪੇਲ਼ਾਯ. ਯਤ੍ਥ ਉਣ੍ਹਪਾਯਾਸਾਦਿਂ ਪਕ੍ਖਿਪਿਤ੍ਵਾ ਉਪਰਿ ਭੋਜਨਪਾਤਿਂ ਠਪੇਨ੍ਤਿ ਭਤ੍ਤਸ੍ਸ ਉਣ੍ਹਭਾਵਾਵਿਗਮਨਤ੍ਥਂ, ਤਾਦਿਸਸ੍ਸ ਭਾਜਨਾਕਾਰਸ੍ਸ ਆਧਾਰਸ੍ਸੇਤਂ ਅਧਿਵਚਨਂ. ਤੇਨੇਵ ਪਾਲ਼ਿਯਂ ‘‘ਆਸਿਤ੍ਤਕੂਪਧਾਨ’’ਨ੍ਤਿ ਵੁਤ੍ਤਂ. ਤਸ੍ਸ ਚ ਪਾਯਾਸਾਦੀਹਿ ਆਸਿਤ੍ਤਕਾਧਾਰੋਤਿ ਅਤ੍ਥੋ. ਇਦਞ੍ਚ ਆਸਿਤ੍ਤਕੂਪਧਾਨਂ ਪਚ੍ਚਨ੍ਤੇਸੁ ਨ ਜਾਨਨ੍ਤਿ ਕਾਤੁਂ, ਮਜ੍ਝਿਮਦੇਸੇਯੇਵ ਕਰੋਨ੍ਤਿ. ਕੇਚਿ ਪਨ ‘‘ਗਿਹਿਪਰਿਭੋਗੋ ਅਯੋਮਯਾਦਿ ਸਬ੍ਬੋਪਿ ਆਧਾਰੋ ਆਸਿਤ੍ਤਕੂਪਧਾਨਮੇਵ ਅਨੁਲੋਮੇਤੀ’’ਤਿ ਵਦਨ੍ਤਿ, ਏਕੇ ਪਨ ‘‘ਕਪ੍ਪਿਯਲੋਹਮਯੋ ਆਧਾਰੋ ਮਲ਼ੋਰਿਕਮੇਵ ਅਨੁਲੋਮੇਤੀ’’ਤਿ. ਵੀਮਂਸਿਤ੍ਵਾ ਗਹੇਤਬ੍ਬਂ. ਪੁਬ੍ਬੇ ਪਤ੍ਤਗੁਤ੍ਤਿਯਾ ਆਧਾਰੋ ਅਨੁਞ੍ਞਾਤੋ. ਇਦਾਨਿ ਭੁਞ੍ਜਿਤੁਂ ਮਲ਼ੋਰਿਕਾ ਅਨੁਞ੍ਞਾਤਾ. ਛਿਦ੍ਦਨ੍ਤਿ ਛਿਦ੍ਦਯੁਤ੍ਤਂ. ਵਿਦ੍ਧਨ੍ਤਿ ਅਨ੍ਤੋਵਿਨਿਵਿਦ੍ਧਛਿਦ੍ਦਂ. ਆਵਿਦ੍ਧਨ੍ਤਿ ਸਮਨ੍ਤਤੋ ਛਿਦ੍ਦਂ.

੨੬੫. ਪਤ੍ਤਂ ਨਿਕ੍ਕੁਜ੍ਜਿਤੁਨ੍ਤਿ ਏਤ੍ਥ ਕਮ੍ਮਵਾਚਾਯ ਅਸਮ੍ਭੋਗਕਰਣਵਸੇਨੇਵ ਨਿਕ੍ਕੁਜ੍ਜਨਂ, ਨ ਪਤ੍ਤਾਨਂ ਅਧੋਮੁਖਟ੍ਠਪਨੇਨ. ਤੇਨਾਹ ‘‘ਅਸਮ੍ਭੋਗਂ ਸਙ੍ਘੇਨ ਕਰੋਤੂ’’ਤਿਆਦਿ, ਤਂ ਵਡ੍ਢਂ ਕਮ੍ਮਵਾਚਾਯ ਸਙ੍ਘੇਨ ਸਦ੍ਧਿਂ ਅਸਮ੍ਭੋਗਂ ਸਙ੍ਘੋ ਕਰੋਤੂਤਿ ਅਤ੍ਥੋ.

ਪਤ੍ਤਂ ਨਿਕ੍ਕੁਜ੍ਜੇਯ੍ਯਾਤਿ ਵਡ੍ਢਸ੍ਸ ਪਤ੍ਤਨਿਕ੍ਕੁਜ੍ਜਨਦਣ੍ਡਕਮ੍ਮਂ ਕਰੇਯ੍ਯ. ਅਸਮ੍ਭੋਗਂ ਸਙ੍ਘੇਨ ਕਰਣਨ੍ਤਿ ਸਙ੍ਘੇਨ ਵਡ੍ਢਸ੍ਸ ਅਸਮ੍ਭੋਗਕਰਣਂ. ਯਥਾ ਅਸਮ੍ਭੋਗੋ ਹੋਤਿ, ਤਥਾ ਕਰਣਨ੍ਤਿ ਅਤ੍ਥੋ. ਨਿਕ੍ਕੁਜ੍ਜਿਤੋ…ਪੇ… ਅਸਮ੍ਭੋਗਂ ਸਙ੍ਘੇਨਾਤਿ ਏਤ੍ਥ ਸਙ੍ਘੇਨ ਅਸਮ੍ਭੋਗੋ ਹੋਤੀਤਿ ਅਤ੍ਥੋ ਦਟ੍ਠਬ੍ਬੋ. ਏਵਂ ਭਗਵਤਾ ਅਸਮ੍ਭੋਗਕਰਣਸ੍ਸ ਆਣਤ੍ਤਤ੍ਤਾ, ਕਮ੍ਮਵਾਚਾਯ ਚ ਸਾਵਿਤਤ੍ਤਾ, ਅਟ੍ਠਕਥਾਯਞ੍ਚ ‘‘ਕੋਚਿ ਦੇਯ੍ਯਧਮ੍ਮੋ ਨ ਗਹੇਤਬ੍ਬੋ’’ਤਿ ਵੁਤ੍ਤਤ੍ਤਾ ਪਤ੍ਤੇ ਨਿਕ੍ਕੁਜ੍ਜਿਤੇ ਤਸ੍ਸ ਸਨ੍ਤਕਂ ਞਤ੍ਵਾ ਗਣ੍ਹਨ੍ਤਸ੍ਸ ਦੁਕ੍ਕਟਮੇਵਾਤਿ ਗਹੇਤਬ੍ਬਂ.

ਅਚ੍ਚਯੋਤਿ ਞਾਯਪ੍ਪਟਿਪਤ੍ਤਿਂ ਅਤਿਕ੍ਕਮਿਤ੍ਵਾ ਪਵਤ੍ਤਿ, ਅਪਰਾਧੋਤਿ ਅਤ੍ਥੋ. ਮਂ ਅਚ੍ਚਗਮਾਤਿ ਮਂ ਅਤਿਕ੍ਕਮ੍ਮ ਪਵਤ੍ਤੋ. ਤਂ ਤੇ ਮਯਂ ਪਟਿਗ੍ਗਣ੍ਹਾਮਾਤਿ ਤਂ ਤੇ ਅਪਰਾਧਂ ਮਯਂ ਖਮਾਮ. ਭਿਕ੍ਖੂਨਂ ਅਲਾਭਾਯ ਪਰਿਸਕ੍ਕਤੀਤਿਆਦੀਸੁ ਅਲਾਭਾਯ ਪਰਿਸਕ੍ਕਨਾਦਿਤੋ ਵਿਰਤੋਤਿ ਏਵਮਤ੍ਥੋ ਗਹੇਤਬ੍ਬੋ. ਅਸਮ੍ਭੋਗਂ ਭਿਕ੍ਖੁਸਙ੍ਘੇਨਾਤਿ ਏਤ੍ਥ ‘‘ਕਤੋ’’ਤਿ ਪਾਠਸੇਸੋ.

੨੬੮. ਯਾਵ ਪਚ੍ਛਿਮਾ ਸੋਪਾਨਕਲ਼ੇਵਰਾਤਿ ਪਠਮਸੋਪਾਨਫਲਕਂ ਸਨ੍ਧਾਯ ਵੁਤ੍ਤਂ. ਤਞ੍ਹਿ ਪਚ੍ਛਾ ਦੁਸ੍ਸੇਨ ਸਨ੍ਥਤਤ੍ਤਾ ਏਵ ਵੁਤ੍ਤਂ. ‘‘ਪਚ੍ਛਿਮਂ ਜਨਤਂ ਤਥਾਗਤੋ ਅਨੁਕਮ੍ਪਤੀ’’ਤਿ ਇਦਂ ਥੇਰੋ ਅਨਾਗਤੇ ਭਿਕ੍ਖੂਨਂ ਚੇਲਪਟਿਕਸ੍ਸ ਅਕ੍ਕਮਨਪਚ੍ਚਯਾ ਅਪਵਾਦਂ ਸਿਕ੍ਖਾਪਦਪਞ੍ਞਤ੍ਤਿਯਾ ਨਿਵਾਰਣੇਨ ਭਗਵਤੋ ਅਨੁਕਮ੍ਪਂ ਸਨ੍ਧਾਯਾਹ. ਅਪਗਤਗਬ੍ਭਾਤਿ ਵਿਜਾਤਪੁਤ੍ਤਾ. ਤੇਨਾਹ ‘‘ਮਙ੍ਗਲਤ੍ਥਾਯਾ’’ਤਿ.

੨੬੯-੨੭੦. ਬੀਜਨਿਨ੍ਤਿ ਚਤੁਰਸ੍ਸਬੀਜਨਿਂ. ਏਕਪਣ੍ਣਚ੍ਛਤ੍ਤਨ੍ਤਿ ਤਾਲਪਣ੍ਣਾਦਿਨਾ ਏਕੇਨ ਪਤ੍ਤੇਨ ਕਤਛਤ੍ਤਂ.

੨੭੪-੫. ਅਨੁਰਕ੍ਖਣਤ੍ਥਨ੍ਤਿ ਪਰਿਗ੍ਗਹੇਤ੍ਵਾ ਗੋਪਨਤ੍ਥਂ. ਦੀਘਂ ਕਾਰੇਨ੍ਤੀਤਿ ਕੇਸੇਹਿ ਸਦ੍ਧਿਂ ਅਚ੍ਛਿਨ੍ਦਿਤ੍ਵਾ ਠਪਾਪੇਨ੍ਤਿ. ਚਤੁਕੋਣਨ੍ਤਿ ਯਥਾ ਉਪਰਿ ਨਲਾਟਨ੍ਤੇਸੁ ਦ੍ਵੇ, ਹੇਟ੍ਠਾ ਹਨੁਕਪਸ੍ਸੇ ਦ੍ਵੇਤਿ ਚਤ੍ਤਾਰੋ ਕੋਣਾ ਪਞ੍ਞਾਯਨ੍ਤਿ, ਏਵਂ ਚਤੁਰਸ੍ਸਂ ਕਤ੍ਵਾ ਕਪ੍ਪਾਪਨਂ. ਪਾਲ਼ਿਯਂ ਦਾਠਿਕਂ ਠਪਾਪੇਨ੍ਤੀਤਿ ਉਤ੍ਤਰੋਟ੍ਠੇ ਮਸ੍ਸੁਂ ਅਚ੍ਛਿਨ੍ਦਿਤ੍ਵਾ ਠਪਾਪੇਨ੍ਤਿ. ਰੁਧੀਤਿ ਖੁਦ੍ਦਕਵਣਂ.

੨੭੭. ਪਾਲ਼ਿਯਂ ਲੋਹਭਣ੍ਡਕਂਸਭਣ੍ਡਸਨ੍ਨਿਚਯੋਤਿ ਲੋਹਭਣ੍ਡਸ੍ਸ, ਕਂਸਭਣ੍ਡਸ੍ਸ ਚ ਸਨ੍ਨਿਚਯੋਤਿ ਅਤ੍ਥੋ. ਬਨ੍ਧਨਮਤ੍ਤਨ੍ਤਿ ਵਾਸਿਦਣ੍ਡਾਦੀਨਂ ਕੋਟੀਸੁ ਅਪਾਤਨਤ੍ਥਂ ਲੋਹੇਹਿ ਬਨ੍ਧਨਂ. ਤਨ੍ਤਕਨ੍ਤਿ ਆਯੋਗਵਾਯਨਤ੍ਥਂ ਤਦਾਕਾਰੇਨ ਪਸਾਰਿਤਤਨ੍ਤਂ.

੨੭੮. ‘‘ਯਤ੍ਥ ਸਰਤਿ, ਤਤ੍ਥ ਬਨ੍ਧਿਤਬ੍ਬ’’ਨ੍ਤਿ ਏਤੇਨ ਅਸਞ੍ਚਿਚ੍ਚ ਕਾਯਬਨ੍ਧਨਂ ਅਬਨ੍ਧਿਤ੍ਵਾ ਪਵਿਟ੍ਠਸ੍ਸ ਅਨਾਪਤ੍ਤੀਤਿ ਦਸ੍ਸੇਤਿ. ਮੁਰਜਵਟ੍ਟਿਸਣ੍ਠਾਨਂ ਵੇਠੇਤ੍ਵਾ ਕਤਨ੍ਤਿ ਏਵਂ ਬਹੁਰਜ੍ਜੁਕੇ ਏਕਤੋ ਕਤ੍ਵਾ ਨਾਨਾਵਣ੍ਣੇਹਿ ਸੁਤ੍ਤੇਹਿ ਕਤਨ੍ਤਿ ਕੇਚਿ ਵਦਨ੍ਤਿ. ਏਕਵਣ੍ਣਸੁਤ੍ਤੇਨਾਪਿ ਵਲਯਘਟਕਾਦਿਵਿਕਾਰਂ ਦਸ੍ਸੇਤ੍ਵਾ ਵੇਠਿਤਮ੍ਪਿ ਮੁਰਜਮੇਵ. ਵਿਕਾਰਂ ਪਨ ਅਦਸ੍ਸੇਤ੍ਵਾ ਮਟ੍ਠਂ ਕਤ੍ਵਾ ਨਿਰਨ੍ਤਰਂ ਵੇਠਿਤਂ ਵਟ੍ਟਤਿ. ਤੇਨੇਵ ਦੁਤਿਯਪਾਰਾਜਿਕਸਂਵਣ੍ਣਨਾਯਂ ਵੁਤ੍ਤਂ ‘‘ਬਹੁਰਜ੍ਜੁਕੇ ਏਕਤੋ ਕਤ੍ਵਾ ਏਕੇਨ ਨਿਰਨ੍ਤਰਂ ਵੇਠੇਤ੍ਵਾ ਕਤਂ ‘ਬਹੁਰਜ੍ਜੁਕ’ਨ੍ਤਿ ਨ ਵਤ੍ਤਬ੍ਬਂ, ਵਟ੍ਟਤੀ’’ਤਿ. ਮੁਦ੍ਦਿਕਕਾਯਬਨ੍ਧਨਂ ਨਾਮ ਚਤੁਰਸ੍ਸਂ ਅਕਤ੍ਵਾ ਸਜ੍ਜਿਤਂ. ਪਾਮਙ੍ਗਦਸਾ ਚਤੁਰਸ੍ਸਾ. ਮੁਦਿਙ੍ਗਸਣ੍ਠਾਨੇਨਾਤਿ ਵਰਕਸੀਸਾਕਾਰੇਨ. ਪਾਸਨ੍ਤੋਤਿ ਦਸਾਪਰਿਯੋਸਾਨਂ.

੨੭੯. ਪਾਲ਼ਿਯਂ ਗਣ੍ਠਿਕਫਲਕਂ ਪਾਸਕਫਲਕਨ੍ਤਿ ਏਤ੍ਥ ਦਾਰੁਦਨ੍ਤਾਦਿਮਯੇਸੁ ਫਲਕੇਸੁ ਗਣ੍ਠਿਕਪਾਸਕਾਨਿ ਅਪ੍ਪੇਤ੍ਵਾ ਚੀਵਰੇ ਠਪੇਤੁਂ ਅਨੁਞ੍ਞਾਤਂ. ਕੋਟ੍ਟੋ ਵਿਵਰਿਯਤੀਤਿ ਅਨੁਵਾਤੋ ਵਿਵਰਿਯਤਿ.

੨੮੦-੧. ਪਾਲ਼ਿਕਾਰਕੋਤਿ ਭਿਕ੍ਖੂਨਂ ਯਥਾਵੁਡ੍ਢਂ ਪਾਲ਼ਿਯਾ ਪਤਿਟ੍ਠਾਪਕੋ. ਤਸ੍ਸਾਪਿ ਤਥਾ ਪਾਰੁਪਿਤੁਂ ਨ ਵਟ੍ਟਤਿ. ਪਾਲ਼ਿਯਂ ਮੁਣ੍ਡਵਟ੍ਟੀਤਿ ਮਲ੍ਲਾਦਯੋ.

੨੮੨. ਪਮਾਣਙ੍ਗੁਲੇਨਾਤਿ ਵਡ੍ਢਕੀਅਙ੍ਗੁਲੇਨ. ਕੇਚਿ ਪਨ ‘‘ਪਕਤਿਅਙ੍ਗੁਲੇਨਾ’’ਤਿ ਵਦਨ੍ਤਿ, ਤਂ ਚਤੁਰਙ੍ਗੁਲਪਚ੍ਛਿਮਕਵਚਨੇਨ ਨ ਸਮੇਤਿ. ਨ ਹਿ ਪਕਤਙ੍ਗੁਲੇਨ ਚਤੁਰਙ੍ਗੁਲਪ੍ਪਮਾਣਂ ਦਨ੍ਤਕਟ੍ਠਂ ਕਣ੍ਠੇ ਅਵਿਲਗ੍ਗਂ ਖਾਦਿਤੁਂ ਸਕਾਤਿ.

੨੮੫. ਪਾਲ਼ਿਯਂ ਸਕਾਯ ਨਿਰੁਤ੍ਤਿਯਾ ਬੁਦ੍ਧਵਚਨਂ ਦੂਸੇਨ੍ਤੀਤਿ ਮਾਗਧਭਾਸਾਯ ਸਬ੍ਬੇਸਂ ਵਤ੍ਤੁਂ ਸੁਕਰਤਾਯ ਹੀਨਜਚ੍ਚਾਪਿ ਉਗ੍ਗਣ੍ਹਨ੍ਤਾ ਦੂਸੇਨ੍ਤੀਤਿ ਅਤ੍ਥੋ.

੨੮੯. ਮਾ ਭਿਕ੍ਖੂ ਬ੍ਯਾਬਾਧਯਿਂਸੂਤਿ ਲਸੁਣਗਨ੍ਧੇਨ ਭਿਕ੍ਖੂ ਮਾ ਬਾਧਯਿਂਸੁ.

੨੯੧. ਅਵਲੇਖਨਪੀਠਰੋਤਿ ਅਵਲੇਖਨਕਟ੍ਠਾਨਂ ਠਪਨਭਾਜਨਵਿਸੇਸੋ. ਅਪਿਧਾਨਨ੍ਤਿ ਪਿਧਾਨਫਲਕਾਦਿ.

ਖੁਦ੍ਦਕਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

ਖੁਦ੍ਦਕਵਤ੍ਥੁਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.