੮. ਚੀਵਰਕ੍ਖਨ੍ਧਕੋ

ਜੀਵਕਵਤ੍ਥੁਕਥਾਦਿਵਣ੍ਣਨਾ

੩੨੯. ਚੀਵਰਕ੍ਖਨ੍ਧਕੇ ਕਮ੍ਮਵਿਪਾਕਨ੍ਤਿ ਕਮ੍ਮਪਚ੍ਚਯਉਤੁਚਿਤ੍ਤਾਹਾਰਸਮੁਟ੍ਠਿਤਂ ਅਪ੍ਪਟਿਬਾਹਿਯਰੋਗਂ ਸਨ੍ਧਾਯ ਵੁਤ੍ਤਂ ਕਮ੍ਮਜਸ੍ਸ ਰੋਗਸ੍ਸ ਅਭਾਵਾ.

੩੩੦. ਪਾਲ਼ਿਯਂ ਸਂਯਮਸ੍ਸਾਤਿ ਸਙ੍ਗਹਣਸ੍ਸ. ਅਵਿਸਜ੍ਜਨਸ੍ਸਾਤਿ ਅਤ੍ਥੋ ‘‘ਯੋ ਸਂਯਮੋ ਸੋ ਵਿਨਾਸੋ’’ਤਿਆਦੀਸੁ (ਪੇ. ਵ. ੨੩੭) ਵਿਯ. ਏਤਸ੍ਸ ਸਂਯਮਸ੍ਸ ਫਲਂ ਉਪਜਾਨਾਮਾਤਿ ਯੋਜਨਾ. ਤਮੇਵ ਫਲਂ ਦਸ੍ਸੇਨ੍ਤੀ ਆਹ ‘‘ਵਰਮੇਤਂ…ਪੇ… ਆਸਿਤ੍ਤ’’ਨ੍ਤਿ. ਕੇਚਿ ਪਨ ‘‘ਸਂਯਮਸ੍ਸਾਤਿ ਆਨਿਸਂਸਸ੍ਸ, ਉਪਯੋਗਤ੍ਥੇ ਚੇਤਂ ਸਾਮਿਵਚਨ’’ਨ੍ਤਿ (ਸਾਰਤ੍ਥ. ਟੀ. ਮਹਾਵਗ੍ਗ ੩.੩੨੯-੩੩੦) ਅਤ੍ਥਂ ਵਦਨ੍ਤਿ.

੩੩੬. ਉਸ੍ਸਨ੍ਨਦੋਸੋਤਿ ਸਞ੍ਜਾਤਪਿਤ੍ਤਾਦਿਦੋਸੋ. ਸਬ੍ਬਤ੍ਥਾਤਿ ਸਕਲਸਰੀਰੇ.

੩੩੭. ਮਹਾਪਿਟ੍ਠਿਯਕੋਜਵਨ੍ਤਿ ਹਤ੍ਥਿਪਿਟ੍ਠਿਯਂ ਅਤ੍ਥਰਿਤਬ੍ਬਤਾਯ ‘‘ਮਹਾਪਿਟ੍ਠਿਯ’’ਨ੍ਤਿ ਲਦ੍ਧਸਮਞ੍ਞਂ ਉਣ੍ਣਾਮਯਤ੍ਥਰਣਂ.

੩੩੮-੯. ਉਪਡ੍ਢਕਾਸਿਨਂ ਖਮਮਾਨਨ੍ਤਿ ਅਡ੍ਢਕਾਸਿਅਗ੍ਘਨਕਂ. ਪਾਲ਼ਿਯਂ ਕਿਂ ਨੁ ਖੋਤਿ ਕਤਮਂ ਨੁ ਖੋ.

੩੪੦-੩੪੨. ਉਪਚਾਰੇਤਿ ਸੁਸਾਨਸ੍ਸ ਆਸਨ੍ਨੇ ਪਦੇਸੇ. ਛਡ੍ਡੇਤ੍ਵਾ ਗਤਾਤਿ ਕਿਞ੍ਚਿ ਅਵਤ੍ਵਾ ਏਵ ਛਡ੍ਡੇਤ੍ਵਾ ਗਤਾ, ਏਤੇਨ ‘‘ਭਿਕ੍ਖੂ ਗਣ੍ਹਨ੍ਤੂ’’ਤਿ ਛਡ੍ਡਿਤੇ ਏਵ ਅਕਾਮਾ ਭਾਗਦਾਨਂ ਵਿਹਿਤਂ, ਕੇਵਲਂ ਛਡ੍ਡਿਤੇ ਪਨ ਕਤਿਕਾਯ ਅਸਤਿ ਏਕਤੋ ਬਹੂਸੁ ਪਵਿਟ੍ਠੇਸੁ ਯੇਨ ਗਹਿਤਂ, ਤੇਨ ਅਕਾਮਭਾਗੋ ਨ ਦਾਤਬ੍ਬੋਤਿ ਦਸ੍ਸੇਤਿ. ਸਮਾਨਾ ਦਿਸਾ ਪੁਰਤ੍ਥਿਮਾਦਿਭੇਦਾ ਏਤੇਸਨ੍ਤਿ ਸਦਿਸਾਤਿ ਆਹ ‘‘ਏਕਦਿਸਾਯ ਵਾ ਓਕ੍ਕਮਿਂਸੂ’’ਤਿ. ਧੁਰਵਿਹਾਰਟ੍ਠਾਨੇਤਿ ਵਿਹਾਰਸ੍ਸ ਸਮ੍ਮੁਖਟ੍ਠਾਨੇ.

ਜੀਵਕਵਤ੍ਥੁਕਥਾਦਿਵਣ੍ਣਨਾ ਨਿਟ੍ਠਿਤਾ.

ਭਣ੍ਡਾਗਾਰਸਮ੍ਮੁਤਿਆਦਿਕਥਾਵਣ੍ਣਨਾ

੩੪੩. ਵਿਹਾਰਮਜ੍ਝੇਤਿ ਸਬ੍ਬੇਸਂ ਜਾਨਨਤ੍ਥਾਯ ਵੁਤ੍ਤਂ. ਵਣ੍ਣਾਵਣ੍ਣਂ ਕਤ੍ਵਾਤਿ ਪਟਿਵੀਸਪ੍ਪਹੋਨਕਤਾਜਾਨਨਤ੍ਥਂ ਹਲਿਦ੍ਦਿਯਾਦੀਹਿ ਖੁਦ੍ਦਕਮਹਨ੍ਤਵਣ੍ਣੇਹਿ ਯੁਤ੍ਤੇ ਸਮੇ ਕੋਟ੍ਠਾਸੇ ਕਤ੍ਵਾ. ਤੇਨਾਹ ‘‘ਸਮੇ ਪਟਿਵੀਸੇ ਠਪੇਤ੍ਵਾ’’ਤਿ. ਇਦਨ੍ਤਿ ਸਾਮਣੇਰਾਨਂ ਉਪਡ੍ਢਪਟਿਵੀਸਦਾਨਂ. ਫਾਤਿਕਮ੍ਮਨ੍ਤਿ ਪਹੋਨਕਕਮ੍ਮਂ. ਯਤ੍ਤਕੇਨ ਵਿਨਯਾਗਤੇਨ ਸਮ੍ਮੁਞ੍ਜਨੀਬਨ੍ਧਨਾਦਿਹਤ੍ਥਕਮ੍ਮੇਨ ਵਿਹਾਰਸ੍ਸ ਊਨਕਤਾ ਨ ਹੋਤਿ, ਤਤ੍ਤਕਂ ਕਤ੍ਵਾਤਿ ਅਤ੍ਥੋ. ਸਬ੍ਬੇਸਨ੍ਤਿ ਤਤ੍ਰੁਪ੍ਪਾਦਵਸ੍ਸਾਵਾਸਿਕਂ ਗਣ੍ਹਨ੍ਤਾਨਂ ਸਬ੍ਬੇਸਂ ਭਿਕ੍ਖੂਨਂ, ਸਾਮਣੇਰਾਨਞ੍ਚ. ਭਣ੍ਡਾਗਾਰਿਕਚੀਵਰੇਪੀਤਿ ਅਕਾਲਚੀਵਰਂ ਸਨ੍ਧਾਯ ਵੁਤ੍ਤਂ. ਏਤਨ੍ਤਿ ਉਕ੍ਕੁਟ੍ਠਿਯਾ ਕਤਾਯ ਸਮਭਾਗਦਾਨਂ. ਵਿਰਜ੍ਝਿਤ੍ਵਾ ਕਰੋਨ੍ਤੀਤਿ ਕਤ੍ਤਬ੍ਬਕਾਲੇਸੁ ਅਕਤ੍ਵਾ ਯਥਾਰੁਚਿਤਕ੍ਖਣੇ ਕਰੋਨ੍ਤਿ.

ਏਤ੍ਤਕੇਨ ਮਮ ਚੀਵਰਂ ਪਹੋਤੀਤਿ ਦ੍ਵਾਦਸਗ੍ਘਨਕੇਨੇਵ ਮਮ ਚੀਵਰਂ ਪਰਿਪੁਣ੍ਣਂ ਹੋਤਿ, ਨ ਤਤੋ ਊਨੇਨਾਤਿ ਸਬ੍ਬਂ ਗਹੇਤੁਕਾਮੋਤਿ ਅਤ੍ਥੋ.

ਭਣ੍ਡਾਗਾਰਸਮ੍ਮੁਤਿਆਦਿਕਥਾਵਣ੍ਣਨਾ ਨਿਟ੍ਠਿਤਾ.

ਚੀਵਰਰਜਨਕਥਾਦਿਵਣ੍ਣਨਾ

੩੪੪. ਏਵਞ੍ਹਿ ਕਤੇਤਿ ਵਟ੍ਟਾਧਾਰਸ੍ਸ ਅਨ੍ਤੋ ਰਜਨੋਦਕਂ, ਬਹਿ ਛਲ੍ਲਿਕਞ੍ਚ ਕਤ੍ਵਾ ਵਿਯੋਜਨੇ ਕਤੇ. ਨ ਉਤ੍ਤਰਤੀਤਿ ਕੇਵਲਂ ਉਦਕਤੋ ਫੇਣੁਟ੍ਠਾਨਾਭਾਵਾ ਨ ਉਤ੍ਤਰਤਿ. ਰਜਨਕੁਣ੍ਡਨ੍ਤਿ ਪਕ੍ਕਰਜਨਟ੍ਠਪਨਕਂ ਮਹਾਘਟਂ.

੩੪੫. ਅਨੁਵਾਤਾਦੀਨਂ ਦੀਘਪਤ੍ਤਾਨਨ੍ਤਿ ਆਯਾਮਤੋ, ਵਿਤ੍ਥਾਰਤੋ ਚ ਅਨੁਵਾਤਂ. ਆਦਿ-ਸਦ੍ਦੇਨ ਦ੍ਵਿਨ੍ਨਂ ਖਨ੍ਧਾਨਂ ਅਨ੍ਤਰਾ ਮਾਤਿਕਾਕਾਰੇਨ ਠਪਿਤਪਤ੍ਤਞ੍ਚ ‘‘ਦੀਘਪਤ੍ਤ’’ਨ੍ਤਿ ਦਟ੍ਠਬ੍ਬਂ. ਆਗਨ੍ਤੁਕਪਤ੍ਤਨ੍ਤਿ ਦਿਗੁਣਚੀਵਰਸ੍ਸ ਉਪਰਿ ਅਞ੍ਞਂ ਪਟ੍ਟਂ ਅਪ੍ਪੇਨ੍ਤਿ, ਤਂ ਸਨ੍ਧਾਯ ਵੁਤ੍ਤਂ. ਤਂ ਕਿਰ ਇਦਾਨਿ ਨ ਕਰੋਨ੍ਤਿ.

੩੪੬. ਪਾਲ਼ਿਯਂ ਨਨ੍ਦਿਮੁਖਿਯਾਤਿ ਤੁਟ੍ਠਿਮੁਖਿਯਾ, ਪਸਨ੍ਨਦਿਸਾਮੁਖਾਯਾਤਿ ਅਤ੍ਥੋ.

੩੪੮. ਅਚ੍ਛੁਪੇਯ੍ਯਨ੍ਤਿ ਪਤਿਟ੍ਠਪੇਯ੍ਯਂ. ਹਤਵਤ੍ਥਕਾਨਨ੍ਤਿ ਪੁਰਾਣਵਤ੍ਥਾਨਂ. ਅਨੁਦ੍ਧਰਿਤ੍ਵਾਵਾਤਿ ਅਗ੍ਗਲ਼ੇ ਵਿਯ ਦੁਬ੍ਬਲਟ੍ਠਾਨਂ ਅਨਪਨੇਤ੍ਵਾਵ.

੩੪੯-੩੫੧. ਵਿਸਾਖਵਤ੍ਥੁਮ੍ਹਿ ਕਲ੍ਲਕਾਯਾਤਿ ਅਕਿਲਨ੍ਤਕਾਯਾ. ਗਤੀਤਿ ਞਾਣਗਤਿ ਅਧਿਗਮੋ. ਅਭਿਸਮ੍ਪਰਾਯੋਤਿ ‘‘ਸਕਿਦੇਵ ਇਮਂ ਲੋਕਂ ਆਗਨ੍ਤ੍ਵਾ ਦੁਕ੍ਖਸ੍ਸਨ੍ਤਂ ਕਰੋਤੀ’’ਤਿਆਦਿਨਾ (ਸਂ. ਨਿ. ੫.੧੦੪੮) ਵੁਤ੍ਤੋ ਞਾਣਾਭਿਸਮ੍ਪਰਾਯੋ, ਮਗ੍ਗਞਾਣਯੁਤ੍ਤੇਹਿ ਗਨ੍ਤਬ੍ਬਗਤਿਵਿਸੇਸੋਤਿ ਅਤ੍ਥੋ. ਤਂ ਭਗਵਾ ਬ੍ਯਾਕਰਿਸ੍ਸਤਿ. ‘‘ਦਦਾਤਿ ਦਾਨ’’ਨ੍ਤਿ ਇਦਂ ਅਨ੍ਨਪਾਨਵਿਰਹਿਤਾਨਂ ਸੇਸਪਚ੍ਚਯਾਨਂ ਦਾਨਵਸੇਨ ਵੁਤ੍ਤਂ. ਸੋਵਗ੍ਗਿਕਨ੍ਤਿ ਸਗ੍ਗਸਂਵਤ੍ਤਨਿਕਂ.

੩੫੯. ਅਟ੍ਠਪਦਕਚ੍ਛਨ੍ਨੇਨਾਤਿ ਅਟ੍ਠਪਦਕਸਙ੍ਖਾਤਜੂਤਫਲਕਲੇਖਾਸਣ੍ਠਾਨੇਨ.

੩੬੨. ਪਾਲ਼ਿਯਂ ਨਦੀਪਾਰਂ ਗਨ੍ਤੁਨ੍ਤਿ ਭਿਕ੍ਖੁਨੋ ਨਦੀਪਾਰਗਮਨਂ ਹੋਤੀਤਿ ਅਤ੍ਥੋ. ਅਗ੍ਗਲ਼ਗੁਤ੍ਤਿਯੇਵ ਪਮਾਣਨ੍ਤਿ ਇਮੇਹਿ ਚਤੂਹਿ ਨਿਕ੍ਖੇਪਕਾਰਣੇਹਿ ਠਪੇਨ੍ਤੇਨਪਿ ਅਗ੍ਗਲ਼ਗੁਤ੍ਤਿਵਿਹਾਰੇ ਏਵ ਠਪੇਤੁਂ ਵਟ੍ਟਤੀਤਿ ਅਧਿਪ੍ਪਾਯੋ. ਨਿਸ੍ਸੀਮਾਗਤਨ੍ਤਿ ਵਸ੍ਸਾਨਸਙ੍ਖਾਤਂ ਕਾਲਸੀਮਂ ਅਤਿਕ੍ਕਨ੍ਤਂ, ਤਂ ਵਸ੍ਸਿਕਸਾਟਿਕਚੀਵਰਂ ਨ ਹੋਤੀਤਿ ਅਤ੍ਥੋ.

ਚੀਵਰਰਜਨਕਥਾਦਿਵਣ੍ਣਨਾ ਨਿਟ੍ਠਿਤਾ.

ਸਙ੍ਘਿਕਚੀਵਰੁਪ੍ਪਾਦਕਥਾਵਣ੍ਣਨਾ

੩੬੩. ਪਞ੍ਚ ਮਾਸੇਤਿ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ. ਵਡ੍ਢਿਂ ਪਯੋਜੇਤ੍ਵਾ ਠਪਿਤਉਪਨਿਕ੍ਖੇਪਤੋਤਿ ਵਸ੍ਸਾਵਾਸਿਕਸ੍ਸਤ੍ਥਾਯ ਦਾਯਕੇਹਿ ਵਡ੍ਢਿਂ ਪਯੋਜੇਤ੍ਵਾ ਠਪਿਤਉਪਨਿਕ੍ਖੇਪਤੋ. ‘‘ਇਧ ਵਸ੍ਸਂਵੁਤ੍ਥਸਙ੍ਘਸ੍ਸਾ’’ਤਿ ਇਦਂ ਅਭਿਲਾਪਮਤ੍ਤਂ. ਇਧ-ਸਦ੍ਦਂ ਪਨ ਵਿਨਾ ‘‘ਵਸ੍ਸਂਵੁਤ੍ਥਸਙ੍ਘਸ੍ਸ ਦੇਮਾ’’ਤਿ ਵੁਤ੍ਤੇਪਿ ਸੋ ਏਵ ਨਯੋ. ਅਨਤ੍ਥਤਕਥਿਨਸ੍ਸਾਪਿ ਪਞ੍ਚ ਮਾਸੇ ਪਾਪੁਣਾਤੀਤਿ ਵਸ੍ਸਾਵਾਸਿਕਲਾਭਵਸੇਨ ਉਪ੍ਪਨ੍ਨਤ੍ਤਾ ਅਨਤ੍ਥਤਕਥਿਨਸ੍ਸਾਪਿ ਵੁਤ੍ਥਵਸ੍ਸਸ੍ਸ ਪਞ੍ਚ ਮਾਸੇ ਪਾਪੁਣਾਤਿ. ਵਕ੍ਖਤਿ ਹਿ ‘‘ਚੀਵਰਮਾਸਤੋ ਪਟ੍ਠਾਯ ਯਾਵ ਹੇਮਨ੍ਤਸ੍ਸ ਪਚ੍ਛਿਮੋ ਦਿਵਸੋ, ਤਾਵ ਵਸ੍ਸਾਵਾਸਿਕਂ ਦੇਮਾਤਿ ਵੁਤ੍ਤੇ ਕਥਿਨਂ ਅਤ੍ਥਤਂ ਵਾ ਹੋਤੁ ਅਨਤ੍ਥਤਂ ਵਾ, ਅਤੀਤਵਸ੍ਸਂਵੁਤ੍ਥਾਨਮੇਵ ਪਾਪੁਣਾਤੀ’’ਤਿ (ਮਹਾਵ. ਅਟ੍ਠ. ੩੭੯). ਤਤੋ ਪਰਨ੍ਤਿ ਪਞ੍ਚਮਾਸਤੋ ਪਰਂ, ਗਿਮ੍ਹਾਨਸ੍ਸ ਪਠਮਦਿਵਸਤੋ ਪਟ੍ਠਾਯਾਤਿ ਅਤ੍ਥੋ. ‘‘ਕਸ੍ਮਾ? ਪਿਟ੍ਠਿਸਮਯੇ ਉਪ੍ਪਨ੍ਨਤ੍ਤਾ’’ਤਿ ਇਦਂ ‘‘ਉਦਾਹੁ ਅਨਾਗਤਵਸ੍ਸੇ’’ਤਿ ਇਮਸ੍ਸਾਨਨ੍ਤਰਂ ਦਟ੍ਠਬ੍ਬਂ. ਪੋਤ੍ਥਕੇਸੁ ਪਨ ‘‘ਅਨਤ੍ਥਤਕਥਿਨਸ੍ਸਾਪਿ ਪਞ੍ਚ ਮਾਸੇ ਪਾਪੁਣਾਤੀ’’ਤਿ ਇਮਸ੍ਸਾਨਨ੍ਤਰਂ ‘‘ਕਸ੍ਮਾ ਪਿਟ੍ਠਿਸਮਯੇ ਉਪ੍ਪਨ੍ਨਤ੍ਤਾ’’ਤਿ ਇਦਂ ਲਿਖਨ੍ਤਿ, ਤਂ ਪਮਾਦਲਿਖਿਤਂ ਪਿਟ੍ਠਿਸਮਯੇ ਉਪ੍ਪਨ੍ਨਂ ਸਨ੍ਧਾਯ ‘‘ਅਨਤ੍ਥਤਕਥਿਨਸ੍ਸਾਪੀ’’ਤਿ ਵਤ੍ਤਬ੍ਬਤੋ. ਵੁਤ੍ਥਵਸ੍ਸੇ ਹਿ ਸਨ੍ਧਾਯ ‘‘ਅਨਤ੍ਥਤਕਥਿਨਸ੍ਸਾਪੀ’’ਤਿ ਵੁਤ੍ਤਂ, ਨ ਚ ਪਿਟ੍ਠਿਸਮਯੇ ਉਪ੍ਪਨ੍ਨਂ ਵੁਤ੍ਥਵਸ੍ਸਸ੍ਸੇਵ ਪਾਪੁਣਾਤੀਤਿ ਸਮ੍ਮੁਖੀਭੂਤਾਨਂ ਸਬ੍ਬੇਸਮ੍ਪਿ ਪਾਪੁਣਨਤੋ. ਤੇਨੇਵ ਵਕ੍ਖਤਿ ‘‘ਸਚੇ ਪਨ ਗਿਮ੍ਹਾਨਂ ਪਠਮਦਿਵਸਤੋ ਪਟ੍ਠਾਯ ਏਵਂ ਵਦਤਿ, ਤਤ੍ਰ ਸਮ੍ਮੁਖੀਭੂਤਾਨਂ ਸਬ੍ਬੇਸਂ ਪਾਪੁਣਾਤਿ. ਕਸ੍ਮਾ? ਪਿਟ੍ਠਿਸਮਯੇ ਉਪ੍ਪਨ੍ਨਤ੍ਤਾ’’ਤਿ (ਮਹਾਵ. ਅਟ੍ਠ. ੧੭੯).

ਦੁਗ੍ਗਹਿਤਾਨੀਤਿ ਅਗ੍ਗਹਿਤਾਨਿ. ਸਙ੍ਘਿਕਾਨੇਵਾਤਿ ਅਤ੍ਥੋ. ਇਤੋਵਾਤਿ ਥੇਰਾਨਂ ਦਾਤਬ੍ਬਤੋਵ, ਇਦਾਨੇਵਾਤਿ ਵਾ ਅਤ੍ਥੋ.

ਸਙ੍ਘਿਕਚੀਵਰੁਪ੍ਪਾਦਕਥਾਵਣ੍ਣਨਾ ਨਿਟ੍ਠਿਤਾ.

ਉਪਨਨ੍ਦਸਕ੍ਯਪੁਤ੍ਤਵਤ੍ਥੁਕਥਾਵਣ੍ਣਨਾ

੩੬੪. ‘‘ਸਤ੍ਤਾਹਵਾਰੇਨ ਅਰੁਣਮੇਵ ਉਟ੍ਠਾਪੇਤੀ’’ਤਿ ਇਦਂ ਨਾਨਾਸੀਮਾਵਿਹਾਰੇਸੁ ਕਤ੍ਤਬ੍ਬਨਯੇਨ ਏਕਸ੍ਮਿਮ੍ਪਿ ਵਿਹਾਰੇ ਦ੍ਵੀਸੁ ਸੇਨਾਸਨੇਸੁ ਨਿਵੁਤ੍ਥਭਾਵਦਸ੍ਸਨਤ੍ਥਂ ਵੁਤ੍ਤਂ, ਅਰੁਣੁਟ੍ਠਾਪਨੇਨੇਵ ਤਤ੍ਥ ਵੁਤ੍ਥੋ ਹੋਤਿ, ਨ ਪਨ ਵਸ੍ਸਚ੍ਛੇਦਪਰਿਹਾਰਾਯ. ਅਨ੍ਤੋਉਪਚਾਰਸੀਮਾਯਪਿ ਯਤ੍ਥ ਕਤ੍ਥਚਿ ਅਰੁਣਂ ਉਟ੍ਠਾਪੇਨ੍ਤੋ ਅਤ੍ਤਨਾ ਗਹਿਤਸੇਨਾਸਨਂ ਅਪ੍ਪਵਿਟ੍ਠੋਪਿ ਵੁਤ੍ਥਵਸ੍ਸੋ ਏਵ ਹੋਤਿ, ਗਹਿਤਸੇਨਾਸਨੇ ਪਨ ਨਿਵੁਤ੍ਥੋ ਨਾਮ ਨ ਹੋਤਿ, ਤਤ੍ਥ ਚ ਅਰੁਣੁਟ੍ਠਾਪਨੇ ਪਨ ਸਤਿ ਹੋਤਿ. ਤੇਨਾਹ ‘‘ਪੁਰਿਮਸ੍ਮਿਂ ਬਹੁਤਰਂ ਨਿਵਸਤਿ ਨਾਮਾ’’ਤਿ, ਏਤੇਨ ਚ ਇਤਰਸ੍ਮਿਂ ਸਤ੍ਤਾਹਵਾਰੇਨਾਪਿ ਅਰੁਣੁਟ੍ਠਾਪਨੇ ਸਤਿ ਏਵ ਅਪ੍ਪਕਤਰਂ ਨਿਵਸਤਿ ਨਾਮ ਹੋਤਿ, ਨਾਸਤੀਤਿ ਦੀਪਿਤਂ ਹੋਤਿ. ਨਾਨਾਲਾਭੇਹੀਤਿ ਵਿਸੁਂ ਵਿਸੁਂ ਨਿਬਦ੍ਧਵਸ੍ਸਾਵਾਸਿਕਲਾਭੇਹਿ. ਨਾਨੂਪਚਾਰੇਹੀਤਿ ਨਾਨਾਪਰਿਕ੍ਖੇਪਨਾਨਾਦ੍ਵਾਰੇਹਿ. ਏਕਸੀਮਾਵਿਹਾਰੇਹੀਤਿ ਦ੍ਵਿਨ੍ਨਂ ਵਿਹਾਰਾਨਂ ਏਕੇਨ ਪਾਕਾਰੇਨ ਪਰਿਕ੍ਖਿਤ੍ਤਤ੍ਤਾ ਏਕਾਯ ਉਪਚਾਰਸੀਮਾਯ ਅਨ੍ਤੋਗਤੇਹਿ ਦ੍ਵੀਹਿ ਵਿਹਾਰੇਹਿ. ਸੇਨਾਸਨਗ੍ਗਾਹੋ ਪਟਿਪ੍ਪਸ੍ਸਮ੍ਭਤੀਤਿ ਪਠਮਂ ਗਹਿਤੋ ਪਟਿਪ੍ਪਸ੍ਸਮ੍ਭਤਿ. ਤਤ੍ਥਾਤਿ ਯਤ੍ਥ ਸੇਨਾਸਨਗ੍ਗਾਹੋ ਪਟਿਪ੍ਪਸ੍ਸਦ੍ਧੋ, ਤਤ੍ਥ.

ਉਪਨਨ੍ਦਸਕ੍ਯਪੁਤ੍ਤਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

ਗਿਲਾਨਵਤ੍ਥੁਕਥਾਵਣ੍ਣਨਾ

੩੬੫-੬. ਭੂਮਿਯਂ ਪਰਿਭਣ੍ਡਂ ਅਕਾਸੀਤਿ ਗਿਲਾਨੇਨ ਨਿਪਨ੍ਨਭੂਮਿਯਂ ਕਿਲਿਟ੍ਠਟ੍ਠਾਨਂ ਧੋਵਿਤ੍ਵਾ ਹਰਿਤੂਪਲਿਤ੍ਤਂ ਕਾਰੇਸੀਤਿ ਅਤ੍ਥੋ. ਭੇਸਜ੍ਜਂ ਯੋਜੇਤੁਂ ਅਸਮਤ੍ਥੋਤਿ ਪਰੇਹਿ ਵੁਤ੍ਤਵਿਧਿਮ੍ਪਿ ਕਾਤੁਂ ਅਸਮਤ੍ਥੋ. ਪਾਲ਼ਿਯਂ ਗਿਲਾਨੁਪਟ੍ਠਾਕਾਨਂ ਚੀਵਰਦਾਨੇ ਸਾਮਣੇਰਾਨਂ ਤਿਚੀਵਰਾਧਿਟ੍ਠਾਨਾਭਾਵਾ ‘‘ਚੀਵਰਞ੍ਚ ਪਤ੍ਤਞ੍ਚਾ’’ਤਿਆਦਿ ਸਬ੍ਬਤ੍ਥ ਵੁਤ੍ਤਂ. ਸਚੇਪਿ ਸਹਸ੍ਸਂ ਅਗ੍ਘਤਿ, ਗਿਲਾਨੁਪਟ੍ਠਾਕਾਨਞ੍ਞੇਵ ਦਾਤਬ੍ਬਨ੍ਤਿ ਸਮ੍ਬਨ੍ਧੋ.

ਗਿਲਾਨਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

ਮਤਸਨ੍ਤਕਕਥਾਦਿਵਣ੍ਣਨਾ

੩੬੯. ਅਞ੍ਞਨ੍ਤਿ ਚੀਵਰਪਤ੍ਤਤੋ ਅਞ੍ਞਂ. ਅਪ੍ਪਗ੍ਘਨ੍ਤਿ ਅਤਿਜਿਣ੍ਣਾਦਿਭਾਵੇਨ ਨਿਹੀਨਂ. ਤਤੋਤਿ ਅਵਸੇਸਪਰਿਕ੍ਖਾਰਤੋ. ਸਬ੍ਬਨ੍ਤਿ ਪਤ੍ਤਂ, ਤਿਚੀਵਰਞ੍ਚ.

ਤਤ੍ਥ ਤਤ੍ਥ ਸਙ੍ਘਸ੍ਸੇਵਾਤਿ ਤਸ੍ਮਿਂ ਤਸ੍ਮਿਂ ਵਿਹਾਰੇ ਸਙ੍ਘਸ੍ਸੇਵ. ਪਾਲ਼ਿਯਂ ਅਵਿਸ੍ਸਜ੍ਜਿਕਂ ਅਵੇਭਙ੍ਗਿਕਨ੍ਤਿ ਆਗਤਾਨਾਗਤਸ੍ਸ ਚਾਤੁਦ੍ਦਿਸਸ੍ਸ ਸਙ੍ਘਸ੍ਸੇਵ ਸਨ੍ਤਕਂ ਹੁਤ੍ਵਾ ਕਸ੍ਸਚਿ ਅਵਿਸ੍ਸਜ੍ਜਿਕਂ ਅਵੇਭਙ੍ਗਿਕਂ ਭਵਿਤੁਂ ਅਨੁਜਾਨਾਮੀਤਿ ਅਤ੍ਥੋ.

੩੭੧-੨. ਅਕ੍ਕਨਾਲ਼ਮਯਨ੍ਤਿ ਅਕ੍ਕਦਣ੍ਡਮਯਂ. ਅਕ੍ਕਦੁਸ੍ਸਾਨੀਤਿ ਅਕ੍ਕਵਾਕੇਨ ਕਤਦੁਸ੍ਸਾਨਿ, ਪੋਤ੍ਥਕਗਤਿਕਾਨਿ ਦੁਕ੍ਕਟਵਤ੍ਥੁਕਾਨੀਤਿ ਅਤ੍ਥੋ. ਦੁਪਟ੍ਟਚੀਵਰਸ੍ਸ ਵਾ ਮਜ੍ਝੇਤਿ ਯਂ ਨਿਟ੍ਠਿਤੇ ਤਿਪਟ੍ਟਚੀਵਰਂ ਹੋਤਿ, ਤਸ੍ਸ ਮਜ੍ਝੇ ਪਟਲਂ ਕਤ੍ਵਾ ਦਾਤਬ੍ਬਾਨੀਤਿ ਅਤ੍ਥੋ.

੩੭੪. ‘‘ਸਨ੍ਤੇ ਪਤਿਰੂਪੇ ਗਾਹਕੇ’’ਤਿ ਵੁਤ੍ਤਤ੍ਤਾ ਗਾਹਕੇ ਅਸਤਿ ਅਦਤ੍ਵਾ ਭਾਜਿਤੇਪਿ ਸੁਭਾਜਿਤਮੇਵਾਤਿ ਦਟ੍ਠਬ੍ਬਂ.

੩੭੬. ਦਕ੍ਖਿਣੋਦਕਂ ਪਮਾਣਨ੍ਤਿ ‘‘ਏਤ੍ਤਕਾਨਿ ਚੀਵਰਾਨਿ ਦਸ੍ਸਾਮੀ’’ਤਿ ਪਠਮਂ ਉਦਕਂ ਪਾਤੇਤ੍ਵਾ ਪਚ੍ਛਾ ਦੇਨ੍ਤਿ. ਤਂ ਯੇਹਿ ਗਹਿਤਂ, ਤੇ ਭਾਗਿਨੋਵ ਹੋਨ੍ਤੀਤਿ ਅਧਿਪ੍ਪਾਯੋ. ਪਰਸਮੁਦ੍ਦੇਤਿ ਜਮ੍ਬੁਦੀਪੇ. ਤਮ੍ਬਪਣ੍ਣਿਦੀਪਞ੍ਹਿ ਉਪਾਦਾਯੇਸ ਏਵਂ ਵੁਤ੍ਤੋ.

ਮਤਸਨ੍ਤਕਕਥਾਦਿਵਣ੍ਣਨਾ ਨਿਟ੍ਠਿਤਾ.

ਅਟ੍ਠਚੀਵਰਮਾਤਿਕਾਕਥਾਵਣ੍ਣਨਾ

੩੭੯. ਪੁਗ੍ਗਲਾਧਿਟ੍ਠਾਨਨਯੇਨ ਵੁਤ੍ਤਨ੍ਤਿ ‘‘ਸੀਮਾਯ ਦਾਨ’’ਨ੍ਤਿਆਦਿਨਾ ਵਤ੍ਤਬ੍ਬੇ ‘‘ਸੀਮਾਯ ਦੇਤੀ’’ਤਿਆਦਿ ਪੁਗ੍ਗਲਾਧਿਟ੍ਠਾਨੇਨ ਵੁਤ੍ਤਂ. ‘‘ਅਪਿਚਾ’’ਤਿਆਦਿਨਾ ਪਠਮਲੇਡ੍ਡੁਪਾਤਭੂਤਪਰਿਕ੍ਖੇਪਾਰਹਟ੍ਠਾਨਤੋ ਬਹਿ ਦੁਤਿਯਲੇਡ੍ਡੁਪਾਤੋਪਿ ਉਪਚਾਰਸੀਮਾ ਏਵਾਤਿ ਦਸ੍ਸੇਤਿ. ਧੁਵਸਨ੍ਨਿਪਾਤਟ੍ਠਾਨਾਦਿਕਮ੍ਪਿ ਪਰਿਯਨ੍ਤੇ ਠਿਤਮੇਵ ਗਹੇਤਬ੍ਬਂ. ਲੋਕੇ ਗਾਮਸੀਮਾਦਯੋ ਵਿਯ ਲਾਭਸੀਮਾ ਨਾਮ ਵਿਸੁਂ ਪਸਿਦ੍ਧਾ ਨਾਮ ਨਤ੍ਥਿ, ਕੇਨਾਯਂ ਅਨੁਞ੍ਞਾਤਾਤਿ ਆਹ ‘‘ਨੇਵ ਸਮ੍ਮਾਸਮ੍ਬੁਦ੍ਧੇਨਾ’’ਤਿਆਦਿ. ਏਤੇਨ ਨਾਯਂ ਸਾਸਨਵੋਹਾਰਸਿਦ੍ਧਾ, ਲੋਕਵੋਹਾਰਸਿਦ੍ਧਾ ਏਵਾਤਿ ਦਸ੍ਸੇਤਿ. ‘‘ਜਨਪਦਪਰਿਚ੍ਛੇਦੋ’’ਤਿ ਇਦਂ ਲੋਕਪਸਿਦ੍ਧਸੀਮਾਸਦ੍ਦਤ੍ਥਵਸੇਨ ਵੁਤ੍ਤਂ. ਪਰਿਚ੍ਛੇਦਬ੍ਭਨ੍ਤਰਂ ਪਨ ਸਬ੍ਬਂ ਜਨਪਦਸੀਮਾਤਿ ਗਹੇਤਬ੍ਬਂ, ਜਨਪਦੋ ਏਵ ਜਨਪਦਸੀਮਾ. ਏਵਂ ਰਟ੍ਠਸੀਮਾਦੀਸੁਪਿ. ਤੇਨਾਹ ‘‘ਆਣਾਪਵਤ੍ਤਿਟ੍ਠਾਨ’’ਨ੍ਤਿਆਦਿ.

ਪਥਵੀਵੇਮਜ੍ਝੇ ਗਤਸ੍ਸਾਤਿ ਯਾਵ ਉਦਕਪਰਿਯਨ੍ਤਾ ਖਣ੍ਡਸੀਮਤ੍ਤਾ ਵੁਤ੍ਤਂ, ਉਪਚਾਰਸੀਮਾਦੀਸੁ ਪਨ ਅਬਦ੍ਧਸੀਮਾਸੁ ਹੇਟ੍ਠਾਪਥਵਿਯਂ ਸਬ੍ਬਤ੍ਥ ਠਿਤਾਨਂ ਨ ਪਾਪੁਣਾਤਿ, ਕੂਪਾਦਿਪਵੇਸਾਰਹਟ੍ਠਾਨੇ ਠਿਤਾਨਞ੍ਞੇਵ ਪਾਪੁਣਾਤੀਤਿ ਹੇਟ੍ਠਾ ਸੀਮਾਕਥਾਯਂ ਵੁਤ੍ਤਨਯੇਨ ਤਂਤਂਸੀਮਟ੍ਠਭਾਵੋ ਵੇਦਿਤਬ੍ਬੋ. ਚਕ੍ਕਵਾਲ਼ਸੀਮਾਯ ਪਨ ਦਿਨ੍ਨਂ ਪਥਵੀਸਨ੍ਧਾਰਕਉਦਕਟ੍ਠਾਨੇਪਿ ਠਿਤਾਨਂ ਪਾਪੁਣਾਤਿ ਸਬ੍ਬਤ੍ਥ ਚਕ੍ਕਵਾਲ਼ਵੋਹਾਰਤ੍ਤਾ.

ਬੁਦ੍ਧਾਧਿਵੁਤ੍ਥੋਤਿ ਬੁਦ੍ਧੇਨ ਭਗਵਤਾ ਨਿਵੁਤ੍ਥੋ. ਪਾਕਵਟ੍ਟਨ੍ਤਿ ਨਿਬਦ੍ਧਦਾਨਂ. ਵਤ੍ਤਤੀਤਿ ਪਵਤ੍ਤਤਿ. ਤੇਹੀਤਿ ਯੇਸਂ ਸਮ੍ਮੁਖੇ ਏਸ ਦੇਤਿ, ਤੇਹਿ ਭਿਕ੍ਖੂਹਿ. ਦੁਤਿਯਭਾਗੇ ਪਨ ਥੇਰਾਸਨਂ ਆਰੁਲ਼੍ਹੇਤਿ ਯਾਵ ਸਙ੍ਘਨਵਕਾ ਏਕਵਾਰਂ ਸਬ੍ਬੇਸਂ ਭਾਗਂ ਦਤ੍ਵਾ ਚੀਵਰੇ ਅਪਰਿਕ੍ਖੀਣੇ ਪੁਨ ਸਬ੍ਬੇਸਂ ਦਾਤੁਂ ਦੁਤਿਯਭਾਗੇ ਥੇਰਸ੍ਸ ਦਿਨ੍ਨੇਤਿ ਅਤ੍ਥੋ. ਪਂਸੁਕੂਲਿਕਾਨਮ੍ਪਿ ਵਟ੍ਟਤੀਤਿ ਏਤ੍ਥ ‘‘ਤੁਯ੍ਹਂ ਦੇਮਾ’’ਤਿ ਅਵੁਤ੍ਤਤ੍ਤਾਤਿ ਕਾਰਣਂ ਵਦਨ੍ਤਿ. ਯਦਿ ਏਵਂ ‘‘ਸਙ੍ਘਸ੍ਸ ਦੇਮਾ’’ਤਿ ਵੁਤ੍ਤੇਪਿ ਵਟ੍ਟੇਯ੍ਯ, ‘‘ਭਿਕ੍ਖੂਨਂ ਦੇਮ, ਥੇਰਾਨਂ ਦੇਮ, ਸਙ੍ਘਸ੍ਸ ਦੇਮਾ’’ਤਿ (ਮਹਾਵ. ਅਟ੍ਠ. ੩੭੯) ਵਚਨਤੋ ਭੇਦੋ ਨ ਦਿਸ੍ਸਤਿ. ਵੀਮਂਸਿਤਬ੍ਬਮੇਤ੍ਥ ਕਾਰਣਂ.

ਪਾਰੁਪਿਤੁਂ ਵਟ੍ਟਤੀਤਿ ਪਂਸੁਕੂਲਿਕਾਨਂ ਵਟ੍ਟਤਿ. ਭਿਕ੍ਖੁਸਙ੍ਘਸ੍ਸ ਚ ਭਿਕ੍ਖੁਨੀਨਞ੍ਚ ਦਮ੍ਮੀਤਿ ਵੁਤ੍ਤੇ ਪਨ ਨ ਮਜ੍ਝੇ ਭਿਨ੍ਦਿਤ੍ਵਾ ਦਾਤਬ੍ਬਨ੍ਤਿ ਏਤ੍ਥ ਯਸ੍ਮਾ ਭਿਕ੍ਖੁਨਿਪਕ੍ਖੇ ਸਙ੍ਘਸ੍ਸ ਪਚ੍ਚੇਕਂ ਅਪਰਾਮਟ੍ਠਤ੍ਤਾ ਭਿਕ੍ਖੁਨੀਨਂ ਗਣਨਾਯ ਭਾਗੋ ਦਾਤਬ੍ਬੋਤਿ ਦਾਯਕਸ੍ਸ ਅਧਿਪ੍ਪਾਯੋਤਿ ਸਿਜ੍ਝਤਿ, ਤਥਾ ਦਾਨਞ੍ਚ ਭਿਕ੍ਖੂਪਿ ਗਣੇਤ੍ਵਾ ਦਿਨ੍ਨੇ ਏਵ ਯੁਜ੍ਜਤਿ. ਇਤਰਥਾ ਹਿ ਕਿਤ੍ਤਕਂ ਭਿਕ੍ਖੂਨਂ ਦਾਤਬ੍ਬਂ, ਕਿਤ੍ਤਕਂ ਭਿਕ੍ਖੁਨੀਨਨ੍ਤਿ ਨ ਵਿਞ੍ਞਾਯਤਿ, ਤਸ੍ਮਾ ‘‘ਭਿਕ੍ਖੁਸਙ੍ਘਸ੍ਸਾ’’ਤਿ ਵੁਤ੍ਤਵਚਨਮ੍ਪਿ ‘‘ਭਿਕ੍ਖੂਨ’’ਨ੍ਤਿ ਵੁਤ੍ਤਵਚਨਸਦਿਸਮੇਵਾਤਿ ਆਹ ‘‘ਭਿਕ੍ਖੂ ਚ ਭਿਕ੍ਖੁਨਿਯੋ ਚ ਗਣੇਤ੍ਵਾ ਦਾਤਬ੍ਬ’’ਨ੍ਤਿ. ਤੇਨਾਹ ‘‘ਪੁਗ੍ਗਲੋ …ਪੇ… ਭਿਕ੍ਖੁਸਙ੍ਘਗ੍ਗਹਣੇਨ ਅਗ੍ਗਹਿਤਤ੍ਤਾ’’ਤਿ. ਭਿਕ੍ਖੁਸਙ੍ਘ-ਸਦ੍ਦੇਨ ਭਿਕ੍ਖੂਨਞ੍ਞੇਵ ਗਹਿਤਤ੍ਤਾ, ਪੁਗ੍ਗਲਸ੍ਸ ਪਨ ‘‘ਤੁਯ੍ਹਞ੍ਚਾ’’ਤਿ ਵਿਸੁਂ ਗਹਿਤਤ੍ਤਾ ਚ ਤਤ੍ਥਸ੍ਸ ਅਗ੍ਗਹਿਤਤਾ ਦਟ੍ਠਬ੍ਬਾ, ‘‘ਭਿਕ੍ਖੂਨਞ੍ਚ ਭਿਕ੍ਖੁਨੀਨਞ੍ਚ ਤੁਯ੍ਹਞ੍ਚਾ’’ਤਿ ਵੁਤ੍ਤਟ੍ਠਾਨਸਦਿਸਤ੍ਤਾਤਿ ਅਧਿਪ੍ਪਾਯੋ. ਪੁਗ੍ਗਲਪ੍ਪਧਾਨੋ ਹੇਤ੍ਥ ਸਙ੍ਘ-ਸਦ੍ਦੋ ਦਟ੍ਠਬ੍ਬੋ. ਕੇਚਿ ਪਨ ‘‘ਭਿਕ੍ਖੁਸਙ੍ਘਗ੍ਗਹਣੇਨ ਗਹਿਤਤ੍ਤਾ’’ਤਿ (ਸਾਰਤ੍ਥ. ਟੀ. ਮਹਾਵਗ੍ਗ ੩.੩੭੯) ਪਾਠਂ ਲਿਖਨ੍ਤਿ, ਤਂ ਨ ਸੁਨ੍ਦਰਂ ਤਸ੍ਸ ਵਿਸੁਂ ਲਾਭਗ੍ਗਹਣੇ ਕਾਰਣਵਚਨਤ੍ਤਾ. ਤਥਾ ਹਿ ਵਿਸੁਂ ਸਙ੍ਘਗ੍ਗਹਣੇਨ ਗਹਿਤਤ੍ਤਾਤਿ ਵਿਸੁਂ ਪੁਗ੍ਗਲਸ੍ਸਪਿ ਭਾਗਗ੍ਗਹਣੇ ਕਾਰਣਂ ਵੁਤ੍ਤਂ. ਯਥਾ ਚੇਤ੍ਥ ਪੁਗ੍ਗਲਸ੍ਸ ਅਗ੍ਗਹਣਂ, ਏਵਂ ਉਪਰਿ ‘‘ਭਿਕ੍ਖੁਸਙ੍ਘਸ੍ਸ ਚ ਤੁਯ੍ਹਞ੍ਚਾ’’ਤਿਆਦੀਸੁਪਿ ਸਙ੍ਘਾਦਿ-ਸਦ੍ਦੇਹਿ ਪੁਗ੍ਗਲਸ੍ਸ ਅਗ੍ਗਹਣਂ ਦਟ੍ਠਬ੍ਬਂ. ਯਦਿ ਹਿ ਗਹਣਂ ਸਿਯਾ, ਸਙ੍ਘਤੋਪਿ, ਵਿਸੁਮ੍ਪੀਤਿ ਭਾਗਦ੍ਵਯਂ ਲਭੇਯ੍ਯ ਉਭਯਤ੍ਥ ਗਹਿਤਤ੍ਤਾ.

ਪੂਜੇਤਬ੍ਬਨ੍ਤਿਆਦਿ ਗਿਹਿਕਮ੍ਮਂ ਨ ਹੋਤੀਤਿ ਦਸ੍ਸਨਤ੍ਥਂ ਵੁਤ੍ਤਂ. ‘‘ਭਿਕ੍ਖੁਸਙ੍ਘਸ੍ਸ ਹਰਾ’’ਤਿ ਇਦਂ ਪਿਣ੍ਡਪਾਤਹਰਣਂ ਸਨ੍ਧਾਯ ਵੁਤ੍ਤਂ. ਤੇਨਾਹ ‘‘ਭੁਞ੍ਜਿਤੁਂ ਵਟ੍ਟਤੀ’’ਤਿ. ‘‘ਅਨ੍ਤੋਹੇਮਨ੍ਤੇ’’ਤਿ ਇਮਿਨਾ ਅਨਤ੍ਥਤੇ ਕਥਿਨੇ ਵਸ੍ਸਾਨਂ ਪਚ੍ਛਿਮੇ ਮਾਸੇ ਦਿਨ੍ਨਂ ਪੁਰਿਮਵਸ੍ਸਂਵੁਤ੍ਥਾਨਞ੍ਞੇਵ ਪਾਪੁਣਾਤਿ, ਤਤੋ ਪਰਂ ਹੇਮਨ੍ਤੇ ਦਿਨ੍ਨਂ ਪਚ੍ਛਿਮਵਸ੍ਸਂਵੁਤ੍ਥਾਨਮ੍ਪਿ ਵੁਤ੍ਥਵਸ੍ਸਤ੍ਤਾ ਪਾਪੁਣਾਤਿ. ਹੇਮਨ੍ਤਤੋ ਪਨ ਪਰਂ ਪਿਟ੍ਠਿਸਮਯੇ ‘‘ਵਸ੍ਸਂਵੁਤ੍ਥਸਙ੍ਘਸ੍ਸਾ’’ਤਿ ਏਵਂ ਵਤ੍ਵਾ ਦਿਨ੍ਨਂ ਅਨਨ੍ਤਰੇ ਵਸ੍ਸੇ ਵਾ ਤਤੋ ਪਰੇਸੁ ਵਾ ਯਤ੍ਥ ਕਤ੍ਥਚਿ ਤਸ੍ਮਿਂ ਵੁਤ੍ਥਵਸ੍ਸਾਨਂ ਸਬ੍ਬੇਸਂ ਪਾਪੁਣਾਤਿ. ਯੇ ਪਨ ਸਬ੍ਬਥਾ ਅਵੁਤ੍ਥਵਸ੍ਸਾ, ਤੇਸਂ ਨ ਪਾਪੁਣਾਤੀਤਿ ਦਸ੍ਸੇਤਿ. ਸਬ੍ਬੇਸਮ੍ਪੀਤਿ ਹਿ ਤਸ੍ਮਿਂ ਭਿਕ੍ਖੁਭਾਵੇ ਵੁਤ੍ਥਵਸ੍ਸਾਨਂ ਸਬ੍ਬੇਸਮ੍ਪੀਤਿ ਅਤ੍ਥੋ ਦਟ੍ਠਬ੍ਬੋ. ‘‘ਵਸ੍ਸਂਵੁਤ੍ਥਸਙ੍ਘਸ੍ਸਾ’’ਤਿ ਵੁਤ੍ਤਤ੍ਤਾ ਸਮ੍ਮੁਖੀਭੂਤਾਨਂ ਸਬ੍ਬੇਸਨ੍ਤਿ ਏਤ੍ਥਾਪਿ ਏਸੇਵ ਨਯੋ. ਅਤੀਤਵਸ੍ਸਨ੍ਤਿ ਅਨਨ੍ਤਰਾਤੀਤਵਸ੍ਸਂ.

ਉਦ੍ਦੇਸਂ ਗਹੇਤੁਂ ਆਗਤੋਤਿ ਉਦ੍ਦੇਸੇ ਅਗ੍ਗਹਿਤੇਪਿ ਅਨ੍ਤੇਵਾਸਿਕੋਵਾਤਿ ਵੁਤ੍ਤਂ. ਗਹੇਤ੍ਵਾ ਗਚ੍ਛਨ੍ਤੋਤਿ ਪਰਿਨਿਟ੍ਠਿਤਉਦ੍ਦੇਸੋ ਹੁਤ੍ਵਾ ਗਚ੍ਛਨ੍ਤੋ. ‘‘ਵਤ੍ਤਂ ਕਤ੍ਵਾ ਉਦ੍ਦੇਸਪਰਿਪੁਚ੍ਛਾਦੀਨਿ ਗਹੇਤ੍ਵਾ ਵਿਚਰਨ੍ਤਾਨ’’ਨ੍ਤਿ ਇਦਂ ‘‘ਉਦ੍ਦੇਸਨ੍ਤੇਵਾਸਿਕਾਨ’’ਨ੍ਤਿ ਇਮਸ੍ਸੇਵ ਵਿਸੇਸਨਂ, ਤੇਨ ਉਦ੍ਦੇਸਕਾਲੇ ਆਗਨ੍ਤ੍ਵਾ ਉਦ੍ਦੇਸਂ ਗਹੇਤ੍ਵਾ ਗਨ੍ਤ੍ਵਾ ਅਞ੍ਞਤ੍ਥ ਨਿਵਸਨ੍ਤੇ ਅਨਿਬਦ੍ਧਚਾਰਿਕੇ ਨਿਵਤ੍ਤੇਤਿ.

ਅਟ੍ਠਚੀਵਰਮਾਤਿਕਾਕਥਾਵਣ੍ਣਨਾ ਨਿਟ੍ਠਿਤਾ.

ਚੀਵਰਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.