੫. ਚਮ੍ਮਕ੍ਖਨ੍ਧਕੋ

ਸੋਣਕੋਲ਼ਿਵਿਸਕਥਾਦਿਵਣ੍ਣਨਾ

੨੪੨. ਚਮ੍ਮਕ੍ਖਨ੍ਧਕੇ ਉਣ੍ਣਪਾਵਾਰਣਨ੍ਤਿ ਉਭਤੋ ਲੋਮਾਨਿ ਉਟ੍ਠਾਪੇਤ੍ਵਾ ਕਤਂ ਉਣ੍ਣਮਯਂ ਪਾਵਾਰਣਂ, ਉਭਤੋ ਕਪ੍ਪਾਸਪਿਚੁਂ ਉਟ੍ਠਾਪੇਤ੍ਵਾ ਵੀਤਪਾਵਾਰੋਪਿ ਅਤ੍ਥਿ, ਤਤੋ ਨਿਵਤ੍ਤਨਤ੍ਥਂ ‘‘ਉਣ੍ਣਪਾਵਾਰਣ’’ਨ੍ਤਿ ਵੁਤ੍ਤਂ.

ਅਡ੍ਢਚਨ੍ਦਪਾਸਾਣੇਤਿ ਸੋਪਾਨਮੂਲੇ ਉਪਡ੍ਢਂ ਅਨ੍ਤੋ ਪਵੇਸੇਤ੍ਵਾ ਠਪਿਤੇ ਅਡ੍ਢਪਾਸਾਣੇ. ਪਾਲ਼ਿਯਂ ਵਿਹਾਰਪਚ੍ਛਾਯਾਯਨ੍ਤਿ ਵਿਹਾਰਪਚ੍ਚਨ੍ਤੇ ਛਾਯਾਯ, ਵਿਹਾਰਸ੍ਸ ਵਡ੍ਢਮਾਨਚ੍ਛਾਯਾਯਨ੍ਤਿਪਿ ਵਦਨ੍ਤਿ.

੨੪੩. ਭੋਗਾਤਿ ਉਪਯੋਗਤ੍ਥੇ ਪਚ੍ਚਤ੍ਤਵਚਨਂ. ਅਚ੍ਚਾਯਤਾਤਿ ਅਤਿਆਯਤਾ ਖਰਮੁਚ੍ਛਨਾ. ਸਰਵਤੀਤਿ ਮਧੁਰਸਰਸਂਯੁਤ੍ਤਾ. ਅਤਿਸਿਥਿਲਾ ਮਨ੍ਦਮੁਚ੍ਛਨਾ. ਵੀਰਿਯਸਮਥਨ੍ਤਿ ਵੀਰਿਯਸਮ੍ਪਯੁਤ੍ਤਸਮਥਂ. ਤਤ੍ਥ ਚ ਨਿਮਿਤ੍ਤਂ ਗਣ੍ਹਾਹੀਤਿ ਤਸ੍ਮਿਞ੍ਚ ਸਮਭਾਵੇ ਸਤਿ ਯਂ ਆਦਾਸੇ ਮੁਖਨਿਮਿਤ੍ਤਂ ਵਿਯ ਨਿਮਿਤ੍ਤਂ ਉਪ੍ਪਜ੍ਜਤਿ, ਤਂ ਸਮਥਨਿਮਿਤ੍ਤਂ, ਵਿਪਸ੍ਸਨਾਨਿਮਿਤ੍ਤਂ, ਮਗ੍ਗਨਿਮਿਤ੍ਤਂ, ਫਲਨਿਮਿਤ੍ਤਞ੍ਚ ਗਣ੍ਹਾਹਿ ਨਿਬ੍ਬਤ੍ਤੇਹੀਤਿ, ਏਵਮਸ੍ਸ ਅਰਹਤ੍ਤਪਰਿਯੋਸਾਨਂ ਕਮ੍ਮਟ੍ਠਾਨਂ ਕਥਿਤਂ.

੨੪੪. ਛਠਾਨਾਨੀਤਿ ਛ ਕਾਰਣਾਨਿ. ਅਧਿਮੁਤ੍ਤੋਤਿ ਪਟਿਵਿਜ੍ਝਿਤ੍ਵਾ ਠਿਤੋ. ਨੇਕ੍ਖਮ੍ਮਾਧਿਮੁਤ੍ਤੋਤਿਆਦਿ ਸਬ੍ਬਂ ਅਰਹਤ੍ਤਵਸੇਨ ਵੁਤ੍ਤਂ. ਅਰਹਤ੍ਤਞ੍ਹਿ ਸਬ੍ਬਕਿਲੇਸੇਹਿ ਨਿਕ੍ਖਨ੍ਤਤ੍ਤਾ ਨੇਕ੍ਖਮ੍ਮਂ, ਤੇਹੇਵ ਚ ਪਵਿਵਿਤ੍ਤਤ੍ਤਾ ਪਵਿਵੇਕੋ, ਬ੍ਯਾਪਜ੍ਜਾਭਾਵਤੋ ਅਬ੍ਯਾਪਜ੍ਜਂ, ਉਪਾਦਾਨਸ੍ਸ ਖਯਨ੍ਤੇ ਉਪ੍ਪਨ੍ਨਤ੍ਤਾ ਉਪਾਦਾਨਕ੍ਖਯੋ, ਤਣ੍ਹਕ੍ਖਯਨ੍ਤੇ ਉਪ੍ਪਨ੍ਨਤ੍ਤਾ ਤਣ੍ਹਕ੍ਖਯੋ, ਸਮ੍ਮੋਹਾਭਾਵਤੋ ਅਸਮ੍ਮੋਹੋਤਿ ਚ ਵੁਚ੍ਚਤਿ.

ਕੇਵਲਂ ਸਦ੍ਧਾਮਤ੍ਤਕਨ੍ਤਿ ਕੇਵਲਂ ਪਟਿਵੇਧਪਞ੍ਞਾਯ ਅਸਮ੍ਮਿਸ੍ਸਂ ਸਦ੍ਧਾਮਤ੍ਤਕਂ. ਪਟਿਚਯਨ੍ਤਿ ਪੁਨਪ੍ਪੁਨਂ ਕਰਣੇਨ ਵਡ੍ਢਿਂ. ਵੀਤਰਾਗਤ੍ਤਾਤਿ ਮਗ੍ਗਪਟਿਵੇਧੇਨ ਰਾਗਸ੍ਸ ਵਿਗਤਤ੍ਤਾ ਏਵ ਨੇਕ੍ਖਮ੍ਮਸਙ੍ਖਾਤਂ ਅਰਹਤ੍ਤਂ ਪਟਿਵਿਜ੍ਝਿਤ੍ਵਾ ਸਚ੍ਛਿਕਤ੍ਵਾ ਠਿਤੋ ਹੋਤਿ. ਸੇਸਪਦੇਸੁਪਿ ਏਸੇਵ ਨਯੋ. ਪਵਿਵੇਕਾਧਿਮੁਤ੍ਤੋਤਿ ‘‘ਪਵਿਵੇਕੇ ਅਧਿਮੁਤ੍ਤੋ ਅਹ’’ਨ੍ਤਿ ਏਵਂ ਅਰਹਤ੍ਤਂ ਬ੍ਯਾਕਰੋਤੀਤਿ ਅਤ੍ਥੋ.

ਸੀਲਬ੍ਬਤਪਰਾਮਾਸਨ੍ਤਿ ਸੀਲਞ੍ਚ ਵਤਞ੍ਚ ਪਰਾਮਸਿਤ੍ਵਾ ਗਹਿਤਗ੍ਗਹਣਮਤ੍ਤਂ. ਸਾਰਤੋ ਪਚ੍ਚਾਗਚ੍ਛਨ੍ਤੋਤਿ ਸਾਰਭਾਵੇਨ ਜਾਨਨ੍ਤੋ. ਅਬ੍ਯਾਪਜ੍ਜਾਧਿਮੁਤ੍ਤੋਤਿ ਅਬ੍ਯਾਪਜ੍ਜਂ ਅਰਹਤ੍ਤਂ ਬ੍ਯਾਕਰੋਤਿ.

ਅਮਿਸ੍ਸੀਕਤਨ੍ਤਿ ਅਮਿਸ੍ਸਕਤਂ. ਕਿਲੇਸਾ ਹਿ ਆਰਮ੍ਮਣੇਨ ਸਦ੍ਧਿਂ ਚਿਤ੍ਤਂ ਮਿਸ੍ਸਂ ਕਰੋਨ੍ਤਿ, ਤੇਸਂ ਅਭਾਵਾ ਅਮਿਸ੍ਸੀਕਤਂ. ਭੁਸਾ ਵਾਤਵੁਟ੍ਠੀਤਿ ਬਲਵਵਾਤਕ੍ਖਨ੍ਧੋ.

ਉਪਾਦਾਨਕ੍ਖਯਸ੍ਸ ਚਾਤਿ ਉਪਯੋਗਤ੍ਥੇ ਸਾਮਿਵਚਨਂ. ਦਿਸ੍ਵਾ ਆਯਤਨੁਪ੍ਪਾਦਨ੍ਤਿ ਚਕ੍ਖਾਦਿਆਯਤਨਾਨਂ ਉਪ੍ਪਾਦਞ੍ਚ ਵਯਞ੍ਚ ਦਿਸ੍ਵਾ. ਚਿਤ੍ਤਂ ਵਿਮੁਚ੍ਚਤੀਤਿ ਇਮਾਯ ਵਿਪਸ੍ਸਨਾਪਟਿਪਤ੍ਤਿਯਾ ਫਲਸਮਾਪਤ੍ਤਿਵਸੇਨ ਚਿਤ੍ਤਂ ਵਿਮੁਚ੍ਚਤਿ.

ਸੋਣਕੋਲ਼ਿਵਿਸਕਥਾਦਿਵਣ੍ਣਨਾ ਨਿਟ੍ਠਿਤਾ.

ਦਿਗੁਣਾਦਿਉਪਾਹਨਪਟਿਕ੍ਖੇਪਕਥਾਵਣ੍ਣਨਾ

੨੪੫. ਸਕਟਵਾਹੇਤਿ ਦ੍ਵੀਹਿ ਸਕਟੇਹਿ ਪਰਿਚ੍ਛਿਨ੍ਨੇ ਵਾਹੇ. ‘‘ਵਾਹੇ’’ਤਿ ਬਹੁਵਚਨਸ੍ਸ ਹਿਰਞ੍ਞਵਿਸੇਸਨਤ੍ਤੇਪਿ ਸਾਮਞ੍ਞਾਪੇਕ੍ਖਾਯ ‘‘ਹਿਰਞ੍ਞ’’ਨ੍ਤਿ ਏਕਵਚਨਂ ਕਤਂ.

੨੪੬. ਅਦ੍ਦਾਰਿਟ੍ਠਕਵਣ੍ਣਾਤਿ ਅਲ੍ਲਾਰਿਟ੍ਠਫਲਵਣ੍ਣਾ, ਤਿਨ੍ਤਕਾਕਪਕ੍ਖਵਣ੍ਣਾਤਿਪਿ ਵਦਨ੍ਤਿ. ਰਜਨਨ੍ਤਿ ਉਪਲਿਤ੍ਤਂ ਨੀਲਾਦਿਵਣ੍ਣਂ ਸਨ੍ਧਾਯ ਵੁਤ੍ਤਂ. ਤੇਨਾਹ ‘‘ਚੋਲ਼ਕੇਨ ਪੁਞ੍ਛਿਤ੍ਵਾ’’ਤਿ. ਤਞ੍ਹਿ ਤਥਾ ਪੁਞ੍ਛਿਤੇ ਵਿਗਚ੍ਛਤਿ. ਯਂ ਪਨ ਚਮ੍ਮਸ੍ਸ ਦੁਗ੍ਗਨ੍ਧਾਪਨਯਨਤ੍ਥਂ ਕਾਲ਼ਰਤ੍ਤਾਦਿਰਜਨੇਹਿ ਰਞ੍ਜਿਤਤ੍ਤਾ ਕਾਲ਼ਰਤ੍ਤਾਦਿਵਣ੍ਣਂ ਹੋਤਿ, ਤਂ ਚੋਲ਼ਾਦੀਹਿ ਅਪਨੇਤੁਂ ਨ ਸਕ੍ਕਾ ਚਮ੍ਮਗਤਿਕਮੇਵ, ਤਸ੍ਮਾ ਤਂ ਵਟ੍ਟਤੀਤਿ ਦਟ੍ਠਬ੍ਬਂ.

ਖਲ੍ਲਕਨ੍ਤਿ ਸਬ੍ਬਪਣ੍ਹਿਪਿਧਾਨਚਮ੍ਮਂ, ਅਪਰਿਗਲ਼ਨਤ੍ਥਂ ਪਣ੍ਹਿਉਪਰਿਭਾਗੇ ਅਪਿਧਾਯ ਆਰੋਪਨਬਨ੍ਧਨਮਤ੍ਤਂ ਵਟ੍ਟਤਿ. ਵਿਚਿਤ੍ਰਾਤਿ ਸਣ੍ਠਾਨਤੋ ਵਿਚਿਤ੍ਰਪਟਾ ਅਧਿਪ੍ਪੇਤਾ, ਨ ਵਣ੍ਣਤੋ ਸਬ੍ਬਸੋ ਅਪਨੇਤਬ੍ਬੇਸੁ ਖਲ੍ਲਕਾਦੀਸੁ ਪਵਿਟ੍ਠਤ੍ਤਾ. ਬਿਲ਼ਾਲਸਦਿਸਮੁਖਤ੍ਤਾ ਮਹਾਉਲੂਕਾ ‘‘ਪਕ੍ਖਿਬਿਲ਼ਾਲਾ’’ਤਿ ਵੁਚ੍ਚਤਿ, ਤੇਸਂ ਚਮ੍ਮਂ ਨਾਮ ਪਕ੍ਖਲੋਮਮੇਵ.

ਦਿਗੁਣਾਦਿਉਪਾਹਨਪਟਿਕ੍ਖੇਪਕਥਾਵਣ੍ਣਨਾ ਨਿਟ੍ਠਿਤਾ.

ਅਜ੍ਝਾਰਾਮੇਉਪਾਹਨਪਟਿਕ੍ਖੇਪਕਥਾਦਿਵਣ੍ਣਨਾ

੨੫੧. ਉਣ੍ਣਾਹਿ ਕਤਪਾਦੁਕਾਤਿ ਏਤ੍ਥ ਉਣ੍ਣਾਮਯਕਮ੍ਬਲੇਹਿ ਕਤਾ ਪਾਦੁਕਾ ਸਙ੍ਗਯ੍ਹਨ੍ਤਿ.

੨੫੩. ਗਙ੍ਗਾਮਹਕੀਲ਼ਿਕਾਯਾਤਿ ਗਙ੍ਗਾਮਹੇ ਕੀਲ਼ਿਕਾਯ. ਤਤ੍ਥ ਹਿ ਇਤ੍ਥਿਪੁਰਿਸਾ ਯਾਨੇਹਿ ਉਦਕਕੀਲ਼ਂ ਗਚ੍ਛਨ੍ਤਿ. ਪੀਠਕਸਿਵਿਕਨ੍ਤਿ ਫਲਕਾਦਿਨਾ ਕਤਂ ਪੀਠਕਯਾਨਂ. ਪਟਪੋਤਲਿਕਂ ਅਨ੍ਦੋਲਿਕਾ. ਸਬ੍ਬਮ੍ਪਿ ਯਾਨਂ ਉਪਾਹਨੇਨਪਿ ਗਨ੍ਤੁਂ ਅਸਮਤ੍ਥਸ੍ਸ ਗਿਲਾਨਸ੍ਸ ਅਨੁਞ੍ਞਾਤਂ.

੨੫੪. ਵਾਲ਼ਰੂਪਾਨੀਤਿ ਆਹਰਿਮਾਨਿ ਵਾਲ਼ਰੂਪਾਨਿ. ਚਤੁਰਙ੍ਗੁਲਾਧਿਕਾਨੀਤਿ ਉਦ੍ਦਲੋਮੀਏਕਨ੍ਤਲੋਮੀਹਿ ਵਿਸੇਸਦਸ੍ਸਨਂ. ਚਤੁਰਙ੍ਗੁਲਤੋ ਹਿ ਊਨਾਨਿ ਕਿਰ ਉਦ੍ਦਲੋਮੀਆਦੀਸੁ ਪਵਿਸਨ੍ਤਿ. ਵਾਨਚਿਤ੍ਰੋ ਉਣ੍ਣਾਮਯਤ੍ਥਰਣੋਤਿ ਨਾਨਾਵਣ੍ਣੇਹਿ ਉਣ੍ਣਾਮਯਸੁਤ੍ਤੇਹਿ ਭਿਤ੍ਤਿਚ੍ਛੇਦਾਦਿਵਸੇਨ ਵਾਯਿਤ੍ਵਾ ਕਤਚਿਤ੍ਤਤ੍ਥਰਣੋ. ਘਨਪੁਪ੍ਫਕੋਤਿ ਬਹਲਰਾਗੋ. ਪਕਤਿਤੂਲਿਕਾਤਿ ਤੂਲਪੁਣ੍ਣਾ ਭਿਸਿ. ਵਿਕਤਿਕਾਤਿ ਸੀਹਰੂਪਾਦਿਵਸੇਨ ਵਾਨਚਿਤ੍ਰਾਵ ਗਯ੍ਹਤਿ. ਉਦ੍ਦਲੋਮੀਤਿ ‘‘ਉਭਤੋਦਸਂ ਉਣ੍ਣਾਮਯਤ੍ਥਰਣ’’ਨ੍ਤਿ ਦੀਘਨਿਕਾਯਟ੍ਠਕਥਾਯਂ ਵੁਤ੍ਤਂ. ਕੋਸੇਯ੍ਯਕਟ੍ਟਿਸ੍ਸਮਯਨ੍ਤਿ ਕੋਸਿਯਸੁਤ੍ਤਾਨਂ ਅਨ੍ਤਰਾ ਸੁਵਣ੍ਣਮਯਸੁਤ੍ਤਾਨਿ ਪਵੇਸੇਤ੍ਵਾ ਵੀਤਂ. ਸੁਵਣ੍ਣਸੁਤ੍ਤਂ ਕਿਰ ‘‘ਕਟ੍ਟਿਸ੍ਸਂ, ਕਸਟ’’ਨ੍ਤਿ ਚ ਵੁਚ੍ਚਤਿ. ਤੇਨੇਵ ‘‘ਕੋਸੇਯ੍ਯਕਸਟਮਯ’’ਨ੍ਤਿ ਆਚਰਿਯ-ਧਮ੍ਮਪਾਲਤ੍ਥੇਰੇਨ ਵੁਤ੍ਤਨ੍ਤਿ ਵਦਨ੍ਤਿ. ਰਤਨਪਰਿਸਿਬ੍ਬਿਤਨ੍ਤਿ ਸੁਵਣ੍ਣਲਿਤ੍ਤਂ. ਸੁਦ੍ਧਕੋਸੇਯ੍ਯਨ੍ਤਿ ਰਤਨਪਰਿਸਿਬ੍ਬਨਰਹਿਤਂ.

ਅਜਿਨਮਿਗਚਮ੍ਮਾਨਂ ਅਤਿਸੁਖੁਮਤ੍ਤਾ ਦੁਪਟ੍ਟਤਿਪਟ੍ਟਾਨਿ ਕਤ੍ਵਾ ਸਿਬ੍ਬਨ੍ਤੀਤਿ ਵੁਤ੍ਤਂ ‘‘ਅਜਿਨਪ੍ਪਵੇਣੀ’’ਤਿ. ਰਤ੍ਤਵਿਤਾਨੇਨਾਤਿ ਸਬ੍ਬਰਤ੍ਤੇਨ ਵਿਤਾਨੇਨ. ਯਂ ਪਨ ਨਾਨਾਵਣ੍ਣਂ ਵਾਨਚਿਤ੍ਤਂ ਵਾ ਲੇਪਚਿਤ੍ਤਂ ਵਾ, ਤਂ ਵਟ੍ਟਤਿ. ਉਭਤੋਲੋਹਿਤਕੂਪਧਾਨੇਪਿ ਏਸੇਵ ਨਯੋ. ‘‘ਚਿਤ੍ਰਂ ਵਾ’’ਤਿ ਇਦਂ ਪਨ ਸਬ੍ਬਥਾ ਕਪ੍ਪਿਯਤ੍ਤਾ ਵੁਤ੍ਤਂ, ਨ ਪਨ ਉਭਤੋਉਪਧਾਨੇਸੁ ਅਕਪ੍ਪਿਯਤ੍ਤਾ. ਨ ਹਿ ਲੋਹਿਤਕ-ਸਦ੍ਦੋ ਚਿਤ੍ਤੇ ਵਤ੍ਤਤਿ, ਪਟਲਿਗ੍ਗਹਣੇਨੇਵ ਚਿਤ੍ਤਕਸ੍ਸਪਿ ਅਤ੍ਥਰਣਸ੍ਸ ਸਙ੍ਗਹੇਤਬ੍ਬਪ੍ਪਸਙ੍ਗਤੋ, ਕਾਸਾਵਂ ਪਨ ਲੋਹਿਤਕਵੋਹਾਰਂ ਨ ਗਚ੍ਛਤਿ. ਤਸ੍ਮਾ ਵਿਤਾਨੇਪਿ ਉਭਤੋਉਪਧਾਨੇਪਿ ਵਟ੍ਟਤਿ. ਸਚੇ ਪਮਾਣਯੁਤ੍ਤਨ੍ਤਿਆਦਿ ਅਞ੍ਞਪ੍ਪਮਾਣਾਤਿਕ੍ਕਨ੍ਤਸ੍ਸ ਬਿਬ੍ਬੋਹਨਸ੍ਸ ਪਟਿਕ੍ਖਿਤ੍ਤਭਾਵਦਸ੍ਸਨਤ੍ਥਂ ਵੁਤ੍ਤਂ, ਨ ਪਨ ਉਚ੍ਚਾਸਯਨਮਹਾਸਯਨਭਾਵਦਸ੍ਸਨਤ੍ਥਂ ਤਥਾ ਅਵੁਤ੍ਤਤ੍ਤਾ. ਤਂ ਪਨ ਉਪਧਾਨਂ ਉਪੋਸਥਿਕਾਨਂ ਗਹਟ੍ਠਾਨਂ ਵਟ੍ਟਤਿ. ਉਚ੍ਚਾਸਯਨਮਹਾਸਯਨਮੇਵ ਹਿ ਤਦਾ ਤੇਸਂ ਨ ਵਟ੍ਟਤਿ. ਦੀਘਨਿਕਾਯਟ੍ਠਕਥਾਦੀਸੁ ਕਿਞ੍ਚਾਪਿ ‘‘ਠਪੇਤ੍ਵਾ ਤੂਲਿਕਂ ਸਬ੍ਬਾਨੇਵ ਗੋਨਕਾਦੀਨਿ ਰਤਨਪਰਿਸਿਬ੍ਬਿਤਾਨਿ ਵਟ੍ਟਨ੍ਤੀ’’ਤਿਆਦਿ ਵੁਤ੍ਤਂ, ਵਿਨਯਟ੍ਠਕਥਾਯੇਵ ਕਪ੍ਪਿਯਾਕਪ੍ਪਿਯਭਾਵੇ ਪਮਾਣਨ੍ਤਿ ਗਹੇਤਬ੍ਬਂ.

ਅਜ੍ਝਾਰਾਮੇਉਪਾਹਨਪਟਿਕ੍ਖੇਪਕਥਾਦਿਵਣ੍ਣਨਾ ਨਿਟ੍ਠਿਤਾ.

ਗਿਹਿਵਿਕਤਾਨੁਞ੍ਞਾਤਾਦਿਕਥਾਵਣ੍ਣਨਾ

੨੫੬. ਅਭਿਨਿਸ੍ਸਾਯਾਤਿ ਅਪਸ੍ਸਾਯ. ਵਿਸੁਕਾਯਿਕਵਿਪ੍ਫਨ੍ਦਿਤਾਨਨ੍ਤਿ ਪਟਿਪਕ੍ਖਭੂਤਾਨਂ ਦਿਟ੍ਠਿਚਿਤ੍ਤਵਿਪ੍ਫਨ੍ਦਿਤਾਨਨ੍ਤਿ ਅਤ੍ਥੋ.

੨੫੭. ਯਤਿਨ੍ਦ੍ਰਿਯਨ੍ਤਿ ਮਨਿਨ੍ਦ੍ਰਿਯਵਸੇਨ ਸਞ੍ਞਤਿਨ੍ਦ੍ਰਿਯਂ.

੨੫੮. ਪਾਲ਼ਿਯਂ ਅਟ੍ਠਕਵਗ੍ਗਿਕਾਨੀਤਿ ਸੁਤ੍ਤਨਿਪਾਤੇ (ਸੁ. ਨਿ. ੭੭੨ ਆਦਯੋ) ਅਟ੍ਠਕਵਗ੍ਗਭੂਤਾਨਿ ਸੋਲ਼ਸ ਸੁਤ੍ਤਾਨਿ. ਏਵਂ ਚਿਰਂ ਅਕਾਸੀਤਿ ਏਵਂ ਚਿਰਕਾਲਂ ਪਬ੍ਬਜ੍ਜਂ ਅਨੁਪਗਨ੍ਤ੍ਵਾ ਅਗਾਰਮਜ੍ਝੇ ਕੇਨ ਕਾਰਣੇਨ ਵਾਸਮਕਾਸੀਤਿ ਅਤ੍ਥੋ. ਸੋ ਕਿਰ ਮਜ੍ਝਿਮਵਯੇ ਪਬ੍ਬਜਿਤੋ, ਤੇਨ ਭਗਵਾ ਏਵਮਾਹ. ਏਤਮਤ੍ਥਂ ਵਿਦਿਤ੍ਵਾਤਿ ਕਾਮੇਸੁ ਦਿਟ੍ਠਾਦੀਨਵਾ ਚਿਰਾਯਿਤ੍ਵਾਪਿ ਘਰਾਵਾਸੇਨ ਪਕ੍ਖਨ੍ਦਨ੍ਤੀਤਿ ਏਤਮਤ੍ਥਂ ਸਬ੍ਬਾਕਾਰਤੋ ਵਿਦਿਤ੍ਵਾ.

ਆਦੀਨਵਂ ਲੋਕੇਤਿ ਸਙ੍ਖਾਰਲੋਕੇ ਅਨਿਚ੍ਚਤਾਦਿਆਦੀਨਵਂ. ਨਿਰੁਪਧਿਨ੍ਤਿ ਨਿਬ੍ਬਾਨਂ. ‘‘ਅਰਿਯੋ ਨ ਰਮਤੀ ਪਾਪੇ’’ਤਿ ਇਮਸ੍ਸ ਹੇਤੁਮਾਹ ‘‘ਪਾਪੇ ਨ ਰਮਤੀ ਸੁਚੀ’’ਤਿ. ਤਤ੍ਥ ਸੁਚੀਤਿ ਵਿਸੁਦ੍ਧਪੁਗ੍ਗਲੋ.

੨੫੯. ਕਾਲ਼ਸੀਹੋਤਿ ਕਾਲ਼ਮੁਖਵਾਨਰਜਾਤਿ. ਚਮ੍ਮਂ ਨ ਵਟ੍ਟਤੀਤਿ ਨਿਸੀਦਨਤ੍ਥਰਣਂ ਕਾਤੁਂ ਨ ਵਟ੍ਟਤਿ, ਭੂਮਤ੍ਥਰਣਾਦਿਵਸੇਨ ਸੇਨਾਸਨਪਰਿਭੋਗੋ ਵਟ੍ਟਤੇਵ.

ਗਿਹਿਵਿਕਤਾਨੁਞ੍ਞਾਤਾਦਿਕਥਾਵਣ੍ਣਨਾ ਨਿਟ੍ਠਿਤਾ.

ਚਮ੍ਮਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.