੬. ਸੁਰਾਪਾਨਵਗ੍ਗੋ
੧. ਸੁਰਾਪਾਨਸਿਕ੍ਖਾਪਦਵਣ੍ਣਨਾ
੩੨੮. ਛਟ੍ਠਵਗ੍ਗਸ੍ਸ ਪਠਮੇ ਪਾਲ਼ਿਯਂ ਕਿਣ੍ਣਪਕ੍ਖਿਤ੍ਤਾਤਿ ਪਿਟ੍ਠਪੂਵਾਦਿਂ ਅਪਕ੍ਖਿਪਿਤ੍ਵਾ ਕਿਣ੍ਣਸਙ੍ਖਾਤਂ ਧਞ੍ਞਙ੍ਕੁਰਾਦਿਸੁਰਾਬੀਜਂ ਪਕ੍ਖਿਪਿਤ੍ਵਾ ਕਤਾ. ਸਮ੍ਭਾਰਸਂਯੁਤ੍ਤਾਤਿ ਸਾਸਪਾਦਿਅਨੇਕਸਮ੍ਭਾਰੇਹਿ ਸਞ੍ਞੁਤ੍ਤਾ.
ਮਧੁਕਤਾਲਨਾਲ਼ਿਕੇਰਾਦਿਪੁਪ੍ਫਾਦਿਰਸੋ ਚਿਰਪਰਿਵਾਸਿਤੋ ਪੁਪ੍ਫਾਸਵੋ ਨਾਮ. ਤਥਾ ਪਨਸਾਦਿ ਫਲਾਸਵੋ. ਮੁਦ੍ਦਿਕਰਸੋ ਮਧ੍ਵਾਸਵੋ. ਉਚ੍ਛੁਰਸੋ ਗੁਲ਼ਾਸਵੋ. ਤਿਫਲਤਿਕਟੁਕਾਦਿਨਾਨਾਸਮ੍ਭਾਰਾਨਂ ਰਸੋ ਚਿਰਪਰਿਵਾਸਿਤੋ ਸਮ੍ਭਾਰਸਂਯੁਤ੍ਤੋ. ਬੀਜਤੋ ਪਟ੍ਠਾਯਾਤਿ ਯਥਾਵੁਤ੍ਤਾਨਂ ਪਿਟ੍ਠਾਦੀਨਂ ਮਜ੍ਜਤ੍ਥਾਯ ਭਾਜਨੇ ਪਕ੍ਖਿਤ੍ਤਕਾਲਤੋ ਪਟ੍ਠਾਯ.
੩੨੯. ਲੋਣਸੋਵੀਰਕਂ ਸੁਤ੍ਤਞ੍ਚ ਅਨੇਕੇਹਿ ਦਬ੍ਬਸਮ੍ਭਾਰੇਹਿ ਅਭਿਸਙ੍ਖਤੋ ਭੇਸਜ੍ਜਵਿਸੇਸੋ. ਉਯ੍ਯੁਤ੍ਤਸਿਕ੍ਖਾਪਦਾਨਂ ਅਚਿਤ੍ਤਕਲੋਕਵਜ੍ਜੇਸੁ ਲੋਕਵਜ੍ਜਤਾ ਪੁਬ੍ਬੇ ਵੁਤ੍ਤਨਯਾਵਾਤਿ ਤਤ੍ਥ ਕਿਞ੍ਚਿਪਿ ਅਵਤ੍ਵਾ ਇਧ ਤੇਹਿ ਅਸਾਧਾਰਣਵਤ੍ਥੁਵਿਸੇਸਸਿਦ੍ਧਾਯ ਅਚਿਤ੍ਤਕਪਕ੍ਖੇਪਿ ਅਕੁਸਲਚਿਤ੍ਤਤਾਯ ਤਂ ਲੋਕਵਜ੍ਜਤਾਦਿਵਿਸੇਸਂ ਦਸ੍ਸੇਤੁਮੇਵ ‘‘ਵਤ੍ਥੁਅਜਾਨਨਤਾਯ ਚੇਤ੍ਥਾ’’ਤਿਆਦਿਨਾ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਯਂ ਪਨੇਤ੍ਥ ਵਤ੍ਤਬ੍ਬਂ, ਤਂ ਪਠਮਪਾਰਾਜਿਕਵਣ੍ਣਨਾਯਂ ਵਿਤ੍ਥਾਰਤੋ ਸਾਰਤ੍ਥਦੀਪਨਿਯਂ ਵਿਰਦ੍ਧਟ੍ਠਾਨਵਿਸੋਧਨਵਸੇਨ ਵੁਤ੍ਤਨ੍ਤਿ ਤਤ੍ਥੇਵ ਗਹੇਤਬ੍ਬਂ. ਮਜ੍ਜਭਾਵੋ, ਤਸ੍ਸ ਪਾਨਞ੍ਚਾਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ.
ਸੁਰਾਪਾਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੨. ਅਙ੍ਗੁਲਿਪਤੋਦਕਸਿਕ੍ਖਾਪਦਵਣ੍ਣਨਾ
੩੩੦. ਦੁਤਿਯੇ ਹਸਾਧਿਪ੍ਪਾਯਤਾ, ਉਪਸਮ੍ਪਨ੍ਨਸ੍ਸ ਕਾਯੇਨ ਕਾਯਾਮਸਨਨ੍ਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ.
ਅਙ੍ਗੁਲਿਪਤੋਦਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩. ਹਸਧਮ੍ਮਸਿਕ੍ਖਾਪਦਵਣ੍ਣਨਾ
੩੩੮. ਤਤਿਯੇ ਪਾਲ਼ਿਯਂ ਹਸਧਮ੍ਮੇ ਹਸਧਮ੍ਮਸਞ੍ਞੀਤਿਆਦੀਸੁ ਉਪ੍ਲਵਾਦਿਮਤ੍ਤਂ ਕਿਂ ਹਸਧਮ੍ਮੋ ਹੋਤੀਤਿ ਗਹਣਵਸੇਨ ਸਤਿ ਕਰਣੀਯੇ ਕਰਿਯਮਾਨਂ ਹਸਧਮ੍ਮਂ ਹਸਧਮ੍ਮੋਤਿ ਗਹਣਵਸੇਨ ਅਤ੍ਥੋ ਵੇਦਿਤਬ੍ਬੋ. ਉਸ੍ਸਾਰੇਨ੍ਤੋਤਿ ਉਦਕੇ ਠਿਤਂ ਨਾਵਂ ਤੀਰੇ ਆਰੋਪੇਨ੍ਤੋ.
ਪਤਨੁਪ੍ਪਤਨਵਾਰੇਸੂਤਿ ਉਦਕਸ੍ਸ ਉਪਰਿਤਲੇ ਮਣ੍ਡੂਕਗਤਿਯਾ ਪਤਨੁਪ੍ਪਤਨਵਸੇਨ ਗਮਨਤ੍ਥਂ ਖਿਤ੍ਤਾਯ ਏਕਿਸ੍ਸਾ ਕਥਲਾਯ ਵਸੇਨ ਵੁਤ੍ਤਂ. ਉਦਕਸ੍ਸ ਉਪਰਿਗੋਪ੍ਫਕਤਾ, ਹਸਾਧਿਪ੍ਪਾਯੇਨ ਕੀਲ਼ਨਨ੍ਤਿ ਦ੍ਵੇ ਅਙ੍ਗਾਨਿ.
ਹਸਧਮ੍ਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੪. ਅਨਾਦਰਿਯਸਿਕ੍ਖਾਪਦਵਣ੍ਣਨਾ
੩੪੪. ਚਤੁਤ੍ਥੇ ਸੁਤ੍ਤਾਨੁਲੋਮਨ੍ਤਿ ਮਹਾਪਦੇਸਾ. ਅਟ੍ਠਕਥਾਤਿਪਿ ਵਦਨ੍ਤਿ. ਉਪਸਮ੍ਪਨ੍ਨਸ੍ਸ ਪਞ੍ਞਤ੍ਤੇਨ ਵਚਨਂ, ਅਨਾਦਰਿਯਕਰਣਨ੍ਤਿ ਦ੍ਵੇ ਅਙ੍ਗਾਨਿ.
ਅਨਾਦਰਿਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੫. ਭਿਂਸਾਪਨਸਿਕ੍ਖਾਪਦਵਣ੍ਣਨਾ
੩੪੫. ਪਞ੍ਚਮੇ ਉਪਸਮ੍ਪਨ੍ਨਤਾ, ਤਸ੍ਸ ਦਸ੍ਸਨਸਵਨਵਿਸਯੇ ਭਿਂਸਾਪੇਤੁਕਾਮਤਾਯ ਵਾਯਮਨਨ੍ਤਿ ਦ੍ਵੇ ਅਙ੍ਗਾਨਿ.
ਭਿਂਸਾਪਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੬. ਜੋਤਿਸਿਕ੍ਖਾਪਦਵਣ੍ਣਨਾ
੩੫੪. ਛਟ੍ਠੇ ਅਲਾਤਂ ਪਤਿਤਨ੍ਤਿ ਅਗ੍ਗਿਕਪਾਲਤੋ ਬਹਿ ਪਤਿਤਂ. ਵਿਜ੍ਝਾਤਨ੍ਤਿ ਵਿਜ੍ਝਾਤਂ ਅਲਾਤਂ ਕਪਾਲਗ੍ਗਿਮ੍ਹਿ ਪਕ੍ਖਿਪਿਤ੍ਵਾ ਜਾਲੇਨ੍ਤਸ੍ਸ ਪਾਚਿਤ੍ਤਿਯਂ, ਤਥਾ ਕੇਵਲਂ ਇਨ੍ਧਨਂ ਪਾਤੇਨ੍ਤਸ੍ਸਪਿ ਵਿਜ੍ਝਾਤਂ ਕਪਾਲਗ੍ਗਿਂ ਮੁਖਵਾਤਾਦਿਨਾ ਉਜ੍ਜਾਲੇਨ੍ਤਸ੍ਸਪਿ. ਗਿਲਾਨਤਾਦਿਕਾਰਣਾਭਾਵੋ, ਵਿਸਿਬ੍ਬੇਤੁਕਾਮਤਾ, ਸਮਾਦਹਨਨ੍ਤਿ ਤੀਣਿ ਅਙ੍ਗਾਨਿ.
ਜੋਤਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੭. ਨਹਾਨਸਿਕ੍ਖਾਪਦਵਣ੍ਣਨਾ
੩੫੭. ਸਤ੍ਤਮੇ ਪਾਲ਼ਿਯਂ ਨਗਰੇ ਥਕਿਤੇਤਿ ਏਤ੍ਥ ਰਞ੍ਞਾ ਚਿਰਂ ਨਹਾਯਿਤੁਕਾਮੇਨ ‘‘ਅਹਂ ਬਹਿ ਉਯ੍ਯਾਨੇ ਕਤਾਰਕ੍ਖੋ ਵਸਿਸ੍ਸਾਮਿ, ਨਗਰਂ ਥਕੇਤ੍ਵਾ ਗੋਪੇਥਾ’’ਤਿ ਅਨੁਞ੍ਞਾਤਾ, ਤੇ ਥਕਿਂਸੂਤਿ ਦਟ੍ਠਬ੍ਬਂ. ਅਸਮ੍ਭਿਨ੍ਨੇਨਾਤਿ ਅਨਟ੍ਠੇਨ, ਤਂ ਦਿਵਸਂ ਪੁਨ ਅਗ੍ਗਹਿਤਾਲਙ੍ਕਾਰੇਨ ਪਬੁਦ੍ਧਮਤ੍ਤੇਨਾਤਿ ਅਧਿਪ੍ਪਾਯੋ. ਮਜ੍ਝਿਮਦੇਸੇ ਊਨਕਦ੍ਧਮਾਸਨਹਾਨਂ, ਸਮਯਾਦੀਨਂ ਅਭਾਵੋਤਿ ਦ੍ਵੇ ਅਙ੍ਗਾਨਿ.
ਨਹਾਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੮. ਦੁਬ੍ਬਣ੍ਣਕਰਣਸਿਕ੍ਖਾਪਦਵਣ੍ਣਨਾ
੩੬੮. ਅਟ੍ਠਮੇ ਪਟਿਲਦ੍ਧਨਵਚੀਵਰੇਨਾਤਿ ਏਤ੍ਥ ਪੁਬ੍ਬੇ ਅਕਤਕਪ੍ਪਂ ਕਤਿਪਾਹਂ ਨਿਵਾਸਨਤ੍ਥਾਯ ਤਾਵਕਾਲਿਕਵਸੇਨ ਲਦ੍ਧਮ੍ਪਿ ਸਙ੍ਗਯ੍ਹਤੀਤਿ ਵਦਨ੍ਤਿ.
੩੬੯. ‘‘ਨਵਂ ਨਾਮ ਅਕਤਕਪ੍ਪ’’ਨ੍ਤਿ ਸਾਮਞ੍ਞਤੋ ਵੁਤ੍ਤਤ੍ਤਾ ਅਞ੍ਞੇਨ ਭਿਕ੍ਖੁਨਾ ਕਪ੍ਪਬਿਨ੍ਦੁਂ ਦਤ੍ਵਾ ਪਰਿਭੁਤ੍ਤਂ ਚੀਵਰਂ, ਤੇਨ ਵਾ, ਤਤੋ ਲਭਿਤ੍ਵਾ ਅਞ੍ਞੇਨ ਵਾ ਕੇਨਚਿ ਦਿਨ੍ਨਮ੍ਪਿ ਕਤਕਪ੍ਪਮੇਵ ਨਵਂ ਨਾਮ ਨ ਹੋਤੀਤਿ ਦਟ੍ਠਬ੍ਬਂ. ‘‘ਨਿਵਾਸੇਤੁਂ ਵਾ ਪਾਰੁਪਿਤੁਂ ਵਾ’’ਤਿ ਵੁਤ੍ਤਤ੍ਤਾ ਅਂਸਬਦ੍ਧਕਾਸਾਵਮ੍ਪਿ ਪਾਰੁਪਿਤਬ੍ਬਤੋ ਕਪ੍ਪਂ ਕਾਤਬ੍ਬਨ੍ਤਿ ਵਦਨ੍ਤਿ. ਚਮ੍ਮਕਾਰਨੀਲਂ ਨਾਮ ਚਮ੍ਮਂ ਨੀਲਵਣ੍ਣਂ ਕਾਤੁਂ ਯੋਜਿਯਮਾਨਂ ਨੀਲਂ. ਪਕਤਿਨੀਲਮੇਵਾਤਿ ਕੇਚਿ. ਯਥਾਵੁਤ੍ਤਚੀਵਰਸ੍ਸ ਅਕਤਕਪ੍ਪਤਾ, ਅਨਟ੍ਠਚੀਵਰਾਦਿਤਾ, ਨਿਵਾਸਨਾਦਿਤਾਤਿ ਤੀਣਿ ਅਙ੍ਗਾਨਿ.
ਦੁਬ੍ਬਣ੍ਣਕਰਣਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੯. ਵਿਕਪ੍ਪਨਸਿਕ੍ਖਾਪਦਵਣ੍ਣਨਾ
੩੭੪. ਨਵਮੇ ਯੇਨਾਤਿ ਯੇਨ ਸਦ੍ਧਿਂ, ਯਸ੍ਸ ਸਨ੍ਤਿਕੇਤਿ ਅਤ੍ਥੋ. ਸਾਮਂ ਵਿਕਪ੍ਪਿਤਸ੍ਸ ਅਪਚ੍ਚੁਦ੍ਧਾਰੋ, ਵਿਕਪ੍ਪਨੁਪਗਚੀਵਰਤਾ, ਅਵਿਸ੍ਸਾਸੇਨ ਪਰਿਭੋਗੋਤਿ ਤੀਣਿ ਅਙ੍ਗਾਨਿ.
ਵਿਕਪ੍ਪਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੦. ਚੀਵਰਅਪਨਿਧਾਨਸਿਕ੍ਖਾਪਦਵਣ੍ਣਨਾ
੩੭੮. ਦਸਮੇ ਪਾਲ਼ਿਯਂ ਅਨ੍ਤਮਸੋ ਹਸਾਪੇਕ੍ਖੋਪੀਤਿ ਅਪਿ-ਸਦ੍ਦੇਨ ਅਥੇਯ੍ਯਚਿਤ੍ਤਂ ਕੋਧੇਨ ਦੁਕ੍ਖਾਪੇਤੁਕਾਮਂ, ਅਵਣ੍ਣਂ ਪਕਾਸੇਤੁਕਾਮਞ੍ਚ ਸਙ੍ਗਯ੍ਹਤਿ. ਤੇਨੇਵ ‘‘ਤਿਵੇਦਨ’’ਨ੍ਤਿ ਵੁਤ੍ਤਂ. ਉਪਸਮ੍ਪਨ੍ਨਸ੍ਸ ਪਤ੍ਤਾਦੀਨਂ ਅਪਨਿਧਾਨਂ, ਵਿਹੇਸੇਤੁਕਾਮਤਾਦੀਤਿ ਦ੍ਵੇ ਅਙ੍ਗਾਨਿ.
ਚੀਵਰਅਪਨਿਧਾਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
ਨਿਟ੍ਠਿਤੋ ਸੁਰਾਪਾਨਵਗ੍ਗੋ ਛਟ੍ਠੋ.