੪. ਸਮਥਕ੍ਖਨ੍ਧਕੋ

ਸਤਿਵਿਨਯਕਥਾਦਿਵਣ੍ਣਨਾ

੧੯੫. ਸਮਥਕ੍ਖਨ੍ਧਕੇ ਖੀਣਾਸਵਸ੍ਸ ਵਿਪੁਲਸਤਿਂ ਨਿਸ੍ਸਾਯ ਦਾਤਬ੍ਬੋ ਵਿਨਯੋ ਚੋਦਨਾਦਿਅਸਾਰੁਪ੍ਪਾਨਂ ਵਿਨਯਨੁਪਾਯੋ ਸਤਿਵਿਨਯੋ.

੧੯੬. ਚਿਤ੍ਤਵਿਪਰਿਯਾਸਕਤੋਤਿ ਕਤਚਿਤ੍ਤਵਿਪਰਿਯਾਸੋ. ਗਗ੍ਗਂ ਭਿਕ੍ਖੁਂ…ਪੇ… ਚੋਦੇਨ੍ਤੀਤਿ ਏਤ੍ਥ ਪਨ ਉਮ੍ਮਤ੍ਤਕਸ੍ਸ ਇਦਂ ਉਮ੍ਮਤ੍ਤਕਂ, ਅਜ੍ਝਾਚਿਣ੍ਣਂ. ਤਦੇਵ ਚਿਤ੍ਤਵਿਪਰਿਯਾਸੇਨ ਕਤਨ੍ਤਿ ਚਿਤ੍ਤਵਿਪਰਿਯਾਸਕਤਂ. ਤੇਨ ਉਮ੍ਮਤ੍ਤਕੇਨ ਚਿਤ੍ਤਵਿਪਰਿਯਾਸਕਤੇਨ ਅਜ੍ਝਾਚਿਣ੍ਣੇਨ ਅਨਾਚਾਰੇਨ ਆਪਨ੍ਨਾਯ ਆਪਤ੍ਤਿਯਾ ਗਗ੍ਗਂ ਭਿਕ੍ਖੁਂ ਚੋਦੇਨ੍ਤੀਤਿ ਏਵਮਤ੍ਥੋ ਦਟ੍ਠਬ੍ਬੋ. ਪਠਮਂ ਮੂਲ਼੍ਹੋ ਹੁਤ੍ਵਾ ਪਚ੍ਛਾ ਅਮੂਲ਼੍ਹਭਾਵਂ ਉਪਗਤਸ੍ਸ ਦਾਤਬ੍ਬੋ ਵਿਨਯੋ ਅਮੂਲ਼੍ਹਵਿਨਯੋ.

੨੦੨. ਧਮ੍ਮਵਾਦੀਨਂ ਯੇਭੁਯ੍ਯਭਾਵਸਮ੍ਪਾਦਿਕਾ ਕਿਰਿਯਾ ਯੇਭੁਯ੍ਯਸਿਕਾਤਿ ਇਮਸ੍ਮਿਂ ਅਤ੍ਥੇ ਸ-ਕਾਰਾਗਮਸਹਿਤੋ ਇਕ-ਪਚ੍ਚਯਨ੍ਤੋਯਂ ਸਦ੍ਦੋਤਿ ਦਸ੍ਸੇਤੁਂ ਆਹ ‘‘ਯਸ੍ਸਾ’’ਤਿਆਦਿ. ਤਤ੍ਥ ਯਸ੍ਸਾ ਕਿਰਿਯਾਯਾਤਿ ਗੂਲ਼੍ਹਕਵਿਵਟ੍ਟਕਾਦਿਨਾ ਸਲਾਕਗ੍ਗਾਹਾਪਕਕਿਰਿਯਾਯ. ਯੇਭੁਯ੍ਯਭਾਵਂ ਨਿਸ੍ਸਿਤਸਮਥਕਿਰਿਯਾ ਯੇਭੁਯ੍ਯਸਿਕਾਤਿ ਏਵਂ ਯੇਭੁਯ੍ਯਸਿਕਾਸਦ੍ਦਸ੍ਸ ਅਤ੍ਥੋ ਗਹੇਤਬ੍ਬੋ. ਏਵਞ੍ਹਿ ਅਯਂ ਅਧਿਕਰਣਸਮਥੋ ਨਾਮ ਹੋਤਿ. ਯਥਾਵੁਤ੍ਤਸਲਾਕਗ੍ਗਾਹੇਨ ਹਿ ਧਮ੍ਮਵਾਦੀਨਂ ਯੇਭੁਯ੍ਯਭਾਵੇ ਸਿਦ੍ਧੇ ਪਚ੍ਛਾ ਤਂ ਯੇਭੁਯ੍ਯਭਾਵਂ ਨਿਸ੍ਸਾਯੇਵ ਅਧਿਕਰਣਵੂਪਸਮੋ ਹੋਤਿ, ਨ ਧਮ੍ਮਵਾਦੀਨਂ ਬਹੁਤਰਭਾਵਸਾਧਕਕਿਰਿਯਾਮਤ੍ਤੇਨ.

੨੦੭. ‘‘ਸੇਸਮੇਤ੍ਥ ਤਜ੍ਜਨੀਯਾਦੀਸੁ ਵੁਤ੍ਤਨਯਮੇਵਾ’’ਤਿ ਏਤੇਨ ਤਜ੍ਜਨੀਯਾਦਿਸਤ੍ਤਕਮ੍ਮਾਨਿ ਵਿਯ ਇਦਮ੍ਪਿ ਤਸ੍ਸਪਾਪਿਯਸਿਕਾਕਮ੍ਮਂ ਅਸੁਚਿਭਾਵਾਦਿਦੋਸਯੁਤ੍ਤਸ੍ਸ, ਸਙ੍ਘਸ੍ਸ ਚ ਵਿਨਿਚ੍ਛਯੇ ਅਤਿਟ੍ਠਮਾਨਸ੍ਸ ਕਤ੍ਤਬ੍ਬਂ ਵਿਸੁਂ ਏਕਂ ਨਿਗ੍ਗਹਕਮ੍ਮਨ੍ਤਿ ਦਸ੍ਸੇਤਿ. ਏਤਸ੍ਮਿਞ੍ਹਿ ਨਿਗ੍ਗਹਕਮ੍ਮੇ ਕਤੇ ਸੋ ਪੁਗ੍ਗਲੋ ‘‘ਅਹਂ ਸੁਦ੍ਧੋ’’ਤਿ ਅਤ੍ਤਨੋ ਸੁਦ੍ਧਿਯਾ ਸਾਧਨਤ੍ਥਂ ਸਙ੍ਘਮਜ੍ਝਂ ਓਤਰਿਤੁਂ, ਸਙ੍ਘੋ ਚਸ੍ਸ ਵਿਨਿਚ੍ਛਯਂ ਦਾਤੁਂ ਨ ਲਭਤਿ, ਤਂ ਕਮ੍ਮਕਰਣਮਤ੍ਤੇਨੇਵ ਚ ਤਂ ਅਧਿਕਰਣਂ ਵੂਪਸਨ੍ਤਂ ਹੋਤਿ.

ਕਥਂ ਪਨੇਤਂ ਕਮ੍ਮਂ ਪਟਿਪ੍ਪਸ੍ਸਮ੍ਭਤੀਤਿ? ਕੇਚਿ ਪਨੇਤ੍ਥ ‘‘ਸੋ ਤਥਾ ਨਿਗ੍ਗਹਿਤੋ ਨਿਗ੍ਗਹਿਤੋਵ ਹੋਤਿ, ਓਸਾਰਣਂ ਨ ਲਭਤਿ. ਤੇਨੇਵ ਪਾਲ਼ਿਯਂ ਓਸਾਰਣਾ ਨ ਵੁਤ੍ਤਾ’’ਤਿ ਵਦਨ੍ਤਿ. ਅਞ੍ਞੇ ਪਨ ‘‘ਪਾਲ਼ਿਯਂ ਨ ਉਪਸਮ੍ਪਾਦੇਤਬ੍ਬਨ੍ਤਿਆਦਿਨਾ ਸਮ੍ਮਾਵਤ੍ਤਨਸ੍ਸ ਵੁਤ੍ਤਤ੍ਤਾ ਸਮ੍ਮਾਵਤ੍ਤਿਤ੍ਵਾ ਲਜ੍ਜਿਧਮ੍ਮੇ ਓਕ੍ਕਨ੍ਤਸ੍ਸ ਓਸਾਰਣਾ ਅਵੁਤ੍ਤਾਪਿ ਤਜ੍ਜਨੀਯਾਦੀਸੁ ਵਿਯ ਨਯਤੋ ਕਮ੍ਮਵਾਚਂ ਯੋਜੇਤ੍ਵਾ ਓਸਾਰਣਾ ਕਾਤਬ੍ਬਾ ਏਵਾ’’ਤਿ ਵਦਨ੍ਤਿ, ਇਦਂ ਯੁਤ੍ਤਂ. ਤੇਨੇਵ ਅਟ੍ਠਕਥਾਯਂ ਵਕ੍ਖਤਿ ‘‘ਸਚੇ ਸੀਲਵਾ ਭਵਿਸ੍ਸਤਿ, ਵਤ੍ਤਂ ਪਰਿਪੂਰੇਤ੍ਵਾ ਪਟਿਪ੍ਪਸ੍ਸਦ੍ਧਿਂ ਲਭਿਸ੍ਸਤਿ. ਨੋ ਚੇ, ਤਥਾਨਾਸਿਤਕੋਵ ਭਵਿਸ੍ਸਤੀ’’ਤਿ (ਚੂਲ਼ਵ. ਅਟ੍ਠ. ੨੩੮). ਤਸ੍ਸਪਾਪਿਯਸਿਕਾਕਮ੍ਮਨ੍ਤਿ ਚ ਅਲੁਤ੍ਤਸਮਾਸੋਯੇਵ. ਤੇਨਾਹ ‘‘ਇਦਂ ਹੀ’’ਤਿ ਆਦਿ.

ਸਤਿਵਿਨਯਕਥਾਦਿਵਣ੍ਣਨਾ ਨਿਟ੍ਠਿਤਾ.

ਅਧਿਕਰਣਕਥਾਵਣ੍ਣਨਾ

੨੧੫. ਵਿਰੂਪਤੋ ਵਿਪਰਿਣਾਮਟ੍ਠੇਨ ਚਿਤ੍ਤਂ ਦੁਕ੍ਖਂ ਵਿਪਚ੍ਚਤੀਤਿ ਆਹ ‘‘ਚਿਤ੍ਤਦੁਕ੍ਖਤ੍ਥਂ ਵੋਹਾਰੋ’’ਤਿਆਦਿ. ਉਪਵਦਨਾਤਿ ਚੋਦਨਾ. ਤਤ੍ਥੇਵਾਤਿ ਅਨੁਵਦਨੇ.

ਆਦਿਤੋ ਪਟ੍ਠਾਯ ਚ ਤਸ੍ਸ ਤਸ੍ਸ ਕਮ੍ਮਸ੍ਸ ਵਿਞ੍ਞਾਤਤ੍ਤਾਤਿ ਵਿਤ੍ਥਾਰਤੋ ਆਗਤਕਮ੍ਮਵਗ੍ਗਸ੍ਸ ਆਦਿਤੋ ਪਟ੍ਠਾਯ ਵਣ੍ਣਨਾਮੁਖੇਨ ਵਿਞ੍ਞਾਤਤ੍ਤਾ ਵਿਨਿਚ੍ਛਯੋ ਭਵਿਸ੍ਸਤੀਤਿ ਯੋਜਨਾ.

੨੧੬. ਪਾਲ਼ਿਯਂ ਅਜ੍ਝਤ੍ਤਂ ਵਾਤਿ ਅਤ੍ਤਨਿ ਵਾ ਅਤ੍ਤਨੋ ਪਰਿਸਾਯ ਵਾ. ਬਹਿਦ੍ਧਾ ਵਾਤਿ ਪਰਸ੍ਮਿਂ ਵਾ ਪਰਸ੍ਸ ਪਰਿਸਾਯ ਵਾ. ਅਨਵਸ੍ਸਵਾਯਾਤਿ ਅਨੁਪ੍ਪਾਦਾਯ.

੨੨੦. ‘‘ਵਿਵਾਦਾਧਿਕਰਣਂ ਕੁਸਲਂ ਅਕੁਸਲਂ ਅਬ੍ਯਾਕਤ’’ਨ੍ਤਿ ਇਦਂ ਪੁਚ੍ਛਾਵਚਨਂ. ਵਿਵਾਦਾਧਿਕਰਣਂ ਸਿਯਾ ਕੁਸਲਨ੍ਤਿਆਦਿ ਵਿਸਜ੍ਜਨਂ. ਏਸ ਨਯੋ ਸੇਸੇਸੁਪਿ.

੨੨੨. ਸਮ੍ਮੁਤਿਸਭਾਵਾਯਪਿ ਆਪਤ੍ਤਿਯਾ ਕਾਰਣੂਪਚਾਰੇਨ ਅਕੁਸਲਾਬ੍ਯਾਕਤਭਾਵੇਨ ਵੁਚ੍ਚਮਾਨੇ ਕੁਸਲਸ੍ਸਾਪਿ ਆਪਤ੍ਤਿਕਾਰਣਤ੍ਤਾ ਤਦੁਪਚਾਰੇਨ ‘‘ਆਪਤ੍ਤਾਧਿਕਰਣਂ ਸਿਯਾ ਕੁਸਲ’’ਨ੍ਤਿ ਵਤ੍ਤਬ੍ਬਂ ਭਵੇਯ੍ਯ, ਤਥਾ ਅਵਤ੍ਵਾ ‘‘ਨਤ੍ਥਿ ਆਪਤ੍ਤਾਧਿਕਰਣਂ ਕੁਸਲ’’ਨ੍ਤਿ ਏਵਂਵਚਨਸ੍ਸ ਕਾਰਣਂ ਦਸ੍ਸੇਤੁਂ ‘‘ਏਤ੍ਥ ਸਨ੍ਧਾਯਭਾਸਿਤਵਸੇਨ ਅਤ੍ਥੋ ਵੇਦਿਤਬ੍ਬੋ’’ਤਿ ਵੁਤ੍ਤਂ. ਏਤ੍ਥ ਚਾਯਮਧਿਪ੍ਪਾਯੋ – ਯਦਿ ਹਿ ਆਪਤ੍ਤਿ ਨਾਮ ਪਰਮਤ੍ਥਧਮ੍ਮਸਭਾਵਾ ਭਵੇਯ੍ਯ, ਤਦਾ ‘‘ਆਪਤ੍ਤਾਧਿਕਰਣਂ ਸਿਯਾ ਅਕੁਸਲ’’ਨ੍ਤਿਆਦਿਵਚਨਂ ਯੁਜ੍ਜੇਯ੍ਯ. ਯਸ੍ਮਾ ਦੁਟ੍ਠਦੋਸਸਿਕ੍ਖਾਪਦਟ੍ਠਕਥਾਦੀਸੁ ਦਸ੍ਸਿਤਦੋਸਪ੍ਪਸਙ੍ਗਤੋ ਪਰਮਤ੍ਥਸਭਆਵਤਾ ਨ ਯੁਤ੍ਤਾ, ਏਕਨ੍ਤਸਮ੍ਮੁਤਿਸਭਾਵਾ ਏਵ ਸਾ ਹੋਤਿ, ਤਸ੍ਮਾ ‘‘ਸਿਯਾ ਅਕੁਸਲਂ ਸਿਯਾ ਅਬ੍ਯਾਕਤ’’ਨ੍ਤਿਪਿ ਨਿਪ੍ਪਰਿਯਾਯਤੋ ਨ ਵਤ੍ਤਬ੍ਬਾ. ਯਦਿ ਪਨ ਅਕੁਸਲਅਬ੍ਯਾਕਤਧਮ੍ਮਸਮੁਟ੍ਠਿਤਤ੍ਤਮੇਵ ਉਪਾਦਾਯ ਪਰਿਯਾਯਤੋ ‘‘ਸਿਯਾ ਅਕੁਸਲਂ ਸਿਯਾ ਅਬ੍ਯਾਕਤ’’ਨ੍ਤਿ ਵੁਤ੍ਤਂ. ਤਦਾ ਕੁਸਲਧਮ੍ਮਸਮਉਟ੍ਠਿਤਤ੍ਤਮ੍ਪਿ ਉਪਾਦਾਯ ਪਰਿਯਾਯਤੋ ‘‘ਆਪਤ੍ਤਾਧਿਕਰਣਂ ਸਿਯਾ ਕੁਸਲ’’ਨ੍ਤਿਪਿ ਵਤ੍ਤਬ੍ਬਂ ਭਵੇਯ੍ਯ. ਯਤੋ ਚੇਤਂ ਵਚਨਂ ਆਪਤ੍ਤਿਯਾ ਅਕੁਸਲਾਬ੍ਯਾਕਤੂਪਚਾਰਾਰਹਤ੍ਤਸ੍ਸ ਕੁਸਲੂਪਚਾਰਾਨਾਰਹਤ੍ਤਸ੍ਸ ਵਿਸੁਂ ਕਾਰਣਸਬ੍ਭਾਵਂ ਸਨ੍ਧਾਯ ਭਾਸਿਤਂ, ਤਸ੍ਮਾ ਯਂ ਤਂ ਕਾਰਣਵਿਸੇਸਂ ਸਨ੍ਧਾਯ ਇਦਂ ਭਾਸਿਤਂ, ਤਸ੍ਸ ਵਸੇਨੇਵੇਤ੍ਥ ਅਤ੍ਥੋ ਵੇਦਿਤਬ੍ਬੋ.

ਇਦਾਨਿ ਪਨ ਯੋ ਅਙ੍ਗਪ੍ਪਹੋਨਕਚਿਤ੍ਤਮੇਵ ਸਨ੍ਧਾਯ ਆਪਤ੍ਤਿਯਾ ਅਕੁਸਲਾਦਿਭਾਵੋ ਵੁਤ੍ਤੋ, ਨਾਞ੍ਞਂ ਵਿਸੇਸਕਾਰਣਂ ਸਨ੍ਧਾਯਾਤਿ ਗਣ੍ਹੇਯ੍ਯ, ਤਸ੍ਸ ਗਾਹੇ ਦੋਸਂ ਦਸ੍ਸੇਨ੍ਤੋ ‘‘ਯਸ੍ਮਿਂ ਹੀ’’ਤਿਆਦਿਮਾਹ. ਤਤ੍ਥ ਪਥਵੀਖਣਨਾਦਿਕੇਤਿ ਪਥਵੀਖਣਨਾਦਿਨਿਮਿਤ੍ਤੇ ਪਣ੍ਣਤ੍ਤਿਵਜ੍ਜੇ. ਆਪਤ੍ਤਾਧਿਕਰਣੇ ਕੁਸਲਚਿਤ੍ਤਂ ਅਙ੍ਗਨ੍ਤਿ ਪਣ੍ਣਤ੍ਤਿਂ ਅਜਾਨਿਤ੍ਵਾ ਕੁਸਲਚਿਤ੍ਤੇਨ ਚੇਤਿਯਙ੍ਗਣਾਦੀਸੁ ਭੂਮਿਸੋਧਨਾਦਿਵਸੇਨ ਪਥਵੀਭੂਤਗਾਮਵਿਕੋਪਨਾਦਿਕਾਲੇ ਕੁਸਲਚਿਤ੍ਤਂ ਕਾਰਣਂ ਹੋਤਿ. ਤਸ੍ਮਿਂ ਸਤੀਤਿ ਤਸ੍ਮਿਂ ਆਪਤ੍ਤਾਧਿਕਰਣੇ ਵਿਜ੍ਜਮਾਨੇ ਕੁਸਲਚਿਤ੍ਤਸਮੁਟ੍ਠਿਤਤ੍ਤੇਨ ਕੁਸਲਵੋਹਾਰਾਰਹਾਯ ਆਪਤ੍ਤਿਯਾ ਵਿਜ੍ਜਮਾਨਾਯਾਤਿ ਅਧਿਪ੍ਪਾਯੋ. ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਚੂਲ਼ਵਗ੍ਗ ੩.੨੨੨) ਪਨ ‘‘ਤਸ੍ਮਿਂ ਸਤੀ’’ਤਿ ਇਮਸ੍ਸ ‘‘ਤਸ੍ਮਿਂ ਕੁਸਲਚਿਤ੍ਤੇ ਆਪਤ੍ਤਿਭਾਵੇਨ ਗਹਿਤੇ’’ਤਿ ਅਤ੍ਥੋ ਵੁਤ੍ਤੋ, ਤਂ ਨ ਯੁਜ੍ਜਤਿ ‘‘ਯਸ੍ਮਿ’’ਨ੍ਤਿ ਯ-ਸਦ੍ਦੇਨ ਪਰਾਮਟ੍ਠਸ੍ਸੇਵ ਆਪਤ੍ਤਾਧਿਕਰਣਸ੍ਸ ‘‘ਤਸ੍ਮਿ’’ਨ੍ਤਿ ਪਰਾਮਸਿਤਬ੍ਬਤੋ.

ਨ ਸਕ੍ਕਾ ਵਤ੍ਤੁਨ੍ਤਿ ਯਦਿ ਸਮ੍ਮੁਤਿਸਭਾਵਾਯਪਿ ਆਪਤ੍ਤਿਯਾ ਅਕੁਸਲਾਦਿਸਮੁਟ੍ਠਿਤਤ੍ਤੇਨ ਅਕੁਸਲਾਦਿਵੋਹਾਰੋ ਕਰੀਯਤਿ, ਤਦਾ ਕੁਸਲਵੋਹਾਰੋਪਿ ਕਤ੍ਤਬ੍ਬੋਤਿ ‘‘ਨਤ੍ਥਿ ਆਪਤ੍ਤਾਧਿਕਰਣਂ ਕੁਸਲ’’ਨ੍ਤਿ ਨ ਸਕ੍ਕਾ ਵਤ੍ਤੁਂ, ਅਞ੍ਞਥਾ ਅਕੁਸਲਾਦਿਭਾਵੋਪਿਸ੍ਸ ਪਟਿਕ੍ਖਿਪਿਤਬ੍ਬੋਤਿ ਅਧਿਪ੍ਪਾਯੋ. ਤਸ੍ਮਾਤਿ ਯਸ੍ਮਾ ਕੁਸਲਾਦੀਨਂ ਤਿਣ੍ਣਂ ਸਮਾਨੇਪਿ ਆਪਤ੍ਤਿਯਾ ਅਙ੍ਗਪ੍ਪਹੋਨਕਤ੍ਤੇ ਕੁਸਲਵੋਹਾਰੋਵ ਆਪਤ੍ਤਿਯਾ ਪਟਿਕ੍ਖਿਤ੍ਤੋ, ਨ ਅਕੁਸਲਾਦਿਵੋਹਾਰੋ, ਤਸ੍ਮਾ ਨਯਿਦਂ ਅਙ੍ਗਪ੍ਪਹੋਨਕਂ ਚਿਤ੍ਤਂ ਸਨ੍ਧਾਯ ਵੁਤ੍ਤਨ੍ਤਿ ‘‘ਆਪਤ੍ਤਾਧਿਕਰਣਂ ਸਿਯਾ ਅਕੁਸਲਂ ਸਿਯਾ ਅਬ੍ਯਾਕਤਂ, ਨਤ੍ਥਿ ਆਪਤ੍ਤਾਧਿਕਰਣਂ ਕੁਸਲ’’ਨ੍ਤਿ ਇਦਂ ਆਪਤ੍ਤਿਯਾ ਸਮੁਟ੍ਠਾਪਕਤ੍ਤੇਨ ਅਙ੍ਗਪ੍ਪਹੋਨਕਂ ਕਾਰਣਭੂਤਂ ਚਿਤ੍ਤਮਤ੍ਤਂ ਸਨ੍ਧਾਯ ਨ ਵੁਤ੍ਤਂ, ਅਞ੍ਞਥਾ ‘‘ਆਪਤ੍ਤਾਧਿਕਰਣਂ ਸਿਯਾ ਕੁਸਲ’’ਨ੍ਤਿਪਿ ਵਤ੍ਤਬ੍ਬਤੋਤਿ ਅਧਿਪ੍ਪਾਯੋ. ਏਤੇਨ ਆਪਤ੍ਤਿਯਾ ਅਕੁਸਲਾਦਿਭਾਵੋਪਿ ਕੇਨਚਿ ਨਿਮਿਤ੍ਤੇਨ ਪਰਿਯਾਯਤੋਵ ਵੁਤ੍ਤੋ, ਨ ਪਰਮਤ੍ਥਤੋਤਿ ਦਸ੍ਸੇਤਿ. ਯਥਾਹ ‘‘ਯਂ ਕੁਸਲਚਿਤ੍ਤੇਨ ਆਪਜ੍ਜਤਿ, ਤਂ ਕੁਸਲਂ, ਇਤਰੇਹਿ ਇਤਰ’’ਨ੍ਤਿ.

ਇਦਂ ਪਨਾਤਿਆਦੀਸੁ ਅਯਂ ਅਧਿਪ੍ਪਾਯੋ – ‘‘ਆਪਤ੍ਤਾਧਿਕਰਣਂ ਸਿਯਾ ਅਕੁਸਲਂ ਸਿਯਾ ਅਬ੍ਯਾਕਤ’’ਨ੍ਤਿ ਇਦਞ੍ਹਿ ਯਂ ਕਿਞ੍ਚਿ ਕਦਾਚਿ ਕਤ੍ਥਚਿ ਕਾਰਣਂ ਭਵਨ੍ਤਂ ਅਨਿਯਤਕਾਰਣਂ ਸਨ੍ਧਾਯ ਵੁਤ੍ਤਂ ਨ ਹੋਤਿ. ਯਂ ਪਨ ਸਬ੍ਬਸਿਕ੍ਖਾਪਦੇਸੁ ਆਪਤ੍ਤਿਯਾ ਕਾਰਣਂ ਭਵਿਤੁਮਰਹਤਿ, ਇਦਮੇਵ ਕਾਰਣਂ ਸਨ੍ਧਾਯ ਵੁਤ੍ਤਂ. ਅਕੁਸਲਞ੍ਹਿ ਪਣ੍ਣਤ੍ਤਿਂ ਞਤ੍ਵਾ ਵੀਤਿਕ੍ਕਮਨ੍ਤਸ੍ਸ ਸਬ੍ਬਾਪਤ੍ਤਿਯਾ ਕਾਰਣਂ ਹੋਤਿ, ਲੋਕਵਜ੍ਜਾਪਤ੍ਤਿਯਾ ਪਨ ਪਣ੍ਣਤ੍ਤਿਂ ਅਜਾਨਨ੍ਤਸ੍ਸਪਿ ਕਾਰਣਂ ਹੋਤਿ. ਕੇਵਲਂ ਪਣ੍ਣਤ੍ਤਿਵਜ੍ਜਾਪਤ੍ਤੀਸੁ ਕੁਸਲਾਬ੍ਯਾਕਤਚਿਤ੍ਤਪਵਤ੍ਤਿਕ੍ਖਣੇ ਏਵ ਅਕੁਸਲਂ ਨ ਵਤ੍ਤਤਿ, ਤਦਞ੍ਞਤ੍ਥ ਸਯਮੇਵ ਪਵਤ੍ਤਤਿ. ਅਬ੍ਯਾਕਤਂ ਪਨ ਕਾਯਵਚੀਭੂਤਂ ਕੁਸਲਾਕੁਸਲਾਦੀਨਂ ਪਵਤ੍ਤਿਕ੍ਖਣੇ ਨਿਰੋਧਸਮਾਪਨ੍ਨਸ੍ਸ ਸਹਸੇਯ੍ਯਾਪਤ੍ਤਿਯਨ੍ਤਿ ਸਬ੍ਬਾਪਤ੍ਤਿਯਾ ਅਙ੍ਗਮੇਵ ਹੋਤਿ ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਕਾਯਵਾਚਙ੍ਗਵਿਰਹਿਤਤ੍ਤਾਭਾਵਾ. ਤਸ੍ਮਾ ਇਮੇਸਂ ਅਕੁਸਲਾਬ੍ਯਾਕਤਾਨਂ ਸਬ੍ਬਾਪਤ੍ਤਿਮੂਲਕਤ੍ਤਮੇਵ ਸਨ੍ਧਾਯ ਇਦਂ ਆਪਤ੍ਤਿਯਾ ਅਕੁਸਲਤ੍ਤਂ, ਅਬ੍ਯਾਕਤਤ੍ਤਞ੍ਚ ਵੁਤ੍ਤਂ. ਯਤ੍ਥ ਪਨ ਪਥਵੀਖਣਨਾਦੀਸੁ ਕੁਸਲਮ੍ਪਿ ਆਪਤ੍ਤਿਯਾ ਕਾਰਣਂ ਹੋਤਿ, ਤਤ੍ਥਾਪਿ ਆਪਤ੍ਤਿਯਾ ਤਦੁਪਚਾਰੇਨ ਕੁਸਲਤ੍ਤਵੋਹਾਰੋ ਅਯੁਤ੍ਤੋ ਸਾਵਜ੍ਜਾਨਵਜ੍ਜਾਨਂ ਏਕਤ੍ਤਵੋਹਾਰਸ੍ਸ ਵਿਰੁਦ੍ਧਤ੍ਤਾ. ਯਦਗ੍ਗੇਨ ਅਞ੍ਞਮਞ੍ਞਂ ਵਿਰੁਦ੍ਧਾ, ਤਦਗ੍ਗੇਨ ਕਾਰਣਕਾਰਿਯਵੋਹਾਰੋਪਿ ਨੇਸਂ ਅਯੁਤ੍ਤੋ. ਤਸ੍ਮਾ ਤਤ੍ਥ ਵਿਜ੍ਜਮਾਨਮ੍ਪਿ ਕੁਸਲਂ ਅਬ੍ਬੋਹਾਰਿਕਂ, ਕਾਯਵਚੀਦ੍ਵਾਰਮੇਵ ਆਵੇਣਿਕਂ ਕਾਰਣਨ੍ਤਿ.

ਤਤ੍ਥ ਏਕਨ੍ਤਤੋ ਅਕੁਸਲਮੇਵਾਤਿ ਅਕੁਸਲਚਿਤ੍ਤੇਨ ਸਮੁਟ੍ਠਹਨਤੋ ਕਾਰਣੂਪਚਾਰਤੋ ਏਵਂ ਵੁਤ੍ਤਂ. ਤਤ੍ਥਾਤਿ ਲੋਕਵਜ੍ਜੇ. ਵਿਕਪ੍ਪੋ ਨਤ੍ਥੀਤਿ ਸਿਯਾ-ਸਦ੍ਦਸ੍ਸ ਵਿਕਪ੍ਪਨਤ੍ਥਤਂ ਦਸ੍ਸੇਤਿ. ਅਕੁਸਲਂ ਹੋਤੀਤਿ ਅਕੁਸਲਸਮੁਟ੍ਠਿਤਾਯ ਕਾਰਣੂਪਚਾਰੇਨ ਅਕੁਸਲਂ ਹੋਤਿ. ਸਹਸੇਯ੍ਯਾਦਿਵਸੇਨ ਆਪਜ੍ਜਨਤੋ ਅਬ੍ਯਾਕਤਂ ਹੋਤੀਤਿ ਇਤ੍ਥਿਯਾਦੀਹਿ ਸਹ ਪਿਟ੍ਠਿਪਸਾਰਣਵਸਪ੍ਪਵਤ੍ਤਕਾਯਦ੍ਵਾਰਸਙ੍ਖਾਤਰੂਪਾਬ੍ਯਾਕਤਵਸੇਨੇਵ ਆਪਜ੍ਜਿਤਬ੍ਬਤੋ ਕਾਰਣੂਪਚਾਰੇਨੇਵ ਆਪਤ੍ਤਿ ਅਬ੍ਯਾਕਤਂ ਹੋਤਿ. ਤਤ੍ਥਾਤਿ ਤਸ੍ਮਿਂ ਪਣ੍ਣਤ੍ਤਿਵਜ੍ਜਾਪਤ੍ਤਾਧਿਕਰਣੇ. ਸਞ੍ਚਿਚ੍ਚਾਸਞ੍ਚਿਚ੍ਚਵਸੇਨਾਤਿ ਪਣ੍ਣਤ੍ਤਿਂ ਞਤ੍ਵਾ, ਅਞ੍ਞਤ੍ਵਾ ਚ ਆਪਜ੍ਜਨਵਸੇਨ ਇਮਂ ਵਿਕਪ੍ਪਭਾਵਂ ਸਨ੍ਧਾਯ ਅਕੁਸਲਤ੍ਤਅਬ੍ਯਾਕਤਤ੍ਤਸਙ੍ਖਾਤਂ ਯਥਾਵੁਤ੍ਤਂ ਇਮਂ ਵਿਕਪ੍ਪਸਭਾਵਂ ਸਨ੍ਧਾਯ ਇਦਂ ਵਚਨਂ ਵੁਤ੍ਤਂ.

ਯਦਿ ਏਵਂ ਅਸਞ੍ਚਿਚ੍ਚਾਪਜ੍ਜਨਪਕ੍ਖੇ ਕੁਸਲੇਨਾਪਿ ਆਪਜ੍ਜਨਤੋ ਤਮ੍ਪਿ ਵਿਕਪ੍ਪਂ ਸਨ੍ਧਾਯ ‘‘ਆਪਤ੍ਤਾਧਿਕਰਣਂ ਸਿਯਾ ਕੁਸਲ’’ਨ੍ਤਿਪਿ ਕਸ੍ਮਾ ਨ ਵੁਤ੍ਤਨ੍ਤਿ ਆਹ ‘‘ਸਚੇ ਪਨਾ’’ਤਿਆਦਿ. ‘‘ਅਚਿਤ੍ਤਕਾਨ’’ਨ੍ਤਿ ਵੁਤ੍ਤਮੇਵਤ੍ਥਂ ਸਮੁਟ੍ਠਾਨਵਸੇਨ ਵਿਭਾਵੇਤੁਂ ‘‘ਏਲ਼ਕਲੋਮਪਦਸੋਧਮ੍ਮਾਦਿਸਮੁਟ੍ਠਾਨਾਨਮ੍ਪੀ’’ਤਿ ਵੁਤ੍ਤਂ. ਅਚਿਤ੍ਤਕਸਮੁਟ੍ਠਾਨਾਨਂ ‘‘ਕੁਸਲਚਿਤ੍ਤਂ ਆਪਜ੍ਜੇਯ੍ਯਾ’’ਤਿ ਏਤੇਨ ਸਾਵਜ੍ਜਭੂਤਾਯ ਆਪਤ੍ਤਿਯਾ ਕਾਰਣੂਪਚਾਰੇਨਾਪਿ ਅਨਵਜ੍ਜਭੂਤਕੁਸਲਵੋਹਾਰੋ ਅਯੁਤ੍ਤੋਤਿ ਦਸ੍ਸੇਤਿ. ‘‘ਨ ਚ ਤਤ੍ਥਾ’’ਤਿਆਦਿਨਾ ਕੁਸਲਸ੍ਸ ਆਪਤ੍ਤਿਯਾ ਕਾਰਣਤ੍ਤਂ ਵਿਜ੍ਜਮਾਨਮ੍ਪਿ ਤਥਾ ਵੋਹਰਿਤੁਂ ਅਯੁਤ੍ਤਨ੍ਤਿ ਪਟਿਕ੍ਖਿਪਿਤ੍ਵਾ ਕਾਯਵਾਚਾਸਙ੍ਖਾਤਂ ਅਬ੍ਯਾਕਤਸ੍ਸੇਵ ਕਾਰਣਤ੍ਤਂ ਦਸ੍ਸੇਤਿ. ਤਤ੍ਥ ਚਲਿਤਪ੍ਪਵਤ੍ਤਾਨਨ੍ਤਿ ਚਲਿਤਾਨਂ, ਪਵਤ੍ਤਾਨਞ੍ਚ. ਚਲਿਤੋ ਹਿ ਕਾਯੋ, ਪਵਤ੍ਤਾ ਵਾਚਾ. ਏਤ੍ਥ ਚ ਕਾਯਵਾਚਾਨਮਞ੍ਞਤਰਮੇਵ ਅਙ੍ਗਂ. ਤਞ੍ਚ…ਪੇ… ਅਬ੍ਯਾਕਤਨ੍ਤਿ ਏਵਂ ਅਬ੍ਯਾਕਤਸ੍ਸ ਆਪਤ੍ਤਿਕਾਰਣਭਾਵੇਨੇਵ ਵੁਤ੍ਤਤ੍ਤਾ. ‘‘ਆਪਤ੍ਤਾਧਿਕਰਣਂ ਸਿਯਾ ਅਕੁਸਲਂ ਸਿਯਾ ਅਬ੍ਯਾਕਤ’’ਨ੍ਤਿ ਇਦਂ ਕਾਰਣੂਪਚਾਰੇਨ ਪਰਿਯਾਯਤੋ ਵੁਤ੍ਤਂ, ਨ ਨਿਪ੍ਪਰਿਯਾਯਤੋਤਿ ਸਿਜ੍ਝਤਿ.

ਯਂ ਪਨ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਚੂਲ਼ਵ. ੩.੨੨੨) ਆਪਤ੍ਤਿਯਾ ਨਿਪ੍ਪਰਿਯਾਯਤੋਵ ਅਕੁਸਲਾਦਿਸਭਾਵਤਂ ਸਮਤ੍ਥੇਤੁਂ ਬਹੁਂ ਪਪਞ੍ਚਿਤਂ, ਤਂ ਨ ਸਾਰਤੋ ਪਚ੍ਚੇਤਬ੍ਬਂ ਦੁਟ੍ਠਦੋਸਸਿਕ੍ਖਾਪਦਟ੍ਠਕਥਾਯਮੇਵ ਪਟਿਕ੍ਖਿਤ੍ਤਤ੍ਤਾ. ਤੇਨੇਵੇਤ੍ਥਾਪਿ ‘‘ਯਂ ਚਿਤ੍ਤਂ ਆਪਤ੍ਤਿਯਾ ਅਙ੍ਗਂ ਹੋਤੀ’’ਤਿਆਦਿਨਾ ਅਕੁਸਲਚਿਤ੍ਤਸ੍ਸਾਪਿ ਆਪਤ੍ਤਿਯਾ ਕਾਰਣਤ੍ਤੇਨ ਭਿਨ੍ਨਤਾਵ ਦਸ੍ਸਿਤਾ. ਯਂ ਪਨੇਤ੍ਥ ਵਤ੍ਤਬ੍ਬਂ, ਤਂ ਹੇਟ੍ਠਾ ਦਸ੍ਸਿਤਮੇਵਾਤਿ ਇਧ ਨ ਵਿਤ੍ਥਾਰਯਿਮ੍ਹ. ਏਵਂ ਵੀਤਿਕ੍ਕਮਤੋ ਯੋ ਵੀਤਿਕ੍ਕਮੋਤਿ ਏਤ੍ਥ ਅਕੁਸਲਚਿਤ੍ਤੇਨ ਞਤ੍ਵਾ ਵੀਤਿਕ੍ਕਮਨ੍ਤਸ੍ਸ ਕਾਯਵਚੀਵੀਤਿਕ੍ਕਮਸਮੁਟ੍ਠਿਤਾ ਆਪਤ੍ਤਿਵੀਤਿਕ੍ਕਮੋਤਿ ਵੁਤ੍ਤੋ. ਏਸ ਨਯੋ ਅਬ੍ਯਾਕਤਵਾਰੇਪਿ.

ਅਧਿਕਰਣਕਥਾਵਣ੍ਣਨਾ ਨਿਟ੍ਠਿਤਾ.

ਅਧਿਕਰਣਵੂਪਸਮਨਸਮਥਕਥਾਦਿਵਣ੍ਣਨਾ

੨੨੮. ਪਾਲ਼ਿਯਂ ਵਿਵਾਦਾਧਿਕਰਣਂ ਏਕਂ ਸਮਥਂ ਅਨਾਗਮ੍ਮਾਤਿਆਦਿ ਪੁਚ੍ਛਾ. ਸਿਯਾਤਿਆਦਿ ਵਿਸ੍ਸਜ੍ਜਨਂ. ਸਿਯਾਤਿਸ੍ਸ ਵਚਨੀਯਨ੍ਤਿ ਏਤੇਨੇਵ ਵੂਪਸਮਂ ਸਿਯਾਤਿ ਵਤ੍ਤਬ੍ਬਂ ਭਵੇਯ੍ਯਾਤਿ ਅਤ੍ਥੋ. ਸਮ੍ਮੁਖਾਵਿਨਯਸ੍ਮਿਨ੍ਤਿ ਸਮ੍ਮੁਖਾਵਿਨਯਤ੍ਤਸ੍ਮਿਨ੍ਤਿ ਭਾਵਪ੍ਪਧਾਨੋ ਨਿਦ੍ਦੇਸੋ ਦਟ੍ਠਬ੍ਬੋ. ਏਵਂ ਸਬ੍ਬਵਾਰੇਸੁ. ‘‘ਕਾਰਕੋ ਉਕ੍ਕੋਟੇਤੀ’’ਤਿ ਇਦਂ ਉਪਲਕ੍ਖਣਮਤ੍ਤਂ, ਯਸ੍ਸ ਕਸ੍ਸਚਿ ਉਕ੍ਕੋਟੇਨ੍ਤਸ੍ਸ ਪਾਚਿਤ੍ਤਿਯਮੇਵ. ਉਬ੍ਬਾਹਿਕਾਯ ਖੀਯਨਕੇ ਪਾਚਿਤ੍ਤਿਯਂ ਨ ਵੁਤ੍ਤਂ ਤਤ੍ਥ ਛਨ੍ਦਦਾਨਸ੍ਸ ਨਤ੍ਥਿਤਾਯ.

੨੩੫. ਵਣ੍ਣਾਵਣ੍ਣਾਯੋ ਕਤ੍ਵਾਤਿ ਖੁਦ੍ਦਕਮਹਨ੍ਤੇਹਿ ਸਞ੍ਞਾਣੇਹਿ ਯੁਤ੍ਤਾਯੋ ਕਤ੍ਵਾ. ਤੇਨਾਹ ‘‘ਨਿਮਿਤ੍ਤਸਞ੍ਞਂ ਆਰੋਪੇਤ੍ਵਾ’’ਤਿ.

੨੪੨. ਕਿਚ੍ਚਾਧਿਕਰਣਂ …ਪੇ… ਸਮ੍ਮਤੀਤਿ ਏਤ੍ਥ ਸਮ੍ਮੁਖਾਵਿਨਯੇਨ ਅਪਲੋਕਨਾਦਿਕਮ੍ਮਂ ਸਮ੍ਪਜ੍ਜਤੀਤਿ ਅਤ੍ਥੋ ਦਟ੍ਠਬ੍ਬੋ.

ਅਧਿਕਰਣਵੂਪਸਮਨਸਮਥਕਥਾਦਿਵਣ੍ਣਨਾ ਨਿਟ੍ਠਿਤਾ.

ਸਮਥਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.