੨. ਰਤਨਸਿਕ੍ਖਾਪਦਵਣ੍ਣਨਾ

੫੦੬. ਦੁਤਿਯੇ ਆਵਸਥਸ੍ਸਾਤਿ ਏਤ੍ਥ ਅਨ੍ਤੋਆਰਾਮੇ ਵਾ ਹੋਤੁ ਅਞ੍ਞਤ੍ਥ ਵਾ, ਯਤ੍ਥ ਕਤ੍ਥਚਿ ਅਤ੍ਤਨੋ ਵਸਨਟ੍ਠਾਨਂ ਆਵਸਥੋ ਨਾਮ. ਛਨ੍ਦੇਨਪਿ ਭਯੇਨਪੀਤਿ ਵਡ੍ਢਕਿਆਦੀਸੁ ਛਨ੍ਦੇਨ, ਰਾਜਵਲ੍ਲਭੇਸੁ ਭਯੇਨ. ਆਕਿਣ੍ਣਮਨੁਸ੍ਸੇਪਿ ਜਾਤੇ…ਪੇ… ਆਸਙ੍ਕਨ੍ਤੀਤਿ ਤਸ੍ਮਿਂ ਨਿਮ੍ਮਨੁਸ੍ਸਟ੍ਠਾਨੇ ਪਚ੍ਛਾ ਆਕਿਣ੍ਣਮਨੁਸ੍ਸੇ ਜਾਤੇਪਿ ਵਿਸਰਿਤ੍ਵਾ ਗਮਨਕਾਲੇ ਅਞ੍ਞਸ੍ਸ ਅਦਿਟ੍ਠਤ੍ਤਾ ਤਮੇਵ ਭਿਕ੍ਖੁਂ ਆਸਙ੍ਕਨ੍ਤਿ. ਪਤਿਰੂਪਂ ਨਾਮ ਕਪ੍ਪਿਯਭਣ੍ਡੇ ਸਯਂ ਪਂਸੁਕੂਲਂ ਗਹੇਤ੍ਵਾ ਅਕਪ੍ਪਿਯਭਣ੍ਡੇ ਪਤਿਰੂਪਾਨਂ ਉਪਾਸਕਾਦੀਨਂ ਦਸ੍ਸੇਤ੍ਵਾ ਚੇਤਿਯਾਦਿਪੁਞ੍ਞੇ ਨਿਯੋਜਨਂ ਵਾ ਦਾਪੇਤ੍ਵਾ ਨਿਰਪੇਕ੍ਖਗਮਨਂ ਵਾ. ਸਮਾਦਪੇਤ੍ਵਾਤਿ ਯਾਚਿਤ੍ਵਾ. ਪਰਸਨ੍ਤਕਤਾ, ਵਿਸ੍ਸਾਸਗ੍ਗਾਹਪਂਸੁਕੂਲਸਞ੍ਞਾਨਂ ਅਭਾਵੋ, ਅਨਨੁਞ੍ਞਾਤਕਾਰਣਾ ਉਗ੍ਗਹਣਾਦਿ ਚਾਤਿ ਤੀਣਿ ਅਙ੍ਗਾਨਿ.

ਰਤਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.