੭. ਕਥਿਨਕ੍ਖਨ੍ਧਕੋ

ਕਥਿਨਾਨੁਜਾਨਨਕਥਾਵਣ੍ਣਨਾ

੩੦੬. ਕਥਿਨਕ੍ਖਨ੍ਧਕੇ ਸੀਸਵਸੇਨਾਤਿ ਪਧਾਨਵਸੇਨ. ਕਥਿਨਨ੍ਤਿ ਪਞ੍ਚਾਨਿਸਂਸੇ ਅਨ੍ਤੋਕਰਣਸਮਤ੍ਥਤਾਯ ਥਿਰਨ੍ਤਿ ਅਤ੍ਥੋ. ਸੋ ਨੇਸਂ ਭਵਿਸ੍ਸਤੀਤਿ ਯੁਜ੍ਜਤੀਤਿ ‘‘ਸੋ ਤੁਮ੍ਹਾਕ’’ਨ੍ਤਿ ਅਵਤ੍ਵਾ ‘‘ਨੇਸ’’ਨ੍ਤਿ ਵਚਨਂ ਯੁਜ੍ਜਤਿ. ਯੇ ਅਤ੍ਥਤਕਥਿਨਾਤਿ ਨ ਕੇਵਲਂ ਤੁਮ੍ਹਾਕਮੇਵ, ਯੇ ਅਞ੍ਞੇਪਿ ਅਤ੍ਥਤਕਥਿਨਾ, ਤੇਸਂ ਭਵਿਸ੍ਸਤੀਤਿ ਅਤ੍ਥੋ. ਅਥ ਵਾ ਵੋਤਿ ਤਦਾ ਸਮ੍ਮੁਖੀਭੂਤੇਹਿ ਸਦ੍ਧਿਂ ਅਸਮ੍ਮੁਖੀਭੂਤੇ ਚ ਅਨਾਗਤੇ ਚ ਭਿਕ੍ਖੂ ਸਬ੍ਬੇ ਏਕਤੋ ਸਮ੍ਪਿਣ੍ਡੇਤ੍ਵਾ ਵੁਤ੍ਤਂ, ਤੁਮ੍ਹਾਕਨ੍ਤਿ ਅਤ੍ਥੋ. ਸੋ ਨੇਸਨ੍ਤਿ ਏਤ੍ਥ ਸੋ ਤੇਸਨ੍ਤਿ ਯੋਜੇਤਬ੍ਬਂ. ਤੇਨਾਹ ‘‘ਅਤ੍ਥਤਕਥਿਨਾਨਂ ਵੋ, ਭਿਕ੍ਖਵੇ, ਇਮਾਨਿ ਪਞ੍ਚ ਕਪ੍ਪਿਸ੍ਸਨ੍ਤੀ’’ਤਿ. ਮਤਕਚੀਵਰਨ੍ਤਿ ਮਤਸ੍ਸ ਚੀਵਰਂ. ‘‘ਵੁਤ੍ਥਵਸ੍ਸਵਸੇਨਾ’’ਤਿ ਇਦਂ ਪਚ੍ਛਿਮਵਸ੍ਸਂਵੁਤ੍ਥਾਨਮ੍ਪਿ ਸਾਧਾਰਣਨ੍ਤਿ ਆਹ ‘‘ਪੁਰਿਮਿਕਾਯ ਵਸ੍ਸਂ ਉਪਗਨ੍ਤ੍ਵਾ ਪਠਮਪਵਾਰਣਾਯ ਪਵਾਰਿਤਾ ਲਭਨ੍ਤੀ’’ਤਿ. ਉਪਗਤਾ ਵਾ ਨ ਲਭਨ੍ਤੀਤਿ ਪਚ੍ਛਿਮਿਕਾਯ ਵੁਤ੍ਥਵਸ੍ਸੇਪਿ ਸਨ੍ਧਾਯ ਵੁਤ੍ਤਂ.

ਖਲਿਮਕ੍ਖਿਤਸਾਟਕੋਤਿ ਅਹਤਵਤ੍ਥਂ ਸਨ੍ਧਾਯ ਵੁਤ੍ਤਂ. ‘‘ਅਕਾਤੁਂ ਨ ਲਬ੍ਭਤੀ’’ਤਿ ਇਮਿਨਾ ਅਨਾਦਰਿਯੇ ਸਤਿ ਦੁਕ੍ਕਟਨ੍ਤਿ ਦੀਪੇਤਿ.

‘‘ਅਪਲੋਕੇਤ੍ਵਾ’’ਤਿ ਇਦਂ ਅਞ੍ਞੇਸਂ ਵਸ੍ਸਂਵੁਤ੍ਥਭਿਕ੍ਖੂਨਂ ਅਦਤ੍ਵਾ ਦਾਤੁਕਾਮੇਹਿ ਕਤ੍ਤਬ੍ਬਵਿਧਿਦਸ੍ਸਨਂ. ਯਦਿ ਏਵਂ ਕਮ੍ਮਵਾਚਾਯ ਏਵ ਦਾਨਂ ਅਵੁਤ੍ਤਨ੍ਤਿ ਆਹ ‘‘ਕਮ੍ਮਵਾਚਾ ਪਨਾ’’ਤਿਆਦਿ. ਕਥਿਨਚੀਵਰਂ ਵਿਯ ਕਮ੍ਮਵਾਚਾਯ ਦਾਤੁਂ ਨ ਵਟ੍ਟਤੀਤਿ ਅਪਲੋਕੇਤ੍ਵਾਵ ਦਾਤਬ੍ਬਨ੍ਤਿ ਅਧਿਪ੍ਪਾਯੋ.

੩੦੮. ਮਹਾਭੂਮਿਕਨ੍ਤਿ ਮਹਾਵਿਸਯਂ, ਚਤੁਵੀਸਤਿਆਕਾਰਵਨ੍ਤਤਾਯ ਮਹਾਵਿਤ੍ਥਾਰਿਕਨ੍ਤਿ ਵੁਤ੍ਤਂ ਹੋਤਿ. ਪਞ੍ਚਕਨ੍ਤਿ ਪਞ੍ਚਖਣ੍ਡਂ. ਏਸੇਵ ਨਯੋ ਸੇਸੇਸੁਪਿ. ਪਠਮਚਿਮਿਲਿਕਾਤਿ ਕਥਿਨਵਤ੍ਥਤੋ ਅਞ੍ਞਾ ਅਤ੍ਤਨੋ ਪਕਤਿਚਿਮਿਲਿਕਾ. ਕੁਚ੍ਛਿਚਿਮਿਲਿਕਂ ਕਤ੍ਵਾ ਸਿਬ੍ਬਿਤਮਤ੍ਤੇਨਾਤਿ ਥਿਰਜਿਣ੍ਣਾਨਂ ਚਿਮਿਲਿਕਾਨਂ ਏਕਤੋ ਕਤ੍ਵਾ ਸਿਬ੍ਬਨਸ੍ਸੇਤਂ ਅਧਿਵਚਨਨ੍ਤਿ ਵਦਨ੍ਤਿ. ਮਹਾਪਚ੍ਚਰਿਯਂ, ਕੁਰੁਨ੍ਦਿਯਞ੍ਚ ਵੁਤ੍ਤਵਚਨਨ੍ਤਿ ਦਸ੍ਸਨਂ, ਬ੍ਯਞ੍ਜਨਤੋ ਏਵ ਭੇਦੋ, ਨ ਅਤ੍ਥਤੋਤਿ ਦਸ੍ਸਨਤ੍ਥਂ ਕਤਨ੍ਤਿਪਿ ਵਦਨ੍ਤਿ. ਪਿਟ੍ਠਿਅਨੁਵਾਤਾਰੋਪਨਮਤ੍ਤੇਨਾਤਿ ਦੀਘਤੋ ਅਨੁਵਾਤਸ੍ਸ ਆਰੋਪਨਮਤ੍ਤੇਨ. ਕੁਚ੍ਛਿਅਨੁਵਾਤਾਰੋਪਨਮਤ੍ਤੇਨਾਤਿ ਪੁਥੁਲਤੋ ਅਨੁਵਾਤਸ੍ਸ ਆਰੋਪਨਮਤ੍ਤੇਨ. ਰਤ੍ਤਿਨਿਸ੍ਸਗ੍ਗਿਯੇਨਾਤਿ ਰਤ੍ਤਿਅਤਿਕ੍ਕਨ੍ਤੇਨ.

੩੦੯. ਹਤਵਤ੍ਥਕਸਾਟਕੇਨਾਤਿ ਅਤਿਜਿਣ੍ਣਸਾਟਕੋ. ਨ ਹਿ ਤੇਨਾਤਿਆਦੀਸੁ ਤੇਨ ਪਰਿਵਾਰਾਗਤਪਾਠੇਨ ਇਧ ਆਨੇਤ੍ਵਾ ਅਵੁਚ੍ਚਮਾਨੇਨ ਕਥਿਨਤ੍ਥਾਰਕਸ੍ਸ ਜਾਨਿਤਬ੍ਬੇਸੁ ਨ ਕਿਞ੍ਚਿ ਪਰਿਹਾਯਤਿ, ਤਸ੍ਸ ਸਬ੍ਬਸ੍ਸ ਇਧੇਵ ਵੁਤ੍ਤਤ੍ਤਾਤਿ ਅਧਿਪ੍ਪਾਯੋ.

੩੧੦. ਮਾਤਾ ਵਿਯਾਤਿ ਮਾਤਿਕਾ, ਇਵਤ੍ਥੇ ਕ-ਪਚ੍ਚਯੋ ਦਟ੍ਠਬ੍ਬੋ. ਤੇਨ ਸਿਦ੍ਧਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਮਾਤਿਕਾਤਿ ਮਾਤਰੋ’’ਤਿਆਦਿ. ਅਸ੍ਸਾਤਿ ਏਤਿਸ੍ਸਾ ਮਾਤਿਕਾਯ. ਪਕ੍ਕਮਨਨ੍ਤਿਕੋ ਕਥਿਨੁਬ੍ਭਾਰੋ ਏਵ ਹਿ ਸਯਂ ਅਤ੍ਤਨੋ ਉਪ੍ਪਜ੍ਜਤੀਤਿ ਏਵਮਭੇਦੂਪਚਾਰੇਨ ‘‘ਮਾਤਿਕਾ’’ਤਿ ਵੁਤ੍ਤੋ ਉਬ੍ਭਾਰਸ੍ਸੇਵ ਪਕ੍ਕਮਨਨ੍ਤੇ ਸਮੁਪ੍ਪਤ੍ਤਿਤੋ, ਤਬ੍ਬਿਨਿਮੁਤ੍ਤਾਯ ਚ ਮਾਤਿਕਾਯ ਅਭਾਵਾ, ਤਪ੍ਪਕਾਸਿਕਾਪਿ ਚੇਤ੍ਥ ਪਾਲ਼ਿ ‘‘ਮਾਤਿਕਾ’’ਤਿ ਵਤ੍ਤੁਂ ਯੁਜ੍ਜਤਿ. ਸਾਪਿ ਹਿ ਪਕ੍ਕਮਨਨ੍ਤਿਕੁਬ੍ਭਾਰਪ੍ਪਕਾਸਨੇਨ ‘‘ਪਕ੍ਕਮਨਨ੍ਤਿਕਾ’’ਤਿ ਵੁਤ੍ਤਾ. ਏਸੇਵ ਨਯੋ ਸੇਸੁਬ੍ਭਾਰੇਸੁਪਿ. ਪਕ੍ਕਮਨਨ੍ਤਿ ਚੇਤ੍ਥ ਉਪਚਾਰਸੀਮਾਤਿਕ੍ਕਮਨਂ ਦਟ੍ਠਬ੍ਬਂ.

ਕਥਿਨਾਨੁਜਾਨਨਕਥਾਵਣ੍ਣਨਾ ਨਿਟ੍ਠਿਤਾ.

ਆਦਾਯਸਤ੍ਤਕਕਥਾਵਣ੍ਣਨਾ

੩੧੧. ‘‘ਨ ਪੁਨ ਆਗਮਿਸ੍ਸ’’ਨ੍ਤਿ ਇਦਂ ਆਵਾਸਪਲਿਬੋਧੁਪਚ੍ਛੇਦਕਾਰਣਦਸ੍ਸਨਂ. ਪਞ੍ਚਸੁ ਹਿ ਚੀਵਰਮਾਸੇਸੁ ਯਦਾ ਕਦਾਚਿ ਨ ਪਚ੍ਚੇਸ੍ਸਨ੍ਤਿ ਚਿਤ੍ਤੇਨ ਉਪਚਾਰਸੀਮਾਤਿਕ੍ਕਮੇਨ ਆਵਾਸਪਲਿਬੋਧੋ ਛਿਜ੍ਜਤਿ. ਪਚ੍ਚੇਸ੍ਸਨ੍ਤਿ ਬਹਿਉਪਚਾਰਗਤਸ੍ਸ ਪਨ ਯਤ੍ਥ ਕਤ੍ਥਚਿ ਨ ਪਚ੍ਚੇਸ੍ਸਨ੍ਤਿ ਚਿਤ੍ਤੇ ਉਪ੍ਪਨ੍ਨਮਤ੍ਤੇ ਛਿਜ੍ਜਤਿ. ਪਠਮਂ ਚੀਵਰਪਲਿਬੋਧੋ ਛਿਜ੍ਜਤੀਤਿ ਨ ਪਚ੍ਚੇਸ੍ਸਨ੍ਤਿ ਪਕ੍ਕਮਨਤੋ ਪੁਰੇਤਰਮੇਵ ਚੀਵਰਸ੍ਸ ਨਿਟ੍ਠਿਤਤ੍ਤਾ ਵੁਤ੍ਤਂ. ‘‘ਕਤਚੀਵਰਮਾਦਾਯਾ’’ਤਿ ਹਿ ਵੁਤ੍ਤਂ. ਅਤ੍ਥਤਕਥਿਨਸ੍ਸ ਹਿ ਭਿਕ੍ਖੁਨੋ ਯਾਵ ‘‘ਸਙ੍ਘਤੋ ਵਾ ਦਾਯਕਕੁਲਾਦਿਤੋ ਵਾ ਚੀਵਰਂ ਲਭਿਸ੍ਸਾਮੀ’’ਤਿ ਚੀਵਰਾਸਾ ਵਾ ਲਦ੍ਧਵਤ੍ਥਾਨਂ ਸਹਾਯਸਮ੍ਪਦਾਦਿਯੋਗਂ ਲਭਿਤ੍ਵਾ ਸਙ੍ਘਾਟਿਆਦਿਭਾਵੇਨ ‘‘ਛਿਨ੍ਦਿਤ੍ਵਾ ਕਰਿਸ੍ਸਾਮੀ’’ਤਿ ਕਰਣਿਚ੍ਛਾ ਵਾ ਪਵਤ੍ਤਤਿ, ਤਾਵ ਚੀਵਰਪਲਿਬੋਧੋ ਅਨੁਪਚ੍ਛਿਨ੍ਨੋ ਏਵ. ਯਦਾ ਪਨ ਯਥਾਪਤ੍ਥਿਤਟ੍ਠਾਨਤੋ ਚੀਵਰਾਦੀਨਂ ਸਬ੍ਬਥਾ ਅਲਾਭੇਨ ਵਾ ਚੀਵਰਾਸਾ ਚੇਵ ਲਦ੍ਧਾਨਂ ਕਤ੍ਵਾ ਨਿਟ੍ਠਾਨੇਨ ਵਾ ਨਟ੍ਠਵਿਨਟ੍ਠਾਦਿਭਾਵੇਨ ਵਾ ਚੀਵਰੇ ਨਿਰਪੇਕ੍ਖਤਾਯ ਵਾ ਕਰਣਿਚ੍ਛਾ ਚ ਵਿਗਚ੍ਛਤਿ, ਤਦਾ ਚੀਵਰਪਲਿਬੋਧੋ ਉਪਚ੍ਛਿਨ੍ਨੋ ਹੋਤਿ.

ਸੋ ਚ ਇਧ ‘‘ਕਤਚੀਵਰਂ ਆਦਾਯਾ’’ਤਿ ਵਚਨੇਨ ਪਕਾਸਿਤੋ. ਏਵਂ ਉਪਰਿ ਸਬ੍ਬਤ੍ਥ ਪਾਲ਼ਿਵਚਨਕ੍ਕਮਂ ਨਿਸ੍ਸਾਯ ਨੇਸਂ ਪਠਮਂ, ਪਚ੍ਛਾ ਚ ਉਪਚ੍ਛਿਜ੍ਜਨਂ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਸਬ੍ਬਥਾਪਿ ਚ ਇਮੇਸਂ ਉਭਿਨ੍ਨਂ ਪਲਿਬੋਧਾਨਂ ਉਪਚ੍ਛੇਦੇਨੇਵ ਕਥਿਨੁਬ੍ਭਾਰੋ, ਨ ਏਕਸ੍ਸ. ਤੇਸਞ੍ਚ ਪੁਬ੍ਬਾਪਰਿਯੇਨ, ਏਕਕ੍ਖਣੇ ਚ ਉਪਚ੍ਛਿਜ੍ਜਨਂ ਦਸ੍ਸੇਤੁਂ ਇਮਾ ਅਟ੍ਠ ਮਾਤਿਕਾ ਠਪਿਤਾਤਿ ਵੇਦਿਤਬ੍ਬਾ. ਅਨ੍ਤੋਸੀਮਾਯਨ੍ਤਿ ਚੀਵਰਨਿਟ੍ਠਾਨਕ੍ਖਣੇਯੇਵ ਛਿਨ੍ਨਤ੍ਤਾ ਵੁਤ੍ਤਂ. ਨੇਵਿਮਂ ਚੀਵਰਂ ਕਾਰੇਸ੍ਸਨ੍ਤਿ ਚੀਵਰੇ ਅਪੇਕ੍ਖਾਯ ਵਿਗਤਤ੍ਤਾ ਕਰਣਪਲਿਬੋਧਸ੍ਸਾਪਿ ਉਪਚ੍ਛਿਨ੍ਨਤਂ ਦਸ੍ਸੇਤਿ. ਯੋ ਪਨ ਅਪ੍ਪਿਚ੍ਛਤਾਯ ਵਾ ਅਨਤ੍ਥਿਕਤਾਯ ਵਾ ਸਬ੍ਬਥਾ ਚੀਵਰਂ ਨ ਸਮ੍ਪਟਿਚ੍ਛਤਿ, ਤਸ੍ਸ ਬਹਿਸੀਮਾਗਤਸ੍ਸ ਸਬ੍ਬਥਾਪਿ ਚੀਵਰਪਲਿਬੋਧਾਭਾਵੇਨ ਨ ਪਚ੍ਚੇਸ੍ਸਨ੍ਤਿ ਸਨ੍ਨਿਟ੍ਠਾਨਮਤ੍ਤੇਨ ਸਨ੍ਨਿਟ੍ਠਾਨਨ੍ਤਿਕੋ ਕਥਿਨੁਬ੍ਭਾਰੋ ਵੇਦਿਤਬ੍ਬੋ. ਸੋ ਪਨਾਤਿ ਪਲਿਬੋਧੁਪਚ੍ਛੇਦੋ. ਅਯਂ ਪਨਾਤਿ ਆਸਾਵਚ੍ਛੇਦਕੋ ਕਥਿਨੁਬ੍ਭਾਰੋ ਵਿਸੁਂ ਵਿਤ੍ਥਾਰੇਤ੍ਵਾ ਵੁਤ੍ਤੋ, ਇਧ ਨ ਵੁਤ੍ਤੋਤਿ ਸਮ੍ਬਨ੍ਧੋ.

ਅਨਾਸਾਯ ਲਭਤੀਤਿ ‘‘ਯਸ੍ਮਿਂ ਕੁਲੇ ਚੀਵਰਂ ਲਭਿਸ੍ਸਾਮਾ’’ਤਿ ਆਸਾ ਅਨੁਪ੍ਪਨ੍ਨਪੁਬ੍ਬਾ, ਤਤ੍ਥ ਚੀਵਰਾਸਾਯ ਅਨੁਪ੍ਪਨ੍ਨਟ੍ਠਾਨੇ ਯਤ੍ਥ ਕਤ੍ਥਚਿ ਲਭਤੀਤਿ ਅਤ੍ਥੋ. ਆਸਾਯ ਨ ਲਭਤੀਤਿ ਆਸੀਸਿਤਟ੍ਠਾਨੇ ਨ ਲਭਤੀਤਿ ਅਤ੍ਥੋ. ਇਧ ਨ ਵੁਤ੍ਤੋਤਿ ਇਧ ਸਵਨਨ੍ਤਿਕਾਨਨ੍ਤਰੇ ਨ ਵੁਤ੍ਤੋ. ਤਤ੍ਥਾਤਿ ਤਸ੍ਮਿਂ ਸੀਮਾਤਿਕ੍ਕਨ੍ਤਿਕੇ. ਸੀਮਾਤਿਕ੍ਕਨ੍ਤਿਕੋ ਨਾਮ ਚੀਵਰਮਾਸਾਨਂ ਪਰਿਯਨ੍ਤਦਿਵਸਸਙ੍ਖਾਤਾਯ ਸੀਮਾਯ ਅਤਿਕ੍ਕਮਨਤੋ ਸਞ੍ਜਾਤੋ. ਕੇਚਿ ‘‘ਬਹਿਸੀਮਾਯ ਕਾਲਾਤਿਕ੍ਕਮੋ ਸੀਮਾਤਿਕ੍ਕਮੋ’’ਤਿ ਮਞ੍ਞਨ੍ਤਿ, ਤੇਸਂ ਅਨ੍ਤੋਉਪਚਾਰੇ ਚੀਵਰਕਾਲਾਤਿਕ੍ਕਮੇਪਿ ਕਥਿਨੁਬ੍ਭਾਰੋ ਅਸਮ੍ਮਤੋ ਨਾਮ ਸਿਯਾਤਿ ਨ ਚੇਤਂ ਯੁਤ੍ਤਂ. ਤਸ੍ਮਾ ਯਤ੍ਥ ਕਤ੍ਥਚਿ ਕਾਲਾਤਿਕ੍ਕਮੋ ਸੀਮਾਤਿਕ੍ਕਮੋਤਿ ਵੇਦਿਤਬ੍ਬੋ. ਏਤ੍ਥ ਚ ਪਾਲ਼ਿਯਂ ‘‘ਕਤਚੀਵਰੋ’’ਤਿ ਇਦਂ ਉਪਲਕ੍ਖਣਮਤ੍ਤਂ, ਅਕਤਚੀਵਰਸ੍ਸਪਿ ਕਾਲਾਤਿਕ੍ਕਮੇਨ ਸੀਮਾਤਿਕ੍ਕਨ੍ਤਿਕੋ ਹੋਤਿ, ਦ੍ਵੇ ਚ ਪਲਿਬੋਧਾ ਏਕਤੋ ਛਿਜ੍ਜਨ੍ਤਿ. ਏਵਂ ਅਞ੍ਞਤ੍ਥਾਪਿ ਯਥਾਸਮ੍ਭਵਂ ਤਂਤਂ ਵਿਸੇਸਨਾਭਾਵੇਪਿ ਕਥਿਨੁਬ੍ਭਾਰਤਾ, ਪਲਿਬੋਧੁਪਚ੍ਛੇਦਪ੍ਪਕਾਰੋ ਚ ਵੇਦਿਤਬ੍ਬੋ. ‘‘ਸਹੁਬ੍ਭਾਰੇ ਦ੍ਵੇਪਿ ਪਲਿਬੋਧਾ ਅਪੁਬ੍ਬਂ ਅਚਰਿਮਂ ਛਿਜ੍ਜਨ੍ਤੀ’’ਤਿ ਇਦਂ ਅਕਤਚੀਵਰਸ੍ਸ ਪਚ੍ਚੇਸ੍ਸਨ੍ਤਿ ਅਧਿਟ੍ਠਾਨਸਮ੍ਭਵਪਕ੍ਖਂ ਸਨ੍ਧਾਯ ਵੁਤ੍ਤਂ, ਤੇਸੁ ਅਞ੍ਞਤਰਾਭਾਵੇਪਿ ਸਹੁਬ੍ਭਾਰੋਵ ਹੋਤਿ.

੩੧੨-੩੨੫. ਸਮਾਦਾਯਵਾਰੋ ਆਦਾਯਵਾਰਸਦਿਸੋਵ. ਉਪਸਗ੍ਗਮੇਵੇਤ੍ਥ ਵਿਸੇਸੋ. ਤੇਨਾਹ ‘‘ਪੁਨ ਸਮਾਦਾਯਵਾਰੇਪਿ…ਪੇ… ਤੇਯੇਵ ਦਸ੍ਸਿਤਾ’’ਤਿ. ਵਿਪ੍ਪਕਤਚੀਵਰੇ ਪਕ੍ਕਮਨਨ੍ਤਿਕਸ੍ਸ ਅਭਾਵਤੋ ‘‘ਯਥਾਸਮ੍ਭਵ’’ਨ੍ਤਿ ਵੁਤ੍ਤਂ. ਤੇਨੇਵ ਵਿਪ੍ਪਕਤਚੀਵਰਵਾਰੇ ਛਲ਼ੇਵ ਉਬ੍ਭਾਰਾ ਵੁਤ੍ਤਾ, ਚੀਵਰੇ ਹਤ੍ਥਗਤੇ ਚ ਆਸਾਵਚ੍ਛੇਦਿਕਸ੍ਸ ਅਸਮ੍ਭਵਾ, ਸੋ ਏਤੇਸੁ ਵਾਰੇਸੁ ਯਤ੍ਥ ਕਤ੍ਥਚਿ ਨ ਵੁਤ੍ਤੋ, ਵਿਸੁਞ੍ਞੇਵ ਵੁਤ੍ਤੋ. ਵਿਪ੍ਪਕਤਵਾਰੇ ਚੇਤ੍ਥ ਆਦਾਯਵਾਰਸਮਾਦਾਯਵਾਰਵਸੇਨ ਦ੍ਵੇ ਛਕ੍ਕਵਾਰਾ ਵੁਤ੍ਤਾ.

ਤਤੋ ਪਰਂ ਨਿਟ੍ਠਾਨਸਨ੍ਨਿਟ੍ਠਾਨਨਾਸਨਨ੍ਤਿਕਾਨਂ ਵਸੇਨ ਤੀਣਿ ਤਿਕਾਨਿ ਦਸ੍ਸਿਤਾਨਿ. ਤਤ੍ਥ ਤਤਿਯਤ੍ਤਿਕੇ ਅਨਧਿਟ੍ਠਿਤੇਨਾਤਿ ‘‘ਪਚ੍ਚੇਸ੍ਸਂ, ਨ ਪਚ੍ਚੇਸ੍ਸ’’ਨ੍ਤਿ ਏਵਂ ਅਨਧਿਟ੍ਠਿਤੇਨ, ਨ ਏਵਂ ਮਨਸਿਕਤ੍ਵਾਤਿ ਅਤ੍ਥੋ. ਤਤਿਯਤ੍ਤਿਕਤੋ ਪਨ ਪਰਂ ਏਕਂ ਛਕ੍ਕਂ ਦਸ੍ਸਿਤਂ. ਏਵਂ ਤੀਣਿ ਤਿਕਾਨਿ, ਏਕਂ ਛਕ੍ਕਞ੍ਚਾਤਿ ਪਠਮਂ ਪਨ੍ਨਰਸਕਂ ਵੁਤ੍ਤਂ, ਇਮਿਨਾ ਨਯੇਨ ਦੁਤਿਯਪਨ੍ਨਰਸਕਾਦੀਨਿ ਵੇਦਿਤਬ੍ਬਾਨਿ.

ਪਾਲ਼ਿਯਂ ਆਸਾਦ੍ਵਾਦਸਕੇ ਬਹਿਸੀਮਾਗਤਸ੍ਸ ਕਥਿਨੁਦ੍ਧਾਰੇਸੁ ਤੇਸਮ੍ਪਿ ਚੀਵਰਾਸਾਦਿਵਸੇਨ ਚੀਵਰਪਲਿਬੋਧੋ ਯਾਵ ਚੀਵਰਨਿਟ੍ਠਾਨਾ ਤਿਟ੍ਠਤੀਤਿ ਆਹ ‘‘ਸੋ ਬਹਿਸੀਮਾਗਤੋ ਸੁਣਾਤਿ ‘ਉਬ੍ਭਤਂ ਕਿਰ ਤਸ੍ਮਿਂ ਆਵਾਸੇ ਕਥਿਨਨ੍ਤਿ…ਪੇ… ਸਵਨਨ੍ਤਿਕੋ ਕਥਿਨੁਦ੍ਧਾਰੋ’’’ਤਿ. ਏਤ੍ਥ ਚ ਸਵਨਕ੍ਖਣੇ ਆਵਾਸਪਲਿਬੋਧੋ ਪਠਮਂ ਛਿਜ੍ਜਤਿ, ਨਿਟ੍ਠਿਤੇ ਚੀਵਰਪਲਿਬੋਧੋਤਿ ਵੇਦਿਤਬ੍ਬੋ.

ਦਿਸਂਗਮਿਕਨਵਕੇ ਦਿਸਂਗਮਿਕੋ ਪਕ੍ਕਮਤੀਤਿ ਨ ਪਚ੍ਚੇਸ੍ਸਨ੍ਤਿ ਪਕ੍ਕਮਤਿ, ਇਮਿਨਾ ਆਵਾਸਪਲਿਬੋਧਾਭਾਵੋ ਦਸ੍ਸਿਤੋ ਹੋਤਿ. ਤੇਨੇਵ ਵਸ੍ਸਂਵੁਤ੍ਥਾਵਾਸੇ ਪੁਨ ਗਨ੍ਤ੍ਵਾ ਚੀਵਰਨਿਟ੍ਠਾਪਿਤਮਤ੍ਤੇ ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ ਵੁਤ੍ਤੋ. ‘‘ਚੀਵਰਪਟਿਵਿਸਂ ਅਪਵਿਲਾਯਮਾਨੋ’’ਤਿ ਇਮਿਨਾ ਚੀਵਰਪਲਿਬੋਧਸਮਙ੍ਗਿਕਤ੍ਤਮਸ੍ਸ ਦਸ੍ਸੇਤਿ, ਅਪਵਿਲਾਯਮਾਨੋਤਿ ਆਕਙ੍ਖਮਾਨੋ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਆਦਾਯਸਤ੍ਤਕਕਥਾਵਣ੍ਣਨਾ ਨਿਟ੍ਠਿਤਾ.

ਕਥਿਨਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.