੯. ਰਾਜਵਗ੍ਗੋ
੧. ਅਨ੍ਤੇਪੁਰਸਿਕ੍ਖਾਪਦਵਣ੍ਣਨਾ
੪੯੯. ਨਵਮਵਗ੍ਗਸ੍ਸ ਪਠਮੇ ਪਾਲ਼ਿਯਂ ਸਂਸੁਦ੍ਧਗਹਣਿਕੋਤਿ ਏਤ੍ਥ ਗਹਣੀਤਿ ਗਬ੍ਭਾਸਯਸਞ੍ਞਿਤੋ ਮਾਤੁ ਕੁਚ੍ਛਿਪ੍ਪਦੇਸੋ, ਪੁਰਿਸਨ੍ਤਰਸੁਕ੍ਕਾਸਮ੍ਫੁਟ੍ਠਤਾਯ ਸਂਸੁਦ੍ਧਗਹਣਿਕੋ. ਅਭਿਸਿਤ੍ਤਖਤ੍ਤਿਯਤਾ, ਉਭਿਨ੍ਨਮ੍ਪਿ ਸਯਨਿਘਰਤੋ ਅਨਿਕ੍ਖਨ੍ਤਤਾ, ਅਪ੍ਪਟਿਸਂਵਿਦਿਤਸ੍ਸ ਇਨ੍ਦਖੀਲਾਤਿਕ੍ਕਮੋਤਿ ਤੀਣਿ ਅਙ੍ਗਾਨਿ.
ਅਨ੍ਤੇਪੁਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੨. ਰਤਨਸਿਕ੍ਖਾਪਦਵਣ੍ਣਨਾ
੫੦੬. ਦੁਤਿਯੇ ਆਵਸਥਸ੍ਸਾਤਿ ਏਤ੍ਥ ਅਨ੍ਤੋਆਰਾਮੇ ਵਾ ਹੋਤੁ ਅਞ੍ਞਤ੍ਥ ਵਾ, ਯਤ੍ਥ ਕਤ੍ਥਚਿ ਅਤ੍ਤਨੋ ਵਸਨਟ੍ਠਾਨਂ ਆਵਸਥੋ ਨਾਮ. ਛਨ੍ਦੇਨਪਿ ਭਯੇਨਪੀਤਿ ਵਡ੍ਢਕਿਆਦੀਸੁ ਛਨ੍ਦੇਨ, ਰਾਜਵਲ੍ਲਭੇਸੁ ਭਯੇਨ. ਆਕਿਣ੍ਣਮਨੁਸ੍ਸੇਪਿ ਜਾਤੇ…ਪੇ… ਆਸਙ੍ਕਨ੍ਤੀਤਿ ਤਸ੍ਮਿਂ ਨਿਮ੍ਮਨੁਸ੍ਸਟ੍ਠਾਨੇ ਪਚ੍ਛਾ ਆਕਿਣ੍ਣਮਨੁਸ੍ਸੇ ਜਾਤੇਪਿ ਵਿਸਰਿਤ੍ਵਾ ਗਮਨਕਾਲੇ ਅਞ੍ਞਸ੍ਸ ਅਦਿਟ੍ਠਤ੍ਤਾ ਤਮੇਵ ਭਿਕ੍ਖੁਂ ਆਸਙ੍ਕਨ੍ਤਿ. ਪਤਿਰੂਪਂ ਨਾਮ ਕਪ੍ਪਿਯਭਣ੍ਡੇ ਸਯਂ ਪਂਸੁਕੂਲਂ ਗਹੇਤ੍ਵਾ ਅਕਪ੍ਪਿਯਭਣ੍ਡੇ ਪਤਿਰੂਪਾਨਂ ਉਪਾਸਕਾਦੀਨਂ ਦਸ੍ਸੇਤ੍ਵਾ ਚੇਤਿਯਾਦਿਪੁਞ੍ਞੇ ਨਿਯੋਜਨਂ ਵਾ ਦਾਪੇਤ੍ਵਾ ਨਿਰਪੇਕ੍ਖਗਮਨਂ ਵਾ. ਸਮਾਦਪੇਤ੍ਵਾਤਿ ਯਾਚਿਤ੍ਵਾ. ਪਰਸਨ੍ਤਕਤਾ, ਵਿਸ੍ਸਾਸਗ੍ਗਾਹਪਂਸੁਕੂਲਸਞ੍ਞਾਨਂ ਅਭਾਵੋ, ਅਨਨੁਞ੍ਞਾਤਕਾਰਣਾ ਉਗ੍ਗਹਣਾਦਿ ਚਾਤਿ ਤੀਣਿ ਅਙ੍ਗਾਨਿ.
ਰਤਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩. ਵਿਕਾਲਗਾਮਪ੍ਪਵਿਸਨਸਿਕ੍ਖਾਪਦਵਣ੍ਣਨਾ
੫੦੮. ਤਤਿਯੇ ਪਾਲ਼ਿਯਂ ਭਯਕਥਨ੍ਤਿ ਰਾਜਚੋਰਾਦਿਭਯਂ ਵਾ ਰੋਗਾਮਨੁਸ੍ਸਦੁਬ੍ਭਿਕ੍ਖਕਨ੍ਤਾਰਾਦਿਭਯਂ ਵਾ ਆਰਬ੍ਭ ਪਵਤ੍ਤਂ. ਵਿਸਿਖਾਕਥਨ੍ਤਿ ਸੁਨਿਵਿਟ੍ਠਾਦਿਵੀਥਿਕਥਂ. ਕੁਮ੍ਭਟ੍ਠਾਨਕਥਨ੍ਤਿ ਉਦਕਤਿਤ੍ਥਕਥਂ, ਕੁਮ੍ਭਦਾਸੀਕਥਂ ਵਾ. ਪੁਬ੍ਬਪੇਤਕਥਨ੍ਤਿ ਅਤੀਤਞਾਤਿਕਥਂ. ਨਾਨਤ੍ਤਕਥਨ੍ਤਿ ਵੁਤ੍ਤਾਹਿ, ਵਕ੍ਖਮਾਨਾਹਿ ਚ ਵਿਮੁਤ੍ਤਂ ਨਾਨਾਸਭਾਵਂ ਨਿਰਤ੍ਥਕਕਥਂ. ਲੋਕਕ੍ਖਾਯਿਕਨ੍ਤਿ ‘‘ਅਯਂ ਲੋਕੋ ਕੇਨ ਨਿਮ੍ਮਿਤੋ’’ਤਿਆਦਿਨਾ ਲੋਕਸਭਾਵਕ੍ਖਾਨਵਸੇਨ ਪਵਤ੍ਤਨਕਥਾ. ਏਵਂ ਸਮੁਦ੍ਦਕ੍ਖਾਯਿਕਾ ਵੇਦਿਤਬ੍ਬਾ. ਇਤਿ ਭਵੋ ਇਤਿ ਅਭਵੋਤਿ ਯਂ ਵਾ ਤਂ ਵਾ ਨਿਰਤ੍ਥਕਕਾਰਣਂ ਵਤ੍ਵਾ ਪਵਤ੍ਤਿਤਕਥਾ ਇਤਿਭਵਾਭਵਕਥਾ. ਏਤ੍ਥ ਚ ਭਵੋ ਸਸ੍ਸਤਂ, ਵੁਡ੍ਢਿ, ਕਾਮਸੁਖਞ੍ਚਾਤਿ ਤਿਵਿਧੋ, ਅਭਵੋ ਤਬ੍ਬਿਪਰੀਤਵਸੇਨ. ਇਤਿ ਇਮਾਯ ਛਬ੍ਬਿਧਾਯ ਇਤਿਭਵਾਭਵਕਥਾਯ ਸਦ੍ਧਿਂ ਦ੍ਵਤ੍ਤਿਂਸਤਿਰਚ੍ਛਾਨਕਥਾ ਨਾਮ ਹੋਨ੍ਤਿ. ਅਥ ਵਾ ਪਾਲ਼ਿਯਂ ਸਰੂਪਤੋ ਅਨਾਗਤਾਪਿ ਅਰਞ੍ਞਪਬ੍ਬਤਨਦੀਦੀਪਕਥਾ ਇਤਿ-ਸਦ੍ਦੇਨ ਸਙ੍ਗਹੇਤ੍ਵਾ ਦ੍ਵਤ੍ਤਿਂਸਤਿਰਚ੍ਛਾਨਕਥਾਤਿ ਵੁਚ੍ਚਨ੍ਤਿ. ਇਤਿ ਵਾਤਿ ਏਤ੍ਥ ਇਤਿ-ਸਦ੍ਦੋ ਪਕਾਰਤ੍ਥੇ. ਵਾ-ਸਦ੍ਦੋ ਵਿਕਪ੍ਪਤ੍ਥੇ. ਤਸ੍ਮਾ ਏਵਂ ਪਕਾਰਂ ਇਤੋ ਅਞ੍ਞਂ ਵਾ ਤਾਦਿਸਂ ਨਿਰਤ੍ਥਕਕਥਂ ਕਥੇਤੀਤਿ ਅਤ੍ਥੋ ਗਹੇਤਬ੍ਬੋ.
੫੧੨. ਉਸ੍ਸਾਹਂ ਪਟਿਪ੍ਪਸ੍ਸਮ੍ਭੇਤ੍ਵਾ ਵਿਹਾਰਂ ਗਚ੍ਛਨ੍ਤਾਤਿ ਏਤ੍ਥ ਗਾਮੂਪਚਾਰਤੋ ਬਹਿ ਨਿਕ੍ਖਨ੍ਤੇ ਅਨ੍ਤਰਾਰਾਮਾਦੀਨਮੁਪਚਾਰਂ ਪਵਿਟ੍ਠੇ ਸਨ੍ਧਾਯ ਵੁਤ੍ਤਂ. ਗਾਮੂਪਚਾਰਬ੍ਭਨ੍ਤਰੇ ਪਨ ਪਟਿਪਸ੍ਸਦ੍ਧੁਸ੍ਸਾਹਾਨਮ੍ਪਿ ਪੁਨ ਤਮੇਵ ਵਾ ਅਞ੍ਞਂ ਵਾ ਗਾਮਂ ਪਵਿਸਿਤੁਕਾਮਤਾਯ ਸਤਿ ਆਪੁਚ੍ਛਨਕਿਚ੍ਚਂ ਨਤ੍ਥਿ. ‘‘ਕੁਲਘਰੇ ਵਾ…ਪੇ… ਗਨ੍ਤਬ੍ਬ’’ਨ੍ਤਿ ਇਦਂ ਪਨ ਪੁਰੇਭਤ੍ਤਂ ਪਵਿਟ੍ਠਾਨਂ ਵਿਕਾਲੇ ਸਞ੍ਜਾਤੇ ਵਿਕਾਲੇ ਗਾਮਪ੍ਪਵੇਸਸ੍ਸ ਆਪੁਚ੍ਛਿਤਬ੍ਬਤਾਯ ਵੁਤ੍ਤਂ. ਅਦਿਨ੍ਨਾਦਾਨੇ ਵੁਤ੍ਤਨਯੇਨਾਤਿ ਦੁਤਿਯਲੇਡ੍ਡੁਪਾਤਂ ਸਨ੍ਧਾਯ ਵੁਤ੍ਤਂ.
੫੧੫. ਅਨ੍ਤਰਾਰਾਮਨ੍ਤਿਆਦੀਸੂਤਿ ਏਤ੍ਥ ਉਸ੍ਸਵਦਿਵਸਾਦੀਸੁ ਮਨੁਸ੍ਸੇਹਿ ਗਾਮੇ ਪਦਕ੍ਖਿਣਂ ਕਾਰੇਨ੍ਤਂ ਜਿਨਬਿਮ੍ਬਾਦਿਂ ਪੂਜੇਤੁਕਾਮੇਹਿ ਵਾ ਰੋਗਵੂਪਸਮਾਦਿਯਤ੍ਥਂ ਮਨੁਸ੍ਸੇਹਿ ਯਾਚਿਤੇਹਿ ਵਾ ਭਿਕ੍ਖੂਹਿ ਸੁਪ੍ਪਟਿਚ੍ਛਨ੍ਨਾਦਿਵਿਧਿਂ ਅਕਤ੍ਵਾਪਿ ਵੀਥਿਮਜ੍ਝੇਨੇਵ ਗਾਮਂ ਪਦਕ੍ਖਿਣਂ ਕਾਤੁਂ ਵਟ੍ਟਤੀਤਿ ਵਦਨ੍ਤਿ, ਤਂ ਨ ਗਹੇਤਬ੍ਬਂ ਅਨਾਪਤ੍ਤਿਵਾਰੇ ਅਵੁਤ੍ਤਤ੍ਤਾ, ‘‘ਮਗ੍ਗਾ ਅਨੋਕ੍ਕਮਿਤ੍ਵਾ…ਪੇ… ਪਾਚਿਤ੍ਤਿਯ’’ਨ੍ਤਿ (ਕਙ੍ਖਾ. ਅਟ੍ਠ. ਵਿਕਾਲਗਾਮਪ੍ਪਵੇਸਨਸਿਕ੍ਖਾਪਦਵਣ੍ਣਨਾ) ਪਟਿਕ੍ਖਿਤ੍ਤਤ੍ਤਾ ਚ. ਵੇਸਾਲਿਂ ਅਨੁਪਰਿਯਾਯਿਤ੍ਵਾ ਪਰਿਤ੍ਤਂ ਕਰੋਨ੍ਤੇਨਾਪਿ ਆਨਨ੍ਦਤ੍ਥੇਰੇਨ ਸੁਪ੍ਪਟਿਚ੍ਛਨ੍ਨਤਾਦਿਂ ਅਕੋਪੇਨ੍ਤੇਨੇਵ, ਅਪਞ੍ਞਤ੍ਤੇ ਵਾ ਸਿਕ੍ਖਾਪਦੇ ਕਤਨ੍ਤਿ ਦਟ੍ਠਬ੍ਬਂ. ਕੇਚਿ ਪਨ ‘‘ਅਨ੍ਤਰਾਰਾਮਾਦਿਗਾਮਨ੍ਤਰੇ ਠਿਤੇਹਿ ਗਰੁਟ੍ਠਾਨੀਯਾਨਂ ਪਚ੍ਚੁਗ੍ਗਮਨਾਨੁਗ੍ਗਮਨਾਦਿਵਸੇਨ ਗਾਮਵੀਥਿਂ ਓਤਰਿਤੁਂ ਵਟ੍ਟਤੀ’’ਤਿ ਵਦਨ੍ਤਿ, ਤਮ੍ਪਿ ਅਨ੍ਤਰਘਰਂ ਪਵਿਸਨ੍ਤਂ ਪਤਿ ਕਾਤੁਂ ਨ ਵਟ੍ਟਤਿ ਏਵ. ਅਨ੍ਤਰਾਰਾਮਾਦਿਕਪ੍ਪਿਯਭੂਮਿਂ ਪਨ ਉਦ੍ਦਿਸ੍ਸ ਗਚ੍ਛਨ੍ਤਂ ਪਤਿ ਕਾਤੁਂ ਵਟ੍ਟਤੀਤਿ ਖਾਯਤਿ, ਵੀਮਂਸਿਤਬ੍ਬਂ. ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਨਾ, ਅਨਨੁਞ੍ਞਾਤਕਾਰਣਾ ਵਿਕਾਲੇ ਗਾਮਪ੍ਪਵੇਸੋਤਿ ਦ੍ਵੇ ਅਙ੍ਗਾਨਿ.
ਵਿਕਾਲਗਾਮਪ੍ਪਵਿਸਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੪. ਸੂਚਿਘਰਸਿਕ੍ਖਾਪਦਵਣ੍ਣਨਾ
੫੨੦. ਚਤੁਤ੍ਥੇ ਪਾਲ਼ਿਯਂ ਵਾਸਿਜਟੇਤਿ ਵਾਸਿਦਣ੍ਡਕੇ. ਅਟ੍ਠਿਮਯਾਦਿਸੂਚਿਘਰਤਾ, ਕਰਣਕਾਰਾਪਨਾਦਿਵਸੇਨ ਅਤ੍ਤਨੋ ਪਟਿਲਾਭੋਤਿ ਦ੍ਵੇ ਅਙ੍ਗਾਨਿ.
ਸੂਚਿਘਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੫. ਮਞ੍ਚਪੀਠਸਿਕ੍ਖਾਪਦਵਣ੍ਣਨਾ
੫੨੧. ਪਞ੍ਚਮੇ ਪਾਲ਼ਿਯਂ ਆਸਯਤੋ, ਭਿਕ੍ਖਵੇ, ਮੋਘਪੁਰਿਸੋ ਵੇਦਿਤਬ੍ਬੋਤਿ ਹੀਨਜ੍ਝਾਸਯਵਸੇਨ ਅਯਂ ਤੁਚ੍ਛਪੁਰਿਸੋਤਿ ਞਾਤਬ੍ਬੋ, ਹੀਨਾਯ ਪਚ੍ਚਯੇ ਲੋਲਤਾਯ ਪੁਗ੍ਗਲਸ੍ਸ ਤੁਚ੍ਛਤਾ ਞਾਤਬ੍ਬਾਤਿ ਅਧਿਪ੍ਪਾਯੋ. ਇਮਸ੍ਮਿਂ ਸਿਕ੍ਖਾਪਦੇ, ਇਤੋ ਪਰੇਸੁ ਚ ਪਞ੍ਚਸੁ ਅਤ੍ਤਨਾ ਕਾਰਾਪਿਤਸ੍ਸ ਪਟਿਲਾਭੇ ਏਵ ਪਾਚਿਤ੍ਤਿਯਂ. ਪਰਿਭੋਗੇ ਪਨਸ੍ਸ, ਅਞ੍ਞੇਸਞ੍ਚ ਦੁਕ੍ਕਟਮੇਵ. ਪਮਾਣਾਤਿਕ੍ਕਨ੍ਤਮਞ੍ਚਪੀਠਤਾ, ਅਤ੍ਤਨੋ ਕਰਣਕਾਰਾਪਨਵਸੇਨ ਪਟਿਲਾਭੋਤਿ ਦ੍ਵੇ ਅਙ੍ਗਾਨਿ.
ਮਞ੍ਚਪੀਠਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੬. ਤੂਲੋਨਦ੍ਧਸਿਕ੍ਖਾਪਦਵਣ੍ਣਨਾ
੫੨੬. ਛਟ੍ਠੇ ਪੋਟਕਿਤੂਲਨ੍ਤਿ ਤਿਣਗਚ੍ਛਜਾਤਿਕਾਨਂ ਤੂਲਂ. ਸੇਸਂ ਵੁਤ੍ਤਨਯਮੇਵ.
ਤੂਲੋਨਦ੍ਧਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੭. ਨਿਸੀਦਨਸਿਕ੍ਖਾਪਦਵਣ੍ਣਨਾ
੫੩੧-੫੩੬. ਸਤ੍ਤਮੇ ਨਿਸੀਦਨਸ੍ਸ ਪਮਾਣਾਤਿਕ੍ਕਨ੍ਤਤਾ, ਅਤ੍ਤਨੋ ਕਰਣਾਦਿਨਾ ਪਟਿਲਾਭੋਤਿ ਦ੍ਵੇ ਅਙ੍ਗਾਨਿ.
ਨਿਸੀਦਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੫੩੭-੫੪੭. ਇਮਿਨਾ ਨਯੇਨ ਅਟ੍ਠਮਨਵਮਦਸਮੇਸੁਪਿ ਅਙ੍ਗਾਨਿ ਵੇਦਿਤਬ੍ਬਾਨਿ. ਸੇਸਂ ਸਬ੍ਬਤ੍ਥ ਸੁਵਿਞ੍ਞੇਯ੍ਯਮੇਵਾਤਿ.
ਨਿਟ੍ਠਿਤੋ ਰਾਜਵਗ੍ਗੋ ਨਵਮੋ.
ਖੁਦ੍ਦਕਵਣ੍ਣਨਾਨਯੋ ਨਿਟ੍ਠਿਤੋ.