੯. ਚਮ੍ਪੇਯ੍ਯਕ੍ਖਨ੍ਧਕੋ

ਕਸ੍ਸਪਗੋਤ੍ਤਭਿਕ੍ਖੁਵਤ੍ਥੁਕਥਾਦਿਵਣ੍ਣਨਾ

੩੮੦. ਚਮ੍ਪੇਯ੍ਯਕ੍ਖਨ੍ਧਕੇ ਤਨ੍ਤਿਬਦ੍ਧੋਤਿ ਤਨ੍ਤਿ ਵੁਚ੍ਚਤਿ ਬ੍ਯਾਪਾਰੋ, ਤਤ੍ਥ ਬਦ੍ਧੋ, ਉਸ੍ਸੁਕ੍ਕਂ ਆਪਨ੍ਨੋਤਿ ਅਤ੍ਥੋ. ਤੇਨਾਹ ‘‘ਤਸ੍ਮਿਂ ਆਵਾਸੇ’’ਤਿਆਦਿ.

੩੮੭-੮. ਹਾਪਨਂ ਵਾ ਅਞ੍ਞਥਾ ਕਰਣਂ ਵਾ ਨਤ੍ਥੀਤਿ ਞਤ੍ਤਿਕਮ੍ਮਸ੍ਸ ਞਤ੍ਤਿਯਾ ਏਕਤ੍ਤਾ ਹਾਪਨਂ ਨ ਸਮ੍ਭਵਤਿ, ਤਸ੍ਸਾ ਏਕਤ੍ਤਾ ਏਵ ਪਚ੍ਛਾ ਞਤ੍ਤਿਠਪਨਵਸੇਨ, ਦ੍ਵਿਕ੍ਖਤ੍ਤੁਂ ਠਪਨਵਸੇਨ ਚ ਅਞ੍ਞਥਾ ਕਰਣਂ ਨਤ੍ਥਿ. ਪਰਤੋਤਿ ਪਰਿਵਾਰੇ. ਤਨ੍ਤਿ ਪਬ੍ਬਾਜਨੀਯਕਮ੍ਮਂ, ਤਸ੍ਸਾਤਿ ਅਤ੍ਥੋ.

ਕਸ੍ਸਪਗੋਤ੍ਤਭਿਕ੍ਖੁਵਤ੍ਥੁਕਥਾਦਿਵਣ੍ਣਨਾ ਨਿਟ੍ਠਿਤਾ.

ਦ੍ਵੇਨਿਸ੍ਸਰਣਾਦਿਕਥਾਵਣ੍ਣਨਾ

੩੯੫. ਏਸਾਤਿ ‘‘ਬਾਲੋ’’ਤਿਆਦਿਨਾ ਨਿਦ੍ਦਿਟ੍ਠਪੁਗ੍ਗਲੋ, ਅਪ੍ਪਤ੍ਤੋਤਿ ਸਮ੍ਬਨ੍ਧੋ. ਤਤ੍ਥ ਕਾਰਣਮਾਹ ‘‘ਯਸ੍ਮਾ’’ਤਿਆਦਿ. ਤਤ੍ਥ ਆਵੇਣਿਕੇਨ ਲਕ੍ਖਣੇਨਾਤਿ ਪਬ੍ਬਾਜਨੀਯਕਮ੍ਮਸ੍ਸ ਨਿਮਿਤ੍ਤਭਾਵੇਨ ਪਾਲ਼ਿਯਂ ਵੁਤ੍ਤਤ੍ਤਾ ਅਸਾਧਾਰਣਭੂਤੇਨ ਕੁਲਦੂਸਕਭਾਵੇਨ. ਯਦਿ ਹੇਸ ਤਂ ਕਮ੍ਮਂ ਅਪ੍ਪਤ੍ਤੋ, ਕਥਂ ਪਨ ਸੁਨਿਸ੍ਸਾਰਿਤੋਤਿ ਆਹ ‘‘ਯਸ੍ਮਾ ਪਨਸ੍ਸ ਆਕਙ੍ਖਮਾਨੋ ਸਙ੍ਘੋ ਪਬ੍ਬਾਜਨੀਯਕਮ੍ਮਂ ਕਰੇਯ੍ਯਾਤਿ ਵੁਤ੍ਤਂ, ਤਸ੍ਮਾ ਸੁਨਿਸ੍ਸਾਰਿਤੋ’’ਤਿ. ਤਤ੍ਥ ਵੁਤ੍ਤਨ੍ਤਿ ਕਮ੍ਮਕ੍ਖਨ੍ਧਕੇ (ਚੂਲ਼ਵ. ੨੭) ਵੁਤ੍ਤਂ.

ਏਤ੍ਥ ਪਨ ਕੁਲਦੂਸਕਕਮ੍ਮਂ ਕਤ੍ਵਾ ਪਬ੍ਬਾਜਨੀਯਕਮ੍ਮਕਤਸ੍ਸ ਤੇਰਸਕਕਣ੍ਡਕਟ੍ਠਕਥਾਯਂ ‘‘ਯਸ੍ਮਿਂ ਵਿਹਾਰੇ ਵਸਨ੍ਤੇਨ ਯਸ੍ਮਿਂ ਗਾਮੇ ਕੁਲਦੂਸਕਕਮ੍ਮਂ ਕਤਂ ਹੋਤਿ, ਤਸ੍ਮਿਂ ਵਿਹਾਰੇ ਵਾ ਤਸ੍ਮਿਂ ਗਾਮੇ ਵਾ ਨ ਵਸਿਤਬ੍ਬ’’ਨ੍ਤਿਆਦਿਨਾ (ਪਾਰਾ. ਅਟ੍ਠ. ੨.੪੩੩) ਯਾ ਸਮ੍ਮਾਵਤ੍ਤਨਾ ਵੁਤ੍ਤਾ, ਸਾ ਇਤਰੇਨਾਪਿ ਪੂਰੇਤਬ੍ਬਾ. ਯਂ ਪਨ ਪਟਿਪ੍ਪਸ੍ਸਦ੍ਧਕਮ੍ਮਸ੍ਸ ਕੁਲਦੂਸਕਸ੍ਸ ਤਤ੍ਥੇਵ ਅਟ੍ਠਕਥਾਯਂ ‘‘ਯੇਸੁ ਕੁਲੇਸੁ ਕੁਲਦੂਸਕਕਮ੍ਮਂ ਕਤਂ, ਤਤੋ ਪਚ੍ਚਯਾ ਨ ਗਹੇਤਬ੍ਬਾ’’ਤਿਆਦਿ ਵੁਤ੍ਤਂ, ਤਂ ਨ ਪੂਰੇਤਬ੍ਬਂ ਕੁਲਸਙ੍ਗਹਸ੍ਸ ਅਕਤਤ੍ਤਾ. ਏਵਂ ਸੇਸਕਮ੍ਮੇਸੁਪਿ. ਯਦਿ ਏਵਂ ‘‘ਤਜ੍ਜਨੀਯਕਮ੍ਮਾਰਹਸ੍ਸ ਨਿਯਸਕਮ੍ਮਂ ਕਰੋਤਿ…ਪੇ… ਏਵਂ ਖੋ, ਉਪਾਲਿ, ਅਧਮ੍ਮਕਮ੍ਮਂ ਹੋਤੀ’’ਤਿਆਦਿਵਚਨਂ (ਮਹਾਵ. ੪੦੨) ਵਿਰੁਜ੍ਝਤੀਤਿ? ਨ ਵਿਰੁਜ੍ਝਤਿ ਸਙ੍ਘਸਨ੍ਨਿਟ੍ਠਾਨਵਸੇਨ ਤਜ੍ਜਨੀਯਾਦਿਕਮ੍ਮਾਰਹਤ੍ਤਸ੍ਸ ਸਿਜ੍ਝਨਤੋ. ਯਸ੍ਸ ਹਿ ਸਙ੍ਘੋ ‘‘ਤਜ੍ਜਨੀਯਕਮ੍ਮਂ ਕਰੋਮਾ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ਕਮ੍ਮਵਾਚਂ ਸਾਵੇਨ੍ਤੋ ਪਬ੍ਬਾਜਨੀਯਕਮ੍ਮਵਾਚਂ ਸਾਵੇਤਿ, ਤਸ੍ਸ ਕਮ੍ਮਂ ਅਧਮ੍ਮਕਮ੍ਮਂ ਹੋਤਿ. ਸਚੇ ਪਨ ‘‘ਤਸ੍ਸੇਵ ਪਬ੍ਬਾਜਨੀਯਕਮ੍ਮਮੇਵ ਕਰੋਮਾ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ਤਦੇਵ ਕਰੋਤਿ, ਤਸ੍ਸ ਤਂ ਕਮ੍ਮਂ ਧਮ੍ਮਕਮ੍ਮਨ੍ਤਿ ਵੇਦਿਤਬ੍ਬਂ.

ਏਵਮਿਧ ‘‘ਨਿਸ੍ਸਾਰਣ’’ਨ੍ਤਿ ਅਧਿਪ੍ਪੇਤਸ੍ਸ ਪਬ੍ਬਾਜਨੀਯਕਮ੍ਮਸ੍ਸ ਵਸੇਨ ਅਤ੍ਥਂ ਦਸ੍ਸੇਤ੍ਵਾ ਇਦਾਨਿ ਤਦਞ੍ਞੇਸਂ ਤਜ੍ਜਨੀਯਾਦੀਨਂ ਵਸੇਨ ਨਿਸ੍ਸਾਰਣੇ ਅਧਿਪ੍ਪੇਤੇ ‘‘ਅਪ੍ਪਤ੍ਤੋ ਨਿਸ੍ਸਾਰਣ’’ਨ੍ਤਿ ਇਮਸ੍ਸ ਪਟਿਪਕ੍ਖਵਸੇਨ ਸਮ੍ਪਤ੍ਤੋ ਨਿਸ੍ਸਾਰਣਂ, ‘‘ਤਞ੍ਚੇ ਸਙ੍ਘੋ ਨਿਸ੍ਸਾਰੇਤਿ. ਸੁਨਿਸ੍ਸਾਰਿਤੋ’’ਤਿ ਅਤ੍ਥਸਮ੍ਭਵਂ ਦਸ੍ਸੇਤੁਂ ਪੁਨ ‘‘ਤਞ੍ਚੇ ਸਙ੍ਘੋ ਨਿਸ੍ਸਾਰੇਤੀਤਿ ਸਚੇ ਸਙ੍ਘੋ’’ਤਿਆਦਿ ਵੁਤ੍ਤਂ. ਤਤ੍ਥ ਤਤ੍ਥਾਤਿ ਤਜ੍ਜਨੀਯਾਦਿਕਮ੍ਮਵਿਸਯੇ, ਏਕੇਨਾਪਿ ਅਙ੍ਗੇਨ ਨਿਸ੍ਸਾਰਣਾ ਅਨੁਞ੍ਞਾਤਾਤਿ ਯੋਜਨਾ. ਪਾਲ਼ਿਯਂ ਅਪ੍ਪਤ੍ਤੋ ਨਿਸ੍ਸਾਰਣਨ੍ਤਿ ਏਤ੍ਥ ਆਪਨ੍ਨੋ ਆਵੇਣਿਕਵਸੇਨ ਤਜ੍ਜਨੀਯਾਦਿਸਙ੍ਖਾਤਂ ਨਿਸ੍ਸਾਰਣਂ ਪਤ੍ਤੋਤਿ ਅਤ੍ਥੋ ਗਹੇਤਬ੍ਬੋ.

ਦ੍ਵੇਨਿਸ੍ਸਰਣਾਦਿਕਥਾਵਣ੍ਣਨਾ ਨਿਟ੍ਠਿਤਾ.

ਚਮ੍ਪੇਯ੍ਯਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.