੩. ਸਮੁਚ੍ਚਯਕ੍ਖਨ੍ਧਕੋ

ਸੁਕ੍ਕਵਿਸ੍ਸਟ੍ਠਿਕਥਾਵਣ੍ਣਨਾ

੯੭. ਸਮੁਚ੍ਚਯਕ੍ਖਨ੍ਧਕੇ ਵੇਦਯਾਮਹਨ੍ਤਿ ਜਾਨਾਪੇਮਿ ਅਹਂ, ਆਰੋਚੇਮੀਤਿਅਤ੍ਥੋ. ਅਨੁਭਵਾਮੀਤਿਪਿਸ੍ਸ ਅਤ੍ਥਂ ਵਦਨ੍ਤਿ. ਪੁਰਿਮਂ ਪਨ ਪਸਂਸਨ੍ਤਿ ਆਰੋਪਨਵਚਨਤ੍ਤਾ. ਆਰੋਚੇਤ੍ਵਾ ਨਿਕ੍ਖਿਪਿਤਬ੍ਬਨ੍ਤਿ ਦੁਕ੍ਕਟਪਰਿਮੋਚਨਤ੍ਥਂ ਵੁਤ੍ਤਂ. ਕੇਚਿ ਪਨ ‘‘ਤਦਹੇਵ ਪੁਨ ਵਤ੍ਤਂ ਸਮਾਦਿਯਿਤ੍ਵਾ ਅਰੁਣਂ ਉਟ੍ਠਾਪੇਤੁਕਾਮਸ੍ਸ ਰਤ੍ਤਿਚ੍ਛੇਦਪਰਿਹਾਰਤ੍ਥਮ੍ਪੀ’’ਤਿ ਵਦਨ੍ਤਿ.

‘‘ਸਭਾਗਾ ਭਿਕ੍ਖੂ ਵਸਨ੍ਤੀ’’ਤਿ ਵੁਤ੍ਤਤ੍ਤਾ ਵਿਸਭਾਗਾਨਂ ਵਸਨਟ੍ਠਾਨੇ ਵਤ੍ਤਂ ਅਸਮਾਦਿਯਿਤ੍ਵਾ ਬਹਿ ਏਵ ਕਾਤੁਮ੍ਪਿ ਵਟ੍ਟਤੀਤਿ ਦਟ੍ਠਬ੍ਬਂ. ‘‘ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮਿਤ੍ਵਾ’’ਤਿ ਇਦਂ ਵਿਹਾਰੇ ਭਿਕ੍ਖੂਨਂ ਸਜ੍ਝਾਯਾਦਿਸਦ੍ਦਸਵਨੂਪਚਾਰਵਿਜਹਨਤ੍ਥਂ ਵੁਤ੍ਤਂ. ‘‘ਮਹਾਮਗ੍ਗਤੋ ਓਕ੍ਕਮ੍ਮਾ’’ਤਿ ਇਦਂ ਮਗ੍ਗਪਟਿਪਨ੍ਨਾਨਂ ਭਿਕ੍ਖੂਨਂ ਉਪਚਾਰਾਤਿਕ੍ਕਮਨਤ੍ਥਂ ਵੁਤ੍ਤਂ. ਗੁਮ੍ਬੇਨ ਵਾਤਿਆਦਿ ਦਸ੍ਸਨੂਪਚਾਰਵਿਜਹਨਤ੍ਥਂ.

‘‘ਸੋਪਿ ਕੇਨਚਿ ਕਮ੍ਮੇਨ ਪੁਰੇ ਅਰੁਣੇ ਏਵ ਗਚ੍ਛਤੀ’’ਤਿ ਇਮਿਨਾ ਆਰੋਚਨਾਯ ਕਤਾਯ ਸਬ੍ਬੇਸੁਪਿ ਭਿਕ੍ਖੂਸੁ ਵਿਹਾਰਗਤੇਸੁ ਊਨੇ ਗਣੇ ਚਰਣਦੋਸੋ ਵਾ ਵਿਪ੍ਪਵਾਸਦੋਸੋ ਵਾ ਨ ਹੋਤਿ ਆਰੋਚਿਤਤ੍ਤਾ ਸਹਵਾਸਸ੍ਸਾਤਿ ਦਸ੍ਸੇਤਿ. ਤੇਨਾਹ ‘‘ਅਯਞ੍ਚਾ’’ ਤਿਆਦਿ. ਅਬ੍ਭਾਨਂ ਕਾਤੁਂ ਨ ਵਟ੍ਟਤੀਤਿ ਕਤਮ੍ਪਿ ਅਕਤਮੇਵ ਹੋਤੀਤਿ ਅਤ੍ਥੋ.

ਸੁਕ੍ਕਵਿਸ੍ਸਟ੍ਠਿਕਥਾਵਣ੍ਣਨਾ ਨਿਟ੍ਠਿਤਾ.

ਪਟਿਚ੍ਛਨ੍ਨਪਰਿਵਾਸਕਥਾਵਣ੍ਣਨਾ

੧੦੨. ਸੁਦ੍ਧਸ੍ਸਾਤਿ ਸਭਾਗਸਙ੍ਘਾਦਿਸੇਸਂ ਅਨਾਪਨ੍ਨਸ੍ਸ, ਤਤੋ ਵੁਟ੍ਠਿਤਸ੍ਸ ਵਾ. ਅਞ੍ਞਸ੍ਮਿਨ੍ਤਿ ਸੁਦ੍ਧਨ੍ਤਪਰਿਵਾਸਵਸੇਨ ਆਪਤ੍ਤਿਵੁਟ੍ਠਾਨਤੋ ਅਞ੍ਞਸ੍ਮਿਂ ਆਪਤ੍ਤਿਵੁਟ੍ਠਾਨੇ. ਪਾਲ਼ਿਯਂ ‘‘ਪਟਿਕਸ੍ਸਿਤੋ ਸਙ੍ਘੇਨ ਉਦਾਯਿ ਭਿਕ੍ਖੁ ਅਨ੍ਤਰਾ ਏਕਿਸ੍ਸਾ ਆਪਤ੍ਤਿਯਾ…ਪੇ… ਮੂਲਾਯਪਟਿਕਸ੍ਸਨਾ’’ਤਿ ਇਦਂ ਕਰਣਵਸੇਨ ਵਿਪਰਿਣਾਮੇਤ੍ਵਾ ਮੂਲਾਯਪਟਿਕਸ੍ਸਨਾਯ ਪਟਿਕਸ੍ਸਿਤੋਤਿ ਯੋਜੇਤਬ੍ਬਂ. ਅਥ ਵਾ ‘‘ਮੂਲਾਯ ਪਟਿਕਸ੍ਸਨਾ ਖਮਤਿ ਸਙ੍ਘਸ੍ਸਾ’’ਤਿ ਉਤ੍ਤਰਪਦੇਨ ਸਹ ਪਚ੍ਚਤ੍ਤਵਸੇਨੇਵ ਯੋਜੇਤੁਮ੍ਪਿ ਵਟ੍ਟਤਿ.

‘‘ਉਦਾਯਿਂ ਭਿਕ੍ਖੁਂ ਅਨ੍ਤਰਾ ਏਕਿਸ੍ਸਾ ਆਪਤ੍ਤਿਯਾ…ਪੇ… ਮੂਲਾਯ ਪਟਿਕਸ੍ਸਿਤ੍ਵਾ’’ਤਿ ਏਤ੍ਥ ਅਨ੍ਤਰਾ ਏਕਿਸ੍ਸਾ ਆਪਤ੍ਤਿਯਾ ਹੇਤੁਭੂਤਾਯ ਉਦਾਯਿਂ ਭਿਕ੍ਖੁਂ ਮੂਲਾਯ ਪਟਿਕਸ੍ਸਿਤ੍ਵਾ ਮੂਲਦਿਵਸੇ ਆਕਡ੍ਢਿਤ੍ਵਾ ਤਸ੍ਸਾ ਅਨ੍ਤਰਾਪਤ੍ਤਿਯਾ ਸਮੋਧਾਨਪਰਿਵਾਸਂ ਦੇਤੂਤਿ ਯੋਜਨਾ. ਆਵਿਕਾਰਾਪੇਤ੍ਵਾ ਵਿਸ੍ਸਜ੍ਜੇਤਬ੍ਬੋਤਿ ਤਸ੍ਸ ਅਤੇਕਿਚ੍ਛਭਾਵਂ ਤੇਨੇਵ ਸਙ੍ਘਸ੍ਸ ਪਾਕਟਂ ਕਾਰੇਤ੍ਵਾ ਲਜ੍ਜਿਗਣਤੋ ਵਿਯੋਜਨਵਸੇਨ ਵਿਸ੍ਸਜ੍ਜੇਤਬ੍ਬੋ.

ਸਤਂ ਆਪਤ੍ਤਿਯੋਤਿ ਕਾਯਸਂਸਗ੍ਗਾਦਿਵਸੇਨ ਏਕਦਿਵਸੇ ਆਪਨ੍ਨਾ ਸਤਂ ਆਪਤ੍ਤਿਯੋ. ਦਸਸਤਨ੍ਤਿ ਸਹਸ੍ਸਾ ਆਪਤ੍ਤਿਯੋ. ਰਤ੍ਤਿਸਤਂ ਛਾਦਯਿਤ੍ਵਾਨਾਤਿ ਯੋਜੇਤਬ੍ਬੋ. ਸਬ੍ਬਪਰਿਵਾਸਕਮ੍ਮਵਾਚਾਵਸਾਨੇਤਿ ਹੇਟ੍ਠਾ ਦਸ੍ਸਿਤਾਨਂ ਦ੍ਵਿਨ੍ਨਂ ਸੁਦ੍ਧਨ੍ਤਪਰਿਵਾਸਾਨਂ, ਤਿਣ੍ਣਂ ਸਮੋਧਾਨਪਰਿਵਾਸਾਨਞ੍ਚਾਤਿ ਇਮੇਸਂ ਸਬ੍ਬੇਸਂ ਪਰਿਵਾਸਾਨਂ ਕਮ੍ਮਵਾਚਾਪਰਿਯੋਸਾਨੇ. ਪੁਰਿਮਨਯੇਨੇਵਾਤਿ ਪਟਿਚ੍ਛਨ੍ਨਪਰਿਵਾਸੇ ਵੁਤ੍ਤਨਯੇਨ.

ਵਿਹਾਰੂਪਚਾਰਤੋਪੀਤਿ ਬਹਿਗਾਮੇ ਭਿਕ੍ਖੂਨਂ ਵਿਹਾਰੂਪਚਾਰਤੋਪਿ. ‘‘ਦ੍ਵੇ ਲੇਡ੍ਡੁਪਾਤਾ ਅਤਿਕ੍ਕਮਿਤਬ੍ਬਾ’’ਤਿ ਇਦਂ ਭਿਕ੍ਖੂਨਂ ਸਵਨੂਪਚਾਰਾਤਿਕ੍ਕਮਨਂ ਵੁਤ੍ਤਂ. ਗਾਮਸ੍ਸਾਤਿ ਨ ਵੁਤ੍ਤਨ੍ਤਿ ਗਾਮਸ੍ਸ ਉਪਚਾਰਂ ਮੁਞ੍ਚਿਤੁਂ ਵਟ੍ਟਤੀਤਿ ਨ ਵੁਤ੍ਤਂ. ਤੇਨ ਗਾਮੂਪਚਾਰੇ ਠਿਤਾਪਿ ਤਤ੍ਥ ਦਸ੍ਸਨਸਵਨੂਪਚਾਰੇ ਅਤਿਕ੍ਕਮਿਤ੍ਵਾ ਠਿਤਾ ਭਿਕ੍ਖੂ ਚ ਭਿਕ੍ਖੁਨਿਯੋ ਚ ਤਸ੍ਸਾ ਰਤ੍ਤਿਚ੍ਛੇਦਂ ਨ ਕਰੋਨ੍ਤੀਤਿ ਦੀਪੇਤਿ.

ਅਨਿਕ੍ਖਿਤ੍ਤਵਤ੍ਤਭਿਕ੍ਖੂਨਂ ਵੁਤ੍ਤਨਯੇਨੇਵਾਤਿ ਉਪਚਾਰਸੀਮਾਯ ਪਵਿਟ੍ਠਾਨਂ ਵਸੇਨ ਰਤ੍ਤਿਚ੍ਛੇਦਂ ਸਨ੍ਧਾਯ ਵੁਤ੍ਤਂ. ਤਸ੍ਮਿਂ ਗਾਮੇਤਿ ਭਿਕ੍ਖੁਨੀਨਂ ਨਿਵਾਸਨਗਾਮੇ. ਅਤ੍ਤਾਨਂ ਦਸ੍ਸੇਤ੍ਵਾਤਿ ਯਥਾ ਆਰੋਚੇਤੁਂ ਸਕ੍ਕਾ, ਤਥਾ ਦਸ੍ਸੇਤ੍ਵਾ. ‘‘ਸਮ੍ਮਨ੍ਨਿਤ੍ਵਾ ਦਾਤਬ੍ਬਾ’’ਤਿ ਇਮਿਨਾ ਸਮ੍ਮਤਾਯ ਸਹਵਾਸੇਪਿ ਰਤ੍ਤਿਚ੍ਛੇਦੋ ਨ ਹੋਤੀਤਿ ਦਸ੍ਸੇਤਿ.

ਮੂਲਾਯਪਟਿਕਸ੍ਸਿਤਸ੍ਸਾਤਿ ਮੂਲਾਯਪਟਿਕਸ੍ਸਿਤਸ੍ਸ ਪੁਨ ਪਰਿਵੁਤ੍ਥਪਰਿਵਾਸਸ੍ਸਾਤਿ ਅਤ੍ਥੋ. ਤਿਸ੍ਸਨ੍ਨਨ੍ਤਿ ਮੂਲਾਪਤ੍ਤਿਯਾ ਸਹ ਦ੍ਵਿਨ੍ਨਂ ਅਨ੍ਤਰਾਪਤ੍ਤੀਨਞ੍ਚ.

੧੦੮. ਸਚੇ ਪਟਿਚ੍ਛਨ੍ਨਾਤਿ ਨਿਕ੍ਖਿਤ੍ਤਵਤ੍ਤੇਨਾਪਨ੍ਨਾਪਤ੍ਤਿਂ ਸਨ੍ਧਾਯ ਵੁਤ੍ਤਂ. ਪਾਲ਼ਿਯਂ ਪਞ੍ਚਾਹਪ੍ਪਟਿਚ੍ਛਨ੍ਨਵਾਰੇ ਅਨ੍ਤਰਾਪਤ੍ਤਿਕਥਾਯਂ ‘‘ਏਵਞ੍ਚ ਪਨ, ਭਿਕ੍ਖਵੇ, ਛਾਰਤ੍ਤਂ ਮਾਨਤ੍ਤਂ ਦਾਤਬ੍ਬ’’ਨ੍ਤਿ ਇਦਂ ਮੂਲਾਯਪਟਿਕਸ੍ਸਨਾਕਮ੍ਮਵਾਚਾਨਨ੍ਤਰਮੇਵ ਦਾਤੁਂ ਵੁਤ੍ਤਂ ਨ ਹੋਤਿ. ਮੂਲਾਯਪਟਿਕਸ੍ਸਿਤਸ੍ਸ ਪਨ ਪਞ੍ਚਦਿਵਸਾਨਿ ਪਰਿਵਸਿਤ੍ਵਾ ਯਾਚਿਤਸ੍ਸ ਮਾਨਤ੍ਤਚਰਣਕਾਲੇ ਆਪਨ੍ਨਾਯ ਤਤਿਯਾਯ ਅਨ੍ਤਰਾਪਤ੍ਤਿਯਾ ਅਪ੍ਪਟਿਚ੍ਛਨ੍ਨਾਯ ਮਾਨਤ੍ਤਦਾਨਂ ਸਨ੍ਧਾਯ ਵੁਤ੍ਤਂ. ਏਵਞ੍ਚ ਦਿਨ੍ਨਮਾਨਤ੍ਤਸ੍ਸ ਏਕੇਨ ਛਾਰਤ੍ਤੇਨ ਪੁਬ੍ਬੇ ਦਿਨ੍ਨਮਾਨਤ੍ਤਾਹਿ ਤੀਹਿ ਆਪਤ੍ਤੀਹਿ ਸਹ ਚਤਸ੍ਸਨ੍ਨਮ੍ਪਿ ਆਪਤ੍ਤੀਨਂ ਮਾਨਤ੍ਤਂ ਚਿਣ੍ਣਮੇਵ ਹੋਤਿ. ਇਮਿਨਾ ਪਨ ਨਯੇਨ ਅਬ੍ਭਾਨਾਰਹਕਾਲੇ ਆਪਨ੍ਨਾਯ ਅਨ੍ਤਰਾਪਤ੍ਤਿਯਾ, ਪਕ੍ਖਪ੍ਪਟਿਚ੍ਛਨ੍ਨਵਾਰੇ ਅਨ੍ਤਰਾਪਤ੍ਤੀਸੁ ਚ ਪਟਿਪਜ੍ਜਨਂ ਵੇਦਿਤਬ੍ਬਂ. ‘‘ਏਕਾਹਪ੍ਪਟਿਚ੍ਛਨ੍ਨਾਦਿਵਸੇਨ ਪਞ੍ਚਾ’’ਤਿ ਇਦਂ ਏਕਾਹਪ੍ਪਟਿਚ੍ਛਨ੍ਨਾਦੀਨਂ ਚਤੁਨ੍ਨਂ ਪਚ੍ਚੇਕਪਰਿਵਾਸਦਾਨਮਾਨਤ੍ਤਦਾਨਅਬ੍ਭਾਨਾਨਿ ਏਕੇਕਂ ਕਤ੍ਵਾ ਵੁਤ੍ਤਂ. ‘‘ਅਨ੍ਤਰਾਪਤ੍ਤਿਵਸੇਨ ਚਤਸ੍ਸੋ’’ਤਿ ਇਦਮ੍ਪਿ ਮਾਨਤ੍ਤਦਾਨਅਬ੍ਭਾਨਾਨਿ ਤਸ੍ਮਿਂ ਤਸ੍ਮਿਂ ਮੂਲਾਯਪਟਿਕਸ੍ਸਨੇ ਏਕਤ੍ਤਂ ਆਰੋਪੇਤ੍ਵਾ ਵੁਤ੍ਤਂ.

ਪਟਿਚ੍ਛਨ੍ਨਪਰਿਵਾਸਕਥਾਵਣ੍ਣਨਾ ਨਿਟ੍ਠਿਤਾ.

ਸਮੋਧਾਨਪਰਿਵਾਸਕਥਾਵਣ੍ਣਨਾ

੧੨੫. ‘‘ਯਸ੍ਮਾ ਪਟਿਚ੍ਛਨ੍ਨਾ ਅਨ੍ਤਰਾਪਤ੍ਤੀ’’ਤਿ ਇਦਂ ਸਮੋਧਾਨਪਰਿਵਾਸਦਾਨਸ੍ਸ ਕਾਰਣਵਚਨਂ, ਨ ਪਨ ਚਿਣ੍ਣਪਰਿਵੁਤ੍ਥਦਿਵਸਾਨਂ ਮਕ੍ਖਿਤਭਾਵਸ੍ਸ, ਅਪ੍ਪਟਿਚ੍ਛਨ੍ਨਾਯ ਅਨ੍ਤਰਾਪਤ੍ਤਿਯਾ ਮੂਲਾਯਪਟਿਕਸ੍ਸਨੇ ਕਤੇਪਿ ਤੇਸਂ ਮਕ੍ਖਿਤਭਾਵਸਮ੍ਭਵਤੋ. ਤਸ੍ਮਾ ‘‘ਮਾਨਤ੍ਤਚਿਣ੍ਣਦਿਵਸਾਪਿ ਪਰਿਵੁਤ੍ਥਦਿਵਸਾਪਿ ਸਬ੍ਬੇ ਮਕ੍ਖਿਤਾਵ ਹੋਨ੍ਤੀ’’ਤਿ ਇਮਸ੍ਸਾਨਨ੍ਤਰਂ ‘‘ਸਮੋਧਾਨਪਰਿਵਾਸੋ ਚਸ੍ਸ ਦਾਤਬ੍ਬੋ’’ਤਿ ਏਵਮੇਤ੍ਥ ਯੋਜਨਾ ਕਾਤਬ੍ਬਾ. ਤੇਨਾਹ ‘‘ਤੇਨੇਵਾ’’ਤਿਆਦਿ.

ਸਮੋਧਾਨਪਰਿਵਾਸਕਥਾਵਣ੍ਣਨਾ ਨਿਟ੍ਠਿਤਾ.

ਅਗ੍ਘਸਮੋਧਾਨਪਰਿਵਾਸਕਥਾਵਣ੍ਣਨਾ

੧੩੪. ‘‘ਏਕਾਪਤ੍ਤਿਮੂਲਕਞ੍ਚਾ’’ਤਿ ਇਮਿਨਾ ‘‘ਏਕਾ ਆਪਤ੍ਤਿ ਏਕਾਹਪ੍ਪਟਿਚ੍ਛਨ੍ਨਾ, ਏਕਾ ਆਪਤ੍ਤਿ ਦ੍ਵੀਹਪ੍ਪਟਿਚ੍ਛਨ੍ਨਾ’’ਤਿਆਦਿਨਯਂ ਦਸ੍ਸੇਤਿ. ਅਪ੍ਪਟਿਚ੍ਛਨ੍ਨਭਾਵਂ ਦਸ੍ਸੇਤੁਨ੍ਤਿ ਅਜਾਨਨਾਦਿਨਾ ਪਟਿਚ੍ਛਨ੍ਨਾਯਪਿ ਆਪਤ੍ਤਿਯਾ ਮਾਨਤ੍ਤਾਰਹਤਾਵਚਨੇਨ ਅਪ੍ਪਟਿਚ੍ਛਨ੍ਨਭਾਵਂ ਦਸ੍ਸੇਤੁਂ. ‘‘ਏਕਸ੍ਸ, ਆਵੁਸੋ, ਮਾਸਸ੍ਸ ਭਿਕ੍ਖੁ ਮਾਨਤ੍ਤਾਰਹੋ’’ਤਿ (ਚੂਲ਼ਵ. ੧੫੩) ਹਿ ਵੁਤ੍ਤਂ. ਏਤ੍ਥ ਏਕਸ੍ਸ ਅਜਾਨਨਪਟਿਚ੍ਛਨ੍ਨਮਾਸਸ੍ਸ ਪਰਿਵਾਸਾਰਹੋ ਨ ਹੋਤਿ, ਕੇਵਲਂ ਆਪਤ੍ਤਿਯਾ ਅਪ੍ਪਟਿਚ੍ਛਨ੍ਨਤ੍ਤਾ ਮਾਨਤ੍ਤਾਰਹੋ ਹੋਤੀਤਿ ਅਧਿਪ੍ਪਾਯੋ. ਪਾਲ਼ਿਯਂ ਮਕ੍ਖਧਮ੍ਮੋਤਿ ਮਦ੍ਦਿਤੁਕਾਮਤਾ. ਸਙ੍ਘਾਦਿਸੇਸਾਨਂ ਪਰਿਵਾਸਦਾਨਾਦਿਸਬ੍ਬਵਿਨਿਚ੍ਛਯਸ੍ਸ ਸਮੁਚ੍ਚਯਤ੍ਤਾ ਪਨੇਸ ਸਮੁਚ੍ਚਯਕ੍ਖਨ੍ਧਕੋਤਿ ਵੁਤ੍ਤੋਤਿ ਵੇਦਿਤਬ੍ਬੋ.

ਅਗ੍ਘਸਮੋਧਾਨਪਰਿਵਾਸਕਥਾਵਣ੍ਣਨਾ ਨਿਟ੍ਠਿਤਾ.

ਸਮੁਚ੍ਚਯਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.