੬. ਭੇਸਜ੍ਜਕ੍ਖਨ੍ਧਕੋ

ਪਞ੍ਚਭੇਸਜ੍ਜਾਦਿਕਥਾਵਣ੍ਣਨਾ

੨੬੦. ਭੇਸਜ੍ਜਕ੍ਖਨ੍ਧਕੇ ਪਿਤ੍ਤਂ ਕੋਟ੍ਠਬ੍ਭਨ੍ਤਰਗਤਂ ਹੋਤੀਤਿ ਬਹਿਸਰੀਰੇ ਬ੍ਯਾਪੇਤ੍ਵਾ ਠਿਤਂ ਅਬਦ੍ਧਪਿਤ੍ਤਂ ਕੋਟ੍ਠਬ੍ਭਨ੍ਤਰਗਤਂ ਹੋਤਿ, ਤੇਨ ਪਿਤ੍ਤਂ ਕੁਪਿਤਂ ਹੋਤੀਤਿ ਅਧਿਪ੍ਪਾਯੋ.

੨੬੧-੨. ਪਾਲ਼ਿਯਂ ਨਚ੍ਛਾਦੇਨ੍ਤੀਤਿ ਰੁਚਿਂ ਨ ਉਪ੍ਪਾਦੇਨ੍ਤਿ. ਸੁਸੁਕਾਤਿ ਸਮੁਦ੍ਦੇ ਏਕਾ ਮਚ੍ਛਜਾਤਿ, ਕੁਮ੍ਭਿਲਾਤਿਪਿ ਵਦਨ੍ਤਿ. ਸਂਸਟ੍ਠਨ੍ਤਿ ਪਰਿਸ੍ਸਾਵਿਤਂ.

੨੬੩. ਪਿਟ੍ਠੇਹੀਤਿ ਪਿਸਿਤੇਹਿ. ਕਸਾਵੇਹੀਤਿ ਤਚਾਦੀਨਿ ਉਦਕੇ ਤਾਪੇਤ੍ਵਾ ਗਹਿਤਊਸਰੇਹਿ. ਉਬ੍ਭਿਦਨ੍ਤਿ ਊਸਰਪਂਸੁਮਯਂ. ਲੋਣਬਿਲਨ੍ਤਿ ਲੋਣਵਿਸੇਸੋ.

੨੬੪-੫. ਛਕਣਨ੍ਤਿ ਗੋਮਯਂ. ਪਾਕਤਿਕਚੁਣ੍ਣਨ੍ਤਿ ਅਪਕ੍ਕਕਸਾਵਚੁਣ੍ਣਂ, ਗਨ੍ਧਚੁਣ੍ਣਂ ਪਨ ਨ ਵਟ੍ਟਤਿ. ਪਾਲ਼ਿਯਂ ਚੁਣ੍ਣਚਾਲਿਨਿਨ੍ਤਿ ਉਦੁਕ੍ਖਲੇ ਕੋਟ੍ਟਿਤਚੁਣ੍ਣਪਰਿਸ੍ਸਾਵਨਿਂ. ਸੁਵਣ੍ਣਗੇਰੁਕੋਤਿ ਸੁਵਣ੍ਣਤੁਤ੍ਥਾਦਿ. ਪਾਲ਼ਿਯਂ ਅਞ੍ਜਨੂਪਪਿਸਨਨ੍ਤਿ ਅਞ੍ਜਨੇ ਉਪਨੇਤੁਂ ਪਿਸਿਤਬ੍ਬਭੇਸਜ੍ਜਂ.

੨੬੭-੯. ਕਬਲ਼ਿਕਾਤਿ ਉਪਨਾਹਭੇਸਜ੍ਜਂ. ਘਰਦਿਨ੍ਨਕਾਬਾਧੋ ਨਾਮ ਘਰਣਿਯਾ ਦਿਨ੍ਨਵਸੀਕਰਣਭੇਸਜ੍ਜਸਮੁਟ੍ਠਿਤਆਬਾਧੋ. ਤਾਯ ਛਾਰਿਕਾਯ ਪਗ੍ਘਰਿਤਂ ਖਾਰੋਦਕਨ੍ਤਿ ਪਰਿਸ੍ਸਾਵਨੇ ਤਚ੍ਛਾਰਿਕਂ ਪਕ੍ਖਿਪਿਤ੍ਵਾ ਉਦਕੇ ਅਭਿਸਿਞ੍ਚਿਤੇ ਤਤੋ ਛਾਰਿਕਤੋ ਹੇਟ੍ਠਾ ਪਗ੍ਘਰਿਤਂ ਖਾਰੋਦਕਂ. ਪਾਲ਼ਿਯਂ ਅਕਟਯੂਸੇਨਾਤਿ ਅਨਭਿਸਙ੍ਖਤੇਨ ਮੁਗ੍ਗਯੂਸੇਨ. ਕਟਾਕਟੇਨਾਤਿ ਮੁਗ੍ਗੇ ਪਚਿਤ੍ਵਾ ਅਚਾਲੇਤ੍ਵਾ ਪਰਿਸ੍ਸਾਵਿਤੇਨ ਮੁਗ੍ਗਯੂਸੇਨਾਤਿ ਵਦਨ੍ਤਿ.

ਪਞ੍ਚਭੇਸਜ੍ਜਾਦਿਕਥਾਵਣ੍ਣਨਾ ਨਿਟ੍ਠਿਤਾ.

ਗੁਲ਼ਾਦਿਅਨੁਜਾਨਨਕਥਾਵਣ੍ਣਨਾ

੨੭੨-੪. ਗੁਲ਼ਕਰਣਨ੍ਤਿ ਉਚ੍ਛੁਸਾਲਂ. ਅਵਿਸ੍ਸਤ੍ਥਾਤਿ ਸਾਸਙ੍ਕਾ.

੨੭੬. ਅਪ੍ਪਮਤ੍ਤਕੇਪਿ ਵਾਰੇਨ੍ਤੀਤਿ ਅਪ੍ਪਮਤ੍ਤਕੇ ਦਿਨ੍ਨੇ ਦਾਯਕਾਨਂ ਪੀਲ਼ਾਤਿ ਪਟਿਕ੍ਖਿਪਨ੍ਤਿ. ਪਟਿਸਙ੍ਖਾਪੀਤਿ ਏਤ੍ਤਕੇਨਪਿ ਯਾਪੇਤੁਂ ਸਕ੍ਕਾ, ‘‘ਅਵਸੇਸਂ ਅਞ੍ਞੇਸਂ ਹੋਤੂ’’ਤਿ ਸਲ੍ਲਕ੍ਖੇਤ੍ਵਾਪਿ ਪਟਿਕ੍ਖਿਪਨ੍ਤਿ.

੨੭੯. ਵਤ੍ਥਿਪੀਲ਼ਨਨ੍ਤਿ ਯਥਾ ਵਤ੍ਥਿਗਤਤੇਲਾਦਿ ਅਨ੍ਤੋਸਰੀਰੇ ਆਰੋਹਨ੍ਤਿ, ਏਵਂ ਹਤ੍ਥੇਨ ਵਤ੍ਥਿਮਦ੍ਦਨਂ. ਸਮ੍ਬਾਧੇ ਸਤ੍ਥਕਮ੍ਮਵਤ੍ਥਿਕਮ੍ਮਾਨਮੇਵ ਪਟਿਕ੍ਖਿਤ੍ਤਤ੍ਤਾ ਦਹਨਕਮ੍ਮਂ ਵਟ੍ਟਤਿ ਏਵ.

ਗੁਲ਼ਾਦਿਅਨੁਜਾਨਨਕਥਾਵਣ੍ਣਨਾ ਨਿਟ੍ਠਿਤਾ.

ਯਾਗੁਮਧੁਗੋਲ਼ਕਾਦਿਕਥਾਵਣ੍ਣਨਾ

੨੮੨-੩. ਪਾਲ਼ਿਯਂ ਦਸਸ੍ਸ ਠਾਨਾਨੀਤਿ ਅਸ੍ਸ ਪਟਿਗ੍ਗਾਹਕਸ੍ਸ ਦਸ ਠਾਨਾਨਿ ਕਾਰਣਾਨਿ ਧਮ੍ਮੇਨਾਤਿ ਅਤ੍ਥੋ. ਅਨੁਪ੍ਪਵੇਚ੍ਛਤੀਤਿ ਦੇਤਿ. ਵਾਤਞ੍ਚ ਬ੍ਯਪਨੇਤੀਤਿ ਸਮ੍ਬਨ੍ਧੋ, ਵਾਤਞ੍ਚ ਅਨੁਲੋਮੇਤੀਤਿ ਅਤ੍ਥੋ. ਸਗ੍ਗਾ ਤੇ ਆਰਦ੍ਧਾਤਿ ਤਯਾ ਦੇਵਲੋਕਾ ਆਰਾਧਿਤਾ.

ਯਾਗੁਮਧੁਗੋਲ਼ਕਾਦਿਕਥਾਵਣ੍ਣਨਾ ਨਿਟ੍ਠਿਤਾ.

ਪਾਟਲਿਗਾਮਵਤ੍ਥੁਕਥਾਵਣ੍ਣਨਾ

੨੮੬. ਪਾਟਲਿਗਾਮੇ ਨਗਰਂ ਮਾਪੇਨ੍ਤੀਤਿ ਪਾਟਲਿਗਾਮਸ੍ਸ ਸਮੀਪੇ ਤਸ੍ਸੇਵ ਗਾਮਖੇਤ੍ਤਭੂਤੇ ਮਹਨ੍ਤੇ ਅਰਞ੍ਞਪ੍ਪਦੇਸੇ ਪਾਟਲਿਪੁਤ੍ਤਂ ਨਾਮ ਨਗਰਂ ਮਾਪੇਨ੍ਤਿ. ਯਾਵਤਾ ਅਰਿਯਂ ਆਯਤਨਨ੍ਤਿ ਯਤ੍ਤਕਂ ਅਰਿਯਮਨੁਸ੍ਸਾਨਂ ਓਸਰਣਟ੍ਠਾਨਂ. ਯਾਵਤਾ ਵਣਿਪ੍ਪਥੋਤਿ ਯਤ੍ਤਕਂ ਵਾਣਿਜਾਨਂ ਭਣ੍ਡਵਿਕ੍ਕੀਣਨਟ੍ਠਾਨਂ, ਵਸਨਟ੍ਠਾਨਂ ਵਾ, ਇਦਂ ਤੇਸਂ ਸਬ੍ਬੇਸਂ ਅਗ੍ਗਨਗਰਂ ਭਵਿਸ੍ਸਤੀਤਿ ਅਤ੍ਥੋ. ਪੁਟਭੇਦਨਨ੍ਤਿ ਸਕਟਾਦੀਹਿ ਨਾਨਾਦੇਸਤੋ ਆਹਟਾਨਂ ਭਣ੍ਡਪੁਟਾਨਂ ਵਿਕ੍ਕੀਣਨਤ੍ਥਾਯ ਮੋਚਨਟ੍ਠਾਨਂ. ਸਰਨ੍ਤਿ ਤਲ਼ਾਕਾਦੀਸੁਪਿ ਵਤ੍ਤਤਿ, ਤਨ੍ਨਿਵਤ੍ਤਨਤ੍ਥਂ ‘‘ਸਰਨ੍ਤਿ ਇਧ ਨਦੀ ਅਧਿਪ੍ਪੇਤਾ’’ਤਿ ਵੁਤ੍ਤਂ ਸਰਤਿ ਸਨ੍ਦਤੀਤਿ ਕਤ੍ਵਾ. ਵਿਨਾ ਏਵ ਕੁਲ੍ਲੇਨ ਤਿਣ੍ਣਾਤਿ ਇਦਂ ਅਪ੍ਪਮਤ੍ਤਕਉਦਕਮ੍ਪਿ ਅਫੁਸਿਤ੍ਵਾ ਵਿਨਾ ਕੁਲ੍ਲੇਨ ਪਾਰਪ੍ਪਤ੍ਤਾ.

ਪਾਟਲਿਗਾਮਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

ਕੋਟਿਗਾਮੇਸਚ੍ਚਕਥਾਵਣ੍ਣਨਾ

੨੮੭. ਪਾਲ਼ਿਯਂ ਸਨ੍ਧਾਵਿਤਨ੍ਤਿ ਭਵਤੋ ਭਵਂ ਪਟਿਸਨ੍ਧਿਗ੍ਗਹਣਵਸੇਨ ਸਨ੍ਧਾਵਨਂ ਕਤਂ. ਸਂਸਰਿਤਨ੍ਤਿ ਤਸ੍ਸੇਵ ਵੇਵਚਨਂ. ਮਮਞ੍ਚੇਵ ਤੁਮ੍ਹਾਕਞ੍ਚਾਤਿ ਮਯਾ ਚ ਤੁਮ੍ਹੇਹਿ ਚ, ਸਾਮਿਵਸੇਨੇਵ ਵਾ ਮਮ ਚ ਤੁਮ੍ਹਾਕਞ੍ਚ ਸਨ੍ਧਾਵਨਂ ਅਹੋਸੀਤਿ ਅਤ੍ਥੋ ਗਹੇਤਬ੍ਬੋ. ਸਂਸਰਿਤਨ੍ਤਿ ਸਂਸਰਿ. ਭਵਤਣ੍ਹਾ ਏਵ ਭਵਤੋ ਭਵਂ ਨੇਤੀਤਿ ਭਵਨੇਤ੍ਤੀਤਿ ਵੁਤ੍ਤਾ.

੨੮੯. ‘‘ਨੀਲਾ ਹੋਨ੍ਤੀ’’ਤਿ ਵੁਤ੍ਤਮੇਵਤ੍ਥਂ ਵਿਵਰਿਤੁਂ ‘‘ਨੀਲਵਣ੍ਣਾ’’ਤਿਆਦਿ ਵੁਤ੍ਤਂ. ਨੀਲਵਣ੍ਣਾਤਿ ਨੀਲਵਿਲੇਪਨਾ. ਏਸ ਨਯੋ ਸਬ੍ਬਤ੍ਥ. ਪਟਿਵਟ੍ਟੇਸੀਤਿ ਪਹਰਿ. ਅਮ੍ਬਕਾਯਾਤਿ ਅਮ੍ਬਾਯ. ਉਪਚਾਰਵਚਨਞ੍ਹੇਤਂ, ਮਾਤੁਗਾਮੇਨਾਤਿ ਅਤ੍ਥੋ. ਉਪਸਂਹਰਥਾਤਿ ਉਪਨੇਥ, ‘‘ਈਦਿਸਾ ਤਾਵਤਿਂਸਾ’’ਤਿ ਪਰਿਕਪ੍ਪੇਥਾਤਿ ਅਤ੍ਥੋ. ਇਦਞ੍ਚ ਭਿਕ੍ਖੂਨਂ ਸਂਵੇਗਜਨਨਤ੍ਥਂ ਵੁਤ੍ਤਂ, ਨ ਨਿਮਿਤ੍ਤਗ੍ਗਾਹਤ੍ਥਂ. ਲਿਚ੍ਛਵਿਰਾਜਾਨੋ ਹਿ ਸਬ੍ਬੇ ਨ ਚਿਰਸ੍ਸੇਵ ਅਜਾਤਸਤ੍ਤੁਨਾ ਵਿਨਾਸਂ ਪਾਪੁਣਿਸ੍ਸਨ੍ਤਿ.

ਕੋਟਿਗਾਮੇਸਚ੍ਚਕਥਾਵਣ੍ਣਨਾ ਨਿਟ੍ਠਿਤਾ.

ਸੀਹਸੇਨਾਪਤਿਵਤ੍ਥੁਆਦਿਕਥਾਵਣ੍ਣਨਾ

੨੯੦. ਸਨ੍ਧਾਗਾਰੇਤਿ ਰਾਜਕਿਚ੍ਚਸ੍ਸ ਸਨ੍ਧਾਰਣਤ੍ਥਾਯ ਨਿਚ੍ਛਿਦ੍ਦਂ ਕਤ੍ਵਾ ਵਿਚਾਰਣਤ੍ਥਾਯ ਕਤਮਹਾਸਭਾਯ. ਗਮਿਕਾਭਿਸਙ੍ਖਾਰੋਤਿ ਗਮਨੇ ਵਾਯਾਮੋ. ਧਮ੍ਮਸ੍ਸ ਚ ਅਨੁਧਮ੍ਮਨ੍ਤਿ ਤੁਮ੍ਹੇਹਿ ਵੁਤ੍ਤਸ੍ਸ ਕਾਰਣਸ੍ਸ ਅਨੁਕਾਰਣਂ, ਤੁਮ੍ਹੇਹਿ ਵੁਤ੍ਤਸ੍ਸ ਅਤ੍ਥਸ੍ਸ ਅਨੁਰੂਪਮੇਵਾਤਿ ਅਧਿਪ੍ਪਾਯੋ. ਸਹਧਮ੍ਮਿਕੋ ਵਾਦਾਨੁਵਾਦੋਤਿ ਪਰੇਹਿ ਵੁਤ੍ਤਕਾਰਣੇਨ ਸਕਾਰਣੋ ਹੁਤ੍ਵਾ ਤੁਮ੍ਹਾਕਂ ਵਾਦੋ ਵਾ ਇਤੋ ਪਰਂ ਤਸ੍ਸ ਅਨੁਵਾਦੋ ਵਾ. ਕੋਚਿ ਅਪ੍ਪਮਤ੍ਤਕੋਪਿ ਗਾਰਯ੍ਹਂ ਠਾਨਂ ਨ ਆਗਚ੍ਛਤੀਤਿ ਕਿਂ ਤਵ ਵਾਦੇ ਗਾਰਯ੍ਹਕਾਰਣਂ ਨਤ੍ਥੀਤਿ ਵੁਤ੍ਤਂ ਹੋਤਿ.

੨੯੩. ਅਨੁਵਿਚ੍ਚਕਾਰਨ੍ਤਿ ਅਨੁਵਿਦਿਤਾਕਾਰਂ. ਰਤਨਤ੍ਤਯਸ੍ਸ ਸਰਣਗਮਨਾਦਿਕਿਰਿਯਂ ਕਰੋਤਿ. ਸਹਸਾ ਕਤ੍ਵਾ ਮਾ ਪਚ੍ਛਾ ਵਿਪ੍ਪਟਿਸਾਰੀ ਅਹੋਸੀਤਿ ਅਤ੍ਥੋ. ਪਟਾਕਂ ਪਰਿਹਰੇਯ੍ਯੁਨ੍ਤਿ ਧਜਪਟਾਕਂ ਉਕ੍ਖਿਪਿਤ੍ਵਾ ‘‘ਈਦਿਸੋ ਅਮ੍ਹਾਕਂ ਸਰਣਂ ਗਤੋ ਸਾਵਕੋ ਜਾਤੋ’’ਤਿ ਨਗਰੇ ਘੋਸੇਨ੍ਤਾ ਆਹਿਣ੍ਡਨ੍ਤਿ.

੨੯੪. ਨਿਮਿਤ੍ਤਕਮ੍ਮਸ੍ਸਾਤਿ ਮਂਸਖਾਦਨਨਿਮਿਤ੍ਤੇਨ ਉਪ੍ਪਨ੍ਨਪਾਣਾਤਿਪਾਤਕਮ੍ਮਸ੍ਸ.

ਸੀਹਸੇਨਾਪਤਿਵਤ੍ਥੁਆਦਿਕਥਾਵਣ੍ਣਨਾ ਨਿਟ੍ਠਿਤਾ.

ਕਪ੍ਪਿਯਭੂਮਿਅਨੁਜਾਨਨਕਥਾਵਣ੍ਣਨਾ

੨੯੫. ਅਨੁਪ੍ਪਗੇ ਏਵਾਤਿ ਪਾਤੋਵ. ਓਰਵਸਦ੍ਦਨ੍ਤਿ ਮਹਾਸਦ੍ਦਂ. ਤਂ ਪਨ ਅਵਤ੍ਵਾਪੀਤਿ ਪਿ-ਸਦ੍ਦੇਨ ਤਥਾਵਚਨਮ੍ਪਿ ਅਨੁਜਾਨਾਤਿ. ਅਟ੍ਠਕਥਾਸੂਤਿ ਅਨ੍ਧਕਟ੍ਠਕਥਾਵਿਰਹਿਤਾਸੁ ਸੇਸਟ੍ਠਕਥਾਸੁ. ਸਾਧਾਰਣਲਕ੍ਖਣਨ੍ਤਿ ਅਨ੍ਧਕਟ੍ਠਕਥਾਯ ਸਹ ਸਬ੍ਬਟ੍ਠਕਥਾਨਂ ਸਮਾਨਂ.

ਚਯਨ੍ਤਿ ਅਧਿਟ੍ਠਾਨਉਚ੍ਚਵਤ੍ਥੁਂ. ਯਤੋ ਪਟ੍ਠਾਯਾਤਿ ਯਤੋ ਇਟ੍ਠਕਾਦਿਤੋ ਪਟ੍ਠਾਯ, ਯਂ ਆਦਿਂ ਕਤ੍ਵਾ ਭਿਤ੍ਤਿਂ ਉਟ੍ਠਾਪੇਤੁਕਾਮਾਤਿ ਅਤ੍ਥੋ. ‘‘ਥਮ੍ਭਾ ਪਨ ਉਪਰਿ ਉਗ੍ਗਚ੍ਛਨ੍ਤਿ, ਤਸ੍ਮਾ ਵਟ੍ਟਨ੍ਤੀ’’ਤਿ ਏਤੇਨ ਇਟ੍ਠਕਪਾਸਾਣਾ ਹੇਟ੍ਠਾ ਪਤਿਟ੍ਠਾਪਿਤਾਪਿ ਯਦਿ ਚਯਤੋ, ਭੂਮਿਤੋ ਵਾ ਏਕਙ੍ਗੁਲਮਤ੍ਤਮ੍ਪਿ ਉਗ੍ਗਤਾ ਤਿਟ੍ਠਨ੍ਤਿ, ਵਟ੍ਟਨ੍ਤੀਤਿ ਸਿਦ੍ਧਂ ਹੋਤਿ.

ਆਰਾਮੋਤਿ ਉਪਚਾਰਸੀਮਾਪਰਿਚ੍ਛਿਨ੍ਨੋ ਸਕਲੋ ਵਿਹਾਰੋ. ਸੇਨਾਸਨਾਨੀਤਿ ਵਿਹਾਰਸ੍ਸ ਅਨ੍ਤੋ ਤਿਣਕੁਟਿਆਦਿਕਾਨਿ ਸਙ੍ਘਸ੍ਸ ਨਿਵਾਸਗੇਹਾਨਿ. ਵਿਹਾਰਗੋਨਿਸਾਦਿਕਾ ਨਾਮਾਤਿ ਸੇਨਾਸਨਗੋਨਿਸਾਦਿਕਾ. ਸੇਨਾਸਨਾਨਿ ਹਿ ਸਯਂ ਪਰਿਕ੍ਖਿਤ੍ਤਾਨਿਪਿ ਆਰਾਮਪਰਿਕ੍ਖੇਪਾਭਾਵੇਨ ‘‘ਗੋਨਿਸਾਦਿਕਾਨੀ’’ਤਿ ਵੁਤ੍ਤਾਨਿ. ‘‘ਉਪਡ੍ਢਪਰਿਕ੍ਖਿਤ੍ਤੋਪੀ’’ਤਿ ਇਮਿਨਾ ਤਤੋ ਊਨਪਰਿਕ੍ਖਿਤ੍ਤੋ ਯੇਭੁਯ੍ਯੇਨ ਅਪਰਿਕ੍ਖਿਤ੍ਤੋ ਨਾਮ, ਤਸ੍ਮਾ ਅਪਰਿਕ੍ਖਿਤ੍ਤਸਙ੍ਖ੍ਯਮੇਵ ਗਚ੍ਛਤੀਤਿ ਦਸ੍ਸੇਤਿ. ਏਤ੍ਥਾਤਿ ਉਪਡ੍ਢਾਦਿਪਰਿਕ੍ਖਿਤ੍ਤੇ. ਕਪ੍ਪਿਯਕੁਟਿਂ ਲਦ੍ਧੁਂ ਵਟ੍ਟਤੀਤਿ ਗੋਨਿਸਾਦਿਯਾ ਅਭਾਵੇਨ ਸੇਸਕਪ੍ਪਿਯਕੁਟੀਸੁ ਤੀਸੁ ਯਾ ਕਾਚਿ ਕਪ੍ਪਿਯਕੁਟਿ ਕਾਤਬ੍ਬਾਤਿ ਅਤ੍ਥੋ.

ਤੇਸਂ ਗੇਹਾਨੀਤਿ ਏਤ੍ਥ ਭਿਕ੍ਖੂਨਂ ਵਾਸਤ੍ਥਾਯ ਕਤਮ੍ਪਿ ਯਾਵ ਨ ਦੇਨ੍ਤਿ, ਤਾਵ ਤੇਸਂ ਸਨ੍ਤਕਂਯੇਵ ਭਵਿਸ੍ਸਤੀਤਿ ਦਟ੍ਠਬ੍ਬਂ. ਵਿਹਾਰਂ ਠਪੇਤ੍ਵਾਤਿ ਉਪਸਮ੍ਪਨ੍ਨਾਨਂ ਵਾਸਤ੍ਥਾਯ ਕਤਗੇਹਂ ਠਪੇਤ੍ਵਾਤਿ ਅਤ੍ਥੋ. ਗੇਹਨ੍ਤਿ ਨਿਵਾਸਗੇਹਂ, ਤਦਞ੍ਞਂ ਪਨ ਉਪੋਸਥਾਗਾਰਾਦਿ ਸਬ੍ਬਂ ਅਨਿਵਾਸਗੇਹਂ ਚਤੁਕਪ੍ਪਿਯਭੂਮਿਵਿਮੁਤ੍ਤਾ ਪਞ੍ਚਮੀ ਕਪ੍ਪਿਯਭੂਮਿ. ਸਙ੍ਘਸਨ੍ਤਕੇਪਿ ਹਿ ਏਤਾਦਿਸੇ ਗੇਹੇ ਸੁਟ੍ਠੁ ਪਰਿਕ੍ਖਿਤ੍ਤਾਰਾਮਤ੍ਤੇਪਿ ਅਬ੍ਭੋਕਾਸੇ ਵਿਯ ਅਨ੍ਤੋਵੁਤ੍ਥਾਦਿਦੋਸੋ ਨਤ੍ਥਿ. ਯੇਨ ਕੇਨਚਿ ਛਨ੍ਨੇ, ਪਰਿਚ੍ਛਨ੍ਨੇ ਚ ਸਹਸੇਯ੍ਯਪ੍ਪਹੋਨਕੇ ਭਿਕ੍ਖੁਸਙ੍ਘਸ੍ਸ ਨਿਵਾਸਗੇਹੇ ਅਨ੍ਤੋਵੁਤ੍ਥਾਦਿਦੋਸੋ, ਨ ਅਞ੍ਞਤ੍ਥ. ਤੇਨਾਹ ‘‘ਯਂ ਪਨਾ’’ਤਿਆਦਿ. ਤਤ੍ਥ ‘‘ਸਙ੍ਘਿਕਂ ਵਾ ਪੁਗ੍ਗਲਿਕਂ ਵਾ’’ਤਿ ਇਦਂ ਕਿਞ੍ਚਾਪਿ ਭਿਕ੍ਖੁਨੀਨਂ ਸਾਮਞ੍ਞਤੋ ਵੁਤ੍ਤਂ, ਭਿਕ੍ਖੂਨਂ ਪਨ ਸਙ੍ਘਿਕਂ ਪੁਗ੍ਗਲਿਕਞ੍ਚ ਭਿਕ੍ਖੁਨੀਨਂ, ਤਾਸਂ ਸਙ੍ਘਿਕਂ ਪੁਗ੍ਗਲਿਕਞ੍ਚ ਭਿਕ੍ਖੂਨਂ ਗਿਹਿਸਨ੍ਤਕਟ੍ਠਾਨੇ ਤਿਟ੍ਠਤੀਤਿ ਵੇਦਿਤਬ੍ਬਂ.

ਮੁਖਸਨ੍ਨਿਧੀਤਿ ਅਨ੍ਤੋਸਨ੍ਨਿਹਿਤਦੋਸੋ ਹਿ ਮੁਖਪ੍ਪਵੇਸਨਨਿਮਿਤ੍ਤਂ ਆਪਤ੍ਤਿਂ ਕਰੋਤਿ, ਨਾਞ੍ਞਥਾ. ਤਸ੍ਮਾ ‘‘ਮੁਖਸਨ੍ਨਿਧੀ’’ਤਿ ਵੁਤ੍ਤੋ.

ਤਤ੍ਥ ਤਤ੍ਥ ਖਣ੍ਡਾ ਹੋਨ੍ਤੀਤਿ ਉਪਡ੍ਢਤੋ ਅਧਿਕਂ ਖਣ੍ਡਾ ਹੋਨ੍ਤਿ. ਸਬ੍ਬਸ੍ਮਿਂ ਛਦਨੇ ਵਿਨਟ੍ਠੇਤਿ ਤਿਣਪਣ੍ਣਾਦਿਵਸ੍ਸਪਰਿਤ੍ਤਾਯਕੇ ਛਦਨੇ ਵਿਨਟ੍ਠੇ. ਗੋਪਾਨਸੀਨਂ ਪਨ ਉਪਰਿ ਵਲ੍ਲੀਹਿ ਬਦ੍ਧਦਣ੍ਡੇਸੁ ਠਿਤੇਸੁਪਿ ਜਹਿਤਵਤ੍ਥੁਕਾ ਹੋਨ੍ਤਿ ਏਵ. ਪਕ੍ਖਪਾਸਕਮਣ੍ਡਲਨ੍ਤਿ ਏਕਸ੍ਮਿਂ ਪਸ੍ਸੇ ਤਿਣ੍ਣਂ ਗੋਪਾਨਸੀਨਂ ਉਪਰਿ ਠਿਤਤਿਣਪਣ੍ਣਾਦਿਚ੍ਛਦਨਂ ਵੁਚ੍ਚਤਿ.

ਅਨੁਪਸਮ੍ਪਨ੍ਨਸ੍ਸ ਦਾਤਬ੍ਬੋ ਅਸ੍ਸਾਤਿਆਦਿਨਾ ਅਕਪ੍ਪਿਯਕੁਟਿਯਂ ਵੁਤ੍ਥਮ੍ਪਿ ਅਨੁਪਸਮ੍ਪਨ੍ਨਸ੍ਸ ਦਿਨ੍ਨੇ ਕਪ੍ਪਿਯਂ ਹੋਤਿ, ਸਾਪੇਕ੍ਖਦਾਨਞ੍ਚੇਤ੍ਥ ਵਟ੍ਟਤਿ, ਪਟਿਗ੍ਗਹਣਂ ਵਿਯ ਨ ਹੋਤੀਤਿ ਦਸ੍ਸੇਤਿ.

੨੯੯. ਪਾਲ਼ਿਯਂ ਕਨ੍ਤਾਰੇ ਸਮ੍ਭਾਵੇਸੀਤਿ ਅਪ੍ਪਭਕ੍ਖਕਨ੍ਤਾਰੇ ਸਮ੍ਪਾਪੁਣਿ.

ਕਪ੍ਪਿਯਭੂਮਿਅਨੁਜਾਨਨਕਥਾਵਣ੍ਣਨਾ ਨਿਟ੍ਠਿਤਾ.

ਕੇਣਿਯਜਟਿਲਵਤ੍ਥੁਕਥਾਵਣ੍ਣਨਾ

੩੦੦. ਜਟਿਲੋਤਿ ਆਹਰਿਮਜਟਾਧਰੋ ਤਾਪਸਵੇਸਧਾਰਕੋ ਯਞ੍ਞਯੁਤ੍ਤੋ ਲੋਕਪੂਜਿਤੋ ਬ੍ਰਾਹ੍ਮਣੋ. ਪਵਤ੍ਤਾਰੋ ਪਾਵਚਨਵਸੇਨ ਵਤ੍ਤਾਰੋ. ਯੇਸਂ ਸਨ੍ਤਕਮਿਦਂ, ਯੇਹਿ ਵਾ ਇਦਂ ਗੀਤਨ੍ਤਿ ਅਤ੍ਥੋ. ਗੀਤਂ ਪਵੁਤ੍ਤਂ ਸਮਿਹਿਤਨ੍ਤਿ ਅਞ੍ਞਮਞ੍ਞਸ੍ਸ ਪਰਿਯਾਯਵਚਨਂ ਵੁਤ੍ਤਨ੍ਤਿ ਅਤ੍ਥੋ. ਤਦਨੁਗਾਯਨ੍ਤੀਤਿ ਤਂ ਤੇਹਿ ਪੁਬ੍ਬੇ ਗੀਤਂ ਅਨੁਗਾਯਨ੍ਤਿ. ਏਵਂ ਸੇਸੇਸੁ ਚ.

ਯਾਵਕਾਲਿਕਪਕ੍ਕਾਨਨ੍ਤਿ ਪਕ੍ਕੇ ਸਨ੍ਧਾਯ ਵੁਤ੍ਤਂ, ਆਮਾਨਿ ਪਨ ਅਨੁਪਸਮ੍ਪਨ੍ਨੇਹਿ ਸੀਤੁਦਕੇ ਮਦ੍ਦਿਤ੍ਵਾ ਪਰਿਸ੍ਸਾਵੇਤ੍ਵਾ ਦਿਨ੍ਨਪਾਨਂ ਪਚ੍ਛਾਭਤ੍ਤਮ੍ਪਿ ਕਪ੍ਪਤਿ ਏਵ. ਅਯਞ੍ਚ ਅਤ੍ਥੋ ਮਹਾਅਟ੍ਠਕਥਾਯਂ ਸਰੂਪਤੋ ਅਵੁਤ੍ਤੋਤਿ ਆਹ ‘‘ਕੁਰੁਨ੍ਦਿਯਂ ਪਨਾ’’ਤਿਆਦਿ. ‘‘ਉਚ੍ਛੁਰਸੋ ਨਿਕਸਟੋ’’ਤਿ ਇਦਂ ਪਾਤਬ੍ਬਸਾਮਞ੍ਞੇਨ ਯਾਮਕਾਲਿਕਕਥਾਯਂ ਵੁਤ੍ਤਂ, ਤਂ ਪਨ ਸਤ੍ਤਾਹਕਾਲਿਕਮੇਵਾਤਿ ਗਹੇਤਬ੍ਬਂ. ਇਮੇ ਚਤ੍ਤਾਰੋ ਰਸਾਤਿ ਫਲਪਤ੍ਤਪੁਪ੍ਫਉਚ੍ਛੁਰਸਾ ਚਤ੍ਤਾਰੋ.

ਪਾਲ਼ਿਯਂ ਅਗ੍ਗਿਹੁਤ੍ਤਮੁਖਾਤਿ ਅਗ੍ਗਿਜੁਹਨਪੁਬ੍ਬਕਾ. ਛਨ੍ਦਸੋਤਿ ਵੇਦਸ੍ਸ. ਸਾਵਿਤ੍ਤੀ ਮੁਖਂ ਪਠਮਂ ਸਜ੍ਝਾਯਿਤਬ੍ਬਾਤਿ ਅਤ੍ਥੋ. ਤਪਤਨ੍ਤਿ ਵਿਜੋਤਨ੍ਤਾਨਂ.

ਕੇਣਿਯਜਟਿਲਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

ਰੋਜਮਲ੍ਲਾਦਿਵਤ੍ਥੁਕਥਾਵਣ੍ਣਨਾ

੩੦੧. ਬਹੁਕਤੋ ਬੁਦ੍ਧੇ ਵਾਤਿ ਬੁਦ੍ਧੇ ਕਤਬਹੁਮਾਨੋਤਿ ਅਤ੍ਥੋ. ਸੋ ਖੋ ਅਹਂ, ਭਨ੍ਤੇ ਆਨਨ੍ਦ, ਞਾਤੀਨਂ ਦਣ੍ਡਭਯਤਜ੍ਜਿਤੋ ਅਹੋਸਿਨ੍ਤਿ ਸੇਸੋ. ਏਵਞ੍ਹਿ ਸਤਿ ‘‘ਏਵਾਹ’’ਨ੍ਤਿ ਪੁਨ ਅਹਂ-ਗਹਣਂ ਯੁਜ੍ਜਤਿ. ਵਿਵਰੀਤਿ ‘‘ਵਿਵਰਤੂ’’ਤਿ ਚਿਨ੍ਤਾਮਤ੍ਤੇਨ ਵਿਵਰਿ, ਨ ਉਟ੍ਠਾਯ ਹਤ੍ਥੇਨ.

੩੦੩. ਅਞ੍ਞਤਰੋਤਿ ਸੁਭਦ੍ਦੋ ਵੁਡ੍ਢਪਬ੍ਬਜਿਤੋ. ਦ੍ਵੇ ਦਾਰਕਾਤਿ ਸਾਮਣੇਰਭੂਮਿਯਂ ਠਿਤਾ ਦ੍ਵੇ ਪੁਤ੍ਤਾ. ਨਾਲ਼ਿਯਾਵਾਪਕੇਨਾਤਿ ਨਾਲ਼ਿਯਾ ਚੇਵ ਥਵਿਕਾਯ ਚ. ਸਂਹਰਥ ਇਮੇਹਿ ਭਾਜਨੇਹਿ ਤਣ੍ਡੁਲਾਦੀਨਿ ਸਙ੍ਕਡ੍ਢਥਾਤਿ ਅਤ੍ਥੋ. ਭੁਸਾਗਾਰੇਤਿ ਪਲਾਲਮਯੇ ਅਗਾਰੇ, ਪਲਾਲਪੁਞ੍ਜਂ ਅਬ੍ਭਨ੍ਤਰਤੋ ਪਲਾਲਂ ਸਙ੍ਕਡ੍ਢਿਤ੍ਵਾ ਅਗਾਰਂ ਕਤਂ ਹੋਤਿ, ਤਤ੍ਥਾਤਿ ਅਤ੍ਥੋ.

ਰੋਜਮਲ੍ਲਾਦਿਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

ਚਤੁਮਹਾਪਦੇਸਕਥਾਵਣ੍ਣਨਾ

੩੦੫. ਪਰਿਮਦ੍ਦਨ੍ਤਾਤਿ ਉਪਪਰਿਕ੍ਖਨ੍ਤਾ. ਦ੍ਵੇ ਪਟਾ ਦੇਸਨਾਮੇਨੇਵ ਵੁਤ੍ਤਾਤਿ ਤੇਸਂ ਸਰੂਪਦਸ੍ਸਨਪਦਮੇਤਂ. ਨਾਞ੍ਞਨਿਵਤ੍ਤਨਪਦਂ ਪਤ੍ਤੁਣ੍ਣਪਟਸ੍ਸਾਪਿ ਦੇਸਨਾਮੇਨ ਵੁਤ੍ਤਤ੍ਤਾ.

ਤੁਮ੍ਬਾਤਿ ਭਾਜਨਾਨਿ. ਫਲਤੁਮ੍ਬੋ ਨਾਮ ਲਾਬੁਆਦਿ. ਉਦਕਤੁਮ੍ਬੋ ਉਦਕਘਟੋ. ਕਿਲਞ੍ਜਚ੍ਛਤ੍ਤਨ੍ਤਿ ਵੇਲ਼ੁਵਿਲੀਵੇਹਿ ਵਾਯਿਤ੍ਵਾ ਕਤਛਤ੍ਤਂ. ਸਮ੍ਭਿਨ੍ਨਰਸਨ੍ਤਿ ਮਿਸ੍ਸੀਭੂਤਰਸਂ.

ਚਤੁਮਹਾਪਦੇਸਕਥਾਵਣ੍ਣਨਾ ਨਿਟ੍ਠਿਤਾ.

ਭੇਸਜ੍ਜਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.