੪. ਪਵਾਰਣਾਕ੍ਖਨ੍ਧਕੋ

ਅਫਾਸੁਵਿਹਾਰਕਥਾਦਿਵਣ੍ਣਨਾ

੨੦੯. ਪਵਾਰਣਾਕ੍ਖਨ੍ਧਕੇ ਪਾਲ਼ਿਯਂ ਪਿਣ੍ਡਾਯ ਪਟਿਕ੍ਕਮੇਯ੍ਯਾਤਿ ਪਿਣ੍ਡਾਯ ਚਰਿਤ੍ਵਾ ਪਟਿਕ੍ਕਮੇਯ੍ਯ. ਅਵਕ੍ਕਾਰਪਾਤਿਨ੍ਤਿ ਅਤਿਰੇਕਪਿਣ੍ਡਪਾਤਠਪਨਕਂ ਏਕਂ ਭਾਜਨਂ. ਅਵਿਸਯ੍ਹਨ੍ਤਿ ਉਕ੍ਖਿਪਿਤੁਂ ਅਸਕ੍ਕੁਣੇਯ੍ਯਂ. ਵਿਲਙ੍ਘਨਂ ਉਕ੍ਖਿਪਨਂ ਵਿਲਙ੍ਘੋ, ਸੋ ਏਵ ਵਿਲਙ੍ਘਕੋ, ਹਤ੍ਥੇਹਿ ਵਿਲਙ੍ਘਕੋ ਹਤ੍ਥਵਿਲਙ੍ਘਕੋਤਿ ਆਹ ‘‘ਹਤ੍ਥੁਕ੍ਖੇਪਕੇਨਾ’’ਤਿ. ਅਥ ਵਾ ਵਿਲਙ੍ਘਕੇਨ ਉਕ੍ਖੇਪਕੇਨ ਹਤ੍ਥੇਨਾਤਿਪਿ ਅਤ੍ਥੋ, ਅਞ੍ਞਮਞ੍ਞਂ ਸਂਸਿਬ੍ਬਿਤਹਤ੍ਥੇਹੀਤਿ ਵੁਤ੍ਤਂ ਹੋਤਿ.

੨੧੩. ਸਚੇ ਪਨ ਵੁਡ੍ਢਤਰੋ ਹੋਤੀਤਿ ਪਵਾਰਣਾਦਾਯਕੋ ਭਿਕ੍ਖੁ ਵੁਡ੍ਢਤਰੋ ਹੋਤਿ. ਏਵਞ੍ਹਿ ਤੇਨ ਤਸ੍ਸਤ੍ਥਾਯ ਪਵਾਰਿਤਂ ਹੋਤੀਤਿ ਏਤ੍ਥ ਏਵਂ ਤੇਨ ਅਪ੍ਪਵਾਰਿਤੋਪਿ ਤਸ੍ਸ ਸਙ੍ਘਪ੍ਪਤ੍ਤਿਮਤ੍ਤੇਨ ਸਙ੍ਘਪਵਾਰਣਾਕਮ੍ਮਂ ਸਮਗ੍ਗਕਮ੍ਮਮੇਵ ਹੋਤੀਤਿ ਦਟ੍ਠਬ੍ਬਂ. ਤੇਨ ਚ ਭਿਕ੍ਖੁਨਾਤਿ ਪਵਾਰਣਾਦਾਯਕੇਨ ਭਿਕ੍ਖੁਨਾ.

੨੩੪. ਬਹੂਪਿ ਸਮਾਨਵਸ੍ਸਾ ਏਕਤੋ ਪਵਾਰੇਤੁਂ ਲਭਨ੍ਤੀਤਿ ਏਕਸ੍ਮਿਂ ਸਂਵਚ੍ਛਰੇ ਲਦ੍ਧੂਪਸਮ੍ਪਦਤਾਯ ਸਮਾਨੁਪਸਮ੍ਪਨ੍ਨਵਸ੍ਸਾ ਸਬ੍ਬੇ ਏਕਤੋ ਪਵਾਰੇਤੁਂ ਲਭਨ੍ਤੀਤਿ ਅਤ੍ਥੋ.

੨੩੭. ਪਾਲ਼ਿਯਂ ਮਿਚ੍ਛਾਦਿਟ੍ਠੀਤਿ ‘‘ਨਤ੍ਥਿ ਦਿਨ੍ਨ’’ਨ੍ਤਿਆਦਿ (ਦੀ. ਨਿ. ੧.੧੭੧; ਮ. ਨਿ. ੧.੪੪੫; ੨.੯੪, ੯੫, ੨੨੫; ੩.੯੧, ੧੧੬, ੧੩੬; ਸਂ. ਨਿ. ੩.੨੧੦; ਧ. ਸ. ੧੨੨੧) ਨਯਪ੍ਪਵਤ੍ਤਾ. ਅਨ੍ਤਗ੍ਗਾਹਿਕਾਤਿ ਸਸ੍ਸਤੁਚ੍ਛੇਦਸਙ੍ਖਾਤਸ੍ਸ ਅਨ੍ਤਸ੍ਸ ਗਾਹਿਕਾ. ਯਂ ਖੋ ਤ੍ਵਨ੍ਤਿਆਦੀਸੁ ਯਂ ਪਵਾਰਣਂ ਠਪੇਸਿ, ਤਂ ਦਿਟ੍ਠੇਨ ਠਪੇਸੀਤਿ ਤਂ-ਸਦ੍ਦਂ ਅਜ੍ਝਾਹਰਿਤ੍ਵਾ ਯੋਜੇਤਬ੍ਬਂ.

੨੩੯. ਵਤ੍ਥੁਂ ਪਕਾਸੇਨ੍ਤੋਤਿ ਪੁਗ੍ਗਲੇ ਪਰਿਸਙ੍ਕੁਪ੍ਪਤ੍ਤਿਯਾ ਨਿਮਿਤ੍ਤਭੂਤਂ ਵਤ੍ਥੁਮਤ੍ਤਂਯੇਵ ਸਨ੍ਧਾਯ ਵੁਤ੍ਤਂ. ਯਂ ਪਨ ਵਤ੍ਥੁਂ ਸਨ੍ਧਾਯ ‘‘ਪੁਗ੍ਗਲੋ ਪਞ੍ਞਾਯਤਿ, ਨ ਵਤ੍ਥੂ’’ਤਿ ਆਹ, ਨ ਤਂ ਸਨ੍ਧਾਯੇਤਂ ਵੁਤ੍ਤਂ. ਯਦਿ ਪਨ ਤਸ੍ਸ ਭਿਕ੍ਖੁਨੋ ਵਸਨਟ੍ਠਾਨੇ ਪੋਕ੍ਖਰਣਿਤੋ ਮਚ੍ਛਗ੍ਗਹਣਾਦਿ ਦਿਸ੍ਸੇਯ੍ਯ, ਤਦਾ ‘‘ਵਤ੍ਥੁ ਚ ਪੁਗ੍ਗਲੋ ਚ ਪਞ੍ਞਾਯਤੀ’’ਤਿ ਵਤ੍ਤਬ੍ਬਂ ਭਵੇਯ੍ਯ. ਤੇਨਾਹ ‘‘ਪੁਰਿਮਨਯੇਨੇਵ ਚੋਰੇਹੀ’’ਤਿਆਦਿ. ਭਿਕ੍ਖੁਨੋ ਸਰੀਰੇ ਮਾਲਾਗਨ੍ਧਞ੍ਚ ਅਰਿਟ੍ਠਗਨ੍ਧਞ੍ਚ ਦਿਸ੍ਵਾ ਏਵਂ ‘‘ਵਤ੍ਥੁ ਚ ਪੁਗ੍ਗਲੋ ਚ ਪਞ੍ਞਾਯਤੀ’’ਤਿ ਵੁਤ੍ਤਨ੍ਤਿ ਵੇਦਿਤਬ੍ਬਂ.

ਅਫਾਸੁਵਿਹਾਰਕਥਾਦਿਵਣ੍ਣਨਾ ਨਿਟ੍ਠਿਤਾ.

ਭਣ੍ਡਨਕਾਰਕਵਤ੍ਥੁਕਥਾਵਣ੍ਣਨਾ

੨੪੦. ਦ੍ਵੇ ਚਾਤੁਦ੍ਦਸਿਕਾ ਹੋਨ੍ਤੀਤਿ ਤਤਿਯਪਕ੍ਖੇ ਚਾਤੁਦ੍ਦਸਿਯਾ ਸਦ੍ਧਿਂ ਦ੍ਵੇ ਚਾਤੁਦ੍ਦਸਿਕਾ ਹੋਨ੍ਤਿ. ‘‘ਭਣ੍ਡਨਕਾਰਕਾਨਂ ਤੇਰਸੇ ਵਾ ਚਾਤੁਦ੍ਦਸੇ ਵਾ ਇਮੇ ਪਨ੍ਨਰਸੀਪਵਾਰਣਂ ਪਵਾਰੇਸ੍ਸਨ੍ਤੀ’’ਤਿ ਇਮਿਨਾ ਯਥਾਸਕਂ ਉਪੋਸਥਕਰਣਦਿਵਸਤੋ ਪਟ੍ਠਾਯ ਭਿਕ੍ਖੂਨਂ ਚਾਤੁਦ੍ਦਸੀਪਨ੍ਨਰਸੀਵੋਹਾਰੋ, ਨ ਚਨ੍ਦਗਤਿਸਿਦ੍ਧਿਯਾ ਤਿਥਿਯਾ ਵਸੇਨਾਤਿ ਦਸ੍ਸੇਤਿ. ਕਿਞ੍ਚਾਪਿ ਏਵਂ ‘‘ਅਨੁਜਾਨਾਮਿ, ਭਿਕ੍ਖਵੇ, ਰਾਜੂਨਂ ਅਨੁਵਤ੍ਤਿਤੁ’’ਨ੍ਤਿ (ਮਹਾਵ. ੧੮੬) ਵਚਨਤੋ ਪਨੇਤ੍ਥ ਲੋਕਿਯਾਨਂ ਤਿਥਿਂ ਅਨੁਵਤ੍ਤਨ੍ਤੇਹਿਪਿ ਅਤ੍ਤਨੋ ਉਪੋਸਥਕ੍ਕਮੇਨ ਚਾਤੁਦ੍ਦਸਿਂ ਪਨ੍ਨਰਸਿਂ ਵਾ, ਪਨ੍ਨਰਸਿਂ ਚਾਤੁਦ੍ਦਸਿਂ ਵਾ ਕਰੋਨ੍ਤੇਹੇਵ ਅਨੁਵਤ੍ਤਿਤਬ੍ਬਂ, ਨ ਪਨ ਸੋਲ਼ਸਮਦਿਵਸਂ ਵਾ ਤੇਰਸਮਦਿਵਸਂ ਵਾ ਉਪੋਸਥਦਿਵਸਂ ਕਰੋਨ੍ਤੇਹਿ. ਤੇਨੇਵ ਪਾਲ਼ਿਯਮ੍ਪਿ ‘‘ਦ੍ਵੇ ਤਯੋ ਉਪੋਸਥੇ ਚਾਤੁਦ੍ਦਸਿਕੇ ਕਾਤੁ’’ਨ੍ਤਿ ਵੁਤ੍ਤਂ. ਅਞ੍ਞਥਾ ਦ੍ਵਾਦਸਿਯਂ, ਤੇਰਸਿਯਂ ਵਾ ਉਪੋਸਥੋ ਕਾਤਬ੍ਬੋਤਿ ਵਤ੍ਤਬ੍ਬਤੋ. ‘‘ਸਕਿਂ ਪਕ੍ਖਸ੍ਸ ਚਾਤੁਦ੍ਦਸੇ, ਪਨ੍ਨਰਸੇ ਵਾ’’ਤਿਆਦਿਵਚਨਮ੍ਪਿ ਉਪਵੁਤ੍ਥਕ੍ਕਮੇਨੇਵ ਵੁਤ੍ਤਂ, ਨ ਤਿਥਿਕ੍ਕਮੇਨਾਤਿ ਗਹੇਤਬ੍ਬਂ.

ਭਣ੍ਡਨਕਾਰਕਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

ਪਵਾਰਣਾਸਙ੍ਗਹਕਥਾਵਣ੍ਣਨਾ

੨੪੧. ‘‘ਪਵਾਰੇਤ੍ਵਾ ਪਨ ਅਨ੍ਤਰਾਪਿ ਚਾਰਿਕਂ ਪਕ੍ਕਮਿਤੁਂ ਲਭਨ੍ਤੀ’’ਤਿ ਇਮਿਨਾ ਪਵਾਰਣਾਸਙ੍ਗਹੇ ਕਤੇ ਅਨ੍ਤਰਾ ਪਕ੍ਕਮਿਤੁਕਾਮਾ ਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਪਵਾਰੇਤੁਂ ਲਭਨ੍ਤੀਤਿ ਦਸ੍ਸੇਤਿ.

ਪਵਾਰਣਾਸਙ੍ਗਹਕਥਾਵਣ੍ਣਨਾ ਨਿਟ੍ਠਿਤਾ.

ਪਵਾਰਣਾਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.